Wi Pápruitjai Jesukrístu akatramu. Yus nuna wakerakui ni akatramuri anaikiamuitjai. Ii yachi Timiutéujai Yus-shuar Kurintiu péprunam íruntrumna nuna áatjarme. Kame Ashí Akaya nunkanam Yusna ajasurmena nunasha áatjarme.

Apa Yussha, ii Uuntri Jesukrístusha shiir Enentáimturma ásar imiatkinchanum tuke shiir pujustinian Yáinmakarat tusan wakerajrume.

Ii Uuntri Jesukrístu Apari, ii Yusri ana nuna naari uunt awajsatai. Niisha ii Aparínti. Iin waitnentramaji. Tura Niisha ii Yúsrinti. Tuma asa iin tuke atsantamji.

Ii Wáitiajnia nui Yuska iin atsantamji. Tura iin atsantamjinia Nútiksarik iisha Chíkich shuar Wáitiainia nuna atsankrarat tusa Túrutmaji.

Warí, Kristu Wáitsamuri Núkap pachiinkiaitjinia Núnisrik ni atsankramurin Núkap pachiinkiaitji.

Tuma asamtai, Wáitiajnia nu, Yusa uwemtikrampratniuri tura ni atsankratniuri atumsha takustarum tusar Wáitiaji. Tura Yus iin atsantampramjinia nu, Yusa uwemtikrampratniuri tura ni atsankratniuri átum takustarum tusar atsankramuitji. Wats, átum uwemtikramu tura atsankramu asarum, ii Wáitsajnia Nútiksarmek Wáitiayatrum shiir Enentáimsarum katsuntramniaitrume.

Tura "Túrattawai" tu Enentáimtajrume. Warí, átum iijiai métek Wáitsaitrume. Núnisan iijiai métek Yus atsantamtsurmek.

Yatsurtiram, iikia Asia nunkanam ti itiurchat Wáinkiamjinia nu nekaatarum tusar wakeraji. Imiá itiurchat Wáinkiar iikia katsuntratin jeachmaji.

Nu itiurchatnumia "iwiaaku Jíinkishtatji" tu Enentáimsamji. Túrasha "iikia tujinchaitji" tu Enentáimtumatsuk, antsu jakamunmayan inianniua Nú Yúsan Enentáimtusarat tusa nu Túrunamji.

Jakamnia itiurchatnumia Yuska uwemtikrampramji. Tura yamaisha uwemtikrampratajtsa pujurtamji. Tura atumsha iin Yus áujtakrumninkia "Yuska tuke uwemtikramprattaji" taji. Tura Untsurí shuar Yus aujsa asakrumin, ii uwempra asakrin Untsurí shuar Yúsan yuminsartatui.

Yatsurtiram, ju nekaatarum tusar wakeraji. Ju nunkanam pujusar tura nekaska atumjai pujusar anantsuk tura Yus umirkar wekaimji. Aya ii nekatairijiain wekaichamji. Antsu Yus iin waitnentrama asa pénker wekasatniun Yainmakmaji.nu nekaar shiir Enentáimji.

Aatjarmena nu Páantaiti. Atum áujsarum nekaatin jearmena nunak aarjai. Chikichan nekaachminian aatsjai. Pénker nekaatarum tusan wakerajrume.

Ishichik nékayatrumek Nú Núkap tuke nekaki wetarum tusan wakerajrume. Nuinkia Jesukrístu Tátinia Nú tsawantai átum winia shiir Enentáimtursattarme. Tura átum pénker wekasa asakrumin shiir Enentáimtustatjarme.

Tura ii shiir enentaimtuniaj nuna nékakun ataksha Yusa waitnenkartutairi nekapsak tusan ataksha atumiin irastinian wakerimjai.

Masetúnia nunkanmaani wéakun iirkuta nankaikitjiarum tusan Enentáimmiajai. Tura Wáketkuncha ataksha iistajrum tusan wakerimjai. Túramtai wi Jutía nunkanam weakui átum Yáintkiatarum tusan atumin iistinian wakerimjai.

Nuinkia ṡurukamtai Túrachmaj? ṡPénker Enentáimtsukek "wetajai" Tímiaj? ṡWi Yus-shuarcha nunisan, Jimiará chichamtiniaiti, Tú Enentáimtursarumek?

Núchaiti. Yus tana nuna Tímiatrusan Umíana Nútiksarik iikia ii chichame umiktai tusar wakeraji. Jú chichamaik, "Ee, Atsá" Tátsuji.

Wisha Serpanujai Timiutéujai Yusa Uchiri Jesukristunun ujakmajrume. Niisha Jú chichamaik, "Ee, Atsá" Tíchaiti. Antsu nii tana nuna tuke Umíawai.

Niijiaisha Yus tana nu Tímiatrusan uminiui. Tuma asamtai Jesukrístu Enentáimtakur "nii tana nuna nekas Túrattawai" tu Enentáimji. Tu Enentáimsar Yusa naari shiir awajeaji.

Atumniasha incha Ikiakátmajnia nu Yúsaiti. Krístunu ajasu asakrin Túrutmaji. Tura anaitiamak Niiniu awajtamji.

Tura ukunam ii achiktatjinia nuna, nekas amastatjai tusa Yus ni Wakanin ii Enentáin apujturmaji. Nujai Níiniuitji tusar paant nékaji.

Atumíin itiurchatan Wáinkiaij tusan nakitiakun Atumí péprurin Kurintiunam jeachmajai. Wáitrakuinkia "Yus iirsati" tajai.

"Aya wi Tájana Nútiksarmek Yus Enentáimtustarum" waantu Enentáimtumasar nu titin nakitiaji. Yus nekas Enentáimtusmaajai kakaarme. Antsu nekas warastarum tusar wakeraji.

Tuma asamtai, atak Kúntuts awajsaijrum tusan nakitiakun, "Atumí tunaari íwiartsurminin jeashtatjai" Tímiajai.

Wi atumin Kúntuts awajkuncha, ṡyaki winia waramtikrusat? Aya atumek, wi nuik Kúntuts awajsamjarmena nuke waramtikrusminiaitrume.

Wi jeakun Atumí tunaari íwiartsurminin Kúntuts Enentáimsaij tusan nakitiakun, nu papin aarmaj Nútiksanak aarmajai. Warí, atumketrume winia waramtikrustin.

Nekaatarum. Nu papin aarmiajai. Kúntuts awajsatjarum tusan aarchamjai; antsu ti aneajrumna nu nekaatarum tusan wakerakun aatramajrume.

Túrasha Kúntuts awajtusmia nu, aya Wíniak Kúntuts awajtuschamai. Antsu atumniasha ishichik Kúntuts awajtamsayi. Patasa chichasaij tusan "ishichik" tajai.

Kame nu aishmankan iruntra chicharkarum Wáitkiasmarum nuke Máakete.

Antsu yamaikia tsankuratniuitrume. Shiir Enentáimtikratniuitrume. Niisha Imiá Kúntuts pujus Nú arant Ajasáin tusarum Túratniuitrume.

Túrakrum nii nekas anearmena nu paant iniaktustarum tusan seajrume.

Kame "aajna nuna umirtukartimpiash" Tímiajai. Kame nuna nekaataj tusan wakerakun nu papin nuik aatramjarme.

Atum tsankurearmena Nú shuaran wisha Núnisnak tsankureajai. Tura tsankuratin ákuinkia, wi tsankurajna nu Ashí atumnian Enentáimtusan, Kristu iimmianum Túrajai.

