1 Peter (Ojibwa)

11

11:1b.1PE.011.001 ᓃᓐ ᐲᑕᕒ ᒋᓴᔅ X ᐅᑎᔑᓂᔕᐙᑲᓇᓐ᙮ ᑭᑑᔑᐲᐊᒪᐎᓂᓂᒻ ᑮᓇᐙ ᑭᔐᒪᓂᑑ ᑳᑮᐅᓈᐸᒥᓀᒃ, ᑳᐲᐎᑌᐌᑖᑯᓯᔦᒃ ᐅᒫ ᐊᑮᕽ, ᒥᓯᐌ ᑲᔦ ᐌᑎ ᑳᐃᔑᐊᔨᑖᔦᒃ, ᐹᑕᔅ ᐊᑮᕽ, ᑲᓬᐁᔑᔭ, ᑳᐸᑑᔕ, ᐁᔕ, ᐱᑎᓂᔭ ᑲᔦ᙮

11:2b.1PE.011.002 ᑮᓇᐙ ᐄᑐᒃ ᑭᑮᐃᔑ ᑮᔖᒋ ᐅᓈᐸᒥᑯᐙ ᐅᑎᓀᑕᒧᐎᓂᕽ ᑭᔐᒪᓂᑑ ᑳᐅᔫᓯᒥᓐᒡ ᐁᐐᐋᐸᒋᐃᓀᒃ᙮ ᑭᔐᒪᓂᑑ ᐅᑕᒑᑾᓐ ᑲᔦ ᑭᑮᐃᔑᐃᑯᐙᒻ ᐁᐐᑎᐯᓂᒥᓀᒃ, ᑮᓇᐙ ᓴ ᒋᓇᐃᑕᐌᒃ ᒋᓴᔅ X, ᒋᐯᑭᐃᑯᐌᒃ ᑲᔦ ᐅᒥᔅᑸᒻ᙮ ᑕᑲ ᔕᐌᑖᑯᓯᐎᓐ, ᐱᓵᓂᓯᐎᓐ ᑲᔦ ᑭᑲᑎᐱᓇᐌᐎᓯᒻ ᑫᒨᔥᑭᓀᔥᑳᑯᔦᒃ᙮

11:3b.1PE.011.003 ᑕᑲ ᑕᒥᑴᒋᐌᑖᑯᓯᐗᓐ ᑳᐅᑭᔐᒪᓂᑑᒥᒡ ᑳᐅᑌᑌᒡ ᑲᔦ ᑳᑎᐯᓂᒥᓇᕽ ᒋᓴᔅ X᙮ ᑭᔐᒪᓂᑑ ᐄᑐᒃ ᑭᑮᒦᓂᑯᓈᓐ ᐅᔥᑭᐱᒫᑎᓯᐎᓐ ᑫᐅᒋᐊᔮᐗᕽ ᐃᐃ ᐊᐯᓂᒧᐎᓐ ᑳᑫᒋᓈᐅᐌᑖᑾᓂᓂᒃ ᐃᐃᒫ ᑳᐅᒌᓂᒃ ᑳᑮᐃᔑᑮᐌᐱᒫᑎᓯᐋᒡ ᒋᓴᔅ Xᑕᓐ ᓂᐳᐎᓂᕽ ᐅᒋ᙮

11:4b.1PE.011.004 ᒦᑕᔥ ᑳᐅᒋᐲᑖᐗᕽ ᒋᑎᐱᓇᐌᐎᓯᐗᕽ ᐃᐃᐌᓂ ᑭᔐᒪᓂᑑ ᑳᐐᒦᓂᓇᕽ ᐐᑳ ᑫᓂᔑᐗᓈᑕᓯᓂᓂᒃ, ᐐᑳ ᑲᔦ ᑫᓂᐊᑯᓈᑾᓯᓂᓂᒃ, ᑫᓀᐱᒋ ᐅᓂᔑᔑᓂᓂᒃ ᑲᔦ᙮ ᑮᓇᐙ ᓴ ᐅᓄ ᑳᑲᓇᐌᑕᒫᑰᐌᒃ ᑭᒋᑮᔑᑯᕽ᙮

11:5b.1PE.011.005 ᑮᓇᐙ ᐄᑐᒃ ᑭᑑᒋᑲᓇᐌᓂᒥᑰᐎᓯᒻ ᑭᔐᒪᓂᑑ ᐅᒪᔥᑲᐎᓰᐎᓂᕽ ᐁᑌᐺᔦᑕᒣᒃ ᑭᐱᒫᒋᐃᑰᐎᓂᐙ ᐋᔕ ᐁᑮ ᑮᔑᓈᑾᒃ ᐁᐐᓈᑯᒋᑳᑌᒃ ᐃᔥᒀᒡ ᑮᔑᑲᒃ᙮

11:6b.1PE.011.006 ᒦᑕᔥ ᐅᐅ ᐐᑫ ᐅᒋᒥᓉᑕᒧᒃ, ᐋᓇᐐᓐ ᓅᑯᒻ ᐊᒋᓇ ᐁᐅᒋᒫᓀᑕᒣᒃ ᐃᐃ ᑳᐃᔑᑲᒀᑕᑭᑑᔦᒃ, ᒥᓯᐌ ᐁᐃᔑᑯᒋᐃᑰᐎᓯᔦᒃ᙮

11:7b.1PE.011.007 ᒦᑕᔥ ᐃᐃ ᑳᐅᒋ ᐃᔑᓭᔦᒃ ᒋᑭᑫᑖᑾᒃ ᑭᑌᐺᔦᑕᒧᐎᓂᐙ ᑌᐺ ᐁᐋᐗᕽ᙮ ᐃᓇᔥᑫ ᐅᓵᐙᐱᑯ ᔔᓂᔮᐗᓯᓐ ᐱᓵᓂᑯ ᑫᓂᔑᐗᓈᒋᒋᑲᓂᐎᐸᓐ, ᐃᔥᑯᑌᕽ ᐃᓴ ᐃᔑᑲᑴᒋᐋᑲᓂᐎ᙮ ᐃᓂ ᑕᔥ ᑭᑌᐺᔦᑕᒧᐎᓂᐙ ᓇᐗᒡ ᑳᑭᒋ ᐃᓀᑖᑾᒃ ᐊᐲᒡ ᐐᓐ ᐊᐊ ᐅᓵᐙᐱᑯ ᔔᓂᔮᐗᓯᓐ, ᒦᐯᔑᑾᓐ ᐁᔑᑲᑴᒋᒋᑳᑌᒃ, ᒫᓄ ᓴ ᒋᔕᔒᐱ ᐊᔮᔦᒃ᙮ ᑮᓇᐙ ᑕᔥ ᑭᑲᑌᐱᓈᒻ ᑫᐅᒋ ᒥᓍᐸᒥᑰᔦᒃ, ᑫᐅᒋᑭᒋ ᐃᓀᓂᒥᑰᔦᒃ, ᑫᐅᒋ ᑭᑌᓂᒥᑰᔦᒃ ᑲᔦ ᐊᐲ ᒋᓴᔅ X ᓈᑯᓯᒡ᙮

11:8b.1PE.011.008 ᐋᓇᐐᓐ ᒪᔑ ᐁᑮᐙᐸᒫᓯᐌᒃ ᔖᑰᒡ ᐃᑕᔥ ᑭᓵᑭᐋᐙ᙮ ᐋᓇᐐᓐ ᑲᔦ ᓅᑯᒻ ᒪᔑ ᐁᐙᐸᒫᓯᐌᒃ, ᔖᑰᒡ ᑭᑌᐺᔦᓂᒫᐙ, ᑭᒨᔥᑭᓀᔥᑳᑯᐙᒻ ᑲᔦ ᐃᐃ ᑫᑌᐐᒋᑳᑌᓯᓄᑭᐸᓐ, ᑳᑭᒋ ᐃᓀᑖᑾᒃ ᒥᓉᑕᒧᐎᓐ᙮

11:9b.1PE.011.009 ᐋᓃᔥ ᐋᔕ ᑭᑌᐱᓈᒻ ᐁᐱᒫᒋᐃᑰᐎᓯᔦᒃ, ᑭᑌᐺᔦᑕᒧᐎᓂᐙᕽ ᐁᐅᒌᒪᑲᒃ᙮

11:10b.1PE.011.010 ᒦ ᓴ ᑕᔥ ᐅᐅᐌᓂ ᐱᒫᒋᐃᑰᐎᓯᐎᓂᓂ ᐃᑭ ᐅᑖᓈᕽ ᑳᑮᑮᑭᑑᑕᒪᐙᐙᒡ ᑭᔐᒪᓂᑑᓐ ᐌᐌᓂ ᑳᑮᐊᑑᓀᐊᒧᐙᒡ, ᑳᑮᑲᑴ ᑭᑫᑕᒧᐙᒡ ᑲᔦ ᐁᑮᓃᑳᓂᑕᔑᑕᒧᐙᒡ ᐅᐅ ᒦᑭᐌᐎᓂᓂ ᑭᔐᒪᓂᑑᓐ ᑫᒦᓂᒥᓀᒃ᙮

11:11b.1PE.011.011 ᐅᑮᑲᑴ ᑭᑫᑖᓈᐙ ᑲᔦ ᐊᐌᓀᓇᓐ ᑫᐱᑕᑯᔑᓂᓂᒡ, ᐋᓃᓐ ᑲᔦ ᒪᔮ ᐊᐲ ᐃᔑᓭᓂᒃ ᐃᐃ ᑫᐃᔑᐌᐸᓂᓂᒃ᙮ ᐃᓂ ᓴ ᑳᑮ ᑭᑭᔥᑲᐙᐙᒡ Xᑕᓐ ᐅᑕᒑᑯᓂ ᐅᑮᐐᑕᒫᑯᐙᓐ ᐁᐐᐱ ᑲᒀᑕᑭᑑᓂᒡ Xᑕᓐ ᐲᓂᔥ ᑕᔥ ᒋᐊᓂᑭᒋ ᐃᓀᑖᑯᓯᓂᒡ᙮

