Colossians (Quichua)

1

1:1b.COL.001.001 Pablo, Jesucristo apóstol nishca cachashca runa, Dios munashcamanda, Timoteo nishca uquindi,

1:2b.COL.001.002 chuyaj shinzhi quirij uquíunama quilícanchi, Cristoi quirijguna, Colosas llactai tiajguna: Gracia nishca ali iyaira cushi shunguras charíchi, ñucanchi Dios Yayamanda, Señor Jesucristomandas.

1:3b.COL.001.003 Diosta, ñucanchi Señor Jesucristo Yayara, agrasinchi, tucui horas cangunamanda Diosta mañasha.

1:4b.COL.001.004 Canguna Cristo Jesuspi quirishcara uyashcanchi, shinallara canguna tucui quirijgunara llaquishcaras,

1:5b.COL.001.005 cangunajta ahua pachai huacachishca ali chapanaraigumanda. Caimanda uyashcanguichi evangelio cierto shimii.

1:6b.COL.001.006 Cai evangelio shimi cangunajma pactamuca imasna tucui mundui shamushcami. Aparisha rin, iñasha rin cangunajpi, canguna uyashca punzhamanda, imahoras cierto pacha uyacanguichi, shinallara yachacanguichi Diospa gracia nishca ali iyaira.

1:7b.COL.001.007 Caita Epafras nishca runamanda uyacanguichi. Paiga ñucanchi llaquishca ñucahua pariju sirvij runa, Cristora ali sirvij cangunara yanapangaj.

1:8b.COL.001.008 Paiga cangunajpi tiaj Espíritu cushca llaquinara cuentahuashcami.

1:9b.COL.001.009 Chiraigumanda, ñucanchi uyashca punzhamanda, cangunamanda Diosta mañanara mana saquinchichu. Canguna Dios munashcara pactajta yachangaj mañanchi, tucui yachanahua, tucui almai intindinahuas.

1:10b.COL.001.010 Shinallara mañanchi canguna Señor valishca tupui puringaj, paita tucuibi cushiyachisha, tucui ali ranaunara aparisha, Diosta ricsiushcai iñasha.

1:11b.COL.001.011 Canguna tucui ursahua shinzhiyachishca tucungaj mañanchi, paihua gusto sumaj ushana tupui, ahuantaisiqui shungura, chapaisiqui iyairas charingaj.

1:12b.COL.001.012 Cushihua Yayara agrasinchi imasna pai ñucanchira alichica quirijguna Yayamanda apiñara ahua pacha punzhai apingaj.

1:13b.COL.001.013 Paiga ñucanchira llandu ushaimanda liushpichica. Ñucanchira paihua llaquishca Churi mandana pachama pasachicami.

1:14b.COL.001.014 Churu randishca manchi, paihua yahuarda pagashcamanda, ucharashcaras ña perdonashcami.

1:15b.COL.001.015 Paiga mana ricuihuaj Dios ricurinami, tucui causajgunamanda ñaupa pagarij.

1:16b.COL.001.016 Tucui paihuajllai rashca aca, ahua pachai tiajguna cai pachai tiajgunas, ricurijguna mana ricurijgunas; rey apu tiarinauna asha, mandajguna asha, atun apuuna asha, ushajguna ashas. Tucui paimanda paihuajta rashca aca.

1:17b.COL.001.017 Pai tucui imamandas ñaupami, tucuiguna paimandami anaun.

1:18b.COL.001.018 Iglesiaga paihua aichami, paiga aichamanda umami. Paiga tucuimanda callarinami, huañushcaunamanda ñaupa pagarij, pailla tucuimanda ñaupa punda aj tucungaj;

1:19b.COL.001.019 imasna Yayara cushiyachica Cristoi entero Dios causasha tiangaj;

1:20b.COL.001.020 shinallara paimanda tucui Dioshua amigopura tucungaj, cai pachais ahua pachais tiajgunandi, cushira rasha paihua cruzpi talishca yahuarmanda.

1:21b.COL.001.021 Shinallara cangunas ñaupa horas manali rashcaunamanda carui tiajguna ajpi, chijnijguna ajpis canguna iyaibi, cuna Dios cangunara amigora rashcami

1:22b.COL.001.022 Cristo aichai, pai huañushcamanda, canguna chuyajguna, ima tinishca illajgunas, mana causayujgunas tucungaj paihua ñaupajpi.

1:23b.COL.001.023 Caita rangami canguna ali shayaríjpi, ali shinzhiyajguna tucujpi canguna quiriushcai, canguna uyashca evangelio shimimanda mana anzhurijpi. Cai shimira camachishcami tucui ahua pacha urai causajgunama. Cai shimira rimangaj ñuca, Pablo, sirvij runa tucucani.

