Ephesians (Quichua)

1

1:1b.EPH.001.001 Pablo, Jesucristo cachashca runa Dios munashcamanda, Efesoi tiaj quirijgunama quillcashca, Cristo Jesuspi ali cierto quirijgunama:

1:2b.EPH.001.002 ñucanchi Yaya Diosmanda, Señor Jesucristomandas, gracia nishca ali iyaira, cushi shunguras charichi.

1:3b.EPH.001.003 Dios, Señor Jesucristo Yaya, alabashca achu. Pai tucui almai bendiciongunahua ñucanchira bendiciashcami Cristoi ahua pacha partiunai.

1:4b.EPH.001.004 Cai pachara manara rashca horasllaira, Dios ñucanchira ajllaca Cristoi, ñucanchi paihua ñaupajpi chuyajlla ima iruspas illaj tucungaj.

1:5b.EPH.001.005 Dios ñucanchira llaquisha, ñaupa horasmanda pacha ñucanchira chicanyachica paihua quiquin churiuna tucungaj Jesucristomanda, pai ali munashcasna,

1:6b.EPH.001.006 paihua sumaj gracia nishca ali iyai alabai tucungaj, pai llaquishca Churu ñucanchira chasquingaj.

1:7b.EPH.001.007 Jesucristoi randishcauna manchi paihua yahuar talishcamanda, ñucanchi ucharashcauna perdonashca ajpi, paihua yapa valij gracia nishca ali iyai tupura.

1:8b.EPH.001.008 Dios cai gracia nishcara yapajta cuhuaca tucui yachanais, tucui intindinais.

1:9b.EPH.001.009 Paihua ñaupa horas pacashca munaira cuna yachachihuashcami, paihua ali munaimanda, pai quiquinllara casna munasha,

1:10b.EPH.001.010 tiempouna pactarijpi tucuira Cristoi tandachingaj, ahua pachai tiajgunandis, cai pachai tiajgunandis.

1:11b.EPH.001.011 Paihuajilai, shinallara, herencia nishca apiñara charicanchi, ñaupa horasmanda pai ajllashcauna ashcaraigu, pai iyarishcasna.

1:12b.EPH.001.012 Dios casna rarca, ñucanchimanda Diospa sumajta alabai tucungaj, ñucanchi ñaupa punda Cristoi chapajguna asha.

1:13b.EPH.001.013 Canguna shinallara Diospa cierto shimira, canguna almara quishpichina evangelio shimira uyajpi, Cristoi quirishca ajpi, Dios cusha nishca Santo Espirituhua shu sellohua cuenta, cangunara paihuaj ajta ricuchishcami.

1:14b.EPH.001.014 Caí Espirítuga ñucanchima ñaupamanda cushcami, ñucanchi huasha bendiciai tucungaraushcara cierto ajta ricuchingaj, Dios ñucanchira randishca pactaringagama, Diospa sumajta alabai tucungaj.

1:15b.EPH.001.015 Chiraigumanda ñucas, canguna Señor Jesuspi quirishcara uyasha, canguna tucui quirijgunara llaquishcaras uyasha,

1:16b.EPH.001.016 ñuca cangunamanda Diosta agrasingaj mana saquinichu, cangunara iyarisha ñuca mañashcaunai.

1:17b.EPH.001.017 Ñuca mañani, ñucanchi Señor Jesucristoj Dios, atun sumaj Yaya, cangunara shu ali intindinara, ali yachana iyairas cuchu, paita ricsinai,

1:18b.EPH.001.018 canguna iyaimanda ñahuiuna punzhayachishca anauchu, canguna yachangaj imara chapaunguichi pai cayashcai, shinallara ima gusto sumaj herencia nishca apiñara Cristo charin quirijgunai.

1:19b.EPH.001.019 Mañauni canguna Diospa atun ushaira yachangaj ñucanchira yanapangaj, imasna paihua shinzhi ushaihua rashcasna.

1:20b.EPH.001.020 Dios cai atun ushaira ricuchica imahoras pai Cristora huañushcaunamanda causachica, paita paihua ali maqui partima tiáchica ahua pachai.