11:12b.1PE.011.012 ᑭᔐᒪᓂᑑᓐ ᑕᔥ ᐅᑮᐙᐸᑕᐃᑯᐙᓐ ᐅᑕᓄᑮᐎᓂᐙᓐ ᐐᓀᑕᐙ ᒋᐅᒋ ᒥᓄᓭᓯᒀ, ᑮᓇᐙ ᐅᔕ ᑲᔦ ᒋᐅᒋ ᒥᓄᓭᐌᒃ᙮ ᐅᑮᑕᔑᑖᓈᐙᓐ ᐃᓂᐌᓂᐗᓐ ᑮᓇᐙ ᓅᑯᒻ ᑳᐱᓅᑕᒣᒃ᙮ ᒦ ᓴ ᐃᐌ ᑳᑮᐅᒋᓅᑕᒣᒃ ᐃᑭᐌᓂᐗᒃ ᒥᓍᒋᒧᐎᓐ ᑳᑮᐐᑕᒪᐎᓀᒀ ᑳᐸᐹ ᑎᐹᒋᒧᐙᒡ ᑳᒪᔥᑲᐎᓰᔥᑳᑯᐙᒡ ᑭᔐᒪᓂᑑᓐ ᐅᑕᒑᑯᓂ ᑭᒋᑮᔑᑯᕽ ᑳᑮᐱᐅᒋ ᐲᒋᓂᔕᐅᒥᓐᒡ᙮ ᒦᐗᓐ ᑕᔥ ᐅᓄᐌᓂᐗᓐ ᐐᑫ ᑲᔦ ᐁᒐᓬᐊᒃ ᑳᒥᓴᐌᑕᒧᐙᒡ ᒋᓂᓯᑐᑕᒧᐙᒡ᙮

11:13b.1PE.011.013 ᑕᑲ ᑕᔥ ᑭᓈᓈᑲᑕᐌᑕᒧᐎᓂᐙᕽ ᐃᔑᑮᔐᑕᒧᒃ ᐙᐃᔑᒋᑫᔦᒃ᙮ ᒨᔕᒃ ᐃᑯ ᐙᐹᑲᒣᑕᒧᒃ᙮ ᒥᓯᐌ ᐃᔑᐊᐯᓂᒧᓄᑕᒧᒃ ᔕᐌᑖᑯᓯᐎᓐ ᑳᐐᒦᓂᑰᔦᒃ ᐊᐲ ᒋᓴᔅ X ᓈᑯᐃᓐᒡ᙮

11:14b.1PE.011.014 ᓇᐃᑕᐎᒃ ᓴ ᑭᔐᒪᓂᑑ, ᑫᑯ ᑲᔦ ᐸᑭᑎᓂᑎᓱᑫᒃ ᒋᐃᔑᓈᐱᓈᑯᓯᔦᒃ ᑳᑮᐃᔑ ᓂᑖ ᒥᓴᐌᒋᑫᔦᒃ ᒣᒀ ᑮᑲᑮᐹᑎᓯᔦᑭᐸᓐ ᒣᒀ ᑮᑭᑫᓂᒫᓯᐌᒃ X᙮

11:15b.1PE.011.015 ᐊᐊ ᐄᑐᒃ ᑳᑮᑲᓅᓂᓀᒃ ᐋᐱᒋ ᐯᑳᑎᓯ, ᒦᑕᔥ ᑫᑮᓇᐙ ᐯᔑᑾᓐ ᑲᑭᓇ ᑫᑰᓐ ᑳᐃᔑᒋᒋᑫᔦᒃ ᐃᔑᐯᑳᑎᓯᒃ᙮

11:16b.1PE.011.016 ᑭᒋᒪᓯᓇᐃᑲᓐ ᐃᔑᐲᐃᑳᑌ: ᐯᑳᑎᓯᒃ ᐋᓃᔥ ᓃᓐ ᓂᐯᑳᑎᔅ᙮

11:17b.1PE.011.017 ᐁᐃᔑᓂᑳᓀᒃ ᑕᔥ ᓂᑌᑌ ᑮᐊᓇᒥᐁᑕᐌᒃ ᐊᐊ ᐯᔑᑾᓐ ᑳᐃᔑᑲᓇᐙᐸᒫᒡ ᐁᑕᓱᐯᔑᑯᓂᒡ ᑲᑭᓇ ᐯᒫᑎᓯᓂᒡ ᐋᓃᓐ ᐁᔑᒋᑫᓂᒡ, ᑕᑲ ᑕᔥ ᒥᓂᒃ ᐃᑯ ᑫᐱᒫᑎᓯᔦᒃ ᐅᐅᒫ ᐊᑮᕽ ᑳᐃᔑᐲᐎᑌᐌᑖᑯᓯᔦᒃ, ᐃᔑᐱᒫᑎᓯᒃ ᐁᑯᑖᓀᓂᒣᒃ ᑭᔐᒪᓂᑑ᙮

11:18b.1PE.011.018 ᐋᓃᔥ ᑳᑮᐃᔑᐱᒫᑎᓯᔦᒃ ᐅᑖᓈᕽ ᑳᑮᐃᓇᐌᒀ ᑭᑫᑌᔭᐋᒥᐙᒃ, ᑳᐐᓐ ᑫᑰᓐ ᑮᐃᓈᐸᑕᓯᓅᓐ᙮ ᑭᑭᑫᑖᒻ ᐄᑐᒃ ᐌᑯᓀᓐ ᑳᑎᐸᐃᑳᑳᓂᐗᕽ ᒋᑎᐯᓂᒥᑯᓯᐌᒃ ᑳᑮᓂᑖ ᐃᔑᐌᐱᓯᔦᒃ᙮ ᑳᐐᓐ ᐙᐹᐱᑯ ᔔᓂᔮ, ᐅᓵᐎ ᔔᓂᔮ ᑲᔦ ᑮᐋᐸᑎᓯᓰᐗᒃ᙮

11:19b.1PE.011.019 ᐃᐃᐌᓂ ᐅᔕ X ᑳᐋᑾᑭᑌᓂᒃ ᐅᒥᔅᑸᒻ ᑮᐋᐸᑕᓂᓂ᙮ ᐐᓐ ᐄᑐᒃ ᑳᑮᒫᓇᒑᓂᔐᓯᐎᒡ ᑳᐲᑯᓈᑯᓯᓯᒃ, ᑳᒫᑭᓯᓯᒃ ᑲᔦ ᑳᑮᐸᑭᑎᓈᓱᐙᑳᓂᐎᒡ᙮

11:20b.1PE.011.020 ᐐᓐ X ᑮᑮᔖᒋᐅᓈᐸᒫ ᒋᑆ ᐅᔑᒋᑳᑌᓂᒃ ᐅᐅ ᐊᑮᓂ, ᓅᑯᒻ ᑕᔥ ᑮᓈᑯᒋᑲᓂᐎ ᐋᔕ ᐁᐯᔓᓈᑾᓂᓂᒃ ᑳᐐᑮᔑᓈᑾᓂᓂᑭᓐ ᑲᑭᓇ ᑫᑰᓇᓐ᙮ ᑮᓇᐙ ᓴ ᑳᑮᐅᒋᓈᑯᒋᑲᓂᐎᒡ᙮

11:21b.1PE.011.021 ᐐᓐ ᐃᑕᔥ ᐅᒋ ᑳᐅᒋᑌᐺᔦᓂᒥᒣᒃ ᑭᔐᒪᓂᑑᓐ ᐁᑮᑮᐌᐱᒫᑎᓯᐃᑯᒡ ᐃᐃᒫ ᓂᐳᐎᓂᕽ ᐅᒋ, ᐁᑮᐃᔑᐃᑯᒡ ᑲᔦ ᒋᑭᒋ ᐃᓀᑖᑯᓯᒡ᙮ ᐐᓐ ᓴ ᑳᐅᒋᑌᐺᔦᓂᒥᒣᒃ, ᑳᐅᒋᐊᐯᓂᒧᓄᑕᐎᒣᒃ ᑲᔦ ᑭᔐᒪᓂᑑᓐ᙮

11:22b.1PE.011.022 ᐃᓇᔥᑫ ᑕᔥ ᓅᑯᒻ ᑭᑑᒋᐯᑭᐃᑎᓱᒻ ᐁᓇᐃᑕᒣᒃ ᐃᐃ ᑌᐺᐎᓐ, ᒦᑕᔥ ᐃᐃ ᐌᐌᓂ ᑳᐅᒋᓵᑭᐁᒀ ᑮᒋᐅᑌᐺᑕᒨᒥᐙᒃ᙮ ᐐᑫ ᓴ ᓵᑭᐃᑎᒃ, ᒥᓯᐌ ᐱᑯ ᑭᑌᐃᐙᕽ᙮

11:23b.1PE.011.023 ᐋᔕ ᐄᑐᒃ ᑭᑮᐋᒋᓂᑖᐎᑭᒻ᙮ ᑳᐐᓐ ᑕᔥ ᑭᑮᐅᑎᓇᓰᒻ ᑭᓃᑭᐃᑯᐙᕽ ᑫᓂᔑᐗᓈᑕᒃ᙮ ᐃᐃᒫ ᐅᔕ ᑭᑮᐅᑎᓈᒻ ᑭᔐᒪᓂᑑ ᐅᑎᑭᑐᐎᓂᕽ ᑳᐱᒫᑕᓂᓂᒃ, ᐐᑳ ᑲᔦ ᑫᐴᓂᓭᓯᓂᓂᒃ᙮

11:24b.1PE.011.024 ᑭᒋᒪᓯᓇᐃᑲᓐ ᐃᔑᐲᐃᑳᑌ: ᑲᑭᓇ ᓴ ᐯᒫᑎᓯᐙᒡ ᒪᔥᑯᓰᕽ ᐃᔑᓈᑯᓯᐗᒃ; ᐃᐃ ᑕᔥ ᑳᐃᔑᑭᒋ ᐃᓀᑖᑯᓯᐙᒡ ᒦᐃ ᐁᓀᑖᑾᓂᓂᒃ ᑖᐱᔥᑰ ᐙᐱᑾᓐ ᐱᑾᑕᑲᒥᒃ ᑳᔭᔮᒃ᙮ ᐃᐃ ᑕᔥ ᒪᔥᑯᓯ ᐹᑌ, ᐃᐃ ᑲᔦ ᐙᐱᑾᓐ ᐸᑭᓯᓐ,

11:25b.1PE.011.025 ᐃᐃᐌᓂ ᑕᔥ ᐐᓐ ᐅᑎᑭᑐᐎᓐ ᐊᐊ ᑳᑎᐯᒋᑫᒡ ᓀᐱᒡ ᑕᓂᔭᔮᓂ᙮ ᒦ ᓴ ᑕᔥ ᐅᐅ ᐃᑭᑐᐎᓐ ᑳᑮᒥᓍᒋᒧᑖᑰᔦᒃ᙮

