¿Ñati mu̶a, Dios ĩ beseriarã? ¿Ponto sitaju̶, Galacia sitaju̶, Capadocia sitaju̶, Asia sitaju̶, Bitinia sitaju̶ ñabaterã jediro, ñati mu̶a? Adi queti mu̶are ucaja yu̶. Gajeroriju̶ mu̶a ñabateboajaquẽne, Dios ĩ ñaroju̶ ñaja mu̶a ñarotiju̶. To bajiri ĩ ocare bu̶to tu̶oĩarã ñari, adi macaru̶cu̶roana rãca ñaboarine, ĩna tu̶oĩarore bajiro tu̶oĩarã me ñarãja mu̶a. Tirũ̶mu̶ju̶, “Ĩna ñaru̶arãma yu̶ rĩa bajiro bajirã” Dios ĩ yimasire ñajare, to bajirone bajiaja mu̶a. To bajiri, “Rojose mana ñaama” mu̶are yiĩaru̶, Esp'iritu Santore mu̶are cõañumi. To bajicõari, Jesucristo ocare cu̶dirãja mu̶a. To bajiro yiyumi, rojose mu̶a yisere ĩ macu̶ su̶orine ĩ masiriorũgũrotire yigu̶. Mu̶are quẽnarotigu̶, Diore ado bajise mu̶are sẽnibosaja yu̶: “Bu̶tobu̶sa quẽnase ĩnare cõaña”, mu̶are yisẽnibosarũgũaja yu̶. “Yu̶ su̶ori yu̶ jacu̶ quẽnaro ĩ yise quetire gãjerãre gotimasioru̶cu̶ja mu̶” yigu̶, yu̶re cũcami Jesucristo. Yu̶ ñaja Pedro, adi quetire mu̶are ucagu̶.

Mani u̶ju̶, Jesucristo jacu̶, bu̶to manire maigũ̶ ñari, rojose mani yisere “Yirẽtobosato” yigu̶, manire rijabosarotiyumi. Ĩ rijato bero, ĩre tudicatioyumi. To bajiro ĩ yire ñajare, Jesúre ajitirũ̶nu̶rã, Esp'iritu Santo su̶orine Diorãca quẽnaro ñacõari, ĩ bojarore bajiro yirã ñaja mani. To bajicõari, mani rijato bero ĩ rãca quẽnaro ñacõa ñarũgũrona ñari, “Quẽnaro yaja mu̶”, Diore ĩre yito mani.

To yicõari, ĩ gotiriarore bajiro õ vecaju̶ bu̶to quẽnase manire Dios rĩare bajiro bajirãre yayiroti me manire ĩ u̶jorotire tu̶oĩavariquẽnaja mani.

Ĩ macu̶re ajitirũ̶nu̶rã mani ñajare, ĩ masise rãca manire quẽnaro coderũgũgũ̶mi, ĩ ñaroju̶ ejacõari, ĩ rãca quẽnaro mani ñarũgũrotire yigu̶. To yicõari, adi macaru̶cu̶ro ti jedirirũ̶mu̶ ti ejaro, ĩ tu̶oĩariarore bajiro yigu̶, jediro quẽnaro manire ĩ yirũgũsere, to yicõari, õ vecaye manire ĩ u̶jorotire quẽne masiojeocõaru̶cu̶mi.

Tire tu̶oĩacõari, adigodoju̶ rojose tãmu̶orã ñaboarine, Dios tu̶ju̶ quẽnase mani bajirotire tu̶oĩa yurã ñari, bu̶to variquẽnaroti ñaja manire.

Rojose tãmu̶oboarine, Jesucristore mani ajitirũ̶nu̶cõa ñajama, “Ĩre ajitirũ̶nu̶rã masu ñaja” yiĩorã yaja mani. Oro vaja cu̶tiro rẽtoro vaja cu̶tiaja Jesucristore mani ajitirũ̶nu̶se. Oroju̶ama, jedise ñaja. “¿Oro masu ñati?” yirã, asioĩama ĩna. Tire bajiro bajiaja Jesucristore mani ajitirũ̶nu̶se quẽne. “Yu̶ macu̶re ajitirũ̶nu̶rã masu ñati ĩna” yiĩaru̶, rojose mani tãmu̶osere yirẽtobosabecu̶mi Dios. To bajiri rojose tãmu̶oboarine, Jesucristore mani ajitirũ̶nu̶cõa ñajama, “To cõrone tudivaru̶cu̶mi yu̶ macu̶” Dios ĩ yitu̶oĩariarũ̶mu̶ne, “Yu̶ ejarẽmose rãca quẽnaro yicaju̶ mu̶a”, manire yivariquẽnaru̶cu̶mi Dios. To bajiro yigajanocõari, rũ̶cu̶bu̶oriaju̶ manire rojoru̶cu̶mi.

Jesucristore ĩabetiriarãja mu̶a. To bajiboarine ĩre mairãja mu̶a quẽne. Adirũ̶mu̶ri quẽne ĩre ĩamena ñaboarine, ĩre ajitirũ̶nu̶rã ñari, quẽnaro variquẽnarãja mu̶a. Dios tu̶ana ĩna variquẽnarore bajiro bu̶to variquẽnarã ñari, mu̶a variquẽnasere rẽtobu̶saro gotiru̶aboarãja mu̶a. To bajiboarine, gotmasimenaja.

Quẽnase mu̶are ĩ u̶jorotire, “To bajirone yiru̶cu̶mi” yitu̶oĩarã ñari, to bajirone bajirãja mu̶a.

To bajiro quẽnaro Dios manire ĩ yirotire gotiyuma tirũ̶mu̶ana, Diore gotirẽtobosariarã. Quẽnagũ̶ ñari, manire ĩamaicõari, quẽnaro ĩ yirotire gotiboarine, bu̶tobu̶sa tire masiru̶aboayujarã ĩna. To bajiri Diore ĩna gotirẽtobosarere quẽnaro buecõari, bu̶to tu̶oĩarũgũñujarã ĩna.