1:24b.COL.001.024 Cuna horasga ñuca canguna raigumanda tormendariushcai cushiyani. Shinajpi Cristo tormendarishcaunamanda paihua aicha nishca iglesiaraigu, ñuca quiquin aichai pishishcara ña pactachiuni.

1:25b.COL.001.025 Caimanda sirvij tucushcani, Dios ñucara cushcasna cangunahua, ñuca Diospa shimira pactajta rimangaj.

1:26b.COL.001.026 Cai pacashca shimi callarimanda tucui tiempounamandas pacashca aca; cuna horasga pascarishcami paita quirijgunama.

1:27b.COL.001.027 Cai pacashca shimi valishca tupuras, paihua sumaj tupuras gentilgunama Dios quirijgunara ricuchisha nica. Cai pacashca shimi nin: Cristo cangunajpimi tian, canguna sumaj tucungaj chapanami.

1:28b.COL.001.028 Cai Cristo shutira rimanchi, tucui runara camachisha, tucui yachaihua yachachisha, tucui runara Cristo Jesuspi sumajlla alichishcara ricuchingaj.

1:29b.COL.001.029 Caimanda shinallara tarabauni, Cristo cushca ushaihua macanausha, cai ushai ñuca shungüi shinzhira tarabaun.

2

2:1b.COL.002.001 Ñuca munani canguna yachangaj imasna cangunamanda mañasha ashcara tormendarishcani, shinallara Laodicea nishca llactai tiajgunamandas, shinallara tucui ñucara mana ricujgunamandas.

2:2b.COL.002.002 Paiguna shunguuna cariyashca anauchu, parijumanda llaquinausha, ali intindina valishca tupura pactanagama, Dios Yaya pacashca shimira yachangaj, caimi Cristo.

2:3b.COL.002.003 Cristojpiga tucui intindina, tucui yachana valishcauna pacashcami tianaun.

2:4b.COL.002.004 Caita cangunara nini, pi runas cangunara ama umachingaj uyanalla shimiunahua.

2:5b.COL.002.005 Ñuca aichai cangunahua mana tiaupis, shinashas espiritui cangunahua pariju tiaunimi. Canguna ali tucushcara cushihua ricuni, shinallara canguna Cristoi shinzhi quirishcaras.

2:6b.COL.002.006 Shinashas, imasna canguna Señor Jesucristora chasquishcanguichi, shinallara paihuajpi puríchi.

2:7b.COL.002.007 Canguna sapiuna cuenta paihuajpi tianauchu, canguna pai ahuai shayachishca anauchu, canguna quiriushcai shinzhi yachishca, imasna cangunara yachachishcasna, Diosta talirijta agrasisha.

2:8b.COL.002.008 Ricuichi pihuas cangunara ama umachichu yachana shimiunahua, yanga umana shimiunahuas, runa yachaimanda, mundu iyarina samillai, mana Cristo rimashca samillai.

2:9b.COL.002.009 Cristoi entero Dios runa aichai causan.

2:10b.COL.002.010 Cangunas Cristoi pactajta anguichi. Paiga tucui atun apu, tucui ushajguna umami.

2:11b.COL.002.011 Shinallara canguna Cristoi circuncisionda rai tucushcanguichi, mana maquihua rashcara, astaun canguna ucha raisiqui aichara ichusha Cristo circuncisionda raushcai.

2:12b.COL.002.012 Paihua pariju pambashca acanguichi canguna bautisarishcai, shinallara chihui paihua pariju causarimucanguichi, Diospa ushaibi quirisha, imasna pai Cristora huañushcaunamanda atarichica.

2:13b.COL.002.013 Cangunaga, huañushcauna ajpi, canguna ucharashcamanda, aichai circuncisionda mana apishcamandas, Dios cangunama causaira cuca Cristohua pariju, tucui canguna ucharashcaunara perdonasha.

2:14b.COL.002.014 Ley shimimanda ñucanchira causayachij quillcara, ñucanchira culpayachijta, borracami, ñucanchi chaupimanda quichusha, cruzpi clavacami.

2:15b.COL.002.015 Casna rasha supai atun apuunaras ushajgunaras vencica, paigunara pajlla pambai pingachica, pai quiquimbi paigunara vencica cruzpi.

2:16b.COL.002.016 Chi raigumanda pihuas cangunara ama taripachu micunamandas, upinamandas, ista punzhaunamandas, mushuj quillamandas, sahuaro punzhaunamandas.

2:17b.COL.002.017 Cai tucuigunaga huasha shamujguna almami. Astaumbas almara llucchijga Cristomi.

