Ri Pedro, Apostol rech ri Jesus Kristo, chkech ri winaq che jacha ekaxlan taq winaq naj kijabʼum wi kibʼ ri eʼajponto, ri eʼajgalasiʼa, ri eʼajkapadosiʼa, ri eʼajasiʼa e ri eʼajbʼitiniʼa, che esikʼim

jeriʼ jas xuchomaj ri Dyos Tatxel chi pa ojer tzij, pa ri Tyoxlaj Uxlabʼxel, arech ri eʼareʼ kenimanik e kchikix chkij ri ukikʼel ri Jesus Kristo. Chiwech ri ix, jun nimalaj sipanik e jun nimalaj utzil.

Tewchiʼbʼal, chech ri Dyos, Tatxel rech ri Qajawxel Jesus Kristo: ri Areʼ, che rukʼ nimalaj loqʼoqʼebʼal ukʼuʼx, xujralkʼuwaʼlaj chi jumul pa ri kʼastajibʼal uwach ri Kristo chkixoʼl ri ekaminaqibʼ, xujralkʼuwaʼlaj chuwach jun kʼaslikalaj eyeʼbʼal,

chuwach jun echbʼal che man kqʼiy taj, man mes taj e man kchʼumuyar taj; e che kanajinaq kan pa ri kaj rumal toqʼobʼisabʼal iwach ri ix,

ri ix, che rumal ri ikojonik, ri uchuqʼabʼ ri Dyos xixukʼol chrech ri kolotajem; che xas aninaq riʼ kuqʼalajisaj ribʼ pa ri kʼisbʼal.

Ri ix, sibʼalaj kixkiʼkot rumal weriʼ, kneʼbʼaʼ rajawaxik che ri ix kamik riʼ kʼo jujun taq kʼax kiqʼaxej,

arech, chi pa ri ukajmaxik ri jeʼlikalaj ikojonik, che are jeʼlik chi na chuwach ri qʼan pwaq, ri qʼan pwaq che ksach uwach cho ri qʼaqʼ e kʼatekʼuriʼ sibʼalaj utz kqil pa ri qʼaqʼ, e rumal kʼuriʼ ri ikojonik kyataʼj chi nimalaj uqʼijil, utzalaj taq tzij e nimalaj ubʼantajik chech, chi pa ri Upetbʼal ri Jesus Kristo.

Ri areʼ, che ri ix man kiwil ta uwach kʼatekʼuriʼ kiloqʼoqʼej; ri areʼ che kixkojon chrech rukʼ nimalaj ikiʼkotemal e rukʼ uqʼijil, kneʼbʼaʼ ukamik riʼ man kiwil ta uwach,

Xa jekʼuriʼ, ri ix utz retaʼmaxik ibʼanom, che kpe na riʼ ri jastaq uwach che iweyeʼm pa ri ikojonik: ri kolotajem chkech taq ri uxlabʼal.

Are waʼ we kolotajem, che xkinikʼoj rij e xkitzukuj ri enim taq qʼaxel utzij ri Dyos, ri eʼareʼ, che xkiyaʼ ubʼixik ri tzij puwiʼ ri sipanik che rech toqʼobʼisabʼal iwach ri ix.

Xkaj xkinikʼoj rij, xkaj xqʼalajin chkiwach, jachike uqʼij e jachike jastaq kuya ubʼixik e jachike are reyeʼm ri Ruxlabʼal ri Kristo, che enojinaq eʼareʼ chrech, aretaq chiʼ kubʼij chkech ri jetaq kʼax che kuriq na riʼ ri Kristo e ri jetaq uqʼijil che kpe chi aqʼan chuwach weriʼ.

Xqʼalajisax chkiwach che man kʼo ta jun utzil kkibʼano rech utoqʼobʼisabʼal kiwach eʼareʼ; xane rumal toqʼobʼisaxik iwach ri ix xkibʼij we tzij riʼ, we tzij che kyaʼ ubʼixik chiwech kumal ri kkibʼij ri Utzalaj Tzij chiwech pa ri ubʼi ri Tyoxlaj Uxlabʼxel che taqom uloq chi pa ri kaj uloq; jun tzij che ri eʼanjelibʼ rukʼ achixinik nimalaj kkikaʼyej weriʼ.