Esp'iritu Santore su̶orine Cristo ĩ bajirotire tu̶oĩa gotimasiñuma. Bu̶to rojose ĩ tãmu̶oro bero, quẽnaro ĩ yirotire tu̶oĩa gotiyuma. Tire gotiriarã ñaboarine, “To cõro ñaro bajiru̶aroja ti. To bajiro bajicõari, bajiru̶aroja” yimasiru̶arã, ĩna gotisere buecõari, tu̶oĩarũgũboayujarã ĩna.

Tire quẽnaro masibetiboarine, Dios su̶orine ado bajiro tu̶oĩañujarã ĩna: “Tire ĩamenaja mani. Mani beroana ĩaru̶arãma”, yitu̶oĩañujarã ĩna. “Mani beroana” ĩna yijama, manirene gotirã yiyuma. Cristo ĩ rijabosare su̶orine quẽnaro Dios ĩ yise queti goticudirimasa, yu̶a gotimasiosene ñaja Diore ĩna gotirẽtobosare. Tire yu̶a gotimasiorotire yigu̶, Esp'iritu Santore cõañumi Dios. Ti oca quẽnase ti ñajare, bu̶to ajimasiru̶arũgũrãma ángel mesa.

Ti ocare quẽnaro ajimasirã ñari, Cristo ĩ tudiejarirũ̶mu̶re quẽnaro Dios ĩ yirotire tu̶oĩa tu̶jamenane, tocãrãcajine mani yirotire quẽnaro tu̶oĩarũgũroti ñaja.

Dios rĩare bajiro bajirã ñari, Cristo ocare mu̶a masiroto rĩjoro, rojose mu̶a yirũgũriarore bajiro yibeticõari, ĩ bojarore bajiroju̶a yirũgũroti ñaja.

Dios, quẽnase rĩne yigu̶, “Yu̶ rĩa ñaru̶arãja mu̶a” ĩ yire ñajare, ĩre bajiro quẽnase rĩne yirũgũroti ñaja.

Ado bajiro gotiaja Dios ocare masa ĩna ucamasire: “Quẽnase rĩne yigu̶ ñaja yu̶. To bajiri quẽnase rĩne yirũgũña mu̶a quẽne”, yigotiaja.

Gajeyerema, ado bajiro mani yigu̶ ñaboarine, masa jediro mani yisere ĩabeserocu̶ ñaami. Ĩ ĩabesejama, “Ãnoama rojose yirã ĩna ñaboajaquẽne, quẽnaro ĩnare yiru̶cu̶ja yu̶”, yibetiru̶cu̶mi. To bajiri, Diore “mani jacu̶” mu̶a yijama, rũ̶cu̶bu̶ose rãca ĩre yicõari, quẽnase rĩne yirũgũroti ñaja.

Tirũ̶mu̶ju̶ mu̶a ñicu̶a rojose ĩna yimasiriarore bajiro yirũgũriarã ñaboayuja mu̶a maji. “Tire yitu̶jacõari, quẽnaro Dios ĩ yirona ñato” yigu̶, rojose mani yise vaja manire rijabosayumi Cristo. Jẽre Cristo manire ĩ vaja yibosarere masirãja mu̶a. Gajeyeũni yoaro ñabeti, gãjoa rãca me vaja yibosayumi.

Rojose yiĩabecu̶ ñari, ĩ rijare su̶orine, jediro rojose mani yire, mani yirotire quẽne manire vaja yibosayumi Cristo.

Adi macaru̶cu̶ro Dios ĩ rujeoroto rĩjoroju̶, tire manire ĩ vaja yibosarotire tu̶oĩacõari, ĩ macu̶re ĩ cõarotire tu̶oĩamasiñuju Dios. To bajiri adi macaru̶cu̶ro tu̶sarirũ̶mu̶ri manire rijabosagu̶ ejayumi Cristo.

“Manire rijabosayumi Cristo” yirã ñari, Diore ajitirũ̶nu̶aja mani. Cristore catiocõari, ĩ tu̶ rũ̶cu̶bu̶oriaju̶re ĩre rojoyuju Dios. To bajiro ĩ yire ñajare, “Ĩ gotiriarore bajirone quẽnaro manire yiru̶cu̶mi Dios”, ĩre yitu̶oĩavariquẽnarãja mu̶a.

“Yu̶ macu̶re ajitirũ̶nu̶ña” Dios ĩ yirere cu̶diriarã ñaja mu̶a. To bajiro bajirã ñari, tirũ̶mu̶ju̶ rojose mu̶a yirũgũre, mu̶a yitu̶jabetire yitu̶jacõari, socamenane sĩgũ̶ rĩare bajiro quẽnaro gãmerã mairoti ñaja. To bajiri bu̶tobu̶sa mu̶a gãmerã mairotire bojaja yu̶.

Adirũ̶mu̶rirema, quẽnaseju̶are mani tu̶oĩarotire Dios ĩ ĩsiriarã ñari, quẽna gãme ruyuarãre bajiro bajirãja mu̶a. Gajerodori ĩ oca ti vasoabetirotire bajiro mu̶a quẽne bajireacõari bero mu̶a caticõa ñarotire yigu̶, ĩ catisere ĩ ĩsiriarã ñarãja mu̶a.

Dios ocare masa ĩna ucamasire ado bajiro ti gotijare, to bajiro yaja yu̶: “Muiju ĩ jiado, bu̶to asirone, ta sĩnicoacaju̶. Go quẽne, sĩniyayicoacaju̶. To bajiri quẽnase ruyuboacati manicaju̶. Tire bajirone bajirãma masa quẽne. Yoaro mene bajireacoaru̶arãma.

To bajiboarine, mani u̶ju̶ ocaju̶ama ñacõa ñarũgũru̶aroja”, yigotiaja Dios ocare masa ĩna ucamasire. “Mani u̶ju̶ oca” ti gotise, Cristo su̶orine quẽnaro Dios ĩ yise quetire, mu̶are gotimasiore ñaja.

