Ri Pabʼlo, che apostol man kumal ta ri winaq on man rumal ta jun winaq, xane rumal ri Jesus Kristo e rumal ri Dyos che Tatxel, che xuwaʼlisaj ri Areʼ chkixoʼl ri ekaminaqibʼ,

xoqujeʼ, konojel ri eʼachalaxik che ekʼo wukʼ ri in, chkech ri Ekomon Tyox rech ri Galasiʼa.

Chiwech ri ix ri sipanik e ri utzilal rech ri Dyos Qatatxel e Utatxel ri Ajawxel Jesus Kristo,

ri Areʼ che xuya ribʼ chuxeʼ ri qamak arech kujubʼoq ubʼik chuwach we uwachulew rech we uchanim riʼ e che sibʼalaj itzel jeriʼ jas kraj ri urayibʼal ri Dyos Qatatxel,

¡chrech ri areʼ ri qʼijil chubʼeqij chubʼsaq! Amen.

Ri in sibʼalaj ksach nukʼuʼx, che ri ix xas chanim xiya kan ri Areʼ che xixusikʼij rumal ri usipanik ri Kristo, e chi aninaq xixbʼe chi rukʼ jun utzalaj tzij chik che jalajoj wi,

e weriʼ are waʼ weriʼ: xane ekʼo nikʼaj winaq che kkikʼyaq ri itzel chixoʼl e kkaj kkikʼex ri Utzalaj Tzij rech ri Kristo:

—Jeʼ nakʼut, we xas uj wi on we jun anjel che pa ri kaj petinaq uloq e kubʼij chiwech jun chik utzalaj tzij, che kʼextalik chuwach ri qabʼim uj chiwech, ¡ri areʼ anatema!

Jeʼ jas qabʼim, xoqujeʼ kamik riʼ, ri in kinbʼij chi jumul: We kʼo jun kubʼij jun chik Utzalaj tzij chiwech, che kʼextalik chuwach ri xikʼam ri ix: ¡Anatema riʼ chrech!

Kʼatekʼuriʼ, kamik riʼ ¿la are kinwaj ri in kinchʼak ri kitoqʼobʼ ri winaq, on are kinwaj kinchʼak ri utoqʼobʼ ri Dyos? ¿On la are kinwaj che in utz kinkil ri winaq? We ri in, are kinwaj che in utz chkiwach ri winaq, ri in, man inupataninel ta chi riʼ ri Kristo.

Jun retaʼmaxik bʼaʼ kinbʼan chiwech ix achalaxik, ri Utzalaj Tzij che ri in xinya ubʼixik, man yataʼl taj kok retaxik kumal ri winaq,

ri in man xinkʼam taj, man xinwetaʼmaj taj rumal jun winaq, kʼatekʼut, xane rumal jun qʼalajisabʼal rech ri Jesus Kristo.

Ri ix, utz utayʼik nakʼut iwumal ri nukʼaslemal ri in jeʼ jas inajjudiʼo, ri in sibʼalaj xeʼinwoqataj ri Komon Tyox rech ri Dyos e sibʼalaj kʼax xinbʼan chkech,

e ri in, in utz pa ri Judaʼismo chkiwach ri enuwinaq che junam kijunabʼ jachaʼ ri in, e ri in sibʼalaj xinkʼol ri pixabʼ kech ri enutat.

Kʼatekʼuriʼ aretaq chiʼ ri Areʼ ri xinukʼam ubʼik e xinusikʼij chi pa ri nusantil rumal ri usipanik ti Areʼ xraj

xuqʼalajisaj rukʼ ri nuwinaqil ri in ri Ukʼojol, arech ri in kinya ubʼixik ri areʼ chkixoʼl ri winaq che man eʼajjudiʼos taj, chi aninaq, ri in man are ta xinbʼe chuwach ri bʼaqilal e ri kikʼel,

e man xinpaqiʼ ta pa ri Jerusalem, arech ri in keʼinriqʼa wibʼ kukʼ ri eʼapostol, ri eʼareʼ che enabʼe chnuwach in; ri in bʼenam neʼ kinbʼan pa ri Arabʼiʼa kʼatekʼuriʼ xintzalej chi na ubʼik pa ri Damasko.

Kʼatekʼuriʼ, okʼowinaq chi oxibʼ junabʼ, aretaq chiʼ xinpaqiʼ pa ri Jerusalem arech kinsolij ri Sefas e xinkanaj rukʼ ri areʼ joʼlajuj qʼij:

ri in ma kʼo ta jun apostol chik xinwil uwach, xane xuwi xinwil ri Santiʼago ri rachalal ri Ajawxel,

e aretaq chiʼ kintzʼibʼaj weriʼ, kinbʼij chuwach ri Dyos che ri in man inbʼanal tzij taj.

