ᑭᑑᔑᐲᐊᒪᐎᓂᓂᒻ ᐁᑕᔑᑕᒪᐎᓇᑰᒃ ᐊᐊᐌ ᑭᔐᒪᓂᑑ ᐅᑎᑭᑐᐎᓐ ᑳᐃᔑᓂᑳᓱᒡ, ᐐᓐ ᑳᒦᑭᐌᒡ ᐱᒫᑎᓯᐎᓐ᙮ ᐐᓐ ᐄᑐᒃ ᒫᐗᒡ ᓂᑕᒻ ᑮᐊᔮ᙮ ᓃᓇᐎᓐᑦ ᐃᑯ ᓂᑮᓅᑕᐙᓈᓐ, ᓂᔥᑮᔑᑯᓈᓂᕽ ᓂᑮᐅᒋᐙᐸᒫᓈᓐ᙮ ᓂᑮᓈᓈᑲᑕᐙᐸᒫᓈᓐ ᑲᔦ, ᓂᑮᓵᒥᓈᓈᓐ ᑲᔦ, ᒦᓴ ᐊᐊᐌ ᑳᐅᒋᐅᔑᐲᐊᒫᑰᔦᒃ!

ᐊᐲ ᑕᔥ ᑮᓈᑯᓰᐃᑎᓱᒡ ᐊᐊᐌ ᐱᒫᑎᓯᐎᓐ, ᓂᑮᐙᐸᒫᓈᓐ, ᓂᑎᐹᒋᒫᓈᓐ ᑲᔦ, ᐁᑕᔑᑕᒫᑰᔦᒃ ᐊᐊᐌ ᒨᔕᒃ ᐃᑯ ᐱᒫᑎᓯᐎᓐ ᑳᐊᔮᒡ᙮ ᐐᓐ ᑳᑮᐐᒋᐊᔮᒥᑯᒡ ᑭᔐᒪᓂᑑᓐ ᑳᐅᑌᑌᒫᐎᓂᒡ, ᓂᑮᓈᑯᓰᑖᑯᓈᓐ᙮

ᐃᐃ ᑕᔥ ᓃᓇᐎᓐᑦ ᑳᑮᐙᐸᑕᒫᕽ, ᑳᑮᓅᑕᒫᕽ ᑲᔦ, ᑳᐅᒋᐐᑕᒫᑰᔦᒃ ᑫᑮᓇᐙ ᒋᐐᒌᐎᔮᕽ, ᐅᐅ ᑳᔑᐐᒌᐗᑭᒡ ᑳᐅᑌᑌᒫᐎᒡ, ᐃᓂ ᑲᔦ ᑳᔑᐐᒌᐎᒪᑭᒡ ᐅᑯᓯᓴᓐ ᒋᓴᔅ Xᑕᓐ᙮

ᒦᑕᔥ ᑳᐅᒋᐅᔑᐲᐊᒫᑰᔦᒃ ᓃᓇᐎᓐᑦ ᐐᑫ ᒋᑮᔑᓈᑾᒃ ᓂᒥᓉᑕᒧᐎᓂᓈᓐ᙮

ᒦᑕᔥ ᐅᐅᐌᓂ ᐅᑎᐹᒋᒧᐎᓐ ᑳᑮᓅᑕᐗᑭᒡ ᐁᐐᑕᒪᐎᓇᑭᒡ, ᒦᑕᔥ ᐅᐅ ᑳᐐᑕᒫᑰᔦᒃ; ᑭᔐᒪᓂᑑ ᐁᐙᓭᔮᓯᒡ, ᑳᐐᓐ ᑲᔦ ᐊᐙᒡ ᐸᑮ ᑲᔥᑮᑎᐱᑭᓯᐎᓐ ᐅᑕᔮᓰᓐ᙮

ᑮᔥᐱᓐ ᐃᑭᑐᔭᕽ ᐁᐐᒌᐗᕽ, ᑲᔥᑮᑎᐱᑲᓄᕽ ᑕᔥ ᐃᔑᐱᒧᓭᔭᕽ, ᑭᑲᑮᓇᐎᔥᑭᒥᓐ ᐄᓴᓐ; ᑳᐐᓐ ᑭᑎᔑᐱᒫᑎᓯᓰᒥᓐ ᑳᐃᓇᑌᒃ ᑌᐺᐎᓐ᙮

ᑮᔥᐱᓐ ᑕᔥ ᐙᓭᔮᕽ ᐃᔑᐱᒫᑎᓯᔭᕽ, ᑖᐱᔥᑰ ᐐᓐ ᐃᑯ ᐊᐊ ᐙᓭᔮᕽ ᑳᐃᔑᐊᔮᒡ, ᒦᑕᔥ ᐁᒥᓄᐐᒌᑎᔭᕽ; ᒋᓴᔅ ᑕᔥ ᐅᒥᔅᑸᒻ ᑭᔐᒪᓂᑑᓐ ᑳᐅᑯᓯᓯᒥᑯᒡ, ᑭᐯᑭᐃᑯᐙᒥᓐ ᒪᒋᑑᑕᒧᐎᓂᕽ ᐅᒋ᙮

ᑮᔥᐱᓐ ᑕᔥ ᑳᐐᓐ ᐎᑳ ᓂᒪᒋᑑᑕᓰᒥᓐ ᐃᑭᑐᔭᕽ, ᒦ ᐃ ᐄᓴᓐ ᐁᐗᔦᔑᑎᓱᔭᕽ, ᑳᐐᓐ ᑌᐺᐎᓐ ᑭᑭᑭᔥᑳᑯᓰᒥᓐ᙮

ᑮᔥᐱᓐ ᑕᔥ ᐙᐐᑕᒪᐗᕽ ᑭᔐᒪᓂᑑ ᑭᒪᒋᑑᑕᒧᐎᓂᓈᓂᓐ, ᐐᓐ ᓴ ᑳᑌᐺᔦᑖᑯᓯᒡ ᑾᔭᒃ ᑳᑑᑕᕽ; ᒦᑕᔥ ᐃᐃ ᑳᐅᒋᐴᓀᑕᒪᐎᓇᕽ, ᑳᐅᒋᐯᑭᐃᓇᕽ ᑲᔦ ᑲᑭᓇ ᐅᒋ ᑳᐃᔑᑾᔭᑯᒋᑫᓯᐗᕽ᙮

ᑮᔥᐱᓐ ᑳᐐᓐ ᓂᑮᒪᒋᑑᑕᓰᒥᓐ ᐃᑭᑐᔭᕽ, ᐊᒦ ᐃ ᐄᓴᓐ ᐯᔑᑾᓐ ᐁᑭᑐᔭᕽ ᐁᑲᑮᓇᐎᔥᑭᒡ ᑭᔐᒪᓂᑑ᙮ ᑳᐐᓐ ᐄᓴᓐ ᐅᑎᑭᑐᐎᓐ ᑭᑭᑭᔥᑳᑯᓰᐙᒥᓐ᙮

ᑮᓇᐙ ᑳᓵᑭᐃᓇᑰᒃ ᓂᓃᒑᓂᓴᒃ ᑳᐃᓀᓂᒥᓇᑰᒃ, ᑭᑑᔑᐲᐊᒪᐎᓂᓂᒻ ᐅᓄ ᒋᒪᒋᑑᑕᓯᐌᒃ᙮ ᑮᔥᐱᓐ ᓴ ᐊᐎᔭ ᒪᒋᑑᑕᕽ, ᑭᑕᔮᐙᓈᓐ ᑳᑮᑭᑑᑕᒪᐎᓇᕽ ᐁᑲᓅᓈᒡ ᑳᐅᑌᑌᒫᐎᓂᒡ, ᒦ ᓴ ᐊᐌ ᒋᓴᔅ X, ᑾᔭᒃ ᑳᐃᔑᒋᑫᒡ᙮

ᐐᓐ ᓴᑯ ᑳᐅᒋᐴᓀᑕᒫᑰᐗᕽ ᑭᒪᒋᑑᑕᒧᐎᓂᓈᓂᓐ, ᑳᐐᓐ ᐐᓐ ᑮᓀᑕᐎᓐᑦ ᐁᑕ, ᐃᐃ ᓴ ᑲᔦ ᑳᔑᒪᒋᑑᑕᒥᓂᒡ ᑲᑭᓇ ᐯᒫᑎᓯᓂᒡ ᐅᐅᒫ ᐊᑮᕽ ᒋᐴᓀᑕᒪᐎᒥᓐᒡ᙮

ᐁᑲᓇᐌᑕᒧᐗᕽ ᐃᑕᔥ ᑭᔐᒪᓂᑑ ᐅᑎᓈᑯᓂᑫᐎᓇᓐ, ᒦ ᐅᒫ ᐌᒋᑫᒋᓈᐅᔭᕽ ᐁᑭᑫᓂᒪᕽ᙮

ᐊᐊᐌ ᑕᔥ ᐐᓐ ᓂᑭᑫᓂᒫ ᑳᐃᑭᑐᒡ, ᐁᑲᓇᐌᑕᓯᒃ ᑕᔥ ᐅᑎᓈᑯᓂᑫᐎᓂᓂ ᒦᐃ ᐄᓴᓐ ᐊᐊ ᑳᑲᑮᓇᐎᔥᑭᒡ᙮ ᑳᐐᓐ ᐄᑐᒃ ᐅᑭᑭᔥᑳᑯᓰᓐ ᑌᐺᐎᓐ᙮