“Yu̶ macu̶re ajitirũ̶nu̶ña” Dios ĩ yirere cu̶diriarã ñari, jediro rojose yibetirũgũroti ñaja. Adi ũnire yibetirũgũña mu̶a: Gãjerãre yitobesa. Socabesa. Gãjerãre, “Quẽnaro ñaama”, ĩnare yiĩatebesa. Gãjerãre rojose ñagõmacabesa.

Bu̶tobu̶sa Dios ocare ajivariquẽnacõari, ti gotirore bajiro yiru̶a tu̶oĩarũtuaroti ñaja mu̶are. Sũca bu̶to ũjuru̶agu̶re bajiro tire yiru̶a tu̶oĩarũtuaroti ñaja. To bajiro mu̶a yijama, “Quẽnaro manire yami Dios” yimasirã ñari, quẽnabu̶saro ĩ bojarore bajiro yirũtuaru̶arãja mu̶a. To bajiro mu̶a yijama, Dios tu̶ju̶ quẽnaro ñacõa ñarũgũru̶arãja.

To bajiri, mani u̶ju̶re Jesucristo, mani catirotire manire ĩsigũ̶re quẽnaro ajitirũ̶nu̶cõa ñaña. Ĩne ñaami masa vi quẽnorã gũ̶ta ĩna cũsu̶orica, ñamasuricare bajiro bajigu̶. Ĩre bu̶to ĩatecama masa. Ĩre ĩna ĩateboajaquẽne, Dioju̶ama, “Ñamasugũ̶ ñaru̶cu̶mi”, ĩre yiyumi.

To bajiro yigu̶ ñari, mu̶are quẽne Jesucristore ajitirũ̶nu̶rã rãcana mu̶a ñajare, Dios ya vire gũ̶ta ĩ jeomu̶javasere bajiro bajiaja mu̶a. To bajicõari, ti vi ñarã, quẽnase rĩne yirã, paiare bajiro bajiaja mu̶a. To bajiri, Esp'iritu Santo su̶ori Dios ĩ ĩavariquẽnasere yiñaña.

Isa'ias ĩ ucamasire Dios oca ado bajiro ti gotijare, Jesucristo su̶orine Dios ĩ quẽnorivire bajiro bajiaja mu̶a: “Sión vãme cu̶ti maca ñarica gũ̶ta, gajea gũ̶ta rẽtoro quẽnaricare bajiro bajirocu̶re cũru̶cu̶ja yu̶. Ĩre ajitirũ̶nu̶rãju̶ama, yu̶ goticatore bajiro ĩnare quẽnaro yu̶ yirũgũjare, ‘Ĩ yirore bajiro yigu̶ ñagũ̶mi’ yu̶re yivariquẽnaru̶arãma”, yigotiaja Dios ocare masa ĩna ucamasire, Cristore Dios ĩ gotirere yiro.

To bajiri, Jesucristore ajitirũ̶nu̶rã ñari, ĩre bu̶to maiaja mani. Gãjerã, ĩre ajimenaju̶arema, Dios ocare masa ĩna ucamasire ti gotirore bajiro bajiaja. Ĩnarema, gũ̶ta ĩna rocariare bajiro bajiami Jesús. Ado bajiro gotiaja ti: “Gũ̶ta rãca vi quẽnorimasa coja gũ̶tare rocarãma ĩna. Ĩna rocaria ñaboarine, gajea gũ̶ta rẽtoro quẽnarica ñaru̶aroja tia. Tia gũ̶ta su̶orine quẽnarivi quẽnoru̶cu̶mi Dios. Tia manijama, quẽnomasibetibogu̶mi”, yigotiaja Dios ocare masa ĩna ucamasire.

To yicõari, gajeye Dios ocare masa ĩna ucamasire “Gũ̶ta masa ĩna ju̶ata quedirotiare bajiro bajiami Jesús” yigotiro yaja. “Coja gũ̶ta, ĩna ju̶ata quedirotiare bajiro bajirocu̶re cũru̶cu̶ja yu̶”, yigotiyuja ti. To bajiro ti gotijama, Cristo ocare ajimena ñari, ĩna rijato beroju̶ rojose ĩna tãmu̶otu̶jabetirotire yiro yaja. “To bajiro bajiru̶arãma” Dios ĩ yigotiriarore bajirone bajiru̶arãma.

To bajiro bajirona me ñaja mu̶aju̶ama. Dios su̶orine ĩ macu̶re ajitirũ̶nu̶cõari, ĩ yarã ñaja mu̶a. Dios, mani u̶ju̶re rũ̶cu̶bu̶orã, ĩ bojarore bajiro quẽnaro yirũgũrã ñaja mu̶a. Ĩ su̶orine cojo masare bajiro bajirã ñari, ĩ bojasere yirã ñaja. Rojose mu̶a yisere ĩ macu̶ ĩ vaja yijeobosare ñajare, Dios yarã ñaja mu̶a. “Ñajediro quẽnaro yu̶ yisere gãjerãre gotiato” yigu̶, “Yu̶ yarã ñaru̶arãja”, mu̶are yiyumi. Diore mu̶a ajitirũ̶nu̶roto rĩjoroju̶, ĩre masimena ñari, vãtia u̶ju̶ ĩ bojasere yirã ñaboayuja mu̶a maji. To bajiro yirã mu̶a ñaboajaquẽne, mu̶are ĩamaicõari, quẽnaro ĩ yire ñajare, ĩre masirã ñari, rojose yitu̶jacõari, Dios ĩ bojaseju̶are yirã ñarãja mu̶a.

Tirũ̶mu̶ju̶ Dios ĩ ĩamaimena ñañuja mu̶a maji. To bajiri, sĩgũ̶ rĩare bajiro ñabesuja mu̶a maji. Adirũ̶mu̶rirema ĩ masune quẽnaro ĩ yijare, ĩ yarã ñarãja mu̶a yuja.

Yu̶ mairã, adigodoju̶ ñarã yoaro me catiñarona ñaja mani. To bajiboarine õ vecaju̶ Dios tu̶ju̶ ñaja mani ñacõa ñarũgũrotoju̶ama. To bajiro bajirona ñari, rojose mu̶a yiru̶a tu̶oĩasere yibetirũgũña. Rojose mu̶a yirũgũjama, Diore mu̶a ajitirũ̶nu̶boasere yitu̶jarã ñari, rojose yiecoru̶arãja.

