ᓃᓐ ᑆᓬ ᑳᐅᔑᐲᐊᒪᐎᓇᑰᒃ᙮ ᑳᐐᓐ ᐃᓂᓂ ᓂᑮᑲᓅᓂᑯᓰ, ᑳᐐᓐ ᑲᔦ ᐃᓂᓃᑳᕽ ᓂᑮᐅᒋ ᐃᓀᑖᑯᓯᓰ ᐃᔑᓂᔕᐙᑲᓐ ᒋᑎᓄᐎᔮᓐ᙮ ᑭᔐᒪᓂᑑ ᐅᔕ, ᐃᓂ ᑲᔦ ᐅᑯᓯᓴᓐ ᒋᓴᔅ Xᑕᓐ ᑳᑮᑮᐌᐱᒫᑎᓯᐋᒡ ᑳᑮᓂᐳᓂᐸᓐ, ᓂᑮᑲᓅᓂᑰᒃ᙮

ᑲᑭᓇ ᓴ ᓃᒋᐅᑌᐺᑕᒨᒃ ᐅᐅᒫ ᑳᐊᔮᐙᒡ ᑭᑕᑯᐴᔔᐃᑯᐙᒃ᙮ ᑮᓇᐙ ᐅᑌᐺᑕᒨᒃ ᐌᑎ ᑳᐊᔮᔦᒃ ᑲᓬᐁᔑᔭ ᐊᑮᕽ ᐯᐸᑳᓐ ᑳᐃᔑᒫᒫᐗᒋᐃᑎᔦᒃ ᑭᑑᔑᐲᐊᒪᐎᓂᓂᒻ᙮

ᑕᑲ ᑭᔐᒪᓂᑑ ᑳᐅᔫᓯᔭᕽ, ᑳᑎᐯᒋᑫᒡ ᑲᔦ ᒋᓴᔅ X, ᑭᑲᒦᓂᑯᐙ ᑭᔐᐙᑎᓯᐎᓐ, ᐱᓵᓀᑕᒧᐎᓐ ᑲᔦ᙮

X ᑕᔥ ᐁᑮᓇᐃᑕᐙᒡ ᑭᑭᔐᒪᓂᑑᒥᓈᓂᓐ ᑳᐅᔫᓯᒥᒪᕽ ᑳᑮᐅᒋᐸᑭᑎᓇᕽ ᐅᐱᒫᑎᓯᐎᓐ ᑭᒪᒋᑑᑕᒧᐎᓂᓈᓂᓐ ᑮᓇᐎᓐᑦ ᐅᒋ ᒋᔖᐾᐗᕽ ᐅᐅᒫ ᑳᐃᔑᒪᒋᓈᑾᓂᓂᒃ ᐅᐅ ᓅᑯᒻ ᑳᐱᒥ ᐃᔑᐌᐸᒃ ᐊᑭ᙮

ᑕᑲ ᑭᔐᒪᓂᑑ ᑕᑭᒋ ᐃᓀᑖᑯᓯ ᐊᐸᓀ ᐱᔑᔑᒃ᙮ ᐁᒣᓐ!

ᐋᐱᒋ ᓴ ᑭᑯᔥᑯᐎᔑᒻ ᐃᐃ ᑳᑮᐃᔑᒋᑫᔦᒃ! ᐋᐱᒋ ᐐᐸ ᐁᓇᑲᓀᒃ ᐊᐊ ᑭᔐᒪᓂᑑ ᑳᑮᑲᓅᓂᓀᒃ ᐃᐃᒫ Xᑕᓐ ᑳᐃᔑᑭᔐᐙᑎᓯᓂᒡ, ᐸᑳᓐ ᑕᔥ ᒥᓍᒋᒧᐎᓐ ᐁᐅᑖᐱᓇᒣᒃ!

ᑫᑫᑦ ᓴ, ᑳᐐᓐ ᑯᑕᒃ ᒥᓍᒋᒧᐎᓐ ᐊᔮᓯᓅᓐ! ᑭᐐᑕᒪᐎᓂᓂᒻ ᑕᔥ ᐁᐊᔮᐙᒡ ᐯᒫᑎᓯᐙᒡ ᐁᑲᑴᐗᓂᔥᑴᐃᓀᒀ, ᐁᑲᑴᐋᒋᑑᐙᒡ ᑲᔦ ᐃᐃᐌᓂ Xᑕᓐ ᐅᒥᓍᒋᒧᐎᓂᓂ!

ᑮᔥᐱᓐ ᑕᔥ ᓃᓇᐎᓐᑦ ᐸᑳᓐ ᐃᓉᑑᔮᕽ ᑯᒫ ᑲᔦ ᒥᓴᐙ ᑯ ᐁᒐᓬ ᑭᒋᑮᔑᑯᕽ ᐱᐅᒌᒡ ᐸᑳᓐ ᑕᔥ ᐃᓉᑑᒡ ᐃᐃ ᒥᓍᒋᒧᐎᓂᓂ ᐋᔕ ᑳᑮᐐᑕᒫᑰᔦᒃ, ᑕᑲ ᑕᓂᔑᐗᓈᑎᓯᐗᒃ ᓂᑲᐃᑰᒥᓐ᙮

ᐋᔕ ᑕᔥ ᐅᐅ ᐁᑮᐃᑭᑐᔮᓐ, ᒦᓇᐙ ᑕᔥ ᓂᐐᐃᑭᑦ: ᑮᔥᐱᓐ ᓴ ᐊᐎᔭ ᑲᑮᑭᒥᓀᒃ ᐸᑳᓐ ᑕᔥ ᐃᓉᑑᒡ ᐃᐃ ᐋᔕ ᑳᑮᐅᑖᐱᓇᒣᒃ ᒥᓍᒋᒧᐎᓂᓂ, ᑕᑲ ᑕᐃᓇᑭᒫ ᒋᓂᔑᐗᓈᑎᓯᒡ᙮

ᒦ ᓇ ᐃ ᐁᓂᑖᑯᓯᔮᓐ ᑖᐱᔥᑰ ᐁᐊᑕᐌᓂᒪᒃ ᐃᓂᓂ ᒋᒥᓍᐸᒥᒡ? ᑳᐐᓐ! ᑭᔐᒪᓂᑑ ᐅᔕ ᓂᓇᑕᐌᓂᒫ ᒋᒥᓍᐸᒥᒡ᙮ ᒦ ᓇ ᐃ ᐁᔑᓈᑯᓯᔭᓐ ᐁᑲᑴᐃᔑᒋᑫᔮᓐ ᐃᓂᓂ ᒋᒥᓍᐸᒥᒡ? ᑮᔥᐱᓐ ᓴ ᐃ ᐃᔑᒋᑫᔮᐹᓐ, ᑳᐐᓐ ᐄᓴᓐ X ᓂᑖᐊᓄᑮᑕᐙᓰ᙮

ᓃᑕᓇᒥᐋᒃ! ᑭᐐᑕᒪᐎᓂᓂᒻ ᑕᔥ, ᐃᐃ ᓴ ᒥᓍᒋᒧᐎᓐ ᑳᑲᑮᒀᑕᒫᓐ ᑳᐐᓐ ᐃᓂᓃᑳᕽ ᑮᐅᒌᓯᓅᓐ᙮

ᑳᐐᓐ ᑲᔦ ᐃᓂᓃᑳᕽ ᓂᑮᐅᑎᓇᓰᓐ, ᑳᐐᓐ ᑲᔦ ᐊᐎᔭ ᐃᓂᓂ ᓂᑮᑭᑭᓄᐊᒫᑯᓰ᙮ ᒋᓴᔅ X ᐅᔕ ᐐᓐ ᐃᑯ ᓂᑮᐙᐸᑕᐃᒃ᙮

ᐋᔕ ᐄᑐᒃ ᑭᑮᓅᑖᒻ ᐋᓃᓐ ᑳᐃᔑᐱᒫᑎᓯᔮᓐ, ᐋᐱᒋ ᐌᐌᓂ ᐁᑮᐱᒥᓂᔕᐊᒫᓐ ᐃᐃ ᒎᐎ ᐊᓇᒥᐁᒋᑫᐎᓐ᙮ ᐋᐱᒋ ᑲᔦ ᐁᑮᒪᓈᒋᐋᓯᐗᒀ ᐁᑮᑲᒀᑕᑭᐊᒀ ᐅᑌᐺᑕᒨᒃ ᑳᐃᔑᐊᔫᑯᐊᔮᐙᒡ ᑳᑎᐯᓂᒥᑯᐙᒡ ᑭᔐᒪᓂᑑᓐ, ᐁᑮᑲᑴᓂᔑᐗᓈᒋᐊᒀ ᑲᔦ᙮

ᐃᑭ ᑲᔦ ᓃᒋ ᒎᐗᒃ ᑳᑮᐐᒋᐊᐲᑖᑎᓰᒪᒀ, ᓇᐗᒡ ᓃᓐ ᐊᐗᔑᒣ ᓂᑮᐃᔑᒋᑫ ᐁᑮᑑᑕᒫᓐ ᐃᐃ ᒎᐎ ᐊᓇᒥᐁᒋᑫᐎᓐ᙮ ᓇᐗᒡ ᓃᓐ ᑲᔦ ᓂᑮᑭᒋ ᐃᓀᑖᓇᓐ ᐃᓂ ᑳᑮᐃᔑᑣᐙᒡ ᐃᑭ ᒣᐎᔕ ᑳᑮᐱᒫᑎᓯᐙᒡ᙮

ᑭᔐᒪᓂᑑ ᑕᔥ ᐅᑭᔐᐙᑎᓯᐎᓂᕽ ᓂᑮᐅᒋᐅᓀᓂᒥᒃ ᒋᑆ ᓂᑖᐎᑭᔮᓐ, ᐅᑭᔐᐙᑎᓯᐎᓂᕽ ᑲᔦ ᓂᑮᐅᒋᑲᓅᓂᒃ ᒋᐊᓄᑮᑕᐗᒃ, ᐁᑮᐃᓀᑕᕽ ᑕᔥ ᑲᔦ ᓂᐱᒫᑎᓯᐎᓂᕽ ᒋᐙᐸᒥᒥᓐᒡ ᐃᓂ ᐅᑯᓯᓴᓐ,

ᐁᑮᐃᓀᑕᕽ ᑲᔦ ᒋᐐᑕᒪᐎᒪᒃ ᐃᐃ ᐁᑳ ᑳᒎᐎᐎᓯᓂᒃ ᒋᑕᔑᑕᒪᐎᒪᒃ ᐃᐃ ᒥᓍᒋᒧᐎᓐ, ᒋᑕᔑᒥᒪᒃ ᐃᓂ ᑭᔐᒪᓂᑑ ᐅᑯᓯᓴᓐ᙮ ᐊᐲ ᑕᔥ ᑳᑮᐙᐸᒥᒪᒃ ᑳᐐᓐ ᐊᐎᔭ ᓂᑮᓈᓯᑲᐙᓰ ᒋᐐᑕᒪᐎᒡ ᐋᓃᓐ ᑫᐃᔑᒋᑫᔮᓐ᙮

ᑳᐐᓐ ᑲᔦ ᒉᕒᐆᓴᓬᐊᒥᕽ ᓂᑮᐃᔖᓰ ᒋᐊᑕᐙᐸᒪᒀ ᐃᑭ ᐃᔑᓂᔕᐙᑲᓇᒃ ᐋᔕ ᒣᐎᔕ ᑳᑮᐱᐅᒋ ᐃᓇᓄᑮᐙᒡ᙮ ᑕᑾᒡ ᑕᔥ ᐱᑾᑕᑲᒥᒃ ᐊᕒᐁᐱᔭ ᐊᑮᕽ ᑳᐃᔑᓂᑳᑌᒃ ᓂᑮᐃᔖ᙮ ᒦᑕᔥ ᑳᐃᔑᑮᐌᐃᔖᔮᓐ ᒦᓇᐙ ᑎᒫᔅᑲᔅ ᐆᑌᓈᕽ ᐁᑮᐃᔖᔮᓐ᙮

ᐹᓂᒫ ᑕᔥ ᓂᓱᐱᐴᓐ 3 ᐁᑮᐃᔑᓭᒃ ᒉᕒᐆᓴᓬᐊᒥᕽ ᓂᑮᐃᔖ, ᐁᑮᐊᑕᐙᐸᒪᒃ ᐲᑕᕒ ᐁᐐᑭᑫᓂᒪᒃ᙮ ᒥᑖᔑᓈᓄᑮᔑᒃ 15 ᑕᔥ ᓂᑮᐐᒋᐊᔮᒫ᙮

ᑳᐐᓐ ᑕᔥ ᑯᑕᒃ ᐃᔑᓂᔕᐙᑲᓇᒃ ᓂᑮᐙᐸᒫᓰᒃ, ᒦ ᐁᑕ ᑯ ᒌᒥᔅ ᑳᑎᐯᒋᑫᒡ ᐐᒋᑭᐌᔭᓐ ᑳᐙᐸᒪᒃ᙮

ᑌᐺ ᐅᔕ ᐅᐅ ᑳᐃᔑᐲᐊᒪᐎᓇᑰᒃ᙮ ᑭᔐᒪᓂᑑ ᓂᑭᑫᓂᒥᒃ ᐁᑮᐗᓂᒧᓯᐙᓐ᙮

ᓈᓈᑫ ᑕᔥ ᐌᑎ ᓂᑮᐊᓂ ᐃᔖ ᓰᕒᐃᔭ ᐊᑮᕽ ᔑᑾ ᓯᓬᐃᔑᔭ ᐊᑮᕽ᙮

ᑳᐐᓐ ᑕᔥ ᐌᐌᓂ ᐃᐃ ᐊᐲ ᓂᑮᑭᑫᓂᒥᑯᓰᒃ ᑳᑌᐺᑕᐙᐙᒡ Xᑕᓐ ᐌᑎ ᒎᑏᔮᑳᕽ ᐯᐸᑳᓐ ᑳᐃᔑᐊᔫᑸᓄᐙᒡ᙮

ᐃᐃᒫ ᑕᔥ ᐁᑕ ᑳᑮᐃᓈᒋᒥᑰᐗᒃ ᓂᑮᐅᒋᑭᑫᓂᒥᑰᒃ᙮ ᒦᑕᔥ ᐅᐅ ᑳᑮᐃᓈᒋᒥᑰᔮᓐ: ᐊᐊ ᓴ ᐃᓂᓂ ᑳᑮᑲᒀᑕᑭᐃᓇᕽ, ᓅᑯᒻ ᐅᐸᐹᑕᔑᑖᓐ ᐃᐃ ᑌᐺᑕᒧᐎᓂᓂ ᑳᑮᑲᑴᓂᔑᐗᓈᒋᑑᐸᓐ᙮

