ᓃᓐ ᑆᓬ, ᒋᓴᔅ X ᐅᑎᔑᓂᔕᐙᑲᓇᓐ᙮ ᑭᔐᒪᓂᑑ ᓴ ᐐᓐ ᐃᑯ ᓂᑮᐃᓀᓂᒥᒃ ᐃᐃ ᒋᐃᓇᓄᑮᔮᓐ᙮ ᑮᓇᐙ ᓴ ᑭᑑᔑᐲᐊᒪᐎᓂᓂᒻ ᐌᑎ ᑳᐊᔮᔦᒃ ᐁᐱᓴᓯᑳᕽ, ᑭᔐᒪᓂᑑ ᑳᑎᐯᓂᒥᓀᒃ ᑲᔦ ᐋᐱᒋ ᐁᑌᐺᔦᑖᑯᓯᐌᒃ ᐁᐐᒋᐱᒫᑎᓰᒣᒃ ᐊᐊ X ᒋᓴᔅ᙮

ᑕᑲ ᑭᔐᒪᓂᑑ ᑳᐅᔫᓯᒪᕽ, ᑳᑎᐯᒋᑫᒡ ᒋᓴᔅ X ᑲᔦ, ᑭᑲᒦᓂᑯᐙ ᐅᑭᔐᐙᑎᓯᐎᓐ, ᐱᓵᓂᓯᐎᓂᓂ ᑲᔦ᙮

ᑕᑲ ᑕᒦᑴᒋᐌᑖᑯᓯ ᑭᔐᒪᓂᑑ ᑳᐅᔫᓯᒥᑯᒡ ᑳᑎᐯᒋᑫᓂᒡ ᒋᓴᔅ Xᑕᓐ᙮ ᐋᓃᔥ ᐁᐐᒌᐎᒪᕽ Xᑕᓐ ᑳᐅᒋᔕᐌᓂᒥᓇᕽ, ᑳᐅᒋᒦᓂᓇᕽ ᑲᔦ ᑲᑭᓇ ᑳᔑᔕᐌᒋᑫᓂᒡ ᑭᔐᒪᓂᑑ ᐅᑕᒑᑾᓐ ᑭᒋᑮᔑᑯᕽ ᑳᐅᒌᒪᑲᓂᓂᑭᓐ᙮

ᐐᓐ ᐋᓃᔥ ᑭᑮᑮᔖᒋᐅᓀᓂᒥᑯᓈᓐ ᒋᐐᒌᐎᒪᕽ Xᑕᓐ ᒋᑆ ᒫᒋᓭᓂᒃ ᐅᐅ ᐊᑮᓂ, ᒋᐯᑭᓯᐗᕽ, ᑫᑰᓐ ᑲᔦ ᐋᐲᓐᒡ ᒋᐃᔑᐊᓈᒣᑖᑯᓯᓯᐗᕽ ᐁᓈᓴᒦᒡ᙮

ᑭᔐᒪᓂᑑ ᑕᔥ ᐁᓵᑭᐃᐌᒡ ᑳᑮᐅᒋᑮᔖᒋ ᐃᓀᑕᕽ ᐁᐐᐅᑯᓯᓯᒥᓇᕽ᙮ ᒋᓴᔅ Xᑕᓐ ᐅᑎᔑᒋᑫᐎᓂᓃᕽ ᐅᑑᒋᑲᔥᑭᑑᓐ᙮ ᐐᓐ ᐃᑕᔥ ᐃᑯ ᑲᔦ ᐁᑮᒥᓍᐸᑕᕽ ᐃᐃ ᑳᑮᐅᒋ ᐃᔑᒋᑫᒡ᙮

ᑕᑲ ᑕᔥ ᒦᑴᒋᐌᓂᒫᑖ ᑭᔐᒪᓂᑑ ᐋᓃᔥ ᑭᒋ ᐃᓀᑖᑾᓂᓂ ᐃᐃ ᐅᑭᔐᐙᑎᓯᐎᓐ, ᑳᑮᐃᔑᒥᒋᒦᓂᓇᕽ ᐃᐃᒫ ᐅᑯᓯᓯᕽ ᑳᓵᑭᐋᒡ᙮

X ᐃᑕᔥ ᐅᒥᔅᑸᒻ ᐁᑮᐅᒋᑲᐎᓂᓂᒃ ᒦᐃᒫ ᐌᒌᒃ ᐃᐃ ᐱᒫᒋᐃᐌᐎᓐ, ᒦ ᑲᔦ ᐃᒫ ᐌᒋᐴᓀᑕᒫᑰᔭᕽ ᒪᒋᑑᑕᒧᐎᓐ, ᐋᓃᔥ ᑭᔐᒪᓂᑑ ᐌᓅᑕᓂᓂ ᐅᑭᔐᐙᑎᓯᐎᓐ᙮

ᐋᓃᔥ ᐋᐱᒋ ᓃᐱᐗᐞ ᑭᑭᒋᒦᓂᑯᓈᓐ ᐃᐃ ᐅᑭᔐᐙᑎᓯᐎᓐ᙮ ᑭᔐᒪᓂᑑ ᑕᔥ ᐐᑫ ᐁᑲᑮᑖᐌᑕᕽ, ᑲᑭᓇ ᑲᔦ ᑫᑰᓂᓂ ᐁᓂᓯᑐᑕᕽ, ᑮᐃᔑᒋᑫ ᑳᑮᐃᓀᑕᕽ:

ᑭᑮᑭᑫᑕᒧᐃᑯᓈᓐ ᐃᐃ ᑳᑮᑭᑫᒋᑳᑌᓯᓂᓂᒃ ᐅᑎᓀᑕᒧᐎᓐ ᐁᑮᑮᔖᒋᐅᓀᑕᕽ ᐁᐐᑮᔑᑑᒡ ᐃᐃᒫ Xᐃᕽ᙮

ᐊᒦᑕᔥ ᐅᐅᐌ ᑳᑮᐃᓀᑕᕽ, ᐁᐐᒫᐗᑑᓇᕽ ᑲᑭᓇ ᑫᑰᓇᓐ ᑳᑮᐅᔑᑑᒡ ᑭᒋᑮᔑᑯᕽ ᐊᑮᕽ ᑲᔦ ᑳᐊᔮᓂᑭᓐ, Xᑕᓐ ᒋᓃᑳᓂᔥᑲᒥᓂᒡ᙮ ᑭᔐᒪᓂᑑ ᐐᓐ ᐃᑯ ᐅᑲᑮᔑᑑᓐ ᐅᑎᓀᑕᒧᐎᓐ ᐊᐲ ᓇᐃᓭᓂᒃ ᑎᐸᐃᑲᓐ᙮

ᐃᐃᒫ ᑕᔥ ᑲᔦ Xᐃᕽ ᑭᑮᑮᔖᒋᐅᓀᓂᒥᑯᓈᓐ ᐁᐐᑎᐯᓂᒥᓇᕽ, ᒦ ᐋᓃᔥ ᐃᐃ ᒪᔮ ᑳᑮᐃᓀᑕᕽ ᑭᔐᒪᓂᑑ ᑳᑲᔥᑭᑑᒡ ᑲᑭᓇ ᑫᑰᓂᓂ ᒋᐃᔑᓭᓂᒃ ᐋᓃᓐ ᑳᐃᔑᐊᑕᐌᑕᕽ᙮

ᐐᓐ ᐄᑐᒃ ᐅᑮᐅᓀᑖᓐ ᓃᓇᐎᓐᑦ ᓂᑕᒻ ᑳᑮᐊᐯᓂᒧᓄᑕᐎᒪᑭᒡ Xᑕᓐ ᒋᐅᒋᒦᑴᒋᐌᓂᒪᑭᒡ, ᐋᓃᔥ ᑭᒋ ᐃᓀᑖᑯᓯ᙮

ᑫᑮᓇᐙ ᑕᔥ ᑭᔐᒪᓂᑑ ᐄᑐᒃ ᑭᑮᐅᒋᒫᒌᑎᐯᓂᒥᑯᐙ ᐊᐲ ᑮᐱᓯᑕᒧᐌᒃ ᐃᐃ ᒥᓍᒋᒧᐎᓐ, ᐋᓃᔥ ᒦ ᐃᒫ ᑳᐅᒋᐱᒫᒋᐃᑰᔦᒃ᙮ ᐁᑮᑌᐺᑕᐌᒃ ᐃᑕᔥ X, ᑭᔐᒪᓂᑑ ᑭᑮᒦᓂᑯᐙ ᐅᑕᒑᑾᓐ ᑳᑮᐊᔓᑕᒫᑫᒡ, ᐁᐐᑭᑭᓇᐙᒋᐃᓀᒃ ᐁᑎᐯᓂᒥᓀᒃ᙮

ᐊᐊ ᑕᔥ ᐊᒑᒃ ᑳᑮᒦᓂᑰᔭᕽ ᒦ ᐃᒫ ᐁᔑᓈᑾᒃ ᐁᑮᑭᒋᐎᑎᐸᐊᕽ ᓂᑯᑎᕽ ᒋᑌᐱᓇᒧᐗᕽ ᐃᐃ ᑳᐐᒦᓂᓇᕽ, ᒦ ᑲᔦ ᐃᐃᒫ ᐌᒋᑭᑫᑕᒧᐗᕽ ᑭᔐᒪᓂᑑ ᐐᑫ ᐁᐐᐱᒫᒋᐋᒡ ᐃᓂ ᐯᒫᑎᓯᓂᒡ ᑳᑎᐯᓂᒫᒡ᙮ ᑕᑲ ᑕᔥ ᒦᑴᒋᐌᓂᒫᑖ ᐋᓃᔥ ᑭᒋ ᐃᓀᑖᑯᓯ᙮

ᐊᐲ ᑕᔥ ᐁᑮᓅᑕᒫᓐ ᐋᓃᓐ ᐁᐲᒋᑌᐺᑕᐌᒃ ᑳᑎᐯᒋᑫᒡ ᒋᓴᔅ, ᐋᓃᓐ ᑲᔦ ᐁᐲᒋᓵᑭᐁᒀ ᐯᒫᑎᓯᐙᒡ ᑭᔐᒪᓂᑑᓐ ᑳᑎᐯᓂᒥᑯᐙᒡ,

ᒦᑕᔥ ᐃᐃ ᒪᔑ ᑳᐅᒋᑭᐱᒌᓯᐙᓐ ᐁᒦᑴᒋᐌᓂᒪᒃ ᑭᔐᒪᓂᑑ ᑮᓇᐙ ᐅᒋ᙮ ᒨᔕᒃ ᑲᔦ ᑭᒥᑰᒥᓂᓂᒻ ᑮᐊᓇᒥᐋᔮᓐ,

ᐁᑲᑴᒋᒪᒃ ᑭᔐᒪᓂᑑ ᑳᐅᑭᔐᒪᓂᑑᒥᑯᒡ ᑳᑎᐯᓂᒥᓇᕽ ᒋᓴᔅ Xᑕᓐ, ᑳᑭᒋ ᐃᓀᑖᑯᓯᒡ ᑳᐅᔫᓯᒥᓐᒡ, ᒋᒦᓂᓀᒃ ᐃᓂ ᐊᒑᑾᓐ ᑳᒦᑭᐌᓂᒡ ᑲᑮᑖᐌᑕᒧᐎᓐ, ᑫᐙᐸᑕᐃᓀᒃ ᑭᔐᒪᓂᑑᓐ ᐊᐗᔑᒣ ᒋᑭᑫᓂᒥᒣᒃ᙮

ᒦ ᓴ ᑕᔥ ᐁᔑᐊᓇᒥᐋᔮᓐ, ᒋᐙᓭᓂᑳᑌᑭᓐ ᑳᐅᒋᓂᓯᑐᑕᒨᒪᑲᑭᓐ ᑭᑌᐃᐙᓐ, ᒋᐯᔭᑌᔮᐸᑕᒧᐌᒃ ᐌᑯᓀᓐ ᐃᐃ ᑳᐲᑖᐌᒃ ᑭᔐᒪᓂᑑ ᐁᐐᒦᓂᓀᒃ ᑳᐃᔑᐊᑐᒥᓀᒃ, ᒋᐙᐸᑕᒧᐌᒃ ᑲᔦ ᐋᓃᓐ ᐁᐲᒋᐌᓅᑕᓂᓂᒃ, ᐁᐲᒋᑭᒋ ᐃᓀᑖᑾᓂᓂᒃ ᑲᔦ ᑳᐐᒦᓈᒡ ᑭᔐᒪᓂᑑ ᐅᐱᒫᑎᓰᒪᐞ;

