ᑮᓐ ᑎᔮᐱᓬᐊᔅ ᑳᓃᑳᓀᑖᑯᓯᔭᓐ, ᑭᑑᔑᐲᐊᒪᐎᓐ᙮ ᐱᐹᑏᓄᐗᒃ ᐃᓴ ᑳᐱ ᐅᔑᐲᐃᑫᐙᒡ ᐁᑎᐹᑐᑕᒧᐙᒡ ᐅᓄᐌᓂᐗᓐ ᑫᑰᓇᓐ ᑳᑮ ᐊᔨᔑᓭᑭᓐ ᐅᐅᒫ ᑳᐃᔑ ᐊᔮᔮᕽ᙮

ᐐᓇᐙ ᐁᑮᐃᔑᐲᐃᑫᐙᒡ ᐋᓃᓐ ᑳᑮᐱ ᐃᔑ ᐐᑕᒫᑯᐙᒡ ᐃᐃ ᑳᐐᑕᒫᑫᓂᒡ ᑭᔐᒪᓂᑑᓐ ᐁᑭᑐᓂᒡ ᑳᑮᐙᐸᑕᒥᓂᒡ ᓂᑕᒻ ᑫᑰᓇᓐ ᑮᒫᒋᓭᓂᑭᓐ᙮

ᑮᓐ ᑫᒋᐃᓀᑖᑯᓯᔭᓐ, ᑫᓃᓐ ᐅᔕ ᐌᐌᓂ ᓂᐱᑲᑴ ᑭᑫᑖᓇᓐ ᑲᑭᓇ ᐅᓄᐌᓂᐗᓐ ᑳᑮ ᐱᐅᒋ ᒫᒋᓭᑭᓐ᙮ ᒦᔥ ᑳᑮᐃᓀᑕᒫᓐ ᒋᐅᔑᐲᐊᒪᐎᓈᓐ ᐌᐌᓂ ᒋᐐᑕᒪᐎᓈᓐ ᒪᔮ ᐁᔑᓭᑭᓐ᙮

ᒦᑕᔥ ᑳᐅᒋ ᐃᔑᒋᑫᔮᓐ ᑫᑮᓐ ᒋᒥᓯᐌ ᑭᑫᑕᒪᓐ ᑲᑭᓇ ᑫᑰᓇᓐ ᑳᑮᐱ ᐃᔑ ᑭᑭᓄᐊᒫᑰᔭᓐ᙮

ᒣᒀ ᑭᒋᐅᑭᒫ ᐁᕒᐊᑦ ᑳᑎᐯᑕᕽ ᒎᑏᔭ ᐊᑭ, ᑮᐊᔮ ᐯᔑᒃ ᐊᓇᒥᐁᐎᑭᒫ ᓭᑲᕒᐋᔭ ᐁᔑᓂᑳᓱᒡ᙮ ᒦ ᐊᐌ ᑳᑮᐅᒋ ᑎᐯᑖᑯᓯᒡ ᑳᑮᐃᔑ ᐊᓇᒥᐁᐎᑭᒫᐎᓂᑯᐸᓀᓐ ᐊᐹᐃᒐᐗᓐ ᙮ ᐐᐙᓐ ᑕᔥ ᐃᓬᐃᓯᐸᑦ ᑮᐃᔑᓂᑳᓱᐗᓐ᙮ ᑫᐐᓐ ᐊᐊ ᐃᑴ ᐁᑮᐅᑕᑳᓀᓯᒡ ᑳᑮᐃᔑ ᐊᓇᒥᐁᐎᑭᒫᐎᓂᒡ ᐁᕒᐊᓇᓐ ᙮

ᒥᒋᓃᔥ ᐃᑕᔥ ᑮᑾᔭᒀᑎᓯᐗᒃ ᐁᓈᓴᒦᓂᒡ ᑭᔐᒪᓂᑑᓐ, ᑫᑰᓐ ᐁᑮᐃᔑ ᐊᓈᒣᑖᑯᓯᓯᒀ ᐁᔑ ᐱᒫᑎᓯᐙᒡ᙮ ᐁᑮᐃᔑᒋᑫᐙᒡ ᑲᑭᓇ ᐁᔑᓯᓂᓂᑭᓐ ᐅᓇᔓᐌᐎᓇᓐ, ᐁᓈᑯᓂᑫᓂᒡ ᑲᔦ ᑳᑎᐯᒋᑫᓂᒡ᙮

ᑳᐐᓐ ᑕᔥ ᐊᐱᓅᒌᔕᓐ ᒋᑮᐊᔮᐙᐙᒡ, ᐋᓃᔥ ᐐᓐ ᐃᓬᐃᓯᐸᑕᓐ ᑳᐐᓐ ᐅᑮ ᑲᔥᑭᑑᓰᓂ ᒋᐊᔮᐙᓂᒡ ᐊᐱᓅᒌᔕᓐ᙮ ᒥᒋᓃᔥ ᐃᑕᔥ ᑮᑭᒋ ᐊᔭᐋᐎᐗᒃ᙮

ᐯᔑᒀ ᑕᔥ ᐁᑮᔑᑳᒃ ᓭᑲᕒᐋᔭ ᑮᐊᓇᒥᐁᐗᓄᑮ ᑭᒋᐊᓇᒥᐁᐎᑲᒥᑯᕽ, ᐁᑮᐃᔑ ᑮᔑᑲᓂᓂᒃ ᐐᓐ ᓂᑕᒻ ᐃᐃ ᒋᐃᓇᓄᑮᒡ᙮

ᐃᐃᐌ ᑳᑮᐊᐸᑭᒋᑫᐙᒡ ᐁᐊᑕ ᑭᑫᒋᑫᐙᒡ ᐊᓇᒥᐁᐎᑭᒫᒃ ᐐᓐ ᒪᔮ ᑮᒦᑯᓭ ᒋᐲᑎᑫᒡ ᐅᑭᒋᐊᓇᒥᐁᐎᑲᒥᑯᓃᕽ ᑳᑎᐯᒋᑫᓂᒡ ᒋᒥᓈᓯᑫᒡ᙮

ᑮᐹᑏᓄᐗᐞ ᐃᑕᔥ ᐊᐎᔭᐞ ᐊᑾᒌᕽ ᑭᒋᐊᓇᒥᐁᐎᑲᒥᑯᕽ ᐁᓇᒥᐋᓂᒡ ᒣᒀ ᐁᒥᓈᓯᑫᒡ᙮

ᒦᑕᔥ ᑳᑮᐅᑎᓯᑯᒡ ᐁᑮᓈᑯᓯᓂᒡ ᑌᐯᒋᑫᓂᒡ ᐅᑌᒐᓬᐃᒥᓂ ᐁᓃᐸᐎᓂᒡ ᑭᒋᓂᑭᕽ ᐃᓇᑫ ᒥᓈᓯᑲᓐ ᐁᔑ ᐸᑭᑎᓈᔂᑌᓂᒃ᙮

ᐊᐲ ᑕᔥ ᓭᑲᕒᐋᔭ ᐁᐙᐸᒫᒡ ᑮᒥᑯᔥᑳᑌᑕᒻ ᐁᑮ ᓭᑭᓯᒡ᙮

ᐅᑮᐃᑰᓐ ᑕᔥ ᐁᒐᓬᐊᓐ: ᓭᑲᕒᐋᔭ, ᑫᑯ ᓭᑭᓯᑫᓐ᙮ ᑭᔐᒪᓂᑑ ᐅᔕ ᑭᓅᑖᒃ ᑳᐃᔑ ᐸᑯᓭᓂᒧᔭᓐ᙮ ᐃᓇᔥᑫ ᑕᔥ ᑭᐐᐤ ᐃᓬᐃᓯᐸᑦ ᑭᑲ ᓂᑖᐎᑭᑕᒫᒃ ᒋᐅᑯᓯᓯᔭᓐ᙮ ᒞᓐ ᑭᑲ ᐃᔑᓂᑳᓈ᙮

ᐐᑫ ᓴ ᑭᑲ ᒌᑫᑕᒻ ᒋᒥᓉᑕᒪᓐ᙮ ᓃᐱᐗᐞ ᑕᔥ ᐊᐎᔭᒃ ᑕᒥᓉᑕᒧᒃ ᐊᐲ ᓂᑖᐎᑭᓂᒡ᙮

ᐊᐊ ᑭᑯᓯᔅ ᐅᑲᑭᒋ ᐃᓀᓂᒥᑰᓐ ᑳᑎᐯᒋᑫᓂᒡ᙮ ᑳᐐᓐ ᑕᒥᓂᑴᓰ ᔔᒥᓈᐳ, ᑯᒫ ᑲᔦ ᑳᒪᔥᑲᐙᑲᒥᓂᓂᒃ ᒥᓂᑴᐎᓐ᙮ ᐊᐲ ᐱᑯ ᓂᑖᐎᑭᒡ ᐅᑲ ᒨᔥᑭᓀᔥᑳᑰᓐ ᑭᔐᒪᓂᑑᓐ ᐅᑕᒑᑯᓂ᙮

ᐅᑲᑴᑳᒋᐋᐞ ᐃᓴ ᓃᐱᐗᐞ ᐊᐎᔭᐞ ᐃᔅᕒᐃᔭᓬᐃᑳᕽ ᑳᐅᒋ ᑎᐯᑖᑯᓯᓂᒡ ᒋᐱᑮᐌᓄᑕᐙᓂᒡ ᑳᑎᐯᒋᑫᓂᒡ ᐅᑭᔐᒪᓂᑑᒥᐙᓐ᙮

ᐐᓐ ᑕᓃᑳᓂ ᑕᑯᔑᓐ ᒋᑆ ᑕᑯᔑᓂᓂᒡ ᑳᑎᐯᒋᑫᓂᒡ᙮ ᑖᐱᔥᑰ ᐃᓬᐋᐃᒐ ᑳᑮᐃᔑ ᐐᒌᐎᑯᒡ ᑭᔐᒪᓂᑑᓐ ᐅᑕᒑᑯᓂ ᐁᑮᒪᔥᑲᐎᓰᒡ, ᒦ ᓴ ᐯᔑᑾᓐ ᑫᐃᔑᓈᑯᓯᒡ ᑭᑯᓯᔅ᙮ ᐅᑲ ᑴᑭᓈᓐ ᐅᑌᑌᒫᓐ ᑲᔦ ᑕᔥ ᐅᑕᐱᓅᒌᔑᒥᓂ ᒦᓇᐙ ᒋᐱᓵᓂ ᐐᒌᑎᓂᒡ᙮ ᐅᑲᑴᑭᓈᓐ ᑲᔦ ᐊᐎᔭᓐ ᑳᔕᔒᐱᑕᒥᓂᒡ ᒋᐱᓯᑕᒥᓂᒡ ᐁᔑ ᑲᑮᑖᐌᑕᒥᓂᒡ ᑴᔭᒀᑎᓯᓂᒡ᙮ ᐐᓐ ᒋᑾᔮᒌᑕᒪᐙᒡ ᑳᑎᐯᒋᑫᓂᒡ ᐅᐱᒫᑎᓰᒥᓂ, ᐅᑮᐃᑰᓐ ᐁᒐᓬᐊᓐ᙮

ᒦᑕᔥ ᓭᑲᕒᐋᔭ ᑳᐃᓈᒡ ᐃᓂ ᐁᒐᓬᐊᓐ: ᐋᓃᓐ ᑕᔥ ᑫᐅᒋ ᑭᑫᑕᒫᓐ ᑌᐺ ᐅᐅ ᒋᐃᔑᐌᐸᒃ, ᐋᓃᔥ ᐁᑭᒋ ᐊᔭᐋᐎᔮᓐ ᓂᐐᐤ ᑕᔥ ᑫᐐᓐ ᑌᐺ ᐁᑭᒋᐊᔭᐋᐎᒡ᙮

ᒦᑕᔥ ᑳᐃᑯᒡ ᐁᒐᓬᐊᓐ: ᓃᓐ ᐅᔕ ᑫᐸᕒᐃᔭᓬ, ᐅᑮᐃᑰᓐ᙮ ᓂᑎᓈᓴᒥᑳᐸᐎᑕᐙ ᐅᔕ ᑭᔐᒪᓂᑑ᙮ ᒦ ᐊᐌ ᑳᑮ ᐲᒋᓂᔕᐅᒡ ᒋᐱ ᐐᑕᒪᐎᓈᓐ ᐅᐅᐌ ᒥᓄ ᑎᐹᒋᒧᐎᓐ᙮

ᔖᑰᒡ ᑕᔥ ᑳᐐᓐ ᑭᑌᐺᑕᓰᓐ ᐅᐅᐌ ᑳᐃᓈᒋᒧᑕᐎᓈᓐ, ᐃᐃ ᑫᒋᓈᒡ ᑳᐐᐃᔑᐌᐸᒃ ᐊᐲ ᐅᒋᒋᓭᒃ᙮ ᐁᑌᐺᑕᓯᐗᓐ ᐃᑕᔥ, ᑳᐐᓐ ᑭᑲ ᑲᔥᑭᑑᓰᓐ ᒋᑲᑭᑐᔭᓐ, ᑳᐐᓐ ᑲᔦ ᑭᑲ ᓅᑖᑯᓯᓰ᙮ ᐹᓂᒫ ᐱᑯ ᑮᔑᑳᒃ ᐅᒋᒋᓭᒃ ᑳᐃᓇᔓᑕᒪᐎᓈᓐ ᒋᐃᔑᐌᐸᒃ, ᒦᔥ ᒦᓇᐙ ᒋᑲᔥᑭᑑᔭᓐ ᒋᑲᑭᑐᔭᓐ, ᐅᑮᐃᑰᓐ ᐁᒐᓬᐊᓐ᙮

ᓭᑲᕒᐋᔭ ᓴ ᐅᑮ ᐲᐃᑰᐞ ᐯᒫᑎᓯᓂᒡ, ᐁᑮᐗᐙᓀᑕᒥᓂᒡ ᐌᑯᓀᓐ ᐌᑕᒥᐃᑯᒡ ᐃᐃᒫ ᑭᒋᐊᓇᒥᐁᐎᑲᒥᑯᕽ᙮

ᐊᐲ ᑕᔥ ᑮᐱ ᓵᑲᐊᕽ ᑳᐐᓐ ᐅᑮ ᑲᔥᑭᑑᓰᓐ ᒋᑲᑲᓅᓈᒡ᙮ ᒦᔥ ᑳᑮ ᑭᑫᓂᒥᑯᒡ ᑫᑰᓐ ᐁᑮᐙᐸᑕᕽ ᑭᒋᐊᓇᒥᐁᐎᑲᒥᑯᕽ᙮ ᑳᐐᓐ ᐅᑮ ᑲᔥᑭᑑᓰᓐ ᑫᑰᓐ ᒋᐃᑭᑐᒡ, ᒦ ᐁᑕᑯ ᐁᑮᒥᒋ ᐊᔨᔑᓂᑫᓂᒡ᙮

ᓭᑲᕒᐋᔭ ᑕᔥ ᑳᐃᔥᒀᓭᓂᒃ ᐅᑕᓇᒥᐁᐗᓄᑮᐎᓐ ᐃᐃᒫ ᑭᒋᐊᓇᒥᐁᐎᑲᒥᑯᕽ, ᒦ ᐃ ᑳᐊᓂ ᐃᔑ ᑮᐌᒡ᙮

ᓈᓈᑫ ᑕᔥ ᐁᐊᓂ ᐃᔑᓭᒃ, ᒦ ᐃ ᐐᐙᓐ ᐃᓬᐃᓯᐸᑕᓐ ᑳᑮ ᑭᑭᔥᑲᐙᐗᓱᓂᒡ᙮ ᑳᐐᓐ ᓂᑯᒋ ᑮᐃᔖᓰᐗᓐ ᓈᓄᑮᓯᔅ ᒥᓂᒃ᙮

ᒦᔥ ᑳᐃᑭᑐᒡ: ᒦᑕᔥ ᐅᐅᐌ ᓇᑫ ᑳᑎᐯᒋᑫᒡ ᐁᔑᒋᑫᑕᒪᐎᒡ ᐁᒥᓍᐸᒥᒡ ᓅᑯᒻ ᑳᑮᔑᑲᓂᓂᒃ᙮ ᑳᐐᓐ ᑕᔥ ᒦᓇᐙ ᐐᑳ ᓂᑲᐊᑲᒋᓰ ᐊᐎᔭᒃ ᒋᐃᔑᐙᒡ ᐁᑲᔥᑭᑑᓯᐙᓐ ᐄᓴᓐ ᒋᐊᔮᐗᒃ ᐊᐱᓅᒌᔥ, ᑮᐃᑭᑐ᙮

ᐊᐲ ᑕᔥ ᐋᔕ ᓂᑯᑣᓱᑮᓯᔅ ᐃᓬᐃᓯᐸᑦ ᐁᑭᑭᔥᑲᐙᐗᓱᒡ, ᑭᔐᒪᓂᑑ ᐅᑮᐃᔑᓂᔕᐙᓐ ᐅᑌᒐᓬᐃᒪᓐ ᑫᐸᕒᐃᔭᓬ ᑳᐃᔑᓂᑳᓱᓂᒡ, ᑳᓬᐊᓬᐄ ᐊᑮᕽ ᒋᐃᔖᓂᒡ ᐃᐃᒫ ᓈᓴᕒᐃᑦ ᐆᑌᓈᕽ᙮

ᐁᑮᐃᔑᓂᔕᐅᓐᒡ ᐊᐊ ᐁᒐᓬ ᐁᔑᐊᔮᓂᒡ ᐃᓂ ᐯᑭ ᐅᔥᑭᓃᑭᑴᐗᓐ ᒣᕒᐃ ᑳᐃᔑᓂᑳᓱᓂᒡ᙮ ᐋᔕ ᐄᑐᒃ ᑮᐊᔓᑕᒫᑎᐙᑯᐸᓐ ᒎᓴᑉ ᐁᔑᓂᑳᓱᓂᒡ ᒋᐐᑎᑫᑎᐙᒡ᙮ ᐊᐊ ᓴ ᒎᓴᑉ ᑮᐅᑕᑳᓀᓯ ᑌᐱᑎᕽ ᑳᑮ ᑭᒋᐅᑭᒫᐎᓂᑯᐸᓀᓐ᙮

ᒦᑕᔥ ᐁᒐᓬ ᑳᑮᐱ ᓈᓯᑲᐙᒡ ᐃᓂ ᐅᔥᑭᓃᑭᑴᐗᓐ ᐁᑮᐃᓈᒡ: ᑭᐴᔔᐃᓐ, ᑳᑎᐯᒋᑫᒡ ᐅᔕ ᑭᐐᒌᐎᒃ ᑲᔦ ᑕᔥ ᐋᐱᒋ ᑭᑭᒋ ᔕᐌᓂᒥᒃ, ᐅᑮᐃᓈᓐ᙮

ᒣᕒᐃ ᑕᔥ ᑮᐅᒋ ᒥᑯᔥᑳᑌᑕᒻ ᐃᐃ ᑳᑮᐃᑯᒡ ᐁᒐᓬᐊᓐ, ᑮᐗᐙᓀᑕᒻ ᑲᔦ ᐌᑯᓀᓐ ᐃᐃ ᓇᑫ ᑳᑮᐃᔑ ᐴᔔᐃᑯᒡ᙮

ᒦᑕᔥ ᐅᐅ ᐁᒐᓬᐊᓐ ᑳᐃᑯᒡ: ᒣᕒᐃ, ᑫᑯ ᐃᐃᐌ ᐅᒋ ᓭᑭᓯᑫᓐ ᑭᔐᒪᓂᑑ ᐅᔕ ᑭᒥᓄ ᑲᓇᐙᐸᒥᒃ᙮

ᐃᓇᔥᑫ ᑕᔥ ᑭᑲ ᑭᑭᔥᑲᐙᐗᔅ ᒋᓂᑖᐎᑭᐊᒡ ᑫᐅᑯᓯᓯᔭᓐ᙮ ᒋᓴᔅ ᑕᔥ ᑭᑲ ᐃᔑᓂᑳᓈ᙮

ᐐᑫ ᓴ ᑕᑭᒋ ᐃᓀᑖᑯᓯ, ᒦᔥ ᑲᔦ ᑫᔑᓂᑳᓂᓐᒡ ᒫᐗᒡ ᑳᐃᔥᐯᑖᑯᓯᒡ ᑭᔐᒪᓂᑑ ᐅᑯᓯᓴᓐ᙮ ᑳᑎᐯᒋᑫᓂᒡ ᑭᔐᒪᓂᑑᓐ ᑲᔦ ᐅᑲ ᑭᒋᐅᑭᒫᐎᐃᑰᓐ ᑖᐱᔥᑰ ᐯᔑᑾᓐ ᑌᐱᑕᓐ ᐅᑫᑌᔭᐋᒥᐸᓃᓐ ᑳᑮᐃᔑ ᑭᒋᐅᑭᒫᐎᓂᒡ᙮

ᐐᓐ ᐃᑕᔥ ᑲᔦ ᓀᐱᒡ ᐅᑲ ᐅᑭᒫᑲᑕᐙᐞ ᒉᑲᐴᕽ ᐌᑕᑳᓀᓯᓂᒡ᙮ ᑳᐐᓐ ᐐᑳ ᑕᐃᔥᒀᓭᓯᓂᓂ ᐅᑭᒋᐅᑭᒫᐎᐎᓐ, ᑮᐃᑭᑐ ᐁᒐᓬ᙮

ᒦᑕᔥ ᒣᕒᐃ ᑳᐃᓈᒡ ᐃᓂ ᐁᒐᓬᐊᓐ: ᐋᓃᓐ ᑕᔥ ᐃᐃ ᑫᐅᒋ ᐃᔑᓭᒃ? ᑫᔮᐱ ᐄᑐᒃ ᐯᑭ ᐅᔥᑭᓃᑭᑴ ᓂᑎᓄᐤ, ᐅᑮᐃᓈᓐ᙮

ᒦᑕᔥ ᐁᒐᓬᐊᓐ ᑳᐃᔑ ᓇᑴᑖᑯᒡ: ᑭᔐᒪᓂᑑ ᐅᑕᒑᑾᓐ ᑭᑲᐱ ᓈᓯᑳᒃ ᑲᔦ ᑕᔥ ᐅᒪᔥᑲᐎᓰᐎᓐ ᐊᐊᐌ ᒫᐗᒡ ᑳᐃᔥᐯᑖᑯᓯᒡ ᑭᑲᐱ ᐊᑲᐙᑌᔥᑳᑯᐙᓐ᙮ ᒦᑕᔥ ᐅᐅᐌᓂ ᐅᒋ, ᐊᐊ ᑳᐐ ᓂᑖᐎᑭᐊᒡ, ᒥᓯᐌ ᑳᐐ ᑎᐯᓂᒥᑯᒡ ᑭᔐᒪᓂᑑᓐ ᒋᐋᐸᒋᐃᑯᒡ, ᑭᔐᒪᓂᑑ ᐅᑯᓯᓴᓐ ᑕᐃᔑᓂᑳᒋᑲᓂᐎ᙮

ᐃᓇᔥᑫ ᐊᐊ ᑭᑎᓇᐌᒫᑲᓐ ᐃᓬᐃᓯᐸᑦ ᑳᐃᔑᓂᑳᓱᒡ ᐋᓇ ᐁᑭᒋ ᐊᔭᐋᐎᒡ ᐋᔕ ᓂᑯᑣᓱᑮᓯᔅ ᐱᑭᑭᔥᑲᐙᐗᓱ᙮ ᐋᓇᐐᓐ ᐁᐃᓂᓐᒡ ᐁᑲᔥᑭᑑᓯᒃ ᒋᐊᔮᐙᒡ ᐊᐱᓅᒌᔕᓐ᙮

ᐋᓃᔥ ᑳᐐᓐ ᑫᑰᓐ ᑭᔐᒪᓂᑑ ᐅᑆᓇᐎᑑᓰᓐ ᑳᐐᐃᔑᒋᑫᒡ, ᐅᑮᐃᑰᓐ ᐁᒐᓬᐊᓐ᙮

ᑭᓅᑕᐎᓐ, ᓃᓐ ᓴ ᑳᑎᐯᒋᑫᒡ ᐅᑕᓄᑮᐋᑲᓇᓐ, ᑮᐃᑭᑐ ᒣᕒᐃ᙮ ᒫᓄ ᓂᑲ ᐃᔑᓭᐙᓐ ᐋᓃᓐ ᐁᑭᑐᔭᓐ᙮ ᒦᑕᔥ ᐊᐸᓐ ᐁᒐᓬᐊᓐ ᑳᐃᔑᓇᑲᓂᑯᒡ᙮

ᒦᑕᔥ ᐃᑯ ᐌᔩᑉ ᒣᕒᐃ ᑳᑮᒫᒑᒡ ᐁᑮᐃᔖᒡ ᐌᑎ ᐆᑌᓈᕽ ᐁᔑ ᐸᐲᑾᑎᓈᓂᒃ ᒎᑏᔭ ᐊᑮᕽ᙮

ᒦᑕᔥ ᑳᑮᐊᓂ ᐲᑎᑫᒡ ᐃᐃᒫ ᓭᑲᕒᐋᔭᐗᓐ ᐅᐙᑳᐃᑲᓂᓃᕽ, ᑲᔦ ᑕᔥ ᐁᑮ ᐴᔔᐋᒡ ᐅᑎᓇᐌᒫᑲᓇᓐ ᐃᓬᐃᓯᐸᑕᓐ ᙮

ᐊᐲ ᑕᔥ ᐃᓬᐃᓯᐸᑦ ᐁᓅᑕᐙᒡ ᒣᕒᐄᓐ ᐁᐴᔔᐃᑯᒡ, ᒦᔥ ᑳᑮᒪᑗ ᑑᑭᐸᓂᐅᓂᒡ ᐊᐱᓅᒌᔕᓐ ᐊᓈᒥᕽ ᐅᒥᓴᑖᕽ, ᒦᑕᔥ ᐃᓬᐃᓯᐸᑦ ᑳᑮᒨᔥᑭᓀᔥᑳᑯᒡ ᑭᔐᒪᓂᑑᓐ ᐅᑕᒑᑯᓂ᙮

ᒦᑕᔥ ᑳᐃᑭᑐᒡ ᐁᑮ ᑭᔒᐌᒡ: ᑮᓐ ᒫᐗᒡ ᑭᑑᒋ ᑭᒋ ᔕᐌᑖᑯᔅ ᑳᑕᔑᐙᒡ ᐃᑴᐗᒃ ᑲᔦ ᑕᔥ ᐁᑭᒋ ᔕᐌᑖᑯᓯᒡ ᐊᐱᓅᒌᔥ ᑫᓂᑖᐎᑭᐊᒡ᙮

ᐌᑯᓀᓐ ᐃᑕᔥ ᐅᐅ ᑭᒋᑫᑰᓐ ᐌᒋ ᐃᔑᓭᔮᓐ, ᓂᑎᐯᒋᑫᒻ ᐅᒫᒫᓐ ᐁᐱ ᒪᐗᑎᔑᒥᒡ?

ᐊᐲ ᐱᑯ ᑳᓅᑕᐎᓈᓐ ᑳᑮᐱ ᐴᔔᐃᔭᓐ ᒦ ᐃ ᐊᐊ ᐊᐱᓅᒌᔥ ᑳᑭᑭᔥᑲᐗᒃ ᑳᑮ ᑑᑭᐸᓂᐅᒡ ᐁᐲᒋ ᒌᑫᑕᕽ᙮

ᐋᐱᒋ ᔕᐌᑖᑯᓯ ᐊᐊ ᐃᑴ ᑳᑌᐺᑕᕽ ᑲᑭᓇ ᒋᒧᔥᑭᓀᓭᓂᒃ ᑳᑮᐃᑯᒡ ᑳᑎᐯᒋᑫᓂᒡ᙮

ᒣᕒᐃ ᑕᔥ ᑮᐃᑭᑐ: ᓂᑌᐃᕽ ᓂᑑᒋᓇᓈᑯᒫ ᑳᑎᐯᒋᑫᒡ,

ᓂᑕᒑᑯᕽ ᓂᑑᒋᑌᐱᓇᐌᐃᒃ ᑭᔐᒪᓂᑑ ᓂᑑᐱᒫᒋᐃᐌᒻ!

ᐋᓃᔛᓐ ᑳᒫᒥᑲᐎᓄᑕᐎᒡ ᓃᓐ ᑳᑕᐸᓭᑖᑯᓯᓂᒡ ᐅᑕᓄᑮᐋᑲᓂᑴᒪᓐ ᐁᑎᓄᐎᔮᓐ᙮ ᒦᑕᔥ ᓅᑯᒻ ᑲᑭᓇ ᐊᐎᔭᒃ ᑫᒫᒌ ᐃᔑᓂᑳᔑᐙᒡ ᑳᔕᐌᑖᑯᓯᒡ!

ᑌᐺ ᓴ ᑭᒋᑫᑰᓇᓐ ᐊᐊ ᑫᒋᒪᔥᑲᐎᓰᒡ ᑭᔐᒪᓂᑑ ᓂᑮᐃᔑᒋᑫᑕᒫᒃ᙮ ᒦᔥ ᐁᔑᓂᑳᓱᒡ ᑫᑌᑖᑯᓯᒡ᙮

ᐅᔕᐌᓂᒫᓐ ᐃᓂᐌᓂᐗᓐ ᑳᑯᑖᓀᓂᒥᑯᒡ, ᐃᓂᐌᓂᐗᐞ ᑲᔦ ᑲᑭᓇ ᑫᐊᓂ ᐋᔮᓂᑫᐱᒫᑎᓯᓂᒡ᙮

ᑌᑕᑯ ᓲᑫᑖᑯᓯ ᐁᑮᒪᔥᑲᐎᑑᑕᕽ, ᐁᑮᐅᓶᓂᔕᐙᒡ ᑲᑭᓇ ᑳᑭᑌᓂᒧᓂᒡ ᐅᑌᐃᓃᕽ᙮

ᐅᑮᓃᓯᓈᓐ ᑳᒪᔥᑲᐎᓰᓂᒡ ᑭᒋᐅᑭᒫᓐ ᐃᐃᒫ ᐅᒋ ᑳᑮᐃᔑ ᐅᑭᒫᐗᐱᓂᒡ᙮ ᐅᑮᐅᐱᓈᓐ ᑕᔥ ᐃᓂᐌᓂᐗᓐ ᑳᑕᐸᓭᑖᑯᓯᓂᒡ᙮

ᐅᑮ ᑌᐐᓯᓂᐋᓐ ᐃᓂᐌᓂᐗᓐ ᑳᐐᐐᓯᓂᓂᒡ ᐱᔑᔑᒃ ᐁᐊᔕᒫᒡ ᐌᓂᔑᔑᓂᓂᑭᓐ ᑫᑰᓇᓐ, ᐃᓂ ᑕᔥ ᐐᓐ ᑳᐌᓅᑎᓯᓂᒡ ᐱᓂᔅᑴ ᐃᑯᒋ ᐅᑎᔑᓂᔕᐙᓐ᙮

ᑮᐃᔑᒋᑫ ᑲᔦ ᑳᑮᐃᔑ ᐊᔓᑕᒪᐙᒡ ᑭᑫᑌᔭᐋᒥᓈᐸᓃᐞ, ᐁᑮᐱ ᐃᔖᒡ ᒋᐱᐐᒋᐋᒡ ᐅᑕᓄᑮᐋᑲᓇᐞ ᐃᔅᕒᐃᔭᓬᐃᕽ ᐌᒋ ᑎᐯᑖᑯᓯᓂᒡ᙮

ᐅᑮᐃᔑᒫᒥᑴᑖᓐ ᐅᑭᔐᐙᑎᓯᐎᓂᕽ ᒋᐐᒋᐋᒡ ᐁᐸᕒᐊᐋᒪᓐ ᐃᐃ ᑲᔦ ᑲᑭᓇ ᑫᓂᐅᐲᐌᓰᒥᓂᒡ ᓀᐱᒡ ᐃᑯ᙮ ᒦ ᐅᐌᓂ ᑳᐃᔑᓇᓈᑯᒧᒡ ᒣᕒᐃ᙮

ᒣᕒᐃ ᐅᑮᐐᒋᐊᔮᒫᓐ ᓂᑯᒋ ᑯ ᓂᑯᑣᓱᑮᓯᔅ ᐃᓬᐃᓯᐸᑕᓐ, ᒦᑕᔥ ᒣᕒᐃ ᑳᐊᓂᔑ ᑮᐌᒡ ᐅᑖᐎᓂᕽ᙮

ᐊᐱ ᑕᔥ ᑳᐅᒋᒋᓭᓂᒃ ᐃᓬᐃᓯᐸᑦ ᒋᓂᑖᐎᑭᓈᐗᓱᒡ, ᒦᔥ ᑳᑮᐊᔮᐙᒡ ᑫᐅᑯᓯᓯᒡ᙮

ᐁᓅᑕᒥᓂᒡ ᑕᔥ ᐅᐐᒋᑖᒫᑲᓇᐞ, ᐃᐃ ᑲᔦ ᐅᑎᓇᐌᒫᑲᓇᐞ ᑳᐊᐲᒋ ᒥᓄᑑᑖᑯᒡ ᑳᑎᐯᒋᑫᓂᒡ, ᑲᑭᓇ ᓴ ᐅᑮᐐᒋ ᒌᑫᑕᒨᒥᑰᐞ᙮

ᓃᔣᓱᑮᔑᒃ 8 ᐃᑕᔥ ᐁᐃᔑᓭᓂᒃ, ᐅᑮ ᑭᑭᓇᐙᑕᔕᑫᔣᐙᓐ ᐃᓂ ᐅᔥᑲᐱᓅᒌᔕᓐ᙮ ᒦᔥ ᑲᔦ ᑳᐃᓀᑕᒧᐙᒡ ᒋᐃᔑᓂᑳᓂᒥᓐᒡ ᓭᑲᕒᐋᔭ ᐋᓃᔥ ᒦ ᐃ ᑳᐃᔑᓂᑳᓱᓂᒡ ᐅᑌᑌᓐ᙮

ᑳᐎᓐ, ᑮᐃᑭᑐᐗᓐ ᐅᒫᒫᓐ᙮ ᒞᓐ ᑕᐃᔑᓂᑳᓱ, ᑮᐃᑭᑐᐗᓐ᙮

ᒦᑕᔥ ᑳᐃᓈᐙᒡ ᐃᓬᐃᓯᐸᑕᓐ: ᑳᐐᓐ ᐄᑐᒃ ᐊᐎᔭ ᑭᑎᓇᐌᒫᑲᓐ ᐃᐃ ᐃᔑᓂᑳᓱᓰ!

ᒦᑕᔥ ᐁᑮᐊᔨᔑᓂᑫᑕᐙᐙᒡ ᐃᓂ ᐅᑌᑌᒫᓐ ᐁᑲᑴᒋᒫᐙᒡ ᐋᓃᓐ ᑫᔑ ᐊᑕᐌᓂᒫᓂᒡ ᐅᑯᓯᓴᓐ ᒋᐃᔑᓂᑳᓱᓂᒡ᙮

ᓭᑲᕒᐋᔭ ᑕᔥ ᑮᐊᑐᑕᒫᑫ ᑫᔑ ᐅᔑᐲᐃᑫᒡ, ᒦᑕᔥ ᑳᐃᔑᐲᐃᑫᒡ: ᒞᓐ ᐃᔑᓂᑳᓱ᙮ ᐋᐱᒋ ᑕᔥ ᑲᑭᓇ ᑮᑯᔥᑴᑕᒨᐞ᙮

ᒦᑕᔥ ᔐᒫᒃ ᓭᑲᕒᐋᔭ ᐁᑮ ᑲᔥᑭᑑᒡ ᒦᓇᐙ ᒋᑲᑭᑐᒡ ᑲᔦ ᐁᑮᒫᒌ ᑭᒋᓇᓈᑯᒫᒡ ᑭᔐᒪᓂᑑᓐ᙮

ᐋᐱᒋ ᑕᔥ ᑲᑭᓇ ᐅᐐᒋᑖᒫᑲᓇᐞ ᑮᓭᑭᓯᐗᐞ᙮ ᒥᓯᐌ ᓴ ᑕᔥ ᑮᑕᔑᒋᑳᑌ ᐃᐃ ᑳᑮᐃᔑᐌᐸᒃ ᐃᐃᒫ ᒎᑏᔭ ᐯᐲᑾᑎᓈᒃ᙮

ᑲᑭᓇ ᓴ ᐊᐎᔭᒃ ᑳᑮᓅᑕᒧᐙᒡ ᐅᐅ ᐅᑮᓈᓈᑲᑕᐌᑖᓈᐙ ᐁᑮᐃᔑ ᑲᑴᑗᐙᒡ: ᑳᓇᑲ ᐊᐌᑴᓐ ᑫᓂᑎᓄᐎᑴᓐ ᐊᐊ ᐊᐱᓅᒌᔥ? ᑮᐸᔭᑌᓈᑾᓂᓂ ᑳᑎᐯᒋᑫᓂᒡ ᐁᔑ ᒪᔥᑲᐎᓰᓂᒡ ᐁᐐᒌᐎᑯᒡ ᐊᐊ ᐊᐱᓅᒌᔥ᙮

ᒦᔥ ᒞᓐ ᐅᑌᑌᓐ ᓭᑲᕒᐋᔭᐗᓐ ᑳᑮᒨᔥᑭᓀᔥᑳᑯᓂᒡ ᑭᔐᒪᓂᑑ ᐅᑕᒑᑯᓂ, ᑲᔦ ᑕᔥ ᐁᑮ ᑲᓅᑕᒪᐙᓂᒡ ᑭᔐᒪᓂᑑᓐ ᐁᑮᐃᑭᑐᓂᒡ:

ᑕᑲ ᑕᓇᓈᑯᒫᑲᓂᐎ ᑳᑎᐯᒋᑫᒡ ᑳᐅᑭᔐᒪᓂᑑᒥᐙᒡ ᐃᔅᕒᐃᔭᓬᐊᒃ ᐐᓐ ᐁᑮ ᐲᔖᒡ, ᐁᑮᐱ ᐊᑕᓈᑕᒪᐙᒡ ᐅᐱᒫᑎᓰᒪᐞ ᒋᐱᒫᒋᐃᒥᓐᒡ᙮

ᐐᓐ ᓴ ᐱᑯ ᑮᒦᑭᐌ ᒣᔥᑲᐌᑖᑯᓯᓂᒡ ᐅᐱᒫᒋᐃᐌᓐ ᐌᑕᑳᓀᓯᓂᒡ ᑌᐱᑎᑳᕽ ᑳᑮᐅᑕᓄᑮᐋᑲᓂᒥᑯᐸᓀᓐ᙮

ᒣᐎᔕ ᐅᐅ ᑭᑮᐊᔓᑕᒫᑯᓈᓐ ᑭᔐᒪᓂᑑ ᐁᑮᐋᐸᒋᐋᒡ ᑴᔭᒀᑎᓯᓂᒡ ᑫᓅᑕᒫᑯᒡ,

ᐁᐐᓈᑕᒪᐎᓇᕽ ᐅᒋ ᑳᒦᑳᓂᔭᒥᑣ, ᐃᐃ ᑲᔦ ᐁᔑᒪᔥᑲᐎᓰᓂᒡ ᑳᔒᑫᓂᒥᔭᒥᑣ᙮

ᑮᐃᑭᑐᑯᐸᓐ ᒋᑯᐹᑌᓂᒫᒡ ᐃᓂᐌᓂᐗᐞ ᑭᑭᒋᐊᔭᐋᒥᓈᐸᓃᐞ, ᑲᔦ ᑕᔥ ᒋᑲᐧᓃᑫᒡ ᑳᑭᒋᐃᓀᑖᑾᓂᓂᒃ ᐅᑕᔓᑕᒫᑫᐎᓐ᙮

ᐁᑮᐋᔩᒋᐊᔓᑕᒪᐙᑯᐸᓀᓐ ᑭᑭᒋᐊᔭᐋᒥᓈᐸᓃᓐ ᐁᐸᕒᐊᐋᒪᓐ,

ᐁᐐᓈᑕᒪᐎᓇᕽ ᐃᐃ ᐅᒋ ᑳᔒᑫᓂᒥᔭᒥᑣ, ᑲᔦ ᑕᔥ ᐱᓵᓐ ᒋᑲᔥᑭᑖᐗᑭᒡ ᐊᓄᑮᑕᐗᑭᒡ ᒣᒬᒡ ᒋᓭᑭᓯᓯᐙᕽ᙮

ᒦᑕᔥ ᑮᓇᐎᓐᑦ ᒋᐯᑫᑖᑯᓯᔭᕽ, ᒋᑾᔭᒀᑎᓯᔭᕽ ᑲᔦ ᑭᔐᒪᓂᑑ ᐁᓈᓴᒦᒡ, ᒥᓂᒃ ᓴᑯ ᐁᑕᓱ ᑮᔑᒃ ᑫᐊᓂ ᐱᒫᑎᓯᔭᕽ᙮

ᑮᓐ, ᓂᓃᒑᓂᔅ, ᑭᑲ ᐃᔑᓂᑳᓂᑰ ᑳᑲᓅᑕᒪᐙᒡ ᒫᐗᒡ ᑳᐃᔥᐯᑖᑯᓯᓂᒡ ᑭᔐᒪᓂᑑᓐ᙮ ᑭᐐ ᓃᑳᓂ ᐃᔑᓂᔕᐅᓐ ᓴ ᓂᑎᐹᒋᒧᐎᓂᓃᒻ, ᒦ ᓴ ᐊᐌ ᑫᑾᔮᒋᑕᒪᐗᒡ ᐋᑎ ᑫᓂ ᐃᔖᒡ᙮

ᒋᐐᑕᒪᐎᒪᒡ ᐅᐱᒫᑎᓰᒪᐞ ᐱᒫᒋᐃᑰᐎᓯᐎᓐ, ᑕᑯ ᒋᐴᓀᒋᑳᑌᓂᑭᓐ ᐅᒪᒋᑑᑕᒧᐎᓂᐙᓐ᙮

ᑭᑭᔐᒪᓂᑑᒥᓈᓐ ᐋᐱᒋ ᑰᐹᑌᓂᒥᐌ ᐁᑭᔐᐙᑎᓯᒡ᙮ ᐁᔑᓈᑾᓂᓂᒃ ᑖᐱᔥᑰ ᑳᐱ ᓵᑳᑌᒃ ᑫᓵᑳᓱᑯᔭᕽ᙮

ᑕᓵᑳᑌᓇᒪᐙᐗᒃ ᓴ ᐃᑭ ᑳᐃᔑ ᐱᒫᑎᓯᐙᒡ ᑳᔑ ᑲᔥᑮᑎᐱᑲᓂᓂᒃ, ᑳ~ᐊᔮᐙᒡ ᑲᔦ ᑳᐃᔑ ᐋᑲᐙᑌᓯᓂᓂᒃ ᓂᐳᐎᓐ, ᑲᔦ ᑕᔥ ᒋᑭᑭᓄᐎᓂᑯᔭᕽ ᒦᑲᓇ ᑳᐃᓇᒧᒃ ᐯᔭᑕᑫᓂᒧᐎᓂᕽ᙮

ᒦᑕᔥ ᐊᐊ ᐊᐱᓅᒌᔥ ᑮᐊᓂ ᒥᑎᑐ, ᑮᐊᓂ ᒪᔥᑲᐎᓰ ᑲᔦ ᐅᐐᔭᐎᕽ, ᐅᑕᒑᑯᕽ ᑲᔦ᙮ ᐱᑾᑕᑮᕽ ᑕᔥ ᑮᑕᔑ ᐱᒫᑎᓯ, ᐹᓂᒫ ᐱᑯ ᐁᑮᐅᒋᒋᓭᓂᒃ ᒣᑴᔭᐄ ᒋᓈᑯᓯᒡ ᑳᐃᔑ ᐊᔮᓂᒡ ᐃᔅᕒᐃᔭᓬᐃᑳᕽ᙮

ᒣᒀ ᐊᐲ ᑮᑭᒋᐅᑭᒫᐎᒡ ᐊᑲᔅᑕᔅ ᑮᐃᓇᔓᐌ ᑲᑭᓇ ᐯᒫᑎᓯᓂᒡ ᐅᑎᐯᒋᑫᐎᓂᕽ ᑳᐊᔮᓂᒡ ᒋᐊᑭᒋᑳᓱᓂᒡ᙮

ᒦᑕᔥ ᐅᐅᐌ ᓂᑕᒻ ᐁᑮᐃᔑᒋᑳᓂᐗᕽ ᒪᓯᓇᐃᑲᓂᕽ ᒋᐅᔑᐲᐅᒥᓐᒡ ᐊᐎᔭᐞ ᒣᒀ ᑶᕒᐄᓂᔭᔅ ᑮᑎᐯᑕᕽ ᓰᕒᐃᔭ ᐊᑭ᙮

ᑲᑭᓇ ᑕᔥ ᐊᐎᔭᒃ ᑮᐃᔖᐗᒃ ᐆᑌᓈᕽ ᑳᐅᒋ ᑎᐯᑖᑯᓯᐙᒡ ᒋᐅᔑᐲᐃᑲᓂᐎᐙᒡ᙮

ᒎᓴᑉ ᑕᔥ ᑮᐅᒋ ᒫᒑ ᐃᐃᒫ ᓈᓴᕒᐃᑦ ᐆᑌᓈᕽ ᑳᓬᐊᓬᐄ ᐊᑮᕽ, ᐁᑮᐃᔖᒡ ᐯᑕᓬᐃᐁᒻ ᐆᑌᓈᕽ ᒎᑏᔭ ᐊᑮᕽ᙮ ᒦ ᐃ ᐄᑐᒃ ᐃᐃᒫ ᑳᑮᑕᔑ ᓂᑖᐎᑯᐸᓀᓐ ᑭᒋᐅᑭᒫ ᑌᐱᑦ ᙮ ᒦᑕᔥ ᐌᑎ ᒎᓴᑉ ᑳᐃᔖᒡ, ᐋᓃᔥ ᑌᐱᑎᑳᕽ ᑮᐅᑕᑳᓀᓯ᙮

ᒎᓴᑉ ᑕᔥ ᐅᑮᐐᒌᐙᓐ ᒣᕒᐄᓐ ᒋᐊᑕᐎ ᐅᔑᐲᐃᑳᓱᐙᒡ, ᐋᔕ ᐐᓐ ᐁᑮᐊᔓᑕᒫᑎᐙᒡ ᒋᐐᑎᑫᑎᐙᒡ, ᑲᔦ ᑕᔥ ᒣᕒᐄᓐ ᐋᔕ ᐁᑭᑭᔥᑲᐙᐗᓱᓂᒡ, ᐋᔕ ᑫᑳ ᒋᓂᑖᐎᑭᓈᐗᓱᓂᒡ᙮

ᒣᒀ ᑕᔥ ᐁᐊᔮᐙᒡ ᐃᐃᒫ ᐯᑕᓬᐃᐁᒦᕽ ᒦ ᐃ ᑳᑮ ᑎᐱᓭᓂᒃ ᒋᓂᑖᐎᑭᓈᐗᓱᓂᒡ᙮

ᒦᑕᔥ ᑳᑮᓂᑖᐎᑭᐋᒡ ᓂᑕᒻ ᐅᑯᓯᓴᓐ᙮ ᒦᔥ ᑳᑮ ᑲᔥᑮᑭᓈᒡ ᑕᑯᐱᓱᓃᑭᓄᕽ ᑲᔦ ᐁᑮ ᐱᒥᔑᒫᒡ ᐱᔑᑭᐗᐞ ᓀᑖᑕᔑ ᐐᓯᓂᓂᒡ᙮ ᑳᐐᓐ ᑮᑕᐙᓯᓂᓂ ᓂᑯᒋ ᓂᐯᐎᑲᒥᑯᕽ᙮

ᒦᑕᔥ ᐃᐃᒫ ᐃᓇᑫᑲᒥᒃ ᑮᐊᔮᐗᒃ ᐅᑲᓇᐎ ᒫᓇᒑᓂᔑᐌᒃ ᓃᑲᑌᔭᐄ ᐁᔑ ᒪᔥᑯᓰᑳᓂᒃ ᐁᓃᐹ ᑲᓇᐌᓂᒫᐙᒡ ᐅᒫᓇᒑᓂᔑᒥᐙᐞ ᐁᐊᔫᑸᓄᓂᒡ᙮

ᓭᓴᑰᒡ ᐃᑕᔥ ᐅᑮᐅᒋ ᐙᐸᒫᐙᓐ ᑳᑎᐯᒋᑫᓂᒡ ᐅᑌᒐᓬᐃᒥᓂ, ᑲᔦ ᑕᔥ ᒥᓯᐌ ᐁᑮᐙᓭᔥᑳᑯᐙᒡ ᑳᑎᐯᒋᑫᓂᒡ ᐅᐙᓭᔮᓯᐎᓂᓂ, ᐋᐱᒋ ᑕᔥ ᑮᓭᑭᓯᐗᒃ᙮

ᒦᑕᔥ ᑳᐃᑯᐙᒡ ᐁᒐᓬᐊᓐ: ᑫᑯ ᓭᑭᓯᑫᒃ! ᓂᐲᑑᓐ ᒥᓍᒋᒧᐎᓐ ᑫᐐᑕᒪᐎᓇᑰᒃ, ᐋᑎ ᑫᐅᒋ ᑭᒋ ᒌᑫᑕᒧᐙᒡ ᑲᑭᓇ ᐯᒫᑎᓯᐙᒡ᙮

ᓅᑯᒻ ᑳᑮᔑᑲᒃ ᐌᑎ ᐆᑌᓈᕽ ᑳᑮᑕᔑ ᓂᑖᐎᑭᑯᐸᓀᓐ ᑌᐱᑦ ᒦ ᐃᒫ ᑳᑕᔑ ᓂᑖᐎᑭᒡ ᐅᐱᒫᒋᐃᐌ, ᒦ ᐊᐌ X ᑭᔐᒪᓂᑑᓐ ᑳᑮᐅᓈᐸᒥᑯᒡ ᒋᑎᐯᒋᑫᒡ᙮

ᒦᑕᔥ ᐅᐅ ᑫᐅᒋ ᑫᒋᓈᐅᔦᒃ: ᑭᑲ ᒥᑲᐙᐙ ᐅᔥᑲᐱᓅᒌᔥ ᒋᑲᔥᑮᑲᐱᓱᒡ ᒋᐱᒥᔑᕽ ᐃᐃᒫ ᐱᔑᑭᐗᒃ ᑳᓂᑖ ᑕᓇᒋᑫᐙᒡ, ᑮᐃᑭᑐ ᐊᐊ ᐁᒐᓬ᙮

ᒦᑕᔥ ᑴᑕᑐ ᑳᑮ ᓈᑯᓯᐙᒡ ᐋᐱᒋ ᐁᐹᑏᓄᐙᒡ ᑭᒋᑮᔑᑯᐎ ᐁᒐᓬᐊᒃ ᐁᓇᓈᑯᒫᐙᒡ ᑭᔐᒪᓂᑑᓐ, ᐅᐅ ᐁᑮᐃᑭᑐᐙᒡ:

ᑕᐐᑭᒋ ᐃᓀᑖᑯᓯ ᑭᔐᒪᓂᑑ ᑭᒋᑮᔑᑯᕽ ᒫᐗᒡ ᐃᔥᐱᒥᕽ, ᑕᒦᓂᑰᐎᓯᐗᒃ ᑲᔦ ᐱᓵᓂᓯᐎᓐ ᐃᑭ ᐊᑮᕽ ᐁᔮᐙᒡ, ᐊᐌᓀᓇᓐ ᐃᓴ ᐱᑯ ᑭᔐᒪᓂᑑ ᑫᒥᓍᐸᒫᒡ, ᑮᐃᑭᑐᐗᓐ᙮

ᐊᐲ ᑕᔥ ᑳᓇᑲᓂᑯᐙᒡ ᐃᓂ ᐁᒐᓬᐊᓐ ᑭᒋᑮᔑᑯᕽ ᐁᑮᐃᔑ ᑮᐌᓂᒡ, ᒦᑕᔥ ᑳᐊᔨᑎᐙᒡ ᐅᑲᓇᐎ ᒫᓇᒑᓂᔑᐌᒃ: ᑕᑲ ᓴ ᐃᔖᑖ ᐌᑎ ᐯᑕᓬᐃᐁᒦᕽ ᒋᐊᑕ ᐙᐸᑕᒪᕽ ᑳᑮᐃᔑᐌᐸᒃ, ᐋᓃᓐ ᐃᐃᐌᓂ ᑳᑎᐯᒋᑫᒡ ᑳᑮ ᑭᑫᑕᒨᐃᓇᕽ᙮

ᒦᑕᔥ ᐃᑯ ᔐᒫᒃ ᑳᐊᓂ ᐃᔑᒫᒑᐙᒡ᙮ ᐁᑮᒥᑲᐙᐙᒡ ᒣᕒᐄᓐ ᑲᔦ ᒎᓴᐴᓐ ᐃᓂ ᑲᔦ ᐅᔥᑲᐱᓅᒌᔕᓐ ᐁᐱᒥᔑᓂᓂᒡ ᐃᐃᒫ ᐱᔑᑭᐗᐞ ᓀᑖᑕᓇᒋᑫᓂᒡ᙮

ᐊᐲ ᑕᔥ ᑳᐙᐸᒫᐙᒡ, ᑮᑎᐹᒋᒧᐗᒃ ᐋᓃᓐ ᐁᒐᓬᐊᓐ ᑳᑮᐃᑯᐙᒡ ᐃᓂᐌᓂᐗᓐ ᐊᐱᓅᒌᔕᓐ ᐅᒋ᙮

ᑲᑭᓇ ᑕᔥ ᐊᐎᔭᒃ ᑳᑮᓅᑕᒧᐙᒡ ᑮᒫᒪᑳᑌᑕᒧᐗᒃ ᐃᐃᐌᓂ ᑳᑮᐐᑕᒫᑯᐙᒡ ᐅᑲᓇᐎ ᒫᓇᒑᓂᔑᐌᐞ᙮

ᒣᕒᐃ ᑕᔥ ᐅᑮᒪᓈ ᐗᓂᑫᓄᑖᓇᓐ ᑲᑭᓇ ᐅᓄᐌᓂᐗᓐ, ᒨᔕᒃ ᐁᑮᓈᓈᑲᑕᐌᑕᕽ᙮

ᒦᑕᔥ ᑳᐊᓂ ᐃᔑ ᑮᐌᐙᒡ ᐅᑲᓇᐎ ᒫᓇᒑᓂᔑᐌᒃ ᐁᑮᑭᒋ ᐃᓀᓂᒫᐙᒡ, ᐁᓇᓈᑯᒫᐙᒡ ᑲᔦ ᑭᔐᒪᓂᑑᓐ ᐃᐃᐌ ᑲᑭᓇ ᑫᑰᓇᓐ ᑳᑮᐃᔑ ᓅᑕᒧᐙᒡ᙮ ᐁᑮᐙᐸᑕᒧᐙᒡ ᑲᔦ ᒪᔮ ᐁᑮᐃᔑᓭᓂᒃ ᐁᒐᓬᐊᓐ ᑳᑮᐃᔑ ᐐᑕᒫᑯᐙᒡ᙮

ᓂᔣᓱᑮᔑᒃ ᑕᔥ ᐁᐃᔑᓭᓂᒃ, ᒦ ᐃ ᐁᑮᐅᒋᒋᓭᓂᒃ ᐊᐊ ᐅᔥᑲᐱᓅᒌᔥ ᒋᑭᑭᓇᐙᑕᔕᑫᔑᑲᓂᐎᒡ᙮ ᒋᓴᔅ ᑕᔥ ᑮᐃᔑ ᓂᑳᒋᑲᓂᐎ, ᒦ ᐃᐌᓂ ᐃᔑᓂᑳᓱᐎᓐ ᐁᒐᓬᐊᓐ ᑳᑮ ᐐᓂᑯᒡ ᒋᑆ ᑭᑭᔥᑲᐙᐗᓱᒥᓐᒡ᙮

ᒦᑕᔥ ᐁᑮᐅᒋᒋᓭᒃ ᒎᓴᑉ, ᐊᐊ ᑲᔦ ᒣᕒᐃ ᒋᐃᔑᒋᑫᐙᒡ ᒨᓯᓲᓐ ᑳᑮᐃᓈᑯᓂᑫᓂᒡ ᐃᐃᐌ ᐯᑭᐃᐌᐎᓐ ᑳᓂᑖ ᐃᔑᒋᑳᓂᐗᕽ ᑳᐃᔥᒀ ᐙᐸᒫᐗᓱᒡ ᐃᑴ᙮ ᒦᑕᔥ ᑳᐃᔑ ᐃᔑᐎᓈᐙᒡ ᐊᐱᓅᒌᔕᓐ ᒉᕒᐆᓴᓬᐊᒥᕽ ᐁᑮ ᐊᑕ ᐸᑭᑎᓇᒪᐙᐙᒡ ᑳᑎᐯᒋᑫᓂᒡ᙮

ᐋᓃᔥ ᒦ ᐃ ᐁᔑᐲᐃᑳᑌᓂᒃ ᐅᑎᓈᑯᓂᑫᐎᓂᕽ ᑳᑎᐯᒋᑫᒡ: ᒫᐗᒡ ᐃᑯ ᓂᑕᒻ ᑸᐎᓭᔅ ᑳᓂᑖᐎᑭᒡ, ᑳᑎᐯᒋᑫᓂᒡ ᐅᑎᐯᓂᒥᑰᓐ ᑕᐃᓇᑭᒫᑲᓂᐎ, ᐁᐃᑭᑑᒪᑲᒃ᙮

ᑲᔦ ᑕᔥ ᑮᐊᑕ ᐸᑭᑎᓈᓱᐗᒃ ᐁᑮᐃᔑᒋᑫᐙᒡ ᐋᓃᓐ ᑳᐃᑭᑑᒪᑲᓂᓂᒃ ᑳᑎᐯᒋᑫᒡ ᐅᑎᓈᑯᓂᑫᐎᓐ ᒋᐸᑭᑎᓈᐙᒡ ᓃᔑᓐ 2 ᐅᒦᒦᓯᐗᐞ ᑳ ᐊᑳᔒᔑᓂᒡ ᑎᓄ, ᑯᒫ ᑲᔦ ᓃᔑᓐ ᐅᒦᒦᓭᓴᐞ᙮

ᐯᔑᒃ ᐃᑕᔥ ᐃᓂᓂ ᑮᐊᔮ ᐃᐃᒫ ᒉᕒᐆᓴᓬᐊᒥᕽ, ᓯᒥᔭᓐ ᐁᔑᓂᑳᓱᒡ᙮ ᑾᔭᒃ ᑮᐃᔑ ᐱᒫᑎᓯ, ᑲᔦ ᑕᔥ ᐁᑮ ᑯᓯᑴᓂᒫᒡ ᑭᔐᒪᓂᑑᓐ᙮ ᐁᑮ ᐲᑑᒡ ᑳᐐ ᐱᒫᒋᐃᒥᓐᒡ ᐃᔅᕒᐃᔭᓬᐊᐞ ᑲᔦ ᑕᔥ ᐁᑮ ᑭᑭᔥᑳᑯᒡ ᑭᔐᒪᓂᑑᓐ ᐅᑕᒑᑯᓂ᙮

ᐅᑮ ᑭᑫᑕᒨᐃᑰᓐ ᐄᓴᓐ ᑭᔐᒪᓂᑑ ᐅᑕᒑᑯᓂ ᒋᓅᑌ ᓂᐳᓯᒃ, ᐹᓂᒫ ᐱᑯ ᑮᐙᐸᒫᒡ ᑳᑎᐯᒋᑫᓂᒡ ᑳᑮ ᐲᑖᒋᒥᒥᓐᒡ ᐅᐱᒫᒋᐃᐌᓐ᙮

ᓯᒥᔭᓐ ᑕᔥ ᐅᑮᐃᔑᓂᔕᐅᑰᓐ ᑭᔐᒪᓂᑑ ᐅᑕᒑᑯᓂ ᑭᒋᐊᓇᒥᐁᐎᑲᒥᑯᕽ ᒋᐊᑕᐎ ᐲᑎᑫᒡ᙮ ᐊᐲ ᐊᐊ ᐊᐱᓅᒌᔥ ᒋᓴᔅ ᑳᐱ ᐲᑎᑲᓂᑯᒡ ᐅᓃᑭᐃᑰᐞ, ᐁᐃᔑᓭᓂᒃ ᒋᑑᑕᒥᓂᒡ ᐃᓈᑯᓂᑫᐎᓐ ᐁᔑᓯᓂᓂᒃ᙮

ᒦᔥ ᓯᒥᔭᓐ ᑳᑮᐅᑖᐱᓈᒡ ᐊᐱᓅᒌᔕᓐ ᐁᑕᑯᓈᒡ ᐯᑭᔥ ᐁᓇᓈᑯᒫᒡ ᑭᔐᒪᓂᑑᓐ ᐁᑮᐃᑭᑐᒡ:

ᑌᐯᒋᑫᔭᓐ, ᒦᑕᔥ ᐱᓵᓐ ᐃᔑ ᐸᑭᑎᓂᔑᓐ ᑭᑕᓄᑮᐋᑲᓐ ᑳᑎᓄᐎᔮᓐ ᒋᐃᔥᒀ ᐱᒫᑎᓯᔮᓐ, ᒋᐃᔑᓭᒃ ᑳᑮᐃᑭᑐᔭᓐ᙮

ᐋᓃᔥ ᑎᐱᓇᐌ ᐱᑯ ᓃᓐ ᓂᔥᑮᔑᑯᕽ ᓂᑑᒋᐙᐸᑖᓐ ᑭᐱᒫᒋᐃᐌᐎᓐ,

ᐃᐃᐌ ᑳᑮᑾᔮᒋᑕᒪᐗᑣ ᐃᑭᐌᓂᐗᒃ ᑲᑭᓇ ᐯᒫᑎᓯᐙᒡ ᐊᐎᔭᒃ᙮

ᒦᑕᔥ ᐅᐅᐌᓂ ᑫᐙᓭᔥᑳᑯᐙᒡ ᑳᒎᐎᐎᓯᒀ ᒋᑭᑫᑕᒧᐙᒡ ᑭᑎᓀᑕᒧᐎᓐ, ᑲᔦ ᑕᔥ ᑫᐅᒋ ᑭᒋ ᐃᓀᑖᑯᓯᐙᒡ ᑭᐱᒫᑎᓰᒪᒃ ᐃᔅᕒᐃᔭᓬᐊᒃ, ᑮᐃᑭᑐ᙮

ᐃᓂ ᑕᔥ ᐅᑌᑌᓐ, ᐅᒫᒫᓐ ᑲᔦ ᐊᐊ ᐊᐱᓅᒌᔥ ᑮᑭᒋ ᒫᒪᑳᑌᑕᒨᐞ ᑫᑰᓇᓐ ᓯᒥᔭᓇᓐ ᑳᑮᐃᓈᓂᒡ ᒋᓴᓲᓐ᙮

ᓯᒥᔭᓐ ᑕᔥ ᐅᑮᐃᓈᐞ: ᑳᑎᐯᒋᑫᒡ ᑭᑲ ᔕᐌᓂᒥᑯᐙ᙮ ᒦᔥ ᐅᐅ ᑳᐃᓈᒡ ᒣᕒᐄᓐ ᐊᐊ ᐊᐱᓅᒌᔥ ᐅᒫᒫᓐ: ᐐᓐ ᑭᔐᒪᓂᑑ ᐅᑮᐅᓀᓂᒫᓐ ᐃᓂ ᐊᐱᓅᒌᔕᓐ ᓃᐱᐗᐞ ᐊᐎᔭᐞ ᑫᐅᒋ ᑆᓇᐎᒋᑫᓂᒡ, ᑲᔦ ᑕᔥ ᓃᐱᐗᐞ ᐊᐎᔭᐞ ᑫᐅᒋ ᐱᒫᒋᐃᒥᓐᒡ ᐃᔅᕒᐃᔭᓬᐃᕽ ᑳᐊᔮᓂᒡ᙮ ᐐᓐ ᒋᑭᑭᓇᐙᒋᓈᑯᑑᒡ ᐅᑎᓀᑕᒧᐎᓂᓂ ᑭᔐᒪᓂᑑᓐ᙮ ᑕᐹᑏᓄᐗᐞ ᐃᑕᔥ ᑲᔦ ᑫᐋᓇᐌᓂᒥᑯᒡ᙮

ᒦᑕᔥ ᑳᐹᑏᓇᑎᓂᓂᑭᓐ ᐅᑮᒨᒋ ᐃᓀᑕᒧᐎᓂᐙᓐ ᒋᓈᑯᒋᑳᑌᓂᑭᓐ᙮ ᑫᑮᓐ ᐃᑕᔥ ᑭᑲ ᐃᓀᑕᒻ ᐁᐸᔑᐸᐅᑰᔭᓐ ᐸᔑᐸᐃᑫᐎᑯᒫᓐ ᑫᐊᐲᒋ ᒥᒋᓇᐌᓯᔭᓐ᙮

ᑮᐊᔮ ᑕᔥ ᑲᔦ ᐃᐃᒫ ᐃᑴ ᑳᑲᓅᑕᒪᐙᒡ ᑭᔐᒪᓂᑑᓐ, ᐋᓇ ᐁᐃᔑᓂᑳᓱᒡ, ᐹᓂᔪᐌᓬᐊᓐ ᐁᑮᐅᑌᑌᒡ, ᐋᔑᕒᐃᕽ ᐌᑕᑳᓀᓯᒡ᙮ ᐋᐱᒋ ᑮᑭᒋ ᑰᑯᒥᓈᐎᓂ, ᓃᔣᓱ ᐱᐴᓐ 7 ᐁᑕ ᐁᑮ ᐐᑎᑫᑯᐸᓐ᙮

ᓂᔣᓯᒥᑕᓇᔑ ᓃᐎ ᐱᐴᓐ 84 ᐋᔕ ᐁᑮ ᑮᐙᒋᑴᐎᒡ᙮ ᒦ ᐃᒫ ᐱᔑᔑᒃ ᑳᐊᔮᒡ ᑭᒋᐊᓇᒥᐁᐎᑲᒥᑯᕽ ᐁᑎᐱᑲᓂᓂᒃ, ᑲᔦ ᑕᔥ ᐁᑮᔑᑲᓂᓂᒃ ᐁᐸᒦᑕᐙᒡ ᑭᔐᒪᓂᑑᓐ, ᐁᑮᒪᑕᐐᐃᑎᓱᒡ, ᐁᑕ ᑯ ᐊᓇᒥᐋᒡ᙮

ᒦᑕᔥ ᒪᔮ ᑫᐐᓐ ᐯᔑᑾᓐ ᑳᑮᐱ ᑕᑯᔑᕽ, ᒦᔥ ᑳᐃᔑ ᓇᓈᑯᒫᒡ ᑭᔐᒪᓂᑑᓐ᙮ ᐅᑮ ᑕᔑᒫᓐ ᐃᓂ ᐊᐱᓅᒌᔕᓐ, ᐁᑮᐐᑕᒪᐙᒡ ᑲᑭᓇ ᐃᓂᐌᓂᐗᐞ ᑳᐲᑑᓂᒡ ᑭᔐᒪᓂᑑᓐ ᒋᐱᒫᒋᑑᓂᒡ ᒉᕒᐆᓴᓬᐊᒻ ᑳᐃᔑ ᒫᔑᓭᓂᒃ᙮

ᐊᐲ ᑕᔥ ᒎᓴᑉ, ᐊᐊ ᑲᔦ ᒣᕒᐃ ᑳᑮᔑᑑᐙᒡ ᑲᑭᓇ ᑳᐃᓇᑌᓂᒃ ᐅᑑᓇᔓᐌᐎᓂᓂ ᑳᑎᐯᒋᑫᓂᒡ ᒋᑑᑕᒧᐙᒡ ᐃᓂ ᐅᒋ ᐊᐱᓅᒌᔕᓐ, ᒦ ᐃ ᑳᐊᓂ ᐃᔑ ᑮᐌᐙᒡ ᐅᑖᐎᓂᐙᕽ ᓈᓴᕒᐃᑎᕽ ᐆᑌᓈᕽ, ᑳᓬᐊᓬᐄ ᐊᑮᕽ᙮

ᐊᐊ ᓴ ᐊᐱᓅᒌᔥ ᑮᐊᓂ ᐅᐱᑭ ᑲᔦ ᐁᑮᐊᓂ ᒪᔥᑲᐎᓰᒡ, ᑲᔦ ᑲᑮᑖᐌᑕᒧᐎᓐ ᐅᑮᐊᓂ ᒨᔥᑭᓀᔥᑳᑯᓐ, ᑭᔐᒪᓂᑑᓐ ᑲᔦ ᐅᑮ ᔕᐌᓂᒥᑰᓐ᙮

ᐁᑕᓱᐱᐴᓐ ᒋᓴᔅ ᐅᓃᑭᐃᑰᐞ ᑮᐃᔖᐗᐞ ᒉᕒᐆᓴᓬᐊᒥᕽ ᐁᒪᔮᓭᓂᒃ ᐱᒫᒋᐃᑰᐎ ᐐᑾᑎᐎᓐ ᑳᐃᒋᑳᑌᒃ᙮

ᐊᐲ ᑕᔥ ᒋᓴᔅ ᒥᑖᔑᓃᔑᓐ 12 ᑮᑕᓱ ᐱᐴᓉᒡ, ᑮᐃᔖᐗᒃ ᒫᒪᐤ ᐁᑕᔑ ᐱᒫᒋᐃᑰᐎ ᐐᑾᑎᓈᓂᐗᓂᓂᒃ᙮

ᐊᐲ ᑕᔥ ᑳᐃᔥᒀ ᐐᑾᑏᐗᑲᒥᑲᓂᓂᒃ, ᒦ ᐃ ᑳᐊᓂ ᐃᔑ ᑲᑮᐌᐙᒡ᙮ ᐊᐊ ᑕᔥ ᐐᓐ ᑸᐎᓭᔅ ᒋᓴᔅ ᑮᐊᔮ ᐃᐃᒫ ᒉᕒᐆᓴᓬᐊᒥᕽ᙮ ᑳᐐᓐ ᑕᔥ ᐅᓃᑭᐃᑰᐞ ᐅᑮ ᑭᑫᑕᓰᓂ ᐅᐅ᙮

ᒦ ᒫᐐᓐ ᐃᑯ ᑫᐐᓐ ᐃᐃᒫ ᒣᑴᔭᐄ ᐱᐊᔮᑐᒃ, ᐅᑮᐃᓀᓂᒥᑰᐞ᙮ ᐋᔕ ᑕᔥ ᑲᐯᑮᔑᒃ ᐁᑮᐱᒥᐊᔮᓂᒡ, ᒦᑕᔥ ᐸᔦᔥ ᐁᑮᒫᒌ ᓇᓈᑕᐙᐸᒥᑯᒡ ᐃᐃᒫ ᑳᐃᔑ ᐊᔮᓂᒡ ᐅᑎᓇᐌᒫᑲᓂᓂ ᐃᓂ ᑲᔦ ᑳᓇᑲᑌᓂᒫᓂᒡ᙮

ᑳᐐᓐ ᐃᑕᔥ ᐅᑮᒥᑲᐙᓯᐙᐙᓐ᙮ ᒦᔥ ᑳᐃᔑ ᑮᐌᐙᒡ ᒉᕒᐆᓴᓬᐊᒥᕽ ᐁᑮᐃᔑ ᓇᓈᑕᐙᐸᒫᐙᒡ᙮

ᐹᓂᒫ ᑕᔥ ᓂᓱᑮᔑᒃ 3 ᐁᐃᔑᓭᓂᒃ ᐲᑎᒃ ᑭᒋᐊᓇᒥᐁᐎᑲᒥᑯᕽ ᐅᑮᐃᔑ ᒥᑲᐙᐙᓐ, ᐁᐐᑕᐱᒫᓂᒡ ᒎᐎᑭᑭᓄᐊᒫᑫᐞ᙮ ᐁᑮ ᐱᓯᑖᑯᓂᒡ, ᐁᑮ ᑲᑴᒋᒥᑯᓂᒡ ᑲᔦ ᑫᑰᓇᓐ᙮

ᑲᑭᓇ ᑕᔥ ᐊᐎᔭᐞ ᑳᑮᓅᑖᑯᓂᒡ ᐅᑮᒫᒪᑳᓯᑖᑯᓂ ᐋᓃᓐ ᑳᐊᐲᒋ ᑾᔭᑯ ᓂᓯᑐᑕᕽ ᑲᔦ ᐁᑲᑮᑖᐎ ᓇᑴᑕᕽ᙮

ᐅᓃᑭᐃᑰᐞ ᑕᔥ ᐐᑫ ᑮᒫᒪᑳᑌᑕᒨᐞ ᐊᐲ ᐁᐙᐸᒥᑯᒡ᙮ ᒦᑕᔥ ᑳᐃᑯᒡ ᐅᒫᒫᓐ: ᓂᑯᓯᔅ, ᐌᑯᓀᓐ ᑕᔥ ᐅᐅ ᐌᒋ ᑑᑕᐎᔮᕽ? ᐁᑕᑕᐌ ᐅᔕ ᓂᑮᒥᑯᔥᑳᑌᑖᒥᓐ ᑭᑌᑌ ᐁᑲᑴ ᒥᑳᑰᔭᓐ, ᐅᑮᐃᑰᓐ᙮

ᒦᑕᔥ ᑳᐃᔑ ᓇᑴᑖᑯᒡ: ᐌᑯᓀᓐ ᑕᔥ ᐌᒋ ᓇᓈᑕᐙᐸᒥᔦᒃ? ᑳᐐᓐ ᐃᓇ ᑭᑭᑫᓂᒥᓰᒻ ᒋᐃᔑᒋᑫᐗᒃ ᓂᑌᑌ ᐅᐸᐹᒥᓯᐎᓐ? ᐅᑮᐃᑰᓐ᙮

ᑳᐐᓐ ᑕᔥ ᐅᑮᓂᓯᑐᑖᑯᓰᐞ ᐃᐃ ᑳᐃᓈᒡ᙮

ᒦᑕᔥ ᒋᓴᔅ ᑳᐃᔑᑮᐌ ᐐᒌᐙᒡ ᐌᑎ ᓈᓴᕒᐃᑎᕽ, ᐌᑎ ᐁᑮᑕᔑ ᓇᐃᑕᐙᒡ ᐅᓃᑭᐃᑰᐞ᙮ ᐅᒫᒫᓐ ᑕᔥ ᐅᑮ ᓵᑭᑑᓂ ᐅᐅ ᐃᐃᒫ ᐅᑌᐃᓃᕽ᙮

ᒋᓴᔅ ᑕᔥ ᑮᐊᓂ ᐅᐱᑭ ᐅᐐᔭᐎᕽ, ᐊᐗᔑᒣ ᑲᔦ ᐁᑮᐊᓂ ᑲᑮᑖᐌᑕᕽ᙮ ᑭᔐᒪᓂᑑᓐ ᐅᑮᒥᓍᐸᒥᑰᓐ, ᐃᐃ ᑲᔦ ᑲᑭᓇ ᐊᐎᔭᐞ᙮

ᒦ ᓴ ᐃ ᒥᑖᔑᓈᓄᐱᐴᓐ 15 ᑖᐃᐲᕒᐃᔭᔅ ᒫᐗᒡ ᐁᑮ ᑭᒋᐅᑭᒫᐎᒡ, ᐃᐃᒫ ᑕᔥ ᒎᑏᔭ ᐊᑮᕽ ᑮᑕᔑ ᑭᒋ ᐅᓇᔓᐌᐎᓂᓃᐎ ᐹᑎᔭᔅ ᐹᐃᓬᐊᑦ ᙮ ᐃᐃᒫ ᑲᔦ ᑳᓬᐊᓬᐄ ᐊᑮᕽ ᑮᑕᔑ ᑭᒋᐅᑭᒫᐎ ᐁᕒᐊᑦ ᑳᐃᔑᓂᑳᓱᒡ᙮ ᐅᐐᒋᑭᐌᔭᓐ ᐱᓬᐊᑉ ᑳᐃᔑᓂᑳᓱᓂᒡ ᑕᔥ ᐐᓐ ᐃᒍᕒᐄᔭ ᑲᔦ ᒍᕒᐋᑯᓈᐃᑎᔅ ᐃᓇᑫᑲᒥᒃ ᑮᑕᔑ ᑭᒋᐅᑭᒫᐎᐗᓐ᙮ ᐊᐊ ᑕᔥ ᐐᓐ ᓬᐃᓭᓂᔭᔅ ᐋᐸᓬᐄᓐ ᐊᑮᕽ ᑮᑕᔑ ᑭᒋᐅᑭᒫᐎ᙮

ᐋᓇᔅ ᐊᐊ ᑲᔦ ᑫᔭᐸᔅ ᐁᑮᒫᐗᒡ ᑭᒋ ᐊᓇᒥᐁᐎᑭᒫᐎᐙᒡ, ᒦᑕᔥ ᐃᐃ ᐊᐲ ᐊᐊ ᒞᓐ ᓭᑲᕒᐋᔭᐗᓐ ᑳᑮᐅᑌᑌᒡ ᑳᑮᐅᑎᓯᑯᒡ ᑭᔐᒪᓂᑑᓐ ᐅᑎᑭᑐᐎᓂᓂ ᒣᒀ ᐱᑾᑕᑮᕽ ᐁᐊᔮᒡ᙮

ᒦᑕᔥ ᒞᓐ ᑳᑮᐃᔖᒡ ᐃᐃᒫ ᒥᓯᐌ ᓇᑫᑲᒥᒃ ᒞᕒᑕᓐ ᓰᐲᕽ ᐁᐃᔑ ᐐᑕᒫᑫᒡ: ᓇᑲᑕᒧᒃ ᑭᒪᒋ ᐃᔑᐌᐱᓯᐎᓂᐙᓐ ᑲᔦ ᑕᔥ ᓰᑲᐊᑖᑰᐎᓯᒃ, ᒦᔥ ᑲᔦ ᑭᔐᒪᓂᑑ ᒋᐴᓀᑕᒪᐎᓀᒃ ᑭᒪᒋ ᐃᔑᐌᐱᓯᐎᓂᐙᓐ, ᑮᐃᑭᑐ᙮

ᒦᐅᐌ ᐁᔑᐲᐃᑳᑌᓂᒃ ᒪᓯᓇᐃᑲᓐ ᑳᑮᐃᑭᑐᑯᐸᓀᓐ ᐋᐃᓭᔭ ᑳᑮ ᑲᓅᑕᒪᐙᒡ ᑭᔐᒪᓂᑑᓐ: ᐊᐎᔭ ᐌᑎ ᐱᑾᑕᑮᕽ ᑮᒪᑗᔖᑯᐌ: ᑮᔑᑕᒪᐎᒃ ᑳᑎᐯᒋᑫᒡ ᐅᒦᑲᓈᒻ, ᐅᔑᑕᒪᐎᒃ ᒋᑾᔭᒀᓂᒃ ᒦᑲᓇ ᑫᐃᔑ ᐱᒥ ᐊᔮᒡ᙮

ᑲᑭᓇ ᑳᔑ ᐙᐙᓇᑎᓈᑭᓐ ᑕᒨᔥᑭᓇᒋᑳᑌᐗᓐ, ᑲᑭᓇ ᐱᒪᑎᓈᓐ ᑲᔦ ᑳᑭᒋ ᐃᔥᐸᑎᓈᑭᓐ ᑕᑕᐸᓴᓂᑳᑌᐗᓐ, ᑳᐙᐙᑳᔥᑲᒧᑭᓐ ᒦᑲᓈᓐ ᑕᑾᔭᑯᒋᑳᑌᐗᓐ, ᑳᒫᓇᒧᑭᓐ ᒦᑲᓈᓐ ᑕᔔᔥᑯᒋᑳᑌᐗᓐ᙮

ᑲᑭᓇ ᑕᔥ ᐊᐎᔭᒃ ᑳᐱᒫᑎᓯᐙᒡ ᐅᑲᐙᐸᑖᓈᐙ ᑭᔐᒪᓂᑑᓐ ᐁᔑ ᐱᒫᒋᐃᐌᓂᒡ, ᐃᔑᐲᐃᑳᑌ᙮

ᓃᐱᐗᐞ ᑕᔥ ᐊᐎᔭᒃ ᐅᑮᐱ ᐊᑕᐙᐸᒫᐙᓐ ᒞᓇᓐ ᒋᓰᑲᐊᑖᑯᐙᒡ᙮ ᑮᓇᐙ ᑭᓀᐱᑰᒃ, ᐁᑮᐃᓈᒡ᙮ ᐊᐌᓀᓐ ᑳᑮ ᐐᑕᒪᐎᓀᒃ ᒋᑲᔥᑭᑑᔦᒃ ᒋᔖᐴᔥᑲᒣᒃ ᑭᔐᒪᓂᑑ ᐅᑎᐹᑯᓂᑫᐎᓐ, ᐋᔕ ᑫᑳ ᐅᐅᐌ ᑳᐐ ᑕᑯᔑᓅᒪᑲᓂᓂᒃ?

ᐃᔑᒋᑫᒃ ᑫᑰᓇᓐ ᑫᐅᒋ ᓈᑾᒃ ᐁᑮᓇᑲᑕᒣᒃ ᑭᒪᒋᑑᑕᒧᐎᓂᐙᓐ᙮ ᑫᑯ ᑲᔦ ᐃᑎᓱᑫᒃ: ᐁᐸᕒᐊᐋᒻ ᐅᔕ ᓂᑭᒋᐊᔭᐋᒥᓈᓐ᙮ ᒦᔥ ᐁᔑ ᐐᑕᒪᐎᓇᑰᒃ, ᑭᔐᒪᓂᑑ ᐅᔕ ᐅᑖ ᑲᔥᑭᐋᐞ ᐃᐃ ᐊᓯᓃᐞ ᒋᑮᐅᐱᑭᐋᐸᓐ ᒋᑮ ᐅᑕᑳᓀᓯᓂᒡ ᐁᐸᕒᐊᐋᒥᑳᕽ᙮

ᐋᔕ ᐙᑳᑾᑦ ᐋᐸᑕᓐ ᑫᐅᒋ ᑮᔥᑭᑲᐅᑣ ᒥᑎᑰᒃ ᐅᒌᐱᑯᐙᕽ᙮ ᐁᑕᓱᐯᔑᑯᒡ ᐃᑕᔥ ᒥᑎᒃ ᑳᐅᒋ ᓂᑖᐎᑭᑑᓯᒃ ᐌᓂᔑᔑᓂᓂᑭᓐ ᒦᓀᓴᓐ, ᒋᑮᔥᑲᑕᐙᑲᓂᐎᒡ ᒋᒪᒋᑌᐌᐱᓂᑲᓂᐎᒡ, ᑮᐃᑭᑐ᙮

ᒦᑕᔥ ᐊᐎᔭᐞ ᑳᐃᔑ ᑲᑴᒋᒥᑯᒡ: ᐋᓃᓐ ᑕᔥ ᑫᐃᔑᒋᑫᔮᕽ?