Kame uunt iwianch Satanás iin emestampratajtsa wakerana nusha nékaji. Tuma asamtai, Túrawain tusar tsankuratniuitji.

Krístunu shiir chichaman Trúas péprunam etserkatajtsan jean, ti pénker takastinian Wáinkiamjai.

Túrasha ii yachi Titiun Wáinkiachu asan, shiir Enentáimsatniun tujinkiamjai. Tura asamtai Trúasnumia aentsun áujsan ikiukiaran Masetúnia nunkanam wémiajai.

Kristu Jesusjai Yuska incha nupetmamtikramak ewekatmasuitji. Tuma asamtai Nincha ti shiir Yúminsa pujajai. Tura kukuj~i Kunkúakui, Ashí nékainia Núnisan ii etserkamujai Kristu shiir chichamen Yuska Ashí aentsun nekamtikiainiawai.

Kristu iin pujurtamu asamtai Yusjai nekapsamka iikia Kunkúaji. Ii Kunkúajnia nuna uwemtikramu ainia nusha tura uwemtikrachma ainia nusha nekapramnia ainiawai.

Menkakatniunam weena nuka ii Kunkúajnia nuna jakamnia mejea nekapramji. Tura iwiaaku átinnium weena nuka iwiaaku átin Kunkúa nekapramji. Maa, nu Túratniuncha ṡyaki Jeá?

Kame Untsurí aents Kuítian achiktaj tusar Yusa chichamen yapajinia Núniskechuitji. Antsu Krístunu ajasu asar, Yus akupkamu asar, Yus iimmianum anantsuk esetsar étsereaji.

ṡNu Tákurninkia, "ataksha ninki waantu Enentáimtumainiawai," tu Enentáimsarmek? ṡChíkich Túruinia Núnisrik, "Ju aishman nekas Yus-Chichaman etserin ainiawai" tusa Papí aarma atumin iniaktustinkiaitiaj~i? ṡChíkich iniaktustin Nú Papí atumin seatniukaitiaj~i?

Atsá. Atumka ii papiria Núniskechukaitrum. Ii Enentáin nu Papí aarmaiti. Tura Nú Papí áujsatniua Núnisan Ashí aents Atumí Túramuri Wáinkiar ii etserkamaj nu, Papru nekas Yusa takatrin takaawai tusa nekaamnia ainiawai.

Iis, Tátsujak. Papí aarma Núnisketrume. Nu Papí Kristu aarmaiti tura iisha Nú Papí atumin Súaji. Tíntiajainchu antsu iwiaaku Yusa Wakaníjiai aarmaiti. Kayanmasha aarchamuiti; antsu shuara Enentáin, auka, aarmaiti.

Kame Krístunu asar, Yus Enentáimta asar, nusha Tíminiaitji, taji.

Ju nékaji; imia iik penké tujinkiaitji. Antsu ii Túrajnia nu Yus ni kakarmarin Súramkurin Túraji.

Yamaram chichaman Yus najanamia nuna, incha pénker etserkatniun suramsaitji. Yaunchu aarma chichamnum, Ashí takamtsuk umirkachrikia tuke jakamniuyaji. Antsu yamaram chichamnum, Yuska ni Wakaníjiai yamaram wekasatniun Súramji. Yusa kakarmarijiai nu chicham étserji.

Yaunchu chichamnaka kayanam aar Yus Muisaisan susamiayi. Susamia nui, Muisaisa yapi ti wincha ajasmiayi. Túrunamtai Israer-shuar ni yapin iistinian tujinkiarmiayi. (Túrasha nu wincha mushatmaki wémiayi.) Túrasha nu chichaman shuar umirkatniun tujintiakui, nu chichamsha aya tuke Jákatniunam Shuáran ejemiayi. Túmayatan winchajai susamuyayi.

Tura yamaram chichaman Yusa Wakaní Súramna nu, nujai nankaamas Shíiraiti.

Kame mesertinnium ejeana Nú chicham winchajai susamuyayi. Tura nujai nankaamas Yúsnum ejeana Nú chichamka Yus iimmianum pénkeraiti.

Iista; yamaram ana nu Imiá shiir asa, yaunchu wincha amia Núnaka mushatmamtikiui.

Núkap arur pujuschamnia nu wincha áchamkia. Kame tuke átinia nuke nujai nankaamas Shíiraiti.

Nu nékakur ti paant étserji.

Muisais Túramia Nútiksarik Túratsji. Ii uuntri Israer-shuar ni yapin wincha ajas menkaan Wáinkiarain tusa tarachjai ni yapin Muisaiska nukumakmiayi.

Tura nu arantcha Muisaisan anturkarmia nuna Enentáisha nukukmauyayi. Nekaatniun tujinkiarmiayi. Tura yamaisha Núnisan yaunchu aarma chichaman áujsam antukar nekaatniun tujintiainiawai. Kristu Enentáimtuschatin ni Enentáin nukukma nu Yapajiáchmaiti. Aya Krístujai nuka Yapajiámniaiti.

Yamaisha Muisaisa aarmarin áujsar nékainiatsui, ni Enentáimmiari nukurkamu asa.

Tura aencha ni Enentái Yapajiá Uuntna ajasmataikia ni Enentáimmiariya nukurkamu ana nu jusamuiti.

"Uunt" Tájinia nu, Yusa Wakaníiti. Uunt Yusa Wakaní pujana nui ankant ajastiniaiti.

Nuke asamtai, iisha ii yapi tarachjai nukukchamu asar íspikia Núnisketji. Uunt Kristu pénkeri iniakmaji. Kristu pénkeri Nú Núkap takaki wéakur, Krístujai métek ajastasa pujaji. Yusa Wakaníkia nuna Túrawai.

Yus iin waitnentrama asa ni chichamen etserkatniun ataktamsaitji. Tuma asamtai yawetsuk takaaji.

Uuka Túratin ana Nuyá tura natsanmai ana nuyasha kanakmiaji. Anankatai tusar wekaatsuji. Tura Yus-Chichamjai nakuratsji. Etserkur aya Yus-Chicham tana Núchik étserji. Ashí aents nuna antukar, "nekas Núiti Yus-Chicham" tiarat tusar Túraji. Wi Tájana nuna Yus nékawai.

Uwempratin Chicham ii étserjinia nu Páantaiti. Ayatik menkakatniunam weena nu "Páantchaiti" Tuíniawai.

Uunt iwianch, ju Nunká uuntri ana nu, nu aentsu Enentáin ukusturuiti. Uunt Krístunu shiir chichaman ii étsermajai Tsáapnin Enentáimprarain tusa ukustawai. Nu Kristu Yúsan ímiatrusan nakumui.

Iisha étserkur, Jesukristu ii Uuntrinti tu étsereaji. Iikia Atumí uuntrintji Tátsuji. Antsu, Jesus ii uuntri asamtai, atumi Yáintrintji, taji.

Yaunchu kiritin aan Yus Tsáapin ati tusa Tsáapnin awajsachmakia. Nú Yúsaiti ii Enentáin tsaapnin awajtamsamia nu. Nu tsaapnijiai ni shiirmarin, Jesukrístu iniakmia nuna, Ashí aents nekaawarat tusar Jesukristunun étsereaji.