ᒋᑭᑫᑕᒧᐌᒃ ᑲᔦ ᐋᓃᓐ ᐁᐲᒋᐊᐗᔑᒣᐌᑖᑾᓂᓂᓂᒃ ᐅᒪᔥᑲᐎᓰᐎᓐ ᑳᐊᓄᑮᒪᑲᓂᓂᒃ ᐃᐃᒫ ᑭᐱᒫᑎᓰᐎᓂᓈᓂᕽ ᐋᔕ ᑳᑮᑌᐺᑕᐗᕽ᙮ ᐋᓃᔥ ᒦᐃ ᐁᔑᐐᒋᐃᐌᒪᑲᓂᓂᒃ ᐃᐃ ᑳᑎᐯᑕᕽ ᐅᑭᒋᒪᔥᑲᐎᓰᐎᓐ,

ᑳᑮᐋᐸᒋᑑᒡ ᐊᐲ ᑮᑮᐌᐱᒫᑎᓯᐋᒡ Xᑕᓐ ᐊᐲ ᑮᓂᐳᓂᒡ, ᐁᑮᐅᑭᒫᐗᐱᐋᒡ ᑲᔦ ᐅᑭᒋᓂᑭᕽ ᐃᓇᑫ ᐌᑎ ᑭᒋᑮᔑᑯᕽ᙮

X ᐃᑕᔥ ᑲᑭᓇ ᐅᐹᔑᒋᔥᑳᓇᓐ ᐅᑭᒫᐎᐎᓇᓐ, ᑲᔥᑭᐁᐎᓯᐎᓇᓐ ᑲᔦ, ᒪᔥᑲᐎᓰᐎᓇᓐ ᑲᔦ, ᑎᐯᓂᒥᐌᐎᓇᓐ ᑲᔦ, ᐃᓂ ᑲᔦ ᑲᑭᓇ ᐐᓱᐎᓇᓐ ᑳᑭᑕᑭᑌᓂᑭᓐ ᑫᒦᓂᓐᒡ ᐊᐎᔭ᙮ ᑳᐐᓐ ᐐᓐ ᐁᑕ ᓅᑯᒻ ᑳᐊᑮᐗᓂᓂᒃ, ᐃᐃ ᓴ ᑲᔦ ᐱᒌᓇᒃ ᑳᐐᐊᑮᐗᓂᓂᒃ᙮

ᑭᔐᒪᓂᑑ ᐅᑮᐸᑭᑎᓈᓇᓐ ᑲᑭᓇ ᑫᑰᓇᓐ Xᑕᓐ ᒋᑕᑕᑯᑳᑕᒥᓂᒡ, ᐅᑮᒦᓈᓐ ᑲᔦ ᑲᑭᓇ ᑫᑰᓂᓂ ᒋᑎᐯᑕᒥᓂᒡ ᐃᐃᒫ ᑳᔑᐊᔮᓂᒡ ᐁᔑᒫᒪᐐᓄᓂᒡ ᐅᑌᐺᑕᒨᐞ᙮

ᐋᓃᔥ ᒦᐗᐞ ᐃᐃᐌᓂ ᐅᐐᔭᐤ, ᒦ ᐃᒫ ᐌᒋᒨᔥᑭᓀᔦᑖᑯᓯᒡ, ᐐᓐ ᑲᔦ ᒥᓯᐌ ᑲᑭᓇ ᑫᑰᓂᓂ ᑳᒨᔥᑭᓀᔥᑲᕽ᙮

ᑮᓇᐙ ᑕᔥ ᑭᑮᓂᐳᒻ ᑭᒪᒋᑑᑕᒧᐎᓂᐙᕽ, ᑭᐗᓂᒋᑫᐎᓂᐙᕽ ᑲᔦ᙮

ᐃᐃ ᓴ ᐁᑮᐃᔑᐱᒧᓭᔦᒃ ᑳᐃᔑᒋᑳᓂᐗᕽ ᐅᐅᒫ ᐊᑮᕽ, ᐁᑮᐃᔑᒋᑫᔦᒃ ᑲᔦ ᑳᐃᔑᒋᑫᒡ ᐊᐊ ᑳᑎᐯᓂᒫᒡ ᑳᑎᐯᑕᒥᓂᒡ ᑲᔥᑭᐁᐎᓯᐎᓐ ᐅᐅᒫ ᒥᔕᑮᔑᑯᕽ, ᐊᐊ ᐊᒑᒃ ᑳᑎᐯᓂᒫᒡ ᐃᐃ ᐯᒫᑎᓯᓂᓂᒡ ᑳᔕᔒᐱᑕᒥᓂᒡ᙮

ᑲᑭᓇ ᑕᔥ ᑫᑮᓇᐎᓐᑦ ᐃᐃ ᑭᑮᐃᔑᐱᒫᑎᓯᒥᓐ ᑳᐃᔑᐱᒫᑎᓯᐙᒡ, ᐁᑮᐃᔑᒋᑫᔭᕽ ᐋᓃᓐ ᐁᔑᐱᔑᒀᑌᑕᒨᒪᑲᑭᓐ ᑭᑫᑌᐃᓈᑎᓯᐎᓂᓈᓂᓐ, ᐁᑮᐃᔑᒋᑫᔭᕽ ᑲᔦ ᐁᔑᒥᓴᐌᑕᒨᒪᑲᑭᓐ ᑭᑫᑌᐃᓈᑎᓯᐎᓂᓈᓂᓐ, ᑭᑎᓀᑕᒧᐎᓂᓈᓂᓐ ᑲᔦ᙮ ᐁᑮᐃᔑᓂᑖᐎᑭᐗᑯᐸᓀᓐ ᑲᔦ ᑭᑮᐃᓈᑎᓯᒥᓐ ᒋᐸᑲᒥᔥᑳᑯᔭᕽ ᑭᔐᒪᓂᑑ ᐅᓂᔥᑳᑎᓯᐎᓐ, ᑖᐱᔥᑰ ᑯᑕᒃ ᐊᐎᔭᒃ ᑳᔑᐱᒫᑎᓯᐙᒡ᙮

ᑭᔐᒪᓂᑑ ᑕᔥ ᐋᐱᒋ ᐁᐌᓅᑕᓂᓂᒃ ᐅᑰᐹᓯᓈᑫᐎᓐ, ᐋᐱᒋ ᑲᔦ ᐁᑮᐹᑏᓇᑑᒡ ᐅᔕᐌᒋᑫᐎᓐ ᑳᑮᐃᔑᔕᐌᓂᒥᓇᕽ,

ᒣᒀ ᑕᔥ ᑮᓂᐳᐗᕽ ᐃᐃᒫ ᑭᒪᒋ ᐃᔑᒋᑫᐎᓂᓈᓂᕽ, ᐐᓐ ᐃᓴ ᑭᔐᒪᓂᑑ ᑭᑮᐱᒫᑎᓯᐃᑯᓈᓐ ᑳᑮᐱᒫᑎᓯᐋᒡ Xᑕᓐ᙮ ᐅᑭᔐᐙᑎᓯᐎᓐ ᐋᓃᔥ ᑭᑑᒋᐱᒫᒋᐃᑰᒻ᙮

ᑭᑮᐃᔑᐃᑯᓈᓐ ᑲᔦ ᒋᐐᒋᑮᐌᐱᒫᑎᓰᒥᒪᕽ ᐃᓂ Xᑕᓐ, ᑭᑮᐃᔑᐃᑯᓈᓐ ᑲᔦ ᒋᐐᑕᐱᒥᒪᕽ ᐌᑎ ᑭᒋᑮᔑᑯᕽ ᒋᐃᔑᐊᔮᐗᕽ X ᒋᓴᓲᓐ ᑳᐃᔑᐊᔮᓂᒡ᙮

ᒦᑕᔥ ᐃᐃ ᑳᑮᐅᒋ ᐃᔑᒋᑫᒡ, ᐃᐃ ᓴ ᐱᒌᓇᒃ ᑳᐐᐱᐊᑮᐗᓂᓂᒃ ᐁᐐᐙᐸᑕᐃᐌᒡ ᑳᑭᒋᐌᓅᑕᓂᓂᒃ ᐅᑭᔐᐙᑎᓯᐎᓐ, ᐃᐃᒫ ᑕᔥ X ᒋᓴᓲᓐ ᐅᐱᒫᑎᓰᐎᓂᓃᕽ ᒦ ᐃᒫ ᐁᔑᓈᑯᑑᒡ᙮

ᐅᑭᔐᐙᑎᓯᐎᓂᕽ ᐅᔕ ᑭᑮᐅᒋᐱᒫᒋᐃᑰᒻ, ᐋᓃᔥ ᑭᑮᑌᐺᔦᑖᒻ᙮ ᑳᐐᓐ ᐐᓐ ᑮᓇᐙ ᐃᐃ ᑭᑲᔥᑭᑕᒫᓱᓰᒻ, ᑭᔐᒪᓂᑑ ᐅᔕ ᐃᐃ ᐅᒦᑭᐌᐎᓐ᙮

ᑳᐐᓐ ᐐᓐ ᑲᔦ ᐊᓄᑮᐎᓂᕽ ᐅᒌᓯᓅᓐ ᐱᒫᒋᐃᑰᐎᓐ, ᐊᐎᔭ ᓴ ᐃᓂᓂ ᐁᑳ ᒋᐅᒋᑭᒋᑳᑮᑭᑐᓯᒃ᙮

ᑮᓇᐎᓐᑦ ᐃᑕᔥ ᑭᔐᒪᓂᑑ ᐅᑎᔑᒫᒌᐎᓐ, X ᒋᓴᓱᕽ ᑭᑮᐅᔑᐃᑯᓈᓐ ᒋᒥᓄᒋᑫᐗᕽ, ᐐᓐ ᐋᓃᔥ ᑭᑮᑾᔮᒌᑕᒫᑯᓈᓐ ᑫᐃᔑᐱᒫᑎᓯᐗᕽ᙮

ᑕᑲ ᑕᔥ ᒫᒥᑲᐎᒃ ᑮᓇᐙ ᐁᑮᐃᔑᓂᑖᐎᑭᔦᒃ ᐁᑳ ᒎ ᒋᑎᓄᐎᓯᐌᒃ, ᐁᑳ ᑳᑭᑭᓇᐙᑕᔕᑫᔓᑰᓯᐌᒃ ᑲᔦ ᐁᑮᐃᔑᓂᑳᓂᓀᒀ ᐃᑭ ᑳᑭᑭᓇᐙᑕᔕᑫᔓᑣ, ᐅᓂᒌᒫᕽ ᐄᑐᒃ ᐅᒌᓂ ᐃᐃ ᑳᑑᑕᐎᑣ ᐃᐃᒫ ᐅᐐᔭᐎᒫᕽ᙮

ᐃᐃ ᑕᔥ ᐊᐲ ᑳᐐᓐ ᑭᑮᐐᒌᐙᓯᐙᐙ X, ᑳᐐᓐ ᑲᔦ ᑭᑮᐅᒋᑎᐯᑖᑯᓯᓰᒻ ᐃᔅᕒᐃᔭᓬᐊᒃ ᑳᐃᔑᑎᐯᑖᑯᓯᐙᒡ, ᑳᐐᓐ ᐃᒫ ᑭᑮᑕᑯᓂᑰᓰᒻ ᐃᐃᒫ ᑳᑮᐃᔑᐊᔓᑕᒫᑎᓈᓂᐗᑭᐸᓐ, ᑳᑮᐃᔑᐊᔓᑕᒪᐙᒡ ᑭᔐᒪᓂᑑ ᐅᐱᒫᑎᓰᒪᐞ, ᐁᑮᐊᔮᓯᐌᒃ ᑲᔦ ᐊᐯᓂᒧᐎᓐ, ᐁᑮᐅᑭᔐᒪᓂᑑᒥᓯᐌᒃ ᑲᔦ ᐅᐅᒫ ᐊᑮᕽ᙮

ᑭᑮᓈᐎᓈᑯᓯᒻ ᐃᐃᐌ ᐊᐲ᙮ ᓅᑯᒻ ᐃᑕᔥ ᐃᐃᒫ X ᒋᓴᔅ ᐅᒥᔅᑸᒥᕽ, ᐋᔕ ᐯᔓ ᑳᑮᐅᒋᐲᓂᑯᔦᒃ᙮

ᐐᓐ ᐋᓃᔥ X ᑳᐲᑕᒪᐎᓇᕽ ᐱᓵᓐ ᒋᐐᒌᑎᔭᕽ, ᐐᓐ ᑳᑮᐃᔑᐋᒡ ᒋᐯᔑᑴᑖᑯᓯᓂᒡ ᐃᐃ ᑳᑮᔒᑫᓂᑎᓂᒡ, ᐐᓐ ᑲᔦ ᑳᑮᐲᑯᐱᑑᒡ ᒫᔑᐐᒌᑎᐎᓐ ᑖᐱᔥᑰ ᐸᑫᒋᑲᓂᕽ ᑳᑮᐃᓀᑖᑾᓂᓂᒃ᙮