Kʼatekʼut, xinbʼe pa ri Siriʼa e pa ri Silisiʼa;

kʼatekʼuriʼ ri Ekomon Tyox pa ri Judeʼa rumal ri Kristo, man ketaʼm ta nuwach ri in;

xuwiʼ kitom «che ri areʼ nabʼe kanoq, xroqataj ri kojonik arech kukʼis uwach e kʼu kamik riʼ kuya ubʼixik ri kojonik»,

kʼatekʼuriʼ xemaltyoxin chrech ri Dyos wumal ri in.

Kʼatekʼuriʼ, pa kajlajuj junabʼ chik, xinpaqiʼ chi jumul pa ri Jerusalem, rukʼ ri Bʼernabʼe e ri in xinkʼam ubʼi ri Tito wukʼ.

Xinpaqiʼk, rumal rech jun qʼalajisabʼal, kʼatekʼuriʼ xinkʼut chkiwach ri utzalaj- tzij, che ri in xinbʼij chkixoʼl ri man eʼajjudiʼos taj – e weriʼ xinbʼij chkiwach ri enim taq winaq, rumal rech, che ri in xinxibʼij wibʼ weneʼ man utz taj che xintij anim on weneʼ ma kʼo ta upatan che xintij anim

Kʼatekʼuriʼ, ri Tito che wachalal ajgriʼego, xoqujeʼ ma xta ta chech ri areʼ che kupus uwi ukowil.

Xane kumal ri eʼareʼ, che man eʼutz eʼachalaxik taj, che xepe chqaxʼol arech kkikʼakalej ri qatzoqopitajem pa ri Kristo Jesus, arech ri uj kujokik ujximitalik,

ri uj, chkiwach we winaq riʼ mawi ma xqaj taj xqakʼamowaj, arech ri uj, kqakʼol chiwech ri ix ri saqalajtzij rech ri Utzalaj Tzij.

Kʼatekʼuriʼ, xoqujeʼ ri keʼilik che enim winaq –man kʼo ta upatan riʼ ri kibʼantajik; ri Dyos man are ta kril ri kibʼanik ri winaq– ri eʼareʼ man kʼo ta uwiʼ xkikoj chrech ri utzalaj nutzij.

Xane aretaq chiʼ xkilo, che ri in xinchilbʼexik che ubʼixik ri Utzalaj Tzij chkech ri man eʼajjudiʼos taj, jeʼ jas xchilbʼex ri Luʼ kukʼ ri eʼajjudiʼo

–rumal rech che ri Areʼ, ri xbʼanowik che ri Pedro kokik apostol chkech ri pusim uwiʼ kikowil, xoqujeʼ, jeriʼ xubʼan chwech ri in pa ri kitoqʼobʼ ri man eʼajjudiʼos taj–

kʼatekʼuriʼ, xkikʼam uqʼabʼ ri sipanik che xyaʼtaj chwech ri in: ri Santiʼago, ri Sefas e ri Xwan, ri eʼareʼ che enim taq winaq, che eraqan taq ja; xkiya ri kiqʼabʼ chwech e chrech ri Bʼernabʼe, jeʼ jas jun kʼutbʼal rech ri komon riqoj ibʼ: ri uj kujbʼe kukʼ ri ma eʼajjudiʼo taj e ri eʼareʼ kebʼe kukʼ ri pusim uwiʼ kikowil;

xuwiʼ che rajawaxik chqech ri uj che keqachomaj ri emebʼaʼibʼ e ri in rukʼ ronojel wanimaʼ kwaj kinbʼan weriʼ.

Kʼatekʼut, aretaq chiʼ xpe ri Sefas pa ri Antiʼokiʼa xinkʼuleʼlaj ri utzij ri areʼ chupalaj, rumal rech che kʼo jun itzel uwach xubʼano.

Rumal rech, aretaq chiʼ majaʼ kepe enikʼaj winaq rech ri Santiʼago; ri areʼ xwaʼ kukʼ ri man eʼajjudiʼo taj; kʼatekʼut aretaq chiʼ xepe we winaq riʼ, ri areʼ xuwaj ribʼ chkiwach ri man eʼajudiʼo taj rumal rech che ri areʼ kuxibʼij ribʼ chkiwach ri pusim uwiʼ kikowil.

Kʼatekʼuriʼ, ri enikʼaj chik eʼajjujdiʼo xoqujeʼ jeriʼ xkibʼano, xoqujeʼ jeriʼ xubʼan ri Bʼernabʼe xuwaj ribʼ chikwach ri eʼareʼ arech man kilitaj taj.

Kʼatekʼut, aretaq xeʼinwilo, che man utz taj ibʼenaq rukʼ ri saqalajtzij utzij ri Utzalaj Tzij, ri in kinbʼij chrech ri Sefas chkiwach konojel ri winaq: «We ri at, che at ajjudiʼo, kʼatekʼuriʼ ri akʼaslemal jeriʼ ma atjudiʼo taj, e man at judiʼo taj kabʼano, ¿jas kʼu kuya riʼ kataʼ chkech ri man eʼajjudiʼo taj, arech kekʼaslemanik jacha eʼajjudiʼo?».

