Wikia Pápruitjai. Wisha Serpanujai tura Timiutéujai iruntran atumin Tisarúnikianmaya Yus-shuar árumna nuna ju papin aatjarme. Atumsha ii Apari Yusna tura Uunt Jesukrístunu ajasuitrume.

Tuma asakrumin ii Aparí Yus tura ii Uuntri Jesukrístusha waitnentrama ásarmatai Yáinmakar pénker awajtamsarat tusan wakerajrume.

Yatsurú, átum pénker matsatu asakrumin iisha Yus tuke Yúminkiaji. Atumka Yus nekas Enentáimtustin Nú Núkap nekaakrum wéarme. Tura nuamtak aneniastincha Nú Núkap nékarme. Nu tuma asamtai Yus yuminsatniuitji.

Atum Yus-shuar asakrumin Chíkich shuar atumin yajauch awajtamainiawai. Tura itiurchat wainiu asarum ti Wáitiarme. Nu tuma ain átumka katsuntearme, tuke Yus Enentáimta asarum. Nu tuma asakrumin, iisha Yus-shuar matsatainia nuka warasar ujainiaji.

"Yusa akupeamurin pachiinkiamniaitrume" Yus Túramprume. Nui pachiinkiataj tau asarum ju nunkanam Wáitiarme. Tura Wáitiakrumsha nuna nankaamas iwiarnaruitrume nui pachiinkiatin. Kame Nújainkia Yus atumin achirmak pénker Túraiti, nuka Páantaiti.

Núnisan atumin Wáitkiarmainia nunasha Yus Tímiatrusan Wáitkiasartincha nekas pénkeraiti.

Tura Wáitiarmena nusha Yus iijiaisha ayamtikramprartin pénkeraiti. Ii Uuntri Jesukrístu ji keana ímianisan kakaram suntarijiai nayaimpinmaya tara wantinkiamtai, nu tsawantai Yus ayampratniun suramsartatji.

Tura Nú tsawantaisha Yúsan nékainiatsna Núnaka ii Uuntri Jesukrístu ti Asutiátajtsa Tátatui.

Taa, nincha menkakatniunam akupkartatui. Chichaak "Wi pujajna Juyá akupeajrume" Títiatui. Tura winia ti kakarmar atsana nui akupeajrume, átum winia umirtukcha asakrumin" niin tiartatui.

Kame Uunt Jesukrístu Tátin tsawantri jeamtai, ni shuari, ni Enentái pénker awajsaru ainia nu, ni Náarin shiir pachisartatui. Tura Yúsan umikiaru ásar, ti shiir Enentáimsar Jesukrístun iisartatui. Ii ujakmajrumna nu antukrum umirka asarum atumsha nui pachiinkiattarme.

Nu tuma asamtai ii Yusrin atumin tuke áujtajrume. Yus atumin achirmakuitrume. Nuinkia Yuska Atumí Enentáin takas Nii wakera nujai métek awajtamsati, taji. Yus umirka asarum pénker wekasataj tusarum wakerarme. Túrarum Yus Enentáimtusrum pénker Túratin wakerarme. Tura wakerarmena nu umiktin Yuska ni kakarmarijiai Yáintí, tu áujtaji.

Atum pénker wekasa asakrumin Chíkich shuarsha ii Uuntri Jesukrístu Náarin nankaamantu Enentáimtusartatui. Nusha auka ii Yusri tura ii Uuntri Jesukrístu Waitnentáimturmasar pénker wekasatniun Yáinmakui Túrarme. Túramtai Chíkich shuar shiir Enentáimturmasartatui.

Tura, yatsuru, ii Uuntri Jesukrístu Tátatna nuna tura Niijiai inkiunaiktatjinia nunasha ujaktinian wakerajrume.

Chíkich shuar anankramawar "Uunt Jesukrístu tsawantri jeayi" tu ujatmaktaj tusar wakeruiniawai. "Iimiarmaj nujai nékajai" turamainiakuisha, "Chícham étserman antukmaj nujai nékajai" turamainiakuisha, tura "Papru Papí aarmari nuna takui nékajai" turamainiakuisha, Páchim Enentáimprairap. Tura sapijmiakairap tusan seajrume.

Penké anannawairap. Nekaatarum. Nu tsawant jeatsain Yúsnumia kanaktin átatui. Tura Nú arant, Tuke Tunaarintin, emesnartatna nu wantinkiattawai.

Niisha aya Wíniak Enentáimtursarat tusa wakerak, ántar-yusnasha tura nekas Yúsnasha shuar tikishmatrarain tusa ti nakitrattawai. Ninki ti nankaamantu Enentáimtumas, Yusa nuke ajas, Uunt Yusa Jeen Wayáa pujustatui. "Júiti Yus" shuar turutiarat tusa mash Túrittiawai.

Yatsurtiram, wi atumjai pujakun nuna Ashí ujakmajrume. ṡNuka kajinmakniurmek?

Yámaikikia, ni tsawantri jeatsain, Tuke Tunaarintin wantinkiain tusa surimia nu nékarme.

Tunaasha yamaisha awai, tura paantcha. Túrasha tunaan surimia nu juramkitniuk taasai nu tunaaka paant átin.