12

12:1b.1PE.012.001 ᑕᑲ ᓴ ᑕᔥ ᐌᐱᓇᒧᒃ ᑲᑭᓇ ᑳᒪᒋᓈᑾᑭᓐ, ᑲᑮᓇᐎᔥᑭᐎᓐ, ᐊᓇᒥᐁᑳᓱᐎᓐ, ᐋᔮᔐᓂᑎᐎᓐ, ᒪᒋᑕᔑᑎᐎᓐ ᑲᔦ᙮

12:2b.1PE.012.002 ᑖᐱᔥᑰ ᐅᔥᑲᐱᓅᒌᔕᒃ ᑳᓂᑖᐎᑭᐙᒡ ᑳᐐᓅᑌᓅᓂᐙᒡ, ᒨᔕᒃ ᐃᑯ ᓅᑕᔮᐹᑴᓄᑕᒧᒃ ᐃᐃ ᐐᑫ ᑳᐯᑳᑲᒥᒃ ᒎᒎᔖᐳ ᑫᒥᓄᔥᑳᑯᐙᒡ ᑭᑕᒑᑯᐙᒃ, ᒥᓂᒀᑕᒧᒃ ᐃᐃᒫ ᒋᐅᒋᒫᒌᑭᔦᒃ ᒋᐱᒫᒋᐃᑰᐎᓯᔦᒃ᙮

12:3b.1PE.012.003 ᐋᔕ ᐄᑐᒃ ᑮᓇᐙ ᑭᑮᒪᓯᐱᑕᒧᐙᒻ ᐅᒥᓄᑑᑖᑫᐎᓐ ᑳᑎᐯᒋᑫᒡ᙮

12:4b.1PE.012.004 ᐱᓈᓯᑲᐎᒃ ᑳᑎᐯᒋᑫᒡ, ᑳᐱᒫᑎᓯᒡ ᐊᓯᓐ ᑳᑮᐋᓇᐌᓂᒥᑯᒡ ᐯᒫᑎᓯᓂᒡ, ᑭᔐᒪᓂᑑᓐ ᑕᔥ ᐐᓐ ᑳᑮᐅᓇᑭᒥᑯᒡ, ᐁᑮᑭᒋ ᐃᓀᓂᒥᑯᒡ ᑲᔦ᙮

12:5b.1PE.012.005 ᒦᑕᔥ ᑫᑮᓇᐙ ᐯᔑᑾᓐ ᐁᑎᓄᐎᔦᒃ ᐊᓯᓃᒃ ᑳᐱᒫᑎᓯᐙᒡ, ᑭᑎᔑᐋᐸᑎᓯᒻ ᐃᐃ ᑳᐅᔑᒋᑳᑌᒃ ᐊᒑᑯᐙᑳᐃᑲᓐ᙮ ᒦᑕᔥ ᐃᐃᒫ ᑫᑕᔑ ᐃᓍᓱᔦᒃ ᐊᓇᒥᐁᐎᑭᒫᒃ ᑳᐋᐸᒋᐃᑯᐙᒡ ᑭᔐᒪᓂᑑᓐ, ᒋᐸᑭᑎᓇᒪᐌᒃ ᑳᐊᒑᑯᐌᑖᑾᓂᓂᑭᓐ ᐸᑭᑎᓈᓱᐎᓇᓐ, ᒦᐗᓐ ᐄᑐᒃ ᑳᒥᓍᐸᑕᕽ ᐅᒋ ᒋᓴᔅ Xᑕᓐ᙮

12:6b.1PE.012.006 ᑭᒋᒪᓯᓇᐃᑲᓐ ᐃᔑᐲᐃᑳᑌ: ᐃᓇᔥᑫ ᓂᑕᓵ ᐊᓯᓐ ᓵᔭᓃᕽ ᐁᑮᐅᓈᐸᒪᒃ ᑫᒋᐃᓇᑭᓱᒡ ᑳᓃᑳᓂᓂᑕᒫᐱᑭᔑᕽ᙮ ᐊᐌᓀᓐ ᑕᔥ ᐃᑯ ᑳᑌᐺᔦᓂᒫᒡ ᑳᐐᓐ ᑕᒥᒋᓇᐌᓯᓰ᙮

12:7b.1PE.012.007 ᑮᓇᐙ ᑕᔥ ᑳᑌᐺᑕᒣᒃ ᐗᐊ ᐊᓯᓐ ᐋᐱᒋ ᑭᑭᒋ ᐃᓀᓂᒫᐙ᙮ ᐃᑭ ᑕᔥ ᐐᓐ ᑳᑌᐺᑕᓯᒀ ᐅᐅ ᐃᔑᑌᐱᒫᐗᒃ: ᐃᓂ ᓴ ᐊᓯᓃᓐ ᑳᐙᑲᐃᑫᐙᒡ ᑳᔮᓇᐌᓂᒫᐙᒡ, ᒦᐗᓐ ᐃᓴ ᐃᓂ ᒫᐗᒡ ᑳᓃᑳᓀᑖᑯᓯᓂᒡ ᐊᓯᓃᓐ᙮

12:8b.1PE.012.008 ᑲᔦᔥ ᐁᐊᓂ ᐃᔑᐲᐃᑳᑌᒃ, ᒦᐗᓐ ᐃᓴ ᐃᓂ ᐊᓯᓃᓐ ᐯᒫᑎᓯᐙᒡ ᑫᐱᓱᑫᔥᑳᑯᐙᒡ, ᒦᐗᓐ ᑲᔦ ᐃᓂ ᑫᑲᐎᐌᐱᔥᑳᑯᐙᒡ᙮ ᒦᑕᔥ ᑳᑮᐅᒋᐱᓱᑫᔑᓄᐙᒡ, ᐋᓃᔥ ᑳᐐᓐ ᐅᑮᓇᐃᑕᓰᓈᐙ ᐃᐃ ᑳᑮᐃᑭᑐᓂᒡ ᑭᔐᒪᓂᑑᓐ᙮ ᒦ ᐄᑐᒃ ᐃᐃ ᑳᑮᐃᓀᓂᒥᑯᐙᑯᐸᓀᓐ ᑭᔐᒪᓂᑑᓐ ᒋᐃᔑᓭᐙᒡ᙮

12:9b.1PE.012.009 ᑮᓇᐙ ᑕᔥ ᑳᐅᑯ ᐅᓀᑖᑯᓯᔦᒃ, ᐊᓇᒥᐁᐎᑭᒫᒃ ᐁᑎᓄᐎᔦᒃ ᑳᐊᓄᑮᑕᐌᒃ ᑭᔐᒪᓂᑑ ᑳᑭᒋᐅᑭᒫᐎᒡ, ᐸᑳᓐ ᑲᔦ ᑳᑮᐃᓇᓯᓀᒃ ᐁᐐᐃᓈᐸᒋᐃᓀᒃ, ᑭᔐᒪᓂᑑ ᑲᔦ ᑳᑎᐯᓂᒥᓀᒃ, ᑭᑮᐅᓈᐸᒥᑯᐙ ᒋᑎᐹᑐᑕᒧᐌᒃ ᐅᒥᓄᒋᑫᐎᓇᓐ᙮ ᑮᓇᐙ ᑲᔦ ᑳᑮᑲᓅᓂᓀᒃ ᒋᓵᑲᐊᒧᐌᒃ ᐃᐃᒫ ᑳᐃᔑᑲᔥᑮᑎᐱᑲᒃ ᑳᑮᐃᔑ ᐊᔮᔦᑭᐸᓐ, ᐃᐃᒫ ᑕᔥ ᒋᔑᐲᑎᑫᔥᑳᔦᒃ ᑳᐃᔑᐅᓂᔑᔑᓂᓂᒃ ᐅᐙᓭᔮᓯᐎᓐ᙮

12:10b.1PE.012.010 ᐋᓃᔥ ᐅᑖᓈᕽ ᑳᐐᓐ ᑭᑮᑎᐯᓂᒥᑯᓰᐙ ᑭᔐᒪᓂᑑ; ᓅᑯᒻ ᐃᑕᔥ ᐐᓐ ᑭᑎᐯᓂᒥᑯᐙ᙮ ᑳᐐᓐ ᑲᔦ ᑭᑮᑌᐱᓇᒧᐙᓰᒻ ᐅᑰᐹᓯᓈᑫᐎᓐ; ᓅᑯᒻ ᑕᔥ ᐐᓐ ᐋᔕ ᑭᑮᑌᐱᓇᒧᐙᒻ᙮

12:11b.1PE.012.011 ᑳᓵᑭᐃᓇᑰᒃ, ᑭᑎᔑᑳᓅᓂᓂᓂᒻ ᑳᐲᐎᑌᐌᑖᑯᓯᔦᒃ, ᐅᐅᒫ ᑲᔦ ᐊᑮᕽ ᑳᐅᒋᑎᐯᑖᑯᓯᓯᐌᒃ, ᒋᒦᑖᑴᓄᑕᒣᒃ ᑭᒪᒋᒥᓴᐌᒋᑫᐎᓂᐗᓐ, ᒦᐗᓐ ᐄᑐᒃ ᐃᓂ ᑳᑲᑴ ᔖᑰᒋᐃᑯᔦᒃ ᐃᐃᒫ ᑭᑕᒑᑯᐙᕽ᙮

12:12b.1PE.012.012 ᐋᐱᒋ ᑕᔥ ᑾᔭᒃ ᐃᔑᐱᒫᑎᓯᒃ ᑳᐃᔑᐊᔮᐙᒡ ᐃᑭ ᑳᑌᐺᑕᓯᒀ, ᐋᓇᐐᓐ ᐁᐃᓂᓀᒀ ᐁᒪᒋ ᐃᔑᐌᐱᓯᔦᒃ᙮ ᐃᓇᔥᑫ ᓴ ᐅᑲᓂᓯᑕᐎᓈᓈᐙᓐ ᐃᓂ ᑭᑎᔑᒋᑫᐎᓂᐙᓐ ᑳᐅᓂᔑᔑᓂᓂᑭᓐ, ᒦᑕᔥ ᑫᔑᒦᑴᒋᐌᓂᒫᐙᒡ ᑭᔐᒪᓂᑑᓐ ᐊᐲ ᑮᔑᑲᓂᓂᒃ ᐐᐱ ᐊᑕ ᑎᐹᑯᓂᐌᓂᒡ᙮

