ᓃᓐ ᓵᔨᒪᓐ ᐲᑕᕒ, ᒋᓴᔅ X ᐅᑕᓄᑮᐋᑲᓇᓐ, ᐅᑎᔑᓂᔕᐙᑲᓇᓐ ᑲᔦ᙮ ᑭᑑᔑᐲᐊᒪᐎᓂᓂᒻ ᑮᓇᐙ ᑳᑮᑌᐱᓇᒣᒃ ᑌᐺᔦᑕᒧᐎᓐ ᐯᔑᑾᓐ ᑳᑭᑕᑭᑌᒃ ᑖᐱᔥᑰ ᓃᓇᐎᓐᑦ ᑎᓄ ᑳᐊᔮᐗᑭᒡ, ᑳᑮᐅᒋᑌᐱᓇᒣᒃ ᐅᑾᔭᒀᑎᓯᐎᓂᕽ ᑭᑭᔐᒪᓂᑑᒥᓈᓐ, ᑭᐱᒫᒋᐃᐌᒥᓈᓐ ᑲᔦ ᒋᓴᔅ X᙮

ᑕᑲ ᑭᔐᐙᑎᓯᐎᓐ, ᐱᓵᓂᓯᐎᓐ ᑲᔦ ᑭᑲᑭᒋᒦᓂᑰᐎᓯᒻ ᐃᐃ ᐅᒋ ᑳᐃᔑᑭᑫᓂᒣᒃ ᑭᔐᒪᓂᑑ ᐊᐊ ᑲᔦ ᒋᓴᔅ ᑳᑎᐯᓂᒥᓇᕽ᙮

ᑭᔐᒪᓂᑑ ᓴ ᐅᒪᔥᑲᐎᓰᐎᓂᕽ ᑭᑑᒋᒦᓂᑰᒥᓐ ᑲᑭᓇ ᑫᑰᓐ ᑳᓅᑌᓭᔭᕽ ᐅᐅ ᑳᐱᒫᑎᓯᔭᕽ ᒋᐃᔑᒥᓄ ᐊᓇᒥᐁᐙᑎᓯᔭᕽ᙮ ᒦᑕᔥ ᐃᐃᒫ ᐌᒋᒦᓂᑰᐎᓯᔭᕽ ᐃᐃ ᐁᑭᑫᓂᒪᕽ ᑭᔐᒪᓂᑑ ᑳᑮᐊᑐᒥᓇᕽ᙮ ᒦ ᓴ ᑕᔥ ᑳᑮᐅᒋᐊᑐᒥᓇᕽ, ᒋᐊᔮᐗᕽ ᐐᓐ ᐃᑯ ᐅᑭᒋ ᐃᓀᑖᑯᓯᐎᓐ, ᐃᐃᐌᓂ ᑲᔦ ᑳᐃᔑᑾᔭᑯᓈᑯᓯᒡ᙮

ᒦᑕᔥ ᐅᐅ ᑳᑮᐅᒋᒦᓂᓇᕽ ᑳᑭᒋ ᐃᓀᑖᑾᓂᓂᑭᓐ, ᑳᑭᑕᑭᑌᓂᑭᓐ ᐅᒦᑮᐌᐎᓇᓐ ᑳᑮᐊᔓᑕᒫᑫᒡ᙮ ᑮᓇᐙ ᓴ ᐅᒦᑭᐌᐎᓂᕽ ᒋᐅᒋ ᔖᐾᑲᑕᒧᐌᒃ ᐃᐃ ᑳᓂᔑᐙᓈᒋᐃᐌᒪᑲᒃ ᒥᓴᐌᒋᑫᐎᓐ ᐅᐅᒫ ᐊᑮᕽ ᑳᐊᔮᒃ, ᒋᔑᐐᑑᑳᓱᔦᑭᐸᓐ ᐃᑕᔥ ᐅᑎᓈᑎᓯᐎᓂᕽ ᑭᔐᒪᓂᑑ᙮

ᒦᑕᔥ ᐅᐅ ᑫᐅᒋ ᑲᑭᓇ ᑫᑰᓐ ᐃᔑᒋᑫᔦᑭᐸᓐ ᑭᑌᐺᑕᒧᐎᓂᐙᕽ ᒋᓂᐊᔮᔦᒃ ᑳᑾᔭᑯᓈᑾᒃ ᐱᒫᑎᓯᐎᓐ, ᐃᐃ ᑕᔥ ᐁᐊᔮᔦᒃ ᐊᓂᐊᔮᒃ ᑭᑫᑕᒫᐎᓐ᙮

ᐁᐅᑭᑫᑕᒫᐎᓂᔦᒃ ᐃᑕᔥ ᐊᓂᐊᔮᒃ ᐊᐎᔭ ᑳᑲᔥᑭᑑᒡ ᐌᐌᓂ ᒋᑎᐯᓂᑎᓱᒡ᙮ ᐅᐅ ᑕᔥ ᐁᔑᑲᔥᑭᑑᔦᒃ ᐊᓂᐊᔮᒃ ᔕᔒᐯᑕᒧᐎᓐ᙮ ᐁᐅᔕᔒᐯᑕᒧᐎᓂᔦᒃ ᑕᔥ ᐊᓂᐊᔮᒃ ᒥᓄᐊᓇᒥᐁᐙᑎᓯᐎᓐ᙮

ᐁᔑᒥᓄᐊᓇᒥᐁᐙᑎᓯᔦᒃ ᐃᑕᔥ ᐊᓂ ᐃᔑᐊᔮᒃ ᑳᐃᔑᓵᑭᐃᑎᐙᒡ ᑳᐐᑕᓇᒥᐋᑎᐙᒡ; ᐅᐅ ᑕᔥ ᐃᔑᓵᑭᐃᑎᔦᒃ, ᐐᑫ ᐊᓂᔕᐌᓂᑎᒃ᙮

ᑮᔥᐱᓐ ᓴ ᐊᔮᔦᒃ ᐅᓄ ᐃᔑᐊᔮᐎᓇᓐ, ᐊᓂᐌᓅᒋᑑᔦᒃ ᑲᔦ ᑭᐱᒫᑎᓯᐎᓂᐙᕽ, ᒦ ᓴ ᐃᓂ ᑫᐃᓂᔥᑳᑯᔦᒃ ᒋᑭᑖᐸᑎᓯᔦᒃ, ᓃᐱᐗᐞ ᑲᔦ ᒋᓂᓈᑾᑭᓐ ᑭᒥᓄᒋᑫᐎᓂᐙᓐ, ᐃᐃ ᑌᐺ ᑳᐃᔑᑭᑫᓂᒣᒃ ᑳᑎᐯᓂᒥᓇᕽ ᒋᓴᔅ X᙮

