1 Thessalonians (Dinka)

11

11:1b.1TH.011.001 Yɛn Paulo, woke Thiluano, ku Timotheo, awarek en gɛɛrku kanithɔ de Thethanlonikei nu e Nhialic Waadayic, ku Bɛnydit Yecu Krithoyic: E dhueeŋdepiɔu tɔu ke week, ayi mat, ne ke bɔ tede Nhialic Waada, ku Bɛnydit Yecu Kritho.

11:2b.1TH.011.002 Wok ee cool e lec Nhialic nɔm e akooinyiin kedhie ne biakduon week wedhie, ku wok ee kedun lueel e lɔŋdayic;

11:3b.1TH.011.003 luɔiduon e gam ayok tak acin pek, ku takku luɔiduon e nhieer, ku aŋɔth aa wek Bɛnydan Yecu Kritho ŋɔɔth ne liɛɛr e wekpiɔth e Nhialic Waada nɔm;

11:4b.1TH.011.004 lonyduon ci Nhialic we lɔc aŋicku, wek mithekɔckuɔn nhiaar,

11:5b.1TH.011.005 welkuɔn piɛth aake cii bɔ e weyiic ne jam tei, aake bɔ ne riɛl ayadaŋ, ku ne Weidit Ɣer, ku ne ŋiny aa wek ke ŋic egɔk; we ŋic taudan e ye wo tɔu e weyiic ne biakdun week.

11:6b.1TH.011.006 Ku we ci aa kɔc ci tauda dɔmic, ayi tau de Bɛnydit, ne gam ca wek jam gam ne ketuc dhal week aret, ku ne miɛtepiɔu e Weidit Ɣer;

11:7b.1TH.011.007 aguɔki aa kɔc bi kɔc taudun aa dɔmic, kɔc nu Makedonia ku Akaya ebɛn.

11:8b.1TH.011.008 Luɔi ca wek jam de Bɛnydit tɔ kok abi kɔc piŋ, acie Makedonia keke Akaya kapac, gamduon ca wek Nhialic gam aci thiei e thai nɔm ebɛn; ku acin ke buk dhil lueel.

11:9b.1TH.011.009 Kek gup ayek wo nyuoth lɔ ci wo lɔ e weyiic, ku wel ca wek rot wɛl Nhialic ne yiethkun yiic, bak ka ke Nhialic yic piir aa looi,

11:10b.1TH.011.010 ku bak Wende aa tiɛɛt paannhial, Wendɛn ci jɔt e kɔc ci thou yiic, yen Yecu, raan ci wo luok e agonh bi bɛn.

12

12:1b.1TH.012.001 Ku wegup, wek mithekɔckuɔ, we ŋic bɛndan ci wo bɛn e weyiic, nɔn cii en e ɣɔric:

12:2b.1TH.012.002 ku acakaa wok e ci kerac kɔn guum, ku wo ye luoi kerac alal e Pilipoi, acit man ŋiɛc wek en, ke wo ŋoot ke wo ye week guieer welpiɛth ke Nhialic ne ater dit, ke wo ril piɔth e riɛl e Nhialicda.

12:3b.1TH.012.003 Ku guieer ee wo wel guiir aa cinic mɛth e kɔc math, ayi jam col aa liu thin, ayi rueeny:

12:4b.1TH.012.004 ku acit man ci Nhialic wo tɔ piɛth, an, bi welpiɛth taau e wocin, yen aye wok jam; acie kɔc ke yok tɔ mit piɔth, ee Nhialic Raan e wo them piɔth.

12:5b.1TH.012.005 Ku acin kool toŋ ci wo wel e mɛthenyin lueel, acit man ŋiɛc wek en, ku acin wui de kalei cuk moony; Nhialic ee caatɔda:

12:6b.1TH.012.006 ku acin lɛc cuk kɔɔr tede kɔc, ayi tede week, ayi tede kɔc kɔk, acakaa wek e cuk duɛɛr miɛn, luɔi ee wok tuuc ke Kritho.