Xa jekʼu waʼ, rukʼ ri kʼaslikalaj inoʼjibʼal, utz ubʼanik bʼaʼ chibʼanaʼ ronojel jas uwach; chikubʼaʼ ri iweyeʼbʼal chrij ri nimalaj sipanik che kpe na riʼ rumal utoqʼobʼisaxik iwach, aretaq chiʼ kuqʼalajisaj na ribʼ ri Jesus Kristo.

Jeriʼ, che ix nimanel taq alkʼuwaʼlaxebʼ, minimaj bʼaʼ ri jetaq irayibʼal jacha ri ojer tzij kanoq aretaq chiʼ man kʼo ta inoʼjibʼal.

Xane chibʼanaʼ ix jeriʼ jacha ri jun che ixusikʼim, che Tyoxlaj ubʼantajik ri Areʼ, xoqujeʼ ri ix, chibʼanaʼ ixtyoxlaj taq winaq pa ronojel ri ikʼaslemal.

Jeriʼ jacha kubʼij ri Tzʼibʼatalik: Rajawaxik che ri ix, ix tyoxlaj taq winaq, rumal rech che tyoxlaj nubʼantajik ri in.

Kʼatekʼuriʼ, we ri ix, Tatxel kixcha chech ri Areʼ, ri areʼ che man are ta kukaʼyij ri kekaʼx ri winaq e kubʼan qʼatojtzij pakiwiʼ konojel winaq rumal ri kichak; rukʼ nimalaj xibʼrikil chixbʼin bʼa aretaq chiʼ ri ix naj ix kʼo wi chech ri qastzij iwulew.

Xoqujeʼ ri ix chiwetaʼmaj bʼaʼ, che xtoʼ iwach chuwach ri itzelalaj kʼaslemal che xiwechbʼej chkech ri inan itat, xtoʼ iwach man rukʼ ta jun jas uwach che ksach uwach, saq pwaq on qʼan pwaq,

xane rukʼ jun jeʼlikalaj kikʼel, kikʼel che jacha ukikʼel jun saquntuj jun alaj chij e chʼajchʼojalaj kikʼel che are ri Kristo

ri areʼ che okisam tza pa ri umajibʼal uloq we uwachulew, kʼatekʼuriʼ, pa ri ukʼisbʼalil, xqʼalajisax uwach rumal iwech ri ix,

ri ix, che rumal Areʼ, kixkojon chrech ri Dyos, che xukʼastajisaj uwach xas chkixoʼl ri ekaminaqibʼ, e xuyaʼ ri uqʼijil chech, arech ri ikojonik chech ri Dyos jeriʼ jeʼ jas ri iweyeʼm.

Aretaq chiʼ, ri ix kixniman chrech ri saqalajtzij, ri ix, kityoxrisaj ri iwuxlabʼal, arech kiloqʼoqʼej chbʼil iwibʼ ix jacha ixachalaxik. Rukʼ jun saqilalaj animaʼ, chiloqʼoqʼej bʼaʼ chbʼil iwibʼ,

rumal rech ri ix, xixalkʼuwaʼlax chi na jumul rukʼ jun ijaʼ che man ksach ta uwach, rumal ri kʼaslikalaj Utzij ri Dyos e che xas kkanaj kanoq, man kʼo ta ukʼisik.

Rumal rech, che ronojel bʼaqilal, jeriʼ jacha jun qʼayes, e ronojel ri ujeʼlal jeriʼ jacha ri ukotzʼijal jun qʼayes; ri qʼayes kchaqijik e ri ukotzʼijal ktzaq uloq;

kʼatekʼut, ri Utzij ri Ajawxel kkanaj kanoq xas pa junalik. E we Tzij riʼ, are ri Utzalaj Tzij che xyaʼ ubʼixik chiwech.

Xa jekʼuriʼ chipaqchiʼj bʼaʼ ronojel jalajoj chomanik e itzelalaj chomanik, ri achixinik e ronojel itzel tzij.

