ᓃᓇᐎᓐᑦ ᑆᓬ ᑲᔦ ᑎᒪᑎ ᐅᑕᓄᑮᐋᑲᓇᐞ X ᒋᓴᔅ᙮ ᑮᓇᐙ ᑭᑑᔑᐲᐊᒫᑰᒻ ᐃᐃᒫ ᐱᓬᐃᐹᐃ ᐆᑌᓈᕽ ᑳᐊᔮᔦᒃ, ᑮᓇᐙ ᑭᔐᒪᓂᑑ ᐅᐱᒫᑎᓰᒪᐞ ᑳᐐᒌᐌᒃ X ᒋᓴᔅ, ᑕᑯ ᑲᔦ ᐃᑭᐌᓂᐗᒃ ᐅᓃᑳᓂᓰᒃ ᑲᔦ ᐅᐐᒋᐃᐌᒃ ᓂᑑᔑᐲᐊᒪᐙᓈᓂᒃ᙮

ᔕᐌᑖᑯᓯᐎᓐ ᑲᔦ ᐱᓵᓀᑕᒧᐎᓐ ᑭᑲᐅᒌᑕᒫᑯᐙ ᑭᔐᒪᓂᑑ ᐊᐌ ᑰᓯᓈᓐ ᑲᔦ ᑳᑎᐯᒋᑫᒡ ᒋᓴᔅ X᙮

ᑕᓯᕽ ᐃᑯ ᐁᒥᑴᓂᒥᓇᑰᒃ ᓂᒦᑴᒋᐎᐋ ᑭᔐᒪᓂᑑ᙮

ᑕᓯᕽ ᐃᑯ ᒨᔕᒃ ᐁᐊᓇᒥᐋᔮᓐ ᓂᒌᑫᑕᒻ ᐁᑲᓅᒋᑫᑕᒪᐎᓇᑰᒃ

ᐅᒋ ᐃᐌ ᑳᐱ ᐃᔑᐐᒋᐃᐌᔦᒃ ᐁᐱᒥᐐᒋᑳᑌᒃ ᒥᓍᒋᒧᐎᓐ, ᓂᑕᒻ ᐃᑯ ᐁᑮᒫᒌᐅᑖᐱᓇᒣᒃ ᐲᓂᔥ ᐃᑯ ᓅᑯᒻ᙮

ᒦ ᐅᐌ ᐁᑫᒋᓈᐁᑕᒫᓐ, ᐃᐃᐌ ᐅᒥᓄᐊᓄᑮᐎᓐ ᑭᔐᒪᓂᑑ ᑳᑮᒫᑕᓄᑳᑕᕽ ᐁᑮᑭᑭᔥᑲᒧᐃᓀᒃ, ᑫᔮᐱ ᒋᓂ ᐃᔑᐊᓄᑳᑕᕽ ᐲᓂᔥ ᐃᑯ ᐊᐲ ᑮᔑᑲᓂᓂᒃ X ᒋᓴᔅ ᑳᐐᑎᐯᑕᕽ, ᐊᒦ ᐃ ᐊᐲ ᒋᑮᔑᒋᑳᑌᒃ᙮

ᑾᔭᑾᓐ ᐃᓴ ᐅᐌ ᒋᐃᓀᓂᒥᓇᑰᒃ, ᒨᔕᒃ ᐁᑕᓀᓂᒥᓇᑰᒃ ᓂᑌᐃᕽ᙮ ᐋᓃᔥ ᑲᑭᓇ ᑳᑕᔑᔦᒃ ᑭᑮᐱ ᐃᔑᐐᒋᐃᐌᒻ ᓂᒦᓂᑰᐎᓯᐎᓂᕽ ᑳᐃᔑᐸᑭᑎᓇᒪᐎᒡ ᑭᔐᒪᓂᑑ, ᐋᓃᔥ ᓅᑯᒻ ᐁᑭᐸᐅᑰᔮᓐ ᑲᔦ ᐅᑖᓈᕽ ᒣᒀ ᐁᑮᐱᓂᔅᑴᓯᔮᓐ ᐁᑮᑲᓅᒋᑫᑕᒪᐙᑕᒫᓐ ᐃᐃ ᒥᓍᒋᒧᐎᓐ ᐁᑮᐱᒥᐋᔩᑕᑑᔮᓐ, ᒨᔕᒃ ᑭᑮᐱᐐᑑᑲᐎᒻ᙮

ᑭᔐᒪᓂᑑ ᓂᑖᑎᐹᒋᒥᒃ ᐋᐱᒋ ᑯ ᐁᐐᐙᐸᒥᓇᑰᒃ᙮ ᐃᐃᒫ ᐐᓐ X ᒋᓴᔅ ᐅᓵᑭᐃᐌᐎᓂᕽ ᐅᒌᒪᑲᓂᓂ ᐅᐅ ᑳᐃᓀᓂᒥᓇᑰᒃ᙮

ᐅᐅ ᑕᔥ ᓂᑎᔑᐊᓇᒥᐋ, ᑫᔮᐱ ᐊᐗᔑᒣ ᒋᐊᓂᐌᓅᒋᐊᔮᒪᑲᒃ ᑭᓵᑭᐃᐌᐎᓂᐙ, ᑕᑯ ᑲᔦ ᒋᐅᑭᑫᑕᒫᐎᓂᔦᒃ ᑲᔦ ᐐᑫ ᒋᓂᓯᑖᐎᓇᒣᒃ,

ᒦ ᐃᐌ ᒋᐃᔑᑲᔥᑭᑑᔦᒃ ᒫᐗᒡ ᑳᐅᓂᔑᔑᑭᓐ ᒋᐅᑖᐱᓇᒣᒃ᙮ ᒦᑕᔥ ᐃᐌ ᒥᓯᐌ ᑫᔑᑌᐺᔦᑖᑯᓯᔦᒃ ᑲᔦ ᐁᑳ ᑫᑰᓐ ᒋᐃᔑᐊᓈᒣᑖᑯᓯᓯᐌᒃ ᐊᐲ ᐅᑮᔑᑳᒥᒡ X᙮

ᑭᑲᐃᔑᒨᔥᑭᓀᔥᑳᑰᒻ ᑫᑰᓇᓐ ᑾᔭᑯᐱᒫᑎᓯᐎᓐ ᐐᓐ X ᒋᓴᔅ ᑳᓂᑖᐎᑭᑑᒡ, ᒦ ᐃᐌ ᑫᐅᒋᑭᑕᑭᒥᓐᒡ ᑭᔐᒪᓂᑑ ᑲᔦ ᑫᐅᒋᓇᓈᑯᒥᓐᒡ᙮

ᓃᒋᐅᑌᐺᑕᒨᒃ, ᑭᓇᑕᐌᓂᒥᓂᓂᒻ ᒋᑭᑫᑕᒣᒃ ᐅᐌ ᑳᐱ ᐃᔑᓭᔮᓐ, ᒦ ᐃᒫ ᑫᔮᐱ ᐌᒋᓂᑭᑫᑖᑾᒃ ᐃᐃ ᒥᓍᒋᒧᐎᓐ᙮

ᐃᐃᐌ ᐅᒋ ᑲᑭᓇ ᔑᒫᑲᓂᔕᒃ ᑳᑲᓇᐌᑕᒧᐙᒡ ᐅᑭᒫᐎᑲᒥᒃ ᓂᑭᑫᓂᒥᑰᒃ Xᑕᓐ ᐁᐅᑕᓄᑮᐋᑲᓂᒥᓂᒡ ᐁᐅᒋᑭᐸᐅᑰᔮᓐ, ᑲᔦ ᑲᑭᓇ ᐯᑳᓂᓯᐙᒡ ᓂᑭᑫᓂᒥᑰᒃ᙮

ᔑᑾ ᓃᐱᐗᐞ ᐃᑭ ᐅᐐᒋᑭᐌᔨᒫᒃ ᑳᑎᐯᒋᑫᓂᒡ ᐁᑌᐺᔦᓂᒫᐙᒡ, ᐁᐙᐸᒥᐙᒡ ᐁᔑᑭᐸᐅᑰᔮᓐ, ᐅᒋᑌᐃᓀᓂᒧᐗᒃ, ᐊᐗᔑᒣ ᐁᐊᓂᒪᔥᑲᐌᓂᒧᐙᒡ ᒋᐙᐐᑕᒧᐙᒡ ᑭᔐᒪᓂᑑ ᐅᑎᐹᒋᒧᐎᓐ, ᐁᑳ ᐁᑯᑖᒋᓯᒀ᙮

