John (Hebrew)
יוחנן
1
1:1b.JOH.001.001 בראשית היה הדבר והדבר היה את האלהים ואלהים היה הדבר׃
1:2b.JOH.001.002 הוא היה בראשית אצל האלהים׃
1:3b.JOH.001.003 הכל נהיה על ידו ומבלעדיו לא נהיה כל אשר נהיה׃
1:4b.JOH.001.004 בו היו חיים והחיים היו אור בני האדם׃
1:5b.JOH.001.005 והאור בחשך זרח והחשך לא השיגו׃
1:6b.JOH.001.006 ויהי איש שלוח מאת האלהים ושמו יוחנן׃
1:7b.JOH.001.007 הוא בא לעדות להעיד על האור למען יאמינו כלם על ידו׃
1:8b.JOH.001.008 הוא לא היה האור כי אם להעיד על האור׃
1:9b.JOH.001.009 האור האמתי המאיר לכל אדם היה בא אל העולם׃
1:10b.JOH.001.010 בעולם היה ועל ידו נהיה העולם והעולם לא הכירו׃
1:11b.JOH.001.011 הוא בא אל אשר לו ואשר המה לו לא קבלהו׃
1:12b.JOH.001.012 והמקבלים אתו נתן עז למו להיות בנים לאלהים המאמינים בשמו׃
1:13b.JOH.001.013 אשר לא מדם ולא מחפץ הבשר אף לא מחפץ גבר כי אם מאלהים נולדו׃
1:14b.JOH.001.014 והדבר נהיה בשר וישכן בתוכנו ונחזה תפארתו כתפארת בן יחיד לאביו רב חסד ואמת׃
1:15b.JOH.001.015 ויוחנן מעיד עליו ויקרא לאמר הנה זה הוא אשר אמרתי עליו הבא אחרי היה לפני כי קדם לי היה׃
1:16b.JOH.001.016 וממלואו לקחנו כלנו חסד על חסד׃
1:17b.JOH.001.017 כי התורה נתנה ביד משה והחסד והאמת באו על ידי ישוע המשיח׃
1:18b.JOH.001.018 את האלהים לא ראה איש מעולם הבן היחיד אשר בחיק האב הוא הודיע׃
1:19b.JOH.001.019 וזאת היא עדות יוחנן בשלח היהודים מירושלים כהנים ולוים לשאל אתו מי אתה׃
1:20b.JOH.001.020 ויודה ולא כחש ויודה לאמר אני אינני המשיח׃
1:21b.JOH.001.021 וישאלו אתו מי אפוא אתה האתה אליהו ויאמר אינני האתה הנביא ויען לא׃
1:22b.JOH.001.022 ויאמרו אליו מי זה אתה למען נשיב לשלחינו דבר מה תאמר עליך׃
1:23b.JOH.001.023 ויאמר אני קול קורא במדבר פנו דרך יהוה כאשר דבר ישעיהו הנביא׃
1:24b.JOH.001.024 והמשלחים היו מן הפרושים׃
1:25b.JOH.001.025 וישאלהו ויאמרו אליו מדוע אפוא מטביל אתה אם אינך המשיח או אליה או הנביא׃
1:26b.JOH.001.026 ויען אתם יוחנן ויאמר אנכי מטביל במים ובתוככם עומד אשר לא ידעתם אתו׃
1:27b.JOH.001.027 הוא הבא אחרי אשר היה לפני ואני נקלתי מהתיר שרוך נעליו׃
1:28b.JOH.001.028 זאת היתה בבית עברה מעבר לירדן מקום אשר יוחנן מטביל שם׃
1:29b.JOH.001.029 ויהי ממחרת וירא יוחנן את ישוע בא אליו ויאמר הנה שה האלהים הנשא חטאת העולם׃
1:30b.JOH.001.030 זה הוא אשר אמרתי עליו אחרי יבא איש אשר היה לפני כי קדם לי היה׃
1:31b.JOH.001.031 ואני לא ידעתיו כי אם בעבור יגלה בישראל באתי אני לטבל במים׃
1:32b.JOH.001.032 ויעד יוחנן ויאמר חזיתי הרוח כדמות יונה ירדת משמים ותנח עליו׃
1:33b.JOH.001.033 ואני לא ידעתיו אולם השלח אתי לטבל במים הוא אמר אלי את אשר תראה הרוח ירדת ונחה עליו הנה זה הוא אשר יטבל ברוח הקדש׃
1:34b.JOH.001.034 ואני ראיתי ואעידה כי זה הוא בן האלהים׃
1:35b.JOH.001.035 ויהי ממחרת ויסף יוחנן ויעמד ושנים מתלמידיו עמו׃
1:36b.JOH.001.036 ויבט אל ישוע והוא מתהלך ויאמר הנה שה האלהים׃
1:37b.JOH.001.037 ושני תלמידיו שמעו את דברו וילכו אחרי ישוע׃
1:38b.JOH.001.038 ויפן ישוע אחריו וירא אתם הלכים אחריו ויאמר אליהם מה תבקשו ויאמרו אליו רבי פרושו מורי איפה תלין׃
1:39b.JOH.001.039 ויאמר אליהם באו וראו ויבאו ויראו את מקום מלונו וישבו עמו ביום ההוא והעת כשעה העשירית׃
1:40b.JOH.001.040 ואחד מן השנים אשר שמעו מאת יוחנן והלכו אחריו הוא אנדרי אחי שמעון פטרוס׃