ᒦᑕᔥ ᑳᐃᔑ ᓇᑴᑕᐙᒡ: ᐱᑯ ᐊᐌᓀᓐ ᐁᔮᑴᓐ ᓃᔑᓐ 2 ᓈᐱᔥᑭᑲᓇᓐ, ᐯᔑᒃ ᐅᑲᒦᓈᓐ ᐊᐎᔭᓐ ᐁᔮᓯᓂᒃ ᓈᐱᔥᑭᑲᓐ᙮ ᐊᐎᔭ ᑲᔦ ᐁᔮᑴᓐ ᒦᒋᒻ ᐅᑲᐊᔕᒫᓐ ᐁᔮᓯᓂᒃ ᒦᒋᒻ᙮

ᐋᓂᑕ ᑲᔦ ᑳᒫᐗᑑᓈᐙᒡ ᑖᑭᔅ ᑎᐸᐃᑫᐎᔔᓂᔮᓐ ᑮᐱᐊᑕ ᓰᑲᐊᑖᓱᐗᒃ᙮ ᒦᑕᔥ ᑳᐃᔑ ᑲᑴᒋᒫᐙᒡ: ᐅᑭᑭᓄᐊᒫᑫ, ᐋᓃᓐ ᑫᐃᔑᒋᑫᔮᕽ? ᐅᑮᐃᓈᐙᓐ᙮

ᑫᑯ ᐹᔑᒡ ᐊᐗᔑᒣ ᑎᐸᐃᑫᐃᐌᑫᒃ, ᑳᐃᑰᔦᒃ ᐁᑕ ᐃᔑ ᑎᐸᐃᑫᐃᐌᒃ, ᐅᑮᐃᓈᐞ᙮

ᐋᓂᑕ ᑲᔦ ᔑᒫᑲᓂᔕᒃ ᐅᑮᐃᔑ ᑲᑴᒋᒫᐙᓐ: ᓃᓇᐎᓐᑦ ᐃᑕᔥ ᐐᓐ ᐋᓃᓐ ᑫᐃᔑᒋᑫᔮᕽ? ᒦᑕᔥ ᑳᐃᓈᒡ: ᑫᑯ ᐐᓐ ᐊᐎᔭ ᒪᑲᒫᑫᓐ ᐅᔔᓂᔮᒪᓐ, ᑫᑯ ᑲᔦ ᐊᐎᔭ ᐃᔑᐊᓂᔖ ᐊᓈᒥᒫᑫᓐ᙮ ᒦ ᐱᑯ ᐃ ᐃᔑᓇᐁᑕᒧᒃ ᑭᑑᑎᓯᐎᓂᐙ, ᐅᑮᐃᓈᐞ᙮

ᐊᐎᔭᒃ ᑕᔥ ᐯᒫᑎᓯᐙᒡ ᑮᐅᒑᓂᒥᐲᐅᐗᒃ, ᑲᔦ ᑕᔥ ᐁᑮᓈᓈᑲᑕᐌᓂᒫᐙᒡ ᒞᓇᓐ, ᒦ ᒫᐐᓐ ᐊᐊᐌ ᑭᔐᒪᓂᑑ ᑳᑮᐊᔓᑕᒫᑫᒡ ᑫᐱᒫᒋᐃᐌᓂᒡ, ᐁᐃᓀᓂᒫᐙᒡ᙮

ᒦᑕᔥ ᒞᓐ ᑳᐃᓈᒡ ᑲᑭᓇ: ᓂᐱ ᓂᑖᐸᒋᑑᓐ ᐁᓰᑲᐊᑕᐎᓇᑰᒃ᙮ ᐊᐊ ᑕᔥ ᐐᓐ ᑳᐐ ᐲᔖᒡ ᓇᐗᒡ ᑭᒋ ᐃᓀᑖᑯᓯ ᐊᐲᒡ ᓃᓐ᙮ ᑳᐐᓐ ᐊᐙᒡ ᓂᑌᐸᑫᑖᑯᓯᓰ ᑲᓇᑫ ᒋᐋᐸᐊᒧᐗᒃ ᐅᒪᑭᓯᓇᓐ᙮ ᐐᓐ ᑕᔥ ᓰᑲᐊᑕᐎᓀᒃ ᐅᑲ ᐋᐸ ᒋᐋᓐ ᑭᔐᒪᓂᑑᓐ ᐅᑕᒑᑯᓂ, ᑲᔦ ᑕᔥ ᐃᔥᑯᑌᓂ᙮

ᑖᐱᔥᑰ ᐃᓀᑖᑯᓯ ᑭᑎᑫᐎᓂᓂ ᑳᑕᑯᓇᕽ ᐅᐸᐎᐌᐸᐃᑲᓈᑎᒃ, ᐁᐐ ᐸᐙᔑᒫᒡ ᐅᐸᑴᔑᑲᓂᒪᓐ᙮ ᐅᑲ ᓇᐃᓈᓐ ᑕᔥ ᐅᐸᑴᔑᑲᓂᒪᓐ ᐊᑖᓱᐎᑲᒥᑯᕽ᙮ ᐅᑲ ᒪᒍᑌ ᐌᐱᓈᓇᓐ ᐃᑕᔥ ᐐᓐ ᐅᑯᓄᔮᓇᓐ ᐃᐃᒫ ᐃᔥᑯᑌᕽ ᐐᑳ ᑳᔑ ᐋᑕᐌᓯᓂᓂᒃ, ᐅᑮᐃᓈᐞ᙮

ᒞᓐ ᐃᑕᔥ ᓃᐱᐗᐞ ᐃᓇᑫ ᐅᑮᐃᔑ ᐊᔮᒀᒥᒫᐞ ᐯᒫᑎᓯᓂᒡ ᐁᑮᐙᐐᑕᒪᐙᒡ ᒥᓍᒋᒧᐎᓐ᙮

ᔖᑰᒡ ᐃᑕᔥ ᒞᓐ ᐅᑮ ᑲᓅᓈᓐ ᐁᕒᐊᑦ ᐁᔑᓂᑳᓱᓂᒡ ᐌᑭᒫᐙᑎᓯᓂᒡ, ᐁᑮ ᐅᒋᐋᒡ, ᐋᓃᔥ ᐁᕒᐊᑕᓐ ᐅᑮᐐᑎᑫᒫᓂ ᐁᕒᐆᑎᔭᓴᓐ ᐐᒋᑭᐌᓯᐗᓐ ᐅᐐᐎᓂ, ᑲᔦ ᑕᔥ ᓃᐱᐗᐞ ᒪᒋᐃᔑᒋᑫᐎᓇᓐ ᐁᑮᐃᔑᒋᑫᓂᒡ᙮

ᐱᑯ ᑕᔥ ᓇᐗᒡ ᑫᔮᐱ ᑮᒪᒋ ᐃᔑᒋᑫ ᐁᕒᐊᑦ ᑭᐸᐅᑏᐎᑲᒥᑯᕽ ᐁᑮ ᑭᐸᐙᒡ ᒞᓇᓐ᙮

ᐊᐲ ᑕᔥ ᑲᑭᓇ ᐊᐎᔭᒃ ᑳᐃᔥᒀ ᓰᑲᐊᑖᑰᐎᓯᐙᒡ, ᒋᓴᔅ ᑫᐐᓐ ᑮᓰᑲᐊᑖᑰᐎᓯ᙮ ᒣᒀ ᐁᐊᓇᒥᐋᒡ ᑭᒋᑮᔑᒃ ᑮᐹᑭᑌᔥᑳᓂ᙮

ᒦᑕᔥ ᑭᔐᒪᓂᑑᓐ ᐅᑕᒑᑯᓂ ᑳᑮᐱ ᓈᓯᑳᑯᒡ ᑖᐱᔥᑰ ᐅᒦᒦᕽ ᐁᐃᔑᓈᑯᓯᓂᒡ ᑲᔦ ᑕᔥ ᑭᒋᑮᔑᑯᕽ ᐊᐎᔭᓐ ᐁᐅᒋ ᑮᑭᑐᓂᒡ: ᑮᓐ ᑎᐱᓇᐌ ᑳᓵᑭᐃᓈᓐ ᓂᑯᓯᔅ, ᑮᓐ ᑳᓇᐁᑕᒥᐃᔭᓐ, ᑮᐃᑭᑐᐗᓐ᙮

ᓂᓯᒥᑕᓇ 30 ᒫᐐᓐ ᐁᑕᓱᐱᐴᓉᒡ ᒋᓴᔅ ᑳᑮᒫᒌ ᑭᑭᓄᐊᒫᑫᒡ᙮ ᒦᔥ ᐊᐎᔭᒃ ᑳᑮᐃᓀᑕᒧᐙᒡ ᒎᓴᐴᓐ ᐁᑮᐅᑯᓯᓯᒥᑯᒡ ᒋᓴᔅ᙮ ᒎᓴᑉ ᐃᑕᔥ ᑮᐅᑌᑌ ᐄᓬᐋᔫᓐ ᙮

ᐄᓬᐋᐃ ᑮᐅᑌᑌ ᒫᑕᑑᓐ ᙮ ᒫᑖᑦ ᑮᐅᑌᑌ ᓬᐄᐹᔭᓐ ᙮ ᓬᐄᐹᐃ ᑮᐅᑌᑌ ᒣᓬᑳᔫᓐ ᙮ ᒣᓬᑳᐃ ᑮᐅᑌᑌ ᒑᓈᔫᓐ ᙮ ᒑᓈᐃ ᑮᐅᑌᑌ ᒎᓴᐴᓐ ᙮

ᒎᓴᑉ ᑮᐅᑌᑌ ᒫᑕᑖᔭᓲᓐ ᙮ ᒫᑕᑖᔭᔅ ᑮᐅᑌᑌ ᐁᒪᓲᓐ ᙮ ᐁᒪᔅ ᑮᐅᑌᑌ ᓀᐊᒨᓐ ᙮ ᓀᐊᒻ ᑮᐅᑌᑌ ᐁᔅᓬᐋᔫᓐ ᙮ ᐁᔅᓬᐋᐃ ᑮᐅᑌᑌ ᓈᑳᔫᓐ ᙮

ᓈᑳᐃ ᑮᐅᑌᑌ ᒣᔮᑑᓐ ᙮ ᒣᔮᑦ ᑮᐅᑌᑌ ᒫᑕᑖᔭᓲᓐ ᙮ ᒫᑕᑖᔭᔅ ᑮᐅᑌᑌ ᓭᒥᔭᓅᓐ ᙮ ᓭᒥᔭᓐ ᑮᐅᑌᑌ ᒎᓭᑰᓐ ᙮ ᒎᓭᒃ ᑮᐅᑌᑌ ᒎᑕᐗᓐ ᙮

ᒎᑕ ᑮᐅᑌᑌ ᒎᐁᓇᓅᓐ ᙮ ᒎᐁᓇᓐ ᑮᐅᑌᑌ ᐅᕒᐄᓴᐗᓐ ᙮ ᐅᕒᐄᓴ ᑮᐅᑌᑌ ᓯᕒᐊᐸᐸᓬᐊᓐ ᙮ ᓯᕒᐊᐸᐸᓬ ᑮᐅᑌᑌ ᔑᔮᓬᑏᔭᓬᐆᓐ ᙮ ᔑᔮᓬᑏᔭᓬ ᑮᐅᑌᑌ ᓃᕒᐋᔫᓐ ᙮

ᓃᕒᐋᐃ ᑮᐅᑌᑌ ᒣᓬᑳᔫᓐ ᙮ ᒣᓬᑳᐃ ᑮᐅᑌᑌ ᐋᑖᔫᓐ ᙮ ᐋᑖᐃ ᑮᐅᑌᑌ ᑰᓴᒨᓐ ᙮ ᑰᓴᒻ ᑮᐅᑌᑌ ᐁᓬᒪᑖᒨᓐ ᙮ ᐁᓬᒪᑖᒻ ᑮᐅᑌᑌ ᐁᕒᐆᓐ ᙮

ᐁᕒ ᑮᐅᑌᑌ ᒑᔓᐙᐆᓐ ᙮ ᒑᔓᐙ ᑮᐅᑌᑌ ᐁᓬᐃᐄᓴᕒᐆᓐ ᙮ ᐁᓬᐃᐄᓴᕒ ᑮᐅᑌᑌ ᒞᕒᐃᒨᓐ ᙮ ᒞᕒᐃᒻ ᑮᐅᑌᑌ ᒫᑕᑑᓐ ᙮ ᒫᑕᑦ ᑮᐅᑌᑌ ᓬᐄᐹᔭᓐ ᙮

ᓬᐄᐹᐃ ᑮᐅᑌᑌ ᓯᒥᔭᓇᓐ ᙮ ᓯᒥᔭᓐ ᑮᐅᑌᑌ ᒎᑕᐗᓐ ᙮ ᒎᑕ ᑮᐅᑌᑌ ᒎᓴᐴᓐ ᙮ ᒎᓴᑉ ᑮᐅᑌᑌ ᒎᓇᒨᓐ ᙮ ᒎᓇᒻ ᑮᐅᑌᑌ ᐃᓬᐋᔭᑭᒪᓐ ᙮

ᐃᓬᐋᔭᑭᒻ ᑮᐅᑌᑌ ᒣᓬᐄᔭᐗᓐ ᙮ ᒣᓬᐄᔭ ᑮᐅᑌᑌ ᒣᓇᐗᓐ ᙮ ᒣᓇ ᑮᐅᑌᑌ ᒫᑕᑕᐗᓐ ᙮ ᒫᑕᑕ ᑮᐅᑌᑌ ᓀᑕᓅᓐ ᙮ ᓀᑕᓐ ᑮᐅᑌᑌ ᑌᐱᑕᓐ ᙮

ᑌᐱᑦ ᑮᐅᑌᑌ ᒉᓯᐗᓐ ᙮ ᒉᓯ ᑮᐅᑌᑌ ᐆᐯᑑᓐ ᙮ ᐆᐯᑦ ᑮᐅᑌᑌ ᐴᐙᓴᓐ ᙮ ᐴᐙᔅ ᑮᐅᑌᑌ ᓵᓬᒪᓇᓐ ᙮ ᓵᓬᒪᓐ ᑮᐅᑌᑌ ᓇᔕᓅᓐ ᙮

ᓇᔕᓐ ᑮᐅᑌᑌ ᐊᒥᓇᑖᐴᓐ ᙮ ᐊᒥᓇᑖᑉ ᑮᐅᑌᑌ ᐋᑎᒥᓅᓐ ᙮ ᐋᑎᒥᓐ ᑮᐅᑌᑌ ᐋᕒᓇᔫᓐ ᙮ ᐋᕒᓇᐃ ᑮᐅᑌᑌ ᐄᓯᕒᐊᓅᓐ ᙮ ᐄᓯᕒᐊᓐ ᑮᐅᑌᑌ ᐲᕒᐃᓴᓐ ᙮ ᐲᕒᐃᔅ ᑮᐅᑌᑌ ᒎᑕᐗᓐ ᙮

ᒎᑕ ᑮᐅᑌᑌ ᒉᑲᐴᓐ ᙮ ᒉᑲᑉ ᑮᐅᑌᑌ ᐋᐃᓯᑰᓐ ᙮ ᐋᐃᓯᒃ ᑮᐅᑌᑌ ᐁᐸᕒᐊᐋᒪᓐ ᙮ ᐁᐸᕒᐊᐋᒻ ᑮᐅᑌᑌ ᑎᕒᐊᐗᓐ ᙮ ᑎᕒᐊ ᑮᐅᑌᑌ ᓀᐅᕒᐊᓐ ᙮

ᓀᐅᕒ ᑮᐅᑌᑌ ᓰᕒᐋᑰᓐ ᙮ ᓰᕒᐋᒃ ᑮᐅᑌᑌ ᕒᐄᐆᓐ ᙮ ᕒᐄᐅ ᑮᐅᑌᑌ ᐲᓬᐁᑰᓐ ᙮ ᐲᓬᐁᒃ ᑮᐅᑌᑌ ᐄᐸᕒᐆᓐ ᙮ ᐄᐸᕒ ᑮᐅᑌᑌ ᔒᓬᐊᐗᓐ ᙮

ᔒᓬᐊ ᑮᐅᑌᑌ ᑮᓇᓅᓐ ᙮ ᑮᓇᓐ ᑮᐅᑌᑌ ᐋᕒᐹᑭᓵᑑᓐ ᙮ ᐋᕒᐹᑭᓵᑦ ᑮᐅᑌᑌ ᔐᒪᓐ ᙮ ᔐᒻ ᑮᐅᑌᑌ ᓅᐗᐙᓐ ᙮ ᓅᐗ ᑮᐅᑌᑌ ᓬᐁᒣᑰᓐ ᙮

ᓬᐁᒣᒃ ᑮᐅᑌᑌ ᒦᑑᓴᓬᐊᐗᓐ ᙮ ᒦᑑᓴᓬᐊ ᑮᐅᑌᑌ ᐄᓈᑰᓐ ᙮ ᐄᓈᒃ ᑮᐅᑌᑌ ᒉᕒᐁᑑᓐ ᙮ ᒉᕒᐁᑦ ᑮᐅᑌᑌ ᒪᐁᓬᐊᓬᐄᔭᓬᐊᓐ ᙮ ᒪᐁᓬᐊᓬᐄᔭᓬ ᑮᐅᑌᑌ ᑫᓇᓅᓐ ᙮

ᑫᓇᓐ ᑮᐅᑌᑌ ᐄᓄᔔᓐ ᙮ ᐄᓄᔥ ᑮᐅᑌᑌ ᓭᑑᓐ ᙮ ᓭᑦ ᑮᐅᑌᑌ ᐋᑕᒨᓐ ᙮ ᐋᑕᒻ ᐅᑮᐅᑌᑌᒫᓐ ᑭᔐᒪᓂᑑᓐ᙮

ᒋᓴᔅ ᑕᔥ ᑮᑮᐌ ᒞᕒᑕᓐ ᓰᐲᕽ ᐁᑮᐅᒋ ᒫᒑᒡ, ᐁᒨᔥᑭᓀᔥᑳᑯᒡ ᑭᔐᒪᓂᑑᓐ ᐅᑕᒑᑯᓂ᙮ ᒦᐗᓐ ᐃᑕᔥ ᐊᒑᑾᓐ ᑳᑮᐃᔑ ᓃᑳᓃᐎᓂᑯᒡ ᐱᑾᑕᑲᒥᒃ᙮

ᒦ ᐌᑎ ᑳᑮᑕᔑ ᑲᑴᒋᐃᑯᒡ ᒪᒋᐊᔭᐋᓐ ᓃᒥᑕᓇ 40 ᑕᓱᑮᔑᒃ ᒥᓂᒃ᙮ ᑳᐐᓐ ᑫᑰᓐ ᐅᑮᐅᒋ ᒦᒋᓰᓐ ᐃᐃᐌ ᒥᓂᒃ᙮ ᐊᐲ ᑕᔥ ᑳᐃᔥᒀᓭᓂᒃ, ᐐᑫ ᑮᓅᑌᔅᑲᑌ᙮

ᒦᑕᔥ ᑳᐃᑯᒡ ᒪᒋᐊᔭᐋᓐ: ᑮᔥᐱᓐ ᑭᔐᒪᓂᑑ ᐅᑯᓯᓴᓐ ᑌᓄᐎᐗᓉᓐ, ᐊᓅᔥ ᐊᐊ ᐊᓯᓐ ᒋᐸᑴᔑᑲᓂᐎᒡ᙮

ᒦᑕᔥ ᒋᓴᔅ ᑳᐃᔑ ᓇᑴᑕᐙᒡ: ᒦ ᐅᐌ ᑭᒋᒪᓯᓇᐃᑲᓐ ᐁᔑᐲᐃᑳᑌᒃ: ᑳᐐᓐ ᐊᐎᔭ ᐸᑴᔑᑲᓂᕽ ᐁᑕ ᑕᐅᒋ ᐱᒫᑎᓯᓯ, ᐅᑮᐃᓈᓐ᙮

ᒦᓇᐙ ᑕᔥ ᒪᒋᐊᔭᐋᓐ ᐅᑮᐃᔑ ᐐᒌᐎᑰᓐ ᐗᑭᑕᑎᓐ, ᑮᔖᑕᑉ ᐃᑯ ᐁᑮᐙᐸᑕᐃᑯᒡ ᑲᑭᓇ ᑳᑭᒋ ᐅᑭᒫᐌᑖᑾᓂᓂᒃ ᐅᐅᒫ ᐊᑮᕽ ᑳᐊᔮᓂᑭᓐ᙮

ᒦᑕᔥ ᑳᐃᑯᒡ: ᑭᑲ ᒦᓂᓐ ᐅᐅ ᑲᑭᓇ ᑲᔥᑭᐁᐎᓯᐎᓐ, ᐃᐃ ᑲᔦ ᒋᑎᐯᑕᒪᓐ ᐁᔑ ᐌᓅᑎᓰᒪᑲᒃ ᐅᐅ ᐊᑭ᙮ ᓃᓐ ᑲᑭᓇ ᓂᑮᒦᓂᑰ ᐅᓄ, ᒋᑲᔥᑭᑑᔮᓐ ᐊᐌᓀᓐ ᐃᑯ ᐁᓀᓂᒪᒃ ᒋᒦᓇᒃ᙮

ᒦᐗᓐ ᐃᑕᔥ ᐅᓄᐌᓂᐗᓐ ᑲᑭᓇ ᑫᑎᐱᓇᐌᐎᓯᔭᓐ ᑮᔥᐱᓐ ᓃᓐ ᐅᒋᒌᑾᓃᑕᐎᔭᓐ ᒋᐊᓇᒥᐁᑕᐎᔭᓐ, ᐅᑮᐃᑰᓐ᙮

ᒦᑕᔥ ᒋᓴᔅ ᑳᐃᔑᓇᑴᑕᐙᒡ: ᑭᒋᒪᓯᓇᐃᑲᓐ ᐃᔑᐲᐃᑳᑌ: ᑳᑎᐯᒋᑫᒡ ᑭᑭᔐᒪᓂᑑᒻ ᑭᑲ ᐅᒋᒌᑾᓃᑕᐤ, ᐐᓐ ᐁᑕ ᑲᔦ ᑭᑲ ᐊᓄᑮᑕᐙ, ᑮᐃᑭᑐ᙮

ᒦᓇᐙ ᑕᔥ ᒪᒋᐊᔭᐋᓐ ᒉᕒᐆᓴᓬᐊᒥᕽ ᐅᑮᐃᔑᐎᓂᑰᓐ, ᐁᑮᐃᔑ ᐸᑭᑎᓂᑯᒡ ᒫᐗᒡ ᑳᐃᔑ ᐃᔥᐸᑭᑌᓂᒃ ᑭᒋᐊᓇᒥᐁᐎᑲᒥᒃ᙮ ᒦᑕᔥ ᑳᐃᑯᒡ: ᑮᔥᐱᓐ ᑭᔐᒪᓂᑑ ᐅᑯᓯᓴᓐ ᑌᓄᐎᐗᓉᓐ, ᒦ ᐅᒫ ᐅᒋ ᒀᔥᑾᓂᓐ᙮

ᐋᓃᔥ ᑭᒋᒪᓯᓇᐃᑲᓐ ᐃᔑᐲᐃᑳᑌ: ᑭᔐᒪᓂᑑ ᓴ ᐅᑲᐊᓅᓈᐞ ᐅᑌᒐᓬᐃᒪᐞ ᒋᓈᓈᑲᒋᐃᒥᒃ, ᒋᑲᓇᐌᓂᒥᒥᒃ ᐋᓃᓐ ᐱᑯ ᑫᓂ ᐃᔑᒋᑫᐗᒡ᙮

ᐃᑭᑑᒪᑲᓐ ᑲᔦ: ᒦᐗᒃ ᐃᑕᔥ ᐃᑭ ᑫᒥᒋᒥᓂᒀ ᒋᐐᓴᑭᓯᑌᔑᓄᐙᓯᐗᒡ ᐃᐃᒫ ᑳᔑ ᐊᓯᓃᑳᓂᒃ, ᐅᑮᐃᑰᓐ᙮

ᒋᓴᔅ ᑕᔥ ᐅᑮᐃᔑ ᓇᑴᑕᐙᓐ: ᐃᑭᑑᒪᑲᓐ ᑲᔦ: ᑳᐐᓐ ᑭᑲ ᑯᑌᓂᒫᓰ ᑳᑎᐯᒋᑫᒡ ᑭᑭᔐᒪᓂᑑᒻ, ᐅᑮᐃᓈᓐ᙮

ᐊᐲ ᑕᔥ ᒋᓴᔅ ᑳᑮᐃᔥᒀ ᑲᑴᒋᐃᑯᒡ ᒪᒋᐊᔭᐋᓐ ᒥᓯᐌ ᑫᑰᓂᕽ, ᒦ ᐃ ᐱᓇᒫ ᐊᒋᓇ ᑳᐃᔑ ᓇᑲᓂᑯᒡ᙮

ᒦᑕᔥ ᒋᓴᔅ ᑳᐃᔑ ᑮᐌᒡ ᐌᑎ ᑳᓬᐊᓬᐄᕽ, ᐁᑮ ᑭᑭᔥᑳᑯᒡ ᐁᔑ ᒪᔅᑲᐎᓰᓂᒡ ᑭᔐᒪᓂᑑᓐ ᐅᑕᒑᑯᓂ᙮ ᐅᑎᐹᒋᒥᑰᐎᓐ ᑕᔥ ᒥᓯᐌᑲᒥᒃ ᑮᒥᓯᑌᔥᑳᒪᑲᓂᓂ᙮

ᒦᑕᔥ ᑳᑮᒫᒋᑖᒡ ᐁᑮ ᑭᑭᓄᐊᒫᑫᒡ ᐃᐃᒫ ᒎᐗᐞ ᐅᑕᓇᒥᐁᐎᑲᒥᑯᓃᕽ, ᑲᑭᓇ ᑲᔦ ᐊᐎᔭᐞ ᐅᑮᑭᒋ ᓇᓈᑯᒥᑰᐞ᙮

ᒋᓴᔅ ᑕᔥ ᑮᐱᑕᑯᔑᓐ ᐃᐃᒫ ᓈᓴᕒᐃᑦ ᐆᑌᓈᕽ, ᑳᑮᑕᔑ ᐅᐱᑭᒡ᙮ ᐊᐲ ᑕᔥ ᐁᐊᓉᐲᐎ ᑮᔑᑲᓂᓂᒃ, ᐯᔑᑾᓐ ᑳᓂᑖ ᐃᔑᒋᑫᒡ, ᑮᐃᔖ ᐊᓇᒥᐁᐎᑲᒥᑯᕽ᙮ ᑮᐸᓯᑸ ᐁᑮᐃᔖᒡ ᐁᓈᓴᒪᐱᓂᒡ ᒋᐊᓇᒥᑑᒡ ᑭᒋᒪᓯᓇᐃᑲᓐ᙮

ᒦᔥ ᑳᑮᒦᓂᓐᒡ ᑎᑎᐲᑭᓅᒪᓯᓇᐃᑲᓐ ᐋᐃᓭᔭᐗᓐ ᐅᑲᓅᑕᒫᑫᓐ ᑳᑮᐃᔑ ᐅᔑᐲᐃᑫᓂᑯᐸᓀᓐ᙮ ᐅᑮᐋᐱᓂᔅᑴᑭᓈᓐ ᐃᑕᔥ ᐃᐃᐌᓂ ᑳᑎᑎᐲᑭᓂᑳᑌᓂᒃ ᒪᓯᓇᐃᑲᓐ᙮ ᐅᑮᒥᑳᓐ ᑕᔥ ᐃᐃᒫ ᑳᐃᔑᐲᐃᑳᑌᓂᒃ:

ᓂᐐᒌᐎᒥᒃ ᑳᑎᐯᒋᑫᒡ ᐅᑕᒑᑾᓐ᙮ ᓃᓐ ᐋᓃᔥ ᓂᑮᐅᓀᓂᒥᒃ ᒋᐲᑕᒪᐗᒀ ᑳᑰᐹᑎᓯᐙᒡ ᒥᓍᒋᒧᐎᓂᓂ᙮ ᓂᑮ ᐲᒋᓂᔕᐅᒃ ᒋᐐᑕᒪᐗᒀ ᑭᐸᐙᑲᓇᒃ ᒋᐸᑭᑎᓂᑣ, ᑲᔦ ᒋᑮᐌ ᐅᑎᓇᒧᐙᒡ ᐅᐙᐱᐎᓂᐙᓐ ᐃᑭᐌᓂᐗᒃ ᑳᐙᐱᓯᒀ, ᒋᐸᑭᑎᓇᒀ ᐃᑭᐌᓂᐗᒃ ᑲᑲᒀᑕᑭᐃᑣ,

ᑲᔦ ᑕᔥ ᒋᐐᑕᒫᓐ ᐃᐃᐌ ᐋᔕ ᐁᐃᔑᓭᒃ ᐊᐲ ᑳᑎᐯᒋᑫᒡ ᑫᔕᐌᓂᒫᒡ ᐅᐱᒫᑎᓰᒪᐞ᙮

ᒋᓴᔅ ᑕᔥ ᐅᑮᑮᐌ ᑎᑎᐲᑭᓈᓐ ᐃᐃ ᒪᓯᓇᐃᑲᓐ ᐁᑮᒦᓈᒡ ᐃᓂ ᐅᐐᒋᐃᐌᓐ ᐃᐃᒫ ᑳᐊᓄᑮᓂᒡ᙮ ᒦᑕᔥ ᐃᐃᒫ ᓃᑳᓇᔭᐄ ᑳᐃᔑ ᐅᓇᐱᒡ ᐁᐐ ᑭᑭᓄᐊᒫᑫᒡ᙮ ᑲᑭᓇ ᐊᐎᔭᐞ ᐃᐃᒫ ᑳ ᐊᔮᓂᒡ ᐊᓇᒥᐁᐎᑲᒥᑯᕽ ᐅᑮ ᑲᓇᐙᐸᒥᑰᐞ᙮

ᒦᑕᔥ ᑳᐃᓈᒡ ᐁᒫᒌ ᑲᑲᓅᓈᒡ: ᒦ ᐃ ᓅᑯᒻ ᑳᑮᔑᑳᒃ ᐅᐅ ᑳᓅᑕᒣᒃ ᐁᑮᐅᒋᒋᓭᒃ ᐃᐃ ᑳᐃᑭᑑᒪᑲᒃ ᑭᒋ ᐅᔑᐲᐃᑫᐎᓐ᙮

ᑲᑭᓇ ᑕᔥ ᐅᑮᒥᓍᐸᒥᑰᐞ ᐁᑮᒫᒪᑳᓯᑖᑯᒡ ᑲᔦ ᑳᐊᐲᒋ ᒥᓄᑖᑯᓯᒡ ᑳᑮᐃᑭᑐᒡ᙮ ᒦᑕᔥ ᑳᐃᑭᑐᓂᒡ: ᑳᐐᓐ ᐃᓇ ᐐᓐ ᒎᓴᑉ ᐃᓂ ᐅᑯᓯᓴᓐ?

ᒦᑕᔥ ᑳᐃᓈᒡ: ᑫᒋᓈᒡ ᐃᑯ ᑭᑲ ᐐᑕᒪᐎᔑᒻ ᐃᐃᐌ ᑲᑮᑖᐎ ᑮᔗᐎᓐ, ᐊᐤ ᑮᓐ ᒪᔥᑭᑮᐎᓂᓂ, ᐊᑕᐎᐃᑎᓱᓐ᙮ ᑲᔦ ᑕᔥ ᑭᑲᐃᔑᒻ, ᑕᑲ ᐅᐅᒫ ᑳᐅᒌᔭᓐ ᐆᑌᓈᕽ ᐃᔑᒋᑫᓐ ᐃᓂ ᐯᔑᑾᓐ ᑳᓅᑕᒫᕽ ᑫᑰᓇᓐ ᑳᐃᔑᒋᑫᐗᓀᓐ ᑲᐸᕒᓂᔭᒻ ᐆᑌᓈᕽ᙮

ᒦᔥ ᑳᐊᓂ ᐃᓈᒡ: ᑌᐺ ᐅᐅᐌ ᑳᐐᑕᒪᐎᓇᑰᒃ, ᑳᐐᓐ ᐐᑳ ᒥᓉᓂᒫᑲᓂᐎᓰ ᐊᐎᔭ ᑳᑲᓅᑕᒪᐙᒡ ᑭᔐᒪᓂᑑᓐ ᐅᑑᑌᓈᒥᕽ ᑳᐅᒌᒡ᙮

ᐃᓇᔥᑫ ᐱᓯᑕᐎᔑᒃ: ᑌᐺ ᐋᐱᒋ ᑮᐹᑏᓄᐗᒃ ᑮᐙᒋᑴᒃ ᐃᔅᕒᐃᔭᓬᐃᕽ ᒣᒀ ᐊᐲ ᐃᓬᐋᐃᒐ ᑮᐊᔮᒡ᙮ ᑳᐐᓐ ᑮᐅᒋ ᑭᒥᓋᓯᓅᓐ ᓂᓱᐱᐴᓐ ᐋᐱᑕ ᒥᓂᒃ᙮ ᐐᑫ ᐁᑮᓅᑌᓭᒃ ᒦᒋᒻ ᒥᓯᐌᑲᒥᒃ᙮ ᐃᔅᕒᐃᔭᓬ ᐊᑮᕽ᙮

ᑳᐎᓐ ᑕᔥ ᐃᓬᐋᐃᒐ ᑮᐃᔑᓂᔕᐙᓰ ᑲᓇᑫ ᐯᔑᒃ ᒋᐊᑕ ᐐᒋᐋᒡ᙮ ᒦ ᐁᑕ ᐃᒫ ᑳᑮᐃᔑᓂᔕᐅᓐᒡ ᐁᔑᐊᔮᓂᒡ ᐯᔑᒃ ᑮᐙᒋᑴᓐ ᒋᐊᐎ ᐐᒋᐋᒡ ᓭᕒᐊᐸᑦ ᐆᑌᓈᕽ ᐃᐃᒫ ᐯᔓ ᑭᒋᐆᑌᓈᕽ ᓵᐃᑕᓐ ᑳᐃᒋᑳᑌᒃ᙮

ᐋᐱᒋ ᑲᔦ ᑮᐹᑏᓄᐗᒃ ᐊᐎᔭᒃ ᐌᒥᑮᐙᐱᓀᐙᒡ ᒣᒀ ᐊᐲ ᑭᔐᒪᓂᑑ ᐅᑲᓅᑕᒫᑫᓐ ᐃᓬᐋᐃᔕᐆᓐ ᑮᐊᔮᓂᒡ᙮ ᑳᐐᓐ ᑕᔥ ᑲᓇᑫ ᐯᔑᒃ ᑮᐅᒋ ᐯᑭᐋᑲᓂᐎᓰ ᐃᐃᐌᓂ ᑳᑮᐃᓈᐱᓀᒡ, ᒦ ᐁᑕ ᓀᐊᒪᓐ, ᓰᕒᐃᔭ ᐊᑮᕽ ᑳᐅᒌᒡ ᑳᑮᐊᑕᐎᐃᓐᒡ, ᑮᐃᑭᑐ᙮

ᐃᑭᐌᓂᐗᒃ ᐃᑕᔥ ᐃᐃᒫ ᐊᓇᒥᐁᐎᑲᒥᑯᕽ ᑳᐊᔮᐙᒡ ᐊᐲ ᐁᓅᑕᒧᐙᒡ ᐅᐅ, ᐋᐱᒋᑯ ᑲᑭᓇ ᑮᓂᔥᑳᑎᓯᐗᒃ᙮

ᒦᔥ ᑳᐃᔑ ᐸᓯᑯᒋᓭᐙᒡ ᐁᑮ ᓵᑭᒋ ᐌᐱᓈᐙᒡ ᒋᓴᓲᓐ ᐃᐃᒫ ᐆᑌᓈᕽ, ᐁᑮᐃᔑᐎᓈᐙᒡ ᐗᑭᑕᑎᓐ ᐃᐃᒫ ᐁᔑᐊᔮᓂᒃ ᐅᑑᑌᓈᒥᐙ, ᐁᐐ ᐱᓂᐌᐱᓈᐙᒡ ᑳᔑ ᑮᔥᑲᑎᓈᓂᒃ᙮

ᔖᑰᒡ ᐃᑕᔥ ᒋᓴᔅ ᑮᐊᓂ ᔖᐳᔥᑳ ᒣᑴᔭᐄ ᐊᐎᔭᐞ ᐁᔑ ᐹᑏᓄᓂᒡ, ᐁᑮᐊᓂ ᒫᒑᒡ᙮

ᒦᑕᔥ ᒋᓴᔅ ᑮᐃᔖ ᐌᑎ ᑲᐸᕒᓂᔭᒻ ᐆᑌᓈᕽ, ᑳᓬᐊᓬᐄ ᐊᑮᕽ, ᒦ ᐌᑎ ᑳᑮᑕᔑ ᑭᑭᓄᐊᒪᐙᒡ ᐯᒫᑎᓯᓂᒡ ᐁᐊᓉᐲᐎ ᑮᔑᑲᓂᓂᒃ᙮

ᑌᐺ ᓴ ᑲᑭᓇ ᐊᐎᔭᐞ ᐅᑮᒫᒪᑳᓯᑖᑰᐞ ᐃᐃᐌᓂ ᐁᔑ ᑭᑭᓄᐊᒪᐙᒡ, ᐋᓃᔥ ᐃᐃ ᐅᑎᑭᑐᐎᓐ ᑮᐃᓂᑖᑾᓂᓂ ᐁᑮᒦᓂᑯᒡ ᑭᔐᒪᓂᑑᓐ ᑲᔥᑭᐁᐎᓯᐎᓐ᙮

ᐯᔑᒃ ᐃᑕᔥ ᐃᓂᓂ ᑮᐊᔮᑯᐸᓐ ᐃᐃᒫ ᐲᑎᑲᒥᒃ ᐊᓇᒥᐁᐎᑲᒥᑯᕽ, ᐁᑮ ᑭᑭᔥᑳᑯᒡ ᒪᒋᐊᒑᑾᓐ ᑳᐯᑫᑕᑯᓯᓯᓂᒃ, ᐁᓂᑯᒃ ᐁᑮᓅᑖᑯᓯᓂᒡ ᐁᔖᑯᐌᓂᒡ,

ᐅᐅ ᐁᐃᑭᑐᓂᒡ: ᐋᐃ! ᐋᓃᓐ ᐙᑑᑕᐎᔮᕽ, ᒋᓴᔅ ᓈᓴᕒᐃᑦ ᑳᐅᒌᔭᓐ? ᑭᐱᐊᑕ ᓂᔑᐗᓈᒋᐃᓈᒻ ᐃᓇ? ᑭᑭᑫᓂᒥᓐ ᐊᐌᓀᓂᐎᔭᓐ ᑮᓐ ᑭᔐᒪᓂᑑ ᑳᑮ ᐲᒋᓂᔕᐙᒡ ᐅᑾᔭᒀᑎᓰᒪᓐ! ᐅᑮᐃᑰᓐ᙮

ᒋᓴᔅ ᑕᔥ ᐅᑮ ᑲᓅᓈᓐ ᐃᓂᐌᓂᐗᓐ ᒪᒋᐊᒑᑾᓐ: ᑭᑑᐲᑭᔅ, ᐅᒋ ᓵᑲᐊᓐ ᐃᐃᒫ ᐊᐊ ᐃᓂᓂ ᐅᐱᒫᑎᓯᐎᓂᕽ, ᐅᑮᐃᓈᓐ᙮ ᒦᑕᔥ ᐊᐊ ᒪᒋᐊᒑᒃ ᑳᐃᔑ ᐊᐸᑭᓈᒡ ᐃᓂ ᐃᓂᓂᐗᓐ ᐃᐃᒫ ᒣᑴ ᐁᔑᐊᔮᓂᒡ ᐯᒫᑎᓯᓂᒡ, ᑲᔦ ᐁᑮᓇᑲᓈᒡ᙮ ᑳᐐᓐ ᑕᔥ ᑫᑰᓐ ᐅᑮ ᑑᑕᐙᓰᓐ ᐃᓂ ᐃᓂᓂᐗᓐ᙮

ᑲᑭᓇ ᑕᔥ ᑮᒫᒪᑳᑌᑕᒨᒃ ᐅᐅ ᐁᑮᐊᔨᑎᐙᒡ: ᐌᑯᓀᓐ ᑕᔥ ᐅᐅ ᑎᓄ ᑭᑭᓄᐃᑫᐎᓐ, ᐁᐊᔮᒡ ᐊᐊ ᐃᓂᓂ ᑲᔥᑭᐁᐎᓯᐎᓐ, ᑕᑯ ᑲᔦ ᒪᔥᑲᐎᓰᐎᓐ ᐁᑲᔥᑭᒫᒡ ᑳᐯᑭᓯᓯᓂᒃ ᒪᒋᐊᒑᑾᐞ, ᒋᓵᑲᐊᒥᓂᒡ! ᑮᐃᑭᑐᐗᒃ᙮

ᒋᓴᔅ ᑕᔥ ᐅᑎᓈᒋᒥᑰᐎᓐ ᒥᓯᐌᑲᒥᒃ ᑮᐊᓂ ᑭᑫᑖᑾᓂᓂ᙮

ᒦᑕᔥ ᒋᓴᔅ ᑳᐃᔑᓵᑲᐊᕽ ᐃᐃᒫ ᐊᓇᒥᐁᐎᑲᒥᑯᕽ, ᓵᐃᒪᓅᓐ ᐁᔑᑖᓂᒡ ᐁᑮᐃᔖᒡ᙮ ᓵᐃᒪᓐ ᑕᔥ ᐅᓯᑯᓴᓐ ᑮᐋᑯᓯᐗᓐ, ᐋᐱᒋ ᐁᑮᑭᒋ ᑭᔑᓱᐙᐱᓀᓂᒡ᙮ ᒋᓴᔅ ᐃᑕᔥ ᑮᐐᑕᒪᐙ ᐋᓃᓐ ᐁᔑ ᐊᔮᓂᒡ ᐃᓂ ᐃᑴᐗᓐ᙮

ᒦᑕᔥ ᒋᓴᔅ ᑳᐃᔑᐊᑕ ᐙᐸᒫᒡ ᐃᑴᐗᓐ, ᐁᑮᓃᐸᐎᒡ ᒌᑭ ᓂᐯᐎᓂᕽ᙮ ᒦᑕᔥ ᑳᐃᔑ ᑲᓅᑕᕽ ᐃᐃᐌᓂ ᑭᔑᓱᐙᐱᓀᐎᓐ᙮ ᒦᑕᔥ ᐊᐊ ᐃᑴ ᑳᑮᓇᑲᓂᑯᒡ ᐅᑖᑯᓯᐎᓐ᙮ ᒦᔥ ᔐᒫᒃ ᐁᑮᐗᓂᔥᑳᒡ ᐁᑮ ᐸᒥᐋᒡ ᒋᓴᓲᓐ, ᐃᐃ ᑲᔦ ᑳᑮ ᐐᒌᐎᑯᓂᒡ᙮

ᐊᐲ ᐁᐊᓂ ᐸᑭᔑᒧᒡ ᑮᓯᔅ, ᑲᑭᓇ ᐊᐎᔭᒃ ᑳᑮ ᑲᓇᐌᓂᒫᐙᒡ ᑳᐋᑯᓯᓂᒡ ᐯᐸᑳᓂ ᐋᑯᓯᐎᓐ ᐁᓈᐱᓀᓂᒡ ᐅᑮ ᐲᑕᒪᐙᐙᓐ ᒋᓴᓲᓐ᙮ ᑲᑭᓇ ᑕᔥ ᐅᑮ ᓵᒥᓈᓂ ᐁᑕᓱ ᐯᔑᑯᓂᒡ ᐁᑮᒥᓄᐊᔮᓂᒡ᙮

ᑮᐹᑏᓄᐗᐞ ᑲᔦ ᒪᒋᐊᒑᑾᐞ ᑳᑮᓇᑲᓈᓂᒡ ᐯᒫᑎᓯᓂᒡ, ᑮᓐ ᑭᔐᒪᓂᑑ ᐅᑯᓯᓴᓐ, ᐁᑮᐃᔑ ᔖᑯᐙᓂᑯᒡ᙮ ᒋᓴᔅ ᑕᔥ ᐅᑮᐅᒋᐋᐞ ᑫᑰᓐ ᒋᐃᑭᑐᓯᓂᒃ, ᐋᓃᔥ ᐅᑮ ᑭᑫᓂᒥᑰᐞ ᐁᑮᐅᓀᓂᒥᑯᒡ ᑭᔐᒪᓂᑑᓐ ᒋᐱᒫᒋᐃᐌᐎᓂᓃᐎᒡ᙮

ᐊᐲ ᐁᐊᓂ ᑮᔑᑲᓂᓂᒃ ᒋᓴᔅ ᐃᐃᒫ ᐆᑌᓈᕽ ᑮᐅᒋ ᒫᒑ ᐁᑮᐃᔖᒡ ᐁᔑᓂᔑᑫ ᐊᔮᓂᒃ᙮ ᐊᐎᔭᐞ ᐃᑕᔥ ᐅᑮᒫᒋ ᓇᓈᑕᐙᐸᒥᑰᐞ᙮ ᐊᐲ ᑕᔥ ᑳᒥᑳᑯᒡ ᐅᑖᓇᑮ ᑲᑴ ᑭᒋᐎᒥᑰᐞ ᒋᒫᒑᓯᒃ᙮

ᒦᑕᔥ ᑳᐃᓈᒡ: ᐃᔑᓭ ᑲᔦ ᐅᒋᑕ ᑯᑕᒃ ᐃᓂ ᐆᑌᓇᐗᓐ ᒋᐐᑕᒫᑫᔮᓐ ᐃᐃᐌᓂ ᒥᓍᒋᒧᐎᓐ ᑭᔐᒪᓂᑑ ᑳᐐᐃᔑ ᐅᔑᓯᑑᒡ ᐅᑎᐯᒋᑫᐎᓐ, ᒦ ᐃ ᑭᔐᒪᓂᑑ ᑳᑮᐅᒋ ᐲᒋᓂᔕᐅᒡ ᒋᐃᔑᒋᑫᔮᓐ, ᑮᐃᑭᑐ᙮

ᒦᑕᔥ ᑳᐃᔑ ᐸᐹᑲᑮᑴᒡ ᐊᓇᒥᐁᐎᑲᒥᑯᑳᕽ ᐃᐃᒫ ᒎᑏᔭ ᐊᑮᕽ᙮

ᐯᔑᑾ ᒋᓴᔅ ᒣᒀ ᐁᓃᐸᐎᒡ ᐃᐃᒫ ᑯᐸᔭᐄ ᑫᓀᓴᕒᐃᑦ ᓵᑲᐃᑲᓃᕽ, ᐊᐎᔭᐞ ᑳᐹᑏᓄᓂᒡ ᐅᑮᒦᐎᔥᑳᑰᐞ ᐁᐱᓯᑖᑯᒡ ᐁᐐᑕᒪᐙᒡ ᑭᔐᒪᓂᑑᓐ ᐅᑎᑭᑐᐎᓂᓂ᙮ ᐁᑯᐲᓈᓂᒃ ᑮᐃᔑᓃᐸᐎ᙮

ᐅᑮᐙᐸᑖᓇᓐ ᓃᔑᓐ 2 ᒌᒫᓇᓐ ᐁᒉᑭᓯᓂᓂᑭᓐ ᒌᑭᐲᒃ, ᐅᐸᑭᑕᐙᐞ ᐁᑮᓇᑲᑕᒥᓂᒡ ᐄᓴᓐ, ᐁᑮᐊᑕ ᑭᓰᓯᐸᓈᓂᒡ ᐅᑕᓴᐲᓂ᙮

ᒦᑕᔥ ᑳᐃᔑ ᐴᓯᒡ ᐃᐃ ᐯᔑᒃ ᒌᒫᓐ, ᓵᐃᒪᓅᓐ ᑌᐯᑕᒥᓂᒡ᙮ ᒦᑕᔥ ᑳᐃᓈᒡ: ᓂᒥᓈᐌᐱᓇᓐ ᐸᑮ᙮ ᒋᓴᔅ ᐲᑑᓇᒃ ᑮᓇᒪᑕᐱ ᐁᑮ ᑭᑭᓄᐊᒪᐙᒡ ᑳᐹᑏᓄᓂᒡ ᐯᒫᑎᓯᓂᒡ᙮

ᐊᐲ ᑕᔥ ᑳᐃᔥᒀ ᑲᑭᑐᒡ, ᒦ ᐃ ᑳᐃᓈᒡ ᓵᐃᒪᓅᓐ: ᓂᒥᓈᐌᔭᐄ ᑳᐊᑯᑮᔥᑳᔭᐙᒃ, ᒦ ᐌᑎ ᐃᔑ ᐸᑯᐲᐅ ᑭᑕᓴᐲᒻ, ᒋᐱᑕᐊᓈᔭᓐ ᑮᑰᔭᒃ᙮

ᒦᑕᔥ ᑳᐃᑯᒡ: ᐅᑭᑭᓄᐊᒫᑫ ᑲᐯᑎᐱᒃ ᐅᔕ ᓂᑖᓇᑮ ᑭᒋᐊᓄᑮᒥᓐ ᐁᐸᑭᑕᐙᔮᕽ᙮ ᑳᐐᓐ ᑫᑰᓐ ᓂᑑᒋ ᐱᑕᐊᓈᓰᒥᓐ᙮ ᑮᔥᐱᓐ ᑕᔥ ᐐᓐ ᐸᑭᑕᐙᓐ ᐃᔑᔭᓐ, ᒦᓇᐙ ᓂᑲ ᐸᑯᐲᐙ ᓂᑕᓴᐲᒻ᙮

ᒦᑕᔥ ᑳᐃᔑ ᐸᑭᑕᐙᐙᒡ᙮ ᓃᐱᐗᐞ ᑮᑰᔭᐞ ᐁᑮ ᐱᑕᐊᓈᐙᒡ, ᒦᔥ ᑳᑮᒫᒌ ᐲᑯᔥᑰᓱᓂᒡ ᐅᑕᓴᐲᐙᐞ᙮

ᐅᑮᐙᑕᐊᒪᐙᐙᐞ ᐃᑕᔥ ᐅᐐᒌᐙᑲᓂᐙᐞ ᑯᑕᒃ ᒌᒫᓂᕽ ᒣᑗ ᐊᔮᓂᒡ ᒋᐱᐊᑕᐎ ᐐᒋᐃᑯᐙᒡ᙮ ᒦᑕᔥ ᑳᐃᔑ ᐲᔖᓂᒡ ᐁᐱ ᐐᒋᐃᑯᐙᒡ ᐁᒫᒪᐎ ᐊᓄᑮᐙᒡ ᐁᑮ ᒨᔥᑭᓇᐋᐙᒡ ᑮᑰᔭᐞ ᓃᔓᐅᓇᒃ᙮ ᒦᔥ ᑳᑮᐊᓂ ᑯᓵᐲᓂᑭᓐ ᐅᒌᒫᓂᐙᓐ, ᑳᐊᐲᒋ ᑭᒋ ᐱᑕᐊᓈᐙᒡ᙮

ᐊᐲ ᑕᔥ ᓵᐃᒪᓐ ᐲᑕᕒ ᑳᐙᐸᑕᕽ ᐋᓃᓐ ᑳᐃᔑᓭᓂᒃ ᑮᐅᒋᒌᑾᓇᐱᑖ ᐁᓈᓴᒦᓂᒡ ᒋᓴᓲᓐ᙮ ᒦᔥ ᑳᐃᓈᒡ: ᑌᐯᒋᑫᔭᓐ ᓃᓐ ᓴ ᐐᑫ ᓂᒪᒋᐱᒫᑎᔅ᙮ ᐃᔑᓈᑾᓐ ᓴ ᒋᓇᑲᔑᔭᐸᓐ᙮

ᐋᓃᔥ ᐐᑫ ᑮᑭᒋ ᒫᒪᑳᑌᑕᒻ, ᐃᐃ ᑲᔦ ᑲᑭᓇ ᑳᑮᐱ ᐐᒋᐃᑯᒡ, ᐋᓃᓐ ᒥᓂᒃ ᑳᐊᐲᒋ ᑭᒋ ᐱᑕᐊᓈᐙᒡ᙮

ᒦᑕᔥ ᐯᔑᑾᓐ ᐃᑭ ᑳᐃᓀᑕᒧᐙᒡ ᒌᒥᔅ, ᐊᐊ ᑲᔦ ᒞᓐ ᑳᐅᑯᓯᓯᒥᑯᐙᒡ ᓭᐸᑏᓐ ᙮ ᒦᐗᐞ ᐄᑐᒃ ᐅᐅ ᓵᐃᒪᓐ ᑳᑮᐐᒋᐃᑯᒡ᙮ ᒦᑕᔥ ᒋᓴᔅ ᑳᐃᓈᒡ ᓵᐃᒪᓅᓐ: ᑫᑯ ᓭᑭᓯᑫᓐ, ᒦᑕᔥ ᓅᑯᒻ ᒋᑳᒋᑎᓇᑣ ᐊᐎᔭᒃ ᐯᒫᑎᓯᐙᒡ, ᐅᑮᐃᓈᓐ᙮

ᒦᑕᔥ ᑳᐃᔑ ᐃᑯᐱᑑᐙᒡ ᐅᒌᒫᓂᐙ ᐃᐃᒫ ᒥᑕᑲᒥᒃ᙮ ᑲᑭᓇ ᑫᑰᓐ ᐁᑮᓇᑲᑕᒧᐙᒡ, ᐁᑮ ᐱᒥᓂᔕᐙᐙᒡ ᒋᓴᓲᓐ᙮

ᐯᔑᒀ ᑕᔥ ᒋᓴᔅ ᐁᐊᔭᔮᒡ ᐯᔑᒃ ᑭᒋ ᐅᑌᓈᕽ, ᑮᐊᔮᐗᓐ ᐃᐃᒫ ᐯᔑᒃ ᐃᓂᓂᐗᓐ ᒥᓯᐌ ᐁᓂᔑᒥᑮᓂᒡ᙮ ᐊᐲ ᐁᐙᐙᐸᒥᑯᒡ ᒦ ᐃ ᑳᑮᐱ ᐊᐸᑭᓂᑎᓱᓂᒡ ᐁᓈᓴᒦᒡ ᐁᐸᑯᓭᓂᒥᑯᒡ ᐁᑮᐃᑯᒡ: ᑌᐯᒋᑫᔭᓐ, ᑮᔥᐱᓐ ᐃᓀᑕᒪᓐ ᑭᑖ ᑲᔥᑭᑑᓐ ᒋᑮ ᐯᑭᐃᔭᐸᓐ᙮

ᒦᑕᔥ ᒋᓴᔅ ᑳᐃᔑ ᓃᒥᓂᑫᓂᒡ ᐁᓵᒥᓈᒡ ᐁᑮᐃᓈᒡ: ᒦ ᐃ ᑌᐺ ᐁᓀᑕᒫᓐ, ᑭᑲ ᐯᑭᐃᑰᐎᔅ, ᐅᑮᐃᓈᓐ᙮ ᒦᑕᔥ ᐃᑯ ᔐᒫᒃ ᑳᑮᓇᑲᓂᑯᓂᒡ ᐃᐃᐌᓂ ᐁᔑ ᐅᒥᑮᐎᓂᐸᓐ᙮

ᒦᔥ ᒋᓴᔅ ᑳᐃᔑ ᐅᒋᐋᒡ ᐁᑮᐃᓈᒡ: ᑫᑯ ᐊᐎᔭ ᐐᑕᒪᐙᑫᓐ ᐅᐅ᙮ ᒫᒑᓐ ᐃᔖᓐ ᐊᑕᐙᐸᒻ ᐊᓇᒥᐁᐎᑭᒫ ᒋᐙᐸᒥᒃ, ᒋᐸᑭᑎᓈᓱᔭᓐ ᑲᔦ ᐁᑮ ᐯᑭᐃᑰᔭᓐ᙮ ᐃᔑᒋᑫᓐ ᒪᔮ ᐁᓇᑌᓂᒃ ᒨᓯᔅ ᑳᑮᐃᓇᔓᐌᒡ, ᒋᐅᒋ ᑫᒋᓈᐅᐙᒡ ᑲᑭᓇ ᐊᐎᔭᒃ ᑌᐺ ᓅᑯᒻ ᐁᒥᓄᐊᔮᔭᓐ, ᐅᑮᐃᓈᓐ᙮

ᔖᑰᒡ ᐃᑕᔥ ᒋᓴᔅ ᐅᑎᐹᒋᒥᑰᐎᓐ ᐋᒌᑫ ᐙᓴ ᑮᐊᓂ ᐅᒻᐺᔥᑳᒪᑲᓂᓂ᙮ ᓃᐱᐗᐞ ᑲᔦ ᐊᐎᔭᐞ ᑮᐲᔖᐗᐞ ᐁᐱᐊᑕ ᐱᓯᑖᑯᒡ, ᑲᔦ ᑕᔥ ᒋᒥᓄᐊᔮᐋᒡ ᐃᐃᐌᓂ ᐅᑖᑯᓯᐎᓂᓂ᙮

ᒋᓴᔅ ᐃᑕᔥ ᐐᓐ ᐁᑕ ᑮᓂᑖᐃᔖ ᐃᐃᒫ ᐱᑾᑕᑲᒥᒃ ᐁᑮᐊᐎ ᐊᑕ ᐊᓇᒥᐋᒡ᙮

ᐯᔑᒀ ᐁᑮᔑᑲᓂᓂᒃ ᒣᒀ ᒋᓴᔅ ᐁᑭᑭᓄᐊᒫᑫᒡ ᐋᓂᑕ ᐯᕒᐊᓯᐗ ᑲᔦ ᑳᑭᑭᓄᐊᒫᑫᓂᒡ ᐅᓇᔓᐌᐎᓐ ᑮᓇᒪᑕᐱᐗᐞ ᐃᐃᒫ ᑳᑮᐱ ᐅᒌᓂᒡ ᐁᑕᓱ ᐆᑌᓈᑳᕽ ᑳᓬᐊᓬᐄᕽ ᑲᔦ ᒎᑏᔭ ᑲᔦ ᑕᔥ ᒉᕒᐆᓴᓬᐊᒥᕽ ᙮ ᐅᒪᔥᑲᐎᓰᐎᓂᓂ ᑳᑎᐯᒋᑫᓂᒡ ᓴ ᑮᒦᓈᑲᓂᐎ ᒋᓴᔅ ᒋᐅᒋ ᒥᓍᒋᐃᒥᓐᒡ ᑳᐋᑯᓯᓂᒡ᙮

ᐋᓂᑕ ᑕᔥ ᐃᓂᓂᐗᒃ ᑮᐲᔕᐗᒃ ᐁᑮᐃᔑ ᐱᒥᐎᓈᐙᒡ ᐅᓂᐯᐎᓂᓃᕽ ᐃᓂᓂᐗᓐ ᑳᓂᐳᐙᐱᓀᓂᒡ, ᐁᑮ ᑯᒋᑑᐙᒡ ᒋᐲᑎᑲᓈᐙᒡ ᐃᐃᒫ ᐙᑳᐃᑲᓂᕽ, ᐁᐐ ᐱᒥᔑᒫᐙᒡ ᐃᐃᒫ ᐯᔓ ᒋᓴᓲᓐ ᐁᔑ ᐊᔮᓂᒡ᙮

ᐅᓵᒻ ᑕᔥ ᐁᐹᑏᓄᓂᒡ ᐊᐎᔭᐞ ᑳᐐᓐ ᐅᑮᒥᑲᓰᓈᐙ ᐋᑎ ᑫᐊᓂ ᐃᔑᐎᓈᐙᒡ᙮ ᒦᑕᔥ ᐗᑭᑕᐸᒃ ᐁᓇᐸᑳᓂᒃ ᐙᑳᐃᑲᓐ ᑳᐃᔑ ᐃᔑᐎᓈᐙᒡ ᐙᐱᑲᓂ ᐊᐸᒀᓐ ᐁᑮ ᐸᑯᓀᐱᑑᐙᒡ᙮ ᒦᔥ ᐃᐃᒫ ᑳᐃᔑ ᐸᑭᑖᐲᑭᓈᐙᒡ ᒣᑴᔭᐄ ᐁᔑ ᐹᑏᓄᓈᓂᐗᓂᓂᒃ ᒋᓴᓲᓐ ᐁᓈᓴᒥᑳᐸᐎᓂᒡ᙮

ᐊᐲ ᑕᔥ ᒋᓴᔅ ᐁᐙᐸᒫᒡ ᐁᐲᒋ ᑌᐺᔦᑕᒥᓂᒡ, ᒦᔥ ᑳᐃᓈᒡ ᐃᓂ ᐃᓂᓋᓐ: ᓃᒌ, ᑭᒪᒋᑑᑕᒧᐎᓇᓐ ᑭᐴᓀᑕᒫᑰ᙮

ᑳᑭᑭᓄᐊᒫᑫᐙᒡ ᐅᓇᔓᐌᐎᓐ, ᐃᑭ ᑲᔦ ᐯᕒᐊᓰᒃ ᐅᐅ ᑮᐊᔨᑭᑐᐗᒃ: ᐊᐌᓀᓐ ᑕᔥ ᐊᐊ ᐃᓂᓂ ᑭᔐᒪᓂᑑᕽ ᑳᐃᓇᑭᑎᓱᒡ? ᑳᐐᓐ ᐊᐎᔭ ᐅᑖ ᑲᔥᑭᑑᓰᓐ ᒋᐴᓀᑕᒫᑫᒡ ᒪᒋᑑᑕᒧᐎᓇᓐ, ᒦ ᐁᑕ ᑯ ᐊᐊ ᑭᔐᒪᓂᑑ᙮

ᒋᓴᔅ ᐅᑮ ᑭᑫᓂᒫᐞ ᐁᔑ ᓈᓈᑲᑕᐌᑕᒥᓂᒡ, ᒦᔥ ᑳᐃᓈᒡ: ᐌᑯᓀᓐ ᐃᑕᔥ ᐃᐃ ᓇᑫ ᐌᒋᐃᔑ ᓈᓈᑲᑕᐌᑕᒣᒃ?

ᓇᐗᒡ ᐃᓇ ᑖᐌᑕᓐ ᒋᐃᑭᑐᔮᐹᓐ: ᑭᒪᒋᑑᑕᒧᐎᓇᓐ ᑭᐴᓀᑕᒫᑰ, ᑯᒫ ᑲᔦ ᒋᐃᑭᑐᔮᐹᓐ: ᐸᓯᑸᓐ ᒋᐱᒧᓭᔭᓐ?

ᒋᑭᑫᑕᒣᒃ ᐃᑕᔥ ᐃᓂᓂ ᐅᑯᓯᓴᓐ ᐁᔮᒡ ᑲᔥᑭᐁᐎᓯᐎᓐ ᐅᐅᒫ ᐊᑮᕽ ᒋᐴᓀᑕᒫᑫᒡ ᒪᒋᑑᑕᒧᐎᓇᓐ᙮ ᒦᑕᔥ ᑳᐃᔑ ᑲᓅᓈᒡ ᐃᓂᐌᓂᐗᓐ ᐃᓂᓂᐗᓐ ᑳᓂᐳᐙᐱᓀᓂᒡ ᒦᑕᔥ ᐁᓂᓈᓐ, ᐸᓯᑸᓐ, ᐅᑖᐱᓇᓐ ᑭᑕᐱᔑᒧᓐ, ᒦᑕᔥ ᐃᔑᑮᐌᓐ, ᐅᑮᐃᓈᓐ᙮

ᒦᑕᔥ ᐃᑯ ᔐᒫᒃ ᑳᐃᔑ ᐸᓯᑸᓂᒡ ᐃᐃᒫ ᑲᑭᓇ ᐁᓈᓴᒦᐙᒡ᙮ ᐁᑮᐅᑖᐱᓇᒥᓂᒡ ᐅᑕᐱᔑᒧᓂᓂ ᐁᔑ ᐱᒥᔑᓂᓂᐸᓐ, ᒦᔥ ᑳᐊᓂ ᐃᔑᑮᐌᓂᒡ ᐁᑭᒋ ᓇᓈᑯᒫᓂᒡ ᑭᔐᒪᓂᑑᓐ᙮

ᑲᑭᓇ ᑕᔥ ᐃᐃᒫ ᑳᑮᐊᔮᐙᒡ ᐅᑮᑭᒋ ᒫᒪᑳᑌᑖᓈᐙ ᐅᐅᐌᓂ, ᑲᔦ ᑕᔥ ᐁᑮᒨᔥᑭᓀᔥᑳᑯᐙᒡ ᓭᑭᓯᐎᓐ᙮ ᒦᔥ ᑳᐃᔑ ᑭᒋ ᓇᓈᑯᒫᐙᒡ ᑭᔐᒪᓂᑑᓐ ᐁᑮᐃᑭᑐᐙᒡ: ᑌᐺ ᓴ ᒫᒪᑳᒡ ᑫᑰᓇᓐ ᑭᐙᐸᑖᒥᓐ ᓅᑯᒻ ᑳᑮᔑᑲᒃ᙮

ᐊᐲ ᑕᔥ ᐅᐅ ᐁᐃᔥᒀᓭᒃ ᒋᓴᔅ ᑮᓵᑲᐊᒻ, ᐁᑮᐊᓂ ᒫᒑᒡ᙮ ᒦᔥ ᑳᑮᐙᐸᒫᒡ ᐃᓂᓂᐗᓐ ᐁᓇᒪᑕᐱᓂᒡ ᐃᐃᒫ ᐁᔑ ᑎᐸᐃᑫᐎᓐᒡ ᑳᒫᐗᑑᓈᓂᒡ ᑖᑭᔅ ᑎᓄ ᔔᓂᔮᓐ ᓬᐄᐹᐃ ᐁᐃᔑᓂᑳᓱᓂᒡ᙮ ᒦᑕᔥ ᑳᐃᓈᒡ: ᐱᒥᓂᔕᐅᔑᓐ᙮

ᒦᑕᔥ ᓬᐄᐹᔭᓐ ᑳᐃᔑ ᐸᓯᑸᓂᒡ ᑲᑭᓇ ᑫᑰᓐ ᐁᑮᓇᑲᑕᒥᓂᒡ ᐁᑮ ᐱᒥᓂᔕᐅᑯᒡ᙮

ᒦᑕᔥ ᓬᐄᐹᐃ ᑳᐃᔑ ᑭᒋ ᐊᔕᑫᒡ ᐁᑮᐊᔕᒫᒡ ᒋᓴᓲᓐ ᐃᐃᒫ ᐲᑎᒃ ᐅᐙᑳᐃᑲᓂᕽ᙮ ᑮᐹᑏᓄᐗᒃ ᐃᑕᔥ ᐃᑭ ᑳᒫᐗᑑᓈᐙᒡ ᑖᑭᔅ ᔔᓂᔮᓐ ᐃᐃᒫ ᐁᑮᐊᔮᐙᒡ, ᐃᑭ ᑲᔦ ᑯᑕᒃ ᐊᐎᔭᒃ ᐁᑮᐐᑕᐱᒫᐙᒡ᙮

ᐋᓂᑕ ᐯᕒᐊᓯᐗᒃ, ᐃᑭ ᑲᔦ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ ᐅᑮᐅᒋ ᑭᒋ ᑲᓅᓈᓂ ᒋᓴᓲᓐ ᐅᑭᑭᓄᐊᒪᐙᑲᓂᓂ: ᐌᑯᓀᓐ ᐌᒋ ᐐᒋ ᐐᓯᓃᒣᒀ, ᑲᔦ ᑕᔥ ᐌᒋ ᐐᒋ ᒥᓂᑴᒣᒀ ᑳᑎᐸᐃᑫᐃᐌᐙᒡ, ᐃᑭ ᑲᔦ ᐊᐎᔭᒃ ᐅᒪᒋᑑᑕᒨᒃ?

ᒦᑕᔥ ᒋᓴᔅ ᑳᐃᔑ ᓇᑴᑕᐙᒡ: ᐊᐎᔭᒃ ᑳᒥᓄᐊᔮᐙᒡ ᑳᐐᓐ ᐅᓇᑕᐌᓂᒫᓯᐙᐙᓐ ᒪᔥᑭᑮᐎᓂᓂᐗᓐ, ᐃᑭᐌᓂᐗᒃ ᐁᑕ ᑳᐋᑯᓯᐙᒡ᙮

ᑳᐐᓐ ᐐᓐ ᑳᑮᐅᒋ ᐲᔖᔮᓐ ᒋᐊᑐᒪᒀ ᐃᑭᐌᓂᐗᒃ ᑳᑾᔭᒀᑎᓯᐙᒡ, ᐃᑭ ᓴ ᐱᑯ ᐅᒪᒋᑑᑕᒨᒃ ᒋᑴᑳᑎᓯᐙᒡ᙮

ᐋᓂᑕ ᐊᐎᔭᒃ ᐅᑮᐃᓈᐙᓐ: ᒋᓴᓲᓐ ᒞᓐ ᐐᓐ ᐅᑭᑭᓄᐊᒪᐙᑲᓇᐞ ᐁᔅᑲᒻ ᑳᐐᓐ ᐅᒋ ᐐᓯᓂᓰᐗᐞ, ᑲᔦ ᑕᔥ ᐁᐊᓇᒥᐋᓂᒡ᙮ ᒦ ᐯᔑᑾᓐ ᐯᕒᐊᓯᐗᒃ ᐅᑭᑭᓄᐊᒪᐙᑲᓂᐙᐞ ᐁᔑᒋᑫᓂᒡ᙮ ᑮᓐ ᑕᔥ ᐐᓐ ᐃᑭ ᑭᑭᓄᐊᒪᐙᑲᓇᒃ ᐗᐐᓯᓂᐗᒃ, ᑕᑯ ᑲᔦ ᒪᒥᓂᑴᐗᒃ᙮

ᒋᓴᔅ ᑕᔥ ᑮᐃᔑᓇᑴᑕᒻ: ᑭᑎᓀᑖᒻ ᐃᓇ ᒋᑲᔥᑭᐁᒀᐸᓐ ᒋᐐᓯᓂᓯᒀᐸᓐ ᐃᑭᐌᓂᐗᒃ ᐊᐎᔭᒃ ᑳᐊᑐᒥᑣ ᐃᐃᒫ ᑳᔑ ᐐᑎᑫ ᐐᓯᓂᓈᓂᐗᕽ ᒣᒀ ᐐᒌᐙᐙᒡ ᐃᓂ ᐃᓂᓂᐗᓐ ᑳᐅᔥᑭ ᐐᑎᑫᓂᒡ? ᑳᐐᓐ ᐄᑐᒃ᙮

ᓂᑯᑎᕽ ᓴ ᑕᐃᔑ ᑮᔑᑲᓂᓂ ᐊᐲ ᑫᐅᑖᐱᓇᒪᐎᑣ ᐃᓂᐌᓂᐗᓐ ᐃᓂᓂᐗᓐ ᑳᐅᔥᑭ ᐐᑎᑫᓂᒡ᙮ ᒦᑕᔥ ᐊᐲ ᑫᐐᓇᐙ ᒋᐐᓯᓂᓯᒀ᙮"

ᒋᓴᔅ ᑕᔥ ᑮᐐᑕᒫᑫ ᐁᑮᐃᔑ ᐊᐌᒋᑫᒡ: ᑳᐐᓐ ᐊᐎᔭ ᐅᑖᐅᒋ ᐸᑴᐱᑑᓰᓐ ᐅᔥᑭ ᑭᑭᔥᑭᑲᓂᕽ ᒋᐸᑾᐊᕽ ᑫᑌ ᑭᑭᔥᑭᑲᓐ᙮ ᑮᔥᐱᓐ ᐃᐃ ᑑᑕᕽ ᐅᑖ ᐲᑯᐱᑑᓐ ᐃᐃᐌᓂ ᐅᔥᑭ ᑭᑭᔥᑭᑲᓐ, ᑲᔦ ᑕᔥ ᐃᐃᐌ ᐅᔥᑭ ᐸᑾᐃᑲᓐ ᑳᐐᓐ ᒥᓴᐙ ᒪᔮ ᑕᐃᔑᓈᑾᓯᓅᓐ ᑫᑌ ᑭᑭᔅᑭᑲᓂᕽ᙮

ᑳᐐᓐ ᑲᔦ ᐊᐎᔭ ᐅᑖᐃᔑ ᓰᑭᓇᓰᓐ ᐅᔥᑭ ᔔᒥᓈᐳᓂ ᐃᐃᒫ ᑫᑌ ᔔᒥᓈᐳ ᐸᔥᑴᑭᓄᐗᔑᕽ᙮ ᑮᔥᐱᓐ ᐃᐃ ᑑᑕᕽ ᑖᑕᒪᑯᓭᓂᐗᓐ ᐃᓂᐌᓂᐗᓐ ᐸᔥᑴᑭᓄᐗᔕᓐ᙮ ᒦᔥ ᒋᓰᑭᓭᑭᐸᓐ ᐅᔥᑭ ᔔᒥᓈᐳ, ᑲᔦ ᑕᔥ ᐸᔥᑴᑭᓄᐗᔕᓐ ᑕᓂᔑᐗᓈᑕᓅᓐ᙮

ᓇᐗᒡ ᐅᔥᑭ ᔔᒥᓈᐳ ᐃᔑᓈᑾᓐ ᒋᐃᔑ ᓰᑭᓂᑳᑌᑭᐸᓐ ᐅᔥᑭ ᐸᔥᑴᑭᓄᐗᔑᕽ᙮

ᑳᐐᓐ ᑲᔦ ᐊᐎᔭ ᐅᓇᑕᐌᑕᓰᓐ ᐅᔥᑭ ᔔᒥᓈᐳ ᑮᐃᔥᒀ ᒥᓂᒀᑕᕽ ᑫᑌ ᔔᒥᓈᐳ᙮ ᑫᑌᔭᐄ ᓇᐗᒡ ᒥᓄᐳᑾᓐ ᑕᐃᑭᑐ, ᐅᑮᐃᓈᐞ᙮

ᒋᓴᔅ ᐁᐱᒧᓭᑯᐸᓀᓐ ᐃᐃᒫ ᐸᑴᔑᑲᓂᐎ ᑭᑎᑫᐎᓂᕽ, ᒣᒀ ᐁᐊᓉᐲᐎ ᑮᔑᑲᓂᓂᒃ, ᐅᑭᑭᓄᐊᒪᐙᑲᓇᐞ ᐃᑕᔥ ᐅᑮ ᒌᔑᐱᓈᓂ ᑳᐃᔑ ᐅᑎᒀᓂᐗᓂᓂᑭᓐ ᐃᓂ ᐸᑴᔑᑲᓂᐎ ᑭᑎᑳᓇᓐ, ᒦᑕᔥ ᑳᐃᔑ ᔑᑯᓇᒥᓂᒡ ᐅᓂᒌᓃᕽ ᐁᑮᒦᒋᓂᒡ᙮

ᐋᓂᑕ ᑕᔥ ᐯᕒᐊᓯᐗᒃ ᑮᐃᑭᑐᐗᒃ: ᐋᓃᓐ ᐌᒋ ᐃᔑᒋᑫᓯᐌᒃ ᑳᐃᓇᑌᒃ ᐃᐃ ᐃᓈᑯᓂᑫᐎᓐ ᑫᑮᑑᑕᒣᑭᐸᓐ ᐁᐊᓉᐲᐎ ᑮᔑᑲᒃ?

ᒋᓴᔅ ᐃᑕᔥ ᐅᑮᐃᔑ ᓇᑴᑕᐙᐞ: ᑳᐐᓐ ᐃᓇ ᑭᑭᑫᑕᓰᓈᐙ ᐁᔑᐲᐃᑳᑌᒃ ᐋᓃᓐ ᑌᐱᑦ ᑳᐃᔑᒋᑫᒡ ᐊᐲ ᑮᓅᑌᔅᑲᑌᒡ, ᐃᐃ ᑲᔦ ᐅᐐᒌᐙᑲᓇᐞ?

ᐁᑮ ᐲᑎᑫᒡ ᑭᒋ ᐸᒀᓀᑲᒥᑯᕽ ᑭᔐᒪᓂᑑᓐ ᑳᐃᔑ ᐊᓇᒥᐁᑕᐎᒥᓐᒡ ᐁᑮᐅᑖᐱᓈᒡ ᐸᑴᔑᑲᓇᓐ ᐁᑮᐊᒸᒡ, ᐁᑮᐊᔕᒫᒡ ᑲᔦ ᑳᐐᒌᐎᑯᒡ ᑳᐸᑭᑎᓇᒪᐎᒥᓐᒡ ᑭᔐᒪᓂᑑᓐ ᑳᐐᓐ ᐄᑐᒃ ᐃᓈᑯᓂᑫᐎᓐ ᐃᑭᑑᒪᑲᓯᓅᓐ ᐃᐃᐌ ᒋᑮᐃᔑᒋᑫᐸᓐ᙮ ᐊᓇᒥᐁᐎᑭᒫᒃ ᐄᑐᒃ ᐁᑕ ᒋᑮᐊᒸᐙᐸᓐ ᐃᓂ ᐸᑴᔑᑲᓇᓐ, ᐅᑮᐃᓈᐞ᙮

ᒦᑕᔥ ᐁᓂᐃᓈᒡ: ᐃᓂᓂ ᐅᑯᓯᓴᓐ ᐅᔕ ᐅᑎᐯᑖᓐ ᑳᐊᓉᐲᐎ ᑮᔑᑲᓂᓂᒃ᙮

ᒦᓇᐙ ᑯᑕᒃ ᐁᐊᓉᐲᐎ ᑮᔑᑲᓂᓂᒃ ᒋᓴᔅ ᑮᐲᑎᑫ ᐊᓇᒥᐁᐎᑲᒥᑯᕽ ᐁᑭᑭᓄᐊᒫᑫᒡ᙮ ᑮᐊᔮᐗᓐ ᓴ ᐃᐃᒫ ᐃᓂᓂᐗᓐ ᐅᑭᒋᓂᒋᓂ ᐁᑮᒪᒫᒋᑯᔥᑳᓂᒡ᙮

ᐃᑭ ᑕᔥ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ ᐃᑭ ᑲᔦ ᐯᕒᐊᓰᒃ ᐅᑮᑲᑴ ᑳᒋᒋᐋᐙᓐ ᒋᓴᓲᓐ ᑕᑲ ᒋᒥᓄᐊᔮᐃᐌᓂᒡ ᐊᓉᐲᐎ ᑮᔑᑲᓂᓂᒃ᙮ ᐅᑮᑲᑴ ᒥᑳᓈᐙ ᑫᑰᓐ ᑫᐅᒋ ᐊᓈᒥᒫᐙᒡ᙮

ᒋᓴᔅ ᐃᑕᔥ ᐅᑮ ᑭᑫᓂᒫᐞ ᐃᐃ ᑳᐃᔑ ᓈᓈᑲᑕᐌᑕᒥᓂᒡ᙮ ᒦᔥ ᑳᑮ ᑲᓅᓈᒡ ᐃᓂ ᐃᓂᓂᐗᓐ ᑳᒪᒫᒋᑯᔥᑳᓂᒃ ᐅᓂᒌᓂ: ᐸᓯᑸᓐ, ᐲᔖᓐ ᐅᐅᒫ ᓃᑳᓇᔭᐄ, ᐅᑮᐃᓈᓐ᙮ ᒦᑕᔥ ᑳᐃᔑ ᐸᓯᑸᓂᒡ ᐁᑮᐱ ᓃᐸᐎᓂᒡ᙮

ᒦᑕᔥ ᑳᐃᔑ ᑲᓅᓈᒡ ᑳᑭᑭᓄᐊᒫᑫᓂᒡ ᐅᓇᔓᐌᐎᓐ ᐃᐃ ᑲᔦ ᐯᕒᐊᓰᐞ: ᒦᑕᔥ ᐁᔑ ᑲᑴᒋᒥᓇᑰᒃ, ᐋᓃᓐ ᐁᓇᑌᒃ ᐃᓈᑯᓂᑫᐎᓐ ᑫᐃᔑᒋᑫᓈᓂᐗᑭᐸᓐ ᐊᓉᐲᐎ ᑮᔑᑲᒃ? ᐊᐎᔭ ᒋᒥᓄᑑᑕᐎᑎᐸᓐ, ᑯᒫ ᑲᔦ ᒋᒫᔑ ᑑᑕᐎᑎᐸᓐ᙮ ᒋᐱᒫᒋᒋᑳᑌᑭᐸᓐ ᐱᒫᑎᓯᐎᓐ, ᑯᒫ ᑲᔦ ᒋᓂᔑᐗᓈᒋᒋᑳᑌᓂᒃ? ᐅᑮᐃᓈᐞ᙮

ᒦᑕᔥ ᒥᓯᐌ ᑳᑮᐊᔨᓈᐱᒡ ᑲᑭᓇ ᐁᑮ ᑲᓇᐙᐸᒫᒡ ᐃᐃᒫ ᑳᐊᔮᓂᒡ ᒦᔥ ᑳᐃᓈᒡ ᐃᓂ ᐃᓂᓂᐗᓐ: ᓃᒥᓂᑫᓂᓐ᙮ ᒦᑕᔥ ᑳᐃᔑ ᓃᒥᓂᑫᓂᓂᒡ, ᐐᑫ ᐁᑮᒥᓄᐊᔮᓂᒃ ᐅᓂᒌᓂ᙮

ᒦᑕᔥ ᑳᐃᔑ ᒨᔥᑭᓀᔥᑳᑯᓂᒡ ᑭᒋ ᓂᔥᑳᑎᓯᐎᓐ ᐁᑮᐊᓂ ᒫᒌ ᑕᔑᑕᒥᓂᒡ ᐋᓃᓐ ᑫᑮ ᑑᑕᐙᐙᐸᓐ ᒋᓴᓲᓐ᙮

ᒦ ᐃᐌ ᐊᐲ ᒋᓴᔅ ᑳᑮᐃᔖᒡ ᐗᑭᑕᑎᓐ ᐁᑮᐊᑕᐎ ᐊᓇᒥᐋᒡ᙮ ᑲᐯᑎᐱᒃ ᑕᔥ ᐌᑎ ᑮᐊᔮ ᐁᑮᐊᓇᒥᐁᑕᐙᒡ ᑭᔐᒪᓂᑑᓐ᙮

ᐊᐲ ᑕᔥ ᐁᐊᓂ ᑮᔑᑲᓂᓂᒃ ᐅᑮᐊᑐᒫᐞ ᐯᔔ ᒋᐲᔖᓂᒡ ᐅᑭᑭᓄᐊᒪᐙᑲᓇᐞ᙮ ᒥᑖᔑᓃᔑᓐ 12 ᐁᑮᐅᑖᐱᓈᒡ ᐃᔑᓂᔕᐙᑲᓇᒃ ᑳᑮᐃᔑᓂᑳᓈᒡ᙮

ᒦᑕᔥ ᐅᐅ ᑳᐃᔑ ᓂᑳᓱᐙᒡ ᑳᑮᐅᓀᓂᓂᒻᑣ᙮ ᓵᐃᒪᓐ ᒦ ᐊᐌ ᐲᑕᕒ ᑳᑮᐃᔑᓂᑳᓂᑯᒡ ᒋᓴᓲᓐ᙮ ᐃᓂ ᑕᔥ ᑲᔦ ᓵᐃᒪᓐ ᐐᒋᑭᐌᓯᐗᓐ ᐁᑕᕒᐆ ᙮ ᐊᐊ ᑲᔦ ᒌᒥᔅ, ᒞᓐ ᑲᔦ, ᐱᓬᐊᑉ ᑲᔦ, ᐊᐊ ᑲᔦ ᐹᕒᑖᓬᐊᒥᔪ ᙮

ᒫᑎᔪ ᑕᔥ, ᐊᐊ ᑲᔦ ᑣᒪᔅ, ᒌᒥᔅ ᐌᑌᑌᒡ ᐋᓬᐃᐱᔭᓴᓐ, ᐊᐊ ᑲᔦ ᓵᐃᒪᓐ ᑳᑮ ᑕᑯᐃᓂᓐᒡ ᑳᐐᑲᑴ ᐋᒋᓭᑑᒡ ᐅᑭᒫᐎᐎᓐ᙮

ᐊᐊ ᑲᔦ ᒎᑕᔅ ᐌᑌᑌᒡ ᒌᒥᓴᓐ ᙮ ᐊᐊ ᑲᔦ ᑯᑕᒃ ᒎᑕᔅ ᐃᔅᑳᕒᐃᔭᑦ ᑳᑮᒪᒥᔑᒫᒡ ᒋᓴᓲᓐ᙮

ᐊᐲ ᑕᔥ ᒋᓴᔅ ᐁᐱ ᓃᓵᒪᒋᐌ ᐐᒌᐙᒡ ᐅᑎᔑᓂᔕᐙᑲᓇᐞ, ᒦ ᐃ ᑳᐊᓂ ᐃᔑ ᑭᐱᒋᑳᐸᐎᒡ ᐁᔑ ᑕᑕᒀᓂᒃ᙮ ᒦᑕᔥ ᐃᐃᒫ ᐋᐱᒋ ᑮᐹᑏᓄᐗᐞ ᑯᑕᒃ ᐅᑭᑭᓄᐊᒪᐙᑲᓇᐞ᙮ ᐋᐱᒋ ᑲᔦ ᐁᐹᑏᓄᓂᒡ ᐊᐎᔭᐞ ᐃᐃᒫ ᐁᑮᐊᔮᓂᒡ ᒥᓯᐌ ᒎᑏᔭ ᐁᑮ ᐱᐅᒌᓂᒡ, ᑲᔦ ᑕᔥ ᒉᕒᐆᓴᓬᐊᒥᕽ ᙮ ᐌᑎ ᑲᔦ ᑮᐱᐅᒌᐗᐞ ᓈᓀᐤ ᑭᒋᑲᒦᕽ ᐆᑌᓇᐗᓐ ᐁᔮᓂᑭᓐ ᐁᔑᓂᑳᑌᓂᑭᓐ ᑕᔭᕒ, ᐃᐃ ᑲᔦ ᓵᐃᑕᓐ ᙮

ᐅᑮᐱ ᐊᑕ ᐱᓯᑕᐙᐙᓐ ᒋᓴᓲᓐ, ᑲᔦ ᑕᔥ ᒋᒥᓍᒋᐃᑣ ᐋᓃᓐ ᑳᐃᔑ ᐋᑯᓯᐙᒡ᙮ ᒦᔥ ᑲᔦ ᐃᑭᐌᓂᐗᒃ ᑳᒪᒋᑑᑖᑯᐙᒡ ᒪᒋᐊᒑᑾᐞ ᑫᐐᓇᐙ ᑮᒥᓍᒋᐋᐗᒃ᙮

ᑲᑭᓇ ᑕᔥ ᐊᐎᔭᒃ ᐅᑮ ᑲᑴ ᓵᒥᓈᐙᓐ ᒋᓴᓲᓐ᙮ ᐋᓃᔥ ᐁᓵᒥᓈᐙᒡ ᒦ ᐃᒫ ᑳᐅᒌᒪᑲᓂᓂᒃ ᒪᔥᑲᐎᓰᐎᓐ ᑳᑮᐊᑕᐎᐃᑯᐙᒡ᙮

ᒦᑕᔥ ᒋᓴᔅ ᑳᐃᑭᑐᒡ ᐁᑲᓇᐙᐸᒫᒡ ᐅᑭᑭᓄᐊᒪᐙᑲᓇᐞ: ᑭᔕᐌᑖᑯᓯᒻ ᑮᓇᐙ ᑳᑭᑎᒫᑫᑕᒣᒃ ᑮᓇᐙ ᑭᑎᐱᓇᐌᐎᓯᒻ ᑭᔐᒪᓂᑑ ᐅᑑᑭᒫᐎᐎᓐ᙮

ᑭᔕᐌᑖᑯᓯᒻ ᑮᓇᐙ ᓅᑯᒻ ᑳᓅᑌᔅᑲᑌᔦᒃ, ᐱᒌᓇᒃ ᑭᑲ ᑌᐐᓯᓂᒻ᙮ ᑭᔕᐌᑖᑯᓯᒻ ᑮᓇᐙ ᓅᑯᒻ ᑳᒪᐎᔦᒃ, ᐱᒌᓇᒃ ᑭᑲ ᐹᐱᒻ᙮

ᑭᔕᐌᑖᑯᓯᒻ ᐊᐲ ᐊᐎᔭᒃ ᑮᔒᑫᓂᒥᓀᒀ, ᑲᔦ ᑕᔥ ᑮᐐᒌᐎᓯᓄᐎᓀᒀ, ᑮᒪᒋ ᐃᓂᓀᒀ ᑲᔦ, ᓅᒋᑯ ᑲᔦ ᑮᐃᑕᒧᐙᒡ ᑭᐐᓱᐎᓂᐙ ᐃᓂ ᐅᒋ ᐃᓂᓂ ᐅᑯᓯᓴᓐ᙮

ᒥᓉᑕᒧᒃ ᐊᐲ ᐅᐅᐌ ᐃᔑᓭᔦᒃ, ᑲᔦ ᑕᔥ ᒋᓃᒥᔦᒃ ᑫᐊᐲᒋ ᒌᑫᑕᒣᒃ ᐋᓃᔥ ᑭᒋ ᐅᑎᓯᐎᓐ ᑭᑲᓇᐌᑕᒫᑰᒻ ᑭᒋᑮᔑᑯᕽ᙮ ᐋᓃᔥ ᒦᐃᐌ ᐯᔑᑾᓐ ᑳᐱ ᑑᑕᐎᑣ ᐅᑫᑌ ᑭᒋᐊᔭᐋᒥᐙᐸᓃᐞ ᐃᑭᐌᓂᐗᒃ ᑳᑮ ᑲᓅᑕᒪᐙᓂᒡ ᑭᔐᒪᓂᑑᓐ᙮

ᐋᓃᓐ ᐄᑐᒃ ᑫᐊᐲᒋ ᑲᒀᑕᑫᑖᑯᓯᔦᒃ, ᑮᓇᐙ ᓅᑯᒻ ᑳᐌᓅᑎᓯᔦᒃ; ᐋᔕ ᑳᐌᑕᒃ ᐱᒫᑎᓯᐎᓐ ᐁᑮᐱ ᐊᔮᔦᒃ᙮

ᐋᓃᓐ ᐄᑐᒃ ᑫᐊᐲᒋ ᑲᒀᑕᑫᑖᑯᓯᔦᒃ ᑮᓇᐙ ᓅᑯᒻ ᑳᑌᐐᓯᓂᔦᒃ: ᐱᒌᓇᒃ ᐊᐲ ᑭᑲ ᓅᑌᔅᑲᑌᒻ᙮ ᐋᓃᓐ ᐄᑐᒃ ᑫᐊᐲᒋ ᑲᒀᑕᑫᑖᑯᓯᔦᒃ ᑮᓇᐙ ᓅᑯᒻ ᑳᐹᐱᔦᒃ: ᐱᒌᓇᒃ ᐅᔕ ᑭᑲ ᒨᑯᓀᒻ, ᑭᑲ ᒪᐎᒻ ᑲᔦ᙮

ᐋᓃᓐ ᐄᑐᒃ ᑮᓇᐙ ᑫᐊᐲᒋ ᑲᒀᑕᑫᑖᑯᓯᔦᒃ ᑲᑭᓇ ᐊᐎᔭᒃ ᒥᓄᑕᔑᒥᓀᒀ᙮ ᒦ ᐃ ᐄᑐᒃ ᐯᔑᑾᓐ ᑳᐃᓈᐙᒡ ᐅᑫᑌ ᑭᒋᐊᔭᐋᒥᐙᐞ ᑳᑮᐃᓍᓱᓂᒡ ᐁᑲᓅᑕᒪᐙᓂᒡ ᑭᔐᒪᓂᑑᓐ᙮

ᒦᑕᔥ ᐁᓂᓇᑰᒃ ᑳᐱᓯᑕᐎᔦᒃ: ᓵᑭᐃᑾᒃ ᐃᑭ ᑳᔒᑫᓂᒥᓀᒀ, ᒥᓄᑑᑕᐎᑾᒃ ᑲᔦ ᐃᑭ ᑳᓂᔥᑫᓂᒥᓀᒀ᙮

ᑮᔥᐱᓐ ᐊᐎᔭ ᐃᓂᒃ: ᑭᓇᑕᐌᓂᒥᓐ ᒋᒪᒋᓭᔭᓐ, ᑮᓐ ᑕᔥ ᑭᑲᐃᓈ: ᑭᓇᑕᐌᓂᒥᓐ ᑭᔐᒪᓂᑑ ᒋᔕᐌᓂᒥᒃ᙮ ᐊᓇᒥᐁᑕᒪᐎᑾᒃ ᐃᑭ ᑳᒪᒋᑑᑕᐎᓀᒀ᙮

ᑮᔥᐱᓐ ᐊᐎᔭ ᐸᓰᑴᑲᓈᒥᒃ ᐸᑭᑎᓇᒪᐤ ᐱᓵᓐ ᑲᔦ ᑴᑭᓇᑫ ᒋᐃᔑ ᐸᓰᑴᑲᓈᒥᒃ᙮ ᑮᔥᐱᓐ ᐊᐎᔭ ᒪᑲᒥᒃ ᑭᐱᓯᑲᐙᑲᓐ, ᐱᓵᓐ ᑲᔦ ᑭᑲ ᒦᓈ ᑭᐸᐸᑭᐗᔮᓐ᙮

ᒦᓐᔥ ᑲᑭᓇ ᐊᐎᔭ ᑫᑰᓐ ᑲᑴᒋᒥᒃ᙮ ᑮᔥᐱᓐ ᐊᐎᔭ ᒪᑲᒥᒃ ᑫᑰᓐ ᑳᑎᐯᑕᒪᓐ ᑫᑯ ᑮᐌ ᐊᑐᑕᒪᐙᑫᓐ᙮

ᐃᔑᑑᑕᒪᐎᑾᒃ ᑯᑕᒃ ᐊᐎᔭᒃ ᑳᐃᔑ ᐊᑕᐌᓂᒣᒀ ᒋᑑᑕᐎᓀᒀ᙮

ᑮᔥᐱᓐ ᐁᑕ ᐁᓵᑭᐁᒀ ᐃᑭᐌᓂᐗᒃ ᑳᓵᑭᐃᓀᒀ, ᐌᑯᓀᓐ ᑕᔥ ᑫᐅᒋ ᔕᐌᑖᑯᓯᔦᑭᐸᓐ? ᐃᓇᔥᑫ ᑫᐐᓇᐙ ᑳᒪᒋᑑᑕᒧᐙᒡ ᐅᓵᑭᐋᐙᓐ ᐃᓂ ᑳᓵᑭᐃᑯᐙᒡ᙮

ᑮᔥᐱᓐ ᑲᔦ ᒥᓄᑑᑕᐌᒀ ᐁᑕ ᐃᑭᐌᓂᐗᒃ ᑳᒥᓄᑑᑕᐎᓀᒀ ᐌᑯᓀᓐ ᑕᔥ ᑫᐅᒋ ᔕᐌᑖᑯᓯᔦᑭᐸᓐ? ᒦ ᓴ ᑫᐐᓇᐙ ᐯᔑᑾᓐ ᑳᒪᒋᑑᑕᒧᐙᒡ ᐁᔑᒋᑫᐙᒡ᙮

ᑮᔥᐱᓐ ᑲᔦ ᐊᐎᐁᒀ ᐁᑕ ᐃᑭᐌᓂᐗᒃ ᑳᑕᓀᓂᒣᒀ ᒋᑮᐌᓇᒪᐎᓀᒀ, ᐌᑯᓀᓐ ᑕᔥ ᑫᐅᒋ ᔕᐌᑖᑯᓯᔦᑭᐸᓐ᙮ ᒦᔥ ᑫᐎᓇᐙ ᑳᒪᒋᑑᑕᒧᐙᒡ ᐁᔑ ᐊᐎᐋᐙᒡ ᑯᑕᒃ ᑳᒪᒋᑑᑕᒥᓂᒡ ᐯᔑᑾᓐ ᒋᐃᔑ ᑮᐌ ᒦᓂᑣ ᒥᓂᒃ ᑳᑮᐊᐎᐃᐌᐙᒡ᙮

ᓵᑭᐃᑾᒃ ᐃᑕᔥ ᐃᑭ ᑳᔒᑫᓂᒥᓀᒀ, ᒥᓄᑑᑖᑫᒃ ᑲᔦ᙮ ᐱᓵᓐ ᑲᔦ ᐊᐎᐃᐌᒃ, ᑫᑯ ᑫᑰᓐ ᑮᐌ ᐊᑕᐌᑕᑫᒃ᙮ ᐃᐃ ᑕᔥ ᑭᑎᐸᐊᒫᑰᐎᓂᐙ ᑕᑭᒋ ᐌᓅᑕᓐ᙮ ᒦᔥ ᑫᐃᑰᔦᒃ ᐁᐅᓃᒑᓂᓯᒥᓀᒃ ᒫᐗᒡ ᑳᐃᔥᐯᑖᑯᓯᒡ ᑭᔐᒪᓂᑑ᙮ ᐐᓐ ᐄᑐᒃ ᑲᔦ ᑳᒥᓄᑑᑕᐙᒡ ᐊᐎᔭᐞ ᑳᑌᐱᓇᐌᐎᓯᓯᓂᒃ, ᐃᐃ ᑲᔦ ᑳᒪᒋ ᐃᔑᐌᐱᓯᓂᒡ᙮

ᑰᐹᑌᓂᒥᐌ ᑰᓯᐙ, ᒦᑕᔥ ᑫᑮᓇᐙ ᐃᔑ ᑰᐹᑌᓂᒥᐌᒃ᙮

ᑫᑯ ᐅᓇᑯᓈᑫᒀᓂᒃ ᐊᐎᔭᒃ, ᑳᐐᓐ ᐃᑕᔥ ᑭᔐᒪᓂᑑ ᑭᑲ ᐅᓈᑯᓂᑯᓰᐙ᙮ ᑫᑯ ᑲᔦ ᐃᓈᑫᒀᓂᒃ ᐊᐎᔭᒃ ᑭᔐᒪᓂᑑᓐ ᒋᓂᐴᒥᑯᐙᒡ, ᑳᐐᓐ ᐃᑕᔥ ᑫᑮᓐ ᑭᔐᒪᓂᑑ ᑭᑲ ᓂᐴᒥᑯᓰ᙮ ᐴᓀᑕᒪᐤ ᑯᑕᒃ ᐊᐎᔭᒃ, ᒦᑕᔥ ᑫᑮᓐ ᒋᐴᓀᑕᒪᐎᒃ ᑭᔐᒪᓂᑑ᙮

ᒦᑭᐌᒃ, ᒦᑕᔥ ᒋᑮᐌ ᒦᓂᑰᐎᓯᔦᒃ᙮ ᑕᒥᓄ ᒨᔥᑭᓀ ᐃᐃ ᑫᒦᓂᑰᔦᒃ, ᒋᑭᓂᑲᐎ ᐌᐱᓂᑳᑌᒃ, ᑲᔦ ᑕᔥ ᒋᒫᒫᑯᓂᑳᑌᒃ, ᒋᐅᓵᒪᔥᑭᓀᒃ ᐃᐃᐌ ᑳᔑᓇᐃᓂᑫᔦᒃ᙮ ᐋᓃᔥ ᒥᓂᒃ ᐃᑯ ᐊᐎᔭᒃ ᑳᑑᑕᒪᐌᒀ ᒦ ᐃᐌ ᑫᐐᓐ ᒥᓂᒃ ᑭᔐᒪᓂᑑ ᑫᑑᑕᒪᐎᓀᒃ᙮

ᒦᑕᔥ ᒋᓴᔅ ᐅᑮ ᐐᑕᒪᐙᐞ ᐅᐅᐌ ᐊᐌᒋᑫᐎᓐ: ᐅᑖ ᑲᔥᑭᑑᓐ ᐃᓇ ᐊᐎᔭ ᑳᐙᐱᓯᒃ ᒋᓃᑳᓃᑕᒪᐙᐸᓐ ᑯᑕᒃ ᐃᓂ ᑳᐙᐱᓯᓂᒃ? ᒥᒋᓃᔥ ᐄᑐᒃ ᑖᐲᑖᓂᑳᓀᓭᐗᒃ᙮

ᑭᑭᓄᐊᒪᐙᑲᓐ ᑳᐐᓐ ᓇᐗᒡ ᑭᑫᑖᓱᓰ ᐊᐲᒡ ᐐᓐ ᐃᓂ ᑳᑭᑭᓄᐊᒫᑯᒡ᙮ ᔖᑰᒡ ᑕᔥ ᐐᓐ ᐊᐊ ᑳᑭᑭᓄᐊᒪᐎᓐᒡ ᐊᐲ ᑌᑮᔑᑑᒡ ᐅᑭᑭᓄᐊᒫᑰᐎᓐ, ᒦᔥ ᐯᔑᑾᓐ ᑫᐐᓐ ᑫᐊᐲᒋ ᑭᑫᑖᓱᒡ ᑖᐱᔥᑰ ᐃᓂ ᑳᑭᑭᓄᐊᒫᑯᒡ᙮

ᐌᑯᓀᓐ ᐌᒋ ᑲᓇᐙᐸᑕᒧᐗᒡ ᑳᐱᓯᓂᒡ ᑮᒋᑭᐌᓯ ᐅᔥᑮᔑᑯᕽ, ᑮᓐ ᐃᑕᔥ ᐐᓐ ᐁᑭᑫᑕᓯᐗᓐ ᑭᒋᒥᑎᒃ ᐁᐊᔮᒃ ᑭᔥᑮᔑᑯᕽ?

