Witjai Pedroitjai, Jisukristu chicham etsegtugkata tusa awemamuitjai. Junak atum mina pataag judío aidautijum nugkem ukuakjum pampagjum nugka Ponto, Galacia, Capadocia, Asia, Bitinia aina nui batsatutigmin agatjime.

Apajuí iina Apajiya nu, duwik nagkamas dutikatasa anentaimtusbaujiya dutiksag etegtamjajui. Dutijama Jisukristui dekaskeapi tabaunum Wakaní Pegkejin sujamsauwai. Jisukristu mantamnak numpen ukajua duwi, iina tudaujinig Apajuí emtinish bakumamainchau pegkeg etamkauwai, imá minak umigtuktinme tujamu asa. Atumnash Apajuí shiig senchi anempa ibau asa, shiig agkan anentaimsa pujutan amastinme.

Emematiagmi Apajuí, iina Apuji Jisukristua nuna Apají, iina senchi wait anenjama nuaduí. Ni yamajam pujutan sujamsauwai, iina Apuji Jisukristu maamuitak ataktú anean nantakiu asamtai. Nuaduí pujut tuke atina nu juwaku ashí Apajuí nayaimpinum umigtamkamua dushakam jukitasa dakamu ajutjamui.

Nu ii jukitna duka tsaitash tsaimaitsui, mamutnash mamumaitsui, tsuwatash wechatnai, yagkug kagaama nunikchatnai. Ashí pegkejak agtinai nayaimpinum pujutak.

Nuigtushkam Jisukristui kajintsá anentaimaidau asajin, Apajuí niina senchijin kuitamjamui, tsawan nagkantina duwi Kristu wantintai, uwemat tuke atina nuna jukitin atinme tujamu asa.

Nuniktin asamtai atumshakam ju nugka juwi wajumak tsawan pujuttajum duwi, kuashat waitiamu ajutjamainakuish shiig aneasjum pujustajum.

Atum aaja waitiamunum Apajuiyai kajintsá anentaimainajum nu dekapsamu asamtai, Jisukristu taatna duwi dekas eme anentsá diyaaku, nuigtú ememattsa diyaam atinaitjume. Oronum pegkegchau peetkau ajapna ayatak orok juwakti tusa, jiiyai apeamu shiig pegkejama nuna nagkaesau wegawai, atum Apajuiyai kajintsajum anentaimjum duka.

Atumek Jisukristuk wainkachu ainayatkujum aneajume. Yamaikish wainchayatkujum dekaskeapi tabaunum shiig aneasjum dakunkut pujagme, nunú dakujamu iman ajutjamaina duka, nuní dakunkut dekapeamu ajutui tusaish chichamaik shiig tumaitsui.

Atum dakunkut pujuinajum duka, Apajuí uwemtijamjatna nunú dekau asajum nuniagme. Nuniau asajum niiní kajintsá anentaimjume.

Duwik Apajuin etsegtujakajua duka: Apajuish aents tudau aidaunash wajuk uwemtijatnukita tusag, dekaatatus anentaimtujakajui. Ditak Apajuí atumin wait anenjamag uwemtijamjatna nunak dekaidau asag: Dusha uwemtash wajuk atinkita, tusag shiig dekaatatus wakegainak kuashat anentaimsau ainawai.

Wakaní Pegkejiya nu ditai pujau asa ichachinam, Jisukristu waitus jaka nantaktinashkam pachis agajajui, ditak: Nunú aents waittsatnush yaki atinaita, dusha wajutik nunikti, tusag dekaatatus senchi wakegajakajui.

Nudiagtai Apajuí dekamtikauwai, atum juwi pujagminig nunikchatnai, duka atak tikich batsamtina nuaduí nuniktinai tusa. Nuna yamai Apajuí chichamen etsejin aina nu atumnak, Wakaní Pegkeji senchijin ujapainawai, Jisukristu nayaimpinmaya awemamua nunú uwemtijamainai tusag. Juka senchi wakejumainai, nayaimpinmaya aentskesh shiig dekainachu asag dekaatatus wakejuinawai.

Ju dekaidau asajum, shiig umintsajum aneaku imagnisjum pujusjum Apajuí dakastajum, nigki wait anenjamu asa, Jisukristu minitai ashí sujamsatin asamtai.

Apajuí uchijí asajum umigkatajum, atum duwik Apajuí dekachu asajum pegkegchau takajakuitjum duke batsamtutsuk.