1:21b.EPH.001.021 Chihui, tucui gobierno ahuais, tucui apu, tucui ushana, tucui mandana ahuais, tucui rimashca shuti ahuais ahuayachishca aca cuna horaspis, huasha shamuna horaspis.

1:22b.EPH.001.022 Shinasha, Dios tucuira Cristo chaqui ucui churashcami. Shinallara paita uma cuenta churashcami tucui ahuai, iglesiama.

1:23b.EPH.001.023 Iglesiaga paihua aichami. Cristo tucuira tucuibi undachin shinallara paihua aichai undajta causaun.

2

2:1b.EPH.002.001 Canguna ucharanais manali rashcaunais huañushca horaspi, Dios cangunara causaira cucami.

2:2b.EPH.002.002 Ñaupa horas canguna chi ucha raushcai causacanguichi, cai mundu causashcasna, huairai mandaj supai apu causana tupui. Cai supai cunallara tarabaun mana casuj runauna shungüi.

2:3b.EPH.002.003 Shinallara ñaupa horas tucui ñucanchi caigunahua causacanchi ñucanchi aicha munashcaunai, aicha munairas iyai munairas rasha. Ñucanchi quiquin rashcaunamanda Dios piñarishcai tiaucanchi tucui chishu runauna cuenta.

2:4b.EPH.002.004 Shinasha, Dios yapa llaquij asha, pai ñucanchira ashcara llaquishcamanda,

2:5b.EPH.002.005 ñucanchi chara ucharanai huañushca ajpi, pai ñucanchira causaira cuca Cristohua pariju. Paihua gracia nishca llaquishcamanda quishpichishca anguichi.

2:6b.EPH.002.006 Cristohua pariju pai ñucanchira causachica, shinallara ñucanchira ahuai tiachica Cristo Jesushua pariju,

2:7b.EPH.002.007 huasha tiempounai paihua gracia nishca ashca valishcara ricuchingaj, pai ñucanchira llaquishcamanda Cristo Jesuspi.

2:8b.EPH.002.008 Gracia nishca yanga llaquishcamanda quishpichishca anguichi, canguna quirishcamanda. Caiga mana cangunamandachu, astaumbas Dios cushcami.

2:9b.EPH.002.009 Cai quishpinaga mana ranaunamandachu, pihuas pai quiquinllara ama alabarichu.

2:10b.EPH.002.010 Ñucanchiga Dios rashcauna manchi, Cristo Jesuspi iñachishcauna, alira rangaj. Cai ali ranaunara Dios ñaupamanda alichica ñucanchi caigunara rasha causangaj.

2:11b.EPH.002.011 Chimanda iyarichi imasna ñaupa horas canguna gentilguna ajpi aichai, circuncisionda mana rajguna nishca acanguichi circuncisionda rajgunamanda, paiguna aichai maquihua rajgunamanda.

2:12b.EPH.002.012 Chi horasgunai, Cristo illaj macanguichi, Israel aillumanda chicanyachishca, Dios cushca pactachina shimiuna illaj, ima chapanas illaj, Diospas illaj cai pachai.

2:13b.EPH.002.013 Astaumbas Cristo Jesuspi, canguna ñaupa horas carui tiajguna, cuna horasga mayanllayachishca acanguichi, Cristo yahuar raigumanda.

2:14b.EPH.002.014 Paiga ñucanchi cushimi. Ishqui runa montonmanda, shujllara rarca, chicanyana quinzhara cuenta tulasha.

2:15b.EPH.002.015 Cristo Jesús, paihua aichai chi piñanaunara tucuchicami, ley camachishca shimii rimashcaunandi paihua ranaunandi. Pai quiquimbi ishqui montonmanda shuj mushuj runallara rarca, cushira rasha.

2:16b.EPH.002.016 Cruzpa raigumanda Cristo ishqui runa montonguna Dioshua amigopura rarca shu aichallai, paihua cruzpi piñanaunara huañuchisha.

