Ephesians (Ojibwa)

1

1:1b.EPH.001.001 ᓃᓐ ᑆᓬ, ᒋᓴᔅ X ᐅᑎᔑᓂᔕᐙᑲᓇᓐ᙮ ᑭᔐᒪᓂᑑ ᓴ ᐐᓐ ᐃᑯ ᓂᑮᐃᓀᓂᒥᒃ ᐃᐃ ᒋᐃᓇᓄᑮᔮᓐ᙮ ᑮᓇᐙ ᓴ ᑭᑑᔑᐲᐊᒪᐎᓂᓂᒻ ᐌᑎ ᑳᐊᔮᔦᒃ ᐁᐱᓴᓯᑳᕽ, ᑭᔐᒪᓂᑑ ᑳᑎᐯᓂᒥᓀᒃ ᑲᔦ ᐋᐱᒋ ᐁᑌᐺᔦᑖᑯᓯᐌᒃ ᐁᐐᒋᐱᒫᑎᓰᒣᒃ ᐊᐊ X ᒋᓴᔅ᙮

1:2b.EPH.001.002 ᑕᑲ ᑭᔐᒪᓂᑑ ᑳᐅᔫᓯᒪᕽ, ᑳᑎᐯᒋᑫᒡ ᒋᓴᔅ X ᑲᔦ, ᑭᑲᒦᓂᑯᐙ ᐅᑭᔐᐙᑎᓯᐎᓐ, ᐱᓵᓂᓯᐎᓂᓂ ᑲᔦ᙮

1:3b.EPH.001.003 ᑕᑲ ᑕᒦᑴᒋᐌᑖᑯᓯ ᑭᔐᒪᓂᑑ ᑳᐅᔫᓯᒥᑯᒡ ᑳᑎᐯᒋᑫᓂᒡ ᒋᓴᔅ Xᑕᓐ᙮ ᐋᓃᔥ ᐁᐐᒌᐎᒪᕽ Xᑕᓐ ᑳᐅᒋᔕᐌᓂᒥᓇᕽ, ᑳᐅᒋᒦᓂᓇᕽ ᑲᔦ ᑲᑭᓇ ᑳᔑᔕᐌᒋᑫᓂᒡ ᑭᔐᒪᓂᑑ ᐅᑕᒑᑾᓐ ᑭᒋᑮᔑᑯᕽ ᑳᐅᒌᒪᑲᓂᓂᑭᓐ᙮

1:4b.EPH.001.004 ᐐᓐ ᐋᓃᔥ ᑭᑮᑮᔖᒋᐅᓀᓂᒥᑯᓈᓐ ᒋᐐᒌᐎᒪᕽ Xᑕᓐ ᒋᑆ ᒫᒋᓭᓂᒃ ᐅᐅ ᐊᑮᓂ, ᒋᐯᑭᓯᐗᕽ, ᑫᑰᓐ ᑲᔦ ᐋᐲᓐᒡ ᒋᐃᔑᐊᓈᒣᑖᑯᓯᓯᐗᕽ ᐁᓈᓴᒦᒡ᙮

1:5b.EPH.001.005 ᑭᔐᒪᓂᑑ ᑕᔥ ᐁᓵᑭᐃᐌᒡ ᑳᑮᐅᒋᑮᔖᒋ ᐃᓀᑕᕽ ᐁᐐᐅᑯᓯᓯᒥᓇᕽ᙮ ᒋᓴᔅ Xᑕᓐ ᐅᑎᔑᒋᑫᐎᓂᓃᕽ ᐅᑑᒋᑲᔥᑭᑑᓐ᙮ ᐐᓐ ᐃᑕᔥ ᐃᑯ ᑲᔦ ᐁᑮᒥᓍᐸᑕᕽ ᐃᐃ ᑳᑮᐅᒋ ᐃᔑᒋᑫᒡ᙮

1:6b.EPH.001.006 ᑕᑲ ᑕᔥ ᒦᑴᒋᐌᓂᒫᑖ ᑭᔐᒪᓂᑑ ᐋᓃᔥ ᑭᒋ ᐃᓀᑖᑾᓂᓂ ᐃᐃ ᐅᑭᔐᐙᑎᓯᐎᓐ, ᑳᑮᐃᔑᒥᒋᒦᓂᓇᕽ ᐃᐃᒫ ᐅᑯᓯᓯᕽ ᑳᓵᑭᐋᒡ᙮

1:7b.EPH.001.007 X ᐃᑕᔥ ᐅᒥᔅᑸᒻ ᐁᑮᐅᒋᑲᐎᓂᓂᒃ ᒦᐃᒫ ᐌᒌᒃ ᐃᐃ ᐱᒫᒋᐃᐌᐎᓐ, ᒦ ᑲᔦ ᐃᒫ ᐌᒋᐴᓀᑕᒫᑰᔭᕽ ᒪᒋᑑᑕᒧᐎᓐ, ᐋᓃᔥ ᑭᔐᒪᓂᑑ ᐌᓅᑕᓂᓂ ᐅᑭᔐᐙᑎᓯᐎᓐ᙮

1:8b.EPH.001.008 ᐋᓃᔥ ᐋᐱᒋ ᓃᐱᐗᐞ ᑭᑭᒋᒦᓂᑯᓈᓐ ᐃᐃ ᐅᑭᔐᐙᑎᓯᐎᓐ᙮ ᑭᔐᒪᓂᑑ ᑕᔥ ᐐᑫ ᐁᑲᑮᑖᐌᑕᕽ, ᑲᑭᓇ ᑲᔦ ᑫᑰᓂᓂ ᐁᓂᓯᑐᑕᕽ, ᑮᐃᔑᒋᑫ ᑳᑮᐃᓀᑕᕽ:

1:9b.EPH.001.009 ᑭᑮᑭᑫᑕᒧᐃᑯᓈᓐ ᐃᐃ ᑳᑮᑭᑫᒋᑳᑌᓯᓂᓂᒃ ᐅᑎᓀᑕᒧᐎᓐ ᐁᑮᑮᔖᒋᐅᓀᑕᕽ ᐁᐐᑮᔑᑑᒡ ᐃᐃᒫ Xᐃᕽ᙮

1:10b.EPH.001.010 ᐊᒦᑕᔥ ᐅᐅᐌ ᑳᑮᐃᓀᑕᕽ, ᐁᐐᒫᐗᑑᓇᕽ ᑲᑭᓇ ᑫᑰᓇᓐ ᑳᑮᐅᔑᑑᒡ ᑭᒋᑮᔑᑯᕽ ᐊᑮᕽ ᑲᔦ ᑳᐊᔮᓂᑭᓐ, Xᑕᓐ ᒋᓃᑳᓂᔥᑲᒥᓂᒡ᙮ ᑭᔐᒪᓂᑑ ᐐᓐ ᐃᑯ ᐅᑲᑮᔑᑑᓐ ᐅᑎᓀᑕᒧᐎᓐ ᐊᐲ ᓇᐃᓭᓂᒃ ᑎᐸᐃᑲᓐ᙮

1:11b.EPH.001.011 ᐃᐃᒫ ᑕᔥ ᑲᔦ Xᐃᕽ ᑭᑮᑮᔖᒋᐅᓀᓂᒥᑯᓈᓐ ᐁᐐᑎᐯᓂᒥᓇᕽ, ᒦ ᐋᓃᔥ ᐃᐃ ᒪᔮ ᑳᑮᐃᓀᑕᕽ ᑭᔐᒪᓂᑑ ᑳᑲᔥᑭᑑᒡ ᑲᑭᓇ ᑫᑰᓂᓂ ᒋᐃᔑᓭᓂᒃ ᐋᓃᓐ ᑳᐃᔑᐊᑕᐌᑕᕽ᙮

1:12b.EPH.001.012 ᐐᓐ ᐄᑐᒃ ᐅᑮᐅᓀᑖᓐ ᓃᓇᐎᓐᑦ ᓂᑕᒻ ᑳᑮᐊᐯᓂᒧᓄᑕᐎᒪᑭᒡ Xᑕᓐ ᒋᐅᒋᒦᑴᒋᐌᓂᒪᑭᒡ, ᐋᓃᔥ ᑭᒋ ᐃᓀᑖᑯᓯ᙮

1:13b.EPH.001.013 ᑫᑮᓇᐙ ᑕᔥ ᑭᔐᒪᓂᑑ ᐄᑐᒃ ᑭᑮᐅᒋᒫᒌᑎᐯᓂᒥᑯᐙ ᐊᐲ ᑮᐱᓯᑕᒧᐌᒃ ᐃᐃ ᒥᓍᒋᒧᐎᓐ, ᐋᓃᔥ ᒦ ᐃᒫ ᑳᐅᒋᐱᒫᒋᐃᑰᔦᒃ᙮ ᐁᑮᑌᐺᑕᐌᒃ ᐃᑕᔥ X, ᑭᔐᒪᓂᑑ ᑭᑮᒦᓂᑯᐙ ᐅᑕᒑᑾᓐ ᑳᑮᐊᔓᑕᒫᑫᒡ, ᐁᐐᑭᑭᓇᐙᒋᐃᓀᒃ ᐁᑎᐯᓂᒥᓀᒃ᙮

1:14b.EPH.001.014 ᐊᐊ ᑕᔥ ᐊᒑᒃ ᑳᑮᒦᓂᑰᔭᕽ ᒦ ᐃᒫ ᐁᔑᓈᑾᒃ ᐁᑮᑭᒋᐎᑎᐸᐊᕽ ᓂᑯᑎᕽ ᒋᑌᐱᓇᒧᐗᕽ ᐃᐃ ᑳᐐᒦᓂᓇᕽ, ᒦ ᑲᔦ ᐃᐃᒫ ᐌᒋᑭᑫᑕᒧᐗᕽ ᑭᔐᒪᓂᑑ ᐐᑫ ᐁᐐᐱᒫᒋᐋᒡ ᐃᓂ ᐯᒫᑎᓯᓂᒡ ᑳᑎᐯᓂᒫᒡ᙮ ᑕᑲ ᑕᔥ ᒦᑴᒋᐌᓂᒫᑖ ᐋᓃᔥ ᑭᒋ ᐃᓀᑖᑯᓯ᙮

1:15b.EPH.001.015 ᐊᐲ ᑕᔥ ᐁᑮᓅᑕᒫᓐ ᐋᓃᓐ ᐁᐲᒋᑌᐺᑕᐌᒃ ᑳᑎᐯᒋᑫᒡ ᒋᓴᔅ, ᐋᓃᓐ ᑲᔦ ᐁᐲᒋᓵᑭᐁᒀ ᐯᒫᑎᓯᐙᒡ ᑭᔐᒪᓂᑑᓐ ᑳᑎᐯᓂᒥᑯᐙᒡ,

1:16b.EPH.001.016 ᒦᑕᔥ ᐃᐃ ᒪᔑ ᑳᐅᒋᑭᐱᒌᓯᐙᓐ ᐁᒦᑴᒋᐌᓂᒪᒃ ᑭᔐᒪᓂᑑ ᑮᓇᐙ ᐅᒋ᙮ ᒨᔕᒃ ᑲᔦ ᑭᒥᑰᒥᓂᓂᒻ ᑮᐊᓇᒥᐋᔮᓐ,

1:17b.EPH.001.017 ᐁᑲᑴᒋᒪᒃ ᑭᔐᒪᓂᑑ ᑳᐅᑭᔐᒪᓂᑑᒥᑯᒡ ᑳᑎᐯᓂᒥᓇᕽ ᒋᓴᔅ Xᑕᓐ, ᑳᑭᒋ ᐃᓀᑖᑯᓯᒡ ᑳᐅᔫᓯᒥᓐᒡ, ᒋᒦᓂᓀᒃ ᐃᓂ ᐊᒑᑾᓐ ᑳᒦᑭᐌᓂᒡ ᑲᑮᑖᐌᑕᒧᐎᓐ, ᑫᐙᐸᑕᐃᓀᒃ ᑭᔐᒪᓂᑑᓐ ᐊᐗᔑᒣ ᒋᑭᑫᓂᒥᒣᒃ᙮

1:18b.EPH.001.018 ᒦ ᓴ ᑕᔥ ᐁᔑᐊᓇᒥᐋᔮᓐ, ᒋᐙᓭᓂᑳᑌᑭᓐ ᑳᐅᒋᓂᓯᑐᑕᒨᒪᑲᑭᓐ ᑭᑌᐃᐙᓐ, ᒋᐯᔭᑌᔮᐸᑕᒧᐌᒃ ᐌᑯᓀᓐ ᐃᐃ ᑳᐲᑖᐌᒃ ᑭᔐᒪᓂᑑ ᐁᐐᒦᓂᓀᒃ ᑳᐃᔑᐊᑐᒥᓀᒃ, ᒋᐙᐸᑕᒧᐌᒃ ᑲᔦ ᐋᓃᓐ ᐁᐲᒋᐌᓅᑕᓂᓂᒃ, ᐁᐲᒋᑭᒋ ᐃᓀᑖᑾᓂᓂᒃ ᑲᔦ ᑳᐐᒦᓈᒡ ᑭᔐᒪᓂᑑ ᐅᐱᒫᑎᓰᒪᐞ;