«Ri uj, uj ajjudiʼo chi aretaq chiʼ xujalaxik uloq e ri uj man uj ajmakunelabʼ taj jeʼ jas ri man eʼajjudiʼo taj;

kʼatekʼut, ri uj qetaʼm, che ri winaq, man sukʼil taj rumal che kubʼan ri Pixabʼ, xaneʼ xuwiʼ rumal ri kojonik chrech ri Jesus Kristo, xoqujeʼ ri uj xujkojon chrech ri Jesus Kristo arech kkariq ri sukʼil pa ri kojonik chrech ri Kristo e man xa ta rumal che kqabʼan ri Pixabʼ, rumal rech, che man kʼo ta jun riʼ kuriq ri sukʼil rumal che kubʼan ri Pixabʼ.

Kʼatekʼuriʼ, we ri uj xqatzukuj ri qasukʼil pa ri Kristo, kʼatekʼuriʼ xoqujeʼ ri uj kʼo ri qamak jeʼ jas ri enikʼaj chik, ¿la patanijel kʼuriʼ ri Kristo chech ri qamak? ¡Jayiʼ!

Rumal rech, we kinyak chi jumul ri jastaq che ri in xinwilij, chi in wi riʼ xinkʼut wibʼ rukʼ ri numak.

Rumal rech, che rumal ri Pixabʼ, ri in xinkamik chuwach ri pixabʼ, arech ri in kkʼojiʼ nukʼaslemal rukʼ ri Dyos; ri in inkʼo cho ri ripibʼal rukʼ ri Kristo;

kʼatekʼut, man in taj kinkʼaslemanik, xane are ri Kristo kkʼaslemanik pa ri in. Ri nukʼaslemal uchanim riʼ che kʼo pa ri bʼaqilal, kinkʼaslemaj pa ri kojonik chrech ri Ukʼojol ri Dyos10 che xinuloqʼoqʼej e xuya ribʼ rech toqʼobʼisabʼal nuwach in.

Ri in man kinchup ta uwach ri usipanik ri Dyos; rumal rech, we ri sukʼil petinaq rukʼ ri Pixabʼ, man kʼo ta upatan riʼ ri ukamikal ri Kristo.

¡Ayum! Ri ix ixajgalata, che man kixnoʼjinik taj, ¿jachin xbʼanow chiwech arech kqaj chiwach kixwartisaxik iwach? Ri ix xkʼut chiwach ri wachibʼal rech ri Jesus Kristo che kʼo cho ri ripibʼal.

Ri in, xuwiʼ jun jas uwach kinwaj kinwetaʼmaj chiwech ri ix: ¿la rumal rech che ri ix xibʼan ri Pixabʼ xikʼam ri Uxlabʼaxel, on rumal rech che ri ix xixkojon chech ri tzij?

¿La chi man kixnoʼjin taj, ri ix che nabʼe ximajij pa ri uxlabʼal e kamik riʼ kikʼis pa ri bʼaqilal?

¿La man kʼo ta upatan ronojel ri jetaq toqʼobʼ che xikʼam ri ix? Jeʼ na kʼuriʼ, man kʼo ta upatan riʼ.

Ri jun che kyaʼow chiwech ri Tyoxlaj Uxlabʼxel e kubʼan taq ri maybʼal chixoʼl ri ix, ¿la kubʼan weriʼ rumal rech che ri ix kibʼan ri Pixabʼ, on rumal rech che ri ix kixkojon chech ri tzij?

Jeʼ nakʼuriʼ ri Abʼraham xkojon chrech ri Dyos e weriʼ xejalax chrech ri areʼ che are waʼ ri usukʼil.

Qas chichobʼoʼ bʼaʼ weriʼ: ri winaq che kkichʼaʼ ri kojonik, eʼare riʼ ri eʼukʼojol ri Abʼraham.

Ri tzʼibʼatalik, xuchʼobʼo che ri Dyos kuya na riʼ ri sukʼil chkech ri man eʼajjudiʼo taj, xa jekʼuriʼ, ojer xubʼij chrech ri Abʼraham we utzalaj tzij riʼ: Pa ri at wi kitewchiʼx na konojel taq ri esiwantinimit.

Xa jekʼuriʼ, ri eʼareʼ che kkichaʼ ri kojonik itewchiʼtalik riʼ rukʼ ri Abʼraham ri areʼ che xkojonik.

Konojel ri eʼareʼ che kkichʼaʼ ukʼaslemaxik ri pixabʼ, kkʼojiʼ riʼ ri jun itzelal pakiwiʼ. Rumal rech jewaʼ kubʼij ri tzʼibʼatalik: Itzel chrech ri areʼ, ri man kukʼol ta ronojel ri pixabʼ che tzʼibʼatalik pa ri uwuj ri Pixabʼ, arech kubʼan ri areʼ.

