Uz gamah mi khat a oma, a min Job ahi; huan huai mi hoihkim leh tang ahi a, Pathian khitaa, hoihlou mudah.

Huan amah lakah tapa sagih leh tanu thum a piang ua.

A neihleh lam leng belam sang sagih leh, sangawngsau sang thum leh, bawngtal za nga leh, sabengtungnu za nga leh inkuan thupi mahmah ahi: huchiin hiai mipa suanlam tate tengteng lakah a thupipen ahi.

Huan a tapate a kuan ua a khat chiat in ah a niin ankuangluina a nei ua; huchiin mi a sawl ua a sanggamnumei thumte uh amau kianga ne ding leh dawn dingin a sam sak ua.

Huan hichi ahia, a ankuang lui san laitak un, Jobin mi a sawla amaute a hihsiangthoua, jingsangin beltakin a thoua, a vekua zah dungjuiin halmang thillatte a lan: Jobin lah, Ka tapaten thil a hihkhial un, a lungtangte un Pathian a gensia uh ahi thei hi, a chi ngala.

Huchiin TOUPA maa Pathian tapate a hongkilak ni uh a om a, huan a lak uah Setam leng a hongpai sama.

Huchiin TOUPAN Setan kiangah, kaw hongkipan na hia? a chi a. Huan Setanin TOUPA a dawnga, Leia langkhat langkhat hoha, a sunga tou vaka suk vak vak ka hi, a chi a.

Huan TOUPAN Setan kiangah, Ka sikha Job na ngaihtuah ngei hia? amah banga hoihkim leh mi tang, Pathian kihtaa hoihlou mudah leiah lah kuamah a om ngal kei a, a chi a.

Huchiin Setanin TOUPA a dawnga, Bangmah lou dia Jobin Pathian kihta ahi maw?

Amah kimvelin leh, a in kimvelin leh, a neih tengteng kimvelin, ning chitengah umna na bawl kei maw? a khut nasep na vualjawla, gamsungah a neihlehlam a pung hi.

Himahleh tuin na khut suahkhia inla, a neih tengteng khoihin, huchiin na maitangah nang a hon gense ding hi, a chi a.

Huan TOUPAN Setan kiangah, Ngaiin, a neih tengteng nang thu ahi; amah mah tungah kia na khut kha ken, a chi a. Huchiin Setan a kuan khetaa TOUPA ma akipanin.

Huan a tapate leh a tanuten a unaupa uh upapen ina a nek ua uain a dawn lai un ni khat thuin a hongtunga,

Job kiangah sawltak khat a honga, Bawngtalten lei a let ua, sabengtungte a kiangah a gamta ua:

Seba miten amau a delh ua, a pi mang uh; ahi, namsau hiamin sikhate a that ua; huan nang hilh dingin kei ke leuleu ka suakta hi, a chi a.

Huchia thu a gen laiin midang khat leng a honga, Van akipanin Pathian mei a kiaa, belamte leh, sikhate akang manga, amau a kangtum hi: huan nang hilh dingin kei keleuleu ka suakta hi, a chi a.

Huchia thu a gen lain, midangkhat a hong laia, Kaldai miten pawl thum a bawl ua, sangawngsaute a delh ua, a pi mangta uhi, huan namsau hiamin sikhate a that ua; huan nang hilh dingin kei keleuleu ka suakta hi, a chi a.

Huchia thu a gen laiin, midang khat mah a honga, Na tapate leh na tanuten a unaupa upapen ina a nek ua uain a dawn lai un:

Huan, ngaiin gamdai akipanin huih thupi a hongnunga, huai in ning lite a honnuaia, tangvalte tungah a chima, a si uh: huan nang hilh dingin kei keleuleu ka suakta hi, a chi a.

Huchihlaiin Job a thou a, a puannaktual a botkeka, a lu a metsianga, leitung dennain a kineia, Pathian a beta hi;

Huan aman, Ka nu sul akipan vuaktangin ka honga, huailamah vuaktangin ka kik ding: TOUPAN a piaa, huan TOUPAN a lamang ta hi; TOUPA min phatin om hen, a chi a.Hiai tengtengah Jobin a hihkhial keia, haihuaitakin Pathian leng a mohsa kei hi.

Hiai tengtengah Jobin a hihkhial keia, haihuaitakin Pathian leng a mohsa kei hi.

TOUPA Pathian tapate ahongkilak ni uh a om nawna, huan a lak uah Setan leng a hongpai sama TOUPA maa kilak ding in.

Huan TOUPAN Setan kiangah, Kaw hongkipan na hia? a chi a. Huan Setanin TOUPA a dawnga, Leia langkhat langkhata hoha, a sunga tou vaka suk vak ka hi, a chi a.

Huan TOUPAN Setan kiangah, Ka sikha Job na ngaihtuah ngei hia? amah banga hoihkim leh mi tang, Pathian kihtaa hoihlou mudah leiah lah kuamah a om ngal keia: amah siatna dingin hon tangsak mah lechin, a ginomna a len chinten hi, a chi a.

Huan Setanin TOUPA a dawnga, Vun sikin vun, ahi, mihingin a neih tengteng hinna sikin a pe ding hi.

Himahleh tuin na khut khainla, a guh leh a sa khoih lechin, huan na maitangah nang hon gense ding hi, a chi a.

Huan TOUPAN Setan kiangah, Ngaiin, Amah na khut ah a om hi; a hinna leltak hawiin, a chi a.

Huchiin Setan a pawt khiaa TOUPA ma akipanin, meima tumin a khepek nuai akipan a lujang tanin Job a gawta.

Huchiin aman kikhuatna dingin belpei a laa; huan meivu lakah a tuta hi.

Huchihlaiin a jiin a kiangah, Na ginomna len chinten lailai na hi hia? Pathian gensia inla, siin, a chi a.

Himahleh a kiangah, Numei haite thugente laka khat bangin thu na gen. Bang ahia? Pathian khut ah hoih i mu dia, hoihlou leng i mu kei dia hia? a chi a. Hiai tengtengah Jobin a muk in thil a hihkhial kei hi.

Huchia Job lawm thumten a tunga hiai hoihlou hongtung tengteng a jak un, amau mi chih amah mun akipanin a hong ua: Elipha Teman mi leh, Bildad Sua mi leh Zophar Naaman mi: huan amah kah ding leh amah lungmuan dingin hoh khawm dingin thuseh a bawl uhi.

Huan gamla pia a dak touh uleh, amah a theikei ua, huan nakpiin a kikou khia ua, a kapta uhi; huan a puannaktual uh michihin a botkek ua, a lu tang uah van lamah leivui a khita uhi.Huchiin a kiangah leitungah ni sagih leh jan sagih a tu ua, a kiangah kuamahin thu khat leng a gen kei uh: a lungkhamna a thupi mahmah chih lah a thei ngal ua.

Huchiin a kiangah leitungah ni sagih leh jan sagih a tu ua, a kiangah kuamahin thu khat leng a gen kei uh: a lungkhamna a thupi mahmah chih lah a thei ngal ua.

Hiai khitin Jobin a kam a kaa, a ni a hamsiat ta hi.

Huan Jobin a dawnga hichiin a chi hi:

Ka pianna ni leh jan, Pasal naupang paiin a om, a kichihna mangthang hen.

Huai ni mialna hihen; tunglam akipan Pathianin kah dah hen, a tungah leng khovak tang kei hen.

Khomial leh sihna limin amau adingin huai ngen uhen; a tungah meipi kai hen; khua nimsak tengtengin huai tuh lausak uhen.

Jan a hihleh, mial sah bikbek a tungah tu hen; kum nite lakah kipak kei hen; khate simna ah tel kei heh.

Ngaiin, huai jan hut hen; huaiah kipah aw hong kei hen.

Huai ni hamsiat amauten hamsiat uhen, leviathan tokthou dinga mansaa om te.

Huaia khomui aksite mial uhen: khovak zong henla, himahleh bangmah neikei hen; jingsang mitvunte leng mu sam kei hen:

Ka nu sul kongkhakte a khak louh jiakin, ka mit akipana buaina a sel louh jiakin.

Sul akipana bang dia silou ka hia? gil akipan ka hongpai khiak laia bangdia kha khah lou kahia?

Bangdia khukten kei honsang uh ahia? Ahihkeileh bangdia ka tep ding, nawiten?

Tuchiangin na lum khina na dai mai ding lah ka hi ngala; ka na ihmuta dia; huchiin ka nakhawlta ding hi:

Lei kumpipate leh thudotmite, amau adinga mun siate bawlte toh;

Ahihkeileh dangkaeng nei lalte, a inte uh dangkaa dimsakte toh;

Ahihkeileh muh louha a hunloua piang bang na hilou ka hia, naungek khovak mu ngeiloute bang?

Huaiah mi gilouten sukbuai a tawpsan ua; huan huaiah mitawlte a khawl uh.

Huai ah suangkulha tangte nuamin a om khawm uh; nasep heutu aw a za kei uh.

Huaiah a lian leh a neu a om ua; huan a pu akipanin sikha a nuamlen.

Bangdia daha om kianga khovak piak ahia, khaa haksa sa kiangah hinna;

Sihna deiha, lah a tunlouhnate kiangah; huan gou sel guk zon sanga thupia zongmite kiang ah;

Han a tun lai ua, nakpitaka kipakte kiang ah?

Bangdia mi a lampi sela om kiang leh Pathianin a umsuak kianga khovak piaka om ahia?

Ka thumna lah an ka nek main a hongtunga, ka maunate tui banga leihbuakin a om hi.

Ka kihtak thil lah ka tungah a hongtung ngala, ka laulau lah ka tungah a hongtung hi.Nuam ka sa keia, muan leng ka muang kei, khawlna leng ka neikei hi; himahleh buaina a hongpai hi.

Nuam ka sa keia, muan leng ka muang kei, khawlna leng ka neikei hi; himahleh buaina a hongpai hi.

Huchihlaiin Elipha Teman miin a dawnga, hichiin a chi hi:

Min nang honhoulim pih tum leh na zadah diam? Hizongleh pau louin kua a om thei dia?

Ngaiin, mi tampi na hilhtaa, huan khut hatloute na hihhatta hi.

A puklai mah na thuten a dingsaka, khuk hatloute na kipsak hi.

Himahleh tuin na tungah a hongtunga, na baha; nang a honkhoiha, na buaita.

Pathian an kihtakna na muanna hi lou hia, na lametna na lampite muanhuaina?

Theigigein, ka honngen hi, hoih hina pia, mangthang ngei kua ahia? ahihkeileh koilaiah ahia midik satkhiaka om?

Kei muh danin, thulimlouhna leilette ahi ua, buaina tuha, huaimah atte.

Pathian huin a mangthang ua, huan a hehna mutin himanin a om uhi.

Humpinelkai huham leh, humpinelkai hangsan aw leh, humpinelkai tuailai hate, a kitan ta.

Samat taksap jiakin humpinelkai tek a mangthanga, huan humpinelkai noute a dalhjak ua.

Tuin a gukin thil ka kiang a hongtunga, ka bilin huaia huauna a sangta hi.

Jan mengmuhna akipana ngaihtuahnate ah, mite nakpi taka a ihmut san lai un,

Launa ka tungah a hontunga, linna, huaiin ka guhte tengteng a singa.

Huailaiin ka mai maah kha a paia; ka chimul a ding ta hi.

Ka ding kinkena, himahleh huaia a kilatdan ka theikak theita keia; a lim tuh ka mit maah a oma; daihna a oma, huan aw ka jaa,

Pathian sangin sithei mihing a dik zo ding hia? A Bawlpa sangin mihing siangthou zo ding hia? chiin.

Ngaiin, a sikhate ah muanna akoih keia; huan a angelte haiin a ngoh hi:

Tungman ina teng amaute hi diak na un chia, a suangphum leivuia oma, leikha maa chimsia:

Jingsang leh nitak kikalin hihsiatin a om ua: theihlouh hialin khantawnin a mangthang uhi.Amau sunga a puanin-khau uh bohkhiak touh hi lou hia? a si ua, huan pilna tel louin.

Amau sunga a puanin-khau uh bohkhiak touh hi lou hia? a si ua, huan pilna tel louin.

Tuin samin; nang hondawng kuamahmah a om a? huan misiangthoute lakah a kua pen lam na nga dia?

Lungjinnain lah mi hai a that ngala, huan thiknain mi mawl a hihlum sek hi.

Mihai zungkai ka mutaa; himahleh thakhatin a tenna ka hamsiat hi.

A tate bitna akipan gamla pi ah a om ua, huan kongpi ah hihgawpin a om uh, kuamah amaute suakta ding a om sam kei uhi.

Kua anlak ding ahia gilkialmiin a gaih khita, ling laka kipan nasana a lak khiak, thangin a sum uh duhin a kam lianpiin a ka hi.

Gimthuakna lah leivui akipanin a hongpawt keia, lei a kipanin buaina leng a hongdawn khe sam kei hi;

Himahleh mihing buai ding maha piang ahi, meiekte a tou len bangin.

Himahleh ken ahihleh, Pathian lamah ka zong dinga, huan Pathian kiangah ka thu ka koih ding hi.

Thil thupite hihpa leh zonkhiaktheihlouh; sim zohlouh thil lamdangte:

Lei tunga vuah pepa leh, loute tunga tui sawlpa:

Huchiin aman a niamsate tung sangah a koihtou a; huan misi sunte muanna ah a tawisang hi.

Zekhemhatte lunggelte bangmahlou a suaksaka, huchiin a khutte un a thiltup uh a hih theikei uhi.

Mi pilte a zekhemhatna un a mana: huan mihoihloute thugen akhupathalin a paihsak hi.

Sunlaiin khomialna a thuak ua, janlai bangin suntang laiin a mai maimah uh.

Himahleh a kam ua kipanin pabeite ahondama, mi hatte khut akipanin tasamte mahmah.

Huchiin gentheiin lametna a neia, huan, thulimlouhnain a kam a humsak hi.

Ngaiin, Pathianin a bawlhoih min nuam a sa hi; huaijiakin Bangkim hihthei sawina musit ken.

Aman lah meima a bawla, a tuama: a liamsaka, huan a khutin a damsak hi.

Buaina gukah a honsuakta sak dinga; ahi, sagih ah gilouin nang a honkhoih kei ding hi.

Kial chiangin nang sihna akipan a hontan ding; namsau thilhihtheihna akipan, kidou chiangin.

Lei jepna akipanin selin na om dinga; siatna ahongtun chiangin na lau sam kei ding hi.

Siatna leh kialna ah na nui dinga, lei gamsate na kihta sam kei ding hi.

Gama suangte toh na kithuahtheih ding jiak un; huan gama gamsate nang tohna kituak ding uhi.

Huan na puanin muangin a om chih na thei ding; huan na ganhuang na veh dinga, bangmah kimlou a om kei ding hi.

Na chite leng a thupi ding chih na thei dinga, huan na suante lei loupa bangin.

Kum chingin na han na juan dinga, a huna buh lak bangin.Ngaiin, hiai, i zongta ua, huchiin a om, jain, na hoihna dingin theiin.

Ngaiin, hiai, i zongta ua, huchiin a om, jain, na hoihna dingin theiin.

Huchiin Jobin a dawnga, hichiin a chi a:

Aw ka lungjinna kibuk peuhmah leh, huan ka tuahsiatna khaina ah kikoih khawm peuhmah leh:

Tuin tuipitea piaunel sangin a gikzo ding: huaijiakin ka thute leng a huham hi.

