John (Quichua)

1

1:1b.JOH.001.001 Callari tiempoi Rimashca Shimi nishca tiaj aca. Cai Rimashca Shimi Dioshua pariju tiaj aca. Cai Rimashca Shimi Dios aca.

1:2b.JOH.001.002 Callari tiempoi Dioshua pariju tiaj aca.

1:3b.JOH.001.003 Tucui rashcauna pai rashcami aca. Pai illaj mana imas rashcachu aca.

1:4b.JOH.001.004 Paihuajpi causai tiaca. Cai causaiga runaunara punzhayachina aca.

1:5b.JOH.001.005 Cai punzhayachina llandu tutara punzhayachin, astaun llanduga punzhayachinara mana llanducachu.

1:6b.JOH.001.006 Shu Dios cachamushca runa, Juan nishca, tiauca.

1:7b.JOH.001.007 Cai Juanga shamuca cai punzhayachinara ricsichingaj, pai rimashcamanda tucui runauna quirinauchu.

1:8b.JOH.001.008 Juan mana cai punzhayachinachu aca, astaun cai punzhayachinara ricsichingaj shamucami.

1:9b.JOH.001.009 Chi cierto punzhayachina, tucui runaunara punzhayachij, cai pachama shamuuca.

1:10b.JOH.001.010 Paiga cai pachai tiaca. Cai pacha pai rashcami aca. Astaun cai pacha paita mana ricsicachu.

1:11b.JOH.001.011 Paihuajma shamuca, randi paihuajguna mana paita chasquinaucachu.

1:12b.JOH.001.012 Astaumbas tucui paita chasquijgunara ushaira cuca Diospa churiuna tucungaj, maicans paihua shutii quirisha.

1:13b.JOH.001.013 Caiguna mana yahuarmanda, mana runa aichamandas, mana runa munaimandas iñachishca anaun. Astaun Diospa munaimandalla iñachishca anaunmi.

1:14b.JOH.001.014 Cai Rimashca Shimiga runa tucuca, ñucanchihua pariju causaca. Paihua sumajta ricucanchi, Yaya Diospa sapalla churi sumaj cuenta. Paiga gracia nishca ali iyaihua undashca aca; ima llullanas iliaca paihua.

1:15b.JOH.001.015 Juan paimanda rimasha, caparisha nica: Caimi ñuca rimaushca runa, ñuca huashai shamuj ñucamanda yalimi, nisha, pai ñucamanda ñaupa ashcaraigu.

1:16b.JOH.001.016 Pai ashcara charishcamanda tucui ñucanchi apishcanchi, maspas paihua mana tucurihuaj gracia nishca ali iyairas.

1:17b.JOH.001.017 Ley camachishca shimi Moisesmanda rimashca aca, randi gracia nishca ali iyai cierto shimis Jesucristomanda shamunauca.

1:18b.JOH.001.018 Pihuas imahoras Diosta mana ricushcachu. Paihua sapalla Churilla, Yayahua pariju tiaj, pailla Diosta ricsichicami.

1:19b.JOH.001.019 Caitaga Juan rimashcami, imahoras judioguna Jerusalén llactamanda sacerdoteunara Levitas nishcaunandi cachanauca paita tapungaj: ¿Pitanguiri can? nisha.

1:20b.JOH.001.020 Paiga rimaca, mana umachicachu, astaun ciertora rimaca: Ñucaga mana Cristochu ani, nisha.

1:21b.JOH.001.021 Paitaga tapunauca: Shinajpiga, ¿Imarai? ¿Elíaschu angui? nisha. Paiga: Mana, nica. ¿Diosmanda rimajehu angui? ninauca. Paiga cutipaca: Mana.

1:22b.JOH.001.022 Paita ninauca: Shinasha ¿pitanguiri? Cuentahuai, ñucanchira cachamujgunara cutipangaj. ¿Imara ningui can quiquinmanda?

1:23b.JOH.001.023 Juan nica: Ñuca runa illashca partimanda caparij shimi ani: Señorba nambira diríchuyachichi, nisha, Diosmanda rimaj Isaías rimashcasna.

1:24b.JOH.001.024 Cai cachamushca runauna íariseogunamanda anauca.

1:25b.JOH.001.025 Shinajpi Juanda tapunauca: ¿Imarasha bautisangui, nisha, can mana Cristo asha, mana Elíaspas, mana Diosmanda rimaj ashas?

1:26b.JOH.001.026 Juan paigunara cutipasha nica: Ñucaga yacui bautisani; randi, canguna chaupi shungüi shu canguna mana ricsishca runa tiaun.

1:27b.JOH.001.027 Caimi ñuca huashai shamuj. Paiga ñucamanda yalimi. Paihua zapatos huascara pascanallas mana valijchu ani.

1:28b.JOH.001.028 Caiguna Betabara nishca llactai tucuca, Jordan yacu chimbara, Juan bautisaushcai.

1:29b.JOH.001.029 Cayandi punzha Juan Jesusta paihuajma shamuuta ricuca. Pai Jesusta ricusha: Caiga, nica, Diospa Borrego, cai pacha uchara llushpichij.

1:30b.JOH.001.030 Caimi ñuca rimaushca runa: Ñuca huashai shamuj, paiga ñucamanda yalimi, pai ñucamanda ñaupa ashcaraigu, nisha.

1:31b.JOH.001.031 Paita mana ricsicanichu; astaun Israelma paita ricsichingaj, ñuca yacui bautisasha shamucani.

1:32b.JOH.001.032 Shinallara Juan nica: Espiritura urpisna ahua pachamanda irgumujta ricucani; paihua ahuai tiauca.

1:33b.JOH.001.033 Ñucaga paita mana ricsicanichu; randi, ñucara yacui bautisangaj cachamuj, paiga ñucara nihuaca: Maicamba ahuai Espíritu urmashcara ricungui, paiga Santo Espirituhua bautisajmi.

1:34b.JOH.001.034 Paita ricucani. Ciertora rimashcani: Caimi Diospa Churi, nisha.

1:35b.JOH.001.035 Cayandi punzha, Juan cuti chihui tiauca, ishqui pai yachachishca runaunandi.

1:36b.JOH.001.036 Juan Jesusta chihui puriuta ricuusha: Caiga Diospa Borregomi, nica.

1:37b.JOH.001.037 Chi ishqui yachachishca runauna pai rimashcara uyanauca; Jesusta catinauca.

1:38b.JOH.001.038 Jesús voltiarisha, paita catijgunara ricuca. ¿Imara mascanguichi? nica. Paiguna cutipasha ninauca: Rabí, (caita runa shimii, Yachachij nin) ¿maibira causaungui?

1:39b.JOH.001.039 Jesús: Ricuj shamichi, nica. Paiguna rishaga, pai tiaushcara ricunauca. Las cuatro mayan tucujpi paihua pariju saquirinauca chi punzhai.

1:40b.JOH.001.040 Cai ishqui Juan rimashcara uyajguna, Jesusta catimujguna, cai ishquimanda shuj Andrés maca, Simón Pedro uqui.

1:41b.JOH.001.041 Paiga paihua uqui Simonda ñaupa punda tupasha, paita nica: Mesías nishcara tupashcanchi; caita runa shimii Cristo nin.

1:42b.JOH.001.042 Andrés paihua uqui Simonda Jesusma pushamuca. Jesús paita ricusha: Can Simón angui, Jonaspa churi, nica, canda Cefas shutichishca angui; caita Pedro nin.

1:43b.JOH.001.043 Cayandi punzha Jesús Galilea partima risha nica. Paiga Felipera tupasha, paita nica: Ñucahua catihaui.

1:44b.JOH.001.044 Felipe Betsaida llactamanda runa aca. Shinallara chi llacta Andrés Pedros causaushca llacta aca.

1:45b.JOH.001.045 Felipe Natanaelda tupaca; paita nica: Moisés pai camachishca shimii quillcaushca runara tupashcanchi. Diosmanda rimajguna shinallara paimanda quillcanauca. Paimi Nazaretmanda Jesús, José churi.

1:46b.JOH.001.046 Natanael nica: ¿Nazaretmanda ima alira shamunara ushangachui? Felipe cutipaca: Ricuj shami, nisha.

1:47b.JOH.001.047 Jesús Natanael paima shamushcara ricusha, Natanaelmanda rimasha nica: Cai runa cierto Israel runami, pai mana umachijchu.

1:48b.JOH.001.048 Natanael paita nica: ¿Maimanda ricsihuanguichu ñucara? Jesús cutipasha: Felipe canda manara cayajllaira, can higo yura ucui shayaushcai, canda ricucani, nica.

1:49b.JOH.001.049 Natanael cutipasha rimaca: Rabí, Yachachij, nisha, can Diospa Churi angui, can Israel Rey apu mangui.

1:50b.JOH.001.050 Cutipasha, Jesús paita nica: ¿Ñuca canda higo yura ucui ricucani nishcamanda quiriungui? Caigunamanda yahunara ricunguimi.

1:51b.JOH.001.051 Jesús nica: Cierto pacha cangunara nini: Caimanda huasha ahua pacha pascashcara ricunguichi; Diospa angelguna Runa Churi ahuai sicasha irgusha rajgunara ricunguichimi.

2

2:1b.JOH.002.001 Quinsa punzha tucunahua, borara ranauca Caná llactai. Caná Galilea partii tiaca. Jesuspa mama chi borai tiauca.

2:2b.JOH.002.002 Jesús pai yachachishca runaunandi borama convirashca anauca.

2:3b.JOH.002.003 Borai, vino pishijpi, Jesuspa mama paita nica: Vino illan.

2:4b.JOH.002.004 Jesús paita nica: ¿Huarmi, imarasha casna rimahuangui? Ñuca horas chara mana pactamunzhu.

2:5b.JOH.002.005 Paihua mama sirvijgunama nica: Tucui pai ima rimashcaras ranguichi.

2:6b.JOH.002.006 Chihui socta atun rumi quisauna tianauca, judioguna armana yachai tono, caran quisa quinsa manga tupu aca.

2:7b.JOH.002.007 Jesús paigunara nica: Quisaunara undachichi yacuhua. Shinajpi undajta undachinauca.

2:8b.JOH.002.008 Shinajpi paigunara nica: Llucchichi cuna; borayuj dueñoma apaichi. Apanaucami.

2:9b.JOH.002.009 Cai yacumanda rashca vinora camashca huasha, borayuj dueño maimanda apamushcara mana yachasha, randi yacura llucchij sirvijguna yachanaucami, pai carira cayaca.

2:10b.JOH.002.010 Carira nica: Tucui runa ñaupa punda ali vinora upichin; pactajta upishca huasha yanga vinora cun; randi can ali vinora cunagama huacachishcangui.

2:11b.JOH.002.011 Cai ñaupa punda munanaita ricurinara Jesús Galileai tiaj Caná llactai rarcami, paihua sumajta ricuchisha. Pai yachachishca runauna paihuajpi quirinauca.

2:12b.JOH.002.012 Caimanda huasha Capernaum nishca llactama irgunauca, paihua pariju paihua mama, paihua uquiuna, pai yachachishca runaunandi. Mana ashca punzhauna chihui tianaucachu.

2:13b.JOH.002.013 Judioguna Pascua ista mayanllayauca. Jesús Jerusalenma sicaca.

2:14b.JOH.002.014 Templo huasii huagrara borregora urpira catujgunara tupaca; shinallara cullquira turcajguna chihui tiajtas tupaca.

2:15b.JOH.002.015 Jesusga huascaunara ahuasha azutinara rarcami. Tucui chigunara templomanda ichuca, borregounandi, huagraunandi. Shinallara turcajguna cullquira allpama talica, paiguna mesaunaras voltiachica.

2:16b.JOH.002.016 Urpira catujgunara nica: Llucchichi cai tucuira. Ñuca Yaya huasira ama catuna huasira raichichu.

2:17b.JOH.002.017 Shinajpi pai yachachishca runauna ñaupa horas quillcashcara iyarinauca, imasna nin: Camba huasira llaquina tucuchihuanmi.

2:18b.JOH.002.018 Judiogunaga paita cutipanauca, nisha: ¿Ima munanaita ricurinara ricuchihuanguichu cai tucuira rashcamanda?

2:19b.JOH.002.019 Jesús cutipasha nica: Cai templora tulaichi, ñucaga quinsa punzhai cuti shayachishami.

2:20b.JOH.002.020 Judioguna caita uyasha ninauca: Chuscu chunga socta huatara tarabasha cai templora shayachishca aca, canga ¿quinsa punzhallaichu shayachingui?

2:21b.JOH.002.021 Jesusga, templo nisha, paihua quiquin aichamanda rimaca.

2:22b.JOH.002.022 Shinasha, pai huañushcaunamanda causarimushcai, pai yachachishca runauna cai rimashcara iyarinauca. Dios quillcashcara quirinaucami, shinallara Jesús rimashca shimira quirinauca.

2:23b.JOH.002.023 Jesús Jerusalembi tiausha, Pascua ista punzhaunai, ashca runauna Jesuspa shutii quirinauca, pai munanaita ricurinaunara ricusha.

2:24b.JOH.002.024 Jesusga paillara paiguna maquii saquinara mana munacachu, tucui runaunara ricsij asha.

2:25b.JOH.002.025 Runaunamanda pihuas rimanara mana ministicachu. Paiga tucui runa shungüi charishcara yachaca.

3

3:1b.JOH.003.001 Shu Nicodemo nishca fariseo runa tiaca; judioguna atun apu maca.

3:2b.JOH.003.002 Nicodemo Jesusma tuta shamuca: Rabí, Yachachij, nica, can Diosmanda shamushca yachachij ajta ricsinchi. Manapihuas can rashcasna munanaita ricurinaunara rangaj ushanma Dios mana paihua tiajpi.

3:3b.JOH.003.003 Jesús cutipasha paita nica: Cierto pacha canda nini: Maicambas mana cuti pagarisha, Dios mandana pachara ricunara mana ushangachu.

3:4b.JOH.003.004 Nicodemo nica: Runaga ¿imasna rasha cuti pagaringachu rucu asha? ¿Paiga mama icsai cuti icunara ushangachu pagaringaj?

3:5b.JOH.003.005 Jesús cutipaca: Cierto pacha canda nini, maicans yacumandas Espiritumandas mana pagarisha, Dios mandana pachai icunara mana ushangachu.

3:6b.JOH.003.006 Aichamanda pagarij aichami; Espiritumandas pagarij espiritumi.

3:7b.JOH.003.007 Ama manzharichu ñuca canda nisha: Cutillara pagarina anguichi.

3:8b.JOH.003.008 Huaira maimandas huairamun, pai tulupushcara uyarin. Astaun huaira maimandas shamun, maimas rin, can mana yachanguichu. Shinallarami tucui Espiritumanda pagarishcauna.

3:9b.JOH.003.009 Nicodemo paita cutipasha: ¿Imasna rasha casna tucungai? nica.

3:10b.JOH.003.010 Jesús paita nica: ¿Can Israel Yachachij Apu ashallarachu, caita mana yachangui?

3:11b.JOH.003.011 Cierto pacha, canda nini, ñucanchi yachashcara rimanchi, ñucanchi ricushcaras ricuchinchi; cangunaga ñucanchi rimashcaunara mana chasquinguichi.

3:12b.JOH.003.012 Canguna ñuca cai pachamanda cuentashcaunara mana quirisha, ¿imasna rashara ñuca ahua pachamanda cuentashcaunara quiringuichi?

3:13b.JOH.003.013 Pihuas ahua pachama mana sicacachu, astaun ahua pachamanda irgumujlla; pai ahua pachai tiaj Runa Churimi.

3:14b.JOH.003.014 Imasna Moisés chaquishca allpa partii machacuira atarichica caspi ahuai, shinallara Runa Churi atarichishca anga,

3:15b.JOH.003.015 tucui maicambas paihuajpi quirisha ama chingarichu, astaumbas huiñai causaira charichu.

3:16b.JOH.003.016 Casnami Dios cai pachara llaquica, paihua sapalla Churira cuca, maicans paihuajpi quirisha ama chingarichu, astaumbas huiñai causaira charichu.

3:17b.JOH.003.017 Diosga paihua Churira mana cachamucachu cai pachara causayachingaj, astaun paimanda cai pachara quishpichingaj.

3:18b.JOH.003.018 Maicans paihuajpi quirijga mana causayachishcachu, astaun maicans mana quirijta ña causayachishcami, Diospa sapalla Churi shutii mana quirishcamanda.

3:19b.JOH.003.019 Caimi causayana: Punzha cai pachama shamuca, runaunaga punzhamanda yali tutara llaquinauca, paiguna rashcauna manali ashcamanda.

3:20b.JOH.003.020 Tucui manalira rajguna punzhara chijninaun, punzhama mana shamunaun, paiguna rashcaunai ama piñai tucungaj.

3:21b.JOH.003.021 Alira rajga punzhama shamun pai rashcauna Dios rashcaunami ricuchingaj.

3:22b.JOH.003.022 Chi huasha, Jesús pai yachachishca runaunandi Judeá partima shamuca. Paigunahua chihui tiaushcai bautisacami.

3:23b.JOH.003.023 Juan shinallara Enon llactai bautisauca, Salim llacta mayambi, ashca yacu chihui tiashcamanda. Shamujguna bautisashca anauca.

3:24b.JOH.003.024 Juan chonda cularbi chara mana ishcashcachu aca.

3:25b.JOH.003.025 Juan yachachishca runauna judiogunahua rimananauca paiguna aichara maillana yachaimanda rimasha.

3:26b.JOH.003.026 Juanma shamunauca: Rabí, Yachachij, nisha, Jordan chimbai canhua tiaushca runa, can rimaushca, shinallara bautisaunmi; tucui paihuajma shamunaun.

3:27b.JOH.003.027 Juan cutipaca: Runa mana imaras apiñara ushanzhu mana paima cushca ajpi ahua pachamanda.

3:28b.JOH.003.028 Cangunallara ñuca rimashcara uyajguna anguichi, ñuca rimashcasna: Ñucaga mana Cristochu ani, astaun paimanda ñaupa cachamushca ani, nisha.

3:29b.JOH.003.029 Huarmira charijga carimi; randi cari amigo, paihua pariju shayarij, paihua shimira uyasha, ashcara cushiyan cari shimira uyashcamanda. Shinami ñuca cushi pactarin.

3:30b.JOH.003.030 Pai yaparinara mimstirin, ñucaga pishiyanara.

3:31b.JOH.003.031 Ahuamanda shamuj tucuimanda yalimi. Cai pachamanda ajga cai pachamandallami, cai pachamanda shimiunaras riman. Ahua pachamanda shamuj tucuimanda yalimi.

3:32b.JOH.003.032 Imara ricushas uyashas, caillara riman. Mana pihuasga pai rimashcara chasquinzhu.

3:33b.JOH.003.033 Maicans pai rimashcara chasquisha, paiga Dios cierto rimaj ashcara ricuchin.

3:34b.JOH.003.034 Dios cachamushca Runa Dios rimashca shimiunara riman. Dios mana tupusha Espiritura cunzhu.

3:35b.JOH.003.035 Yaya Churira llaquin; tucuira paihua maquii entregashcami.

3:36b.JOH.003.036 Maicans Churu quirisha huiñai causaira charin. Maicans Churira mana casusha, causaira mana ricungachu, randi Dios piñarishca paihua ahuai tianmi.

4

4:1b.JOH.004.001 Fariseoguna Jesús Juanmanda yali runaunara yachachiun bautisaun nishcara uyanauca.

4:2b.JOH.004.002 Randi Jesús mana bautisacachu, astaun pai yachachishca runauna bautisajguna anauca.