ᐐᓐ ᑲᔦ ᐅᐐᔭᐎᕽ ᐅᑮᑳᓰᐋᓐ ᐅᓇᔓᐌᐎᓐ ᐋᓃᓐ ᑳᑮᐃᓈᑯᓂᑫᒪᑲᓂᓂᒃ, ᐋᓃᓐ ᑲᔦ ᐁᔑᒋᑫᒪᑲᓂᓂᒃ᙮ ᒦᑕᔥ ᑳᑮᐃᓀᑕᕽ ᒋᐯᔑᑴᑖᑯᓯᓂᒡ ᐯᒫᑎᓯᓂᒡ ᐁᑮᐐᐅᒋᐅᔥᑭᐅᔑᐋᒡ ᑳᐃᔑᓃᔗᐙᓇᑭᓯᓂᒡ, ᐁᐐᐃᔑᐋᒡ ᐱᓵᓐ ᒋᐐᒌᑎᓂᒡ ᒎᐗᐞ ᐃᐃ ᑲᔦ ᐁᑳ ᑳᒎᐎᐎᓯᓂᒃ᙮

ᐐᓐ ᐄᑐᒃ ᑲᔦ X ᐊᐲ ᑮᓂᐳᒡ ᐋᔑᑌᔮᑎᑯᕽ ᐅᑮᓂᑕᒪᐙᐞ ᐃᐃ ᑳᑮᐃᔑᔒᑫᓂᑎᓂᒡ, ᐁᑮᓈᒋᐱᓈᒡ ᑾᔭᒃ ᒋᐐᒌᑎᓂᒡ᙮ ᐁᑮᐃᔑᐋᒡ ᑲᔦ ᒋᐯᔑᑴᑖᑯᓯᓂᒡ ᐯᔑᑾᓐ ᐐᔭᐎᒫᕽ ᒋᐅᒋᑎᐯᑖᑯᓯᓂᒡ᙮ ᐋᔑᑌᔮᑎᑯᕽ ᑲᔦ ᐅᑮᐅᒋᓈᒋᐱᓈᐞ ᑾᔭᒃ ᒋᐐᒌᐙᓂᒡ ᑭᔐᒪᓂᑑᓐ᙮

ᑮᐱᑕᑯᔑᓐ X ᐁᑮᑕᔑᑕᒪᐎᓀᒃ ᑳᔑᒥᓍᑐᑌᓂᒃ ᐱᓵᓐ ᐐᒌᑎᐎᓐ ᑮᓇᐙ ᐁᑳ ᑳᒎᐎᐎᓯᐌᒃ ᑳᑮᓈᐌᑖᑯᓯᔦᒃ ᑲᔦ, ᑫᐐᓇᐙ ᑕᔥ ᑳᒎᐎᐎᐙᒡ ᑮᐐᑕᒪᐙᐗᒃ ᐱᓵᓐ ᐐᒌᑎᐎᓐ ᐐᓇᐙ ᑳᑮᐯᔗᑖᑯᓯᐙᒡ᙮

ᐐᓐ ᐃᑕᔥ ᐅᒋ, ᑳᐅᒋᑲᔥᑭᑖᐗᕽ ᑮᓇᐎᓐᑦ ᑳᔑᓃᔗᐙᓇᑭᓯᔭᕽ ᒥᒋᑲᑭᓇ ᒋᐱᓈᓯᑲᐗᕽ ᐊᐊ ᑳᐅᔫᓯᒥᓐᒡ, ᐋᓃᔥ ᑭᐯᔑᑴᑖᑯᓯᐙᒥᓐ ᐁᐐᒌᐎᒥᓇᕽ ᑳᐯᔑᑯᓂᒡ ᐅᑕᒑᑾᓐ᙮

ᓇᔥᑫ ᑕᔥ ᑮᓇᐙ ᐁᑳ ᑳᒎᐎᐎᓯᐌᒃ ᑳᐐᓐ ᐊᐗᔑᒣ ᑭᐲᐎᑌᐎᓰᒻ, ᑳᐐᓐ ᑲᔦ ᑭᒪᔭᑫᑖᑯᓯᓰᒻ, ᓅᑯᒻ ᐃᑕᔥ ᐐᓐ ᑫᑮᓇᐙ ᑭᑑᒋᑎᐯᑖᑯᓯᒻ ᐃᐃ ᑭᔐᒪᓂᑑ ᐅᐱᒫᑎᓰᒪᐞ ᑳᐃᔑᐊᔮᓂᒡ, ᑭᔐᒪᓂᑑ ᑲᔦ ᐅᐙᑳᐃᑲᓂᕽ ᑳᐅᒋᑎᐯᑖᑯᓯᓂᒡ᙮

ᒦᑕᔥ ᐃᐃᒫ ᑫᑮᓇᐙ ᐁᔑᐊᓯᑰᔦᒃ ᒋᐙᑳᐃᑲᓂᐎᔦᒃ ᐃᐃᒫ ᑳᑮᐃᔑᐅᓈᑯᓯᒋᑫᐙᒡ ᐃᔑᓂᔕᐙᑲᓇᒃ, ᐃᐃ ᑲᔦ ᑭᔐᒪᓂᑑ ᐅᑎᐹᒋᒧᐎᓂᓃᒪᐞ, X ᒋᓴᔅ ᐐᓂᑯ ᑳᓂᑕᒫᐱᑭᔑᕽ ᐊᓯᓐ ᑎᓄᐎ ᐙᑳᐃᑲᓂᕽ᙮

ᐋᓃᔥ ᒦ ᐃᒫ Xᐃᕽ ᑳᐅᒋᒥᓋᑌᒃ ᐃᐃ ᑲᑭᓇ ᐙᑳᐃᑲᓐ, ᐲᓂᔥ ᐁᐊᓂᒫᒌᑭᒃ, ᐲᓂᔥ ᐃᑕᔥ ᑭᔐᒪᓂᑑ ᐅᑭᒋᐊᓇᒥᐁᐎᑲᒥᒃ ᒋᐊᓂᑎᓄᐗᓂᓂᒃ, ᑳᑎᐯᒋᑫᒡ ᑫᑕᔑᐊᓇᒥᐁᑕᐎᓐᒡ᙮

X ᐁᐐᒌᐎᓀᒃ ᑫᑮᓇᐙ ᑕᔥ ᑳᐅᒋᒫᒪᐎᐅᓇᑭᓂᑰᔦᒃ ᐁᐅᔑᒋᑳᑌᒃ ᐙᑳᐃᑲᓐ, ᒦ ᐃᒫ ᑭᔐᒪᓂᑑ ᐁᑖᒡ ᐋᓃᔥ ᐅᑕᒑᑾᓐ ᐃᐃᒫ ᐊᔮᐗᓐ᙮

ᒦ ᓴ ᐅᐅ ᓃᓐ ᑆᓬ ᑳᐅᒋᑕᑯᓂᑰᔮᓐ ᐁᐊᓄᑮᑕᐗᒃ X ᒋᓴᔅ ᑮᓇᐙ ᐅᒋ ᐁᑳ ᑳᒎᐎᐎᓯᐌᒃ᙮

ᑫᒋᓈᒡ ᒫᐐᓐ ᐋᔕ ᑭᑮᓅᑖᒻ ᑭᔐᒪᓂᑑ ᑳᑭᔐᐙᑎᓯᒡ ᐁᑮᒦᔑᒡ ᐅᐅ ᐊᓄᑮᐎᓂᓂ ᑮᓇᐙ ᒋᒥᓄᓭᔦᒃ᙮

ᐐᓐ ᐃᓴ ᐱᑯ ᑭᔐᒪᓂᑑ ᓂᑮᐙᐸᑕᐃᒃ ᒋᑭᑫᑕᒧᐗᒃ ᐃᐃ ᑳᑮᑭᑫᒋᑳᑌᓯᓂᓂᒃ ᐅᑎᓀᑕᒧᐎᓐ᙮ ᐋᔕ ᐸᑮ ᓂᑮᑕᔑᑖᓐ ᐅᐅ ᑳᑮᐅᔑᐲᐊᒪᐎᓇᑰᒃ᙮

ᑮᔥᐱᓐ ᓴ ᐊᓇᒥᑑᔦᒃ ᑭᑲᓂᓯᑐᑖᒻ ᐃᓴ, ᑭᑲᑭᑫᑖᒻ ᑲᔦ ᐋᓃᓐ ᐁᔑᑭᑫᑕᒧᐗᒃ ᐃᐃ X ᐅᑎᓀᑖᑯᓯᐎᓐ ᑳᑮᑭᑫᒋᑳᑌᓯᓂᓂᒃ᙮

ᐌᑎ ᑕᔥ ᐅᑖᓈᕽ ᐃᓂᓂᐗᒃ ᑳᐐᓐ ᑮᐙᐸᑕᐋᓰᐗᒃ ᒋᑭᑫᑕᒧᐙᒡ ᐅᐅ᙮ ᑭᔐᒪᓂᑑ ᑕᔥ ᐐᓐ ᐃᑯ ᐁᑮᐋᐸᒋᐋᒡ ᐅᑕᒑᑾᓐ ᐅᑮᐙᐸᑕᐋᐞ ᐃᐃ ᐅᑎᔑᓂᔕᐙᑲᓇᐞ ᐅᑎᐹᒋᒧᐎᓂᓃᒪᐞ ᑲᔦ ᑳᑭᑌᑖᑯᓯᓂᒡ᙮

ᒦᑕᔥ ᐅᐅ ᑳᐃᑕᒫᓐ: ᐃᑭ ᓴ ᑲᔦ ᑳᒎᐎᐎᓯᒀ ᒥᓍᒋᒧᐎᓂᕽ ᑫᐐᓇᐙ ᐅᑲᐅᒋᑌᐱᓈᓈᐙ ᑳᐐᑌᐱᓇᒥᓂᒡ ᒎᐗᐞ ᑭᔐᒪᓂᑑᓐ ᑳᐐᒦᓂᑯᓂᒡ᙮ ᒦ ᓴ ᑲᔦ ᐐᓇᐙ ᐃᐃᒫ ᐁᔑᐐᑑᑳᓱᐙᒡ X ᐅᐐᔭᐎᓂᓃᕽ᙮ ᑮᐃᓀᑖᑯᓯᐗᒃ ᑲᔦ ᐐᓇᐙ ᒋᒦᓂᑣ ᑭᔐᒪᓂᑑᓐ ᑳᑮᐃᔑᐊᔓᑕᒫᑫᓂᒡ ᐃᐃᒫ X ᒋᓴᓱᕽ᙮

ᓃᓐ ᓂᑮᑎᓄᐎᐃᑰ ᒋᐊᓄᑳᑕᒫᓐ ᒥᓍᒋᒧᐎᓐ, ᑭᔐᒪᓂᑑ ᐁᑮᐃᔑᔕᐌᓂᒥᒡ ᒋᐃᓇᓄᑮᐗᒃ, ᐁᑮᐅᒋᒦᔑᒡ ᑳᔑᐊᓄᑮᒪᑲᓂᓂᒃ ᐅᒪᔥᑲᐎᓰᐎᓐ᙮

ᓃᓐ ᐃᑕᔥ ᓇᐗᒡ ᓂᑕᐸᓭᑖᑯᔅ ᐊᐲᒡ ᐐᓐ ᐃᑭ ᒫᐗᒡ ᑳᑕᐸᓭᑖᑯᓯᐙᒡ ᑭᔐᒪᓂᑑ ᐅᐱᒫᑎᓰᒪᐞ᙮ ᔖᑰᒡ ᐃᑕᔥ ᓂᑮᐃᔑᒦᓂᑰᐎᔅ ᒋᐃᔑᐎᑕᐗᒀ ᐁᑳ ᑳᒎᐎᐎᓯᒀ ᒥᓍᒋᒧᐎᓂᓂ, ᒋᑭᑫᑕᒧᐙᒡ ᐐᑳ ᑳᑌᑕᑯᐐᑌᓯᓂᓂᒃ ᐋᓃᓐ ᐁᐲᒋᐌᓅᑎᓯᓂᒡ ᐃᓂ Xᑕᓐ᙮