ᒦᑕᔥ ᐃᐃᒫ ᑳᐃᔑᒦᑴᒋᐌᓂᒫᐙᒡ ᑭᔐᒪᓂᑑᓐ ᐃᐃ ᑳᑮᑑᑕᐎᒥᒡ ᐃᐃᒫ ᓂᐱᒫᑎᓯᐎᓂᕽ᙮

ᒥᑖᔑᓃᐎᐱᐴᓐ 14 ᑕᔥ ᐁᑮᐊᓂ ᐃᔑᓭᒃ ᓂᑮᑮᐌᐃᔖ ᐌᑎ ᒉᕒᐆᓴᓬᐊᒥᕽ ᙮ ᐹᕒᓇᐸᔅ ᓴ ᓂᑮᐐᒌᐙ, ᑕᐃᑕᔅ ᑲᔦ ᓂᑮᑕᑯᐐᒌᐙᓈᓐ᙮

ᑭᔐᒪᓂᑑ ᑕᔥ ᐁᑮᐙᐸᑕᐃᒡ ᒋᐃᔖᐗᒃ ᑳᑮᐅᒋ ᐃᔖᐗᒃ᙮ ᓂᑮᑮᒨᒋᓇᑭᔥᑲᐙᒃ ᑕᔥ ᐃᑭ ᐅᓃᑳᓂᓰᒃ ᐁᑮᐐᑕᒪᐗᒀ ᐋᓃᓐ ᒪᔮ ᑳᐃᔑᑲᑮᑭᒪᒃ ᐃᐃ ᐁᑳ ᑳᒎᐎᐎᓯᓂᒃ, ᐁᑮᑕᔑᑕᒪᐎᒪᒃ ᐃᐃ ᒥᓍᒋᒧᐎᓂᓂ᙮ ᐋᓃᔥ ᓂᑮᓇᓃᓵᓀᑖᓐ ᐃᐃ ᐅᑖᓈᕽ ᑳᑮᐃᓇᓄᑮᔮᓐ ᓅᑯᒻ ᑲᔦ ᑳᐃᔑᒋᑫᔮᓐ, ᐁᑳ ᑫᑰᓐ ᒋᐅᒌᓯᓄᒃ᙮

ᐊᐊ ᑕᔥ ᑕᐃᑕᔅ ᑳᑮᐐᒌᐗᒃ ᑲᕒᐄᒃ ᑮᑎᓄᐎ᙮ ᑳᐐᓐ ᑕᔥ ᑮᑲᑳᒋᐋᓰ ᒋᑭᑭᓇᐙᑕᔕᑫᔑᑲᓂᐎᒡ᙮

ᐋᓂᑕ ᓴ ᐋᓇᑮᐃᓀᑕᒨᒃ ᐃᐃ ᒋᑮᐃᔑᐃᒥᑎᐸᓐ᙮ ᐃᑭ ᑕᔥ ᐃᓂᓂᐗᒃ ᐁᑮᐊᓇᒥᐁᑳᓱᐙᒡ ᓂᑮᐐᒌᐎᑯᓈᓂᒃ ᐁᑮᑮᒨᒋᐲᑎᑲᓂᑎᓱᐙᒡ, ᐁᑮᑮᒨᒋᓈᓈᑲᒋᐃᓇᑭᑣ ᐁᑮᑲᑴᒥᑲᒧᐙᒡ ᐋᓃᓐ ᐁᔑᑎᐯᓂᒥᑯᓯᐙᕽ ᐃᐃ ᒨᓯᔅ ᐅᑑᓇᔓᐌᐎᓐ, ᐋᓃᔥ X ᒋᓴᓲᓐ ᑳᐋᐸᐅᒥᔭᒥᓐᒡ ᓂᐐᒌᐎᑯᓈᓂᓐ᙮ ᒦᑕᔥ ᐃᐃ ᑳᑮᐅᒋ ᐃᔑᒋᑫᐙᒡ ᐁᑮᐊᑕᐌᓂᒪᑭᑣ ᒦᓇᐙ ᒋᑎᐯᓂᒥᑯᔮᕽ ᐅᓇᔓᐌᐎᓂᓂ᙮

ᑳᐐᓐ ᑕᔥ ᓂᑮᐸᑭᑎᓂᑎᓱᓰᒥᓐ ᐃᐃ ᒋᐃᔑᓭᔮᕽ᙮ ᑳᐐᓐ ᐃᑯ ᐯᔑᑯᑎᐸᐃᑲᓀᔅ ᓂᑮᐱᓯᑕᐙᓯᐙᓈᓂᒃ᙮ ᒦᑕᔥ ᐃᐃ ᑳᑮᐅᒋ ᐃᔑᒋᑫᔮᕽ: ᐃᐃ ᒥᓍᒋᒧᐎᓐ ᑳᐃᔑᑌᐺᒪᑲᒃ ᓂᑮᐊᑕᐌᑖᒥᓐ ᑫᔮᐱ ᒋᐐᒌᐎᑯᔦᒃ᙮

ᐃᑭ ᑕᔥ ᑳᐃᓂᑣ ᐁᓃᑳᓀᑖᑯᓯᐙᒡ – ᒦ ᐅᐅ ᑕᔥ ᑳᐅᒋ ᐃᑭᑐᔮᓐ, ᑳᐐᓐ ᓃᓐ ᑫᑰᓐ ᓂᑎᓀᓂᒫᓰᒃ ᐋᓃᓐ ᑳᑎᓄᐎᐙᒡ, ᐋᓃᔥ ᑭᔐᒪᓂᑑ ᑳᐐᓐ ᐅᑎᔑᑲᓇᐙᐸᒫᓰᓐ ᐊᐎᔭᓐ ᐋᓃᓐ ᐁᔑᓈᑯᓯᓂᒡ ᓵᑭᒐᔭᐄ – ᐃᑭ ᑳᓃᑳᓀᑖᑯᓯᐙᒡ ᑳᐐᓐ ᐊᐗᔑᒣ ᑫᑰᓐ ᓂᑮᒦᓂᑯᓰᒃ ᑫᑭᑭᓄᐊᒫᑫᔮᓐ᙮

ᔖᑰᒡ ᑕᔥ ᐅᑮᐙᐸᑖᓈᐙ ᐁᑮᒦᓂᑰᐗᒃ ᒋᐐᑕᒫᑫᔮᓐ ᒥᓍᒋᒧᐎᓂᓂ, ᒋᑲᑮᑭᒥᒪᒃ ᐃᐃ ᐁᑳ ᑳᒎᐎᐎᓯᓂᒃ, ᑖᐱᔥᑰ ᑫᐐᓐ ᐲᑕᕒ ᑳᑮᐃᔑᒦᓂᓐᒡ ᒋᐐᑕᒫᐙᒡ ᒥᓍᒋᒧᐎᓂᓂ ᐃᐃ ᒎᐗᐞ᙮

ᑭᔐᒪᓂᑑ ᐅᔕ ᐅᒪᔥᑲᐎᓰᐎᓂᕽ ᐃᔑᓂᔕᐙᑲᓐ ᑳᐅᒋᑎᓄᐎᔮᓐ, ᒋᓈᓯᑲᐗᒀ ᐃᑭ ᐁᑳ ᑳᒎᐎᐎᓯᒀ, ᑖᐱᔥᑰ ᑫᐐᓐ ᐲᑕᕒ ᐃᔑᓂᔕᐙᑲᓐ ᑳᑮᐅᒋᑎᓄᐎᒡ ᒋᑲᑮᑭᒫᒡ ᐃᐃ ᒎᐗᐞ᙮

ᒌᒥᔅ, ᐲᑕᕒ, ᒞᓐ ᑳᐃᓇᑭᒥᑣ ᐁᓃᑳᓃᐙᒡ ᐅᑮᓂᓯᑖᐎᓈᓈᐙ ᑭᔐᒪᓂᑑᓐ ᑳᑮᐃᔑᔕᐌᓂᒥᒥᒡ᙮ ᓂᑮᐅᒋ ᓴᑭᓂᒌᓂᑯᓈᓂᒃ ᐃᑕᔥ ᐹᕒᓇᐸᓴᓐ ᑫᓃᓐ, ᐁᐐᓈᑯᑑᐙᒡ ᐁᐐᐐᑕᓄᑮᑎᔮᕽ᙮ ᒦᑕᔥ ᑲᑭᓇ ᑳᐃᓀᑕᒫᕽ ᓃᓇᐎᓐᑦ ᐹᕒᓇᐸᔅ ᒋᑕᓇᓄᑮᔮᕽ ᐁᑳ ᑳᒎᐎᐎᓯᓂᒃ ᑳᐃᔑᔭᔮᓂᒡ, ᑫᐐᓇᐙ ᑕᔥ ᒎᐗᐞ ᑳᐃᔑᔭᔮᓂᒡ᙮

ᒦᑕᔥ ᐁᑕ ᑳᐃᔑᐸᑯᓭᓂᒥᓇᑭᑣ ᒋᒫᒥᑲᐎᓄᑕᐎᒪᑭᒡ ᐃᐃ ᑳᑭᑎᒫᑭᓯᓂᒡ ᐅᑌᐺᑕᒨᐞ ᑳᑮᐊᔮᓂᒡ ᑳᑮᐃᔑᐊᔮᐙᒡ᙮ ᒦᑕᔥ ᐃᐃᐌ ᒫᐗᒡ ᐃᑯ ᑳᑮᐊᑕᐌᑕᒫᓐ ᐁᐐᐃᔑᒋᑫᔮᓐ᙮

ᐊᐲ ᑕᔥ ᐲᑕᕒ ᑮᐱᑕᑯᔑᕽ ᐃᐃᒫ ᐁᑎᔮᑯᑳᕽ, ᓂᑮᑭᒋᓅᒋᐋ᙮ ᑲᑭᓇ ᑕᔥ ᐊᐎᔭᒃ ᑮᓅᑕᒨᒃ᙮ ᐋᓃᔥ ᑮᓈᑾᓂᓂ ᐐᓐ ᓭᓯᒃ ᐁᑮᐃᔑᒋᑫᓯᒃ᙮

ᒦᑕᔥ ᐅᐅ ᐲᑕᕒ ᑳᐃᔑᒋᑫᒡ: ᒋᑆ ᑕᑯᔑᓂᓂᒡ ᑕᔥ ᐃᐃ ᐃᓂᓂᐗᐞ ᒌᒥᔅ ᑳᑮᐲᒋᓂᔕᐙᒡ, ᐲᑕᕒ ᐱᓵᓂᑯ ᐅᑮᐐᒋᐐᓯᓃᒫᐞ ᐃᐃ ᐁᑳ ᑳᒎᐎᐎᓯᓂᒃ ᐅᑌᐺᑕᒨᐞ᙮ ᐊᐲ ᑕᔥ ᑳᐱᑕᑯᔑᓂᓂᒡ, ᒦ ᐃ ᑳᐐᓐ ᐅᑮᐐᒋᐐᓯᓃᒫᓰᐞ ᐋᓃᔥ ᑮᑯᑖᒋ᙮ ᐋᓃᔥ ᐅᑮᑯᓵᐞ ᐃᐃ ᑳᑮᑭᒋ ᐃᓀᑕᒥᓂᒡ ᑭᑭᓇᐙᑕᔕᑫᔓᑰᐎᓂᓂ᙮

ᒦᑕᔥ ᑯᑕᒃ ᑳᑮᐊᓇᒥᐋᐙᒡ ᒎᐗᒃ ᑳᐊᓂ ᐃᔑᒋᑫᐙᒡ ᐲᑕᕒᐆᓐ ᑳᑮᐃᔑᒋᑫᓂᒡ ᐁᑮᐌᐱᐃᑯᐙᒡ ᐁᑳ ᓭᓯᒃ ᐁᐃᔑᒋᑫᓯᓂᒃ᙮ ᐹᕒᓇᐸᔅ ᓴ ᑫᐐᓐ ᑮᐃᔑᒋᑫ ᑳᑮᐃᔑᒋᑫᓂᒡ ᐃᐃ ᑳᑯᓵᓂᒡ ᒎᐗᐞ᙮

ᐊᐲ ᑕᔥ ᐁᑮᐙᐸᒪᒀ ᐁᑳ ᐁᑮᐃᔑᒋᑫᓯᒀ ᐋᓃᓐ ᑳᐃᓇᑌᓂᒃ ᐃᐃ ᑌᐺᐎᓐ ᑳᑕᔑᑌᒃ ᒥᓍᒋᒧᐎᓂᕽ, ᐲᑕᕒ ᓂᑮᑲᓅᓈ ᐁᓈᓴᒦᓂᒡ ᑲᑭᓇ ᐃᐃᒫ ᑳᑮᐊᔮᓂᒡ᙮ ᒦᑕᔥ ᐅᐅ ᑳᐃᓇᒃ: ᑮᓐ ᐄᑐᒃ ᑭᒎᐎᐤ, ᑳᐐᓐ ᑕᔥ ᐃᐃ ᑭᑎᔑᒋᑫᓰ᙮ ᐁᑳ ᑳᒎᐎᐎᓯᒀ ᓴ ᑳᐃᔑᐱᒫᑎᓯᐙᒡ ᑭᑎᔑᒋᑫ᙮ ᐋᓃᓐ ᑕᔥ ᑫᔑᑲᔥᑭᐊᑣᐸᓐ ᐃᐃ ᐁᑳ ᑳᒎᐎᐎᓯᒀ ᒋᐃᔑᒋᑫᐙᒡ ᒎᐗᐞ ᑳᐱᒫᑎᓯᐙᒡ? ᓂᑮᐃᓈ᙮