4:3b.JOH.004.003 Jesusga fariseoguna cai shimira uyashcara yachasha, Judea partimanda llucshisha, cutillara Galilea partima rica.

4:4b.JOH.004.004 Ministiricami Samaría partira pasangaj.

4:5b.JOH.004.005 Shinajpi Jesús shu Samaría partii tiaj Sicar nishca llactama pactamuca. Cai llacta Jacob paihua churi Josema cushca allpa mayambi tiauca.

4:6b.JOH.004.006 Jacobpa yacu bujyu chihui tiaca. Shinajpi Jesús nambira purisha, sambayashca asha, yacu bujyu rayai tiarica. Doce horas tupu aca.

4:7b.JOH.004.007 Shu Samariamanda huarmi yacura apingaj shamuca. Jesús paita nica: Yacura upichihuai.

4:8b.JOH.004.008 Yachachishca runauna micunara randingaj llactama rinaushca aca.

4:9b.JOH.004.009 Samariamanda huarmi Jesusta nica: ¿Imarasha can judio runa asha ñucara upina yacura mañangui, ñuca Samaría huarmi asha? Judioguna Samaría runaunahua mana llutarinaun.

4:10b.JOH.004.010 Jesús cutipaca: Can Dios cuyashcara ricsishaga, canda, Upichihuai nisha rimajtas ricsishaga, can paita mañanguima, paiga causana yacura canda cunma.

4:11b.JOH.004.011 Huarmi nica: Señor, imaras mana charingui yacura llucchingaj; yacu uctu yapa ucumi. ¿Maimanda cai causana yacura charinguichu?

4:12b.JOH.004.012 Ñucanchi Jacob yaya cai yacu uctura cuyahuaca. Cai yacu uctumanda pai upiuca churiunandi animalgunandi. Canga ¿paimanda valichú angui?

4:13b.JOH.004.013 Jesús cutipaca: Maicans cai yacura upishaga cutillara upinaichingami.

4:14b.JOH.004.014 Randi maicans ñuca cushca yacura upisha, huiñaigama mana cuti upinaichingachu. Ñuca cushca yacuga paihua shungu ucui yacu bujyu cuenta pahuangami huiñai causaira cungaj.

4:15b.JOH.004.015 Huarmi paita nica: Señor, cai yacura cuhuai, ñuca ama upinaichingaj, ama caima llucchij shamungaj.

4:16b.JOH.004.016 Jesús nica: Carira cayai risha, caima shamichi.

4:17b.JOH.004.017 Huarmi cutipasha nica: Cari illaj ani. Jesusga nica: Ciertomi ningui, Cari illaj mani.

4:18b.JOH.004.018 Pichca carira charishcangui; can cuna chariushca mana quiquin carichu. Shina nisha, ciertomi rimashcangui.

4:19b.JOH.004.019 Huarmiga: Señor, nica, can Diosmanda rimaj angui, yachin.

4:20b.JOH.004.020 Ñucanchi yayauna cai urcui Diosta alabanauca. Randi canguna ninguichi Jerusalenllai Diosta alabanami, nisha.

4:21b.JOH.004.021 Jesús paita nica: Huarmi, quirihuai, nisha, horas pactaringami mana cai urcuis, mana Jerusalembis Yayara alabanguichi.

4:22b.JOH.004.022 Canguna mana ricsishcara adoranguichi; randi ñucanchi ricsishcallara adoranchi. Quishpinaga judiogunamanda shamun.

4:23b.JOH.004.023 Horas shamun, amallara pactamun, imahoras cierto adorajguna Yayara almai cierto adoranaungami. Shinallara Yaya casna adorajgunara mascanmi paita adorangaj.

4:24b.JOH.004.024 Diosga Espiritumi. Paita adorajguna almai cierto adorangaj ministirinmi.

4:25b.JOH.004.025 Huarmiga: Ñuca yachanimi, nica, Mesías nishca shamuna angami, pai Cristo nishca shutichishcami. Pai shamujpiga tucuira yachachinga ñucanchira.

4:26b.JOH.004.026 Jesús paita nica: Ñuca canhua rimau, Cristo maní.

4:27b.JOH.004.027 Chi ratollaira pai yachachishca runauna shamunauca. Jesús cai huarmihua rimaushcamanda manzharinauca, astaun mana pihuas paita tapucachu: ¿Imara tapungui? nisha, ¿imara paihua rimangui?

4:28b.JOH.004.028 Shinajpi huarmi paihua quisara saquisha, llactama rica; llactai tiaj runaunara rimaca.

4:29b.JOH.004.029 Ricuj shamichi, nica, shu runara. Pai ñuca tucui rashcaunara rimahuashcami. ¿Manzhu cai Cristo angái?

4:30b.JOH.004.030 Shinajpi llactamanda llucshimusha, runauna Jesusma shamunauca.

4:31b.JOH.004.031 Yachachishca runaunaga Jesusta: Yachachij, micui, nisha ruganauca.

4:32b.JOH.004.032 Paiga cutipaca: Ñuca shu canguna mana yachashca micunara charini micungaj.

4:33b.JOH.004.033 Shinajpi yachachishca runauna paigunapura ninauca: ¿Maicans paihuajta ima micunara apamushca angái?

4:34b.JOH.004.034 Jesús paigunara nica: Ñucara cachamuj Dios munashcara rangaj, caitami ñuca micuna, paihua ranaunara pactachingaj.

4:35b.JOH.004.035 ¿Manzhu ninguichi: Chara chuscu quilla pishin pallanagama? Cangunara nini: Ñahuira atarichichi, chagraunara ricuichi. Tucui ña chaquirishcami pallangaj.

4:36b.JOH.004.036 Pallajga paihua pagara apin, muyuunara huiñai causaihuajta pallan. Shinasha tarpujpas pallajpas pariju cushiyanaun.

4:37b.JOH.004.037 Casnamanda cierto rimashcami: Shujmi tarpun, shuj randi pallan.

4:38b.JOH.004.038 Canguna mana tarpushcara pallangaj cachamucani. Shujguna tarabanauca, cangunaga paiguna tarabashcamanda valiricanguichi.

4:39b.JOH.004.039 Ashca chi llactamanda Samaría runauna Jesuspi quirinauca chi huarmi rimashcamanda, pai nishcamanda: Paiga tucui ñuca rashcaunara cuentahuaca, nisha.

4:40b.JOH.004.040 Samaría runauna Jesusma shamushaga, paita ruganauca, Ñucanchihua saquiri, nisha. Jesús ishqui punzha tupura paigunahua saquirica.

4:41b.JOH.004.041 Ashca runauna maspas quirinauca, Jesús rimashcamanda.

4:42b.JOH.004.042 Paiguna ninauca huarmira: Ña quirinchimi, mana can rimashcamandalla, astaun ñucanchillara paita uyashcanchi. Shinasha pai cierto pacha Cristo nishca, cai pachara Quishpichij ashcara ricsinchi.

4:43b.JOH.004.043 Ishqui punzha huasha, Jesús chi llactamanda llucshisha, Galilea partima rica.

4:44b.JOH.004.044 Jesusllara nica: Diosmanda rimaj paihua quiquin llactai mana chasqui tucunzhu.

4:45b.JOH.004.045 Jesús Galileama shamujpiga, chihui causajguna paita chasquinauca, tucui pai ista punzha rashcaunara ricushcamanda Jerusalembi. Paigunas istama rinaushca aca.

4:46b.JOH.004.046 Shinajpi Jesús cuti Galileai tiaj Cana nishca llactama shamuca, maibi ñaupa vinora yacumanda rarcami. Capernaum llactai, shu reyhua capitán tiaca; paihua churi ungushca aca.

4:47b.JOH.004.047 Caiga, Jesús Judeamanda Galileama shamushcara uyasha, Jesuspajma rica. Paiga Jesusta ringaj rugaca, churira alichingaj, ña huañungaraupi.

4:48b.JOH.004.048 Shinajpi Jesús paita nica: Canguna atun ricurinaunara munanaita ranaunaras mana ricusha, mana quiringuichi.

4:49b.JOH.004.049 Rey apuhua capitanga Jesusta nica: Señor, ñuca churi manara huañujllaira, uctalla irgusha shamupai.

4:50b.JOH.004.050 Jesús cutipaca: Ri, nisha, camba churi causaun. Runaga Jesús rimashcara quirisha ricami.

4:51b.JOH.004.051 Irgushca huasha, sirvijguna paita tupangaj llucshinauca. Paita rimanauca: Camba churi causaunmi, nisha.

4:52b.JOH.004.052 Shinajpi capitán tapuca: ¿Imahorasta aliyangaj callarica? Caina, la una tupura, calentura chiriyaca, ninauca.

4:53b.JOH.004.053 Yaya shinajpi intindica huahua aliyashca horas Jesús rimashca horas chi tupui aca, pai rimaushcai: Camba churi causaunmi, nisha. Paiga, entero huasii tiajgunandi quirinauca.

4:54b.JOH.004.054 Caita ishqui cuti Jesús ali munanaita ricurinara rarcami, Jesús Galileama shamujpi.

5

5:1b.JOH.005.001 Chimanda huasha, judioguna ista punzhauna tiajpi, Jesús Jerusalenma sicaca.

5:2b.JOH.005.002 Jerusalembi, borregouna pungu mayambi, shu ichilla yacu cocha tiaca. Hebreo shimii cai yacu Betesda nishcami. Pichca rumi istandiyuj pungura chanca.

5:3b.JOH.005.003 Cai punguunai ashca ungushcauna sirinauca, ñausa ñahuiyujguna, anga chaquiuna, suchuuna. Tucui caiguna yacu cuyurishcara chapanauca.

5:4b.JOH.005.004 Huaquin horas shu ángel yacuma irgumuj aca, yacura cuyuchingaj. Yacu cuyurishca huasha, ñaupa punda yacui icuj runa ima ungüimandas alichishca aca.

5:5b.JOH.005.005 Chihui shu runa tiaca, quinsa chunga pusac huatara ungushca.

5:6b.JOH.005.006 Jesús paita ricusha, unai tiashcara yachasha, paita nica: ¿Aliyanara munanguichu?

5:7b.JOH.005.007 Ungushca runa cutipaca: Señor, nisha, pitas mana charinichu yacu cuyurijpi ñucara yacui satingaj; ñucalla alimanda shamungama, shuj ñucamanda ñaupara irgun.

5:8b.JOH.005.008 Jesús paita nica: Atari, camba puñunara api, puri.

5:9b.JOH.005.009 Chi horasllaira cai runa aliyashca aca. Puñunara apisha ricami. Samana punzha aca.

5:10b.JOH.005.010 Shinajpi judioguna alichishca runara ninauca: Samana punzhami; camba puñunara apañara mana ushanguichu.

5:11b.JOH.005.011 Runa cutipaca: Ñucara alichij runa rimahuaca, Puñunara apisha, puri, nica.

5:12b.JOH.005.012 Shinajpi runara tapunauca: ¿Pita acai canda casna rimaj: Puñunara apisha puri, nij?

5:13b.JOH.005.013 Aliyashca runaga pi ashcaras paita alichijta mana yachacachu, Jesús chimanda rishca ajpi.

5:14b.JOH.005.014 Huashaga, Jesús cai runara templo huasii tupasha, paita nica: Ña alichishca angui; uchara ama cuti rangui, ama huasha yalijta ungungaj.

5:15b.JOH.005.015 Runa rishaga, judiogunara cuentaca: Jesusmi ñucara alichij aca, nisha.

5:16b.JOH.005.016 Chimanda judioguna Jesusta tormendachinauca, paita huañuchingaj nisha mascanauca, caigunara samana punzhai rashcamanda.

5:17b.JOH.005.017 Jesús paigunara nica: Nuca Yaya cunagamas tarabaun, ñucas tarabauni.

5:18b.JOH.005.018 Shinajpi chimanda judioguna Jesusta huañuchingaj astaun mas mascanauca samana punzha yachaira mana casushcamanda, shinallara Dios ñuca Yayami nishcamanda, shina nisha paulara Dios tupullara rasha.

5:19b.JOH.005.019 Shinajpi Jesús cutipasha nica: Cierto pacha cangunara nini: Churi pai quiquin munaimandalla mana imaras ranara ushan. Yaya rashcara ricusha chillararami ran. Imaras Yaya ran, shinallarami Churi ran.

5:20b.JOH.005.020 Yayaga Churira llaquin, tucui pai rashcaunara Churira ricuchin. Caimanda yalijta rashcaunara paita ricuchingami canguna manzharíngaj.

5:21b.JOH.005.021 Imasna Yaya huañushcaunara causachin, paigunara causaira cusha, shinallarami Churi pai munashca runaunara causaira cun.

5:22b.JOH.005.022 Yaya mana pitas taripanzhu, randi tucui taripana Churima cushcami.

5:23b.JOH.005.023 Casna tucun tucui runa Churira ahuayachinauchu, paiguna Yayara ahuayachishca cuenta. Maicans Churira mana ahuayachisha, paita cachamuj Yayaras mana ahuayachinzhu.

5:24b.JOH.005.024 Cierto pacha cangunara nini: Maicans ñuca shimira uyasha, ñucara cachamujpi quirishas, paiga huiñai causaira charin; mana causayuj tucungachu, astaun huañuimanda causaima ña pasashcami.

5:25b.JOH.005.025 Cierto pacha cangunara nini: Horas shamun, amallaras pactarin, imahoras huañushcauna Diospa Churi shimira uyanaungami, uyajgunas causarinaungami.

5:26b.JOH.005.026 Imasna Yaya paillaira causaira charin, shinallara Churira cuca paillaira causaira charingaj.

5:27b.JOH.005.027 Shinallara taripangaj ushaira paita cuca, pai Runa Churi ashcamanda.

5:28b.JOH.005.028 Caimanda ama manzharinguichi. Horas shamungami tucui pambariajguna paihua shimira uyanaungami.

5:29b.JOH.005.029 Alira rajguna causangaj causarinaunga; randi manalira rajguna causayachi tucungaj causarinaungami.

5:30b.JOH.005.030 Ñuca munaimandallara mana ima ranara ushanichu. Uyashca tupullara taripani. Ñuca taripashcaga ali tupumi. Ñuca quiquin munaira mana ranichu, astaun ñucara cachamuj Yaya munashcara rauni.

5:31b.JOH.005.031 Ñucaga ñucamandallara rimasha, casna rimashca mana ciertochu.

5:32b.JOH.005.032 Shujga ñucamanda rimanmi. Pai ñucamanda rimashcara cierto ajta yachani.

5:33b.JOH.005.033 Cangunaga Juanma uyajgunara cachacanguichi. Pai cierto shimimanda rimacami.

5:34b.JOH.005.034 Ñuca pi runamandas pai rimashcara mana apinichu; astaun caita rimani canguna quishpichi tucungaj.

5:35b.JOH.005.035 Juan sindij velasna punzhayachij aca. Canguna pai punzhayachishcai ansa chi tiempora cushiyasha nicanguichi.

5:36b.JOH.005.036 Ñucaga Juan rimashca shimimanda yali valij shimira charinimi. Yaya ñucara cuhuashca ranaunara rangaj, shinallara rauni. Caigunaga Yaya ñucara cachamushcara rimanaun.

5:37b.JOH.005.037 Shinallara ñucara cachamuj Yaya ñucamanda riman. Paihua shimira mana imahoras uyashcanguichi. Paihua samiras mana imahoras ricushcanguichi.

5:38b.JOH.005.038 Pai rimashca shimira canguna corazombi causajta mana charinguichi. Pai cachamushca Churira mana quiringuichi.

5:39b.JOH.005.039 Quillcashcaunara ricuichi. Canguna iyaringuichi chihui huiñai causaira charinguichimi. Chi Quillcashcauna ñucamanda rimanaun.

5:40b.JOH.005.040 Ñucama shamunara mana munanguichi causaira charingaj.

5:41b.JOH.005.041 Runaunamanda ahuayachishcara mana chasquinichu.

5:42b.JOH.005.042 Cangunara ricsini. Canguna shungu ucui Diosta mana llaquinguichi.

5:43b.JOH.005.043 Ñucaga ñuca Yaya shutii shamushcani. Cangunaga ñucara mana chasquinguichi. Shujga paihua quiquin shutii shamujpi, canguna paita chasquinguichima.

5:44b.JOH.005.044 Cangunaga, ¿imasna quirinara ushanguichi? Canguna shujgunamanda ahuayachishcara parijumanda chasquinaunguichi. Astaumbas shu sapalla Diosmanda shamuj ahuayachishcara mana mascanguichi.

5:45b.JOH.005.045 Ama iyaichichu ñuca cangunara causayachisha Yaya ñaupajpi. Shujga cangunara causayachin, canguna quishpichihuangami niushca Moisés.

5:46b.JOH.005.046 Canguna Moisesta quirjpiga, ñucaras quiringuichima. Pai ñucamanda quillcacami.

5:47b.JOH.005.047 Canguna pai quillcashcara mana quirijpiga, ¿imasnara ñuca rimashca shimira quiringuichima?

6

6:1b.JOH.006.001 Caimanda huasha, Jesús Tiberias nishca Galilea lamar chimbama rica.

6:2b.JOH.006.002 Ashca runa paita catimunauca, pai munanaita ricurinaunara ungushcaunahua rashcara ricushcamanda.

6:3b.JOH.006.003 Jesús urcui sicasha chihui tiarica pai yachachishca runaunandi.

6:4b.JOH.006.004 Judioguna Pascua nishca ista mayallayauca.

6:5b.JOH.006.005 Jesús muyujta ricusha, ashca runauna paihuajma shamujgunara ricusha, Felipera rimaca: ¿Maimanda tandara randishun tucui caiguna micungaj? nisha.

6:6b.JOH.006.006 Cai shimira Jesús rimaca paita camangaj. Paiga imasna rana ashcaras yachacami.

6:7b.JOH.006.007 Felipe paita cutipaca: Ishqui patsaj cullqui tupu tanda mana pactangachu caran dueño ansa ansa micungaj.

6:8b.JOH.006.008 Shu pai yachachishca runa, Andrés, Simón Pedro uqui, Jesusta rimaca:

6:9b.JOH.006.009 Caibi shu huahua, pai pichca cebadamanda rashca tandara ishqui ichilla yacu aichahuaras charin. ¿Imarasha pactangairi cai tucuira carangaj?

6:10b.JOH.006.010 Shinajpi Jesús nica: Runaunara tiachichi. Chi llactai ashca quihua tiaca. Pichca huaranga tupu cariuna tiarinauca.

6:11b.JOH.006.011 Jesús tandaunara apisha, Diosta agrasishca huasha, yachachishca runaunama tandara cuca. Yachachishca runauna tiajgunara cunauca. Shinallara ichilla aichahuaras caranma cunauca, paiguna munashca tupura.

6:12b.JOH.006.012 Runauna sajsajta micushca huasha, Jesús pai yachachishca runaunara nica: Puchuunara pallaichi, imaras ama ichuringaj.

6:13b.JOH.006.013 Shinajpi chunga ishqui tasauna undajta pallanauca, chi pichca cebada tandaunamanda micujguna puchuchishcara.

6:14b.JOH.006.014 Chi runauna, Jesús cai munanaita ricurinara rashcara ricusha, ninauca: Cierto pacha caimi Diosmanda rimaj, cai pachama shamuna aj.

6:15b.JOH.006.015 Jesusga paiguna shamungaraushcara riparasha, paita apingaj Rey Apura rangaj, cuti pailla urcuma anzhuricami sapalla tiangaj.

6:16b.JOH.006.016 Ña tutayaupi, Jesús yachachishca runauna lamarma irgunauca.

6:17b.JOH.006.017 Shu canoai icusha, lamar chimba partima rinauca, Capernaum llactama. Ña tutayashcami, Jesús paigunama chara mana shamucachu.

