Schneller rath / nie gůt that.

Wo ein weiser rath ist / da ist kein eilen / sonder vnnbedenckens / vnd dieselbigen leut sind forchtsam etwas anzugreiffen / Aber wenn sie es gefasset haben vnnd nach vil bedenckens beschlossen / so lassen sie inen dasselbig schwerlich nemen. Die tollkünen aber fallen bald auff einding / vnd fallen auch bald wider dauon / wie alle Nationen von vns Teutschen sagen /Daß künheyt vnnd můts gnůg bei vns sei / aber es sei nicht ein weiser rath / sonder thumb künheyt / welches mann nicht ehe sihet denn nach der that / sie sei wol oder übel gerathen. Fabius Cunctator bei den Römern / thet dem Hanniball jrem schädlichen feind /der funfftzehen jar in Italia lag / in dem daß er jn auff hielt / vnd kein schlacht lifern wolte / wirser denn alle Hauptleut zuuorgethan hetten mit allen schlachten.

Küne leut lassen sich bald entrüsten / seind bald im harnisch / vnnd wenn etwas gesagt wirdt / das jhnen nicht gefellt so volgen sie jhrem můt / vn meynen / jr toller vnweiser rath sei der beste / faren fort / vnnd thůn denn offtmals das sie hernach gerewet. Wo aber weiserrath ist / da lassen sie fürüber gehn / alles [73] was sich zur sach nit reimet / vnd trachten alleyn dahin /daß die sach ein gůt end erlange.