Ri Pabʼlo, ri Silbʼano e ri Timoteʼo, chkech ri Komon Tyox kech ri eʼajtesalonika, che Komon Tyox pa ri Dyos Tatxel e pa ri Ajawxel Jesus Kristo. Kqaya apan jun rutzil iwach e nimalaj utzil chiwech.

Pa ronojel kajbʼal, nim kqil wi ri Dyos piwiʼ; kixqanaʼtisaj pa ronojel ri qachʼawem rukʼ ri Dyos.

Kqanaʼtisaj chuwach ri Qadyos e Qatatxel ri ichak, ri ikojonik, ri ichak pa ri iloqʼoqʼebʼal ikʼux, ri nimalaj uchoqʼabʼ ri iweyeʼbʼal che petinaq rukʼ ri Qajawxel Jesus Kristo.

Loqʼalaj taq achalaxik rumal ri Dyos, qetaʼm che ri ix, ixchaʼtalik.

Rumal rech che ri Utzalaj Qatzij man xopan ta iwukʼ xaq rukʼ taq ri tzij, xane xoqujeʼ xopan iwukʼ rukʼ uchoqʼabʼ e rukʼ sibʼalaj uchak ri Tyoxlaj Uxlabʼaxel. Kʼatekʼuriʼ, ri ix iwetaʼm jas ubʼanik xqabʼan ri qachak chixoʼl ix.

Pa iwech wi, ri ix xibʼano ix jeriʼ, uj jacha ri uj e jacha ri Ajawxel, aretaq chiʼ pa kʼilaj taq kʼax xikʼulaj ri Tzij, xikʼulaj rukʼ ukiʼkotemal ri Tyoxlaj Uxlabʼxel:

Tekʼuriʼ, kamik riʼ, ix jun kʼamabʼal noʼj chkiwach konojel ri ekojonelabʼ ekʼo pa ri Masedoniʼa e rech ri Akaya.

Ri Utzij ri Ajawxel sibʼalaj naj xel ubʼi pa ri itinamit, man xaq ta pa ri Masedoniʼa e pa ri Akaya, xane pa ronojel kʼolbʼal, xoqujeʼ ri ikojonik chrech ri Dyos, xa jekʼuriʼ ma rajawaxik taj che kujchʼaw puwiʼ ri areʼ.

Jelaʼ wi, ri eʼareʼ kkitzijoj ubʼixik jas ri qokibʼal ri uj xqabʼan pa ri itinamit e jas ri ukʼexik iwibʼ chuwach ri Dyos, aretaq chiʼ xiya kan ri joʼs taq dyoses arech are kipatanij ri kʼaslik e ri qastzij Dyos.

Xoqujeʼ ri reyeʼxik kibʼano ri Ukʼojol che kpe na riʼ pa ri kaj, ri areʼ che xkʼasbʼaʼx uwach chi chkixoʼl ri ekaminaqibʼ, ri Jesus che kujutoʼtajisaj chuwach ri oyowal che petinaq uloq.

Achalaxik, ri ix iwetaʼm che ri qokibʼal pa ri itinimit, kʼo wi ri upatan.

Ri ix, iwetaʼm che ri uj kʼo ri sibʼalaj kʼax xqakʼaxkʼolij xoqujeʼ kʼo sibʼalaj itzel taq tzij xqakʼaxkʼolij pa ri Filipos, kʼatekʼut ri Qa-dyos xuya ri qachoqʼabʼ arech ri uj pa taq ri kʼax kqaya ubʼixik ri Utzalaj Tzij chiwech.

Ri qatzij kqaya ubʼixik chiwech, man petinaq ta rukʼ ri joʼs jastaq, man petinaq taj rukʼ ri itzel jastaq e man kqaj taj kixqasubʼu.

Xaq xuwi ri Dyos xyaʼow chqech ri Utzalaj Tzij, aretaq chiʼ xujrilo che ri uj, uj utz pa ri kʼax, xajekʼuriʼ kqabʼij ri Utzalaj Tzij e man are ta kqaj che ri winaq, utz kujkilo, xane are kqaj che utz kujril ri Dyos, ri areʼ che kril ri animaʼ pa ri kʼax.