Nu Tsáapin Imiá pénker ana nuna ii ayashiin Yus ikiusuiti. Tura ii ayashi kakarmachu, nuwe najanamua aanin asamtai, Warí, kakaram ájinia nu Yúsnumiachukait. Ii ai nuna nekaawarat tusa Yuska ni Tsáapnintrin ii ayashiin ikiusuiti.

Tuma asamtai ii itiurchatri árentmaku árinin tuke jiinkimniaitji. "Itiurkatjik" taji, Túrasha Yus Yáinmaji.

Aents pataaturmainiakrincha Yus ikiurmatsji. Emesrataj Tukamá tujintiainiawai.

Kame Krístun Máataj tusa tuke wakeriarmia Núnisan incha tuke mantamataj turamainiaji. Túrasha Jákachu asar Kristu kakarmari ii ayashiin iniakmaji.

Iisha Jesusna ajasu asar wekaajnia nui tuke tsawant Tsúumainium jasattuk ajaji. Túrar ii ayashi jakamniaitiat nu ayashnium Jesusa iwiaakmari paant iniakmaji.

Iisha Yus-Chicham étserkur ii ayashiin jasattuk ajaji, tuma ain atumsha umikiu asarum nekas iwiaaku atin Wáinkiarme.

Yus-Papinium yaunchu aarmanum: "Yúsan Enentáimtusmajai, tuma asan etserkamjai" Tátsuk. Iisha Núnisrik Yus Enentáimtusar wekaaji. Tuma asar étserji.

Yus kakarmaiti. Uunt Jesusan jakamunmayan iniantkimiayi. Incha Núnisan Jesusjai iniantamkittiaji. Tura atumjai métek ni pujamunam juramkittiaji. Nusha paant nékaji.

Atumsha Untsurí aencha Yus-Chicham antukakrumin, Yus Yáinmakurme. Tuma asamtai atumsha Nútiksarmek Yus yuminsarum pujarme. Nujai Yusa naari uunt awajsamuiti. Nu nekaar Wáitsatin ashamatsji.

Tura yaweatsji. Ii ayashi amuiki wéakuisha ii Enentáinkia yamaram ajaki wéawai.

Warí, ukunam tuke shiir pujustatjinia nu Enentáimtakrikia, ju nunkanam Wáitiajnia nu, ti itiurchataitiat, aya yamaiya asa tiikia itiurchatchaiti, tura Wárik nankaamawai. Túrasha ii itiurchatrijiai Yuska ti shiir ana nuna amuukachmin ana nuna Núkap suramsattaji.

Tuma asamtai Wáinjinia nu ti Enentáimtatsji. Antsu Wáintsujnia nu nekas Enentáimtaji. Wáinjinia nusha aya yamaiyaiti. Antsu Wáintsujnia nuka tuke amuukachminiaiti.

Wats ju nékaji. Nayaimpiniam ii shiir pujustinian amuukachmin ayashin Yus najanamun ikiurtamsaitji. Aents najanachmaiti nu. Tuma asamtai ii ayashi emesnakuisha Warí itiurtamajia. Nuka aaka Núnisan amuukamniaiti.

Ju ayashnium pujusar Wáitiaji, taji. Yamaram ayash nayaimpiniam pujana nu achiktai tusar wakeraji.

Ayashtichu ajasaij tusar, yamaram ayashtin ajastaitsar wakeraji. Pushía Núnik yamaram ayash iin nukurmaktai tusar wakeraji.

Tura jui ayashjai pujusar Wáitsar pujakur shiir Enentáimtsuji. Arut Pushí aiktinia Núnisrik ju ayash ikiuktiaitsar Tátsuji. Antsu yamaram Pushí entsartinia Núnisrik yamaram ayashnium tuke Pujusmí tusar taji. Iista, ju ayash amuukachminkiait. Yamaram ayashnium pujusar tuke iwiaaku pujustatji.

Yamaram ayashintin ajastinian iwiarturmaruitjinia nu Yúsaiti. Tura nekas Túrattajai tusa ni Wakanin suramsaitji.

Ju nékaji. Ju ayashnium pujajnia juinkia Uunt Jesusjai pujatsji. Tuma asamtai, Wáinjinia nu ti Enentáimtutsuk Yus Enentáimtusar tuke shiir Enentáimsar wekaaji.

Tura ju ayashniumia Jíinkir Uunt Jesusjai tuke pujustaitsar wakeraji. Tura Túrattaji tu nékaji.

Tuma asamtai ju ayashnium pujakrisha tura ju ayash ikiukrisha Uunt Jesus tuke waramtiksatai taji.

Warí, ju ayashjai ii Túramajnia nu ujakam, "pénkeraiti", "yajauchiiti" Kristu turutit tusar, Ashí iisha Uunt Kristui jeatniuitji. Tura ii Túramujai métek akirmaktatji.

Tuma asamtai ju nékaji: Uunt umirkashtin ti Tsúumainti. Nu nekaar Ashí shuar Yus-shuaran awajsataj tusar ti takaaji. Tura incha Yus nékarmaji. Tura ii Túramuri átumka Atumí Enentáin paant nékarme, tajai.

Ataksha, "wi pénkeraitjai" tusar nu Tátsuji. Antsu, ii Túramu Nekáa asakrumin Enentáiniam ana nuna Enentáimtsuk aya Pátatkea nujai warainia Nú shuar tsanumprutmainiakui yaintkiatarum tusar taji.

"Wáurkaiti" turamainiajiash. Nusha Warí, itiurtamajia. Ashí Túrajnia nu, Yus aneakur tura atumin Yáintai tusar Túraji.

Kame Ashí ii Túrajnia nu Kristu anenkrattairijiai Túraji. Kame ju nékaji: Kristu Ashí shuaran jaruku asamtai, Yus iimmianum Ashí iisha jaka Núnisaitji.

Kristu Ashí shuaran jaruk nantarkimiayi. Tuma asamtai Krístunam iisha iwiaaku pujajnia jui, iik wararmamtsuk, Kristu umirkatniuitji.

Tura yamaisha aya ni ayashi iirsar, "nu shuar pénkeraiti" tura "nu shuar yajauchiiti," titin tujintiaji. Kame yaunchu aya ni ayashi iirsar "Kristu yajauchiiti" tu Enentáimsamiaji. Tura yamaikia Yapajiár, esetsar Enentáimkiur "Kristu Yusa Uchirínti" taji.

Tuma asamtai, Krístunu Ajasúka yamaram najanamuiti. Yaunchu Enentáimtairi menkakayi. Antsu Núnaka iikias ni Enentáimtairi nekas yamarmaiti yamaikia.

Nunasha Yus Túraiti. Iin nawampramkattsa Krístun akupturmakuitji. Tura nu etserkatniun incha ataktamsaitji.

Yuska iin tunaarinniutin Asutiámatniun nakitiak Krístujai nawampramkamiaji. Tura incha Yus-shuartin nu ujaktinian ataktamsaitji.

Krístunu ataksamu asar, Yuska "winia Uchirjai nawamnaikiatarum" tusa ii wenejai atumin seatmarme. Tuma asakrin, Kristu Náariin "Túratarum" Tájarme.

Krístuka tunaan penké Túrachmiayi. Túmanak ii tunaariin Yus Krístun makuumiayi. Nuna tura Krístunam makuuchmin awajtamsamiaji.

Ni Papiriin Yus yaunchu Isayasan juna Tímiayi: Tsawant jeamtai, ame seatmena nuna anturkamjame. Uwempratin tsawant jeamtaisha yainmajme. Wats yamaikia Yus seatin jeayi.

