Titus (Ojibwa)

1

1:1b.TIT.001.001 ᓃᓐ ᑆᓬ ᑭᔐᒪᓂᑑ ᐅᑕᓄᑮᐋᑲᓇᓐ, ᑲᔦ ᒋᓴᔅ X ᐅᑎᔑᓂᔕᐙᑲᓇᓐ᙮ ᓃᓐ ᓴ ᑲᔦ ᓂᑮᐅᓀᓂᒥᑰ, ᒋᐐᒋᑖᐗᒃ ᐅᑌᐺᑕᒧᐎᓂᐙᓐ ᐃᑭ ᐯᒫᑎᓯᐙᒡ ᑭᔐᒪᓂᑑᓐ ᑳᑎᐯᓂᒥᑯᐙᒡ, ᒋᑭᑫᑕᒧᐙᒡ ᑲᔦ ᑌᐺᐎᓂᓂ ᐃᐃᐌ ᐯᔑᑾᓐ ᑳᐃᓀᑖᑾᒃ ᑭᑕᓇᒥᐋᐎᓂᓈᓐ,

1:2b.TIT.001.002 ᐁᔑᐊᐯᓂᒧᓄᑕᒪᕽ ᑲᔦ ᐃᐃ ᐐᑳ ᑫᐃᔥᒀᓭᓯᓄᒃ ᐱᒫᑎᓯᐎᓐ ᑭᔐᒪᓂᑑ ᑳᑮᐊᔓᑕᒪᐎᓇᕽ ᒣᐎᔕ ᒋᑆ ᒫᒋᓭᒃ ᑫᑰᓐ᙮ ᑳᐐᓐ ᐋᓃᔥ ᐐᑳ ᑮᐗᓂᒧᓰ᙮

1:3b.TIT.001.003 ᐊᐲ ᑕᔥ ᒪᔮ ᐁᑮᐅᒋᒋᓭᓂᒃ, ᐅᑮᓈᑯᑑᓐ ᐅᐅ ᐱᒫᑎᓯᐎᓐ ᐅᑎᑭᑐᐎᓂᕽ᙮ ᑲᔦ ᓃᓐ ᑕᔥ ᓂᑮᐃᓇᑭᒥᑰ ᒋᐸᐹᑕᔑᑕᒫᓐ, ᐋᓃᔥ ᑭᔐᒪᓂᑑ ᑳᐱᒫᒋᐃᓇᕽ ᑮᐃᓈᑯᓂᑫ᙮

1:4b.TIT.001.004 ᑮᓐ ᑕᐃᑕᔅ ᑭᑑᔑᐲᐊᒪᐎᓐ, ᑮᓐ ᑳᐅᑯᓯᓯᒥᓈᓐ ᐃᐃᒫ ᐯᔑᑾᓐ ᐁᐃᔑᑌᐺᑕᒪᕽ᙮ ᑕᑲ ᑭᔐᒪᓂᑑ ᑳᐅᔫᓯᒥᓐᒡ ᑲᔦ ᒋᓴᔅ X ᑭᑑᐱᒫᒋᐃᐌᒥᓈᓐ ᑭᑲᐙᐸᑕᐃᒃ ᐅᑭᔐᐙᑎᓯᐎᓐ ᑲᔦ ᐱᓵᓂᓯᐎᓐ ᑭᑲᒦᓂᒃ᙮

1:5b.TIT.001.005 ᒦ ᓴ ᑕᔥ ᐃᐃ ᑳᑮᐅᒋᓇᑲᓂᓈᓐ ᐌᑎ ᑲᕒᐄᑦ ᒥᓂᓯᕽ, ᒋᑾᔭᑯᓇᒪᓐ ᐅᓄ ᑳᑮᑮᔑᐅᓇᑌᓯᓄᑭᓐ ᑲᔦ ᒋᐅᓈᐸᒪᑣ ᑫᓃᑳᓂᓯᐙᒡ ᐊᓇᒥᐋᐎᓂᕽ ᐃᐃᒫ ᑳᑕᓯᑭᓐ ᐆᑌᓇᐗᓐ, ᒋᐃᔑᒋᑫᔭᓐ ᑳᑮᐃᓂᓈᓐ᙮

