Es ist besser das kind weyne / dann der vatter.

Salomon sagt: Wer sein kind lieb hat / der sparet die růten nit. Item / Thorheyt ist an des kinds hertz gebunden / aber die růt nimpt die thorheyt hin. Darumb wanns kind seinn willen wil haben / so strafft es der weise vatter / obs schon darumb weynet / so ists besser / das kind weyne in der jugent dann der vatter im alter. Die kinder wöllen messer haben / wöllen auff stůlen / bäncken / vnd tischen sein / gibt mans jnen nit / vnd laßt sie nit thůn jren willen / so weynē sie. Der weise vatter spricht aber: Wann das kind ein messer het / so möcht es jm selbs leydt thůn / es möcht auch villeicht vom thisch / vom banck / vom stůl /hals vnnd beyn entzwey fallen / so würd ich dann weynen / derhalben ists besser / ich komme zuuor /vnnd laß das kind weynen / Es weynet mir lieber dann ich.