6:18b.JOH.006.018 Lamar tsajlas tucuca shinzhi huairashcamanda.

6:19b.JOH.006.019 Paiguna canoai shu samai tupura purishca huasha, Jesusta yacu ahuara puriuta ricunauca. Canoa mayanma shamujpi, paiguna manzharinauca.

6:20b.JOH.006.020 Jesús paigunara nica: Ñuca mani. Ama manzhaichichu.

6:21b.JOH.006.021 Shinajpi paiguna Jesusta munaihua chasquinauca canoai. Uctalla allpama pactamunauca, paiguna riushca llactama.

6:22b.JOH.006.022 Cayandi punzha, chimba partii causajguna shu canoalla tiashcara ricunauca, shinallara Jesús mana rishcara yachachishca runaunahua chi canoai, randi yachachishca runauna paigunalla rinaushca aca.

6:23b.JOH.006.023 Shinajllaira shu ichilla canoauna Tiberias llactamanda shamunaushca aca, runauna micushca pamba mayanma shamusha maibi runauna micunauca Jesús Diosta agrasishca huasha.

6:24b.JOH.006.024 Runauna Jesús illajta ricusha, shinallara pai yachachishca runaunas illajta, paiguna ichilla canoaunai icusha, Capernaum llactama rinauca, Jesusta mascasha.

6:25b.JOH.006.025 Paiguna Jesusta lamar chimbama ajta tupasha, paita ninauca: Yachachij, ¿imahoras caima pactamucangui?

6:26b.JOH.006.026 Jesús paigunara cutipaca: Cierto pacha nini, canguna ñucara mascahuanguichi, mana munanaita ricushcamanda, astaun tandara sajsajta micushcamanda.

6:27b.JOH.006.027 Tarabaichi, mana yanga pasanalla micunamanda, astaun huiñai causaigama duraj micunamanda. Cai sami micunara Runa Churi cangunara cunga; casna rangaj Yaya Dios paita ricuchicami.

6:28b.JOH.006.028 Jesusta ninauca: ¿Imara rashun Dios rashcaunara rangaj?

6:29b.JOH.006.029 Jesús cutipasha nica: Caita Dios ranami: canguna pai cachamushca runai quirinauchu.

6:30b.JOH.006.030 Shinajpi paiguna ninauca: ¿Ima munanaita ricurinara ranguichu can, ñucanchi ricusha quiringaj? ¿Imara rangui?

6:31b.JOH.006.031 Ñucanchi yayauna Maná nishca micunara micunauca chaquishca allpa partii, Quillcai quillcashcasna: Ahua pachamanda tandara paigunama micungaj cucami, nisha.

6:32b.JOH.006.032 Jesús paigunara nica: Cierto pacha cangunara nini: Chi ahua pachamanda tandara mana Moisés cushcachu aca, astaun ñuca Yaya cangunara ahua pachamanda cierto tandara cunmi.

6:33b.JOH.006.033 Ahua pachamanda irgumuj runa, caimi Diosmanda tanda. Paiga cai pachara causaira cun.

6:34b.JOH.006.034 Runauna paita ninauca: Señor, tucui horas cai tandara cuhuai.

6:35b.JOH.006.035 Jesús paigunara nica: Ñuca causaira cuj tanda maní. Maicans ñucama shamuj, mana imahoras yarcachingachu. Maicans ñucajpi quirij, huiñaigama mana imahoraspas upinaichingachu.

6:36b.JOH.006.036 Astaun cangunara rimashcani, ñucara ricushallara mana quiringuichi.

6:37b.JOH.006.037 Yaya tucui ñucama cuhuashca ñucama shamunga. Maicans ñucama shamujta mana callpachishachu.

6:38b.JOH.006.038 Ahua pachamanda irgumucani, mana ñuca munaira rangaj, astaun ñucara cachamuj munashcara rangaj.

6:39b.JOH.006.039 Caitami ñucara cachamuj Yaya munai: Tucui ñucara cuhuashcamanda ama imaras chingachichu, astaun puchucai punzhai paita causachingaj.

6:40b.JOH.006.040 Caitami ñucara cachamujpa munai: Tucui maicambas Churira ricuj, paihuajpi quirij, huiñai causaira charichu; puchucai punzhai ñuca paita causachisha.

6:41b.JOH.006.041 Shinajpi judioguna pinarinauca Jesús rimashcamanda: Ñuca ahua pachamanda shamuj tanda maní, nishcamanda.

6:42b.JOH.006.042 Ninauca: ¿Manzhu cai Jesús José churi? Paihua yayaras paihua mamaras ricsinchi. Shinasha, ¿imarasha nin, ahua pachamanda shamucani?

6:43b.JOH.006.043 Jesús cutipasha paigunara nica: Ama piñaringuichi cangunapura.

6:44b.JOH.006.044 Pihuas ñucama mana shamun, ñucara cachamuj Yaya mana paita pushamujpi. Puchucai punzhai ñuca paita causachisha.

6:45b.JOH.006.045 Diosmanda rimajguna quillcashcaunai quillcashca tian: Dios tucui runaunara yachachingami. Shinajpi tucui Yayara uyaj, paimanda yachaj, ñucama shamunga.

6:46b.JOH.006.046 Pihuas Yayara mana ricushcachu; Diosmanda shamuj, pailla Yayara ricushcami.

6:47b.JOH.006.047 Cierto pacha cangunara nini: Maicans ñucajpi quirisha huiñai causaira charin.

6:48b.JOH.006.048 Ñuca causaira cuj tanda maní.

6:49b.JOH.006.049 Canguna yayauna chaquishca allpa partii Maná nishca micunara micunauca, micusha huañunauca.

6:50b.JOH.006.050 Randi, caimi ahua pachamanda shamuj tanda, maican cai Jandara micusha ama huañuchu.

6:51b.JOH.006.051 Ñucaga causaj tanda maní, ahua pachamanda shamuj. Maicans cai tandara micusha huiñaigama causangami. Ñuca cushca tanda ñuca quiquin aichami. Cai aicharaga cai pacha causana randimanda cushami.

6:52b.JOH.006.052 Shinajpi judioguna paigunapura rimananauca: ¿Imarasha cai runa paihua quiquin aichara micungaj cungachu? nisha.

6:53b.JOH.006.053 Jesús nica: Cierto pacha cangunara nini: Runa Churi aichara mana micusha, paihua yahuarda mana upisha, causaira mana charinguichichu cangunajpi.

6:54b.JOH.006.054 Maicans ñuca aichara micuj yahuarda upij huiñai causaira charin; puchucai punzhai ñuca paita causachishami.

6:55b.JOH.006.055 Ñuca aicha cierto micunami; ñuca yahuar cierto upinami.

6:56b.JOH.006.056 Ñuca aichara micuj ñuca yahuarda upij ñucajpi tiaun, ñucas paihuajpi.

6:57b.JOH.006.057 Imasna causaj Yaya ñucara cachaca, ñucas Yayamanda causaunimi, shinallara maicans ñucara micusha ñucamanda causangami.

6:58b.JOH.006.058 Caimi ahua pachamanda irgumuj tanda. Mana canguna yayauna Maná nishcara micusha huañushcasna, astaun cai tandara micuj huiñaigama causangami.

6:59b.JOH.006.059 Jesús cai tucuira judioguna tandarina huasii rimaca, pai Capernaum llactai yachachiushcai.

6:60b.JOH.006.060 Pai yachachishca runaunamanda ashcauna cai rimashcaunara uyasha: Cai shimi yapa mana chasquihuajchu, ninauca. ¿Pita caita uyanara ushangairi?

6:61b.JOH.006.061 Jesús paigunapura caimanda piñarishcara paihua shungüi yachasha, nica: ¿Cai shimichu cangunara piñachin?

6:62b.JOH.006.062 ¿Imara ninguichima canguna Runa Churi pai ñaupa tiashcama sicachiushcara ricusha?

6:63b.JOH.006.063 Espíritu causaira cun. Aichaga mana imajtas sirvin. Ñuca canguna rimaushca shimiuna espiritumi, causaimi.

6:64b.JOH.006.064 Randi cangunamanda huaquinguna mana quiringuichi. Jesusga callarimanda mana quirijgunara ricsicami, shinallara paita huañuchingaj apichingarau runaras ricsicami.

6:65b.JOH.006.065 Jesús rimaca: Chiraigumanda nicani: Pis ñucama shamunara mana ushan Yaya mana paita cujpi shamungaj.

6:66b.JOH.006.066 Caimanda pacha, pai yachachishca runaunamanda ashcauna tigranauca, paihua pariju purinara saquinauca.

6:67b.JOH.006.067 Shinajpi Jesús pai chunga ishqui runaunara nica: ¿Cangunas shinallara saquinara munanguichi?

6:68b.JOH.006.068 Simón Pedro cutipasha: Señor, nica, ¿pihuajmara rishunzhu? Canlla huiñai causaira cuentaj shimiunara rimangui.

6:69b.JOH.006.069 Can Cristo nishca causaj Diospa Churi ashcara quirishcanchi, ricsinchimi, nica.

6:70b.JOH.006.070 Jesús cutipaca: ¿Manzhu ñuca cangunara chunga ishquira ajllashcani, shinajllaira cangunamanda shuj supaimi?

6:71b.JOH.006.071 Judas Iscariote, Simomba churimanda rimaca. Paiga Jesusta apichingarau runa aca. Pai chi chunga ishquimanda shuj aca.

7

7:1b.JOH.007.001 Caimanda huasha, Jesús Galilea partii puriuca. Judea partira purinara mana munacachu, judioguna paita huañuchingaj mascashcamanda.

7:2b.JOH.007.002 Judioguna ichilla huasi rana ista mayanllayamuca.

7:3b.JOH.007.003 Jesuspa uquiuna paita: Caimanda llucshi, ninauca, Judea partima ri, can yachachishca runauna can rashcaunara ricunauchu.

7:4b.JOH.007.004 Maican runas ricsi tucusha nisha mana pacalla raun. Can cai rashcaunara rasha, canllara pajlla pambai ricuchi tucui runaunama.

7:5b.JOH.007.005 Paihua uquiuna paihuajpi mana quirinaucachu.

7:6b.JOH.007.006 Shinajpi Jesús paigunara nica: Ñuca punzha chara mana pactamun. Canguna punzhaga tucui horas puruntumi.

7:7b.JOH.007.007 Cai pacha runauna cangunara chijninara mana ushanaunzhu. Randi ñucara chijnihuanaun ñuca paigunara rimashcamanda, Canguna rashcauna manalichu, nisha.

7:8b.JOH.007.008 Cangunaga istama sicaichi; ñucaga chara mana rínichu, ñuca punzha chara mana pactarinzhu.

7:9b.JOH.007.009 Caita rimashca huasha Galileai saquirica.

7:10b.JOH.007.010 Paihua uquiuna rishca huasha, Jesús shinallara istama sicasha rica, mana pajllai astaun pacallai ricami.

7:11b.JOH.007.011 Istai judioguna Jesusta mascanauca: Paiga, ¿maibirairi? nisha.

7:12b.JOH.007.012 Jesusmanda rimananauca ashcara. Huaquinguna: Pai ali runami, nisha; shujgunaga: Mana, nisha, pai runaunara umachin.

7:13b.JOH.007.013 Pihuas pajllai paimanda mana rimacachu, judiogunara manzhashcamanda.

7:14b.JOH.007.014 Chaupi istai Jesús templo huasima sicasha yachachicami.

7:15b.JOH.007.015 Judioguna manzharinauca: Paiga, ¿imasnara quillcashcaunara yachan, ninauca, pai mana yachachishca ajllaira?

7:16b.JOH.007.016 Jesús cutipasha nica: Ñuca yachachiushcara mana ñucajchu, randi ñucara cachamujmandami.

7:17b.JOH.007.017 Maicans Diospa munaira pactachinara munashaga, yachachishcamanda yachangami, Diosmandachu shamun, ñucamandallachu rimauni.

7:18b.JOH.007.018 Maicans pai quiquinmandallara rimausha, pai quiquin ahuayanara mascan. Astaun maicans paita cachamujpa ahuayanara mascau, paiga cierto rimajmi, paihuajpi ima llullas illan.

7:19b.JOH.007.019 ¿Manzhu Moisés ley camachishca shimira cangunara cuca, shinajllaira cangunamanda mana pihuas cai camachishcara pactachin? ¿Imamanda ñucara huañuchingaj mascaunguichi?

7:20b.JOH.007.020 Runauna cutipanauca: Supaira charingui, nisha. ¿Pita canda huañuchisha nin?

7:21b.JOH.007.021 Jesús paigunara cutipaca: Shu rashcara rarcani; tucui canguna cai rashcamanda manzharinguichi.

7:22b.JOH.007.022 Cierto pacha Moisés cangunara circuncisión nishca aichai ricurij señalda cuca, randi mana paimandallachu aca, astaun rucuunamandami. Shinasha, samana punzhai cai circuncisión nishca camachishcara cariunahua pactachinguichi.

7:23b.JOH.007.023 Cariuna circuncisión nishcara chasquijpi samana punzhai, Moisés camachishcara ama paquingaj, ¿imarasha ñucara piñahuanguichi ñuca shu ungushca runara alichishcamanda samana punzhai?

7:24b.JOH.007.024 Ricushcamandalla ama taripaichi, astaun ali cierto taripanara taripaichi.

7:25b.JOH.007.025 Shinajpi huaquin Jerusalembi causajguna ninauca: ¿Manzhu cai runara mascanauca huañuchingaj?

7:26b.JOH.007.026 Ricuichi imasna pai pajllai rimaun; pihuas paita mana imaras nin. ¿Cai runa quiquin Cristo ashcara cierto pacha intindinaushcachu atun apuuna?

7:27b.JOH.007.027 Cai runaga, maimanda pai shamushcara ricsinchi. Cristo shamujpiga, pai shamushcara pihuas mana yachangachu.

7:28b.JOH.007.028 Shinajpi Jesús temploi yachachisha, caparisha rimaca: Ñucaras ricsinguichi, nisha, ñuca maimanda shamushcaras shinallara yachanguichi. Ñuca quiquinmandallara mana shamucanichu; astaun ñucara cachamuj, pai ciertomi. Paitaga mana ricsinguichi canguna.

7:29b.JOH.007.029 Ñucaga paita ricsiními. Paimanda ani. Paiga ñucara cachamucami.

7:30b.JOH.007.030 Shinajpi Jesusta apingaj camanauca. Shinajllaira mana pihuas paita apica, paihua horas chara mana pactamujpi.

7:31b.JOH.007.031 Ashca runauna paihuajpi quirinauca: Cristoga pai shamushcai, ¿caimanda yalijta munanaita ricurinaunara rangachu? nisha.

7:32b.JOH.007.032 Fariseoguna runauna Jesusmanda casna rimanaushcara uyanauca. Sacerdote apuuna fariseogunandi guardaunara cachanauca Jesusta apingaj.

7:33b.JOH.007.033 Shinajpi Jesús nica: Chara ansa tiempora cangunahua tiasha, chihuasha ñucara cachamujma rishami.

7:34b.JOH.007.034 Ñucara mascahuanguichimi, randi mana tupahuanguichichu. Maibi ñuca tiaushcama chima shamunara mana ushanguichichu.

7:35b.JOH.007.035 Shinajpi judioguna paigunapura ninauca: ¿Maimara ringai

7:37b.JOH.007.037 Ista puchucai punzhai, atun ista punzha asha, Jesús shayarisha caparica: Maicans upinaichisha ñucama shamuchu, upichu, nica.

7:38b.JOH.007.038 Maicans ñucajpi quirij, Diospa Quillcai quillcashcasna, paihuajmanda causana yacuuna llucshimunaungami.

7:39b.JOH.007.039 Jesús caita rimasha, paihuajpi quirijguna apingaraushca Espiritumanda rimaca, chara Santo Espíritu mana shamushca ajpi» Jesús chara mana sumacyachishcamanda.

7:40b.JOH.007.040 Shinajpi taucarai runaunamanda huaquinguna caita uyasha: Cierto pacha cai runa Diosmanda rimajmi ninauca.

7:41b.JOH.007.041 Shujgunaga: Caimi Cristo ninauca. Huaquingunaga: ¿Cristo Galileamandachu shamunga? ninauca.

7:42b.JOH.007.042 ¿Manzhu Diospa Quillcai quillcashca tian: Cristo David miraigunamanda, Belén llactamanda, David iñashca llactamanda shamungami? ninauca.

7:43b.JOH.007.043 Shinasha, Jesusmanda paigunapura piñanausha rimananauca.

7:44b.JOH.007.044 Paigunamanda huaquinguna Jesusta apisha ninauca; randi pihuas paita mana apicachu.

7:45b.JOH.007.045 Guardauna sacerdote apuunama fariseogunamas tigranauca. Apuuna shamujgunara ninauca: ¿Imarasha paita mana apamucanguichi?

7:46b.JOH.007.046 Guardauna cutipasha: Mana pi runas pai rimashcasna imahoras rimashcachu, ninauca.

7:47b.JOH.007.047 Shinajpi fariseoguna cutipanauca: ¿Cangunas shinallara umachi tucushcanguichi?

7:48b.JOH.007.048 ¿Huaquinguna apuunamandas faríseogunamandas paihuajpi quirinaushca chari?

7:49b.JOH.007.049 Cai yanga runaunaga, ley camachishca shimira mana yachajguna, maldiciashcaunami, ninauca.

7:50b.JOH.007.050 Nicodémoga, pai ñaupa Jesusma tutai shamuj, apuunamanda asha, paigunara nica:

7:51b.JOH.007.051 ¿Ñucanchi ley camachishca shimi shu runara taripanzhu paimanda manara uyasha, pai rashcara manara yachasha?

7:52b.JOH.007.052 Fariseoguna cutipasha paita ninauca: ¿Can Galilea runachu angui? Ricupai, mascapai, Galileamanda ima rimajpas mana imahoraspas ataricachu.

7:53b.JOH.007.053 Caran dueño paihua huasima rica.

8

8:1b.JOH.008.001 Jesús Olivos nishca urcuma rica. 2 Cayandi tutamanda templo huasima tigraca. Tucui runauna paima shamunauca. Jesús tiarisha paigunara yachachica.

8:3b.JOH.008.003 Shinajpi yachaira yachachijguna fariseogunandi Jesusma shu manali causaj huarmira pushamunauca, shujhua tacariushcai apishca aca. Paita paiguna chaupi shungüi shayachinauca.

8:4b.JOH.008.004 Paiguna Jesusta: Yachachij, ninauca, cai huarmira shujhua tacariushcai apishca aca.

8:5b.JOH.008.005 Moisés ley camachishca shimii casnaunara rumihua shitasha huañuchinami ñisha mandaca. Canga, ¿imara ningui?

8:6b.JOH.008.006 Cai tucuira Jesusta ninauca paita tentasha, paita causayachingaj. Jesusga allpama cumurisha maqui rerohua allpai quillcaca.

8:7b.JOH.008.007 Paiguna paita maspas tapusha, Jesús shayarisha nica: Cangunamanda maicans ucha illaj asha ñaupa rumihua shitachu paita.

8:8b.JOH.008.008 Jesús cuti cumurisha allpai quillcaca.

8:9b.JOH.008.009 Paigunaga, uyashallara, iyaibi pingarisha, shuj shujlla llucshisha rinauca, rucuunamanda maltaunagama. Jesusga sapalla saquirica, chaupi shungüi shayau huarmindi.

8:10b.JOH.008.010 Jesús atarisha, huarmi sapalla ajta ricusha, paita nica: Huarmi, ¿maibirai canda causayachijguna? ¿Mana pihuas canda causayachishcachu?

