ᓃᓐ ᒎᑦ ᒋᓴᔅ X ᐅᑕᓄᑮᐋᑲᓇᓐ᙮ ᒌᒥᔅ ᐃᔑᓂᑳᓱ ᓃᒋᑭᐌᓯ᙮ ᑭᑑᔑᐲᐊᒪᐎᓂᓂᒻ ᑲᑭᓇ ᑮᓇᐙ ᑳᔭᑐᒥᓀᒃ, ᑳᓵᑭᐃᓀᒃ ᑲᔦ ᑭᔐᒪᓂᑑ ᑳᐅᔫᓯᒥᓐᒡ, ᒋᓴᔅ X ᐃᑕᔥ ᑳᑲᓇᐌᓂᒥᓀᒃ᙮

ᒦᑕᔥ ᐃᐃ ᐁᔑᐸᑯᓭᓂᒧᔮᓐ ᒨᔕᑭᑯ ᒋᑰᐹᑌᓂᒥᓀᒃ ᑭᔐᒪᓂᑑ ᒋᐊᓂᑳᑌᑖᑾᒃ ᑭᐱᓵᓀᑕᒧᐎᓂᐙ ᒫᓄ ᑲᔦ ᒋᐊᓂᑳᒋᓵᑭᐃᑎᔦᒃ᙮

ᑳᓵᑭᐃᓇᑰᒃ, ᐋᐱᒋ ᐅᔕ ᐌᐌᓂ ᓂᑮᑲᑴᐃᔑᒋᑫ ᒋᐅᔑᐲᐊᒪᐎᓇᑰᒃ ᑭᐱᒫᒋᐃᑰᐎᓂᓈᓐ ᐅᒋ ᑳᒫᒪᐎᑑᔭᕽ᙮ ᓅᑯᒻ ᐃᑕᔥ ᓂᑮᐃᓇᒪᒋᐞ ᒋᐅᔑᐲᐊᒪᐎᓇᑰᒃ ᐁᑳᒋᑲᓅᓂᓇᑰᒃ ᑮᓇᐙ ᒋᑲᑴᓈᑕᒫᑕᒣᒃ ᐃᐃ ᑌᐺᑕᒧᐎᓐ ᑭᔐᒪᓂᑑ ᑳᑮᒦᓈᒡ ᐅᐱᒫᑎᓰᒪᐞ᙮

ᐊᓂᑕ ᐁᓇᒥᐁᐙᑎᓯᓯᒀ ᐅᔕ ᑭᑮᐲᑎᑳᑯᓈᓂᒃ ᐁᑮᑭᑫᑖᑯᓯᓯᒀ ᐁᑎᓄᐎᐙᒡ᙮ ᒦᐗᒃ ᐃᑕᔥ ᐃᐃ ᑳᑮᑴᑭᓇᒧᐙᒡ ᐁᓈᑐᑌᓂᒃ ᑭᔐᒪᓂᑑᓐ ᐅᑭᔐᐙᑎᓯᐎᓂᓂ, ᒦᔥ ᒣᔥᑾᒡ ᐁᓈᐸᒋᑑᐙᒡ ᐱᓵᓐ ᑫᐅᒋᑑᑕᒧᐙᒡ ᓅᒋᑯ ᐅᑎᔑᒋᑫᐎᓂᐙᓐ᙮ ᒦᐗᒃ ᐃᑕᔥ ᐃᑭ ᑳᔮᓇᐌᓂᒫᐙᒡ ᒋᓴᔅ Xᑕᓐ ᑳᒥᒋᐯᔑᑯᓂᒡ ᑭᑑᑭᒫᒥᓈᓂᓐ, ᑳᑎᐯᓂᒥᒥᓇᕽ ᑲᔦ᙮ ᒣᐎᔕ ᐄᑐᒃ ᑮᐃᔑᐲᐃᑳᑌᑯᐸᓐ ᐋᓃᓐ ᑫᔑᑲᒀᑕᑭᐃᑣ᙮