ᐊᐌᓀᓐ ᑕᔥ ᑳᒪᓀᓯᒡ ᐅᓄ ᒦᐃ ᐁᔑᓈᑯᓯᒡ ᑖᐱᔥᑰ ᐊᐎᔭ ᐙᓴ ᑳᐊᒀᐱᓯᒃ, ᐋᐲᒋᑯ ᑳᐙᐱᓯᒃ᙮ ᒦᓴ ᐗᐊ ᑳᐗᓃᑫᒡ ᐁᑮᐯᑭᐃᑎᐸᓐ ᑳᑮᐃᔑ ᓂᑖ ᒪᒋᑑᑕᑭᐸᓐ᙮

ᓃᒋᐅᑌᐺᑕᒨᒃ, ᑕᑲ ᑕᔥ ᐋᔅᑯᓀᑕᒧᒃ ᒋᑫᒋᓈᐅᐌᑖᑾᓂᓂᒃ ᑭᔐᒪᓂᑑ ᑳᑮᐃᔑᑲᓅᓂᓀᒃ᙮ ᑮᔥᐱᓐ ᓴ ᐅ ᐃᔑᒋᑫᔦᒃ, ᑳᐐᓐ ᐐᑳ ᑭᑲᐸᑭᔑᓰᒻ᙮

ᒦᑕᔥ ᑫᑮᓇᐙ ᑳᐐᐅᒋ ᐌᓅᒋ ᑕᐎᓇᒫᑰᔦᒃ ᒋᐲᑎᑫᔥᑳᔦᒃ ᐃᐃᒫ ᐐᑳ ᑫᔑᐴᓂᓭᓯᓂᓂᒃ ᑳᐃᔑᑭᒋᐅᑭᒫᐎᒡ ᑳᑎᐯᓂᒥᓇᕽ ᑳᐱᒫᒋᐃᓇᕽ ᒋᓴᔅ X᙮

ᓃᓐ ᓴ ᐱᑯ ᒨᔕᒃ ᓂᑲᐊᔛ ᒋᒫᒥᑰᑕᒪᐎᓇᑰᒃ ᐅᓄᐌᓂᐗᓐ, ᐋᓇᐐᓐ ᐋᔕ ᐁᑭᑫᑕᒣᒃ ᐅᓄ᙮ ᐃᐃ ᑕᔥ ᑌᐺᐎᓐ ᑳᑭᑫᑕᒣᒃ, ᒦ ᓴ ᐃᐃᒫ ᐁᔑᒪᔥᑲᐎᑳᐸᐎᔦᒃ᙮

ᒦᑕᔥ ᐁᓀᑕᒫᓐ ᒥᓂᒃ ᐃᑯ ᑫᐱᒫᑎᓯᔮᓐ ᐅᐅᒫ ᓂᐐᔭᐎᕽ ᑾᔭᒃ ᒋᐃᔑᒋᑫᔮᐹᓐ, ᒋᐅᒻᐺᒥᓇᑰᑭᐸᓐ, ᒋᒫᒥᑰᑕᒪᐎᓂᓇᑰᒃ ᐅᓄᐌᓂᐗᓐ᙮

ᐁᑭᑫᑕᒫᓐ ᑯᑕ ᐋᔕ ᑫᑳ ᐁᐐ ᑮᒋᑯᔥᑲᒫᓐ ᐅᐅ ᓂᐐᔭᐤ ᐅᐅᒫ ᐊᑮᕽ ᑳᑖᓄᑕᒫᓐ, ᑳᑮᐃᔑ ᐯᑌᐐᑕᒪᐎᒡ ᐊᐊ ᑳᑎᐯᒋᑫᒡ ᒋᓴᔅ X᙮

ᒋᑆ ᓂᐳᔮᓐ ᓴ ᐌᐌᓂ ᑫᑰᓐ ᓂᑲᐃᔑᒋᑫ ᐅᓄᐌᓂᐗᓐ ᑫᐅᒋᒫᒥᑲᐎᓄᑕᒣᒃ᙮

ᑳᐐᓐ ᓃᓇᐎᓐᑦ ᓂᑮᐋᐸᒋᑑᓯᒥᓐ ᐃᓂ ᑳᑲᑮᑖᐎᑖᑾᑭᓐ ᑎᐹᒋᒧᐎᓇᓐ ᑫᑮ ᒥᒋ ᐅᔑᑑᔮᑭᐸᓐ ᐊᐲ ᑮᑕᔑᑕᒫᑰᔦᒃ ᑳᐐᒪᔥᑳᐌᑖᑾᓂᓂᒃ ᐅᑕᑯᔑᓄᐎᓐ ᑳᑎᐯᒋᑫᒡ ᒋᓴᔅ X᙮ ᓃᓇᐎᓐᑦ ᐅᔕ ᓂᔥᑮᔑᑯᓈᓂᕽ ᓂᑮᐅᒋ ᐙᐸᑕᒧᐙᒥᓐ ᑳᐃᔑ ᒫᐗᒋ ᑭᒋᐅᑭᒫᐌᑖᑯᓯᒡ᙮

ᐊᐲ ᓴ ᑭᔐᒪᓂᑑᓐ ᑳᐅᔫᓯᒥᒥᓐᒡ ᑮᒦᓂᑯᒡ ᑭᑌᑖᑯᓯᐎᓐ, ᑭᒋ ᐃᓀᑖᑯᓯᐎᓐ ᑲᔦ, ᐊᐲ ᑲᔦ ᑮᐅᒋᑲᓅᓈ ᐃᒫ ᑳᑮᐃᔑᐊᔮᓂᒡ ᑳᒫᐗᒋᑯ ᑭᒋ ᐃᓀᑖᑯᓯᓂᒡ ᐅᐅ ᐁᑮᐃᓂᓐᒡ: ᒦ ᓴ ᐗᐊ ᓃᓂᑯ ᓂᑯᓯᔅ ᑳᓵᑭᐊᒃ, ᐐᓐ ᓴ ᐱᑯ ᑳᒥᓍᐸᒪᒃ, ᑮᐃᓈ᙮

