Er weyß weder wort noch weise.

[202] Das ist / er weyß nichts / er ist vntüchtig zů dem handel / dann bei vns gilt wort vnnd weise so vil / als / Er kans wol / als wann wir võ einem sagen / der ein ding wol kan / Der weyß doch wort vnd weise darzů / der kans doch / es steht jm wol an. An einem lied seind wort vnd weise / Die weise ist das gedöne des gsangs / oder der lawt. Die wort seind die sach an jhr selbs /wer nun ein lied wol künnen soll / můß die wort vnnd weise können / sonst kan ers nit recht. Item so einer sich gern wolt seltzam / hoffertig / klůg / weise / stellen / vnd weyß doch weder wort noch weise darzů.