Ri Pabʼlo, apostol rech ri Kristo rumal ri urayibʼal ri Dyos, arech, ri in kinyaʼ ubʼixik ri chiʼnik rech kʼaslemal pa ri Kristo Jesus,

chrech ri Timoteʼo, ri loqʼalaj walkʼuwaʼl, chech areʼ ri usipanik ri Dyos, ri loqʼoqʼebʼal ukʼuʼx, ri utzil rumal ri Dyos Tatxel e rumal ri Kristo Jesus Qajawxel.

Kinmaltyoxij chrech ri Dyos che ri in, in rajchak, jacha ri enunan nutat aretaq chiʼ chi paqʼij e chi chaqʼabʼ, rukʼ jun sukʼalaj chomabʼal, katnaʼtaj chwech pa ri nuchʼawem rukʼ ri Dyos.

Aretaq chiʼ knaʼtaj chwech ri uwaʼl taq awach sibʼalaj kinwaj katinwil chi jumul, arech kinnoj chrech sibʼalaj kiʼkotemal.

Ri in, kinmayow chech ri unaʼtisaxik ri akojonik kʼolik che man sachinaq ta pa ri ubʼe, ri kojonik, che nabʼe xjaqiʼ pa ri ranimaʼ ri awatiʼt Loʼis e pa ri ranimaʼ ri anan eʼunise e xoqujeʼ kinchomaj che xoqujeʼ xjaqiʼ pa ri awanimaʼ ri at.

Rumal kʼu waʼ weriʼ; ri in kinta chawech, chakojoʼ bʼaʼ achuqʼabʼ chupam ri usipanik ri Uxlabʼal che xukoj ri Dyos pa ri awanimaʼ ri at, aretaq chiʼ xokisax ri qʼabʼaj pawiʼ.

Rumal rech, che ri Dyos man xuyaʼ ta chqech jun uxlabʼal rech xibʼrikil xane xuyaʼ chqech jun uxlabʼal rech chuqʼabʼ, rech loqʼoqʼebʼal kʼuʼx, rech kowinem.

Matkʼix bʼaʼ rumal ri utzij ri Qajawxel che kayaʼ na ubʼixik, on matkʼix bʼaʼ chwech ri in che in tzʼapital pa cheʼ rumal areʼ, xane chatkʼol bʼaʼ wukʼ pa ri kʼax rech toqʼobʼisabʼal uwach ri utzalaj tzij rukʼ ri uqʼabʼ ri Dyos,

che xujukʼolo e xujusikʼij rumal jun tyoxlaj tzij, man xa ta rumal qachak ri uj, xane rumal ri uchomabʼal ri areʼ e rumal ri usipanik, che xuyaʼ chqech pa ri Kristo Jesus, aretaq chiʼ majaʼ kʼo we uwachulew riʼ.

E we sipanik riʼ, kamik xukʼut ribʼ pa ri upetbʼal ri Qajawxel ri Kristo Jesus, ri areʼ che xukʼis tzij puwiʼ ri kamikal e che xubʼano arech kchubʼlin ri junalikalaj kʼaslemal rumal ri utzalaj tzij.

Ri in, xinokisaxik in jun ajchak chech we Utzalaj Tzij riʼ, jeʼ jas in ajtoqoʼntzij, in apostol e in nimalaj ajtij chrech.

Rumal kʼu waʼ weriʼ, ri in wetaʼm uchʼijik we kʼax riʼ; kʼatekʼuriʼ, ri in man kinkʼix ta rumal weriʼ; rumal rech, che ri in qas wetaʼm jachin ri xinkojon chrech, e ri in, chi utz wi ri kinchomaj, che ri areʼ, kkowin riʼ kukʼol ri nukʼolibʼal chi kʼa pa ri jun Qʼij na riʼ.

Qas utz rilik chabʼanaʼ bʼaʼ ri usukʼil taq ri nutzij puwiʼ ri qakojonik e puwiʼ ri loqʼoqʼebʼal ukʼuʼx ri Jesus Kristo, che ri xato.

