1 Thessalonians (Shuar)

11

11:1b.1TH.011.001 Wikia Pápruitjai. Wisha Serpanujai tura Timiutéujai Tisarúnikianmaya Yus-shuar ajasuitrumna nuna aatjarme. Atumsha Yus-shuar asarum Apa Yúsnaitrume, tura Uunt Jesukrístunuitrume. Ii Apari Yus, tura ii Uuntri Jesukrístu waitnentrama ásarmatai, ti shiir imiatkinchanum pujustarum, tu wakerajrume.

11:2b.1TH.011.002 Iisha Yus áujkurkia atumniasha tuke Enentáimtusar Yus shiir yuminsaji.

11:3b.1TH.011.003 Atumsha Yus nekas Enentáimtakrum umirkarumna nu nékaji. Núnisrumek, Yus aneakrum takaarme. Tura Jesukrístu Tatí tusarum tuke tsawant Nákarme. Nu neka asar, ii Apari Yus áujkur, nusha Ashí Enentáimsar áujtajrume.

11:4b.1TH.011.004 Yatsurú, Yus anenmarme. Anenma asa Winia arti tusa achirmakurmena nusha nékaji.

11:5b.1TH.011.005 Enentáimpratarum. Iisha Yúsai Uwempratin Chicham atumin ujakmajnia nusha aya Chíchamjain Tíchamji. Antsu Nú arant, nu chicham nekasaiti tusar Yusa Wakaní kakarmarijiai Tímiaji. Tura átum pénker matsamsarat tusar atumjai pujusar shiir iruntrar wekasarmiaji. Nusha paant nékarme.

11:6b.1TH.011.006 Atumsha yamaikia íksarmek ii Túramiaj nu, tura ii Uuntri Jesukrístu Túramia nu Túrarme. Itiurchat ain Yus-Chicham umikiurme. Tura Wáitiayatrumek Yusa Wakani shiir Enentáimtikramkui warasrum pujarme.

11:7b.1TH.011.007 Nu Túrakrum Ashí Masetúnia tura Akaya nunkanmaya Yus-shuarsha shiir wekasatin jintintiarme.

11:8b.1TH.011.008 Tuma asarum Uunt Yusa chichame ti ipiamparurme. Tuma asamtai Masetúnia tura Akaya nunkanmaya shuar nuna nékainiawai. Tura Nú nankaamas Yus nekas umirkarmena nuna Ashí aents nékainiawai. Nuna nékainia ásar ii étserman atsumainiatsui.

11:9b.1TH.011.009 Antsu átum iin pénker itiaamun nii íksan ujatmainiaji. Tura nuyasha ántar-yus Enentáimtustin iniaisarum nekas iwiaaku Yus nekas Enentáimtusrum umirkarumna nunasha ujatmainiaji.

11:10b.1TH.011.010 Tura nuyasha Yusa Uchiri Jesus jakamunmayan Yus iniantkimia nu, nayaimpinimaya Tatí tusarum átum Nákamuncha ujatmainiaji. Iis, Jesus Nínkiti Yusa Kajetáiri tsawantri jeattana Nuyá uwemtikrampratin.

12

12:1b.1TH.012.001 Atumsha nékarme, Yatsurú, iisha ántrar Atumíin jeachmaji.

12:2b.1TH.012.002 Antsu itiurchat Wáinkiaitiatar arantutsuk shiir Uwempratin Chichaman ujakmajrume. Iis, nuik Jiripius péprunam incha katsekramkarmiaji. Tura Nú arant, ti itiurchat Wáinkiamiajai. Túmaitiatan Yus Yáintkiui Yusa chichamen ujakmajrume. Nuka atumsha ti penker nékarme.

12:3b.1TH.012.003 Warí, iisha Yus-Chicham atumin ujakmiaj nu nekasauyi. Tura yajauch Enentáimsan, anankatjarum tusan Tíchamjarme.

