ᓃᓐ ᑆᓬ ᐅᐅ ᓂᑑᔑᐲᐃᑲᓐ, ᓃᓐ ᑳᐅᓈᐸᒥᒡ ᑭᔐᒪᓂᑑ ᐁᐃᓀᑕᕽ ᒋᐅᐸᐹᒥᓯᐎᓂᔮᓐ X ᒋᓴᔅ ᒋᐅᑎᔑᓂᔕᐙᑲᓂᒥᒡ᙮ ᐊᐊ ᑕᔥ ᑭᐐᒋᐅᑌᐺᑕᒨᒥᓈᓐ ᓵᔅᑎᓃᔅ ᑳᐐᒌᐗᒃ᙮

ᑭᑑᔑᐲᐊᒫᑰᒻ ᑮᓇᐙ ᐅᑕᓇᒥᐋᒃ ᐃᐃᒫ ᒀᕒᐃᑎᕽ ᑳᐊᔮᔦᒃ, ᑭᔐᒪᓂᑑ ᑳᑎᐯᓂᒥᓀᒃ ᑳᒫᐗᒋᐊᓇᒥᐋᔦᒃ᙮ ᑮᓇᐙ ᑳᐊᑐᒥᓀᒃ ᑭᔐᒪᓂᑑ ᐅᑾᔭᒀᑎᓰᒪᐞ ᒋᑎᓄᐎᔦᒃ, ᐐᓐ ᐁᑮᐅᓇᓯᓀᒃ ᒋᐃᔑᑎᐯᓂᒥᓀᒃ, ᐁᐐᒌᐎᒣᒃ X ᒋᓴᓲᓐ᙮ ᑕᑯ ᑲᔦ ᑲᑭᓇ ᓂᑑᔑᐲᐊᒪᐙᓈᓂᒃ ᐸᑳᓐ ᑳᑕᓇᑮᐙᒡ ᑳᐊᓇᒥᐁᑕᐙᐙᒡ X ᒋᓴᓲᓐ ᑳᑎᐯᓂᒥᓇᕽ᙮ ᒦ ᐊᐌ ᑲᑭᓇ ᐯᔑᑾᓐ ᑳᔑᑎᐯᓂᒥᓇᕽ᙮ ᑲᑭᓇ ᐅᐅ ᑳᑎᓄᐎᔦᒃ ᑭᑑᔑᐲᐊᒫᑰᒻ᙮

ᒫᓄ ᑭᑲᔕᐌᓂᒥᑯᐙ, ᑭᑲᒪᒥᓄᓭᐃᑯᐙ ᑭᔐᒪᓂᑑ ᑰᓯᓈᓐ ᑲᔦ ᑳᑎᐯᒋᑫᒡ ᒋᓴᔅ X᙮

ᒨᔕᒃ ᓂᑑᒋᓇᓈᑯᒫ ᓂᑭᔐᒪᓂᑑᒻ ᑮᓇᐙ ᐌᑎ ᐁᔮᔦᒃ ᐁᑮᐅᒌᑕᒪᐎᓀᒃ ᐅᔕᐌᒋᑫᐎᓐ ᐁᐅᒋᒦᓂᑯᐎᓯᔦᒃ X ᒋᓴᔅ ᐅᒋ᙮

ᐐᓐ ᐃᑯ ᐁᐐᒌᐎᓀᒃ ᑭᑮᐌᓅᒋᐃᑯᐙ ᒥᓯᐌ ᑭᐱᒫᑎᓯᐎᓂᐙᕽ ᑕᑯ ᑲᔦ ᑲᑭᓇ ᑭᑎᔑᑮᑭᑐᐎᓂᐙᕽ ᑲᔦ ᑲᑭᓇ ᑭᑭᑫᑕᒧᐎᓂᐙᕽ᙮

ᐁᑮᐊᐲᒋᐋᔩᑌᑕᒣᒃ X ᐅᑎᓈᒋᒥᑰᐎᓐ,

ᑳᐐᓐ ᐊᐙᒡ ᐸᑮ ᑭᑮᓅᑌᓭᓰᒻ ᑭᔕᐌᓂᒥᑰᐎᓂᐙ ᒋᒦᓂᑰᐎᓯᔦᒃ, ᐁᐲᐁᒃ ᒋᓴᔅ X ᒋᐱᓈᑯᓯᒡ ᐌᑎ ᐃᔥᐱᒥᕽ᙮

ᐐᓐ ᑭᑲᐋᔩᒋᐃᑯᐙ ᒋᒪᔥᑲᐎᓰᔦᒃ ᐲᓂᔥ ᐃᑯ ᒋᐌᒀᐊᔮᒃ, ᒦ ᓴ ᐃᐌ ᐁᑳ ᑫᑰᓐ ᒋᐃᔑᐊᓈᒣᑖᑯᓯᓯᐌᒃ ᐊᐲ ᐅᑮᔑᑳᒥᒡ ᐊᐊ ᑳᑎᐯᓂᒥᓇᕽ ᒋᓴᔅ X᙮

ᑌᐺᔦᑖᑯᓯ ᓴ ᐊᐌ ᑭᔐᒪᓂᑑ, ᒦ ᐊᐌ ᑳᑮᐊᑐᒥᓀᒃ ᒋᐐᒌᐎᒣᒃ ᐃᓂ ᐅᑯᓯᓴᓐ ᒋᓴᔅ Xᑕᓐ, ᒦᐗᓂᓂ ᑳᑎᐯᓂᒥᒥᓇᕽ᙮

ᓃᒋᐅᑌᐺᑕᒨᒃ! ᑭᑎᔑᑲᓅᓂᓂᓂᒻ ᐅᐐᓱᐎᓂᕽ ᑳᑎᐯᓂᒥᓇᕽ ᒋᓴᔅ X᙮ ᑭᐸᑯᓭᓂᒥᓂᓂᒻ, ᐯᔑᑾᓐ ᑲᑭᓇ ᒋᐃᑭᑐᔦᒃ, ᐁᑳ ᑫᑰᓐ ᐸᑫᐎᓂᑎᐎᓐ ᒋᐊᔮᒪᑲᓯᓄᒃ ᐃᐃᒫ ᐁᔑᐊᔮᔦᒃ, ᑾᔭᒃ ᓴ ᑯ ᒋᓈᐱᓭᒃ ᑭᐐᒋᐃᑎᐎᓂᐙ, ᐯᔑᑾᓐ ᒋᐃᓀᑕᒣᒃ, ᐯᔑᑾᓐ ᑲᔦ ᒋᑲᑴᐃᔑᒋᑫᔦᒃ᙮

ᐋᓃᔥ, ᓃᒋᐅᑌᐺᑕᒨᒃ, ᑫᑰᓐ ᓂᐱᐐᑕᒫᑰᒃ ᐋᓂᓐᑦ ᐌᑎ ᐯᒥᐅᒋ ᐃᔖᐙᒡ ᑲᓬᐆᐎ ᐅᐙᑳᐃᑲᓂᕽ᙮ ᑾᔭᒃ ᐃᑯ ᓂᐐᑕᒫᑰᒃ, ᐋᓍᐸᑎᐎᓐ ᑮᓇᐙ ᐃᐃᒫ ᐁᐊᔮᒪᑲᒃ, ᐃᑭᑐᐗᒃ᙮

ᒦ ᐅᐌ ᑳᐃᑕᒫᓐ: ᑳᑕᓱᐯᔑᑯᔦᒃ ᐯᐸᑳᓐ ᐁᐃᔑᐐᑕᒧᐙᒡ ᐁᔑᐱᒥᓂᔕᐃᑫᐙᒡ᙮ ᐯᔑᒃ ᐃᑭᑐ: ᓃᓐ ᐅᑭᑭᓄᐊᒪᐙᑲᓐ ᐊᐊ ᑆᓬ ᙮ ᑲᔦ ᐯᔑᒃ, ᓃᓐ ᐊᑆᓬᐊᔅ ᐅᑭᑭᓄᐊᒪᐙᑲᓇᓐ, ᐃᔑᐐᓂᑎᓱ᙮ ᐯᔑᒃ ᑲᔦ, ᓃᓐ ᐲᑕᕒ ᐅᑭᑭᓄᐊᒪᐙᑲᓇᓐ, ᐃᑭᑐ᙮ ᐯᔑᒃ ᐃᑕᔥ ᑲᔦ ᐃᑭᑐ: ᓃᓐ X ᐁᑕ ᓂᐱᒥᓂᔕᐙ᙮

ᓇ! ᑕᐸᐲᑭᔑᐱᓈ ᓇ ᐊ X, ᐯᐸᑳᓐ ᒋᐊᔫᑴᓄᐃᓐᒡ? ᑆᓬ ᐃᓇ ᐊ ᑳᑮᓂᐳᑕᒪᐎᓀᒃ ᐋᔑᑌᔮᑎᑯᕽ? ᑭᑮᐃᔑᓰᑲᐊᑖᑰᒻ ᐃᓇ ᒋᐊᐱᐐᓂᓐᒡ ᑆᓬ ᒋᐅᒋᐅᑭᑭᓄᐊᒪᐙᑲᓂᒥᓀᒃ? ᑳᐐᓐ ᐄᑐᒃ!

ᓂᓇᓈᑯᒫ ᑭᔐᒪᓂᑑ ᐁᑳ ᐁᑮᓰᑲᐊᑕᐙᓯᐗᒃ ᐊᐎᔭ ᑳᑕᔑᔦᒃ, ᒦ ᐁᑕ ᐅᑯ ᑲᕒᐃᔅᐸᔅ, ᑫᔭᔅ ᑲᔦ᙮

ᑫᑯ ᐐᓐ ᐊᐎᔭ ᓂᑲᐃᑯᓰ ᓃᓐ ᓂᑎᔑᓂᑳᓱᐎᓂᕽ ᐁᑮᓰᑲᐊᑖᑰᔦᒃ ᒋᐅᑭᑭᓄᐊᒪᐙᑲᓂᒥᓇᑰᒃ᙮

ᐊᐊᐌ ᑕᔥ ᑲᔦ ᓂᑮᓰᑲᐊᑕᐙ ᐃᔅᑌᐸᓇᔅ ᑲᔦ ᐃᓂᐌᓂᐗᐞ ᐅᐙᑳᐃᑲᓂᕽ ᑳᔑᑖᓂᒡ᙮ ᑳᐐᓐ ᒦᓇᐙ ᓂᒫᒥᑲᐎᓰ ᑯᑕᒃ ᐊᐎᔭ ᐃᐃᒫ ᒋᑮᓰᑲᐊᑕᐙᐗᑭᐸᓀᓐ᙮

ᑳᐐᓐ ᐐᓐ ᒋᐸᐹᒥᓰᑲᐊᑖᑫᔮᓐ ᓂᑮᐱᐅᒋ ᐃᔑᓂᔕᐅᑯᓰ ᐊ X, ᐃᐃᔥ ᐐᓐ ᒥᓍᒋᒧᐎᓐ ᒋᐐᑕᒫᑫᔮᓐ, ᒦ ᒪᔮ ᐁᓇᓅᔑᒡ᙮ ᑳᐐᓐ ᐐᓐ ᓂᑮᑲᑴᐃᓂᑖᑯᓯᓰ ᐁᐅᑭᑫᑖᓱᐎᓂᔮᓐ, ᐋᓃᔥ ᑳᐐᓐ ᓂᑮᐊᑕᐌᑕᓰᓐ ᒋᑭᐱᔥᑲᒧᐗᒃ X ᐅᓂᐳᑕᒫᑫᐎᓐ ᐋᔑᑌᔮᑎᑯᕽ ᑳᔑᒪᔥᑲᐎᓰᒪᑲᓂᓂᒃ ᒋᐊᓄᑮᒪᑲᓯᓂᓂᒃ᙮

ᐃᐃᐌ ᐋᓃᔥ ᑳᐃᓈᒋᒥᓐᒡ X ᐁᑮᓂᐳᒡ ᐋᔑᑌᔮᑎᑯᕽ, ᐅᐅᐌ ᐅᑎᓂᑖᓈᐙ ᐃᑭᐌᓂᐗᒃ ᑳᓂᐗᓂᔑᓄᐙᒡ, ᑖᐱᔥᑰ ᐁᑲᑮᐹᑕᓂᓂᒃ᙮ ᑮᓇᐎᓐᑦ ᐃᑕᔥ ᐐᓐ ᑳᓂᐱᒫᒋᐃᑰᔭᕽ, ᒦ ᐃᒫ ᑎᐹᒋᒧᐎᓂᕽ ᐁᐊᑌᓂᒃ ᐅᒪᔥᑲᐎᓰᐎᓐ ᑭᔐᒪᓂᑑ᙮

ᐃᔑᐲᐃᑳᑌ ᐋᓃᔥ ᐃᐃ ᑭᒋᒪᓯᓇᐃᑲᓐ: ᐊᐊ ᑳᑲᑮᑖᐎᓯᒡ ᓂᑲᓂᔑᐗᓈᒋᑖᐙᓐ ᐅᑲᑮᑖᐎᓯᐎᓐ, ᐊᐊ ᑕᔥ ᑳᐅᑲᑮᑖᐌᑕᒧᐎᓂᒡ ᓂᑲ ᐸᑳᓐ ᐊᑖᐙᓐ ᐅᑭᑫᑖᓱᐎᓐ, ᐃᑭᑐ ᑭᔐᒪᓂᑑ᙮

ᐋᓃᓐ ᑲᔦ ᐃᑭ ᐙᐃᓍᓱᐙᒡ ᑳᑲᑮᑖᐎᓯᐙᒡ, ᑲᔦ ᐃᑭ ᓂᔮᑲᒋᑑᐙᒡ ᒪᓯᓇᐃᑲᓇᓐ, ᑲᔦ ᐃᑭᐌᓂᐗᒃ ᐅᐅᒫ ᐊᑮᕽ ᑳᑲᑮᑖᐎᑖᑯᓯᐙᒡ? ᐋᓇᑮᑲᑮᑖᐎᓯᐙᒡ ᐃᑭ ᓅᑯᒻ ᐯᒫᑎᓯᐙᒡ ᐊᑮᕽ, ᑭᔐᒪᓂᑑ ᐅᑎᓇᑭᑖᓐ ᐁᑲᑮᐹᑕᓂᓂᒃ ᐅᑲᑮᑖᐎᓯᐎᓂᓂ᙮

ᐐᓐ ᐋᓃᔥ ᑭᔐᒪᓂᑑ ᒫᐗᒡ ᐁᑲᑮᑖᐌᑕᕽ, ᑳᐐᓐ ᐅᑮᐸᑭᑎᓈᓰᐞ ᐅᐅ ᐯᒫᑎᓯᓂᒡ ᐐᓇᐙ ᑯ ᐅᑲᑮᑖᐎᓯᐎᓂᐙᕽ ᒋᐅᒋᑭᑫᓂᒥᑯᐸᓐ᙮ ᑮᐃᓀᑕᒻ ᐃᑕᔥ ᐁᐐᐱᒫᒋᐋᒡ ᐃᐃ ᑫᑌᐺᑕᒥᓂᒡ᙮ ᐅᑮᐋᐸᒋᑑᓐ ᐅᐅ ᑎᐹᒋᒧᐎᓐ ᑳᐐᑕᒫᑫᔮᕽ, ᐃᐃ ᑯ ᐁᐃᓀᑕᒧᐙᒡ ᐁᑲᑮᐹᑕᓂᓂᒃ ᐅᐅᒫ ᐊᑮᕽ᙮

ᒎᐗᒃ ᐋᓃᔥ ᐅᐐᐙᐸᑖᓈᐙ ᒫᒪᑳᒋᒋᑫᐎᓇᓐ, ᒦ ᐸᔦᔥ ᒋᑌᐸᑫᑕᒧᐙᒡ᙮ ᐃᑭᔥ ᑲᔦ ᑲᕒᐄᑲᒃ ᐅᓇᑐᓀᐋᓈᐙ ᒥᓂᒃ ᓴ ᑯ ᑳᑲᑮᑖᐗᓂᓂᒃ᙮

ᓃᓇᐎᓐᑦ ᐃᑕᔥ ᑳᐐᑕᒫᑫᔮᕽ, ᓂᑕᔑᒫᓈᓐ ᐊᐊ X ᑳᑮᐃᔑ ᐊᑯᓴᑲᐃᑲᓂᐎᒡ ᐋᔑᑌᔮᑎᑯᕽ᙮ ᐅᐅᐌ ᑕᔥ ᐁᑕᔑᑌᒃ ᐅᔒᑭᑖᓈᐙ ᐃᑭ ᒎᐗᒃ, ᐅᑯ ᑕᔥ ᑲᔦ ᑳᒎᐎᐎᓯᒀ ᐅᑲᑮᐹᓯᑖᓈᐙ᙮

ᐃᑭ ᑕᔥ ᑭᔐᒪᓂᑑᓐ ᑳᐊᑐᒥᑯᐙᒡ, ᑫᒫ ᒎᐎᐙᒡ ᑫᒫ ᑲᕒᐄᑭᐎᐙᒡ, ᐅᓂᓯᑐᑖᓈᐙ X ᐐᓐ ᑭᔐᒪᓂᑑᓐ ᐁᐅᒪᔥᑲᐎᓰᒥᒥᑯᒡ, ᑲᔦ ᑭᔐᒪᓂᑑᓐ ᐁᐅᑲᑮᑖᐌᑕᒧᐎᓂᑯᒡ᙮

ᐃᓇᔥᑫ ᑭᔐᒪᓂᑑᓈᕽ ᐋᓇᐃᔑᓈᑾᑭᐸᓐ ᑫᑰᓐ ᒋᑲᑮᐸᑕᒃ, ᐊᐗᔑᒣ ᑖᑲᑮᑖᐗᓐ ᐊᐲᒡ ᐃᓂᓃᓈᕽ ᑳᐊᔮᒪᑲᒃ᙮ ᐃᐃᐌᔥ ᐁᓃᓇᒪᒃ ᐋᓇᐃᔑᓈᑾᒃ ᑫᑰᓐ ᑭᔐᒪᓂᑑᓈᕽ, ᐊᐗᔑᒣ ᒪᔥᑲᐎᓰᒪᑲᓐ ᐊᐲᒡ ᐃᓂᓃᓈᕽ ᑫᔑᒪᔥᑲᐎᓰᒪᑲᒃ ᑫᑰᓐ᙮

ᓃᒋᐅᑌᐺᑕᒨᒃ! ᒫᒥᑲᐎᔪᒃ ᐋᓃᓐ ᑳᑮᐃᓈᑎᓯᔦᒃ ᐃᐃ ᐊᐲ ᐁᐊᑐᒥᓀᒃ ᑭᔐᒪᓂᑑ᙮ ᑳᐐᓐ ᑭᑮᐹᑏᓄᓰᒻ ᑳᑲᑮᑖᐎᓯᔦᒃ ᐅᐅᒫ ᐊᑮᕽ ᐊᐎᔭᒃ ᑳᐃᔑᓈᑯᓯᐙᒡ, ᑳᐐᓐ ᑲᔦ ᐃᐃᐌ ᑭᑮᐃᔑᐅᑭᒫᐌᑖᑯᓯᓰᒻ, ᑳᐐᓐ ᑲᔦ ᓃᐱᐗᐞ ᐃᐃᐌ ᓇᑫ ᑭᑮᐃᔑᑭᒋ ᐃᓀᑖᑯᓯᓰᒻ᙮

ᐅᐅᒫ ᑕᔥ ᐊᐎᔭᒃ ᐊᑮᕽ ᑳᐃᓀᑕᒧᐙᒡ ᑲᑮᐹᑕᓐ ᑲᔦ ᓃᓇᒪᓐ, ᒦ ᐅᐌᓂ ᑭᔐᒪᓂᑑ ᑳᑮᐅᓈᐸᑕᕽ ᒋᐅᒋᑕᐸᓯᓈᒡ ᐅᐅ ᑳᑲᑮᑖᐎᓯᓂᒡ ᑲᔦ ᑳᒪᔥᑲᐙᑎᓯᓂᒡ᙮

ᑲᔦ ᐃᓂᐌᓂᐗᓐ ᐊᑮᕽ ᑳᑕᐸᓭᑖᑾᑭᓐ ᑲᔦ ᑳᐋᓍᐸᒋᑳᑌᑭᓐ, ᑲᔦ ᑫᑰᓇᓐ ᑳᐊᔮᒪᑲᓯᓄᑭᓐ, ᑭᔐᒪᓂᑑ ᐅᑮᑲᑮᑭᓈᓇᓐ, ᒋᐴᓂᓭᓂᒃ ᐃᑕᔥ ᐌᑯᓀᓐ ᓴ ᑯ ᐊᑮᕽ ᑳᔑᑭᒋ ᐃᓀᑖᑾᓂᓂᒃ᙮

ᒦ ᐅᐌ ᑳᐅᒋᑑᑕᕽ ᐁᑳ ᐊᐎᔭᓐ ᐯᒫᑎᓯᓂᒡ ᒋᒫᒦᒀᓂᑎᓱᓯᓂᒃ ᐃᒫ ᑭᔐᒪᓂᑑ ᐁᓈᓴᒦᒡ᙮

ᒦ ᐊᐌ ᑭᔐᒪᓂᑑ ᑳᐃᔑᒋᑫᐃᓀᒃ ᒋᒫᒌᐐᒌᐌᒃ X ᒋᓴᔅ᙮ ᐅᑮᐃᔑᐋᓐ Xᑕᓐ ᒦ ᐃᒫ ᒋᐊᔮᒪᑲᒃ ᑭᑲᑮᑖᐎᓯᐎᓂᓈᓐ᙮ ᒦ ᐊᐌ X ᐁᔑᒋᑫᐃᓇᕽ ᒋᑾᔭᑾᑭᒥᓇᕽ ᑭᔐᒪᓂᑑ, ᐐᓐ ᐅᑾᔭᒀᑎᓰᒪᐞ ᒋᑎᓄᐎᔭᕽ, ᑲᔦ ᒦ ᐊᐌ X ᑳᑮᐸᑭᑎᓂᓇᕽ ᐃᐃᒫ ᑳᑮᑭᒋᐎᓂᑯᔭᕽ ᒪᒋᑑᑕᒧᐎᓐ᙮

ᒦ ᐋᓃᔥ ᐅᐅ ᐁᑭᑑᒪᑲᒃ ᑭᒋᒪᓯᓇᐃᑲᓐ: ᐊᐌᓀᓐ ᓴ ᑯ ᑫᑭᒋ ᐃᓀᑕᕽ ᑫᑰᓐ, ᐅᑲᑭᒋ ᐃᓀᑖᓐ ᐁᑕ ᑳᑑᑕᒥᓂᒡ ᑳᑎᐯᒋᑫᓂᒡ᙮

ᓃᒋᐅᑌᐺᑕᒨᒃ! ᐊᐲ ᑳᐱᒥᐅᑎᓯᓇᑰᒃ, ᑭᑮᐱᐐᑕᒪᐎᓂᓂᒻ ᐃᐃᐌ ᑳᑎᐹᑐᑌᓂᒃ ᑭᔐᒪᓂᑑ ᐅᑎᔑᒋᑫᐎᓐ᙮ ᑳᐐᓐ ᐃ ᐊᐲ ᓂᑮᑲᑴᐋᐸᒋᑑᓰᓇᓐ ᐁᑲᑳᓍᑭᓐ ᐃᑭᑐᐎᓇᓐ ᑖᐱᔥᑰ ᐁᑭᑭᓯᔮᓐ ᑭᒋᑭᑫᑖᓱᐎᓐ᙮

ᐋᓃᔥ ᓂᑮᐅᓀᑖᓐ ᑲᑭᓇ ᑫᑰᓐ ᒋᐗᓃᑫᓄᑕᒫᓐ ᒣᒀ ᐁᐐᒋᑖᒥᓇᑰᒃ, ᒦ ᐁᑕ ᐅᐌ ᒋᐐᑕᒫᑫᔮᓐ ᒋᓴᔅ ᐁᓈᒋᒥᓐᒡ, ᒣᒥᑕᑫ ᑳᔑᓂᐳᒡ ᐋᔑᑌᔮᑎᑯᕽ᙮

ᐊᐲ ᑕᔥ ᐁᐅᑎᓯᓇᑰᒃ, ᓂᑮᓃᓇᒥᔅ, ᓂᑮᑭᒋᓂᓂᑭᔥᑳ ᐁᐲᒋᓭᑭᓯᔮᓐ᙮

ᐊᐲ ᑕᔥ ᐁᑲᑭᑐᔮᓐ, ᐁᑲᑮᑴᔮᓐ ᑲᔦ, ᑳᐐᓐ ᓂᑮᑲᑴ ᐃᓂᑖᑯᓯᓰ ᒋᑭᒋᑭᑫᑕᒫᓐ ᑫᑰᓐ ᒋᐅᒋᑲᔥᑭᒪᒀ ᐊᐎᔭᒃ᙮ ᐃᐃᒫ ᑕᔥ ᓂᑲᑮᑴᐎᓂᕽ ᑮᐙᐸᒋᑳᑌ ᐁᑌᐊᐲᒌᓂᒡ ᑭᔐᒪᓂᑑ ᐅᑕᒑᑾᓐ᙮

ᒦ ᐅᐌ ᐌᒋ ᐃᔑᒋᑫᔮᓐ, ᐁᑳ ᐐᓐ ᒋᐅᑎᓇᓯᐌᒃ ᑭᑌᐺᑕᒧᐎᓂᐙ ᐅᒋ ᐊᐎᔭ ᐃᓂᓂ ᐅᑭᑫᑖᓱᐎᓂᕽ, ᐃᐃᒫᔥ ᐐᓐ ᒪᔮ ᐅᒪᔥᑲᐎᓰᐎᓂᕽ ᑭᔐᒪᓂᑑ᙮

ᑌᐺ ᓴ ᑯ ᑲᑮᑖᐎᓯᐎᓐ ᓂᑎᔑᑲᑮᑭᒫᓈᓂᒃ ᐃᑭ ᐊᓇᒥᐁᐙᑎᓯᐎᓂᕽ ᑳᒪᔥᑲᐎᑭᐙᒡ, ᐅᐅ ᑕᔥ ᑲᑮᑖᐎᓯᐎᓐ ᑳᐐᓐ ᐃᒫ ᐅᒌᒪᑲᓯᓅᓐ ᐅᐅᒫ ᓅᑯᒻ ᐊᑮᕽ, ᑳᐐᓐ ᑲᔦ ᐅᒋᑎᐯᑖᑾᓯᓅᓐ ᐃᑭ ᑳᓃᑳᓂᓰᑲᑕᒧᐙᒡ ᐅᐅ ᐊᑭ᙮ ᐋᓇᐐᓐ ᐁᒪᔥᑲᐎᓰᐙᒡ, ᑳᐐᓐ ᑕᓂᐊᔮᓰᐗᒃ᙮

ᐃᐃᐌ ᑕᔥ ᓂᑲᑮᑴᓄᑖᓐ ᐃᐃ ᑭᔐᒪᓂᑑ ᐅᑲᑮᑖᐎᓯᐎᓐ, ᐃᐃᐌ ᐁᑳ ᐃᓂᓃᓈᕽ ᑫᑮ ᐃᓇᒪᒋᑳᑌᓯᓂᓂᒃ, ᑭᔐᒪᓂᑑ ᐁᑮᑳᑕᒫᑫᒡ᙮ ᓃᔮᒃ ᐃᑕᔥ ᒋᑆ ᐊᓂᒫᒋᓭᒃ ᐅᐅ ᐊᑭ, ᑭᑮᐅᓀᑕᒫᑯᓈᓐ ᐅᑲᑮᑖᐌᑕᒧᐎᓂᕽ ᑫᐃᔑᒋᑫᐃᓇᕽ ᒋᐅᒋᐊᔮᐗᕽ ᑭᒋ ᐃᓀᑖᑯᓯᐎᓐ᙮

ᐅᐅ ᑲᑮᑖᐌᑕᒧᐎᓐ ᑳᐐᓐ ᐅᑮᑭᑫᑕᓰᓈᐙ ᐅᑯ ᑳᓃᑳᓂᓰᑲᑕᒧᐙᒡ ᐅᐅ ᐊᑭ᙮ ᑮᔥᐱᓐ ᑮᑭᑫᑕᒧᐙᐸᓐ, ᑳᐐᓐ ᐅᑖᑮᐊᑯᓴᑲᐙᓯᐙᐙᓐ ᐃᓂ ᑳᑎᐯᒋᑫᓂᒡ ᒫᐗᒡ ᑳᑭᒋ ᐃᓀᑖᑯᓯᓂᒡ᙮

ᐅᐅᐌ ᑕᔥ ᐃᔑᐲᐃᑳᑌ: ᐃᐃᐌ ᐁᑳ ᐐᑳ ᐊᐎᔭ ᑳᐙᐸᑕᓯᒃ ᑲᔦ ᐁᑳ ᐊᐎᔭ ᐁᑮᐅᒋᓅᑕᓯᒃ ᐃᐃᐌᔥ ᑲᔦ ᐐᑳ ᐊᐎᔭ ᑳᐃᓀᑕᓯᒃ ᒋᐃᔑᐌᐸᑭᐸᓐ, ᒦ ᐃ ᒪᔮ ᑭᔐᒪᓂᑑ ᑳᑮᑾᔮᒌᑕᒪᐙᒡ ᐃᐃ ᑳᓵᑭᐃᑯᒡ᙮

ᑮᓇᐎᓐᑦ ᐃᑕᔥ ᑭᑮᑭᑫᑕᒧᐃᑯᓈᓐ ᑭᔐᒪᓂᑑ, ᐃᓂ ᐅᑕᒑᑾᓐ ᐁᑮᐙᐸᑕᐃᓇᕽ᙮ ᐊᐌ ᐊᒑᒃ ᐅᒑᑭᑭᑫᑖᓐ ᑲᑭᓇ ᑫᑰᓐ, ᐊᐴᔥᑫ ᐁᔑ ᐃᔥᐹᓂᒃ ᑭᔐᒪᓂᑑ ᐅᑎᓀᑕᒧᐎᓐ᙮

ᐃᓇᔥᑫ ᐊᐌᓀᓐ ᐃᓂ ᑫᑭᑫᑕᒫᑯᒡ ᐋᓃᓐ ᐁᓀᑕᕽ ᐊᐎᔭ? ᒦᐗᓐ ᐁᑕ ᐃᓂ ᐅᑕᒑᑾᓐ ᑳᐸᐹᑭᑭᓰᓄᑕᐙᒡ ᐅᑭᑫᑕᒫᑰᓐ᙮ ᒦ ᐃ ᐯᔑᑾᓐ ᑭᔐᒪᓂᑑ ᑳᐃᓀᑕᕽ ᑳᐐᓐ ᐸᑳᓐ ᐊᐎᔭᓐ ᐅᑲᑭᑫᑕᒫᑯᓰᓐ᙮ ᒦᐗᓐ ᐁᑕ ᐃᓂ ᑭᔐᒪᓂᑑ ᐅᑕᒑᑾᓐ ᑲᑭᓇ ᐅᑭᑫᑕᒫᑰᓐ᙮

ᐃᐃᐌ ᑕᔥ ᐃᓀᑕᒧᐎᓐ ᒥᓯᐌ ᑳᐋᐸᒋᑑᐙᒡ ᐅᒫ ᐊᑮᕽ ᑳᐱᒫᑎᓯᐙᒡ, ᑳᐐᓐ ᑮᓇᐎᓐᑦ ᐃᐃ ᑭᑮᐅᑖᐱᓇᓰᒥᓐ᙮ ᑮᓇᐎᓐᑦ ᒣᔥᑾᒡ ᑭᑮᐅᑖᐱᓈᓈᓐ ᐊᐊ ᐊᒑᒃ ᑳᐱ ᐃᔑᓂᔕᐅᑯᒡ ᑭᔐᒪᓂᑑᓐ, ᒦ ᐊᐌ ᐊᒑᒃ ᑳᒦᓂᑰᔭᕽ ᒋᑭᑫᑕᒧᐗᕽ ᐅᓄᐌᓂᐗᓐ ᑳᑮᒦᓂᓇᕽ ᐁᑮᔕᐌᓂᒥᓇᕽ ᑭᔐᒪᓂᑑ᙮

ᐃᓂᐌᓂᐗᓐ ᓴ ᑯ ᑳᔑᑲᑭᑐᔮᕽ, ᑳᐐᓐ ᐐᓐ ᓂᑖᐸᒋᑑᓰᒥᓐ ᐃᓂ ᑲᑮᑖᐎᑮᔗᐎᓇᓐ ᐃᓂᓃᓈᕽ ᐌᒋᑭᑭᓄᐃᑳᑌᓂᑭᓐ᙮ ᐃᓂ ᑕᔥ ᑭᔐᒪᓂᑑ ᐅᑕᒑᑾᓐ ᓂᑭᑭᓄᐊᒫᑯᓈᓐ ᒋᐃᔑᑲᑭᑐᔮᕽ, ᑲᔦ ᐃᓂ ᑳᐊᒑᑯᐗᓂᓂᑭᓐ ᓂᑎᔑᐸᔭᑌᓂᓯᑐᑕᒨᓈᓈᓂᒃ ᐃᑭ ᑳᑭᑭᔥᑲᐙᐙᒡ ᑭᔐᒪᓂᑑᓐ ᐅᑕᒑᑯᓂ᙮

ᐊᐎᔭ ᑕᔥ ᐁᑳ ᑳᑭᑭᔥᑲᐙᓯᒃ ᑭᔐᒪᓂᑑᓐ ᐅᑕᒑᑯᓂ, ᑳᐐᓐ ᐅᑲᐅᑖᐱᓇᓰᓇᓐ ᐃᓂ ᑫᑰᓇᓐ ᐃᐃᒫ ᐊᒑᑯᕽ ᑳᐅᒌᒪᑲᓂᓂᑭᓐ᙮ ᐋᓃᔥ ᐅᑎᓂᑖᓇᓐ ᐁᑲᑮᐹᑌᑖᑾᓂᓂᑭᓐ᙮ ᑳᐐᓐ ᑲᓇᑫ ᐅᓂᓯᑐᑕᓰᓇᓐ᙮ ᒦ ᐁᑕ ᐐᒌᐎᑯᒡ ᑭᔐᒪᓂᑑᓐ ᐅᑕᒑᑯᓂ ᐅᑲᐅᒋᓂᓯᑐᑖᓐ᙮

ᒦᑕᔥ ᐊᐎᔭ ᐁᔮᐙᒡ ᑭᔐᒪᓂᑑᓐ ᐅᑕᒑᑯᓂ, ᐐᓐ ᐅᑲᓂᓯᑕᐌᑖᓐ ᑲᑭᓇ ᑫᑰᓐ ᐋᓃᓐ ᐁᔑᐊᔮᓂᒃ᙮ ᑲᔦ ᑳᐐᓐ ᐅᑲᓂᓯᑕᐌᓂᒥᑯᓰᓐ ᐊᐎᔭᓐ ᑳᑭᑭᔥᑳᑯᓯᓂᒃ ᐃᓂ ᐊᒑᑾᓐ᙮

ᐃᓇᔥᑫ ᒦ ᐅᐌ ᑳᐃᔑᐲᐃᑳᑌᒃ: ᐊᐌᓀᓐ ᑫᑫᑕᒪᐙᒡ ᑳᑎᐯᒋᑫᓂᒡ ᐋᓃᓐ ᐁᓀᑕᒥᓂᒡ? ᐊᐌᓀᓐ ᑫᑰᓐ ᑫᑭᑭᓄᐊᒪᐙᐸᓐ? ᐃᔑᐲᐃᑳᑌ᙮ ᑮᓇᐎᓐᑦ ᐃᑕᔥ ᑭᑕᔮᐙᒥᓐ ᐃᐃ X ᐅᑎᓀᑕᒧᐎᓐ᙮

ᓃᒋᐅᑌᐺᑕᒨᒃ! ᐌᑎ ᐅᑖᓈᕽ ᑳᑮᐱᐙᐸᒥᓇᑰᒃ, ᑳᐐᓐ ᐃᐃᐌ ᑭᑮᑌᐊᐲᑖᑎᓯᓰᒻ ᒋᐃᔑᑲᓅᓂᓇᑰᒃ ᑖᐱᔥᑰ ᑳᐊᔮᐎᒣᒃ ᑭᔐᒪᓂᑑ ᐅᑕᒑᑾᓐ᙮ ᒦ ᐱᑯ ᐁᑕ ᑖᐱᔥᑰ ᑳᐊᑮᐙᑎᓯᐙᒡ ᑭᑮᐃᔑᑲᓅᓂᓂᓂᒻ, ᐋᓃᔥ ᑭᑮᐊᐱᓅᒌᔑᐌᑖᑯᓯᒻ ᐃᐃ ᐊᐲ ᐁᒫᒌᐱᒥᓂᔕᐌᒃ X᙮

ᒦ ᐁᑕ ᒎᒎᔖᐳ ᑭᑮᒥᓇᐃᓂᓂᒻ, ᑳᐐᓐ ᐃᑯ ᑳᒪᔥᑲᐙᒃ ᒦᒋᒻ ᑭᑮᐊᔕᒥᓯᓅᓂᓂᒻ, ᐁᑳ ᒪᔑ ᐁᑮᑌᐃᔑᐊᔮᓯᐌᒃ᙮ ᓅᑯᒻ ᓴ ᑯ ᑳ ᒪᔑ ᑭᑎᔑᐊᔮᓰᒻ᙮

ᑫᔮᐱ ᐋᓃᔥ ᑭᑎᔑᐱᒫᑎᓯᒻ ᑖᐱᔥᑰ ᐊᑮᕽ ᑳᐃᔑᑎᐯᑖᑯᓯᐙᒡ᙮ ᐋᓃᔥ ᑮᓇᐙ ᑯ ᐊᔮᒪᑲᓐ ᐅᑌᓂᑎᐎᓐ, ᐊᔮᓅᑎᐎᓐ, ᑳᐐᓐ ᐃᓇ ᐃᔑᓈᑾᓯᓅᓐ ᐅᐅ ᓴ ᐊᑮᕽ ᐁᐅᒋᑎᐯᑖᑯᓯᔦᒃ? ᑳᐐᓐ ᐃᓇ ᑭᑎᓈᑎᓯᓰᒻ ᑳᒥᒋᐊᑮᐙᑎᓯᐙᒡ?