ᓃᓇᐎᓐᑦ ᑕᔥ ᑌᐺ ᑳᒎᐎᐎᔮᕽ ᓂᑮᐃᔑᓂᑖᐎᑭᒥᓐ᙮ ᑳᐐᓐ ᐐᓐ ᓂᑎᓄᐎᓰᒥᓐ ᑖᐱᔥᑰ ᐃᑭ ᐁᑳ ᑳᒎᐎᐎᓯᒀ ᐅᒪᒋᑑᑕᒨᒃ ᑳᐃᔑᓂᑳᓂᑣ᙮

ᓂᑭᑫᑖᒥᓐ ᐋᓃᔥ ᐊᐎᔭ ᑮᑌᐺᑕᐙᒡ ᒋᓴᔅ Xᑕᓐ, ᒦ ᓴ ᐃ ᐌᒋᒥᓄᐐᒌᐎᑯᒡ ᐃᓂ ᑭᔐᒪᓂᑑᓐ, ᑳᐐᓐ ᐐᓐ ᐁᑑᑕᕽ ᐃᐃ ᐅᓇᔓᐌᐎᓂᓂ ᑳᐃᓇᑌᓂᒃ᙮ ᑫᓃᓇᐎᓐᑦ ᑕᔥ ᓂᑮᑌᐺᑕᐙᓈᓐ X ᒋᓴᔅ᙮ ᐃᐃᒫ ᑕᔥ ᐁᑌᐺᑕᐗᑭᒡ X, ᒦ ᐃ ᑫᐅᒋᒥᓄᐐᒌᐎᓇᑭᒡ ᑭᔐᒪᓂᑑ, ᐋᓃᔥ ᑳᐐᓐ ᐊᐎᔭ ᐅᑑᒋᒥᓄᐐᒌᐎᑯᓰᓐ ᑭᔐᒪᓂᑑᓐ ᐁᒥᒋᑑᑕᕽ ᑳᐃᓇᑌᓂᒃ ᐃᐃ ᐅᓇᔓᐌᐎᓂᓂ᙮

ᑫᓃᓇᐎᓐᑦ ᑕᔥ ᐁᐊᑐᓀᐊᒫᕽ ᐃᐃ ᒥᓍᐸᒥᑰᐎᓐ ᐁᑌᐺᑕᐗᑭᒡ X, ᒦᑕᔥ ᐄᓴᓐ ᑫᓃᓇᐎᓐᑦ ᐁᔑᓈᑯᓯᔮᕽ ᑳᒪᒋᑑᑕᒧᐙᒡ᙮ ᒦ ᓇ ᑕᔥ ᐁᔑᓈᑾᓂᓂᒃ ᑖᐱᔥᑰ X ᐐᓐ ᐁᐊᓂᒫᒌᑭᑑᒡ ᒪᒋᑑᑕᒧᐎᓂᓂ? ᑫᑯ ᐃᐃ ᐃᓀᑕᑫᒃ!

ᑮᔥᐱᓐ ᑮᐌᐅᔑᑑᔮᓐ ᐃᐃ ᑳᑮᓂᔑᐗᓈᒋᑑᔮᓐ, ᒦ ᐃᒫ ᐁᔑᓈᑾᒃ ᓃᓐ ᐁᐲᑯᓇᒫᓐ ᑭᔐᒪᓂᑑ ᐅᑑᓇᔓᐌᐎᓐ᙮

ᒦᑕᔥ ᑖᐱᔥᑰ ᐁᔑᓈᑯᓯᔮᓐ ᐋᔕ ᐁᑮᓂᐳᔮᓐ, ᑖᐱᔥᑰ ᐅᓇᔓᐌᐎᓐ ᓴ ᐁᑮᓂᓯᑯᔮᓐ᙮ ᒦᑕᔥ ᐃᐃ ᑳᐅᒋᑎᐯᓂᒥᑯᓯᐙᓐ ᐅᓇᔓᐌᐎᓐ᙮ ᒦᑕᔥ ᐃᐃ ᑳᑮᐅᒋ ᐃᔑᓭᒃ ᒋᐃᔑᐱᒫᑎᓯᔮᓐ ᑳᔑᐊᑕᐌᓂᒥᒡ ᑭᔐᒪᓂᑑ᙮

X ᓴ ᓂᑮᐐᒋᓂᐴᒫ ᐊᐲ ᐁᑮᓂᓯᓐᒡ ᐃᐃᒫ ᐋᔑᑌᔮᑎᑯᕽ᙮ ᑳᐐᓐ ᑕᔥ ᓃᓐ ᐗᐊ ᑳᐱᒫᑎᓯᔮᓐ, ᐐᓐ ᐅᔕ X ᑳᐱᒫᑎᓯᒡ ᓂᐱᒫᑎᓯᐎᓂᕽ᙮ ᐁᑌᐺᑕᐎᒪᒃ ᑭᔐᒪᓂᑑ ᐅᑯᓯᓴᓐ, ᑳᐅᒋᐱᒫᑎᓯᔮᓐ ᐅᐅ ᓅᑯᒻ ᐱᒫᑎᓯᐎᓐ ᑳᐱᒫᑎᓯᔮᓐ᙮ ᐋᓃᔥ X ᓂᑮᓵᑭᐃᒃ, ᐅᑮᐸᑭᑎᓈᓐ ᑲᔦ ᐅᐱᒫᑎᓯᐎᓐ ᓃᓐ ᐅᒋ᙮

ᑳᐐᓐ ᓂᑖᓇᐌᑕᒧᐙᓰᓐ ᑭᔐᒪᓂᑑ ᐅᑭᔐᐙᑎᓯᐎᓐ᙮ ᑮᔥᐱᓐ ᑾᔭᒀᑎᓯᐎᓐ ᐅᒌᒪᑲᑭᐸᓐ ᐃᐃᒫ ᐅᓇᔓᐌᐎᓂᕽ, ᐊᓂᔖ ᐄᓴᓐ X ᑮᓂᐳᑯᐸᓐ᙮

ᐁᑕᑕᐌ ᓴ ᑭᑲᑮᐹᑎᓯᒻ ᑳ ᑲᓬᐁᔑᔭᐎᓂᓃᐎᔦᒃ ! ᐊᐌᓀᓐ ᑕᔥ ᐋᔕ ᑳᔖᑰᑌᓂᒥᓀᒃ? ᐋᓃᔥ ᑖᐱᔥᑰ ᐁᑮᐙᐸᒣᒃ ᒋᓴᔅ X ᐁᓂᐳᒡ ᐋᔑᑌᔮᑎᑯᕽ ᐃᓀᑖᑾᓐ ᐋᐱᒋ ᑭᒋᐌᐌᓂ ᑳᐐᑕᒫᑰᔦᒃ ᐋᓃᓐ X ᑳᐃᔑᒋᑫᒡ᙮

ᐯᔑᑾᔭᒃ ᑕᔥ ᑫᑰᓐ ᐐᑕᒪᐎᔑᒃ: ᐋᓃᑎ ᑳᐅᒋᑌᐱᓂᒣᒃ ᑭᔐᒪᓂᑑ ᐅᑕᒑᑾᓐ? ᐁᑑᑕᒣᒃ ᐃᓇ ᑳᐃᓇᑌᒃ ᐃᐃ ᐅᓇᔓᐌᐎᓐ, ᑯᒫ ᑲᔦ ᐁᑮᓅᑕᒣᒃ ᐃᐃ ᒥᓍᒋᒧᐎᓐ, ᐁᑮᑌᐺᑕᒣᒃ ᑕᔥ?

ᐁᑕᑕᐌ ᓴ ᑭᑲᑮᐹᑎᓯᒻ! ᑭᔐᒪᓂᑑ ᐅᑕᒑᑯᕽ ᐁᑮᐅᒋᒫᒋᑖᔦᒃ, ᒦ ᓇ ᑕᔥ ᐙᐃᔑᒋᑫᔦᒃ ᐗᑭᒐᔭᐄ ᑭᐐᔭᐎᐙᕽ ᑳᓂᑖᐃᔑᒋᑫᔦᒃ ᐁᐐᐃᔑᑮᔑᑭᔦᒃ ᐊᓇᒥᐋᐎᓂᕽ?

ᑳᐐᓐ ᐃᓇᔥ ᑫᑰᓐ ᑭᑎᓀᑕᓰᒻ ᐃᐃ ᑳᑮᐱᐊᔨᔑᓭᔦᒃ ᐅᑖᓈᕽ? ᑫᒋᓈᒡ ᒫᐐᓐ ᑫᑰᓐ ᐃᐃᒫ ᑭᑮᐅᑎᓈᒻ ᑫᑭᑖᐸᒋᑑᔦᒃ᙮

ᑭᑮᒦᓂᑯᐙ ᑭᔐᒪᓂᑑ ᐅᑕᒑᑾᓐ ᔑᑾ ᑮᒪᔥᑲᐗᓄᑮ ᐁᑮᒫᒪᑳᒋᒋᑫᒡ ᑳᐃᔑᔭᔮᔦᒃ᙮ ᒦ ᓇ ᑕᔥ ᑳᐅᒋ ᐃᔑᒋᑫᒡ ᐁᐃᔑᒋᑫᐌᒃ ᐁᑑᑕᒣᒃ ᑳᐃᓇᑌᒃ ᒎᐎᐎ ᐅᓇᔓᐌᐎᓐ, ᑯᒫ ᑲᔦ ᐁᑌᐺᑕᒣᒃ ᑎᐹᒋᒧᐎᓐ ᑳᑮᓅᑕᒣᒃ?

ᐃᓇᔥᑫ ᒦ ᐯᔑᑾᓐ ᐁᐸᕒᐊᐋᒻ ᑳᑮᐃᔑᓭᒡ, ᐁᐃᔑᐲᐃᑳᑌᒃ: ᐁᐸᕒᐊᐋᒻ ᐅᑮᑌᐺᑕᐙᓐ ᑭᔐᒪᓂᑑᓐ, ᐁᑮᑌᐺᑕᐙᒡ ᑕᔥ ᑭᔐᒪᓂᑑᓐ, ᒦᑕᔥ ᑳᑮᐅᒋ ᐃᓇᑭᒥᓐᒡ ᐅᑾᔭᒀᑎᔅ᙮

ᑭᑭᑫᑖᒻ ᐄᑐᒃ ᐅᐅ, ᐃᑭ ᓴ ᑳᑌᐺᑕᒧᐙᒡ ᐯᒫᑎᓯᐙᒡ ᒦᐗᒃ ᐃᓴ ᐃᑭ ᒪᔮ ᐁᐸᕒᐊᐋᒥᕽ ᑳᐅᑕᑳᓀᓯᐙᒡ᙮

ᑭᒋᒪᓯᓇᐃᑲᓐ ᐋᓃᔥ ᓃᔮᒃ ᑮᑎᐹᒋᒨᒪᑲᓐ ᑭᔐᒪᓂᑑ ᐁᐐᑎᓄᐙᓈᒡ ᐁᑾᔭᒀᑎᓯᓂᒡ ᐃᐃ ᐁᑳ ᑳᒎᐎᐎᓯᓂᒃ ᐅᑌᐺᑕᒧᐎᓂᓃᕽ ᐅᒋ᙮ ᐋᓃᔥ ᑫᐐᓐ ᐁᐸᕒᐊᐋᒻ ᓃᔮᒃ ᐅᑮᒥᓍᒋᒧᑖᑯᓐ ᑭᒋᒪᓯᓇᐃᑲᓐ ᐁᑮᐃᑯᒡ: ᑮᓐ ᓴ ᑭᔐᒪᓂᑑ ᑳᐐᐅᒋᔕᐌᓂᒫᒡ ᑲᑭᓇ ᐯᒫᑎᓯᓂᒡ᙮

ᐁᐸᕒᐊᐋᒻ ᐅᑮᑌᐺᑕᐙᓐ ᑭᔐᒪᓂᑑᓐ, ᒦᑕᔥ ᑳᑮᐅᒋᔕᐌᑖᑯᓯᒡ᙮ ᒦᑕᔥ ᑲᔦ ᓅᑯᒻ ᑲᑭᓇ ᑳᐅᑌᐺᑕᒧᐎᓂᐙᒡ ᑕᑯᔕᐌᑖᑯᓯᐗᒃ ᑖᐱᔥᑰ ᑳᑮᐃᔑᔕᐌᑖᑯᓯᒡ᙮

ᐃᑭ ᑕᔥ ᐐᓐ ᑳᐊᐯᓂᒧᓄᑕᒧᐙᒡ ᐁᐐᓇᐃᑕᒧᐙᒡ ᑳᐃᓇᑌᓂᒃ ᐃᐃ ᐅᓇᔓᐌᐎᓂᓂ, ᒦᑕᔥ ᒨᔕᒃ ᐃᓀᑖᑯᓯᐗᒃ ᐁᐐᓂᔑᐗᓈᑎᓯᐙᒡ, ᐋᓃᔥ ᑭᒋᒪᓯᓇᐃᑲᓐ ᐃᔑᐲᐃᑳᑌ: ᐊᐌᓀᓐ ᓴ ᒨᔕᒃ ᐁᑳ ᑳᐱᓯᑕᓯᒃ ᐁᑑᑕᓯᒃ ᑲᔦ ᑲᑭᓇ ᑫᑰᓂᓂ ᑳᐃᔑᐲᐃᑳᑌᓂᒃ ᐃᐃ ᐅᓇᔓᐌᐎᒪᓯᓇᐃᑲᓂᓂ, ᐃᓇᑭᒫ ᒋᓂᔑᐗᓈᑎᓯᒡ᙮