1:41b.JOH.001.041 הוא פגש בראשונה את שמעון אחיו ויאמר אליו את המשיח מצאנו אשר תרגומו כריסטוס׃
1:42b.JOH.001.042 ויוליכהו אל ישוע ויהי כהביט אליו ישוע ויאמר שמעון בן יונה לך יקרא כיפא אשר תרגומו פטרוס׃
1:43b.JOH.001.043 ויהי ממחרת ויואל ישוע לצאת הגלילה וימצא את פילפוס ויאמר אליו לך אחרי׃
1:44b.JOH.001.044 ופילפוס היה מבית צידה עיר אנדרי ופטרוס׃
1:45b.JOH.001.045 ויפגע פילפוס את נתנאל ויאמר אליו מצאנו אתו אשר כתב משה בספר התורה והנביאים את ישוע בן יוסף מנצרת׃
1:46b.JOH.001.046 ויאמר אליו נתנאל המנצרת תצא לנו טובה ויאמר אליו בא וראה׃
1:47b.JOH.001.047 וירא ישוע את נתנאל בא לקראתו ויאמר עליו הנה באמת בן ישראל אשר אין בו רמיה׃
1:48b.JOH.001.048 ויאמר אליו נתנאל מאין ידעתני ויען ישוע ויאמר לו בטרם קרא לך פילפוס בהיותך תחת התאנה אנכי ראיתיך׃
1:49b.JOH.001.049 ויען נתנאל ויאמר אליו רבי אתה בן אלהים אתה הוא מלך ישראל׃
1:50b.JOH.001.050 ויען ישוע ויאמר אליו על אמרי לך כי תחת התאנה ראיתיך האמנת הנה גדלות מאלה תראה׃
1:51b.JOH.001.051 ויאמר אליו אמן אמן אני אמר לכם מעתה תראו השמים נפתחים ומלאכי אלהים עלים וירדים על בן אלהים׃
2
2:1b.JOH.002.001 וביום השלישי היתה חתנה בקנה אשר בגליל ואם ישוע היתה שם׃
2:2b.JOH.002.002 וישוע ותלמידיו היו גם הם קרואים אל החתנה׃
2:3b.JOH.002.003 ויחסר היין ותאמר אם ישוע אליו יין אין להם׃
2:4b.JOH.002.004 ויאמר אליה ישוע מה לי ולך אשה עתי עדין לא באה׃
2:5b.JOH.002.005 ותאמר אמו אל המשרתים ככל אשר יאמר לכם תעשו׃
2:6b.JOH.002.006 והנה ששה כדי אבן ערוכים שם כמשפט היהודים לטהרתם שתים או שלש בתים יכיל כל אחד׃
2:7b.JOH.002.007 ויאמר אליהם ישוע מלאו לכם הכדים מים וימלאום עד למעלה׃
2:8b.JOH.002.008 ויאמר שאבו נא והביאו אל רב המסבה ויביאו׃
2:9b.JOH.002.009 ויטעם רב המסבה את המים אשר נהפכו ליין ולא ידע מאין הוא ואולם המשרתים אשר שאבו את המים ידעו ויקרא רב המסבה אל החתן׃
2:10b.JOH.002.010 ויאמר אליו כל איש יתן בראשונה את היין הטוב וכאשר ישכרו יתן להם את הגרוע ואתה צפנת היין הטוב עד עתה׃
2:11b.JOH.002.011 זאת תחלת האתות אשר עשה ישוע בקנה אשר בארץ הגליל וגלה את כבודו ויאמינו בו תלמידיו׃
2:12b.JOH.002.012 ויהי אחרי כן וירד אל כפר נחום הוא ואמו ואחיו ותלמידיו ולא ארכו ימי שבתם שם׃
2:13b.JOH.002.013 ויקרבו ימי חג הפסח אשר ליהודים ויעל ישוע ירושלים׃
2:14b.JOH.002.014 וימצא במקדש מכרי בקר וצאן ובני יונה ואת מחליפי כסף ישבים שם׃
2:15b.JOH.002.015 ויקח חבלים ויעבתם לשוט ויגרש כלם מן המקדש ואת הצאן ואת הבקר ויפזר את מעות השלחנים ויהפך שלחנתיהם׃
2:16b.JOH.002.016 ואל מכרי היונים אמר הוציאו אלה מזה ואל תעשו את בית אבי לבית מסחר׃
2:17b.JOH.002.017 ויזכרו תלמידיו את הכתוב כי קנאת ביתך אכלתני׃
2:18b.JOH.002.018 ויענו היהודים ויאמרו אליו אי זו אות תראנו כי כזאת אתה עשה׃
2:19b.JOH.002.019 ויען ישוע ויאמר אליהם הרסו את ההיכל הזה ובשלשה ימים אקימנו׃
2:20b.JOH.002.020 ויאמרו היהודים הנה זה ארבעים ושש שנה נבנה ההיכל הזה ואתה בשלשה ימים תקימנו׃
2:21b.JOH.002.021 והוא דבר על היכל גויתו׃
2:22b.JOH.002.022 ואחרי קומו מן המתים זכרו תלמידיו כי זאת אמר להם ויאמינו בכתוב ובדבר אשר דבר ישוע׃
2:23b.JOH.002.023 ויהי בהיתו בירושלים בחג הפסח האמינו רבים בשמו כי ראו האתות אשר עשה׃
2:24b.JOH.002.024 והוא ישוע לא הפקיד את עצמו בידם על אשר ידע את כלם׃
2:25b.JOH.002.025 ולא הצטרך לעדות איש על האדם כי הוא ידע מה בקרב האדם׃