12:13b.1PE.012.013 ᑳᑎᐯᒋᑫᒡ ᑕᔥ ᐁᐐᒌᐌᒃ, ᓇᐃᑕᒧᒃ ᑲᑭᓇ ᐃᓂᓃᐎᐅᓇᑯᓂᑫᐎᓇᓐ; ᓇᐃᑕᐎᒃ ᑲᔦ ᐊᐊ ᑲᔦ ᒫᐗᒡ ᑳᑭᒋᐅᑭᒫᐎᒡ ᑲᑭᓇ ᑫᑰᓂᓂ ᑳᓈᑲᒋᑑᒡ᙮

12:14b.1PE.012.014 ᓇᐃᑕᐎᑾᒃ ᑲᔦ ᑳᓂ ᐋᓂᑫ ᐅᑭᒫᐎᐙᒡ, ᐋᓃᔥ ᒫᐗᒋᑯ ᑳᑭᒋᐅᑭᒫᐎᓂᒡ ᐅᑮᐅᓇᑭᒥᑯᐙᓐ ᒋᓇᓇᐊᓵᓂᒡ ᑳᓂᑖ ᒪᒫᔒᓂᒡ, ᒋᒥᓍᐸᒫᓂᒡ ᑕᔥ ᐐᓐ ᐃᐃ ᑾᔭᒃ ᑳᐃᔑᒋᑫᓂᒡ᙮

12:15b.1PE.012.015 ᑭᔐᒪᓂᑑ ᓴ ᐃᓀᑕᒻ ᐃᐃ ᑳᐃᔑᒥᓄᒋᑫᔦᒃ ᒋᐅᒋ ᐴᓂᑑᓂᒡ ᐃᐃ ᑳᑲᑮᐹᑎᓯᓂᒡ ᐯᒫᑎᓯᓂᒡ ᑳᐃᔑᓂᑖ ᑳᑮᑭᑐᓂᒡ, ᑫᑫᑕᓯᓂᒃ ᐁᑭᑐᓂᒡ᙮

12:16b.1PE.012.016 ᐃᔑᐱᒫᑎᓯᒃ ᐃᑕᔥ ᑖᐱᔥᑰ ᐯᒫᑎᓯᐙᒡ ᑳᑎᐯᓂᒫᓯᐎᑣ, ᑫᑯ ᑕᔥ ᐐᓐ ᓇᐹᒡ ᐃᓈᐸᒋᑑᑫᒃ ᐃᐃ ᑳᐃᔑᑎᐯᓂᒥᑰᓯᐌᒃ ᒋᐅᒋᑳᑑᔦᒃ ᒪᒋᑫᑰᓐ᙮ ᐃᔑᐱᒫᑎᓯᒃ ᐃᑕᔥ ᐁᑎᓄᐎᐌᒃ ᑭᔐᒪᓂᑑ ᑳᑎᐯᓂᒫᒡ ᐅᑕᓄᑮᐋᑲᓇᐞ᙮

12:17b.1PE.012.017 ᑭᑌᓂᒥᑾᒃ ᑲᑭᓇ ᐊᐎᔭᒃ, ᓵᑭᐃᑾᒃ ᑲᔦ ᑮᒋᐅᑌᐺᑕᒨᒥᐙᒃ, ᑯᑖᓀᓂᒥᒃ ᑲᔦ ᑭᔐᒪᓂᑑ᙮ ᑭᑌᓂᒥᒃ ᓴ ᐊ ᑲᔦ ᒫᐗᒡ ᐃᑯ ᑭᒋᐅᑭᒫ᙮

12:18b.1PE.012.018 ᑮᓇᐙ ᑕᔥ ᐅᐸᒦᑖᑫᒃ ᐸᑭᑎᓂᑎᓱᒃ ᐱᓵᓂᑯ ᒋᑎᐯᓂᒥᓀᒀ ᑭᑑᑭᒫᒥᐙᒃ, ᑕᑯ ᑭᑌᓂᒥᑾᒃ ᑲᔦ᙮ ᑳᐐᓐ ᐐᓐ ᐁᑕ ᑳᒥᓄᑑᑕᐎᓀᒀ, ᑳᓈᓈᑲᑕᐌᓂᒥᓀᒀ ᑲᔦ; ᐃᑭ ᓴ ᑯ ᑲᔦ ᑳᑲᒀᓂᓴᑭᓰᑕᐎᓀᒀ᙮

12:19b.1PE.012.019 ᑮᔥᐱᓐ ᐅᒋᑲᒀᑕᑭᑑᔦᒃ ᐁᓈᓈᑲᑕᐌᓂᒣᒃ ᑭᔐᒪᓂᑑ, ᔒᐱᓀᓄᑕᒣᒃ ᐃᑕᔥ ᐅᐅ ᑲᒀᑕᑭᑑᐎᓐ ᑳᑮ ᑲᔥᑭᑕᒫᓱᓯᐌᒃ, ᑭᔐᒪᓂᑑ ᓴ ᑭᑲᔕᐌᓂᒥᑯᐙ᙮

12:20b.1PE.012.020 ᑳᐐᓐ ᐄᑐᒃ ᑫᑰᓐ ᑭᑖ ᐅᒋ ᒥᓋᑭᒥᑰᓰᒻ ᑮᔥᐱᓐ ᒥᓴᐙᑯ ᔕᔒᐯᑕᒣᒃ ᐃᐃ ᑳᐃᔑᐸᐸᑭᑌᐅᑰᔦᒃ ᑭᒪᒫᔒᐎᓂᐙᓐ ᐅᒋ, ᐋᓃᔥ ᑭᑲᔥᑭᑕᒫᓱᒻ᙮ ᑮᔥᐱᓐ ᐃᑕᔥ ᔕᔑᐯᑕᒣᒃ ᐃᐃ ᑳᐃᔑᑲᑾᑕᑭᐃᑰᔦᒃ ᑭᑾᔭᑯᒋᑫᐎᓂᐙᕽ ᐅᒋ, ᑭᔐᒪᓂᑑ ᓴ ᑭᑲᒥᓍᐸᒥᑯᐙ᙮

12:21b.1PE.012.021 ᒦ ᓴ ᑕᔥ ᑳᑮᐅᒋ ᐃᔑᐊᑐᒥᑰᔦᒃ, ᐋᓃᔥ X ᑮᑲᒀᑕᑭᑑ ᑮᓇᐙ ᐅᒋ, ᐁᑮᓇᑲᑕᒪᐎᓀᒃ ᑫᓈᐹᐸᑕᒧᐌᒃ ᒋᐱᒥᓂᔕᐌᒃ ᐋᓃᓐ ᑳᐃᔑᐱᒫᑎᓯᒡ᙮

12:22b.1PE.012.022 ᑳᐐᓐ ᐄᑐᒃ ᐐᑳ ᑮᒪᒋᑑᑕᓰ, ᑳᐐᓐ ᑲᔦ ᐐᑳ ᑮᓅᑕᐙᓰ ᒋᑮᐗᓂᒧᒡ᙮

12:23b.1PE.012.023 ᐊᐲ ᓴ ᓅᒋᑯ ᑮᐃᒋᑲᓂᐎᒡ, ᑳᐐᓐ ᑮᐋᔑᑌ ᓅᒋᑯ ᐃᑭᑐᓰ᙮ ᐊᐲ ᑲᔦ ᑮᑲᒀᑕᑭᐃᓐᒡ, ᑳᐐᓐ ᐅᑮᐃᓈᓰᐞ ᑳᑮᑲᒀᑕᑭᐃᑯᒡ: ᐊᐤ ᒣᔥᑾᒡ ᑮᓇᐙ ᑭᑲᑲᒀᑕᑭᑑᒻ᙮ ᒦᐃ ᐄᑐᒃ ᑳᑮᐸᑭᑎᓂᑎᓱᒡ ᑫᔑᓈᑕᒫᑯᒡ ᑭᔐᒪᓂᑑᓐ ᑾᔭᒃ ᑳᐅᓈᑯᓂᐌᓂᒡ᙮

12:24b.1PE.012.024 ᐐᓐ ᓴ ᐱᑯ ᑭᑮᐱᒥᐎᑕᒫᑯᓈᓐ ᑭᒪᒋᑑᑕᒧᐎᓂᓈᓂᓐ ᐃᐃᒫ ᐅᐐᔭᐎᕽ ᐊᐲ ᑮᓂᓯᓐᒡ ᐋᔑᑌᔮᑎᑯᕽ, ᑮᓇᐎᓐᑦ ᒋᐅᒋ ᐃᓀᑖᑯᓯᐗᕽ ᐁᑮᓂᐳᐗᕽ, ᒋᐸᐹᒣᑕᓯᐗᕽ ᐊᐗᔑᒣ ᒪᒋᑑᑕᒧᐎᓐ, ᒣᔥᑾᒡ ᐃᑕᔥ ᒋᐃᔑᐱᒫᑎᓯᐗᕽ ᒋᑾᔭᒀᑎᓯᔭᕽ᙮ ᐃᐃ ᓴ ᑕᔥ ᑳᑮᐃᔑ ᒫᑭᒋᑲᓂᐎᒡ ᑭᑑᒋ ᒥᓄᐊᔮᐃᑰᒥᓐ᙮

12:25b.1PE.012.025 ᑖᐱᔥᑰ ᒫᓇᒑᓂᔕᒃ ᑳᑮᐗᓂᔑᓄᐙᒡ ᑭᑮᐃᔑᓈᑯᓯᒻ, ᐋᔕ ᑕᔥ ᓅᑯᒻ ᑭᑮᐱ ᐊᔐᑮᐌᐎᓂᑰᒻ ᒋᐱᒥᓂᔕᐌᒃ ᐅᑲᓇᐎᒫᓇᒑᓂᔑᐌ ᑳᐃᓂᓐᒡ, ᑳᑲᓇᐌᑕᕽ ᑭᐱᒫᑎᓯᐎᓂᐙᓐ᙮

13

13:1b.1PE.013.001 ᑮᓇᐙ ᐐᐐᒫᒃ, ᒦᑕᔥ ᐯᔑᑾᓐ ᐃᔑᐸᑭᑎᓂᑎᓱᒃ ᒋᑎᐯᓂᒥᓀᒀ ᑭᓈᐯᒥᐙᒃ᙮ ᐃᓇᔥᑫ ᒥᓴᐙ ᑯ ᑌᐺᑕᓯᒀ ᑭᔐᒪᓂᑑᓐ ᐅᑎᑭᑐᐎᓂᓂ, ᑭᑎᔑᐱᒫᑎᓯᐎᓂᐙ ᐅᔕ ᐅᑲᑲᔥᑭᐃᑯᓈᐙ ᒋᑌᐺᑕᒧᐙᒡ, ᑳᐐᓐ ᐃᑕᔥ ᒣᒬᒡ ᑫᑰᓐ ᑭᑲᐃᑭᑐᓰᒻ᙮

