Ri Judas, ajpatanijel rech ri Jesus Kristo, ri rachalal ri Santiʼago, chkech ri esikʼitalik, ri eloqʼlaj rumal ri Dyos Tatxel, e che ekʼolom rech toqʼobʼisabʼal uwach ri Jesus Kristo;

chiwech ri ix, ri nimalaj utzil e nimalaj loqʼoqʼebʼal kʼuʼx.

Ix nuloqʼlaj, ri in, sibʼalaj kwaj xintzʼibʼaj chiwech puwiʼ ri qakolotajem, e wilom, che rajawaxik che ri in kinbʼan weriʼ, arech kinyaʼ jun tzij rech ichuqʼabʼ, arech ri ix, xas kikoj ichuqʼabʼ pa ri toqʼobʼisabʼal uwach ri qakojonik, che xa pa jumul xyaʼtaj chkech ri etyoxlaj taq winaq.

Rumal rech, che pa kʼuʼtalik xeʼokik chixoʼl ri ix, ejujun taq winaq, che chi pa ri ojer tzij uloq, ri Tzʼibʼatalik xuqʼalajisaj we qʼatojtzij riʼ: we winaq riʼ man kʼo ta kikojonik, kkikʼaslemaj jun itzelalaj kʼaslemal rukʼ ri nimalaj usipanik ri Qadyos, man kaj ta uwach ri jun chi Ajaw, ri Qajawxel Jesus Kristo.

Ri in, kwaj kinnaʼtaj chiwech, che ri ix xeʼtaʼmatajik iwumal weriʼ chi pa junalik; che ri Ajawxel, aretaq chiʼ xekolotaj rumal areʼ ri winaq chuwach ri rulew ri Egipto, chi chanim xeʼukamisaj ri jachintaq ri man xekojon taj.

Kʼatekʼuriʼ, ri anjelibʼ, ri man xekanaj ta kan pa ri nabʼe kikʼolibʼal, e xane are xkiyaʼ kan ri kachoch, eʼujatʼim chi kʼateʼ na pa ri qʼatojtzij rech ri Nimalaj Qʼij; eʼujatʼim pa junalikalaj taq yutbʼal e chi pa ukʼisbʼalil taq ri qʼequʼmal.

E xoqujeʼ ri Sodoma e ri Gomorra e ri tinimit che ekʼo chunaqaj chkech, ejacha ri eʼanjelibʼ riʼ, xemakunik e xkaj chik jun chi uwach bʼaqilal; ri eʼareʼ ejun kʼamabʼal noʼj, kʼo ri qʼatojtzij pakiwiʼ e tajin kkikʼaxkʼolij jun junalikalaj kʼaslemal pa ri qʼaqʼ.

Xoqujeʼ ejeriʼ nakʼut we winaq riʼ, rukʼ jun itzelalaj chomanik, kkibʼan ri itzel rukʼ ri bʼaqilal; kketzelaj uwach ri Ajawinik, kkibʼij itzel taq tzij chkech ri Enimalaj taq Qʼijil.

Kʼatekʼuriʼ, ri nimalaj anjel Migueʼl, aretaq chiʼ xchʼoʼjin rukʼ ri Kʼaxtokʼ rumal ri ubʼaqil ri Moʼises; man xukachʼ taj xubʼij ri itzel qʼatojtzij puwiʼ ri areʼ, xuwi xubʼij: «¡Chukʼajisaj bʼaʼ awach ri Ajawxel!».

Kʼatekʼuriʼ, ri eʼareʼ, kkiyoqʼo e kkibʼij itzel tzij puwiʼ ri jastaq che man kkichʼobʼ taj; e ri eʼareʼ, ejeriʼ jas ri awaj che man kʼo ta kichomanik; kkisach kibʼ chupam ri jastaq che si ketaʼm wi ri eʼareʼ; ri jastaq ketaʼm jeriʼ jas ri kibʼantajik eʼareʼ.

Itzel bʼaʼ chkech ri eʼareʼ, rumal rech che xebʼe pa ri ubʼe ri Kaʼin, xkikʼyaq kibʼ pa ri itzel uchomanik ri Bʼalaʼam xa rumal rech che xkaj pwaq; xkʼis kiwach pa ri itzel rech ri Kore.