1:19b.EPH.001.019 ᒋᑭᑫᑕᒧᐌᒃ ᑲᔦ ᐋᓃᓐ ᐁᐲᒋᐊᐗᔑᒣᐌᑖᑾᓂᓂᓂᒃ ᐅᒪᔥᑲᐎᓰᐎᓐ ᑳᐊᓄᑮᒪᑲᓂᓂᒃ ᐃᐃᒫ ᑭᐱᒫᑎᓰᐎᓂᓈᓂᕽ ᐋᔕ ᑳᑮᑌᐺᑕᐗᕽ᙮ ᐋᓃᔥ ᒦᐃ ᐁᔑᐐᒋᐃᐌᒪᑲᓂᓂᒃ ᐃᐃ ᑳᑎᐯᑕᕽ ᐅᑭᒋᒪᔥᑲᐎᓰᐎᓐ,

1:20b.EPH.001.020 ᑳᑮᐋᐸᒋᑑᒡ ᐊᐲ ᑮᑮᐌᐱᒫᑎᓯᐋᒡ Xᑕᓐ ᐊᐲ ᑮᓂᐳᓂᒡ, ᐁᑮᐅᑭᒫᐗᐱᐋᒡ ᑲᔦ ᐅᑭᒋᓂᑭᕽ ᐃᓇᑫ ᐌᑎ ᑭᒋᑮᔑᑯᕽ᙮

1:21b.EPH.001.021 X ᐃᑕᔥ ᑲᑭᓇ ᐅᐹᔑᒋᔥᑳᓇᓐ ᐅᑭᒫᐎᐎᓇᓐ, ᑲᔥᑭᐁᐎᓯᐎᓇᓐ ᑲᔦ, ᒪᔥᑲᐎᓰᐎᓇᓐ ᑲᔦ, ᑎᐯᓂᒥᐌᐎᓇᓐ ᑲᔦ, ᐃᓂ ᑲᔦ ᑲᑭᓇ ᐐᓱᐎᓇᓐ ᑳᑭᑕᑭᑌᓂᑭᓐ ᑫᒦᓂᓐᒡ ᐊᐎᔭ᙮ ᑳᐐᓐ ᐐᓐ ᐁᑕ ᓅᑯᒻ ᑳᐊᑮᐗᓂᓂᒃ, ᐃᐃ ᓴ ᑲᔦ ᐱᒌᓇᒃ ᑳᐐᐊᑮᐗᓂᓂᒃ᙮

1:22b.EPH.001.022 ᑭᔐᒪᓂᑑ ᐅᑮᐸᑭᑎᓈᓇᓐ ᑲᑭᓇ ᑫᑰᓇᓐ Xᑕᓐ ᒋᑕᑕᑯᑳᑕᒥᓂᒡ, ᐅᑮᒦᓈᓐ ᑲᔦ ᑲᑭᓇ ᑫᑰᓂᓂ ᒋᑎᐯᑕᒥᓂᒡ ᐃᐃᒫ ᑳᔑᐊᔮᓂᒡ ᐁᔑᒫᒪᐐᓄᓂᒡ ᐅᑌᐺᑕᒨᐞ᙮

1:23b.EPH.001.023 ᐋᓃᔥ ᒦᐗᐞ ᐃᐃᐌᓂ ᐅᐐᔭᐤ, ᒦ ᐃᒫ ᐌᒋᒨᔥᑭᓀᔦᑖᑯᓯᒡ, ᐐᓐ ᑲᔦ ᒥᓯᐌ ᑲᑭᓇ ᑫᑰᓂᓂ ᑳᒨᔥᑭᓀᔥᑲᕽ᙮

2

2:1b.EPH.002.001 ᑮᓇᐙ ᑕᔥ ᑭᑮᓂᐳᒻ ᑭᒪᒋᑑᑕᒧᐎᓂᐙᕽ, ᑭᐗᓂᒋᑫᐎᓂᐙᕽ ᑲᔦ᙮

2:2b.EPH.002.002 ᐃᐃ ᓴ ᐁᑮᐃᔑᐱᒧᓭᔦᒃ ᑳᐃᔑᒋᑳᓂᐗᕽ ᐅᐅᒫ ᐊᑮᕽ, ᐁᑮᐃᔑᒋᑫᔦᒃ ᑲᔦ ᑳᐃᔑᒋᑫᒡ ᐊᐊ ᑳᑎᐯᓂᒫᒡ ᑳᑎᐯᑕᒥᓂᒡ ᑲᔥᑭᐁᐎᓯᐎᓐ ᐅᐅᒫ ᒥᔕᑮᔑᑯᕽ, ᐊᐊ ᐊᒑᒃ ᑳᑎᐯᓂᒫᒡ ᐃᐃ ᐯᒫᑎᓯᓂᓂᒡ ᑳᔕᔒᐱᑕᒥᓂᒡ᙮

2:3b.EPH.002.003 ᑲᑭᓇ ᑕᔥ ᑫᑮᓇᐎᓐᑦ ᐃᐃ ᑭᑮᐃᔑᐱᒫᑎᓯᒥᓐ ᑳᐃᔑᐱᒫᑎᓯᐙᒡ, ᐁᑮᐃᔑᒋᑫᔭᕽ ᐋᓃᓐ ᐁᔑᐱᔑᒀᑌᑕᒨᒪᑲᑭᓐ ᑭᑫᑌᐃᓈᑎᓯᐎᓂᓈᓂᓐ, ᐁᑮᐃᔑᒋᑫᔭᕽ ᑲᔦ ᐁᔑᒥᓴᐌᑕᒨᒪᑲᑭᓐ ᑭᑫᑌᐃᓈᑎᓯᐎᓂᓈᓂᓐ, ᑭᑎᓀᑕᒧᐎᓂᓈᓂᓐ ᑲᔦ᙮ ᐁᑮᐃᔑᓂᑖᐎᑭᐗᑯᐸᓀᓐ ᑲᔦ ᑭᑮᐃᓈᑎᓯᒥᓐ ᒋᐸᑲᒥᔥᑳᑯᔭᕽ ᑭᔐᒪᓂᑑ ᐅᓂᔥᑳᑎᓯᐎᓐ, ᑖᐱᔥᑰ ᑯᑕᒃ ᐊᐎᔭᒃ ᑳᔑᐱᒫᑎᓯᐙᒡ᙮

2:4b.EPH.002.004 ᑭᔐᒪᓂᑑ ᑕᔥ ᐋᐱᒋ ᐁᐌᓅᑕᓂᓂᒃ ᐅᑰᐹᓯᓈᑫᐎᓐ, ᐋᐱᒋ ᑲᔦ ᐁᑮᐹᑏᓇᑑᒡ ᐅᔕᐌᒋᑫᐎᓐ ᑳᑮᐃᔑᔕᐌᓂᒥᓇᕽ,

2:5b.EPH.002.005 ᒣᒀ ᑕᔥ ᑮᓂᐳᐗᕽ ᐃᐃᒫ ᑭᒪᒋ ᐃᔑᒋᑫᐎᓂᓈᓂᕽ, ᐐᓐ ᐃᓴ ᑭᔐᒪᓂᑑ ᑭᑮᐱᒫᑎᓯᐃᑯᓈᓐ ᑳᑮᐱᒫᑎᓯᐋᒡ Xᑕᓐ᙮ ᐅᑭᔐᐙᑎᓯᐎᓐ ᐋᓃᔥ ᑭᑑᒋᐱᒫᒋᐃᑰᒻ᙮

2:6b.EPH.002.006 ᑭᑮᐃᔑᐃᑯᓈᓐ ᑲᔦ ᒋᐐᒋᑮᐌᐱᒫᑎᓰᒥᒪᕽ ᐃᓂ Xᑕᓐ, ᑭᑮᐃᔑᐃᑯᓈᓐ ᑲᔦ ᒋᐐᑕᐱᒥᒪᕽ ᐌᑎ ᑭᒋᑮᔑᑯᕽ ᒋᐃᔑᐊᔮᐗᕽ X ᒋᓴᓲᓐ ᑳᐃᔑᐊᔮᓂᒡ᙮

2:7b.EPH.002.007 ᒦᑕᔥ ᐃᐃ ᑳᑮᐅᒋ ᐃᔑᒋᑫᒡ, ᐃᐃ ᓴ ᐱᒌᓇᒃ ᑳᐐᐱᐊᑮᐗᓂᓂᒃ ᐁᐐᐙᐸᑕᐃᐌᒡ ᑳᑭᒋᐌᓅᑕᓂᓂᒃ ᐅᑭᔐᐙᑎᓯᐎᓐ, ᐃᐃᒫ ᑕᔥ X ᒋᓴᓲᓐ ᐅᐱᒫᑎᓰᐎᓂᓃᕽ ᒦ ᐃᒫ ᐁᔑᓈᑯᑑᒡ᙮

2:8b.EPH.002.008 ᐅᑭᔐᐙᑎᓯᐎᓂᕽ ᐅᔕ ᑭᑮᐅᒋᐱᒫᒋᐃᑰᒻ, ᐋᓃᔥ ᑭᑮᑌᐺᔦᑖᒻ᙮ ᑳᐐᓐ ᐐᓐ ᑮᓇᐙ ᐃᐃ ᑭᑲᔥᑭᑕᒫᓱᓰᒻ, ᑭᔐᒪᓂᑑ ᐅᔕ ᐃᐃ ᐅᒦᑭᐌᐎᓐ᙮

2:9b.EPH.002.009 ᑳᐐᓐ ᐐᓐ ᑲᔦ ᐊᓄᑮᐎᓂᕽ ᐅᒌᓯᓅᓐ ᐱᒫᒋᐃᑰᐎᓐ, ᐊᐎᔭ ᓴ ᐃᓂᓂ ᐁᑳ ᒋᐅᒋᑭᒋᑳᑮᑭᑐᓯᒃ᙮

2:10b.EPH.002.010 ᑮᓇᐎᓐᑦ ᐃᑕᔥ ᑭᔐᒪᓂᑑ ᐅᑎᔑᒫᒌᐎᓐ, X ᒋᓴᓱᕽ ᑭᑮᐅᔑᐃᑯᓈᓐ ᒋᒥᓄᒋᑫᐗᕽ, ᐐᓐ ᐋᓃᔥ ᑭᑮᑾᔮᒌᑕᒫᑯᓈᓐ ᑫᐃᔑᐱᒫᑎᓯᐗᕽ᙮

2:11b.EPH.002.011 ᑕᑲ ᑕᔥ ᒫᒥᑲᐎᒃ ᑮᓇᐙ ᐁᑮᐃᔑᓂᑖᐎᑭᔦᒃ ᐁᑳ ᒎ ᒋᑎᓄᐎᓯᐌᒃ, ᐁᑳ ᑳᑭᑭᓇᐙᑕᔕᑫᔓᑰᓯᐌᒃ ᑲᔦ ᐁᑮᐃᔑᓂᑳᓂᓀᒀ ᐃᑭ ᑳᑭᑭᓇᐙᑕᔕᑫᔓᑣ, ᐅᓂᒌᒫᕽ ᐄᑐᒃ ᐅᒌᓂ ᐃᐃ ᑳᑑᑕᐎᑣ ᐃᐃᒫ ᐅᐐᔭᐎᒫᕽ᙮

2:12b.EPH.002.012 ᐃᐃ ᑕᔥ ᐊᐲ ᑳᐐᓐ ᑭᑮᐐᒌᐙᓯᐙᐙ X, ᑳᐐᓐ ᑲᔦ ᑭᑮᐅᒋᑎᐯᑖᑯᓯᓰᒻ ᐃᔅᕒᐃᔭᓬᐊᒃ ᑳᐃᔑᑎᐯᑖᑯᓯᐙᒡ, ᑳᐐᓐ ᐃᒫ ᑭᑮᑕᑯᓂᑰᓰᒻ ᐃᐃᒫ ᑳᑮᐃᔑᐊᔓᑕᒫᑎᓈᓂᐗᑭᐸᓐ, ᑳᑮᐃᔑᐊᔓᑕᒪᐙᒡ ᑭᔐᒪᓂᑑ ᐅᐱᒫᑎᓰᒪᐞ, ᐁᑮᐊᔮᓯᐌᒃ ᑲᔦ ᐊᐯᓂᒧᐎᓐ, ᐁᑮᐅᑭᔐᒪᓂᑑᒥᓯᐌᒃ ᑲᔦ ᐅᐅᒫ ᐊᑮᕽ᙮

2:13b.EPH.002.013 ᑭᑮᓈᐎᓈᑯᓯᒻ ᐃᐃᐌ ᐊᐲ᙮ ᓅᑯᒻ ᐃᑕᔥ ᐃᐃᒫ X ᒋᓴᔅ ᐅᒥᔅᑸᒥᕽ, ᐋᔕ ᐯᔓ ᑳᑮᐅᒋᐲᓂᑯᔦᒃ᙮

2:14b.EPH.002.014 ᐐᓐ ᐋᓃᔥ X ᑳᐲᑕᒪᐎᓇᕽ ᐱᓵᓐ ᒋᐐᒌᑎᔭᕽ, ᐐᓐ ᑳᑮᐃᔑᐋᒡ ᒋᐯᔑᑴᑖᑯᓯᓂᒡ ᐃᐃ ᑳᑮᔒᑫᓂᑎᓂᒡ, ᐐᓐ ᑲᔦ ᑳᑮᐲᑯᐱᑑᒡ ᒫᔑᐐᒌᑎᐎᓐ ᑖᐱᔥᑰ ᐸᑫᒋᑲᓂᕽ ᑳᑮᐃᓀᑖᑾᓂᓂᒃ᙮