3
3:1b.JOH.003.001 ויהי איש אחד בתוך הפרושים ושמו נקדימון שר ליהודים׃
3:2b.JOH.003.002 ויבא אל ישוע לילה ויאמר אליו רבי ידענו כי אתה מורה מאת אלהים באת כי לא יוכל איש לעשות האתות אשר אתה עשה בלתי אם האלהים עמו׃
3:3b.JOH.003.003 ויען ישוע ויאמר אליו אמן אמן אני אמר לך אם לא יולד איש מלמעלה לא יוכל לראות מלכות האלהים׃
3:4b.JOH.003.004 ויאמר אליו נקדימון איך יולד אדם והוא זקן הכי שוב ישוב אל בטן אמו ויולד׃
3:5b.JOH.003.005 ויען ישוע אמן אמן אני אמר לך אם לא יולד איש מן המים והרוח לא יוכל לבוא אל מלכות האלהים׃
3:6b.JOH.003.006 הנולד מן הבשר בשר הוא והנולד מן הרוח רוח הוא׃
3:7b.JOH.003.007 אל תתמה על אמרי לך כי עליכם להולד מלמעלה׃
3:8b.JOH.003.008 הרוח באשר יחפץ שם הוא נשב ואתה תשמע את קולו אך לא תדע מאין בא ואנה הוא הולך כן כל הנולד מן הרוח׃
3:9b.JOH.003.009 ויען נקדימון ויאמר אליו איכה תהיה כזאת׃
3:10b.JOH.003.010 ויען ישוע ויאמר אליו רבן של ישראל אתה וזאת לא ידעת׃
3:11b.JOH.003.011 אמן אמן אני אמר לך כי את אשר ידענו נדבר ואת אשר ראינו נעיד ואתם לא תקבלו עדותנו׃
3:12b.JOH.003.012 אם אמרתי אליכם דברי הארץ ואינכם מאמינים איך תאמינו באמרי אליכם דברי השמים׃
3:13b.JOH.003.013 ואיש לא עלה השמימה בלתי אם אשר ירד מן השמים בן האדם אשר הוא בשמים׃
3:14b.JOH.003.014 וכאשר הגביה משה את הנחש במדבר כן צריך בן האדם להנשא׃
3:15b.JOH.003.015 למען לא יאבד כל המאמין בו כי אם יחיה חיי עולמים׃
3:16b.JOH.003.016 כי ככה אהב האלהים את העולם עד אשר נתן את בנו את יחידו למען לא יאבד כל המאמין בו כי אם יחיה חיי עולמים׃
3:17b.JOH.003.017 כי האלהים לא שלח את בנו אל העולם לדין את העולם כי אם למען יושע בו העולם׃
3:18b.JOH.003.018 המאמין בו לא ידון ואשר לא יאמין בו כבר נדון כי לא האמין בשם בן האלהים היחיד׃
3:19b.JOH.003.019 וזה הוא הדין כי האור בא אל העולם ובני האדם אהבו החשך מן האור כי רעים מעשיהם׃
3:20b.JOH.003.020 כי כל פעל עולה ישנא את האור ולא יבא לאור פן יוכחו מעשיו׃
3:21b.JOH.003.021 אבל עשה האמת יבא לאור למען יגלו מעשיו כי נעשו באלהים׃
3:22b.JOH.003.022 ויהי אחרי הדברים האלה ויבא ישוע ותלמידיו אל ארץ יהודה ויגר שם עמהם ויטבל׃
3:23b.JOH.003.023 וגם יוחנן היה טבל בעינון קרוב לשלם כי שמה מים לרב ויבאו ויטבלו׃
3:24b.JOH.003.024 כי עוד לא נתן יוחנן אל בית הסהר׃
3:25b.JOH.003.025 ויהי ריב בין תלמידי יוחנן ובין היהודים על דבר הטהרה׃
3:26b.JOH.003.026 ויבאו אל יוחנן ויאמרו אליו רבי האיש אשר היה עמך בעבר הירדן ואשר העידת לו הנו טבל וכלם באים אליו׃
3:27b.JOH.003.027 ויען יוחנן לא יוכל איש לקחת דבר בלתי אם נתן לו מן השמים׃
3:28b.JOH.003.028 ואתם עדי כי אמרתי אנכי אינני המשיח רק שלוח אני לפניו׃
3:29b.JOH.003.029 אשר לו הכלה הוא החתן ורע החתן העמד ושמע אתו שמוח ישמח לקול החתן הנה שמחתי זאת עתה שלמה׃
3:30b.JOH.003.030 הוא יגדל הלוך וגדל ואני אחסר הלוך וחסור׃
3:31b.JOH.003.031 הבא ממעל נעלה על כל ואשר מארץ מארץ הוא ומארץ ידבר הבא משמים נעלה על כל׃
3:32b.JOH.003.032 ואת אשר ראה ושמע את זאת יעיד ואין מקבל עדותו׃
3:33b.JOH.003.033 ואשר קבל עדותו חתום חתם כי האלהים אמת׃
3:34b.JOH.003.034 כי את אשר שלחו אלהים דברי אלהים ידבר כי לא במדה נתן אלהים את הרוח׃
3:35b.JOH.003.035 האב אהב את בנו ואת כל נתן בידו׃
3:36b.JOH.003.036 כל המאמין בבן יש לו חיי עולמים ואשר לא יאמין בבן לא יראה חיים כי אם חרון אלהים ישכן עליו׃