Duka nunitsuk, Apajuí atumin etegtamjawa duka pegkejam asamtai, atumshakam pegkejam amainaitjume, ashí atum wajuk pujagme nuwishkam.

Apajuí chichame agagbauwa nui: “Wi pegkejam asamtai, atumshakam pegkejam atajum”, tawa duwi.

Atumek Apajuiya nu: “Apawah”, tajume. Nuniau asajum, ju nugka juwi pujusjumshakam, nigka ajantusjum diimainaitjume. Apajuik aents aidau takasbaujinak betek dita wajuk takasuk ainawa dutiksag suuwai, makichik aentsun imá senchi wait anentsuk. Nuaduí shiig pujumain ainagme.

Atumek atumi muunjum wainak batsamajakua nuninuk batsatutijum uwemtijamu ainagme. Atumek, wají besen oro, kuichik aina nujaigkish akikmatka uwemtijashbauwaitjum duka shiig dekagme.

Kristu achinag jaak, uwig makichkish pegkegchauji atsujun maajakú aina numamtuk, niina numpe pegkegman ukajua duwi, akikmatka uwemtijamu ainaji.

Nunak Apajuí nugkash najannatsaig, Jisukristu nunikti tusa tiuwai. Duwik tibaun imapam yamaya juwi nunak umiké jutiin anempau asa.

Atumek Kristui kajintsá anentaibaunum Apajuiyaig dekaskeapi tajume. Nigka jakau aig Apajuí inanki, niina inamtaijiya nui Apu ema apusauwai. Dutikau asamtai niiní kajintsá anentaimkujum dakaidautigmek, Apajuí anagtabauwa nunak dekas imatiksagkeap amastatua tumainaitjume.

Yamaik atumek chicham dekaskea nu umiau asajum, tudaush idaisau ainajum duwi, atumi yatsum aidaujaish dekaskenum aneeniamunum, pempentunisjumek aneeniajum duka nunisjumek aneenitajum.

Apajuinu chicham pegkeja duka tuke atinai. Atum dekaskeapi tiuwaitjum duwi, pujut tuke atina nu ajutjamjume. Nunú pujut Apajuinumia jukimua duka nagkankashtin tuke atinai, iina apají akimpauwa nu sujamsamua nuninchau asa.

Apajuí chichame agagbau: “Ashí aents aidauk tuke dupa ainawai, aantsag aentsú imanjishkam yagkugjai betekai, dupa kagatai yagkujishkam kagajá kakegama anmamtinai aentsú pujutji aidauk.

Tujash Apajuí chichamega duka nuninchauwai, tuke atakea duwish atinai”, tawai. Apajuí chichamega duka, Jisukristui uwemtijamainuk tusa etsegkamua nuuwai.

Nuaduí idaisatajum ashí pegkegchau aidau: Waitjut, tikichdau diigsá wakejaku kajejut, wainka tsanumku pegkeja iman iwainmamat, tikich pegkegchau pachittsa augmatut aina dushakam.

Nuniakum uchi yamá akiintsau muntsun muntsuatatus senchi wakejuwama numamtuk, Apajuí chichame shiig pegkeja nu wakejitajum. Nujai wakanmin tsakaakjum uwemat jukimnujum.

Atumek Apu Apajuí pegkeg asa yaijatna duka, dekapsau asajum shiig dekagme.

Kristu “Kaya tuke pujuwa imana” nujai ijutkau atajum, nunú kaya numamtina nuna Apajuí tikichin nagkaesau emauwai, tujash aents aidauk dakitug idaisajui.

Atumshakam Jisukristu aentsji wajasugme, Wakaní Pegkeji jukiu asajum. Nuaduí Wakaní Pegkeji wakega duke takaakjum, ashí Kristu nemajin aidaujai ijuntsajum Apajuiyai sumitkau atajum, Apajuí ememattai jega jegamkamua numamtin atasajum. Nunú aaja nuniakjum Apajuik shiig awagmamainaitjume.

Apajuí chichame duwik agagbauwa nuwishkam: “Shiig puyatjusjum antuktajum, wi Siognum apusattajai makichik aentsun, kaya dekas shiig pegkeg etegka, jega jegamku aputuatasa atsumtayama iman atinun. Nuanuí kajinas ekeemsaju aidauk, dita kajintsá anentaimtusbaujinak makichkish wainkag juwakchatnai”, tawai.

