Wikia ju papin aajna ju Semun Pítruitjai. Jesukrístu akatramu asan ni takarniurintjai. Ii Yusri tura iin Uwemtikramin Jesukrístu umirumna nuna atumniasha juna aatjarme. Niisha Ashí aentsun métekrak Enentáimtin asamtai atumsha iijiai métek Niiniu ajasurme. Nuka ti penkeraiti.

Yus, tura ii Uuntri Jesussha nékarmena Nú Núkap nekaki wéakrumin, Yuska atumin ti nukap Yáinmaktatrume tura ti nekas imiatkinchanum pujustinian suramsattarme. Nuna nekaan tuke Núnisan Atí tusan wakerajrume.

Yus uunt asa tura Ashí Túramnia asa, umirtukat tusa achirmakuitji. Nii neka asar atsumajnia nu Wáinkiaitji. Yus-shuarti wekasatniusha, tura Niin aneatniusha ii atsumajnia nuna Yuska kakaram asa suramsaitji.

Niisha uunt asa tura tujinkiachu asa ni chichamen suramsaitji. Nu chichamsha ti kakarmaiti tura ti penkeraiti. Nu chichamjai atumsha Atumí ayashi yajauch wakerana Nuyá uwemprarum, Yusai Páchitkia átinian suramsaitrume.

Yus umirkarme. Yamaikia juna Túrataj tusarum kakartiniaitrume. Ti penker wekasatniuitrume. Nuyá Yusna nekaatniuitrume.

Nuyá yayauch Túrashtin iimiastiniaitrume. Nuyá katsuntratniuitrume. Nuyá Yus shiir Enentáimtusrum wekasatniuitrume.

Tura Nuyá Ashí shuar shiir Enentáimtustiniaitrume. Tura nu nankaamas Ashí shuar aneatniuitrume.

Ashí nu Túrakrumka, tura tuke Túrukrum wéakrumka, nakiarchattarme. Túrarum ni takatri émamkesrum takastatrume. Tura ii Uuntri Jesukrístu nekas nekaattarme.

Tura nuna Túruiniatsna nuka, kusurua aanin ainiawai. Jesukrístu wakeramurin Enentáimtuiniatsui. Ni tunaariya uwemprarmia nuna kajinmatainiawai.

Tuma asamtai yatsurtiram, Yus atumin anaitiamak achirmakurmena nu tuke Enentáimsarum wetarum. Túrakrumka penké iniarchattarme.

Tura ii Uuntri Jesukrístu uwemtikramprajnia nu, Nii tuke akupeana nui, nakittsuk shiir awaintiamattarme.

Tuma asamtai nékarminin tura Yusna nekas ana Nuyá kanaatsrumnin tuke Enentáimtikratjarme.

Nekaatarum. Winia Jákatniurun jeatema nuna ii Uuntri Jesukrístu ujatkayi. Tuma asamtai iwiaaku pujajna juik atumin tuke Enentáimpratarum tusan jintintratniuitjarme, tu Enentáimsajai.

Tura wi jakamtai, wi aajna juna tuke kajinmatkiirum tusan, wi jeajna nuna Túrattajai.

Ii Uuntri Jesukrístu kakarmari tura ni Táratniuri etserkamajnia nu, aya aentsnumia ántar chichamchauyi. Antsu imia ii jiijiai Uunt Jesukrístu waantu ajasu Wáinkia asar ujakmajrume.

Tura Apa Yus Jesukrístun shiir waantu awajsamia nui, ni Imiá shiir pujutairiya chichaak Tímiayi, "Juka winia ti aneamur Uchiruiti. Niin ti wararjai."

Iisha naint "Yusna" Tájinia nui Niijiai Pujá asar nu nayaimpinmaya chichaamu paant antukmaji.