1:6b.TIT.001.006 ᒦᑕᔥ ᐊᐊ ᑳᓃᑳᓂᓯᒡ ᐊᓇᒥᐋᐎᓂᕽ ᐁᔑᓈᑾᓂᓂᒃ ᑫᑰᓐ ᒋᐃᔑᐊᓈᒣᑖᑯᓯᓯᒃ, ᒋᒥᒋᐯᔑᑯᐋᒡ ᑲᔦ ᐅᐐᑎᑫᒫᑲᓇᓐ, ᐅᓃᒑᓂᓴᐞ ᑲᔦ ᒋᐅᑌᐺᑕᒧᐎᓂᓂᒡ, ᒋᑎᓄᐎᓯᓂᑭᐸᓐ ᑳᓂᑖᐃᓂᒥᓐᒡ ᐁᑮᐗᔥᑴᓂᒡ, ᐁᔕᔒᐱᑕᒥᓂᒡ ᑲᔦ᙮

1:7b.TIT.001.007 ᐊᐊ ᓴ ᑳᓃᑳᓂᑲᓇᐙᐸᑕᕽ ᐊᓇᒥᐋᐎᓐ, ᐃᔑᓈᑾᓂᓂ ᐐᑫ ᐱᑯ ᑫᑰᓂᓂ ᒋᐃᔑᐊᓈᒣᑖᑯᓯᓯᒃ᙮ ᐋᓃᔥ ᑭᔐᒪᓂᑑᓐ ᐅᑲᓇᐌᒋᑫᑕᒪᐙᓐ᙮ ᑳᐐᓐ ᑲᔦ ᐐᓐ ᐁᑕ ᑯ ᑕᐃᔥᐯᓂᑎᓱᓰ, ᑳᐐᓐ ᑲᔦ ᒋᐗᑫᐎᑭᑖᓱᒡ, ᑳᐐᓐ ᑲᔦ ᒋᓂᑖᒥᓂᑴᒡ᙮ ᑳᐐᓐ ᑲᔦ ᒋᐋᒀᑎᓯᒡ, ᑳᐐᓐ ᑲᔦ ᒋᓵᑭᐋᒡ ᔔᓂᔮᓐ᙮

1:8b.TIT.001.008 ᒦ ᓴ ᑕᔥ ᒋᒥᓉᑕᕽ ᒋᐲᑎᑲᓈᒡ ᐊᐎᔭᐞ ᐅᑖᐎᓂᕽ, ᒋᓵᑭᑑᒡ ᑲᔦ ᑳᐅᓂᔑᔑᓂᓂᒃ, ᐌᐌᓂ ᒋᐱᒫᑎᓯᒡ, ᑾᔭᒃ ᑲᔦ ᒋᑑᑕᐙᒡ ᐊᐎᔭᐞ, ᑲᔦ ᑭᔐᒪᓂᑑᓐ ᑳᐃᔑᒥᓉᑕᒥᓂᒡ ᒋᐃᔑᐱᒫᑎᓯᒡ᙮ ᒋᑲᔥᑭᑑᒡ ᑲᔦ ᐐᑫ ᐱᑯ ᒋᑲᓇᐌᓂᑎᓱᒡ ᐋᓃᓐ ᐁᔑᐱᒫᑎᓯᒡ᙮

1:9b.TIT.001.009 ᐅᓃᑳᓂᓰ ᑲᔦ ᐅᑲᑭᒋᐎᓈᓐ ᐃᐃ ᑳᑌᐺᔦᑖᑾᓂᓂᒃ ᐃᑭᑐᐎᓂᓂ ᑳᐃᔑᐊᔮᓂᒃ ᑾᔭᒃ ᑭᑭᓄᐊᒫᑎᐎᓂᕽ᙮ ᒦᑕᔥ ᑫᐃᔑᑲᔥᑭᑑᒡ ᒋᑲᑳᓱᒫᒡ ᐊᐎᔭᐞ ᑾᔭᒃ ᑭᑭᓄᐊᒫᑫᐎᓂᕽ ᑲᔦ ᒋᔖᑰᓱᒫᒡ ᐃᐃ ᑳᐋᔑᑌᒥᐌᓂᒡ᙮

1:10b.TIT.001.010 ᐋᐱᒋ ᑕᔥ ᐹᑏᓄᐗᒃ ᑳᔕᔒᐱᑕᒧᐙᒡ ᐊᓅᒋᑯ ᑲᔦ ᐁᐃᑭᑐᐙᒡ, ᐁᐗᓂᐎᔑᐌᐙᒡ ᑲᔦ᙮ ᒦᐗᑯᑯ ᑳᑮᐃᔑᑎᐯᑖᑯᓯᐙᐸᓐ ᑳᐱᐅᒋᑴᑳᑎᓯᐙᒡ ᐃᐃᒫ ᓇᑫ ᒎᐗᐞ ᑳᐃᔑᐊᓇᒥᐋᓂᒡ᙮