12:7b.1TH.012.007 Ku wo aaye ŋiec reer emaath e weyiic, cit man ee tik mithke ŋiec muk apiɛth:

12:8b.1TH.012.008 ku ne taŋ ee wok week tak aret, en aa ye wok piɔth miɛt, luɔi yin wo week welpiɛth ke Kritho, ku acie keek kapac, ee weikuɔ ayadaŋ, ne nhieer ci wo week nhiaar alal.

12:9b.1TH.012.009 Wek ee weniim tak, wek mithekɔckuɔ, ne luɔi diit thieek yok looi: wo ye luui akol ku wakɔu, wok e cin piɔth luɔi bi wo raan tok miɛn e weyiic, agoku welpiɛth ke Nhialic guieer week aya.

12:10b.1TH.012.010 Wek aye caatɔɔ, ayi Nhialic aya, ne tau ee wok tɔu e weyiic wek kɔc ci gam, taudan ɣeric ku piɛthic ku cinic gaak dueere wo gɔk:

12:11b.1TH.012.011 acit man ŋiɛc wek en, guieer ee wok week guieer ku muŋ ee wo week muk piɔth, ku lek ee wok week lɛk wedhie, cit man ee wun mith jam keke mithke,

12:12b.1TH.012.012 an, bak ŋiec reer e reer e roŋ ke Nhialic, Raan e cɔl week e ciɛɛŋde ku dhueeŋde.

12:13b.1TH.012.013 Yen a ye wok cool e lec Nhialic acin pek, luɔi kɛn wek jam gam cit nɔn ee yen jam de kɔc tei, waan gam wek jam cak piŋ tede wook, ku acak tɔ ye jam e Nhialic, ku ye jam e Nhialic egɔk, jam e cool e lni e weyiic ayadaŋ wek kɔc gam.

12:14b.1TH.012.014 Ku week, mithekɔckuɔ, we ci aa kɔc e tau de kanithɔɔ ke Nhialic dɔmic kanithɔɔ nu e Yecu Krithoyic e Judaya: ne guom ca wek karɛc mane guum ayadaŋ tede kɔc ke paandun, ka kit e ka cik guum tede Judai;

12:15b.1TH.012.015 kek kɔc ci Bɛnydit Yecu nɔk ayi nebii ayadaŋ, ku acik wo yɔŋ, ku ciki Nhialic e tɔ mit piɔu, ku yek ater lueel e kɔc kedhie;

12:16b.1TH.012.016 ayek wook pɛn guieer guiir wo Juoor jam e kuny bike kony wei; yen aye kek karɛcken kut niim ecaŋɣɔn: ku agɔth aci bɛn tede keek ka cin ke ye doŋ.

12:17b.1TH.012.017 Ku wook, mithekɔckuɔ, nɔn ci wo jɔt e welɔm buk ceŋ roor e akool liaakaŋ, ku ye wokgup kek e jɔt acie wopiɔth, yen aa ŋɛk wok en alal e tiŋ bi wo we tiŋ nyin, we cuk tak alal:

12:18b.1TH.012.018 yen aa ya yɛn bɛn tede week kɔɔr, yɛn Paulo guop, nɔn ban bɛn raantok, ku nɔn ee yen raanrou; go Catan wo peen.

12:19b.1TH.012.019 Aŋɔth ŋathku ee kaŋo, ayi miɛt e wopiɔth, ayi goldan e dhueeŋ, yek kaŋo? Ciki e week, e Bɛnydan Yecu Kritho nɔm ne bɛn bi en bɛn?

12:20b.1TH.012.020 Wek aye dhueeŋda ku yak miɛt e wopiɔth.