Ri eʼareʼ e jun nimalaj kʼax pa ri iwaʼim; utz utzalaj kiwaʼim kkibʼano chkiwach nimalaj konojel: ri eʼareʼ ejacha sutzʼ che man kʼo ta joron rukʼam e xa jeriʼ keʼujumumej ubʼi ri kyaqiqʼ; ejacha cheʼ erech kʼisbʼal junabʼ che man kʼo ta kiwach; kamul chik ekaminaq e chi ebʼoqom chi pa ri urabʼ uloq,

eʼuqʼetal rech ri polow che kkichubʼaj ri uwoqow kikʼixbʼal, ejacha chʼimil che kesachik e che kebʼe pa ri junalik e nimalaj qʼequʼmal.

Ri Henok, ri uwuq tatxel chuwach chi aqʼanoq ri Adam, ri are qʼaxel utzij ri Dyos che xubʼij pakiwiʼ: «Kamik riʼ, ri Ajawxel petinaq uloq kukʼ ri eʼutyox anjelibʼ che sibʼalaj kekichiwik,

arech kubʼanaʼ ri qʼatojtzij pakiwiʼ nimalaj konojel ri man kekojon taj e puwiʼ ronojel ri xkibʼano; puwiʼ ri kʼaxalaj taq tzij xkibʼij puwiʼ ri Areʼ ri eʼajmakibʼ che man kekojon taj».

Kʼatekʼuriʼ, ri eʼareʼ, kewixwatik, kejilowik, kebʼe pa ri kirayibʼal; ri upakichiʼ kkibʼij kʼaxalaj taq tzij; kkibʼij jun utzalaj tzij xa rumal che kʼo jun kkaj.

Kʼatekʼuriʼ, ri ix, ixloqʼlaj; chinaʼtisaj bʼaʼ ri xkiyaʼ ubʼixik chiwech ri eʼuʼapostol ri Qajawxel Jesuskristo.

Ri eʼareʼ xkibʼij chiwech: «Pa ri ukʼisbʼal ri uwachulew, kekʼojiʼ ejujun riʼ che kketzʼebʼej na riʼ uwach ri winaq, e kkikʼaslemaj riʼ jeʼ jas kraj ri itzel taq kirayinik».

Eʼare waʼ ri kkibʼan kʼax, ejachnel taq wachaj, ri eʼareʼ eʼawaj che man kʼo ta kuxlabʼal.

Kʼatekʼuriʼ, ri ix, ixloqʼlaj, chiyakaʼ iwibʼ pa ri tyoxlaj kojonik, chixchʼaw bʼaʼ rukʼ ri Dyos pa ri Tyoxlaj Uxlabʼxel,

qas chikʼoloʼ bʼa iwibʼ pa ri loqʼoqʼebʼal ukʼuʼx ri Dyos, chiweyeʼj bʼaʼ ri loqʼoqʼebʼal ukʼuʼx ri Qajawxel Jesus Kristo chuwach ri junalikalaj kʼaslemal.

Chkech ri kubʼan kebʼ kikʼuʼx, ri xaq keyojkaʼrik; chiyaʼaʼ bʼaʼ ri utzalaj chomanik chkech;

ri enikʼaj chik, cheʼikoloʼ bʼaʼ chuwach ri qʼaqʼ; kʼatekʼuriʼ, ri enikʼaj chik, chixibʼij bʼaʼ iwibʼ chkiwach e xas xoqujeʼ chipaqchiʼj bʼaʼ ri itzel atzʼyaq che tzʼil rumal ri kibʼaqil.

Chrech ri Areʼ, che kkowinik kixukʼol chuwach ri makaj e che kkowinik ixchʼajchʼoj kixukoj chuwach ri uqʼijil e rukʼ nimalaj kiʼkotemal,

¡chrech ri Areʼ, ri jun chi Dyos, ri Qakolonel Jesus Kristo Qajawxel, chech ri nimalaj qʼijil, nimalaj chuqʼabʼ chi ojer kanoq, chi kamik riʼ e chi chubʼeqʼij chubʼesaq! ¡Amen!