Atum niiní kajintsá anentaimaidautigminig, Jisukristui dekas ashí aents aidaun nagkaesauwa duka. Tujash niiní kajinas anentaimainatsu nunú aidaunmag, agagbaunum ditan pachis tawa nunisagke: “Aents jegá jegamin aidau kayá ajapawajua nunú, kaya dekas jegá ichichkatin apujtutia iman wajasé. Nunú dutika dakitjamua nu atatui ashí tikich aents aidaun nagkaesauk.”

Tikich chicham agagbaunmash juna pachis chichaak: “Nunú kaya nunak kuashat aents tukumak iyajagtinai” tawai. Nunak dita Apajuí umijuinachu asag, suwimkan jukiagtin asag nunikagtinai.

Tujash atumek Apajuí mina uchig atinme tusa etegjamu ainagme. Atumnak ni etegtamjau asa sacerdote etamkajui Apú takajin atinme tusa. Jutii pegkegchaunum batsatjin Apajuí jiigmajui. Dutijamau asamtai, Apajuinu dekas chicham pegkeg shiig anentaimtujaish tumainchauwa nuna etsejuinak pujustinme tibau ainaji.

Atumek duwikik Apajuí aentsji aajakchauwaitjume, tujash yamaik Apajuí aentsji waigkugme. Tuja duwikik Apajuí wait anenjachbau aajakuitjume, tujash yamaik atumnash Apajuí wait anenjamjaje.

Aneetaig yatsug aidauh, ubag aidauh, jutiik ju nugka juwiyachu ainaji. Nunin ainag duwi tajime: Wait aneasjum iina iyashí pegkegchau wakegamua duka takaa batsamtigpajum. Iyash pegkegchaun wakega nunak, iina wakanig dakitawai.

Aents Apajuí nemajuinatsu nujaig shiig kuitamamsajum pujustajum. Atumnak yamaik aents pegkegchauwa iman chichagtamainawai, tujash tsawan jegatna nunú tsawantin atum pegkeg takasuitjum nuna diisag Apajuinak emematiagtinai.

Apajuí nemaju asajum nugkanmaya apu aina nuna apujin sumimkatajum, Apajuin pegkegchaun chichagkainum.

Aikasjumek apú atuwe aina dushakam antugkatajum. Wagki ditak aents pegkegchaun takaina nuna suwimkan suwak, pegkejan ayamjukti tusa adaikamu ainawai.

Apajuik wakegawai pegkejan takastinme tusa, nuna wainainak aents anentainkachu aidaush atumin pegkegchau chichagtamaina dusha itatkatnume tau asa.

Aents chicham umiktá tibauwa nui agkanmitkamush wajuku amainaita nunisjumek pujustajum. Nunú chicham umiktá tibauwa nuwig agkantaitjai tusam pegkegchau takastasa wakeetsuk. Dekaskenmash Apajuí nemagnush wajuku amainaita nunisjumek shiig pujustajum.

Ashí aents aidauk ajantusjum diyakjum, Jisukristun nemagkaju yatsut aina dushakam aneetajum, Apajuishkam ajantusa diyakjum, ju nugkanmaya apu aina nuna apujishkam ajantusa diistajum.

Inak aidautigmesh atumi apujum shiig ajantusjum diyakjum umigkatajum. Apu pegkeg aina imá duke umigkatasa wakeetsuk, tikich apu pegkegchau aidaushkam umigkatajum.

Atum pegkegchau takasbauk atsugtamaig waitkagmainakuish, Apajuí nemajin asajum katsunjatajum. Duka Apajuinak shiig awagmawai.

¿Wají pegkejaita ii pegkegchau takasbaunum suwimak juwayatku katsuntajai tabaush? Pegkeg amainai, ii pegkegchau takaschamunmag suwimak juwaku, kajetsuk emamkesa katsuntamua duka Apajuin shiig awagbau asamtai.

Kristuk jutii waittsatnun iwaintugmak waittsauwai. Nuniku asamtai Apajuí jutiinak etegtamjauwai, ditash Kristu waittsauwa nunisag waittsatnume tusa.

Kristuk makichkish tudaunak takaschauwai, waitjutnakesh waitjuachui.

Pegkegchau chichagmashkam nigka dutiksag iikag tichauwai. Waitkamshakam iikmakchauwai, Apajuin idaitusui ni dekas dutikati tusa.

Kristu numinum achinag jakauwa duwi jutii tudaujinak akikmatjamkauwai. Nuniku asa nigka wakegawai, tudau takatnak idayinak shiig batsamsag pegkeja nunak takastinme tusa. Niina iyashí asutiam tsupinjauwa duwi pegkeja duke takamainaitji, pegkeg pujustasa.