ᑌᐺ ᒦᓇᐙ ᐋᓂᑕ ᐅᑎᔑᑲᑮᑴᓄᑕᐙᐙᓐ Xᑕᓐ ᐋᔮᔐᑕᒧᐎᓂᕽ ᑲᔦ ᑲᑴᐸᑭᓈᑎᐎᓂᕽ᙮ ᐋᓂᓐᑦ ᐃᑕᔥ ᑾᔭᒃ ᐐᒥᓄᐐᒋᐃᐌᐗᒃ, ᐁᐅᒋᑲᑮᑴᐙᒡ᙮

ᐅᑯᐌᓂᐗᒃ ᓵᑭᐃᐌᐎᓂᕽ ᐃᔑᒋᑫᐗᒃ᙮ ᐅᑭᑫᑖᓈᐙ ᑭᔐᒪᓂᑑ ᐁᑮᐃᓇᓄᑮᐃᒡ ᒋᑲᓅᒋᑫᑕᒪᐙᑕᒫᓐ ᐃᐃ ᒥᓍᒋᒧᐎᓐ᙮

ᐃᑭ ᑕᔥ ᐯᑳᓂᓯᐙᒡ ᑳᐐᓐ ᑌᐺᐎᓂᕽ ᐅᑎᔑᑲᑮᑴᓄᑕᐙᓯᐙᐙᓐ Xᑕᓐ᙮ ᐐᓇᐙ ᑕᔥ ᐃᑯ ᐁᑕ ᐐᓃᑳᓀᑖᑯᓯᐗᒃ᙮ ᐃᓀᑕᒨᒃ ᐋᓃᔥ ᑫᔮᐱ ᓴᓇᑭᓯᐎᓐ ᐁᐐᑲᑴ ᑲᔥᑭᑕᒪᐎᐙᒡ ᐅᐅᒫ ᐁᔑᑭᐸᐅᑰᔮᓐ᙮

ᑳᐐᓐ ᐃᑯᑕᓄ ᓂᑎᓀᑕᓰᓐ᙮ ᓂᒥᓉᑕᒻ ᑮᔥᐱᓐ ᐁᑕ ᑲᑮᑴᓄᑕᐎᓐᒡ ᐊᐊ X, ᐋᓃᓂᑯ ᑫᐃᔑᓭᓂᒃ, ᒫᑭᔖ ᓇᐹᒡ ᐃᓀᑕᒧᐎᓂᕽ, ᒫᑭᔖ ᑲᔦ ᑾᔭᒃ ᐃᓀᑕᒧᐎᓂᕽ ᐅᒋᑲᑮᑴᓄᑕᐎᓐᒡ᙮ ᔑᑾ ᑫᔮᐱ ᓂᑲᓂ ᐃᔑᒥᓉᑕᒻ᙮

ᓂᑭᑫᑖᓐ ᐋᓃᔥ ᐁᐊᓇᒥᐁᑕᒪᐎᔦᒃ ᑲᔦ ᐁᐱᐐᒋᐃᒥᒡ ᒋᓴᔅ X ᐅᑕᒑᑾᓐ, ᓂᑲᐅᒋᐸᑭᑎᓂᑰ᙮

ᒦ ᐅᐌ ᐁᑭᒋᒥᓴᐌᑕᒫᓐ ᐁᐸᑯᓭᓂᒧᔮᓐ, ᐁᑳ ᐐᑳ ᑫᑰᓐ ᒋᐅᒋᒣᓂᔐᑕᓯᐙᓐ, ᒨᔕᒃ ᐃᑕᔥ ᒋᒪᔥᑲᐌᓂᒧᔮᓐ, ᒣᒥᑕᑫ ᑯ ᑲᔦ ᓅᑯᒻ, ᐁᓂᑭᓂᔮᓐ ᐃᑯ ᒋᑭᑌᑖᑯᐊᒃ ᐊᐊ X, ᑫᒫ ᐱᒫᑎᓯᔮᓐ ᑫᒫ ᓂᐳᔮᓐ᙮

ᐌᑯᓀᓐ ᐋᓃᔥ ᓃᓐ ᐙᐅᒋᐱᒫᑎᓯᔮᓐ? X ᐁᑕ ᐊᐌ ᑳᐅᒋᐱᒫᑎᓯᔮᓐ᙮ ᒦᑕᔥ ᐃᐃ ᓂᐳᔮᓐ ᓇᐗᒡ ᓂᑖᒥᓄᓴᐃᑯᓐ᙮

ᑮᔥᐱᓐ ᑕᔥ ᑫᔮᐱ ᑲᔥᑭᑑᔮᓐ ᒥᓄᐊᓄᑮᐎᓐ ᑫᔮᐱ ᓂᐐᔭᐎᕽ ᐱᒫᑎᓯᔮᓐ, ᒦᔥ ᐃᐃ ᐁᔑᐗᐙᓀᑕᒫᓐ ᐋᓃᓐ ᒪᔮ ᑫᐃᔑᒋᑫᔮᓐ᙮

ᓃᔡᔭᒃ ᓂᑑᒋᐐᑯᐱᓂᑰ᙮ ᒫᐗᒡ ᓂᒥᓴᐌᑖᓐ ᒋᒫᒑᔮᓐ ᒋᐊᐎᐐᒌᐗᒃ ᐊᐌ X, ᒦ ᐃᐌ ᒫᐗᒡ ᑫᐅᓂᔑᔑᕽ᙮

ᑮᓇᐙ ᑕᔥ ᓇᐗᒡ ᑖᐊᑕᐌᑖᑾᓐ ᑫᔮᐱ ᓂᐐᔭᐎᕽ ᒋᐱᒫᑎᓯᔮᓐ᙮

ᒦ ᐃᐌ ᐁᑾᔭᑴᑕᒫᓐ, ᐁᐃᔑᑭᑫᑕᒫᓐ ᑫᔮᐱ ᒋᓂᐊᔮᔮᓐ᙮ ᑫᔮᐱ ᑭᑲᓂᐐᒋᐱᒫᑎᓰᒥᓂᓂᒻ ᑲᑭᓇ, ᑭᑲᐃᔑᐐᒋᐃᓂᓂᒻ ᒋᓂᒫᒌᔥᑳᔦᒃ ᑲᔦ ᒋᓂ ᐃᔑᒨᒋᑫᑕᒣᒃ ᑭᑌᐺᑕᒧᐎᓂᐙᕽ᙮

ᐊᐲᔥ ᒦᓇᐙ ᐐᒋᐊᔮᒥᓇᑰᒃ ᓇᐗᒡ ᑫᔮᐱ ᑫᑰᓐ ᑭᑲᐊᔮᓈᐙ ᒋᐅᒋ ᐃᔥᐯᓂᒣᒃ X ᒋᓴᔅ ᐁᐊᓂᐐᒌᐌᒃ᙮

ᐅᐅᐌ ᐁᑕ ᑭᑎᓂᓂᓂᒻ: ᐃᔑᐱᒫᑎᓯᔪᒃ ᒋᐯᔑᑯᓈᑾᒃ ᐁᔑᐊᔮᓂᒃ ᐅᒥᓍᒋᒧᐎᓐ ᐊᐊ X᙮ ᒦᔥ ᑮᔥᐱᓐ ᐃᔖᔮᓐ ᒋᐙᐸᒥᓇᑰᒃ, ᑮᔥᐱᓐ ᑲᔦ ᐙᐸᒥᓯᓄᐎᓇᑰᒃ, ᓂᑲᓅᑖᓐ ᐁᔑᐊᔮᔦᒃ, ᑫᔮᐱ ᐁᓲᑭᑳᐸᐎᔦᒃ ᐯᔑᑾᓐ ᐃᑯ ᒫᒪᐤ ᐁᐃᓀᑕᒣᒃ, ᐯᔑᑾᓐ ᐁᑕ ᑭᓇᑕᐌᑕᒧᐎᓂᐙᕽ ᐁᓂᑯᒃ ᒋᒫᒪᐎᐐᒋᐃᑎᔦᒃ, ᐁᑲᑴᒫᒑᑑᔦᒃ ᐃᐃ ᑌᐺᐎᓐ ᑳᐃᔑᑌᐺᑕᒪᕽ ᐃᐌ ᑳᐃᔑᓅᑕᒪᕽ ᒥᓍᒋᒧᐎᓂᕽ᙮