12:4b.1TH.012.004 Antsu Yus iin pénker enentaimturmas Uwempratin Chicham etserkatarum tusa akatrampramiaji. Tuma asamtai Núnisrik étsereaji. Túrasha aya aents waramtiksatai tusar étsertsuji. Antsu Ninki Yúsak ii Enentáin nekartamin asamtai, shiir Enentáimtiksataitsar Túraji.

12:5b.1TH.012.005 Atumka nékarme, penkesha Shíirmach chichasan anankachjarme. Nuyasha, kuit achiktai tusar ántrar chichaschamji. Núnaka Yus nékawai.

12:6b.1TH.012.006 Iisha Kristu akatramurintji. Tuma asar ni kakarmarijiai akupkatin takakuji. Páchitsuk Túramniauji. Túrasha waantu ajastaj Tíchamji. Nuyá atumsha tura chikichcha iin waantu awajtamsataj Tákuisha iikia nakitmiaji.

12:7b.1TH.012.007 Antsu uchi Kuírchin ni Nukurí pénker iis tsakatmana aintsarik iikia atumniaka shiir iismajrume.

12:8b.1TH.012.008 Iisha ti shiir aneajrume. Tuma asar Yus-Chicham ujaktai tusar ti wakerukmaji. Tura aya ujakar iniaisatin wakerukchamji. Antsu ii Jákatniuitkiursha iniaisachaaji, Atumín ti anea asar~i.

12:9b.1TH.012.009 Yatsurú, ii atsumaj nu sumarmaktai tusar kakaram takakmasmaj nu ṡkajinmatkintrumek? Atsá. Nékarme. Iis, Yus-Chicham étserkur, tsawaisha Káshisha takasmiaji. Nusha, akirkata, tiij tusar takakmasmiaji.

12:10b.1TH.012.010 Yatsurú, atumjai pujumiaj nui iisha Yus wakerana nu Túrimiaji, tura yajauch Túrutsuk shiir wekasamiaji. Nujai incha chikichkisha yajauch chichartamkatniusha atsumiayi. Nuka atumsha nékarme tura Nú arant Yus nékawai.

12:11b.1TH.012.011 Tura atumniasha ankant ankant Yúsnum Ikiakármajrumna nu nékarme. Tura uchin ni apari átsankeana Nútiksarik shiir Enentáimtikramajrumna nusha nékarme.

12:12b.1TH.012.012 Tura Yúsjai shiir wekasatarum Tímiajrume. Yus nankaamas uunt asa Ashí akupeawai. Tura Yus-shuaraitrumna nuna, Winin pachiinkiarat tusa, Yus untsurmarme. Yus untsurma asamtai Níiniuitrume. Niiniu asarum Yusa uchiria Núnisrumek wekasatniuitrume.

12:13b.1TH.012.013 Yus-Chicham ii étserma antukrum, aya aentsnumianchaiti Tímiarme. Yúsnumiaiti Tímiarme. Nu tiniu asarum umirkamarme. Kame nekas Tárume. Ii étserjinia nu nekas Yusa chichamente. Atum nu chicham umirka asakrumin, Atumí Enentáin kakaram ajastinian amaawai, Yus-Chicham asa. Atum Yus-Chicham umirkaru asakrumin iisha tuke tsawant Yus Yúminkiaji.

12:14b.1TH.012.014 Yatsurú, ju nekaatarum. Aya atumek Wáitiatsrume. Ashí Jutía nunkanam Israer-shuar, ni shuarinketiat, Yus-shuaran Wáitkiascharmakia. Iis, Yus-shuaran Kristu Jesusan umirkaru ásarmatai Wáitkiasarmiayi. Yamaikia atumniasha Atumí Shuárin Wáitkiarmainiawai. Nujai Jutía nunkanmaya Yus-shuarjai métekrak ajasurme.

