21

ᓃᓐ ᑆᓬ ᒋᓴᔅ X ᐅᑎᔑᓂᔕᐙᑲᓇᓐ ᑭᔐᒪᓂᑑ ᑳᑮᐃᓀᑕᕽ, ᑎᒪᑎ ᑮᑕᓇᒥᐋᓈᓐ ᓴ ᓂᐐᒌᐙ᙮ ᑭᑑᔑᐲᐊᒪᐎᓂᓂᒻ ᑮᓇᐙ ᐅᑌᐺᑕᒨᒃ ᒀᕒᐃᑎᕽ ᑳᐃᔑᒫᐗᒋᐃᑎᔦᒃ, ᑭᔐᒪᓂᑑ ᑳᑎᐯᓂᒥᓀᒃ, ᑲᑭᓇ ᑲᔦ ᑭᔐᒪᓂᑑ ᑳᑎᐯᓂᒫᒡ ᐯᒫᑎᓯᓂᒡ ᒥᓯᐌ ᑳᐊᔮᓂᒡ ᐌᑎ ᐊᑫᔮᐗᑮᕽ ᙮
ᑕᑲ ᑭᔐᒪᓂᑑ ᑰᓯᓈᓐ, ᑳᑎᐯᒋᑫᒡ ᒋᓴᔅ X ᑲᔦ ᑭᑲᑭᔐᐙᑎᓰᑲᑖᑯᐙ; ᐱᓵᓂᓯᐎᓂᓂ ᑲᔦ ᑭᑲᒦᓂᑯᐙ᙮
ᑕᑲ ᒦᑴᒋᐌᓂᒫᑖ ᑭᔐᒪᓂᑑ, ᑳᑎᐯᒋᑫᒡ ᒋᓴᔅ X ᑳᐅᔫᓯᒡ, ᑳᔕᐌᒋᑫᒡ ᐌᔫᓯᒥᓐᒡ, ᐋᓃᔥ ᒦ ᐃ ᐌᑎ ᑲᑭᓇ ᐌᒌᒃ ᓈᑕᒫᑰᐎᓐ᙮
ᓂᐐᒋᐃᑯᓈᓐ ᓴ ᑮᐗᐙᓀᑕᒥᒫᔑᓭᔮᕽ, ᑫᓃᓇᐎᓐᑦ ᒋᐐᒋᐊᑭᑣ ᑯᑕᒃ ᐃᑭ ᐐᑫ ᑳᑲᒀᑕᑭᒫᔑᓭᐙᒡ, ᒋᐋᐸᒋᑑᐙᒡ ᓴ ᐃᐃ ᐐᒋᐃᑰᐎᓐ ᑭᔐᒪᓂᑑᕽ ᑳᑮᐅᑎᓇᒫᕽ᙮
ᑖᐱᔥᑰ ᓴ ᑳᔑ ᐐᒋ ᑲᒀᑕᑭᑑᒪᑭᒡ ᐊᐊ X ᐅᑲᒀᑕᑭᑑᐎᓂᕽ, ᒦ ᓴ ᐯᔑᑾᓐ ᐃᐃᒫ Xᐃᕽ ᑭᔐᒪᓂᑑ ᓂᑲᐐᒋᐃᑯᓈᓐ᙮
ᑮᔥᐱᓐ ᑲᒀᑕᑭᑑᔮᕽ, ᒦ ᓴ ᑳᐅᒋᑲᒀᑕᑭᑑᔮᕽ, ᑮᓇᐙ ᒋᐐᒋᐃᑰᔦᒃ ᒋᐱᒫᒋᐃᑰᐎᓯᔦᒃ ᑲᔦ᙮ ᑮᔥᐱᓐ ᑕᔥ ᐐᒋᐃᑰᔮᕽ, ᒦᑕᔥ ᑫᑮᓇᐙ ᒋᐐᒋᐃᑰᐎᓯᔦᒃ, ᐁᒦᓂᑰᔦᒃ ᒪᔥᑲᐎᓰᐎᓐ ᒋᑲᔥᑭᑑᔦᒃ ᒋᔕᔒᐯᑕᒣᒃ ᐃᓂ ᑭᑲᒀᑕᑭᑑᐎᓂᐙᓐ, ᑫᓃᓇᐎᓐᑦ ᑳᔑᑲᒀᑕᑭᑑᔮᕽ᙮
ᑫᒋᓈᒡ ᐃᑕᔥ ᑭᑌᐺᔦᓂᒥᑰᒻ ᐁᑭᑫᓂᒥᑰᔦᒃ ᑫᑮᓇᐙ ᐁᐃᔑᑲᒀᑕᑭᑑᔦᒃ ᑖᐱᔥᑰ ᑳᐃᔑᑲᒀᑕᑭᑑᔮᕽ, ᑲᔦ ᐁᐃᔑᐐᒋᐃᑰᐎᓯᔦᒃ ᑖᐱᔥᑰ ᑳᔑᐐᒋᐃᑰᔮᕽ᙮
ᓃᑕᓇᒥᐋᓈᓂᒃ! ᑭᐐᐐᑕᒫᑰᒻ ᐋᐱᒋ ᐁᑮᑲᒀᑕᑭᑑᔮᕽ ᐌᑎ ᐁᔖᐗᑮᕽ ᑮᐊᔮᔮᕽ, ᒦ ᓴ ᑳᐊᐲᒋᒥᒑᑭᓐ ᐃᓂ ᑲᒀᑕᑭᑑᐎᓇᓐ, ᐁᑮᑯᓯᑴᑖᑾᑭᓐ ᑲᔦ ᑳᑮᒦᓂᑰᔮᕽ, ᒦ ᓴ ᑳᐃᓀᑕᒫᕽ ᑫᒋᓈᒡ ᒦ ᐃ ᒋᓂᐳᔮᕽ᙮
ᒦᑕᔥ ᑳᐃᔑᓈᑯᓯᔮᕽ ᑖᐱᔥᑰ ᐁᑮᐃᓇᑭᒥᑰᔮᕽ ᒋᓂᐳᔮᕽ᙮ ᒦᑕᔥ ᐅᐅ ᑳᑮᐅᒋ ᐃᔑᓭᔮᕽ, ᐊᐊ ᓴ ᑭᔐᒪᓂᑑ ᒋᐊᐯᓂᒧᔮᕽ ᑳᑮᐌᐱᒫᑎᓯᐋᒡ ᑳᓂᐳᓂᒡ, ᑳᐐᓐ ᐐᓐ ᓃᓇᐎᓐᑦ ᒋᐊᐯᓂᒧᓄᑖᓱᓯᐙᕽ᙮
ᐋᐱᒋ ᑕᔥ ᓂᑮᐯᔣᐸᑖᒥᓐ ᐃᐃ ᓂᐳᐎᓐ᙮ ᑭᔐᒪᓂᑑ ᑕᔥ ᓂᑮᔖᐾᐃᑯᓈᓐ᙮ ᑲᔦ ᓂᑲᔖᐾᐃᑯᓈᓐ᙮ ᐐᓐ ᑕᔥ ᓂᑕᐯᓂᒧᓄᑕᐙᓈᓐ ᒦᓇᐙ ᒋᓂᔖᐾᐃᔭᒥᓐᒡ᙮
ᑫᑮᓇᐙ ᓴ ᑭᐐᒋᐃᔑᓈᒻ ᑮᐊᓇᒥᐁᑕᒪᐎᔮᕽ᙮ ᒦ ᓴ ᑲᔦ ᐁᔑᓈᑾᒃ ᑳᐹᑏᓇᑎᑭᓐ ᑳᑮᐃᔑᐊᓇᒥᐁᑕᒪᐎᔮᕽ ᓴ ᑕᓇᑴᒋᑳᑌᐗᓐ, ᑭᔐᒪᓂᑑ ᑕᔥ ᓂᑲᔕᐌᓂᒥᑯᓈᓐ᙮ ᐋᐱᒋ ᓴ ᑕᐹᑏᓄᐗᒃ ᑫᓇᓈᑯᒥᐌᐙᒡ ᓃᓇᐎᓐᑦ ᐅᒋ᙮
ᐅᐅᐌ ᑕᔥ ᐐᑫ ᓂᑭᒋ ᐃᓀᑖᒥᓐ, ᐁᑭᑫᓂᑎᓱᔮᕽ ᑾᔭᒃ ᐁᑮᐃᔑᐱᒫᑎᓯᔮᕽ ᐅᐅᒫ ᐊᑮᕽ, ᑾᔭᒃ ᑲᔦ ᐁᑮᐐᒌᐎᑰᔦᒃ᙮ ᐋᐱᒋ ᓴ ᐌᐌᓂ ᑭᑮᐐᒌᐎᑰᒻ, ᐋᓃᔥ ᑭᔐᒪᓂᑑ ᐅᑭᔐᐙᑎᓯᐎᓐ ᓂᑮᐐᒋᐃᑯᒥᓐ᙮ ᑳᐐᓐ ᐐᓐ ᐃᓂᓃᐎᑲᑮᑖᐌᑕᒧᐎᓐ ᓂᑮᐐᒋᐃᑯᓰᒥᓐ᙮
ᑫᔑᐊᓇᒥᑑᔦᒃ, ᑫᔑᓂᓯᑐᑕᒣᒃ ᐃᓴ ᐁᑕ ᑭᑎᔑᐲᐊᒫᑰᒻ, ᒦᑕᔥ ᐁᔑᐸᑯᓭᓂᒥᑰᔦᒃ ᒋᓂᓯᑐᑕᒣᒃ ᐲᓂᔥ ᐌᑎ ᐃᔥᒀᒡ᙮
ᐋᓇᐐᓐ ᐸᑮ ᐁᑕ ᐁᓂᓯᑐᑕᐎᔮᕽ, ᑮᓇᐙ ᐅᔕ ᒋᔑᑭᒋ ᐃᓀᓂᒥᔮᕽ ᑖᐱᔥᑰ ᑫᔑᑭᒋ ᐃᓀᓂᒥᑰᔦᒃ ᐊᐲ ᒋᓴᔅ ᑳᑎᐯᒋᑫᒡ ᐱᑕᑯᔑᕽ᙮
ᓂᑕᒻ ᓴ ᑫᒋᓈᒡ ᓂᑮᐃᓀᑖᓈᐸᓐ ᐁᐐᒪᐗᑎᓯᓇᑰᒃ ᒋᐅᒋᒥᓉᑕᒣᒃ ᓃᔣ᙮
ᐌᑎ ᓴ ᒫᓯᑑᓂᔭ ᐊᑮᕽ ᑳᐐᐃᔖᔮᐹᓐ, ᓂᑮᐃᓀᑖᓈᐸᓐ ᐁᐐᐙᐸᒥᓇᑰᒃ, ᒦᓇᐙ ᐱᑮᐌᔮᐹᓐ ᐁᐐᐙᐸᒥᓇᑰᑭᐸᓐ ᒋᑮᐐᒋᐃᔦᑭᐸᓐ ᐌᑎ ᑳᐐᐃᔖᔮᐹᓐ ᒎᑏᔭ ᐊᑮᕽ᙮
ᐅᐅ ᓴ ᐁᑮᐃᔑᒋᑫᓯᐙᓐ ᑳᑮᐃᓀᑕᒫᐹᓐ, ᒦ ᓇᐃ ᑳᐃᔑᓈᑯᓯᔮᓐ ᑖᐱᔥᑰ ᑫᑰᓐ ᐁᑕ ᐁᒥᒋ ᐃᓀᑕᒫᓐ, ᐁᐃᔑᒋᑫᓯᐙᓐ ᑳᑮᐃᓀᑕᒫᓐ? ᑖᐱᔥᑰ ᐁᒥᒋᐗᐙᓀᑕᒫᓐ ᐃᓇ ᓂᑎᔑᓈᑯᔅ? ᒦ ᓇᐃ ᐁᔑᓈᑯᓯᔮᓐ ᒦ ᓇᑫ ᑮᐃᑭᑐᔮᓐ, ᐁᑑᑕᓯᐙᓐ ᑕᔥ ᐃᐃ ᑳᑮᐃᑭᑐᔮᓐ?
ᑫᒋᓈᒡ ᓴ ᑭᔐᒪᓂᑑ ᑳᔑᑌᐺᔦᑖᑯᓯᒡ, ᒦ ᓴ ᐃᐌ ᑫᓃᓇᐎᓐᑦ ᐁᔑᑌᐺᔮᕽ ᑳᐃᓈᒋᒧᑖᑰᔦᒃ᙮
ᐊᐊ ᓴ ᒋᓴᔅ X ᑭᔐᒪᓂᑑ ᐅᑯᓯᓴᓐ ᑳᑮᑲᑮᒀᓇᑭᒡ ᑎᒪᑎ, ᓵᐃᓬᐊᔅ, ᑫᓃᓐ ᑕᔥ, ᑳᐐᓐ ᐐᓐ X ᑳᒥᒋᐗᐙᓀᑖᑯᓯᒡ, ᐐᓐ ᐃᓴ ᐊᐊ ᑌᐺᐎᓐ᙮
ᒦ ᓴ ᐊᐊ ᑳᑌᐺᔦᑕᒧᑑᒡ ᑲᑭᓇ ᑭᔐᒪᓂᑑᓐ ᐅᑕᔓᑕᒫᑫᐎᓂᓂ᙮ ᒦᑕᔥ ᐁᒣᓐ ᐌᒋ ᐃᑭᑐᔮᕽ, X ᒋᓴᔅ ᐁᑌᐺᔦᓂᒪᑭᒡ᙮ ᒦ ᓴ ᐁᔑᓈᑾᒃ ᐁᓈᑯᑖᐗᑭᒡ ᑭᔐᒪᓂᑑ ᐅᑭᒋ ᐃᓀᑖᑯᓯᐎᓐ᙮
ᐐᓐ ᐅᔕ ᑭᔐᒪᓂᑑ ᐅᑎᔑᒋᑫᐎᓐ ᑳᐅᒋᒪᔥᑲᐎᑳᐸᐎᔮᕽ, ᑲᔦ ᑮᓇᐙ ᑳᐅᒋᒪᔥᑲᐎᑳᐸᐎᔦᒃ X ᐁᐐᒌᐎᓇᕽ᙮ ᑭᔐᒪᓂᑑ ᐅᔕ ᐸᑳᓐ ᑭᑮᐃᔑᐅᓂᓂᑯᓈᓐ ᒋᐃᓇᓄᑲᐗᕽ᙮
ᐐᓐ ᐅᔕ ᑭᔐᒪᓂᑑ ᑭᑮᒦᓂᑯᓈᓐ ᐅᑕᒑᑾᓐ, ᐁᑮᐃᔑᑭᑭᓇᐙᒋᐃᓇᕽ, ᑖᐱᔥᑰ ᐁᑮᑭᒋᐎᑎᐸᐊᕽ, ᓂᑯᑎᕽ ᑫᒋᓈᒡ ᒋᑎᐯᑕᒧᐗᕽ ᑳᑮᐊᔓᑕᒪᐎᓇᕽ᙮
ᑭᔐᒪᓂᑑ ᓴ ᑭᑖᐐᑕᒫᑯᐙ ᐁᑌᐺᔮᓐ ᑳᐃᑭᑐᔮᓐ, ᐅᑭᑫᑖᓐ ᑲᔦ ᐁᓀᑕᒧᐗᒃ᙮ ᐁᑳ ᒋᒫᓀᑕᓯᐌᒃ ᐅᔕ ᑳᑮᐅᒋᐲᔖᓯᐙᓐ ᒀᕒᐃᑎᕽ ᙮
ᑳᐐᓐ ᐐᓐ ᓂᑲᑴᑎᐯᑕᓰᒥᓐ ᑭᑌᐺᑕᒧᐎᓂᐙ᙮ ᓂᑭᑫᑖᒥᓐ ᓴ ᐁᒪᔥᑲᐎᑳᐸᐎᔦᒃ ᐃᐃᒫ ᑭᑌᐺᑕᒧᐎᓂᐙᕽ᙮ ᑭᐐᑕᓄᑮᒥᑰᒻ ᑲᔦ ᐊᐗᔑᒣ ᒋᒥᓉᑕᒣᒃ᙮

22

ᒦᑕᔥ ᑳᑮᐅᒋ ᐃᓀᑕᒫᓐ ᒋᐊᑕᐙᐸᒥᓯᓄᐎᓇᑰᒃ ᒦᓇᐙ, ᒫᑭᔖ ᓴ ᑭᑖᐅᒋᒫᓀᑖᒻ᙮
ᐋᓃᔥ ᑮᔥᐱᓐ ᐅᒋᒫᓀᑕᒣᑭᐸᓐ ᐁᐙᐸᒥᓇᑰᒃ, ᐊᐌᓀᓐ ᑕᔥ ᐊᐎᔭ ᑫᒥᓉᑕᒥᐃᐸᓐ, ᐋᓃᔥ ᑲᑭᓇ ᓂᑖᒫᓀᑕᒧᐋᒃ ᑫᑮᒥᓉᑕᒥᐃᐙᐸᓐ᙮
ᒦᑕᔥ ᑳᑮᐅᒋ ᐅᔑᐲᐊᒪᐎᓇᑰᒃ, ᑳᐐᓐ ᓂᑮᐃᓀᑕᓰ ᐊᐲ ᐅᑎᓯᓇᑰᒃ ᒋᒫᓀᑕᒥᐃᐙᐸᓐ ᐃᑭ ᐯᒫᑎᓯᐙᒡ ᑫᑮᒥᓉᑕᒥᐃᐙᐸᓐ᙮ ᒦᑕᔥ ᐁᔑᑫᒋᓈᐅᔮᓐ ᑮᔥᐱᓐ ᑮᒥᓉᑕᒫᓐ ᑫᑮᓇᐙ ᐁᒥᓉᑕᒣᒃ᙮
ᐊᐲ ᓴ ᑮᐅᔑᐲᐊᒪᐎᓇᑰᒃ, ᐋᐱᒋ ᓂᑮᑭᒋᒥᑯᔥᑳᑌᑕᒻ, ᐁᑮᑯᓯᑯᑌᐁᔮᓐ ᑲᔦ, ᐋᓃᔥ ᑳᐐᓐ ᓂᑎᓀᑕᓰ ᐁᐐᒫᓀᑕᒥᐃᓇᑰᒃ᙮ ᐃᐃ ᓴ ᒋᐙᐸᑕᒣᒃ ᒋᑭᑫᑕᒣᒃ ᑲᔦ ᐋᓃᓐ ᐁᐲᒋᓵᑭᐃᓇᑰᒃ᙮
ᑮᔥᐱᓐ ᑕᔥ ᐊᐎᔭ ᑮᒫᓀᑕᒥᐃᐌᒡ, ᑳᐐᓐ ᑕᔥ ᓃᓐ ᐁᑕ ᓂᑮᒫᓀᑕᓰ, ᑫᑮᓇᐙ ᓴ ᑲᑭᓇ ᑳᑕᔑᔦᒃ ᑭᑮᒫᓀᑖᒻ᙮ ᒦᑕᔥ ᑳᐅᒋ ᐃᑭᑐᔮᓐ, ᑳᐐᓐ ᓂᑎᓀᑕᓰ ᒋᓴᓇᑭᐊᒃ᙮
ᒦᑕᔥ ᐗᐊ ᑳᑮᑑᑕᐎᓀᒃ, ᐋᔕ ᑌᒥᓂᒃ ᑭᑮᑲᒀᑕᑭᐋᐙ ᐃᐃ ᑳᑮᑑᑕᐌᒃ᙮
ᓅᑯᒻ ᐃᑕᔥ ᐴᓀᑕᒪᐎᒃ, ᑲᓅᓂᒃ ᑲᔦ ᐌᐌᓂ ᒋᐱᒫᑎᓯᒡ; ᒫᑭᔖ ᐅᐅ ᑑᑕᐙᓯᐌᒃ ᑕᓂᒫᓀᑕᒻ ᐲᓂᔥ ᑲᔦ ᐐᑫ ᑕᓂᐸᑭᒌ᙮
ᒦᑕᔥ ᐁᔑᐸᑯᓭᓂᒥᓂᓇᑰᒃ, ᒋᑭᑫᑕᕽ ᐐᑫ ᐁᓵᑭᐁᒃ᙮
ᑭᑮᐅᔑᐲᐊᒪᐎᓂᓂᒻ ᓴ ᐅᐅ ᐅᔑᐲᐃᑲᓐ ᐁᑮᐊᑕᑭᑫᓂᒥᓂᓇᑰᒃ ᑮᔥᐱᓐ ᑌᐺ ᒨᔕᒃ ᒋᐊᔛᔦᒃ ᒋᐃᔑᒋᑫᔦᒃ ᐃᐃ ᑳᑮᐃᔑᑭᑭᓄᐊᒪᐎᓇᑰᒃ᙮
ᐊᐲ ᓴ ᑮᐴᓀᑕᒪᐌᒃ ᐊᐎᔭ ᐋᓃᓂᑯ ᑳᑮᐃᔑᒋᑫᒡ, ᑫᓃᓐ ᓴ ᓂᐴᓀᑕᒪᐙ᙮ ᐊᐲ ᓴ ᑫᓃᓐ ᑮᐴᓀᑕᒫᑫᔮᓐ, ᑮᔥᐱᓐ ᑯᑕ ᑮᐊᔮᒃ ᑫᑰᓐ ᒋᐴᓀᑕᒫᓐ, ᓂᑎᔑᒋᑫ ᓴ ᐅᐅ X ᐁᓈᓴᒦᒡ ᑮᓇᐙ ᐅᒋ᙮
ᐋᓃᔥ ᑳᐐᓐ ᑭᓇᑕᐌᓂᒫᓯᐙᓈᓐ ᒪᒋᐊᔭᐋ ᓭᑕᓐ ᒋᔖᑰᒋᐃᓇᕽ᙮ ᑭᑭᑫᑕᒧᐙᒥᓐ ᐋᓃᔥ ᐋᓃᓐ ᐙᐊᓂ ᐃᔑᒋᑫᒡ᙮
ᐊᐲ ᓴ ᐁᑮᑕᑯᔑᓈᓐ ᐌᑎ ᒐᕒᐆᐗᔅ ᐆᑌᓈᕽ ᐁᐐᑲᑮᒀᑕᒫᓐ ᒥᓍᒋᒧᐎᓐ ᐁᐐᑕᔑᒪᒃ X, ᓂᑮᐃᔑᒥᑳᓐ ᓴ ᐋᔕ ᑳᑎᐯᒋᑫᒡ ᐁᑮᑕᐎᓇᒪᐎᒡ ᐱᓵᓂᑯ ᓃᓐ ᒋᐊᓄᑮᐗᒃ᙮
ᒦᑕᔥ ᐃᐃ ᑳᐅᒑᓂᒣᑕᒫᓐ ᐋᓃᔥ ᑳᐐᓐ ᓂᑮᒥᑲᐙᓰ ᓃᑕᓇᒥᐋ ᑕᐃᑕᔅ ᙮ ᒦᑕᔥ ᓂᑮᐴᔔᐋᒃ ᐯᒫᑎᓯᐙᒡ ᐌᑎ ᐁᑮᓇᑲᓇᒀ, ᒫᓯᑑᓂᔭ ᐊᑮᕽ ᐃᓇᑫ ᐁᑮᐊᓂ ᐃᔑᒫᒑᔮᓐ᙮
ᑕᑲ ᒦᑴᒋᐌᓂᒫᑖ ᑭᔐᒪᓂᑑ᙮ ᐐᓐ ᐄᑐᒃ ᑳᑮᐃᔑᓈᑯᓯᐃᔭᒥᓐᒡ ᒋᐃᔑᓈᑯᓯᔮᕽ ᑕᑯᓂᑲᓇᒃ ᑳᐱᒥᐎᓂᑣ X ᐁᓃᑳᓃᒡ ᐁᑮᔖᑰᒋᑣᒡ᙮ ᐐᓐ ᓂᑖᐸᒋᐃᑯᓈᓐ ᒥᓯᐌ ᒋᐅᒋᑭᑫᓂᒥᓐᒡ ᑖᐱᔥᑰ ᑫᑰᓐ ᑳᒥᓄᒫᑾᒃ᙮
X ᓂᑖᐸᒋᐃᑯᓈᓐ ᐁᒥᓈᓴᒪᐎᓐᒡ ᑭᔐᒪᓂᑑ᙮ ᐃᑭ ᑕᔥ ᑳᐱᒫᒋᐃᑣ ᐃᑭ ᑲᔦ ᑳᓂ ᓂᔑᐗᓈᑎᓯᐙᒡ ᐅᒥᓈᑖᓈᐙ ᒥᓈᓯᑲᓐ᙮
ᐃᑭ ᐋᓃᔥ ᑳᓂᓂᔑᐗᓈᑎᓯᐙᒡ ᑖᐱᔥᑰ ᓂᐳᐎᓂᕽ ᐅᑎᔑᒫᑖᓈᐙ, ᐃᑭ ᑕᔥ ᑳᐱᒪᒋᐃᑣ, ᐱᒫᑎᓯᐎᓂᕽ ᐅᑎᔑᒫᑖᓈᐙ᙮ ᐊᐌᓀᓐ ᑕᔥ ᑫᑌᐱᓭᐸᓐ ᐅᐅᐌ ᒋᐃᓇᓄᑮᒡ?
ᑳᐐᓐ ᐃᑕᔥ ᐐᓐ ᓂᑑᑕᓰᒥᓐ ᐃᐃ ᑭᔐᒪᓂᑑ ᐅᑎᑭᑐᐎᓐ ᑖᐱᔥᑰ ᐋᓂᑕ ᑳᐹᑏᓄᐙᒡ ᑳᑑᑕᒧᐙᒡ ᐁᐐᐅᑎᓈᐙᒡ ᑌᐱᓈᒃ ᔔᓂᔮᓐ᙮ ᑳᐐᓐ ᓃᓇᐎᓐᑦ ᐃᐃ ᓂᑎᔑᒋᑫᓰᒥᓐ᙮ ᐋᓃᔥ ᑭᔐᒪᓂᑑ ᓂᑮᐃᔑᓂᔕᐅᑯᓈᓐ ᐌᐌᓂ ᒋᑳᑮᑭᑐᔮᕽ ᐁᓈᓴᒦᒡ, ᑖᐱᔥᑰ X ᐅᑕᓄᑮᐋᑲᓇᐞ᙮