ᓃᓇᐎᓐᑦ ᓴ ᐱᑯ ᓂᑮᓅᑕᒧᐙᒥᓐ ᑭᒋᑮᔑᑯᕽ ᑳᑮᐱ ᐅᒋ ᑲᓅᓂᓐᒡ, ᐊᐲ ᐌᑎ ᑮᐐᒌᐗᑭᒡ ᑭᒋᐗᒌᕽ ᑳᑮᑕᓀᑖᑯᓯᓂᒡ ᑭᔐᒪᓂᑑᓐ᙮

ᒦᑕᔥ ᓃᓇᐎᓐᑦ ᑳᐅᒋ ᑫᒋᓈᐅᐌᑕᒧᐗᑭᒡ ᐅᑎᐹᒋᒧᐎᓂᐙᓐ ᐃᑭ ᑳᑮᑮᑭᑑᑕᒪᐙᐙᒡ ᑭᔐᒪᓂᑑᓐ᙮ ᐋᐱᒋ ᓴ ᑭᑖᒥᓄᒋᑫᒻ ᐱᓯᑕᒣᒃ ᐅᐅ, ᐋᓃᔥ ᒦᐃ ᐁᔑᓈᑾᒃ ᑖᐱᔥᑰ ᐙᓴᑯᓀᒋᑲᓐ ᑳᐙᓴᑯᓀᒃ ᑳᐃᔑᑲᔥᑮᑎᐱᑲᒃ ᐲᓂᔥ ᒋᓂᐲᑖᐸᕽ, ᐲᓂᔥ ᒋᐱᒨᑲᐊᕽ ᐙᐸᓇᓇᕽ ᑳᐃᓂᓐᒡ, ᒦᔥ ᐃᐃᒫ ᑭᑌᐃᐙᓐ ᑫᐅᒋᐙᓭᓈᑾᑭᓐ᙮

ᐅᐅᐌ ᑕᔥ ᒫᐗᒡ ᐃᑯ ᑭᑫᑕᒧᒃ: ᑳᐐᓐ ᐊᐎᔭ ᐅᑖᑲᔥᑭᑑᓰᓐ ᐐᓂᑯ ᒋᐐᑕᑭᐸᓐ ᒪᔮ ᐃᐃ ᑳᐃᔑ ᑲᓅᑕᒪᐎᒥᓐᒡ ᑭᔐᒪᓂᑑᓐ ᑫᑌᐅᔑᐲᐃᑫᐎᓂᕽ᙮

ᐋᓃᔥ ᑳᐃᔑ ᑲᓅᑕᒪᐎᓐᒡ ᑭᔐᒪᓂᑑ ᑳᐐᓐ ᐐᑳ ᐃᓂᓂ ᐅᑎᓀᑕᒧᐎᓂᕽ ᑮᐅᒌᒪᑲᓯᓅᓐ᙮ ᐃᑭᐌᓂᐗᒃ ᐅᔕ ᐃᓂᓂᐗᒃ ᑳᑮᒥᓯᐌᑎᐯᓂᒥᑯᐙᒡ ᑭᔐᒪᓂᑑᓐ ᐅᑕᒑᑯᓂ ᑮᐃᑭᑐᐗᒃ ᑳᐃᔑᐊᑕᐌᑕᒥᓂᒡ ᑭᔐᒪᓂᑑᓐ᙮

ᐃᓇᔥᑫ ᑮᐅᒋᑭᑫᑖᑯᓯᐗᒃ ᐄᑐᒃ ᐃᑭ ᐅᑖᓈᕽ ᑳᑮᐃᓍᓂᑎᓱᐙᒡ ᐁᑮᑭᑑᑕᒪᐙᐙᒡ ᑭᔐᒪᓂᑑᓐ ᐃᐃᒫ ᒣᑴᔭᐄ ᑳᐃᔑᐊᔮᓂᒡ ᐯᒫᑎᓯᓂᒡ᙮ ᒦᑕᔥ ᐯᔑᑾᓐ ᑫᔑᐊᔮᐙᒡ ᐅᐗᓂᑭᑭᓄᐊᒫᑫᒃ ᑳᐃᔑᐊᔮᔦᒃ᙮ ᒦᐗᒃ ᓴ ᐃᑭ ᑫᐲᑑᐙᒡ ᑫᓂᔑᐗᓈᒋᐃᐌᒪᑲᓂᓂᑭᓐ ᑭᑭᓄᐃᑫᐎᓇᓐ ᑳᑌᐺᐗᓯᓂᓂᑭᓐ᙮ ᐅᑲᔮᓇᐌᓂᒫᐙᓐ ᑲᔦ ᑳᑎᐯᓂᒥᑯᐙᒡ Xᑕᓐ ᑳᑮᑎᐸᐅᑯᐙᒡ᙮ ᐐᓇᐙ ᑕᔥ ᐱᑯ ᑕᑲᔥᑭᑕᒫᓱᐗᒃ ᑫᐅᒋ ᑫᑕᑐ ᓂᔑᐗᓈᒋᐃᑎᓱᐙᒡ᙮

ᑕᐹᑎᓄᐗᐞ ᐃᑕᔥ ᑲᔦ ᑫᓇᓈᐱᓈᑯᐙᒡ ᐃᐃ ᑳᐃᔑᐐᓈᑎᓯᐙᒡ᙮ ᒦ ᓴ ᑕᔥ ᐃᐃᒫ ᑫᐅᒋᐹᐱᓀᒋᑳᑌᒃ ᐃᐃ ᐱᒫᑎᓯᐎᓐ ᑳᐱᒧᓵᑕᒪᕽ ᑌᐺᐎᓂᕽ ᑳᐃᔑᓯᕽ᙮

ᐅᑯ ᑕᔥ ᑳᐗᓂᑭᑭᓄᐃᑫᐙᒡ ᑳᓂᑖ ᐋᔅᑯᓂᓯᐙᒡ, ᒦ ᐁᑕ ᑯ ᐁᐃᓍᓂᓀᒀ ᐁᐐᐅᒋᑲᔥᑭᒋᑫᐙᒡ᙮ ᐋᓃᔥ ᐅᑲᐋᐸᒋᑑᓈᐙᓐ ᐃᓂ ᐐᓇᐙ ᐱᑯ ᐅᑲᑲᔦᓂᓯᐎᓂᐙᓐ᙮ ᐋᔕ ᐅᔕ ᒣᐎᔕ ᐅᑯ ᑎᓄ ᑮᑮᔖᑯᓈᐗᒃ ᑫᑑᑕᐎᑣ; ᐃᓂ ᑲᔦ ᑳᐐᓂᔑᐗᓈᒋᐃᑯᐙᒡ ᑳᐐᓐ ᓂᐹᓰᐗᓐ᙮