13:2b.1PE.013.002 ᐋᓃᔥ ᐅᑲᐙᐸᑖᓈᐙ ᐁᔑᐯᑳᑎᓯᔦᒃ, ᑌᐺ ᑲᔦ ᐁᑯᑖᓀᓂᒥᒣᒃ ᑭᔐᒪᓂᑑᓐ᙮

13:3b.1PE.013.003 ᑕᑲ ᑲᔦ ᑭᒥᓄᓈᑯᓯᐎᓂᐙᓐ ᑳᐐᓐ ᑕᐅᒌᓯᓅᓇᓐ ᑳᐃᔑᐗᐌᔑᐃᑎᓱᔦᒃ ᓵᑭᒐᔭᐄ ᐋᓃᓐ ᐁᔑᑲᑴ ᒥᓄᓈᑯᑑᔦᒃ ᑮᓂᓯᓯᐙᓐ, ᐁᑭᑭᔥᑲᒣᒃ ᑲᔦ ᑳᐅᓵᐎ ᔔᓂᔮᐎᐗᑭᓐ ᓈᐱᔥᑭᑲᓇᓐ, ᐃᓂ ᑲᔦ ᑳᔮᑾᑭᑌᑭᓐ ᑭᑭᔥᑭᑲᓇᓐ᙮

13:4b.1PE.013.004 ᑕᑲ ᓴ ᐃ ᑭᒥᓄᓈᑯᓯᐎᓂᐙᓐ ᑕᐅᒌᒪᑲᓅᓐ ᐲᒐᔭᐄ ᑭᑌᐃᐗᕽ, ᒦ ᓴ ᐃ ᑎᓄ ᒥᓄᓈᑯᓯᐎᓐ ᐐᑳ ᑫᐴᓂᓭᓯᓄᒃ ᑳᐅᒌᒃ ᑮᓅᑳᑎᓯᔦᒃ, ᑮᐱᓵᓈᑎᓯᔦᒃ ᑲᔦ᙮ ᒦ ᓴ ᐃᐌᓂ ᑭᔐᒪᓂᑑ ᒫᐗᒡ ᐃᑯ ᑳᑭᑕᑭᑕᕽ᙮

13:5b.1PE.013.005 ᐃᓇᔥᑫ ᐃᑭ ᐅᑖᓈᕽ ᑳᑮᐱᒫᑎᓯᐙᒡ ᐃᑴᐗᒃ ᑳᑮᐊᓇᒥᐁᐙᑎᓯᐙᒡ ᑳᑮᐊᐯᓂᒧᓄᑕᐙᐙᒡ ᑭᔐᒪᓂᑑᓐ, ᑮᐃᔑ ᓂᑖ ᐗᐌᔑᐃᑎᓱᐗᒃ, ᐁᑮᐸᑭᑎᓂᑎᓱᐙᒡ ᐅᓈᐯᒥᐙᐞ ᒋᑎᐯᓂᒥᑯᐙᒡ᙮

13:6b.1PE.013.006 ᓭᕒᐊ ᓴ ᐁᑮᓇᐃᑕᐙᒡ ᐁᐸᕒᐊᐋᒪᓐ ᑳᑮᐅᒋ ᐃᔑᓂᑳᓈᒡ ᓂᑑᑭᒫᒻ᙮ ᒦᑕᔥ ᐁᐅᑖᓂᓯᒥᓀᒃ ᓭᕒᐊ ᑮᔥᐱᓐ ᐃᔑᒋᑫᐌᒃ ᑳᑾᔭᑯᓈᑾᓂᓂᒃ, ᑮᔥᐱᓐ ᑲᔦ ᐸᑭᑎᓇᓯᐌᒃ ᑫᑰᓐ ᒋᓭᑭᐃᑯᔦᒃ ᐋᓃᓐ ᑫᑑᑕᐎᓀᒀ ᑭᓈᐯᒥᐙᒃ᙮

13:7b.1PE.013.007 ᑫᑮᓇᐙ ᑕᔥ ᐅᓈᐯᒥᒫᒃ, ᒦ ᓴ ᐯᔑᑾᓐ ᐃᔑᐐᒋᐱᒫᑎᓰᒥᑾᒃ ᑭᐐᐎᐙᒃ ᐌᐌᓂ ᒋᓂᓯᑕᐌᓂᒣᒀ ᐐᓇᐙ ᓅᑕᐞ ᐁᐊᐲᒌᐙᒡ, ᐋᓃᔥ ᐃᑴᐎᐗᒃ᙮ ᓈᑯᑖᐤ ᑕᔥ ᐁᑭᑌᓂᒣᒀ ᐋᓃᓐ ᐁᑑᑕᐌᒀ᙮ ᑫᐐᓇᐙ ᐅᔕ ᑕᑎᐱᓇᐌᐎᓯᐗᒃ ᑳᐐᑎᐱᓇᐌᐎᓯᔦᒃ ᐃᐃᐌᓂ ᐱᒫᑎᓯᐎᓐ ᑭᔐᒪᓂᑑ ᑳᒥᒋᒦᑭᐌᒡ᙮ ᑮᔥᐱᓐ ᑕᔥ ᐃᐃ ᐃᔑᒋᑫᔦᒃ, ᑳᐐᓐ ᑫᑰᓐ ᑕᐗᓇᔥᑴᐃᐌᒪᑲᓯᓅᓐ ᐊᐲ ᐊᓇᒥᐁᑕᐌᒃ ᑭᔐᒪᓂᑑ᙮

13:8b.1PE.013.008 ᐅᐅᐌ ᑕᔥ ᑭᑎᓂᓂᓂᒻ ᐃᔥᒀᒡ, ᑲᑭᓇ ᓴ ᑳᑕᔑᔦᒃ ᐯᔑᑾᓐ ᐃᔑᓈᓈᑲᑕᐌᑕᒧᒃ, ᒋᑰᐹᑌᓂᑎᔦᒃ᙮ ᐃᔑᓵᑭᐃᑎᒃ ᑲᔦ ᑳᐃᔑᓵᑭᐃᑎᐙᒡ ᑳᐅᐐᒋᑭᐌᑎᐙᒡ, ᒥᓄᑑᑖᑎᒃ ᑲᔦ, ᑕᐸᓭᓂᒧᒃ ᑲᔦ᙮

13:9b.1PE.013.009 ᐊᐎᔭ ᑲᔦ ᒪᒋᑑᑕᐎᒃ, ᑫᑯ ᒪᒋᑫᑰᓐ ᑎᐸᐃᑳᑫᑫᓐ᙮ ᐊᐎᔭ ᑲᔦ ᒪᒋ ᐃᓂᒃ, ᑫᑯ ᐋᔑᑌ ᒪᒋ ᐃᓈᑫᓐ᙮ ᑕᑾᒡ ᓴ ᑮᓐ ᑲᑴᒋᒥᒻ ᑭᔐᒪᓂᑑᓐ ᒋᒥᓄᓭᐃᑯᒡ᙮ ᒋᑌᐱᓇᒧᐌᒃ ᐅᔕ ᑳᑮᐅᒋᐊᑐᒥᓀᒃ ᒋᒥᓄᓭᐃᓀᒃ ᑭᔐᒪᓂᑑ᙮

13:10b.1PE.013.010 ᑭᒋᒪᓯᓇᐃᑲᓐ ᓴ ᐃᔑᐲᐃᑳᑌ: ᐊᐌᓀᓐ ᓴ ᑯ ᑫᐐᒥᓉᑕᕽ ᐁᐱᒫᑎᓯᒡ, ᑳᒥᓵᐌᑕᕽ ᑲᔦ ᒋᐙᐸᑕᕽ ᑳᒥᓄᓭᐎᑮᔑᑲᓂᓂᒃ, ᒦᓴᐃ ᐁᔑᓈᑾᓂᓂᒃ ᒋᒪᒋᑮᔗᓯᑭᐸᓐ, ᒋᐴᓂᑑᐸᓐ ᑲᔦ ᑳᐃᔑᓂᑖᑮᐗᓂᒧᒡ᙮

13:11b.1PE.013.011 ᐃᔑᓈᑾᓂᓂ ᓴ ᒋᐴᓂᑑᐸᓐ ᒪᒋᑫᑰᓇᓐ, ᒣᔥᑾᒡ ᑕᔥ ᒋᑑᑕᑭᐸᓐ ᐃᐃ ᑳᐅᓂᔑᔑᓂᓂᒃ, ᒋᑲᑴ ᒥᓄ ᐐᒌᐎᐌᐸᓐ, ᒨᔕᒃ ᐃᑯ ᐃ ᒋᑲᑴ ᐃᔑᒋᑫᐸᓐ᙮

13:12b.1PE.013.012 ᑳᑎᐯᒋᑫᒡ ᐅᔕ ᐅᑲᓇᐙᐸᒫᐞ ᑲᑾᔭᒀᑎᓯᓂᒡ, ᐅᐱᓯᑕᐙᐞ ᑲᔦ ᑮᐊᓇᒥᐁᑖᑯᒡ; ᑳᐐᓐ ᑕᔥ ᐐᓐ ᐅᒥᓍᐸᒫᓰᐞ ᐃᐃ ᑳᒪᒋᑑᑕᒥᓂᒡ᙮

13:13b.1PE.013.013 ᐊᐌᓀᓐ ᑕᔥ ᑫᑲᔥᑭᑑᐸᓐ ᒋᒫᔑᑑᑕᐎᓀᒃ ᑮᔥᐱᓐ ᒥᓴᐌᑕᒣᒃ ᐁᐐᑑᑕᒣᒃ ᐃᐃ ᑳᐅᓂᔑᔑᒃ?