ᐋᓇᐐᓐ ᐋᔕ ᑲᑭᓇ ᐁᑭᑫᑕᒣᒃ ᐅᐅ, ᔖᑰᒡ ᐃᑕᔥ ᓂᒥᓴᐌᑖᓐ ᒋᒫᒥᑲᐎᒥᓂᓇᑰᒃ ᑳᑎᐯᒋᑫᒡ ᐁᑮᐅᒋᔖᐾᐋᒡ ᐅᐱᒫᑎᓰᒪᐞ ᐌᑎ ᐄᒋᐸᑮᕽ ᑮᓵᑭᒋᐎᓈᒡ᙮ ᓈᓈᑫ ᑕᔥ ᐅᑮᓂᔑᐙᓈᒋᐋᐞ ᐃᐃ ᑳᑮᑌᐺᔦᑕᓯᓂᒃ᙮

ᒫᒥᑲᐎᓄᑕᐎᑾᒃ ᐃᑕᔥ ᐁᒐᓬᐊᒃ ᑳᑮᐃᔑᑕᔒᑫᓯᒀ ᑳᑮᐃᔑᒦᓂᑣᐸᓐ ᒋᔑᑎᐯᒋᑫᐙᒡ, ᑳᑮᓇᑲᑕᒧᐙᒡ ᑫᑮᐃᔑᑖᐙᐸᓐ᙮ ᓅᑯᒻ ᐃᑕᔥ ᐲᐙᐱᑴᔮᐲᓐ ᐐᑳ ᑫᐴᓂᐊᔮᓯᓂᓂᑭᓐ ᐋᐸᑕᓂᓂᐗᓐ ᐁᒪᒫᒋᑾᐱᓱᐙᒡ᙮ ᐊᓈᒥᕽ ᑳᐃᔑᑲᔥᑮᑎᐱᑲᓂᓂᒃ ᐃᑕᔥ ᑭᔐᒪᓂᑑᓐ ᐅᑕᔑᑭᐸᐅᑯᐙᓐ ᐁᑲᓇᐌᓂᒥᑯᐙᒡ ᐁᐐᑎᐹᑯᓂᑯᐙᒡ ᐊᐲ ᑭᒋᑎᐹᑯᓂᑫᐎᑮᔑᑲᓂᓂᒃ᙮ ᒦᑕᔥ ᐃᐃ ᐊᐲ ᑫᓂᔑᐗᓈᒋᐃᑣ᙮

ᒫᒥᑲᐎᒃ ᐃᑕᔥ ᑲᔦ ᔂᑕᒻ, ᑲᒸᕒᐊ, ᐃᓂ ᑲᔦ ᐆᑌᓇᐗᓐ ᑳᑮᐊᔮᑭᓐ ᐃᐃᒫ ᒌᑲᔭᐄ᙮ ᐃᑭᐌᓂᐗᒃ ᑲᔦ ᑳᑮᑕᔒᑫᐙᒡ ᐃᐃᒫ ᐆᑌᓈᑳᕽ ᐯᔑᑾᓐ ᑮᐃᔑᒋᑫᐗᒃ ᑳᑮᐃᔑᒋᑫᓂᒡ ᒪᒋᐁᒐᓬᐊᐞ ᓅᒋᑯ ᐁᑮᐃᔑᒋᑫᐙᒡ, ᐁᑮᓇᐹᒋ ᐱᔑᒀᒋᒋᑫᐙᒡ ᑲᔦ᙮ ᐃᓂ ᑕᔥ ᐆᑌᓇᐗᓐ, ᐃᑭ ᑲᔦ ᑳᑮᐱᒫᑎᓯᐙᒡ ᑮᓇᓇᐊᓵᐗᒃ ᒋᓀᐱᒋ ᒑᑭᓱᑣ᙮ ᒦᔥ ᐃᐃᒫ ᐁᔑᐙᐸᑕᐃᑰᔭᕽ, ᐯᑭᔥ ᐃᑕᔥ ᐁᐊᔮᒀᒥᒥᑰᔭᕽ᙮

