ᓃᓐ ᑆᓬ ᑭᑑᔑᐲᐊᒪᐎᓐ, ᓃᓐ X ᒋᓴᔅ ᐅᑎᔑᓂᔕᐙᑲᓇᓐ, ᐐᓐ ᑭᔐᒪᓂᑑ ᐁᔑᐊᑕᐌᓂᒥᒡ ᒋᐐᑕᒫᑫᔮᓐ ᐅᐅ ᐱᒫᑎᓯᐎᓐ, ᑳᑮᐃᔑᓃᑳᓂᐐᑕᒫᑰᔭᕽ ᐁᐊᔮᔭᕽ ᐁᐅᒋᑎᐯᑖᑯᓯᔭᕽ X ᒋᓴᓯᕽ᙮

ᑮᓐ ᑕᔥ ᑎᒪᑎ ᑭᑑᔑᐲᐊᒪᐎᓐ, ᓂᑯᓯᔅ ᐁᓈᑯᒥᓈᓐ, ᑭᔕᐌᓂᒥᓐ᙮ ᐊᐯ ᓴ ᐅᓄ ᑲᒦᓂᑰᐎᔅ, ᐐᑑᑳᑰᐎᓐ, ᔕᐌᓂᒥᑰᐎᓐ, ᐱᓵᓂᓯᐎᓐ, ᒫᑭᐌᒡ ᑭᔐᒪᓂᑑ ᐌᔫᓯᒥᓐᒡ ᒦᓇᐙ X ᒋᓴᔅ ᑳᑎᐯᓂᒥᓇᕽ᙮

ᒦᐗᓂᓂ ᐯᔑᑾᓐ ᑭᔐᒪᓂᑑᓐ ᓂᑭᒋᐊᔭᐋᒥᓈᐸᓃᒃ ᑳᑮᐊᓄᑮᑕᐙᐙᒡ, ᑲᔦ ᐐᓐ ᐃᑕᔥ ᓃᓐ ᐃᑯ ᐁᓄᑮᑕᐗᒃ᙮ ᓂᑾᔭᑴᑖᓐ ᐃᑕᔥ ᑲᔦ ᐁᑾᔭᑯᒋᑫᔮᓐ ᐁᐊᓄᑮᑕᐗᒃ᙮ ᓂᒦᑴᒋᐎᐋ ᑭᔐᒪᓂᑑ, ᒨᔕᒃ ᐁᒥᑴᓂᒥᓈᓐ ᐁᐊᓇᒥᐋᔮᓐ ᐁᑮᔑᑲᒃ, ᐁᑎᐱᑲᒃ ᑲᔦ᙮

ᓂᒫᒥᑲᐤ ᐁᑮᐅᒋᑲᐙᐱᔭᓐ ᑮᐸᑫᐎᓂᑎᔭᕽ᙮ ᑭᓅᑌᐐᐙᐸᒥᓐ ᐃᓴ, ᒦᑕᔥ ᐃᑯ ᒋᑭᒋᒌᑫᑕᒫᓐ᙮

ᒨᔕᒃ ᓂᒫᒥᑲᐤ ᑌᐺ ᐁᔑᑌᐺᔦᑕᒪᓐ, ᒪᔮ ᐊᐌ ᑰᑯᒻ ᓬᐆᐎᔅ ᓃᑳᓐ ᑳᑌᐺᔦᑕᕽ, ᑫᐐᓐ ᐃᑕᔥ ᐊᐊᐌ ᑭᒫᒫ ᐃᔫᓂᔅ ᑳᐃᔑᑌᐺᔦᑕᕽ, ᐁᔑᑫᒋᓈᐁᓂᒥᓈᓐ ᑕᔥ ᑖᐱᔥᑰ ᑫᑮᓐ ᐁᔑᑌᐺᔦᑕᒪᓐ᙮

ᐅᒋ ᐅ ᑭᑌᐺᔦᑕᒧᐎᓐ ᑭᑑᒋᒫᒥᑲᐙᒥᓐ ᒋᐅᐱᓯᔭᓐ ᐅᐅ ᑳᑮᐃᔑᒦᓂᒃ ᑭᔐᒪᓂᑑ ᐃᐃᐌ ᐊᐲ ᑳᓵᒥᓂᓈᓐ ᐁᑮᐅᓇᑭᒥᓈᓐ ᒋᐊᓇᒥᐁᐗᓄᑮᔭᓐ᙮

ᐃᓂ ᐋᓃᔥ ᐅᑕᒑᑾᓐ ᑭᔐᒪᓂᑑ ᑳᑮᒦᓂᓇᕽ, ᑳᐐᓐ ᐐᓐ ᒋᑯᑖᒋᔭᕽ ᑭᑎᔑᒦᓂᑯᓰᓈᓐ, ᐃᐃᐌ ᓴ ᐐᓐ ᒪᔥᑲᐎᓰᐎᓐ, ᓵᑭᐃᐌᐎᓐ, ᑲᑮᑖᐎᓯᐎᓐ ᒋᑭᑭᓯᔭᕽ᙮

ᒦᑕᔥ ᑳᐐᓐ ᑭᑖᐅᒋᔖᑴᓂᒧᓰ ᒋᑎᐹᒋᒥᓐᒡ ᐊᐊ ᑳᑎᐯᓂᒥᓇᕽ᙮ ᑫᑯ ᑲᔦ ᓃᓐ ᐊᑲᑌᓂᒥᔑᑫᓐ, ᐐᓐ ᐊᐊ ᑳᑎᐯᒋᑫᒡ ᑳᐅᒋᑭᐸᐅᑰᔮᓐ᙮ ᑲᔦ ᑮᓐ ᐅᑖᐱᓐ ᐁᔑᑎᑕᑾᐆᓂᑰᐎᓯᔭᓐ ᒋᐅᒋᑯᑕᑭᑑᔭᓐ ᐃᐃᐌ ᐅᒋ ᒥᓍᒋᒧᐎᓐ, ᐁᐃᔑᒦᓂᒃ ᐅᒪᔥᑲᐎᓰᐎᓐ ᑭᔐᒪᓂᑑ᙮

ᒦ ᐊᐌ ᑳᐱᒫᒋᐃᓇᕽ, ᑳᐊᑐᒥᓇᕽ ᑲᔦ, ᐐᓐ ᐃᑯ ᑎᐱᓇᐌ ᒋᑎᐯᓂᒥᓇᕽ ᐁᑮᐃᓀᓂᒥᓇᕽ᙮ ᑳᐐᓐ ᑮᓇᐎᓐᑦ ᑭᑎᔑᒋᑫᐎᓂᓈᓐ ᑭᑑᒋᑑᑖᑯᓰᓈᓐ, ᐐᓐ ᐃᑯ ᑎᐱᓇᐌ ᐅᑮᐅᓀᑖᓐ ᐁᑮᐃᔑᔕᐌᓂᒥᓇᕽ᙮ ᒣᐎᔕ ᒋᑆ ᐊᓂᒫᒋᓭᒃ ᑫᑰᓐ, ᐋᔕ ᑮᔖᒡ ᑭᑮᒦᓂᑯᓈᓐ ᑭᔐᒪᓂᑑ ᐅᔕᐌᒋᑫᐎᓐ, X ᒋᓴᓲᓐ ᐁᑮᐅᒋᒦᓂᓇᕽ᙮