2:17b.EPH.002.017 Pai shamuca cushi shimira rimangaj canguna carui tiajgunama, chishu mayanllai tiajgunamas.

2:18b.EPH.002.018 Jesucristomanda ñucanchi ishquindi monton shu Espiritumandalla Yaya ñaupajpi icunchi.

2:19b.EPH.002.019 Shinasha cuna canguna mana carumandaunachu anguichi, mana pasiajgunas, astaun quirijgunahua pariju causajguna anguichi, Diospa aillui tiajguna.

2:20b.EPH.002.020 Dios cachashca runauna ahuai, Diosmanda rimajguna ahuais shayachishca acanguichi, rumi istandi siquiga quiquin Jesucristomi.

2:21b.EPH.002.021 Entero huasi Jesuspi ali rashca asha, iñasha rin shu chuyaj templo huasi cuenta tucungaj Señorbi.

2:22b.EPH.002.022 Paihuajpi canguna shinallara pariju shayachishca anguichi shu huasira rangaj, Dios chihui causangaj Espiritui.

3

3:1b.EPH.003.001 Chiraigumanda, ñuca, Pablo, canguna gentilgunamanda chonda cularbi Cristo Jesuspa ishcashca runa mani.

3:2b.EPH.003.002 Canguna uyashcanguichi chari imasna Dios ñucara ajllacami paihua gracia nishca llaquishcara cangunara yachachingaj.

3:3b.EPH.003.003 Pai ricuchishcamanda cai pacashca shimira ñucama rimashca aca, imasna ñaupa ansallara quillcacani.

3:4b.EPH.003.004 Chi quillcara ricusha, ricsinara ushanguichi imasna Cristo pacashca shimira intindiuni.

3:5b.EPH.003.005 Cai pacashca shimi, ñaupa horasgunai runa churiunama mana ricuchishcachu aca, astaumbas cuna horas Espiritumanda chuyaj cachashca runaunama Diosmanda rimajgunamas ricuchishcami,

3:6b.EPH.003.006 imasna gentilguna judiogunahua pariju Dios cushca shimira chasquijgunami, shinallara Cristo aichamanda partiunami, maspas Dios cushca shimira apijgunami Cristo Jesuspi, evangelio shimimanda.

3:7b.EPH.003.007 Cai shimira yachachij tucucani, Diospa gracia nishcara ñucama cushcamanda, paihua ushai rashcasna.

3:8b.EPH.003.008 Ñuca tucui quirijgunamanda pishi ajllaira, cai gracia nishca valijta ñucama cushca aca gentilgunama evangelio shimira rimangaj, Cristoi tiaj mana tupuihuaj valijgunara.

3:9b.EPH.003.009 Shinallara ñucama cushca aca tucui runaunara ricuchingaj imasna Dios pacashca shimi pactarinmaca. Unai tiempounamanda tucuira raj Diospi pacashcami aca.

3:10b.EPH.003.010 Dios casnami rarca, paihua atun yachashcara iglesiamanda cuna yachachingaj ahua pachai tiaj mandajgunamas, ushajgunamas,

3:11b.EPH.003.011 imasna pai huiñaimanda iyashcasna ñucanchi Señor Jesucristoi rangaj.

3:12b.EPH.003.012 Paihuajpi huacachishca manchi, maspas Diospa ñaupajpi icumunara charinchi mana manzhasha, Cristoi quirishca raigumanda.

3:13b.EPH.003.013 Chiraigumanda cangunara rugauni ama llaquiringaj ñuca tormendarinaunamanda cangunaraigu. Randi, caiguna canguna ahuayachinami.

3:14b.EPH.003.014 Caimandami Señor Jesucristo Yaya ñaupajpi cungurini.

3:15b.EPH.003.015 Paimanda tucui aillu ahua pachais cai pachais shutichishcami.

3:16b.EPH.003.016 Diosta mañauni imasna pai ali sumacyachishcasna, paihua ushanahua cangunara shmzhiyachingaj canguna shungu ucui, paihua Espiritumanda.