Atumek duwikik uwig kuitamkachbau wainak yujama numamtuk yujajakuitjume. Tujash yamaik Jisukristua nuuwai atumin kuitamjamak ayamjutpa duka.

Atum nuwatkamu aidautigmek atumí aishuminig sumimkatajum, Apajuí chichame etsegbaun aishum dekaskeapi tuinachushkam, atum shiig pujamun waipainak, nuniktajum tachamaitak dekaskeapi titinme,

dekaskenum Apajuí umigkujum imagnisa pujau asagmin.

Atumek jaanch pegkeg iwajamu aina ibau nugkugjum iwagmamjatasagmek wakemaitsugme. Intashmesh tikich pegkeg diigsatnume tusagmek iwagmaitsugme, nuigtú oro aina imanjai iwagmamjatasagmesh wakemaitsugme.

Dekas iwagmamta duka pujut pegkeja nuuwai, nunin asamtai atumek nuwa kakagchauch tutitjachu amainaitjume, nuna Apajuik wakegas diiyawai.

Nuwa pegkeg duwik batsamajakajua dushakam, Apajuiyaig kajinas anentaimaidau asag, imá aishinig sumimajakú ainawai.

Sarashkam nunisag Abragnak umijak mina apug tujakuí, emematus anentau asa. Atumshakam pegkeg takaakjumek, Sara nawanjiya numamtin ainagme, nunin asajum makichkish puyatkas pujumainaitjume.

Aishmag aidautigmeshkam nuwemjaig shiig antugdaikajum pujustajum, nuwak kakaakchau asamtai. Apajuishkam nuwanash wait anentau asa pujut nagkanchaun susauwai. Atum nuwemjai shiig pujushtaik, Apajuishkam ni augmash antugtamkachagtatui.

Aatsa nuniakjum ashí betek nuninuk anentaimkau, puyatjus anentaimtunin, yatsut anendayas aneenin, wait anenkagtin, nuigtush ememachu atajum.

Pegkegchau awajtamainakuish dutiksagmekek iikaigpajum, pegkegchau chichagtamainakuish dutiksagmek chichagtsuk pegkegnum ausatajum. Jutiinak Apajuí pegkegnum yaimpaktatus etegtamjau asamtai, tikich aidaush pegkegnumag yaimainaitji.

“Ni shiig aneas dakujus pujustatus wakegauk, pegkegchau chichatnak, waitjutnashkam idaimainai.

Pegkegchau takat aina duka idaisatajum, nuniakjum pegkeg aina duke takastajum. Nuniakjum shiig agkan anentaimsa pujustasajum wakeetajum.

Apu Apajuik pegkejan takaina nuna kuitamak dita augmash antujui, untsu aents pegkegchaun takaina nunak dakitawai.”

Atum imá pegkeja duke takaagminig, makichkish pegkegchau etamainuk atsawai.

Tujash atum pegkeg takaakjum waitiakjumek shiig aneastajum. Tuja pegkegchau awajtamainakuish ishamkaigpa.

Apu Kristuwa nu puyatjusjum ememattajum, nuniakjum tikich aents: ¿Wagka Kristush nemagjume? tujamkuish atum Kristui kajintsá anentaimkujum dakainajum nu ujamainush shiig umintsau atajum.

Tujash niishkam ajantusjum diyakjum, kagkagchauch shiig chichatajum. Atumek pegkeg takat dekajum duke takau atajum, nuniagmin tikich Kristu nemajuinachu pegkegchaun chichagtamaina nu datsajagtatui.

Dekas pegkejai, Apajuí atumin pegkejan takainak waittsati, pegkegchau takaaku waitmaina nuna tusa wakejutpakuig waitmainaitjum duka.

Kristushkam makichkia jakauwai ajumaish jakashtinun iina tudaujin tsagkugtamjatatus. Nigka machikish pegkegchau ni waitmainjig atsugmaitak, Apajuijai igkumtijamkata tau asa pegkegchau aidaunum waittsauwai. Iyashinig dekas jakauwai, tujash niina wakaninig jakachui.

Nunik jakashkam aents jinau wakaní tuke achikbaujai betek batsatbaunum weuwai, chichaman etsegkatatus.