ᓅᑯᒻ ᐃᑕᔥ ᒧᔐᓈᑾᓂᓂ ᐅᔕᐌᒋᑫᐎᓐ ᐁᑮᓈᑯᓯᒡ ᐊᐊ ᑳᐱᒫᒋᐃᓇᕽ X ᒋᓴᔅ᙮ ᐐᓐ ᐅᑮᐋᓂᔑᑑᓐ ᐃᐃ ᓂᐳᐎᓐ, ᐃᐃᐌᔥ ᒥᓍᒋᒧᐎᓐ ᐁᑮᐅᒋᒧᔐᓈᑯᑑᒡ ᐃᐃ ᐱᒫᑎᓯᐎᓐ ᐁᑳ ᐐᑳ ᑫᐴᓂᐊᔮᓯᓂᓂᒃ᙮

ᒦ ᐃᐌ ᒥᓍᒋᒧᐎᓐ ᓂᑎᓇᓅᓂᒃ ᒋᐐᑕᒫᑫᔮᓐ᙮ ᒦ ᐃᐌ ᐯᒥᐅᒋ ᐃᔑᓂᔕᐅᑰᔮᓐ ᐅᑎᔑᓂᔕᐙᑲᓇᓐ ᒋᑎᓄᐎᔮᓐ, ᒋᑭᑭᓄᐊᒫᑫᔮᓐ ᑲᔦ᙮

ᒦᔥ ᐅᓄ ᑳᐅᒋᑲᒀᑕᑭᑑᔮᓐ᙮ ᑳᐐᓐ ᐐᓐ ᓂᑑᒋᐊᑲᒋᓰ ᐅᓄ ᐋᓇᑑᑖᑰᔮᓐ, ᐋᓃᔥ ᓂᑾᔭᑴᓂᒫ ᑳᑌᐺᔦᓂᒪᒃ, ᐁᑲᔥᑭᑑᒡ ᐃᐃᐌ ᑳᑮᑲᓇᐌᑕᐊᒃ, ᐲᓂᔥ ᐃᑯ ᐃᐌ ᐁᑮᔑᑲᓂᓂᒃ ᒋᑲᓇᐌᑕᒪᐎᒡ᙮

ᑲᔦ ᑮᓐ ᐊᐸᓀ ᑯ ᑲᓇᐌᑕᓐ ᐃᓂ ᑾᔭᒃ ᐃᑭᑐᐎᓇᓐ ᑳᑮᐃᔑᓅᑕᐎᔭᓐ᙮ ᒦ ᑯ ᑫᑮᓐ ᐯᔑᑾᓐ ᒋᐃᔑᐐᑕᒪᓐ, ᒋᑭᑭᓯᔭᓐ ᑲᔦ ᑌᐺᔦᑕᒧᐎᓐ, ᓵᑭᐃᐌᐎᓐ, X ᒋᓴᔅ ᑳᐅᒌᑕᒫᑫᒡ ᐁᐐᒌᐗᕽ᙮

ᐅᓂᔑᔑᓐ ᐃᐃ ᑭᑲᓇᐌᑕᐃᑰᐎᓐ᙮ ᒦᐃ ᐃᔑᑲᓇᐌᑕᓐ, ᑭᑲᐐᒋᐃᒃ ᑭᔐᒪᓂᑑ ᐅᑕᒑᑾᓐ ᑳᑭᑭᔥᑲᐎᒥᓇᕽ᙮

ᐋᔕ ᑭᑭᑫᑖᓐ ᑲᑭᓇ ᐁᑮᓇᑲᔑᐙᒡ ᐅᑌᐺᑕᒨᒃ ᐁᔖᐗᑮᕽ ᑳᐊᔮᐙᒡ, ᑕᑯ ᑲᔦ ᐁᑮᐃᔑᒋᑫᐙᒡ ᐱᒉᓬᐊᔅ, ᐊᕒᒫᒋᓃᔅ ᑲᔦ᙮

ᑳᑎᐯᒋᑫᒡ ᐃᑕᔥ ᐅᑲᔕᐌᓂᒫᐞ ᑳᑕᔑᓂᒡ ᐅᑖᐎᓂᓃᕽ ᐊᓀᓯᑆᕒᐊᓴᓐ ᙮ ᓃᐱᐗᐋᕽ ᓂᑮᐱᓲᑭᑌᐁᔥᑳᒃ ᐊᐊ ᐃᓂᓂ, ᑳᐐᓐ ᑲᔦ ᑮᐅᒋᐊᑲᒋᓰ ᐁᑮᑭᐸᐅᑰᐗᒃ᙮

ᐌᔩᑉ ᐃᑕᔥ ᐃᑯ ᐁᑮᑕᑯᔑᕽ ᐅᐅᒫ ᐅᕒᐆᒥᕽ ᐌᐌᓂ ᓂᑮᓇᓈᑐᓀᐅᒃ ᐲᓂᔥ ᐃᑯ ᐁᑮᒥᑲᐎᒡ᙮

ᒫᓄ ᐅᑲᐃᓀᓂᒥᑰᓐ ᐃᓂ ᑳᑎᐯᒋᑫᓂᒡ ᐅᑭᑎᒫᑭᓈᑫᐎᓂᓂ ᒋᐅᒌᑕᒫᑯᒡ ᐹᓂᒫ ᐅᒋᒋᓭᓂᒃ ᐅᑮᔑᑳᒥᓂ᙮ ᐗᐐᑫ ᑲᔦ ᑮᓐ ᑭᑭᑫᑖᓐ ᐋᓃᓐ ᐃᑯ ᒥᓂᒃ ᑳᑮᐃᔑᐐᒋᐃᒡ ᐊᓀᓯᑆᕒᐊᔅ ᐃᐃᒫ ᐁᐱᓴᓯᕽ ᑳᑮᐊᔮᔮᐹᓐ᙮

ᓂᑯᓯᔅ, ᑭᑎᓂᓐ ᐅᐅᐌ, ᑭᑲᐐᐃᔑᒪᔥᑲᐎᓰ ᐃᐃ ᐅᔕᐌᒋᑫᐎᓐ ᑳᒦᓂᒃ X ᒋᓴᔅ ᐁᑭᑭᔥᑲᐗᒡ᙮

ᐅᓄ ᑕᔥ ᑫᑰᓇᓐ ᑳᑮᓅᑕᐎᔭᓐ ᐁᐐᑕᒫᑫᔮᓐ ᓃᐱᐗᐞ ᐊᐎᔭᒃ ᐁᓅᑕᐎᐙᒡ, ᒦᐗᓄᓄ ᐊᓂᑭᑭᓄᐊᒪᐤ ᐃᓂᓂᐗᒃ ᑳᑾᔭᑴᑖᑯᓯᐙᒡ, ᑫᑲᔥᑭᑑᐙᒡ ᒋᐊᓂᑭᑭᓄᐊᒪᐙᐙᒡ ᑯᑕᒃ ᐊᐎᔭᐞ᙮

