Yɛn Paulo, woke Thiluano, ku Timotheo, awarek en gɛɛrku kanithɔ de Thethanlonikei nu e Nhialic Waadayic, ku Bɛnydit Yecu Krithoyic: E dhueeŋdepiɔu tɔu ke week, ayi mat, ne ke bɔ tede Nhialic Waada, ku Bɛnydit Yecu Kritho.

Wok ee cool e lec Nhialic nɔm e akooinyiin kedhie ne biakduon week wedhie, ku wok ee kedun lueel e lɔŋdayic;

luɔiduon e gam ayok tak acin pek, ku takku luɔiduon e nhieer, ku aŋɔth aa wek Bɛnydan Yecu Kritho ŋɔɔth ne liɛɛr e wekpiɔth e Nhialic Waada nɔm;

lonyduon ci Nhialic we lɔc aŋicku, wek mithekɔckuɔn nhiaar,

welkuɔn piɛth aake cii bɔ e weyiic ne jam tei, aake bɔ ne riɛl ayadaŋ, ku ne Weidit Ɣer, ku ne ŋiny aa wek ke ŋic egɔk; we ŋic taudan e ye wo tɔu e weyiic ne biakdun week.

Ku we ci aa kɔc ci tauda dɔmic, ayi tau de Bɛnydit, ne gam ca wek jam gam ne ketuc dhal week aret, ku ne miɛtepiɔu e Weidit Ɣer;

aguɔki aa kɔc bi kɔc taudun aa dɔmic, kɔc nu Makedonia ku Akaya ebɛn.

Luɔi ca wek jam de Bɛnydit tɔ kok abi kɔc piŋ, acie Makedonia keke Akaya kapac, gamduon ca wek Nhialic gam aci thiei e thai nɔm ebɛn; ku acin ke buk dhil lueel.

Kek gup ayek wo nyuoth lɔ ci wo lɔ e weyiic, ku wel ca wek rot wɛl Nhialic ne yiethkun yiic, bak ka ke Nhialic yic piir aa looi,

ku bak Wende aa tiɛɛt paannhial, Wendɛn ci jɔt e kɔc ci thou yiic, yen Yecu, raan ci wo luok e agonh bi bɛn.

Ku wegup, wek mithekɔckuɔ, we ŋic bɛndan ci wo bɛn e weyiic, nɔn cii en e ɣɔric:

ku acakaa wok e ci kerac kɔn guum, ku wo ye luoi kerac alal e Pilipoi, acit man ŋiɛc wek en, ke wo ŋoot ke wo ye week guieer welpiɛth ke Nhialic ne ater dit, ke wo ril piɔth e riɛl e Nhialicda.

Ku guieer ee wo wel guiir aa cinic mɛth e kɔc math, ayi jam col aa liu thin, ayi rueeny:

ku acit man ci Nhialic wo tɔ piɛth, an, bi welpiɛth taau e wocin, yen aye wok jam; acie kɔc ke yok tɔ mit piɔth, ee Nhialic Raan e wo them piɔth.

Ku acin kool toŋ ci wo wel e mɛthenyin lueel, acit man ŋiɛc wek en, ku acin wui de kalei cuk moony; Nhialic ee caatɔda:

ku acin lɛc cuk kɔɔr tede kɔc, ayi tede week, ayi tede kɔc kɔk, acakaa wek e cuk duɛɛr miɛn, luɔi ee wok tuuc ke Kritho.

Ku wo aaye ŋiec reer emaath e weyiic, cit man ee tik mithke ŋiec muk apiɛth:

ku ne taŋ ee wok week tak aret, en aa ye wok piɔth miɛt, luɔi yin wo week welpiɛth ke Kritho, ku acie keek kapac, ee weikuɔ ayadaŋ, ne nhieer ci wo week nhiaar alal.

Wek ee weniim tak, wek mithekɔckuɔ, ne luɔi diit thieek yok looi: wo ye luui akol ku wakɔu, wok e cin piɔth luɔi bi wo raan tok miɛn e weyiic, agoku welpiɛth ke Nhialic guieer week aya.