Diore masimena vatoaju̶ ñarã ñari, quẽnase rĩne yirũgũña, “ ‘Rojose yama’ gãjerãre yi ocasãroma” yirã. Quẽnase rĩne mu̶a yicõa ñasere ĩariarã ñari, “Mu̶ su̶orine quẽnaro yirũgũcama”, Diore yiru̶arãma, masare ĩ ĩabeserirũ̶mu̶ ti ejaro.

Roma macagu̶ u̶ju̶ ñamasugũ̶, ĩre cu̶dirũgũña mu̶a. Ĩre moabosarãre quẽne cu̶dirũgũña. “Rojose yirãre rojose ĩna yise vaja rojose yu̶re yibosato” yigu̶, to yicõari, “Quẽnaro yirãre quẽnaro ĩna yise vaja quẽnaro yu̶re yibosato” yigu̶, ĩnare cũgũ̶mi u̶ju̶ ñamasugũ̶. Õ vecagu̶, mani u̶ju̶re quẽnaro ĩna rũ̶cu̶bu̶orotire bojarã ñari, quẽnaro ĩnare cu̶dirũgũña mu̶a.

Diore ajimena, mu̶are rojose ĩna ocasãrere ajicõari, “Socase ñaja” u̶jarã ĩna yitu̶oĩarotire yigu̶, quẽnase rĩne mu̶a yirũgũsere bojaami Dios.

Ado bajiro ti bajijare, Dios ĩ bojasere yirũgũroti ñaja: Rojose mani yiboajaquẽne, manire masirioyumi Dios. To bajiro ĩ yire ñajare, “Rojose mani yijama, no yibeaja”, yitu̶oĩaroti me ñaja. Ado bajiroju̶a tu̶oĩarũgũroti ñaja: “Manire maigũ̶ ñari, rojose mani yirere masirioyumi Dios. To bajiri, mani quẽne, ĩre mairã ñari, ĩ bojaseju̶are yiru̶arãja”, yitu̶oĩarũgũroti ñaja.

Masa jedirore rũ̶cu̶bu̶oroti ñaja. Gãjerã Jesucristore ajitirũ̶nu̶rãre quẽne mairũgũroti ñaja. “Ĩre mani cu̶dibetijama, manire ĩavariquẽnabecu̶mi Dios” yitu̶oĩarã ñari, ĩ bojarore bajiro yirũgũña. To yicõari, Roma macagu̶ u̶ju̶ ñamasugũ̶re quẽne quẽnaro rũ̶cu̶bu̶orũgũña.

Mu̶a, gãjerãre moabosarã, mu̶a u̶jarãre ajirũ̶cu̶bu̶ocõari, ĩna rotisere quẽnaro cu̶dirũgũroti ñaja. Quẽnaro yirã ĩna ñajama, ĩna ñabetijaquẽne, ĩna rotisere quẽnaro cu̶diroti ñaja.

Cojojirema sĩgũ̶ rojose ĩ yibetiboajaquẽne, “Rojose yiyuja mu̶” ĩre yitu̶oĩacõari, rojose ĩre yigu̶mi ĩ u̶ju̶. To bajiro ĩ yiboajaquẽne, ĩre moabosarimasu̶ju̶a, Dios ĩ bojarore bajiro yigu̶ ñari, ĩ gãmebetijama, “Quẽnaroja”, yiru̶cu̶mi Dios.

Rojose mu̶a yijama, to bajiro mu̶a yise vaja rojose mu̶are yigu̶mi mu̶a u̶ju̶. To ĩ yiro bero, “Rojose mani yijare, to bajiro yimi” yimasirã ñari, ĩre gãmebetiru̶arãja. To bajiboarine, quẽnaro mu̶a yiboajaquẽne, rojose mu̶are ĩ yijama, rojose tãmu̶oboarine, gãmebetiru̶arãja mu̶a. To bajiro mu̶a bajise ñaja Dios ĩ ĩavariquẽnase.

To bajiro mu̶a bajirotire yigu̶, “Yu̶ rĩa ñaña”, mu̶are yirimi Dios. Cristo quẽne, manire rojose tãmu̶obosagu̶ ñaboarine, gãmebeticami. To bajiro ĩ bajicati ti ñajare, ĩre bajiro bajiroti ñaja manire quẽne.

Cojojirema rojose yiĩabeticami. Ñimu̶ju̶are yitobeticami.

Masa ĩre ĩna tud'iboajaquẽne, ĩnare tud'igãmebeticami. Rojose ĩre ĩna yirone, “Yu̶re rojose mu̶a yise vaja rojose mu̶are yiru̶cu̶ja”, ĩnare yibeticami. Ado bajiroju̶a tu̶oĩacami: “Dios ñaami, masa rojose ĩna yise vaja rojose ĩnare yigãmerocu̶ma. To bajiro ĩ yijama, quẽnaro riojo yiru̶cu̶mi”, yitu̶oĩacami.

To bajicõari, yucú̶tẽroju̶ ĩre ĩna jaju sĩarone, rojose mani yise vaja, manire rojose tãmu̶obosacami, rojose yibeticõari, quẽnaseju̶are mani yirotire yigu̶.

Tirũ̶mu̶ju̶ma Diore ajimena ñari, oveja codeecobeticõari, ĩna mavisiacudirore bajiro bajiyuja mu̶a maji. Yucu̶rema, Cristore ajitirũ̶nu̶rã ñari, oveja codeecorãre bajiro bajiaja mu̶a.

