2 Timothy (Quichua)

1

1:1b.2TI.001.001 Ñuca, Pablo, apóstol nishca Jesucristo cachashca runa, Dios munashcamanda, imasnara pai causanara cusha nishcasna Cristo Jesuspi.

1:2b.2TI.001.002 Ñuca llaquishca churi Timoteoma quülcauni. Gracia nishca ali iyairas, llaquij shunguras cushi shunguras chari, Yaya Diosmanda, Cristo Jesús ñucanchi Señormandas.

1:3b.2TI.001.003 Diosta agrasini, paita sumaj iyaihua sirvini ñuca yayaunamanda pacha. Mana saquisha canmanda iyariuni, Diosta mañausha tutandi punzhandi;

1:4b.2TI.001.004 camba ñahui iquira talishcara iyarisha, ashcara munani canda ricungaj, ñuca ashcara cushiyangaj.

1:5b.2TI.001.005 Can shunguhua quirinara iyariuni. Shinallara quirinauca camba Loida rucu mama, camba Eunice mamas. Maspas, cierto mani can shinallara quiriungui.

1:6b.2TI.001.006 Chimanda canda nini, cambajpi tiaj Dios cuyashcara causachingui ninara huairachishca cuenta; chi cuyashca ñuca maquira camba ahuai churashcamanda aca.

1:7b.2TI.001.007 Dios ñucanchima mana cuhuacachu manzhai iyaira, randi ushana iyaira, llaquina iyaira, aicha munaira arcana iyairas.

1:8b.2TI.001.008 Ama pingarichu ñucanchi Señormanda rimangaj, shinallara ñucamandas, ñuca paihua ishcashca runa asha. Randi, evangelio ali shimimanda ñucahua pariju tormendarinara apingui, Diospa ushaira cushcasna.

1:9b.2TI.001.009 Pai ñucanchira quishpichihuaca, sumaj cayanahua cayasha, mana ñucanchi rashcauna raigumanda, astaun pai quiquin munashcamanda, shinallara Cristo Jesuspi cushca gracia nishca ali iyaimandas, tiempouna manara callarishcaira cushca,

1:10b.2TI.001.010 shinallara cunas ricuchishcami ñucanchira Quishpichij Cristo Jesús ricurímushcai. Pai huañuira vencica, causairas mana huañuihuaj causairas punzhajlla ricuchica evangelio ali shimii.

1:11b.2TI.001.011 Cai evangelio ali shimira camachijpas, cachashca runas, Gentil nishcaunara yachachijpas ñuca churai tucucani.

1:12b.2TI.001.012 Chiraigumanda casna tormendarini; randi mana pingarinichu, ñuca maicanda quirishcaras yachani, pai cierto pacha ñuca mingashcara ushanmi huacachinara, chi punzhagama.

1:13b.2TI.001.013 Ñucamanda uyashca ali shimi tonora catingui, Cristo Jesuspi tiaj quirinais, llaquinais.

1:14b.2TI.001.014 Canda mingashca ali shimira huacachi ñucanchijpi causaj Santo Espíritu yanapashcahua.

1:15b.2TI.001.015 Ña yachangui imasna tucui Asiai tiajguna ichuhuanauca, Figelo Hermógenes nishcauna rashcasna.

1:16b.2TI.001.016 Onesíforo nishcaunara Señor llaquipachu. Pai ashca cuti cariyachihuaca. Ñuca iru huascaunamanda mana pingaricachu.

1:17b.2TI.001.017 Maspas, Roma llactai tiaushcai llaquishcahua mascahuaca ñucara, tupahuacami.

1:18b.2TI.001.018 Señor paita cupachu llaquinara tupangaj Señormanda chi punzhai. Alimi yachangui imasna Efeso llactai ashcara yanapahuaca ñucanchira.

2

2:1b.2TI.002.001 Canga, ñuca churi, Cristo Jesuspi tiaj gracia nishca ali iyaibi shinzhiyari.