Kʼatekʼuriʼ, che ri Pixabʼ, man kukoj ta jun winaq sukʼ chuwach ri Dyos, weriʼ saq chqawach rumal rech che ri sukʼ winaq kʼo ukʼaslemal riʼ pa ri kojonik;

kʼatekʼuriʼ ri Pixabʼ man petinaq ta xas rukʼ ri kojonik; xane ri winaq che kubʼan taq ri pixabʼ riʼ, ri areʼ kʼo ukʼaslemal rumal ri pixabʼ.

Ri Kristo xujuloqʼ ri uj chuwach ri itzel rech ri Pixabʼ riʼ, ri areʼ xretzelaj ribʼ arech kutoqʼobʼisaj qawach ri uj rumal rech che tzʼibʼatalik: «Itzel rech riʼ ri jun che xekel cho ri cheʼ»,

arech kopan kukʼ ri man eʼajjudiʼo taj, chi rumal ri Kristo Jesus, ri Tewchiʼbʼal rech ri Abʼraham e rumal ri kojonik, kyaʼtaj chqech uj ri Uxlabʼaxel rech ri chʼinik.

Eʼachalaxik, kinsol uwach chiwech jeʼ jas ri winaq: jun tzʼibʼanik bʼim kanoq che utz ubʼanik xbʼanik, ri areʼ che petinaq chi kukʼ ri winaq, man kchup ta uwach e man kʼo ta kkʼex chrech.

Kʼatekʼuriʼ, xbʼix ri taq chiʼnik chrech ri Abʼraham e chkech ri rijaʼlil. Ri tzʼibʼatalik man kubʼij taj: «e chkech taq ri erijaʼlil», jeʼ neʼ che ekʼo ekʼi; xane xuwi jun kubʼij: chech jun awijaʼl, weriʼ kubʼij, are ri Kristo.

Kʼatekʼuriʼ, jeriʼ ri nuchomanik in: jun tzʼibʼatalik bʼim kanoq che utz ubʼanik xubʼan ri Dyos; ri Pixabʼ che kpe chi aqʼan kijebʼ ciʼent juwinaq lajuj junabʼ, man kkowin ta riʼ kuchup ri areʼ, e man kkowin ta riʼ che ubʼixik che man utz ta ri chiʼnik.

Rumal rech, che weta jun echbʼal chi tzuyul chrij ri Pixabʼ, man petinaq ta chi riʼ rumal ri chʼinik: kʼatekʼuriʼ, rumal jun chʼinik, ri Dyos xuya ri utoqʼobʼ chrech ri Abʼraham.

Xa jekʼuriʼ ¿jas upatan ri Pixabʼ? Ri Pixabʼ jun tiqbʼal nakʼut arech kkʼojiʼ ri makaj, chi kʼateʼ kpe na ri ijaʼlil rech ri chiʼnik, xbʼix kumal ri eʼajpataninel kech ri eʼanjelibʼ e rumal ri uchak jun qʼaxeltzij.

Kʼatekʼuriʼ man kʼo ta jun qʼaxeltzij riʼ aretaq chiʼ xa jun chi winaq kwonwatik, e ri Dyos xa jun chi Dyos.

Rukʼ weriʼ ¿la kkʼulelaʼn ri Pixabʼ chrech taq ri uchiʼnik ri Dyos? ¡Man kkʼuleʼlan taj! Rumal rech che weta xya chqech jun Pixabʼ che kkowinik kuya ri kʼaslemal, utz na kʼu riʼ che ri sukʼil kpe rukʼ ri Pixabʼ.

Kʼatekʼut ri Tzʼibʼatalik kutzʼapij ronojel jastaq chuxeʼ ri mak, arech ri chiʼnik, rumal ri kojonik chrech ri Jesus Kristo xyaʼtaj chkech ri kekojonik.

Aretaq chiʼ kpe ri kojonik, ri uj uj tzʼapitalik chuxeʼ ri Pixabʼ; ri uj, uj kʼolom chrech ri kojonik che ri kpe na.

Xajekʼuriʼ, ri Pixabʼ are qajtij uloq chi kʼateʼ ri Kristo arech ri uj ujsukʼil taq winaq rumal ri qakojonik.

Kʼatekʼut, aretaq chiʼ xopan ri kojonik, ri uj ma uj kʼo ta chi chuxeʼ jun ajtij chik.

Rumal rech che iwonojel ix, ixralkʼuwaʼl ri Dyos rumal ri ikojonik chrech ri Jesus Kristo.

Iwonojel ri ibʼanom iqasnaʼ pa ri Kristo, xas iwatzʼyaqim ri Kristo:

man kʼo ta chi jun ajjudiʼo on ajgriʼego, man kʼo ta chi jun pataninel on ajaw, ma kʼo ta chi jun achi on ixoq; rumal rech, che ri ix, xuwiʼ ix jun chik pa ri Kristo Jesus.