ᐃᐃ ᐯᔑᒃ ᐃᑭᑐᒡ: ᓃᓐ ᑆᓬ ᓂᐱᒥᓂᔕᐙ, ᑲᔦ ᑯᑕᒃ, ᓃᓐ ᐊᑆᓬᐊᔅ ᓂᐱᒥᓂᔕᐙ, ᐃᑭᑐᒡ, ᑳᐐᓐ ᐃᓇ ᐃᓂᓃᓈᕽ ᑭᑎᔑᐊᔮᓰᒻ?

ᐊᐌᓀᓐ ᑕᔥ ᐊᐊ ᐊᑆᓬᐊᔅ? ᐊᐌᓀᓐ ᐊᐊ ᑲᔦ ᑆᓬ? ᓃᓇᐎᓐᑦ ᐁᑕ ᑭᔐᒪᓂᑑ ᐅᑕᓄᑮᐋᑲᓇᐞ ᓂᑎᓄᐎᒥᓐ ᑳᐅᑎᓇᒣᒃ ᑭᑌᐺᑕᒧᐎᓂᐙ᙮ ᐯᐸᑳᓐ ᑕᔥ ᓂᑎᓇᓄᑮᒥᓐ ᐃᐌ ᑳᔑᐸᒥᓇᒧᐃᔭᒥᓐᒡ ᐊᐊ ᑳᑎᐯᒋᑫᒡ᙮

ᓃᓂᑕᒻ ᓂᑮᑭᑎᑳᑖᓇᓐ ᑭᑎᑳᓀᓴᓐ, ᒦᔥ ᐐᓂᑕᒻ ᐊᑆᓬᐊᔅ ᐅᑮᑎᐹᐹᐗᑑᓇᓐ᙮ ᐐᓐ ᐃᑕᔥ ᐃᑯ ᑭᔐᒪᓂᑑ ᐅᑮᒫᒌᑭᑑᓇᓐ᙮

ᒦ ᓴ ᐃ ᑳᐐᓐ ᑫᑰᓐ ᐃᓀᑖᑯᓯᓰᐗᒃ ᐊᐊᐌ ᑳᑭᑎᑫᒡ, ᐊᐊᐌ ᑲᔦ ᑳᑎᐹᐹᐗᒋᑫᒡ, ᐊᐊᐌᔥ ᐁᑕ ᑭᔐᒪᓂᑑ ᑭᒋ ᐃᓀᑖᑯᓯ ᐁᒫᒌᑭᒋᑫᒡ᙮

ᑳᐐᓐ ᐯᐸᑳᓐ ᑕᐃᓀᑖᑯᓯᓰᐗᒃ ᐊᐊ ᑳᑭᑎᑫᒡ, ᐊᐊ ᑲᔦ ᑳᑎᐹᐹᐗᒋᑫᒡ: ᐯᐯᔑᒃ ᐅᑲᑎᐸᐊᒫᑯᐙᓐ ᐃᓂ ᑭᔐᒪᓂᑑᓐ ᐋᓃᓂᑯ ᐁᔑᓈᑾᓂᓂᑭᓐ ᐅᑕᓄᑮᐎᓂᐙᓐ᙮

ᓃᓇᐎᓐᑦ ᐃᓴ ᓂᐐᑕᓄᑮᑎᒥᓐ ᐁᐊᓄᑲᐗᑭᒡ ᑭᔐᒪᓂᑑ᙮ ᑮᓇᐙ ᑕᔥ ᐐᓐ ᑭᔐᒪᓂᑑ ᑳᔑᑭᑎᑫᒡ ᑭᑎᓀᑖᑯᓯᒻ᙮ ᑲᔦ ᓴ ᑭᑎᓀᑖᑯᓯᒻ ᑭᔐᒪᓂᑑ ᐁᐅᔑᑑᒡ ᐙᑳᐃᑲᓐ᙮

ᓃᓐ ᓂᑮᐃᔑᒋᑫ ᐃᐌ ᑳᐃᔑᒦᔑᒡ ᐊᐊ ᑭᔐᒪᓂᑑ᙮ ᑖᐱᔥᑰ ᐊᐎᔭ ᐗᐐᑫ ᑳᓇᑲᒋᐙᑳᐃᑫᒡ ᓃᓐ ᓂᑕᒻ ᓂᑮᐅᓈᑯᓯᑑᓐ ᐃᐃᒫ ᑫᔑᐙᑳᐃᑳᑌᒃ᙮ ᐸᑳᓐ ᒦᓇᐙ ᐊᐎᔭ ᐗᑭᑖᐱᒃ ᑮᒫᒌᐙᑳᐃᑫ ᐃᐃᒫ ᑳᑮᐃᔑᐅᓈᑯᓯᒋᑫᔮᐹᓐ᙮ ᑕᓱᐯᔑᒃ ᐃᑕᔥ ᐌᐌᓂ ᑕᑲᑴᐃᔑᒫᒌ᙮

ᑭᔐᒪᓂᑑ ᐋᔕ ᓂᑕᒻ ᐅᑮᐃᓇᓵᓐ ᒋᓴᔅ Xᑕᓐ ᐐᓐ ᒋᐅᓈᑯᓯᒋᑳᑳᓂᐎᓂᒡ᙮ ᑳᐐᓐ ᑖᐸᑳᓇᓯᓅᓐ ᑫᑰᓐ ᐊᐎᔭ ᒋᐃᓇᑑᒡ᙮

ᐃᑭ ᑕᔥ ᐅᐅᒫ ᐗᑭᑖᐱᒃ ᑳᔑᐙᑳᐃᑫᐙᒡ, ᐋᓂᓐᑦ ᐅᓵᐎ ᔔᓂᔮᐗᓯᓃᓐ ᐅᑎᔑᐋᐸᒋᐋᐙᓐ, ᑲᔦ ᐙᐱᔥᑭᔔᓂᔮᐗᓯᓃᓐ, ᑲᔦ ᐁᑭᑕᑭᓱᓂᒡ ᐊᓯᓃᐞ᙮ ᐋᓂᓐᑦ ᐃᑕᔥ ᑲᔦ ᒥᑎᑰᓐ, ᒪᔥᑯᓰᓐ, ᑳᓅᑲᔥᑲᓂᓂᑭᓐ ᐅᑖᐸᒋᑑᓈᐙᓐ᙮

ᑲᑭᓇ ᑕᔥ ᐊᐎᔭ ᑕᐙᐸᒋᑳᑌᓂ ᐅᑕᓄᑮᐎᓐ᙮ ᑕᐙᐸᑕᐃᐌᒪᑲᓐ ᐃᐃ ᑮᔑᑲᓐ ᑫᐱᐅᑮᔑᑳᒥᒡ ᐊᐊ X᙮ ᒦ ᐃᐌ ᐊᐲ ᑲᑭᓇ ᐊᐎᔭ ᐃᐃᒫ ᐃᔥᑯᑌᕽ ᑕᐅᒋᑭᑫᒋᑳᑌᓂ ᐋᓃᓐ ᒪᔮ ᐁᔑᐊᔮᓂᒃ ᐅᑕᓄᑮᐎᓐ᙮

ᐃᐃᐌ ᐗᑭᑖᐱᒃ ᑳᐙᑳᐃᑳᑌᒃ, ᑮᔥᐱᓐ ᐃᔥᒀᑭᑌᒃ, ᑕᑎᐸᐊᒪᐙ ᐊᐌᑎ ᐅᑕᓄᑮ᙮

ᒑᑳᑭᑌᓂᒃ ᐃᑕᔥ ᐊᐎᔭ ᐅᑑᔑᒋᑫᐎᓐ, ᒦ ᐃ ᒋᐗᓂᑑᒡ᙮ ᐐᓐ ᐁᑕ ᑕᐱᒫᒋᐋ᙮ ᑖᐱᔥᑰ ᒣᑴᔥᑯᑌ ᐁᐅᒋᐸᐲᒡ ᑕᐃᔑᓈᑯᓯ᙮

ᑳᐐᓐ ᐃᓇ ᑭᑭᑫᑕᓰᒻ ᒫᒪᐤ ᐁᐃᓍᓂᑰᔦᒃ ᑭᔐᒪᓂᑑ ᐅᑭᒋᐊᓇᒥᐁᐎᑲᒥᒃ? ᐐᓐ ᐋᓃᔥ ᑭᔐᒪᓂᑑ ᐅᑕᒑᑾᓐ ᐃᔑᑖᐗᓐ ᐃᐃᒫ ᑳᔑᒫᒪᐎᐃᑎᔦᒃ᙮

ᑮᔥᐱᓐ ᐊᐎᔭ ᓂᔑᐗᓈᒋᑕᒪᐙᒡ ᐅᐌᓂ ᐅᑭᒋᐊᓇᒥᐁᐎᑲᒥᑯᓂ ᑭᔐᒪᓂᑑᓐ, ᑲᔦ ᐐᓐ ᐅᑲᓂᔑᐗᓈᒋᐃᑰᓐ ᑭᔐᒪᓂᑑᓐ᙮ ᐋᓃᔥ ᐃᓇᒋᑳᑌ ᐁᑕ ᑭᔐᒪᓂᑑ ᒋᑎᐯᑕᕽ ᐅᑭᒋᐊᓇᒥᐁᐎᑲᒥᒃ᙮ ᒦ ᐃᐌ ᐁᑎᓄᐎᔦᒃ᙮

ᑫᑯ ᐐᓐ ᐊᐎᔭ ᑕᐗᔦᔑᑎᓱᓰ᙮ ᑮᔥᐱᓐ ᐊᐎᔭ ᐃᓀᓂᑎᓱᒡ ᐁᐃᔑᑲᑮᑖᐎᓯᒡ ᓅᑯᒻ ᐅᑯᐌᓂᐗᒃ ᑳᐱᒫᑎᓯᐙᒡ ᐁᔑᓇᒧᐙᒡ ᑲᑮᑖᐎᓯᐎᓐ, ᒫᓄ ᒋᐌᐱᓇᕽ ᐃᐃ ᑳᔑᑭᑫᑕᒫᓱᒡ᙮ ᒦᔥ ᐃᐃᒫ ᑌᐺ ᒋᐅᒋᓂᑲᑮᑖᐌᑕᕽ᙮

ᐃᐌ ᐋᓃᔥ ᐅᒫ ᐊᑮᕽ ᑳᐃᔑᓇᒧᐙᒡ ᒋᑲᑮᑖᐗᓂᓂᒃ, ᒦ ᐃᐌ ᐁᔑᓇᕽ ᑭᔐᒪᓂᑑ ᐁᑲᑮᐹᑕᓂᓂᒃ᙮ ᐋᓃᔥ ᐅᐅᐌ ᐃᔑᐲᐃᑳᑌ: ᐃᑭᐌ ᐅᑲᑮᑖᐎᓰᒃ ᐐᓇᐙ ᑯ ᐅᐗᔦᔑᒥᐌᐎᓂᐙᕽ ᐅᑲᔑᑕᓱᓂᑯᐙᓐ ᑭᔐᒪᓂᑑᓐ᙮

ᑲᔦ ᐃᔑᐲᐃᑳᑌ: ᑳᑎᐯᒋᑫᒡ ᐅᑭᑫᑕᒪᐙᐞ ᐅᓈᓈᑲᑕᐌᑕᒧᐎᓂᓂ ᐃᓂ ᐅᑲᑮᑖᐎᓰᐞ, ᐁᑳ ᑫᑰᓐ ᐁᐃᓍᑌᓯᓂᓂᒃ᙮

ᑫᑯ ᐐᓐ ᐊᐎᔭ ᐅᑲᒪᒦᒀᑕᓰᓐ ᐃᐃᐌ ᑫᑲᔥᑭᑑᒡ ᐯᒫᑎᓯᒡ᙮ ᐋᔕ ᑲᑭᓇ ᑫᑰᓐ ᑭᒦᓂᑰᒻ:

ᑆᓬ, ᐊᑆᓬᐊᔅ, ᐲᑕᕒ, ᐅᐅ ᓅᑯᒻ ᐊᑮᕽ ᑳᐊᔮᒃ, ᐱᒫᑎᓯᐎᓐ, ᓂᐳᐎᓐ, ᐃᐃᐌ ᑲᔦ ᓅᑯᒻ ᑳᓂ ᐃᔑᐌᐸᒃ, ᓃᑳᓇᔭᐄ ᑲᔦ ᑫᐃᔑᐌᐸᒃ, ᑲᑭᓇ ᑫᑰᓐ ᑭᑎᐯᑖᓈᐙ᙮

ᑮᓇᐙ ᑕᔥ ᑭᑎᐯᓂᒥᑯᐙ X, ᔑᑾ X ᐐᓐ ᑭᔐᒪᓂᑑᓐ ᐅᑎᐯᓂᒥᑰᓐ᙮

ᒦ ᐃᐌ ᑫᐃᓀᓂᒥᑰᔮᕽ ᐁᐅᑕᓄᑮᐋᑲᓂᒥᔭᒥᓐᒡ X, ᐁᑮᑲᓇᐌᑕᐃᑰᔮᕽ ᐃᓂ ᑫᑰᓇᓐ ᐸᔦᔥ ᑳᑭᑫᑖᑯᑑᒡ ᑭᔐᒪᓂᑑ᙮

ᔑᑾ ᑲᔦ ᐊᑕᐌᑖᑯᓯ ᐊᐌ ᑳᑲᓇᐌᑕᐃᓐᒡ ᒥᓯᐌ ᑯ ᒋᑫᒋᓈᐁᑖᑯᓯᒡ᙮

ᓃᓐ ᐃᑕᔥ ᑳᐐᓐ ᓂᐐᓈᐸᑫᑕᓰᓐ ᑮᔥᐱᓐ ᑫᑰᓐ ᐃᔑᓈᓈᑲᓴᐙᐸᒥᔦᒃ ᓂᑕᓄᑮᐎᓂᕽ, ᑲᔦ ᐱᑯ ᐊᐎᔭ ᐯᒫᑎᓯᒡ, ᐋᓃᓐ ᐃᑯ ᑫᐃᓀᓂᒥᔑᒡ᙮ ᑳᐐᓐ ᓃᓐ ᐃᑯ ᓂᓈᓈᑲᒋᐃᑎᓱᓰ᙮

ᑳᐐᓐ ᑫᑰᓐ ᓂᑎᔑᑭᑫᓂᑎᓱᓰ ᑫᑰᓐ ᒋᐃᔑᐊᔮᔮᓐ᙮ ᑳᐐᓐ ᑕᔥ ᐃᐃᒫ ᐅᒋᑭᑫᑖᑾᓯᓅᓐ ᐁᑾᔭᑯᓯᕽ ᓂᑎᔑᐊᔮᐎᓐ᙮ ᑳᑎᐯᒋᑫᒡ ᒦ ᐁᑕ ᑫᑾᔭᑯᓂᓯᑕᐎᓇᐎᒡ᙮

ᒦ ᐃ ᑫᑮᓇᐙ, ᑫᑯ ᐅᓵᒻ ᐐᐸ ᐊᓅᒋᑯ ᐃᓀᓂᒫᑫᒃ ᐊᐎᔭ ᐅᑎᔑᒋᑫᐎᓐ ᒋᑆ ᓇᐃᓭᒃ᙮ ᐹᓂᒫ ᐁᑕ ᑕᑯᔑᕽ ᑳᑎᐯᒋᑫᒡ, ᐅᑲᐱᑑᑖᓐ ᐙᓭᔮᕽ ᒋᒧᔐᓈᑾᓂᓂᒃ ᑲᑭᓇ ᑫᑰᓐ, ᒥᓴᐙᑯ ᐗᓂᑎᐱᑲᓄᕽ ᐋᓇ ᑳᑑᓂᒡ ᐊᐎᔭᓐ ᐅᑎᔑᒋᑫᐎᓂᓂ᙮ ᑲᔦ ᐅᑲᑑᑖᓐ ᒋᒧᔐᔮᐸᒋᑳᑌᓂᒃ ᐋᓃᓐ ᐁᓀᑕᒧᐙᒡ ᐊᐌᓀᓇᒃ ᐅᑌᐃᐙᕽ᙮ ᒦ ᐃᐌ ᐊᐲ ᑲᑭᓇ ᐊᐎᔭ ᑫᔑᒥᓍᒋᒥᑯᒡ ᑭᔐᒪᓂᑑᓐ ᐋᓃᓂᑯ ᑳᔑᑲᔥᑭᑕᒫᓱᒡ᙮

ᓃᒋᐅᑌᐺᑕᒨᒃ, ᐅᓄᐌᓂᐗᓐ ᑳᐱᑕᔑᑕᒫᓐ ᓂᑮᐋᐌᒋᑳᑫᓇᓐ ᑖᐱᔥᑰ ᓃᓀᑕᐎᓐᑦ ᐊᑆᓬᐊᔅ ᑳᑮᐃᑰᔮᕽ, ᒋᐅᒋᑭᑭᓇᐙᐸᒥᔑᓈᔮᕽ ᑫᔑᐊᔮᔦᒃ, ᒋᐅᓵᒥᒋᑫᓯᐌᒃ, ᐃᐃᐌ ᓴ ᐁᑕ ᑯ ᑳᐃᔑᐲᐃᑳᑌᒃ ᐃᐃ ᑭᒋᒪᓯᓇᐃᑲᓐ᙮ ᐃᒫ ᑕᔥ ᑳᑕᔑᔦᒃ ᑳᐐᓐ ᐊᐎᔭ ᑕᐃᔑᓈᑫᓰ ᐃᓂ ᐯᔑᒃ ᒋᐃᔥᐯᓂᒫᒡ ᑲᔦ ᑯᑕᒃ ᒋᑕᐸᓭᓂᒫᒡ, ᑳᐐᓐ ᑲᔦ ᒋᐃᔑᐋᓍᐸᑎᔦᒃ᙮

ᐃᓇᔥᑫ ᐊᐌᓀᓐ ᑳᐃᔑᐃᒃ ᐊᐗᔑᒣ ᒋᑮᐃᓀᑖᑯᓯᔭᓐ? ᐌᑯᓀᔥ ᐐᓐ ᐃᐃ ᐁᔮᔭᓐ ᐐᑳ ᑳᒦᓂᑰᓯᐗᓐ? ᑮᔥᐱᓐ ᑕᔥ ᑌᐺ ᑳᒦᓂᑰᐗᓀᓐ ᑲᑭᓇ ᑫᑰᓐ, ᐋᓃᓐ ᑕᔥ ᑫᐅᒋᒪᒦᒀᓱᔭᓐ ᑖᐱᔥᑰ ᐁᑮᒥᒋᐊᔮᔭᓐ?

ᐋᔕ ᓇ ᑲᑭᓇ ᑫᑰᓐ ᑭᑕᔮᒻ ᑳᐊᑕᐌᑕᒣᒃ? ᐋᔕ ᓇ ᑭᑌᐌᓅᑎᓯᒻ? ᐋᔕ ᓇ ᑭᑑᑭᒫᐎᒻ ᑫᓃᓇᐎᓐᑦ ᐃᑕᔥ ᐁᑎᓄᐎᓯᐙᕽ? ᐊᐯᔥ ᑌᐺ ᑮᑭᒋᐅᑭᒫᐎᔦᑭᐸᓐ, ᑭᑖᑮᐐᒌᐎᑰᒻ ᐁᔑᐅᑭᒫᐗᐱᔦᒃ᙮

ᒦ ᐅᐌ ᐁᔑᓇᒫᓐ: ᓃᓇᐎᓐᑦ ᑭᔐᒪᓂᑑ ᐅᑎᔑᓂᔕᐙᑲᓇᐞ ᒫᐗᒡ ᐅᑖᓈᕽ ᒧᔐᐊᔭᐄ ᓂᑮᐃᓇᓯᑯᓈᓐ᙮ ᓂᑎᔑᓈᑯᓯᒥᓐ ᑖᐱᔥᑰ ᐃᑭᐌᓂᐗᒃ ᓂᐳᐎᓂᕽ ᑳᐃᓈᑯᓂᑲᓂᐎᐙᒡ ᐁᐐᑭᑖᐸᒥᑣ ᐋᓃᓐ ᑫᔑᓂᓯᑣ᙮ ᑲᑭᓇ ᒥᓯᐌᑲᒥᒃ ᑳᑕᓶᓄᐙᒡ ᐃᑭ ᐯᒫᑎᓯᐙᒡ ᑲᔦ ᐁᒐᓬᐊᒃ ᓂᑭᑖᐸᒥᑯᓈᓐ ᐁᔑᒋᑫᐃᑰᔮᕽ᙮

ᐅᑲᑮᐹᑎᓰᒃ ᓂᑎᓀᑖᑯᓯᒥᓐ ᐁᐊᓄᑲᐗᑭᒡ ᐊᐊ X᙮ ᑮᓇᐙ ᑕᔥ ᓂᑲᑮᑖᐌᑖᒥᓐ ᐁᐐᒌᐎᓇᕽ X ᑭᑎᓀᑖᒻ᙮ ᓃᓇᐎᓐᑦ ᓂᒪᒉᑖᑯᓯᒥᓐ, ᑮᓇᐙ ᑕᔥ ᐐᓐ ᑭᑎᔥᐯᑖᑯᓯᒻ᙮

ᐲᓂᔥ ᓴ ᑯ ᐅᐅ ᓅᑯᒻ ᓂᐸᐹᓅᑌᔅᑲᑌᒥᓐ, ᓂᓅᑌᔮᐹᑴᒥᓐ, ᓂᓅᑌᑯᓇᔦᒥᓐ, ᑲᔦ ᓂᐸᐸᑭᑌᐅᑰᒥᓐ, ᓂᑸᓇᐎ ᐃᔑᑖᒥᓐ,

ᑲᔦ ᓂᓂᑖ ᒑᑮᐃᑎᓱᒥᓐ ᐁᑭᒋᐊᓄᑮᔮᕽ᙮ ᐋᓇᐐᓐ ᐁᒪᒋᐊᔓᑕᒫᑰᔮᕽ, ᐋᒋᑯ ᑕᔥ ᓃᓇᐎᓐᑦ ᑭᑲᔕᐌᓂᒥᑰᒻ ᓂᑎᓈᓈᓂᒃ᙮ ᐊᐲ ᑕᔥ ᐊᑯ ᐁᐅᒌᑳᑰᔮᕽ, ᓂᑲᑴᒪᔥᑲᐌᑖᒥᓐ᙮

ᒦᑭᓱᒥᑰᔮᕽ ᑲᔦ, ᐋᒋᑯ ᓂᐙᑲᐎᒫᓈᓂᒃ᙮ ᑖᐱᔥᑰ ᐌᐱᓂᑲᓇᒃ ᓂᑎᓀᓂᒥᑰᒥᓐ, ᒫᐗᒡ ᐃᑯ ᓂᑕᐸᓭᓂᒥᑰᒥᓐ, ᐲᓂᔥ ᐃᑯ ᓅᑯᒻ᙮

ᑳᐐᓐ ᐐᓐ ᒋᒣᓂᔑᐃᑰᔦᒃ ᑭᑎᔑᐲᐊᒪᐎᓯᓅᓂᓂᒻ᙮ ᑖᐱᔥᑰ ᓂᓃᒑᓂᓴᒃ ᑭᐐᐃᔑᑭᑭᓄᐊᒪᐎᓂᓂᒻ᙮

ᐋᓃᔥ ᒥᑖᒋᕽ ᒥᑖᔂᒃ ᐋᓇ ᑕᔑᐙᒡ ᐁᑲᓇᐌᓂᒫᐗᔂᓂᓀᒀ ᐁᐐᒌᐌᒃ ᐊᐊ X, ᐯᔑᒃ ᐁᑕ ᑭᑑᔫᓯᒻ᙮ ᓃᓐ ᓴ ᑭᑮᐅᓃᒑᓂᓯᒥᓂᓂᒻ ᐁᑮᐱᐐᑕᒪᐎᓇᑰᒃ ᐃᐃ ᒥᓍᒋᒧᐎᓐ᙮ ᒦ ᐃᒫ ᑳᐱᐅᒋᐐᒌᐌᒃ ᐊᐊ X ᒋᓴᔅ᙮

ᒦ ᐃᐌ ᑳᐅᒋᐸᑯᓭᓂᒥᓇᑰᒃ ᒋᑭᑭᓇᐙᐸᒥᔦᒃ᙮

ᒦ ᐃᐌ ᓂᑎᓇᓅᓈ ᐊᐌ ᑎᒪᑎ ᒋᐊᑕᐙᐸᒥᓀᒃ᙮ ᒦ ᐊᐌ ᓂᑯᓯᔅ ᑳᓵᑭᐊᒃ, ᑳᑾᔭᑴᑖᑯᓯᒡ ᐁᐱᒥᓂᔕᐙᒡ ᐃᓂ ᑳᑎᐯᒋᑫᓂᒡ᙮ ᒦ ᐊᐌ ᑫᒥᑲᐙᓱᒥᓀᒃ ᐋᓃᓐ ᑳᐃᔑᐱᒥᓂᔕᐃᑫᔮᓐ ᐁᐊᓂᐐᒌᐗᒃ X ᒋᓴᔅ᙮ ᑲᔦ ᑭᑲᔑᐐᑕᒫᑯᐙ ᐋᓃᓐ ᑫᓃᓐ ᑳᔑᑭᑭᓄᐊᒫᑫᔮᓐ ᐋᑎ ᓴ ᑯ ᑳᐃᔑᒫᐗᒋᐃᑎᐙᒡ ᐅᑕᓇᒥᐋᒃ᙮

ᐋᓂᑕ ᑕᔥ ᑮᓇᐙ ᐋᔕ ᑭᑌᐸᑫᓂᑎᓱᒻ᙮ ᑭᑮᐃᓀᓂᒥᒻ ᐁᑳ ᒦᓇᐙ ᐐᑳ ᒋᐱᒪᐗᑎᓯᓯᓅᓇᑰᒃ᙮

ᐃᓀᑕᕽ ᐃᑕᔥ ᑳᑎᐯᒋᑫᒡ, ᐱᒌᓇᒃ ᑭᑲᐱᐊᑕᐙᐸᒥᓂᓂᒻ᙮ ᒦ ᐊᐲ ᑫᑕᔑᑭᑫᑕᒪᐗᒀ ᐅᑯ ᑳᑭᑌᓂᒧᐙᒡ, ᐋᓃᓐ ᐃᐃ ᑌᐺ ᐁᔑᒪᔥᑲᐎᓰᐙᒡ, ᑳᐐᓐ ᐁᑕ ᐅᑎᑭᑐᐎᓂᐙ᙮

ᑳᐐᓐ ᐋᓃᔥ ᐃᒫ ᑲᑭᑐᐎᓂᕽ ᐁᑕ ᑕᐙᐸᒋᑳᑌᓯᓂᓂ ᐁᑕᔑᑭᒫᐎᒡ ᑭᔐᒪᓂᑑ, ᐃᒫᔥ ᐐᓐ ᐅᒪᔥᑲᐎᓰᐎᓐ ᐁᑕᔑᐊᓄᑮᒪᑲᓂᓂᒃ ᑕᑭᑫᒋᑳᑌᓂ᙮

ᐋᓃᓐ ᑕᔥ ᑫᔑᒥᓉᑕᒣᒃ ᒋᐱ ᐃᔑᐅᑎᓯᓇᑰᒃ? ᐸᔕᔐᐃᑲᓐ ᐃᓇ ᓂᑲᐱᑭᑭᔅ, ᑯᒫ ᑲᔦ ᓵᑭᐃᐌᐎᓂᕽ ᒋᐱ ᐃᔑᒥᓄᑲᓅᓂᓇᑰᒃ?

ᐋᔩᑎᐎᓐ ᐃᓴ ᑕᔥ ᐱᐃᓈᑐᑌ ᐁᐊᔮᒪᑲᒃ ᑳᔑᐊᔮᔦᒃ, ᐊᐎᔭ ᓴ ᑯ ᐁᐃᔑᐱᔑᒀᑎᓯᒡ ᐃᐃ ᑎᓄ ᒫᐗᒡ ᑳᒪᒋᓈᑾᒃ, ᐊᐴᔥᑫ ᐃᑭᐌᓂᐗᒃ ᑳᐊᓇᒥᐋᓯᒀ ᑫᐃᔑᒋᑫᓯᒀᐸᓐ: ᒦ ᐃᐌ ᐁᐃᑭᑐᕽ ᐊᐎᔭ ᐊ ᐯᔑᒃ ᐁᐐᒌᐙᒡ ᐅᑌᑌᓐ ᐐᐎᓂ᙮

ᐋᓃᔛᓐ ᑳᐅᒋᑭᑌᓂᒧᔦᒃ! ᓇᐗᒡ ᐄᑐᒃ ᑭᑖᑮᒫᓀᑖᒻ! ᓇᐗᒡ ᑖᐅᓂᔑᔑᓐ ᒋᐃᓈᑯᓂᑫᔦᑭᐸᓐ ᒋᐐᒌᐎᓯᓄᐌᑭᐸᓐ ᐊᐊ ᑳᑑᑕᕽ᙮

ᐋᓇᐐᓐ ᐃᑕᔥ ᐙᓴ ᐅᑌᑎᔮᓐ, ᑭᐐᒌᐎᓂᓂᒻ ᓂᑎᓀᑕᒧᐎᓂᕽ, ᑲᔦ ᑖᐱᔥᑰ ᐁᐐᒌᐎᓇᑰᒃ, ᐋᔕ ᑭᑎᐯᒋᑫᒥᓈᓐ ᒋᓴᔅ ᐅᐐᓱᐎᓂᕽ ᓂᑮᐅᓇᔓᐙᓈ ᐊᐌ ᐃᓂᓂ ᐅᐅ ᐁᒫᓂᓈᑾᓂᓂᒃ ᑳᑑᑕᕽ᙮

ᐊᐲᔥ ᐁᒫᐗᒋᐃᑎᔦᒃ ᑭᑲᐐᒌᐎᓂᓂᒻ ᓂᑎᓀᑕᒧᐎᓂᕽ, ᑲᔦ ᑭᑲᐐᒌᐎᑯᒥᓐ ᐅᒪᔥᑲᐎᓰᐎᓐ ᐊᐊ ᑭᑎᐯᒋᑫᒥᓈᓐ ᒋᓴᔅ᙮

ᒦᔥ ᐃ ᐊᐲ ᑭᑲᔑᐸᑭᑎᓇᒪᐙᐙ ᐊᐊ ᓭᑕᓐ ᒋᑑᑕᐙᒡ ᐅᓄ ᐃᓂᓂᐗᓐ ᒋᐅᒋᓂᔑᐗᓈᑕᓂᓂᒃ ᐐᔭᐎᓂ᙮ ᒦ ᐅᐌ ᒋᑑᑕᐌᒃ ᐊᐊ ᐃᓂᓂ ᒋᐱᒫᑎᓯᒡ ᐅᑕᒑᑯᕽ ᐹᓂᒫ ᐱᐅᑮᔑᑳᒥᒡ ᑳᑎᐯᒋᑫᒡ᙮

ᑳᐐᓐ ᐅᓂᔑᔑᓯᓅᓐ ᒋᒪᒦᒀᓂᑎᓱᔦᑭᐸᓐ᙮ ᑭᑭᑫᑖᒻ ᐅᐅᐌ ᐁᓂᑖᐃᑭᑐᕽ: ᐸᑮ ᐊᒋᑳᑌᒃ ᐃᐃ ᐅᐱᓯᑲᓀᔅ, ᒥᓯᐌ ᑭᒋᐸᑴᔑᑲᓐ ᐃᔑᐅᐱᔥᑳ ᐁᑮᔑᓱᒡ᙮

ᑖᐱᔥᑰ ᐅᐱᓯᑲᓀᓯᕽ ᐃᓀᑖᑾᓐ ᐃᐃ ᒪᒋ ᐃᔑᐌᐱᓯᐎᓐ, ᒦ ᐃ ᐅᒋᐌᐱᓇᒧᒃ ᐃᐃ ᑳᑮᐱᐋᐸᒋᑑᔦᒃ ᐅᐱᓯᑲᓀᔅ, ᒥᓯᐌ ᒋᐯᑳᑎᓯᔦᒃ, ᑖᐱᔥᑰ ᐅᔥᑭᐸᑴᔑᑲᓂᕽ ᒋᐃᓀᑖᑯᓯᔦᒃ ᐁᑳ ᐁᐊᔮᓯᓄᒃ ᐃᐃ ᐅᐱᓯᑲᓀᔅ᙮ ᐋᓃᔥ ᒦ ᐃᐌ ᐋᔕ ᐁᑎᓄᐎᔦᒃ᙮ ᐋᔕ ᑮᑮᔑᒋᑳᑌ ᑮᓇᐎᓐᑦ ᑫᔑᐐᑾᑎᔭᕽ, ᐋᔕ X ᐁᑮᐸᑭᑎᓈᔂᓂᐎᒡ, ᑭᒫᓇᒑᓂᔐᓯᒥᓈᓐ ᐁᐃᓀᑖᑯᓯᒡ ᑎᓄ ᑳᓂᓯᓐᒡ ᐁᐱᒫᒋᐃᑰᐎ ᐐᑾᑎᓈᓂᐗᕽ᙮

ᒦᑕᔥ ᐅᐅ ᑫᐃᔑᓈᑯᓯᔭᕽ ᑖᐱᔥᑰ ᐁᐃᔑᐐᑾᑎᔭᕽ ᐅᐱᓯᑲᓀᔅ ᐁᐊᔮᓯᓄᒃ᙮ ᑳᐐᓐ ᒦᓇᐙ ᒪᒋ ᐃᓀᑕᒧᐎᓐ, ᒪᒋᒋᑫᐎᓐ ᑭᑲᐋᐸᒋᑑᓰᒥᓐ, ᐅᑖᓈᕽ ᑳᑮᐱ ᐃᓈᑎᓯᔭᕽ᙮ ᑾᔭᑯᐃᓀᑕᒧᐎᓐ, ᑾᔭᑯᒋᑫᐎᓐ ᑭᑲᐋᐸᒋᑑᒥᓐ, ᑖᐱᔥᑰ ᐁᐊᒧᓐᒡ ᐊᐊ ᐸᑴᔑᑲᓐ ᐁᐅᐱᓯᑲᓂᐎᓯᒃ᙮

ᐸᑳᓐ ᐃᐃ ᐊᐲ ᐁᑮᐅᔑᐲᐊᒪᐎᓇᑰᒃ: ᑫᑯ ᐐᒋᐋᑫᒀᓂᒃ ᐊᐎᔭᒃ ᑳᐱᔑᒀᑎᓯᐙᒡ, ᑭᑮᐃᓂᓂᓂᒻ᙮

ᑳᐐᓐ ᐐᓐ ᐃᐃ ᓂᑎᑭᑐᓰ ᐃᑭ ᑳᐊᓇᒥᐋᓯᒀ ᒋᒪᓈᐐᒌᐌᒀ, ᑮᔥᐱᓐ ᐱᔑᒀᑎᓯᐙᒡ ᑲᔦ ᐁᐊᔫᓵᒥᓯᐙᒡ ᑲᔦ ᐁᑭᒨᑎᔥᑭᐙᒡ ᑲᔦ ᐁᒪᓂᑑᑫᐙᒡ᙮ ᑳᐐᓐ ᑭᑖ ᐴᓂᐙᐸᒫᓯᐙᐙᒃ ᐃᑭ ᑎᓄ ᐅᒫ ᐊᑮᕽ ᐊᔮᔦᒃ᙮

ᐃᐃᐌᔥ ᑳᐃᔑᐲᐊᒫᓐ, ᐊᐎᔭ ᑳᐃᑎᓱᒡ ᒋᐅᐐᒋᔖᓂᒥᓐᒡ ᐊᓇᒥᐋᐎᓂᕽ, ᐱᔑᒀᑎᓯᒡ ᐃᑕᔥ ᑫᒫ ᐊᔫᓵᒥᓯᒡ ᑫᒫ ᑲᔦ ᒪᓂᑑᑫᒡ, ᑕᔑᒥᐌᒡ, ᓂᑖᑮᐗᔥᑴᐲᒡ, ᒪᑲᑗᒡ: ᑫᑯ ᐊᐌ ᐐᒋᐋᑫᒃ᙮ ᐊᐴᔥᑫ ᑳᐐᓐ ᑭᑖ ᐐᒋᐐᓯᓃᒫᓯᐙᐙ ᐊᐊ ᑎᓄ᙮

ᐃᓇᔥᑫ ᑳᐐᓐ ᓃᓐ ᓂᑑᐸᐹᒥᓯᐎᓂᓰ ᒋᐅᓇᔓᐙᓇᒀ ᑳᐐᒋ ᑎᐯᑖᑯᓰᒥᓯᓅᐗᒀ᙮ ᐐᓐ ᐅᔕ ᐅᑲᐅᓇᔓᐙᓈᐞ ᐊᐌ ᑭᔐᒪᓂᑑ᙮ ᑮᓇᐙ ᑕᔥ ᐐᓐ ᑭᑖ ᐅᓇᔓᐙᓈᐙᒃ ᐃᑭ ᑳᐐᒋ ᑎᐯᑖᑯᓰᒣᒀ᙮ ᒦ ᐃᐌ ᑳᐅᔑᐲᐃᑳᑌᒃ: ᐊᐊᐌ ᑳᓂᑖ ᒪᒋᒋᑫᒡ, ᐃᑯᒋ ᐃᔑᓂᔕᐅᒃ!