ᐊᐊᐌ ᑕᔥ ᐐᓐ ᑳᑲᓇᐌᑕᕽ ᐅᑎᑭᑐᐎᓂᓂ, ᑭᔐᒪᓂᑑᓐ ᓴ ᑫᑮᐃᔑᓵᑭᐋᐸᓐ ᑮᑮᔑᒋᑳᑌᓂ ᐅᐱᒫᑎᓯᐎᓂᕽ᙮ ᒦᑕᔥ ᐃᐃ ᐃᔑᒋᑫᔭᕽ, ᒦ ᐅᒫ ᑫᐅᒋᑫᒋᓈᐅᔭᕽ ᐁᐐᒋᐊᔮᒪᕽ ᑭᔐᒪᓂᑑ᙮

ᐊᐊᐌ ᑕᔥ ᑳᐃᑭᑐᒡ ᐁᑎᐱᐐᒌᐙᒡ ᑭᔐᒪᓂᑑᓐ, ᐃᔑᓇᑾᓂᓂ ᑯ ᒋᐃᔑᐱᒧᓭᐸᓐ ᐯᔑᑾᓐ ᑳᔑᐱᒧᓭᓂᒡ Xᑕᓐ᙮

ᑳᓵᑭᐃᓇᑰᒃ, ᑳᐐᓐ ᐐᓐ ᐅᔥᑭ ᐃᓈᑯᓂᑫᐎᓐ ᐅᐅ ᑳᐅᔑᐲᐊᒪᐎᓇᑰᒃ; ᑫᑌᐃᓈᑯᓂᑫᐎᓐ ᐅᔕ ᑳᑕᔑᑕᒪᐎᓇᑰᒃ, ᒦ ᓴ ᐃᐃᐌ ᑳᒫᒌᑭᑫᑕᒣᒃ ᑮᒫᒌᐊᓇᒥᐁᐙᑎᓯᔦᒃ᙮ ᐅᐅ ᑕᔥ ᑫᑌᐃᓈᑯᓂᑫᐎᓐ, ᒦᓴ ᐃᐌᓂ ᑭᔐᒪᓂᑑ ᐅᑎᐹᒋᒧᐎᓐ ᐋᔕ ᑳᑮᓅᑕᒣᒃ᙮

ᔖᑰᒡ ᐃᑕᔥ ᐅᔥᑭᑫᑰᓂᕽ ᐃᓀᑖᑾᓐ ᐅᐅ ᐃᓈᑯᓂᑫᐎᓐ ᑳᐅᔑᐲᐊᒪᐎᓇᑰᒃ᙮ ᑌᐺᐎᓐ ᐄᑐᒃ ᐃᐃᒫ Xᐃᕽ ᐃᔑᓈᑾᓂᓂ, ᐃᐃᒫ ᑲᔦ ᑭᐱᒫᑎᓯᐎᓂᐙᕽ᙮ ᐋᓃᔥ ᑳᑲᔥᑮᑎᐱᑲᒃ ᐊᓂᐊᑯᓈᑾᓐ, ᐃᐃ ᑕᔥ ᑳᐙᓭᔮᒃ ᐋᔕ ᐊᓂᓵᑳᑌ᙮

ᐊᐊ ᑕᔥ ᑳᐃᑭᑐᒡ ᐁᐊᔮᒡ ᑳᔑᐙᓭᔮᓂᒃ, ᔖᑰᒡ ᑕᔥ ᔒᑫᓂᒫᒡ ᐐᑕᓇᒥᐋᓐ, ᑳᔑᑲᔥᑮᑎᐱᑲᓂᓂᒃ ᓴ ᑫᔮᐱ ᐃᔑᐊᔮ᙮

ᐊᐊ ᑕᔥ ᐐᓐ ᑳᓵᑭᐋᒡ ᐐᑕᓇᒥᐋᓐ, ᑳᔑᐙᓭᔮᓂᒃ ᐃᔑᐱᒫᑎᓯ᙮ ᑳᐐᓐ ᑕᔥ ᑫᑰᓂᓂ ᐅᑕᔮᓰᓐ ᑫᐅᒋᐱᓱᑫᔑᕽ᙮

ᐊᐊᐌ ᑕᔥ ᐐᓐ ᑳᔒᑫᓂᒫᒡ ᐐᑕᓇᒥᐋᓐ, ᑳᔑᑲᔥᑮᑎᐱᑲᓂᓂᒃ ᐄᓴᓐ ᐃᔑᐊᔮ, ᑳᔑᑲᔥᑮᑎᐱᑲᓂᓂᒃ ᑲᔦ ᐃᔑᐱᒧᓭ᙮ ᑳᐐᓐ ᐅᑭᑫᑕᓰᓐ ᐋᓃᑎ ᐁᔖᒡ, ᐋᓃᔥ ᑳᑲᔥᑮᑎᐱᑲᓂᓂᒃ ᐅᑭᐹᐱᔥᑳᑯᓐ᙮

ᑳᓵᑭᐃᓇᑰᒃ ᓂᓃᒑᓂᓴᒃ ᑳᐃᓀᓂᒥᓇᑰᒃ, ᒦ ᐅᔕ ᑳᐅᒋᐅᔑᐲᐊᒪᐎᓇᑰᒃ, ᒋᒫᒥᑲᐎᔦᒃ ᐁᑮᐴᓀᒋᑳᑌᑭᓐ ᑭᒪᒋᑑᑕᒧᐎᓂᐙᓐ X ᐅᑎᔑᓂᑳᓱᐎᓂᕽ ᐅᒋ᙮

ᑫᑮᓇᐙ ᓴ ᓇᐗᒡ ᑳᑭᑖᑎᓯᔦᒃ, ᑭᑑᔑᐲᐊᒪᐎᓂᓂᒻ ᒋᒫᒥᑲᐎᔦᒃ ᐁᑭᑫᓂᒣᒃ ᐊᐊ ᑲᔦᑌ ᑳᑮᐊᔮᒡ ᑮᒫᒋᓭᓂᒃ ᑲᑭᓇ ᑫᑰᓐ᙮ ᑫᑮᓇᐙ ᑳᐅᔥᑳᑎᓯᔦᒃ, ᑭᑑᔑᐲᐊᒪᐎᓂᓂᒻ ᒋᒫᒥᑲᐎᔦᒃ ᐁᑮᔖᑰᒋᐁᒃ ᒪᒋᐊᔭᐋ᙮ ᑭᑑᔑᐲᐊᒪᐎᓂᓂᒻ ᑮᓇᐙ ᑳᐃᓀᓂᒥᓇᑰᒃ ᐊᐱᓅᒌᔕᒃ, ᒋᒫᒥᑲᐎᔦᒃ ᐁᑭᑫᓂᒣᒃ ᑳᐅᑌᑌᒫᐎᒡ᙮

ᑭᑑᔑᐲᐊᒪᐎᓂᓂᒻ ᑮᓇᐙ ᑳᑭᑖᑎᓯᔦᒃ, ᒋᒫᒥᑲᐎᔦᒃ ᐁᑭᑫᓂᒣᒃ ᐊᐊ ᑲᔦᑌ ᑳᑮᐊᔮᒡ ᑮᒫᒋᓭᓂᒃ ᑲᑭᓇ ᑫᑰᓐ᙮ ᑭᑑᔑᐲᐊᒪᐎᓂᓂᒻ ᑮᓇᐙ ᑳᐅᔥᑳᑎᓯᔦᒃ, ᒋᒫᒥᑲᐎᔦᒃ ᐁᒪᔥᑲᐎᓰᔦᒃ, ᑭᔐᒪᓂᑑ ᑲᔦ ᐁᐊᔮᓂᒃ ᐅᑎᑭᑐᐎᓐ ᑭᐱᒫᑎᓯᐎᓂᐙᕽ, ᐁᑮᔖᑰᒋᐁᒃ ᑲᔦ ᒪᒋᐊᔭᐋ᙮

ᑫᑯ ᓵᑭᑑᑫᒃ ᑳᓂᑖᐃᓇᑲᒥᑲᒃ ᐅᐅᒫ ᐊᑮᕽ, ᐃᓂ ᑲᔦ ᑫᑰᓇᓐ ᑳᐊᔮᑭᓐ ᐊᑮᕽ᙮ ᑮᔥᐱᓐ ᐊᐎᔭ ᓵᑭᑑᒡ ᐊᑮᐎᒋᑫᐎᓇᓐ, ᑳᐐᓐ ᐄᓴᓐ ᐅᓵᑭᐋᓰᓐ ᑳᐅᑌᑌᒫᐎᓂᒡ᙮

ᐋᓃᔥ ᑲᑭᓇ ᑫᑰᓇᓐ ᐅᓄᐌᓂᐗᓐ ᐅᐅᒫ ᐊᑮᕽ ᑳᐊᔮᑭᓐ, ᐊᐎᔭ ᑳᐃᔑᒪᒋᒥᓴᐌᒋᑫᒡ, ᐅᔥᑮᔑᑯᒫᕽ ᑲᔦ ᑳᐅᒋᒥᓴᐎᓈᑫᕽ, ᐃᔑᐱᒫᑎᓯᐎᓂᕽ ᑲᔦ ᑳᔑᑭᒋ ᐃᓀᓂᑎᓱᕽ, ᑳᐐᓐ ᐅᓄ ᐅᑌᑌᒫᕽ ᐅᒌᒪᑲᓯᓅᓇᓐ, ᐊᑮᕽ ᐅᔕ ᐅᒋᐅᔑᐆᒪᑲᓅᓐ!