4
4:1b.JOH.004.001 ויהי כאשר נודע לאדון כי שמעו הפרושים אשר ישוע העמיד והטביל תלמידים הרבה מיוחנן׃
4:2b.JOH.004.002 ואולם ישוע הוא לא הטביל כי אם תלמידיו׃
4:3b.JOH.004.003 ויעזב את ארץ יהודה וילך שנית הגלילה׃
4:4b.JOH.004.004 ויהי לו לעבר בארץ שמרון׃
4:5b.JOH.004.005 ויבא לעיר מערי שמרון ושמה סוכר היא ממול חלקת השדה אשר נתנה יעקב לבנו ליוסף׃
4:6b.JOH.004.006 ושם באר יעקב וישוע היה עיף מן הדרך וישב לו על הבאר והעת כשעה הששית׃
4:7b.JOH.004.007 ותבא אשה משמרון לשאב מים ויאמר אליה ישוע תני נא לי לשתות׃
4:8b.JOH.004.008 כי תלמידיו הלכו העירה לקנות אכל׃
4:9b.JOH.004.009 ותאמר אליו האשה השמרונית הן יהודי אתה ואיככה תשאל ממני לשתות ואנכי אשה שמרונית כי לא יתערבו היהודים עם השמרונים׃
4:10b.JOH.004.010 ויען ישוע ויאמר אליה לו ידעת את מתת אלהים ומי הוא האמר אליך תני נא לי לשתות כי עתה שאלת ממנו ונתן לך מים חיים׃
4:11b.JOH.004.011 ותאמר אליו האשה אדני הן אין לך כלי לשאב בו והבאר עמקה ומאין לך אפוא מים חיים׃
4:12b.JOH.004.012 האתה גדול מיעקב אבינו אשר נתן לנו את הבאר הזאת וישת ממנה הוא ובניו ובעירו׃
4:13b.JOH.004.013 ויען ישוע ויאמר אליה כל השתה מן המים האלה ישוב ויצמא׃
4:14b.JOH.004.014 ואשר ישתה מן המים אשר אנכי נתן לו לא יצמא לעולם כי המים אשר אתן לו יהיו בקרבו למקור מים נבעים לחיי העולמים׃
4:15b.JOH.004.015 ותאמר אליו האשה אדני תנה לי המים ההם למען לא אצמא עוד ולא אוסיף לבוא הנה לשאב׃
4:16b.JOH.004.016 ויאמר אליה ישוע לכי וקראי לאישך ושובי הלום׃
4:17b.JOH.004.017 ותען האשה ותאמר אין לי איש ויאמר אליה ישוע כן דברת אין לי איש׃
4:18b.JOH.004.018 כי בעלים חמשה היו לך ואשר לך עתה איננו בעלך לכן אמת הדבר אשר דברת׃
4:19b.JOH.004.019 ותאמר אליו האשה אדני ראה אנכי כי נביא אתה׃
4:20b.JOH.004.020 אבותינו השתחוו בהר הזה ואתם אמרים כי ירושלים היא המקום הנבחר להשתחות שמה׃
4:21b.JOH.004.021 ויאמר אליה ישוע אשה האמיני לי כי תבוא שעה אשר לא בהר הזה אף לא בירושלים תשתחוו לאב׃
4:22b.JOH.004.022 אתם משתחוים אל אשר לא ידעתם ואנחנו משתחוים אל אשר ידענו כי הישועה מן היהודים היא׃
4:23b.JOH.004.023 אולם תבוא שעה ועתה היא אשר עבדי אל האמתים ישתחוו לאב ברוח ובאמת כי במשתחוים כאלה חפץ האב׃
4:24b.JOH.004.024 האלהים רוח הוא והמשתחוים לו צריכים להשתחות ברוח ובאמת׃
4:25b.JOH.004.025 ותאמר אליו האשה ידעתי כי יבא המשיח הנקרא כריסטוס הוא בבאו יגיד לנו את כל׃
4:26b.JOH.004.026 ויאמר אליה ישוע אני הוא המדבר אליך׃
4:27b.JOH.004.027 ויהי הוא מדבר ככה ותלמידיו באו ויתמהו על דברו עם אשה אך לא אמר לו איש מה זה תשאל או מה תדבר עמה׃
4:28b.JOH.004.028 ותעזב האשה את כדה ותלך העירה ותאמר אל האנשים׃
4:29b.JOH.004.029 באו וראו איש אשר הגיד לי כל אשר עשיתי הכי זה הוא המשיח׃
4:30b.JOH.004.030 ויצאו מן העיר ויבאו אליו׃
4:31b.JOH.004.031 טרם יבאו ותלמידיו בקשו ממנו לאמר אכל נא אדני׃
4:32b.JOH.004.032 ויאמר אליהם יש לי אכל לאכל אשר אתם לא ידעתם׃
4:33b.JOH.004.033 ויאמרו התלמידים איש אל רעהו הכי הביא לו איש לאכל׃
4:34b.JOH.004.034 ויאמר אליהם ישוע מאכלי הוא לעשות רצון שלחי ולהשלים מעשהו׃
4:35b.JOH.004.035 הלא אתם תאמרו כי עוד ארבעה חדשים והקציר בא הנה אני אמר לכם שאו עיניכם וראו בשדות כי כבר הלבינו לקציר׃
4:36b.JOH.004.036 והקוצר יקח שכרו ויאסף תבואה לחיי עולמים למען ישמחו יחדו גם הזרע גם הקוצר׃