ᑫᑯ ᑯᓵᑫᒀᓂᒃ ᐃᑭᐌᓂᐗᒃ ᑫᓇᑳᔥᑲᐎᓀᒀ᙮ ᑕᐅᒋᑭᑫᑕᒨᒃ ᐐᓇᐙ ᐁᐐᓂᔑᐗᓈᑎᓯᐙᒡ, ᑮᓇᐙ ᑕᔥ ᒋᐱᒫᒋᐃᑰᐎᓯᔦᒃ᙮ ᑭᔐᒪᓂᑑ ᐋᓃᔥ ᐊᐊᐌ ᑳᐐᒋᐃᓀᒃ᙮

ᑭᑮᒦᓂᑰᐎᓯᒻ ᒋᐸᒦᑕᐌᒃ ᐊᐌ X᙮ ᑳᐐᓐ ᐁᑕ ᐁᑌᐺᑕᐌᒃ, ᐃᐃᐌᔥ ᑲᔦ ᒋᐅᒋᑲᒀᑕᑭᑑᔦᒃ᙮

ᑲᔦ ᑮᓇᐙ ᒋᐐᒋᐃᐌᔦᒃ ᐃᐃᒫ ᒦᑳᑎᐎᓂᕽ, ᐃᐃᐌ ᓃᓐ ᐅᑖᓈᕽ ᑳᑮᐃᔑᐙᐸᒥᔦᒃ ᑲᔦ ᓴ ᑯ ᓅᑯᒻ ᐁᔑᓅᑕᒣᒃ ᐁᑕᔑᒦᑳᓱᔮᓐ᙮

ᑮᔥᐱᓐ ᑌᐺ ᐅᒋᒪᔥᑲᐎᓰᐌᑴᓐ ᐁᐐᒌᐎᓀᒃ ᐊᐊ X, ᑮᔥᐱᓐ ᑲᔦ ᐅᒋᓲᑭᑌᐁᔦᒃ ᐅᒋ ᐃᐌᓂ ᐅᓵᑭᐃᐌᐎᓂᕽ, ᑮᔥᐱᓐ ᑲᔦ ᒣᓄᐐᒌᐙᐌᑴᓐ ᐃᓂ ᑭᔐᒪᓂᑑ ᐅᑕᒑᑾᓐ, ᑮᔥᐱᓐ ᑲᔦ ᐅᒋᔕᐌᓂᑎᔦᒃ ᑲᔦ ᑕᔥ ᒋᐅᒋᑭᑎᒫᑫᓂᑎᔦᒃ,

ᑮᔥᐱᓐ ᐅᓄᐌᓂᐗᓐ ᑌᐺ ᐁᔑᐊᔮᐌᑴᓐ, ᒦ ᐅᐌ ᑭᑎᔑᑲᓅᓂᓂᓂᒻ ᐐᑫ ᒋᑲᑴᒨᒋᑫᑕᒥᐃᔦᒃ, ᒪᔮ ᐯᔑᑾᓐ ᒋᐃᓀᑕᒣᒃ ᑲᔦ ᐯᔑᑾᓐ ᒋᐊᐲᒋᓵᑭᐃᑎᔦᒃ ᑲᔦ ᐐᑫ ᒋᐯᔑᑴᐙᓇᑫᑕᒣᒃ, ᐐᑫ ᒋᐐᒋ ᐃᓀᑕᒨᑎᔦᒃ᙮

ᑫᑯ ᑲᔦ ᑫᑰᓐ ᐃᔑᒋᑫᑫᒃ ᒋᑲᑴᓃᑳᓀᑖᑯᐃᑎᓱᔦᒃ, ᓇᐗᒡ ᐃᐌ ᑲᑴᑕᐸᓭᓂᒧᑖᑎᒃ, ᒨᔕᒃ ᐃᑕᔥ ᑮᓐ ᓇᐗᒡ ᑭᑭᑕᑭᔅ ᐃᔑᓈᑎᒃ᙮

ᑳᐐᓐ ᐊᐎᔭ ᐐᓐ ᐃᑯ ᑎᐱᓇᐌ ᐁᑕ ᑖᑲᑴᒥᓄᓴᐃᑎᓱᓰ, ᑲᑭᓇᔥ ᐃᑯ ᒋᑲᑴᓈᓈᑲᑕᐌᓂᑎᔦᒃ᙮

X ᒋᓴᔅ ᑳᑮᐃᓈᑎᓯᒡ ᑭᑖᑲᑴᐃᓈᑎᓯᒻ ᑫᑮᓇᐙ:

ᐋᓇᐐᓐ ᑭᔐᒪᓂᑑᕽ ᐁᑮᐱ ᐃᓈᑎᓯᒡ, ᑳᐐᓐ ᐃᑕᔥ ᑮᐃᓀᑕᓰ ᒋᒪᔥᑲᐎᑲᓇᐌᑕᕽ ᐃᐌ ᑳᐃᔑᑭᔐᒪᓂᑑᐌᑖᑯᓯᒡ᙮

ᐐᓐ ᐃᑕᔥ ᐃᑯ ᒣᔥᑾᒡ ᑮᐃᓀᓂᑎᓱ ᑲᑭᓇ ᒋᐸᑭᑎᓇᕽ, ᑲᔦ ᐅᑮᐅᑖᐱᓈᓐ ᐊᓄᑮᐋᑲᓂᕽ ᒋᐃᔑᐱᒫᑎᓯᒡ᙮ ᐃᓂᓃᕽ ᐃᑕᔥ ᐃᑯ ᑮᐃᔑᓂᑖᐎᑭ ᑲᔦ ᐃᓂᓃᕽ ᑮᐃᔑᓈᑯᐋᑲᓂᐎ᙮

ᑮᑕᐸᓭᑖᑯᐃᑎᓱ, ᑮᑲᐯᓇᓈᐃᑕᒻ, ᐲᓂᔥ ᐃᑯ ᒋᓂᐳᒡ, ᐁᑮᑕᔑᓀᒡ ᐋᔑᑌᔮᑎᑯᕽ᙮

ᒦᓴ ᑕᔥ ᐅᑮᐅᒋᑭᑌᑖᑯᐃᑰᓐ ᐃᓂ ᑭᔐᒪᓂᑑᓐ, ᒫᐗᒡ ᐃᔥᐱᒥᕽ ᒋᓃᑳᓇᑭᓱᒡ᙮ ᑲᔦ ᐅᑮᒦᓂᑰᓐ ᒫᐗᒡ ᐁᑭᑕᑭᑌᓂᒃ ᒥᓄᐐᓱᐎᓐ ᑳᑕᓯᑭᓐ ᐐᓱᐎᓇᓐ᙮

ᒦᓴ ᑕᔥ ᐊᐌ ᒋᓴᔅ ᐅᐐᓱᐎᓐ ᐐᒋᑳᑌᓂᒃ, ᑲᑭᓇ ᐊᐎᔭ ᑕᐅᒋᒌᑾᓃᑖᐗᒃ ᑭᒋᑮᔑᑯᕽ ᑳᐊᔮᐙᒡ, ᑲᔦ ᑕᔥ ᐊᑮᕽ ᑲᔦ ᐊᓈᒪᑲᒥᒃ ᑳᐊᔮᐙᒡ,

ᑲᔦ ᑲᑭᓇ ᐁᑕᓱᐯᔑᑯᒡ ᐅᑲᑎᐹᒋᒫᐙᓐ ᒋᓴᔅ Xᑕᓐ ᐁᑎᐯᒋᑫᓂᒡ, ᒦ ᐃᐌ ᑭᔐᒪᓂᑑ ᐌᔫᓯᒥᓐᒡ ᒋᐅᒋᑭᑌᓂᒥᓐᒡ᙮

ᒦᓴ ᐃᐌ ᓯᔮᑭᐃᓇᑰᒃ, ᐃᐃᐌ ᐁᑮᐃᔑᐱᓯᑕᐎᔦᒃ ᑮᐐᒋᔭᔮᒥᓇᑰᒃ, ᐊᐗᔑᒣ ᓅᑯᒻ ᐁᐐᒋᐊᔮᒥᓯᓄᐎᓇᑰᒃ ᐊᑕᐌᑖᑾᓐ ᒋᑑᑕᒣᒃ ᐃᐃ ᑳᐃᓂᓇᑰᒃ᙮ ᑯᑖᓀᑕᒧᐎᓂᕽ, ᓂᓂᑭᔥᑳᐎᓂᕽ ᐃᔑᑲᐯᐊᓄᑳᑕᒫᓱᒃ ᑭᐱᒫᒋᐃᑰᐎᓂᐙ ᐲᓂᔑᑯ ᒋᑮᔑᓈᑾᒃ᙮