Yamái Yúsnum uwempratin jeayi. Tuma asamtai, iikia Yusa takatrin pachitkiajnia nu, Yusa anenkrattairi pénker achiktarum tusar seajrume.

Tura "Papru etserkamuri ántraiti" Tíarain tusar Chíkich yajauch Enentáimtiktsuk pénker wekaaji.

Nekas Yusa takarniurintji nuna paant nekaawarat tusar Wáitiayatrik, atsumayatrik, itiurchatnum pujayatrik shiir katsunteaji.

Ju itiurchat Wáinkiamji: katsumpramkarmaji; sepunam Enketmáwarmiaji; Charáa-Charáa awajtamiarmiaji; takatcha ti itiurchat takasmiaji; kanutsuk pujumiaji; tura tsukasha ti tsukammiaji.

Tunáa nakitrar wekaaji; Yus-Chicham Unuimiátraitji; shiir Enentáijiai katsuntrar wekaaji. Chíkich shuar pénker awajeaji; Yusa Wakaní pujurtamkurin shuar nekas aneaji;

nekas chicham ana nu étsereaji; tura Yusa kakarmarisha Nú paant iniakmaji. Tura ni nemasrin nupettukain tusa suntar ni tantarin Júana Núnisrik iisha ii nemasri íwianch nupettamkaij tusar ii Yusri tuke umirkar wekaaji.

Shuar shiir Enentáimturmainiakrincha, yajauch Enentáimturmainiakrincha, pénker chichartamainiakrincha, yajauch chichartamainiakrincha tuke Yusjai shiir wekaaji. "Wáitruiniawai" turamainiakrincha tuke nekas chichaaji.

"Nu aents nékatsji" turamainiakrincha Yusnumka nékanji; Jákatin Tsúumainnium wekayatrik tuke iwiaaku pujaji; Asutiámuitiatrik mantamnatsji. Yusa takarniurintiaj nu Ashí nujai paant nekaamniaiti.

Kúntuts pujayatrik ii Enentáinkia waraaji; Kuítrinchaitiatrik Chíkich shuar Kuítrintin awajeaji; penké takakchiatrik Ashí Wáinji.

Yatsurtiram, Kurintiunam pujarmena nu, Ashí paant ujakchamkajrum. Ti aneajrumna nu nékarme.

Wikia atumin paant chichastajtsan wakerajrume; antsu átumka anenttsuk paant chichastin nakitrarme.

Winia uchirua Núnisnak chichaajrume; wi tuke paant chichaarjarmena Núnisrumek atumsha Atumí Enentáin ana nu, paant ujatkatarum tusan seajrume.

Yus-shuar Yus-shuarchajai tsaninktinian Enentáimsashtiniaiti. Warí, ṡYusan umirna Nú shuar, iwianchin umirna Nú shuarjai métek Enentáimiainiawak? ṡTsáapnisha kiritjai Máimtek áminkiait?

ṡKrístuka uunt iwianchjai nawamnaikiamniakait? ṡYus-shuar Yus-shuarchajai tsanin shiir pujusminkiait?

ṡIwiaaku Yusa jeencha ántar-yus pujustinkiait? Tura atumsha iwiaaku Yusa jéentrume. Yus Ninki ni Papiriin juna Tíchamka: Niijiai tsaninkia pujusan, niijiai wekasartatjai tura ni Yusri átatjai; tura niisha Wíi aents ajasartatui.

Tuma asamtai junasha Tímiayi: Nii matsatainia Nuyá Jíinkitiarum, tura niiya kanaktiarum, tawai Uunt Yus; tura yajauch ana nu antinkiairap. Túrakrumninkia awayattajrume.

Tura Atumí Apari átatjai; átumka winia uchir átatrume. Nuna Wi Imiá kakaram uunt Yus asan tajai. Tu aarmaiti.

Tuma asamtai aneamur yatsurtiram, nusha, Yus Tímia nu, iin Túramji. Nu tuma asamtai ii ayashi tura ii Enentáisha yajauch ajasain tusar, Ashí Tunáa ana Nuyá kanaktiniaitji. Túrar "Yusak nekas ii uuntrinti" takur, ii ayashisha, ii Enentáisha takamtsuk tuke tsawant Yus iiktustiniaitji.

Ataksha nawamnaikiatai. Iikia shuar yajauch awajsachmaji; yajauch jintintrachmaji; anankachmaji.

Makuutai tusan nuna Tátsujai. Antsu nuik Tíchamkajrum, iwiaaku pujakrisha jakarsha átumka ii Enentáin áchitkiarme.

Araantutsuk aatjarme; shiir Enentáimjai. Itiurchatnum pujayatnak, atumin Enentáimtusan Enentairuí kakaram Enentáimsan waraajai.

Jui Masetúnianum penké ayamprachmaji. Antsu ti Wáitsamji. Aentsnumia itiurchat Wáinkiamji, tura ii Enentáijiainkia ashamkamji.

Tura Kúntuts pujakrincha Yus Ikiakátmartinian nékawai. Tuma asamtai Titiún akupturkamai. Nujai winia Enentáirun Ikiakármai.

Tura átum nii Ikiakármarumna nuna Titiu ujatkamai. Nuna antukan ti warasmajai. Títiuka átum iirsatin wakerarmena nuna ujatkamai; Túrunamia nuna Kúntuts Enentáimmiarumna nusha, tura winia anentu asarum Enentáimturumna nuna ujatkamai. Nuna antukan Nú nankaamas warasmajai.

Papí nuik akupkamaj nu áujsarum Kúntuts Enentáimprarme; Núnaka nékajai. Túrasha ii akupmainchu Túraitjai Tátsujai. Eta, nuikkia Tímiajai, Túrasha yamaikia Tátsujai. Papí áujsarum ishichik Kúntuts Enentáimprarumna nuna nekaan waraajai.

Kame Kúntuts Enentáimprakrumin waraatsjai. Antsu Atumí tunaari nekaarum Kúntuts Enentáimprarum Atumí Enentái Yusjai Yapajiá asakrumin nuna nekaan waraajai. Kame Yus wakerana Nútiksarmek Kúntutsrum katsuntearme; tuma asamtai iikia nu papijiai yajauch awajsachji.

Nekaatarum. Yus wakerana Nútiksan Kúntuts katsunteakka ni Enentái Yúsnum Yapajiáwai. Nuinkia ni Tunaaríya uwempraiti. Nuka "Túrumainchu Túraitjai" Tíchamniaiti. Antsu Yusan Enentáimtutsuk Kúntuts pujakka ni Enentái Yapajiáshtatui; Yapajítsuk ni Tunaaríya uwemtsuk jakattawai.

Tura iistarum; Yus wakerana Nútiksarmek Atumí Kúntutsri katsuntearme. Tuma asarum wi aatjarmena nu esettsarum Enentáimtusurme. Atumí Túramuri ujatkatajtsa wakerimiarme. Tura nu Tunáa nakitramarme; tura ashamkamarme. Tura yajauchin Túramia nu Asutiámarme. Tura winia anentu asarum wi timia Tímiatrusrumek turatai tusarum ti wakerimiarme. Nu tura asakrumin pénker Túrarmena nu, paant iniakmarme.

Kame yajauchin Túramia nuna ni tunaarin iniaisat tusan wakerakun, tura Wáitias pujumia nu atak shiir Enentáimsati tusan wakerakun nu papin aatramjarme. Tura Nú nankaamas átum Yúsnum iin anearmena nu nekamatarum tusan aatramjarme.