ᑮᔥᐱᓐ ᐊᐎᔭ ᐅᑌᓂᑎᐙᒡ ᐁᐊᔮᔦᒃ, ᑳᐐᓐ ᐃᓇ ᑖᔖᑴᓂᒧᓰ ᐊᐎᔭ ᒋᐊᓵᒡ ᐅᐐᒋᐅᑌᐺᑕᒨᓐ ᐃᐃᒫ ᑎᐹᑯᓂᑎᐎᓂᕽ ᑳᔑᐅᓈᑯᓂᐌᓂᒡ ᐊᐎᔭᐞ ᐁᑳ ᑳᐊᓇᒥᐋᓯᓂᒃ? ᑳᐐᓐ ᐃᓇ ᑖᑮᓇᓇᐊᑕᒫᓱᓰᐗᒃ ᐁᐐᒋᐃᑯᐙᒡ ᑭᔐᒪᓂᑑ ᐅᑾᔭᒀᑎᓰᒪᐞ?

ᑳᐐᓐ ᐃᓇ ᑭᑭᑫᑕᓰᒻ ᑭᔐᒪᓂᑑ ᐅᑾᔭᒀᑎᓰᒪᐞ ᒋᐅᓇᔓᐙᓈᓂᒡ ᑲᑭᓇ ᐊᑮᕽ ᑳᐊᔮᓂᒡ? ᑮᔥᐱᓐ ᑌᐺ ᐊᐎᔭᒃ ᑫᐅᓇᔓᐙᓀᒀ ᑲᑭᓇ ᐊᑮᕽ ᑳᐊᔮᐙᒡ, ᑳᐐᓐ ᐃᓇ ᑭᑌᐊᐲᑌᑖᑯᓯᓰᒻ ᑫᑰᓐ ᑳᐊᑳᓭᑖᑾᒃ ᒋᓇᓇᐃᓯᑑᔦᒃ?

ᑳᐐᓐ ᐃᓇ ᑭᑭᑫᑕᓰᒻ ᑮᓇᐎᓐᑦ ᐃᑯᑎᕽ ᒋᐅᓇᔓᐙᓇᒀ ᐁᒐᓬᐊᒃ? ᒦ ᐃ ᐊᐗᔑᒣ ᑫᔑᑲᔥᑭᑑᔦᒃ ᐅᓄᐌᓂᐗᓐ ᓅᑯᒻ ᐱᒫᑎᓯᐎᓂᕽ ᒋᑌᐅᓇᔓᐙᑕᒪᕽ!

ᑮᔥᐱᓐ ᑮᓂᐸᓯᑸᒪᑲᒃ ᐅᐅ ᑎᓄ, ᑭᑖᐃᓇᓵᐙᒃ ᐃᓇ ᐃᑭ ᐁᑳ ᑲᓇᑫ ᑳᐃᓀᑖᑯᓯᓯᒀ ᐁᔑᒫᐗᒋᐃᑎᔦᒃ, ᐐᓇᐙ ᒋᑲᑴ ᓇᓇᐃᓯᑑᐙᒡ?

ᐅᐌ ᑭᑎᔑᑲᓅᓂᓂᓂᒻ ᒋᒣᓂᔐᑕᒣᒃ᙮ ᑫᒋᓈᒡ ᐯᔑᒃ ᑖᑮᐊᔮ ᑳᑕᔑᔦᒃ ᐁᐃᔑᐊᔮᒀᒥᓯᒡ ᒋᓇᓇᐃᓯᑕᒪᐙᒡ ᐐᒋᐅᑕᓇᒥᐋᐞ ᑫᑰᓇᓐ ᐁᔑᐅᑌᓂᑎᓂᒡ᙮

ᐋᒋᑯ ᐸᑳᓐ ᑭᑎᔑᒋᑫᒻ, ᐯᔑᒃ ᐃᐃᒫ ᑎᐹᑯᓂᑎᐎᓂᕽ ᐁᐊᓵᒡ ᐐᒋᐅᑌᐺᑕᒨᓐ, ᐁᑳ ᑳᑌᐺᑕᓯᓂᒃ ᐁᐊᓅᓈᒡ ᒋᓇᓇᐃᓯᑑᓂᒡ᙮

ᐃᐃᒫ ᐅᔕ ᐅᒋᑭᑫᑖᑾᓐ ᐋᔕ ᐁᑮᐗᓂᒋᑫᔦᒃ, ᐊᐲ ᐁᐅᑌᓂᑎᔦᒃ, ᐁᐅᓈᑯᓂᑎᔦᒃ᙮ ᑳᐐᓐ ᐃᓇ ᐊᐗᔑᒣ ᑖᑮᐅᓂᔑᔑᓯᓅᓐ ᐋᓇ ᒫᔑᑑᑕᐎᓐᒡ ᐊᐎᔭ ᒋᓇᓈᑸᓯᒃ? ᑳᐐᓐ ᐃᓇ ᑖᑮᐅᓂᔑᔑᓯᓅᓐ ᐋᓇ ᐗᔦᔑᒥᑯᒡ ᐊᐎᔭᓐ ᐁᑳ ᒋᒫᓈᑯᓈᓯᒃ?

ᐋᒋᑯ ᒣᔥᑾᒡ ᑭᑑᑖᒻ ᐁᒫᔑᑑᑖᑫᔦᒃ, ᐁᐗᔦᔑᑫᔦᒃ, ᐊᐴᔥᑫ ᑭᐐᒋᐅᑌᐺᑕᒨᒥᐙᒃ ᐁᑑᑕᐌᒀ᙮

ᑫᒋᓈᒡ ᑭᑖ ᑭᑫᑖᒻ: ᐃᑭ ᑳᒪᒋ ᐃᔑᐌᐱᓯᐙᒡ ᑳᐐᓐ ᑕᐊᔮᓰᐗᒃ ᐃᐃᒫ ᐁᑕᔑᑎᐯᒋᑫᓂᒡ ᑭᔐᒪᓂᑑᓐ᙮ ᑫᑯ ᑫᑰᓐ ᑭᑲᐗᓂᔑᒥᑯᓰᒻ: ᑳᐐᓐ ᐅᑯ ᑕᒦᓈᓰᐗᒃ ᑭᔐᒪᓂᑑᓐ ᐅᑎᐯᒋᑫᐎᓂᓂ: ᐃᑭ ᑳᐱᔑᒀᑎᓯᐙᒡ, ᑲᔦ ᑳᒪᓂᑑᑫᐙᒡ, ᑲᔦ ᐊᐎᔭ ᑳᑮᒨᒋᐐᒌᐙᒡ ᐸᑳᓐ ᐊᐎᔭᓐ ᐅᐐᑎᑫᒫᑲᓂᓂ, ᑲᔦ ᐃᓂᓂᐗᒃ ᑳᐃᑴᔑᑑᐙᒡ, ᑲᔦ ᑳᐐᒋᐱᔑᒀᒋᑯᑖᑎᐙᒡ ᐃᑭ ᐃᓂᓂᐗᒃ,

ᔑᑾ ᑳᑭᒨᑎᔥᑭᐙᒡ, ᑳᐅᓵᒥᓯᐙᒡ, ᑳᓂᑖ ᒥᓂᑴᐙᒡ, ᑳᑕᔑᒥᐌᐙᒡ, ᑳᐗᓂᒋᑫᐃᐌᐙᒡ ᑲᔦ᙮ ᑲᑭᓇ ᐅᑯ ᑎᓄ ᑳᐐᓐ ᑕᒦᓈᓰᐗᒃ ᑭᔐᒪᓂᑑᓐ ᐅᑎᐯᒋᑫᐎᓂᓂ᙮

ᐋᓂᓐᑦ ᓴ ᑮᓇᐙ ᐅᐅ ᑭᑮᑎᓄᐎᒻ᙮ ᐋᔕ ᑕᔥ ᑭᑮᐊᑕ ᐯᑳᐹᐗᓂᑰᒻ, ᐋᔕ ᑭᑮᐅᓇᓯᑰᒻ ᑭᔐᒪᓂᑑ ᒋᑎᐯᓂᒥᓀᒃ, ᐋᔕ ᑭᑮᐃᔑᒋᑫᐃᑰᒻ ᒋᑾᔭᑾᑭᒥᓀᒃ ᑭᔐᒪᓂᑑ᙮ ᑳᑎᐯᒋᑫᒡ ᒋᓴᔅ X ᐅᐐᓱᐎᓂᕽ ᑳᐃᔑᒋᑫᐃᓀᒃ ᑲᔦ ᐃᓂᐌ ᐅᑕᒑᑾᓐ ᑭᑭᔐᒪᓂᑑᒥᓈᓐ᙮

ᐅᐅᐌ ᒫᐐᓐ ᐊᐎᔭ ᑕᐃᑭᑐ: ᑲᑭᓇ ᑫᑰᓐ ᓂᑕᐎᓇᒫᑰ ᒋᑑᑕᒫᓐ᙮ ᐁᐊᐞ, ᑳᐐᓐ ᐃᑕᔥ ᑲᑭᓇ ᑭᑲᒥᓄᔥᑳᑯᓰᓐ ᐁᑑᑕᒪᓐ᙮ ᑲᔦ ᓃᓐ ᓂᑖᑮᐃᑭᑦ ᑲᑭᓇ ᑫᑰᓐ ᐁᑕᐎᓇᒫᑰᔮᓐ ᒋᑑᑕᒫᓐ᙮ ᑳᐐᓐ ᐃᑕᔥ ᑫᑰᓐ ᓂᑖ ᐸᑭᑎᓇᒪᐙᑕᓰᓐ ᒋᑎᐯᓂᒥᑯᔮᐹᓐ᙮

ᑲᔦ ᐃᑭᑐᒻ: ᒦ ᐃ ᐌᒋᑾᔮᑕᑌᒃ ᐃᐃ ᒦᒋᒻ ᒋᒦᒋᓈᑳᑌᒃ, ᒦ ᐃ ᐁᓍᑌᒃ ᐅᒥᓴᑖᒫ ᒋᐅᒋᐐᓯᓂᕽ᙮ ᐁᐊᐞ, ᓂᑎᑭᑦ, ᓂᑯᑎᕽ ᐃᑕᔥ ᑭᔐᒪᓂᑑ ᒥᒋᑲᑭᓇ ᐅᑲᑭᐱᑎᓈᓇᓐ ᒦᒋᒻ ᑲᔦ ᐅᒥᓴᑖᒫ᙮ ᑳᐐᓐ ᐅᔕ ᐃᐌ ᑮᐅᒋ ᐃᓇᒋᑳᑌᓯᓅᓐ ᐃᐃ ᐐᔭᐎᒫ ᒋᐱᔑᒀᑎᓯᐎᓂᐗᕽ, ᐃᐃᔥ ᐐᓐ ᑳᑎᐯᒋᑫᒡ ᒋᐊᓄᑳᑯᒡ᙮ ᑲᔦ ᑳᑎᐯᒋᑫᒡ ᐐᓐ ᐅᑑᒌᑕᒪᐙᑖᓐ ᐃᐃ ᐐᔭᐎᒫ᙮

ᑲᔦ ᑭᔐᒪᓂᑑ ᐅᑮᑮᐌᐱᒫᑎᓰᐋᓐ ᐃᓂ ᑳᑎᐯᒋᑫᓂᒡ ᑳᑮᓂᐳᓂᒡ᙮ ᑲᔦ ᑮᓇᐎᓐᑦ ᑎᐱᓇᐌ ᐅᒪᔥᑲᐎᓰᐎᓂᕽ ᑭᑲᐅᒋ ᑮᐌᐱᒫᑎᓰᐃᑯᓈᓐ᙮

ᑳᐐᓐ ᐃᓇ ᑭᑭᑫᑕᓰᒻ ᑭᐐᔭᐎᐙᓐ ᐁᐅᐸᑫᐎᓯᐎᓂᒡ X? ᓂᑖᐅᑖᐱᓇᒪᐙᓐ ᐃᓇ X ᐅᐸᑫᐎᓯᐎᓐ ᒋᐋᑕᑕᒪᐗᒃ ᐅᐱᔑᒀᑎᓰᑴᓐ ᒋᐅᐸᑫᐎᓯᐎᓂᓂᒡ? ᑳᐐᓐ ᐃᐌ ᒋᐃᔑᓈᑾᑭᐸᓐ!

ᑳᐐᓐ ᐃᓇ ᑭᑭᑫᑕᓰᒻ? ᐊᐌᓀᓐ ᓴ ᑯ ᑳᐐᒌᐙᒡ ᐅᐱᔑᒀᑎᓰᑴᓐ, ᐃᓀᑖᑾᓐ ᒋᐯᔑᑯᐐᔮᓭᐙᒡ᙮ ᐋᓃᔥ ᑭᔐᒪᓂᑑ ᑮᐃᑭᑐ ᑭᒋᐅᔑᐲᐃᑫᐎᓂᕽ: ᐃᑭ ᑳᓃᔑᐙᒡ ᒋᐯᔑᑯ ᐐᔭᐎᐙᒡ᙮

ᐊᐎᔭ ᑕᔥ ᑳᐐᒌᐙᒡ ᑳᑎᐯᒋᑫᓂᒡ, ᐯᔑᑴᑖᑯᓯᐗᒃ ᐃᐃᒫ ᐊᒑᑯᕽ᙮

ᒨᔕᒃ ᒫᒌᐸᐃᐙᑕᒧᒃ ᐱᔑᒀᑎᓯᐎᓐ᙮ ᑲᑭᓇ ᓴ ᑯ ᐃᐌ ᒪᒋᑑᑕᒧᐎᓐ ᑳᑑᑕᕽ ᐊᐎᔭ, ᒦ ᓴ ᐃᐌ ᓵᑭᒋ ᓇᑫ ᐐᔭᐎᕽ ᑳᐃᓀᑖᑾᒃ᙮ ᐊᐊᐌᔥ ᐱᔑᒀᑎᓯᐎᓐ ᑳᑑᑕᕽ ᐅᐗᓂᑑᑖᓐ ᑎᐱᓇᐌ ᐅᐐᔭᐤ᙮

ᑳᐐᓐ ᐃᓇ ᑭᑭᑫᑕᓰᒻ ᑭᐐᔭᐎᐙᓐ ᐁᐅᑕᓇᒥᐁᐎᑲᒥᑯᒥᓂᒡ ᑭᔐᒪᓂᑑ ᐅᑕᒑᑾᓐ ᑳᑭᑭᔥᑲᐎᓀᒃ, ᑭᔐᒪᓂᑑ ᑳᒦᓂᓀᒃ? ᑳᐐᓐ ᑮᓇᐙ ᑎᐱᓇᐌ ᑭᑎᐯᓂᑎᓱᓰᒻ᙮

ᐋᓃᔥ ᑭᑮᑎᐸᐅᑯᐙ ᑭᔐᒪᓂᑑ, ᐐᓐ ᐁᑮᐊᑑᒡ ᑎᐸᐃᑫᐎᓐ᙮ ᒦ ᐃᐌ ᐃᓈᐸᒋᑖᐙᒃ ᑭᐐᔭᐎᐙᓐ ᒋᐅᒋ ᑭᒋ ᐃᓀᑖᑯᐁᒃ ᑭᔐᒪᓂᑑ᙮

ᔑᑾ ᓂᑲᓇᑴᑖᓇᓐ ᐃᓂ ᑫᑰᓇᓐ ᑳᑮᐱᐅᔑᐲᐊᒪᐎᔦᒃ᙮ ᐅᓂᔑᔑᓐ ᐊᐊ ᐃᓂᓂ ᐱᓵᓂᑯ ᐐᑳ ᐁᐅᑖᐱᓈᓯᒃ ᐃᑴᐗᓐ᙮

ᐹᑏᓇᑎᓐ ᐃᑕᔥ ᐱᔑᒀᑎᓯᐎᓐ ᐁᐊᔮᒃ, ᒫᓄ ᑲᑭᓇ ᐊᐌ ᐃᓂᓂ ᐅᑲᑎᐯᓂᒫᓐ ᑎᐱᓇᐌ ᐐᐗᓐ᙮ ᒦᓇᐙ ᐊᐊᐌ ᐃᑴ ᒋᑎᐱᓇᐌᐎᓯᒡ ᐅᓈᐯᒪᓐ᙮

ᐊᐊᐌ ᐃᓂᓂ ᒦ ᐃ ᒋᑎᐱᑑᑕᕽ ᐃᐃ ᑳᐃᓀᑖᑯᓯᒡ ᐁᐐᐎᒡ ᒋᓇᓇᐁᑕᒥᐋᒡ, ᑲᔦᔥ ᐊᐌ ᐃᑴ ᐅᑲᓇᓇᐁᑕᒥᐋᓐ ᐅᓈᐯᒪᓐ᙮

ᐊᐊᐌ ᐃᑴ ᑳᐐᓐ ᐐᓀᑕ ᐅᑎᐯᑕᓰᓐ ᐅᐐᔭᐤ, ᐐᓐ ᑕᔥ ᑲᔦ ᐅᓈᐯᒪᓐ ᐅᑎᐯᑕᒥᓂ᙮ ᐯᔑᑾᓐ ᐊᐊᐌ ᐃᓂᓂ ᑳᐐᓐ ᐐᓀᑕ ᐅᑎᐯᑕᓰᓐ ᐅᐐᔭᐤ᙮ ᐃᓂᔥ ᑲᔦ ᐐᐗᓐ ᐅᑎᐯᑕᒥᓂ᙮

ᑫᑯ ᐐᓐ ᐗᓃᑫᓄᑕᐙᑫᓐ ᑭᐐᑎᑫᒫᑲᓐ, ᐹᓂᒫ ᐁᑕ ᑮᑲᓅᓂᑎᔦᒃ ᓇᑯᑎᔦᒃ, ᒋᑲᑴ ᑌᐃᔑᓭᒃ ᐁᔑᐯᐯᔑᑯᔦᒃ ᒋᑲᓅᓀᒃ ᑭᔐᒪᓂᑑ᙮ ᒦᔥ ᐃᐃ ᒦᓇᐙ ᒋᐐᒌᑎᔦᒃ᙮ ᒦ ᐃ ᐁᑳ ᒋᐅᒋᑲᔥᑭᐃᓯᓄᐌᒃ ᐊᐊ ᓭᑕᓐ ᑭᓃᓇᒥᓯᐎᓂᐙᕽ᙮

ᑳᐐᓐ ᐐᓐ ᒋᐃᓈᑯᓂᑫᔮᓐ ᑲᑭᓇ ᐊᐎᔭ ᒋᐐᑎᑫᐸᓐ᙮ ᑭᒥᒋᐐᑕᒪᐎᓂᓂᒻ ᐃᑕᔥ ᑫᑑᑕᒣᑭᐸᓐ᙮

ᐊᐯᔥ ᑲᑭᓇ ᐊᐎᔭ ᐃᔑᐊᔮᐙᐸᓐ ᓃᓐ ᑳᔑᐊᔮᔮᓐ ᐁᐐᑎᑫᓯᐙᓐ᙮ ᐁᑕᔑᒡ ᐃᑕᔥ ᐊᐎᔭ ᒪᔮ ᐅᑕᔮᓐ ᐅᒦᓂᑰᐎᓯᐎᓐ, ᐁᑕᓱᐯᐯᔑᒃ ᐅᑎᔑᒦᓂᑰᓐ ᑭᔐᒪᓂᑑᓐ ᐅᑎᔑᐃᑰᐎᓐ᙮

ᐅᐅ ᓴ ᑕᔥ ᓂᑎᓈᒃ ᐃᑭ ᑳᒥᒋᐯᐯᔑᑯᐙᒡ ᑲᔦ ᐅᑮᐙᑎᓰᒃ: ᑖᐅᓂᔑᔑᓐ ᐊᐸᓀ ᓴ ᑯ ᒋᐃᔑᐯᐯᔑᑯᔦᑭᐸᓐ ᑖᐱᔥᑰ ᑫᓃᓐ ᑳᐃᔑᐊᔮᔮᓐ᙮

ᑮᔥᐱᓐ ᐐᓐ ᑲᔥᑭᑑᓯᐌᒃ ᒋᑲᓇᐌᓂᑎᓱᔦᒃ, ᒦ ᐃ ᐱᓵᓐ ᒋᓂᐐᑎᑫᔦᒃ᙮ ᓇᐗᒡ ᐅᓂᔑᔑᓐ ᐊᐎᔭ ᒋᐐᑎᑫᐸᓐ, ᐊᐲᒡ ᐐᓐ ᒋᑲᒀᑕᑭᐃᑯᐸᓐ ᐃᐃ ᐅᒥᓴᐌᑕᒧᐎᓐ᙮

ᑮᓇᐙ ᑕᔥ ᑳᐐᑎᑫᑎᔦᒃ ᑭᑎᔑᐐᑕᒪᐎᓂᓂᒻ ᐅᐅ ᐃᓈᑯᓂᑫᐎᓐ – ᑳᐐᓐ ᓃᓐ ᐅᐅᐌ ᓂᑎᑭᑐᐎᓐ, ᐊᐊᐌᔥ ᑳᑎᐯᒋᑫᒡ: ᑳᐐᓐ ᐅᑲᓇᑲᓈᓰᓐ ᐊᐊ ᐃᑴ ᐅᓈᐯᒪᓐ, ᑭᑎᑰᒻ᙮

ᑮᔥᐱᓐ ᑕᔥ ᓇᑲᓈᒡ, ᒦ ᐃᐌ ᒋᐸᐯᔑᑯᒡ, ᑫᒫ ᒦᓇᐙ ᒋᑮᐌᓄᑕᐙᒡ ᐅᓈᐯᒪᓐ᙮ ᐊᐎᔭ ᑲᔦ ᐐᐎᒡ ᑳᐐᓐ ᐅᑲᐌᐱᓈᓰᓐ᙮

ᒦᓇᐙ ᐃᑭ ᐯᑳᓂᓯᐙᒡ ᓃᓐ ᐅᐅᐌ ᓂᑎᓈᒃ – ᑳᐐᓐ ᐐᓐ ᑳᑎᐯᒋᑫᒡ ᒪᔮ ᐅᑮᐐᑕᓰᓐ: ᐊᐊ ᐅᑌᐺᑕᒧ ᐊᔮᐙᒡ ᐁᑌᐺᑕᓯᓂᒃ ᐐᐗᓐ, ᑮᔥᐱᓐ ᐃᓀᑕᒥᓂᒡ ᐱᓵᓂᑯ ᒋᐐᒌᐎᑯᒡ, ᑳᐐᓐ ᐅᑲᐌᐱᓈᓰᓐ ᐃᓂ ᐐᐗᓐ᙮

ᑲᔦ ᐊᐊ ᐃᑴ ᑳᐃᔑᐅᓈᐯᒥᒡ ᐁᑳ ᐁᑌᐺᑕᓯᓂᒃ, ᑮᔥᐱᓐ ᐃᓀᑕᒥᓂᒡ ᒋᐐᒌᐎᑯᒡ, ᑳᐐᓐ ᐅᑖᐌᐱᓈᓰᓐ᙮

ᐃᓇᔥᑫ ᐋᓃᔥ ᐊᐊᐌ ᐅᓈᐯᒥᒫ ᑳᑌᐺᑕᓯᒃ, ᑲᔦ ᐐᓐ ᐃᓀᑖᑯᓯ ᐁᑎᐯᓂᒥᑯᒡ ᑭᔐᒪᓂᑑᓐ ᐁᐐᐎᒡ ᐃᑴᐗᓐ ᐁᐅᑌᐺᑕᒧᐎᓂᓂᒡ᙮ ᔑᑾ ᑲᔦ ᐃᑴ ᑳᐅᑌᐺᑕᒧᐎᓂᓯᒃ, ᐅᓈᐯᒥᒡ ᐃᑕᔥ ᐅᑌᐺᑕᒨᓐ, ᑲᔦ ᐐᓐ ᐃᓀᑖᑯᓯ ᐁᑎᐯᓂᒥᑯᒡ ᑭᔐᒪᓂᑑᓐ᙮ ᐃᓇᔥᑫ ᑮᔥᐱᓐ ᐅᐅᐌ ᐃᔑᓭᓯᓄᑭᐸᓐ, ᐃᑭ ᐅᓃᒑᓂᓯᒫᒃ ᑖᐱᔥᑰ ᑖᐃᓀᑖᑯᓯᐗᒃ ᐁᑎᐯᓂᒥᑯᓯᒀ ᑭᔐᒪᓂᑑᓐ᙮ ᐃᔑᓭ ᓴ ᑯ, ᒦ ᐃ ᐌᒋ ᐃᓀᑖᑯᓯᐙᒡ ᑫᐐᓇᐙ ᐁᑎᐯᓂᒥᑯᐙᒡ ᑭᔐᒪᓂᑑᓐ᙮

ᑮᔥᐱᓐ ᐃᑕᔥ ᑳᑌᐺᑕᓯᒃ ᐐᓇᑲᓈᒡ ᐃᓂ ᐐᑎᑫᒫᑲᓇᓐ ᑳᑌᐺᑕᒥᓂᒡ, ᐱᓵᓂᑯ ᑕᒫᒑ᙮ ᑮᔥᐱᓐ ᐅᐅᐌ ᐃᔑᓭᒃ, ᐊᐊᐌ ᑳᓇᑲᓂᓐᒡ ᐃᔑᐸᑭᑎᓈ ᐋᓃᓂᑯ ᒋᐃᔑᒋᑫᒡ, ᐋᓃᓂᑯ ᐊᐊᐌ ᑫᒫ ᐃᓂᓂ, ᑫᒫ ᐃᑴ᙮ ᐋᓃᔥ ᑭᔐᒪᓂᑑ ᑭᑮᐃᔑᐊᑐᒥᑯᓈᓐ ᒥᓯᐌ ᑯ ᒋᑲᑴ ᒥᓄᐐᒌᑎᔭᕽ᙮

ᑮᓐ ᐅᑌᐺᑕᒨᑴ, ᐋᑎ ᑫᐅᒋᑭᑫᑕᒪᐸᓐ ᒋᐱᒫᒋᐊᒡ ᑭᓈᐯᒻ? ᑲᔦ ᑮᓐ ᐅᓈᐯᒥᒫ, ᐋᑎ ᑫᐅᒋᑭᑫᑕᒪᐸᓐ ᒋᐱᒫᒋᐊᒡ ᑭᐐᐤ?

ᐅᐅᐌ ᑕᔥ ᐐᓐ ᑭᑎᑰᒻ: ᐁᑕᔑᒡ ᐊᐎᔭ ᑕᓂ ᐃᔑᐱᒫᑎᓯ ᑳᐃᔑᒦᓂᑯᒡ ᑳᑎᐯᒋᑫᓂᒡ, ᑲᔦ ᑳᑮᐃᔑᐊᔮᐸᓐ ᐊᐲ ᑮᐊᑐᒥᑯᒡ ᐃᓂ ᑭᔐᒪᓂᑑᓐ᙮ ᒦ ᐅᐌ ᓃᓐ ᑳᐃᔑᐅᓇᑭᑕᒫᓐ ᒥᓯᐌ ᐁᑕᔑᐊᓇᒥᐋᕽ᙮

ᐊᐎᔭ ᐃᓂᓂ ᐋᔕ ᑳᑮ ᑭᑭᓇᐙᑕᔕᑫᔓᒡ ᑮᐊᑐᒥᑯᒡ ᑭᔐᒪᓂᑑᓐ, ᑳᐐᓐ ᐅᑖᑲᑴ ᐋᒋᑑᓰᓐ ᐅᑭᑭᓇᐙᒋᔓᑰᐎᓐ᙮ ᐊᐌᔥ ᑲᔦ ᐃᓂᓂ ᐁᑳ ᒪᔑ ᐁᑭᑭᓇᐙᑕᔕᑫᔣᓯᐎᓐᒡ ᐊᐲ ᐁᐊᑐᒥᓐᒡ, ᑳᐐᓐ ᒣᒬᒡ ᑖᑭᑭᓇᐙᑕᔕᑫᔣᓰ᙮

ᑳᐐᓐ ᐃᑯᑕᓄ ᐃᓀᑖᑾᓯᓅᓐ ᑫᒫ ᐁᑭᑭᓇᐙᑕᔕᑫᔓᓐᒡ ᐃᓂᓂ ᑫᒫ ᒋᑭᑭᓇᐙᑕᔕᑫᔣᓯᐎᓐᒡ᙮ ᒦ ᐃᐌ ᑳᑭᒋ ᐃᓀᑖᑾᒃ: ᐊᐎᔭ ᒋᓇᐃᑕᑭᐸᓐ ᑭᔐᒪᓂᑑᓐ ᐅᑎᓈᑯᓂᑫᐎᓂᓂ᙮

ᑲᑭᓇ ᐊᐎᔭ ᐯᔑᑾᓐ ᑕᐃᔑᐊᔮ ᐅᑎᔑᐃᑰᐎᓂᕽ ᑳᑮᐃᔑᐊᔮᒡ ᐊᐲ ᑳᐊᑐᒥᓐᒡ᙮

ᑮᓐ ᐃᓇ ᑭᑮᐊᓄᑮᐋᑲᓂᐤ ᐊᐲ ᑮᐊᑐᒥᑰᔭᓐ? ᑫᑯ ᐐᓐ ᐃᐃ ᐸᐹᐱᓯᔅᑫᑕᑫᓐ᙮ ᑮᔥᐱᓐ ᐃᑕᔥ ᐃᔑᓭᒃ ᒋᐸᑭᑎᓂᑰᔭᓐ, ᒦ ᐃ ᐅᑖᐱᓇᓐ᙮

ᐊᐎᔭ ᓴ ᑯ ᐊᓄᑮᐋᑲᓐ ᐁᑎᓄᐎᒡ ᐊᐲ ᑮᐊᑐᒥᑯᒡ ᑳᑎᐯᒋᑫᓂᒡ, ᑳᑎᐯᒋᑫᒡ ᐅᑖᐸᐙᑲᓇᓐ ᐃᓀᑖᑯᓯ᙮ ᐯᔑᑾᓐ ᐃᑕᔥ ᐊᐎᔭ ᑳᐊᐗᑳᓂᐎᓯᒃ ᐊᐲ ᑮᐊᑐᒥᑯᒡ Xᑕᓐ, ᓅᑯᒻ ᐃᑕᔥ ᐅᑑᑕᓄᑮᐊᑲᓂᒥᑰᓐ ᐃᓂ Xᑕᓐ᙮

ᑭᔐᒪᓂᑑ ᑭᑮᑎᐸᐅᑯᐙ ᒋᑎᐯᓂᒥᓀᒃ᙮ ᑳᐐᓐ ᑭᑲᑎᐯᓂᒥᑯᓰᐙᒃ ᐃᓂᓂᐗᒃ᙮

ᓃᒋᐅᑌᐺᑕᒨᒃ! ᑲᑭᓇ ᐊᐎᔭ ᐯᔑᑾᓐ ᐅᑖᐊᓂ ᐃᔑᐐᒌᐙᓐ ᐃᓂ ᑭᔐᒪᓂᑑᓐ ᑖᐱᔥᑰ ᑳᑮᐃᔑᐊᔮᒡ ᐊᐲ ᑳᐊᑐᒥᑯᒡ᙮

ᔑᑾ ᑳᐃᔑᑲᑴᒋᒥᔦᒃ ᐋᓃᓐ ᑫᐃᔑᒋᑫᐙᒡ ᐅᔥᑭ ᐃᑴᐗᒃ ᒪᔑ ᑳᐸᐹᒣᓂᒫᓯᐎᑣ᙮ ᑳᐐᓐ ᓂᑕᔮᐙᓰᓐ ᐊᒪᓐᒡ ᑳᐃᓈᑯᓂᑫᑯᐸᓀᓐ ᑳᑎᐯᒋᑫᒡ᙮ ᑭᐐᑕᒪᐎᓂᓂᒻ ᐃᑕᔥ ᓃᓐ ᐁᓀᑕᒫᓐ᙮ ᑳᑎᐯᒋᑫᒡ ᐅᔕᐌᒋᑫᐎᓂᕽ ᓂᑑᒋ ᐃᓀᑖᑯᔅ ᒋᑌᐺᔦᓂᒥᑰᔮᓐ᙮

ᒣᒀ ᓴ ᑯ ᓅᑯᒻ ᒥᑯᔥᑳᒋᐃᐌᐎᓐ ᐁᐊᔮᒪᑲᒃ, ᓂᑎᓀᑕᒻ ᐁᐅᓂᔑᔑᕽ ᐊᐎᔭ ᐯᔑᑾᓂᑯ ᒋᐃᔑᐊᔮᐸᓐ᙮

ᑭᐐᐤ ᐃᓇ? ᑳᐐᓐ ᑭᑖᑲᑴ ᐸᑫᐎᓈᓰ᙮ ᑫᔮᐱ ᓇ ᑭᐸᐯᔑᒃ? ᑳᐐᓐ ᑭᑖ ᐊᑐᓀᐙᓰ ᑫᐐᐎᔭᓐ᙮

ᑮᔥᐱᓐ ᐃᑕᔥ ᒫᓄ ᐊᓂᐐᐎᔭᓐ, ᑳᐐᓐ ᐃᐃᒫ ᑭᑎᔑᐗᓂᑑᑕᓰ᙮ ᑮᔥᐱᓐ ᑲᔦ ᐅᔥᑭ ᐃᑴ ᐐᑎᑫᒡ, ᑳᐐᓐ ᑫᐐᓐ ᐗᓂᑑᑕᓰ᙮ ᓇᐗᒡ ᐃᑕᔥ ᓂᑖᒥᓉᑕᒻ ᒋᑭᒋᐎᓂᓇᑰᒃ ᒋᐊᓂᒣᒀᔥᑲᓯᐌᒃ ᐃᐃᐌ ᓴᓇᑭᓯᐎᓐ ᑳᓂᐅᑎᑕᒧᐙᒡ ᐅᐐᑎᑫᒃ᙮

ᒦ ᐅᐌ ᐁᑕᒫᓐ, ᓃᒋᐅᑌᐺᑕᒨᒃ! ᑳᐐᓐ ᑫᔮᐱ ᑭᓉᔥ ᑕᑕᐙᓯᓅᓐ᙮ ᒦ ᐅᒫ ᐊᑯᓈᒃ ᐃᑭᐌᓂᐗᒃ ᑳᐐᐎᐙᒡ ᑕᐃᔑᐱᒫᑎᓯᐗᒃ ᑖᐱᔥᑰ ᐁᐅᑕᒥᐃᑯᓯᒀ ᐐᐎᐙᐞ᙮

ᐃᑭᔥ ᑲᔦ ᑳᒪᐎᐙᒡ ᐁᑳ ᒋᓈᐃᑯᓯᒀ ᑲᔥᑫᑕᒧᐎᓐ᙮ ᐃᑭᐌᔥ ᑲᔦ ᑳᒌᑫᑕᒧᐙᒡ ᐁᑳ ᒋᐅᑕᒥᐃᑯᓯᒀ ᐃᐌ ᑳᐅᒋᒥᓉᑕᒧᐙᒡ᙮ ᐃᑭ ᑕᔥ ᑲᔦ ᑳᐊᑖᐌᐙᒡ ᑫᑰᓇᓐ ᑳᐐᓐ ᐅᑖᐅᓵᒣᑕᓰᓈᐙ, ᑖᐱᔥᑰ ᐁᑎᐯᑕᓯᒀ ᑫᑰᓐ ᑖᐃᓀᑕᒨᒃ᙮

ᐃᑭᐌᓂᐗᒃ ᑲᔦ ᐊᑮᐎ ᑫᑰᓇᓐ ᑳᐊᓄᑳᑕᒧᐙᒡ, ᑳᐐᓐ ᐅᑖᐅᓵᒦᑲᓰᓈᐙ᙮ ᐅᐅᐌ ᐋᓃᔥ ᑳᐃᔑᓈᑾᒃ ᐅᐅ ᐊᑭ, ᑳᐐᓐ ᑭᓉᔥ ᑕᓂᐊᔮᒪᑲᓯᓅᓐ᙮

ᑭᓇᑕᐌᓂᒥᓂᓂᒻ ᐁᑳ ᒥᑯᔥᑳᑌᑕᒧᐎᓐ ᒋᐊᔮᓯᐌᒃ᙮ ᒪᔑ ᐊᐎᔭ ᐁᐐᑎᑫᓯᒃ ᐅᑕᔮᒀᒣᑖᓐ ᑳᐃᓀᑕᒥᓂᒡ ᐃᓂ ᑳᑎᐯᒋᑫᓂᒡ, ᐋᓃᓐ ᑫᐃᔑᓇᐁᑕᒥᐋᒡ᙮