ᐋᓃᔥ ᑭᔐᒪᓂᑑ ᐊᐌ ᑳᐃᓇᓄᑮᒡ ᐃᐃᒫ ᑭᐱᒫᑎᓯᐎᓂᐙᕽ᙮ ᑭᑭᑭᔥᑲᒧᐃᑯᐙ ᒋᐃᓀᑕᒣᒃ ᑲᔦ ᒋᑑᑕᒣᒃ ᐅᑎᔑᐊᑕᐌᑕᒧᐎᓐ᙮

ᑲᑭᓇ ᑫᑰᓐ ᑲᑴᑑᑕᒧᒃ ᐁᑳ ᐐᑳ ᑫᑰᓐ ᒋᑕᔑᑕᓯᐌᒃ, ᑲᔦ ᐐᑳ ᒋᐋᔮᓅᑎᓯᐌᒃ᙮

ᒦ ᐃ ᑭᔐᒪᓂᑑ ᐅᓃᒑᓂᓴᐞ ᒋᑎᓄᐎᔦᒃ, ᐁᑳ ᑫᑰᓐ ᒋᐃᔑᐊᔮᓯᐌᒃ ᑲᔦ ᒋᐯᑭᓈᑯᓯᔦᒃ, ᑲᔦ ᐁᑳ ᑫᑰᓐ ᒋᑕᔑᒥᑰᓯᐌᒃ᙮ ᐃᐃᒫ ᒣᑴᐊᔭᐄ ᑭᑕᔨᑖᒻ ᐁᐊᔮᐙᒡ ᐃᑭ ᑳᑾᔭᑯᒋᑫᓯᒀ ᑲᔦ ᐊᓅᒡ ᑳᐃᓈᑎᓯᐙᒡ᙮ ᑭᑲᑕᔑᓵᑳᑌᓯᒻ ᑖᐱᔥᑰ ᐗᓇᑯᔕᒃ ᐁᐃᔑᐙᓵᔐᐙᒡ ᑮᔑᑯᕽ,

ᑲᔦ ᐁᓃᒥᓇᒪᐌᒀ ᐃᐃ ᑎᐹᒋᒧᐎᓐ ᑫᐅᒋᐱᒫᑎᓯᐙᒡ᙮ ᑮᔥᐱᓐ ᑌᐺ ᐅᐅᐌ ᐃᔑᒋᑫᔦᒃ ᑭᑲᐅᒋᐙᐎᔐᓂᒥᓂᓂᒻ ᐊᐲ ᐅᑮᔑᑳᒥᒡ X᙮ ᑕᐃᔑᑭᑫᑖᑾᓐ ᐃ ᐊᐲ ᐁᑳ ᐊᓂᔖ ᐁᑮᐱᒪᓄᑮᓯᐙᓐ ᑲᔦ ᐊᓂᔖ ᐁᑮᐅᒋᒑᑮᐃᑎᓱᓯᐙᓐ᙮

ᒫᑭᔖ ᓂᑲᐃᔑᓂᑉ ᑖᐱᔥᑰ ᐁᐸᑭᑎᓈᔂᓂᐎᔮᓐ, ᓂᐱᒫᑎᓯᐎᓐ ᒋᓰᑭᓂᑳᑌᒃ ᐗᑭᒡ ᐃᐃᒫ ᑮᓇᐙ ᐁᔑᐸᑭᑎᓂᑫᔦᒃ, ᐋᓃᔥ ᑭᑌᐺᑕᒧᐎᓂᐙ ᑳᒦᓀᒃ ᑭᔐᒪᓂᑑ ᐁᐊᓇᒥᐁᑕᐌᒃ᙮ ᑮᔥᐱᓐ ᐃᐃᐌ ᐃᔑᓭᒃ ᓂᑲᒥᓉᑕᒻ, ᑲᔦ ᑮᓇᐙ ᑲᑭᓇ ᒋᐐᒋᐃᐌᔦᒃ ᓂᒌᑫᑕᒧᐎᓂᕽ,

ᒦ ᐃ ᐯᔑᑾᓐ ᑲᔦ ᑮᓇᐙ ᑭᑖᒌᑫᑖᒻ, ᑲᔦ ᓃᓐ ᒋᐐᒋᒨᒋᑫᑕᒪᐎᓇᑰᒃ᙮

ᓂᐸᑯᓭᓂᒻ ᑮᔥᐱᓐ ᐃᓀᑕᕽ ᑳᑎᐯᒋᑫᒡ ᒋᐃᔑᓂᔕᐗᒃ ᐊᐊᐌ ᑎᒪᑎ ᒋᐊᐎᐅᑎᓯᓀᒃ, ᒦᑕᔥ ᒋᐅᒋᒪᔥᑲᐌᑕᒫᓐ ᓅᑕᒫᓐ ᐁᔑᐱᒫᑎᓯᔦᒃ᙮

ᐋᓃᔥ ᒦ ᐁᑕ ᐊᐌ ᑎᒪᑎ ᑫᐐᒋ ᐃᓇᒪᒋᐆᒪᒃ᙮ ᒦ ᐁᑕ ᐊᐌ ᑌᐺ ᑳᓈᑲᑕᐌᑕᒪᐎᓀᒃ ᑮᓇᐙ ᐁᔑᐌᐱᓯᔦᒃ᙮

ᑲᑭᓇ ᐋᓃᔥ ᐯᑳᓂᓯᐙᒡ ᐐᓀᑕᐙ ᑲᓇᐙᐸᑕᒫᓱᐗᒃ ᐅᑎᔑᐌᐱᓯᐎᓂᐙ᙮ ᑳᐐᓐ ᐐᓐ ᐅᐱᒣᑕᒪᐙᓯᐙᐙᓐ ᒋᓴᔅ Xᑕᓐ ᐅᑖᔨᑎᐎᓂᓂ᙮

ᑮᓇᐙ ᑕᔥ ᑭᑭᑫᓂᒫᐙ ᐅᑎᔑᒋᑫᐎᓐ ᐊᐊ ᑎᒪᑎ, ᐁᑮᓈᑯᑑᒡ ᐅᒥᓋᑭᓱᐎᓐ᙮ ᑖᐱᔥᑰ ᐅᑯᓯᓯᒫ ᐁᐐᒋᐋᒡ ᐅᑌᑌᓐ, ᑲᔦ ᐐᓐ ᓂᑮᐐᑕᓄᑮᒥᒃ ᒋᒫᒌᔥᑳᒪᑲᒃ ᐃᐃ ᒥᓍᒋᒧᐎᓐ᙮

ᒦᔥ ᐃᐃ ᐱᒌᓇᒃ ᐃᑯ ᑭᑫᑕᒫᓐ ᑫᐃᔑᐌᐱᓯᔮᓐ, ᓂᑲᐃᓀᑕᒻ ᐐᐸ ᒋᑲᑴᐃᔑᓂᔕᐗᒃ᙮

ᓂᑕᐯᓂᒧᓄᑕᐙ ᑕᔥ ᑳᑎᐯᒋᑫᒡ ᑲᔦ ᓃᓐ ᐐᐸ ᒋᐃᔑᓭᔮᓐ ᒋᐅᑎᓯᓇᑰᒃ᙮

ᓂᑮᑌᐃᔑᓈᓐ ᐃᑕᔥ ᐁᐊᑕᐌᑖᑾᒃ ᐃᐃᒫ ᒋᐃᔑᓂᔕᐗᒃ ᐊᐊᐌ ᑮᒋᐅᑌᐺᑕᒨᒥᓈᓐ ᐃᐹᐸᕒᐊᑕᐃᑕᔅ ᒋᐊᑕᐙᐸᒥᓀᒃ᙮ ᒦ ᐋᓃᔥ ᐊᐊᐌ ᑳᑮᐱᐐᑕᓄᑮᒥᒡ ᑲᔦ ᓂᐐᒋᒦᑳᓱᐎᓂᓃᒻ ᐁᐃᓀᓂᒪᒃ᙮ ᑲᔦ ᑮᓇᐙ ᑭᑮᐱᐊᓅᓈᐙ ᐁᐱ ᐃᔑᐎᑑᒡ ᑭᐐᑑᑳᑫᐎᓂᐙ ᐁᒦᔑᔦᒃ᙮