Nuinkia nu Tuke Tunaarintin wantinkiattawai. Tura Uunt Jesus ni wenejai Umpuí aun Máattawai. Tara ni wincharijiai nuna amuktatui.

Nu Tuke Tunaarintin, iwianchi uuntri Satanás akupkam Tátatui. Ni kakarmari iniakmastaj tusa, aentsti Túrachminian Túrak anankawartatui.

Jinium wémin ainia Nú shuaran Ashí Tunáa ana nujai anankawartatui. Nu shuar Yus-Chichaman nekas ana Núnaka nakitraru ásar uwemprachmin ainiawai.

Iis, nekas ana nuna nakitia ásarmatai, ti ananmamawar wait-chichaman umirkarat tusa Yuska tsankatkattawai.

Warí, niisha ni tunaarin wararainiak, nekas ana nuna nakitraru ásarmatai, Yuska "jinium wétatrume" tiartatui nuna.

Tura, yatsuru, Uunt Jesus aneamu árumna nu, iisha atumin Enentáimtusar ii Yusri yuminsaji. Atum nekas ana nuka umikiurme. Tuma asakrumin Yusa Wakaní Atumí Enentáin pénker awajtamsaitrume. Nu tuma asamtai Yámankamtaikniumia Yuska "átum uwempramniaitrume" Túramprume.

Nu Túrunat tusa Yus wakerutmarme. Krístujai Uwempratin Chicham ii ujakjinia nujai Yus untsurmakmarme. II Uuntri Jesukrístu ti penker pujana nui pachiinkiamniuram tusan ujakmajrume, Nú chichaman.

Wátsek, yatsuru, Yusjai katsuartarum. Yus-Chicham etserkamu antukurmena nu, tura wisha aaran akuptukjarmena nusha kajinmatkiirap.

Ii Uuntri Jesukrístusha tura ii Apari Yussha ti penker ásar incha anenmatsjik. Tura waitnentrama ásar incha shiir Enentáimtikramji. Tura Nú nankaamas ii tuke pénker pujustinian ikiurtamsaitji.

Nu tuma asamtai, pénker chichastarum tusa, tura pénker takastarum tusa Jesukrístuka shiir Enentáimtikramar Ikiakátmarartí.

Nuyá, Yatsurú, Yusa chichame shiir Pampartí tusarum Yus áujtursatarum. Atum Yus-Chicham wakerukmarmena aintsan Ashí nunkanam Wakerukartí tusarum Yus seatarum.

Tura yajauch shuar, pénker ana nuna ti nakitiainia nu, incha yajauch Awajtamsachartí tusarum Yus áujkartustarum. Kame Chíkich aents Yúsan umirkacharu ainiawai.

Túrasha Uunt Jesusak atumin iniaitsuk Wáitmaktatrume. Tura atumin Ikiakátmartatrume. Tura íwianch anankramataj takui Kíishturmaktatrume.

Kame Yus atumin yainmaktatrume, taji. Ii Tájinia nu Yamái Umíarme. Tura tuke umirkattarme. Nusha nekaar shiir Enentáimji.

Uunt Yus Yainmakartí ni anenkrattairin nekaatniun. Kristu itiurchatan katsuntramia Núnisan atumniasha katsuntratniun Yus Yainmaktí.

Yatsurtiram, antuktarum. Ii Uuntri Jesukrístu chichamejai ju taji: "Nuyá Yus-shuar wi jintintramun nakitiak aya wékana nu ikiuktiarum."

Ii Túrajnia Núnisrumek Túratin nékarme. Júiti: atumjai pujusmaj nui tuke takakmasmiaji. Atumí yurumkari iisha akikmakar yurummiaji. Atumjai itiurchat áchatí tusar tsawaisha Káshisha tuke takakmasmiaji.

Kame iisha, Kristu akatramu asar "Yáintkiatarum" Tíminiuji; Túrasha nu Tútsuk, ii Túrajnia Núnisrumek Túratin nekaatarum tusar, iisha tuke tsawant takaamiaji.

Warí, atumjai pujumiaj nui "Takastinian nakitiana nuka Yurumáshti" Tíchamkaj~i.

Iis, atumiinia Weeá, Nánkamas Enentáimiainiak tura Nánkamas Túruiniak penké takatsuk pujuiniawai, Túramainiaji.

Nú Shuáran ii Uuntri Jesukrístu chichamejai "Tákamtak shiir Takakmasartí" tajai.

Yatsurtiram, yawetsuk shiir Túratarum.

Ju papinium ii Tájinia nuna, shuar umiktinian nakitiakuinkia "umichuiti" Tákuram, ni natsarat tusarum ikiuktiarum.

Túrasha "Yus-shuara nemasrinti" tiip. Ayatik jintintrata, tura Yúsai Enentáimtikrata, ame nekas yatsumea aitkiasmek.

Uunt Yuska, imiatkichu Enentái susamniaiti. Jú Yus, itiurchatnum pujarminin atumin tuke imiatkichu Enentáimtikramsarti. Uunt Yuska atumin pujurtamsarti, tajai.

Jui wi Papru juna aajai. Wi papin akupeaj nui Júnisnak winia Náarun aaran apujeajai, Wíniaiti tusan.

Ii Uuntri Jesukrístu atumin Ashí yainmakarat tusan wakerajrume. Nu Atí.