23

ᒦ ᓇᐃ ᐁᓂᑖᑯᓯᔮᕽ ᒦᓇᐙ ᐁᒥᒋᑭᒋ ᐃᓀᓂᑎᓱᔮᕽ? ᒦ ᓇᐃ ᑫᓃᓇᐎᓐᑦ ᐁᔑᓈᑯᓯᔮᕽ ᑖᐱᔥᑰ ᑯᑕᒃ ᑳᐃᔑᓈᑯᓯᐙᒡ ᒣᒬᒡ ᐅᔑᐲᐃᑲᓇᓐ ᒋᐱᒥᐎᑑᔮᕽ ᒋᐙᐸᑕᒣᒃ, ᑯᒫ ᑲᔦ ᐅᔑᐲᐃᑲᓐ ᒋᒦᔑᔮᕽ ᑫᐅᒋᑭᑫᓂᒥᑰᔮᕽ?
ᑮᓇᐙ ᓴ ᐁᔑᐱᒫᑎᓯᔦᒃ ᒦ ᐃᐌ ᐅᔑᐲᐃᑲᓐ ᐌᒋᑭᑫᓂᒥᑰᔮᕽ, ᓂᑌᐃᓈᓂᕽ ᐁᐅᔑᐲᐃᑳᓱᔦᒃ᙮ ᒦᑕᔥ ᑲᑭᓇ ᐊᐎᔭᒃ ᐅᑭᑫᑖᓈᐙ, ᐅᐙᐸᑖᓈᐙ, ᑖᐱᔥᑰ ᐁᐊᓇᒥᑑᐙᒡ᙮
ᐋᐱᒋ ᐸᔭᑌᓈᑾᓐ X ᐁᑮᐅᔑᐲᐊᕽ ᐅᐅ ᐅᔑᐲᐃᑲᓐ᙮ ᑳᐐᓐ ᐐᓐ ᐅᔑᐲᐃᑲᓈᐴᓂ ᐅᑮᐋᐸᒋᑑᓰᓐ, ᐃᓂ ᓴ ᐅᑮᐋᐸᒋᐋᓐ ᐅᑕᒑᑯᓂ ᑳᐱᒫᑎᓯᓂᒡ ᑭᔐᒪᓂᑑᓐ᙮ ᑳᐐᓐ ᐐᓐ ᓇᐸᑳᐱᑲᓯᓃᕽ ᑮᐃᔑᐅᔑᐲᐃᑫᓰ, ᐯᒫᑎᓯᓂᒡ ᐅᑌᐃᓃᕽ ᐅᔕ ᑮᐃᔑᐅᔑᐲᐃᑫ᙮
ᒦᑕᔥ ᐅᐅ ᑳᐅᒋ ᐃᑭᑐᔮᕽ, ᐋᓃᔥ ᓂᑫᒋᓈᐋᓈᓐ ᑭᔐᒪᓂᑑ ᐁᐐᒌᐗᑭᒡ X᙮
ᑳᐐᓐ ᑕᔥ ᑫᑰᓐ ᓂᑕᔮᓰᒥᓐ ᑫᐅᒋ ᐃᑭᑐᔮᑭᐸᓐ ᐁᑲᔥᑭᑑᔮᕽ ᒋᑑᑕᒫᕽ ᐅᐅ ᐊᓄᑮᐎᓐ, ᑭᔐᒪᓂᑑ ᓴ ᐐᓐ ᓂᒦᓂᑯᓈᓐ ᒋᑲᔥᑭᑑᔮᕽ᙮
ᐊᐊ ᓴ ᑳᑮᐅᔑᐃᔭᒥᓐᒡ ᑳᐅᒋᑲᔥᑭᑑᔮᕽ ᒋᐊᓄᑳᑕᒫᕽ ᐃᐃ ᐅᔥᑭᐊᔓᑕᒫᑎᐎᓐ, ᑳᐐᓐ ᐐᓐ ᐃᐃ ᑳᒥᒋᐅᔑᐲᐃᑳᑌᒃ ᐅᓇᔓᐌᐎᓐ, ᐃᐃ ᓴ ᑭᔐᒪᓂᑑ ᐅᑕᒑᑾᓐ ᑳᒦᑭᐌᓂᒡ᙮ ᐃᐃ ᓴ ᑳᒥᒋᐅᔑᐲᐃᑳᑌᒃ ᐅᓇᔓᐌᐎᓐ ᓂᐳᐎᓐ ᐃᐃᒫ ᐅᒌᒪᑲᓐ᙮ ᐊᐊ ᑕᔥ ᐐᓐ ᐊᒑᒃ ᒦᑭᐌ ᐱᒫᑎᓯᐎᓐ᙮
ᐃᐃ ᓴ ᐅᓇᔓᐌᐎᓐ ᐁᑮᒥᒋᐅᔑᐲᐃᑳᑌᒃ ᐃᐃᒫ ᓇᐸᑲᓯᓃᕽ, ᑭᔐᒪᓂᑑ ᓴ ᑲᔦ ᐅᑭᒋ ᐃᓀᑖᑯᓯᐎᓐ ᑮᓈᑾᓂᓂ ᐊᐲ ᐃᐃ ᐅᓇᔓᐌᐎᓐ ᑮᒦᑭᐌᒡ᙮ ᐊᐊ ᓴ ᑲᔦ ᒨᓯᔅ ᑳᑮᐃᔑᐙᓰᑴᓱᒡ ᐋᐱᒋ ᐐᐸ ᑮᐊᓂᐊᑯᓈᑾᓂᓂ᙮ ᒦᑕᔥ ᑳᐊᐲᒋ ᒪᔥᑲᐎᓈᑾᓂᓂᒃ ᐃᔅᕒᐃᔭᓬᐊᒃ ᑳᐐᓐ ᐅᑮᑲᔥᑭᑑᓰᓈᐙ ᒋᑲᓇᐙᐸᒫᐙᒡ ᒨᓯᓲᓐ᙮ ᑮᔥᐱᓐ ᑕᔥ ᐃᐃ ᐅᓇᔓᐌᐎᓐ ᑳᐲᑕᒫᑯᐙᒡ ᓂᐳᐎᓐ ᐁᑮᐊᐲᒋ ᑭᒋ ᐃᓀᑖᑾᒃ ᒣᒀ ᐁᐊᓄᑮᒪᑲᒃ,
ᓇᐗᒡ ᓴ ᐃᐃᒫ ᑳᐃᔑᐊᓄᑮᒡ ᐊᐊ ᐊᒑᒃ ᐊᐗᔑᒣ ᑕᑭᒋ ᐃᓀᑖᑾᓐ᙮
ᑮᔥᐱᓐ ᓴ ᐃᐃ ᑳᐲᑕᒫᑯᔭᕽ ᓂᐳᐎᓐ ᐁᑮᑭᒋ ᐃᓀᑖᑾᒃ, ᓇᐗᒡ ᐄᑐᒃ ᐃᐃ ᑳᐱᒫᒋᐃᐌᒪᑲᒃ ᑕᑭᒋ ᐃᓀᑖᑾᓐ᙮
ᓅᑯᒻ ᑕᔥ ᐁᐊᔮᔭᕽ ᐃᐃ ᓇᐗᒡ ᑳᑭᒋ ᐃᓀᑖᑾᒃ, ᐃᐃ ᓴ ᑳᑮᑭᒋ ᐃᓀᑖᑾᑭᐸᓐ ᑳᑮᐙᓭᔮᑭᐸᓐ ᐋᔕ ᑮᐃᔥᒀᓭ᙮
ᑮᔥᐱᓐ ᓴ ᐃᐃ ᑳᑮᑭᒋ ᐃᓀᑖᑾᒃ ᐊᒋᓇ ᐁᑕ ᐁᑮᐊᔮᒃ, ᓇᐗᒡ ᐃᐃ ᓅᑯᒻ ᒨᔕᒃ ᑳᐊᔮᒃ ᑕᑭᒋ ᐃᓀᑖᑾᓐ᙮
ᐅᐅ ᑕᔥ ᐁᐃᔑᐊᐯᓂᒧᔮᕽ, ᒦ ᓴ ᑳᐅᒋᓲᑭᑌᐁᔮᕽ ᑮᑮᑭᑐᔮᕽ᙮
ᑳᐐᓐ ᐐᓐ ᓂᑎᔑᓈᑯᓯᓰᒥᓐ ᑖᐱᔥᑰ ᒨᓯᔅ ᑳᑮᑭᐲᑴᐱᓂᑎᓱᒡ ᑭᐲᑭᓂᑲᓂᓂ ᐁᑮᐋᐸᒋᑑᒡ, ᒦ ᓴ ᐃᐃ ᑳᑮᐅᒋ ᐃᔑᒋᑫᒡ ᒋᐙᐸᑕᓯᓂᒃ ᐃᐃ ᐃᔅᕒᐃᔭᓬᐊᐞ ᐯᒫᑎᓯᓂᒡ ᐃᐃ ᑳᑮᐃᔑᐙᓰᑴᓱᒡ ᐁᑮᐊᓂᐊᑯᓈᑾᓂᓂᒃ᙮
ᒦ ᓴ ᑳᐃᔑᓈᑾᓂᓂᑭᓐ ᐃᓂ ᐅᑎᓀᑕᒧᐎᓂᐙᓐ ᑖᐱᔥᑰ ᐁᑮᑭᐲᑭᓂᑳᑌᓂᑭᓐ᙮ ᒦᑕᔥ ᑲᔦ ᓅᑯᒻ ᑳᑮᔑᑲᓂᓂᒃ ᑫᔮᐱ ᐃᐃ ᑭᐲᑭᓂᑲᓂᓂ ᐁᔑᑭᐲᑭᓂᑳᑌᓂᒃ ᐃᐃᒫ ᐅᑎᓀᑕᒧᐎᓂᐙᕽ ᑮᐊᓇᒥᑑᐙᒡ ᐃᐃ ᒪᓯᓇᐃᑲᓂᓂ, ᑫᑌᐊᔓᑕᒫᑫᐎᓂᓂ ᑳᔑᑕᔑᑌᓂᒃ᙮ ᐹᓂᒫ ᓴ ᐊᐎᔭ ᑮᐐᒌᐙᒡ Xᑕᓐ, ᒦ ᓴ ᐹᓂᒫ ᐃᐃ ᑭᐲᑭᓂᑲᓂᓂ ᐁᐅᑖᐱᓂᑳᑌᓂᒃ᙮
ᒥᓴᐙ ᑯ ᓅᑯᒻ ᑳᑮᔑᑲᓂᓂᒃ ᑮᓅᑕᒧᐙᒡ ᐁᐊᓇᒥᒋᑳᑌᓂᒃ ᐃᐃ ᒨᓯᔅ ᐅᑑᓇᔓᐌᐎᓂᓂ, ᑳᐐᓐ ᓂᓯᑐᑕᓰᐗᒃ, ᑖᐱᔥᑰ ᑫᔮᐱ ᐁᑭᐸᑰᑌᓂᒃ ᐃᐃ ᑭᐲᑭᓂᑲᓂᓂ ᐃᐃᒫ ᐅᑎᓀᑕᒧᐎᓂᐙᕽ᙮
ᐊᐲ ᑕᔥ ᐊᐎᔭ ᑮᑴᑮᑕᐙᒡ ᑳᑎᐯᒋᑫᓂᒡ, ᑭᐲᑭᓂᑲᓐ ᐅᑖᐱᓂᑳᑌᓂ᙮
ᐊᐊ ᑕᔥ ᑳᑎᐯᒋᑫᒡ ᑳᑕᔑᓱᒡ ᒦ ᓴ ᐊᐊᐌ ᑭᔐᒪᓂᑑ ᐅᑕᒑᑾᓐ᙮ ᐋᑎ ᑕᔥ ᐃᑯ ᐊᐊ ᐊᒑᒃ ᐁᔮᒡ, ᒦ ᓴ ᐃᒫ ᐁᔮᒪᑲᒃ ᐸᑭᑎᓂᑰᐎᓐ᙮
ᑮᓇᐎᓐᑦ ᑕᔥ ᑲᑭᓇ ᑭᒧᔐᔩᑴᐙᓭᔥᑲᒧᐙᒥᓐ ᑳᑎᐯᒋᑫᒡ ᐅᑭᒋ ᐃᓀᑖᑯᓯᐎᓐ᙮ ᑭᑎᔑᐃᑯᓈᓐ ᒋᐃᔑᓈᑯᓯᔭᕽ ᒋᐊᔮᐗᕽ ᐅᑭᒋ ᐃᓀᑖᑯᓯᐎᓐ, ᒨᔕᒃ ᑳᓂᑭᒋ ᐃᓀᑖᑾᓂᓂᒃ᙮ ᑳᑎᐯᒋᑫᒡ ᐅᑕᒑᑾᓐ ᐅᔕ ᑳᐃᔑᐃᓇᕽ᙮

24

ᑭᔐᒪᓂᑑ ᓴ ᑳᔕᐌᒋᑫᒡ ᓂᑮᒦᓂᑯᓈᓐ ᐅᐅ ᐊᓇᒥᐁᐎᐊᓄᑮᐎᓐ ᒋᐊᓄᑳᑕᒫᕽ᙮ ᒦᑕᔥ ᑳᐅᒋᐸᑭᑌᑕᓯᐙᕽ᙮
ᑲᑭᓇ ᓴ ᓂᑮᐌᐱᓈᒥᓐ ᑮᒨᒋᒋᑫᐎᓇᓐ, ᑳᐊᑲᓯᓈᑾᑭᓐ ᑲᔦ ᐃᔑᒋᑫᐎᓇᓐ, ᑳᐐᓐ ᐐᓐ ᑲᔦ ᓂᐗᔦᔑᒥᐌᓰᒥᓐ᙮ ᑳᐐᓐ ᐐᓐ ᑲᔦ ᐸᑳᓐ ᓂᑎᓉᑖᐙᓰᒥᓐ ᑭᔐᒪᓂᑑ ᐅᑎᑭᑐᐎᓐ᙮ ᐃᐃᒫ ᓴ ᑳᐃᔑᐸᔭᑌᑖᑾᓂᓂᒃ ᑭᔐᒪᓂᑑ ᐅᑌᐺᐎᓐ ᒦ ᓴ ᐃᒫ ᐁᔑᐱᒫᑎᓯᔮᕽ, ᑭᔐᒪᓂᑑ ᐁᓈᓴᒦᒡ, ᑾᔭᒃ ᓴ ᒋᐃᔑᓈᑯᓯᔮᕽ ᑲᑭᓇ ᐊᐎᔭ ᑳᐃᔑᒥᓍᐸᑕᕽ᙮
ᑮᔥᐱᓐ ᓴ ᒥᓍᒋᒧᐎᓐ ᑳᑲᑮᒀᑕᒫᕽ ᑳᒋᑳᑌᒃ, ᒦ ᓴ ᐁᑳᑕᒪᐎᑣ ᐃᑭ ᑳᐗᓂᔑᓄᐙᒡ᙮
ᐋᓃᔥ ᐊᐊ ᒪᒋᐊᔭᐋ ᑳᒪᓂᑑᐎᒡ ᐅᐅᒫ ᐊᑮᕽ ᐅᑮᐃᔑᐋᐞ ᒋᐙᐱᓯᓂᒃ ᐃᐃᒫ ᐅᑎᓀᑕᒧᐎᓂᓃᕽ, ᒦ ᓴ ᑕᔥ ᑳᐅᒋᑌᐺᑕᓯᓂᒃ᙮ ᑳᐐᓐ ᑕᔥ ᑲᔦ ᐅᓇᑕᐌᓂᒫᓰᐞ ᒋᐙᐸᑕᒥᓂᒡ ᐃᐃ ᑳᐃᔑᐙᓭᔮᓂᒃ ᐃᐃ ᒥᓍᒋᒧᐎᓂᓂ, ᐃᐃᒫ ᑳᐃᔑᑕᔑᑌᓂᒃ X ᐅᑭᒋ ᐃᓀᑖᑯᓯᐎᓐ᙮ ᐋᓃᔥ ᒪᔮ ᐱᑯ ᑭᔐᒪᓂᑑᕽ ᐃᔑᓈᑯᓯ ᐊᐊ X᙮
ᑳᐐᓐ ᑕᔥ ᐐᓐ ᓃᓇᐎᓐᑦ ᓂᑲᑮᒀᓂᑎᓱᓰᒥᓐ, ᒋᓴᔅ X ᓴ ᓂᑎᑭᑐᒥᓐ ᐁᑎᐯᒋᑫᒡ, ᓃᓇᐎᓐᑦ ᐃᑕᔥ ᓂᑎᑭᑐᒥᓐ ᐁᐸᒦᑖᑰᔦᒃ ᒋᓴᔅ ᐅᒋ᙮
ᑭᔐᒪᓂᑑ ᓴ ᑳᑮᐃᑭᑐᒡ: ᐃᐃᒫ ᓴ ᑳᐃᔑᑲᔥᑮᑎᐱᑲᒃ, ᑳᐙᓭᔮᒃ ᑕᓵᑳᑌ, ᒦ ᓴ ᐊᐊᐌ ᐯᔑᑾᓐ ᑭᔐᒪᓂᑑ ᑳᑮᐙᓭᔮᑑᒡ ᓂᑌᐃᓈᓂᓐ ᒋᑭᑫᑕᒧᐗᑭᒡ ᑭᔐᒪᓂᑑ ᐅᑭᒋ ᐃᓀᑖᑯᓯᐎᓐ, X ᐁᐙᓰᑴᔥᑳᑯᒡ᙮
ᓃᓇᐎᓐᑦ ᓴ ᑳᐊᔮᔮᕽ ᐅᐅ ᑳᑭᒋ ᐃᓀᑕᒫᕽ ᐌᓅᑎᓯᐎᓐ, ᒦ ᓴ ᐁᔑᓈᑯᓯᔮᕽ ᑖᐱᔥᑰ ᐙᐱᑲᓂᐗᑭᑯᕽ ᐁᔑᐲᓇᐊᒫᕽ, ᒋᓈᑾᓂᓂᒃ ᑭᔐᒪᓂᑑ ᒫᐗᒡ ᐁᒪᔥᑲᐎᓰᒡ, ᑳᐐᓐ ᓃᓇᐎᓐᑦ᙮
ᒥᓯᐌ ᓂᑑᒋ ᒥᑯᔥᑳᒌᑳᑰᒥᓐ, ᑳᐐᓐ ᑕᔥ ᓂᔖᑰᒋᔥᑳᑰᓰᒥᓐ; ᐁᐙᓀᑕᒫᕽ ᑲᔦ ᓂᑯᑎᕽ, ᑳᐐᓐ ᑕᔥ ᒪᔑ ᓂᐸᑭᒌᓰᒥᓐ᙮
ᒨᔕᒃ ᑲᔦ ᓂᑲᒀᑕᑭᐃᑰᒥᓐ, ᔖᑰᒡ ᑕᔥ ᑳᐐᓐ ᐐᑳ ᓂᓇᑲᓂᑰᓰᒥᓐ; ᐁᑲᐎᐌᐱᓂᑰᔮᕽ ᑲᔦ ᑳᐐᓐ ᑕᔥ ᒪᔑ ᓂᓂᔑᐗᓈᒋᐃᑰᓰᒥᓐ᙮
ᒦᑕᔥ ᐁᔑᓈᑾᒃ ᒨᔕᒃ ᐁᐱᒥᐎᑖᐗᑭᒡ ᒋᓴᔅ ᐅᓂᐳᐎᓐ ᐃᐃᒫ ᓂᐐᔭᐎᓈᓂᕽ, ᐃᐃ ᓴ ᑳᐅᒋ ᐃᔑᓈᑾᒃ ᐅᐱᒫᑎᓯᐎᓐ ᒋᐙᐸᒋᑳᑌᓂᒃ ᐃᐃᒫ ᓂᐐᔭᐎᓈᓂᕽ᙮
ᐃᐃᒫ ᓴ ᓂᐱᒫᑎᓯᐎᓂᓈᓂᕽ, ᒦ ᓴ ᐁᔑᓈᑯᓯᔮᕽ ᑖᐱᔥᑰ ᒨᔕᒃ ᐁᓇᓃᓵᓂᓯᔮᕽ ᐁᐊᔓᓂᐳᔮᕽ ᒋᓴᔅ ᐅᒋ᙮ ᐃᐃ ᓴ ᐅᐱᒫᑎᓯᐎᓐ ᒋᐙᐸᒋᑳᑌᓂᒃ ᐃᐃᒫ ᓂᐐᔭᐎᓈᓂᕽ ᑳᐗᑫᓂᐴᒪᑲᑭᓐ᙮
ᒦ ᓴ ᐅ ᑳᐃᒋᑳᑌᒃ, ᓂᐳᐎᓐ ᓃᓇᐎᓐᑦ ᓂᓅᒋᐃᑰᒥᓐ ᐃᐃᒫ ᓂᐱᒫᑎᓯᐎᓂᓈᓂᕽ, ᑮᓇᐙ ᑕᔥ ᐱᒫᑎᓯᐎᓐ ᐊᓄᑮᒪᑲᓐ ᑭᐱᒫᑎᓯᐎᓂᐙᕽ᙮
ᑫᓃᓇᐎᓐᑦ ᑕᔥ ᐯᔑᑾᓐ ᐁᔑᑌᐺᔦᑕᒫᕽ ᑭᒋᒪᓯᓇᐃᑲᓐ ᐁᔑᐲᐃᑳᑌᒃ: ᓂᑮᑮᑭᑦ ᐋᓃᔥ ᐁᑌᐺᑕᒫᓐ᙮ ᒦᑕᔥ ᐯᔑᑾᓐ ᑫᓃᓇᐎᓐᑦ ᐁᐃᔑᑌᐺᑕᒫᕽ ᑳᐅᒋᑮᑭᑐᔮᕽ᙮
ᐊᐊ ᓴ ᑭᔐᒪᓂᑑ ᑳᑮᑮᐌᐱᒫᑎᓯᐋᒡ ᐃᓂ ᑳᑎᐯᒋᑫᓂᒡ ᒋᓴᓲᓐ, ᓂᑭᑫᓂᒫᓈᓐ ᓴ ᒋᑮᐌᐱᒫᑎᓯᐃᔭᒥᓐᒡ ᐋᓃᔥ ᓂᐐᒌᐙᓈᓐ ᒋᓴᔅ᙮ ᑭᑲᐃᔑᐎᓂᑯᓈᓐ ᑕᔥ ᒫᒪᐤ ᒋᐃᔑᐊᔮᐗᕽ ᐌᑎ ᑳᔑᐊᔮᒡ᙮
ᑮᓇᐙ ᐅᐅ ᑲᑭᓇ ᑳᐅᒋ ᐃᔑᓭᒃ; ᐃᑭ ᓴ ᑳᐹᑏᓄᐙᒡ ᐯᒫᑎᓯᐙᒡ ᐁᐊᓂᑌᐱᓂᑯᐙᒡ ᑭᔐᒪᓂᑑᓐ ᐅᑭᔐᐙᑎᓯᐎᓂᓂ ᐋᐱᒋ ᑕᔥ ᑕᐹᑏᓇᑎᓅᓐ ᐃᓂ ᐊᓇᒥᐋᐎᓇᓐ ᒋᓇᓈᑯᒥᓐᒡ ᑭᔐᒪᓂᑑ ᑳᑭᒋ ᐃᓀᑖᑯᓯᒡ᙮
ᒦᑕᔥ ᐅᐅ ᐐᑳ ᑳᐅᒋᐸᑭᑌᑕᓯᐙᕽ᙮ ᐋᓇᐐᓐ ᓂᐐᔭᐎᓈᓂᓐ ᐁᐊᓂᓂᐴᒪᑲᑭᓐ, ᔖᑰᒡ ᑕᔥ ᓂᑕᒑᑯᓈᓂᒃ ᓂᐱᒫᑎᓯᐎᓂᓈᓂᕽ ᐊᓂᐅᔥᑭᐅᔑᒋᑲᓂᐎᐗᒃ ᐁᑕᓱᑮᔑᒃ᙮
ᐅᐅ ᓴ ᑳᐃᔑᐋᓂᒥᓯᔮᕽ ᓂᓈᑫᑖᒥᓐ, ᐋᓃᔥ ᐊᒋᓇ ᐁᑕ ᓂᓅᒋᐃᑯᒥᓐ᙮ ᒦᑕᔥ ᑫᐅᒋᐅᑎᓯᑯᔮᕽ ᒫᐗᒡ ᑳᑭᒋ ᐃᓀᑖᑾᒃ ᑭᒋ ᐃᓀᑖᑯᓯᐎᓐ ᐐᑳ ᑫᐴᓂᓭᓯᓄᒃ᙮
ᑳᐐᓐ ᑕᔥ ᐐᓐ ᐃᓂ ᑳᓈᑾᑭᓐ ᓂᑲᓇᐙᐸᑕᓰᒥᓐ, ᐃᓂ ᓴ ᑳᓈᑾᓯᓄᑭᓐ; ᐃᓂ ᓴ ᑳᓈᑾᑭᓐ ᐊᒋᓇ ᐁᑕ ᐊᔮᐗᓐ, ᐃᓂ ᑕᔥ ᐐᓐ ᑳᓈᑾᓯᓄᑭᓐ ᐱᔑᔑᒃ ᐊᔮᐗᓐ᙮

