ᓃᓇᐎᓐᑦ ᐃᑯ ᓂᑑᔑᐲᐃᑲᓂᓈᓐ ᑆᓬ, ᓯᓬᐯᓇᔅ, ᑎᒪᑎ ᙮ ᑮᓇᐙ ᑭᑑᔑᐲᐊᒫᑰᒻ ᑌᓴᓬᐊᓇᐃᑳᕽ ᑳᑕᔑᐊᓇᒥᐋᔦᒃ, ᐁᐐᒌᐎᓀᒃ ᑭᔐᒪᓂᑑ ᑳᐅᔫᓯᒪᕽ ᑲᔦ ᑳᑎᐯᒋᑫᒡ ᒋᓴᔅ X᙮

ᔕᐌᓂᒥᑰᐎᓐ, ᑯᔥᒀᐙᑌᑕᒧᐎᓐ ᑭᑲᒦᓂᑯᐙ ᑭᔐᒪᓂᑑ ᑳᐅᔫᓯᒫᐎᒡ ᑲᔦ ᑳᑎᐯᒋᑫᒡ ᒋᓴᔅ X᙮

ᑳᐐᒋᐅᑌᐺᑕᒨᒥᑰᔦᒃ, ᐃᓇᑌ ᒨᔕᒃ ᒋᓇᓈᑯᒪᑭᒡ ᑭᔐᒪᓂᑑ ᐁᒥᑴᓂᒥᑰᔦᒃ᙮ ᑾᔭᒃ ᐃᐃᐌ ᒋᑑᑕᒪᕽ ᐋᓃᔥ ᐊᐗᔑᒣ ᑭᒋᒫᒌᑭᓐ ᑭᑌᐺᔦᑕᒧᐎᓂᐙ ᑲᔦ ᐁᐊᓂᒥᔖᒃ ᑭᓵᑭᐃᑎᐎᓂᐙ ᑲᑭᓇ ᐁᔑᓵᑭᐃᑎᔦᒃ᙮

ᐋᑎ ᐱᑯ ᑳᐃᔑᐊᓇᒥᐁᑕᐎᓐᒡ ᑭᔐᒪᓂᑑ ᑭᑎᔑᒪᒦᒀᓂᑰᒻ, ᐋᓃᔥ ᒥᓴᐙ ᓴ ᐐᓐ ᐁᐅᒌᑳᑰᔦᒃ ᑲᔦ ᐁᐅᒋ ᑲᒀᑕᑭᐃᑰᔦᒃ, ᑫᔮᐱ ᑭᒪᔥᑲᐌᑖᒻ, ᑫᔮᐱ ᑭᑌᐺᔦᑖᒻ᙮ ᒦ ᐅ ᐁᓈᒋᒥᑰᔦᒃ᙮

ᒦ ᐅ ᑲᔦ ᑳᐅᒋᑭᑫᑖᑾᓂᓂᒃ ᐁᑾᔭᑾᓂᓂᒃ ᑭᔐᒪᓂᑑ ᐅᑎᓈᑯᓂᑫᐎᓐ, ᐋᓃᔥ ᐃᐃᐌ ᑳᐃᔑᐌᐱᓯᔦᒃ ᑭᑲᐅᒋ ᑌ ᐃᓀᑖᑯᓯᒻ ᐃᐃᒫ ᒋᐊᔮᔦᒃ ᐅᑎᐯᒋᑫᐎᓂᕽ᙮ ᒦ ᐋᓃᔥ ᐃᐃᐌ ᐌᒋᑲᒀᑕᑭᑑᔦᒃ᙮