ᑲᔦ ᑮᓐ, ᐋᓃᓐ ᒥᓂᒃ ᑳᒦᓂᑰᔭᓐ ᑲᒀᑕᑭᑑᐎᓐ, ᐊᓂᐅᑖᐱᓇᓐ᙮ ᒦ ᐃᐌ ᒋᐅᒋᐅᒥᓄᔑᒫᑲᓂᔒᒥᒃ ᐊᐊ X ᒋᓴᔅ᙮

ᐊᐊᐌ ᓴ ᑯ ᐃᓂᓂ ᑳᔭᑕᔑᒫᑲᓂᔑᐎᒡ, ᓇᐗᒡ ᐐᐃᔑᒋᑫ ᒋᐐᓇᓇᐁᑕᒥᓂᒡ ᐃᓂᐌᓂᐗᓐ ᑳᐅᓈᐸᒥᑯᒡ᙮ ᑳᐐᓐ ᐅᑲᐱᒣᑕᓰᓐ ᐃᐃᐌᓂ ᐅᐱᒫᑎᓯᐎᓐ ᐌᑎ ᑳᐅᒌᒡ᙮

ᐊᐊ ᑲᔦ ᐅᑕᒥᓄ ᑳᑲᑴᒋᑲᔑᐌᒡ, ᒦ ᐁᑕ ᒋᐸᑭᓈᑫᒡ ᓇᐃᑕᕽ ᐃᐃᐌᓂ ᐅᑕᒥᓄᐎ ᐃᓈᑯᓂᑫᐎᓐ᙮

ᐊᐊ ᑲᔦ ᐅᑭᑎᑫ ᑳᑭᒋᐊᓄᑮᒡ, ᒦᐊᐌ ᑫᐅᑖᐱᓇᑭᐸᓐ ᐃᓂ ᓂᑕᒻ ᐅᓂᑖᐎᒋᑲᓂᕽ ᑳᐅᑎᓂᑳᑌᓂᑭᓐ, ᐋᓃᔥ ᑮᑲᔥᑭᑕᒫᓱ᙮

ᓈᓈᑲᑕᐌᑕᓐ ᐅᓄ ᑳᐃᑭᑐᔮᓐ, ᑲᑭᓇ ᑫᑰᓐ ᑳᑎᐯᒋᑫᒡ ᑭᑲᑭᑫᑕᒨᓂᒃ ᒋᔑᓂᓯᑐᑕᒪᓐ᙮

ᒫᒥᑴᓂᒻ ᐊᐊ ᒋᓴᔅ X ᑳᐱᐅᑕᑳᓀᓯᒡ ᑌᐱᑎᑳᕽ, ᑲᔦᔥ ᐁᑮᓂᐳᐸᓐ ᒦᓇᐙ ᑮᑮᐌᐱᒫᑎᓯ᙮ ᒦ ᐃᐌ ᐁᔑᐐᑕᒫᓐ ᐃᐃᐌ ᒥᓍᒋᒧᐎᓐ᙮

ᒦ ᐃᐌ ᒥᓍᒋᒧᐎᓐ ᑳᐅᒋᑯᑕᑭᑑᔮᓐ, ᐊᐴᔥᑫ ᐁᐅᒋᑭᐸᐅᑰᔮᓐ ᑖᐱᔥᑰ ᐅᒪᒋᒋᑫᔥᒃ᙮ ᑳᐐᓐ ᐃᑕᔥ ᐐᓐ ᐃᐌ ᐃᓇᑭᑌᓯᓂᓂ ᑭᔐᒪᓂᑑ ᐅᑎᑭᑐᐎᓐ ᒋᑭᐸᐃᑳᑌᓂᒃ᙮

ᒦ ᐃᐌ ᑲᑭᓇ ᑫᑰᓐ ᓂᑑᒋᔕᔒᐯᑖᓐ ᒋᐐᐐᒋᐃᒪᒃ ᐃᓂ ᑭᔐᒪᓂᑑ ᐅᑑᓈᐸᒫᑲᓇᐞ, ᑫᐐᓇᐙ ᒋᐅᑎᓇᒧᐙᒡ ᐃᐃ ᐱᒫᒋᐃᑰᐎᓐ ᑫᒦᓂᑯᐙᒡ X ᒋᓴᓲᓐ, ᐊᔑᒡ ᑲᔦ ᑭᑌᑖᑯᓯᐎᓐ ᐐᑳ ᑫᐴᓂᐊᔮᓯᓂᓂᒃ᙮

ᐋᓃᔥ ᑌᐺᒪᑲᓐ ᐅᐅᐌ ᐃᑭᑐᐎᓐ: ᑮᔥᐱᓐ ᑌᐺ ᑳᐐᒋᓂᐴᒫᐗᑫᓐ, ᑭᑲᐐᒋᐱᒫᑎᓰᒫᓈᓐ ᑕᔥ ᑲᔦ᙮

ᑮᔥᐱᓐ ᔕᔒᐱᐊᔮᔭᕽ ᒦ ᐃ ᑲᔦ ᒋᐐᒋᑎᐯᒋᑫᒪᕽ᙮ ᑮᔥᐱᓐ ᐋᓇᐌᓂᒪᕽ, ᑲᔦ ᐐᓐ ᑭᑲᔮᓇᐌᓂᒥᑯᓈᓐ᙮

ᑮᔥᐱᓐ ᐴᓂᑌᐺᑕᐗᕽ, ᑫᔮᐱᔥ ᐐᓐ ᑕᑫᒋᓈᐁᑖᑯᓯ᙮ ᑳᐐᓐ ᐐᑳ ᐅᑲᔮᒋᑑᓰᓐ ᐅᑎᓈᑎᓯᐎᓐ᙮

ᐅᓄ ᑫᑰᓇᓐ ᒫᒥᑲᐙᓱᒻ ᐃᑭ ᑳᓅᑕᐎᒀ᙮ ᑭᔐᒪᓂᑑ ᐁᓈᓴᒦᒡ ᑭᑲᐃᔑᐊᔮᒀᒥᒫᒃ ᐁᑳ ᒋᑲᑴᔖᑰᓱᑎᓯᒀ ᐃᓂ ᐃᑭᑐᐎᓇᓐ᙮ ᑳᐐᓐ ᐃᑯᑕᓄ ᑖᐃᓈᐸᑕᓯᓅᓐ, ᒦ ᐁᑕ ᒋᒥᒋᓂᔑᐗᓈᒋᐃᑣ ᑳᐱᓯᑕᒧᐙᒡ᙮