2:15b.EPH.002.015 ᐐᓐ ᑲᔦ ᐅᐐᔭᐎᕽ ᐅᑮᑳᓰᐋᓐ ᐅᓇᔓᐌᐎᓐ ᐋᓃᓐ ᑳᑮᐃᓈᑯᓂᑫᒪᑲᓂᓂᒃ, ᐋᓃᓐ ᑲᔦ ᐁᔑᒋᑫᒪᑲᓂᓂᒃ᙮ ᒦᑕᔥ ᑳᑮᐃᓀᑕᕽ ᒋᐯᔑᑴᑖᑯᓯᓂᒡ ᐯᒫᑎᓯᓂᒡ ᐁᑮᐐᐅᒋᐅᔥᑭᐅᔑᐋᒡ ᑳᐃᔑᓃᔗᐙᓇᑭᓯᓂᒡ, ᐁᐐᐃᔑᐋᒡ ᐱᓵᓐ ᒋᐐᒌᑎᓂᒡ ᒎᐗᐞ ᐃᐃ ᑲᔦ ᐁᑳ ᑳᒎᐎᐎᓯᓂᒃ᙮

2:16b.EPH.002.016 ᐐᓐ ᐄᑐᒃ ᑲᔦ X ᐊᐲ ᑮᓂᐳᒡ ᐋᔑᑌᔮᑎᑯᕽ ᐅᑮᓂᑕᒪᐙᐞ ᐃᐃ ᑳᑮᐃᔑᔒᑫᓂᑎᓂᒡ, ᐁᑮᓈᒋᐱᓈᒡ ᑾᔭᒃ ᒋᐐᒌᑎᓂᒡ᙮ ᐁᑮᐃᔑᐋᒡ ᑲᔦ ᒋᐯᔑᑴᑖᑯᓯᓂᒡ ᐯᔑᑾᓐ ᐐᔭᐎᒫᕽ ᒋᐅᒋᑎᐯᑖᑯᓯᓂᒡ᙮ ᐋᔑᑌᔮᑎᑯᕽ ᑲᔦ ᐅᑮᐅᒋᓈᒋᐱᓈᐞ ᑾᔭᒃ ᒋᐐᒌᐙᓂᒡ ᑭᔐᒪᓂᑑᓐ᙮

2:17b.EPH.002.017 ᑮᐱᑕᑯᔑᓐ X ᐁᑮᑕᔑᑕᒪᐎᓀᒃ ᑳᔑᒥᓍᑐᑌᓂᒃ ᐱᓵᓐ ᐐᒌᑎᐎᓐ ᑮᓇᐙ ᐁᑳ ᑳᒎᐎᐎᓯᐌᒃ ᑳᑮᓈᐌᑖᑯᓯᔦᒃ ᑲᔦ, ᑫᐐᓇᐙ ᑕᔥ ᑳᒎᐎᐎᐙᒡ ᑮᐐᑕᒪᐙᐗᒃ ᐱᓵᓐ ᐐᒌᑎᐎᓐ ᐐᓇᐙ ᑳᑮᐯᔗᑖᑯᓯᐙᒡ᙮

2:18b.EPH.002.018 ᐐᓐ ᐃᑕᔥ ᐅᒋ, ᑳᐅᒋᑲᔥᑭᑖᐗᕽ ᑮᓇᐎᓐᑦ ᑳᔑᓃᔗᐙᓇᑭᓯᔭᕽ ᒥᒋᑲᑭᓇ ᒋᐱᓈᓯᑲᐗᕽ ᐊᐊ ᑳᐅᔫᓯᒥᓐᒡ, ᐋᓃᔥ ᑭᐯᔑᑴᑖᑯᓯᐙᒥᓐ ᐁᐐᒌᐎᒥᓇᕽ ᑳᐯᔑᑯᓂᒡ ᐅᑕᒑᑾᓐ᙮

2:19b.EPH.002.019 ᓇᔥᑫ ᑕᔥ ᑮᓇᐙ ᐁᑳ ᑳᒎᐎᐎᓯᐌᒃ ᑳᐐᓐ ᐊᐗᔑᒣ ᑭᐲᐎᑌᐎᓰᒻ, ᑳᐐᓐ ᑲᔦ ᑭᒪᔭᑫᑖᑯᓯᓰᒻ, ᓅᑯᒻ ᐃᑕᔥ ᐐᓐ ᑫᑮᓇᐙ ᑭᑑᒋᑎᐯᑖᑯᓯᒻ ᐃᐃ ᑭᔐᒪᓂᑑ ᐅᐱᒫᑎᓰᒪᐞ ᑳᐃᔑᐊᔮᓂᒡ, ᑭᔐᒪᓂᑑ ᑲᔦ ᐅᐙᑳᐃᑲᓂᕽ ᑳᐅᒋᑎᐯᑖᑯᓯᓂᒡ᙮

2:20b.EPH.002.020 ᒦᑕᔥ ᐃᐃᒫ ᑫᑮᓇᐙ ᐁᔑᐊᓯᑰᔦᒃ ᒋᐙᑳᐃᑲᓂᐎᔦᒃ ᐃᐃᒫ ᑳᑮᐃᔑᐅᓈᑯᓯᒋᑫᐙᒡ ᐃᔑᓂᔕᐙᑲᓇᒃ, ᐃᐃ ᑲᔦ ᑭᔐᒪᓂᑑ ᐅᑎᐹᒋᒧᐎᓂᓃᒪᐞ, X ᒋᓴᔅ ᐐᓂᑯ ᑳᓂᑕᒫᐱᑭᔑᕽ ᐊᓯᓐ ᑎᓄᐎ ᐙᑳᐃᑲᓂᕽ᙮

2:21b.EPH.002.021 ᐋᓃᔥ ᒦ ᐃᒫ Xᐃᕽ ᑳᐅᒋᒥᓋᑌᒃ ᐃᐃ ᑲᑭᓇ ᐙᑳᐃᑲᓐ, ᐲᓂᔥ ᐁᐊᓂᒫᒌᑭᒃ, ᐲᓂᔥ ᐃᑕᔥ ᑭᔐᒪᓂᑑ ᐅᑭᒋᐊᓇᒥᐁᐎᑲᒥᒃ ᒋᐊᓂᑎᓄᐗᓂᓂᒃ, ᑳᑎᐯᒋᑫᒡ ᑫᑕᔑᐊᓇᒥᐁᑕᐎᓐᒡ᙮

2:22b.EPH.002.022 X ᐁᐐᒌᐎᓀᒃ ᑫᑮᓇᐙ ᑕᔥ ᑳᐅᒋᒫᒪᐎᐅᓇᑭᓂᑰᔦᒃ ᐁᐅᔑᒋᑳᑌᒃ ᐙᑳᐃᑲᓐ, ᒦ ᐃᒫ ᑭᔐᒪᓂᑑ ᐁᑖᒡ ᐋᓃᔥ ᐅᑕᒑᑾᓐ ᐃᐃᒫ ᐊᔮᐗᓐ᙮

3

3:1b.EPH.003.001 ᒦ ᓴ ᐅᐅ ᓃᓐ ᑆᓬ ᑳᐅᒋᑕᑯᓂᑰᔮᓐ ᐁᐊᓄᑮᑕᐗᒃ X ᒋᓴᔅ ᑮᓇᐙ ᐅᒋ ᐁᑳ ᑳᒎᐎᐎᓯᐌᒃ᙮

3:2b.EPH.003.002 ᑫᒋᓈᒡ ᒫᐐᓐ ᐋᔕ ᑭᑮᓅᑖᒻ ᑭᔐᒪᓂᑑ ᑳᑭᔐᐙᑎᓯᒡ ᐁᑮᒦᔑᒡ ᐅᐅ ᐊᓄᑮᐎᓂᓂ ᑮᓇᐙ ᒋᒥᓄᓭᔦᒃ᙮

3:3b.EPH.003.003 ᐐᓐ ᐃᓴ ᐱᑯ ᑭᔐᒪᓂᑑ ᓂᑮᐙᐸᑕᐃᒃ ᒋᑭᑫᑕᒧᐗᒃ ᐃᐃ ᑳᑮᑭᑫᒋᑳᑌᓯᓂᓂᒃ ᐅᑎᓀᑕᒧᐎᓐ᙮ ᐋᔕ ᐸᑮ ᓂᑮᑕᔑᑖᓐ ᐅᐅ ᑳᑮᐅᔑᐲᐊᒪᐎᓇᑰᒃ᙮

3:4b.EPH.003.004 ᑮᔥᐱᓐ ᓴ ᐊᓇᒥᑑᔦᒃ ᑭᑲᓂᓯᑐᑖᒻ ᐃᓴ, ᑭᑲᑭᑫᑖᒻ ᑲᔦ ᐋᓃᓐ ᐁᔑᑭᑫᑕᒧᐗᒃ ᐃᐃ X ᐅᑎᓀᑖᑯᓯᐎᓐ ᑳᑮᑭᑫᒋᑳᑌᓯᓂᓂᒃ᙮

3:5b.EPH.003.005 ᐌᑎ ᑕᔥ ᐅᑖᓈᕽ ᐃᓂᓂᐗᒃ ᑳᐐᓐ ᑮᐙᐸᑕᐋᓰᐗᒃ ᒋᑭᑫᑕᒧᐙᒡ ᐅᐅ᙮ ᑭᔐᒪᓂᑑ ᑕᔥ ᐐᓐ ᐃᑯ ᐁᑮᐋᐸᒋᐋᒡ ᐅᑕᒑᑾᓐ ᐅᑮᐙᐸᑕᐋᐞ ᐃᐃ ᐅᑎᔑᓂᔕᐙᑲᓇᐞ ᐅᑎᐹᒋᒧᐎᓂᓃᒪᐞ ᑲᔦ ᑳᑭᑌᑖᑯᓯᓂᒡ᙮

3:6b.EPH.003.006 ᒦᑕᔥ ᐅᐅ ᑳᐃᑕᒫᓐ: ᐃᑭ ᓴ ᑲᔦ ᑳᒎᐎᐎᓯᒀ ᒥᓍᒋᒧᐎᓂᕽ ᑫᐐᓇᐙ ᐅᑲᐅᒋᑌᐱᓈᓈᐙ ᑳᐐᑌᐱᓇᒥᓂᒡ ᒎᐗᐞ ᑭᔐᒪᓂᑑᓐ ᑳᐐᒦᓂᑯᓂᒡ᙮ ᒦ ᓴ ᑲᔦ ᐐᓇᐙ ᐃᐃᒫ ᐁᔑᐐᑑᑳᓱᐙᒡ X ᐅᐐᔭᐎᓂᓃᕽ᙮ ᑮᐃᓀᑖᑯᓯᐗᒃ ᑲᔦ ᐐᓇᐙ ᒋᒦᓂᑣ ᑭᔐᒪᓂᑑᓐ ᑳᑮᐃᔑᐊᔓᑕᒫᑫᓂᒡ ᐃᐃᒫ X ᒋᓴᓱᕽ᙮

3:7b.EPH.003.007 ᓃᓐ ᓂᑮᑎᓄᐎᐃᑰ ᒋᐊᓄᑳᑕᒫᓐ ᒥᓍᒋᒧᐎᓐ, ᑭᔐᒪᓂᑑ ᐁᑮᐃᔑᔕᐌᓂᒥᒡ ᒋᐃᓇᓄᑮᐗᒃ, ᐁᑮᐅᒋᒦᔑᒡ ᑳᔑᐊᓄᑮᒪᑲᓂᓂᒃ ᐅᒪᔥᑲᐎᓰᐎᓐ᙮

3:8b.EPH.003.008 ᓃᓐ ᐃᑕᔥ ᓇᐗᒡ ᓂᑕᐸᓭᑖᑯᔅ ᐊᐲᒡ ᐐᓐ ᐃᑭ ᒫᐗᒡ ᑳᑕᐸᓭᑖᑯᓯᐙᒡ ᑭᔐᒪᓂᑑ ᐅᐱᒫᑎᓰᒪᐞ᙮ ᔖᑰᒡ ᐃᑕᔥ ᓂᑮᐃᔑᒦᓂᑰᐎᔅ ᒋᐃᔑᐎᑕᐗᒀ ᐁᑳ ᑳᒎᐎᐎᓯᒀ ᒥᓍᒋᒧᐎᓂᓂ, ᒋᑭᑫᑕᒧᐙᒡ ᐐᑳ ᑳᑌᑕᑯᐐᑌᓯᓂᓂᒃ ᐋᓃᓐ ᐁᐲᒋᐌᓅᑎᓯᓂᒡ ᐃᓂ Xᑕᓐ᙮