13

13:1b.1TH.013.001 Na wen, aci cien luɔi bi wok e bɛ guum, ke luelku e wopiɔth, an, apiɛth te bi wo nyaaŋ Athenai wapac;

13:2b.1TH.013.002 agoku Timotheo tooc, mɛnhkeneda, ku ye raan e ka ke Nhialic looi, raan e wok luui etok ne welpiɛth ke Kritho, acuk tooc luɔi bi en week tɔ kaac apiɛth, ku riit wepiɔth e gamduon ca wek gam;

13:3b.1TH.013.003 ke cin raan bi ro yal ne biak de katuc dhal wooke: luɔi ŋiɛc wek en wegup, nɔn ee yen biak de kake yen e dɔme wo.

13:4b.1TH.013.004 Ayi ɣɔn tɔu wok e weyiic ayadaŋ, acuk kɔn lɛk week nɔn bi wo kerɛɛc dhal wook guum; acit man ci en guɔ aa yic enɔɔne, aŋiɛcki week.

13:5b.1TH.013.005 Yen aa tuɔɔc ɛn raan, waan ci en cien luɔi ban e bɛ guum, ke ya bi gamdun ŋic, nɔn de ke ci jɔŋ e kɔc them we yien them, ago luɔida aa ɣɔric.

13:6b.1TH.013.006 Ku enɔɔne, te ci Timotheo lɔ bɛn e welɔm bi tede wook, ke bii jam piɛth jam de gamdun ku nhieerdun, ayi taŋ aa wek cool e tak wook apiɛth ecaŋɣɔn, ku nɔn kaar wek tiŋ ba wek wo tiŋ alal, acit man kɔɔr wok tiŋ bi wo we tiŋ ayadaŋ;

13:7b.1TH.013.007 yen aa jɔ wok muk piɔth ne biakdun, wek mithekɔckuɔ, ne ketuc dhal wook ebɛn ku ne dak e wo dak e kaŋ, ee gamdun yen aa muk wopiɔth:

13:8b.1TH.013.008 wok piir enɔɔne, te kaac wek aril e Bɛnyditic.

13:9b.1TH.013.009 Ee lɛc ŋo dueer wok Nhialic bɛ lɛc nɔm ne biakdun, ne miɛtepiɔu ebɛn miɛt ee wo piɔth miɛt ne biakdun e Nhialicda nɔm?

13:10b.1TH.013.010 Wok e cool e lɔŋ alal wɛɛrwakɔu ku akol, ke we buk tiŋ nyin, agoku ka dak week e gamdun looi abik dikedik.

13:11b.1TH.013.011 Enɔɔne, e Nhialic guop, yen aye Waada, keke Bɛnydan Yecu Kritho, e ke wo nyuoth kueerdan lɔ tede week:

13:12b.1TH.013.012 e Bɛnydit e we tɔ ŋuak wenyiin abak kuɛth ne nhieer nhiaar wek rot, ku ne nhieer nhiaar wek kɔc kedhie, acit man nhiɛɛr wok week ayadaŋ;

13:13b.1TH.013.013 luɔi bi en we tɔ kaac piɔth aril, ke cin gaak dueere we gɔk, ne ɣɛɛrepiɔu e Nhialic nɔm, Yen aye Waada, ekool e bɛn bi Bɛnydan Yecu Kritho bɛn keke kɔckɛn ɣerpiɔth kedhie.

14

14:1b.1TH.014.001 Cook cieen, wek mithekɔckuɔ, wek laŋku, ku lekku week ne Bɛnydit Yecu, yan, acit man ca wek jam yok tede wook, jam de reer ba wek dhil reer, ke we bi Nhialic tɔ mit piɔu, wek laŋku, ke reerduon piɛth bi aa cool e ŋuak enyin.

14:2b.1TH.014.002 We ŋic jam cuk yien week ne Bɛnydit Yecu.