ᑭᔐᒪᓂᑑ ᓃᓐ ᓂᑮᐋᐸᒋᐃᒃ ᑲᑭᓇ ᐯᒫᑎᓯᓂᒡ ᒋᐯᔭᑌᔮᐸᑕᒥᓂᒡ ᐋᓃᓐ ᐙᐃᔑᐊᓄᑮᑑᒡ ᑳᑮᑭᑫᒋᑳᑌᓯᓂᓂᒃ ᐅᑎᓀᑕᒧᐎᓐ᙮ ᐃᐃᐌᓂ ᑕᔥ ᐅᑎᓀᑕᒧᐎᓐ ᒣᐎᔕ ᐅᑖᓈᕽ ᑭᔐᒪᓂᑑ ᑲᑭᓇ ᑫᑰᓂᓂ ᑳᐅᔑᑑᒡ, ᒦ ᐃᐌᓂ ᒨᔕᒃ ᑳᑮᐱᑳᑑᒡ ᒋᑭᑫᒋᑳᑌᓯᓂᓂᒃ᙮

ᓅᑯᒻ ᐃᑕᔥ ᑭᔐᒪᓂᑑ, ᐅᑕᓇᒥᐋᐞ ᐅᑖᐸᒋᐋᐞ ᐁᐙᐸᑕᐃᐌᒡ ᐅᑲᑮᑖᐌᑕᒧᐎᓐ᙮ ᒦᑕᔥ ᐃᐃ ᑳᐊᒑᑯᐌᑖᑯᓯᓂᒡ ᑳᐅᑭᒫᑲᑖᑫᓂᒡ ᑳᐃᓂᑣ, ᑳᑲᔥᑭᐁᐎᓯᓂᒡ ᑲᔦ, ᑭᒋᑮᔑᑯᕽ ᑳᐊᔮᓂᒡ ᒋᐱᑭᑫᑕᒥᓂᒡ ᑭᔐᒪᓂᑑ ᐁᐊᔮᒡ ᑲᑮᑖᐌᑕᒧᐎᓐ᙮

ᑭᔐᒪᓂᑑ ᓴ ᑮᐃᔑᒋᑫ ᒣᐎᔕ ᐅᑖᓈᕽ ᑳᑮᐱ ᐃᓀᑕᒧᑯᐸᓀᓐ ᐃᐃᒫ ᑕᔥ X ᒋᓴᓱᕽ ᑳᑎᐯᓂᒥᓇᕽ, ᒦᐃᒫ ᐁᔑᓈᑾᓂᓂᒃ ᐃᐃ ᐁᑮᑮᔑᑑᒡ ᑳᐐᐃᔑᒋᑫᑯᐸᓀᓐ᙮

X ᑕᔥ ᐁᐐᒌᐗᕽ, ᐁᑌᐺᑕᐗᕽ ᑲᔦ ᑳᐅᒋᓲᑭᑌᐁᔭᕽ, ᑳᐅᒋᑫᒋᓈᐅᔭᕽ ᑲᔦ ᐊᐲ ᑮᐱᓈᓯᑲᐗᕽ ᑭᔐᒪᓂᑑ ᐌᑎ ᑳᐃᔑᐊᔮᒡ᙮

ᒦᑕᔥ ᐁᔑᐸᑯᓭᓂᒥᓂᓇᑰᒃ, ᒋᐲᑯᑌᐁᓯᐌᒃ ᐅᐅ ᑮᓇᐙ ᑳᐅᒋᑲᒀᑕᑭᑑᔮᓐ, ᑮᓇᐙ ᓴ ᑭᑲᐅᒋᒥᓄᓭᒻ ᐅᐅ ᑳᔑᑲᒀᑕᑭᑑᔮᓐ᙮

ᒦᑕᔥ ᐅᐅ ᑳᐅᒋ ᐅᒋᒌᑾᓇᐱᑖᔮᓐ ᐁᓈᓴᒦᒡ ᑳᐅᔫᓯᒥᓐᒡ,

ᒦᐃ ᐄᑐᒃ ᑲᑭᓇ ᐊᐎᔭᒃ ᐌᑎᓇᒧᐙᒡ ᐅᐐᓱᐎᓂᐙᓐ ᑭᒋᑮᔑᑯᕽ, ᐊᑮᕽ ᑲᔦ ᑳᐊᔮᐙᒡ, ᑳᑕᓱᐯᐸᑳᓉᐙᓇᑭᓯᐙᒡ ᑳᐅᑌᑌᐙᒡ᙮

ᓂᒪᔥᑲᐎᑲᑴᒋᒫ ᑳᐅᔫᓯᒥᓐᒡ ᒋᒦᓂᓀᒃ, ᑳᐃᔑᐌᓅᑕᓂᓂᒃ ᐅᑭᒋ ᐃᓀᑖᑯᓯᐎᓐ ᒋᐅᒋᒪᔥᑲᐎᓰᐃᑯᔦᒃ ᐃᐃᒫ ᑳᔑᒪᔥᑲᐎᓰᓂᒡ ᐅᑕᒑᑾᓐ᙮ ᒋᒪᔥᑲᐎᓰᔦᒃ ᐃᐃᒫ ᐲᒐᔭᐄ ᑭᐱᒫᑎᓯᐎᓂᐙᕽ᙮

ᐁᑌᐺᑕᒣᒃ ᑲᔦ X ᒋᐃᔑᑖᒡ ᐃᐃᒫ ᑭᑌᐃᐙᕽ, ᑮᓇᐙ ᑲᔦ ᑖᐱᔥᑰ ᐗᑕᐲᓐ ᑳᑯᑖᐎᑭᑭᓐ, ᒋᑯᑖᐎᑭᔦᒃ ᓵᑭᐃᐌᐎᓂᕽ, ᑳᔑᐅᓇᑌᒃ ᑲᔦ ᓵᑭᐃᐌᐎᓐ ᒦ ᐃᒫ ᒋᐃᔑᐋᔩᑕᐱᔦᒃ᙮

ᒋᑲᔥᑭᑑᔦᒃ ᑲᔦ ᒋᐐᒋᑭᑫᑕᒨᒥᒣᒃ ᐃᐃ ᑭᔐᒪᓂᑑ ᑲᑭᓇ ᐅᑕᓇᒥᐋᒪᐞ ᐋᓃᓐ ᐁᓂᑯᑴᑖᑾᓂᓂᒃ X ᐅᓵᑭᐃᐌᐎᓐ, ᐋᓃᓐ ᐁᐲᒋᒪᑲᑌᔦᑖᑾᓂᓂᒃ, ᐋᓃᓐ ᑲᔦ ᐁᐲᒋᑭᓉᐌᑖᑾᓂᓂᒃ, ᐋᓃᓐ ᑲᔦ ᐁᐲᒋᐃᔥᐯᑖᑾᓂᓂᒃ, ᐋᓃᓐ ᑲᔦ ᐁᐲᒋᐙᓴᐌᑖᑾᓂᓂᒃ ᐊᓈᒪᔭᐄ ᐃᓇᑫ᙮

ᑫᑫᑦ ᑲᔦ ᒋᑭᑫᑕᒧᐌᒃ X ᐅᓵᑭᐃᐌᐎᓐ, ᐐᑳ ᑫᑌᐱᑭᑫᒋᑳᑌᓯᓂᓂᒃ, ᒋᒨᔥᑭᓀᔥᑳᑯᐌᒃ ᑲᔦ ᑲᑭᓇ ᑭᔐᒪᓂᑑ ᐅᑎᓈᑎᓯᐎᓐ ᐁᔑᒨᔥᑭᓀᐌᑖᑾᓂᓂᒃ᙮

ᐊᐊ ᑕᔥ ᑭᔐᒪᓂᑑ ᑳᐊᓄᑮᒪᑲᓂᓂᒃ ᐅᒪᔥᑲᐎᓰᐎᓐ ᐃᐃᒫ ᑭᐱᒫᑎᓯᐎᓂᓈᓂᕽ, ᐅᑲᔥᑭᑑᓐ ᐊᐗᔑᒣ ᒋᐃᔑᒋᑫᒡ ᑳᐃᔑᑲᑴᒋᒪᕽ, ᐋᓃᓐ ᑲᔦ ᐁᓀᑕᒧᐗᕽ,

ᑕᑲ ᓴ ᐐᓐ ᒨᔕᒃ ᐃᑯ ᑕᑭᒋ ᐃᓀᑖᑯᓯ ᐃᐃᒫ ᐅᑕᓇᒥᐋᐞ ᑳᐃᔑᐊᔮᓂᒡ, ᐃᐃᒫ ᑲᔦ X ᒋᓴᓱᕽ ᒨᔕᒃ ᐃᑯ ᐊᐸᓀ ᑫᓂᐊᔭᔮᓂᒃ᙮ ᐁᒣᓐ᙮

ᓃᓐ ᐃᑕᔥ ᑳᑎᐯᒋᑫᒡ ᐁᐊᓄᑮᑕᐗᒃ ᑳᐅᒋᑭᐸᐅᑰᔮᓐ, ᑭᑎᔑᐸᑯᓭᓂᒥᓂᓂᒻ, ᐋᐱᒋ ᐁᑭᒋ ᐃᓀᑖᑾᒃ ᑳᔑᑲᓅᓂᑰᔦᒃ, ᑮᐊᑐᒥᓀᒃ ᑭᔐᒪᓂᑑ, ᒦᑕᔥ ᐃᓇᑫ ᒋᐃᔑᐱᒫᑎᓯᔦᒃ᙮

ᒨᔕᒃ ᑲᑴᑕᐸᓭᓂᒧᒃ, ᑲᑴᓅᑳᑎᓯᒃ, ᔕᔒᐯᑕᒧᒃ ᑲᔦ, ᑲᑴᔕᔒᐯᓂᑎᒃ ᒋᐙᐸᑕᐃᑎᔦᒃ ᐁᓵᑭᐃᑎᔦᒃ᙮

ᒫᐗᒡ ᓴ ᑯ ᑭᒋᐊᓄᑮᒃ ᒋᑲᓇᐌᑕᒧᐌᒃ ᐐᒌᑎᐎᓐ ᑭᔐᒪᓂᑑ ᐅᑕᒑᑾᓐ ᑳᒦᓂᓀᒃ, ᐱᓵᓂᓰᑲᑖᑎᐎᓐ ᐋᐸᒋᑑᒃ ᑳᐅᒋᒥᒋᒥᔥᑳᒃ ᑳᐃᔑᒥᓄᐐᒌᑎᔦᒃ᙮

ᒥᒋᐯᔑᑾᓐ ᓴ ᐐᔭᐎᒫ, ᒥᒋᐯᔑᑯ ᑲᔦ ᐊᐊ ᐊᒑᒃ, ᒥᒋᐯᔑᑾᓂᓂ ᑳᐃᔑᐊᑐᒥᓀᒃ ᑭᔐᒪᓂᑑ, ᒦᑕᔥ ᐃᐃᒫ ᐁᔑᐊᐯᓂᒧᔦᒃ᙮

ᒥᒋᐯᔑᑯ ᑲᔦ ᑳᑎᐯᒋᑫᒡ, ᒥᒋᐯᔑᑾᓐ ᑲᔦ ᑌᐺᔦᑕᒧᐎᓐ, ᒥᒋᐯᔑᑾᓐ ᑲᔦ ᓰᑲᐊᑖᓱᐎᓐ,

ᒥᒋᐯᔑᑯ ᑲᔦ ᑭᔐᒪᓂᑑ, ᑲᑭᓇ ᐊᐎᔭᓐ ᑳᐅᔫᓯᒥᑯᒡ, ᐐᓐ ᑲᔦ ᑲᑭᓇ ᐊᐎᔭᐞ ᐅᑎᐯᓂᒫᐞ, ᒥᓯᐌ ᑲᔦ ᑕᓇᓄᑮ, ᐐᓐ ᑲᔦ ᑲᑭᓇ ᐊᐎᔭᐞ ᐅᐱᒫᑎᓯᐎᓂᓃᕽ ᐊᔨᑖ᙮