ᐋᐱᒋ ᐅᓇᑕᐌᑖᓐ ᒋᐙᐸᒥᓀᒃ᙮ ᑲᔦ ᑮᒥᑯᔥᑳᑌᑕᒻ ᐁᑭᑫᑕᕽ ᐁᑮᓅᑕᒣᒃ ᐁᐋᑯᓯᐸᓐ᙮

ᑌᐺ ᓴ ᑯ ᑮᐋᑯᓯ, ᑫᑳ ᐱᑯ ᐁᑮᐅᒋᓂᐳᒡ᙮ ᐅᑮᑭᑎᒫᑭᓈᑰᓐ ᐃᑕᔥ ᑭᔐᒪᓂᑑᓐ᙮ ᑳᐐᓐ ᑕᔥ ᐐᓀᑕ, ᑲᔦ ᓃᓐ ᐃᑕᔥ ᓂᑮᑭᑎᒫᑭᓈᑰ, ᐁᑳ ᒋᐊᔮᑸᑕᐙᓯᓄᑭᓐ ᓂᐲᑴᑕᒧᐎᓇᓐ᙮

ᒦᓴ ᐅᐌ ᓇᐗᒡ ᐃᑯ ᓂᑮᐸᐹᔐᑖᓐ ᒋᐃᔑᓂᔕᐗᒃ, ᑫᑮᓇᐙ ᒋᒥᓉᑕᒣᒃ ᒦᓇᐙ ᑮᐙᐸᒣᒃ᙮ ᔑᑾ ᑫᓃᓐ ᒋᐅᒋᒫᒑᒪᑲᒃ ᓂᒥᑯᔥᑳᑌᑕᒧᐎᓐ᙮

ᒦᑕᔥ ᐊᐊᐌ ᐅᑖᐱᓂᒃ ᑭᑭᒌᑫᑕᒧᐎᓂᕽ, ᒥᒋᑲᑭᓇ ᑳᑎᐯᒋᑫᒡ ᐁᔑᐐᒌᐎᓀᒃ᙮ ᑲᔦ ᑭᑕᑭᒥᒃ ᑲᑭᓇ ᐊᐎᔭ ᐊᐌ ᑳᑎᓄᐎᒡ᙮

ᐐᓐ ᐋᓃᔥ ᒫᓄ ᑯ ᐃᑕᐙᒡ ᐅᑮᐸᑭᑎᓈᓐ ᐅᐱᒫᑎᓯᐎᓐ, ᐲᓂᔥ ᐁᑮᐅᒋᐯᔡᒋᐃᑯᒡ ᓂᐳᐎᓐ, ᓇᐗᒡ ᐐᓐ Xᑕᓐ ᐁᐐᐊᓄᑮᑕᐙᒡ᙮ ᒦ ᐅᐌ ᑳᐃᔑᒋᑫᒡ ᐁᑮᓈᐱᑑᑕᕽ ᑮᓇᐙ ᑯ ᑫᑮᐃᔑᐐᒋᐃᔦᑭᐸᓐ ᐁᑮᑲᔥᑭᑑᓯᐌᒃ᙮

ᐅᐌ ᑕᔥ ᐃᔥᒀᒡ ᑭᑎᔑᐐᑕᒪᐎᓂᓂᒻ, ᓃᒋᐅᑌᐺᑕᒨᒃ: ᐅᒋᒌᑫᑕᒧᒃ ᐃᐌ ᐁᔑᐐᒌᐌᒃ ᑳᑎᐯᒋᑫᒡ᙮ ᑳᐐᓐ ᐃᑯᑕᓄ ᓂᑎᓀᑕᓰᓐ ᒦᓇᐙ ᐯᔑᑾᓐ ᒋᐐᑕᒫᓐ ᐃᐃᐌ ᐅᑖᓈᕽ ᑳᑮᐃᔑᐲᐊᒪᐎᓇᑰᒃ, ᓇᐗᒡ ᐃᐃᒫ ᒋᐃᔑᑲᓇᐌᑖᑯᓯᔦᒃ᙮

ᓇᐋᓰᑲᑕᐎᑯᒃ ᐃᑭ ᑳᑑᑕᒧᐙᒡ ᐁᑳ ᑳᑾᔭᑾᓯᓂᓂᒃ, ᐃᑭ ᐊᓂᒧᔑᕽ ᑳᐃᓀᑖᑯᓯᐙᒡ᙮ ᓇᐋᓰᑲᑕᐎᑯᒃ ᐃᑭ ᑳᐐᐯᔑᔕᒧᐙᒡ ᐐᔭᐎᐙᓐ᙮

ᑮᓇᐎᓐᑦ ᐅᔕ ᑭᑖᐎᒥᓐ ᑳᒦᓂᑰᐎᓯᔭᕽ ᑾᔭᒃ ᑭᑭᓇᐙᑕᔕᑫᔓᑰᐎᓂᕽ ᑳᐃᓀᑖᑾᒃ᙮ ᐋᓃᔥ ᑮᓇᐎᓐᑦ ᑭᑎᔑᐊᓇᒥᐁᑕᐙᓈᓐ ᑭᔐᒪᓂᑑ ᐁᐃᔑᑲᔥᑭᑑᐃᒥᓇᕽ ᐅᑕᒑᑾᓐ᙮ ᔑᑾ ᑭᑑᒋᒨᒋᑫᑖᒥᓐ ᐃᐌ ᐁᐐᒌᐎᓇᕽ X ᒋᓴᔅ᙮ ᑳᐐᓐ ᑲᓇᑫ ᑭᑕᐯᓂᒧᓄᑕᓰᒥᓐ ᑫᑰᓐ ᐗᑭᒋᓇᐤ ᐁᑕ ᐁᑑᒋᑳᑌᒃ᙮

ᑫᓃᓐ ᓴ ᑯ ᓂᑖᑲᔥᑭᑑᓈᐸᓐ ᐃᐃᒫ ᒋᐊᐯᓂᒧᔮᓐ ᐃᔑᑣᐎᓂᕽ ᐗᑭᒋᓇᐤ ᑳᑑᒋᑳᑌᒃ᙮ ᑮᔥᐱᓐ ᐊᐎᔭ ᐃᓀᑕᕽ ᐁᑲᔥᑭᑑᒡ ᒋᐃᔑᐊᐯᓂᒧᓄᑕᕽ ᐃᐃ ᐗᑭᒋᓇᐤ ᑳᑑᒋᑳᑌᒃ, ᓇᐗᒡ ᓃᓐ ᐃᑯ ᓂᑖᑌᐃᓇᑭᔅ᙮

ᑲᔦ ᓃᓐ ᓂᑮᑭᑭᓇᐙᑕᔕᑫᔓᑰ ᑮᓂᔣᓱᑮᔑᑲᒃ 8 ᐊᐸᓀ ᐁᑮᓂᑖᐎᑭᔮᓐ᙮ ᑲᔦ ᓃᓐ ᐃᐃᒫ ᐃᔅᕒᐃᔭᓬ ᐃᓂᓃᓈᕽ ᓂᑮᐅᒌ, ᑲᔦ ᐃᐃᒫ ᑕᓶᐙᓇᑭᓯᐎᓂᕽ ᐯᒋᒪᓐ ᐁᐅᑕᑳᓀᓯᔮᓐ᙮ ᓂᒥᓯᐌᔅ ᐄᐸᕒᐆ ᐁᑎᓄᐎᔮᓐ᙮ ᑲᔦ ᑕᔥ ᓂᑮᐯᕒᐊᓰᐎᓂᓃᐤ ᑳᑮᐃᔑᑲᓇᐌᑕᒫᓐ ᒎᐗᒃ ᐅᑎᓈᑯᓂᑫᐎᓂᐙ᙮

ᐐᑫ ᓂᑮᐃᔑᐅᓵᒣᑖᓐ ᓂᑕᓇᒥᐋᐎᓐ ᐁᑮᐅᒋᑲᒀᑕᑭᐃᒪᒃ X ᐅᑕᓇᒥᐋᑲᓇᐞ᙮ ᔑᑾ ᒥᓂᒃ ᐁᔑᑲᔥᑭᑑᒡ ᐊᐎᔭ ᐁᑲᓇᐌᑕᕽ ᐃᐃ ᐃᓈᑯᓂᑫᐎᓐ, ᐗᐐᑫ ᐃᒫ ᓂᑮᑾᔭᑯᑑᑕᒻ᙮