14:3b.1TH.014.003 Kede piɔn e Nhialic ki, yan, ɣɛɛr ba wek piɔth ɣɛɛr, ku pal ba wek kɔɔrediaar pɔl;

14:4b.1TH.014.004 we wedhie, e ŋɛk e ye guopde ŋiec dɔm ne ɣɛɛrepiɔu ku rieeu,

14:5b.1TH.014.005 ku cii epiɔu tum kerac ne ŋɔɔŋ e ye dɔm, cit man e Juoor kuc Nhialic;

14:6b.1TH.014.006 e cin raan bi akeu waan, ciɛm mɛnhkene e kedaŋ: luɔi ee yen Bɛnydit yen ee Raan bi ka cit ekake guoor kedhie, acit man ci wok e kɔn lɛk week ayadaŋ, ku acuk rot tɔ ye caatɔɔ.

14:7b.1TH.014.007 Acie kede luɔi col en e cɔɔle Nhialic wook, ee kede ɣɛɛrepiɔu.

14:8b.1TH.014.008 Yen ka, raan reec piŋ, acie raan e reec en kede piŋ, ee Nhialic, Raan ci we miɔɔc ne Weikɛn Ɣer.

14:9b.1TH.014.009 Ku ne kede nhieer ba wek mithekɔckun nhiaar acin ke duɛɛr gaar week, wegup, we cii Nhialic wɛɛt, an, bak rot nhiaar wapac;

14:10b.1TH.014.010 ku kene ayak looi ayadaŋ tede niithekɔckun kedhie nu Makedonia ebɛn. Ku wek laŋku, wek mithekɔckuɔ, ke nhieerdun bi lɔ ke ŋuak enyin aret;

14:11b.1TH.014.011 ke we bi reer ba wek reer emaath aa cool e thɛm wek e, ku bak kakun gup aa looi, ku yak luui e wecin, acit man ci wok e lɛk week;

14:12b.1TH.014.012 luɔi ba wek reer ke we lɔ piɔth gɔk ne kɔc nu biic, ku cin ke bi we dak.

14:13b.1TH.014.013 Ku wok cin piɔth luɔi ba wek e kuc, wek mithekɔckuɔ, ne kede kɔc ci nin; ke we cii piɔth bi jiɛth alal, cit man e kɔc kɔk, kɔc cin ke ŋathki.

14:14b.1TH.014.014 Ku te gɛm wok en nɔn ci Yecu thou, ku be ro bɛ jɔt, yen acit bii bi Nhialic kɔc ci lɔ nin e Yecuyic bɛɛi ne yen etok.

14:15b.1TH.014.015 Ku kene a lekku week ne jam e Bɛnydit, yan, Wok kɔc piir, kɔc bi doŋ aɣet bɛn bi Bɛnydit bɛn, wo cii kɔc ci nin bi waan.

14:16b.1TH.014.016 Bɛnydit guop abi bɛn piny paannhial ne kiɛɛu, ku ne rol e bɛny nu e tuucnhial niim, ku kaaŋ de Nhialic; go kɔc ci thou ne Krithoyic agoki rot kɔn jɔt:

14:17b.1TH.014.017 na ele, ke wok kɔc piir, kɔc ci doŋ, wo bi gap nhial ne keek etok e luaat yiic, buk lɔ rɔm ne Bɛnydit e yomic: ku jɔku tɔu ne Bɛnydit etok aɣet athɛɛr.

14:18b.1TH.014.018 Yen ya wek wepiɔth muk wapac ne welke.

15

15:1b.1TH.015.001 Ku ne kede run ku akool, wek mithekɔckuɔ, acin ke duɛɛr gaar week.

15:2b.1TH.015.002 Wegup aŋiɛcki egɔk nɔn bi akol e Bɛnydit bɛn cit man ee cuɛɛr bɛn wakɔu.

15:3b.1TH.015.003 Ku te lueel kek en, an, Piny arɛɛr ediu, ku acin riɔɔc nu; en a bi riaak e kegup ethiau, cit man e kɛc ci tik kac; ku acin ke dueer kek poth.

15:4b.1TH.015.004 Ku week, mithekɔckuɔ, wek cii nu e cuɔlic, bi ekoole we math cit man e cuɛɛr:

15:5b.1TH.015.005 luɔi aa wek wɛɛt ke ɣɛɛrepiny wedhie, ku yak wɛɛt ke akol: wo cie kɔc ke wɛɛrwakɔu, ayi cuɔlepiny.