Utz ukʼolik chabʼanaʼ bʼaʼ ri kʼolibʼal yaʼom chqech; rukʼ ri uchuqʼabʼ ri Tyoxlaj Uxlabʼaxel che xas jeqel wi qukʼ ri uj.

Ri at, awetaʼm chik, che ri winaq eʼajasiʼa, konojel xinkipachiʼj e chkixoʼl ri eʼareʼ riʼ, kʼo ri Figelo e ri Hermogenes.

Ri Ajawxel, chpax bʼaʼ ri ukʼuʼx chkech ri erachal ri Onesiforo, rumal rech che ri areʼ sibʼalaj xuyaʼ nuchuqʼabʼ e man xkʼix ta chech ri jetaq chʼichʼ che inujatʼim pa cheʼ.

Kʼatekʼuriʼ, aretaq chiʼ, xpe pa ri Roma, ri areʼ xinutzukukej e chi xinuriq wi.

Ri Ajawxel, chuyaʼaʼ bʼaʼ ri loqʼoqʼebʼal ukʼuʼx chrech areʼ chuwach ri Ajawxel pa ri jun Qʼij riʼ. Kʼatekʼuriʼ, ri nupatanaxik xubʼan ri areʼ chwech pa ri Efeso, ri at utz chi na retaʼmaxik waʼ weriʼ chnuwach ri in.

Kʼatekʼuriʼ, ri at, atwalkʼuwaʼl, ri at, chatkʼol bʼaʼ pa ri uchuqʼabʼ ri usipanik ri Kristo Jesus.

Ri tzij che xawetaʼmaj xas rumal wech ri in e chkiwach sibʼalaj winaq, chayaʼa bʼaʼ chkech ejujun eʼachijabʼ che qas kekowinik che ukʼutik chkech enikʼaj chik.

Ri at, chachʼijaʼ bʼaʼ ri kʼax jeriʼ jas ronojel winaq che rajchʼoj ri Kristo Jesus.

Jun che are uchak ri chʼoʼj, man kʼo ta jastaq uwach chik kuchomaj pa ri ukʼaslemal we qastzij are kraj utz kilitaj rumal ri xsikʼin rech.

Xoqujeʼ, jeriʼ ri winaq che kchakun pa ri estadiʼo, ri areʼ kchʼakanik xuwi we utz uchʼoʼjixik xubʼano jeʼ jas kubʼij taq ri upixabʼ ri estadiʼo.

Rajawaxik riʼ, che ri uwach ri tikoʼn kyakik, are nabʼe kyaʼ chech ri jun ajchak che sibʼalaj xchakunik.

Chʼachʼobʼoʼ bʼaʼ ri jastaq, che ri in kwaj kinbʼij. Kʼatekʼuriʼ, ri Ajawxel, kubʼan na riʼ arech ri at kachʼobʼ ronojel weriʼ.

Qas chnaʼtaj chawech che ri Jesus Kristo xkʼastaj chkixoʼl ri ekaminaqibʼ, ri areʼ che rijaʼal ri David, jeʼ jas kubʼij ri utzalaj nutzij.

Pa ri utoqʼobʼ, ri in in kʼo pa ri kʼax, chi jacha in jun ajbʼanal kʼax in kʼo pa cheʼ rukʼ taq chʼich. Kʼatekʼut, ri utzij ri Dyos ma jatʼim ta rukʼ chʼichʼ rech jun rukʼ kʼo pacheʼ.

Rumal kʼu waʼ weriʼ, ri in kinqʼiʼ ronojel kʼax rech toqʼobʼisabʼal kiwach konojel ri esikʼim, arech xoqujeʼ kʼo ri kilotajem pa ri Kristo Jesus rukʼ ri junalikalaj qʼijil.