ᐃᐃ ᓴ ᐊᑭ, ᑳᐃᔑᒥᓴᐌᒋᑫᓈᓂᐗᕽ ᑲᔦ, ᑕᐴᓂᓭᐗᓐ᙮ ᐊᐊ ᑕᔥ ᐐᓐ ᑳᑑᑕᕽ ᑳᔑᐊᑕᐌᑕᒥᓂᒡ ᑭᔐᒪᓂᑑᓐ ᓀᐱᒡ ᑕᐱᒫᑎᓯ᙮

ᑮᓇᐙ ᑳᓵᑭᐃᓇᑰᒃ ᐊᐱᓅᒌᔕᒃ, ᒦᐅᐌ ᐃᔥᒀᒡ ᐁᐃᔑᓭᒃ᙮ ᑳᑮᐃᔑᓅᑕᒣᒃ ᐁᐐᐱᑕᑶᔑᕽ ᐊᐊ ᑳᑲᑴᓇᑳᔥᑲᐙᒡ Xᑕᓐ, ᐋᔕ ᑕᔥ ᓃᐱᐗᐞ ᑳᑲᑴᓇᑳᔥᑲᐙᐙᒡ Xᑕᓐ ᑮᐱᑕᑯᔑᓅᒃ᙮ ᒦᑕᔥ ᐅᐅᒫ ᐌᒋᑭᑫᑖᑾᒃ ᒦᐃ ᐋᔕ ᐃᔥᒀᒡ ᐁᐊᓂᐅᒋᒋᓭᒃ᙮

ᑳᐐᓐ ᑕᔥ ᐐᓇᐙ ᑭᐐᒋᑎᐯᑖᑯᓰᒥᑯᓰᓈᓂᒃ, ᒦᓴᐃ ᑳᑮᐅᒋᓇᑲᓂᓇᒀ᙮ ᑮᔥᐱᓐ ᑳᐅᒋᑎᐯᑖᑯᓯᔭᕽ ᑌᐺ ᐃᔑᑎᐯᑖᑯᓯᐙᐸᓐ, ᑫᔮᐱ ᐄᑐᒃ ᑭᑖᑮᐐᒌᐎᑯᓈᓂᒃ᙮ ᐁᑮᓇᑲᓂᓇᒀ ᑕᔥ ᒦᐃᒫ ᐁᔑᐯᑌᓈᑾᓂᓂᒃ ᑳᔑᑎᐯᑖᑯᓯᔭᕽ ᑌᐺ ᐁᐅᒋᑎᐯᑖᑯᓯᓯᒀ᙮

ᑮᓇᐙ ᑕᔥ ᐐᓐ ᑭᑮᒦᓂᑰᐎᓯᒻ ᑭᔐᒪᓂᑑ ᐅᑕᒑᑾᓐ, ᑲᑭᓇ ᑲᔦ ᑭᑭᑫᑖᒻ᙮

ᑳᐐᓐ ᑕᔥ ᑳᑮᐅᒋᐅᔑᐱᐊᒪᐎᓇᑰᒃ ᐁᑭᑫᑕᓯᐌᒃ ᑌᐺᐎᓐ, ᐁᑭᑫᑕᒣᒃ ᐅᔕ᙮ ᑭᑭᑫᑖᒻ ᑲᔦ ᑮᐗᓂᒧᐎᓐ ᑌᐺᐎᓂᕽ ᐁᐅᒌᓯᓄᒃ᙮

ᐊᐌᓀᓐ ᑕᔥ ᑫᑮᓇᐎᔥᑭᒡ? ᐊᐎᔭ ᓴ ᑯ ᑳᐃᑭᑐᒡ ᒋᓴᓲᓐ ᐁᐋᐎᓯᓂᒃ ᑳᑮᐅᓈᐸᒥᑯᓂᒡ ᑭᔐᒪᓂᑑᓐ, ᒦ ᓴ ᐊᐌ ᑳᑲᑴᓇᑳᔥᑲᐙᒡ Xᑕᓐ᙮ ᐋᓃᔥ ᑳᐐᓐ ᐅᑎᐹᒋᒫᓰᓐ ᑳᐅᔫᓯᒥᒥᓐᒡ, ᐅᑯᓯᓯᒫᓐ ᑲᔦ᙮

ᐊᐌᓀᓂᑕᔑᑯ ᑳᑎᐹᒋᒫᓯᒃ ᐅᑯᓯᓯᒫᓐ ᑳᐐᓐ ᐅᑕᔮᐙᓰᓐ ᑳᐅᔫᓯᒥᒥᓐᒡ᙮ ᐊᐊ ᑕᔥ ᑳᑎᐹᒋᒫᒡ ᐅᑯᓯᓯᒫᓐ ᐅᑕᑯᐊᔮᐙᓐ ᑳᐅᔫᓯᒥᒥᓐᒡ᙮

ᒦᑕᔥ ᐁᔑᓈᑾᒃ ᒋᑭᑭᔥᑲᒣᑭᐸᓐ ᐃᐃ ᓂᑕᒻ ᑳᑮᓅᑕᒣᒃ ᑮᒫᒌᐊᓇᒥᐁᐙᑎᓯᔦᒃ᙮ ᑮᔥᐱᓐ ᐃᐃ ᐃᔑᓭᒃ, ᒦᑕᔥ ᑫᔑᑭᒋᐎᐊᔮᔦᒃ ᑳᔑᐊᔮᒡ ᐅᑯᓯᓯᒫ, ᐊᐊ ᑲᔦ ᑳᐅᔫᓯᒥᓐᒡ᙮

ᒦᑕᔥ ᐅᐅᐌᓂ ᐐᓐ ᐃᑯ ᐅᑯᓯᓯᒫ ᑳᑮᐊᔓᑕᒪᐎᓇᕽ, ᐱᒫᑎᓯᐎᓐ ᐐᑳ ᑫᐴᓂᓭᓯᓂᓂᒃ᙮

ᑭᑑᔑᐲᐊᒪᐎᓂᓂᒻ ᐃᑕᔥ ᐁᑕᔑᑕᒪᐎᓇᑰᒃ ᐃᑭ ᑳᑲᑴᐗᓂᐎᓂᓀᒀ᙮

ᑮᓇᐙ ᑕᔥ ᐐᓐ X ᑭᑮᓰᑭᓇᒫᑯᐙ ᐅᑕᒑᑾᓐ᙮ ᐁᑭᑭᔥᑲᐎᒥᓀᒃ ᐃᑕᔥ, ᑳᐐᓐ ᒣᒬᒡ ᑭᑲᒪᓀᓯᓰᒻ ᐊᐎᔭ ᒋᑭᑭᓄᐊᒪᐎᓀᒃ᙮ ᐅᑕᒑᑾᓐ ᑕᔥ ᑳᑮᓰᑭᓇᒪᐎᓀᒃ ᑭᑲᑭᑭᓄᐊᒫᑯᐙᒻ ᑲᑭᓇ ᑫᑰᓂᓂ᙮ ᐃᐃ ᑕᔥ ᑳᑭᑭᓄᐊᒪᐎᒥᓀᒃ ᑌᐺᐗᓂᓂ, ᑳᐐᓐ ᐐᓐ ᑮᐗᓂᒧᐎᓐ ᑎᓄᐗᓯᓂᓂ᙮ ᐃᐃ ᑕᔥ ᑳᔑᑭᑭᓄᐊᒪᐎᒥᓀᒃ, ᒦ ᐃᒫ ᐅᒋ ᒨᔕᒃ ᐐᒌᐎᒃ X᙮

ᑮᓇᐙ ᓂᓃᒑᓂᓴᒃ ᑳᓵᑭᐃᓇᑰᒃ, ᑕᑲ ᒨᔕᒃ ᐐᒌᐙᑖ᙮ ᐊᐲ ᑕᔥ ᓈᑯᓯᒡ ᒋᓲᑭᑌᐁᔭᕽ, ᒋᐊᑲᒌᑕᐙᓯᐗᕽ ᑲᔦ ᐊᐲ ᐱᑕᑶᔑᕽ᙮

ᑭᑭᑫᑖᒻ ᐄᑐᒃ X ᐁᑾᔭᒀᑎᓯᒡ; ᑭᑭᑫᑖᒻ ᑲᔦ ᑲᑭᓇ ᐊᐎᔭ ᑳᐃᔑᒋᑫᒡ ᑳᑾᔭᑯᓈᑾᓂᓂᒃ ᐅᑑᓃᒑᓂᓯᒥᑰᓐ ᑭᔐᒪᓂᑑᓐ᙮

ᐃᓇᔥᑫ ᐯᒥᐊᐲᒋᔕᐌᓂᒥᓇᕽ ᑳᐅᔫᓯᒥᓐᒡ! ᑭᔐᒪᓂᑑ ᐅᓃᒑᓂᓴᐞ ᑭᑎᔑᓂᑳᓂᑰᒥᓐ᙮ ᑌᐺ ᐋᓃᔥ ᑭᑎᓄᐎᐙᒥᓐ! ᒦᓴ ᐅᐅᒫ ᐊᑮᕽ ᐯᒫᑎᓯᐙᒡ ᑳᐅᒋᑭᑫᓂᒥᓯᓄᐎᓇᒀ ᐋᓃᔥ ᑳᐐᓐ ᐅᑭᑫᓂᒫᓯᐙᐙᓐ ᑭᔐᒪᓂᑑᓐ!