8:11b.JOH.008.011 Huarmi nica: Mana pihuas, Señor. Shinasha Jesús paita nica: Ñucas canda mana causayachinichu. Rilla, ama mas cuti ucharaichu.

8:12b.JOH.008.012 Cuti Jesús paigunara rimaca: Ñucaga cai pacha punzha mani, nisha. Ñucara catimuj runa llandui mana puringachu; astaun cai causai punzhara charingami.

8:13b.JOH.008.013 Shinajpi fariseoguna paita ninauca: Can quiquinmandallara rimaungui. Mana valinzhu can rimashca shimiuna.

8:14b.JOH.008.014 Jesús cutipaca: Ñuca quiquinmandallara rimasha, ñuca rimashcaga valinmi. Ñuca maimanda shamushcara maima rinaras yachanimi. Randi, canguna ñuca shamushcara ñuca rinaras mana yachanguichichu.

8:15b.JOH.008.015 Canguna runa tupullara taripanguichi. Ñucaga pitas mana taripanichu.

8:16b.JOH.008.016 Ñuca taripajpi, ñuca taripashca ciertomi. Ñuca mana sapallachu ani, astaun ñucas ñucara cachamuj Yayandi.

8:17b.JOH.008.017 Canguna ley camachishca shimii quillcashca tian: Ishquipura rimashca ciertomi.

8:18b.JOH.008.018 Ñuca quiquinmanda rimani. Ñucara cachamuj Yayas, pai shinallara ñucamanda riman.

8:19b.JOH.008.019 Fariseoguna: Camba Yayaga, ¿maibirai? ninauca. Jesús cutipaca: Ñucaras, ñuca Yayaras, mana ricsihuanguichichu. Ñucara ricsishaga, shinallara ñuca Yayaras ricsinguichimami.

8:20b.JOH.008.020 Cai shimiunara Jesús rimaca cullquira tandachina pistui, pai templo huasii yachachiusha. Pihuas paita mana apicachu, paihua horas manara pactarijpi.

8:21b.JOH.008.021 Cutillara Jesús paigunara nica: Riunimi. Canguna mascahuanguichimi, astaun canguna ucharashcai huañunguichimi. Ñuca riusncama shamunara mana ushanguichichu.

8:22b.JOH.008.022 Shinajpi judioguna ninauca: ¿Pai quiquinllara huañuchingachu, pai nisha: Ñuca riusncama shamunara mana ushanguichichu?

8:23b.JOH.008.023 Jesús paigunara nica: Uramanda anguichi, ñucaga ahuamanda ani. Canguna cai pachamandami anguichi, ñucaga mana cai pachamandachu ani.

8:24b.JOH.008.024 Chiraigumanda cangunara nicani: Canguna ucharashcaunai huañunguichimi. Canguna ñuca ajta mana quirijpiga, canguna ucharashcaunai huañunguichimi.

8:25b.JOH.008.025 Paita ninauca: Canga, ¿Pitangui? Shinajpi Jesús paigunara nica: Ñuca cangunara ñaupa punda cuentashcasna ani.

8:26b.JOH.008.026 Cangunara rimangaj taripangajpas ashcara charini. Ñucara cachamuj cierto rimajmi. Ñuca paimanda imara uyashcaras chillara cai pachai rimauni.

8:27b.JOH.008.027 Runaunaga mana intindinaucachu pai Yayamanda rimashcara.

8:28b.JOH.008.028 Shinajpi Jesús paigunara nica: Canguna Runa Churira atarichishca huasha, ñuca ajta intindinguichimi. Shinallara intindinguichimi ñucamandallara mana imaras ranichu. Astaun imara Yaya ñucara yachachishcara, chillara rimauni.

8:29b.JOH.008.029 Ñucara cachamuj ñucahua pariju tian. Yaya ñuca sapallara mana saquihuashcachu. Ñucaga tucui horas pai munashcasna rani.

8:30b.JOH.008.030 Jesús shina rimajpi, ashca runauna paihuajpi quirinauca.

8:31b.JOH.008.031 Shinajpi Jesús paihuajpi quirij judiogunara nica: Canguna ñuca shimiunai causausha, cierto pacha ñuca yachachishca runauna tucunguichimi.

8:32b.JOH.008.032 Cierto shimira yachanguichimi. Cai cierto shimiga cangunara liuriyachingami.

8:33b.JOH.008.033 Paiguna Jesusta cutipanauca: Abrahanmanda miraiguna anchi, imahoras pitas mana sirvishcanchichu. ¿Imarasha ningui, Liuriyachishcauna anguichi?

8:34b.JOH.008.034 Jesús paigunara cutipaca: Cierto pacha cangunara nini, maicans uchara rasha, uchara sirvij tucun.

8:35b.JOH.008.035 Sirvijga mana tucui horas huasii saquirinzhu. Randi, churi huiñaigama huasii tiaun.

8:36b.JOH.008.036 Shinajpi Churi cangunara liuriyachijpi, cierto pacha liuriyachishcauna tucunguichimi.

8:37b.JOH.008.037 Canguna Abrahanmanda miraiguna ajta ricsinimi. Randi, ñucara huañuchingaj mascanguichi, ñuca shimiuna canguna shungüi mana icushcamanda.

8:38b.JOH.008.038 Ñuca Yaya ñaupajpi ricushcara rimauni. Cangunas canguna yaya ñaupajpi uyashcaras raunguichi.

8:39b.JOH.008.039 Paiguna cutipanauca: Ñucanchi yaya Abrahanmi. Jesusga nica: Canguna Abrahamba churiuna asha, Abraham rashcaunara ranguichimami.

8:40b.JOH.008.040 Cunaga ñucara huañuchinara mascanguichi, ñuca Diosmanda uyashcara cierto shimira rimaj. Abraham mana caita rarcachu.

8:41b.JOH.008.041 Canguna yaya rashca tupura ranguichi. Shinajpi judioguna paita ninauca: Ñucanchi mana shujhua tacarishcamanda pagarishcachu anchi. Shu yayara charinchi, paiga Diosmi.

8:42b.JOH.008.042 Shinajpi Jesús paigunara nica: Dios canguna yaya ajpi, cierto pacha ñucara llaquinguichima. Diospajmanda liucshishcani, shamushcani. Ñucamandallara mana shamucanichu, astaun pai ñucara cachamuca.

8:43b.JOH.008.043 ¿Imarasha ñuca shimira mana intindinguichichu? Ñuca rimashcara mana uyashcamanda mana intindinguichichu.

8:44b.JOH.008.044 Cangunaga canguna supai apu yayamanda anguichi. Canguna yaya munashcara pactachinara munanguichi. Paiga callarimanda pacha huañuchij aca, cierto shimira mana rimacachu, paihuajpi cierto rimana mana tian. Paiga llullara rimasha, pai quiquinmanda riman. Pai llullajmi, shinallara llullanahua yayami.

8:45b.JOH.008.045 Nucaga cierto shimira rimashcamanda, mana quirinhuanguichi ñucara.

8:46b.JOH.008.046 ¿Cangunamanda maican ñucara uchamanda causayachinzhu? Ñuca cierto shimira rimasha, ¿imaraigu mana quirihuanguichi?

8:47b.JOH.008.047 Maicans Diosmanda aj, Dios rimashcara uyan. Caimanda mana uyahuanguichi, canguna mana Diosmanda ashcaraigu.

8:48b.JOH.008.048 Shinajpi judioguna Jesusta cutipanauca: ¿Manzhu ali rimashcanchi, Can Samaría runa angui, supaiyuj angui? nisha.

8:49b.JOH.008.049 Jesús cutipasha rimaca: Supaira mana charinichu, astaun ñuca Yayara ahuayachiuni. Cangunaga ñucara mana ahuayachinguichichu.

8:50b.JOH.008.050 Ñuca quiquin ahuayanara mana mascanichu. Shujga mascan, taripan.

8:51b.JOH.008.051 Cierto pacha cangunara nini: Maicans ñuca rimashcara huacachisha, huiñaigama huañuira mana ricungachu.

8:52b.JOH.008.052 Shinajpi judioguna paita ninauca: Cuna yachanchi supaira charingui. Abraham huañuca, Diosmanda rimajgunas huañunauca. Canga ningui: Pihuas ñuca shimira pactachisha huiñaigama huañuira mana ricungachu.

8:53b.JOH.008.053 Canga, ¿ñucanchi yaya Abrahanmanda yalichu angui? Pais huañuca, shinallara Diosmanda rimajgunas. Canga, ¿pita tucusha ningui?

8:54b.JOH.008.054 Jesús cutipaca: Ñucaga ñucamandallara ahuayasha, chi ahuayana mana imajtas valin. Ñuca Yayaga ñucara ahuayachinmi. Paimanda canguna, Ñucanchi Diosmi, ninguichi.

8:55b.JOH.008.055 Paitaga mana ricsinguichi, randi ñuca paita ricsinimi. Ñucaga: paita mana ricsinichu nisha, cangunasna llullaj tucuima. Randi, ñuca paita ricsinimi, shinallara pai rimashcara pactachini.

8:56b.JOH.008.056 Canguna Abraham yaya ñuca punzhara ricungarausha cushiyaca. Ricucami, ricushaga cushi tucuca.

8:57b.JOH.008.057 Shinajpi paiguna: Can manara pichca chunga huatara charingui, ¿Abrahanda ricushcanguichu? ninauca.

8:58b.JOH.008.058 Jesús cutipaca: Cierto pacha cangunara nini: Manara Abraham tiajllaira, ñuca maní.

8:59b.JOH.008.059 Judioguna caita uyasha rumiunara apinauca paita shitangaj. Randi Jesús pacalla risha templomanda llucshica; paiguna chaupi shungura pasasha rica.

9

9:91b.JOH.009.091 Jesús chimanda pasaushcai, shu ñausa pagarij runara ricuca.

9:2b.JOH.009.002 Yachachishca runauna paita: Yachachij, ninauca: ¿Pi ucharashcamanda cai runa ñausa pagarimuca, paulara paihua yayaunamanda?

9:3b.JOH.009.003 Jesús cutipaca: Mana pai ucharashcamanda, mana paihua yayauna ucharashcamanda ñausa pagarica. Shina tucuca Dios ranaunara paihuajpi ricuchingaj.

9:4b.JOH.009.004 Ministirinmi ñucara cachamujpa ranaunara rangaj punzha ajllaira. Tuta shamujpi mana pihuas ushan tarabanara.

9:5b.JOH.009.005 Ñuca cai pachai tiaushca horas, cai pacha punzha ani.

9:6b.JOH.009.006 Casna rimasha, Jesús allpai tiucaca, tiucahua turura apiyachica, turura ñausa runa ñahuii llutaca.

9:7b.JOH.009.007 Shina rasha Jesús paita: Ri, nica, maillairi Siloé nishca yacui. Cai Siloé shuti runa shimii, Cachashca, nin. Shinajpi runa ricami, maillaca. Ricusha tigramucamí.

9:8b.JOH.009.008 Paihua mayambi causajguna pai ñausa ashcara ricsijgunas ninauca: Caiga, ¿manzhu mañasha tiaj runa?

9:9b.JOH.009.009 Huaquinguna: Paimi, ninauca. Shujgunaga: Chilla ricurij yachin. Pai quiquinllara: Ñuca mani, nica.

9:10b.JOH.009.010 Paita ninauca: Camba ñahui ¿imasna rasha pascarinauca?

9:11b.JOH.009.011 Runa cutipasha: Chi Jesús nishca runa turura rasha ñahuii llutaca. Siloema ri maillangaj, nihuaca. Ñucaga ricani, rnaillacani, maillasha ricuj tucucani.

9:12b.JOH.009.012 Shinajpi: ¿Pai maibirai? ninauca: Runaga: Mana yachanichu, cutipaca.

9:13b.JOH.009.013 Fariseogunama cai ñaupa horas ñausa aj runara pushanauca.

9:14b.JOH.009.014 Samana punzha maca Jesús turura rasha paihua ñahuiunara pascaca.

9:15b.JOH.009.015 Paiguna cuti paita tapunauca: ¿Imasna rashara ricuj tucucangui? nisha. Runa paigunara nica: Ñahui ahuai turura llutaca, maillacani, ricuj tucuni.

9:16b.JOH.009.016 Shinajpi fariseogunamanda huaquinguna: Cai runa mana Diosmandachu, ninauca, samana punzhara mana huacachin. Shujgunaga: Uchayuj runa, ¿imasna cai munanaita ricurínaunara rangachu? Paríjumanda piñanausha rimananauca.

9:17b.JOH.009.017 Cutillara ñausa aj runara rimanaun: Canga, ¿imara ningui paimanda, pai camba ñahuira pascajta? Runa cutipaca: Paiga Diosmanda rimajmi nini.

9:18b.JOH.009.018 Judioguna pai ñausa ashcara ricuj tucushcaras mana quirinaucachu. Shinasha ñahuira pascashca runa yayaunara cayanauca.

9:19b.JOH.009.019 Paigunara tapunauca: ¿Caichu canguna churi, ñausa pagarij nishca? ¿Ima rasha cuna ricun?

9:20b.JOH.009.020 Yayauna cutipasha: Cai ñucanchi churi asnearas yachanchi, pai ñausa pagarishcaras yachanchi, ninauca.

9:21b.JOH.009.021 Imarasha cuna ricuj tucushca, caita mana yachanchichu. Pi paihua ñahuira pascashcaras mana yachanchichu. Paiga iyaiyuj runami, paita tapuichi, paulara rimangami.

9:22b.JOH.009.022 Casna ninauca yayauna judiogunara manzhashcamanda. Judioguna ña rimanauca maicans Jesús Mesías nishcami nisha nij, pai tandarina huasimanda ichui tucunmami.

9:23b.JOH.009.023 Chiraigumanda yayauna: Iyaiyujmi, paita tapuichi, ninauca.

9:24b.JOH.009.024 Shinajpi ñausa aj runara cüti cay anauca; paita rimasha: Diosta alabairi, nisha, chi runa uchayuj ajta yachanchi, ninauca.

9:25b.JOH.009.025 Shinajpi ñausa aj runa cutipaca: Uchayuj ashcara imasnaras mana yachanichu; caita yachani: Ñuca ñausa ashcara, cuna ricuuni.

9:26b.JOH.009.026 Fariseoguna cutillara runara ninauca: ¿Imara rarca canda? ¿Imasna rashara camba ñahuira pascaca?

9:27b.JOH.009.027 Runaga paigunara cutipasha: Ña cangunara rimashcani, nica. Uyanara mana munacanguichi. ¿Imarasha cuti uyanara munanguichi? ¿Cangunas shinallara pai yachachishca runauna tucunara munanguichi?

9:28b.JOH.009.028 Paita caminauca, nisha: Canmi pai yachachishca runa angui; astaun ñucanchi Moisés yachachishca runauna manchi.

9:29b.JOH.009.029 Dios Moisesta rimashcara yachanchi; randi cai runa maimanda pai asnearas mana yachanchichu.

9:30b.JOH.009.030 Runaga cutipaca: Cierto pacha caita manzhanaitami, canguna pai ajta mana yachanguichi, shina ajllaira ñuca ñahuira pascahuacami.

9:31b.JOH.009.031 Dios uchayujgunara mana uyanzhu, caita yachanchi; randi maicans Diosta manzhasha, paihua munaira rashas, Dios paita uyanmi.

9:32b.JOH.009.032 Callarimanda mana uyarishcachu aca shu runa pagarishcamanda ñausa ajta, ñahuira pascai tucungaj.

9:33b.JOH.009.033 Cai runa mana Diosmanda asha, mana imaras ranara ushanma.

9:34b.JOH.009.034 Paita cutipasha ninauca: Can uchallai pagarimucangui, ¿shinashas ñucanchira yachachihuangui? Shinajpi, paita canzhama ichunauca.

9:35b.JOH.009.035 Jesús paita ichushcara uyasha, paita tarisha rimaca: ¿Diospa Churu quiringuichu? nisha.

9:36b.JOH.009.036 Runa cutipaca: ¿Paiga pitangairi, Señor, ñuca paihuajpi quiringaj?

9:37b.JOH.009.037 Jesús nica: Paita ricushcangui; canhua rimau ñuca mani.

9:38b.JOH.009.038 Pai nica: Señor, quirinimi. Casna nisha Jesusta adoraca.

9:39b.JOH.009.039 Jesús nica: Ñuca taripangaj cai pachama shamucani, mana ricujguna ricunauchu, ricujgunas ñausa tucunauchu.

9:40b.JOH.009.040 Fariseogunamanda huaquinguna paihua pariju tiajguna cai shimira uyasha ninauca: ¿Ñucanchis shinallara ñausachu anchi?

9:41b.JOH.009.041 Jesús nica: Canguna ñausa ashaga ucha illajguna anguichima; randi cuna: Ricunchimi, nisha, caimanda canguna ucha saquirin.

10

10:1b.JOH.010.001 Jesús nica: Cierto pacha cangunara nini: Maican runa borrego cularbi icusha, mana pungura pasasha, astaun shu partii quinzhara sicasha, casna runa shuhuajmi.

10:2b.JOH.010.002 Maican runa pungullara icusha, pai borregora cierto cuirajmi.

10:3b.JOH.010.003 Pungura cuiraj runa paihuajta pascan; borregouna paihua shimira uyanaun. Paiga borregounara shutii cayan, paigunara llucchin.

10:4b.JOH.010.004 Tucui paihua quiquin borregounara llucchisha, ñaupasha rin. Borregouna paita catinaun, paihua shimira ricsishcamanda.

10:5b.JOH.010.005 Randi, borregouna shu mana ricsishca runara mana catinaungachu, astaun paimanda miticunaunga, shujguna shimira mana ricsishcamanda.

10:6b.JOH.010.006 Cai yachachingaj cuentanara Jesús paigunara cuentacami. Pai rimashcara mana intindinaucachu.

10:7b.JOH.010.007 Shinasha Jesús cuti rimaca: Cierto pacha cangunara nini, Ñuca borregouna pungu mani.

10:8b.JOH.010.008 Tucui ñucamanda ñaupa shamujguna shuhuajgunas shuhuasha huañichijgunas anaun. Borregounaga paigunara mana uyanaucachu.

10:9b.JOH.010.009 Ñuca pungu mani. Maican ñucahua icusha quishpi tucungami; icunga, llucshinga, micuna quihuara taringami.

10:10b.JOH.010.010 Shuhuaj apingajlla, huañuchingajlla, huajlichingajlla shamun. Randi ñuca shamucani borregouna causaira charinauchuj causaira charishaga talirijta charinauchu.

10:11b.JOH.010.011 Ñuca borregora ali cuiraj ani. Ali cuirajga paihua causaira cun borregouna randimanda.

10:12b.JOH.010.012 Randi, cuirangaj pagashca runa, pai mana quiquin cuiraj asha, borregouna mana paihua quiquimbaj ajpi, shu puma shamushcara ricusha miticun, borregounara saquín. Shinasha puma borregounara apijpi, llambu chausirin.

10:13b.JOH.010.013 Pai miticusha rin, pagashca runa ashcamanda; borregounara mana llaquin, mana cuiran.

10:14b.JOH.010.014 Ñuca borregora ali cuiraj ani; borreogunara ricsini; ñuca borregouna ñucara ricsihuanaun, imasna Yaya ñucara rícsishcasna, shinallara ñucas Yayara ricsishcasna.

10:15b.JOH.010.015 Borregouna randimanda ñuca causaira cuni.

10:16b.JOH.010.016 Shinallara shu borregounara charini, mana cai cularbi tiajguna. Chigunaras pushamunara ministini. Paigunas ñuca shimira uyanaungami. Shu montonlla anaunga, shu cuirajlla tiangami.