2:2b.2TI.002.002 Can ñucamanda ashca ricujguna ñaupajpi uyashcara, ali quirij runaunama pasachingui, paiguna ushajguna asha shujgunara yachachingaj.

2:3b.2TI.002.003 Canga tormendarinaunara ahuantangui Cristo Jesuspa ali soldaro cuenta.

2:4b.2TI.002.004 Pi runas, soldaro asha, mana inquitanzhu causana ranaunai, paita soldaro tucungaj apijta cushiyachingaj.

2:5b.2TI.002.005 Maicambas pujllanaunai macanausha, mana ali macanaupi, llaitura mana apinzhu.

2:6b.2TI.002.006 Tarabaj runaga iñashca muyuunara apingaj ñaupara tarabana anga.

2:7b.2TI.002.007 Ñuca rimashcara uyai. Señor tucuira canda intindichingami.

2:8b.2TI.002.008 Jesucristora iyari, Davidmanda mirashca, huañuimanda causarishca, ñuca evangelio ali shimii rimashcasna.

2:9b.2TI.002.009 Chi ali shimimanda tormendariuni, huatashcami ani causayuj runasna, randi Diospa shimi mana huatashcachu.

2:10b.2TI.002.010 Ajllashca runaunara llaquishcamanda tucuira ahuantani, paigunas quishpinara charinauchu nisha. Chi quishpichina Cristo Jesuspi tiaun huiñaigama duraj sumajhua.

2:11b.2TI.002.011 Cai shimi ciertomi. Ñucanchi paihua pariju huañushca ajpi, shinallara paihua pariju causashun.

2:12b.2TI.002.012 Ñucanchi tormendarijpis, shinallara paihua pariju rey apuuna tucushun. Ñucanchi, Paita mana ricsinichu, nijpi, paiga shinallara ñucanchima: Mana ricsinichu, ningami.

2:13b.2TI.002.013 Ñucanchi mana quirihuajlla ajpi, paiga ali quirihuajllami. Paihua quiquin quirihuaj tonora saquinara mana ushanzhu.

2:14b.2TI.002.014 Caita iyachingui paigunara. Diospa ñaupajpi camachingui ama shimiunamanda macan anauchu. Chita mana ansas valinzhu, astaun uyajgunara huajlichin.

2:15b.2TI.002.015 Diospa ñaupajpi canllara ricuchingui shu alimi nishca runa cuenta, shu pingarina illaj tarabaj runa cuenta, cierto shimira ali camachij.

2:16b.2TI.002.016 Yanga shimiunara ama uyaichu. Chita uyajguna Diosmanda mas mas anzhurinaunga.

2:17b.2TI.002.017 Paiguna shimi ismushca aicha cuenta micurisha rin. Himeneo Fileto nishcauna cai samiunami.

2:18b.2TI.002.018 Paiguna cierto shimimanda pandarinaushca, causarina ña pasashcami nisha. Shina nisha huaquinguna quirinara huajlichinaun.

2:19b.2TI.002.019 Randi, Dios churashca urcun siqui cuenta shimi shinzhimi, casnami nin: Señor paihua quiquimbajgunara ricsin; shinallara: Tucui Cristo shutira rimasha rugaj uchamanda anzhurichu.

2:20b.2TI.002.020 Atun huasii, mana curillahua cullquillahua rashca puruuna tianaunzhu, astaun caspi batías, allpa mangas tianaun, huaquinguna valijguna, huaquingunaga yanga apinaunami.

2:21b.2TI.002.021 Shinajpi maican runa paulara ima manalimandas pichajpi, valij puru cuenta tucunga, chicanyachishca, Señorhuaj valijmi anga, ima ali ranaras rangaj puruntushca.

2:22b.2TI.002.022 Shina ajpi maltauna ucha munashcaunamanda miticui; ali dirichu ranaunara, quirinaras, llaquinaras cushi shunguras cati, Señorda chuyaj shunguhua rugajgunandi.