ᑾᔭᒃ ᐃᑕᔥ ᐐᓐ ᐅᑲᓇᓇᐊᑑᓐ, ᒣᔥᑾᒡ ᑲᒀᑕᑭᑑᐎᓐ ᐅᑲᒦᓈᐞ ᐃᐃᐌᓂᐗᐞ ᑲᑲᒀᑕᑭᐃᓀᒀ᙮

ᑮᓇᐙ ᑳᑲᒀᑕᑭᑑᔦᒃ ᒫᒪᐤ ᑭᑲᒦᓂᑯᓈᓐ ᒋᐊᓉᐱᔭᕽ ᐊᐊ ᑭᔐᒪᓂᑑ, ᒦ ᐃ ᐊᐲ ᑭᒋᑮᔑᑯᕽ ᐱᐅᒋᓈᑯᓯᒡ ᐊᐊ ᑳᑎᐯᒋᑫᒡ ᒋᓴᔅ, ᐁᐐᑭᑭᑕᑯᔑᓅᒫᒡ ᐃᐃ ᐅᑌᒐᓬᐃᒪᐞ ᐁᒪᔥᑲᐎᓰᓂᒡ,

ᑲᔦ ᐃᔥᑯᑌ ᑫᒪᔥᑲᐗᑾᓀᓂᒃ ᐁᐱᑭᑭᓯᒡ ᐅᑲᒣᔥᑯᒋᑎᐸᐊᒪᐙᐞ ᐊᐌᓀᓇᐞ ᐃᑯ ᐁᑳ ᑳᑭᑫᓂᒫᓯᓂᒃ ᑭᔐᒪᓂᑑᓐ, ᑲᔦ ᒥᓂᒃ ᓴ ᑯ ᐊᐎᔭᓐ ᑳᑌᐺᑕᓯᓂᒃ ᐃᐃᐌ ᐅᒥᓍᒋᒥᑰᐎᓐ ᑳᑎᐯᓂᒥᓇᕽ ᒋᓴᔅ᙮

ᐅᑯ ᑕᐃᔑᑎᐸᐊᒪᐙᐗᒃ ᒋᓀᐱᒋᐊᔮᐙᒡ ᓂᔑᐗᓈᑎᓯᐎᓂᕽ᙮ ᑕᓀᐱᒋᐸᑫᐎᓈᐗᒃ ᐁᑳ ᒋᐙᐸᒫᓯᒀ ᑳᑎᐯᒋᑫᓂᒡ ᑲᔦ ᐁᔑᐙᓭᔮᓂᒃ ᐅᒪᔥᑲᐎᓰᐎᓂᓂ᙮

ᒦ ᐃᐌ ᐊᐲ ᐁᔑᑮᔑᑲᒃ ᐁᐐᐲᔖᒡ ᑳᑎᐯᒋᑫᒡ ᐁᐐᑭᑕᑭᒥᑯᒡ ᐃᐃ ᐅᑾᔭᒀᑎᓰᒪᐞ ᑲᔦ ᐁᐐᒫᒪᑳᓯᓈᑯᒡ ᐃᐃ ᒥᓂᒃ ᑳᑌᐺᑖᑯᒡ᙮ ᑲᔦ ᑮᓇᐙ ᑭᑲᑕᑯᐊᔮᒻ ᐃᐃ ᐊᐲ, ᐋᓃᔥ ᑭᑮᑌᐺᑖᒻ ᓂᑎᐹᒋᒧᐎᓂᓈᓐ ᑳᑮᐐᑕᒫᑰᔦᒃ᙮

ᒦ ᓴ ᑯ ᐊᐸᓀ ᐌᒋᐊᓇᒥᐁᑕᒫᑰᔦᒃ, ᐊᐊ ᑭᑭᔐᒪᓂᑑᒥᓈᓐ ᒋᐊᐲᑕᑭᒥᓀᒃ ᒋᐅᑎᓵᐸᑕᒣᒃ ᐃᐃᐌ ᐱᒫᑎᓯᐎᓐ ᑳᐃᔑᐊᑐᒥᓀᒃ, ᒫᓄ ᑲᔦ ᐅᑲᑎᐱᓴᑣᓐ ᐌᑯᓀᓐ ᐃᑯ ᒥᓄᑫᑰᓐ ᑳᑮᐃᓀᑕᒣᒃ ᒋᑑᑕᒣᒃ, ᑲᔦ ᑲᑭᓇ ᑫᑰᓐ ᑭᑌᐺᔦᑕᒧᐎᓂᐙᕽ ᑳᐐᐅᒋᐊᓄᑳᑕᒣᒃ ᐅᑲᑎᐱᓴᑣᓐ᙮