ᑲᑭᓇ ᑕᔥ ᑳᑕᓱᐯᔑᑯᔭᕽ X ᐅᒦᑭᐌᐎᓂᕽ ᑭᑮᐃᔑᔕᐌᑖᑯᓯᒥᓐ, ᐁᑮᐃᔑᒫᒫᑕᐆᓂᓇᕽ ᐅᒦᑭᐌᐎᓇᓐ ᑳᑮᐅᓀᑕᕽ ᒋᐃᓇᓄᑮᔭᕽ᙮

ᑭᒋᒪᓯᓇᐃᑲᓐ ᑕᔥ ᐃᔑᐲᐃᑳᑌ: ᐊᐲ ᓴ ᐌᑎ ᐃᔥᐱᒥᕽ ᑮᐃᔖᒡ, ᑳᒋᑎᓂᑲᓇᐞ ᓃᐱᐗᐞ ᐅᑮᒫᒌᓈᐞ, ᒦᑭᐌᐎᓇᓐ ᑕᔥ ᐅᑮᒦᓈᐞ ᐃᓂᓂᐗᐞ᙮

ᐌᑯᓀᓐ ᑕᔥ ᐃᔥᐱᒥᕽ ᑮᐃᔖᒡ ᑳᐃᒋᑳᑌᒃ? ᒦ ᓴ ᐅᐅ ᑳᐃᒋᑳᑌᒃ, ᐱᓇᒫ ᓴ ᒫᐗᒡ ᐃᑯ ᑕᐸᓴᑮᕽ ᑮᐲᔖ᙮

ᐊᐊ ᑕᔥ ᑳᑮᐱᓈᔒᒡ ᐅᐅᒫ ᐊᑮᕽ, ᒦ ᓴ ᐊᐊ ᐯᔑᑾᓐ ᐃᔥᐱᒥᕽ ᑳᑮᐃᔖᒡ, ᐙᓴ ᐌᑎ ᐊᐗᔑᒣ ᑭᒋᑮᔑᑯᕽ ᐁᑮᐃᔖᒡ, ᑲᑭᓇ ᑫᑰᓂᓂ ᐁᐐᒨᔥᑭᓀᔥᑲᕽ᙮

ᐐᓐ ᐃᑕᔥ ᑳᑮᒦᓈᒡ ᐃᓂᓂᐗᐞ ᐊᓄᑮᐎᓇᓐ, ᐋᓂᑕ ᐃᔑᓂᔕᐙᑲᓐ ᒋᑎᓄᐎᓂᒡ, ᐋᓂᑕ ᒋᑎᓄᐎᓂᒡ ᑳᑲᓅᒋᑫᑕᒪᐙᓂᒡ ᑭᔐᒪᓂᑑᓐ, ᐋᓂᑕ ᒋᐸᐹᐐᑕᒫᑫᓂᒡ ᒥᓍᒋᒧᐎᓐ, ᐋᓂᑕ ᒋᑲᓇᐌᓂᒫᓂᒡ ᐅᑕᓇᒥᐋᐞ, ᐋᓂᑕ ᑲᔦ ᒋᑭᑭᓄᐊᒫᑫᓂᒡ᙮

ᒦᑕᔥ ᐃᐃ ᑳᑮᐅᒋᒦᓈᒡ ᐁᐐᑾᔮᒋᐋᒡ ᑭᔐᒪᓂᑑ ᐅᑕᓇᒥᐋᒪᐞ ᒋᑑᑕᒥᓂᒡ ᐅᐙᐐᒋᐃᐌᐎᐊᓄᑮᐎᓐ, ᒋᐅᒋᑮᔑᓈᑾᓂᓂᒃ ᐁᐅᐱᒋᑳᑌᓂᒃ X ᐅᐐᔭᐤ,

ᐹᓂᒫ ᑲᑭᓇ ᑮᐯᔑᑴᑖᑾᒃ ᑭᑌᐺᑕᒧᐎᓂᓈᓐ, ᑳᐃᔑᑭᑫᓂᒪᕽ ᑲᔦ ᑭᔐᒪᓂᑑ ᐅᑯᓯᓴᓐ, ᒦᑕᔥ ᐃᐃ ᐸᔦᔥ ᒋᓂᑮᔖᐯᐎᐗᕽ, ᒋᐅᒋᒋᔥᑳᐗᕽ ᐅᒨᔥᑭᓀᐌᑖᑯᓯᐎᓂᕽ X ᒪᔮ ᑫᑮᓇᐎᓐᑦ ᒋᐃᔑᓈᑯᓯᔭᕽ᙮

ᑕᑲ ᑕᔥ ᑳᐐᓐ ᐊᐱᓅᒌᔑᕽ ᑭᑲᐃᔑᐊᔮᓰᒥᓐ, ᒋᐸᐹᒫᐅᑯᓯᐗᕽ, ᒋᐸᐹᒥᐌᐹᔑᓯᐗᕽ ᐋᑎ ᐱᑯ ᐌᑖᓂᒪᒃ, ᐋᓃᔥ ᑖᐱᔥᑰ ᓅᑎᓄᕽ ᐃᓀᑖᑾᓂᓂ ᐅᑭᑭᓄᐃᑫᐎᓂᐙᓐ ᐃᑭ ᑳᐗᓂᑭᑭᓄᐃᑫᐙᒡ᙮ ᐋᓃᔥ ᐅᑲᔥᑭᐋᐙᐞ ᐋᓂᑕ ᐁᐗᓂᒫᐙᒡ ᐁᐋᐸᒋᑑᐙᒡ ᑳᑲᑲᔦᑖᑾᓂᓂᑭᓐ ᐅᑎᔑᒋᑫᐎᓂᐙᓐ᙮

ᑮᓇᐎᓐᑦ ᑕᔥ ᐐᓐ ᓵᑭᐃᐌᐎᓂᕽ ᐁᐅᒌᒪᑲᒃ ᑳᑕᔑᑕᒪᕽ ᑌᐺᐎᓐ, ᒥᓯᐌ ᑭᑲᐃᔑᒫᒌᑭᒥᓐ ᐃᓇᑫ X ᑳᐃᔑᐊᔮᒡ, ᑳᓃᑳᓂᔥᑲᕽ ᐅᐐᔭᐤ᙮

ᐐᓐ ᐃᑕᔥ ᑲᑭᓇ ᑫᑰᓂᓂ ᐁᓈᑲᒋᑑᒡ, ᒦ ᐃ ᑳᐅᒋ ᒫᒪᐎ ᒥᓄᓯᑭᓐ ᐃᓂ ᐯᐸᑳᓐ ᑳᐃᓍᑌᑭᓐ ᐃᐃᒫ ᐐᔭᐎᒫᕽ᙮ ᒦ ᐃᒫ ᑲᑭᓇ ᐌᒋᒥᒋᒥᔥᑳᒃ ᑳᐃᔑᐊᔫᓇᒋᑳᑌᑭᓐ ᐊᔮᓂᑲᐎᑲᓈᓇᓐ᙮ ᐁᑕᓱ ᐯᔑᑾᒃ ᓴ ᐃᓈᐸᑕᓐ ᑫᑮᐃᓇᓄᑮᒪᑲᑭᐸᓐ᙮ ᒦᑕᔥ ᐅᐅ ᓵᑭᐃᑎᐎᓐ ᐁᓇᓄᑮᒪᑲᒃ, ᑳᐅᒋᒫᒌᑭᒃ ᐐᔭᐎᒫ, ᑳᐅᒋ ᒪᔥᑲᐎᐃᑎᓲᒪᑲᒃ ᑲᔦ᙮

ᑭᑕᔮᒀᒥᒥᓂᓂᒻ ᐃᑕᔥ ᑳᑎᐯᒋᑫᒡ ᐅᑎᔑᓂᑳᓱᐎᓂᕽ: ᑫᑯ ᐊᐗᔑᒣ ᐃᔑᐱᒫᑎᓯᑫᒃ ᑖᐱᔥᑰ ᐃᑭ ᐁᑳ ᑳᒎᐎᐎᓯᒀ ᑳᐃᔑᒋᑫᐙᒡ, ᐋᓃᔥ ᐅᑎᓀᑕᒧᐎᓂᐙᓐ ᑳᐐᓐ ᑫᑰᓐ ᐊᐲᑌᑖᑾᓯᓂᓂᐗᓐ᙮

ᑲᔥᑮᑎᐱᑲᓂᓂᐗᓐ ᑲᔦ ᐅᓈᑲᑕᐌᑕᒧᐎᓂᐙᓐ, ᑳᐐᓐ ᑲᔦ ᐃᐃᒫ ᑭᔐᒪᓂᑑ ᑳᔑᐱᒫᒋᐃᐌᓂᒡ ᐃᔑᑎᐯᑖᑯᓯᓰᐗᒃ, ᐋᓃᔥ ᑳᐐᓐ ᐅᒋᑕ ᐅᐐᑲᑴᑭᑫᓂᒫᓯᐙᐙᓐ ᐋᓃᔥ ᑲᔦ ᐁᔕᔒᐱᑕᒧᐙᒡ᙮

ᑳᐐᓐ ᑲᔦ ᐊᐙᒡ ᐸᑮ ᐊᑲᒋᐎᓐ ᐅᑕᔮᓰᓈᐙ, ᐱᓵᓂᑯ ᐐᑫ ᐊᓅᒋᑯ ᐁᐃᔑᒋᑫᐙᒡ ᐋᓃᓐ ᐐᓀᑕᐙ ᑯ ᑫᐅᒋᒥᓉᑕᒧᐙᒡ, ᐁᐃᔑᒋᑫᐙᒡ ᑲᑭᓇ ᐃᓂ ᑎᓄ ᑳᐐᓀᑖᑾᓂᓂᑭᓐ, ᐋᐱᒋ ᑲᔦ ᐁᐅᓵᒣᑕᒧᐙᒡ ᑫᔮᐱ ᐁᐐᐃᔑᒋᑫᐙᒡ᙮

ᑳᐐᓐ ᑕᔥ ᐐᓐ ᐃᐃ ᓇᑫ ᑭᑮᐃᔑᑭᑭᓄᐊᒫᑯᓯᐙ X᙮

ᑌᐺ ᐄᑐᒃ ᑭᑮᓅᑕᐙᐙ ᐊᐊ X, ᑭᑮᑭᑭᓄᐊᒫᑯᐙ ᑲᔦ᙮ ᒦᓴ ᐃᐌ ᑳᓅᑕᒣᒃ ᑌᐺᐎᓐ ᑳᒥᑭᑳᑌᒃ ᒋᓴᓱᕽ,

ᐁᑮᑭᑭᓄᐊᒫᑰᔦᒃ ᑫᑑᑕᒣᒃ ᐃᓂ ᑭᑫᑌᐃᓈᑎᓯᐎᓂᐙᓐ, ᐸᑫᔭᐄ ᒋᐃᔑᐌᐱᓇᒣᒃ, ᐋᓃᔥ ᒦᐃᒫ ᑳᐃᔑᑲᑲᔦᓂᓰᒪᑲᑭᓐ ᒪᒋᒥᓴᐌᑕᒧᐎᓇᓐ ᑳᑮᐊᓂᐅᒋ ᓂᔑᐗᓈᒋᒋᑳᑌᒃ᙮

ᓅᑯᒻ ᐃᑕᔥ ᐊᓂᐅᔥᑭᐃᑰᐎᓯᒃ ᑭᑕᒑᑯᐙᕽ ᑳᐅᒋᓈᓈᑲᑕᐌᑕᒣᒃ᙮

ᐱᓯᑲᒧᒃ ᑲᔦ ᐃᐃ ᐅᔥᑭᐱᒫᑎᓯᐎᓐ ᑳᑮᐅᔑᒋᑳᑌᒃ ᒋᐃᔑᓈᑾᒃ ᑭᔐᒪᓂᑑ ᑳᐃᔑᓈᑯᓯᒡ, ᑌᐺ ᒋᑾᔭᒀᑎᓰᑲᑕᐌᒀ ᐯᒫᑎᓯᐙᒡ, ᑌᐺ ᒋᑾᔭᑯᑑᑕᒧᐌᒃ ᑭᔐᒪᓂᑑ ᑳᐃᔑᐊᑕᐌᓂᒥᓀᒃ᙮

ᐊᐤ ᐃᑕᔥ ᐴᓂᑑᒃ ᑭᑮᐗᓂᒧᐎᓂᐙᓐ! ᑳᑌᐺᔦᑖᑾᒃ ᑕᔥ ᐙᐐᑕᒪᐎᒃ ᑲᑭᓇ ᑳᑕᓱᐯᐯᔑᑯᔦᒃ ᑮᒋᐱᒫᑎᓰᒃ, ᐋᓃᔥ ᑲᑭᓇ ᑳᑕᔑᔭᕽ ᐯᔑᑾᓐ ᑭᑎᔑᑎᐯᑖᑯᓯᒥᓐ᙮