Rõmia, manaju̶ cu̶tirãre, mu̶are gotigu̶ yaja yu̶: Mu̶a quẽne, mani u̶ju̶ ĩ ĩavariquẽnarotire bojarã ñari, mu̶a manaju̶re quẽnaro cu̶dirũgũña. Sĩgũ̶ri, mu̶a manaju̶a, Cristo ocare ajimena ñarãma. To bajiri, Cristo ocare mu̶a gotibosasere ajiru̶amenama. Ti ocare gotibetiboarine, Diore rũ̶cu̶bu̶ocõari, quẽnase rĩne yiñaña mu̶a. To bajiro mu̶a yisere ĩacõari, ĩna quẽne Cristo ocare ajitirũ̶nu̶borãma.

“ ‘Manire ĩavariquẽnato ũ̶mu̶a’ yirã, ¿no bajiro yirãti mani?” mu̶a yitu̶oĩajama, “Ado bajiro yiru̶arãja”, yitu̶oĩabetiroti ñaja: Mu̶a joa quẽnorotire, quẽnase mu̶a bu̶sarotire, mu̶a gãmo yorotire, to yicõari, quẽnase mu̶a sudi sãñarotire quẽne, ti ũnire bu̶to tu̶oĩaroti me ñaja.

Ado bajiroju̶a bu̶to tu̶oĩaroti ñaja: Quẽnase yiru̶a tu̶oĩarũgũroti ñaja. Mani ruju̶aye jedise ñaja. Quẽnase mani tu̶oĩaseju̶ama jedibetiru̶aroja. To bajiri, mu̶a manaju̶are ajirũ̶cu̶bu̶ocõari, ĩnare quẽnaro mu̶a yirotire tu̶oĩarũgũroti ñaja. To bajiro mu̶a yijama, mu̶are bu̶to ĩavariquẽnaru̶cu̶mi Dios.

Tirũ̶mu̶ju̶ to bajiro quẽnaro yirã ñamasiñujarã rõmia manaju̶ cu̶timasiriarã. Diore rũ̶cu̶bu̶omasiriarã, “Manire ĩ gotiriarore bajiro yiru̶cu̶mi”, yitu̶oĩamasiñujarã. To yicõari, ĩna manaju̶re cu̶dirũgũmasiñujarã ĩna.

To bajirone bajimasiñuju Sara vãme cu̶timasirio. So manaju̶ Abrahamre ĩre so jijama, “Yu̶ u̶ju̶”, ĩre yimasiñuju, ĩre rũ̶cu̶bu̶ogo. To yicõari, ĩre quẽnaro cu̶dimasiñuju so. So bajiriarore bajiro bajiroti ñaja mu̶are quẽne. Mu̶a manaju̶a rojose ĩna yirotire tu̶oĩa güimenane, quẽnaro yicõa ñaroti ñaja.

Ũ̶mu̶a, manajo cu̶tirãre, mu̶are quẽne gotiaja yu̶: Mu̶a quẽne, mani u̶ju̶ ĩ ĩavariquẽnarotire bojarã ñari, “Rõmia tĩmabetibu̶sarã ñaama” yitu̶oĩacõari, mu̶a manajoare ĩnare ejarẽmorũgũña. To yicõari, Dios quẽnagũ̶ ñari, ĩnare quẽne, ĩna rijato beroju̶ “Tudirijabeticõato” yigu̶, ĩ catisere ĩ ĩsiriarã ĩna ñajare, ĩnare quẽnaro rũ̶cu̶bu̶oya. Quẽnaro ĩnare mu̶a rũ̶cu̶bu̶obetijama, ĩre mu̶a sẽnisere ajibetiru̶cu̶mi Dios.

Gãjerã Cristore ajitirũ̶nu̶rã rãca mu̶a bajiñarotire mu̶a jedirore gotitu̶sagu̶ yaja yu̶. Sĩgũ̶re bajiro quẽnaro tu̶oĩacõari, ñarũgũru̶arãja mu̶a. Gãjerã rojose ĩna tãmu̶osere mu̶a ĩajama, ĩnare ĩamaicõari, ejarẽmoroti ñaja. “Yu̶ rẽtoro ñamasurã ñaama”, gãjerãre yitu̶oĩaroti ñaja.

Gãjerã rojose mu̶are ĩna yijama, ĩnare gãmebetiroti ñaja. Gãjerã mu̶are ĩna tud'ijama, ĩnare tud'igãmebetiroti ñaja. Ado bajiroju̶a ĩnare yirũgũroti ñaja: Tud'igãmemenane, quẽnaro ĩna ñarotire yirã, Diore ĩnare sẽnibosaya. To bajiro mu̶a yirũgũsere bojaami Dios, “To bajiro ĩna yijama, jediro quẽnase yu̶ ĩsiru̶asere bu̶jaru̶arãma” mu̶are yimasigũ̶ ñari.

Dios ocare masa ĩna ucamasire ado bajiro ti gotijare, “Tire riojo gotiami Pedro”, yimasirãja mu̶a: “Quẽnaro ĩna ñaru̶ajama, ĩna ñagõroto rĩjoro quẽnaro tu̶oĩarũgũru̶arãma, ‘Rojose ñagõrobe’ yirã. To yicõari, gãjerãre yitobetiru̶arãma.

Rojose yitu̶jacõari, quẽnaseju̶are yirũgũru̶arãma. ‘Gãjerã rãca quẽnaro ñarãsa’ yirã, ĩna yimasiro cõro quẽnaro ĩnare yicõa ñarũgũru̶arãma.

Quẽnaro yirãre ĩatirũ̶nu̶rũgũami Dios. To bajiri, ĩre ĩna sẽnijama, ĩnare ejarẽmorũgũami. To bajiboarine, rojose yirãrema ĩavariquẽnabeami”, yigotiaja Dios ocare masa ĩna ucamasire.

Quẽnase rĩne mu̶a yicõa ñajama, ñimarãju̶a mu̶are rojose yigu̶, magũ̶mi.

To bajiboarine, sĩgũ̶ri rojose mu̶are ĩna yijama, “Quẽnaro manire yiru̶cu̶mi Dios” yimasirã ñari, rojose mu̶are yirãre güibeticõari, bu̶to variquẽnaroti ñaja mu̶are.