3:17b.EPH.003.017 Shinallara mañauni Cristo canguna shungu ucui causachu canguna quirishcamanda, canguna ali shinzhi shayachishca asha llaquishcai,

3:18b.EPH.003.018 tucui quirijgunahua ali intindingaj imasna Cristo llaquishca anzhu ashcara, suni ashcaras, ucu ashcaras, ahua ashcaras,

3:19b.EPH.003.019 maspas Cristo llaquishcara yachangaj, tucui yachanaras pasajta, shinallara canguna shungu quiquin Dioshua tali tali undajta angaj.

3:20b.EPH.003.020 Dios ushajmi tucuira ñucanchi mañashcamanda intindishcamandas yalijta rangaj, imasna ñucanchi ucui paihua ushai taraban.

3:21b.EPH.003.021 Paiga sumacyachishca achu iglesiai Cristo Jesuspi tucui tiempounai huiñai huiñaigama. Amen.

4

4:1b.EPH.004.001 Ñucaga, Señorda sirvishcamanda chonda cularbi ishcashca runa, cangunara rugauni canguna cayashcasna alira puringaj.

4:2b.EPH.004.002 Manso shunguhua, ali shunguhuas, ali chapanahuas, parijumanda ahuantanuichi llaquishcahua.

4:3b.EPH.004.003 Ali ricuichi shujlla tucungaj Espiritui, cushi shunguhua parijupura asha.

4:4b.EPH.004.004 Shu aicha tian, shu Espíritu, imasna shu chapanallahua cayai tucucanguichi.

4:5b.EPH.004.005 Shu Señor tian, shu quirina, shu bautisana.

4:6b.EPH.004.006 Shu Dios tian, tucuihua Yaya. Paiga tucui ahuai tucuihuajtas, tucuibis.

4:7b.EPH.004.007 Shinashas caran dueño ñucanchima gracia nishcara cushca aca, imasna Cristo cushcasna.

4:8b.EPH.004.008 Chiraigumanda rimashca tian: Ahuama sicasha, ishcashca runaunara paihua pariju pushaca; runaunama cushcaunara cucami.

4:9b.EPH.004.009 Cai sicashca nishcaga, ¿manzhu nin pai caí pacha ucumanda mas huashama ñaupa irguca?

4:10b.EPH.004.010 Cai irgujga shinallarami ahuama sicaca tucui ahua pachauna ahuai, tucuira undachingaj.

4:11b.EPH.004.011 Paillara cuca: Huaquingunara apóstoles nishca Dios cachashca runauna tucungaj, shujgunara Diosmanda rimajguna, shujgunara evangelio ali shimira rimajguna, shujgunaraga ricujgunas yachachijgunas,

4:12b.EPH.004.012 quirijgunara alichingaj Diosta sirvinauchu, shinallara Cristo cuerpo nishca aichara shinzhiyachingaj;

4:13b.EPH.004.013 tucui ñucanchi shujllai pactanagama, quirinais, Diospa Churira ricsinais, caran dueño ali shunguyuj runa pactanagama, pactajta runa tucungaj, Cristohua undachishca;

4:14b.EPH.004.014 ñucanchi ama istu istu purij huahuaunasna angaj, ama manali yachachina huaira cuenta pai munashcama apai tucungaj, ama umachij runauna umachishcahua pandarina shimihuas umachi tucungaj.

4:15b.EPH.004.015 Astaumbas, cierto shimira llaquinahua catisha, tucuibi Cristoi iñashunchi, paimi ñucanchi uma.

4:16b.EPH.004.016 Paimanda, entero aicha ali tandachishca, ali pigarishca asha, tucui paihua mucuuna parijumanda yanapanaun, caran parti paihua tonoi rasha, iñasha ringaj llaquinai.

4:17b.EPH.004.017 Shinajpi caitami nini, Señorbi rimauni shinallara munani, canguna cunallara ama purínguichi shu gentilguna cuenta, paiguna manali iyashcaunai.

4:18b.EPH.004.018 Paiguna intindinai llanduyashca anaun, Diospa causanamanda anzhurishca, paiguna yachai illaj ashcamanda, paiguna shungu shinzhiyashcamanda.