15:6b.1TH.015.006 Yen du wok e nin cit man e kɔc kɔk; yok yin ku piɛthku niim.

15:7b.1TH.015.007 Kɔc e nin ee wɛɛrwakɔu en aye kek nin; ayi kɔc e ro tɔ wit mɔu, ee wɛɛrwakɔu en aye mɔu ke wit.

15:8b.1TH.015.008 Ku wook, wok kɔc ke akol, yok niim piath, abuk weu pat yiic e yɔu gel aa cieŋ, weu ke gam ku nhieer; ku ceŋku aŋɔth de kunydewei a ye akup e wokuiim.

15:9b.1TH.015.009 Nhialic aken wo dɔm ne kede agɔth, ee luɔi bi wo kunydewei yok, en aa dɔm en wook ne Bɛnydan Yecu Kritho,

15:10b.1TH.015.010 raan ci thou ne biakda, luɔi bi wok piir ne yen etok, ayi te yin wok ayi te niin wok.

15:11b.1TH.015.011 Yen aa wek wepiɔth muk wapac, ku yak rot kueet wapac, acit man aa wek e looi ayadaŋ.

15:12b.1TH.015.012 Ku wek laŋku, wek mithekɔckuɔ, ke we bi kɔc e luui e weyiic aa ŋic, kɔc nu e weniim e Bɛnyditic, kɔc e we tak wel;

15:13b.1TH.015.013 aguɔki ke aa rieu alaldiite ku nhiaarki keek ne biak de luɔiden. Ku yak ŋiec reer e rot apiɛth.

15:14b.1TH.015.014 Wek lekku, wek mithekɔckuɔ, an, Yak kɔc e loŋ yalic nen, yak kɔc e piɔth riɔɔc muk piɔth, yak kɔc kɔc kony, yak piɔth liɛɛr ne kɔc kedhie.

15:15b.1TH.015.015 Mathdhien, e cin raan e raan luoi kerac raan ci e kɔn luoi kerac; yak kepiɛth kuany cok anandun, e ŋɛk e ŋɛk luoi kepiɛth, ayi raan ebɛn.

15:16b.1TH.015.016 Yak piɔth miɛt anandun;

15:17b.1TH.015.017 yak cool e lɔŋ acin pek;

15:18b.1TH.015.018 Yak thieithieei lueel ne kerieec ebɛn: kene e kede piɔn e Nhialic ne kedun e Kritho Yecuyic.

15:19b.1TH.015.019 Duoki Weidit Ɣer e piɔɔk abik liu;

15:20b.1TH.015.020 wel ci guiir duoki keek e biɔɔn;

15:21b.1TH.015.021 yak kaŋ them kedhie: yak kepiɛth muk aril;

15:22b.1TH.015.022 yak tɛɛm e luɔi de kerac ebɛn.

15:23b.1TH.015.023 Ku enɔɔne, Nhialic de mat, Yen guop, e we tɔ ɣerpiɔth eliŋliŋ; ku weikun ebɛn ku piɔndun ku guopdun e ye ke muk acin keliu, ku bi cien ke dueere ke gɔk aɣet bɛn bi Bɛnydan Yecu Kritho bɛn.

15:24b.1TH.015.024 Raan cɔl week ee Raan Adot, Raan bi luɔi dhil thol ayadaŋ.

15:25b.1TH.015.025 Mithekɔckuɔ, yak lɔŋ ne biakda.

15:26b.1TH.015.026 Thiecki mithekɔckuɔ kedhie ne ciem ɣeric.

15:27b.1TH.015.027 Wek yɔɔk ne Bɛnydit, an, Taki awareke kueen mithekɔckuɔn ɣerpiɔth kedhie.

15:28b.1TH.015.028 E dhueeŋ de Bɛnydan Yecu Kritho piɔu e ye tɔu ke week. Amen.