12:15b.1TH.012.015 Niisha Israer-shuaraitiatan Yus-Chichaman etserin armia nuna nuamtaketiat Máawarmiayi. Tura Nú Weeák Uunt Jesusnasha Máawarmiayi. Tura incha aa jiiki akuptamkarmiaji. Maaj, niisha Yúsan shiir Enentáimtikiainiatsui. Tura Núnisan Ashí aentsun kajerainiawai.

12:16b.1TH.012.016 Warí, Israer-shuarcha Uwempratin Chicham ujaktaj Tákurnisha niisha suritramainiaji. Nuna Túruiniak yaunchu tunaan Túriarmia Nújainkia nankaamas yamaikia Túrawarai. Pai, Túrasha yamaikia Yusa kajetairii Imiá tsuumai ana nui pujusarai.

12:17b.1TH.012.017 Iisha, yatsuru, ishichik tsawant atumiiya kanakir jeachat pujayatrik, atumjaisha Wáinniaiyachiatrik tuke ii Enentáinkia Enentáimtimjiarme. Tuma asar ataksha atumin iistai tusar ti wakerimji.

12:18b.1TH.012.018 Nekas winitiaitsar wakerimji. Imia Wíkisha winitniun ti nukap Enentáimsamjai. Tura iwianchi uuntri Satanás tuke nuna suritrammiaji.

12:20b.1TH.012.020 Atumsha shiir wekasa asakrumin iisha ti shiir Enentáimsar waraaji. Nu tuma asar Uunt Jesukrístu Tátintri shiir Enentáimsar Nákaji. Nii Támatai Imiá warastatji. Atumin Yus-shuar awajsa asar, Nii Támatai atumsha iijiai Jesus shiir inkiuntatji. Tuma asamtai nu Enentáimsar tawasap achiktinia aintsar waraaji.

13

13:1b.1TH.013.001 Iisha ataksha atumin iistaitsar ti wakerimji. Tura tujintiakur iikia Atenas péprunam Juákur ii yachi Timiutéu atumin iirmainiarat tusar akupkatai, timiaji.

13:2b.1TH.013.002 Iisha Kristui Uwempratin Chicham etsermiaj nui, Timiutéuka iijiai métek takasuiti. Tuma asa niisha Yusa takatrin Takáa asa atumniasha Yusai kakartarum turamarti tusar akupkamji.

13:3b.1TH.013.003 Tura Nú arant, itiurchatan Wáiniuk iniaisarain tusa Ikiakátmararti tusar Timiutéu akupkamji. Yatsurú, átumka nékarme, Ashí Yus-shuaraitjinia nuka Páchitsuk Wáitsatniuitji. Iis, tuma asamtai atumsha ti nekas itiurchatnum pujarme, Yus-Chicham umirka asarum.

13:4b.1TH.013.004 Iimiatarum, atumjai nuik tuke pujumjinia nui "iisha Wáitsartatji" Tíchamkajrum. Iis, Túrunachaik. Nuka nékarme.

13:5b.1TH.013.005 Tura atumin íwianch tunaanum ajunmarchariash tusan, wisha Kúntuts Enentáimsamiajai. Tura ántrar takaschajiash tu Enentáimsamiajai. Tuma asamtai nekaataj tusan ti wakerakun, wisha ti nukap tsawant Nákaschamiajai. Antsu Wárik Timiutéun akupkamiajai. Yúsjai pénkerash wekainia tusan, "nu inintrusam ikiuuta" timiajai.

13:6b.1TH.013.006 Tura yamaikia Timiutéu Tisarúnikianmaya waketki tayi. Niisha taa, átum Yus aneakrum shiir Enentáimtamuncha ujatmaji. Tura átum iin anenma asarum tuke Enentáimsar pujamuncha tura ii atumin iistaitsar wakerajnia Núnisrumek atumsha incha iirmaitiai tusarum wakeramuncha Timiutéu ujatmaji.

13:7b.1TH.013.007 Tuma asamtai, yatsuru, Ashí itiurchat tura Wáitsatin Wáiniatrik átum Yus shiir Enentáimta asakrumin iisha shiir Enentáimji.