1:11b.TIT.001.011 ᒦᑕᔥ ᐁᔑᓈᑾᓂᓂᒃ ᒋᑲᑴᑭᐱᑎᓂᑣ, ᐋᓃᔥ ᐅᓂᔑᐗᓈᒋᑕᒪᐙᐙᐞ ᐊᐎᔭᐞ ᐅᑌᐺᑕᒧᐎᓂᓂ, ᐊᐴᔥᑫ ᑳᑕᑕᔑᓂᒡ ᐃᐃᒫ ᑖᐎᓇᓐ ᒋᐴᓂᑌᐺᑕᒥᓂᒡ, ᐁᐃᔑᑭᑭᓄᐃᑫᐙᒡ ᐋᓃᓐ ᑫᑮᐃᔑᑭᑭᓄᐃᑫᓯᒀᐸᓐ᙮ ᑳᐐᓐ ᑾᔭᒃ ᑑᑕᓰᐗᒃ, ᔔᓂᔮᓐ ᐃᑕᔥ ᐁᑕ ᑳᐅᒋ ᐃᔑᒋᑫᐙᒡ᙮

1:12b.TIT.001.012 ᐯᔑᒃ ᐃᑕᔥ ᐃᓂ ᑲᕒᐄᑦ ᐃᓂᓂᐗᒃ ᑳᐃᓇᑭᒫᐙᒡ ᐁᑮᑲᓅᒋᑫᑕᒪᐙᓂᒡ ᒪᓂᑑᓐ ᐅᐅ ᑮᐃᑭᑐᐗᓐ: ᐃᑭ ᓴ ᑲᕒᐄᑎᕽ ᑳᐊᔮᐙᒡ ᒨᔕᒃ ᑲᑮᓇᐎᔥᑭᐗᒃ, ᒪᒋᐊᔭᐋᐎᔑᕽ ᑲᔦ ᐃᓀᑖᑯᓯᐗᒃ, ᐐᑫ ᑲᔦ ᐁᑭᑎᒥᔥᑭᐙᒡ ᐁᓂᑖᑳᔕᑫᐙᒡ᙮

1:13b.TIT.001.013 ᑌᐺ ᑕᔥ ᐃᐃ ᑳᑮᐃᑭᑐᒡ᙮ ᒦ ᓴ ᑕᔥ ᐃᐃ ᑫᐅᒋᐊᔮᒀᒥᒪᑣ ᑾᔭᒃ ᑌᐺᑕᒧᐎᓂᕽ ᒋᐃᔑᐱᒫᑎᓯᐙᒡ,

1:14b.TIT.001.014 ᒋᐸᐹᐱᓯᔅᑫᑕᓯᒀ ᑲᔦ ᐃᓂ ᒎᐎ ᐋᑎᓲᑫᐎᓇᓐ, ᒋᐱᓯᑕᐙᓯᒀ ᑲᔦ ᐋᓃᓐ ᐁᓈᑯᓂᑫᓂᒡ ᐃᐃ ᐃᓂᓂᐗᐞ ᑳᑮᓇᑲᑕᒥᓂᒡ ᑌᐺᐎᓂᓂ᙮

1:15b.TIT.001.015 ᐃᑭ ᑕᔥ ᑳᐯᑳᑎᓯᐙᒡ, ᑲᑭᓇ ᑫᑰᓐ ᐯᑲᓂᓂ, ᐃᑭ ᑕᔥ ᐐᓐ ᑳᐐᓈᑎᓯᐙᒡ, ᑳᑌᐺᑕᓯᒀ ᑲᔦ, ᑳᐐᓐ ᑫᑰᓂᓂ ᐯᑲᓯᓂᓂ, ᐋᓃᔥ ᐅᓈᓈᑲᑕᐌᑕᒧᐎᓂᐙᓐ ᑲᔦ ᐅᑭᑫᓂᑎᓱᐎᓂᐙᓐ ᐐᓀᑖᑾᓂᓂᐗᓐ᙮