ᐋᓃᓐ ᑕᔥ ᐌᒋ ᑲᔥᑭᑑᔭᓐ ᐁᐃᓇᒡ ᑮᒋᑭᐌᓯ: ᓃᒋᑭᐌᓯ ᐸᑭᑎᓂᔑᓐ ᒋᐅᑖᐱᓇᒫᓐ ᐃᐃᐌ ᑳᐱᓯᓂᔭᓐ, ᑮᓐ ᐃᑕᔥ ᐁᐙᐸᑕᓯᐗᓐ ᐃᐃ ᑭᒋᒥᑎᒃ ᑭᔥᑮᔑᑯᕽ ᑳᐊᔮᒃ? ᑮᓐ ᑳᒥᓍᑎᓰᑳᓱᔭᓐ ᐱᓇᒫ ᐅᑖᐱᓇᓐ ᐃᐃ ᒥᑎᒃ ᑭᔥᑮᔑᑯᕽ ᑳᐊᔮᒃ, ᒦᔥ ᐸᔦᔥ ᒋᐙᐱᔭᓐ ᒋᐅᑖᐱᓇᒧᐗᒡ ᑳᐱᓯᓂᒡ ᑮᒋᑭᐌᓯ ᐅᔥᑮᔑᑯᕽ᙮

ᑳᒥᓄᓂᑖᐎᑭᒡ ᒥᑎᒃ ᑳᐐᓐ ᒪᒋᒦᓂᐎᓰ᙮ ᑳᒪᒋᓂᑖᐎᑭᒡ ᒥᑎᒃ ᑳᐐᓐ ᐅᓂᑖᐎᑭᑑᓰᓇᓐ ᒥᓄᒦᓇᓐ᙮

ᐁᑕᔑᒡ ᒥᑎᒃ ᐅᒋ ᑭᑫᓂᒫᑲᓂᐎ ᐋᓃᓐ ᐁᔑᓈᑾᓂᓂᒃ ᐅᒦᓂᒪᓐ ᑳᓂᑖᐎᑭᑑᒡ᙮ ᑳᐐᓐ ᐯᒫᑎᓯᐙᒡ ᐅᑑᑎᓇᓰᓈᐙᓐ ᐱᒃ ᑎᓄᐎᒥᓇᓐ ᐃᐃᒫ ᑲᐎᒥᓇᑭᔒᐙᑎᑯᕽ, ᑯᒫ ᑲᔦ ᔔᒥᓈᑎᑯᕽ᙮

ᒥᓄᑫᑰᓐ ᐅᒌᒪᑲᓂᓂ ᐃᐃᒫ ᐅᐱᒫᑎᓯᐎᓂᕽ ᐊᐊᐌ ᐃᓂᓂ ᑳᒥᓄ ᐱᒫᑎᓯᒡ ᐋᓃᔥ ᑳᐃᔑ ᒨᔥᑭᓀᔥᑳᑯᒡ ᒥᓄ ᑫᑰᓐ ᐅᑌᐃᕽ ᓈᑾᓂᓂ᙮ ᒦᓇᐙ ᒪᒋ ᑫᑰᓐ ᑕᔥ ᐐᓐ ᐅᒌᒪᑲᓂᓂ ᐃᐃᒫ ᐊᐎᔭ ᑳᒪᒋ ᐱᒫᑎᓯᒡ ᐋᓃᔥ ᑳᐃᔑ ᒨᔥᑭᓀᔥᑳᑯᒡ ᒪᒋ ᑫᑰᓇᓐ ᐅᑌᐃᕽ ᑳᓈᑾᓂᓂᒃ ᐊᓃᔥ ᐃᓂᓂ ᐃᑭᑑᒪᑲᓂᓂ ᐅᑑᓐ ᑳᐃᔑ ᒨᔥᑭᓀᓂᒃ ᐅᑌᐃᕽ᙮

ᐌᑯᓀᓐ ᐌᒋ ᐃᔑᓂᑳᔑᔦᒃ ᑌᐯᒋᑫᔭᓐ, ᑌᐯᒋᑫᔭᓐ! ᐁᐃᔑᒋᑫᓯᐌᒃ ᐃᑕᔥ ᑳᐃᓂᓇᑰᒃ?

ᐊᐌᓀᓐ ᓴ ᐱᑯ ᑳᐱᓈᓯᑲᐎᒡ, ᑳᐃᔑᒋᑫᒡ ᐃᑕᔥ ᐋᓃᓐ ᐁᔑ ᓅᑕᕽ ᓂᑎᑭᑐᐎᓇᓐ, ᒦᔥ ᐅᐅ ᐁᔑᓈᑯᓯᒡ᙮

ᑖᐱᔥᑰ ᐃᓂᓂ ᑳᐅᔑᑑᒡ ᐙᑳᐃᑲᓐ, ᐊᓈᒥᕽ ᑳᐃᓈᓂᑫᒡ ᐁᔑ ᐊᓯᓃᑳᓂᒃ᙮ ᒦᔥ ᐃᐃᒫ ᑭᑕᓯᓃᕽ ᐁᔑ ᐅᓈᑯᓯᒋᑫᒡ᙮ ᐊᐲ ᑕᔥ ᓰᐱ ᑮᒨᔥᑲᐊᕽ, ᑳᐐᓐ ᒋᐗᑲᐎᓭᒃ ᐃᐃ ᐙᑳᐃᑲᓐ ᐊᐲ ᐋᓇᑮᐅᒋᒋᐲᒃ ᐋᓃᔥ ᑾᔭᒃ ᑮᐅᓇᑭᒋᑳᑌ᙮

ᐊᐊ ᑕᔥ ᐐᓐ ᑳᓅᑕᕽ ᓂᑎᑭᑐᐎᓇᓐ ᑳᐃᔑᒋᑫᓯᒃ ᐃᑕᔥ ᐁᑭᑐᐗᒃ, ᒦ ᐃ ᐁᔑᓈᑯᓯᒡ ᑖᐱᔥᑰ ᐃᓂᓂ ᑳᐅᓈᑯᓯᑑᒡ ᐙᑳᐃᑲᓐ ᐁᔑ ᐊᓯᓃᑳᓯᓂᓂᒃ᙮ ᐊᐲ ᑕᔥ ᑮᓂᑭᐲᒃ, ᑮᐊᓂ ᐅᒋᒋᐲᒃ ᐃᐃᐌ ᐙᑳᐃᑲᓐ ᔐᒫᒃ ᐃᑯ ᑕᑲᐎᓭ ᒋᐲᓯᓭᒃ᙮

ᐊᐲ ᒋᓴᔅ ᑳᑮᐃᔥᒀ ᐐᑕᒪᐙᒡ ᑲᑭᓇ ᐅᓄᐌᓂᐗᐞ ᐯᒫᑎᓯᓂᒡ ᑮᐃᔖ ᑲᐸᕒᓂᔭᒥᕽ ᐆᑌᓈᕽ᙮

ᑮᐊᔮᑯᐸᓐ ᐯᔑᒃ ᔑᒫᑲᓂᔒᐎᑭᒫ ᐁᑮᐊᔮᐙᒡ ᐊᓄᑮᐋᑲᓇᓐ ᐐᑫ ᐁᑮᑭᒋ ᓵᑭᐋᒡ, ᐐᑫ ᑕᔥ ᐁᑮᐋᑯᓯᓂᒡ ᐋᔕ ᑫᑳ ᒋᓂᐳᓂᒡ᙮

ᐊᐲ ᔑᒫᑲᓂᔒᐎᑭᒫ ᐁᓅᑕᕽ ᐯᔓ ᐁᑕᓈᒋᒥᒥᓐᒡ ᒋᓴᓲᓐ ᐅᑮᐃᔑᓂᔕᐙᐞ ᐋᓂᑕ ᑳᓃᑳᓀᑖᑯᓯᓂᒡ ᒎᐗᐞ ᒋᑲᑴᒋᒫᓂᒡ ᒋᓴᓲᓐ ᒋᐲᔖᓂᒡ ᒋᐱᒥᓍᒋᐋᓂᒡ ᐅᑕᓄᑮᐋᑲᓇᓐ᙮

ᐁᑮᐱ ᓈᓯᑲᐙᐙᒡ ᒋᓴᓲᓐ ᐁᓂᑯᒃ ᐅᑮ ᐸᑯᓭᓂᒫᐙᓐ: ᑌᐺ ᑌᐊᐲᑌᑖᑯᓯ ᐅᐅ ᒋᐃᔑᒋᑫᑕᒪᐗᒡ᙮

ᐋᓃᔥ ᐐᓐ ᓂᓵᑭᐃᑯᓈᓐ ᑳᒎᐎᐎᔮᕽ, ᐐᓐ ᑲᔦ ᑳᑮᐅᔑᑕᒪᐎᔭᒥᓐᒡ ᐊᓇᒥᐁᐎᑲᒥᑯᓂ, ᐅᑮᐃᓈᐙᓐ᙮

ᒦᑕᔥ ᒋᓴᔅ ᑳᑮᐊᓂ ᐐᒌᐙᒡ ᐋᔕ ᐯᔓ ᐁᐊᓂ ᐅᑎᑕᒥᓂᒡ ᐙᑳᐃᑲᓂᓂ᙮ ᒦᔥ ᔑᒫᑲᓂᔒᐎᑭᒫ ᑳᑮᐃᔑᓂᔕᐙᒡ ᓭᔮᑭ ᐐᒌᐙᒡ ᐅᐅ ᒋᐊᐎ ᐃᓈᓂᒡ: ᑌᐯᒋᑫᔭᓐ, ᑫᑯ ᐐᓐ ᑫᔮᐱ ᒥᑯᔥᑳᒋᐃᑎᓱᑫᓐ᙮ ᑳᐐᓐ ᐄᑐᒃ ᓂᑌᐸᑫᑖᑯᓯᓰ ᒋᑮ ᐲᑎᑫᔭᓐ ᐅᐅᒫ ᓂᐙᑳᐃᑲᓂᕽ᙮

ᑳᐐᓐ ᑲᔦ ᓂᑎᓀᓂᑎᓱᓰ ᐁᑌᐸᑫᑖᑯᓯᔮᓐ ᒋᑮᐱ ᓈᓯᑲᐎᓈᓐ᙮ ᒥᒋ ᐃᑭᑐᓐ ᐁᑕ, ᒦᔥ ᒋᒥᓄᐊᔮᒡ ᓂᑕᓄᑮᐋᑲᓐ᙮

ᒦ ᐃ ᑫᓃᓐ ᐁᔑᓈᑯᓯᔮᓐ ᐃᓂᓂ ᐁᑮᒦᔑᒡ ᑎᐯᒋᑫᐎᓐ ᓂᑑᑭᒫᒪᒃ ᐃᑕᔥ ᓂᑲᓇᐙᐸᒥᑰᒃ᙮ ᓂᑕᔮᐗᒃ ᑲᔦ ᔑᒫᑲᓂᔕᒃ ᑳᑲᓇᐙᐸᒪᒀ᙮ ᐅᐅ ᐯᔑᒃ ᑮᐃᓇᒃ: ᒫᒑᓐ, ᒦ ᐃ ᐁᔑᒫᒑᒡ᙮ ᒦᓇᐙ ᑯᑕᒃ ᑮᐃᓇᒃ: ᐲᔖᓐ, ᒦ ᐃ ᐁᔑ ᐲᔖᒡ᙮ ᓂᑕᓄᑮᐋᑲᓐ ᑲᔦ ᑮᐃᓇᒃ: ᐅᐅ ᐃᔑᒋᑫᓐ, ᒦ ᐱᑯ ᐃ ᐁᑑᑕᕽ᙮

ᒋᓴᔅ ᑕᔥ ᑮᒫᒪᑳᑌᑕᒻ ᐊᐲ ᑳᓅᑕᕽ ᐅᐅᐌᓂ᙮ ᐅᑮ ᑴᑭᑳᐸᐎᑕᐙᐞ ᐁᑮᐃᓈᒡ ᑳᐹᑏᓄᓂᒡ ᑳᐱᒥᓂᔕᐅᑯᒡ: ᑭᐐᑕᒪᐎᓂᓂᒻ, ᑳᐐᓐ ᐐᑳ ᐊᐎᔭ ᓂᐱᒥᑲᐙᓰ ᐅᐅ ᓇᑫ ᒋᔑ ᑌᐺᔦᑕᕽ ᐅᐅᒫ ᐃᔅᕒᐃᔭᓬ ᐊᑮᕽ᙮

ᐃᐃ ᑕᔥ ᑳᑮ ᐲᒋᓂᔕᐅᑣᐸᓐ ᐊᐲ ᐁᑮᐌᐙᒡ ᐅᐙᑳᐃᑲᓂᓃᕽ ᔑᒫᑲᓂᔒᐎᑭᒫᓐ, ᒦᔥ ᑳᑮᒥᑲᐙᐙᒡ ᐃᓂ ᐊᓄᑮᐋᑲᓇᓐ ᐁᒥᓄᐊᔮᓂᒡ᙮

ᐐᐸ ᓈᑫ ᒋᓴᔅ ᑮᐃᔖ ᐆᑌᓈᕽ ᓀᓐ ᐁᔑᓂᑳᑌᓂᒃ ᐁᐐᒌᐎᑯᒡ ᐅᑭᑭᓄᐊᒪᐙᑲᓇᐞ ᐃᐃ ᑲᔦ ᑳᐹᑏᓄᓂᒡ ᐯᒫᑎᓯᓂᒡ᙮

ᐋᔕ ᑕᔥ ᐁᐊᓂ ᐅᑎᑕᕽ ᐁᔑ ᐃᔥᒀᑌᒥᐗᓂᓂᒃ ᐃᐃ ᐆᑌᓇ, ᓇᐃᑖᒃ ᐅᑮᒣᒀᔥᑳᓐ ᐁᓇᐃᓂᑫᐎᓐᒡ᙮ ᐊᐊ ᓴ ᑕᔥ ᐃᓂᓂ ᑳᑮᓂᐳᒡ ᐄᓴᓐ ᑮᒥᒋ ᐯᔑᑯ ᐁᐅᑯᓯᓯᒥᑯᒡ ᑮᐙᒋᑴᐗᓐ᙮ ᑮᐹᑏᓄᐗᐞ ᐊᐎᔭᐞ ᐁᐐᒌᐎᑯᓂᒡ ᐆᑌᓈᕽ ᐌᒌᓂᒡ᙮

ᐊᐲ ᑕᔥ ᑳᑎᐯᒋᑫᒡ ᐁᐙᐸᒫᒡ ᐃᓂ ᐃᑴᐗᓐ ᐋᐱᒋ ᐅᑮ ᑰᐹᓯᓇᐙᓐ, ᒦᔥ ᑳᐃᓈᒡ: ᑫᑯ ᒪᐎᑫᓐ᙮

ᒦᑕᔥ ᐯᔓ ᑳᑮᐃᔖᒡ, ᐁᑮ ᓵᒥᓇᕽ ᐱᒫᑾᐃᑲᓐ᙮ ᒦᔥ ᑳᑮ ᑭᐱᒌᓂᒡ ᐃᐃ ᑳᐱᒥᐎᑑᓂᒡ ᐱᒫᑾᐃᑲᓐ᙮ ᒋᓴᔅ ᑕᔥ ᑮᐃᑭᑐ: ᐅᔥᑭᓃᑭ, ᐗᓂᔥᑳᓐ ᑭᑎᓂᓐ᙮

ᒦᑕᔥ ᐃᓂ ᑳᑮᓂᐳᓂᐸᓐ ᑮᐅᒋ ᒪᔮᐗᐱᐗᓐ, ᑲᔦ ᑕᔥ ᐁᑮᒫᒌ ᑲᑭᑐᓂᒡ᙮ ᒋᓴᔅ ᑕᔥ ᐅᑮᐃᔑ ᐸᑭᑎᓈᓐ ᐃᓂ ᐃᓂᓂᐗᓐ ᐁᔑ ᐊᔮᓂᒡ ᐅᒫᒫᓂ᙮

ᑲᑭᓇ ᑕᔥ ᐅᑮᒨᔥᑭᓀᔥᑳᑯᓈᐙ ᑯᑖᓀᑕᒧᐎᓐ, ᐁᑮᓇᓈᑯᒫᐙᒡ ᑭᔐᒪᓂᑑᓐ ᐁᑮ ᐃᑭᑐᐙᒡ: ᑭᔐᒪᓂᑑ ᑭᒦᓂᑯᓈᓐ ᑫᒋ ᐃᓀᑖᑯᓯᓐᒡ ᑫᓅᑕᒫᑯᒡ ᐁᔑ ᐊᔮᐗᕽ, ᒦᔥ ᑲᔦ ᑳᐃᑭᑐᐙᒡ: ᑭᔐᒪᓂᑑ ᑮᐲᔖ ᐁᐐ ᐱᒫᒋᐋᒡ ᐅᐱᒫᑎᓰᒪᐞ᙮

ᐃᐃ ᓴ ᑕᔥ ᒋᓴᔅ ᐁᓈᒋᒥᓐᒡ ᑮᓅᑖᑳᓂᐗᓂᓂ ᒥᓯᐌ ᒎᑏᔭ ᐊᑮᕽ, ᒥᓯᐌ ᑲᔦ ᐙᑳᔭᐄ ᐃᐃᒫ ᐊᑮᕽ᙮

ᐅᑭᑭᓄᐊᒪᐙᑲᓇᐞ ᐃᑕᔥ ᒞᓐ ᐅᑮᐐᑕᒫᑰᐞ ᑲᑭᓇ ᐅᓄᐌᓂᐗᓐ᙮

ᒦᔥ ᑳᑮᐊᑐᒫᒡ ᓃᔑᓐ 2 ᐅᑭᑭᓄᐊᒪᐙᑲᓇᐞ ᐁᑮᐃᔑᓂᔕᐙᒡ ᒋᐊᐎ ᑲᑴᒋᒫᓂᒡ ᑳᑎᐯᒋᑫᓂᒡ: ᑮᓐ ᐃᓇ ᐊᐊ ᑳᐃᑰᔭᓐ ᑳᐐᐱ ᑕᑯᔑᕽ, ᑯᒫ ᑲᔦ ᑯᑕᒃ ᐊᐎᔭ ᒋᐲᐃᑎᐸᓐ?

ᐊᐲ ᐁᐱ ᓈᓯᑲᐙᐙᒡ ᒋᓴᓲᓐ ᑮᐃᑭᑐᐗᒃ: ᒞᓐ ᓰᑲᐊᑖᑫᐎᓂᓂ ᓂᑮ ᐲᒋᓂᔕᐅᑯᓈᓐ ᒋᑲᑴᒋᒥᑰᔭᓐ ᑮᔥᐱᓐ ᑮᓐ ᐊᐊ ᑳᐃᑰᔭᓐ ᑳᐐᐱ ᑕᑯᔑᕽ ᑯᒫ ᑲᔦ ᑯᑕᒃ ᐊᐎᔭ ᒋᐲᐃᑎᐸᓐ?

ᒦᐃᐌ ᐊᐲ ᒋᓴᔅ ᑳᑮᒥᓍᒋᐋᒡ ᓃᐱᐗᐞ ᐯᒫᑎᓯᓂᒡ ᐁᑕᓱ ᐃᓈᐱᓀᓂᒡ, ᐋᓃᓐ ᑲᔦ ᐁᔑ ᐋᑯᓯᓂᒡ᙮ ᐃᐃ ᑲᔦ ᑫᑭᔥᑳᑯᓂᒡ ᒪᒋᐊᒑᑾᐞ᙮ ᑲᔦ ᑕᔥ ᐁᑮᐙᐱᐋᒡ ᓃᐱᐗᐞ ᐊᐎᔭᐞ ᑳᐙᐱᓯᓂᒃ᙮

ᐅᑮᐋᔑᑌᒫᐞ ᒞᓇᓐ ᑳᑮ ᐲᒋᓂᔕᐙᓂᒡ: ᑮᐌᒃ, ᐐᑕᒪᐎᒃ ᒞᓐ ᐌᑯᓀᓐ ᑳᑮᐙᐸᑕᒣᒃ, ᑳᑮᓅᑕᒣᒃ ᑲᔦ᙮ ᐁᐙᐱᐃᑣ ᐃᑭ ᑳᐙᐱᓯᒀ, ᐃᑭ ᑲᔦ ᐁᐱᒧᓭᐃᑣ ᑳᐱᒧᓭᓯᒀ, ᐃᑭ ᑕᔥ ᑲᔦ ᐌᒥᑮᐙᐱᓀᐙᒡ ᐁᐯᑭᐃᑣ᙮ ᐁᑮᐌ ᐱᒫᑎᓰᐃᑣ ᑲᔦ ᑳᓂᐳᐙᒡ, ᐃᑭ ᑲᔦ ᑫᑎᒫᑭᓯᐙᒡ ᐁᐐᑕᒪᐎᑣ ᒥᓍᒋᒧᐎᓐ᙮

ᐋᓃᓐ ᑫᐊᐲᒋ ᒥᓉᑕᒧᐙᒡ ᐃᑭᐌᓂᐗᒃ ᑳ ᐋᓉᑕᓯᒀ ᐁᑕᔑᒥᑰᐗᒃ᙮

ᐊᐲ ᑕᔥ ᒞᓇᓐ ᑳᑮ ᐲᒋᓂᔕᐙᒡ ᐁᑮᒫᒑᓂᒡ ᒋᓴᔅ ᐅᑮᒫᒌ ᐐᑕᒪᐙᐞ ᑳᐹᑏᓄᓂᒡ ᐊᐎᔭᐞ ᐁᑕᔑᒫᒡ ᒞᓇᓐ: ᐊᐲ ᑳᑮᐃᔖᔦᒃ ᒞᓐ ᑳᔑ ᐊᔮᒡ ᐱᑾᑕᑮᕽ ᐌᑯᓀᓐ ᑳᐃᓀᑕᒣᒃ ᒋᐙᐸᑕᒣᒃ, ᒋᐯᔑᑾᑭᑌᒃ ᐃᓇ ᒪᔥᑯᓯ ᐁᐗᑲᐙᓯᕽ?

ᐌᑯᓀᓐ ᑕᔥ ᑳᐊᑕ ᐙᐸᑕᒣᒃ ᑮ ᐃᔖᔦᒃ? ᐊᐊ ᐃᓇ ᐃᓂᓂ ᐌᓂᔑᔑᓂᓂᑭᓐ ᐅᑭᑭᔥᑭᑲᓇᓐ? ᒦᐗᒃ ᐄᑐᒃ ᐃᑭ ᑎᓄ ᑳᑭᒋ ᒥᓄᑯᓇᔦᐙᒡ ᑳᐌᓅᒋ ᐱᒫᑎᓯᐙᒡ ᐁᔑᑖᐙᒡ ᐅᑭᒫᐎᑲᒥᑯᕽ᙮

ᐐᑕᒪᐎᔑᒃ, ᐌᑯᓀᓐ ᑳᐊᑕ ᐙᐸᑕᒣᒃ ᐌᑎ ᑮᐃᔖᔦᒃ? ᐊᐎᔭ ᓇ ᑳᑲᓅᑕᒪᐙᒡ ᑭᔐᒪᓂᑑᓐ? ᒦᑕᔥ ᐁᔑ ᐐᑕᒪᐎᓇᑰᒃ, ᑭᑮᐙᐸᒫᐙ ᐄᑐᒃ ᐊᐎᔭ ᓇᐗᒡ ᑫᒋ ᐃᓀᑖᑯᓯᒡ ᐊᐲᒡ ᐐᓐ ᐃᑭ ᑫᓅᑕᒪᐙᐙᒡ ᑭᔐᒪᓂᑑᓐ᙮

ᒞᓐ ᐅᔕ ᑳᑕᔑᒥᓐᒡ ᐋᓃᓐ ᑭᒋᒪᓯᓇᐃᑲᓐ ᑳᐃᑭᑑᒪᑲᒃ: ᑭᔐᒪᓂᑑ ᐃᑭᑐ, ᓂᑲ ᐃᔑᓂᔕᐙ ᓂᑲ ᓅᒋᑫᑕᒫᑫ ᒋᓃᑳᓃᒡ ᒋᐊᐲᒋ ᐅᔑᑕᒪᐎᒃ ᑫᐊᓂ ᐃᔖᐗᒡ, ᐃᑭᑑᒪᑲᓐ᙮

ᑭᐐᑕᒪᐎᓂᓂᒻ ᑕᔥ ᒞᓐ ᒫᐗᒡ ᑭᒋ ᐃᓀᑖᑯᓯ ᐊᐲᒡ ᑯᑕᒃ ᐃᓂᓂᐗᒃ ᑳᑮᐱ ᐱᒫᑎᓯᐙᒡ᙮ ᔖᑰᒡ ᑕᔥ ᐊᐊ ᒫᐗᒡ ᐸᑮ ᑳᐃᓀᑖᑯᓯᒡ ᑭᔐᒪᓂᑑ ᐅᑎᐯᒋᑫᐎᓂᕽ ᓇᐗᒡ ᑭᒋ ᐃᓀᑖᑯᓯ ᐊᐲᒡ ᐐᓐ ᐃᓂ ᒞᓇᓐ, ᑮᐃᑭᑐ᙮

ᐊᐲ ᑕᔥ ᐃᑭ ᐯᒫᑎᓯᐙᒡ, ᐃᑭ ᑲᔦ ᑳᒫᐗᑑᓈᐙᒡ ᑎᐸᐃᑫᐎᔔᓂᔮᓐ ᐅᐅ ᐁᓅᑕᒧᐙᒡ, ᒦ ᐃ ᑳᑮ ᑭᑫᑕᒧᐙᒡ ᑭᔐᒪᓂᑑᓐ ᑾᔭᒃ ᐁᐃᓈᑯᓂᐌᓂᒡ, ᐁᑮ ᓰᑲᐊᑖᑯᐙᒡ ᒞᓇᓐ᙮

ᐃᑭ ᑕᔥ ᐯᕒᐊᓰᒃ ᐃᑭ ᑲᔦ ᑳᒥᓯᐌ ᑭᑫᑕᒧᐙᒡ ᐅᓇᔓᐌᐎᓐ ᐅᑮᐋᓉᑕᐙᐙᓐ ᑭᔐᒪᓂᑑᓐ ᐁᔑ ᐊᑕᐌᑕᒥᓂᒡ, ᑳᐐᓐ ᑲᔦ ᑮᐃᓀᑕᓰᐗᒃ ᒋᓰᑲᐊᑖᑯᐙᒡ ᒞᓇᓐ᙮

ᒋᓴᔅ ᑮᐊᓂ ᐃᑭᑐ: ᐋᓃᓐ ᐃᑕᔥ ᑫᐃᑭᑐᔮᐹᓐ ᐄᓴᓐ ᐁᐃᔑᓈᑯᓯᐙᒡ ᐅᑯ ᐃᓂᓂᐗᒃ ᓅᑯᒻ ᑳᐱᒫᑎᓯᐙᒡ? ᐋᓃᓐ ᑕᔥ ᐁᓀᑖᑯᓯᐙᒡ?

ᒦᔥ ᐁᓀᑖᑯᓯᐙᒡ ᑖᐱᔥᑰ ᐊᐱᓅᒌᔕᒃ ᑳᐊᐱᐙᒡ ᑳᔑ ᐊᑖᐙᓂᐗᓂᓂᒃ᙮ ᒦᔥ ᐅᐅ ᐁᔑ ᔖᔖᑯᐙᓂᑎᐙᒡ: ᑭᑮ ᑭᑐᒋᑫᑕᒫᑰᒻ ᐐᑎᑫᐎ ᑭᑐᒋᑫᐎᓐ ᑳᐐᓐ ᒋᑮᐅᒋ ᓃᒥᔦᒃ, ᑲᔦ ᑕᔥ ᓂᑮᓂᑲᒧᒥᓐ ᓇᐃᓂᑫᐎ ᓂᑲᒧᐎᓇᓐ ᑳᐐᓐ ᑕᔥ ᒋᑮᐐᒪᐎᔦᒃ, ᐃᑭᑐᐗᒃ᙮

ᐃᓇᔥᑫ ᒞᓐ ᓰᑲᐊᑖᑫᐎᓂᓂ ᑮᐲᔖᒡ ᑳᐐᓐ ᑮᐅᒋ ᐐᓯᓂᓰ, ᑳᐐᓐ ᑲᔦ ᑮᐅᒋ ᒥᓂᑴᓰ ᔔᒥᓈᐳ᙮ ᒦᑕᔥ ᑳᑮᐃᓀᒃ: ᐅᑭᑭᔥᑳᑰᓐ ᒪᒋᐊᒑᑾᓐ᙮

ᐃᓂ ᑕᔥ ᐐᓐ ᐃᓂᓂ ᐅᑯᓯᓴᓐ ᑮᐲᔖᐗᓐ ᐁᐱ ᐐᓯᓂᓂᒡ, ᑲᔦ ᑕᔥ ᐁᐱ ᒥᓂᑴᓂᒡ᙮ ᒦᔥ ᐁᓂᒣᒃ: ᑲᓇᐙᐸᒥᒃ ᐊᐊ ᒫᐗᒡ ᐁᓂᑖ ᐐᓯᓂᒡ, ᑲᔦ ᐁᓂᑖ ᒥᓂᑴᒡ, ᐁᓵᑭ ᐐᒌᐙᒡ ᑳᒫᐗᑑᓈᓂᒡ ᑎᐸᐃᑫᐎᔔᓂᔮᓐ, ᐃᐃ ᑲᔦ ᐅᒪᒋᑑᑕᒨᐞ, ᒦᐃ ᐁᓀᒃ᙮

ᐃᑭᐌᓂᐗᒃ ᑕᔥ ᑳᐅᑖᐱᓇᒧᐙᒡ ᑭᔐᒪᓂᑑᓐ ᐅᑲᑮᑖᐌᑕᒧᐎᓂᓂ, ᒦᐗᒃ ᐃᑭ ᑳᓈᑯᑑᐙᒡ ᐁᑾᔭᒀᓂᒃ, ᐅᑮᐃᓈᐞ᙮

ᐯᔑᒃ ᑕᔥ ᐯᕒᐊᓰᓐ ᐅᑮᐊᑐᒥᑰᓐ ᒋᐊᑕᐎ ᐐᒋ ᐐᓯᓃᒫᒡ᙮ ᒦᔥ ᒋᓴᔅ ᑳᑮ ᐲᑎᑫᒡ ᐯᕒᐊᓰᓐ ᐅᐙᑳᐃᑲᓂᓃᕽ ᐁᑮᐐᒋ ᐐᓯᓃᒫᒡ, ᐁᑮᐅᐱᒣᔑᕽ ᑕᐸᓯ ᑑᐳᐎᓈᑯᕽ᙮

ᐃᐃᒫ ᑕᔥ ᐆᑌᓈᕽ ᑮᐊᔮ ᐃᑴ ᒪᒋ ᐃᔑᐌᐱᓯᐎᓂᕽ ᐁᔑ ᐱᒫᑎᓯᒡ᙮ ᑮᓅᑕᒻ ᐄᓴᓐ ᐊᐊ ᐃᑴ ᒋᓴᓲᓐ ᐁᐐᓯᓂᓂᒡ ᐃᐃᒫ ᐯᕒᐊᓰᓐ ᐅᐙᑲᐃᑲᓂᓃᕽ᙮ ᒦᔥ ᑳᑮ ᐲᑑᒡ ᒥᓈᑯᐅᓐ ᐊᓯᓃᐎ ᐙᐹᐱᑯ ᐅᒨᑕᔮᐱᑯᕽ ᐁᒧᔥᑭᓀᓂᒃ᙮

ᑮᐲᔖ, ᐅᑖᓈᕽ ᐃᓇᑫ ᐁᑮᐃᔑ ᓃᐸᐎᒡ ᒋᓴᓲᓐ ᐁᔑ ᓯᑌᔑᓂᓂᒡ᙮ ᑮᒪᐎ, ᐅᑑᒋᑲᐙᐱᐎᓇᓐ ᐁᑮᐋᐸᒋᑑᒡ ᐁᑭᓰᐲᑭᓯᑌᓈᒡ᙮ ᐐᓂᓯᓴᓐ ᐃᑕᔥ ᐅᑮᐋᐸᒋᑑᓇᓐ ᐁᐹᑾᐊᕽ ᐅᓯᑎᓂ᙮ ᒦᔥ ᑳᐃᔑ ᐅᒌᒫᒡ ᐅᓯᑎᓃᕽ, ᐁᑮ ᓰᑭᓇᕽ ᑲᔦ ᒥᓈᑯᐅᓐ ᐅᓯᑎᓃᕽ᙮

ᐃᓂᐌᓂᐗᓐ ᐃᑕᔥ ᐯᕒᐊᓰᓐ ᒋᓴᔅ ᑳᑮᐊᑐᒥᑯᒡ ᒋᐐᒋ ᐐᓯᓃᒫᒡ ᐊᐲ ᐁᐙᐸᒫᓂᒡ ᐃᑴᐗᓐ ᐁᔑᒋᑫᓂᒡ ᑮᐃᓀᑕᒨᓐ: ᑮᔥᐱᓐ ᐗᐊ ᐃᓂᓂ ᑎᓄᐎᐸᓐ ᑭᔐᒪᓂᑑᓐ ᑳᑲᓅᑕᒪᐙᒡ ᐅᑖ ᑭᑫᓂᒫᓐ ᐊᐌᓀᓂᐎᓂᒡ ᐃᓂ ᐃᑴᐗᓐ ᑳᓵᒥᓂᑯᒡ᙮ ᐅᑖ ᑭᑫᓂᒫᓐ ᐄᑐᒃ ᐁᒪᒋ ᐃᔑ ᐌᐱᓯᓂᒡ᙮

ᒦᑕᔥ ᒋᓴᔅ ᐅᐅ ᑳᐃᓈᒡ: ᓵᐃᒪᓐ ᑫᑰᓐ ᑭᐐᐃᓂᓐ, ᐅᑮᐃᓈᓐ᙮ ᐊᐤ, ᐐᑕᒪᐎᔑᓐ ᐙᐃᔑᔭᓐ, ᐅᑮᐃᑰᓐ᙮

ᒦᔥ ᑳᐃᓈᒡ: ᑮᐊᔮᐗᒃ ᐄᓴᓐ ᓃᔑᓐ 2 ᐃᓂᓂᐗᒃ ᐁᑮᒪᓯᓇᐊᒪᐙᐙᒡ ᑳᒪᓯᓇᐃᑫᐃᐌᓂᒡ ᔔᓂᔮᓐ᙮ ᐊᐊ ᐯᔑᒃ ᐅᑮᒪᓯᓇᐊᒪᐙᓐ ᒥᓂᒃ ᓈᓍᒃ 500 ᐙᐹᐱᑯ ᔔᓂᔮᓴᐞ, ᐊᐊ ᑕᔥ ᑯᑕᒃ ᓈᓂᒥᑕᓇ 50 ᐁᑕ᙮

ᑳᐐᓐ ᑕᔥ ᐅᑮ ᑲᔥᑭᑑᓰᓈᐙ ᒋᑮᐌ ᑎᐸᐊᒪᐙᐙᒡ᙮ ᒦᔥ ᑳᒪᓯᓇᐃᑫᐃᐌᓂᒡ ᑳᑮ ᑭᓰᐊᒫᑯᐙᒡ ᐁᐴᓀᑕᒫᑯᐙᒡ ᐅᒪᓯᓇᐃᑫᐎᓂᐙᓐ᙮ ᐊᐌᓀᓐ ᐃᑕᔥ ᐁᓀᑕᒪᓐ ᒫᐗᒡ ᑫᓵᑭᐋᒡ, ᐅᑮᐃᓈᓐ᙮

ᒦᑕᔥ ᑳᐃᑯᒡ: ᒦ ᐃ ᐁᓀᑕᒫᓐ, ᐊᐊ ᒫᐐᓐ ᐯᔑᒃ ᓃᐱᐗᐞ ᑳᑮ ᐴᓀᑕᒪᐎᓐᒡ᙮ ᑭᑌᐺ, ᑮᐃᑭᑐ ᒋᓴᔅ᙮

ᒦᑕᔥ ᑳᐃᔑ ᑴᑭᑴᓂᒡ ᐁᑮ ᑲᓇᐙᐸᒫᒡ ᐃᓂ ᐃᑴᐗᓐ᙮ ᒦᔥ ᑳᐃᓈᒡ ᓵᐃᒪᓅᓐ: ᑭᐙᐸᒫ ᓇ ᐗᐊ ᐃᑴ? ᓂᑮᐱ ᐲᑎᑫ ᑭᐙᑳᐃᑲᓂᕽ ᑳᐐᓐ ᑕᔥ ᑭᑑᒋ ᒦᔑᓰ ᓂᐱ ᒋᑭᓰᐲᑭᓯᑌᔮᓐ᙮ ᐗᐊ ᑕᔥ ᐐᓐ ᐃᑴ ᐅᑭᓰᓯᐸᑑᓇᓐ ᓂᓯᑕᓐ ᐅᓯᐲᒀᓇᓐ ᐁᐋᐸᒋᑑᒡ, ᐐᓂᓯᓴᓐ ᑲᔦ ᐁᐹᑾᐃᑳᑫᒡ᙮

ᑳᐐᓐ ᑲᔦ ᑭᑮᐅᒋ ᐅᒌᒥᓰ ᐊᐲ ᑳᐲᑎᑫᔮᓐ᙮ ᐗᐊ ᑕᔥ ᐐᓐ ᐃᑴ ᑳᐐᓐ ᐅᒋ ᑭᐱᒌᓰ ᐁᐊᔪᒌᑕᕽ ᓂᓯᑎᓇᓐ ᐊᐲ ᑳᐲᑎᑫᐗᒃ᙮

ᑳᐐᓐ ᑲᓇᑫ ᑭᑮᓰᑭᓇᓰᓐ ᐋᓬᐃᑉ ᑎᓄ ᐱᒥᑌ ᓂᑎᒀᓂᕽ᙮ ᐗᐊ ᑕᔥ ᐐᓐ ᐃᑴ ᐅᑮ ᓰᑭᓈᓐ ᒥᓈᑯᐅᓐ ᓂᓯᑎᕽ᙮

ᑭᐐᑕᒪᐎᓐ ᑕᔥ ᐃᐃᐌᓂ ᐅᑭᒋ ᓵᑭᐃᐌᐎᓐ ᒦ ᐃᒫ ᐌᒋ ᑭᑫᑖᑾᓂᓂᒃ ᐁᑮ ᐴᓀᑕᒪᐎᓐᒡ ᓃᐱᐗᐞ ᐅᒪᒋᑑᑕᒧᐎᓇᓐ᙮ ᐊᐎᔭ ᑕᔥ ᐐᓐ ᐸᑮ ᐁᑕ ᑳᐴᓀᑕᒪᐎᓐᒡ, ᐸᑮ ᐁᑕ ᐅᓈᑯᑑᓐ ᓵᑭᐃᐌᐎᓐ, ᑮᐃᑭᑐ᙮

ᒦᔥ ᑳᐃᓈᒡ ᐃᓂ ᐃᑴᐗᓐ: ᑭᒪᒋᑑᑕᒧᐎᓇᓐ ᑭᐴᓀᑕᒫᑰ᙮

ᑯᑕᒃ ᑕᔥ ᐃᑭ ᑳᑮᐊᐱᐙᒡ ᑑᐳᐎᓈᑯᕽ ᑮᐊᔨᑎᐗᒃ: ᐊᐌᓀᓐ ᐃᑕᔥ ᐗᐊ ᑳᐴᓀᑕᒫᑫᒡ ᒪᒋᑑᑕᒧᐎᓇᓐ? ᑮᐃᑭᑐᐗᒃ᙮

ᒦᑕᔥ ᒋᓴᔅ ᑳᐃᓈᒡ ᐃᓂ ᐃᑴᐗᓐ: ᑭᑌᐺᐗᑫᑕᒧᐎᓐ ᑭᐱᒫᒋᐃᑰᓐ᙮ ᒦ ᐃ ᐱᓵᓐ ᐊᓂᔑ ᒫᒑᓐ, ᐅᑮᐃᓈᓐ᙮

ᓈᓈᑫ ᑕᔥ ᐁᐊᓂ ᐃᔑᓭᓂᒃ, ᒋᓴᔅ ᑮᐸᐹ ᐃᔖ ᐅᑌᓈᑳᕽ, ᐁᔑ ᑲᑲᐯᔑᐎᓐᒡ ᑲᔦ᙮ ᑮᐸᐹ ᐐᑕᒫᑫ ᒥᓍᒋᒧᐎᓐ, ᐃᐃᐌᓂ ᑲᔦ ᑭᔐᒪᓂᑑᓐ ᐅᑎᐯᒋᑫᐎᓂᓂ, ᐁᑮᐐᒌᐎᑯᒡ ᒥᑖᔑᓃᔑᓐ 12 ᐅᑭᑭᓄᐊᒪᐙᑲᓇᐞ᙮

ᐃᐃ ᑲᔦ ᐋᓂᑕ ᐃᑴᐗᐞ ᐅᑮ ᐱᒥᓂᔕᐅᑰᐞ ᑳᑮᐱ ᒥᓍᒋᐋᒡ ᐋᑯᓯᐎᓂᕽ, ᐋᓂᑕ ᑲᔦ ᒪᒋᐊᒑᑾᐞ ᑳᑮ ᓵᑭᒋᓂᔕᐊᒪᐙᒡ᙮ ᒦ ᐊᐌ ᐯᔑᒃ ᒣᕒᐃ ᒫᑲᑕᓬᐊᐎᑴ ᑳᐃᔑᓂᑳᓂᓐᒡ ᒦ ᐊᐌ ᓃᔣᓱ 7 ᒪᒋᐊᒑᑾᐞ ᑳᑮ ᓵᑭᒋᓂᔕᐊᒪᐎᓐᒡ᙮

ᐊᐊ ᑕᔥ ᐯᔑᒃ ᒍᐋᓇ ᑮᐃᔑᓂᑳᓱ, ᐅᓈᐯᒪᓐ ᑰᓴ ᑮᐃᔑᓂᑳᓱᐗᓐ ᑳᑮᐅᑭᒫᑲᑕᒥᓂᒡ ᐁᕒᐊᑕᓐ ᐅᑕᔮᐎᓂᓂ, ᐊᐊ ᑕᔥ ᑲᔦ ᓱᓵᓇ ᐁᔑᓂᑳᓱᒡ᙮ ᐃᑭ ᑕᔥ ᑲᔦ ᑯᑕᒃ ᐃᑴᐗᒃ ᑳᑮᐋᐸᒋᑑᐙᒡ ᐅᑕᔭᐄᒥᐙᓐ ᐁᐐᒋᐋᐙᒡ ᒋᓴᓲᓐ, ᐃᐃ ᑲᔦ ᐅᑭᑭᓄᐊᒪᐙᑲᓂᓂ᙮

ᐐᑫ ᑕᔥ ᑮᐹᑏᓄᐗᒃ ᐯᒫᑎᓯᐙᒡ ᐁᑮᐅᑸᓄᐃᑎᐙᒡ ᐁᑮᐱ ᐊᑕ ᐙᐸᒫᐙᒡ ᒋᓴᓲᓐ᙮ ᐯᐸᑳᓐ ᐆᑌᓈᕽ ᐁᑮᐱ ᐊᔪᒌᓂᒡ᙮ ᒦᔥ ᒋᓴᔅ ᑳᑮᐐᑕᒪᐙᒡ ᐅᐅ ᐊᐌᒋᑫᐎᓐ:

ᑮᐊᔮ ᓴ ᐃᓂᓂ ᐁᑮ ᑭᑎᑳᑕᕽ ᑭᑎᑳᓀᓴᓐ᙮ ᒣᒀ ᑕᔥ ᐁᐅᓶ ᐌᐱᓇᕽ ᑭᑎᑳᓀᓴᓐ, ᐋᓂᑕ ᒦᑲᓈᕽ ᑮᐃᔑ ᐸᑭᓯᓂᓂᐗᓐ᙮ ᒦᐗᓐ ᑕᔥ ᐃᓂ ᑳᑮ ᑕᑕᑯᑳᑌᑭᓐ, ᐱᓀᔒᔕᒃ ᑲᔦ ᐅᑮ ᑭᑖᓈᐙᓐ᙮

ᐋᓂᑕ ᑕᔥ ᑭᑎᑳᓀᓴᓐ, ᐁᔑ ᐊᓯᓃᑳᒃ ᑳᐃᔑ ᑕᐸᓴᑲᒥᑳᒃ ᑮᐃᔑ ᐸᑭᓯᓅᓐ᙮ ᐐᐸ ᑕᔥ ᑮᓂᑖᐎᑭᓅᓐ ᑭᑎᑳᓇᓐ᙮ ᒦᔥ ᑳᐊᓂ ᐃᔑ ᐹᑌᑭᓐ ᑳᐐᓐ ᐋᓃᔥ ᑮᓂᐲᐗᓯᓅᓇᓐ᙮

ᐋᓂᑕ ᑕᔥ ᑭᑎᑳᓀᓴᓐ ᐅᑳᐎᒥᓇᑲᔒᑳᕽ ᑮᐃᔑ ᐸᑭᓯᓅᓐ᙮ ᐅᑳᐎᒥᓇᑲᔒᓐ ᑕᔥ ᐁᐅᐱᑭᑭᓐ ᐅᑮ ᑭᐱᔥᑳᓈᐙᓐ ᐃᓂ ᑭᑎᑳᓀᓴᓐ, ᒦᔥ ᑳᐃᔑ ᓂᐴᒪᑲᓂᓂᑭᓐ᙮

ᐋᓂᑕ ᑕᔥ ᑭᑎᑳᓀᓴᓐ, ᒫᐗᒡ ᐃᑯ ᐁᔑ ᒥᓄᑲᒥᑳᒃ ᑮᐃᔑ ᐸᑭᓯᓅᓐ᙮ ᐐᑫ ᑕᔥ ᑮᒥᓄᑭᓅᓐ ᐃᓂ ᑭᑎᑳᓇᓐ᙮ ᓂᑯᑣᒃ 100 ᑕᓯᕽ ᑮᐅᑎᓂᑳᑌᐗᓐ ᒥᓂᒃ ᑳᑮ ᑭᑎᑳᑌᑯᐸᓀᓐ ᐃᓂ ᑭᑎᑳᓇᓐ᙮ ᒦᔥ ᑳᐊᓂ ᐃᑭᑐᒡ: ᐊᐌᓀᓐ ᓴ ᐱᑯ ᐌᓅᑕᒫᐎᓂᒡ ᑕᑲ ᑕᐱᓯᑕᒻ, ᑮᐃᑭᑐ᙮

ᒦᑕᔥ ᐅᑭᑭᓄᐊᒪᐙᑲᓇᐞ ᑳᑮ ᑲᑴᒋᒥᑯᒡ ᐋᓃᓐ ᐁᑭᑑᒪᑲᓂᓂᒃ ᐃᐃᐌᓂ ᐊᐌᒋᑫᐎᓐ᙮

ᒦᔥ ᒋᓴᔅ ᑳᐃᔑ ᓇᑴᑕᐙᒡ: ᑮᓇᐙ ᐅᔕ ᑭᐸᑭᑎᓇᒫᑰᒻ ᒋᑭᑫᑕᒣᒃ ᐃᓂ ᑳᑮ ᑭᑫᒋᑳᑌᓯᓄᑭᓐ ᑫᑰᓇᓐ ᑭᔐᒪᓂᑑ ᐅᑎᐯᒋᑫᐎᓐ ᑳᑕᔑᑌᑭᓐ᙮ ᐐᓇᐙ ᑕᔥ ᐐᓐ ᐊᐌᒋᑫᐎᓇᓐ ᓂᑖᐸᒋᑖᐙᓇᓐ ᐁᑲᓅᓇᒀ: ᒥᓴᐙ ᐋᓇ ᐃᓈᐱᐙᒡ, ᑳᐐᓐ ᐙᐱᓰᐗᒃ; ᒥᓴᐙ ᐋᓇ ᓅᑕᒧᐙᒡ, ᑳᐐᓐ ᓂᓯᑐᑕᓰᐗᒃ᙮

ᒦᐅᐌ ᐁᑭᑑᒪᑲᒃ ᐅᐅ ᐊᐌᒋᑲᓐ, ᐃᐃ ᓴ ᑭᑎᑳᓀᔅ, ᒦ ᐃᐌᓂ ᑭᔐᒪᓂᑑ ᐅᑎᑭᑐᐎᓐ᙮

ᐊᐎᔭ ᑳᓅᑕᕽ ᐁᑎᐹᑐᑌᓂᒃ ᑭᔐᒪᓂᑑᓐ ᐅᑎᐯᒋᑫᐎᓂᓂ, ᐁᓂᓯᑐᑕᓯᒃ ᐃᑕᔥ, ᒦ ᑖᐱᔥᑰ ᐁᔑᓈᑯᓯᒡ ᐃᓂ ᑳᑮ ᐸᑭᓯᑭᓐ ᑭᑎᑳᓀᓴᓐ ᐃᐃᒫ ᒦᑲᓈᕽ᙮ ᒪᒋᐊᔭᐋ ᐱᑕᑯᔑᓐ ᐁᐅᑖᐱᓇᕽ ᐃᓂ ᐋᔕ ᑳᑮ ᑭᑎᑳᑌᓂᑭᓐ ᐅᑌᐃᒫᕽ ᐊᐎᔭᓐ ᒋᑌᐺᑕᓯᓂᒃ, ᑲᔦ ᑕᔥ ᒋᐱᒫᒋᐋᓯᐎᒥᓐᒡ᙮

ᐃᓂ ᑕᔥ ᑳᑮ ᐸᑭᓯᑭᓐ ᑭᑎᑳᓀᓴᓐ ᑳᔑ ᐊᓯᓃᑳᒃ, ᒦ ᐃ ᐁᔑᓈᑯᓯᒡ ᐊᐊ ᔐᒫᒃ ᑳᐅᑖᐱᓇᕽ ᑭᔐᒪᓂᑑ ᐅᑎᐹᒋᒧᐎᓐ ᐊᐲ ᐁᓅᑕᕽ, ᐋᐱᒋ ᐁᒥᓉᑕᕽ᙮ ᑳᐐᓐ ᐃᑕᔥ ᐙᓴ ᒋᑯᑖᐎᑮᕽ᙮ ᐋᐱᒋ ᑕᔥ ᐊᒋᓇ ᐁᑕ ᑌᐺᑕᒻ᙮ ᐊᐲ ᑕᔥ ᑯᒋᐃᑰᐎᓯᐎᓐ ᐁᐅᑎᓯᑯᒡ, ᒦ ᐃ ᐁᔑ ᐸᑭᒌᒡ᙮

ᐃᓂ ᑕᔥ ᑳᑮ ᐸᑭᓯᑭᓐ ᑭᑎᑳᓀᓴᓐ ᑳᔑ ᐅᑳᐎᒥᓇᑲᔒᑳᒃ, ᒦ ᐃ ᐁᔑᓈᑯᓯᒡ ᐊᐊ ᑳᓅᑕᕽ ᑭᔐᒪᓂᑑ ᐅᑎᐹᒋᒧᐎᓐ᙮ ᐁᐊᓂ ᐱᒫᑎᓯᒡ ᐃᑕᔥ ᐅᓵᒻ ᐁᐅᒑᓂᒣᑕᕽ, ᐅᓵᒻ ᑲᔦ ᐁᓵᑭᑑᒡ ᐌᓅᑎᓯᐎᓐ, ᐃᐃᐌᓂ ᑲᔦ ᐊᑮᐎ ᒌᑫᑕᒧᐎᓐ, ᒦ ᐃ ᑳᐐᓐ ᒋᓂ ᑮᔑᑭᒡ᙮

ᐃᓂ ᑕᔥ ᑳᑮ ᐸᑭᓯᑭᓐ ᑭᑎᑳᓀᓴᓐ ᐃᐃᒫ ᑳᔑ ᒥᓄᑲᒥᑳᒃ ᒦ ᐃ ᐁᔑᓈᑯᓯᒡ ᐊᐎᔭ ᑳᓅᑕᕽ ᑭᔐᒪᓂᑑ ᐅᑎᐹᒋᒧᐎᓐ᙮ ᒦᐗᒃ ᐃᑭ ᐌᐌᓂ ᑳᑭᒋᐌᑕᒧᐙᒡ, ᑳᒥᓄ ᑲᓇᐌᑕᒧᐙᒡ ᑲᔦ ᐅᑌᐃᐙᕽ᙮ ᐁᔕᔒᐯᑕᒧᐙᒡ ᐃᑕᔥ, ᒦ ᐃ ᑳᐅᒋ ᓂᑖᐎᑭᑑᐙᒡ ᔒᐎᒦᒋᒻ᙮

ᒦᑕᔥ ᐅᐅ ᒋᓴᔅ ᑳᐊᓂ ᐃᑭᑐᒡ: ᑳᐐᓐ ᐊᐎᔭ ᐅᑕᑑᓰᓐ ᐙᓴᑯᓀᒋᑲᓐ ᐊᓈᒥ ᐊᑭᑯᕽ, ᑯᒫ ᑲᔦ ᐊᓈᒥ ᓂᐯᐎᓈᑯᕽ᙮ ᐗᑭᒋ ᐙᓴᑯᓀᒋᑲᓈᑯᕽ ᐅᔕ ᐃᔑ ᐸᑭᑎᓂᑳᑌ ᐃᐃ ᐙᓴᑯᓀᒋᑲᓐ, ᐃᑭ ᑳᐲᔖᐙᒡ ᒋᐙᐸᑕᒧᐙᒡ ᐁᐙᓴᑯᓀᓂᒃ᙮

ᑲᑭᓇ ᑫᑰᓐ ᑳᑳᒋᑳᑌᒃ, ᒦ ᐃᐌ ᐱᒌᓇᒃ ᒋᒧᔐᔮᐸᒋᑳᑌᒃ᙮ ᑮᔥᐱᓐ ᑲᔦ ᐋᓇᑮᐊᑾᓇᐃᑳᑌᑭᐸᓐ ᑫᑰᓐ, ᒥᓴᐙ ᑕᓈᑾᓐ ᐙᓭᔮᕽ᙮

ᐊᔮᒀᒥᓯᒃ ᐃᑕᔥ ᐋᓃᓐ ᐁᔑ ᐱᓯᑕᒣᒃ᙮ ᐊᐎᔭ ᓴ ᑫᑰᓂᓂ ᑳ ᐊᔮᒡ, ᑕᒦᓈ ᑫᑰᓐ ᐊᐗᔑᒣ᙮ ᐊᐊ ᑕᔥ ᐐᓐ ᑫᑰᓂᓂ ᑳ ᐊᔮᓯᒃ, ᒥᓴᐙ ᑯ ᐸᑮ ᑫᑰᓀᓯᓂ ᐁᔮᒡ ᑕᐅᑖᐱᓇᒪᐙ᙮

ᒋᓴᔅ ᑕᔥ ᐅᒫᒫᓐ, ᐐᒋᑭᐌᔭᐞ ᑲᔦ ᑮᐱ ᑕᑯᔑᓅᐞ ᐁᐐᐙᐸᒥᑯᒡ, ᑳᐐᓐ ᑮᑲᔥᑭᐅᓰᐗᐞ ᐅᓵᒻ ᐋᓃᔥ ᑮᐹᑏᓄᐗᐞ ᐊᐎᔭᐞ᙮

ᐯᔑᒃ ᐃᑕᔥ ᐊᐎᔭᓐ ᐅᑮᐃᑰᓐ: ᑕᑲ ᐱᓇᒫ, ᑭᒫᒫ, ᑮᒋᑭᐌᔭᒃ ᑲᔦ ᐊᑾᒌᕽ ᓃᐸᐎᐗᒃ ᐁᐐᐙᐸᒥᒀ, ᐅᑮᐃᑰᓐ᙮

ᐅᐅ ᑕᔥ ᒋᓴᔅ ᑮᐃᔑᓇᑴᑕᒻ: ᒦᐗᒃ ᐅᔕ ᐅᑯ ᓂᒫᒫ, ᓃᒋᑭᐌᔭᒃ ᑲᔦ ᑳᐃᔑᒋᑫᐙᒡ ᐋᓃᓐ ᐁᔑᓅᑕᒧᐙᒡ ᑭᔐᒪᓂᑑᓐ ᐁᑭᑐᓂᒡ᙮ ᐃᑭ ᐅᔕ ᑳᓇᐃᑕᐙᐙᒡ ᑳᐃᔑᒋᑫᐙᒡ ᑲᔦ ᐁᑭᑐᓂᒡ ᑭᔐᒪᓂᑑᓐ, ᒦ ᐅᔕ ᐊᐌ ᓂᒫᒫ, ᓃᒋᑭᐌᔭᒃ ᑲᔦ᙮

ᐋᐱᑎᕽ ᑕᔥ ᐁᑮᔑᑲᓂᓂᒃ ᒋᓴᔅ ᑮᐴᓯ ᒌᒫᓐ ᐁᑮᐐᒌᐎᑯᒡ ᐅᑭᑭᓄᐊᒪᐙᑲᓇᐞ᙮ ᒦᔥ ᑳᐃᓈᒡ: ᐊᐤ, ᑕᑲ ᐃᔖᑖ ᐌᑎ ᐊᑳᒥᕽ, ᐅᑮᐃᓈᐞ᙮ ᒦᔥ ᑳᐃᔑ ᐋᔕᐗᐊᒧᐙᒡ᙮

ᒣᒀ ᑕᔥ ᐁᐱᒫᔑᐙᒡ ᒋᓴᔅ ᑮᓂᐹ ᐲᑑᓇᒃ᙮ ᒦᑕᔥ ᑫᑕᑐ ᑮᑭᒋ ᐸᑲᒫᓂᒪᓐ ᐁᑮᑭᒋ ᒪᒫᑳᔥᑳᓂᒃ᙮ ᑮᓵᓰᑲᐅᑯᐗᒃ ᐁᑮᐊᓂ ᒨᔥᑭᓀᐲᒃ ᐃᐃ ᒌᒫᓐ᙮ ᑲᑭᓇ ᑮᓇᓃᓵᓂᓯᐗᒃ᙮

ᑮᐃᔖᐗᒃ ᑕᔥ ᐁᔑ ᓂᐹᓂᒡ ᒋᓴᓲᓐ ᐁᑮᐊᒪᒋᐋᐙᒡ ᐁᐃᓈᐙᒡ: ᐅᑭᑭᓄᐊᒫᑫ ᐋᔕ ᑫᑳ ᓂᑲ ᓂᓵᐹᐌᒥᓐ, ᐅᑮᐃᓈᐙᓐ᙮ ᒋᓴᔅ ᑕᔥ ᑮᐸᓯᑸ ᐁᑮ ᑲᓅᑕᕽ ᑭᒋ ᓅᑎᓐ, ᓂᐲᓂ ᑲᔦ ᑫᒋ ᒪᒫᑳᔥᑳᓂᒃ᙮ ᒦᑕᔥ ᑳᐊᓂ ᐃᔑ ᐊᓍᓅᐌᓂᒃ, ᐐᑫ ᑕᔥ ᑮᐊᓍᑎᓐ᙮

ᒦᔥ ᑳᐃᓈᒡ ᐅᑭᑭᓄᐊᒪᐙᑲᓇᐞ: ᐋᑎ ᑕᔥ ᐃᐃ ᑭᑌᐺᑕᒧᐎᓂᐙ? ᐐᑫ ᑕᔥ ᑮᒫᒪᑳᑌᑕᒨᐞ, ᐁᑮ ᓭᑭᓯᓂᒡ ᐁᑮᐊᔨᑎᓂᒡ: ᑳᓇᑲ ᐊᐌᓀᓐ ᑌᓄᐎᑴᓐ ᐗᐊ ᐃᓂᓂ᙮ ᐁᑲᓅᑕᕽ ᑭᒋ ᓅᑎᓐ, ᑳᒪᒫᑳᔥᑳᓂᒃ ᑲᔦ, ᒦᔥ ᐁᔑ ᓇᐃᑖᑯᒡ!

ᒦᑕᔥ ᑳᐃᔑ ᐋᔕᐗᐊᒧᐙᒡ ᐃᐃ ᑳᓬᐊᓬᐄᐎ ᓵᑲᐃᑲᓐ, ᐁᑮᐃᔑ ᒥᔕᑳᐙᒡ ᐃᐃᒫ ᑫᕒᐊᓵᐗᑮᕽ ᙮

ᒋᓴᔅ ᑕᔥ ᐁᐱ ᑲᐹᒡ, ᐅᑮᐱ ᐊᑕ ᓇᑭᔥᑳᑰᓐ ᐯᔑᒃ ᐃᓂᓂᐗᓐ ᐁᑭᑭᔥᑳᑯᓂᒡ ᒪᒋᐊᒑᑾᓐ ᐃᐃᒫ ᐆᑌᓈᕽ ᐁᐅᒌᓂᒡ᙮ ᐋᔕ ᑭᓉᔥ ᐁᑮᐱ ᐅᒋ ᑭᑭᑯᓇᔦᓯᓂᒃ, ᑳᐐᓐ ᑲᔦ ᐙᑳᐃᑲᓂᕽ ᑮᐃᔑᑖᓰᐗᓐ᙮ ᒌᐯᑲᒥᑯᕽ ᑮᐃᔑᑖᐗᓐ, ᐁᔑ ᓇᐃᓂᒥᓐᒡ ᑳᓂᐳᓂᒡ ᑮᐃᔑᑖ᙮

ᐊᐲ ᑕᔥ ᐊᐊ ᐃᓂ ᐁᐙᐸᒫᒡ ᒋᓴᓲᓐ ᐁᐲᑐᐌᒡ ᑮᐃᔑ ᔖᑯᐌ: ᑮᓐ ᒋᓴᔅ ᐌᑯᓯᓯᒥᒃ ᑭᔐᒪᓂᑑ ᒫᐗᒡ ᑳᐃᔥᐯᑖᑯᓯᒡ᙮ ᐋᓃᓐ ᐙᑑᑕᐎᔭᓐ? ᑭᐸᑯᓭᓂᒥᓐ ᒋᑲᒀᑕᑭᐃᓯᐗᓐ, ᐅᑮᐃᑰᓐ᙮

ᒋᓴᔅ ᐄᑐᒃ ᐅᑮ ᑲᓅᓈᓐ ᐃᓂ ᒪᒋᐊᒑᑾᓐ ᒋᓵᑭᒋ ᓇᑲᓈᓂᒡ ᐃᓂ ᐃᓂᓂᐗᓐ᙮ ᒨᔕᒃ ᐁᑮᐅᑎᑎᓂᑯᓂᒡ, ᒨᔕᒃ ᑲᔦ ᐁᑮ ᑲᓇᐌᒋᑲᓂᐎᓂᒡ᙮ ᑲᔦ ᑕᔥ ᐁᑮᒪᒫᒋᑾᐱᓂᒥᓐᒡ ᓴᑳᐹᓇᓐ ᐁᐋᐸᑕᓂᓂᑭᓐ, ᐁᑮ ᑭᒋᐅᓯᑌᐅᒥᓐᒡ ᑲᔦ ᒥᑎᑯᕽ᙮ ᒨᔕᒃ ᐃᑕᔥ ᐅᑮ ᐲᑯᐱᑑᓂ᙮ ᒪᒋᐊᒑᑾᓐ ᐁᑮᐃᔑ ᐐᑯᔥᑳᐃᑯᓂᒡ ᐱᑾᒐᔭᐄᕽ᙮

ᒋᓴᔅ ᑕᔥ ᐅᑮᐃᔑ ᑲᑴᒋᒫᓐ: ᐋᓃᓐ ᐁᔑᓂᑳᓱᔭᓐ? ᒦᔥ ᑳᐃᑯᒡ: ᐅᐹᑏᓄ ᓂᑎᔑᓂᑳᔅ, ᐋᓃᔥ ᓂᐹᑏᓄᒥᓐ, ᐅᑮᐃᑰᓐ᙮

ᒋᓴᔅ ᑕᔥ ᐅᑮ ᐸᑯᓭᓂᒥᑰᐞ ᒋᐃᔑᓂᔕᐙᓯᒃ ᑳᔑ ᐐᐹᓂᒃ ᑳᔑ ᒥᔕᑮᔮᓯᓂᓂᒃ᙮

ᐃᐃᒫ ᑕᔥ ᓀᐗᑕᑎᓐ ᑮᐹᑏᓄᐗᒃ ᑰᑰᔕᒃ ᐁᑮᐅᑕᒋᑫᐙᒡ᙮ ᐅᑮ ᐸᑯᓭᓂᒥᑰᐞ ᐃᑕᔥ ᒋᓴᔅ ᒋᐸᑭᑎᓈᒡ ᐃᐃ ᒪᒋᐊᒑᑾᐞ ᐃᐃᒫ ᑰᑰᔑᕽ ᒋᔑ ᐲᑎᑫᔥᑳᓂᒡ᙮ ᒦᔥ ᑳᑮ ᐸᑭᑎᓈᒡ᙮

ᒦᑕᔥ ᑳᐃᔑ ᓇᑲᓈᓂᒡ ᐃᓂ ᐃᓂᓂᐗᓐ, ᐁᑮᐊᓂ ᐃᔑ ᐲᑎᑫᔥᑲᐙᓂᒡ ᐃᐃ ᑰᑰᔕᐞ᙮ ᒦᑕᔥ ᑲᑭᓇ ᑰᑰᔕᒃ ᐃᐃᒫ ᑳᐃᔑ ᓈᓯᐲᐸᐃᑎᐙᒡ ᐁᔑ ᑮᔥᑳᒪᑎᓈᓂᒃ ᐁᑮ ᐸᑯᐲᐸᐃᑎᐙᒡ ᓵᑲᐃᑲᓃᕽ᙮ ᑲᑭᓇ ᑕᔥ ᑮᓂᓵᐹᐌᐗᒃ᙮

ᐃᑭᐌᓂᐗᒃ ᐃᑕᔥ ᑫᓇᐌᓂᒫᐙᒡ ᑰᑰᔕᐞ ᐁᐙᐸᑕᒧᐙᒡ ᐅᐅ, ᑮᒫᒌᐸᐃᑎᐗᒃ ᐁᑮᐊᐎ ᐸᐹ ᑎᐹᒋᒧᐙᒡ, ᐆᑌᓈᑲᕽ, ᐃᐃᒫ ᑲᔦ ᐙᑳᔭᐄ ᐊᑮᕽ᙮

ᐯᒫᑎᓯᐙᒡ ᑕᔥ ᑮᐃᔖᐗᒃ ᐁᑮᐊᑕ ᐙᐸᑕᒧᐙᒡ ᐋᓃᓐ ᑳᐃᓇᑲᒥᑲᓂᓂᒃ᙮ ᐅᑮᐱ ᓈᓯᑲᐙᐙᓐ ᒋᓴᓲᓐ, ᐅᑮᐙᐸᒫᐙᓐ ᑲᔦ ᐃᓂ ᐃᓂᓂᐗᓐ ᑳᑮ ᑭᑭᔥᑲᐙᓂᐸᓐ ᐃᓂ ᒪᒋᐊᒑᑾᐞ ᐁᓇᒪᑕᐱᓂᒡ ᐁᔑ ᓯᑌᑳᐸᐎᓂᒡ ᒋᓴᓲᓐ᙮ ᑮᑭᑭᑯᓇᔦᐗᓐ, ᑾᔭᒃ ᐁᑮᐃᓀᑕᒥᓂᒡ᙮ ᒦᔥ ᑲᑭᓇ ᑳᑮ ᓭᑭᓯᐙᒡ᙮

ᒦᑕᔥ ᐃᑭ ᑳᑮᐙᐸᑕᒧᐙᒡ ᐅᐅ ᐁᐃᓇᑲᒥᑲᓂᓂᒃ ᐅᑮ ᑎᐹᒋᒫᐙᓐ ᐃᓂ ᐃᓂᓂᐗᓐ ᑳᑮ ᑭᑭᔥᑲᐙᓂᐸᓐ ᒪᒋᐊᒑᑾᓐ ᐋᓃᓐ ᑲᔦ ᑳᐃᔑ ᐱᒫᒋᐃᒥᓐᒡ᙮

ᒦᑕᔥ ᑲᑭᓇ ᐃᐃᒫ ᑳᑮᐊᔮᓂᒡ ᑫᕒᐊᓵ ᐊᑮᕽ ᑳᑮᐱ ᑲᓅᓂᑯᒡ ᒋᐊᓂ ᒫᒑᒡ, ᐅᓵᒻ ᐋᓃᔥ ᑮᑭᒋ ᓭᑭᓯᐗᐞ᙮ ᒦᑕᔥ ᒋᓴᔅ ᑳᐃᔑ ᐴᓯᒡ ᒌᒫᓐ ᐁᑮᐊᓂ ᒫᒑᒡ᙮

ᒋᓴᔅ ᑕᔥ ᐅᑮᐱ ᐸᑯᓭᓂᒥᑰᓐ ᐃᓂ ᐃᓂᓂᐗᓐ ᒪᒋᐊᒑᑾᐞ ᑳᑮᐅᒋ ᓵᑭᒋᓂᔕᐅᒥᓐᒡ ᐅᐱᒫᑎᓯᐎᓂᓃᕽ ᐁᑮᐃᑯᒡ: ᑕᑲ ᐸᑭᑎᓂᔑᓐ ᒋᐐᒌᐎᓈᓐ, ᐅᑮᐃᑰᓐ᙮ ᒋᓴᔅ ᑕᔥ ᐅᑮᒫᒋᓂᔕᐙᓐ ᐁᑮᐃᓈᒡ:

ᒫᒑᓐ ᐊᓂᑮᐌᓐ, ᒋᓂ ᐐᑕᒫᑫᔭᓐ ᐋᓃᓐ ᑭᔐᒪᓂᑑ ᑳᐃᔑᒋᑫᑕᒪᐎᒃ, ᐅᑮᐃᓈᓐ᙮ ᒦᑕᔥ ᑳᐊᓂ ᐃᔑ ᒫᒑᓂᒡ ᐃᓂ ᐃᓂᓂᐗᓐ ᐁᑮ ᐸᐹ ᑎᐹᒋᒧᒡ ᐃᐃᒫ ᒥᓯᐌ ᐆᑌᓈᕽ ᐋᓃᓐ ᑳᐃᔑᒋᑫᑕᒫᑯᓂᒡ ᒋᓴᓲᓐ᙮

ᐊᐲ ᑳᐱᑮᐌ ᐋᔕᐗᐊᕽ ᐃᐃ ᓵᑲᐃᑲᓐ, ᑮᐹᑏᓄᐗᐞ ᐯᒫᑎᓯᓂᒡ ᒣᓉᑕᒥᓂᒡ ᐁᒥᔕᑳᒡ, ᐋᓃᔥ ᑲᑭᓇ ᐅᑮ ᐲᐃᑰᐞ᙮

ᐯᔑᒃ ᐃᑕᔥ ᑮᐱ ᑕᑯᔑᓅᓐ ᐃᓂᓂᐗᓐ ᑳᓃᑳᓂᔅᑲᒥᓂᒡ ᐃᐃ ᒎᐗᐞ ᐅᑕᓇᒥᐁᐎᑲᒥᑯᓂ, ᒉᐃᕒᐊᔅ ᐁᔑᓂᑳᓱᓂᒡ᙮ ᐁᔑ ᓯᑌᑳᐸᐎᒡ ᐃᓇᑫ ᐁᑮᐊᐸᑭᓱᓂᒡ ᐁᐸᑯᓭᓂᒥᑯᒡ ᒋᐃᔖᒡ ᐅᑖᐎᓂᓃᕽ᙮

ᑮᒥᒋ ᐯᔑᑯᐗᓐ ᐄᑐᒃ ᐅᑖᓂᓴᓐ ᐊᐊ ᐃᓂᓂ ᐁᑮᒥᑖᔑᓃᔓ ᐱᐴᓉᓂᒡ 12, ᐁᐐᐊᓂ ᓂᐳᓂᒡ᙮ ᒋᓴᔅ ᑕᔥ ᐁᐊᓂ ᐱᒥ ᐊᔮᒡ, ᐐᑫ ᐅᑮ ᓰᒋᔥᑳᑰᐞ ᑳᑮ ᐹᑏᓄᓂᒡ ᐊᐎᔭᐞ᙮

ᐯᔑᒃ ᐃᑕᔥ ᐃᑴ ᐃᐃᒫ ᒣᑴᔭᐄ ᑮᐊᔮ ᒥᑖᔑᓃᔓ ᐱᐴᓐ 12 ᐁᑮᐐᓴᑫᑕᕽ ᐁᒥᔅᑸᐙᐱᓀᒡ᙮ ᐋᒋᑯ ᑕᔥ ᑮᐐᓴᑳᐱᓀ ᐋᓇᑮᐊᑕᐎᐃᑯᒡ ᒪᔥᑭᑮᐎᓂᓂᐗᐞ, ᐁᑮ ᒑᑭᓈᒡ ᑲᔦ ᐅᔔᓂᔮᒪᓐ ᒥᓂᒃ ᐁᔮᐙᑯᐸᓀᓐ᙮ ᑳᐐᓐ ᐊᐎᔭᓐ ᐅᑮ ᑲᔥᑭᐃᑯᓰᓐ ᒋᒥᓄᐊᔮᒡ᙮

ᐗᐊ ᑕᔥ ᐃᑴ ᐅᑖᓈᕽ ᐃᓇᑫ ᐅᑮᐃᔑ ᓈᓯᑲᐙᓐ ᒋᓴᓲᓐ ᐁᑮ ᓵᒥᓇᕽ ᐗᓇᑴᔩᒃ ᐅᐗᑭᒋ ᑲᔥᑮᑮᐎᓂᓂ᙮ ᒦᑕᔥ ᐃᑯ ᔐᒫᒃ ᑳᑮᐴᓂ ᒥᔅᑸᐎᒡ᙮

ᒦᔥ ᒋᓴᔅ ᑳᐃᔑ ᑲᑴᑗᒡ: ᐊᐌᓀᓐ ᑳᓵᒥᓂᒡ? ᑲᑭᓇ ᐊᐎᔭᐞ ᐅᑮᐋᓉᑖᑰᐞ᙮ ᐲᑕᕒᐆᓐ ᑕᔥ ᐅᑮᐃᑰᓐ: ᐅᑭᑭᓄᐊᒫᑫ, ᑭᐙᐸᒫᒃ ᐄᑐᒃ ᐁᐹᑏᓄᐙᒡ ᐊᐎᔭᒃ ᐙᑳᔭᐄ ᑳᓰᒋᔥᑲᐎᒀ, ᐅᑮᐃᑰᓐ᙮

ᒦᔥ ᒋᓴᔅ ᑳᐃᑭᑐᒡ: ᐊᐎᔭ ᐅᔕ ᓂᑮ ᓵᒥᓂᒃ; ᓂᑭᑫᑖᓐ ᓂᒪᔥᑲᐎᓰᐎᓐ ᐁᓵᑲᐊᒨᒪᑲᒃ, ᑮᐃᑭᑐ᙮

ᐗᐊ ᑕᔥ ᐃᑴ ᐅᑮ ᑭᑫᑖᓐ ᐊᐗᔑᒣ ᐁᑳᒋ ᐊᔮᓯᒃ, ᒦᔥ ᑳᑮ ᐲᔖᒡ ᐁᓭᑭᓯᒡ ᐁᑮᐊᐸᑭᓱᒡ ᐁᓈᓴᒦᓂᒡ᙮ ᑮᑎᐹᒋᒧ ᑲᑭᓇ ᐊᐎᔭᐞ ᐁᓈᓴᒦᓂᒡ ᐌᑯᓀᓐ ᑳᐅᒋ ᓵᒥᓈᒡ ᒋᓴᓲᓐ, ᐋᓃᓐ ᑲᔦ ᔐᒫᒃ ᑳᐃᔑ ᒥᓄᐊᔮᒡ᙮

ᒦᑕᔥ ᒋᓴᔅ ᑳᐃᓈᒡ ᐃᓂ ᐃᑴᐗᓐ: ᓂᑖᓂᔅ, ᑭᑌᐺᑕᒧᐎᓂᕽ ᑭᑑᒋ ᒥᓄᐊᔮ, ᒦ ᐃ ᐱᓵᓐ ᐊᓂᔑ ᒫᒑᓐ᙮

ᒣᒀ ᑕᔥ ᒋᓴᔅ ᐁᑕᓉᐌᑑᒡ, ᐊᐎᔭᓐ ᑮᐱᐅᒋ ᑕᑯᔑᓅᓐ ᐁᔑᑖᓂᒡ ᐃᓂ ᐃᓂᓂᐗᓐ ᑳᓃᑳᓂᔥᑲᒥᓂᒡ ᐃᐃ ᐊᓇᒥᐁᐎᑲᒥᒃ ᐁᑮᐃᑭᑐᓂᒡ: ᐋᔕ ᑮᓂᐳ ᑭᑖᓂᔅ᙮ ᑫᑯ ᐊᐗᔑᒣ ᐅᑕᒥᐋᑫᓐ ᐊᐊ ᐅᑭᑭᓄᐊᒫᑫ, ᑮᐃᑭᑐᐗᓐ᙮

ᒋᓴᔅ ᑕᔥ ᐁᓅᑕᕽ ᐅᐅ, ᐅᑮᐃᓈᓐ ᐃᓂ ᒉᐃᕒᐊᓴᓐ: ᑫᑯ ᓭᑭᓯᑫᓐ, ᒥᒋ ᑌᐺᑕᓐ, ᒦᔥ ᒋᒥᓄᐊᔮᒡ, ᐅᑮᐃᓈᓐ᙮

ᐊᐲ ᑕᔥ ᐁᑕᑯᔑᓄᐙᒡ ᐅᐙᑳᐃᑲᓂᓃᕽ, ᑳᐐᓐ ᐊᐎᔭᓐ ᐅᑮ ᐸᑭᑎᓈᓰᓐ ᒋᐐᒋ ᐲᑎᑫᒥᑯᒡ, ᒦ ᐁᑕ ᐲᑕᕒᐆᓐ, ᒞᓇᓐ, ᒌᒥᓴᓐ ᑲᔦ᙮ ᐅᑮ ᐸᑭᑎᓈᓐ ᑲᔦ ᐃᓂ ᐅᑌᑌᒫᓐ, ᐃᓂ ᑲᔦ ᐅᒫᒫᒫᓐ ᐌᑖᓂᓯᓂᒡ ᐃᓂ ᐃᑴᓭᓴᓐ᙮

ᑲᑭᓇ ᐃᐃᒫ ᑳᑮᐊᔮᐙᒡ ᐅᑮᒪᐎᒫᐙᓐ ᐁᑮᐅᒋ ᒥᒋᓇᐌᓯᐙᒡ ᐃᓂ ᐃᑴᓭᓴᓐ᙮ ᒦᔥ ᒋᓴᔅ ᑳᐃᓈᒡ: ᑫᑯ ᒪᐎᑫᒃ, ᑳᐐᓐ ᐅᔕ ᓂᐳᓰ, ᒥᒋ ᓂᐹ ᐄᑐᒃ, ᐁᑮᐃᓈᒡ᙮

ᑲᑭᓇ ᑕᔥ ᐅᑮ ᐹᐱᓄᑖᑰᐞ ᐋᓃᔥ ᐅᑮ ᑭᑫᓂᒫᓂ ᐁᑮᓂᐳᓂᒡ ᐃᓂ ᐃᑴᓭᓴᓐ᙮

ᒦᑕᔥ ᒋᓴᔅ ᑳᑮ ᓴᑭᓂᑫᓈᒡ ᐃᑴᓭᓴᓐ ᐁᑮᐃᓈᒡ: ᐃᑴᓭᔅ, ᐗᓂᔥᑳᓐ, ᐁᑮᐃᓈᒡ᙮

ᔐᒫᒃ ᑕᔥ ᑮᑮᐌ ᐱᒫᑎᓯᐗᓐ ᐁᑮᐗᓂᔥᑳᓂᒡ᙮ ᒋᓴᔅ ᑕᔥ ᐅᑮᐊᓅᓈᐞ ᐃᐃᒫ ᐁᔮᓂᒡ ᒋᐊᔕᒫᓂᒡ ᐃᓂ ᐃᑴᓭᓴᓐ᙮

ᐅᓃᑭᐃᑯᒫᐞ ᐃᑕᔥ ᑮᑭᒋ ᒫᒪᑳᑌᑕᒨᐞ᙮ ᒋᓴᔅ ᐃᑕᔥ ᐅᑮ ᑲᓅᓈᐞ ᐊᐎᔭᓐ ᒋᐐᑕᒪᐙᓯᓂᒃ ᐅᐅ ᑳᑮᐃᔑᓭᓂᒃ᙮

ᒋᓴᔅ ᑕᔥ ᐅᑮᐊᑐᒫᐞ ᒥᑖᔑᓃᔑᓐ 12 ᐅᑭᑭᓄᐊᒪᐙᑲᓇᐞ ᐁᑮᒦᓈᒡ ᒪᔥᑲᐎᓰᐎᓐ, ᑲᔥᑭᐁᐎᓯᐎᓐ ᑲᔦ ᒋᓵᑭᒋᓂᔕᐙᓂᒡ ᒪᒋᐊᒑᑾᐞ, ᒋᑲᔥᑭᑑᓂᒡ ᑲᔦ ᒋᒥᓄᐊᔮᐃᐌᓂᒡ᙮

ᒦᑕᔥ ᑳᑮᐃᔑ ᒫᒋᓂᔕᐙᒡ ᒋᐸᐹᐐᑕᒫᑫᓂᒡ ᐃᐃ ᑭᔐᒪᓂᑑᓐ ᐁᐐᐅᔑᓯᑑᓂᒡ ᐅᑎᐯᒋᑫᐎᓂᓂ, ᑲᔦ ᑕᔥ ᒋᒥᓍᒋᐋᓂᒡ ᑳᐋᑯᓯᓂᒡ᙮

ᒦᑕᔥ ᒋᓴᔅ ᑳᐃᓈᒡ: ᑫᑯ ᑫᑰᓐ ᒫᒌᑑᑫᒃ ᐊᐲ ᐊᓂ ᒫᒑᔦᒃ, ᓴᑲᐅᓈᑎᒃ, ᐸᔥᑴᐗᔥ, ᑫᒦᒋᔦᒃ, ᔔᓂᔮ, ᑫᑰᓐ ᑲᔦ ᑫᒣᔥᑯᒋᔥᑲᒣᒃ᙮

ᐱᑯ ᐋᑎ ᑫᔑ ᐊᑐᒥᑰᔦᒃ ᒋᐲᑎᑫᔦᒃ, ᒦ ᐃᒫ ᐃᔑ ᑲᐯᔑᒃ, ᒦᔥ ᐃᐃᒫ ᑫᓂᐅᒋ ᒫᒑᔦᒃ᙮

ᐋᓃᑎ ᑕᔥ ᐃᑯ ᑫᔑ ᐲᑎᑫ ᐊᑐᒥᑰᓯᐌᒃ, ᐊᐲ ᑕᔥ ᐊᓂ ᓇᑲᑕᒣᒃ ᐃᐃ ᐆᑌᓇ, ᒦᔥ ᐃᔑ ᐹᐸᐎᓯᑌᔑᒨᓄᒃ ᒋᐅᒋ ᑭᑫᑕᒧᐙᒡ ᐁᐗᓂᑑᑕᒧᐙᒡ᙮

ᒦᑕᔥ ᐅᑭᑭᓄᐊᒪᐙᑲᓇᐞ ᑳᐃᔑ ᒫᒑᓂᒡ ᐁᑮᐃᔖᓂᒡ ᒥᓯᐌ ᐁᔑ ᐊᔨᔑᑖᓂᐗᓂᓂᒃ ᐁᐐᑕᒫᑫᓂᒡ ᒥᓍᒋᒧᐎᓐ, ᑲᔦ ᑕᔥ ᐁᒥᓍᒋᐋᓂᒡ ᐊᐎᔭᐞ ᐱᑯ ᐋᑎ ᐁᔮᓂᒡ᙮

ᐊᐲ ᐁᕒᐊᑦ ᑳᑭᒋ ᐅᑭᒫᐎᒡ ᑳᓬᐊᓬᐄᕽ ᐁᓅᑕᕽ ᑲᑭᓇ ᑫᑰᓐ ᑳᐊᔨᔑᓭᓂᒃ ᑮᐅᒋ ᐗᐙᓀᑕᒻ ᐃᐃᐌ ᐋᓂᑕ ᐊᐎᔭᐞ ᑳᑮᐃᑭᑐᓂᒡ᙮ ᐁᑮᐃᑭᑐᓈᓂᐗᓂᓂᒃ ᐄᓴᓐ ᒞᓇᓐ ᓰᑲᐊᑖᑫᐎᓂᓂᐗᓐ ᐁᑮ ᐱᑮᐌ ᐱᒫᑎᓯᓂᒡ᙮

ᑯᑕᒃ ᑕᔥ ᐁᑮᐃᑭᑐᓂᒡ: ᐃᓬᐋᐃᒐ ᑮᓈᑯᓯ, ᐋᓂᑕ ᑕᔥ ᐁᑮᐃᑭᑐᓂᒡ ᒦ ᓴ ᐊᐌ ᐯᔑᒃ ᐁᑮᑮᐌ ᐱᒫᑎᓯᒡ ᒣᐎᔕ ᑳᑮ ᑲᓅᑕᒪᐙᒡ ᑭᔐᒪᓂᑑᓐ᙮

ᒦᑕᔥ ᐁᕒᐊᑦ ᑳᐃᑭᑐᒡ: ᒞᓐ ᐐᓐ ᓂᑮ ᑮᔥᑭᑴᑕᐙ, ᐊᐌᓀᓐ ᑕᔥ ᐊᐊ ᑎᓄ ᐃᓂᓂ ᑳᓈᓅᑕᒫᓐ᙮ ᒦᑕᔥ ᒨᔕᒃ ᑳᑮᑲᑴ ᐙᐸᒫᒡ ᒋᓴᓲᓐ᙮

ᐃᔑᓂᔕᐙᑲᓇᒃ ᑕᔥ ᐁᑮ ᐱᑮᐌᐙᒡ, ᐅᑮᐐᑕᒪᐙᐙᓐ ᒋᓴᓲᓐ ᑲᑭᓇ ᑫᑰᓐ ᑳᑮᐊᔨᔑᒋᑫᐙᒡ᙮ ᒦᑕᔥ ᑳᐃᔑ ᒫᒌ ᐐᒌᐙᒡ ᐅᑎᔑᓂᔕᐙᑲᓇᐞ ᐐᓀᑕᐙ ᑯ ᐁᑮᐃᔖᐙᒡ ᐆᑌᓈᕽ ᐯᓭᑕ ᐁᔑᓂᑳᑌᓂᒃ᙮

ᐅᑮ ᑭᑫᓂᒥᑰᐞ ᑕᔥ ᑳᐹᑏᓄᓂᒡ ᐯᒫᑎᓯᓂᒡ ᐌᑎ ᐁᑮᐃᔖᒡ, ᒦᔥ ᑳᐃᔑ ᐱᒥᓂᔕᐅᑯᒡ᙮ ᒦᑕᔥ ᒋᓴᔅ ᑳᑮᐃᓈᒡ ᐁᒥᓉᑕᕽ ᐁᐲᔖᓂᒡ, ᐁᑮ ᑕᔑᑕᒪᐙᒡ ᑲᔦ ᑭᔐᒪᓂᑑᓐ ᐅᑎᐯᒋᑫᐎᓂᓂ, ᑲᔦ ᑕᔥ ᐁᑮᒥᓍᒋᐋᒡ ᐃᓂᐌᓂᐗᐞ ᑳᑮ ᑲᑴᒋᒥᑯᒡ ᒋᒥᓄᐊᔮᓂᒡ᙮

ᐊᐲ ᑕᔥ ᐁᐊᓂ ᐅᓈᑯᔑᓂᓂᒃ, ᐅᑮᐱ ᓈᓯᑳᑰᐞ ᐃᐃ ᑳᒥᑖᔑᓃᔑᓂᒡ 12 ᐅᑭᑭᓄᐊᒪᐙᑲᓇᐞ ᐁᑮᐃᑯᒡ: ᑲᓅᔥ ᐯᒫᑎᓯᐙᒡ ᒋᒫᒑᐙᒡ ᒋᐃᔖᐙᒡ ᐁᔑ ᐆᑌᓈᓯᐗᓂᓂᒃ, ᑳᔑ ᐊᔮᓂᐗᓂᓂᒃ ᑲᔦ, ᒋᐊᐎ ᓇᓈᑕ ᐙᐸᑕᒧᐙᒡ ᒦᒋᒻ, ᐋᓃᑎ ᑲᔦ ᑫᔑ ᓂᐹᐙᒡ᙮ ᐱᑾᒐᔭᐄ ᐄᑐᒃ ᑭᑕᔮᒥᓐ, ᐁᑮᐃᑯᒡ᙮

ᒦᔥ ᒋᓴᔅ ᑳᐃᓈᒡ: ᑮᓇᐙ ᒦᓂᑾᒃ ᑫᑰᓂᓂ ᑫᒦᒋᐙᒡ᙮ ᒦᔥ ᑳᐃᑯᒡ: ᓈᓇᓐ ᐁᑕ ᐸᑴᔑᑲᓂᑳᓀᓴᒃ ᓂᑕᔮᐙᓈᓂᒃ, ᓃᔑᓐ ᑮᑯᔭᒃ᙮ ᑭᓇᑕᐌᓂᒥᔑᓈᒻ ᐃᓇ ᒋᐊᐎ ᐊᑖᐌᔮᕽ ᒦᒋᒻ ᒋᑌᐱᓭᒃ ᑲᑭᓇ ᐅᑯ ᒋᐐᓯᓂᐙᒡ?