ᐌᐌᓂ ᑲᑴᐐᑾᒋᑑᓐ ᒋᐃᔑᑳᐸᐎᐃᑎᓱᔭᓐ ᑫᔑᒥᓍᐸᒥᒃ ᑭᔐᒪᓂᑑ, ᑖᐱᔥᑰ ᐊᓄᑮᐋᑲᓐ ᐁᑳ ᑳᐊᑲᒋᐃᑯᓯᒃ ᐅᑕᓄᑮᐎᓐ, ᑲᔦ ᒦ ᐃᐌ ᐁᐃᔑᐐᑕᒫᑫᔭᓐ ᐁᔑᑾᔭᑯᓯᓂᓂᒃ ᑭᔐᒪᓂᑑ ᐅᑌᐺᐎᓐ᙮

ᑫᑯ ᐐᒋᑑᓈᒫᑫᓐ ᐊᐎᔭᒃ ᐁᒪᒋᑖᑾᓂᓂᒃ, ᐁᑲᑮᐹᑌᑖᑾᓂᓂᒃ ᑲᔦ ᐁᑕᔑᑕᒧᐙᒡ᙮ ᓇᐗᒡ ᐙᓴ ᐅᑎᔑᑳᒋᔥᑳᑯᓐ ᐊᐎᔭ ᐃᐃᒫ ᒋᐊᔮᓯᒃ ᑭᔐᒪᓂᑑᓈᕽ᙮

ᐃᐌ ᐅᑭᑭᓄᐊᒫᑫᐎᓂᐙ ᐋᒋᑯ ᑕᓂᒫᒌᔥᑳᒪᑲᓂᓂ ᑖᐱᔥᑰ ᐁᐃᓈᐱᓀᒡ ᐊᐎᔭ ᐁᐱᒋᐳᓭᓂᒃ᙮ ᑕᑯ ᑲᔦ ᓃᔑᐗᒃ ᐅᐅ ᐁᐃᔑᑭᑭᓄᐊᒫᑫᐙᒡ ᐋᐃᒥᓃᔭᔅ, ᐹᐃᓬᐄᑕᔅ ᙮

ᒦ ᐅᑯ ᑮᐅᒋᐸᑫᐗᒃ ᑌᐺᐎᓂᕽ, ᐅᐅᐌᓂ ᐁᐃᔑᑭᑭᓄᐊᒫᑫᐙᒡ: ᐋᔕ ᑮᐃᔥᒀᐃᔑᓭ ᑳᐐᐃᔑᑮᐌᐱᒫᑎᓯᐃᑰᔭᑭᐸᓐ, ᐁᐃᑭᑐᐙᒡ᙮ ᒦᑕᔥ ᐅᐅ ᓇᑫ ᐁᔑᓂᔑᐗᓈᒋᑕᒪᐙᐙᒡ ᐅᑌᐺᑕᒧᐎᓂᓂ ᐋᓂᑕ᙮

ᐅᐅ ᓴ ᑭᔐᒪᓂᑑ ᐃᔑᓈᑾᓂᓂ ᑳᐃᔑᑌᐺᒡ ᑖᐱᔥᑰ ᐋᔩᒋᐅᓈᐱᑭᓯᒋᑲᓐ ᐐᑳ ᑫᐗᑲᐎᔥᑳᓯᓂᓂᒃ, ᐅᐅᐌ ᐁᐃᔑᑭᑭᓇᐙᒋᓯᓂᓂᒃ: ᑳᑎᐯᒋᑫᒡ ᐅᑮᑳᔦᓂᒫᐞ ᐊᐌᓀᓇᐞ ᐃᓂ ᑳᑎᐯᓂᒫᒡ᙮ ᐅᐅ ᑲᔦ, ᐊᐌᓀᓐ ᐃᑯ ᐊᐌ ᓂᑎᐯᓂᒥᒃ ᑳᑎᐯᒋᑫᒡ, ᐁᐃᑭᑐᒡ, ᐅᑲᐴᓂᑑᓐ ᐅᒪᒋᑑᑕᒧᐎᓐ, ᐁᔑᓯᓂᓂᒃ᙮

ᐃᓇᔥᑫ ᐊᐎᔭ ᐅᑭᒋᐙᑳᐃᑲᓂᕽ ᐁᐊᔮᒡ ᐊᒋᑲᓇᓐ, ᑳᐐᓐ ᐁᑕ ᑳᐅᓵᐎ ᔔᓂᔮ ᐙᐱᑲᓂᓂᑭᓐ ᑲᔦ ᑳᐙᐹᐱᑲᓂᓂᑭᓐ ᐅᑕᔮᓰᓇᓐ, ᑲᔦ ᓴ ᑯ ᑳᒥᑎᑯᐗᑭᓐ ᑲᔦ ᐙᐱᑲᓂᐊᒋᑲᓇᓐ ᐅᑕᔮᓇᓐ᙮ ᐋᓂᑕ ᐁᔑᑭᑌᑖᑾᓂᓂᑭᓐ ᐅᑎᔑᐋᐸᒋᑑᓇᓐ, ᐋᓂᑕ ᑕᔥ ᑕᓱᑮᔑᒃ ᑳᐅᑖᐱᓇᕽ ᐁᓀᑳᒥᐋᐸᒋᑑᒡ᙮

ᑮᔥᐱᓐ ᐊᐎᔭ ᒦᐎᓂᔑᑕᕽ ᐌᑯᓀᓐ ᓴ ᑯ ᐙᓀᑖᑾᓂᓂᒃ, ᑖᐱᔥᑰ ᒥᓄᐊᒋᑲᓐ ᑕᐃᓀᑖᑯᓯ ᑫᒋ ᐃᓀᑖᑾᓂᓂᒃ ᒋᐃᔑᐋᐸᑎᓯᒡ᙮ ᐋᔕ ᐋᓃᔥ ᐅᑮᒦᓈᓐ ᐅᐱᒫᑎᓯᐎᓐ ᐃᓂ ᑳᑎᐯᓂᒥᑯᒡ, ᑭᑖᐸᑎᓯᐎᓂᕽ ᒋᐃᓈᐸᒋᐃᑯᒡ, ᐁᐙᐌᓃᒡ ᒥᓄᐊᓄᑮᐎᓂᕽ ᒋᐃᓈᐸᑎᓯᒡ᙮

ᒦ ᐃᐌ ᐌᒋ ᐃᓂᓈᓐ: ᑫᑯ ᑫᑮᓐ ᐱᓯᑕᑫᓐ ᐅᔥᑳᑎᓰᐎ ᒥᓴᐌᑕᒧᐎᓇᓐ᙮ ᐱᒥᓂᔕᐊᓐ ᑕᔥ ᒥᓍᑎᓯᐎᓐ, ᑌᐺᔦᑕᒧᐎᓐ, ᓵᑭᐃᐌᐎᓐ, ᑯᔥᒀᐙᑌᑕᒧᐎᓐ᙮ ᒦ ᐃᐌ ᒋᐃᔑᑲᑴ ᐐᒌᐗᑣ ᐃᑭᐌᓂᐗᒃ ᑾᔭᑯᑌᐁᐎᓂᕽ ᑳᐃᔑᑲᓅᓈᐙᒡ ᐃᓂ ᑳᑎᐯᒋᑫᓂᒡ᙮