2:18b.COL.002.018 Ama lugarda cuichichu pihuas cangunamanda canguna ganashcara quichungaj, manso shungura charini nisha, angelgunara alabasha, paiguna mana ricushcai satirisha, yangamanda umai punguirisha paiguna ucha aicha iyaibi.

2:19b.COL.002.019 Casnauna Cristora mana charinaun Uma cuenta. Paimandaga entero aicha carashca asha, tucui tullu mucuuna anguhua pigarishca asha, iñasha rin Dios cushca iñanahua.

2:20b.COL.002.020 Canguna Cristohua pariju huañushca ashaga mundu yachanamanda, ¿imarashara mundui causajguna cuenta mundu camachishcaunara uyanguichichui:

2:21b.COL.002.021 casna samiunara: ama apichu, ama gustaichu, ama liangaichu?

2:22b.COL.002.022 Caigunami runauna camachishcauna, yachachishcaunas. Tucui caiguna paiguna raushcallai pasanaun.

2:23b.COL.002.023 Casna ranauna cierto pacha sabiro cuenta yachin, runa yanga alabanai, yanga manso shungüi, aichara livachinai. Astaumbas, casna ranauna imajpas mana sirvinaun ucha aicha munaira vencingaj.

3

3:1b.COL.003.001 Cangunaga, Cristohua pariju causarishca asha, ahuai tiajgunara mascaichi, maibi Cristo Diospa ali maqui partii tiarishcami.

3:2b.COL.003.002 Ahuai tiajgunara ricuichi, mana cai pachai tiajgunara.

3:3b.COL.003.003 Huañushcanguichi, canguna causaiga Cristohua pariju Diospajpi pac ashcami.

3:4b.COL.003.004 Imahoras Cristo, canguna causai, ricurimujpi, chi horasllaira cangunas paihua pariju ricuringuichimi paihua sumajpi.

3:5b.COL.003.005 Shinajpi, cangunajpi tiaj mundu munaira huañuchichi: shujhua tacarinara, irus iyaira, ucha aicha munaira, manalirana munaira, cullquira yapajta munanaras, caimi runa rashca diosta alabana cuenta.

3:6b.COL.003.006 Casna ranaunamanda, Diospa piñarina shamun mana casujgunama.

3:7b.COL.003.007 Canguna casna rashcaunai ñaupa horas puricanguichi, imasna chigunai causacanguichi.

3:8b.COL.003.008 Cuna horasga, canguna tucui casna ranaunara saquichi: piñarina, piñana, manali shungu, Diosta camina, irus shimiuna canguna shimimanda.

3:9b.COL.003.009 Ama llullanuichi cangunapura, canguna rucu causaira ichushca raigumanda pai rashcaunahua.

3:10b.COL.003.010 Astaumbas mushuj causaira churarichi. Caimi mushuj yasha rin, canguna pactajta yachanagama, paita iñachij Cristo tonoi.

3:11b.COL.003.011 Cai mushuj causaibi, illan ima griegos ima judíos, ima circuncisionda ranas mana ranas, ima aucas ima carumanda shamujpas, ima sirvijpas ima liuri runas. Astaumbas, Cristo tucuimi tucuigunais.

3:12b.COL.003.012 Shinajpi, canguna Dios ajllashcauna asha, chuyajguna, llaquishcauna, llullu shungura churarichi, shinallara ali shunguras, manso shunguras, ahuantaísiqui shunguras.

3:13b.COL.003.013 Parijumanda ahuantanuichL Parijumanda perdonanuichi maican runa shujta piñajpi. Imasnara Cristo cangunara perdonashcasna, shinallara perdonanuichi cangunapura.

3:14b.COL.003.014 Cai tucui ahuai, llaquij shungura churarichi, tucui alira pactachingaj.

3:15b.COL.003.015 Diospa cushi mandachu canguna shungu ucui. Chi cushimallara cayashca acanguichi shu aichallai. Shinallara Diosta agrasichi.

3:16b.COL.003.016 Cristo shimi canguna shungüi undajta tiachu. Cangunapura yachachichi, camachichi tucui yachanahua, salmos nishcaunahua, alma cantanaunahua, gracia nishca ali iyaihua Señorda cantasha canguna shungüi.

3:17b.COL.003.017 Imara rashas, rimana ajpi, rana ajpis, tucuira raichi Señor Jesuspa shutü, paimanda Dios Yayara agrasisha.

3:18b.COL.003.018 Huarmiuna, canguna cariunara casuichi, imasnara Señorbi quirijgunahua ali tucun.