ᐊᐊᐌ ᓴ ᑳᐐᑎᑫᒡ ᑲᔦ ᐅᐱᒣᑖᓐ ᐊᑮᐎ ᐊᓄᑮᐎᓐ, ᐁᐐᑲᑴ ᓇᓇᐁᑕᒥᐋᒡ ᐃᓂ ᐐᐗᓐ,

ᒦ ᐃᐌ ᑳ ᐋᔮᔕᐌᑕᕽ᙮ ᔑᑾ ᑲᔦ ᐊᐌ ᑳᐅᓈᐯᒥᓯᒃ ᑫᒫ ᑲᔦ ᑭᒋᐅᔥᑭᓃᑭᑴ ᓇᐗᒡ ᐅᑕᔮᒀᒣᑕᒪᐙᓐ ᑳᑎᐯᒋᑫᓂᒡ ᐅᑎᔑᐊᓄᑮᐎᓂᓂ, ᒥᓯᐌ ᐁᐐᐸᑭᑎᓂᑎᓱᑲᑕᐙᒡ ᐐᔭᐎᕽ ᑲᔦ ᐅᑕᒑᑯᕽ᙮ ᐊᐊ ᑕᔥ ᐐᓐ ᑳᐅᓈᐯᒥᒡ ᐅᑕᔮᒀᒣᑖᓐ ᐊᑮᐎ ᐊᓄᑮᐎᓐ ᐁᐐᓇᓇᐁᑕᒥᐋᒡ ᐅᓈᐯᒪᓐ᙮

ᑭᐐᑲᑴ ᐐᒋᐃᓂᓂᒻ ᐃᐌ ᑳᐅᒋ ᐃᑭᑐᔮᓐ᙮ ᑳᐐᓐ ᑭᐐᒥᒋ ᐅᒋᐃᓯᓅᓂᓂᒻ, ᐃᐃᐌᔥ ᑳᑾᔭᑯᓈᑾᒃ ᒋᑑᑕᒣᒃ ᑲᔦ ᒥᓯᐌ ᒋᐊᓄᑲᐌᒃ ᑳᑎᐯᒋᑫᒡ, ᐁᑳ ᐸᑳᓐ ᑫᑰᓐ ᒋᐅᑕᒣᑕᒥᐃᑯᓯᐌᒃ᙮

ᔑᑾ ᐊᐎᔭ ᐅᑖᓂᓯᒡ ᐁᐅᔥᑭᓃᑭᑴᐎᓂᒡ, ᑮᔥᐱᓐ ᐁᓀᑕᕽ ᐁᑾᔭᑯᓈᑾᓯᓂᓂᒃ ᑳᑑᑕᐙᒡ ᐁᐐᑎᑫᐋᓯᒃ ᐋᔕ ᐁᑌᑕᓱᐱᐴᓉᓂᒡ ᒋᑮᐐᑎᑫᓂᐸᓐ, ᑮᔥᐱᓐ ᐃᔑᐊᑕᐌᑖᑾᒃ, ᐱᓵᓂᑯ ᐅᑲᑑᑕᐙᓐ ᐁᔑᐊᑕᐌᑕᕽ: ᐅᑲᐐᑎᑫᐋᓐ᙮ ᑳᐐᓐ ᐗᓂ ᐃᔑᒋᑫᓰ ᐁᐐᑎᑫᐋᒡ᙮

ᐊᐎᔭ ᑕᔥ ᐁᐋᔩᑌᑕᕽ ᐁᑳ ᒋᐐᑎᑫᐋᓯᒃ ᐃᓂ ᐅᔥᑭᓃᑭᑴᓐ, ᐐᓐ ᐃᑯ ᐁᐊᔨᓀᑕᕽ, ᐁᑳ ᐊᐎᔭ ᐁᐃᔑᐃᑯᓯᒃ, ᑲᔦ ᐐᓐ ᐁᑲᔥᑭᑑᒡ ᐁᔑᐊᑕᐌᑕᕽ, ᒦ ᐃ ᒋᐅᓂᔑᔑᓂᓂᒃ ᐁᐐᑎᑫᐋᓯᒃ᙮

ᒦ ᓴ ᑯ ᒥᓄᑑᑕᒻ ᐊᐊᐌ ᑳᐐᑎᑫᐋᒡ ᐃᓂ ᐅᔥᑭᓃᑭᑴᓐ᙮ ᐊᐊᐌ ᑕᔥ ᑲᐐᑎᑫᐋᓯᒃ ᓇᐗᒡ ᑕᒥᓄᑑᑕᒻ᙮

ᔑᑾ ᐊᐌ ᐃᑴ ᑳᐅᓈᐯᒥᒡ ᐃᓀᑖᑯᓯ ᐃᒫ ᒋᐊᔭᔮᒡ ᐃᓂ ᐅᓈᐯᒪᓐ ᑫᐊᑯᐱᒫᑎᓯᓂᒡ᙮ ᑮᔥᐱᓐ ᓂᐳᓂᒡ ᐅᓈᐯᒪᓐ, ᒦ ᐃ ᐁᐸᑭᑎᓂᓐᒡ ᐱᑯ ᐊᐎᔭᓐ ᒦᓇᐙ ᒋᐅᓈᐯᒥᒡ ᐁᔑᐊᑕᐌᓂᒫᒡ᙮ ᒦ ᐁᑕ ᐅᑌᐺᑕᒨᓐ ᒋᐐᑎᑫᒫᒡ᙮

ᓇᐗᒡ ᐃᑕᔥ ᑕᒥᓉᑕᒻ ᐯᔑᑾᓂᑯ ᒋᐃᔑᐊᔮᐸᓐ᙮ ᒦ ᐃᐌ ᓃᓐ ᐁᓀᑕᒫᓐ᙮ ᓂᑎᓀᑕᒻ ᐃᑕᔥ ᑫᓃᓐ ᐌᒋᑮᑭᑐᔮᓐ ᐁᑭᑭᔥᑲᐎᒪᒃ ᑭᔐᒪᓂᑑ ᐅᑕᒑᑾᓐ᙮

ᔑᑾ ᐃᐌ ᑳᑮᐃᔑᐲᐊᒪᐎᔦᒃ, ᐋᓃᓐ ᐁᓀᑖᑾᒃ ᐃᐃ ᒦᒋᒻ ᐁᐸᑭᑎᓇᒪᐎᑣ ᒪᓂᑑᑳᓇᒃ: ᑌᐺᒪᑲᓐ ᐅᐅᐌ ᐃᑭᑐᐎᓀᔅ: ᑲᑭᓇ ᑭᑕᔮᒥᓐ ᑭᑫᑕᒧᐎᓐ᙮ ᐅᐌ ᑕᔥ ᐃᔑᑭᑫᑕᒧᐎᓐ ᐅᑭᑌᓂᒧᐃᑯᓐ ᐊᐎᔭ ᐁᐊᔮᒡ᙮ ᐊᐊᐌ ᑕᔥ ᓵᑭᐃᑎᐎᓐ ᑳᐋᐸᒋᑑᒡ, ᐅᑲᑴ ᒪᔥᑲᐎᑭᐋᓐ ᐅᐐᒋᐅᑌᐺᑕᒨᓐ᙮

ᐊᐎᔭ ᓂᑭᑫᑖᓐ ᑫᑰᓐ ᑳᐃᓀᑕᕽ, ᑳᐐᓐ ᓴ ᑌᐺ ᑫᑰᓐ ᐅᑌᑭᑫᑕᓰᓐ ᐃᐃ ᑳᐃᔑᐊᑕᐌᑖᑯᓯᒡ᙮

ᐊᐎᔭ ᑕᔥ ᑳᓵᑭᐋᒡ ᑭᔐᒪᓂᑑᓐ, ᐅᑭᑫᓂᒥᑰᓐ᙮

ᐃᐃᐌᔥ ᒦᓇᐙ ᐁᓀᑖᑾᒃ ᐁᒦᒋᓈᑳᑌᒃ ᑫᑰᓐ ᑳᑮᐸᑭᑎᓇᒪᐎᑣ ᒪᓂᑑᑳᓇᒃ: ᑭᑭᑫᑖᒥᓐ ᐃᐃᐌ ᐁᔑᐋᐸᑎᓯᒡ ᒪᓂᑑᑳᓐ᙮ ᑳᐐᓐ ᑌᐺ ᐊᔮᓰ ᐊᐎᔭ᙮ ᑭᑭᑫᓂᒫᓈᓐ ᐯᔑᒃ ᐁᑕ ᐁᐊᔮᒡ ᑭᔐᒪᓂᑑ᙮

ᐋᓇᐐᓐ ᐁᐊᔮᐙᒡ ᒪᓂᑑᒃ ᑳᐃᓂᑣ ᑮᔑᑯᕽ ᑫᒫ ᐊᑮᕽ ᐁᑕᓀᑖᑯᓯᐙᒡ, ᑲᔦ ᐋᓇ ᐹᑌᓄᐙᒡ ᒪᓂᑑᒃ ᑲᔦ ᐅᑎᐯᒋᑫᒃ ᑳᐃᓂᑣ,

ᑮᓇᐎᓐᑦ ᐃᑕᔥ ᐯᔑᒃ ᐁᑕ ᐊᔮ ᑭᔐᒪᓂᑑ, ᒦ ᐊᐌ ᑳᐅᔫᓯᒥᓐᒡ, ᑲᑭᓇ ᑫᑰᓐ ᑳᑮᐅᔑᑑᒡ᙮ ᑲᔦ ᐐᓐ ᑭᑑᒋᐱᒫᑎᓯᒥᓐ ᒋᐊᓄᑮᑕᐗᕽ᙮ ᔑᑾ ᑲᔦ ᐯᔑᒃ ᐁᑕ ᐊᔮ ᑳᑎᐯᒋᑫᒡ, ᒦ ᐊᐌ ᒋᓴᔅ X᙮ ᒦ ᐅᔕ ᐊᐌ ᑲᑭᓇ ᑫᑰᓐ ᑳᑮᐅᒌᒪᑲᒃ ᑳᑮᐅᔑᒋᑳᑌᒃ, ᔑᑾ ᐐᓐ ᐊᐊᐌ ᑭᐱᒫᑎᓯᐎᓂᓈᓐ ᑳᐅᒌᒪᑲᒃ᙮

ᑳᐐᓐ ᑕᔥ ᑲᑭᓇ ᐊᐎᔭ ᐅᑕᔮᓰᓐ ᐅᐅ ᑭᑫᑕᒧᐎᓐ᙮ ᐋᓃᔥ ᐋᓂᑕ ᐊᐎᔭᒃ ᐅᓇᓇᒫᔮᐸᑖᓈᐙ ᒪᓂᑑᑫᐎᓐ, ᐲᓂᔑᑯ ᓅᑯᒻ ᐊᐎᔭ ᐁᒦᒋᒡ ᑫᑰᓐ, ᒦ ᐃ ᐁᔑᓇᕽ ᑌᐺ ᐁᑎᐯᑕᒥᓂᒡ ᐃᓂ ᒪᓂᑑᑳᓇᓐ᙮ ᒦᑕᔥ ᐁᑾᔭᑴᓂᑎᓱᓯᒃ ᑳᐅᒋᒫᓀᓂᑎᓱᒡ ᐃᐃ ᐁᑮᒦᒋᒡ᙮

ᐃᐃᐌ ᑕᔥ ᒦᒋᒻ ᐁᔑᐋᐸᒋᑑᔭᕽ, ᑳᐐᓐ ᐅᐅᐌ ᑭᑎᔑᐃᑯᓰᒥᓐ ᐊᐗᔑᒣ ᒋᒥᓄᐐᒌᐗᕽ ᑭᔐᒪᓂᑑ᙮ ᑮᔥᐱᓐ ᒪᓈᒦᒋᔭᕽ ᑳᐐᓐ ᐃᐃᒫ ᐊᐗᔑᒣ ᑭᑲᑕᐸᓭᑖᑯᓯᓰᒥᓐ᙮ ᔑᑾ ᒦᒋᔭᕽ ᑳᐐᓐ ᐊᐗᔑᒣ ᑭᑲᒥᓄᐃᔑᐌᐱᓯᓰᒥᓐ᙮

ᑮᓇᐙ ᑕᔥ ᐋᓇᐐᓐ ᐁᐸᑭᑎᓂᑰᔦᒃ ᐋᓃᓂᑯ ᐁᔑᐊᑕᐌᑕᒣᒃ, ᐊᔮᒀᒥᓯᔪᒃ! ᒫᑭᔖ ᑫᑰᓐ ᐁᑑᑕᒣᒃ ᑖᑮᐅᒋ ᐱᓱᑫᔑᓐ ᐊᐎᔭ ᑎᓄ ᑳᒪᔥᑲᐎᑌᐺᑕᓯᒃ᙮

ᑮᓐ ᑭᑕᔮᓐ ᐃᐃᐌ ᑭᑫᑕᒧᐎᓐ, ᐸᑳᓐ ᐃᑕᔥ ᐊᐎᔭ ᑳᑾᔭᑴᑕᓯᒃ ᐃᐃ ᐅᑎᔑᒋᑫᐎᓐ, ᑮᔥᐱᓐ ᐁᐙᐸᒥᒃ ᐃᐃᒫ ᒪᓂᑑᑫᐎᑲᒥᑯᕽ ᐁᑕᔑᐐᓯᓂᔭᓐ, ᑲᔦ ᐐᓐ ᒫᐐᓐ ᑕᐃᓀᑕᒻ ᐱᓵᓐ ᐃᑯ ᐃᒫ ᒋᐅᑕᒋᑫᐸᓐ ᐃᐃᐌ ᑳᑮᐸᑭᑎᓇᒪᐎᒥᓐᒡ ᒪᓂᑑᑳᓇᐞ?

ᒦᑕᔥ ᐃᐃ ᒋᐅᒋᓂᔑᐗᓈᒋᐃᑯᒡ ᐊᐊ ᑭᐐᒋᐅᑌᐺᑕᒧ ᐁᓃᓇᒥᓯᒡ, ᐅᓵᒻ ᐃᑯ ᐁᑮᓈᑯᑑᔭᓐ ᑭᑭᑫᑕᒧᐎᓐ᙮ ᒦ ᐅᔕ ᐊᐌ ᐯᔑᒃ ᑳᑮᓂᐴᑕᒫᑯᒡ Xᑕᓐ᙮

ᐅᐅᐌ ᑕᔥ ᐃᔑᒋᑫᔦᑭᐸᓐ, ᑭᑖᐗᓂᑑᑕᐙᐙ X, ᐋᓃᔥ ᑭᑎᔑᐗᓂᑑᑕᐙᐙᒃ ᑭᐐᒋᐅᑌᐺᑕᒨᒥᐙᒃ, ᐁᐗᑫ ᒫᓀᓂᑎᓱᐙᒡ ᐁᑾᔭᑴᑕᓯᒀ ᐅᑎᔑᒋᑫᐎᓂᐙ, ᐁᐃᔑᒫᓂᓭᐁᒀ᙮

ᒦ ᐅᐌ ᓃᓐ ᐁᓀᑕᒫᓐ: ᑮᔥᐱᓐ ᐊᐎᔭ ᒪᒋᑑᑕᒧᐃᑯᒡ ᐃᐃᐌ ᑳᒦᒋᓈᑌᒃ, ᓂᑖᐃᓀᑕᒻ ᐐᑳ ᒦᓇᐙ ᐐᔮᔅ ᒋᒦᒋᓯᐙᐹᓐ, ᐁᑳ ᒋᐸᑭᔑᒫᓯᐗᑭᐸᓐ ᐊᐊ ᓃᒋᐅᑌᐺᑕᒧ᙮

ᑳᐐᓐ ᐃᓇ ᓂᑎᐯᓂᑎᓱᓰ? ᑳᐐᓐ ᐃᓇ ᓂᑎᔑᓂᔕᐙᑲᓂᒥᑰᓰ? ᑳᐐᓐ ᐃᓇ ᓃᓐ ᓂᑮᐙᐸᒫᓰ ᐊᐌ ᒋᓴᔅ X ᑳᑎᐯᓂᒥᓇᕽ? ᑳᐐᓐ ᐃᓇ ᑮᓇᐙ ᑳᐅᒋᑌᐺᑕᒣᒃ ᐁᐊᓄᑮᑕᐗᒃ ᑳᑎᐯᒋᑫᒡ?

ᐋᓇᐐᓐ ᐸᑳᓐ ᐊᐎᔭ ᐃᔑᐅᑖᐱᓂᓯᒀ ᒋᐃᔑᓂᔕᐙᑲᓂᐎᔮᓐ, ᑮᓇᐙ ᐁᓂᐌᒃ ᑭᑎᓀᓂᒥᒻ, ᐋᓃᔥ ᑮᓇᐙ ᑳᑎᐯᒋᑫᒡ ᐁᐐᒌᐌᒃ ᐅᒋᑭᑫᒋᑳᑌ ᐁᐃᔑᓂᔕᐙᑲᓂᐎᔮᓐ᙮

ᐊᐲ ᑯ ᐁᑲᑴ ᓈᓈᑲᒋᐃᐙᒡ ᐊᐎᔭᒃ, ᐊᒦ ᐅᐌ ᐁᔑᓇᑴᑕᒫᓐ:

ᑳᐐᓐ ᐃᓇ ᓂᑎᓇᑭᓱᓰ ᐅᐅ ᑳᔑᐊᓄᑮᑕᒫᑫᔮᓐ ᒋᐅᒋᐊᔕᒥᑰᔮᐹᓐ?

ᑳᐐᓐ ᐃᓇ ᓃᓐ ᓂᑎᓇᑭᓱᓰ ᒋᓈᐱᒋᑫᔮᓐ ᑳᑑᑕᒧᐙᒡ ᐃᑭ ᑯᑕᒃ ᐃᔑᓂᔕᐙᑲᓇᒃ ᑲᔦ ᑳᑎᐯᒋᑫᒡ ᐐᒋᑭᐌᔭᐞ, ᑲᔦ ᐐᓐ ᐲᑕᕒ ᑳᑑᑕᕽ? ᑳᐐᓐ ᐃᓇ ᑲᔦ ᓃᓐ ᐯᔑᑾᓐ ᓂᑖᐸᐹᒥ ᐐᒌᐙᓰᐸᓐ ᐅᑌᐺᑕᒨᑴ ᐐᐎᔮᐹᓐ ᑫᐐᓐ ᒋᐊᔕᒥᑎᐸᓐ?

ᑯᒫ ᓃᓇᐎᓐᑦ ᐁᑕ ᐹᕒᓇᐸᔅ ᐃᑕᐙ ᐁᐊᓄᑮᑕᒫᓱᔮᕽ ᒋᐊᔕᑎᓱᔮᕽ?

ᐊᐌᓀᓐ ᑎᐱᓇᐌ ᑫᐅᑖᒋᐃᑎᓱᐸᓐ ᐁᔑᒫᑲᓂᔒᐎᒡ? ᐊᐌᓀᓐ ᐊᐊ ᑭᑎᑫᐎᓂᓂ ᑫᐊᒨᒥᓀᓯᑭᐸᓐ ᑎᐱᓇᐌ ᐅᔔᒥᓂᑭᑎᑫᐎᓂᕽ? ᐊᐌᓀᓐ ᐊᐊᐌ ᐅᑲᓇᐎᒫᓇᒑᓂᔑᐌ ᑫᐋᐸᒋᑑᓯᑭᐸᓐ ᐃᐃ ᒎᒎᔖᐴᓂ ᐐᓐ ᐃᐃᒫ ᐁᐅᑎᓇᕽ ᐅᒫᓇᒑᓂᔑᒥᕽ?

ᑳᐐᓐ ᐐᓐ ᒣᒬᒡ ᐃᓂᓃᓈᕽ ᓂᑲᐅᑎᓇᓰᓐ ᐃᑭᑐᐎᓐ᙮ ᐋᓃᔥ ᐯᔑᑾᓐ ᐃᑭᑑᒪᑲᓐ ᑫᑌᐃᓈᑯᓂᑫᐎᓐ᙮

ᒦ ᐃᐌ ᐁᔑᐲᐃᑳᑌᓂᒃ ᒨᓯᔅ ᐅᑎᓈᑯᓂᑫᐎᓐ: ᑫᑯ ᑭᐱᑑᓀᐱᓈᑫᓐ ᐊᐊ ᐱᔑᑭ ᐁᐸᐎᔥᑲᐙᒡ ᐸᑴᔑᑲᓇᓐ, ᐃᑭᑑᒪᑲᓐ᙮ ᑳ ᒫᐐᓐ ᒪᔮ ᐱᔑᑭᐗᐞ ᐁᓵᑭᐋᒡ ᑳᐅᒋ ᐃᑭᑐᒡ ᑭᔐᒪᓂᑑ᙮

ᑳᐐᓐ ᐃᓇ ᑌᐺ ᑮᓇᐎᓐᑦ ᑳᑮᐅᒋ ᐃᑭᑐᒡ? ᑫᒋᓈᒡ ᑮᓇᐎᓐᑦ ᑮᐅᒋᐅᔑᐲᐃᑳᑌ᙮ ᐃᓇᔥᑫᔥ ᐊᐌ ᑭᑎᑫᐎᓂᓂ ᑳᐱᑭᔥᑲᑲᒥᑭᐱᒋᑫᒡ, ᑲᔦ ᐲᓂᔥ ᐊᐌ ᑳᐸᐎᔥᑭᑫᒡ, ᑲᑭᓇ ᑫᑰᓐ ᑕᐃᔑᐊᓄᑮᐗᒃ ᐁᐲᑑᐙᒡ ᐃᐃ ᐊᐲ ᑫᐅᑕᒋᑫᐙᒡ᙮

ᐃᓇᔥᑫ ᓃᓇᐎᓐᑦ ᐃᐃᐌ ᑳᐊᒑᑴᑖᑾᒃ ᓂᑮᑭᑎᑳᑖᒥᓐ ᐃᐃᒫ ᑳᔑᐊᔮᔦᒃ᙮ ᐅᓵᒻ ᐃᓇ ᑭᑖ ᓴᓇᑫᑖᒻ ᐱᒪᓂᔑᑫᔮᑭᐸᓐ ᑭᑕᑮᐎ ᑫᑰᓂᒥᐙᓐ ᒋᐐᒋᐃᑯᔮᑭᐸᓐ?

ᐯᑳᓂᓯᐙᒡ ᐅᐅᐌ ᐃᔑᑎᐯᓂᒥᓀᒀ, ᑳᐐᓐ ᐃᓇ ᓃᓇᐎᓐᑦ ᓇᐗᒡ ᓂᑎᓀᑖᑯᓯᓰᒥᓐ? ᑳᐐᓐ ᐃᑕᔥ ᓃᓇᐎᓐᑦ ᐃᐃᐌ ᓂᑮᐋᐸᒋᑑᓰᒥᓐ᙮ ᒫᓄ ᑕᔥ ᓂᑮᐃᓀᑖᒥᓐ ᑲᑭᓇ ᑫᑰᓐ ᒋᐱᒥᐎᑑᔮᕽ, ᐁᑳ ᑫᑰᓐ ᒋᑭᐱᔥᑲᓯᐙᕽ ᐃᐌ ᐅᒥᓍᒋᒧᐎᓐ X᙮

ᑫᒋᓈᒡ ᑭᑭᑫᑖᓈᐙᑐᒃ, ᐊᐎᔭᒃ ᑭᒋᐊᓇᒥᐁᐎᑲᒥᑯᕽ ᑳᑕᓇᓄᑮᐙᒡ, ᐃᐃᒫ ᐅᑕᒋᑫᐗᒃ᙮ ᐃᑭ ᑕᔥ ᑲᔦ ᑳᐸᒥᓇᒧᐙᒡ ᑳᐃᔑᐸᑭᑎᓂᑫᕽ, ᐸᑴᓇᒪᐙᐗᒃ ᐸᑭᑎᓂᑫᐎᓂᕽ ᒋᐅᒋᐐᓯᓂᐙᒡ᙮

ᒦ ᑯ ᐯᔑᑾᓐ ᑳᑎᐯᒋᑫᒡ ᐅᑮᐃᓇᑑᓐ ᐃᐃᐌᓂᐗᐞ ᑳᐐᑕᒫᑫᓂᒡ ᐃᐃ ᒥᓍᒋᒧᐎᓐ ᐃᐃᒫ ᒋᐅᑖᑎᓯᓂᐸᓐ᙮

ᐅᓄᐌᓂᐗᓐ ᐃᑕᔥ ᑳᐃᓇᑌᑭᓐ, ᑳᐐᓐ ᓃᓐ ᓂᑮᐋᐸᒋᑑᓰᓇᓐ᙮ ᑳᐐᓐ ᑲᔦ ᓅᑯᒻ ᓂᑑᒋ ᐃᔑᐲᐊᓰᓐ ᒋᐅᑖᐱᓇᒫᓱᔮᓐ ᐅᐅ ᑳᐃᓇᑌᒃ ᒋᐐᒋᐃᑯᔮᓐ᙮ ᓇᐗᒡ ᓂᑖᓂᑉ ᐊᐲᒡ ᐊᐎᔭ ᐊᓂᔖ ᐃᑭᑐ ᒋᐃᔑᐸᓐ ᐅᐅ ᑳᔑᑭᒋ ᐃᓀᑕᒫᓐ᙮

ᐋᓇᐐᓐ ᐃᐃ ᐁᒥᓍᒋᒧᔮᓐ, ᑳᐐᓐ ᓂᑕᔮᓰᓐ ᑫᐅᒋᒪᒦᒀᓱᔮᐹᓐ᙮ ᐃᓇᔥᑫ ᓂᑕᐲᒋ ᐊᑕᐌᓂᒥᑰ ᒦ ᐃᐌ ᒋᑑᑕᒫᓐ ᐃᐃ ᑳᐃᑰᔮᓐ᙮ ᑕᑯᑖᓀᑖᑾᓐ ᐃᐃ ᑫᐃᔑᓭᔮᐹᓐ ᐐᑕᒫᑫᓯᐙᓐ ᒥᓍᒋᒧᐎᓐ᙮

ᐃᔑᐊᓄᑮᔮᐹᓐ ᓃᓐ ᐃᑯ ᑳᔑᐅᓀᑕᒫᓐ ᑖᐱᔥᑰ ᐊᓄᑮᐎᓐ ᐁᐅᑖᐱᓇᒫᓐ, ᓂᑖᐃᓀᑕᒻ ᒋᐅᑎᓯᔮᓐ᙮ ᐅᐅᐌ ᑕᔥ ᑳᑑᑕᒫᓐ ᓂᓇᑕᐌᑖᑯᔅ᙮ ᐋᓃᔥ ᓂᑮᐅᐸᐹᒥᓯᐎᓂᐃᒃ ᑭᔐᒪᓂᑑ᙮

ᐌᑯᓀᓐ ᐃᑕᔥ ᐃᐃ ᑫᑎᐸᐊᒫᑰᔮᓐ? ᒦ ᐃᐌ ᒫᓂᑰᔮᓐ, ᒋᐐᑕᒫᑫᔮᓐ ᐃᐃ ᒥᓍᒋᒧᐎᓐ, ᑫᑰᓐ ᐁᐅᑎᓯᓯᐙᓐ, ᑲᔦ ᓴ ᑯ ᐁᐋᐸᒋᑑᓯᐙᓐ ᓂᐐᒋᐃᑰᐎᓐ ᑳᐃᓇᑕᒫᑰᔮᓐ, ᐃᐌ ᒥᓍᒋᒧᐎᓐ ᐁᐸᐹᒥᓰᓄᑕᒫᓐ ᑫᐅᒋᒦᓂᑰᔮᐹᓐ᙮

ᑳᐐᓐ ᐊᐎᔭ ᐃᓂᓂ ᓂᑎᐯᓂᒥᑯᓰ᙮ ᓂᑎᔑᐃᑎᔅ ᐃᑕᔥ ᑲᑭᓇ ᐊᐎᔭᒃ ᒋᐅᑕᓄᑮᐋᑲᓂᒥᐙᒡ, ᐊᒦ ᐃᐌ ᐊᐗᔑᒣ ᓃᐱᐗᐞ ᒋᑲᔥᑭᐊᒀ ᒋᑌᐺᑕᒧᐙᒡ᙮

ᒣᒀ ᐁᐐᒌᐗᒀ ᒎᐗᒃ, ᒦ ᐃᐌ ᓂᑎᔑᐱᒫᑎᔅ ᒋᐃᔑᑲᔥᑭᐊᒀ᙮ ᐋᓇᐐᓐ ᓃᓐ ᒨᓯᔅ ᐅᑎᓈᑯᓂᑫᐎᓐ ᐁᑎᐯᓂᒥᑯᓯᐙᓐ, ᑲᔦ ᓃᓐ ᓂᑎᔑᐱᒫᑎᔅ ᒋᑲᔥᑭᐊᒀ ᑳᑎᐯᓂᒥᑯᐙᒡ᙮

ᔑᑾ ᐯᔑᑾᓐ ᐃᑭ ᑳᐋᐸᒋᑑᓯᒀ ᒎᐗᐞ ᐅᑎᓈᑯᓂᑫᐎᓂᓂ, ᐐᒌᐗᒀ, ᑫᓃᓐ ᓂᑎᔑᐱᒫᑎᔅ, ᐁᑳ ᑫᓃᓐ ᐁᐋᐸᒋᑑᓯᐙᓐ ᐃᐃ ᐃᓈᑯᓂᑫᐎᓐ, ᒦ ᐃ ᓇᐗᒡ ᒋᑲᔥᑭᐊᒀ᙮ ᑳᐐᓐ ᓂᑎᑭᑐᓰ ᐁᑲᓇᐌᑕᓯᐙᓐ ᑭᔐᒪᓂᑑ ᐅᑎᓈᑯᓂᑫᐎᓐ, ᐋᓃᔥ ᐊᐊ X ᓂᑎᐯᓂᒥᑯᐙᓐ ᐅᑎᓈᑯᓂᑫᐎᓐ᙮

ᑲᔦ ᐊᐎᔭᒃ ᑳᐗᑫᐎᓯᐙᒡ ᐅᑌᐺᑕᒧᐎᓂᐙᕽ ᐐᒌᐗᒀ, ᑲᔦ ᓃᓐ ᓂᑖᐸᒋᑕᒪᐙᒃ ᐅᑎᔑᐊᔮᐎᓂᐙ, ᒦ ᐃᐌ ᒋᐃᔑᑲᔥᑭᐊᒀ᙮ ᐋᓃᓂᑯ ᓂᑲᑴᑎᓄᐎᐃᑎᔅ ᑲᑭᓇ ᐊᐎᔭᒃ ᑳᑎᓄᐎᐙᒡ, ᐋᓂᑕ ᓴ ᑯ ᒋᐱᒫᒋᐊᒀ᙮ ᐌᑯᓀᓐ ᐃᑯ ᓂᑑᑖᓐ ᑫᐅᒋᑲᔥᑭᒋᑫᔮᓐ᙮

ᑲᑭᓇ ᑫᑰᓐ ᓂᑎᔑᒋᑫ ᒋᐸᐹᐐᑌᒃ ᐃᐃ ᒥᓍᒋᒧᐎᓐ, ᑲᔦ ᓃᓐ ᐃᐃᒫ ᒋᑕᑯ ᔕᐌᑖᑯᓯᔮᓐ᙮

ᑫᒋᓈᒡ ᑭᑭᑫᑖᓈᐙ ᐐᑲᑴᒋᑲᓂᑎᕽ, ᓃᐱᐗᐞ ᐊᐎᔭ ᐐᒋᐃᐌᐗᒃ ᐁᒫᒌᐸᐃᑎᐙᒡ᙮ ᐯᔑᒃ ᐃᑕᔥ ᐁᑕ ᑕᐸᑭᓈᑫ ᒋᑎᐸᐊᒪᐎᓐᒡ᙮ ᒦ ᐃᐌ ᑮᓇᐙ ᑾᔭᒃ ᑲᑴᐱᒥᐸᑑᒃ ᒋᐸᑭᓈᑫᔦᒃ᙮

ᔑᑾ ᑲᑭᓇ ᑳᑲᑴᒋᑲᔑᐌᒡ, ᒣᒀ ᐁᐅᔒᑖᐃᑎᓱᒡ, ᐌᐌᓂ ᑯ ᓈᑲᒋᑕᒫᓱ; ᒦ ᐹᓂᒫ ᑮᐸᑭᓈᑫᒡ ᒋᒦᓂᓐᒡ ᐅᐸᑭᓈᑫᐙᓄᒀᓐ ᐐᐸ ᑫᓂᔑᐗᓈᑕᓂᓂᒃ᙮ ᑮᓇᐎᓐᑦ ᐃᑕᔥ ᑭᑲᒦᓂᑰᒥᓐ ᐯᔑᒃ ᐐᑳ ᑫᓂᔑᐗᓈᑕᓯᓄᒃ᙮

ᒦ ᐃᐌ ᓃᓐ ᑳᐅᒋᑾᔭᑯᐸᑑᔮᓐ ᐌᑎ ᒋᓃᑳᓂᐅᒋᒋᓭᔮᓐ᙮ ᑖᐱᔥᑰ ᑲᔦ ᓂᑎᔑᐊᔮ ᐁᑲᑴᑕᑲᓀᔮᓐ᙮ ᑳᐐᓐ ᐊᓂᔖ ᓂᒥᒋᐸᐸᓇᑲᓀᓰ᙮

ᒦᑕᔥ ᑳᐅᒋᐸᐸᑭᑌᐊᒫᓐ ᐃᐃ ᓂᐐᔭᐤ ᒋᑲᔥᑭᑑᔮᓐ ᒥᓯᐌ ᒋ ᐃᔑᑎᐯᑕᒫᓐ᙮ ᑮᔥᐱᓐ ᐃᐃ ᐃᔑᒋᑫᓯᐙᓐ ᒫᑭᔖ ᑭᓅᑌᓭ ᓂᑖᐃᑰ, ᐋᓇᐐᓐ ᐯᑳᓂᓯᐙᒡ ᐁᑮᐊᑐᒪᒀ ᒋᑲᑴᒋᑲᔑᐌᐙᒡ᙮

ᓃᒋᐅᑌᐺᑕᒨᒃ! ᒨᔕᒃ ᑭᑖᒫᒥᑲᐎᒻ ᐃᑭᐌᓂᐗᒃ ᑳᑮᐱ ᐃᓈᑎᓯᐙᑯᐸᓀᓐ ᑭᑫᑌᐊᔭᐋᒥᓈᐸᓃᒃ ᑳᑮᐱᒥᓂᔕᐙᐙᒡ ᐃᓂ ᒨᓯᓲᓐ ᔒᐹ ᐗᑸᕽ ᐁᑮᐊᓂᐊᔮᐙᒡ ᐁᑮᑕᐱᓇᐎᔥᑳᑯᐙᒡ, ᑲᔦ ᐁᑮᓂᔖᐳᔥᑲᒧᐙᒡ ᐃᐃ ᑭᒋᑲᒻ᙮

ᐃᐃ ᐗᑶ ᐁᑮᐋᑲᐗᑰᑌᓂᒃ ᑲᔦ ᐃᐌ ᑭᒋᑲᒻ ᐁᑮᔖᐴᔥᑲᒧᐙᒡ, ᒦ ᑳᐃᓀᑖᑾᒃ ᐁᑮᓰᑲᐊᑖᓱᐙᒡ ᒨᓯᓯᕽ ᒋᐅᒋ ᑎᐯᑖᑯᓯᐙᒡ᙮

ᔑᑾ ᑲᑭᓇ ᐯᔑᑾᓐ ᑳᐊᒑᑯᐗᕽ ᒦᒋᒻ ᑮᐃᔑᐐᓯᓂᐗᒃ᙮

ᑲᔦ ᑲᑭᓇ ᐯᔑᑾᓐ ᑮᐃᔑᒥᓂᑴᐗᒃ ᐁᐊᒑᑯᐗᓂᓂᒃ ᒥᓂᑴᐎᓐ᙮ ᑮᐅᒋᒥᓂᑴᐗᒃ ᐃᒫ ᐁᐊᒑᑴᑖᑯᓯᒡ ᑭᑖᐱᑯᕽ ᑳᐱᒥᐐᒌᐎᑯᐙᒡ, ᐊᒦ ᐊᐌ ᑭᑖᐱᒃ X ᐁᐋᐎᒡ᙮

ᐋᓇᐐᓐ ᐃᑯ ᐃᐃᐌ ᑳᐃᔑᐌᐱᓯᐙᒡ, ᓃᐱᐗᐞ ᑳᑕᔑᐙᒡ ᑳᐐᓐ ᐅᑮᒥᓄᓇᐌᐋᓯᐙᐙᓐ ᑭᔐᒪᓂᑑᓐ᙮ ᐊᒦ ᐃᐌ ᑳᐅᒋ ᐹᐲᐌᓯᓂᓂᑭᓐ ᐐᔭᐎᐙᓐ ᐱᑾᑕᑲᒥᑳᕽ᙮