ᑳᓵᑭᐃᓇᑰᒃ, ᐋᔕ ᐅᔕ ᓅᑯᒻ ᑭᔐᒪᓂᑑ ᐅᓃᒑᓂᓴᐞ ᑭᑎᓄᐎᐙᒥᓐ, ᐌᑎ ᑕᔥ ᓃᑳᓇᔭᐄ ᑳᐐᓐ ᒪᔑ ᑭᑫᑖᑾᓯᓅᓐ ᐋᓃᓐ ᒪᔮ ᑫᐃᓀᑕᑯᓯᐗᑴᓐ᙮ ᔖᑰᒡ ᐃᑕᔥ ᑭᑭᑫᑖᒥᓐ, ᐊᐲ ᓈᑯᓯᒡ, ᑳᐃᓀᑖᑯᓯᒡ ᑫᑮᓇᐎᓐᑦ ᒋᐃᓀᑖᑯᓯᔭᕽ; ᐋᓃᓐ ᑲᔦ ᒪᔮ ᐁᔑᓈᑯᓯᒡ ᑭᑲᐃᔑᐙᐸᒫᓈᓐ᙮

ᑲᑭᓇ ᑕᔥ ᐊᐎᔭ ᐅᐅ ᑳᔑᐊᐯᓂᒧᓄᑕᐙᒡ, ᐃᔑᐯᑭᐃᑎᓱ ᑖᐱᔥᑰ ᑳᔑᐯᑫᑖᑯᓯᓂᒡ Xᑕᓐ᙮

ᑲᑭᓇ ᑕᔥ ᐊᐎᔭ ᑳᓂᑖᒪᒋᑑᑕᕽ, ᒦᐊᐌ ᑎᓄ ᑳᓂᑖᐋᓇᐌᑕᕽ ᑭᔐᒪᓂᑑᓐ ᐅᑑᓇᔓᐌᐎᓂᓂ᙮ ᑮᐋᓇᐌᒋᑳᑌᒃ ᐅᔕ ᐅᓇᔓᐌᐎᓐ, ᒦᓴᐃ ᐁᒪᒋᑑᑕᒧᓈᓂᐗᕽ᙮

ᑭᑭᑫᑖᒥᓐ ᑕᔥ ᑲᔦ ᐁᑮᐱᑕᑶᔑᕽ ᒋᐌᐱᓇᒪᐎᓇᕽ ᑭᒪᒋᑑᑕᒧᐎᓂᓈᓂᓐ᙮ ᑳᐐᓐ ᐐᓐ X ᐅᑕᔮᓰᓐ ᒪᒋᑑᑕᒧᐎᓐ᙮

ᐊᐎᔭ ᓴ ᑳᐐᒌᐎᑯᒡ Xᑕᓐ ᑳᐐᓐ ᓂᑖᒪᒋᑑᑕᓰ, ᐊᐊ ᑕᔥ ᐊᐎᔭ ᑳᓂᑖᒪᒋᑑᑕᕽ, ᒦ ᐄᓴᓐ ᐊᐌ ᐐᑳ ᑳᐙᐸᒫᓯᒃ, ᑳᑭᑫᓂᒫᓯᒃ ᑲᔦ᙮

ᓂᓃᒑᓂᓴᒃ, ᑕᑲ ᑫᑯ ᐊᐎᔭ ᑭᑲᐗᓂᒥᑯᓰᐙ᙮ ᐊᐊᐌ ᓴ ᑾᔭᒃ ᑳᓂᑖᑑᑕᕽ, ᒦᓴ ᐊᐊᐌ ᑳᔑᑾᔭᒀᑎᓯᒡ ᑖᐱᔥᑰ ᑳᔑᑾᔭᒀᑎᓯᓂᒡ Xᑕᓐ᙮

ᐊᐊ ᑕᔥ ᐐᓐ ᑳᓂᑖᒪᒋᑑᑕᕽ ᒪᒋᐊᔭᐋᕽ ᐅᒋᑎᐯᑖᑯᓯ, ᐋᓃᔥ ᒪᒋᐊᔭᐋ ᑮᐅᒋᒪᒋᑑᑕᒻ ᑮᒫᒋᓭᓂᒃ ᐅᐅ ᐊᑮᓂ᙮ ᒦᑕᔥ ᐅᐅ ᑳᑮᐅᒋᓈᑯᓯᓂᒡ ᑭᔐᒪᓂᑑ ᐅᑯᓯᓴᓐ, ᐁᐐᓂᔑᐗᓈᒋᑕᒪᐙᓂᒡ ᐁᓇᓄᑮᓂᒡ ᒪᒋᐊᔭᐋᓐ᙮

ᐊᐎᔭ ᓴ ᑭᔐᒪᓂᑑᓐ ᑳᐅᓃᒑᓂᓯᒥᑯᒡ ᑳᐐᓐ ᓂᑖᒪᒋᑑᑕᓰ, ᐋᓃᔥ ᑭᔐᒪᓂᑑᓐ ᑳᐃᔑᐊᔮᓂᒡ ᐅᑭᑭᔥᑳᑯᓐ᙮ ᑳᐐᓐ ᐅᑖᑲᔥᑭᑑᓰᓐ ᑫᔮᐱ ᒋᐊᓂᒪᒋᑑᑕᕽ, ᐋᓃᔥ ᑭᔐᒪᓂᑑᓈᕽ ᐅᒋᓂᑖᐎᑭ᙮

ᐋᐱᒋ ᐅᔕ ᐯᔭᑌᓈᑯᓯᐗᒃ ᐃᑭ ᑭᔐᒪᓂᑑᓐ ᑳᐅᓃᒑᓂᓯᒥᑯᐙᒡ, ᐃᑭ ᑲᔦ ᒪᒋᐊᔭᐋᓐ ᑳᐅᓃᒑᓂᓯᒥᑯᐙᒡ᙮ ᐊᐎᔭ ᓴ ᑳᐃᔑᒋᑫᓯᒃ ᑳᑾᔭᑯᓈᑾᓂᓂᒃ ᑳᐐᓐ ᑭᔐᒪᓂᑑᓐ ᐅᑑᓃᒑᓂᓯᒥᑯᓰᓐ, ᑳᐐᓐ ᑲᔦ ᐊᐊ ᑎᓄ ᐅᓵᑭᐋᓰᐞ ᐐᑕᓇᒥᐋᐞ᙮

ᒦᑕᔥ ᐅᐅᐌ ᑎᐹᒋᒧᐎᓐ ᑳᑮᐱᓅᑕᒣᒃ ᑮᒫᒌᐊᓇᒥᐁᐙᑎᓯᔦᒃ, ᑮᓇᐎᓐᑦ ᓴ ᒋᓵᑭᐃᑎᔭᑭᐸᓐ᙮

ᑫᑯ ᑕᔥ ᐐᓐ ᓇᓈᐱᓇᐙᑫᒃ ᑫᓐ, ᑳᑮᐅᒋᑎᐯᑖᑯᓯᒡ ᒪᒋᐊᔭᐋᕽ, ᐁᑮᓂᓵᒡ ᐃᑕᔥ ᐃᓂ ᐐᒋᑭᐌᔭᓐ᙮ ᐌᑯᓀᓂᓂ ᑕᔥ ᑳᐅᒋᓂᓵᒡ? ᐅᑎᔑᒋᑫᐎᓇᓐ ᐄᑐᒃ ᑮᒪᒋᓈᑾᓂᓂᐗᓐ, ᐐᒋᑭᐌᔭᓐ ᑕᔥ ᐐᓐ ᐅᑎᔑᒋᑫᐎᓂᓂ ᑮᒥᓄᓈᑾᓂᓂᐗᓐ᙮