3:9b.EPH.003.009 ᑭᔐᒪᓂᑑ ᓃᓐ ᓂᑮᐋᐸᒋᐃᒃ ᑲᑭᓇ ᐯᒫᑎᓯᓂᒡ ᒋᐯᔭᑌᔮᐸᑕᒥᓂᒡ ᐋᓃᓐ ᐙᐃᔑᐊᓄᑮᑑᒡ ᑳᑮᑭᑫᒋᑳᑌᓯᓂᓂᒃ ᐅᑎᓀᑕᒧᐎᓐ᙮ ᐃᐃᐌᓂ ᑕᔥ ᐅᑎᓀᑕᒧᐎᓐ ᒣᐎᔕ ᐅᑖᓈᕽ ᑭᔐᒪᓂᑑ ᑲᑭᓇ ᑫᑰᓂᓂ ᑳᐅᔑᑑᒡ, ᒦ ᐃᐌᓂ ᒨᔕᒃ ᑳᑮᐱᑳᑑᒡ ᒋᑭᑫᒋᑳᑌᓯᓂᓂᒃ᙮

3:10b.EPH.003.010 ᓅᑯᒻ ᐃᑕᔥ ᑭᔐᒪᓂᑑ, ᐅᑕᓇᒥᐋᐞ ᐅᑖᐸᒋᐋᐞ ᐁᐙᐸᑕᐃᐌᒡ ᐅᑲᑮᑖᐌᑕᒧᐎᓐ᙮ ᒦᑕᔥ ᐃᐃ ᑳᐊᒑᑯᐌᑖᑯᓯᓂᒡ ᑳᐅᑭᒫᑲᑖᑫᓂᒡ ᑳᐃᓂᑣ, ᑳᑲᔥᑭᐁᐎᓯᓂᒡ ᑲᔦ, ᑭᒋᑮᔑᑯᕽ ᑳᐊᔮᓂᒡ ᒋᐱᑭᑫᑕᒥᓂᒡ ᑭᔐᒪᓂᑑ ᐁᐊᔮᒡ ᑲᑮᑖᐌᑕᒧᐎᓐ᙮

3:11b.EPH.003.011 ᑭᔐᒪᓂᑑ ᓴ ᑮᐃᔑᒋᑫ ᒣᐎᔕ ᐅᑖᓈᕽ ᑳᑮᐱ ᐃᓀᑕᒧᑯᐸᓀᓐ ᐃᐃᒫ ᑕᔥ X ᒋᓴᓱᕽ ᑳᑎᐯᓂᒥᓇᕽ, ᒦᐃᒫ ᐁᔑᓈᑾᓂᓂᒃ ᐃᐃ ᐁᑮᑮᔑᑑᒡ ᑳᐐᐃᔑᒋᑫᑯᐸᓀᓐ᙮

3:12b.EPH.003.012 X ᑕᔥ ᐁᐐᒌᐗᕽ, ᐁᑌᐺᑕᐗᕽ ᑲᔦ ᑳᐅᒋᓲᑭᑌᐁᔭᕽ, ᑳᐅᒋᑫᒋᓈᐅᔭᕽ ᑲᔦ ᐊᐲ ᑮᐱᓈᓯᑲᐗᕽ ᑭᔐᒪᓂᑑ ᐌᑎ ᑳᐃᔑᐊᔮᒡ᙮

3:13b.EPH.003.013 ᒦᑕᔥ ᐁᔑᐸᑯᓭᓂᒥᓂᓇᑰᒃ, ᒋᐲᑯᑌᐁᓯᐌᒃ ᐅᐅ ᑮᓇᐙ ᑳᐅᒋᑲᒀᑕᑭᑑᔮᓐ, ᑮᓇᐙ ᓴ ᑭᑲᐅᒋᒥᓄᓭᒻ ᐅᐅ ᑳᔑᑲᒀᑕᑭᑑᔮᓐ᙮

3:14b.EPH.003.014 ᒦᑕᔥ ᐅᐅ ᑳᐅᒋ ᐅᒋᒌᑾᓇᐱᑖᔮᓐ ᐁᓈᓴᒦᒡ ᑳᐅᔫᓯᒥᓐᒡ,

3:15b.EPH.003.015 ᒦᐃ ᐄᑐᒃ ᑲᑭᓇ ᐊᐎᔭᒃ ᐌᑎᓇᒧᐙᒡ ᐅᐐᓱᐎᓂᐙᓐ ᑭᒋᑮᔑᑯᕽ, ᐊᑮᕽ ᑲᔦ ᑳᐊᔮᐙᒡ, ᑳᑕᓱᐯᐸᑳᓉᐙᓇᑭᓯᐙᒡ ᑳᐅᑌᑌᐙᒡ᙮

3:16b.EPH.003.016 ᓂᒪᔥᑲᐎᑲᑴᒋᒫ ᑳᐅᔫᓯᒥᓐᒡ ᒋᒦᓂᓀᒃ, ᑳᐃᔑᐌᓅᑕᓂᓂᒃ ᐅᑭᒋ ᐃᓀᑖᑯᓯᐎᓐ ᒋᐅᒋᒪᔥᑲᐎᓰᐃᑯᔦᒃ ᐃᐃᒫ ᑳᔑᒪᔥᑲᐎᓰᓂᒡ ᐅᑕᒑᑾᓐ᙮ ᒋᒪᔥᑲᐎᓰᔦᒃ ᐃᐃᒫ ᐲᒐᔭᐄ ᑭᐱᒫᑎᓯᐎᓂᐙᕽ᙮

3:17b.EPH.003.017 ᐁᑌᐺᑕᒣᒃ ᑲᔦ X ᒋᐃᔑᑖᒡ ᐃᐃᒫ ᑭᑌᐃᐙᕽ, ᑮᓇᐙ ᑲᔦ ᑖᐱᔥᑰ ᐗᑕᐲᓐ ᑳᑯᑖᐎᑭᑭᓐ, ᒋᑯᑖᐎᑭᔦᒃ ᓵᑭᐃᐌᐎᓂᕽ, ᑳᔑᐅᓇᑌᒃ ᑲᔦ ᓵᑭᐃᐌᐎᓐ ᒦ ᐃᒫ ᒋᐃᔑᐋᔩᑕᐱᔦᒃ᙮

3:18b.EPH.003.018 ᒋᑲᔥᑭᑑᔦᒃ ᑲᔦ ᒋᐐᒋᑭᑫᑕᒨᒥᒣᒃ ᐃᐃ ᑭᔐᒪᓂᑑ ᑲᑭᓇ ᐅᑕᓇᒥᐋᒪᐞ ᐋᓃᓐ ᐁᓂᑯᑴᑖᑾᓂᓂᒃ X ᐅᓵᑭᐃᐌᐎᓐ, ᐋᓃᓐ ᐁᐲᒋᒪᑲᑌᔦᑖᑾᓂᓂᒃ, ᐋᓃᓐ ᑲᔦ ᐁᐲᒋᑭᓉᐌᑖᑾᓂᓂᒃ, ᐋᓃᓐ ᑲᔦ ᐁᐲᒋᐃᔥᐯᑖᑾᓂᓂᒃ, ᐋᓃᓐ ᑲᔦ ᐁᐲᒋᐙᓴᐌᑖᑾᓂᓂᒃ ᐊᓈᒪᔭᐄ ᐃᓇᑫ᙮

3:19b.EPH.003.019 ᑫᑫᑦ ᑲᔦ ᒋᑭᑫᑕᒧᐌᒃ X ᐅᓵᑭᐃᐌᐎᓐ, ᐐᑳ ᑫᑌᐱᑭᑫᒋᑳᑌᓯᓂᓂᒃ, ᒋᒨᔥᑭᓀᔥᑳᑯᐌᒃ ᑲᔦ ᑲᑭᓇ ᑭᔐᒪᓂᑑ ᐅᑎᓈᑎᓯᐎᓐ ᐁᔑᒨᔥᑭᓀᐌᑖᑾᓂᓂᒃ᙮

3:20b.EPH.003.020 ᐊᐊ ᑕᔥ ᑭᔐᒪᓂᑑ ᑳᐊᓄᑮᒪᑲᓂᓂᒃ ᐅᒪᔥᑲᐎᓰᐎᓐ ᐃᐃᒫ ᑭᐱᒫᑎᓯᐎᓂᓈᓂᕽ, ᐅᑲᔥᑭᑑᓐ ᐊᐗᔑᒣ ᒋᐃᔑᒋᑫᒡ ᑳᐃᔑᑲᑴᒋᒪᕽ, ᐋᓃᓐ ᑲᔦ ᐁᓀᑕᒧᐗᕽ,

3:21b.EPH.003.021 ᑕᑲ ᓴ ᐐᓐ ᒨᔕᒃ ᐃᑯ ᑕᑭᒋ ᐃᓀᑖᑯᓯ ᐃᐃᒫ ᐅᑕᓇᒥᐋᐞ ᑳᐃᔑᐊᔮᓂᒡ, ᐃᐃᒫ ᑲᔦ X ᒋᓴᓱᕽ ᒨᔕᒃ ᐃᑯ ᐊᐸᓀ ᑫᓂᐊᔭᔮᓂᒃ᙮ ᐁᒣᓐ᙮

4

4:1b.EPH.004.001 ᓃᓐ ᐃᑕᔥ ᑳᑎᐯᒋᑫᒡ ᐁᐊᓄᑮᑕᐗᒃ ᑳᐅᒋᑭᐸᐅᑰᔮᓐ, ᑭᑎᔑᐸᑯᓭᓂᒥᓂᓂᒻ, ᐋᐱᒋ ᐁᑭᒋ ᐃᓀᑖᑾᒃ ᑳᔑᑲᓅᓂᑰᔦᒃ, ᑮᐊᑐᒥᓀᒃ ᑭᔐᒪᓂᑑ, ᒦᑕᔥ ᐃᓇᑫ ᒋᐃᔑᐱᒫᑎᓯᔦᒃ᙮

4:2b.EPH.004.002 ᒨᔕᒃ ᑲᑴᑕᐸᓭᓂᒧᒃ, ᑲᑴᓅᑳᑎᓯᒃ, ᔕᔒᐯᑕᒧᒃ ᑲᔦ, ᑲᑴᔕᔒᐯᓂᑎᒃ ᒋᐙᐸᑕᐃᑎᔦᒃ ᐁᓵᑭᐃᑎᔦᒃ᙮

4:3b.EPH.004.003 ᒫᐗᒡ ᓴ ᑯ ᑭᒋᐊᓄᑮᒃ ᒋᑲᓇᐌᑕᒧᐌᒃ ᐐᒌᑎᐎᓐ ᑭᔐᒪᓂᑑ ᐅᑕᒑᑾᓐ ᑳᒦᓂᓀᒃ, ᐱᓵᓂᓰᑲᑖᑎᐎᓐ ᐋᐸᒋᑑᒃ ᑳᐅᒋᒥᒋᒥᔥᑳᒃ ᑳᐃᔑᒥᓄᐐᒌᑎᔦᒃ᙮

4:4b.EPH.004.004 ᒥᒋᐯᔑᑾᓐ ᓴ ᐐᔭᐎᒫ, ᒥᒋᐯᔑᑯ ᑲᔦ ᐊᐊ ᐊᒑᒃ, ᒥᒋᐯᔑᑾᓂᓂ ᑳᐃᔑᐊᑐᒥᓀᒃ ᑭᔐᒪᓂᑑ, ᒦᑕᔥ ᐃᐃᒫ ᐁᔑᐊᐯᓂᒧᔦᒃ᙮

4:5b.EPH.004.005 ᒥᒋᐯᔑᑯ ᑲᔦ ᑳᑎᐯᒋᑫᒡ, ᒥᒋᐯᔑᑾᓐ ᑲᔦ ᑌᐺᔦᑕᒧᐎᓐ, ᒥᒋᐯᔑᑾᓐ ᑲᔦ ᓰᑲᐊᑖᓱᐎᓐ,

4:6b.EPH.004.006 ᒥᒋᐯᔑᑯ ᑲᔦ ᑭᔐᒪᓂᑑ, ᑲᑭᓇ ᐊᐎᔭᓐ ᑳᐅᔫᓯᒥᑯᒡ, ᐐᓐ ᑲᔦ ᑲᑭᓇ ᐊᐎᔭᐞ ᐅᑎᐯᓂᒫᐞ, ᒥᓯᐌ ᑲᔦ ᑕᓇᓄᑮ, ᐐᓐ ᑲᔦ ᑲᑭᓇ ᐊᐎᔭᐞ ᐅᐱᒫᑎᓯᐎᓂᓃᕽ ᐊᔨᑖ᙮

4:7b.EPH.004.007 ᑲᑭᓇ ᑕᔥ ᑳᑕᓱᐯᔑᑯᔭᕽ X ᐅᒦᑭᐌᐎᓂᕽ ᑭᑮᐃᔑᔕᐌᑖᑯᓯᒥᓐ, ᐁᑮᐃᔑᒫᒫᑕᐆᓂᓇᕽ ᐅᒦᑭᐌᐎᓇᓐ ᑳᑮᐅᓀᑕᕽ ᒋᐃᓇᓄᑮᔭᕽ᙮