ᑲᑭᓇ ᑕᔥ ᐅᓄᐌᓂᐗᓐ ᑮᐃᔑᐌᐱᓯᐗᒃ ᑮᓇᐎᓐᑦ ᑭᑭᓇᐙᒋᒋᑲᓐ ᑫᐊᔮᒀᒫᐸᑕᒪᕽ, ᐁᑳ ᑫᑮᓇᐎᓐᑦ ᒋᒥᓴᐌᑕᓯᐗᕽ ᑳᐅᓂᔑᔑᓯᓄᒃ ᐐᓇᐙ ᐋᓂᓐᑦ ᑳᐃᔑᒋᑫᐙᒡ;

ᐁᑳ ᑲᔦ ᐅᔑᒋᑲᓇᒃ ᒋᒪᓂᑑᑳᑫᓯᐗᕽ, ᐐᓇᐙ ᐋᓂᓐᑦ ᑳᐃᔑᒋᑫᐙᒡ᙮ ᐋᓃᔥ ᒦ ᐅᐌ ᐁᔑᐲᐃᑳᑌᒃ: ᑮᐅᑾᐱᐗᒃ ᐁᑮᑭᒋᐐᓯᓂᐙᒡ ᑲᔦ ᐁᑮᐊᓂᒥᓂᑴᐙᒡ ᐲᓂᔥ ᐁᑮᐊᓂᐅᒻᐺᐃᔑᐊᔮᐙᒡ ᐁᑮᐊᓂᓃᒥᐙᒡ, ᐃᑭᑑᒪᑲᓐ᙮

ᑫᑯ ᑮᓇᐎᓐᑦ ᑭᑖᐱᔑᒀᒋᒋᑫᓰᒥᓐ ᑖᐱᔥᑰ ᐐᓇᐙ ᐋᓂᓐᑦ ᑳᑮᑑᑕᒧᐙᒡ᙮ ᒦ ᐊᐲ ᐯᔑᒃ ᐁᑮᔑᑲᒃ ᓃᔥᑕᓇᔑᓂᓯᓐ ᑕᓱ ᒥᑖᔂᒃ 23,000 ᑮᑕᔑᐗᒃ ᐁᑮ ᑫᑕᑣᐱᓀᐙᒡ ᐁᑮᓂᐳᐙᒡ᙮

ᑳᐐᓐ ᑲᔦ ᑭᑲ ᑲᑳᒋᐋᓯᐙᓈᓐ ᐊᐊᐌ ᑳᑎᐯᒋᑫᒡ, ᐋᓃᓐ ᒥᓂᒃ ᑫᐸᑭᑎᓂᓇᕽ ᒋᑑᑕᒧᐗᕽ, ᐐᓇᐙ ᐋᓂᓐᑦ ᑳᑮᐃᔑᒋᑫᐙᒡ᙮ ᑭᓀᐱᑰᐞ ᐅᑮᓂᓯᑯᐙᐞ᙮

ᑳᐐᓐ ᑲᔦ ᑭᑲᒥᑕᐎᒫᓯᐙᓈᓐ, ᐋᓂᓐᑦ ᐐᓇᐙ ᑳᑮᐃᔑᒋᑫᐙᒡ᙮ ᐅᑮᓂᔑᐗᓈᒋᐃᑯᐙᓐ ᐃᑕᔥ ᐃᓂ ᓂᔑᐗᓈᒋᐃᐌᐎ ᐁᒐᓬᐊᓐ᙮

ᐃᓇᔥᑫ ᑲᑭᓇ ᐅᓄᐌᓂᐗᓐ ᑮᐃᔑᐌᐱᓯᐗᒃ, ᐸᑳᓐ ᐊᐎᔭᒃ ᑫᐅᒋᐊᔮᒀᒥᓯᐙᒡ᙮ ᔑᑾ ᑮᓇᐎᓐᑦ ᑮᐅᔑᐲᐃᑳᑌᐗᓐ ᒋᐊᔮᒀᒥᒥᑯᔭᕽ᙮ ᓅᑯᒻ ᐃᑯ ᐋᓃᔥ ᐁᔑᐱᒫᑎᓯᔭᕽ, ᐱᒌᓇᒃ ᐐᐊᓂ ᐃᔥᒀᓭᐗᓐ ᐅᓄ ᑳᐱᒥᓭᑭᓐ ᐅᐅᒫ ᐊᑮᕽ᙮

ᐃᓇ ᑕᔥ, ᐊᐊᐌ ᓂᓱᑭᑳᐸᐤ ᑳᐃᓀᓂᑎᓱᒡ, ᐌᐌᓂ ᑖᐊᔮᒀᒥᓯ ᐁᑳ ᒋᐸᑭᔑᓯᒃ᙮

ᑲᑭᓇ ᑯᒋᐃᑰᐎᓐ ᐊᓂᐙᐸᑕᒣᒃ, ᒦ ᐯᔑᑾᓐ ᑲᑭᓇ ᐊᐎᔭ ᒋᓂᐅᑎᑕᕽ᙮ ᐊᐌ ᑕᔥ ᑭᔐᒪᓂᑑ ᑳᐐᓐ ᐐᑳ ᐅᐐᐋᒋᑑᓰᓐ ᑳᔑᐊᔓᑕᒫᑫᒡ᙮ ᑳᐐᓐ ᐊᐗᔑᒣ ᑭᑲᐸᑭᑎᓇᒫᑯᓰᐙ ᒋᑲᑴᒋᐃᑰᔦᒃ ᑫᔑᒪᔥᑲᐎᑳᐸᐎᔦᒃ᙮ ᐊᐲ ᑕᔥ ᐁᑲᑴᒋᐃᑰᔦᒃ, ᑭᔐᒪᓂᑑ ᑭᑲᑌᐊᐲᒌᐃᑯᐙ ᒋᑌᑲᔥᑭᑑᔦᒃ᙮ ᒦ ᐃᐌ ᑭᑲᐃᔑᒦᓂᑯᐙ ᐋᓃᓐ ᑫᔑᔖᐴᔥᑲᒣᒃ᙮

ᐊᐤ ᐃᑕᔥ ᑳᓵᑭᐃᓇᑰᒃ! ᑫᑯ ᐊᐙᒡ ᐸᑮ ᐐᒋᑣᑫᒃ ᐃᐃ ᒪᓂᑑᑫᐎᓐ᙮

ᑭᑎᔑᑲᓅᓂᓂᓂᒻ ᐁᑲᑮᑖᐌᑕᒣᒃ᙮ ᑮᓇᐙ ᑯ ᒋᐅᓀᑕᒣᒃ ᐅᐅ ᑳᐃᓂᓇᑰᒃ᙮

ᐃᐃᐌ ᐅᔕ ᒥᓂᒀᑲᓐ ᑳᓂᑖ ᐅᑖᐱᓇᒪᕽ ᐁᑕᑯᒦᑴᒋᐎᐊᕽ ᑭᔐᒪᓂᑑ, ᐊᐲ ᐅᒋᒥᓂᑴᔭᕽ, ᑳᐐᓐ ᐃᓇ ᑭᐐᑑᑲᒧᐙᓰᒥᓐ X ᐅᒥᔅᑸᒻ? ᐊᐊᐌᔥ ᑲᔦ ᐸᑴᔑᑲᓐ ᑳᓂᑖ ᐸᐸᑴᐱᓇᕽ, ᐊᐲ ᐁᐊᒶᕽ, ᑳᐐᓐ ᐃᓇ ᑭᐐᑑᑲᒧᐙᓰᒥᓐ X ᐅᐐᔭᐤ?

ᐯᔑᒃ ᐁᑕ ᐋᐸᑎᓯ ᐊᐌ ᐸᑴᔑᑲᓐ᙮ ᒦᑕᔥ ᐃᐌ ᐋᓇ ᐹᑏᓄᔭᕽ, ᑲᑭᓇ ᑭᒫᒪᐎᑑᒥᓐ ᐃᐃ ᐯᔑᒃ ᐐᔭᐎᒫ, ᐋᓃᔥ ᐯᔑᒃ ᐊᐊ ᐸᑴᔑᑲᓐ ᑭᑑᑕᒫᓈᓐ᙮

ᐃᓇ ᐃᐌ ᑳᐃᔑᒋᑫᐙᒡ ᐃᔅᕒᐃᔭᓬ ᐃᓂᓂᐗᒃ: ᐃᑭᐌᓂᐗᒃ ᑳᐅᑕᑕᒧᐙᒡ ᐃᐃ ᑳᐸᑭᑎᓈᔂᓂᐗᓂᓂᒃ, ᐅᐐᑑᑳᓈᐙ ᐃᐌ ᐁᐸᑭᑎᓈᓱᑲᑕᐎᓐᒡ ᑭᔐᒪᓂᑑ᙮

ᐋᓃᓐ ᑕᔥ ᐁᑭᑐᔮᓐ? ᐊᐊᐌ ᐅᔑᒋᑲᓐ ᑳᒪᓂᑑᑳᑳᓂᐎᒡ, ᑌᐺ ᓇ ᐱᒫᑎᓯ? ᑳᐐᓐ ᐅᔕ ᑫᑰᓐ ᐃᓈᐸᑎᓯᓰ᙮ ᐃᐃᐌ ᑕᔥ ᑲᔦ ᒦᒋᒻ ᑳᐸᑭᑎᓈᓱᑲᑕᐎᓐᒡ ᐅᔑᒋᑲᓐ, ᑫᑰᓐ ᐃᓇ ᐃᓈᐸᑕᓐ?

ᑳᐐᓐ ᑫᑰᓐ! ᐃᓇᔥᑫ ᓴ ᐃᐃᐌ ᑳᐸᑭᑎᓈᓱᐙᒡ ᐅᒪᓂᑑᑫᒃ ᐁᑕᔑᐸᑭᑎᓂᑫᐙᒡ, ᒪᒋᐊᒑᑾᐞ ᒪᔮ ᑳᒦᓂᒥᓐᒡ᙮ ᑳᐐᓐ ᑕᔑᒦᓈᓰ ᑭᔐᒪᓂᑑ᙮ ᔑᒀ ᑳᐐᓐ ᑭᓇᑕᐌᓂᒥᓯᓅᓂᓂᒻ ᒪᒋᐊᒑᑾᒃ ᒋᐐᑑᑲᐌᒀ᙮

ᑳᐐᓐ ᐐᓐ ᑭᑖᑲᔥᑭᑑᓰᒻ ᒋᐅᒋᒥᓂᑴᔦᑭᐸᓐ ᒥᒋᓃᔥ ᑳᑎᐯᒋᑫᒡ ᐅᒥᓂᒀᑲᓂᕽ ᑲᔦ ᒪᒋᐊᒑᑾᒃ ᐅᒥᓂᒀᑲᓂᐙᕽ᙮ ᑳᐐᓐ ᑭᑖᑲᔥᑭᑑᓰᒻ ᒥᒋᓃᔥ ᑳᑎᐯᒋᑫᒡ ᐅᐐᓯᓂᐎᓈᑎᑯᕽ ᒋᐅᒋᐐᓯᓂᔦᑭᐸᓐ ᑲᔦ ᒪᒋᐊᒑᑾᒃ ᐅᐐᓯᓂᐎᓈᑎᑯᐙᕽ᙮

ᑫᒫ, ᑭᑖᑲᑳᒋᐋᓈᓐ ᑳᑎᐯᒋᑫᒡ ᒋᐅᑌᑕᕽ? ᓇᐗᒡ ᐃᓇ ᑭᒪᔥᑲᐎᓰᒥᓐ ᐊᐲᒡ ᐐᓐ ᑳᑎᐯᒋᑫᒡ ᑭᑖᐃᓀᑖᒥᓐ?

ᒫᑭᔖ ᐊᐎᔭ ᐃᑭᑐᒡ: ᑲᑭᓇ ᑫᑰᓐ ᓂᐸᑭᑎᓇᒫᑰᒥᓐ ᒋᑑᑕᒫᕽ᙮ ᑌᐺ, ᓂᑖᐃᓈ, ᑳᐐᓐ ᐃᑕᔥ ᑲᑭᓇ ᑫᑰᓐ ᐅᓂᔑᔑᓯᓅᓐ ᒋᑑᑕᒫᓐ᙮ ᐋᓇᐐᓐ ᐁᐃᑭᑐᕽ ᑲᑭᓇ ᑫᑰᓐ ᐁᐸᑭᑎᓇᒫᑰᔭᕽ, ᑳᐐᓐ ᑕᔥ ᑲᑭᓇ ᑫᑰᓐ ᐁᑑᑕᒪᕽ ᐅᑲᐐᒋᐃᑯᓰᓐ ᐸᑳᓐ ᐊᐎᔭ᙮

ᑳᐐᓐ ᐋᓃᔥ ᑭᑖᐊᑕᐌᑕᓰᒥᓐ ᐁᑕ ᒋᐯᔑᑯᒥᓄᓭᔭᕽ, ᐸᑳᓐ ᐃᑕᔥ ᐊᐎᔭᒃ ᑲᔦ ᐐᓇᐙ ᒋᒥᓄᓭᐙᒡ᙮

ᐱᑯ ᑫᑰᓐ ᑭᑲᒦᒋᒻ ᑳᑕᓇᑖᐙᑫᕽ ᐃᐃᒫ ᒦᒋᒥᑲᒥᑯᕽ᙮ ᑫᑯ ᒣᒬᒡ ᑲᑴᑗᑫᒃ ᐋᑎ ᑳᐅᑎᓂᑳᑌᒃ, ᒦ ᐃ ᐁᑳ ᒋᐅᒋᒫᓀᑕᓯᐌᒃ᙮

ᐋᓃᔥ ᑲᑭᓇ ᐅᑎᐯᑖᓐ ᑳᑎᐯᒋᑫᒡ ᐅᐅ ᐊᑭ, ᑲᑭᓇ ᑲᔦ ᑫᑰᓐ ᐗᑭᑕᑲᒥᒃ ᑳᐊᔮᓂᒃ, ᐃᔑᐲᐃᑳᑌ᙮

ᐊᐎᔭ ᑕᔥ ᑳᑌᐺᑕᓯᒃ ᐊᑐᒥᓀᒃ ᒋᐐᒋᐐᓯᓃᒥᓀᒃ, ᐃᓀᑕᒣᒃ ᐃᑕᔥ ᒋᐃᔖᔦᒃ, ᐱᓵᓂᑯ ᒦᒋᔪᒃ ᐃᐃ ᑳ ᐊᔕᒥᑰᔦᒃ᙮ ᑫᑯ ᑲᑴᑗᑫᒃ ᑳᒦᒋᔦᒃ, ᒫᑭᔖ ᑭᑖᐅᒋᒫᓀᑖᒻ ᓅᑕᒣᒃ᙮

ᒫᑭᔖᔥ ᐊᐎᔭ ᑭᑲᐃᑯᐙ: ᒦ ᐅᐌ ᒦᒋᒻ ᒪᓂᑑᑳᓂᕽ ᑳᑮᐃᔑ ᐸᑭᑎᓂᑳᑳᓂᐗᕽ᙮ ᑮᔥᐱᓐ ᐅᐅ ᐃᓂᓀᒃ, ᑳᐐᓐ ᑭᑖᒦᒋᓰᒻ, ᐁᑳ ᑫᑰᓐ ᒋᐃᓀᑕᓯᒃ ᐊᐊᐌ ᑳᐐᑕᒪᐎᓀᒃ, ᑲᔦ ᐁᑳ ᒫᓀᓂᑎᓱᐎᓐ ᒋᐅᒌᒪᑲᓯᓄᒃ᙮

ᑳᐐᓐ ᑳᐃᑕᒫᓐ ᑮᓇᐙ ᐃᐃᐌ ᒋᒫᓀᑕᒣᒃ ᑮᔥᐱᓐ ᒦᒋᔦᒃ, ᐊᐊᐌ ᓴ ᑳᑮᐐᑕᒪᐎᓀᒃ ᒫᑭᔖ ᑕᐅᒋᒥᑯᔥᑳᑌᑕᒻ ᐙᐸᒥᓀᒃ᙮ ᒫᑭᔖ ᑕᐃᑭᑐ ᐊᐎᔭ: ᓃᓐ ᑫᑰᓐ ᐁᐸᑭᑎᓇᒪᐙᑕᒫᓐ, ᐋᓃᔛᓐ ᑫᐅᒋᑭᐱᔥᑲᐎᐸᓐ ᐸᑳᓐ ᐊᐎᔭ ᐁᒫᓈᓯᓇᕽ ᒋᒪᓈᒫᓀᑕᒥᐊᒃ?

ᑮᔥᐱᓐ ᒦᑴᒡ ᐁᑮᐃᓇᒃ ᑭᔐᒪᓂᑑ ᐃᐃᐌ ᑳᐐᒦᒋᔮᓐ, ᐋᓃᔛᓐ ᐊᐎᔭ ᑫᑰᓐ ᑫᐅᒋᐃᔑᐸᓐ ᐋᔕ ᐁᑮᐅᒋᓇᓈᑯᒧᔮᓐ ᐃᐃ ᒦᒋᒻ?

ᒦ ᐃ ᐁᑭᑐᔮᓐ, ᐌᑯᓀᓐ ᓴ ᑯ ᐁᔑᒋᑫᔦᒃ, ᒫᑭᔖ ᐐᓯᓂᔦᒃ, ᒫᑭᔖ ᒥᓂᑴᔦᒃ, ᑲᑭᓇ ᑯ ᐃᔑᒋᑫᔪᒃ ᑭᔐᒪᓂᑑ ᒋᑭᑌᑖᑯᐃᓐᒡ᙮

ᒦ ᐃᐌ ᐃᓈᑎᓯᒃ, ᐁᑳ ᑫᑰᓐ ᒋᐃᓀᓂᒥᓯᓄᐌᒀ ᒎᐗᒃ ᑲᔦ ᑳᒎᐎᐎᓯᒀ, ᑲᔦ ᑭᔐᒪᓂᑑ ᐅᒫᐗᒋᐋᑲᓇᐞ᙮

ᓃᓐ ᐁᔑᒋᑫᔮᓐ, ᒦ ᐃᐌ ᑑᑕᒧᒃ᙮ ᑲᑭᓇ ᐊᐎᔭ ᓂᑲᑴ ᓇᓇᐁᑕᒥᐋ ᐋᓃᓂᑯ ᐁᔑᒋᑫᔮᓐ, ᑳᐐᓐ ᐁᑕ ᒋᑲᑴᐯᔑᑯᒥᓄᓴᐃᑎᓱᔮᓐ, ᐃᑭᔥ ᐐᓐ ᑲᑭᓇ ᒋᒥᓄᓴᐃᑣ ᒋᐱᒫᒋᐃᑣ᙮

ᑮᓇᐙ ᑲᔦ ᑭᑭᓇᐙᐸᒥᔑᒃ ᑲᔦ ᓃᓐ ᐁᐃᔑᑭᑭᓇᐙᐸᒪᒃ X᙮

ᑭᓇᓈᑯᒥᓂᓂᒻ ᒨᔕᒃ ᐁᒥᑴᓂᒥᔦᒃ ᑲᔦ ᐁᑲᑴ ᒥᒋᒣᑕᒣᒃ ᒥᓂᒃ ᑫᑰᓐ ᑳᑮᐋᓂᑫ ᐐᑕᒪᐎᓇᑰᒃ᙮

ᐅᐅᐌ ᑕᔥ ᑭᓇᑕᐌᓂᒥᓂᓂᒻ ᒋᑭᑫᑕᒣᒃ: ᐊᐊᐌ X ᐁᓃᑳᓂᓰᑲᑕᐙᒡ ᑲᑭᓇ ᐃᓂᓂᐗᓐ᙮ ᔑᑾ ᐊᐌ ᐃᓂᓂ ᐐᓐ ᐅᓃᑳᓂᓰᑲᑕᐙᓐ ᐃᓂ ᐐᐗᓐ, ᔑᑾ ᐐᓐ ᐊᐊᐌ ᑭᔐᒪᓂᑑ ᐅᓃᑳᓂᓰᑲᑕᐙᓐ ᐃᓂ Xᑕᓐ᙮

ᒦ ᓴ ᐃᐌ ᑮᔥᐱᓐ ᑭᑳᓄᒀᓀᒡ ᐃᓂᓂ ᐁᐊᓇᒥᐋᒡ ᑲᔦ ᐁᑲᓅᑕᒪᐙᒡ ᑭᔐᒪᓂᑑᓐ, ᑳᐐᓐ ᐅᑭᒋ ᐃᓀᑖᑯᐋᓰᓐ ᐃᓂ Xᑕᓐ ᑳᓃᑳᓂᓰᔥᑳᑯᒡ᙮

ᐊᐊᐌ ᑕᔥ ᐃᑴ ᑮᔥᐱᓐ ᔖᔖᑲᓂᑎᒀᓀᒡ ᐁᐊᓇᒥᐋᒡ ᑲᔦ ᐁᑲᓅᑕᒪᐙᒡ ᑭᔐᒪᓂᑑᓐ, ᑲᔦ ᐐᓐ ᑳᐐᓐ ᐅᑭᒋ ᐃᓀᑖᑯᐋᓰᓐ ᐃᓂ ᐅᓈᐯᒪᓐ ᑳᓃᑳᓂᓰᔥᑳᑯᒡ᙮ ᑳᐐᓐ ᐸᑳᓐ ᑖᐃᓀᑖᑯᓯᓰ ᐊᐎᔭ ᐃᑴ ᑳᒥᑕᔅᑭᑎᒀᓀᔓᓐᒡ᙮

ᒦᑕᔥ ᐃᐃ ᑮᔥᐱᓐ ᐐᑭᑳᓄᒀᓀᓯᒃ ᐊᐊ ᐃᑴ, ᐃᑕᐙ ᐱᑯ ᒋᒪᔕᔥᑯᔕᑭᐸᓐ ᐐᓂᓯᓴᓐ᙮ ᐅᒋ ᓴ ᑯ ᐁᒣᓂᔐᑖᑾᒃ ᐁᒥᑕᔅᑭᑎᒀᓀᔓᓐᒡ ᑫᒫ ᐁᑮᔥᑭᔕᕽ ᐐᓂᓯᓴᓐ ᐊᐊ ᐃᑴ, ᒦ ᓴ ᑯ ᐃ ᒋᑭᑳᓄᒀᓀᒡ᙮

ᐊᐊᐌ ᑕᔥ ᐃᓂᓂ ᑳᐐᓐ ᐊᑕᐌᑖᑯᓯᓰ ᒋᑭᑳᓄᒀᓀᒡ, ᐋᓃᔥ ᐅᒋ ᐃᔑᐊᔮ ᑭᔐᒪᓂᑑᓐ ᐁᐃᓈᑎᓯᓂᒡ ᑲᔦ ᐁᔑᐊᐲᒋ ᑭᒋ ᐃᓀᑖᑯᓯᓂᒡ᙮ ᐊᐊᐌ ᑕᔥ ᐃᑴ ᐅᒋ ᐃᔑᐊᔮ ᑳᔑᑭᒋ ᐃᓀᑖᑯᓯᓂᒡ ᐃᓂ ᐃᓂᓂᐗᓐ᙮

ᑳᐐᓐ ᐅᔕ ᐃᑴᕽ ᑮᐅᒋᐅᔑᐋᓰ ᐊᐌ ᐃᓂᓂ; ᐃᓂᓃᕽ ᓴ ᐐᓐ ᑮᐅᒋᐅᔑᐋ ᐊᐊ ᐃᑴ᙮

ᑳᐐᓐ ᐋᓃᔥ ᒋᐐᒋᐋᐸᓐ ᐃᓂ ᐃᑴᐗᓐ ᑮᐅᒋᐅᔑᐋᓰ ᐊᐌ ᐃᓂᓂ; ᐊᐊᔥ ᐐᓐ ᐃᑴ ᑮᐅᒋᐅᔑᐋ ᒋᐐᒋᐋᒡ ᐃᓂ ᐃᓂᓂᐗᓐ᙮

ᒦ ᐃᐌ ᑫᐅᒋᐋᑲᐗᐊᕽ ᐅᑎᒀᓐ ᐊᐊ ᐃᑴ, ᐁᐃᔑᓈᑯᑑᒡ ᐅᑭᒋ ᐃᓀᑖᑯᓯᐎᓐ᙮ ᒦ ᐃᐌ ᒣᒥᑕᑫ ᑕᐃᔑᒋᑫ ᐊᐊ ᐃᑴ, ᐁᑲᓇᐙᐸᒥᑯᐙᒡ ᐃᐃ ᐁᒐᓬᐊᐞ᙮

ᐃᐃᒫ ᑕᔥ ᐁᔑᐐᒌᐎᓇᕽ ᑳᑎᐯᒋᑫᒡ, ᑳᐐᓐ ᑕᐱᓂᔅᑴᐱᒫᑎᓯᓰ ᐊᐊ ᐃᑴ ᐃᓂᓂᐗᓐ ᐃᑯ ᒋᐐᒋᐃᑯᐸᓐ᙮ ᐊᐊᐌᔥ ᑲᔦ ᐃᓂᓂ ᑳᐐᓐ ᑫᐐᓐ ᑕᐱᓂᔅᑴᐱᒫᑎᓯᓰ ᐃᑴᐗᓐ ᐃᑯ ᒋᐐᒋᐃᑯᐸᓐ᙮

ᐋᓃᔥ ᐯᔑᑾᓐ ᐊᐊ ᐃᑴ ᐃᐃᒫ ᐃᓂᓃᕽ ᐁᑮᐅᒋᐅᔑᐋᑲᓂᐎᒡ, ᒦ ᑲᔦ ᐐᓐ ᐯᔑᑾᓐ ᐊᐊ ᐃᓂᓂ ᐃᐃᒫ ᐃᑴᕽ ᐅᑖᑎᓯ᙮ ᑭᔐᒪᓂᑑᓈᕽ ᐃᑕᔥ ᐐᓐ ᐅᒌᒪᑲᓂᓂ ᑲᑭᓇ ᑫᑰᓐ᙮

ᑮᓇᐙ ᓴ ᑯ ᑲᑴᑾᔭᑯᓇᒧᒃ: ᒥᓄᓈᑾᓐ ᐃᓇ ᐊᐌ ᐃᑴ ᐁᔖᔖᑲᓂᑎᒀᓀᒡ ᐁᑲᓅᓈᒡ ᑭᔐᒪᓂᑑᓐ?

ᐃᓇᔥᑫ ᐁᔑᐃᑰᐎᓯᔭᕽ ᑭᑖᐅᒋᑭᑫᑖᒻ ᐁᒣᓂᔐᑖᑯᓯᒡ ᑳᑕᑳᓂᑴᒡ ᐊᐊ ᐃᓂᓂ᙮

ᐊᐊ ᑕᔥ ᐃᑴ ᑲᑳᓍᓂᓯᓭᒡ, ᒦ ᐃᐌᓂ ᐅᑭᒋ ᐃᓀᑖᑯᓯᐎᓐ᙮ ᐋᓃᔥ ᐃᔑᒦᓂᑰᐎᓯ ᒋᑲᑳᓍᓂᑴᒡ ᒋᐊᑾᓇᐊᕽ ᐅᑎᒀᓐ᙮

ᑮᔥᐱᓐ ᐊᐎᔭ ᐁᐐᐋᓉᑕᕽ ᐅᐅ ᑭᑭᓄᐊᒫᑫᐎᓐ, ᑳᐐᓐ ᐸᑳᓐ ᓂᑕᔮᓰᒥᓐ, ᑳᐐᓐ ᑲᔦ ᐋᑎᑯ ᐃᐃᒫ ᐁᔑᒫᒫᐗᒋᐃᑎᐙᒡ ᐁᔑᐊᓇᒥᐁᑕᐙᐙᒡ ᑭᔐᒪᓂᑑᓐ᙮ ᑳᐐᓐ ᑲᔦ ᐐᓇᐙ ᐸᑳᓐ ᐃᔑᒋᑫᓰᐗᒃ᙮

ᐅᓄ ᑕᔥ ᑳᐐᑭᑭᓄᐊᒪᐎᓇᑰᒃ ᑳᐐᓐ ᑭᐙᐎᔐᓂᒥᓯᓅᓂᓂᒻ᙮ ᑳᐐᓐ ᐋᐱᒋ ᐅᓂᔑᔑᓯᓅᓐ ᐁᔑᐲᑎᑲᓂᑎᔦᒃ, ᓇᐗᒡ ᓴ ᑯ ᒫᓂᓈᑾᓐ᙮

ᓃᑳᓐ ᐃᑯ ᑭᑎᓂᓂᓂᒻ, ᓂᑮᐐᑕᒫᑰ ᐁᐊᔫᑯ ᐊᔮᓄᑎᔦᒃ ᐁᒫᐗᒋᐃᑎᔦᒃ᙮ ᓇᐗᒡ ᐃᑯ ᓂᑌᐺᑖᓐ᙮

ᐅᒋᑕ ᑯ ᑕᓂ ᐃᔑᓭ ᐸᑫᐎᓂᑎᐎᓇᓐ ᒋᐊᔮᒪᑲᑭᓐ ᐁᐊᔮᔦᒃ, ᒦ ᐁᑕ ᐃᒫ ᒋᐸᔭᑌᓈᑯᓯᐙᒡ ᐃᑭᐌᓂᐗᒃ ᑳᑾᔭᑯᒋᑫᐙᒡ᙮

ᐊᐲ ᑯ ᐁᒫᐗᒋᐃᑎᔦᒃ, ᑳᐐᓐ ᐐᓐ ᑳᑎᐯᒋᑫᒡ ᐅᑕᔕᑫᐎᓐ ᑭᑎᔑᓈᑯᒋᑫᓰᒻ ᑮᐐᓯᓂᔦᒃ᙮

ᐋᓃᔥ ᑲᑭᓇ ᑯ ᐯᐯᔑᒃ ᐅᓅᑌ ᐅᑖᐱᓈᓈᐙ ᐐᓇᐙ ᑯ ᐁᐐᐐᓯᓂᐙᒡ᙮ ᒦᔥ ᐃᐃ ᐋᓂᑕ ᐊᐎᔭᒃ ᑫᔮᐱ ᓅᑌᔅᑲᑌᐙᒡ, ᐋᔕ ᐋᓂᓐᑦ ᐁᑮᐗᔥᑴᐲᐙᒡ᙮

ᑳᐐᓐ ᐃᓇ ᑭᑑᐙᑳᐃᑲᓂᓰᒻ ᒋᑕᔑᐐᓯᓂᔦᒃ ᑲᔦ ᒋᑕᔑᒥᓂᑴᔦᒃ? ᑫᒫ ᓇ ᓇᐗᒡ ᑭᐐᒫᓀᓂᒥᒫᐙᐞ ᑭᔐᒪᓂᑑ ᐅᒫᐗᒋᐋᑲᓇᐞ? ᑭᑲᒣᓂᔑᐋᐙᒃ ᐃᓇ ᑕᔥ ᐃᑭ ᐁᑳ ᑫᑰᓐ ᑳᐊᔮᓯᒀ? ᐋᓃᓐ ᑫᐃᓂᓇᑰᒃ? ᑭᒥᓄᒋᑫᒻ ᐃᓇ ᑭᑲᐃᓂᓂᓂᒻ? ᑳᐐᓐ ᐊᐙᒡ ᑲᓇᑫ!

ᓇᔥᑫ ᐋᓃᔥ ᑳᑎᐯᒋᑫᒡ ᓃᓐ ᐃᑯ ᓂᑮᐐᑕᒫᒃ, ᒦ ᐃᐌ ᐋᔕ ᑫᑮᓇᐙ ᑳᑮᐋᓂᑫ ᐐᑕᒪᐎᓇᑰᒃ, ᐃᐃᐌ ᑳᑮᐃᔑᒋᑫᒡ ᑳᑎᐯᒋᑫᒡ ᒋᓴᔅ ᒦ ᐃᐌ ᐊᐲ ᐁᑎᐱᑲᓂᓂᒃ ᒋᑆ ᐅᑖᐱᓂᑲᓂᐎᒡ᙮ ᐸᑴᔑᑲᓇᓐ ᐅᑮᐅᑖᐱᓈᓐ᙮

ᐁᑮᓇᓈᑯᒧᒡ ᐃᑕᔥ ᐅᑮᐸᐸᑴᐱᓈᓐ, ᐅᐅᐌ ᐁᐃᑭᑐᒡ: ᒦ ᓴ ᐅᐌ ᓃᔭᐤ, ᐅᒋ ᑮᓇᐙ᙮ ᒦ ᐅᐌ ᐊᓂᐅᒋᑑᑕᒧᒃ ᐊᒬᒃ ᒋᒫᒥᑲᐎᓄᑕᐎᔦᒃ᙮

ᒦ ᐃ ᐯᔑᑾᓐ ᑳᐃᔥᒀᐐᓯᓂᐙᒡ ᐅᑮᐅᑖᐱᓈᓐ ᐃᐃ ᒥᓂᒀᑲᓐ, ᑳᔑᒨᔥᑭᓀᐲᒃ ᔔᒥᓈᐳ, ᐅᐅᐌ ᐁᐃᓈᒡ: ᐅᐅ ᒥᓂᒀᑲᓐ ᑳᐃᔑᓈᑯᑑᒡ ᑭᔐᒪᓂᑑ ᐅᑑᔥᑭᐊᔓᑕᒫᑫᐎᓐ, ᓂᒥᔅᑸᕽ ᑫᐋᔩᒋᑑᒡ ᐅᑕᔓᑕᒫᑫᐎᓐ᙮ ᐊᐲ ᐱᑯ ᒥᓂᑴᔦᒃ ᐅᐅ ᑑᑕᒧᒃ ᒋᒫᒥᑲᐎᓄᑕᐎᔦᒃ᙮

ᒦ ᐃ ᐁᓀᑖᑾᒃ, ᑕᓯᕽ ᐃᑯ ᐊᒬᒃ ᐗᐊ ᐸᑴᔑᑲᓐ ᑲᔦ ᐁᐅᒋᒥᓂᑴᔦᒃ ᐅᐅ ᒥᓂᒀᑲᓂᕽ, ᒨᔕᒃ ᑭᑲᐃᔑᓈᑯᑕᒫᑫᒻ ᑳᑮᐃᔑᓂᐴᑕᒫᑫᒡ ᑳᑎᐯᒋᑫᒡ, ᐲᓂᔥ ᐃᑯ ᒋᑕᑶᔑᕽ᙮

ᒦ ᐃᐌ ᑮᔥᐱᓐ ᐊᐎᔭ ᑌᐱᓈᒃ ᐊᒸᒡ ᑳᑎᐯᒋᑫᓂᒡ ᐅᐸᑴᔑᑲᓂᒥᓂ, ᑲᔦ ᐃᔑᒥᓂᑴᒡ ᐅᒥᓂᒀᑲᓂᓃᕽ, ᐁᑳ ᑾᔭᒃ ᐁᑭᑌᓂᒫᓯᒃ ᑳᑎᐯᒋᑫᓂᒡ, ᑕᐃᓇᑭᒫ ᐊᐎᔭ ᐁᑮᐹᐱᓄᑕᒪᐙᒡ ᑳᑎᐯᒋᑫᓂᒡ ᐐᔭᐎᓂ ᑲᔦ ᐅᒥᔅᑸᒥᓂ᙮

ᒦᑕᔥ ᐃᐃ ᑲᑭᓇ ᐊᐎᔭ ᐊᑲᐌ ᑕᑲᑴ ᑾᔭᑴᓂᑎᓱ ᐋᓃᓐ ᐁᔑᐊᔮᒡ, ᒦᑕᔥ ᐃᐃ ᒋᐊᒸᒡ ᐃᓂ ᐸᑴᔑᑲᓇᓐ ᑲᔦ ᒋᐅᒋᒥᓂᑴᒡ ᐃᐃ ᒥᓂᒀᑲᓂᓂ᙮

ᑮᔥᐱᓐ ᐃᑕᔥ ᑾᔭᒃ ᐃᔑᓇᓯᒃ ᐋᓃᓐ ᐁᓍᑌᓂᒃ ᑳᑎᐯᒋᑫᓂᒡ ᐐᔭᐎᓂ ᐊᐲ ᐁᐊᒸᒡ ᐃᓂ ᐸᑴᔑᑲᓇᓐ ᑲᔦ ᐅᒋᒥᓂᑴᒡ ᐃᐃ ᒥᓂᒀᑲᓂᓂ, ᑕᐅᒋᑲᔥᑭᑕᒫᓱ ᒋᑎᐹᑯᓂᑲᓂᐎᒡ ᒣᒀ ᐁᐐᓯᓂᒡ ᑲᔦ ᐁᒥᓂᑴᒡ᙮

ᒦ ᐅᐌ ᓃᐱᐗᐞ ᑳᐅᒋᐋᑯᓯᐙᒡ ᑲᔦ ᐁᐅᒋᓃᓇᒥᓯᐙᒡ ᑮᓇᐙ ᐃᐃᒫ ᑳᑕᔑᔦᒃ, ᑲᔦ ᑌᒥᓂᒃ ᐁᑮᓂᐳᐙᒡ ᐊᐎᔭᒃ᙮

ᑮᔥᐱᓐ ᐃᑕᔥ ᐊᑲᐌ ᑲᑴᑾᔭᑯᓈᓱᔭᕽ, ᑳᐐᓐ ᒣᒬᒡ ᑭᑖ ᑎᐹᑯᓂᑰᓰᒥᓐ᙮

ᑳᑎᐯᒋᑫᒡ ᐃᑕᔥ ᑭᑲᑴᑾᔭᑯᓈᑯᓈᓐ ᑲᔦ ᑭᑾᔭᑯᓂᑯᓈᓐ, ᐁᑳ ᒋᑕᒀᑯᓂᑰᓯᐗᕽ ᑫᐃᓈᑯᓂᑣ ᐃᑭᐌᓂᐗᒃ ᐊᑮᕽ ᑳᑎᐯᑖᑯᓯᐙᒡ᙮

ᐃᓇ ᑕᔥ, ᓃᒋᐅᑌᐺᑕᒨᒃ! ᐊᐲ ᐊᑕ ᒫᐗᒋᐐᓯᓂᔦᒃ ᑳᑎᐯᒋᑫᒡ ᐅᑕᔕᑫᐎᓐ, ᐲᐃᑎᔪᒃ!