Chibʼanaʼ bʼaʼ, ix jeriʼ jacha ri eʼakʼalabʼ che kʼateriʼ keʼalaxik; chiweyeʼj bʼaʼ ri leche, che man kʼo ta retzelal, arech, rukʼ weriʼ kixkʼiyik, ix rech ri kolotajem,

jeriʼ na kʼuriʼ, we xqaj chiwach che ri Ajawxel utzalaj Ajawawxel.

Chixqibʼ bʼaʼ rukʼ ri Areʼ che kʼaslikalaj abʼaj che xkipaqchiʼj ri winaq, kʼatekʼut xchaʼik, utzalaj abʼaj chunaqaj ri Dyos.

Xoqujeʼ bʼaʼ ri ix, chibʼanaʼ bʼaʼ ix kʼaslik taq abʼaj, xixok bʼaʼ pa ri uwokibʼal jun uxlabʼal ja, jun ja rech utoqʼobʼisabʼal uwach jun tyxolaj chuchqajawinik, arech kchiʼxik jujun taq uxlabʼalalaj taq toqʼobʼ che utz chuwach ri Dyos chi rumal ri Jesus Kristo.

Kʼo na kʼut pa ri Tzʼibʼatalik: Kamik riʼ, ri in kinkoj pa ri Siʼon jun abʼaj rech ri rajawal ja, jun chaʼom abʼaj, jun jeʼlikalaj abʼaj; jachin ri kukubʼa ukʼuʼx chrij, man kbʼan ta riʼ ri itzel chrech.

Ri ix che kʼo ri ikojonik, chiwech ri qʼijil; kʼatekʼut, ri jachintaq man kʼo ta kikojonik, chkech eʼareʼ ri abʼaj che xkipaqchiʼj ri ajchakibʼ, xokisax che rajawal ja,

jun abʼaj che bʼanal kʼax pa ri bʼe, jun abʼaj che kbʼan tzaqem rumal. Kkipachqʼij kaqan cho we abʼaj riʼ, rumal rech chech man kekojon ta chrech ri Tzij; are waʼ weriʼ esikʼital wi.

Kʼatekʼut, ri ix, ix jun chaʼom ijaʼ, ix jun ajawinel chuchqajawisanik, ix jun tyoxlaj amaqʼ, ix jun loqʼom siwantinimit arech kiyaʼ ubʼixik ri utzil rech ri Jun, ri xixsikʼin chi tza chuwach uloq ri qʼequʼmal chi kʼateʼ na chuwach ri utzalaj chaj,

ri ix, che ojer kanoq man ix jun siwan tinimit taj, e kʼu kamik riʼ, ix siwan utinimit ri Dyos, ri ix, che ojer man kʼo ta xtoqʼobʼisax iwach, e kamik riʼ, ri ix, xtoqʼobʼisax iwach.

Ix nuloqʼalaj, ri in, kinbʼij chiwech, rukʼ sibʼalaj chuqʼabʼ, ri ix che ix jacha ixkaxlan taq winaq e che man ix ajwaral taj, kinbʼij chiwech che chipaqchiʼj ri jetaq urayibʼal ri bʼaqilal che kchʼoʼjin rukʼ ri uxlabʼal.

Chkʼojiʼ bʼaʼ jun utzʼalaj ikʼaslemal chkixoʼl ri man eqatinimit taj, arech, aretaq chiʼ kbʼix jalum taq tzij chiwij, che ix elaqʼomabʼ; ri eʼareʼ, aretaq chiʼ kkil na ri utzalaj taq ichak, nim riʼ kkil wi ri Dyos pa ri Uqʼij ri Upetbʼal.

Chixniman bʼaʼ chkech konojel ajawabʼ qas rumal rech ri Ajawxel; chixniman bʼaʼ chrech ri ajawinel jeriʼ che jun ajawinel,

chixniman bʼaʼ chkech ri eqʼaxal utzij, rumal rech che are ri ajawinel keʼutaq uloq, arech kkikʼajisaj kiwaq jachintaq ri kkibʼan ri itzel e arech utz tzij kbʼix chkech kumal ri winaq che utz kikʼaslemal kkikʼaslemaj.