25

ᑭᑭᑫᑖᒥᓐ ᓴ ᐅᐅ ᐸᒀᓀᑲᒥᒃ ᑳᑖᓄᑕᒪᕽ ᐅᐅᒫ ᐊᑮᕽ, ᒦ ᓴ ᐃᐃ ᑭᐐᔭᐎᓈᓐ, ᐲᑯᐱᒋᑳᑌᒃ, ᑭᑕᔮᒥᓐ ᐙᑳᐃᑲᓐ ᑭᔐᒪᓂᑑ ᐐᓐ ᐃᑯ ᑳᑮᐅᔑᑕᒪᐎᓇᕽ ᐌᑎ ᑭᒋᑮᔑᑯᕽ ᒋᐃᔑᑖᐗᕽ᙮ ᑳᐐᓐ ᑕᔥ ᐐᓐ ᐅᓂᒌᒫᕽ ᑮᐅᒋᐅᔑᒋᑳᑌᓯᓅᓐ, ᒨᔕᑭᑯ ᐊᐸᓀ ᑕᐊᔮᒪᑲᓐ᙮
ᑳᐐᓐ ᑕᔥ ᑭᑕᓂᓵᐅᓰᒥᓐ ᐁᒨᑯᓀᔭᕽ ᐁᒥᓴᐌᑕᒪᕽ ᐃᓂ ᑭᑖᐎᓂᓈᓂᓐ ᑭᒋᑮᔑᑯᕽ ᑳᐅᒌᑭᓐ, ᒋᐱᓯᑲᒨᓂᑰᔭᕽ᙮
ᐊᐲ ᓴ ᐱᓯᑲᒪᕽ, ᑳᐐᓐ ᑭᑲᐃᔑᓈᑯᓯᓰᒥᓐ ᑫᑰᓐ ᐁᑭᑭᔥᑲᓯᐗᕽ᙮
ᐅᐅᒫ ᓴ ᐁᐊᔮᔭᕽ ᐊᑮᐎᐸᒀᓀᑲᒥᑯᕽ, ᑭᑎᓇᒪᒋᐅᒥᓐ ᐁᐐᒨᑯᓀᔭᕽ ᐅᓵᒻ ᐁᑲᒀᑕᑭᑑᔭᕽ᙮ ᑳᐐᓐ ᑕᔥ ᐐᓐ ᑭᑎᓀᑕᓰᒥᓐ ᒋᑮᒋᑯᔥᑲᒨᓂᑰᔭᕽ ᐅᓄ ᑭᑕᑮᐎᐐᔭᐎᓈᓂᓐ, ᐃᐃ ᓴ ᐁᐊᑕᐌᑕᒪᕽ ᐁᐐᐊᔮᔭᕽ ᐃᐃ ᑭᒋᑮᔑᑯᕽ ᑳᐊᔮᒃ ᒋᐱᓯᑲᒨᓂᑰᔭᕽ, ᐃᐃ ᓴ ᑳᓂᓂᐴᒪᑲᒃ ᒋᓂ ᐃᔑᐊᑯᓈᑾᒃ ᐃᐃᒫ ᐱᒫᑎᓯᐎᓂᕽ᙮
ᑭᔐᒪᓂᑑ ᓴ ᑳᑮᑾᔮᒋᐃᓇᕽ ᐸᑳᓐ ᒋᐃᔑᓈᑯᓯᔭᕽ, ᑭᑮᒦᓂᑯᓈᓐ ᐅᑕᒑᑾᓐ ᐁᐐᑭᑭᓇᐙᒋᑑᒡ ᐃᐃ ᑳᑮᐃᔑᐊᔓᑕᒪᐎᓇᕽ᙮
ᒦᑕᔥ ᒨᔕᒃ ᑳᐅᒋᒪᔥᑲᐌᑕᒪᕽ, ᑭᑭᑫᑖᒥᓐ ᑲᔦ ᒥᓂᒃ ᐃᑯ ᑫᑖᔭᕽ ᑭᐐᔭᐎᓈᓂᕽ, ᑳᐐᓐ ᑭᑕᔮᓰᒥᓐ ᐌᑎ ᑳᑎᐯᒋᑫᒡ ᐅᑖᐎᓂᕽ᙮
ᑌᐺᑕᒧᐎᓂᕽ ᓴ ᑭᑎᔑᐱᒧᓭᒥᓐ, ᑳᐐᓐ ᐐᓐ ᑳᐃᔑᐙᐸᑕᒪᕽ᙮
ᐋᐱᒋ ᓴ ᑭᒪᔥᑲᐌᑖᒥᓐ ᐁᐃᔑᒥᓴᐌᑕᒪᕽ ᑲᔦ ᐁᐐᓇᑲᑕᒪᕽ ᐅᓄ ᑭᐐᔭᐎᓈᓂᓐ, ᐁᐐᐐᒋᐊᔮᒪᕽ ᑳᑎᐯᒋᑫᒡ ᐌᑎ ᑳᔑᐊᔮᒡ᙮
ᒫᐗᒡ ᑕᔥ ᐁᔑᒥᓴᐌᑕᒪᕽ ᒋᑑᑕᒪᕽ, ᒦ ᓴ ᐃᐃ ᒋᒥᓍᐸᒥᓇᕽ ᐅᐅᒫ ᑳᔑᑖᔭᕽ, ᑯᒫ ᑲᔦ ᐌᑎ᙮
ᐋᓃᔥ ᑲᑭᓇ ᑳᑕᔑᔭᕽ ᐅᒋᑕᑯ ᐃᔑᓈᑾᓐ ᒋᓇᑭᔥᑲᐗᕽ X ᐁᓈᓴᒦᒡ, ᒋᑎᐹᑯᓂᓇᕽ᙮ ᐊᐎᔭ ᓴ ᑕᔑᑎᐸᐊᒪᐙ ᑲᑭᓇ ᑫᑰᓂᓂ ᑳᑮᐃᔑᒋᑫᒡ ᐃᐃᒫ ᐊᑮᕽ ᒣᒀ ᐅᐐᔭᐎᕽ ᑮᐱᒫᑎᓯᒡ, ᑯᒫ ᑲᔦ ᑳᒥᓄᒋᑫᑯᐸᓀᓐ, ᑯᒫ ᑲᔦ ᑳᒫᔑᒋᑫᑯᐸᓀᓐ᙮
ᓂᑭᑫᑖᒥᓐ ᓴ ᐌᑯᓀᓐ ᑳᐃᒋᑳᑌᒃ ᒋᑯᓯᓐᒡ ᐊᐊ ᑳᑎᐯᒋᑫᒡ, ᒦᑕᔥ ᑲᔦ ᑳᐅᒋᑲᑴᑲᔥᑭᒪᑭᑣ ᑯᑕᒃ ᐊᐎᔭᒃ᙮ ᒦ ᓴ ᐁᔑᐸᑯᓭᓂᒥᑰᔦᒃ ᐃᐃᒫ ᑭᑌᐃᐙᕽ ᒋᑭᑫᓂᒥᔮᕽ ᑖᐱᔥᑰ ᑭᔐᒪᓂᑑ ᑳᔑᑭᑫᓂᒥᔭᒥᓐᒡ᙮
ᑳᐐᓐ ᓃᓇᐎᓐᑦ ᒦᓇᐙ ᓂᐐᒥᒋ ᒥᓄᑕᔑᑎᓱᓰᒥᓐ, ᑭᐐᒦᓂᑰᒻ ᑫᑰᓐ ᑫᐅᒋᑭᑕᑭᒥᔑᔮᕽ, ᒋᑲᔥᑭᑑᔦᒃ ᓴ ᑾᔭᒃ ᒋᓇᑴᑕᐌᒀ ᐃᑭ ᑳᑭᒋ ᐃᓀᑕᒧᐙᒡ ᐋᓃᓐ ᐁᔑᓈᑯᓯᓂᒡ ᐃᓂᓂᐗᓐ ᐊᑾᒌᕽ ᐃᓇᑫ, ᐃᐃᒫ ᑕᔥ ᐅᐱᒫᑎᓯᐎᓂᓃᕽ ᒋᑮᐃᔑᑲᓇᐙᐸᒫᐙᐸᓐ᙮
ᑮᔥᐱᓐ ᑕᔥ ᐃᔑᓈᑯᓯᔮᕽ ᐁᑮᐗᔥᑴᔮᑎᓯᔮᕽ, ᑭᔐᒪᓂᑑ ᐅᔕ ᑳᐅᒋ ᐃᔑᐊᔮᔮᕽ ᑳᐊᓄᑮᑕᐗᑭᒡ᙮ ᑮᔥᐱᓐ ᑲᔦ ᐸᑲᑫᑕᒫᕽ, ᑮᓇᐙ ᐅᔕ ᒋᐐᒋᐃᑰᔦᒃ ᑳᐅᒋ ᐃᔑᐊᔮᔮᕽ᙮
X ᐃᓴ ᐅᓵᑭᐃᐌᐎᓐ ᓂᑎᐯᓂᒥᑯᒥᓐ, ᐁᑭᑫᑕᒫᕽ ᑲᔦ ᐯᔑᒃ ᓴ ᐃᓂᓂ ᐁᑮᓂᐴᑕᒪᐙᒡ ᑲᑭᓇ ᐃᓂᓂᐗᐞ᙮ ᒦᑕᔥ ᑲᑭᓇ ᓴ ᐊᐎᔭᒃ ᑳᑮᐅᒋᐐᒌᐙᐙᒡ ᐃᐃᒫ ᐅᓂᐳᐎᓂᓃᕽ᙮
ᑲᑭᓇ ᓴ ᐊᐎᔭᐞ ᐅᑮᓂᐳᑕᒪᐙᐞ, ᐃᑭ ᓴ ᑳᐱᒫᑎᓯᐙᒡ ᒋᐃᔑᐱᒫᑎᓯᐙᒡ ᒋᒥᓍᐸᒥᑯᐙᒡ ᐃᓂ ᑳᑮᓂᐳᑕᒫᑯᐙᒡ, ᑳᑮᑮᐌᐱᒫᑎᓯᐃᒥᓐᒡ ᐐᓇᐙ ᐅᒋ᙮ ᑳᐐᓐ ᐐᓐ ᐐᓇᐙ ᐁᑕ ᑳᐅᒋᐱᒫᑎᓯᐙᒡ᙮
ᑳᐐᓐ ᑕᔥ ᓅᑯᒻ ᓂᑎᔑᑲᓇᐙᐸᒫᓯᐙᓈᓐ ᐊᐎᔭ ᑖᐱᔥᑰ ᐃᓂᓂ ᑳᐃᔑᑲᓇᐙᐸᒋᑫᒡ᙮ ᑮᔥᐱᓐ ᓴ ᐃᐃ ᐋᐱᑎᕽ ᑮᐃᔑᑲᓇᐙᐸᒪᑭᑎᐸᓐ ᐊᐊ X, ᑳᐐᓐ ᓅᑯᒻ ᐃᐃ ᓂᑎᔑᒋᑫᓰᒥᓐ᙮
ᑮᔥᐱᓐ ᓴ ᐊᐎᔭ ᐊᔮᒡ ᐃᐃᒫ Xᐃᕽ, ᒦ ᓴ ᐃ ᑮᐅᔥᑭᐅᔑᒋᑲᓂᐎᒡ᙮ ᑲᑭᓇ ᓴ ᑫᑌᔭᐄᓐ ᑮᐃᔥᒀᓭᐗᓐ, ᐅᔥᑲᔭᐄᓐ ᑕᔥ ᑮᑕᑯᔑᓅᒪᑲᓅᓐ᙮
ᑭᔐᒪᓂᑑ ᓴ ᐅᐅ ᑲᑭᓇ ᐅᑎᔑᒋᑫᐎᓐ, ᐃᐃᒫ Xᐃᕽ ᑳᑮᓈᒋᐐᑯᐱᓂᓇᕽ ᒋᒥᓄᐐᒌᐗᑭᒡ, ᑳᑮᒦᓂᓇᑭᒡ ᑲᔦ ᐅᐅ ᐊᓄᑮᐎᓂᓂ ᒋᓈᒋᐐᑯᐱᓇᑭᑣ ᐯᒫᑎᓯᐙᒡ ᒋᓈᓯᑲᐙᐙᒡ ᑭᔐᒪᓂᑑᓐ᙮
ᑭᔐᒪᓂᑑ ᓴ ᐃᐃᒫ Xᐃᕽ ᑮᐊᔮ ᐁᑮᓈᒋᐐᑯᐱᑕᒫᓱᒡ ᐯᒫᑎᓯᓂᒡ ᒋᑮᐌᐐᒌᐎᑯᒡ ᐅᐅᒫ ᐊᑮᕽ ᑳᐊᔮᓂᒡ᙮ ᑳᐐᓐ ᐅᑮᐊᑭᑕᒪᐙᓰᐞ ᐃᐃ ᑳᑮᐃᔑᒪᒋᑑᑕᒥᓂᒡ᙮ ᓂᑮᐸᑭᑎᓇᒫᑯᓈᓐ ᓴ ᐃᐃᐌᓂ ᐃᑭᑐᐎᓂᓂ ᑳᐃᔑᑕᔑᑌᓂᒃ ᐁᐐᒥᓄᐐᒌᐙᒡ ᐯᒫᑎᓯᓂᒡ᙮
ᓃᓇᐎᓐᑦ ᓴ ᑳᑮᑭᑐᑕᒪᐗᑭᒡ ᐊᐊ X, ᑭᔐᒪᓂᑑ ᓴ ᓂᑖᐸᒋᐃᑯᓈᓐ ᐁᑲᓅᓂᓀᒃ, ᒦᑕᔥ ᐁᔑᐸᑯᓭᓂᒥᑰᔦᒃ ᐋᓃᔥ ᓂᑮᑭᑑᑕᒪᐙᓈᓐ X: ᑮᐌᓈᓯᑲᐎᒃ ᑭᔐᒪᓂᑑ᙮
X ᑕᔥ ᐐᑳ ᑳᑮᑭᑫᑕᓯᒃ ᒪᒋᑑᑕᒧᐎᓂᓂ, ᔖᑰᒡ ᐃᑕᔥ ᒪᒋᑑᑕᒧᐎᓂᕽ ᐅᑮᑎᓄᐎᐃᑰᓐ ᑭᔐᒪᓂᑑᓐ ᑮᓇᐎᓐᑦ ᐅᒋ, ᑮᓇᐎᓐᑦ ᒣᔥᑾᒡ ᑭᔐᒪᓂᑑ ᐅᑾᔭᒀᑎᓯᐎᓂᕽ ᒋᑎᓅᐎᔭᕽ ᐁᐐᒌᐗᕽ X᙮