3:19b.COL.003.019 Cariuna, canguna huarmiunara llaquichi. Paigunahua ama milli tucuichichu.

3:20b.COL.003.020 Churiuna, canguna yayaunara uyaichi tucuibi. Casna rasha Señorda cushiyachinguichi.

3:21b.COL.003.021 Yayauna, canguna churiunara ama yapajta piñachinguichichu, paigunara ama llaquichingaj.

3:22b.COL.003.022 Sirvijguna, canguna cai pachai aj patrongunara tucuibi uyaichi, mana paiguna ricushcallai tarabasha runaunara cushiyachingaj munajgunasna, astaumbas ali shungumanda, Diosta manzhasha.

3:23b.COL.003.023 Tucui imara rashas, shungumanda raichi, Diospajta cuenta mana runajta.

3:24b.COL.003.024 Caita yachaichi, Señormanda pagai tucunguichimi, herencia nishca Dios cushcahua, canguna Cristo Señorda sirvishcamanda.

3:25b.COL.003.025 Astaumbas, manali raj runa pai manali rashcallarara cuti apingami, Dios runaunara mana chicanyachinzhu.

4

4:1b.COL.004.001 Patronguna, ali tupura raichi canguna tarabaj runaunahua, caita ricsisha, cangunas ahua pachai Patronda charinguichimi.

4:2b.COL.004.002 Ama sambayasha mañaichi, canguna mañashcara chapausha, Diosta agrasishcahua.

4:3b.COL.004.003 Shinallara chi horasllai ñucanchimanda mañaichi, Señor ñucanchima lugarda cuchu Cristo pacashca shimira rimangaj. Caimanda chonda cularbi ishcai tucuni.

4:4b.COL.004.004 Shinallara ñucamanda mañaichi ñuca pajlla pambai rimangaj ñuca ministishcasna.

4:5b.COL.004.005 Yachanahua purichi mana quirijguna ñaupajpi, punzhaunara mana pirdisha.

4:6b.COL.004.006 Canguna rimashca shimiuna ali iyaihua rimashca achu tucui horas, cachihua mishquiyachishca cuenta, canguna caran dueñora imasna cutipana ashcaras yachangaj.

4:7b.COL.004.007 Ñuca tucui rashcaunara Tíquico cangunara cuentangami. Paiga llaquishca uquimi, ali sirvij, ñucahua pariju ali yanapaj Señorda sirvishcai.

4:8b.COL.004.008 Caimanda paita cangunajma cachacaní, canguna imasna ashcaras yachangaj, canguna shungura cariyachingaj.

4:9b.COL.004.009 Paihua pariju Onésimo nishcara cachacaní, paimi llaquishca ali uqui, cangunajmandallara. Tucui caibi ima tucushcaras cangunama rimanaunga.

4:10b.COL.004.010 Aristarco nishcaga, ñucahua pariju chonda cularbi ishcarij, cangunara saluraun. Shinallara Marcos, Bernabehua panimanda churi, cangunara saluraun. Paimanda camachishcara uyacanguichi. Pai cangunajma shamujpi paita chasquichi.

4:11b.COL.004.011 Shinallara Justo nishca Jesús cangunara saluraun. Caigunalla circuncisionda rana montonmanda ñucara yanapanaun Dios mandana pacha shimira rimangaj. Ñucara cushiyachihuanaushcami.

4:12b.COL.004.012 Cangunamanda aj Epafras, Cristora sirvij runa, cangunara saluraun. Tucui horas pai mañashcaunai cangunamanda rugaun, canguna shinzhiuna tucungaj, aliuna, Dios tucui munashcara ali pactachijguna.

4:13b.COL.004.013 Paimanda caita nini: Paimi cangunara ashcara llaquin, shinallara Laodícea, Hierápolis nishca llactaunai tiajgunaras.

4:14b.COL.004.014 Lucas, llaquishca doctor, cangunara saluraun, shinallara Demás nishca.

4:15b.COL.004.015 Laodiceai tiaj uquiunara saluraichi, shinallara Nimias nishcara, paihua huasü tiaj iglesiaras.

4:16b.COL.004.016 Cai quillcara cangunajpi ricushca huasha, ricuchinguichi Laodicea iglesiai. Shinallara Laodiceama cachashca quillcara ricuichi cangunas.

4:17b.COL.004.017 Arquipo nishcara rimaichi: Riqui, nisha, can Señormanda apishca sirvinara pactachi.

4:18b.COL.004.018 Ñuca, Pablo, quiquin maquihua quillcasha cangunara salurauni. Ñuca huatariashcara iyarichi. Gracia nishca ali iyai cangunahua tiachu. Amen.