ᒦᑕᔥ ᐯᔑᑾᓐ ᐅᑯ ᐅᐗᓂᑭᑭᓄᐃᑫᒃ ᐁᔑᒋᑫᐙᒡ, ᐅᑎᔑᓇᒧᐎᓂᐙᕽ ᐃᑯ ᓇᑫ ᐁᐃᔑᓅᒋᑯᑑᑕᒧᐙᒡ ᐅᐐᔭᐎᐙᓐ᙮ ᑳᐐᓐ ᑲᔦ ᐅᐸᐹᐱᓯᔅᑫᑕᓰᓈᐙᓐ ᐅᑭᒫᐎᐎᓇᓐ ᑭᔐᒪᓂᑑᓐ ᑳᐅᓇᑑᓂᒡ᙮ ᓅᒋᑯ ᑲᔦ ᐅᑎᓈᐙᐞ ᐁᒐᓬᐊᐞ ᑳᑭᑌᑖᑯᓯᓂᒡ ᐃᔥᐱᒥᕽ ᑳᔭᔮᓂᒡ᙮

ᐃᓇᔥᑫ ᐐᓐ ᐊᐊ ᑳᓃᑳᓀᑖᑯᓯᒡ ᐁᒐᓬ ᒪᔨᑲᓬ ᑳᐐᓐ ᐃᐃ ᑮᐃᔑᒋᑫᓰ᙮ ᐊᐲ ᑮᑲᑴᔖᑰᓱᒫᒡ ᒪᒋᐊᔭᐋᓐ ᐋᓃᓐ ᑫᑮᑑᒋᑳᑌᓂᑭᐸᓐ ᒨᓯᓲᓐ ᐅᐐᔭᐎᓂ, ᑳᐐᓐ ᒪᔨᑲᓬ ᑲᓇᑫ ᐅᑮᑲᑴ ᓂᔑᐗᓈᓱᒫᓰᓐ ᒪᒋᐊᔭᐋᓐ ᐊᓅᒋᑯ ᐃᔑᑮᔗᐎᓇᓐ ᒋᑮᐋᐸᒋᑑᐸᓐ᙮ ᒦᐁᑕ ᑳᐃᓈᒡ: ᑕᑲ ᑳᑎᐯᒋᑫᒡ ᑭᑲᑭᒋᓅᒋᐃᒃ, ᐅᑮᐃᓈᓐ᙮

ᐅᑯᐌᓂᐗᒃ ᐃᑕᔥ ᐐᓐ ᐃᓂᓂᐗᒃ ᒦᓴᑯᐃ ᐁᔑᒪᒋ ᐃᑕᒧᐙᒡ ᑫᑰᓇᓐ ᓀᓯᑐᑕᓯᒀ᙮ ᐃᓂ ᓴ ᐐᓐ ᐸᑮ ᑫᑰᓐ ᑳᑭᑫᑕᒧᐙᒡ, ᐅᑎᔑᑭᑫᑖᓈᐙ ᐁᑕ ᑖᐱᔥᑰ ᐊᔭᐋᐎᔕᐞ ᑳᐃᔑᒥᒋ ᐸᐎᑭᑫᒋᑫᓂᒡ ᑌᐺ ᐁᓈᓈᑲᑕᐌᑕᓯᓂᒃ᙮ ᒦᐗᓐ ᑕᔥ ᐃᓂ ᑎᓄ ᑫᓂᔑᐗᓈᒋᐃᑯᐙᒡ᙮

ᐐᑫ ᓴ ᑕᑭᒋᑰᐹᓯᓈᑯᓯᐗᒃ! ᒦᓴ ᒪᔮ ᐁᔑᒋᑫᐙᒡ ᐁᓈᐱᒋᑫᐙᒡ ᑳᑮᐃᔑᒋᑫᓂᑯᐸᓀᓐ ᑫᓇᓐ ᒣᐎᔕ᙮ ᒦ ᑲᔦ ᐯᔑᑾᓐ ᐁᔑᒋᑫᐙᒡ ᑳᑮᐃᔑᒋᑫᓂᑯᐸᓀᓐ ᐯᓬᐊᒨᓐ ᑳᑮᐃᔑᒪᒫᔒᓂᒡ ᔔᓂᔮᓐ ᐅᒋ᙮ ᒦᔥ ᑲᔦ ᐯᔑᑾᓐ ᐁᔑᔕᔒᐱᑕᒧᐙᒡ ᑖᐱᔥᑰ ᑳᑮᐃᔑᔕᔒᐱᑕᒧᓂᑯᐸᓀᓐ ᒀᕒᐊ ᑳᑮᐃᔑᓂᑳᓱᓂᒡ᙮ ᒦᑕᔥ ᐯᔑᑾᓐ ᐃᓇᑫ ᑫᔑᓂᔑᐗᓈᑎᓯᐙᒡ ᑫᑮᐃᔑᓭᓂᒡ᙮