26

ᐃᐃᒫ ᓴ ᑳᐃᔑᐐᑕᓄᑮᒪᑭᒡ ᐊᐊ ᑭᔐᒪᓂᑑ, ᒦᑕᔥ ᐁᔑᐸᑯᓭᓂᒥᑰᔦᒃ ᑮᓇᐙ ᐋᔕ ᑳᑮᒦᓂᓀᒃ ᑭᔐᒪᓂᑑ ᐅᑭᔐᐙᑎᓯᐎᓐ, ᑫᑯ ᐊᓂᔖ ᐅᑖᐱᓇᒧᐙᑫᒃ᙮
ᑭᔐᒪᓂᑑ ᓴ ᐃᑭᑐ: ᐊᐲ ᓴ ᐁᑮᐅᒋᒋᓭᒃ ᒋᐙᐸᑕᐃᓇᑰᒃ ᓂᒥᓄᒋᑫᐎᓐ, ᑭᑮᓅᑕᐎᓂᓂᒻ᙮ ᐊᐲ ᓴ ᐁᑮᐃᔑᑮᔑᑲᒃ ᒋᐱᒫᒋᐃᓇᑰᒃ, ᑭᑮᐐᒋᐃᓂᓂᒻ᙮ ᐃᓇᔥᑫ ᐱᓯᑕᒧᒃ! ᑎᐸᐃᑲᓐ ᐅᔕ ᐋᔕ ᑮᐅᒋᒋᓭ ᒋᑌᐱᓇᒧᐌᒃ ᑭᔐᒪᓂᑑ ᐅᒥᓄᒋᑫᐎᓐ, ᒦ ᓴ ᓅᑯᒻ ᑳᑮᔑᑲᒃ ᐁᔑᑮᔑᑲᒃ ᒋᐱᒫᒋᐃᑰᔦᒃ!
ᐋᐱᒋ ᑕᔥ ᓂᑕᔮᒀᒥᓯᒥᓐ ᒋᑭᐱᔥᑲᐙᓯᐗᑭᒡ ᐊᐎᔭ, ᐋᓃᔥ ᑳᐐᓐ ᓂᓇᑕᐌᓂᒫᓯᐙᓈᓐ ᐊᐎᔭ ᒋᒥᑲᕽ ᒪᒋᑫᑰᓂᓂ ᐃᐃᒫ ᓂᑕᓄᑮᐎᓂᓈᓂᕽ᙮
ᒦ ᓴ ᐁᔑᓈᑯᑑᔮᕽ ᑭᔐᒪᓂᑑ ᐁᐊᓄᑮᑕᐗᑭᒡ ᐃᐃᒫ ᑳᐃᔑᔕᔒᐯᑕᒫᕽ ᐃᓂ ᐋᓂᒥᓯᐎᓇᓐ, ᑳᐃᔑᑲᒀᑕᑭᓭᔮᕽ, ᑳᐃᔑᓴᓇᑭᓭᔮᕽ ᑲᔦ᙮
ᐁᑮᐸᐸᑭᑌᐅᑰᔮᕽ, ᐁᑮᑭᐸᐅᑰᔮᕽ, ᐁᑮᒫᒪᐎᐅᑎᑎᓂᑰᔮᕽ, ᒨᔕᒃ ᑲᔦ ᐁᑳᔑᐳ ᐊᓄᑮᔮᕽ, ᐁᑳ ᐁᓂᐹᓯᐙᕽ ᑲᔦ ᒨᔕᒃ, ᒦᒋᒻ ᑲᔦ ᐁᑳ ᐁᑮᐊᔮᓯᐙᕽ᙮
ᐯᑳᑎᓯᐎᓂᕽ, ᑭᑫᑕᒫᐎᓂᕽ, ᔕᔒᐯᑕᒧᐎᓂᕽ, ᒥᓄᑑᑖᑎᐎᓂᕽ ᑲᔦ, ᒦ ᓴ ᐃᐃᒫ ᐁᔑᓈᑯᑑᔮᕽ ᑭᔐᒪᓂᑑ ᐅᑕᓄᑮᐋᑲᓇᐞ ᐁᑎᓅᐎᔮᕽ; ᐃᐃᒫ ᑲᔦ ᑭᔐᒪᓂᑑ ᐅᑕᒑᑾᓐ ᐁᐐᑕᓄᑮᒥᔭᒥᓐᒡ, ᑌᐺ ᑲᔦ ᑳᐃᔑᓵᑭᐃᐌᔮᕽ;
ᐃᐃᒫ ᑲᔦ ᑳᐃᔑᑎᐹᑐᑕᒫᕽ ᑌᐺᐎᓐ, ᑭᔐᒪᓂᑑ ᑲᔦ ᐅᒪᔥᑲᐎᓰᐎᓂᕽ᙮ ᒦ ᓴ ᐃᐃ ᑾᔭᒀᑎᓯᐎᓐ ᑳᐋᐸᒋᑑᔮᕽ ᑮᒦᑳᓱᔮᕽ, ᒦ ᑲᔦ ᐃᐌ ᑳᐋᐸᒋᑑᔮᕽ ᑮᓈᑕᒫᓱᔮᕽ᙮
ᓂᑯᑎᕽ ᑕᔥ ᓂᑭᑌᓂᒥᑰᒥᓐ, ᓂᑯᑎᕽ ᑲᔦ ᑳᐐᓐ ᓭᓯᒃ ᓂᑑᑖᑰᓰᒥᓐ, ᓂᑯᑎᕽ ᓅᒋᑯ ᓂᑎᑰᒥᓐ, ᓂᑯᑎᕽ ᑲᔦ ᓂᒥᓄᑕᔑᒥᑰᒥᓐ᙮ ᑖᐱᔥᑰ ᓴ ᐁᑲᑮᓇᐎᔥᑭᔮᕽ ᓂᑑᑖᑰᒥᓐ ᐋᓇᐐᓐ ᐁᑕᔑᑕᒫᕽ ᑌᐺᐎᓐ᙮
ᒦᑕᔥ ᐁᑑᑖᑰᔮᕽ ᑖᐱᔥᑰ ᐁᑭᑫᓂᒥᑰᓯᐙᕽ, ᔖᑰᒡ ᑕᔥ ᑲᑭᓇ ᐊᐎᔭᒃ ᓂᑭᑫᓂᒥᑯᓈᓂᒃ᙮ ᑖᐱᔥᑰ ᑲᔦ ᐁᐃᔑᓈᑯᓯᔮᕽ ᐁᓂᐳᔮᕽ, ᔖᑰᒡ ᑕᔥ ᓂᐱᒫᑎᓯᒥᓐ ᑳᐃᔑᐙᐸᒥᔮᕽ᙮ ᐁᑲᒀᑕᑭᐃᑰᔮᕽ ᑲᔦ, ᑳᐐᓐ ᑕᔥ ᒪᔑ ᓂᓂᓯᑰᓰᒥᓐ᙮
ᐋᓇ ᑲᔦ ᐁᒪᒉᑕᒫᕽ ᔖᑰᒡ ᑕᔥ ᒨᔕᒃ ᓂᒌᑫᑖᒥᓐ᙮ ᐁᑭᑎᒫᑭᓈᑯᓯᔮᕽ ᑲᔦ, ᔖᑰᒡ ᑕᔥ ᓂᐱᐗᐞ ᐯᒫᑎᓯᐙᒡ ᓂᐌᓅᑎᓯᐋᓈᓂᒃ᙮ ᐁᐃᔑᓈᑯᓯᔮᕽ ᑲᔦ ᑫᑰᓐ ᐁᐊᔮᓯᐙᕽ, ᔖᑰᒡ ᑕᔥ ᑲᑭᓇ ᑫᑰᓐ ᓂᑕᔮᒥᓐ᙮
ᑮᓇᐙ ᓴ ᐌᑎ ᒀᕒᐃᑎᕽ ᑳᐊᔮᔦᒃ, ᐙᐃᑰᔦᒃ ᓴ ᑭᑮᐃᑰᒻ, ᑭᑮᐹᑭᓇᒫᑰᒻ ᓂᑌᐃᓈᓂᓐ ᐁᓵᑭᐃᑰᔦᒃ᙮
ᑳᐐᓐ ᑕᔥ ᓃᓇᐎᓐᑦ ᑳᑮᑭᐸᐊᒫᑰᔦᒃ ᓂᑌᐃᓈᓂᓐ, ᑮᓇᐙ ᐅᔕ ᑳᑮᑭᐸᐊᒪᐎᔮᕽ ᑭᑌᐃᐙᓐ᙮
ᑖᐱᔥᑰ ᑕᔥ ᐁᐅᓃᒑᓂᓯᒥᓇᑰᒃ ᑭᑎᔑᑲᓅᓂᓂᓂᒻ – ᑫᑮᓇᐙ ᑕᔥ ᐙᐸᑕᐃᔑᓈᒻ ᐁᐐᓵᑭᐐᒌᐎᔑᔮᕽ, ᐅᑖᐱᓂᔑᓈᒻ ᑭᑌᐃᐙᕽ᙮
ᑫᑯ ᐐᓐ ᐯᔑᑾᓐ ᐃᔑᑲᑴᐐᒌᐙᑫᒀᓂᒃ ᐃᑭ ᑳᑌᐺᑕᓯᒀ, ᐋᓃᔥ ᑳᐐᓐ ᑖᐃᔑᓭᓯᓅᓐ᙮ ᑖᐃᔑᓈᑾᓐ ᐃᓇ ᒋᓃᔑᑭᐸᓀᓐ ᐃᐃ ᑾᔭᒀᑎᓯᐎᓐ ᐃᐃ ᑕᔥ ᒪᒋᐱᒫᑎᓯᐎᓐ? ᑕᐐᒌᑏᒪᑲᓅᓐ ᐃᓇ ᐃᐃ ᑳᐙᓭᔮᒃ ᐃᐃ ᑕᔥ ᑳᑲᔥᑮᑎᐱᑲᒃ?
ᐯᔑᑾᓐ ᐃᓇ X ᐊᐊ ᑕᔥ ᑲᔦ ᒪᒋᐊᔭᐋ ᑖᐃᓀᑕᒨᒃ? ᐯᔑᑾᓐ ᐃᓇ ᐃᔑᒋᑫᐗᒃ ᐊᐊ ᑳᑌᐺᑕᕽ ᐊᐊ ᑲᔦ ᑳᑌᐺᑕᓯᒃ?
ᑭᔐᒪᓂᑑ ᓇ ᐅᑭᒋᐊᓇᒥᐁᐎᑲᒥᒃ ᐃᔑᒋᑫᒪᑲᓂᓂ, ᑳᐃᔑᒋᑫᓂᒡ ᐃᐃ ᒪᓂᑑᑳᓇᐞ? ᑮᓇᐎᓐᑦ ᓴ ᑳᐱᒫᑎᓯᒡ ᑭᔐᒪᓂᑑ ᐅᑭᒋᐊᓇᒥᐁᐎᑲᒥᒃ! ᑭᔐᒪᓂᑑ ᓴ ᐐᓐ ᐁᑮᐃᑭᑐᒡ: ᓂᑲᐐᒋᑲᐯᔒᒫᒃ ᓴ ᐃᑭ ᑳᑎᐯᓂᒪᒀ ᐯᒫᑎᓯᐙᒡ, ᓂᑲᐐᒋᑖᒫᒃ ᑲᔦ ᒣᑴᔭᐄ, ᓂᑲᐅᒪᓂᑑᒥᑰᒃ ᑕᔥ, ᑫᐐᓇᐙ ᑕᔥ ᓂᑲᑎᐯᓂᒫᒃ᙮
ᑳᑎᐯᒋᑫᒡ ᓴ ᐁᐃᑭᑐᒡ: ᓇᑲᓂᑾᒃ, ᐸᑳᓐ ᑮᓇᐙ ᐃᔑᐱᒫᑎᓯᒃ, ᑫᑯ ᐐᓐ ᐸᐹᒣᑕᑫᒃ ᑫᑰᓐ ᑳᐐᓀᑖᑾᒃ᙮ ᒦᑕᔥ ᑫᔑᐅᑖᐱᓂᓇᑰᒃ,
ᑭᑲᐅᑌᑌᒥᒻ ᐃᑕᔥ, ᑮᓇᐙ ᑕᔥ ᑭᑲᐅᑯᓯᓯᒥᓂᓂᒻ, ᑭᑲᐅᑖᓂᓯᒥᓂᓂᒻ ᑲᔦ, ᑮᐃᑭᑐ ᑳᑎᐯᒋᑫᒡ ᑳᒫᒪᐎ ᒪᔥᑲᐎᓰᒡ᙮

27

ᑳᓵᑭᐃᓇᑰᒃ, ᐅᐅᐌ ᑕᔥ ᐁᑮᐃᔑᐊᔓᑕᒫᑰᔭᕽ, ᑕᑲ ᓴ ᐯᑭᑑᑖᓂᓐ ᑭᐱᒫᑎᓯᐎᓂᓈᓂᓐ᙮ ᑕᑲ ᑳᐐᓐ ᑭᑲᐸᐹᒣᑕᓰᒥᓐ ᑫᑰᓐ ᑫᐐᓂᔥᑳᑯᔭᕽ ᐃᐃᒫ ᑭᐐᔭᐎᓈᓂᕽ, ᑭᑕᒑᑯᓈᓂᕽ ᑲᔦ᙮ ᑕᑲ ᐌᐌᓂ ᐱᒫᑎᓰᑲᑕᐙᑖ ᐁᑭᒋ ᐃᓀᓂᒪᕽ ᑭᔐᒪᓂᑑ᙮
ᑕᐎᓇᒪᐎᔑᓈᒻ ᐃᓴ ᐃᐃᒫ ᑭᑌᐃᐙᕽ, ᑳᐐᓐ ᐄᑐᒃ ᐊᐎᔭ ᓂᑮᒫᔑᐐᒌᐙᓯᐙᓈᓐ, ᑳᐐᓐ ᑲᔦ ᐊᐎᔭ ᓂᑮᓂᔑᐗᓈᒋᐋᓯᐙᓈᓐ, ᑳᐐᓐ ᑲᔦ ᐊᐎᔭ ᓂᑮᐗᔦᔑᒫᓯᐙᓈᓐ᙮
ᐃᐃ ᓴ ᐋᔕ ᐅᑖᓈᕽ ᑳᑮᐃᑰᔦᒃ, ᑳᐐᓐ ᑕᔥ ᐐᓐ ᐁᐐᓂᔑᐗᓈᓱᒥᓇᑰᒃ ᑳᑮᐅᒋ ᐃᑭᑐᔮᓐ᙮ ᓂᑌᐃᓈᓂᕽ ᓴ ᑭᓵᑭᐃᑰᒻ, ᐁᐐᐐᒋᓂᐴᒥᑰᔦᒃ, ᐁᐐᐐᒋᐱᒫᑎᓰᒥᑰᔦᒃ ᑲᔦ᙮
ᐋᐱᒋ ᓴ ᑭᑫᒋᓈᐃᓂᓂᒻ, ᑭᑭᒋ ᐃᓀᓂᒥᓂᓂᒻ ᑲᔦ, ᒦᑕᔥ ᐃᐃᒫ ᑳᐅᒋᒪᔥᑲᐌᑕᒫᕽ᙮ ᑲᑭᓇ ᑳᐃᔑᐅᒑᓂᒥᓭᔮᕽ ᐋᐱᒋ ᓴ ᓂᒨᔥᑭᓀᔥᑳᑯᓐ ᒥᓉᑕᒧᐎᓐ᙮
ᒥᓴᐙ ᓴ ᐁᑮᑕᑯᔑᓈᕽ ᐌᑎ ᒫᓯᑑᓂᔮᑳᕽ ᑳᐐᓐ ᐌᐌᓂ ᓂᑮᐊᓉᐱᓰᒥᓐ᙮ ᒥᓯᐌ ᓴ ᐋᓇᒥᓯᐎᓐ ᑮᐊᔮ, ᑖᐱᔥᑰ ᐁᑮᒦᑳᓱᔮᕽ ᐁᑮᐃᔑᓈᑯᓯᔮᕽ, ᐁᑮᑯᑖᒋᔮᕽ ᑲᔦ ᓂᑌᐃᓈᓂᕽ᙮
ᑭᔐᒪᓂᑑ ᑕᔥ ᑳᒪᔥᑲᐎᑌᐁᐋᒡ ᐊᐎᔭᐞ ᑳᐸᑭᑌᑕᒥᓂᒡ, ᓂᑮᐲᒋᓂᔕᐊᒫᑯᓈᓐ ᑕᐃᑕᓴᓐ ᑫᐅᒋᒥᓉᑕᒫᕽ᙮
ᑳᐐᓐ ᑕᔥ ᐐᓐ ᐁᑕ ᐁᑮᑕᑯᔑᕽ ᑳᑮᐅᒋᒥᓉᑕᒫᕽ, ᐃᐃ ᓴ ᑲᔦ ᐁᑮᑎᐹᒋᒥᓀᒃ ᐋᓃᔥ ᑳᐃᔑᐐᒋᐁᒃ ᒋᒪᔥᑲᐌᑕᕽ᙮ ᓂᑮᐐᑕᒫᑯᓈᓐ ᑲᔦ ᐋᐱᒋ ᐁᑮᐊᑕᐌᑕᒣᒃ ᐁᐐᐙᐸᒥᔦᒃ, ᐁᒫᓀᑕᒣᒃ ᑲᔦ, ᐁᐃᔑᓈᑯᓯᔦᒃ ᐃᓴ ᐁᐐᓈᑕᒪᐎᔦᒃ, ᒦᑕᔥ ᐊᐗᔑᒣ ᑳᑮᐅᒋᒌᑫᑕᒫᓐ᙮
ᒥᓴᐙ ᑯ ᑮᐅᒋᒫᓀᑕᒣᑭᐸᓐ ᐃᐃ ᐅᔑᐲᐃᑲᓐ ᓃᓐ ᑳᑮᐅᔑᐲᐊᒫᓐ, ᑳᐐᓐ ᓴ ᓂᒫᓀᑕᓰ ᐁᑮᐅᔑᐲᐊᒫᓐ᙮ ᐊᒋᓇ ᓂᑮᒫᓀᑕᒻ ᐁᑮᐙᐸᒥᓇᑰᑭᐸᓐ ᐁᒫᓀᑕᒣᒃ᙮ ᐊᒋᓇ ᑕᔥ ᐁᑕ ᑭᑮᒫᓀᑖᒻ᙮
ᑳᐐᓐ ᑕᔥ ᐐᓐ ᐁᑮᒫᓀᑕᒣᒃ ᑳᑮᐅᒋᒥᓉᑕᒫᓐ, ᐃᐃᒫ ᓴ ᑭᒫᓀᑕᒧᐎᓂᐙᕽ ᐁᑮᐅᒋᐸᑳᓂᔑᐊᔮᔦᒃ᙮ ᑭᔐᒪᓂᑑ ᑕᔥ ᑭᑮᒦᓂᑯᐙ ᐃᐃ ᒫᓀᑕᒧᐎᓐ᙮ ᑳᐐᓐ ᑕᔥ ᑫᑰᓐ ᑭᑮᐃᔑᒫᔑᑑᑖᑰᓰᒻ᙮
ᐋᓃᔥ ᐃᐃ ᑭᔐᒪᓂᑑ ᑳᒦᑭᐌᒡ ᑎᓄ ᒫᓀᑕᒧᐎᓐ ᒦ ᓴ ᐃᒫ ᐌᒌᒃ ᑴᑳᑎᓯᐎᓐ, ᒦᑕᔥ ᐃᒫ ᑫᐅᒋᐱᒫᒋᐃᓐᒡ ᐊᐎᔭ᙮ ᒦᑕᔥ ᐊᐎᔭ ᑳᐐᓐ ᑕᐐᔭᑫᑕᓰ ᐱᒫᒋᐃᓐᒡ᙮ ᐊᑮᕽ ᐃᑕᔥ ᑳᐅᒌᒃ ᑎᓄ ᒫᓀᑕᒧᐎᓐ ᒦ ᐃᒫ ᓂᐳᐎᓐ ᐌᒌᒃ᙮
ᑭᐙᐸᑖᒻ ᐃᓇᔥ ᐋᓃᓐ ᑭᔐᒪᓂᑑ ᑳᐃᓈᐸᒋᑑᒡ ᐃᐃ ᑭᒫᓀᑕᒧᐎᓂᐙ? ᒦᑕᔥ ᑳᐅᒋᐌᐌᓂᐱᒫᑎᓯᔦᒃ᙮ ᒦ ᑲᔦ ᑳᐅᒋ ᑲᑴ ᐯᑭᓈᑯᓯᔦᒃ, ᒦ ᑲᔦ ᑳᑮᐅᒋᓂᔥᑫᑕᒣᒃ ᐅᐅ ᑳᑮᐃᔑᓭᒃ, ᒦ ᑲᔦ ᑭᑮᐅᒋᓇᓃᓵᓀᑖᒻ, ᒦ ᑲᔦ ᑳᑮᐅᒋᒥᓴᐌᑕᒣᒃ ᐁᐐᐙᐸᒥᔦᒃ, ᐋᐱᒋ ᑲᔦ ᑾᔭᒃ ᑭᑮᑲᑴᑮᔑᑑᒻ ᑫᑰᓐ ᑮᓅᒋᑑᔦᒃ ᐁᐐᓇᓇᐃᑑᔦᒃ ᑳᒪᒫᔒᒪᑲᒃ᙮ ᒦᑕᔥ ᐃᐃᒫ ᐁᔑᓈᑯᑑᔦᒃ ᒥᓯᐌ ᑾᔭᒃ ᐁᐱᒫᑎᓯᔦᒃ᙮
ᑳᐐᓐ ᑕᔥ ᐐᓐ ᐁᑕ ᑳᑮᐅᒋᐅᔑᐲᐊᒪᐎᓇᑰᒃ ᐊᐊ ᑳᑮᒫᔑᑑᑕᕽ, ᐊᐊ ᑲᔦ ᑳᑮᒫᔑᑑᑕᐎᓐᒡ᙮ ᒦ ᐋᓃᔥ ᐅᐅ ᑳᑮᐅᒋ ᐃᔑᒋᑫᔮᕽ, ᑮᓇᐙ ᒋᐙᐸᑎᓱᔦᒃ ᐁᓈᓴᒦᒡ ᑭᔐᒪᓂᑑ ᐋᓃᓐ ᐁᐲᒋᓵᑭᐃᔮᕽ᙮
ᒦᑕᔥ ᐃᐃ ᑳᑮᐅᒋᒪᔥᑲᐌᑕᒫᕽ᙮ ᑳᐐᓐ ᐐᓐ ᐁᑕ ᓃᓇᐎᓐᑦ ᑳᑮᐅᒋᒥᓉᑕᒫᕽ᙮ ᑕᐃᑕᔅ ᐅᔕ ᐁᑮᒥᓉᑕᕽ ᑳᑮᐅᒋᒌᑫᑕᒫᕽ᙮ ᐋᓃᔥ ᐱᓵᓐ ᑮᐅᒋ ᐃᓀᑕᒻ ᑮᓇᐙ ᑲᑭᓇ ᑳᑮᐃᔑᒋᑫᔦᒃ᙮
ᐋᐱᒡ ᐅᔕ ᑭᑮᑭᒋ ᒥᓄᑕᔑᒥᓂᓂᒻ ᐊᐲ ᑳᑮᑲᑲᓅᓇᒃ ᑕᐃᑕᔅ᙮ ᑳᐐᓐ ᓂᑮᐅᒋᐊᑲᒋᓰ, ᐋᓃᔥ ᓂᑮᑌᐺ ᑳᑮᐃᔑᑕᔑᒥᓇᑰᒃ᙮ ᒨᔕᒃ ᐅᔕ ᑌᐺᐎᓂᕽ ᑭᑮᐃᔑᑲᓅᓂᑰᒻ᙮ ᐃᐃ ᑕᔥ ᑲᔦ ᑳᑮᐃᔑᑭᒋ ᒥᓄᑕᔑᒥᑰᔦᒃ ᑕᐃᑕᔅ ᐁᑮᓅᑕᕽ, ᐋᔕ ᑮᑭᑫᑖᑾᓐ ᐁᑮᑌᐺᔮᕽ᙮
ᐋᐱᒋ ᑕᔥ ᐊᐗᔑᒣ ᑭᑕᓂᓵᑭᐃᑯᐙ ᐁᐃᔑᒫᒥᑲᐎᒡ ᐋᐱᒋ ᐁᑮᓇᐃᑕᐌᒃ ᑫᑰᓂᓂ ᐁᑮᐃᔑᑲᓅᓂᓀᒃ, ᐌᐌᓂ ᐁᑮᐲᑎᑲᓀᒃ ᑲᔦ ᑖᐱᔥᑰ ᐁᑮᑯᑖᓀᓂᒣᒃ, ᐁᑮᓇᓂᑭᔥᑳᔦᒃ ᑲᔦ᙮
ᐋᐱᒋ ᑕᔥ ᓂᒥᓉᑕᒻ ᒥᓯᐌ ᐁᐃᔑᑌᐺᔦᓂᒥᓇᑰᒃ!