10:17b.JOH.010.017 Chiraigumanda Yaya llaquihuanmi, ñuca causaira cushcamanda, cuti causaira apingaj.

10:18b.JOH.010.018 Ñuca causairaga pihuas ñucamanda mana quichun, ñucallara cuni. Cungaj ushaira charinimi, cuti apiñaras ushanimi. Cai mandashca shimira Yayamanda apicani.

10:19b.JOH.010.019 Cutillara judiogunapura Jesús rimashcamanda piñanausha rimananauca.

10:20b.JOH.010.020 Paigunamanda ashcauna ninauca: Supaira charin, nuspa tucushca, ¿Imaraigu paita uyanguichi?

10:21b.JOH.010.021 Shujgunaga: Cai shimiuna mana supaiyujmandachu, ninauca. ¿Supaiga ñausa runa ñahuira pascanara ushanzhu?

10:22b.JOH.010.022 Jerusalembi, templo huasira Diosma cushcara iyarina ista pactamuca. Tamia horas aca.

10:23b.JOH.010.023 Jesús templo huasii puriuca, Salomomba pungüi.

10:24b.JOH.010.024 Judioguna pai muyujta tandarisha, paita rimanauca: ¿Imahorasgama ñucanchi shungura turbachingui? nisha. Can Cristo ashaga, pajllai rimahuai.

10:25b.JOH.010.025 Jesús cutipaca: Rimashcani, astaun canguna mana quiricanguichi. Ñuca Yaya shutii rashcauna ñucamanda rimanaun.

10:26b.JOH.010.026 Cangunaga mana quiringuichi, mana ñuca borregounamanda asha, ñuca cangunara rimashcasna.

10:27b.JOH.010.027 Ñuca borregouna ñuca shimira uyanaun. Paigunara ricsinimi, shinallara paiguna ñucara catimunaun.

10:28b.JOH.010.028 Paigunara huiñai causaira cuni; huiñaigama mana huañunaungachu. Ñuca maquimanda pihuas paigunara mana quichungachu.

10:29b.JOH.010.029 Ñuca Yaya paigunara cuhuaca. Yayaga tucuimanda yalimi. Ñuca Yaya maquimanda paigunara pihuas mana quichungachu.

10:30b.JOH.010.030 Ñucahua Yayahua shujlla manchi.

10:31b.JOH.010.031 Shinajpi judioguna rumiunara cuti apinauca paita shitangaj.

10:32b.JOH.010.032 Jesús paigunara cutipaca: Ashca ali rashcaunara cangunara ricuchishcani ñuca Yayamanda. ¿Maicanmanda ñucara rumihua shitasha ninguichi?

10:33b.JOH.010.033 Judioguna cutipanauca: Mana ima alira rashcamandas rumihua shitanchi, astaun can Diosta camishcamanda, can runa ashallara Dios tucusha nishcamanda, ninauca.

10:34b.JOH.010.034 Jesús cutipaca: ¿Manzhu canguna ley shimii quillcashca tian, Nicani diosguna anguichi?

10:35b.JOH.010.035 Diospa shimira chasquijgunara 'diosguna' shutichishcajpiga, shinashas Diospa shimi mana paquirinallachu,

10:36b.JOH.010.036 ¿Yaya Dios chicanyachishca runara, cai pachama cachamushcara: Camishcangui, ninguichi, pai Diospa Churi ani nishcamanda?

10:37b.JOH.010.037 Ñucaga Yayamanda rashcaunara mana rajpiga, ama quirihuaichichu.

10:38b.JOH.010.038 Randi, ñuca casna rashcaunara rajpi, ñucara mana quirisha, rashcaunara quirichi, canguna ricsinauchu, quirinauchu Yaya ñucajpi tiashcara ñucas paihuajpi tiashcaras.

10:39b.JOH.010.039 Cuti paita apingaj iyarinauca. Jesusga paiguna maquimanda quishpicami.

10:40b.JOH.010.040 Jesús Jordan yacu chimbama rica, Juan ñaupa bautisaushcai. Chihui tiauca.

10:41b.JOH.010.041 Ashca runauna paihuajma shamunauca. Paiguna ninauca: Cierto pacha Juan ima munanaita ricurinaras mana rarcachu, astaun tucui pai cai runamanda rimashcauna pactarinauca.

10:42b.JOH.010.042 Ashca runauna chihui Jesuspi quirinauca.

11

11:1b.JOH.011.001 Chi horas shu Betania llactamanda runa, paihua shuti Lázaro, ungushca aca. Cai llactai María paihua ñaña Martandi causaushca aca.

11:2b.JOH.011.002 Cai María, ungushca Lázaro pañi, Señorda gusto asnaj ambihua armachij aca, Señorba chaquiras paihua acchahua chaquichica.

11:3b.JOH.011.003 Paniuna Jesusma shimira cachanauca: Señor, nisha, can llaquishca runa ungushcami.

11:4b.JOH.011.004 Jesús caita uyasha: Cai ungüi mana huañuchinachu, nica, astaun Diosta ahuayachingaj, Diospa Churi caimanda ahuayachishca tucungaj.

11:5b.JOH.011.005 Jesús Martaras paihua ñañaras Lazaroras llaquicami.

11:6b.JOH.011.006 Jesús Lázaro ungushcara uyasha, pai tiashcai ishqui punzha mas saquiricami.

11:7b.JOH.011.007 Shinajpi, caimanda huasha, Jesús pai yachachishca runaunara: Acuíchi, nica, cutillara Judea partima.

11:8b.JOH.011.008 Yachachishca runaunaga: Yachachij, ninauca, sar punzhalla judioguna canda rumihua shitanara munanauca. ¿Cuti riunguichu chima.

11:9b.JOH.011.009 Jesús cutipaca: ¿Manzhu caran punzha chunga ishqui horasta charin? Maicans punzhara purisha mana nijtangachu, cai pacha punzhara ricusha.

11:10b.JOH.011.010 Randi, maicans tuta purisha nijtangami, punzha paihuajpi illashcamanda.

11:11b.JOH.011.011 Caita rimashca huasha, Jesús nica: Ñucanchi llaquishca Lázaro amigo puñunmi. Puñushcamanda paita llicchachingaj riunimi.

11:12b.JOH.011.012 Shinajpi yachachishca runauna: Señor, ninauca, pai puñujpi ahyangami.

11:13b.JOH.011.013 Randi, Jesús casna rimasha, Lázaro huañushcara rimacami.

11:14b.JOH.011.014 Shinajpi Jesús pajllai, Lázaro huañushcami, nica.

11:15b.JOH.011.015 Cangunamanda cushiyauni ñuca chihui illashcamanda, canguna quiringaj. Acuichi paihuajma.

11:16b.JOH.011.016 Shinajpi Tomás, Chapa Huahua nishca, chishu yachachishca runaunama nica: Acuichi ñucanchis, paihua pariju huañungaj.

11:17b.JOH.011.017 Shinasha Jesús shamuca. Huañushca Lazarora ña chuscu punzha pambashcara tupaca.

11:18b.JOH.011.018 Betania Jerusalén mayambi tiaca, shu samai purina tupui.

11:19b.JOH.011.019 Ashca judioguna Martama Mariamas shamunaushca aca paigunara cushiyachingaj, Lázaro huañushcamanda.

11:20b.JOH.011.020 Shinajpi Marta Jesús shamushcara uyasha, paita tupangaj llucshica. Mariaga huasii tiauca.

11:21b.JOH.011.021 Marta Jesusta nica: Señor, can caibi tiaushca ajpiga ñuca turi mana huañunmachu aca.

11:22b.JOH.011.022 Shinallara cuna ricsinimi imaras can Diosta mañajpi, Dios canda cungami.

11:23b.JOH.011.023 Jesús: Camba turi causaringami, nica.

11:24b.JOH.011.024 Marta: Yachanimi, nica, puchucai punzha causarinai pa. causaringami.

11:25b.JOH.011.025 Jesús cutipasha nica: Ñucaga causarina mani, causais ani. Maicans ñucajpi quirisha, huañushca ashallara, causaringami.

11:26b.JOH.011.026 Tucui causajgunaga ñucajpi quirisha huiñaigama mana huañunaungachu. ¿Caita quiringuichu can?

11:27b.JOH.011.027 Marta cutipaca: Shinai, Señor, nisha, can Cristo nishca Diospa Churi ajta, cai pachama shamujta, quirishcani.

11:28b.JOH.011.028 Marta casna rimasha pacalla rica paihua ñaña Manara cayangaj. Paita nica: Yachachij caibimi, canda cayaun.

11:29b.JOH.011.029 Maríaga caita uyasha, uctalla shayarisha paihuajma shamuca.

11:30b.JOH.011.030 Jesús chara llactai mana icushcachu aca, astaun Marta paita tupashca pambai chapauca.

11:31b.JOH.011.031 Shinajpi Maríahua pariju huasii tiaj judioguna, paita cushiyachij shamujguna, pai ucta atarishcara llucshishcaras ricusha, paita catinauca: Aya huasima huacangaj riunmi, nisha.

11:32b.JOH.011.032 Maríaga, Jesús tiashcama shamusha, paita ricusha, paihua chaquii tuama urmasha, paita nica: Señor, can caibi tiaushca ajpi, ñuca turi mana huañunmachu aca.

11:33b.JOH.011.033 Shinajpi Jesús María huacashcara shinallara paihua pariju shamuj judioguna huacashcaras ricusha, paihua shungüi yapa llaquirisha turbarica.

11:34b.JOH.011.034 Jesús nica: Paita ¿maibi pambacanguichi? Señor, ninaun, ricuj shami.

11:35b.JOH.011.035 Jesús huacacami.

11:36b.JOH.011.036 Shinajpi judioguna ninauca: Ricuichi imasna Jesús paita llaquicami.

11:37b.JOH.011.037 Paigunamanda huaquinguna ninauca: Cai ñausa ñahuira pascaj ¿manzhu ushanmaca cai runara huañuimanda quishpichingaj?

11:38b.JOH.011.038 Jesús cuti paihua shungüi llaquirisha, aya huasima shamuca. Peñas uctu aca. Shu rumi uctu pungu ahuai siriuca.

11:39b.JOH.011.039 Jesús: Rumira anzhuchichi, nica. Martaga, huañu Lázaro pañi, nica: Señor, asnangami; ña chuscu punzha pambashcami.

11:40b.JOH.011.040 Jesusga: ¿Manzhu canda nicani, can quirishallara, Dios sumaj munanaita rashcara ricunguimi?

11:41b.JOH.011.041 Shinajpi huañushca runa siriushcamanda rumira anzhuchinauca. Jesús ahuama ricusha: Yaya, nica, can ñucara uyashcara agrasini.

11:42b.JOH.011.042 Can tucui horas ñucara uyashcara yachacani. Randi cai ashca muyujta shayajgunamanda casna nicani, paiguna can ñucara cachamushcara quirinauchu.

11:43b.JOH.011.043 Caita rimashca huasha, Jesús shinzhira caparisha: Lázaro, nica, pajllama llucshi.

11:44b.JOH.011.044 Huañushca runaga llucshicami. Maquindi chaquindi llachapahua huatashca, ñahuis llachapahua pÜlushca aca. Jesús nica: Huatashcara pascaichi, saquichi richu.

11:45b.JOH.011.045 Shinajpi Mariajma shamuj judiogunamanda ashcauna Jesús rashcara ricusha, paihuajpi quirinauca.

11:46b.JOH.011.046 Randi, huaquinguna faríseogunama rinauca Jesús rashcara paigunara cuentangaj.

11:47b.JOH.011.047 Shinajpi sacerdote apuuna fariseogunandi pariju tandarimusha ninauca: ¿Imara rashun? Cai runa munanaita ricurinaunara ashcara raun.

11:48b.JOH.011.048 Ñucanchi paita casnalla saquijpi, tucui runauna paihuajpi quirinaungami. Romanosguna shamunaunga ñucanchi santo llactaras ailluunaras tulangaj.

11:49b.JOH.011.049 Caifas, apuunamanda shuj, chi huatai sacerdoteuna atun apu asha, paigunara nica: Mana imaras yachanguichi;

11:50b.JOH.011.050 shinallara mana iyanguichi imasnara ali tucunga shu runa ñucanchi entero aillu randimanda huañungaj, tucui runauna ama chingaringaj.

11:51b.JOH.011.051 Caitaga mana pai quiquinmandalla rimaca, astaun pai chi huatai sacerdote atun apu asha, Diosmanda rimasha, Jesús entero aillu randimanda huañunami anga, nica.

11:52b.JOH.011.052 Shinallara mana chi llacta aillumandalla huañuchu, astaun tucui Diospa chausirishca churiunara shujllai tandachingaj.

11:53b.JOH.011.053 Shinasha, chi punzhamanda, paigunapura Jesusta huañuchingaj iyanaucami.

11:54b.JOH.011.054 Shinajpi Jesús judiogunahua ña mana pajllai puricachu. Paiga runa illashca partí rayapura shu Efraín nishca llactama rica. Chihui pai yachachishca runaunahua saquirica.

11:55b.JOH.011.055 Judioguna Pascua ista mayanllayauca. Chi llactamanda ashcauna Jerusalenma sicanauca Pascua ista manara pactamujllaira maular ingaj.

11:56b.JOH.011.056 Jesusta mascanauca. Templo huasii huaquinguna shujgunara tapunauca: ¿Jesús istama shamungachui? ¿Imasnara iyanguichiri?

11:57b.JOH.011.057 Sacerdote apuuna fariseogunandi mandanauca: Maicans Jesús tiashcara yachasha rimanauchu, Jesusta apingaj, nisha.

12

12:1b.JOH.012.001 Pascua istamanda socta punzha ñaupa, Jesús Betaniama shamuca, huañuj Lázaro llactama, pai huañushcaunamanda causachishca.

12:2b.JOH.012.002 Chihui Jesuspajta shu istara ranauca, tuta. Marta yanapaca. Lázaroga Jesushua pariju mesai tiaríca.

12:3b.JOH.012.003 Shinajpi María shu libra tupu gusto asnaj ambira apamuca; ashca valij aca. Chi ambihua Jesuspa chaquira armachica, shinallara paihua acchahua chaquira chaquichica. Ambi gusto asnaihua entero huasi undarica.

12:4b.JOH.012.004 Judas Iscariote, Simomba churi, shu Jesús yachachishca runa, paita entregangarau, rimaca:

12:5b.JOH.012.005 Cai ambi quinsa patsaj cullqui tupu valin, nica. ¿Imarasha mana catushca aca tsuntsuunama cungaj?

12:6b.JOH.012.006 Casna rimaca, mana tsuntsuunara llaquishcamanda, astaun yachachishca runauna cullqui bolsara charisha, shuhuaj asha, chimanda cullquira apij aca.

12:7b.JOH.012.007 Shinajpi Jesús: Saqui, nica; ñuca pambarina punzahgama caita huacachishcami.

12:8b.JOH.012.008 Tsuntsuuna tucui horas tianaunga, randi ñuca mana tucui horas cangunahua tiashachu.

12:9b.JOH.012.009 Shinajpi judiogunamanda ashcauna Jesús chihui tiashcara uyanauca. Jesusmandalla mana shamunaucachu, astaun Lazarora ricungaj shamunaucami, pai huañushcamanda causarishcara ricungaj.

12:10b.JOH.012.010 Sacerdote apuuna paigunapura rimananauca Lazarora huañuchingaj nisha.

12:11b.JOH.012.011 Pai causarishcaraigumanda ashca judioguna anzhurinauca, Jesuspi quirinauca.

12:12b.JOH.012.012 Cayandi punzha, ashca runauna istama shamujguna, Jesús Jerusalenma shamungaraushcara uyasha,

12:13b.JOH.012.013 ramos pangaunara apisha, paita tupangaj llucshinauca. Caparinauca: ¡Alabashca angui! nisha, ¡Señor Diospa shutii shamuj, Israel Rey Apu, bendiciashca achu!

12:14b.JOH.012.014 Jesús shu malta burrora tupasha, paihua ahuai tiaríca, cai Quillcashcasna:

12:15b.JOH.012.015 Ama manzhaichu Siomba ushushi: Caiga, camba Rey Apu malta burro ahuai tiarisha shamun.

12:16b.JOH.012.016 Ñaupa punda cai tucuira mana ali intindinaucachu pai yachachishca runauna. Astaun Jesusta sumacyachishca huasha, cai tucuira paimanda quillcashca ajta iyarinauca, shinallara quillcashcasna runauna paita cai tucuira ranauca.

12:17b.JOH.012.017 Jesushua pariju tiajguna Lazarora aya huasimanda cayaushcai, huañushcamanda causarishcais, pai rashcara cuentanauca.

12:18b.JOH.012.018 Chimandas runauna paita tupangaj shamunauca, Jesús chi munanaita ricurinara uyashcamanda.

12:19b.JOH.012.019 Astaun fariseoguna paigunapura ninauca: ¡Ricupaichi imasnara mana imaras ushanguichi. Entero mundu paita catinaun!

12:20b.JOH.012.020 Istama Diosta alabangaj shamujgunahua huaquin griego runauna tianauca.

12:21b.JOH.012.021 Caiguna Felipema shamunauca. Cai Felipe Galilea partii tiaj Betsaida nishca llactamanda aca. Paiguna Felipera ruganauca: Señor, nisha, Jesusta ricunara munanchi.

12:22b.JOH.012.022 Felipe caita Andresta cuentaca. Shinajpi Andrés Felipendi Jesusta cuentanauca.

12:23b.JOH.012.023 Shinajpi Jesús cutipasha: Runa Churira sumacyachina horas pactamun, nica.

12:24b.JOH.012.024 Cierto pacha cangunara nini: Trigo muyu allpai urmasha, mana huañusha sapalla saquirin. Randi, huañushaga, ashcara aparin.

12:25b.JOH.012.025 Maicans paihua causaira llaquisha, causaira pirdingami. Randi, maicans cai pachai paihua causaira chijnisha, huiñaigama paihua causaira huacachingami.

12:26b.JOH.012.026 Maicans ñucara sirvisha, catihuachu. Maibi ñuca tiaupi chillaira ñucara sirvij tiangami. Maican runa ñucara sirvisha, ñuca Yaya paita ahuayachingami.

12:27b.JOH.012.027 Cunallara ñuca alma turbarinmi. ¿Imara nishairi? ¿Yaya, cai horasmanda quishpichihuai, nishachu? Astaun, caita pactachingaj cai horasma shamucani.

12:28b.JOH.012.028 Yaya, nica, camba shutira ahuayachingui. Shinajpi ahua pachamanda shu shimi uyarica, nisha: Ahuayachishcani, cutillara ahuayachishami.

12:29b.JOH.012.029 Chihui tiaj ashca runauna, shimira uyajguna: Rayuca, ninauca. Huaquingunaga: Shu ángel paita rimashcami, ninauca.

12:30b.JOH.012.030 Jesús cutipasha: Cai shimi mana ñucajta, astaun cangunajta uyaricami, nica.

12:31b.JOH.012.031 Cuna cai pacha taripanami. Cunallara cai pacha atun apu ichui tucungami.

12:32b.JOH.012.032 Ñucaga allpamanda atarichishca ajpi, tucui runaunara ñucajma aisashami.

12:33b.JOH.012.033 Jesús casna rimasha pai huañuna samillara intindichicami.

12:34b.JOH.012.034 Runaunaga paita cutipanauca: Ley shimimanda uyashcanchi Cristo huiñaigama tiangami, nisha. ¿Imarasha ningui can Runa Churi atarinara ministinmi? ¿Pitai cai Runa Churi?

12:35b.JOH.012.035 Shinajpi Jesús paigunara nica: Unaillara punzha cangunahua tiangami. Purichi punzha tiaullaira, tuta cangunara ama cungaimanda apichu. Tutai purij maima ríushcaras mana yachanzhu.