Apajuí Noen tiuwai: Arca najanata. Tusa tima arcan najana ayatak ocho aents uwemkajui. Nunikmatai tikich aents chichaman umikchaju aidauk ashí jakekajui. Jujú jakekú aajakaju aina nuna wakanin Jisusak wejiuwai ujaktatus.

Nunú yumia duka Noejai batsatunak ajekjachajui, numamtuk Jisukristu aneantua nujai ijutkau pujamunum uwemjau ainaji. Jutii yamiimainag duwi Jisukristujai ijutkau pujamua nu iwainmamainaji. Yamimamua duka iyash pegkeg emá uwemjatasaik yamimantsui. Jutiik Jisukristu mantamdauwa nui dekaskeapi tabaunum uwemkau asaja, Apajuí emtinig bakumamainchau ainaji.

Yamaik nigka nayaimpinum waka, ashí nayaimpinmaya aents aidaun Apuji wajas, nuigtú wakan senchigtin nayaimpinmaya aina nunash Apuji wajasá, Apajuí inamtaijin untsujin eketui.

Kristu juwi pujusá niina iyashin waittsauwa nunisjumek atumshakam waitmainaitjume. Wagki iyashnum waitiamua duka, tudau taká takaakua wetanmag dakitmitkagbau asamtai.

Wajupa tsawanta ju nugka juwi pujuttaji duwik, pegkegchau takatak anentaimtú batsamtsuk, Apajuí wakegamua duke takamainaitji.

Maake yamaik, yaunchuk Apajuí nemagchau asagmek, atum pegkegchau wakegamu wakejusjum takaakjum, tsanijimta duke tunamatjajum batsamtakjum, umutchakam imanik nampektasajum umakjum, nampekjumesh jiyá jiyanitjai yu wajakuitjume, nuniakjum Apajuí dakitamua nunú apajimat batsamtujakuitjum duka idaisatajum.

Nunú nuniajumin aents atumjai pegkegchaun takajakú aidauk, atum ditajai ijunja pegkegchau takat dakitamun waipainak: ¿Wagkag yamaish jutiijaish ijuntsua? tusag pegkegchau chichagtamainawai.

Tujash Jisukristu, aents jakau aidau, iwaaku aidaujai dekagbau atina duwi, dita takasbaujinak diisá titinai.

Nuaduí Apajuí chichameg aents jakaja dushakam ujakbau ainawai. Aents iwaaku pujusá dekaskeapi tiu jakau aina duka, wakaninig Apajuí tuke pujuwa nunisag pujustin ainawai.

Tsawantak jegawai ashí wají aina nunú nagkankatnuk. Nuaduí atumek emetmamjajum aneaku pujusjum, Apajuí aujú batsamtajum.

Tuja juna nagkaesauwa nuuwai puyatjunisa pempeentuniki aneenita duka, aneenita nujaiyai kuashat pegkegchau aidaush pempeentuniki tsagkugdaimaina dushakam.

Atumi jeemin ayamsatatus minakuishkam, shiig anentsajum awayatajum pegkegchau chichagdaitsuk.

Makí makichik ii yupichu dutikatnun Apajuí anenjauch amasajua nujai, tikich aidaush yaigtajum. Atumnak Apajuí wait anenjamu asa, ashí ni amasbauwa nunú shiig kuitamsajum takamain ainagme.

Apajuí chichame etsegkugmesh, niina chichame tawa dutiksagmek etsegkatajum. Tikich yayakjumesh, Apajuí atum yupichu dutikatnun amaa nujai yaigtajum. Nunú aajajum dutikakjum Jisukristu yaimpasmatai, Apajuí ajumaish tuke imanuk senchigtin, imá nigki atina nunú ememattajum. Aatus atí.

Mina aneetaig yatsug aidauh, ubag aidauh, atum Apajuiyai kajintsá anentaimjum nuna, dekaskeash nuninait tusa dekapjabaunum waitiamu ajutjamainakuish, tikima wají nagkaechataiya imanuk anentaimtú pujuigpajum.

Ayatak shiig aneastajum Kristu waittsamua nunisjumek waituidau asajum, ni imanjijai wantinkatna duwi imá shiig aneasjum dakunkut pujustin asajum.

Atum Kristu nemajin asagmin, pegkegchau chichagtamainakuish, shiig aneasjum pujustajum. Wakaní Pegkeji dekas imana nunú atuminig pujau asamtai.

Nunin asamtai makichkitigmekesh magkagtin, kasa, pegkegchau takau, tikichin pegkegchaujin yujajuinak waitú yujau aina nunin aigpajum.