4:8b.EPH.004.008 ᑭᒋᒪᓯᓇᐃᑲᓐ ᑕᔥ ᐃᔑᐲᐃᑳᑌ: ᐊᐲ ᓴ ᐌᑎ ᐃᔥᐱᒥᕽ ᑮᐃᔖᒡ, ᑳᒋᑎᓂᑲᓇᐞ ᓃᐱᐗᐞ ᐅᑮᒫᒌᓈᐞ, ᒦᑭᐌᐎᓇᓐ ᑕᔥ ᐅᑮᒦᓈᐞ ᐃᓂᓂᐗᐞ᙮

4:9b.EPH.004.009 ᐌᑯᓀᓐ ᑕᔥ ᐃᔥᐱᒥᕽ ᑮᐃᔖᒡ ᑳᐃᒋᑳᑌᒃ? ᒦ ᓴ ᐅᐅ ᑳᐃᒋᑳᑌᒃ, ᐱᓇᒫ ᓴ ᒫᐗᒡ ᐃᑯ ᑕᐸᓴᑮᕽ ᑮᐲᔖ᙮

4:10b.EPH.004.010 ᐊᐊ ᑕᔥ ᑳᑮᐱᓈᔒᒡ ᐅᐅᒫ ᐊᑮᕽ, ᒦ ᓴ ᐊᐊ ᐯᔑᑾᓐ ᐃᔥᐱᒥᕽ ᑳᑮᐃᔖᒡ, ᐙᓴ ᐌᑎ ᐊᐗᔑᒣ ᑭᒋᑮᔑᑯᕽ ᐁᑮᐃᔖᒡ, ᑲᑭᓇ ᑫᑰᓂᓂ ᐁᐐᒨᔥᑭᓀᔥᑲᕽ᙮

4:11b.EPH.004.011 ᐐᓐ ᐃᑕᔥ ᑳᑮᒦᓈᒡ ᐃᓂᓂᐗᐞ ᐊᓄᑮᐎᓇᓐ, ᐋᓂᑕ ᐃᔑᓂᔕᐙᑲᓐ ᒋᑎᓄᐎᓂᒡ, ᐋᓂᑕ ᒋᑎᓄᐎᓂᒡ ᑳᑲᓅᒋᑫᑕᒪᐙᓂᒡ ᑭᔐᒪᓂᑑᓐ, ᐋᓂᑕ ᒋᐸᐹᐐᑕᒫᑫᓂᒡ ᒥᓍᒋᒧᐎᓐ, ᐋᓂᑕ ᒋᑲᓇᐌᓂᒫᓂᒡ ᐅᑕᓇᒥᐋᐞ, ᐋᓂᑕ ᑲᔦ ᒋᑭᑭᓄᐊᒫᑫᓂᒡ᙮

4:12b.EPH.004.012 ᒦᑕᔥ ᐃᐃ ᑳᑮᐅᒋᒦᓈᒡ ᐁᐐᑾᔮᒋᐋᒡ ᑭᔐᒪᓂᑑ ᐅᑕᓇᒥᐋᒪᐞ ᒋᑑᑕᒥᓂᒡ ᐅᐙᐐᒋᐃᐌᐎᐊᓄᑮᐎᓐ, ᒋᐅᒋᑮᔑᓈᑾᓂᓂᒃ ᐁᐅᐱᒋᑳᑌᓂᒃ X ᐅᐐᔭᐤ,

4:13b.EPH.004.013 ᐹᓂᒫ ᑲᑭᓇ ᑮᐯᔑᑴᑖᑾᒃ ᑭᑌᐺᑕᒧᐎᓂᓈᓐ, ᑳᐃᔑᑭᑫᓂᒪᕽ ᑲᔦ ᑭᔐᒪᓂᑑ ᐅᑯᓯᓴᓐ, ᒦᑕᔥ ᐃᐃ ᐸᔦᔥ ᒋᓂᑮᔖᐯᐎᐗᕽ, ᒋᐅᒋᒋᔥᑳᐗᕽ ᐅᒨᔥᑭᓀᐌᑖᑯᓯᐎᓂᕽ X ᒪᔮ ᑫᑮᓇᐎᓐᑦ ᒋᐃᔑᓈᑯᓯᔭᕽ᙮

4:14b.EPH.004.014 ᑕᑲ ᑕᔥ ᑳᐐᓐ ᐊᐱᓅᒌᔑᕽ ᑭᑲᐃᔑᐊᔮᓰᒥᓐ, ᒋᐸᐹᒫᐅᑯᓯᐗᕽ, ᒋᐸᐹᒥᐌᐹᔑᓯᐗᕽ ᐋᑎ ᐱᑯ ᐌᑖᓂᒪᒃ, ᐋᓃᔥ ᑖᐱᔥᑰ ᓅᑎᓄᕽ ᐃᓀᑖᑾᓂᓂ ᐅᑭᑭᓄᐃᑫᐎᓂᐙᓐ ᐃᑭ ᑳᐗᓂᑭᑭᓄᐃᑫᐙᒡ᙮ ᐋᓃᔥ ᐅᑲᔥᑭᐋᐙᐞ ᐋᓂᑕ ᐁᐗᓂᒫᐙᒡ ᐁᐋᐸᒋᑑᐙᒡ ᑳᑲᑲᔦᑖᑾᓂᓂᑭᓐ ᐅᑎᔑᒋᑫᐎᓂᐙᓐ᙮

4:15b.EPH.004.015 ᑮᓇᐎᓐᑦ ᑕᔥ ᐐᓐ ᓵᑭᐃᐌᐎᓂᕽ ᐁᐅᒌᒪᑲᒃ ᑳᑕᔑᑕᒪᕽ ᑌᐺᐎᓐ, ᒥᓯᐌ ᑭᑲᐃᔑᒫᒌᑭᒥᓐ ᐃᓇᑫ X ᑳᐃᔑᐊᔮᒡ, ᑳᓃᑳᓂᔥᑲᕽ ᐅᐐᔭᐤ᙮

4:16b.EPH.004.016 ᐐᓐ ᐃᑕᔥ ᑲᑭᓇ ᑫᑰᓂᓂ ᐁᓈᑲᒋᑑᒡ, ᒦ ᐃ ᑳᐅᒋ ᒫᒪᐎ ᒥᓄᓯᑭᓐ ᐃᓂ ᐯᐸᑳᓐ ᑳᐃᓍᑌᑭᓐ ᐃᐃᒫ ᐐᔭᐎᒫᕽ᙮ ᒦ ᐃᒫ ᑲᑭᓇ ᐌᒋᒥᒋᒥᔥᑳᒃ ᑳᐃᔑᐊᔫᓇᒋᑳᑌᑭᓐ ᐊᔮᓂᑲᐎᑲᓈᓇᓐ᙮ ᐁᑕᓱ ᐯᔑᑾᒃ ᓴ ᐃᓈᐸᑕᓐ ᑫᑮᐃᓇᓄᑮᒪᑲᑭᐸᓐ᙮ ᒦᑕᔥ ᐅᐅ ᓵᑭᐃᑎᐎᓐ ᐁᓇᓄᑮᒪᑲᒃ, ᑳᐅᒋᒫᒌᑭᒃ ᐐᔭᐎᒫ, ᑳᐅᒋ ᒪᔥᑲᐎᐃᑎᓲᒪᑲᒃ ᑲᔦ᙮

4:17b.EPH.004.017 ᑭᑕᔮᒀᒥᒥᓂᓂᒻ ᐃᑕᔥ ᑳᑎᐯᒋᑫᒡ ᐅᑎᔑᓂᑳᓱᐎᓂᕽ: ᑫᑯ ᐊᐗᔑᒣ ᐃᔑᐱᒫᑎᓯᑫᒃ ᑖᐱᔥᑰ ᐃᑭ ᐁᑳ ᑳᒎᐎᐎᓯᒀ ᑳᐃᔑᒋᑫᐙᒡ, ᐋᓃᔥ ᐅᑎᓀᑕᒧᐎᓂᐙᓐ ᑳᐐᓐ ᑫᑰᓐ ᐊᐲᑌᑖᑾᓯᓂᓂᐗᓐ᙮

4:18b.EPH.004.018 ᑲᔥᑮᑎᐱᑲᓂᓂᐗᓐ ᑲᔦ ᐅᓈᑲᑕᐌᑕᒧᐎᓂᐙᓐ, ᑳᐐᓐ ᑲᔦ ᐃᐃᒫ ᑭᔐᒪᓂᑑ ᑳᔑᐱᒫᒋᐃᐌᓂᒡ ᐃᔑᑎᐯᑖᑯᓯᓰᐗᒃ, ᐋᓃᔥ ᑳᐐᓐ ᐅᒋᑕ ᐅᐐᑲᑴᑭᑫᓂᒫᓯᐙᐙᓐ ᐋᓃᔥ ᑲᔦ ᐁᔕᔒᐱᑕᒧᐙᒡ᙮

4:19b.EPH.004.019 ᑳᐐᓐ ᑲᔦ ᐊᐙᒡ ᐸᑮ ᐊᑲᒋᐎᓐ ᐅᑕᔮᓰᓈᐙ, ᐱᓵᓂᑯ ᐐᑫ ᐊᓅᒋᑯ ᐁᐃᔑᒋᑫᐙᒡ ᐋᓃᓐ ᐐᓀᑕᐙ ᑯ ᑫᐅᒋᒥᓉᑕᒧᐙᒡ, ᐁᐃᔑᒋᑫᐙᒡ ᑲᑭᓇ ᐃᓂ ᑎᓄ ᑳᐐᓀᑖᑾᓂᓂᑭᓐ, ᐋᐱᒋ ᑲᔦ ᐁᐅᓵᒣᑕᒧᐙᒡ ᑫᔮᐱ ᐁᐐᐃᔑᒋᑫᐙᒡ᙮

4:20b.EPH.004.020 ᑳᐐᓐ ᑕᔥ ᐐᓐ ᐃᐃ ᓇᑫ ᑭᑮᐃᔑᑭᑭᓄᐊᒫᑯᓯᐙ X᙮

4:21b.EPH.004.021 ᑌᐺ ᐄᑐᒃ ᑭᑮᓅᑕᐙᐙ ᐊᐊ X, ᑭᑮᑭᑭᓄᐊᒫᑯᐙ ᑲᔦ᙮ ᒦᓴ ᐃᐌ ᑳᓅᑕᒣᒃ ᑌᐺᐎᓐ ᑳᒥᑭᑳᑌᒃ ᒋᓴᓱᕽ,

4:22b.EPH.004.022 ᐁᑮᑭᑭᓄᐊᒫᑰᔦᒃ ᑫᑑᑕᒣᒃ ᐃᓂ ᑭᑫᑌᐃᓈᑎᓯᐎᓂᐙᓐ, ᐸᑫᔭᐄ ᒋᐃᔑᐌᐱᓇᒣᒃ, ᐋᓃᔥ ᒦᐃᒫ ᑳᐃᔑᑲᑲᔦᓂᓰᒪᑲᑭᓐ ᒪᒋᒥᓴᐌᑕᒧᐎᓇᓐ ᑳᑮᐊᓂᐅᒋ ᓂᔑᐗᓈᒋᒋᑳᑌᒃ᙮

4:23b.EPH.004.023 ᓅᑯᒻ ᐃᑕᔥ ᐊᓂᐅᔥᑭᐃᑰᐎᓯᒃ ᑭᑕᒑᑯᐙᕽ ᑳᐅᒋᓈᓈᑲᑕᐌᑕᒣᒃ᙮

4:24b.EPH.004.024 ᐱᓯᑲᒧᒃ ᑲᔦ ᐃᐃ ᐅᔥᑭᐱᒫᑎᓯᐎᓐ ᑳᑮᐅᔑᒋᑳᑌᒃ ᒋᐃᔑᓈᑾᒃ ᑭᔐᒪᓂᑑ ᑳᐃᔑᓈᑯᓯᒡ, ᑌᐺ ᒋᑾᔭᒀᑎᓰᑲᑕᐌᒀ ᐯᒫᑎᓯᐙᒡ, ᑌᐺ ᒋᑾᔭᑯᑑᑕᒧᐌᒃ ᑭᔐᒪᓂᑑ ᑳᐃᔑᐊᑕᐌᓂᒥᓀᒃ᙮

4:25b.EPH.004.025 ᐊᐤ ᐃᑕᔥ ᐴᓂᑑᒃ ᑭᑮᐗᓂᒧᐎᓂᐙᓐ! ᑳᑌᐺᔦᑖᑾᒃ ᑕᔥ ᐙᐐᑕᒪᐎᒃ ᑲᑭᓇ ᑳᑕᓱᐯᐯᔑᑯᔦᒃ ᑮᒋᐱᒫᑎᓰᒃ, ᐋᓃᔥ ᑲᑭᓇ ᑳᑕᔑᔭᕽ ᐯᔑᑾᓐ ᑭᑎᔑᑎᐯᑖᑯᓯᒥᓐ᙮