ᒦᑕᔥ ᐅᓄ ᑫᑰᓇᓐ ᐃᔑᒋᑳᑌᑭᓐ ᑮᓇᐙ ᑕᐅᒋᑭᑌᒋᑳᑌᓂ ᐅᐐᓱᐎᓐ ᐊᐊ ᑳᑎᐯᓂᒥᓇᕽ ᒋᓴᔅ, ᔑᑾ ᑲᔦ ᑮᓇᐙ ᑭᑲᑕᑯᒦᓂᑯᐙ ᐅᑭᑌᑖᑯᓯᐎᓐ᙮ ᐅᓄᔥ ᑲᑭᓇ ᑕᐅᒌᒪᑲᓅᓐ ᐅᔕᐌᒋᑫᐎᓂᕽ ᐊᐊ ᑭᑭᔐᒪᓂᑑᒥᓈᓐ ᑲᔦ ᑳᑎᐯᒋᑫᒡ ᒋᓴᔅ X᙮

ᑳᐐᒋᐅᑌᐺᑕᒨᒥᑰᔦᒃ! ᓂᑲᐐᑕᔑᑖᓐ ᐋᓃᓐ ᐁᓀᑖᑾᓂᓂᒃ ᐅᑕᑯᔑᓄᐎᓐ ᑳᑎᐯᓂᒥᓇᕽ ᒋᓴᔅ X, ᐃᐃ ᑲᔦ ᑫᔑᒫᒪᐎᓈᓯᑲᐗᕽ ᐃᐃᒫ ᐁᔑᐊᔮᒡ᙮ ᑭᐸᑯᓭᓂᒥᓂᓂᒻ

ᐁᑳ ᐐᐸ ᒋᐗᑲᐎᓂᑰᓯᐌᒃ ᑭᓈᓈᑲᑕᐌᒋᑲᓂᐙᕽ᙮ ᑳᐐᓐ ᐐᐸ ᑭᑲᒥᑯᔥᑳᒋᐃᑯᓰᐙ ᐊᐎᔭ ᐁᐃᑭᑐᒡ ᐋᔕ ᐁᐱᐅᒋᒋᓭᓂᒃ ᑳᑎᐯᒋᑫᒡ ᐅᑮᔑᑲᓅᒻ, ᒫᑭᔖ ᐊᐎᔭ ᐅᒋᑲᑭᑐᒡ ᐊᒑᑯᓈᕽ, ᒫᑭᔖ ᑲᔦ ᑮᐃᑭᑐᒻ ᓃᓇᐎᓐᑦ ᐁᑮᐃᔑᐲᐃᑫᔮᕽ᙮

ᑫᑯ ᑭᑲᐗᓂᒥᑯᓰᐙ ᐊᐎᔭ ᐋᓃᓂᑯ ᑫᐃᑭᑐᑴᓐ᙮ ᑳᐐᓐ ᐃᐃ ᑕᐃᔑᓭᓯᓅᓐ ᑮᔑᑲᓐ, ᐹᓂᒪ ᐁᑕ ᒥᓯᐌᑲᒥᒃ ᑮᐋᒋᐃᑎᓱᓈᓂᐗᕽ ᐁᐌᐱᓈᐙᒡ ᐃᓂ ᑳᑎᐯᒋᑫᓂᒡ, ᑲᔦ ᐊᐲ ᐱᐊᔮᒡ ᐊᐊ ᐗᐐᑫ ᑳᑎᐯᓂᒥᑯᒡ ᒪᒋᒋᑫᐎᓐ – ᒦ ᐊᐌ ᐱᒌᓇᒃ ᓂᔑᐗᓈᑎᓯᐎᓂᕽ ᑫᐃᔑᐌᐱᓂᓐᒡ᙮