ᓂᑯᒋᑯ ᓈᓇᓐ ᒥᑖᔂᒃ 5,000 ᑮᑕᔑᐗᐞ ᐃᓂᓂᐗᐞ ᐃᐃᒫ᙮ ᒦᔥ ᒋᓴᔅ ᑳᐃᓈᒡ ᐅᑭᑭᓄᐊᒪᐙᑲᓇᐞ: ᓀᓈᓂᒥᑕᓇ 50 ᐃᔑ ᐊᔫᑾᐱᐃᑾᒃ, ᐅᑮᐃᓈᐞ᙮

ᒦᑕᔥ ᐅᐅ ᑳᑑᑕᒥᓂᒡ᙮ ᑲᑭᓇ ᑕᔥ ᑮᐅᓇᐱᐗᐞ ᐃᐃᒫ ᑳᑮᐊᔮᓂᒡ᙮

ᒦᑕᔥ ᒋᓴᔅ ᑳᑮᐅᑖᐱᓈᒡ ᐃᓂ ᓈᓇᓐ ᐸᑴᔑᑲᓂᑳᓀᓴᐞ, ᐃᓂ ᑲᔦ ᓃᔑᓐ ᑮᑰᔭᐞ ᑭᒋᑮᔑᑯᕽ ᐁᑮᐃᓈᐱᒡ ᐁᑮᓇᓈᑯᒫᒡ ᑭᔐᒪᓂᑑᓐ ᐃᓂᐌᓂᐗᐞ ᐅᒋ᙮ ᒦᔥ ᑳᐃᔑ ᐸᑴᐱᓈᒡ, ᐁᑮᒦᓈᒡ ᐅᑭᑭᓄᐊᒪᐙᑲᓇᐞ, ᒋᒫᒫᑕᐆᓈᓂᒡ ᐃᓂ ᐃᐃᒫ ᑳᑮᐊᔮᓂᒡ᙮

ᑲᑭᓇ ᓴ ᑮᑌᐐᓯᓂᐗᒃ᙮ ᑭᑭᓄᐊᒪᐙᑲᓇᒃ ᑕᔥ ᐅᑮᒫᐗᑑᓈᓈᐙ ᐃᐃ ᒦᒋᒻ ᑳᑮᐃᔥᑯᓭᓂᒃ ᒥᑖᔑᓃᔑᓐ 12 ᒪᔥᑯᓰᐎ ᒦᒋᒥᐗᔕᓐ, ᐁᑮᒨᔥᑭᓀᑭᓐ᙮

ᐋᐱᑎᕽ ᐃᑕᔥ ᒋᓴᔅ ᐐᓐ ᐁᑕ ᐁᐊᓇᒥᐋᒡ, ᐁᐐᒌᐎᑯᒡ ᐅᑭᑭᓄᐊᒪᐙᑲᓇᐞ, ᒦᔥ ᑳᐃᔑᑲᑴᒋᒫᒡ: ᐊᐌᓀᓇᓐ ᐁᑭᑐᐙᒡ ᐊᐎᔭᒃ ᐁᑎᓄᐎᐗᒃ?

ᒦᔥ ᐅᐅ ᑕᔥ ᑳᐃᑯᒡ: ᐋᓂᑕ ᑭᑎᑰᒃ, ᒞᓐ ᓰᑲᐊᑖᑫᐎᓂᓂ᙮ ᑯᑕᒃ ᑭᑎᑰᒃ ᐃᓬᐋᐃᒐ ᙮ ᑯᑕᒃ ᑭᑎᑰᒃ ᒉᕒᐃᒫᔭ, ᑯᒫ ᑲᔦ ᐯᔑᒃ ᑮᑮᐌ ᐱᒫᑎᓯᐎᑐᒃ ᑳᑮ ᑲᓅᑕᒪᐙᑯᐸᓀᓐ ᑭᔐᒪᓂᑑᓐ ᑭᑎᑰ, ᐅᑮᐃᑰᐞ᙮

ᒋᓴᔅ ᐃᑕᔥ ᐅᑮᐃᓈᐞ: ᐊᐌᓀᓐ ᑕᔥ ᑮᓇᐙ ᐁᑭᑐᔦᒃ ᐁᑎᓄᐎᔮᓐ? ᓵᐃᒪᓐ ᐲᑕᕒ ᑕᔥ ᐅᑮᐃᓈᓐ: ᑮᓐ ᐃᓴ ᐊᐊ ᑭᔐᒪᓂᑑᓐ ᑳᑮ ᑮᔖᒋ ᐅᓀᓂᒥᑯᒡ ᒋᐱᒫᒋᐃᐌᒡ᙮

ᒋᓴᔅ ᑕᔥ ᐅᑮ ᑲᓅᓈᐞ ᐅᑮᐋᔨᒋᑲᓅᓈᐞ ᒋᐐᑕᒪᐙᓯᓂᒃ ᐅᐅᐌᓂ ᐊᐎᔭᓐ᙮

ᒦᑕᔥ ᑲᔦ ᑳᐃᓈᒡ: ᐅᒋᑕ ᐱᑯ ᐃᓂᓂ ᐅᑯᓯᓴᓐ ᑕᑭᒋᑲᒀᑕᑭᑑᐗᓐ, ᐅᑲ ᐋᓇᐌᓂᒥᑰᐞ ᑲᔦ ᑳᓃᑳᓂᓯᓂᒡ, ᐃᐃ ᑲᔦ ᐊᓇᒥᐁᐎᑭᒫᐞ, ᐃᐃ ᑲᔦ ᐅᓇᔓᐌᐎᓂᐙᐞ ᑳᑭᑭᓄᐊᒫᑫᓂᒡ ᐅᓇᔓᐌᐎᓐ᙮ ᒦᔥ ᒋᓂᓯᒥᓐᒡ᙮ ᓂᓱᑮᔑᒃ ᑕᔥ ᐃᔑᓭᓂᒃ ᑕᑮᐌ ᐱᒫᑎᓰᐋᐗᓐ᙮

ᒦᑕᔥ ᐅᐅ ᑲᑭᓇ ᑳᐃᓈᒡ: ᑮᔥᐱᓐ ᐊᐎᔭ ᐐᐱᒥᓂᔕᐅᒡ, ᑕᑲ ᑕᐋᓇᐌᓂᑎᓱ, ᐅᑲ ᐅᑖᐱᓈᓐ ᐅᑖᔑᑌᔮᑎᑯᒪᓐ ᑫᐱᒥᐎᓈᒡ ᐁᑕᓱᑮᔑᒃ ᒋᐱᒥᓂᔕᐅᒡ᙮

ᐊᐊ ᑕᔥ ᑫᒪᓈ ᐗᓂᑑᒡ ᐅᐱᒫᑎᓯᐎᓐ, ᐋᒋᑯ ᑳᐐᓐ ᑕᑌᐱᓇᒫᓱᓰ ᑌᐺ ᑫᐅᒋ ᐱᒫᑎᓯᒡ᙮ ᐊᐊ ᑕᔥ ᑫᐸᑭᑎᓇᕽ ᐅᐱᒫᑎᓯᐎᓐ ᓃᓐ ᐅᒋ, ᑕᑌᐱᓇᒫᓱ ᑌᐺ ᑫᐅᒋ ᐱᒫᑎᓯᒡ᙮

ᐌᑯᓀᓐ ᑫᑲᔥᑭᑕᒫᓱᐸᓐ ᐊᐎᔭ ᑮᔥᐱᓐ ᐋᓇᑌᐱᓇᒫᓱᒡ ᑲᑭᓇ ᑫᑰᓐ ᐅᐅᒫ ᐊᑮᕽ, ᐐᓐ ᐃᑕᔥ ᐃᑯ ᓂᔑᐗᓈᒋᐃᑎᓱᒡ, ᑲᔦ ᑕᔥ ᐅᒋ ᑲᒀᑕᑭᑑᒡ?

ᐊᐌᓀᓐ ᓴ ᐱᑯ ᑫᐅᒋ ᐊᑲᒋᒡ ᓃᓐ ᐅᒋ, ᐃᓂ ᑲᔦ ᓂᑭᑭᓄᐊᒫᑫᐎᓇᓐ, ᒦᓴᐌ ᑫᐊᑲᒌᑖᑯᒡ ᑫᒋ ᐃᓀᑖᑯᓯᓂᒡ ᐃᓂᓂ ᐅᑯᓯᓯᓂ ᐊᐲ ᐱᑕᑯᔑᓂᓂᒡ, ᑲᔦ ᑕᔥ ᐅᑭᒋ ᐃᓀᑖᑯᓯᐎᓂᓃᕽ ᐌᔫᓯᒥᒥᓐᒡ, ᐃᐃ ᑲᔦ ᑫᑌᑖᑯᓯᓂᒡ ᐁᒐᓬᐊᐞ᙮

ᑌᐺ ᑕᔥ ᐅᐅ ᑳᐃᓂᓇᑰᒃ᙮ ᐋᓂᑕ ᓴ ᐅᐅᒫ ᑳᓃᐸᐎᐙᒡ ᑳᐐᓐ ᑕᓂᐳᓰᐗᒃ ᐹᓂᒫ ᑮᐙᐸᑕᒧᐙᒡ ᐃᐃ ᑭᔐᒪᓂᑑᓐ ᐅᑑᑭᒫᐎᓂᓂ᙮

ᓂᔣᓱᑮᔑᒃ 8 ᑕᔥ ᐁᐃᔑᓭᓂᒃ ᒋᓴᔅ ᐅᑮᒫᒌᓈᓐ ᐲᑕᕒᐆᓐ, ᒌᒥᓴᓐ, ᐃᓂ ᑲᔦ ᒞᓇᓐ ᙮ ᑮᐃᔖᐗᒃ ᐁᔑ ᐃᔥᐸᑎᓈᓂᒃ ᐁᑮᐊᐎ ᐊᓇᒥᐋᐙᒡ᙮

ᒣᒀ ᑕᔥ ᐁᐊᓇᒥᐋᒡ ᐸᑳᓐ ᑮᐊᓂ ᐃᔑᓈᑯᓯ ᐅᐐᒀᕽ, ᐅᑭᑭᔥᑭᑲᓇᓐ ᐐᑫ ᑮᐙᐱᔥᑭᐙᓭᓈᑾᓂᓂᐗᓐ᙮

ᒦᑕᔥ ᑭᑭᓄᐊᒪᐙᑲᓇᒃ ᑳᑮᐙᐸᒫᐙᒡ ᓃᔑᓐ ᐃᓂᓂᐗᐞ ᐁᑲᑲᓅᓂᑯᓂᒡ᙮ ᒨᓯᓲᓐ ᐃᓂ ᑲᔦ ᐃᓬᐋᐃᒐᐗᓐ ᙮

ᐐᑫ ᑮᑭᒋ ᐙᓭᓈᑯᓯᐗᐞ, ᐁᑮ ᑕᔑᑕᒥᓂᒡ ᐋᓃᓐ ᑫᔑ ᓂᓯᒥᓐᒡ ᒋᓴᓲᓐ ᐋᔕ ᑫᑳ ᑳᐐᐃᔑᓭᓂᒃ ᐃᐃᒫ ᒉᕒᐆᓴᓬᐊᒥᕽ ᙮

ᐲᑕᕒ ᑕᔥ ᐃᐃ ᑲᔦ ᑳᑮᐐᒌᐎᑯᒡ ᑮᑭᐸᑭᑾᔑᐗᒃ᙮ ᐊᐲ ᑕᔥ ᐁᑯᔥᑯᓯᐙᒡ ᐅᑮᐙᐸᒫᐙᓐ ᒋᓴᓲᓐ ᐁᔑᑭᒋ ᐃᓀᑖᑯᓯᓂᒡ, ᐃᐃ ᑲᔦ ᓃᔑᓐ ᑳᑮᐐᒋ ᑲᐸᐎᑖᑯᓂᒡ᙮

ᐋᔕ ᑕᔥ ᑫᑳ ᐁᐐᐊᓂ ᓇᑲᓂᑯᓂᒡ, ᐲᑕᕒ ᐅᐅ ᐅᑮᐃᓈᓐ ᒋᓴᓲᓐ: ᑌᐯᒋᑫᔭᓐ, ᐋᐱᒋ ᓴ ᒦ ᐃ ᑾᔭᒃ ᐅᐅᒫ ᑳᐊᔮᔭᕽ, ᑮᔥᐱᓐ ᐃᔑᒥᓴᐌᑕᒪᓐ, ᓂᓯᓐ ᐊᑲᐙᑌᐃᑲᓇᓐ ᓂᑲ ᐸᑕᑭᑑᒥᓐ, ᑮᓐ ᐯᔑᒃ ᒋᐊᔮᔭᓐ, ᒨᓯᔅ ᑲᔦ ᐯᔑᒃ, ᐃᓬᐋᐃᒐ ᑲᔦ ᐯᔑᒃ, ᑮᐃᑭᑐ᙮ (ᑳᐐᓐ ᐄᑐᒃ ᐅᑮ ᑭᑫᑕᓰᓐ ᐋᓃᓐ ᑳᐃᑭᑐᒡ᙮)

ᒣᒀ ᑕᔥ ᐁᑲᑭᑐᒡ, ᐗᑸᓂ ᐅᑮᐊᑲᐙᑌᔥᑳᑯᓈᐙ᙮ ᑭᑭᓄᐊᒪᐙᑲᓇᒃ ᐃᑕᔥ ᑮᓭᑭᓯᐗᒃ ᐁᑮᐋᑲᐎᔥᑳᑯᐙᒡ ᐗᑸᓂ᙮

ᒦᑕᔥ ᑳᑮᓅᑕᐙᐙᒡ ᐊᐎᔭᓐ ᐗᑸᕽ ᐁᐅᒋ ᑮᑭᑐᓂᒡ: ᒦ ᐅᔕ ᐗᐊ ᓂᑯᓯᔅ, ᑳᑮᐅᓈᐸᒪᒃ; ᐱᓯᑕᐎᒃ᙮

ᐊᐲ ᑕᔥ ᐊᐎᔭᓐ ᑳᐃᔥᒀ ᑮᑭᑐᓂᒡ, ᒋᓴᓲᓐ ᐁᑕ ᐃᒫ ᑮᐊᔮᐗᓐ᙮ ᑭᑭᓄᐊᒪᐙᑲᓇᒃ ᑳᐐᓐ ᑮᓅᑖᑎᓰᐗᒃ᙮ ᑳᐐᓐ ᑲᔦ ᐊᐎᔭᓐ ᐅᑮᐐᑕᒪᐙᓯᐙᐙᓐ ᐅᐅ ᑳᑮᐃᓈᐱᔑᓄᐙᒡ᙮

ᒦᑕᔥ ᐅᐅ ᑳᐃᔑᓭᓂᒃ ᐁᐊᓂᐙᐸᓂᓂᒃ ᐊᐲ ᒋᓴᔅ, ᐃᐃ ᑲᔦ ᓂᓯᓐ ᐅᑭᑭᓄᐊᒪᐙᑲᓇᐞ ᐃᔥᐸᑎᓈᕽ ᐁᐱᐅᒋ ᓃᓴᒋᐌᐙᒡ᙮ ᑮᐹᑏᓄᐗᐞ ᐯᒫᑎᓯᓂᒡ ᑳᑮᓇᑭᔥᑳᑯᐙᒡ᙮

ᐯᔑᒃ ᑕᔥ ᐃᓂᓂᐗᓐ ᐃᐃᒫ ᒣᑴᔭᐄ ᐁᔑ ᐹᑏᓄᓈᓂᐗᓂᓂᒃ ᑮᐅᒋ ᑭᔒᐌ ᑮᑭᑐᐗᓐ ᐁᑮᐃᑭᑐᓂᒡ: ᐅᑭᑭᓄᐊᒫᑫ, ᑭᐸᑯᓭᓂᒥᓐ ᒋᑲᓇᐙᐸᒪᒡ ᓂᑯᓯᔅ, ᒦᐁᑕᐊᐌ ᓂᓃᒑᓂᔅ᙮

ᑫᑕᑐ ᐅᓂᑖ ᐅᑎᑎᓂᑰᓐ ᐃᓂ ᒪᒋᐊᒑᑾᓐ, ᒦᔥ ᐁᔑᔖᑯᐌᒡ᙮ ᐅᒋᐱᓂᑯ ᑲᔦ ᐲᓂᔥ ᐁᐲᑌᐗᓂᓂᒃ ᐅᑑᓐ᙮ ᐅᐐᓴᑫᑕᒥᐃᑰᓐ ᑲᔦ, ᑳᐐᓐ ᓇᓈᔥ ᒋᐴᓂᐃᑯᒡ᙮

ᓂᑖᓇᑮᐸᑯᓭᓂᒫᒃ ᑭᑭᑭᓄᐊᒪᐙᑲᓇᒃ ᒋᓵᑭᒋᓂᔕᐙᐙᒡ ᐃᓂ ᒪᒋᐊᒑᑾᓐ, ᑳᐐᓐ ᑕᔥ ᐅᑮ ᑲᔥᑭᐋᓯᐙᐙᓐ, ᐅᑮᐃᑰᓐ᙮

ᒋᓴᔅ ᑕᔥ ᑮᐃᑭᑐ: ᐁᑕᑕᐌ ᑳᐐᓐ ᑭᑌᐺᑕᓰᒻ, ᑳᐐᓐ ᑲᔦ ᑾᔭᒃ ᑭᑎᔑᐊᔮᓰᒻ! ᑳᓇᑲ ᓈ ᒥᓂᒃ ᑫᐐᒌᐎᓇᑰᑭᐸᓐ? ᑳᓇᑲ ᓈ ᒦᓇ ᑭᑖᔕᔒᐯᓂᒥᓂᓂᒻ? ᒦᑕᔥ ᒋᓴᔅ ᑳᐃᓈᒡ ᐃᓂ ᐃᓂᓂᐗᓐ: ᐲᑕᒪᐎᔑᓐ ᐅᐅᒫ ᐊᐊ ᑸᐎᓭᔅ᙮

ᒦᑕᔥ ᑳᑮ ᐲᔖᓂᒡ ᐃᓂ ᑸᐎᓭᓴᓐ᙮ ᒦᔥ ᑳᑮᐅᑎᑎᓂᑯᓂᒡ ᒪᒋᐊᒑᑾᓐ ᒥᑕᑲᒥᒃ ᐁᑮᐃᔑ ᑲᐎᐌᐱᓂᑯᓂᒡ, ᑕᑯ ᑲᔦ ᐁᑮᐅᒋᐱᓂᑯᓂᒡ᙮ ᒋᓴᔅ ᑕᔥ ᐅᑮ ᑲᓅᓈᓐ ᐃᓂ ᒪᒋᐊᒑᑾᓐ᙮ ᒦᑕᔥ ᔐᒫᒃ ᑳᐃᔑ ᓵᑲᐊᒥᓂᒡ᙮ ᔐᒫᒃ ᑕᔥ ᑮᒥᓄᐊᔮᐗᓐ ᐃᓂ ᑸᐎᓭᓴᓐ᙮ ᒦᔥ ᑳᐃᔑᒦᓈᓂᒡ ᐃᓂ ᐅᑌᑌᓂ᙮

ᑲᑭᓇ ᑕᔥ ᐃᐃᒫ ᑳᑮᐊᔮᐙᒡ ᑮᒫᒪᑳᑌᑕᒨᒃ ᐋᓃᓐ ᐁᐲᒋ ᑭᒋ ᐃᓀᑖᑯᓯᓂᒡ ᑭᔐᒪᓂᑑᓐ᙮ ᒣᒀ ᑕᔥ ᐊᐎᔭᐞ ᐁᒫᒪᑳᑌᑕᒥᓂᒡ ᐅᐅ ᑲᑭᓇ ᒋᓴᔅ ᑳᑮᐃᔑᒋᑫᒡ, ᒦᔥ ᐅᐅ ᑳᐃᓈᒡ ᐅᑭᑭᓄᐊᒪᐙᑲᓇᐞ᙮

ᐌᐌᓂ ᐱᓯᑕᐎᔑᒃ ᐅᐅ ᑳᐐᐃᓂᓇᑰᒃ, ᐃᓂᓂ ᐅᑯᓯᓴᓐ ᐅᔕ ᑕᔑ ᐸᑭᑎᓂᑳᓱᐗᓐ ᐃᓂᓃᑳᕽ᙮

ᑭᑭᓄᐊᒪᐙᑲᓇᒃ ᐃᑕᔥ ᑳᐐᓐ ᐅᑮᓂᓯᑐᑕᓰᓈᐙ ᐅᐅ ᐃᑭᑐᐎᓐ, ᑳᐐᓐ ᐋᓃᔥ ᐅᐅ ᑮᐃᔑ ᒦᓂᑰᐎᓯᓰᐗᒃ ᒋᓂᓯᑐᑕᒧᐙᒡ ᐅᐅᐌᓂ᙮ ᑮᔖᑴᓂᒧᐗᒃ ᑲᔦ ᒋᑲᑴᒋᒫᐙᒡ ᐅᐅᐌᓂ᙮

ᑭᑭᓄᐊᒪᐙᓇᒃ ᐃᑕᔥ ᑮᒫᒌ ᑭᒋᑲᑲᓅᓂᑎᐗᒃ ᐊᐌᓀᓐ ᐊᐊ ᒪᔮ ᑫᒋ ᐃᓀᑖᑯᓯᒡ᙮

ᒋᓴᔅ ᑕᔥ ᐅᑮ ᑭᑫᑖᓐ ᐋᓃᓐ ᐁᓀᑕᒥᓂᒡ᙮ ᒦᑕᔥ ᑳᑮᐅᑖᐱᓈᒡ ᐊᐱᓅᒌᔕᓐ ᐁᑮᓃᐸᐎᐋᒡ ᒋᐐᒋᑳᐸᐎᑖᑯᒡ᙮

ᒦᑕᔥ ᐅᐅ ᑳᐃᓈᒡ: ᐊᐌᓀᓐ ᐃᑯ ᑫᐐᒋᐋᒡ ᐯᔑᒃ ᐅᐅ ᐊᐱᓅᒌᔕᐞ, ᓃᓐ ᐅᒋ ᐁᐅᒋ ᐃᔑᒋᑫᒡ, ᒦ ᐯᔑᑾᓐ ᑫᓃᓐ ᐁᐃᔑᐐᒋᐃᒡ᙮ ᐊᐌᓀᓐ ᐃᓴ ᐙᒋᐃᑴᓐ, ᑳᐐᓐ ᓃᓀᑕ ᓂᐐᒋᐃᑯᓰ, ᐃᓂᐌᓂᐗᓐ ᐃᓴ ᐅᐐᒋᐋᓐ ᑭᔐᒪᓂᑑᓐ, ᒦᐗᓐ ᐃᓂ ᑳᐱ ᐃᔑᓂᔕᐅᒥᒡ᙮ ᐊᐌᓀᓐ ᓴᑯ ᒫᐗᒡ ᐸᑮ ᐁᓀᑖᑯᓯᑴᓐ ᑳᑕᔑᔦᒃ, ᒦ ᓴ ᐊᐌ ᑫᒋ ᐃᓀᑖᑯᓯᒡ, ᐅᑮᐃᓈᐞ᙮

ᒦᑕᔥ ᑳᐃᔑ ᑲᓅᓂᑯᒡ ᐃᓂ ᒞᓇᓐ : ᐅᑭᑭᓄᐊᒫᑫ, ᓂᑮᐙᐸᒫᓈᓐ ᐯᔑᒃ ᐃᓂᓂ ᐁᓵᑭᒋᓂᔕᐊᒪᐙᒡ ᒪᒋᐊᒑᑾᐞ ᐁᐊᐱᒧᒡ ᑭᑎᔑᓂᑳᓱᐎᓐ᙮ ᐃᑕᐙ ᑕᔥ ᓂᑮᐅᒋᐋᓈᓐ, ᐋᓃᔥ ᑳᐐᓐ ᑭᐸᐹᐐᒌᐎᑯᓰᓈᓐ, ᐅᑮᐃᑰᓐ᙮

ᒋᓴᔅ ᐃᑕᔥ ᐅᐅᐌ ᐅᑮᐃᓈᓐ: ᑫᑯ ᐅᒋᐋᑫᒃ᙮ ᐊᐎᔭ ᑳᓇᑳᔥᑲᐎᓱᓄᐎᓇᑭᒡ ᐅᔕ ᑭᐐᒋᐃᑯᓈᓐ, ᐅᑮᐃᓈᓐ᙮

ᐋᔕ ᑕᔥ ᑫᑳ ᐁᐅᒋᒋᓭᓂᒃ ᒋᓴᔅ ᒋ ᐃᔑᐎᓂᓐᒡ ᑭᒋᑮᔑᑯᕽ, ᑮᐃᓀᑕᒻ ᐁᐐᐃᔖᒡ ᒉᕒᐆᓴᓬᐊᒥᕽ ᙮

ᐅᑮᓃᑳᓂᓂᔕᐙᐞ ᑕᔥ ᑫᓂᓃᑳᓈᒋᒧᓂᒡ ᑳᐐᐊᓂ ᐃᔖᒡ ᒋᐃᔖᓂᒡ ᓴᒣᕒᐃᔭ ᐊᑮᕽ ᒋᑾᔮᒋᑕᒫᑯᒡ ᑲᑭᓇ ᑫᑰᓐ᙮

ᐃᐃ ᑕᔥ ᐯᒫᑎᓯᓂᒡ ᐃᐃᒫ ᐁᔮᓂᒡ ᑳᐐᓐ ᐅᑮᒥᓍᐸᒥᑯᓰᐞ, ᐋᓃᔥ ᑮᒥᒋ ᐱᒥᐊᔮ ᐃᐃᒫ ᐁᑮᐃᔖᒡ ᒉᕒᐆᓴᓬᐊᒥᕽ᙮

ᐊᐲ ᑕᔥ ᑭᑭᓄᐊᒪᐙᑲᓇᒃ ᒌᒥᔅ ᐊᐊ ᑲᔦ ᒞᓐ ᐁᐙᐙᐸᑕᒧᐙᒡ ᐅᐅ ᒦ ᐃ ᑳᐃᑭᑐᐙᒡ: ᑌᐯᒋᑫᔭᓐ, ᑭᓇᑕᐌᓂᒥᔑᓈᒻ ᐃᓇ ᒋᑲᓅᑕᒫᕽ ᐃᔥᑯᑌ ᒋᐱᐅᒋ ᓈᔒᔥᒪᑲᒃ ᑭᒋᑮᔑᑯᕽ ᑫᓂᔑᐗᓈᒋᐃᑯᐙᒡ?

ᒋᓴᔅ ᑕᔥ ᑮᑴᑭᑖ ᐁᑮᑭᔒ ᑲᓅᓈᒡ, ᐁᑮᐃᓈᒡ: ᑳᐐᓐ ᑭᑭᑫᓂᒫᓯᐙᐙ ᐁᔑᐊᔮᓂᒡ ᑭᔐᒪᓂᑑ ᐅᑕᒑᑾᓐ ᐌᒋ ᑎᐯᑖᑯᓯᔦᒃ, ᐋᓃᔥ ᓃᓐ ᐃᓂᓂ ᐅᑯᓯᓴᓐ ᑮᐲᔖᐗᓐ ᒋᐱ ᐱᒫᒋᐃᐌᓂᒡ, ᑳᐐᓐ ᐐᓐ ᒋᓂᔑᐗᓈᒋᐃᐌᓂᒡ, ᐅᑮᐃᓈᐞ᙮

ᒦᑕᔥ ᐸᑳᓐ ᐁᔮᐎᓂᒃ ᑳᑮᐃᔖᐙᒡ᙮

ᐁᐊᓂᐱᒥᐊᔮᐙᒡ ᐃᑕᔥ ᒦᑲᓈᕽ, ᐯᔑᒃ ᐃᓂᓂᐗᓐ ᐅᑮᐃᑰᓐ: ᑭᑭᓄᐊᒫᑫ, ᑭᑲ ᐐᒌᐎᓐ ᐋᑎ ᐱᑯ ᑫᐃᔖᔭᓐ᙮

ᒦᑕᔥ ᐅᐅ ᒋᓴᔅ ᑳᐃᔑᓇᑴᑕᐙᒡ: ᐃᑭ ᐙᑯᔕᒃ ᐅᐙᔑᐗᒃ, ᐃᑭ ᑲᔦ ᐱᓀᔒᔕᒃ ᐅᐗᓯᔀᓂᐗᒃ᙮ ᓃᓐ ᑕᔥ ᐃᓂᓂ ᐅᑯᓯᓴᓐ ᑳᐐᓐ ᓂᑕᔮᓰᓐ ᐋᑎ ᑫᔑ ᐱᒥᔑᓈᓐ ᒋᐊᓉᔑᓈᓐ, ᑮᐃᑭᑐ᙮

ᒋᓴᔅ ᑕᔥ ᑯᑕᒃ ᐃᓂᓂᐗᓐ ᐅᑮᐃᓈᓐ: ᐱᒥᓂᔕᐅᔑᓐ᙮ ᒦᔥ ᑳᐃᔑ ᓇᑴᑖᑯᒡ: ᐸᑭᑎᓂᔑᓐ ᐱᓇᒫ ᒋᑮᐌᔮᓐ ᒋᐊᑕᐎ ᓇᐃᓇᒃ ᓂᑌᑌ᙮

ᒦᔥ ᐅᐅ ᒋᓴᔅ ᑳᐃᔑ ᓇᑴᑕᐙᒡ: ᑕᑲ ᐐᓇᐙ ᐱᑯ ᐅᑲᑕᔒᑳᓈᐙ ᒋᓇᐃᓈᐙᒡ ᐅᑎᓇᐌᒫᑲᓂᐙᐞ ᑳᐐᓂᐳᓂᒡ, ᑮᓐ ᐃᑕᔥ ᐐᓐ ᒫᒑᓐ ᒋᐸᐹᐐᑕᒫᑫᐗᒡ ᑭᔐᒪᓂᑑ ᐅᑑᑭᒫᐎᐎᓐ, ᐅᑮᐃᓈᓐ᙮

ᒦᓇᐙ ᑕᔥ ᐊᐎᔭᓐ ᐅᑮᐃᑰᓐ: ᑌᐯᒋᑫᔭᓐ, ᑭᑲ ᐱᒥᓂᔕᐅᓐ᙮ ᐱᓇᒫ ᑕᔥ ᓂᑕᒻ ᐸᑭᑎᓂᔑᓐ ᒋᑮᐌᔮᓐ ᒋᐊᐎ ᐴᔔᐊᒀ ᓂᑖᐎᓂᕽ ᐁᔮᐙᒡ, ᐅᑮᐃᑰᓐ᙮

ᒦᔥ ᒋᓴᔅ ᑳᐃᑭᑐᒡ: ᐱᑯ ᐊᐎᔭ ᑳᒫᒌ ᐅᒻᐺᑲᒥᑭᐱᒋᑫᒡ ᑮᔥᐱᓐ ᐃᑕᔥ ᐃᔑ ᐋᐸᓈᐱᒡ ᑳᐐᓐ ᑕᑌᐊᐲᑌᑖᑯᓯᓰ ᑭᔐᒪᓂᑑᓐ ᐅᑎᐯᒋᑫᐎᓂᓃᕽ ᒋᔑ ᐋᐸᑎᓯᒡ᙮

ᐊᐲ ᑳᑎᐯᒋᑫᒡ ᑳᐃᔥᒀ ᑲᑲᓅᓈᒡ, ᒦᔥ ᑳᑮᐅᓇᑭᒫᒡ ᓃᔣᓯᒥᑕᓇᔑᓃᔑᓐ 72 ᐃᓂᓂᐗᐞ ᒋᓀᓃᔑᓂᒡ ᒋᑮ ᓃᑳᓂ ᐊᔨᔖᓂᒡ ᒥᓯᐌ ᐆᑌᓈᑳᕽ, ᐊᔮᐎᓂᕽ ᑲᔦ ᐐᓐ ᐃᑯ ᐙᐊᓂ ᐃᔖᒡ᙮

ᐅᐅ ᐁᑮᐃᓈᒡ: ᐹᑏᓇᑦ ᑫᒪᓂᔑᑳᑌᑭᐸᓐ, ᐋᐱᒋ ᑕᔥ ᐊᑳᓰᓄᐗᒃ ᐅᑕᓄᑮᒃ᙮ ᑲᑴᒋᒥᒃ ᑭᔐᒪᓂᑑ ᑳᑎᐯᑕᕽ ᒪᓂᔑᑫᐎᓐ ᒋᐃᔑᓂᔕᐙᒡ ᐅᑕᓄᑮᐞ ᒋᒫᒨᔕᑭᓂᑫᓂᒡ ᐅᑭᑎᑫᐎᓂᕽ᙮

ᒦᑕᔥ ᐃᔑ ᒫᒑᒃ᙮ ᒦ ᐃ ᐁᔑᓈᑯᓯᔦᒃ ᑖᐱᔥᑰ ᒫᓇᒑᓂᔕᒃ ᑳᐃᔖᐙᒡ ᒣᑴ ᒪᐄᑲᓂᑳᕽ᙮

ᑫᑯ ᒫᒌᑑᑫᒃ ᑭᔔᓂᔮᐗᔑᐙᓐ, ᑭᐲᓇᐃᑲᓂᐗᔑᐙᓐ ᑲᔦ, ᑳᑭᑭᔥᑲᒣᒃ ᐁᑕ ᑭᒪᑭᓯᓂᐙᓐ ᑭᑲᒫᒌᑑᒻ᙮ ᑫᑯ ᑭᐱᒌᑫᒃ ᒋᐅᑕᒬᐌᑑᔦᒃ ᑮᔥᐱᓐ ᐊᐎᔭ ᓇᑭᔥᑲᐌᒃ᙮

ᐋᑎ ᑕᔥ ᐃᑯ ᑫᔑ ᐲᑎᑫᔦᒃ ᐙᑳᐃᑲᓂᕽ, ᒦ ᐅᐌ ᓂᑕᒻ ᑫᐃᑭᑐᔦᒃ: ᑭᑲᔕᐌᑖᑯᓯᒻ ᐅᐅᒫ ᐙᑲᐃᑲᓃᕽ ᐁᔮᔦᒃ᙮

ᑮᔥᐱᓐ ᑕᔥ ᒥᓄᐐᒌᐎᓀᒀ ᐃᐃᒫ ᑳᐊᔮᐙᒡ ᐙᑳᐃᑲᓂᕽ, ᐃᐃᒫ ᐃᔑᓇᑲᑕᒧᒃ ᐃᐃᐌ ᑳᑮᐃᑭᑐᔦᒃ ᑮᐱᐲᑎᑫᔦᒃ: ᐱᓵᓐ ᐱᒫᑎᓯᒃ᙮ ᑮᔥᐱᓐ ᑕᔥ ᐃᓈᑎᓯᓯᒀ ᐃᐃᒫ ᐙᑳᐃᑲᓂᕽ, ᑮᐌ ᐅᑖᐱᓇᒧᒃ ᐃᐃᐌ ᑳᑮᐃᑭᑐᔦᑭᐸᓐ᙮

ᒦᔥ ᐃᐃᒫ ᑳᑮᐃᔑ ᐲᑎᑲᓂᑰᔦᒃ ᑫᔑ ᐊᔮᔦᒃ, ᐱᓵᓐ ᐃᑯ ᐃᓇᒋᑫᒃ, ᐃᔑᒥᓂᑴᒃ ᑲᔦ ᐋᓃᓐ ᐃᑯ ᐁᓇᔕᒥᑰᔦᒃ, ᐊᓃᔥ ᒋᑎᐸᐊᒪᐎᑎᐸᓐ ᐊᐎᔭ ᑳᐊᓄᑮᒡ᙮ ᑫᑯ ᐐᓐ ᐹᐲᑎᑫᑫᒃ ᐯᐸᑳᓐ ᐅᐙᑳᐃᑲᓂᑳᕽ᙮

ᐋᑎ ᐱᑯ ᐆᑌᓈᑳᕽ ᐁᔑ ᐲᑎᑫᔥᑳᔦᒃ, ᑮᔥᐱᓐ ᑕᔥ ᐃᑭ ᐯᒫᑎᓯᐙᒡ ᐃᓀᓂᒥᓀᒀ ᐱᓵᓐ ᒋᐲᔖᔦᒃ, ᐱᓵᓐ ᐃᑯ ᒦᒋᒃ ᑫᑰᓐ ᑫᐊᔕᒥᑰᔦᒃ᙮

ᒥᓍᒋᐃᑾᒃ ᑳᐋᑯᓯᐙᒡ ᐃᐃᒫ ᐆᑌᓈᕽ ᑳᐊᔮᐙᒡ ᐅᐅ ᒋᔑ ᐐᑕᒪᐌᒀ: ᐋᔕ ᑭᐯᔕᐙᐸᑕᒧᐙᒻ ᑭᔐᒪᓂᑑ ᒋᑎᐯᓂᒥᓀᒃ᙮

ᐊᐲ ᑕᔥ ᐊᓂ ᐲᑎᑫᔥᑳᔦᒃ ᐆᑌᓈᕽ, ᐊᐎᔭᒃ ᑕᔥ ᐃᓀᑕᓯᒀ ᐃᐃᒫ ᒋᐲᔖᔦᒃ, ᒦᑲᓈᕽ ᐃᔖᒃ ᐅᐅ ᒋᐃᑭᑐᔦᒃ:

ᐃᐃ ᓴ ᑳᐹᔥᑭᓀᓭᒃ ᑭᑑᑌᓈᒥᐙᕽ ᑳᐊᑯᑫᒃ ᓂᓯᑎᓈᕽ ᓂᑑᒋ ᐹᐹᐎᓯᑌᔑᒨᓄᒥᓐ ᒋᐅᒋ ᑭᑭᓇᐙᒋᓈᑯᑑᔮᕽ ᐁᓈᑎᓯᔦᒃ᙮ ᑫᑯ ᑕᔥ ᐗᓃᑫᑫᒃ ᐋᔕ ᐁᐯᔣᐸᑕᒧᐌᒃ ᑭᔐᒪᓂᑑ ᒋᑎᐯᓂᒥᓀᒃ᙮

ᑭᐐᑕᒪᐎᓂᓂᒻ ᐊᐲ ᑎᐹᑯᓂᑫᐎᑮᔑᑲᒃ ᑭᔐᒪᓂᑑ ᓇᐗᒡ ᐅᑲᑰᐹᓯᓈᓐ ᐃᐃ ᔂᑕᒻ ᐊᐲᒡ ᐐᓐ ᐃᐃ ᐆᑌᓈᓂ᙮

ᑮᓇᐙ ᑾᕒᐋᓯᓐ ᑳᐊᔮᔦᒃ ᑭᑲ ᐅᒑᓂᒥᓯᒻ᙮ ᑫᑮᓇᐙ ᑭᑲ ᐅᒑᓂᒥᓯᒻ ᐯᓭᑕ ᑳ ᐊᔮᔦᒃ᙮ ᑮᔥᐱᓐ ᐃᓂ ᑳᐙᐸᑕᒣᒃ ᒫᒪᑳᒋᒋᑫᐎᓇᓐ ᑮᓈᑯᒋᑳᑌᑯᐸᓀᓇᓐ ᐃᐃᒫ ᐆᑌᓈᕽ ᑕᔭᕒᐃᕽ, ᓵᐃᑕᓂᕽ ᑲᔦ, ᐋᔕ ᒣᐎᔕ ᐅᑖᑮ ᐱᓯᑳᓈᐙᓐ ᑳᐊᓴᐱᐌᑲᓂᓂᑭᓐ ᑲᔦ ᒣᐎᔕ ᐅᑖᑮ ᐲᐎᐌᐱᓈᓈᐙ ᐲᑸᓂ ᐅᑎᒀᓂᐙᕽ ᒋᓈᑯᑑᐙᒡ ᑳᑮ ᑴᑳᑎᓯᐙᒡ᙮

ᒫᒥᑲᐎᒃ ᐃᑕᔥ ᐅᐅ: ᐊᐲ ᑎᐹᑯᓂᑫᐎ ᑮᔑᑲᒃ, ᑭᔐᒪᓂᑑ ᓇᐗᒡ ᐅᑲ ᑰᐹᓯᓇᐙᐞ ᐃᐃ ᑕᔭᕒᐃᕽ, ᓵᐃᑕᓂᕽ ᑲᔦ ᑳᐃᔑ ᐊᔮᓂᒡ ᐊᐲᒡ ᑮᓇᐙ᙮

ᑮᓇᐙ ᑕᔥ ᑲᐸᕒᓂᔭᒥᕽ ᑳᐊᔮᔦᒃ; ᑭᑮᐃᓀᑖᒻ ᐃᓇ ᐁᐐᐃᔥᐯᓂᑎᓱᔦᒃ ᑭᒋᑮᔑᑯᕽ ᐃᓇᑫ ᒫᐗᒡ ᒋᑭᒋ ᐃᓀᑖᑾᒃ ᑭᑑᑌᓈᒥᐙ? ᐌᑎ ᐅᓂᐴᒃ ᑳᔑ ᐊᔮᐙᒡ ᑭᑲᐃᔑ ᐌᐱᓂᑰᒻ᙮

ᒦᔥ ᒋᓴᔅ ᑳᐃᓈᒡ ᐅᑭᑭᓄᐊᒪᐙᑲᓇᐞ: ᐊᐌᓀᓐ ᐃᑯ ᑫᐱᓯᑕᐎᓀᒃ, ᓃᓐ ᑳᐱᓯᑕᐎᒡ᙮ ᐊᐌᓀᓐ ᐃᑯ ᑳᐋᓇᐌᓂᒥᓀᒃ, ᓃᓐ ᐅᔕ ᑳᐋᓇᐌᓂᒥᒡ᙮ ᐊᐌᓀᓐ ᐃᑕᔥ ᐃᑯ ᑳᐋᓇᐌᓂᒥᒡ ᐅᑖᓇᐌᓂᒫᓐ ᐃᓂᐌᓂᐗᓐ ᑳᐲᒋᓂᔕᐅᒥᒡ, ᑮᐃᑭᑐ᙮

ᐃᑭ ᑕᔥ ᓃᔣᓯᒥᑕᓇᔑᓃᔑᓐ ᐃᓂᓂᐗᒃ ᑳᐱᑮᐌᐙᒡ ᐐᑫ ᑮᐱ ᒌᑫᑕᒨᒃ ᐁᑮᐃᑭᑐᐙᒡ: ᑌᐯᒋᑫᔭᓐ, ᒪᒋᐊᒑᑾᒃ ᓴ ᑮᐸᑕᐲᐗᒃ ᒋᓵᑲᐊᒧᐙᒡ ᐊᐲ ᑮᑲᓅᓇᑭᑣ ᑭᐐᓱᐎᓂᕽ ᐅᒋ, ᑮᐃᑭᑐᐗᒃ᙮

ᒦᑕᔥ ᒋᓴᔅ ᑳᐃᓈᒡ: ᓂᑮᐙᐸᒫ ᓭᑕᓐ ᑭᒋᑮᔑᑯᕽ ᐁᐅᒋ ᐸᑭᔑᕽ ᑖᐱᔥᑰ ᑳᓈᔕᑮᔮᑌᓭᒃ ᐁᑮᐃᔑᓈᑯᓯᒡ᙮

ᐱᓯᑕᐎᔑᒃ, ᑭᑮᒦᓂᓂᓂᒻ ᐅᔕ ᑲᔥᑭᐁᐎᓯᐎᓐ ᒋᑕᑯᑳᓀᒀ ᑳᑯᑖᓀᑖᑯᓯᐙᒡ ᑭᓀᐱᑰᒃ, ᐃᑭ ᑲᔦ ᐅᓱᐎᐙᕽ ᑳᐅᒋ ᒌᓱᐌᐙᒡ, ᑲᔦ ᑕᔥ ᒋᔖᑰᒋᑑᔦᒃ ᒥᓯᐌ ᐁᔑ ᒪᔥᑲᐎᓰᒡ ᐊᐊ ᓭᑕᓐ ᑳᓇᑳᓂᐌᒡ᙮ ᑳᐐᓐ ᑫᑰᓐ ᑭᑲ ᐐᓴᑳᐱᓇᓂᑯᓰᒻ᙮

ᑫᑯ ᑕᔥ ᐐᓐ ᐅᒋ ᒌᑫᑕᑫᒃ ᐁᐱᓯᑕᐎᓀᒀ ᒪᒋᐊᒑᑾᒃ, ᓇᐗᒡ ᐅᒋ ᒥᓉᑕᒧᒃ ᑭᐐᓱᐎᓂᐙᓐ ᐁᐅᔑᐲᐃᑳᑌᑭᓐ ᑭᒋᑮᔑᑯᕽ᙮

ᒦᑕᔥ ᐃᐃ ᐯᔑᑾᓐ ᑎᐸᐃᑲᓐ ᒋᓴᔅ ᐅᑮ ᒌᑫᑕᒧᔥᑳᑰᓐ ᑭᔐᒪᓂᑑᓐ ᐅᑕᒑᑯᓂ᙮ ᒦᔥ ᑳᐃᑭᑐᒡ: ᓂᑌᑌ, ᒦᑴᒡ ᑭᑎᓂᓐ, ᑳᑎᐯᑕᒪᓐ ᑮᔑᒃ, ᐊᑭ ᑲᔦ, ᐋᓃᔥ ᑳᐐᓐ ᑭᑮ ᑭᑫᑕᒨᓈᓰᒃ ᐅᓄ ᑫᑰᓇᓐ ᐃᑭᐌᓂᐗᒃ ᑳᑲᑮᑖᐌᑕᒧᐙᒡ ᑳᑭᑫᑖᓱᐙᒡ ᑲᔦ, ᐃᑭ ᑕᔥ ᐐᓐ ᐋᐱᒋ ᑳᑭᑫᑕᓯᒀ ᑫᑰᓐ ᑭᑮᐙᐸᑕᐋᒃ᙮ ᓂᑌᑌ, ᒦ ᐅᐌ ᐁᔑ ᒥᓍᐸᑕᒪᓐ᙮

ᒦᑕᔥ ᑳᐊᓂ ᐃᑭᑐᒡ: ᓂᑌᑌ ᑕᔥ ᑲᑭᓇ ᑫᑰᓂᓂ ᓂᑮᒦᓂᒃ᙮ ᑳᐐᓐ ᐊᐎᔭ ᐅᑭᑫᓂᒫᓰᓐ ᐃᓂ ᐅᑯᓯᓯᒫᓐ, ᒦ ᐁᑕ ᐊᐊ ᑳᐅᔫᓯᒥᓐᒡ᙮ ᑳᐐᓐ ᑲᔦ ᐊᐎᔭ ᐅᑭᑫᓂᒫᓰᓐ ᐃᓂ ᑳᐅᔫᓯᒥᒥᓐᒡ, ᒦ ᐁᑕ ᐊᐊ ᐅᑯᓯᓯᒫ᙮ ᐃᐃ ᑕᔥ ᐁᑕ ᑲᔦ ᑳᐃᓀᑕᕽ ᐅᑯᓯᓯᒫ ᒋᑭᑫᑕᒨᓈᒡ᙮

ᒋᓴᔅ ᐅᑮ ᑴᑭᑳᐸᐎᑕᐙᐞ ᐅᑭᑭᓄᐊᒪᐙᑲᓇᐞ ᐁᐃᓈᒡ: ᐁᑕᑕᐌ ᑮᓇᐙ ᑭᔕᐌᑖᑯᓯᒻ ᐁᐙᐸᑕᒣᒃ ᐅᐅ ᑳᐙᐸᑕᒣᒃ᙮

ᑭᐐᑕᒪᐎᓂᓂᒻ ᐱᐹᑏᓄᐗᒃ ᑭᔐᒪᓂᑑᓐ ᑫᓅᑕᒪᐙᐙᒡ, ᐃᑭ ᑲᔦ ᑭᒋᐅᑭᒫᒃ ᐁᑮᐃᔑ ᒥᓴᐌᑕᒧᐙᒡ ᒋᐙᐸᑕᒧᐙᒡ ᓅᑯᒻ ᑮᓇᐙ ᑳᐙᐸᑕᒣᒃ, ᑳᐐᓐ ᐃᑕᔥ ᐅᑮᐙᐸᑕᓰᓈᐙ᙮ ᑲᔦ ᑕᔥ ᒋᓅᑕᒧᐙᒡ ᑫᑰᓇᓐ ᑮᓇᐙ ᑳᓅᑕᒣᒃ, ᑳᐐᓐ ᑕᔥ ᐅᑮᓅᑕᓰᓈᐙ, ᐅᑮᐃᓈᓐ᙮

ᐯᔑᒃ ᑕᔥ ᑳᑭᑭᓄᐊᒫᑫᓂᒡ ᐅᓇᔓᐌᐎᓐ ᐅᑮᑲᑴ ᐗᓂᑮᔗᐃᑰᓐ ᐁᑮᐃᔑ ᑲᑴᒋᒥᑯᒡ: ᐅᑭᑭᓄᐊᒫᑫ, ᐋᓃᓐ ᑫᐃᔑᒋᑫᔮᓐ ᒋᐊᔮᔮᓐ ᑳᑭᑫ ᐱᒫᑎᓯᐎᓐ, ᐅᑮᐃᑰᓐ᙮

ᒦᔥ ᒋᓴᔅ ᑳᐃᓈᒡ: ᐋᓃᓐ ᑕᔥ ᐁᔑᐲᐃᑳᑌᒃ ᐃᐃ ᑫᑌ ᐅᓇᔓᐌᐎᓐ? ᐋᓃᓐ ᐁᔑᓂᓯᑐᑕᒪᓐ?

ᒦᑕᔥ ᑳᐃᑯᒡ: ᑭᑖ ᓵᑭᐋ ᑌᐯᒋᑫᒡ ᑭᑭᔐᒪᓂᑑᒻ ᐃᐃᒫ ᒥᓯᐌ ᑭᑌᐃᕽ, ᐃᐃᒫ ᑲᔦ ᒥᓯᐌ ᑭᑕᒑᑯᕽ, ᐃᐃᒫ ᑲᔦ ᒥᓯᐌ ᑭᒪᔥᑲᐎᓰᐎᓂᕽ, ᐃᐃᒫ ᑲᔦ ᒥᓯᐌ ᑭᓈᑲᑕᐌᑕᒧᐎᓂᕽ᙮ ᒋᓵᑭᐋᒡ ᑲᔦ ᑮᒋᐱᒫᑎᔅ ᑖᐱᔥᑰ ᑳᔑ ᓵᑭᐃᑎᓱᔭᓐ, ᐅᑮᐃᑰᓐ᙮

ᒦᔥ ᒋᓴᔅ ᑳᐃᓈᒡ: ᑾᔭᒃ ᑭᑎᔑᓇᑴᑕᒻ᙮ ᒦ ᐅᐌ ᐃᔑᒋᑫᓐ, ᒦᔥ ᒋᐊᔮᔭᓐ ᐱᒫᑎᓯᐎᓐ, ᐅᑮᐃᓈᓐ᙮

ᐃᓂ ᑕᔥ ᑳᑭᑭᓄᐊᒫᑫᓂᒡ ᐅᓇᔓᐌᐎᓐ ᑮᐐᑲᑴ ᑫᒋᓇᐅᐙᓐ, ᒦᔥ ᑳᐃᔑ ᑲᑴᒋᒥᑯᒡ: ᐊᐌᓀᓐ ᑕᔥ ᐊᐊ ᓃᒋᐱᒫᑎᔅ?

ᒦᑕᔥ ᐅᐅ ᒋᓴᔅ ᑳᐃᓈᒡ: ᐯᔑᒀ ᐃᓂᓂ ᒉᕒᐆᓴᓬᐊᒥᕽ ᑮᐅᒋ ᒫᒑ ᐁᑮᐃᔖᒡ ᒉᕒᐊᑰ ᐆᑌᓈᕽ᙮ ᒣᒀ ᑕᔥ ᐁᐱᒥ ᐊᔮᒡ ᐅᑮᒨᒋᔥᑲᐞ ᐅᑮᐅᑎᑎᓂᑰᐞ ᐁᑮᒪᑲᒥᑯᒡ, ᑳᑮ ᑭᑭᔥᑲᕽ ᑲᔦ ᐁᑮᒪᑲᒥᓐᒡ, ᑲᔦ ᑕᔥ ᐁᑮ ᐸᐸᑭᑌᐅᑯᒡ᙮ ᒦᔥ ᑳᐃᔑ ᓇᑲᓂᑯᒡ, ᐁᑮᐋᐱᑑᓂᐳᒡ᙮

ᓇᐃᑖᒃ ᑕᔥ ᐊᓇᒥᐁᐎᑭᒫ ᑫᐐᓐ ᑮᐱᐱᒪᐊᑑ ᐃᐃ ᒦᑲᓈᓂ᙮ ᐊᐲ ᑕᔥ ᐁᐙᐸᒫᒡ ᐁᐱᒥᔑᓂᓂᒡ ᐃᓂ ᑳᑮᒦᑳᒋᑲᓂᐎᓂᒡ, ᒦ ᐃ ᓇᐹᒡ ᐃᓇᑫ ᑳᐃᔑ ᐌᒫᔥᑲᐙᒡ᙮

ᒦᑕᔥ ᑫᐐᓐ ᐊᐊ ᐊᓇᒥᐁᐗᓄᑮᐋᑲᓐ ᓬᐄᐸᔨᕽ ᐌᑕᑳᓀᓯᒡ ᐅᑮᐱ ᐅᑎᑖᓐ ᐃᐃᒫ᙮ ᐊᐲ ᑕᔥ ᐁᐙᐸᒫᒡ ᐁᐱᒥᔑᓂᓂᒡ ᐃᓂ ᐃᓂᓂᐗᓐ, ᒦ ᐃ ᑫᐐᓐ ᓇᐹᒡ ᐃᓇᑫ ᑳᐃᔑ ᐌᒫᔥᑲᐙᒡ᙮

ᐯᔑᒃ ᑕᔥ ᐃᓂᓂ ᓴᒣᕒᐃᔭ ᐌᒌᒡ ᐁᐱᒥ ᐊᔮᒡ ᐃᐃᒫ ᒦᑲᓈᕽ ᐅᑮᐱ ᐅᑎᑖᓐ ᐁᔑ ᐱᒥᔑᓂᓂᒡ ᐃᓂ ᐃᓂᓂᐗᓐ᙮ ᐁᐙᐸᒫᒡ ᐃᑕᔥ ᐅᑮ ᑰᐹᓯᓇᐙᓐ᙮

ᒦᔥ ᑳᑮᓈᓯᑲᐙᒡ ᐁᐱᒥᔑᓂᓂᒡ᙮ ᐅᑮ ᓰᑭᓈᓐ ᔔᒥᓈᐴᓂ, ᐱᒥᑌᓂ ᑲᔦ ᐁᑮᐋᐸᒋᑑᒡ ᐁᑮ ᐴᓯᓈᒡ ᑳᐃᔑ ᓇᒣᔮᐱᓇᓂᒥᓐᒡ᙮ ᒦᔥ ᑲᔦ ᑳᐃᔑ ᓰᑑᐱᓈᒡ, ᐁᑮᐊᓂ ᐗᑭᒋᔑᒫᒡ ᐃᐃᒫ ᒥᑕᑎᒨᓯᕽ᙮ ᐅᑮᐃᔑᐎᓈᓐ ᑲᔦ ᑲᐯᔒᐎᑲᒥᑯᕽ, ᐁᑮᐊᐎ ᓈᓈᑲᒋᐋᒡ᙮

ᐊᐲ ᑕᔥ ᐁᐊᓂ ᐙᐸᓂᓂᒃ ᐁᐐᐊᓂ ᒫᒑᒡ, ᐅᑮ ᑭᑎᓈᐞ ᓃᔑᓐ 2 ᐙᐹᐱᑯ ᔔᓂᔮᓴᐞ ᐁᑮᒦᓈᒡ ᑳᑲᓇᐌᑕᒥᓂᒡ ᑲᐯᔒᐎᑲᒥᒃ ᐁᑮᐃᓈᒡ: ᑾᔭᒃ ᑲᓇᐌᓂᒻ᙮ ᐊᐲ ᑕᔥ ᐱᑮᐌᔮᓐ ᐱᑭᐱᒌᔮᓐ ᐅᐅᒫ, ᑭᑲ ᑎᐸᐊᒪᐎᓐ ᐋᓃᓐ ᒥᓂᒃ ᑫᒣᑎᓂᑫᐃᒃ ᐁᑲᓇᐌᓂᒪᒡ, ᐅᑮᐃᓈᓐ᙮ ᒦ ᐃ ᒋᓴᔅ ᑳᐃᓈᒋᒧᒡ᙮

ᒦᑕᔥ ᒋᓴᔅ ᑳᐃᔑᑲᑴᒋᒫᒡ: ᐋᓃᓐ ᑮᓐ ᐁᓀᑕᒪᓐ ᐃᑭᐌᓂᐗᒃ ᓂᓯᓐ 3 ᑳᑮᐱᒥ ᐊᔮᐙᒡ, ᐊᐌᓀᓐ ᐊᐊ ᑳᑮ ᑑᑕᕽ ᑖᐱᔥᑰ ᐁᐐᒋᐱᒫᑎᓰᒫᒡ ᐃᓂᐌᓂᐗᓐ ᐃᓂᓂᐗᓐ ᑳᑮ ᒦᑳᓂᑯᓂᒡ ᐅᑮᒨᒋᔥᑲᐞ? ᐅᑮᐃᓈᓐ᙮

ᒦᑕᔥ ᑳᐃᑯᒡ: ᐊᐊᐌ ᓴ ᑳᑮ ᑰᐹᓯᓇᐙᒡ ᐃᓂ ᐃᓂᓂᐗᓐ, ᐅᑮᐃᑰᓐ᙮ ᒦᔥ ᒋᓴᔅ ᑳᐃᓈᒡ: ᒦ ᐃ ᐊᓂᔑ ᒫᒑᓐ, ᐯᔑᑾᓐ ᐅᐅ ᒋᐃᔑᒋᑫᔭᓐ, ᐅᑮᐃᓈᓐ᙮

ᒋᓴᔅ ᑕᔥ ᐅᑭᑭᓄᐊᒪᐙᑲᓇᐞ ᑲᔦ ᒣᒀ ᐁᐱᒥ ᐊᔮᐙᒡ ᐅᑮᐱ ᐅᑎᑖᓈᐙ ᐆᑌᓇᐌᔅ᙮ ᒦ ᐃᒫ ᑳᑮ ᐲᑎᑲᓂᑯᒡ ᐃᑴᐗᓐ ᒫᕒᑕ ᐁᔑᓂᑳᓱᓂᒡ᙮

ᒫᕒᑕ ᑮᐊᔮᐗᓐ ᐐᒋᑴᓐ ᒣᕒᐃ ᐁᔑᓂᑳᓱᓂᒡ᙮ ᒦᐗᓐ ᐃᓂ ᑳᑮᐊᐱᓂᒡ ᐁᔑᓯᑌᐱᓂᒡ ᑳᑎᐯᒋᑫᓂᒡ ᐁᐱᓯᑖᐙᓂᒡ ᐋᓃᓐ ᐁᔑ ᑭᑭᓄᐊᒫᑫᓂᒡ᙮

ᒫᕒᑕ ᑮᐅᒋ ᐅᒑᓂᒣᑕᒻ ᐐᓐ ᐁᑕ ᒋᐊᓄᑮᒡ ᐁᐸᒦᑖᑫᒡ᙮ ᐯᔓ ᑮᐲᔖ ᐁᑮᐱ ᐃᑭᑐᒡ: ᑌᐯᒋᑫᔭᓐ, ᑳᐐᓐ ᐃᓇ ᑫᑰᓐ ᑭᑎᓀᑕᓰ ᐁᐐᒋᐃᓯᒃ ᓂᒋᑴ ᐅᐅᐌ ᐊᓄᑮᐎᓐ ᑳᑑᑕᒫᓐ᙮ ᐐᑕᒪᐤ ᒋᐱ ᐐᒋᐃᒡ, ᑮᐃᑭᑐ᙮

ᒦᔥ ᑳᑎᐯᒋᑫᒡ ᑳᐃᔑ ᓇᑴᑕᐙᒡ: ᒫᕒᑕ, ᒫᕒᑕ, ᐁᑕᑕᐌ ᓃᐱᐗᐞ ᑫᑰᓐ ᑭᒥᑯᔥᑳᒋᐃᑯᓐ, ᐁᐗᓇᔥᑴᐃᑯᔭᓐ ᑲᔦ᙮

ᐯᔑᒃ ᐁᑕ ᔖᑰᒡ ᑫᑰᓐ ᓃᑳᓀᑖᑾᓐ᙮ ᒣᕒᐃ ᑕᔥ ᐐᓐ ᐅᑮᐅᑖᐱᓈᓐ ᐁᐐᐃᔑᒋᑫᒡ ᑳᒥᓄᓈᑾᓂᓂᒃ, ᑳᐐᓐ ᑕᔥ ᑕᒪᑲᒫᓰ ᐃᐃᐌᓂ, ᐅᑮᐃᓈᓐ᙮

ᐋᐱᑎᕽ ᑕᔥ ᒋᓴᔅ ᑮᐊᓇᒥᐋ ᐯᔑᒃ ᐊᔮᐎᓂᕽ᙮ ᐊᐲ ᑳᐃᔥᒀ ᐊᓇᒥᐋᒡ ᐯᔑᒃ ᐅᑭᑭᓄᐊᒪᐙᑲᓇᓐ ᐅᑮᐃᑰᓐ: ᑌᐯᒋᑫᔭᓐ, ᑭᑭᓄᐊᒪᐎᔑᓈᒻ ᐋᓃᓐ ᑫᔑ ᐊᓇᒥᐋᔮᕽ ᑖᐱᔥᑰ ᒞᓐ ᑳᑮᐃᔑ ᑭᑭᓄᐊᒪᐙᒡ ᐅᑭᑭᓄᐊᒪᐙᑲᓇᐞ᙮

ᒦᑕᔥ ᑳᐃᓈᒡ: ᐊᐲ ᐊᓇᒥᐋᔦᒃ, ᒦ ᐅᐌ ᑫᐃᑭᑐᔦᒃ: ᑳᐅᔫᓯᒥᑰᔭᓐ, ᑲᑭᓇ ᐊᐎᔭᒃ ᐅᑲᑭᒋ ᐃᓀᑖᓈᐙ ᑭᑎᔑᓂᑳᓱᐎᓐ, ᐱᐅᔑᓯᑑᓐ ᑭᑎᐯᒋᑫᐎᓐ᙮

ᒦᔑᔑᓈᒻ ᐁᑕᓱ ᑮᔑᒃ ᑫᐅᒋ ᐱᒫᑎᓯᔮᕽ᙮

ᐴᓀᑕᒪᐎᔑᓈᒻ ᑲᔦ ᓂᒪᒋᑑᑕᒧᐎᓂᓈᓇᓐ, ᐋᓃᔥ ᓃᓇᐎᓐᑦ ᓂᐴᓀᑕᒪᐙᓈᓂᒃ ᐃᑭᐌᓂᐗᒃ ᑳᐗᓂᑑᑕᐎᔭᒥᑣ᙮ ᑫᑯ ᐃᔑᐎᔑᔑᓈᑳᕽ ᑲᑴᒋᐃᑰᐎᓂᕽ᙮

ᒦᑕᔥ ᒋᓴᔅ ᑳᐃᓈᒡ ᐅᑭᑭᓄᐊᒪᐙᑲᓇᐞ: ᑮᔥᐱᓐ ᐅᐅᒫ ᑳᑕᔑᔦᒃ ᐯᔑᒃ ᐊᔮᐙᑴᓐ ᑳᓵᑭ ᐐᒌᐙᒡ, ᐊᑕ ᐙᐸᒫᒡ ᐃᑕᔥ ᐅᐙᑳᐃᑲᓂᓃᕽ ᐋᐱᑖ ᑎᐱᑲᓂᓂᒃ ᐅᐅ ᐃᓈᒡ: ᑳᓵᑭ ᐐᒌᐎᓈᓐ, ᑕᑲ ᐊᐎᐃᔑᓐ ᓂᓯᓐ 3 ᐸᑴᔑᑲᓇᒃ?

ᓂᓵᑭ ᐐᒌᐙᑲᓐ ᐅᔕ ᑮᑕᑯᔑᓐ ᐁᐱᒥ ᐊᔮᒡ, ᑳᐐᓐ ᑕᔥ ᑫᑰᓐ ᓂᑕᔮᓰᓐ ᑫᐊᔕᒪᒃ, ᐁᐃᓇᒡ᙮

ᐅᐅ ᑕᔥ ᑮᒋᐱᒫᑎᔅ ᐲᑎᒃ ᒪᑗᐅᒋ ᑲᓅᓂᒃ: ᑫᑯ ᒥᑯᔥᑳᒋᐃᔑᑫᓐ᙮ ᐃᔥᒀᑌᒻ ᐋᔕ ᓂᑮ ᑭᐸᐋᓐ᙮ ᐋᔕ ᑲᔦ ᓂᑮ ᑲᐎᔑᒧᒥᓐ ᓂᑕᐱᓅᒌᔑᒪᒃ᙮ ᑳᐐᓐ ᓂᑲ ᐗᓂᔥᑳᓰ ᒋᒦᓂᓈᓐ ᑫᑰᓐ, ᐁᐃᓂᒃ᙮

ᒦᑕᔥ ᐁᔑ ᐐᑕᒪᐎᓇᑰᒃ, ᑳᐐᓐ ᐄᑐᒃ ᑕᐃᓀᑕᓰ ᒋᐗᓂᔥᑳᒡ ᒋᒦᓂᒃ ᑫᑰᓂᓂ ᒥᓴᐙ ᐃᑯ ᐁᓵᑭ ᐐᒌᐎᒃ᙮ ᔖᑰᒡ ᐃᑕᔥ ᑕᐗᓂᔥᑳ ᒋᒦᓂᒃ ᐋᓃᓐ ᐁᔑ ᓅᑌᓭᐗᒡ ᐋᓃᔥ ᑳᐐᓐ ᑭᐸᑭᒌᐙᓰᓐ ᐁᑲᑴᒋᒪᒡ᙮

ᒦᑕᔥ ᐁᓂᓇᑰᒃ: ᑲᑴᑗᔦᒃ ᐃᓴ, ᑭᑲ ᒦᓂᑰᒻ᙮ ᓇᓈᑐᓂᑫᔦᒃ, ᑭᑲ ᒥᑭᑫᒻ ᐃᑕᔥ᙮ ᒪᑗᐋᑾᐃᑫᔦᒃ, ᑭᑲ ᐹᑭᑌᓇᒫᑰᒻ ᐃᑕᔥ᙮

ᐊᐌᓀᓐ ᐊᐊ ᑳᑲᑴᑗᒡ, ᒦ ᐊᐌ ᑫᒦᓂᓐᒡ᙮ ᐊᐊ ᑳᓇᓈᑐᓂᑫᒡ ᐅᒥᑳᓐ᙮ ᑲᔦ ᐊᐌ ᑳᐹᐹᐗᐃᑫᒡ ᑕᐹᑭᑌᓇᒪᐙ᙮

ᑮᓇᐙ ᑳᐅᑌᑌᒫᐎᔦᒃ ᑮᔥᐱᓐ ᑭᑯᓯᔅ ᑲᑴᒋᒥᒃ ᑮᑰᔭᓐ, ᒣᔅᑾᒡ ᐃᓇ ᑭᑖ ᒦᓈ ᑭᓀᐱᑰᓐ?

ᑯᒫ ᑲᔦ ᑭᑯᓯᔅ ᑲᑴᒋᒥᒃ ᐙᐗᓐ, ᒣᔥᑾᒡ ᐃᓇ ᑭᑖᒦᓈ ᑳᒌᓱᐌᓂᒡ ᒪᓂᒎᔕᓐ?

ᓇᔥᑫ ᑮᓇᐙ ᐋᓇ ᐃᔑᒪᒋ ᐃᓂᓃᐎᔦᒃ, ᐁᓂᐌᒃ ᑭᑭᑫᑖᒻ ᑳᐅᓂᔑᔑᓂᓂᑭᓐ ᑫᐃᔑ ᒦᓀᒀ ᑭᓃᒑᓂᓯᐙᒃ᙮ ᑫᒋᓈᒡ ᐊᐗᔑᒣ ᑭᑌᑌᐙ ᑭᒋᑮᔥᑯᕽ ᑳᐊᔮᒡ ᑕᒦᑭᐌ ᐅᑕᒑᑾᓐ, ᒋᒦᓈᒡ ᐊᐌᓀᓇᓐ ᐃᑯ ᑫᑲᑴᒋᒥᑯᒡ, ᑮᐃᑭᑐ ᒋᓴᔅ᙮

ᒋᓴᔅ ᑕᔥ ᐅᑮ ᓵᑭᒋᓂᔕᐙᓐ ᒪᒋᐊᒑᑾᓐ ᑲᓂᑖᐌᓯᓂᒃ᙮ ᐊᐲ ᒪᒋᐊᒑᑾᓐ ᑳᓵᑲᐊᒥᓂᒡ, ᒦᔥ ᐃᓂ ᐃᓂᓂᐗᓐ ᑳᑮ ᑲᔥᑭᑑᓂᒡ ᒋᑲᑭᑐᓂᒡ᙮ ᐃᓂᐌᓂᐗᐞ ᑕᔥ ᑳᐹᑏᓄᓂᒡ ᑮᑭᒋ ᒫᒪᑳᑌᑕᒨᐞ᙮

ᐋᓂᑕ ᑕᔥ ᑮᐃᑭᑐᐗᐞ: ᑭᒋᐅᑭᒫ ᒪᒋᐊᒑᑾᓐ ᐱᐁᓬᓯᐳᓬᐆᓐ ᐅᔕ ᐅᒦᓂᑰᓐ ᒪᔥᑲᐎᓰᐎᓐ ᒋᓵᑭᒋ ᐌᐱᓈᒡ ᒪᒋᐊᒑᑾᐞ, ᑮᐃᑭᑐᐗᐞ᙮

ᑯᑕᒃ ᐃᑕᔥ ᐅᑮ ᑲᑴᒋᐃᑰᐞ ᐁᑮ ᑲᑳᓱᒥᑯᒡ ᒋᓴᔅ ᒋᒫᒪᑳᒋᒋᑫᒡ ᑭᒋᑮᔑᑯᕽ ᒋᐱ ᐅᒌᓂᒃ᙮ ᒋᓈᑯᑑᒡ ᑭᔐᒪᓂᑑᓐ ᐁᑮᐅᓈᐸᒥᑯᒡ᙮

ᒋᓴᔅ ᑕᔥ ᐅᑮ ᑭᑫᓂᒫᐞ ᐋᓃᓐ ᐁᓀᑕᒥᓂᒡ, ᒦᑕᔥ ᑳᐃᓈᒡ: ᑮᔥᐱᓐ ᓴ ᑎᐯᒋᑫᐎᓂᕽ ᐊᐎᔭᒃ ᑳᐊᔮᐙᒡ ᐐᐯᐸᑳᓂᑑᐙᒡ ᒋᒦᑳᑎᐙᒡ, ᐋᐱᒋ ᐐᐸ ᑕᓂᔑᐗᓈᑕᓐ ᐃᐃ ᑎᐯᒋᑫᐎᓐ᙮ ᑮᔥᐱᓐ ᑲᔦ ᑖᐎᓐ ᐯᐸᑳᓂᐃᑎᓲᒪᑲᒃ ᐋᐱᒋ ᐐᐸ ᑕᐸᑭᓯᓐ᙮

ᑮᔥᐱᓐ ᓭᑕᓐ ᑳᑕᔑ ᐅᑭᒫᐎᒡ ᒫᒦᑳᑎᓈᓂᐗᓂᓂᒃ, ᐋᐱᒋ ᐐᐸ ᑕᐸᑭᓯᓂᓂ᙮ ᑭᑎᔑᒻ ᐃᑕᔥ ᑲᔦ ᐁᒦᔑᒡ ᐱᐁᓬᓯᐳᓬ ᒪᔥᑲᐎᓰᐎᓐ ᑳᐅᒋ ᓵᑭᒋ ᐌᐱᓂᒪᒃ ᒪᒋᐊᒑᑾᐞ᙮

ᑮᔥᐱᓐ ᐃᑕᔥ ᐄᓴᓐ ᐐᒋᐃᒡ ᐱᐁᓬᓯᐳᓬ ᑮᓵᑭᒋ ᐌᐱᓂᒪᒃ ᒪᒋᐊᒑᑾᐞ, ᐋᑎ ᑕᔥ ᐃᑭ ᑳᐱᒥᓂᔕᐅᓀᒀ ᐌᑎᓇᒧᐙᒡ ᒪᔥᑲᐎᓰᐎᓐ ᒋᓵᑭᒋ ᐌᐱᓈᐙᒡ ᒪᒋᐊᒑᑾᐞ? ᐃᑭ ᓴ ᑳᐱᒥᓂᔕᐅᓀᒀ ᐅᓈᑯᑑᓈᐙ ᑮᓇᐙ ᐋᓂᔖ ᐁᐃᔑᔦᒃ᙮

ᑮᔥᐱᓐ ᐃᑕᔥ ᐐᓐ ᐋᐸᒋᑖᐗᒃ ᑭᔐᒪᓂᑑ ᐅᒪᔥᑲᐎᓰᐎᓐ ᐁᓵᑭᒋᓂᔕᐗᒀ ᐃᑭ ᒪᒋᐊᒑᑾᒃ, ᒦᑕᔥ ᐄᓴᓐ ᑫᒋᓈᒡ ᐁᐅᑎᓯᑯᐌᒃ ᑭᔐᒪᓂᑑ ᐅᑎᐯᒋᑫᐎᓐ᙮

ᐊᐲ ᑳᒪᔥᑲᐎᓰᒡ ᐃᓂᓂ, ᐌᐌᓂ ᐱᑯ ᐁᑭᑮᒡ ᐅᒦᑳᓲᐎ ᐋᐸᒋᒋᑲᓇᓐ ᐁᑲᓇᐌᑕᕽ ᐅᐙᑳᐃᑲᓐ, ᑳᑎᐯᑕᕽ ᐱᓵᓐ ᐊᔮᓂᐗᓐ᙮

ᑳᐐᓐ ᑲᔦ ᐊᐎᔭ ᐅᑖ ᑲᔥᑭᑑᓰᓐ ᒋᐲᑎᑫᒡ ᒋᑮ ᒪᑲᒫᒡ ᐅᑕᔭᐄᒥᓂ ᐅᐙᑳᐃᑲᓂᓃᕽ ᐃᓂ ᑳᒪᔥᑲᐎᓰᓂᒡ ᐃᓂᓂᐗᓐ᙮ ᐱᓇᒫ ᐁᑕ ᑕᑯᐱᓈᒡ ᐃᓂ ᐃᓂᓂᐗᓐ ᒦ ᐃ ᐹᓂᒫ ᒋᑲᔥᑭᑑᐸᓐ ᒋᑮ ᒪᑲᒫᒡ ᐅᑕᔭᐄᒥᓂ ᐅᐙᑳᐃᑲᓂᓃᕽ᙮

ᐊᐌᓀᓐ ᓴ ᐱᑯ ᑳᐐᒌᐎᓯᒃ ᒦ ᐊᐌ ᑳᓇᑲᔥᑲᐎᒡ, ᐊᐌᓀᓐ ᑲᔦ ᑳᐐᒋᐃᓯᒃ ᑮᒫᐗᑑᓂᑫᔮᓐ, ᒦ ᐊᐌ ᐄᓴᓐ ᑳᐅᓶ ᐌᐱᓂᑫᒡ᙮

ᐊᐲ ᒪᒋᐊᒑᒃ ᑮᐅᒋ ᓵᑭᒋ ᐌᐱᓂᑲᓂᐎᒡ ᐃᓂᓃᕽ, ᒦ ᐃ ᒥᓯᐌ ᐁᔑ ᐸᐹᒥ ᐊᔮᒡ ᐱᑾᑕᑲᒥᒃ ᑳᐃᔑ ᐹᑌᓂᒃ ᐁᑲᑴ ᒥᑲᕽ ᐋᑎ ᑫᔑ ᐊᓉᐱᒡ, ᑳᐐᓐ ᑕᔥ ᑫᑰᓂᓂ ᐅᒥᑲᓰᓐ᙮ ᒦᑕᔥ ᐁᑭᑐᒡ: ᓂᑲ ᑮᐌ ᓂᐙᑳᐃᑲᓂᕽ ᐋᑎ ᑳᑮᐅᒋ ᓵᑲᐊᒫᓐ᙮

ᒦᑕᔥ ᐁᔑ ᑮᐌᒡ ᐁᒥᑲᕽ ᐅᐙᑳᐃᑲᓐ ᐐᑫ ᐁᑮ ᐯᑭᒋᑳᑌᓂᒃ, ᑲᔦ ᑕᔥ ᐁᓴᑲᑭᒋᑳᑌᓂᒃ᙮

ᒦᑕᔥ ᐁᔑᑮᐌ ᑕᑯᔑᕽ ᐁᑕᑯ ᐲᓈᒡ ᓃᔣᓱ ᒪᒋᐊᒑᑾᐞ ᓇᐗᒡ ᐁᒪᒑᑎᓯᓂᒡ ᐊᐲᒡ ᐐᓐ᙮ ᒦᑕᔥ ᐁᔑ ᐲᑎᑫᐙᒡ ᐃᐃᒫ ᐁᐃᔑᑖᐙᒡ᙮ ᐊᐊ ᑕᔥ ᐃᓂᓂ ᓇᐗᒡ ᑭᒋ ᐃᔑᐊᔮ ᐊᐲᒡ ᐐᓐ ᑳᑮᐃᔑ ᐊᔮᐸᓐ ᓂᑕᒻ᙮

ᒣᒀ ᑕᔥ ᒋᓴᔅ ᐅᐅ ᐁᐃᑭᑐᒡ, ᐯᔑᒃ ᐃᑴᐗᓐ ᐅᑮᐅᒋ ᑲᓅᓂᑰᓐ ᐃᐃᒫ ᒣᑴᔭᐄ ᐁᔑ ᐹᑏᓄᓈᓂᐗᓂᓂᒃ ᐁᐃᑯᒡ: ᑳᓇᑲ ᐁᐲᒋ ᔕᐌᑖᑯᓯᑴᓐ ᐊᐊ ᐃᑴ ᑳᑮᓂᑖᐎᑭᐃᒃ, ᑳᑮᓅᓂᐃᒃ ᑲᔦ, ᐅᑮᐃᑰᓐ᙮

ᒦᔥ ᐅᐅ ᒋᓴᔅ ᑳᐃᔑ ᓇᑴᑕᐙᒡ: ᓇᐗᒡ ᐄᑐᒃ ᐃᑭ ᔕᐌᑖᑯᓯᐗᒃ ᑳᓅᑕᒧᐙᒡ ᑭᔐᒪᓂᑑᓐ ᐁᑭᑐᓂᒡ, ᑲᔦ ᑕᔥ ᑳᓇᐃᑕᒧᐙᒡ᙮

ᐊᐲ ᑕᔥ ᐊᐎᔭᐞ ᐋᒌᑫ ᐁᐊᓂ ᐹᑏᓄᓂᒡ, ᒋᓴᔅ ᑮᐊᓂ ᐃᑭᑐ: ᐋᐱᒋ ᒪᒋ ᐃᓇᑫ, ᐊᓅᒋᑯ ᑲᔦ ᐃᔑᐱᒫᑎᓯᐗᒃ ᓅᑯᒻ ᑳᐱᒫᑎᓯᐙᒡ, ᒦ ᐁᑕ ᑯ ᐁᔑᒋᑫᐙᒡ ᐁᓇᓈᑕ ᐙᐸᑕᒧᐙᒡ ᒫᒪᑳᒋᒋᑫᐎᓇᓐ᙮ ᐃᐃᐌᓂ ᑕᔥ ᐁᑕ ᒫᒪᑳᒋᒋᑫᐎᓐ ᑫᐙᐸᑕᒧᐙᒡ, ᑖᐱᔥᑰ ᒎᓇ ᑳᑮᐃᔑ ᒫᒪᑳᒋᓭᒡ᙮

ᑖᐱᔥᑰ ᒎᓇ ᑳᑮᐃᓍᓂᓐᒡ ᒫᒪᑳᒋᒋᑫᐎᓂᕽ ᑫᐅᒋ ᐙᐱᓂᒡ ᑳᑮᐊᔮᓂᒡ ᓂᓂᐸ ᑭᒋ ᐆᑌᓇ, ᒦᔥ ᑫᐐᓐ ᐯᔑᑾᓐ ᐃᓂ ᐃᓂᓂ ᐅᑯᓯᓴᓐ ᑫᐅᒋ ᐙᐸᒋᑳᓱᓂᒡ ᐅᐅ ᓅᑯᒻ ᑳᐱᒫᑎᓯᔭᕽ᙮

ᐊᐲ ᑕᔥ ᑎᐹᑯᓂᑫᐎ ᑮᔑᑲᒃ ᑭᒋᐅᑭᒫᑴ ᔖᐗᓄᕽ ᑳᑮᐅᒌᒡ ᑕᐸᓯᑸ ᒋᐊᓈᒥᒥᓀᒃ᙮ ᐋᓃᔥ ᐐᓐ ᐙᓴ ᑮᐱ ᐃᔖ ᐅᑕᑮᒥᕽ ᐁᑮᐱ ᐅᒌᒡ ᐁᐐᓅᑕᕽ ᔂᓬᐊᒪᓇᓐ ᐁᔑ ᑲᑮᑖᐎ ᑭᑭᓄᐃᑫᓂᒡ᙮ ᑭᐐᑕᒪᐎᓂᓂᒻ ᐃᑕᔥ ᓇᐗᒡ ᑫᒋ ᐃᓀᑖᑯᓯᒡ ᐊᐎᔭ ᐊᔮ ᐅᐅᒫ ᓅᑯᒻ ᐊᐲᒡ ᐐᓐ ᐊᐊ ᔂᓬᐊᒪᓐ᙮

ᐊᐲ ᑎᐹᑯᓂᑫᐎ ᑮᔑᑲᒃ ᐯᒫᑎᓯᐙᒡ ᓂᓂᐸ ᐆᑌᓈᕽ ᑳᐅᒌᐙᒡ ᑎᐹᑯᓂᑎᐎᓂᕽ ᑕᐃᔖᐗᒃ ᒋᐊᓈᒥᒥᓀᒀ ᓅᑯᒻ ᑳᐱᒫᑎᓯᔦᒃ᙮ ᑮᑴᑳᑎᓯᐗᒃ ᐄᑐᒃ ᐐᓇᐙ ᐊᐲ ᐁᓅᑕᐙᐙᒡ ᒎᓇᐗᓐ ᐁᑲᑮᑴᓂᒡ᙮ ᑌᐺ ᑕᔥ ᐅᐅ ᑳᐃᓂᓇᑰᒃ, ᑭᑕᔮᐙᐙ ᐊᐎᔭ ᓇᐗᒡ ᑫᒋ ᐃᓀᑖᑯᓯᒡ ᐊᐲᒡ ᐐᓐ ᐊᐊ ᒎᓇ, ᑮᐃᑭᑐ ᒋᓴᔅ᙮

ᐊᐎᔭ ᑮᓴᑲᐊᕽ ᐙᓴᑯᓀᒋᑲᓐ ᑳᐐᓐ ᐅᑎᔑ ᐊᑑᓰᓐ ᐃᐃᒫ ᐊᓈᒥᒪᑲᒃ᙮ ᐃᐃᒫ ᓴ ᐅᑎᔑ ᐊᑑᓐ ᐙᓴᑯᓀᒋᑲᓈᑎᑯᕽ ᒋᐙᐱᓂᒡ ᐃᓂᐌᓂᐗᐞ ᑳᐱ ᐲᑎᑫᓂᒡ ᐁᐙᓭᔮᓂᒃ᙮

ᑭᔥᑮᔑᑰᓐ ᓴ ᑖᐱᔥᑰ ᐙᓴᑯᓀᒋᑲᓐ ᐃᔑᓈᑾᓅᓐ ᐁᐙᓭᓇᒫᑯᔭᓐ ᑭᐐᔭᐎᕽ᙮ ᐊᐲ ᑭᔥᑮᔑᑰᓐ ᒥᓄᐊᔮᒪᑲᑭᓐ ᒥᓯᐌ ᑭᐐᔭᐎᕽ ᒨᔥᑭᓀᒪᑲᓐ ᐙᓭᔮ᙮ ᑮᔥᐱᓐ ᑕᔥ ᑾᔭᒃ ᐊᓄᑮᒪᑲᓯᓄᑭᓐ ᑭᔥᑮᔑᑰᓐ, ᒥᓯᐌ ᐄᓴᓐ ᑭᐐᔭᐎᕽ ᒨᔥᑭᓀᒪᑲᓐ ᐗᓃᑎᐱᑲᓐ᙮

ᐊᔮᒀᒥᓯᓐ ᑕᔥ ᐃᐃᐌ ᑳᐙᓭᔮᒃ ᑳᑭᑭᔥᑳᑯᔭᓐ ᒋᑎᓄᐗᓯᓄᒃ ᑳᑲᔥᑮ ᑎᐱᑲᒃ᙮

ᑮᔥᐱᓐ ᒥᓯᐌ ᑭᐐᔭᐎᕽ ᒨᔥᑭᓀᒪᑲᒃ ᐙᓭᔮ, ᐊᐙᒡ ᐃᑯ ᐸᑮ ᐊᔮᓯᓄᒃ ᑳᑲᔥᑮ ᑎᐱᑲᒃ, ᒦᐃ ᒥᓯᐌ ᒋᒨᔥᑭᓀᒃ ᐙᓭᔮ ᑭᐐᔭᐎᕽ ᑖᐱᔥᑰ ᐙᓴᑯᓀᒋᑲᓐ ᑳᐸᑲᑳᑌᒃ ᑳᐙᑌᓇᒫᑯᔭᓐ᙮

ᑳᐃᔥᒀ ᑲᑭᑐᒡ ᑕᔥ ᒋᓴᔅ, ᐯᔑᒃ ᐯᕒᐊᓰᓐ ᐅᑮᐊᑐᒥᑰᓐ ᐁᐐᐐᒋ ᐐᓯᓃᒥᑯᒡ᙮ ᒦᔥ ᑳᐃᔑ ᐃᔖᒡ ᐁᑮᐊᐎ ᐅᓈᐱᒡ ᒋᐐᓯᓂᒡ ᑑᐳᐎᓈᑯᕽ᙮

ᐐᑫ ᑕᔥ ᐃᓂ ᐯᕒᐊᓰᓐ ᑮᑯᔥᑴᑕᒨᓐ ᐁᐙᐸᒥᑯᒡ ᐱᓇᒫ ᐁᑭᓰᓂᒌᓯᒃ ᒋᑆ ᐐᓯᓂᒡ᙮

ᒦᑕᔥ ᑳᑎᐯᒋᑫᑦ ᑳᐃᓈᒡ: ᑌᐺ ᓴ ᑮᓇᐙ ᐯᕒᐊᓰᒃ ᑭᑭᓰᔮᐱᑭᓈᓈᐗ ᓵᑭᒐᔭᐄ ᓇᑫ ᐅᓈᑲᓐ ᐃᐃ ᑲᔦ ᒥᓂᒀᑲᓐ, ᐲᒐᔭᐄ ᑕᔥ ᐁᒨᔥᑭᓀᒪᑲᒃ ᐅᓵᒥᓯᐎᓐ, ᐃᐃ ᑲᔦ ᒪᒑᑎᓯᐎᓐ᙮

ᐋᓃᓐ ᐁᐲᒋ ᑲᑮᐹᑎᓯᔦᒃ? ᑭᔐᒪᓂᑑ ᐄᑐᒃ ᑳᑮᐅᔑᑑᒡ ᓵᑭᒐᔭᐄ ᑳᐊᔮᓂᒃ, ᐃᐃᐌᓂ ᑲᔦ ᐲᒐᔭᐄ ᑳᐊᔮᓂᒃ᙮

ᒦᓂᑾᒃ ᐃᑕᔥ ᑳᑭᑎᒫᑭᓯᐙᒡ ᐃᐃᐌᓂ ᐁᔮᓂᒃ ᐲᒐᔭᐄ ᑭᒥᓂᒀᑲᓂᐙᕽ, ᑭᑑᓈᑲᓂᐙᕽ ᑲᔦ, ᒦᑕᔥ ᑲᑭᓇ ᑫᑰᓐ ᒋᐯᑭᓈᑾᒃ ᑮᓇᐙ ᐅᒋ᙮