4:19b.EPH.004.019 Paigunara sintina illajguna asha, pingai illajlla causangaj entreganauca, ima irus ranaras munaihua rangaj.

4:20b.EPH.004.020 Astaumbas canguna caí samira rangaj mana yachacanguichichu Cristomanda,

4:21b.EPH.004.021 ciertora pacha paita uyashca asha, paimanda yachachishca asha, imasna cierto shimi Jesuspi tian.

4:22b.EPH.004.022 Rucu runa ñaupa causana samira saquichi, umachina munashcaunahua huajlichishcami.

4:23b.EPH.004.023 Shinallara mushujyachishca aichi canguna alma iyaibi.

4:24b.EPH.004.024 Dios samiilai rashca mushuj runara churachichi ali shunguhua, ciertora rimaj chuyaj shunguhuas.

4:25b.EPH.004.025 Chi raigumanda, llulla shimira saquisha, caran dueño paihua mayambi causajhua cierto shimira rimachu. Parijumanda shu aichamanda partiuna manchi.

4:26b.EPH.004.026 Canguna piñarishca horas uchara ama raichichu. Canguna piñaríshcara alichichi indi manara icujllaira.

4:27b.EPH.004.027 Supai apura lugarda ama cuichichu cangunara tentangaj.

4:28b.EPH.004.028 Ñaupa horas shuhuajga ama mas shuhuachu, astaumbas alira tarabasha, paihua quiquin maquihua tarabachu, chimanda charingaj ministijgunama cungaj.

4:29b.EPH.004.029 Canguna shimimanda ama ima manali shimis llucshichu astaumbas ali yanapana shimiuna, uyajgunara cariyachingaj.

4:30b.EPH.004.030 Diospa Santo Espiritura ama llaquichichichu. Paimanda canguna Diospaj ajta ricuchishca acanguichi randina punzhagama.

4:31b.EPH.004.031 Cangunamanda tucui ayaj iyaira, piñarinara, piñanara, caparinaunara, milli shimiunara anzhuchichi, shinallara tucui manaliras.

4:32b.EPH.004.032 Randi cangunapura, parijumanda ali shungupura tucuichi, llaquisiquiuna, parijumanda perdonanausha, imasna Dios cangunara perdonaca Cristoi.

5

5:1b.EPH.005.001 Diosta catirijguna aichi, llaquishca huahuaunasna.

5:2b.EPH.005.002 Llaquinai purichi, imasna Cristo ñucanchira llaquica, shinallara ñucanchimanda pai quiquinllara entregaca, cuyashca cuenta, Diospa ñaupajpi shu gusto asnaj sacrificiora cuenta.

5:3b.EPH.005.003 Randiga, shujhua tacarina, tucui irusta rana, cullquira yapajta llaquina, ama rimashcallas uyarichu cangunapura, canguna chuyaj shunguuna asha.

5:4b.EPH.005.004 Shinallara ima irus shimis, ima upa cuenta rimanas, ima yanga burlanas mana rimaihuajchu. Mana valinaun. Astaumbas Diosta agrasisha rimaichi.

5:5b.EPH.005.005 Caita cierto pacha yachaichi: Mana ima shujhua tacarij runa, mana ima irus shungu runa, mana ima cullquira yapajta llaquij runa (caimi runa rashca diosta alabana cuenta) imaras charingachu Cristohua Dios mandana pachai.

5:6b.EPH.005.006 Pihuas cangunara ama umachichu, yanga shimira rimasha. Cai quiquin ucharashcaunamanda Dios mana casujgunahua piñarin.

5:7b.EPH.005.007 Casna rajgunahua ama llutarichichu.

5:8b.EPH.005.008 Ñaupa horas llandui tiaucanguichi, astaun cunaga punzhai tiaunguichimi Señorbi. Punzhamanda churiunasna purichi.

5:9b.EPH.005.009 Punzhai purishcamanda aparishcauna caigunami: llaquij shungu, ali shungu, ciertora rimaj shungu.