ᐊᐌᓀᓐ ᐃᑯ ᑳᑲᑴ ᔖᑰᓱᑫᒡ ᐁᑲᑮᐹᒋᑮᔗᒡ ᐁᑭᑫᑖᓱᓯᒃ, ᑫᑯ ᐅᐌ ᐱᒣᑕᑫᓐ᙮ ᑭᑭᑫᑖᓐ ᒦ ᐃᒫ ᐁᐅᒌᒪᑲᒃ ᑮᑳᑎᐎᓐ᙮

ᐊᐎᔭ ᑳᐊᓄᑮᐃᑯᒡ ᑳᑎᐯᒋᑫᓂᒡ ᑳᐐᓐ ᑕᓂᑖ ᑲᑴᔖᑰᓱᑫᓰ᙮ ᐯᑭᑳᒡ ᐅᑲᑲᓅᓈᐞ ᑲᑭᓇ, ᑕᓂᑖ ᑭᑭᓄᐊᒫᑫ, ᐅᑲᔕᔒᐯᓂᒫᐞ,

ᓅᑳᑎᓯᐎᓂᕽ ᒋᑲᑴᒫᒦᓄᒫᒡ ᐃᓂ ᑳᑲᑴᐗᓈᒥᑯᒡ᙮ ᒫᑭᔖ ᑭᔐᒪᓂᑑ ᐅᑲᒦᓈᐞ ᒋᑴᑳᑎᓯᓂᒡ ᒋᐱᑭᑫᑕᒥᓂᒡ ᐃᐃ ᑌᐺᐎᓐ᙮

ᒦ ᐃᐌ ᐁᐃᔑᐸᑲᑫᑕᒧᐙᒡ ᑫᐅᒋᑲᔥᑭᐅᐙᒡ ᐃᐃᒫ ᑳᐃᔑᑕᓲᓂᑯᐙᒡ ᐃᓂ ᓭᑕᓇᓐ ᑳᑮᐃᔑᑳᒋᑎᓂᑯᐙᒡ ᐁᑮᐃᓇᓅᓂᑯᐙᒡ ᐋᓃᓂᑯ ᑳᑮᐃᓀᓂᒥᑯᐙᒡ᙮

ᑭᑫᑕᓐ ᐅᐅ, ᐃᔥᒀᒡ ᐊᓂᑲᑮᔑᑲᒃ ᑕᐲᒋ ᐃᔑᐌᐸᓐ ᒋᓴᓇᑲᒃ ᐃᐃᐌ ᐱᒫᑎᓯᐎᓐ᙮

ᐋᓃᔥ ᐃᑭ ᐯᒫᑎᓯᐙᒡ ᐐᓇᐙ ᐱᑯ ᑎᐱᓇᐌ ᑕᓵᑭᐃᑎᓱᐗᒃ; ᐅᑲᓵᑭᐋᐙᓐ ᑲᔦ ᐅᔔᓂᔮᒥᐙᓐ᙮ ᑕᐃᔥᐯᓂᑎᓱᐗᒃ, ᑕᒪᒦᒀᓂᑎᓱᐗᒃ, ᐅᑲᐹᐱᓄᑕᐙᐙᓐ ᑭᔐᒪᓂᑑᓐ᙮ ᑳᐐᓐ ᑲᔦ ᐅᑲᐱᓯᑕᐙᓰᐙᐙᐞ ᐅᓃᑭᐃᑯᐙᐞ᙮ ᑳᐐᓐ ᑕᓂᑖ ᒦᑴᒋᐌᑕᓰᐗᒃ; ᐅᑲᐋᓇᐌᑖᓈᐙ ᑲᔦ ᐊᓇᒥᐋᐎᓐ᙮

ᑳᐐᓐ ᑲᔦ ᐅᑲᐅᑌᐃᓄᑕᐙᓯᐙᐙᐞ ᐅᐐᒋᐱᒫᑎᓰᒫᑲᓂᐙᐞ, ᐅᑲᓴᓇᑭᐋᐙᐞ ᐃᑕᔥ, ᐁᐸᐹᑕᔑᒥᐌᐙᒡ, ᐁᐐᓂᑖᐲᑾᑲᒥᑭᓯᐙᒡ᙮ ᐅᒦᑳᓱᔥᑲᒃ ᑕᐃᓈᐗᒃ᙮ ᐅᑲᔒᑫᑖᓈᐙ ᑳᐅᓂᔑᔑᓂᓂᒃ᙮

ᑕᒪᒥᔑᐃᐌᐗᒃ᙮ ᑳᐐᓐ ᑕᐅᓈᓈᑲᑕᐌᒋᑲᓂᓰᐗᒃ᙮ ᐅᑲᐅᓵᒣᑖᓈᐙ ᐅᑭᑌᓂᒧᐎᓂᐙ᙮ ᓇᐗᒡ ᐅᑲᒥᓉᑖᓈᐙ ᐅᑎᔑᒋᑫᐎᓂᐙᓐ ᐊᐲᒡ ᐐᓐ ᒋᓵᑭᐋᐙᐸᓐ ᑭᔐᒪᓂᑑᓐ᙮

ᐅᑭᒐᔭᐄ ᐁᑕ ᑯ ᐅᑲᐊᔮᓈᐙ ᐊᓇᒥᐋᐎᓂᕽ ᑳᐃᔑᓈᑾᓂᓂᒃ, ᐅᑲᐌᐱᓈᓈᐙ ᑕᔥ ᐃᐃᐌ ᒪᔮ ᑳᐃᔑᒪᔥᑲᐎᓰᒪᑲᓂᓂᒃ᙮ ᑫᑯ ᐐᒌᐙᑫᓐ ᐅᑯ ᑎᓄ᙮

ᐋᓂᓐᑦ ᓴ ᑯ ᐅᓇᓇᒫᔦᓂᒫᐙᓐ ᐊᐎᔭᓐ ᐲᓂᔥ ᒋᓀᐱᒋ ᐲᑎᑲᓂᑯᐙᒡ ᐅᐙᑳᐃᑲᓂᓃᕽ, ᐃᐃᒫ ᐁᐊᓂᑌᐱᒫᐙᒡ ᐃᑴᐗᐞ ᑳᑲᑮᑖᐌᑕᓯᓂᒃ ᒋᓇᐃᑖᑯᐙᒡ᙮ ᐅᑯ ᑕᔥ ᐃᑴᐗᒃ ᐅᑑᓵᒣᑖᓈᐙ ᐅᒪᒋᒋᑫᐎᓂᐙᓐ᙮ ᐅᑕᓂᑳᒋᔥᑳᑯᓈᐙ ᑲᔦ ᑫᑰᓇᓐ ᐊᓅᒋᑯ ᐁᔑᒥᓴᐌᑕᒧᐙᒡ᙮