ᑭᑲ ᐅᒑᓂᒥᓯᒻ, ᑮᓇᐙ ᐯᕒᐊᓰᒃ, ᐁᒦᑭᐌᔦᒃ ᐯᔑᒃ ᑫᑰᓐ ᐁᑕᓱ ᒥᑖᒋᕽ ᑳᓂᑖᐎᑭᑑᔦᒃ ᑕᑯᓭᒀᓇᓐ, ᒥᓐᑦ, ᐃᐃ ᑲᔦ ᐅᕒᐆ ᑎᓄ᙮ ᑳᐐᓐ ᐃᑕᔥ ᑭᐸᐹᐱᓯᔅᑫᑕᓰᒻ ᑭᔐᒪᓂᑑ ᐅᓵᑭᐃᐌᐎᓐ, ᐋᓃᓐ ᑲᔦ ᐌᐌᓂ ᐁᓈᑯᓂᑫᒡ᙮ ᒦ ᓴ ᐃ ᑫᐃᔑᒋᑫᔦᑭᐸᓐ, ᑳᐐᓐ ᐐᓐ ᑲᔦ ᒋᐋᓶᔮᐸᒣᒀ ᑯᑕᒃ ᐊᐎᔭᒃ᙮

ᑭᑲ ᐅᒑᓂᒥᓯᒻ ᑮᓇᐙ ᐯᕒᐊᓰᒃ, ᐁᓵᑭᑑᔦᒃ ᐁᐃᔑ ᐊᐱᔦᒃ ᑳᑭᑕᑭᑌᒃ ᐊᐱᐎᓐ ᐊᓇᒥᐁᐎᑲᒥᑯᕽ, ᑲᔦ ᑕᔥ ᐁᒥᓉᑕᒣᒃ ᑮᐴᔔᐃᑯᔦᒃ ᒋᑕᑯ ᑭᑌᓂᒥᑰᔦᒃ ᐃᐃᒫ ᑳᑕᔑ ᐊᑖᐌᓈᓂᐗᕽ᙮

ᑭᑲ ᐅᒑᓂᒥᓯᒻ, ᑮᓇᐙ ᑭᑎᔑᓈᑯᓯᒻ ᑖᐱᔥᑰ ᑳᑭᑭᓇᐙᒋᒋᑳᑌᓯᓄᑭᓐ ᓂᑾᐊᑳᓇᓐ᙮ ᐯᒫᑎᓯᐙᒡ ᑕᔥ ᐃᐃᒫ ᐁᐃᔑ ᐱᒧᓭᐙᒡ ᐁᑭᑫᑕᓯᒀ, ᑮᐃᑭᑐ᙮

ᐯᔑᒃ ᑕᔥ ᑳᒥᓯᐌ ᑭᑫᑕᒥᓂᒡ ᐅᓇᔓᐌᐎᓐ ᐅᑮᐃᑰᓐ: ᐅᑭᑭᓄᐊᒫᑫ ᐊᐲ ᐅᐅᐌᓂ ᑮᐃᓇᑣ ᐯᕒᐊᓰᒃ ᑫᓃᓇᐎᓐᑦ ᐅᔕ ᓂᑑᒋ ᒪᒋᑖᒥᓐ, ᐅᑮᐃᑰᓐ᙮

ᐅᐅ ᑕᔥ ᒋᓴᔅ ᐅᑮᐃᔑ ᓇᑴᑕᐙᓐ: ᑫᑮᓇᐙ ᑭᑲ ᐅᒑᓂᒥᓯᒻ ᑳᒥᓯᐌ ᑭᑫᑕᒣᒃ ᐅᓇᔓᐌᐎᓐ, ᐋᓃᔥ ᑭᑑᓇᑕᒪᐙᐙᒃ ᐯᒫᑎᓯᐙᒡ ᑳᑯᓯᑾᓂᓂᑭᓐ ᑫᐱᒥᐎᑑᐙᒡ, ᑳᐐᓐ ᐃᑕᔥ ᑮᓇᐙ ᐯᔑᒀᑯᓂᓐᒡ ᑭᑖᐸᒋᑑᓰᓈᐙ ᒋᐐᒋᐁᒀᐸᓐ ᐃᑭ ᑳᐱᒥᐎᑑᐙᒡ ᑳᑯᓯᑾᓂᓂᑭᓐ᙮

ᐋᐱᒋ ᑭᑲ ᐅᒑᓂᒥᓯᒻ ᐋᓃᔥ ᑭᒥᓄ ᓈᑯᑑᒻ ᑳᑮᐃᔑ ᓇᐃᓂᑣ ᑭᔐᒪᓂᑑ ᑫᓅᑕᒫᑯᒡ᙮ ᑭᑫᑌᔭᐋᒥᐙᐸᓃᒃ ᐄᑐᒃ ᐅᑮᓂᓵᐙᐞ ᐃᐃ ᐅᑲᓅᑕᒫᑫᐞ᙮

ᑮᓇᐙ ᐄᑐᒃ ᑭᑭᑫᑖᒻ, ᑭᑎᔑ ᓇᐁᑖᒻ ᑲᔦ ᐋᓃᓐ ᑳᐃᔑᒋᑫᐙᒡ ᑭᑫᑌᔭᐋᒥᐙᐸᓃᒃ ᐁᑮᓂᓵᐙᒡ ᑫᓅᑕᒫᑫᓂᒡ᙮ ᒦᔥ ᑳᑮᐅᒋ ᐅᔑᑑᔦᒃ ᑫᔑ ᓇᐃᓂᑣ᙮

ᒦᑕᔥ ᐅᐅᐌᓂ ᐅᒋ ᑭᔐᒪᓂᑑ ᑫᑮᑖᐌᑕᕽ ᑳᐅᒋ ᐃᑭᑐᒡ: ᓂᑲ ᐃᔑᓂᔕᐊᒪᐙᒃ ᓴ ᑫᑲᓅᑕᒪᐎᒥᒡ, ᐃᐃ ᑲᔦ ᑫᐱᒥᐎᑑᓂᒡ ᑎᐹᒋᒧᐎᓐ᙮ ᒦᐗᐞ ᐃᑕᔥ ᐃᐃ ᐋᓂᑕ ᑫᓂᓵᐙᒡ᙮

ᐃᓇᔥᑫ ᑕᔥ ᐐᓇᐙ ᐊᐎᔭᒃ ᓅᑯᒻ ᑳᐱᒫᑎᓯᐙᒡ ᐅᑲ ᐸᑲᒥᔥᑳᑯᓈᐙ ᐃᐃᐌᓂ ᑳᑮᐱ ᓂᓯᒥᓐᒡ ᑫᓅᑕᒪᐙᓂᒡ ᑭᔐᒪᓂᑑᓐ ᐊᐲ ᑳᑮᐅᔑᒋᑳᑌᒃ ᐅᐅ ᐊᑭ ᐲᓂᔥ ᐅᐅ ᐃᔑᐊᐲ᙮

ᐃᐃᒫ ᐅᒋ ᐊᐲ ᐁᐸᓬ ᑳᑮᓂᓯᓐᒡ ᐲᓂᔥ ᐃᑕᔥ ᐊᐲ ᓭᑲᕒᐋᔭ ᑳᑮᓂᓯᓐᒡ ᐃᐃᒫ ᐃᔑᓇᓴᐗᔭᐄ ᐸᑭᑎᓈᓱᐎᓈᐱᑯᕽ, ᐃᐃ ᑲᔦ ᑳᐃᔑ ᑯᑖᓀᑖᑾᒃ ᐃᐃᒫ ᐲᑎᒃ ᑭᒋᐊᓇᒥᐁᐎᑲᒥᑯᕽ᙮ ᑌᐺ ᑕᔥ ᐅᐅ ᑳᐐᑕᒪᐎᓇᑰᒃ, ᓅᑯᒻ ᑳᐱᒫᑎᓯᐙᒡ ᐅᑲ ᐸᑲᒥᔥᑳᑯᓈᐙ ᐃᐃᐌᓂ ᑲᑭᓇ ᑳᑮᐱ ᓂᓯᒥᓐᒡ ᑫᓅᑕᒪᐙᓂᒡ ᑭᔐᒪᓂᑑᓐ᙮

ᐋᓃᓐ ᑫᐊᐲᒋ ᐅᒑᓂᒥᓯᔦᒃ ᑮᓇᐙ ᑳᒥᓯᐌ ᑭᑫᑕᒣᒃ ᐅᓇᔓᐌᐎᓐ᙮ ᑮᓇᐙ ᐄᑐᒃ ᑳᑮᐅᑖᐱᓇᒣᒃ ᐋᐹᐱᑲᐃᑲᓐ ᑳᐅᒋ ᑭᑫᒋᑳᑌᒃ ᑫᑰᓐ, ᑳᐐᓐ ᑮᓇᐙ ᑭᑮᐐ ᐲᑎᑫᓰᒻ, ᐁᑭᐱᔥᑲᐌᒀ ᑕᔥ ᐃᑭ ᑳᐐ ᐲᑎᑫᐙᒡ᙮

ᐊᐲ ᒋᓴᔅ ᑳᐅᒋ ᒫᒑᒡ ᐃᐃᒫ ᐊᔮᐎᓂᕽ, ᑳᑭᑭᓄᐊᒫᑫᓂᒡ ᐅᓇᔓᐌᐎᓐ, ᐃᑭ ᑲᔦ ᐯᕒᐊᓰᐞ ᐅᑮᒫᔑ ᐐᒌᐎᑰᐞ, ᐁᑮ ᑲᑳᓱᒥᑯᒡ ᒋᑕᔑᑕᕽ ᓃᐱᐗᐞ ᑫᑰᓐ ᐙᐅᒋ ᑲᑴᒋᒥᑯᒡ᙮

ᐁᑮ ᐲᐃᑯᒡ ᐃᓂᐌᓂᐗᐞ ᐁᐐ ᑳᒋᒋᐃᑯᒡ, ᑮᔥᐱᓐ ᑫᑰᓐ ᐃᔑ ᐗᓂᑮᔗᒡ ᐁᐐᐅᒋ ᑭᒋ ᓅᒋᐃᑯᒡ᙮

ᒦᑕᔥ ᐊᐲ ᐃᐃᐌ ᓃᐱᐗᐞ ᒥᑖᔂᒃ ᐁᐱ ᒫᐗᒋᐃᑎᓂᒡ ᐐᑫ ᐁᑮ ᓰᒋᔥᑯᑖᑎᓂᒡ ᑮᐊᓂ ᑕᑕᑯᑳᓂᑎᐗᐞ ᑲᔦ᙮ ᒦᔥ ᒋᓴᔅ ᑳᑮᒫᒌ ᑲᑲᓅᓈᒡ ᐅᑭᑭᓄᐊᒪᐙᑲᓇᐞ ᐁᑮᐃᓈᒡ: ᐊᔮᒀᒥᓯᒃ ᒋᐃᔑᓈᑯᓯᓯᐌᒃ ᐯᕒᐊᓰᒃ ᑳᐃᓍᓂᑎᓱᐙᒡ ᐅᒥᓍᑎᓰᒃ᙮ ᑖᐱᔥᑰ ᐅᐱᓯᑲᓀᔅ ᒥᓯᐌ ᑳᐃᔖᒪᑲᒃ ᐊᓈᒥᕽ ᐸᑴᔑᑲᓂᕽ, ᒦ ᐃ ᐁᔑᓈᑾᓂᓂᒃ ᐅᐱᒫᑎᓯᐎᓂᐙ᙮

ᑫᑰᓐ ᓴ ᐱᑯ ᑳᐊᑾᓇᐃᑳᑌᒃ ᑕᒧᔐ ᓈᑯᒋᑳᑌ, ᑫᑰᓐ ᑲᔦ ᑳᑮᒨᑌᑖᐗᒃ ᑕᑭᑫᑖᑾᓐ᙮

ᐋᓃᓐ ᐃᓴ ᑯ ᐁᑭᑐᔦᒃ ᑮᑎᐱᑲᒃ ᑕᓅᑖᑳᓂᐗᓐ ᑮᔑᑲᒃ᙮ ᐋᓃᓐ ᑲᔦ ᐁᔑᑮᒨᒋ ᑮᑭᑐᔭᓐ ᐸᑫᒋᑲᓂᕽ ᐗᑭᒋ ᐙᑳᐃᑲᓂᑳᕽ ᑕᐅᒋ ᑭᔒᐌ ᑕᔑᒋᑳᑌ᙮

ᒦᑕᔥ ᐁᓂᓇᑰᒃ, ᑫᑯ ᑕᔥ ᐐᓐ ᑯᓵᑫᒀᓂᒃ ᐃᑭ ᑳᓂᑑᐙᒡ ᐐᔭᐎᒫ, ᐁᑲᔥᑭᑑᓯᒀ ᑕᔥ ᐊᐗᔑᒣ ᒋᐊᓂ ᐃᔑᒋᑫᐙᒡ᙮

ᑭᐐᑕᒪᐎᓂᓂᒻ ᐃᑕᔥ ᐊᐌᓀᓐ ᑫᑯᓭᑭᐸᓐ᙮ ᑯᓯᒃ ᑭᔐᒪᓂᑑ, ᐐᓐ ᐄᑐᒃ ᑳᑲᔥᑭᑑᒡ ᑮᐃᔥᒀ ᓂᓵᒡ ᐊᐎᔭᓐ ᒋᐃᔑ ᐌᐱᓈᒡ ᒪᒋ ᐃᔥᑯᑌᕽ᙮ ᑌᐺ ᑕᔥ ᑭᐐᑕᒪᐎᓂᓂᒻ ᒋᑯᓭᒃ ᑭᔐᒪᓂᑑ᙮

ᑳᐐᓐ ᐃᓇ ᓈᓇᓐ ᒥᔅᑯᒥᓂᑫᓯᐗᒃ ᓃᔓ ᐲᐙᐱᑰᔅ ᐃᓇᑭᓱᓰᐗᒃ? ᔖᑰᒡ ᐃᑕᔥ ᑳᐐᓐ ᐊᐙᒡ ᐯᔑᒃ ᐅᐗᓃᑫᑖᑯᓰᓐ ᑭᔐᒪᓂᑑᓐ᙮

ᐃᓇᔥᑫ ᑕᔥ ᑮᓇᐙ ᑳᑕᓱ ᐯᔑᑾᑭᓐ ᑮᓂᓯᓯᐙᓐ ᑲᑭᓇ ᑭᑫᒋᑳᑌᐗᓐ ᐁᑕᓯᑭᓐ᙮ ᑫᑯ ᑕᔥ ᑮᓇᐙ ᓭᑭᓯᑫᒃ, ᓇᐗᒡ ᑮᓇᐙ ᑭᑭᒋ ᐃᓀᑖᑯᓯᒻ ᐊᐲᒡ ᐐᓐ ᐃᑭ ᒥᔅᑯᒥᓂᑫᓯᐗᒃ!

ᒦᑕᔥ ᐁᓂᓇᑰᒃ, ᐊᐊᐌ ᓴ ᑫᐐᔑᒡ ᐁᑭᑫᓂᒥᒡ ᐁᓈᓴᒦᓂᒡ ᐯᒫᑎᓯᓂᒡ, ᒦ ᐃ ᑫᓃᓐ ᐃᓂᓂ ᐅᑯᓯᓴᓐ ᓂᑲ ᐐᓈ ᐁᑭᑫᓂᒪᒃ ᐁᓈᓴᒦᓂᒡ ᑭᔐᒪᓂᑑᓐ ᐅᑌᒐᓬᐃᒥᓂ᙮

ᐊᐊ ᑕᔥ ᐐᓐ ᑳᐋᓇᐌᓂᒥᒡ ᐁᓈᓴᒦᓂᒡ ᐯᒫᑎᓯᓂᒡ, ᒦᑕᔥ ᑫᐐᓐ ᐯᔑᑾᓐ ᑫᔑ ᐋᓇᐌᑖᑯᓯᒡ ᐁᓈᓴᒦᓂᒡ ᑭᔐᒪᓂᑑᓐ ᐅᑌᒐᓬᐃᒥᓂ᙮

ᐊᐎᔭ ᐱᑯ ᑫᒪᒋ ᐃᓈᒡ ᐃᓂ ᐃᓂᓂ ᐅᑯᓯᓯᒫᓐ ᑕᐴᓀᑕᒪᐙᑲᓂᐎ᙮ ᐊᐎᔭ ᑕᔥ ᐐᓐ ᒪᒋ ᐃᓈᒡ ᑭᔐᒪᓂᑑᓐ ᐅᑕᒑᑯᓂ ᑳᐐᓐ ᑕᐴᓀᑕᒪᐙᓰ᙮

ᐊᐲ ᓴ ᐃᔑᐎᓂᑰᔦᒃ ᐁᑕᔑ ᒫᐗᒋᐃᑎᐙᒡ ᐁᐐ ᑎᐹᑯᓂᓀᒀ ᐁᓈᓴᒦᐙᒡ ᐌᑭᒫᐌᑖᑯᓯᐙᒡ, ᐃᑭ ᑲᔦ ᑭᒋᐅᑭᒫᒃ, ᑫᑯ ᐐᓐ ᐗᐙᓀᑕᑫᒃ ᐋᓃᓐ ᑫᐃᔑ ᓈᑕᒫᓱᔦᒃ, ᐋᓃᓐ ᑲᔦ ᑫᐃᑭᑐᔦᒃ᙮

ᑭᔐᒪᓂᑑ ᐅᑕᒑᑾᓐ ᐅᔕ ᑭᑲ ᑭᑭᓄᐊᒫᑯᐙ ᐋᓃᓐ ᑫᐃᑭᑐᔦᒃ ᐃᐃ ᐊᐲ᙮

ᐯᔑᒃ ᑕᔥ ᐃᓂᓂᐗᓐ ᑮᐅᒋ ᑮᑭᑐᐗᓐ ᐃᐃᒫ ᐁᔑ ᐹᑏᓄᓈᓂᐗᓂᓂᕽ ᐁᑮᐃᑯᒡ: ᐅᑭᑭᓄᐊᒫᑫ, ᑕᑲ ᑲᓅᔥ ᓃᒋᑭᐌᓯ ᒋᓀᓈᐎᓇᒪᐎᒡ ᐃᐃᐌᓂ ᒥᓂᒃ ᑫᑰᓐ ᑳᑮᓇᑲᑕᒪᐎᔭᒥᓐᒡ ᓂᑌᑌᓈᓐ ᐊᐲ ᑳᑮᐃᔥᒀ ᐱᒫᑎᓯᒡ᙮

ᒋᓴᔅ ᑕᔥ ᐅᑮᐃᔑ ᓇᑴᑕᐙᓐ, ᓃᒋᐱᒫᑎᔅ: ᐊᐌᓀᓐ ᑳᐃᓇᑭᒥᒡ ᒋᑎᐹᑯᓂᐌᔮᓐ, ᑯᒫ ᑲᔦ ᒋᐅᓀᑕᒫᓐ ᐋᓃᓐ ᑫᔑ ᓀᓈᐎᓇᒫᑎᔦᒃ ᐃᓂ ᑳᑮᓇᑲᑕᒫᑰᔦᒃ?

ᒦᑕᔥ ᑳᐃᓈᒡ ᑲᑭᓇ ᐃᐃᒫ ᑳᑮᐊᔮᓂᒡ: ᐊᔮᒀᒥᓯᒃ, ᑲᓇᐌᓂᑎᓱᒃ ᒋᐊᔪᓵᒥᓯᓯᐌᒃ, ᐋᓃᔥ ᑳᐐᓐ ᐊᐎᔭ ᐅᒋ ᐱᒫᑎᓯᓰ ᐋᓃᓐ ᒥᓂᒃ ᑫᑰᓐ ᐁᔮᒡ, ᒥᓴᐙ ᑯ ᐋᓇ ᑭᒋ ᐌᓅᑎᓯᒡ᙮

ᒋᓴᔅ ᑕᔥ ᐅᑮᐐᑕᒪᐙᐞ ᐅᐅ ᐊᐌᒋᑲᓐ: ᐋᐱᑎᕽ ᑮᐊᔮ ᐃᓂᓂ ᐁᑮᐌᓅᑎᓯᒡ, ᐅᑭᑎᑫᐗᑲᒥᒃ ᐁᑮᒥᓄ ᓂᑖᐎᑭᒋᑫᒪᑲᓂᓂᒃ᙮

ᒦᔥ ᐄᓴᓐ ᑳᐃᓀᑕᕽ: ᐋᓃᓐ ᑕᔥ ᑫᐃᔑᒋᑫᔮᓐ? ᑳᐐᓐ ᐊᐗᔑᒣ ᓂᑕᔮᓰᓐ ᐊᑖᓱᐎᑲᒥᒃ ᑫᔑ ᐊᑑᔮᓐ ᑳᓂᑖᐎᑭᑭᓐ ᓂᑭᑎᑫᐗᑲᒥᑯᕽ᙮

ᒦᔥ ᐄᓴᓐ ᑳᐃᑎᓱᒡ: ᒦᐅᐌ ᑫᐃᔑᒋᑫᔮᓐ, ᓂᑲ ᐲᑯᐱᑑᓇᓐ ᓂᑖᑖᓱᐎᑲᒥᑰᓐ, ᒦᔥ ᒋᐅᔑᑑᔮᓐ ᑯᑕᒃ ᓇᐗᒡ ᒋᒪᒥᒑᑭᓐ ᑫᔑ ᑲᓇᐌᑕᒫᓐ ᑲᑭᓇ ᑳᓂᑖᐎᑭᑭᓐ ᓂᑭᑎᑫᐗᑲᒥᑯᕽ, ᐃᓂ ᑲᔦ ᑯᑕᒃ ᑫᑰᓇᓐ ᑳᑎᐯᑕᒫᓐ᙮

ᒦ ᓴ ᑫᐃᑎᓱᔮᓐ: ᐆᐗ, ᐁᑕᑕᐌ ᑭᒥᓄᓭ, ᓃᐱᐗᐞ ᑫᑰᓇᓐ ᐁᐊᔮᔭᓐ ᑳᐅᓂᔑᔑᑭᓐ, ᑭᓉᔥ ᑕᓱᐱᐴᓐ ᐐᑳ ᒋᓅᑌᓭᓯᐗᓐ᙮ ᒦᔥ ᐃᔑ ᒥᒋ ᐊᔭᔮᓐ, ᒋᐐᓯᓂᔭᓐ, ᒋᒥᓂᑴᔭᓐ ᑲᔦ ᑕᔥ ᒋᒌᑫᑕᒪᓐ ᐁᐱᒫᑎᓯᔭᓐ, ᑮᐃᑭᑐ᙮

ᒦᑕᔥ ᑭᔐᒪᓂᑑᓐ ᑳᐃᑯᒡ: ᑮᓐ ᑳᑲᑮᐹᑎᓯᔭᓐ᙮ ᓅᑯᒻ ᑳᐐ ᑎᐱᑲᒃ ᑭᐱᒫᑎᓯᐎᓐ ᑕᐅᑖᐱᓂᑳᑌ᙮ ᐊᐌᓀᓐ ᑕᔥ ᑫᐊᔮᒡ ᐃᓂᐌᓂᐗᓐ ᑮᓐ ᑳᑮ ᑾᔮᒋᑕᒫᓱᔭᓐ ᐁᐐᐊᔮᔭᓐ? ᐅᑮᐃᑰᓐ᙮

ᒦᔥ ᒋᓴᔅ ᑳᐊᓂ ᐃᑭᑐᒡ: ᒦ ᐅᐌ ᑫᐃᔑᓈᑯᓯᒡ ᐊᐊᐌ ᑳᑾᔮᒋᑕᒫᓱᒡ ᐌᓅᑎᓯᐎᓐ, ᑳᐐᓐ ᐌᓅᑎᓯᓰ ᐁᓈᓴᒦᓂᒡ ᑭᔐᒪᓂᑑᓐ᙮

ᒦᑕᔥ ᐅᐅ ᒋᓴᔅ ᑳᐃᓈᒡ ᐅᑭᑭᓄᐊᒪᐙᑲᓇᐞ: ᑫᑯ ᐅᒋ ᒥᑯᔥᑳᑌᑕᑫᒃ ᑭᐱᒫᑎᓯᐎᓂᐙᓐ, ᐌᑯᓀᓐ ᑫᒦᒋᔦᒃ, ᐌᑯᓀᓐ ᑲᔦ ᑫᒥᓂᑴᔦᒃ᙮ ᑫᑯ ᑲᔦ ᐅᒋ ᐅᒑᓂᒣᑕᑫᒃ ᑭᐐᔭᐎᐙᓐ, ᐌᑯᓀᓐ ᑲᔦ ᑫᑭᑭᔥᑲᒣᒃ᙮

ᓇᐗᒡ ᐅᔕ ᐱᒫᑎᓯᐎᓐ ᑭᒋ ᐃᓀᑖᑾᓐ ᐊᐲᒡ ᐐᓐ ᒦᒋᒻ, ᐃᐃ ᑲᔦ ᒦᔭᐤ ᓇᐗᒡ ᑭᒋ ᐃᓀᑖᑾᓐ ᐊᐲᒡ ᐐᓐ ᑭᑭᔥᑭᑲᓇᓐ᙮

ᐃᓇᔥᑫ ᑳᑳᑭᐗᒃ ᑳᐸᐹᒥᓭᐙᒡ, ᑳᐐᓐ ᑭᑎᑫᓰᐗᒃ, ᑳᐐᓐ ᑲᔦ ᒫᐗᒋᒋᑫᓰᐗᒃ᙮ ᑳᐐᓐ ᑲᔦ ᐅᑕᔮᓰᓈᐙ ᒦᒋᒥᑲᒥᒃ, ᐊᑖᓱᐎᑲᒥᒃ ᑲᔦ᙮ ᔖᑰᒡ ᑕᔥ ᑭᔐᒪᓂᑑᓐ ᐅᑕᔕᒥᑯᐙᓐ᙮ ᑳᐐᓐ ᐃᓇ ᑮᓇᐙ ᐊᐗᔑᒣ ᑭᑕᐲᑌᑖᑯᓯᓰᒻ ᐊᐲᒡ ᐃᑭ ᐱᓀᔒᔕᒃ?

ᑭᓉᔥ ᐃᓇ ᑭᑖᐅᒋ ᐱᒫᑎᔅ ᐁᒥᑯᔥᑳᑌᑕᒪᓐ? ᑫᑫᑦ ᐃᓇ ᑭᓉᔥ ᑕᐱᒫᑎᓯ?

ᑮᔥᐱᓐ ᑕᔥ ᐁᑲᔥᑭᑑᓯᐌᒃ ᒋᑑᑕᒣᒃ ᐃᐃᐌ ᑳᐊᑳᓯᕽ, ᐌᑯᓀᓐ ᑕᔥ ᐌᒋ ᐅᒑᓂᒣᑕᒣᒃ ᑯᑕᒃ ᑫᑰᓇᓐ?

ᐃᓇᔥᑫ ᐙᐸᑕᒧᒃ ᐙᐱᑾᓃᓐ ᐁᐱᒥᑭᑭᓐ᙮ ᑳᐐᓐ ᐊᓄᑮᒪᑲᓯᓅᓇᓐ, ᑳᐐᓐ ᑲᔦ ᐅᔑᑕᒫᑎᓲᒪᑲᓯᓅᓇᓐ ᑭᑭᔥᑭᑲᓇᓐ᙮ ᑭᐐᑕᒪᐎᓂᓂᒻ ᐃᑕᔥ, ᐊᐴᔥᑫ ᐊᐌ ᑭᒋᐅᑭᒫ ᔂᓬᐊᒪᓐ ᐋᓇ ᑮᑭᒋ ᐌᓅᑎᓯᒡ, ᑳᐐᓐ ᐃᐃ ᑮᐃᔑ ᒥᓄᓈᑾᓯᓂᓂᐗᓐ ᐅᑭᑭᔥᑭᑲᓇᓐ ᑖᐱᔥᑰ ᐯᔑᒃ ᐅᐅ ᐙᐱᑾᓐ ᑳᐃᔑ ᒥᓄᓈᑾᒃ᙮

ᑭᔐᒪᓂᑑ ᐄᑐᒃ ᑳᐱᒋᑯᓇᔦᑑᒡ ᒪᔥᑯᓰᓐ ᐁᔮᓂᑭᓐ ᐱᑾᒐᔭᐄ᙮ ᓅᑯᒻ ᑳᑮᔑᑲᒃ ᐁᔮᓂᑭᓐ ᐃᓂ ᒪᔥᑯᓰᓐ, ᐙᐸᓂᓂᒃ ᑕᔥ ᐁᒪᒍᑌ ᐌᐱᓂᑳᑌᑭᓐ᙮ ᓇᐗᒡ ᐃᑕᔥ ᑮᓇᐙ ᑭᑲ ᐱᒋᑯᓇᔦᐃᑯᐙ᙮ ᐁᑕᑕᐌ ᐊᑳᓭᑖᑾᓐ ᑭᑌᐺᑕᒧᐎᓂᐙ᙮

ᑫᑯ ᑕᔥ ᐅᒋ ᒥᑯᔥᑳᑌᑕᑫᒃ ᐌᑯᓀᓐ ᑫᒦᒋᔦᒃ, ᑫᒥᓂᑴᔦᒃ ᑲᔦ? ᑫᑯ ᐅᒑᓂᒣᑕᑫᒃ᙮

ᒦᐗᓐ ᐅᓄ ᒨᔕᒃ ᑳᓇᓈᑐᓀᐊᒧᐙᒡ ᐃᑭ ᑳᑭᑫᓂᒫᓯᒀ ᑭᔐᒪᓂᑑᓐ᙮ ᑰᓯᐙ ᐅᔕ ᐅᑭᑫᑖᓐ ᐁᓅᑌᓭᔦᒃ ᐅᓄᐌᓂᐗᓐ᙮

ᓇᐗᒡ ᑕᔥ ᐊᑐᓀᐊᒧᐙᒃ ᐅᑑᑭᒫᐎᐎᓐ, ᑭᑲ ᒦᓂᑰᐎᓯᒻ ᑕᔥ ᐅᓄᐌᓂᐗᓐ ᑲᔦ᙮

ᑫᑯ ᑕᔥ ᓭᑭᓯᑫᒃ, ᑮᓇᐙ ᑳᐊᑳᓰᓄᔦᒃ ᒫᓇᒑᓂᔐᓴᒃ ᑰᓯᐙ ᐅᔕ ᐅᑎᔑ ᒥᓍᐸᑖᓐ ᒋᒦᓂᓀᒃ ᑫᑮᓇᐙ ᒋᑎᐯᒋᑫᔦᒃ ᐃᐃᒫ ᐅᑎᐯᒋᑫᐎᓂᕽ᙮

ᐊᑖᐙᑫᒃ ᑲᑭᓇ ᑭᑕᔭᐄᒥᐙᓐ ᒋᒦᓀᒀ ᑕᔥ ᔔᓂᔮᓐ ᐃᑭ ᑳᑭᑎᒫᑭᓯᐙᒡ᙮ ᑾᔮᒋᑕᒫᓱᒃ ᑕᔥ ᔔᓂᔮᐗᔕᓐ ᐐᑳ ᑫᓅᑌ ᓂᔑᐗᓈᑕᓯᓄᑭᓐ᙮ ᒋᐊᑕᒫᓱᔦᒃ ᑳᑭᒋ ᐃᓀᑕᒣᒃ ᑭᒋᑮᔑᑯᕽ ᐐᑳ ᑫᔑ ᒑᑭᓭᓯᓄᒃ᙮ ᑳᐐᓐ ᐌᑎ ᐅᑮᒨᒋᔥᒃ ᑕᐅᑎᑕᓰ, ᑳᐐᓐ ᑲᔦ ᒦᑾᓇᔥᒃ ᐅᑲ ᓂᔑᐗᓈᒋᑑᓰᓇᓐ᙮

ᐋᑎ ᓴ ᐱᑯ ᑫᐊᔮᒃ ᑳᑭᒋ ᐃᓀᑕᒣᒃ, ᒦ ᓴ ᐃᒫ ᑫᐊᔮᑭᓐ ᑭᑌᐃᐙᓐ᙮

ᑭᑭᑯᓇᔦᒃ ᒨᔕᒃ ᒋᐊᔦᐲᒣᔦᒃ, ᒫᓄ ᒋᐙᓴᑯᓀᑭᓐ ᑭᐙᓴᑯᓀᒋᑲᓂᐙᓐ᙮

ᑖᐱᔥᑰ ᐊᓄᑮᐋᑲᓇᒃ ᑳᓃᐯᐱᐙᒡ ᐁᐲᐋᐙᒡ ᑳᑎᐯᓂᒥᑯᐙᒡ ᒋᐱᑮᐌᓂᒡ ᑳᑮᐃᔖᓂᒡ ᑭᒋ ᐐᑎᑫ ᐐᓯᓂᐎᓂᕽ᙮ ᐊᐲ ᑕᔥ ᐁᐱ ᑕᑯᔑᓂᓂᒡ ᐁᐱ ᐹᐹᐗᐃᑫᓂᒡ ᔐᒫᒃ ᐃᑯ ᐅᐹᑭᑌᓇᒪᐙᐙᓐ ᐃᔥᒀᑌᒻ᙮

ᐋᐱᒋ ᓴ ᑕᔕᐌᑖᑯᓯᐗᒃ ᐃᑭ ᐊᓄᑮᐋᑲᓇᒃ ᒥᑳᑯᐙᒡ ᑳᑎᐯᓂᒥᑯᐙᒡ ᐁᐲᐋᐙᒡ ᒋᐱᑕᑯᔑᓂᓂᒡ᙮ ᑭᐐᑕᒪᐎᓂᓂᒻ ᑕᔥ, ᒦᔥ ᑫᔑ ᐱᓯᑲᒥᓂᒡ ᐋᑰᐱᓱᓐ ᐁᐐᐊᔕᒥᑯᐙᒡ᙮ ᐅᑲ ᐊᐱᐃᑯᐙᓐ ᑕᐸᓯ ᑑᐳᐎᓈᑯᕽ ᐁᐐ ᐸᒥᐃᑯᐙᒡ ᒋᐐᓯᓂᐙᒡ᙮

ᐋᐱᒋ ᓴ ᑕᔕᐌᑖᑯᓯᐗᒃ ᐃᑭ ᐊᓄᑮᐋᑲᓇᒃ ᐁᒥᑳᑯᐙᒡ ᐁᑾᔮᒌᐙᒡ, ᒥᓴᐙ ᑯ ᐋᐱᑖ ᑎᐱᑲᓂᓂᒃ ᐱᑕᑯᔑᓂᓂᒡ, ᒥᓴᐙ ᑯ ᑲᔦ ᐹᓂᒫ ᓇᐗᒡ ᓈᑫ ᐐᐱ ᑕᑯᔑᓂᓂᒡ!

ᑭᑫᑕᒧᒃ ᐃᑕᔥ ᐅᐅ, ᑮᔥᐱᓐ ᐃᓂᓂ ᑳᑎᐯᑕᕽ ᐙᑳᐃᑲᓐ ᑭᑫᓂᒫᒡ ᐊᐲ ᑎᐸᐃᑲᓐ ᐙᐱ ᑕᑯᔑᓂᓂᒡ ᐅᑮᒨᒋᔥᑲᓐ, ᑳᐐᓐ ᐅᑖ ᐸᑭᑎᓈᓰᓐ ᐃᓂ ᐅᑮᒨᒋᔥᑲᓐ ᒋᐲᑾᐊᒥᓂᒡ ᒋᐱ ᐲᑎᑫᓂᒡ ᐅᐙᑳᐃᑲᓂᕽ᙮

ᒦᑕᔥ ᐯᔑᑾᓐ ᑫᑮᓇᐙ ᑫᔑ ᐅᔒᑖᔦᑭᐸᓐ ᒨᔕᒃ, ᐋᓃᔥ ᐃᓂᓂ ᐅᑯᓯᓴᓐ ᑕᐱ ᑕᑯᔑᓅᓐ ᐊᐲ ᑎᐸᐃᑲᓂᕽ ᑫᐲᐃᒫᓯᐌᒃ᙮

ᐲᑕᕒ ᑕᔥ ᑮᐃᔑ ᑲᑴᑗ: ᑌᐯᒋᑫᔭᓐ, ᓃᓇᐎᓐᑦ ᐃᓇ ᐱᑯ ᑳᐐᑕᒪᐎᔮᕽ ᐅᐅ ᐊᐌᒋᑫᐎᓐ, ᑯᒫ ᑲᔦ ᑲᑭᓇ ᐊᐎᔭᒃ ᑳᐐᑕᒪᐗᑣ?

ᒦᔥ ᑳᑎᐯᒋᑫᒡ ᑳᐃᑭᑐᒡ: ᐊᐌᓀᓐ ᓴ ᐊ ᑾᔭᒃ ᑳᑲᑮᑖᐌᑕᕽ ᐊᓄᑮᐋᑲᓐ? ᒦ ᓴ ᐊᐊᐌ ᑳᒦᓂᑯᒡ ᐅᑑᑭᒫᒪᓐ ᑳᒫᒑᓂᒡ, ᒋᑎᐯᓂᒫᒡ ᑯᑕᒃ ᐊᓄᑮᐋᑲᓇᐞ ᒋᐊᔕᒫᒡ ᐊᐲ ᐅᒋᒋᓭᓂᒃ ᒋᐐᓯᓂᓈᓂᐗᓂᓂᒃ᙮

ᐋᐱᒋ ᓴ ᑕᔕᐌᑖᑯᓯ ᐊᐊ ᐊᓄᑮᐋᑲᓐ ᒥᑳᑯᒡ ᐅᑑᑭᒫᒪᓐ ᐱᑮᐌᓂᒡ ᐁᐃᔑᒋᑫᒡ ᑳᑮᐃᓇᓄᑮᐃᑎᐸᓐ᙮

ᑫᑫᑦ ᓴ ᑭᑎᓂᓂᓂᒻ, ᐊᐊ ᐊᓄᑮᐋᑲᓐ ᐅᑲ ᒦᓂᑰᓐ ᐅᑑᑭᒫᒪᓐ ᑲᑭᓇ ᐅᑕᔭᐄᒥᓂ ᒋᓈᓈᑲᒋᑑᒡ᙮

ᑮᔥᐱᓐ ᑕᔥ ᐐᓐ ᐊᐊ ᐊᓄᑮᐋᑲᓐ ᐃᓀᑕᕽ: ᑳᐐᓐ ᓴ ᐐᐸ ᑕᑕᑯᔑᓰ ᓂᑑᑭᒫᒻ᙮ ᒦᑕᔥ ᐃᔑᒫᒌ ᐸᐸᑭᑌᐙᒡ ᐅᐐᑕᓄᑮᒫᑲᓇᐞ ᑳᐃᓂᓃᐎᓂᒡ, ᐃᐃ ᑲᔦ ᑳᐃᑴᐎᓂᒡ᙮ ᒦᔥ ᐁᔑ ᐐᓯᓂᒡ, ᐁᔑ ᒥᓂᑴᒡ ᑲᔦ, ᑕᑯ ᑲᔦ ᐁᑮᐗᔥᑴᐲᒡ᙮

ᐊᐊ ᑕᔥ ᐊᓄᑮᐋᑲᓐ ᑕᑕᑯᔑᓅᓐ ᐅᑑᑭᒫᒪᓐ ᓂᑯᑎᕽ ᑮᔑᑲᓂᓂᒃ ᐊᐲ ᐁᐲᐋᓯᒃ, ᐁᑭᑫᓂᒫᓯᒃ ᐋᓃᓐ ᐊᐲ ᑕᓱ ᑎᐸᐃᑲᓀᔮᓂᒃ ᑫᑕᑯᔑᓂᓂᒡ᙮ ᐅᑑᑭᒫᒪᓐ ᑕᔥ ᐅᑲ ᐲᓯᔓᑰᓐ ᒋ ᐃᔑᐌᐱᓂᑯᒡ ᐁᔑ ᐊᔮᓂᒡ ᑳᑌᐺᑕᓯᓂᒃ᙮

ᐊᐊ ᑕᔥ ᐊᓄᑮᐋᑲᓐ ᑳᑮ ᑭᑫᑕᕽ ᐅᑑᑭᒫᒪᓐ ᐋᓃᓐ ᑳᔑ ᓇᑕᐌᓂᒥᑯᒡ ᒋᑑᑕᕽ, ᐃᔑ ᑾᔮᒌᓯᒃ ᑕᔥ ᒋᐐ ᑑᑕᕽ, ᐁᔑ ᐊᑕᐌᓂᒥᑯᒡ ᐅᑑᑭᒫᒪᓐ ᒋᐃᔑᒋᑫᒡ ᑕᐐ ᑲᒀᑕᑭᐋ ᐹᑏᓍ ᒋᑭᒋ ᐸᐸᔕᔐᐅᓐᒡ᙮

ᐊᐊ ᑕᔥ ᐐᓐ ᐊᓄᑮᐋᑲᓐ ᑳᑭᑫᑕᓯᒃ ᐋᓃᓐ ᐁᔑ ᐊᑕᐌᓂᒥᑯᒡ ᐅᑑᑭᒫᒪᓐ, ᑑᑕᕽ ᐃᑕᔥ ᑫᑰᓐ ᑫᑮᐅᒋ ᐸᐸᔕᔐᐅᑎᐸᓐ, ᔖᑰᒡ ᐸᑮ ᐁᑕ ᑕᐸᔕᔐᐙ᙮ ᐊᐊ ᓴ ᓃᐱᐗᐞ ᑳᒦᓂᑰᐎᓯᒡ ᐊᑕᐌᓂᒫ ᓃᐱᐗᐞ ᒋᐸᑭᑎᓂᑫᒡ᙮ ᐊᐊ ᑲᔦ ᑭᒋ ᓃᐱᐗᐞ ᑳᒦᓂᓐᒡ ᐊᑕᐌᑖᑯᓯ ᐊᐗᔑᒣ ᐐᓐ ᓃᐱᐗᐞ ᒋᐸᑭᑎᓂᑫᒡ᙮

ᓂᑮ ᐲᔖ ᐁᐐ ᓴᑲᐊᒫᓐ ᐅᐅᐌ ᐊᑭ, ᐋᓃᓐ ᐁᐲᒋ ᒥᓴᐌᑕᒫᓐ ᐋᔕ ᒋᐱᔅᑲᓀᑭᐸᓐ!

ᐊᔮ ᑲᒀᑕᑫᑕᒧᐎᓐ ᑳᐐ ᓰᑲᐊᑖᑰᔮᓐ, ᐁᑕᑕᐌ ᑕᔥ ᓂᑑᒋ ᒥᑯᔥᑳᑌᑕᒻ ᐁᐲᑑᔮᓐ ᒋᐃᔥᒀᓭᒃ᙮

ᑭᑎᓀᑕᒻ ᐃᓇ ᐁᑮ ᐲᑑᔮᓐ ᐱᓵᓂᓯᐎᓐ ᐅᐅᒫ ᐊᑮᕽ? ᑳᐐᓐ ᐱᓵᓂᓯᐎᓐ ᓂᑮ ᐲᑑᓰᓐ, ᐃᐃ ᒪᐎᓀᔥᑯᑖᑎᐎᓐ ᓂᑮ ᐲᑑᓐ᙮

ᐅᐅ ᑕᔥ ᐃᔑᓅᑯᒻ ᓈᓇᓂᐙᒡ 5 ᐊᐎᔭᒃ ᐯᔑᒃ ᑖᐎᓂᕽ ᐃᔑᑖᐙᒡ ᑕᒪᐎᓀᔥᑯᑖᑎᐗᒃ᙮ ᓂᓯᓐ 3 ᐃᑭ ᐅᑲ ᒪᐎᓀᔥᑲᐙᐙᐞ ᐃᐃ ᑯᑕᒃ ᓃᔑᓐ 2 ᐁᔮᓂᒡ᙮ ᐃᑭ ᑳᓃᔑᐙᒡ 2 ᐅᑲ ᒪᐎᓀᔥᑲᐙᐙᐞ ᐃᐃ ᑳᓂᓯᓂᒡ 3᙮

ᐅᑌᑌᒫ ᐅᑲ ᒪᐎᓀᔥᑲᐙᓐ ᐅᑯᓯᓴᓐ, ᐅᑯᓯᓯᒫ ᐅᑲ ᒪᐎᓀᔥᑲᐙᓐ ᐅᑌᑌᓐ᙮ ᐅᒫᒫᒫ ᐅᑲ ᒪᐎᓀᔥᑲᐙᓐ ᐅᑕᓂᓴᓐ, ᐅᑖᓂᓯᒫ ᐅᑲ ᒪᐎᓀᔥᑲᐙᓐ ᐅᒫᒫᓐ᙮ ᐅᓯᑯᓯᒫ ᐅᑲ ᒪᐎᓀᔥᑲᐙᓐ ᐅᔑᒥᓴᓐ, ᐅᔑᒥᓯᒫ ᐅᑲ ᒪᐎᓀᔥᑲᐙᓐ ᐅᓯᑯᓴᓐ᙮

ᒋᓴᔅ ᑕᔥ ᐅᑮᐃᓈᐞ ᐯᒫᑎᓯᓂᒡ: ᐊᐲ ᐁᐙᐸᑕᒣᒃ ᐗᑶ ᐁᐱ ᓵᑳᓇᑾᒃ ᓂᑳᐲᐊᓄᕽ ᐃᓇᑫ, ᒦ ᐃ ᐁᑭᑐᔦᒃ ᐁᐐ ᑭᒥᐗᕽ, ᒦᔥ ᑌᐺ ᐁᔑ ᑭᒥᐗᕽ᙮

ᐊᐲ ᑲᔦ ᐁᑭᑫᑕᒣᒃ ᔖᐗᓄᕽ ᐁᐅᒋᓄᐌᒃ, ᒦ ᐃ ᒦᓇᐙ ᐁᑭᑐᔦᒃ ᐁᐐ ᑭᔖᑌᒃ, ᒦᔥ ᑌᐺ ᐁᔑ ᑭᔖᑌᒃ᙮

ᑮᓇᐙ ᑳᐐᓐ ᓂᓂᓯᑐᑕᓰᒥᓐ ᑳᐃᓍᓂᑎᓱᔦᒃ, ᐁᑲᓇᐙᐸᑕᒣᒃ ᐅᐅᐌ ᐊᑭ, ᑲᔦ ᑕᔥ ᐃᔥᐱᒥᕽ ᑮᔑᑯᕽ ᐁᐃᓈᐱᔦᒃ ᑭᑑᒋ ᑭᑫᑖᒻ ᑳᐐᐊᓂ ᐃᔑᐌᐸᒃ᙮ ᐋᓃᓐ ᑕᔥ ᐐᓐ ᐌᒋ ᑭᑫᑕᓯᐌᒃ ᐋᓃᓐ ᑫᐃᑕᒣᒃ ᐅᐅᐌ ᓅᑯᒻ ᑳᐊᓂ ᐃᔑᐌᐸᒃ!

ᐌᑯᓀᓐ ᐃᑕᔥ ᑮᓇᐙ ᐱᑯ ᐌᒋ ᐅᓀᑕᓯᐌᒃ ᑾᔭᒃ ᒋᑮᐃᔑᒋᑫᔦᑭᐸᓐ?

ᑮᔥᐱᓐ ᐊᐎᔭ ᐐᑎᐹᑯᓂᒃ ᐁᓀᐱᑕᓯᓇᐊᒪᐗᒡ, ᐃᔑᐎᓂᒃ ᑕᔥ ᐃᐃᒫ ᑎᐹᑯᓂᑫᐎᑲᒥᑯᕽ, ᒥᓂᒃ ᐃᑯ ᐁᑯ ᑲᔥᑭᑑᔭᓐ ᑯᒋᑑᓐ ᒋᑾᔭᑯᑕᒪᐗᒡ ᒋᑆ ᐃᔑᐎᓂᒃ ᐌᑎ ᑎᐹᑯᓂᑫᐎᑲᒥᑯᕽ᙮ ᑮᔥᐱᓐ ᐅᐅᐌ ᐃᔑᒋᑫᓯᐗᓐ ᑭᑲ ᐃᔑᐎᓂᒃ ᐁᓈᓴᒦᓂᒡ ᑎᐹᑯᓂᑫᐎᓂᓂᐗᓐ ᒦᑕᔥ ᑫᐃᔑ ᐸᑭᑎᓇᒪᐙᒡ ᔑᒫᑲᓂᔕᓐ ᑲᔦ ᒋᐲᒋ ᐌᐱᓂᑯᔭᓐ ᑭᐸᐅᑏᐎᑲᒥᑯᕽ᙮

ᒦᔥ ᐃᐃᒫ ᑫᐊᔮᔭᓐ, ᑳᐐᓐ ᑭᑲ ᓵᑲᐊᓰ ᐹᓂᒫ ᐃᔥᒀ ᑎᐸᐃᑫᔭᓐ ᑕᓱ ᐲᐙᐱᑰᔅ ᑳᑮᐃᓈᑯᓂᑰᔭᓐ, ᑮᐃᑭᑐ ᒋᓴᔅ᙮

ᐃᐃᐌ ᐊᐲ ᐁᐃᔑᓭᒃ ᐋᓂᑕ ᐃᐃᒫ ᑮᐊᔮᐗᒃ ᑳᑮᐐᑕᒪᐙᐙᒡ ᒋᓴᓲᓐ ᐋᓃᓐ ᑳᐃᔑᓭᓂᒡ ᑳᓬᐊᓬᐄᕽ ᑳᑮ ᐅᒌᓂᒡ ᐯᒫᑎᓯᓂᒡ᙮ ᐊᐊ ᐄᑐᒃ ᐹᐃᓬᐊᑦ ᑮᐃᓈᑯᓂᑫ ᒋᓂᓯᒥᓐᒡ ᒣᒀ ᐁᐸᑭᑎᓈᓱᓂᒡ ᐅᒥᔅᑸᒥᓂ ᐁᑮᑕᒀᑲᒥᓂᑳᑌᓂᑭᓐ᙮

ᐅᐅ ᑕᔥ ᒋᓴᔅ ᑮᐃᔑ ᓇᑴᑕᒻ: ᑭᑎᓀᑕᒻ ᐃᓇ ᐃᑭ ᑳᑮᓂᓯᑣ ᑳᓬᐊᓬᐄᕽ ᑳᐅᒌᐙᒡ ᑳᑮᐅᒋ ᑲᒀᑕᑭᑑᐙᒡ ᓇᐗᒡ ᐐᓇᐙ ᐁᑭᒋ ᐅᒪᒋᑑᑕᒧᐎᓂᐙᒡ ᐊᐲᒡ ᐐᓐ ᑯᑕᒃ ᑳᓬᐊᓬᐄᕽ ᑳᐅᒌᓂᒡ?

ᑳᐐᓐ ᐃᐃᐌᓂ ᑳᑮᐅᒋ ᐃᔑᓭᐙᒡ᙮ ᒦᑕᔥ ᐐᓐ ᐁᔑ ᐐᑕᒪᐎᓇᑰᒃ, ᑮᔥᐱᓐ ᐅᒋ ᑴᑭᐱᒫᑎᓯᓯᐌᒃ ᒋᓇᑲᑌᒣᒃ ᑭᒪᒋᑑᑕᒧᐎᓂᐙᓐ ᒦ ᐃ ᑫᑮᓇᐙ ᑲᑭᓇ ᒋᓂᔑᐗᓈᑎᓯᔦᒃ᙮

ᐃᑭ ᑕᔥ ᐐᓐ ᒥᑖᔑᓂᔣᓱ 18 ᐯᒫᑎᓯᐙᒡ ᑳᑮ ᐋᐱᓯᑰᓱᐙᒡ ᑮᑲᐎᓭᓂᒃ ᐃᐃ ᐃᔥᐸᑭᒋᑲᓐ ᐃᐃᒫ ᓯᓬᐆᐗᒦᕽ, ᑭᑎᓀᑖᒻ ᐃᓇ ᓇᐗᒡ ᐐᓇᐙ ᐁᑮᒪᒑᑎᓯᐙᒡ ᐊᐲᒡ ᑲᑭᓇ ᑯᑕᒃ ᐯᒫᑎᓯᐙᒡ ᐃᐃᒫ ᒉᕒᐆᓴᓬᐊᒥᕽ ᑳᑮᐃᔑᑖᐙᒡ?

ᑳᐐᓐ ᐃᐃᐌᓂ ᑳᑮᐅᒋ ᐃᔑᓭᐙᒡ᙮ ᒦᑕᔥ ᐐᓐ ᐁᔑ ᐐᑕᒪᐎᓇᑰᒃ, ᑮᔥᐱᓐ ᐅᒋ ᑴᑭᐱᒫᑎᓯᓯᐌᒃ ᒋᓇᑲᑌᒣᒃ ᑭᒪᒋᑑᑕᒧᐎᓂᐙᓐ ᒦ ᐃ ᑫᑮᓇᐙ ᑲᑭᓇ ᒋᓂᔑᐗᓈᑎᓯᔦᒃ᙮

ᒋᓴᔅ ᑮᐐᑕᒫᑫ ᐅᐅᐌᓂ ᐊᐌᒋᑫᐎᓐ: ᑮᐊᔮ ᐯᔑᒃ ᐃᓂᓂ ᐁᑮᐊᔮᐙᒡ ᒦᓂᔖᑎᑰᓐ ᐅᔔᒥᓂᑭᑎᑫᐎᓂᕽ᙮ ᐅᑮᐊᑕᐙᐸᒫᓐ ᐃᓂ ᒥᑎᑰᓐ ᑕᑲ ᒋᓂᑖᐎᑭᑑᓂᑴᓐ ᒦᓂᔕᓐ᙮ ᑳᐐᓐ ᑕᔥ ᐅᑮᒥᑲᓰᓇᓐ᙮

ᒦᑕᔥ ᑳᐃᓈᒡ ᐅᑭᑎᑫᐗᓄᑮᐋᑲᓇᓐ: ᐃᓇᔥᑫ ᐋᔕ ᓂᓱ ᐱᐴᓐ 3 ᒨᔕᒃ ᐁᐱ ᐊᑕ ᐙᐸᑕᒫᓐ ᒦᓂᔕᓐ ᐅᐅᒫ ᒦᓂᔖᑎᑯᕽ, ᑳᐐᓐ ᑕᔥ ᐐᑳ ᓂᒥᑲᓰᓇᓐ᙮ ᑲᐗᐅᒃ ᐊᐊ ᒥᑎᒃ᙮ ᐊᓂᔖ ᐅᑭᐱᔥᑳᓐ ᐃᐃ ᑭᑎᑫᐗᑮᓂ᙮

ᐊᐊ ᑕᔥ ᑭᑎᑫᐗᓄᑮᐋᑲᓐ ᑮᐃᔑ ᓇᑴᑕᒻ: ᐅᑭᒫ, ᑫᑯ ᐸᐹᒣᓂᒫᑫᓐ᙮ ᑕᑲ ᒫᓄ ᐯᔑᑯ ᐱᐴᓐ ᑕᐸᑕᑭᓱ ᐊᐊ ᒥᑎᒃ᙮ ᓂᑲ ᐲᑾᑲᒥᑭᐌᐸᐃᑫ ᐙᑳᔭᐄ ᒥᑎᑯᕽ, ᑲᔦ ᑕᔥ ᓂᑲ ᐊᑑᓐ ᑳᒥᓄ ᓂᑖᐎᑭᒋᑫᒪᑲᒃ᙮

ᑮᔥᐱᓐ ᐊᐊ ᒥᑎᒃ ᒦᓂᔑᐎᒡ ᒦᓇᐙ ᐊᓂ ᓃᐱᓂᓂᒃ, ᐋᐱᒋ ᑕᐅᓂᔑᔑᓐ᙮ ᑮᔥᐱᓐ ᑕᔥ ᐐᓐ ᒦᓂᔑᐎᓯᒃ, ᒦᔥ ᐃᑕᐙ ᒋᑲᐗᐅᓐᒡ ᑳᔑ ᐊᑕᐌᑕᒪᓐ, ᐅᑮᐃᓈᓐ᙮

ᐯᔑᒀ ᑕᔥ ᐁᐊᓉᐲᐎ ᑮᔑᑲᓂᓂᒃ ᒋᓴᔅ ᑮᑭᑭᓄᐊᒫᑫ ᐃᐃᒫ ᐊᓇᒥᐁᐎᑲᒥᑯᕽ᙮

ᐃᑴ ᐃᐃᒫ ᑮᐊᔮ ᐁᑮ ᑭᑭᔥᑳᑯᒡ ᒪᒋᐊᒑᑾᓐ ᐁᑮᒪᒫᒋᑯᓂᑯᒡ, ᑲᔦ ᑕᔥ ᐁᑮᒦᓂᑯᒡ ᐋᑯᓯᐎᓐ ᒥᑖᔑᓂᔣᓱ 18 ᑕᓱ ᐱᐴᓐ᙮ ᑮᐱᔅᑮᒌᔥᑳ, ᑳᐐᓐ ᑲᔦ ᐅᑮ ᑲᔥᑭᑑᓰᓐ ᒋᑕᔓᑖᒡ᙮

ᐊᐲ ᑕᔥ ᒋᓴᔅ ᐁᐙᐸᒫᒡ ᐃᓂ ᐃᑴᐗᓐ ᐅᑮ ᑲᓅᓈᓐ ᒋᐲᔖᓂᒡ ᐁᑮᐃᓈᒡ: ᓅᑯᒻ ᑳᔑ ᐋᑯᓯᔭᓐ ᑭᑲ ᒥᓄᐊᔮ, ᑳᐐᓐ ᑫᔮᐱ ᑭᑲ ᐋᑯᓯᓰ᙮

ᒦᔥ ᒋᓴᔅ ᑴᑴᑭᓂᓐᒡ ᑳᐃᔑ ᓵᒥᓈᒡ ᐃᑴᐗᓐ, ᒦᑕᔥ ᔐᒫᒃ ᐃᓂ ᐃᑴᐗᓐ ᑳᐃᔑ ᑕᔣᑯᑳᐸᐎᓂᒡ ᑲᔦ ᑕᔥ ᐁᑮᓇᓈᑯᒫᓂᒡ ᑭᔐᒪᓂᑑᓐ᙮

ᑳᓃᑳᓂᔥᑲᒥᓂᒡ ᐊᓇᒥᐁᐎᑲᒥᒃ ᑮᐅᒋ ᓂᔥᑳᑎᓯᐗᓐ ᐃᐃᐌ ᒋᓴᔅ ᐁᑮᒥᓍᒋᐃᐌᒡ ᐁᐊᓉᐲᐎ ᑮᔑᑲᓂᓂᒃ᙮ ᒦᑕᔥ ᑳᐃᑭᑐᓂᒡ ᐁᑲᓅᓈᓂᒡ ᐯᒫᑎᓯᓂᒡ ᑳᐱ ᒫᐗᒋᐃᑎᓂᒡ: ᓂᑯᑣᓱ ᑮᔑᒃ ᐄᑐᒃ ᐊᔮᐗᓐ ᐊᐎᔭ ᑫᐊᓄᑮᐸᓐ᙮ ᒦᑕᔥ ᐃᐃᐌ ᐊᐲ ᑫᐲᔖᔦᑭᐸᓐ ᒋᒥᓍᒋᐃᑰᔦᑭᐸᓐ, ᑳᐐᓐ ᐐᓐ ᐊᓉᐲᐎ ᑮᔑᑲᒃ᙮

ᑳᑎᐯᒋᑫᒡ ᑕᔥ ᐅᑮᐃᔑ ᓇᑴᑕᐙᓐ: ᑮᓇᐙ ᑳᐊᓇᒥᐁᑳᓱᔦᒃ, ᑮᓇᐙ ᑳᑕᔑᔦᒃ, ᑮᐊᓉᐲᐎ ᑮᔑᑲᒃ ᐄᑐᒃ ᑭᑖᐸᐋᐙ ᑭᐱᔑᑮᒥᐙ, ᑯᒫ ᑲᔦ ᑭᒫᔑᒥᑕᑎᒨᒥᐙ ᐋᑎ ᐁᔑ ᑲᓇᐌᑖᑯᓯᐙᒡ ᐁᐃᔑᐎᓀᒀ ᐋᑎ ᑫᐅᒋ ᒥᓂᑴᐙᒡ᙮

ᐃᓇᔥᑫ ᑕᔥ ᐗᐊ ᐯᔑᒃ ᐃᑴ ᐁᐸᕒᐊᐋᒥᕽ ᐌᑕᑳᓀᓯᒡ ᓭᑕᓇᓐ ᑳᐱ ᒪᒫᒋᑾᐱᓂᑯᒡ ᐋᑯᓯᐎᓂᕽ ᒥᑖᔑ ᓂᔣᓱ ᑕᓱ ᐱᐴᓐ 18᙮ ᑳᐐᓐ ᐃᓇ ᑕᔥ ᑖᐅᒋ ᐋᐸᐅᑰᐎᓯᓰ ᒋᒥᓄᐊᔮᒡ ᐁᐊᓉᐲᐎ ᑮᔑᑲᓂᓂᒃ?

ᒋᓴᔅ ᑕᔥ ᑳᐃᔑ ᓇᑴᑕᐙᒡ ᐃᐃ ᑳᐋᓍᐸᒥᑯᒡ ᐅᑮᑲᑳᓱᒫᐞ᙮ ᐃᐃ ᑕᔥ ᐐᓐ ᑯᑕᒃ ᐊᐎᔭᐞ ᑮᐅᒋ ᒥᓉᑕᒨᐞ ᑲᑭᓇ ᒫᒪᑳᒋᒋᑫᐎᓇᓐ ᑳᑮᐃᔑᒋᑫᓂᒡ᙮

ᒋᓴᔅ ᑕᔥ ᑮᑲᑴᑗ: ᐋᓃᓐ ᑕᔥ ᑭᔐᒪᓂᑑ ᐅᑎᐯᒋᑫᐎᓐ ᐁᓀᑖᑾᓂᓂᒃ? ᐋᓃᓐ ᐃᑕᔥ ᑫᔑ ᑎᐱᓯᑑᔮᐹᓐ?

ᒦᑕᔥ ᐁᔑᓈᑾᒃ ᑖᐱᔥᑰ ᐃᓂᓂ ᑳᑭᑎᑳᑕᕽ ᑳ ᐊᑳᓯᓂᓂᒃ ᑭᑎᑳᓀᔅ ᐅᑭᑎᑫᐗᑮᕽ ᐃᐃ ᑭᑎᑳᓀᔅ ᑮᐊᓂ ᐅᐱᑭᓐ, ᐲᓂᔥ ᐁᑮᐊᓂ ᒥᑎᑯᐗᕽ᙮ ᒦᑕᔥ ᐃᐃᒫ ᐗᑎᑾᓂᕽ ᐱᓀᔒᔕᒃ ᑳᐃᔑ ᐊᑰᓯᐙᒡ ᐁᑮᐅᔑᑑᐙᒡ ᐅᐗᓯᓴᓂᐙᓐ᙮

ᒦᓇᐙ ᒋᓴᔅ ᑮᐃᔑ ᑲᑴᑗ: ᐋᓃᓐ ᑫᔑ ᑎᐱᓯᑖᐗᒃ ᑭᔐᒪᓂᑑ ᐅᑎᐯᒋᑫᐎᓐ?

ᒦ ᐃ ᐁᔑᓈᑾᒃ ᑖᐱᔥᑰ ᐃᑴ ᑳᐅᑖᐱᓇᕽ ᐸᑮ ᐅᐱᓯᒋᑲᓐ ᐁᐃᔑ ᑭᓂᑲᐎᓇᕽ ᐃᐃᒫ ᓈᓂᒥᑕᓇ ᑕᓱ ᑎᐹᐲᔥᑰᒋᑲᓐ ᐸᑴᔑᑲᓂᐗᔑᕽ ᐲᓂᔥ ᒥᓯᐌ ᐃᓂ ᐸᑴᔑᑲᓂᑳᓇᓐ ᐁᐅᐱᔑᓂᓂᒡ᙮

ᒋᓴᔅ ᑮᐊᓂ ᐃᔖ ᐃᓇᑫ ᑳᔑ ᐗᐆᑌᓈᐗᓂᓂᒃ, ᐃᐃᒫ ᑲᔦ ᑳᐊᔨᔑᑖᓂᐗᓂᓂᒃ ᐁᑭᑭᓄᐊᒪᐙᒡ ᐯᒫᑎᓯᓂᒡ ᐁᑮᐊᓂ ᐃᔖᒡ ᑕᔥ ᒉᕒᐆᓴᓬᐊᒥᕽ ᙮

ᐯᔑᒃ ᑕᔥ ᐊᐎᔭᓐ ᐅᑮᐅᒋ ᑲᑴᒋᒥᑰᓐ: ᑌᐯᒋᑫᔭᓐ, ᑕ ᐊᑳᓰᓄᐗᒃ ᐃᓇ ᐯᒫᑎᓯᐙᒡ ᑫᐱᒫᒋᐃᑰᐎᓯᐙᒡ? ᒦᔥ ᒋᓴᔅ ᑳᐃᔑ ᓇᑴᑕᐙᒡ:

ᒫᐗᒡ ᑯᒋᑑᒃ ᒋᑲᑴ ᐲᑎᑫᔦᒃ ᐃᐃᐌ ᑳᐊᑳᓴᑌᔮᒃ ᐃᔥᒀᑌᒻ᙮ ᐹᑏᓄᐗᒃ ᐅᔕ ᐯᒫᑎᓯᐙᒡ ᐃᐃᒫ ᑳᑲᑴ ᐲᑎᑫᐙᒡ, ᑳᐐᓐ ᑕᔥ ᐅᑲ ᑲᔥᑭᑑᓰᓈᐙ᙮

ᐊᐲ ᐊᐊ ᑳᑎᐯᑕᕽ ᐙᑳᐃᑲᓐ ᑮᐸᓯᑸᒡ ᑮᑭᐸᐊᕽ ᑕᔥ ᐃᔥᒀᑌᒻ, ᒦᔥ ᐊᑾᒌᕽ ᒋᓃᐸᐎᔦᒃ ᒋᒪᑗ ᔮᑾᐃᑫᔦᒃ ᒋᒪᑗ ᐸᑯᓭᑕᒧᐎᑖᑯᓯᔦᒃ ᑲᔦ ᐅᐅ ᒌᑭᑐᔦᒃ: ᑌᐯᒋᑫᔭᓐ, ᐹᑭᓇᒪᐎᔑᓈᒻ᙮ ᒦᔥ ᑫᒪᑗ ᐃᓂᓀᒃ: ᑳᐐᓐ ᑭᑭᑫᓂᒥᓯᓅᓂᓂᒻ, ᐋᑎ ᑲᔦ ᑳᐱ ᐅᒌᔦᒃ᙮

ᒦᑕᔥ ᑫᐃᓀᒃ: ᑭᑮᐐᒋ ᐐᓯᓃᒥᑰ ᐄᑐᒃ, ᑭᑮᐐᒋ ᒥᓂᑴᒥᑰ ᑲᔦ᙮ ᑭᑮᐱ ᑭᑭᓄᐊᒫᑫ ᑲᔦ ᓂᑖᐎᓂᓈᓂᕽ᙮

ᒦᔥ ᐅᐅ ᑫᐃᓂᓀᒃ: ᑳᐐᓐ ᑭᑭᑫᓂᒥᓯᓅᓂᓂᒻ, ᐋᑎ ᑲᔦ ᐌᒌᐌᑴᓐ᙮ ᓂᑯᒋ ᐅᒫ ᐅᒋ ᐃᔖᒃ, ᑲᑭᓇ ᑮᓇᐙ ᐅᒪᒋᑑᑕᒨᒃ᙮

ᒦᑕᔥ ᒋᑭᒋ ᒪᐎᔦᒃ ᒋᑲᒌᔥᑲᑕᒣᒃ ᑲᔦ ᑮᐱᑎᐙᓐ ᐊᐲ ᐙᐸᒣᒃ ᐁᐸᕒᐊᐋᒻ, ᐋᐃᓯᒃ ᑲᔦ ᐊᐊ ᑲᔦ ᒉᑲᑉ ᙮ ᐃᑭ ᑲᔦ ᐙᐸᒣᒀ ᑲᑭᓇ ᑳᑮ ᑲᓅᑕᒪᐙᐙᒡ ᑭᔐᒪᓂᑑᓐ ᐊᔮᐙᒡ ᐃᐃᒫ ᑭᔐᒪᓂᑑᓐ ᐅᑎᐯᒋᑫᐎᓂᓂᕽ, ᑮᓇᐙ ᑕᔥ ᐐᓐ ᓵᑭᒋ ᐌᐱᓂᑰᔦᒃ᙮

ᐯᒫᑎᓯᐙᒡ ᓴ ᑕᐱ ᐅᒌᐗᒃ ᐙᐸᓄᕽ, ᓂᑳᐲᐊᓄᕽ, ᑮᐌᑎᓄᕽ, ᔖᐗᓄᕽ ᑲᔦ ᒋᐱ ᐊᐱᐙᒡ ᐃᐃᒫ ᐁᔑ ᐐᑾᑎᐎᓐᒡ ᑭᔐᒪᓂᑑᓐ ᐅᑎᐯᒋᑫᐎᓂᕽ᙮

ᒦᑕᔥ ᐃᑭᐌᓂᐗᒃ ᐃᔥᒀᒡ ᑳᑮᐱ ᐊᔮᐙᒡ ᓂᑕᒻ ᑕᐊᔮᐗᒃ, ᐃᑭ ᑕᔥ ᐐᓐ ᓂᑕᒻ ᑳᑮᐱ ᐊᔮᐙᒡ ᐃᔥᒀᒡ ᑕᐊᔮᐗᒃ᙮

ᒣᒀ ᐃᐃᐌ ᐁᔑᓭᓂᒃ ᐋᓂᑕ ᐯᕒᐊᓰᒃ ᐅᑮᐱ ᓇᑭᔥᑲᐙᐙᓐ ᒋᓴᓲᓐ ᐁᐃᓈᐙᒡ: ᐃᑯᒋ ᐅᒫ ᐅᒋ ᒫᒑᓐ ᐸᑳᓐ ᐃᑯᒋ ᒋᐊᐎᐊᔮᔭᓐ, ᑭᒋ ᐅᑭᒫ ᐁᕒᐊᑦ ᐅᔕ ᑭᓇᑐᓀᐅᒃ ᐁᐐᓂᓯᒃ᙮

ᒋᓴᔅ ᑕᔥ ᐅᑮᐃᔑ ᓇᑴᑕᐙᐞ: ᐊᐎ ᐐᑕᒪᐎᒃ ᐊᐊ ᐙᑯᔥ ᐁᓵᑭᒋᓂᔕᐗᒀ ᒪᒋᐊᒑᑾᒃ, ᑲᔦ ᑕᔥ ᐁᒥᓍᒋᐃᐌᔮᓐ ᓅᑯᒻ ᑳᑮᔑᑲᒃ᙮ ᓂᓱ ᑮᔑᒃ 3 ᑕᔥ ᑮᐃᔑᓭᓂᒃ, ᒦ ᐃ ᒋᑮᔑᑖᐗᒃ ᓂᑕᑯᑮᐎᓐ᙮

ᒦᑕᔥ ᐐᓐ ᐃᑯ ᐋᔕ ᐁᔑᓭᒃ ᒋᐊᓂ ᒫᒑᔮᓐ ᓅᑯᒻ ᑳᑮᔑᑲᒃ, ᐙᐸᕽ ᑲᔦ, ᒦᓇᐙ ᑕᔥ ᑯᑕᒃ ᐊᓂ ᐙᐸᕽ᙮ ᑳᐐᓐ ᐐᓐ ᑖᐃᔑᓭᓯᓅᓐ ᐊᐎᔭ ᑳᑲᓅᑕᒪᐙᒡ ᑭᔐᒪᓂᑑᓐ ᐱᑯ ᐊᑎ ᒋᑕᔑ ᓂᓯᑎᐸᓐ, ᒦ ᐁᑕ ᑯ ᒉᕒᐆᓴᓬᐊᒥᕽ ᙮

ᑮᓇᐙ ᐁᔮᔦᒃ ᒉᕒᐆᓴᓬᐊᒥᕽ᙮ ᑭᑮᓂᓵᐙᒃ ᑳᑲᓅᑕᒪᐙᐙᒡ ᑭᔐᒪᓂᑑᓐ, ᑭᑮ ᐸᐲᒶᓯᓇᐋᐙᒃ ᑲᔦ ᐃᑭᐌᓂᐗᒃ ᑭᔐᒪᓂᑑ ᑳᑮ ᐲᒋᓂᔕᐊᒫᐎᓀᒃ᙮ ᐋᓃᓐ ᑕᓯᕽ ᑳᐃᔑ ᐊᑕᐌᑕᒫᓐ ᒋᑮᒫᒪᐎᓂᓇᑰᒃ ᑖᐱᔥᑰ ᓅᔐ ᐊᐹᑲᐋᒀᓐ ᑳᔑ ᒫᐗᒋᐋᒡ ᐅᓃᒑᓂᓴᐞ ᔒᐹᔭᐄ ᐅᓂᑸᑲᓂᕽ᙮ ᑳᐐᓐ ᑕᔥ ᑭᑮᐅᒋ ᐃᓀᑕᓰᒻ ᒋᒫᒪᐎ ᐃᓂᓇᑰᒃ᙮

ᒦᑕᔥ ᑭᔐᒪᓂᑑ ᒋᓇᑲᑕᕽ ᑭᑕᓇᒥᐁᐎᑲᒥᑯᐙ ᒋᐸᐹᐱᓯᔅᑫᑕᓯᒃ᙮ ᑌᐺ ᑕᔥ ᐐᓐ ᑳᐃᓂᓇᑰᒃ ᑳᐐᓐ ᑭᑲ ᐅᒋ ᐙᐸᒥᓰᒻ ᐹᓂᒫ ᐅᒋᒋᓭᒃ ᐅᐅ ᒋᐃᑭᑐᔦᒃ: ᑭᔐᒪᓂᑑ ᐅᑲ ᔕᐌᓂᒫᓐ ᐃᓂᐌᓂᐗᓐ ᑳᐱ ᐃᔖᓂᒡ ᑳᑎᐯᒋᑫᓂᒡ ᐅᑎᔑᓂᑳᓱᐎᓂᓃᕽ᙮

ᐯᔑᒀ ᐁᐊᓉᐲᐎ ᑮᔑᑲᓂᓂᒃ ᒋᓴᔅ ᑮᐊᑕ ᐐᓯᓂ ᑳᐃᔑᑖᓂᒡ ᐯᔑᒃ ᑳᓃᑳᓀᑖᑯᓯᓂᒡ ᐯᕒᐊᓰᓐ ᙮ ᐃᐃᒫ ᑕᔥ ᑳᑮᐊᔮᓂᒡ ᐯᔓ ᐐᑫ ᐅᑮᓈᑲᒋᐃᑰᐞ᙮

ᑮᐊᔮ ᑕᔥ ᐃᐃᒫ ᐯᔑᒃ ᐃᓂᓂ ᐅᑳᑕᓐ, ᐅᓂᑲᓐ ᑲᔦ ᐁᑮ ᐹᑭᓭᓂᑭᓐ᙮ ᒦᐗᓐ ᐃᑕᔥ ᐃᓂ ᑳᑮᐱ ᓈᓯᑳᑯᒡ ᒋᓴᔅ,

ᒋᓴᔅ ᑕᔥ ᑮᑮᑭᑐ ᐁᑲᑴᒋᒫᒡ ᑳᑭᒋ ᑭᑫᑕᒥᓂᒡ ᐅᓇᔓᐌᐎᓐ, ᐃᐃ ᑲᔦ ᐯᕒᐊᓰᐞ: ᐃᓇᑌ ᓇ ᑭᑑᓇᔓᐌᐎᓂᓈᓐ ᐊᐎᔭ ᐱᓵᓐ ᒋᒥᓄᐊᔮᐃᑎᐸᓐ ᐊᓉᐲᐎ ᑮᔑᑲᓂᓂᒃ, ᑯᒫ ᑲᔦ ᑳᐐᓐ᙮

ᑳᐐᓐ ᑕᔥ ᑮᓅᑖᑎᓰᐗᐞ᙮ ᒋᓴᔅ ᐅᑮ ᑌᐱᓈᓐ ᐃᓂ ᐃᓂᓂᐗᓐ ᐁᑮᒥᓍᒋᐋᒡ, ᒦᔥ ᑳᐃᔑ ᒫᒋᓂᔕᐙᒡ᙮

ᒦᑕᔥ ᐅᐅ ᑳᐊᓂ ᐃᓈᒡ: ᑮᔥᐱᓐ ᑭᑯᓯᓯᐙ ᑯᒫ ᑲᔦ ᑭᐱᔑᑮᒥᐙ ᐲᒋᓭᒡ ᐙᓂᑳᓂᕽ ᐊᓉᐲᐎ ᑮᔑᑲᓂᓂᒃ ᑳᐐᓐ ᐃᓇ ᑕᔥ ᔐᒫᒃ ᑭᑖ ᑲᑴ ᑲᔥᑭᐋᓯᐙᐙ?

ᑳᐐᓐ ᑕᔥ ᑫᑰᓐ ᐅᑮᐊᔮᓰᓂ ᑫᔑ ᓇᑴᑖᑯᒡ᙮

ᒋᓴᔅ ᑕᔥ ᐁᑲᓇᐙᐸᒫᒡ ᐅᑮᓂᓯᑕᐎᓈᓐ ᐋᓂᑕ ᐊᑐᒫᑲᓇᐞ ᐁᐃᔑ ᐊᐱᐃᑎᓱᓂᒡ ᒫᐗᒡ ᑫᑕᑭᑌᓂᑭᓐ ᐊᐱᐎᓇᓐ ᑑᐳᐎᓈᑯᕽ᙮ ᒦᑕᔥ ᒋᓴᔅ ᑳᐃᔑ ᐐᑕᒪᐙᒡ ᐊᐌᒋᑫᐎᓐ ᑲᑭᓇ ᐃᐃᒫ ᑳᐊᔮᓂᒡ:

ᐊᐲ ᐱᑯ ᐊᐎᔭ ᐊᑐᒥᒃ ᒋᐃᔖᐗᒡ ᐐᑎᑫ ᐐᑾᑎᐎᓂᕽ ᑫᑯ ᐐᓐ ᐃᔑ ᐅᓇᐱᑫᓐ ᑳᔑ ᑭᑌᑖᑾᒃ ᐊᐱᐎᓐ᙮ ᒫᑭᔕ ᑕᐃᔑᓭ ᑯᑕᒃ ᐊᐎᔭ ᓇᐗᒡ ᐁᑭᑌᑖᑯᓯᒡ ᐄᓴᓐ ᐁᑮᐊᑐᒥᓐᒡ ᐊᐲᒡ ᑮᓐ᙮

ᐊᐊ ᑕᔥ ᑳᑮᐊᑐᒥᒃ ᒫᑭᔖ ᑭᑲᐱ ᓈᓯᑳᒃ ᐅᐅ ᒋᐃᓂᒃ: ᑕᑲ ᑕᐎᔅᑲᐤ ᐗᐊ ᐃᓂᓂ ᐃᐃᒫ ᑳᔑ ᐊᐱᔭᓐ᙮ ᒦᔥ ᒋᐊᑲᒋᔭᓐ ᒋᔑ ᐊᐱᔭᓐ ᑳᔑ ᑕᐸᓭᑖᑾᒃ ᐊᐱᐎᓐ᙮

ᐊᐲ ᑕᔥ ᐊᑐᒥᑰᔭᓐ, ᐃᔑ ᐅᓇᐱᓐ ᑳᔑ ᑕᐸᓭᑖᑾᒃ ᐊᐱᐎᓐ᙮ ᒦᑕᔥ ᐊᐊᐌ ᑳᑮᐊᑐᒥᒃ ᑭᑲᐱ ᓈᓯᑳᒃ ᐅᐅ ᒋ ᐃᓂᒃ: ᓃᒋ ᐲᔖᓐ ᐌᑎ ᑾᔭᒃ ᐊᐱᐎᓐ ᑳᐃᔑ ᐊᔮᒃ᙮ ᒦᑕᔥ ᑮᓐ ᒋᐙᐸᒥᒀ ᐁᒦᓂᑰᔭᓐ ᑭᑌᓂᒥᑰᐎᓐ ᐁᓈᓴᒦᐙᒡ ᑲᑭᓇ ᑯᑕᒃ ᐊᑐᒫᑲᓇᒃ᙮

ᐊᐎᔭ ᓴ ᑳᐃᔥᐯᓂᑎᓱᒡ, ᑕᑕᐸᓭᓂᒫ᙮ ᐊᐎᔭ ᓴ ᑳᑕᐸᓭᓂᑎᓱᒡ, ᒦ ᓴ ᐊᐌ ᑫᐃᔥᐯᑖᑯᓯᒡ᙮

ᒦᑕᔥ ᐅᐅ ᒋᓴᔅ ᑳᐃᓈᒡ ᐃᓂ ᐃᓂᓂᐗᓐ ᑳᑮᐊᑐᒥᑯᒡ: ᐊᐲ ᐊᔕᑫᔭᓐ, ᑯᒫ ᑲᔦ ᐐᑾᑫᔭᓐ, ᑫᑯ ᐐᓐ ᐊᑐᒫᑫᓐ ᑳᓵᑭᐊᑣ, ᑮᒋᑭᐌᓯᐗᒃ, ᐯᔓ ᑳᐃᓇᐌᒪᑣ, ᐃᑭ ᑲᔦ ᑳᐌᓅᑎᓯᐙᒡ ᐯᔓ ᑳᐐᒋᑖᒪᑣ᙮ ᑮᔥᐱᓐ ᐃᐃ ᐃᔑᒋᑫᔭᓐ, ᑭᑲᑮᐌ ᐊᑐᒥᑰᒃ ᐅᔕ, ᒦᔥ ᐄᓴᓐ ᒋᐃᔑᓈᑾᒃ ᐁᑮᐌ ᑎᐸᐊᒫᑰᔭᓐ᙮

ᑮᓐ ᑕᔥ ᐊᐲ ᐐᑾᑫᔭᓐ, ᐊᑐᒻ ᐃᑭᐌᓂᐗᒃ ᑳᑭᑎᒫᑭᓯᐙᒡ, ᑳᒫᑭᓯᐙᒡ, ᑳᐱᒧᓭᓯᒀ, ᐃᑭ ᑲᔦ ᑳᐙᐱᓯᒀ᙮

ᑭᑲ ᔕᐌᑖᑯᔅ᙮ ᑳᐐᓐ ᐄᑐᒃ ᐅᑲᔥᑭᑑᓰᓈᐙ ᒋᑮᐌ ᑎᐸᐊᒪᐎᒀ᙮ ᑭᑲ ᑎᐸᐊᒫᑰᐎᔅ ᐅᔕ ᐊᐲ ᑮᔑᑲᒃ ᑳᐐ ᑮᐌ ᐱᒫᑎᓯᐃᑣ ᐅᑾᔭᒀᑎᓰᒃ, ᐅᑮᐃᓈᓐ᙮

ᐯᔑᒃ ᑕᔥ ᑳᐐᑕᐱᒥᑯᒡ ᐃᐃᒫ ᑑᐳᐎᓈᑯᕽ ᐁᓅᑕᒥᓂᒡ ᐅᐅᐌᓂ ᒦ ᐃ ᑳᐃᑯᒡ: ᐋᐱᒋ ᔕᐌᑖᑯᓯᐎᑐᒃ ᐊᐎᔭ ᑳᑕᔑ ᐐᓯᓂᒡ ᑭᔐᒪᓂᑑᓐ ᐁᔑ ᑎᐯᒋᑫᓂᒡ᙮

ᒦᔥ ᒋᓴᔅ ᑳᐃᓈᒡ: ᑮᐊᔮ ᐯᔑᒃ ᐃᓂᓂ ᐁᑮ ᑭᒋ ᐐᑾᑫᒡ ᓃᐱᐗᐞ ᐊᐎᔭᐞ ᐁᑮᐊᑐᒫᒡ ᒋᐱ ᐐᓯᓂᓂᒡ᙮

ᐊᐲ ᑕᔥ ᐁᐅᒋᒋᓭᒃ ᒋᐐᓯᓂᐙᒡ ᐅᑮᐃᔑᓂᔕᐙᓐ ᐅᑕᓄᑮᐋᑲᓇᓐ ᒋᐊᑕᐎ ᐐᑕᒪᐙᓂᒡ ᑳᑮᐊᑐᒫᒡ: ᐲᔖᒃ, ᐋᔕ ᑲᑭᓇ ᑫᑰᓐ ᑾᔮᑕᑌ᙮

ᒦᑕᔥ ᑲᑭᓇ ᑳᑮ ᑕᔑᓂᒡ ᑳᑮᒫᒋ ᐃᑭᑐᓂᒡ ᐁᐅᑕᒥᓭᓂᒡ᙮ ᐃᓂ ᓂᑕᒻ ᐃᓂᓂᐗᓐ ᐅᑮᐃᓈᓂ ᐊᓄᑮᐋᑲᓇᓐ: ᓂᑮᐊᑖᐌ ᑭᑎᑫᐗᑭ, ᐅᒋᑕ ᑯ ᐃᔑᓈᑾᓐ ᒋᑮ ᐃᔖᔮᓐ ᒋᐊᑕ ᐙᐸᑕᒫᓐ᙮ ᑭᐸᑯᓭᓂᒥᓐ ᑫᑰᓐ ᒌᓀᓂᒥᓯᐗᓐ ᐅᐅᐌ ᑳᔑ ᐅᑕᒥᓭᔮᓐ᙮

ᐃᓂ ᑕᔥ ᑯᑕᒃ ᑮᐃᑭᑐᐗᓐ: ᓂᑮᐊᑖᐌ ᓈᓇᓐ ᐱᔑᑭᐗᒃ᙮ ᒦᔥ ᐁᐊᓂ ᒫᒑᔮᓐ ᐁᐊᑕ ᑲᑴᒋᐊᒀ᙮ ᑭᐸᑯᓭᓂᒥᓐ ᑕᔥ ᑫᑰᓐ ᒋᐃᓀᓂᒥᓯᐗᓐ ᐅᐅᐌ ᑳᔑ ᐅᑕᒥᓭᔮᓐ᙮

ᒦᓇᐙ ᑯᑕᒃ ᑮᐃᑭᑐᐗᓐ: ᓅᑯᒻ ᐃᑯ ᓂᑮᐃᔥᒀ ᑭᒋᐐᑎᑫ᙮ ᑳᐐᓐ ᑕᔥ ᐃᔑᓭᓯᓅᓐ ᒋᑮ ᐲᔖᔮᐹᓐ᙮

ᐊᐊ ᑕᔥ ᐊᓄᑮᐋᑲᓐ ᑮᑮᐌ ᐁᑮᐊᐎ ᐐᑕᒪᐙᒡ ᐅᑑᑭᒫᒪᓐ ᑲᑭᓇ ᑳᑮᐃᓂᓐᒡ᙮ ᒦᑕᔥ ᐊᐊ ᑳᑎᐯᑕᕽ ᐙᑳᐃᑲᓐ ᑮᓂᔥᑳᑎᓯ᙮ ᒦᔥ ᒦᓇᐙ ᑳᐃᓈᒡ ᐅᑕᓄᑮᐋᑲᓇᓐ: ᑕᑲ ᐌᔩᑉ ᐃᔖᓐ ᐃᐃᒫ ᑳᐃᔑ ᐱᒪᒧᒃ ᑭᒋ ᒦᑲᓇ, ᐃᐃᒫ ᑲᔦ ᑳᔑ ᐸᐸᑫᒧᑭᓐ ᒦᑲᓇᓐ ᐆᑌᓈᕽ᙮ ᐲᔥ ᐃᑭᐌᓂᐗᒃ ᑳᑭᑎᒫᑭᓯᐙᒡ, ᑳᒫᑭᓭᐙᒡ, ᑳᐙᐱᓯᒀ, ᐃᑭ ᑲᔦ ᑳᑲᔥᑭᑑᓯᒀ ᒋᐱᒧᓭᐙᒡ, ᐅᑮᐃᓈᓐ᙮

ᐐᐸ ᑕᔥ ᐃᑯ ᐊᓄᑮᐋᑲᓐ ᐅᑮᐱ ᑲᓅᓈᓐ ᐅᑑᑭᒫᒪᓐ: ᐋᔕ ᑮᐃᔑᒋᑫᓈᓂᐗᓐ ᑳᑮᐃᔑ ᐊᓅᑮᔭᓐ᙮ ᑫᔮᐱ ᑕᔥ ᑕᐙ ᑫᔑ ᐊᐱᓈᓂᐗᕽ, ᐅᑮᐃᓈᓐ᙮

ᒦᑕᔥ ᐊᐊ ᐅᑭᒫ ᑳᐃᓈᒡ ᐅᑕᓄᑮᐋᑲᓇᓐ: ᑕᑲ ᐃᔑ ᒫᒌᐊᑑᓐ ᒦᑲᓈᕽ ᑳᒫᒌᒧᑭᓐ, ᐃᔖᓐ ᑲᔦ ᑳᐸᐸᑫᒧᑭᓐ ᒋᐲᒋᓂᔕᐗᑣ ᐊᐎᔭᒃ, ᒦᑕᔥ ᐅᐅᐌ ᐃᔑᒋᑫᔭᓐ ᓂᐙᑳᐃᑲᓐ ᒋᒨᔥᑭᓀᒃ᙮

ᒦᑕᔥ ᐁᔑ ᐐᑕᒪᐎᓇᑰᒃ ᑲᑭᓇ ᐃᑭᐌᓂᐗᒃ ᓂᑕᒻ ᑳᑮᐊᑐᒥᑣ ᑳᑮ ᐲᔖᓯᒀ ᑳᐐᓐ ᐅᑲ ᑯᒋᐳᑕᓰᓈᐙ ᒦᒋᒻ ᐁᔑ ᐐᑾᑫᐗᒃ, ᑮᐃᑭᑑ᙮

ᐯᔑᒀ ᒋᓴᔅ ᐁᐱᒥ ᐐᒌᐎᑯᒡ ᑳᐹᑏᓄᓂᒡ ᐊᐎᔭᐞ ᑮᐅᒋ ᑴᑭ ᑳᐸᐎ ᐁᑮ ᑲᓅᓈᒡ:

ᑮᔥᐱᓐ ᐊᐎᔭ ᑳᐱ ᓈᓯᑲᐎᒡ ᔒᑫᓂᒫᓯᒃ ᑕᔥ ᐅᑌᑌᓐ, ᐅᒫᒫᓐ ᑲᔦ, ᐐᐗᓐ, ᐅᓃᒑᓂᓴᐞ ᑲᔦ, ᑯᒫ ᑲᔦ ᐐᒋᑭᐌᓯᐗᓐ, ᐅᑕᐌᒫᓐ ᑲᔦ, ᑮᔥᐱᓐ ᑲᔦ ᔒᑫᑕᓯᒃ ᐅᐱᒫᑎᓯᐎᓐ ᑳᐐᓐ ᐊᐊ ᑕᑎᓄᐎᓰ ᓂᑭᑭᓄᐊᒪᐙᑲᓐ᙮

ᐊᐎᔭ ᑫᐱᒥᐎᓈᓯᒃ ᐅᑖᔑᑌᔮᑎᑯᒪᓐ, ᑳᐱᒥᓂᔕᐅᓯᒃ ᑲᔦ, ᑳᐐᓐ ᑕᑎᓄᐎᓰ ᓂᑭᑭᓄᐊᒪᐙᑲᓐ᙮

ᑮᔥᐱᓐ ᑮᓇᐙ ᑳᑕᔑᔦᒃ ᐯᔑᒃ ᐃᓀᑕᕽ ᐁᐐᐅᔑᑑᒡ ᑳᐃᔥᐸᑭᑌᓂᒃ ᐊᔕᐙᐱᐎᓐ, ᐱᓇᒫ ᓇ ᑖᐅᓇᐱ ᒋᑲᑴ ᑭᑫᑕᕽ ᐋᓃᓐ ᒥᓂᒃ ᑫᐃᓇᑭᑌᓂᒃ ᑳᐐᐅᔑᑑᒡ, ᑕᑲ ᒋᐊᔮᐙᑴᓐ ᔔᓂᔮᓐ ᒋᑮᔑᑑᒡ ᐃᐃ ᑳᐐᐅᔑᑑᒡ?