12:36b.JOH.012.036 Imahoras punzhara charisha, punzhara quirichi, canguna punzhamanda churiuna tucungaj.

12:37b.JOH.012.037 Shinashas, Jesús runauna ñaupajpi ashca munanaita ricurinaunara rajllaíra, mana paita quirinaucachu;

12:38b.JOH.012.038 Diosmanda rimaj Isaías rimashca pactaringaj imasna nin: Señor, ¿pita ñucanchi rimashcara quirishcachu? ¿Pima Diospa ushanara ricuchishcachu?

12:39b.JOH.012.039 Chi raigumanda quirinara mana ushanaucachu, imasna Isaías shu partii nica:

12:40b.JOH.012.040 Paiguna ñahuiunara ñausayachica, shunguras shinzhiyachica; ñahuihua ama ricunauchu, shunguhuas ama intindinauchu, ama ñucama voltiarinauchu, ñuca paigunara alichingaj.

12:41b.JOH.012.041 Cai shimiunara Isaías rimaca, pai Diospa sumajta ricusha, Diosmanda rimashas.

12:42b.JOH.012.042 Shinasha, apuunamanda ashcauna Jesuspi quirinauca; astaun fariseogunara manzhashcamanda paiguna quirishcara mana rimanaucachu, tandarina huasimanda ama ichui tucungaj.

12:43b.JOH.012.043 Paiguna Dios alabashcamanda runauna alabashcara yali llaquinauca.

12:44b.JOH.012.044 Jesús caparisha nica: Maicans ñucajpi quirisha, mana ñucajllaira quirinzhu, astaun ñucara cachamujpis quirinmi.

12:45b.JOH.012.045 Maicans ñucara ricusha, shinallara ñucara cachamujtas ricun.

12:46b.JOH.012.046 Ñucaga punzhayachij cai pachama shamushcani, tucui ñucajpi quirijguna ama tuta llandui tianauchu.

12:47b.JOH.012.047 Maicans ñuca shimira uyajpi, mana pactachijpi, mana ñuca paita taripanichu. Cai pachara taripangaj mana shamucanichu, astaun cai pachara quishpichingaj.

12:48b.JOH.012.048 Maicans ñucaras,_ñuca shimiras mana chasquisha, paita taripangaj charin. Ñuca rimashca shimi paita taripangami puchucai punzhai.

12:49b.JOH.012.049 Ñuca ñucamandallara mana rimacanichu; astaun ñucara cachamuj Yaya, paiga mandahuaca imara rimanaras.

12:50b.JOH.012.050 Yachanimi Dios camachishca shimi huiñai causaimi. Ñuca imara rimashas, Yaya ñucama rimashcasna rimauni.

13

13:1b.JOH.013.001 Pascua ista manara pactamujllaira, Jesús paihua horas ña pactamushcara ricsisha, cai pachamanda Yayajma ringaj, paihua cai pachai causajgunara llaquisha, puchucaigama paigunara llaquicami.

13:2b.JOH.013.002 Tuta micunara micuushcai, supai apu Simomba churi Judas Iscariote shungüi iyachica Jesusta entregangaj.

13:3b.JOH.013.003 Jesús yachaca paihua Yaya tucuira paihua maquii churashcara, shinallara pai Diosmanda shamushcara, Diospajma rinaras yachaca.

13:4b.JOH.013.004 Jesús micuna mesamanda atarisha, churanara anzhuchisha, chaquichina llachapara apisha chumbillica.

13:5b.JOH.013.005 Shinajpi, shu batiai yacura talisha, pai yachachishca runauna chaquira maillangaj callarica, pai chumbülishca llachapahua chaquiunara chaquichica.

13:6b.JOH.013.006 Jesús Simón Pedroma shamujpi, Pedro nica: Señor, ¿canzhu ñuca chaquira maillangui?

13:7b.JOH.013.007 Jesús paita cutipasha: Ñuca raushcara mana intindinguichu cuna, nica, astaun huasha intindinguimi.

13:8b.JOH.013.008 Pedroga: Mana imahoras chaquira maillahuangui ñucajta, nica. Jesusga: Nuca canda mana maülajpiga, mana imaras charinguichu ñucahua, nica.

13:9b.JOH.013.009 Simón Pedro cutipasha: Señor, nica, mana chaquillara, astaun maquindis umandis maillahuai.

13:11b.JOH.013.011 Jesús maican runa paita entregangaraushcara yachaca, chi raigumanda nica: Mana tucui pichashcachu.

13:12b.JOH.013.012 Shinajpi, chaquiunara maillashca huasha, Jesús paihua churanara churarisha, cuti mesai tiarica. Jesús paigunara tapuca: ¿Yachanguichi ñuca cangunahua rashcara?

13:13b.JOH.013.013 Canguna ñucara: Yachachij, Señor, nisha nihuanguichi. Shina nisha alimi rimanguichi. Shinami ani.

13:14b.JOH.013.014 Ñucaga Señor, Yachachij asha, canguna chaquira mailiashcani; shinallara cangunas shujguna chaquira maillana anguichi.

13:15b.JOH.013.015 Ñuca shu ricuchinara cangunara ricuchishcani, ñuca rashcasna canguna shinallara ranguichi.

13:16b.JOH.013.016 Cierto pacha cangunara nini: Sirvijga paihua patronmanda mana yalinzhu; shinallara cachashca runa paita cachajmanda mana yalinzhu.

13:17b.JOH.013.017 Canguna cai camachishcaunara yachasha pactachishas, cushi shunguyuj anguichi.

13:18b.JOH.013.018 Ñuca mana tucuimanda rimanichu. Ñuca ajllashca runaunara ricsinimi. Astaun, Diospa Quillca pactaringaj; Ñucahua pariju tandara micuj paihua chaquira atarichica ñucahua contra rasha.

13:19b.JOH.013.019 Cunamanda pacha, manara pactarijllaira, cangunara rimashcani. Shina asha pactarishca horasllaira ñuca maican ajtas quiringuichi.

13:20b.JOH.013.020 Cierto pacha cangunara nini: Maicans ñuca cachashca runara chasquisha, ñucaras chasquin. Maicans ñucara chasquisha ñucara cachamujtas chasquin.

13:21b.JOH.013.021 Caita rimashca huasha, Jesús paihua shungüi yapa llaquirica. Cierto pacha cangunara nini, cangunamanda shuj ñucara entregangami, nica.

13:22b.JOH.013.022 Shinajpi yachachishca runauna parijumanda ricunanausha, paigunapura tapunauca: ¿Pitangai Jesús casna rimaushca? nisha.

13:23b.JOH.013.023 Shu Jesús yachachishca runa, pai llaquishca, Jesuspa rayai quimirisha siriuca.

13:24b.JOH.013.024 Simón Pedro, maquihua ricuchisha paita nica: Tapui, ¿pitairi pai casna rimaushca runa?

13:25b.JOH.013.025 Paiga, Jesuspa pichu rayai quimirisha sirij: Señor, ¿pitairi? nica.

13:26b.JOH.013.026 Jesús cutipasha: Ñuca ucuchishca tandara cushca runami, nica. Jesusga tandara ucuchisha, Simomba churi Judas Iscariotema cuca.

13:27b.JOH.013.027 Judas ucushca tandara apishca huasha, Satanás supai apu paihua shungüi icuca. Shinajpi Jesús paita nica: Can rangaraushcara uctalla rai.

13:28b.JOH.013.028 Jesús imamanda caita rimashcara mesai tiajguna mana intindinaucachu.

13:29b.JOH.013.029 Huaquinguna iyanauca Judas cullqui bolsara charishcamanda, Jesús paita nica: Ñucanchi istai ministishcara randingui; mana shinasha imaras tsuntsuunama cuyangaj rimaca.

13:30b.JOH.013.030 Ucushca tandara apishca huasha, Judas llucshica. Tuta aca.

13:31b.JOH.013.031 Pai llucshishca huasha, Jesús: Cuna Runa Churi sumacyachishcami, nica. Shinallara, Dios paihua Churu sumacyachishcami.

13:32b.JOH.013.032 Diosga Churimanda sumacyachishca asha, shinallara Dios pai quiquinllai Churira sumacyachingami, cunallara paita sumacyachingami.

13:33b.JOH.013.033 Churihuauna, chara ansa cangunahua pariju tiausha. Mascahuanguichi, randi imasnara judiogunara nicani: Ñuca riusncama canguna shamunara mana ushanguichichu. Shinallara cangunaras cuna nini.

13:34b.JOH.013.034 Mushuj mandashca shimira cangunara rimauni: Parijumanda llaquinaunguichi. Ñuca cangunara llaquishcasna, shinallara parijumanda llaquinaunguichi.

13:35b.JOH.013.035 Caimanda tucui runauna canguna ñuca yachachishca runauna ajgunara ricsinaungami, canguna parijumanda llaquinausha.

13:36b.JOH.013.036 Simón Pedro Jesusta nica: Señor, ¿maimara ringui? Jesús cutipaca: Ñuca riusncama cuna mana ushangui catinara, astaun huashaga catihuanguimi.

13:37b.JOH.013.037 Pedroga: ¿imamanda canda amallara catinara mana ushashachu? nica. Can randimanda ñuca causaira cushami.

13:38b.JOH.013.038 Jesús cutipaca: ¿Camba causaira ñuca randimanda cunguichu? Cierto pacha canda nini: Gallo manara cantajllaira, can quinsa cuti, Paita mana ricsinichu, ninguimi.

14

14:1b.JOH.014.001 Canguna shungu ama turbaríchu. Diospi quiringuichi, ñucajpis quirichi.

14:2b.JOH.014.002 Ñuca Yaya llactai ashca huasi tian. Mana shina ajpiga, cangunara rimaimacani. Ñuca canguna tianara alichingaj ríunimi.

14:3b.JOH.014.003 Rishaga, tianaunara alichisha, cuti shamushami cangunara ñucajma pushangaj, ñuca tiaushcai canguna shinallara chihui tiangaj.

14:4b.JOH.014.004 Ñuca riushcara yachanguichi, shinallara nambiras.

14:5b.JOH.014.005 Tomás paita nica: Señor, can riushcara mana yachanchi, ¿imasna rashara nambira ricsina angai?

14:6b.JOH.014.006 Jesús paita nica: Ñuca ñambi ani, cierto shimi ani, causáis ani. Mana pihuas Yayama shamun, mana ñucahua shamusha.

14:7b.JOH.014.007 Ñucara ricsisha, Yayaras ricsmguichima. Cunamanda paita ricsinguichi, paita ricushcanguichi.

14:8b.JOH.014.008 Felipe paita nica: Señor, Yayara ricuchihuapai, chilla basta.

14:9b.JOH.014.009 Jesús paita nica: ¿Ashca punzhaunara cangunahua pariju tiashcani, can ñucara mana ricsihuashcangui, Felipe? Maicans ñucara ricusha Yayaras ricushcami. ¿Imasnajpira shina ningui: Yayara ricuchihuapai?

14:10b.JOH.014.010 ¿Ñucaga ñuca Yayajpi tiashcara, Yaya ñucajpis tiashcara manzhu quiringui? Ñuca cangunara rimashca shimiunara mana ñucamandallachu rimani, astaun ñucajpi causaj Yaya, paimi tucui ranaunara raun.

14:11b.JOH.014.011 Ñucara quirihuaichi ñuca Yayajpi tiashcara, Yayas ñucajpis tiashcara; manashaga quiquin rashcaunamanda quirihaunguichi.

14:12b.JOH.014.012 Cierto pacha cangunara nini: Maicans ñucajpi quirisha, ñuca rashca samiunara shinallara rangami; caigunamanda yalijtas rangami, ñuca Yayajma rinamanda.

14:13b.JOH.014.013 Canguna tucui imaras ñuca shutii Yayara mañajpi, cai tucuira rashallami, Yaya Churimanda sumacyachishca angaj.

14:14b.JOH.014.014 Canguna imaras ñuca shutii mañajpi, rashallami.

14:15b.JOH.014.015 Canguna ñucara llaquishaga, ñuca mandashca shimiunara pactachichi.

14:16b.JOH.014.016 Ñuca Yayara rugasha, pai cangunara shu Yanapajta cachamungami huiñaigama cangunahua pariju tiangaj.

14:17b.JOH.014.017 Cai Yanapaj cierto shimira rimaj Espiritumi. Cai pacha runauna paita chasquinara mana ushanaun, paita mana ricusha, mana ricsishas. Cangunaga paita ricsinguichi. Paiga cangunahua pariju tiaun, canguna shungu ucui tiangami.

14:18b.JOH.014.018 Cangunaraga mana huaccha huahuaunara saquishachu. Cangunama shamushami.

14:19b.JOH.014.019 Unaillara cai pacha runauna ñucara mana ricunaungachu. Astaun canguna ricuhuanguichimi. Ñuca causashcaraigu cangunas causaunguichimi.

14:20b.JOH.014.020 Chi punzhai ñuca Yayajpi tiashcara yachanguichi, cangunas ñucajpi, ñucas cangunajpi.

14:21b.JOH.014.021 Maicans ñuca mandashca shimiunara charisha, pactachishas paimi ñucara liaquij. Ñucara llaquijta, ñuca Yaya paita llaquingami, ñucas paita llaquisha, ñucallara paima ricuchishami.

14:22b.JOH.014.022 Judas, mana Iscariote, Jesusta nica: Señor, ¿Imarasha ñucanchillara ricuchingui, mana tucui cai pacha runaunaras?

14:23b.JOH.014.023 Jesús paita cutipasha nica: Maicans ñucara llaquij, ñuca mandashca shimira pactachingami. Yayas paita llaquingami. Paihuajma shamushun, paihua causashun.

14:24b.JOH.014.024 Maicans ñucara mana llaquij, ñuca shimira mana pactachinzhu. Canguna uyashca shimi mana ñucamandallarachu shamun, astaun ñucara cachamuj Yaya rimashcami.

14:25b.JOH.014.025 Ñucas cangunahua pariju tiashallara cai shimiunara rimashcani.

14:26b.JOH.014.026 Yaya ñuca shutii cachamushca Yanapajga, Santo Espíritu ashaga, cangunara tucui imaras yachachingami; shinallara tucui ñuca rimashcaunara cangunara iyarichingami.

14:27b.JOH.014.027 Cushi shungura cangunara saquinimi; ñucamanda cushi shungura cangunara cuni. Mana cai pacha cushcasna cunichu. Canguna shungu ama turbarichu shinallara ama manzharichu.

14:28b.JOH.014.028 Uyashcangui imasnara cangunara nicani: Riunimi, shinallara tigramunimi. Canguna ñucara llaquisha, cierto pacha cushiyanguichima, Yayajma riunimi nishcamanda, Yaya ñucamanda yali ashcaraigu.

14:29b.JOH.014.029 Cuna, manara tucujllaira cangunara cuentashcani, imahoras casna tucujpi canguna quiringuichima.

14:30b.JOH.014.030 Cunamanda mana ashcara cangunara rimashachu. Cai pacha atun apu shamun; paiga ñucajpi imaras mana charin.

14:31b.JOH.014.031 Astaun cai pacha runauna Yayara ñuca llaquishcaras, Yaya ñucara mandashcaras ricsinauchu, shinallarami rauni. Atarichi, caimanda acuichi, nica.

15

15:1b.JOH.015.001 Jesús nica: Ñuca cierto uvillas yura ani, ñuca Yayaga yurara cuirajmi.

15:2b.JOH.015.002 Tucui pallca ñucamanda muyura mana aparijta pitinaunga; muyura aparijgunara pichanaunga astaun mas aparingaj.

15:3b.JOH.015.003 Ñuca rimashca shimimanda canguna ña pichashca anguichi.

15:4b.JOH.015.004 Ñucajpi tiaichi, ñucas cangunajpi. Imasnara pallca paulara mana aparingachu mana yurai tiajpi, shinallara canguna mana aparinguichichu mana ñucajpi tiajpi.

15:5b.JOH.015.005 Ñuca uvillas yura ani, canguna pallcauna anguichi. Pihuas ñucajpi tiausha, ñucas paihuajpi, paiga ashca muyura aparingami. Ñucamanda anzhurishca asha, mana ima ranaras ushanguichichu.

15:6b.JOH.015.006 Maicans mana ñucajpi tiausha, mana valij pallca cuenta ichui tucunga, chaquiringaj. Ichushca pallcaunara tandachinaunga, ninai shitasha rupachinaunga.

15:7b.JOH.015.007 Canguna ñucajpi tiausha, ñuca shimiuna cangunajpi tiausha, imaras munasha mañaichi, cangunajta rashca anga.

15:8b.JOH.015.008 Canguna ashca muyura aparijpi, ñuca Yaya sumacyachishca angami. Shinashas, canguna ñuca quiquin yachachishca runauna tucunguichimi.

15:9b.JOH.015.009 Imasna Yaya ñucara llaquihuaca, shinallara ñuca cangunara llaquishcani. Ñuca llaquiushcai tiaichi.

15:10b.JOH.015.010 Canguna ñuca mandashca shimiunara pactachijpi, ñuca llaquiushcai tiaunguichimi, imasna ñuca Yaya mandashca shimiunara pactachishcani, shinallara pai llaquiushcais tiauni.

15:11b.JOH.015.011 Cai shimiunara cangunama rimashcani ñuca cushi cangunajpi tiachu, canguna cushi undajta angaj.

15:12b.JOH.015.012 Caimi ñuca mandashca shimi: Canguna parijumanda llaquinuichi, ñuca cangunara llaquishcasna.

15:13b.JOH.015.013 Pi runas cai llaquinamanda yalira mana charinzhu, shu runa paihua causaira paihua amigouna randimanda cusha.

15:14b.JOH.015.014 Canguna ñuca amigouna anguichi ñuca mandashcara rasha.

15:15b.JOH.015.015 Cunaga, cangunara sirvijguna nisha mana rimashachu. Sirvijga paihua patrón rashcara mana yachanzhu. Astaun cangunara amigouna nisha rimashcani. Ñuca Yayamanda uyashcara, tucuira cangunara cuentashcani.

15:16b.JOH.015.016 Canguna ñucara mana ajllahuashcanguichi, astaun ñuca cangunara ajllacani. Cangunara cachashcani aparisha ringaj, canguna aparishca saquirichu, canguna imaras Yayara mañajpi ñuca shutii cangunara cungami.

15:17b.JOH.015.017 Caita cangunara mandani: Llaquinaunguichi parijumanda.

15:18b.JOH.015.018 Cai pacha runauna cangunara chijnisha, caita yachaichi, paiguna shinallara ñucara chijninauca cangunamanda ñaupara.

15:19b.JOH.015.019 Canguna cai pachamanda asha, cai pacha runauna paiguna quiquimbajta llaquinaunma; astaun canguna mana cai pachamanda ashaga, chijni tucushcanguichi, ñuca cangunara cai pachamanda ajllashcaraigu.

15:20b.JOH.015.020 Ñuca cangunara rimashca shimira iyaringuichi. Shu sirvij paihua patronmanda mana yalinzhu. Runauna ñucara torméndachihuanauca; shinallara cangunara tormendachinaungami. Paiguna ñuca rimashca shimira pactachisha, shinallara canguna rimashcara pactachinaungami.

15:21b.JOH.015.021 Astaumbas, cai tucuira cangunara ranaunga ñuca shutimanda, Jiucara cachamujta mana ricsishcamanda.

15:22b.JOH.015.022 Ñuca mana shamushcajpiga, paigunama mana rimashcajpis, uchara mana charinaunmaca. Cuna paiguna rimanara mana ushanaun, Mana yachanchichu, nisha, paiguna ucharashcamanda.