1:16b.TIT.001.016 ᒦᑕᔥ ᐁᑭᑐᐙᒡ ᐁᑭᑫᓂᒫᐙᒡ ᑭᔐᒪᓂᑑᓐ, ᐅᑕᓄᑮᐎᓂᐙᓐ ᐃᑕᔥ ᐅᑎᔑᓈᑯᑑᓈᐙ ᐁᑭᑫᓂᒫᓯᒀ ᐁᐃᔑᒋᑫᐙᒡ, ᐁᔒᑫᑖᑯᓯᐙᒡ, ᐁᔕᔒᐱᑕᒧᐙᒡ ᑲᔦ᙮ ᑳᐐᓐ ᐃᑕᔥ ᑫᑰᓐ ᐊᐲᑌᑖᑯᓯᓰᐗᒃ, ᒥᓴᐙ ᐱᑯ ᑾᔭᒃ ᒋᑮᐃᔑᒋᑫᐙᐸᓐ᙮

2

2:1b.TIT.002.001 ᑮᓐ ᐃᑕᔥ ᐐᓐ ᐃᔑᑭᑭᓄᐊᒫᑫᓐ ᐯᔑᑾᓐ ᒋᐃᓀᑖᑾᒃ ᐃᐃ ᑳᑾᔭᑯᓯᕽ ᑭᑭᓄᐃᑫᐎᓐ᙮

2:2b.TIT.002.002 ᑭᑭᓄᐊᒪᐤ ᐊᑭᐌᓯᐗᒃ ᒋᑲᓇᐌᑕᒧᐙᒡ ᐅᑎᔑᒋᑫᐎᓂᐙᓐ, ᒋᓂᑆᑳᐱᒫᑎᓯᐙᒡ, ᑾᔭᒃ ᒋᐃᓀᑕᒧᐙᒡ, ᒋᒪᔥᑲᐎᑌᐺᑕᒧᐙᒡ ᑲᔦ, ᒋᓵᑭᐃᐌᐙᒡ, ᐐᑳ ᑲᔦ ᒋᐸᑭᒌᓯᒀ᙮

2:3b.TIT.002.003 ᐃᑭ ᑲᔦ ᑳᑭᒋᐊᔭᐋᐎᐙᒡ ᐃᑴᐗᒃ ᒋᑮᐃᓈᑎᓯᐙᐸᓐ ᐃᑴᐗᒃ ᑎᓄ ᑳᑯᑖᓀᓂᒫᐙᒡ ᑭᔐᒪᓂᑑᓐ, ᑳᐐᓐ ᐐᓐ ᒋᐸᐹ ᐊᓅᒋᑯ ᐃᑭᑐᐙᒡ, ᒋᑎᐯᓂᒥᑯᓯᒀ ᑲᔦ ᔔᒥᓈᐳ, ᒋᑭᑭᓄᐃᑫᐙᒡ ᑕᔥ ᑳᐅᓂᔑᔑᓂᓂᒃ,

2:4b.TIT.002.004 ᒋᑭᑭᓄᐊᒪᐙᐙᒡ ᑳᐅᔥᑳᑎᓯᓂᒡ ᐃᑴᐗᐞ ᒋᓵᑭᐋᓂᒡ ᐅᓈᐯᒥᓂ, ᒋᓵᑭᐋᓂᒡ ᑲᔦ ᐅᓃᒑᓂᓯᓂ,

2:5b.TIT.002.005 ᑾᔭᒃ ᑲᔦ ᒋᑲᓇᐌᑕᒥᓂᒡ ᐅᐱᒫᑎᓯᐎᓂᓂ, ᒋᐯᑳᑎᓯᓂᒡ ᑲᔦ, ᑳᐃᔑᑖᓂᒡ ᑲᔦ ᒋᑕᓇᓄᑮᓂᒡ, ᒋᒥᓍᑎᓯᓂᒡ, ᒋᓇᐃᑕᐙᓂᒡ ᑲᔦ ᐅᓈᐯᒥᓂ, ᑭᔐᒪᓂᑑ ᐅᑎᑭᑐᐎᓐ ᓴ ᐊᓅᒋᑯ ᒋᐅᒋ ᐃᒋᑳᑌᓯᓂᓂᒃ᙮

2:6b.TIT.002.006 ᑲᑳᓱᒥᑾᒃ ᐃᑕᔥ ᑲᔦ ᑳᐅᔥᑳᑎᓯᐙᒡ ᐃᓂᓂᐗᒃ ᑾᔭᒃ ᒋᑲᓇᐌᑕᒧᐙᒡ ᐅᐱᒫᑎᓯᐎᓂᐙᓐ᙮

2:7b.TIT.002.007 ᑲᑭᓇ ᑕᔥ ᑫᑰᓐ ᑳᐃᔑᒋᑫᔭᓐ, ᐙᐸᑕᐃᐌᓐ ᒋᑭᑭᓇᐙᐸᒋᑳᑌᑭᓐ ᐃᓂ ᑭᒥᓄᒋᑫᐎᓇᓐ, ᒋᑾᔭᑯᓈᑾᑭᓐ ᐃᓂ ᑭᑭᑭᓄᐃᑫᐎᓇᓐ, ᒋᓂᑆᑳᐱᒫᑎᓯᔭᓐ᙮