Man kʼo ta jun joʼs tzij xqabʼij, ri ix iwetaʼm, man are ta xqachomaj ri pwaq, ri Dyos qʼatbʼaltzij chrech weriʼ;

man xqatzukuj ta qaqʼijil chkiwach ri winaq, chkiwach ri siwan itinamit on qaqʼij pa jun chik kʼolbʼal,

puneʼtaneʼ uj taqoʼnelabʼ rech ri Kristo, ri uj kujkowinik weta xqakoj ri qaʼlal piwiʼ. Kʼatekʼut, ri uj uj utz taq winaq xqabʼan chixoʼl xqabʼano jeʼ jas jun nan che kuya ri wa chkech ri eral e kubʼan ri rajawaxik chkech,

xa jeriʼ nakʼut, sibʼalaj loqʼoqʼebʼal qakʼuʼx chiwech, xqaj xqaya chiwech pa junamam, ri Utzalaj Tzij rech ri Dyos e ri qakʼaslemal, rumal rech che nim ri iqʼij chqawach.

Achalaxikʼ, ri ix knaʼtaj chiwech ri qachak e ri qakosik: chi chaqʼabʼ e chi paqʼij, xujchakunik arech man kʼo ta jun kuya jun jas uwach chqech, aretaq chiʼ ri uj xqabʼij ri Utzalaj Tzij chiwech.

Ri ix, ix qʼatbʼaltzij puwiʼ weriʼ, xoqujeʼ ri Dyos, che ri uj xqabʼan ri tyoxlaj taq jastaq, ri utzalaj taq jastaq e man taqal ta yajkil chqech ri uj.

Jeʼ jas ubʼanik jun tatxel kukʼ ri eralkʼuwaʼl, ri ix iwetaʼm che iwukʼ ix iwonojel, ri uj

xqaya jun tzij rech ichoqʼabʼ, xqaya jun tzij rech qʼaʼlbʼal ikʼuʼx, xqatzʼonoj chiwech arech ri ix kkʼojiʼ jun utzalaj ikʼaslemal chuwach ri Dyos che ixusikʼim arech kixpe pa ri rajawibʼal e ri uqʼijil.

Rumal kʼu waʼ weriʼ, ri uj nim kqil wi ri Dyos pa ronojel kajbʼal, rumal rech che aretaq chiʼ xikʼam ri utzij ri Dyos che xqaya ubʼixik chiwech, man xikʼam taj jeʼ jas kitzij ri winaq, xane xikʼamo jeʼ jas ri saqalaj ubʼeʼal, che are Utzij ri Dyos. Kʼatekʼuriʼ, we tzij riʼ kchakun iwukʼ ri ix, ri ix kojonelabʼ.

Rumal rech che ri ix, ix achalaxik, xibʼano jeriʼ jeʼ jas taq ri etyox winaq rech ri Dyos pa ri Kristo Jesus pa ri Judeʼa: ri ix kʼo kʼax xiriqo rumal kech ri iwinaq jeriʼ jas ri xkiriq ri eʼareʼ kumal ri eʼajjudiʼo:

Eʼare waʼ we winaq riʼ ri xkikamisaj ri Ajawxel Jesus e ri eqʼaxal utzij ri Dyos, eʼare waʼ ri xkibʼan kʼax chqech ri uj, ri Dyos, man eʼutz taj kerilo; ri eʼareʼ ekikʼulel ronojel winaq,

aretaq kujkiqʼatej ri uj che uyaʼiʼk ubʼixik ri Tzij chkech ri winaq che man junam ta qakojonik kukʼ, arech kʼo ri kikolotajem; xajekʼuriʼ, rumal weriʼ pa ronojel kajbʼal tajin kkitzʼaqatisaj ri nimalaj kimak; kʼatekʼuriʼ ri Royowal xqaj pakiwiʼ ri eʼareʼ arech kukʼis tzʼij pakiwiʼ.