ᑮᔥᐱᓐ ᑕᔥ ᐁᑕ ᐁᑮᒥᒋ ᐅᓇᑑᒡ ᐙᐃᔑ ᐅᔑᑑᒡ ᐅᑕᔕᐙᐲᐎᑲᒥᒃ, ᑮᔑᑑᓯᒃ ᐃᑕᔥ, ᒦᔥ ᑲᑭᓇ ᑳᐙᐸᑕᒥᓂᒡ ᐋᓃᓐ ᑳᐃᔑ ᒫᒌᒡ ᒋᐹᐱᐃᑯᒡ᙮

ᒦᔥ ᐅᐅ ᑫᐃᑯᒡ: ᐃᓇᑭᓃᓐ ᐗᐊ ᐃᓂᓂ ᐁᑮᒫᒌ ᐅᔑᒋᑫᒡ, ᑳᐐᓐ ᑕᔥ ᐅᑮ ᑮᔑᑑᓰᓐ ᑳᑮ ᒫᒋᑑᒡ᙮

ᑮᔥᐱᓐ ᑭᒋ ᐅᑭᒫ ᐊᔮᐙᒡ ᒥᑖᒋᕽ ᒥᑖᔂᒃ 10,000 ᔑᒫᑲᓂᔕᐞ ᐁᐐᐊᑕ ᒦᑳᓈᒡ ᑕᔥ ᑯᑕᒃ ᑭᒋᐅᑭᒫᓐ ᐁᔮᐙᓂᒡ ᓃᔥᑕᓇ ᒥᑖᔂᒃ 20,000 ᔑᒫᑲᓂᔕᐞ, ᐱᓇᒫ ᓇ ᑕᓇᒪᑕᐱ ᒋᐅᓀᑕᕽ ᑕᑲ ᒋᑌ ᐊᐲᒌᑴᓐ ᒋᔖᑰᒋᐋᒡ ᐃᓂ ᑯᑕᒃ ᑭᒋᐅᑭᒫᓐ?

ᑮᔥᐱᓐ ᑕᔥ ᑌᐸᑫᓂᒧᓯᒃ ᒦᔥ ᑫᔑ ᐃᔑᓂᔕᐙᒡ ᑎᐹᒋᒧᐎᓂᓂᐗᐞ ᒋᐊᑕ ᓇᑭᔥᑲᐙᓂᒡ ᐃᓂ ᑭᒋᐅᑭᒫᓐ ᒥᓴᐙ ᑯ ᐁᓈᐎᓈᑯᓯᓂᒡ, ᐁᐃᔑ ᐸᑯᓭᓂᒫᒡ ᐱᓵᓐ ᒋᐐᒌᐎᑯᒡ᙮

ᒦᑕᔥ ᐯᔑᑾᓐ ᐁᔑᓈᑾᒃ, ᐊᐎᔭ ᑳᐸᑭᑎᓇᓯᒃ ᑲᑭᓇ ᑫᑰᓇᓐ ᐅᑕᔭᐄᒪᓐ ᑳᐐᓐ ᑕᑎᓄᐎᓰ ᓂᑭᑭᓄᐊᒪᐙᑲᓐ᙮

ᐋᐱᒋ ᐅᓂᔑᔑᓐ ᔒᐎᑖᑲᓐ᙮ ᑮᔥᐱᓐ ᑕᔥ ᐊᓂ ᓂᓯᑐᐳᑾᓯᓄᒃ, ᐋᓃᓐ ᐃᑕᔥ ᒦᓇᐙ ᑫᔑ ᑮᐌ ᔒᐎᑖᑲᓂᐗᑭᐸᓐ?

ᑳᐐᓐ ᐊᐲᑌᑖᑾᓯᓅᓐ ᒋ ᐋᐸᑕᑭᐸᓐ ᑭᑎᑫᐗᑮᕽ, ᑯᒫ ᑲᔦ ᑳᔑ ᐅᑯᓯᕽ ᒨᐤ, ᒦ ᐁᑕ ᑯ ᒋᐌᐱᓂᑳᑌᑭᐸᓐ᙮ ᑕᑲ ᐊᐎᔭ ᑳᐅᑕᐗᑳᒡ ᑕᐱᓯᑕᒻ᙮

ᐯᔑᒀ ᐁᑮᔑᑲᒃ ᑖᑭᔅ ᔔᓂᔮᓐ ᑳᒫᐗᑑᓈᐙᒡ, ᐃᑭ ᑲᔦ ᑯᑕᒃ ᑳᐋᓇᐌᓂᒥᑣ ᐅᑮᐱ ᓈᓯᑲᐙᐙᓐ ᒋᓴᓲᓐ ᐁᐱ ᐱᓯᑕᐙᐙᒡ᙮

ᒦᑕᔥ ᐃᑭ ᐯᕒᐊᓰᒃ ᐃᑭ ᑲᔦ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ ᑮᐊᔨᑭᑐᐗᒃ ᐁᐋᓍᐸᒋᑫᐙᒡ: ᐊᐊᐌ ᐃᓂᓂ ᐅᒥᓉᑖᓐ ᐁᐐᒌᐙᒡ ᐅᒪᒋᑑᑕᒨᐞ, ᑲᔦ ᑕᔥ ᐁᐐᒋ ᐐᓯᓃᒫᒡ᙮

ᒦᑕᔥ ᒋᓴᔅ ᑳᑮᐐᑕᒪᐙᒡ ᐅᐅᐌᓂ ᐊᐌᒋᑫᐎᓐ:

ᑮᔥᐱᓐ ᑮᓇᐙ ᐊᐎᔭ ᐊᔮᐙᒡ ᓂᑯᑣᒃ 100 ᒫᓇᒑᓂᔕᐞ, ᐯᔑᒃ ᑕᔥ ᐗᓂᔑᓂᓂᒡ, ᐋᓃᓐ ᑫᐃᔑᒋᑫᐸᓐ? ᐅᑖ ᓇᑲᓈᐞ ᒫᐐᓐ ᐃᐃ ᔖᑲᓯᒥᑕᓇᔑ ᔖᑲᓱ 99 ᒫᓇᒑᓂᔕᐞ ᐃᐃᒫ ᒥᔕᐗᑲᒥᒃ ᒋᐊᑐᓀᐙᐸᓐ ᐃᓂ ᐯᔑᒃ ᑳᐗᓂᔑᓂᓂᒡ, ᐁᑮ ᐸᑭᒌᓯᒃ ᐹᓂᒫ ᑳᒥᑲᐙᒡ᙮

ᐊᐲ ᑕᔥ ᒥᑲᐙᒡ, ᑕᒌᑫᑕᒻ, ᒦᔥ ᑫᔑ ᐗᑭᑕᓵᒡ ᐅᑎᓂᒫᑲᓂᕽ,

ᒦᔥ ᑫᓂᔑ ᑮᐌᐎᓈᒡ᙮ ᐅᑲ ᒫᒪᐎ ᐊᑐᒫᐞ ᑕᔥ ᑳᓵᑭ ᐐᒌᐙᒡ, ᐃᐃ ᑲᔦ ᐯᔓ ᐅᐐᒋᑖᒫᑲᓇᐞ ᐅᐅ ᒌᓈᒡ: ᐐᒋ ᒥᓉᑕᒨᒥᔑᒃ, ᓂᑮᒥᑲᐙ ᑳᑮᐗᓂᔑᕽ ᓂᒫᓇᒑᓂᔑᒻ!

ᒦᑕᔥ ᐁᔑ ᐐᑕᒪᐎᓇᑰᒃ, ᒦᔥ ᐯᔑᑲᓐ ᐁᔑ ᒌᑫᑕᒧᓈᓂᐗᕽ ᐌᑎ ᑭᒋᑮᔑᑯᕽ ᐊᐊ ᐅᒋ ᑳᒪᒋᑑᑕᕽ ᑮᑴᑳᑎᓯᒡ, ᐊᐲᒡ ᐐᓐ ᐃᓂᐌᓂᐗᐞ ᔖᑲᓯᒥᑕᓇᔑ ᔖᑲᓱ 99 ᑴᔭᒀᑎᓯᓂᒡ ᒣᒬᒡ ᑫᑴᑳᑎᓯᓯᓂᒃ᙮

ᐃᓇᔥᑫ ᐃᑴ ᑮᐊᔮᐙᒡ ᒥᑖᓱ ᐙᐹᐱᑯ ᔔᓂᔮᓴᐞ, ᐯᔑᒃ ᑕᔥ ᐗᓂᐋᒡ, ᐋᓃᓐ ᑕᔥ ᑫᐃᔑᒋᑫᒡ? ᒦ ᐃ ᑫᔑ ᓴᑲᐊᕽ ᐅᐙᓴᑯᓀᒋᑲᓐ, ᐁᐌᐸᐃᑫᒡ ᑲᔦ ᐅᐙᑳᐃᑲᓂᕽ, ᐌᐌᓂ ᐁᑲᑴ ᒥᑲᐙᒡ ᐁᐸᑭᒌᓯᒃ ᐹᓂᒫ ᐁᑮᒥᑲᐙᒡ᙮

ᐊᐲ ᑕᔥ ᑳᒥᑲᐙᒡ, ᒦ ᐃ ᐁᔑ ᒫᒪᐎ ᐊᑐᒫᒡ ᑳᓵᑭ ᐐᒌᐙᒡ, ᐃᐃ ᑲᔦ ᐯᔓ ᑳᐐᒋᑖᒥᑯᒡ ᐅᐅ ᐁᐃᓈᒡ: ᐐᒋ ᒥᓉᑕᒨᒥᔑᒃ, ᓂᑮᒥᑲᐙ ᐅᔕ ᑳᑮᐗᓂᐊᒃ ᓂᐙᐹᐱᑯ ᔔᓂᔮᓯᒻ᙮

ᒦᑕᔥ ᐯᔑᑾᓐ ᐌᑎ ᑭᒋᑮᔑᑯᕽ ᑭᔐᒪᓂᑑ ᐅᑌᒐᓬᐃᒪᐞ ᐁᔑ ᒌᑫᑕᒥᓂᒡ ᐃᓂ ᐅᒋ ᐯᔑᒃ ᐅᒪᒋᑑᑕᒨᓐ ᑳᑴᑳᑎᓯᓂᒡ᙮

ᒋᓴᔅ ᑕᔥ ᑮᐊᓂ ᐃᑭᑐ: ᑮᐊᔮ ᐃᓂᓂ ᐁᑮᓃᔑᓂᒡ 2 ᐅᑯᓯᓴᐞ᙮

ᐃᓂ ᑳᐅᔒᒣᔑᒫᐎᓂᒡ ᐅᑮᐃᑰᓐ: ᓂᑌᑌ, ᑕᑲ ᓅᑯᒻ ᑮᔖᒡ ᒦᔑᔑᓐ ᒥᓂᒃ ᑫᑰᓐ ᑳᐐᒦᔑᔭᓐ ᑭᑎᐯᒋᑫᐎᓂᕽ ᐅᒋ ᑫᑎᐯᑕᒫᓐ᙮ ᒦᑕᔥ ᐊᐊ ᐅᑌᑌᒫ ᑳᐃᔑ ᓀᓈᐎᓇᕽ ᐃᐃ ᐅᐌᓅᑎᓯᐎᓐ ᐁᑮᒫᒦᓈᒡ ᑳᓃᔑᓂᒡ ᐅᑯᓯᓴᐞ᙮

ᑳᐐᓐ ᑕᔥ ᑕᔑ ᓈᓈᑫ, ᒦ ᐃ ᐋᔕ ᑳᑮᐊᑖᐙᑫᒡ ᒥᓂᒃ ᑳᑮ ᑎᐯᑕᕽ᙮ ᒦᑕᔥ ᑳᐃᔑ ᒫᒑᒡ ᐙᓴ ᐸᑳᓐ ᐊᑮᕽ ᐁᑮᐃᔖᒡ᙮ ᒦᑕᔥ ᐌᑎ ᑳᑕᔑ ᒑᑭᓈᒡ ᐅᔔᓂᔮᒪᓐ, ᐁᑮ ᑮᐗᔥᑴ ᐱᒫᑎᓯᒡ᙮

ᑲᑭᓇ ᑕᔥ ᑫᑰᓐ ᑳᑮᐊᔮᒡ ᑮᒑᑭᓭ᙮ ᒦᔥ ᐃᐃ ᐊᐲ ᑳᑮᑭᒋ ᓅᑌᓭᒃ ᒦᒋᒻ ᐃᐃᒫ ᒥᓯᐌ ᐊᑮᕽ᙮ ᐐᑫ ᑫᐐᓐ ᑮᑰᐹᒋ ᓅᑌᓭ᙮

ᒦᑕᔥ ᑳᑮᐃᔖᒡ ᐁᑮᐊᐎ ᐊᓄᑮᑕᐙᒡ ᐃᓂᓂᐗᓐ ᐃᐃᒫ ᐊᑮᕽ ᐁᔮᓂᒡ᙮ ᒦᔥ ᑳᑮᐃᔑᓂᔕᐅᓐᒡ ᐃᐃᒫ ᑭᑎᑫᐎᑲᒥᑯᕽ ᒋᐸᒥᐋᒡ ᒋᐊᔕᒫᒡ ᑰᑰᔕᐞ ᒋᐐᓯᓂᓂᒡ᙮

ᐅᑮᒥᓴᐌᑖᓐ ᑕᔥ ᑫᐐᓐ ᒋᑮᒦᒋᐸᓐ ᐃᐃᐌᓂ ᑰᑰᔕᐞ ᑳᒦᒋᓂᒡ᙮ ᑳᐐᓐ ᑕᔥ ᐊᐎᔭᓐ ᐅᑮᒦᓂᑯᓰᓐ ᑫᑰᓐ ᑫᒦᒋᒡ᙮

ᐊᐲ ᑕᔥ ᑳᐊᓂ ᐸᑲᑫᑕᕽ ᐅᐅ ᑮᐃᑎᓱ: ᐃᓇᔥᑫ ᐐᓐ ᓂᑌᑌ ᐁᐹᑏᓄᓂᒡ ᐅᑕᓄᑮᐋᑲᓇ ᑌᐐᓯᓂᐗᐞ, ᐃᔥᑯᓭᐗᐞ ᑲᔦ ᒦᒋᒻ, ᓃᓐ ᑕᔥ ᐐᓐ ᐁᑲᐗᔅᑲᑌᔮᓐ᙮

ᑕᑲ ᓴ ᓂᑲ ᒫᒑ ᒋᑮᐌᔮᓐ ᒋᐃᔖᔮᓐ ᓂᑌᑌᑳᕽ ᐅᐅ ᒋᐃᓇᒃ: ᓂᑌᑌ, ᓂᑮᒪᒋᑑᑕᐙ ᑭᔐᒪᓂᑑ, ᑫᑮᓐ ᑲᔦ ᑭᑮᒪᒋᑑᑕᐎᓐ᙮

ᑳᐐᓐ ᑕᔥ ᓂᑌᐸᑫᑖᑯᓯᓰ ᓂᑯᓯᔅ ᒋᐃᔑᓂᑳᒥᔑᔭᓐ᙮ ᑭᐸᑯᓭᓂᒥᓐ ᑕᔥ ᑭᑕᓄᑮᐋᑲᓇᒃ ᑳᑑᑕᐗᑣ ᑫᓃᓐ ᒋᑑᑕᐎᔭᓐ, ᑮᐃᓀᑕᒻ ᐁᐐᐃᓈᒡ

ᒦᑕᔥ ᑌᐺ ᑳᐃᔑ ᐸᓯᑸᒡ ᐁᑮᒫᒑᒡ ᐁᑮ ᑮᐌᓄᑕᐙᒡ ᐅᑌᑌᓐ᙮ ᑫᔮᐱ ᑕᔥ ᐁᓈᐎᓈᑾᓂᓂᒃ ᒋᑆ ᐅᑎᑕᕽ ᐅᑌᑌᓐ ᐅᑕᔮᐎᓂᓂ, ᒦ ᐃ ᐋᔕ ᐁᑮᐙᐸᒥᑯᒡ ᐅᑌᑌᓐ ᐁᐱ ᓈᑯᓯᒡ ᐁᑮ ᑰᐹᓯᓈᑯᒡ᙮ ᒦᔥ ᑳᑮᐊᐸᑑᓂᒡ ᐁᐱ ᓈᑯᓯᒡ ᐁᑮ ᑭᑭᒋᒌᓂᑯᒡ ᐁᐅᒌᒥᑯᒡ᙮

ᐅᑯᓯᓯᒫ ᑕᔥ ᑮᐃᑭᑐ: ᓂᑌᑌ, ᓂᑮᒪᒋᑑᑕᐙ ᑭᔐᒪᓂᑑ, ᑫᑮᓐ ᑲᔦ ᑭᑮᒪᒋᑑᑕᐎᓐ᙮ ᑳᐐᓐ ᑕᔥ ᓂᑌᐸᑫᑖᑯᓯᓰ ᓂᑯᓯᔅ ᒋᐃᔑᓂᑳᒥᔑᔭᓐ, ᑮᐃᑭᑐ᙮

ᐊᐊ ᑕᔥ ᐅᑌᑌᒫ ᐅᑮᐃᓈᐞ ᐅᑕᓄᑮᐋᑲᓇᐞ: ᑕᑲ ᐌᔩᑉ ᐲᑑᒃ ᒫᐗᒡ ᐌᓂᔑᔑᒃ ᑭᑭᔥᑭᑲᓐ, ᐱᓯᑲᒧᐃᒃ᙮ ᐱᓯᑲᒧᐃᒃ ᑲᔦ ᓈᐱᓂᒌᐱᓱᓇᓐ ᐅᓂᒌᕽ, ᒪᑭᓯᓇᓐ ᑲᔦ ᐱᑕᑭᓯᓀᐃᒃ᙮

ᒦᑕᔥ ᐃᔑ ᒫᒑᒃ ᒋᓈᓯᑲᐌᒃ ᑳᒥᓄᓈᑯᓯᒡ ᑳᐋᒋᐳᒡ ᐱᔑᑮᔅ ᒋᓂᓭᒃ᙮ ᒫᐗᐤ ᑭᑲᑭᒋ ᐐᓯᓂᒥᓐ ᐁᐲᒋ ᒥᓉᑕᒪᕽ᙮

ᐗᐊ ᓴ ᓂᑯᓯᔅ ᐁᑮᓂᐳᐸᓐ ᓅᑯᒻ ᑕᔥ ᐱᒫᑎᓯ᙮ ᐁᑮᐗᓂᔑᑭᐸᓐ ᓅᑯᒻ ᑕᔥ ᐁᑮᒥᑲᐎᓐᒡ᙮ ᒦᑕᔥ ᑳᐃᔑ ᒫᒋ ᑭᒋ ᐐᓯᓂᐙᒡ᙮

ᒣᒀ ᑕᔥ ᐁᑭᒋ ᐃᓇᑲᒥᑲᓂᓂᒃ ᐊᐊ ᐐᓐ ᑳᐅᓴᔦᓯᒫᐎᒡ ᐅᑯᓯᓯᒫ ᑮᐊᓄᑮ ᑭᑎᑫᐗᑮᕽ᙮ ᐊᐲ ᑕᔥ ᐁᐱᑮᐌᒡ ᐯᔓ ᐁᐊᓂ ᐅᑎᑕᕽ ᐙᑳᐃᑲᓐ, ᐅᑮᓅᑖᓐ ᐁᒪᑗ ᑭᑐᒋᑳᓂᐗᓂᓂᒃ, ᑲᔦ ᐁᒪᑗ ᓃᒥᓈᓂᐗᓂᓂᒃ᙮

ᒦᑕᔥ ᑳᑮᐊᑐᒫᒡ ᐯᔑᒃ ᐊᓄᑮᐋᑲᓇᓐ ᐁᑲᑴᒋᒫᒡ ᐋᓃᓐ ᐁᔑᒋᑳᓂᐗᓂᓂᒃ᙮

ᒦᑕᔥ ᑳᐃᑯᒡ: ᑭᔒᒣᓐᔥ ᐅᔕ ᑮᑕᑯᔑᓐ᙮ ᑭᑌᑌ ᑕᔥ ᐅᑮᓂᓵᓐ ᐃᓂ ᒫᐗᒡ ᑳᒥᓄᓈᑯᓯᓂᒡ, ᑳᐐᓂᓄᓂᒡ ᐱᔑᑮᓴᓐ ᐋᓃᔥ ᒥᓉᑕᒻ ᐁᐱᑮᐌᓄᑖᑯᒡ ᐅᑯᓯᓴᓐ ᐁᐱᒫᑎᓯᓂᒡ ᑲᔦ ᑕᔥ ᐁᒥᓄᐊᔮᓂᒡ᙮

ᐊᐊ ᑕᔥ ᑳᐅᓴᔦᓯᒫᐎᒡ ᑮᓂᔥᑳᑎᓯ ᐁᑮᐐ ᐲᑎᑫᓯᒃ ᐙᑳᐃᑲᓂᕽ᙮ ᐅᑌᑌᓐ ᑕᔥ ᐅᑮᐱ ᓈᓯᑳᑰᓐ ᐁᑮᐱ ᑳᑮᓱᒥᑯᒡ ᐱᓵᓐ ᒋᐲᑎᑫᒡ᙮

ᒦᑕᔥ ᑳᐃᓈᒡ ᐃᓂ ᐅᑌᑌᓐ: ᐃᓇᔥᑫ ᐋᓃᓐ ᑕᓱ ᐱᐴᓐ ᐋᔕ ᑳᐱ ᐊᓄᑮᑕᐎᓈᓐ ᑖᐱᔥᑰ ᐊᐊᐌ ᐯᔑᒃ ᑭᑕᓄᑮᐋᑲᓐ ᑳᐊᓄᑮᑕᐎᒃ, ᒨᔕᒃ ᐁᐱ ᐃᔑᒋᑫᔮᓐ ᑳᔑ ᐊᑕᐌᓂᒥᔭᓐ᙮ ᐌᑯᓀᓐ ᑕᔥ ᑳᐱ ᒦᓂᔑᔭᓐ? ᑳᐐᓐ ᑲᓇᑫ ᐯᔑᒃ ᑭᑮᒦᔑᓰ ᒫᓇᒑᓂᔐᔅ ᒋᑮᐐᒋ ᐐᓯᓂᒪᒀᐸᓐ ᓂᓵᑭ ᐐᒌᐙᑲᓇᒃ!

ᐊᐊ ᑕᔥ ᐐᓐ ᑭᑯᓯᔅ ᐁᑮᓂᔑᐗᓈᒋᑑᒡ ᑲᑭᓇ ᑭᑎᐱᓇᐌᐎᓯᐎᓐ ᐁᑮᒥᒋ ᒑᑭᓂᑫᒡ ᐁᐸᐹ ᓅᑎᑴᐌᒡ᙮ ᐊᐲ ᑕᔥ ᐁᐱᑮᐌᒡ ᒦ ᐃ ᑳᐃᔑ ᓂᑕᒪᐗᒡ ᑳᐅᓂᔑᔑᓂᒡ, ᑳᐐᓂᓄᓂᒡ ᐱᔑᑮᓴᓐ!

ᐅᐅ ᑕᔥ ᐅᑮᐃᔑ ᓇᑴᑖᑰᓐ ᐅᑌᑌᓐ: ᓂᑯᓯᔅ, ᒨᔕᒃ ᐅᐅᒫ ᑭᐱᐐᒋ ᐊᔮᒥᔥ᙮ ᒥᓂᒃ ᓴ ᑫᑰᓐ ᑳᑎᐱᓇᐌᐎᓯᔮᓐ ᒦ ᓴ ᐃᐌ ᑫᑮᓐ ᑌᐱᓇᐌᐎᓯᔭᓐ᙮

ᐅᒋᑕ ᑕᔥ ᐃᑯ ᐃᔑ ᓇᐃᓈᑾᓐ ᒋᑭᒋ ᐐᓯᓂᔭᑭᐸᓐ, ᒋᒥᓉᑕᒪᑭᐸᓐ ᑲᔦ ᐋᓃᔥ ᑭᔒᒣᓐᔥ ᐁᑮᓂᐳᐸᓐ, ᓅᑯᒻ ᑕᔥ ᐁᐱᒫᑎᓯᒡ᙮ ᐁᑮᐗᓂᔑᑭᐸᓐ ᑲᔦ, ᓅᑯᒻ ᑕᔥ ᐁᑮᒥᑲᐎᓐᒡ, ᐅᑮᐃᑰᓐ᙮

ᒋᓴᔅ ᐅᑮᐃᓈᐞ ᐅᑭᑭᓄᐊᒪᐙᑲᓇᐞ: ᐯᔑᒀ ᑮᐊᔮ ᐃᓂᓂ ᐋᐱᒋ ᐁᑮᐌᓅᑎᓯᒡ ᑲᔦ ᑕᔥ ᐁᑮᐊᔮᐙᒡ ᐊᓄᑮᐋᑲᓇᓐ ᑳᑮ ᑲᓇᐌᑕᒫᑯᒡ ᐅᑎᐯᑖᓱᐎᓇᓐ᙮ ᐊᐊ ᑕᔥ ᐃᓂᓂ ᑮᐱ ᐐᑕᒪᐙ ᑳᑲᓇᐌᑕᒫᑯᒡ ᑾᔭᒃ ᐁᑮᐃᓈᐸᒋᑑᓯᓂᒃ ᐅᑕᔭᐄᒪᓐ ᑳᑎᐯᑕᕽ᙮

ᒦᑕᔥ ᑳᑮ ᑲᓅᓈᒡ ᒋᐲᑎᑫᓂᒡ ᐅᐅ ᐁᑮᐃᓈᒡ: ᐌᑯᓀᓐ ᐅᐅ ᑳᐃᔑ ᓅᑕᒫᓐ ᐁᐃᔑᒋᑫᐗᓉᓐ? ᐱᐙᐸᑕᐃᔑᓐ ᒥᓯᐌ ᐋᓃᓐ ᐁᓈᐸᒋᑑᔭᓐ ᓂᑎᐯᑖᓱᐎᓇᓐ᙮ ᑳᐐᓐ ᑕᔥ ᐊᐗᔑᒣ ᑭᑲ ᑲᓇᐌᑕᓰᓇᓐ ᓂᑎᐯᑖᓱᐎᓇᓐ᙮

ᐊᐊ ᑕᔥ ᐊᓄᑮᐋᑲᓐ ᑮᐃᑎᓱ: ᓂᑑᑭᒫᒻ ᑳᐊᓄᑮᑕᐗᒃ ᓂᐐ ᐸᑭᑎᓂᒃ ᐃᐃ ᐁᓇᓄᑮᐗᒃ᙮ ᐋᓃᓐ ᑕᔥ ᑫᐃᔑᒋᑫᔮᓐ? ᐅᓵᒻ ᓂᓃᓇᒫᑎᔅ ᒋᐙᓂᑫᔮᐹᓐ, ᓂᑖ ᐊᑲᒡ ᑲᔦ ᒋᐸᐹ ᐸᑯᔑᐃᐌᔮᓐ᙮

ᐋᔕ ᓂᑭᑫᑖᓐ ᐋᓃᓐ ᑫᐃᔑᒋᑫᔮᓐ ᑳᓵᑭ ᐐᒌᐎᐙᒡ ᑫᐅᒋ ᐲᑎᑲᔑᐙᒡ ᐅᑖᐎᓂᐙᕽ ᐊᐲ ᐸᑭᑎᓂᑰᔮᓐ ᐅᐅ ᐁᓇᓄᑮᔮᓐ᙮

ᒦᑕᔥ ᑳᐃᔑ ᑲᓅᓈᒡ ᑲᑭᓇ ᐊᐎᔭᐞ ᐃᓂᐌᓂᐗᐞ ᑳᒪᓯᓇᐊᒪᐙᓂᒡ ᐅᑑᑭᒫᒪᓐ᙮ ᒦᔥ ᑳᐃᔑ ᑲᑴᒋᒫᒡ ᐃᓂ ᓂᑕᒻ ᐃᓂᓂᐗᓐ: ᐋᓃᓐ ᒥᓂᒃ ᒣᓯᓇᐊᒪᐗᒡ ᓂᑑᑭᒫᒻ? ᐅᑮᐃᓈᓐ᙮

ᒦᑕᔥ ᑳᐃᑯᒡ ᐃᓂ ᐃᓂᓂᐗᓐ: ᓂᔣᔂᒃ 800 ᑕᓱ ᑎᐸᐆᐹᓐ ᐋᓬᐃᑉ ᑎᓄ ᐱᒥᑌ ᓂᒪᓯᓇᐊᒪᐙ, ᐅᑮᐃᑰᓐ᙮ ᒦᑕᔥ ᑳᐃᓈᒡ: ᐅᐅᒫ ᐃᔑ ᐊᐱᓐ᙮ ᔐᒫᒃ ᐃᑯ ᓃᐙᒃ 400 ᐃᔑᐲᐊᓐ ᐃᐃ ᑭᒪᓯᓇᐃᑫᐎᓐ, ᐅᑮᐃᓈᓐ᙮

ᒦᓇᐙ ᑕᔥ ᑯᑕᒃ ᐅᑮᐃᔑ ᑲᑴᒋᒫᓐ: ᑮᓐ ᑕᔥ ᐐᓐ ᐋᓃᓐ ᒥᓂᒃ ᒣᓯᓇᐊᒪᐗᒡ? ᐅᑮᐃᓈᓐ᙮ ᒥᑖᔂᒃ 1,000 ᑕᓱ ᒪᑲᒃ ᐸᑴᔑᑲᓇᓐ ᓂᒪᓯᓇᐊᒪᐙ, ᐅᑮᐃᑰᓐ᙮ ᒦᔥ ᑳᐃᓈᒡ: ᐃᓇ ᐅᐌ ᑭᒪᓯᓇᐃᑫᐎᓐ, ᓂᔣᔂᒃ 800 ᐃᔑᐲᐊᓐ, ᐅᑮᐃᓈᓐ᙮

ᒦᑕᔥ ᐊᐊ ᐅᑭᒫ ᑳᑮᐊᑐᒫᒡ ᐃᓂ ᑳᑲᓇᐌᑕᒫᑯᒡ ᐅᑕᔭᐄᒪᓐ ᑳᑮᐗᔦᔑᒋᑫᓂᒡ: ᐐᑫ ᑭᑲᑮᑖᐎᒋᑫ ᐁᑲᓇᐙᐸᑎᓱᔭᓐ, ᐅᑮᐃᓈᓐ᙮ ᐃᓇᔥᑫ ᐐᓐ ᐃᑯ ᐯᒫᑎᓯᐙᒡ ᓅᑯᒻ ᐊᑮᕽ ᑳᐅᒋ ᑎᐯᑖᑯᓯᐙᒡ ᓇᐗᒡ ᑾᔭᒃ ᐅᑲᓇᐌᑖᓈᐙ ᑳᔑ ᐊᓄᑮᐙᒡ ᐊᐲᒡ ᐐᓐ ᐃᑭᐌᓂᐗᒃ ᐙᓭᔮᕽ ᑳᐅᒋ ᑎᐯᑖᑯᓯᐙᒡ᙮

ᒦᔥ ᒋᓴᔅ ᑫᔮᐱ ᑳᐊᓂ ᐃᑭᑐᒡ: ᒦᑕᔥ ᐅᐅᐌ ᐁᔑ ᐐᑕᒪᐎᓇᑰᒃ᙮ ᐊᑮᐎ ᐌᓅᑎᓯᐎᓐ ᐋᐸᒋᑑᒃ ᒋᐅᑎᓇᒫᓱᔦᒃ ᑫᓵᑭ ᐐᒌᐎᓀᒀ, ᐊᐲ ᓴ ᑕᔥ ᑮᒑᑭᓭᒃ, ᒦᑕᔥ ᒋᒥᓉᑕᒧᓈᓂᐗᕽ ᒋᐲᑎᑲᓂᑰᔦᒃ ᑖᐎᓂᕽ ᐐᑳ ᑫᐃᔥᒀᓭᓯᓄᒃ᙮

ᐱᑯ ᐊᐌᓀᓐ ᑫᐊᔮᒀᒥᓰᑲᑕᒧᑴᓐ ᑳᐊᑳᓭᑖᑾᓂᓂᒃ ᒦ ᐯᔑᑾᓐ ᑫᔑ ᐊᔮᒀᒥᓰᑲᑕᕽ ᑳᑭᒋ ᐃᓀᑖᑾᓂᓂᒃ ᑫᑰᓐ᙮ ᐊᐌᓀᓐ ᑲᔦ ᑫᐅᒋ ᐗᔦᔑᐃᐌᑴᓐ ᒥᓴᐙ ᐊᑳᓭᑖᑾᓂᓂᒃ ᒦ ᐯᔑᑾᓐ ᑫᐃᔑ ᐗᔦᔑᐃᐌᒡ ᐃᐃᐌᓂ ᑳᑭᒋ ᐃᓀᑖᑾᓂᓂᒃ᙮

ᑮᔥᐱᓐ ᑕᔥ ᑌᐺᔦᑖᑯᓯᔦᒃ ᒋᓇᓈᑲᒋᑑᔦᒃ ᐊᔮᒀᒥᓰᑲᑕᓯᐌᒃ ᐁᔑ ᐋᐸᒋᑑᔦᒃ ᐊᑮᐎ ᐌᓅᑎᓯᐎᓐ, ᐋᓃᓐ ᑕᔥ ᐐᓐ ᑫᔑ ᐸᑭᑎᓇᒫᑰᔦᑭᐸᓐ ᑳᑾᔭᑾᒃ ᐌᓅᑎᓯᐎᓐ?

ᑮᔥᐱᓐ ᑕᔥ ᑌᐺᔦᑖᑯᓯᓯᐌᒃ ᒋᓈᑲᒋᑑᔦᒃ ᐁᑮᐅᒋ ᐊᔮᒀᒥ ᐋᐸᒋᑑᔦᒃ ᑯᑕᒃ ᐊᐎᔭ ᐅᑕᔭᐄᒪᓐ, ᐋᓃᓐ ᐃᑕᔥ ᑫᑮᐃᔑ ᐸᑭᑎᓇᒫᑰᔦᑭᐸᓐ ᑫᑰᓐ ᒋᑎᐯᑕᒣᒃ?

ᑳᐐᓐ ᐊᓄᑮᐋᑲᓐ ᐅᑲ ᑎᐯᓂᒥᑯᓰᐞ ᓃᔑᓐ ᐅᑭᒫᐞ᙮ ᐋᓃᔥ ᐯᔑᒃ ᐅᑲ ᔒᑫᓂᒫᓐ, ᔑᑾ ᐯᔑᒃ ᐅᑲᓵᑭᐋᓐ᙮ ᐯᔑᒃ ᐃᓂᐌ ᐅᑲ ᑭᒋᐎᓈᓐ, ᔑᑾ ᐯᔑᒃ ᐅᑲ ᐌᐱᓈᓐ᙮ ᑳᐐᓐ ᑭᑖ ᑎᐯᓂᒥᑯᓰ ᑭᔐᒪᓂᑑ ᑲᔦᔥ ᒋᑕᑯ ᑎᐯᓂᒥᑭᐸᓐ ᔔᓂᔮ᙮

ᐊᐲ ᑕᔥ ᐃᑭᐯᕒᐊᓰᒃ ᐁᓅᑕᒧᐙᒡ ᑲᑭᓇ ᐅᐅᐌᓂ, ᐅᑮ ᐹᐱᓄᑕᐙᐙᓐ ᒋᓴᓲᓐ, ᐋᓃᔥ ᐅᑮ ᓵᑭᐋᐙᓐ ᔔᓂᔮᓐ᙮

ᒦᑕᔥ ᒋᓴᔅ ᑳᐃᓈᒡ: ᑮᓇᐙ ᐅᔕ ᑳᑲᑴ ᒥᓄᓈᑯᐃᑎᓱᔦᒃ ᐁᓈᓴᒦᐙᒡ ᐯᒫᑎᓯᐙᒡ, ᑭᔐᒪᓂᑑ ᑕᔥ ᐐᓐ ᑭᑭᑫᓂᒥᑯᐙ ᐁᓈᑎᓯᔦᒃ ᑭᑌᐃᐗᕽ᙮ ᐃᐃᐌᓂ ᐅᔕ ᐊᐎᔭᒃ ᑳᑭᒋ ᐃᓀᑕᒧᐙᒡ, ᒦ ᐃᐌᓂ ᑭᔐᒪᓂᑑ ᑳᔒᑫᑕᕽ᙮

ᒨᓯᔅ ᐅᑑᓇᔓᐌᐎᓇᓐ, ᐃᐃ ᑲᔦ ᑳᑮᐃᔑᐲᐃᑫᐙᒡ ᑫᓅᑕᒪᐙᐙᒡ ᑭᔐᒪᓂᑑᓐ ᑮᐱ ᑕᔑᑌᓂ ᐲᓂᔥ ᑮᐱ ᐊᔮᒡ ᒞᓐ ᓰᑲᐊᑖᑫᐎᓂᓂ᙮ ᒦᑕᔥ ᐃᐃ ᐊᐲ ᑳᑮᒫᒌ ᑕᔑᑌᓂᒃ ᐁᔑᒥᓍᑐᑌᓂᒃ ᑭᔐᒪᓂᑑ ᐅᑎᐯᒋᑫᐎᓐ᙮ ᒦᔥ ᑲᑭᓇ ᐊᐎᔭᒃ ᐁᓂᑯᒃ ᐁᔑ ᑲᑴᒋᑑᐙᒡ ᒋᐲᑎᑫᐙᒡ ᐃᐃᒫ ᒋᐅᒋ ᑎᐯᑖᑯᓯᐙᒡ᙮

ᓇᐗᒡ ᐌᑕᓐ ᐃᐃᐌ ᑮᔑᒃ, ᐊᑭ ᑲᔦ ᒋᐴᓂᓭᒃ, ᐊᐲᒡ ᐃᐌ ᐯᔑᒃ ᒐᑭᐲᐃᑲᓐ ᒋᐅᑖᐱᓂᑳᑌᒃ ᐅᓇᔓᐌᐎᓂᕽ ᐅᒋ᙮

ᐊᐌᓀᓐ ᐃᑯ ᐃᓂᓂ ᑳᐌᐱᓈᒡ ᐐᐗᓐ ᑯᑕᒃ ᑕᔥ ᐃᑴᐗᓐ ᑳᐐᑎᑫᒫᒡ ᐱᔑᒀᑎᓯ᙮ ᐊᐊ ᑕᔥ ᐃᓂᓂ ᑳᐐᑎᑫᒫᒡ ᐃᑴᐗᓐ ᑳᑮ ᐌᐱᓂᑯᓂᒡ ᐅᓈᐯᒥᓂ ᐱᔑᒀᑎᓯ᙮

ᐯᔑᒃ ᑮᐊᔮ ᐃᓂᓂ ᐋᐱᒋ ᐁᑮᐌᓅᑎᓯᒡ ᐁᑭᑭᔥᑲᕽ ᑲᔦ ᒫᐗᒡ ᑳᐋᑾᑭᑌᓂᑭᓐ ᑭᑭᔥᑭᑲᓇᓐ᙮ ᒫᐗᒡ ᐃᑯ ᐁᑮᑭᒋ ᐌᓅᑖᑎᓯᒡ ᐁᑕᓱ ᑮᔑᒃ᙮

ᑮᐊᔮ ᑕᔥ ᑲᔦ ᐁᑭᑎᒫᑭᓯᒡ ᐃᓂᓂ ᓬᐋᓴᕒᐊᔅ ᐁᔑᓂᑳᓱᒡ, ᒥᓯᐌ ᐅᐐᔭᐎᕽ ᐁᑮᐅᒥᑮᐎᒡ᙮ ᑮᓂᑖ ᐊᐱ ᐅᑎᔥᒀᑌᒥᓃᕽ ᐃᓂ ᑳᐌᓅᑎᓯᓂᒡ ᐃᓂᓂᐗᓐ᙮

ᑮᐃᔑ ᒥᓴᐌᑕᒻ ᒋᒦᒋᒡ ᐃᔥᑾᒋᑲᓇᓐ ᑳᐅᒋ ᐸᑭᓯᓂᓂᑭᓐ ᐅᑑᐳᐎᓈᑯᓃᕽ ᐃᓂ ᑳᐌᓅᑎᓯᓂᒡ᙮ ᐊᓂᒨᐞ ᐃᑕᔥ ᑮᐲᔖᐙᐞ ᐁᑮᐱ ᓅᔅᒀᑕᐊᒥᓂᒡ ᓬᐋᓴᕒᐊᔅ ᑳᔑ ᐅᒥᑮᐎᒡ᙮

ᑳᑭᑎᒫᑭᓯᒡ ᐃᓂᓂ ᑮᐃᔥᒀ ᐱᒫᑎᓯ᙮ ᐁᒐᓬᐊᐞ ᑕᔥ ᐅᑮᒫᒌᓂᑰᐞ ᐁᑮᐃᔑᐎᓂᑯᒡ ᑭᒋᑮᔑᑯᕽ ᒋᐊᐎ ᐐᑕᐱᒫᒡ ᐁᐸᕒᐊᐋᒪᓐ ᙮ ᐊᐊ ᑕᔥ ᑫᐐᓐ ᑳᐌᓅᑎᓯᒡ ᐃᓂᓂ ᑮᐃᔥᒀ ᐱᒫᑎᓯ, ᒦᔥ ᑳᐃᔑ ᓇᐃᓂᓐᒡ᙮

ᐃᐃᒫ ᓴ ᑕᔥ ᑮᐃᔑ ᐊᔮ ᑳᔑ ᑲᓇᐌᑖᑯᓯᐙᒡ ᑳᓂᐳᐙᒡ᙮ ᐐᑫ ᑮᑲᒀᑕᑭ ᐐᓴᑫᑕᒻ᙮ ᐃᔥᐱᒥᕽ ᑕᔥ ᐁᐃᓈᐱᒡ ᐅᑮᐙᐸᒫᓐ ᐁᐸᕒᐊᐋᒪᓐ ᐙᓴ ᐁᒪᑗ ᐊᔮᓂᒡ, ᐁᒪᑗ ᐐᑕᐱᒫᓂᒡ ᓬᐋᓴᕒᐊᓴᓐ᙮

ᒦᑕᔥ ᑳᑮ ᔖᑯᐙᓈᒡ: ᓂᑌᑌ ᐁᐸᕒᐊᐋᒻ ᑰᐹᓯᓇᐎᔑᓐ, ᑕᑲ ᐲᒋᓂᔕᐅ ᓬᐋᓴᕒᐊᔅ ᒋᒉᑭᐲᓂᒌᓂᒡ ᓂᐲᕽ ᒋᐱ ᑕᑳᐹᐗᑑᒡ ᓂᑌᓇᓂᐤ, ᐁᑕᑕᐌ ᐅᔕ ᓂᐐᓴᑳᑭᔅ ᐅᐅᒫ ᐃᔥᑯᑌᕽ᙮

ᐅᐅ ᑕᔥ ᐁᐸᕒᐊᐋᒪᓐ ᐅᑮᐃᑰᓐ: ᓂᑯᓯᔅ, ᒫᒥᑴᑕᓐ ᒣᒀ ᑮᐱᒫᑎᓯᔭᓐ ᑳᐅᓂᔑᔑᑭᓐ ᑫᑰᓇᓐ ᑭᑮᐊᔮᓇᓐ᙮ ᐊᐊ ᑕᔥ ᐐᓐ ᓬᐋᓴᕒᐊᔅ ᑳᐅᓂᔑᔑᓯᓂᑭᓐ ᐅᑮᐊᔮᓇᓐ᙮ ᓅᑯᒻ ᑕᔥ ᐐᓐ ᒥᓉᑕᒥᐋ, ᑮᓐ ᑕᔥ ᐎᓐ ᐁᑭᒋ ᐐᓴᑫᑕᒪᓐ᙮

ᑳᐐᓐ ᑕᔥ ᐁᑕ ᐃᐃ ᒥᓂᒃ, ᐊᔮᒪᑲᓐ ᓴ ᐃᐌ ᐁᒥᔕᑮᔮᓯᓄᒃ ᐙᓇᐃᑲᓐ ᐅᐅᒫ ᓇᓴᐤ ᑳᔑ ᐊᔮᔭᕽ᙮ ᒦᑕᔥ ᐅᐅᒫ ᑳᔑ ᐊᔮᔮᕽ ᑳᐅᒋ ᑲᔥᑭᑑᓯᒀ ᐌᑎ ᒋᐃᔖᒡ ᑳᔑ ᐊᔮᔦᒃ, ᒦᔥ ᑲᔦ ᐌᑎ ᑳᐊᔮᐙᒡ ᐁᔑ ᐊᔮᔦᒃ ᑳᐅᒋ ᑲᔥᑭᑑᓯᒀ ᐅᐅᒫ ᓇᑫ ᒋᐲᔖᐙᒡ᙮

ᑳᐌᓅᑎᓯᒡ ᐃᓂᓂ ᑕᔥ ᑮᐃᑭᑐ: ᓂᑌᑌ, ᐁᐸᕒᐊᐋᒻ ᑭᐸᑯᓭᓂᒥᓐ ᐁᑲᑴᒋᒥᓈᓐ ᒋᐃᔑᓂᔕᐗᒡ ᓬᐋᓴᕒᐊᔅ ᓂᑌᑌᓐ ᐅᐙᑳᐃᑲᓂᓃᕽ᙮

ᒦ ᐅᔕ ᐌᑎ ᐁᔮᐙᒡ ᓈᓇᓐ ᓃᒋᑭᐌᓯᐗᒃ᙮ ᐸᑭᑎᓐ ᒋᐃᔖᒡ ᒋᐊᑕᐎ ᐐᑕᒪᐙᒡ, ᒋᐲᔖᓯᓂᒃ ᐅᐅᒫ ᑲᒀᑕᑭ ᐐᓴᑫᑕᒧᐎᓐ ᐁᔑ ᐊᔮᓂᒃ, ᐅᑮᐃᓈᓐ᙮

ᒦᑕᔥ ᐅᐅ ᑳᐃᑯᒡ ᐁᐸᕒᐊᐋᒪᓐ : ᑮᒋᑭᐌᓯᐗᒃ ᐄᑐᒃ ᐅᑕᔮᐙᐙᓐ ᒨᓯᓲᓐ, ᐃᐃ ᑲᔦ ᑳᑲᓅᑕᒪᐙᓂᒡ ᑭᔐᒪᓂᑑᓐ᙮ ᒦᐗᐞ ᐃᓂᐌᓂᐗᐞ ᑫᐱᓯᑕᐙᐙᒡ᙮

ᒦᔥ ᑳᐃᔑ ᓇᑴᑕᐙᒡ: ᓂᑌᑌ ᐁᐸᕒᐊᐋᒻ ᑳᐐᓐ ᐃᐃᐌ ᑌᒥᓂᒃ᙮ ᑮᔥᐱᓐ ᓴ ᐊᐎᔭᓐ ᓂᐳᐎᓂᕽ ᐱᐅᒋ ᓈᓯᑳᑯᐙᒡ, ᒦ ᐃ ᑫᒋᓈᒡ ᒋᑴᑳᑎᓯᐙᒡ, ᐅᑮᐃᓈᓐ᙮

ᒦᑕᔥ ᑳᐃᑯᒡ ᐁᐸᕒᐊᐋᒪᓐ: ᑮᔥᐱᓐ ᐐᐱᓯᑕᐙᓯᒀ ᒨᓯᓲᓐ, ᐃᐃ ᑲᔦ ᑳᑲᓅᑕᒪᐙᓂᒡ ᑭᔐᒪᓂᑑᓐ, ᑳᐐᓐ ᑖᑲᔥᑭᒫᓰᐗᒃ ᒥᓴᐙ ᑯ ᐊᐎᔭᓐ ᓂᐳᐎᓂᕽ ᐅᒋ ᐗᓂᔥᑳᓂᒡ, ᐅᑮᐃᑰᓐ᙮

ᒦᑕᔥ ᒋᓴᔅ ᑳᐃᓈᒡ ᐅᑭᑭᓄᐊᒪᐙᑲᓇᐞ: ᑫᑰᓇᓐ ᓴ ᑕᑕᑯᔑᓅᒪᑲᓅᓐ ᑫᐅᒋ ᒪᒋᑑᑕᒥᕽ᙮ ᐋᐱᒋ ᑕᔥ ᑕᑯᐹᓯᓈᑯᓯ ᐊᐊ ᐊᐎᔭ ᐐᓐ ᑳᐅᒋ ᐅᑎᔑᐌᒪᑲᓂᓂᑭᓐ᙮

ᓇᐗᒡ ᐄᑐᒃ ᑖᐅᓂᔑᔑᓂᓂ ᑳᒥᒑᐱᑭᓯᓂᒡ ᐲᓯᐴᒋᑲᓇᓯᓃᓐ ᒋᑕᑯᐱᒋᑲᓂᐎᓂᐸᓐ ᐅᑴᑲᓂᕽ ᒋᓂᓵᐹᐗᒋᑲᓂᐎᐸᓐ ᐃᐃᒫ ᑳᔑ ᑮᔥᑳᔭᐙᓂᒃ ᑭᒋᑲᒦᕽ, ᐊᐲᒡ ᐐᓐ ᒋᐸᑭᔑᒫᐸᓐ ᐃᓂ ᑳᑌᐺᔦᓂᒥᒥᒡ᙮

ᑲᓇᐌᓂᑎᓱᓐ ᑕᔥ ᐁᔑᒋᑫᔭᓐ᙮ ᑮᔥᐱᓐ ᑮᒋᑭᐌᓯ ᒪᒋᑑᑕᕽ, ᑭᑖ ᑲᓅᓈ ᐅᔕ, ᑮᔥᐱᓐ ᑕᔥ ᐐᐴᓂᑑᒡ ᐅᑎᔑᒋᑫᐎᓐ, ᑭᑲ ᐴᓀᑕᒪᐙ᙮

ᑮᔥᐱᓐ ᑕᔥ ᒪᒋᑑᑕᐎᒃ ᓃᔣᒋᕽ ᐋᐱᑎᕽ ᐁᑮᔑᑲᓂᓂᒃ, ᓃᔣᒋᕽ ᑕᔥ ᐱᓈᓯᑲᐎᒃ ᐅᐅ ᐃᓂᒃ: ᑕᑲ ᐴᓀᑕᒪᐎᔑᓐ᙮ ᐱᓵᓐ ᓴ ᑭᑲ ᐴᓀᑕᒪᐙ᙮

ᐃᔑᓂᔕᐙᑲᓇᒃ ᐅᑮᐃᓈᐙᓐ ᑳᑎᐯᒋᑫᓂᒡ: ᐐᒋᐃᔑᓈᒻ ᒋᒪᔥᑲᐎᓰᒪᑲᒃ ᓂᑌᐺᑕᒧᐎᓂᓈᓐ᙮

ᑳᑎᐯᒋᑫᒡ ᑕᔥ ᑮᐃᔑ ᓇᑴᑕᒻ: ᑮᔥᐱᓐ ᐊᔮᔦᑭᐸᓐ ᑌᐺᐗᑫᑕᒧᐎᓐ ᑖᐱᔥᑰ ᐯᔑᑯᒥᓐ ᒫᐗᒡ ᑳᐊᑳᓯᕽ ᑭᑎᑳᓀᔅ ᑭᑖᐃᓈᐙ ᐗᐊᐌᑎ ᑭᒋ ᒥᑎᒃ: ᐸᑾᒋᒌᐱᑫᐱᓂᑎᓱᓐ ᐊᑕᐎ ᐸᑕᑭᓱᓐ ᑭᒋᑲᒦᕽ, ᑭᑕ ᓇᐃᑖᑯᐙ ᐅᔕ, ᐅᑮᐃᓈᐞ᙮

ᑳᓂᑲ ᐐᓐ ᑮᓇᐙ ᐯᔑᒃ ᐊᔮᐌᒃ ᐊᓄᑮᐋᑲᓐ ᐁᐅᒻᐺᑲᑲᒥᑭᐱᑑᒡ ᑭᑎᑫᐗᑮᓂ, ᑲᔦ ᑕᔥ ᐁᓇᓈᑲᒋᐋᒡ ᒫᓇᒑᓂᔕᐞ᙮ ᐊᐲ ᑕᔥ ᐁᐱ ᐅᒋ ᑕᑯᔑᕽ ᑭᑎᑫᐗᑲᒥᑯᕽ ᑭᑖᐃᓈ ᓇ: ᑕᑲ ᐌᔩᑉ ᑲᑭᑖᑕᐲᓐ ᒋᐐᓯᓂᔭᓐ?

ᑳᐐᓐ ᐃᐃᐌ ᑭᑎᔑᒋᑫᓰ᙮ ᓇᐗᒡ ᐅᐅᐌᓂ ᑭᑖᐃᓈ: ᑾᔮᒋᑕᒪᐎᔑᓐ ᑫᐅᓈᑯᔑ ᒦᒋᔮᓐ᙮ ᐱᓯᑲᓐ ᐋᑰᐱᓱᓐ ᒋᐸᒥᐃᔭᓐ ᐁᐐᓯᓂᔮᓐ, ᑲᔦ ᑕᔥ ᐁᒥᓂᑴᔮᓐ᙮ ᐹᓂᒫ ᑕᔥ ᐃᔥᒀ ᐐᓯᓂᔮᓐ, ᒦ ᑮᓐ ᐃᐃ ᐸᔦᔥ ᒋᐐᓯᓂᔭᓐ, ᑭᑲᐃᓈ᙮

ᑳᐐᓐ ᐃᓇ ᑕᔥ ᒦᑴᒡ ᑖᐃᒋᑲᓂᐎᓰ ᐊᐊ ᐊᓄᑮᐋᑲᓐ ᐁᑮᐃᔑᒋᑫᒡ ᑳᑮᐃᔑ ᐊᓅᓂᓐᒡ?

ᒦᑕᔥ ᐯᔑᑾᓐ ᑫᑮᓇᐙ ᑫᐃᔑᒋᑫᔦᑭᐸᓐ᙮ ᐊᐲ ᑮᐃᔥᒀ ᐃᔑᒋᑫᔦᒃ ᑲᑭᓇ ᑳᑮᐃᑰᔦᒃ, ᒦ ᐃ ᑫᐃᑭᑐᔦᑭᐸᓐ: ᓃᓇᐎᓐᑦ ᓴ ᐱᑯ ᐊᓄᑮᐋᑲᓇᒃ ᓂᒥᒋ ᑎᓄᐎᒥᓐ, ᐁᑮᒥᒋ ᐃᔑᒋᑫᔮᕽ ᐁᑕ ᑫᑮᐃᓇᓄᑮᔮᑭᐸᓐ᙮

ᒋᓴᔅ ᑕᔥ ᐁᐊᓂᐱᒥ ᐊᔮᒡ ᒉᕒᐆᓴᓬᐊᒥᕽ ᐁᐃᔖᒡ, ᓇᓴᐗᔭᐄ ᐃᓇᑫ ᑮᐊᓂ ᐃᔖ ᐁᔑ ᐊᔮᓂᒃ ᓴᒣᕒᐃᔭ ᐊᑭ, ᐃᐃ ᑲᔦ ᑳᓬᐊᓬᐄ ᐊᑭ᙮

ᐋᔕ ᑕᔥ ᑫᑳ ᐁᐊᓂ ᐅᑎᑕᕽ ᐁᔑᑖᓂᐗᓂᓂᒃ, ᒥᑖᓱ ᐃᓂᓂᐗᐞ ᐌᒥᑮᐙᐱᓀᓂᒡ ᐅᑮᐱ ᐊᑕ ᓇᑭᔥᑳᑰᐞ᙮ ᐙᓴᔩᔥ ᐃᑯ ᑮᒪᑗ ᓃᐸᐎᐗᐞ᙮

ᒦᑕᔥ ᑳᒪᑗᐃᑯᒡ: ᒋᓴᔅ ᐅᑭᑭᓄᐊᒫᑫ, ᑕᑲ ᑰᐹᓯᓇᐎᔑᓈᒻ!

ᒋᓴᔅ ᐁᐙᐸᒫᒡ ᒦ ᐃ ᑳᐃᓈᒡ: ᒫᒑᒃ, ᐊᑕ ᐙᐸᒥᒃ ᐊᓇᒥᐁᐎᑭᒫ ᒋᐊᑕ ᑭᑫᓂᒥᓀᒃ᙮ ᒣᒀ ᑕᔥ ᐁᐊᓂ ᐱᒥ ᐊᔮᐙᒡ, ᒦ ᐃ ᑳᑮ ᐯᑭᐃᑰᐎᓯᐙᒡ ᐁᔑ ᐅᒥᑮᐙᐱᓀᐙᐸᓐ᙮

ᐯᔑᒃ ᐃᑕᔥ ᐊᐊ ᐁᐙᐸᑕᕽ ᐁᐯᑭᐃᑰᐎᓯᒡ, ᐅᑮᑮᐌ ᓈᓯᑲᐙᓐ ᒋᓴᓲᓐ, ᐁᑮᑭᔒᐌᒡ ᐁᓇᓈᑯᒫᒡ ᑭᔐᒪᓂᑑᓐ᙮

ᐁᔑᓯᑌᑳᐸᐎᓂᒡ ᒋᓴᓲᓐ ᑮᐃᔑ ᐊᓂᒥᑯᐸᓂᐅ ᐁᑮᓇᓈᑯᒫᒡ᙮ ᐊᐊ ᓴ ᑕᔥ ᐃᓂᓂ ᓴᒣᕒᐃᔭ ᐊᑮᕽ ᑮᐅᒌ᙮

ᒦᑕᔥ ᒋᓴᔅ ᑳᐃᑭᑐᒡ: ᒥᑖᓱ ᐅᔕ ᐃᓂᓂᐗᒃ ᑮᐯᑭᐃᑰᐎᓯᐗᒃ, ᐋᑎ ᑕᔥ ᐐᓐ ᐃᑭ ᑯᑕᒃ ᔖᑲᓱ?

ᐋᓃᓐ ᑕᔥ ᐐᓐ ᐁᑕ ᐗᐊ ᐸᑳᓐ ᐊᑮᕽ ᑳᐅᒌᒡ ᐌᒋ ᐱᑮᐌᒡ ᐁᐱ ᓇᓈᑯᒫᒡ ᑭᔐᒪᓂᑑᓐ?

ᒦᔥ ᑳᐃᓈᒡ ᐃᓂ ᐃᓂᓂᐗᓐ: ᐸᓯᑸᓐ ᒦ ᐃ ᐃᔑ ᒫᒑᓐ᙮ ᑭᑌᐺᐗᑫᑕᒧᐎᓐ ᑭᑮᒥᓍᒋᐃᑯᓐ, ᐅᑮᐃᓈᓐ᙮

ᐋᓂᑕ ᐯᕒᐊᓰᒃ ᐅᑮ ᑲᑴᒋᒫᐙᓐ ᒋᓴᓲᓐ ᐋᓇᐲ ᑫᐅᔑᓯᒋᑳᑌᓂᒃ ᑭᔐᒪᓂᑑ ᐅᑎᐯᒋᑫᐎᓐ᙮ ᐅᐅ ᑕᔥ ᒋᓴᔅ ᐅᑮᐃᓈᐞ: ᐊᐲ ᑭᔐᒪᓂᑑ ᐱᐅᔑᓯᑑᒡ ᐅᑎᐯᒋᑫᐎᓐ ᑳᐐᓐ ᐄᑐᒃ ᑕᓂᓯᑕᐎᓈᑯᓯᓂᓂ᙮

ᑳᐐᓐ ᑲᔦ ᐊᐎᔭ ᑖᐃᑭᑐᓰ: ᐃᓇᔥᑫ, ᒦ ᐅᐌᓂ, ᑯᒫ ᑲᔦ ᐃᓇ ᐃᐌᓂ ᑭᔐᒪᓂᑑ ᐅᑎᐯᒋᑫᐎᓐ᙮ ᑭᔐᒪᓂᑑ ᐅᑎᐯᒋᑫᐎᓐ ᐅᔕ ᐊᔮᒪᑲᓐ ᑭᐱᒫᑎᓯᐎᐙᕽ᙮

ᒦᑕᔥ ᒋᓴᔅ ᑳᐃᓈᒡ ᐅᑭᑭᓄᐊᒪᐙᑲᓇᐞ: ᑕᐅᒋᒋᓭ ᐅᓴ ᑎᐸᐃᑲᓐ ᐊᐲ ᒋᒥᓴᐌᑕᒣᒃ ᒋᑮᐙᐸᑕᒣᑭᐸᓐ ᐯᔑᒃ ᐅᑮᔑᑲᓄᒻ ᐃᓂᓂ ᐅᑯᓯᓴᓐ, ᑳᐐᓐ ᑕᔥ ᑭᑲ ᐙᐸᑕᓰᒻ᙮

ᑕᓂ ᐊᔮᐗᒃ ᑕᔥ ᐅᐅ ᑫᐃᓂᓀᒀ: ᐃᓇᔥᑫ ᐌᑎ ᐃᓈᐱᓐ᙮ ᐃᓇᔥᑫ ᐅᒫ ᐃᓈᐱᓐ᙮ ᑫᑯ ᑕᔥ ᐌᑎ ᐃᔖᑫᒃ ᒋᐊᐎ ᐃᓈᐱᔦᒃ᙮

ᑖᐱᔥᑰ ᑳᔑ ᐙᑌᓭᒃ ᐌᑎ ᐃᔥᐱᒥᕽ, ᑴᑴᒃ ᐃᑕᔥ ᐃᓇᑫ ᐌᑎ ᐃᔥᐱᒥᕽ ᐁᐃᔑ ᒪᒥᔕᑮ ᐙᓭᔮᒃ, ᒦᓴ ᑫᐃᔑᓈᑾᓂᓂᒃ ᐊᐲ ᐱᑕᑯᔑᓂᓂᒡ ᐃᓂᓂ ᐅᑯᓯᓴᓐ᙮

ᐱᓇᒫ ᑕᔥ ᓂᑕᒻ ᓃᐱᐗᐞ ᑕᔑ ᑲᒀᑕᑭᑑ, ᒋᐋᓇᐌᓂᒥᑯᒡ ᐯᒫᑎᓯᓂᒡ ᐅᐅ ᓅᑯᒻ ᑳᑮᔑᑲᓂᓂᒃ᙮

ᐃᐃᐌᓴ ᑳᑮᐱ ᐊᔨᔑᓭᓂᒃ ᒣᒀ ᐊᐲ ᓅᐗ ᑮᐱ ᐱᒫᑎᓯᒡ, ᒦᑕᔥ ᐯᔑᑾᓐ ᑫᐃᔑᓈᑾᓂᓂᒃ ᐃᓂᓂ ᐅᑯᓯᓴᓐ ᐅᑮᔑᑲᓄᒻ᙮

ᐯᒫᑎᓯᐙᒡ ᑮᐐᓯᓂᐗᒃ, ᑮᒥᓂᑴᐗᒃ ᑲᔦ᙮ ᐃᓂᓂᐗᒃ, ᐃᑴᐗᒃ ᑲᔦ ᐁᑮᐙᐐᑎᑫᑎᐙᒡ ᐲᓂᔥ ᐊᐲ ᓅᐗ ᑳᑮ ᐴᓯᒡ ᑭᒋ ᒌᒫᓐ᙮ ᒦᑕᔥ ᑳᑮᓂᑭᐲᒃ ᒥᓯᐌ ᐊᑮᕽ ᑲᑭᓇ ᐯᒫᑎᓯᐙᒡ ᑮᓂᔑᐗᓈᑎᓯᐗᒃ᙮

ᒦᑕᔥ ᐃᐃᐌ ᑫᐃᔑᓭᒃ ᑳᑮᐱ ᐃᔑᓭᒃ ᒣᒀ ᓬᐋᑦ ᑮᐱᒫᑎᓯᒡ᙮ ᐯᒫᑎᓯᐙᒡ ᐄᑐᒃ ᑮᐐᓯᓂᐗᒃ, ᑮᒥᓂᑴᐗᒃ ᑲᔦ᙮ ᑮᐊᑖᐌᐗᒃ, ᑲᔦ ᑕᔥ ᑮᐊᑖᐙᑫᐗᒃ᙮ ᑮᑭᑎᑫᐗᒃ, ᑲᔦ ᑕᔥ ᑮᐙᑳᐃᑫᐗᒃ᙮

ᐊᐲ ᑕᔥ ᐁᑮᔑᑲᓂᓂᒃ ᓬᐋᑦ ᐃᐃᒫ ᑮᐅᒋ ᒫᒑᒡ ᔂᑕᒻ ᐆᑌᓈᕽ, ᒦᔥ ᐃᔥᑯᑌ, ᐊᐊ ᑲᔦ ᐊᓯᓐ ᑳᐐᓴᑳᐸᓱᐌᒡ ᑳᑮᐅᒋ ᐸᑭᔑᕽ ᑮᔑᑯᕽ ᑲᑭᓇ ᐃᐃᒫ ᐁᔮᐙᒡ ᐁᑮᓂᓯᑯᐙᒡ᙮

ᒦᑕᔥ ᐃᐃᐌ ᐯᔑᑾᓐ ᑫᐃᔑᓈᑾᒃ ᑮᔑᑲᒃ ᐊᐲ ᐃᓂᓂ ᐅᑯᓯᓴᓐ ᓈᑯᓯᓂᒡ᙮

ᐊᐲ ᐃᐃ ᐃᔑ ᑮᔑᑲᒃ, ᐊᐎᔭ ᐗᑭᒋ ᐙᑳᐃᑲᓂᕽ ᑳ ᐊᔮᒡ ᑕᑲ ᑳᐐᓐ ᑕᐱ ᓃᓵᑕᐌᓰ ᐱᓇᒫ ᒋᐱ ᓈᓯᑲᕽ ᐅᑕᔭᐄᒪᓐ᙮ ᐊᐊ ᑲᔦ ᐌᑎ ᑳᐊᔮᒡ ᒥᔕᐗᑲᒥᒃ ᑳᐐᓐ ᑕᑮᐌᓰ ᒋᓈᓯᑲᕽ ᑫᑰᓐ᙮

ᒫᒥᑴᓂᒥᒃ ᑳᑮᐃᔑᐌᐱᓯᓂᒡ ᓬᐋᑦ ᐐᐗᓐ᙮

ᐊᐌᓀᓐ ᓴ ᐱᑯ ᑫᑲᑴ ᑭᒋᐎᓇᕽ ᐅᐱᒫᑎᓯᐎᓐ ᑳᐐᓐ ᐅᑲ ᐅᑎᓇᓰᓐ ᒋᐱᒫᑎᓯᒡ᙮ ᐊᐊ ᑕᔥ ᑲᔦ ᑫᐸᑭᑎᓇᕽ ᐅᐱᒫᑎᓯᐎᓐ ᓃᓐ ᐅᒋ, ᒦ ᐊᐌ ᑫᐱᒫᑎᓯᒡ᙮

ᒦᔥ ᐁᔑ ᐐᑕᒪᐎᓇᑰᒃ᙮ ᓃᔑᓐ ᐊᐎᔭᒃ ᑕᓂᐹᐗᒃ ᓂᐯᐎᓈᑯᕽ ᐁᑎᐱᑲᓂᓂᒃ᙮ ᐯᔑᒃ ᑕᐅᒋ ᐅᑖᐱᓈ, ᑯᑕᒃ ᐃᑕᔥ ᑕᓇᑲᓈ᙮

ᓃᔑᓐ ᐃᑴᐗᒃ ᑕᐊᓄᑮᐗᒃ ᐁᐲᓯᐴᒋᑫᐙᒡ᙮ ᐯᔑᒃ ᑕᐅᒋ ᐅᑖᐱᓈ, ᐊᐊ ᑕᔥ ᑯᑕᒃ ᑕᓇᑲᓈ᙮

ᓃᔑᓐ ᓴ ᐃᓂᓂᐗᒃ ᑕᐊᔮᐗᒃ ᐃᔑᐯᔑᑾᓐ ᒥᔕᐗᑲᒥᒃ, ᐯᔑᒃ ᑕᐅᒋ ᐅᑖᐱᓈ, ᐊᐊ ᑕᔥ ᑯᑕᒃ ᑕᓇᑲᓈ᙮

ᐅᑭᑭᓄᐊᒪᐙᑲᓇᐞ ᐃᑕᔥ ᐅᑮᐃᔑ ᑲᑴᒋᒥᑰᐞ: ᑌᐯᒋᑫᔭᓐ, ᐋᓇᐲ ᐃᐃᐌ ᑫᐃᔑᓭᒃ? ᐅᐅ ᑕᔥ ᒋᓴᔅ ᑮᐃᔑᓇᑴᑕᒻ: ᐋᑎ ᓴ ᐱᑯ ᑫᔑᐊᑌᒃ ᑳᓂᐴᒪᑲᒃ ᒦᔭᐤ, ᒦ ᓴ ᐃᒫ ᑫᑕᔑ ᒫᐗᒋᐃᑎᐙᒡ ᐃᑭ ᒥᑕᔅᑭᑎᒀᓀᓯᐗᒃ᙮

ᒋᓴᔅ ᐅᑮᐐᑕᒪᐙᐞ ᐅᑭᑭᓄᐊᒪᐙᑲᓇᐞ ᐊᐌᒋᑲᓐ ᑫᐅᒋ ᑭᑭᓄᐊᒪᐙᒡ ᒨᔕᒃ ᒋᐊᓇᒥᐁᑕᐙᓂᐸᓐ ᑭᔐᒪᓂᑑᓐ, ᐐᑳ ᒋᐋᓇᐌᒋᑫᓯᓂᒃ᙮

ᑮᐊᔮ ᐄᓴᓐ ᐃᓂᓂ ᐆᑌᓈᕽ ᐁᑮ ᑯᑖᓀᓂᒫᓯᒃ ᑭᔐᒪᓂᑑᓐ, ᐁᑮ ᐸᐹ ᐱᓯᔅᑫᓂᒫᓯᒃ ᑲᔦ ᐃᓂᓂᐗᐞ᙮

ᑮᐙᒋᑴ ᑲᔦ ᐃᐃᒫ ᑮᐊᔮ ᐯᔑᑾᓐ ᐆᑌᓈᕽ ᐁᑮᓂᑖ ᓈᓯᑲᐙᒡ ᐃᓂ ᐅᑎᐹᑯᓂᐌᓐ ᐁᑮ ᑲᑴᒋᒫᒡ ᐁᐊᑕᐌᑕᕽ ᑾᔭᒃ ᒋᑑᑕᐎᓐᒡ ᐅᐅ ᐁᑮᐃᓈᒡ: ᐐᒋᐃᔑᓐ ᒋᔖᑰᒋᐊᒃ ᑳᑲᑴ ᒪᒋᓭᐃᔑᒡ!

ᑳᐐᓐ ᑕᔥ ᓇᓈᓐᔥ ᐅᑎᐹᑯᓂᐌ ᑮᐃᓀᑕᓰ᙮ ᑫᑲᐲ ᑕᔥ ᐅᐅ ᑮᐃᓀᑕᒻ: ᐋᓇᐐᓐ ᐁᑯᑖᓀᓂᒫᓯᐗᒃ ᑭᔐᒪᓂᑑ, ᐁᐸᐹ ᐱᓯᔅᑫᓂᒫᓯᐗᒀ ᑲᔦ ᐊᐎᔭᒃ

ᔖᑰᒡ ᐃᑕᔥ ᐊᐊ ᑮᐙᒋᐌ ᓂᒥᑯᔥᑳᓱᒥᒃ, ᐃᑕᐙ ᓴ ᓂᑲ ᐐᒋᐋ ᒋᑌᐱᓇᕽ ᐃᐃ ᑳᔑ ᐊᑕᐌᑕᕽ᙮ ᑫᒋᓈᒡ ᒫᐐᓐ ᓂᑲ ᓅᑌ ᒑᑮᐃᒃ ᐁᓂᐹᒋ ᐲᔖᒡ᙮

ᒦᔥ ᑎᐯᒋᑫᒡ ᑳᐊᓂ ᐃᑭᑐᒡ: ᐃᓇᔥᑫ ᐱᓯᑕᒧᒃ ᐋᓃᓐ ᐁᑭᑐᒡ ᐊᐊ ᑳᑾᔭᑯᒋᑫᓯᒃ ᐅᑎᐹᑯᓂᐌ᙮

ᒦᑕᔥ ᐃᐃ ᓇᑫ ᑭᔐᒪᓂᑑ ᑾᔭᒃ ᑫᔑ ᐅᓈᑯᓈᒡ ᐃᐃ ᑳᑮᐅᓈᐸᒫᒡ ᑳᔖᑯᐙᓂᑯᒡ ᒋᐐᒋᐋᒡ ᐁᑕᓱ ᑮᔑᒃ, ᐁᑕᓱ ᑎᐱᒃ ᑲᔦ᙮ ᑕᑆᑕᐐ ᓇ ᒋᐐᒋᐋᒡ?

ᒦᔥ ᐁᓂᓇᑰᒃ, ᐋᐱᒋ ᐅᔕ ᑕᑭᑖᑕᐲ ᑾᔭᒃ ᒋᔑ ᐐᒋᐃᒥᓐᒡ᙮ ᐊᐲ ᑕᔥ ᐱᑕᑯᔑᕽ ᐊᐊ ᐃᓂᓂ ᐅᑯᓯᓴᓐ, ᐅᑲ ᒥᑳᓐ ᐃᓇ ᑌᐺᔦᑕᒧᐎᓐ ᐅᐅᒫ ᐊᑮᕽ?

ᐃᐃᒫ ᑕᔥ ᑮᐊᔮᐙᐞ ᐋᓂᑕ ᐊᐎᔭᐞ ᑳᑮ ᑾᔭᒀᑎᓰᐎ ᑌᐸᑫᓂᑎᓱᓂᒡ, ᐁᑮᐋᓍᐸᒫᓂᒡ ᑕᔥ ᑯᑕᒃ ᐊᐎᔭᐞ ᐁᔑᒋᑫᓂᒡ᙮ ᒦᑕᔥ ᒋᓴᔅ ᐅᐅ ᑳᑮᐃᔑ ᐊᐌᒋᑫᒡ᙮

ᐋᐱᑎᕽ ᑮᓃᔑᐗᒃ ᐃᓂᓂᐗᒃ ᐁᑮ ᐃᔖᐙᒡ ᑭᒋᐊᓇᒥᐁᐎᑲᒥᑯᕽ ᐁᑮᐊᑕ ᐊᓇᒥᐋᐙᒡ᙮ ᐯᔑᒃ ᑮᐯᕒᐊᓰᐎ, ᐊᐊ ᑕᔥ ᑯᑕᒃ ᑳᑎᐸᐃᑫᐃᐌᒡ ᑖᑭᔅ ᔔᓂᔮᓐ ᐁᑮ ᑎᓄᐎᒡ᙮

ᐊᐊ ᑕᔥ ᐯᕒᐊᓰ ᑮᓃᑲᑌᑳᐸᐎ ᐅᐅ ᐁᑮᐃᔑ ᐊᓇᒥᐋᒡ: ᑭᔐᒪᓂᑑ ᒦᑴᒡ ᓴ ᑭᑎᓂᓐ ᐁᑎᓄᐎᓯᐙᓐ ᑖᐱᔥᑰ ᑯᑕᒃ ᐊᐎᔭᒃ ᑳᑭᒨᑎᐙᒡ, ᑳᒪᒋᑑᑕᒧᐙᒡ, ᑳᐱᔑᒀᑎᓯᐙᒡ ᑲᔦ᙮ ᐊᐊ ᑲᔦ ᑳᑎᐸᐃᑫᐃᐌᒡ ᑖᑭᔅ ᔔᓂᔮᓐ ᑳᒪᑗ ᐊᔮᒡ᙮

ᓃᔓᑮᔑᒃ ᐁᑕᓱ ᑕᐗᑌ ᑳᐐᓐ ᓂᑑᒋ ᐐᓯᓂᓰ ᐱᑯ ᐁᐊᓇᒥᐋᔮᓐ᙮ ᑲᔦ ᑕᔥ ᐯᔑᒃ ᒥᑖᓱ ᐁᐸᑭᑎᓂᑫᔮᓐ ᒥᓯᐌ ᒥᓂᒃ ᑳᑲᔥᑭᒋᑫᔮᓐ, ᑮᐃᑭᑐ᙮

ᐊᐊ ᑕᔥ ᐐᓐ ᑳᑎᐸᐃᑫᐃᐌᒡ ᑖᑭᔅ ᔔᓂᔮᓐ ᓇᐗᒡ ᐙᓴ ᑮᒪᑗ ᓃᐸᐎ᙮ ᑳᐐᓐ ᑳᓇᑫ ᐃᔥᐱᒥᕽ ᑮᐃᓈᐱᓰ᙮ ᑮᐸᑭᑌ ᔮᑭᑲᓀᐅᑎᓱ ᐁᑭᒋ ᒥᒋᓇᐌᓯᒡ ᐁᐃᑭᑐᒡ: ᑭᔐᒪᓂᑑ ᑰᐹᓯᓇᐎᔑᓐ, ᓃᓐ ᐁᒪᒑᑎᓯᔮᓐ, ᑮᐃᑭᑐ᙮

ᒦᑕᔥ ᐁᓂᓇᑰᒃ, ᐗᐊ ᑕᔥ ᑳᑎᐸᐃᑫᐃᐌᒡ ᑖᑭᔅ ᔔᓂᔮᓐ ᐊᐲ ᐊᓂ ᑮᐌᒡ ᓇᐗᒡ ᐅᑮᒥᓍᐸᒥᑰᓐ ᑭᔐᒪᓂᑑᓐ ᐊᐲᒡ ᐐᓐ ᐊᐊ ᐯᕒᐊᓰ᙮ ᐊᐎᔭ ᓴ ᑳᐃᔥᐯᓂᑎᓱᒡ, ᑕᑕᐸᓭᓂᒫ᙮ ᐊᐎᔭ ᓴ ᑳᑕᐸᓭᓂᑎᓱᒡ, ᒦ ᓴ ᐊᐌ ᑫᐃᔥᐯᑖᑯᓯᒡ᙮

ᐋᓂᑕ ᑕᔥ ᐊᐎᔭᒃ ᐅᑮ ᐲᓈᐙᐞ ᐊᐱᓅᒌᔕᐞ ᐁᔑ ᐊᔮᓂᒡ ᒋᓴᓲᓐ ᒋᓵᒥᓈᓂᒡ᙮ ᑭᑭᓄᐊᒪᐙᑲᓇᒃ ᑕᔥ ᐅᐅ ᐁᐙᐸᑕᒧᐙᒡ, ᐅᑮ ᑭᔒ ᑲᓅᓈᓂ ᐃᐃ ᑳᑮ ᐲᓈᓂᒡ᙮

ᒋᓴᔅ ᑕᔥ ᐅᑮᐊᑐᒫᐞ ᐊᐱᓅᒌᔕᐞ ᒋᓈᓯᑳᑯᒡ ᐅᐅ ᐁᑮᐃᑭᑐᒡ: ᒫᓄ ᐊᐱᓅᒌᔕᒃ ᓂᑲᐱ ᓈᓯᑳᑰᒃ᙮ ᑫᑯ ᐐᓐ ᑭᐱᑎᓈᑫᒀᓂᒃ᙮ ᒦᐗᒃ ᐄᑐᒃ ᐃᑭ ᑳᑎᐯᑕᒥᐃᑰᐎᓯᐙᒡ ᑭᔐᒪᓂᑑᓐ ᐅᑎᐯᒋᑫᐎᓂᓂ᙮ ᐋᓃᔥ ᒦᐗᒃ ᐃᓴ ᐃᑭ ᑎᓄ ᐯᒫᑎᓯᐙᒡ ᐅᑯ ᑳᐃᓈᑎᓯᐙᒡ ᐊᐱᓅᒌᔑᕽ ᑫᑎᐯᓂᒥᑯᐙᒡ ᑭᔐᒪᓂᑑᓐ᙮

ᑌᐺ ᓴ ᑳᐃᓂᓇᑰᒃ, ᐊᐌᓀᓐ ᓴ ᐱᑯ ᑫᐅᑖᐱᓇᓯᒃ ᑭᔐᒪᓂᑑᓐ ᐅᑎᐯᒋᑫᐎᓂᓂ ᑖᐱᔥᑰ ᑳᐃᔑ ᐅᑖᐱᓇᕽ ᐗᐊ ᐊᐱᓅᒌᔥ, ᑳᐐᓐ ᐐᑳ ᐅᑲ ᑲᔥᑭᑑᓰᓐ ᒋᐲᑎᑫᒡ᙮ ᑭᔐᒪᓂᑑ ᐅᑎᐯᒋᑫᐎᓂᕽ᙮

ᐋᐱᑎᕽ ᑕᔥ ᐃᓂᓂ ᐅᑮᓈᓯᑲᐙᓐ ᒋᓴᓲᓐ ᐁᑮᐃᓈᒡ: ᐅᓴᓭᑳᑭᑭᓄᐊᒫᑫ, ᐌᑯᓀᓐ ᓴᓭᑳ ᐃᔑᒋᑫᐎᓐ ᑫᐃᔑᒋᑫᔮᐹᓐ ᑫᐅᒋ ᒦᓂᑰᔮᓐ ᐱᒫᑎᓯᐎᓐ ᐐᑳ ᑫᐴᓂᓭᓯᓄᒃ?

ᒋᓴᔅ ᐅᑮᐃᔑ ᓇᑴᑕᐙᓐ: ᐌᑯᓀᓐ ᐌᒋ ᐃᔑᔭᓐ ᐁᓴᓭᑳᐎᔮᓐ᙮ ᑳᐐᓐ ᐊᐎᔭ ᓴᓭᑳᐎᓰ, ᒦ ᐁᑕ ᑯ ᑭᔐᒪᓂᑑ᙮

ᑭᑭᑫᑖᓇᓐ ᐄᑐᒃ ᐃᓂ ᐅᓇᔓᐌᐎᓇᓐ: ᑫᑯ ᐸᐹᒣᓂᒥᒫᑫᓐ ᐸᑳᓐ ᐊᐎᔭ ᐐᐗᓐ, ᑫᑯ ᓂᔑᐌᑫᓐ, ᑫᑯ ᑭᒨᑎᑫᓐ, ᑫᑯ ᑲᔦ ᐊᐎᔭ ᓅᒋᑯ ᐃᓈᒋᒫᑫᓐ ᑎᐹᑯᓂᓐᒡ, ᑭᒋ ᐃᓀᓂᒻ ᑭᑌᑌ, ᑭᒫᒫ ᑲᔦ᙮

ᐅᔥᑭᓃᑭᐗᓐ ᐅᑮᐃᑰᓐ: ᑮᐱ ᐅᔥᑳᑎᓯᔮᓐ ᐅᔕ ᐱᑯ ᐅᓄ ᑲᑭᓇ ᐅᓇᔓᐌᐎᓇᓐ ᓂᐱ ᓇᐃᑖᓇᓐ᙮

ᒋᓴᔅ ᑕᔥ ᐅᐅ ᐁᓅᑕᕽ, ᒦ ᐃ ᑳᐃᓈᒡ: ᐯᔑᒃ ᑫᑰᓐ ᑭᓅᑌᓭ ᑫᑮᐃᔑᒋᑫᔭᐸᓐ᙮ ᐊᑖᐙᑫᓐ ᑲᑭᓇ ᑫᑰᓇᓐ ᑳᐊᔮᔭᓐ, ᒋᒦᓇᑣ ᔔᓂᔮᓐ ᑫᑎᒫᑭᓯᐙᒡ᙮ ᐌᓅᑎᓯᐎᓐ ᑕᔥ ᑭᑲ ᐊᔮᓐ ᐌᑎ ᑭᒋᑮᔑᑯᕽ᙮ ᒦᑕᔥ ᐃᔑ ᐲᔖᑲᓐ ᒋᐱᒥᓂᔕᐅᔭᓐ᙮

ᐁᓅᑖᑯᒡ ᐃᑕᔥ ᐃᓂ ᐃᓂᓂᐗᓐ ᐅᐅ ᐁᐃᓈᒡ, ᐐᑫ ᑮᒫᓀᑕᒨᓐ ᐋᓃᔥ ᑭᑭᒋ ᐌᓅᑎᓯᐗᓐ᙮

ᐊᐲ ᑕᔥ ᒋᓴᔅ ᐁᐙᐸᒫᒡ ᐁᒫᓀᑕᒥᓂᒡ ᒦ ᐃ ᑳᐃᑭᑐᒡ: ᐋᐱᒋ ᓴᓇᑲᓂᓂ ᑳᐌᓅᑎᓯᒡ ᒋᑮ ᐲᑎᑫᐸᓐ ᑭᔐᒪᓂᑑᓐ ᐁᔑ ᑎᐯᒋᑫᓂᒡ᙮

ᓇᐗᒡ ᓴᓇᑲᓂᓂ ᑳᐌᓅᑎᓯᒡ ᒋᐲᑎᑫᐸᓐ ᑭᔐᒪᓂᑑᓐ ᐁᔑ ᑎᐯᒋᑫᓂᒡ, ᐊᐲᒡ ᐐᓐ ᐱᒀᐎᑲᓀᒥᑕᑎᒻ ᒋᔒᐹᔥᑳᐸᓐ ᐃᐃᐌᓂ ᑳᔑ ᐸᑯᓀᔮᓂᒃ ᔖᐳᓂᑲᓐ᙮

ᐃᐃ ᑕᔥ ᐯᒫᑎᓯᓂᒡ ᐁᓅᑖᑯᒡ ᐅᐅ ᐁᐃᑭᑐᒡ ᒦ ᐃ ᑳᐃᑭᑐᓂᒡ: ᐊᐌᓀᓐ ᑕᔥ ᐃᓈ ᑫᑮᐱᒫᒋᐃᑰᐎᓯᐸᓐ?