2:8b.TIT.002.008 ᒥᓄᑮᔗᐎᓇᓐ ᐃᑕᔥ ᐁᑕ ᐋᐸᒋᑑᓐ ᐊᐎᔭ ᐊᓅᒋᑯ ᒋᐃᓂᓯᓄᒃ, ᐃᑭ ᓴ ᑳᔒᑫᓂᒥᒀ ᑕᐊᑲᒋᐗᒃ, ᐋᓃᔥ ᑭᑲᑸᓇᐎ ᐃᑯᓈᓂᒃ᙮

2:9b.TIT.002.009 ᐃᑭ ᑲᔦ ᐊᓄᑮᐋᑲᓇᒃ ᒋᐸᑕᐲᑕᐙᐙᒡ ᐅᑑᑭᒫᒥᐙᐞ, ᒥᓯᐌ ᐱᑯ ᒋᐃᔑᒥᓍᐸᒥᑯᐙᒡ, ᒋᐋᔮᔑᑌᒫᓯᒀ ᑲᔦ ᑮᑲᓅᓂᑯᐙᒡ᙮

2:10b.TIT.002.010 ᒋᑭᒨᑎᒫᓯᒀ ᑲᔦ ᐅᑑᑭᒫᒥᐙᐞ, ᐃᐃ ᓴ ᒋᐃᔑᒋᑫᐙᒡ ᒨᔕᒃ ᐃᑯ ᒋᐙᐸᑕᐃᐌᐙᒡ ᑾᔭᒃ ᐁᐃᔑᐱᒫᑎᓯᐙᒡ, ᐁᑌᐺᔦᑖᑯᓯᐙᒡ ᑲᔦ᙮ ᒦ ᓴ ᑕᔥ ᒥᓯᐌ ᐃᐃᒫ ᑫᐅᒋᑭᒋ ᐃᓀᒋᑳᑌᒃ ᐃᐃ ᑳᐃᔑᑭᑭᓄᐊᒫᑎᓈᓂᐎᒡ ᑭᔐᒪᓂᑑ ᑭᑑᐱᒫᒋᐃᐌᒥᓈᓐ᙮

2:11b.TIT.002.011 ᑭᔐᒪᓂᑑ ᐋᓃᔥ ᐅᑮᓈᑯᑑᓐ ᐅᔕᐌᒋᑫᐎᓐ ᑲᑭᓇ ᐯᒫᑎᓯᓂᒡ ᑫᐅᒋᐱᒫᒋᐃᑣ᙮

2:12b.TIT.002.012 ᒦᑕᔥ ᐃᐃᒫ ᐌᒋᑭᑫᑕᒪᕽ ᒋᐋᓇᐌᑕᒪᕽ ᐃᓂ ᐃᔑᒋᑫᐎᓇᓐ ᑭᔐᒪᓂᑑ ᑳᔒᑫᑕᕽ, ᐃᓂ ᑲᔦ ᐊᑮᐎ ᒥᓴᐌᒋᑫᐎᓇᓐ᙮ ᒦᑕᔥ ᐁᔑᐊᑕᐌᓂᒥᑰᔭᕽ ᐌᐌᓂ ᒋᑲᓇᐌᑕᒪᕽ ᑭᐱᒫᑎᓯᐎᓂᓈᓐ, ᒋᑾᔭᒀᑎᓯᔭᕽ ᑲᔦ, ᒋᐃᔑᐱᒫᑎᓯᔭᕽ ᑲᔦ ᑭᔐᒪᓂᑑ ᑳᐃᔑᐸᑯᓭᓂᒥᓇᕽ ᐅᐅᒫ ᐊᑮᕽ,