ᐃᓇᔥᑫ ᑭᔐᒪᓂᑑ ᑳᐐᓐ ᐅᑮᒪᓈᒋᐋᓰᐞ ᐁᒐᓬᐊᐞ ᑳᑮᒪᒋᑑᑕᒥᓂᒡ, ᑳᐃᔑᑲᒀᑕᑭᑑᕽ ᓴ ᐅᑮᐃᔑᓃᓯᐌᐱᓈᐞ᙮ ᒦᑕᔥ ᐌᑎ ᐅᐅ ᐃᔑᐊᐲ ᐁᔑᑭᐸᐅᒥᓐᒡ ᑳᐃᔑᑲᔥᑮᑎᐱᑲᓂᓂᒃ, ᒦᔥ ᐃᐃᒫ ᑫᔑᑲᓇᐌᑖᑯᓯᓂᒡ ᐲᓂᔥ ᒋᐅᒋᒋᓭᓂᒃ ᑳᐐᑎᐹᑯᓂᑫᐎ ᑮᔑᑲᓂᓂᒃ᙮

ᑭᔐᒪᓂᑑ ᑲᔦ ᑳᐐᓐ ᐅᑮᒪᓈᒋᐋᓰᐞ ᒣᐎᔕ ᑳᑮᐱᒫᑎᓯᓂᑯᐸᓀᓐ ᑳᑫᑌᐊᑮᐗᓂᓂᑯᐸᓀᓐ, ᐊᐲ ᑮᓂᑭᐸᓈᑯᐸᓀᓐ ᐅᐅᒫ ᑫᑌᐊᑮᕽ ᑳᑮᑭᑌᓂᒥᑯᓯᒃ᙮ ᒦ ᐁᑕ ᑯ ᓅᐗᐗᓐ ᑳᑮᓂᑖ ᑕᔑᑕᒥᓂᒡ ᑾᔭᒀᑎᓯᐎᓐ ᑳᑮᐱᒫᒋᐋᒡ᙮ ᓃᔣᓱ 7 ᑲᔦ ᑯᑕᒃ ᐊᐎᔭᐞ ᐅᑮᑕᑯᐱᒫᒋᐋᐞ᙮

ᑭᔐᒪᓂᑑ ᐃᑕᔥ ᑲᔦ ᑮᑑᑕᐙᑯᐸᓐ ᒋᑕᑯᓂᔑᐗᓈᒋᐃᒥᓐᒡ ᐃᐃ ᐯᒫᑎᓯᓂᒡ ᐊᐲ ᑮᒑᑳᑭᓴᕽ ᑭᒋᐅᑌᓇᐗᓐ ᔂᑕᒻ ᐃᐃ ᑲᔦ ᑲᒸᕒᐊ ᑳᑮᐃᔑᓂᑳᑌᓂᑭᓐ᙮ ᐃᔥᑯᑌᓂ ᓴ ᐅᑮᐋᐸᒋᑑᓐ᙮ ᒦᑕᔥ ᐃᐃᒫ ᐁᔑᐙᐸᑕᐃᑰᔭᕽ ᐋᓃᓐ ᑫᐃᔑᓭᐙᒡ ᑳᑭᑌᓂᒫᓯᒀ ᑭᔐᒪᓂᑑᓐ᙮

ᐅᑮᔖᐾᐋᓐ ᑕᔥ ᑲᔦ ᓬᐋᑕᓐ ᑾᔭᒃ ᑳᑮᐃᓂᓃᐎᓂᒡ᙮ ᓬᐋᑦ ᐄᑐᒃ ᐅᑮᑭᒋ ᒫᓀᑕᒧᐃᑰᐞ ᐃᐃ ᐯᒫᑎᓯᓂᒡ ᑳᑮᐃᔑᐐᓈᑎᓯᓂᒡ ᑳᑮᐃᔑᒋᑫᓂᒡ ᐙᐃᔑᒋᑫᓂᒡ ᐃᑯ᙮

ᐗᐊ ᑕᔥ ᑳᑮᑾᔭᒀᑎᓯᒡ ᒣᑴᔭᐄ ᐁᑮᐃᔑᑖᒡ ᑮᐅᒋ ᑲᒀᑕᑫᑕᒻ ᐅᑕᒑᑯᕽ, ᐁᑕᓱᑮᔑᒃ ᐋᓃᔥ ᐅᑮᐙᐹᑖᓐ, ᐅᑮᓅᑖᓐ ᑲᔦ ᐋᓃᓐ ᑳᐃᔑᒪᒋ ᐃᔑᒋᑫᓂᒡ ᐯᒫᑎᓯᓂᒡ᙮

ᒦᑕᔥ ᐃᐃᒫ ᐌᒋᓈᑾᓂᓂᒃ ᑳᑎᐯᒋᑫᒡ ᐁᓂᑖ ᔕᐾᐋᒡ ᐯᒫᑎᓯᓂᒡ ᑳᑭᑌᓂᒥᑯᒡ ᐃᐃᒫ ᑳᐃᔑ ᐗᓯᑖᐎᓭᓂᒡ᙮ ᐅᑲᔥᑭᑑᓐ ᑲᔦ ᐁᒪᒫᒋᑯᓈᒡ ᐃᐃ ᑳᒪᒋ ᐃᔑᐌᐱᓯᓂᒡ ᐹᓂᒫ ᑎᐹᑯᓂᑫᐎᑮᔑᑲᓂᓂᒃ ᐁᐐᓇᓇᐊᓵᒡ᙮

ᐃᑭᐌᓂᐗᒃ ᓴ ᒣᒥᑕᑫ ᑳᐃᔑᒋᑫᐙᒡ ᐋᓃᓐ ᐁᔑᒪᒋ ᒥᓴᐌᑕᒨᒪᑲᓂᓂᑭᓐ ᐅᐐᔭᐎᐙᓐ; ᑳᐐᓐ ᑲᔦ ᐅᐸᐹᒥᑕᐙᓯᐙᐙᐞ ᐊᐌᓀᓇᐞ ᐃᑯ ᑳᓃᑳᓂᓯᓂᒡ᙮ ᐋᐱᒋ ᑲᔦ ᓲᑭᑌᐁᐗᒃ, ᑲᑳᒋᒡ ᑲᔦ ᑫᑰᓂᓂ ᐃᔑᒋᑫᐗᒃ; ᑳᐐᓐ ᑲᔦ ᑯᑖᒋᓰᐗᒃ ᐁᒪᓈᓱᒫᓯᒀ ᑳᓃᑳᓀᑖᑯᓯᓂᒡ ᐊᐌᑴᓇᐞ ᐃᔥᐱᒥᕽ ᑳᐊᔮᓂᒡ, ᑕᑾᒡ ᐃᑕᔥ ᐅᐹᐱᓄᑕᐙᐙᐞ᙮