5:10b.EPH.005.010 Imaras Dios munashcara yachangaj mascaichi.

5:11b.EPH.005.011 Ucha llandui mana valij rashcaunara ama raichichu. Astaumbas casna rajgunara piñaichi.

5:12b.EPH.005.012 Paiguna pacallai rashcaunara pinganaitami rimangaj.

5:13b.EPH.005.013 Tucui rashcauna punzhai churashca ricurinaun. Punzha tucuira ricuchin.

5:14b.EPH.005.014 Chiraigumanda rimashca tian: Llicchari, puñuj runa. Huañushcaunamanda atari. Cristo canda punzhayachingami.

5:15b.EPH.005.015 Shinasha, ricuichi imasna purishcaras, ricushallara puringaj, ama upauna cuenta astaun iyaiyuj cuenta,

5:16b.EPH.005.016 tiempora mana pirdisha, punzhauna manali ashcamanda.

5:17b.EPH.005.017 Chimanda ama upa cuenta tucuichichu, astaumbas imaras Dios munashcaras intindinguichi.

5:18b.EPH.005.018 Vinohua ama machaichichu, paihuajpi nusparína tian; astaun Espirituhua undashca aichi,

5:19b.EPH.005.019 cangunapura rimanausha salmos nishca cantanaunahua, alma cantanaunahua shungumanda cantasha, Diosta alabasha canguna shungüi.

5:20b.EPH.005.020 Tucui horas Yaya Diosta agrasichi tucuimanda, ñucanchi Señor Jesucristo shutii.

5:21b.EPH.005.021 Parijumanda casuichi, Diosta manzhashcai.

5:22b.EPH.005.022 Huarmiuna paiguna quiquin cariunara uyanauchu, Señorda uyashca cuenta.

5:23b.EPH.005.023 Cariga paihua huarmi umami, imasna Cristo iglesia umami; iglesia paihua aichami, Cristoga iglesiara Quishpichijmi.

5:24b.EPH.005.024 Imasna iglesia Cristora uyan, shinallara huarmiuna tucuibi paiguna cariunara uyanauchu.

5:25b.EPH.005.025 Cariuna, canguna huarmiunara llaquichi, imasna Cristo iglesiara llaquica, iglesia randimanda paulara cuca,

5:26b.EPH.005.026 iglesiara chuyayachingaj, pai Quillcashca Shimihua paita maillaca, chuya yacuhua maillashca cuenta,

5:27b.EPH.005.027 iglesiara sumajlla pai quiquinmallara cungaj, ima iruspas illaj, ima sipus illaj, ima manali illajpas, chuya achu, ima tinirishcas illaj.

5:28b.EPH.005.028 Shinallara cariuna paiguna huarmiunara llaquinami, paiguna quiquin aicharasna. Maican runa paihua huarmira llaquisha, pai quiquinllarara llaquinmi.

5:29b.EPH.005.029 Mana imahoraspas pi runas paihua quiquin aichara chijnicachu, astaumbas carán, cuiran, imasna Cristo iglesiara cuiranmi.

5:30b.EPH.005.030 Ñucanchi paihua aichamanda partiuna manchi, paihua aichamanda, paihua tulluunamandas.

5:31b.EPH.005.031 Caimanda, shu runa paihua yayaras paihua mamaras saquinga, paihua huarmihua llutaringami. Paiguna ishqui shu aichalla tucunaungami.

5:32b.EPH.005.032 Cai pacashca shimi valijmi. Caita rimauni Cristoras iglesiaras iyasha.

5:33b.EPH.005.033 Maspas, cangunamanda caran dueño paihua quiquin huarmira llaquichu, pai quiquinllara llaquishcasna. Huarmiga paihua carira uyachu.

6

6:1b.EPH.006.001 Huahuauna, yayaunara uyaichi, Señorda llaquij huahuaunasna. Caimi ali.

6:2b.EPH.006.002 Yayaras mamaras llaquina mangui. Caimi ñaupa camachishca shimi shu cusha nishca shimihua rimashca, casna nisha:

6:3b.EPH.006.003 Can caita rasha ali tucungui, unaira causaunguimi cai pachai.