2:13b.TIT.002.013 ᐁᐊᔕᐙᐸᑕᒪᕽ ᐃᑕᔥ ᐃᐃ ᑳᐲᑑᔭᕽ ᑭᑕᐯᓂᒧᐎᓂᓈᓐ ᑫᐊᐲᒋᒥᓉᑖᑾᒃ, ᑲᔦ ᒋᐙᐸᑕᒧᐗᕽ ᐅᑭᒋ ᐃᓀᑖᑯᐎᓯᓐ X ᒋᓴᔅ ᑭᑭᒋᑭᔐᒪᓂᑑᒥᓈᓐ ᑳᐱᒫᒋᐃᓇᕽ᙮

2:14b.TIT.002.014 ᐐᓐ ᐋᓃᔥ ᑮᐸᑭᑎᓂᑎᓱ ᑮᓇᐎᓐᑦ ᐅᒋ, ᐁᑮᑎᐸᐅᓇᕽ ᐃᐃᒫ ᑲᑭᓇ ᒪᒋᑑᑕᒧᐎᓂᕽ ᒋᐅᒋᑎᐯᑖᑯᓯᓯᐗᕽ, ᑲᔦ ᐁᑮᐯᑭᐋᒡ ᐯᒫᑎᓯᓂᒡ ᐐᓐ ᐃᑯ ᐁᐐᑎᐯᓂᒫᒡ, ᐃᐃ ᒣᓴᐌᑕᒥᓂᒡ ᐁᐐᒥᓄᒋᑫᓂᒡ᙮

2:15b.TIT.002.015 ᒦᐗᓐ ᐃᑕᔥ ᐅᓄ ᑕᔑᑕᓐ, ᑲᑳᓱᒻ ᐃᑭ ᑳᓅᑕᐎᒀ ᑲᔦ ᒋᐅᒋᐊᑣ ᐗᓂᑑᑕᒧᐙᒡ᙮ ᐋᐸᒋᑑᓐ ᑲᔦ ᑲᑭᓇ ᑭᑕᐲᑌᑖᑯᓯᐎᓐ ᑳᐃᔑᓃᑳᓀᑖᑯᓯᔭᓐ᙮ ᑫᑯ ᐸᑭᑎᓈᑫᓐ ᐊᐎᔭ ᒋᐋᓇᐌᓂᒥᒃ᙮

3

3:1b.TIT.003.001 ᐐᑕᒪᐎᑾᒃ ᐃᑕᔥ ᒋᐸᑕᐲᑕᐙᐙᒡ ᑳᑎᐯᓂᒥᐌᓂᒡ, ᐃᐃ ᑲᔦ ᑳᐅᑭᒫᐌᑖᑯᓯᓂᒡ, ᒋᓇᓇᐃᑕᐙᐙᒡ ᒨᔕᒃ ᐃᑯ ᒋᐗᐌᐯᒦᐙᒡ ᒋᑑᑕᒧᐙᒡ ᑳᐅᓂᔑᔑᓂᓂᒃ᙮

3:2b.TIT.003.002 ᐐᑕᒪᐤ ᑲᔦ ᒋᒪᒋ ᐃᓈᓯᒀ ᐊᐎᔭᓐ, ᒨᔕᒃ ᐃᑕᔥ ᐃᑯ ᒋᐙᐸᑕᐋᐙᒡ ᑲᑭᓇ ᐊᐎᔭᐞ ᐁᓅᑫᓂᒫᐙᒡ, ᐱᓵᓂᑯ ᑲᔦ ᐊᐎᔭᐞ ᐁᒥᓄᐐᒌᐙᐙᒡ᙮

3:3b.TIT.003.003 ᐋᓃᔥ ᑫᑮᓇᐎᓐᑦ ᐋᐱᑎᕽ ᑭᑮᑲᑮᐹᑎᓯᒥᓐ, ᐁᑮᔕᔒᐱᑕᒪᕽ, ᐁᑮᐗᓂᔑᒥᑰᔭᕽ ᑲᔦ, ᐁᑮᑎᐯᓂᒥᑯᔭᕽ ᐌᑯᓀᓐ ᐃᑯ ᒥᓴᐌᒋᑲᓇᓐ, ᐁᑮᐊᑕᐌᑕᒪᕽ ᒨᔕᒃ ᒋᒥᓄᒪᒋᐅᔭᕽ᙮ ᑫᑮᓇᐎᓐᑦ ᐄᑐᒃ ᑭᑮᒪᒋᑕᔑᑫᒥᓐ, ᑭᑮᒥᓴᐌᑕᒫᑫᒥᓐ ᑲᔦ, ᐁᑮᔒᑫᓂᒥᑰᔭᕽ, ᐁᑮᓂᔥᑫᓂᑎᔭᕽ ᑲᔦ ᑲᑭᓇ᙮