“Cristo, mani u̶ju̶, jediro masigũ̶ ñaami”, yitu̶oĩa rũ̶cu̶bu̶ocõa ñarũgũrãja mu̶a. Gãjerã, “¿No bajiro tu̶oĩarã ñari, ‘Quẽnaro yu̶are yiru̶cu̶mi Dios’ yati mu̶a?” mu̶are ĩna yisẽniĩajama, mu̶a cu̶dirotire quẽnaro tu̶oĩa yuya mu̶a.

“Ĩna rẽtoro masirã ñaja” yitu̶oĩamenane, Dios ĩ bojarore bajiro ĩnare quẽnaro cu̶diru̶arãja mu̶a. “Rojose yama” gãjerãre ĩna yigotisere ajicõari, “Socarã yaja mu̶a” ĩna yibojoneorotire yirã, quẽnase rĩne yirũgũru̶arãja mu̶a. Cristore ajitirũ̶nu̶rã ñari, to bajiro yiroti ñaja mu̶are.

Rojose mu̶a yise su̶orine rojose mu̶are ĩna yijama, “Ju̶aji to bajiro yibetiru̶arãja”, yitu̶oĩaru̶arãja mu̶a. Ti quẽne quẽnase ñaja, bajiroju̶ma. To bajiboarine ti rẽtoro quẽnamasuse ñaja quẽnase mu̶a yise su̶orine Dios ĩ bojarore bajiro rojose mu̶a tãmu̶ojama.

Cristo quẽne, quẽnase rĩne yigu̶ ñaboarine, rojose tãmu̶ocõari, rojose yirãre manire rijabosacami. To bajiro bajicami, Dios tu̶ju̶ quẽnaro mani ñarũgũrotire yigu̶. Rijacoaboarine, Esp'iritu Santo su̶orine tudicatiyumi.

To bajicõari, rijariarã, tubiberiaroju̶ ñarãre ĩnare gotimasiogũ̶ vasuju Cristo.

To ñariarã, Noé ĩ ñamasiriarodoju̶ ñariarã ñañujarã. Ĩnare Dios ocare gotimasiboayuju Noé. Ajiru̶abetimasiñujarã ĩna. To bajiri, cũmua jairicare Noé ĩ quẽnotoyene, ĩre ĩna ajirotire yoaro yumasiboayuju Dios. Ĩre ajibeticõa ñamasiñujarã ĩna. To cõrone cũmua quẽnogajanocõari, cojomo cõro jedi, gaje ãmo idia jẽnituarirãcu̶ rĩne vasãjamasiñujarã. Oco ñamu̶se rãca ĩ ruureare su̶orine rojorã rãca ĩna ñacõa ñaborotire ĩnare yirẽtobosamasiñuju Dios.

Oco rãca mani bautizaecorirũ̶mu̶ne, manire rojose tãmu̶oboronare yirẽtobosayumi Dios. “Ti ũnine bajiyuja ti Noére Dios ĩ yimasire quẽne”, yimasiaja mani. Oco rãca mani bautizecojama, Dios mani jacu̶re quẽnaro mani tu̶oĩarotire yirã, “Rojose yu̶a yisere masirioya”, ĩre yisẽniaja mani. To yicõari, “Jesucristo manire ĩ rijabosaro bero Dios ĩre ĩ catiore ñajare, manire rojose tãmu̶oboronare yirẽtobosayumi”, yaja mani.

Jesucristo, tudicaticõari, õ vecaju̶ Diorãca rotiñagũ̶mi. Toju̶ ñarã, u̶jarã ñamasurã, ñamasumena quẽne, ángel mesa, gãjerã quẽne, ĩ rotisere cu̶diñarãma.

Adigodoju̶ ñagũ̶, rojose tãmu̶ocami Cristo. To bajiri, manire quẽne, “To bajiro mani bajirotire Dios ĩ bojajama, rojose tãmu̶oru̶arãja”, yitu̶oĩaroti ñaja. Rojose tãmu̶ocõari, Cristore bu̶tobu̶sa mani tu̶oĩajama, rojosere yiru̶a tu̶oĩamenaja mani.

To bajiro mani tu̶oĩarũgũjama, adigodoju̶ mani catiñaro cõro mani masu mani bojarore bajiro yibeticõari, Dios ĩ bojaseju̶are yirũgũru̶arãja.

Ado bajiro ti bajijare, to bajiro yirũgũroti ñaja mu̶are: Diore mu̶a masiroto rĩjoro, mu̶a masu mu̶a bojarore bajiro, ado bajiro yirũgũñuja mu̶a maji: Rojose yirã ñari, rõmia rãca ajeriarã cu̶tirũgũñuja mu̶a. Idire mecu̶ose idimecu̶cõari, rojose yicudirũgũñuja mu̶a. “Ado bajirã ñarãma” ĩna masune yiquẽnorujeocõari, ĩna rũ̶cu̶bu̶orãre mu̶a quẽne rũ̶cu̶bu̶orũgũñuja.

To bajiro mu̶a yirũgũboarere yitu̶jacõari, rojose yirã rãca mu̶a ñabetijare, adirũ̶mu̶rirema “¿no yirã mani rãca rojose yiru̶abeati? Rojorã ñaama” mu̶are yitu̶oĩacõari, ajatud'irãma ĩna.

To bajiro mu̶are ajatud'irã, “Rojose yirã ñari, ĩnare ajatud'icaju̶ yu̶a”, mani u̶ju̶re yigotiroti ñaja ĩnare. Mani u̶ju̶ ñaami yoaro mene vadicõari, catirãre, rijariarãre quẽne ĩabeserocu̶.

Yoaro me to bajiro ĩ yirotire tu̶oĩagũ̶ ñari, rijariarãre quẽne ĩ oca quẽnasere gotimasioñuju mani u̶ju̶. To bajiro ĩnare gotimasioñuju, jẽre rijariarã ñaboarine, ĩre ajitirũ̶nu̶rã ñari, tudicaticõari, Diorãca quẽnaro ĩna ñarotire yigu̶.