ᐋᐱᒋ ᓴ ᐐᑫ ᐸᔭᑌᓈᑾᓐ, ᑳᐐᓐ ᓴ ᐊᐎᔭ ᐅᑑᒋᑾᔭᑾᑭᒥᑯᓰᓐ ᑭᔐᒪᓂᑑᓐ ᐁᒥᒋᑑᑕᕽ ᑳᐃᓇᑌᓂᒃ ᐃᐃ ᐅᓇᔓᐌᐎᓂᓂ, ᐋᓃᔥ ᑭᒋᒪᓯᓇᐃᑲᓐ ᐃᔑᐲᐃᑳᑌ: ᐊᐎᔭ ᓴ ᑳᐅᒋᑾᔭᑾᑭᒥᓐᒡ ᐅᑌᐺᑕᒧᐎᓂᕽ ᑕᐱᒫᑎᓯ᙮

ᐊᐎᔭ ᓴ ᑳᑲᓇᐌᑕᕽ ᐅᓇᔓᐌᐎᓐ ᑳᐐᓐ ᒣᒬᒡ ᐅᑖᐸᒋᑑᓰᓐ ᐅᑌᐺᔦᑕᒧᐎᓐ᙮ ᐅᐅ ᐄᑐᒃ ᑭᒋᒪᓯᓇᐃᑲᓐ ᐃᑭᑑᒪᑲᓐ: ᐊᐌᓀᓐ ᓴ ᐱᑯ ᑳᑑᑕᕽ ᑲᑭᓇ ᑫᑰᓂᓂ ᑳᐃᓇᑌᓂᒃ ᐃᐃ ᐅᓇᔓᐌᐎᓂᓂ, ᒦ ᓴ ᐃᐃᒫ ᐁᔑᐱᒫᑎᓯᒡ᙮

X ᑭᑮᑎᐸᐅᑯᓈᓐ ᒋᐸᑭᑎᓂᑰᐗᕽ ᐅᓇᔓᐌᐎᓐ ᑳᑮᐃᔑᓂᐴᒥᑰᔭᑭᐸᓐ, ᐋᓃᔥ ᑮᑎᓄᐎᐋ ᐐᓐ ᑳᓇᓂᐴᒥᓐᒡ ᑮᓇᐎᓐᑦ ᐅᒋ᙮ ᐋᓃᔥ ᑭᒋᒪᓯᓇᐃᑲᓐ ᐃᔑᐲᐃᑳᑌ: ᐊᐎᔭ ᓴ ᑯ ᒥᑎᑯᕽ ᑳᐊᑰᓂᓐᒡ ᒦ ᓴ ᐊᐌ ᑳᓇᓂᐴᒥᓐᒡ᙮

ᒦᑕᔥ ᐅᐅ X ᒋᓴᔅ ᑳᑮᐅᒋ ᐃᔑᒋᑫᒡ, ᐁᑳ ᑳᒎᐎᐎᓯᒀ ᑫᐐᓇᐙ ᒋᒦᓂᑣ ᐃᐃ ᔕᐌᑖᑯᓯᐎᓂᓂ, ᑖᐱᔥᑰ ᑭᔐᒪᓂᑑ ᑳᑮᐃᔑᐊᔓᑕᒪᐙᒡ ᐁᐐᔕᐌᓂᒫᒡ ᐁᐸᕒᐊᐋᒪᓐ, ᑫᑮᓇᐎᓐᑦ ᑕᔥ ᑌᐺᔦᑕᒧᐎᓂᕽ ᑭᑲᐅᒋᑌᐱᓈᓈᓐ ᐊᐊ ᑭᔐᒪᓂᑑ ᐅᑕᒑᑾᓐ ᑳᑮᐊᔓᑕᒪᐎᓇᕽ᙮

ᓃᑕᓇᒥᐋᒃ, ᑭᐐᐐᑕᒪᐎᓂᓂᒻ ᓴ ᑫᑰᓐ ᐋᓃᓐ ᑫᐅᒋᓂᓯᑐᑕᒣᒃ ᐅᐅ ᑳᐐᑕᒪᐎᓇᑰᒃ᙮ ᐊᐲ ᓴ ᓃᔑᓐ 2 ᐃᓂᓂᐗᒃ ᐁᑮᑮᔐᑕᒧᐙᒡ ᑫᑰᓂᓂ, ᐁᑮᐅᔑᐲᐊᒧᐙᒡ ᑲᔦ, ᑳᐐᓐ ᓴ ᐊᐎᔭ ᐅᑲᐲᑯᓇᓰᓐ᙮ ᑳᐐᓐ ᑲᔦ ᐊᐎᔭ ᐊᐗᔑᒣ ᐅᑖᓇᑭᑑᓰᓐ ᐃᐃ ᐋᔕ ᐊᔓᑕᒫᑎᐎᓂᕽ ᑳᑮᐅᔑᐲᐃᑳᑌᓂᒃ᙮

ᐃᓇᔥᑫ ᑕᔥ ᑭᔐᒪᓂᑑ ᐅᑮᐊᔓᑕᒪᐙᓐ ᐁᐸᕒᐊᐋᒪᓐ ᐁᐐᔕᐌᓂᒫᒡ, ᐃᓂ ᑲᔦ ᐅᐲᐌᓰᒥᓂ᙮ ᑳᐐᓐ ᑕᔥ ᑭᒋᒪᓯᓇᐃᑲᓐ ᐃᔑᐲᐃᑳᑌᓯᓅᓐ, ᑭᐲᐌᓰᒪᒃ ᑳᐹᑏᓄᐙᒡ᙮ ᑭᐲᐌᓰᒻ ᐅᔕ ᐃᔑᐲᐃᑳᑌ, ᒦ ᓴ ᐊᐊᐌ ᐯᔑᒃ ᐊᐎᔭ, X ᑳᑕᔑᒥᓐᒡ᙮

ᒦᑕᔥ ᐅᐅ ᑳᐃᑕᒫᓐ, ᑭᔐᒪᓂᑑ ᐊᐲ ᑮᒦᓈᒡ ᐁᐸᕒᐊᐋᒪᓐ ᐃᐃ ᐊᔓᑕᒫᑎᐎᓂᓂ, ᑮᐃᑭᑐ ᑲᔦ ᐁᐐᑲᓇᐌᑕᕽ᙮ ᓃᐙᒃ ᓂᓯᒥᑕᓇ 430 ᑕᓱᐱᐴᓐ ᑕᔥ ᐁᑮᐊᓂ ᐃᔑᓭᒃ, ᐅᓇᔓᐌᐎᓐ ᑮᐅᓇᒋᑳᑌ᙮ ᑳᐐᓐ ᑕᔥ ᐃᐃᒫ ᐅᓇᔓᐌᐎᓂᕽ ᑕᐅᒋᐋᓇᐌᒋᑳᑌᓯᓂᓂ ᑭᔐᒪᓂᑑ ᐋᔕ ᑳᑮᐋᔩᒋ ᐊᔓᑕᒫᑫᒡ, ᑳᐐᓐ ᑲᔦ ᑕᐅᒋᑳᓯᐃᑳᑌᓯᓂᓂ ᑳᑮᐃᑭᑐᒡ᙮

ᑮᔥᐱᓐ ᑕᔥ ᑭᔐᒪᓂᑑ ᐅᒦᑭᐙᓐ ᐅᒋᐊᓄᑮᒪᑲᓂᓂᑭᐸᓐ ᐃᐃᒫ ᐁᑕ ᐁᑲᓇᐌᒋᑳᑌᓂᒃ ᐅᓇᔓᐌᐎᓐ, ᑳᐐᓐ ᐄᓴᓐ ᐊᐗᔑᒣ ᑭᔐᒪᓂᑑ ᑳᑮᐃᔑᐊᔓᑕᒫᑫᒡ ᐊᓄᑮᒪᑲᓯᓂᓂ᙮ ᐋᔕ ᑕᔥ ᑭᔐᒪᓂᑑ ᐁᑮᐊᔓᑕᒫᑫᒡ, ᑳᑮᐅᒋᒥᒋᒦᓈᒡ ᐁᐸᕒᐊᐋᒪᓐ ᐃᐃ ᐅᒦᑭᐙᓐ᙮

ᐋᓃᓐ ᑕᔥ ᑳᐃᓇᑌᒃ ᐃᐃ ᐅᓇᔓᐌᐎᓐ? ᒦ ᐃ ᐄᑐᒃ ᑳᑮᐅᒋᓇᑭᑑᒡ ᐅᓇᔓᐌᐎᓂᓂ ᐁᐐᐯᔭᑌᓈᑯᑑᒡ ᐃᐃ ᒪᒋᑑᑕᒧᐎᓂᓂ᙮ ᒦ ᑲᔦ ᑳᑮᐃᓇᒋᑳᑌᒃ, ᐹᓂᒫ ᓴ ᐁᐸᕒᐊᐋᒻ ᐅᐲᐌᓰᒪᓐ ᐱᑕᑯᔑᓂᓂᒡ ᓃᔮᒃ ᑳᑮᐊᔓᑕᒪᐎᒥᓐᒡ, ᒦᑕᔥ ᐃ ᐹᒫ ᒋᐴᓇᓄᑮᒪᑲᒃ ᐃᐃ ᐅᓇᔓᐌᐎᓐ᙮ ᐁᒐᓬᐊᒃ ᑕᔥ ᑮᐋᐸᑎᓯᐗᒃ ᒋᐅᓇᑑᐙᒡ ᐃᐃ ᐅᓇᔓᐌᐎᓂᓂ᙮ ᐯᔑᒃ ᐃᑕᔥ ᐃᓂᓂ ᑮᐋᐸᑎᓯ ᒋᐋᓂᑫᒦᓈᒡ ᐃᐃ ᐯᒫᑎᓯᓂᒡ᙮

ᑳᑮᑭᑐᑕᒫᑫᒡ ᑕᔥ ᑳᐐᓐ ᐋᐸᑎᓯᓰ ᐊᐎᔭ ᑮᒥᒋᐯᔑᑯᒡ ᑫᑰᓂᓂ ᑮᐃᔑᒋᑫᒡ᙮ ᑭᔐᒪᓂᑑ ᑕᔥ ᐊᐊ ᑳᒥᒋᐯᔑᑯᒡ᙮ ᐐᓐ ᐃᑯ ᑮᑭᑐᑕᒫᓱ ᐁᒦᑭᐌᒡ ᐅᑕᔓᑕᒫᑫᐎᓐ᙮

ᐅᓇᔓᐌᐎᓐ ᐃᓇ ᑕᔥ ᐅᒦᑖᑴᔥᑳᓐ ᐃᐃ ᑭᔐᒪᓂᑑ ᐅᑕᔓᑕᒫᑫᐎᓂᓂ? ᑳᐐᓐ ᐃᐃ ᐐᑳ ᑖᐃᔑᓭᓯᓅᓐ! ᐋᓃᔥ ᑮᔥᐱᓐ ᐊᔮᓂᑭᐸᓐ ᐅᓇᔓᐌᐎᓐ ᐊᐎᔭ ᑫᑮᐅᑎᓇᑭᐸᓐ ᐱᒫᑎᓯᐎᓐ ᒦᑕᔥ ᐃᐃᒫ ᑭᔐᒪᓂᑑᓐ ᑫᑮᐅᒋᑾᔭᑾᑭᒥᑯᐸᓐ ᐁᑑᑕᕽ ᑳᐃᓇᑌᓂᒃ ᐃᐃ ᐅᓇᔓᐌᐎᓐ᙮

ᑭᒋᒪᓯᓇᐃᑲᓂᕽ ᐃᑕᔥ ᐃᔑᐲᐃᑳᑌ, ᑲᑭᓇ ᓴ ᐯᒫᑎᓯᐙᒡ ᐊᑮᕽ ᐅᑭᒋᐎᔥᑳᑯᓈᐙ ᒪᒋᑑᑕᒧᐎᓐ᙮ ᒦᑕᔥ ᐃᐃ ᑭᔐᒪᓂᑑ ᑳᑮᐊᔓᑕᒪᐙᒡ ᐊᐌᓀᓇᐃᑯ ᑫᑌᐺᑕᐙᓂᒡ ᒋᓴᔅ Xᑕᓐ, ᒦ ᐃᐃᐌ ᑕᒦᓈᐗᒃ, ᐋᓃᔥ ᑌᐺᑕᒨᒃ᙮

ᐃᐃ ᑕᔥ ᒋᑆ ᐃᔑᓭᒃ ᑌᐺᔦᑕᒧᐎᓐ ᒋᐊᓄᑮᒪᑲᒃ, ᐅᓇᔓᐌᐎᓐ ᐃᓴ ᑭᑮᑕᑯᓂᑯᒥᓐ᙮ ᐹᓂᒫ ᓴ ᑌᐺᔦᑕᒧᐎᓐ ᐁᑮᓈᑾᒃ ᒦᑕᔥ ᐃᐃ ᑳᐃᔑᐸᑭᑎᓂᑰᔭᕽ᙮

X ᑕᔥ ᒋᑆ ᑕᑯᔑᕽ, ᐅᓇᔓᐌᐎᓐ ᑭᑮᑎᐯᓂᒥᑯᒥᓐ ᒋᑭᑭᓄᐎᓂᑯᔭᕽ X ᑫᑕᔑᑎᐯᓂᒥᓇᕽ᙮ ᒦᑕᔥ ᐃᐃ ᑳᑮᐅᒋ ᐃᔑᓭᒃ, ᑭᔐᒪᓂᑑ ᒋᐅᒋᑾᔭᑾᑭᒥᓇᕽ ᐃᐃᒫ ᑌᐺᔦᑕᒧᐎᓂᕽ᙮