ᒦᐗᑭᑭ ᑎᓄ ᐃᑴᐗᒃ ᑳᓇᓈᑕᑭᑫᑕᒧᐙᒡ, ᐁᑳ ᑕᔥ ᐐᑳ ᐁᑎᐱᑭᑫᑕᓯᒀ ᐃᐌ ᑌᐺᐎᓐ᙮

ᐃᑭᐌᓂᐗᒃ ᐃᑕᔥ ᐅᑭᑭᓄᐊᒫᑫᒃ ᑖᐱᔥᑰ ᐃᔑᐊᔮᐗᒃ ᒑᓃᔅ, ᒑᐸᕒᐄᔅ, ᒣᐎᔕ ᑳᑮᐗᓈᐋᐙᒡ ᐃᓂ ᒨᓯᓲᓐ ᙮ ᓅᑯᒻ ᐯᔑᑾᓐ ᐃᔑᒋᑫᐗᒃ ᐅᑯ ᐅᑭᑭᓄᐊᒫᑫᒃ᙮ ᐅᐗᓈᑑᓈᐙ ᐃ ᑌᐺᐎᓐ᙮ ᓂᔑᐗᓈᑕᓂᓂ ᐅᑎᓀᑕᒧᐎᓂᐙ᙮ ᐊᔨᓍᓱᐗᒃ ᐅᑌᐺᔦᑕᒧᐎᓂᐙᕽ᙮

ᑳᐐᓐ ᐋᐱᒋ ᑫᑰᓐ ᐅᑲᑲᔥᑭᑑᓰᓈᐙ᙮ ᐱᒌᓇᒃ ᐃᑕᔥ ᑲᑭᓇ ᐅᑲᒧᔐᑭᑫᓂᒥᑯᐙᓐ ᐁᑮᑲᑮᐹᒋᒋᑫᐙᒡ, ᑖᐱᔥᑰ ᑫᐐᓇᐙ ᑳᑮᐃᔑᐌᐱᓯᐙᑯᐸᓀᓐ ᒑᓃᔅ, ᒑᐸᕒᐄᔅ ᑲᔦ᙮

ᑮᓐ ᐃᑕᔥ ᑭᐱᐅᒋᑭᑫᓂᒻ ᐁᐋᔩᑎᔮᓐ, ᐌᑯᓀᓐ ᐃᐃ ᑳᐃᔑᑭᑭᓄᐊᒫᑫᔮᓐ, ᑳᑲᑴᐃᔑᑕᒫᓱᔮᓐ ᑲᔦ ᑭᑮᐙᐸᒻ, ᐃᐃ ᑲᔦ ᐁᔑᑌᐺᔦᑕᒫᓐ, ᐁᔑᔕᔒᐯᑕᒫᓐ, ᐁᔑᓵᑭᐃᐌᔮᓐ, ᐁᔑᒪᔥᑲᐌᑕᒫᓐ,

ᑳᐃᔑᐅᒌᑳᑰᔮᓐ ᑲᔦ, ᑳᐃᔑᑲᒀᑕᑭᓭᔮᓐ ᑲᔦ᙮ ᑲᑭᓇ ᑭᑭᑫᓂᒻ ᐋᓃᓐ ᑳᑑᑖᑰᔮᓐ ᐁᑎᔮᒃ ᐆᑌᓈᕽ, ᐋᐃᑰᓂᔭᒦᕽ, ᓬᐃᔅᑕᕒᐊᐃᕽ ᑲᔦ, ᐋᓃᓐ ᑳᑮᐊᐲᒋᑲᒀᑕᑭᐃᑰᔮᓐ᙮ ᑲᑭᓇ ᑕᔥ ᓂᑮᐅᒋᔖᐾᐃᒃ ᑳᑎᐯᒋᑫᒡ᙮

ᒦᐃ ᐯᔑᑾᓐ ᐊᐌᓀᓐ ᐃᑯ ᑳᐐᐅᒋᐊᓇᒥᐁᐙᑎᓯᒡ X ᒋᓴᓲᓐ, ᑫᐐᓇᐙ ᑕᐅᒋᑲᒀᑕᑭᐋᐗᒃ᙮

ᐋᓃᔥ ᐃᑭ ᑳᒪᒑᑎᓯᐙᒡ, ᐃᑭ ᑲᔦ ᐅᐗᔦᔑᒥᐌᒃ, ᐊᐗᔑᒣ ᑕᓂ ᐃᔑᐊᔮᐗᒃ, ᓃᐱᐗᐞ ᐁᐐᐗᔦᔑᐋᐙᒡ᙮ ᑲᔦ ᐐᓇᐙ ᐱᑯ ᑕᓂᐗᔦᔑᐋᐗᒃ᙮

ᑮᓐ ᐃᑕᔥ, ᒥᓂᒃ ᑳᐱ ᐃᔑᑭᑭᓄᐊᒫᑰᔭᓐ, ᑳᐱ ᐃᔑᑌᐺᔦᑕᒪᓐ ᑲᔦ, ᑫᔮᐱ ᐊᓂᑲᑴᐐᒋᑑᓐ, ᐋᓃᔥ ᑭᑾᔭᑴᓂᒫᒃ ᐃᑭ ᑳᑭᑭᓄᐊᒪᐎᒀ᙮

ᔑᑾ ᑳᐱᐊᑯᐊᐱᓅᒌᔑᐎᔭᓐ ᑭᑮᐱᐅᒋᑭᑫᑖᓇᓐ ᐃᓂ ᒫᐗᒡ ᑳᑭᒋ ᐃᓀᑖᑾᑭᓐ ᐅᔑᐲᐃᑫᐎᓇᓐ, ᐃᓂ ᑳᑲᔥᑭᑑᒪᑲᑭᓐ ᒋᑲᑮᑖᐌᑕᒧᐃᑯᔭᓐ ᒋᐅᒋᐱᒫᒋᐃᑰᔭᓐ ᐁᑌᐺᑕᐗᒡ X ᒋᓴᔅ᙮

ᑲᑭᓇ ᑭᒋᐅᔑᐲᐃᑫᐎᓐ ᑮᑭᑫᑕᒧᐃᐌ ᑭᔐᒪᓂᑑ, ᑲᔦ ᑭᑖᐸᑕᓐ ᒋᑭᑭᓄᐊᒫᑫᕽ ᐃᐃ ᑌᐺᐎᓐ, ᐊᐎᔭ ᑲᔦ ᐗᓂᑭᑭᓄᐊᒫᑫᒡ ᒋᐙᐸᑕᐃᓐᒡ ᐁᑾᔭᑾᓯᓂᓂᒃ᙮ ᐃᓈᐸᑕᓐ ᑲᔦ ᒋᒫᒦᓄᒥᐌᕽ, ᒋᑭᑭᓄᐊᒪᐎᓐᒡ ᑲᔦ ᐊᐎᔭ ᐋᓃᓐ ᑫᔑᑾᔭᑯ ᐃᔑᔭᔮᒡ᙮