ᐐᓐ ᐐᐃᔥᐯᑖᑯᐃᑎᓱ, ᑲᑭᓇ ᐁᐐᒦᑳᑕᕽ ᑳᐊᓇᒥᐁᑕᒫᑕᒧᐙᒡ ᐃᑭ ᐯᒫᑎᓯᐙᒡ, ᑲᔦ ᑲᑭᓇ ᑫᑰᓐ ᑳᒪᓂᑑᐌᑖᑾᓂᓂᒃ᙮ ᐐᓐ ᐃᐃᒫ ᐐᓇᒪᑕᐱ ᐃᐃᒫ ᐲᑎᒃ ᑭᔐᒪᓂᑑ ᐅᐙᑳᐃᑲᓂᕽ, ᐐᓐ ᐁᐐᐃᓇᑭᑎᓱᒡ ᐁᑭᔐᒪᓂᑑᐎᒡ᙮

ᑳᐐᓐ ᐃᓇ ᑭᒫᒥᑲᐎᓰᒻ? ᑲᑭᓇ ᑭᑮᐐᑕᒪᐎᓂᓂᒻ ᒣᒀ ᑮᐐᒌᐎᓇᑰᒃ᙮

ᑫᑰᓐ ᐃᑕᔥ ᑭᐱᒌᑫᒪᑲᓐ ᐁᑳ ᒋᐅᒋᒋᓭᓯᓄᒃ᙮ ᑮᓇᐙᔥ ᑭᑭᑫᑖᓈᐙ ᐌᑯᓀᓐ ᐃᐃ ᑳᑭᐱᐊᔮᒃ᙮ ᒪᔮ ᑕᔥ ᐃᑯ ᐊᐲ ᑳᐅᓀᒋᑳᑌᒃ ᒋᐅᒋᒋᓭᓂᒃ, ᑕᓈᑯᓯ ᐊᐊ ᑳᒫᒪᐎᒪᒑᑎᓯᒡ᙮

ᐋᔕ ᑕᔥ ᐱᒪᓄᑮᒪᑲᓐ ᐃᐃ ᒪᒋᒋᑫᐎᓐ ᐋᑲᐗᔭᐄ ᑳᐃᔑᐊᓄᑮᒪᑲᒃ᙮ ᑳᐐᓐ ᐐᓐ ᓀᐗᒐᔭᐄ ᑕᐃᔑᐌᐸᓯᓅᓐ ᐃᐃ ᑳᐐᐃᔑᐌᐸᒃ, ᐹᓂᒫ ᓴ ᑯ ᐃᑯᒋ ᒫᒌᓂᓐᒡ ᐊᐊᐌ ᑳᑭᐱᔥᑭᑫᒡ᙮

ᒦᔥ ᐃᐃ ᐊᐲ ᑕᓈᑯᐃᑎᓱ ᐊᐊ ᑳᒫᒪᐎᒪᒑᑎᓯᒡ᙮ ᐊᐊ ᑕᔥ ᑳᑎᐯᒋᑫᒡ ᐱᒌᓇᒃ ᐅᑲᓂᓵᓐ ᐃᓂ ᑳᒪᒋᒋᑫᓂᒡ, ᐃᐃ ᐅᐸᑭᑕᓈᒧᐎᓐ ᐅᑑᓂᕽ ᐁᐅᒋᓭᓂᒃ ᐁᐐᐋᐸᒋᑑᒡ᙮ ᐅᑲᓂᔑᐗᓈᒋᐋᓐ, ᐅᐙᓭᓯᐎᓐ ᐁᐐᐱᐊᔑᒋᓈᑯᓯᒡ, ᑕᑯᔑᕽ᙮