ᑮᔥᐱᓐ ᑕᔥ ᓂᔥᑳᑎᓯᔦᒃ, ᑫᑯ ᐃᐃᒫ ᑭᓂᔥᑳᑎᓯᐎᓂᐙᕽ ᐅᒋᒪᒋᑑᑕᑫᒃ᙮ ᐴᓂᑭᑖᓱᒃ ᒋᑆ ᐸᑭᔑᒧᒡ ᑮᓯᔅ᙮

ᑫᑯ ᑲᔦ ᑕᐎᓇᒪᐙᑫᒃ ᒪᒋᐊᔭᐋ ᑭᐱᒫᑎᓯᐎᓂᐙᕽ᙮

ᑕᑲ ᑲᔦ ᐊᐊ ᑳᓂᑖᑭᒨᑎᒡ ᑕᐴᓂᑭᒨᑎ, ᓇᐗᒡ ᐊᓄᑮᒡ ᑕᐅᓂᔑᔑᓂᓂ ᐅᓂᒌᓐ ᒋᐋᐸᒋᑑᐸᓐ᙮ ᐋᓃᔥ ᒦ ᐃᒫ ᑫᐅᒋᐊᔮᒡ ᑫᑰᓂᓂ ᒋᒦᓈᒡ ᐃᐃ ᑳᓅᑌᓭᓂᒡ᙮

ᑫᑯ ᑲᔦ ᑳᓂᔑᐗᓈᒋᐃᐌᒪᑲᑭᓐ ᐃᑭᑐᐎᓇᓐ ᐋᐸᒋᑑᑫᒃ ᑮᑮᑭᑐᔦᒃ, ᐃᓂ ᓴ ᑳᐐᒋᐃᐌᒪᑲᑭᓐ ᐃᑭᑐᐎᓇᓐ ᐋᐸᒋᑑᒃ, ᒋᐐᒋᐃᑣ ᓅᑯᒻ ᐃᑯ ᑳᐃᔑᓅᑌᓭᐙᒡ, ᐃᑭ ᓴ ᑳᐱᓯᑕᐎᓀᒀ ᒋᐅᒋᒥᓄᓭᐙᒡ᙮

ᑫᑯ ᑲᔦ ᒫᓀᑕᒧᐃᒫᑫᒃ ᑳᐯᑳᑎᓯᓂᒡ ᑭᔐᒪᓂᑑ ᐅᑕᒑᑾᓐ, ᒦ ᐃ ᐋᓃᔥ ᐃᐃᒫ ᐌᒋᑭᑭᓇᐙᒋᐃᑰᔦᒃ ᐋᑎ ᐌᒋᑎᐯᑖᑯᓯᔦᒃ, ᓂᑯᑎᕽ ᓴ ᑮᔑᑲᓂᓂᒃ ᑭᔐᒪᓂᑑ ᐅᑲᑮᔑᑑᓐ ᑭᐱᒫᒋᐃᑰᐎᓂᐙ᙮

ᐌᐱᓇᒧᒃ ᑕᔥ ᑲᑭᓇ ᓂᔥᑫᑕᒧᐎᓇᓐ, ᐋᑯᑭᑖᓱᐎᓐ ᑲᔦ, ᓂᔥᑳᑎᓯᐎᓇᓐ ᑲᔦ, ᓂᔥᑭᑭᔒᐌᑮᑳᑎᐎᓐ ᑲᔦ, ᒪᒋᑕᔑᑎᐎᓇᓐ ᑲᔦ, ᐃᓂ ᑲᔦ ᑮᒨᒋᔒᑫᒋᑫᐎᓇᓐ᙮

ᒥᓄᑑᑖᑎᒃ, ᑯᐹᑌᓂᑎᒃ ᑲᔦ ᐌᐌᓂ ᒋᐐᒋᐃᑎᔦᒃ, ᐴᓀᑕᒫᑎᒃ ᑲᔦ ᑖᐱᔥᑰ ᑭᔐᒪᓂᑑ ᑳᑮᐃᔑᐴᓀᑕᒪᐎᓀᒃ ᐃᐃᒫ Xᐃᕽ᙮

ᑮᓇᐙ ᑕᔥ ᑳᔕᐌᓂᒥᓀᒃ ᑭᔐᒪᓂᑑ ᐁᐅᓃᒑᓂᓯᒥᓀᒃ, ᓇᓈᐱᓇᐎᒃ ᐁᔑᐱᒫᑎᓯᒡ᙮

ᓵᑭᐃᑎᐎᓂᕽ ᑲᔦ ᐃᔑᐱᒧᓭᒃ ᑖᐱᔥᑰ X ᑳᑮᐃᔑᔕᐌᓂᒥᓀᒃ, ᐁᑮᐸᑭᑎᓇᕽ ᐅᐱᒫᑎᓯᐎᓐ ᑮᓇᐎᓐᑦ ᐅᒋ, ᐱᓵᓐ ᐃᑯ ᒋᓂᓯᓐᒡ ᐁᑮᐸᑭᑎᓇᒪᐙᒡ ᑭᔐᒪᓂᑑᓐ, ᐅᑮᒥᓈᓴᒪᐙᓐ, ᒦ ᓴ ᐃᐃᐌᓂ ᑭᔐᒪᓂᑑ ᑳᒥᓄᒫᑕᕽ᙮

ᑳᐐᓐ ᐄᑐᒃ ᐊᐙᒡ ᑕᐊᔮᓯᓅᓐ ᐱᔑᒀᑎᓯᐎᓐ, ᐐᓈᑎᓯᐎᓐ ᑲᔦ, ᐋᔅᑯᓂᓯᐎᓐ ᑲᔦ ᒋᑕᑯᐐᑌᒃ ᐃᐃᒫ ᑳᔑᐊᔮᔦᒃ, ᐁᑎᓄᐎᔦᒃ ᑭᔐᒪᓂᑑ ᐅᐱᒫᑎᓰᒪᐞ᙮

ᑫᑯ ᑲᔦ ᐐᓂᑮᔗᑫᒃ, ᑫᑯ ᑲᔦ ᑲᑮᐹᒋᑮᔗᑫᒃ, ᑫᑯ ᑲᔦ ᓅᒋᑯ ᐃᔑᒦᑭᓯᑖᑯᓯᑫᒃ, ᐋᓃᔥ ᑳᐐᓐ ᐃᐃ ᐅᓂᔑᔑᓯᓅᓐ᙮ ᒨᔕᒃ ᐃᑕᔥ ᑕᔑᑕᒧᒃ ᑫᐅᒋᒦᑴᒋᐌᑕᒣᒃ᙮

ᑫᒋᓈᒡ ᐄᑐᒃ ᑭᑭᑫᑖᒻ ᐊᐎᔭ ᑳᐱᔑᒀᑎᓯᒡ, ᑳᐐᓈᑎᓯᒡ ᑲᔦ, ᑳᒥᓴᐌᑕᕽ ᑫᑰᓂᓂ ᐸᑳᓐ ᐊᐎᔭᓐ ᐅᑕᔭᐄᒥᓂ, ᒦᐃ ᐋᓃᔥ ᐁᔑᒪᓂᑑᑫᒡ, ᑳᐐᓐ ᐃᑭ ᑳᑑᑕᒧᐙᒡ ᐅᑲᑌᐱᓇᓰᓈᐙ ᐃᐃ ᑳᐐᒦᓂᑎᓈᓂᐗᓂᓂᒃ ᐃᐃᒫ ᐅᑑᑭᒫᐎᐎᓂᓃᕽ Xᑕᓐ ᔑᑾ ᑲᔦ ᑭᔐᒪᓂᑑᓐ᙮

ᑫᑯ ᑲᔦ ᐸᑭᑎᓈᑫᒃ ᐊᐎᔭ ᒋᐗᓂᐎᓂᓀᒃ ᑲᑮᐹᒋᑮᔗᐎᓇᓐ ᐋᐸᒋᑑᒡ, ᐋᓃᔥ ᒦᐗᓄᓄ ᑳᐃᔑᒋᑫᐙᒡ, ᑳᔕᔒᐱᑕᒧᐙᒡ ᑳᐐᐅᒋᐸᑲᒥᔥᑳᑯᐙᒡ ᑭᔐᒪᓂᑑᓐ ᐅᓂᔥᑳᑎᓯᐎᓂᓂ᙮

ᑫᑯ ᑕᔥ ᐐᒌᐙᑫᒀᓂᒃ ᐃᑭ ᐅᐅ ᑳᐃᔑᒋᑫᐙᒡ᙮

ᑮᓇᐙ ᑕᔥ ᑲᔥᑮᑎᐱᑲᓄᕽ ᑭᑮᐃᔑᐱᒫᑎᓯᒻ ᐅᑖᓈᕽ, ᓅᑯᒻ ᐃᑕᔥ ᑭᐙᓭᓈᑯᓯᒻ ᑳᑎᐯᒋᑫᒡ ᐅᒋ᙮ ᒦᑕᔥ ᐃᐃᒫ ᐃᔑᐱᒧᓭᒃ ᑳᐃᔑᐱᒫᑎᓯᐙᒡ ᐙᓭᔮᕽ ᑳᐃᔑᑎᐯᑖᑯᓯᐙᒡ᙮

ᐋᓃᔥ ᑳᐙᓭᔮᒃ ᐅᒋᓂᑖᐎᑮᒪᑲᓅᓐ ᑲᑭᓇ ᑳᐅᓂᔑᔑᒃ ᒥᓄᑑᑕᒧᐎᓐ, ᑾᔭᒀᑎᓯᐎᓐ, ᑌᐺᐎᓐ ᑲᔦ᙮

ᑲᑴᑭᑫᑕᒧᒃ ᐃᑕᔥ ᑲᔦ ᐌᑯᓀᓐ ᐃᓂ ᑳᑎᐯᒋᑫᒡ ᑳᒥᓍᐸᑕᕽ᙮

ᑫᑯ ᑲᔦ ᐐᒋᐋᑫᒀᓂᒃ ᐃᑭ ᐯᒫᑎᓯᐙᒡ ᐅᑎᔑᒋᑫᐎᓂᐙᓐ ᑲᔥᑮᑎᐱᑲᓄᕽ ᑳᐅᒋᑎᐯᑖᑾᓂᓂᑭᓐ, ᐋᓃᔥ ᑳᐐᓐ ᑫᑰᓂᓂ ᐃᐃᒫ ᐅᑑᑎᓇᓰᓈᐙ᙮ ᐅᐅ ᑕᔥ ᐃᔑᒋᑫᒃ, ᒧᔐᓇᒪᐎᑾᒃ ᐃᓂ ᐅᑎᔑᒋᑫᐎᓂᐙᓐ᙮

ᐋᓃᔥ ᑌᐺ ᐐᑫ ᐊᑲᑌᑖᑾᓂᓂᐗᓐ ᒋᑕᔑᒋᑳᑌᓂᑭᓐ ᐅᑮᒨᒋ ᐃᔑᒋᑫᐎᓂᐙᓐ᙮

ᑲᑭᓇ ᑕᔥ ᑫᑰᓇᓐ ᓈᑾᓅᓐ ᑮᐲᒋᑳᑌᑭᓐ ᑳᐃᔑᐙᓭᔮᒃ, ᑲᑭᓇ ᑕᔥ ᑫᑰᓐ ᑮᓈᑾᒃ ᒦᐃᒫ ᐌᒋᑭᑫᒋᑳᑌᒃ ᐁᑎᓄᐗᕽ᙮

ᒦᑕᔥ ᐅᐅ ᑳᐅᒋ ᐃᔑᐲᐃᑳᑌᒃ ᑭᒋᒪᓯᓇᐃᑲᓐ: ᑯᔥᑯᓯᓐ ᑳᓂᐹᔭᓐ! ᑮᐌᐱᒫᑎᓯᓐ ᐅᒋ ᐃᒫ ᑳᐃᔑᓂᐳᔭᓐ, X ᐃᑕᔥ ᑭᑲᐙᓭᔥᑳᒃ᙮

ᐋᐱᒋ ᑕᔥ ᐊᔮᒀᒥᓯᒃ ᐋᓃᓐ ᐁᔑᐱᒫᑎᓯᔦᒃ, ᑫᑯ ᐃᔑᐱᒫᑎᓯᑫᒃ ᑖᐱᔥᑰ ᑳᑲᑮᐹᑎᓯᐙᒡ᙮ ᑳᐃᔑᐱᒫᑎᓯᐙᒡ ᐃᑕᔥ ᐅᑲᑮᑖᐌᑕᒨᒃ ᐃᔑᐱᒫᑎᓯᒃ᙮