ᐅᓄ ᑕᔥ ᑲᑭᓇ ᐅᑎᓯᐎᓐ ᑫᑮᐃᓇᑭᑕᒫᐹᓐ, ᓅᑯᒻ ᓂᑎᔑᓈᓇᓐ ᐁᑮᐗᓂᒋᑫᔮᓐ, ᓇᐗᒡ X ᐁᐐᑭᑫᓂᒪᒃ᙮

ᑳᐐᓐ ᐃᓂᐌᓂᐗᓐ ᐁᑕ ᓂᑎᔑᓇᓰᓇᓐ, ᑲᑭᓇ ᑫᑰᓐ ᐋᓇᑑᑕᒫᓐ ᓂᑎᔑᓈᓐ ᒥᓯᐌ ᐁᑮᐗᓂᒋᑫᔮᓐ, ᓇᐗᒡ ᐃᑯ ᐁᐐᐊᔮᔮᓐ ᑫᑰᓐ ᒫᐗᒡ ᑳᐅᓂᔑᔑᕽ, ᒦ ᐃᐌ ᒋᑭᑫᓂᒪᒃ X ᒋᓴᔅ ᑳᑎᐯᓂᒥᒡ᙮ ᐐᓐ ᐁᐐᐊᔮᐗᒃ ᓂᑮᐅᒋᐌᐱᓈᓐ ᑲᑭᓇ᙮ ᒋᒥᒋᐌᐱᓂᑳᑌᒃ ᐁᑕ ᓂᑎᓇᑭᑖᓐ ᑲᑭᓇ, ᓇᐗᒡ ᐁᐐᐅᑎᓇᒃ ᐊᐊ X᙮

ᒥᓯᐌ ᐯᔑᑾᓐ ᓂᐐᐃᔑᑕᑯᐐᒌᐙ᙮ ᑳᐐᓐ ᑫᔮᐱ ᓃᓐ ᓂᑑᔑᑕᒫᓱᓰ ᓂᑾᔭᒀᑎᓯᐎᓐ, ᐃᐌ ᑎᓄ ᑳᐅᒌᒪᑲᒃ ᐃᓈᑯᓂᑫᐎᓐ ᐁᑲᓇᐌᒋᑳᑌᒃ ᑳᐐᓐ ᓂᑕᔮᓰᓐ᙮ ᓅᑯᒻ ᐃᑕᔥ ᓂᑕᔮᓐ ᐃᐃ ᑾᔭᒀᑎᓯᐎᓐ ᐃᐃᒫ ᓴ ᐁᐅᒌᒪᑲᒃ ᐁᑌᐺᑕᐎᓐᒡ ᐊᐊ X᙮ ᒦ ᐃᐌ ᑾᔭᒀᑎᓯᐎᓐ ᑭᔐᒪᓂᑑ ᑳᒦᔑᒡ ᑳᑌᐺᑕᒧᐗᒃ᙮

ᐅᐅᐌ ᓴ ᐁᑕ ᓂᓇᑕᐌᑖᓐ, ᐐᓐ X ᒋᑭᑫᓂᒪᒃ ᑲᔦ ᒋᐱᑭᑫᑕᒪᐗᒃ ᐃᐌ ᒪᔥᑲᐎᓰᐎᓐ ᐃᐃᒫ ᐌᒌᒪᑲᒃ ᐅᑮᐌᐱᒫᑎᓯᐎᓂᕽ᙮ ᑲᔦ ᓂᐐᐐᒋᐃᐌ ᐅᑯᑕᑭᑑᐎᓂᕽ X, ᓂᐐᓈᐹᑎᓰᒫ ᑳᐃᓈᑎᓯᒡ ᐅᓂᐳᐎᓂᕽ,

ᐅᐅᐌ ᐁᐃᓀᑕᒫᓐ ᐋᓃᓂᑯ ᑲᔦ ᓃᓐ ᒋᐃᔑᐅᑎᑕᒫᓐ ᒋᐅᒋᐗᓂᔥᑳᓂᑰᔮᓐ ᓂᐳᐎᓂᕽ ᒋᑮᐌᐱᒫᑎᓯᔮᓐ᙮

ᑳᐐᓐ ᐃᐌ ᓂᑖᐃᑭᑐᓰ ᐋᔕ ᒋᑲᔥᑭᑑᔮᓐ, ᑳᐐᓐ ᑲᔦ ᐁᑮᔑᐃᑰᐎᓯᔮᓐ᙮ ᐁᓂᑯᒃ ᐃᑕᔥ ᓂᑕᓂᑲᑴᑳᒋᑎᓇᒫᔅ ᐃᐃᐌ ᑳᑮᐐᒦᔑᒡ ᑳᑮᐅᒋᑳᒋᑎᓂᒡ X ᒋᓴᔅ᙮

ᓃᒋᐅᑌᐺᑕᒧᐎᑐᒃ! ᑳᐐᓐ ᐋᔕ ᓂᑎᓀᑕᓰᓐ ᐁᑳᒋᑎᓇᒫᓱᔮᓐ᙮ ᐯᔑᒃ ᐃᑕᔥ ᑫᑰᓐ ᓂᑑᑕᒻ: ᓂᐐᑲᑴᓇᑲᑖᓇᓐ ᐅᑖᓈᕽ ᑳᐊᔮᑭᓐ ᒋᒫᒥᑲᐎᓯᐙᓐ, ᓃᑳᓇᔭᐄ ᑲᐊᔮᒪᑲᑭᓐ ᓂᑲᑴᑳᒋᑎᓈᓇᓐ᙮

ᑾᔭᒃ ᐃᑯ ᐊᐸᓀ ᓂᑕᐸᑑ ᒋᐅᒋᒋᐸᑑᔮᓐ ᐌᑎ ᑳᐃᔑᑭᑭᓇᐙᓯᓈᑾᒃ ᐸᑭᓈᑫᐎᓐ, ᒦ ᐃᒫ ᒋᑕᔑᒦᓂᑰᔮᓐ ᓂᑎᐸᐊᒫᑰᐎᓐ, ᒦ ᐃᐌ ᐃᔥᐱᒥᕽ ᒋᑕᓈᑎᓯᔮᓐ, ᒦ ᐃᐌ ᑳᐃᔑᐊᑐᒥᒡ ᑭᔐᒪᓂᑑ ᒋᓴᔅ Xᐃᕽ᙮

ᑕᓯᓐ ᐃᑯ ᑮᓇᐎᓐᑦ ᑳᑮᔑᐊᓇᒥᐁᐙᑎᓯᔭᕽ ᐯᔑᑾᓐ ᐅᐅᐌ ᑲᑴᐃᓀᑕᑖ᙮ ᑮᔥᐱᓐ ᐃᑕᔥ ᐸᑳᓐ ᐃᓀᑕᒧᐎᓐ ᐊᔮᐌᑴᓐ ᐋᓂᑕ, ᒦ ᐃᐌ ᑭᑲᐙᐸᑕᐃᑯᐙ ᑭᔐᒪᓂᑑ᙮

ᒫᓄ ᑕᔥ ᑫᔮᐱ ᒋᐊᓂ ᐃᔑᒫᒑᔭᕽ ᐯᔑᑾᓐ ᐃᐃᐌ ᐋᔕ ᑳᐱ ᐃᔑᐅᑎᑕᒪᕽ᙮

ᓂᐐᒋᐅᑌᐺᑕᒨᒃ! ᓈᓈᐱᓇᐎᔑᒃ ᑳᐃᔑᒋᑫᔮᓐ, ᑲᓇᐙᐸᒥᑯᒃ ᐃᑭᐌᓂᐗᒃ ᑳᐃᓈᑎᓯᐙᒡ ᓃᓇᐎᓐᑦ ᑳᑮᐃᔑᒋᑫᔮᕽ, ᐁᑮᑭᑭᓇᐙᐸᑕᐃᑰᔦᒃ᙮

ᐃᐌ ᑕᔥ ᓃᐱᐗᐋᕽ ᐋᔕ ᑳᑮᐐᑕᒪᐎᓇᑰᒃ, ᓅᑯᒻ ᒦᓇᐙ ᑭᐐᑕᒪᐎᓂᓂᒻ, ᑲᔦ ᓂᐐᓴᑲᐅᑯᓐ ᐁᐐᑕᒪᐎᓇᑰᒃ ᐅᐅᐌ: ᓃᐱᐗᐞ ᐃᔑᐱᒫᑎᓯᐗᒃ ᐁᐐᓈᐸᑫᑕᓯᒀ Xᑕᓐ ᐅᑕᔑᓂᐳᐎᓂᓂ ᐋᔑᑌᔮᑎᑯᕽ᙮