2:23b.2TI.002.023 Iyai illaj upa rimanaunara ama uyaichu, macanauna shimiunara llucchinaun.

2:24b.2TI.002.024 Señorda sirvij ama piñaisiqui tucuchu, astaun llaquisiqui tucui runaunahua, ali yachachij, ahuantaj achu,

2:25b.2TI.002.025 paita piñajgunara manso shunguhua camachisha, Dios munajpi arrepentirinaunga chari cierto shimira yachangaj.

2:26b.2TI.002.026 Shinarajpi supai tugllamanda liushpirinaunga, api tucushca asha, pai munashcara rangaj.

3

3:1b.2TI.003.001 Shinallara caita yachangui: puchucai punzhaunai tormendosguna shamunaungami.

3:2b.2TI.003.002 Runauna paiguna quiquinllara llaquij tucunaunga, cullquira llaquijgunas, mas tucuisiquiunas, valijmi ani nijgunas, irusta rimajgunas, yayaunara mana casujgunas, mana agrasijgunas, manaliunas,

3:3b.2TI.003.003 llaquina illajgunas, mana mañaihuajgunas, camijgunas, mana ahuantajgunas, milliunas, aliranara chijnijgunas,

3:4b.2TI.003.004 amigounara entregajgunas, mana iyaihua rajgunas, pai quiquinllara llaquijgunas, aicha munashcaunara Diosmanda yali llaquijgunas.

3:5b.2TI.003.005 Ali causai ricurinara charinaun, randi paihua ushaira mana ricsinaunzhu. Casna runaunahua ama llutarichu.

3:6b.2TI.003.006 Caigunamanda huaquinguna huasii icusha, mana iyaiyuj huarmiunara apinaun. Cai huarmiuna yapa uchayujgunami, ima aicha munaihuas apashcaunami.

3:7b.2TI.003.007 Paiguna tucui horas yachasha rinaun, astaumbas cierto shimira yachanama mana imahoraspas pactanara ushanaunzhu.

3:8b.2TI.003.008 Imasna Janes Jambres nishcauna Moisesta arcanauca, shinallara cai runauna cierto shimira arcanaun. Casna runauna iyaibi huajlishcaunami, quirinamanda ichushcauna.

3:9b.2TI.003.009 Paiguna mana mas ñaupajma rinaungachu. Tucui riparanaunga imasna paiguna mana ali iyaiyujguna ashcara, chi ishqui runaunasna.

3:10b.2TI.003.010 Canga ñuca yachachishcara catishcanguimi, ñuca causashcaras, iyashcaras, quirinaras, chapaisiqui shunguras, llaquinaras, ahuantashcaras,

3:11b.2TI.003.011 ñuca molestai tucushcaras, ñuca tormendarishcaras, imasna ñuca Antioquía, Iconio, Listra nishca llactaunai tiaushcai tucushcaras yachangui, imasna yapa tormendachihuanauca. Randi tucuimanda Señor quishpichihuaca.

3:12b.2TI.003.012 Shinallara tucui Cristo Jesuspi ali causasha nijguna tormendachi tucunaungami.

3:13b.2TI.003.013 Astaun manali runaunas umachijgunas mas manalii rinaunga, umachisha, shinallara umachi tucushas.

3:14b.2TI.003.014 Canga, can yachashcara, can cierto ajta ricsishcaras cati, canda camachijta ricsisha.

3:15b.2TI.003.015 Shinallara yachangui imasna can ichilla huahua horasmanda pacha Diospa Santo Quillcashcaunara ricsishcangui. Cai shimiuna canda alma quishpichina yachanara cunaun Cristo Jesuspi quirijpi.

3:16b.2TI.003.016 Tucui Dios Quillcashca Diosmanda rimashcami. Valinmi yachachingaj, camachingaj, alichingaj, ali causanara yachachingaj,

3:17b.2TI.003.017 Diospa runa ali tucungaj, pactajta alichishca tucui ali ranara rangaj.