Atum umikiu asarum waraakrumin iisha shiir Enentáimji. Tura shiir itiaamarumna nuna Titiu waraak ujatkamtai Nú nankaamas shiir waraaji.

Atumin shiir Enentáimtajrumna nuna Titiun ujakmajai. Tura nuna nekas aan Titiu nekaamai. Tuma asamtai atumin natsantrachmajrume. Kame atumin tuke nekas ana nuna Tímiajrume. Núnisan atumnian Titiun Tímiaj nusha nekasauyi.

Tura Títiuka atumin Enentáimturmas ti waraawai. "Jiatmaktajtsa winiatsuash" tusarum ti ashamkachurmek. Túmayatrum, nii pénker tati tusarum pachischarme. Tura nii taa seatmarma nu umikiurme. Títiuka nuna Enentáimias waraawai.

Tura wikia, átum pénker Túramurmin nekaan tura pénker Túrawartatui tu Enentáimsan waraajai.

Yatsurtiram, Masetúnia Núnkanmaya Yus-shuaran Yus waitnentainia nuna Yamái ujaktatjarme.

Ti itiurchatnum nekapsamu ainiawai. Túmayatan warainiawai. Tura ti Kuítrincha ainiayatan emeentutsuk Kuítrinniua Núnisan suiniawai.

Juna wi paant nekaan ujaajrume. Niisha wakeramujai Súsatniun jeainia nuna Súiniawai; tura Nú nankaamassha Súiniawai.

Yus-shuaran Kuítrinchan Súsartaitsa ti wakeruiniak, nu Túratniun ti seatmarmaji.

Tura ii Enentáimmiaj Nú nankaamas Túrawarmiayi. Emka Yúsnum ninki sumamawarmiayi. Tura Yusa wakeramuri Túrattaji tusar incha "Yáintajrume" turammiaji.

Tuma asamtai, "Masetúnia nunkanam kuit Júuktin nankamamamna nu, Kurintiu peprunmasha amukta" tusar Titiu seamiaji.

Atumsha Ashí pénker Túratin ti nékarme. Yus Enentáimtustincha, unuiniartincha, ju nunkanmaya nekaatniusha, iin aneatniusha nuka Ashí nékarme. Wats, jusha Túratarum. Yus-shuar Kuítrincha ainia nu achikiarat tusarum Titiu Támatai Núkap susatarum.

Kame Atumí uuntria Núnisnak akupeatsjarme, Túratniuitrume tusan. Antsu Chíkich shuar ni Kuítrin susartasa ti wakeruinia nuna atumin ujakan, Atumí anenkrattairi nekaspashi tusan nekapsatajtsa pujajai.

Ii uuntri Jesukrístu waitnenkartutairi nékarme. Ashí takakuyayi, tura atumin anenma asa Kuítrincha Núnisan ajasmiayi. Ju nunkanam Kuítrincha Núnis ajasmatai átum nayaimpiniam Kuítriniak tusa Túramiayi.

Juna Enentáimjai. Nuik uwitin, "Yáintatji" Tíchamkarum. Tura nu Túratin ti wakerimiarme.

Nankamamarmena nu yamaikia amuktarum. Nuik ti wakerimiarmena Núnisrumek yamaisha Súsatin jearmena nu susatarum.

Iistarum. Ni Kuítrin Yúsan nekas susatajtsa wakerakuinkia, nii jeana nuna susat tusa Yus wakerawai. "Jeana Nú nankaamas susati" Tátsui Yus.

Chíkich ti Núkap susarum atumnia Táasat tusan Tátsujai.

Antsu Ashí métek takusarat tusan tajai. Iis atumsha yamaikia ti nukap takakrume; nujai atsuma nu Súsatniuitrume. Ukunam Chíkich tsawantai átum atsumashtarmeash. Nuinkia niisha atumin suramsarti. Nu Túratin ákuinkia Ashí métek takustin átatui.

Yusa Papiriin yaunchu aarman Núnis Tátsuk: Núkap takusmia nu ampirchamiayi; tura ishichik takusmia nu atsumachmiayi.

Tura wi aneajrumna Núnisan atumin aneatniun Yus Titiun susamiayi. Tuma asamtai Yúsan yuminsan pujajai.

Iis, wi takui wétinian wakerimiayi. Tura Nú nankaamas, atumin anenma asa, ni Enentáijiain wéawai.

Tura Chíkich Yus-shuar Titiujai akupkatajtsa pujaji. Nu shuar Yusa Chichamen ti penker etserainakui, Ashí Yus-shuar iruntramunam niin pénker áujmatainiawai.

Tura Nú shuarnaka ii tsaniakmari Atí tusar Ashí Yus-shuar iruntramunam nuna anaikiarmiayi. Iijiai Kuítian jukiarti tusar anaikiarmiayi. Iis Yusa Náarin Ashí aents uunt najanawarat tusar tura Ashí shuar Atumí tsankarin nekaawarat tusar nu takat Túratsjik.

Iis, ju kuit ii jukittiajnia nu, Núkap asamtai, aents tsanumprutmawaraij tusar, Titiujai tura ju shuarjaisha wéaji.

Yus iimmianumsha, aents iimmianumsha ii naka wekaajnia nuna nekaawarat tusar Túraji.

Nu Jimiará shuarjai Chíkich Yus-shuar akupeaji. Yusa takatrin takastasa ti wakerana nu nekas nékaji. Tura átum Yáintin ti wakerarmena nuna Nekáa niisha atumiin jeataj tusa ti wakerawai. Nuna Túmak Yusa takatrin takastinian wakerana nuna paant iniakmawai.

Tura aisha Chíkich shuar Titiun nekaataitsar anintruiniakuisha, "Titiu Papru tsaniakmarinti. Incha Yáinmaktajtsa Páprujai takaawai" titiarum. Chíkich Yus-shuaran nekaataitsar anintruiniakuisha, "Yus-shuar akupkamu ainiawai, tura Kristu Náarin shiir awajin ainiawai" titiarum.

Tura Atumí anenkrattairi Ashí Yus-shuar nekaawarat tusarum, nu shuar pénker itiaatarum. Nu Túrakrum, atumnia ii shiir Tímiaj nu nekasaiti tu iniaktustatrume.

Kame átum Yus-shuar Kuítrincha Súsatin wakerarme; nuna nékajai. Tuma asan Núnaka aatrachminiaitjarme.

Atumsha Súsatin wakera asakrumin wi nunasha shiir Enentáimsan, "Akaya nunkanmaya shuar nuik uwitinia wakerusmatak Yáintinian wakeruiniawai" tusan Masetúnianmaya Shuáran ujaajai.

Tura "Kuítniasha Súsatniun ti wakeruiniawai" Tímiaj nuna, "Wáitiaiti" Tíarain tusan nakitiajai. Tuma asan, kuit susatajtsa wakerarum nu iwiaratarum tusan nu menaintiu Yus-shuaran nuna Yáinmakarat tusan emka akupenajai.

Wi ukunam Masetúnianmaya shuarjai atumiin jean, kuit Súsatin Tímiarmena nuna iwiarachman Wáinkian natsaraij tusan, tura atumsha natsarairum tusan Túrajai. Warí, "Súsatniun ti wakeruiniawai" tuke tu wéatsjak.