ᒦ ᐃᐌ ᐃᔑᒦᓈ ᐊᐊᐌ ᑳᐊᓄᑲᐙᒡ ᑭᔐᒪᓂᑑᓐ, ᒋᑌᐊᔨᔒᒡ ᑲᔦ ᑲᑭᓇ ᑫᑰᓐ ᒋᐅᒌᑕᒪᐎᓐᒡ, ᑲᑭᓇ ᐃᓂ ᐌᓂᔑᔑᓂᓂᑭᓐ ᒋᑑᑕᕽ᙮

ᑭᑕᔮᒀᒥᒥᓐ ᐁᐙᐸᒥᒡ ᑭᔐᒪᓂᑑ, ᐊᐊᐌ X ᒋᓴᔅ ᑲᔦ, ᑫᑎᐹᑯᓈᒡ ᐃᓂ ᐯᒫᑎᓯᓂᒡ, ᐃᓂ ᓀᐳᓂᒡ ᑲᔦ᙮ ᐅᑕᑯᔑᓄᐎᓐ ᑲᔦ ᐅᑎᐯᒋᑫᐎᓐ X ᒋᓴᔅ ᓂᑎᑭᑐᐃᑯᓐ ᐅᐅ ᐙᐃᓂᓈᓐ᙮

ᑮᓐ ᐐᑕᒫᑫᓐ ᑭᔐᒪᓂᑑ ᐅᑎᑭᑐᐎᓐ᙮ ᐋᓃᓂᑯ ᐃᐊᐲ ᐁᔑᓇᐃᓈᑾᒃ ᐐᑕᒫᑫᓐ, ᒫᓄ ᓴ ᐐᓐ ᐃᔑᓈᑾᓯᓄᒃ, ᐐᑕᒫᑫᓐ᙮ ᑲᔦ ᑲᑴᑲᔥᑭᒥᐌᓐ᙮ ᑲᔦ ᒫᓈᓯᓇᒪᓐ ᑫᑰᓐ ᐅᒋᐞ ᐊᐌ ᑳᑑᑕᕽ᙮ ᑲᑳᓱᒥᐌᓐ, ᑲᑭᓇ ᑫᑰᓐ ᒋᒪᒥᓇᐗᑳᑎᓰᑲᑕᒪᓐ ᑲᔦ ᒨᔕᒃ ᒋᐃᔑᑭᑭᓄᐊᒫᑫᔭᓐ᙮

ᐋᓃᔥ ᐃᑯᑎᕽ ᑕᐃᔑᐌᐸᓐ ᒋᔑᑲᓯᑕᒧᐙᒡ ᐃᐃ ᑾᔭᒃ ᑭᑭᓄᐊᒫᑫᐎᓐ, ᓇᐗᒡ ᐁᐐᒫᐗᑑᓈᐙᒡ ᐊᐎᔭᐞ ᑫᑭᑭᓄᐊᒫᑯᐙᒡ ᐃᐃᐌ ᐐᓇᐙ ᐱᑯ ᑳᐐᐱᓯᑕᒧᐙᒡ᙮

ᐅᑲᐊᓂᐌᐱᓈᐙ ᑾᔭᒃ ᑌᐺᐎᓐ ᒋᓇᓈᑕ ᐱᓯᑕᒧᐙᒡ ᒪᔭᑳᒋᒧᐎᓇᓐ᙮

ᑮᓐ ᐃᑕᔥ ᑫᔮᐱ ᐯᔑᑾᓐ ᐃᑯ ᑲᑴᐃᔑᑲᑮᑖᐎᓯᓐ, ᑲᑴᔕᔒᐱᐊᔮᓐ ᐊᐲ ᐁᑲᒀᑕᑭᐃᑰᔭᓐ᙮ ᒦ ᐃᐌ ᐃᔑᐊᓄᑮᓐ ᒥᓍᒋᒧᐎᓐ ᒋᐐᑕᒫᑫᔭᓐ᙮ ᑎᐱᑑᑕᓐ ᐃᐌ ᑳᐃᔑᐊᓄᑮᐃᒃ ᑭᔐᒪᓂᑑ᙮

ᓃᓐ ᐃᑕᔥ ᐃᑯ, ᐋᔕ ᑫᑳ ᒦᐅ ᐊᐲ ᒋᐸᑭᑎᓈᔂᑲᓂᐎᔮᓐ᙮ ᐋᔕ ᑎᐱᓭ ᒋᒫᒑᔮᓐ᙮

ᒥᓄᑲᑴᒋᑲᓂᑎᐎᓂᕽ ᓂᑮᐊᐸᑑ᙮ ᓂᑮᑮᔑᑑᓐ, ᓂᑮᐱᑲᓇᐌᑖᓐ ᐃᐃ ᑭᑌᐺᔦᑕᒧᐎᓂᓈᓐ᙮

ᐋᔕ ᐌᑎ ᓂᐲᐃᑯᓐ ᓂᑎᐸᐊᒫᑰᐎᓐ ᑾᔭᒃ ᓴ ᑯ ᐁᑮᑎᐱᓴᑣᔮᓐ, ᑫᐅᒋᒦᔑᒡ ᐊᐊᐌ ᑳᑎᐯᒋᑫᒡ ᐌᑎ ᐊᐲ ᑫᐅᑮᔑᑲᓄᒥᒡ᙮ ᒦ ᐊᐌ ᐅᑭᒋᑎᐹᑯᓂᐌ ᒥᓯᐌ ᑳᐃᔑᑾᔭᑯᒋᑫᒡ᙮ ᑳᐐᓐ ᓃᓀᑕ ᓂᑲᐅᒋᒦᓂᑰᓰ, ᐃᑭᐌᓂᐗᒃ ᓴ ᑲᔦ ᒫᐗᒡ ᑳᐲᐋᐙᒡ ᒋᓈᑯᓯᓂᒡ ᐁᓵᑭᐋᐙᒡ, ᑕᒦᓈᐗᒃ᙮

ᐌᔩᑉ ᐱᑲᑴᐊᑕᐙᐸᒥᔑᓐ!