Qastzij nakʼut, we tzij riʼ: We ri uj xujkam rukʼ ri areʼ, xoqujeʼ kʼo riʼ qakʼaslemal rukʼ ri areʼ.

We rukʼ qachuqʼabʼ, kujkanaj kan rukʼ ri areʼ, xoqujeʼ uj ajawinel riʼ rukʼ ri areʼ. We ri uj, kqapaqchiʼj ri areʼ xoqujeʼ kujupaqchiʼj na riʼ ri areʼ.

We ri uj, kubʼan kebʼ ri qatzij, ri areʼ man kubʼan ta kebʼ ri utzij, rumal rech che man kupaqchiʼj ta riʼ ri utzij.

Chabʼij bʼaʼ jumul chik ronojel weriʼ e chabʼij bʼaʼ chuwach ri Dyos che xas makʼojiʼ wi ri chʼoʼj rukʼ taq ri tzij, che xuwi kkowin chkisachik ri ketowik.

Chabʼanaʼ bʼaʼ ronojel, arech ri at qas at utz chuwach ri Dyos e che ri at man kʼo ta jun jas uwach che kresaj akʼixbʼal, xane qas at jun utz rajchak ri tzij che saqalajtzij.

Ri tzij che man kʼo ta ucholaj rukʼ ri qakojonik chapaqchiʼj ubʼik. Ri eʼareʼ che kkibʼij we taq tzij riʼ kebʼe riʼ pa ri man kʼaslemal ta rukʼ Dyos.

Kʼatekʼuriʼ, ri kitzij, kubʼan kʼax riʼ jeriʼ jas jun yabʼil rech ri qatzʼumal. Ri Himeneʼo e ri Fileto, ejujun na kʼut chkech we eʼareʼ riʼ.

Ri eʼareʼ naj xebʼe wi chrech ri saqalajtzij, aretaq chiʼ kkijikibʼaʼ che ri kʼastajibʼal chi bʼantajinaq chik; xa jekʼuriʼ, xkibʼan kʼax chrech ri kikojonik ejujun taq winaq.

Kʼatekʼut, ri utzalaj utikbʼalil che xukoj ri Dyos xas kʼo wi ri nimalaj uchuqʼabʼ, e xas tʼiqitalik rukʼ taq we tzij riʼ: Ri Ajawxel, retaʼm kiwach ri eʼuwinaq e chupaqchiʼj bʼaʼ ubʼik ri itzel ri winaq che kubʼij ri ubʼiʼ ri Ajawxel.

Pa jun nimalaj ja, ma xuwi ta kʼo qʼan pwaq taq kʼolbʼal riʼ on saq pwaq taq kʼolbʼal, xane xoqujeʼ, kʼo jun riʼ che cheʼ kʼolbʼal on xqʼol kʼolbʼal. Kʼo nikʼaj riʼ kokisax chech jastaq che nimalaj taq ubʼantajik e kʼo chi nikʼaj riʼ che kokisax chech ri tzaqibʼal qatzʼilal.

Jeʼ na kʼuriʼ, we jun winaq, man kʼo ta jun makaj kubʼano, che ri xinbʼij in, ri areʼ, jun utzalaj laq riʼ, tyoxlaj laq riʼ e utzalaj laq riʼ chuwach ri Ajaw, e xas utz wi riʼ chrech ronojel chak chuwach ri Ajaw.

Chatanimajoq chuwach ri jetaq urayibʼal ri akʼojolil. Chatzukuj bʼaʼ ri sukʼil, ri kojonik, ri loqʼoqʼebʼal kʼuʼx, ri jaʼmaril, chi pa junamam kukʼ konojel ri chi rukʼ jun saqalaj kanimaʼ kkibʼij ri ubʼiʼ ri Ajawxel.

Chapaqchiʼj ubʼik ri chʼuʼj e ri man utzalaj chomabʼal taj. Ri at, awetaʼm, che weriʼ chi kakʼaman ubʼi pa ri chʼuʼjil.