4:37b.JOH.004.037 כי בזאת אמת המשל כי זה זרע ואחר יקצר׃
4:38b.JOH.004.038 אנכי שלחתי אתכם לקצר את אשר לא עמלתם בו ואחרים עמלו ואתם נכנסתם בעמלם׃
4:39b.JOH.004.039 ויאמינו בו שמרנים רבים מן העיר ההיא על דבר האשה אשר העידה לאמר הוא הגיד לי את כל אשר עשיתי׃
4:40b.JOH.004.040 ויהי כאשר באו אליו השמרנים וישאלו ממנו לשבת אתם וישב שם יומים׃
4:41b.JOH.004.041 ועוד רבים מהמה האמינו בו בעבור דברו׃
4:42b.JOH.004.042 ויאמרו אל האשה מעתה לא בעבור מאמרך נאמין כי באזנינו שמענו ונדע כי אמנם זה הוא המשיח מושיע העולם׃
4:43b.JOH.004.043 ויהי מקץ שני הימים ויצא משם ללכת הגלילה׃
4:44b.JOH.004.044 כי הוא ישוע העיד כי נביא בארץ מולדתו איננו נכבד׃
4:45b.JOH.004.045 ויהי הוא בא ארץ הגליל ויאספהו אנשי הגליל כי ראו את כל אשר עשה בירושלים בימי החג כי גם הם עלו לחג את החג׃
4:46b.JOH.004.046 ויבא ישוע עוד הפעם אל קנה אשר בגליל מקום שומו המים ליין ואיש היה מעבדי המלך ובנו חלה בכפר נחום׃
4:47b.JOH.004.047 ויהי כשמעו כי בא ישוע מיהודה לארץ הגליל וילך אליו וישאל מאתו לרדת ולרפא את בנו כי קרב למות׃
4:48b.JOH.004.048 ויאמר אליו ישוע אם לא תראו אתות ומופתים לא תאמינו׃
4:49b.JOH.004.049 ויאמר אליו האיש אשר מעבדי המלך אדני רדה נא בטרם ימות בני׃
4:50b.JOH.004.050 ויאמר אליו ישוע לך לך בנך חי והאיש האמין לדבר אשר דבר אליו ישוע וילך׃
4:51b.JOH.004.051 ויהי ברדתו ויפגעו בו עבדיו ויבשרו אתו כי חי בנו׃
4:52b.JOH.004.052 וידרש מאתם את השעה אשר בה רוח לו ויאמרו אליו תמול בשעה השביעית עזבתו הקדחת׃
4:53b.JOH.004.053 וידע אביהו כי היתה השעה אשר דבר לו ישוע בנך חי ויאמן הוא וכל ביתו׃
4:54b.JOH.004.054 זה הוא האות השני אשר עשה ישוע בבאו מיהודה לארץ הגליל׃
5
5:1b.JOH.005.001 אחר הדברים האלה היה חג ליהודים ויעל ישוע ירושלים׃
5:2b.JOH.005.002 ובירושלים ברכה קרובה לשער הצאן ושמה בלשון עברית בית חסדא ולה חמשה אלמים׃
5:3b.JOH.005.003 שמה שכבו חולים ועורים ופסחים ויבשי כח לרב והמה מיחלים לתנועת המים׃
5:4b.JOH.005.004 כי מלאך ירד במועדו אל הברכה וירעש את מימיה והיה הירד ראשון אל תוכה אחרי התגעשו המים הוא נרפא מכל מחלה אשר דבקה בו׃
5:5b.JOH.005.005 ואיש היה שם אשר חלה חליו זה שלשים ושמנה שנה׃
5:6b.JOH.005.006 וירא אתו ישוע שכב וידע כי ארכו לו ימי חליו ויאמר אליו התחפץ להרפא׃
5:7b.JOH.005.007 ויען החולה אדני אין איש אתי אשר ישליכני בהרעש המים אל הברכה ובטרם אבא וירד אחר לפני׃
5:8b.JOH.005.008 ויאמר אליו ישוע קום שא את משכבך והתהלך׃
5:9b.JOH.005.009 וכרגע שב האיש לאיתנו וישא את משכבו ויתהלך והיום ההוא יום שבת היה׃
5:10b.JOH.005.010 ויאמרו היהודים אל האיש הנרפא שבת היום אסור לך לשאת את משכבך׃
5:11b.JOH.005.011 ויען אתם לאמר האיש אשר החלימני הוא אמר אלי שא את משכבך והתהלך׃
5:12b.JOH.005.012 וישאלהו מי זה האיש אשר אמר לך שא את משכבך והתהלך׃
5:13b.JOH.005.013 והנרפא לא ידע מי הוא כי סר ישוע וילך בהיות המון רב במקום ההוא׃
5:14b.JOH.005.014 ויהי אחרי כן וימצאהו ישוע בבית המקדש ויאמר אליו הנה נרפא לך אל תוסיף לחטא פן תאנה אליך רעה גדולה מזאת׃
5:15b.JOH.005.015 וילך האיש ויגד ליהודים כי ישוע הוא אשר רפאו׃
5:16b.JOH.005.016 ועל כן רדפו היהודים את ישוע ויבקשו המיתו על כי עשה כזאת בשבת׃
5:17b.JOH.005.017 ויען אתם ישוע אבי פעל עד עתה וגם אנכי פעל׃
5:18b.JOH.005.018 אז יוסיפו היהודים לבקש את נפשו כי מלבד אשר חלל את השבת עוד אמר כי האלהים הוא אביו וידמה לאלהים׃