28

ᑮᓇᐙ ᑕᔥ ᓃᑕᓇᒥᐋᓈᓂᒃ, ᑭᓇᑕᐌᓂᒥᑰᒻ ᒋᑭᑫᑕᒣᒃ ᐋᓃᓐ ᑭᔐᒪᓂᑑ ᐅᑭᔐᐙᑎᓯᐎᓐ ᐁᔑᐊᓄᑮᒪᑲᓂᓂᒃ ᐯᐸᑳᓐ ᐅᑌᐺᑕᒨᒃ ᑳᐃᔑᒫᐗᒋᐃᑎᐙᒡ ᐃᐃᒫ ᒫᓯᑑᓂᔭ ᐊᑮᕽ᙮
ᐋᓇ ᑕᔥ ᐐᓐ ᐁᑮᒫᔑᓭᐙᒡ ᐅᓵᒻ ᐁᑮᐹᑏᓇᑎᑭᓐ ᐋᓇᒥᓯᐎᓇᓐ, ᔖᑰᒡ ᑕᔥ ᑳᐊᐲᒋᒥᓉᑕᒧᐙᒡ, ᐋᐱᒋ ᓴ ᑮᒥᓄᒋᑫᐗᒃ ᐊᐲ ᐁᒦᑭᐌᐙᒡ ᔔᓂᔮᓐ ᐋᓇᐐᓐ ᐁᑮᑭᑎᒫᑭᓯᐙᒡ᙮
ᑭᐐᑕᒪᐎᓂᓂᒻ ᑕᔥ, ᐁᑮᒦᑭᐌᐙᒡ ᑕᔥ ᒥᓂᒃ ᐃᑯ ᐁᑯᑲᔥᑭᑑᐙᒡ, ᐊᐗᔑᒣ ᑲᔦ ᑮᒦᑭᐌᐗᒃ, ᐐᓇᐙ ᓴ ᑯ ᐁᑮᐃᓀᑕᒧᐙᒡ᙮
ᒦᑕᔥ ᓂᑮᐸᑯᓭᓂᒥᑯᓈᓂᒃ, ᓂᑮᑲᑴᒋᒥᑯᓈᓂᒃ ᑲᔦ ᐁᐐᐐᒋᐋᐙᒡ ᐃᐃ ᑭᔐᒪᓂᑑ ᐅᐱᒫᑎᓰᒪᐞ ᑳᑭᑎᒫᑭᓯᓂᒡ ᒎᑏᔭ ᐊᑮᕽ ᑳᐊᔮᓂᒡ᙮
ᐊᐗᔑᒣ ᑕᔥ ᑮ ᐃᔑᒋᑫᐗᒃ ᑳᑮᐃᔑ ᐸᑯᓭᑕᒫᑭᐸᓐ, ᐱᓇᒫ ᓴ ᐅᑮ ᐸᑭᑎᓇᒪᐙᐙᓐ ᐅᐱᒫᑎᓯᐎᓂᐙᓐ ᑳᑎᐯᒋᑫᓂᒡ, ᑲᔦ ᓃᓇᐎᓐᑦ ᓂᑮ ᐸᑭᑎᓇᒫᑯᓈᓂᒃ ᑳᐃᔑ ᐊᑕᐌᑕᒥᓂᒡ ᑭᔐᒪᓂᑑᓐ᙮
ᒦ ᓴ ᑕᔥ ᒫᓄ ᑳᑮᐅᒋᑲᓅᓇᑭᒡ ᑕᐃᑕᔅ ᒋᐐᒋᐃᓀᒃ ᒋᑮᔑᑑᔦᒃ ᐁᐐᓈᑯᑑᔦᒃ ᑭᓵᑭᐃᐌᐎᓂᐙ, ᐐᓐ ᐋᓃᔥ ᐅᑮᒫᒋᑑᓐ ᐃᐃ ᑭᐸᑭᑎᓂᑫᐎᓂᐙ᙮
ᐋᐱᒋ ᓴ ᒥᓯᐌ ᐁᐃᔑᐌᓅᑎᓯᔦᒃ, ᐃᐃᒫ ᑭᑌᐺᑕᒧᐎᓂᐙᕽ, ᑭᑮᑭᑐᐎᓂᐙᕽ, ᑭᑭᑫᑕᒫᐎᓂᐙᕽ, ᐃᐃᒫ ᑲᔦ ᐌᐌᓂ ᑳᐃᔑᐐᑑᑳᓱᔦᒃ, ᑳᐃᔑᓵᑭᐃᔮᕽ ᑕᔥ ᑫᓃᓇᐎᓐᑦ; ᒦᑕᔥ ᑲᔦ ᐁᔑᐊᑕᐌᓂᒥᑰᔦᒃ ᐋᐱᒋ ᒋᓈᑾᒃ ᑭᓵᑭᐃᐌᐎᓂᐙ ᐅᐅ ᐙᐃᔑᒥᓄᒋᑫᔦᒃ᙮
ᑳᐐᓐ ᑕᔥ ᐐᓐ ᑫᑰᓐ ᓂᑑᓇᑑᓰᓐ ᐋᓃᓐ ᑫᐃᔑᒋᑫᔦᑭᐸᓐ! ᑭᑮᐐᑕᒪᐎᓂᓂᒻ ᐋᓃᓐ ᑫᐐᓇᐙ ᐅᑌᐺᑕᒨᒃ ᑳᑮᐃᔑᐐᒋᑣᐙᒡ ᐁᐸᑭᑎᓂᑫᐙᒡ, ᑫᐅᒋᑭᑫᑕᒫᓐ ᐋᓃᓐ ᒪᔮ ᑫᑮᓇᐙ ᐁᐲᒋᓵᑭᐃᐌᔦᒃ᙮
ᑭᑭᑫᓂᒫᐙ ᐋᓃᓐ ᑳᐊᐲᒋ ᑭᔐᐙᑎᓯᒡ ᑌᐯᒋᑫᒡ ᒋᓴᔅ X, ᐋᓇᐐᓐ ᐁᑮᐌᓅᑎᓯᒡ, ᒦᑕᔥ ᑳᐃᔑᐃᑎᓱᒡ ᒋᑭᑎᒫᑭᓯᒡ ᑮᓇᐙ ᐅᒋ, ᐃᐃᒫ ᓴ ᐅᑭᑎᒫᑭᓯᐎᓂᕽ ᑮᓇᐙ ᒋᐅᒋ ᐌᓅᑎᓯᔦᒃ᙮
ᒦᑕᔥ ᓃᓐ ᐁᓀᑕᒫᓐ: ᐋᐱᒋ ᑖᐅᓂᔑᔑᓐ ᒋᑮᔑᑑᔦᑭᐸᓐ ᐃᐃ ᑳᑮᒫᒋᑑᔦᒃ ᐱᐴᓄᕽ᙮ ᑮᓇᐙ ᐋᓃᔥ ᓂᑕᒻ ᑭᑮᒫᒌᐸᑭᑎᓂᑫᒻ, ᐁᑮᒥᓉᑕᒣᒃ ᑲᔦ ᐁᐐᐃᔑᒋᑫᔦᒃ᙮
ᑮᔑᑑᒃ ᑕᔥ ᐃᐃ ᐊᓄᑮᐎᓐ᙮ ᑖᐱᔥᑰ ᓴ ᑳᑮᐃᔑᒨᒋᑫᑕᒣᒃ ᑮᒫᒋᑑᔦᒃ, ᒦ ᓴ ᐯᔑᑾᓐ ᐃᔑᑮᔑᑑᒃ ᒋᐋᐸᒋᑑᔦᒃ ᐃᓂ ᓅᑯᒻ ᑳ ᐊᔮᔦᒃ᙮
ᑮᔥᐱᓐ ᓴ ᒌᑫᑕᒣᒃ ᐁᒦᑭᐌᔦᒃ, ᑭᔐᒪᓂᑑ ᓴ ᐅᑲᐅᑖᐱᓈᓇᓐ ᑭᒦᑭᐌᐎᓂᐙᓐ ᐋᓃᔥ ᐃᐃᒫ ᑫᑰᓇᓐ ᑳᐊᔮᔦᒃ ᑭᑑᒋᒦᑭᐌᒻ, ᐋᓃᔥ ᑳᐐᓐ ᒣᒬᒡ ᑫᑰᓐ ᑭᑖᒦᑭᐌᓰᒻ ᑮᔥᐱᓐ ᑫᑰᓐ ᐁᔮᓯᐌᒃ᙮
ᑳᐐᓐ ᑕᔥ ᐐᓐ ᐃᑭ ᑳᐐᒋᐁᒀ ᒋᒥᒋᐊᔭᔮᐙᒡ, ᑮᓇᐙ ᐁᑭᒋᐊᓄᑮᔦᒃ ᐁᒦᓀᒀ ᑫᑰᓐ᙮ ᐯᔑᑾᓐ ᐄᑐᒃ ᑖᐃᔑᐐᒋᐃᑎᒻ᙮
ᐋᓃᔥ ᒣᒀ ᓅᑯᒻ ᑮᓇᐙ ᐐᑫ ᑭᒥᓄᓭᒻ, ᐁᐌᓅᑎᓯᔦᒃ ᑲᔦ, ᒦᑕᔥ ᐁᔑᓈᑾᒃ ᒋᐐᒋᐁᒀ ᐃᑭ ᑳᓅᑌᓭᐙᒡ᙮ ᓂᑯᑎᕽ ᒫᐐᓐ ᑕᐃᔑᓭ ᑮᓇᐙ ᒋᓅᑌᓭᔦᒃ, ᐐᓇᐙ ᑕᔥ ᒋᐌᓅᑎᓯᐙᒡ᙮ ᒦᓴ ᑕᔥ ᐐᓂᑕᒪᐙ ᑭᑲᐐᒋᐃᑯᐙᒃ᙮ ᒦᓴ ᑕᔥ ᐯᐯᔑᑾᓐ ᑫᔑᐐᑑᑯᑖᑎᔦᒃ᙮
ᑭᒋᒪᓯᓇᐃᑲᓐ ᓴ ᐁᐃᔑᐲᐃᑳᑌᒃ: ᐊᐎᔭ ᓃᐱᐗᐞ ᑳᑮᒨᔕᑭᓂᑫᒡ ᑳᐐᓐ ᓃᐱᐗᐞ ᐊᐗᔑᒣ ᑫᑰᓂᓂ ᐅᑮᐊᔮᓰᓐ᙮ ᐊᐊ ᑕᔥ ᐐᓐ ᐸᑮ ᑳᑮᒨᔕᑭᓂᑫᒡ ᑳᐐᓐ ᑮᒪᓀᓯᓰ ᑫᑰᓂᓂ᙮
ᒦᑴᒡ ᓴ ᓂᑎᓈᓈᓐ ᑭᔐᒪᓂᑑ ᐁᑮᒦᓈᒡ ᑕᐃᑕᓴᓐ ᑫᐐᓐ ᐯᔑᑾᓐ ᒋ ᐃᔑᒨᒋᑫᑕᒥᓂᒡ ᒋᐐᒋᐃᒥᓀᒃ ᑖᐱᔥᑰ ᓃᓇᐎᓐᑦ ᑳᐐᐃᔑᐐᒋᐃᑰᔦᒃ᙮
ᔐᒫᒃ ᑕᔥ ᑲᔦ ᑮᐃᓀᑕᒻ ᐁᐐᐃᔑᒋᑫᒡ ᑳᑮᐃᓇᑭᒡ, ᐐᓐ ᓴ ᑯ ᐁᑮᐃᓀᑕᕽ ᐁᐐᐐᒋᑣᒡ, ᐋᐱᒡ ᑲᔦ ᐁᑮᐃᓀᑕᕽ ᐁᐐᐊᑕᐙᐸᒥᓀᒃ᙮
ᐅᑎᓯᓀᒃ ᐃᑕᔥ ᐅᑲᐸᑲᒥᐐᒌᐙᓐ ᐃᓂ ᑳᑭᑌᓂᒥᒥᓐᒡ ᑮᑕᓇᒥᐋᓈᓂᓐ᙮ ᓃᓇᐎᓐᑦ ᓴ ᓂᑮᐃᔑᓂᔕᐙᓈᓐ ᐊᐊ ᑮᑕᓇᒥᐋᓈᓐ, ᐋᓃᔥ ᐋᐱᒋ ᑭᑌᓂᒫ ᐃᐃᒫ ᐯᐸᑳᓐ ᑳᐃᔑᒫᐗᒋᐃᑎᐙᒡ ᐅᑌᐺᑕᒨᒃ ᐅᑕᓄᑮᐎᓂᕽ ᐅᒋ ᑲᔦ ᐁᑲᑮᒀᑕᕽ ᒥᓍᒋᒧᐎᓂᓂ᙮
ᑲᔦ ᑕᔥ ᐃᐃᒫ ᐅᑌᐺᑕᒨᒃ ᑳᐃᔑᒫᒫᐗᒋᐃᑎᐙᒡ ᑮᐅᑖᐱᓂᑲᓂᐎ ᐁᑮᐃᓇᑭᒥᓐᒡ ᑲᔦ ᒋᐐᒌᐎᓇᑭᒡ ᐁᐱᒥᐎᑑᔮᕽ ᓵᑭᐃᐌᐎᓂᕽ ᑳᐅᒌᒪᑲᑭᓐ ᐸᑭᑎᓂᑫᐎᓇᓐ, ᑳᓈᑲᒋᑑᔮᕽ ᑳᑎᐯᒋᑫᒡ ᓴ ᒋᐅᒋᑭᒋ ᐃᓀᑖᑯᓯᒡ, ᐁᓈᑯᑑᔮᕽ ᐃᑕᔥ ᑲᔦ ᐁᐊᑕᐌᑕᒫᕽ ᐁᐐᐐᑑᑳᓱᔮᕽ᙮
ᐋᐱᒋ ᑕᔥ ᓂᑕᔮᒀᒥᒋᑫᒥᓐ ᐅᐅ ᑳᐅᒋ ᐃᔑᒋᑫᔮᕽ᙮ ᑳᐐᓐ ᐋᓃᔥ ᓂᓇᑕᐌᓂᒫᓯᐙᓈᓐ ᐊᐎᔭ ᒋᐃᓀᑕᕽ ᑾᔭᒃ ᐁᓈᓈᑲᒋᑑᓯᐙᕽ ᐅᐅ ᑳᐌᓅᑕᒃ ᐸᑭᑎᓂᑫᐎᓐ᙮
ᒦᑕᔥ ᒫᐗᒡ ᐁᔑᒥᓴᐌᑕᒫᕽ ᑾᔭᒃ ᐁᐐᐃᔑᒋᑫᔮᕽ᙮ ᑳᐐᓐ ᐐᓐ ᐁᑕ ᑳᑎᐯᒋᑫᒡ ᒋᒥᓍᐸᑕᕽ, ᐃᓂᓂᐗᒃ ᓴ ᑲᔦ ᒋᒥᓍᐸᑕᒧᐙᒡ᙮
ᒦᓇᐙ ᑕᔥ ᑯᑕᒃ ᐯᔑᒃ ᓃᑕᓇᒥᐋᓈᓐ ᓂᓐ ᑕᑯ ᐃᔑᓂᔕᐙᓈᓐ ᒋᐱᐐᒌᐎᑯᒡ ᐃᐃ ᑳᐊᑕᐙᐸᒥᒥᓀᒃ᙮ ᓂᑮᐊᑕᑭᑫᓂᒫᓈᓐ ᓴ ᒨᔕᒃ, ᓂᑭᑫᓂᒫᓈᓐ ᑲᔦ ᐋᐱᒋ ᐁᐐᐐᑑᑳᓱᒡ᙮ ᐋᔕ ᑕᔥ ᑭᑫᒋᓈᐃᑯᐙ, ᒦᑕᔥ ᐊᐗᔑᒣ ᑳᐅᒋᒨᒋᑫᑕᕽ ᐁᐐᐐᑑᑳᓱᒡ᙮
ᑕᐃᑕᔅ ᑕᔥ ᐐᓐ, ᒦ ᓴ ᐊᐊ ᓂᐐᒌᐙᑲᓐ, ᐁᐐᑕᓄᑮᒥᒡ ᐅᐅ ᑳᐐᒋᐃᑰᔦᒃ᙮ ᐃᑭ ᑕᔥ ᑯᑕᒃ ᓃᔑᓐ ᑮᑕᓇᒥᐋᓈᓂᒃ ᑳᐐᐱᐐᒌᐙᐙᒡ ᑕᐃᑕᓴᓐ ᐅᑎᔒᓂᔕᐅᑯᐙᐞ ᐅᑌᐺᑕᒨᐞ ᐯᐸᑳᓐ ᑳᐃᔑᒫᐗᒋᐃᑎᓂᒡ᙮ ᑲᔦ ᐅᐱᒫᑎᓯᐎᓂᐙᕽ X ᐅᒋᑭᒋ ᐃᓀᓂᒫ᙮
ᐙᐸᑕᐃᑯᒃ ᑕᔥ ᐁᓵᑭᐁᒀ᙮ ᑫᒋᓈᒡ ᓴ ᒥᓯᐌ ᑳᐊᔮᐙᒡ ᐅᑌᐺᑕᒨᒃ ᒋᑭᑫᑕᒧᐙᒡ ᐁᑌᐺᔮᕽ ᐃᓴ ᑳᐃᔑᒥᓄᑕᔑᒥᑰᔦᒃ ᒨᔕᒃ᙮

