Grosse herrn dencken lang.

Alle wolgeordnete gemeynen vnnd Regiment haben geschicht bücher / darein sie verzeychen / wo etwas ehrlichs oder vnehrlichs / gemeynem friden vnd rechten dienstlich oder schädlich / von iemand fürgenommen ist worden / darauß es kompt / daß die grossen herren lang gedencken. Im bůch Hefter steht geschriben von dem Mardocheo: Wie er vor langer zeit dem König sein leben errettet hette. Da man das dem König lase / erhůb er den Mardocheum / vnd macht jn zum gwalthaber des gãtzen Königreichs. Diser brauch ist zum gůten / im bösen braucht mans auch / vnnd also: Wer ein übelthat begeht / vnd entrinnet / der ist darumb noch nit frei / kõpt er ein mal wider / so wirt er eben so wol gestrafft / als wer er nie entrunnen.