5:19b.JOH.005.019 ויען ישוע ויאמר אליהם אמן אמן אני אמר לכם לא יוכל הבן לעשות דבר מנפשו בלתי את אשר יראה את אביו עשה כי את אשר עשה הוא גם הבן יעשה כמהו׃
5:20b.JOH.005.020 כי האב אהב את הבן ומראה אתו כל אשר יעשה ועוד מעשים גדולים מאלה יראהו למען תתמהו׃
5:21b.JOH.005.021 כי כאשר האב יעיר ויחיה את המתים כן גם הבן יחיה את אשר יחפץ׃
5:22b.JOH.005.022 כי האב לא ידין איש כי אם כל המשפט נתן לבן למען יכבדו כלם את הבן כאשר יכבדו את האב׃
5:23b.JOH.005.023 מי אשר לא יכבד את הבן גם את האב אשר שלחו איננו מכבד׃
5:24b.JOH.005.024 אמן אמן אני אמר לכם השמע דברי ומאמין לשלחי יש לו חיי עולמים ולא יבא במשפט כי עבר ממות לחיים׃
5:25b.JOH.005.025 אמן אמן אני אמר לכם כי תבוא שעה ועתה היא אשר ישמעו המתים את קול בן האלהים והשמעים חיה יחיו׃
5:26b.JOH.005.026 כי כאשר לאב יש חיים בעצמו כן נתן גם לבן להיות לו חיים בעצמו׃
5:27b.JOH.005.027 ואף שלטן נתן לו לעשות משפט כי בן אדם הוא׃
5:28b.JOH.005.028 אל תתמהו על זאת כי הנה שעה באה אשר כל שכני קבר את קולו ישמעון׃
5:29b.JOH.005.029 ויצאו עשי הטוב לתקומת החיים ועשי הרע לתקומת המשפט׃
5:30b.JOH.005.030 לא אוכל לעשות דבר מנפשי כאשר אשמע כן אשפט ומשפטי משפט צדק כי לא אבקש רצוני כי אם רצון האב אשר שלחני׃
5:31b.JOH.005.031 אם אנכי מעיד עלי עדותי איננה נאמנה׃
5:32b.JOH.005.032 יש אחר המעיד עלי וידעתי כי עדותו אשר הוא מעיד עלי נאמנה היא׃
5:33b.JOH.005.033 אתם שלחתם אל יוחנן והוא העיד על האמת׃
5:34b.JOH.005.034 ואני אינני לקח עדות מאדם אך אמרתי זאת למען תושעון׃
5:35b.JOH.005.035 הוא היה הנר הדלק והמאיר ואתם רציתם לשוש כשעה לאורו׃
5:36b.JOH.005.036 ואני יש לי עדות גדולה מעדות יוחנן כי המעשים אשר נתן לי אבי להשלימם המעשים האלה אשר אני עשה מעידים עלי כי האב שלחני׃
5:37b.JOH.005.037 והאב אשר שלחני הוא מעיד עלי ואתם את קולו לא שמעתם מעולם ותמונתו לא ראיתם׃
5:38b.JOH.005.038 ודברו איננו שכן בקרבכם כי אינכם מאמינים לשלוחו׃
5:39b.JOH.005.039 דרשו בכתובים אשר תחשבו שיש לכם חיי עולמים בהם והמה המעידים עלי׃
5:40b.JOH.005.040 ואתם אינכם אבים לבוא אלי להיות לכם חיים׃
5:41b.JOH.005.041 לא אקח כבוד מבני אדם׃
5:42b.JOH.005.042 אכן ידעתי אתכם כי אין אהבת אלהים בקרבכם׃
5:43b.JOH.005.043 אני הנה באתי בשם אבי ולא קבלתם אתו ואם יבא אחר בשם עצמו אתו תקבלו׃
5:44b.JOH.005.044 איך תוכלו להאמין אתם הלקחים כבוד איש מרעהו ואת הכבוד אשר מאת האלהים היחיד לא תבקשו׃
5:45b.JOH.005.045 אל תחשבו כי אנכי אטען עליכם לפני אבי משה הוא הטען עליכם אשר לו תיחלו׃
5:46b.JOH.005.046 כי לו האמנתם למשה גם לי תאמינו כי הוא כתב עלי׃
5:47b.JOH.005.047 ואם לכתביו אינכם מאמינים איכה לדברי תאמינו׃
6
6:1b.JOH.006.001 ויהי אחרי כן ויצא ישוע אל עבר ים הגליל אשר לטיבריה׃
6:2b.JOH.006.002 וילכו אחריו המון עם רב כי ראו אותתיו אשר עשה עם החולים׃
6:3b.JOH.006.003 ויעל ישוע על ההר וישב שם הוא ותלמידיו׃
6:4b.JOH.006.004 וימי הפסח חג היהודים קרבו לבוא׃
6:5b.JOH.006.005 וישא ישוע את עיניו וירא עם רב בא אליו ויאמר אל פילפוס מאין נקנה להם לחם לאכל׃
6:6b.JOH.006.006 ואך למען נסות אתו דבר זאת כי הוא ידע את אשר יעשה׃
6:7b.JOH.006.007 ויען אתו פילפוס לחם מאתים דינר לא ימצא להם לקחת לו איש איש מעט׃
6:8b.JOH.006.008 ויאמר אליו אחד מתלמידיו אנדרי אחי שמעון פטרוס׃