Thilbangkimhihthei thalte lah ka sungah a om ngala, gu huai akipana ka khain a dawn vek: Pathian mulkimhuainate kei dou dingin a kivual petmah uhi.

Loupa a neih laiin gam sabengtung a ham hia? ahihkeileh a annekding tungah bawngtal a ham hia?

Gim neilou chi tel louin a kine thei dia hia? ahihkeileh aktuida ah limna mawngmawng a om hia?

Ka khain amaute a khoih nuam kei; kei dingin an kihhuai bang ahi uh.

Aw ka nget tang thei leng jaw; ka thil deih Pathianin honphal lejaw:

Kei honhihgawp dingin Pathian deihlam hi lai henla; a khut zanin, kei honsat khe mai leh:

Huchiin lungmuanna ka nei lai mai dia; ahi, dawmlou natna ah ka kipak ding: Mi Siangthou thute lah ka kitheihmohbawl ngal kei a.

Ka hatna bang ahia, ka ngak ding? huan ka beina bang ahia, ka kuhkal ding?

Ka hatna, suangte hatna hi hia? ahihkeileh ka sa dalsik hia?

Keiah panpihna a om het kei hilou hia, huan kei akipan theihsiamna hawlmangin?

Bah dia mansaa om kiangah a lawmin Siamna a etsak ding ahi kei mo; huchilou-in Bangkimhihthei kihtakna a tawpsan ahi kei ding mo.

Luita bangin ka unaute a lepchiah uh; luita mangthang luanna bangin.

Huai tuh tuikhalin a voma; huai ah vuk a kisel.

A lum hun chiangin a tuimang ua, a sat chingin a mun ua kipan a mangthang uh.

Huai lampia khualzinte a pial ua, bangmah omlouhna munah a paitou ua, a mangthang uh.

Tema khualzinten a zong ua, Seba pawlten a lamen uh.

A kilamet hangun a zahlak uh; huai lamah avapai ua a hawmsuak uh.

Tuin lah bangmah na hi ngal kei ua; mulkimhuaina na mu ua, na lau uhi.

Kei honpia un? ahihkeileh na neihlehlam ua kipanin kei adingin thilpiak lan un, ka chi hia?

Ahihkeileh, nuaisiahhatmite khut ahipan hontan un, ka chi hia?

Hon sinsakin, huan ka dai ding: ka lamhaihna theisiam dingin hon bawlin.

Dikna thute hat hina mahmah e: Himahleh na miselnain bang a selphoua?

Thute selphou dinga um na hi uh hia? Chimoh mi thugente huih bang ahi chih theiin.

A hi, paneiloute tungah ai na san ding ua, na lawm uh sumsinna vanin na bawl ding uh.

Tuin huaijiakin hehpihtakin hon en un; na ma uah ka juau ka gen sin ngal kei a.

Kik nawn un ka honngen ahi, diklouhna om kei hen; ahi, kik nawn un, ka thu a dik ahi.Ka lei ah diklouhna a om hia? thil hoihlou ka leiin a theikak theikei dia hia?

Ka lei ah diklouhna a om hia? thil hoihlou ka leiin a theikak theikei dia hia?

Lei tungah mihing adin kidouna a om kei mo? huan a nite kilohmi nite bang ahi ka hia?

Lim deih mahmah sikha bangin, a loh lamen kilohmi bangin:

Huaibangin bangmahlou khate nei dinga bawl ka hi, huan kei adingin jan chimhuaite seh ahi hi.

Ka lup chiangin, Chikchiangin ka thou dia? ka chi a; himahleh jan a sawt hi; huan khatlam khatlamah ni suah matan kilumlehnain ka dim hi.

Ka sa than leh leivui khalin a tuama; ka vun a kimata a puakkham thak hi.

Ka nite siamganmi khohthei sangin a kin jawa, lametna beia zatbei ahi.

Aw ka hinna huih ahi chih theigige in: ka mitin hoih a mu nawn kei ding hi.

Kei honmu mitin honen thei nawn takei dinga; na mitte ka tugnah a om ding ua, himahleh ka omta kei ding hi.

Meipi a mangthanga a omta kei bangin, huchiin kuapeuh Seola pai suk a hongpai tou nawnta kei uhi.

A in ah a kik nawnta kei dinga, a munin amah a thei nawnta kei ding hi.

Huaijiakin ka kam ka khou kei dinga; ka lungsim gimnaah thu ka gen ding; ka kha haksatna ah ka phun ding hi.

Tuipi ka hi hia, a hihkeileh tuipiganhinglian, huchia kei na honchin nak?

Ka lupnain honlungmuan dinga, ka tutna nemin ka phunna a jangkhaisak ding, ka chih chiangin;

Huaichiangin mangtein na honlau saka, mengmuhnatein na honmulkimsak hi:

Huchiin ka khain heklup leh sihna a tela, hiai ka guhte sangin.

Ka hinna ka chimtaka; ka hing gige kei ding: honom sak maimai un; ka nite lah bangmahlou ahi ngala.

Mihing bang ahi, amah na hihlet dinga, amah tunga na lungtang na koih dinga.

Jingsang tenga amah na veh dinga, mitphiat chiha amah na ettel ding?

Bangtan vei kei honlehngatsan lou ding na hia, bangtanvei ka chil ka nawmvalh matan honomsak maimai lou ding na hia?

Na khial hita leng, na tungah bang ka hiha, Aw mite chingpa nang? bangdia nang adia chiamtehna banga konkoih na hia, huchia keimaha dia puakgik ka hih maimah?Huan bangdia ka tatlekna ngaidam loua, ka thulimlohna la mang lou oi? Kei tuin leivuia lum ding ka hi a; kuhkaltakin na honzong dia, himahleh ka omta kei ding.

Huan bangdia ka tatlekna ngaidam loua, ka thulimlohna la mang lou oi? Kei tuin leivuia lum ding ka hi a; kuhkaltakin na honzong dia, himahleh ka omta kei ding.

Huchiin Bildad Sua miin a dawnga, hichiin a chi a:

Bangtan hiai thilte gen ding na hia? huan bangtan na kama thute huih hat bang ding ahi ua?

Pathianin vaihawmna a hekkawi ahia? ahihkeileh Thilbang-kimhih theiin dikna a hekkawi ahia?

Na tate a tunga a khelh ua, hua a tatlekna uh khuta amaute a pikhiak a leh:

Pathian lam kuhkaltaka na zona, hua Thilbangkimhihthei kianga na thilnget na bawl leh;

Na siangthoua na dik leh; nang jiakin tuin ka khanglou mahmah dia, huan na diktatna omna a lohching sak ding hi.

Huan na kipatna neu mahleh, ahihhangin na tawpna na nunglam nakpiin a khang ding hi.

Huai jiakin ka honngen ahi, hun masa thu kan inla, a pipute un a na zonkhiak uh lamah kisuk in:

(Ei lah jana lel i hi ua, bangmah i theikei uh, leitungah i nite uh lah limliap ahi a: )

Amauten nang a honsinsak un, a honhilh un, a lungtang ua kipanin thute a gen kei ding ua hia?

Buannawi louin phaipek a khang khe thei ahia? tui louin loupa a khangthei ahia?

Hinga a oma, sat puk louh a hihlaiin, loupa dangte main a vuai nak hi.

Huaibangmahin Pathian manghilhte tengteng lampi ahi; huan pathianlimsaklou mi lametna a mangthang ding:

A muanna a kitam dinga, a kingakna maimomlen ahi hi.

A intung a ngai dia, himahleh a ding kei ding: huaiah a lenchinten dia, himahleh a pangsawt kei ding hi.

Ni suah main a hinga, huan a selte a huan tuamin a meng khia uh.

A zungte leivum kimah a jam ua, suangte omna mun ah a hing hi.

A mun akipan lakmang hi leh, huchiin amah a kitheihmohbawl dinga, Ka honmu ngeikei, chiin.

Ngaiin, hiai a lampi kipahna ahia, huan lei akipanin adangte a hongsuak ding uh.

Ngaiin, Pathianin mi hoihkim a paikhe kei ding, gilouhihmite leng a tungding sam kei ding hi.

Na kam nuihin a hondimsak lai lai dia, na mukte kikounain.Nang honmudahte zumnain akhuh dinga; huan gilou puanin omta kei ding hi.

Nang honmudahte zumnain akhuh dinga; huan gilou puanin omta kei ding hi.

Huan Jobin a dawnga, hichiin a chi a:

Chihtaktakin huchi ahi chih ka thei hi: himahleh Pathian lakah mihing bangchiin a dik thei dia?

Amah kisel pih a utlam a hihleh, sang khata khat amah a dawng theikei ding hi.

Amah lungtangin a pila, hatnain a thilhihthei ahi: amah douin kua a kikhauhsakin, a lohchingta a oi?

Mualte a suana, a theikei ua, heha amaute a lumleh laiin.

A mun akipanin lei a singa, huan huaia khuamte aling uh.

Ni thu a piaa, huan a suak kei; aksite a bilhkhum ngiungeu hi.

Amah kian vante a phalhkhiaa, tuipi kihawt tungah a pai hi.

Aman Jangkhua, Zuheisuktun leh Siguk leh simlam aksi tamna munte a bawl hi.

Aman sui theih vuallouh thil thupite a hiha; ahi, sim zohlouh thillamdangte.

Ngaiin, ka kiangah a paia, amah ka mu kei: a pai lailaia, himahleh amah ka mu kei hi.

Ngaiin, samat a mana, amah kuan a kham thei dia? Bang hih na hia? kuan a kiangah a chi dia.

Pathianin a hehna a lakik kei ding; Rahab panpihmite amah nuaiah a kun petmah uhi.

Bangchipheta tawm jawin amah ka dawngin, amah toh ngaihtuah dingin ka thute ka telkhe dia?

Amah, diktatta zongleng, ka dawng kei ding hi; ka gal kiangah thilngetna ka bawl ding.

Samta leng la, huan honna dawngta leh; himahleh ka aw a ngaikhia chih ka um kei ding hi.

Huihpiin aman a honkitamsaka, a san omlouin ka liamnate a pungsak hi.

Ka nak a honphal keia, himahleh thangpaihnain a hondimsak hi.

Hatna thu gen leng, ngaiin, Amah a hat hi: huan vaihawmna thu, kuan hun a pe dia?

Diktatta zongleng, ka kamin a honmohpaih hi: hoihkim ta zongleng, hoihlouin a hontelsak ding hi.

Hoih kim mahleng, ka kilimsak kei; ka hinna ka musit.

Khat ahi veka; huaijiakin, Hoihkim leh gilou a hihse tuak, ka chi

Jepnain thakhatin hihlum leh, mi hoih thuakna a nuihsan ding hi.

Lei mi gilou khuta piakin a om: huaia vaihawmmite maitangte a tuama; amah ahihkeileh, kua a hita dia?

Tuin ka nite laitaipihmi sangin a kinjaw: a tai mang ua, hoih a mu kei uh.

Long kinte bangin a pai mang uhi: muvanlai samat tunga ngumkiak bangin.

Ka phunna ka mang ngilh dia, ka mel lungkham ka pai dia, ka kipak ding, chi leng.

Ka lungkhamna tengteng ka laua, hoih non sa kei ding chih ka thei hi.

Mohpaihin ka om dia; ahihleh bangdia a thawna semgim ka hia?

Vuk tuiin kisilin, ka khutte huchitakin siangsak ngeitak leng;

Hinapiin guam sungah na honpai lut thou dia, huan keimah puanten a hon kih ding uh.

Kei bangin, amah lah mihing ahi keia, amah ka dawn theihna dingin, vaihawmnaa ka hoh khawm theihna ding un.

Ka kikal uah kou gel honmat theihna dingin, thulaigenmi a om kei hi.

Kei akipanin achiang la meng henla a kihtakhuainain kei honlausak kei hen:Huaichiangin thu ka gen dia, amah ka lau kei ding: keimah ah lah huchibang ka hi ngal kei a.

Huaichiangin thu ka gen dia, amah ka lau kei ding: keimah ah lah huchibang ka hi ngal kei a.

Ka khain ka hinna a chimtaka; ka utdandanin ka phun ding hi: ka kha thangpaihnain ka gen ding.

Pathian kiangah, Honmohpaih ken; bangdia honkinakpih na hia hontheisak in, ka chi ding hi.

Na nuaisiah nang adia hoih ahi maw, na khutte thilhih na muhsita, giloute thugen tunga na maitai?

Sa mitte nei na hi hia, ahihkeileh mihing muh banga mu na hi hia?

Na nite mihing nite bang hia, ahihkeileh na kumte mihing kumte bang,

Ka thulimlouhna na kana, ka khelhna na nungdelha,

Ka gilou kei chih na theih nakpia, na khuta kipan hon suaktasak ding a omlouh?

Na khutten a honsek un a honbawl kimvel sipsipa; tun kiheiin non hihse dia hia?

Theigige in, ka honngen ahi, tungman banga na honmek dan; leivui hontun nawn ding na hi hia?

Nawitui bangin na honsung khiain, nawituidat bangin na hontok kei maw?

Vun leh sain na hontuama, guhte leh thagui-tein na honphan khawm hi.

Hinna leh deihsakna na honphala, huan na kepnain ka lungsim a hawi hi.

Himahleh hiai thilte na lungtang sungah na sela; hiai bel na tup ahi chih ka thei hi:

Thil ka hihkhelh leh, huchiin non chiamteha, huan ka thulimlouhna akipan na honkhah kei ding hi.

Ka gitlouh leh, ka tung a gik hi; ka diktat leh, huchiin leng ka lutang ka sangsak kei ding, zahlaknaa dim ngalin leh ka gimthuakna enin.

Huan ka lutang a kiletsak leh, humpinelkai bangin nang non benga: huan ka tunga na lamdandan na hon ensak nawn hi.

Kei kalh na palaite na thaksaka, ka tunga na hehna na khangsaka; hondou ding sepaih hon thak non sawl hi.

Bangdia sul akipan kei honlakhia na hia oi leh? na si taleng, kuamah muh main.

Omlou mahbang bangta ding hiinga; sul akipana hana puaka omta ding hi inga.

Ka nite a tom kei maw? huchi ahihleh, tawpin, honom sak maimaiin, huchia neukhaa ka lungmuan theihna dingin.

Ka kik nawn louhna akipana ka pai main, khomialna gam leh sihna limliap gam mahmah ah:Mialna mahbanga, mialna sahna gama: sihna limliap gam, dan himhim omlouhna, khovak khomial banga a omna mun ah.

Mialna mahbanga, mialna sahna gama: sihna limliap gam, dan himhim omlouhna, khovak khomial banga a omna mun ah.

Huan zophar Naamanmi in a dawnga, huchiin a chi a:

Thu tampite dawn louh ding ahia hia? huan mi houlimnaa dim siamtansak ding hia?

Na kisaktheihnaten mite daisak ding hia? huan na simmoh chiangin, kuamahin nang honzahlaksak lou ding uhia?

Ka thuhilh a siangthoua, huan na mit uah ka siang hi, na chi ngala.

Himahleh Pathianin thugen maijen le jaw, nang demin a mukte hongleh;

Huchin pilna thugukte nang a honensak dinga, a theihna ah thuah tampi ahi chih: huaijiakin na thulimlouhna gun sanga tawmjaw na lakah Pathianin nang a honphut chih theiin.

Zonin Pathian na mu thei diam; hoihkimna ah Thilbangkimhihthei na mu thei diam?

Van bangin a sanga; bang na hih thei dia? Seol sangin a thuka; bang na thei thei dia?