4

4:1b.2TI.004.001 Canda nini Diospa ñaupajpi, Señor Jesucristo ñaupajpis, pai causajgunaras huañushcaunaras taripaj asha, pai ricurimushcai, pai mandana pachais:

4:2b.2TI.004.002 shimira camachi, nisha, shinzhira rimai, horas ajpis mana ajpis, intindichi, camachi, yachachi, tucui chapanahua, ali yachanahuas.

4:3b.2TI.004.003 Horas shamun runauna ali yachachinara mana uyanaungachu. Randi, paiguna rinri shicshisha cuenta, paiguna quiquin aicha munashcasna yachachijgunara tandachinaunga.

4:4b.2TI.004.004 Shinallara cierto shimiunara uyangaj rinrira tapanaunga, yanga cuentanaunama voltiarinaunga.

4:5b.2TI.004.005 Canga, tucuibi ali ñahuihua tiai, tormendosta ahuantai, evangelio ali shimira rimai, canma cushca sirvinara pactachi.

4:6b.2TI.004.006 Ñuca ñallami sacrificiora rai tucungarauni. Ñuca llucshina horas ña pactariunmi.

4:7b.2TI.004.007 Ali macanaunara macanaushcanimi; callpanara tucuchishcani; quirinara huacachishcani.

4:8b.2TI.004.008 Cunamanda ñucajta ali causana llaitura huacachishcami. Chi llaitura ali taripaj Señor chi punzhai cuhuangami ñucama; mana ñucamallachu astaun shinallara tucui pai shamunara llaquijgunamas.

4:9b.2TI.004.009 Ñucara ricungaj uctalla shamungui.

4:10b.2TI.004.010 Demás, cai pachara llaquisha, ñucara saquihuaca, Tesalónica llactama rica. Crescente Galacia partima rica, Tito Dalmacia partimas.

4:11b.2TI.004.011 Lucaslla ñucahua tiaun. Marcosta apisha pushamui, pai valijmi ñucara yanapangaj.

4:12b.2TI.004.012 Tíquico nishcara Efeso llactama cachacani.

4:13b.2TI.004.013 Can shamusha, ñuca Troas llactai Carpo huasii mingashca ponchora apamui, shinallara ñuca quillcaunaras, maspas carai quillcashca pangaunaras.

4:14b.2TI.004.014 Alejandro, paila irura tarabaj runa, yapa manalira rahuaca. Señorga paita cutichichu pai shina rashcamanda.

4:15b.2TI.004.015 Cambas cuirai ama paihua llutaringaj; pai ñucanchi shimiunara ashcara arcashcami.

4:16b.2TI.004.016 Ñucara ñaupa punda taripaushcai, mana pihuas ñucahua tiauca. Tucui ichuhuanauca. Ama causayuj tucunauchu chimanda.

4:17b.2TI.004.017 Randi Señorga ñucahua pariju tiauca, ursara cuhuaca paihua shimira ali rimangaj, tucui gentilguna uyangaj. Shina ajpi león puma shimimanda quishpi tucucani.

4:18b.2TI.004.018 Señor quishpichihuangami tucui manalimanda; paihua ahua pachai tiaj rey apu mandanama pactanagama ñucara huacachingami. Paihuajmi ali sumaj achu, huiñai huiñaigama. Amen.

4:19b.2TI.004.019 Priscaras, Aquilaras, Onesíforounaras, salurai.

4:20b.2TI.004.020 Erasto Corinto llactai saquirica. Trófimo nishcara ungushca ajpi saquicani Mileto llactai.

4:21b.2TI.004.021 Tamia horas manara pactamujllaira shamungui. Eubulo canda saluran, shinallara Pudente, Lino, Claudia, tucui uquiunas canda saluranaun.

4:22b.2TI.004.022 Señor Jesucristo camba espirituhua tiachu. Gracia nishca ali iyai cangunahua tiachu. Amen.