2 Timothy (Ojibwa)

21

21:1b.2TI.021.001 ᓃᓐ ᑆᓬ ᑭᑑᔑᐲᐊᒪᐎᓐ, ᓃᓐ X ᒋᓴᔅ ᐅᑎᔑᓂᔕᐙᑲᓇᓐ, ᐐᓐ ᑭᔐᒪᓂᑑ ᐁᔑᐊᑕᐌᓂᒥᒡ ᒋᐐᑕᒫᑫᔮᓐ ᐅᐅ ᐱᒫᑎᓯᐎᓐ, ᑳᑮᐃᔑᓃᑳᓂᐐᑕᒫᑰᔭᕽ ᐁᐊᔮᔭᕽ ᐁᐅᒋᑎᐯᑖᑯᓯᔭᕽ X ᒋᓴᓯᕽ᙮

21:2b.2TI.021.002 ᑮᓐ ᑕᔥ ᑎᒪᑎ ᑭᑑᔑᐲᐊᒪᐎᓐ, ᓂᑯᓯᔅ ᐁᓈᑯᒥᓈᓐ, ᑭᔕᐌᓂᒥᓐ᙮ ᐊᐯ ᓴ ᐅᓄ ᑲᒦᓂᑰᐎᔅ, ᐐᑑᑳᑰᐎᓐ, ᔕᐌᓂᒥᑰᐎᓐ, ᐱᓵᓂᓯᐎᓐ, ᒫᑭᐌᒡ ᑭᔐᒪᓂᑑ ᐌᔫᓯᒥᓐᒡ ᒦᓇᐙ X ᒋᓴᔅ ᑳᑎᐯᓂᒥᓇᕽ᙮

21:3b.2TI.021.003 ᒦᐗᓂᓂ ᐯᔑᑾᓐ ᑭᔐᒪᓂᑑᓐ ᓂᑭᒋᐊᔭᐋᒥᓈᐸᓃᒃ ᑳᑮᐊᓄᑮᑕᐙᐙᒡ, ᑲᔦ ᐐᓐ ᐃᑕᔥ ᓃᓐ ᐃᑯ ᐁᓄᑮᑕᐗᒃ᙮ ᓂᑾᔭᑴᑖᓐ ᐃᑕᔥ ᑲᔦ ᐁᑾᔭᑯᒋᑫᔮᓐ ᐁᐊᓄᑮᑕᐗᒃ᙮ ᓂᒦᑴᒋᐎᐋ ᑭᔐᒪᓂᑑ, ᒨᔕᒃ ᐁᒥᑴᓂᒥᓈᓐ ᐁᐊᓇᒥᐋᔮᓐ ᐁᑮᔑᑲᒃ, ᐁᑎᐱᑲᒃ ᑲᔦ᙮

21:4b.2TI.021.004 ᓂᒫᒥᑲᐤ ᐁᑮᐅᒋᑲᐙᐱᔭᓐ ᑮᐸᑫᐎᓂᑎᔭᕽ᙮ ᑭᓅᑌᐐᐙᐸᒥᓐ ᐃᓴ, ᒦᑕᔥ ᐃᑯ ᒋᑭᒋᒌᑫᑕᒫᓐ᙮

21:5b.2TI.021.005 ᒨᔕᒃ ᓂᒫᒥᑲᐤ ᑌᐺ ᐁᔑᑌᐺᔦᑕᒪᓐ, ᒪᔮ ᐊᐌ ᑰᑯᒻ ᓬᐆᐎᔅ ᓃᑳᓐ ᑳᑌᐺᔦᑕᕽ, ᑫᐐᓐ ᐃᑕᔥ ᐊᐊᐌ ᑭᒫᒫ ᐃᔫᓂᔅ ᑳᐃᔑᑌᐺᔦᑕᕽ, ᐁᔑᑫᒋᓈᐁᓂᒥᓈᓐ ᑕᔥ ᑖᐱᔥᑰ ᑫᑮᓐ ᐁᔑᑌᐺᔦᑕᒪᓐ᙮

21:6b.2TI.021.006 ᐅᒋ ᐅ ᑭᑌᐺᔦᑕᒧᐎᓐ ᑭᑑᒋᒫᒥᑲᐙᒥᓐ ᒋᐅᐱᓯᔭᓐ ᐅᐅ ᑳᑮᐃᔑᒦᓂᒃ ᑭᔐᒪᓂᑑ ᐃᐃᐌ ᐊᐲ ᑳᓵᒥᓂᓈᓐ ᐁᑮᐅᓇᑭᒥᓈᓐ ᒋᐊᓇᒥᐁᐗᓄᑮᔭᓐ᙮

21:7b.2TI.021.007 ᐃᓂ ᐋᓃᔥ ᐅᑕᒑᑾᓐ ᑭᔐᒪᓂᑑ ᑳᑮᒦᓂᓇᕽ, ᑳᐐᓐ ᐐᓐ ᒋᑯᑖᒋᔭᕽ ᑭᑎᔑᒦᓂᑯᓰᓈᓐ, ᐃᐃᐌ ᓴ ᐐᓐ ᒪᔥᑲᐎᓰᐎᓐ, ᓵᑭᐃᐌᐎᓐ, ᑲᑮᑖᐎᓯᐎᓐ ᒋᑭᑭᓯᔭᕽ᙮

21:8b.2TI.021.008 ᒦᑕᔥ ᑳᐐᓐ ᑭᑖᐅᒋᔖᑴᓂᒧᓰ ᒋᑎᐹᒋᒥᓐᒡ ᐊᐊ ᑳᑎᐯᓂᒥᓇᕽ᙮ ᑫᑯ ᑲᔦ ᓃᓐ ᐊᑲᑌᓂᒥᔑᑫᓐ, ᐐᓐ ᐊᐊ ᑳᑎᐯᒋᑫᒡ ᑳᐅᒋᑭᐸᐅᑰᔮᓐ᙮ ᑲᔦ ᑮᓐ ᐅᑖᐱᓐ ᐁᔑᑎᑕᑾᐆᓂᑰᐎᓯᔭᓐ ᒋᐅᒋᑯᑕᑭᑑᔭᓐ ᐃᐃᐌ ᐅᒋ ᒥᓍᒋᒧᐎᓐ, ᐁᐃᔑᒦᓂᒃ ᐅᒪᔥᑲᐎᓰᐎᓐ ᑭᔐᒪᓂᑑ᙮

21:9b.2TI.021.009 ᒦ ᐊᐌ ᑳᐱᒫᒋᐃᓇᕽ, ᑳᐊᑐᒥᓇᕽ ᑲᔦ, ᐐᓐ ᐃᑯ ᑎᐱᓇᐌ ᒋᑎᐯᓂᒥᓇᕽ ᐁᑮᐃᓀᓂᒥᓇᕽ᙮ ᑳᐐᓐ ᑮᓇᐎᓐᑦ ᑭᑎᔑᒋᑫᐎᓂᓈᓐ ᑭᑑᒋᑑᑖᑯᓰᓈᓐ, ᐐᓐ ᐃᑯ ᑎᐱᓇᐌ ᐅᑮᐅᓀᑖᓐ ᐁᑮᐃᔑᔕᐌᓂᒥᓇᕽ᙮ ᒣᐎᔕ ᒋᑆ ᐊᓂᒫᒋᓭᒃ ᑫᑰᓐ, ᐋᔕ ᑮᔖᒡ ᑭᑮᒦᓂᑯᓈᓐ ᑭᔐᒪᓂᑑ ᐅᔕᐌᒋᑫᐎᓐ, X ᒋᓴᓲᓐ ᐁᑮᐅᒋᒦᓂᓇᕽ᙮