Huaia tehna lei sangin a saujawa, tuipi sangin a zajaw hi.

Paisuak henla, man henla, huan vaihawmna ah sam leh, huchiin kuan amah a dal thei dia?

Aman lah mi bangmahloute a thei ngala: ngaihtuah kei mahleh, thu limlouhna leng a mu hi.

Mihing theihsiamna beiin theihsiamna a nei ding, sabengtung nou mihinga a pian chiangin.

Na lungtang na koih dika, amah lama na khutte na jak leh;

Na khuta thulimlouhna a oma, gamlapia na koihkhiaka, gitlouhna na puanina na tensak kei leh;

Huchiin gensiatna ding omlouin na mai na daksak taktak dinga; ahi, na kip dinga, na lau kei ding:

Na haksatna na mangngilh ding jiakin; tui luang mangsa bangin na theigige ding hi:

Huan sunlai sangin na hinna a telzo dinga; khomial om mahleh, jingsang bang ahi ding hi.

Huan lametna a om jiakin, na kipta ding hi; ahi, amah tanchin na zong dinga, muangin na khawlta ding hi.

Lup leng na lum lai dinga, huan kuamahin nang honlausak kei ding uhi; ahi, mi tampiin nang a honzong ding uhi.Himahleh gilou mitte a juausuak dinga, taina ding lampi a neikei ding ua, huan a lametna uh kha khah ahi ding hi.

Himahleh gilou mitte a juausuak dinga, taina ding lampi a neikei ding ua, huan a lametna uh kha khah ahi ding hi.

Huchiin Jobin a dawnga, hichiin a chi a:

Ginlelh vuallouhin mite jaw na hi hi peuhmah ua, huan nou toh pilnaa si ding hi.

Himahleh noute bangmahin theihsiamna ka nei hi; nou sangin ka niamzo kei hi: ahi, hiaite bang thilte kuan a theikei a?

Kei jaw mi a inveng adia nuihzabuk ka hi a, kei, huai Pathian sama, hua aman amah dawnpa, mi dik, mi hoihkim, nuihzabuk kana hi.

Omnuama om ngaihtuahnaah vangsiatna muhsitna a oma; ahihhangin, a khe uh teute adingin mansain a om hi.

Suamhatmite puaninte a lohchinga, Pathian hehsakte akip ua; a khut uh pathiana neite Pathian in tampi a pia.

Himahleh gamsate dongin, huan amau nang a honsinsak ding uh; huan huihkhuaa vasate, huchiin nang a honhilh ding uh:

Ahihkeileh lei kiangah thu genin, nang a honsinsak dinga; huan tuipia ngasaten na kiangah a phuang ding uhi.

Hiaite tengteng ah, TOUPA khutin a hihkhin chih kua ahia theilou?

Amah khut ah thil hing chiteng kha leh, mihing tengteng hatna a om hi.

Bilin thute a enchian kei maw, dangtungin a an achiam bangin?

Mi upate kiangah pilna a om, huan nite sauna ah theihsiamna a om hi.

Amah kiangah pilna leh hatna a om; aman thupha leh theihsiamna a nei.

Ngaiin, a kai puka, a kilam nawn theikei ding; mihing a khak binga, kuaman a hong theikei ding.

Ngaiin, tui a chinga a kang; a khahkhiaa lei a tum vek.

A kiangah hatna leh pilna a oma; khema omte leh khempa amaha ahi.

Thuhilhmite lohsamin a pi manga, huan vaihawmmite mihaiin a bawl hi.

Kumpipate kolte a suta, huan kawnggakin a kawng uh a gak hi.

Siampute lohsamin a pimanga, huan mi hatte a zou hi.

Muante thugen a suana, upate theihsiamna a la mang hi.

Lalte tungah muhsitna a buaka, mihatte kawnggak a phel hi.

Mial akipanin thil thukte a mukhiaa, huan sihna limliap khovakah a honla khia hi.

Namte a pungsaka, huan amau a hihsia: namte a theh-jaka, huan a lakhawm nawn hi.

Leia mite hausate lungtang a la manga, huan gamdaia lampi omlouhna ah amau a vakvai sak hi.Vakna beiin khomial ah a mai ua, huan zukhammi bangin amau a hoisak hi.

Vakna beiin khomial ah a mai ua, huan zukhammi bangin amau a hoisak hi.

Ngaiin, ka mitin hiai tengteng a muta hi, ka bilin huai a jaa a theisiam ta hi.

Na thei uh, huaimah ken leng ka thei hi: nou sangin ka niamzo kei hi.

Thilbangkimhihthei kiangah thu ka gen mahmah ding, huan Pathian toh houlim ka ut hi.

Himahleh nou jaw juau phuakte na hi ua, a phattuamlou daktolte na hi vek uhi.

Aw na vek un dai sipsip le uchin maw; na pilna uh hi ding hiven.

Tuin ka thusut ja un, ka mukte ngetna ngaikhia un.

Pathian adingin diktatloutakin thu na gen ding uam, amah adingin khemhat takin na houlim ding uam?

Ami na zahtak ding uam? Pathian adin na sual ding uam?

Nou a honzonkhiak a hoih hia? ahihkeileh min mi a khem bangin, amah na khem ding uam?

Nou a honsal mahmah ding, a guka mite na zahtak uleh.

A hoih tungtuannain nou a honlausak kei dia hia, nou tungah a kihtakhuaina a ke kei diam?

Na thugen minthangte uh vut paunakte ahi, na kidalnate uh tungman kidalnate ahi.

Dai unla, thu ka gen theihna dingin, honomsak maimai un, ka tungah a hongtung ding hongtung heh.

Bangdingin ka hain ka sa ka lain, ka khut ah ka koih dia?

Aman honhihlum mahleh, amah ka ngak lai ding: ama ah ka lampite ka kemhoih lailai ding hi.

Hiai leng ka hotdamna ahi ding; pathianlimsaklou mi a maa hongpai lou ding a hih jiakin.

Ka thugen thanuam takin ja un, ka thuphuan na bil sung uah om hen.

Ngai un, tuin ka thu ka bawlhoihtaa; ka diktat ahi chih ka thei hi.

Kei hon kiselpih ding amah kua ahia? kei lah tuin ka dai dia kha ka khah ding hi.

Ka tungah thil nih hih kei phot le uchin, huan na mai akipan ka bu kei ding hi.

Kei akipanin gamla ah na khut kai kikin; huan na lauhuainain honlausak ken.

Huaichiangin honsam lechin, ka hondawng ding; ahihkeileh honpausak inla, hondawng in.

Ka thulimlouhnate leh khelhnate bang ahia? Ka tatlekna leh ka khelhna hontheisakin.

Bangdia na mai sela na melma dia honbawl na hia?

Singnah mutleng na hihbuai dia hia? buhpawl keu na delh dia hia?

Nang lahkei demin thil kha taktak na gelh ngala, ka tuailai thulimlouhnate na honluahsak hi:

Ka khete leng kol na bunsaka, ka lampite tengteng na chiamteh hi; ka khenuai kimah gi na khunga.Mihing jaw thil muat bangin a mangthanga, nget nekgawp puansilh bangin.

Mihing jaw thil muat bangin a mangthanga, nget nekgawp puansilh bangin.

Mihing numei apan piang nite tawmchik ahia,

Pak bangin hong dawn khiaa, a vuai nawn pah, limliap bangin a taia, a om gige kei.

Huan mi huchibang tungah ma mit na hakin, nang toh vaihawmna ah kei non pi hia?

Thil nin akipanin kuan ahia thil siang la khe thei? Kuamahin.

A nite sehsa ahi chih theiin, na kiangah a khate simna a oma, a kan theilouh dingin a gamgite na septa hi;

Amah en ken, a khawl theihna dingin, kiloh banga, a ni a hihkim matan.

Phuk paihin om mahleh, a hongsel nawn dinga, huaia ahiang nou a tawp kei ding, chih sing adin lametna lah a om ngala.

Huaia a zung lei ah upa mahleh, huaia a kungpi lei ah sita mahleh;

Himahleh tui gim jiakin a hongnou thak dia, singsuan bangin bawkte a honnei khe nawn ding hi.

Himahleh mihing a sia, a mang jel hi: ahi, mihingin kha a khaha, huan koiah a om a?

Tuipi akipan tuite a pai bangin, luipi bel a tula, a kang hi;

Huaimahbangin mihing a luma a thou kei hi: vante a om nawn louh matan, akhanglou kei ding uh, a ihmu uh leng a halhkhe sam kei ding uhi.

Aw Seol ah honna sel lechin aw, na thangpaihna aman masiah honna guk kep lechin, hun sehsa honna piain, kei hontheigige lechin aw;

Mi si leh, a hing nawn diam? ka galdouna leh nasepna ni tengteng ka ngak dinga, ka suahtakna a hongtun ma tanin.

Non na sam dia, huan ka hondawng ding hi: na khut nasep non lunggulh ding hi.

Himahleh tuin ka kalsuante na sima: ka khelhna peuhmah na chiamteh hi.

Ip sungah ka tatlekna bilhin a oma, huan ka thulimlouhna na gonggak hi.

Huan mual puk bangmahlou a honghi taktaka, a mun akipanin suangpi suanin a om hi;

Tuiten suang a kiamsak ua; huaia dimletten leia leivui a tai mang uh; huan mihing lametna na hihsia hi.

Khantawnin amah na zou a, a paia; a mel na lamdang saka, amah na sawl mang hi.

A tapate zahin a om ua, aman a theikei; hihniamin a om ua, himahleh aman amau ahi chih a theikei.Himahleh a tunga a sain natna a neia, huan a sunga a khain a sun hi.

Himahleh a tunga a sain natna a neia, huan a sunga a khain a sun hi.

Huchiin Elipha Teman miin a dawng a, hichiin a chi a:

Mi pilin theihna bangmahlou toh dawnna a bawlin, suahlam huihin a gilpi a dimsak sak diam?

Houlimna phatuamlou toh thu a ngaihtuahin, ahihkeileh hoih a hih theihna louh dinga thugente a ngaihtuah diam?

A hi, launa na hihmanga, huan Pathian maa kipiakzohna na dal lai hi.

Na thulimlouhnain lah na kam a sinsaka, zekhemhat mi lei na tel ngal a.

Nang mahmah kamin nang siamlouh ahontang saka, kei hilouin; ahi, nang demin nangmah mukte mahmahin a hontheihpih hi.

A piang mihing masapen na hi ahia? ahihkeileh tangte maa lakkhiaka om na hi maw?

Pathian thuhilh guk na za ta hia? huan pilna na kikoih hoih hia?

Ka theih louh uh bang na theia? koua omlou bang na theisiama?

Ka lak uah samkang leh mi upa mahmah a om tuaktuak, na pa sanga nakpia upajawte.

Pathian nepnate leh siamtaka honhilh thute nang adia neu lua uhia?

Bangdia na lungtangin nang honpi mang ahia? Bang dia na mitte phia ahia?

Huchia Pathian dema na lungsim na heia, na kam akipana huchibang thute na pawtkhiak sak.

Mihing bang ahia, a sian ding? numei apan piang amah kua ahia a diktat ding?

Ngaiin, a mi siangthoute ah muanna a koih keia: ahi, a mitmuhin vante a siang kei uhi.

Mi kihhuai leh sia, mi thulimlouhna tui banga dawn, nak sian keina semin chia:

Ka honensak ding, honja in; huan ka muhsa ka phuang ding:

(Huai tuh mi pilten a pipute ua kipan na gen ua, a im kei uh;

Amau kiangah kia gam tuh piakin a oma, huan mikhual kuamah a lak uah a pai kei uh: )

Mi gilouin a damsung ni tengin natna a thuaka, nuaisiahhatmi adia khawlkhawm kumte zah mahmah.

Launa ging a bil ah a oma; hauhlaiin lokmi a tungah a hongpai ding hi:

Khomial akipan a hongkik ding chih a um keia, huan namsaua ngakin a om hi.

Tanghou zongin a tamvaka, Koia om ahia? chiin. Khomial ni a kiang chinah mansain a om chih a theikei hi.

Dahna leh haksatnain amah a lausaka; kumpipa galdou dia mansa bangin, amah a zou uhi.

Pathian dou dinga a khut a likkhiak jiakin, Thilbangkimhihthei dou dinga kisathei taka a oma,

A lum, a tuamna sahtaknei toh amah doua a tai teitei jiakin;

A thaua a maitang a khuha, a gila thau a kholkhawma,

Khopi tulsaa a tena, kuamah ten tuak louhna inte, segawp ngiingei dingte a luah jiakin;

A hau kei dinga, a neihlehlam a om gige kei dinga; amah leiah zung a kai kei ding;

Khomial akipan a suakta kei dinga, meikuangin a selnoute a kangkeu dinga, a paklunlaite huchin a mut mang ding.

Amah kikhemin, banglou ah muang kei hen: bangmahlou lah a thukna hi ding ahi ngala.

A hun main hihzohin a om dia, huan ahiang nou kei ding hi.

Grepgui bangin a gah min lou a singpulh dia, oliv bangin a pak a pai khe ding.

Pathianlimsaklou kithuahpihna lah hut ding ahia, golhna puaninte lah meiin kangmang ding ahi ngala.Siatna a pai ua, thulimlouhna a suakkhe sak uh, huan a lungtang un khemna a opkeuh uh.

Siatna a pai ua, thulimlouhna a suakkhe sak uh, huan a lungtang un khemna a opkeuh uh.

Huan Jobin a dawnga, hichiin a chi a:

Huchibang thil tampi ka zata hi: lungmuanmi chimtakhuai ngen na hi uhi.

Thu bangmahlouten tawp a nei ding uam? ahihkeileh dawng dinga nang honhihheh bang ahia?

Nou bangin kei leng ka pai thei sam hi; na kha uh ka kha muna om hileh, noute dema thute kaikhawma, ka lu hon sinkhum thei ding hi vengin.

Himahleh ka kamin nou kon hatsak dinga, ka muka muannain na lungkhamna uh kon nem ding.

Thu gen mahleng, ka dahna nepin a om keia: huan doh mahleng, hihnopin ka oma hia?

Himahleh a honchimtak saktaa: ka lawmte tengteng na hihgamta hi.

Huan kip takin na honlena, huai tuh kei demna theihpihna ahi: huchiin ka gawnna kei demin a thoua, ka mai tangah a theisak hi.

A hehnain kei a honbot keka, a honsawi hi; a ha a hon gawi khuma: ka tungah ka galin a mit a tathiam hi.

A kam uh lianpiin a honkat khum ua; simmoh takin biang ah a honbeng uh: kei dou dingin a kikai khawm ua.

Pathianin pathianlimsakloute kiangah a honpe khiaa, migiloute khut ah a honpai khia hi.

Om nuamin ka om, huan a honkitam jaksaka; ahi, ka ngawngin a honmana, a honpai nen hi: a muitum dingin a hontung tou lai hi.

A thalkapmiten ka kim ka velah a hon um ua, ka sisanguite a bottata, a hawi kei; leiah ka sinkha a sung khia hi.

Siatna tungah siatnain a honsesaka; galhat bangin ka tungah a tai.

Ka vun tungah saiip ka khuia, leivui ah ka kingata hi.

Kahnain ka mai a hoihta keia, ka mitvunte ah sihna limliap a om hi;

Ka khut ah hiamgamna omkei mahleh, huan ka thumna siangthou mahleh.

Aw lei, ka sisan khuh ken, huan ka kahnain khawlmun neikei hen.