6:9b.JOH.006.009 יש פה נער אשר לו חמש ככרות לחם שערים ושני דגים אך אלה מה המה לעם רב כזה׃
6:10b.JOH.006.010 ויאמר ישוע צוו את העם לשבת ארצה וירק דשא לרב היה במקום ההוא וישבו לארץ כחמשת אלפי איש במספר׃
6:11b.JOH.006.011 ויקח ישוע את ככרות הלחם ויברך ויתן לתלמידיו והתלמידים אל המסבים וככה גם מן הדגים כאות נפשם׃
6:12b.JOH.006.012 ויהי כאשר שבעו ויאמר אל תלמידיו אספו את פתותי לחם הנותרים למען לא יאבד מאומה׃
6:13b.JOH.006.013 ויאספו וימלאו שנים עשר סלים בפתותי חמש ככרות לחם השערים הנותרים לאכליהם׃
6:14b.JOH.006.014 ויהי כראות האנשים את האות הזה אשר עשה ישוע ויאמרו הנה זה הוא באמת הנביא הבא לעולם׃
6:15b.JOH.006.015 וידע ישוע כי יבאו ויתפשהו להמליך אותו וימלט עוד הפעם אל ההר הוא לבדו׃
6:16b.JOH.006.016 ויהי בערב וירדו תלמידיו אל הים ויבאו באניה ויעברו אל עבר הים אל כפר נחום׃
6:17b.JOH.006.017 ויכס אתם החשך וישוע לא בא אליהם׃
6:18b.JOH.006.018 ויסער הים כי רוח גדולה נושבת׃
6:19b.JOH.006.019 והם חתרו במשוטיהם כדרך עשרים וחמש או שלשים ריס ויראו את ישוע מתהלך על הים הלוך וקרב אל האניה וייראו׃
6:20b.JOH.006.020 ויאמר אליהם אני הוא אל תיראו׃
6:21b.JOH.006.021 ויואילו לקחת אתו אל האניה ורגע הגיעה האניה לארץ אשר הם הלכים שמה׃
6:22b.JOH.006.022 ויהי ממחרת וירא המון העם העמד מעבר לים כי לא היתה אניה בזה בלתי אחת אשר ירדו בה תלמידיו וכי ישוע לא בא עם תלמידיו אל האניה אך תלמידיו לבדם נסעו מזה׃
6:23b.JOH.006.023 ואניות אחרות באו מטיברים קרוב למקום אשר אכלו שם את הלחם בברכת האדון׃
6:24b.JOH.006.024 ויהי כראות המון העם כי ישוע איננו שם אף לא תלמידיו וירדו גם הם באניות ויבאו אל כפר נחום לבקש את ישוע׃
6:25b.JOH.006.025 וכאשר מצאו אתו מעבר הים ויאמרו אליו רבי מתי באת הלם׃
6:26b.JOH.006.026 ויען אתם ישוע ויאמר אמן אמן אני אמר לכם לא על ראותכם את האתות תבקשוני כי אם על אשר אכלתם מן הלחם ותשבעו׃
6:27b.JOH.006.027 אל תעמלו במאכל אשר יאבד כי אם במאכל הקים לחיי עולמים אשר בן האדם יתננו לכם כי בו חתם חותמו אביו האלהים׃
6:28b.JOH.006.028 ויאמרו אליו מה נעשה לפעל פעלות אלהים׃
6:29b.JOH.006.029 ויען ישוע ויאמר אליהם זאת פעלת אלהים כי תאמינו בזה אשר הוא שלחו׃
6:30b.JOH.006.030 ויאמרו אליו מה אפוא האות אשר תעשה למעננראה ונאמין בך מה תפעל׃
6:31b.JOH.006.031 אבותינו אכלו את המן במדבר כאשר כתוב לחם מן השמים נתן למו לאכל׃
6:32b.JOH.006.032 ויאמר אליהם ישוע אמן אמן אני אמר לכם לא משה נתן לכם את הלחם מן השמים כי אם אבי נתן לכם את הלחם מן השמים האמתי׃
6:33b.JOH.006.033 כי לחם אלהים הוא היורד מן השמים ונתן חיים לעולם׃
6:34b.JOH.006.034 ויאמרו אליו אדני תנה לנו תמיד את הלחם הזה׃
6:35b.JOH.006.035 ויאמר להם ישוע אנכי הוא לחם החיים כל הבא אלי לא ירעב ואשר יאמין בי לא יצמא עוד׃
6:36b.JOH.006.036 ואני הנה אמרתי לכם כי גם חזיתם אתי ולא תאמינו׃
6:37b.JOH.006.037 כל אשר יתננו לי אבי יבוא אלי והבא אלי לא אהדפנו החוצה׃
6:38b.JOH.006.038 כי ירדתי מן השמים לא לעשות רצוני כי אם רצון שלחי׃
6:39b.JOH.006.039 וזה רצון האב אשר שלחני כי כל אשר נתן לי לא יאבד לי כי אם אקימנו ביום האחרון׃
6:40b.JOH.006.040 וזה רצון שלחי אשר כל הראה את הבן ומאמין בו יהיו לו חיי עולמים ואני אקימנו ביום האחרון׃
6:41b.JOH.006.041 וילנו עליו היהודים על אמרו אנכי הוא הלחם הירד מן השמים׃
6:42b.JOH.006.042 ויאמרו הלא זה הוא ישוע בן יוסף אשר אנחנו ידעים את אביו ואת אמו ואיך יאמר מן השמים באתי׃