21:10b.2TI.021.010 ᓅᑯᒻ ᐃᑕᔥ ᒧᔐᓈᑾᓂᓂ ᐅᔕᐌᒋᑫᐎᓐ ᐁᑮᓈᑯᓯᒡ ᐊᐊ ᑳᐱᒫᒋᐃᓇᕽ X ᒋᓴᔅ᙮ ᐐᓐ ᐅᑮᐋᓂᔑᑑᓐ ᐃᐃ ᓂᐳᐎᓐ, ᐃᐃᐌᔥ ᒥᓍᒋᒧᐎᓐ ᐁᑮᐅᒋᒧᔐᓈᑯᑑᒡ ᐃᐃ ᐱᒫᑎᓯᐎᓐ ᐁᑳ ᐐᑳ ᑫᐴᓂᐊᔮᓯᓂᓂᒃ᙮

21:11b.2TI.021.011 ᒦ ᐃᐌ ᒥᓍᒋᒧᐎᓐ ᓂᑎᓇᓅᓂᒃ ᒋᐐᑕᒫᑫᔮᓐ᙮ ᒦ ᐃᐌ ᐯᒥᐅᒋ ᐃᔑᓂᔕᐅᑰᔮᓐ ᐅᑎᔑᓂᔕᐙᑲᓇᓐ ᒋᑎᓄᐎᔮᓐ, ᒋᑭᑭᓄᐊᒫᑫᔮᓐ ᑲᔦ᙮

21:12b.2TI.021.012 ᒦᔥ ᐅᓄ ᑳᐅᒋᑲᒀᑕᑭᑑᔮᓐ᙮ ᑳᐐᓐ ᐐᓐ ᓂᑑᒋᐊᑲᒋᓰ ᐅᓄ ᐋᓇᑑᑖᑰᔮᓐ, ᐋᓃᔥ ᓂᑾᔭᑴᓂᒫ ᑳᑌᐺᔦᓂᒪᒃ, ᐁᑲᔥᑭᑑᒡ ᐃᐃᐌ ᑳᑮᑲᓇᐌᑕᐊᒃ, ᐲᓂᔥ ᐃᑯ ᐃᐌ ᐁᑮᔑᑲᓂᓂᒃ ᒋᑲᓇᐌᑕᒪᐎᒡ᙮

21:13b.2TI.021.013 ᑲᔦ ᑮᓐ ᐊᐸᓀ ᑯ ᑲᓇᐌᑕᓐ ᐃᓂ ᑾᔭᒃ ᐃᑭᑐᐎᓇᓐ ᑳᑮᐃᔑᓅᑕᐎᔭᓐ᙮ ᒦ ᑯ ᑫᑮᓐ ᐯᔑᑾᓐ ᒋᐃᔑᐐᑕᒪᓐ, ᒋᑭᑭᓯᔭᓐ ᑲᔦ ᑌᐺᔦᑕᒧᐎᓐ, ᓵᑭᐃᐌᐎᓐ, X ᒋᓴᔅ ᑳᐅᒌᑕᒫᑫᒡ ᐁᐐᒌᐗᕽ᙮

21:14b.2TI.021.014 ᐅᓂᔑᔑᓐ ᐃᐃ ᑭᑲᓇᐌᑕᐃᑰᐎᓐ᙮ ᒦᐃ ᐃᔑᑲᓇᐌᑕᓐ, ᑭᑲᐐᒋᐃᒃ ᑭᔐᒪᓂᑑ ᐅᑕᒑᑾᓐ ᑳᑭᑭᔥᑲᐎᒥᓇᕽ᙮

21:15b.2TI.021.015 ᐋᔕ ᑭᑭᑫᑖᓐ ᑲᑭᓇ ᐁᑮᓇᑲᔑᐙᒡ ᐅᑌᐺᑕᒨᒃ ᐁᔖᐗᑮᕽ ᑳᐊᔮᐙᒡ, ᑕᑯ ᑲᔦ ᐁᑮᐃᔑᒋᑫᐙᒡ ᐱᒉᓬᐊᔅ, ᐊᕒᒫᒋᓃᔅ ᑲᔦ᙮

21:16b.2TI.021.016 ᑳᑎᐯᒋᑫᒡ ᐃᑕᔥ ᐅᑲᔕᐌᓂᒫᐞ ᑳᑕᔑᓂᒡ ᐅᑖᐎᓂᓃᕽ ᐊᓀᓯᑆᕒᐊᓴᓐ ᙮ ᓃᐱᐗᐋᕽ ᓂᑮᐱᓲᑭᑌᐁᔥᑳᒃ ᐊᐊ ᐃᓂᓂ, ᑳᐐᓐ ᑲᔦ ᑮᐅᒋᐊᑲᒋᓰ ᐁᑮᑭᐸᐅᑰᐗᒃ᙮

21:17b.2TI.021.017 ᐌᔩᑉ ᐃᑕᔥ ᐃᑯ ᐁᑮᑕᑯᔑᕽ ᐅᐅᒫ ᐅᕒᐆᒥᕽ ᐌᐌᓂ ᓂᑮᓇᓈᑐᓀᐅᒃ ᐲᓂᔥ ᐃᑯ ᐁᑮᒥᑲᐎᒡ᙮

21:18b.2TI.021.018 ᒫᓄ ᐅᑲᐃᓀᓂᒥᑰᓐ ᐃᓂ ᑳᑎᐯᒋᑫᓂᒡ ᐅᑭᑎᒫᑭᓈᑫᐎᓂᓂ ᒋᐅᒌᑕᒫᑯᒡ ᐹᓂᒫ ᐅᒋᒋᓭᓂᒃ ᐅᑮᔑᑳᒥᓂ᙮ ᐗᐐᑫ ᑲᔦ ᑮᓐ ᑭᑭᑫᑖᓐ ᐋᓃᓐ ᐃᑯ ᒥᓂᒃ ᑳᑮᐃᔑᐐᒋᐃᒡ ᐊᓀᓯᑆᕒᐊᔅ ᐃᐃᒫ ᐁᐱᓴᓯᕽ ᑳᑮᐊᔮᔮᐹᓐ᙮

22

22:1b.2TI.022.001 ᓂᑯᓯᔅ, ᑭᑎᓂᓐ ᐅᐅᐌ, ᑭᑲᐐᐃᔑᒪᔥᑲᐎᓰ ᐃᐃ ᐅᔕᐌᒋᑫᐎᓐ ᑳᒦᓂᒃ X ᒋᓴᔅ ᐁᑭᑭᔥᑲᐗᒡ᙮

22:2b.2TI.022.002 ᐅᓄ ᑕᔥ ᑫᑰᓇᓐ ᑳᑮᓅᑕᐎᔭᓐ ᐁᐐᑕᒫᑫᔮᓐ ᓃᐱᐗᐞ ᐊᐎᔭᒃ ᐁᓅᑕᐎᐙᒡ, ᒦᐗᓄᓄ ᐊᓂᑭᑭᓄᐊᒪᐤ ᐃᓂᓂᐗᒃ ᑳᑾᔭᑴᑖᑯᓯᐙᒡ, ᑫᑲᔥᑭᑑᐙᒡ ᒋᐊᓂᑭᑭᓄᐊᒪᐙᐙᒡ ᑯᑕᒃ ᐊᐎᔭᐞ᙮