4:26b.EPH.004.026 ᑮᔥᐱᓐ ᑕᔥ ᓂᔥᑳᑎᓯᔦᒃ, ᑫᑯ ᐃᐃᒫ ᑭᓂᔥᑳᑎᓯᐎᓂᐙᕽ ᐅᒋᒪᒋᑑᑕᑫᒃ᙮ ᐴᓂᑭᑖᓱᒃ ᒋᑆ ᐸᑭᔑᒧᒡ ᑮᓯᔅ᙮

4:27b.EPH.004.027 ᑫᑯ ᑲᔦ ᑕᐎᓇᒪᐙᑫᒃ ᒪᒋᐊᔭᐋ ᑭᐱᒫᑎᓯᐎᓂᐙᕽ᙮

4:28b.EPH.004.028 ᑕᑲ ᑲᔦ ᐊᐊ ᑳᓂᑖᑭᒨᑎᒡ ᑕᐴᓂᑭᒨᑎ, ᓇᐗᒡ ᐊᓄᑮᒡ ᑕᐅᓂᔑᔑᓂᓂ ᐅᓂᒌᓐ ᒋᐋᐸᒋᑑᐸᓐ᙮ ᐋᓃᔥ ᒦ ᐃᒫ ᑫᐅᒋᐊᔮᒡ ᑫᑰᓂᓂ ᒋᒦᓈᒡ ᐃᐃ ᑳᓅᑌᓭᓂᒡ᙮

4:29b.EPH.004.029 ᑫᑯ ᑲᔦ ᑳᓂᔑᐗᓈᒋᐃᐌᒪᑲᑭᓐ ᐃᑭᑐᐎᓇᓐ ᐋᐸᒋᑑᑫᒃ ᑮᑮᑭᑐᔦᒃ, ᐃᓂ ᓴ ᑳᐐᒋᐃᐌᒪᑲᑭᓐ ᐃᑭᑐᐎᓇᓐ ᐋᐸᒋᑑᒃ, ᒋᐐᒋᐃᑣ ᓅᑯᒻ ᐃᑯ ᑳᐃᔑᓅᑌᓭᐙᒡ, ᐃᑭ ᓴ ᑳᐱᓯᑕᐎᓀᒀ ᒋᐅᒋᒥᓄᓭᐙᒡ᙮

4:30b.EPH.004.030 ᑫᑯ ᑲᔦ ᒫᓀᑕᒧᐃᒫᑫᒃ ᑳᐯᑳᑎᓯᓂᒡ ᑭᔐᒪᓂᑑ ᐅᑕᒑᑾᓐ, ᒦ ᐃ ᐋᓃᔥ ᐃᐃᒫ ᐌᒋᑭᑭᓇᐙᒋᐃᑰᔦᒃ ᐋᑎ ᐌᒋᑎᐯᑖᑯᓯᔦᒃ, ᓂᑯᑎᕽ ᓴ ᑮᔑᑲᓂᓂᒃ ᑭᔐᒪᓂᑑ ᐅᑲᑮᔑᑑᓐ ᑭᐱᒫᒋᐃᑰᐎᓂᐙ᙮

4:31b.EPH.004.031 ᐌᐱᓇᒧᒃ ᑕᔥ ᑲᑭᓇ ᓂᔥᑫᑕᒧᐎᓇᓐ, ᐋᑯᑭᑖᓱᐎᓐ ᑲᔦ, ᓂᔥᑳᑎᓯᐎᓇᓐ ᑲᔦ, ᓂᔥᑭᑭᔒᐌᑮᑳᑎᐎᓐ ᑲᔦ, ᒪᒋᑕᔑᑎᐎᓇᓐ ᑲᔦ, ᐃᓂ ᑲᔦ ᑮᒨᒋᔒᑫᒋᑫᐎᓇᓐ᙮

4:32b.EPH.004.032 ᒥᓄᑑᑖᑎᒃ, ᑯᐹᑌᓂᑎᒃ ᑲᔦ ᐌᐌᓂ ᒋᐐᒋᐃᑎᔦᒃ, ᐴᓀᑕᒫᑎᒃ ᑲᔦ ᑖᐱᔥᑰ ᑭᔐᒪᓂᑑ ᑳᑮᐃᔑᐴᓀᑕᒪᐎᓀᒃ ᐃᐃᒫ Xᐃᕽ᙮

5

5:1b.EPH.005.001 ᑮᓇᐙ ᑕᔥ ᑳᔕᐌᓂᒥᓀᒃ ᑭᔐᒪᓂᑑ ᐁᐅᓃᒑᓂᓯᒥᓀᒃ, ᓇᓈᐱᓇᐎᒃ ᐁᔑᐱᒫᑎᓯᒡ᙮

5:2b.EPH.005.002 ᓵᑭᐃᑎᐎᓂᕽ ᑲᔦ ᐃᔑᐱᒧᓭᒃ ᑖᐱᔥᑰ X ᑳᑮᐃᔑᔕᐌᓂᒥᓀᒃ, ᐁᑮᐸᑭᑎᓇᕽ ᐅᐱᒫᑎᓯᐎᓐ ᑮᓇᐎᓐᑦ ᐅᒋ, ᐱᓵᓐ ᐃᑯ ᒋᓂᓯᓐᒡ ᐁᑮᐸᑭᑎᓇᒪᐙᒡ ᑭᔐᒪᓂᑑᓐ, ᐅᑮᒥᓈᓴᒪᐙᓐ, ᒦ ᓴ ᐃᐃᐌᓂ ᑭᔐᒪᓂᑑ ᑳᒥᓄᒫᑕᕽ᙮

5:3b.EPH.005.003 ᑳᐐᓐ ᐄᑐᒃ ᐊᐙᒡ ᑕᐊᔮᓯᓅᓐ ᐱᔑᒀᑎᓯᐎᓐ, ᐐᓈᑎᓯᐎᓐ ᑲᔦ, ᐋᔅᑯᓂᓯᐎᓐ ᑲᔦ ᒋᑕᑯᐐᑌᒃ ᐃᐃᒫ ᑳᔑᐊᔮᔦᒃ, ᐁᑎᓄᐎᔦᒃ ᑭᔐᒪᓂᑑ ᐅᐱᒫᑎᓰᒪᐞ᙮

5:4b.EPH.005.004 ᑫᑯ ᑲᔦ ᐐᓂᑮᔗᑫᒃ, ᑫᑯ ᑲᔦ ᑲᑮᐹᒋᑮᔗᑫᒃ, ᑫᑯ ᑲᔦ ᓅᒋᑯ ᐃᔑᒦᑭᓯᑖᑯᓯᑫᒃ, ᐋᓃᔥ ᑳᐐᓐ ᐃᐃ ᐅᓂᔑᔑᓯᓅᓐ᙮ ᒨᔕᒃ ᐃᑕᔥ ᑕᔑᑕᒧᒃ ᑫᐅᒋᒦᑴᒋᐌᑕᒣᒃ᙮

5:5b.EPH.005.005 ᑫᒋᓈᒡ ᐄᑐᒃ ᑭᑭᑫᑖᒻ ᐊᐎᔭ ᑳᐱᔑᒀᑎᓯᒡ, ᑳᐐᓈᑎᓯᒡ ᑲᔦ, ᑳᒥᓴᐌᑕᕽ ᑫᑰᓂᓂ ᐸᑳᓐ ᐊᐎᔭᓐ ᐅᑕᔭᐄᒥᓂ, ᒦᐃ ᐋᓃᔥ ᐁᔑᒪᓂᑑᑫᒡ, ᑳᐐᓐ ᐃᑭ ᑳᑑᑕᒧᐙᒡ ᐅᑲᑌᐱᓇᓰᓈᐙ ᐃᐃ ᑳᐐᒦᓂᑎᓈᓂᐗᓂᓂᒃ ᐃᐃᒫ ᐅᑑᑭᒫᐎᐎᓂᓃᕽ Xᑕᓐ ᔑᑾ ᑲᔦ ᑭᔐᒪᓂᑑᓐ᙮

5:6b.EPH.005.006 ᑫᑯ ᑲᔦ ᐸᑭᑎᓈᑫᒃ ᐊᐎᔭ ᒋᐗᓂᐎᓂᓀᒃ ᑲᑮᐹᒋᑮᔗᐎᓇᓐ ᐋᐸᒋᑑᒡ, ᐋᓃᔥ ᒦᐗᓄᓄ ᑳᐃᔑᒋᑫᐙᒡ, ᑳᔕᔒᐱᑕᒧᐙᒡ ᑳᐐᐅᒋᐸᑲᒥᔥᑳᑯᐙᒡ ᑭᔐᒪᓂᑑᓐ ᐅᓂᔥᑳᑎᓯᐎᓂᓂ᙮

5:7b.EPH.005.007 ᑫᑯ ᑕᔥ ᐐᒌᐙᑫᒀᓂᒃ ᐃᑭ ᐅᐅ ᑳᐃᔑᒋᑫᐙᒡ᙮

5:8b.EPH.005.008 ᑮᓇᐙ ᑕᔥ ᑲᔥᑮᑎᐱᑲᓄᕽ ᑭᑮᐃᔑᐱᒫᑎᓯᒻ ᐅᑖᓈᕽ, ᓅᑯᒻ ᐃᑕᔥ ᑭᐙᓭᓈᑯᓯᒻ ᑳᑎᐯᒋᑫᒡ ᐅᒋ᙮ ᒦᑕᔥ ᐃᐃᒫ ᐃᔑᐱᒧᓭᒃ ᑳᐃᔑᐱᒫᑎᓯᐙᒡ ᐙᓭᔮᕽ ᑳᐃᔑᑎᐯᑖᑯᓯᐙᒡ᙮

5:9b.EPH.005.009 ᐋᓃᔥ ᑳᐙᓭᔮᒃ ᐅᒋᓂᑖᐎᑮᒪᑲᓅᓐ ᑲᑭᓇ ᑳᐅᓂᔑᔑᒃ ᒥᓄᑑᑕᒧᐎᓐ, ᑾᔭᒀᑎᓯᐎᓐ, ᑌᐺᐎᓐ ᑲᔦ᙮

5:10b.EPH.005.010 ᑲᑴᑭᑫᑕᒧᒃ ᐃᑕᔥ ᑲᔦ ᐌᑯᓀᓐ ᐃᓂ ᑳᑎᐯᒋᑫᒡ ᑳᒥᓍᐸᑕᕽ᙮

5:11b.EPH.005.011 ᑫᑯ ᑲᔦ ᐐᒋᐋᑫᒀᓂᒃ ᐃᑭ ᐯᒫᑎᓯᐙᒡ ᐅᑎᔑᒋᑫᐎᓂᐙᓐ ᑲᔥᑮᑎᐱᑲᓄᕽ ᑳᐅᒋᑎᐯᑖᑾᓂᓂᑭᓐ, ᐋᓃᔥ ᑳᐐᓐ ᑫᑰᓂᓂ ᐃᐃᒫ ᐅᑑᑎᓇᓰᓈᐙ᙮ ᐅᐅ ᑕᔥ ᐃᔑᒋᑫᒃ, ᒧᔐᓇᒪᐎᑾᒃ ᐃᓂ ᐅᑎᔑᒋᑫᐎᓂᐙᓐ᙮

5:12b.EPH.005.012 ᐋᓃᔥ ᑌᐺ ᐐᑫ ᐊᑲᑌᑖᑾᓂᓂᐗᓐ ᒋᑕᔑᒋᑳᑌᓂᑭᓐ ᐅᑮᒨᒋ ᐃᔑᒋᑫᐎᓂᐙᓐ᙮

5:13b.EPH.005.013 ᑲᑭᓇ ᑕᔥ ᑫᑰᓇᓐ ᓈᑾᓅᓐ ᑮᐲᒋᑳᑌᑭᓐ ᑳᐃᔑᐙᓭᔮᒃ, ᑲᑭᓇ ᑕᔥ ᑫᑰᓐ ᑮᓈᑾᒃ ᒦᐃᒫ ᐌᒋᑭᑫᒋᑳᑌᒃ ᐁᑎᓄᐗᕽ᙮

5:14b.EPH.005.014 ᒦᑕᔥ ᐅᐅ ᑳᐅᒋ ᐃᔑᐲᐃᑳᑌᒃ ᑭᒋᒪᓯᓇᐃᑲᓐ: ᑯᔥᑯᓯᓐ ᑳᓂᐹᔭᓐ! ᑮᐌᐱᒫᑎᓯᓐ ᐅᒋ ᐃᒫ ᑳᐃᔑᓂᐳᔭᓐ, X ᐃᑕᔥ ᑭᑲᐙᓭᔥᑳᒃ᙮

5:15b.EPH.005.015 ᐋᐱᒋ ᑕᔥ ᐊᔮᒀᒥᓯᒃ ᐋᓃᓐ ᐁᔑᐱᒫᑎᓯᔦᒃ, ᑫᑯ ᐃᔑᐱᒫᑎᓯᑫᒃ ᑖᐱᔥᑰ ᑳᑲᑮᐹᑎᓯᐙᒡ᙮ ᑳᐃᔑᐱᒫᑎᓯᐙᒡ ᐃᑕᔥ ᐅᑲᑮᑖᐌᑕᒨᒃ ᐃᔑᐱᒫᑎᓯᒃ᙮