13:8b.1TH.013.008 Atumsha Yúsjai tariara Weká asakrumin, shuar jaa pénker ajas Enentái chinkiana aintsarik Enentáimji.

13:9b.1TH.013.009 Yus pénker umirka asakrumin, iisha shiir waraaji. Warasu asar ii Yusri ti Yúminkiaji.

13:10b.1TH.013.010 Incha Yus akuptamkurninkia atumiin Tímiajaik jeartiai tusar wakeraji. Túrar Yusna nekaatin mash nékatsrum nu jintintiatai tusar tuke ti seaji.

13:11b.1TH.013.011 Atumiin weri iistinian ii Apari Yussha tura ii Uuntri Jesukrístusha iin Yáinmaktai tusar wakeraji.

13:12b.1TH.013.012 Atumin ii aneajnia Núnisan Yus atumniasha mai anenai ajatniun tura chikichcha aneastinian Enentáimtikramprartí. Tura Nú nukap anenkrattain Yus Amasartí tusar wakeraji.

13:13b.1TH.013.013 Yus Ikiakátmakui átum Tunáa Túrutsuk Yus umirkarum wekasatarum tusar ii Apari Yus seaji. Ii Uuntri Jesus Níiniurijiai winiak pénker wekaarmin tati tusar taji.

14

14:1b.1TH.014.001 Iikia Uunt Jesus akupkamuitji. Tuma asar nu kakarmajai atumniasha ju Túratarum tusan akupeajrume. Atumsha iwiaaku pujarmena nui Yus shiir waramtiksatarum tura tuke pénker Túrukrum wetarum tusar seajrume. Iisha nuik atumin unuiniarmajrumna Nútiksarmek Túratarum.

14:2b.1TH.014.002 Uunt Jesusa akupeamurijiai tura nu kakarmajai atumniasha nuik unuiniarmajrumna nu átumka nékarme.

14:3b.1TH.014.003 Atumin Yus wakerutmarmena nu Júiti: "Shuar aya Winin sumama pujusat tusan chikichkinkesha shuar tsanirmaashti".

14:5b.1TH.014.005 Yus-shuarcha ainia nu, Yúsan nékainiachu ásar, aya ninki Enentáimtumasar aya ni ayashi wakeramunak umiktinian wakeruiniak nuwan Enentáimtuiniawai. Atumsha Núnisrumek Túrawairap. Antsu atumsha Atumí nuari pénker Enentáimtusrum shiir aneasrum ayastarum.

14:6b.1TH.014.006 Nú arant, amesha ame yatsum anankam ni nuari yajauch awajtusaip. Nu Túrakrumninkia ii Tímiajrumna Nútiksan Uunt Yus ti kakaram Asutiámawartatui.

14:7b.1TH.014.007 Warí, Yus incha pénkercha yajauch Túratarum turamchaitji. Antsu aya pénkerak Túratarum turamji.

14:8b.1TH.014.008 Tuma asamtai shuar ju chichaman nakitiakka aentsun nakitiatsui, antsu Yúsan nakitraiti. Tura nu Yussha ni Wakanin amaawiti tunaan Túrashtinian.

14:9b.1TH.014.009 Tura yamaikia nuamtak Yus-shuar aneniastin ana nuna ti neka asakrumin aatrashtatjarme. Warí, imia Ninki Yus atumin mai anenai ajatniun jintintramawarmatai nékarme.

14:10b.1TH.014.010 Iis Nútiksarmek aneniatsrumek Ashí Masetúnianam matsatainia nujai. Túrasha, yatsuru, Atumí anenkrattairi Nú nukap ajasti tusan, seajrume.

14:11b.1TH.014.011 Yamaikia Tímiaj Nútiksarmek, yayauchin Túruinia nui wekatsuk, Chíkich shuarna pachittsuk, Atumí takatriin shiir ankant pujusrum Atumí uwejejain Takakmá pujutarum.