3:4b.TIT.003.004 ᐊᐲ ᑕᔥ ᑭᔐᒪᓂᑑ ᑭᑑᐱᒫᒋᐃᐌᒥᓈᓐ ᐅᑭᔐᐙᑎᓯᐎᓐ ᑮᓈᑯᑑᒡ, ᐃᐌ ᓇᑫ ᑲᔦ ᑳᐃᔑᔕᐌᓂᒫᒡ ᐃᐃ ᐯᒫᑎᓯᓂᒡ,

3:5b.TIT.003.005 ᑭᑮᐱᒫᒋᐃᑯᓈᓐ᙮ ᑳᐐᓐ ᑕᔥ ᐐᓐ ᑭᒥᓄᐊᓄᑮᐎᓂᓈᓂᕽ ᑳᑮᐃᔑᒋᑫᔭᕽ, ᐃᐃᒫ ᓴ ᐐᓐ ᐃᑯ ᐅᑰᐹᓯᓈᑫᐎᓐ ᑭᑮᐅᒋᐱᒫᒋᐃᑯᓈᓐ᙮ ᐊᐊ ᓴ ᑭᔐᒪᓂᑑ ᐅᑕᒑᑾᓐ ᑭᑮᐃᔑᒋᑫᐃᑯᓈᓐ, ᑭᑮᑭᓰᔮᐹᐗᓂᑯᓈᓐ ᐁᑮᐅᔥᑭᓂᑖᐎᑭᐃᓇᕽ, ᐅᔥᑭᐱᒫᑎᓯᐎᓐ ᑲᔦ ᐁᑮᒦᓂᓇᕽ᙮

3:6b.TIT.003.006 ᒦᔥ ᐅᓄ ᐅᑕᒑᑾᓐ ᑭᔐᒪᓂᑑ ᑳᑮᐌᓅᒋᓰᑭᓇᒪᐎᓇᕽ ᒋᓴᔅ X ᑳᐱᒫᒋᐃᓇᕽ ᐅᒋ᙮

3:7b.TIT.003.007 ᒦ ᓴ ᑕᔥ ᐅᑭᔐᐙᑎᓯᐎᓂᕽ ᒋᐅᒋ ᐃᓇᑭᒥᓇᕽ ᑾᔭᒃ ᒋᒥᓄᐐᒌᐗᕽ, ᑲᔦ ᒋᑌᐱᓇᒪᕽ ᐃᐃ ᐱᒫᑎᓯᐎᓐ ᐐᑳ ᑫᐃᔥᒀᓭᓯᓄᒃ ᑳᐊᐯᓂᒧᓄᑕᒪᕽ᙮

3:8b.TIT.003.008 ᑌᐺᔦᑖᑾᓐ ᐃᑕᔥ ᐅᐅ ᐃᑭᑐᐎᓐ᙮ ᑭᓇᑕᐌᓂᒥᓐ ᐃᑕᔥ ᐌᐌᓂ ᒋᐐᑕᒫᑫᔭᓐ ᐅᓄ ᑭᒋᑫᑰᓇᓐ, ᐃᑭ ᓴ ᑳᑌᐺᑕᐙᐙᒡ ᑭᔐᒪᓂᑑᓐ ᒋᐊᔮᒀᒥᓯᐙᒡ ᐋᐱᒋ ᒋᒥᓄᑑᑕᒧᐙᒡ ᒨᔕᒃ᙮ ᐋᐱᒋ ᐋᓃᔥ ᒥᓄᓈᑾᓐ ᐃᐃ ᒋᑮᐃᔑᒋᑫᓈᓂᐗᑭᐸᓐ, ᑲᑭᓇ ᑲᔦ ᐊᐎᔭ ᑕᐅᒋᒥᓄᓭ᙮

3:9b.TIT.003.009 ᑫᑯ ᑕᔥ ᐐᓐ ᐐᒋᐋᑫᓐ ᐊᐎᔭᒃ ᐊᓂᔖ ᐱᑯ ᑳᑮᑳᑎᐙᒡ ᑲᔦ ᑳᒥᑰᑕᒧᐙᒡ ᐋᑎ ᑳᐱᐅᑕᑳᓀᓯᐙᒡ, ᑲᔦ ᒫᔑᑲᓅᓂᑎᐙᒡ᙮ ᑫᑯ ᑲᔦ ᐐᒋᑑᑫᓐ ᐁᑲᑴᔖᑰᓱᑎᕽ ᐃᐃ ᐅᓇᔓᐌᐎᓐ ᑳᐃᑭᑑᒪᑲᒃ, ᐋᓃᔥ ᑳᐐᓐ ᑫᑰᓐ ᑕᐃᓈᐸᑕᓯᓅᓐ ᐃᐃ ᐃᔑᒋᑫᕽ᙮ ᑳᐐᓐ ᑲᔦ ᑫᑰᓐ ᐊᐲᑌᑖᑾᓯᓅᓇᓐ᙮