Tu mahmahin, Ngaiin, a hontheihpih van ah a oma, kei hontheihpihpa tungsangah a om hi.

Ka lawmten honnuihsan ua, himahleh ka mitin Pathian lamah khituite a sungkhia hi;

Huchia Pathian laka mihing dikna a letkip theiha, a inveng laka mihing tapa dikna, a letkip theihna dingin:Kum tawm a hongtun chiangin lah ka kik nawn louhna ding lampi ah ka pai ta ding ahi ngala.

Kum tawm a hongtun chiangin lah ka kik nawn louhna ding lampi ah ka pai ta ding ahi ngala.

Ka lungsim hihgawpin a oma, ka nite a bei, kei dingin han mansain a om hi.

Ka kiangah musitmite a om taktak ua, a hehna uah ka mit a omgige hi.

Tuin thuchiam honpia in, nangmahmah toh kei adingin mohkhu honghi in; kei toh khutte beng ding kua a oma?

Theihsiamna akipan a lungtang uh na sel ngala: huai jiakin amau na hihlian kei ding hi.

Kuapeuh matdinga a lawmte heka, a neihlehlam tan tummi, a tate nangawn nit a juausuak ding hi.

Mite houlimna dingin a honbawl laia; huan tangpi kih ka honghita hi.

Lungkhamna jiakin ka mit leng a miala, huan ka hiangte tengteng limliap bang ahi.

Mi dikten hiaiah lamdang a sa ding ua, huan mihoih pathianlimsakloute dou dingin a kitokthou ding.

Himahleh mi diktat a lampi ah a pang zouzou dia, huan kuapeuh khut siangneite a hat semsem ding uhi.

Himahleh hongkik un, na vek un, huan tuin hong un: huchiin na lak uah mi pil ka mu kei ding.

Ka nite a beita, ka thiltupte a se gawpta hi, ka lungtang ngaihtuahte nasanin.

Jan sunin a kheng ua: khovakin khomial a naih, a chi uh.

Seol ka in bangin en leng; khomial ah ka tutnanem phahta leng;

Siatna kiangah, Ka pa na hi, chi leng; tangtel kiangah, ka nu leh ka sanggamnu na hi, chi leng;

Huchi hileh ka lametna koia om ahia? Huan lamet nei hileng kuan honmusak dia?Seol mundai ah te paisukin leivui ah ka kik khawm ding ua adiam?

Seol mundai ah te paisukin leivui ah ka kik khawm ding ua adiam?

Huchiin Bildad Sua miin a dawnga, hichiin a chi a:

Thute zonga bangtan thang kam ding na hia ua? Ngaihtuah in, huaikhit chiangin ka pau ding uh.

Bangdia gamsa banga sima oma, na mitmuh ua sianglou honghi ka hi ua?

Nang na hehna kipumpei nang jiakin lei mangngilhin a om diam? ahihkeileh a mun akipatin suangpi suan khiakin a om diam?

A hi, migilou vakna mihsakin a om dinga, a meiek a tang kei ding.

A puanin ah vakna a mial dia, a tunga a khawnvak mihsak ahi ding.

A hatna kalsuante hihtuailuai ahi dia, huan amah thupha genin amah a paikhe ding hi.

Amah khe mahmahin lah len sungah amah a pai lut ngala, huan len ah a kiawksak hi.

Thangin a khetulah a man dia, thangin amah a len ding hi.

Leiah amaha dingin a ba selin a oma, lampi ah amah adin thang.

Kihtakhuaiten ning chiteng ah amah a lausak dia, a khetul ah a delhjui ding hi.

A hatna gilkial nekin a om dia, huan tuahsiatna a khawlna dingin mansain a om ding.

A pumpi hiangte a negai dinga, ahi, ahiangte sihna ta masapenin a negai ding.

A suan a puanin akipan zungkalh khiakin a om dia; huan lauhuainate kumpipa kianga piin a om ding.

Amaha hi lou a puanin sungah teng a om ding: a tenna ah kat theh jakin a om ding hi.

Nuailamah a zungte a keu dia, huan tunglamah ahiang sat khiak ahi ding.

Lei akipanin a theihgige a mangthang ding; huan kongzing ah min a neikei ding.

Khovak akipanin khomial ah hawllut ahi dinga, huan khovel akipana delh khiak.

A mite lakah tapa a neikei dia tapa tapa leng: a omna ah kuamah omlai a om kei ding hi.

Tumlama omten a ni lamdang a sa ding ua, suahlama omte hihlaua a om bang un.Huchibang mi diktatloute tennate ahi petmaha, huan hiai Pathian theilou mi mun ahi hi.

Huchibang mi diktatloute tennate ahi petmaha, huan hiai Pathian theilou mi mun ahi hi.

Huan Jobin a dawnga, hichiin a chi a:

Bangtan ka kha hihbuaia, thutea honhihjan gawp ding na hi ua?

Hiai sawmvei tak na honkouta ua: ka tunga giloutaka na hih uh na zum kei ua.

Huan na na paikhialta mawng leng maw, keimah kianga ka diklouhna om gige hi.

Kei demin nou kiliansak petmah ve nuchin, ka minsiatna ka tungah gen ven uchin:

Pathianin ka thu ah honzouta chih tuin thei un, huan a lenin a honum suak hi.

Ngai un, Hiamgamna, chiin ka kikou khiaa, himahleh jakin ka om kei: panpih deihin ka kikoua, himahleh vaihawmna a om kei hi.

Ka pai theihlouhna dingin ka lampi a um a, huan ka paina dingte ah khomial a koih hi.

Ka thupina honsuahsaka, ka lu akipan lallukhu a la.

Ning chitengah a hon hihniama, ka mangta hi: huan, sing bangin ka lametna a bot khia.

Ka tungah a hehna leng a soua, amah adingin a galte laka khat bangin a honsim hi.

A sepaihpawlte a hongkuan khawm ua, ka siatna dingin a lampi uh a bawl uh, huan ka puanin kimvelin puanin a kai uh.

Kei akipanin ka unaute gamlapi ah a koiha, ka mel-theihte kei akipanin a mituam vekta uh.

Ka tanauten a honjuausanta ua, huan ka lawm theihngeiten a honmangngilhta uh.

Ka in tengte leh, ka sikhanuten, mikhual a honsa ua: a mitmuh un namdangmi ka hi.

Ka sikha ka sama, a hondawng kei, ka kamin amah khem mahleng leng.

Ka ji adingin muhthadahhuai ka hia, ka nu tate adingin, kihhuai.

Naupang neute nangawnin a honsimmoh ua; ka thoh leh, ka siatna dingin thu a gen uhi.

Ka lawm gilte tengtengin kei a honhua ua: huan amau ka itte ka tungah a hel uh.

Ka guh ka vun ah leh ka sa ah a belh bikbeka, huan ka ha vun toh ka suakta hi.

Honhehpih un, honhehpih un, Aw nou ka lawmte; Pathian khutin kei a honkhoihta ngala.

Bangdia Pathian banga nou honsawi na hi ua, ka saa bangdia lungkim lou na hi ua?

Aw ka thute tuin gelhin om le uh aw; Aw laibu ah kigelh lut le aw;

Sik leh ngen gelhna zumin khantawn adingin suangpia gelh hile uh aw;

Himahleh ka Tanpa a hing chih leh, leitungah a tawp chiangin a ding ding chih ka thei hi:

Huan ka vun huchibanga hihsiata a om khit nungin, himahleh ka sa akipan Pathian ka mu ding hi:

Keimah adingin amah keimahmahin ka mu dia, huan ka miten a en dia, midang hi louin. Ka sungah ka lungtang a sidangta hi!

Amah bangchibangin i sawi ta phet diamah; na chih uleh, kei ah thu bul muhin a om chih theiin;Namsau kihta un: hehnain lah namsau gawtnate a hontun ngala, huchia vaihawmna a om chih na theih theihna ding un.

Namsau kihta un: hehnain lah namsau gawtnate a hontun ngala, huchia vaihawmna a om chih na theih theihna ding un.

Huan Zophar Naaman miin a dawng a, hichiin a chi a:

Huaijiakin ka ngaihtuahnaten kei dawnna a honpiaa, ka sunga om ka kinna thu jiak mahmahin.

Kei honzahlaksak salhna ka zataa, huan ka theihsiamna khain a hondawng hi.

Lei tunga mihing koiha a om nungsiah, hun lui thu hiai na theikei maw;

Gilou vualzohna a toma, huan pathianlimsakloute nuamsakna mitphiat kal sunglel ahi chih?

A hoihkimna vante phain tuangtou mahleh, a luin meipite pha mahleh;

Himahleh amah ek bangin khantawnin a mangthang dinga: Koia om ahia? amah muten a chi ding uh.

Mang bangin a lengmang dinga, huan muhin a omkei ding hi: ahi, jan mengmuh banga hawlmangin a om ding hi.

Amah mu mitin amah a muta kei ding hi; a munin leng amah a muta kei ding hi.

A taten gentheite deihsakna a zong ding ua, huan a khutten a hauhsakna ape nawn ding hi.

A guhte a tuailainain a dima, himahleh leivui ah amah toh a lum ding hi.

Gitlouhna a kam ah khum mahleh, a lei ah sel mahleh;

Sitin, paisak keiin, a kam sungah kem gige zo mahleh;

Himahleh a gila a an a kitoka, a sunga khuai gu ahi hi.

Hauhsaknate a nawmvalha, huan a lokhe nawn ding hi: Pathianin a gilpi akipanin apaikhe ding hi.

Khuai gu a tep dia: gul leiin amah a that ding.

Luipite, khuaiju leh nawituidat lui luangte a en kei ding hi.

Sepgim gah a pe nawn dia huan a nawmvalh suk kei ding hi; a muhsa ah kipahna a neikei ding.

Aman lah gentheite a nuaisiaha, a mangngilh hi; a lam louhpi in hiamgamtakin alata.

A deihgawlnain tawp aneihlouhjiakin, a kipahpih thil himhim a khol kei ding.

A nekgaihlouh bangmah omlai a om kei hi; huaijiakin a hauhnain a daih sawt kei ding.

A nian san lain haksa sakna a nei dia: gimthuak mi chiteng khut a tungah a hongtung ding.

A gilpi hihdim dinga a kisaklaiin, Pathianin a tungah a thangpaihna kihtakhuaina a khe dinga, a nek laiin a tungah a zusak ding hi.

Sik galvan akipan a tai dia, huan dal thalin amah a kap pailet ding.

A dok khiaa, huan a pumpi akipanin a hongpai khia: ahi a sinkha apat a mukzum te velvel hongpai khiaa launate a tungah a hongtung hi.

A gou dingin mialna tengteng kholkhawmin a om: mi mutlouh meiin amah a negai ding; a puanina nutsiata om a negai ding hi.

Vanten a thulimlouhna a taklang ding ua, huan lei amah dou dingin a thou ding.

A ina punna a paimang dinga, a vante a heh niin a luang mang ding hi.Hiai bel Pathian akipana mi gilou tantuan ahi, a gouluah dia Pathianin a sehsak.

Hiai bel Pathian akipana mi gilou tantuan ahi, a gouluah dia Pathianin a sehsak.

Huan Jonin a dawnga, hichiin a chi a:

Ka thugen hoihtakin ngaikhia unla, hiai na khamuanna thu uh hihen.

Honthuak teitei unla, ka hon-gen ding a, ka gen khit chiangin nuihsan na nu teh.

Kei phunna mihing tungah ahi ahia? Bangdia kuhkalloua omlou ding ka hia?

Honen unla, lamdang sa unla, khutin na kam uh hum un.

Ka ngaihtuahin ka lung a donga, linnain ka sa a man nak.

Bangjiakin ahia migilou a hina, tekkuna a dama, a hong thupikhiak?

A suante uh a kiang uah a mitmuh uah a hihkipa, a gil ua gahte a mai ma uah.

A inleloute uh lauhuai lakah a bita, Pathian chiang a tunguah a ke kei hi.

A bawngtal un chi a khah a, a juau ngeikei, a bawngpi un nou a nei a, a nou a siat ngeikei.

Ganhon bangin a taneute uh a pawtsak ua, a tate uh a lam uh.

A pekging uleh kaihging toh kituakin la a sa ua, a tamngai ging uah a kipak uh.

A nite uh lamzangtakin a zang ua, lungmuangin Seol ah a paisuk uh.

Huan, Pathian kiangah, Honpaisan in, na lampite theih ka kilawp kei uh.

Bangkimhihthei banga a hih, a na ka sep ding uh, A kianga ka thum un punna banga ka muh ding uh? a chi uh.

Ngaiin; a lamzanna uh a khut ua om ahi kei ahia? Migilou lemtheihna kei akipana gamlapia om ahi.

Migilou meisel bangzah vei tak a mita, vangtahna a tung ua a tuna, a thangpaihnaa Pathianin lungkhamna a piak chiat?

Bangzah vei ahia buhpawl huih mut bang a hihua, buhsi huihpi mutmang bang a hih uh?

Pathianin gitlouhnate a tate uh adingin a kholkhawm, na chi ua, amau tungah tungsak le ake, a theihsiam nadingun.

Amau mit ngeiin a siatna uh mu uhenla, Bangkimhihthei thangpaihna dawn uhen.

Aman nungin a in uh amau adin banga ahih, a kha zah uh hihtawp a hih nungin?

Kuan ahia Pathian theihna sinsak ding? aman lah sangpia omte vai a hawmsak ngala.

A lutlaiin mi a si a, nuamsa leh bittaka om in.

A sa thauin a dima, a guhngekte leng nawnnain a dim hi.

Midang lungkhamtakin a si a, hoihna himhim chiam ngei louin.

Vutlak ah kibangin a lum ua, thanin a pumtuam hi.

Ngaiin, na ngaihtuahte uh ka thei, dikloupia ka tunga na sawmte uh.

Koiah ahia kumpi in a om, migilou tenna puanin koiah a om a? na chi uh.

Zinzin mite na dong ngeikei ua hia? A gente uh na pom kei ua hia?

Migilou tuh vangtah niin hawiin a om a, thangpaih niin amah hotkhiakin a om, chih.

Kua ahia a maitang a a lampi pulak dinga, kua ahia a thilhih banga amah din ding?

Han lama puak ahih laiin, a han ven ahi.

Luiguama leitangte amah adin a nuama; mi tengteng in a nung a jui ua, amah maa napaite simsenglouh ahi uh.Bangchiin thumumal omlou piin hon khamuan ding na hia? Na dawnnate uah juauthu loungal bangmah a om kei hi.

Bangchiin thumumal omlou piin hon khamuan ding na hia? Na dawnnate uah juauthu loungal bangmah a om kei hi.

Huchiin Elipha Teman miin a dawng a, hichiin a chi a;

Mihing Pathian adingin a phatuam thei diam? Kuapeuh a pil amah mah adingin a phatuam ngeia.

Na diktat, Thilbangkimhihthei adinga kipahna ahi himhim hia? ahihkeileh na lampite na hoihkim sak, amah dia punna hia?

Nang a honsalha, vaihawmnaa nang toh a lut, amah na kihtak jiak hia?

Na gitlouhna a lian kei maw? Na thulimlouhna ah leng tawpna a om sam kei hi.

Bangmahlou dingin na unau thuchiamte na lata ngala, huan vuaktangte a puansilh uh na suahsaka.

Gim adin dawn dingin tui na pe kei a, huan gilkial adin tanghou na it hi.

Himahleh mi hat in gam a neia; mi deihthoh a sungah a teng hi.