14:12b.1TH.014.012 Atum Táasairum tusan Tájarme. Túrakrumninkia atumniasha Chíkich shuar pénker Enentáimturmasartatui.

14:13b.1TH.014.013 Yatsuru, Yus-shuarcha ni shuari jakamtai "atakka Wáinkiashtatjai" tusa ti kuntuts Enentáimainiawai. Tuma asamtai atumsha Nútiksarmek Kúntuts Enentáimsairum tusan juna Tájarme. Jákaru ainia nu urukawartinkit paant nekaatarum.

14:14b.1TH.014.014 Jesus Jákayat nantakchamkia. Núnisan Yus Jesusan iniantkin Niin umirkar Jákaru ainiana nunasha iniantkittiawai. Paant nékaji nusha.

14:15b.1TH.014.015 Tuma asamtai Yus-Chicham nekaprutamnia nuna atumniasha jintintiajrume. Iisha tuke iwiaaku pujarin Kristu Táakuisha Jákaru ainia nuka ikiuakur émkishtatji.

14:16b.1TH.014.016 Antsu Yus akupeakui, Yusa Suntarí uuntri untsumkui tura Yusa kachurin umpuarmatai Uunt Jesukrístu untsumuk Yus pujamunmaya tarattawai. Nuinkia Krístunu ajasar Jákaru ainiana nu iwiarsumunmaya nantakiartatui emka.

14:17b.1TH.014.017 Tura Nuyá iisha Yus-shuar tuke iwiaaku pujajnia nu Krístujai yuranminiam ajapén inkiunaikiartatji. Nuní Ashí nayaimpiniam ii Uuntri Jesukrístujai tuke iwiaaku pujusartatji.

14:18b.1TH.014.018 Tuma asamtai ju shiir chicham atumin ujakjana jujai mai Ikiakánai ajatarum.

15

15:1b.1TH.015.001 Túrasha, yatsuru, ni Tátintri waritin tura Warí tsawantai, nuka aatratin atsumatsrume.

15:2b.1TH.015.002 Ni Tátintri Júnis átin nékarme. Kiritniunam Kasá shuar kasamkataj tusa Tátatna nu nekaachminiaiti. Núnisan Nákatsuk pujuiniai Uunt Kristu tsawantri jeattawai.

15:3b.1TH.015.003 Ashí shuar "Pai, yamaikia ti nekas shiir pénker pujuiniaji" tu matsatainiai, aya aneachma nunka mesertin tsawant jeattawai. Nuwa ajamtin aya aneachma jatema aintsan, nékachmanum átatui. Túmakui pisartin penké atsuttawai.

15:4b.1TH.015.004 Túrasha, yatsuru, átumka ujakmaitrume. Nu tsawant atumsha aneara pujarmin jeattawai. Atumsha aneara Pujá asakrumin Kasá aintsan Tarutrámashtatui.

15:5b.1TH.015.005 Enta, átumka Tsáapninium Wekáa asarum Yus-shuartirmeka nékaitrume. Iikia kiritniumianchuitji.

15:6b.1TH.015.006 Nu tuma asar, Chíkich uruka Núnisrik, ii Enentáin kanartinia Núnisrik "Warí, winia itiurtawa" Tíchami. Antsu naka Enentáimsar anearmi.

15:7b.1TH.015.007 Iis, kashi kanarchatniukait. Tura nampeena nu kashi nampeenawai.

15:8b.1TH.015.008 Túrasha iikia shiir Tsáapninium wekainiaj nuka naka Enentáimprar tuke nampetsuk pujustiniaitji. Suntar ni nemasri anankruawain tusa anear wekasatniuiti. Tura iisha Núnisrik íwianch yajauch awajtamsaij tusar anearmi. Yus Enentáimtusar aneetniuitji. Tura Núnisrik iisha, ju nunkanmaya uwemprar Yúsai tuke pujustatji, tu Enentáimprar Wetái.