ᐱᒌᓇᒃ ᑕᐹᑲᒋᐊᔮᐗᒃ ᓂᔑᐗᓈᑎᓯᐎᓂᕽ᙮ ᐋᓃᔥ ᐅᒪᓂᑑᒥᐗᒃ ᐐᔭᐎᐙᓐ ᑳᐃᔑᐊᑕᐌᑕᒨᒪᑲᓂᓂᑭᓐ᙮ ᐃᐃᐌ ᑫᑮᒣᓂᔐᑕᒧᐙᐸᓐ ᓇᐗᒡ ᐃᑕᔥ ᐅᐙᐎᔐᑖᓈᐙ, ᐊᑮᐗᔭᐄᓐ ᐁᑕ ᐁᐸᐹᒣᑕᒧᐙᒡ᙮

ᑮᓇᐎᓐᑦ ᐃᑕᔥ ᐃᒫ ᑭᒋᑮᔑᑯᕽ ᑭᑑᒋᑎᐯᑖᑯᓯᒥᓐ᙮ ᑭᑖᑯᐲᐋᓈᓐ ᑭᑑᐱᒫᒋᐃᐌᒥᓈᓐ ᐃᐃᒫ ᒋᐅᒋᑕᑯᔑᕽ, ᒦᐊᐌ ᑳᑎᐯᒋᑫᒡ ᒋᓴᔅ X᙮

ᐐᓐ ᑭᑲᐋᒌᑕᒫᑯᓈᓐ ᑭᐐᔭᐎᓈᓂᓐ ᑳᒪᒉᑖᑾᓂᓂᑭᓐ᙮ ᐅᑲᐅᔑᑑᓇᓐ ᐐᓐ ᐁᑭᑌᑖᑾᓂᓂᒃ ᐐᔭᐤ ᒋᐃᔑᓈᑾᓂᓂᑭᓐ᙮ ᐅᒪᔥᑲᐎᓰᐎᓐ ᐅᑲᐋᐸᒋᑑᓐ ᐃᐃᐌ ᐁᐅᒋᑲᔥᑭᑑᒡ ᑲᑭᓇ ᑫᑰᓐ ᐁᑎᐯᑕᕽ᙮

ᓂᐐᒋᐅᑌᐺᑕᒨᒃ! ᑮᓇᐙ ᑳᓵᑭᐃᓇᑰᒃ, ᐋᐱᒋ ᑭᓇᑕᐌᓂᒥᓂᓂᒻ, ᐋᐱᒋ ᑭᒥᓉᑕᒥᐃᒻ, ᐋᐱᒋ ᑭᐙᐎᔐᓂᒥᓂᓂᒻ᙮ ᓯᔮᑭᐃᓇᑰᒃ, ᒦ ᐅᐌ ᐃᔑᓲᑭᑳᐸᐎᒃ ᐃᐃᐌ ᑳᐱ ᐃᓂᓇᑰᒃ ᒋᐊᓂ ᐃᔑᐐᒌᐌᒃ ᑳᑎᐯᒋᑫᒡ᙮

ᔑᑾ ᑮᓐ ᔪᐆᑎᔭ, ᑲᔦ ᑮᓐ ᓯᑎᑭ, ᑭᑲᑳᓱᒥᑰᒻ: ᑲᑴᐯᔑᑴᑕᒧᒃ, ᒦ ᐃ ᐃᔑᐐᒌᐎᒃ ᑳᑎᐯᒋᑫᒡ᙮

ᑲᔦ ᑮᓐ ᓂᐐᑕᓄᑮᒫᑲᓐ, ᑳᑾᔭᑴᑖᑯᓯᔭᓐ, ᐐᒋᐞ ᐅᑯ ᐃᑴᐗᒃ᙮ ᐁᓂᑯᒃ ᓂᑮᐐᑕᓄᑮᒥᑰᒃ ᒋᒫᒌᔥᑳᓂᒃ ᐃᐃ ᒥᓍᒋᒧᐎᓐ᙮ ᑲᔦ ᐅᑮᐐᑕᓄᑮᒫᐙᓐ ᐃᓂ ᑲᓬᐁᒪᑕᓐ ᑲᔦ ᐃᓂ ᑯᑕᒃ ᓂᐐᑕᓄᑮᒫᑲᓇᐞ, ᐃᓂᐌᓂᐗᐞ ᐅᐐᓱᐎᓂᓂ ᑳᐊᔮᓂᑭᓐ ᐃᐃᒫ ᐅᒪᓯᓇᐃᑲᓂᕽ ᑭᔐᒪᓂᑑ ᑳᐃᔑᐅᔑᐲᐙᒡ ᐊᐌᓀᓇᐞ ᑳᑮᒦᓈᒡ ᐱᒫᑎᓯᐎᓐ᙮

ᒨᔕᒃ ᒌᑫᑕᒧᒃ ᐁᐐᒌᐌᒃ ᑳᑎᐯᒋᑫᒡ᙮ ᒦᓇᐙ ᓂᑎᑭᑦ: ᒌᑫᑕᒧᒃ!

ᒥᓯᐌ ᓅᑳᑎᓯᒃ ᑲᑭᓇ ᐊᐎᔭ ᒋᑭᑫᓂᒥᓀᒀ᙮ ᐯᔓᓈᑾᓂᓂ ᒋᑕᑯᔑᕽ ᑳᑎᐯᒋᑫᒡ᙮

ᑫᑯ ᑫᑰᓐ ᑭᑖᐗᓈᔦᑕᒥᐃᑯᓰᒻ᙮ ᐊᓇᒥᐋᒃ ᐃᑕᔥ, ᑲᑴᒋᒥᒃ ᑭᔐᒪᓂᑑ ᐌᑯᓀᓐ ᐃᑯ ᑳᐃᔑᓅᑌᓭᔦᒃ ᐯᑭᔥ ᑲᔦ ᒋᒦᑴᒋᐌᑕᒣᒃ᙮

ᑭᑲᐅᑎᓯᑯᒻ ᐅᐱᓵᓀᑕᒧᐃᐌᐎᓐ ᑭᔐᒪᓂᑑ, ᐗᐐᑫ ᑳᐸᑭᓈᑫᒪᑲᓂᓂᒃ ᐁᔑᐊᔮᒃ ᑭᑭᑫᑕᒧᐎᓂᓈᓐ᙮ ᑭᑲᔑᑲᓇᐌᑕᒫᑯᒻ ᑭᑌᐃᐙᕽ ᑲᔦ ᑭᓈᑲᑕᐌᒋᑲᓂᐙᕽ, ᐁᑳ ᑫᑰᓐ ᐃᐃᒫ ᒋᐃᔑᓭᓯᐌᒃ ᐁᐐᒌᐌᒃ X ᒋᓴᔅ᙮

ᒦᓇᐙ ᐃᔥᒀᒡ, ᓂᐐᒋᐅᑌᐺᑕᒨᒪᒃ, ᓈᓈᑲᑕᐌᑕᒧᒃ ᐅᓄ ᑳᑎᓄᐎᐗᑭᓐ, ᐌᑯᓀᓂᑯ ᑳᑌᐺᐗᑫᑖᑾᒃ, ᔑᑾ ᑳᑭᑌᑖᑾᒃ, ᐌᑯᓀᓐ ᐃᑯ ᑳᑾᔭᑾᒃ, ᑲᔦ ᑳᐯᑫᑖᑾᒃ, ᑲᔦ ᑳᒥᓄᓈᑾᒃ, ᑲᔦ ᑳᒥᓍᑐᑌᒃ᙮ ᐌᑯᓀᓐ ᓴ ᑯ ᒥᓄᐃᔑᐌᐱᓯᐎᓐ ᑳᐃᓀᑖᑾᒃ ᑲᔦ ᑳᒥᓄᒋᑫᐗᑫᑖᑾᒃ, ᒦ ᐃᐌ ᐃᔑᓈᑲᑕᐌᑕᒧᒃ᙮

ᑲᑴᓂᑖᑑᑕᒧᒃ ᐌᑯᓀᓐ ᐃᑯ ᑳᑮᑭᑭᓄᐊᒫᑰᔦᒃ ᑲᔦ ᑳᑮᒦᓂᑰᔦᒃ, ᑫᒫ ᑳᑮᐱᓯᑕᐎᔦᒃ ᑫᒫ ᑲᔦ ᑳᑮᐃᔑᐙᐸᒥᔦᒃ ᓃᓐ ᐁᑑᑕᒫᓐ᙮ ᑭᑲᐃᔑᐐᒌᐎᑯᐙ ᐊᐌ ᑭᔐᒪᓂᑑ ᐊᐌ ᑳᐱᓵᓀᑕᒧᐃᓇᕽ᙮