Wek aye caatɔɔ, ayi Nhialic aya, ne tau ee wok tɔu e weyiic wek kɔc ci gam, taudan ɣeric ku piɛthic ku cinic gaak dueere wo gɔk:

acit man ŋiɛc wek en, guieer ee wok week guieer ku muŋ ee wo week muk piɔth, ku lek ee wok week lɛk wedhie, cit man ee wun mith jam keke mithke,

an, bak ŋiec reer e reer e roŋ ke Nhialic, Raan e cɔl week e ciɛɛŋde ku dhueeŋde.

Yen a ye wok cool e lec Nhialic acin pek, luɔi kɛn wek jam gam cit nɔn ee yen jam de kɔc tei, waan gam wek jam cak piŋ tede wook, ku acak tɔ ye jam e Nhialic, ku ye jam e Nhialic egɔk, jam e cool e lni e weyiic ayadaŋ wek kɔc gam.

Ku week, mithekɔckuɔ, we ci aa kɔc e tau de kanithɔɔ ke Nhialic dɔmic kanithɔɔ nu e Yecu Krithoyic e Judaya: ne guom ca wek karɛc mane guum ayadaŋ tede kɔc ke paandun, ka kit e ka cik guum tede Judai;

kek kɔc ci Bɛnydit Yecu nɔk ayi nebii ayadaŋ, ku acik wo yɔŋ, ku ciki Nhialic e tɔ mit piɔu, ku yek ater lueel e kɔc kedhie;

ayek wook pɛn guieer guiir wo Juoor jam e kuny bike kony wei; yen aye kek karɛcken kut niim ecaŋɣɔn: ku agɔth aci bɛn tede keek ka cin ke ye doŋ.

Ku wook, mithekɔckuɔ, nɔn ci wo jɔt e welɔm buk ceŋ roor e akool liaakaŋ, ku ye wokgup kek e jɔt acie wopiɔth, yen aa ŋɛk wok en alal e tiŋ bi wo we tiŋ nyin, we cuk tak alal:

yen aa ya yɛn bɛn tede week kɔɔr, yɛn Paulo guop, nɔn ban bɛn raantok, ku nɔn ee yen raanrou; go Catan wo peen.

Aŋɔth ŋathku ee kaŋo, ayi miɛt e wopiɔth, ayi goldan e dhueeŋ, yek kaŋo? Ciki e week, e Bɛnydan Yecu Kritho nɔm ne bɛn bi en bɛn?

Wek aye dhueeŋda ku yak miɛt e wopiɔth.

Na wen, aci cien luɔi bi wok e bɛ guum, ke luelku e wopiɔth, an, apiɛth te bi wo nyaaŋ Athenai wapac;

agoku Timotheo tooc, mɛnhkeneda, ku ye raan e ka ke Nhialic looi, raan e wok luui etok ne welpiɛth ke Kritho, acuk tooc luɔi bi en week tɔ kaac apiɛth, ku riit wepiɔth e gamduon ca wek gam;

ke cin raan bi ro yal ne biak de katuc dhal wooke: luɔi ŋiɛc wek en wegup, nɔn ee yen biak de kake yen e dɔme wo.

Ayi ɣɔn tɔu wok e weyiic ayadaŋ, acuk kɔn lɛk week nɔn bi wo kerɛɛc dhal wook guum; acit man ci en guɔ aa yic enɔɔne, aŋiɛcki week.

Yen aa tuɔɔc ɛn raan, waan ci en cien luɔi ban e bɛ guum, ke ya bi gamdun ŋic, nɔn de ke ci jɔŋ e kɔc them we yien them, ago luɔida aa ɣɔric.

Ku enɔɔne, te ci Timotheo lɔ bɛn e welɔm bi tede wook, ke bii jam piɛth jam de gamdun ku nhieerdun, ayi taŋ aa wek cool e tak wook apiɛth ecaŋɣɔn, ku nɔn kaar wek tiŋ ba wek wo tiŋ alal, acit man kɔɔr wok tiŋ bi wo we tiŋ ayadaŋ;

yen aa jɔ wok muk piɔth ne biakdun, wek mithekɔckuɔ, ne ketuc dhal wook ebɛn ku ne dak e wo dak e kaŋ, ee gamdun yen aa muk wopiɔth:

wok piir enɔɔne, te kaac wek aril e Bɛnyditic.