Kʼatekʼut, we ri ix, ix rech ri Kristo, ri ix ix rijaʼlil riʼ ri Abʼraham e ix ixechbʼanelabʼ riʼ jeriʼ jacha ri chiʼnik.

Kʼatekʼuriʼ, ri in kinbʼij, aretaq chiʼ, ri echbʼanel akʼal na ri areʼ xas man jalajoj ta riʼ, chuwach jun ajpatanel.

Ri areʼ, kʼo riʼ chuxeʼ taq ri kitaqanik ri eʼutatbʼal e chuxeʼ ri eril rech ri jastaq rech, chi kʼateʼ na kopan ri qʼij che xubʼij ri Utat.

Xoqujeʼ nakʼut, ri uj uj jeriʼ arechiʼ che uj akʼalabʼ, uj kʼo chuxeʼ ri ukowinem ri jastaq che rech we uwachulew.

Kʼatekʼuriʼ, aretaq chiʼ, nimalaj xtzʼaqat ri qʼij ri Dyos xutaq uloq ri ukʼojol; xaʼlaxik chi rukʼ jun ixoq, xaʼlaxik chuxeʼ ri Pixabʼ;

arech, che ri areʼ keʼukol ri ekʼo chuxeʼ ri ukowinem ri pixabʼ e arech, che ri uj kujuxik ujralkʼuwaʼl.

Ri kʼutbʼal, che ri ix, ix ralkʼuwaʼl, ri Dyos xutaq uloq pa ri qanimaʼ ri Ruxlabʼal ri Ukʼojol che kuraqaqej uchiʼ e kubʼij; ¡Abʼbʼa, Tat!

Xajekʼuriʼ, ri at man at jun ajpatanijel ta chik, xane at alkʼuwaʼlxel chik; e we at alkʼuwaʼlxel chik, at echbʼanel ri chi rumal ri Dyos.

Ojer kanoq, aretaq chiʼ ri ix, man iwetaʼm ta uwach ri Dyos, ri ix, ix kʼo chuxeʼ ri kikowinem ri qastzij che ma edyos taj;

kʼatekʼut, kamik riʼ, che ri ix iwetaʼm chi uwach ri Dyos, on are utzubʼixik che ri Areʼ retaʼm chi iwach ix, ¿jas kʼu che, kixtzalej pa taq ri jastaq che man kʼo ta uchuqʼabʼ e che man utz taj; e ri ix, jacha ri ojer, kiwaj kikoj iwibʼ chuxeʼ ri ukowinem ronojel weriʼ?

Ri ix, kinikʼoj rij taq ri qʼij, taq ri ikʼ, taq ri junabʼ.

Ri ix, kibʼan chwech, arech ri in kinxibʼij wibʼ rumal rech, we man kʼo ta rutzilal ri nukosik iwukʼ.

Kinta chiwech, che ri ix, chixux bʼaʼ jeriʼ in jas ri in, rumal rech, che ri in, xinuxisaj wibʼ, jeriʼ ix jas ri ix; ixachalaxik, sibʼalaj rukʼ ronojel wanimaʼ kinta weriʼ chiwech. Ri ix man xiwetzelaj ta nuwach.

Kʼatekʼuriʼ, ri ix, iwetaʼm che jun yabʼilal xyoʼw bʼe chwech, che ri in xinyaʼ ubʼixik chiwech ri Utzalaj Tzij chi pa ri nabʼe mul,

e rukʼ ri kʼax kuyaʼ chiwech ri jun yawabʼ bʼaqilal riʼ; ri ix, man xiniwetzelaj taj e man itzel taj xiniwilo; xane xinikʼulaj in jeʼ jas jun anjel rech ri Dyos; xinikʼulaj in jeʼ jas ri Kristo Jesus.

¿Jawijeʼ kʼo wi kamik, ri utzalaj taq tzij che kiyaʼ chbʼil taq iwibʼ ri ix? Rumal neʼ, che ri in, kuyaʼo kinbʼij chiwech: Ri ix, xa makoʼl xixkowinik xikʼot ri iwoqʼoch arech kiyaʼ chwech ri in.

¿La xa puch xinjalo inikʼulel rumal rech che ri in qas kinbʼij ri saqalajtzij chiwech?

Ri kkaj chiwech ix man utz taj; are kkaj kixkitas ubʼi wukʼ ri in, arech kixkiyut kukʼ ri eʼareʼ.

Utz ri uyutik jun rukʼ jun chik we xa rumal kʼo ri utzil chi ronojel qʼij e man xuwi taj aretaq chiʼ ri in in kʼo naqaj chiwech ri ix,

ix alaj taq walkʼuwaʼl, iwumal ri ix, chi jumul chik kinkʼaxkʼolij ri uloqʼexik iwach chi kʼateʼ na aretaq chiʼ ri Kristo tzʼaqatinaq chi iwukʼ ri ix.

