Es kan ein narr mehr fragens / dann zehen weisen berichten.

Zv Bayrn war ein narr gwesen / der hat geantwort / da man jn fragte / Warumb er ein narr were: Darumb /sagt er / binn ich ein narr / daß ich rede was mit einfellt / Vnd es ist über die maß fein geredt / Dann narren vnd vnuerständige [284] leut werffen das hundert ins tausent / daß mann nit weyß wer koch oder keller /welches das hinderst oder forderste ist. Aber ein weiser man redet mit bedacht / vnd nichts vergebens / hat acht auff die zeit / stette vnnd person / Derhalb kan ein narr mehr vngerheimpts fragens / dann zehen weisen berichten können. Salomo sagt / Ein narr schüttet seinen geyst auff ein mal auß / Aber ein weiser helt an sich. Ein narr redet was jm zůfellt / aber ein weiser man redet wo es not ist.