Rumal rech che are waʼ ri urayibʼal ri Dyos; ri ix rumal che utz kibʼano, kitzʼapij kichiʼ riʼ ri jachintaq man kʼo ta kinoʼjibʼal.

Chibʼanaʼ bʼaʼ, ronojel jas uwach, ix jeriʼ jacha ix winaq che kixkowinik kibʼan ri utzil, ix jeʼ jas ixajpatanijel chrech ri Dyos; mibʼan bʼaʼ jeriʼ, jachaʼ kkibʼan ri eʼareʼ, che kkikoj jun payuʼ puwiʼ ri itzelalaj kirayibʼal.

Nim cheʼiwilaʼ wi konojel winaq; cheʼiloqʼoqʼej ri eʼachalaxik, chixibʼij bʼa iwibʼ chuwach ri Dyos, nim chiwilaʼ wi ri ajawinel.

Ri ix, che ixpatanijel, rukʼ xibʼrikil chixniman bʼaʼ chkech ri iwajaw; man xuwi ta chkech ri eʼutz taq iwajaw, xane xoqujeʼ chkech ri ekʼaxkʼaʼy taq ajaw.

Rumal rech, che jun sipanik waʼ aretaq chiʼ ri uj kqakuy ri kʼax, ri man utz taj, e weriʼ ronojel chi xa rumal ri Ajawxel.

Kʼatekʼuriʼ, ¿jas uwach iqʼijil na kʼuriʼ kʼolik, we ri ix kiriq ri kʼax rumal rech che ri ix xibʼan ri itzel? Kʼatekʼut, we ri ix kibʼan ri utz e kikuy ri kʼax; waʼ weriʼ, jun nimalaj sipanik waʼ chuwach ri Dyos.

Xane rumal kʼu waʼ weriʼ, ri ix, xixsikʼixik, rumal che ri Kristo, xoqujeʼ xuriq kʼax rumal toqʼobʼisabʼal iwach ri ix, e xuyaʼ kan jun kʼamabʼal noʼj chiwech, arech ri ix kiterembʼej ri Areʼ.

Ri areʼ, che man xubʼan ta jun makaj –man xriqitaj ta jun itzel jas uwach pa ri uchiʼ–

ri Areʼ che aretaq chiʼ kyoqʼik, man kʼo ta jun tzij xutzalij uwach; aretaq chiʼ kʼo pa ri kʼax, man kʼo ta jun tzij xuchʼaʼo, xane xkojon chrech ri Areʼ, ri Jun che kubʼan qʼatojtzij chi rukʼ ri sukʼil;

ri areʼ, che cho ri jun cheʼ xutelej cho ri ubʼaqil ri jetaq qamak uj arech ri uj, aretaq chiʼ ujkaminaq chi chuwach ri jetaq qamak, kujkʼaslemanik chuwach ri sukʼil; ri areʼ, rukʼ taq ri sokotajinaq wi, ri ix xixkunatajik.

Rumal rech, ri ix, ix jeriʼ jacha ri esachinaq taq chij; kʼatekʼut ukamik riʼ, xixtzalij uloq rukʼ ri Ajyuqʼ, che ajchajinel chrech ri iwuxlabʼal.

Xoqujeʼ, ri ix, ixoqibʼ, chixniman bʼaʼ chkech ri iwachajil, arech, we xoqujeʼ neʼ ekʼo jujun chkech, man kkaj taj kekojon chrech ri Tzij, rumal neʼ, we man kechʼaktaj ta rumal ri jetaq tzij, che chʼaktajoq bʼaʼ rukʼ ri kikʼaslemal ri ixoqibʼ,

aretaq chiʼ kkil ri ikʼaslemal che xas pa nimalaj nimanik.

Ri nim iqʼijil, makʼojiʼ bʼaʼ chi xuwi chrij rukʼ ri pachʼum iwiʼ, rukʼ ri qʼan taq pwaq mulqʼabʼ e rukʼ ri jetaq atzʼyaq,

xane chkʼoji bʼaʼ pa ri iwanimaʼ, pa ri jaʼmarinaqlaj iwuxlabʼal che man ksach ta uwach; wa weriʼ nimalaj jeʼlik utzil chuwach ri Dyos.