Khutvuakin meithaite na sawl manga, huan pabeite khutte hihtanin a om hi.

Huaijiakin thangte na kim ah a om ua, huan lau guihnain nang honhihbuai hi.

Ahihkeileh khomial, na muh theihlouh, leh tui tampiin nang a honkhuh hi.

Van sangah Pathian a om ka hia? huan aksite sandan en in, sang hina tel uh e;

Huan nang, Pathianin bang a theia? khomial bikbek lakah vai a hawm thei dia hia?

Amaha dingin meipi sahte, a muhlouhna din, khuhna ahi a; huan van kum sungah a vak ahi, na chi.

Mi giloute totsa lampi lui na kem ding hia?

A hun ma ua lak manga oma, a kingakna ua tuiluang banga butkhiak a omte:

Pathian kianga, Hon pai mangsanin; huan eia dingin Thilbangkimhihtheiin bang a hih theia? chite.

Himahleh a inte uh thil hoihin a dimsak ua: himahleh migiloute thugen kei akipan a gamla hi.

Mi diktatten a mu ua, a kipak ua; huan mihoihten amau a nuihsan ua,

Chihtaktakin ei dou dinga thoute sat khiakin a om ua, huan amaute laka omlai meiin a hulgaita, chiin.

Tuin amah kimeltheihpih inla, muang takin omin: Huaiah hoih na kiangah a hongpai ding hi.

A kam akipanin dan tuh sangin, ka honngen hi, huan na lungtang ah a thute khol khawmin.

Thilbangkimhihthei kianga na kik nawn leh, lam kipin na om ding hi; na puaninte akipana gamla pia diktatlouhna na koih mang leh.

Huan na gou leivui ah koih inla, huan luite suangte lakah Ophir dang kaeng;

Huchiin Thilbangkimhihthei na gou ahi dia, nanga dingin manpha dangka.

Huchiin Thilbangkimhihthei ah na kipakin, Pathian kiangah na dak tou ding a hih jiakin.

Amah kiangah na thumna na gen dia, aman a honza ding.

Thil khat tungah thupukna bawlin thu na pe dia, huan nanga dia hihkipin a om ding hi; huan na lampite ah khovak a tang ding.

A honsawnpuk chiang un, Thoh touhna a om, na chi ding; huan mi niamkhiak aman a hondam ding hi.Amah a hoihlou nasan a suaktasak dinga: ahi, na khutte sianna jiakin amah suangtaksakin a om ding.

Amah a hoihlou nasan a suaktasak dinga: ahi, na khutte sianna jiakin amah suangtaksakin a om ding.

Huchiin Jobin a dawnga, hichiin a chi a:

Tuni mahmahin ka phunna helhuai ahi: ka thuakna ka mauna sangin a gikjaw hi.

Aw amah ka muhna mun thei lengla, a tutna mahmah ah hoh thei leng aw!

A maah ka thu ka bawlhoih dia, thugentein ka kam dimsak ding hi veng.

A honna dawnna ding thute ka thei dia, huan bang ahia ka kianga a gen ding ka theisiam ding.

A thilhihtheihna letnain kei a honsel diam? Ii; himahleh kei a honlimsak ding hi.

Huailaiah mi dikin amah thu a sutpih thei dia; huchiin ka vaihawmmi akipan suahtaksakin ka om tawntungta ding hi.

Ngaiin, mailam juanin ka paia, himahleh huailaiah a om kei; huan nunglam juanin, himahleh amah ka mu kei hi.

Veilam pangah, na sep laiin, himahleh amah ka mu theikeia: taklam pangah a bu, amah ka muh theihlouhna dingin.

Hiamhleh ka zuih lampi a thei a; a hon zeet laiin, dangkaeng bangin ka honsuakkhe ding hi.

Ka khein a kalsuante a len kipa; a lampi ka juita, ka pial kei.

A mukte thupiak akipan ka pai kik keia, a kama thute a kiphamoh ka an sangin ka kholkhawm jaw hi.

Himahleh amah lungsim khek lou ahia, amah kuan a hei thei dia? a khain a deih, huai mah a hih jel hi.

Kei dia sehsa a hih ngala: huan thil huchibang tampi a kiangah a om hi.

Huaijiakin a omna ah ka buaia; ka ngaihtuah chiangin amah ka lau hi.

Pathianin lah ka lungtang a bahsakta ngala, huan Thilbangkimhihtheiin a honhihbuaita hi.Khomial main satkhiakin ka om ngal keia, ka maia kipan khomial sah leng a khuh sam kei hi.

Khomial main satkhiakin ka om ngal keia, ka maia kipan khomial sah leng a khuh sam kei hi.

Bangdia Thilbangkimhiihtheiin vaihawmna hunte bawl lou ahia? huan amah theiten bangdia a nite mu lou uh ahia?

Gamgi suan a om ua; ganhon hiamgamtakin a la mang ua, a vak uh.

Pabeite sabengtung a hawl mang ua: thuchiamna dingin meithai bawngtal a la uh.

Lampi akipan tasamte a hei khia ua: leia gentheite a kisel khawm uhi.

Ngaiin gam keua sabengtungte bangin a thilhihna lam uah, an thanuamtaka zongin a pai khia ua; a tate uh a dingin gamdaiin amau an a suaksak hi.

Gam lamah a gan an uh a at ua; huan migiloute grep gah a la uh.

Jan khuain puan beiin vuaktangin a lum ua, huan khovot ah khuhna neilouin.

Mualte vuahphinin a kawt ua, belhding deihmanin suangpi a kawi uhi.

Nawi akipan pabei kai khia a om ua, huan gentheite thuchiam la:

Huchiin tasamte puanbeiin vuaktangin a vialvak ua, buhphalte gilkialin a pua uhi.

Oliv sing lakah sathau a bawl ua; a uain sukna uh a chil ua, himahleh a dangtak uhi.

Khopi akipanin mite a mau ua, huan liamte kha a kikou khiaa; himahleh Pathianin a limsak kei hi.

Hiaite khovak tunga helte laka ahi ua; huai lampite a theikei ua, huaia lampite ah a om gige sam kei uhi.

Tualthatmi jan mialin a thoua, gentheite leh tasamte a thata; ahi, janin gutami ahi.

Angkawm mi mitin leng khomui a ngaka, kuamahin honmu kei ding, chiin: huan a mai a bawl lamdang hi.

Khomialin inte a vut pailet ua: sun chiangin a kikhum bilh ua; khovak a theikei uh.

Amaute tengteng adingin lah jingsang sihna limliap bang ahi ngala; janmial lauhuaite lah lawmin a nei ngal ua.

Tuite tungah kintaka taihmangin om ua; a tantuan uh leiah hamsiatin a om: agrephuante sukmiin a naih kei.

Khokhal leh nisain vuk tuite a tawpkanga: huaibangmahin thilhihkhialte Seolin a hih hi.

Sulin amah a mangngilh dia; thanin limsa takin amah kivaknain a nei ding uh; theihgigein a omta kei dia, huan diktatlouhna sing banga hihtanin a om ding.

Ta neilou numei ching a negaia; meithai adingin hoih a hih kei hi.

Ahia lah Pathianin a thilhihtheihnain in hatte hin a sausaka, hinna a lamet phaklouh lai unleng a dingtou uh.

Bitna Pathianin amau a piaa, huchiin huaiah a khawl uh; huan a mitte a lampite uah a om hi.

Hihletin a om ua; himahleh sawtlou kalin, a bei uhi; ahi, sukniamin a om ua, mi dang tengteng bangin lampi akipan lak khiakin a om ua, buhvui banga at khiakin a om uhi.Huchibang na hi kei ta leh kua ahia juautheia hon chian dinga, ka thugen ah leng bangmah omlou-a lak ding?

Huchibang na hi kei ta leh kua ahia juautheia hon chian dinga, ka thugen ah leng bangmah omlou-a lak ding?

Huan Bildad Sua miin a dawnga, hichiin a chi a:

Lalna leh launa Pathian kiangah a om; aman a mun sangte ah muanna a bawl hi.

A sepaihte hihzah himhim a om ahia? huan a vakna suahlouhna kua a om a?

Huchi a hih chiangin Pathian lakah bangchiin mihing a dik thei dia? ahihkeileh amah numei suan bangchiin a siang thei dia?

Ngaiin, khapi nangawnin tetna a neikeia, a mitmuhin aksite a siangthou kei hi.Mihing, tangtel, bangchiphetin a siangkei zo de aw; huan mihing ta, tangtel;

Mihing, tangtel, bangchiphetin a siangkei zo de aw; huan mihing ta, tangtel;

Huan Jobin a dawnga, hichiin a chi a:

Thilhihtheihna neilou amah bangchiin na panpihta a amai; hanta neilou ban bangchiin na hondamta a amai;

Pilna neilou amah bangchin na thuhilha, huan nakpitaka theihna hoih na phuangkheta a;

Kua kiangah ahia thute na genkhiak tak? Huan kua kha ahia nang akipan hongpai khia?

Sisate tuite nuai leh huaia tengte nuaiah a ling uh.

A maah Seol vuaktangin a oma, huan Abaddon in kikhuhna a neikei hi.

Aman mal mun awng tungah a phalh khia a, huan bang mahlou tungah lei a khai hi.

A meipi sahin tuite a tuna; huan huaite nuaiah meipi a kikek kei hi.

Khapi mai a khuha, a tungah a meipi a phalh hi.

Tuite tungah, khovak leh khomial kigitna ah, kawlmong a kaikual hi.

A salhna ah van khuamte a ling ua, lamdang a sa uh.

A thilhihtheihnain tuipi a khawlsaka, huan a theihsiamna in Rahab a sat.

A huin vante bawlhoihin a oma; a khutin gulpi man-gang tailai a sun hi.Ngaiin, hiaite a thilhih mong lel ahi uh. Ngatchika a huau siausiau lel! A thilhihtheihna Vanging kua ahia theisiam ding?

Ngaiin, hiaite a thilhih mong lel ahi uh. Ngatchika a huau siausiau lel! A thilhihtheihna Vanging kua ahia theisiam ding?

Huchiin Jobin a gentehna thu apan nawna, huchiin a chi a:

Pathian a hing bangin, aman ka dikna a la manga; huan Thil bangkim hihtheiin, aman ka kha a hih buai a;

Ka hinna ka sunga a om laiteng, huan Pathian hu ka nakvanga a om laiteng?

Ka mukten thutaklou a gen kei ding, ka leiin leng khemna thu a gen kei ding.

Siam kon tansak mahmah kei ding hi: ka sihma tan ka takna kei akipanin ka koih mang kei ding hi.

Ka diktatna ka len chintena, ka khah kei ding hi: ka damlai teng ka lungtangin kei honkou kei ding.

Ka melma gilou bang hi henla, huan kei dou dia thou mi diktatlou bang hihen.

Punna muta mahleh, Pathian limsakloumi lametna, Pathian in a kha a lak mang ngalin, bang ahia?

A tunga buaina a tunin, a kikou Pathian in a za diam?

Thil bangkim hihthei ah nuam asa in, chiklaipeuhin Pathian sap nuam asa diam?

Pathian khut tungtangah nang ka honsinsak ding; Thil bangkim hihthei kianga om ken ka im kei ding hi.

Ngai un, noute tengteng in huai na muta ua; ahihngalleh, bangdia bangmahlou honghi vek na hi ua?

Hiai Pathian laka mi gilou tantuan leh, nuaisiahhat mite goutan, Thil bangkim hihthei akipana a muh uh ahi.

A tate a pun uleh, nuamsau ading ahi; huan a suan tanghouin a tai kei ding hi.

A nunga omlaite hi lengin a vuidia, huan a meithaite un kahna a bawl kei ding uh.

Dangka leivui bangin vum touin, puansilh tungman bangin bawl mahleh;

A bawl thei, himahleh mi dikten a silh ding, huan mi hoihten dangka pen a hawm ding hi.

Inn a lam tuh maimom len bang ahia, vengmiin a bawl aidakbuk bang ahi.

Hausa inn a luma, himahleh khopin a om kei ding; a mit a haka, huan a om kei.

Tuite bangin launaten amah a pha a; janin huihpiin amah a gu mang hi.

Suahlam huihin amah a po manga, huan a pai mang hi; huchiin a mun akipanin amah a mut mang hi

Pathianin lah amah nakpiin a lawn dia, a dawm kei ding: a khut akipan taimang a ut ding.Miten amah a khut uh a bet khum ding ua, huan a mun akipanin amah a nuihsan khe ding uhi.

Miten amah a khut uh a bet khum ding ua, huan a mun akipanin amah a nuihsan khe ding uhi.

Chihtaktakin dangka adingin khuk a oma, huan a hihsiang uh dangkaeng adingin mun.

Lei akipanin sik a kilakhia a, huan suang akipanin dal a ki sungkhia hi.

Mihingin khomial phaktawp a neisaka, huan khomial sah leh thukah phaktawp gamlapen tanin sik-bua a zongkhia.

Mite om louhna ah kokhuk lutna hawm a tou vangua, mite apat gamla ah a kikhai ua, khatlam khatlamah a ki vei uh.

Lei ahihleh, huai akipanin tanghou a hongsuaka: huan a nuaiah meia hihbangin a kilumlet hi.

Huailaia suangte saphir suang mun ahi a, huan dangkaeng nen a nei hi.

Huai lampi sasial ne vasain a theikei a, mu-akla mitin leng a mu ngei sam kei hi.

Gamsa kisatheiten a sikkha ngeikei ua, humpinelkai lunlai leng huailaiah a paikha neikei hi.

Meisah suanpi tungah a khut a koiha; a zungin mualte a lumlet a lumlet hi.

Suangpite lakah lam a tou honga; huan a mitin thil mangpha chiteng a mu hi.

A takkhiak louhna ding un lui luangte a tuama; huan thilkisel khovak ah a honlakhia a.

Himahleh ko ilaiah a pilna a kimu dia? Huan theihsiamna mun koilaia om ahia?

Mihingin a lampi a theikei hi; mihing gamah leng muhin a om kei hi.

Tui thukin, Ka kiangah a omkei, a chi a.

Dangkaenga muh theih ahi keia, huai man dingin dangka leng buk theih ahi kei hi.

Ophir dangkaeng toh a manphatna teh theih ahi kei ding, onik mantam hiam saphir toh hiam.

Dangkaeng leh limlangin a kimpih theikei ua: huai khenna dingin dangkaeng hoih suangmantam leng ahi theikei ding hi.

Suang dum hiam suang muhpaisuak theih a kigen kei ding: A hi, pilna man rubi suang sangin a sangjaw hi.

Ethiopia topazi suangin a pha kei dia, dangkaeng tak toh leng a manphatna teh ding ahi kei.

Ahihleh pilna koi akipana hongpai ahia? Huan theihsiamna mun koia om hia?

Mihing tengteng mit akipana sel ahi chih leh, huihkhua a vasate akipan sitsa a om ahi chih theiin.

Siatna leh sihnain, huaia thuthang ka bil un ka ja uh, a chi ua.

Huaia lampi Pathianin a theisiam, huai amun a thei hi.

Lei mong tanin a en ngala, huan van nuai thil tangtang a mu hi.

Huiha dinga gikna a piak lain, leh tuite tehna a a teh laiin;

Vuah adinga thupiak a bawla, vanging khophia adia lampi a bawl laiin;

Huailaiin aman a mua, a phuanga; ahih kipa, ahi, a zong khia hi.Huan mihing kiangah, Ngaiin, TOUPA kihtak, huai pilna ahi: huan hoihlou akipan pai mang theisiamna ahi, a chi hi.