ᐃᓇᔥᑫ ᑕᔥ ᐋᔕ ᐁᑮᐅᒋᒋᓭᒃ ᑌᐺᔦᑕᒧᐎᓐ ᒋᐋᐸᑕᒃ, ᑳᐐᓐ ᐅᓇᔓᐌᐎᓐ ᐊᐗᔑᒣ ᑭᑎᐯᓂᒥᑯᓰᒥᓐ᙮

ᐁᑌᐺᔦᓂᒣᒃ ᐅᔕ X ᒋᓴᔅ, ᑲᑭᓇ ᑳᐅᒋᐅᑯᓯᓯᒥᓀᒃ ᑭᔐᒪᓂᑑ᙮

ᑲᑭᓇ ᓴ ᑳᑕᔑᔦᒃ, ᑳᑮᓰᑲᐊᑖᓱᔦᒃ ᒋᐐᒌᐌᒃ X, ᒦᑕᔥ ᐁᔑᓈᑯᓯᔦᒃ, ᐁᑭᑭᔥᑲᒧᐌᒃ ᐐᓐ ᐃᑯ X ᐅᐱᒫᑎᓯᐎᓐ᙮

ᐊᐊ ᑕᔥ ᒎ, ᐊᐊ ᑲᔦ ᑳᒎᐎᐎᓯᒃ, ᐊᐊ ᑲᔦ ᐅᐸᒦᑖᑫ, ᐊᐊ ᑲᔦ ᑳᑎᐯᓂᑎᓱᒡ, ᐊᐊ ᐃᓂᓂ, ᐊᐊ ᐃᑴ, ᑳᐐᓐ ᐯᐸᑳᓐ ᐃᓀᑖᑯᓯᓰᐗᒃ᙮ ᑲᑭᓇ ᓴ ᑮᓇᐙ ᑭᐯᔑᑴᑖᑯᓯᒻ ᐃᐃᒫ Xᐃᕽ᙮

ᑮᔥᐱᓐ ᑕᔥ Xᐃᕽ ᐃᔑᑎᐯᑖᑯᓯᔦᒃ ᑮᓇᐙ ᐄᓴᓐ ᐁᐸᕒᐊᐋᒥᕽ ᑭᑑᑕᑳᓀᓯᒻ, ᑭᑲᑌᐱᓇᒧᐙᒻ ᑲᔦ ᑭᔐᒪᓂᑑ ᑳᑮᐊᔓᑕᒫᑫᒡ᙮

ᐅᐅ ᑕᔥ ᓂᑎᑭᑦ, ᐊᐊ ᓴ ᐅᑯᓯᓯᒫ ᒣᒀ ᐁᑸᐎᓭᓯᐎᒡ ᑳᐐᓇᑲᑕᒫᑯᒡ ᐅᑌᑌᓐ ᐅᑕᔭᐄᒥᓂ ᒋᑎᐯᑕᕽ, ᒦ ᓴ ᑫᐐᓐ ᐁᑑᒋᑲᓂᐎᒡ ᑖᐱᔥᑰ ᐅᐸᒦᑖᑫᓐ ᑳᑑᒋᑲᓂᐎᓂᒡ, ᐋᓇᐐᓐ ᑲᑭᓇ ᑫᑰᓂᓂ ᐁᑎᐯᑕᕽ ᐊᐊ ᐅᑯᓯᓯᒫ᙮

ᒣᒀ ᑕᔥ ᐁᑸᐎᓭᓯᐎᒡ, ᐊᔮᐗᐞ ᓴ ᐃᓂᓂᐗᐞ ᑫᓇᐌᓂᒥᑯᒡ, ᑫᓈᑲᒋᑕᒫᑯᒡ ᑲᔦ ᐃᓂ ᐅᑌᑌᓐ ᑳᑮᓇᑲᑕᒫᑯᒡ᙮ ᐹᓂᒫ ᑕᔥ ᐁᐅᒋᒋᓭᓂᒃ ᐊᐲ ᑳᑮᐃᑭᑐᓂᒡ ᐅᑌᑌᓐ ᒋᐴᓂᓈᓈᑲᒋᐃᓐᒡ, ᒦ ᓴ ᐊᐲ ᑫᐴᓂᓈᓈᑲᒋᒋᑲᓂᐎᒡ᙮

ᒦᑕᔥ ᐯᔑᑾᓐ ᑫᑮᓇᐎᓐᑦ, ᑭᑮᑎᐯᓂᒥᑯᓈᓂᒃ ᐃᑭ ᐊᒑᑾᒃ ᑳᑎᐯᑕᒧᐙᒡ ᐅᐅ ᒥᓯᐌ ᐊᑮᓂ ᒋᑆ ᑭᑫᑕᒪᕽ ᐃᐃ ᑌᐺᐎᓐ᙮

ᐊᐲ ᑕᔥ ᑎᐸᐃᑲᓐ ᐁᑮᐅᒋᒋᓭᓂᒃ, ᑭᔐᒪᓂᑑ ᐐᓐ ᐃᑯ ᐅᑯᓯᓴᓐ ᐅᑮᐲᒋᓂᔕᐙᓐ᙮ ᐃᐃᒫ ᑕᔥ ᐃᑴᕽ ᑮᐃᔑᓂᑖᐎᑭ᙮ ᒦᑕᔥ ᑲᔦ ᐁᑮᐃᔑᐱᒫᑎᓯᒡ ᑳᑮᐃᔑᑲᓇᐌᒋᑳᑌᓂᒃ ᒨᓯᔅ ᐅᑑᓇᔓᐌᐎᓂᓂ᙮

ᒦᑕᔥ ᐁᐐᑎᐸᐙᒡ ᒋᐸᑭᑎᓂᑯᓂᒡ ᐃᐃ ᐅᐱᒫᑎᓰᐞ ᑳᑮᑎᐯᓂᒥᑯᓂᒡ ᐅᓇᔓᐌᐎᓂᓂ ᑳᑮᐅᒋᐲᔖᒡ, ᒦ ᓴ ᑕᔥ ᑭᔐᒪᓂᑑ ᑲᑭᓇ ᑫᑮᓇᐎᓐᑦ ᑎᐱᓇᐌ ᒋᐅᑯᓯᓯᒥᓇᑭᒡ᙮

ᐁᐅᑯᓯᓯᒥᓀᒃ ᐃᑕᔥ ᑭᔐᒪᓂᑑ ᑭᑮᐃᔑᓂᔕᐊᒫᑯᓈᓐ ᓴ ᐃᓂ ᐅᑯᓯᓴᓐ ᐅᑕᒑᑯᓂ ᐃᐃᒫ ᑭᑌᐃᓈᓂᕽ᙮ ᒦᑕᔥ ᐊᐊ ᐊᒑᒃ ᑳᐃᑭᑐᒡ: ᐋᐸ, ᑮᓐ ᓂᑌᑌ!

ᑳᐐᓐ ᑕᔥ ᑫᔮᐱ ᐅᐸᒦᑖᑫ ᑭᑎᓄᐎᓰ, ᑭᔐᒪᓂᑑ ᓴ ᓅᑯᒻ ᑭᑑᑯᓯᓯᒥᒃ᙮ ᐁᐅᑯᓯᓯᒥᒃ ᐃᑕᔥ ᑭᐐᒦᓂᒃ ᑳᒦᓈᒡ ᐃᐃ ᐅᑯᓯᓴᐞ᙮

ᐅᑖᓈᕽ ᑕᔥ ᑳᐐᓐ ᑭᑮᑭᑫᓂᒫᓯᐙᐙ ᑭᔐᒪᓂᑑ᙮ ᐃᑭ ᓴ ᑭᑮᑎᐯᓂᒥᑯᐙᒃ ᐁᑮᐊᓄᑮᑕᐌᒀ ᐊᐎᔭᐗᒃ ᐁᑳ ᑌᐺ ᑳᒪᓂᑑᐎᓯᒀ᙮

ᐋᔕ ᑕᔥ ᑭᑭᑫᓂᒫᐙ ᑎᐱᓇᐌ ᑭᔐᒪᓂᑑ – ᓇᐗᒡ ᒫᐐᓐ ᑖᐅᓂᔑᔑᓐ ᒋᐃᑭᑐᔮᓐ ᑭᑭᑫᓂᒥᑯᐙ ᑭᔐᒪᓂᑑ᙮ ᐌᑯᓀᓐ ᑕᔥ ᐌᒋᐐᑮᐌᓄᑕᐌᒀ ᐅᑯ ᑎᓄ ᐊᒑᑾᒃ ᑳᓃᓇᒥᓯᐙᒡ, ᐃᑭ ᑲᔦ ᑳᑯᐹᓯᓈᑯᓯᐙᒡ ᑳᑲᑴᑎᐯᒋᑫᐙᒡ? ᒦ ᓇ ᐃ ᐁᔑᐊᑕᐌᓂᒣᒀ ᒦᓇᐙ ᒋᑎᐯᓂᒥᓀᒀ?

ᐋᐱᒋ ᓴ ᐌᐌᓂ ᑭᑲᓇᐌᑖᒻ ᐅᓄ ᑳᑭᒋ ᐃᔑᑮᔑᑲᑭᓐ, ᑮᓯᓲᒃ ᑲᔦ, ᐙᐊᓂ ᐃᔑᐌᐸᒃ ᑲᔦ, ᐃᓂ ᑲᔦ ᐋᓂᑕ ᑳᑭᒋ ᐃᓀᑕᒣᒃ ᑭᑭᓅᓄᐎᓇᓐ᙮

ᐋᐱᒋ ᓴ ᑭᑑᒑᓂᒣᓂᒥᓂᓂᒻ, ᑰᓂᑫ ᒦᐃ ᐁᔑᓈᑾᒃ ᐊᓂᔖ ᐁᑮᐅᒋᐊᓄᑮᔮᓐ ᐁᑮᑲᑴᐐᒋᐃᓇᑰᒃ᙮

ᓃᑕᓇᒥᐋᒃ! ᒦᑕᔥ ᐁᔑᐸᑯᓭᓂᒥᓇᑰᒃ, ᑳᐃᔑᐱᒫᑎᓯᔮᓐ ᒋᐃᔑᐱᒫᑎᓯᔦᒃ, ᐋᓃᔥ ᑫᓃᓐ ᑳᑎᓄᐎᔦᒃ ᓂᑎᓄᐤ᙮ ᑳᐐᓐ ᐋᐲᒋᑯ ᑭᑮᒪᒋᑑᑕᐎᓰᒻ᙮

ᑭᑭᑫᓂᒥᔑᒻ ᐄᑐᒃ ᐁᑮᐋᑯᓯᔮᓐ ᑳᑮᐅᒋ ᐃᔑᓭᒃ ᒋᐐᑕᒪᐎᓇᑰᒃ ᒥᓍᒋᒧᐎᓐ, ᒦᑕᔥ ᐃᐃ ᐸᔦᔥ ᐁᑮᓅᑕᐎᔦᒃ᙮

ᐋᓇ ᑕᔥ ᐁᑮᓴᓇᑭᐃᑰᔦᒃ ᐃᐃ ᑳᑮᐃᔑᐊᔮᔮᓐ ᐃᐃᒫ ᓂᐐᔭᐎᕽ, ᑳᐐᓐ ᑕᔥ ᔖᑰᒡ ᑭᑮᐋᓇᐌᓂᒥᓰᒻ, ᑳᐐᓐ ᑲᔦ ᑭᑮᔒᑫᑕᓰᒻ ᑳᑮᐃᓈᐱᓀᔮᓐ᙮ ᒦᑕᔥ ᑳᐃᔑᒋᑫᔦᒃ, ᐁᑮᐅᑖᐱᓂᔦᒃ ᑖᐱᔥᑰ ᑫᑮᐃᔑᐅᑖᐱᓀᑭᐸᓐ ᐁᒐᓬ ᑭᔐᒪᓂᑑᕽ ᑳᑮᐅᒌᒡ, ᐁᑮᐃᔑᐅᑖᐱᓂᔦᒃ ᑲᔦ ᑖᐱᔥᑰ ᑫᑮᐃᔑᐅᑖᐱᓀᑭᐸᓐ X ᒋᓴᔅ᙮

ᐋᐱᒋ ᓴ ᐁᑮᒌᑫᑕᒣᑭᐸᓐ! ᐋᓃᓐ ᑕᔥ ᑳᐃᔑᓭᔦᒃ? ᒦᑕᔥ ᐅᐅ ᑫᐃᓈᒋᒥᓇᑰᒃ, ᑮᔥᐱᓐ ᑲᔥᑭᑑᔦᑭᐸᓐ ᒋᐅᑖᐱᓇᒣᑭᐸᓐ ᑭᔥᑮᔑᑯᐙᓐ, ᑭᑖᑮᒦᔑᒻ ᐄᑐᒃ᙮

ᒦ ᓇ ᑕᔥ ᐅᐅ ᓅᑯᒻ ᑳᐅᒋᐃᓀᓂᒥᔦᒃ ᐁᔒᑫᓂᒥᓇᑰᒃ, ᐁᐐᑕᒪᐎᓇᑰᒃ ᐃᐃ ᑌᐺᐎᓐ?