13:14b.1PE.013.014 ᒥᓴᐙ ᓴ ᑯ ᐅᒋᑲᒀᑕᑭᐃᑰᔭᓐ ᐁᑑᑕᒪᓐ ᐃᐃ ᑳᑾᔭᑯᓈᑾᒃ, ᐁᑕᑕᐌ ᓴ ᑭᑭᒋᔕᐌᑖᑯᔅ᙮ ᑫᑯ ᑲᔦ ᑯᑕᒧᐙᑫᒃ ᐊᐎᔭ ᑳᐐᑑᑕᐎᓀᒃ; ᑫᑯ ᑲᔦ ᐅᒑᓂᒣᑕᑫᒃ᙮

13:15b.1PE.013.015 ᐊᓇᒥᐁ ᑯᑖᓀᓂᒥᒃ ᐃᑕᔥ X ᑭᑌᐃᐙᕽ, ᐋᓃᔥ ᑌᐊᐲᑌᑖᑯᓯ ᒋᐃᔑᑭᑌᓂᒥᑎᐸᓐ ᐁᑎᐯᒋᑫᒡ᙮ ᐊᔛᓐ ᑕᔥ ᒨᔕᒃ ᐃᑯ ᒋᓇᑴᑕᐗᑎᐸᓐ ᐊᐎᔭ ᑳᑲᑴᒋᒥᒃ ᒋᐐᑕᒪᐗᒡ, ᐃᐃᐌᓂ ᑳᐊᐱᑌᐁᔑᒨᓄᐗᒡ᙮

13:16b.1PE.013.016 ᐌᐌᓂ ᐅᒋᑲᓅᔥ ᑭᓅᑳᑎᓯᐎᓂᕽ᙮ ᐌᐌᓂ ᐃᔑᐱᒫᑎᓯᓐ ᐙᐐᑫ ᒋᐯᑭᐊᔮᒃ ᑳᐅᒋᓈᓈᑲᑕᐌᑕᒪᓐ᙮ ᐃᑭ ᓴ ᓅᒋᑯ ᑳᐃᑕᒧᐙᒡ ᐃᐃ ᑳᐃᔑᒥᓄᑑᑕᒧᐗᒡ ᐁᐐᒌᐎᒪᒡ Xᑕᓐ, ᑕᐅᒋᐊᑲᒋᐃᑎᓱᐗᒃ ᐃᐃ ᑳᔑᒪᒋᑕᔑᒥᒀ᙮

13:17b.1PE.013.017 ᓇᐗᒡ ᐄᑐᒃ ᑕᐅᓂᔑᔑᓂᓂ ᑮᔥᐱᓐ ᑭᔐᒪᓂᑑᓐ ᐃᓀᑕᒥᓂᒡ, ᐊᐎᔭ ᒋᐅᒋᑲᒀᑕᑭᑑᐸᓐ ᐁᑑᑕᕽ ᑳᐅᓂᔑᔑᓂᓂᒃ, ᐊᐲᒡ ᐐᓐ ᐊᐎᔭ ᒋᐅᒋᑲᒀᑕᑭᑑᐸᓐ ᒪᒋᑫᑰᓂᕽ᙮

13:18b.1PE.013.018 ᒦ ᓴ X ᑫᐐᓐ ᑳᐃᔑᐌᐱᓯᒡ: X ᓴ ᐋᐱᑎᕽ ᑮᐅᒋᓂᐳ, ᒋᐴᓀᒋᑳᑌᓂᑭᓐ ᒪᒋᑑᑕᒧᐎᓇᓐ, ᒦ ᐃ ᑮᑌᑎᐸᐊᕽ; ᐐᓐ ᑳᑾᔭᒀᑎᓯᒡ ᐁᑮᓂᐴᑕᒪᐙᒡ ᐃᐃ ᑳᑾᔭᑾᑎᓯᓯᓂᒃ, ᐁᐐᐃᔑᐲᓂᓀᒃ ᑭᔐᒪᓂᑑᓐ ᑳᔑᐊᔮᓂᒡ᙮ ᐐᔭᐎᒫᕽ ᓴ ᐃᓇᑫ ᑮᐃᔑᓂᒋᑲᓂᐎ, ᐊᒑᑯᕽ ᐃᑕᔥ ᐐᓐ ᐃᓇᑫ ᑮᐱᒫᑎᓯᐋ᙮

13:19b.1PE.013.019 ᒦᑕᔥ ᐃᐃ ᓇᑫ ᑳᑮᐃᔑ ᐃᔖᒡ ᐁᑮᐊᐎ ᐐᑕᒪᐙᒡ ᐊᒑᑾᐞ ᐌᑎ ᑳᑮᑕᔑᑭᐸᐅᒥᓐᒡ᙮

13:20b.1PE.013.020 ᒦᐗᐞ ᐃᓴ ᐃ ᐅᑕᒑᑯᐙᐞ ᐃᑭ ᐅᑖᓈᕽ ᑳᑮᓇᐃᑕᐙᓯᒀ ᑭᔐᒪᓂᑑᓐ ᐊᐲ ᑮᔕᔒᐱ ᐲᐅᓂᒡ ᒣᒀ ᓅᐗᐗᓐ ᑮᐅᔑᑑᓂᒡ ᑭᒋᒌᒫᓂᓂ᙮ ᐋᐱᒋ ᑕᔥ ᐸᑮ, ᓂᔣᓱ 8 ᐁᑕ ᐯᒫᑎᓯᐙᒡ ᑮᐅᒋᐱᒫᒋᐋᐗᒃ ᓂᐲᕽ᙮

13:21b.1PE.013.021 ᐃᐃ ᑕᔥ ᓂᐱ, ᒦ ᐃ ᐁᔑᓈᑾᒃ ᓰᑲᐊᑖᓱᐎᓐ ᓅᑯᒻ ᑳᐱᒫᒋᐃᑯᔦᒃ᙮ ᑳᐐᓐ ᐐᓐ ᐁᑕ ᓅᒋᑯ ᑫᑰᓐ ᑳᑮᓰᔮᐹᐗᒋᑳᑌᒃ ᑭᐐᔭᐎᐙᕽ ᑭᑑᒋ ᐱᒫᒋᐃᑰᐎᓯᓰᒻ᙮ ᐃᐃᐌ ᐅᔕ ᐊᐎᔭ ᑳᐅᒋ ᐊᔓᑕᒪᐙᒡ ᑭᔐᒪᓂᑑᓐ ᑾᔭᒃ ᐁᐃᔑᓈᑾᓂᓂᒃ ᑳᐅᒋᓈᓈᑲᑕᐌᑕᕽ᙮ X ᓴ ᑳᑮᐃᔑ ᑮᐌᐱᒫᑎᓯᐃᓐᒡ ᓂᐳᐎᓂᕽ ᐅᒋ, ᒦ ᓴ ᐃᒫ ᐌᒋᐱᒫᒋᐃᑰᐎᓯᔦᒃ᙮

13:22b.1PE.013.022 ᐐᓐ ᐄᑐᒃ X ᑳᑮᐃᔖᒡ ᑭᒋᑮᔑᑯᕽ ᐁᑮᐊᐎ ᐊᐱᒡ ᐅᑭᒋᓂᑭᓃᕽ ᐃᓇᑫ ᑭᔐᒪᓂᑑᓐ, ᐁᑮᒦᓂᓐᒡ ᒋᑎᐯᓂᒫᒡ ᐁᒐᓬᐊᐞ, ᐃᐃ ᑲᔦ ᑳᐊᒑᑴᑖᑯᓯᓂᒡ ᑳᑲᔥᑭᐁᐎᓯᓂᒡ, ᐃᐃ ᑲᔦ ᑳᒪᔥᑲᐌᑖᑯᓯᓂᒡ᙮

14

14:1b.1PE.014.001 X ᐃᑕᔥ ᑫᐐᓐ ᐁᑮᑲᒀᑕᑭᑑᒡ ᐅᐐᔭᐐᕽ, ᒦᑕᔥ ᑫᑮᓇᐙ ᐁᔑᓈᑾᒃ ᒋᐃᔑᑮᔒᔦᑭᐸᓐ ᐯᔑᑾᓐ ᐃᐃ ᓇᑫ ᒋᐃᔑᓈᓈᑲᑕᐌᑕᒣᑭᐸᓐ᙮ ᐋᓃᔥ ᐊᐎᔭ ᑳᑲᑾᑕᑭᑑᒡ ᐅᐐᔭᐐᕽ ᐋᔕ ᐅᑮᐴᓂᑑᓐ ᒪᒋᑑᑕᒧᐎᓐ᙮

14:2b.1PE.014.002 ᒦᑕᔥ ᐃᐃ ᐁᔑᓈᑾᒃ ᒥᓂᒃ ᐃᑯ ᑫᐱᒫᑎᓯᔦᒃ ᐅᐅᒫ ᐊᑮᕽ ᒋᐃᔑᐱᒫᑎᓯᓯᐌᑭᐸᓐ ᑳᐃᔑ ᓂᑖ ᒥᓴᐌᒋᑫᐙᒡ ᐯᒫᑎᓯᐙᒡ; ᐃᐃ ᓴ ᒋᐃᔑᐱᒫᑎᓯᔦᑭᐸᓐ ᑭᔐᒪᓂᑑ ᑳᐃᔑᐊᑕᐌᑕᕽ᙮

14:3b.1PE.014.003 ᐋᔕ ᐄᑐᒃ ᑌᒥᓂᒃ ᐅᑖᓈᕽ ᑭᑮᐃᔑᐌᐱᓯᒻ ᑳᐃᔑᐌᐱᓯᐙᒡ ᑳᑌᐺᑕᓯᒀ᙮ ᒦᑕᔥ ᐅᐅ ᑳᐃᔑᐌᐱᓯᔦᒃ, ᐁᑮᐐᓈᑎᓯᔦᒃ, ᐁᑮᒪᒋᒥᓴᐌᒋᑫᔦᒃ, ᐁᑮᓂᑖ ᑮᐗᔥᑴᐲᔦᒃ, ᐁᑮᓇᓂᑖ ᐅᑸᓄᔦᒃ ᐁᑮᐹᐹ ᑮᐗᔥᑴᐲ ᓂᔑᐗᓈᑕᑲᒥᑭᓯᔦᒃ, ᐁᑮᐃᔑ ᓂᑖ ᐊᓇᒥᐁᑕᐌᒀ ᑲᔦ ᒪᓂᑑᑳᓇᒃ ᐁᑮᐃᔑᒋᑫᔦᒃ ᑫᑮ ᒪᓈ ᐃᔑᒋᑫᔦᑭᐸᓐ᙮

14:4b.1PE.014.004 ᐐᑫ ᑕᔥ ᑭᒫᒪᑳᑌᓂᒥᑯᐙᒃ ᐃᑭ ᑳᑌᐺᑕᓯᒀ, ᐁᐐᒌᐙᓯᐌᒀ ᑳᓂᑖ ᐃᔑᒋᑫᐙᒡ ᑳᐃᔑᓂᑖ ᐅᓵᒥᒋᑫᐙᒡ, ᒦᑕᔥ ᐃᐃ ᓅᒋᑯ ᑳᐅᒋ ᐃᓂᓀᒀ᙮