22:3b.2TI.022.003 ᑲᔦ ᑮᓐ, ᐋᓃᓐ ᒥᓂᒃ ᑳᒦᓂᑰᔭᓐ ᑲᒀᑕᑭᑑᐎᓐ, ᐊᓂᐅᑖᐱᓇᓐ᙮ ᒦ ᐃᐌ ᒋᐅᒋᐅᒥᓄᔑᒫᑲᓂᔒᒥᒃ ᐊᐊ X ᒋᓴᔅ᙮

22:4b.2TI.022.004 ᐊᐊᐌ ᓴ ᑯ ᐃᓂᓂ ᑳᔭᑕᔑᒫᑲᓂᔑᐎᒡ, ᓇᐗᒡ ᐐᐃᔑᒋᑫ ᒋᐐᓇᓇᐁᑕᒥᓂᒡ ᐃᓂᐌᓂᐗᓐ ᑳᐅᓈᐸᒥᑯᒡ᙮ ᑳᐐᓐ ᐅᑲᐱᒣᑕᓰᓐ ᐃᐃᐌᓂ ᐅᐱᒫᑎᓯᐎᓐ ᐌᑎ ᑳᐅᒌᒡ᙮

22:5b.2TI.022.005 ᐊᐊ ᑲᔦ ᐅᑕᒥᓄ ᑳᑲᑴᒋᑲᔑᐌᒡ, ᒦ ᐁᑕ ᒋᐸᑭᓈᑫᒡ ᓇᐃᑕᕽ ᐃᐃᐌᓂ ᐅᑕᒥᓄᐎ ᐃᓈᑯᓂᑫᐎᓐ᙮

22:6b.2TI.022.006 ᐊᐊ ᑲᔦ ᐅᑭᑎᑫ ᑳᑭᒋᐊᓄᑮᒡ, ᒦᐊᐌ ᑫᐅᑖᐱᓇᑭᐸᓐ ᐃᓂ ᓂᑕᒻ ᐅᓂᑖᐎᒋᑲᓂᕽ ᑳᐅᑎᓂᑳᑌᓂᑭᓐ, ᐋᓃᔥ ᑮᑲᔥᑭᑕᒫᓱ᙮

22:7b.2TI.022.007 ᓈᓈᑲᑕᐌᑕᓐ ᐅᓄ ᑳᐃᑭᑐᔮᓐ, ᑲᑭᓇ ᑫᑰᓐ ᑳᑎᐯᒋᑫᒡ ᑭᑲᑭᑫᑕᒨᓂᒃ ᒋᔑᓂᓯᑐᑕᒪᓐ᙮

22:8b.2TI.022.008 ᒫᒥᑴᓂᒻ ᐊᐊ ᒋᓴᔅ X ᑳᐱᐅᑕᑳᓀᓯᒡ ᑌᐱᑎᑳᕽ, ᑲᔦᔥ ᐁᑮᓂᐳᐸᓐ ᒦᓇᐙ ᑮᑮᐌᐱᒫᑎᓯ᙮ ᒦ ᐃᐌ ᐁᔑᐐᑕᒫᓐ ᐃᐃᐌ ᒥᓍᒋᒧᐎᓐ᙮

22:9b.2TI.022.009 ᒦ ᐃᐌ ᒥᓍᒋᒧᐎᓐ ᑳᐅᒋᑯᑕᑭᑑᔮᓐ, ᐊᐴᔥᑫ ᐁᐅᒋᑭᐸᐅᑰᔮᓐ ᑖᐱᔥᑰ ᐅᒪᒋᒋᑫᔥᒃ᙮ ᑳᐐᓐ ᐃᑕᔥ ᐐᓐ ᐃᐌ ᐃᓇᑭᑌᓯᓂᓂ ᑭᔐᒪᓂᑑ ᐅᑎᑭᑐᐎᓐ ᒋᑭᐸᐃᑳᑌᓂᒃ᙮

22:10b.2TI.022.010 ᒦ ᐃᐌ ᑲᑭᓇ ᑫᑰᓐ ᓂᑑᒋᔕᔒᐯᑖᓐ ᒋᐐᐐᒋᐃᒪᒃ ᐃᓂ ᑭᔐᒪᓂᑑ ᐅᑑᓈᐸᒫᑲᓇᐞ, ᑫᐐᓇᐙ ᒋᐅᑎᓇᒧᐙᒡ ᐃᐃ ᐱᒫᒋᐃᑰᐎᓐ ᑫᒦᓂᑯᐙᒡ X ᒋᓴᓲᓐ, ᐊᔑᒡ ᑲᔦ ᑭᑌᑖᑯᓯᐎᓐ ᐐᑳ ᑫᐴᓂᐊᔮᓯᓂᓂᒃ᙮

22:11b.2TI.022.011 ᐋᓃᔥ ᑌᐺᒪᑲᓐ ᐅᐅᐌ ᐃᑭᑐᐎᓐ: ᑮᔥᐱᓐ ᑌᐺ ᑳᐐᒋᓂᐴᒫᐗᑫᓐ, ᑭᑲᐐᒋᐱᒫᑎᓰᒫᓈᓐ ᑕᔥ ᑲᔦ᙮

22:12b.2TI.022.012 ᑮᔥᐱᓐ ᔕᔒᐱᐊᔮᔭᕽ ᒦ ᐃ ᑲᔦ ᒋᐐᒋᑎᐯᒋᑫᒪᕽ᙮ ᑮᔥᐱᓐ ᐋᓇᐌᓂᒪᕽ, ᑲᔦ ᐐᓐ ᑭᑲᔮᓇᐌᓂᒥᑯᓈᓐ᙮

22:13b.2TI.022.013 ᑮᔥᐱᓐ ᐴᓂᑌᐺᑕᐗᕽ, ᑫᔮᐱᔥ ᐐᓐ ᑕᑫᒋᓈᐁᑖᑯᓯ᙮ ᑳᐐᓐ ᐐᑳ ᐅᑲᔮᒋᑑᓰᓐ ᐅᑎᓈᑎᓯᐎᓐ᙮

22:14b.2TI.022.014 ᐅᓄ ᑫᑰᓇᓐ ᒫᒥᑲᐙᓱᒻ ᐃᑭ ᑳᓅᑕᐎᒀ᙮ ᑭᔐᒪᓂᑑ ᐁᓈᓴᒦᒡ ᑭᑲᐃᔑᐊᔮᒀᒥᒫᒃ ᐁᑳ ᒋᑲᑴᔖᑰᓱᑎᓯᒀ ᐃᓂ ᐃᑭᑐᐎᓇᓐ᙮ ᑳᐐᓐ ᐃᑯᑕᓄ ᑖᐃᓈᐸᑕᓯᓅᓐ, ᒦ ᐁᑕ ᒋᒥᒋᓂᔑᐗᓈᒋᐃᑣ ᑳᐱᓯᑕᒧᐙᒡ᙮