ᐃᑭ ᑕᔥ ᐐᓐ ᐁᒐᓬᐊᒃ ᓇᐗᒡ ᑳᓲᑫᑖᑯᓯᐙᒡ, ᑳᒪᔥᑲᐎᓰᐙᒡ ᑲᔦ, ᑳᐐᓐ ᑲᓇᑫ ᐅᒪᒋ ᐃᓈᓯᐙᐙᐞ ᑳᐗᓂᑭᑭᓄᐃᑫᓂᒡ ᐁᓈᓴᒦᓂᒡ ᑳᑎᐯᒋᑫᓂᒡ᙮

ᐅᑯ ᑕᔥ ᐐᓐ ᑳᐗᓂᑭᑭᓄᐃᑫᐙᒡ ᐅᒪᒋ ᐃᑖᓈᐙᓐ ᑫᑰᓇᓐ ᑳᓂᓯᑐᑕᓯᒀ᙮ ᒦ ᐅᐌ ᐁᔑᓈᑯᓯᐙᒡ, ᑖᐱᔥᑰ ᑳᐁᔖᐙᑎᓯᓯᒀ ᐊᔭᐋᐎᔕᒃ, ᐅᑎᔑᐊᔮᐎᓂᐙᕽ ᐃᑯ ᑳᐃᔑᒋᑫᐙᒡ, ᒦ ᐁᑕ ᑳᐅᒋᓂᑖᐎᑭᐙᒡ ᒋᑳᒋᑎᓂᑣ, ᒋᓂᓯᑣ ᑕᔥ ᑲᔦ᙮ ᒦᑕᔥ ᐯᔑᑾᓐ ᑫᔑᓂᓯᑣ ᐅᐗᓂᑭᑭᓄᐃᑫᒃ ᑳᑑᑕᐎᒥᓐᒡ ᐊᔭᐋᐎᔕᐞ᙮

ᐃᐃ ᑳᐃᔑᒪᒫᔒᑲᑖᑫᐙᒡ ᐃᑕᔥ, ᒦ ᐯᔑᑾᓐ ᑫᐐᓇᐙ ᑫᐃᔑᑎᐸᐊᒪᐎᑣ᙮ ᒦᓴᑯ ᐱᓵᓐ ᐁᑮᔑᑲᓂᓂᒃ ᐁᐃᔑᒋᑫᐙᒡ ᑫᒥᓉᑕᒧᔥᑳᑯᐙᒡ, ᐐᓇᐙ ᐱᑯ ᑳᐃᓀᑕᒧᐙᒡ ᐁᒥᓉᑖᑾᓂᓂᑭᓐ᙮ ᐐᓇᐙ ᓴ ᑭᑕᑲᓯᓈᑯᓯᐃᑯᐙᒃ, ᑭᒫᔑᔥᑳᑯᐙᒃ ᐁᐐᒋᐐᓯᓃᒥᓀᒀ; ᒦᑕᔥ ᐃᑯ ᑫᔮᐱ ᐁᔑᒥᓉᑕᒧᐃᑎᓱᐙᒡ ᐁᑲᑲᔦᓂᓯᐙᒡ᙮

ᒦ ᐁᑕ ᑯ ᑲᔦ ᐃ ᑎᓄ ᑳᓇᓈᑕᐙᐸᒫᐙᒡ ᐃᑴᐗᐞ ᓅᒋᑯ ᑫᑑᑕᐙᐙᒡ᙮ ᑳᐐᓐ ᐐᑳ ᑌᒪᒋᑑᑕᓰᐗᒃ᙮ ᐋᐱᒋ ᑲᔦ ᓈᑲᒌᐗᒃ ᐁᑌᐱᓇᒧᐙᒡ ᑳᐊᑕᐌᑕᒧᐙᒡ᙮ ᑭᔐᒪᓂᑑᓐ ᐄᑐᒃ ᐅᑲᓂᔑᐙᓈᒋᐃᑯᐙᓐ᙮

ᐁᑮᓇᑲᑕᒧᐙᒡ ᑕᔥ ᐃᐃ ᑾᔭᒃ ᐃᔖᐎᓐ, ᒦᑕᔥ ᑳᐃᔑᐗᓂᒫᒑᐙᒡ ᐁᑮᓈᐸᐊᒫᓈᐙᒡ ᑳᑮᐃᔑᐱᒧᓭᓂᒡ ᐯᓬᐊᒨᓐ, ᑳᑮᑲᓅᒋᑫᑕᒪᐙᒡ ᑭᔐᒪᓂᑑᓐ᙮ ᐋᐱᒋ ᐄᑐᒃ ᓴ ᐅᑮᓵᑭᑑᓂ ᓅᒋᑯ ᐁᐃᔑᒋᑫᓂᒡ ᐁᑮᐅᒋᑲᔥᑭᒋᑫᓂᒡ᙮ ᐲᐅᕒ ᑳᑮᐃᔑᓂᑳᓱᓂᑯᐸᓀᓐ ᐅᑌᑌᓂ᙮

ᒫᔑᒥᑕᑎᒨᓐ ᐄᑐᒃ ᐅᑮᑭᔒᑲᓅᓂᑰᓐ ᐊᐊ ᐯᓬᐊᒻ ᐃᐃ ᑳᑮᐃᔑᒪᒫᔒᒡ, ᐊᔭᐋᐎᔕᓐ ᑳᓂᑖᑮᑭᑐᓯᓂᒃ ᐃᓂᓃᕽ ᑮᐃᓉᐗᓐ ᐁᑲᓅᓂᑯᒡ᙮ ᒦᑕᔥ ᑳᐃᔑᑭᐱᒌᒡ ᐯᓬᐊᒻ ᐊᐗᔑᒣ ᓅᒋᑯ ᒋᑲᑮᐹᒋᒋᑫᓯᒃ᙮

ᒦᑕᔥ ᑲᔦ ᐁᔑᓈᑯᓯᐙᒡ ᑳᐗᓂᑭᑭᓄᐃᑫᐙᒡ ᑖᐱᔥᑰ ᓂᐱ ᑳᐃᔑᒨᑭᒋᐗᕽ ᑳᐃᔅᑲᑌᑭᓐ, ᐃᐃ ᑲᔦ ᑳᐹᔥᑭᓀᔮᒃ ᑳᐸᐹᒥᐌᐹᓯᕽ ᑮᑭᒋᓅᑎᕽ᙮ ᒦᐗᒃ ᓴ ᐃᑭ ᑳᑕᐎᓇᒪᐎᑣ ᒫᐗᒡ ᐃᑯ ᑳᐃᔑ ᑲᔥᑮᑎᐱᑲᓂᓂᒃ᙮