ᓃᑕᓇᒥᐋᒃ, ᑫᑯ ᒫᒪᑳᑌᑕᑫᒃ ᑮᔥᐱᓐ ᔒᑫᓂᒥᓀᒀ ᐊᑮᕽ ᑳᐊᔮᐙᒡ᙮

ᑭᑭᑫᑖᒥᓐ ᑕᔥ ᑮᓇᐎᓐᑦ ᓂᐳᐎᓂᕽ ᐁᑮᐅᒋᓵᑭᒋᔥᑳᔭᕽ, ᐁᑮᐃᔑᐲᑎᑫᔥᑳᔭᕽ ᑕᔥ ᐱᒫᑎᓯᐎᓂᕽ, ᐋᓃᔥ ᑭᓵᑭᐋᓈᓂᒃ ᑮᑕᓇᒥᐋᓈᓂᒃ᙮ ᐊᐊᐌ ᑕᔥ ᐐᓐ ᑳᓵᑭᐃᐌᓯᒃ, ᓂᐳᐎᓂᕽ ᑕᓀᑖᑯᓯ᙮

ᐊᐎᔭ ᑕᔥ ᑳᔒᑫᓂᒫᒡ ᐐᑕᓇᒥᐋᓐ ᒦᓴ ᑖᐱᔥᑰ ᐁᓀᑖᑯᓯᒡ ᑳᓂᔑᐌᒡ᙮ ᑭᑭᑫᑖᒥᓐ ᐃᑕᔥ ᐊᐎᔭ ᑳᓂᔑᐌᒡ ᑳᐐᓐ ᐅᑭᑭᔥᑳᑯᓰᓐ ᐃᐃ ᐱᒫᑎᓯᐎᓐ ᐐᑳ ᑫᐴᓂᓭᓯᓂᓂᒃ᙮

ᐃᐃ ᑕᔥ X ᑳᑮᐃᔑᐸᑭᑎᓇᕽ ᐅᐱᒫᑎᓯᐎᓐ ᑮᓇᐎᓐᑦ ᐅᒋ, ᒦ ᐃᒫ ᑫᐅᒋᑭᑫᑕᒪᑭᐸᓐ ᐋᓃᓐ ᐊᐎᔭ ᑳᓵᑭᐃᐌᒡ ᑫᐃᔑᒋᑫᒡ᙮ ᒦᑕᔥ ᑫᑮᓇᐎᓐᑦ ᐁᔑᓈᑾᒃ ᒋᐸᑭᑎᓇᒪᑭᐸᓐ ᑭᐱᒫᑎᓯᐎᓂᓈᓂᓐ ᑮᑕᓇᒥᐋᓈᓂᒃ ᐅᒋ᙮

ᐊᐎᔭ ᑕᔥ ᑳᑌᐱᓭᒡ ᑫᑰᓇᓐ, ᐙᐸᒫᒡ ᐐᑕᓇᒥᐋᓐ ᓅᑌᓭᓂᒡ, ᐃᔑᑰᐹᑌᓂᒫᓯᒃ ᑕᔥ, ᐋᓃᓐ ᑕᔥ ᐃᓈ ᑫᔑᑭᑭᔥᑳᑯᐸᓐ ᑭᔐᒪᓂᑑᓐ ᐅᓵᑭᐃᐌᐎᓂᓂ?

ᑳᐅᓃᒑᓂᓯᒥᓇᑰᒃ, ᑕᑲ ᑳᐐᓐ ᐐᓐ ᐁᑕ ᑭᑎᑭᑐᐎᓂᓈᓂᕽ ᑭᑲᐅᒋᓵᑭᐃᐌᓰᒥᓐ, ᑳᐐᓐ ᑲᔦ ᑭᑲᒥᒋᑕᔑᑕᓰᒥᓐ; ᑭᑲᑑᑖᒥᓐ ᓴ ᒋᓈᑾᒃ ᑌᐺ ᓵᑭᐃᐌᐎᓐ᙮

ᐅᐅ ᑕᔥ ᐃᔑᒋᑫᔭᕽ, ᒦ ᐅᒫ ᑫᐅᒋᑭᑫᑕᒪᕽ ᑌᐺᐎᓂᕽ ᐁᐅᒋᑎᐯᑖᑯᓯᔭᕽ᙮ ᒦᑕᔥ ᑲᔦ ᐅᐅᒫ ᑫᐅᒋᐱᓵᓂᑑᔭᕽ ᑭᑌᐃᓈᓂᓐ ᒋᔖᑴᓂᒧᓯᐗᕽ ᑭᔐᒪᓂᑑ ᐁᓈᓴᒦᒡ᙮

ᑮᔥᐱᓐ ᓴ ᑯ ᑮᒥᑯᔥᑳᑌᑕᒥᐃᑯᔭᕽ ᑭᑌᐃᓈᓂᓐ, ᑭᒪᒋ ᐃᔑᐌᐱᔅ ᐁᐃᑯᔭᕽ, ᓇᐗᒡ ᐄᑐᒃ ᑭᔐᒪᓂᑑ ᑭᑭᑫᓂᒥᑯᓈᓐ ᐊᐲᒡ ᐐᓐ ᑳᐊᐲᒋ ᑭᑫᓂᑎᓱᔭᕽ ᑭᑌᐃᓈᓂᕽ, ᐐᓐ ᑲᔦ ᑲᑭᓇ ᑫᑰᓂᓂ ᑳᑭᑫᑕᕽ᙮

ᑳᓵᑭᐃᓇᑰᒃ, ᑮᔥᐱᓐ ᑭᒪᒋ ᐃᔑᐌᐱᔅ ᐃᑯᓯᐗᕽ ᑭᑌᐃᓈᓂᓐ, ᒦᑕᔥ ᐃᐃ ᑫᐅᒋᓲᑭᑌᐁᔭᕽ ᐁᓈᓴᒦᒡ᙮

ᒦᑕᔥ ᑲᔦ ᐌᒋᑌᐱᓇᒧᐗᕽ ᐌᑯᓀᓂᑯ ᑳᑲᑴᒋᒪᕽ, ᐋᓃᔥ ᑭᓇᐃᑕᒧᐙᒥᓐ, ᐁᐃᔑᒋᑫᐗᕽ ᑲᔦ ᑳᒥᓍᐸᑕᕽ᙮

ᒦᑕᔥ ᐅᐅ ᐁᓈᑯᓂᑫᒡ, ᒋᑌᐺᔦᑕᒧᐗᕽ ᐅᑎᔑᓂᑳᓱᐎᓂᓂ ᐅᑯᓯᓴᓐ ᒋᓴᔅ Xᑕᓐ, ᒋᓵᑭᐃᑎᔭᑭᐸᓐ, ᑳᑮᐃᓈᑯᓂᓇᕽ᙮

ᐊᐊ ᑕᔥ ᐃᑯ ᑳᑲᓇᐌᑕᕽ ᐋᓃᓐ ᐁᓈᑯᓂᑫᓂᒡ, ᐅᑎᐱᐐᒌᐙᓐ ᑭᔐᒪᓂᑑᓐ, ᐅᐐᒌᐎᑰᓐ ᐃᑕᔥ ᑲᔦ᙮ ᐃᓂ ᑕᔥ ᐅᑕᒑᑾᓐ ᑳᑮᒦᓂᓇᕽ, ᒦᐃᒫ ᐌᒋᑭᑫᑕᒪᕽ ᐁᐐᒌᐎᓇᕽ᙮

ᑳᓵᑭᐃᓇᑰᒃ, ᑫᑯ ᑌᐺᑕᐙᑫᒀᓂᒃ ᑲᑭᓇ ᑳᐃᑭᑐᐙᒡ ᐁᑭᑭᔥᑳᑯᐙᒡ ᑭᔐᒪᓂᑑᓐ ᐅᑕᒑᑯᓂ᙮ ᐊᑕᑭᑫᓂᒥᑯᒃ ᑕᑲ ᑭᔐᒪᓂᑑᕽ ᒋᐅᒌᓂᑴᓐ ᐃᓂ ᐊᒑᑾᓐ ᑳᑭᑭᔥᑲᐙᐙᒡ᙮ ᐋᓃᔥ ᐹᑏᓄᐗᒃ ᑳᐃᓍᓂᑎᓱᐙᒡ ᐁᑮᑭᑑᑕᒪᐙᐙᒡ ᑭᔐᒪᓂᑑᓐ, ᒥᓯᐌ ᐁᐃᔖᐙᒡ ᐅᐅᒫ ᐊᑮᕽ᙮

ᐅᐅ ᑕᔥ ᑭᑲᐅᒋᑭᑫᓂᒥᒫᐙᓐ ᑮᔥᐱᓐ ᑌᐺ ᑭᔐᒪᓂᑑ ᐅᑕᒑᑾᓐ ᐁᐋᐎᓂᑴᓐ᙮ ᐁᑕᓱᐯᔑᒃ ᐃᑕᔥ ᐃᑯ ᐊᐎᔭ ᑳᐐᑕᕽ ᒋᓴᔅ Xᑕᓐ ᐃᓂᓃᓈᕽ ᐁᑮᐃᔑᐅᐐᔭᐎᓂᒡ, ᒦᓴ ᑭᔐᒪᓂᑑᕽ ᑳᐅᒌᓂᒡ ᐃᓂ ᐊᒑᑾᓐ ᑳᑭᑭᔥᑳᑯᒡ᙮