Kʼatekʼuriʼ, rajawaxik, che ri upatanijel ri Ajawxel, chi man kchʼuʼjar taj, xane rajawaxik che ri areʼ keʼukʼulaj konojel ri winaq, kukʼut ri tzij e kukochʼ ri kʼax,

rajawaxik, che rukʼ chʼuchʼujil kyajan chkech ri eʼukʼulel. Rajawaxik kuchomaj, che weneʼ ri Dyos kuyaʼ na chkech arech kkikʼex kibʼ e weneʼ kketaʼmaj na ri saqalajtzij

e weneʼ ketzalij pa jun utzalaj noʼjibʼal, weneʼ naj kekʼojiʼ wi chrech ri ukʼat ri kʼaxtokʼ che eʼutzʼapim ri eʼareʼ pa cheʼ e che eʼajpatanijel chrech ri urayibʼal.

Ri at, qas utz retaʼmaxik chabʼanaʼ bʼaʼ, che pa ri kʼisbʼal taq qʼij, kʼo na sibʼalaj kʼax kpetik.

Ri winaq exuʼy riʼ, kbʼe riʼ ri loqʼoqʼebʼal kikʼuʼx chrij ri pwaq, kkibʼij nimalaj taq tzij riʼ, nimal riʼ kkibʼano, sibʼalaj itzel riʼ kkibʼij pakiwiʼ ri winaq; man keniman ta riʼ chkech ri ekinan kitat, man kkimaltyoxij ta riʼ ri utzil, kkibʼan na riʼ ri itzel chrech ri Dyos,

man kʼo ta kanimaʼ riʼ, man kʼo ta loqʼoqʼebʼal kikʼuʼx riʼ, kkibʼij riʼ sibʼalaj itzel, man kʼo ta jun utzil riʼ pa ri kikʼaslemal, man kkibʼan ta riʼ ri utzil, ri eʼareʼ si ekʼulel riʼ chrech ri utzil.

Ekojol taq tzij, kkijikibʼaʼ tzij che man tzij taj, emoy rumal ri xuwi kanimal riʼ kkilo, erachiʼl riʼ ri itzel kʼaslemal e man erachiʼl ta riʼ ri Dyos,

ri eʼareʼ je kilik riʼ che ewinaq kikojonik, kʼatekʼuriʼ, kkipaqchiʼj ri uchuqʼabʼ ri qakojonik. Ri at, chaqʼilaʼ awibʼ che katbʼe kukʼ ri eʼareʼ.

Ri eʼareʼ riʼ, ekʼo riʼ chkixoʼl ri nikʼaj che keʼok cho taq ja e kechubʼlin riʼ chkiwach ri man eʼutz taq ixoqibʼ taj che kʼo sibʼalaj kimak, kʼo sibʼalaj itzel taq kirayibʼal e kʼatekʼuriʼ

ronojel qʼij kkitijoj kibʼ e chi ma kekowin ta chrech retaʼmaxik ri saqalajtzij.

Jeʼ jas ri Jannes e ri Jambʼres che xechʼoʼjin rukʼ ri Moʼises, xoqujeʼ jewaʼ kkibʼan ri eʼareʼ riʼ kechʼoʼjin rukʼ ri saqalajtzij, eʼachijabʼ che kʼo itzel taq kichomabʼal, chi man eʼutz ta pa ri kikojonik.

Kʼatekʼuriʼ, man naj ta riʼ kibʼe wi, rumal rech che ri kimoxil kqʼalajisaxik riʼ chkiwach nimalaj konojel, jacha xqʼalajisaxik ri kimoxil ri ekebʼ kanoq riʼ.

Ri at, chi xinaterneʼbʼej pa ri nutzij, pa ri nukʼaslemal, pa ri nuchomabʼal, pa ri nukojonik, pa ri nukochʼonik, pa ri uloqʼoqʼebʼal nukʼuʼx, pa ri nuchuqʼabʼ,

pa ri inoqatalik, pa ri kʼax xpe panuwiʼ pa ri Antiʼokiʼa, pa ri Ikoniʼum, e pa ri Listra. Ri in, sibʼalaj kʼax xpe panuwiʼ. Kʼatekʼuriʼ, ri Ajawxel, xas xutoʼ nuwach chuwach ronojel.