Kwaj neʼ che weta ri in, in kʼo naqaj chiwech ri ix kamik riʼ; arech utz ri nutzij iwukʼ ri ix; xa ne rumal rech che ri in, man wetaʼm taj jas ichʼabʼexik kinbʼano.

Chibʼij bʼaʼ chwech ri in, ri ix, che kiwaj kikoj iwibʼ chuxeʼ ri Pixabʼ ¿la xa man kita ta ri pixabʼ?

Pa ri tzʼibʼatalik kqilo, che ri Abʼraham xkʼojiʼ kebʼ ukʼojol: jun xkʼojiʼ rukʼ ri ajpatanel ixoq e ri jun chik xkʼojiʼ rukʼ ri tzoqopitalik ixoq;

ri jun che rech ri ajpatanel ixoq, xaʼlaxik jeriʼ jacha kuta ri bʼaqilal; kʼatekʼut ri jun che rech ri tzoqopitalik ixoq, xaʼlaxik rumal ri chiʼnik.

Waʼ weriʼ jun wachibʼal: we ekebʼ ixoqibʼ riʼ kkikʼut kebʼ chapbʼal qʼabʼaj; ri nabʼe ixoq are ri chapbʼalqʼabʼ pa ri Sinaʼi, kuloqʼaj ri ral jeʼ jas ajpatanel: ri areʼ, are ri Agar

(rumal rech che ri bʼiʼaj Sinaʼi kʼo pa Arabʼiʼa) e kamik riʼ, are ri Jerusalem, ri areʼ ajpataninel xoqujeʼ ri eral.

Kʼatekʼuriʼ, ri Jerusalem chikaj are riʼ ri tzoqopitalik e ri areʼ, are na kʼu riʼ ri qanan;

rumal rech, che tzʼibʼatalik weriʼ: chatkiʼkotoq, ri at che man xatkowin taj kkʼojiʼ jun awal, ri at che man xaloqʼaj ta uwach jun awal; charaqaqej bʼaʼ achiʼ rumal kiʼkotemal; ri at, che man aweʼtam ta ri ukʼaxkʼolil ri uloqʼoxik jun akʼal; xane are ekʼi ri ral ri wonobʼaʼm kanoq chuwach ri qas ixoqilal.

Kʼatekʼuriʼ, ri ix, ixachalaxik, che ix jeriʼ jas ri Isaʼak, ix na kʼuriʼ ix ral ri chiʼnik.

Kʼatekʼut, qas jeriʼ jeʼ jas ri ojer, ri alkʼuwaʼlxel rumal ri bʼaqilal, xroqataj ri ral ri Uxlabʼal, weriʼ jewaʼ xoqujeʼ kamik riʼ.

E jas kubʼij ri Tzʼibʼatalik: chakʼyaqaʼ bʼi ri ajpataninel ixoq rukʼ ri ral, rumal rech che man utz taj che ri ral ri ajpataninel ixoq kechbʼenik rukʼ ri ral ri tzoqopitalik ixoq.

Xa jekʼuriʼ ix achalaxik; ri uj, man uj ralkʼuwaʼl ta ri ajpataninel ixoq, xane ujralkʼuwaʼl ri tzoqopitalik ixoq.

Arech ri uj, ujkiritajinaq kujkanaj kanoq, are ri Kristo xujkirowik. Qas utz ikʼolik bʼaʼ chibʼanaʼ bʼaʼ rukʼ weriʼ; mikoj chi bʼaʼ iwibʼ chuxeʼ ri jatʼibʼal rech ri ajpataninel.

In ri in Pabʼlo, ri kbʼin weriʼ chiwech: We ri ix, kixtowik arech kpus uwiʼ ri ikowil, man kʼo upatan riʼ ri Kristo chiwech.

Kinbʼij chi jumul weriʼ chech ronojel winaq che kpus uwiʼ ri ukowil. Rajawaxik che ri areʼ, chi kubʼan wi riʼ ronojel ri Pixabʼ.

Ri ix, xitas apan iwibʼ chuwach ri Kristo, iwonojel ri ix, che are kitzukuj ri sukʼil pa ri Pixabʼ; ri ix, xitzaq apan iwibʼ, xitas apan iwibʼ chuwach ri sipanik.

Kʼatekʼuriʼ, ri uj, rumal ri Uxlabʼxel kqeyeʼj pa ri qakojonik ri jastaq che rech ri sukʼil.

Rumal rech, che pa ri Kristo Jesus, man kʼo ta ubʼantajik ri pusim uwiʼ kowil on ri man pusim taj, xane xuwi kʼo ubʼantajik ri kojonik che kchakunik rumal ri loqʼoqʼebʼal kʼuʼx.