22:15b.2TI.022.015 ᐌᐌᓂ ᑲᑴᐐᑾᒋᑑᓐ ᒋᐃᔑᑳᐸᐎᐃᑎᓱᔭᓐ ᑫᔑᒥᓍᐸᒥᒃ ᑭᔐᒪᓂᑑ, ᑖᐱᔥᑰ ᐊᓄᑮᐋᑲᓐ ᐁᑳ ᑳᐊᑲᒋᐃᑯᓯᒃ ᐅᑕᓄᑮᐎᓐ, ᑲᔦ ᒦ ᐃᐌ ᐁᐃᔑᐐᑕᒫᑫᔭᓐ ᐁᔑᑾᔭᑯᓯᓂᓂᒃ ᑭᔐᒪᓂᑑ ᐅᑌᐺᐎᓐ᙮

22:16b.2TI.022.016 ᑫᑯ ᐐᒋᑑᓈᒫᑫᓐ ᐊᐎᔭᒃ ᐁᒪᒋᑖᑾᓂᓂᒃ, ᐁᑲᑮᐹᑌᑖᑾᓂᓂᒃ ᑲᔦ ᐁᑕᔑᑕᒧᐙᒡ᙮ ᓇᐗᒡ ᐙᓴ ᐅᑎᔑᑳᒋᔥᑳᑯᓐ ᐊᐎᔭ ᐃᐃᒫ ᒋᐊᔮᓯᒃ ᑭᔐᒪᓂᑑᓈᕽ᙮

22:17b.2TI.022.017 ᐃᐌ ᐅᑭᑭᓄᐊᒫᑫᐎᓂᐙ ᐋᒋᑯ ᑕᓂᒫᒌᔥᑳᒪᑲᓂᓂ ᑖᐱᔥᑰ ᐁᐃᓈᐱᓀᒡ ᐊᐎᔭ ᐁᐱᒋᐳᓭᓂᒃ᙮ ᑕᑯ ᑲᔦ ᓃᔑᐗᒃ ᐅᐅ ᐁᐃᔑᑭᑭᓄᐊᒫᑫᐙᒡ ᐋᐃᒥᓃᔭᔅ, ᐹᐃᓬᐄᑕᔅ ᙮

22:18b.2TI.022.018 ᒦ ᐅᑯ ᑮᐅᒋᐸᑫᐗᒃ ᑌᐺᐎᓂᕽ, ᐅᐅᐌᓂ ᐁᐃᔑᑭᑭᓄᐊᒫᑫᐙᒡ: ᐋᔕ ᑮᐃᔥᒀᐃᔑᓭ ᑳᐐᐃᔑᑮᐌᐱᒫᑎᓯᐃᑰᔭᑭᐸᓐ, ᐁᐃᑭᑐᐙᒡ᙮ ᒦᑕᔥ ᐅᐅ ᓇᑫ ᐁᔑᓂᔑᐗᓈᒋᑕᒪᐙᐙᒡ ᐅᑌᐺᑕᒧᐎᓂᓂ ᐋᓂᑕ᙮

22:19b.2TI.022.019 ᐅᐅ ᓴ ᑭᔐᒪᓂᑑ ᐃᔑᓈᑾᓂᓂ ᑳᐃᔑᑌᐺᒡ ᑖᐱᔥᑰ ᐋᔩᒋᐅᓈᐱᑭᓯᒋᑲᓐ ᐐᑳ ᑫᐗᑲᐎᔥᑳᓯᓂᓂᒃ, ᐅᐅᐌ ᐁᐃᔑᑭᑭᓇᐙᒋᓯᓂᓂᒃ: ᑳᑎᐯᒋᑫᒡ ᐅᑮᑳᔦᓂᒫᐞ ᐊᐌᓀᓇᐞ ᐃᓂ ᑳᑎᐯᓂᒫᒡ᙮ ᐅᐅ ᑲᔦ, ᐊᐌᓀᓐ ᐃᑯ ᐊᐌ ᓂᑎᐯᓂᒥᒃ ᑳᑎᐯᒋᑫᒡ, ᐁᐃᑭᑐᒡ, ᐅᑲᐴᓂᑑᓐ ᐅᒪᒋᑑᑕᒧᐎᓐ, ᐁᔑᓯᓂᓂᒃ᙮

22:20b.2TI.022.020 ᐃᓇᔥᑫ ᐊᐎᔭ ᐅᑭᒋᐙᑳᐃᑲᓂᕽ ᐁᐊᔮᒡ ᐊᒋᑲᓇᓐ, ᑳᐐᓐ ᐁᑕ ᑳᐅᓵᐎ ᔔᓂᔮ ᐙᐱᑲᓂᓂᑭᓐ ᑲᔦ ᑳᐙᐹᐱᑲᓂᓂᑭᓐ ᐅᑕᔮᓰᓇᓐ, ᑲᔦ ᓴ ᑯ ᑳᒥᑎᑯᐗᑭᓐ ᑲᔦ ᐙᐱᑲᓂᐊᒋᑲᓇᓐ ᐅᑕᔮᓇᓐ᙮ ᐋᓂᑕ ᐁᔑᑭᑌᑖᑾᓂᓂᑭᓐ ᐅᑎᔑᐋᐸᒋᑑᓇᓐ, ᐋᓂᑕ ᑕᔥ ᑕᓱᑮᔑᒃ ᑳᐅᑖᐱᓇᕽ ᐁᓀᑳᒥᐋᐸᒋᑑᒡ᙮

22:21b.2TI.022.021 ᑮᔥᐱᓐ ᐊᐎᔭ ᒦᐎᓂᔑᑕᕽ ᐌᑯᓀᓐ ᓴ ᑯ ᐙᓀᑖᑾᓂᓂᒃ, ᑖᐱᔥᑰ ᒥᓄᐊᒋᑲᓐ ᑕᐃᓀᑖᑯᓯ ᑫᒋ ᐃᓀᑖᑾᓂᓂᒃ ᒋᐃᔑᐋᐸᑎᓯᒡ᙮ ᐋᔕ ᐋᓃᔥ ᐅᑮᒦᓈᓐ ᐅᐱᒫᑎᓯᐎᓐ ᐃᓂ ᑳᑎᐯᓂᒥᑯᒡ, ᑭᑖᐸᑎᓯᐎᓂᕽ ᒋᐃᓈᐸᒋᐃᑯᒡ, ᐁᐙᐌᓃᒡ ᒥᓄᐊᓄᑮᐎᓂᕽ ᒋᐃᓈᐸᑎᓯᒡ᙮

22:22b.2TI.022.022 ᒦ ᐃᐌ ᐌᒋ ᐃᓂᓈᓐ: ᑫᑯ ᑫᑮᓐ ᐱᓯᑕᑫᓐ ᐅᔥᑳᑎᓰᐎ ᒥᓴᐌᑕᒧᐎᓇᓐ᙮ ᐱᒥᓂᔕᐊᓐ ᑕᔥ ᒥᓍᑎᓯᐎᓐ, ᑌᐺᔦᑕᒧᐎᓐ, ᓵᑭᐃᐌᐎᓐ, ᑯᔥᒀᐙᑌᑕᒧᐎᓐ᙮ ᒦ ᐃᐌ ᒋᐃᔑᑲᑴ ᐐᒌᐗᑣ ᐃᑭᐌᓂᐗᒃ ᑾᔭᑯᑌᐁᐎᓂᕽ ᑳᐃᔑᑲᓅᓈᐙᒡ ᐃᓂ ᑳᑎᐯᒋᑫᓂᒡ᙮