Kʼatekʼuriʼ, achalaxik, aretaq chiʼ ujachom ribʼ qawach iwukʼ, kʼatekʼut man ujachom ra ribʼ ri qanimaʼ, rukʼ ronojel qanimaʼ sibʼalaj xqaj xqil chi jumul iwach.

Rumal kʼu waʼ, xqaj xujbʼe iwukʼ –xoqujeʼ, chi in wi in Pabʼlo, kʼi taq mul xinkoj nuchoqʼabʼ che kinbʼek– kʼatekʼuriʼ, xujuqʼatej ri Satanas.

Jeʼ na kʼut, ¿jachike kʼuriʼ ri qeyeʼbʼal, ri qakiʼkotemal, ri ukʼutbʼal qanimal chuwach ri Qajawxel Jesus aretaq chiʼ kpe ri areʼ, weta mata ix kʼo ri ix?

Jeʼ nakʼut, ix ri ix qaqʼijil e ix ri ix qakiʼkotemal.

Kʼatekʼuriʼ, rumal che man kqaqʼiʼ ta chik che kqeyeʼj chi jumul weriʼ, kqaj xqakʼam uqʼabʼ che qatukel kujkanaj kan pa ri Atenas

e kqataq ubʼi le Timoteʼo iwukʼ, che qachalal uj e toʼbʼanel rukʼ ri Dyos pa ri Utzalaj Utzij ri Kristo, arech, ri areʼ, kuyaʼ uchoqʼabʼ e ukowil ri ikojonik,

arech man kʼo ta jun chiwech che kubʼan kebʼ ukʼuʼx pa taq ri kʼax. Ri ix qas iwetaʼm che are waʼ ri qechbʼal:

Aretaq chiʼ ri uj, uj kʼo chik chixoʼl, ri uj xqaya ubʼixik chiwech che kqariq na sibʼalaj taq kʼax, kʼatekʼuriʼ xpe na kʼut kamik riʼ, jeriʼ jacha iwetaʼm chik.

Xakʼu jeriʼ, rumal che ri in man kinqʼiʼ ta chik kinweyeʼj chi jumul weriʼ, kintaq ubʼi ri areʼ arech krilaʼ ri ikojonik. Kinweyeʼj che ri kojol ikʼuʼx mata bʼaʼ ixutzaqom pa ri itzel, xa jekʼuriʼ ri qachak weneʼ man utz ta chik ubʼanom.

Kʼatekʼuriʼ, we uchanim riʼ, ri Timoteʼo kʼateriʼ kulik chi pa ri itinimit uloq, kʼatekʼuriʼ kuya utzalaj taq utzijol chqech puwiʼ ri ikojonik e puwiʼ ri uloqʼoqʼebʼal ikʼuʼx: kubʼij che ri ix ikʼolom jun utzalaj chomanik paqawiʼ ri uj, xoqujeʼ che ri ix, kiwaj kiwil qawach jeʼ jas ri uj che kqaj kqil iwach.

Achalaxik, rukʼ ri ikojonik, ri uj kkʼojiʼ jun qachoqʼabʼ pa ronojel qaxibʼrikil e pa ronojel kʼax kqariqo.

Kamik riʼ, ri uj kʼo jun kʼakʼalaj qakʼaslemal, rumal rech che ri ix sibʼalaj utz ix kanajinaq pa ri Ajawxel.

¿La qas kʼu kujkowin waʼ che utzalaj umaltyoxinik kqabʼan chrech ri Dyos piwiʼ ri ix, rumal rech ronojel ri kiʼkotemal kiya ix chqech chuwach ri Qadyos?

Chi chaqʼabʼ, chi paqʼij kqataʼ chrech, arech ri uj kqil chi na iwach e xa jekʼuriʼ kqaya na, kqatzʼaqatisaj na ri kraj na pa ri ikojonik.