ᐋᓃᔥ ᓂᑮᓇᑲᓂᒃ ᐊᐊ ᑏᒪᔅ, ᐅᐅ ᓅᑯᒻ ᐃᑯ ᑳᐃᔑᐊᑮᐗᓂᓂᒃ ᐁᑮᓇᐗᒋᓵᑭᑑᒡ᙮ ᐊᐸᓀᔥ ᐃᐃᒫ ᑮᐃᔑᒫᒑ ᑌᓴᓬᐊᓇᐃᑳᕽ ᙮ ᑲᕒᐁᓭᔅ ᐃᑕᔥ ᑮᐃᔖ ᑲᓬᐁᔑᔮᕽ ᙮ ᔑᑾ ᑕᐃᑕᔅ ᑲᔦ ᑮᐃᔑᒫᒑ ᑖᓬᒣᔖᕽ ᙮

ᒦ ᐁᑕ ᐊᐌ ᐙᒌᐎᒡ ᓬᐅᒃ ᙮ ᑮᓐ ᐃᑕᔥ ᐅᑎᓐ ᐊᐊ ᒫᕒᒃ ᒋᐱᐐᒌᐎᒃ, ᓂᑲᐐᒋᐃᒃ ᐁᐊᓄᑮᔮᓐ᙮

ᐊᐊᔥ ᑎᑭᑲᔅ ᐃᐃᒫ ᓂᑮᐃᔑᓂᔕᐙ ᐁᐱᓴᓯᕽ ᙮

ᑮᓐ ᐃᑕᔥ ᐊᐲ ᐱᒫᒑᔭᓐ, ᐲᑑᑲᓐ ᓂᑭᒋᐲᓯᑲᐙᑲᓐ ᑳᑮᓇᑲᑕᒧᐗᒃ ᐊᐊ ᑳᕒᐸᔅ ᐃᐃᒫ ᐁᐊᔮᒡ ᒐᕒᐆᐗᓯᕽ ᙮ ᐲᑑᑲᓐ ᑲᔦ ᐃᓂ ᒪᓯᓇᐃᑲᓇᓐ, ᒣᒥᑕᑫ ᑯ ᐃᓂ ᐸᔥᑴᑭᓄᕽ ᑳᐅᔑᐲᐃᑳᑌᑭᓐ᙮

ᑭᐐᑕᒪᐎᓐ ᐁᔑᐊᔮᒡ ᐊᐊ ᐋᓬᐃᑭᓵᑕᕒ ᐅᐲᐙᐱᑯᑫ ᑳᐃᓂᓐᒡ᙮ ᐋᓃᔥ ᓂᑮᑭᒋᒪᒋᑑᑖᒃ᙮ ᑳᑎᐯᒋᑫᓂᒡ ᐃᑕᔥ ᐅᑲᑎᐸᐊᒫᑰᓐ ᐅᑎᔑᒋᑫᐎᓇᓐ᙮

ᑲᔦ ᑮᓐ ᐃᑕᔥ ᐊᔮᔛᑲᑕᐤ, ᐋᓃᔥ ᐅᑮᑲᑴᐗᓈᑑᓐ ᓂᑎᐹᒋᒧᐎᓂᓈᓐ᙮

ᓂᑕᒻ ᐃᑯ ᐁᑮᑎᐹᑯᓂᑰᔮᓐ ᓃᓐ ᐃᑯ ᓂᑮᑲᓅᒋᑫᑕᒫᑎᔅ, ᐊᐎᔭ ᐁᑮᐐᐐᒋᐃᓯᒃ᙮ ᑲᑭᓇ ᓂᑮᓇᑲᓂᑰᒃ᙮ ᒫᓄ ᑕᔥ ᑳᐐᓐ ᐅᑲᐊᑭᑕᒫᑯᓰᐙᓐ ᑭᔐᒪᓂᑑᓐ᙮

ᐐᓐ ᐃᑕᔥ ᑳᑎᐯᒋᑫᒡ ᒨᔕᒃ ᓂᑮᐱᐐᒋᐃᒃ, ᓂᑮᒪᔥᑲᐎᓰᐃᒃ, ᐁᑮᐅᒋᑲᔥᑭᑑᔮᓐ ᑲᑭᓇ ᒋᒨᔥᑭᓀᐐᑕᒫᑫᔮᓐ ᑭᔐᒪᓂᑑ ᐅᑎᐹᒋᒧᐎᓐ, ᒦ ᐃ ᑲᑭᓇ ᑯ ᒋᐅᒋᓅᑕᒧᐙᒡ ᐃᑭ ᑳᑭᑫᓂᒫᓯᒀ ᑭᔐᒪᓂᑑᓐ᙮ ᔑᑾ ᓂᑮᔖᐾᐃᑰ ᐋᔕ ᐁᑮᑕᓀᑖᑯᓯᔮᐹᓐ ᐅᑑᓂᕽ ᐊᐊ ᒥᔑᐱᔑᐤ᙮

ᑲᔦ ᓂᑲᔖᐾᐃᒃ ᑳᑎᐯᒋᑫᒡ ᑲᑭᓇ ᐃᓂ ᐋᓇᐐᒪᒋᑑᑖᑰᔮᓐ, ᓂᑲᑲᓇᐌᓂᒥᒃ ᐃᑕᔥ ᐃᒫ ᒋᐅᑎᑕᒫᓐ ᐅᑎᐯᒋᑫᐎᓂᕽ ᑭᒋᑮᔑᑯᕽ ᐁᑕᔑᑭᒫᐎᒡ᙮ ᒦ ᐊᐌ ᐊᐸᓀ ᑯ ᒨᔕᒃ ᑕᑭᑌᓂᒫ, ᐐᑳ ᓴ ᑯ ᒋᐌᒀᓭᓯᓄᒃ! ᐁᒣᓐ᙮

ᐴᔔ ᓂᑎᓈᒃ ᐸᕒᐃᓯᓬᐊ, ᐊᑶᓬᐊ ᑲᔦ, ᑲᑭᓇ ᑲᔦ ᐁᑕᔑᐙᒡ ᐊᓀᓯᑆᕒᐊᔅ ᐅᐙᑳᐃᑲᓂᕽ᙮

ᔑᑾ ᑭᐐᑕᒪᐎᓐ, ᐃᕒᐋᔅᑕᔅ ᑮᐃᔥᑸ ᐃᐃᒫ ᒀᕒᐃᑎᕽ ᙮ ᒐᕒᐆᐱᒪᔅ ᓂᑮᓇᑲᓈ ᐃᒫ ᒫᐃᓬᐄᑕᓯᕽ ᐁᑭᔖᑖᐱᓀᒡ᙮

ᑮᓐ ᐱᑲᑴᑕᑯᔑᓂᓐ ᒋᑆ ᐱᐴᕽ᙮ ᑲᔦ ᑭᐴᔔᐃᒃ ᐃᔫᐱᔪᓬᐊᔅ, ᐅᑯ ᑲᔦ ᐱᔫᑌᔅ, ᓬᐋᐃᓇᔅ, ᑲᓬᐙᑎᔭ, ᑲᑭᓇ ᑭᐐᒋᐅᑌᐺᑕᒨᒫᑲᓂᓈᓂᒃ ᐅᐅᒫ ᑳᐊᔮᐙᒡ᙮

ᒫᓄ ᑭᑕᒑᒃ ᐅᑲᐐᒌᐎᑰᓐ ᑳᑎᐯᒋᑫᓂᒡ᙮ ᐅᑭᔐᐙᑎᓯᐎᓐ ᒥᒋᑲᑭᓇ ᑭᑲᐊᔑᒋᐐᒌᐎᑯᒻ᙮