Nu tuma asamtai, au takui Súarme tu Enentáimsarain tusan ju Yus-shuaran emka akupenajai. Niisha nu Kuítian iwiaratniun Yáinmakarti, tajai. Nuinkia wisha Masetúnianmaya shuarjai ukunam jeawakrin, nu kuit atumsha nekas Atumí Enentáijiain~ki Súsatin wakerarmena nu nekaamnia átatui.

Tura junasha paant Tájarme: ishichik araana nu ishichik Júuktatui. Núkap araana nusha Núkap Júuktatui. Kuit Súsatniusha Núniskete.

Tura Ashí shuar ni Enentáin Enentáimsana nunak susati. "Nakitiayatnak susatjai" Tíchamniaiti. "Turutainiakui susatjai" Tíchamniaiti. Shiir Enentáimias Súana nuna Yuska shiir Enentáimtawai.

Ashí pénker ana nuna suramsatniun Yus tujintiatsui. Nujai átum atsumashtatrume. Tura chikichan Yáintin Núkap takustatrume.

Yus-Papinium ju aarma awai: Kuítrinchan Núkap susayi; nuna tura, tuke Túratin átatui.

Arakmaun araakan Súana nusha Yúsaiti. Tura yurumkan Súana nusha Yúsaiti. Niisha átum pénker araatniun suramsattarme. Tura araarumna nujai pénker Túratarum tusa araakrumin ipiampartatui.

Tuma asamtai Núkap juukma takaku asarum, Núkap Súsatin jeattarme. Nuinkia Súarmena nuna ii uwejeyan Chíkich Yus-shuar achikiar Yúsan yuminsartatui.

Warí, ju kuit Yus-shuar Kuítrincha Súakrin ni atsumamurincha atsumachartatui. Tura Nú nankaamas Yúsan ti yuminsartatui.

Nu shuar Yáintai tusarum tura Ashí Yus-shuar yaintai tusarum Súatsrumek. Nujai Kristu shiir chichamen umiarmena nuna nékainiawai. Tura Kuítrum emeentutsuk sua asakrumin niisha Yusa Náarin uunt awajsartatui.

Kame Yus atumin ti waitnentramainiakui Kuítrum Súatsrumek. Sua asakrumin nu shuar atumin ti anenmainiak Yúsan áujturmasartatui.

ḂTura Ashí iisha ii Yusri ti yuminsatniuitji! ṡIn Súramjinia nuna yaki Jintíartinian Jeá?

Wats, "Papru iijiai pujak péejchach ajawai, tura Yajá pujak kakaram chichaawai" Chíkich shuar turutainiatsuk. Kame imia wiki Papru Kristu anenkartutairijiai juna seatjarum tusan pujajai.

Atumí weatkamuriya shuar chichainiak "Papru ni tsaniakmarijiai ju nunkanam akupin ajastai tusar wakeruiniak jintintiainiawai" turutainia nuna Kíishtumaktajtsan Enentáimjai. Wisha atumiin jean kakaram chichaschataj tusan, nu antukairap tu seajrume.

Aentstanka nunkanmaya aentsuitji, Túrasha Jú aents maania aintsar Máaniatsji.

Ju nunkanmaya nankijiai Máaniatsji antsu ii nankiri Yusa kakarmarinti. Nujai iwianchi kakarmari Núpeteaji.

Ju nunkanmaya aentsu Jintíamurinkia tura waantu Enentáimtumamurinkia, Yus nekaatniun itit awajea nuka, nu nankijiai Núpeteaji. Tura Ashí ju nunkanmaya Enentáimsatin yapajniak, emetamu aintsan, Kristun umirkarat tusar nu nankijiai Núpeteaji.

Nekas umirkatin átum jeawakrumninkia nuinkia umirkatniun tuke nakitiainia nu, Yusa kakarmarijiai Asutiáttaji, tajai.

Atumsha aya Pátatek ana nu iiyarme. Wats, shuar nekas Krístunu ajasman nekamaka, Núnisan winiasha Krístunuiti tu Enentáimtursatniuiti.

Yusa kakarmarijiai akupeaji tuke Tákuncha natsaamatsjai. Nu kakarman atumin pénker jintintiatarum tusa Kristu suramsaitji. Kame atumin emesratniun suramsachuitji.

"Ni aarmarijiai awaktamkatajtsa wakerutmaji" Tátsurpash. Núchaiti.

"Papru aarmari ti kakaram ainiawai, tura jui pujak kakarmachuiti; tura etserkatniuncha nékatsui" turutainiawai.

Wats, tuinia nuka junasha nekaawarti. Yajá pujakur kakaram aajinia Núnisrik atumjai pujakrisha kakaram Túrattaji.

"Wiki Imiá pénkeraitjai" tuinia nujai méteketji Tátsuji. Ní shuaraitji Tátsuji. Warí, niisha imia ninki nekapmamainiawai. Tura ni ai iisar "nu nankaamas pénkeraitjai" tu wéenawai. Nuna Túruiniak netse Túruiniawai.

Antsu iikia, ii nekamatin jeajnia Nú nankaamas waantu ajaschattaji. Ii takastatjinia nui Yus Ninki jintintramji. Nu arant wéatsji. Kame atumiin takastinian Yus tsankatramkaitji.

Tuma asamtai, Tájinia nu Yus tsankatramka Nú iniankas Túratsji. Warí, iisha emka Kristu chichamejai Atumíin jeachmakaj~i. "Emka jeamji" Tájinia nu ántrar Tátsuji. Kame Yus tsankatramakrin jeamji.

Chíkich takasmanum iikia waantu Enentáimtumasar, "ii takatrinti" Tátsuji. Antsu Yamái Enentáimtarmena Nú nankaamas Yus Enentáimtustarum tusar wakeraji. Nu Túrakrumninkia Atumíin tuke takasminiaitji.

Nuyasha Chíkich takaana nui takatsuk átum pujarmena Nú arant pujuinia nusha Yus-Chicham ujaktaj tusar wakeraji. Nu Túrar Chíkich shuar takasma "íiniuiti" Tíchattaji.

Tura pénker Enentáimtumastaj tusa wakerakka, Yúsnaitjai tusa pénker Enentáimtumasti.

Warí, ninki "pénkeraitjai" tumamna nuka anturkachminiaiti. Antsu Uunt "pénkeraiti" tana Nú shuar nekas pénkeraiti.

Waurua Núnisnak chichastatjana nu anturtukaintrumeash. Ee, anturtuktarum tusan seajrume.

Atumniasha Krístunak anajmamtikrajrume. Tura nuwa Chíkich aishmankan nékatsuk ni aishrijiain~ki nuatnaiya Núnisrumek átum chikicha chichame umirtsuk aya ni chichamen~ki umiakrumin Krístuí ejetaj tusan wakerajrume. Nuna Túrataj tusan atumin akasmatajrume. Nu akasmaktinian Yus surusuiti.

Túrasha íwianch ni nekatairijiai emka nuwa Epan anankamia Nútiksan atumniasha Yusa jintiya awajimtikramar Kristu aneashtinian Enentáimtikramprarmatai anankamu airum tusan tsuutajrume.

Warí, Chíkich shuar Jesusnan Nusháa étserkamujai Táiniakuisha pénker ántarme. Tura Nusháa wakan achikiam, Nusháa chichamjai uwempramniaiti tu etserainiakuisha, nekasapitia Tárume.

Kame "Yúsnumia akatramu asar etserkatin Imiá nékaitji" tuinia nujai nankaamas nékaitjai, tu Enentáimjai.