6:4b.EPH.006.004 Yayauna, canguna huahuaunara ama piñachichichu, astaumbas paigunara ali iñachichi cangunara casungaj, Señorba shimira yachachisha.

6:5b.EPH.006.005 Sirvijguna, canguna cai pachai tiaj patrongunara uyaichi, manzhashcahua, ali shunguhua, Cristora sirvina cuenta,

6:6b.EPH.006.006 mana ricushcallai tarabasha, runaunara cushiyachingaj munajgunasna, astaun Cristora sirvijguna cuenta, shungumanda Diospa munaira rasha;

6:7b.EPH.006.007 ali munaihua sirvisha, Señorda sirvina cuenta, mana runaunara,

6:8b.EPH.006.008 caita yachasha, runa ima alira rashas caillara cuti chasquinga Diosmanda, sirvij ashas, liuri ashas.

6:9b.EPH.006.009 Canguna, patronguna, shinallara raichi paigunahua, piñanara saquisha. Caita ricsichi, paiguna Señor canguna Señorbas ahua pachai tian. Paiga sirvijgunamanda patrongunamanda mana chicanyachinzhu.

6:10b.EPH.006.010 Cuna, ñuca uquiuna, Señorbi shinzhiyaichi, paihua ushana ursahua.

6:11b.EPH.006.011 Tucui Diospa iru churanaunara cuenta churarichi, canguna shinzhi tucungaj, supai apumanda tucui alma apiña tictitara vencingaj

6:12b.EPH.006.012 Ñucanchi macanaunaga mana aichahuachu mana yahuarhuachu, astaumbas atungunahua, shinzhiunahuas, llandu tuta mundu apuunahuas, ahua huairai tiau milli supaigunahuas.

6:13b.EPH.006.013 Chiraigumanda Diospa iru churana cuenta enterora apichi, manali punzhai canguna shayarinara ushangaj, tucui chigunara vencishca huasha canguna shinzhira shayaringaj.

6:14b.EPH.006.014 Shinasha shinzhira shayarichi, cierto shimihua chumbillishca, ali causanahua churarishca, pichura quillpana palahua cuenta.

6:15b.EPH.006.015 Canguna chaquii, zapatos cuenta, evangelio cushi shimira churarichi.

6:16b.EPH.006.016 Maspas, Diosta quirina, lorerara cuenta apaichi, manali supai shitashca tucui nina balistaunara cuenta arcangaj.

6:17b.EPH.006.017 Shinallara, alma quishpichina, iru gorrara cuenta apaichi, shinallara Espíritu espararas, caimi Diospa shimi.

6:18b.EPH.006.018 Tucui horas mañaichi tucui mañanahuas tucui ruganahuas Espiritui, canguna mañashcara chapausha mana sambayasha, tucui quirijgunamanda rugasha.

6:19b.EPH.006.019 Shinallara ñucamandas mañaichi, ñuca shimira pascanai, rimanara ñucama cui tucungaj evangelio pacashca shimira manzhai illaj yachachingaj.

6:20b.EPH.006.020 Ñuca Dios cachashca rimaj ani; cadena huascahua huatashca ani evangelio shimimanda. Mañaichi ñucamanda, ñuca mana manzhasha, imasna rimana ashcaras Cristomanda rimangaj.

6:21b.EPH.006.021 Canguna ñucamanda yachangaj, ñuca rashcaunaras, llaquishca uqui Tíquico, tucuira cangunara cuentanga. Pai Diosta ali sirvijmi.

6:22b.EPH.006.022 Paita cangunama cachashcani, canguna imasna ñucanchihua tucushcara yachangaj, pai canguna shungura cariyachingaj.

6:23b.EPH.006.023 Uquiuna cushi shungura charinauchu, quirij shungura, llaquij shunguras, Dios Yayamanda, Señor Jesucristomandas.

6:24b.EPH.006.024 Tucui cierto shungumanda Señor Jesucristora llaquijguna gracia nishca ali iyaira charinauchu. Amen.