Ri ix, qas utz uchapaleʼxik xibʼan ri ibʼe; ¿jachin xkojow kʼax pa ri ibʼe arech man kiterneʼj bʼe ta ri saqalajtzij?

Waʼ we jun chomanik riʼ, man petinaq ta rukʼ ri Areʼ ri kixsikʼinik.

Jubʼiqʼ uchʼamilal kaxlanwa kuwaʼlisaj uwach ronojel ri qʼor.

Kʼatekʼuriʼ, ri in, kinkubʼaʼ nukʼuʼx, che ri ix, chi pa ri Ajawxel riʼ, man kʼo ta chi jun ichomanik chuwach weriʼ; kʼatekʼut, ri areʼ, che kkojow kʼax pa ri ichomanik, chi kʼo wi riʼ ri qʼatbʼaltzij puwiʼ xaq apachin neʼ.

Kʼatekʼuriʼ, ri ix achalaxik, we ri in tajin na kinyaʼ ubʼixik ri pusinik uwiʼ kowil, ¿jas kʼu che kinoqatax chi jumul? Xkʼis na kʼu uwach riʼ ri kʼax rech ri ripbʼal.

¡Weta kkimuch kibʼ ri jachintaq kkinim ri kʼax pa ri iwuxlabʼal!

Ix achalaxik, xane ixsikʼitalik arech ri ixkiritajinaq; kʼatekʼuriʼ, rukʼ we ixkiritajinaq chik, mikʼam bʼaʼ ichuqʼabʼ arech kiyaʼ chrech ri ibʼaqil; xane rumal ri loqʼoqʼebʼal kʼuʼx chikaj, chipatanij bʼaʼ chbʼil taq iwibʼ.

Xane jun tzijobʼelil kubʼij ronojel ri Pixabʼ pa ri rutzilal: Ri at, chaloqʼoqʼej ri awajil atzʼaqat jeriʼ jas uloqʼoqʼexik awibʼ at kabʼano.

Kʼatekʼut, we ri ix, kikatzkaʼ iwibʼ e kitijej iwibʼ; qas chikʼoloʼ bʼaʼ iwibʼ arech man kikʼis ta tzij piwiʼ ri ix.

Ri in, kinbʼij weriʼ chiwech: We are ri Uxlabʼxel kkʼamow ibʼe, ri ix, ma kixkowin ta riʼ kibʼan ri urayibʼal ri bʼaqilal.

Rumal rech, che ri bʼaqilal, are kraj ri itzel puwiʼ ri uxlabʼal e ri uxlabʼal, are kraj ri utzil puwiʼ ri bʼaqilal; ekebʼ, kechʼojinik, xa jekʼuriʼ, man kibʼan taj ri jastaq che kiwaj kibʼano.

We kʼo ri Uxlabʼxel iwukʼ ri ix, ri ix, man ix kʼo ta riʼ chuxeʼ ri pixabʼ.

Kʼatekʼuriʼ, utz retaʼmaxik qabʼanom ronojel ri jastaq che kubʼan ri bʼaqilal: ri mak rukʼ ixoq achi, ri itzel taq jas uwach, ri qʼaxem uwiʼ pa ri kʼaslemal,

ri qʼijilanik chkech ri ejoʼs taq dyos, ri itzbʼal, ri kʼaxkʼol pa taq ri animaʼ, ri chʼoj, ri tiʼtem, ri oyowal, ri itzel taq tzij, ri itzel komon, ri tasoj ibʼ,

ri itzel taq rayibʼal, ri qʼaxem uwiʼ che ri wa, ri itzel taq uwach waʼim e ukyaʼ, e ronojel jas uwach che jeriʼ – Kʼatekʼuriʼ, ri in kinbʼij chiwech, jeʼ jas nubʼim chik chiwech, ri kebʼanow we jetaq mak riʼ, man kechbʼej ta riʼ ri Rajawibʼal ri Dyos.

Kʼatekʼuriʼ, ri uwach kuyaʼ ri Uxlabʼxel are weriʼ: ri loqʼoqʼebʼal kʼuʼx, ri kiʼkotemal, ri jaʼmaril, ri kochʼonik, ri patanajik, ri man kubʼan ta kebʼ qatzij,

ri kmeʼlal, ri utz uchapik ri kʼaslemal; rukʼ weriʼ, man kʼo ta jun pixabʼ che kchʼojin rukʼ.

Rumal rech, ri eʼareʼ che erech ri Kristo Jesus, xkikoj riʼ ri kibʼaqil rukʼ taq ri urayibʼal e itzel taq chomanik cho ri ripbʼal.

Kʼatekʼuriʼ, we ri qakʼaslemal jeriʼ jeʼ jas ri Uxlabʼxel, xoqujeʼ ri Uxlabʼxel kubʼan riʼ ri uchak paqawiʼ ri uj.