Jeriʼ na kʼuriʼ ri kikʼaslemal konojel ri kekojon chrech ri Kristo chi pa ri kʼaslemal rukʼ ri Dyos, ri eʼareʼ xas kkiriq wi riʼ ri kʼax.

Kʼatekʼuriʼ, ri eʼajmakibʼ e ri winaq che ekʼo rukʼ ri man utz tzij taj, chi pa ronojel qʼij kebʼe na riʼ pa ri itzel, rukʼ che kkiyaʼ ri man saqalajtzij taj chkech ri enikʼaj chik e xoqujeʼ chbʼil aqʼan kibʼ.

Kʼatekʼuriʼ, ri at, chakʼoloʼ bʼaʼ ri tzij che xawetaʼmaj e che ri qas xatkojon chrech. Ri at, awetaʼm ejachin taq ri eʼawajtij chrech weriʼ.

Kʼatekʼuriʼ, chi aretaq chiʼ at akʼal na, ri at xawetaʼmaj ri tyoxlaj taq tzʼibʼ; waʼ weriʼ, kkowinik kuyaʼ ri anoʼjibʼal che kuyaʼ ri kolotajem chawech chi rumal ri akojonik chrech ri Kristo Jesus.

Ronojel tzibʼ, rukʼ ri Ruxlabʼal ri Dyox petinaq wi e kʼo upatan chrech ri tijoj ibʼ, utz che utzalijisaxik uwach tzij, arech kkʼut ri kolom bʼe, arech ktijox ukʼutik ri sukʼil;

rukʼ weriʼ, ri utz achi che rech ri Dyos chi usukʼubʼam ribʼ riʼ che ubʼanik ronojel utz chak.

Nimalaj kinkʼomij chawech, xas chuwach ri Dyos e chuwach ri Kristo Jesus, ri areʼ che kubʼan na riʼ ri qʼatojtzij pakiwiʼ ri ekʼaslik e pakiwiʼ ri ekaminaqibʼ, pa ri ubʼi, ri Upetbʼal e ri Rajawibʼal.

Chayaʼaʼ bʼaʼ ubʼixik ri tzij xas amaqʼel; chakʼutuʼ bʼaʼ jachike ri joʼs taq tzij, chatyajan bʼaʼ chrech ri ma utz taj, chayaʼaʼ bʼaʼ jun tzij rech chuqʼabʼ rukʼ kochʼonik e chakʼutuʼ ri tzij.

Chi kpe na riʼ nikʼaj taq qʼij, jawijeʼ, ri winaq man kkichʼij ta riʼ ri tzij; e xa rumal ri jetaq kirayibʼal riʼ kkʼojiʼ chi kixikine ekʼi kajtij riʼ keʼokik.

Kkitas apan riʼ ri kixikin arech man kkita ta ri saqalajtzij e are kkitatbʼej riʼ ri tzij che man utz taj.

Kʼatekʼuriʼ, ri at, rukʼ sibʼalaj anojibʼal chabʼanaʼ bʼaʼ ronojel, chachʼijaʼ bʼaʼ ri kʼax, chayaʼaʼ bʼaʼ ubʼixik ri Utzalaj Tzij, utz ubʼanik chabʼanaʼ ri achak.

Kʼatekʼuriʼ, ri in, chi kinokisax waʼ jeriʼ in jun tabʼal toqʼobʼ e ri welik ubʼik chi xopanik.

Ri in utzalaj uchʼojixik xinbʼano chi pa ri ukʼisbʼalil; ri in xinkʼisaʼ ri nubʼe, ri in chi xinkʼol wi ri nukojonik.