5:16b.EPH.005.016 ᑲᑴᒥᓍᐸᒋᑑᒃ ᓴ ᒥᓂᒃ ᑳᔑᑕᐎᓇᒫᑰᔦᒃ ᒋᒥᓄᒋᑫᔦᒃ, ᐋᓃᔥ ᐋᐱᒋ ᒨᔕᒃ ᒪᒋᑮᔑᑲᓐ᙮

5:17b.EPH.005.017 ᑫᑯ ᑕᔥ ᑲᑮᐹᑎᓯᑫᒃ᙮ ᓂᓯᑐᑕᒧᐙᒃ ᐃᓴ ᑳᑎᐯᒋᑫᒡ ᐅᑎᓀᑕᒧᐎᓐ᙮

5:18b.EPH.005.018 ᑫᑯ ᑮᐗᔥᑴᐲᓄᑕᑫᒃ ᐃᐃ ᔔᒥᓈᐳ, ᑭᑲᓂᔑᐗᓈᒋᐃᑎᓱᒻ᙮ ᐅᐅ ᑕᔥ ᐃᔑᒋᑫᒃ, ᐸᑭᑎᓂᒥᒃ ᑭᔐᒪᓂᑑ ᐅᑕᒑᑾᓐ ᒨᔕᒃ ᒋᒨᔥᑭᓀᔥᑲᐎᒥᓀᒃ᙮

5:19b.EPH.005.019 ᐃᔑᑲᑲᓅᓂᑎᒃ ᐁᑭᑑᒪᑲᑭᓐ ᑭᒋᒪᓯᓇᐃᑲᓂ ᓂᑲᒧᓇᓐ, ᐊᓇᒥᐁᓂᑲᒧᓇᓐ ᑲᔦ, ᒋᐃᓇᐊᒧᐌᒃ ᑲᔦ ᑭᔐᒪᓂᑑ ᐅᑕᒑᑾᓐ ᑳᒦᓂᓀᒃ ᓂᑲᒧᓇᓐ, ᒋᓇᓂᑲᒧᔦᒃ, ᒋᓇᓂᑲᒧᑕᐌᒃ ᑳᑎᐯᒋᑫᒡ ᑭᑌᐃᐙᕽ᙮

5:20b.EPH.005.020 ᒨᔕᒃ ᑲᔦ ᒦᑴᒋᐌᓂᒥᒃ ᑭᔐᒪᓂᑑ ᑳᐅᔫᓯᒫᐎᒡ, ᐌᑯᓀᓂᑯ ᐌᑎᓯᑯᔦᒃ ᐃᔑᒦᑴᒋᐌᓂᒥᒃ ᐅᑎᔑᓂᑳᓱᐎᓂᓃᕽ ᑳᑎᐯᒋᑫᓂᒡ X ᒋᓴᓲᓐ᙮

5:21b.EPH.005.021 ᑲᔦ ᑕᔥ ᐸᑭᑎᓂᑎᓱᑲᑖᑎᒃ ᑳᑕᔑᔦᒃ ᐁᑯᑖᓀᓂᒣᒃ X᙮

5:22b.EPH.005.022 ᑮᓇᐙ ᐐᐎᒫᒃ ᐸᑭᑎᓂᑎᓱᒃ ᒋᓇᐃᑕᐌᒀ ᑭᓈᐯᒥᐙᒃ ᑖᐱᔥᑰ ᑫᑑᑕᐌᑭᐸᓐ ᑳᑎᐯᒋᑫᒡ᙮

5:23b.EPH.005.023 ᐋᓃᔥ ᐅᓈᐯᒥᒫ ᐅᓃᑳᓂᔥᑲᐙᓐ ᐐᐗᓐ ᑖᐱᔥᑰ X ᑳᐃᔑᓃᑳᓂᔥᑲᐙᒡ ᑳᒫᒪᐌᓄᓂᒡ ᐅᑕᓇᒥᐋᐞ, ᐐᓐ ᐋᓃᔥ ᐅᑮᐱᒫᒋᐋᐞ ᐃᐃ ᐅᑕᓇᒥᐋᐞ, ᒦ ᐃ ᐋᓃᔥ ᐃᐃ ᐅᐐᔭᐤ᙮

5:24b.EPH.005.024 ᑖᐱᔥᑰ ᐅᑕᓇᒥᐋᒃ ᑳᐃᔑᐸᑭᑎᓂᑎᓱᑲᑕᐙᐙᒡ Xᑕᓐ, ᒦ ᓴ ᐯᔑᑾᓐ ᐐᐎᒫᒃ ᑫᑑᑕᐙᐙᐸᓐ ᐅᓈᐯᒥᐙᐞ ᒥᓯᐌ ᐱᑯ᙮

5:25b.EPH.005.025 ᑮᓇᐙ ᑲᔦ ᐅᓈᐯᒥᒫᒃ, ᔕᐌᓂᒥᑾᒃ ᑭᐐᐎᐙᒃ ᑖᐱᔥᑰ X ᑳᑮᐃᔑᔕᐌᓂᒫᒡ ᑳᒫᒪᐐᓄᐋᒡ ᐅᑕᓇᒥᐋᐞ, ᐁᑮᐅᒋᐸᑭᑎᓇᕽ ᐅᐱᒫᑎᓯᐎᓐ ᑲᔦ᙮

5:26b.EPH.005.026 ᒦ ᓴ ᑕᔥ ᑳᐅᒋᐸᑭᑎᓂᑎᓱᒡ, ᐁᐐᐅᓇᓵᒡ ᐅᑕᓇᒥᐋᐞ ᑭᔐᒪᓂᑑᓐ ᒋᑎᐱᓇᐌᐎᓯᓂᒡ, ᐁᑮᐋᐸᒋᑑᒡ ᐅᑎᑭᑐᐎᓐ, ᐁᑮᐃᔑᐯᑳᐹᐗᓈᒡ ᓂᐲᕽ,

5:27b.EPH.005.027 ᐁᐐᐲᑕᒫᓱᒡ ᐃᐃ ᐅᑕᓇᒥᐋᐞ ᑖᐱᔥᑰ ᐁᐅᔥᑭᑴᐌᒡ ᐐᓐ ᐁᐐᐅᓈᐯᒥᒥᓐᒡ, ᐐᑫ ᒋᐯᑭᓈᑯᓯᓂᒡ ᐃᐃᒫ ᑳᐃᔑᐊᔮᒡ, ᑲᓇᑫ ᒋᐹᐹᑌᐎᓈᑯᓯᓯᓂᒃ, ᒋᐊᔫᓰᑭᓈᑯᓯᓯᓂᒃ ᑲᔦ, ᐐᑫ ᓴ ᒋᒥᓄᓈᑯᓯᓂᒡ᙮ ᒦᑕᔥ ᐁᔑᐊᑕᐌᓂᒫᒡ ᐐᓐ ᐁᑕ ᑯ ᐁᐐᑎᐱᓇᐌᐎᓯᒡ, ᑫᑰᓂᓂ ᑲᔦ ᒋᐃᔑᐊᓈᒣᑖᑯᓯᓯᓂᒃ᙮

5:28b.EPH.005.028 ᒦᑕᔥ ᐁᔑᓈᑾᓂᓂᒃ ᐅᓈᐯᒥᒫᒃ ᒋᔕᐌᓂᒫᐙᐸᓐ ᐐᐎᐙᐞ ᑖᐱᔥᑰ ᑳᐃᔑᓵᑭᑑᐙᒡ ᐅᐐᔭᐎᐙᓐ᙮ ᐊᐊ ᓴ ᑳᔕᐌᓂᒫᒡ ᐐᐗᓐ, ᒦ ᓴ ᐊᐊᐌ ᑳᓵᑭᐃᑎᓱᒡ᙮

5:29b.EPH.005.029 ᐋᓃᔥ ᑳᐐᓐ ᐊᐎᔭ ᐐᑳ ᐅᔒᑫᑕᓰᓐ ᐅᐐᔭᐤ᙮ ᐋᐱᒋ ᓴ ᐌᐌᓂ ᐊᔕᑎᓱ, ᐌᐌᓂ ᑲᔦ ᐅᓈᓈᑲᒋᑑᓐ ᐃᐃ ᐅᐐᔭᐤ᙮ ᒦᑕᔥ ᐁᑑᑕᐙᒡ X ᐅᑕᓇᒥᐋᐞ᙮

5:30b.EPH.005.030 ᐋᓃᔥ ᑲᑭᓇ X ᐅᐐᔭᐎᕽ ᑭᑎᔑᑎᐯᑖᑯᓯᒥᓐ᙮

5:31b.EPH.005.031 ᐅᐅ ᑕᔥ ᐃᔑᓯᓐ: ᒦᑕᔥ ᐅᐅ ᐃᓂᓂ ᑳᐅᒋᓇᑲᓈᒡ ᐅᑌᑌᓐ, ᐅᒫᒫᓐ ᑲᔦ ᒋᐐᒌᐙᒡ ᐃᓂ ᐐᐗᓐ᙮ ᐃᐃ ᐁᓃᔑᐙᒡ ᒦᑕᔥ ᐁᔑᓈᑯᓯᐙᒡ ᐁᐯᔑᑯᐙᒡ ᐐᔭᐎᐙᕽ᙮

5:32b.EPH.005.032 ᐅᐅ ᑕᔥ ᑳᑮᑭᑫᒋᑳᑌᓯᓄᒃ ᐅᑖᓈᕽ, ᐋᐱᒋ ᑭᒋ ᐃᓀᑖᑾᓐ᙮ ᐅᐅ ᑕᔥ ᑳᑕᔑᑕᒫᓐ, ᐋᓃᓐ X ᐁᔑᐐᒌᐙᒡ ᐅᑕᓇᒥᐋᐞ᙮

5:33b.EPH.005.033 ᑕᑲ ᑕᔥ ᑮᓇᐙ ᑳᑕᔑᔦᒃ ᔕᐌᓂᒥᑾᒃ ᑭᐐᐎᐙᒃ ᑖᐱᔥᑰ ᑳᐃᔑᓵᑭᐃᑎᓱᔦᒃ, ᑕᑲ ᑲᔦ ᐐᐎᒫᒃ ᐅᑲᑭᑌᓂᒫᐙᐞ ᐅᓈᐯᒥᐙᐞ᙮

6

6:1b.EPH.006.001 ᑮᓇᐙ ᑕᔥ ᐊᐱᓅᒌᔕᒃ, ᓇᐃᑕᐎᑾᒃ ᑭᓃᑭᐃᑯᐙᒃ, ᐋᓃᔥ ᑳᑎᐯᒋᑫᒡ ᐅᑮᐃᔑᐅᓀᑖᓐ, ᐋᐱᒋ ᓴ ᑲᔦ ᐅᓂᔑᔑᓐ ᐃᐃ ᒋᐃᔑᒋᑫᔦᑭᐸᓐ᙮

6:2b.EPH.006.002 ᑭᑌᓂᒥᑾᒃ ᑭᑌᑌᐙᒃ, ᑭᒫᒫᐙᒃ ᑲᔦ, ᒦᓴ ᐅᐅᐌ ᐸᔦᔥ ᐃᓈᑯᓂᑫᐎᓂᕽ ᑳᐃᔑᑕᔑᑌᒃ ᐊᔓᑕᒫᑫᐎᓐ:

6:3b.EPH.006.003 ᐋᐱᒋ ᓴ ᑭᑲᒥᓄᓭᒻ, ᑭᓉᔥ ᑲᔦ ᑭᑲᐱᒫᑎᓯᒻ ᐅᐅᒫ ᐊᑮᕽ, ᐁᐃᔑᓯᕽ᙮

6:4b.EPH.006.004 ᑮᓇᐙ ᐅᑌᑌᒫᒃ ᑫᑯ ᑲᑳᒋᐋᑫᒀᓂᒃ ᑭᓃᒑᓂᓯᐙᒃ ᒋᓂᔥᑳᑎᓯᐙᒡ᙮ ᐃᔑᐅᐱᑭᐃᑾᒃ, ᐃᔑᒫᒦᓄᒥᑾᒃ, ᐃᔑᑭᑭᓄᐊᒪᐎᑾᒃ ᑲᔦ ᒋᐃᔑᒋᑫᐙᒡ ᑳᑎᐯᒋᑫᓂᒡ ᑳᑮᐃᔑᐅᓇᒋᑫᓂᒡ᙮

6:5b.EPH.006.005 ᑮᓇᐙ ᐅᐸᒦᑖᑫᒃ ᓇᐃᑕᐎᑾᒃ ᐃᑭ ᑳᐅᑑᑭᒫᒥᔦᒃ, ᐅᐅᒫ ᐊᑮᕽ ᑳᐊᔮᐙᒡ᙮ ᑭᑌᓂᒥᑾᒃ, ᑯᑖᓀᓂᒥᑾᒃ ᑲᔦ ᑌᐺ ᐃᐃᒫ ᑭᑌᐃᐙᕽ, ᒋᑑᑕᐌᒀ ᑖᐱᔥᑰ ᑳᑑᑕᐌᒃ X᙮