Adi macaru̶cu̶ro ti jedirotirũ̶mu̶ cõñaro bajiaja. To bajiri, quẽnaro tu̶oĩacõari, rũ̶cu̶bu̶ose rãca tocãrãcajine Diore sẽnirũgũña mu̶a.

To yicõari, gãmerã ĩamairũgũña. Ti ñaja ñamasusema. Gãjerãre bu̶to mani maijama, cojoji me manire rojose ĩna yiboajaquẽne, ĩnare masiriorũgũru̶arãja.

Gãjerã mu̶a ya vi ĩna ejajama, variquẽnase rãca ĩnare quẽnaro yirũgũru̶arãja mu̶a.

Tocãrãcu̶re ĩamaicõari, ricati mu̶a yimasirotire mu̶are u̶jorimi Dios. To bajiri, mu̶are ĩ u̶jore mu̶a yimasise rãca Dios ĩ bojarore bajiro gãmerã ejarẽmorũgũroti ñaja.

Mu̶a rãcagu̶ Dios ocare gotigu̶ ĩ ñajama, quẽnaro gotimasioato. Gãjima, “Quẽnaro gãjerãre ejarẽmoru̶cu̶mi” yigu̶, mani jacu̶ Dios ĩ masisere ĩ u̶jor'i ñari, quẽnaro ejarẽmoato. Ĩna yirore bajiro rĩne yicõa ñato gãjerã quẽne. Jediro mani yisere ĩacõari, “Jesucristo su̶orine ĩnare quẽnaro ejarẽmogũ̶mi Dios ñajediro u̶ju̶”, gãjerã ĩna yirũ̶cu̶bu̶orotire yirã, to bajirone yicõa ñaña.

Yu̶ mairã, ajiya mu̶a. Masa rojose mu̶are ĩna yijama, “¿Yu̶ macu̶re ajitirũ̶nu̶rã masu ñati ĩna?” yiĩaru̶, rojose mu̶a tãmu̶osere yirẽtobosabecu̶mi Dios. To bajiro ti bajijama, “¿No yigu̶, Jesúre ajitirũ̶nu̶gũ̶ ñaboarine, rojose tãmu̶oati yu̶?”, yibesa.

Mu̶a quẽne, Cristore ajitirũ̶nu̶rã ñari, rojose ĩ tãmu̶ocatore bajiro rojose mu̶a tãmu̶ojama, variquẽnaña. To bajiro rĩne mu̶a bajicõa ñajama, adi macaru̶cu̶roju̶ Cristo ĩ tudiejarirũ̶mu̶re, ĩ rãca ñacõari, rẽtobu̶saro variquẽnaru̶arãja mu̶a.

Cristore mu̶a ajitirũ̶nu̶se su̶orine gãjerã mu̶are ĩna tud'iboajaquẽne, variquẽnaña mu̶a, Dios ĩ cõagũ̶, Esp'iritu Santo, “Quẽnaro yirã ñato” yigu̶, bu̶tobu̶sa ĩ ejarẽmorã ñari.

Cristore mu̶a ajitirũ̶nu̶se su̶orine rojose mu̶are yiru̶arãma masa. To bajiboarine rojose mu̶a yise su̶ori rojose mu̶a tãmu̶ojama, ĩavariquẽnabetiru̶cu̶mi Dios. To bajiri, “Rojose yirã ñari, rojose tãmu̶oaja mani” yirobe yirã, ado bajiro rojose yibetirũgũña: Gãjerãre sĩabesa. Juarudibesa. Gãjerãre gõjanabiobesa.

Cristore ajitirũ̶nu̶rã ñari, quẽnaseju̶are mu̶a yiboajaquẽne, gãjerã rojose mu̶are ĩna yisere tãmu̶ocõari, “Rojose bajiaja mani” yitu̶oĩabojonemenane, Dioju̶are, “Mu̶ ejarẽmose rãca quẽnaro yicõa ñaja yu̶a”, ĩre yivariquẽnaña.

Jẽre adirũ̶mu̶rine masa ĩna yisere ĩacõari, “Ado bajiro yicana ñari, quẽnase bu̶jarã, rojose tãmu̶orã, bajiru̶arãma” Dios ĩ yiroti ejacoato yaja. To bajiro ĩ yisu̶orona ñaja mani, ĩ yarã Cristore ajitirũ̶nu̶rã. To bajiri, “Adigodoju̶ rojose mani tãmu̶oro rẽtobu̶saro ĩre ajitirũ̶nu̶mena roque rojose tãmu̶oru̶arãma”, yimasiaja mani.

Tire bajirone gotiaja Dios ocare masa ĩna ucamasire. “Rojose mana ñaama” Dios ĩ yiĩarã quẽne, adigodoju̶ ñarã rojose tãmu̶oaja mani. To bajiri, “Rojose mani tãmu̶oro rẽtobu̶saro ĩre ajitirũ̶nu̶mena roque rojose tãmu̶oru̶arãma”, yimasiaja mani.

Rojose mu̶a tãmu̶orotire Dios ĩ bojajare, rojose tãmu̶oboarine, quẽnaseju̶are yicõa ñaña mu̶a. “Ĩ gotiriarore bajiro quẽnaro manire ĩatirũ̶nu̶cõa ñaru̶cu̶mi manire rujeor'i, ĩ tu̶ju̶ quẽnaro mani ñarũgũrotire yigu̶”, yitu̶oĩarũgũña.

Bu̶cu̶rã, Cristore ajitirũ̶nu̶rãre ũmato ñarãre, mu̶are gotigu̶ yaja yu̶. Yu̶ quẽne, Cristore ajitirũ̶nu̶rãre ũmato ñagũ̶ ñaja yu̶. To bajicõari, Cristo rojose manire ĩ tãmu̶obosacatire ĩacacu̶ ñaja yu̶. To bajicõari, quẽna ĩ tudiejarotirũ̶mu̶ yu̶ quẽne, mu̶a rãca ĩre ĩavariquẽnaru̶cu̶ja yu̶.