ᐁᑕᓱᐯᔑᒃ ᐃᑕᔥ ᐊᐎᔭ ᑫᐃᑭᑐᓯᒃ ᒋᓴᓲᓐ ᐅᐅ ᐁᐃᔑᐊᔮᓂᒡ, ᑳᐐᓐ ᐄᓴᓐ ᑭᔐᒪᓂᑑᕽ ᐅᒌᓰᐗᓐ ᐃᓂ ᐊᒑᑾᓐ ᑳᑭᑭᔥᑳᑯᒡ᙮ ᒦ ᐅᔕ ᐄᓴᓐ ᐊᐊ ᑳᑲᑴᓇᑳᔥᑲᐙᒡ Xᑕᓐ ᐅᑕᒑᑯᓂ, ᑳᑮᓅᑕᒣᒃ ᐋᔕ ᐁᐐᐱᑕᑶᔑᕽ᙮ ᐃᓇᔥᑫ ᐋᔕ ᐄᑐᒃ ᐅᐅᒫ ᐊᑮᕽ ᐊᔮ᙮

ᓂᓃᒑᓂᓴᒃ, ᑭᔐᒪᓂᑑᓈᕽ ᑕᔥ ᑮᓇᐙ ᑭᑑᒌᒻ, ᑭᑮᔖᑯᒋᐋᐙᒃ ᑲᔦ ᐃᑭ ᑳᑮᐃᓍᓂᑎᓱᐙᒡ ᐁᑮᑭᑑᑕᒪᐙᐙᒡ ᑭᔐᒪᓂᑑᓐ, ᐋᓃᔥ ᐊᐊ ᑳᑭᑭᔥᑲᐎᓀᒃ ᓇᐗᒡ ᓲᑫᑖᑯᓯ ᐊᐲᒡ ᐐᓐ ᐃᓂ ᐊᒑᑾᓐ ᑳᑭᑭᔥᑳᑯᐙᒡ ᐃᑭ ᐅᐅᒫ ᐊᑮᕽ ᑳᐅᒋᑎᐯᑖᑯᓯᐙᒡ᙮

ᐊᑮᕽ ᐃᑕᔥ ᐅᒋᑎᐯᑖᑯᓯᐗᒃ, ᒦᑕᔥ ᑲᔦ ᑳᐅᒋ ᐃᔑᒋᑫᐙᒡ ᑳᐃᔑᑮᔗᓂᒡ ᐊᑮᕽ ᑳᐃᓈᑎᓯᓂᒡ, ᒦᐃ ᑲᔦ ᑳᐅᒋᐱᓯᑖᑯᐙᒡ ᐅᐅᒫ ᐊᑮᕽ ᑳᐊᔮᓂᒡ᙮

ᑮᓇᐎᓐᑦ ᑕᔥ ᐐᓐ ᑭᔐᒪᓂᑑᕽ ᑭᑑᒋᑎᐯᑖᑯᓯᒥᓐ᙮ ᐊᐌᓀᓂᑯ ᑳᑮᑫᓂᒫᒡ ᑭᔐᒪᓂᑑᓐ ᑭᐱᓯᑖᑯᓈᓐ᙮ ᐊᐊ ᑕᔥ ᐐᓐ ᑭᔐᒪᓂᑑᕽ ᑳᐅᒋᑎᐯᑖᑯᓯᓯᒃ ᑳᐐᓐ ᑭᐱᓯᑖᑯᓰᓈᓐ᙮ ᒦᑕᔥ ᐅᐅᒫ ᑫᐅᒋᐯᑌᔦᓂᒥᑣ ᐃᑭ ᑳᑭᑭᔥᑳᑯᐙᒡ ᐃᓂ ᐊᒑᑾᓐ ᑌᐺᐎᓐ ᑳᑭᑭᓄᐃᑫᓂᒡ, ᐃᑭ ᑕᔥ ᑲᔦ ᑳᑭᑭᔥᑲᐙᐙᒡ ᐊᒑᑾᓐ ᑳᐗᓂᐎᔑᐌᓂᒡ᙮

ᑳᓵᑭᐃᓇᑰᒃ, ᑕᑲ ᓵᑭᐃᑎᑖ᙮ ᓵᑭᐃᐌᐎᓐ ᓴ ᑭᔐᒪᓂᑑᕽ ᐅᒌᒪᑲᓐ᙮ ᑲᑭᓇ ᑕᔥ ᐊᐎᔭ ᑳᓵᑭᐃᐌᒡ ᐅᑑᓃᒑᓂᓯᒥᑰᓐ ᑭᔐᒪᓂᑑᓐ, ᐅᑭᑫᓂᒫᓐ ᑲᔦ ᑭᔐᒪᓂᑑᓐ᙮

ᐊᐊᐌ ᑕᔥ ᑳᓵᑭᐃᐌᓯᒃ ᑳᐐᓐ ᐅᑭᑫᓂᒫᓰᓐ ᑭᔐᒪᓂᑑᓐ᙮ ᑭᔐᒪᓂᑑ ᐄᑐᒃ ᐃᔑᐊᔮ ᐁᓵᑭᐃᐌᒡ᙮

ᑭᔐᒪᓂᑑ ᑕᔥ ᑭᑮᓈᑯᑕᒫᑯᓈᓐ ᐁᓵᑭᐃᓇᕽ, ᐁᑮᐲᒋᓂᔕᐙᒡ ᑳᒥᒋᐯᔑᑯᓂᒡ ᐅᑯᓯᓴᓐ ᐅᐅᒫ ᐊᑮᕽ, ᑮᓇᐎᓐᑦ ᒋᐊᔭᔮᐗᕽ ᐱᒫᑎᓯᐎᓐ ᐅᑯᓯᓯᕽ ᐅᒋ᙮

ᒦᑕᔥ ᐅᐅᐌ ᓵᑭᐃᐌᐎᓐ, ᑳᐐᓐ ᐐᓐ ᐁᑮᓵᑭᐊᕽ ᑭᔐᒪᓂᑑ, ᐐᓐ ᐄᑐᒃ ᑭᑮᓵᑭᐃᑯᓈᓐ, ᑳᑮᐅᒋ ᐲᒋᓂᔕᐙᒡ ᐅᑯᓯᓴᓐ ᑫᐅᒋᐴᓀᑕᒫᑰᔭᕽ ᑭᒪᒋᑑᑕᒧᐎᓂᓈᓂᓐ᙮

ᑳᓵᑭᐃᓇᑰᒃ, ᑮᔥᐱᓐ ᑭᔐᒪᓂᑑ ᐅᐅ ᓇᑫ ᑮᐃᔑᓵᑭᐃᓇᕽ, ᑫᑮᓇᐎᓐᑦ ᑕᔥ ᐃᔑᓈᑾᓐ ᒋᓵᑭᐃᑎᔭᑭᐸᓐ᙮

ᑳᐐᓐ ᒪᔑ ᐐᑳ ᐊᐎᔭ ᐅᐙᐸᒫᓰᓐ ᑭᔐᒪᓂᑑᓐ, ᑮᔥᐱᓐ ᑕᔥ ᓵᑭᐃᑎᔭᕽ, ᑭᔐᒪᓂᑑ ᐄᓴᓐ ᑭᐐᒋᐊᔮᒥᑯᓈᓐ, ᒦᐃ ᑮᑮᔑᓈᑾᓂᓂᒃ ᐅᓵᑭᐃᐌᐎᓐ ᑭᐱᒫᑎᓯᐎᓂᓈᓂᕽ᙮

ᒦᑕᔥ ᐌᒋᑭᑫᑕᒪᕽ ᐁᐐᒋᐊᔮᒪᕽ ᑭᔐᒪᓂᑑ, ᐁᐐᒋᐊᔮᒥᓇᕽ ᑲᔦ, ᐋᓃᔥ ᑭᑮᒦᓂᑯᓈᓐ ᐅᑕᒑᑾᓐ᙮

ᑮᓇᐎᓐᑦ ᓴ ᑭᑮᐙᐸᑖᒥᓐ, ᑭᑎᐹᒋᒧᒥᓐ ᑲᔦ ᑳᐅᔫᓯᒥᓐᒡ ᐁᑮᐲᒋᓂᔕᐙᒡ ᐅᑯᓯᓴᓐ ᒋᐱᒫᒋᐋᓂᒡ ᐯᒫᑎᓯᓂᒡ ᐅᐅᒫ ᐊᑮᕽ ᑳᐊᔮᓂᒡ᙮

ᐊᐌᓀᓐ ᑕᔥ ᐃᑯ ᑫᐐᑕᕽ ᒋᓴᓲᓐ ᒪᔮ ᐁᐅᑯᓯᓯᒥᑯᓂᒡ ᑭᔐᒪᓂᑑᓐ, ᒦ ᐄᑐᒃ ᐊᐊ ᐁᐐᒋᐊᔮᒫᒡ ᑭᔐᒪᓂᑑᓐ, ᐁᐐᒋᐊᔮᒥᑯᒡ ᑲᔦ᙮

ᑮᓇᐎᓐᑦ ᑕᔥ ᑭᑮᐱᑭᑫᑖᒥᓐ, ᐁᑮᑌᐺᑕᒧᐗᕽ ᑲᔦ ᐋᓃᓐ ᐁᔑᓵᑭᐃᓇᕽ ᑭᔐᒪᓂᑑ᙮ ᑭᔐᒪᓂᑑ ᓴ ᐃᔑᐊᔮ ᐁᓵᑭᐃᐌᒡ᙮ ᐊᐌᓀᓂᑕᔑᑯ ᓵᑭᐃᐌᐎᓂᕽ ᐁᑕᔑᐱᒫᑎᓯᒡ, ᐅᐐᒋᐊᔮᒫᓐ ᑭᔐᒪᓂᑑᓐ, ᐅᐐᒋᐊᔮᒥᑰᓐ ᑕᔥ ᐃᑯ ᑲᔦ᙮