ᐊᐎᔭ ᑕᔥ ᓅᑌᔅᑲᑌᒡ, ᐊᑲᐌ ᐐᓐ ᐅᑖᐎᓂᕽ ᑕᑕᔑᐐᓯᓂ᙮ ᒦ ᐃᐌ ᐃᔑᒫᐗᒋᐃᑎᔪᒃ, ᐁᑳ ᐃᓈᑯᓂᑰᐎᓐ ᒋᐅᑎᓯᑯᓯᐌᒃ᙮ ᐸᑳᓐ ᐃᑕᔥ ᑫᑰᓇᓐ ᓂᑲᓇᓇᐃᓯᑑᓇᓐ ᐹᓂᒫ ᑕᑯᔑᓈᓐ᙮

ᔑᑾ ᐅᐌ ᓂᐐᓇᑴᑖᓐ ᑳᐃᔑᐲᐊᒪᐎᔦᒃ, ᐋᓃᓐ ᐁᓀᑖᑾᒃ ᐊᒑᑯᐎ ᐃᔑᐊᔮᐎᓐ᙮ ᓃᒋᐅᑌᐺᑕᒨᒃ, ᑭᓇᑕᐌᓂᒥᓂᓂᒻ ᐃᐃ ᒋᑭᑫᑕᒣᒃ᙮

ᑭᑭᑫᑖᓈᐙ ᒋᑆ ᒪᔑ ᐊᓇᒥᐋᔦᒃ, ᐃᑯᒋ ᐃᒫ ᑭᑮᐗᐙᓂᔑᒥᑰᒻ ᒋᐸᒦᑕᐌᒀ ᒪᓂᑑᑳᓇᒃ ᑳᐱᒫᑎᓯᓯᒀ ᐁᑮᑭᑐᓯᒀ᙮ ᐋᑎ ᓴ ᑯ ᑭᑮᐃᔑᐎᓂᑰᒻ᙮

ᒦ ᐃᐌ ᑳᐅᒋᓂᓯᑐᑕᒨᓂᓇᑰᒃ ᐅᐅᐌ: ᐊᐎᔭ ᑭᔐᒪᓂᑑ ᐅᑕᒑᑯᕽ ᐁᐅᑎᓇᕽ ᐃᑭᑐᐎᓐ, ᑳᐐᓐ ᑕᓂᔑᐗᓈᑎᓯ ᐅᑲᐃᓈᓰᓐ ᒋᓴᓲᓐ᙮ ᐊᐎᔭ ᑕᔥ ᒦ ᐊᐌ ᒋᓴᔅ ᑳᑎᐯᒋᑫᒡ ᐃᑭᑐᒡ, ᒦ ᐁᑕ ᑭᔐᒪᓂᑑ ᐅᑕᒑᑯᕽ ᑳᐅᒋᑮᑭᑐᒡ᙮

ᐃᓇᔥᑫ ᐯᐸᑳᓐ ᑎᓄᐗᓅᓐ ᐊᒑᑯᐎ ᒦᓂᑰᐎᓇᓐ, ᒦᑕᔥ ᐁᑕ ᑭᔐᒪᓂᑑ ᐅᑕᒑᑾᓐ ᐁᔑᐯᔑᑯᓂᒡ ᑳᐅᓇᐆᔑᐌᓂᒡ᙮

ᐯᐸᑳᓐ ᑲᔦ ᑎᓄᐗᓅᓐ ᐁᔑᐸᒦᑖᑫᐙᒡ ᐊᐎᔭᒃ, ᒦᔥ ᐁᑕ ᑳᑎᐯᒋᑫᒡ ᐁᔑᐯᔑᑯᒡ ᑳᐊᓄᑮᑕᐎᓐᒡ᙮

ᔑᑾ ᐯᐸᑳᓐ ᑎᓄᐗᓅᓐ ᐁᔑᑲᔥᑭᑑᐙᒡ ᐊᐎᔭᒃ ᐅᑕᓄᑮᐎᓂᐙᓐ, ᒦᑕᔥ ᐁᑕ ᐊᐌ ᑭᔐᒪᓂᑑ ᐁᔑᐯᔑᑯᒡ ᐁᔑᐊᓄᑮᒡ ᐁᑕᓱᐯᔑᑯᓂᒡ ᐅᐱᒫᑎᓯᐎᓂᓃᕽ ᑲᑭᓇ ᑫᑰᓐ ᒋᑲᔥᑭᑑᓂᒡ᙮

ᐁᑕᓱᐯᔑᑯᒡ ᐊᐎᔭ ᐃᔑᒦᓈ ᑫᑰᓐ ᑭᔐᒪᓂᑑ ᐅᑕᒑᑾᓐ ᐁᓈᑯᑑᓂᒡ ᐅᑎᔑᐊᔮᐎᓂᓂ᙮ ᒦᑕᔥ ᑲᑭᓇ ᐊᐎᔭ ᒋᐅᒋᒥᓄᓭᐙᒡ᙮

ᐊᐊ ᐯᔑᒃ ᐅᒦᓂᑰᓐ ᑭᔐᒪᓂᑑᓐ ᐅᑕᒑᑯᓂ ᒥᓄᑭᑫᒋᑫᐎᓂᕽ ᒋᐃᔑᑮᔗᒡ᙮ ᒦᓇᐙ ᐯᔑᒃ ᐸᔭᑌᓂᓯᑐᑕᒧᐎᓐ ᐅᒦᓂᑰᓐ ᐃᓂ ᐯᔑᑾᓐ ᐊᒑᑾᓐ ᒋᐃᔑᑮᔗᒡ᙮

ᒦᓇᐙ ᐯᔑᒃ ᐊᐎᔭ ᑭᒋᑌᐺᑕᒧᐎᓐ ᐅᒦᓂᑰᓐ ᐅᓄ ᐯᔑᑾᓐ ᐊᒑᑾᓐ, ᔑᑾ ᐸᑳᓐ ᐊᐎᔭ ᒥᓄᐊᔮᐃᐌᐎᓇᓐ ᐅᒦᓂᑰᓐ ᐅᓄ ᐯᔑᑾᓐ ᐊᒑᑾᓐ᙮

ᒦᓇᐙ ᑕᔥ ᐯᔑᒃ ᒋᑲᔥᑭᑑᒡ ᒫᒪᑳᒋᒋᑫᐎᓇᓐ ᐃᔑᒦᓈ, ᒦᓇᐙ ᐯᔑᒃ ᑭᔐᒪᓂᑑᓐ ᒋᑲᓅᑕᒪᐙᒡ ᐃᔑᒦᓈ᙮ ᒦᓇᐙ ᑕᔥ ᐯᔑᒃ ᒋᓂᓯᑖᐌᔦᑕᕽ ᐁᑎᓄᐗᓂᓂᑭᓐ ᐃᓂ ᒦᓂᑰᐎᓇᓐ, ᑮᔥᐱᓐ ᑌᐺ ᑭᔐᒪᓂᑑᓐ ᐅᑕᒑᑯᓂ ᐁᐅᒌᒪᑲᓂᓂᑴᓐ ᑫᒫ ᑳᐐᓐ᙮ ᔑᑾ ᒦᓇᐙ ᐯᔑᒃ ᐯᐸᑳᓐ ᐃᔑᑮᔗᐎᓇᓐ ᐃᔑᒦᓈ, ᐯᔑᒃ ᐃᑕᔥ ᑲᔦ ᐃᔑᒦᓈ ᒋᐋᓂᑲᓅᑕᕽ ᐃᓂ ᐃᔑᑮᔗᐎᓇᓐ᙮

ᒦᑕᔥ ᐃᐃ ᑲᑭᓇ ᐅᓄ ᐁᓇᓄᑮᒡ ᐊᐌ ᑳᐯᔑᑯᒡ ᐊᒑᒃ ᒫᒦᓈᒡ ᑲᑭᓇ ᐊᐎᔭᐞ, ᐐᓐ ᐃᑯ ᐁᓀᑕᕽ᙮

ᐃᓇᔥᑫ ᒦ ᐅᐌ ᐁᓀᑖᑯᓯᒡ ᐊᐊ X ᑖᐱᔥᑰ ᐊᐎᔭ ᐐᔭᐎᕽ᙮ ᐋᓇ ᐯᔑᑾᒃ ᐅᐅ ᐐᔭᐤ, ᐹᑏᓇᑎᓅᓐ ᐃᑕᔥ ᐯᐸᑳᓐ ᐁᔑᓈᑾᑭᓐ ᑳᐃᔑᐋᐸᑕᑭᓐ᙮ ᑲᑭᓇ ᑕᔥ ᐐᓐ ᐅᓄᐌᓂᐗᓐ ᐋᓇᐐᓐ ᐋᓇᐹᑏᓇᑎᑭᓐ, ᒦᔥ ᐁᑕ ᐁᔑᐯᔑᑾᒃ ᐅᐅᐌ ᐐᔭᐤ᙮

ᒦ ᓴ ᑯ ᐯᔑᑾᓐ ᑫᑮᓇᐎᓐᑦ ᒥᓂᒃ ᐁᔑᐯᐸᑳᓉᐙᓇᑭᓯᔭᕽ, ᑫᒫ ᒎᐗᒃ ᑫᒫ ᑲᔦ ᑳᒎᐎᐎᓯᒀ, ᑲᔦ ᑎᐯᓂᒫᑲᓇᒃ ᑲᔦ ᑳᑕᑎᐯᓂᑎᓱᐙᒡ, ᑲᑭᓇ ᑭᑮᐃᔑᓰᑲᐊᑖᑯᓈᓐ ᐃᓂ ᐯᔑᑾᓐ ᑭᔐᒪᓂᑑ ᐅᑕᒑᑾᓐ ᐃᐃᒫ ᐯᔑᒃ ᐐᔭᐎᒫᕽ ᒋᐅᒋᑎᐯᑖᑯᓯᔭᕽ᙮ ᔑᑾ ᐯᔑᑾᓐ ᑭᑮᐃᔑᒥᓇᐃᑰᒥᓐ ᐊᐊ ᐯᔑᑾᓐ ᐊᒑᒃ ᒋᒥᓂᒀᓇᕽ᙮

ᐃᓇᔥᑫ ᐋᓃᔥ ᐅᐌ ᐐᔭᐎᒫ ᐁᔑᓈᑾᒃ ᑳᐐᓐ ᒥᒋᐯᔑᑯᓈᑾᓯᓅᓐ, ᐹᑏᓇᑎᓅᓐ ᐅᔕ ᐅᒫ ᑳᑕᓱᐃᔑᓈᑯᓯᕽ᙮

ᐊᐊ ᑕᔥ ᐅᓯᑎᒫ ᐃᑭᑐᒡ: ᓃᓐ ᐁᐅᓂᒌᒫᐎᓯᐙᓐ, ᑳᐐᓐ ᐃᐃᒫ ᓂᑑᒋᑎᐯᑖᑯᓯᓰ ᐐᔭᐎᕽ, ᐅᐅ ᐋᓇᐃᑭᑐᐸᓐ, ᒪᔥᑲᐙᒡ ᐃᑯ ᐅᒋᑎᐯᑖᑾᓐ ᐃᐃᒫ ᐐᔭᐎᕽ ᐃᐃ ᐅᓯᑎᒫ᙮

ᑫᒫ ᑲᔦ ᐅᑕᐗᑳᒫ ᐋᓇᐃᑭᑐᐸᓐ: ᓃᓐ ᐋᓃᔥ ᐁᐅᔥᑮᔑᑯᐎᓯᐙᓐ, ᑳᐐᓐ ᓃᓐ ᐃᐃᒫ ᓂᑑᒋᑎᐯᑖᑯᓯᓰ ᐐᔭᐎᕽ, ᐅᐅᐌ ᐋᓇᐃᑭᑐᒡ, ᒪᔥᑲᐙᒡ ᐃᑯ ᐅᒋᑎᐯᑖᑾᓐ ᐃᐃᒫ ᐐᔭᐎᕽ ᐃᐃ ᐅᑕᐗᑳᒫ᙮

ᐃᓇᔥᑫ ᑮᔥᐱᓐ ᒥᓯᐌ ᐅᔥᑮᔑᑯᐗᑭᐸᓐ ᐃᐃ ᐐᔭᐎᒫ, ᐋᓃᑎ ᑫᐅᒋᓅᑕᒨᒪᑲᑭᐸᓐ? ᒥᓯᐌᔥ ᑲᔦ ᐅᑕᐗᑳᐗᑭᐸᓐ, ᐋᑎ ᑫᑮᐅᒋ ᒥᓈᒋᑫᒪᑲᑭᐸᓐ?

ᐐᓐ ᐃᑕᔥ ᐐᓐ ᐊᐊ ᑭᔐᒪᓂᑑ ᐁᑕᓱᐯᔑᒃ ᐅᑮᒫᒪᐎᑑᓇᓐ ᐃᓂ ᑳᐯᐸᑳᓇᑎᓂᓂᑭᓐ ᑳᑕᓱᐃᔑᓈᑯᓯᕽ ᒋᐯᔑᑾᓂᓂᒃ ᐃᐃ ᐐᔭᐤ, ᐐᓐ ᐃᑯ ᐁᐃᔑᐅᓀᑕᕽ᙮

ᑮᔥᐱᓐ ᐁᑕ ᐯᔑᑯᐊᔮᒃ ᐃᐌ ᐸᑫᓯᐎᓐ ᑳᐐᓐ ᐐᔭᐎᒫ ᑕᐃᔑᓈᑾᓯᓅᓐ᙮

ᐹᑏᓇᑎᓅᓐ ᐃᑕᔥ ᐐᓐ ᐃᓂ ᐃᔑᓈᑯᓯᐎᓇᓐ, ᐁᐯᔑᑾᒃ ᐃᑕᔥ ᐃᐃ ᐐᔭᐎᒫ᙮

ᒦᑕᔥ ᐃᐃ ᐅᔥᑮᔑᑯᒫ ᑳᐐᓐ ᐅᑲᑮᐃᓈᓰᓐ ᐃᓂ ᐅᓂᒌᒫ: ᑳᐐᓐ ᑫᑰᓐ ᑭᑎᓈᐸᒋᐃᓯᓅᓐ! ᐊᐊᐌᔥ ᑲᔦ ᐅᑎᒀᓂᒫ ᑳᐐᓐ ᐅᑖᓂᓈᓰᐞ ᐅᓯᑕᐞ: ᑳᐐᓐ ᑮᓇᐙ ᑫᑰᓐ ᑭᑎᓈᐸᒋᐃᓯᓅᓂᓂᒻ᙮

ᑳᐐᓐ ᐃᐃ ᑕᐃᓀᑖᑾᓯᓅᓐ᙮ ᓇᐗᒡ ᐃᑕᔥ ᐐᓐ ᑭᑖᐸᑕᓅᓐ ᐃᓂ ᑫᑰᓇᓐ ᐐᔭᐎᒫᕽ ᑳᐗᑫᐎᓈᑾᑭᓐ᙮

ᐃᓂᐌᓂᐗᓐ ᐃᑕᔥ ᐸᑮ ᑳᐊᐲᑌᑕᒪᕽ, ᓇᐗᒡ ᐃᑯ ᒋᒥᓄᐊᐲᑌᑖᑾᑭᓐ ᑭᑎᔑᑑᒥᓐ᙮ ᐃᓂᐌᔥ ᑲᔦ ᐁᑳ ᑳᒥᓄᓈᑾᓯᓄᑭᓐ, ᑫᔮᐱ ᐌᐌᓂ ᑭᑎᔑᑭᑭᔥᑭᑫᒥᓐ ᑾᔭᒃ ᒋᐃᔑᓈᑾᑭᓐ᙮

ᐃᓂᔥ ᐐᓐ ᑳᒥᓄᓈᑾᑭᓐ ᑳᐐᓐ ᒣᒬᒡ ᒋᐃᔑᐆᒪᑲᓯᓄᑭᓐ᙮ ᐐᓐ ᑕᔥ ᑭᔐᒪᓂᑑ ᐅᑮᐃᔑᒫᒪᐎᑑᓐ ᐃᐃ ᐐᔭᐎᒫ, ᐅᓄᐌᓂᐗᓐ ᐃᑯᑕᓄ ᑳᐃᓀᑖᑾᓯᓄᑭᓐ, ᓇᐗᒡ ᐁᑮᐃᔑᑑᒡ ᒋᑭᒋ ᐃᓀᑖᑾᓂᓂᑭᓐ᙮

ᒦ ᐃᐌ ᐁᓀᑖᑾᒃ ᐁᑳ ᐸᑫᐎᓂᑎᐎᓐ ᒋᐊᔮᒪᑲᓯᓄᒃ ᐐᔭᐎᒫᕽ, ᑲᑭᓇ ᑕᔥ ᑳᐯᐸᑳᓇᑎᑭᓐ ᐃᔑᓈᑯᓯᐎᓇᓐ ᐯᔑᑾᓐ ᐃᑯ ᒋᐃᔑᓈᑲᒋᐃᑏᒪᑲᑭᓐ᙮

ᐊᐲ ᑯ ᐁᒪᒋᓭᒃ ᐯᔑᒃ ᐸᑫᓯᐎᓐ, ᒦ ᐯᔑᑾᓐ ᐃᑯ ᑲᑭᓇ ᐸᑫᓯᐎᓇᓐ ᐐᒋ ᐃᓇᒪᒋᐅᑏᒪᑲᓅᓐ᙮ ᐯᔑᒃ ᐃᑕᔥ ᑲᔦ ᑭᒋ ᐃᓀᒋᑳᑌᒃ ᐸᑫᓯᐎᓐ, ᒦ ᐯᔑᑾᓐ ᐃᑯ ᑲᑭᓇ ᐁᔑᒫᒪᐎ ᒌᑫᑕᒨᒪᑲᑭᓐ᙮

ᑮᓇᐙ ᑳᑕᔑᔦᒃ ᒦ ᐃᐌᓂ ᐅᐐᔭᐤ X᙮ ᐁᑕᓱᐯᔑᑯᔦᒃ ᑭᑑᒋᑎᐯᑖᑯᓯᒻ ᒦ ᐃᒫ X ᐅᐐᔭᐎᕽ ᑳᑕᓱᐃᔑᓈᑯᓯᔦᒃ᙮

ᐃᐃᒫ ᑕᔥ ᐁᔑᒫᐗᒋᐃᑎᐙᒡ ᐅᑌᐺᑕᒨᒃ ᑲᑭᓇ ᐊᐎᔭᐞ ᑭᔐᒪᓂᑑ ᐅᑮᐃᓇᓵᐞ ᑫᐅᒋᑎᐯᑖᑯᓯᓂᒡ᙮ ᓂᑕᒻ ᐅᑮᐃᓇᓵᐞ ᐃᔑᓂᔕᐙᑲᓇᐞ ᒋᓃᑳᓀᑖᑯᓯᓂᒡ᙮ ᒦᓇᐙ ᑕᔥ ᐅᑎᐹᒋᒨᐞ ᑳᑲᓅᒋᑫᑕᒫᑯᒡ ᐅᑮᐃᓇᓵᐞ ᒋᐋᓂᑫ ᓃᑳᓀᑖᑯᓯᓂᒡ᙮ ᒦᑕᔥ ᒦᓇᐙ ᐅᑭᑭᓄᐊᒫᑫᐞ ᐅᑮᐃᓇᓵᐞ ᒋᐊᓂᐋᓂᑫ ᓃᑳᓀᑖᑯᓯᓂᒡ᙮ ᒦᑕᔥ ᐃᒫ ᐁᓂᐋᓂᑲᐎᔥᑳᑫᐙᒡ ᑳᒫᒪᑳᒋᒋᑫᐙᒡ, ᒦᓇᐙ ᑕᔥ ᐃᑭ ᑳᔑᒦᓂᑰᐎᓯᐙᒡ ᒋᒥᓄᔭᔮᐃᐌᐙᒡ ᑲᔦ ᑳᐐᒋᐃᐌᐙᒡ, ᒦᓇᐙ ᑕᔥ ᐋᓂᑕ ᑳᓃᑳᓂᓰᑲᑖᑫᐙᒡ ᐃᓇᓵᐗᒃ, ᑲᔦ ᐯᐸᑳᓐ ᐃᔑᑮᔗᐎᓇᓐ ᑳᒦᓂᑣ᙮

ᑳᐐᓐ ᑲᑭᓇ ᐊᐎᔭ ᐃᔑᓂᔕᐙᑲᓐ ᑎᓄᐎᓰᐗᒃ᙮ ᑳᐐᓐ ᑲᑭᓇ ᐃᔑᒦᓈᓰᐗᒃ ᒋᑲᓅᑕᒪᐙᐙᒡ ᑭᔐᒪᓂᑑᓐ᙮ ᑳᐐᓐ ᑲᔦ ᑲᑭᓇ ᐅᑭᑭᓄᐊᒫᑫᐎᓰᐗᒃ, ᑳᐐᓐ ᑲᑭᓇ ᒫᒪᑳᒋᒋᑫᓰᐗᒃ᙮

ᑳᐐᓐ ᑲᑭᓇ ᒦᓂᑰᐎᓯᓰᐗᒃ ᒋᒥᓄᔭᔮᐃᐌᐙᒡ᙮ ᑳᐐᓐ ᑲᔦ ᑲᑭᓇ ᐃᔑᑮᑭᑐᓰᐗᒃ ᐯᐸᑳᓐ ᐊᔨᔑᑮᔗᐎᓇᓐ᙮ ᑳᐐᓐ ᑲᑭᓇ ᐊᐎᔭ ᐋᓂᑲᓅᑕᒫᑫᓰᐗᒃ᙮

ᐃᓂ ᑕᔥ ᒫᐗᒡ ᑳᐅᓂᔑᔑᑭᓐ ᒦᓂᑰᐎᓯᐎᓇᓐ, ᒦᐗᓂᓂ ᑲᑴ ᐊᑕᐌᑕᒧᒃ᙮ ᐯᔑᒃ ᐃᑕᔥ ᐃᔑᐊᔮᐎᓐ ᑭᐐᐊᓂᐙᐸᑕᐃᓂᓂᒻ ᒫᐗᒡ ᐁᓃᑳᓂᐅᓂᔑᔑᕽ᙮

ᐋᓇᐐᓐ ᑲᔥᑭᑑᔮᓐ ᐯᐸᑳᓐ ᑳᐃᔑᑮᔗᐙᒡ ᐃᓂᓂᐗᒃ ᑲᔦ ᐁᒐᓬᐊᒃ, ᑮᔥᐱᓐ ᐃᑕᔥ ᐁᑳ ᓵᑭᐃᐌᓯᐙᓐ, ᒦ ᐊᓂᔖ ᒋᒥᒋ ᓈᓅᑖᑯᓯᔮᓐ᙮ ᑖᐱᔥᑰ ᑲᒥᒋ ᐹᐹᐙᐱᑲᐃᑳᑌᒃ ᑲᔦ ᐁᒥᒋ ᐸᐸᓶᐌᔮᐱᑭᓭᒃ ᐁᐗᓂᔥᑴᐌᑖᑾᑭᓐ ᑖᐃᓀᑖᑾᓐ ᓂᑲᑭᑐᐎᓐ᙮

ᒫᑭᔖ ᑲᔦ ᐊᔮᔮᓐ ᒦᓂᑰᐎᓯᐎᓐ ᒋᑲᓅᑕᒪᐗᒃ ᑭᔐᒪᓂᑑ, ᒫᑭᔖ ᑲᔦ ᑲᑭᓇ ᑫᑰᓐ ᑭᑫᑕᒧᐎᓐ ᐊᔮᔮᓐ, ᑲᔦ ᑲᑭᓇ ᑫᑰᓇᓐ ᒋᐅᒋᓂᓯᑐᑕᒫᓐ ᐁᑳ ᒪᔑ ᑳᑭᑫᑖᑾᓯᓄᑭᓐ, ᑲᔦ ᐁᑌᐱᓭᔮᓐ ᑌᐺᔦᑕᒧᐎᓐ ᒋᑲᓅᑕᒫᓐ ᐗᒋᐗᓐ ᒋᐋᑕᑌᑭᓐ; ᑲᑭᓇ ᐃᓂ ᐋᓇᑲᔥᑭᑑᔮᓐ, ᑮᔥᐱᓐ ᑕᔥ ᐁᑳ ᓵᑭᐃᐌᓯᐙᓐ, ᑳᐐᓐ ᐄᓴᓐ ᑫᑰᓐ ᓂᑖᐃᓈᐸᑎᓯᓰ᙮

ᑲᔦ ᑲᑭᓇ ᐋᓇ ᒫᒫᑕᐆᑮᔮᓐ ᓂᑎᐱᓇᐌᐎᓯᐎᓐ, ᐴᔥᑫ ᓂᐐᔭᐤ ᐸᑭᑎᓇᒫᓐ ᒋᒑᑭᓯᑳᑌᒃ, ᑮᔥᐱᓐ ᑕᔥ ᓵᑭᐃᐌᓯᐙᓐ ᑳᐐᓐ ᑫᑰᓐ ᐃᐃᒫ ᓂᑲᐅᑎᓇᓰᓐ᙮

ᓵᑭᐃᐌᒡ ᐊᐎᔭ ᑕᔕᔒᐯᑕᒻ, ᑕᑭᔐᐙᑎᓯ᙮ ᑳᐐᓐ ᐅᑲᐅᑌᓂᒫᓰᓐ ᐊᐎᔭᓐ᙮ ᑳᐐᓐ ᒪᒦᒀᓂᑎᓱᓰ, ᑳᐐᓐ ᑲᔦ ᐃᔥᐯᓂᑎᓱᓰ᙮

ᓵᑭᐃᐌᒡ ᐊᐎᔭ ᑕᒪᓈ ᒫᔑᐙᐸᑕᐃᐌ᙮ ᑳᐐᓐ ᓃᑳᓀᓂᑎᓱᓰ, ᑳᐐᓐ ᐐᐸ ᓂᔥᑳᑎᓯᓰ᙮ ᑳᐐᓐ ᐅᐸᐹᒣᑕᓰᓐ ᑫᑰᓐ ᐁᐃᔑᒋᑫᐃᓐᒡ᙮

ᐊᐊ ᓯᔮᑭᐃᐌᒡ ᑳᐐᓐ ᐅᒋᒥᓉᑕᓰ ᐊᐎᔭᓐ ᐁᒪᒋᒋᑫᓂᒡ᙮ ᓇᐗᒡ ᐃᑕᔥ ᐅᒋᒥᓉᑕᒻ ᐃᐃ ᑌᐺᐎᓐ ᐁᑑᒋᑳᑌᓂᒃ᙮

ᑳᐐᓐ ᑕᐅᒋᐸᑭᒌᓰ᙮ ᑲᐯᐊᔭᐄ ᑌᐺᔦᑕᒻ, ᒪᔥᑲᐎᐊᐯᓂᒧ, ᐱᔑᔑᒃ ᐃᑯ ᒪᔥᑲᐌᑕᒻ᙮

ᑳᐐᓐ ᐐᑳ ᑕᐃᔥᒀᓭᓯᓅᓐ ᐃᐃ ᓵᑭᐃᐌᐎᓐ᙮ ᐋᓂᑕ ᐊᓇᐃᔑᒦᓂᑣ ᑫᐃᔑᑲᓅᒋᑫᑕᒪᐙᐙᒡ ᑭᔐᒪᓂᑑᓐ, ᐹᓂᒫ ᑕᔥ ᑕᐴᓂᐊᔮ ᐃᐌ ᐃᔑᑮᑭᑐᐎᓐ᙮ ᐋᓂᑕ ᑲᔦ ᐸᑳᓂᑮᔗᐎᓐ ᐁᒦᓂᑣ, ᐹᓂᒫ ᐊᐲ ᑕᐴᓂᑮᔗᒻ᙮ ᐋᓂᑕ ᑭᑫᑕᒧᐎᓐ ᐋᓇ ᐊᔮᐙᒡ, ᐹᓂᒫ ᑕᓇᑲᒋᑳᑌ ᐃᐌ ᓅᑯᒻ ᑳᑭᑫᑖᑾᒃ᙮

ᐅᐅᐌ ᐋᓃᔥ ᓅᑯᒻ ᑳᑭᑫᑕᒪᕽ, ᐸᑮ ᐁᑕ ᐃᐌ ᑭᑭᑫᑖᒥᓐ᙮ ᔑᑾ ᐋᓇᐐᓐ ᐃᔑᒦᓂᑰᔭᕽ ᑭᔐᒪᓂᑑ ᐁᑲᓅᒋᑫᑕᒪᐗᕽ, ᐸᑮ ᐁᑕ ᑭᐐᑖᒥᓐ ᐅᑎᓀᒋᑫᐎᓐ᙮

ᐊᐲ ᑕᔥ ᐱᐅᒋᒋᓭᒃ ᐃᐃ ᑳ ᐊᐲᒋ ᒥᓯᐌᐊᔮᒃ, ᑳᐐᓐ ᑫᔮᐱ ᑕᓈᑾᓯᓅᓐ ᐃᐃᐌ ᐸᑮ ᑳ ᐊᔮᒃ᙮

ᐊᐲ ᑮᐊᐱᓅᒌᔑᐎᔮᐹᓐ, ᐊᐱᓅᒌᔑᕽ ᓂᑮᐃᔑᑲᑭᑦ, ᓂᑮᐃᔑᓇᒻ, ᓂᑮᐃᓀᑕᒻ᙮ ᐹᓂᒫ ᑕᔥ ᐁᑮᑭᒋ ᐃᓂᓃᐎᔮᓐ, ᐋᔕ ᓂᑮᓇᑲᑖᓐ ᓂᑕᐱᓅᒌᔑᐎ ᐋᔨᑎᐎᓐ᙮

ᐃᐃᐌ ᓅᑯᒻ ᑳᐙᐸᑕᒪᕽ ᑖᐱᔥᑰ ᐙᐸᒧᓂᕽ ᐁᒥᒋᐸᐎᓈᑾᒃ ᑭᑎᔑᓈᒥᓐ᙮ ᐱᒌᓇᒃ ᐃᑕᔥ ᐅᒋᒋᓭᒃ, ᑾᔭᒃ ᐃᑯ ᐯᔓ ᑭᑲᐙᐸᒫᓈᓐ᙮ ᒣᒀ ᐱᑯ ᐅᐅ ᐊᐲ ᐸᑮ ᐁᑕ ᓂᑎᔑᑭᑫᑕᒻ᙮ ᐹᓂᒫ ᑕᔥ ᐊᐲ ᓂᑲᒥᓯᐌ ᑭᑫᑕᒻ ᑖᐱᔥᑰ ᑭᔐᒪᓂᑑ ᑳᐃᔑᔖᐳᑭᑭᑫᓂᒥᔑᒡ᙮

ᒣᒀ ᑕᔥ ᐊᔮᐗᓐ ᐅᓄ ᓂᓯᓐ ᐁᑳ ᑫᐃᔥᒀᓭᓯᓄᑭᓐ: ᑌᐺᔦᑕᒧᐎᓐ, ᐊᐯᓂᒧᐎᓐ, ᓵᑭᐃᐌᐎᓐ᙮ ᐃᐃᐌ ᑕᔥ ᓵᑭᐃᐌᐎᓐ ᒫᐗᒡ ᑭᒋ ᐃᓀᑖᑾᓐ᙮

ᒦ ᐃᐌ ᓵᑭᐃᐌᐎᓐ ᐱᒥᓂᔕᐊᒧᒃ᙮ ᐊᑕᐌᑕᒧᒃ ᐃᑕᔥ ᑲᔦ ᐊᒑᑯᐎ ᒦᓂᑰᐎᓇᓐ᙮ ᒦ ᐃᐌ ᓇᐗᒡ ᐃᔑᐊᑕᐌᑕᒧᒃ ᒋᑲᓅᑕᒪᐌᒃ ᑭᔐᒪᓂᑑ᙮

ᐊᐊᐌ ᐋᓃᔥ ᐁᐃᔑᑲᑭᑐᒡ ᐯᐸᑳᓐ ᐊᔨᔑᑮᔗᐎᓇᓐ, ᑳᐐᓐ ᒪᔮ ᐅᑎᔑᑲᓅᓈᓰᐞ ᐃᓂ ᐯᒫᑎᓯᓂᒡ, ᑭᔐᒪᓂᑑᓐ ᐁᑕ ᑯ᙮ ᑳᐐᓐ ᐸᑳᓐ ᐊᐎᔭᓐ ᐅᓂᓯᑐᑖᑯᓰᓐ᙮ ᐁᔑᒦᓂᑯᒡ ᐃᑕᔥ ᐃᓂ ᑭᔐᒪᓂᑑᓐ ᐅᑕᒑᑾᓐ, ᒦ ᐃᐌ ᐁᔑᐐᑕᕽ ᐃᓂ ᑫᑰᓇᓐ ᑳᑳᒋᑳᑌᓂᑭᓐ᙮

ᐊᐎᔭ ᑕᔥ ᑳᑲᓅᑕᒪᐙᒡ ᑭᔐᒪᓂᑑᓐ ᐅᑎᔑᑲᓅᓈᐞ ᐃ ᐯᒫᑎᓯᓂᒡ ᒋᑲᑴ ᒪᔥᑲᐎᑭᐋᒡ᙮ ᐅᑲᑴᒦᓈᐞ ᒪᔥᑲᐌᑕᒧᐎᓐ, ᐅᑲᑴᓇᓇᐁᑕᒥᐋᐞ᙮

ᐊᐎᔭ ᑳᐸᑳᓂᑮᔗᒡ ᐐᓐ ᐃᑯ ᐁᑕ ᒪᔥᑲᐎᑭᐃᑎᓱ᙮ ᐊᐎᔭ ᑕᔥ ᑳᑲᓅᒋᑫᑕᒪᐙᒡ ᑭᔐᒪᓂᑑᓐ, ᑲᑭᓇ ᐊᐎᔭᐞ ᐅᒪᔥᑲᐎᑭᐋᐞ ᐅᑌᐺᑕᒨᐞ ᑳᑕᔑᒫᐗᒋᐃᑎᓂᒡ᙮

ᓂᑖᒥᓉᑕᒻ ᑲᑭᓇ ᐊᐎᔭ ᐯᐸᑳᓂᑮᔗᐎᓇᓐ ᐋᐸᒋᑑᔦᒃ᙮ ᓇᐗᒡ ᐃᑕᔥ ᓂᑖᒥᓉᑕᒻ ᑲᓅᑕᒪᐌᒃ ᑭᔐᒪᓂᑑ᙮ ᓇᐗᒡ ᐋᓃᔥ ᑭᑕᑭᒫ ᐊᐌ ᑳᑲᓅᑕᒪᐙᒡ ᑭᔐᒪᓂᑑᓐ ᐊᐲᒡ ᐐᓐ ᐊᐊ ᑳᐯᐸᑳᓂᑮᔗᒡ᙮ ᒦ ᐁᑕ ᑫᔑᑭᑖᐸᑎᓯᒡ, ᐃᐃᒫ ᐊᔮᒡ ᐊᐎᔭ ᑫᐊᓂᑲᓅᑕᒫᑫᒡ, ᑲᑭᓇ ᐃᒫ ᑳᑕᔑᒫᐗᒋᐃᑎᐙᒡ ᐅᑌᐺᑕᒨᒃ ᒋᐅᒋᒪᔥᑲᐎᐃᑯᐙᒡ ᐃᐃᐌ ᐃᑭᑐᐎᓐ᙮

ᐋᓃᓐ, ᓃᒋᐅᑌᐺᑕᒨᒃ! ᐊᐲ ᐅᑎᓯᓇᑰᒃ ᐋᓃᓐ ᑫᐃᓈᐸᑎᓯᔮᐹᓐ ᐸᑳᓂ ᐃᔑᑮᔗᐎᓇᓐ ᐁᑕ ᐃᔑᑮᑭᑐᔮᓐ? ᑮᔥᐱᓐ ᐁᑕ ᐃᔑᑲᓅᓂᓇᑰᒃ ᑭᔐᒪᓂᑑ ᑳᐃᔑᑭᑫᑕᒨᔑᐌᒡ, ᑲᔦ ᑭᑫᒋᑫᐎᓐ ᒦᓂᓇᑰᒃ, ᑲᔦ ᑫᑰᓐ ᑭᔐᒪᓂᑑ ᐃᔑᑲᓅᑕᒪᐗᒃ ᑫᒫ ᑲᔦ ᑫᑰᓐ ᑭᑭᓄᐊᒪᐎᓇᑰᒃ, ᒦ ᐁᑕ ᐃᒫ ᑫᐃᔑᒥᓄᓭᐃᓇᑰᒃ᙮

ᐃᓇᔥᑫ ᐋᓃᔥ ᑭᑐᒋᑲᓇᒃ ᐁᐱᒫᑎᓯᓯᒀ, ᒫᑭᔖ ᐴᑖᒋᑲᓐ ᑲᔦ ᒪᑗᔮᐲᑭᐱᒋᑲᓐ – ᐅᑲᓂᓯᑖᐎᑖᓐ ᐃᓇ ᐊᐎᔭ ᐃ ᓂᑲᒧᓐ ᓅᐙᒡ ᐃᑯ ᐃᓉᐌᒧᒋᑫᓈᓂᐗᓂᓂᒃ? ᑳᐐᓐ ᐄᑐᒃ᙮

ᐊᐯ ᑲᔦ ᐁᐊᑕᒦᑳᓱᓈᓂᐗᕽ, ᐊᐊᐌ ᑳᓅᑖᑯᑕᒪᐙᒡ ᔑᒫᑲᓂᔕᐞ, ᑮᔥᐱᓐ ᓅᐙᒡ ᐃᔑᓅᑖᑯᑑᒡ ᐃᐃ ᐴᑖᒋᑲᓐ, ᐊᐌᓀᓇᓐ ᐃᑕᔥ ᑫᑭᑫᑕᒥᓂᐸᓐ ᒋᐗᐌᓃᓂᒡ?