Ovejare coderimasu̶ quẽnaro ĩ ĩatirũ̶nu̶rore bajiro, mu̶a quẽne, variquẽnase rãca Cristore ajitirũ̶nu̶rãre ĩatirũ̶nu̶rũgũña mu̶a, “Dios ĩ bojarore bajiro quẽnaro yirã ñato” yirã. “Ĩnare yu̶a codese vaja, gãjoa bu̶jarãsa” yirã me, to bajiro yirũgũña mu̶a.

Bu̶to ĩnare rotibetiroti ñaja. Ado bajiroju̶a yiroti ñaja. Cristo ĩ bojarore bajiro ĩnare ũmato yiñarũgũña mu̶a.

To bajiro ĩnare mu̶a ũmato yicõa ñajama, mani u̶ju̶ Cristo mu̶a rãca variquẽnaru̶cu̶mi. To bajicõari, ĩ tudiejarirũ̶mu̶ mu̶are quẽnaro yiru̶cu̶mi, “Yu̶ rãca variquẽnacõa ñato” yigu̶.

Mamarãre, mu̶are quẽne gotiaja yu̶. Mu̶are ũmato ñarãre quẽnaro rũ̶cu̶bu̶ocõari, cu̶diya. Cristore ajitirũ̶nu̶rã, mu̶a jediro quẽnaro gãmerã rũ̶cu̶bu̶oya. “Ĩna rẽtoro ñamasugũ̶ ñaja yu̶”, yitu̶oĩabesa. Ado bajiroju̶a yiya: “Yu̶ rẽtoro ñamasurã ñaama”, gãjerãre yitu̶oĩaroti ñaja. Dios ocare masa ĩna ucamasire ado bajiro ti gotijare, to bajiro bajiroti ñaja: “ ‘Ĩna rẽtoro ñamasurã ñaja yu̶a’ yirãre ajibeami Dios. ‘Yu̶a rẽtoro ñamasurã ñaama’ gãjerãre yitu̶oĩarãju̶are quẽnaro ejarẽmoami”, yigotiaja Dios ocare masa ĩna ucamasire.

To bajiri Diore, “Yu̶a rẽtoro ñamasugũ̶ ñaami” yirã, quẽnaro yirũ̶cu̶bu̶orũgũña mu̶a. “Yu̶a u̶ju̶, ñajediro masijeogu̶ ñaja mu̶. Mu̶ bojarore bajiro bajiato”, ĩre yirũ̶cu̶bu̶orũgũña. To bajiro mu̶a yijama, “To cõrone adi macaru̶cu̶ro jedicoaru̶aroja” Dios ĩ yitu̶oĩariarũ̶mu̶ ti ejaro, “Gãjerã rẽtoro ñamasurã ñato” yigu̶, mu̶are yiru̶cu̶mi Dios.

Dios mu̶are quẽnaro ĩ ĩatirũ̶nu̶jare, mu̶a tu̶oĩarejaise jedirore ĩre gotirũgũña mu̶a.

Quẽnaro tu̶oĩamasiri ñaña, “Satanás rojose ĩ yirotisere cu̶dirobe” yirã. Macarocagu̶ yai, bar'i sĩaru̶, ĩ bajirore bajiro, rojose tãmu̶otu̶jabetiriaroju̶ manire Dios ĩ cõarotire bojagu̶ ñari, rojose manire yiroticudirũgũgũ̶mi Satanás.

To bajiro ĩ yirotiboasere cu̶dibetirũgũña mu̶a. “Ĩ gotiriarore bajiro quẽnaro manire ejarẽmoru̶cu̶mi Dios” yitu̶oĩa tu̶jamenane, Dios ĩ bojaseju̶are yicõa ñarũgũru̶arãja mu̶a. “Adigodoana Cristore ajitirũ̶nu̶rã jediro, manire bajirone rojose tãmu̶orãma ĩna quẽne”, yimasiritibesa.

Adigodoju̶ ñarã, rojose mani tãmu̶oro bero, Dios tu̶ju̶ mani ejarone, ĩ bojarore bajiro quẽnase rĩne yirã mani ñarũgũrotire yigu̶, yiru̶cu̶mi Dios. Ĩne ñaami manire ĩamaicõari, jediro mani yisere manire ejarẽmogũ̶. Ĩ su̶orine, “Cristore ajitirũ̶nu̶cõari, ĩ rãca quẽnaro ñarũgũru̶arãja” gãjerã ĩna yigotisere ajiyuja mu̶a.

Ĩ ñaami masijeogu̶, ñajediro u̶ju̶. “To bajirone bajicõa ñaru̶cu̶mi”, ĩre yirũ̶cu̶bu̶oto mani.

Adi papera rãca mojoroaca mu̶are yu̶ gotisere yu̶re ucabosami Silvano. Ĩ ñaami Cristore quẽnaro ajitirũ̶nu̶gũ̶, ĩ yirore bajiro yigu̶. “Adi papera ĩ ucasere ĩavariquẽnacõari, Cristore ajitirũ̶nu̶ tu̶jabeticõato” yigu̶, yaja yu̶. To yicõari, “Dios, manire ĩamaicõari, quẽnaro ĩ ejarẽmosere masiato” yigu̶, yaja yu̶. To bajiri, tire masiritimenane, ĩre ajitirũ̶nu̶cõa ñaña mu̶a.

Ado Babilonia vãme cu̶ti macaju̶ ñarã, Cristore ajitirũ̶nu̶rã, mu̶are quẽnarotiama ĩna. Dios su̶orine Cristore ajitirũ̶nu̶rã ñaama ĩna quẽne. Yu̶ macu̶re bajiro bajigu̶, Marcos vãme cu̶tigu̶ quẽne mu̶are quẽnarotiami.

Cristo su̶orine cojo masare bajiro bajirã ñari, quẽnaro gãmerã yisẽniĩa, yiñaña mu̶a. Toana, Cristore ajitirũ̶nu̶rã jedirore ado bajiro Diore mu̶are sẽnibosaja yu̶: “ ‘Mu̶ macu̶ Cristo yarã, quẽnaro ñato’ yigu̶, ĩnare ejarẽmoña”, mu̶are yisẽnibosaja yu̶. To cõro ñaja.