ᐋᐱᒋ ᑲᔦ ᑭᔒᐌᐗᒃ ᐁᑲᑮᐹᒋ ᒪᒦᒀᓂᑎᓱᐙᒡ, ᐅᑖᐸᒋᑑᓈᐙᓐ ᑲᔦ ᐐᔭᐎᒫ ᑳᐃᔑ ᒪᒋ ᒥᓴᐌᒋᑫᒪᑲᓂᓂᒃ ᐁᐅᒋᑳᒋᒋᐋᐙᒡ ᐃᐃ ᐸᔦᔑᑯ ᑳᓂᒫᒋᑖᓂᒡ ᑳᑕᐸᓰᓄᑕᐙᓂᒡ ᐃᓂᐌᓂᐗᐞ ᐯᒫᑎᓯᓂᒡ ᑳᓂᑖ ᐗᐗᓃᓂᒡ᙮

ᐁᐊᔓᑕᒪᐙᐙᒡ ᑫᑰᓇᓐ ᐃᓈᑯᓂᑫᐎᓇᓐ ᒋᑎᐯᓂᒥᑯᓯᓂᒃ, ᔖᑰᒡ ᐃᑕᔥ ᐐᓇᐙ ᐱᑯ ᐅᒥᓯᐌᑎᐯᓂᒥᑯᓈᐙ ᑫᓂᔑᐗᓈᒋᐃᑯᐙᒡ᙮ ᐌᑯᓀᓂᓂ ᓴ ᑯ ᐊᐎᔭ ᑳᔖᑯᒋᐃᑯᒡ, ᒦ ᓴ ᐃᐌᓂ ᑌᐯᓂᒥᑯᒡ᙮

ᐊᐌᓀᓇᒃ ᓴ ᑯ ᑳᑮᔖᐼᑲᑕᒧᐙᒡ ᐃᐃ ᑳᓂᔑᐙᓈᒋᐃᐌᒪᑲᓂᓂᒃ ᑳᐃᔑᒋᑫᓂᒡ ᐯᒫᑎᓯᓂᒡ ᐅᐅᒫ ᐊᑮᕽ, ᐁᑭᑫᓂᒫᐙᒡ ᑳᑎᐯᓂᒥᒥᓇᕽ ᐅᐱᒫᒋᐃᐌᓐ ᒋᓴᔅ Xᑕᓐ; ᑮᔥᐱᓐ ᐃᑕᔥ ᒦᓇᐙ ᐅᑎᔑᒋᑫᐎᓂᐙᕽ ᐅᒋᑕᑯᐱᓂᑯᐙᒡ, ᔖᑰᒋᐃᑯᐙᒡ ᑲᔦ, ᓇᐗᒡ ᐄᑐᒃ ᓅᑯᒻ ᑭᒋ ᐃᔑᓈᑯᓯᐗᒃ ᐋᐲᒡ ᐐᓐ ᐌᑎ ᓂᑕᒻ ᑳᑮᐃᔑᓈᑯᓯᐙᒡ᙮

ᓇᐗᒡ ᐄᑐᒃ ᑖᑮᐅᓂᔑᔑᓂᓂ ᐐᑳ ᑭᑫᑕᓯᒀᐸᓐ ᐃᐃ ᑳᑾᔭᑯᓈᑾᓂᓂᒃ ᐱᒫᑎᓯᐎᓐ, ᐊᐲᒡ ᐐᓐ ᐁᑮᐃᔥᒀ ᑭᑫᑕᒧᐙᒡ ᒋᓇᑲᑕᒧᐙᐸᓐ ᐃᐃ ᒥᓍᒋᒧᐎᓐ ᑭᔐᒪᓂᑑᕽ ᑳᑮᐅᒌᓂᒃ ᑳᑮᐐᑕᒪᐎᑣ᙮

ᒦᓴᑯ ᒪᔮ ᑌᐺ ᐁᔑᓭᐙᒡ ᑳᐃᔑᓯᓂᓂᒃ ᐃᐃ ᓇᓀᑳᒻ ᐃᑭᑐᐎᓐ: ᐊᓂᒧᔥ ᐅᑮᐌᐊᑕᒦᒋᓐ ᑳᑮᔑᔑᑲᑯᐙᑕᕽ, ᐅᐅ ᑕᔥ ᑲᔦ ᐃᑭᑐᐎᓐ: ᐊᐊ ᑰᑰᔥ ᑮᐃᔥᒀ ᑭᓰᓯᐸᒋᑲᓂᐎᒡ, ᒦ ᐃ ᒦᓇᐙ ᐁᔑ ᑮᐌ ᑎᑎᐱᔑᒨᓄᒡ ᐊᔕᔥᑮᑳᕽ᙮

ᑳᓵᑭᐃᓇᑰᒃ, ᒦ ᓴ ᐃ ᐅᐌ ᐋᔕ ᓃᔑᕽ 2 ᐁᐅᔑᐲᐊᒪᐎᓇᑰᒃ᙮ ᒦ ᓴ ᑕᔥ ᑳᑮᐅᒋ ᐅᔑᐲᐊᒪᐎᓇᑰᒃ ᓃᔣ ᒋᒫᒥᑲᐙᒥᓇᑰᒃ ᒋᐊᒪᒋᑑᔮᓐ ᑭᓈᓈᑲᑕᐌᑕᒧᐎᓂᐙᓐ ᑾᔭᒃ ᒋᐃᓀᑕᒣᒃ᙮

ᑭᓇᑕᐌᓂᒥᓂᓂᒻ ᑲᔦ ᒋᒫᒥᑲᐎᓄᑕᒣᒃ ᑳᑮᐃᑭᑐᐙᒡ ᐃᑭ ᑳᑭᑌᑖᑯᓯᐙᒡ ᒣᐎᔕ ᑳᑮᑲᓅᑕᒪᐙᐙᒡ ᑭᔐᒪᓂᑑᓐ᙮ ᒋᒫᒥᑲᐎᔦᒃ ᑲᔦ ᐅᑎᐹᒋᒧᐎᓐ ᑳᑎᐯᒋᑫᒡ ᑳᐅᐱᒫᒋᐃᐌᒥᔭᕽ ᑳᑮᒦᓂᒥᓀᒃ ᐅᑎᔑᓂᔕᐙᑲᓇᐞ᙮

ᐅᐅ ᑕᔥ ᒫᐗᒋᑯ ᒥᑴᑕᒧᒃ, ᐃᔥᒀᒡ ᐊᓂᑲᑮᔑᑲᒃ ᑕᓂᐊᔮᐗᒃ ᐯᒫᑎᓯᐙᒡ ᑫᑎᐯᓂᒥᑯᐙᒡ ᐅᒥᓴᐌᒋᑫᐎᓂᐙᓐ᙮ ᒦᐗᒃ ᓴ ᐃᑭ ᑫᐹᐱᓄᑕᐎᓀᒀ᙮