6:6b.EPH.006.006 ᑳᐐᓐ ᐐᓀᑕ ᐁᑲᓇᐙᐸᒥᓀᒀ, ᒋᐃᔑᒋᑫᓯᐌᒃ ᐃᓂᓂᐗᒃ ᐁᑕ ᒋᒥᓍᐸᒥᓀᒀ᙮ ᐃᐃᒫ ᓴ ᑭᑌᐃᐙᕽ ᐃᔑᒋᑫᒃ ᑭᔐᒪᓂᑑ ᑳᐃᔑᐊᑕᐌᑕᕽ, ᐋᓃᔥ X ᑭᑕᓄᑮᑕᐙᐙ᙮

6:7b.EPH.006.007 ᒌᑫᑕᒧᒃ ᐃᑕᔥ ᐃᐃ ᑳᐃᔑᐸᒦᑖᑫᔦᒃ, ᒋᐃᔑᒋᑫᔦᒃ ᑖᐱᔥᑰ ᑳᑎᐯᒋᑫᒡ ᐁᐊᓄᑮᑕᐌᒃ, ᑳᐐᓐ ᐐᓐ ᐃᓂᓂᐗᒃ᙮

6:8b.EPH.006.008 ᑭᑫᑕᒧᒃ ᐃᑕᔥ ᐅᐅ, ᐋᓃᓐ ᓴ ᑯ ᐊᐎᔭ ᐁᔑᒥᓄᑑᑕᕽ, ᑳᑎᐯᒋᑫᓂᒡ ᓴ ᐅᑲᑮᐌᑑᑖᑰᓐ, ᑯᒫ ᑲᔦ ᐁᓄᑮᑕᒫᑫᑴᓐ ᐁᑎᐯᓂᑎᓱᓯᒃ, ᑯᒫ ᑲᔦ ᑌᐯᓂᑎᓱᑴᓐ᙮

6:9b.EPH.006.009 ᑮᓇᐙ ᑕᔥ ᑳᐅᑭᒫᐎᔦᒃ, ᒦ ᓴ ᐯᔑᑾᓐ ᑑᑕᐎᑾᒃ ᑳᐊᓄᑮᑕᒪᐎᓀᒀ᙮ ᑫᑯ ᑲᔦ ᑲᑴᓭᑭᒫᑫᒀᓂᒃ, ᐋᓃᔥ ᐅᑑᑭᒫᒥᐙᓐ ᑲᔦ ᑮᓇᐙ ᑕᔥ ᑭᑑᑭᒫᒥᐙ ᑭᒋᑮᔑᑯᕽ ᐊᔮ᙮ ᑲᑭᓇ ᓴ ᐊᐎᔭᓐ ᐯᔑᑾᓐ ᐅᑎᓀᓂᒫᓐ᙮

6:10b.EPH.006.010 ᒦᑕᔥ ᐅᐅ ᐃᔥᒀᒡ ᐙᐃᓂᓇᑰᒃ, ᑳᑎᐯᒋᑫᒡ ᐅᑭᒋᒪᔥᑲᐎᓰᐎᓂᕽ, ᒦᐃᒫ ᐅᑎᓇᒧᒃ ᑭᒪᔥᑲᐎᓰᐎᓂᐙ᙮

6:11b.EPH.006.011 ᐱᓯᑲᒧᐙᒃ ᑕᔥ ᒥᓯᐌ ᐱᑯ ᑭᔐᒪᓂᑑ ᑳᒦᓂᓀᒃ ᒦᑳᓱᐎ ᑭᑭᔥᑭᑲᓐ, ᒋᑲᔥᑭᑑᔦᒃ ᒋᐅᒋᒪᔥᑲᐎᑳᐸᐐᑕᐌᒃ ᒪᒋᐊᔭᐋ, ᐃᓂ ᑲᔦ ᐅᑲᑲᔦᓂᓯ ᐃᔑᒋᑫᐎᓇᓐ᙮

6:12b.EPH.006.012 ᑳᐐᓐ ᐄᑐᒃ ᐅᐐᔭᐎᓰᐗᒃ ᐃᑭ ᑳᒦᑳᓂᓇᒀ, ᐋᓃᔥ ᐊᒑᑯᐎᐗᒃ ᑳᐅᑭᒫᑲᑖᑫᐙᒡ, ᑳᑲᔥᑭᐁᐎᓯᐙᒡ ᑲᔦ, ᐃᑭ ᑲᔦ ᑳᑎᐯᑕᒧᐙᒡ ᓅᑯᒻ ᑳᑲᔥᑮᑎᐱᑫᑖᑾᓂᓂᒃ ᐊᑮᓂ, ᐃᑭ ᑲᔦ ᒪᒋᐊᒑᑾᒃ ᑳᒪᒋᓅᒋᒋᑫᐙᒡ ᐯᐸᑳᓐ ᐊᔮᐎᓂᕽ ᑮᔑᑯᕽ ᑳᐃᔑᐊᔭᔮᐙᒡ᙮

6:13b.EPH.006.013 ᐅᑖᐱᓇᒧᐙᒃ ᐃᑕᔥ ᑲᑭᓇ ᑭᔐᒪᓂᑑ ᒦᑳᓱᐎ ᑭᑭᔥᑭᑲᓇᓐ ᑳᒦᓂᓀᒃ ᒋᒥᓯᐌ ᐋᑰᔥᑳᑯᔦᒃ, ᒋᑲᔥᑭᑑᔦᒃ ᒋᓇᓈᑸᔦᒃ ᐊᐲ ᑮᔑᑲᒃ ᒪᒋᑫᑰᓐ ᓅᒋᐃᑯᔦᒃ, ᑲᑭᓇ ᑲᔦ ᑫᑰᓐ ᒋᐃᔑᒋᑫᔦᒃ ᒋᒪᔥᑲᐎᑳᐸᐎᔦᒃ᙮

6:14b.EPH.006.014 ᒪᔥᑲᐎᑳᐸᐎᒃ ᐃᑕᔥ ᐐᑫ, ᐁᑭᒋᐱᓱᔦᒃ ᐃᐃ ᑌᐺᐎᓐ, ᐁᑭᑭᔥᑲᒣᒃ ᑲᔦ ᐃᐃ ᑾᔭᒀᑎᓯᐎᓐ ᑖᐱᔥᑰ ᐃᐃ ᐲᐙᐱᒃ ᔑᒫᑲᓂᔕᒃ ᑳᐱᓯᑲᒧᐙᒡ ᐅᑳᑭᑲᓂᐙᕽ᙮

6:15b.EPH.006.015 ᒨᔕᒃ ᐊᔓᐎᓯᒃ ᒋᐐᑕᒫᑫᔦᒃ ᒥᓍᒋᒧᐎᓐ ᑳᐃᔑᑕᔑᑌᒃ ᑫᔑᐱᓵᓂᐐᒌᐎᓐᒡ ᑭᔐᒪᓂᑑ, ᒦ ᐃ ᐃᓇᑭᓯᓀᒃ᙮

6:16b.EPH.006.016 ᐅᐅ ᑕᔥ ᒫᐗᒡ ᐃᑯ ᐃᔑᒋᑫᒃ: ᐅᑖᐱᓇᒧᒃ ᐃᐃ ᑌᐺᔦᑕᒧᐎᓐ, ᒋᐅᓇᑳᐃᑲᓂᔦᒃ, ᒋᑲᔥᑭᑑᔦᒃ ᒋᐋᑕᐌᐊᒧᐌᒃ ᑲᑭᓇ ᑳᐃᔥᑯᑌᐗᓂᓂᑭᓐ ᒪᒋᐊᔭᐋ ᐅᐱᑾᑰᓐ ᑳᐱᒧᓀᒃ᙮

6:17b.EPH.006.017 ᐱᒫᒋᐃᑰᐎᓐ ᑕᔥ ᑲᔦ ᐱᓯᑲᒧᒃ ᒋᐅᒦᑳᓱᐙᓄᒀᓂᔦᒃ᙮ ᑕᑲ ᑕᔥ ᑲᔦ ᑭᔐᒪᓂᑑ ᐅᑎᑭᑐᐎᓐ ᐅᐸᔑᐸᐃᑫᐎᑯᒫᓂᒃ, ᐅᑕᒑᑾᓐ ᑳᒦᓂᒥᓀᒃ᙮

6:18b.EPH.006.018 ᑭᔐᒪᓂᑑ ᑕᔥ ᐅᑕᒑᑾᓐ ᑳᐃᔑᐐᒋᐃᒥᓀᒃ ᒨᔕᒃ ᐊᓇᒥᐋᒃ ᐁᑲᑴᑗᔦᒃ ᑫᑰᓐ ᐱᑯ᙮ ᐅᐅ ᑕᔥ ᐁᐃᔑᒋᑫᔦᒃ, ᒨᔕᒃ ᐊᔕᐙᐱᒃ, ᑫᑯ ᑲᔦ ᐸᑭᒌᑫᒃ ᐁᐊᓇᒥᐋᔦᒃ, ᐁᐊᓇᒥᐁᑕᒪᐎᒣᒃ ᑲᑭᓇ ᑭᔐᒪᓂᑑ ᐅᐱᒫᑎᓰᒪᐞ᙮

6:19b.EPH.006.019 ᐊᓇᒥᐁᑕᒪᐎᔑᒃ ᐃᑕᔥ ᑭᔐᒪᓂᑑ ᒋᒦᔑᒡ ᑾᔭᒃ ᐃᑭᑐᐎᓇᓐ ᑫᐋᐸᒋᑖᐗᒃ ᐊᐲ ᑮᑭᑐᐗᒃ, ᒋᓲᑭᑌᐁᐗᒃ ᒋᑕᔑᑕᒧᐗᒃ ᑳᑮᐱᑭᑫᒋᑳᑌᓯᓂᓂᒃ ᑌᐺᐎᓐ ᑳᑕᔑᑌᓂᒃ ᐃᐃᒫ ᒥᓍᒋᒧᐎᓂᕽ᙮

6:20b.EPH.006.020 ᒦ ᓴ ᑕᔥ ᑳᐅᒋᒫᒫᒋᑾᐱᓱᔮᓐ, ᐁᑮᑭᑑᑕᒫᑫᐎᓂᓃᐎᔮᓐ ᐁᐊᓄᑮᑕᐗᒃ ᑳᑎᐯᒋᑫᒡ, ᐅᐅ ᑲᔦ ᑳᑕᔑᑕᒫᓐ ᒥᓍᒋᒧᐎᓐ, ᒋᓲᑭᑌᐁᔮᓐ ᒋᐃᑭᑐᔮᓐ ᐋᓃᓐ ᑳᐃᔑᐊᑕᐌᑖᑯᓯᔮᓐ᙮

6:21b.EPH.006.021 ᑎᑭᑲᔅ ᑳᓵᑭᐊᑭᒡ ᓃᑕᓇᒥᐋᓈᓐ, ᐋᐱᒋ ᑲᔦ ᑳᑌᐺᔦᑖᑯᓯᒡ ᑳᐊᓄᑮᑕᐙᒡ ᑲᔦ ᑳᑎᐯᒋᑫᓂᒡ, ᑭᑲᐐᑕᒫᑯᐙ ᑲᑭᓇ ᑫᑰᓂᓂ ᒋᑭᑫᓂᒥᔦᒃ ᐋᓃᓐ ᐁᔑᐌᐱᓯᔮᓐ, ᐋᓃᓐ ᑲᔦ ᐁᔑᐊᔮᔮᓐ᙮

6:22b.EPH.006.022 ᒦ ᓴ ᑕᔥ ᐃᐃ ᑳᑮᐅᒋ ᐃᔑᓂᔕᐗᒃ ᐌᑎ ᑳᐃᔑᐊᔮᔦᒃ, ᒋᐐᑕᒪᐎᓀᒃ ᐋᓃᓐ ᑲᑭᓇ ᐁᔑᐊᔮᐗᑭᒡ ᑲᔦ ᑮᓇᐙ ᒋᒪᔥᑲᐌᑕᒣᒃ᙮

6:23b.EPH.006.023 ᑲᑭᓇ ᑳᐐᒋᑌᐺᑕᒨᒥᑣ, ᑕᑲ ᑭᔐᒪᓂᑑᓐ ᑳᐅᔫᓯᒥᒥᓐᒡ, ᑳᑎᐯᒋᑫᓂᒡ ᒋᓴᔅ Xᑕᓐ ᑲᔦ ᐅᑲᒦᓂᑯᐙᓐ ᐱᓵᓀᑕᒧᐎᓂᓂ, ᓵᑭᐃᐌᐎᓂᓂ ᑳᑕᑯᓯᓂᓂᒃ ᑌᐺᔦᑕᒧᐎᓂᓂ᙮

6:24b.EPH.006.024 ᑕᑲ ᑭᔐᒪᓂᑑᓐ ᐅᑭᔐᐙᑎᓯᐎᓂᓂ ᐅᑲᐐᒌᐎᑯᓈᐙ ᑲᑭᓇ ᑳᓵᑭᐋᐙᒡ ᑳᑎᐯᒋᑫᓂᒡ ᒋᓴᔅ Xᑕᓐ, ᐐᑳ ᐅᓵᑭᐃᐌᐎᓂᐙ ᑳᓂᐴᒪᑲᓯᓂᓂᒃ᙮