29

ᑳᐐᓐ ᑕᔥ ᐐᓐ ᒣᒬᒡ ᒋᐅᔑᐲᐊᒪᐎᓇᑰᒃ ᒋᐐᑕᒫᑰᔦᒃ, ᐃᑭ ᓴ ᑳᐃᔑᐐᒋᐃᑣ ᑭᔐᒪᓂᑑᓐ ᑳᑎᐯᓂᒥᑯᐙᒡ ᒎᑏᔭ ᐊᑮᕽ ᑳ ᐊᔮᐙᒡ᙮
ᐋᓃᔥ ᓂᑭᑫᑖᓐ ᐁᐐᐐᑑᑳᓱᔦᒃ᙮ ᓂᑮᐐᑕᒪᐙᒃ ᑲᔦ ᐌᑎ ᒫᓯᑑᓂᔮᐗᑮᕽ ᑳᐊᔮᐙᒡ ᐊᐎᔭᒃ ᐋᓃᔥ ᒨᔕᒃ ᑭᐐᐐᑑᑳᓱᒻ᙮ ᐅᐅ ᑕᔥ ᐁᑮᐃᑭᑐᔮᓐ: ᑮᑕᓇᒥᐋᓈᓂᒃ ᓴ ᐊᑫᔮᐗᑮᕽ ᑳᐊᔮᐙᒡ ᐱᐴᓄᕽ ᐃᓴ ᐋᔕ ᑮᑮᔑᑖᐗᒃ ᐁᐐᐐᑑᑳᓱᐙᒡ᙮ ᐃᐃᐌᓂ ᑕᔥ ᐁᑮᐙᐸᑕᒧᐙᒡ ᐋᐱᒋ ᐁᐐᐐᑑᑳᓱᔦᒃ, ᒦᑕᔥ ᑫᐐᓇᐙ ᐯᔑᑾᓐ ᐁᓀᑕᒧᐙᒡ ᐁᐐᐃᔑᒋᑫᐙᒡ᙮
ᒦ ᓴ ᑕᔥ ᑳᐅᒋ ᓃᑳᓂᓂᔕᐗᒀ ᐅᑯ ᑮᑕᓇᒥᐋᓈᓂᒃ, ᒋᑮᐗᓂᒧᓯᐗᒃ ᐃᐃ ᒨᔕᒃ ᑳᐃᔑᒥᓄᑕᔑᒥᑰᔦᒃ᙮ ᒦᓴ ᑕᔥ ᑫᔮᐱ ᐁᑭᑐᔮᓐ, ᑭᑲᑮᔑᑖᒻ ᐄᑐᒃ ᐋᔕ ᐁᐐᒦᑭᐌᔦᒃ᙮
ᑮᔥᐱᓐ ᑕᔥ ᐸᑲᒥᐐᒌᐗᒀ ᒫᓴᑑᓂᔮᕽ ᑳᐅᒌᐙᒡ, ᒥᑳᑰᔦᒃ ᑕᔥ ᐁᑮᑮᔒᑖᓯᐌᒃ, ᐋᐱᒋ ᓂᑖᑭᒋᐊᑲᒋᒥᓐ᙮ ᑫᑮᓇᐙ ᑕᔥ ᑭᑖᐊᑲᒋᒻ, ᐋᓃᔥ ᐐᑫ ᑭᑭᒋ ᐃᓀᓂᒥᓂᓂᒻ!
ᒦᑕᔥ ᑳᐅᒋᓃᑳᓂᓂᔕᐗᒀ ᐅᑯ ᑮᑕᓇᒥᐋᓈᓂᒃ ᒋᐅᑎᓯᓀᒀ ᒋᑆ ᑕᑯᔑᓈᓐ᙮ ᒦᑕᔥ ᒋᑮᔑᐅᔒᑖᓄᑕᒣᒃ ᐃᐃ ᑳᑮᐊᔓᑕᒫᑫᔦᒃ ᐁᐐᒦᑭᐌᔦᒃ᙮ ᐊᐲ ᐌᑎ ᐱᑕᑯᔑᓈᓐ ᐋᔕ ᑭᑲᑮᔑᑖᒻ᙮ ᒦᑕᔥ ᐃᐃᒫ ᑫᔑᓈᑾᒃ ᐁᓵᑭᑑᔦᒃ ᐁᒦᑭᐌᔦᒃ, ᑳᐐᓐ ᐐᓐ ᐁᒦᑭᐌᔦᒃ ᐋᓃᔥ ᐁᐃᔑᓈᑾᒃ ᒋᒦᑭᐌᔦᒃ᙮
ᐅᐅ ᑕᔥ ᑭᑎᓂᓂᓂᒻ, ᐊᐎᔭ ᓴ ᐸᑮ ᑳᑭᑎᑳᑕᕽ ᑭᑎᑳᓀᓴᓐ, ᐋᐱᒋ ᐸᑮ ᐅᑲᒨᓇᐋᓇᓐ ᑭᑎᑳᓇᓐ᙮ ᐊᐊ ᑕᔥ ᓃᐱᐗᐞ ᑳᑭᑎᑳᑕᕽ ᑭᑎᑳᓀᓴᓐ ᐋᐱᒋ ᓃᐱᐗᐞ ᐅᑲᒨᓇᐋᓇᓐ ᑭᑎᑳᓇᓐ᙮
ᐊᐎᔭ ᓴ ᒋᔑᒦᑭᐌᐸᓐ ᒥᓂᒃ ᐃᑯ ᐐᓐ ᐁᓀᑕᕽ, ᑳᐐᓐ ᐐᓐ ᒋᓂᔥᑫᑕᕽ, ᑳᐐᓐ ᐐᓐ ᑲᔦ ᒋᐃᓀᑕᕽ ᒦ ᓴ ᒦᓇᐙ ᒋᒦᑭᐌᔮᓐ᙮ ᑭᔐᒪᓂᑑ ᓴ ᐅᔕᐌᓂᒫᓐ ᐃᓂ ᑳᒥᓉᑕᒥᓂᒡ ᑮᒦᑭᐌᓂᒡ᙮
ᑭᔐᒪᓂᑑ ᓴ ᐅᑲᔥᑭᑑᓐ ᒋᒦᓂᓀᒃ ᐊᐗᔑᒣ ᐊᐲᒡ ᐐᓐ ᑳᐃᔑᓅᑌᓭᔦᒃ, ᒨᔕᒃ ᓴ ᐌᐌᓂ ᒋᑌᐱᓭᔦᒃ ᑳᐃᔑᓅᑌᓭᔦᒃ, ᒋᑌᐱᓭᔦᒃ ᑲᔦ ᑯᑕᒃ ᐊᐎᔭᒃ ᒋᒦᓀᒀ᙮
ᑭᒋᒪᓯᓇᐃᑲᓐ ᓴ ᐁᐃᔑᐲᐃᑳᑌᒃ: ᐊᐊ ᓴ ᑾᔭᒃ ᐃᓂᓂ ᑳᒪᓈᒋᒋᑫᓯᒃ ᐁᒦᓈᒡ ᑳᑭᑎᒫᑭᓯᓂᒡ᙮ ᐃᐃ ᓴ ᐅᑾᔭᑯᒋᑫᐎᓐ ᑳᐐᓐ ᐐᑳ ᑕᐴᓂᓭᓯᓂᓂ᙮
ᑭᔐᒪᓂᑑ ᓴ ᑳᒦᓈᒡ ᑭᑎᑫᐎᓂᓂᐗᓐ ᑭᑎᑳᓀᓯᓂ, ᐸᑴᔑᑲᓇᓐ ᑲᔦ ᒋᐐᓯᓂᓂᒡ, ᒦ ᓴ ᑫᔑᒦᓂᓀᒃ ᐃᐃ ᑭᑎᑳᓀᓯᓂ ᒥᓂᒃ ᑫᓅᑌᓭᔦᒃ᙮ ᒦᑕᔥ ᐃᐃᒫ ᑳᔑᒥᓄᒋᑫᔦᒃ ᑭᒦᑭᐌᐎᓂᐙᕽ, ᒦ ᓴ ᐃᐃᒫ ᑫᐅᒋᒫᒌᑭᑭᓐ, ᐋᐱᒋ ᑕᔥ ᒋᐌᓅᑎᓯᔦᒃ ᐊᐲ ᒨᓇᐃᑫᔦᒃ᙮
ᑭᔐᒪᓂᑑ ᓴ ᑭᑲᒦᓂᑯᐙ ᒨᔕᒃ ᐊᐗᔑᒣ ᑫᔮᐱ ᓇᐗᒡ ᒋᒦᑭᐌᔦᒃ᙮ ᐃᓇᔥᑫ ᑕᔥ ᐊᐲ ᓴ ᒦᓇᑭᑣ ᐊᐎᔭᒃ ᐃᐃ ᑭᒦᑭᐌᐎᓂᐙᓐ, ᐅᑲᑭᒋᒦᑴᒋᐌᓂᒫᐙᓐ ᑭᔐᒪᓂᑑᓐ᙮
ᐃᐃ ᑕᔥ ᑳᐃᔑᒋᑫᔦᒃ ᐃᐃᒫ ᑭᑕᓄᑮᐎᓂᐙᕽ ᐁᒦᑭᐌᔦᒃ, ᒦ ᓴ ᐃᒫ ᐌᒋᑭᒋᒪᒥᒋᒥᓐᒡ ᑭᔐᒪᓂᑑ᙮
ᐃᑭ ᓴ ᑳᐐᒋᐁᒀ ᐋᐱᒋ ᑕᒥᓉᑕᒨᒃ᙮ ᑳᐐᓐ ᐁᑕ ᐃᐃ ᑳᔑᒥᓄᒋᑫᔦᒃ ᑮᒦᓀᒀ ᑭᒦᑭᐌᐎᓂᐙᓐ, ᐅᑲᒦᑴᒋᐌᓂᒫᐙᓐ ᓴ ᑭᔐᒪᓂᑑᓐ ᐁᓈᑯᑑᔦᒃ ᐁᐃᔑᒋᑫᔦᒃ ᐃᐃ ᑳᐃᔑᑌᐺᑕᒣᒃ᙮
ᐋᐱᒋ ᓴ ᐌᐌᓂ ᑭᑲ ᐊᓇᒥᐁᑕᒫᑯᐙᒃ ᐋᓃᔥ ᐐᑫ ᑭᔐᒪᓂᑑ ᐅᑭᔐᐙᑎᓯᐎᓐ ᐊᓄᑮᒪᑲᓂᓂ ᑭᐱᒫᑎᓯᐎᓂᐙᕽ᙮
ᑕᑲ ᓴ ᒦᑴᒡ ᐃᓈᑖ ᑭᔐᒪᓂᑑ ᑳᒥᒋᒦᓂᓇᕽ ᑭᒋᑫᑰᓂᓂ!

210

ᓃᓐ ᐃᓴ ᐱᑯ ᑆᓬ ᐁᐃᔑᔦᒃ ᑕᔥ ᐁᑯᑖᒋᔮᓐ ᐊᐲ ᐌᑎ ᑮᐊᔮᔮᓐ ᐌᑎ ᑳᐃᔑᐊᔮᔦᒃ, ᐋᐱᒋ ᑕᔥ ᐁᐋᒀᑎᓰᑲᑕᐎᓇᑰᒃ ᐙᓴ ᑮᐊᔮᔮᓐ᙮ ᑭᑎᔑᑲᑴᒋᒥᓂᓂᒻ ᑕᔥ ᐃᐃᒫ X ᐁᓅᑳᑎᓯᒡ ᐁᒥᓍᑎᓯᒡ ᑲᔦ᙮
ᑫᑯ ᑫᑰᓐ ᒋᐃᔑᒋᑫᓯᐌᒃ ᑫᐅᒋ ᐋᒀᑎᓰᑲᑕᐎᓇᑰᒃ ᐊᐲ ᐅᑎᓯᓇᑰᒃ᙮ ᓂᑭᑫᑖᓐ ᑲᔦ ᒋᑲᔥᑭᑑᔮᐹᓐ ᒋᓇᓇᐊᓴᒀ ᐊᑮᕽ ᐅᔕ ᐅᑑᑎᓈᓈᐙ ᑳᐃᔑᒋᑫᐙᒡ ᑳᐃᔑᔭᒥᑣ᙮
ᑌᐺ ᓴ ᑭᐐᔭᐎᓈᓂᕽ ᑭᑎᔑᐱᒫᑎᓯᒥᓐ᙮ ᑳᐐᓐ ᑕᔥ ᐐᓐ ᐊᑮᐎ ᒦᑳᓱᐎᓐ ᑭᑖᐸᒋᑑᓰᒥᓐ᙮
ᑳᐐᓐ ᑕᔥ ᐐᓐ ᐊᑮᐎ ᐋᐸᒋᑖᑲᓇᓐ ᓂᑖᐸᒋᑑᓰᒥᓐ ᐃᐃ ᐁᒦᑳᓱᔮᕽ᙮ ᑭᔐᒪᓂᑑ ᓴ ᑳᒪᔥᑲᐎᓰᒪᑲᓂᓂᑭᓐ ᐅᒦᑳᓱᐎ ᐋᐸᒋᑖᑲᓇᓐ ᓂᑖᐸᒋᑖᐙᒥᓐ, ᒋᓂᔑᐗᓈᒋᑖᐗᑭᒡ ᑳᒪᔥᑲᐌᑖᑾᓂᓂᑭᓐ ᐅᐙᑳᐃᑲᓇᓐ ᑳᒦᑳᓂᓇᕽ᙮
ᓂᑲᓂᔑᐗᓈᒋᑑᒥᓐ ᑲᔦ ᐃᓂ ᒪᒋᑮᑳᑎᐎᓇᓐ᙮ ᐃᓂ ᓴ ᑲᔦ ᓂᑲᐲᑯᓈᒥᓐ ᑳᑭᒋ ᐃᓀᓂᑎᓲᒪᑲᑭᓐ ᑫᑰᓇᓐ ᑳᒦᑖᑴᔥᑳᑫᒪᑲᑭᓐ ᒋᑭᑫᓂᒫᓯᐎᓐᒡ ᑭᔐᒪᓂᑑ, ᑲᑭᓇ ᑲᔦ ᐃᓀᑕᒧᐎᓇᓐ ᓂᑭᒋᐎᓈᒥᓐ X ᒋᓇᐃᑖᑯᒡ᙮
ᐊᐲ ᑕᔥ ᑮᑫᒋᓈᐃᑰᔦᒃ ᐋᔕ ᐁᑮᓇᐃᑕᒣᒃ, ᐋᔕ ᐅᔕ ᓂᑮᑮᔑᑖᒥᓐ ᐁᐐᓂᔑᐗᓈᒋᑑᔮᕽ ᑲᑭᓇ ᔕᔒᐱᑕᒧᐎᓐ᙮
ᑮᓇᐙ ᑕᔥ ᐐᓐ ᐊᑾᒌᕽ ᐁᑕ ᑭᑎᔑᑲᓇᐙᐸᑖᒻ᙮ ᐊᐎᔭ ᓇ ᐌᑎ ᐊᔮ ᐁᐃᓀᓂᑎᓱᒡ Xᐃᕽ ᐁᐃᔑᑎᐯᑖᑯᓯᒡ? ᑕᑲ ᒦᓇᐙ ᑕᓈᓈᑲᑕᐌᓂᑎᓱ ᐋᓃᔥ ᒦ ᐯᔑᑾᓐ ᑫᓃᓇᐎᓐᑦ Xᐃᕽ ᓂᑎᔑᑎᐯᑖᑯᓯᒥᓐ ᑖᐱᔥᑰ ᑫᐐᓐ ᑳᐃᔑᑎᐯᑖᑯᓯᒡ᙮
ᑳᐐᓐ ᑕᔥ ᓂᔖᑴᓂᒧᓰ ᓃᐱᐗᐞ ᑕᔑᑕᒪᐎᓇᑰᒃ ᑳᑎᐯᒋᑫᒡ ᑳᑮᒦᓂᓇᑭᒡ ᑲᔥᑭᐁᐎᓯᐎᓐ᙮ ᑮᓇᐙ ᓴ ᒋᐅᐱᑭᔦᒃ ᑳᑮᐅᒋᒦᓂᑰᔮᕽ, ᑳᐐᓐ ᐐᓐ ᐁᐐᓂᔑᐗᓈᒋᐃᑰᔦᒃ᙮
ᑳᐐᓐ ᑕᔥ ᐐᓐ ᓂᓇᑕᐌᑕᓰᓐ ᒋᐃᔑᓇᑯᓯᔮᓐ ᑖᐱᔥᑰ ᐁᑲᑴᓭᑭᐃᓇᑰᒃ ᓂᑑᔑᐲᐃᑲᓇᓐ ᐁᐋᐸᒋᑑᔮᓐ᙮
ᐁᐃᑭᑐᐙᒡ ᓴ ᑲᔦ: ᐋᐱᒋ ᓴ ᓃᐱᐗᐞ ᐃᔑᐲᐃᑫ ᐃᐃᒫ ᐅᑑᔑᐲᐃᑲᓂᕽ, ᐋᐱᒋ ᑲᔦ ᒪᔥᑲᐎᑮᔗᒪᑲᓂᓂᐗᓐ᙮ ᑮᔥᐱᓐ ᑕᔥ ᐐᔭᐎᕽ ᑮᐙᐸᒪᑭᒡ ᐅᐅᒫ ᑮᐊᔮᒡ, ᐋᐱᒋ ᓴ ᒪᒉᑖᑯᓯ, ᐃᐃ ᑲᔦ ᑳᐃᑭᑐᒡ ᑳᐐᓐ ᑫᑰᓐ ᐊᐲᑌᑖᑾᓯᓂᓂ, ᓂᑎᑰᒃ᙮
ᑕᑲ ᑫᑯ ᐅᐅ ᐊᐎᔭ ᑕᐃᓀᑕᓰ! ᐋᓃᔥ ᑳᐃᔑᒪᔥᑲᐎᐲᐃᑫᔮᕽ ᐃᐃᒫ ᓂᑑᔑᐲᐃᑲᓂᓈᓂᕽ, ᒦ ᓴ ᐯᔑᑾᓐ ᑫᔑᒪᔥᑲᐎᑮᔗᔮᕽ ᐊᐲ ᐙᐸᒥᑰᔦᒃ᙮
ᑳᐐᓐ ᑕᔥ ᐐᓐ ᓂᑖᐃᔑᒋᑫᓰᒥᓐ ᒋᐃᓀᓂᑎᓱᔮᕽ ᑖᐱᔥᑰ ᓴ ᐃᑭ ᑳᐃᔑ ᐃᔥᐯᓂᑎᓱᐙᒡ, ᐋᐱᒋ ᑲᔦ ᐁᑲᑮᐹᑎᓯᐙᒡ᙮ ᐐᓇᐙ ᓴ ᑲᔦ ᐁᐅᔑᑑᐙᒡ ᐋᓃᓐ ᐙᐃᔑᑎᐹᐸᑎᓱᐙᒡ᙮ ᒦᑕᔥ ᐃᐃᒫ ᑲᔦ ᐁᔑᑎᐹᐸᑎᓱᐙᒡ᙮
ᓃᓇᐎᓐᑦ ᐃᑕᔥ ᐐᓐ ᑳᐐᓐ ᐊᐗᔑᒣ ᓂᑲᑕᔑᑎᓱᓰᒥᓐ, ᐋᓃᔥ ᑭᔐᒪᓂᑑ ᑳᑮᐃᔑᐅᓇᑕᒪᐎᔭᒥᓐᒡ ᐁᑕ ᓂᑲᐃᑭᑐᒥᓐ᙮ ᒦᑕᔥ ᑲᔦ ᐯᔑᑾᓐ ᐁᔑᒋᑫᔮᕽ ᐃᐃᒫ ᑳᐃᔑᐊᓄᑮᔮᕽ ᐌᑎ ᑳᐃᔑᐊᔮᔦᒃ᙮
ᑮᓇᐙ ᑕᔥ ᐃᐃᒫ ᐁᐊᔮᔦᒃ ᑭᔐᒪᓂᑑ ᑳᑮᐃᔑᐅᓇᑕᒪᐎᓇᑭᒡ, ᑳᐐᓐ ᓴ ᐊᐗᔑᒣ ᓂᑮᐃᔑᒋᑫᓰᒥᓐ ᐊᐲ ᑳᑮᐅᑎᓯᑰᔦᒃ, ᐁᑮᐐᑕᒫᑰᔦᒃ ᐃᐃ ᒥᓍᒋᒧᐎᓐ X ᑳᐃᔑᑕᔑᓱᒡ᙮
ᑳᐐᓐ ᑲᔦ ᓂᐐᑕᔑᑕᒧᐙᓰᒥᓐ ᐅᑕᓄᑮᐎᓂᐙᓐ ᐃᑭᐌᓂᐗᒃ ᑯᑕᒃ ᑳᑲᑮᑴᐙᒡ, ᑭᔐᒪᓂᑑ ᑳᑮᐃᔑ ᐅᓇᑕᒪᐎᓇᑭᒡ ᐁᑕ ᓂᑕᔑᑕᒧᐙᒥᓐ᙮ ᐊᐗᔑᒣ ᓴ ᓂᐸᑯᓭᑖᒥᓐ ᒋᒫᒌᑭᑭᓐ ᑭᑌᐺᑕᒧᐎᓂᐙᓐ, ᐊᐗᔑᒣ ᒋᐊᓄᑮᔮᕽ ᐃᐃᒫ ᑳᐃᔑᐊᔮᔦᒃ, ᒋᐱᒥᓂᔕᐊᒪᐗᑭᒡ ᑭᔐᒪᓂᑑ ᑳᑮᐃᔑᒦᔑᔭᒥᓐᒡ᙮
ᒦᑕᔥ ᑲᔦ ᐁᐐᑲᑮᒀᑕᒫᕽ ᐃᐃ ᒥᓍᒋᒧᐎᓐ ᐯᐸᑳᓐ ᐊᑮᕽ ᓇᐗᒡ ᐃᑯ ᐙᓴ ᐁᐐᐃᔖᔮᕽ᙮ ᑳᐐᓐ ᑕᔥ ᑲᔦ ᑯᑕᒃ ᐃᓂᓂ ᐅᑕᓄᑮᐎᓐ ᑳᑮᒦᓂᓐᒡ ᓂᐐᑕᔑᑕᒧᐙᓰᒥᓐ᙮
ᑭᒋᒪᓯᓇᐃᑲᓐ ᑕᔥ ᐁᐃᔑᐲᐃᑳᑌᒃ: ᐊᐎᔭ ᓴ ᑫᑰᓂᓂ ᑳᐐᑕᔑᑕᕽ ᑕᑲ ᐅᑲᑕᔑᑖᓐ ᐋᓃᓐ ᑳᑎᐯᒋᑫᓂᒡ ᑳᑮᐃᔑᒋᑫᓂᒡ᙮
ᐊᐎᔭ ᓴ ᑮᐃᓀᑕᕽ ᐁᑮᒥᓄᑑᑕᕽ ᑳᐐᓐ ᐐᓐ ᐃᐃᒫ ᐅᒋᒥᓋᑭᒫᓰ᙮ ᐹᓂᒫ ᓴ ᑳᑎᐯᒋᑫᓂᒡ ᑮᐃᓀᓂᒥᑯᒡ, ᒦᑕᔥ ᐃᐃ ᐸᔦᔥ ᐁᒥᓍᑭᒥᓐᒡ᙮