Jeriʼ na kʼut xkibʼan ri etyoxlaj taq ixoqibʼ pa ojer tzij kanoq, ri xkeyeʼj ri Dyos; ri eʼareʼ xeniman chrech ri kachajil,

jeriʼ na kʼut, ri Sara xunimaj ri Abʼraham, Wajawxel xcha chech. Ri ix, ix ral ri areʼ, aretaq chiʼ utz kibʼano, aretaq chiʼ man kixibʼij ta iwibʼ e aretaq chiʼ man kʼo ta kʼax pa ri iwuxlabʼal.

Xoqujeʼ bʼaʼ ri ix, ix achajilal; ronojel qʼij, chibʼanaʼ bʼaʼ utz pa ri ikʼaslemal rukʼ ri iwixoqil; ix jeriʼ rukʼ ri areʼ, nojimal uchʼabʼexik, ri areʼ che man kʼo ta uchuqʼabʼ; chiyaʼaʼ bʼaʼ uqʼijil, rumal rech, che ri areʼ, xoqujeʼ echbʼanel chrech ri sipanikalaj kʼaslemal. Rukʼ weriʼ, man kʼo ta kʼax riʼ kuriq ri ichʼawem rukʼ ri Dyos.

Pa uwokibʼal ronojel, chkʼojiʼ bʼaʼ chi nimalaj iwonojel, xa jun iwuxlabʼal, ix utz kukʼ ri achalaxik, chiloqʼoqʼej bʼaʼ iwibʼ, chisachaʼ bʼaʼ imak, chkʼojiʼ bʼaʼ jun mochʼochʼikalaj iwuxlabʼal,

mitzalij itzel pa ukʼaxel itzel, mitzalij bʼaʼ yoqʼonik tzij rukʼ yoqʼonik tzij. Xane cheʼitewchiʼj ri eʼareʼ, rumal rech che ixsikʼital chrech weriʼ, arech ri ix kiwechbʼej ri tewchiʼbʼal.

Rumal rech, jachin kraj kuchajij ri ukʼaslemal e kraj kril utzil pa taq ri uqʼij; rajawaxik che mkʼojiʼ bʼaʼ ri itzel cho ri raqʼ, e mkʼojiʼ bʼaʼ ri itzel tzij pa ri uchiʼ,

naj bʼaʼ chkʼojiʼ wi chrech ri itzel e chubʼanaʼ bʼaʼ ri utzil, chutzukuj bʼaʼ ri jaʼmaril e chutijaʼ anim chrij.

Rumal rech, ri Ajawxel ukojom ri uwoqʼoch pakiwiʼ ri esukʼil taq winaq, ukojom ri uxikʼin che utatabʼexik ri kichʼawem rukʼ ri Dyos; kʼatekʼuriʼ, ri Ajawxel bʼenaq ri upalaj chkilik, chkikʼuleʼlaxik ri kkibʼan ri itzel.

Kʼatekʼuriʼ, ¿jachin kbʼanow itzel riʼ chiwech, we ri ix kibʼan sibʼalaj utzil?

Kneʼbʼaʼ kiriq kʼax rumal ri sukʼil, utzalaj iwech riʼ, aretaq chiʼ ri ix kikuy ri kʼax rumal toqʼobʼisabʼal uwach ri sukʼil. Mixibʼij bʼaʼ iwibʼ chkiwach ri eʼareʼ, e mubʼan bʼa kʼax ri ichomanik.

Xane chiyaʼaʼ bʼaʼ nimalaj uqʼijil ri Ajawxel, ri Kristo pa ri iwanimaʼ, e chi amaqʼel chijikibʼaʼ iwibʼ che utzalejixik uwach ri kitzij jachintaq kkitaʼ chiwech ri ucholajil ri eweyeʼbʼal.

