Es hilfft nit wol spannen / sonder wol abschiessen.

Am end sihet man Cuius toni. Es ligt nit am wol anfahen / sonder am wol enden.

Was sol ein gsatz das man nicht handthabt? Der nachtruck vnnd das ende thůts in allen dingen / Wol ansetzen / anfahen / außziehen / an tretten / vnd das spil oder spieß in die hand nemen / ist wol etwas / ja das halb theyl der arbeyt / aber noch nit gar das ende /d' nachtruck thůts erst / das spilkarten / vnd den spieß mit sig heym füren / Man můß ein ding ans end füren / wer vnd erwegen erligt / von dem singt man kein triumph lied. Der anfahet zulauffen oder kempffen / oder bawen / můß biß zum fürgesteckten zil lauffen / biß zum sig streiten / vnd nit im grund erligen / sonder den thurn biß zũ knopff füren / sonst můß er den spot zũ schaden habē / Lu.: 4. Vil were wol angfangē / vnn manches [220] gsatz vnn institut / wann der nachtruck darhinder were. Garn richten fahet nit vögel / sonder zůziehen / Den angel můß mann einwerffen / vnd herauß mit dem fisch ziehen.