ᓃᓐ ᐃᑕᔥ ᐁᐐᒌᐗᒃ ᑳᑎᐯᒋᑫᒡ, ᓂᒌᑫᑕᒧᐃᑯᓐ ᓅᑯᒻ ᒦᓇᐙ ᐁᐱᒥᓄᑑᑕᐎᔦᒃ, ᐋᔕ ᑭᓉᔥ ᐁᑮᓀᐱᒋ ᐃᔑᓭᓯᓄᒃ ᒋᑑᑕᐎᔦᒃ᙮ ᐋᓇᐐᓐ ᑳᐐᓐ ᐐᑳ ᑭᑮᐴᓂᒫᒥᑐᓀᓂᒥᓰᒻ, ᑳᐐᔥ ᓇᓈᔥ ᑮᐃᔑᓭᓯᓅᓐ ᓂᑎᑭᑦ᙮

ᑳᐐᓐ ᐃᓴ ᓅᑌᓭᐎᓐ ᓂᑑᒋ ᐃᑭᑐᓰ, ᐋᓃᔥ ᓂᑮᑭᑭᓄᐊᒫᑰᐎᔅ ᒋᑌᐱᓭᐗᑫᑕᒫᓐ ᐋᓃᓂᑯ ᐁᔑᐌᐱᓯᔮᓐ᙮

ᓂᑮᐊᓂ ᐃᔑᐙᐸᑖᓐ ᐃᑯᑎᕽ ᒋᓅᑌᓭᔮᓐ, ᑲᔦ ᐃᑯᑎᕽ ᒋᐌᓅᒋᓭᔮᓐ᙮ ᑲᔦᔥ ᓂᑮᒥᑴᑖᓐ ᑫᐃᔑᓇᐁᑕᒫᓐ ᐱᑯ ᐊᐲ, ᐋᑎ ᑯ ᐊᔮᔮᓐ, ᒫᑭᔖ ᑌᐐᓯᓂᔮᓐ, ᒫᑭᔖ ᑲᔦ ᓅᑌᔅᑲᑌᔮᓐ; ᑫᒫ ᐌᓅᒋᓭᔮᓐ ᑫᒫ ᑲᔦ ᓅᑌᓭᔮᓐ, ᓂᓇᐁᑕᒻ᙮

ᑲᑭᓇ ᑫᑰᓐ ᓂᑲᔥᑭᑑᓐ ᐁᐃᔑᐃᒡ ᐊᐊ X ᑳᒪᔥᑲᐎᓰᐃᒡ᙮

ᐗᐐᑫ ᑕᔥ ᑭᑮᒥᓄᒋᑫᒻ ᐁᑮᒥᓄᐐᒋᐃᔦᒃ ᒣᒀ ᓂᑑᒑᓂᒥᓯᐎᓂᕽ᙮

ᑮᓇᐙ ᐱᓬᐃᐹᔨᕽ ᑳᐃᔑᒫᐗᒋᐃᑎᔦᒃ, ᑭᒥᓄᑭᑫᑖᒻ ᐋᓃᓐ ᑳᐃᔑᐌᐱᓯᔮᓐ ᐃᐌ ᐊᐲ ᐁᑮᐅᒋᒫᒑᔮᓐ ᒫᓯᑑᓂᔮᐗᑮᕽ, ᐌᑎ ᓂᑕᒻ ᐁᑮᒫᒌᐐᑕᒫᑫᔮᓐ ᒥᓍᒋᒧᐎᓐ᙮ ᑮᓇᐙ ᐁᑕ ᑭᑮᐐᒋᐃᒻ, ᑳᐐᓐ ᐸᑳᓐ ᐊᐎᔭ ᐅᑕᓇᒥᐋᒃ ᓂᑮᐅᒋᐐᒋᐃᑯᓰᒃ᙮ ᑮᓀᑕᐙ ᓂᑕᒻ ᑭᑮᐃᔑᐐᒋᐃᐌᒻ ᒦᓂᑰᐎᓂᕽ ᑲᔦ ᐅᒌᑕᒫᑫᐎᓂᕽ᙮

ᑲᔦ ᐊᐲ ᑳᐊᔮᔮᓐ ᑌᓴᓬᐊᓇᐃᑳᕽ, ᑳᐐᓐ ᐁᑕ ᐋᐱᑎᕽ ᑭᑮᐱ ᐃᔑᓂᔕᐊᒪᐎᓰᒻ ᑳᓅᑌᓭᔮᓐ᙮

ᑳᐐᓐ ᐐᓐ ᐃᐃ ᒋᒦᓂᑰᔮᓐ ᓂᑎᓀᑕᓰᓐ᙮ ᓇᐗᒡ ᐃᑕᔥ ᑭᓇᑕᐌᓂᒥᓂᓂᒻ ᒥᓄᑫᑰᓐ ᒋᓇᑲᑭᓱᔦᒃ᙮

ᓂᑮᑎᐱᒦᓂᑰ, ᑮᐊᐗᔑᒣᓭ ᑳᒦᔑᔦᒃ᙮ ᓂᑮᐱᐌᓅᒋᒦᓂᒃ ᐊᐌ ᐃᐹᐸᕒᐊᑕᐃᑕᔅ, ᑲᑭᓇ ᐁᑮᒦᔑᒡ ᑳᑮᐱ ᐃᔑᓂᔕᐊᒪᐎᔦᒃ᙮ ᐃᓀᑖᑾᓅᓐ ᑖᐱᔥᑰ ᐸᑭᑎᓂᑫᐎᓐ ᐁᒥᓄᒫᑾᒃ, ᑫᔑᐅᑖᐱᓇᕽ ᑭᔐᒪᓂᑑ ᑲᔦ ᑫᔑᒥᓄᓇᕽ᙮

ᔑᑾ ᑲᑭᓇ ᑮᓇᐙ ᑫᔑᓅᑌᓭᔦᒃ ᑭᑲᐅᒌᑕᒫᑯᐙ ᓂᑭᔐᒪᓂᑑᒻ, ᐃᐃᒫ ᒋᐅᒌᒪᑲᓂᓂᒃ ᐁᐅᓂᔑᔑᓂᓂᒃ ᐅᐌᓅᑎᓯᐎᓐ, ᐃᐃᒫ ᑳᐊᔮᒪᑲᓂᓂᒃ X ᒋᓴᔅ ᐁᐊᔮᒡ᙮

ᑭᑭᔐᒪᓂᑑᒥᓈᓐ ᑲᔦ ᑰᓯᓈᓐ ᑭᑌᑖᑯᓯᐎᓂᕽ ᑕᐃᓇᑭᒫ ᐱᔑᔑᒃ ᐃᑯ ᐊᐸᓀ᙮ ᐁᒣᓐ᙮

ᑲᑭᓇ ᑕᐴᔔᐋᐗᒃ ᑭᔐᒪᓂᑑ ᐅᐱᒫᑎᓰᒪᐞ ᐃᑭᐌᓂᐗᒃ X ᒋᓴᓲᓐ ᑳᑎᐯᓂᒥᑯᐙᒡ᙮ ᑲᔦ ᐅᐐᒋᑌᐺᑕᒨᒫᒃ ᐅᐅᒫ ᑳᐐᒋᐊᔮᒥᐙᒡ ᑫᐐᓇᐙ ᑭᐴᔔᐃᑯᐙᒃ᙮

ᑲᔦ ᑲᑭᓇ ᑭᔐᒪᓂᑑ ᐅᐱᒫᑎᓰᒪᐞ ᐅᐅᒫ ᑳᐊᔮᐙᒡ ᑭᐴᔔᐃᑯᐙᒃ, ᒣᒥᑕᑫ ᐃᑭᐌᓂᐗᒃ ᐃᐃᒫ ᑳᑎᐯᑖᑯᓯᐙᒡ ᒫᐗᒡ ᑭᒋᐅᑭᒫ ᐅᐙᑳᐃᑲᓂᕽ᙮

ᐅᑭᔐᐙᑎᓯᐎᓐ ᑳᑎᐯᒋᑫᒡ ᒋᓴᔅ X ᑭᑲᐐᐐᒌᐎᑯᒻ ᑭᑕᒑᑯᐙᕽ᙮