ᑲᑴᒥᓍᐸᒋᑑᒃ ᓴ ᒥᓂᒃ ᑳᔑᑕᐎᓇᒫᑰᔦᒃ ᒋᒥᓄᒋᑫᔦᒃ, ᐋᓃᔥ ᐋᐱᒋ ᒨᔕᒃ ᒪᒋᑮᔑᑲᓐ᙮

ᑫᑯ ᑕᔥ ᑲᑮᐹᑎᓯᑫᒃ᙮ ᓂᓯᑐᑕᒧᐙᒃ ᐃᓴ ᑳᑎᐯᒋᑫᒡ ᐅᑎᓀᑕᒧᐎᓐ᙮

ᑫᑯ ᑮᐗᔥᑴᐲᓄᑕᑫᒃ ᐃᐃ ᔔᒥᓈᐳ, ᑭᑲᓂᔑᐗᓈᒋᐃᑎᓱᒻ᙮ ᐅᐅ ᑕᔥ ᐃᔑᒋᑫᒃ, ᐸᑭᑎᓂᒥᒃ ᑭᔐᒪᓂᑑ ᐅᑕᒑᑾᓐ ᒨᔕᒃ ᒋᒨᔥᑭᓀᔥᑲᐎᒥᓀᒃ᙮

ᐃᔑᑲᑲᓅᓂᑎᒃ ᐁᑭᑑᒪᑲᑭᓐ ᑭᒋᒪᓯᓇᐃᑲᓂ ᓂᑲᒧᓇᓐ, ᐊᓇᒥᐁᓂᑲᒧᓇᓐ ᑲᔦ, ᒋᐃᓇᐊᒧᐌᒃ ᑲᔦ ᑭᔐᒪᓂᑑ ᐅᑕᒑᑾᓐ ᑳᒦᓂᓀᒃ ᓂᑲᒧᓇᓐ, ᒋᓇᓂᑲᒧᔦᒃ, ᒋᓇᓂᑲᒧᑕᐌᒃ ᑳᑎᐯᒋᑫᒡ ᑭᑌᐃᐙᕽ᙮

ᒨᔕᒃ ᑲᔦ ᒦᑴᒋᐌᓂᒥᒃ ᑭᔐᒪᓂᑑ ᑳᐅᔫᓯᒫᐎᒡ, ᐌᑯᓀᓂᑯ ᐌᑎᓯᑯᔦᒃ ᐃᔑᒦᑴᒋᐌᓂᒥᒃ ᐅᑎᔑᓂᑳᓱᐎᓂᓃᕽ ᑳᑎᐯᒋᑫᓂᒡ X ᒋᓴᓲᓐ᙮

ᑲᔦ ᑕᔥ ᐸᑭᑎᓂᑎᓱᑲᑖᑎᒃ ᑳᑕᔑᔦᒃ ᐁᑯᑖᓀᓂᒣᒃ X᙮

ᑮᓇᐙ ᐐᐎᒫᒃ ᐸᑭᑎᓂᑎᓱᒃ ᒋᓇᐃᑕᐌᒀ ᑭᓈᐯᒥᐙᒃ ᑖᐱᔥᑰ ᑫᑑᑕᐌᑭᐸᓐ ᑳᑎᐯᒋᑫᒡ᙮

ᐋᓃᔥ ᐅᓈᐯᒥᒫ ᐅᓃᑳᓂᔥᑲᐙᓐ ᐐᐗᓐ ᑖᐱᔥᑰ X ᑳᐃᔑᓃᑳᓂᔥᑲᐙᒡ ᑳᒫᒪᐌᓄᓂᒡ ᐅᑕᓇᒥᐋᐞ, ᐐᓐ ᐋᓃᔥ ᐅᑮᐱᒫᒋᐋᐞ ᐃᐃ ᐅᑕᓇᒥᐋᐞ, ᒦ ᐃ ᐋᓃᔥ ᐃᐃ ᐅᐐᔭᐤ᙮

ᑖᐱᔥᑰ ᐅᑕᓇᒥᐋᒃ ᑳᐃᔑᐸᑭᑎᓂᑎᓱᑲᑕᐙᐙᒡ Xᑕᓐ, ᒦ ᓴ ᐯᔑᑾᓐ ᐐᐎᒫᒃ ᑫᑑᑕᐙᐙᐸᓐ ᐅᓈᐯᒥᐙᐞ ᒥᓯᐌ ᐱᑯ᙮

ᑮᓇᐙ ᑲᔦ ᐅᓈᐯᒥᒫᒃ, ᔕᐌᓂᒥᑾᒃ ᑭᐐᐎᐙᒃ ᑖᐱᔥᑰ X ᑳᑮᐃᔑᔕᐌᓂᒫᒡ ᑳᒫᒪᐐᓄᐋᒡ ᐅᑕᓇᒥᐋᐞ, ᐁᑮᐅᒋᐸᑭᑎᓇᕽ ᐅᐱᒫᑎᓯᐎᓐ ᑲᔦ᙮

ᒦ ᓴ ᑕᔥ ᑳᐅᒋᐸᑭᑎᓂᑎᓱᒡ, ᐁᐐᐅᓇᓵᒡ ᐅᑕᓇᒥᐋᐞ ᑭᔐᒪᓂᑑᓐ ᒋᑎᐱᓇᐌᐎᓯᓂᒡ, ᐁᑮᐋᐸᒋᑑᒡ ᐅᑎᑭᑐᐎᓐ, ᐁᑮᐃᔑᐯᑳᐹᐗᓈᒡ ᓂᐲᕽ,

ᐁᐐᐲᑕᒫᓱᒡ ᐃᐃ ᐅᑕᓇᒥᐋᐞ ᑖᐱᔥᑰ ᐁᐅᔥᑭᑴᐌᒡ ᐐᓐ ᐁᐐᐅᓈᐯᒥᒥᓐᒡ, ᐐᑫ ᒋᐯᑭᓈᑯᓯᓂᒡ ᐃᐃᒫ ᑳᐃᔑᐊᔮᒡ, ᑲᓇᑫ ᒋᐹᐹᑌᐎᓈᑯᓯᓯᓂᒃ, ᒋᐊᔫᓰᑭᓈᑯᓯᓯᓂᒃ ᑲᔦ, ᐐᑫ ᓴ ᒋᒥᓄᓈᑯᓯᓂᒡ᙮ ᒦᑕᔥ ᐁᔑᐊᑕᐌᓂᒫᒡ ᐐᓐ ᐁᑕ ᑯ ᐁᐐᑎᐱᓇᐌᐎᓯᒡ, ᑫᑰᓂᓂ ᑲᔦ ᒋᐃᔑᐊᓈᒣᑖᑯᓯᓯᓂᒃ᙮

ᒦᑕᔥ ᐁᔑᓈᑾᓂᓂᒃ ᐅᓈᐯᒥᒫᒃ ᒋᔕᐌᓂᒫᐙᐸᓐ ᐐᐎᐙᐞ ᑖᐱᔥᑰ ᑳᐃᔑᓵᑭᑑᐙᒡ ᐅᐐᔭᐎᐙᓐ᙮ ᐊᐊ ᓴ ᑳᔕᐌᓂᒫᒡ ᐐᐗᓐ, ᒦ ᓴ ᐊᐊᐌ ᑳᓵᑭᐃᑎᓱᒡ᙮

ᐋᓃᔥ ᑳᐐᓐ ᐊᐎᔭ ᐐᑳ ᐅᔒᑫᑕᓰᓐ ᐅᐐᔭᐤ᙮ ᐋᐱᒋ ᓴ ᐌᐌᓂ ᐊᔕᑎᓱ, ᐌᐌᓂ ᑲᔦ ᐅᓈᓈᑲᒋᑑᓐ ᐃᐃ ᐅᐐᔭᐤ᙮ ᒦᑕᔥ ᐁᑑᑕᐙᒡ X ᐅᑕᓇᒥᐋᐞ᙮

ᐋᓃᔥ ᑲᑭᓇ X ᐅᐐᔭᐎᕽ ᑭᑎᔑᑎᐯᑖᑯᓯᒥᓐ᙮

ᐅᐅ ᑕᔥ ᐃᔑᓯᓐ: ᒦᑕᔥ ᐅᐅ ᐃᓂᓂ ᑳᐅᒋᓇᑲᓈᒡ ᐅᑌᑌᓐ, ᐅᒫᒫᓐ ᑲᔦ ᒋᐐᒌᐙᒡ ᐃᓂ ᐐᐗᓐ᙮ ᐃᐃ ᐁᓃᔑᐙᒡ ᒦᑕᔥ ᐁᔑᓈᑯᓯᐙᒡ ᐁᐯᔑᑯᐙᒡ ᐐᔭᐎᐙᕽ᙮

ᐅᐅ ᑕᔥ ᑳᑮᑭᑫᒋᑳᑌᓯᓄᒃ ᐅᑖᓈᕽ, ᐋᐱᒋ ᑭᒋ ᐃᓀᑖᑾᓐ᙮ ᐅᐅ ᑕᔥ ᑳᑕᔑᑕᒫᓐ, ᐋᓃᓐ X ᐁᔑᐐᒌᐙᒡ ᐅᑕᓇᒥᐋᐞ᙮

ᑕᑲ ᑕᔥ ᑮᓇᐙ ᑳᑕᔑᔦᒃ ᔕᐌᓂᒥᑾᒃ ᑭᐐᐎᐙᒃ ᑖᐱᔥᑰ ᑳᐃᔑᓵᑭᐃᑎᓱᔦᒃ, ᑕᑲ ᑲᔦ ᐐᐎᒫᒃ ᐅᑲᑭᑌᓂᒫᐙᐞ ᐅᓈᐯᒥᐙᐞ᙮

ᑮᓇᐙ ᑕᔥ ᐊᐱᓅᒌᔕᒃ, ᓇᐃᑕᐎᑾᒃ ᑭᓃᑭᐃᑯᐙᒃ, ᐋᓃᔥ ᑳᑎᐯᒋᑫᒡ ᐅᑮᐃᔑᐅᓀᑖᓐ, ᐋᐱᒋ ᓴ ᑲᔦ ᐅᓂᔑᔑᓐ ᐃᐃ ᒋᐃᔑᒋᑫᔦᑭᐸᓐ᙮

ᑭᑌᓂᒥᑾᒃ ᑭᑌᑌᐙᒃ, ᑭᒫᒫᐙᒃ ᑲᔦ, ᒦᓴ ᐅᐅᐌ ᐸᔦᔥ ᐃᓈᑯᓂᑫᐎᓂᕽ ᑳᐃᔑᑕᔑᑌᒃ ᐊᔓᑕᒫᑫᐎᓐ:

ᐋᐱᒋ ᓴ ᑭᑲᒥᓄᓭᒻ, ᑭᓉᔥ ᑲᔦ ᑭᑲᐱᒫᑎᓯᒻ ᐅᐅᒫ ᐊᑮᕽ, ᐁᐃᔑᓯᕽ᙮

ᑮᓇᐙ ᐅᑌᑌᒫᒃ ᑫᑯ ᑲᑳᒋᐋᑫᒀᓂᒃ ᑭᓃᒑᓂᓯᐙᒃ ᒋᓂᔥᑳᑎᓯᐙᒡ᙮ ᐃᔑᐅᐱᑭᐃᑾᒃ, ᐃᔑᒫᒦᓄᒥᑾᒃ, ᐃᔑᑭᑭᓄᐊᒪᐎᑾᒃ ᑲᔦ ᒋᐃᔑᒋᑫᐙᒡ ᑳᑎᐯᒋᑫᓂᒡ ᑳᑮᐃᔑᐅᓇᒋᑫᓂᒡ᙮

ᑮᓇᐙ ᐅᐸᒦᑖᑫᒃ ᓇᐃᑕᐎᑾᒃ ᐃᑭ ᑳᐅᑑᑭᒫᒥᔦᒃ, ᐅᐅᒫ ᐊᑮᕽ ᑳᐊᔮᐙᒡ᙮ ᑭᑌᓂᒥᑾᒃ, ᑯᑖᓀᓂᒥᑾᒃ ᑲᔦ ᑌᐺ ᐃᐃᒫ ᑭᑌᐃᐙᕽ, ᒋᑑᑕᐌᒀ ᑖᐱᔥᑰ ᑳᑑᑕᐌᒃ X᙮