14:5b.1PE.014.005 ᐐᓇᐙ ᓴ ᐱᑯ ᐅᑲᓇᑴᑕᐙᐙᓐ ᑭᔐᒪᓂᑑᓐ ᐃᐃ ᑳᑮᐃᔑᒋᑫᐙᒡ, ᐋᔕ ᑳᑮᔒᑖᓂᒡ ᐁᐐᑎᐹᑯᓈᓂᒡ ᐃᐃ ᑳᐱᒫᑎᓯᓂᒡ, ᐃᐃ ᑲᔦ ᑳᓂᐳᓂᒡ᙮

14:6b.1PE.014.006 ᒦ ᓴ ᑕᔥ ᑫᐐᓇᐙ ᑳᑮᐅᒋᐐᑕᒪᐎᑣ ᒥᓍᒋᒧᐎᓐ ᐃᑭ ᐋᔕ ᑳᑮᓂᐳᐙᒡ᙮ ᐋᓇᐐᓐ ᐃᓂᓃᓈᕽ ᐃᓇᑫ ᐁᑮᐃᔑᑎᐹᑯᓂᑣ ᐅᐐᔭᐎᐙᕽ, ᔖᑰᒡ ᐃᑕᔥ ᐅᑕᒑᑯᐙᕽ ᑕᐃᔑᐱᒫᑎᓯᐗᒃ ᑭᔐᒪᓂᑑᓈᕽ ᐃᓇᑫ᙮

14:7b.1PE.014.007 ᐃᐃ ᓴ ᑲᑭᓇ ᑫᑰᓐ ᑳᐐᐃᔥᒀᓭᒃ ᐋᔕ ᐯᔓᓈᑾᓐ, ᑲᔥᑭᑑᒃ ᐃᑕᔥ ᑾᔭᒃ ᒋᐃᔑᑎᐯᓂᑎᓱᔦᒃ, ᐙᐹᑲᒣᑕᒧᒃ ᑲᔦ ᒋᑲᔥᑭᑑᔦᒃ ᒋᐊᓇᒥᐋᔦᒃ᙮

14:8b.1PE.014.008 ᒫᐗᒡ ᐃᑕᔥ ᐃᑯ ᐅᐅ ᐃᔑᒋᑫᒃ, ᐋᐱᒋ ᓴ ᓵᑭᐐᒌᑎᒃ, ᐋᓃᔥ ᒦ ᐃᒫ ᓵᑭᐃᐌᐎᓂᕽ ᐁᔑᐊᑯᓈᑾᑭᓐ ᑳᐹᑎᓇᑎᑭᓐ ᒪᒋᑑᑕᒧᐎᓇᓐ᙮

14:9b.1PE.014.009 ᐹᐹᑭᑌᓇᒫᑎᒃ ᑲᔦ ᑭᑖᐎᓂᐙᓐ; ᑫᑯ ᑕᔥ ᐃᐃ ᐅᒋᑭᒋᑳᑮᑭᑐᑫᒃ᙮

14:10b.1PE.014.010 ᐁᑕᓱᐯᔑᑯᔦᒃ ᐃᑕᔥ ᑳᑮᐃᔑᒦᓂᑰᐎᓯᔦᒃ ᒦᑭᐌᐎᓇᓐ ᒋᓈᓈᑲᒋᑑᔦᒃ, ᒦᑕᔥ ᐁᔑᓈᑾᒃ ᒋᐃᓈᐸᒋᑑᔦᑭᐸᓐ ᑭᒦᓂᑰᐎᓂᐙᓐ ᑭᔐᒪᓂᑑ ᑳᑮᒦᓂᓀᒃ ᒋᐅᒋᒥᓄᓭᐃᑎᔦᒃ ᑳᑕᔑᔦᒃ᙮

14:11b.1PE.014.011 ᐊᐌᓀᓐ ᑕᔥ ᐃᑯ ᑳᑮᑭᑐᒡ, ᐃᔑᓈᑾᓂᓂ ᒋᑕᔑᑕᑭᐸᓐ ᑭᔐᒪᓂᑑᓐ ᐁᑭᑐᓂᒡ᙮ ᐊᐌᓀᓐ ᑕᔥ ᐃᑯ ᑲᔦ ᑳᐸᒦᑖᑫᒡ ᐃᔑᓈᑾᓂᓂ ᒋᐋᐸᒋᑑᐸᓐ ᒪᔥᑲᐎᓰᐎᓐ ᑭᔐᒪᓂᑑᓐ ᑳᒦᓂᑯᒡ, ᑲᑭᓇ ᓴ ᐱᑯ ᑫᑰᓂᕽ ᑭᔐᒪᓂᑑ ᒋᒦᑴᒋᐌᑖᑯᓯᒡ ᐅᒋ ᐃᓂ ᒋᓴᔅ Xᑕᓐ᙮ ᐐᓐ ᐄᑐᒃ ᑳᑎᐯᑕᕽ ᑭᒋ ᐃᓀᑖᑯᓯᐎᓐ, ᒪᔥᑲᐎᓰᐎᓐ ᑲᔦ, ᓀᐱᒡ ᐃᑯ, ᐁᒣᓐ᙮

14:12b.1PE.014.012 ᑳᓵᑭᐃᓇᑰᒃ, ᑫᑯ ᒫᒪᑳᑌᑕᑫᒃ ᐃᐃ ᑳᐅᑎᓯᑯᔦᒃ ᑳᐐᓴᑫᑖᑾᑭᓐ ᑯᒋᐃᑰᐎᓇᓐ ᑳᑲᒀᑕᑭᐃᑯᔦᒃ ᑖᐱᔥᑰ ᐁᐃᓀᑖᑾᒃ ᐁᐐᒪᔭᑭ ᐃᔑᐌᐱᓯᔦᒃ᙮

14:13b.1PE.014.013 ᒣᔥᑾᒡ ᐅᔕ ᑭᑖᒌᑫᑖᒻ ᐁᐃᓀᑕᑾᒃ ᐁᐐᑑᑳᓱᔦᒃ ᐃᓇᑫ X ᑳᑮᐃᔑ ᑲᒀᑕᑭᑑᒡ, ᒋᐅᒋᒨᔥᑭᓀᔥᑳᑯᔦᒃ ᒥᓉᑕᒧᐎᓐ ᐊᐲ ᓈᑯᒋᑳᑌᓂᒃ ᐅᑭᒋ ᐃᓀᑖᑯᓯᐎᓐ᙮

14:14b.1PE.014.014 ᑮᔥᐱᓐ ᐃᑕᔥ ᐅᒋᒪᒋ ᐃᑰᔦᒃ X ᐅᑎᔑᓂᑳᓱᐎᓂᕽ, ᒦᐃ ᒋᔕᐌᑖᑯᓯᔦᒃ, ᐋᓃᔥ ᐊᐊ ᐊᒑᒃ ᑳᑭᒋ ᐃᓀᑖᑯᓯᒡ ᑭᑭᑭᔥᑲᐙᐙ, ᐊᒦᐗᓐ ᐃᓴ ᐃᓂ ᑭᔐᒪᓂᑑ ᐅᑕᒑᑾᓐ᙮

14:15b.1PE.014.015 ᑫᒋᓈᒡ ᒫᐐᓐ ᑭᑲ ᑲᒀᑕᑭᑑᒻ᙮ ᑫᑯ ᑕᔥ ᐐᓐ ᐅᒋᑲᒀᑕᑭᑑᑫᒃ ᑖᐱᔥᑰ ᑳᐅᒋᑲᒀᑕᑭᑑᒡ ᐊᐎᔭ ᑳᓂᔑᐌᒡ, ᐅᑮᒨᒋᔥᒃ, ᑳᓂᑖ ᒪᒫᔒᒡ, ᐊᐊ ᑲᔦ ᑳᐗᓇᔥᑴᑲᒥᑭᓯᒡ ᐁᔑᐅᐸᐹᒥᓯᐎᓂᓯᒃ᙮

14:16b.1PE.014.016 ᐃᓇᔥᑫ ᓴ ᑮᔥᐱᓐ ᐊᐎᔭ ᐅᒋ ᑲᒀᑕᑭᑑᒡ ᐁᐊᓇᒥᐁᐙᑎᓯᒡ, ᑕᑲ ᑫᑯ ᑕᐊᑲᑌᑕᓰ, ᒣᔥᑾᒡ ᓴ ᐅᑲᒦᑴᒋᐌᓂᒫᓐ ᑭᔐᒪᓂᑑᓐ ᐁᐱᒥᐎᑑᒡ Xᑕᓐ ᐅᐐᓱᐎᓂᓂ᙮

14:17b.1PE.014.017 ᒦ ᐅᔕ ᐃ ᐋᔕ ᑎᐸᐃᑲᓐ ᐁᐅᒋᒋᓭᒃ ᑎᐹᑯᓂᑫᐎᓐ ᒋᒫᒋᓭᒃ, ᐃᑭ ᑕᔥ ᑭᔐᒪᓂᑑᕽ ᑳᐅᒋᑎᐯᑖᑯᓯᐙᒡ ᓂᑕᒻ ᑕᑎᐹᑯᓈᐗᒃ᙮ ᑮᔥᐱᓐ ᑕᔥ ᑮᓂᑕᒪᐎᓐᑦ ᑎᐹᑯᓂᑰᔭᕽ, ᐋᓃᓐ ᐄᑐᒃ ᑫᐃᔑᓭᐙᑴᓐ ᐃᐃ ᑳᑮᓇᐃᑕᓯᒀ ᒥᓍᒋᒧᐎᓐ ᑭᔐᒪᓂᑑᕽ ᐌᒌᓂᒃ᙮

14:18b.1PE.014.018 ᑭᒋᒪᓯᓇᐃᑲᓐ ᐃᔑᐲᐃᑳᑌ: ᑮᔥᐱᓐ ᐅᑾᔭᒀᑎᔅ ᐊᑳᐙ ᐱᒫᒋᒋᑲᓂᐎᒡ, ᐋᓃᓐ ᑕᔥ ᑳᓇᑲ ᑫᐃᔑᓭᐙᑴᓐ ᑳᑭᑌᓂᒫᓯᒀ ᑭᔐᒪᓂᑑᓐ, ᑳᒪᒋ ᐃᔑᐌᐱᓯᐙᒡ ᑲᔦ᙮