Tura nuna nankaamas ti nekasa nu, Yúsnan etserin yaunchu etserkarmia nusha nékaji. Ju étserma jusha, tsawant tsawaatsain kiritniunam ji keak Tsáapin awajeana aintsan asamtai, pénker Enentáimta asarum pénker Túrarme. Tura Kristu taa, Yánkuam etsantea Núnisan Atumí Enentáin Ashí paant awajsattawai. Tura nu tsawant jeatsain nu étserma tuke pénker Enentáimtustarum.

Tura ju emka nekaatarum. Shuar aya ni Enentáimmiarijiain, Yusa Wakaníjiainchu, Yus-Chicham urukamtai tu Chicháa nuna nekaatniun jeatsui.

Warí, Yúsnan etserin yaunchu etserkarmia nu, aya ni wakeramurijiain Tícharmiayi. Nu aishmankan Enentáin Yus pujursarmiayi. Tuma asa ni tiarmia nuna Yusa Wakaní jintintiam tiarmiayi.

Tura Israer-shuarnum wait chichaman etserniusha Páchitkiarmiayi. Atumiincha wait chichaman unuiniau Páchitkia ártatui. Niisha awajimtikrampratniun wakeruiniak Wáitian ti yajauchin uukar unuiniarartatui. Tura "Uunt Jesus uwemtikrurmia nusha ántraiti" tiartatui. Nuna takui ni amuukatniurisha Wárik jeartiatui.

Tura Untsurí shuar ni yajauch Túruiniamurin iirsar métek Túrawartatui. Iis, "Yus-Chichaman unuiniaitjai" Tuíniayatan Imiá yajauch Túruiniakui Untsurí aents "Yus-Chicham ántraiti" tiartatui.

Kuítian ti wakeruinia ásar, wait chichaman unuitiamprar Akíam Kuítriniawartatui. Tura Nú shuar yaunchu Yus Jákatniunam sumamtikiawarma ásar, ni amuukatin tsawantri jeatemayi.

ṡWarí? Yuska ni suntari nayaimpiniam pujuarmia nunasha penké tsankurachmiayi. Antsu nayaimpinmaya jinium akupkarmiayi. Tura nekapsatin tsawant jeatsain kiritniunam jinkiamu emetamu pujuiniawai.

Yáunchuya shuarnasha Yus tsankurachmiayi. Antsu amuukarat tusa amaarkatniun akuptukarmiayi. Antsu aya Nuain, Yusjai wekasatniun etserin asamtai ni shuari siati armia nujai uwemtikramiayi.

Enentáimpratarum. Sutuma pépruncha tura Kumura pépruncha nayaimpinmaya jin akuptuk Yus mash amukmiayi. Aya Yúnkunmik awajsamiayi. Ukunam nu Túrunamun nekaawar, shuar Tunáa Túratin Tsúumainian nekaawarat tusa Túramiayi.

Tura Yus Ráutan uwemtikramiayi. Pénker shuar asa, Sutumanmaya shuar Imiá yajauch ásar Tunáa Túruiniakui, Raut Kúntuts Enentáimsamiayi.

Pénker aishman asa, Nuyá shuara yajauchirin Wáitiainiak, ni Enentái pénker asamtai tuke tsawant Kúntuts Enentáimiuk Wáitmiayi.

Tura incha tunaan iniakturmakrin, nu tunaanum nupetnakchati tusa Uunt Yus uwemtikrampramniaitji, ni umirka asakrin. Túrasha yajauch Shuárnaka nekapsatin tsawant jeakui ti Asutniáwarat tusa Yus Yámaikikia apujeawai.

Tura Yus akupeana nuna umirkatniun nakitrar ni yajauch wakeramurin Túruinia nunasha Yuska nekas Asutiáttawai. Enentáimcha ainiawai. Tura ni wakeramuriniak wakeruiniawai. Niijiai nankaamas akupin ainia nuna yajauch áujmatainiawai.

Warí, imia Yusa suntari Yusai matsatainia nu, nuna Túratniun Tsúumainiawai. Nankaamas kakaram tura nankaamas uunt ainiayat nu akupniun katsekainiatsui.

