[82] Ein gůter nachbaur ist ein edel kleynot.

Wer einn bösen nachbaurn hat / der hat einn ewigen zanck vnnd hader / kan sich nicht wol vor jm hůten /er thůt jm an ehr vnnd gütern schaden. Widerumb so ist ein frommer nachbaur gar ein edels kleynot / Ja es solt niemand ein kleynot darfür in seim kasten haben /Hilfft an allen orten seinem nachbaurn vor schaden hüten vnd sorgen. Vber diß so fürdert ihn auch sein frommer nachbaur an gůt vnd an ehr. Salomon sagt: Ein nachbaur ist besser in der nähe / dann ein brůder in der ferne. Mit den nachbaurn hebt mann die scheuren.