22:23b.2TI.022.023 ᐊᐌᓀᓐ ᐃᑯ ᑳᑲᑴ ᔖᑰᓱᑫᒡ ᐁᑲᑮᐹᒋᑮᔗᒡ ᐁᑭᑫᑖᓱᓯᒃ, ᑫᑯ ᐅᐌ ᐱᒣᑕᑫᓐ᙮ ᑭᑭᑫᑖᓐ ᒦ ᐃᒫ ᐁᐅᒌᒪᑲᒃ ᑮᑳᑎᐎᓐ᙮

22:24b.2TI.022.024 ᐊᐎᔭ ᑳᐊᓄᑮᐃᑯᒡ ᑳᑎᐯᒋᑫᓂᒡ ᑳᐐᓐ ᑕᓂᑖ ᑲᑴᔖᑰᓱᑫᓰ᙮ ᐯᑭᑳᒡ ᐅᑲᑲᓅᓈᐞ ᑲᑭᓇ, ᑕᓂᑖ ᑭᑭᓄᐊᒫᑫ, ᐅᑲᔕᔒᐯᓂᒫᐞ,

22:25b.2TI.022.025 ᓅᑳᑎᓯᐎᓂᕽ ᒋᑲᑴᒫᒦᓄᒫᒡ ᐃᓂ ᑳᑲᑴᐗᓈᒥᑯᒡ᙮ ᒫᑭᔖ ᑭᔐᒪᓂᑑ ᐅᑲᒦᓈᐞ ᒋᑴᑳᑎᓯᓂᒡ ᒋᐱᑭᑫᑕᒥᓂᒡ ᐃᐃ ᑌᐺᐎᓐ᙮

22:26b.2TI.022.026 ᒦ ᐃᐌ ᐁᐃᔑᐸᑲᑫᑕᒧᐙᒡ ᑫᐅᒋᑲᔥᑭᐅᐙᒡ ᐃᐃᒫ ᑳᐃᔑᑕᓲᓂᑯᐙᒡ ᐃᓂ ᓭᑕᓇᓐ ᑳᑮᐃᔑᑳᒋᑎᓂᑯᐙᒡ ᐁᑮᐃᓇᓅᓂᑯᐙᒡ ᐋᓃᓂᑯ ᑳᑮᐃᓀᓂᒥᑯᐙᒡ᙮

23

23:1b.2TI.023.001 ᑭᑫᑕᓐ ᐅᐅ, ᐃᔥᒀᒡ ᐊᓂᑲᑮᔑᑲᒃ ᑕᐲᒋ ᐃᔑᐌᐸᓐ ᒋᓴᓇᑲᒃ ᐃᐃᐌ ᐱᒫᑎᓯᐎᓐ᙮

23:2b.2TI.023.002 ᐋᓃᔥ ᐃᑭ ᐯᒫᑎᓯᐙᒡ ᐐᓇᐙ ᐱᑯ ᑎᐱᓇᐌ ᑕᓵᑭᐃᑎᓱᐗᒃ; ᐅᑲᓵᑭᐋᐙᓐ ᑲᔦ ᐅᔔᓂᔮᒥᐙᓐ᙮ ᑕᐃᔥᐯᓂᑎᓱᐗᒃ, ᑕᒪᒦᒀᓂᑎᓱᐗᒃ, ᐅᑲᐹᐱᓄᑕᐙᐙᓐ ᑭᔐᒪᓂᑑᓐ᙮ ᑳᐐᓐ ᑲᔦ ᐅᑲᐱᓯᑕᐙᓰᐙᐙᐞ ᐅᓃᑭᐃᑯᐙᐞ᙮ ᑳᐐᓐ ᑕᓂᑖ ᒦᑴᒋᐌᑕᓰᐗᒃ; ᐅᑲᐋᓇᐌᑖᓈᐙ ᑲᔦ ᐊᓇᒥᐋᐎᓐ᙮

23:3b.2TI.023.003 ᑳᐐᓐ ᑲᔦ ᐅᑲᐅᑌᐃᓄᑕᐙᓯᐙᐙᐞ ᐅᐐᒋᐱᒫᑎᓰᒫᑲᓂᐙᐞ, ᐅᑲᓴᓇᑭᐋᐙᐞ ᐃᑕᔥ, ᐁᐸᐹᑕᔑᒥᐌᐙᒡ, ᐁᐐᓂᑖᐲᑾᑲᒥᑭᓯᐙᒡ᙮ ᐅᒦᑳᓱᔥᑲᒃ ᑕᐃᓈᐗᒃ᙮ ᐅᑲᔒᑫᑖᓈᐙ ᑳᐅᓂᔑᔑᓂᓂᒃ᙮

23:4b.2TI.023.004 ᑕᒪᒥᔑᐃᐌᐗᒃ᙮ ᑳᐐᓐ ᑕᐅᓈᓈᑲᑕᐌᒋᑲᓂᓰᐗᒃ᙮ ᐅᑲᐅᓵᒣᑖᓈᐙ ᐅᑭᑌᓂᒧᐎᓂᐙ᙮ ᓇᐗᒡ ᐅᑲᒥᓉᑖᓈᐙ ᐅᑎᔑᒋᑫᐎᓂᐙᓐ ᐊᐲᒡ ᐐᓐ ᒋᓵᑭᐋᐙᐸᓐ ᑭᔐᒪᓂᑑᓐ᙮

23:5b.2TI.023.005 ᐅᑭᒐᔭᐄ ᐁᑕ ᑯ ᐅᑲᐊᔮᓈᐙ ᐊᓇᒥᐋᐎᓂᕽ ᑳᐃᔑᓈᑾᓂᓂᒃ, ᐅᑲᐌᐱᓈᓈᐙ ᑕᔥ ᐃᐃᐌ ᒪᔮ ᑳᐃᔑᒪᔥᑲᐎᓰᒪᑲᓂᓂᒃ᙮ ᑫᑯ ᐐᒌᐙᑫᓐ ᐅᑯ ᑎᓄ᙮

23:6b.2TI.023.006 ᐋᓂᓐᑦ ᓴ ᑯ ᐅᓇᓇᒫᔦᓂᒫᐙᓐ ᐊᐎᔭᓐ ᐲᓂᔥ ᒋᓀᐱᒋ ᐲᑎᑲᓂᑯᐙᒡ ᐅᐙᑳᐃᑲᓂᓃᕽ, ᐃᐃᒫ ᐁᐊᓂᑌᐱᒫᐙᒡ ᐃᑴᐗᐞ ᑳᑲᑮᑖᐌᑕᓯᓂᒃ ᒋᓇᐃᑖᑯᐙᒡ᙮ ᐅᑯ ᑕᔥ ᐃᑴᐗᒃ ᐅᑑᓵᒣᑖᓈᐙ ᐅᒪᒋᒋᑫᐎᓂᐙᓐ᙮ ᐅᑕᓂᑳᒋᔥᑳᑯᓈᐙ ᑲᔦ ᑫᑰᓇᓐ ᐊᓅᒋᑯ ᐁᔑᒥᓴᐌᑕᒧᐙᒡ᙮