15:9b.1TH.015.009 Páantchakait. "Jinium wéchatniuitrume" Yus incha Túramji. Antsu ii Uuntri Jesukrístujai uwempratniun tsankatramkaitji.

15:10b.1TH.015.010 Niijiai métekrak iwiaaku ami tusa Jesukrístu iin jarutramkamiaji. Nu tuma asamtai iisha ii ayashijiai iwiaaku pujakrisha Niijiai iwiaakji, tura ii ayashijiai Jáakrisha Niijiai tuke iwiaakji.

15:11b.1TH.015.011 Tuma asamtai tuke Túrarmena Núnisrumek, shiir Enentáimtiknaisarum mai Ikiakánai ajatarum.

15:12b.1TH.015.012 Yatsurú, juna seajrume. Atumjai pujuinia Nú shuar Yúsnan takakmainiakui shiir Enentáimtustarum. Jintintramuk chichartamainiakui umirkatarum.

15:13b.1TH.015.013 Yúsnan takainia ásarmatai ti pénker Enentáimtusrum aneestarum. Tura yajauch awajnaitsuk ti shiir nawamnaikiarum matsamsatarum.

15:14b.1TH.015.014 Tura junasha seajrume, yatsuru. Takastinian nakitiana nusha chicharkatarum. Tura yaweena nusha ataksha Enentáimtikrarum Ikiakártarum. Kakarmachu ana nusha Yáintarum. Tura Ashí shuarjai kajetsuk katsuntrarum wekasatarum.

15:15b.1TH.015.015 Aneartarum, yatsuru. Chíkich yajauch Túrutmamtai amesha Nútiksamek yapajkiaip. Antsu nuka Túrutsuk átumka mai pénker awajnai ajatarum. Tura Nú arant, Ashí nunkanmasha Ashí shuarsha Nútiksarmek Túratarum.

15:16b.1TH.015.016 Tuke shiir warasrum pujustarum.

15:17b.1TH.015.017 Tuke tsawant iniaitsuk Yus áujsatarum.

15:18b.1TH.015.018 Pénker pujakmesha, itiurchat pujakmesha Ashí Warí Wáiniam nuisha Yus shiir yuminsatarum. Kristu Jesusai Yus-shuar ajasutiram nu Túratniun Yus wakerawai.

15:19b.1TH.015.019 Ji ikiajniaktinia Núnisan Yusa Wakaní Enentáimin keana nuka tunaajai téenmamtikiarum ikiajniakairap.

15:20b.1TH.015.020 Yus jintintrar akupkamu asa pénker chichaman etserainia nu nakitrairap.

15:21b.1TH.015.021 Ashí etserkamu ana nu nekasashit tusarum nekaatarum. Túrarum aya pénker ana nuke achiktarum.

15:22b.1TH.015.022 Ashí yajauch ana nuyanka kanaktiarum.

15:23b.1TH.015.023 Yuska, imiatkinchanum wekasatin amaana nu, atumin takamtsuk shiir Awajtamsartí. Tura ii Uuntri Jesukrístu Táatsain, Atumí Wakaní Atumí enentai tura Atumí ayashisha mash métek tunaajainchu awajtamsati.

15:24b.1TH.015.024 Yus atumin untsurmakmarumna nu Tímianak uminiaiti. Nii tana nuna yawetsuk Túrattawai.

15:25b.1TH.015.025 Ashí yatsurtiram winiasha Yus áujtursatarum.

15:26b.1TH.015.026 Ashí Yus-shuar árum nu, amikmaaniatarum.

15:27b.1TH.015.027 Winia Uuntru Jesukrístu chichamejai juna Tájarme. Ju Papí Ashí Yus-shuar antukarti tusarum Ashí iruntramunam áujsatarum.

15:28b.1TH.015.028 Ii Uuntri Jesukrístu atumin Yáinmákartí. Nu Atí.