Ti pénker chichastinian nékachiatnak winia nekaatairsha taamtsui. Núnaka ii Túramurijiai tuke paant iniakmaji.

"Akirkata" Tútsuk Yus-Chichaman atumin ujakmajrumna nui ṡTunáa Túrajak? Atum ankant ajastarum tusan wikia péejchach ajasu asan, "etserkamunam akirkata" Tíchamjarme.

Antsu atumin Yáintaj tusan pujakun Chíkich Yus-shuarnumia Kuítian suruiniakui achikmiajai. Nuna Túran ni Kuítrin emeentukmiajai.

Tura atumjai pujusan atsumaknasha atumniaka seachjarme. Masetúnianmaya Yus-shuar taar, wi atsummiajna nuna surusarmiayi. Nu tuma asamtai Tájarme, seachjarme tura seashtatjarme.

Ashí Akaya nunkanam nuna ujaktinian suritrukchartatui. Nuna Tákun Kristu nekasrijiai tajai.

ṡUrukamtai nuna taja? ṡAtumin aneachu asanak taja? Atsá. Aneajrumna nuna Yus nékawai.

Túrasha wi Túrajna nuna tuke turu wétatjai. "Papru Túrana Núnisrik Túraji" tuinia nuna Tíarain tusan Túrattajai.

Warí, niisha Yúsnumia akatrachma ainiawai. Anankartin ainiawai. "Kristu akatramurintji" Tumá átaj tusar wekainiawai.

Nusha urukaku Túmait Tíchamniaiti. Warí, imia Satanáskesha "nayaimpinmaya akatramuitjai" Tumá átaj tusa wekaatsuk.

Nuinkia imia ni suntarisha pénkeran Túrawai Tumá atai tusar wekasachartinkiait; Túrasha ni amuamurinkia Tunáa Túriarma nujai métek Nekapmá Asutiátin átatui.

Ataksha Tájarme "Wáurkaiti" tu Enentáimtursacharti. Kame "Wáurkaiti" tu Enentáimturiatrumek, chichastin tsankatruktarum. Ishichik waantu Enentáimtumastaj tusan wakerajai.

Tura waantu Enentáimtumastaj Tájana nu, Uunta tsankatramurijiai Tátsujai. Antsu waurka Núnisnak chichaajai.

Untsurí ju nunkanam uunt ajasar ti waantu Enentáimtumainiakui wisha ishichik waantu Enentáimtumastatjai.

Imiá nékayatrum waurka ainia nu shiir Enentáimtusrum ánturearme.

Niisha atumin takamtikramainiakuisha, kasartamainiakuisha, Atumí nérenniuri ajainiakuisha, yajauch chichartamainiakuisha, yapimin awattamainiakuisha Ashí nu katsuntearme.

Natsamayatnak Tájarme Ḃiikia nu Túratin kakarmachuuji! Wats, niisha araanainiatsna nuna wisha araantatsjai. (Waurka Núnisnak chichaajai.)

Niisha Ipríu-shuar ainiakuisha wisha Núnisnak Ipríu-shuaraitjai. Israer-shuar ainiakuisha wisha Núnisnak Israer-shuaraitjai. Apraáma weeatri ainiakuisha pai, wisha Núnisnak.

Kristu takarniurintji, tuiniawai. Wikia aujai nankaamasaitjai. Kame nuna Tákun waurka Núnisnak chichaajai. Kame niijiai nankaamas takasuitjai; niijiai nankaamas Asutiámuitjai; niijiai nankaamas sepunam enkeamuitjai; ti Núkap Jáninkiamjai.

Israer-shuar Chikichkí achirkacharmai. Antsu Tímiajni senku jea achirkarmai. Tura emka achirkarmia nui awa-awatatkua trainta nuiwi ejeyarmiayi. Tura nu Tímiajni senku jea achirkarmia nuisha Nútiksan nujai métek awatturarmiayi.

Numijiai Menaintiú awatturarmai. Kayajaisha mantuatai tusar Chikichkí tukurarmai, kanusha Menaintiú wayamai wi enkempran wekaimiaj nui. Tura nayaantsanam ajapén chikichik kashi nui pujusan tsawarmajai tura nu tsawantcha tuke pujusmajai.

Ti nukap wekasaitjai. Tura Entsá wekasan Tsúumainian Wáinkiaitjai. Tura kasa shuarjaisha, Wíi shuarjaisha tura yajaya shuarjaisha Tsúumainian Wáinkiaitjai. Péprunmasha, kampuniunmasha, nayaantsanmasha Tsúumainian Wáinkiaitjai. Wait Yus-shuarsha yajauch awajtustaj tusar wakeriarmai.

Itiurchatnasha ti Wáinkiaitjai; takatnasha ti takasuitjai. Ti Untsurí Kánutsuk pujusuitjai. Tsukamaknasha, kitiamaknasha Wáitsaitjai. Ti ijiarmaitjai. Pushir Táasmatai Tsetsekruí Wáitsaitjai.

Tura nuna nankaamas, kaarka kijin Júkitniua Núnisnak Yus-shuar pénker wekainiawash tusan Ashí tsawant ti Enentáimsan pujajai.

Chikichik Yus-shuar kakarmachu pujakui wisha kakarmachu nekapeajai. Shuar chikichan tunaanum ajuawarmatainkia wisha natsamakun kajekan Wáitiajai.

Maa, waantu chichastin ákuinkia, antsu winia kakarmachu awajtuinia nuna ujakan waantu ajasaintjai.

Yus, ii Uuntri Jesukristu Apari ana nu (ni naari tuke shiir awajsamu Atí) wi Wáitratsjana nuna nékawai.

Tamasku péprunam pujai nu nunkanmaya akupin winia Jinkiá juruktiaj tusa wakerak pepru tanish téntakma Wáitiriin suntaran apujsamiayi. Aretas uunt Kapitián pujai Túramiayi.

Túrasha uunt chankinnium enketawar pepru aa tanishri aankamunam jiiki itiararmiayi. Tu uwempramiajai.

Kame wiki shiir chicharmamsatniun nakitiajai. Túmayatnak iimiarjana nuna tura uunt Yus iniaktursamia nuna ujaktiniaitjarme.

Krístun umirin ana Nú aishmankan nékajai. Nu aishman Jimiará nayaimpin nankaikin Menaintiú nayaimpiniam junakniuiti. Nusha katurse Uwí nankaamasuiti. Kame ayashtiuk wakaashit, tura ayashtichu wakaashit. Núnaka nékatsjai; aya Yúsak nékawai.

Tura nekas junakniua Núnaka nékajai. Ayashtiuk wakaashit, ayashtichu wakaashit, Núnaka aya Yúsak nékawai.

Yus-shuara Wakaní shiir pujutainium junakmiayi. Nuisha paant awajsachmin ana nuna antukmiayi. Nii antukmia Nú chicham paant awajsatniun suritkiamuiti.

Nu aishmanka Túrunamuri nankaamakuiti tajai. Tura wikia nankaamakuitjai Túmamtsuk, kakarmachuitjiana nuna paant ujaajai.

Nankaamakuitjai Túmamtiaj tusan wakeraknaka nekas Tíminiaitjai, ántran Tíchaintjai. Túrasha Túratsjai. Winia Túramuruk Wáinkiarum winia chichampruk antukrum, waritia Enentáimsarum nujai métek Enentáimtursatarum tusan wakerajai.