ᒦᔥ ᒋᓴᔅ ᑳᐃᔑ ᓇᑴᑕᕽ: ᐃᓂᓂ ᐐᓐ ᑳᐐᓐ ᐅᑖ ᑲᔥᑭᑑᓰᓐ ᐅᐅ ᒋᐃᔑᒋᑫᒡ, ᑭᔐᒪᓂᑑ ᑕᔥ ᐐᓐ ᑲᑭᓇ ᑫᑰᓐ ᐅᐌᒋᑑᓐ᙮

ᐅᑮᐃᑰᓐ ᐃᑕᔥ ᐲᑕᕒᐆᓐ : ᐃᓇᔥᑫ, ᑲᑭᓇ ᑫᑰᓐ ᓂᑮᓇᑲᑖᒥᓐ ᐁᐐ ᐱᒥᓂᔕᐅᑰᔭᓐ᙮

ᒦᑕᔥ ᒋᓴᔅ ᑳᐃᑭᑐᒡ: ᑌᐺ ᐅᐅᐌ ᑳᐐᑕᒪᐎᓇᑰᒃ, ᐊᐌᓀᓐ ᐃᑯ ᑫᓇᑲᑕᕽ ᐅᑕᔮᐎᓐ, ᑫᓇᑲᓈᒡ ᑲᔦ ᐐᐗᓐ, ᐐᒋᑭᐌᓯᐗᓐ ᑲᔦ, ᐅᓃᑭᐃᑰᐞ ᑲᔦ, ᑲᔦ ᑕᔥ ᐅᑕᐱᓅᒌᔑᒪᐞ ᒋᑮ ᑎᐯᓂᒥᑰᐸᓐ ᑭᔐᒪᓂᑑᓐ᙮

ᒦ ᐊᐌ ᐊᐗᔑᒣ ᑕᓯᕽ ᑫᒦᓂᓐᒡ ᒣᒀ ᐅᐅᒫ ᐱᒫᑎᓯᐎᓂᕽ᙮ ᒦᔥ ᑲᔦ ᒋᑕᑯ ᒦᓂᓐᒡ ᐱᒫᑎᓯᐎᓐ ᐐᑳ ᑫᐴᓂᓭᓯᓂᓂᒃ᙮

ᒋᓴᔅ ᑕᔥ ᐸᑫᔭᐄ ᐅᑮᐃᔑᐎᓈᐞ ᒥᑖᔑ ᓃᔑᓐ 12 ᐅᑭᑭᓄᐊᒪᐙᑲᓇᐞ ᐁᑮᐃᓈᒡ: ᐱᓯᑕᐎᔑᒃ, ᒉᕒᐆᓴᓬᐊᒥᕽ ᑭᑲ ᐊᓂ ᐃᔖᒥᓐ᙮ ᑲᑭᓇ ᑫᑰᓐ ᑳᑮᐃᔑᐲᐃᑫᐙᒡ ᐃᑭ ᑫᓅᑕᒪᐙᐙᒡ ᑭᔐᒪᓂᑑᓐ ᑕᒨᔥᑭᓀᓭᓂ ᐁᑮ ᑕᔑᒫᐙᒡ ᐃᓂ ᐃᓂᓂ ᐅᑯᓯᓴᓐ ᐁᓂᒥᓐᒡ᙮

ᐊᐊ ᑕᔥ ᐃᓂᓂ ᐅᑯᓯᓴᓐ ᑕᔑ ᐸᑭᑎᓈ ᐁᔑ ᐊᔮᓂᒡ ᑳᒎᐎᐎᓯᓂᒃ᙮ ᒦᑕᔥ ᒋᐹᐱᐃᓐᒡ, ᒋᒫᔑ ᑑᑕᐎᓐᒡ ᑲᔦ, ᒦᔥ ᑲᔦ ᒋᓴᓰᒀᓂᓐᒡ᙮

ᒦᑕᔥ ᑲᔦ ᒋᐸᐸᔕᔐᐅᓐᒡ, ᒦᔥ ᑲᔦ ᑫᔑ ᓂᓯᓐᒡ᙮ ᓂᓱ ᑮᔑᒃ 3 ᑕᔥ ᐃᔑᓭᓂᒃ, ᑕᑮᐌ ᐱᒫᑎᓯ, ᐅᑮᐃᓈᐞ᙮

ᑭᑭᓄᐊᒪᐙᑲᓇᒃ ᑕᔥ ᑳᐐᓐ ᒋᑮᓂᓯᑐᑕᒧᐙᒡ ᑫᑰᓐ ᑳᑮ ᑕᔑᑕᒥᓂᒡ ᐋᓃᔥ ᑮᑑᑕᐙᐗᒃ ᒋᓂᓯᑐᑕᓯᒀ ᐃᓂ ᐃᑭᑐᐎᓇᓐ᙮ ᑳᐐᓐ ᑲᔦ ᒋᑮ ᑭᑫᑕᒧᐙᒡ ᐌᑯᓀᓐ ᑳᑮ ᑕᔑᑕᒥᓂᒡ᙮

ᐋᔕ ᒋᓴᔅ ᐯᔓ ᐁᐊᓂ ᐅᑎᑕᕽ ᒉᕒᐊᑯ ᐆᑌᓇ, ᐯᔑᒃ ᐃᓂᓂᐗᓐ ᑳᐙᐱᓯᓂᒃ ᑮᓇᒪᑕᐱᐗᓐ ᒌᑭ ᒦᑲᓇ ᐁᐸᑯᔑᐃᐌᓂᒡ᙮

ᐊᐲ ᑕᔥ ᐊᐊ ᐃᓂᓂ ᐁᓅᑕᕽ ᐁᐹᑏᓄᓂᒡ ᐊᐎᔭᐞ ᐁᐱᒥ ᐊᔮᓂᒡ ᑮᑲᑴᑗ ᐋᓃᓐ ᐁᓇᑲᒥᑲᓂᓂᒃ᙮

ᒦᔥ ᑳᐃᓂᓐᒡ: ᒋᓴᔅ ᓈᓴᕒᐃᑎᕽ ᑳᐅᒌᒡ ᐱᒥ ᐊᔮ, ᑮᐃᓈ᙮

ᒦᑕᔥ ᑳᐃᔑ ᔖᑯᐌᒡ: ᒋᓴᔅ, ᑌᐱᑎᕽ ᑳᐅᑕᑳᓀᓯᔭᓐ ᑰᐹᓯᓇᐎᔑᓐ᙮

ᐃᐃ ᑕᔥ ᐊᐎᔭᐞ ᑳᓃᑳᓃᓂᒡ ᐅᑮ ᑭᔒ ᑲᓅᓂᑰᐞ ᐁᑮᐃᑯᒡ ᒋᐅᐲᑭᓯᓯᒃ᙮ ᐋᒋᑯ ᑕᔥ ᐁᓂᑯᒃ ᑮᔖᑯᐌ ᐁᑮᐃᑭᑐᒡ: ᑌᐱᑎᕽ ᑳᐅᑕᑳᓀᓯᔭᓐ ᑰᐹᓯᓇᐎᔑᓐ᙮

ᒦᑕᔥ ᒋᓴᔅ ᑳᑮ ᑭᐱᒌᒡ ᐁᑮᐊᓅᑮᒡ ᒋᐲᑕᒪᐎᓐᒡ ᐃᓂ ᐃᓂᓂᐗᓐ ᐊᐲ ᑕᔥ ᐯᔓ ᐁᐱ ᐊᔮᓂᒡ ᒦ ᐃ ᑳᐃᔑ ᑲᑴᒋᒫᒡ:

ᐋᓃᓐ ᐁᔑ ᐊᑕᐌᓂᒥᔭᓐ ᒋᐃᔑᒋᑫᑕᒪᐎᓈᓐ? ᐅᑮᐃᓈᓐ᙮ ᑌᐯᒋᑫᔭᓐ, ᓂᓇᑕᐌᑖᓐ ᒋᐙᐱᔮᓐ, ᐅᑮᐃᑰᓐ᙮

ᒦᑕᔥ ᑳᐃᓈᒡ: ᒦᑕᔥ ᐃᔑᐙᐱᓐ᙮ ᑭᑌᐺᐗᑫᑕᒧᐎᓐ ᓴ ᑭᒥᓍᒋᐃᑯᓐ᙮

ᔐᒫᒃ ᑕᔥ ᐊᐊ ᐃᓂᓂ ᐅᑮᑲᔥᑭᑑᓐ ᒋᐙᐱᒡ, ᐁᑮ ᐱᒥᓂᔕᐙᒡ ᒋᓴᓲᓐ᙮ ᑲᔦ ᑕᔥ ᐁᑮᓇᓈᑯᒫᒡ ᑭᔐᒪᓂᑑᓐ᙮ ᐊᐲ ᑕᔥ ᐃᑭ ᑳᐹᑏᓄᐙᒡ ᐊᐎᔭᒃ ᐁᐙᐸᑕᒧᐙᒡ ᐅᐅᐌᓂ, ᒦ ᐃ ᑫᐐᓇᐙ ᑲᑭᓇ ᑳᐃᔑ ᓇᓈᑯᒫᐙᒡ ᑭᔐᒪᓂᑑᓐ᙮

ᒋᓴᔅ ᐅᑮᐱ ᐅᑎᑖᓐ ᒉᕒᐊᑯ ᐆᑌᓇ ᐁᑮᒥᒋ ᔖᐳᔥᑳᒡ᙮

ᑮᐊᔮ ᑕᔥ ᐃᐃᒫ ᐃᓂᓂ ᓵᑮᔭᔅ ᐁᔑᓂᑳᓱᒡ ᒫᐗᒡ ᑳᓃᑳᓂᔥᑲᐙᒡ ᑳᒫᐗᑑᓈᓂᒡ ᑖᑭᔅ ᔔᓂᔮᓐ ᑲᔦ ᑕᔥ ᐐᑫ ᐁᑮᐌᓅᑎᓯᒡ᙮

ᐅᑮᑲᑴ ᐙᐸᒫᓐ ᐊᐌᓀᓂᐎᓂᒡ ᒋᓴᓲᓐ᙮ ᑳᐐᓐ ᑕᔥ ᐅᑮᐙᐸᒫᓰᓐ ᐋᓃᔥ ᑮᑕᑰᓰ, ᐅᓵᒻ ᑲᔦ ᑮᐹᑏᓄᐗᐞ ᐯᒫᑎᓯᓂᒡ᙮

ᒦᑕᔥ ᑮᓃᑳᓂᐸᑑ ᐁᐱᒧᓭᓈᓂᐗᓂᓂᒃ ᑲᔦ ᑕᔥ ᐁᑮᐊᒀᑕᐌᒡ ᓯᑲᒶᕒᐃᐙᑎᑯᕽ ᐙᐅᒋ ᐙᐸᒫᒡ ᒋᓴᓲᓐ ᒪᔮ ᐃᐃᐌᑎ ᐐᐊᓂ ᐃᔑ ᐱᒧᓭᓂᒡ ᐁᔑ ᐊᑰᓯᒡ᙮

ᐊᐲ ᒋᓴᔅ ᑳᐱ ᐅᑎᑕᕽ ᐁᔑ ᐊᑰᓯᓂᒡ ᓵᑮᔭᓴᓐ, ᐃᔥᐱᒥᕽ ᑮᐃᓈᐱ ᐁᑲᓅᓈᒡ: ᓵᑮᔭᔅ, ᐌᔩᑉ ᐱᓃᓵᑕᐌᓐ᙮ ᓅᑯᒻ ᑳᑮᔑᑲᒃ ᐅᒋᑕ ᓂᑲᐱ ᐊᔮ ᐃᐃᒫ ᑭᑕᔮᐎᓂᕽ, ᐅᑮᐃᓈᓐ᙮

ᓵᑮᔭᔅ ᑕᔥ ᑮᐸᐹᔒ ᐁᓃᓵᑕᐌᒡ, ᑲᔦ ᑕᔥ ᐁᑮᒥᓉᑕᕽ ᒋᓴᓲᓐ ᐱᓵᓐ ᒋᐲᑎᑳᑯᒡ᙮

ᑲᑭᓇ ᑕᔥ ᐊᐎᔭᒃ ᐅᐅ ᐁᐃᔑ ᐙᐸᑫᐙᒡ ᑮᒫᒌ ᑭᒋ ᑳᑮᑭᑐᐗᒃ ᐁᑮᐃᑭᑐᐙᒡ: ᒦ ᐃ ᐊᐸᓐ ᒋᓴᔅ ᐁᐊᑕ ᒪᐗᑎᓵᒡ ᐅᑖᐎᓂᓃᕽ ᐅᒪᒑᑎᓴᓐ, ᑮᐃᑭᑐᐗᒃ᙮

ᓵᑮᔭᔅ ᑕᔥ ᑮᐸᓯᑸ ᐁᑲᓅᓈᒡ ᑳᑎᐯᒋᑫᓂᒡ: ᐃᓇᔥᑫ ᑌᐯᒋᑫᔭᓐ ᐋᐱᑕ ᓂᑲ ᐸᑭᑎᓈᓇᓐ ᓂᑕᔭᐄᒪᓐ ᒋᒦᓇᒀ ᑳᑭᑎᒫᑭᓯᐙᒡ᙮ ᒥᓂᒃ ᑲᔦ ᑳᑮᐱ ᐗᔦᔑᒪᒀ ᐊᐎᔭᒃ ᓃᐎᕽ 4 ᐊᐗᔑᒣ ᒥᓂᒃ ᓂᑲᔑ ᑮᐌ ᑎᐸᐊᒪᐙᒃ, ᐅᑮᐃᓈᓐ᙮

ᒦᑕᔥ ᒋᓴᔅ ᑳᐃᓈᒡ: ᐱᒫᒋᐃᑰᐎᓯᐎᓐ ᐅᑑᑎᓯᑯᓈᐙ ᐅᐅᒫ ᑳᐊᔮᐙᒡ ᑖᐎᓂᕽ ᓅᑯᒻ ᑳᑮᔑᑲᒃ ᐋᓃᔥ ᑫᐐᓐ ᐊᐊ ᐃᓂᓂ ᐁᐸᕒᐊᐋᒥᕽ ᓂᑖᐎᑭᒋᑲᓂᕽ ᐅᑕᑳᓀᓯ᙮

ᓃᓐ ᐋᓃᔥ ᐃᓂᓂ ᐅᑯᓯᓴᓐ ᓂᑮ ᐲᔖ ᐁᐱ ᐊᑐᓀᐗᒀ, ᑲᔦ ᑕᔥ ᐁᐐ ᐱᒫᒋᐊᒀ ᑳᐗᓂᔑᓄᐙᒡ, ᑮᐃᑭᑐ᙮

ᒣᒀ ᑕᔥ ᐯᒫᑎᓯᓂᒡ ᐁᐱᓯᑖᑯᒡ ᒋᓴᔅ ᑫᔮᐱ ᐅᑮᐊᓂ ᐐᑕᒪᐙᐞ ᐊᐌᒋᑫᐎᓐ ᐋᔕ ᐁᐯᔓᓈᑾᓂᓂᒃ ᒋᐅᑎᑕᕽ ᒉᕒᐆᓴᓬᐊᒻ ᙮ ᒦ ᐄᑐᒃ ᑳᐃᓀᑕᒥᓂᒡ ᐋᔕ ᔐᒫᒃ ᒋᓈᑾᓂᓂᒃ ᑭᔐᒪᓂᑑᓐ ᐅᑎᐯᒋᑫᐎᓂᓂ᙮

ᒦᑕᔥ ᑳᐃᑭᑐᒡ: ᐯᔑᒀ ᑮᐊᔮ ᐃᓂᓂ ᒫᐗᒡ ᐁᑭᒋ ᐃᓀᑖᑯᓯᒡ᙮ ᑮᑾᔮᒌ ᐙᓴ ᐊᑮᕽ ᐁᐐᐃᔑ ᒫᒑᒡ, ᐌᑎ ᐁᐐᐊᐎ ᑕᔑ ᑭᒋᐅᑭᒫᐎᐃᓐᒡ᙮ ᐊᐲ ᑕᔥ ᑮᐃᔥᒀ ᐅᓇᑭᒥᓐᒡ, ᐁᐐ ᐱᑮᐌᒡ ᒋᐅᑭᒫᑲᑕᕽ ᐊᑮᕽ ᑳᐅᒌᒡ᙮

ᒋᑆ ᒫᒑᒡ ᑕᔥ ᐅᑮ ᑲᓅᓈᐞ ᒥᑖᓱ ᐅᑕᓄᑮᐋᑲᓇᐞ ᑲᑭᓇ ᐁᑮᒫᒦᓈᒡ ᐯᐯᔑᒃ ᐅᓵᐎ ᔔᓂᔮᓴᐞ᙮ ᒦᔥ ᑳᐃᓈᒡ: ᐃᔑ ᐸᑭᑎᓂᒃ ᐗᐊ ᔔᓂᔮ ᑫᐅᒋ ᔔᓂᔮᑫᔮᓐ ᒥᓂᒃ ᐃᑯ ᑫᐅᑌᑎᔮᓐ ᐲᓃᔥ ᒋᐱᑕᑯᔑᓈᓐ, ᐅᑮᐃᓈᐞ᙮

ᐊᐊ ᑕᔥ ᐃᓂᓂ ᑳᔒᑫᓂᒥᑯᒡ ᐅᐐᒋ ᐯᒫᑎᓰᒫᑲᓇᐞ ᐅᑮᐃᔑᓂᔕᐙᓂ ᑳᑎᐹᒋᒧᓂᒡ ᐅᐅ ᒋᐊᐎ ᐃᑭᑐᓂᒡ: ᑳᐐᓐ ᓂᓇᑕᐌᓂᒫᓯᐙᓈᓐ ᐗᐊ ᐃᓂᓂ ᒋᑭᒋ ᐅᑑᑭᒫᒥᔮᕽ᙮

ᔖᑰᒡ ᐃᑕᔥ ᐊᐊ ᐃᓂᓂ ᑮᑭᒋᐅᑭᒫᐎᐋ, ᒦᔥ ᑳᐱᔑ ᑮᐌᒡ᙮ ᔐᒫᒃ ᐃᑕᔥ ᑮᐃᓈᑯᓂᑫ ᐅᑕᓄᑮᐋᑲᓇᐞ ᒋᐱ ᓃᐸᐎᓂᒡ ᐁᓈᓴᒦᒡ ᐁᐐᐊᑕ ᑭᑫᑕᕽ ᐋᓃᓐ ᒥᓂᒃ ᑳᑲᔥᑭᒋᑫᓂᒡ᙮

ᐃᓂ ᓂᑕᒻ ᑳᐲᔖᓂᒡ ᑮᐃᑭᑐᐗᓐ: ᓂᑑᑭᒫᒻ, ᑯᑕᒃ ᒥᑖᓱ ᓂᑕᔮᐙᒃ ᐅᓵᐎ ᔔᓂᔮᓴᒃ ᑳᑮᐅᒋ ᑲᔥᑭᒋᑫᔮᓐ ᐊᐊ ᐯᔑᒃ ᑳᑮᒦᔑᔭᓐ ᐅᒋ, ᐅᑮᐃᑰᓐ᙮

ᒦᑕᔥ ᑳᐃᓈᒡ: ᒦ ᐃᐌ ᐁᑮᒥᓄᒋᑫᔭᓐ, ᑮᓐ ᑾᔭᒃ ᐊᓄᑮᐋᑲᓐ ᑭᑎᓄᐤ᙮ ᐁᑾᔭᑯ ᑑᑕᒪᓐ ᑕᔥ ᒥᓴᐙᑯ ᑳ ᐊᑳᓭᑖᑾᒃ, ᑭᒦᓂᓐ ᒋᓈᓈᑲᒋᑑᔭᓐ ᒥᑖᓱ ᑭᒋᐆᑌᓇᐗᓐ, ᐅᑮᐃᓈᓐ᙮

ᐃᓂ ᑯᑕᒃ ᐅᑕᓄᑮᐋᑲᓇᓐ ᑮᐲᔖᐗᓐ ᐁᑮᐃᑯᒡ: ᓂᑑᑭᒫᒻ ᑯᑕᒃ ᓈᓇᓐ ᓂᑕᔮᐙᒃ ᐅᓵᐎ ᔔᓂᔮᓴᒃ ᑳᑮᐅᒋ ᑲᔥᑭᒋᑫᔮᓐ ᐊᐊ ᐯᔑᒃ ᑳᑮᒦᔑᔭᓐ ᐅᒋ, ᐅᑮᐃᑰᓐ᙮

ᒦᑕᔥ ᐐᓐ ᐃᓂ ᑳᐃᓈᒡ: ᑮᓐ ᑕᔥ ᐐᓐ ᑭᑲ ᒦᓂᓐ ᓈᓇᓐ ᒋᓈᓈᑲᒋᑑᔭᓐ ᑭᒋ ᐆᑌᓇᐗᓐ, ᐅᑮᐃᓈᓐ᙮

ᐃᓂᐌᓂᐗᓐ ᐃᑕᔥ ᑯᑕᒃ ᐊᓄᑮᐋᑲᓇᓐ ᑮᐲᔖᐗᓐ ᐁᑮᐃᑯᒡ: ᓂᑑᑭᒫᒻ, ᐃᓇ ᐗᐊ ᑭᑑᓵᐎ ᔔᓂᔮᓯᒻ᙮ ᐋᐱᑳᑲᓂᕽ ᓂᑮᑲᔥᑮᑭᓈ ᐁᑮ ᑲᓇᐌᓂᒪᒃ,

ᐁᑮ ᑯᓯᓈᓐ ᐋᓃᔥ ᑭᑭᑫᓂᒥᓐ ᐋᓃᓐ ᐁᐲᒋ ᐋᒀᑎᓯᔭᓐ ᐁᐅᑖᐱᓇᒪᓐ ᑮᓐ ᑳᑎᐯᑕᓯᐗᓐ, ᑲᔦ ᑕᔥ ᐁᒫᐗᑑᓇᒪᓐ ᐁᒪᓂᔑᒪᓐ ᑮᓐ ᑳᑮ ᑭᑎᑳᑕᓯᐗᓐ, ᐅᑮᐃᑰᓐ᙮

ᒦᑕᔥ ᑳᐃᑯᒡ ᐅᑑᑭᒫᒪᓐ: ᑮᓐ ᒫᐗᒡ ᓅᒋᑯ ᐊᓄᑮᐋᑲᓐ᙮ ᑭᑎᑭᑐᐎᓇᓐ ᓂᑲ ᐋᐸᒋᑑᓇᓐ ᑫᐅᒋ ᐅᓈᑯᓂᓈᓐ᙮ ᑭᑭᑫᑖᓐ ᐋᐱᒋ ᐁᐋᒀᑎᓯᔮᓐ, ᐁᐅᑖᐱᓇᒫᓐ ᑲᔦ ᑳᑎᐯᑕᓯᐙᓐ, ᐁᒪᓂᔕᒫᓐ ᑲᔦ ᑳᑮᑭᑎᑳᑕᓯᐙᓐ᙮

ᐌᑯᓀᓐ ᑕᔥ ᑳᐅᒋ ᐊᓵᓯᐙᒡ ᓂᔔᓂᔮᒻ ᑫᑮᐅᒋ ᑲᔥᑭᒋᑫᔮᐹᓐ ᐊᐲ ᑕᔥ ᑮᐱᑕᑯᔑᓈᓐ ᒋᑮ ᓵᑭᓯᐊᑭᐸᓐ ᓂᔔᓂᔮᒻ, ᒥᓂᒃ ᑲᔦ ᑳᐋᓂᑫ ᑲᔥᑭᒋᑫᒡ?

ᒦᑕᔥ ᑳᐃᓈᒡ ᐃᐃᒫ ᑳᑮᓃᐸᐎᓂᒡ: ᐅᑖᐱᓂᒥᒃ ᐃᓂ ᐅᓵᐎ ᔔᓂᔮᓴᓐ ᑳᐊᔮᐙᒡ, ᐃᓂ ᑕᔥ ᒦᓂᒥᒃ ᐊᓄᑮᐋᑲᓇᓐ ᒥᑖᓱ ᐅᓵᐎ ᔔᓂᔮᓴᐞ ᑳᐊᔮᐙᓂᒡ᙮

ᒦᔥ ᑳᐃᓂᓐᒡ ᐊᐊ ᑭᒋᐅᑭᒫ: ᓂᑑᑭᒫᒥᓈᓐ, ᐋᔕ ᐄᑐᒃ ᐐᓐ ᒥᑖᓱ ᔔᓂᔮᓴᐞ ᐅᑕᔮᐙᐞ, ᑮᐃᓈ᙮

ᑭᒋᐅᑭᒫ ᑕᔥ ᑮᐃᑭᑐ: ᑭᐐᑕᒪᐎᓂᓂᒻ ᐅᐅ, ᑲᑭᓇ ᐊᐎᔭ ᑫᑰᓐ ᑳᐊᔮᒡ ᐋᒌᑫ ᐊᐗᔑᒣ ᑕᒦᓈᑲᓂᐎ, ᐊᐊ ᑕᔥ ᐐᓐ ᑫᑰᓐ ᑳᐊᔮᓯᒃ, ᑕᐅᑖᐱᓇᒪᐙ ᒥᓴᐙ ᑯ ᐸᑮ ᑫᑰᓐ ᑳᐊᔮᒡ᙮

ᐃᑭᐌᓂᐗᒃ ᑕᔥ ᐐᓐ ᑳᔒᑫᓂᒥᐙᒡ ᑳᑮᐊᑕᐌᓂᒥᓯᒀ ᒋᐅᑭᒫᑲᑕᐗᒀ, ᐲᓂᑾᒃ ᐅᐅᒫ ᐁᔑ ᐊᔮᐗᒃ᙮ ᓂᓯᑾᒃ ᐁᓈᓴᒦᐗᒃ, ᑮᐃᑭᑐ᙮

ᐅᐅ ᑕᔥ ᒋᓴᔅ ᑳᐃᔥᒀ ᐃᑭᑐᒡ, ᑮᐊᓂ ᓃᑳᓂ ᒫᒑ ᒉᕒᐆᓴᓬᐊᒥᕽ ᐁᐃᔖᐙᒡ᙮

ᐊᐲ ᑕᔥ ᑫᑳ ᐁᐊᓂ ᑕᑯᔑᕽ ᐯᐸᒋ ᐁᔑᓂᑳᑌᓂᒃ ᐃᔥᑖᐎᓂᕽ ᑲᔦ ᐯᑕᓂ ᐁᔑ ᐊᔮᓂᑭᓐ ᐁᐱᑾᑎᓈᓂᒃ ᐋᓬᐃᑉ ᐁᒋᑳᑌᓂᒃ, ᒋᓴᔅ ᑕᔥ ᐅᑮᓃᑳᓂᓂᔕᐙᐞ ᓃᔑᓐ 2 ᐅᑭᑭᓄᐊᒪᐙᑲᓇᐞ,

ᐅᐅ ᐁᑮᐃᓈᒡ: ᐊᓂ ᓃᑳᓂ ᐃᔖᒃ ᑳᒪᑗ ᐊᔮᒃ ᑳᐃᔑᑖᓂᐗᕽ᙮ ᐊᐲ ᑕᔥ ᐊᓂ ᐲᑎᑫᔥᑳᔦᒃ ᑭᑲ ᐙᐸᒫᐙ ᒫᔑᒥᑕᑎᒻ ᒋᓴᑳᑾᐱᓱᒡ ᒪᔑ ᐊᐎᔭᓐ ᐁᐴᓱᓄᑖᑯᓯᒃ᙮ ᐋᐸᐙᑫᒃ ᑕᔥ ᒋᐲᓀᒃ᙮

ᑮᔥᐱᓐ ᑕᔥ ᐊᐎᔭ ᐅᐅ ᐃᔑ ᑲᑴᒋᒥᓀᒃ: ᐌᑯᓀᓐ ᐌᒋ ᐋᐸᐌᒃ ᐊᐊ ᒫᔑᒥᑕᑎᒻ? ᐅᐅ ᓴ ᑭᑲ ᐃᓈᐙ: ᑳᑎᐯᒋᑫᒡ ᐅᐐᐋᐸᒋᐋᓐ, ᐅᑮᐃᓈᐞ᙮

ᐃᑭ ᑕᔥ ᑳᑮᓃᑳᓂᓂᔕᐅᑣ ᑮᐃᔖᐗᒃ ᐁᑮᐃᔑ ᒥᑲᒧᐙᒡ ᑲᑭᓇ ᑳᑮᐃᓂᑣ᙮

ᒣᒀ ᑕᔥ ᐁᐋᐸᐙᐙᒡ ᐃᓂ ᒫᔑᒥᑕᑎᒨᓐ, ᑌᐯᓂᒥᑯᓂᒡ ᐅᑮᐃᑯᐙᓐ: ᐌᑯᓀᓐ ᑕᔥ ᐌᒋ ᐋᐸᐌᒃ ᒫᔑᒥᑕᑎᒻ᙮

ᒦᔥ ᑳᐃᓈᐙᒡ: ᑳᑎᐯᒋᑫᒡ ᐅᐐᐋᐸᒋᐋᓐ, ᐅᑮᐃᓈᐙᓐ᙮

ᐅᑮ ᐲᓈᐙᓐ ᑕᔥ ᐃᓂ ᒫᔑᒥᑕᑎᒨᓐ ᐁᔑ ᐊᔮᓂᒡ ᒋᓴᓲᓐ᙮ ᒦᑕᔥ ᑳᐃᔑ ᐗᑭᑕᑑᐙᒡ ᐅᑲᔥᑮᑮᐎᓂᐙᓐ, ᒦᔥ ᐃᐃᒫ ᑳᐃᔑ ᐊᐸᐱᓂᒡ ᒋᓴᓲᓐ᙮

ᐁᐊᓂ ᐱᒥ ᐊᔮᒡ ᐃᑕᔥ, ᐯᒫᑎᓯᓂᒡ ᐅᑮ ᑕᔗᑮᑭᓯᑑᓂ ᐅᑲᔥᑮᑮᐎᓂᓂ ᐃᐃᒫ ᒦᑲᓈᕽ᙮

ᐊᐲ ᐯᔓ ᐁᐊᓂ ᐅᑎᑕᕽ ᒉᕒᐆᓴᓬᐊᒻ ᐁᔑ ᓃᓴᒋᐌᒧᓂᓂᒃ ᒦᑲᓇ ᑳᔑ ᐃᔥᐸᑎᓈᓂᒃ ᐋᓬᐃᑉ ᑭᑎᑳᓈᑎᑯᑳᕽ ᐁᒋᑳᑌᓂᒃ, ᐋᐱᒋ ᑮᐹᑏᓄᐗᐞ ᑳᐱᒥᓂᔕᐅᑯᒡ ᐁᑮᒫᒌ ᒌᑫᑕᒥᓂᒡ ᐁᓂᑯᒃ ᐁᑮ ᔖᑯᐌᓂᒡ ᐁᓇᓈᑯᒫᓂᒡ ᑭᔐᒪᓂᑑᓐ ᑲᑭᓇ ᒫᒪᑳᒋᒋᑫᐎᓇᓐ ᑳᑮᐙᐸᑕᒥᓂᒡ:

ᔕᐌᑖᑯᓯ ᐊᐊ ᑭᒋᐅᑭᒫ ᑳᐱ ᑕᑯᔑᕽ ᐅᑎᔑᓂᑳᓱᐎᓂᓃᕽ ᑳᑎᐯᒋᑫᓂᒡ᙮ ᐱᓵᓂᓯᐎᓐ ᐊᔮᒪᑲᓐ ᑭᒋᑮᔑᑯᕽ, ᑲᔦ ᑕᔥ ᒫᐗᒡ ᑭᒋ ᐃᓀᑖᑯᓯᐎᓐ ᐅᑕᔮᓐ ᑭᔐᒪᓂᑑ ᒫᐗᒡ ᐃᔥᐱᒥᕽ ᑳᐊᔮᒡ, ᑮᐃᔑ ᔖᑯᐌᐗᒃ᙮

ᐋᓂᑕ ᑕᔥ ᐯᕒᐊᓰᒃ ᒣᑴᔭᐄ ᑳᔑ ᐹᑏᓄᓈᓂᐗᓂᓂᒃ ᐅᑮᐅᒋ ᑲᓅᓈᐙᓐ ᒋᓴᓲᓐ ᐁᑮᐃᓈᐙᒡ: ᐅᑭᑭᓄᐊᒫᑫ, ᑲᓅᔥ ᑭᑭᑭᓄᐊᒪᐙᑲᓇᒃ ᒋᓅᑖᑎᓯᒀ᙮

ᒋᓴᔅ ᑕᔥ ᑮᐃᔑ ᓇᑴᑕᒻ: ᑭᐐᑕᒪᐎᓂᓂᒻ, ᑮᔥᐱᓐ ᐐᓇᐙ ᓅᑖᑎᓯᒀ, ᐊᓯᓃᒃ ᐅᔕ ᑕᔖᔖᑯᐌᐗᒃ᙮

ᐊᐲ ᒋᓴᔅ ᐋᔕ ᐯᔓ ᐁᐊᓂ ᐅᑎᑕᕽ ᒉᕒᐆᓴᓬᐊᒻ ᑭᒋᐆᑌᓇ, ᐊᐲ ᐁᑌᐹᐸᑕᕽ ᐅᑮᒪᐎᑖᓐ,

ᐁᑮᐃᑭᑐᒡ: ᑮᔥᐱᓐ ᑕᔥ ᑮᑭᑫᑕᒣᑭᐸᓐ ᓅᑯᒻ ᑳᑮᔑᑲᒃ ᐋᑎ ᑫᐅᒋ ᒦᓂᑰᔦᑭᐸᓐ ᐱᓵᓂᓯᐎᓐ; ᑳᐐᓐ ᑕᔥ ᑭᑮ ᐙᐸᑕᐃᑰᓰᒻ ᐃᓂᐌᓂᐗᓐ᙮

ᑭᑲ ᐅᑎᓵᐸᑖᒻ ᐅᔕ ᑮᔑᑲᒃ, ᐊᐲ ᑳᔒᑫᓂᒥᓀᒀ ᒋᐙᑳ ᐱᑾᑲᒥᑲᐃᑫᐙᒡ ᑫᐅᒋ ᒦᑳᓂᓀᒀ᙮ ᑭᑲ ᐙᑳᔥᑳᑯᐙᒃ ᑲᔦ, ᒥᓯᐌ ᑲᔦ ᐃᓇᑫ ᑭᑲ ᐅᒌᑳᑯᐙᒃ᙮

ᐐᑫ ᓴ ᑯ ᐅᑲ ᓂᔑᐗᓈᒋᑑᓈᐙ ᑭᑑᑌᓈᒥᐙ᙮ ᑭᑲ ᓂᓯᑰᒻ, ᐊᐱᓅᒌᔕᐞ ᑲᔦ ᐅᑲ ᓂᓵᐙᐞ᙮ ᑳᐐᓐ ᑲᓇᑫ ᐯᔑᒃ ᐊᓯᓐ ᑕᐃᓇᐱᓰ ᑳᑮᐃᔑ ᑭᑕᐱᐸᓐ, ᐅᓵᒻ ᐋᓃᔥ ᑳᐐᓐ ᑭᑮᓂᓯᑕᐎᓇᓰᒻ ᐊᐲ ᑮᔑᑲᓂᓂᒃ ᑭᔐᒪᓂᑑ ᑫᑮ ᐱᒫᒋᐃᓀᑭᐸᓐ᙮

ᒋᓴᔅ ᑮᐲᑎᑫ ᐃᐃᒫ ᑭᒋᐊᓇᒥᐁᐎᑲᒥᑯᕽ, ᐁᑮᒫᒌ ᓵᓵᑭᒋᓂᔕᐙᒡ ᑲᑭᓇ ᑳᑮ ᐊᑖᐌᐎᑲᒥᑯᑫᓂᒡ᙮

ᒦᔥ ᐅᐅ ᑳᐃᓈᒡ: ᒦ ᓴ ᐁᔑᐲᐃᑳᑌᒃ ᑭᒋᒪᓯᓇᐃᑲᓐ ᑭᔐᒪᓂᑑ ᐁᑮᐃᑭᑐᒡ: ᓂᐙᑳᐃᑲᓐ ᓴ ᑕᐃᔑᓂᑳᑌ ᐊᓇᒥᐁ ᐙᑳᐃᑲᓐ, ᑮᓇᐙ ᑕᔥ ᐁᐃᔑ ᓈᑯᑑᔦᒃ ᑖᐱᔥᑰ ᒋᐅᑳᓲᐎᑲᒥᑯᐙᒡ ᐅᒪᑲᑗᔥᑲᒃ᙮

ᑕᓱ ᑮᔑᒃ ᒋᓴᔅ ᑮᑭᑭᓄᐊᒫᑫ ᑭᒋᐊᓇᒥᐁᐎᑲᒥᑯᕽ᙮ ᐃᐃ ᑕᔥ ᑭᒋᐊᓇᒥᐁᐎᑭᒫᐞ, ᐃᐃ ᑲᔦ ᑳᑭᑭᓄᐊᒫᑫᓂᒡ ᐅᓇᔓᐌᐎᓐ, ᐃᐃ ᑲᔦ ᑳᓃᑳᓃᑕᒪᐙᓂᒡ ᐯᒫᑎᓯᓂᒡ ᐅᑮ ᑲᑴ ᓂᓯᑰᐞ᙮

ᑳᐐᓐ ᐅᑮ ᑭᑫᑕᓰᓂ ᐋᓃᓐ ᑫᑮᐅᒋ ᓂᓯᑯᐸᓐ ᐋᓃᔥ ᑲᑭᓇ ᐯᒫᑎᓯᓂᒡ ᐅᑮ ᑭᒋᐌᑕᒥᓂ ᑳᑮᐃᑭᑐᒡ᙮ ᑮᑭᒋᐎ ᐊᔮᐗᐞ ᐁᑮ ᐱᓯᑖᑯᒡ ᐋᓃᓐ ᐁᑭᑐᒡ᙮

ᐋᐱᑎᕽ ᐁᑮᔑᑲᓂᓂᒃ ᒋᓴᔅ ᑮᐊᔮ ᑭᒋᐊᓇᒥᐁᐎᑲᒥᑯᕽ ᐁᑭᑭᓄᐊᒫᑫᒡ, ᐁᑮ ᑕᔑᑕᕽ ᑲᔦ ᒥᓍᒋᒧᐎᓐ᙮ ᒦᔥ ᑳᑮᐱ ᓈᓯᑳᑯᒡ ᑭᒋᐊᓇᒥᐁᐎᑭᒫᐞ, ᑳᑭᑭᓄᐊᒫᑫᓂᒡ ᐅᓇᔓᐌᐎᓐ, ᐃᐃ ᑲᔦ ᑳᓃᑳᓂᓯᓂᒡ ᐅᓇᔓᐌᐎᓂᕽ,

ᒦᑕᔥ ᑳᐃᑯᒡ: ᐐᑕᒪᐎᔑᓈᒻ, ᐌᑯᓀᓐ ᑎᓄ ᑲᔥᑭᐁᐎᓯᐎᓐ ᑳᐋᐸᒋᑑᔭᓐ ᐅᓄ ᑳᐃᔑᒋᑫᔭᓐ? ᐊᐌᓀᓐ ᑲᔦ ᑳᒦᓂᒃ ᐃᐃ ᑲᔥᑭᐁᐎᓯᐎᓐ?

ᒋᓴᔅ ᑕᔥ ᐅᑮᐃᔑ ᓇᑴᑕᐙᐞ: ᐯᔑᒃ ᑕᔥ ᑫᑰᓐ ᑫᓃᓐ ᑭᐐ ᑲᑴᒋᒥᓂᓂᒻ᙮ ᓇᑴᑕᐎᔑᒃ ᐃᑕᔥ᙮

ᐋᑎ ᑳᐅᒌᓂᒃ ᐊᐊ ᒞᓐ ᐅᓰᑲᐊᑖᑫᐎᓐ? ᑭᔐᒪᓂᑑᕽ ᐃᓇ ᑯᒫ ᑲᔦ ᐃᓂᓃᑳᕽ? ᐅᑮᐃᓈᐞ᙮

ᒦᑕᔥ ᑳᐃᔑ ᒫᒌ ᑲᑲᓅᓂᑎᓂᒡ ᐁᑮ ᑕᔑᑕᒫᑎᓂᒡ ᐁᑮᐃᑭᑐᓂᒡ: ᑮᔥᐱᓐ ᐃᑭᑐᔭᕽ ᑭᔐᒪᓂᑑᕽ, ᑭᑲᐃᑯᓈᓐ ᑕᔥ ᐌᑯᓀᓐ ᑕᔥ ᑳᐅᒋ ᑌᐺᑕᐙᓯᐌᒃ ᐊᐊ ᒞᓐ?

ᑮᔥᐱᓐ ᑕᔥ ᐃᑭᑐᔭᕽ ᐃᓂᓃᑳᕽ, ᑲᑭᓇ ᐃᑭ ᑳᐹᑏᓄᐙᒡ ᑭᑲ ᐸᐲᒶᓯᓇᐃᑯᓈᓂᒃ ᐋᓃᔥ ᑲᑭᓇ ᐅᑎᓇᑭᒫᐙᓐ ᐃᓂ ᒞᓇᓐ ᑭᔐᒪᓂᑑᓐ ᑳᑲᓅᑕᒪᐙᓂᒡ᙮

ᒦᑕᔥ ᑳᐃᑯᒡ: ᑳᐐᓐ ᓂᑭᑫᑕᓰᒥᓐ ᐋᑎ ᐌᒌᒪᑲᓄᑴᓐ᙮

ᒦᑕᔥ ᑳᐃᓈᒡ: ᑳᐐᓐ ᑕᔥ ᑫᓃᓐ ᑭᑲ ᐐᑕᒪᐎᓯᓅᓂᓂᒻ ᐌᑯᓀᓐ ᑎᓄ ᑲᔥᑭᐁᐎᓯᐎᓐ ᑳᐋᐸᒋᑑᔮᓐ ᐅᐅ ᑳᐃᔑᒋᑫᔮᓐ᙮

ᒋᓴᔅ ᑕᔥ ᐅᑮᐐᑕᒪᐙᐞ ᐯᒫᑎᓯᓂᒡ ᐅᐅ ᐊᐌᒋᑫᐎᓐ: ᑮᐊᔮ ᐯᔑᒃ ᐃᓂᓂ ᐁᑮ ᑭᑎᑳᑕᕽ ᔔᒥᓂᑭᑎᑫᐎᓐ᙮ ᒦᔥ ᑳᐃᔑ ᐊᐎᐋᒡ ᑯᑕᒃ ᑭᑎᑫᐎᓂᓂᐗᐞ᙮ ᒦᑕᔥ ᑳᐃᔑ ᒫᒑᒡ ᑭᓉᔥ ᐁᑮᐃᓀᑎᒡ᙮

ᐊᐲ ᑕᔥ ᐁᐅᒋᒋᓭᓂᒃ ᒋᒪᐎᔂᓱᓂᒡ ᐃᐃ ᔔᒥᓇᐞ, ᐅᑮᐃᔑᓂᔕᐙᓐ ᐃᓴ ᐅᑕᓄᑮᐋᑲᓇᐞ ᐃᐃᒫ ᑳᐃᔑ ᑭᑎᑳᓱᓂᒡ ᔔᒥᓇᐞ ᑫᐐᓐ ᐃᐃᒫ ᐁᐐᐅᑎᓯᒡ ᒥᓂᒃ ᑫᑮᐅᑎᓯᐸᓐ᙮ ᑳᑮᐊᐎᐃᑣ ᑕᔥ ᐅᑮ ᐸᐸᑭᑌᐙᐙᓐ ᐃᓂ ᐊᓄᑮᐋᑲᓇᓐ, ᑫᑰᓐ ᐋᐲᓐᒡ ᐁᑮᒫᒌᑑᓯᓂᒃ᙮

ᒦᓇᐙ ᑕᔥ ᐊᐊ ᑭᑎᑫᐎᑭᒫ ᐅᑮᐃᔑᓂᔕᐙᓐ ᑯᑕᒃ ᐅᑕᓄᑮᐋᑲᓇᓐ, ᒦᑕᔥ ᑳᑮᐊᐎᐃᑣ ᐯᔑᑾᓐ ᑳᐃᔑ ᐸᐸᑭᑌᐙᐙᒡ, ᐁᑮᒫᔑ ᑑᑕᐙᐙᒡ ᑲᔦ, ᑫᑰᓐ ᐋᐲᓐᒡ ᐁᑮᒫᒌᑑᓯᓂᒃ᙮

ᒦᓇᐙ ᑯᑕᒃ ᐅᑕᓄᑮᐋᑲᓇᓐ ᐅᑮᐃᔑᓂᔕᐙᓐ, ᒦᔥ ᑳᐃᔑ ᒫᑭ ᑑᑕᐎᒥᓐᒡ ᐁᑮ ᓵᑭᒋ ᐌᐱᓂᑲᓂᐎᓂᒡ ᑲᔦ᙮

ᒦᑕᔥ ᐊᐊ ᑭᑎᑫᐎᑭᒫ ᑳᐃᑭᑐᒡ: ᐋᓃᓐ ᑕᔥ ᐃᓈ ᑫᐃᔑᒋᑫᔮᓐ? ᓂᑯᓯᓴᓐ ᓂᑲ ᐃᔑᓂᔕᐅᒫᓐ ᑳᓵᑭᐃᒪᒃ, ᒫᑭᔖ ᑕᔥ ᐅᑲ ᑭᑌᓂᒫᐙᓐ᙮

ᐊᐲ ᑕᔥ ᑳᑮᐊᐎᐃᑣ ᐁᐙᐸᒫᐙᒡ ᐃᓂ ᐅᑯᓯᓯᒫᓐ, ᒦᑕᔥ ᑳᐃᑭᑐᐙᒡ: ᒦ ᓴ ᐃᓂ ᑭᑎᑫᐎᑭᒫ ᐅᑯᓯᓴᓐ᙮ ᐊᐯᔪᒃ ᑕᑲ ᓂᓯᒫᑖᓂᓐ, ᒋᐊᔮᐗᕽ ᐃᐃ ᑳᐐ ᑎᐱᓇᐌᐎᓯᓂᒡ!

ᒦᑕᔥ ᑳᑮᐅᑎᑎᓈᐙᒡ ᐁᑮ ᓵᑭᒋ ᐌᐱᓈᐙᒡ ᐃᐃᒫ ᔔᒥᓂᐎ ᑭᑎᑳᓂᕽ, ᐁᑮᓂᓵᐙᒡ ᑲᔦ᙮ ᐋᓃᓐ ᑕᔥ ᑫᑑᑕᐙᒡ ᐊᐊ ᑭᑎᑫᐎᑭᒫ ᑳᑎᐯᑕᕽ ᔔᒥᓂ ᑭᑎᑫᐎᓐ ᐃᐃ ᑳᑮᐊᐎᐋᒡ?

ᑕᐱ ᑕᑯᔑᓐ ᐄᑐᒃ ᒋᐱ ᓂᓵᒡ ᐃᐃ ᑳᑮᐊᐎᐋᐸᓐ ᔔᒥᓂᐎ ᑭᑎᑫᐎᓐ, ᑯᑕᒃ ᐊᐎᔭᐞ ᒋᒦᓈᒡ, ᐅᑮᐃᓈᐞ᙮ ᐁᓅᑖᑯᒡ ᐃᑕᔥ ᐯᒫᑎᓯᓂᒡ ᐅᐅ ᑮᐃᑭᑐᐗᐞ: ᑕᑲ ᑳᐐᓐ ᐐᑳ ᐃᐃ ᑕᐃᔑᓭᓯᓅᓐ!

ᒋᓴᔅ ᑕᔥ ᐅᑮ ᑲᓇᐙᐸᒫᐞ ᐁᑮ ᑲᑴᒋᒫᒡ: ᐋᓃᓐ ᑕᔥ ᐁᑭᑑᒪᑲᒃ ᐅᐅ ᑳᐃᔑᐲᐃᑳᑌᒃ ᑫᑌᒪᓯᓇᐃᑲᓂᕽ? ᐃᓂ ᓴ ᐊᓯᓃᓐ ᑳᐙᑳᐃᑫᐙᒡ ᑳᐋᓇᐌᓂᒫᐙᒡ, ᒦᐗᓐ ᐃᓴ ᐃᓂ ᒫᐗᒡ ᑳᓃᑳᓀᑖᑯᓯᓂᒡ ᐊᓯᓃᓐ᙮

ᐊᐌᓀᓐ ᐃᑕᔥ ᐃᑯ ᐃᒫ ᑫᔑ ᐸᑭᔑᕽ ᐊᓯᓃᕽ, ᑕᐲᓯᔑᓐ᙮ ᐊᐊ ᑕᔥ ᑲᔦ ᑫᐱᓯᑰᓱᒡ ᐃᓂ ᐊᓯᓃᓐ ᑕᔑᑯᒌᔥᑰᓱ᙮

ᐃᑭ ᑕᔥ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ, ᐃᑭ ᑲᔦ ᑭᒋᐊᓇᒥᐁᐎᑭᒫᒃ ᔐᒫᒃ ᐅᑮᑲᑴ ᑳᒋᑎᓈᐙᓐ ᒋᓴᓲᓐ ᐊᓃᔥ ᐅᑮ ᑭᑫᑖᓈᐙ ᐐᓇᐙ ᐁᑕᔑᒥᑯᐙᒡ ᑮᐊᐌᒋᑫᓂᒡ᙮ ᐅᑮ ᑯᓵᐙᐞ ᐃᑕᔥ ᐯᒫᑎᓯᓂᒡ᙮

ᐐᑫ ᑕᔥ ᐅᑮᓈᑲᒋᐋᐙᓐ ᐁᑮᐃᔑᓂᔕᐙᐙᒡ ᑲᔦ ᐊᐎᔭᐞ ᒌᓍᓂᑎᓱᓂᒡ ᑾᔭᒃ ᑎᓄ ᐁᓈᑎᓯᓂᒡ ᑫᑮᒨᒋ ᓈᑲᒋᐋᓂᒡ ᒋᓴᓲᓐ᙮ ᐅᑮᐃᔑ ᐊᑕᐌᑖᓈᐙ ᐁᐐ ᑳᒋᒋᐋᐙᒡ ᑫᑰᓐ ᐃᑭᑐᓂᒡ, ᐁᐐᐃᔑ ᐸᑭᑎᓈᐙᒡ ᐃᑕᔥ ᒋᐅᓈᑯᓂᑯᓂᒡ ᑫᔥᑭᐁᐎᓯᓂᒡ, ᒣᔥᑲᐎᓰᓂᒡ ᑲᔦ ᑭᒋ ᐅᓇᔓᐌᐎᓂᓂᐗᓐ ᐅᕒᐆᒥᕽ ᐌᒌᓂᒡ᙮

ᐃᑭ ᑕᔥ ᑳᑮᐃᔑᓂᔕᐅᑣ ᐅᑮᒨᒋ ᓈᓈᑲᑎᓰᒃ ᐅᐅ ᐅᑮᐃᔑ ᑲᑴᒋᒫᐙᓐ ᒋᓴᓲᓐ: ᐅᑭᑭᓄᐊᒫᑫ, ᑭᑭᑫᓂᒥᑰ ᑾᔭᒃ ᐁᐃᑭᑐᔭᓐ, ᑾᔭᒃ ᑲᔦ ᐁᐃᔑ ᑭᑭᓄᐊᒫᑫᔭᓐ᙮ ᑭᑭᑫᓂᒥᑰ ᑲᔦ ᑲᑭᓇ ᐊᐎᔭ ᐯᔑᑾᓐ ᐁᑑᑕᐗᒡ ᑳᑑᑕᐗᒡ ᐊᐊ ᐯᔑᒃ ᐊᐎᔭ᙮ ᑌᐺᐎᓐ ᑲᔦ ᐁᑭᑭᓄᐊᒫᑫᔭᓐ ᐋᓃᓐ ᑭᔐᒪᓂᑑ ᑳᔑ ᐊᑕᐌᓂᒫᒡ ᐊᐎᔭᓐ ᒋᐃᔑ ᐱᒫᑎᓯᓂᒡ᙮

ᐐᑕᒪᐎᔑᓈᒻ ᑕᔥ ᐋᓃᓐ ᐁᓀᑕᒪᓐ: ᑫᑮᓇᐎᓐᑦ ᐃᓇ ᐃᔑᓈᑾᓐ ᒋᑎᐸᐊᒪᕽ ᐃᐃ ᑖᑭᔅ ᑳᑎᐸᐃᑫᐃᐌᒡ ᐊᐊ ᒫᐗᒡ ᐃᑯ ᑭᒋᐅᑭᒫ ᐌᑎ ᐅᕒᐆᒥᕽ ᑳᐊᔮᒡ, ᑯᒫ ᑲᔦ ᑳᐐᓐ ᓂᑖ ᑎᐸᐊᓰᒥᓐ? ᐅᑮᐃᓈᐙᓐ᙮

ᒋᓴᔅ ᑕᔥ ᐅᑮ ᑭᑫᓂᒫᐞ ᐁᑮᒪᒋ ᐃᓀᑕᒥᓂᒡ, ᒦᑕᔥ ᑳᐃᓈᒡ:

ᐙᐸᑕᐃᔑᓐ ᐊᐊ ᐙᐹᐱᑯ ᔔᓂᔮᔅ᙮ ᐊᐌᓀᓐ ᐗᐊ ᑳᒪᓯᓂᔑᕽ? ᐊᐌᓀᓐ ᐅᐅᐌᓂ ᐅᐐᓱᐎᓐ ᑳᐅᔑᐲᐃᑳᑌᓂᒃ? ᐅᑮᐃᓈᐞ᙮ ᒫᐗᒡ ᐃᑯ ᑭᒋᐅᑭᒫ, ᐅᑮᐃᑰᐞ᙮

ᒦᑕᔥ ᑳᐃᓈᒡ: ᒦᓂᒃ ᓴ ᐊᐊ ᒫᐗᒡ ᐃᑯ ᑭᒋᐅᑭᒫ ᑳᑎᐯᑕᕽ, ᒦᓂᒃ ᐃᑕᔥ ᑲᔦ ᐐᓐ ᑭᔐᒪᓂᑑ ᑳᑎᐯᑕᕽ, ᐅᑮᐃᓈᐞ᙮

ᑳᐐᓐ ᑕᔥ ᐅᑮ ᑲᔥᑭᑑᓰᓈᐙ ᒋᐅᒋ ᑳᒋᒋᐋᐙᒡ ᐋᓃᓐ ᑫᐃᑭᑐᓂᒡ᙮ ᐐᑫ ᑮᑭᒋ ᒫᒪᑳᑌᑕᒨᒃ ᑳᑮᐃᔑ ᓇᑴᑖᑯᐙᒡ, ᑳᐐᓐ ᑕᔥ ᒋᑮᓅᑖᑎᐙᒡ᙮

ᐋᓂᑕ ᓵᒐᓰᒃ ᐅᑮᐱ ᐊᑕ ᐙᐸᒫᐙᓐ ᒋᓴᓲᓐ᙮ ᒦᐗᒃ ᐅᑯᐌᓂᐗᒃ ᑳᐃᔑ ᑭᑭᓄᐃᑫᐙᒡ: ᑳᐐᓐ ᐊᐎᔭ ᒦᓇᐙ ᑕᑮᐌ ᐱᒫᑎᓯᓰ ᐃᔥᒀ ᐱᒫᑎᓯᒡ᙮

ᐅᑮ ᑲᑴᒋᒫᐙᓐ: ᐅᑭᑭᓄᐊᒫᑫ, ᒨᓯᔅ ᑕᔥ ᑮᐃᔑᐲᐃᑫ ᐅᑑᓇᔓᐌᐎᓂᕽ, ᑮᔥᐱᓐ ᐃᓂᓂ ᓂᐳᒡ ᐁᓇᑲᓈᒡ ᐃᓂ ᐐᐗᓐ, ᐁᑮᐊᔮᐙᓯᒀ ᐊᐱᓅᒌᔕᐞ, ᐐᒋᑭᐌᔭᓐ ᓴ ᐅᑲ ᐐᑎᑫᒫᓂ ᐃᓂ ᐐᐗᓐ ᒋᐊᔮᑕᒫᑯᒡ ᐊᐱᓅᒌᔕᐞ᙮

ᐃᓇᔥᑫ ᑕᔥ ᑮᓃᔣᒋᐗᒃ ᐃᑭ ᐃᓂᓂᐗᒃ ᐁᑮᐐᒋᑭᐌᑎᐙᒡ᙮ ᑳᓴᓰᑭᓯᒡ ᑕᔥ ᓂᑕᒻ ᑮᐐᐎ, ᐁᑮᓂᐳᒡ ᑕᔥ ᐁᑮᐊᔮᐙᓯᒃ ᐊᐱᓅᒌᔕᐞ᙮

ᐊᐊ ᑕᔥ ᐁᓂᐅᔒᒣᔑᒫᐎᒡ ᑫᐐᓐ ᑮᐊᓂ ᐐᐎ ᐃᓂ ᐃᑴᐗᓐ᙮

ᒦᑕᔥ ᐯᔑᑾᓐ ᐊᐊ ᐊᓂ ᐋᓂᑫ ᐅᔒᒣᔑᒫ ᑳᐃᔑᓭᒡ᙮ ᑲᑭᓇ ᐃᑭ ᑳᑮᓃᔣᒋᐙᒡ ᑳᑮᐐᒋᑭᐌᑎᐙᒡ ᐯᔑᑾᓐ ᑮᐃᔑᓭᐗᒃ ᐁᑮᓂᐳᐙᒡ, ᐁᑮᐅᒋ ᐊᔮᐙᓯᒀ ᑕᔥ ᐊᐱᓅᒌᔕᐞ᙮

ᐊᐊ ᑕᔥ ᐃᑴ ᐃᔥᒀᒡ ᑮᓂᐳ᙮

ᐊᐲ ᑕᔥ ᑮᐌ ᐱᒫᑎᓯᓈᓂᐗᕽ, ᐊᐌᓀᓐ ᑕᔥ ᐊᐊ ᒪᔮ ᑫᐐᐎᒡ ᐃᓂ ᐃᑴᐗᓐ? ᐋᓃᔥ ᒥᒋᓃᔣᓱ ᐅᑮᐐᑎᑫᒫᐙᓐ᙮

ᐅᐅ ᑕᔥ ᒋᓴᔅ ᐅᑮᐃᓈᐞ: ᐃᓂᓂᐗᒃ, ᐃᑴᐗᒃ ᑲᔦ ᐙᐐᑎᑫᑎᐗᒃ ᐅᐅ ᓅᑯᒻ ᑳᐱᒥᓭᒃ ᐊᑭ᙮

ᐃᑭ ᑕᔥ ᐃᓂᓂᐗᒃ, ᐃᑭ ᑲᔦ ᐃᑴᐗᒃ ᑳᑌᐸᑫᑖᑯᓯᐙᒡ ᑕᑮᐌ ᐱᒫᑎᓯᐗᒃ᙮ ᑕᐊᓂ ᐱᒫᑎᓯᐗᒃ ᑲᔦ ᐌᑎ ᓃᑳᓇᔭᐄ ᑫᓂ ᐱᒥᓭᓂᒃ ᑳᐐᓐ ᐄᑐᒃ ᑕᐐᑎᑫᓈᓂᐗᓯᓅᓐ᙮

ᒦᑕᔥ ᐁᒐᓬᐃᕽ ᒋᑎᓄᐎᐙᒡ, ᑳᐐᓐ ᐐᑳ ᑕᓂᐳᓰᐗᒃ᙮ ᑭᔐᒪᓂᑑᓐ ᐅᑑᓃᒑᓂᓯᒥᑯᐙᓐ, ᐋᓃᔥ ᓂᐳᐎᓂᕽ ᑮᐅᒋ ᑮᐌ ᐱᒫᑎᓯᐗᒃ᙮

ᐃᐃᒫ ᓴ ᑳᔑ ᑕᔑᑌᒃ ᐃᐃ ᑳᑮ ᐱᔅᑲᓀᒃ ᐁᔑ ᐱᑾᑯᐹᒃ, ᒦ ᐃᒫ ᒨᓯᔅ ᐁᔑ ᐯᑌᓈᑯᑑᒡ ᐃᑭ ᑳᓂᐳᐙᐸᓐ ᐁᑮᐌ ᐱᒫᑎᓯᐙᒡ᙮ ᒨᓯᔅ ᑮᐃᑭᑐᑯᐸᓐ: ᑳᑎᐯᒋᑫᓂᒡ ᓴ ᐅᑭᔐᒪᓂᑑᒥ ᐁᐸᕒᐊᐋᒻ, ᐋᐃᓯᒃ ᑲᔦ, ᐊᐊ ᑲᔦ ᒉᑲᑉ ᙮

ᑳᐱᒫᑎᓯᓂᒡ ᐃᓴ ᐅᑑᑭᔐᒪᓂᑑᒥᑰᐞ, ᑳᐐᓐ ᐐᓐ ᐃᐃ ᑳᓂᐳᓂᒡ᙮ ᐐᓐ ᐄᑐᒃ ᑲᑭᓇ ᐊᐎᔭᓐ ᑳᐅᒋ ᐱᒫᑎᓯᓂᒡ, ᑮᐃᑭᑐ᙮

ᐋᓂᑕ ᑕᔥ ᑫᑭᓄᐊᒫᑫᓂᒡ ᐅᓇᔓᐌᐎᓐ ᐅᑮᐃᑰᐞ: ᐅᑭᑭᓄᐊᒫᑫ, ᑾᔭᒃ ᐃᐃ ᑳᐃᑭᑐᔭᓐ᙮

ᑳᐐᓐ ᑕᔥ ᑮᑲᔥᑭᑌᐁᓰᐗᐞ ᐊᐗᔑᒣ ᑫᑰᓐ ᒋᑲᑴᒋᒥᑯᒡ᙮

ᒦᑕᔥ ᒋᓴᔅ ᑳᐃᓈᒡ: ᐋᓃᓐ ᑕᔥ ᐌᒋ ᐃᑭᑐᓈᓂᐗᕽ ᑭᔐᒪᓂᑑ ᑳᐅᓈᐸᒫᒡ ᐁᐅᑯᓯᓯᒥᑯᓂᒡ ᑌᐱᑕᓐ ?

ᐐᓐ ᐄᑐᒃ ᐃᑯ ᑌᐱᑦ ᐃᑭᑐ ᐃᐃᒫ ᓂᑲᒧᓂᕽ ᑫᑌ ᒪᓯᓇᐃᑲᓂᕽ: ᑳᑎᐯᒋᑫᒡ ᐅᑮᐃᓈᓐ ᐃᓂ ᑳᑎᐯᓂᒥᒥᒡ: ᐃᐃᒫ ᐃᔑᓇᒪᑕᐱᓐ ᓂᑭᒋᓂᑭᕽ ᐃᓇᑫ,

ᐹᓂᒫ ᓴ ᑭᑲᐃᔑᐃᓐ ᒋᔖᑰᒋᐊᑣ ᑳᓂᔥᑫᓂᒥᒀ᙮

ᑌᐱᑦ ᑕᔥ ᐁᑮᐃᔑᓂᑳᓈᒡ: ᑳᑎᐯᒋᑫᒡ᙮ ᐋᓃᓐ ᑕᔥ ᐃᓈ ᑭᔐᒪᓂᑑᓐ ᑳᑮᐅᓈᐸᒥᑯᒡ ᑫᔑ ᐅᑯᓯᓯᒥᑯᐸᓐ ᑌᐱᑕᓐ?

ᒣᒀ ᑕᔥ ᑲᑭᓇ ᐯᒫᑎᓯᓂᒡ ᐁᐱᓯᑖᑯᒡ ᒋᓴᔅ ᐅᑮᐃᓈᐞ ᐅᑭᑭᓄᐊᒪᐙᑲᓇᐞ:

ᐊᔮᒀᒥᓰᑕᐎᑾᒃ ᐃᑭ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ᙮ ᐅᒥᓉᑖᓈᐙ ᐁᐸᐹᒧᓭᐙᒡ ᐁᑭᑭᔥᑲᒧᐙᒡ ᑫᓍᐲᑲᓂᓂᑭᓐ ᑲᔥᑮᑮᐎᓇᓐ᙮ ᐅᒥᓉᑖᓈᐙ ᑲᔦ ᐁᐴᔓᐃᑣ ᐊᑾᒌᕽ ᑳᑕᓇᑖᐌᕽ᙮ ᑲᔦ ᑕᔥ ᐁᐃᔑ ᐊᐱᐙᒡ ᒫᐗᒡ ᑫᒋ ᐃᓀᑖᑾᓂᓂᑭᓐ ᐊᐱᐎᓇᓐ ᐃᐃᒫ ᒎᐎ ᐊᓇᒥᐁᐎᑲᒥᑯᕽ, ᐃᐃᒫ ᑲᔦ ᑳᑕᔑ ᐐᑾᑎᐎᓐᒡ᙮

ᒦᐗᒃ ᐄᑐᒃ ᐃᑭ ᑳᐌᓵᓂᐋᐙᒡ ᑮᐙᒋᑴᐗᐞ ᐁᑭᒨᑎᒫᐙᒡ ᐅᑕᔮᐎᓂᓂ, ᑲᔦ ᑕᔥ ᑭᓉᔥ ᐁᐊᓇᒥᐋᐙᒡ ᒋᐙᐸᒥᑣ᙮ ᐊᐗᔑᒣ ᑕᔥ ᐐᓇᐙ ᐅᑲ ᐅᒋ ᐊᔮᓈᐙ ᑲᒀᑕᑭᐃᑰᐎᓐ, ᑮᐃᑭᑐ᙮

ᒋᓴᔅ ᐁᐊᔨᓈᐱᒡ ᐅᑮᐙᐸᒫᐞ ᑳᐌᓅᑎᓯᓂᒡ ᐊᐎᔭᐞ ᐁᐸᑭᑎᓇᒥᓂᒡ ᐅᐸᑭᑎᓂᑫᐎᓂᓂ ᑳᐃᔑ ᑲᓇᐌᓂᒥᒥᓐᒡ ᔔᓂᔮᓐ ᑭᒋᐊᓇᒥᐁᐎᑲᒥᑯᕽ᙮

ᒦᑕᔥ ᑳᑮᐙᐸᒫᒡ ᐁᑭᑎᒫᑭᓯᓂᒡ ᑮᐙᒋᑴᐗᓐ ᐁᐸᑭᑎᓈᓂᒡ ᓃᔑᓐ 2 ᐅᓵᐙᐱᑰᓴᐞ᙮

ᒦᑕᔥ ᑳᐃᑭᑐᒡ: ᑌᐺ ᐅᐌ ᑳᐐᑕᒪᐎᓇᑰᒃ, ᐊᐊᐌ ᑳᑭᑎᒫᑭᓯᒡ ᑮᐙᒋᑴ ᓇᐗᒡ ᓃᐱᐗᐞ ᐸᑭᑎᓂᑫ ᐊᐲᒡ ᐐᓐ ᐃᑭ ᑲᑭᓇ ᑯᑕᒃ ᐊᐎᔭᒃ᙮

ᐃᑭᐌᓂᐗᒃ ᓴ ᐐᓐ ᑯᑕᒃ ᐅᐌᓅᑎᓯᐎᓂᐙᕽ ᐅᒋ ᐸᑭᑎᓂᑫᐗᒃ, ᐊᐊ ᑕᔥ ᐐᓐ ᐃᑴ ᐁᑭᑎᒫᑭᓯᒡ ᐅᒥᓯᐌ ᐸᑭᑎᓈᓐ ᐅᑑᑖᑎᓯᐎᓐ᙮

ᐋᓂᑕ ᑕᔥ ᐅᑭᑭᓄᐊᒪᐙᑲᓇᐞ ᐅᑮ ᑕᔑᑕᒥᓂ ᑭᒋᐊᓇᒥᐁᐎᑲᒥᒃ ᐋᓃᓐ ᑳᐊᐲᒋ ᒥᓄᒋᑳᑌᓂᒃ᙮ ᐅᑮ ᑕᔑᑕᒥᓂ ᑲᔦ ᐸᑭᑎᓂᑫᐎᓇᓐ ᑳᑮ ᐸᑭᑎᓇᒪᐎᒥᓐᒡ ᑭᔐᒪᓂᑑᓐ᙮ ᒦᑕᔥ ᒋᓴᔅ ᑳᐃᑭᑐᒡ:

ᐅᓄᐌᓂᐗᓐ ᑕᔥ ᑳᐙᐸᑕᒣᒃ, ᓂᑯᑎᕽ ᐃᑯ ᑕᐅᒋᒋᓭ, ᐊᐙᒋᑯ ᐯᔑᒃ ᐊᓯᓐ ᒋᐃᔑ ᐊᐱᓯᒃ ᑳᑮᐃᔑ ᐊᐱᐸᓐ᙮ ᑲᑭᓇ ᐅᔕ ᐊᓯᓃᒃ ᑕᓈᓃᓯ ᐌᐱᓂᑳᓱᐗᒃ᙮

ᒦᑕᔥ ᐅᑭᑭᓄᐊᒪᐙᑲᓇᐞ ᑳᐃᔑ ᑲᑴᒋᒥᑯᒡ: ᐅᑭᑭᓄᐊᒫᑫ, ᐐᑕᒪᐎᔑᓈᒻ ᐋᓃᓐ ᐊᐲ ᑫᐃᔑᓭᒃ ᐃᐃᐌ ᑳᐃᑭᑐᔭᓐ᙮ ᐋᓃᓐ ᑲᔦ ᓃᔮᒃ ᑫᐅᒋ ᓂᓯᑕᐎᓈᑾᒃ ᐃᐃᐌ ᐊᐲ ᐐᐃᔑᐌᐸᒃ?

ᒦᔥ ᒋᓴᔅ ᑳᐃᓈᒡ: ᐊᔮᒀᒥᓯᒃ, ᒋᐗᓂᐎᓂᓯᓄᐎᓂᓀᒃ ᐊᐎᔭ᙮ ᐋᓃᔥ ᑕᐹᑏᓄᐗᒃ ᐊᐎᔭᒃ ᒋᐱ ᑕᑯᔑᓄᐙᒡ ᐃᐃᒫ ᓂᑎᔑᓂᑳᓱᐎᓂᕽ ᒋᐃᑭᑐᐙᒡ: ᓃᓐ ᓴ ᑭᔐᒪᓂᑑ ᐅᑑᓈᐸᒫᑲᓇᓐ᙮ ᐋᔕ ᐯᔓᓈᑾᓐ ᐃᐃ ᒋᐃᔑᓭᒃ᙮ ᑫᑯ ᑕᔥ ᐱᒥᓂᔕᐙᑫᒀᓂᒃ᙮

ᑭᑲ ᓅᑖᒻ ᓴ ᐃ ᒦᑳᑎᐎᓐ, ᑭᑲ ᓈᓅᑖᒻ ᑲᔦ ᐁᒫᒦᑳᑎᓈᓂᐗᕽ᙮ ᑫᑯ ᑕᔥ ᓭᑭᓯᑫᒃ᙮ ᐱᓇᒫ ᓴ ᐅᐅ ᑕᐃᔑᓭ ᒋᑆ ᐃᔥᒀᓭᑭᓐ ᐅᓄ ᑫᑰᓇᓐ ᒣᒀ ᑳᐙᐸᑕᒪᕽ᙮

ᒦᑕᔥ ᑳᐊᓂ ᐃᓈᒡ: ᑕᒫᒦᑳᑎᐗᒃ ᓴ ᐯᐸᑳᓐ ᑳᑕᓶᐙᓇᑭᓯᐙᒡ ᐅᐅᒫ ᐊᑮᕽ, ᐅᑭᒫᐎᐎᓇᓐ ᑲᔦ ᑕᒫᒦᑳᑏᒪᑲᓅᓐ᙮ ᐯᐸᑳᓐ ᐊᑮᓐ ᑕᒫᒦᑳᑏᒪᑲᓅᓐ᙮

ᑕᐃᔑᐌᐸᓐ ᒋᑲᑯᔥᑯᓭᒃ ᐊᑭ, ᒥᓯᐌ ᑲᔦ ᒦᒋᒻ ᑕᓈᓅᑌᓭ, ᐯᐸᑳᓐ ᐊᑮᕽ᙮ ᑕᐊᔮᒪᑲᓐ ᑲᔦ ᑭᒋ ᐋᑯᓯᐎᓐ ᒥᓯᐌ ᐯᐸᑳᓐ ᐊᑮᕽ᙮ ᑫᐃᔑᐌᐸᒃ ᑲᔦ ᑕᑯᑖᓀᑖᑾᓐ, ᑮᔑᑯᕽ ᑲᔦ ᑕᐱᐅᒋ ᒫᒪᑳᓯᓈᑾᓐ᙮

ᐅᐅ ᑕᔥ ᑲᑭᓇ ᒋᑆ ᐃᔑᓭᒃ ᑭᑲ ᑕᑯᓂᑰᒻ, ᑲᔦ ᑕᔥ ᒋᑲᒀᑕᑭᐃᑰᔦᒃ᙮ ᑭᑲᔑ ᐸᑭᑎᓂᑰᒻ ᒎᐎ ᐊᓇᒥᐁᐎᑲᒥᑯᑳᕽ, ᑭᐸᐅᑏᐎᑲᒥᑯᕽ ᑲᔦ᙮ ᑭᑲᐃᔑᐎᓂᑰᒻ ᑲᔦ ᐁᓈᓴᒦᐙᒡ ᑭᒋᐅᑭᒫᒃ, ᐃᑭ ᑲᔦ ᑳᓃᑳᓂᓯᐙᒡ ᓂᑎᔑᓂᑳᓱᐎᓂᕽ ᐅᒋ᙮

ᒦᑕᔥ ᐃᐃ ᐊᐲ ᑫᓇᐃᓭᒃ ᒋᐐᑕᒫᑫᔦᒃ ᒥᓍᒋᒧᐎᓐ᙮

ᑮᔖᒡ ᐃᑕᔥ ᐅᓀᑕᒧᒃ ᒋᒥᑯᔥᑳᑌᑕᓯᐌᒃ ᐋᓃᓐ ᑫᐃᑭᑐᔦᒃ ᓈᑕᒫᓱᔦᒃ᙮

ᓃᓐ ᓴ ᐱᑯ ᑭᑲ ᒦᓂᓂᓂᒻ ᐃᑭᑐᐎᓇᓐ, ᑲᑮᑖᐌᑕᒧᐎᓐ ᑲᔦ᙮ ᑳᐐᓐ ᑕᔥ ᐅᑲ ᑲᔥᑭᑑᓰᓈᐙ ᐃᑭ ᑳᔒᑫᓂᒥᓀᒀ ᒋᐸᐹᒥᑕᓯᒀ ᐁᑭᑐᔦᒃ, ᑳᐐᓐ ᑭᑲ ᔖᑰᓱᒥᑯᓰᐙᒃ᙮

ᑭᑲᒪᒥᔑᐃᑯᐙᒃ ᑭᓃᑭᐃᑯᐙᒃ, ᑮᒋᑭᐌᓯᐙᒃ, ᑭᑎᓇᐌᒫᑲᓂᐙᒃ, ᐃᑭ ᑲᔦ ᑳᓵᑭ ᐐᒋᐎᓀᒀ᙮ ᐋᓂᑕ ᑕᔥ ᑮᓇᐙ ᑭᑲ ᓂᓯᑰᒻ᙮

ᑲᑭᓇ ᐊᐎᔭ ᑭᑲ ᔒᑫᓂᒥᑯᐙ ᓃᓐ ᐅᒋ᙮

ᑳᐐᓐ ᑕᔥ ᑲᓇᑫ ᐊᐙᒡ ᐯᔑᒃ ᑮᓂᓯᓯᐙ ᑭᑎᒀᓂᐗᕽ ᑕᐗᓂᓭᓯᓅᓐ᙮

ᐋᔩᒋᑳᐸᐎᒃ ᐃᑕᔥ, ᒦᑕᔥ ᐃᐃᒫ ᑫᐅᒋ ᐱᒫᑎᓯᔦᒃ᙮

ᐊᐲ ᑕᔥ ᐙᐸᒣᒀ ᔑᒫᑲᓂᔕᒃ ᐙᑲᔥᑲᒧᐙᒡ ᒉᕒᐆᓴᓬᐊᒻ ᒦ ᐃ ᒋᑭᑫᑕᒣᒃ ᐋᔕ ᐁᐯᔓᓈᑾᒃ ᒋᓂᔑᐗᓈᒋᒋᑳᑌᒃ ᒉᕒᐆᓴᓬᐊᒻ᙮

ᐃᑭ ᓴ ᑳᑖᐙᒡ ᐃᐃᒫ ᒎᑏᔮᑳᕽ ᐌᑎ ᑕᐊᐸᐃᐌᐗᒃ ᑳᔑ ᐸᐲᑾᑎᓈᓂᒃ᙮ ᐃᑭ ᑲᔦ ᐲᒋ ᑭᒋ ᐆᑌᓇ ᑳᐊᔮᐙᒡ ᑕᑲ ᑕᓵᑭᒋᐸᐃᐌᐗᒃ, ᐃᑭ ᑲᔦ ᐱᑾᒐᔭᐄ ᐁᔮᐙᒡ ᑳᐐᓐ ᑕᐲᑎᑫᓰᐗᒃ ᐃᐃᒫ ᑭᒋ ᐆᑌᓈᕽ᙮

ᒦᑕᔥ ᐅᐅᐌ ᑮᔑᑲᓐ ᑳᐃᔑᓂᑳᑌᒃ: ᑭᔐᒪᓂᑑ ᐅᓇᓇᐊᔑᐌᐎᓐ᙮ ᒦᑕᔥ ᐃᐃ ᐊᐲ ᒋᒨᔥᑭᓀᓭᒃ ᑲᑭᓇ ᑳᐃᔑᐲᐃᑳᑌᒃ ᑭᒋᐅᔑᐲᐃᑲᓂᕽ᙮

ᐃᐃᐌ ᑕᔥ ᐊᐲ ᑮᔑᑲᒃ, ᐋᐱᒋ ᑕᑰᐹᒋᓭᐗᒃ ᐃᑭ ᐃᑴᐗᒃ ᑳᑭᑭᔥᑲᐙᐗᓱᐙᒡ, ᐃᑭ ᑲᔦ ᐅᒫᒫᒫᒃ ᑳᓅᓂᐋᐙᒡ ᐅᓃᒑᓂᓯᐙᐞ᙮ ᐐᑫ ᓴ ᑕᑭᒋ ᐗᓯᑖᐌᑖᑾᓐ ᐅᐅᒫ ᐊᑮᕽ, ᑭᔐᒪᓂᑑ ᐅᓂᔅᑳᑎᓯᐎᓐ ᐅᑲ ᐸᑲᒥᔥᑳᑯᓈᐙ ᐅᑯ ᐯᒫᑎᓯᐙᒡ᙮

ᐋᓂᑕ ᑲᔦ ᑕᐅᒋ ᓂᓵᐗᒃ ᐸᔑᐸᐃᑫᐎᑯᒫᓂᕽ, ᐋᓂᑕ ᑲᔦ ᑕᒫᒌᒋᑲᓂᐎᐗᒃ ᐁᑕᑯᓂᑣ ᒋᐊᔨᔑᐎᒋᑲᓂᐎᐙᒡ ᒥᓯᐌ ᐯᐸᑳᓐ ᐊᑮᕽ᙮ ᐐᑫ ᐅᑲᐱ ᑕᑕᑯᑳᑖᓈᐙ ᒉᕒᐆᓴᓬᐊᒻ ᐃᑭ ᑳᒎᐎᐎᓯᒀ ᐲᓂᔥ ᑫᐐᓇᐙ ᒋᐅᒋᒋᓭᓂᒃ ᒋᐃᔥᒀ ᑎᐯᑕᒧᐙᒡ᙮

ᑕᒪᔭᑭ ᓈᑯᓯ ᑮᓯᔅ, ᑎᐱᑭ ᑮᓯᔅ ᑲᔦ, ᐃᑭ ᑲᔦ ᐗᓇᑯᔕᒃ᙮ ᑲᑭᓇ ᑳᐯᐸᑳᓉᐙᓇᑭᓯᐙᒡ ᐯᒫᑎᓯᐙᒡ ᑕᑲᒀᑕᑫᑕᒨᒃ, ᒋᐙᓀᑕᒥ ᑯᑕᒧᐙᒡ ᐁᒪᑗᔮᑲᒥᔥᑳᓂᒃ ᑭᒋᑲᒻ, ᑲᔦ ᐁᑭᒋ ᒪᒫᑳᔥᑳᓂᒃ᙮

ᐯᒫᑎᓯᐙᒡ ᑕᐗᓃᑫᐗᒃ ᑫᐊᐲᒋ ᓭᑭᓯᐙᒡ ᐋᓃᔥ ᐅᑲᑭᑫᑖᓈᐙ ᐋᓃᓐ ᐙᓂ ᐃᔑᐌᐸᓂᓂᒃ ᐅᐅᒫ ᒥᓯᐌ ᐊᑮᕽ᙮ ᑮᔑᑯᕽ ᑲᔦ ᐁᔮᒪᑲᑭᓐ ᒣᔅᑲᐌᑖᑾᑭᓐ ᑕᑯᔥᑯ ᐌᐱᓂᑳᑌᐗᓐ᙮

ᒦᑕᔥ ᐃᐃ ᐊᐲ ᐃᓂᓂ ᐅᑯᓯᓴᓐ ᑫᓈᑯᓯᓂᒡ ᐃᐃᒫ ᐗᑸᕽ ᒋᐱ ᐱᒥ ᐊᔮᓂᒡ ᒋᐱ ᑭᑮᓂᒡ ᑭᒋ ᒪᔥᑲᐎᓰᐎᓐ, ᑲᔦ ᑕᔥ ᑭᒋ ᑭᑌᑖᑯᓯᐎᓐ᙮

ᐊᐲ ᐅᓄᐌᓂᐗᓐ ᒫᒌ ᐃᔑᓭᑭᓐ, ᒦ ᐃ ᐃᔑ ᐸᓯᑸᒃ ᐃᔥᐱᒥᕽ ᒋᐃᓈᐱᔦᒃ, ᐋᔕ ᐯᔓᓈᑾᓐ ᑭᐱᒫᒋᐃᑰᐎᓂᐙ᙮

ᒋᓴᔅ ᑕᔥ ᐅᑮᐐᑕᒪᐙᐞ ᐅᐅᐌᓂ ᐊᐌᒋᑫᐎᓐ: ᑲᓇᐙᐸᒥᒃ ᐊᐊ ᒦᓂᔖᑎᒃ ᐱᒃ ᑎᓄᐙᑎᒃ, ᐃᑭ ᑲᔦ ᑯᑕᒃ ᒥᑎᑰᒃ᙮

ᐊᐲ ᐁᐙᐸᒣᒀ ᐁᓵᑭᐸᑮᐙᒡ, ᒦ ᐃ ᐁᑭᑫᑕᒣᒃ ᐋᔕ ᐐᐸ ᐁᐐᓃᐱᕽ᙮

ᒦᑕᔥ ᐃᐃ ᐯᔑᑾᓐ, ᐊᐲ ᐊᓂ ᐙᐸᑕᒣᒃ ᐅᓄ ᐊᓂ ᐃᔑᓭᑭᓐ, ᒦ ᐃ ᒋᑭᑫᑕᒣᒃ ᐋᔕ ᐁᐯᔓᓈᑾᓂᓂᒃ ᑭᔐᒪᓂᑑ ᐅᑎᐯᒋᑫᐎᓐ᙮

ᑌᐺ ᐅᐌ ᑳᐃᓂᓇᑰᒃ, ᑳᐐᓐ ᓴ ᑕᒑᑭ ᓂᐳᓰᐗᒃ ᐅᑯ ᑳᐱᒫᑎᓯᐙᒡ, ᒦ ᐃ ᐋᔕ ᑲᑭᓇ ᒋᐃᔑᐌᐸᑭᓐ ᐅᓄ ᑳᐐᑕᒪᐎᓇᑰᒃ᙮

ᒥᓴᐙ ᑯ ᑮᔑᒃ, ᐊᑭ ᑲᔦ ᐃᔥᒀᓭᑭᓐ, ᓂᑎᑭᑐᐎᓇᓐ ᑕᔥ ᐐᓐ ᑳᐐᓐ ᐐᑳ ᑕᐃᔥᒀᓭᓯᓅᓇᓐ ᑳᔑ ᑌᐺᒪᑲᑭᓐ᙮

ᐊᔮᒀᒥᓯᒃ ᐅᓵᒻ ᒋᐅᑕᒣᑕᓯᐌᒃ ᑲᑮᐹᑎᓯᐎᓐ, ᐃᐃ ᑲᔦ ᒥᓂᑴᐎᓐ᙮ ᑫᑯ ᑲᔦ ᐅᓵᒣᑕᑫᒃ ᐅᐅ ᐊᑮᐎ ᐱᒫᑎᓯᐎᓐ, ᒫᑭᔖ ᐃᐃᐌ ᑳᐐᐃᔑ ᑮᔑᑲᒃ ᑭᑲ ᑴᑕᑐ ᐅᑎᓯᑯᒻ, ᒋᑳᒋᑎᓂᑯᔦᒃ ᑖᐱᔥᑰ ᐗᓃᐃᑲᓐ᙮

ᑲᑭᓇ ᓴᑯ ᐯᒫᑎᓯᐙᒡ ᐅᐅᒫ ᐊᑮᕽ ᐁᔮᐙᒡ ᐅᑲᐅᑎᓯᑯᓈᐙ ᐅᐅᐌᓂ᙮

ᐊᔕᐙᐱᒃ, ᒨᔕᒃ ᑲᔦ ᒋᐊᓇᒥᐋᔦᒃ ᒋᐊᔮᔦᒃ ᒪᔥᑲᐎᓰᐎᓐ ᒋᑲᔥᑭᑑᔦᒃ ᒋᔖᐳᔥᑲᒣᒃ ᐃᐃ ᑲᑭᓇ ᑳᐐᐃᔑᐌᐸᒃ, ᒋᑲᔥᑭᑑᔦᒃ ᑲᔦ ᒋᓃᐸᐎᔦᒃ ᐁᓈᓴᒦᓂᒡ ᐃᓂᓂ ᐅᑯᓯᓴᓐ, ᑮᐃᑭᑐ᙮

ᐁᑕᓱ ᑮᔑᒃ ᑕᔥ ᒋᓴᔅ ᑮᑭᑭᓄᐊᒫᑫ ᐃᐃᒫ ᑭᒋᐊᓇᒥᐁᐎᑲᒥᑯᕽ᙮ ᐁᐊᓂ ᐅᓈᑯᔑᓂᓂᒃ ᑕᔥ ᐊᑯ ᑮᒫᒑ ᐁᑮᐊᐎ ᑎᐱᑭᔑᒡ ᐁᔑ ᐃᔥᐸᑎᓈᓂᒃ ᐋᓬᐃᑉ ᑭᑎᑳᓈᑎᑯᑳᕽ ᑳᐃᔑᓂᑳᑌᒃ᙮

ᐐᐸ ᑕᔥ ᐁᑭᔐᐹᐗᑲᓂᓂᒃ ᑲᑭᓇ ᐯᒫᑎᓯᐙᒡ ᑮᐃᔖᐗᒃ ᑭᒋᐊᓇᒥᐁᐎᑲᒥᑯᕽ ᐁᐐ ᐱᓯᑕᐙᐙᒡ ᒋᓴᓲᓐ᙮

ᐋᔕ ᐁᐊᓂ ᐯᔓᓈᑾᒃ ᐃᐃᐌ ᑳᑮᓂᑖ ᒫᐗᒋᐃᑎᓈᓂᐗᕽ ᑮᐊᒧᓐᒡ ᑳᐅᐱᓯᑲᓂᐎᓯᒃ ᐸᑴᔑᑲᓐ, ᒦ ᐃ ᑳᐃᔑᓂᑳᑌᒃ ᐱᒫᒋᐃᑰᐎ ᐐᑾᑎᐎᓐ᙮

ᑭᒋᐊᓇᒥᐁᐎᑭᒫᒃ, ᐃᑭ ᑲᔦ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ ᐅᑮ ᑯᓵᐙᐞ ᐯᒫᑎᓯᓂᒡ, ᒦᑕᔥ ᑳᐃᔑᑲᑴ ᒥᑲᒧᐙᒡ ᐋᓃᓐ ᐃᓇᑫ ᑫᔑ ᑮᒨᒋ ᓂᓵᐙᒡ ᒋᓴᓲᓐ᙮

ᒦᑕᔥ ᓭᑕᓇᓐ ᑳᑮ ᐲᑎᑫᔥᑳᑯᒡ ᒎᑕᔅ ᐃᔅᑫᕒᐃᔭᑦ ᑳᐃᓂᓐᒡ, ᑫᐐᓐ ᐄᑐᒃ ᒎᑕᔅ ᐯᔑᒃ ᑮᑎᓄᐎ ᑳᑮᒥᑖᔑ ᓃᔑᓂᒡ 12 ᑭᑭᓄᐊᒪᐙᑲᓇᐞ᙮

ᒦᑕᔥ ᒎᑕᔅ ᑳᐃᔑ ᒫᒑᒡ ᐁᑮᐊᐎ ᑲᓅᓈᒡ ᑭᒋᐊᓇᒥᐁᐎᑭᒫᐞ, ᐃᐃ ᑲᔦ ᔑᒫᑲᓂᔕᓐ ᑳᓂᑖ ᑲᓇᐌᑕᒥᓂᒡ ᒋᐊᓇᒥᐁᐎᑲᒥᑯᓂ ᑭ ᐋᓃᓐ ᑫᔑ ᐐᒋᐋᒡ ᒋᑳᒋᑎᓈᓂᒡ ᒋᓴᓲᓐ᙮

ᐐᑫ ᓴ ᑮᒥᓉᑕᒨᐞ, ᒦᔥ ᑳᑮᐊᔓᑕᒫᑯᒡ ᐁᐐᒦᓂᑯᒡ ᔔᓂᔮᓐ᙮

ᒎᑕᔅ ᑕᔥ ᐅᑮ ᓇᐁᑖᓐ, ᒦᔥ ᑳᐃᔑ ᒫᒌ ᓈᓈᑲᒋᐋᒡ ᐋᓃᓐ ᐊᐲ ᑫᓇᐃᓭᓂᒃ ᒋᑳᒋᑎᓈᒡ ᒋᓴᓲᓐ, ᐊᐲ ᑲᔦ ᐁᐐᒪᒥᔑᒫᒡ ᒋᑭᑫᑕᓯᓂᒃ ᐯᒫᑎᓯᓂᒡ᙮

ᑮᐱ ᐅᒋᒋᓭ ᐁᑮᐃᔑ ᑮᔑᑲᒃ ᐊᐲ ᑮᐊᒧᓐᒡ ᑳᐅᐱᓯᑲᓂᐎᓯᒃ ᐸᑴᔑᑲᓐ᙮ ᒦ ᐄᑐᒃ ᐃᐃ ᐊᐲ ᑳᑮᓂᓯᑣ ᒫᓇᒑᓂᔐᓴᒃ ᑫᐋᐸᑎᓯᐙᒡ ᐱᒫᒋᐃᑰᐎ ᐐᑾᑎᕽ᙮

ᒋᓴᔅ ᑕᔥ ᐅᑮᐃᔑᓂᔕᐙᓐ ᐲᑕᕒᐆᓐ ᐃᓂ ᑲᔦ ᒞᓇᓐ ᐅᐅ ᐁᑮᐃᓈᒡ: ᒫᒑᒃ, ᐊᑕᐎ ᑾᔮᒋᑑᒃ ᐱᒫᒋᐃᑰᐎ ᐐᑾᑎᐎᓐ ᑫᑕᔑ ᐐᓯᓂᔭᕽ, ᐅᑮᐃᓈᐞ᙮

ᐋᑎ ᐁᔑ ᐊᑕᐌᑕᒪᓐ ᒋᐃᔑ ᑾᔮᒋᑑᔮᕽ? ᐅᑮᐃᑰᐞ᙮

ᒦᔥ ᑳᐃᓈᒡ: ᐊᐲ ᐊᓂ ᐲᑎᑫᔥᑳᔦᒃ ᑭᒋ ᐆᑌᓇ ᑭᑲ ᐙᐸᒫᐙ ᒋᒣᒀᔥᑲᐌᒃ ᐃᓂᓂ ᐄᓴᓐ ᐁᑮ ᓈᑕᐃᐲᒡ ᐊᑑᐹᓂᕽ᙮ ᑭᑲ ᐱᒥᓂᔕᐙᐙ ᑕᔥ ᐋᑎ ᐱᑯ ᐁᓂᔑ ᐲᑎᑫᒡ ᐙᑳᐃᑲᓂᕽ᙮

ᐅᐅᐌ ᑭᑲᐃᓈᐙ: ᐅᑭᑭᓄᐊᒫᑫ ᑭᑎᒃ, ᐋᑎ ᒪᐗᑎᔑᐌᐎᑲᒥᒃ ᐁᔮᒃ ᑫᑕᔑ ᐐᒋ ᐐᓯᓃᒪᒀ ᓂᑭᑭᓄᐊᒪᐙᑲᓇᒃ ᐁᐐ ᐱᒫᒋᐃᑰᐎ ᐐᑾᑎᔮᕽ, ᒦ ᐃ ᑫᐃᓀᒃ᙮

ᑭᑲ ᐙᐸᑕᐃᑯᐙ ᐃᔥᐱᒥᕽ ᐁᔮᓂᒃ ᐁᒥᒑᓂᒃ ᒪᐗᑎᔑᐌᐎᑲᒥᒃ ᑲᑭᓇ ᑫᑰᓐ ᐃᐃᒫ ᐁᑾᔮᑕᑌᓂᒃ᙮ ᒦᑕᔥ ᐃᐃᒫ ᑫᔑ ᑾᔮᑕᑑᔦᒃ ᑲᑭᓇ ᑫᑰᓐ, ᐅᑮᐃᓈᐞ᙮

ᒦᑕᔥ ᑭᑭᓄᐊᒪᐙᑲᓇᒃ ᑳᐃᔑ ᒫᒑᐙᒡ ᐁᑮᐃᔑ ᒥᑲᒧᐙᒡ ᑲᑭᓇ ᑫᑰᓐ ᐃᐃᐌᓂ ᒋᓴᓲᓐ ᑳᑮᐃᔑ ᐐᑕᒫᑯᐙᒡ᙮ ᒦᔥ ᐃᐃᒫ ᑳᑕᔑ ᑾᔮᒌᐙᒡ ᑫᑕᔑ ᐱᒫᒋᐃᑰᐎ ᐐᑾᑎᐙᒡ᙮