Maqatzukuj bʼaʼ nimalaj qaqʼijil, aretaq chiʼ kujchʼojinik chqaxoʼl, e aretaq chiʼ kqaj che uj jeriʼ jeʼ jas ri jun chik.

Ix achalaxik xoqujeʼ, we kiwil jun che kmakunik, ri ix, che ix winaq ix rech ri uxlabʼal; chijikomaj bʼaʼ ri areʼ rukʼ jun kmeʼlalaj uxlabʼal, e ri at, chachajij bʼaʼ awibʼ, rumal rech, che xoqujeʼ riʼ ri at loqʼ riʼ katuchap ri itzel.

Chitoʼoʼ bʼaʼ iwibʼ che ukʼamik ubʼik ri jetaq eqaʼn e xa jeriʼ na kʼuriʼ utz ubʼanik riʼ kibʼano ri Upixabʼ ri Kristo.

Rumal rech, we kʼo jun kuchomaj che ri areʼ kʼo unimal; e ri areʼ xas man kʼo ta wi unimal, chi are ri areʼ riʼ ksubʼuw ribʼ.

Ronojel winaq, chrilaʼ chunikʼoj ri ukʼaslemal, xa jekʼuriʼ xas kuriq na wi riʼ ri uqʼijil pa ri areʼ e man rajawaxik ta riʼ kutzukuj pa kech wi ri enikʼaj chik;

rumal rech, che rajawaxik, che chjujnal winaq krukʼaj ri reqaʼn.

Ri tijoxel, chuyaʼaʼ bʼaʼ ronojel utz taq jastaq chrech ri jun ri kkʼutuw ri tzij chuwach.

Misubʼ bʼaʼ iwibʼ; man kʼo ta jun winaq kretzʼebʼej uwach ri Dyos. Rumal rech, che ri jastaq che kutik jun winaq, are riʼ ri kuyak na uwach;

ri areʼ, che ktikonijik pa ri bʼaqilal che kqʼayik, kuyak na riʼ bʼaqilal che kqaʼyik; ri are che ktikonijik pa ri Uxlabʼal, kuyak na riʼ pa ri Uxlabʼal ri junalik kʼaslemal.

Mujtaniʼ bʼaʼ chrech ubʼanik ri utzil; rumal rech che kpe na riʼ ri uyakik uwach ri pa ri uqʼij we ri uj man kqachoʼpij ta qibʼ che ubʼanik.

Xa jekʼuriʼ, aretaq chiʼ ri uj, kujkowinik, xas chqabʼanaʼ wi ri utzil chkech konojel kʼatekʼuriʼ xas are chiqanabʼisaj ri eqachal che junam ri qakojonik kukʼ.

Chiwilampeʼ ri nimalaj taq nutzʼibʼ ri kutzʼibʼaj we nuqʼabʼ rech toqʼobʼisabʼal iwach.

Ri ejujun taq winaq che are kkaj utz keʼilik pa ri kibʼaqilal, eʼareʼ waʼ we winaq riʼ ri ketaqan chiwech arech kipus uwiʼ ri ikowil, are kkaj che man kʼo ta kʼax kpe pakiwiʼ rumal ri uripbʼal ri Kristo.

Waʼ we eʼareʼ riʼ, che kipusim uwiʼ ri kikowil, ri eʼareʼ, xoqujeʼ man kkibʼan taj ri kubʼij ri pixabʼ; xuwi are kkaj che rukʼ ri upusik uwiʼ ikowil ix, kkʼojiʼ nimalaj kiqʼijil eʼareʼ pa ri ibʼaqil ri ix.

Kʼatekʼuriʼ, ri in, man kinwaj taj nimalaj nuqʼijil; xuwiʼ kwaj riʼ we pa ri uripbʼal ri Qajawxel Jesus Kristo, ri areʼ, che xukoj ri uwachulew cho ri ripbʼal rumal wech in, e ri in xinukoj cho ri ripbʼal chkiwach ri uwachulew:

Rumal rech, che ma kʼo ta ubʼantajik riʼ we pusim uwiʼ ri kowil on we man pusim taj; ri rajawaxik, are riʼ, che ri uj, uj jun kʼakʼalaj winaq.

Kʼatekʼuriʼ, chkech konojel winaq che kkiterneʼbʼej we jastaq uwach riʼ, jun nimalaj jaʼmaril bʼaʼ chkech e jun nimalaj loqʼoqʼebʼal kʼuʼx bʼaʼ chkech; xoqujeʼ je waʼ chkech ri Israʼel che rech ri Dyos.

Kʼatekʼuriʼ, chi pa we kamik ubʼik riʼ, makʼojiʼ bʼaʼ jun winaq che kbʼanow kʼax chwech; xane wukʼam pa ri nubʼaqil ri jetaq utʼiqbʼal ri Jesus.

Ix achalaxik, ri usipanik ri Qajawxel Jesus Kristo, chkanaj kan bʼaʼ pa ri iwuxlabʼal ¡Amen!