Huan mihing kiangah, Ngaiin, TOUPA kihtak, huai pilna ahi: huan hoihlou akipan pai mang theisiamna ahi, a chi hi.

Huan Jobin a gentehna thu a gen nawna, hichiin a chi a:

Aw nidanglai khate banga om hileng, Pathianin a honveh lai nite bangin;

Ka lu tunga a khawnvak a tana, amah vakna a khomiala ka vak lai;

Ka hoihlai nitea ka om banga, ka puanin tunga a Pathian thuguk a om laiin;

Ka kianga Thilbangkimhihthei a om laia, ka kima ka tate a om lai un;

Ka kalsuante bawngnawia sawp a hiha, suangpiin sathau luipite a honbut khiaklaiin:

Khopia kongpi juana ka pai laiin, kongzinga ka tutna ka bawl laiin,

Tangvalten a honmu ua, huan a bu ua: huan upate a thou ua a ding uh:

Lalte houlim a kidek ua, huan a kam uah a khut uh a koih uh:

Miliante aw a daia, huan a lei uh a kam dangtawng uah a belh hi.

Bilin a honjak laiin, hampha a honchia; huan mitin a honmuh laiin, pom a honchia;

A kap mi genthei, amah panpih ding kuamah neilou, pa bei leng ka suahtaksak jiakin.

Mangthang dinga mansa vualjawlna ka tungah a hongtunga: huan meithai lungtang kipah jiaka lasa dingin ka omsaka.

Diktatna ka silha, huan a hontuam hi: ka dikna puannak thupi bang leh suangmantam bang ahi.

Mittaw adingin mitte ka hi a, khebai adingin khete ka hi.

Tasam adingin pa ka hia: huan ka theihlouh thubul ka zong khia hi.

Diktatlou mi haijek ka hihtana, huan aha akipan a samat ka khahsak.

Huan ken, Ka bu ah ka si dinga, piaunel bangin ka nite ka pungsak ding, ka chi a:

Ka zungte tuite phain a dalh jaka, huan ka hiangah jankhuain daitui a kai:

Kei ah ka thupina a thak gige a, huan ka khut ah ka thalpeu a thak gige.

Miten a honngai ua, a ngak ua, ka thuhilh adingin a dai dide uh.

Ka thute zohin a pau nawn kei uh; huan ka thugen a tunguah a takkhia.

Huan vuah ngak bangin a honngak ua; huan vuah nanungte ading bangin lianpiin a kamka uh.

Kimuanna a neih louh chiangun a tunguah ka nuihmai a; huan ka mel tang a paikhe kei uh.A lampi ding uh ka telsaka, hausa bangin ka tua; sepaihpawl laka kumpipa bangin ka lenga, sunmite lungmuanmi bangin.

A lampi ding uh ka telsaka, hausa bangin ka tua; sepaihpawl laka kumpipa bangin ka lenga, sunmite lungmuanmi bangin.

Himahleh kei sanga naupang, a pate uh ka ganching uite toh koih dia ka sitten, kei nuihzabawlna in a hon zang uh.

A hi, a khutte uh hata, huaiin kei bang a honlohtak dia, huai a hatna uh beisaten?

Taksapna leh kialna in a tuikang ua; lei keu leh sia a kheuh uh,

Pawna annteh a lou ua; huan loukha zungte a an uh ahi.

Mite lak akipan hawl khiakin a om ua; guta nung bangin amau nungah a kikou ua.

Guama hengte ah a teng ngei ding ua, lei leh suangpi hawmte ah.

Pawn lakah a ham ua; lahou nuaite ah a kise-khawm uh.

Mihaite tate ahi ua, ahi, mi thulimloute tate; gama kipanin delhkhiak ahi uh

Huan tuin kei a la uh ka honghia ahi, amaua dingin houlimna ka hi.

A honkih ua, kei akipan a tuam din uh, ka maia chil siat a kidek kei uh.

Pathianin lah Ka khau a khaha, a honhihgim hi, huan ka maah kamkaihna a khahkhia uh.

Ka khut taklam pangah mipi thuzohlouhte a thou ua; ka khe a a nawlkhin ua, huchiin a siatna lampi uh ka maah a koih uh.

Ka lampi a hihsia ua, ka tuahsiatna a zong ua, kuaman a kham kei uh.

Awng zapia paisuak bangin a hong ua: siatna lakah ka tungah a kikhuk uh.

Launate ka tungah a hei ua, huih bangin ka minphatna a delhmang uh; huan meipi bangin ka hauhna a paimang hi.

Huchiin tuin ka sungah ka kha buakkhiakin a om; gimthuakna niten kei a honman uh.

Janin ka guhte a sawi, huan kei honseuh natna ten khawl chih a neikei uh.

Ka natna hi hat mahmahna jiakin ka puansilh a nina: ka puannak ngawng bangin kei a honggak hi.

Buannawi ah a honpai luta, huan leivui leh meivu bang ka honghi hi.

Na kiangah ka kikoua, huan non dawng kei hi: Ka dinga, huan kei non en maimaha.

Ka tunga khel dingin na kilumleta: na ban hatnain kei non sawi hi.

Huihah non domkang tou a, huai tungah na hontuang sak; huan huih ah non lumlet let hi.

Sihna na hontun ding chih lah ka thei ngala, huan mihing tengteng adia sehsa in ah.

Hitamahleh siatnaa pukgawp miin a ban jak lou ding hia? Ahihkeileh a tuahsiatna ah panpihna ngenin kikou lou ding hia?

Buainaa om adingin ka kap kei maw? Tasamte adingin ka kha a dah kei maw?

Hoih ka ngak chiangin, hoihlou a hongpaia; khovak ka ngak chiangin, khomial a hongpai.

Ka lungtang a buai, khawl a mu ngei kei; gimthuakna nite ka tungah a hongtung.

Hihvoma omin ka vialvak, himahleh ni hihvom hilou-in; khawmpi ah ka dinga panpih deihin ka kikou hi.

Sehalte unaupa ka hia, vakengsangte lawm ka hi hi.

Ka vun a voma, kei akipan a pilh uh, huan kholumin ka guhte a kang hi.Huaijiakin ka kaihging sunna a suaka, ka mutging mikapte aw.

Huaijiakin ka kaihging sunna a suaka, ka mutging mikapte aw.

Ka mit toh thukhun ka nabawlkhinta; bangchin nungak ka en theita dia oi?

Ahihleh tunglam Pathian akipanin ka tantuan bang a hita dia, tungsang Thilbangkimhihthei akipanin ka goutan?

Mi dikloute tungah tuahsiatna a tung kei mo, gitlouh nasemte tungah siatna?

Aman ka lampite a mukhin keiin, ka kalsuante a sim vek kei ahia?

Thujuau toh na oma, hua ka khe khem dinga nakinoh ahih leh;

(Bukna diktak ah honbuk dih ua, Pathianin ka thutakna thei hen! )

Ka kalsuan lampi akipan anapial hiam, ka lungtang-in ka mitte anajui hiam, huan ka khutte ah nin himhim anabelh hiam:

Huchi anahihleh, chi tuh ning, midangin ne hen; ahi, ka loua piang bulkalh khiak hi hen.

Ka lungtang numei lama khema anaoma, huan ka innveng kongkhaka ka nangaktak leh:

Huchi anahihtak leh ka jiin midan adingin an su henla, huan midangte amah tungah kun uhen.

Huchibang gitlouhna hoih hetlou lah ahi ngala; ahi, vaihawmmite gawt ding thulimlouhna ngei,

Siatna dinga kangbei leh, ka punna tengteng zungkalh ding mei hi ding lah ahi ngala.

Ka tunga phunna a neihlai ua, ka sikhapa hiam ka sikhanu hiam makhua namusita, nakhualsak lou ka hih leh;

Pathian a thohkhiak chiangin bang ka hihta dia? Thu a kan hun chiangin bangin ka dawngta dia?

Kei sula honbawlpan amah a bawl kei mo? Huan khatin a honbawl tuak ahi kei mo?

Migentheite a lunggulh uh ka napiak louha, ahihkeileh a vuaksuak dinga meithai mitte ka naomsak leh;

Ahihkeileh kei kiain ka an ka naneka, huaia pabeiin ananek kei leh;

(Ii, ka tuailai akipanin pa bang ka hi, ka kiangah ana khanglianta; huan ka nu sul akipan amah pipa ka nahita hi: )

Kuapeuh taksap jiaka mangthang hiam, ahihkeileh tasam khuhna neilou hiam ka namuh leh;

A kawngten kei a honna vualjawl louha, ka belam mula lumsaka ana om kei leh;

Kongpia panpihna ka muh jiaka pabeite siatna dinga ka khut ka nalik leh;

Huchi anahihleh, ka liang ka liangjang akipan kia henla, a guh akipan ka ban kitan hen.

Pathian akipan tuahsia lah keia dingin launa ahi ngala, A thupina lah ka tuak ngam ngal keia.

Dangkaeng lametpena ka nabawla, dangkaeng hoih kiangah, ka muanna na hi, ka nachihtaka;

Ka hauhna thupi jiaka hiam, ka khutin tam a nalam jiaka ka nakipaha;

A vak laia ni hiam, thupitaka pai pai kha hiam kana eta,

Huchia ka lungtang aguka khema a oma, ka kamin ka khut anatawptak aleh:

Hiai leng thulimlouhna vaihawmmite gawt ding ahi: tunga Pathian kianga najuauta hi ding ka hih jiakin.

Kei honmudah siatnaa ka nakipaha, ahihkeileh hoihlou a tunga a tun chianga ka nakipah uat aleh;

(Ka melma hamsiat ding leh a henna thum dingin ka kam ka nakhialsak kei);

Ka puaninaten, A ana kihihvah lou kua a oma, hon nachih kei ua leh;

(Kongzing ah mikhual ana giak ngei kei; khualzin adingin ka kongte ka nahongta)

Adam banga ka angsunga ka thulimlouhna na sela, ka tatlekna na khuh ka hiha,

Ajiak, mi tampi launa thupitak ka neihjiak ahiha, sungte hon muhdaina launa jiak a huchia dai didea, popawt lou ka nahih leh-

Aw, kei honja mi nei leng maw: (Ngaiin, hiaiah ka min gelh a om hi. Thil bangkim hihtheiin hondawng hen; ) huan ka galin a gelh khiat matna nei leng maw:

Chihtaktakin ka liang jangah ka po dinga; lallukhu bangin kei ah ka kan den ding hi.

A kiangah ka kal suan zah ka phuang dinga; lal bangin ka kiang naiah ka hoh ding hi.

Ka kam kei dema a kikoua, huaia lei lehsate a kah khawm uleh;

Sum loua huai gahte ka nanektaka, ahihkeileh huaia a neite a hinna uh ka natansak aleh:Buh hilouin loulingneite, barli-buh hilouin loubualte pou jaw hen.

Buh hilouin loulingneite, barli-buh hilouin loubualte pou jaw hen.

Huchibangin hiai mi thumte Job dawn a tawpta ua, amah mit a diktat a hih jiakin.

Huailaiin Buz mi Barakel tapa Elihu hehna a kuangkhia a, Ram innkuana mi: Job tungah a hehna kuangkhiaa, Pathian hizo loua amah siam a kitansak jiakin.

A lawm thumte tungah leng a hehna a kuangkhiaa, dawnna ding neiloua, hinapia lah Job a mohpaih jiak un.

Amah sanga a upatjawk jiak uh, Job kianga thugen dingin Elihuin a ngak a.

Huan hiai mi thumte kama dawnna a om kei chih a theihin, a hehna a kuangkhia hi.

Huchiin Buz mi Barakel tapa Elihuin a dawnga: Ka naupanga, huan nou na upa mahmah uh; huaijaikin ka daia, ka lungsim ka hon ensak ngam kei hi.

Huchiin ka chi, Niten thu a gen ding uh, huan kum tampiin pilna a sinsak ding hi.

Himahleh mihing lungsim a oma, huan Thilbangkimtheiin amaute theihsiamna a pia hi.

A pilte mi thupite ahi kei ua, vaihawmna theisiamte leng upate ahi sam kei uh.

Huaijiakin, hongngaikhia un; ken leng ka lungsim ka ensak ding, ka chi.

Ngai un, na thute uh ka ngaka, gen ding na zon khiak lai un, na thusutte uh ka ngaikhia.

Ahi, kon limsaka, huan, ngai un, kuamah Job thuzoh zou na om kei uh, ahihkeileh na lak uah, a thute dawng.

Pilna I muta, chi lou dingin pilvang un; mihing hilouin Pathianin amah a zou thei hi:

Aman lah kei siatna dingin a thute ahihkeia; ken leng nou thugente in amah ka dawng sam kei ding.

Lamdang asa ua, a dawng nawnta kei uh; gen ding thu khat leng a neikei uh.

Thu a genlouh jiak uh, a ding kinken ua, a dawn nawnlouh jiakin ka ngak diam?

Ken leng ka dawn ding ka dong hia, ka lungsim ka ensak sam ding hi.

Thuin lah ka dim ngala; ka sunga khain a honsawl teitei hi.

Ngai un, ka gilpi pawtkhiakna neilou uain bang ahi; khuainulhaite bangin puakjak dingin mansain a om hi.

Ka halh theihna dingin, ka pau ding; ka mukte ka hong dinga ka dawng ding hi.

Mihing himhim mihinna honzahtaksak kei un, ka hon ngen hi; kuamah kiangah leng maitangphatna min ka pe ding hi.Maitangphatna minte piak ding ka thei ngal keia; huchilouinjaw kei a honla zok ding hi.

Maitangphatna minte piak ding ka thei ngal keia; huchilouinjaw kei a honla zok ding hi.

Akoi abang hileh, Job, ka honngen hi, thugen ja inla ka thugen tengteng ngaikhiain.

Ngaiin, tuni, ka kam ka kaa, ka kamin ka pau hi.

Ka thuten ka lungtang dikna a genkhe ding uh; huan ka mukten a theih ngei uh chihtaktakin a gen ding uhi.

Pathian Khain a honbawla huan Thil bangkim hihthei huin hinna a honpai hi.

Na theih leh, hondawng in; ka maah na thute a kizomzomin koihin, na panna ah ding in.

Ngaiin, nang bangin Pathian lamah ka om hi: kei leng tungmana bawl ka hi.

Ngaiin, ka lauhuainain nang a honlausak kei ding, ka hahkatna leng na tungah a gik kei ding hi.

Chihtaktakin ka jakin na pautaa, huan na thute ging ka zata hi.

Ka siang hi, tatlekna bei; ka hoiha, kei ah thulimlouhna leng a om kei, chiin:

Ngaiin, kei demna ding a jiak a mua melmain a honsimta hi;

Ka khete kol a bunsaka, ka lampite tengteng achiamteh hi.

Ngaiin, ka hondawng ding, hiai na diklouhna ah; mihing sangin lah Pathian a lianzo ngala.

Bangdia amah dou na hia, Ka thute a bangmahmah lah a dawng kei ding, chiin?

Pathianin lah khatvei a gena, ahi, nihvei, mihingin limsak kei mahleh.

Jana mang ah, mengmuhna ah, mite tunga ihmut kip a kiak laiin, lupna tunga ihmut laite in;

Huailaiin mite bilte a honga, vaunatein amau a hihlaua,

Huchia a thiltup akipana mihing a lakkika, mihing a kipana kisaktheihna a satkhiak theihna dingin;

Aman kokhuk akipan a kha a kep kik saka, namsaua kipan a hinna.