Kʼatekʼuriʼ, chibʼanaʼ bʼaʼ weriʼ rukʼ chʼuchʼuj tzij e rukʼ utzil. Chkʼojiʼ bʼaʼ iwukʼ jun utzalaj iwanimaʼ, jun utzalaj ichomanik, arech, chi puwiʼ ri jastaq che kkichʼaʼ chipalaj, si are riʼ ri kchakun chech usachik kikʼuʼx ri jachintaq keyoqʼowik chech ri utzalaj ikʼaslemal rukʼ ri Kristo.

Are utz riʼ we kqariq ri kʼax rumal che kqabʼan ri utzil, we are waʼ ri ureyeʼbʼal ri Dyos; chuwach che we kqariq ri kʼax rumal che kqabʼan ri itzel.

Xoqujeʼ na kʼut ri Kristo, xa jumul xkamik rumal rech ri jetaq makaj, ri areʼ sukʼil rumal rech che kutoqʼobʼisaj kiwach ri man esukʼil winaq taj; arech ri Areʼ, kukʼam qabʼe chi kʼa chuwach ri Dyos. Xkamisax ri ubʼaqilal, xyaʼ ukʼaslemal pa ri Uxlabʼal.

Xoqujeʼ, ri Areʼ xbʼe che ubʼixik ri Tzij, chkech ri ekʼo pa cheʼ,

ri eʼareʼ che ojer kanoq man kekojon taj, chi aretaq chiʼ xkanaj kukʼ ri ukochʼonik ri Dyos, pa taq ri qʼij, aretaq chiʼ ri Noʼe xubʼan ri Arka, che chupam xa ekebʼ oxibʼ winaq, xa ewajxaqibʼ xekoltaj chuwach ri jaʼ.

We jaʼ riʼ, are waʼ ri ukʼaninaq kamik riʼ ri qasnaʼ che kixkolowik; e we qasnaʼ riʼ man xa ta esebʼal ri tzʼil pa ri qabʼaqil, xane are retal rech chuwach ri Dyos, jun utzlaj qanimaʼ e jun utzalal qachomanik chi rumal ri kʼastajibʼal uwach ri Jesus Kristo,

ri areʼ che kamik riʼ kʼo pa kaj pa ri rikyaqʼabʼ ri Dyos, e chuxeʼ raqan ri areʼ kojom ri jetaq Ajawibʼal e ri jetaq kowinem.

Ri Kristo xukʼaxkʼolij ri kʼax pa ri ubʼaqil; xoqujeʼ ri ix, chkʼojiʼ bʼaʼ ichuqʼabʼ pa we jun chomanik: Jachin kukʼaxkʼolij ri kʼax pa ri ubʼaqil man kkanaj ta kan riʼ ri mak rukʼ,

arech kukʼaslemaj ri kʼisbʼal taq qʼij che kʼo na ri ukʼaslemal, man jeriʼ taj jacha ri urayibʼal ubʼaqil, xane jeriʼ jacha ri urayibʼal ri Dyos.

Sibʼalaj ix najtajinaq che ri ubʼanik ri kirayibʼal ri man junam ta qakojonik kukʼ, ikʼasleman ri itzel rukʼ ixoq achi, ri itzel taq rayinik, ri itzel rukʼ ri amajaʼ, ri kixqʼax che uwiʼ iwa, ri itzel cho taq ri mexa, ri itzel taq qʼijilanik chkech ri eʼesal uwach dyos.

Chech weriʼ, ksach kikʼuʼx, che ri ix man kikoj ta anim kukʼ ri eʼareʼ e che man kixbʼe ta kukʼ che ubʼanik ri kqʼax uwiʼ kkibʼan eʼareʼ, xa jekʼuriʼ, sibʼalaj nimalaj iyoqʼik kkibʼano.

Ri eʼareʼ, chi kebʼe wi riʼ chuwach ri areʼ, ri kbʼanow ri qʼatojtzij pakiwiʼ ri ekaminaq e pakiwiʼ ri ekʼaslik.

Rumal na kʼu waʼ, xyaʼ ubʼixik ri Utzalaj Tzij chi xoqujeʼ chkech ri ekaminaqibʼ, arech, ri eʼareʼ che xas xbʼan ri qʼatojtzij pa ri kibʼaqil chkiwach ri winaq, kikʼasleman riʼ pa ri uxlabʼal chuwach ri Dyos.