ᐃᐃᐌᓂ ᓴ ᑳᔭᑲᑌᑕᓯᒀ ᑳᐃᔑᓂᑖᐸᐹᒪᑲᒥᑭᓯᐙᒡ, ᒦᓴ ᐃᒫ ᐌᒋᐐᓂᔥᑲᒧᐙᒡ ᑮᓇᐙ ᐁᐐᑑᑳᓱᐙᒡ ᑳᐃᔑᓵᑭᐃᑏᐎ ᐐᑾᑎᔦᒃ, ᐐᓀᑕᐙ ᐱᑯ ᐁᓈᓈᑲᒋᐃᑎᓱᐙᒡ᙮ ᒦᔥ ᐁᔑᓈᑯᓯᐙᒡ ᑖᐱᔥᑰ ᐗᑶ ᑳᐱᒥᐌᐹᓯᕽ, ᑳᑭᒥᐗᓄᑫᒪᑲᓯᓄᒃ᙮ ᑖᐱᔥᑰ ᒥᑎᑯᕽ ᑮᑕᒀᑭᒃ ᐃᔑᓈᑯᓯᐗᒃ, ᑳᓂᑖᐎᑭᑑᓯᒀ ᑲᔦ ᑫᑰᓂᓂ ᑫᑮᒦᒋᓈᑳᑌᓂᑭᐸᓐ, ᐁᐃᔑᓈᑯᓯᐙᒡ ᑲᔦ ᑭᑭᒌᐱᒃ ᑳᐱᑾᑕᑮᐱᒋᑲᓂᐎᐙᒡ ᒥᑎᑰᒃ, ᐐᑫ ᑕᔥ ᐁᐋᔩᒋᓂᐳᐙᒡ᙮

ᒦ ᑲᔦ ᐁᔑᓈᑯᓯᐙᒡ ᑖᐱᔥᑰ ᑳᑭᒋᒪᒫᑳᔥᑳᒃ ᑭᒋᑲᒦᕽ, ᐅᑎᔑᒋᑫᐎᓂᐙᓐ ᑳᐃᔑᒨᑭᓈᑾᓂᓂᑭᓐ ᑖᐱᔥᑰ ᐲᑌ ᑳᒨᑭᓈᑾᒃ ᑮᑭᒋᓅᑎᕽ᙮ ᐁᐃᔑᓈᑯᓯᐙᒡ ᑲᔦ ᑖᐱᔥᑰ ᐗᓇᑯᔕᒃ ᓅᒋᑯ ᑳᐸᐹᒪᑰᒋᓄᐙᒡ, ᑭᔐᒪᓂᑑ ᐅᑮᐅᓇᓵᐞ ᓀᐱᒡ ᐃᑯ ᒋᐊᔮᓂᒡ ᒫᐗᒡ ᐃᑯ ᐙᓴ ᐊᓈᒥᕽ ᑳᐃᔑᑲᔥᑮᑎᐱᑲᓂᓂᒃ᙮

ᒦᐗᐃᑕᔥ ᐅᐅ ᑳᑮᑕᔑᒫᑯᐸᓀᓐ ᐄᓄᒃ, ᓃᐎᕽ ᐋᑕᒧᕽ ᑳᑮᐅᒋᐋᓂᑰᐱᓱᒡ, ᑳᑮᐃᑭᑐᑯᐸᓀᓐ: ᑳᑎᐯᒋᑫᒡ ᐅᔕ ᐐᐱᑕᑯᔑᓐ ᐁᐐᐱᐐᒌᐙᒡ ᒥᑖᔂᒃ ᑭᒋᒥᑖᔂᒃ ᑭᔐᒪᓂᑑᓐ ᐅᑭᑌᑖᑯᓰᒥᓂ,