ᐊᐊ ᑕᔥ ᑳᒫᒪᐎᒪᒑᑎᓯᒡ ᑫᐱᓈᑯᐃᑎᓱᒡ, ᑕᐐᐱᑭᑮ ᐅᑲᔥᑭᐁᐎᓯᐎᓂᓂ ᐃᓂ ᓭᑕᓇᓐ ᙮ ᐅᑲᑑᑖᓇᓐ ᒪᒫᑕᐎᒋᑫᐎᓇᓐ, ᑭᑭᓇᐙᒋᒋᑲᓇᓐ ᑲᔦ ᑳᒪᒪᔭᑭᓈᑾᓂᓂᑭᓐ ᐁᐐᑲᑴᐗᔦᔑᑫᒡ᙮

ᑲᑭᓇ ᑯ ᐃᓂ ᒪᒋᑫᑰᓇᓐ ᐅᑲᐋᐸᒋᑑᓇᓐ ᐁᐐᑲᑴ ᑲᑮᓇᐎᔥᑭᒫᒡ ᒥᓂᒃ ᐊᐎᔭᓐ ᑳᐐᓂᔑᐗᓈᑎᓯᓂᒡ᙮ ᑳᐐᓐ ᐋᓃᔥ ᐅᑮᓵᑭᑑᓰᓈᐙ ᐃᐃ ᑌᐺᐎᓐ, ᑳᐐᓐ ᐅᑑᑖᐱᓇᓰᓈᐙ ᐃᐃ ᒋᐅᒋᐱᒫᒋᐃᑣᐸᓐ᙮

ᒦ ᐃᐌ ᑭᔐᒪᓂᑑ ᑫᐅᒋᐲᒋᓂᔕᐊᒪᐙᒡ ᐃᐃ ᑫᐗᔦᔑᐃᑯᐙᒡ, ᑫᑲᔥᑭᐃᑯᐙᒡ ᒋᑌᐺᔦᑕᒧᐙᒡ ᐃᐃ ᐁᑳ ᑳᑌᐺᒪᑲᓯᓂᓂᒃ᙮

ᒦᑕᔥ ᐃᐃ ᒋᐹᑖᔮᑯᓂᑲᓂᐎᐙᒡ ᒥᓂᒃ ᐃᑯ ᐃᑭᐌᓂᐗᒃ ᑳᑌᐺᑕᓯᒀ ᐃᐃ ᑌᐺᐎᓐ, ᓇᐗᒡ ᐃᐃᐌᓂ ᐁᑮᒥᓉᑕᒧᐙᒡ ᒪᒋ ᐃᓈᑎᓯᐎᓐ᙮

ᑳᐐᒋᐅᑌᐺᑕᒨᒥᑰᔦᒃ, ᑮᓇᐙ ᑳᓵᑭᐃᓀᒃ ᑭᔐᒪᓂᑑ! ᑮᓇᐙ ᓂᑑᒋᒦᑴᒋᐎᐋ ᑭᔐᒪᓂᑑ, ᐋᓃᔥ ᒫᐗᒡ ᓃᑳᓐ ᑭᑮᐅᓀᓂᒥᑯᐙ ᒋᐱᒫᒋᐃᑰᐎᓯᔦᒃ, ᐁᑮᐃᔑᐊᓄᑮᓂᒡ ᐅᑕᒑᑾᓐ ᑭᔐᒪᓂᑑ, ᐐᓐ ᐃᑯ ᒋᑎᐯᓂᒥᓀᒃ, ᑲᔦᔥ ᐁᑮᑌᐺᑕᒣᒃ ᑌᐺᐎᓐ᙮