Nu aishmansha Enentáincha yajasma Núnin ainiawai. Achikiar mantamnatniuk akiinia ainiawai. Enentáimtsuk Nánkamsar yajauchin chichainiawai. Tuma ásar yajasma Núnisan Jákartatui.

Chikichan Wáitkiamia aintsan Wáitsartatui. Tuke tsawant ni wakeramunak Túruiniak "waraajai" tuiniawai. Tura atumjai irunar Yurumáiniayatan atumin anankramawar warainiawai. Nuka natsantaiti.

Nuwan wakerutskeka iiniatsui. Tunaan yawetainiatsui. Yúpichuch ainia Nú shuaran netse Túratniun wakerumtikiainiawai. Kuítian wakeruktinniasha ti nékainiawai. Jákatniunam sumamawaru ainiawai.

Yúsnumaani naka wétsuk awajirarai. Peura uchiri Paraam Yúsnan etserniuitiat yaunchu awajimia Núnisaran awajiniawai ju shuar. Paraamka tunaan tura, Kuítian achiktinian ti wakerukmiayi.

Tura niisha Tunáa Túratajtsa weai Yuska umpuurun chichachun aents chichaana nujai métek chichamtikiamiayi. Nuinkia umpuuru timia nujai Yúsnan etserin ni netse Túratniurin Enentáimiar iniaisamiayi.

Nu aishmansha yumirmat kuyua Núnis ainiawai. Tura Núnisan yuranmisha Kíariat nase umpuim menkaana nu, yumi ajuarcha ásar, penké ántar ainiawai. Warí, Yus-Chichamjai aentsun yainiainiatsui. Niisha Imiá kirit ámanum tuke pujustin ainiawai.

Niisha ti chichainiayat ántar chichainiawai. Yajauch Túratniujai tura ayash wakera Nújaisha Páchim Túriarmia Nuyá kanakiarua Nú shuaran ataksha tunaanum ajuartajtsa wakeruiniawai.

"Iiya Núnis Túrakrumka ankant átatrume" tu wénawai. Túrasha imia ninki ni tunaariin emetamu ainiawai. Páantchakait. Shuar Warí tunaajaim nupetnaka, nuna emetamurinti.

Kame shuar, uunt Jesukrístu uwemtikiartin ana nuna chichamen nékainiak ju nunkanam yajauch ainia Nuyá uwempra ainia nu, Tunáa nupetkam atak yajauchiniam iniainiakka, nuik pujumia Nújainkia nankaamas Yamái Imiá yajauch pujuiniawai.

Yusa akupkamurin Imiá pénkera nuna Yus Nú shuarnasha Súsarmiayi. Túrasha nékainiayat tunaanum waketkiaru ásar ti Asutniáwartatui. Tuma asamtai, nekas jintia nekaachuitkiunka maak árainti.

Tíchamukait, "Yawá iyak ataksha Yúawai," tura, "kuchisha imiaimiuitiat ataksha tsakusnum maajkimiui." Nu aishmansha Núnisan yajauchiniam ataksha Wáketainiawai.

Aneamu yatsurtiram ju papin Jimiará aatjarme. Mai papinium winia jintintiamurjai Atumí chamir Enentáin Enentáimtikratjarum tusan wakerajrume.

Yúsnan etserin, pénker wekain armia nuna etserkamuri Enentáimturtarum. Tura ii Uuntri akupkamurin ni akatramurijiai ujatmakarmia nusha Enentáimpratarum. Jesukrístu uwemtikrampramaj nuna chichamen tajai.

Jusha emka nekaatarum. Amuamu tsawantin Yúsnan wishikin wantinkiartatui. Tura niisha ni yajauch wakeramurin Túrusar wekasartatui.

Tura juna tiartatui. "ṡKrístuka "wi atak Tátatjai" timia nusha urukuit? Warí, ii uuntri yaunchu kajinkiarmia Nuyá Yapajiáchmaiti. Yus yaunchu ju nunkan najanamia Nuyá yamaisha tuke Núniskete" tiartatui.