15:23b.JOH.015.023 Maicans ñucara chijnisha shinallara ñuca Yayaras chijnin.

15:24b.JOH.015.024 Ñuca paiguna chaupi shungüi shujguna mana rashca tono ranaunara mana rashca ajpiga, paiguna uchara mana charinaunmaca. Cunaga ñucaras Yayaras ricunaushcami, chijninaushcami.

15:25b.JOH.015.025 Cai casna tucushcami paiguna ley shimii quillcashca pactaringaj: Yangamanda ñucara chijnihuanauca, nisha.

15:26b.JOH.015.026 Astaun Yayajmanda ñuca cachamushca Yanapaj, pai Yayajmanda llucshimuj, cierto rimaj Espíritu aj, pai shamushaga ñucamanda rimangamí.

15:27b.JOH.015.027 Cangunas shinallara ñucamanda rimanguichi, canguna callarimanda ñucahua pariju causashcamanda.

16

16:1b.JOH.016.001 Cai tucuira cangunara rimashcani, canguna ama manzharingaj.

16:2b.JOH.016.002 Tandarina huasiunamanda cangunara ichunaungami. Punzha shamunga imahoras maican runas cangunara huañuchisha, Diosta sirviunimi nisha iyangami.

16:3b.JOH.016.003 Caita ranaungami Yayaras ñucaras mana ricsishcamanda.

16:4b.JOH.016.004 Cai shimiunara cangunara rimashcani, horas pactamujpi, ñuca casna rimashcaunara iyarinauchu.

16:5b.JOH.016.005 Cuna ñucara cachamujma riunimi. Cangunamanda pihuas mana tapuhuangui: ¿Maima riungui? nisha.

16:6b.JOH.016.006 Astaun ñuca casna rimashcamanda, canguna shungüi ashcara llaquiringuichi.

16:7b.JOH.016.007 Cierto shimira rimauni: Ñuca ringaj ministirinmi, nisha. Ñuca mana rijpiga, Yanapaj cangunajma mana shamungachu. Ñuca risha, paita cachamushami.

16:8b.JOH.016.008 Yanapaj shamusha, tucui runaunara ucharas, ali causanaras, taripanaras ricsichingami.

16:9b.JOH.016.009 Uchamanda rimangami, runauna ñucajpi mana quirishcamanda.

16:10b.JOH.016.010 Ali causanamanda rimangami, ñuca Yayajma riushcamanda; ñucara mana mas ricunguichichu.

16:11b.JOH.016.011 Taripanamandas rimangami, cai pacha atun apu ña taripashcamanda.

16:12b.JOH.016.012 Chara ashcara charini cangunara cuentangaj, astaun cunaliara uyanara mana ushanguichichu.

16:13b.JOH.016.013 Imahoras cai cierto shimira rimaj Espíritu shamusha, pai cangunara tucui cierto rimashcara yachachingami. Pai quiquinmandallara mana rimangachu, astaun pai tucui uyashcara cuentangami, ima huasha horas shamunaras rimangami.

16:14b.JOH.016.014 Pai ñucara sumacyachingami; ñucajmanda ajgunara cangunara rimangami.

16:15b.JOH.016.015 Ñuca Yaya tucui charishca ñucajmi; chimanda nicani: Espíritu ñucajmanda apisha, cangunara yachachingami.

16:16b.JOH.016.016 Unaillara mana ricuhuanguichichu, cuti unaillai ricuhuanguichimi; ñuca Yayajma rishcamanda.

16:17b.JOH.016.017 Shinajpi pai yachachishca runaunamanda huaquinguna ninauca: ¿Imara nin, Unaillara ñucara mana ricuhuanguichichu, cuti unaillai ricuhuanguichimi; shinallara Yayajma riunimi?

16:18b.JOH.016.018 Paiguna ninauca: ¿Imara nin cai Unaillai nishca? Pai rimashcara mana intindinchichu.

16:19b.JOH.016.019 Jesusga paiguna tapusha nishcara ricsisha, paigunara nica: ¿Cangunapura tapunguichi cai ñuca rimashcara, Unaillara mana ricuhuanguichichu, cuti unaillai, ricuhuanguichimi nisha?

16:20b.JOH.016.020 Cierto pacha cangunara nini: Huacangaraunguichi, llaquiringaraunguichi; astaun cai pacha runauna cushiyanaungami. Shinasha canguna llaqui tucujpi, canguna llaquirishca cushi tucungami.

16:21b.JOH.016.021 Imahoras shu huarmi pagarichisha nanachinmi, paihua horas pactamushcamanda. Huahua pagarishca huasha, huarmi paihua nanaira ña cungarin, shu runa cai pachai pagarishcara cushiyashcamanda.

16:22b.JOH.016.022 Shinallara canguna cierto pacha llaquiringuichimi. Shinasha ñuca cangunara cuti ricusha, canguna shungu cushiyangami. Canguna cushiyashcara pihuas mana quichungachu.

16:23b.JOH.016.023 Chi punzhai imaras mana tapuhuanguichi. Cierto pacha cangunara nini: Tucui imaras Yayara mañajpi ñuca shutii, pai cungami.

16:24b.JOH.016.024 Cuna horasgama imaras mana mañashcanguichi ñuca shutii. Mañaichi, cui tucunguichimi, canguna cushi pactaringaj.

16:25b.JOH.016.025 Cai tucuira yachachingaj cuentanaunahua cangunara rimashcani. Horas shamunga ñuca mana yachachingaj cuentanaunahua rimashachu, astaun pajllallai Yayamanda rimasha.

16:26b.JOH.016.026 Chi punzhai ñuca shutii mañanguichi. Mana ninichu ñuca Yayara cangunamanda rugasha;

16:27b.JOH.016.027 Yaya paulara cangunara llaquin, canguna llaquihuashcamanda, ñuca Diosmanda llucshishcara quiríshcamandas.

16:28b.JOH.016.028 Yayajmanda llucshicani, cai pachama shamucani. Cutillara cai pachara saquisha, Yayajma riunimi.

16:29b.JOH.016.029 Pai yachachishca runauna ninauca: Cuna pajllai rimaungui, mana ima pacashca shimira rimaungui.

16:30b.JOH.016.030 Cuna intindinchi can tucui imaras yachangui; pihuas canda imaras tapungaj mana ministingui. Caimanda can Diosmanda llucshishcara quirinchimi.

16:31b.JOH.016.031 Jesús cutipaca: ¿Cunarachu quiringuichi?

16:32b.JOH.016.032 Horas shamun, ña pactamun, nica, canguna chausiringuichimi, caran dueño paihua partima, ñucara sapalla saquihuanguichi. Astaun ñuca mana sapallachu ani, Yaya ñucahua pariju tiaunmi.

16:33b.JOH.016.033 Cai tucuira cangunara rimashcani canguna ñucajpi cushira charínguichima. Cai pachai tormendosta charinguichimi, astaun quirichi, ñuca cai pachara vencishcanimi.

17

17:1b.JOH.017.001 Jesús cai tucuira rimaca. Ahuama ricusha, nica: Yaya, horas pactamun. Camba Churira sumacyachingui, camba Churi shinallara canda sumacyachichu.

17:2b.JOH.017.002 Can paita ushaira cushcangui tucui runauna ahuai, tucui can paita cushca runaunama huiñai causaira cungaj.

17:3b.JOH.017.003 Caimi huiñai causai, canda sapalla cierto Dios ajta, can cachamushca Jesucristoras ricsinauchu.

17:4b.JOH.017.004 Ñuca cai pachai canda sumacyachishcani. Can ñuca rangaj cushcara pactachishcanimi.

17:5b.JOH.017.005 Cuna, Yaya, ñucara sumacyachihuangui canhua pariju, ñuca ñaupa horas canhua pariju charishca sumajhua, cai pachara manara rashca ajllaira.

17:6b.JOH.017.006 Can cai pachamanda cuhuashca runaunama camba shutira ricuchishcani. Cai runauna cambajguna anauca, paigunara cuhuashcangui. Paiguna camba shimira pactachinauca.

17:7b.JOH.017.007 Cuna paiguna ricsinaushcami imasna tucui can ñucara cushcauna cambajmanda shamunaushcami.

17:8b.JOH.017.008 Can ñucara rimashca shimiunara paigunara rimashcani. Paiguna cai shimiunara chasquinaushcami. Cierto pacha ñuca canmanda llucshishcara yachanaun, shinallara can ñucara cachamushcara quirinaushcami.

17:9b.JOH.017.009 Paigunamanda rugauni. Cai pacha runaunamanda mana rugaunichu, astaun can ñucara cushca runaunamanda rugauni. Paiguna cambajguna anaun.

17:10b.JOH.017.010 Tucui ñucaj cambajmi, shinallara cambaj ñucajmi. Paigunamanda sumacyachishca ani.

17:11b.JOH.017.011 Cunamanda cai pachai mana tiaunichu; caiguna cai pachai tianaunmi. Ñucaga cambajma shamuni. Sumaj Yaya, caigunara, can ñucama cushca runaunara, huacachipai camba shutii, paiguna shujlla anauchu ñucanchisna.

17:12b.JOH.017.012 Cai pachai ñuca paigunahua pariju tiaushcai, camba shutii paigunara huacachicani. Can ñucama cushca runaunara huacachishcani, paigunamanda pihuas mana pirdiricachu; randi pirdirina aj runa, paula pirdirica, Quillcashca pactaringaj.

17:13b.JOH.017.013 Cunaga cambajma shamuni. Caita cai pachai rimauni, paiguna ñuca cushira pactajta charinauchu paiguna shungüi.

17:14b.JOH.017.014 Can rimashca shimira paigunara rimashcani. Caí pacha runauna paigunara chijninaucami, paiguna mana cai pachamanda ashcaraigu, imasna ñucas shinallara mana cai pachamandachu ani.

17:15b.JOH.017.015 Can paigunara cai pachamanda llucchingaj mana ruganichu, astaun can paigunara manalimanda huacachichu.

17:16b.JOH.017.016 Paiguna mana cai pachamandachu anaun, imasna ñucas mana cai pachamandachu ani.

17:17b.JOH.017.017 Paigunara chicanyachi camba cierto shimii. Can rimashca shimi ciertomi.

17:18b.JOH.017.018 Imasna ñucara cai pachama cachamucangui, shinallara ñuca paigunara cai pachama cachamushcani.

17:19b.JOH.017.019 Paigunara llaquishcamanda ñuca ñucallara mundumanda chicanyachiuni, paiguna shinallara cierto shimii chicanyachishca anauchu.

17:20b.JOH.017.020 Mana caigunamandallachu mañauni, astaun shinallara paiguna rimashcamanda ñucajpi quiringaraujgunamandas,

17:21b.JOH.017.021 paigunapura shujlla anauchu, imasna can Yaya ñucajpi, ñucas cambajpis, shinallara paigunas ñucanchijpis shujlla anauchu, cai pacha runauna can ñucara cachamushcara quirinauchu.

17:22b.JOH.017.022 Nuca can cuhuashca sumajta paigunama cushcani, paigunapura shujlla anauchu, ñucanchi imasna shujlla ashcasna;

17:23b.JOH.017.023 ñuca paigunajpis, can ñucajpis, paiguna ali pacha shujlla anauchu; cai pacha runauna can ñucara cachamushcara yachanauchu, shinallara can paigunara llaquishcara ricsinauchu, imasna can ñucara llaquishcasna.

17:24b.JOH.017.024 Yaya, can cuhuashca runauna ñuca munani maibi ñuca tiashcais paigunas ñucahua pariju tianauchu, can ñucara cushca sumajta ricungaj. Can cai pachara manara rajllaira ñucara llaquihuashcangui.

17:25b.JOH.017.025 Ali Yaya, cai pacha runauna canda mana ricsinaushcachu, astaun ñuca canda ricsishcani. Caigunas can ñucara cachamushcara ricsinaushcami.

17:26b.JOH.017.026 Shinallara ñuca camba shutira paigunama ricsichishcani, charajpas ricsichisha, can ñucara llaquishca sami llaquina paigunajpi tiachu, ñucas paigunajpi tiachu.

18

18:1b.JOH.018.001 Jesús cai tucuira rimashca huasha, pai yachachishca runaunahua pariju llucshica, Cedro nishca yacu chimbama, shu sisa pambama. Chihui icuca pai yachachishca runaunahua.

18:2b.JOH.018.002 Judaspas, Jesusta entregaj runa, cai sisa pambara ricsica. Ashca cuti Jesús pai yachachishca runaunandi chihui tandarijguna aca.

18:3b.JOH.018.003 Judas, shu monton soldarounara apisha, sacerdote apuunamanda fariseogunamandas cachashca guardaunandi, chi pambama rinauca, velaunahua nina huanguunahuas esparaunahuas.

18:4b.JOH.018.004 Jesusga tucui ima tucungaraushcaras yachasha, ñaupasha rica: Pita mascaunguichi, nica.

18:5b.JOH.018.005 Nazaretmanda Jesusta mascaunchi, ninauca. Jesusga: Ñuca mani, nica. Paigunahua, Judas, Jesusta entregaj runa, chillaira tiauca.

18:6b.JOH.018.006 Jesús paigunara, Ñuca mani, nijpi, runauna huashama tigrasha allpama urmanauca.

18:7b.JOH.018.007 Cuti Jesús: ¿Pita mascaunguichi? tapuca. Paiguna, Nazaretmanda Jesusta, ninauca.

18:8b.JOH.018.008 Jesús cutipasha nica: Ña nicani, Ñuca mani. Canguna ñucara mascasha, caigunara ringaj saquichi, nica.

18:9b.JOH.018.009 Casna tucuca pai rimashca shimi pactaringaj: Can ñucara cushca runaunamanda pitas mana pirdishcani, nisha.

18:10b.JOH.018.010 Shinajpi Simón Pedro, esparara charisha, llucchica, sacerdote atun apura sirvijta chugríchica, paihua ali rinri carara pitisha. Cai sirvij Maleo nishca shutiyuj aca.

18:11b.JOH.018.011 Shinajpi Jesús Pedrora nica: Esparara carai sati. ¿Ñuca Yaya cushca tormendarina vasora manzhu upisha?

18:12b.JOH.018.012 Shinajpi soldaro monton paiguna capitandi judioguna cachashcaunandi Jesusta apinauca, huascahua paita huatanauca.

18:13b.JOH.018.013 Ñaupa punda Jesusta Anas nishcama pushanauca, pai Caifas nishca huarmi yaya asha, Caifas chi huatai sacerdoteuna atun apu aca.

18:14b.JOH.018.014 Chi Caifas judiogunama rimaj aca: Shu runa tucui runauna randimanda huañuna ministirin, nisha.

18:15b.JOH.018.015 Simón Pedro, shu yachachishca runandi Jesusta catinauca. Chishu yachachishca runa sacerdote atun apu ricsishca aca. Pai Jesushua pariju sacerdote atun apu huasi pungüi icuca.

18:16b.JOH.018.016 Astaun Pedro pungu pajllama tiauca. Shinasha chi yachachishca runa, sacerdote atun apu ricsishca asha, pungüi ricuj huarmira rimaca, Pedrora ucuma icuchica.

18:17b.JOH.018.017 Shinajpi pungura cuiraj huarmi Pedrora nica: ¿Manzhu can cai runa yachachishca runaunamanda angui? Pedro cutipasha: Mana, nica.

18:18b.JOH.018.018 Sirvijguna guardaunandi shayarisha ninara tandachinauca. Chiri tucushcamanda cunurianauca. Paigunahua pariju Pedro shayarica cunungaj.

18:19b.JOH.018.019 Sacerdote atun apu Jesusta tapuca pai yachachishca runaunamanda, pai camachishcaras.

18:20b.JOH.018.020 Jesús paita: Ñucaga pajllai runaunara rimashcani, nica. Tucui horas tandarina huasii yachachishcani, templo huasüs, tucui judioguna tandarinaunais yachachishcani. Pacalla imaras mana rimashcanichu.

18:21b.JOH.018.021 ¿Imarasha tapuhuangui ñucara? Uyajgunara tapui imara paigunara rimashcani. Paiguna ñuca rimashcara yachanaun.

18:22b.JOH.018.022 Jesús casna rimajpi, shu chihui tiaj guarda Jesusta sajmaca, nisha: ¿Shinachu sacerdote atun apura cutipangui?

18:23b.JOH.018.023 Jesús cutipaca: Ima manaliras rimashca ajpi, manalira ricuchihuai. Mana shinasha, ¿imamanda sajmahuangui?

18:24b.JOH.018.024 Shinajpi Anas huatashca Jesusta Caifas sacerdote atun apujma cachaca.

18:25b.JOH.018.025 Shinajpi Pedro shayarisha cunuuca. Paita ninauca: ¿Manzhu can pai yachachishca runaunamanda angui? Pedroga, Mana, nica.

18:26b.JOH.018.026 Sacerdote atun apura sirvijgunamanda shuj, rinri chugrichishca runa aillu, paita nica: ¿Manzhu canda ricucani sisa pambai, Jesushua pariju?

18:27b.JOH.018.027 Cuti Pedro: Paita mana ricsinichu, nica. Chi ratollaira gallo cantaca.

18:28b.JOH.018.028 Tutamanda Jesusta Caifaspajmanda taripana huasima pushanauca. Paigunaga taripana huasii mana icunaucachu, shujgunahua ama llutarisha huajliringaj, shina rasha Pascua istara micunara ushangaj.

18:29b.JOH.018.029 Shinajpi Pilato canzhama llucshimuca, paigunama. ¿Imamanda causayachinguichi cai runara? nica.

18:30b.JOH.018.030 Cutipasha, ninauca: Cai runa mana causayuj ajpi, cambajma mana pushamunchimachu aca.

18:31b.JOH.018.031 Shinajpi Pilato paigunara nica: Cangunalla paita pushaichi, canguna yachaira paita taripaichi. Judioguna paita: Ñucanchiga pitas mana huañuchinara ushanchichu, ninauca.

18:32b.JOH.018.032 Caita ninauca Jesús rimashca shimi pactaringaj, imahoras pai ima sami huañuihua huañunara rimaca.

18:33b.JOH.018.033 Shinasha Pilato cuti taripana huasii icuca. Jesusta cayasha tapuca: ¿Can judioguna rey apuchu angui? nisha.

18:34b.JOH.018.034 Jesús paita cutipaca: Caitaga, ¿camba quiquin iyaimanda rimanguichu, mañasha^shujgunachu ñucamanda rimanauca?

18:35b.JOH.018.035 Pilato cutipaca: ¿Ñucaga judiochu ani? Camba llactapurauna sacerdote apuunandi canda ñucama entreganaushca. ¿Imara rashcangui?

18:36b.JOH.018.036 Jesús cutipaca: Ñuca mandana pacha mana cai pachamandachu. Cai pachamanda ajpiga, ñucara sirvijguna macananaunmami, ñuca judiogunama ama cui tucungaj. Astaun ñuca mandana pacha mana caimandachu.

18:37b.JOH.018.037 Shinajpi Pilato paita nica: ¿Shinasha can rey apuchu angui? Jesús cutipaca: Can rey apu angui nisha nihuangui. Chiraigumanda pagaricani; chiraigumanda cai pachama shamucani, cierto shimira rimangaj. Tucui cierto shimira chasquij ñuca shimira uyanmi.

18:38b.JOH.018.038 Pilato paita: ¿Cierto shimiga, imarai? nica. Caita rimashca huasha, Pilato cuti judiogunama llucshisha, paigunara: Ima causaras paihuajpi mana tupanichu, nica.

18:39b.JOH.018.039 Canguna yachaira charinguichi, Pascua istai ñuca cangunama shu runara cacharingaj. Shinasha, ¿ñuca cai judioguna Rey Apura cacharingaj munanguichi?