3:10b.TIT.003.010 ᑮᔥᐱᓐ ᐃᑕᔥ ᐊᐎᔭ ᑳᐗᓂᔥᑴᐃᐌᒡ, ᐊᔮᒀᒥᒻ ᐋᐱᑎᕽ, ᐲᓂᔥ ᐃᑕᔥ ᓃᔣ 2, ᒦ ᓴ ᐃᔑᐋᓇᐌᓂᒻ ᐱᓯᑕᐎᓯᓄᒃ᙮

3:11b.TIT.003.011 ᑭᑭᑫᑖᓐ ᐋᓃᔥ ᐊᐊ ᐃᓂᓂ ᐁᒪᒋ ᐃᔑᐌᐱᓯᒡ, ᐃᐃᒫ ᓴ ᐅᑎᔑᒋᑫᐎᓂᕽ ᐅᒋᓈᑾᓂᓂ ᐁᐗᓂᑑᑕᕽ᙮

3:12b.TIT.003.012 ᐊᐲ ᑕᔥ ᐲᒋᓂᔕᐗᒃ ᐋᕒᑎᒪᔅ ᑯᒫ ᑲᔦ ᑎᑭᑲᔅ ᐌᑎ ᑳᐃᔑᐊᔮᔭᓐ ᒋᓈᐱᔥᑲᐎᒃ, ᐐᑫ ᑲᑴᑲᔥᑭᑑᑲᓐ ᒋᐱᐊᑕᐙᐸᒥᔭᓐ ᐌᑎ ᓂᑳᐸᓬᐃᔅ ᐆᑌᓈᕽ, ᐋᓃᔥ ᐋᔕ ᓂᑮᐃᓀᑕᒻ ᐁᐐᑕᔑᐱᐴᓂᔑᔮᓐ ᐌᑎ᙮

3:13b.TIT.003.013 ᐐᑫ ᑕᔥ ᑲᑴᐐᒋᐞ ᐊᐌ ᓰᓇᔅ ᐅᓈᑕᒫᑫ, ᐊᑆᓬᐊᔅ ᑲᔦ, ᒋᒫᒑᐙᒡ ᐃᐃ ᑳᐐᐸᐹᒥᔭᔮᐙᒡ, ᑫᒋᓈᒡ ᑲᔦ ᒋᐐᒋᐊᑣ ᑫᑰᓂᓂ ᒋᓅᑌᓭᓯᒀ᙮

3:14b.TIT.003.014 ᒦ ᓴ ᐁᔑᓈᑾᓂᓂᒃ ᑭᐐᒋᑌᐺᑕᒨᒥᓈᓂᒃ ᒋᑭᑫᑕᒧᐙᐸᓐ ᒨᔕᒃ ᐃᑯ ᒋᑲᑴᒥᓄᑑᑕᒧᐙᒡ, ᒋᑲᔥᑭᑕᒫᓱᐙᒡ ᑫᑰᓂᓂ ᒋᓅᑌᓭᓯᒀ᙮ ᑳᐐᓐ ᐐᓐ ᐊᓂᔖ ᐱᑯ ᒋᒥᒋᐱᒫᑎᓯᐙᐸᓐ᙮

3:15b.TIT.003.015 ᐅᑯ ᑕᔥ ᑲᑭᓇ ᑳᐐᒌᐎᐙᒡ ᑭᐴᔔᐃᑯᐙᒃ᙮ ᐴᔔᑕᒪᐎᔑᓈᒻ ᐃᑕᔥ ᒋᐴᔔᐊᑣ ᑲᔦ ᐅᑯ ᑳᓵᑭᐃᔭᒥᑣ ᐅᒋ ᐃᐌ ᑭᑌᐺᑕᒧᐎᓂᓈᓂᕽ᙮ ᑭᔐᒪᓂᑑ ᐅᑭᔐᐙᑎᓯᐎᓐ ᑭᑲᐐᒌᐎᑯᒻ ᑲᑭᓇ ᑳᑕᔑᔦᒃ᙮