ᒦ ᓴ ᑕᔥ ᑫᐃᑭᑐᐙᒡ: ᐋᓃᓐ ᑕᔥ ᑳᐃᔑᓭᓂᒃ ᑳᑮᐃᔑ ᐊᔓᑕᒫᑫᑯᐸᓀᓐ ᐁᐐᐱᑕᑯᔑᕽ? ᐃᓇᔥᑫ ᑭᑫᑌᔭᐋᒥᓈᓂᒃ ᐋᔕ ᑮᒑᑭᓂᐳᐗᒃ, ᒦᓴᑯ ᐯᔑᑾᓐ ᑫᔮᐱ ᐯᒥ ᐃᔑᐌᐸᒃ ᑳᑮᐃᔑᐌᐸᒃ ᑮᐅᔑᒋᑳᑌᒃ ᐅᐅ ᐊᑭ, ᑕᐃᑭᑐᐗᒃ᙮

ᐅᒋᑕ ᐱᑯ ᐁᐗᓃᑫᓄᑕᒧᔑᑑᐙᒡ, ᑭᔐᒪᓂᑑᓐ ᐅᑎᑭᑐᐎᓂᓃᕽ ᐁᑮᐅᒋᐊᔮᓂᒃ ᑭᒋᑮᔑᒃ ᒣᐎᔕ, ᐃᐃᐌᓂ ᑲᔦ ᐊᑭ ᓂᐲᑳᕽ ᐁᐅᒋᓵᑭᐲᓂᒃ, ᓂᐲᓂ ᐁᑮᐋᐸᑕᓂᓂᒃ ᑮᐅᔑᒋᑳᑌᓂᒃ ᐊᑭ᙮

ᒦ ᓴ ᐃᐃᒫ ᓂᐲᕽ ᑳᑮᐃᔑ ᓂᑭᐸᒋᑳᑌᑯᐸᓀᓐ ᐃᐃ ᑫᑌ ᐊᑭ ᑳᑮᐊᔮᑯᐸᓀᓐ, ᒦ ᐃᒫ ᑳᑮᐃᔑ ᓂᔑᐗᓈᒋᒋᑳᑌᒃ᙮

ᐃᐃ ᑕᔥ ᑮᔑᒃ, ᐃᐃ ᑲᔦ ᐊᑭ ᓅᑯᒻ ᑳᐊᔮᑭᓐ, ᒦ ᓴ ᐯᔑᑾᓐ ᑭᔐᒪᓂᑑ ᐅᑎᑭᑐᐎᓂᕽ ᐌᒋᑲᓇᐌᑖᑾᓂᓂᑭᓐ ᐱᒌᓇᒃ ᐁᐐᒑᑭᓯᑳᑌᓂᑭᓐ᙮ ᒦ ᓴ ᑳᐅᒋ ᑲᓇᐌᑖᑾᑭᓐ ᐁᐐᑕᑯ ᓂᔑᐗᓈᒋᒋᑳᑌᑭᓐ ᐃᐃ ᐊᐲ ᑎᐹᑯᓂᑫᐎ ᑮᔑᑲᓂᓂᒃ, ᑳᐐᓂᔑᐗᓈᒋᐃᑣ ᐃᑭ ᑳᑭᑌᓂᒫᓯᒀ ᑭᔐᒪᓂᑑᓐ᙮

ᑳᓵᑭᐃᓇᑰᒃ, ᑫᑯ ᑕᔥ ᐐᓐ ᐅᐅ ᐊᐙᒡ ᐸᑮ ᐗᓃᑫᓄᑕᑫᒃ, ᑳᑎᐯᒋᑫᒡ ᐁᐃᓀᑕᕽ ᐯᔑᑯ ᑮᔑᒃ, ᒥᑖᔂᒃ ᑕᓱᐱᐴᓐ᙮ ᒦ ᑲᔦ ᒥᑖᔂᒃ ᑕᓱᐱᐴᓐ ᐁᓀᑕᕽ ᐯᔑᑯ ᑮᔑᒃ᙮

ᑳᑎᐯᒋᑫᒡ ᓴ ᑳᐐᓐ ᐸᐯᒌᓰ ᐁᐐᐃᔑᒋᑫᒡ ᐃᐃ ᑳᑮᐃᔑ ᐊᔓᑕᒫᑫᒡ, ᑖᐱᔥᑰ ᑳᐃᒋᑲᓂᐎᒡ ᐁᐸᐯᒌᒡ᙮ ᑭᔕᔒᐯᓂᒥᑯᐙ ᐅᔕ ᐁᐊᑕᐌᓂᒫᓯᒃ ᐊᐎᔭᓐ ᒋᓂᔑᐗᓈᑎᓯᓂᒡ᙮ ᑲᑭᓇ ᓴ ᐊᐎᔭᓐ ᐅᓇᑕᐌᓂᒫᓐ ᒋᑴᑳᑎᓯᓂᒡ᙮

ᐃᐃ ᓴ ᑮᔑᑲᓂᓂᒃ ᑳᑎᐯᒋᑫᒡ ᑳᐐᑕᑯᔑᕽ ᑕᓭᓴᑰᒋ ᐅᒋᒋᓭ, ᑖᐱᔥᑰ ᐅᑮᒨᒋᔥᒃ ᓃᔮᒃ ᑳᑭᑫᑖᑯᓯᓯᒃ ᐁᐐᑕᑯᔑᕽ᙮ ᒦ ᓴ ᑕᔥ ᐃᐃ ᐊᐲ ᐃᔥᐱᒥᕽ ᑮᔑᒃ ᑫᐊᑯᓈᑾᒃ ᑭᔒᐌ ᓅᑖᑾᒃ ᑫᑰᓐ᙮ ᒦ ᑲᔦ ᐃᐃ ᐊᐲ ᑲᑭᓇ ᑫᑰᓇᓐ ᐃᔥᐱᒥᕽ ᑳᐊᔮᑭᓐ ᑳᐐᓂᔑᐗᓈᒋᒋᑳᑌᑭᓐ ᐃᔥᑯᑌ ᐁᐐᐋᐸᑕᒃ᙮ ᐃᐃ ᑲᔦ ᐊᑭ, ᑲᑭᓇ ᑲᔦ ᑫᑰᓐ ᐃᐃᒫ ᑳᐊᔮᑭᓐ ᑳᐐᓐ ᑕᑭᑫᑖᑾᓯᓅᓇᓐ᙮