ᒦᑕᔥ ᑳᐅᒋᑲᑴᓵᑭᐃᓀᒀ ᐃᑭ ᑯᑕᒃ ᐃᓂᓂᐗᒃ ᐸᑳᓐ ᑳᐃᓉᑑᐙᒡ ᐃᐃ ᒥᓍᒋᒧᐎᓐ, ᑳᐐᓐ ᐋᓃᔥ ᑭᓇᑕᐌᓂᒥᑯᓰᐙᒃ ᒋᐐᐐᒌᐎᔦᒃ᙮ ᑭᓇᑕᐌᓂᒥᑯᐙᒃ ᐅᔕ ᒋᐐᐐᒌᐌᒀ᙮ ᑳᐐᓐ ᑕᔥ ᑌᐺ ᑾᔭᒃ ᑭᐐᓵᑭᐃᑯᓰᐙᒃ᙮

ᐋᐱᒋ ᑕᔥ ᐅᓂᔑᔑᓂᓂ ᐊᐎᔭᒃ ᑮᐐᓵᑭᐐᒌᐎᓀᒀ, ᑳᐐᓐ ᐁᑕ ᐌᑎ ᑮᐊᔮᔮᓐ, ᑮᔥᐱᓐ ᑯᑕ ᑾᔭᒃ ᐐᐐᒌᐎᓀᒀ᙮

ᓂᓃᒑᓂᓴᒃ ᑳᐃᓇᐌᓂᒥᓇᑰᒃ! ᑖᐱᔥᑰ ᐃᑴ ᑳᐊᐲᒋᐐᓴᑫᑕᕽ ᑮᐐᐙᐸᒫᐗᓱᒡ, ᒦ ᑫᓃᓐ ᐯᔑᑾᓐ ᐁᐲᒋᐐᓴᑫᑕᒫᓐ ᑮᒥᑴᓂᒥᓇᑰᒃ, ᐁᒥᓴᐌᑕᒧᐗᒃ X ᐅᑎᔑᐊᔮᐎᓐ ᒋᓂᑖᐎᑭᓂᓂᒃ ᐃᐃᒫ ᑭᐱᒫᑎᓯᐎᓂᐙᕽ᙮

ᐊᐯᔥ ᑕᔥ ᓅᑯᒻ ᐐᒌᐎᓇᑰᒃ ᐌᑎ ᑳᔑᐊᔮᔦᒃ! ᐸᑳᓐ ᐄᑐᒃ ᑭᑖᐃᓂᓂᓂᒻ᙮ ᐋᐱᒋ ᓴ ᑭᑸᓇᐎᑑᑖᑰᒻ!

ᑕᑲ ᑭᐐᑲᑴᒋᒥᓂᓂᒻ ᑫᑰᓐ ᑮᓇᐙ ᑳᐊᑕᐌᑕᒣᒃ ᐅᓇᔓᐌᐎᓐ ᒋᑎᐯᓂᒥᑯᔦᒃ: ᑳᐐᓐ ᐃᓇ ᑭᓅᑕᓰᒻ ᐋᓃᓐ ᐁᑭᑑᒪᑲᒃ ᐃᐃ ᐅᓇᔓᐌᐎᓐ?

ᐅᐅ ᐄᑐᒃ ᐃᔑᐲᐃᑳᑌ, ᐁᐸᕒᐊᐋᒻ ᑮᓃᔑᐗᐞ 2 ᐅᑯᓯᓴᐞ᙮ ᐃᓂ ᑕᔥ ᐃᑴᐗᓐ ᑳᑮᐸᒦᑖᑯᒡ, ᒦ ᐃᒫ ᐯᔑᒃ ᐅᑯᓯᓴᓐ ᑳᐅᑎᓈᒡ᙮ ᐃᓂ ᑕᔥ ᑯᑕᒃ ᐯᔑᒃ ᐅᑯᓯᓴᓐ, ᐐᐎᕽ ᓴ ᐱᑯ ᐅᑮᐅᑎᓈᓐ᙮

ᐊᐊ ᑕᔥ ᑸᐎᓭᔅ ᐃᐃᒫ ᐅᐸᒦᑕᑫᐎᑴᕽ ᑳᑮᐅᒋᓂᑖᐎᑭᒡ, ᑲᑭᓇ ᐊᐎᔭ ᑳᐃᔑᓂᑖᐎᑭᓂᒡ ᐃᓴ ᑮᐃᔑᓂᑖᐎᑭ᙮ ᐊᐊ ᑕᔥ ᑯᑕᒃ ᑸᐎᓭᔅ ᐃᐃᒫ ᐁᐸᕒᐊᐋᒻ ᐐᐎᕽ ᑳᑮᐅᒌᒡ, ᑭᔐᒪᓂᑑ ᓴ ᐅᑕᔓᑕᒫᑫᐎᓂᕽ ᑮᐅᒌ᙮

ᑎᐹᒋᒧᐎᓐ ᑕᔥ ᑭᒦᓂᑰᒻ ᑫᐅᒋᓂᓯᑐᑕᒣᒃ᙮ ᐃᑭ ᓴ ᓃᔑᓐ ᐃᑴᐗᒃ ᒦ ᑖᐱᔥᑰ ᐁᔑᓈᑯᓯᐙᒡ ᐃᓂ ᓃᔑᓐ ᐊᔓᑕᒫᑎᐎᓇᓐ ᑭᔐᒪᓂᑑᓐ ᑳᑮᐅᓇᑑᓂᒡ᙮ ᐁᑳᕒ ᑕᔥ ᑮᐃᔑᓂᑳᓱ ᐊᐊ ᐃᑴ ᑳᑮᓂᑖᐎᑭᐋᒡ ᐅᓃᒑᓂᓴᐞ ᒋᐸᒦᑖᑫᓂᒡ᙮ ᒦᑕᔥ ᑲᔦ ᐁᔑᓈᑯᓯᒡ ᑖᐱᔥᑰ ᐃᐃ ᐊᔓᑕᒫᑎᐎᓐ ᑳᑮᐅᓇᒋᑳᑌᒃ ᐃᐃᒫ ᑭᒋᐗᒋᐎᕽ ᓵᐃᓇᐃ ᙮

ᐁᑳᕒ ᑕᔥ ᑲᔦ ᐃᔑᓈᑯᓯ ᑖᐱᔥᑰ ᐃᐃ ᑭᒋᐗᒋᐤ ᓵᐃᓇᐃ ᑳᑮᐃᔑᓂᑳᑌᓂᒃ ᐌᑎ ᐊᕒᐁᐱᔭ ᐊᑮᕽ ᑳᐊᔮᓂᒃ᙮ ᒦ ᓴ ᑲᔦ ᑖᐱᔥᑰ ᐁᔑᓈᑯᓯᒡ ᐃᐃ ᑭᒋᐆᑌᓈᓂ ᒉᕒᐆᓴᓬᐊᒻ ᓅᑯᒻ ᑳᐙᐸᑕᒣᒃ᙮ ᒉᕒᐆᓴᓬᐊᒻ ᐃᓴ ᐃᔑᓈᑾᓐ ᑖᐱᔥᑰ ᐅᐸᒦᑖᑫ, ᐃᑭ ᑲᔦ ᑲᑭᓇ ᐯᒫᑎᓯᐙᒡ ᐃᒫ ᑳᐃᔑᑎᐯᑖᑯᓯᐙᒡ᙮

ᐃᐃᐌ ᑕᔥ ᐐᓐ ᒉᕒᐆᓴᓬᐊᒻ ᑭᒋᑮᔑᑯᕽ ᑳᐅᒋᑎᐯᑖᑾᒃ ᐱᓂᔅᑴ ᐱᑯ ᑎᐯᓂᑎᓲᒪᑲᓐ᙮ ᒦ ᓴ ᐁᔑᓈᑯᓯᔭᕽ ᐁᐅᒫᒫᑕᒪᕽ᙮

ᐋᓃᔥ ᑭᒋᒪᓯᓇᐃᑲᓐ ᐃᔑᐲᐃᑳᑌ: ᒌᑫᑕᓐ ᑕᔥ ᑮᓐ ᐃᑴ ᐐᑳ ᑳᐊᔮᐙᓯᐗᒡ ᐊᐱᓅᒌᔥ! ᔖᑯᐌᓐ, ᒌᑭᑖᑯᓯᓐ, ᑮᓐ ᐐᑳ ᑳᒨᔑᑑᓯᐗᓐ ᐃᐃ ᑳᐃᔑᐐᓴᑫᑕᒧᐙᒡ ᐃᑴᐗᒃ ᑳᐐᐅᓃᒑᓂᓯᐙᒡ! ᐊᐊ ᓴ ᐃᑴ ᑳᑮᓇᑲᒋᑲᓂᐎᒡ ᓇᐗᒡ ᓃᐱᐗᐞ ᐅᑲᐊᔮᐙᐞ ᐊᐱᓅᒌᔕᐞ ᐊᐲᒡ ᐐᓐ ᐊᐊ ᐃᑴ ᐐᑳ ᑳᑮᓇᑲᓂᑯᓯᒃ ᐅᓈᐯᒪᓐ᙮

ᓅᑯᒻ ᑕᔥ ᑮᓇᐙ ᓃᑕᓇᒥᐋᒃ, ᑭᔐᒪᓂᑑ ᐅᑕᔓᑕᒫᑫᐎᓂᕽ ᑭᑑᒋᐅᓃᒑᓂᓯᒥᑰᒻ, ᑖᐱᔥᑰ ᐋᐃᓯᒃ ᐊᔓᑕᒫᑫᐎᓂᕽ ᑳᑮᐃᔑᐅᓃᒑᓂᓯᒥᓐᒡ᙮

ᐃᐃ ᑕᔥ ᐊᐲ, ᐊᐊ ᓴ ᑸᐎᓭᔅ ᑳᑮᐃᔑᓂᑖᐎᑭᒡ ᑲᑭᓇ ᐊᐎᔭ ᑳᐃᔑᓂᑖᐎᑭᓂᒡ, ᐅᑮᑲᒀᑕᑭᐋᓐ ᐃᓂ ᑯᑕᒃ ᑸᐎᓭᓴᓐ ᑳᑮᐅᒋᓂᑖᐎᑭᓂᒡ ᑭᔐᒪᓂᑑᓐ ᐅᑕᒑᑯᓂ ᐅᑎᔑᒋᑫᐎᓂᓃᕽ᙮ ᒦᑕᔥ ᑫᔮᐱ ᓅᑯᒻ ᐁᔑᓭᒃ᙮

ᒦ ᓴ ᐅᐅ ᑭᒋᒪᓯᓇᐃᑲᓐ ᐁᔑᐲᐃᑳᑌᒃ: ᓂᑯᒋ ᓴ ᐃᔑᓂᔕᐅᒃ ᐊᐊ ᑳᐸᒦᑖᑫᒡ ᐃᑴ, ᐃᓂ ᑲᔦ ᐅᑯᓯᓴᓐ᙮ ᐋᓃᔥ ᐊᐊ ᑸᐎᓭᔅ ᑳᑮᐅᒫᒫᒡ ᐃᓂ ᐃᑴᐗᓐ ᑳᑮᐸᒦᑖᑫᓂᒡ, ᑳᐐᓐ ᑕᒦᓈᓰ ᑫᑰᓂᓂ ᐅᑌᑌᓐ ᐅᑕᔭᐄᒥᓂ ᑖᐱᔥᑰ ᑳᐐᐃᔑᒦᓂᓐᒡ ᐊᐊ ᑸᐎᓭᔅ ᑳᑮᐅᒫᒫᒡ ᐃᓂ ᐃᑴᐗᓐ ᑳᐸᒦᑖᑫᓯᓂᒃ᙮

ᓃᑕᓇᒥᐋᒃ, ᑳᐐᓐ ᑕᔥ ᐊᐊ ᐃᑴ ᑳᐸᒦᑖᑫᒡ ᑭᑑᓃᒑᓂᓯᒥᑯᓰᓈᓐ, ᐊᐊ ᓴ ᐃᑴ ᑳᐸᒦᑖᑫᓯᒃ ᑭᑑᓃᒑᓂᓯᒥᑯᓈᓐ᙮

X ᓴ ᑭᑮᐋᐸᐅᑯᓈᓐ ᐁᑳ ᒦᓇᐙ ᒋᑎᐯᓂᒥᑯᓯᐗᕽ ᐅᓇᔓᐌᐎᓐ᙮ ᒪᔥᑲᐎᑳᐸᐎᒃ ᐃᑕᔥ ᐃᐃᒫ ᑳᑮᐃᔑᐋᐸᐅᑰᔦᒃ᙮ ᑫᑯ ᒦᓇᐙ ᐸᑭᑎᓂᑎᓱᑫᒃ ᒋᑎᐯᓂᒥᑯᔦᒃ ᐅᓇᔓᐌᐎᓐ᙮

ᐃᓇᔥᑫ ᐱᓯᑕᐎᔑᒃ, ᓃᓐ ᑆᓬ ᑭᐐᑕᒪᐎᓂᓂᒻ! ᑮᔥᐱᓐ ᐸᑭᑎᓂᑎᓱᔦᒃ ᒋᑭᑭᓇᐙᑕᔕᑫᔓᑰᔦᒃ, ᑳᐐᓐ ᐃᐃᒫ ᑲᓇᑫ X ᑭᑲᐅᒋᐐᒋᐃᑯᓰᐙ᙮

ᒦᓇᐙ ᑭᑕᔮᒀᒥᒥᓂᓂᒻ, ᑮᔥᐱᓐ ᐊᐎᔭ ᐸᑭᑎᓂᑎᓱᒡ ᐱᓵᓂᑯ ᒋᑭᑭᓇᐙᑕᔕᑫᔓᓐᒡ, ᒦ ᓴ ᐁᔑᓈᑾᓂᓂᒃ ᐅᒋᑕᑯ ᒋᓇᐃᑕᕽ ᑲᑭᓇ ᐃᐃ ᐅᓇᔓᐌᐎᓐ ᑳᐃᓇᑌᓂᒃ᙮

ᑮᓇᐙ ᑕᔥ ᑳᑲᑴᒋᑑᔦᒃ ᒋᐅᒋᒥᓋᑭᒥᓀᒃ ᑭᔐᒪᓂᑑ ᐁᐱᒥᓂᔕᐊᒣᒃ ᐃᐃ ᐅᓇᔓᐌᐎᓐ ᑳᐃᓇᑌᒃ, ᒦ ᓴ ᐃ ᑖᐱᔥᑰ ᐁᐃᔑᒋᑫᔦᒃ ᐁᓇᑲᓀᒃ X ᐁᐐᒌᐙᓯᐌᒃ᙮ ᒦ ᓴ ᐁᐊᔮᔦᒃ ᐋᑎ ᑭᔐᒪᓂᑑ ᐅᑭᔐᐙᑎᓯᐎᓐ ᑫᔑᐐᒋᐃᑯᓯᐌᒃ᙮