ᒦ ᐯᔑᑾᓐ ᑫᑮᓇᐙ᙮ ᑮᔥᐱᓐ ᐃᔑᑮᔗᓯᐌᒃ ᒋᐸᑲᑭᑖᑾᒃ, ᐋᑎ ᑫᐅᒋᑭᑫᒋᑳᑌᑭᐸᓐ ᐃᐃᐌ ᑳᐃᑭᑐᔦᒃ? ᐊᓂᔖ ᑭᑲᒥᒋᑲᑭᑐᒻ᙮

ᐹᑏᓇᑎᓄᑐᑫᓇᓐ ᐃᔑᑮᔗᐎᓇᓐ ᐅᐅᒫ ᐊᑮᕽ᙮ ᑳᐐᓐ ᐊᐙᒡ ᐯᔑᒃ ᐃᔑᑮᔗᐎᓐ ᐊᓂᔖ ᐃᓉᒪᑲᓯᓅᓐ᙮

ᑮᔥᐱᓐ ᐃᑕᔥ ᑭᑫᑕᓯᐙᓐ ᐃᔑᑮᔗᐎᓐ, ᓂᑲᒪᔭᑭᑕᐙ ᐊᐌ ᑳᐃᔑᑮᔗᒡ, ᔑᑾ ᑫᐐᓐ ᓂᑲᒪᔭᑭᑖᒃ᙮

ᑮᓇᐙ ᑕᔥ ᐁᐋᑯ ᐊᑕᐌᑕᒣᒃ ᐊᒑᑯᐎ ᒦᓂᑰᐎᓇᓐ, ᒦᐗᓂᓂ ᒫᐗᒡ ᑲᑴᓇᑲᒋᑑᒃ ᐃᓂ ᒦᓂᑰᐎᓯᐎᓇᓐ ᐊᐗᔑᒣ ᑫᐅᒋᒥᓄᓭᐃᑯᐙᒡ ᑲᑭᓇ ᐅᑌᐺᑕᒨᒃ ᐃᐃᒫ ᑳᒫᐗᒋᐊᓇᒥᐋᐙᒡ᙮

ᒦᑕᔥ ᐃᐃ ᐊᐌᓀᓐ ᓀᑖ ᐋᐸᒋᑑᒡ ᐸᑳᓐ ᐃᔑᑮᔗᐎᓐ ᐅᑲᑲᑴᒋᒫᓐ ᑭᔐᒪᓂᑑᓐ ᒋᒦᓂᑯᒡ ᒋᐋᓂᑲᓅᑕᒫᓱᒡ᙮

ᑮᔥᐱᓐ ᐋᓃᔥ ᐃᔑᐊᓇᒥᐋᔮᓐ ᐸᑳᓐ ᐃᔑᑮᔗᐎᓂᕽ, ᓂᑕᒑᑯᕽ ᐄᓴᓐ ᓂᑐᒋᐊᓇᒥᐋ᙮ ᑳᐐᓐ ᐃᐃᒫ ᑳᔑᓈᑲᑕᐌᑕᒫᓐ ᐃᔑᐐᒋᐃᐌᒪᑲᓯᓅᓐ᙮

ᐅᐅ ᑕᔥ ᐃᔑᓭᒃ, ᐋᓃᓐ ᑫᐃᔑᒋᑫᔮᓐ? ᓂᑕᒑᑯᕽ ᓂᑲᐅᒋᐊᓇᒥᐋ, ᑲᔦ ᓴ ᑯ ᑳᔑᓈᑲᑕᐌᑕᒫᓐ ᓂᑲᐅᒋᐊᓇᒥᐋ᙮ ᓂᑕᒑᑯᕽ ᓂᑲᐅᒋᓂᑲᒻ, ᐃᒫᔥ ᑲᔦ ᑳᔑᓈᑲᑕᐌᑕᒫᓐ ᓂᑲᐅᒋᓂᑲᒻ᙮

ᑮᔥᐱᓐ ᐃᑕᔥ ᑭᑕᒑᑯᕽ ᐁᑕ ᐅᒋᓇᓈᑯᒪᒡ ᐊᐊ ᑭᔐᒪᓂᑑ, ᐲᑎᑫᒡ ᐃᑕᔥ ᐊᐎᔭ ᑳᐐᒋ ᐃᓀᑖᑯᓰᒥᓯᓄᐌᒃ, ᐋᓃᓐ ᑫᔑᓇᑯᑕᕽ ᐁᒣᓐ ᒋᐃᑭᑐᒡ? ᑳᐐᓐ ᐋᓃᔥ ᐅᑭᑫᑕᓰᓐ ᐃᐃ ᑳᐃᑭᑐᐎᓐᒡ᙮

ᐋᓇᐐᓐ ᐁᑌᐅᓂᔑᔑᕽ ᑭᓇᓈᑯᒥᐌᐎᓐ, ᑳᐐᓐ ᑲᓇᑫ ᐅᒥᓄᓭᐃᑯᓰᓐ ᐊᐊᐌ ᑳᑭᑫᑕᓯᒃ᙮

ᓃᓐ ᐃᑯ ᓂᓇᓈᑯᒫ ᑭᔐᒪᓂᑑ, ᐊᐌᓀᓐ ᐃᑯ ᑳᑕᔑᔦᒃ ᐯᐸᑳᓂ ᐃᔑᑮᔗᐎᓇᓐ ᐁᔑᐋᐸᒋᑑᒡ, ᓇᐗᒡ ᓃᓐ ᓃᐱᐗᐞ ᓂᑎᔑᑮᔗ᙮

ᐊᐲᔥ ᐁᒫᐗᒋᐃᑎᓈᓂᐗᕽ, ᓇᐗᒡ ᓂᑖᐃᓀᑕᒻ ᓈᓇᓐ ᒋᐋᐸᒋᑑᔮᓐ ᐃᑭᑐᐎᓇᓐ ᑫᐃᔑᓂᓯᑐᑖᑾᑭᓐ, ᐸᑳᓐ ᐊᐎᔭ ᒋᑭᑭᓄᐊᒪᐗᒀ, ᐊᐲᒡ ᐐᓐ ᒥᑖᒋᕽ ᒥᑖᔂᒃ ᑕᓯᑭᓐ ᓂᑎᑭᑐᐎᓇᓐ ᐁᒪᔭᑭᑮᔗᔮᓐ᙮

ᓃᒋᐅᑌᐺᑕᒨᒃ, ᑫᑯ ᐃᐌ ᐊᐱᓅᒌᐎ ᐃᓀᑕᒧᐎᓐ ᐃᔑᐋᐸᒋᑑᑫᒃ᙮ ᒦ ᐅᐌ ᑕᔥ ᐁᑕ ᒋᑲᑴᐃᔑᐊᔮᔦᒃ ᐅᔥᑲᐱᓅᒌᔑᕽ, ᒋᒪᓈᑭᑫᑕᒣᒃ ᑳᒫᔑᓈᑾᑭᓐ᙮ ᑭᓈᑲᑕᐌᒋᑲᓂᐙᕽ ᐃᑕᔥ ᑖᐱᔥᑰ ᑳᑮᔖᐯᐎᒡ ᐃᔑᐊᔮᔪᒃ᙮

ᑫᑌᑭᒋᐅᔑᐲᐃᑫᐎᓂᕽ ᐃᔑᐲᐃᑳᑌ ᐅᐅᐌ: ᑳᑎᐯᒋᑫᒡ ᐃᑭᑐ: ᑳᒪᔭᑭᑮᔗᐙᒡ ᓂᑲᐊᓅᓈᒃ ᒋᑲᓅᓈᐙᒡ ᓂᐱᒫᑎᓰᒪᐞ᙮ ᒥᓴᐙ ᐲᐎᑌᒃ ᐅᑑᓂᐙᕽ ᓂᑲᐃᔑᑲᓅᓈᒃ ᐅᑯ ᓂᐱᒫᑎᓰᒪᒃ, ᑫᔮᐱ ᑕᔥ ᑳᐐᓐ ᓂᑲᐱᓯᑖᑯᓰᒃ, ᐃᑭᑐ᙮

ᒦᑕᔥ ᐅᐅᐌ ᐃᔑᒦᓂᑰᐎᓯᐎᓐ ᐯᐸᑳᓂᑮᔗᐎᓇᓐ ᐁᐋᐸᑕᑭᓐ ᐁᓅᑖᑾᑭᓐ, ᑕᐅᒋᑭᑫᓂᑎᓱᐗᒃ ᐃᑭ ᑳᐅᑌᐺᑕᒧᐎᓂᓯᒀ ᐁᑎᓄᐎᐙᒡ᙮ ᑳᐐᓐ ᐐᓐ ᐃᓈᐸᑕᓯᓅᓐ ᐅᑌᐺᑕᒨᒃ ᒋᑭᑫᓂᑎᓱᐙᒡ᙮ ᐃᐃᐌ ᑕᔥ ᐃᔑᒦᓂᑰᐎᓯᐎᓐ ᑭᔐᒪᓂᑑ ᐁᑲᓅᑕᒪᐙᒡ ᐊᐎᔭ, ᒦ ᐃᒫ ᑕᐅᒋᑭᑫᓂᑎᓱᐗᒃ ᐅᑌᐺᑕᒨᒃ, ᐃᔑᑲᓅᓂᑣ᙮ ᑳᐐᓐ ᐐᓐ ᐃᐃᒫ ᑳᐅᑌᐺᑕᒧᐎᓂᓯᒀ ᑕᐅᒋᑭᑫᓂᑎᓱᓰᐗᒃ᙮

ᒦᑕᔥ ᑮᔥᐱᓐ ᑲᑭᓇ ᐁᒫᐗᑑᐲᑎᑫᐙᒡ ᐅᑌᐺᑕᒨᒃ, ᑲᑭᓇ ᑕᔥ ᑕᔑᐯᐸᑳᓂᑮᔗᐙᒡ, ᑮᔥᐱᓐ ᐃᑕᔥ ᐅᒋᐲᑎᑫᐙᒡ ᐋᓂᑕ ᐃᑭᐌᓂᐗᒃ ᐁᑳ ᒪᔑ ᐁᐐᒋ ᐃᓀᑖᑯᓰᒥᓯᓄᐌᒀ ᑫᒫ ᑲᔦ ᑳᐅᑌᐺᑕᒧᐎᓂᓯᒀ, ᑳᐐᓐ ᐃᓇ ᑮᐗᔥᑴᔮᑎᓯᐗᒃ ᑭᑖᐃᑯᓰᐙᒃ?

ᑮᔥᐱᓐ ᐃᑕᔥ ᑲᑭᓇ ᐅᒋᑲᓅᑕᒪᐙᐙᒡ ᑭᔐᒪᓂᑑᓐ ᐅᑎᑭᑐᐎᓂᓃᕽ, ᒦᔥ ᐊᐲ ᐁᐲᑎᑫᒡ ᐊᐎᔭ ᐁᑳ ᒪᔑ ᑳᐐᒋ ᐃᓀᑖᑯᓰᒥᐌᓯᒃ ᑫᒫ ᑲᔦ ᑳᐅᑌᐺᑕᒧᐎᓂᓯᒃ, ᐅᑲᒪᒦᑾᐅᑯᓐ ᐃᐃᐌ ᑳᓅᑕᕽ, ᐃᐃᐌᓂ ᑕᔥ ᑲᑭᓇ ᑳᐃᑭᑐᓂᒡ ᑾᔭᒃ ᐅᑲᐙᐸᑕᐃᑯᓐ ᐋᓃᓐ ᑳᐃᓈᑎᓯᒡ᙮

ᐃᐃᐌᓂ ᑳᑮᑳᑑᐸᓐ ᐅᑎᓀᑕᒧᐎᓐ ᒧᔐᐊᔭᐄ ᑕᐃᔑᓯᒋᑳᑌᓂ᙮ ᑕᐊᓂᒥᑯᑖ, ᐅᑲᑭᒋ ᐃᓀᓂᒫᓐ ᐃᑕᔥ ᑭᔐᒪᓂᑑᓐ, ᑲᔦ ᑭᑲᐃᓈᒋᒥᑯᐙ ᑌᐺ ᐁᐐᒌᐎᓀᒃ ᑭᔐᒪᓂᑑ᙮

ᐋᓃᓐ ᐃᑕᔥ, ᓃᒋᐅᑌᐺᑕᒨᒃ? ᐊᐲ ᐙᒫᐗᒋᐃᑎᔦᒃ ᐯᔑᒃ ᐅᑕᔮᓐ ᓂᑲᒧᐎᓐ, ᔑᑾ ᐯᔑᒃ ᐅᑕᔮᓐ ᑭᑭᓄᐊᒫᑫᐎᓐ, ᔑᑾ ᑲᔦ ᐯᔑᒃ ᐅᑭᑫᑕᒧᐃᑰᓐ ᑭᔐᒪᓂᑑᓐ ᒋᐐᑕᒫᑫᒡ᙮ ᔑᑾ ᐯᔑᒃ ᐸᑳᓐ ᐃᔑᑮᔗᐎᓐ ᐃᔑᒦᓈ, ᒦᓇᐙᔥ ᐊᐊ ᐯᔑᒃ ᐅᑖᓂᑲᓅᑕᒪᐙᓐ ᐃᓂ ᐸᑳᓐ ᑳᐃᔑᑮᔗᓂᒡ᙮ ᒦ ᑯ ᐃ ᑲᑭᓇ ᑕᑑᒋᑳᑌᐗᓐ ᒋᒫᒪᐎ ᒪᔥᑲᐎᑭᐃᑎᔦᒃ᙮

ᑮᔥᐱᓐ ᐊᐎᔭᒃ ᐐᐸᑳᓂᑮᔗᐙᒡ, ᒫᑭᔖ ᓃᔑᓐ ᒫᑭᔖ ᑲᔦ ᓂᓯᓐ ᐁᑕ ᑕᑲᑭᑐᐗᒃ, ᑳᐐᓐ ᐊᐗᔑᒣ᙮ ᐸᑳᓐ ᐃᑕᔥ ᐃᑯ ᐊᐎᔭ ᐅᑲᐋᓂᑲᓅᑖᓐ ᐃᐌ ᑳᐃᑭᑐᐎᓐᒡ᙮

ᐊᔮᓯᒃ ᐃᑕᔥ ᐊᐎᔭ ᑫᐋᓂᑲᓅᑕᕽ, ᒫᓄ ᑕᒥᒋᓇᒪᑕᐱ ᐊᐌ ᐸᑳᓂᑮᔗᐎᓐ ᑳᐊᔮᒡ᙮ ᐐᓀᑕ ᑕᑲᓅᓂᑎᓱ ᑲᔦ ᑭᔐᒪᓂᑑᓐ ᐅᑲᑲᓅᓈᓐ᙮

ᐃᑭᐌᓂᐗᒃ ᐃᑕᔥ ᑳᓂᑖ ᑲᓅᑕᒪᐙᐙᒡ ᑭᔐᒪᓂᑑᓐ ᑕᓃᔑᐗᒃ ᑫᒫ ᑕᓂᓯᐗᒃ ᑫᑲᑭᑐᐙᒡ᙮ ᑯᑕᒃ ᐃᑕᔥ ᐊᐎᔭᒃ ᐅᑲᑲᑴᓯᑖᓈᐙ᙮

ᐊᐎᔭ ᑕᔥ ᐃᑯ ᐁᒣᑴᓇᒪᑕᐱᒡ, ᑮᔥᐱᓐ ᐅᒋᑭᑫᑕᒧᐃᑯᒡ ᑭᔐᒪᓂᑑᓐ ᑫᑰᓐ ᒋᐐᑕᒫᑫᒡ, ᓃᑳᓐ ᐊᐊ ᑳᑲᑭᑐᒡ ᑕᑭᐱᒋᑲᑭᑐ᙮

ᑲᑭᓇ ᐯᐯᔑᒃ ᑳᑕᔑᔦᒃ ᑭᑲᐸᑭᑎᓇᒫᑰᒻ ᒋᑲᓅᑕᒪᐌᒃ ᑭᔐᒪᓂᑑ, ᒦᑕᔥ ᐃᐌ ᑲᑭᓇ ᐊᐎᔭ ᒋᐃᔑᑭᑭᓄᐊᒫᑰᐎᓯᒡ ᑲᔦ ᑲᑭᓇ ᒋᐅᒋᒪᔥᑲᐌᑕᒧᐙᒡ᙮

ᐊᐎᔭ ᑕᔥ ᐃᔑᒦᓂᑰᐎᓯᒡ ᒋᑲᓅᒋᑫᑕᒪᐙᒡ ᑭᔐᒪᓂᑑᓐ, ᐅᑲᑲᔥᑭᑑᓐ ᒋᑎᐯᑕᕽ ᐃᐃ ᐅᑎᔑᒦᓂᑰᐎᓯᐎᓐ ᑾᔭᒃ ᒋ ᐃᓈᐸᒋᑑᒡ᙮

ᐃᓇᔥᑫ ᑳᐐᓐ ᐃᐌ ᓂᔑᐗᓈᑕᑲᒥᑭᓯᐎᓐ ᐅᑑᔑᑑᓰᓐ ᑭᔐᒪᓂᑑ, ᐃᐃᐌ ᓴ ᒋᓴᑲᑲᒥᑭᓯᕽ᙮ ᒦᓇᐙ ᑕᔥ ᐅᐌ ᐁᔑᒋᑫᐙᒡ ᑭᔐᒪᓂᑑ ᐅᐱᒫᑎᓰᒪᐞ ᐋᑎ ᐱᑯ ᑳᐃᔑᒫᐗᒋᐃᑎᓂᒡ, ᐯᔑᑾᓐ ᑫᑮᓇᐙ ᒋᐃᔑᒋᑫᔦᒃ:

ᑕᑲ ᑕᑯᔅᒀᐙᑕᐱᐗᒃ ᐃᑭ ᐃᑴᐗᒃ᙮ ᑳᐐᓐ ᑕᐸᑭᑎᓇᒪᐙᓰᐗᒃ ᒋᑲᑭᑐᐙᒡ᙮ ᐃᓈᐗᒃ ᓴ ᐅᑖᓈᕽ ᒋᐃᓀᑖᑯᓯᐃᑎᓱᐙᒡ᙮ ᒦ ᐃᐌ ᐁᔑᓯᕽ ᑭᔐᒪᓂᑑ ᐅᑎᓈᑯᓂᑫᐎᓐ᙮

ᑮᔥᐱᓐ ᐃᑕᔥ ᑫᑰᓐ ᐐᐊᑕᑭᑫᑕᒧᐙᒡ ᐁᑮᑌᓂᓯᑐᑕᓯᒀ, ᐅᑲᑕᔑᑲᑴᒋᒫᐙᓐ ᐅᓈᐯᒥᐙᓐ ᐹᓂᒫ ᑮᑮᐌᐙᒡ ᐅᐙᑳᐃᑲᓂᐙᕽ᙮ ᐊᑲᒋᐌᑖᑾᓐ ᐃᓴ ᐊᐌ ᐃᑴ ᐁᑲᑭᑐᒡ ᐃᒫ ᐁᑕᔑᒫᐗᒋᐃᑎᕽ᙮

ᑯᒫ ᑮᓇᐙ ᐁᑕ ᑮᐅᒌᒪᑲᓄᑐᒃ ᐃᐃ ᑭᔐᒪᓂᑑ ᐅᑎᑭᑐᐎᓐ? ᑮᓀᑕᐙ ᓇ ᑭᑮᐱᐅᑎᓯᑯᒻ?

ᑮᔥᐱᓐ ᐊᐎᔭ ᓃᓐ ᑳᑲᓅᑕᒪᐗᒃ ᑭᔐᒪᓂᑑ ᐁᐃᓀᑕᕽ, ᑯᒫ ᓃᓐ ᓂᑕᒑᑯᐙᑎᔅ ᐃᓀᑕᕽ, ᐅᑖᓂᓯᑖᐎᓈᓇᓐ ᐃᓂ ᓃᓐ ᐌᔑᐲᐊᒪᐎᓇᑰᒃ ᑳᑎᐯᒋᑫᒡ ᐅᑎᓈᑯᓂᑫᐎᓐ ᐁᐋᐗᓂᓂᑭᓐ᙮

ᑮᔥᐱᓐ ᐃᑕᔥ ᐊᐎᔭ ᐐᓅᑕᓯᒃ ᐅᓄ ᐃᑭᑐᐎᓇᓐ, ᑳᐐᓐ ᑫᐐᓐ ᑕᐱᓯᑕᐙᑲᓂᐎᓰ᙮

ᑮᓇᐙ ᑕᔥ ᓃᒋᐅᑌᐺᑕᒨᒃ, ᒫᐗᒡ ᒥᓴᐌᑕᒧᒃ ᒋᑲᓅᑕᒪᐌᒃ ᑭᔐᒪᓂᑑ᙮ ᑳᐐᓐ ᑲᔦ ᑭᑲᐅᒋᐋᓯᐙᐙᒃ ᐊᐎᔭᒃ ᒋᐯᐸᑳᓂᑮᔗᓯᒀ᙮

ᒫᓄ ᓴ ᑲᑭᓇ ᑫᑰᓐ ᑾᔭᒃ ᒋᒥᓄᓈᑾᒃ, ᐊᐸᓀ ᓴ ᑯ ᒋᒥᓄᑑᒋᑳᑌᒃ ᑲᑭᓇ ᑫᑰᓐ᙮

ᓃᒋᐅᑌᐺᑕᒨᒃ, ᑭᐐᐙᐸᑕᐃᓂᓂᒻ ᐋᓃᓐ ᐁᔑᓈᑾᒃ ᐃᐃ ᒥᓍᒋᒧᐎᓐ, ᒦ ᐃᐌ ᓂᑕᒻ ᑳᑮ ᑲᑮᑭᒥᓇᑰᑭᐸᓐ ᑲᔦ ᑳᑮᐅᑖᐱᓇᒣᒃ, ᐊᒦ ᐃᒫ ᐁᑕᔑᒪᔥᑲᐎᑳᐸᐎᔦᒃ᙮

ᒦ ᓴ ᐅ ᒥᓍᒋᒧᐎᓐ ᑳᐱᒥᐅᒌᒪᑲᒃ ᒋᐱᒫᒋᐃᑰᔦᒃ ᑮᔥᐱᓐ ᓀᐱᒡ ᐃᑯ ᑭᒋᐎᓇᒣᒃ᙮ ᑮᔥᐱᓐ ᐃᑕᔥ ᑫᑰᓐ ᐃᓈᐸᑕᓯᓄᒃ ᑳᑮᐱᑌᐺᑕᒣᒃ ᑳᐐᓐ ᑭᑲᐱᒫᒋᐃᑰᓰᒻ᙮

ᐃᐃᐌ ᓴ ᑕᔥ ᑳᒫᐗᒋ ᓃᑳᓀᑖᑾᒃ ᑳᑮᒦᓂᑰᔮᓐ, ᑫᑮᓇᐙ ᑭᑮᐊᓂᐐᑕᒪᐎᓂᓂᒻ᙮ ᒦ ᐅᐌ ᐁᐃᑭᑑᒪᑲᒃ: ᐊᐊ X ᐁᑮᐃᔑᓂᐳᒡ ᐅᒋ ᑭᒪᒋᑑᑕᒧᐎᓂᓈᓂᓐ, ᒦ ᐃᐌ ᓃᔮᒃ ᑳᑮᐃᔑᐲᐃᑳᑌᒃ ᑫᑌᒪᓯᓇᐃᑲᓐ᙮

ᔑᑾ ᐃᐃ ᐁᑮᓇᐃᓂᓐᒡ, ᐁᑮᓂᓱᑮᔑᑾᑳᓂᒃ ᐃᑕᔥ ᐁᑮᑮᐌᐱᒫᑎᓯᐃᓐᒡ ᒪᔮ ᐁᑮᐊᓂ ᐃᔑᓭᒃ ᐃᐃ ᓃᔮᒃ ᑳᑮᐃᔑᐲᐃᑳᑌᒃ ᑫᑌᒪᓯᓇᐃᑲᓐ᙮

ᔑᑾ ᐁᑮᐙᐸᒥᑯᒡ ᐃᓂ ᐲᑕᕒᐆᓐ, ᒦᑕᔥ ᑲᔦ ᑯᑕᒃ ᐃᐃᐌᓂᐗᐞ ᒥᑖᔑᓃᔑᓐ ᑳᑮᐃᓂᒥᓐᒡ ᐅᑮᐙᐸᒥᑰᐞ᙮

ᒦᔥ ᐃᐃ ᐹᓂᒫ ᓈᑫ ᓈᓍᒃ ᐊᐗᔑᒣ ᐅᑮᐙᐸᒥᑰᐞ ᐅᑌᐺᑕᒨᐞ, ᐯᔑᑾᓐ ᐃᑯ ᐃᔭᐲ ᐅᑮᐙᐸᒥᑰᐞ᙮ ᑫᑳ ᑲᑭᓇ ᓅᑯᒻ ᑫᔮᐱ ᐱᒫᑎᓯᐗᒃ᙮ ᐋᓂᑕ ᑕᔥ ᐋᔕ ᑮᐃᔥᒀᐱᒫᑎᓯᐗᒃ᙮

ᒦᓇᐙ ᑕᔥ ᐅᑮᐙᐸᒥᑰᓐ ᐃᓂ ᒌᒥᓴᓐ, ᓈᑫ ᒥᒋᑲᑭᓇ ᐅᑎᔑᓂᔕᐙᑲᓇᐞ᙮

ᑲᔦ ᓃᓐ ᐃᑕᔥ ᐊᔪᑖᓈᕽ ᓂᑮᐙᐸᒫ, ᓃᓐ ᐋᓇ ᐃᓀᑖᑯᓯᔮᓐ ᐊᐎᔭ ᐁᑾᔭᑯ ᓂᑖᐎᑭᓯᒃ᙮

ᓃᓐ ᒫᐗᒡ ᐅᑖᓈᕽ ᓂᑎᓀᑖᑯᔅ ᑲᑭᓇ ᐃᑭ ᐁᓇᑭᒥᑣ ᐃᔑᓂᔕᐙᑲᓇᒃ᙮ ᑳᐐᓐ ᓂᑌᐊᐲᑌᑖᑯᓯᓰ ᐃᔑᓂᔕᐙᑲᓐ ᒋᐃᑰᔮᐹᓐ᙮ ᐋᓃᔥ ᓂᑮᑲᒀᑕᑭᐃᒫᐞ ᑭᔐᒪᓂᑑ ᑳᒫᐗᒋᑌᐺᑖᑯᒡ᙮

ᓂᑮᔕᐌᓂᒥᒃ ᐃᑕᔥ ᑭᔐᒪᓂᑑ, ᐁᐅᒋ ᐃᔑᐊᔮᔮᓐ ᓅᑯᒻ ᐁᓈᑎᓯᔮᓐ᙮ ᐃᐃᐌ ᑕᔥ ᐅᔕᐌᒋᑫᐎᓐ ᑳᒦᓂᑰᔮᓐ ᑳᐐᓐ ᑲᓇᑫ ᑮᐋᓇᐌᐗᓯᓅᓐ᙮ ᐊᐗᔑᒣ ᓂᑮᑭᒋᐊᓄᑮ ᐊᐲᒡ ᐐᓐ ᑲᑭᓇ ᐯᑳᓂᓯᐙᒡ ᐃᔑᓂᔕᐙᑲᓇᒃ᙮ ᐋᓇᐐᓐ ᑳᐐᓐ ᓃᓐ ᑎᐱᓇᐌ ᑌᐺ ᓂᑮᐊᓄᑮᓰ, ᐃᐃᐌ ᓴ ᐐᓐ ᑭᔐᒪᓂᑑ ᐅᔕᐌᒋᑫᐎᓐ ᑮᐊᓄᑮᒪᑲᓂᓂ ᐁᐐᑑᑳᑯᔮᓐ᙮

ᒦ ᓴ ᑕᔥ ᐅᐅᐌ, ᐊᐌᓀᓐ ᐃᑯ ᐌᒋᓅᑕᒧᐌᒃ ᒥᓍᒋᒧᐎᓐ, ᑫᒫ ᓃᓐ ᐋᐎᔮᓐ, ᑫᒫ ᐐᓇᐙ ᐸᑳᓐ ᐃᔑᓂᔕᐙᑲᓇᒃ, ᒦᐗᓂᓂ ᐯᔑᑾᓐ ᐁᔑᑲᑮᑴᓄᑕᒫᕽ᙮ ᒦ ᐃᐌ ᒪᔮ ᑳᑌᐺᑕᒣᒃ᙮

ᒦᑕᔥ ᐃᐃ ᓂᑎᓈᒋᒧᐎᓂᓈᓐ ᐁᔑᓯᕽ, X ᐁᑮᑮᐌᐱᒫᑎᓯᐃᓐᒡ ᐅᒋ ᓂᐳᐎᓂᕽ᙮ ᐋᓃᔛᓐ ᐋᓂᑕ ᑮᓇᐙ ᐌᒋ ᐃᑭᑐᔦᒃ ᐁᐊᔮᒪᑲᓯᓄᒃ ᒋᑮᐌᐱᒫᑎᓯᕽ ᐅᒋ ᓂᐳᐎᓂᕽ, ᐋᔕ ᐅᔕ ᐁᑮᑲᔥᑭᑑᒡ X?

ᑮᔥᐱᓐ ᐊᔮᒪᑲᓯᓄᑭᐸᓐ ᒋᑮᐌᐱᒫᑎᓯᕽ ᐅᒋ ᓂᐳᐎᓂᕽ, ᒦ ᐃ ᑫᐐᓐ X ᒋᑮᑮᐌᐱᒫᑎᓯᓯᑭᐸᓐ᙮

ᑮᔥᐱᓐ ᐃᑕᔥ X ᑮᑮᐌᐱᒫᑎᓯᓯᑭᐸᓐ, ᑳᐐᓐ ᑫᑰᓐ ᑖᑮᐃᓈᐸᑕᓯᓅᓐ ᓂᑲᑮᑴᐎᓂᓈᓐ, ᑭᑌᐺᑕᒧᐎᓂᐙ ᑲᔦ᙮

ᑲᔦ ᓴ ᑕᔥ, ᐅᑲᑮᓇᐎᔥᑳᒋᒨᒃ ᓂᑖᐃᔑᓈᑯᓯᒥᓐ, ᐋᓃᔥ ᓂᑮᐃᓈᓈᓐ ᑭᔐᒪᓂᑑ ᐁᑮᑮᐌᐱᒫᑎᓯᐋᒡ Xᑕᓐ᙮ ᑮᔥᐱᓐ ᐃᑕᔥ ᑌᐺᐎᓂᐗᑭᐸᓐ ᐁᑳ ᐊᐎᔭ ᒋᑮᐌᐱᒫᑎᓯᓯᒃ, ᑳᐐᓐ ᐄᓴᓐ ᑫᐐᓐ ᑭᔐᒪᓂᑑ ᐅᑮᑮᐌᐱᒫᑎᓯᐋᓰᓐ ᐃᓂ Xᑕᓐ᙮

ᐃᓇᔥᑫ ᓴ ᑮᔥᐱᓐ ᑮᐌᐱᒫᑎᓯᐋᓯᐎᑣ ᐃᑭ ᑳᐃᔥᒀᐱᒫᑎᓯᐙᒡ, ᑳᐐᓐ ᐄᓴᓐ ᑲᔦ ᐐᓐ X ᑖᑮᑮᐌᐱᒫᑎᓯᐋᓰ᙮

ᑮᔥᐱᓐ ᐃᑕᔥ X ᑳᑮᐌᐱᒫᑎᓯᐋᓯᐎᑎᐸᓀᓐ, ᑳᐐᓐ ᐊᐙᒡ ᑫᑰᓐ ᐃᓈᐸᑕᓯᓅᓐ ᑭᑌᐺᑕᒧᐎᓂᐙ᙮ ᑫᔮᐱ ᐄᓴᓐ ᐃᒫ ᑭᑕᔮᒻ ᑭᒪᒋ ᐃᔑᐌᐱᓯᐎᓂᐙᕽ᙮

ᒦ ᓴ ᐃᐌ ᑲᔦ ᑫᐃᔑᓈᑾᑭᐸᓐ, ᐃᑭ ᑳᑮᐊᐱᓂᐳᐙᒡ Xᑕᓐ ᐋᓇᑮᑌᐺᑕᐙᐙᒡ, ᐋᔕ ᐁᑮᓂᔑᐗᓈᑎᓯᐙᒡ᙮

ᑮᔥᐱᓐ ᐅᒫ ᐱᒫᑎᓯᐎᓂᕽ ᐁᑕ ᐃᔑᐐᒋᐃᑯᐗᑴᓐ ᐁᐊᐯᓂᒧᓄᑕᐗᕽ X, ᒦᐃ ᑮᓇᐎᓐᑦ ᐊᐗᔑᒣ ᒋᐃᔑᑰᐹᑌᑖᑯᓯᔭᑭᐸᓐ ᐊᐲᒡ ᐐᓐ ᑲᑭᓇ ᐊᐎᔭ᙮

ᑌᐺ ᑕᔥ ᑮᐅᒋᑮᐌᐱᒫᑎᓯᐋ ᓂᐳᐎᓂᕽ ᐊᐊ X! ᒦᑕᔥ ᐃᐃᒫ ᒋᐅᒋᐋᔩᒋᑭᑫᑖᑾᒃ ᒦᓇᐙ ᒋᑮᐌᐱᒫᑎᓯᐙᒡ ᑳᑮᐃᔥᒀᐱᒫᑎᓯᐙᒡ᙮

ᐃᓇᔥᑫ ᐋᓃᔥ ᐃᐃᒫ ᑳᐊᔨᔑᒋᑫᑯᐸᓀᓐ ᐊᐊ ᐯᔑᒃ ᐃᓂᓂ, ᐊᒦ ᐃᒫ ᑳᐅᒌᒪᑲᓂᓂᒃ ᐃᐃ ᓂᐳᐎᓐ, ᐊᐊ ᑕᔥ ᐐᓐ ᑯᑕᒃ ᐃᓂᓂ ᑳᑮᐃᔑᒋᑫᒡ, ᒦ ᐃᒫ ᐌᒌᒪᑲᒃ ᒋᐅᒋᑮᐌᐱᒫᑎᓯᐃᑰᔭᕽ ᓂᐳᐎᓂᕽ᙮

ᐃᐃᒫ ᓴ ᐋᑕᒥᕽ ᐁᐅᑕᑳᓀᓯᐙᒡ, ᒦ ᐃᒫ ᐌᒋᓂᐳᐙᒡ ᑲᑭᓇ ᐊᐎᔭᒃ᙮ ᒦ ᐯᔑᑾᓐ ᐁᐐᒌᐎᑯᐙᒡ Xᑕᓐ, ᒦ ᐃᒫ ᑲᑭᓇ ᑫᐅᒋᒦᓂᑣ ᐱᒫᑎᓯᐎᓐ᙮

ᑾᔭᒃ ᐃᑕᔥ ᐃᑯ ᑕ ᐊᓂᑮᐌᐱᒫᑎᓯᐗᒃ: ᐊᐊᐌ X ᒫᐗᒡ ᓂᑕᒻ ᑮᑮᐌᐱᒫᑎᓯ᙮ ᐹᓂᒫᔥ ᒦᓇᐙ ᑕᑶᔑᕽ, ᒦᐗᐞ ᐃᐃᐌᓂᐗᐞ ᑫᓂᑮᐌᐱᒫᑎᓯᓂᒡ X ᑳᑎᐯᓂᒫᒡ᙮

ᒦᑕᔥ ᐃᐃ ᐊᐲ ᑕᐊᓂᐌᒀᔥᑳᒪᑲᓐ ᑲᑭᓇ ᑫᑰᓐ᙮ ᐊᑲᐌ ᑲᑭᓇ X ᐅᑲᔖᑰᒋᐋᐞ ᐃᓂᐌᓂᐗᐞ ᑳᐅᑭᒫᐌᑖᑯᓯᓂᒡ ᑲᔦ ᑳᑲᔥᑭᐁᐎᓯᓂᒡ ᑲᔦ ᑳᒪᔥᑲᐌᑖᑯᓯᓂᒡ᙮ ᒦ ᐊᐲ ᐅᑎᐯᒋᑫᐎᓐ ᒋᒦᓈᒡ ᐃᓂ ᑭᔐᒪᓂᑑᓐ ᐌᔫᓯᒥᒥᓐᒡ᙮

ᐐᓐ ᐃᓴ X ᐊᑕᐌᑖᑯᓯ ᒋᐅᑭᒫᐎᒡ ᐲᓂᔥ ᐃᑯ ᑲᑭᓇ ᑭᔐᒪᓂᑑᓐ ᑳᒑᑭᔖᑰᒋᑕᒫᑯᒡ ᐃᐃ ᑳᒦᑳᓂᑯᒡ᙮

ᐃᐃᐌ ᑕᔥ ᐃᔥᒀᒡ ᒥᓯᐌ ᑫᔖᑰᒋᐋᑲᓂᐎᒡ ᑳᒦᑳᓱᒡ, ᒦ ᓴ ᐊᐌ ᓂᐳᐎᓐ᙮

ᐋᓃᔥ ᑭᒋᒪᓯᓇᐃᑲᓐ ᐃᔑᐲᐃᑳᑌ ᐊᐊ X ᐁᑕᔑᒥᓐᒡ: ᑲᑭᓇ ᑫᑰᓐ ᒋᐊᐱᓯᑌᐱᒡ ᒋᑎᐯᑕᕽ ᐁᑮᐃᔑᑕᒫᑯᒡ ᑭᔐᒪᓂᑑᓐ᙮ ᐃᐃᐌ ᑕᔥ ᑳᐃᑭᑑᒪᑲᒃ: ᑲᑭᓇ ᑫᑰᓐ ᒋᑎᐯᑕᕽ ᐁᑮᐃᔑᑕᒫᑯᒡ, ᒦ ᐃᒫ ᐁᔑᑭᑫᑖᑾᒃ ᑭᔐᒪᓂᑑ ᐁᑕᑾᑭᒋᑳᓱᓯᒃ ᒋᑎᐯᓂᒥᑯᐸᓐ Xᑕᓐ᙮ ᐐᓐ ᐋᓃᔥ ᑲᑭᓇ ᐅᑕᑕᒪᐙᓐ ᐃᓂ Xᑕᓐ᙮

ᐹᓂᒫ ᑕᔥ ᑲᑭᓇ ᑫᑰᓐ ᐁᑮᐊᑕᒪᐎᓐᒡ X ᒋᑎᐯᑕᕽ, ᒦ ᐊᐲ ᐊᐊᐌ ᐅᑯᓯᓯᒫ ᑫᐃᓇᓯᑎᓱᒡ ᑭᔐᒪᓂᑑᓐ ᒋᑎᐯᓂᒥᑯᒡ, ᒦᐗᓐ ᐃᓂᐌᓂᐗᓐ ᑳᑮᐊᑕᒫᑯᒡ ᑲᑭᓇ ᑫᑰᓐ ᒋᑎᐯᑕᕽ᙮ ᒦᑕᔥ ᐃᐃ ᐊᐲ ᒥᓯᐌ ᑫᒫᒌᑎᐯᑕᒥᓂᒡ ᑲᑭᓇ ᑫᑰᓐ ᑭᔐᒪᓂᑑᓐ᙮

ᑮᔥᐱᓐ ᐃᑕᔥ ᐅᐅᐌ ᐁᔑᓭᑴᓐ, ᐋᓃᓐ ᑫᐃᓂᑣ ᐅᑯ ᑳᐃᔑᒋᑫᐙᒡ ᑳᐅᒋᓰᑲᐊᑖᑎᐙᒡ ᐃᐃ ᑳᑮᓂᐳᓂᒡ ᐁᑲᑴᐐᒋᐋᐙᒡ? ᐋᓃᓐ ᐃᑕᔥ ᐃᓈ ᐁᓍᑕᒧᐙᒡ? ᐅᐅ ᑕᔥ ᐃᔑᓭᑭᐸᓐ ᐃᑭ ᑳᑮᓂᐳᐙᒡ ᒦᓇᐙ ᒋᐱᒫᑎᓯᓯᒀᐸᓐ, ᐋᓃᓐ ᐁᓀᑕᒧᐙᒡ ᑳᐅᒋᓰᑲᐊᑖᑎᐙᒡ ᐃᐃ ᓀᐳᓂᒡ?