Túrasha nunkancha nayaimpincha Yus yaunchu najanamia nuna nekaatniun nakitiainiawai. Yusa chichamejai nunka entsaya jiinkimiayi tura nunkasha Entsá nanatrawai, Yus timia nujai métek.

Tura ukunam nu nunkan amaarkamujai Yus emesramiayi. Ashí nuna nekaatniun nakitiainiawai.

Tura Yus tiniu asamtai nayaimpisha nunkasha Yamáiya nuka jijiai emesnarat tusa ikiusma ainiawai. Yus aentsun nekapsattana nu tsawantai yajauch aents emesnartatui; tura jisha nu tsawantai nunkancha nayaimpincha aesattawai.

Tura jusha, aneamu yatsurtiram, Enentáimsatarum. Uunt Krístujainkia Chikichík tsawant mir uwiya Núniskete; mir uwisha Chikichík tsawanta Núniskete.

Uunt Kristu, "atak Tátatjai" tana nuna umitsuk menkakashtatui. Ayatik aentsti "wau taatsui" taji. ṡUrukamtai wau taatsua? Iin aentstin Nákarmaji. Shuar Chikichkísha menkakain tusa nakitiawai. Antsu Ashí shuar Enentáin Yapajiáwarat tusa wakerawai.

Túrasha Uunta tsawantri aya aneachma jeattawai. Kasa aya aneachma kiritniunam taana Núnisan Tátatui. Nu tsawantin nayaimpisha ipiamta Núnis Charáa timiatai menkakattawai. Tura nui Ashí írunna Núurtiuk esaawartatui. Tura nunkasha tura Ashí írunna nusha esaawartatui.

Ashí nu emesnartin neka asarum atumsha Imiá nekas Yus tuke Enentáimtusrum, takamtsuk umirkarum wekasatniuitrume.

Yusa tsawantri Wárik tati tusar, Jintiá iimprusar Nákastiniaitji. Nu tsawantai nayaimpisha Esáa emesnartatui, tura Ashí írunna Núurtiuk ti tsuer ajas entsamnattawai.

Tura iikia yamaram nayaimpisha, yamaram nunkasha ati tusar Nákaji. Nu átatui, Tímiayi Yus. Tura nuisha aya pénkerak átatui.

Nu tuma asamtai, aneamu yatsurtiram, ju Túrunati tusarum Nákarmena nui, imiatkinchanum wekasam chamir Enentáimjai makuuchmin Yus Wáitkiati tusarum wekasatarum.

Ju nekaatarum. Iin uwemtikramprataj tusa Yus ti Nákarmaji. Ii aneamu yachi Páprusha Núnisan Yus ni nekatairin susamia Tímiatrusan aatrampramarme.

Ashí Papí aarmia nui Pápruka wi tajana nuna chichaawai. Kame ni aarmari Chíkichka ishichik nekaachminiusha ainiawai. Nékachu ainia Nú shuarsha, tura Yúsnum tariarcha ainia nusha Papru aarman Yapajiáwar Nusháa jintintiainiawai. Tura Chíkich chichamsha Yus-Chichamnumia ana nuna Núnisan Túruiniawai. Túmainiakka ninki emesmamainiawai.

Wátsek, aneamu yatsurtiram, Túruntsain ujakjarmena nu neka asarum, yajauch shuar anankramattsa wakerutmainiak awajimtikrurain tusarum, tura Yusai tariarurmena Nuyá iniaraij tusarum anearum wekasatarum.

Tura ii Uuntri Jesukrístu iin Uwemtikkiartin ana nu, Yamái nékarmena Nú nankaamas nekaatarum. Tura Enentáimin Nú nankaamas tariarum wetarum. Yamaisha tura tuke, ii Uuntri Jesukristu Náarin uunt Awájsartí. Nu Atí.