Ee lɛc ŋo dueer wok Nhialic bɛ lɛc nɔm ne biakdun, ne miɛtepiɔu ebɛn miɛt ee wo piɔth miɛt ne biakdun e Nhialicda nɔm?

Wok e cool e lɔŋ alal wɛɛrwakɔu ku akol, ke we buk tiŋ nyin, agoku ka dak week e gamdun looi abik dikedik.

Enɔɔne, e Nhialic guop, yen aye Waada, keke Bɛnydan Yecu Kritho, e ke wo nyuoth kueerdan lɔ tede week:

e Bɛnydit e we tɔ ŋuak wenyiin abak kuɛth ne nhieer nhiaar wek rot, ku ne nhieer nhiaar wek kɔc kedhie, acit man nhiɛɛr wok week ayadaŋ;

luɔi bi en we tɔ kaac piɔth aril, ke cin gaak dueere we gɔk, ne ɣɛɛrepiɔu e Nhialic nɔm, Yen aye Waada, ekool e bɛn bi Bɛnydan Yecu Kritho bɛn keke kɔckɛn ɣerpiɔth kedhie.

Cook cieen, wek mithekɔckuɔ, wek laŋku, ku lekku week ne Bɛnydit Yecu, yan, acit man ca wek jam yok tede wook, jam de reer ba wek dhil reer, ke we bi Nhialic tɔ mit piɔu, wek laŋku, ke reerduon piɛth bi aa cool e ŋuak enyin.

We ŋic jam cuk yien week ne Bɛnydit Yecu.

Kede piɔn e Nhialic ki, yan, ɣɛɛr ba wek piɔth ɣɛɛr, ku pal ba wek kɔɔrediaar pɔl;

we wedhie, e ŋɛk e ye guopde ŋiec dɔm ne ɣɛɛrepiɔu ku rieeu,

ku cii epiɔu tum kerac ne ŋɔɔŋ e ye dɔm, cit man e Juoor kuc Nhialic;

e cin raan bi akeu waan, ciɛm mɛnhkene e kedaŋ: luɔi ee yen Bɛnydit yen ee Raan bi ka cit ekake guoor kedhie, acit man ci wok e kɔn lɛk week ayadaŋ, ku acuk rot tɔ ye caatɔɔ.

Acie kede luɔi col en e cɔɔle Nhialic wook, ee kede ɣɛɛrepiɔu.

Yen ka, raan reec piŋ, acie raan e reec en kede piŋ, ee Nhialic, Raan ci we miɔɔc ne Weikɛn Ɣer.

Ku ne kede nhieer ba wek mithekɔckun nhiaar acin ke duɛɛr gaar week, wegup, we cii Nhialic wɛɛt, an, bak rot nhiaar wapac;

ku kene ayak looi ayadaŋ tede niithekɔckun kedhie nu Makedonia ebɛn. Ku wek laŋku, wek mithekɔckuɔ, ke nhieerdun bi lɔ ke ŋuak enyin aret;

ke we bi reer ba wek reer emaath aa cool e thɛm wek e, ku bak kakun gup aa looi, ku yak luui e wecin, acit man ci wok e lɛk week;

luɔi ba wek reer ke we lɔ piɔth gɔk ne kɔc nu biic, ku cin ke bi we dak.

Ku wok cin piɔth luɔi ba wek e kuc, wek mithekɔckuɔ, ne kede kɔc ci nin; ke we cii piɔth bi jiɛth alal, cit man e kɔc kɔk, kɔc cin ke ŋathki.

Ku te gɛm wok en nɔn ci Yecu thou, ku be ro bɛ jɔt, yen acit bii bi Nhialic kɔc ci lɔ nin e Yecuyic bɛɛi ne yen etok.

Ku kene a lekku week ne jam e Bɛnydit, yan, Wok kɔc piir, kɔc bi doŋ aɣet bɛn bi Bɛnydit bɛn, wo cii kɔc ci nin bi waan.