ᒦ ᐅᐌ ᑳᐃᔑᐊᑐᒥᓀᒃ, ᒦ ᐅᐌ ᒥᓍᒋᒧᐎᓐ ᓃᓇᐎᓐᑦ ᑳᑮᐐᑕᒫᑰᔦᒃ, ᒋᐅᒋᐊᑐᒥᓀᒃ ᒋᐅᒋᑌᐱᐱᑕᒫᓱᔦᒃ ᐅᑭᑌᑖᑯᓯᐎᓐ ᑳᐐᐸᑴᓇᒪᐎᓀᒃ ᑳᑎᐯᓂᒥᓇᕽ ᒋᓴᔅ X᙮

ᐊᐤ, ᑳᐐᒋᐅᑌᐺᑕᒨᒥᑰᔦᒃ! ᐋᔩᒋᑳᐸᐎᒃ, ᒥᒋᒥᓇᒧᒃ ᑲᑭᓇ ᑳᑮᐋᓂᑫᑭᑭᓄᐊᒫᑰᔦᒃ, ᒥᓂᒃ ᓴ ᑯ ᑳᐱᓯᑕᐎᔮᕽ ᑲᔦᔥ ᑳᐃᔑᐲᐊᒫᑰᔦᒃ᙮

ᓂᐸᑯᓭᓂᒫ ᐐᓐ ᑎᐱᓇᐌ ᑳᑎᐯᓂᒥᓇᕽ ᒋᓴᔅ X ᑲᔦ ᑭᔐᒪᓂᑑ ᑭᑌᑌᓈᓐ ᑳᑮᓵᑭᐃᓇᕽ, ᑲᔦ ᐁᔕᐌᓂᒥᓇᕽ ᑳᑮᐅᒋᒦᓂᓇᕽ ᒪᔥᑲᐌᑕᒧᐎᓐ ᐱᔑᔑᒃ ᑫᐐᒌᐎᑯᔭᕽ ᑲᔦ ᒪᔥᑲᐎ ᐊᐯᓂᒧᐎᓐ᙮

ᓂᐸᑯᓭᓂᒫ ᒋᒪᔥᑲᐌᑕᒥᐃᓀᒃ ᑲᔦ ᒋᒪᔥᑲᐎᓰᐃᓀᒃ ᑲᑭᓇ ᑫᑰᓐ ᒋᒥᓄᑑᑕᒣᒃ ᑲᔦ ᒋᒥᓄᑲᑭᑐᔦᒃ᙮

ᒦᓇᐙ ᑕᔥ ᑭᑲᑴᒋᒥᓂᓂᒻ, ᑳᐐᒋᐅᑌᐺᑕᒨᒥᑰᔦᒃ, ᐊᓇᒥᐁᑕᒪᐎᔑᓈᒻ ᒋᒫᒌᔥᑳᒪᑲᓂᓂᒃ ᑳᑎᐯᒋᑫᒡ ᐅᑎᐹᒋᒧᐎᓐ, ᑲᔦᔥ ᒋᓂᑭᒋ ᐃᓀᒋᑳᑌᓂᒃ ᑖᐱᔥᑰ ᑲᔦ ᑮᓇᐙ ᐁᔑᑭᒋ ᐃᓀᑕᒣᒃ᙮

ᑲᔦ ᒋᐸᐲᐃᔭᒥᓐᒡ ᐊᐊ ᑭᔐᒪᓂᑑ ᐁᑳ ᒋᐅᑎᓵᓯᐗᑭᑣ ᐃᑭ ᑳᓴᓇᑭᓯᐙᒡ, ᐃᑭ ᑲᔦ ᑳᒪᒋ ᐃᔑᐌᐱᓯᐙᒡ, ᐁᑳ ᑫᑰᓐ ᒋᑑᑕᐎᓯᔭᒥᑣ᙮ ᐋᓃᔥ ᑳᐐᓐ ᑲᑭᓇ ᐊᐎᔭ ᐅᑌᐺᑕᒧᐎᓂᓰ᙮