A lupna tungah natnaa sawiin leng a om, huan a guhtea kinakna omgige tohin:

Huchiin a hinnain tanghou a kiha, huan a khain an lim.

Asa a tum manga, huchiin muh theihin a om kei; huan a kimulou a guhte hongdawk khia uh.

A hi, a kha kokhuk kiangah a hong naia, huan a hinna hihsemite kiangah.

A kianga angel, kamlet, sang khat laka khat, mihing kianga amah adia dik bang ahia chih etsakding a om leh;

Huchia amah adinga chingtheia, Kokhuka pai sukna akipan amahsuaktasak un, tatna ka muta,

A sa naupanga sangin nou jaw hen; a tuailai nite lamah kik nawnta hen, chi angel.

Pathian kiangah a thuma, huan amah dingin deihsak theihin a om hi; huchiin nuamna toh a mai a mua: huan a diktatna a kiangah a pe nawn hi.

Mite maah la asa a, Ka khialta a, a dik kana hekkawia thukin ka om kei!

Kokhuk sunga paisukna akipan ka kha a tanta a, huan ka hinna vakna a muta ding hi, achia.

Ngaiin, hiai thilte tengteng Pathianin, mihing lak ah hihna, nihvei, ahi thumvei.

Kokhuk akipan a kha pi kik dingin, huchia mihing vaknaa hihvaka a om theihna dingin.

Chiamteh hoihin, Aw Job, honngaikhia in: dai inla, thu ka gen ding.

Gending mahmah na neih leh, hon dawng in: Pau in, siam hontansak lah ka ut ngala.Na neih kei leh, kei honngaikhia in: dai inla pilna ka honsinsak ding hi.

Na neih kei leh, kei honngaikhia in: dai inla pilna ka honsinsak ding hi.

Huailouin Elihuin a dawnga, hichiin a chi a:

Ka thute ja un, nou mi pilte; nou theihna neite, bil hondoh un.

Dangtawngin ann achiam bangin, bilin thute a enchain hi.

A dik eia dingin I tel ding uh; I lak ua hoih bang ahia I thei ding uh.

Job in lah, Ka dika, huan Pathianin ka dikna a la mang, a chi ngala:

Ka dikna huchin hita mahleh juautheia sim ka hia; tatlekna bei himahleng, ka liamna hihdam theihlouh ahi.

Muhsitna tui banga dawn bei, Job bang mihing kua ahia?

Thulimlou nasemmite toh a hona pai, mi giloute toh om khawmmi.

Aman lah, Pathian laka ka kipahna ding bangmah ka lohtak kei, a chi ngala.

Huaijiakin, nou theisiammite, honngaikhia un: Pathianin, gilou bangchiin a hih ngei mahmah dia; huan Thilbangkimhihtheiin thulimlou bangchiin a hih mahmah dia.

Aman lah mihing thilhih amah kianga pe kik ding hi ngala, huan mi chiteng a lampite kianga pekik ding ahi.

A hi, mohkhuksakna thu ah, Pathianin giloutakin a hih kei dia, Thilbangkimhihtheiin leng vaihawmna a hihse sam kei ding hi.

Kuan ahia amah leitunga heututna pia? Ahihkeileh khovel pumpi kuan ahia a thua koih?

Mihing tunga a lungtang a ngaka, amah lama a kha leh a hu a lakkhawm leh;

Sa tengteng a mangthang khawm ding ua, huan mihing leivui a suak nawn ding hi.

Theihsiamna na neih leh, hiai ja in: ka thute aw ngaikhia in.

Mi thudik huaiin vai a hawm ding hia? Huan dik leh hat amah na mohpaih ding hia?

Kumpipa kianga, Na hoih kei chih a kilawm hia? Ahihkeileh miliante kianga, Na gilou uh? Chih.

Mi lalte mi hinna zahtak loua, mi genthei sanga mi hausate limsak zote kianga chih kilawm sem lou ding hia? Amaute tengteng lah a khut nasep ahi ngal ua.

Mitphiat kallouin a si ua jankim lai mahmahin; mite a ling ua a pai mang ua, mihingkhut hilouin mihatte lakmangin a om uhi.

A mitte lah mihing lampite tungah a oma, huan a painate tengteng a mu hi.

Thulimlou nasemmite buk theihna ding, khomial a omkei a, sihna limliap leng a om sam kei hi.

Vaihawmna a Pathian maa a pai dingin, mihing a ngaihtuah lailai a kiphamoh ngal keia.

Lamte theihphak vual louhin aman mi hatte a hihjan veka, a mun uah midangte a tungkhia hi.

Huaijiakin a nasepte uh a thei hi; janin amau a lumleta, huchiin hihsiatin a om uhi.

Midang mitmuh mahmahin mi giloute bangin amau a gawt hi.

Amah zuihna akipan a pialkhiak ua, a lampitea a koi mahmah a limsaklouh jiakun:

Huchiin genthei kahna a kiang tung dingin a bawl ua, huan gimthuak kahna a ja hi.

Amah napau kei leh, huchiin kuan siamlouh a tangsak dia? huan aman a mai a sel leh, huchiin amah kuan a mu thei dia? namte kianga hih hiam, ahihkeileh, mihing kianga hih hiam zong a kibang hi:

Huchia pathiantheilou min vai a hawm louha, huchia mite thanga awksak ding kuamah a omlouhna dingin.

Kuapeuhin Pathian kiangah, Gawtna ka thuakta, ka gilou nawn kei ding,

Ka muh louh nang honsinsak in: gilou ka hih aleh ka hih nawn kei ding, a chi uhia?

A thukna na deih bangin a om diam, huchia na nial? Kei hilouin, nang na tel ngeingei ding lah ahi ngala.

Theisiammiten ka kiangah, A hi, a chi ding uh, a honja mi pil chitengin,

Jobin theihna beiin thu a gena, huan a thute pilna bei ahi uh.

Mihaite banga a dawnna thu ah, a tawp chiangin Job tungtang ngaihtuah le uh.Aman lah a khelhna ah helna a behlapa, I lak uah a khut a benga, Pathian kalhin a thute a pungsakta ngala.

Aman lah a khelhna ah helna a behlapa, I lak uah a khut a benga, Pathian kalhin a thute a pungsakta ngala.

Huailouin Elihuin a dawnga, hichiin a chi a:

Hiai na dikna hiin na ngaihtuah hia, ahihkeileh, keia mawng ahi, Pathian mai ah, na chi hia,

Kei adingin bang phattuamna a om dia? huan. Ka khelh nak sal aleh, bang phattuamna ka neia? na chih?

Nang, leh na kianga na lawmte ka hondawng ding.

Vante lam en inla, mu in; huan vante, nang sanga sangjaw, en in.

Na hihkhelh leh, amah dema bang hih na hia? Huan na tatleknate punsak hileh, amah tunga bang hih na hia?

Daktat hi lechin, amah bang na pia a? Ahihkeileh na khut akipan bang a mu a?

Na gitlouhnain mi bang bangin a hihna thei a; huan na diktatnain mihing tapa a hih hampha thei hi.

Nuaisiahna tam mahmah jiakin a kikou khia ua; mi hat ban jiakin panpih deihin a kikou uh.

Himahleh kuamahin, Jan chia late pia, Pathian kei Bawlpa koia om ahia;

Leia gamsate sanga honsinsak tamjaw leh, vana vasate sanga hon pilsakjaw? A chi kei uh.

Huailaiah a kikou ua, himahleh, mi gilou kisaktheihna jiakin, kuamahin dawnna a pe kei uh.

Chihtaktakin Pathianin bangmahlou aza kei dia, Thil bangkim hihtheiin leng a limsak sak kei ding hi.

Nang ngial houh: Amah ka mu kei, a thu maah a om, amah ka ngak hi, na chih vial.

Himahleh tuin, heha a veh louha, kiotsakna leng a limsaklouin jiakin;Huaijiakin Jobin bangmahlouin a kam a ka ahi; theihna beiin thu a tamsak ahi.

Huaijiakin Jobin bangmahlouin a kam a ka ahi; theihna beiin thu a tamsak ahi.

Elihu mahin a gen jela, huchiin a chi a:

Honna thuakzou zek inla, huan ka hon ensak ding; Pathian sikin lah banghiam khat gending ka nei ngala.

Gamla akipan ka theihna kon la dinga, huan diktatna kei Bawlpa tungah ka nga ding hi.

Diktakin ka thute lah juau ahi ngal keia: hoihkim khat lah ka kiangah a om hi.

Ngaiin, Pathianin thil a hihtheia, kuamah a musit kei: theihsiamna hatna ah thil a hihthei hi.

Gilou hinna a hawi keia: himahleh gimthuakte kiangah a dikna uh a pia hi.

Mi diktat akipan a mit a la kik keia: himahleh laltutphah tunga kumpipa toh amau khantawnin a koiha, huchiin hihletin a om uhi.

Huan sikkhautea gaka a om ua, gimthuakna guitea laka a om uleh;

Huchiin a thilhih uh amau a ensaka, huan a tatlekna uh, huchia kisatheitaka a na omna uh.

Thuhilhna lamah a bil uh leng a honsaka, thulimlouhna akipan kik dingin thu a pia hi.

Amah thu a ngaihkhiak ua, a na a sep uh leh, a nite uh hausaknain a hihbei ding ua, a kumte uh kipahnain.

Himahleh a ngaihkhiak kei ua leh, namsauin a mangthang ding ua, huan theihna beiin a si ding uh.

Himahleh amau lungtanga pathianilimsaklouhnaten hehna a khol khawm uhi: amau a hen laiin panpih deihin a kikou kei uh.

Tuailaiin a si ua, siangloute lakah a hinna uh a mangthang hi.

A gimthuaknain gimthuakte a suaktasaka, nuaisiah na ah a bil uh a honsak hi.

A hi, gakchihna om louhna mun, mun lian lamah dahna akipan nang a honpi mang ta ding a; huan na donkan tunga kilui thaunain a dimta ding hi.

Himahleh giloute vaihawmnain na dima: vaihawmna leh diktatnain nang nang a honlen hi.

Thangpaihna a om jiakin, pilvangin huchilouin jaw na kichinnain nang a honpi mangkha ding hi; tatna letnain leng nang honpialsak sam kei hen.

Dahna a na om louhna dingin, na hauhsaknate a hun diam, ahihkeileh na hatna thilhihtheihna tengteng?

Mite tengteng a mun ua sat khiaka a om lai un, jan deih ken.

Pilvangin, gilou limsak ken: gimthuakna sangin hiai lah na telta ngala.

Ngaiin, Pathianin a thilhihtheihnain sangtakin a hih: amah bang sinsakmi kua ahia?

Kuan amah a lampi thu a piaa? ahihkeileh, kuan, Diklouhna na bawlta, a chi thei dia?

Miten la a asak uh, a thilhih hihlian dingin theigige in.

Huaiah mite tengteng a en ua; huai mihing in gamla pi ah a mu hi.

Ngaiin, Pathian a liana, amah I theikei uh: a kumte zah zontheih ahi kei.

Tui takte aman a tawi khin ngala, huai a tuihu akipan vuah a ju:

Huai vanten a sungkhe suk ua, tampipiin mihing tungah a tak.

A hi, meipi kiphahte, a in vanpigingte kuamahmahin a theisiam dia?

Ngaiin, a kimah a khovak a jaka: huan tuipi nuai a tuam hi.

Hiaitein lah mite a vaihawmsak ngala; an tampi a pia hi.

Khophiain a khutte a tuama; huan chiamtehna khoh dingin thu a pia hi.Huai husain a tungtang thu a gena, ganhonten leng hongkuan tou huihpi tungtang thu.

Huai husain a tungtang thu a gena, ganhonten leng hongkuan tou huihpi tungtang thu.

Hiaiah leng ka lungtang a linga, a mun akipan suanin a om hi.

A awging leh a kam akipana ging paikhia nouten ngaikhia un.

Van pumpi nuaiah huai tuh a sawlkhiaa, huan a khophia lei tawpnate tannin.

Huai zohin aw a kikoua; a lalna awin vanpi a gingsaka: huan a aw jaka a om chiangin amau a len kei.

Pathianin a awin lamdangtakin vanpi a gingsaka; I theih theihlouh, thil thupite a hih jel hi.

Aman lah vuk kiangah, Lei ah kiain, a chi ngala; huchi mahbangin vuah malphin kiangah leng.

Mi chiteng khut a tuambita; huchia a bawlsa mite tengtengin huai a theihtheihna ding un.

Huailaiin gamsate a mun uah a lut ua, huan a kuate uah a om nilouh uh.

Simlam dantan akipan huihpi a honga: mallam akipan khovot.

Pathian huin tuikhal piak ahi: huan tuite nakna hihhaksatin a om.

A hi, meipi nawnna a posaka; a khophia meipi a phalhsak hi:

Huan amah piin a kivial heihei ua, tentheihna khovel maikaih tunga amaute thu a piak peuhmah a hihna ding un: S

Bawlhoihna ding hiam, a gam ading hiam, ahihkeileh chitna ding hiama, a hon paisakna ah.

Hiai ngaikhiain, Aw Job: Ding kinken inla, Pathian thilhih lamdangte ngaihtuah in.

Amaute tunga Pathianin a thupiak a koiha, a meipi khophia a tansak dan na thei hia?

Meipite kibukdiknate, amah theihna hoihkim thilhih lamdangte na thei hia?

Sim huih jiaka lei a daih sisip laia, na puansilhte a lum dan?

Amah toh van, suntawm limlang banga khauh, na phalh thei hia?

A kianga ka gen ding uh hon sinsak in; mialna jiakin lah ka thugen ding uh ka gelkhol theikei ua.

Thu ka gen ding chih amah hilh ding a diam? ahihkeileh mihingin valh khita om ut ding a diam?

Huchiin miten vantea om vak khovak a mu kei ua: himahleh huih a nunga, amaute a hihsiang hi.

Mal akipanin dangkaenga thupi a hongpaia: Pathianin lalna kihtakhuai a tungah a nei hi.

Thil bangkim hihthei thu ahihleh, mu theikei hang: thilhihtheihna ah a thupi pet mah hi: Huan vaihawmna leh dikna hauhna ah gim a thuaksak kei ding hi.Huaijiakin miten amah a lau ua: lungtanga pil kuamahmah a limsak kei hi.

Huaijiakin miten amah a lau ua: lungtanga pil kuamahmah a limsak kei hi.

Huchiin pingpei akipanin TOUPAN job a dawnga, hichiin a chi a:

Theihna bei thutea thuhilh hihmial hiai kua ahia?

Kipasalsakin tuin na kawng gakin; Hondong ding ka hi, ka kianga na gen ding ahi.

Lei kingaknate ka koih laiin nang koiah na oma? Phuangin, theihsiamna nei na hih leh.

Huaia tehnate kua bawl ahi, thei na hih leh! ahihkeileh a tunga tehna khau kua zan ahia?

A nuai suangphumte kua phum ahia, ahihkeileh huai a ninga suang kua koih ahia;

Jingsang aksiten la a sak khawm ua, Pathian tapate tengteng kipah jiaka a kikou lai un?

Ahihkeileh kuan kongkhaktein tuipite a khak binga, gil akipan hongpawt khia banga, a hongpuahkhiak laiin.

Huaia puansilh meipi leh, khomial bikbek, huaia dinga tuamna puan ka bawla,

Huaia dinga ka thupiak bawla, kalhnate leh kongkhakte koiha,

Hiaitan na hongpai ding, himahleh a ban hilouin, ka chiha; huan hiailaiah a kiuangsak na tuikihotte lettangin a om ding uh, ka chih laiin?