18:40b.JOH.018.040 Shinajpi tucui pariju caparinauca: Caitaga mana, nisha, astaun Barrabasta munanchi. Barrabasga shuhuaj runa aca.

19

19:1b.JOH.019.001 Shinajpi Pilato Jesusta apisha, paita azutica. 2 Soldarounaga casha llaitura ahuanauca, Jesuspa umai churachinauca. Paita puca llachapahua churachinauca.

19:3b.JOH.019.003 ¡Alabashcangui, ninauca, judioguna Rey Apu! Shina nisha paita sajmanauca.

19:4b.JOH.019.004 Shinajpi Pilato cuti canzhama llucshisha, judiogunara nica: Ricuichi, paita llucchimuni canguna y achangaj, ñuca mana ima causaras tupanichu paihuajpi.

19:5b.JOH.019.005 Jesús canzhama llucshica, casha llaitu paihua umai, puca llachapahua churarishca. Pilato paigunara nica: ¡Ricuichi cai runara!

19:6b.JOH.019.006 Sacerdote apuuna guardaunandi Jesusta ricusha caparinauca: Chacatai, chacatai, nisha. Pilátoga paigunara nica: Cangunalla paita pushaichi, chacataichi. Ñucaga ima causaras paihuajpi mana tupanichu.

19:7b.JOH.019.007 Judioguna cutipanauca: Ley shimira charinchi; ñucanchi ley shimimanda pai huañuna anga, Diospa Churi ani, nishcamanda.

19:8b.JOH.019.008 Pilato caita uyasha maspas manzharicami.

19:9b.JOH.019.009 Cuti taripana huasii icusha, Pilato Jesusta: ¿Maimandara angui can? nisha tapuca. Jesús mana imaras cutipaca.

19:10b.JOH.019.010 Shinajpi Pilato paita: ¿Imarasha mana cutipahuangui? nica. ¿Manzhu yachangui canda chacatangaj ushaira charini, shinallara canda cacharinaras ushaira charini?

19:11b.JOH.019.011 Jesús cutipaca: Ñucahua mana ima ushairas charinguima, mana ahua pachamanda cushcajpi. Chimanda ñucara canda cuj runa yali uchayujmi.

19:12b.JOH.019.012 Caimanda Pilato Jesusta cacharingaj iyarica. Judiogunaga astaun caparisha: Can cai runara cacharisha, mana Cesarba amigochu angui, ninauca. Maicans paillara rey apu tucusha Cesarda chijnin.

19:13b.JOH.019.013 Shinajpi Pilato cai shimira uyasha, Jesusta canzhama pushaca. Taripanai tiarica, Rumi Pata nishca pistui; caita hebreo shimii Gabata nishcami.

19:14b.JOH.019.014 Pascua ista aiichina punzha aca, doce horas chaupi punzha mayan. Shinajpi Pilato nica: ¡Ricuichi canguna Rey Apura!

19:15b.JOH.019.015 Paiguna caparisha: ¡Llucchi, llucchi, paita chacatai! ninauca. Pilatoga: ¿Canguna Rey Apura chacatashachu? nica. Shinajpi sacerdote apuuna: Cesarlla ñucanchi rey apumi, shujpas illanmi, ninauca.

19:16b.JOH.019.016 Shinasha Pilato Jesusta paigunama entregaca chacatangaj. Paiguna Jesusta apisha pushanaucami.

19:17b.JOH.019.017 Jesús paihua cruzta aparisha ricami, Uma Tullu nishca pambama, caita hebreo shimii, Gólgota nishcami.

19:18b.JOH.019.018 Chihui Jesusta chacatanauca. Paindi ishquiras, ali maquima shujta, llaquima shujta, Jesús paiguna chaupi shungüi.

19:19b.JOH.019.019 Pilato shu quillcara quillcaca, cruz ahuai churacami. Shinami quillcashca aca: Nazaretmanda Jesús, judioguna Rey Apu.

19:20b.JOH.019.020 Ashca judioguna cai quillcashcara ricunauca; Jesús chacatashca pamba entero llacta mayambi ashcamanda. Chi quillcashca hebreo, griego, latin shimiunai quillcashca aca.

19:21b.JOH.019.021 Judioguna sacerdote apuuna Pilatora ninauca: Judioguna Rey Apu ama quillcangui, randi: Judioguna Rey Apu mani, nica; shinara quillcai.

19:22b.JOH.019.022 Shinajpi Pilato cutipaca: Ñuca ña quillcashcaga quillcashcami.

19:23b.JOH.019.023 Soldarouna Jesusta chacatashca huasha, paihua churanaunara apisha chuscu partii chaupinauca, caran soldaro shu partira charingaj. Paihua ucu churarina sirana illaj aca, ahuamanda shujllai ahuashca aca.

19:24b.JOH.019.024 Paigunapura ninauca: Ama lliquishunchi caita. Astaun ajllashunchi pihuajchu anga; maican Uchayuj asha apachu. Shina rasha, quillcashcara pactachinauca, cai: Paigunapura ñuca churanara chaupinauca, ñuca llachapamanda maican lichayujta ajllanauca, nisha. Soldarouna shina ranauca.

19:25b.JOH.019.025 Jesuspa cruz rayai, paihua mama, paihua mama ñaña, Cleofaspa huarmi Marías, María Magdalenas chihui pariju tianauca.

19:26b.JOH.019.026 Jesús paihua mamara ricusha, pai llaquishca yachachishca runaras chihui tiajtas ricusha, Jesús paihua mamara nica: Huarmi, riqui camba churira.

19:27b.JOH.019.027 Chi huasha Jesús cai yachachishca runara nica: Riqui camba mamara. Chimanda pacha cai yachachishca runa Jesuspa mamara paihua quiquin huasima pushaca.

19:28b.JOH.019.028 Chimanda huasha, Jesús tucuira ña pactarishcara yachasha, Quillcara pactachingaj: Upinai, nica.

19:29b.JOH.019.029 Chihui shu ayac vinohua undachishca vaso tiaca. Shinajpi shu pútusta tsungachinauca vinohua; caspi pundai huatasha, Jesuspa shimii llutanauca.

19:30b.JOH.019.030 Jesús vinora upishca huasha: Ña pactarishcami, nica. Shina nisha, umara uraima lapusha, espiritura entregacami.

19:31b.JOH.019.031 Shinajpi judioguna Pascua alkhina punzha asha, samana punzhai huañushcauna cruzpi ama saquirinauchu, chi samana punzha atun ista punzha asha, Pilatora mañanauca paiguna changa tulluunara paquinauchu, paigunara cruzmanda anzhuchinauchu.

19:32b.JOH.019.032 Soldarouna shamujpi, changaunara paquinauca shu runara chishu runaras, Jesushua pariju chacatashcaunara.

19:33b.JOH.019.033 Shinajpi Jesusma shamusha, pai ña huañushcara ricusha, paihua changara mana paquinaucachu.

19:34b.JOH.019.034 Astaumbas shu soldaro Jesusta costillaspi tucsica lanzahua. Chimanda yahuarndi yacundi llucshinauca.

19:35b.JOH.019.035 Chita ricuj runa riman. Pai rimashca shimi ciertomi. Pai rimashca shimi cierto ashcara paimi yachan, canguna shinallara quirinauchu.

19:36b.JOH.019.036 Cai tucuira rashca aca Quillcashca pactaringaj, shina nisha: Paimanda ima tulluras mana paquishcachu anga.

19:37b.JOH.019.037 Shinallara shu Quillcashcai: Paiguna tucshishca runara ricunaungami, nin.

19:38b.JOH.019.038 Chimanda huasha, Arimatea llactamanda José, pai Jesús yachachishca runa asha, astaun pacallami judiogunara manzhashcaraigu, Pilatora mañaca: Lugarda cuhuai, nisha, Jesuspa aichara cruzmanda llucchingaj. Pilato lugarda cucami. Shinajpi José shamuca, Jesuspa aichara llucchicami.

19:39b.JOH.019.039 Shinallara shamuca Nicodemo, pai ñaupa Jesusma tutai shamuj, mirrahua, aloehua masashca gusto asnaj ambira apamusha, patsac libra tupura.

19:40b.JOH.019.040 Jesuspa aichara apinauca, llachapahua pillunauca gusto asnajgunahua, judioguna pambana yachaira.

19:41b.JOH.019.041 Jesús chacatashca pamba mayambi shu sisa pamba tiaca. Sisa pambai shu mushuj pambana uctu tiaca, chihui pitas chara mana pambashcachu aca.

19:42b.JOH.019.042 Pascua alichina punzha ashcamanda, chi pambana uctu mayanlla ajpi, chillai Jesusta chingachinauca.

20

20:1b.JOH.020.001 Semana callarina punzhai, tuta ucura, chara llandu ashcai, María Magdalena Jesús pambashcama shamuca. Rumi anzhuchishcara ricuca.

20:2b.JOH.020.002 Shinajpi María callpasha rica Simón Pedroma, chishu yachachishca runamas, pai Jesús llaquishcara. Paigunara nica: Pambashcamanda Señorda apanaushca. Illanmi. Maibi churashcaras mana yachanchichu.

20:3b.JOH.020.003 Pedro, chishu yachachishca runandi llucshisha, pambashcama rinauca.

20:4b.JOH.020.004 Cai ishqui runa pariju callpanauca. Chishujga Pedromanda yali uctalla callpaca, ñaupalla pambashcama pactaca.

20:5b.JOH.020.005 Cumurisha ricungaj llachapaunara sirijta ricuca. Shinashas mana icucachu.

20:6b.JOH.020.006 Huasha, Simón Pedro paita catisha pactamuca; pambashca uctui icusha siriu llachapaunara ricuca.

20:7b.JOH.020.007 Shinallara umai pillushca llachapara ricuca, mana chishu llachapaunahua pariju, astaun shujpi pillushca aca.

20:8b.JOH.020.008 Shinajpi chishu yachachishca runa, chi ñaupa pactamuj pambashcama, país shinallara icuca. Ricusha quiricami.

20:9b.JOH.020.009 Paiguna Quülcashcai quillcashcara Jesús huañushcaunamanda causarínara chara mana intindinaucachu.

20:10b.JOH.020.010 Yachachishca runauna paiguna huasima tigranauca.

20:11b.JOH.020.011 Astaun María pambashca canzhai huacasha tiauca; huacashallara pambashcara ricungaj cumurica.

20:12b.JOH.020.012 Ishqui angelda ricuca, yurajta churarishcaunara. Shuj umama, shujtas chaquima Jesús sirishcai tianauca.

20:13b.JOH.020.013 Angelguna paita: Huarmi, ninauca, ¿imamanda huacaunguiri? Maríaga: Ñuca Señorda apashcamanda, nica. Maibi paita churashcaras mana yachanichu.

20:14b.JOH.020.014 Shina rimasha, María huashama voltiarisha, Jesús chihui shayauta ricuca. Paita Jesús ajtara mana ricsicachu.

20:15b.JOH.020.015 Jesús paita: Huarmi, nica, ¿imarasha huacaunguirí? ¿Pita mascaunguiri? Maríaga, sisa pambara cuirajmi iyasha, nica: Señor, can paita apashca ajpiga, maibi churashcangui cuentahuai. Ñuca paita apasha.

20:16b.JOH.020.016 Jesusga: ¡María! nica. Paiga voltiarisha ricusha: ¡Raboni! nica. Caimi, Yachachij, nin.

20:17b.JOH.020.017 Jesús paita nica: Ama llangahuaichu. Chara Yayajma mana sicashcanichu. Ñuca uquiunama ri; paigunara rimairi: Ñuca Yayajma, canguna Yayajmas, ñuca Diosma, canguna Diosmas sicauni, nica.

20:18b.JOH.020.018 María Magdalena rica yachachishca runaunama cuentangaj imasna Señorda ricushcaras, pai rimashcaras.

20:19b.JOH.020.019 Chi quiquin punzha, ña chishiyaupi, semana callarina punzha asha, yachachishca runauna tandarinauca. Paiguna tandariushcai pungu ishcashca aca, judiogunara manzhashcamanda. Jesús shamusha, paiguna chaupi shungüi shayarisha, paigunara: Cushiyaichi, nica.

20:20b.JOH.020.020 Caita rimashca huasha, Jesús paihua maquira paihua costillastas ricuchica. Yachachishca runauna Señorda ricusha cushiyanaucami.

20:21b.JOH.020.021 Shinajpi Jesús paigunara nica: Cushiyaichi. Yaya ñucara cachashcasna, shinallara cangunara cachauni.

20:22b.JOH.020.022 Casna rimashca huasha, Jesús paiguna ahuara samaca, nisha: Santo Espiritura apichi.

20:23b.JOH.020.023 Maicanma ucharashcaunara llushpichisha, llushpichishca anaunmi. Maicanmas ucharashcaunara saquichisha, saquichishca anaunmi.

20:24b.JOH.020.024 Tomasga, chunga ishquimanda shuj, Chapa Huahua nishca, Jesús shamushcai illacami.

20:25b.JOH.020.025 Chishu yachachishca runauna paita ninauca: Señorda ricushcanchi. Tomás cutipaca: Paihua maquii clavashca uctuunara mana ricusha, ñuca rerora clavo uctuunai mana satisha, ñuca maquiras costillaspi mana satisha, mana quirishachu.

20:26b.JOH.020.026 Pusac punzha huasha, cutillara yachachishca runauna ucui tianauca, Tomás paigunahua tiauca. Jesús icuca, pungu ishcashca asha. Paiguna chaupi shungüi shayarisha: Cushiyaichi, nica.

20:27b.JOH.020.027 Shinajpi Jesús Tomasta: Rerora apami, nica, ñuca maquiunara riqui, nica. Caima maquira chutachi, costillaspi sari. Ama mana quirij tucui, astaun quirij tucui.

20:28b.JOH.020.028 Tomás cutipaca: Ñuca Señor, ñuca Dios, nisha.

20:29b.JOH.020.029 Jesús paita: Can, Tomás, ricushcamandalla quirishcangui. Astaun mana ricusha quirijguna bendiciashca anaungami.

20:30b.JOH.020.030 Jesús shinallara ashca munanaita ricurinaunara rarcami pai yachachishca runauna ñaupajpi, chiguna cai quillcai mana quillcashcachu tian.

20:31b.JOH.020.031 Caigunara quillcashcami Cristo Diospa Churi ashcara quiringaj, canguna quirisha causaira charingaj paihua shutii.

21

21:1b.JOH.021.001 Chimanda huasha, Jesús cuti pai yachachishca runaunama ricurimuca Tiberias nishca lamar patai. Cai samii ricurica.

21:2b.JOH.021.002 Simón Pedro, Chapa Huahua nishca Tomás, Galileai Canámanda Natanael, Zebedeo churiuna, shu ishqui Jesús yachachishca runaunandi pariju tianauca.

21:3b.JOH.021.003 Simón paigunara nica: Licangaj riuni. Chishujguna: Canhua catimunchi, ninauca. Risha, canoai icunauca. Tuta pagarijta imaras mana apinaucachu.

21:4b.JOH.021.004 Punzhayaushcai, Jesús pulayai shayarica. Yachachishca runaunaga pai Jesús ajta mana ricsinaucachu.

21:5b.JOH.021.005 Jesús: Churihuauna, nica, ¿imahuaras micunara charinguichi? illan, ninauca.

21:6b.JOH.021.006 Paigunara nica: Licara ali maqui partima shitai, tupanguichimi. Shinajpi licara shitasha, ashca aichahua apirica. Licara mana imasna rashas llucchihuaj aca, ashca aichahua tiashcamanda.

21:7b.JOH.021.007 Shinajpi chi Jesús llaquishca yachachishca runa Pedrora nica: Señormi. Simón Pedro, Señor ajta uyasha, churanara churarisha chumbillica, llatan ashcamanda; chasna rasha yacuma pahuaca.

21:8b.JOH.021.008 Chishu yachachishca runauna canoandi shamunauca, licara aisasha, paiguna yacu patamanda mana yapa carui anauca, patsaj metro tupullai.

21:9b.JOH.021.009 Allpama pactamujpiga, ninara apichishcara, nina ahuai aichahua churashcaras ricunauca, tandandi.

21:10b.JOH.021.010 Jesús paigunara nica: Cuna apishca aichahuamanda apamichi.

21:11b.JOH.021.011 Simón Pedro sicaca, licara pulayama aisamusha. Atun aichahuahua undashca aca, shu patsaj pichca chunga quinsa ashca. Shina tupu ashas, lica mana lliquiricachu.

21:12b.JOH.021.012 Jesús paigunara: Micuj shamichi, nica. Pihuas paita tapunara mana ushanaucachu: Canga ¿pitangui? nisha, pai Señor ashcara riparasha.

21:13b.JOH.021.013 Shinajpi Jesús shamujpi, tandara apisha paigunara cuca, shinallara aichahuaras.

21:14b.JOH.021.014 Caita ña quinsa cuti Jesús pai yachachishca runaunama ricurimuca pai causarishca huasha.

21:15b.JOH.021.015 Micushca huasha, Jesús Simón Pedrora nica: Simón, Jonaspa churi, ¿caigunamanda yali ashcara llaquihuanguichu? Pedro cutipaca: Ari, nisha, can yachangui, Señor, ñuca canda llaquinimi. Jesús paita: Ñuca borrego huahuaunara carangui, nica.

21:16b.JOH.021.016 Ishqui cuti Jesús paita: Simón, Jonaspa churi, ¿ashcara llaquihuanguichu? nica. Ari, nica, can yachangui, Señor, ñuca canda llaquinimi. Jesús paita: Ñuca borregounara carangui, nica.

21:17b.JOH.021.017 Jesús quinsa cuti tapusha: Simón, Jonaspa churi, nica, ¿llaquihuanguichu can? Pedroga, Jesús quinsa cuti tapushcai: Llaquihuanguichu, nishcamanda llaquiricami. Cutipaca: Señor, nisha, tucuira yachangui; ñuca canda llaquishcara yachangui. Jesús paita: Ñuca borregounara carangui, nica.

21:18b.JOH.021.018 Cierto pacha canda nini: Malta ashcai, canlla churaricangui; maima munashcamas purij acangui. Randi, can rucu tucushcai, maquiunara chutachingui, shujga canda churachingami, can mana munashcama canda pushanaungami.

21:19b.JOH.021.019 Caita nica Jesús, Pedro imahuara huañungarauca, Diosta sumacyachingaj. Shina rimasha, Catihuai, nica.

21:20b.JOH.021.020 Pedro voltiarisha, Jesús llaquishca yachachishca runara catimujta ricuca. Caiga Jesuspa rayai quimirisha sirij aca tuta micushcai, Jesusta tapusha: Señor, ¿pimi canda huañuchingaj entregangachu? nisha.

21:21b.JOH.021.021 Pedro paita ricusha Jesusta nica: Señor, ¿cai runaga imara?

21:22b.JOH.021.022 Jesús: Ñuca cuti tigramungagama pai tiauchu munasha, ¿canda imara? nica. Canga, catihuai.

21:23b.JOH.021.023 Shinasha uquiunapura cai shimi mirarica, cai yachachishca runa mana huañunachu, nisha. Astaun Jesús mana nicachu: Mana huañunachu, randi shina nicami: Cai runa ñuca cuti tigramungagama tiauchu ñuca munasha, ¿canda imara?

21:24b.JOH.021.024 Caimi cai tucuira rimaj yachachishca runa. Cai tucuira quillcacami. Pai rimashcauna cierto ajta yachanchi. 25 Shinallara Jesús rashcauna shujguna ashcara tianaun; caranda chican chican quillcajpiga, entero cai pacha mana pactanmachu aca quillcashca librounara charingaj yachin. Amen.