23:7b.2TI.023.007 ᒦᐗᑭᑭ ᑎᓄ ᐃᑴᐗᒃ ᑳᓇᓈᑕᑭᑫᑕᒧᐙᒡ, ᐁᑳ ᑕᔥ ᐐᑳ ᐁᑎᐱᑭᑫᑕᓯᒀ ᐃᐌ ᑌᐺᐎᓐ᙮

23:8b.2TI.023.008 ᐃᑭᐌᓂᐗᒃ ᐃᑕᔥ ᐅᑭᑭᓄᐊᒫᑫᒃ ᑖᐱᔥᑰ ᐃᔑᐊᔮᐗᒃ ᒑᓃᔅ, ᒑᐸᕒᐄᔅ, ᒣᐎᔕ ᑳᑮᐗᓈᐋᐙᒡ ᐃᓂ ᒨᓯᓲᓐ ᙮ ᓅᑯᒻ ᐯᔑᑾᓐ ᐃᔑᒋᑫᐗᒃ ᐅᑯ ᐅᑭᑭᓄᐊᒫᑫᒃ᙮ ᐅᐗᓈᑑᓈᐙ ᐃ ᑌᐺᐎᓐ᙮ ᓂᔑᐗᓈᑕᓂᓂ ᐅᑎᓀᑕᒧᐎᓂᐙ᙮ ᐊᔨᓍᓱᐗᒃ ᐅᑌᐺᔦᑕᒧᐎᓂᐙᕽ᙮

23:9b.2TI.023.009 ᑳᐐᓐ ᐋᐱᒋ ᑫᑰᓐ ᐅᑲᑲᔥᑭᑑᓰᓈᐙ᙮ ᐱᒌᓇᒃ ᐃᑕᔥ ᑲᑭᓇ ᐅᑲᒧᔐᑭᑫᓂᒥᑯᐙᓐ ᐁᑮᑲᑮᐹᒋᒋᑫᐙᒡ, ᑖᐱᔥᑰ ᑫᐐᓇᐙ ᑳᑮᐃᔑᐌᐱᓯᐙᑯᐸᓀᓐ ᒑᓃᔅ, ᒑᐸᕒᐄᔅ ᑲᔦ᙮

23:10b.2TI.023.010 ᑮᓐ ᐃᑕᔥ ᑭᐱᐅᒋᑭᑫᓂᒻ ᐁᐋᔩᑎᔮᓐ, ᐌᑯᓀᓐ ᐃᐃ ᑳᐃᔑᑭᑭᓄᐊᒫᑫᔮᓐ, ᑳᑲᑴᐃᔑᑕᒫᓱᔮᓐ ᑲᔦ ᑭᑮᐙᐸᒻ, ᐃᐃ ᑲᔦ ᐁᔑᑌᐺᔦᑕᒫᓐ, ᐁᔑᔕᔒᐯᑕᒫᓐ, ᐁᔑᓵᑭᐃᐌᔮᓐ, ᐁᔑᒪᔥᑲᐌᑕᒫᓐ,

23:11b.2TI.023.011 ᑳᐃᔑᐅᒌᑳᑰᔮᓐ ᑲᔦ, ᑳᐃᔑᑲᒀᑕᑭᓭᔮᓐ ᑲᔦ᙮ ᑲᑭᓇ ᑭᑭᑫᓂᒻ ᐋᓃᓐ ᑳᑑᑖᑰᔮᓐ ᐁᑎᔮᒃ ᐆᑌᓈᕽ, ᐋᐃᑰᓂᔭᒦᕽ, ᓬᐃᔅᑕᕒᐊᐃᕽ ᑲᔦ, ᐋᓃᓐ ᑳᑮᐊᐲᒋᑲᒀᑕᑭᐃᑰᔮᓐ᙮ ᑲᑭᓇ ᑕᔥ ᓂᑮᐅᒋᔖᐾᐃᒃ ᑳᑎᐯᒋᑫᒡ᙮

23:12b.2TI.023.012 ᒦᐃ ᐯᔑᑾᓐ ᐊᐌᓀᓐ ᐃᑯ ᑳᐐᐅᒋᐊᓇᒥᐁᐙᑎᓯᒡ X ᒋᓴᓲᓐ, ᑫᐐᓇᐙ ᑕᐅᒋᑲᒀᑕᑭᐋᐗᒃ᙮

23:13b.2TI.023.013 ᐋᓃᔥ ᐃᑭ ᑳᒪᒑᑎᓯᐙᒡ, ᐃᑭ ᑲᔦ ᐅᐗᔦᔑᒥᐌᒃ, ᐊᐗᔑᒣ ᑕᓂ ᐃᔑᐊᔮᐗᒃ, ᓃᐱᐗᐞ ᐁᐐᐗᔦᔑᐋᐙᒡ᙮ ᑲᔦ ᐐᓇᐙ ᐱᑯ ᑕᓂᐗᔦᔑᐋᐗᒃ᙮

23:14b.2TI.023.014 ᑮᓐ ᐃᑕᔥ, ᒥᓂᒃ ᑳᐱ ᐃᔑᑭᑭᓄᐊᒫᑰᔭᓐ, ᑳᐱ ᐃᔑᑌᐺᔦᑕᒪᓐ ᑲᔦ, ᑫᔮᐱ ᐊᓂᑲᑴᐐᒋᑑᓐ, ᐋᓃᔥ ᑭᑾᔭᑴᓂᒫᒃ ᐃᑭ ᑳᑭᑭᓄᐊᒪᐎᒀ᙮

23:15b.2TI.023.015 ᔑᑾ ᑳᐱᐊᑯᐊᐱᓅᒌᔑᐎᔭᓐ ᑭᑮᐱᐅᒋᑭᑫᑖᓇᓐ ᐃᓂ ᒫᐗᒡ ᑳᑭᒋ ᐃᓀᑖᑾᑭᓐ ᐅᔑᐲᐃᑫᐎᓇᓐ, ᐃᓂ ᑳᑲᔥᑭᑑᒪᑲᑭᓐ ᒋᑲᑮᑖᐌᑕᒧᐃᑯᔭᓐ ᒋᐅᒋᐱᒫᒋᐃᑰᔭᓐ ᐁᑌᐺᑕᐗᒡ X ᒋᓴᔅ᙮

23:16b.2TI.023.016 ᑲᑭᓇ ᑭᒋᐅᔑᐲᐃᑫᐎᓐ ᑮᑭᑫᑕᒧᐃᐌ ᑭᔐᒪᓂᑑ, ᑲᔦ ᑭᑖᐸᑕᓐ ᒋᑭᑭᓄᐊᒫᑫᕽ ᐃᐃ ᑌᐺᐎᓐ, ᐊᐎᔭ ᑲᔦ ᐗᓂᑭᑭᓄᐊᒫᑫᒡ ᒋᐙᐸᑕᐃᓐᒡ ᐁᑾᔭᑾᓯᓂᓂᒃ᙮ ᐃᓈᐸᑕᓐ ᑲᔦ ᒋᒫᒦᓄᒥᐌᕽ, ᒋᑭᑭᓄᐊᒪᐎᓐᒡ ᑲᔦ ᐊᐎᔭ ᐋᓃᓐ ᑫᔑᑾᔭᑯ ᐃᔑᔭᔮᒡ᙮