211

ᒦᑕᔥ ᐁᔑᒥᓴᐌᓂᒥᓇᑰᒃ, ᒋᔕᔒᐯᓂᒥᔦᒃ ᐃᐃ ᐁᑲᑮᐹᑌᓂᒧᔮᓐ ᐸᑮ᙮ ᓂᑫᒋᓈᐞ ᐃᑕᔥ ᐁᔕᔒᐯᓂᒥᔦᒃ᙮
ᑭᑑᑌᓂᒥᓂᓂᒻ ᓴ ᑫᓃᓐ ᑖᐱᔥᑰ ᑭᔐᒪᓂᑑ ᑳᐃᔑᐅᑌᓂᒥᓀᒃ! ᒦ ᐃ ᐋᓃᔥ ᐁᔑᓈᑯᓯᔦᒃ ᑖᐱᔥᑰ ᑳᐯᑭᓯᒡ ᐃᑴ ᐁᑮᐊᔓᑕᒪᐗᑭᐸᓐ X ᐐᓐ ᐁᑕ ᒋᐐᑎᑫᒥᓀᒃ᙮
ᑮᓇᐙ ᑕᔥ ᐁᒥᒋᐯᔑᑯᐁᒃ ᐌᐌᓂ ᑲᔦ ᐁᐐᒌᐌᒃ X, ᑭᓇᓃᓵᓀᓂᒥᓂᓂᒻ ᑫᑮᓇᐙ ᒋᐗᓂᒥᑰᔦᒃ ᑭᑎᓀᑕᒧᐎᓂᐙᕽ ᑖᐱᔥᑰ ᐄᑉ ᑳᑮᐃᔑᐗᓂᒥᑯᒡ ᑳᑲᑮᑖᐐᓂᒡ ᒪᒋᑭᓀᐱᑰᓐ᙮
ᐊᐎᔭ ᓴ ᑮᐅᑎᓯᓀᒃ ᐸᑳᓐ ᒋᓴᓲᓐ ᑮᑕᔑᒫᒡ, ᒦ ᓴ ᐊᐌ ᐁᔑᑌᐺᑕᐌᒃ, ᑳᐐᓐ ᓃᓇᐎᓐᑦ ᑳᑮᑕᔑᒪᑭᒡ ᒪᔮ ᒋᓴᔅ, ᑭᑑᑖᐱᓈᐙ ᑲᔦ ᐸᑳᓐ ᐊᒑᒃ, ᑳᑎᓄᐎᓯᓂᒃ ᑭᔐᒪᓂᑑ ᐅᑕᒑᑾᓐ ᑳᑮᐅᑖᐱᓂᒣᑭᐸᓐ, ᑭᑑᑖᐱᓈᒻ ᑲᔦ ᐸᑳᓐ ᒥᓍᒋᒧᐎᓐ, ᓃᓇᐎᓐᑦ ᑕᔥ ᐐᓐ ᑾᔭᒃ ᐁᑮᑲᑮᑭᒥᑰᔦᒃ᙮
ᑳᐐᓐ ᑕᔥ ᑲᔦ ᓂᑎᓀᓂᑎᓱᓰ ᓇᐗᒡ ᓃᓐ ᐁᑕᐸᓭᑖᑯᓯᔮᓐ ᐊᐲᒡ ᐐᓐ ᐃᑭ ᑳᒥᒋ ᐃᓍᓂᑎᓱᐙᒡ ᐁᓃᑳᓀᑖᑯᓯᐙᒡ ᐃᔑᓂᔕᐙᑲᓇᒃ᙮
ᑯᒫ ᑲᔦ ᑳᐐᓐ ᓂᓂᑖᑳᑮᑭᑐᓰ, ᑳᐐᓐ ᑕᔥ ᐐᓐ ᑭᑫᑕᒫᐎᓐ ᓂᓅᑌᓭᓰ᙮ ᒥᓯᐌ ᐄᑐᒃ ᑭᑮᐃᔑᐙᐸᑕᐃᑰᒻ ᑳᑮᐃᔑᒋᑫᔮᕽ ᐁᑌᐺᔮᕽ ᐅᐅ ᑳᑮᐃᑭᑐᔮᕽ᙮
ᑳᐐᓐ ᑕᔥ ᑫᑰᓐ ᑭᑮᐃᓇᑭᑕᒪᐎᓯᓅᓂᓂᒻ ᐊᐲ ᐁᑮᑲᑮᒀᑕᒫᓐ ᐅᐅ ᒥᓍᒋᒧᐎᓐ, ᐁᑮᑲᑮᒀᓇᒃ ᑭᔐᒪᓂᑑ᙮ ᐋᐱᒋ ᑲᔦ ᓂᑮᑕᐸᓭᓂᑎᔅ ᑮᓇᐙ ᒋᑭᒋ ᐃᓀᑖᑯᓯᔦᒃ᙮ ᒦ ᓇ ᑕᔥ ᐁᑮᒪᒫᔒᔮᓐ?
ᐊᐲ ᓴ ᐌᑎ ᑳᑮᑕᓇᓄᑮᔮᓐ ᑳᔑᐊᔮᔦᒃ, ᑯᑕᒃ ᓴ ᐯᐸᑳᓐ ᐅᑌᐺᑕᒨᒃ ᑳᐄᔑᒫᐗᒋᐃᑎᐙᒡ ᓂᑮᑎᐸᐊᒫᑰᒃ᙮ ᒦᑕᔥ ᐁᑮᐃᔑᓈᑯᓯᔮᓐ ᑖᐱᔥᑰ ᐁᑮᑭᒨᑎᒪᒀ ᔔᓂᔮᓐ᙮ ᒦᑕᔥ ᐃᐃ ᐁᐐᐐᒋᐃᓇᑰᒃ ᑳᑮᐅᒋ ᐃᔑᓭᒃ᙮
ᐌᑎ ᑕᔥ ᐊᐲ ᑳᑮᐐᒌᐎᓇᑰᒃ, ᑳᐐᓐ ᓴ ᐊᐎᔭ ᑳᑕᔑᔦᒃ ᓂᑮᒥᑯᔥᑳᓱᒫᓰ ᒋᐐᒋᐃᒡ ᐊᐲ ᔔᓂᔮ ᐁᑮᓅᑌᓭᔮᓐ᙮ ᑮᑕᓇᒥᐋᓈᓂᒃ ᓴ ᒫᓯᑑᓂᔮᐗᑮᕽ ᑳᐊᔮᐙᒡ ᓂᑮᐲᑕᒫᑰᒃ ᑲᑭᓇ ᑫᑰᓂᓂ ᑳᑮᐃᔑᓅᑌᓭᔮᓐ᙮ ᑳᐐᓐ ᓴ ᐐᑳ ᑫᑰᓐ ᑭᑲᐊᑲᐊᑐᑕᒪᐎᓯᓅᓂᓂᒻ᙮ ᒦ ᓴ ᐃ ᒨᔕᒃ ᑫᐃᔑᒋᑫᔮᓐ᙮
ᐃᐃ ᑕᔥ X ᐅᑌᐺᐎᓐ ᐁᑭᑭᔥᑳᑯᔮᓐ, ᑳᐐᓐ ᓴ ᐐᑳ ᓂᑲᐸᑭᒌᓰ ᒋᑕᔑᑕᒫᓐ ᐅᐅ ᑳᑮᐃᔑᒥᓄᒋᑫᔮᓐ ᐃᐃᒫ ᒥᓯᐌ ᐊᑫᔮᐗᑮᕽ ᐃᔖᔮᓐ᙮
ᐋᓃᓐ ᐃᑕᔥ? ᐅᓵᒻ ᐃᓇ ᐁᓵᑭᐃᓯᓇᐎᓇᑰᒃ? ᑭᔐᒪᓂᑑ ᓴ ᐅᑭᑫᑖᓐ ᐁᓵᑭᐃᓇᑰᒃ᙮
ᒦᑕᔥ ᐃᑯ ᑫᐃᔑᒋᑫᔮᓐ ᐃᐃ ᒨᔕᒃ ᑳᐃᔑᒋᑫᔮᓐ᙮ ᐋᓃᔥ ᑳᐐᓐ ᓂᓇᑕᐌᓂᒫᓰᒃ ᐃᑭ ᑳᐃᓍᓂᑎᓱᐙᒡ ᐃᔑᓂᔕᐙᑲᓇᒃ ᒋ ᐃᔑᒪᒦᒀᓂᑎᓱᐙᒡ, ᒋᐃᑭᑐᐙᒡ ᑲᔦ ᑫᐐᓇᐙ ᓴ ᐁᐃᓇᓄᑮᐙᒡ ᐯᔑᑾᓐ ᑳᐃᓇᓄᑮᔮᕽ᙮
ᑳᐐᓐ ᓴ ᑾᔭᒃ ᐃᔑᓂᔕᐙᑲᓇᒃ ᑎᓄᐎᓰᐗᒃ᙮ ᒦ ᓴ ᐃᑭ ᑳᐃᓍᓂᑎᓱᐙᒡ ᐃᔑᓂᔕᐙᑲᓇᒃ, ᑳᑮᐗᓂᒧᐙᒡ ᐁᑕᔑᑕᒧᐙᒡ ᐅᑕᓄᑮᐎᓂᐙᓐ᙮ ᑖᐱᔥᑰ ᑕᔥ ᑲᔦ ᑌᐺ X ᐅᑎᔑᓂᔕᐙᑲᓇᐞ ᐁᐃᔑᓈᑯᓯᐃᑎᓱᐙᒡ᙮
ᑫᑯ ᑕᔥ ᒫᒪᑳᑌᑕᑫᒃ, ᐋᓃᔥ ᒪᒋᐊᔭᐋ ᑫᐐᓐ ᐃᔑᐃᑎᓱ ᑖᐱᔥᑰ ᐁᒐᓬ ᑳᐙᓭᓈᑯᓯᒡ᙮
ᑫᑯ ᑲᔦ ᑭᒋ ᐃᓀᑕᑫᒃ ᑮᔥᐱᓐ ᐅᑕᓄᑮᐋᑲᓇᐞ ᐃᔑᐃᑎᓱᓂᒡ ᑖᐱᔥᑰ ᐁᐃᔑᐐᒋᑣᓂᒡ ᐃᐃᒫ ᑾᔭᒀᑎᓯᐎᓂᕽ᙮ ᐌᑎ ᓴ ᐃᔥᒀᒡ ᑕᑎᐸᐊᒪᐙᐗᒃ ᑲᑭᓇ ᑫᑰᓂᓂ ᑳᑮᐃᔑᒋᑫᐙᒡ᙮
ᒦᓇᐙ ᑕᔥ ᓂᑎᑭᑦ, ᑫᑯ ᐊᐎᔭ ᑕᐃᓀᑕᓰ ᐁᑲᑮᐹᑎᓯᔮᓐ᙮ ᑮᔥᐱᓐ ᑕᔥ ᐃᐃ ᐃᓀᓂᒥᔑᔦᒃ, ᒦ ᓴ ᐃ ᐱᓵᓂᑯ ᐃᔑᐅᑖᐱᓂᔑᒃ, ᑫᓃᓐ ᓴ ᐸᑮ ᒋᒪᒦᒀᓂᑎᓱᔮᓐ᙮
ᐅᐅ ᑕᔥ ᑳᐐᐃᑭᑐᔮᓐ ᓅᑯᒻ, ᑳᐐᓐ ᐄᑐᒃ ᐐᓐ ᐊᐊ ᑳᑎᐯᒋᑫᒡ ᑳᐃᔑᐊᑕᐌᓂᒥᒡ ᒋᐃᑭᑐᔮᓐ᙮ ᐅᐅ ᑕᔥ ᑳᐃᔑᒪᒦᒀᓂᑎᓱᔮᓐ, ᒦ ᓴ ᐁᔑᓈᑯᓯᔮᓐ ᑖᐱᔥᑰ ᐁᑲᑮᐹᑎᓯᔮᓐ᙮
ᐋᐱᒋ ᑕᔥ ᐁᐹᑏᓄᐙᒡ ᐊᐎᔭᒃ ᑳᒪᒦᒀᓂᑎᓱᐙᒡ ᐃᐃᒫ ᐐᔮᓯᐱᒫᑎᓯᐎᓂᕽ ᐅᒋ, ᒦ ᓴ ᑫᓃᓐ ᑫᐃᔑᒋᑫᔮᓐ᙮
ᑭᑎᓀᑖᒧᐙᑐᒃ ᒫᐐᓐ ᐋᐱᒋ ᐁᑲᑮᑖᐌᑕᒣᒃ ᐁᔕᔒᐯᓂᒣᒀ ᑫᑮᐹᑎᓯᐙᒡ!
ᑭᔕᔒᐯᓂᒫᐙ ᓴ ᑲᔦ ᐊᐎᔭ ᑳᐊᔮᓅᓂᓀᒃ ᐁᒥᑯᔥᑳᓱᒥᓀᒃ ᑫᑰᓂᓂ ᒋᐃᔑᒋᑫᔦᒃ, ᐊᐎᔭ ᑲᔦ ᑳᐗᔦᔑᒥᓀᒃ, ᐊᐎᔭ ᑲᔦ ᑳᒪᒫᒋᑯᓂᓀᒃ, ᐊᐎᔭ ᑲᔦ ᑳᒪᒋᓇᐎᓀᒃ ᑯᒫ ᑲᔦ ᑳᐸᓰᑴᐅᓀᒃ᙮
ᐋᐱᒋ ᓴ ᓂᑕᑲᒡ ᐁᐃᑭᑐᔮᓐ ᐁᑮᔖᑴᓂᒧᔮᕽ ᓃᓇᐎᓐᑦ ᐅᐅ ᒋᑑᑖᑰᔦᒃ᙮ ᑮᔥᐱᓐ ᐊᐎᔭ ᐐᒪᒦᒀᑕᕽ ᑫᑰᓂᓂ, ᑫᓃᓐ ᓴ ᒦ ᐯᔑᑾᓐ ᑫᐃᔑᒋᑫᔮᓐ᙮ ᐋᐱᒋ ᒫᐐᓐ ᓂᑲᑮᐹᓯᓈᑯᔅ᙮
ᐄᐸᕒᐆᐎᐗᒃ ᐃᓇ? ᑫᓃᓐ ᓴ ᐄᐸᕒᐆ ᓂᑎᓄᐤ᙮ ᐃᔅᕒᐃᔭᓬᐄᐎᐗᒃ ᐃᓇ? ᑫᓃᓐ ᓴ ᐃᔅᕒᐃᔭᓬ ᓂᑎᓄᐤ᙮ ᐁᐸᕒᐊᐋᒥᕽ ᐃᓇ ᑮᐅᒌᐗᒃ? ᑫᓃᓐ ᓴ ᒦ ᐃᒫ ᐌᑕᑳᓀᓯᔮᓐ᙮
X ᐃᓇ ᐃᐃ ᐅᑕᓄᑮᐋᑲᓇᐞ? ᓂᑲᑲᑮᐹᓯᑖᑯᔅ ᒫᐐᓐ ᐅᐅ ᑳᐐᐃᑭᑐᔮᓐ! ᓇᐗᒡ ᐃᑕᔥ ᓃᓐ ᑾᔭᒃ ᐊᓄᑮᐋᑲᓐ ᐊᐲᒡ ᐐᓇᐙ! ᓇᐗᒡ ᓃᓐ ᓂᑮᑭᒋᐊᓄᑮ! ᓇᐗᒡ ᓃᓐ ᐹᑏᓍ ᓂᑮᑭᐸᐅᑰ, ᓇᐗᒡ ᓃᓐ ᑲᔦ ᐹᑏᓍ ᓂᑮᐸᐸᔕᔐᐅᑰ, ᓇᐗᒡ ᓃᓐ ᑲᔦ ᐹᑏᓍ ᑫᑳ ᓂᑮᓂᑉ᙮
ᒎᐗᒃ ᓂᓯᒥᑕᓇᔑᔖᑲᒋᕽ 39 ᓴ ᐊᐎᔭᓐ ᐅᐸᐸᔕᔐᐙᐙᓐ ᐋᐱᑎᕽ ᐁᐸᔕᔐᐙᐙᒡ᙮ ᓈᓂᕽ ᐃᑕᔥ ᐃᐃᐌ ᓂᑮᑑᑖᑰᒃ ᒎᐗᒃ᙮
ᓂᓯᕽ 3 ᑲᔦ ᓂᑮᐸᐸᑭᑌᐅᑰ ᒥᑎᑰᓐ ᐁᑮᐋᐸᒋᒋᑳᑌᑭᓐ᙮ ᐋᐱᑎᕽ ᑲᔦ ᓂᑮᐸᐱᒶᓯᓇᐃᑰ, ᓃᔣ 3 ᑲᔦ ᐁᑮᐲᑾᐊᕽ ᓂᑭᒋᒌᒫᓂᓈᓐ, ᐋᐱᑎᕽ ᑕᔥ ᑲᐯᑎᐱᒃ, ᑲᐯᑮᔑᒃ ᑲᔦ ᓂᑮᐸᐹᒫᐅᒃ ᑭᒋᑲᒦᕽ᙮
ᒨᔕᒃ ᑲᔦ ᐁᐸᐹᒥᐊᔮᔮᓐ, ᐁᑮᓇᓃᓵᓂᓯᔮᓐ ᒋᓂᑭᐲᔮᓐ ᓰᐲᑳᕽ, ᐁᑮᓇᓃᓵᓂᐃᐙᒡ ᑲᔦ ᑮᒨᒋᔥᑲᒃ, ᐁᑮᓇᓃᓵᓂᐃᐙᒡ ᑲᔦ ᒎᐗᒃ ᑲᔦ ᐁᑳ ᑳᒎᐎᐎᓯᒀ, ᐁᑮᓇᓃᓵᓂᓯᔮᓐ ᑲᔦ ᑭᒋᐆᑌᓈᑳᕽ, ᐁᑮᓇᓃᓵᓂᓯᔮᓐ ᑲᔦ ᐱᑾᑕᑲᒥᑯᕽ, ᐁᑮᓇᓃᓵᓂᓯᔮᓐ ᑲᔦ ᑭᒋᑲᒦᕽ, ᐁᑮᓇᓃᓵᓂᐃᐙᒡ ᑲᔦ ᐃᑭ ᑳᑮᐊᓇᒥᐁᑳᓱᐙᒡ᙮
ᐋᐱᒋ ᑕᔥ ᑲᔦ ᐁᑮᑭᒋᐊᓄᑮᔮᓐ, ᐁᑮᑲᒀᑕᑭᓭᔮᓐ ᑲᔦ, ᒨᔕᒃ ᑲᔦ ᐌᐌᓂ ᐁᑮᓂᐹᓯᐙᓐ, ᒨᔕᒃ ᑲᔦ ᐁᑮᐐᐐᓯᓂᔮᓐ, ᐁᑮᐐᒥᓂᑴᔮᓐ ᑲᔦ, ᒨᔕᒃ ᑲᔦ ᒦᒋᒻ ᑌᒥᓂᒃ ᐁᑮᐊᔮᓯᐙᓐ, ᐊᑾᒌᕽ ᑲᔦ ᒨᔕᒃ ᐁᑮᐊᔮᔮᓐ, ᐁᑮᑮᑲᒋᔮᓐ ᑲᔦ ᒨᔕᒃ᙮
ᑳᐐᓐ ᑕᔥ ᐐᓐ ᑲᑭᓇ ᑫᑰᓇᓐ ᓂᐐᐐᑕᓰᓇᓐ᙮ ᐁᑕᓱᑮᔑᒃ ᑲᔦ ᐁᐅᒋᑯᓯᑴᑕᒫᓐ ᐁᓈᓈᑲᑕᐌᓂᒪᒀ ᐅᑌᐺᑕᒨᒃ ᑲᑭᓇ ᐊᔮᐎᓂᕽ ᑳᐃᔑᒫᐗᒋᐃᑎᐙᒡ᙮
ᐊᐎᔭ ᓴ ᑮᒪᒉᓂᒧᒡ ᐋᐱᒋ ᓴ ᓂᑯᐹᑌᓂᒫ᙮ ᐊᐎᔭ ᑲᔦ ᑮᐃᔑᐎᓂᓐᒡ ᒪᒋᑑᑕᒧᐎᓂᕽ, ᐋᐱᒋ ᓴ ᓂᑭᒋᒫᓀᑕᒻ᙮
ᑮᔥᐱᓐ ᑕᔥ ᐐᒪᒦᒀᓂᑎᓱᔮᓐ, ᒦ ᓴ ᐃᓂ ᑫᑕᔑᑕᒫᓐ ᒋᐐᑕᒫᓐ ᐋᓃᓐ ᐁᔑᓃᓇᒥᓯᔮᓐ᙮
ᑭᔐᒪᓂᑑᓐ ᑳᑎᐯᒋᑫᒡ ᒋᓴᔅ ᑳᐅᔫᓯᒡ ᒨᔕᒃ ᑳᒦᑴᒋᐌᓂᒥᒥᓐᒡ, ᓂᑭᑫᓂᒥᒃ ᐁᑳ ᐁᑮᐗᓂᒧᓯᐙᓐ᙮
ᐌᑎ ᑕᔥ ᒣᒀ ᑎᒫᔅᑲᓯᕽ ᑮᐊᔮᔮᓐ, ᐊᐊ ᓴ ᐋᓂᑫᐅᑭᒫ ᑳᑮᑎᐯᓂᒥᑯᒡ ᐃᓂ ᑭᒋᐅᑭᒫᓐ ᐊᕒᐄᑕᓴᓐ ᐅᑮᐊᓵᐞ ᔑᒫᑲᓂᔕᐞ ᒥᓯᐌ ᑭᒋ ᐃᔥᒀᑌᒥᑳᕽ ᐁᐐᑲᑴᑕᑯᓂᒡ᙮
ᐃᐃᒫ ᑕᔥ ᑳᑮᐃᔑᐸᑯᓀᔮᒃ ᑳᔑᐙᑳᔮᐱᑭᓂᑳᑌᒃ ᐆᑌᓇ ᒦ ᐃᒫ ᓂᑮᐅᒋ ᓃᓵᐲᑭᓂᑰ, ᑭᒋᐐᑯᐲᒪᑲᑯᕽ ᐁᑮᐃᔑᑳᓂᑰᔮᓐ᙮ ᒦᑕᔥ ᐃᐃᒫ ᑳᑮᐅᒋᔖᐾᑲᑕᐗᒃ ᐊᐊ ᑭᒋᐅᑭᒫ᙮