Xas kamik ubʼik riʼ, ksukʼumaxik chwech ri wiqibʼal nujolom che are ri sukʼil, jun tojbʼal chwech che kuyaʼ na riʼ ri Ajawxel chwech pa ri jun qʼij riʼ, ri areʼ che sukʼlaj Qʼatbʼal Tzij; e ma xuwi ta riʼ chwech ri in kuyaʼo, xane xoqujeʼ kuyaʼ na chkech konojel ri eʼareʼ che rukʼ ronojel uloqʼoqʼebʼal kikʼuʼx xkiyeʼj na che ri Areʼ xas kuqʼalajisaj wi ribʼ riʼ.

Chakowij bʼa uloq ri apetik wukʼ,

rumal rech che ri Demas xinuwonobʼaʼ kanoq, rumal ri loqʼoqʼebʼal ukʼuʼx chrech we uwachulew riʼ, ri areʼ xbʼe pa Tesalonika; ri Kressente, xbʼe pa Galasiʼa; ri Tito xbʼe pa Dalmasiʼa.

Ri xuwi kʼo wukʼ are ri Lukas. Chakʼamaʼ uloq ri Markos awukʼ rumal che ri areʼ utz riʼ chwech pa ri nuchak.

Ri in, xintaq bʼi ri Tikiko pa ri Efeso.

Aretaq chiʼ katpetik, chakʼamaʼ uloq ri jun watzʼyaq che ri in xinyaʼ kan pa ri Troada pa ri rachoch ri Karpo; xoqujeʼ chakʼamaʼ uloq ri jetaq nuwuj, ri are sibʼalaj kwaj che kakʼam uloq are ri jetaq nutzʼibʼanik rukʼ nuqʼabʼ.

Ri Alejandro, ri areʼ che ajchʼiyil pwaq, ubʼanom sibʼalaj itzel chwech. Ri Ajawxel, kuyaʼ na utojbʼalil riʼ chrech jeriʼ jas ri uchak.

Xoqujeʼ ri at, chawilaʼ awibʼ chuwach ri areʼ, rumal rech che ri areʼ xujal jun nimalaj kʼulel chrech ri nutzij.

Pa ri nabʼe mul che xinkʼojiʼ chuwach jun qʼatbʼaltzij, man kʼo ta jun winaq xintoʼwik, konojel bʼaʼ xinkiyaʼ kanoq. Kwaj neʼ man kʼo ta itzel ukʼaxel chkech rumal weriʼ.

Kʼatekʼuriʼ, chi are ri Ajawxel xinutoʼo, xuyaʼ sibʼalaj nuchuqʼabʼ, arech xas ri in kinya ubʼixik ri Tzij e kkitatbʼej ri winaq che man eʼajjudiʼos taj. Kʼatekʼuriʼ, xinkoltajik chuwach ri upuchiʼ ri koj.

Ri Ajawxel, kutoʼ na chuwach riʼ chuwach ronojel itzel e kinukol riʼ aretaq chiʼ kinukʼol chrech ri Rajawibʼal chikaj. ¡Chrech bʼaʼ ri are ri Nimalaj Qʼijil chubʼeqʼij chubʼesaq! ¡Amen!

Chayaʼaʼ jun rutzil kiwach ri Priska e ri Akila, xoqujeʼ chkech ri rachalaxik ri Onesiforo.

Ri Erasto xkanaj kan pa ri Korinto. Ri Trofimo, yawabʼ xinyaʼ kan pa ri Mileto.

Chi chanim chatpet uloq aretaq chiʼ majaʼ kpe ri qʼälaj. Ri Eʼubʼulo, ri Pudente, ri Lino, ri Klaʼudiʼa e konojel ri eʼachalaxik, kkiyaʼ apan jun rutzil awach.

¡Ri Ajawxel kkʼojiʼ bʼaʼ rukʼ ri awuxlabʼal! ¡Ri usipanik ri Dyos kkʼojiʼ bʼaʼ iwukʼ ri ix!