23:17b.2TI.023.017 ᒦ ᐃᐌ ᐃᔑᒦᓈ ᐊᐊᐌ ᑳᐊᓄᑲᐙᒡ ᑭᔐᒪᓂᑑᓐ, ᒋᑌᐊᔨᔒᒡ ᑲᔦ ᑲᑭᓇ ᑫᑰᓐ ᒋᐅᒌᑕᒪᐎᓐᒡ, ᑲᑭᓇ ᐃᓂ ᐌᓂᔑᔑᓂᓂᑭᓐ ᒋᑑᑕᕽ᙮

24

24:1b.2TI.024.001 ᑭᑕᔮᒀᒥᒥᓐ ᐁᐙᐸᒥᒡ ᑭᔐᒪᓂᑑ, ᐊᐊᐌ X ᒋᓴᔅ ᑲᔦ, ᑫᑎᐹᑯᓈᒡ ᐃᓂ ᐯᒫᑎᓯᓂᒡ, ᐃᓂ ᓀᐳᓂᒡ ᑲᔦ᙮ ᐅᑕᑯᔑᓄᐎᓐ ᑲᔦ ᐅᑎᐯᒋᑫᐎᓐ X ᒋᓴᔅ ᓂᑎᑭᑐᐃᑯᓐ ᐅᐅ ᐙᐃᓂᓈᓐ᙮

24:2b.2TI.024.002 ᑮᓐ ᐐᑕᒫᑫᓐ ᑭᔐᒪᓂᑑ ᐅᑎᑭᑐᐎᓐ᙮ ᐋᓃᓂᑯ ᐃᐊᐲ ᐁᔑᓇᐃᓈᑾᒃ ᐐᑕᒫᑫᓐ, ᒫᓄ ᓴ ᐐᓐ ᐃᔑᓈᑾᓯᓄᒃ, ᐐᑕᒫᑫᓐ᙮ ᑲᔦ ᑲᑴᑲᔥᑭᒥᐌᓐ᙮ ᑲᔦ ᒫᓈᓯᓇᒪᓐ ᑫᑰᓐ ᐅᒋᐞ ᐊᐌ ᑳᑑᑕᕽ᙮ ᑲᑳᓱᒥᐌᓐ, ᑲᑭᓇ ᑫᑰᓐ ᒋᒪᒥᓇᐗᑳᑎᓰᑲᑕᒪᓐ ᑲᔦ ᒨᔕᒃ ᒋᐃᔑᑭᑭᓄᐊᒫᑫᔭᓐ᙮

24:3b.2TI.024.003 ᐋᓃᔥ ᐃᑯᑎᕽ ᑕᐃᔑᐌᐸᓐ ᒋᔑᑲᓯᑕᒧᐙᒡ ᐃᐃ ᑾᔭᒃ ᑭᑭᓄᐊᒫᑫᐎᓐ, ᓇᐗᒡ ᐁᐐᒫᐗᑑᓈᐙᒡ ᐊᐎᔭᐞ ᑫᑭᑭᓄᐊᒫᑯᐙᒡ ᐃᐃᐌ ᐐᓇᐙ ᐱᑯ ᑳᐐᐱᓯᑕᒧᐙᒡ᙮

24:4b.2TI.024.004 ᐅᑲᐊᓂᐌᐱᓈᐙ ᑾᔭᒃ ᑌᐺᐎᓐ ᒋᓇᓈᑕ ᐱᓯᑕᒧᐙᒡ ᒪᔭᑳᒋᒧᐎᓇᓐ᙮

24:5b.2TI.024.005 ᑮᓐ ᐃᑕᔥ ᑫᔮᐱ ᐯᔑᑾᓐ ᐃᑯ ᑲᑴᐃᔑᑲᑮᑖᐎᓯᓐ, ᑲᑴᔕᔒᐱᐊᔮᓐ ᐊᐲ ᐁᑲᒀᑕᑭᐃᑰᔭᓐ᙮ ᒦ ᐃᐌ ᐃᔑᐊᓄᑮᓐ ᒥᓍᒋᒧᐎᓐ ᒋᐐᑕᒫᑫᔭᓐ᙮ ᑎᐱᑑᑕᓐ ᐃᐌ ᑳᐃᔑᐊᓄᑮᐃᒃ ᑭᔐᒪᓂᑑ᙮

24:6b.2TI.024.006 ᓃᓐ ᐃᑕᔥ ᐃᑯ, ᐋᔕ ᑫᑳ ᒦᐅ ᐊᐲ ᒋᐸᑭᑎᓈᔂᑲᓂᐎᔮᓐ᙮ ᐋᔕ ᑎᐱᓭ ᒋᒫᒑᔮᓐ᙮

24:7b.2TI.024.007 ᒥᓄᑲᑴᒋᑲᓂᑎᐎᓂᕽ ᓂᑮᐊᐸᑑ᙮ ᓂᑮᑮᔑᑑᓐ, ᓂᑮᐱᑲᓇᐌᑖᓐ ᐃᐃ ᑭᑌᐺᔦᑕᒧᐎᓂᓈᓐ᙮

24:8b.2TI.024.008 ᐋᔕ ᐌᑎ ᓂᐲᐃᑯᓐ ᓂᑎᐸᐊᒫᑰᐎᓐ ᑾᔭᒃ ᓴ ᑯ ᐁᑮᑎᐱᓴᑣᔮᓐ, ᑫᐅᒋᒦᔑᒡ ᐊᐊᐌ ᑳᑎᐯᒋᑫᒡ ᐌᑎ ᐊᐲ ᑫᐅᑮᔑᑲᓄᒥᒡ᙮ ᒦ ᐊᐌ ᐅᑭᒋᑎᐹᑯᓂᐌ ᒥᓯᐌ ᑳᐃᔑᑾᔭᑯᒋᑫᒡ᙮ ᑳᐐᓐ ᓃᓀᑕ ᓂᑲᐅᒋᒦᓂᑰᓰ, ᐃᑭᐌᓂᐗᒃ ᓴ ᑲᔦ ᒫᐗᒡ ᑳᐲᐋᐙᒡ ᒋᓈᑯᓯᓂᒡ ᐁᓵᑭᐋᐙᒡ, ᑕᒦᓈᐗᒃ᙮

24:9b.2TI.024.009 ᐌᔩᑉ ᐱᑲᑴᐊᑕᐙᐸᒥᔑᓐ!