Bɛnydit guop abi bɛn piny paannhial ne kiɛɛu, ku ne rol e bɛny nu e tuucnhial niim, ku kaaŋ de Nhialic; go kɔc ci thou ne Krithoyic agoki rot kɔn jɔt:

na ele, ke wok kɔc piir, kɔc ci doŋ, wo bi gap nhial ne keek etok e luaat yiic, buk lɔ rɔm ne Bɛnydit e yomic: ku jɔku tɔu ne Bɛnydit etok aɣet athɛɛr.

Yen ya wek wepiɔth muk wapac ne welke.

Ku ne kede run ku akool, wek mithekɔckuɔ, acin ke duɛɛr gaar week.

Wegup aŋiɛcki egɔk nɔn bi akol e Bɛnydit bɛn cit man ee cuɛɛr bɛn wakɔu.

Ku te lueel kek en, an, Piny arɛɛr ediu, ku acin riɔɔc nu; en a bi riaak e kegup ethiau, cit man e kɛc ci tik kac; ku acin ke dueer kek poth.

Ku week, mithekɔckuɔ, wek cii nu e cuɔlic, bi ekoole we math cit man e cuɛɛr:

luɔi aa wek wɛɛt ke ɣɛɛrepiny wedhie, ku yak wɛɛt ke akol: wo cie kɔc ke wɛɛrwakɔu, ayi cuɔlepiny.

Yen du wok e nin cit man e kɔc kɔk; yok yin ku piɛthku niim.

Kɔc e nin ee wɛɛrwakɔu en aye kek nin; ayi kɔc e ro tɔ wit mɔu, ee wɛɛrwakɔu en aye mɔu ke wit.

Ku wook, wok kɔc ke akol, yok niim piath, abuk weu pat yiic e yɔu gel aa cieŋ, weu ke gam ku nhieer; ku ceŋku aŋɔth de kunydewei a ye akup e wokuiim.

Nhialic aken wo dɔm ne kede agɔth, ee luɔi bi wo kunydewei yok, en aa dɔm en wook ne Bɛnydan Yecu Kritho,

raan ci thou ne biakda, luɔi bi wok piir ne yen etok, ayi te yin wok ayi te niin wok.

Yen aa wek wepiɔth muk wapac, ku yak rot kueet wapac, acit man aa wek e looi ayadaŋ.

Ku wek laŋku, wek mithekɔckuɔ, ke we bi kɔc e luui e weyiic aa ŋic, kɔc nu e weniim e Bɛnyditic, kɔc e we tak wel;

aguɔki ke aa rieu alaldiite ku nhiaarki keek ne biak de luɔiden. Ku yak ŋiec reer e rot apiɛth.

Wek lekku, wek mithekɔckuɔ, an, Yak kɔc e loŋ yalic nen, yak kɔc e piɔth riɔɔc muk piɔth, yak kɔc kɔc kony, yak piɔth liɛɛr ne kɔc kedhie.

Mathdhien, e cin raan e raan luoi kerac raan ci e kɔn luoi kerac; yak kepiɛth kuany cok anandun, e ŋɛk e ŋɛk luoi kepiɛth, ayi raan ebɛn.

Yak piɔth miɛt anandun;

yak cool e lɔŋ acin pek;

Yak thieithieei lueel ne kerieec ebɛn: kene e kede piɔn e Nhialic ne kedun e Kritho Yecuyic.

Duoki Weidit Ɣer e piɔɔk abik liu;

wel ci guiir duoki keek e biɔɔn;

yak kaŋ them kedhie: yak kepiɛth muk aril;

yak tɛɛm e luɔi de kerac ebɛn.

Ku enɔɔne, Nhialic de mat, Yen guop, e we tɔ ɣerpiɔth eliŋliŋ; ku weikun ebɛn ku piɔndun ku guopdun e ye ke muk acin keliu, ku bi cien ke dueere ke gɔk aɣet bɛn bi Bɛnydan Yecu Kritho bɛn.

Raan cɔl week ee Raan Adot, Raan bi luɔi dhil thol ayadaŋ.

Mithekɔckuɔ, yak lɔŋ ne biakda.

Thiecki mithekɔckuɔ kedhie ne ciem ɣeric.

Wek yɔɔk ne Bɛnydit, an, Taki awareke kueen mithekɔckuɔn ɣerpiɔth kedhie.

E dhueeŋ de Bɛnydan Yecu Kritho piɔu e ye tɔu ke week. Amen.