ᑮᔥᐱᓐ ᓵᑭᐃᐌᐎᓐ ᑭᐱᒫᑎᓯᐎᓂᓈᓂᕽ ᐃᔑᑮᔑᓈᑾᒃ, ᒦᐃ ᑫᐅᒋᑫᒋᓇᐅᐌᓂᒧᔭᕽ ᐊᐲ ᑎᐹᑯᓂᑫᐎᑮᔑᑲᒃ, ᐋᓃᔥ X ᑳᐃᔑᓈᑾᓂᓂᒃ ᐅᐱᒫᑎᓯᐎᓐ, ᒦ ᑫᑮᓇᐎᓐᑦ ᐁᔑᐱᒫᑎᓯᔭᕽ ᐅᐅᒫ ᐊᑮᕽ᙮

ᐊᐊᐌ ᑳᓵᑭᐃᐌᒡ ᑳᐐᓐ ᑯᑖᒋᓰ᙮ ᐃᐃ ᓴ ᑳᑮᔑᓈᑾᓂᓂᒃ ᓵᑭᐃᐌᐎᓐ ᐅᒋᓵᑭᒋᔥᑭᑳᑌᓂ ᑯᑖᒋᐎᓐ᙮ ᐋᓃᔥ ᐊᐎᔭ ᑳᓇᓃᓵᓀᑕᕽ ᐁᐐᓇᓇᐊᓯᓐᒡ, ᒦ ᐃᒫ ᐌᒌᒃ ᑯᑖᒋᐎᓐ᙮ ᐊᐎᔭ ᑕᔥ ᑳᑯᑖᒋᒡ ᑳᐐᓐ ᒪᔑ ᑮᔑᓈᑯᒋᑳᑌᓯᓂᓂ ᓵᑭᐃᐌᐎᓐ ᐅᐱᒫᑎᓯᐎᓂᕽ᙮

ᒦᑕᔥ ᑳᐅᒋᓵᑭᐃᐌᔭᕽ, ᐋᓃᔥ ᑭᔐᒪᓂᑑ ᓂᑕᒻ ᑭᑮᔕᐌᓂᒥᑯᓈᓐ᙮

ᑮᔥᐱᓐ ᐊᐎᔭ ᐃᑭᑐᒡ ᐁᓵᑭᐋᒡ ᑭᔐᒪᓂᑑᓐ, ᔒᑫᓂᒫᒡ ᐃᑕᔥ ᐐᑕᓇᒥᐋᓐ, ᒦᓴ ᐊᐌ ᑳᑲᑮᓇᐎᔥᑭᒡ᙮ ᐋᓃᔥ ᐊᐎᔭ ᑳᓵᑭᐋᓯᒃ ᐐᑕᓇᒥᐋᓐ ᑳᐙᐸᒫᒡ, ᐋᓃᓐ ᐃᑕᔥ ᐃᓈ ᑫᐃᔑᑲᔥᑭᑑᐸᓐ ᒋᓵᑭᐋᒡ ᑭᔐᒪᓂᑑᓐ ᑳᐙᐸᒫᓯᒃ?

ᒦᑕᔥ ᐅᐅ ᑭᔐᒪᓂᑑ ᑳᑮᐃᓈᑯᓂᓇᕽ, ᐊᐌᓀᓐ ᓴ ᑫᓵᑭᐋᒡ ᑭᔐᒪᓂᑑᓐ, ᐃᔑᓈᑾᓂᓂ ᑲᔦ ᒋᓵᑭᐋᐸᓐ ᐐᑕᓇᒥᐋᓐ᙮

ᑲᑭᓇ ᐊᐎᔭ ᑳᑌᐺᑕᕽ ᒋᓴᓲᓐ ᐁᐋᐎᓂᒡ ᑳᑮᐅᓇᑭᒥᑯᓂᒡ ᑭᔐᒪᓂᑑᓐ ᒋᐱᒫᒋᐃᐌᒡ, ᒦᓴ ᐊᐌ ᑭᔐᒪᓂᑑᓐ ᑳᐅᓃᒑᓂᓯᒥᑯᒡ᙮ ᑲᑭᓇ ᑕᔥ ᑲᔦ ᐊᐎᔭ ᑳᓵᑭᐋᒡ ᑳᐅᔫᓯᒥᒥᓐᒡ, ᐅᓵᑭᐋᐞ ᑲᔦ ᐊᐌᓀᓇᐃᑯ ᑭᔐᒪᓂᑑᓐ ᑳᐅᓃᒑᓂᓯᒥᑯᓂᒡ᙮

ᒦᑕᔥ ᐅᐅ ᐌᒋᑭᑫᑕᒪᕽ ᐁᓵᑭᐃᒪᕽ ᑭᔐᒪᓂᑑ ᐅᓃᒑᓂᓴᐞ, ᑮᓵᑭᐊᕽ ᑭᔐᒪᓂᑑ, ᐁᑑᑕᒧᐗᕽ ᑲᔦ ᐅᑎᓈᑯᓂᑫᐎᓇᓐ᙮

ᐁᑲᓇᐌᑕᒧᐗᕽ ᑕᔥ ᑭᔐᒪᓂᑑ ᐅᑎᓈᑯᓂᑫᐎᓇᓐ, ᒦ ᐃᒫ ᐁᔑᓈᑯᑖᐗᕽ ᐁᓵᑭᐊᕽ᙮ ᐅᑎᓈᑯᓂᑫᐎᓇᓐ ᑕᔥ ᑳᐐᓐ ᓴᓇᑫᑖᑾᓯᓂᓂᐗᓐ᙮

ᐊᐌᓀᓂᑕᔑᑯ ᑳᐅᓃᒑᓂᓯᒥᑯᒡ ᑭᔐᒪᓂᑑᓐ ᐅᔖᑰᒋᔥᑳᓇᓐ ᐊᑮᕽ ᑳᑕᓀᑖᑾᓂᓂᑭᓐ᙮ ᐋᓃᓐ ᐃᑕᔥ ᒪᔮ ᐌᒋᐸᑭᓇᐙᑕᒪᕽ ᐊᑮᕽ ᑳᑕᓀᑖᑾᒃ? ᑭᑌᐺᑕᒧᐎᓂᓈᓂᕽ ᐅᔕ!

ᐊᐌᓀᓐ ᑕᔥ ᑫᔖᑰᒋᔥᑲᑭᐸᓐ ᐊᑮᕽ ᑳᑕᓀᑖᑾᓂᓂᑭᓐ? ᐊᐊᐌ ᓴ ᐁᑕ ᑳᑌᐺᑕᕽ ᒋᓴᓲᓐ ᐁᐅᑯᓯᓯᒥᑯᓂᒡ ᑭᔐᒪᓂᑑᓐ᙮

ᒋᓴᔅ X ᐅᔕ ᑳᑮᔖᐳᔥᑲᕽ ᓂᐲᓂ ᑮᓰᑲᐊᑖᓱᒡ, ᒥᔅᑸᓂ ᑲᔦ ᑮᓂᒋᑲᓂᐎᒡ᙮ ᑳᐐᓐ ᐐᓐ ᓂᐲᕽ ᐁᑕ ᑮᐱ ᐃᔑᔖᐳᔥᑳᓰ, ᒥᒋᓃᔡᔦᒃ ᓴ ᓂᐲᕽ, ᒥᔅᑸᕽ ᑲᔦ᙮ ᑭᔐᒪᓂᑑ ᐅᑕᒑᑾᓐ ᑕᔥ ᐃᑯ ᑎᐹᒋᒧᐗᓐ ᐁᑌᐺᐗᓂᓂᒃ ᐅᐅ, ᐋᓃᔥ ᐅᑕᒑᑾᓐ ᑌᐺᐎᓐ ᑎᓄᐎᐗᓐ᙮