Chi are ta bʼaʼ ri Dyos, Qatatxel e Qajawxel Jesus, kkʼamow ubʼi ri qabʼe chi iwukʼ ix.

Kʼatekʼuriʼ, ri ix, ri Ajawxel, kukʼiyirisaj ta bʼaʼ e kixujunamaj ta bʼaʼ pa ri loqʼoqʼebʼal ikʼuʼx chi rubʼilom taq iwibʼ e ri loqʼoqʼebʼal ikʼuʼx kukʼ konojel jeʼ jas ri loqʼoqʼebʼal qakʼuʼx ri uj chiwech ix:

arech kkʼojiʼ uchoqʼabʼ ri iwanimaʼ pa ri tyoxlaj kʼaslemal chuwach ri Dyos, ri Qatatxel, pa ri upetbʼal uloq ri Ajawxel Jesus kukʼ konojel ri eʼutyoxlaj taq winaq.

Kʼatekʼuriʼ, achalaxik, ri uj kqata chiwech e kqakoj qachoqʼabʼ pa ri Ajawxel Jesus: ri ix xikʼulaj ri Qatzij puwiʼ ri kʼaslemal che kqaj chuwach ri Dyos, kʼatekʼuriʼ, kamik riʼ, chixkʼaslemanoq jeʼ jas weriʼ; chnimar ta bʼaʼ uwach weriʼ pa ri ikʼaslemal.

Ri ix, utz retaʼmaxik ibʼanom ri upixabʼ ri Ajawxel Jesus che xqaqʼaxej chiwech.

Kʼatekʼuriʼ, are waʼ ri urayibʼal ri Dyos: ri utyoxrisaxik iwibʼ; mibʼan ri itzel taq jastaq,

rajawaxik che iwonojel ix kiwetaʼmaj ukʼamik ubʼi ri ibʼaqil pa ri tyox e utzalaj kʼaslemal,

e mixtzaq pa ri itzel kʼaslemal jeʼ jas kkibʼan ri enikʼaj chik che kʼo chi jun kikojonik che ma ketaʼm ta uwach ri Dyos;

chixoʼl ri ix, mata bʼaʼ kʼo jun kqʼaʼx puwiʼ ri rachalal on che kusubʼu ri rachalal. Ri Ajawxel kuya na ukʼoqabʼal waʼ weriʼ, jeʼ jas xyaʼtaj ubʼixik chiwech, e xoqujeʼ xqakojojej qachoqʼabʼ chech ubʼanik weriʼ.

Rumal rech che ri Dyos man xujusikʼij ta pa ri itzel kʼaslemal, xaneʼ xujusikʼij pa ri tyoxlaj kʼaslemal.

Xa jekʼuriʼ, we kʼo jun kretzalaj kukʼyaq ubʼi weriʼ, man kretzelaj taj, man kukʼyaq ta ubʼi jun winaq, xane are kretzelaj, are kukʼyaq bʼi ri Dyos che kubʼan sipanik chiwech pa ri Tyoxlaj Ruxlabʼxel.

Man rajawaxik taj, che ri uj kujtzʼibʼan chiwech puwiʼ ri loqʼoqʼebʼal kʼuʼx chkixoʼl ri eʼachalaxik, rumal rech che ri ix xiwetaʼmaj weriʼ chi qas rukʼ ri Dyos,

kʼatekʼuriʼ sibʼalaj utz ubʼanik kibʼan weriʼ kukʼ konojel ri achalaxik eʼajmasedoniʼa. Kʼatekʼut, kqata chiwech achalaxik, che qas chibʼanaʼ bʼaʼ, qas chixnabʼeʼajoq pa ri utzil,

chitzukuj iqʼijil pa ri jaʼmarilalaj kʼaslemal, rukʼ kixok il chech ubʼanik ronojel ichak, chixchakun bʼaʼ rukʼ ri iqʼabʼ, jeʼ jas ujtaqaninaq chiwech.