ᓃᓇᐎᓐᑦ ᑕᔥ ᐐᓐ, ᒦ ᐃ ᐁᔑᐊᐯᓂᒧᔮᕽ ᑭᔐᒪᓂᑑ ᒋᐅᒋᑾᔭᑾᑭᒥᔭᒥᓐᒡ᙮ ᐅᑕᒑᑾᓐ ᐃᑕᔥ ᓂᐐᒌᐃᑯᐙᒥᓐ ᐁᑌᐺᔦᑕᒫᕽ ᑳᐅᒋᐲᑑᔮᕽ ᐃᐃ ᑾᔭᒀᑎᓯᐎᓐ᙮

ᐊᐲ ᓴ ᑮᐐᒌᐎᓐᒡ X ᒋᓴᔅ, ᐊᐊ ᓴ ᑳᑭᑭᓇᐙᑕᔕᑫᔑᑲᓂᐎᒡ ᐊᐊ ᑲᔦ ᐁᑳ ᑳᑭᑭᓇᐙᑕᔕᑫᔑᑲᓂᐎᓯᒃ ᑳᐐᓐ ᐯᔑᒃ ᐊᐗᔑᒣ ᐊᐲᑌᑖᑯᓯᓰ᙮ ᑳᐐᓐ ᑕᔥ ᐐᓐ ᐃᐃ ᑳᑭᒋ ᐃᓀᑖᑾᒃ᙮ ᑌᐺᑕᒧᐎᓐ ᓴ ᐃᐃ ᓵᑭᐃᐌᐎᓂᕽ ᑳᐃᔑᐊᓄᑮᒪᑲᒃ, ᒦ ᓴ ᐃ ᑳᑭᒋ ᐃᓀᑖᑾᒃ᙮

ᐋᐱᒋ ᑕᔥ ᐐᑫ ᐌᐌᓂ ᐁᒥᓄᐸᑑᔦᑭᐸᓐ ᐁᑲᑴᒋᑲᔑᐌᔦᒃ ᐁᐃᔑᒋᑫᔦᑭᐸᓐ! ᐊᐌᓀᓐ ᑕᔥ ᑳᑭᐱᑎᓂᓀᒃ ᐁᐱᒥᓂᔕᐊᒣᑭᐸᓐ ᐃᐃ ᑌᐺᐎᓐ? ᐋᓃᓐ ᑕᔥ ᑳᐃᑭᑐᒡ ᑳᑮᐅᒋᑲᔥᑭᒥᓀᒃ?

ᑳᐐᓐ ᑕᔥ ᐐᓐ ᑭᔐᒪᓂᑑ ᑳᐊᑐᒥᓀᒃ ᐃᐃ ᑭᑮᐃᑯᓰᐙ!

ᐋᐱᒋ ᓴ ᐸᑮ ᐅᐱᓯᑲᓐ ᐁᐋᐸᑕᒃ, ᒦ ᓴ ᒥᓯᐌ ᐸᑴᔑᑲᓐ ᐁᔑᐅᐱᔥᑳᒡ, ᒫᐐᓐ ᑖᐃᑭᑐᒻ᙮

ᑭᑑᒋᑫᒋᓈᐃᓂᓂᒻ ᐁᐐᒋᐌᒃ ᑳᑎᐯᒋᑫᒡ, ᒋᐅᑖᐱᓇᓯᐌᒃ ᑫᑰᓐ ᐸᑳᓐ ᑳᐃᔑᑌᐺᑕᓯᐙᓐ᙮ ᑭᔐᒪᓂᑑ ᓴ ᐅᑲᓇᓇᐊᓵᓐ ᐃᓂ ᐃᓂᓂᐗᓐ ᐊᐌᓀᓂᐎᓂᑴᓐ ᑳᒥᑯᔥᑳᒋᐃᓀᒃ᙮

ᓃᑕᓇᒥᐋᒃ, ᑮᔥᐱᓐ ᑕᔥ ᓃᓐ ᑫᔮᐱ ᑲᑮᒀᑕᒫᐹᓐ ᐃᐃ ᑭᑭᓇᐙᑕᔕᑫᔓᑰᐎᓐ, ᐌᑯᓀᓐ ᑕᔥ ᑫᔮᐱ ᐌᒋᑲᒀᑕᑭᐃᑰᔮᓐ? ᑮᔥᐱᓐ ᑕᔥ ᐃᐃ ᑌᐺ ᐃᔑᑲᑮᑴᔮᓐ, ᑳᐐᓐ ᐄᑐᒃ ᐊᐎᔭ ᓂᑖᒫᓂᑖᑯᓰ ᑲᑮᒀᓂᒪᒃ ᐃᓂ ᒋᓴᓲᓐ ᑳᑮᓂᐳᓂᒡ ᐋᔑᑌᔮᑎᑯᕽ᙮

ᒦᑕᔥ ᐁᔑᒥᓴᐌᑕᒫᓐ ᐃᑭ ᓴ ᑳᒥᑯᔥᑳᒋᐃᓀᒀ ᐱᓵᓂᑯ ᒋᐊᓂᒪᓂᔕᒧᐙᒡ ᐅᑎᓂᓃᐎᓂᐙᓐ᙮

ᑮᓇᐙ ᑕᔥ ᐐᓐ ᓃᑕᓇᒥᐋᒃ, ᑭᔐᒪᓂᑑ ᐅᔕ ᑭᑮᐊᑐᒥᑯᐙ ᐃᐃᒫ ᐋᐸᐅᑰᐎᓂᕽ ᒋᑎᐯᓂᑎᓱᔦᒃ᙮ ᑫᑯ ᑕᔥ ᐐᓐ ᐃᐃ ᑭᑎᐯᓂᒥᑎᓱᐃᑰᐎᓂᐙ ᐋᐸᒋᑑᑫᒃ ᒋᐅᒋᒪᒋᑑᑕᒣᒃ, ᑫᑯ ᑲᔦ ᐸᑭᑎᓇᑫᒃ ᐃᓂ ᑭᒪᒋᒥᓴᐌᑕᒧᐎᓂᐙᓐ ᒋᑎᐯᓂᒥᑯᔦᒃ᙮ ᐅᐅ ᑕᔥ ᐃᔑᒋᑫᒃ, ᓵᑭᐃᑎᐎᓂᕽ ᐃᔑᓈᓈᑲᒋᐃᑎᒃ᙮

ᐋᓃᔥ ᑲᑭᓇ ᐅᓇᔓᐌᐎᓐ ᑖᐃᔑᒨᔥᑭᓀᑑᒋᑳᑌ ᐅᐅ ᐃᔑᒋᑫᓈᓂᐗᕽ: ᓵᑭᐞ ᑮᒋᐱᒫᑎᔅ ᑖᐱᔥᑰ ᑳᐃᔑᓵᑭᐃᑎᓱᔭᓐ᙮

ᐊᔮᒀᒥᓯᒃ! ᑮᔥᐱᓐ ᐊᔭᐋᐎᔑᕽ ᑑᑖᑎᔦᒃ, ᒫᒫᑾᓂᑎᔦᒃ, ᐐᓴᑳᐱᓇᓂᑎᔦᒃ, ᒦ ᒫᐐᓐ ᐃᐃ ᒋᒑᑭᓇᓂᑎᔦᒃ!

ᒦᑕᔥ ᐅᐅ ᐁᓂᓇᑰᒃ: ᐸᑭᑎᓂᒃ ᓴ ᐊᐊ ᑭᔐᒪᓂᑑ ᐅᑕᒑᑾᓐ ᒋᐱᒥᐎᑑᒡ ᐃᓂ ᑭᐱᒫᑎᓯᐎᓂᐙᓐ᙮ ᑳᐐᓐ ᑕᔥ ᑭᑲᐃᔑᒋᑫᓰᒻ ᑳᐃᔑᒪᒋᒥᓴᐌᑕᒨᒪᑲᒃ ᑭᑫᑌᐃᓈᑎᓯᐎᓂᐙ᙮

ᐊᐎᔭ ᓴ ᐅᑫᑌᐃᓈᑎᓯᐎᓐ ᓇᐹᒡ ᐃᓇᑫ ᐃᔑᒥᓴᐌᑕᒨᒪᑲᓂᓂ, ᑳᐐᓐ ᐐᓐ ᑭᔐᒪᓂᑑ ᐅᑕᒑᑾᓐ ᑳᐃᔑᒥᓴᐌᑕᒥᓂᒡ ᐃᔑᒋᑫᒪᑲᓯᓂᓂ᙮ ᐊᐊ ᑕᔥ ᑲᔦ ᑭᔐᒪᓂᑑ ᐅᑕᒑᑾᓐ ᑳᐐᓐ ᐃᔑᒥᓴᐌᑕᓰᐗᓐ ᐃᐃ ᑫᑌᐃᓈᑎᓯᐎᓐ ᑳᐐᐃᔑᒋᑫᒪᑲᓂᓂᒃ᙮ ᐊᐊ ᑕᔥ ᐊᒑᒃ ᐅᒥᓴᐌᑕᒧᐎᓐ ᐃᐃ ᑲᔦ ᑭᑫᑌᐃᓈᑎᓯᐎᓂᐙ ᒦᑕᔥ ᒨᔕᒃ ᒦᑳᑏᒪᑲᓅᓐ᙮ ᒦᑕᔥ ᐃᐃ ᑳᐅᒋᑲᔥᑭᑑᓯᐌᒃ ᐃᐃ ᑳᔑᐊᑕᐌᑕᒣᒃ ᐁᐐᐃᔑᒋᑫᔦᒃ᙮

ᑮᔥᐱᓐ ᑕᔥ ᑭᔐᒪᓂᑑ ᐅᑕᒑᑾᓐ ᐱᒥᐎᑑᓂᒡ ᑭᐱᒫᑎᓯᐎᓂᐙᓐ, ᑳᐐᓐ ᐄᓴᓐ ᑭᑎᐯᓂᒥᑯᓰᒻ ᐃᐃ ᐅᓇᔓᐌᐎᓐ᙮

ᐋᐱᒋ ᑕᔥ ᐯᔭᑌᓈᑾᓐ ᐃᐃ ᑫᑌᐃᓈᑎᓯᐎᓐ ᐁᔑᒋᑫᒪᑲᒃ᙮ ᒦᑕᔥ ᐅᐅ ᐁᔑᐊᓄᑮᒪᑲᒃ: ᐱᔑᒀᑎᓯᐎᓐ, ᐐᓈᑎᓯᐎᓐ, ᓇᐹᒋᐱᔑᒀᒋᒋᑫᐎᓐ,

ᒪᓂᑑᑫᐎᓐ, ᒪᒫᑕᐎᒋᑫᐎᓐ, ᔒᑫᓂᑎᐎᓐ, ᑮᑳᑎᐎᓐ, ᐊᔮᔐᓂᑎᐎᓐ, ᐗᑫᐎᑭᑖᓱᐎᓐ, ᑲᑴᓃᑳᓀᓂᑎᓱᐎᓐ, ᑲᑴᔖᑰᓱᑎᐎᓐ, ᐸᑫᐎᓂᑎᐎᓐ,

ᒥᓴᐎᓈᑫᐎᓇᓐ, ᑮᐗᔥᑴᐲᐎᓐ, ᐸᐹᑲᑮᐹᑎᓯᐎᓐ ᑲᔦ ᑖᐱᔥᑰ ᒦᐗᓄᓄ ᑎᓄ᙮ ᒦᑕᔥ ᓃᔮᒃ ᐁᔑᐊᔮᒀᒥᒥᓇᑰᒃ, ᐊᐎᔭ ᑳᑑᑕᕽ ᐃᓂ ᑳᐐᑕᒫᓐ, ᑳᐐᓐ ᑕᐐᒋᑣᓰ ᑭᔐᒪᓂᑑᓐ ᐅᑑᑭᒫᐎᐎᓂᓃᕽ᙮

ᐃᓂ ᑕᔥ ᑭᔐᒪᓂᑑ ᐅᑕᒑᑾᓐ, ᒦᐗᓄᓄ ᓀᑖᐎᑭᑑᓂᒡ: ᓵᑭᐃᐌᐎᓐ, ᒥᓉᑕᒧᐎᓐ, ᐱᓵᓂᓯᐎᓐ, ᔒᐯᑕᒧᐎᓐ, ᑭᔐᐙᑎᓯᐎᓐ, ᒥᓄᑑᑖᑎᐎᓐ, ᑌᐺᔦᑖᑯᓯᐎᓐ,

ᓅᑳᑎᓯᐎᓐ, ᐌᐌᓂ ᑲᓇᐌᓂᑎᓱᐎᓐ᙮ ᐃᑭ ᑕᔥ ᐅᐅ ᑳᐃᔑᐱᒫᑎᓯᐙᒡ ᑳᐐᓐ ᐅᑲᐸᐹᒣᓂᒥᑯᓰᓈᐙ ᐅᓇᔓᐌᐎᓂᓂ᙮

ᐃᑭ ᑕᔥ X ᒋᓴᓱᕽ ᑳᐃᔑᑎᐯᑖᑯᓯᐙᒡ ᐋᔕ ᐋᔑᑌᔮᑎᑯᕽ ᐅᑮᐃᔑᓂᑑᓈᐙᓐ ᐅᑫᑌᐃᓈᑎᓯᐎᓂᐙᓐ, ᐃᓂ ᑲᔦ ᑳᑮᐃᔑᑕᑯᐊᑕᐌᑕᒨᒪᑲᓂᓂᑭᐸᓃᓐ, ᑲᔦ ᑳᑮᐃᔑᒥᓴᐌᒋᑫᒪᑲᓂᓂᑭᐸᓃᓐ᙮