ᑌᐺᐎᓂᐎ ᑕᔥ ᐊᐊ ᑳᑎᐯᒋᑫᒡ᙮ ᒦ ᐊᐌ ᑫᓲᑭᒪᔥᑲᐎᓰᐃᓀᒃ ᑲᔦ ᑫᒦᑖᑴᓇᒪᐎᓀᒃ ᐃᓂ ᒪᒋᐊᔭᐋᓐ᙮

ᓂᑎᔑᐃᑯᓈᓐ ᐃᑕᔥ ᐊᐊ ᑳᑎᐯᒋᑫᒡ ᐁᐅᒋᑾᔭᑴᓂᒥᑰᔦᒃ, ᐋᔕ ᐁᑮᐱ ᐃᔑᒋᑫᔦᒃ ᑳᑮᐃᔑᐐᑕᒫᑰᔦᒃ ᑲᔦ ᑫᔮᐱ ᒋᐊᓂ ᐃᔑᒋᑫᔦᒃ᙮

ᒫᓄ ᑕᔥ ᑳᑎᐯᒋᑫᒡ ᑭᑲᑭᑭᓄᐊᒫᑯᐙ ᐯᔑᑾᓐ ᐃᑯ ᒋᐃᔑᓵᑭᐃᐌᔦᒃ ᑖᐱᔥᑰ ᐐᓐ ᑭᔐᒪᓂᑑ ᐁᔑᒋᑫᒡ, ᑲᔦᔥ ᒋᐃᔑᒪᔥᑲᐌᑕᒣᒃ ᑖᐱᔥᑰ ᑫᐐᓐ X ᑳᑮᐃᔑᒪᔥᑲᐌᑕᕽ᙮

ᑳᐐᒋᐅᑌᐺᑕᒨᒥᑰᔦᒃ! ᑭᑎᔑᑲᑳᓱᒥᑰᒻ ᐅᐐᓱᐎᓂᕽ ᑳᑎᐯᓂᒥᓇᕽ ᒋᓴᔅ X: ᑭᑲᒪᓈᐐᒌᐙᐙ ᐊᐌᓀᓐ ᐃᓴ ᑯ ᐅᑌᐺᑕᒧ ᑳᐐᒥᒋᐅᑖᒋᐃᑯᓯᒡ ᐁᓵᐱᐊᓄᑮᓯᒃ, ᐁᐱᓯᑕᓯᒃ ᐃᐃ ᑭᑭᓄᐊᒫᑎᐎᓐ ᑳᑮᐐᑕᒫᑰᔦᒃ᙮

ᑮᓇᐙ ᐋᓃᔥ ᐌᐌᓂ ᑭᑭᑫᑖᒻ ᒋᓈᐱᒋᑫᔦᒃ ᑳᑮᐃᔑᐙᐸᒥᔮᕽ᙮ ᑳᐐᓐ ᐃᒫ ᓂᑮᑕᔑᑭᑎᒥᓰᒥᓐ ᑳᐃᔑᐊᔮᔦᒃ᙮

ᑳᐐᓐ ᓂᑮᐐᒥᒋᐊᔕᒥᑰᓰᒥᓐ᙮ ᑲᔦ ᐁᑎᐱᑲᒃ ᑲᔦ ᐁᑮᔑᑲᒃ ᓂᑮᑭᒋᐊᓄᑮᒥᓐ, ᓃᓇᐎᓐᑦ ᓂᑮᐐᐋᐸᒋᑑᒥᓐ ᓂᑕᔨᔒᐎᓂᓈᓂᓐ ᐁᑳ ᐁᐐᑯᓯᑸᐃᑰᓯᐌᒃ᙮