Na nite a kipat nungsiah jingsang thu na piain, phalvak a mun thei dingin na bawlta hia;

Huchia lei tawpnate a mat theiha, huai akipana gilou sinkhiak a hihtheihna dingin?

Chiamtehna nuaia tungmanlei bangin mel a kikhenga; huan puansilh bangin thil tengteng ze neiin a dingkhia hi:

Huan gilou akipana a khovak uh lettang sak ahia, a ban liksang uh a kitan hi.

Tuipi nakte sungah na lut ta hia? Ahihkeileh tuithuk tawpna ah na paita hia?

Sihna kongpite na kiangah taklatin a omta hia? Ahihkeileh sihna limliap kongpite na muta hia?

Lei zatdan na thei siamte hia? Phuang in, huai na theih vek leh.

Khovak tenna zotna lampi koiah a oma, huan khomial omna mun koisan ahia;

Huchia huai a gamgi tana na tonpi theiha, huchia huai a in tana lampite na theihna dingin?

Thei mah niteh maw, huailaia piangta lah hi ding china? Hhuan na nite tamdan lah thupi mahmah hi dia!

Vuk koihkhawmna ah na lut ngeita hia, ahihkeileh gial koihkawm na muta hia.

Buaina hun adia ka sit, kidou leh kisat nia dia?

Bang lampi ah ahia khovak a kikhen a, ahihkeileh leitunga suahlam huih a dalhjak?

Kuan ahia tui tampi luanna dinga tuilam khuak, ahihkeileh kekkia adia lampi;

Mihing om louhna mun gam tunga vuah zusak dingin; mihing om louhna, gamdai tungah;

Lei kisia leh segawpsa lungkimsak ding; loupa hing nou khangkhesak ding?

Vuahin pa a nei hia? Ahihkeileh daitui takte kua suan ahia?

Kua gil akipana tuikhal hongpai ahia? Huan van daituikhal ngou, kua suahsak ahia?

Suang bangin tuite a taka, tuithuk maite a khal hi.

Siguk khaute na khihkhawm thei hia, ahihkeileh zuheisuktun khaute na phel thei hia?

Amah hunbi ah Aksilamvaka chiamtehnate na pikhe thei hia? Ahihkeileh Jangkhua leh tate na pi thei hia?

Van thusehte na thei hia? Huai lalna lei ah na dingkhesak thei diam?

Nang tui tampiin a khuh theihna dingin meipite kiangah na aw na suahkhe thei diam?

A pai theihna ding un khophiate na sawl khe thei hia?

Sunggil lamah pilna kuan a koiha? Ahihkeileh lungsim kiangah kuan theihsiamna a pia a?

Pilnain kuan meipite a sim thei dia? Ahihkeileh kuan van tuithawlte a bo khe thei dia.

A lompia leivui a luana, a sakte a kimat khawm ngiungeu lai un?

Humpinelkai adingin samat na betsak ding hia? Ahihkeileh humpinelkai noute gilkial na hihdam ding hia?

A kua ua a boh ua, buk dinga a bukna mun ua a om nilouh lai un?Vaak ading a an kuan a pia a? A noute Pathian kianga kikou a ann duh mana a vakvak lai un?

Vaak ading a an kuan a pia a? A noute Pathian kianga kikou a ann duh mana a vakvak lai un?

Suangpia gam sathakten a suahsak hun uh na thei hia? ahihkeileh nou a neih lai uh na chiamteh thei hia?

A chinsak zah khate na sim thei hia? Ahihkeileh a suahsak hun na thei hia?

A kun ua, a tate uh a suang uh, a lungkhamnate uh a pai khia uhi.

A tate uh deihhuai takin a om ua, gamlak ah a khang lian ua; a kuankhia ua, a hongkik nawn kei uh.

Kuan gam sabengtung a khah khiaa? Ahihkeileh kuan gam sabengtung honte a phel a?

Loupa gam a inin ka bawla, huan chi gam a tenna munin;

Khopi buai nuanua a musita, hawlmi kikounate leng a za sam kei hi.

Mual dungte a gantatna mun ahia, huan thilhing chiteng a zong hi.

Na na sem gingin gam bawngtal a lungkim diam? Ahihkeileh na anpiakna kiangah a omgige diam?

Leilehna ah khauin gam bawngtal na khih thei diam? Ahihkeileh na nungah guamte a toktam diam?

A hatna a thupi jiakin, amah na muang diam? Ahihkeileh a kiangah na sepgimna na khiat diam?

Na chi in a hontuta, na buhphuala buh a kaihkhawm theihna dingin amah na muang diam?

Ostrik-va kha kisathei takin a kijapa; himahleh a khavengte leh a multe a migi hia?

A tuite lah leitungah a nusiaa, leivui ah a lumsaka,

Khein a sikkham thei chih a mangngilha, ahihkeileh gamsain a sikgawp thei chih.

Amaha hi lou bangin, a noute siatna dingin a khauha: a sep gimna bangmahlou hita zongleh, a lau kei hi:

Pathian in pilna a ngolhsak jiakin, theihsiamna leng a pe sam kei hi.

Tungsang lama a kitawi sang chiangin, sakol leh a tungtuangmi a nuihsan.

Sakol a hatna na piak hia? Mul nemin a ngawng na tuam hia?

Khaukhup bangin na tawmsak hia? A hamna thupi a lauhuai ve.

Guam ah lei a tuana, a hatna ah a kipaka: mi kigalvante tuak dingin a pai khia.

Lauhuai a nuihsana, a lungdong keia; namsau leng a nungngat sam kei hi.

Amah ah thalbawm a ging lenglenga, teipi tezelzel leh chiangzum.

Kihtakhuaina leh hehnain lei a nawmvalha; Pengkul aw ahi chih leng a um sam kei hi.

Pengkul a gin tengin, Hah; a chi a, huan kidouna, heutute vanpiging leh kikou, gamlapi apan a thei.

Na pilnain mu sangpi a lengsakin, a khate simlamah a phalh hia?

Nang thupiakin muvanlai a tunglen in, tungsang ah a bu a sep hia?

Suangpi tungah a tenga, huailaiah giahna a neia, suangpi hengte ah leh kulh muanhuaite ah.

Huai akipanin matding a mu a; a miten gamla ah a mu hi.A nouten leng sisan a tep bei ua: huan thah omna mun ah, huailaiah a om hi.

A nouten leng sisan a tep bei ua: huan thah omna mun ah, huailaiah a om hi.

Huailouin Toupan Job a dawnga, hichiin a chi a:

Kuapeuh awlmoh neilou in thil bangkim hihthei a kiselpih diam? Kuapeuh Pathian kiselpih, huai tuh amah dawngsak un.

Huan Jobin Toupa a dawnga, hichiin a chi a.:

Ngaiin, Bangmah ka hi keia; bang ka hon dawng dia? Ka kam ah ka khut ka koih.

Khatvei ka pauta a, ka dawng kei ding; ahi nihvei, himahleh ka pau nawn kei ding.

Huchiin Toupan Job pingpei akipanin a dawnga, hichiin a chi a:

Ki pasal sakin tuin na kawng gak in: nang akipan ka honphut dia, kei kiangah na honphuang ding hi.

Ka vaihawmna nangawn bangmahloua koih ding na hi hia? Siam na tantheihna dia, kei honmohpaih ding na hi hia?

Ahihkeileh Pathian bangin ban na nei hia? Huan amah bangin awin vanpi na gingsak thei hia?

Tuin nang hoihkim leh zahnain kijem in; zahna leh lalnain kivan in.

Na hehna dimlette sungkhia in; huan mi chih kisatheite en inla, hihniam in.

Mi chih kisathei en inla, kainiam in; huan a dinna uah migiloute tuanchil in.

Leivui ah amaute selkhawm in; mun daiah a mai uh kan in.

Huchiin na khut taklamin nang a hondam thei chih ka honthei ding.

Nang kon siam banga ka siam, tuin en in chingpi; bawngtal bangin loupa a ne.

En in tuin, a hatna a kawngah a oma, a gilpi thate ah a hatna a om hi.

Sidar sing bangin a mei a tangsaka: a pheite thaguite phankhawmin a om hi.

A guhte dal lawng ahi uh; a guh leh tangte sik tawn bang ahi.

Pathian lampitea a pipen ahi: amah bawlpa kiain a namsau amah kiang lam naih dingin a bawl thei ding.

Chihtaktakin mualten an amah a puak ua; gamsate tengteng mawlna munah.

Tuilili singte nuaiah a luma, pumpeng mun dai leh gam nawng ah.

Tuilili singten amah a limun a khuh ua; luite singnahkaiten amah a tuam kimvel vek.

Ngaiin, lui a dimlet leh, a ling kei: a kam chiang pha hialin Jordan khang mahleh, a muang hi.A kiven laiin kuapeuhin amah sikkawiin a man diam, ahihkeileh thangin a nak a vut pailet diam?

A kiven laiin kuapeuhin amah sikkawiin a man diam, ahihkeileh thangin a nak a vut pailet diam?

Ngakuaiin Ole na kai khe thei diam? Ahihkeileh a khauin a lei na sawm tum thei diam?

A nak sungah khauhual na thun thei diam? Ahihkeileh sikkawiin a haijek na vut pailet thei diam?

Na kiangah thil nget tampi a bawl diam? Ahihkeileh na kiangah thu nemte a gen diam?

Khantawna dingin amah sikha dia na lak theihna dingin, nang toh thukhun a bawl diam?

Vasa toh bangin amah toh na mawl diam? Ahihkeileh na sikhanute adingin amah na hen diam?

Ngamanmi pawlten amah sumsinna dingin a bawl ding uam? Sumsinmite lakah amah a juak ding uam?

Sik lenin a vun na dimsak thei diam, ahihkeileh a lu ngalingte in?

A tungah na khut koih in; kidouna theigigein, huchibangin na hih nawn kei hial ding.

Ngaiin, amah lametna bangmahlou ahi: amah muh mahmahin mi paihkhiakin a om kei dia hia?

Amah hihhalh ngam khop dingin kuamah a hang kei: ka maa ding kua ahia leh?

Amah ka dit ding, ka kiangah kuan a pe masa aleh? Van pumpi nuaia om peuhmah keia ahi.

A guhlehtang thu ah ka dai kei ding, a hatna mahmah leh, a pum kilawmna ah leng.

A paunsilh tungnung kuan a suahsak thei dia? A kamkaih thuahnih sungah kua hongpai dia?

A mai kongkhakte kuan a hong thei dia? A ha kimvelah lauhauina a om.

A lip hattakte a kisaktheihna ahi, suai khaksa tobangin khak khum ahi.

A kal ua huihzam a lut theihlouhna dingin, khatin a dang a naih mahmah.

Khat leh a dang a kizom ua, a kisoumat ua, huchiin khentheihlouhin a om uh.

A hahchhiauten a vaksak zola, a mitte jingsang mitvunte bang ahi.

A kam akipanin meisel kuangte a pawt khia, meiekte a tawm khia hi.

A nakvangte akipanin meikhu a pawta, hal siangna bel leh chiklak loupa kang akipan bangin.

A huin suang a kuangsaka, a kam akipanin meikuang a pawt khia hi.

A ngawng ah hatna a om gigea, a maah lauhuaina a lam hi.

Asa thate a kizom khawm ua: a tungah a kip ua; hihtat theihin a om kei uh.

A lungtang suang bangin a kip a; ahi, buhgawina suang nuainungjaw bang ahi.

Amah a thoh chiangin, mihatte a lau uh: lauluatna jiakin omdan ding a theikei uh.

Min amah namsauin sat leh, a phatuam kei hi; teipi leng, thal leng, sikmuk zum leng.

Buhpawl bangin sik a sima, sing muatsa bangin dal.

Thalin amah a taisak theikei ding: amah lakah vaisuanglot suangte buhpawl a suak hi.

Khetbukte buhpawl banga sim ahi: chiangzuma khohte a nuihsan hi.

A nuai lampangte belpei hiam ahi: buannawi tungah buh khetna chiang bangin a kiphah.

Tuithuk bel banga sou dingin a bawla: tuipi nuhtheih bawm bangin a bawl hi.

A nungah lampi a vangsaka; tuithuk samkang min a sa ding hi.

Lei tungah amah bang a om keia, lau loua bawl.A sang peuh thil chiteng a ena: kisathei tapate tengteng tungah kumpipa ahi.

A sang peuh thil chiteng a ena: kisathei tapate tengteng tungah kumpipa ahi.

Huchiin Jobin TOUPA a dawnga, hichiin a chi a:

Thil bangkim na hih thei chih leh nang thiltup kham theih ahi kei chih ka thei hi.

Hiai thuhilhna theihna telloua sel kua ahia? Huaijiakin ka theihsiamlouh ka na genkhiaa, ka theih louh, kei adia lamdang lua thilte.

Ja in, ka honngen hi, huan ka pau ding; nang ka hon phut ding, kei lamah nang phuangin, nonchia.

Ka bil jaknain nang ka honjaa; himahleh tuin ka mitin nang a mu a,

Huaijiakin ka kikiha, leivui leh meivu ah ka kisik hi.

Huan hichi ahia, huchia TOUPAN Job kianga hiai thute a gen khitin, TOUPAN Elipha Teman mi kiangah, Ka hehna nang tung leh, na lawm nihte tungah a kuang ka sikha Job banga nouten ka tanchiin thildik na gen louh jiak un, a chi a.

Huaijiakin tuin, bawngtal sagih leh belamtal sagih la unla ka sikha Job kiangah hoh unla, noua dingin halmang thillat lan un; huchiin ka sikha Job nou adingin a thum dinga; amah vangin ka sang dia, huchiin na haina uh dungjuiin na tunguah ka hih kei ding; ka sikha Job bangin lah ka tanchin thildik na gen ngal kei ua, chiin.

Huchiin Elipha Teman mi leh Bildan Sua mi leh Zophar Naaman mi a kuanta ua, amau TOUPAN thu a piak bangin a hihta uhi: huan TOUPAN Job a sangta hi.

Huan TOUPAN Job koltanna, a lawmte adia thu a nget laiin a heita a: huchiin TOUPAN Job a maa a neih zahnih a peta hi.

Huailaiin a kiangah, a unaute tengteng leh, a sanggamnute tengteng leh, tumalama a meltheihte hisa tengteng leh, a in sunga tanghou amah toh nete a hongpai ua: amah a nem ua, a tunga TOUPAN hoihlou a tunsak tengteng tungtang thu ah amah a lungmuang uh: michiin leng amah sum nengneng leh, mi chihin dangkaeng zungbuh a pia uhi.

Huchiin TOUPAN Job tawpna lam a kipatna lam sangin a nak vualjawl jawa: huchiin belam sang sawmleh li, leh sangawngsau sang guk leh bawngtal sang khat leh, sabengtungnu sang khat a neia.

Tapa sagih leh tanu thum leng a nei a.

Huan a masapen, Jemima a chi a; a nihna min, Kezia; a thumna min, Keren-happuk.

Huan gamsung pumpi ah Job tanute banga melhoih a om kei uhi: huan a pa un a unaute uh lakah goutan amau a pia.

Huai nungin Job bel kum ja leh sawmli a dama, a tapate, leh a tapate tapate, khang li nasan a mu hi.Huchiin Job a sita a, a tek mahmah, nite a tam mahmah ngala.

Huchiin Job a sita a, a tek mahmah, nite a tam mahmah ngala.