ᐊᒑᑯᕽ ᐃᑕᔥ ᐁᐅᒋᐱᒫᑎᓯᔭᕽ, ᑕᑲ ᑕᔥ ᑲᔦ ᐊᒑᑯᕽ ᐃᔑᐱᒧᓭᑖ᙮

ᑕᑲ ᑳᐐᓐ ᑭᑲᐗᐎᔣᓱᓰᒥᓐ ᑳᐐᓐ ᑲᔦ ᑭᑲᑲᑴᓂᔥᑭᐃᑎᓰᒥᓐ, ᑳᐐᓐ ᑲᔦ ᑭᑲᐊᔮᔐᓂᑎᓰᒥᓐ᙮

ᓃᑕᓇᒥᐋᒃ, ᑮᔥᐱᓐ ᑕᔥ ᐊᐎᔭ ᐅᒋᒥᑲᐎᓐᒡ ᐋᓃᓐ ᐃᑯ ᐃᔑᒪᒋ ᐃᔑᒋᑫᒡ, ᑮᓇᐙ ᓴ ᑳᓇᐃᑕᐎᒣᒃ ᑭᔐᒪᓂᑑ ᐅᑕᒑᑾᓐ ᐐᒋᐃᒃ ᐊᐊ ᑳᑮᒪᒫᔒᒡ ᒦᓇᐙ ᑾᔭᒃ ᒋᐱᒧᓭᒡ᙮ ᐌᐌᓂ ᓴ ᑑᑕᐎᒃ ᐊᐲ ᐐᒋᐁᒃ᙮ ᑳᑕᓱᐯᔑᑯᔦᒃ ᐃᑕᔥ ᓈᓈᑲᒋᐃᑎᓱᒃ ᑫᑮᓇᐙ ᒋᑯᒋᐃᑰᓯᐌᒃ᙮

ᐙᐐᒋᐃᑎᒃ ᑕᔥ ᒋᐱᒥᐎᑕᒫᑎᔦᒃ ᐃᓂ ᑳᐱᒥᐎᑑᔦᒃ᙮ ᐅᐅ ᑕᔥ ᑮᐃᔑᒋᑫᔦᒃ ᒦ ᓴ ᐃ ᐁᓇᐃᑕᒧᐌᒃ ᐅᓇᔓᐌᐎᓐ X ᑳᑮᐃᔑᑭᑭᓄᐃᑫᒡ᙮

ᑮᔥᐱᓐ ᑕᔥ ᐃᓂᓂ ᑭᒋᑫᑰᓂᓂ ᐃᓀᓂᑎᓱᒡ, ᑫᑰᓂᓂ ᑕᔥ ᐁᐊᐲᑌᑖᑯᓯᓯᒃ, ᐋᐱᒋ ᑭᒋᐗᓀᓂᑎᓱ᙮

ᒦ ᓴ ᐁᔑᓈᑾᓂᓂᒃ ᐊᐎᔭ ᐐᓐ ᐃᑯ ᒋᑲᓇᐙᐸᑕᕽ ᐋᓃᓐ ᐁᔑᒋᑫᒡ᙮ ᑮᔥᐱᓐ ᑕᔥ ᒥᓄᓈᑾᓂᓂᒃ ᐃᐃ ᐅᑎᔑᒋᑫᐎᓐ, ᐅᑕᔮᓐ ᓴ ᑫᑰᓂᓂ ᒋᐅᒋᑭᒋ ᐃᓀᑕᕽ᙮ ᑳᐐᓐ ᑕᔥ ᐐᓐ ᒣᒬᒡ ᐸᑳᓐ ᐊᐎᔭᓐ ᐅᑲᑲᓇᐙᐸᒫᓰᓐ ᑕᑲ ᑾᔭᒃ ᒋᐃᔑᐱᒫᑎᓯᑴᓐ᙮

ᒦ ᓴ ᐁᔑᓈᑾᓂᓂᒃ ᑲᑭᓇ ᐊᐎᔭ ᐐᓐ ᐃᑯ ᒋᐱᒥᐎᑕᒫᓱᐸᓐ ᐅᐱᒥᐗᓈᓐ᙮

ᐊᐊ ᑕᔥ ᐃᓂᓂ ᑳᑭᑭᓄᐊᒪᐎᓐᒡ ᐃᐃ ᑭᔐᒪᓂᑑ ᐅᑎᐹᒋᒧᐎᓂᓂ, ᒦ ᓴ ᐁᔑᓈᑾᓂᓂᒃ ᐃᐃᒫ ᑳᐅᓂᔑᔑᓂᓂᑭᓐ ᑫᑰᓇᓐ ᑳᑎᐯᑕᕽ ᒋᐅᒋᐐᒋᐋᒡ ᐃᓂ ᑳᑭᑭᓄᐊᒫᑯᒡ᙮

ᑫᑯ ᑕᔥ ᐐᓐ ᐗᓀᑕᑫᒃ ᐅᐅ: ᑭᔐᒪᓂᑑ ᓴ ᑳᐐᓐ ᑎᓄᐎᓰ ᒋᐹᐱᓄᑕᐎᑎᐸᓐ᙮ ᐌᑯᓀᓐ ᓴ ᑯ ᐃᓂᓂ ᑫᑎᑳᑕᕽ, ᒦ ᓴ ᐃᐃᐌᓂ ᑫᒨᓇᐊᕽ᙮

ᐊᐊ ᓴ ᐊᐎᔭ ᑳᐃᔑᑭᑎᑫᒡ ᐅᑫᑌᐃᓈᑎᓯᐎᓂᕽ, ᓂᐳᐎᓂᓂ ᑕᔥ ᐅᑲᒨᓇᐋᓐ ᐃᐃᒫ ᑳᑮᐃᔑᑭᑎᑫᒡ᙮ ᐊᐊ ᓴ ᐐᓐ ᐊᐎᔭ ᐃᐃᒫ ᑳᐃᔑᑭᑎᑫᒡ, ᑳᐃᔑᐐᒋᐃᐌᓂᒡ ᑭᔐᒪᓂᑑᓐ ᐅᑕᒑᑯᓂ, ᒨᔕᒃ ᑫᐊᔮᓂᒃ ᐱᒫᑎᓯᐎᓂᓂ ᐅᑲᒨᓇᐋᓐ ᐃᐃᒫ ᑳᑮᐃᔑᑭᑎᑫᒡ᙮

ᑕᑲ ᑕᔥ ᑮᓇᐎᓐᑦ ᑳᐐᓐ ᑭᑲᐸᑭᑌᑕᓰᒥᓐ ᐃᐃ ᑳᐃᔑᑲᑴᒥᓄᑑᑕᒪᕽ ᒨᔕᒃ᙮ ᐋᓃᔥ ᑕᐅᒋᒋᓭ ᐊᐲ ᑫᑮᓇᐎᓐᑦ ᒋᒨᓇᐃᑫᔭᕽ, ᑮᔥᐱᓐ ᓅᑌᐸᑭᒌᓯᐗᕽ᙮

ᑕᑲ ᑕᔥ ᑮᔥᐱᓐ ᐃᔑᓭᒃ ᐊᐎᔭ ᒋᒥᓄᑑᑕᐗᑭᒡ, ᑕᑲ ᑾᔭᒃ ᑑᑕᐙᑖᓂᒃ ᑲᑭᓇ ᐯᒫᑎᓯᐙᒡ, ᐃᑭ ᓴ ᐊᐗᔑᒣ ᐐᒋᐋᑖᓂᒃ ᑳᐅᒋ ᐃᓇᐌᒪᒀ ᑌᐺᑕᒧᐎᓂᕽ ᑳᐃᔑᑎᐯᑖᑯᓯᐙᒡ᙮

ᑭᐙᐸᑖᒻ ᐄᑐᒃ ᓃᓐ ᐋᓃᓐ ᐁᐲᒋᒪᑭᐲᐃᑫᔮᓐ ᐅᐅ ᐃᔥᒀᒡ ᑳᐅᔑᐲᐊᒪᐎᓇᑰᒃ, ᓃᓐ ᐃᑯ ᓂᓂᓐᒡ ᐁᐋᐸᒋᑑᔮᓐ᙮

ᐃᑭ ᑕᔥ ᐊᐎᔭᒃ ᑳᑲᑴᑲᔥᑭᒥᓀᒀ ᒋᑭᑭᓇᐙᑕᔕᑫᔑᑲᓂᐎᔦᒃ, ᒦᐗᒃ ᓴ ᐃᑭ ᐁᑕ ᑳᑲᑴᒥᓄᓈᑯᑑᐙᒡ ᒋᐙᐸᒋᑳᑌᓂᑭᓐ ᐅᑎᔑᒋᑫᐎᓂᐙ ᐐᔭᐎᒫᕽ ᐃᓇᑫ, ᐁᐐᐅᒋᒪᒦᒀᓂᑎᓱᐙᒡ ᐃᑕᔥ᙮ ᒦᑕᔥ ᐃᐃ ᐁᑕ ᑳᐅᒋ ᐃᔑᒋᑫᐙᒡ, ᑮᔥᐱᓐ ᐋᓃᔥ ᑕᔑᒫᐙᐸᓐ Xᑕᓐ ᑳᑮᐅᒋᓂᐳᓂᒡ ᐋᔑᑌᔮᑎᑯᕽ ᑫᐐᓇᐙ ᑖᑮᑲᒀᑕᑭᐋᐗᒃ᙮

ᐃᑭ ᓴ ᑳᑭᑭᓇᐙᑕᔕᑫᔓᐌᐙᒡ ᑳᐐᓐ ᑕᔥ ᑲᔦ ᐐᓇᐙ ᐅᑑᑕᓰᓈᐙ ᐃᐃ ᐅᓇᔓᐌᐎᓂᓂ ᑳᐃᓇᑌᓂᒃ᙮ ᒦ ᓴ ᐁᑕ ᑕᔥ ᑳᐅᒋᐊᑕᐌᓂᒥᓀᒀ ᒋᑭᑭᓇᐙᑕᔕᑫᔓᑰᔦᒃ ᐁᐐᒪᒦᒀᓂᑎᓱᐙᒡ ᐁᑮᑲᔥᑭᒥᓀᒀ ᒋᐅᑖᐱᓇᒧᐌᒃ ᑳᐃᔑᑭᑭᓇᐙᒋᑑᐙᒡ ᐐᔭᐎᒫᓐ᙮

ᑳᐐᓐ ᐃᑕᔥ ᓃᓐ ᐐᑳ ᓂᑖᐃᔑᒋᑫᓰ᙮ ᓃᓐ ᐃᑕᔥ ᐐᓐ ᐃᐃ ᐁᑕ ᓂᑲᑕᔑᑖᓐ ᒋᓴᔅ X ᐁᑮᓂᐳᒡ ᐃᐃᒫ ᐋᔑᑌᔮᑎᑯᕽ᙮ ᐅᐅᒫ ᐊᑮᕽ ᑳᑭᒋ ᐃᓀᑖᑾᒃ ᓃᓐ ᐐᓐ ᓂᑎᓇᑭᑖᓐ ᑖᐱᔥᑰ ᐁᓂᐴᒪᑲᒃ᙮ ᒦ ᑲᔦ ᓃᓐ ᐁᔑᓈᓱᔮᓐ ᐁᑮᓂᐳᔮᓐ ᒋᑑᑕᓯᐙᓐ ᑳᑭᒋ ᐃᓀᑖᑾᒃ ᐅᐅᒫ ᐊᑮᕽ᙮

ᐊᐊ ᑕᔥ ᑳᑮᑭᑭᓇᐙᑕᔕᑫᔑᑲᓂᐎᒡ, ᑲᔦ ᑳᑭᑭᓇᐙᒋᒋᑲᓂᐎᓯᒃ ᑳᐐᓐ ᑲᓇᑫ ᑫᑰᓐ ᐃᓈᐸᑕᓯᓂᓂ ᑳᑑᑕᐎᑣ᙮ ᐊᐎᔭ ᐅᔕ ᑳᐅᔥᑭᐅᔑᒋᑲᓂᐎᒡ ᒦ ᓴ ᐅᐅᐌ ᑳᑭᒋ ᐃᓀᑖᐗᒃ᙮

ᐃᑭ ᓴ ᑳᐐᐃᔑᐱᒫᑎᓯᐙᒡ ᐃᐃ ᑳᑮᐃᔥᒀᑕᔑᑕᒫᓐ ᐱᓵᓀᑕᒧᐎᓂᓂ, ᔕᐌᑖᑯᓯᐎᓂᓂ ᑲᔦ ᑕᒦᓈᐗᒃ, ᐃᑭ ᑲᔦ ᑲᑭᓇ ᐃᔅᕒᐃᔭᓬ ᑳᐃᓀᑖᑯᓯᐙᒡ, ᑭᔐᒪᓂᑑᓐ ᑳᑎᐯᓂᒥᑯᐙᒡ᙮

ᒦᑕᔥ ᐅᐅ ᐁᑭᑐᔮᓐ ᐃᔥᒀᒡ, ᑕᑲ ᑫᑯ ᐊᐎᔭ ᐊᐗᔑᒣ ᓂᑲᒥᑯᔥᑳᒋᐃᑯᓰ, ᐋᓃᔥ ᓈᑾᓅᓐ ᐃᓂ ᓂᑲᒀᑕᑭᐃᑰᐎᓇᓐ ᐃᐃᒫ ᓂᐐᔭᐎᕽ᙮ ᒦᑕᔥ ᐃᐃᒫ ᐁᔑᑭᑭᓇᐙᓯᓈᑾᒃ ᐁᐊᓄᑮᑕᐗᒃ ᒋᓴᔅ᙮

ᑕᑲ ᑕᔥ ᑳᑎᐯᒋᑫᒡ ᒋᓴᔅ X ᐅᑭᔐᐙᑎᓯᐎᓐ ᑭᑲᐐᒌᐎᑯᒻ ᑭᑕᒑᑯᐙᕽ ᑲᑭᓇ ᑳᑕᔑᔦᒃ, ᓃᑕᓇᒥᐋᒃ! ᐁᒣᓐ᙮