24:10b.2TI.024.010 ᐋᓃᔥ ᓂᑮᓇᑲᓂᒃ ᐊᐊ ᑏᒪᔅ, ᐅᐅ ᓅᑯᒻ ᐃᑯ ᑳᐃᔑᐊᑮᐗᓂᓂᒃ ᐁᑮᓇᐗᒋᓵᑭᑑᒡ᙮ ᐊᐸᓀᔥ ᐃᐃᒫ ᑮᐃᔑᒫᒑ ᑌᓴᓬᐊᓇᐃᑳᕽ ᙮ ᑲᕒᐁᓭᔅ ᐃᑕᔥ ᑮᐃᔖ ᑲᓬᐁᔑᔮᕽ ᙮ ᔑᑾ ᑕᐃᑕᔅ ᑲᔦ ᑮᐃᔑᒫᒑ ᑖᓬᒣᔖᕽ ᙮

24:11b.2TI.024.011 ᒦ ᐁᑕ ᐊᐌ ᐙᒌᐎᒡ ᓬᐅᒃ ᙮ ᑮᓐ ᐃᑕᔥ ᐅᑎᓐ ᐊᐊ ᒫᕒᒃ ᒋᐱᐐᒌᐎᒃ, ᓂᑲᐐᒋᐃᒃ ᐁᐊᓄᑮᔮᓐ᙮

24:12b.2TI.024.012 ᐊᐊᔥ ᑎᑭᑲᔅ ᐃᐃᒫ ᓂᑮᐃᔑᓂᔕᐙ ᐁᐱᓴᓯᕽ ᙮

24:13b.2TI.024.013 ᑮᓐ ᐃᑕᔥ ᐊᐲ ᐱᒫᒑᔭᓐ, ᐲᑑᑲᓐ ᓂᑭᒋᐲᓯᑲᐙᑲᓐ ᑳᑮᓇᑲᑕᒧᐗᒃ ᐊᐊ ᑳᕒᐸᔅ ᐃᐃᒫ ᐁᐊᔮᒡ ᒐᕒᐆᐗᓯᕽ ᙮ ᐲᑑᑲᓐ ᑲᔦ ᐃᓂ ᒪᓯᓇᐃᑲᓇᓐ, ᒣᒥᑕᑫ ᑯ ᐃᓂ ᐸᔥᑴᑭᓄᕽ ᑳᐅᔑᐲᐃᑳᑌᑭᓐ᙮

24:14b.2TI.024.014 ᑭᐐᑕᒪᐎᓐ ᐁᔑᐊᔮᒡ ᐊᐊ ᐋᓬᐃᑭᓵᑕᕒ ᐅᐲᐙᐱᑯᑫ ᑳᐃᓂᓐᒡ᙮ ᐋᓃᔥ ᓂᑮᑭᒋᒪᒋᑑᑖᒃ᙮ ᑳᑎᐯᒋᑫᓂᒡ ᐃᑕᔥ ᐅᑲᑎᐸᐊᒫᑰᓐ ᐅᑎᔑᒋᑫᐎᓇᓐ᙮

24:15b.2TI.024.015 ᑲᔦ ᑮᓐ ᐃᑕᔥ ᐊᔮᔛᑲᑕᐤ, ᐋᓃᔥ ᐅᑮᑲᑴᐗᓈᑑᓐ ᓂᑎᐹᒋᒧᐎᓂᓈᓐ᙮

24:16b.2TI.024.016 ᓂᑕᒻ ᐃᑯ ᐁᑮᑎᐹᑯᓂᑰᔮᓐ ᓃᓐ ᐃᑯ ᓂᑮᑲᓅᒋᑫᑕᒫᑎᔅ, ᐊᐎᔭ ᐁᑮᐐᐐᒋᐃᓯᒃ᙮ ᑲᑭᓇ ᓂᑮᓇᑲᓂᑰᒃ᙮ ᒫᓄ ᑕᔥ ᑳᐐᓐ ᐅᑲᐊᑭᑕᒫᑯᓰᐙᓐ ᑭᔐᒪᓂᑑᓐ᙮

24:17b.2TI.024.017 ᐐᓐ ᐃᑕᔥ ᑳᑎᐯᒋᑫᒡ ᒨᔕᒃ ᓂᑮᐱᐐᒋᐃᒃ, ᓂᑮᒪᔥᑲᐎᓰᐃᒃ, ᐁᑮᐅᒋᑲᔥᑭᑑᔮᓐ ᑲᑭᓇ ᒋᒨᔥᑭᓀᐐᑕᒫᑫᔮᓐ ᑭᔐᒪᓂᑑ ᐅᑎᐹᒋᒧᐎᓐ, ᒦ ᐃ ᑲᑭᓇ ᑯ ᒋᐅᒋᓅᑕᒧᐙᒡ ᐃᑭ ᑳᑭᑫᓂᒫᓯᒀ ᑭᔐᒪᓂᑑᓐ᙮ ᔑᑾ ᓂᑮᔖᐾᐃᑰ ᐋᔕ ᐁᑮᑕᓀᑖᑯᓯᔮᐹᓐ ᐅᑑᓂᕽ ᐊᐊ ᒥᔑᐱᔑᐤ᙮

24:18b.2TI.024.018 ᑲᔦ ᓂᑲᔖᐾᐃᒃ ᑳᑎᐯᒋᑫᒡ ᑲᑭᓇ ᐃᓂ ᐋᓇᐐᒪᒋᑑᑖᑰᔮᓐ, ᓂᑲᑲᓇᐌᓂᒥᒃ ᐃᑕᔥ ᐃᒫ ᒋᐅᑎᑕᒫᓐ ᐅᑎᐯᒋᑫᐎᓂᕽ ᑭᒋᑮᔑᑯᕽ ᐁᑕᔑᑭᒫᐎᒡ᙮ ᒦ ᐊᐌ ᐊᐸᓀ ᑯ ᒨᔕᒃ ᑕᑭᑌᓂᒫ, ᐐᑳ ᓴ ᑯ ᒋᐌᒀᓭᓯᓄᒃ! ᐁᒣᓐ᙮

24:19b.2TI.024.019 ᐴᔔ ᓂᑎᓈᒃ ᐸᕒᐃᓯᓬᐊ, ᐊᑶᓬᐊ ᑲᔦ, ᑲᑭᓇ ᑲᔦ ᐁᑕᔑᐙᒡ ᐊᓀᓯᑆᕒᐊᔅ ᐅᐙᑳᐃᑲᓂᕽ᙮

24:20b.2TI.024.020 ᔑᑾ ᑭᐐᑕᒪᐎᓐ, ᐃᕒᐋᔅᑕᔅ ᑮᐃᔥᑸ ᐃᐃᒫ ᒀᕒᐃᑎᕽ ᙮ ᒐᕒᐆᐱᒪᔅ ᓂᑮᓇᑲᓈ ᐃᒫ ᒫᐃᓬᐄᑕᓯᕽ ᐁᑭᔖᑖᐱᓀᒡ᙮

24:21b.2TI.024.021 ᑮᓐ ᐱᑲᑴᑕᑯᔑᓂᓐ ᒋᑆ ᐱᐴᕽ᙮ ᑲᔦ ᑭᐴᔔᐃᒃ ᐃᔫᐱᔪᓬᐊᔅ, ᐅᑯ ᑲᔦ ᐱᔫᑌᔅ, ᓬᐋᐃᓇᔅ, ᑲᓬᐙᑎᔭ, ᑲᑭᓇ ᑭᐐᒋᐅᑌᐺᑕᒨᒫᑲᓂᓈᓂᒃ ᐅᐅᒫ ᑳᐊᔮᐙᒡ᙮

24:22b.2TI.024.022 ᒫᓄ ᑭᑕᒑᒃ ᐅᑲᐐᒌᐎᑰᓐ ᑳᑎᐯᒋᑫᓂᒡ᙮ ᐅᑭᔐᐙᑎᓯᐎᓐ ᒥᒋᑲᑭᓇ ᑭᑲᐊᔑᒋᐐᒌᐎᑯᒻ᙮