Rukʼ kʼu waʼ weriʼ, ri ix kkʼojiʼ jun utzalaj ikʼaslemal riʼ chkiwach ri winaq che man ekʼo ta iwukʼ, kʼatekʼuriʼ man kʼo ta jun winaq riʼ rajawaxik chiwech.

Achalaxik ri uj man kqataj taj che man kʼo ta iwetaʼm pakiwiʼ ri ekaminaqibʼ. Maqʼoxow iwanimaʼ jeʼ jas ri enikʼaj taq winaq chik che man kʼo ta keyeʼbʼal.

Rumal che we kqakojo che ri Jesus xkamik, kʼatekʼuriʼ xkʼastaj uwach; xoqujeʼ, ri ewinaq che kewar pa ri rutzil ri Jesus, ri Dyos keʼukʼam ubʼi na riʼ rukʼ ri areʼ.

Rajawaxik kqabʼij weriʼ chiwech puwiʼ ri Utzij ri Ajawxel. Ri uj, ri uj winaq che kujkʼasiʼk, ri uj kʼo na aretaq chiʼ kpetik ri Ajawxel, man kujnabʼeʼaj ta riʼ chkiwach ri ekaminaq nabʼe chqawach.

Rukʼ ri kʼutbʼal che kuya na ri uchʼabʼal ri arkanjel, e rukʼ ri kʼutbʼal che kuya na ri utum ri Dyos, ri Dyos kxuliʼ uloq riʼ chi pa ri kaj uloq e ri xekam rumal ri Kristo, are kkʼastaj kiwach riʼ nabʼe;

kʼatekʼuriʼ, uj chi na kʼuriʼ, ri ujwinaq che uj kʼas na, ri uj kʼo na kanoq, kqamulij qibʼ riʼ kukʼ e kujkʼam bʼi riʼ puwiʼ taq sutzʼ arech kqakʼulaj ri Ajawxel pa ri kyaqiqʼ. Kʼatekʼuriʼ, je na kʼuriʼ ri qakʼolem rukʼ ri Ajawxel chubʼeqʼij chubʼesaq.

Chiyaʼa bʼa ichoqʼabʼ chi rubʼilom taq iwibʼ rukʼ taq we chomanik riʼ.

Kʼatekʼuriʼ, puwiʼ taq ri kajbʼal e puwiʼ taq ri qʼij man rajawaxik taj kintzʼibʼan chiwech puwiʼ weriʼ achalaxik.

Ri ix, iwetaʼm che ri Uqʼij ri Ajawxel kpe riʼ jeʼ jas jun elaqʼom che kpe chaqʼabʼ.

Aretaq chiʼ, ri winaq kkibʼij na: ¡Nimalaj Utzil e man kʼo ta kok chqech! Chi pa we kajbʼal riʼ ktzaq na pakiwiʼ ri itzel, jeʼ jas taq ri qʼoxom kuriq ri ixoq che kril na uwach ri ral, kʼatekʼuriʼ man kekowin ta riʼ keʼanimajik ubʼik.

Kʼatekʼuriʼ, ri ix achalaxik, man ix kʼo ta pa ri qʼequʼm, arech che ri jun qʼij riʼ kixuriqaʼ jeʼ jas kubʼan jun elaqʼom:

rumal rech che iwonojel ri ix, ix ralkʼuwaʼl ri chaj saqil e ix ralkʼuwaʼl ri qʼij. Ri uj, man uj rech ta ri chaqʼabʼ e man uj rech ta ri qʼequʼmal.

Xajekʼuriʼ, rumal weriʼ mujwar bʼaʼ jeʼ jas kkibʼan ri enikʼaj taq winaq chik, xaneʼ chujkʼasaloq e chqachajij qibʼ chuwach ri jastaq.

Ri kewarik, chaqʼabʼ riʼ kewarik e ri keqʼabʼarik, chaqʼabʼ riʼ keqʼabʼarik.