ᑳᐐᓐ ᐐᓀᑕ ᐁᑲᓇᐙᐸᒥᓀᒀ, ᒋᐃᔑᒋᑫᓯᐌᒃ ᐃᓂᓂᐗᒃ ᐁᑕ ᒋᒥᓍᐸᒥᓀᒀ᙮ ᐃᐃᒫ ᓴ ᑭᑌᐃᐙᕽ ᐃᔑᒋᑫᒃ ᑭᔐᒪᓂᑑ ᑳᐃᔑᐊᑕᐌᑕᕽ, ᐋᓃᔥ X ᑭᑕᓄᑮᑕᐙᐙ᙮

ᒌᑫᑕᒧᒃ ᐃᑕᔥ ᐃᐃ ᑳᐃᔑᐸᒦᑖᑫᔦᒃ, ᒋᐃᔑᒋᑫᔦᒃ ᑖᐱᔥᑰ ᑳᑎᐯᒋᑫᒡ ᐁᐊᓄᑮᑕᐌᒃ, ᑳᐐᓐ ᐐᓐ ᐃᓂᓂᐗᒃ᙮

ᑭᑫᑕᒧᒃ ᐃᑕᔥ ᐅᐅ, ᐋᓃᓐ ᓴ ᑯ ᐊᐎᔭ ᐁᔑᒥᓄᑑᑕᕽ, ᑳᑎᐯᒋᑫᓂᒡ ᓴ ᐅᑲᑮᐌᑑᑖᑰᓐ, ᑯᒫ ᑲᔦ ᐁᓄᑮᑕᒫᑫᑴᓐ ᐁᑎᐯᓂᑎᓱᓯᒃ, ᑯᒫ ᑲᔦ ᑌᐯᓂᑎᓱᑴᓐ᙮

ᑮᓇᐙ ᑕᔥ ᑳᐅᑭᒫᐎᔦᒃ, ᒦ ᓴ ᐯᔑᑾᓐ ᑑᑕᐎᑾᒃ ᑳᐊᓄᑮᑕᒪᐎᓀᒀ᙮ ᑫᑯ ᑲᔦ ᑲᑴᓭᑭᒫᑫᒀᓂᒃ, ᐋᓃᔥ ᐅᑑᑭᒫᒥᐙᓐ ᑲᔦ ᑮᓇᐙ ᑕᔥ ᑭᑑᑭᒫᒥᐙ ᑭᒋᑮᔑᑯᕽ ᐊᔮ᙮ ᑲᑭᓇ ᓴ ᐊᐎᔭᓐ ᐯᔑᑾᓐ ᐅᑎᓀᓂᒫᓐ᙮

ᒦᑕᔥ ᐅᐅ ᐃᔥᒀᒡ ᐙᐃᓂᓇᑰᒃ, ᑳᑎᐯᒋᑫᒡ ᐅᑭᒋᒪᔥᑲᐎᓰᐎᓂᕽ, ᒦᐃᒫ ᐅᑎᓇᒧᒃ ᑭᒪᔥᑲᐎᓰᐎᓂᐙ᙮

ᐱᓯᑲᒧᐙᒃ ᑕᔥ ᒥᓯᐌ ᐱᑯ ᑭᔐᒪᓂᑑ ᑳᒦᓂᓀᒃ ᒦᑳᓱᐎ ᑭᑭᔥᑭᑲᓐ, ᒋᑲᔥᑭᑑᔦᒃ ᒋᐅᒋᒪᔥᑲᐎᑳᐸᐐᑕᐌᒃ ᒪᒋᐊᔭᐋ, ᐃᓂ ᑲᔦ ᐅᑲᑲᔦᓂᓯ ᐃᔑᒋᑫᐎᓇᓐ᙮

ᑳᐐᓐ ᐄᑐᒃ ᐅᐐᔭᐎᓰᐗᒃ ᐃᑭ ᑳᒦᑳᓂᓇᒀ, ᐋᓃᔥ ᐊᒑᑯᐎᐗᒃ ᑳᐅᑭᒫᑲᑖᑫᐙᒡ, ᑳᑲᔥᑭᐁᐎᓯᐙᒡ ᑲᔦ, ᐃᑭ ᑲᔦ ᑳᑎᐯᑕᒧᐙᒡ ᓅᑯᒻ ᑳᑲᔥᑮᑎᐱᑫᑖᑾᓂᓂᒃ ᐊᑮᓂ, ᐃᑭ ᑲᔦ ᒪᒋᐊᒑᑾᒃ ᑳᒪᒋᓅᒋᒋᑫᐙᒡ ᐯᐸᑳᓐ ᐊᔮᐎᓂᕽ ᑮᔑᑯᕽ ᑳᐃᔑᐊᔭᔮᐙᒡ᙮

ᐅᑖᐱᓇᒧᐙᒃ ᐃᑕᔥ ᑲᑭᓇ ᑭᔐᒪᓂᑑ ᒦᑳᓱᐎ ᑭᑭᔥᑭᑲᓇᓐ ᑳᒦᓂᓀᒃ ᒋᒥᓯᐌ ᐋᑰᔥᑳᑯᔦᒃ, ᒋᑲᔥᑭᑑᔦᒃ ᒋᓇᓈᑸᔦᒃ ᐊᐲ ᑮᔑᑲᒃ ᒪᒋᑫᑰᓐ ᓅᒋᐃᑯᔦᒃ, ᑲᑭᓇ ᑲᔦ ᑫᑰᓐ ᒋᐃᔑᒋᑫᔦᒃ ᒋᒪᔥᑲᐎᑳᐸᐎᔦᒃ᙮

ᒪᔥᑲᐎᑳᐸᐎᒃ ᐃᑕᔥ ᐐᑫ, ᐁᑭᒋᐱᓱᔦᒃ ᐃᐃ ᑌᐺᐎᓐ, ᐁᑭᑭᔥᑲᒣᒃ ᑲᔦ ᐃᐃ ᑾᔭᒀᑎᓯᐎᓐ ᑖᐱᔥᑰ ᐃᐃ ᐲᐙᐱᒃ ᔑᒫᑲᓂᔕᒃ ᑳᐱᓯᑲᒧᐙᒡ ᐅᑳᑭᑲᓂᐙᕽ᙮

ᒨᔕᒃ ᐊᔓᐎᓯᒃ ᒋᐐᑕᒫᑫᔦᒃ ᒥᓍᒋᒧᐎᓐ ᑳᐃᔑᑕᔑᑌᒃ ᑫᔑᐱᓵᓂᐐᒌᐎᓐᒡ ᑭᔐᒪᓂᑑ, ᒦ ᐃ ᐃᓇᑭᓯᓀᒃ᙮

ᐅᐅ ᑕᔥ ᒫᐗᒡ ᐃᑯ ᐃᔑᒋᑫᒃ: ᐅᑖᐱᓇᒧᒃ ᐃᐃ ᑌᐺᔦᑕᒧᐎᓐ, ᒋᐅᓇᑳᐃᑲᓂᔦᒃ, ᒋᑲᔥᑭᑑᔦᒃ ᒋᐋᑕᐌᐊᒧᐌᒃ ᑲᑭᓇ ᑳᐃᔥᑯᑌᐗᓂᓂᑭᓐ ᒪᒋᐊᔭᐋ ᐅᐱᑾᑰᓐ ᑳᐱᒧᓀᒃ᙮

ᐱᒫᒋᐃᑰᐎᓐ ᑕᔥ ᑲᔦ ᐱᓯᑲᒧᒃ ᒋᐅᒦᑳᓱᐙᓄᒀᓂᔦᒃ᙮ ᑕᑲ ᑕᔥ ᑲᔦ ᑭᔐᒪᓂᑑ ᐅᑎᑭᑐᐎᓐ ᐅᐸᔑᐸᐃᑫᐎᑯᒫᓂᒃ, ᐅᑕᒑᑾᓐ ᑳᒦᓂᒥᓀᒃ᙮

ᑭᔐᒪᓂᑑ ᑕᔥ ᐅᑕᒑᑾᓐ ᑳᐃᔑᐐᒋᐃᒥᓀᒃ ᒨᔕᒃ ᐊᓇᒥᐋᒃ ᐁᑲᑴᑗᔦᒃ ᑫᑰᓐ ᐱᑯ᙮ ᐅᐅ ᑕᔥ ᐁᐃᔑᒋᑫᔦᒃ, ᒨᔕᒃ ᐊᔕᐙᐱᒃ, ᑫᑯ ᑲᔦ ᐸᑭᒌᑫᒃ ᐁᐊᓇᒥᐋᔦᒃ, ᐁᐊᓇᒥᐁᑕᒪᐎᒣᒃ ᑲᑭᓇ ᑭᔐᒪᓂᑑ ᐅᐱᒫᑎᓰᒪᐞ᙮

ᐊᓇᒥᐁᑕᒪᐎᔑᒃ ᐃᑕᔥ ᑭᔐᒪᓂᑑ ᒋᒦᔑᒡ ᑾᔭᒃ ᐃᑭᑐᐎᓇᓐ ᑫᐋᐸᒋᑖᐗᒃ ᐊᐲ ᑮᑭᑐᐗᒃ, ᒋᓲᑭᑌᐁᐗᒃ ᒋᑕᔑᑕᒧᐗᒃ ᑳᑮᐱᑭᑫᒋᑳᑌᓯᓂᓂᒃ ᑌᐺᐎᓐ ᑳᑕᔑᑌᓂᒃ ᐃᐃᒫ ᒥᓍᒋᒧᐎᓂᕽ᙮

ᒦ ᓴ ᑕᔥ ᑳᐅᒋᒫᒫᒋᑾᐱᓱᔮᓐ, ᐁᑮᑭᑑᑕᒫᑫᐎᓂᓃᐎᔮᓐ ᐁᐊᓄᑮᑕᐗᒃ ᑳᑎᐯᒋᑫᒡ, ᐅᐅ ᑲᔦ ᑳᑕᔑᑕᒫᓐ ᒥᓍᒋᒧᐎᓐ, ᒋᓲᑭᑌᐁᔮᓐ ᒋᐃᑭᑐᔮᓐ ᐋᓃᓐ ᑳᐃᔑᐊᑕᐌᑖᑯᓯᔮᓐ᙮

ᑎᑭᑲᔅ ᑳᓵᑭᐊᑭᒡ ᓃᑕᓇᒥᐋᓈᓐ, ᐋᐱᒋ ᑲᔦ ᑳᑌᐺᔦᑖᑯᓯᒡ ᑳᐊᓄᑮᑕᐙᒡ ᑲᔦ ᑳᑎᐯᒋᑫᓂᒡ, ᑭᑲᐐᑕᒫᑯᐙ ᑲᑭᓇ ᑫᑰᓂᓂ ᒋᑭᑫᓂᒥᔦᒃ ᐋᓃᓐ ᐁᔑᐌᐱᓯᔮᓐ, ᐋᓃᓐ ᑲᔦ ᐁᔑᐊᔮᔮᓐ᙮

ᒦ ᓴ ᑕᔥ ᐃᐃ ᑳᑮᐅᒋ ᐃᔑᓂᔕᐗᒃ ᐌᑎ ᑳᐃᔑᐊᔮᔦᒃ, ᒋᐐᑕᒪᐎᓀᒃ ᐋᓃᓐ ᑲᑭᓇ ᐁᔑᐊᔮᐗᑭᒡ ᑲᔦ ᑮᓇᐙ ᒋᒪᔥᑲᐌᑕᒣᒃ᙮

ᑲᑭᓇ ᑳᐐᒋᑌᐺᑕᒨᒥᑣ, ᑕᑲ ᑭᔐᒪᓂᑑᓐ ᑳᐅᔫᓯᒥᒥᓐᒡ, ᑳᑎᐯᒋᑫᓂᒡ ᒋᓴᔅ Xᑕᓐ ᑲᔦ ᐅᑲᒦᓂᑯᐙᓐ ᐱᓵᓀᑕᒧᐎᓂᓂ, ᓵᑭᐃᐌᐎᓂᓂ ᑳᑕᑯᓯᓂᓂᒃ ᑌᐺᔦᑕᒧᐎᓂᓂ᙮

ᑕᑲ ᑭᔐᒪᓂᑑᓐ ᐅᑭᔐᐙᑎᓯᐎᓂᓂ ᐅᑲᐐᒌᐎᑯᓈᐙ ᑲᑭᓇ ᑳᓵᑭᐋᐙᒡ ᑳᑎᐯᒋᑫᓂᒡ ᒋᓴᔅ Xᑕᓐ, ᐐᑳ ᐅᓵᑭᐃᐌᐎᓂᐙ ᑳᓂᐴᒪᑲᓯᓂᓂᒃ᙮