212

ᐅᒋᑕ ᑕᔥ ᐃᑯ ᒋᒪᒦᒀᓂᑎᓱᔮᓐ ᐃᔑᓈᑾᓐ᙮ ᐋᓇᐐᓐ ᑳᐐᓐ ᑫᑰᓐ ᑕᐃᓈᐸᑕᓯᓅᓐ᙮ ᓂᐐᑕᔑᑖᓇᓐ ᑕᔥ ᐃᓂ ᐃᓈᐸᑕᒧᐎᓇᓐ ᐃᓂ ᑲᔦ ᐙᐸᑕᐃᑰᐎᓇᓐ ᑳᑎᐯᒋᑫᒡ ᑳᑮᒦᔑᒡ᙮
ᓂᑭᑫᓂᒫ ᓴ ᐯᔑᒃ ᐃᓂᓂ Xᑕᓐ ᑳᐐᒌᐎᑯᒡ ᒥᑖᔑᓃᐎᐱᐴᓇᑳᓂ ᒫᐐᓐ ᐁᑮᐃᔑᐎᒋᑲᓂᐎᒡ ᐌᑎ ᒫᐗᒡ ᑳᐃᔑ ᐃᔥᐹᓂᒃ ᑮᔑᑯᕽ᙮ –ᑳᐐᓐ ᑕᔥ ᒪᔮ ᓂᑭᑫᑕᓰᓐ ᑮᔥᐱᓐ ᐅᐅ ᑳᐃᔑᓭᑯᐸᓀᓐ, ᑯᒫ ᑲᔦ ᑳᐃᓈᐸᑕᒧᑯᐸᓀᓐ, ᑭᔐᒪᓂᑑ ᓴ ᐁᑕ ᐅᑭᑫᑖᓐ᙮–
ᐁᑭᑫᓂᒪᒃ ᑕᔥ ᐗᐊ ᐃᓂᓂ, ᑭᔐᒪᓂᑑ ᓴ ᐅᑭᑫᑖᓐ ᑯᒫ ᑲᔦ ᑳᐃᔑᓭᓂᑴᓐ ᑯᒫ ᑲᔦ ᑳᐃᓈᐸᑕᒥᓂᑴᓐ᙮
ᓂᑭᑫᓂᒫ ᓴ ᐁᑮᐃᔑᐎᒋᑲᓂᐎᒡ ᐌᑎ ᑳᐃᔑᐎᓂᑣ ᑳᔕᐌᑖᑯᓯᐙᒡ, ᐁᑮᓅᑕᕽ ᓴ ᑫᑰᓇᓐ ᑳᑲᔥᑭᒋᑳᑌᓯᓂᓂᑭᓐ ᒪᔮ ᒋᑕᔑᑌᓂᑭᓐ, ᑳᐐᓐ ᑲᔦ ᐊᐎᔭ ᐸᑭᑎᓈᓰ ᒋᑎᐹᑐᑕᕽ ᐃᓂ ᑫᑰᓇᓐ᙮
ᓂᐐᒪᒦᒀᓈ ᑕᔥ ᐊᐊ ᑎᓄ ᐃᓂᓂ᙮ ᑳᐐᓐ ᑕᔥ ᓃᓐ ᓂᐐᒪᒦᒀᓂᑎᓱᓰ, ᐃᓂ ᓴ ᐁᑕ ᒋᓈᑾᑭᓐ ᑳᐃᔑᓃᓇᒥᓯᔮᓐ᙮
ᒥᓴᐙ ᑯ ᑮᔥᐱᓐ ᐐᒪᒦᒀᓂᑎᓱᔮᓐ, ᑳᐐᓐ ᓂᑖᑲᑮᐹᓯᓈᑯᓯᓰ᙮ ᐋᓃᔥ ᓂᑌᐺ ᐃᐃ ᑳᐐᐃᑭᑐᔮᓐ᙮ ᑳᐐᓐ ᑕᔥ ᓂᐐᒪᒦᒀᓂᑎᓱᓰ ᐋᓃᔥ ᑳᐐᓐ ᐊᐎᔭ ᓂᓇᑕᐌᓂᒫᓰ ᐊᐗᔑᒣ ᒋᐃᓀᓂᒥᒡ ᐅᐅ ᑳᐃᔑᐙᐸᒥᒡ ᐃᐃ ᑲᔦ ᑳᐃᔑᓅᑕᐎᒡ ᐁᐃᑭᑐᔮᓐ᙮
ᐁᑮᐙᐸᑕᒫᓐ ᑕᔥ ᑫᑰᓇᓐ ᒫᐗᒡ ᐃᑯ ᐁᒥᓄᓈᑾᑭᓐ, ᒋᐅᒋᑭᒋ ᐃᓀᓂᒧᓯᐙᓐ ᑕᔥ, ᒦ ᓴ ᓂᑮᒦᓂᑰ ᑫᐅᒋᐐᓴᑫᑕᒫᓐ ᐃᐃᒫ ᓂᐐᔭᐎᕽ᙮ ᒦ ᐃ ᒪᒋᐊᔭᐋ ᑳᑮᐲᒋᓂᔕᐊᒪᐎᒡ ᒨᔕᒃ ᐁᐸᐸᑭᑌᐅᑯᐗᒃ ᓂᐐᔭᐎᕽ, ᒦ ᓴ ᑕᔥ ᐃᐃ ᑳᐅᒋᑭᒋ ᐃᓀᓂᒧᓯᐙᓐ᙮
ᓃᔣ 3 ᑕᔥ ᓂᑖᓇᑮᑲᓅᓈ ᑳᑎᐯᒋᑫᒡ ᐁᑮᑲᑴᒋᒪᒃ ᒋᐅᑖᐱᓇᕽ ᐃᐃ ᓂᐐᓴᑫᑕᒧᐎᓂᓂ᙮
ᐅᐅ ᑕᔥ ᓂᑮᐃᔑᓇᑴᑖᒃ: ᓂᑭᔐᐙᑎᓯᐎᓐ ᐅᔕ ᐁᑕ ᑭᑌᐱᓭᐃᑯᓐ, ᒦ ᓴ ᐃᐃᒫ ᑭᓃᓇᒥᓯᐎᓂᕽ ᒫᐗᒡ ᐁᔑᓈᑾᒃ ᓂᒪᔥᑲᐎᓰᐎᓐ᙮ ᒦ ᓴ ᑕᔥ ᐃᐃ ᑫᔑᒌᑫᑕᒫᓐ ᒋᑭᒋ ᐃᓀᑕᒫᓐ ᐃᐃ ᑳᐃᔑᓃᓇᒥᓯᔮᓐ, ᐋᓃᔥ X ᐅᒪᔥᑲᐎᓰᐎᓐ ᓂᓇᑕᐌᑕᒧᐙᓐ ᒋᑭᑭᔥᑳᑯᐗᒃ᙮
ᒦᑕᔥ ᐃᐃ ᑫᔑᓇᐁᑕᒫᓐ ᐃᐃᒫ ᑳᐃᔑᓃᓇᒥᓯᔮᓐ, ᓅᒋᑯ ᑲᔦ ᑳᐃᔑ ᐃᑰᔮᓐ, ᑳᐃᔑᑲᒀᑕᑭᓭᔮᓐ ᑲᔦ, ᑳᐃᔑᑲᒀᑕᑭᐃᑰᔮᓐ ᑲᔦ, ᒨᔕᒃ ᑲᔦ ᑳᐃᔑᓴᓇᑭᓭᔮᓐ X ᐅᒋ᙮ ᐊᐲ ᑕᔥ ᑮᓃᓇᒥᓯᔮᓐ, ᒦᑕᔥ ᒫᐗᒡ ᐁᔑᒪᔥᑲᐎᓰᔮᓐ᙮
ᐋᐱᒋ ᑕᔥ ᓂᑲᑮᐹᓯᓈᑯᔅ, ᑮᓇᐙ ᐋᓃᔥ ᑳᑮᐃᔑᐃᔦᒃ ᒋᐃᔑᒋᑫᔮᓐ! ᑮᓇᐙ ᐅᔕ ᐃᔑᓈᑾᓐ ᑾᔭᒃ ᒋᑕᔑᒥᔦᑭᐸᓐ᙮ ᑫᑰᓐ ᑕᔥ ᐐᓐ ᐁᐊᐲᑌᑖᑯᓯᓯᐙᓐ, ᔖᑰᒡ ᑕᔥ ᑳᐐᓐ ᐊᐗᔑᒣ ᓂᑕᐸᓭᑖᑯᓯᓰ ᐃᐃ ᑳᐊᐲᑌᑖᑯᓯᐙᒡ ᑳᑭᒋ ᐃᓀᑖᑯᓯᐙᒡ ᐃᔑᓂᔕᐙᑲᓂᕽ ᑳᐃᓍᓂᑎᓱᐙᒡ᙮
ᐃᓂ ᓴ ᑭᑭᓇᐙᒋᒋᑫᐎᓇᓐ ᐃᓂ ᑲᔦ ᒫᒪᑳᒋᒋᑫᐎᓇᓐ ᑲᔦ ᒪᔥᑲᐎ ᐃᔑᒋᑫᐎᓇᓐ ᑳᑮᐃᔑᒋᑫᔮᓐ ᐃᐃᒫ ᑳᔑᐊᔮᔦᒃ ᐐᑳ ᐁᑮᐸᑭᒌᓯᐙᓐ, ᒦ ᓴ ᐃᐃᒫ ᐁᔑᓈᑾᒃ ᑫᓃᓐ ᓴ ᑾᔭᒃ ᐃᔑᓂᔕᐙᑲᓐ ᐁᑎᓄᐎᔮᓐ!
ᐌᑯᓀᓐ ᑕᔥ ᐌᒋ ᐃᓀᑕᒣᒃ ᑮᓇᐙ ᐸᑳᓐ ᐁᑮᑑᑖᑰᔦᒃ ᐊᐲᒡ ᐐᓐ ᐃᑭ ᑯᑕᒃ ᐅᑌᐺᑕᒨᒃ ᑳᐃᔑᐲᑎᑫᐙᒡ? ᐅᓵᒻ ᐃᓇ ᐁᑮᑲᑴᒋᒥᓯᓄᐎᓇᑰᒃ ᒋᐐᑑᑲᐎᔦᒃ ᑳᐅᒋ ᐃᓀᑕᒣᒃ? ᑕᑲ ᑕᔥ ᐴᓀᑕᒪᐎᔑᒃ ᑳᑮᐃᔑᒪᒫᔒᑲᑕᐎᓇᑰᒃ!
ᒦᑕᔥ ᐋᔕ ᓂᓯᕽ 3 ᐁᑮᑮᔒᑖᔮᓐ ᐁᐐᐊᑕᐙᐸᒥᓇᑰᑭᐸᓐ᙮ ᑳᐐᓐ ᑕᔥ ᐐᓐ ᑫᑰᓐ ᑭᑲᐊᑐᑕᒪᐎᓯᓅᓂᓂᒻ᙮ ᑮᓇᐙ ᐅᔕ ᑳᐊᑕᐌᓂᒥᓇᑰᒃ, ᑳᐐᓐ ᐐᓐ ᑭᑕᔨᐄᒥᐙᓐ᙮ ᐋᓃᔥ ᐊᐱᓅᒌᔕᒃ ᑳᐐᓐ ᐅᑕᔕᒫᓯᐙᐙᐞ ᐃᐃ ᐅᓃᑭᐃᑰᐙᐞ, ᐃᑭ ᓴ ᐅᓃᑭᐃᑰᒫᒃ ᐅᑕᔕᒫᐙᐞ ᐅᓃᒑᓂᓯᐙᐞ᙮
ᐋᐱᒋ ᓴ ᓂᑲᒥᓉᑖᓐ ᑲᑭᓇ ᑫᑰᓐ ᒋᐸᑭᑎᓇᒫᓐ, ᒋᐸᑭᑎᓂᑎᓱᔮᓐ ᑲᔦ ᒋᐐᒋᐃᓇᑰᒃ᙮ ᐋᓇ ᑕᔥ ᐐᑫ ᑭᑖᓇᓵᑭᐃᓂᓂᒻ ᑮᓇᐙ ᑕᔥ ᐸᑮ ᑭᓵᑭᐃᔑᒻ᙮
ᓰᔮᑫᓐ ᒫᐐᓐ ᐋᔕ ᑭᑌᐺᑖᒻ ᐁᑮᒥᑯᔥᑳᒋᐃᓯᓄᐎᓇᑰᒃ᙮ ᐊᐎᔭ ᑕᔥ ᑕᐃᑭᑐ ᐁᑮᓇᑲᒋᑲᔦᓂᓯᔮᓐ, ᑲᔦ ᐁᑲᔥᑭᒥᓇᑰᒃ ᐁᐗᔦᔑᑖᑯᓯᔮᓐ᙮
ᒦ ᓇ ᐃ ᑳᐃᔑᒋᑫᔮᓐ ᐁᑮᐗᔦᔑᒥᓇᑰᒃ, ᐁᑮᐋᐸᒋᐊᒀ ᐃᑭ ᑳᑮᐃᔑᓂᔕᐗᒀ ᐌᑎ ᑳᐃᔑᐊᔮᔦᒃ?
ᑕᐃᑕᔅ ᐅᔕ ᓂᑮᑲᓅᓈ ᒋᐃᔖᒡ ᐯᔑᒃ ᑯᑕᒃ ᐅᑕᓇᒥᐋᓐ ᒋᐱᐐᒌᐙᒡ᙮ ᒦ ᓇ ᑕᔥ ᐁᑭᑐᔦᒃ ᑕᐃᑕᔅ ᐁᑮᐗᔦᔑᒥᓀᒃ? ᐯᐸᑳᓐ ᐃᓇ ᓂᑎᓀᑖᒥᓐ, ᐯᐸᑳᓐ ᐃᓇ ᓂᑎᔑᒋᑫᒥᓐ?
ᒦ ᒫᐐᓐ ᒨᔕᒃ ᐁᓀᓂᒥᔮᕽ ᐁᑲᑴᓈᑕᒫᓱᔮᕽ᙮ ᑳᐐᓐ ᓴ ᐃᐃ ᓂᑎᔑᒋᑫᓰᒥᓐ! X ᐅᔐᑕ ᑳᐃᔑᐊᑕᐌᓂᒥᓇᑭᒡ ᒋᐃᑭᑐᐗᑭᒡ ᓂᑎᑭᑐᒥᓐ, ᑭᔐᒪᓂᑑ ᐁᓈᓴᒦᒡ᙮ ᑮᓇᐙ ᑕᔥ ᒋᐅᐱᑭᔦᒃ!
ᐋᐱᒋ ᑕᔥ ᓂᓇᓃᓵᓀᑕᒻ ᐊᐲ ᐌᑎ ᐅᑎᓯᓇᑰᒃ ᑭᒋᐸᑳᓐ ᒋᐃᔑᐊᔮᔦᒃ, ᐁᑳ ᒋᐃᔑᐊᔮᓯᐌᒃ ᑳᐃᔑᐊᑕᐌᓂᒥᓇᑰᒃ, ᑫᓃᓐ ᑕᔥ ᑭᒋᐸᑳᓐ ᒋᐃᔑᐊᔮᔮᓐ ᐊᐲ ᐙᐸᒥᔦᒃ᙮ ᒦᑕᔥ ᑲᔦ ᐁᔑᓇᓃᓵᓀᑕᒫᓐ ᒋᒥᑲᒫᓐ ᑮᑳᑎᐎᓐ, ᐊᔮᔐᓂᑎᐎᓐ, ᐗᑫᐎᑭᑖᓱᐎᓐ, ᑲᑴᓃᑳᓀᓂᑎᓱᐎᓐ, ᐊᓅᒋᑯ ᐃᑎᐎᓐ, ᑕᔑᑎᐎᓐ, ᑭᒋ ᐃᓀᓂᑎᓱᐎᓐ, ᑫᑰᓐ ᑲᔦ ᓭᓯᒃ ᐁᐃᔑᓭᓯᓄᒃ᙮
ᒦᑕᔥ ᐁᔑᓭᑭᓯᔮᓐ ᒦᓇᐙ ᐊᐲ ᐅᑎᓯᓇᑰᒃ, ᑭᔐᒪᓂᑑ ᒋᐃᔑᐃᒡ ᒋᐊᑳᓯᓈᑯᓯᐗᒃ ᐃᐃᒫ ᐁᓈᓴᒦᔦᒃ, ᒦ ᐃ ᑫᐅᒋᒪᐎᔮᓐ ᐃᑭ ᓃᐱᐗᐞ ᑳᑮᒪᒋᑑᑕᒧᐙᒡ ᐅᑖᓈᕽ, ᒪᔑ ᑕᔥ ᑲᔦ ᐁᐌᐱᓇᓯᒀ ᐃᓂ ᑳᐐᓀᑖᑾᓂᓂᑭᓐ ᐅᑎᔑᒋᑫᐎᓂᐙᓐ, ᑲᔦ ᐁᑮᐱᔑᒀᑎᓯᐙᒡ, ᑳᐐᓐ ᑲᔦ ᑮᒪᓈᐃᔑᒋᑫᓰᐗᒃ ᑫᑮᐃᔑᒋᑫᓯᑭᐸᓐ᙮

213

ᒦᑕᔥ ᐅᐅ ᓂᓯᕽ 3 ᐋᔕ ᐁᐃᔑᓭᒃ ᐁᐐᐱᐊᑕᐙᐸᒥᓇᑰᒃ᙮ ᑭᒋᒪᓯᓇᐃᑲᓐ ᓴ ᐁᐃᔑᐲᐃᑳᑌᒃ: ᑮᔥᐱᓐ ᓃᔑᐙᒡ 2 ᑯᒫ ᑲᔦ ᓂᓯᐙᒡ 3 ᐊᐎᔭᒃ ᒦ ᓴ ᒋᑌᐺᑕᐎᑣ ᑎᐹᑐᑕᒧᐙᒡ ᑳᑮᐙᐸᑕᒧᐙᒡ᙮
ᑭᐐᑕᒪᐎᓂᓂᒻ ᑕᔥ ᑮᓇᐙ ᑳᑮᒪᒋᑑᑕᒣᒃ, ᐃᑭ ᑲᔦ ᑯᑕᒃ ᑳᑮᒪᒋᑑᑕᒧᐙᒡ ᐅᑖᓈᕽ᙮ ᒥᓴᐙ ᑯ ᐌᑎ ᐊᔮᓯᐙᓐ ᑳᐃᔑᐊᔮᔦᒃ, ᒦ ᓴ ᒦᓇᐙ ᐯᔑᑾᓐ ᐁᓂᓇᑰᒃ ᑳᑮᐃᓂᓇᑰᑭᐸᓐ ᐃᔥᒀᒡ ᐌᑎ ᑮᐊᔮᔮᓐ᙮ ᐊᐲ ᓴ ᐌᑎ ᑕᑯᔑᓈᓐ, ᑳᐐᓐ ᓴ ᑕᔖᐾᓰᐗᒃ ᐃᑭ ᑳᐐᑭᒋᓅᒋᐊᒀ᙮
ᑲᑭᓇ ᓴ ᑫᑰᓐ ᑭᓇᑕᐙᐸᑖᒻ ᑫᐅᒋᑭᑫᑕᒣᒃ X ᐁᐋᐸᒋᐃᒡ ᑫᑰᓂᓂ ᑮᐐᐃᑭᑐᒡ᙮ ᐊᐲ ᑕᔥ ᑲᓅᓂᓀᒃ ᑭᑲᐙᐸᒫᐙ ᓴ ᐁᒪᔥᑲᐎᓰᒡ, ᐋᓃᔥ ᑳᐐᓐ ᒪᒌᐗᑮᓰ᙮
ᑫᒋᓈᒡ ᓴ ᑖᐱᔥᑰ ᐁᒪᒌᐗᑮᒡ ᑮᐃᔑᓈᑯᓯ ᐊᐲ X ᑮᐊᑯᓴᑲᐅᓐᒡ ᐃᐃᒫ ᐋᔑᑌᔮᑎᑯᕽ᙮ ᓅᑯᒻ ᑕᔥ ᑭᔐᒪᓂᑑᓐ ᐅᒪᔥᑲᐎᓰᐎᓂᓃᕽ ᐃᔑᐱᒫᑎᓯ᙮ ᑫᓃᓇᐎᓐᑦ ᓴ ᐁᐐᒌᐗᑭᒡ X ᒦ ᓴ ᐯᔑᑾᓐ ᐁᔑᓈᑯᓯᔮᕽ ᐁᒪᒌᐗᑮᔮᕽ᙮ ᐃᐃᒫ ᑕᔥ ᐐᓐ ᑭᔐᒪᓂᑑ ᐅᒪᔥᑲᐎᓰᐎᓂᕽ ᓂᑲᐃᔑᐐᒋᐱᒫᑎᓰᒫᓈᓐ X, ᐊᐲ ᐐᒌᐎᑰᔦᒃ᙮
ᑕᑲ ᐊᑕᑭᑫᓂᑎᓱᒃ, ᑲᓇᐙᐸᑎᓱᒃ ᑲᔦ ᑌᐺᔦᑕᒧᐎᓂᕽ ᒋᐃᔑᐱᒫᑎᓯᔦᒃ᙮ ᑭᑭᑫᑖᒻ ᒫᐐᓐ ᓯᔮᑫᓐ ᒋᓴᔅ X ᐁᑭᑭᔥᑲᐌᒃ᙮ ᑯᒫ ᑲᔦ ᐋᔕ ᑳᐸᑆᓇᐎᒋᑫᐌᑯᐸᓀᓐ᙮
ᒦᑕᔥ ᐁᔑᑫᒋᓈᐅᔮᓐ ᒋᑭᑫᓂᒥᔮᕽ ᑫᓃᓇᐎᓐᑦ ᐁᑮᑆᓇᐎᒋᑫᓯᐙᕽ ᒋᒥᓍᐸᒥᑰᔮᕽ᙮
ᒦᑕᔥ ᐁᔑᐊᓇᒥᐁᑕᐗᑭᒡ ᑭᔐᒪᓂᑑ ᑮᓇᐙ ᐁᑳ ᓅᒋᑯ ᒋᐃᔑᒋᑫᓯᐌᒃ᙮ ᑳᐐᓐ ᐐᓐ ᐁᐊᑕᐌᑕᒫᕽ ᓂᑕᓄᑮᐎᓂᓈᓐ ᒋᒥᓄᓈᑾᒃ᙮ ᑮᓇᐙ ᓴ ᐌᐌᓂ ᒋᐱᒫᑎᓯᔦᒃ, ᐋᓇ ᒫᐐᓐ ᐃᔑᓈᑯᓯᔮᕽ ᓃᓇᐎᓐᑦ ᐁᑮᑆᓇᐎᒋᑫᔮᕽ᙮
ᑳᐐᓐ ᐋᓃᔥ ᑫᑰᓐ ᓂᑖᑑᑕᓰᒥᓐ ᒋᑭᐱᑎᓇᒫᕽ ᐃᐃ ᑌᐺᐎᓐ, ᒦ ᐁᑕ ᑯ ᐁᔑᒋᑫᔮᕽ ᐁᐐᒋᑑᔮᕽ ᒋᒫᒌᔥᑳᒃ᙮
ᓂᒥᓉᑖᒥᓐ ᑲᔦ ᓃᓇᐎᓐᑦ ᐁᐃᔑᓈᑯᓯᔮᕽ ᐁᒪᔥᑲᐎᓰᓯᐙᕽ, ᑮᓇᐙ ᑕᔥ ᐁᒪᔥᑲᐎᓰᔦᒃ᙮ ᒦ ᑲᔦ ᐁᔑᐊᓇᒥᐁᑕᒫᑰᔦᒃ ᒥᓯᐌ ᑾᔭᒃ ᒋᓂ ᐃᔑᓈᑯᓯᔦᒃ᙮
ᒦᑕᔥ ᑳᐅᒋᐅᔑᐲᐊᒪᐎᓇᑰᒃ ᒣᒀ ᐙᓴ ᐁᐊᔮᔮᓐ᙮ ᑳᐐᓐ ᓴ ᓂᑎᓀᑕᓰ ᒋᑭᒋᓅᒋᐃᓇᑰᒃ ᒋᑮᐋᐸᒋᑖᐗᑭᐸᓐ ᑭᔐᒪᓂᑑ ᐅᑲᔥᑭᐁᐎᓯᐎᓂᓂ ᑳᑮᒦᔑᒡ᙮ ᒦ ᐃ ᐋᓃᔥ ᑳᑮᐅᒋᒦᓂᑰᔮᕽ ᑮᓇᐙ ᒋᐐᒋᐃᑰᔦᒃ, ᒋᐅᐱᑭᔦᒃ ᑲᔦ, ᑳᐐᓐ ᐐᓐ ᒋᐲᑯᐱᓂᑰᔦᒃ᙮
ᐴᔔ ᑕᔥ ᑭᑎᓂᓂᓂᒻ ᓃᒋᑌᐺᑕᒨᒃ! ᐐᑫ ᓴ ᑾᔭᒃ ᑲᑴᑾᔭᒀᑎᓯᒃ! ᐱᓯᑕᒧᒃ ᑳᐃᑭᑐᔮᓐ᙮ ᐌᐌᓂ ᑲᔦ ᐱᓯᑖᑎᒃ ᐋᓃᓐ ᐁᑭᑐᔦᒃ᙮ ᐌᐌᓂ ᑲᔦ ᐐᒌᑎᒃ᙮ ᑭᔐᒪᓂᑑ ᓴ ᑳᓵᑭᐃᐌᒡ, ᑳᒦᑭᐌᒡ ᑲᔦ ᐱᓵᓂᓯᐎᓐ ᑭᑲᐐᒌᐎᑯᐙ!
ᐅᑌᐺᑕᒨᒃ ᐊᓇᒥᐁ ᐅᒌᒥᑯᒃ ᑳᐴᔔᐁᒀ, ᒦ ᓇᑫ ᐃᔑᐴᔔᐃᑎᒃ᙮ ᑲᑭᓇ ᓴ ᑭᔐᒪᓂᑑ ᐅᒥᓍᑎᓰᒪᐞ ᑭᐴᔔᐃᑯᐙᒃ᙮
ᑳᑎᐯᒋᑫᒡ ᒋᓴᔅ X ᐅᑭᔐᐙᑎᓯᐎᓐ, ᑭᔐᒪᓂᑑ ᑲᔦ ᐅᓵᑭᐃᐌᐎᓐ, ᑭᔐᒪᓂᑑ ᐅᑕᒑᑾᓐ ᑲᔦ ᐅᒥᓄᐐᒌᐎᐌᐎᓂᓂ ᑭᑲᐐᒌᐎᑯᒻ ᑲᑭᓇ ᑳᑕᔑᔦᒃ᙮
License
CC-0
Link to license
Citation Suggestion for this Edition
TextGrid Repository (2025). Paul the Apostle. 2 Corinthians (Ojibwa). Multilingual Parallel Bible Corpus. https://hdl.handle.net/21.11113/0000-0016-AF3F-E