ᐊᐲ ᑎᐸᐃᑲᓐ ᐁᐃᔑᓭᓂᒃ ᒋᐐᓯᓂᓈᓂᐗᕽ ᒋᓴᔅ ᑮᐅᓈᑯᔑᓐ ᐃᔑ ᐅᐱᒣ ᑕᐸᓯ ᑑᐳᐎᓈᑯᕽ᙮ ᐅᑎᔑᓂᔕᐙᑲᓇᐞ ᑲᔦ ᑮᐅᓇᐱᐗᐞ᙮

ᒦᑕᔥ ᑳᐃᓈᒡ: ᒫᐗᒡ ᐁᑮᐊᑕᐌᑕᒫᓐ ᐅᐅᐌ ᒋᐐᒋ ᐐᓯᓃᒥᓇᑰᒃ ᐅᐅᐌ ᑳᑑᑕᒪᕽ ᐱᒫᒋᐃᑰᐎ ᐐᑾᑎᐗᓐ ᒋᑆ ᑲᒀᑕᑭᑑᔮᓐ᙮

ᑌᐺ ᐅᐌ ᑳᐐᑕᒪᐎᓇᑰᒃ, ᑳᐐᓐ ᒦᓇᐙ ᐅᐅ ᓂᑲᐃᔑ ᐐᓯᓂᓰ ᑳᐐᑾᑎᔭᕽ ᐹᓂᒫ ᑮᑎᐱ ᑮᔑᓈᑾᓂᓂᒃ ᑭᔐᒪᓂᑑ ᐅᑎᐯᒋᑫᐎᓐ᙮

ᒦᑕᔥ ᒋᓴᔅ ᑳᑮᐅᑖᐱᓇᕽ ᒥᓂᒀᑲᓐ ᐁᑮᓇᓈᑯᒫᒡ ᑭᔐᒪᓂᑑᓐ ᑲᔦ ᑕᔥ ᐁᑮᐃᑭᑐᒡ: ᐅᑖᐱᓇᒧᒃ ᐅᐅᐌ ᑳᑕᔑᔦᒃ ᒋᐅᒋ ᒫᒪᐎ ᒥᓂᑴᔦᒃ᙮

ᒦᔥ ᐁᔑ ᐐᑕᒪᐎᓇᑰᒃ, ᑳᐐᓐ ᒦᓇᐙ ᓂᑲᐅᒋ ᒥᓂᑴᓰ ᐅᐅ ᑎᓄ ᔔᒥᓈᐳ ᐹᓂᒫ ᑭᔐᒪᓂᑑ ᐅᑎᐯᒋᑫᐎᓐ ᐱᑕᑯᔑᓅᒪᑲᓂᓂᒃ᙮

ᐅᑮᐅᑖᐱᓈᓐ ᑲᔦ ᐸᑴᔑᑲᓇᓐ ᐁᑮᓇᓈᑯᒧᒡ ᐁᑮ ᐸᑴᐱᓈᒡ ᐁᑮᒫᒦᓈᒡ ᒋᐊᒸᓂᒡ ᐁᑮᐃᓈᒡ: ᒦ ᐅᐌ ᓃᐎᔭᐤ ᑳᐸᑭᑎᓇᒫᑰᔦᒃ᙮ ᒨᔕᒃ ᐅᐅ ᐃᔑᒋᑫᒃ ᒋᒫᒥᑲᐎᓄᑕᐎᔦᒃ᙮

ᑳᐃᔥᒀ ᐐᓯᓂᐙᒡ ᑕᔥ, ᒦ ᐃ ᐯᔑᑾᓐ ᒋᓴᔅ ᑳᐃᔑ ᒦᓈᒡ ᐃᐃ ᒥᓂᒀᑲᓐ ᐁᑮᐃᑭᑐᒡ: ᒦ ᐅᐌ ᒥᓂᒀᑲᓐ ᑭᔐᒪᓂᑑ ᐅᑑᔥᑭ ᐊᔓᑕᒫᑫᐎᓐ ᓂᒥᔅᑸᒥᕽ ᑳᐅᒋ ᐋᔩᒋᓈᑾᒃ ᑳᓰᑭᓂᑳᑌᒃ ᑮᓇᐙ ᐅᒋ᙮

ᐃᓇᔥᑫ ᑭᐐᒋ ᐐᓯᓃᒥᑯᓈᓐ ᐅᐅᒫ ᑑᐳᐎᓈᑯᕽ ᐊᐊ ᑳᐐᒪᒥᔑᐃᒡ᙮

ᐃᓂ ᓴ ᐃᓂᓂ ᐅᑯᓯᓴᓐ ᑕᐃᔑᓭᐗᓐ ᑖᐱᔥᑰ ᑭᔐᒪᓂᑑ ᑳᑮᐃᔑ ᐅᓀᑕᕽ᙮ ᐋᐱᒋ ᑕᔥ ᑕᑭᒋ ᑰᐹᒋᓭᐗᓐ ᐃᓂᐌᓂᐗᓐ ᑫᒪᒥᔑᒥᑯᒡ᙮

ᒦᑕᔥ ᑳᑮᒫᒌ ᑲᑴᒋᑎᓂᒡ ᑳᓂᑲ ᐊᐌᓀᓐ ᐅᐅᐌ ᑫᐃᔑᒋᑫᑴᓐ᙮

ᒦᑕᔥ ᐅᑭᑭᓄᐊᒪᐙᑲᓇᐞ ᐁᑮᒫᒌ ᑲᑲᓅᓂᑎᓂᒡ ᐊᐌᓀᓐ ᐊᐊ ᑳᑕᔑᓂᒡ ᒫᐗᒡ ᑫᑭᒋ ᐃᓀᑖᑯᓯᓂᒡ᙮

ᒦᑕᔥ ᐅᐅ ᒋᓴᔅ ᑳᐃᓈᒡ: ᐃᑭ ᓴ ᑳᑎᐯᓂᒫᐙᒡ ᐯᒫᑎᓯᓂᒡ ᑳᑭᑫᓂᒫᓯᓂᒃ ᑭᔐᒪᓂᑑᓐ, ᐐᑫ ᐅᑎᐯᓂᒫᐙᐞ, ᐃᑭ ᑕᔥ ᑳᐅᑭᒫᑲᑖᑫᐙᒡ ᐃᔑᓂᑳᓂᑎᓱᐗᒃ ᑳᒥᓄᓭᐃᐌᐙᒡ᙮

ᑮᓇᐙ ᑕᔥ ᐐᓐ ᑳᐐᓐ ᐃᐃ ᑭᑲ ᐃᔑᒋᑫᓰᒻ᙮ ᑌᑾᒡ ᓴ ᑮᓐ ᑫᒋ ᐃᓀᑖᑯᓯᔭᓐ ᒋᑮᐃᓀᑖᑯᓯᔭᐸᓐ ᑖᐱᔥᑰ ᒫᐗᒡ ᑳᐅᔥᑳᑎᓯᒡ᙮ ᐊᐊ ᑕᔥ ᑲᔦ ᑳᑎᐯᓂᒥᐌᒡ ᒋᑮᐃᓀᑖᑯᓯᐸᓐ ᑖᐱᔥᑰ ᑳᐸᒦᑖᑫᒡ᙮

ᐊᐌᓀᓐ ᑕᔥ ᓇᐗᒡ ᑫᒋ ᐃᓀᑖᑯᓯᒡ? ᐊᐊ ᓇ ᑳᓇᒪᑕᐱᒡ ᑳᐐ ᐐᓯᓂᒡ, ᑯᒫ ᑲᔦ ᐊᐊ ᑳᐸᒦᑖᑫᒡ? ᐊᐊᐌ ᐄᑐᒃ ᑳᓇᒪᑕᐱᒡ᙮ ᐁᐐᒌᐎᓇᑰᒃ ᑕᔥ ᓃᓐ ᑭᐸᒦᑕᐎᓂᓂᒻ᙮

ᑮᓇᐙ ᑕᔥ ᑳᐱ ᐐᒌᐎᔦᒃ ᐃᐃ ᑲᑭᓇ ᑳᐱᔑ ᑲᑴᒋᐃᑰᔮᓐ᙮

ᑖᐱᔥᑰ ᓅᔅ ᑳᑮᐃᔑ ᒦᔑᒡ ᒋᐅᑭᒫᑲᑖᑫᐗᒃ, ᒦᔥ ᐯᔑᑾᓐ ᑫᑮᓇᐙ ᐁᔑ ᒦᓂᓇᑰᒃ᙮

ᑮᓇᐙ ᑕᔥ ᑭᑲᑕᔑ ᐐᓯᓂᒻ, ᑭᑲᑕᔑ ᒥᓂᑴᒻ ᑲᔦ ᓂᑑᐳᐎᓈᑯᕽ ᑳᑕᔑ ᑎᐯᒋᑫᔮᓐ᙮ ᑮᓇᐙ ᑭᑲᔑ ᐊᐱᒻ ᑭᒋᐅᑭᒫᐗᐱᐎᓂᕽ ᒋᐅᓈᑯᓀᒀ ᒥᑖᔑ ᓃᔑᓐ 12 ᑳᑕᓶᐙᓇᑭᓯᐙᒡ ᐃᔅᕒᐃᔭᓬᐊᒃ ᐯᒫᑎᓯᐙᒡ᙮

ᓵᐃᒪᓐ, ᓵᐃᒪᓐ ᐱᓯᑕᐎᔑᓐ, ᓭᑕᓐ ᐅᔕ ᑮᑲᑴᑗ, ᑮᐸᑭᑎᓇᒪᐙ ᑲᔦ ᐁᐐ ᑯᒋᐃᓀᒃ ᑖᐱᔥᑰ ᑭᑎᑫᐎᓂᓂ ᑳᔑ ᓀᓈᐎᓇᕽ ᐌᓂᔑᔑᓂᓂᑭᓐ, ᑳᒪᒋᓈᑾᓂᓂᑭᓐ ᑲᔦ ᐸᑴᔑᑲᓂᒥᓇᓐ᙮

ᓵᐃᒪᓐ, ᐋᔕ ᑕᔥ ᑭᑮᐊᓇᒥᐁᑕᒪᐎᓐ, ᒋᑆᓇᐎᒋᑫᒪᑲᓯᓄᒃ ᑭᑌᐺᑕᒧᐎᓐ᙮ ᐊᐲ ᑕᔥ ᑲᔦ ᐱᑮᐌᓄᑕᐎᔭᓐ, ᐐᒋᐋᑲᓐ ᑭᐐᒋ ᑭᑭᓄᐊᒪᐙᑲᓇᒃ ᒋᒪᔥᑲᐎᓰᐙᒡ᙮

ᐅᐅ ᑕᔥ ᐲᑕᕒ ᑮᐃᔑ ᓇᑴᑕᒻ: ᑌᐯᒋᑫᔭᓐ, ᓂᑲ ᑾᔮᒌ ᐅᔕ ᐁᐐᐃᔑ ᐐᒌᐎᓈᓐ ᑭᐸᐅᑏᐎᑲᒥᑯᕽ, ᑲᔦ ᑕᔥ ᓂᐳᐎᓂᕽ, ᑮᐃᑭᑐ᙮

ᒦᑕᔥ ᒋᓴᔅ ᑳᐃᓈᒡ: ᑭᐐᑕᒪᐎᓐ ᐲᑕᕒ, ᒋᑆ ᓅᑖᑯᓯᒡ ᐋᐯ ᐊᐹᑲᐋᒀᓐ ᓅᑯᒻ ᑳᑎᐱᑲᒃ, ᒦ ᐃ ᐋᔕ ᓂᓯᕽ 3 ᒋ ᐃᑭᑐᔭᓐ ᐁᑭᑫᓂᒥᓯᐗᓐ, ᐅᑮᐃᓈᓐ᙮

ᒦᑕᔥ ᑳᐃᔑ ᑲᑴᒋᒫᒡ ᑲᑭᓇ: ᐊᐲ ᑳᑮᒫᒋᓂᔕᐅᓇᑰᑭᐸᓐ ᐌᑎ ᐅᑖᓈᕽ, ᑮᒫᒌᑑᓯᐌᑭᐸᓐ ᔔᓂᔮᐗᔥ, ᐸᔥᑴᐗᔥ ᑲᔦ, ᐃᓂ ᑲᔦ ᒪᑭᓯᓇᓐ, ᑫᑰᓐ ᐃᓇ ᑭᑮᓅᑌᓭᒻ? ᑳᐐᓐ ᑫᑰᓐ ᓂᑮᓅᑌᓭᓰᒥᓐ, ᐅᑮᐃᑰᐞ᙮

ᒦᑕᔥ ᑳᐃᓈᒡ: ᓅᑯᒻ ᐃᑕᔥ ᐊᐌᓀᓐ ᐃᑯ ᐁᔮᑴᓐ ᔔᓂᔮᐗᔥ, ᑯᒫ ᑲᔦ ᐸᔥᑴᐗᔥ ᐱᓵᓐ ᐅᑲ ᒫᒌᑑᓐ᙮ ᐊᐌᓀᓐ ᐃᑕᔥ ᐃᑯ ᐁᔮᓯᒃ ᐸᔑᐸᐃᑫᐎᑯᒫᓐ, ᐅᑲ ᐊᑖᐙᑫᓐ ᐅᑲᔥᑮᑮᐎᓐ ᒋᐊᑖᐌᒡ ᐸᔑᐸᐃᑫᐎᑯᒫᓐ᙮

ᒦᑕᔥ ᐁᔑᐲᐃᑳᑌᒃ: ᑫᐐᓐ ᐄᑐᒃ ᑮᐃᓇᑭᑎᓱ ᐁᐐᒌᐙᒡ ᐅᒪᒋᑑᑕᒨᐞ᙮ ᒦᔥ ᐁᔑ ᐐᑕᒪᐎᓇᑰᒃ ᓃᓐ ᐃᐃ ᑳᑕᔑᒥᑰᔮᓐ ᒋᑎᐱᓭᒃ᙮ ᐃᐃ ᓴ ᑌᐺ ᑳᔑ ᑕᔑᒥᑰᔮᓐ ᒦ ᐃ ᐋᓴ ᒋᒨᔥᑭᓀᓭᒃ᙮

ᒦᑕᔥ ᑳᐃᑯᒡ ᐅᑭᑭᓄᐊᒪᐙᑲᓇᐞ: ᑌᐯᒋᑫᔭᓐ, ᐃᓇᔥᑫ ᐲᓈᐱᓐ᙮ ᐃᓇ ᐅᓄ ᓃᔑᓐ ᐸᔑᐸᐃᑫᐎᑯᒫᓇᓐ, ᐅᑮᐃᑰᐞ᙮ ᒦ ᐃ ᑌᒥᓂᒃ, ᑮᐃᑭᑐ᙮

ᒋᓴᔅ ᑕᔥ ᑮᐊᓂ ᒫᒑ ᐁᑮᐃᔖᒡ ᑳᑮᓂᑖ ᐃᔖᐙᒡ ᑳᔑ ᐃᔥᐸᑎᓈᓂᒃ ᐋᓬᐃᑉ ᑭᑎᑳᓈᑎᑯᑳᕽ, ᐅᑭᑭᓄᐊᒪᐙᑲᓇᐞ ᐁᐐᒌᐎᑯᒡ᙮

ᐊᐲ ᐌᑎ ᑳᑕᑯᔑᕽ ᑳᑮᓂᑖ ᐃᔖᐙᒡ, ᐅᐅ ᐅᑮᐃᓈᐞ ᐅᑭᑭᓄᐊᒪᐙᑲᓇᐞ: ᐊᓇᒥᐋᒃ ᒋᓈᓯᑳᑯᓯᐌᒃ ᑲᑴᒋᐃᑰᐎᓐ᙮

ᒦᑕᔥ ᐐᓐ ᑫᔮᐱ ᐊᐗᔑᒣ ᑮᐊᓂ ᒫᒑ ᐁᑮᓇᑲᓈᒡ ᐅᑭᑭᓄᐊᒪᐙᑲᓇᐞ᙮ ᐁᑯ ᑌᐱ ᐌᐱᓂᑳᓂᐗᕽ ᒥᓂᒃ ᑮᐃᔖ, ᐁᑮᐅᒋᒌᑾᓇᐱᑖᒡ ᐁᑮᐊᓇᒥᐋᒡ:

ᓅᔅ, ᑮᔥᐱᓐ ᓴ ᐃᔑᓈᑾᑭᐸᓐ, ᑕᑲ ᐅᑖᐱᓇᒪᐎᔑᓐ ᐅᐅ ᒥᓂᒀᑲᓐ ᑳᐐᐃᔑ ᑲᒀᑕᑭᑑᔮᓐ᙮ ᑳᐐᓐ ᓴ ᓃᓐ ᐁᔑ ᒥᓴᐌᑕᒫᓐ, ᑮᓐ ᓴ ᐁᔑ ᐊᑕᐌᑕᒪᓐ ᑕᐃᔑᒋᑳᓂᐗᓐ, ᑮᐃᑭᑐ᙮

ᐁᒐᓬᐊᐗᓐ ᑕᔥ ᑭᒋᑮᔑᑯᕽ ᐅᑮᐱ ᐅᒋ ᓈᓯᑳᑰᓐ ᐁᒦᓂᑯᒡ ᓰᑐᓂᑰᐎ ᒪᔥᑲᐎᓰᐎᓐ᙮

ᐐᑫ ᓴ ᑮᑭᒋ ᐐᓴᑫᑕᒻ ᐁᑮᐊᓇᒥᐋᒡ ᑌᐺ ᐱᑯ, ᒦᔥ ᐅᑖᐺᓱᐎᓐ ᑳᑮ ᐱᒫᔑᑲᐎᓂᓂᒃ ᑖᐱᔥᑰ ᒥᔅᑶ ᑳᐸᑭᑲᐎᕽ ᐊᑮᑳᕽ᙮

ᑮᐸᓯᑸ ᑕᔥ ᑳᐃᔥᒀ ᐊᓇᒥᐋᒡ ᐁᑮᐃᔖᒡ ᐁᔑ ᐊᔮᓂᒡ ᐅᑭᑭᓄᐊᒪᐙᑲᓇᐞ᙮ ᐅᑮᐅᑎᓵᐞ ᐁᓂᐹᓂᒡ, ᐋᓃᔥ ᑮᐊᔦᑯᓯᐗᐞ ᑳᐊᐲᒋ ᒥᒋᓇᐌᓯᓂᒡ᙮

ᒦᔥ ᑳᐃᓈᒡ: ᐌᑯᓀᓐ ᐌᒋ ᓂᐹᔦᒃ? ᐗᓂᔥᑳᒃ, ᐊᓇᒥᐋᒃ ᒋᓈᓯᑳᑯᓯᐌᒃ ᑲᑴᒋᐃᑰᐎᓐ᙮

ᒣᒀ ᑕᔥ ᒋᓴᔅ ᐁᑲᑮᑭᑐᒡ, ᑮᐱᐅᒋ ᑕᑯᔑᓅᐞ ᐁᐹᑏᓄᓂᒡ ᐊᐎᔭᐞ ᒎᑕᔅ ᐁᔑᓂᑳᓱᓂᒡ ᐯᔑᒃ ᑳᑮᒥᑖᔑ ᓃᔑᓂᒡ ᐅᑭᑭᓄᐊᒪᐙᑲᓇᓐ ᐁᑮ ᐲᓈᓂᒡ᙮ ᒦᐗᓐ ᑕᔥ ᐃᓂ ᒋᓴᔅ ᑳᑮᐅᒌᒥᑯᒡ᙮

ᒦᑕᔥ ᒋᓴᔅ ᑳᐃᓈᒡ: ᒎᑕᔅ, ᑭᑑᒌᒥᒫᓐ ᐃᓇ ᐃᓂᓂ ᐅᑯᓯᓴᓐ ᒋᒪᒥᔑᐃᒪᒡ?

ᐊᐲ ᑕᔥ ᑭᑭᓄᐊᒪᐙᑲᓇᒃ ᐁᐙᐸᑕᒧᐙᒡ ᐋᓃᓐ ᐙᐃᔑᓭᓂᒃ ᒦ ᐃ ᑳᐃᑭᑐᐙᒡ: ᑌᐯᒋᑫᔭᓐ, ᓂᐸᔑᐸᐃᑫᐎᑯᒫᓂᓈᓂᓐ ᐃᓇ ᓂᑲ ᐋᐸᒋᑑᒥᓐ ᒋᒦᑳᓱᔮᕽ᙮

ᐯᔑᒃ ᑕᔥ ᒋᓴᔅ ᐅᑭᑭᓄᐊᒪᐙᑲᓇᓐ ᐅᑮ ᐸᑭᑌᐙᓂ ᐃᓂ ᐯᔑᒃ ᐅᑕᓄᑮᐋᑲᓂᓂ ᐃᓂ ᒫᐗᒡ ᑭᒋᐊᓇᒥᐁᐎᑭᒫᓐ, ᒦᑕᔥ ᐁᑮ ᑮᔥᑭ ᐌᐸᑲᓈᑕᒪᐙᒡ ᐅᑕᐗᑳᓂ᙮

ᒋᓴᔅ ᑕᔥ ᑮᐃᑭᑐ: ᒦ ᐃ ᒥᓂᒃ! ᒦᔥ ᑳᐃᔑ ᓵᒥᓈᒡ ᐅᑕᐗᑳᓃᕽ ᐃᓂ ᐊᓄᑮᐋᑲᓇᓐ ᐁᑮᒥᓍᒋᐋᒡ᙮

ᒦᑕᔥ ᒋᓴᔅ ᑳᐃᓈᒡ ᑭᒋᐊᓇᒥᐁᐎᑭᒫᐞ, ᐃᐃ ᑲᔦ ᑫᓇᐌᑕᒥᓂᒡ ᑭᒋᐊᓇᒥᐁᐎᑲᒥᒃ, ᐃᐃ ᑕᔥ ᑲᔦ ᑳᓃᑳᓀᑖᑯᓯᓂᒡ ᑳᑮᐱ ᓈᓯᑳᑯᒡ: ᓃᓐ ᐃᓇ ᐅᑮᒨᒋᔥᒃ, ᐁᐲᔖᔦᒃ ᐁᐱ ᑭᑮᔦᒃ ᐸᔑᐸᐃᑫᐎᑯᒫᓇᓐ, ᐃᓂ ᑲᔦ ᐸᑭᑌᐃᑲᓈᑎᑰᓐ?

ᐁᑕᓱ ᑮᔑᒃ ᐄᑐᒃ ᑭᑮᐐᒌᐎᓂᓂᒻ ᑭᒋᐊᓇᒥᐁᐎᑲᒥᑯᕽ, ᑳᐐᓐ ᑕᔥ ᑭᑮ ᐸᐹᒣᓂᒥᓰᒻ᙮ ᒦᑕᔥ ᐅᐅᐌ ᑮᓇᐙ ᑭᑎᐸᐃᑲᓂᐙ, ᐊᐲ ᑳᑲᔥᑮ ᑎᐱᑲᒃ ᑮᒫᒌ ᑎᐯᒋᑫᒪᑲᒃ᙮

ᒦᔥ ᑳᑮᐅᑖᐱᓈᐙᒡ ᒋᓴᓲᓐ ᐁᑮᐃᔑᐎᓈᐙᒡ ᐅᐙᑳᐃᑲᓂᓃᕽ ᒫᐗᒡ ᑭᒋᐊᓇᒥᐁᐎᑭᒫᓐ᙮ ᐲᑕᕒ ᑕᔥ ᓇᐗᒡ ᐃᑯ ᐙᓴ ᐅᑖᓈᕽ ᑮᐅᒋ ᐱᒥᓂᔕᐃᑫ᙮

ᐊᑾᒌᕽ ᑕᔥ ᑮᐴᑕᐌᐗᐞ ᒫᐗᒡ ᑭᒋᐊᓇᒥᐁᐎᑭᒫᓐ ᐅᐙᑳᐃᑲᓂᓃᕽ ᓈᐗᔭᐄ ᑳᔑ ᐙᑳ ᒣᓂᑲᓈᑰᓂᑳᑌᓂᒃ ᐁᑮᐙᑳᓇᐱᓂᒡ᙮ ᒦᔥ ᑫᐐᓐ ᐃᐃᒫ ᐲᑕᕒ ᑳᑕᑾᐱᒡ᙮

ᐯᔑᒃ ᑕᔥ ᐃᓂ ᐅᔥᑭᓃᑭᑴᐎ ᐊᓄᑮᐋᑲᓇᓐ ᐅᑮᐙᐸᒥᑰᓐ ᐃᐃᒫ ᐁᓇᒪᑕᐱᒡ ᒌᑭᔥᑯᑌ᙮ ᐌᐌᓂ ᐅᑮ ᑲᓇᐙᐸᒥᑰᓐ ᒦᔥ ᑳᐃᑭᑐᓂᒡ: ᐗᐊ ᓴ ᐃᓂᓂ ᑫᐐᓐ ᐅᑮᐐᒌᐙᓐ ᒋᓴᓲᓐ᙮

ᐲᑕᕒ ᑕᔥ ᑮᐋᓉᑕᒻ: ᐃᑴ, ᑳᐐᓐ ᐅᔕ ᓂᑭᑫᓂᒫᓰ, ᐅᑮᐃᓈᓐ᙮

ᓈᓈᑫ ᑕᔥ ᐁᐊᓂ ᐃᔑᓭᒃ ᐃᓂᓂᐗᓐ ᐲᑕᕒ ᐅᑮᐙᐸᒥᑰᓐ ᐁᑮᐃᑯᒡ: ᑫᑮᓐ ᐄᑐᒃ ᐯᔑᒃ ᑳᑎᓄᐎᔭᓐ᙮ ᒦᔥ ᐲᑕᕒ ᑳᐃᓈᒡ: ᐃᓂᓂ, ᑳᐐᓐ ᓃᓐ ᓂᑖᐎᓰ!

ᓈᓈᑫ ᑕᔥ ᐯᔑᑯ ᑎᐸᐃᑲᓐ ᐁᐃᔑᓭᓂᒃ ᑯᑕᒃ ᐃᓂᓂᐗᓐ ᑮᑲᑴ ᑌᐺᐗᓐ ᐁᑮᐃᑭᑐᓂᒡ: ᐗᐊ ᓴ ᐃᓂᓂ ᑫᐐᓐ ᐅᑮᐐᒌᐙᓐ ᒋᓴᓲᓐ, ᑫᐐᓐ ᐄᑐᒃ ᑳᓬᐊᓬᐄᐎᓂᓃᐎ !

ᒦᑕᔥ ᑳᐃᔑ ᓇᑴᑕᐙᒡ: ᑳᐐᓐ ᑲᓇᑫ ᓂᑭᑫᑕᓰᓐ ᐃᐃ ᑳᑕᔑᑕᒪᓐ᙮ ᒣᒀ ᑕᔥ ᐁᑮᑭᑐᒡ, ᐋᐯ ᐋᐸᑲᐋᒀᓇᓐ ᑮᐅᒋ ᓅᑖᑯᓯᐗᓐ᙮

ᑳᑎᐯᒋᑫᒡ ᑮᑴᑭᑳᐸᐎ ᐁᑮ ᑲᓇᐙᐸᒫᒡ ᐱᑦᑕᕒᐆᓐ᙮ ᒦᑕᔥ ᐲᑕᕒ ᑳᑮᒫᒥᑲᐎᒡ ᑳᑮᐃᑯᒡ ᑳᑎᐯᒋᑫᓂᒡ: ᒋᑆ ᓅᑖᑯᓯᒡ ᓈᐯ ᐊᐹᑲᐋᒀᓐ ᓅᑯᒻ ᑳᑎᐱᑲᒃ, ᒦ ᐃ ᐋᔕ ᓂᓯᕽ 3 ᒋᐃᑭᑐᔭᓐ ᐁᑭᑫᓂᒥᓯᐗᓐ᙮

ᐲᑕᕒ ᑕᔥ ᑮᓵᑲᐊᒻ ᐁᑮᐊᐎ ᐐᓴᑲᑌᒧᒡ᙮

ᐃᑭ ᑕᔥ ᐃᓂᓂᐗᒃ ᑳᑮ ᑲᓇᐌᓂᒫᐙᒡ ᒋᓴᓲᓐ ᐅᑮᒫᒌ ᒦᑭᓱᒫᐙᓐ ᑲᔦ ᑕᔥ ᐁᑮ ᐸᐸᑭᑌᐙᐙᒡ᙮

ᐅᑮᐋᑲᐙᐸᐱᓈᐙᓐ ᐁᑮ ᑲᑴᒋᒫᐙᒡ: ᐊᑕᑭᑫᑕᓐ, ᐐᑕᒪᐎᔑᓈᒻ ᐊᐌᓀᓐ ᑳᐸᑭᑌᐅᒃ᙮

ᓃᐱᐗᐞ ᑲᔦ ᑯᑕᒃ ᑫᑰᓇᓐ ᐅᑮᐊᔨᓈᐙᓐ ᐁᑮᒫᓀᓂᒫᐙᒡ᙮

ᐊᐲ ᐁᐊᓂ ᑭᔐᐹᐗᑲᓂᓂᒃ ᑳᓃᑳᓂᓯᐙᒡ ᐅᓇᔓᐌᐎᓂᕽ, ᑭᒋᐊᓇᒥᐁᐎᑭᒫᒃ ᑲᔦ, ᐃᑭ ᑲᔦ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ ᑮᒫᒪᐎ ᓇᑭᔥᑯᑖᑎᐗᒃ᙮ ᒋᓴᔅ ᑕᔥ ᑫᐐᓐ ᐃᐃᒫ ᑮᐲᒋᑲᓂᐎ ᒋᐅᒋᔥᑲᐎ ᑳᐸᐎᑕᐙᒡ ᑳᓂᑖ ᐅᓈᑯᓂᑫᓂᒡ᙮

ᒦᔥ ᑳᐃᓈᐙᒡ: ᐐᑕᒪᐎᔑᓈᒻ, ᑮᓐ ᐃᓇ ᑭᔐᒪᓂᑑ ᑳᑮᐅᓈᐸᒫᒡ ᒋᐱᒫᒋᐃᐌᓂᒡ? ᒦᑕᔥ ᑳᐃᔑ ᓇᑴᑕᐙᒡ: ᑮᔥᐱᓐ ᐋᓇ ᐐᑕᒪᐎᓇᑰᒃ, ᑳᐐᓐ ᑭᑖ ᑌᐺᑕᐎᓰᒻ᙮

ᑲᑴᒋᒥᓇᑰᒃ ᑲᔦ ᑫᑰᓐ ᑳᐐᓐ ᑭᑖ ᓇᑴᑕᐎᓰᒻ᙮

ᐅᐅ ᑕᔥ ᐃᔑᐊᐲ ᒦ ᐃ ᒋᒫᒋᓭᒃ ᐃᓂᓂ ᐅᑯᓯᓴᓐ ᒋᐊᐱᓂᒡ ᐅᑭᒋᓂᑭᓃᕽ ᐃᓇᑫ ᑳᑭᒋ ᐃᓀᑖᑯᓯᓂᒡ ᑭᔐᒪᓂᑑᓐ, ᒋᓴᔅ ᑮᐃᑭᑐ᙮

ᒦᔥ ᑲᑭᓇ ᑳᐃᑭᑐᓂᒡ: ᑮᓐ ᐃᓇ ᑕᔥ ᑭᔐᒪᓂᑑ ᐅᑯᓯᓴᓐ? ᐅᐅ ᑕᔥ ᑮᐃᔑ ᓇᑴᑕᒻ: ᒦ ᐃ ᐁᑭᑐᔦᒃ ᓃᓐ ᐁᐋᐎᔮᓐ᙮

ᒦᑕᔥ ᑳᐃᑭᑐᓂᒡ: ᑳᐐᓐ ᐊᐎᔭᓐ ᐊᐗᔑᒣ ᐅᑖ ᑎᐹᒋᒥᑯᓰᓐ ᐋᓃᔥ ᑮᓇᐎᓐᑦ ᐃᑯ ᑭᓅᑕᐙᓈᓐ ᐋᓃᓐ ᐃᐃᐌᓂ ᑳᐃᑭᑐᒡ᙮

ᑲᑭᓇ ᓴ ᑳᐅᓇᔓᐌᐙᒡ ᒫᒪᐤ ᑮᐸᓯᑸᐗᒃ ᐁᑮᐃᔑᐎᓈᐙᒡ ᒋᓴᓲᓐ ᐁᓈᓴᒦᓂᒡ ᐹᐃᓬᐊᑑᓐ ᙮

ᒦᑕᔥ ᐃᐃᒫ ᑳᑮᒫᒌ ᐊᓈᒥᒫᐙᒡ ᒋᓴᓲᓐ ᐁᑮᐃᑭᑐᐙᒡ: ᓂᑮ ᑳᒋᑎᓈᓈᓐ ᐅᔕ ᐗᐊ ᐃᓂᓂ ᐁᐗᓂᒫᒡ ᑭᐱᒫᑎᓰᒥᓈᓂᐞ, ᐁᐐᑕᒫᑫᒡ ᒋᑎᐸᐊᒪᐙᓯᐎᒥᓐᒡ ᒫᐗᒡ ᑭᒋᐅᑭᒫᓐ ᑖᑭᔅ ᔔᓂᔮᓐ᙮ ᒦᑕᔥ ᑲᔦ ᐁᓍᓂᑎᓱᒡ ᐐᓐ ᐁᐋᐎᒡ ᑭᔐᒪᓂᑑᓐ ᑳᐅᓈᐸᒥᑯᒡ, ᐐᓐ ᐄᓴᓐ ᐁᑭᒋᐅᑭᒫᐎᒡ᙮

ᐹᐃᓬᐊᑦ ᑕᔥ ᐅᑮ ᑲᑴᒋᒫᓐ ᒋᓴᓲᓐ: ᑮᓐ ᐃᓇ ᐅᑭᒋ ᐅᑑᑭᒫᒥᐙᓐ ᒎᐗᒃ? ᒦᑕᔥ ᑳᐃᑯᒡ: ᒦ ᑾᑐᔕ ᐃ ᐁᑭᑐᔭᓐ᙮

ᒦᑕᔥ ᐹᐃᓬᐊᑦ ᑳᐃᓈᒡ ᑭᒋᐊᓇᒥᐁᐎᑭᒫᐞ ᐃᐃ ᑲᔦ ᑳᐹᑏᓄᓂᒡ: ᑳᐐᓐ ᑫᑰᓐ ᓂᒥᑲᒧᐙᓰᓐ ᑫᐅᒋ ᑎᐹᑯᓂᑎᐸᓐ ᐗᐊ ᐃᓂᓂ, ᑮᐃᑭᑐ᙮

ᐋᒋᑯ ᑕᔥ ᑮᑲᑴ ᔖᑰᓱᑖᑯᓯᐗᐞ ᐁᑮᐃᑭᑐᓂᒡ: ᐗᐊ ᐃᓂᓂ ᐁᔑ ᑭᑭᓄᐊᒫᑫᒡ ᑮᐅᒋ ᐅᒻᐺᑲᒥᑲᓂᓂ ᒥᓯᐌ ᒎᑏᔭ ᐊᑮᕽ᙮ ᐌᑎ ᓴ ᑮᐃᔑ ᒫᒋᑖ ᑳᓬᐊᓬᐃᐎ ᐊᑮᕽ ᐲᓃᔥ ᑕᔥ ᐅᐅᒫ ᐁᑮ ᐱᑕᑯᔑᕽ᙮

ᐊᐲ ᑕᔥ ᐹᐃᓬᐊᑦ ᑳᓅᑕᕽ ᐅᐅ ᑮᑲᑴᑗ: ᐊᐊᐌ ᐃᓂᓂ ᑳᓬᐊᓬᐄᕽ ᐃᓇ ᐅᒌ?

ᐊᐲ ᐹᐃᓬᐊᑦ ᑳᑭᑫᑕᕽ ᒋᓴᓲᓐ ᐁᐅᒌᓂᒡ ᐁᕒᐊᑕᓐ ᑳᐃᔑ ᑎᐯᒋᑫᓂᒡ, ᒦ ᐃ ᑳᑮᐃᔑᓂᔕᐙᒡ ᐁᔑ ᐊᔮᓂᒡ ᐁᕒᐊᑕᓐ᙮ ᒉᕒᐆᓴᓬᐊᒥᕽ ᐄᑐᒃ ᓇᐃᑖᒃ ᑮᐊᔮᐗᓐ ᐃᐃ ᐊᐲ᙮

ᐐᑫ ᑕᔥ ᐁᕒᐊᑦ ᑮᒥᓉᑕᒻ ᐁᐙᐸᒫᒡ ᒋᓴᓲᓐ᙮ ᐋᔕ ᑭᓉᔥ ᑮᐱᐅᒋ ᓈᓅᑕᒻ ᐁᑕᔑᒥᒥᓐᒡ, ᐅᑮᐃᔑ ᒥᓴᐌᑖᓐ ᑲᔦ ᐁᐐᐙᐸᒫᒡ ᒋᓴᓲᓐ ᒫᒪᑳᒋᒋᑫᓂᒡ᙮

ᓃᐱᐗᐞ ᐃᑕᔥ ᑫᑰᓇᓐ ᐅᑮ ᑲᑴᒋᒫᓐ, ᑳᐐᓐ ᑕᔥ ᒋᓴᓲᓐ ᐅᑮᐅᒋ ᓇᑴᑖᑯᓰᓐ᙮

ᐃᑭ ᑕᔥ ᑭᒋᐊᓇᒥᐁᐎᑭᒫᒃ ᐃᑭ ᑲᔦ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ ᑮᒪᑌ ᑳᐸᐎᐗᒃ ᐁᑮᑲᑴ ᒪᔥᑲᐎ ᐊᓈᒥᒫᐙᒡ᙮

ᒦᔥ ᐁᕒᐊᑦ ᐃᐃ ᑲᔦ ᐅᔑᒫᑲᓂᔒᒪᐞ ᐅᑮ ᐹᐱᓄᑕᐙᐙᓐ ᒋᓴᓲᓐ ᑲᔦ ᑕᔥ ᐁᑮ ᒦᑭᓱᒫᐙᒡ᙮ ᐅᑮ ᐱᓯᑲᒨᓈᐙᓐ ᑲᔦ ᒫᐗᒡ ᐌᓂᔑᔑᓂᓂᒃ ᑲᔥᑮᑮᐎᓐ᙮ ᒦᔥ ᑳᐃᔑ ᑮᐌᓂᔕᐙᐙᒡ ᒦᓇᐙ ᐁᔑ ᐊᔮᓂᒡ ᐹᐃᓬᐊᑑᓐ᙮

ᒦᑕᔥ ᐃᐃ ᐊᐲ ᐁᑮᔑᑲᓂᓂᒃ ᐁᕒᐊᑦ ᐊᐊ ᑲᔦ ᐹᐃᓬᐊᑦ ᑳᑮᒥᓄ ᐐᒌᑎᐙᒡ, ᐅᑖᓈᕽ ᐄᑐᒃ ᑮᔒᑫᓂᑎᐗᒃ᙮

ᐹᐃᓬᐊᑦ ᐅᑮᒫᒪᐎ ᐊᑐᒫᐞ ᑭᒋᐊᓇᒥᐁᐎᑭᒫᐞ, ᑳᓃᑳᓂᑕᒪᐙᓂᒡ ᑲᔦ ᒎᐗᐞ, ᐃᐃ ᑲᔦ ᐯᒫᑎᓯᓂᒡ᙮

ᒦᔥ ᑳᐃᓈᒡ: ᑭᑮ ᐲᑕᒪᐎᔑᒻ ᐗᐊ ᐃᓂᓂ ᐁᑮᐃᑭᑐᔦᒃ ᐁᐗᓂᒫᒡ ᐯᒫᑎᓯᓂᒡ ᑳᐅᒋ ᐅᒻᐺᑲᒥᑭᓯᓂᒡ᙮ ᐁᓈᓴᒦᔦᒃ ᑕᔥ ᑮᐊᑕᑭᑫᓂᒫ, ᑳᐐᓐ ᑕᔥ ᑫᑰᓐ ᓂᑎᔑ ᒥᑲᒧᐙᓰᓐ ᑫᐅᒋ ᑌᐱᒣᑭᐸᓐ ᐃᐃᐌᓂ ᑳᐃᓀᒃ᙮

ᑳᐐᓐ ᑕᔥ ᑲᔦ ᐁᕒᐊᑦ ᐅᑮᒥᑲᓰᓐ ᑫᑰᓐ ᒋᑮᐗᓂᑑᑕᒥᓂᒡ ᒦᔥ ᑳᑮᐱ ᐅᒋ ᑮᐌᓂᔕᐙᒡ᙮ ᑳᐐᓐ ᒥᑭᑳᑌᓯᓂᓂ ᑫᑰᓐ ᑫᐅᒋ ᓂᓯᑎᐸᓐ᙮

ᒦᑕᔥ ᑫᐃᔑᒋᑫᔮᓐ ᒋᐸᐸᔕᔐᐅᓐᒡ, ᒦᔥ ᑫᔑ ᐸᑭᑎᓇᒃ, ᑮᐃᑭᑐ᙮

ᒦ ᐃ ᐄᑐᒃ ᑳᐃᔑᓭᓂᒃ ᐅᒋᑕ ᑯ ᐯᔑᒃ ᑕᑯᓂᑲᓇᓐ ᒋᑮ ᐸᑭᑎᓈᐸᓐ ᐃᐃ ᐊᐲ ᐁᐐᑾᑏᐗᑲᒥᑭᓯᐎᓐᒡ᙮

ᐃᑭ ᑕᔥ ᑲᑭᓇ ᑳᒫᐗᒋᐃᑎᐙᒡ ᑮᒫᒪᐎ ᔖᑯᐌᐗᒃ: ᓂᓯᒃ ᐐᓐ ᐊᐊ ᐃᓂᓂ᙮ ᐸᑭᑎᓇᒪᐎᔑᓈᒻ ᐊᐊ ᐸᕒᐋᐸᔅ ! ᑮᐃᑭᑐᐗᒃ᙮

ᐊᐊ ᐄᑐᒃ ᐸᕒᐋᐸᔅ ᑮᐲᒋ ᐌᐱᓈ ᑭᐸᐅᑏᐎᑲᒥᑯᕽ ᐁᑮᒪᒫᔑᒡ ᐁᑮᐅᒻᐺᑲᒥᓯᑯᐸᓀᓐ ᐃᐃᒫ ᐆᑌᓈᕽ᙮ ᑲᔦ ᑕᔥ ᐁᑮᓂᔑᐌᑯᐸᓀᓐ᙮

ᐹᐃᓬᐊᑦ ᐅᑮᐊᑕᐌᑖᓐ ᒋᑮ ᐸᑭᑎᓈᐸᓐ ᒋᓴᓲᓐ, ᒦᔥ ᒦᓇᐙ ᑳᑮ ᑲᓅᓈᒡ ᑳᐹᑏᓄᓂᒡ ᐯᒫᑎᓯᓂᒡ᙮

ᒦᑕᔥ ᐁᓂᑯᒃ ᑳᑮ ᔖᑯᐌᓂᒡ ᐁᑮᐃᑭᑐᓂᒡ: ᐊᑯᓴᑲᐅ, ᐊᑯᓴᑲᐅ!

ᒦᑕᔥ ᐅᐅ ᓂᓯᕽ ᐹᐃᓬᐊᑦ ᑳᐃᓈᒡ: ᐋᓃᓐ ᑕᔥ ᑳᐃᔑ ᒪᒫᔑᒡ? ᑳᐐᓐ ᑫᑰᓐ ᓂᒥᑲᒧᐙᓰᓐ ᑫᐅᒋ ᓂᓯᑎᐸᓐ᙮ ᓂᑲ ᐊᓅᑮ ᒋᐸᐸᔕᔐᐅᓐᒡ, ᒦᔥ ᑫᔑ ᐸᑭᑎᓂᓐᒡ, ᑮᐃᑭᑐ᙮

ᐋᒋᑯ ᑕᔥ ᐁᓂᑯᒃ ᑮᑭᔒᐌᐗᐞ ᐁᔖᑯᐌᓂᒡ ᐁᑮᐃᑭᑐᓂᒡ ᒋᐊᑯᓴᑲᐅᒥᓐᒡ ᒋᓴᓲᓐ, ᐲᓂᔥ ᐁᑮ ᔖᑰᓱᑖᑯᓯᓂᒡ᙮

ᐹᐃᓬᐊᑦ ᑕᔥ ᐅᑮᐃᓈᑯᓈᓐ ᒋᓴᓲᓐ ᐃᐃ ᑳᑮᐃᔑ ᑲᑴᑗᓂᒡ᙮

ᒦᑕᔥ ᑳᑮ ᐸᑭᑎᓈᒡ ᐃᓂ ᐃᓂᓂᐗᓐ ᑳᑮᐊᑕᐌᓂᒥᒥᓐᒡ ᑳᑮᒪᒫᔑᓂᐸᓐ ᐁᐅᒻᐺᑲᒥᑭᓯᓂᒡ ᐃᐃᒫ ᐆᑌᓈᕽ᙮ ᐅᑮ ᐸᑭᑎᓈᐞ ᐱᓵᓐ ᐃᑯ ᐁᓀᑕᒥᓂᒡ ᒋᑑᑕᐙᓂᒡ ᒋᓴᓲᓐ᙮

ᔑᒫᑲᓂᔕᒃ ᑕᔥ ᐅᑮᒫᒌᓈᐙᓐ ᒋᓴᓲᓐ᙮ ᒣᒀ ᐁᐊᓂ ᐱᒥ ᐊᔮᐙᒡ ᐅᑮᒣᒀᔥᑲᐙᐙᓐ ᐃᓂᓂᐗᓐ ᓴᐃᕒᐄᓃᕽ ᐌᒌᓂᒡ, ᓵᐃᒪᓐ ᐁᔑᓂᑳᓱᓂᒡ, ᐁᐱ ᑕᑯᔑᓂᓂᒡ ᐃᐃᒫ ᐆᑌᓈᕽ ᐱᑾᒐᔭᐄᕽ ᐁᑮᐲ ᐅᒌᓂᒡ᙮ ᒦᐗᓐ ᐃᓂ ᑳᑮᒪᓂᐱᓈᐙᒡ ᐁᑮ ᐱᒋᐗᓀᐋᐙᒡ ᐋᔑᑌᔮᑎᑰᓐ ᒋᐱᒥᐎᑕᒪᐙᓂᒡ ᐅᑖᓈᕽ ᐃᓇᑫᔭᐄ ᒋᓴᓲᓐ ᑳᐃᔑ ᐱᒧᓭᓂᒡ᙮

ᐋᐱᒋ ᑕᔥ ᑮᐹᑏᓄᐗᒃ ᐯᒫᑎᓯᐙᒡ ᐁᐱᒥᓂᔕᐙᐙᒡ ᒋᓴᓲᓐ᙮ ᐋᓂᑕ ᑲᔦ ᐃᑴᐗᒃ ᐁᑮᒪᐎᐙᒡ, ᐁᑮᒥᒋᓇᐌᓯᐙᒡ ᑲᔦ᙮

ᒋᓴᔅ ᑕᔥ ᑮᑴᑭ ᑳᐸᐎ ᐁᑮᐃᓈᒡ: ᑮᓇᐙ ᐃᑴᐗᒃ ᒉᕒᐆᓴᓬᐊᒥᕽ ᐌᒌᔦᒃ, ᑫᑯ ᓃᓐ ᒪᐎᒥᔑᑫᒃ᙮ ᑮᓇᐙ ᐱᑯ ᒪᐎᑎᓱᒃ, ᑭᑕᐱᓅᒌᔑᒥᐙᒃ ᑲᔦ ᒪᐎᒥᑾᒃ᙮

ᓂᑯᑎᕽ ᐅᔕ ᑕᐅᒋᒋᓭ ᒋᔑ ᑮᔑᑲᒃ ᐊᐲ ᐯᒫᑎᓯᐙᒡ ᒋᐃᑭᑐᐙᒡ: ᐋᐱᒋ ᔕᐌᑖᑯᓯᐗᒃ ᐃᑭ ᐃᑴᐗᒃ ᑳᑆᓇᐎ ᐅᑕᐱᓅᒌᔑᒥᐙᒡ, ᐃᑭ ᑲᔦ ᑳᓂᑖᐎᑭᐋᓯᒀ ᐊᐱᓅᒌᔕᐞ, ᐐᑳ ᑲᔦ ᑳᐱ ᓅᓂᐋᐗᓱᓯᒀ᙮

ᒦᑕᔥ ᐃᐃ ᐊᐲ ᐯᒫᑎᓯᐙᒡ ᑫᐃᑕᒧᐙᒡ ᑭᒋ ᐗᒌᓐ: ᐸᑕᑯᔥᑲᐎᔑᓈᒻ᙮ ᒦᔥ ᑲᔦ ᒋ ᐃᑕᒧᐙᒡ ᑳᐱᑾᑎᓈᓂᑭᓐ: ᐋᑲᐎᔥᑲᐎᔑᓈᒻ᙮

ᑮᔥᐱᓐ ᑕᔥ ᐅᐅᐌᓂ ᐃᔑᒋᑫᐙᒡ ᒣᒀ ᒥᑎᑰᓐ ᐁᐊᔥᑳᑎᑯᐎᓂᒡ, ᐋᓃᓐ ᑕᔥ ᐐᓐ ᑫᐃᔑᐌᐸᒃ ᐊᐲ ᐹᓱᒡ ᐊᐊ ᒥᑎᒃ?

ᓃᔑᓐ ᑕᔥ 2 ᑯᑕᒃ ᐃᓂᓂᐗᒃ ᑳᑮ ᑭᒋ ᒪᒫᔑᐙᒡ ᑫᐐᓇᐙ ᑮᐃᔑᐎᒋᑲᓂᐎᐗᒃ ᒋᐐᒋ ᓂᐴᒫᐙᒡ ᒋᓴᓲᓐ᙮

ᐊᐲ ᑳᐅᑎᑕᒧᐙᒡ ᐃᐃᒫ ᐅᑎᒀᓂᑫᑲᓂᑳᕽ ᐁᔑᓂᑳᑌᓂᒃ ᒦ ᐃᒫ ᒋᓴᔅ ᑳᑮᑕᔑ ᐊᑯᓴᑲᐅᓐᒡ, ᐃᐃ ᑲᔦ ᓃᔑᓐ ᐅᒪᒫᔑᐞ᙮ ᐯᔑᒃ ᐅᑭᒋ ᓂᑭᕽ ᐃᓇᑫ, ᑯᑕᒃ ᐃᑕᔥ ᐅᓇᒪᑎ ᓂᑭᕽ ᐃᓇᑫ ᑮᐃᔑ ᐊᑯᓴᑲᐅᒫᐗᐞ᙮

ᒦᔥ ᒋᓴᔅ ᑳᐃᑭᑐᒡ: ᓅᔅ, ᐴᓀᑕᒪᐤ, ᑳᐐᓐ ᐅᑭᑫᑕᓰᓈᐙ ᐋᓃᓐ ᐁᔑᒋᑫᐙᒡ᙮ ᔑᒫᑲᓂᔕᒃ ᑕᔥ ᑮᑲᑴ ᐸᑭᓈᑎᐗᒃ ᐁᑮᐊᐸᑭᒋᑫᐙᒡ ᐁᑮᓀᓈᐎᓇᒫᑎᐙᒡ ᐃᐃ ᐅᑭᑭᔥᑭᑲᓂᓂ᙮

ᐃᑭᐌᓂᐗᒃ ᑕᔥ ᐯᒫᑎᓯᐙᒡ, ᐃᑭ ᑲᔦ ᑳᓃᑳᓃᑕᒫᑫᐙᒡ ᒎᐗᒃ ᑮᓃᐸᐎᐗᒃ ᐁᑲᓇᐙᐱᐙᒡ ᐅᑮ ᐸᐱᓄᑕᐙᐙᓐ ᒋᓴᓲᓐ ᐁᑮᐃᓈᐙᒡ: ᐅᑮ ᐱᒫᒋᐋᐞ ᐄᑐᒃ ᑯᑕᒃ ᐊᐎᔭᐞ᙮ ᑕᑲ ᑕᔥ ᑕᐱᒫᒋᐃᑎᓱ ᑮᔥᐱᓐ ᐐᓐ ᑌᐺ ᐊᔮᐎᑴᓐ ᑭᔐᒪᓂᑑ ᐅᑐᓈᐸᒫᑲᓇᓐ ᒋᐱᒫᒋᐃᐌᓂᒡ᙮

ᔑᒫᑲᓂᔕᒃ ᑕᔥ ᑫᐐᓇᐙ ᐅᑮ ᐹᐱᓄᑕᐙᐙᓐ᙮ ᐁᑮᐱ ᓈᓯᑲᐙᐙᒡ ᐁᑮᐎᒥᓇᐋᐙᒡ ᔔᒥᓈᐳ ᑳᐐᓴᑳᑲᒥᓂᓂᒃ

ᐁᑮᐃᓈᐙᒡ: ᐱᒫᒋᐃᑎᓱᓐ ᑮᔥᐱᓐ ᑮᓐ ᐅᑭᒋᐅᑑᑭᒫᒥᐙᓐ ᒎᐗᒃ, ᐅᑮᐃᓈᐙᓐ᙮

ᐃᔥᐱᒥᕽ ᐃᓇᑫ ᑳᐃᔑ ᐊᑰᒋᕽ ᑮᐊᑰᑌᓂ ᐅᔑᐲᐃᑲᓐ ᐁᑮᐃᔑᐲᐃᑳᑌᓂᒃ: ᒦᐗᓐ ᐅᓄ ᐅᑭᒋᐅᑑᑭᒫᒥᐙᓐ ᒎᐗᒃ᙮

ᐯᔑᒃ ᑕᔥ ᐅᒪᒫᔒᓐ ᑳᑮᐐᒋ ᐊᑯᓴᑲᐅᑰᒫᒡ ᐅᑮᐅᒋ ᑲᓅᓂᑰᓐ: ᑳᐐᓐ ᐃᓇ ᑮᓐ ᑳᐅᓈᐸᒥᓐᒡ ᒋᐱᒫᒋᐃᐌᒡ? ᐱᒫᒋᐃᑎᓱᓐ, ᑫᓃᓇᐎᓐᑦ ᑕᔥ ᐱᒫᒋᐃᔑᓈᒻ᙮

ᐃᓂ ᑕᔥ ᑯᑕᒃ ᐅᒪᒫᔒᓐ ᐅᑮ ᑭᔒ ᑲᓅᓈᓂ: ᑳᐐᓐ ᐃᓇ ᑭᑯᓵᓰ ᑭᔐᒪᓂᑑ? ᑲᑭᓇ ᐅᐅ ᑳᔑ ᓂᓯᔭᕽ 3 ᐯᔑᑾᓐ ᑭᑮᐃᔑ ᐅᓇᔓᐙᓂᑰᒥᓐ ᑫᔑ ᑲᒀᑕᑭᐃᑰᔭᕽ᙮

ᑮᓇᐎᓐᑦ ᐐᓐ ᑾᔭᒃ ᑭᑎᓈᑯᓂᑰᒥᓐ, ᑭᑎᔑᒋᑫᐎᓂᓈᓂᕽ ᐁᐅᒋ ᑲᔥᑭᑕᒫᓱᔭᕽ ᐅᐅ᙮ ᐐᓐ ᑕᔥ ᑳᐐᓐ ᑫᑰᓐ ᑮᐃᔑ ᐗᓂᑑᑕᓰ᙮

ᒦᔥ ᑳᐃᓈᒡ ᒋᓴᓲᓐ: ᒋᓴᔅ, ᒫᒥᑲᐌᓂᒦᔒᑲᓐ ᐊᐲ ᐱᑕᑯᔑᓇᓐ ᑭᑑᑭᒫᐎᐎᓂᕽ᙮

ᒋᓴᔅ ᑕᔥ ᐅᑮᐃᓈᓐ ᐃᓂ ᐃᓂᓂᐗᓐ: ᑭᑕᔓᑕᒪᐎᓐ, ᓅᑯᒻ ᑳᑮᔑᑲᒃ ᑭᑲ ᐐᒌᐎᔥ ᐃᐃᒫ ᐸᕒᐊᑖᐃᓯᕽ ᑳᐃᔑᐎᓂᑣ ᑳᔕᐌᑖᑯᓯᐙᒡ᙮

ᒦᑕᔥ ᐃᐃᐌ ᓂᑯᒋ ᑯ ᐊᐲ ᐁᐋᐱᑕ ᑮᔑᑲᒃ ᑮᐊᓂ ᑲᔥᑮ ᑎᐱᑲᓐ ᒥᓯᐌ ᐊᑮᕽ ᐲᓂᔥ ᐁᑮᐊᓂ ᓂᓱᑎᐸᐃᑲᓀᔮᒃ 3᙮

ᑮᓯᔅ ᑲᔦ ᑮᐴᓂ ᓵᑳᓯᑫ᙮ ᒦᑕᔥ ᐃᐃ ᑭᒋᐊᓇᒥᐁᐎᑲᒥᑯᕽ ᑭᒋᑭᐲᑲᐃᑲᓐ ᓈᐗᔭᐄ ᑳᑮ ᑖᔥᑮᑭᓭᒃ᙮

ᒦᑕᔥ ᒋᓴᔅ ᐁᓂᑯᒃ ᑳᑮ ᔖᑯᐌᒡ ᐁᐃᑭᑐᒡ: ᓅᔅ, ᑭᑲᓇᐌᑕᐃᓐ ᓂᑕᒑᒃ! ᐊᐲ ᐃ ᑳᐃᔥᒀ ᐃᑭᑐᒡ, ᒦ ᐃ ᑳᐃᔑ ᓂᐳᒡ᙮

ᐊᐊ ᑕᔥ ᔑᒫᑲᓂᔒᐎᑭᒫ ᑳᐙᐸᑕᕽ ᐋᓃᓐ ᑳᐃᔑᓭᓂᒃ ᐅᑮᓇᓈᑯᒫᓐ ᑭᔐᒪᓂᑑᓐ ᐁᑮᐃᑭᑐᒡ: ᑌᐺ ᐄᓴᓐ ᑾᔭᒃ ᑮᐃᓂᓃᐎ ᐗᐊ!

ᐃᑭ ᑕᔥ ᐯᒫᑎᓯᐙᒡ ᑳᑮ ᐹᑏᓄᐙᒡ ᐁᒫᐗᒋᐃᑎᐙᒡ ᐁᐙᐸᑕᒧᐙᒡ ᐅᐅᐌᓂ, ᐋᓃᓐ ᑲᔦ ᑳᐃᔑᓭᓂᒃ, ᑮᐊᓂ ᑮᐌᐗᒃ ᐁᑮ ᐸᐸᑭᑌ ᔮᑭᑲᓀᐅᑎᓱᐙᒡ ᑳᐊᐲᒋ ᒥᒋᓇᐌᓯᐙᒡ᙮

ᑲᑭᓇ ᐃᑭ ᑳᑮ ᑭᑫᓂᒫᐙᒡ ᒋᓴᓲᓐ, ᐃᑭ ᑲᔦ ᐃᑴᐗᒃ ᑳᓬᐊᓬᐄᕽ ᑳᑮᐅᒋ ᐱᒥᓂᔕᐙᐙᒡ ᐙᓴᔩᔥ ᐃᑯ ᑮᓃᐸᐎᐗᒃ ᑳᐅᓵᐱᐙᒡ᙮

ᑮᐊᔮ ᐃᓂᓂ ᒎᓴᑉ ᐁᑮᐃᔑᓂᑳᓱᒡ᙮ ᑾᔭᒃ ᑮᐃᓂᓃᐎ, ᑲᔦ ᑕᔥ ᑮᒥᓍᑎᓯ, ᐁᑮ ᑕᑾᐱᒡ ᑳᓂᑖ ᐅᓈᑯᓂᑫᓂᒡ᙮

ᐁᕒᐊᒪᑏᔭ ᐆᑌᓈᕽ, ᒎᑏᔭ ᐊᑮᕽ ᑮᐅᒌ᙮ ᑫᐐᓐ ᐄᑐᒃ ᐅᑮ ᐲᑑᓐ ᐃᐃ ᑳᐐᒫᒌ ᑎᐯᒋᑫᓂᒡ ᑭᔐᒪᓂᑑᓐ᙮ ᑳᐐᓐ ᑲᔦ ᐐᓐ ᐅᑮᓇᐁᑕᓰᓐ ᑳᑮᐃᓀᑕᒥᓂᒡ, ᐃᐃ ᑲᔦ ᑳᑮᐃᔑᒋᑫᓂᒡ᙮

ᑮᐃᔖ ᐁᓈᓴᒦᓂᒡ ᐹᐃᓬᐊᑑᓐ ᐁᑮ ᑲᑴᑗᒡ ᐅᐐᔭᐎᓂ ᒋᓴᓲᓐ᙮

ᒦᑕᔥ ᑳᑮ ᐱᓇᐊᕽ, ᐁᑮᐐᑴᔩᑭᓇᕽ ᐙᐱᔥᑮᑭᓄᕽ᙮ ᒦᔥ ᑳᐃᔑ ᐊᑑᒡ ᓇᐃᓂᑏᐎᑲᒥᑯᕽ ᑳᑮᐃᔑ ᐐᐹᐱᑲᐃᑳᑌᓂᒃ ᐊᓯᓃᑳᕽ, ᐐᑳ ᐁᑮ ᐱᐅᒋ ᐋᐸᑕᓯᓂᓂᒃ᙮

ᒦ ᐃ ᐁᑮᐃᔑ ᑮᔑᑲᒃ ᑳᓂᑖ ᑾᔮᒌᐙᒡ, ᐋᓃᔥ ᐋᔕ ᑫᑳ ᑮᒫᒋᓭ ᒋᐊᓉᐲᐎ ᑮᔑᑲᒃ᙮

ᐃᑭᐌᓂᐗᒃ ᑕᔥ ᐃᑴᐗᒃ ᑳᑮᐱ ᐅᒋ ᐱᒥᓂᔕᐙᐙᐸᓐ ᒋᓴᓲᓐ ᑳᓬᐊᓬᐄᕽ ᐅᒋ, ᐅᑮ ᐱᒥᓂᔕᐙᐙᓐ ᒎᓴᐴᓐ᙮ ᐅᑮᐙᐸᑖᓈᐙ ᑕᔥ ᐃᐃ ᓇᐃᓂᑏᐎᑲᒥᒃ, ᑲᔦ ᑕᔥ ᐅᑮᐙᐸᑖᓈᐙ ᐋᓃᓐ ᒋᓴᓲᓐ ᐅᐐᔭᐎᓂ ᑳᐃᓇᒋᑳᑌᓂᒃ᙮

ᒦᑕᔥ ᑳᐃᔑ ᑮᐌᐙᒡ ᐁᑮ ᑾᔮᒋᑑᐙᒡ ᒥᓈᑯᐅᓇᓐ, ᑲᔦ ᑕᔥ ᑎᓄ ᒣᓄᒫᑾᓂᓂᒃ ᐴᓰᐎᓐ ᑳᐊᒋᑳᑌᒃ ᐐᔭᐎᒫᕽ᙮ ᐁᐊᓉᐲᐎ ᑮᔑᑲᓂᓂᒃ ᑮᐊᓉᐱᐗᒃ ᐅᓇᔓᐌᐎᓐ ᑳᐃᓇᑌᒃ ᒋᑑᒋᑳᑌᒃ᙮

ᐐᐸ ᑭᑭᔐᑉ ᐁᐊᓇᒥᐁᑮᔑᑲᓂᓂᒃ, ᐃᑴᐗᒃ ᑮᐃᔖᐗᒃ ᓇᐃᓂᑏᐎᑲᒥᑯᕽ ᐁᐃᔑᐎᑑᐙᒡ ᑕᑯᓭᒀᓇᓐ ᑳᑮ ᑾᔮᒋᑑᐙᒡ᙮

ᐅᑮᒥᑲᐙᐙᓐ ᐊᓯᓃᓐ ᐁᑮᒫᒋ ᑎᑎᐱᓂᑳᓱᓂᒡ ᐃᐃᒫ ᑳᑮ ᑭᐸᐱᓂᐸᓐ ᑳᐅᒋ ᐲᑎᑳᓂᐗᕽ ᓇᐃᓂᑏᐎᑲᒥᑯᕽ᙮

ᒦᑕᔥ ᑳᐃᔑ ᐲᑎᑫᐙᒡ, ᑳᐐᓐ ᑕᔥ ᐅᑮᒥᑲᓰᓈᐙ ᐅᐐᔭᐎᓂ ᑳᑎᐯᒋᑫᓂᒡ ᒋᓴᓲᓐ᙮

ᒣᒀ ᑕᔥ ᐁᓃᐸᐎᐙᒡ ᐃᐃᒫ ᐁᒫᒪᑳᑌᑕᒧᐙᒡ ᐅᐅ ᑳᑮᐃᔑᓭᓂᒃ, ᒦᑕᔥ ᑫᑕᑐ ᓃᔑᓐ 2 ᐃᓂᓂᐗᐞ ᐁᐙᓭᔮᓂᑭᓐ ᐅᑭᑭᔥᑭᑲᓂᓂ ᑳᑮᐅᒋ ᐐᒋ ᑳᐸᐎᑖᑯᐙᒡ᙮

ᐁᒨᔥᑭᓀᔥᑳᑯᐙᒡ ᑕᔥ ᓭᑭᓯᐎᓐ ᐃᑭ ᐃᑴᐗᒃ ᒦ ᐃ ᑳᑮᐊᓂᒥᑯᑖᐙᒡ ᒥᑕᑲᒥᒃ᙮ ᒦᔥ ᐅᐅ ᑳᐃᑯᐙᒡ ᐃᓂ ᐃᓂᓂᐗᐞ: ᐌᑯᓀᓐ ᐌᒋ ᓇᓈᑕᐙᐸᒣᒃ ᑳᐱᒫᑎᓯᒡ ᐃᐃᒫ ᒣᑴᔭᐄ ᑳᐃᔑᐊᔮᓂᒡ ᑳᓂᐳᓂᒡ?

ᑳᐐᓐ ᐅᐅᒫ ᐊᔮᓰ᙮ ᐋᔕ ᑮᑮᐌ ᐱᒫᑎᓯ᙮ ᑳᐐᓐ ᐃᓇ ᑭᒫᒥᑲᐎᓰᒻ ᑳᑮᐃᓂᓀᑭᐸᓐ ᒣᒀ ᑮᐐᒌᐌᒃ ᐌᑎ ᑳᓬᐊᓬᐄᕽ ?

ᐃᓂᓂ ᐅᑯᓯᓴᓐ ᑕᔑ ᐸᑭᑎᓂᒫᐗᓐ ᐁᔑ ᐊᔮᓂᒡ ᒋᐅᓇᔓᐙᓂᑯᓂᒡ ᑳᒪᒋᑑᑕᒥᓂᒡ ᐃᓂᓂᐗᐞ, ᒋᐊᑯᓴᑲᐅᓐᒡ ᑲᔦ᙮ ᓂᓱ ᑮᔑᒃ 3 ᑕᔥ ᐃᔑᓭᓂᒃ ᒋᑮᐌ ᐱᒫᑎᓯᒡ᙮

ᒦᑕᔥ ᐃᑴᐗᒃ ᑳᑮᒫᒥᑲᐎᐙᒡ ᑳᐃᑭᑐᓂᐸᓐ ᒋᓴᓲᓐ᙮

ᒦᔥ ᐃᐃᒫ ᐃᑭ ᐃᑴᐗᒃ ᑳᐅᒋ ᑮᐌᐙᒡ ᓇᐃᓂᑏᐎᑲᒥᑯᕽ ᐁᑮᐊᐎ ᐐᑕᒪᐙᐙᒡ ᑳᒥᑖᔑ ᐯᔑᑯᓂᒡ 11 ᑭᑭᓄᐊᒪᐙᑲᓇᐞ ᑲᑭᓇ ᑫᑰᓐ ᑳᑮᐃᔑ ᐙᐸᑕᒧᐙᒡ᙮ ᐃᐃ ᑲᔦ ᑲᑭᓇ ᑯᑕᒃ ᐅᑮᐐᑕᒪᐙᐙᐞ᙮

ᒦᐗᒃ ᑕᔥ ᐅᑯ ᐃᑴᐗᒃ ᑳᑮᐃᔖᐙᒡ ᒣᕒᐃ ᒫᑲᑕᓬᐊᐎᑴ, ᒍᐋᓇ, ᐊᐊ ᑲᔦ ᒣᕒᐃ ᐅᒫᒫᓐ ᒌᒥᔅ ; ᐃᐃ ᑕᔥ ᑲᔦ ᑯᑕᒃ ᐃᑴᐗᐞ ᑳᑮᐐᒌᐎᑯᐙᒡ ᐅᑮᐐᑕᒪᐙᐙᐞ ᐃᔑᓂᔕᐙᑲᓇᐞ ᑳᑮᐃᓈᐱᔑᓄᐙᒡ᙮

ᐃᑭ ᑕᔥ ᐃᔑᓂᔕᐙᑲᓇᒃ ᑳᐐᓐ ᐅᑮ ᑌᐺᑕᐙᓯᐙᐙᐞ ᐃᐃ ᐃᑴᐗᐞ ᐋᓃᔥ ᐅᑮ ᑲᑮᐹᓯᑕᐙᐙᐞ᙮

ᐲᑕᕒ ᑕᔥ ᑮᐸᓯᑸ, ᐁᑮᐊᐸᑑᒡ ᓇᐃᓂᑏᐎᑲᒥᑯᕽ᙮ ᐊᐲ ᐌᑎ ᑳᐅᑎᑕᕽ ᑮᓇᐗᑭᑖ ᐁᑮᐃᓈᐱᒡ᙮ ᒦᔥ ᑳᑮᐙᐸᑕᕽ ᐁᑕ ᓇᐃᓂᑫᐎ ᐃᔒᑭᓅᓐ ᐁᐊᑌᓂᑭᓐ᙮ ᑮᒫᒪᑳᑌᑕᒻ ᐋᓃᓐ ᑳᑮᐃᔑᓭᓂᒃ᙮

ᐃᐃᐌ ᑕᔥ ᐯᔑᑾᓐ ᐁᑮᔑᑲᒃ, ᓃᔑᓐ 2 ᒋᓴᔅ ᐅᑭᑭᓄᐊᒪᐙᑲᓇᐞ ᑮᐃᔖᐗᐞ ᐃᒣᔭᔅ ᐁᔑᓂᑳᑌᓂᒃ ᐊᔮᐎᓐ᙮ ᑫᑳ ᒫᐐᓐ ᓃᔣᓱ 7 ᑎᐸᐃᑲᓐ ᑮᐊᐲᒑᓂ ᒉᕒᐆᓴᓬᐊᒥᕽ ᐅᒋ᙮

ᑮᑲᑲᓅᓂᑎᐗᐞ ᐁᐸᐱᒧᓭᓂᒡ ᐁᑮ ᑕᔑᑕᒥᓂᒡ ᑲᑭᓇ ᑫᑰᓐ ᑳᑮᐃᔑᓭᓂᒃ᙮

ᒣᒀ ᑕᔥ ᐁᑲᑲᓅᓂᑎᓂᒡ ᐁᑕᔑᑕᒫᑎᓂᒡ ᐅᓄᐌᓂᐗᓐ, ᒋᓴᔅ ᐅᑮᐱ ᐊᑎᒫᐞ, ᐁᑮᐊᓂ ᐐᑕᐊᑑᒫᒡ᙮

ᐅᑮᐙᐸᒥᑰᐞ, ᑳᐐᓐ ᑕᔥ ᐅᑮᐅᒋ ᓂᓯᑕᐎᓈᑯᓰᐞ᙮

ᒦᑕᔥ ᒋᓴᔅ ᑳᐃᔑ ᑲᑴᒋᒫᒡ: ᐌᑯᓀᓐ ᐃᐃ ᑳᐱᒥ ᑕᔑᑕᒫᑎᔦᒃ ᐁᐱᒧᓭᔦᒃ? ᒦᔥ ᑳᐃᔑ ᑭᐱᒌᓂᒡ ᐁᑮᒫᓀᑕᒧᐎᓈᑯᓯᓂᒡ᙮

ᐃᓂ ᐯᔑᒃ ᑲᓬᐄᔭᐸᔅ ᐁᔑᓂᑳᓱᓂᒡ ᐅᑮᐃᔑ ᑲᑴᒋᒥᑰᓐ: ᒦ ᓇ ᑮᓐ ᐁᑕ ᐁᐸᐯᔑᑰᔭᓐ ᐁᐱ ᑮᔫᑌᔭᓐ ᒉᕒᐆᓴᓬᐊᒥᕽ, ᐁᑭᑫᑕᓯᐗᓐ ᑕᔥ ᐅᓄᐌᓂᐗᓐ ᑳᐱ ᐃᓇᑲᒥᑲᒃ ᓅᑯᒻ ᑳᐱ ᑲᑮᔑᑲᑭᓐ, ᐅᑮᐃᑰᓐ᙮

ᐌᑯᓀᓇᓐ ᑳᐃᑕᒪᓐ, ᐅᑮᐃᓈᓐ? ᒦᑕᔥ ᑳᐃᔑ ᓇᑴᑕᑰᒡ: ᐃᐃᐌᓂ ᐋᓃᓐ ᑳᑮ ᑑᑕᐎᓐᒡ ᒋᓴᔅ ᓈᓴᕒᐃᑎᕽ ᑳᐅᒌᒡ᙮ ᑮᑎᓄᐎ ᑲᑲᓅᑕᒪᐙᒡ ᑭᔐᒪᓂᑑᓐ᙮ ᐋᐱᒋ ᑮᒪᔥᑲᐎᑮᔗ, ᑮᒪᔥᑲᐎᒋᑫ ᑲᔦ ᐁᓈᓴᒦᓂᒡ ᑭᔐᒪᓂᑑᓐ, ᐃᐃ ᑲᔦ ᑲᑭᓇ ᐯᒫᑎᓯᓂᒡ᙮

ᑭᒋᐊᓇᒥᐁᐎᑭᒫᒃ, ᐃᑭ ᑲᔦ ᑳᑎᐯᓂᒥᔭᒥᑣ ᐅᑮᐃᔑ ᐸᑭᑎᓈᐙᓐ ᒋᐅᓇᔓᐙᓂᒥᓐᒡ ᒋᓂᓯᒥᓐᒡ᙮ ᒦᑕᔥ ᑳᑮᐊᑯᓴᑲᐙᐙᒡ᙮

ᒦ ᓴ ᐃ ᑳᐃᔑ ᐸᑯᓭᓂᒧᔮᑭᐸᓐ ᐐᓐ ᒋᑮ ᐱᒫᒋᐋᐸᓐ ᐃᔅᕒᐃᔭᓬᐊᐞ ᙮ ᐅᐅ ᑕᔥ ᑲᑭᓇ ᑳᑮᐃᔑᓭᒃ, ᒦ ᐃ ᐋᔕ ᓂᓱᑮᔑᒃ ᑳᑮᐃᓇᑲᒥᑲᑭᐸᓐ᙮

ᐋᓂᑕ ᑕᔥ ᑲᔦ ᐃᑴᐗᒃ ᑳᐐᒌᐎᔭᒥᑣ ᓂᑮᒫᒪᑳᑌᑕᒥᐃᑯᓈᓂᒃ᙮ ᐐᐸ ᑭᑭᔐᑉ ᑮᐃᔖᐗᒃ ᓇᐃᓂᑏᐎᑲᒥᑯᕽ᙮

ᑳᐐᓐ ᑕᔥ ᐅᑮᒥᑲᓰᓈᐙ ᐅᐐᔭᐎᓂ᙮ ᒦᔥ ᐁᐱᑮᐌᐙᒡ ᑳᐃᑭᑐᐙᒡ ᐁᑮᐙᐸᒫᐙᒡ ᐄᓴᓐ ᐁᒐᓬᐊᐞ, ᐁᑮᐃᑯᐙᒡ ᐁᐱᒫᑎᓯᓂᒡ ᒋᓴᓲᓐ᙮

ᐋᓂᑕ ᑕᔥ ᑲᔦ ᑳᐐᒌᐎᔭᒥᑣ ᑮᐃᔖᐗᒃ ᓇᐃᓂᑏᐎᑲᒥᑯᕽ᙮ ᒦᑕᔥ ᑳᑮᒥᑲᒧᐙᒡ ᒪᔮ ᐁᑮᐃᔑᓈᑾᓂᓂᒃ ᑳᑮᐃᑭᑐᓂᒡ ᐃᑴᐗᐞ, ᑳᐐᓐ ᑕᔥ ᐐᓐ ᐅᑮᐅᒋ ᐙᐸᒫᓯᐙᐙᓐ, ᐅᑮᐃᑰᓐ᙮

ᒦᑕᔥ ᒋᓴᔅ ᑳᐃᓈᒡ: ᐋᓃᓐ ᐁᐲᒋ ᑲᑮᐹᑎᓯᔦᒃ᙮ ᐁᑕᑕᐌ ᑭᐸᐯᒌᒻ ᑭᑌᐃᐙᕽ ᒋᑌᐺᑕᒣᒃ ᑲᑭᓇ ᑳᑮᐱ ᐃᑭᑐᐙᒡ ᑫᓅᑕᒪᐙᐙᒡ ᑭᔐᒪᓂᑑᓐ᙮

ᑳᐐᓐ ᐃᓇ ᐅᒋᑕ ᐱᓇᒫ X ᐅᐅᓇᑫ ᒋᑮᐃᔑ ᑲᒀᑕᑭᑑᐸᓐ, ᒋᑮᐊᓂᔑ ᐲᑎᑫᐸᓐ ᑕᔥ ᐅᑭᒋ ᐃᓀᑖᑯᓯᐎᓂᕽ?

ᒦᑕᔥ ᒋᓴᔅ ᐊᐗᔑᒣ ᑳᐊᓃᔑ ᐐᑕᒪᐙᒡ ᐐᓐ ᐁᑮ ᑕᔑᒥᓐᒡ ᐃᐃᒫ ᒥᓯᐌ ᑭᒋᐅᔑᐲᐃᑫᐎᓂᕽ᙮ ᐃᐃᒫ ᐁᑮᐅᒋ ᒫᒌ ᑕᔑᒥᓐᒡ ᒨᓯᓲᓐ ᐁᔑᐲᐃᑫᓂᒡ ᐲᓂᔥ ᑲᑭᓇ ᑳᑮᐃᔑᐲᐃᑫᓂᒡ ᑫᓅᑕᒪᐙᓂᒡ ᑭᔐᒪᓂᑑᓐ᙮

ᐋᔕ ᐁᐊᓂ ᐯᔓᓈᑾᓂᓂᒃ ᐃᐃᒫ ᐊᔮᐎᓂᕽ ᑳᐃᔖᐙᒡ, ᒋᓴᔅ ᐅᑮᐃᔑᓈᑯᑑᓐ ᑖᐱᔥᑰ ᑫᔮᐱ ᐙᓴ ᐁᐐᐊᓂ ᐃᔖᒡ᙮

ᐅᑮᑲᑴ ᑲᔥᑭᒫᐙᓐ ᑕᔥ ᐁᑮᐃᓈᐙᒡ: ᒦ ᐅᒫ ᐃᔑᓂᐹᓐ ᑳᐐᐃᔑ ᓂᐹᔮᕽ᙮ ᐋᔕ ᐄᑐᒃ ᐊᓂ ᐊᐲᒋᓈᑯᔑᓐ, ᐋᔕ ᑲᔦ ᑫᑳ ᑕᑎᐱᑲᓐ, ᐅᑮᐃᓈᐙᓐ᙮ ᒦᔥ ᒋᓴᔅ ᑳᐃᔑ ᐲᑎᑫᒡ ᒋᐐᒋ ᑲᐯᔑᒫᒡ᙮

ᒋᓴᔅ ᑕᔥ ᑮᐅᓇᐱ ᐁᐐᐐᑑᐸᒫᒡ᙮ ᐅᑮᐅᑖᐱᓈᓐ ᐸᑴᔑᑲᓇᓐ ᑲᔦ ᑕᔥ ᐁᑮᓇᓈᑯᒧᒡ᙮ ᐅᑮ ᐸᑴᐱᓈᓐ ᑕᔥ ᐸᑴᔑᑲᓇᓐ ᐁᑮᐊᓂ ᐊᔕᒫᒡ᙮

ᒦᑕᔥ ᑳᑮ ᐹᑳᐱᐃᑣ ᐁᑮᓂᓯᑕᐎᓇᐙᐙᒡ᙮ ᒋᓴᔅ ᑕᔥ ᑮᐅᒋ ᐊᑯᓈᑯᓯ᙮

ᒦᑕᔥ ᑳᐊᔨᑎᐙᒡ: ᑳᐐᓐ ᐃᓇ ᑖᐱᔥᑰ ᐃᔥᑯᑌ ᑳᐱᔅᑲᓀᒃ ᑭᑮᐅᒋ ᐃᓇᒪᒋᐅᓰᒥᓐ ᑭᑌᐃᓈᕽ ᒣᒀ ᐃᐃ ᑳᐱ ᑲᑲᓅᓂᓇᕽ ᒦᑲᓈᕽ ᑲᔦ ᑕᔥ ᑳᐱ ᐐᑕᒪᐎᓇᕽ ᐁᑭᑑᒪᑲᓂᓂᒃ ᑭᒋᐅᔑᐲᐃᑲᓐ?

ᔐᒫᒃ ᑕᔥ ᑮᐗᓂᔥᑳᐗᒃ ᒉᕒᐆᓴᓬᐊᒥᕽ ᐁᑮᐃᔑ ᑮᐌᐙᒡ᙮ ᒦᑕᔥ ᐃᐃᒫ ᑳᐃᔑ ᒥᑲᐙᐙᒡ ᒥᑖᔑ ᐯᔑᒃ 11 ᑭᑭᓄᐊᒪᐙᑲᓇᐞ, ᐃᐃ ᑲᔦ ᑯᑕᒃ ᐊᐎᔭᐞ ᐁᒫᐗᒋᐃᑎᓂᒡ᙮

ᒦᔥ ᑳᐃᑭᑐᓂᒡ: ᑌᐺ ᑳᑎᐯᒋᑫᒡ ᑮᑮᐌ ᐱᒫᑎᓯ᙮ ᐅᑮᓈᑯᓰᑕᐙᓐ ᑕᔥ ᓵᐃᒪᓅᓐ !

ᐃᑭ ᑕᔥ ᑳᔑ ᓃᔑᐙᒡ ᑮᐐᑕᒫᑫᐗᒃ ᐋᓃᓐ ᑳᑮ ᐊᔨᔑᓭᓂᒃ ᒣᒀ ᐁᐱᒧᓭᐙᒡ ᒦᑲᓈᕽ, ᐋᓃᓐ ᑲᔦ ᑳᐃᔑ ᓂᓯᑕᐎᓇᐙᐙᒡ ᑳᑎᐯᒋᑫᓂᒡ ᐊᐲ ᑳᐸᑴᓈᓂᒡ ᐸᑴᔑᑲᓇᓐ᙮

ᒣᒀ ᑕᔥ ᐃᐃ ᓃᔑᓐ 2 ᐁᐙᐐᑕᒫᑫᓂᒡ ᐅᐅᐌᓂ ᑫᑕᑐ ᑳᑎᐯᒋᑫᒡ ᐐᓐ ᑮᐅᒋ ᓃᐸᐎ ᐃᐃᒫ ᒣᑴᔭᐄ ᐁᔑ ᐊᔮᓂᒡ ᐁᑮᒫᒪᐎ ᐃᓈᒡ: ᐱᓵᓀᑕᒧᐎᓐ ᑭᑲ ᐐᒌᐎᑯᒻ!

ᑮᑭᒋ ᓭᑭᓯᐗᐞ ᒌᐸᔾ ᓂᐙᐸᒫᓈᓐ ᐁᐃᓀᑕᒥᓂᒡ᙮

ᒦᑕᔥ ᒋᓴᔅ ᑳᐃᓈᒡ: ᐌᑯᓀᓐ ᐌᒋ ᒥᑯᔥᑳᑌᑕᒣᒃ? ᐌᑯᓀᓐ ᑲᔦ ᐌᒋ ᐋᓉᑕᒣᒃ ᑭᑎᓀᑕᒧᐎᓂᐙᕽ?

ᐃᓇᔥᑫ ᐙᐸᑕᒧᒃ ᓂᓂᒌᓐ, ᓂᓯᑕᓐ ᑲᔦ᙮ ᓃᓐ ᐅᔕ ᐱᑯ ᓃᓐ᙮ ᐃᓇᔥᑫ ᓵᒥᓂᔑᒃ᙮ ᑳᐐᓐ ᐄᑐᒃ ᒌᐸᔾ ᐐᔮᓯᐎᓰ, ᑳᐐᓐ ᑲᔦ ᐅᑲᓂᐎᓰ ᐃᐃᐌ ᓃᓐ ᑳᔑ ᐙᐸᒥᔦᒃ᙮

ᐅᐅ ᑕᔥ ᑳᐃᔥᒀ ᐃᑭᑐᒡ, ᒦ ᐃ ᑳᐃᔑ ᐙᐸᑕᐋᒡ ᐅᓂᒌᓐ, ᐅᓯᑕᓐ ᑲᔦ᙮

ᑳᐐᓐ ᑫᔮᐱ ᑮᑌᐺᑕᓰᐗᐞ ᑳᐊᐲᒋ ᒥᓉᑕᒥᓂᒡ ᑲᔦ ᑕᔥ ᑳᐊᐲᒋ ᒫᒪᑳᑌᑕᒥᓂᒡ᙮ ᒦᔥ ᐅᐅ ᒋᓴᔅ ᑳᐃᓈᒡ: ᑭᑕᔮᒻ ᐃᓇ ᑫᑰᓐ ᑫᒦᒋᔮᓐ?

ᐅᑮᒦᓈᐙᓐ ᑕᔥ ᑮᑰᔭᓐ ᐋᔕ ᑳᑮ ᑮᔑᓱᓂᒡ᙮

ᒦᑕᔥ ᐃᐃ ᑳᑮᐅᑖᐱᓈᒡ ᐁᑮᐊᒸᒡ ᒣᒀ ᐁᑲᓇᐙᐸᒥᑯᒡ ᐅᑭᑭᓄᐊᒪᐙᑲᓇᐞ᙮

ᒦᑕᔥ ᐅᐅ ᑳᐃᓈᒡ: ᒦ ᓴ ᐅᐌ ᑳᑮᐐᑕᒪᐎᓂᓇᑰᒃ ᒣᒀ ᑳᐱ ᐐᒌᐎᓂᓇᑰᒃ᙮ ᑲᑭᓇ ᑫᑰᓐ ᑳᐅᔑᐲᐃᑳᑌᒃ ᐁᑕᔑᒥᑰᔮᓐ ᐃᐃᒫ ᐅᑑᓇᔓᐌᐎᓂᕽ ᒨᓯᔅ ᐃᑭ ᑲᔦ ᐅᑑᔑᐲᐃᑲᓂᐙᕽ ᐃᑭ ᑫᓅᑕᒪᐙᐙᒡ ᑭᔐᒪᓂᑑᓐ, ᐃᐃᒫ ᑲᔦ ᒪᓯᓇᐃᑲᓂᕽ ᓂᑲᒧᓇᓐ, ᓂᑕᔑᒥᑰ᙮

ᒦᑕᔥ ᑳᑮᒦᓈᒡ ᒋᓂᓯᑐᑕᒥᓂᒡ ᑭᒋᐅᔑᐲᐃᑫᐎᓇᓐ᙮

ᒦᔥ ᑳᐊᓂ ᐃᓈᒡ: ᒦᑕᔥ ᐅᐅ ᐁᔑᐲᐃᑳᑌᒃ, ᐁᑮᐃᔑᓈᑾᒃ ᑭᔐᒪᓂᑑ ᑳᑮᐅᓈᐸᒫᒡ ᒋᑮ ᑲᒀᑕᑭᑑᓂᒡ ᑲᔦ ᑕᔥ ᓂᐳᐎᓂᕽ ᒋᐅᒋ ᑮᐌ ᐱᒫᑎᓯᓂᒡ ᓂᓱ ᑮᔑᒃ 3 ᐃᔑᓭᓂᒃ᙮

ᑴᑳᑎᓯᐎᓐ, ᐃᐃ ᑲᔦ ᐊᐎᔭ ᑳᐴᓀᑕᒪᐎᓐᒡ ᐅᒪᒋᑑᑕᒧᐎᓇᓐ ᒋᑲᑮᒀᑌᓂᒃ ᐅᐐᓱᐎᓂᕽ ᐅᒋ ᒋᐐᑕᒪᐎᑣ ᑲᑭᓇ ᑳᐯᐸᑳᓉᐙᓇᑭᓯᐙᒡ ᐯᒫᑎᓯᐙᒡ ᐃᐃᒫ ᒉᕒᐆᓴᓬᐊᒥᕽ ᒋᐅᒋ ᒫᒌ ᑲᑮᒀᑌᒃ᙮

ᑮᓇᐙ ᑕᔥ ᑭᐙᐸᑖᓈᐙᓐ ᐅᓄᐌᓂᐗᓐ᙮

ᓃᓐ ᐃᑕᔥ ᐃᑯ ᑭᑲ ᐲᒋᓂᔕᐊᒪᐎᓂᓂᒻ ᓅᔅ ᑳᑮᐊᔓᑕᒫᑫᒡ᙮ ᐃᐃᒫ ᑕᔥ ᑭᒋ ᐆᑌᓈᕽ ᑭᑲ ᑕᔑ ᐲᐅᒻ ᐹᓂᒫ ᑮᐱ ᐅᑎᓯᑯᔦᒃ ᐃᐃ ᒪᔥᑲᐎᓰᐎᓐ ᐃᔥᐱᒥᕽ ᑳᐐᐱ ᐅᒌᒪᑲᒃ᙮

ᒦᑕᔥ ᐃᐃᒫ ᑭᒋ ᐆᑌᓈᕽ ᑳᐅᒋ ᒫᒋ ᐐᒌᐙᒡ ᐲᓂᔥ ᐌᑎ ᐁᐊᓂ ᐅᑎᑕᒧᐙᒡ ᐯᑕᓃᕽ ᙮ ᒦᑕᔥ ᐃᐃᒫ ᑳᑮᐅᐱᓂᑫᑖᒡ ᑴᑴᑭᓂᒃ ᐁᑮ ᔕᐌᓂᒫᒡ᙮

ᒣᒀ ᑕᔥ ᐁᔕᐌᓂᒫᒡ, ᐅᑮᐅᒋ ᓇᑲᓈᐞ ᐁᑮᐅᐱᔥᑳᒡ ᑭᒋᑮᔑᑯᕽ ᐁᐃᔑᐎᓂᓐᒡ᙮

ᒦᑕᔥ ᑳᐃᔑ ᐊᓇᒥᐁᑕᐙᐙᒡ, ᒉᕒᐆᓴᓬᐊᒥᕽ ᐁᑮᐊᓂ ᐃᔑ ᑮᐌᐙᒡ ᐁᑮᒧᔥᑭᓀᔥᑳᑯᐙᒡ ᑭᒋ ᒥᓉᑕᒧᐎᓐ᙮

ᐃᐃᒫ ᑕᔥ ᒨᔕᒃ ᑮᐊᔮᐗᒃ ᑭᒋᐊᓇᒥᐁᐎᑲᒥᑯᕽ ᐁᓇᓈᑯᒫᐙᒡ ᑭᔐᒪᓂᑑᓐ᙮