ᓂᔀᔦᒃ ᓴ ᐅᒋᑎᐹᒋᒫ ᒋᓴᔅ᙮

ᑭᔐᒪᓂᑑ ᐅᑕᒑᑾᓐ, ᓂᐱ, ᐃᐃ ᑲᔦ ᒥᔅᑶ᙮ ᐅᓄ ᓴ ᓂᔀᔦᒃ ᐯᔑᑾᓐ ᐅᒋ ᐃᓈᒋᒫ᙮

ᐃᓇᔥᑫ ᑭᑌᐺᑕᒧᐙᒥᓐ ᐃᓂᓂ ᐅᑎᓈᒋᒧᐎᓐ, ᔖᑰᒡ ᑕᔥ ᐐᓐ ᑭᔐᒪᓂᑑ ᐅᑎᐹᒋᒧᐎᓐ ᓇᐗᒡ ᒪᔥᑲᐎᑌᐺᒪᑲᓂᓂ, ᐐᓐ ᐄᑐᒃ ᒪᔮ ᑳᑎᐹᒋᒫᒡ ᐅᑯᓯᓴᓐ᙮

ᐊᐊ ᓴ ᑳᑌᐺᔦᓂᒫᒡ ᑭᔐᒪᓂᑑᓐ ᐅᑯᓯᓯᓂ, ᐅᑕᔮᓐ ᐅᑌᐃᕽ ᑳᐃᔑᑌᐺᔮᒋᒥᒥᓐᒡ ᐅᑯᓯᓯᒫᓐ᙮ ᐊᐌᓀᓂᑕᔑᑯ ᑳᑌᐺᑕᐙᓯᒃ ᑭᔐᒪᓂᑑᓐ, ᒦᐃ ᐅᑲᑮᓇᐎᔥᑭᕽ ᐁᑑᑕᐙᒡ, ᐁᑌᐺᑕᓯᒃ ᑭᔐᒪᓂᑑᓐ ᐁᓈᒋᒫᓂᒡ ᐅᑯᓯᓯᓂ᙮

ᒦᑕᔥ ᐅᐅ ᑎᐹᒋᒧᐎᓐ ᐁᔑᓯᕽ, ᑭᔐᒪᓂᑑ ᐁᑮᒦᓂᓇᕽ ᐱᒫᑎᓯᐎᓐ ᐐᑳ ᑫᐴᓂᓭᓯᓂᓂᒃ᙮ ᐃᐃ ᓴ ᐱᒫᑎᓯᐎᓐ ᐅᑯᓯᓯᕽ ᐅᒌᓂ᙮

ᐊᐊ ᑕᔥ ᑳᐊᔮᐙᒡ ᐅᑯᓯᓯᒫᓐ ᐅᑕᔮᓐ ᐱᒫᑎᓯᐎᓐ᙮ ᐊᐊ ᑕᔥ ᐐᓐ ᑳᐊᔮᐙᓯᒃ ᑭᔐᒪᓂᑑᓐ ᐅᑯᓯᓯᓂ ᑳᐐᓐ ᐅᑖᔮᓰᓐ ᐱᒫᑎᓯᐎᓐ᙮

ᑭᑑᔑᐲᐊᒪᐎᓂᓂᒻ ᐃᑕᔥ ᐅᓄ ᑮᓇᐙ ᑳᑌᐺᑕᒧᐌᒃ ᐅᐐᓱᐎᓂᓂ ᑭᔐᒪᓂᑑ ᐅᑯᓯᓴᓐ, ᒋᑭᑫᑕᒣᒃ ᐁᐊᔮᔦᒃ ᐱᒫᑎᓯᐎᓐ ᐐᑳ ᑫᐴᓂᓭᓯᓄᒃ᙮

ᒦᑕᔥ ᑲᔦ ᑳᐅᒋᑫᒋᓈᐅᔭᕽ ᑮᓈᓯᑲᐗᕽ ᑭᔐᒪᓂᑑ: ᑮᔥᐱᓐ ᐃᔑᑲᑴᒋᒪᕽ ᐁᓇᑌᓂᒃ ᐅᑎᓀᑕᒧᐎᓐ, ᑭᑲᓅᑖᑯᓈᓐ᙮

ᑮᔥᐱᓐ ᑕᔥ ᑭᑫᑕᒪᕽ ᐁᓅᑕᐎᓇᕽ ᐋᓃᓐ ᐃᑯ ᑳᔑᑲᑴᒋᒪᕽ, ᑭᑭᑫᑖᒥᓐ ᒋᒦᓂᓇᕽ ᐃᐃ ᑳᑮᐃᔑᑲᑴᒋᒪᕽ᙮

ᑮᔥᐱᓐ ᐊᐎᔭ ᐙᐸᒫᒡ ᐐᑕᓇᒥᐋᓐ ᑑᑕᒥᓂᒡ ᒪᒋᑑᑕᒧᐎᓐ ᑎᓄ ᑳᐃᔑᐎᔑᐌᒪᑲᓯᓂᓂᒃ ᓂᐳᐎᓂᕽ, ᐅᑖᐊᓇᒥᐁᑕᐙᓐ ᐅᔕ ᑭᔐᒪᓂᑑᓐ, ᐅᑲᒦᓂᑯᓂ ᑕᔥ ᐱᒫᑎᓯᐎᓐ᙮ ᐃᑭ ᑯᑕ ᑳᐃᓇᒀ ᐅᒪᒋᑑᑕᒧᐎᓂᐙᓐ ᑳᐃᔑᐎᓂᑯᓯᒀ ᓂᐳᐎᓂᕽ᙮ ᐊᔮ ᓴ ᒪᒋᑑᑕᒧᐎᓐ ᑳᐃᔑᐎᔑᐌᒪᑲᒃ ᓂᐳᐎᓂᕽ᙮ ᑳᐐᓐ ᓂᑎᑭᑐᓰ ᒋᑮᐊᓇᒥᐁᒋᑳᑌᑭᐸᓐ ᐅᐅ ᑎᓄ᙮

ᑲᑭᓇ ᐅᔕ ᐗᓂᑑᑕᒧᐎᓐ ᒪᒋᑑᑕᐎᓐ ᐃᓇᑭᒋᑳᑌ᙮ ᐊᔮ ᑕᔥ ᒪᒋᑑᑕᒧᐎᓐ ᑳᐃᔑᐎᔑᐌᒪᑲᓯᓄᒃ ᓂᐳᐎᓂᕽ᙮

ᑭᑭᑫᑖᒥᓐ ᐄᑐᒃ ᐊᐎᔭ ᑭᔐᒪᓂᑑᓐ ᑳᐅᓃᒑᓂᓯᒥᑯᒡ ᑳᐐᓐ ᓂᑖᒪᒋᑑᑕᓰ᙮ ᑭᔐᒪᓂᑑᓐ ᐅᑯᓯᓯᓂ ᐅᔕ ᐅᑲᓇᐌᓂᒥᑰᓐ, ᒪᒋᐊᔭᐋᓐ ᑕᔥ ᑳᐐᓐ ᐅᑲᑲᔥᑭᐃᑯᓰᓐ ᒋᒫᔑᓭᐃᑯᒡ᙮

ᑭᑭᑫᑖᒥᓐ ᑭᔐᒪᓂᑑ ᐁᐅᓃᒑᓂᓯᒥᓇᕽ; ᐃᑭ ᑕᔥ ᐐᓐ ᐅᐅᒫ ᐊᑮᕽ ᑳᐅᒋᑎᐯᑖᑯᓯᐙᒡ ᒪᒋᐊᔭᐋᓐ ᐅᑎᐯᓂᒥᑯᐙᓐ᙮

ᑭᑭᑫᑖᒥᓐ ᑲᔦ ᑭᔐᒪᓂᑑ ᐅᑯᓯᓴᓐ ᐁᑮᐱᑕᑶᔑᓂᓂᒡ, ᐁᑮᒦᓂᒥᓇᕽ ᑲᔦ ᓂᓯᑐᑕᒧᐎᓐ, ᒋᐅᒋᑭᑫᓂᒪᕽ ᑳᒪᔮᐌᑖᑯᓯᒡ ᑭᔐᒪᓂᑑ᙮ ᑭᐐᒋᐊᔮᒫᓈᓐ ᑕᔥ ᑳᒪᔮᐌᑖᑯᓯᒡ ᑭᔐᒪᓂᑑ, ᐃᓂ ᑲᔦ ᐅᑯᓯᓴᓐ ᒋᓴᔅ Xᑕᓐ᙮ ᒦᓴ ᐗᐊ ᑭᔐᒪᓂᑑ ᑳᑌᐺᐎᓂᐎᒡ, ᐐᓐ ᓴ ᐊ ᐱᒫᑎᓯᐎᓐ ᐐᑳ ᑫᐴᓂᓭᓯᓂᓂᒃ᙮

ᑳᓵᑭᐃᓇᑰᒃ ᓂᓃᒑᓂᓴᒃ, ᑫᑯ ᐸᐹᒣᓂᒫᑫᒀᓂᒃ ᒪᓂᑑᑳᓇᒃ᙮