ᐁᐐᐱᑎᐹᑯᓈᒡ ᑲᑭᓇ, ᒋᐅᓈᑯᓈᒡ ᑲᔦ ᐋᓃᓐ ᑫᑑᑕᐎᒥᓐᒡ ᐃᐃ ᑲᑭᓇ ᑳᐃᔑᒋᑫᓯᓂᒃ ᑭᔐᒪᓂᑑ ᑳᐃᔑᐊᑕᐌᑕᕽ, ᐃᐃ ᑲᔦ ᑲᑭᓇ ᓅᒋᑯ ᑳᐃᓈᐱᓀᒥᑯᒡ ᐅᒪᒋ ᐃᔑᐌᐱᓰᐞ, ᑮᐃᑭᑐᑯᐸᓐ᙮

ᒦᐗᑭᓴ ᐅᑯ ᒨᔕᒃ ᑳᓂᑖᑭᒋᑳᑮᑭᑐᐙᒡ, ᑯᑕᒃ ᑲᔦ ᐊᐎᔭᐞ ᑳᔭᓈᒥᒫᐙᒡ; ᐐᓇᐙᑯ ᐁᐃᔑᒋᑫᐙᒡ ᐁᔑᒪᒋᒥᓴᐌᑕᒧᐙᒡ᙮ ᐋᐱᒋ ᐅᒋᑕ ᑲᔦ ᐁᒥᓄᐃᓈᐙᒡ ᐊᐎᔭᐞ ᐐᓇᐙ ᐱᑯ ᐁᑕ ᐁᐐᐅᒋᒥᓄᓭᐃᑎᓱᐙᒡ᙮

ᑮᓇᐙ ᑕᔥ ᐐᓐ ᑳᓵᑭᐃᓇᑰᒃ, ᒫᒥᑲᐎᐙᒃ ᐅᑖᓈᕽ ᑳᑮᐱ ᐃᓂᓀᒀᐸᓐ ᑳᑎᐯᒋᑫᒡ ᒋᓴᔅ X ᐅᑎᔑᓂᔕᐙᑲᓇᐞ᙮

ᒦᓴ ᐅᐌᓂ ᑳᐃᓂᓀᒀ: ᐊᐲ ᑕᔥ ᐃᔥᒀᒡ ᐊᓂᑲᑮᔑᑲᒃ, ᑕᓂᔭᔮᐗᒃ ᓴ ᑫᐹᐱᓄᑖᑫᐙᒡ, ᑫᐃᔑᒋᑫᐙᒡ ᐐᓇᐙ ᐱᑯ ᐅᒪᒋᒥᓴᐌᒋᑲᓂᐙᓐ, ᐁᑯᓵᓯᒀ ᑭᔐᒪᓂᑑᓐ᙮

ᒦᐗᑭᓴ ᐅᑯ ᑳᓂᑖ ᓀᓈᐎᔥᑲᐙᐙᒡ ᐅᑌᐺᑕᒨᐞ, ᐐᑫ ᑳᑎᐯᓂᒥᑯᐙᒡ ᑳᐃᔑᒥᓴᐌᑕᒧᒪᑲᓂᓂᑭᓐ ᐅᐐᔭᐎᐙᓐ᙮ ᑳᐐᓐ ᑲᔦ ᐅᑕᔮᐙᓯᐙᐙᓐ ᑭᔐᒪᓂᑑᓐ ᐅᑕᒑᑯᓂ᙮

ᑮᓇᐙ ᑕᔥ ᐐᓐ ᑳᓵᑭᐃᓇᑰᒃ, ᐁᑭᑌᑖᑾᒃ ᑭᑌᐺᑕᒧᐎᓂᐙ, ᐁᐃᓀᑖᑾᒃ ᐙᑳᐃᑲᓐ ᑳᐃᔑᐅᓈᐱᑭᓯᒋᑳᑌᒃ, ᒦ ᐃᒫ ᐃᔑᐅᐱᑳᐸᐎᐃᑎᒃ᙮ ᐃᔑᐊᓇᒥᐋᒃ ᐃᑕᔥ ᑲᔦ ᑳᐃᔑᑭᑭᓄᐎᓂᒥᓀᒃ ᑭᔐᒪᓂᑑ ᐅᑕᒑᑾᓐ᙮