Ri ukʼisbʼalil ronojel ri jastaq, xas tajin kqibʼ uloq. Chkʼojiʼ bʼa nimalaj inoʼjibʼal, chiwiʼlaʼ iwibʼ arech qas ix utz pa ri chʼawem rukʼ ri Dyos.

Nabʼe, qas are chichajij ri jun nimalaj loqʼoqʼebʼal ikʼuʼx chixoʼl, rumal rech, che ri loqʼoqʼebʼal kʼuʼx, kʼi taq makaj kusacho.

Chikʼulaj bʼaʼ iwibʼ chixoʼl e xaq bʼa miwixwetej iwibʼ.

Chijujunal; rukʼ ri nimalaj sipanik che xikʼam rukʼ ri Dyos, chipatanij bʼaʼ iwibʼ chixoʼl, xa jekʼuriʼ ix utz taq ajchakibʼ che ukʼyarisaxik ri jetaq usipanik ri Dyos.

We kʼo jun kchʼawik, ri utzij jeriʼ ta bʼa jacha ri Utzij ri Dyos; we kʼo jun kubʼan jun chak, chubʼanaʼ bʼaʼ jeʼ jas jun taqanik che petinaq rukʼ ri Dyos, arech ri Dyos, chi pa ronojel kʼo uqʼijil rumal ri Jesus Kristo, ¡che chrech ri areʼ ri qʼijil e ri kowinem chubʼeqʼij, chubʼesaq! ¡Amen!

Ix loqʼalaj taq winaq, michomaj bʼaʼ, che man utz ta ri qʼaqʼ che xtʼiqitaj chixoʼl arech kixkajmaxik pa ri kʼax, e michomaj neʼ che weriʼ jun sachibʼal kʼuʼx,

xane chixkiʼkotoq, we ri ix, kichʼij ri kʼax rukʼ ri Kristo, arech, aretaq chiʼ kuqʼalajisaj na ri uqʼijil, xoqujeʼ ri ix kkʼojiʼ ri ikiʼkotemal.

Utz iwech ri ix we kʼax iyoqʼik kbʼanik rumal ri ubʼiʼ ri Kristo, rumal rech, che ri Ruxlabʼal ri qʼijil, che Ruxlabʼal ri Dyos kanajinaq kan piwi ixʼ.

Muriq bʼaʼ kʼax jun chixoʼl ri ix, xa rumal che jun kamisanel, on jun elaqʼom, on rumal che jun itzel winaq, on rumal che kyoqʼonik,

kʼatekʼut, we jun kuriq kʼax xa rumal rech che Ajkristo, makʼix bʼaʼ, nim bʼaʼ chrilaʼ wi ri Dyos rumal rech che rukʼam we bʼiʼaj riʼ.

Rumal rech che kamik riʼ, xopan uchapaleʼxik ri qʼatojtzij rumal ri Rachoch ri Dyos. Kʼatekʼuriʼ, we kuchapaleʼj ubʼanik we qʼatojtzij qukʼ ri uj ¿jas kkikʼisbʼej na kʼuriʼ riʼ ri man kkaj taj kekojon chech ri Utzalaj Utzij ri Dyos?

We ri sukʼalaj winaq kkoltajik rukʼ kʼax ¿jas ukʼutik na ribʼ riʼ kubʼano, ri ajmakunel e ri itzel winaq?

Xa jeʼnakʼuriʼ, ri jachintaq kkiriq kʼax chi jeriʼ jacha kraj ri Dyos, chkijachaʼ bʼaʼ si kuxlabʼal chrech ri Utzalaj Ajbʼanal rech, Ajkʼiysanel rech we uwachulew, e chkibʼanaʼ bʼa ri utzil.

Ri in, kinta weriʼ, rukʼ chuqʼabʼ, chkech ri enim taq winaq che ekʼo chqaxoʼl, ri in che in nim winaq jeriʼ jas eʼareʼ, ri in che xinwil ri ukʼaxkʼol ri Kristo, e che kʼo nuqʼijil pa ri qʼijil che man naj ta chik kʼo wi kukʼut ribʼ.