14:19b.1PE.014.019 ᑕᑲ ᑕᔥ ᐃᑭ ᑳᐅᒋ ᑲᒀᑕᑭᑑᐙᒡ ᐁᑑᑕᒧᐙᒡ ᑭᔐᒪᓂᑑᓐ ᑳᐃᔑᐊᑕᐌᑕᒥᓂᒡ, ᐅᑲᒦᓈᐙᓐ ᐅᐱᒫᑎᓯᐎᓂᐙᓐ ᑳᑌᐺᔦᑖᑯᓯᓂᒡ ᑳᑮᐅᔑᐃᑯᐙᒡ, ᐁᑑᑕᒧᐙᒡ ᐃᐃᐌᓂ ᑳᑾᔭᑯᓈᑾᓂᓂᒃ᙮

15

15:1b.1PE.015.001 ᐃᑭ ᓴ ᑳᓃᑳᓀᑖᑯᓯᐙᒡ ᑳᐊᔮᐙᒡ ᐌᑎ ᑳᐃᔑᐊᔭᔦᒃ, ᒦᐗᒃ ᓴ ᐃᑭ ᑳᑲᓅᓇᒀ; ᑫᓃᓐ ᐄᑐᒃ ᓂᓃᑳᓀᑖᑯᔅ ᐁᑮᐙᐸᒪᒃ X ᐁᑲᒀᑕᑭᑑᒡ, ᓂᐐᐐᑑᑳᔅ ᑕᔥ ᐅᑭᒋ ᐃᓀᑖᑯᓯᐎᓐ ᑳᐐᓈᑯᒋᑳᑌᓂᒃ᙮

15:2b.1PE.015.002 ᒦᑕᔥ ᐁᓇᒀ: ᓈᑲᒋᐃᑾᒃ ᑭᔐᒪᓂᑑ ᐅᒫᓇᒑᓂᔑᒪᐞ ᑳᒦᓂᓀᒃ ᒋᓈᑲᒋᐃᒣᒃ, ᑫᑯ ᐐᓐ ᐊᓂᓵᒡ ᐃᔑᒋᑫᑫᒃ, ᑮᓇᐙ ᓴ ᐱᑯ ᑭᑎᓀᑕᒧᐎᓂᐙᕽ ᒋᐅᒋ ᐃᔑᒋᑫᔦᒃ ᒋᑑᑕᒧᐌᒃ ᑭᔐᒪᓂᑑ ᐅᑎᓀᑕᒧᐎᓐ᙮ ᑫᑯ ᐐᓐ ᐁᑕ ᒋᒥᒋᐅᑎᓯᔦᒃ ᐅᒋ ᐃᔑᒋᑫᑫᒃ, ᒌᑫᑕᒧᒃ ᓴ ᐃ ᐁᐊᓄᑮᑕᐌᒃ ᐁᓈᓈᑲᒋᐃᐌᔦᒃ᙮

15:3b.1PE.015.003 ᑫᑯ ᐐᓐ ᑲᔦ ᑲᑴᑎᐯᓂᒫᑫᒀᓂᒃ ᐃᑭ ᑳᒦᓂᑰᔦᒃ ᒋᓈᑲᒋᐁᒀ, ᐃᔑᐱᒫᑎᓯᒃ ᓴ ᑫᔑᑭᑭᓇᐙᐸᒥᓀᒀ᙮

15:4b.1PE.015.004 ᐊᐲ ᑕᔥ ᓈᑯᓯᒡ ᐊᐊ ᑳᒫᐗᒋ ᓃᑳᓀᑖᑯᓯᒡ ᐅᑲᓇᐎᒫᓇᒑᓂᔑᐌ, ᑭᑲᑌᐱᓈᒻ ᑕᔥ ᐃᐃ ᒋᑭᑳᓄᒀᓈᑕᒣᒃ ᐃᐃ ᑭᒋ ᐃᓀᑖᑯᓯᐎᓐ ᐐᑳ ᑫᓂᐊᑯᓈᑾᓯᓄᒃ᙮

15:5b.1PE.015.005 ᒦ ᓴ ᐯᔑᑾᓐ ᑫᑮᓇᐙ ᑳᐅᔥᑳᑎᓯᔦᒃ ᓇᐃᑕᐎᑾᒃ ᐃᑭ ᑳᑭᑖᑎᓯᐙᒡ᙮ ᑲᑭᓇ ᐱᑯ ᑳᑕᔑᔦᒃ ᐱᒋᑯᓇᔮᑕᒧᒃ ᑕᐸᓭᓂᒧᐎᓐ ᒋᐙᐐᑑᑯᑖᑎᔦᒃ, ᐋᓃᔥ ᑭᒋᒪᓯᓇᐃᑲᓐ ᐃᔑᐲᐃᑳᑌ: ᑭᔐᒪᓂᑑ ᐅᔕ ᐅᓇᑳᔥᑲᐙᐞ ᑳᑭᒋ ᐃᓀᓂᑎᓱᓂᒡ; ᐅᒥᓄᑑᑕᐙᐞ ᐃᑕᔥ ᐐᓐ ᐃᐃ ᑳᑕᐸᓭᓂᒧᓂᒡ᙮

15:6b.1PE.015.006 ᑮᓇᐙ ᑕᔥ ᑕᐸᓭᓂᑎᓱᒃ ᐱᓵᓐ ᒋᑎᐯᓂᒥᓀᒃ ᑭᔐᒪᓂᑑ ᑳᐃᔑᒪᔥᑲᐎᓰᒡ, ᒋᐅᐱᓂᓀᒃ ᐐᓐ ᐃᑯ ᐊᐲ ᑫᔑᒥᓍᐸᑕᕽ᙮

15:7b.1PE.015.007 ᐸᑭᒋᐗᓀᑕᒪᐎᒃ ᐐᓂᑕᒻ ᒋᐱᒥᐗᓀᑕᒪᐎᓀᒃ ᑲᑭᓇ ᑳᒥᑯᔥᑳᑌᑕᒧᐃᑯᔦᒃ, ᐋᓃᔥ ᐐᓐ ᑭᓈᓈᑲᒋᐃᑯᐙ᙮

15:8b.1PE.015.008 ᐙᐹᑲᒣᑕᒧᒃ, ᐊᔕᐙᐱᒃ ᑲᔦ, ᐋᓃᔥ ᑳᔑᑫᓂᒥᓀᒃ ᒪᒋᐊᔭᐋ ᐸᐸᒥᐊᔮ ᑖᐱᔥᑰ ᒥᔑᐱᔑᐤ ᑳᐸᐹᓅᑖᑯᓯᒡ ᐁᓇᓈᑕᐙᐸᒫᒡ ᐊᐌᓀᓇᓐ ᐙᑭᑕᒸᒡ᙮

15:9b.1PE.015.009 ᐋᔩᒋᑳᐸᐎᒃ ᐃᑕᔥ ᐃᐃᒫ ᑭᑌᐺᑕᒧᐎᓂᐙᕽ, ᒋᓇᑳᔥᑲᐌᒃ ᒪᒋᐊᔭᐋ᙮ ᑭᑭᑫᑖᒻ ᐄᑐᒃ ᑫᐐᓇᐙ ᑲᑭᓇ ᑭᐐᒋᐅᑌᐺᑕᒨᒫᑲᓂᐙᒃ ᒥᓯᐌ ᐊᑮᕽ ᒦ ᐯᔑᑾᓐ ᐁᐃᔑᐱᒧᓭᐙᒡ ᑲᒀᑕᑭᐃᑰᐎᓂᕽ᙮

15:10b.1PE.015.010 ᐊᐲ ᑕᔥ ᐊᒋᓇ ᑮᑲᒀᑕᑭᑑᔦᒃ, ᑭᔐᒪᓂᑑ ᑳᐌᓅᒋ ᐐᒦᑭᐌᒡ ᑭᔐᐙᑎᓯᐎᓐ, ᑳᑮᐊᑑᒥᓀᒃ Xᐃᕽ ᒋᐃᔑᐐᑑᑳᓱᔦᒃ ᐃᐃᒫ ᑳᐃᔑᓀᐱᒋ ᑭᒋ ᐃᓀᑖᑯᓯᒡ, ᐐᓐ ᐃᑯ ᑭᑲᑮᔑᓈᑯᐃᑯᐙ, ᑭᑲᐃᔑᐃᑯᐙ ᑲᔦ ᒋᐋᔩᒋᑳᐸᐎᔦᒃ, ᒋᒪᔥᑲᐎᓰᔦᒃ, ᑭᑲᓀᐱᒋᐅᓇᓯᑯᐙ ᑲᔦ᙮

15:11b.1PE.015.011 ᑕᑲ ᑭᔐᒪᓂᑑ ᑕᑎᐯᓂᒥᐌ ᓀᐱᒡ ᐃᑯ, ᐁᒣᓐ!

15:12b.1PE.015.012 ᓵᐃᓬᐊᔅ ᓴ ᑳᑌᐺᔦᑖᑯᓯᒡ ᑮᑕᓇᒥᐋᓈᓐ ᑳᐃᓇᑭᒪᒃ, ᓂᐐᒋᐃᒃ ᐅᐅ ᐸᑮ ᑳᐅᔑᐲᐊᒪᐎᓇᑰᒃ, ᐁᐊᑕᐌᓂᒥᓇᑰᒃ ᒋᒪᔥᑲᐌᑕᒣᒃ, ᐁᐐᑕᒪᐎᓇᑰᒃ ᑲᔦ ᑭᔐᒪᓂᑑ ᐅᑭᔐᐙᑎᓯᐎᓐ ᐁᑌᐺᒪᑲᓂᓂᒃ᙮ ᐗᐐᑫ ᑕᔥ ᐃᐃᒫ ᐋᔩᒋᑳᐸᐎᒃ᙮

15:13b.1PE.015.013 ᐃᑭ ᑕᔥ ᑲᔦ ᐅᑌᐺᑕᒨᒃ ᑳᐊᔮᐙᒡ ᐹᐱᓬᐊᓄᕽ ᑳᑮᐐᒋᐅᓀᑖᑯᓰᒥᓀᒀ, ᑭᐴᔔᐃᑯᐙᒃ᙮ ᑭᐴᔔᐃᑯᐙ ᑲᔦ ᓂᑯᓯᓯᕽ ᑳᐃᓀᓂᒪᒃ ᒫᕒᒃ ᙮

15:14b.1PE.015.014 ᐅᒌᒥᑾᒃ ᑳᐴᔔᐁᒀ ᐅᑌᐺᑕᒨᒃ, ᒋᓈᑾᒃ ᐁᓵᑭᐃᑎᔦᒃ᙮ ᑕᑲ ᐱᓵᓀᑕᒧᐎᓐ ᑭᑲᐐᒌᐎᑯᒻ ᑲᑭᓇ ᑳᐐᒌᐌᒃ X᙮