ᑲᔦ ᓃᓇᐎᓐᑦ, ᐋᓃᔥ ᐌᒋᑑᑕᒫᕽ ᐁᑕᓱᑎᐸᐃᑲᓐ ᐁᓇᓃᓵᓂᐃᑎᓱᔮᕽ ᓂᔑᐗᓈᑎᓯᐎᓂᕽ?

ᓃᒋᐅᑌᐺᑕᒨᒃ, ᐁᑕᓱᑮᔑᒃ ᓂᐯᔣᐸᑖᓐ ᐃᐃ ᓂᐳᐎᓐ᙮ ᐃᓇᔥᑫ ᓴ ᐐᑫ ᑭᑭᒋ ᐃᓀᓂᒥᓂᓂᒻ ᐃᐃᒫ ᐁᐅᒌᒪᑲᒃ ᐁᐐᒌᐎᓇᕽ ᐊᐊ X ᒋᓴᔅ ᑳᑎᐯᓂᒥᓇᕽ, ᒦ ᐃᐌ ᐁᓇᒪᒋᐅᔥᑳᑯᔮᓐ ᒋᐐᑕᒪᐎᓇᑰᒃ᙮

ᐃᐃᐌ ᓴ ᑯ ᐁᑮᐱᒦᑳᓇᒀ ᐱᑾᒋᐊᔭᐋᐎᔕᒃ ᑳᐃᓀᑖᑯᓯᐙᒡ ᐅᐅᒫ ᐁᐱᓴᓯᕽ, ᑮᔥᐱᓐ ᐃᓂᓃᓈᕽ ᐁᑕ ᐅᑎᓇᒫᓐ ᓂᑎᓇᒪᒋᐅᐎᓐ ᐃᔑᐱᒫᑎᓯᔮᓐ, ᑳᐐᓐ ᐊᐙᒡ ᑫᑰᓐ ᓂᑖᐃᓈᐸᒋᑑᓰᓐ᙮ ᑮᔥᐱᓐ ᑮᐌᐱᒫᑎᓯᐋᓯᐎᑣ ᑳᑮᐃᔥᒀᐱᒫᑎᓯᐙᒡ, ᒦᓴ ᐃᑕᐙ ᐃᔑᒋᑫᑖ ᐁᓀᑳᒥ ᐃᑭᑐᕽ: ᐊᐤ ᐐᓯᓂᑖ, ᒥᓂᑴᑖ, ᒥᓴᐙ ᐅᔕ ᑭᑲᓂᐳᒥᓐ!

ᑫᑯ ᐗᔦᔑᑎᓱᑫᒃ᙮ ᐋᓇ ᒥᓄᐃᔑᐌᐱᓯᔭᓐ, ᒪᒋ ᐃᔑᐌᐱᓯᐙᒡ ᐃᑕᔥ ᑳᐐᑑᑲᐗᑣ, ᑭᑲᓂᔑᐗᓈᒋᐃᑯᓐ᙮

ᑾᔭᒃ ᐃᑯ ᒨᑫᑕᒧᒃ, ᐴᓂᑑᒃ ᑭᒪᒋ ᐃᔑᐌᐱᓯᐎᓂᐙᓐ᙮ ᐃᓇᔥᑫ ᒋᐊᑲᒋᐌᑕᒣᒃ ᐅᐅ ᑳᐐᑕᒪᐎᓇᑰᒃ: ᐋᓂᑕ ᑳᐐᓐ ᑭᑭᑫᓂᒫᓯᐙᐙ ᑭᔐᒪᓂᑑ᙮

ᐊᐎᔭ ᑕᔥ ᑕᐃᑭᑐ: ᐋᓃᓐ ᐃᑕᔥ ᑫᑮᐃᔑ ᑮᐌᐱᒫᑎᓯᐃᑣᐸᓐ ᐃᑭᐌᓂᐗᒃ ᓀᐳᐙᒡ? ᐋᓃᓐ ᐃᑕᔥ ᑫᔑᐐᔭᐌᐙᒡ ᐊᐲ ᑮᔥᐱᓐ ᑌᐺ ᑮᐌᐱᒫᑎᓯᐙᒡ?

ᑮᓐ ᑫᑮᐹᑎᓯᔭᓐ, ᓂᑖᐃᓈ᙮ ᐃᐃ ᓴ ᐐᓐ ᑫᑎᑳᑕᒪᓐ, ᑳᐐᓐ ᑕᐱᒫᑎᓰᑲᑌᓯᓅᓐ, ᐹᓂᒫ ᐁᑕ ᑮᓂᑾᐃᑳᑌᒃ ᐁᓂᐴᒪᑲᒃ ᐁᐃᔑᓈᑾᒃ᙮

ᐃᐃᐌ ᓴ ᑳᑭᑎᑳᑕᒪᓐ ᑳᐐᓐ ᐃᐃᐌ ᐁᑮᔑᑭᒃ ᑳᐃᔑᓈᑾᒃ ᑭᑖ ᓂᒀᐗᑲᐊᓰᓐ, ᑭᑎᑳᓀᔅ ᐅᔕ ᐁᑕ ᑭᐸᑭᑎᓈᓐ, ᒫᑭᔖ ᐸᑴᔑᑲᓐ ᐁᑭᑎᑳᓀᓯᐎᒡ, ᒫᑭᔖ ᑲᔦ ᐸᑳᓐ ᑳᑎᓄᐗᕽ᙮

ᑭᔐᒪᓂᑑ ᐅᑎᓇᑑᓐ ᐃᐃ ᑭᑎᑳᓀᔅ ᑫᔑᐐᔭᐐᒪᑲᒃ ᐋᓃᓂᑯ ᑳᐃᓀᑕᕽ᙮ ᐁᑕᓯᕽ ᓴ ᑯ ᑭᑎᑳᓀᔅ ᐃᔑᐐᔭᐎᐗᓐ ᒪᔮ ᐁᑎᓄᐗᕽ᙮

ᔑᑾ ᑲᔦ ᑳᐐᔮᓯᐎᐙᒡ, ᑳᐐᓐ ᐯᔑᑾᓐ ᑲᑭᓇ ᐃᔑᐐᔮᓯᐎᓰᐗᒃ᙮ ᐊᐊᐌ ᓴ ᑯ ᐃᓂᓂ ᐐᓐ ᐁᑎᓄᐎᒡ ᐃᔑᐐᔮᓯᐎ᙮ ᐃᑭᔥ ᑲᔦ ᐊᔭᐋᐎᔕᒃ ᐸᑳᓐ ᐃᔑᐐᔮᓯᐎᐗᒃ᙮ ᑲᔦ ᐱᓀᔒᔕᒃ ᐸᑳᓐ ᑫᐐᓇᐙ ᐃᔑᐐᔮᓯᐎᐗᒃ᙮ ᐃᑭ ᑕᔥ ᑲᔦ ᑭᓅᔐᒃ ᐸᑳᓐ ᑫᐐᓇᐙ ᑎᓄᐎᐗᒃ ᐁᐅᔅᑲᐎᐎᐙᒡ᙮

ᐊᔮᒪᑲᓅᓐ ᑕᔥ ᑲᔦ ᑮᔑᑯᕽ ᑳᑎᓄᐗᑭᓐ ᐐᔭᐎᐗᓐ ᑳᑕᔑᐱᒫᑎᓯᐙᒡ ᑲᔦ ᐊᑮᕽ ᑳᑎᓄᐗᑭᓐ ᑳᔑᐊᔮᐙᒡ᙮ ᔑᑾ ᐸᑳᓐ ᐃᔑᐅᓂᔑᔑᓂᓂᐗᓐ ᑮᔑᑯᕽ ᑳᑕᔑᐅᐐᔭᐎᐙᒡ, ᑲᔦ ᐅᒫ ᐊᑮᕽ ᑳᑕᔑᐅᐐᔭᐎᐙᒡ ᐁᔑᐅᓂᔑᔑᓂᓂᑭᓐ᙮

ᐊᐊᐌ ᑕᔥ ᑲᔦ ᑮᓯᔅ ᐐᓐ ᐃᑯ ᑎᐱᓇᐌ ᐃᓈᓯᑫ᙮ ᐊᐊᐌᔥ ᑲᔦ ᑎᐱᑭᑮᓯᔅ ᑲᔦ ᐐᓐ ᐸᑳᓇᑎᓂᓂ ᐅᑎᓈᓯᑫᐎᓐ᙮ ᐊᐴᔥᑫ ᑲᔦ ᐗᓇᑯᔕᒃ ᐯᐸᑳᓐ ᐃᑯ ᑫᐐᓇᐙ ᐃᔑᐊᔨᓈᓯᑫᐗᒃ᙮

ᒦ ᐅᐌ ᑫᐃᔑᓈᑾᒃ ᑫᑮᐌᐱᒫᑎᓯᐃᑣ ᑳᐃᔥᒀᐱᒫᑎᓯᐙᒡ᙮ ᐊᐲ ᐁᓇᐃᓂᑳᑌᒃ ᐃᐃ ᐐᔭᐎᒫ, ᑎᓄᐗᓐ ᐊᑲᐌ ᒋᓂᔑᐗᓈᑕᒃ᙮ ᐹᓂᒫᔥ ᑮᐌᐱᒫᑎᓯᓈᓂᐗᕽ ᒦ ᐃᐌ ᑫᐃᔑᐊᔮᑭᓐ ᐐᔭᐎᒫᓐ ᐐᑳ ᒋᓂᔑᐗᓈᑕᓯᓄᑭᓐ᙮

ᑰᐹᑌᑖᑾᓐ ᐃᐃ ᐁᓇᐃᒋᑳᑌᒃ, ᒦᓇᐙ ᑕᔥ ᐱᒫᒋᒋᑳᑌᒃ ᐐᑫ ᑕᐅᓂᔑᔑᓐ᙮ ᐗᑫᐗᓐ ᐃᐃ ᑳᓇᐃᒋᑳᑌᒃ, ᐱᒫᒋᒋᑳᑌᒃ ᐃᑕᔥ ᑕᓲᑫᑖᑾᓐ᙮

ᐃᐃ ᐐᔭᐤ ᑳᓇᐃᓂᑳᑌᒃ ᒦᐃᐌ ᑳᐊᔮᒪᑲᒃ ᐅᐅ ᓅᑯᒻ ᐱᒫᑎᓯᐎᓂᕽ᙮ ᐊᐲᔥ ᐃᐃᐌ ᑮᐌᐱᒫᒋᒋᑳᑌᒃ ᒦᐃᐌ ᑎᓄ ᐐᔭᐤ ᑫᔑᒥᓍᐸᑕᒃ ᐊᒑᑯᒫᕽ᙮ ᐊᔮ ᐃᐃᐌ ᐐᔭᐤ ᑳᐊᔮᒪᑲᒃ ᐅᐅ ᐅᒋ ᓅᑯᒻ ᐱᒫᑎᓯᐎᓂᕽ, ᑲᔦ ᐃᐌ ᑎᓄ ᐊᔮᒪᑲᓐ ᐐᔭᐤ ᑫᔑᒥᓍᐸᑕᒃ ᐊᒑᑯᕽ ᐅᒋ᙮

ᐅᐅᐌ ᐋᓃᔥ ᐃᑭᑑᒪᑲᓐ ᑫᑌᒪᓯᓇᐃᑲᓐ: ᐊᐊᐌ ᒫᐗᒡ ᓃᑳᓐ ᑳᐅᔑᐃᓐᒡ ᐃᓂᓂ ᐋᑕᒻ, ᑮᐃᔑᐋ ᐯᒫᑎᓯᒡ ᐁᑭᑲᒑᑴᒡ, ᐃᔑᐲᐃᑳᑌ᙮ ᐊᐊᐌ ᑕᔥ ᐐᓐ ᐃᔥᒀᒡ ᑳ ᐋᐎᒡ ᐋᑕᒻ, ᒦ ᐊᐌ ᐊᒑᒃ ᑳᐱᒫᑎᓰᔥᑳᑫᒡ᙮

ᑳᐐᓐ ᐌᑎ ᓂᑕᒻ ᐅᒌᒪᑲᓯᓅᓐ ᐃᐃ ᑳᐊᒑᑴᑖᑾᒃ, ᑳᐐᔮᓯᐗᕽ ᓴ ᐐᓐ ᓂᑕᒻ ᑮᐊᔮᒪᑲᓐ, ᒦᑕᔥ ᐃᐃ ᑮᐊᓂᐊᔮ ᓈᑫ ᑳᐊᒑᑴᑖᑾᒃ᙮

ᐊᐌ ᓂᑕᒻ ᐃᓂᓂ ᐋᑕᒻ ᑳᑮᐃᔑᐊᔮᒡ, ᒥᑕᑲᒥᑯᕽ ᑮᐅᒋᐅᔑᒋᑳᓱ ᐅᐅᒫ ᐁᑮᐅᒌᒡ ᐊᑮᕽ᙮ ᐊᐊᐌ ᑕᔥ ᑯᑕᒃ ᐃᓂᓂ ᑳᑮᐃᔑᐊᔮᒡ ᑮᐱᐅᒌ ᑭᒋᑮᔑᑯᕽ᙮

ᐃᑭ ᐅᒫ ᐊᑮᕽ ᑳᐅᒋᑎᐯᑖᑯᓯᐙᒡ, ᒦᐃ ᐁᓈᑎᓯᐙᒡ ᐊᐊᐌ ᒥᑕᑲᒥᑯᕽ ᑳᑮᐅᒋ ᐅᔑᒋᑳᓱᒡ᙮ ᐃᑭᐌᓂᐗᒃ ᐃᑕᔥ ᑭᒋᑮᔑᑯᕽ ᑳᐅᒋᑎᐯᑖᑯᓯᐙᒡ, ᒦᐃ ᐁᓀᑖᑯᓯᐙᒡ ᐁᓈᑎᓯᒡ ᐊᐊ ᑭᒋᑮᔑᑯᕽ ᑳᑮᐱᐅᒌᒡ᙮

ᔑᑾ ᐯᔑᑾᓐ ᐃᑯ ᐁᐱᑭᑭᔥᑲᒧᐙᒡ ᐅᑎᔑᓈᑯᓯᐎᓐ ᐊᐊ ᓂᑕᒻ ᒥᑕᑲᒥᑯᕽ ᑳᑮᐅᒋᐅᔑᐃᓐᒡ, ᑲᔦ ᑭᑲᓈᐱ ᑭᑭᔥᑲᒧᐙᒥᓐ ᐅᑎᔑᓈᑯᓯᐎᓐ ᐊᐊᐌ ᐃᓂᓂ ᑭᒋᑮᔑᑯᕽ ᑳᐱᐅᒌᒡ᙮

ᓃᒋᐅᑌᐺᑕᒨᒃ, ᒦ ᐅᐌ ᐁᑭᑐᔮᓐ: ᐊᐊᐌ ᑳ ᐊᔮᒡ ᐐᔮᔅ, ᒥᔅᑸᓂ ᑕᔥ ᑲᔦ ᐁᑕ, ᑳᐐᓐ ᐅᑖᐃᔑᑲᔥᑭᑑᓰᓐ ᒋᒦᓂᓐᒡ ᒋ ᐃᔑᐐᑑᑳᓱᒡ ᐃᐃᒫ ᑭᔐᒪᓂᑑ ᐅᑎᐯᒋᑫᐎᓂᕽ᙮ ᐃᐃ ᑕᔥ ᑲᔦ ᑫᓂᐴᒪᑲᒃ ᑳᐐᓐ ᐐᑳ ᑕᒦᓈᑲᓂᐗᓯᓅᓐ ᐃᐃ ᐱᔑᔑᒃ ᒋᐱᒫᑕᒃ᙮

ᐋᓃᔥ, ᑭᐐᑕᒪᐎᓂᓂᒻ ᐃᐃ ᒪᔑ ᑳᑮᐸᔭᑌ ᑭᑫᒋᑳᑌᓯᓄᒃ: ᑳᐐᓐ ᑲᑭᓇ ᑭᑲᐃᔥᒀᐱᒫᑎᓯᓰᒥᓐ᙮ ᑲᑭᓇ ᑕᔥ ᑭᑲᐋᒋᐃᑰᒥᓐ᙮

ᑫᓯᑳ, ᐯᔑᑯ ᐸᓴᑳᐱᕽ ᑕᐃᔑᑭᑖᑕᐱᓭ, ᐊᓂ ᐃᔥᒀᓭᒃ ᑲᑭᓇ ᑫᑰᓐ ᑫᓅᑖᑾᓂᓂᒃ ᑭᔐᒪᓂᑑ ᐅᑭᒋᐴᑖᒋᑲᓐ᙮ ᐋᓃᔥ ᑕᒪᑗᐃᓉᒪᑲᓐ, ᒦᔥ ᐃᐃ ᐊᐲ ᑫᑮᐌᐱᒫᑎᓯᐙᒡ ᐃᑭ ᓀᐳᐙᒡ ᐁᑳ ᒦᓇᐙ ᒋᓂᐳᓯᒀ᙮ ᒦᑕᔥ ᒥᒋᑲᑭᓇ ᒫᒪᐤ ᑭᑲᐋᒋᐃᑰᒥᓐ᙮

ᐅᐌ ᐋᓃᔥ ᑳᐗᑫᓂᔑᐗᓈᑕᒃ ᓇᑕᐌᑖᑾᓐ ᒋᐋᒋᒋᑳᑌᒃ ᐐᑳ ᒋᓂᔑᐗᓈᑕᓯᓄᒃ, ᐃᐃᔥ ᑲᔦ ᑳᐗᑫᓂᐴᒪᑲᒃ ᑕᐃᔑᐋᒋᒋᑳᑌ ᐐᑳ ᒋᓂᐴᒪᑲᓯᓄᒃ᙮

ᐊᐲ ᑕᔥ ᑮᐃᔑᓭᒃ ᑳᐗᑫᓂᔑᐗᓈᑕᒃ ᑲᔦ ᑳᓂᓂᐴᒪᑲᒃ ᐁᑮᐋᒋᒋᑳᑌᑭᓐ ᒋᓂᔑᐗᓈᑕᓯᓄᒃ ᑲᔦ ᒋᓂᐴᒪᑲᓯᓄᒃ, ᒦ ᐊᐲ ᑕᑎᐱᓭ ᐅᐅᐌ ᐃᑭᑐᐎᓐ ᑳᑮᐃᔑᐲᐃᑳᑌᒃ: ᓂᐳᐎᓐ ᓂᔑᐗᓈᒋᒋᑳᑌ, ᑭᔐᒪᓂᑑ ᐅᔖᑰᒋᑣᐎᓐ ᐋᔕ ᑮᑮᔑᒋᑳᑌ᙮

ᑮᓐ ᓂᐳᐎᓐ, ᐋᑎ ᑕᔥ ᑫᐅᒋᔖᑰᒋᑣᔭᐸᓐ? ᑮᓐ ᓂᐳᐎᓐ, ᐋᑎ ᑫᐅᒋᐐᓴᑭᒌᓱᐌᔭᐸᓐ?

ᐃᐃᒫ ᒪᒋ ᐃᔑᐌᐱᓯᐎᓂᕽ ᐅᒋᑲᔥᑭᑑᒪᑲᓐ ᐃᐃ ᓂᐳᐎᓐ ᒋᐐᓴᑲᐅᐌᒪᑲᒃ, ᐃᐃᐌᔥ ᑲᔦ ᒪᒋ ᐃᔑᐌᐱᓯᐎᓐ ᐅᒋᒪᔥᑲᐎᓰᒪᑲᓐ ᐃᐃᒫ ᐅᓇᔓᐌᐎᓂᕽ᙮

ᒦᑴᒡ ᐃᑕᔥ ᑕᐃᓈ ᑭᔐᒪᓂᑑ ᑳᔑᒦᓂᓇᕽ ᑮᓇᐎᓐᑦ ᒋᔖᑰᒋᑣᔭᕽ ᐅᒋ ᐊᐌ ᑳᑎᐯᓂᒥᓇᕽ ᒋᓴᔅ X᙮

ᐊᐤ ᐃᓴ ᓃᒋᐅᑌᐺᑕᒨᒃ ᑳᓵᑭᐃᓇᑰᒃ! ᓲᑭᑳᐸᐎᒃ, ᑫᑯ ᑫᑰᓐ ᑭᑲᐗᑲᐐᐃᑯᓰᒻ, ᒨᔕᒃ ᓴ ᒋᐌᓅᒋᐊᓄᑮᑕᐌᒃ ᐊᐊ ᑳᑎᐯᒋᑫᒡ᙮ ᑭᑭᑫᑖᓈᐙ ᐅᔕ ᐁᑳ ᐊᓂᔖ ᐁᐊᓄᑮᑕᐙᓯᐌᒃ ᑳᑎᐯᒋᑫᒡ᙮

ᔑᑾ ᐃᐌ ᐁᑕᔑᒋᑳᑌᒃ ᐁᐐᒫᒪᐎ ᐸᑭᑎᓂᑫᕽ ᒋᐐᒋᐃᒥᓐᒡ ᑭᔐᒪᓂᑑ ᐅᐱᒫᑎᓰᒪᐞ ᐁᔑᓅᑌᓭᓂᒡ ᒎᑏᔭ ᐊᑮᕽ ᑳᐊᔮᓂᒡ: ᐃᐃᐌ ᓴ ᑳᑮᐃᔑ ᑭᑭᓄᐊᒪᐗᒀ ᐯᐸᑳᓐ ᑳᐃᔑᒫᐗᒋᐃᑎᐙᒡ ᐅᑌᐺᑕᒨᒃ ᑲᓬᐁᔑᔭ ᐊᑮᕽ, ᒦᐃᐌ ᑫᑮᓇᐙ ᒋᑑᑕᒣᒃ᙮

ᐁᑕᓱ ᐊᓇᒥᐁᑮᔑᑲᒃ ᑳᑕᓱᐯᔑᑯᔦᒃ ᐸᑳᓐ ᐃᔑᐊᓯᒃ ᐸᑮ ᑭᔔᓂᔮᒥᐙ᙮ ᐋᓃᓂᑯ ᐊᐎᔭ ᐁᔑᑲᔥᑭᒋᑫᑴᓐ ᒋᒪᓈᒋᐋᒡ, ᐁᑳ ᒣᒬᒡ ᒋᒫᐗᒋᒋᑫᓯᐌᒃ ᐊᐲ ᑕᑯᔑᓈᓐ᙮

ᐊᐲ ᑕᔥ ᑕᑯᔑᓈᓐ, ᐊᐌᓀᓇᒃ ᐃᑯ ᑫᑾᔭᑴᓂᒣᒀ ᓂᑲᒦᓈᒃ ᓂᑑᔑᐲᐃᑫᐎᓐ ᒋᐐᑌᓂᒃ ᐁᔑᐅᐸᐹᒥᓯᐎᓂᐙᒡ᙮ ᒦᔥ ᓂᑲᐃᔑᓂᔕᐙᒃ ᒉᕒᐆᓴᓬᐊᒥᕽ ᒋᐃᔑᐎᑑᐙᒡ ᑭᑭᔐᐙᑎᓯᐎ ᐸᑭᑎᓂᑫᐎᓂᐙ᙮

ᑮᔥᐱᓐ ᑕᔥ ᑫᓃᓐ ᓇᐃᓈᑾᒃ ᒋᐃᔖᔮᓐ ᓂᑲᓂᐐᒌᐙᒃ᙮

ᐱᒌᓇᒃ ᐃᑕᔥ ᑭᑲᐱᐅᑎᓯᓂᓂᒻ ᐹᓂᒫ ᑮᔖᐴᔥᑳᔮᓐ ᒫᓯᑑᓂᔮᐗᑮᕽ ᙮ ᒦ ᐋᓃᔥ ᐌᑎ ᐁᓀᑕᒫᓐ ᒫᓯᑑᓂᔮᐗᑮᕽ ᒋᐊᓂᐱᒥᐊᔮᔮᓐ᙮

ᒫᑭᔖ ᐃᔑᓭᒃ ᑭᑲᐐᒋᔭᔮᒥᓂᓂᒻ, ᒫᑭᔖ ᑲᔦ ᒋᑕᔑᐱᐴᓂᔑᔮᓐ, ᒦᑕᔥ ᐃᐃ ᐊᐲ ᒋᐐᒋᐃᔦᒃ ᐋᑎ ᓴ ᑯ ᑫᐃᔖᔮᓐ᙮

ᑳᐐᓐ ᓂᑎᓀᑕᓰ ᐁᑕ ᒋᐱᒥᒣᑴᔮᐸᒥᓇᑰᒃ᙮ ᓇᐗᒡ ᓂᑎᓀᑖᓐ ᑭᓉᔒᔥ ᒋᐐᒋᔭᔮᒥᓇᑰᒃ, ᑮᔥᐱᓐ ᐃᔑᐸᑭᑎᓇᒪᐎᒡ ᑳᑎᐯᒋᑫᒡ᙮

ᑫᔮᐱ ᐊᑲᐌ ᐅᐅᒫ ᓂᑲᐊᔭᔮ ᐁᐱᓴᓯᕽ ᐲᓂᔥ ᐃᑯ ᐊᓂᐅᒋᒋᓭᒃ ᐯᑎᒀᔅᑎᐎ ᑮᔑᑲᓐ ᙮

ᐋᓃᔥ ᐃᓇᑌ ᑫᔮᐱ ᐅᒫ ᐁᐹᑭᓯᕽ ᓃᐱᐗᐞ ᒋᑲᔥᑭᑑᔮᓐ ᑳᑭᒋ ᐃᓀᑖᑾᑭᓐ᙮ ᓃᐱᐗᐞ ᐃᑕᔥ ᐊᐎᔭ ᐊᔮᐗᒃ ᐁᑲᑴᑭᐱᔥᑲᐎᐙᒡ᙮

ᑮᔥᐱᓐ ᐃᐃᒫ ᐱᐃᔑᑕᑯᔑᕽ ᐊᐊ ᑎᒪᑎ ᑳᔑᐊᔮᔦᒃ, ᑲᑴᒥᓄᐐᒋᐃᒃ ᐁᑳ ᒋᓭᑭᓯᓯᒃ᙮ ᐋᓃᔥ ᑖᐱᔥᑰ ᑲᔦ ᓃᓐ ᐁᔑᐊᓄᑲᐗᒃ ᑳᑎᐯᒋᑫᒡ, ᑲᔦ ᐐᓐ ᑕᔥ ᐅᑕᓄᑲᐙᓐ ᐊᐊ ᑎᒪᑎ᙮

ᑳᐐᓐ ᐅᑖᐋᓍᐸᒥᑯᓰᓐ ᐊᐎᔭᓐ᙮ ᐐᒋᐃᒃ ᐃᑕᔥ, ᒋᓂᐅᒋᒥᓄᒫᒑᒡ ᒋᐱᐅᑎᔑᒡ ᒦᓇᐙ᙮ ᐋᓃᔥ ᓂᐲᐋ ᒋᐱᐐᒌᐎᑯᒡ ᐃᐃ ᐅᑌᐺᑕᒨᐞ ᑳᐐᐲᔖᓂᒡ᙮

ᐊᐊᐌ ᑕᔥ ᑮᒋᑭᐌᔨᓈᓐ ᐊᑆᓬᐊᔅ ᑳᐃᓂᓐᒡ, ᓃᐱᐗᐋᕽ ᓂᑖᓇᑮᐃᓈ ᒋᓂᐙᐸᒥᓀᒃ ᒋᓂᐐᒌᐙᒡ ᑯᑕᒃ ᐐᒋᑭᐌᔨᒫᐞ, ᑳᐐᓐ ᑕᔥ ᑲᓇᑫ ᒪᔑ ᐃᓀᑕᓰ ᓅᑯᒻ ᒋᐃᔖᒡ᙮ ᐋᓃᓐ ᐃᓴ ᑯ ᐊᐲ ᐃᔑᓇᐃᓭᒃ, ᑕᐃᔖ᙮

ᐊᔕᐙᐱᔪᒃ, ᒪᔥᑲᐎᑳᐸᐎᔪᒃ ᑌᐺᑕᒧᐎᓂᕽ, ᐊᐸᓀ ᒋᓲᑭ ᐃᓂᓃᐎᔦᒃ᙮ ᒪᔥᑲᐎᓰᒃ!

ᑲᑭᓇ ᑫᑰᓐ ᓵᑭᐃᑎᐎᓂᕽ ᐃᔑᑑᑕᒧᒃ᙮

ᓃᒋᐅᑌᐺᑕᒨᒃ, ᑫᑰᓐ ᑭᐐᐸᑯᓭᓂᒥᓂᓂᒻ᙮ ᑭᑭᑫᓂᒫᐙ ᐃᔅᑌᐸᓇᔅ ᑲᔦ ᐅᐙᑳᐃᑲᓂᕽ ᑳᐐᒋᑖᒫᒡ᙮ ᒦᐗᑭᑭ ᓃᑳᓐ ᑳᑮᑕᔑ ᑴᑳᑎᓯᐙᒡ ᐃᐃᒫ ᐊᑫᔮᐗᑮᕽ, ᔑᑾ ᐌᐌᓂ ᐁᑮᐃᓇᓯᑎᓱᐙᒡ ᐁᐐᒋᐋᐙᒡ ᐃᐃ ᑭᔐᒪᓂᑑ ᐅᐱᒫᑎᓰᒪᐞ᙮

ᑭᓇᑕᐌᓂᒥᓂᓂᒻ ᒋᓃᑳᓇᑭᒣᒀ ᒋᐱᓯᑕᐌᒀ ᐅᑯᐌᓂᐗᒃ ᑎᓄ, ᑲᔦ ᑲᑭᓇ ᐊᐎᔭᐞ ᑳᐐᑕᓄᑮᒥᑯᐙᒡ ᐁᐃᔑᐸᒦᑖᑫᓂᒡ᙮

ᓂᑑᒋᓇᐁᑕᒻ ᐁᑮᐱᐅᑎᔑᐙᒡ ᐃᔅᑌᐸᓇᔅ ᑲᔦ ᑆᕒᒐᓀᑕᔅ ᑲᔦ ᐊᑫᔨᑲᔅ ᙮ ᑭᑮᓈᐱᔥᑳᑯᐙᒃ ᐅᐅᒫ ᐁᐊᔮᓯᐌᒃ᙮

ᓂᑮ ᑭᔑᔕᐎᓰᔥᑳᑰᒃ ᒦ ᐯᔑᑾᓐ ᐃᑯ ᑫᑮᓇᐙ ᑳᑮᐃᔑᒋᑫᐃᓀᒀ᙮ ᑭᑖᑭᑫᓂᒫᐙᒃ ᐅᑯ ᑳᑎᓄᐎᐙᒡ᙮

ᑭᐴᔔᐃᑯᐙᒃ ᐅᑌᐺᑕᒨᒃ ᐯᐸᑳᓐ ᐁᔑᒫᐗᒋᐃᑎᐙᒡ ᐁᔖᐗᑮᕽ ᙮ ᐴᔔ ᑲᔦ ᑭᑎᑯᐙᒃ ᐊᑶᓬᐊ ᑲᔦ ᐸᕒᐃᓯᓬᐊ ᑲᔦ ᐃᑭ ᐅᒫ ᐅᐙᑳᐃᑲᓂᐙᕽ ᑳᑕᔑᒫᐗᒋᐃᑎᐙᒡ ᐅᑌᐺᑕᒨᒃ᙮ ᑳᑎᐯᒋᑫᓂᒡ ᑭᑎᔑᐊᐱᐴᔔᐃᑯᐙᒃ᙮

ᑲᔦ ᑲᑭᓇ ᐅᐅᒫ ᑳᐊᔮᐙᒡ ᐅᐐᒋᑭᐌᔨᒫᒃ ᑫᐐᓇᐙ ᑭᐴᔔᐃᑯᐙᒃ᙮ ᐅᑌᐺᑕᒨᒃ ᐊᓇᒥᐁᐅᒌᒥᑾᒃ᙮ ᑮᐴᔔᐁᒀ, ᒦᐃ ᓇᑫ ᐃᔑᐴᔔᐃᑎᒃ᙮

ᓃᓐ ᑆᓬ ᑭᐴᔔᐃᓂᓂᒻ, ᓃᓐ ᑎᐱᓇᐌ ᓂᓂᒌᕽ ᐁᐅᔑᐲᐊᒫᓐ᙮

ᐊᐌᓀᓐ ᓴ ᑯ ᓯᔮᑭᐋᓯᒃ ᐃᓂ ᑳᑎᐯᒋᑫᓂᒡ, ᑕᐃᒋᑳᓱ ᒋᓂᔑᐗᓈᑎᓯᒡ! ᒪᕒᐊᓇ ᑖ! – ᓂᑎᐯᒋᑫᒥᓈᓐ, ᐐᐱᑕᑯᔑᓂᓐ!

ᒫᓄ ᐅᑭᔐᐙᑎᓯᐎᓐ ᐊᐊ ᑳᑎᐯᓂᒥᓇᕽ ᒋᓴᔅ X ᑭᑲᐐᒌᐎᑯᐙᒻ᙮

ᑲᑭᓇ ᑮᓇᐙ ᓂᓵᑭᐃᐌᐎᓐ ᑭᑲᐐᑕᔑ ᐐᒌᐎᑯᒻ ᐁᐃᔑᒫᒪᐎ ᐐᒌᑎᔭᕽ ᐃᐃᒫ X ᒋᓴᓱᕽ᙮