Kʼatekʼut, ri uj che uj rech ri paqʼij, chqaqʼilaʼ bʼaʼ qibʼ chrech ri jastaq; chqakojoʼ bʼaʼ ri ukowil ri kojonik e ri ukowil ri loqʼoqʼebʼal kʼuʼx e chqakojoʼ bʼaʼ ri ukowil ri eyeʼbʼal chrech ri kolotajem.

Ri Dyos man ujuyaʼom ta chuwach ri oyowal, xaneʼ ujuyaʼom arech kqariq ri kolotajem rumal ri Qajawxel Jesus Kristo,

che xkamik rumal nimalaj toqʼobʼ chqech ri uj, arech, puneʼtaneʼ ujkʼaslik on ujwarinaq, ri uj chi ujkʼaslik riʼ rukʼ ri areʼ.

Rumal kʼu weriʼ, rajawaxik che kiyaʼ ichoqʼabʼ chrech rubʼilom taq iwibʼ e che kiya kʼambʼal taq noʼj chiwach jeʼ jas kibʼan chi ukamik riʼ.

Kqata chiwech, achalaxik qas utzalaj kilik kibʼano ri kechakunik e kekos chi- xoʼl ri ix. Ri eʼareʼ eʼare ekʼamal taq bʼe chiwech chuwach ri Ajawxel e che ri eqʼilik chrech ri man utz taj.

Cheʼiwilij rukʼ sibʼalaj loqʼoqʼebʼal rumal ri kichak kkibʼano. Chikʼaslemaj utzil chixoʼl.

Xoqujeʼ, kqata chiwech achalaxik, cheʼiqʼilaʼ bʼaʼ ri xaq ksach kikʼuʼx, chiyaʼaʼ kichoqʼabʼ ri xaq xibʼiribʼ ekʼolik, chikubʼaʼ kikʼuʼx ri xaq kebʼ kanimaʼ kibʼanom, cheʼiqʼilaʼ bʼaʼ konojel ri winaq.

Qas chiwilij che man kʼo ta jun kutzalij ukʼaxel jun etzalal rumal jun etzalal chik, are nabʼe qas chixok il rech ri utzil chi rubʼilom taq iwibʼ e chrech ri utzil chkech konojel.

Qas amaqʼel chixkiʼkotoq.

Qas chixchʼaw rukʼ ri Dyos pa ronojel kajbʼal.

Pa ronojel kʼolibʼal chixmaltyoxin chrech ri Dyos. Are waʼ ri urayibʼal ri Dyos chiwech pa ri Kristo Jesus.

Michup bʼaʼ ri Tyoxlaj Uxlabʼxel,

miwetzelaj uwach ri jetaq usipanik ri qʼaxem utzij ri Dyos,

xaneʼ are chinikʼoj ronojel jas uwach: Kʼatekʼuriʼ are chikʼoloʼ jachike ri utz;

chikʼoloʼ iwibʼ, chiqʼilaʼ iwibʼ chrech ronojel itzel.

Qas chi xutyoxirisaj bʼaʼ ri Udyos ri nimalaj utzil, kʼatekʼuriʼ, ronojel ri ixkʼas wi, ri iwuxlabʼal, ri ukʼuʼx iwanimaʼ e ri ibʼaqil, kikʼol chuwach ri itzel chi kʼa pa ri Upetibʼal ri Qajawxel Jesus Kristo.

Ri areʼ, ri kixsikʼinik, man kukʼex ta ri utzij: e are Areʼ kbʼanow na weriʼ.

Achalaxik, xoqujeʼ chixchʼawoq, chita paqawiʼ chrech ri Dyos.

Chiyaʼaʼ jun nimalaj rutzil kiwach konojel ri achalaxik rukʼ jun tyoxlaj tzʼumanik.

Sibʼalaj rukʼ ronojel wanimaʼ kinta chiwech, che chisikʼij we wuj riʼ chkiwach konojel ri eʼachalaxik.

¡Chkanaj ta bʼaʼ iwukʼ ri utoqʼobʼ ri Qajawxel Jesus Kristo!