ᐅᐅᐌ ᑕᔥ ᐃᓇᑫ ᐁᐐᐃᔑ ᓂᔑᐗᓈᒋᒋᑳᑌᑭᓐ ᐅᓄ ᑲᑭᓇ, ᐋᓃᓐ ᐃᑕᔥ ᑮᓇᐙ ᑫᑮᐃᔑᐱᒫᑎᓯᔦᑭᐸᓐ? ᒦᐄᑐᒃ ᐁᔑᓈᑾᒃ ᒋᐯᑳᑎᓯᔦᒃ, ᒋᐸᑭᑎᓂᑎᓱᔦᒃ ᑲᔦ ᑭᔐᒪᓂᑑ ᒋᑎᐯᓂᒥᓀᒃ᙮

ᐁᐲᑖᐌᒃ ᑮᔑᑲᓂᓂᒃ ᑭᔐᒪᓂᑑ ᑳᐐᑎᐹᑯᓂᐌᒡ, ᑲᑴ ᐌᔩᐱᑑᒃ ᐐᐸ ᒋᐃᔑᓭᒃ᙮ ᒦᐅᔕᐃ ᐊᐲ ᑮᔑᒃ ᑳᐐᐊᒀᑭᑌᒃ, ᑳᐐᓂᔑᐗᓈᒋᒋᑳᑌᒃ ᑲᔦ᙮ ᐃᓂ ᑲᔦ ᑲᑭᓇ ᐃᔥᐱᒥᕽ ᑳᐊᔮᑭᓐ ᑕᓂᑭᑌᐗᓐ ᑫᐊᐲᒋᑭᔑᑌᒃ᙮

ᑳᑮᐃᔑ ᐊᔓᑕᒫᑫᑯᐸᓀᓐ ᐃᑕᔥ ᑮᓇᐎᓐᑦ ᑳᐅᒋᐲᑑᔭᕽ ᐃᐃ ᑳᐐᐅᔥᑭ ᐅᔑᒋᑳᑌᒃ ᑮᔑᒃ, ᐅᔥᑭ ᐊᑭ ᑲᔦ, ᒦ ᓴ ᐃᒫ ᑾᔭᒀᑎᓯᐎᓐ ᑫᔑᑖᒪᑲᒃ᙮

ᑕᑲ ᑕᔥ, ᑳᓵᑭᐃᓇᑰᒃ, ᐁᐲᑑᔦᒃ ᐅᓄ, ᐋᑯᒋᑫᒃ ᐊᐲ ᑭᔐᒪᓂᑑ ᑕᑯᔑᕽ ᒋᒥᑲᐎᓀᒃ ᐁᐯᑳᑎᓯᔦᒃ, ᑫᑰᓐ ᑲᔦ ᒋᐃᔑ ᐊᓈᒣᑖᑯᓯᓯᐌᒃ, ᐱᓵᓂᑯ ᒋᐐᒌᐌᒃ᙮

ᐃᓀᑕᒧᐙᒃ ᐃᑕᔥ ᐃᐃ ᑳᑎᐯᒋᑫᒡ ᐁᔑᔕᔒᐯᑕᕽ, ᒦ ᓴ ᐃᒫ ᐌᒌᒃ ᐱᒫᒋᐃᑰᐎᓐ᙮ ᑖᐱᔥᑰ ᑳᓵᑭᐊᑭᒡ ᑮᑕᓇᒥᐋᓈᓐ ᑆᓬ ᑳᑮᐃᔑᐲᐊᒪᐎᓀᒃ, ᐁᑮᐋᐸᒋᑑᒡ ᑲᑮᑖᐌᑕᒧᐎᓐ ᑭᔐᒪᓂᑑᓐ ᑳᑮᒦᓂᑯᒡ᙮

ᒦᑕᔥ ᐯᔑᑾᓐ ᐃᓇᑫ ᐁᔑᐲᐃᑫᒡ ᑲᑭᓇ ᐅᑑᔑᐲᐃᑲᓂᕽ ᐅᓄᐌᓂᐗᓐ ᑮᑕᔑᑕᕽ᙮ ᐊᔮᓂᐗᓐ ᓴ ᐋᐱᒋ ᑫᑰᓇᓐ ᓭᓇᑭᑖᑾᓂᓂᑭᓐ ᐅᑑᔑᐲᐃᑲᓂᕽ᙮ ᒦᐗᓐ ᓴ ᐃᓂ ᓅᒋᑯ ᑳᐃᓉᑑᐙᒡ ᐃᑭ ᑳᑲᑮᐹᑎᓯᐙᒡ, ᑳᑭᓯᑲᐙᑎᓯᓯᒀ᙮ ᒦ ᓴ ᑲᔦ ᐁᑑᑕᒧᐙᒡ ᑯᑕᒃ ᑫᑰᓇᓐ ᑭᒋᒪᓯᓇᐃᑲᓂᕽ ᑳᐃᔑᐊᔪᔑᐲᐃᑳᑌᓂᑭᓐ᙮ ᐐᓇᐙ ᓴ ᑲᔥᑭᑕᒫᓱᐗᒃ ᓂᔑᐗᓈᑎᓯᐎᓐ᙮

ᑮᓇᐙ ᑕᔥ ᑳᓴᑭᐃᓇᑰᒃ! ᐋᔕ ᐁᑭᑫᑕᒣᒃ ᐅᓄ, ᐊᔮᒀᒥᓯᒃ ᒋᑕᑯ ᐗᓂᔑᒥᓯᓄᐌᒀ ᑳᐃᔑᐗᔦᔑᑎᓱᐙᒡ ᑳᒪᒋ ᐃᔑᐌᐱᓯᐙᒡ, ᒋᐅᒋ ᐸᑭᔑᓯᐌᒃ ᐃᐃᒫ ᑳᐃᔑ ᐋᔩᒋᑳᐸᐎᔦᒃ᙮

ᐃᔑᐱᒫᑎᓯᒃ ᓴ ᒋᐊᓂ ᐃᔑᒫᒌᑭᔦᒃ ᑭᑕᓇᒥᐁᐙᑎᓯᐎᓂᐙᕽ, ᒋᓂᑭᑫᓂᒣᒃ ᑳᑎᐯᓂᒥᓇᕽ ᑳᐱᒫᒋᐃᓇᕽ ᒋᓴᔅ X᙮ ᑕᑲ ᐐᓐ ᒨᔕᒃ ᑕᑭᒋ ᐃᓀᓂᒫ ᓅᑯᒻ ᓀᐱᒡ ᐃᑯ ᑲᔦ᙮ ᐁᒣᓐ᙮