ᑭᔐᒪᓂᑑ ᐅᓵᑭᐃᐌᓂᓂᕽ ᐃᔑᐊᔮᒃ ᑫᔑᑲᓇᐌᑖᑯᓯᔦᒃ, ᒋᔮᔅᑯᓂᐲᐁᒃ ᑳᑎᐯᒋᑫᒡ ᒋᓴᔅ X ᑳᐃᔑᑰᐹᓯᓈᑫᒡ ᑳᐐᐃᔑᒦᓂᓀᒃ ᐱᒫᑎᓯᐎᓐ ᐐᑳ ᑫᐴᓂᓭᓯᓂᓂᒃ᙮

ᑰᐹᑌᓂᒥᑾᒃ ᐃᑭ ᑳᓂᑖᐋᓉᑕᒧᐙᒡ᙮

ᐋᓂᑕ ᑕᔥ ᐐᓐ ᐱᒫᒋᐃᑾᒃ, ᓵᑭᒋᐐᑯᐱᓂᑾᒃ ᐃᐃᒫ ᒪᒋ ᐃᔥᑯᑌᕽ᙮ ᑰᐹᑌᓂᒥᑾᒃ ᐃᑕᔥ ᑯᑕᒃ ᐋᓂᑕ ᒋᑕᑯᑯᑖᓀᑕᒣᒃ᙮ ᑲᒀᓂᓴᑫᑕᒧᐙᒃ ᐅᑎᔑᒋᑫᐎᓂᐙᓐ᙮ ᐊᔮᒀᒥᓯᒃ ᑮᓇᐙ ᐃᐃᒫ ᒋᐅᒋᐐᓂᔥᑳᑰᓯᐌᒃ᙮

ᑕᑲ ᓴ ᓅᑯᒻ ᒦᑴᒋᐌᓂᒫᑖ ᑳᒥᒋᐯᔑᑯᒡ ᑭᔐᒪᓂᑑ ᑳᐱᒫᒋᐃᓇᕽ᙮ ᐐᓐ ᐄᑐᒃ ᑳᑲᔥᑭᑑᒡ ᒋᑲᓇᐌᓂᒥᓀᒃ ᒋᐸᑭᔑᓯᐌᒃ, ᒋᐲᓂᓀᒃ ᑲᔦ ᑳᐃᔑᐅᑭᒫᐌᑖᑾᓂᓂᒃ ᑳᐃᔑᐊᔮᒡ, ᐊᐙᒡ ᐃᑯ ᑫᑰᓐ ᒋᔑᐊᓈᒣᑖᑯᓯᓯᐌᒃ, ᐐᑫ ᑲᔦ ᒋᒥᓉᑕᒧᐌᒃ᙮ ᒋᓴᔅ X ᑳᑎᐯᓂᒥᓇᕽ ᐁᐐᒌᐗᕽ, ᑕᑲ ᓴ ᐅᒋᒦᑴᒋᐌᓂᒫᑖ ᑭᔐᒪᓂᑑ ᐋᓃᔥ ᑭᒋ ᐃᓀᑖᑯᓯ, ᑭᒋᐅᑭᒫᐌᑖᑯᓯ, ᒪᔥᑲᐌᑖᑯᓯ, ᐐᓐ ᑲᔦ ᑳᑲᔥᑭᐁᐎᓯᒡ᙮ ᒦᓴ ᐅᐌᓂ ᑳᐃᓀᑖᑯᓯᒡ ᒋᑆ ᐊᔮᓂᒃ ᐊᑭ, ᓅᑯᒻ ᑲᔦ, ᒦ ᑲᔦ ᐃ ᓀᐱᒡ ᐃᑯ ᑫᓂ ᐃᔑᐊᔮᒡ! ᐁᒣᓐ!