Atumek Jisukristu nemajuidau asajum waitiakjumesh datsaamtsuk, Apajuishkam shiig aneasjum emematmainaitjume nu waitiamua duwi.

Apajuí aentsji aidauti waittsatnuk yamaik nagkamnae, aatus nu jutiiní waitiamu nagkamna aniaish, Apajuí chichamen uminatsu dusha, ¿wajuk nagkankatnukita? Ditak shiig senchi waittsatin ainawai.

Jisusa nemajuinak uwemkau pegkejan takaidaukesh waituina nuniaish, ¡aents Apajuin dakitin pegkegchau takau aidaush wajukatnus aina!

Nunin asamtai, atum Apajuí waittsati tusa wakejutpamunum waitiakjumesh, ayatak pegkeja duke takatajum. Nuniakjum Apajuí iina najapauwa nu, ni tibaujinak imatiksag umina nu, atumi wakanmishkam idaitustajum.

Yamai atum Kristu nemajuidaun diin aidautigmin, wishakam Kristu nemajuidaun diin asan tajime. Kristu waitkasa maamunash wi dekas mina jiijuí shiig wainkauwaitjai, nuniku asan dakajai, ni juwi taakui dekas pujut pegkeg iman atina nu jukitnaitag nuna.

Jisukristu nemajin aidau shiig kuitamkatajum, uwijá kuitamin aidau uwigjin kuitamin aina imatiksajum. Tikich inapakui kuichik jukitasa takamainaitam nunitsuk, shiig wakejusjum Apajuí wakega dutiksagmek takastajum.

Atum wagagsajum chichagkatasagmek wakeyigpa, nunitsuk atumin pujutjum pegkeg iwaintuktajum.

Atum nu betek dutiksagmek umiakjumek, Kristu dekaskenum uwijá kuitamna nunú minakui, wají shiig pegkeg tuke atina nu jukitnaitjume.

Antsagmek datsauch aidautigmeshkam, Jisusa nemajuidaun diin aina nui sumitkau atajum. Ashí atum aidautigmek emematsuk, tikich aidaujaish pempentunisjumek sumimdaimain ainagme, wagki: “Apajuik aents ememachu aidaun wait anentug yayaak, emebau aidaunak yaitsuk idayu asamtai.”

Apajuí dekas senchigtina nuna emtinig imanchauch anenmamtajum, ni tsawan jegatai iman etamtin asamtai.

Ashí atum uyumamugmik Apajuí idaitustajum, ni atumnak kuitamjamu asamtai.

Aneaku niimkau atajum, atumi shiwajum iwanchia duka pegkegchaun takamtijamsatatus, ikamyawa kajeak shinuwama imatak teentugmawai.

Nuniakuishkam atum Apajuiyai kajintsá anentaibaunum iwanch waitkagmainakuish katsunjatajum. Nuniakjum adeagtajum, ashí tikich nugkanmaya atumi yatsum aidaush, wijai betekap waituinawa tusajum.

Tujash atum ju nugka juwi pujusjum wajumak tsawantai waittsagminchakam, Apajuí shiig pegkeg etabiagtatui, waittsamujin diisag junik dekapjainum tusa. Dutijama nigka wait anenkagtina ibau asa, Jisukristujai pujustinme tusa niina senchijin amas, kakajus niiní tsujamainchau etami ajumaish wajukashtina nui awaintamawagtinai.

Niiyai Apuk, iman asa tuke Apuk atinai. Aatus atí.

Jujú papiinak Silvano yaintsamtai agajan ni minakui awemajai. Nigka yatsut dekas shiig Kristu umignai. Tuja wi papiin agatjim junak, atum Kristui kajintsá anentaimjum duka, nuní nagkaemasjum anentaimtakjum, Apajuí dekaskenum atumnak anempaina dusha dekaatajum tusan agatjime. Ashí wi tajim nuwig emetmamjajum pujustajum.

Jisukristu nemagkaju Babilonia pujuina nunashkam Apajuik etegjauwai, ni atumin etegtamjauwa dutiksag. Nunú aidaushkam atumnak kumpamjamainawai, Marcos mina uchijua imana dushakam aikasag kumpamjamainawai.

Makí makichik atum aidautigmeshkam aneenisjum ashí tikich aidaujaishkam kumpamdayatajum, dutikdayakjum atum ditajai aneeniamushkam iwaintuniktajum. Ashí atum Kristunu aidautigminak shiig agkan anentaimsa pujutan amastinme. Aatus atí.