Wi nayaimpiniam Wáinkiamajna nu Timiá pénker asamtai ántar waantu Enentáimtumaschatniun, janki mesertinia Núnisan winia ayashrui najaimiatniun sunasmiajai. Nuka wi Wáitsatin Satanásnumia akupkamuiti.

Nuka jurutkitia tusan Uuntan Menaintiú seamjai.

Tuma ain Uunt winia turutmiayi "Atsá. Jaa pujayatmek winia waitnenkartutairjai shiir pujame. Shuar kakarmachun winia kakarmarun Wi suakui Ashí aents nu shuara ayashiin winia kakarmarun Wáiniainiawai." Tuma asamtai, Kristu kakarmari winia ayashrui paant ati tusan kakarmachuitiatnak araantatsjai.

Tuma asamtai, wi Krístun aneakui shuar katsekruiniakuisha, kajertuiniakuisha, winia Kuítrusha, kakarmarsha atsain waraajai. Kame Ashí itiurchat ana nui kakarmachuitiatnak kakaram nekapeajai.

Wi "pénkeraitjai" Túmamkun waurua Núnisnak chichaajai. Tura atumsha winia pénker chichartusminiaitiatrumek, Túrachu asakrumin tu chichasjai. Warí, wi penké ántraitiatnak, "ti pénker akatramuitji" tumamainia Nú nunkaachichuitjai.

Atumjai pujumiaj nui, itiurchat ámanman katsuntran takasmiajai. Yuska ni kakarmarin iniakmastaj tusa ti uuntan aents tujintiamun Túratniun surusmiayi. Nujai "Papru nekas winia akatramuruiti" tusa paant iniakmasmiayi.

Warí, Chíkich Yus-shuaran Yáinmiaj Núnisnak atumniasha Yáinmajrume. Ayatik atumin "kuit surusta" Tíchamjarme. ḂNu yajauchiitkiuinkia tsankurturtarum!

Jújainkia Menaintiú iwiarnarjai atumin iistaj tusan. Tura jeaknaka, "etserkamun akirkatarum" Tíchattajrume. Atumí Kuítrin wakeratsjai. Antsu atumin wakerajrume. Warí, winia uchirchakaitrum. Uchisha Aparín Kuítian ikiauntukchatniuiti. Antsu apari ni Uchirín Kuítian ikiauntuktiniaiti.

Atumniasha Yáintaj tusan Ashí takakjana juna ajapawaintjai, tura winia kakarmarnasha Ashí Emenkákaintjai. Wi ti wakeramaitiatrum átumka ishichik wakerutarminin Túrawaintjai.

Túrasha Chíkich shuar chichainiak "Nekasaiti; Papru ninki ii Kuítrin jurutramkichmaji. Túrasha anankartuatniun neka asa iin anankramachmiashia" turutainiatsuk.

ṡNusha itiura? ṡShuáran wi akupkamaj nujai Kuítrumin achikjak?

Atumin iirmasat tusan Titiun "Wetá" Tímiajai. Tura niin atamprit tusan Chíkich Yus-shuaran akupkamjai. ṡTitiusha Kuítrumin juruttramkimkiarum? ṡWisha niisha mai metek Enentáimsar métek takaschamkaj~i?

ṡWarí Enentáimsarum? ṡAtum pénker ainiawai turutik tusar nu Tájik? Antsu, aneamu yatsurtiram, ii Tájinia nu atumin Yúsnum Ikiakártajrum tusar taji.

Wi atumiin jeaknasha, wi Wáitkiataj tusan wakeraj nuna Wáinkiashtatjai, tu Enentáimsan itiurchat Enentáimjai. Tura atumsha wakerarmena Núnisrumek Wáinkiashtatrume, tu Enentáimjai. Yajauch chicharnaikiatniuncha, yajauch Enentáimtunaistinniasha, kajernaikiatniuncha, ninki Enentáimtumastinniasha, tsanumpratniuncha, Mái-tunai ajatniuncha, waantu Enentáimtumastinniasha, yajauch wekasatniuncha, Ashí nuna Wáinkiashtajash tusan itiurchat Enentáimjai.

Tura wi jeaknasha, átum yajauch Túratniusha, tsanirmatniusha tura yajauch ti wakerarmena nu, yaunchu Túriniarmena nu, Untsurí shuartiram iniaisachurmena nuna nekashtajash. Tura Enentáim yapajitsuk tuke tura asakrumin uutchatjash tajai. Kame wi átum umikchamun nekaamtai Yus winia Iniatsátrattawai tusan Tsúumajai.

Jujai Menaintiú iistajrum tusan winiajai. Ashí iwiaratin ana nu, Jimiará tura Menaintiú shuara chichamejai iwiarnartatui.

Wi atumjai pujachiatnak, atumjai Pujáa Núnisnak aatjarme. Yaunchu Tunáa Túrimiarmena nuna tura Ashí Shuártirmin wi nuik Tímiajrumna nuna ataksha Tájarme, wi atak tana tunaarum iwiareachkurminkia iniaisashtatjarme.

Nuinkia wi Kristu kakarmarijiai chichaajna nu nekaattarme. Nu nekaataj tusarum wakeratsrumek. Tura Krístuka kakarmachuchuiti. Antsu Atumí Enentáin kakaram takaawai.

Kristu nekas kakarmachua Nútiksan Krúsnum Máamuitiat, Yusa kakarmarijiai iwiaakuiti. Ayashnium Kristu kakarmachu nekapmia Núnisrik iikia kakarmachuitji. Túrasha Yusa kakarmarijiai ni takatri takaaji. Nu atumin iniakmastatji.

"Nekas Yúsan umirniuashitiaj" tusarum nekamatarum. Iimiastarum. Antar Yus-shuarchaitkiurmeka Jesukrístu Atumí Enentáin pujurtama nu nekaattarme.

Tura iikia ántar Yus-shuarchaitji nu nekaatarum tusan wakerajai.

Tura átum Tunáa Túrawáirum tusar Yus seaji. Aents iin pénker Enentáimtikramprat tusar Tátsuji. "Antar ainiawai" Túramprinin, átum pénker wekasatarum tusar wakeraji.

Warí, Yusa nekas chichame emesratin tujintiaji. Antsu ii Túrajnia nu Yusa nekas chichamejai Túraji.

Tuma asamtai, átum kakarmaitkiurminkia iikia kakarmachuitiatar shiir Enentáimji. Atumsha nekas kakaram Ajasúk tusar Yus tuke seaji.

Atumin emesratin Yuska winia akuptatsui. Antsu Yus akuptukuiti atumin Ikiakártinian. Tuma asamtai, wi Atumíin jeaknaka kakaram chicharkaijrum tusan winitsuk ju papin aatjarme.

Ayu, yatsurtiram, shiir pujustarum. Krístunam tuke kakaram ajastarum. Yus shiir Enentáimtikramprarti. Chikichík Enentáik Enentáimsatarum. Shiir awajnaisarum pujustarum. Tura Yus anenmarmena nu, shiir Enentáimtikramna nu atumjai pujurtamsattarme.

Yúsnum shiir Enentáimtunaisrum amikmaanaisatarum.

Ashí Yus-shuar ainia nu amikmaatmarme.

Uunt Jesukrístu waitnenkartutairi, Yusa anenkrattairisha Atumíin pujurtamsati. Tura Yusa Wakanísha tuke nemartamsarti. Nu Atí.