[301] Einhelligkeyt macht gedeien.
Concordia fulciuntur opes.

Kleine reichthumb seind groß / so manns zusamen helt. Es ist ein schwaches ding vmb ein besem reiß /so mann aber vil zusamen thůt / machen sie einn besem. Also wenn man kleine reichthumb trewlich zusamen helt / vnd zwenfreund zusamen setzen / so sind sie vnuerdorben. Zwen heben mehr dann einer. Vil federn machen ein bett / wie ein leicht gering ding vmb ein feder ist. Also sagt Salustius / Daß auß frid vnd eynigkeyt kleine ding wachsen / vnnd durch zwitracht grosse ding fallen. Frid vnd eynigkeyt hat allestätt bawen. Zwitracht vnnd krieg / hat Niniue /Babylon / vnd alle stätt zerstöret. Wo weib vnd man einander anstehen / vnd trewlich zusamen setzen / ists vnmoglich daß sie not leiden / vnnd nit etwas überkommen / wie arm sie zusamen kommen. Dargegen faselt auch groß gůt nit / sonder verschleufft vnder den händen / vnnd verschwindt wie Quecksilber /wenn sie vneynig / eins da / das ander dort hinauß wil.