Chiyuqʼuj bʼaʼ ri jupuq che xuyaʼ ri Dyos chiwech, qas utz rilik chibʼanaʼ, mibʼano che xa rumal xixtaqik, chibʼanaʼ bʼaʼ rukʼ ronojel iwanimaʼ jeʼ jas jun urayibʼal ri Dyos;

man xa ta rumal arech ri ix, ix ajawxel chkiwach ri winaq, xane chibʼanaʼ bʼaʼ, ixkʼamabʼal noʼj chkiwach ri jupuq.

Kʼatekʼuriʼ, aretaq chiʼ kopan na riʼ ri kʼamabʼalbʼe chkech ri eʼajyuqʼ, ri ix, kyaʼtaj na riʼ ri utojbʼalil chiwech, jun nimalaj qʼijil che man ksach ta uwach.

Kʼatekʼuriʼ, xoqujeʼ ri ix, che ixalitomabʼ ixkʼojlabʼ, cheʼinimaj ri enim taq winaq; chimochʼochʼej iwibʼ chbʼil taq iwibʼ, rumal rech, che ri Dyos, keʼukʼuleʼlaj jachintaq ri kkinimarisaj kibʼ, e kuyaʼ ri nimalaj usipanik chkech ri kkimochʼochʼirisaj kibʼ.

Chimochʼochʼirisaj bʼaʼ iwibʼ chuxeʼ uchuqʼabʼ ri uqʼabʼ ri Dyos, arech, ri Areʼ qas kixuchʼelej pa ri utzalaj qʼij che kuriqaʼ na,

qas chiyaʼaʼ bʼaʼ pa ri uqʼabʼ ri areʼ, ronojel ri kixmayow rukʼ, rumal rech, che are Areʼ kchajin iwech e kubʼan utz chiwech.

Chkʼojiʼ bʼaʼ jun utzalaj ikʼaslemal, e qas chixkʼasaloq. Ri ikʼulel, che are ri kʼaxtokʼ, kwaʼkatik jeriʼ jas jun koj e kjaninik, e tajin kutzukuj jachin loqʼ kutijo.

Rukʼ chuqʼabʼ chixkowir bʼaʼ pa ri ikojonik chuwach ri areʼ; e ri ix, iwetaʼm, che ri eʼachalaxik pa ri Komon ri ekʼo chuwachulew; xoqujeʼ tajin kkikʼaxkʼolij we kʼax riʼ.

Aretaq chiʼ ri ix, xkʼaxkʼobʼejtaj iwumal ri jubʼiqʼ kʼax, ri Dyos che ajchaqʼe e yaʼl rech ronojel nimalaj sipanik, ri areʼ che xixusikʼij chrech ri junalikalaj qʼijil pa ri Kristo, kixukowirisaj chijumul riʼ, kuyaʼ chi na ichuqʼabʼ riʼ; kixujikibʼaʼ chi na riʼ, e kubʼan na riʼ arech ri ix man kixtzaq taj.

¡Chrech ri Areʼ ri kowinem chubʼeqij, chubʼesaq! ¡Amen!

Ri in, kintzʼibʼaj we jetaq tzij chiwech riʼ rumal ri Silbʼano, ri areʼ che ri in kinchomaj jun achalaxik che man kukʼex ta ri utzij; xixintzʼibʼaj, arech ri ix kʼo kebʼ oxibʼ tzij rech ichuqʼabʼ; e che ri ix, iwetaʼm che are waʼ ri qastzij usipanik ri Dyos: chixkanaj bʼaʼ pa weriʼ.

Ri Komon Tyox che kʼo pa ri Bʼabʼiloniʼa; ri eʼareʼ che xesikʼixik jeʼ jas ri ix, kuyaʼ apan jun rutzil iwach; xoqujeʼ kuya apan jun rutzil iwach ri Markos, ri nukʼojol.

Chiyaʼaʼ bʼaʼ ri rutzil iwach chbʼil taq iwibʼ, rukʼ jun tzʼumanik che rech ri loqʼoqʼebʼal kʼuʼx. Ri nimalaj Utzil chiwech iwonojel ri ixkanajinaq pa ri Kristo.