ᐋᓇᐐᓐ ᓂᑮᑌᐃᓀᑖᑯᓯᒥᓐ ᒋᑮᐸᒥᐃᔮᑭᐸᓐ, ᔖᑰᒡ ᐃᑕᔥ ᓂᑮᐊᓄᑮᑕᒫᓱᒥᓐ, ᑮᓇᐙ ᒋᑭᑭᓇᐙᐸᒥᔮᕽ ᑳᐃᓈᑎᓯᔮᕽ᙮

ᒣᒀ ᓴ ᐁᑮᐐᒋᐊᔮᒥᑰᔦᒃ ᑭᑮᐃᔑᐊᔮᒀᒥᒥᑰᒻ: ᑮᔥᐱᓐ ᐊᐎᔭ ᐃᓀᑕᓯᒃ ᒋᐊᓄᑮᒡ, ᒫᓄ ᑳᐐᓐ ᑕᐐᓯᓂᓰ᙮

ᐋᓃᔥ ᓂᓅᑖᒥᓐ ᐋᓂᑕ ᐁᐊᔮᔦᒃ ᑳᒥᒋᐊᔮᓂᓯᐱᒫᑎᓯᐙᒡ, ᐁᒥᒋᓅᒋᑕᒪᐙᐙᒡ ᐸᑳᓐ ᐊᐎᔭᓐ ᐅᑕᔨᑎᐎᓂᓂ᙮

ᐅᑯ ᑎᓄ ᓂᑎᔑᑲᑳᓱᒫᓈᓂᒃ ᑳᑎᐯᒋᑫᓂᒡ ᒋᓴᔅ Xᑕᓐ, ᑯᔥᒀᐙᑎᓯᐎᓂᕽ ᒋᐃᓇᓄᑮᐙᒡ ᒋᐸᒥᐃᑎᓱᐙᒡ᙮

ᑳᐐᒋᐅᑌᐺᑕᒨᒥᑰᔦᒃ! ᑫᑯ ᐴᓂᑑᑫᒃ ᑭᒥᓄᐊᓄᑮᐎᓂᐙ᙮

ᑮᔥᐱᓐ ᐊᐎᔭ ᑳᐐᓀᐱᒋᐱᓯᑕᓯᒃ ᐅᓄᐌᓂᐗᓐ ᑳᐃᔥᐲᐊᒫᕽ, ᑭᑭᓇᐙᑌᓂᒥᒃ ᐊᐊ ᐁᑎᓄᐎᒡ᙮ ᑫᑯ ᐐᒋᐋᑫᒃ, ᒋᐊᑲᒋᐃᑯᒡ ᐅᑎᔑᒋᑫᐎᓐ᙮

ᑫᑯ ᐐᓐ ᐃᔑᓇᐙᑫᒃ ᒋᔒᑫᓂᒣᒃ, ᐋᒋᑯ ᑭᑲᑲᑮᑭᒫᐙ, ᑮᒋᔖᓂᐙ ᒋᐃᓇᑭᒣᒃ᙮

ᐊᐊ ᑳᑎᐯᒋᑫᒡ ᑳᓂᑖ ᒦᑭᐌᒡ ᑯᔥᒀᐙᑌᑕᒧᐎᓐ, ᐐᓐ ᐃᑯ ᑎᐱᓇᐌ ᑭᑲᒦᓂᑯᐙ ᒨᔕᒃ, ᐋᓃᓂᑯ ᐁᔑᐌᐱᓯᕽ᙮ ᑳᑎᐯᒋᑫᒡ ᑲᑭᓇ ᑭᑲᐐᒌᐎᑯᐙ᙮

ᓃᓐ ᐃᑯ ᑎᐱᓇᐌ ᓂᓂᓐᒡ ᓂᑖᐸᒋᑑᓐ ᐁᐅᔑᐲᐊᒫᓐ ᐅᐅ: ᓃᓐ ᑆᓬ ᑭᐴᔔᐃᓂᓂᒻ᙮ ᒦ ᑯ ᐃᐌ ᐁᔑᐲᐃᑫᔮᓐ᙮

ᐅᔕᐌᒋᑫᐎᓐ ᑳᑎᐯᓂᒥᓇᕽ ᒋᓴᔅ X ᒥᒋᑲᑭᓇ ᑭᑲᐊᔑᒋᐐᒌᐎᑯᒻ᙮