6:43b.JOH.006.043 ויען ישוע ויאמר אליהם אל תלינו איש אל רעהו׃
6:44b.JOH.006.044 לא יוכל איש לבוא אלי בלתי אם ימשכהו אבי אשר שלחני ואני אקימנו ביום האחרון׃
6:45b.JOH.006.045 הלא כתוב בנביאים וכל בניך למודי יהוה לכן כל אשר שמע מן האב ולמד יבא אלי׃
6:46b.JOH.006.046 לא כאלו ראה איש את האב בלתי הבא מאת האלהים הוא ראה את האלהים׃
6:47b.JOH.006.047 אמן אמן אני אמר לכם המאמין בי לו חיי עולמים׃
6:48b.JOH.006.048 אנכי הוא לחם החיים׃
6:49b.JOH.006.049 אבותיכם אכלו את המן במדבר וימתו׃
6:50b.JOH.006.050 זה הוא הלחם הירד מן השמים למען יאכל איש ממנו ולא ימות׃
6:51b.JOH.006.051 אנכי הלחם החי הירד מן השמים איש כי יאכל מן הלחם הזה יחיה לעולם והלחם אשר אתננו הוא בשרי אשר אני נתן בעד חיי העולם׃
6:52b.JOH.006.052 ויתוכחו היהודים איש עם רעהו לאמר איכה יוכל זה לתת לנו את בשרו לאכל׃
6:53b.JOH.006.053 ויאמר אליהם ישוע אמן אמן אני אמר לכם אם לא תאכלו את בשר בן האדם ושתיתם את דמו אין לכם חיים בקרבכם׃
6:54b.JOH.006.054 האכל את בשרי והשתה את דמי יש לו חיי עולמים ואני אקימנו ביום האחרון׃
6:55b.JOH.006.055 כי בשרי באמת הוא מאכל ודמי באמת הוא משקה׃
6:56b.JOH.006.056 האכל את בשרי ושתה את דמי הוא ילין בי ואני בו׃
6:57b.JOH.006.057 כאשר שלחני האב החי ואנכי חי בגלל אבי כן האכל אתי גם הוא יחיה בגללי׃
6:58b.JOH.006.058 זה הוא הלחם הירד מן השמים לא כאשר אכלו אבותיכם את המן וימתו האכל את הלחם הזה יחיה לעולם׃
6:59b.JOH.006.059 כזאת דבר בבית הכנסת בלמדו בכפר נחום׃
6:60b.JOH.006.060 ורבים מתלמידיו כשמעם אמרו קשה הדבר הזה מי יוכל לשמע אתו׃
6:61b.JOH.006.061 ויבן ישוע בלבו כי תלמידיו מלינים על זאת ויאמר אליהם הזאת לכם למכשול׃
6:62b.JOH.006.062 מה אפוא אם תראו את בן האדם עלה אל אשר היה שם לפנים׃
6:63b.JOH.006.063 הרוח הוא הנתן חיים והבשר אין בו מועיל הדברים אשר אני דברתי אליכם רוח המה וחיים המה׃
6:64b.JOH.006.064 אך יש מכם אשר לא יאמינו כי ישוע ידע מראש מי הם אשר אינם מאמינים ומי המוסר אתו׃
6:65b.JOH.006.065 ויאמר על כן אמרתי לכם כי לא יוכל איש לבוא אלי בלתי אם נתן לו מאת אבי׃
6:66b.JOH.006.066 מן העת הזאת רבים מתלמידיו נסגו אחור ולא יספו להתהלך אתו׃
6:67b.JOH.006.067 ויאמר ישוע אל שנים העשר היש את נפשכם גם אתם לסור ממני׃
6:68b.JOH.006.068 ויען אתו שמעון פטרוס אדני אל מי נלך דברי חיי עולמים עמך׃
6:69b.JOH.006.069 ואנחנו האמנו ונדע כי אתה המשיח בן אל חי׃
6:70b.JOH.006.070 ויען אתם ישוע הלא בחרתי אני בכם שנים העשר ואחד מכם שטן הוא׃
6:71b.JOH.006.071 זאת אמר על יהודה בן שמעון איש קריות כי עתיד היה למסרו והוא אחד משנים העשר׃
7
7:1b.JOH.007.001 אחרי הדברים האלה הלך ישוע בארץ הגליל הלוך ועבור כי לא אבה להתהלך ביהודה על אשר בקשו היהודים להרגו׃
7:2b.JOH.007.002 ויקרב חג היהודים הוא חג הסכות׃
7:3b.JOH.007.003 ויאמרו אליו אחיו קום ולך מזה ארצה יהודה למען יראו גם תלמידיך את המעשים אשר אתה עשה׃
7:4b.JOH.007.004 כי לא יעשה איש דבר בסתר והוא חפץ להתפרסם לכן אם אתה עשה כאלה הגלה אל העולם׃
7:5b.JOH.007.005 כי אחיו גם הם לא האמינו בו׃
7:6b.JOH.007.006 ויאמר אליהם ישוע עתי לא באה עד עתה ועתכם תמיד נכונה׃
7:7b.JOH.007.007 לא יוכל העולם לשנוא אתכם ואתי ישנא באשר אני מעיד עליו כי רעים מעלליו׃
7:8b.JOH.007.008 עלו אתם לחג את החג אני לא אעלה אל החג הזה כי עתי לא מלאה עד עתה׃
7:9b.JOH.007.009 כזאת דבר וישב בגליל׃
7:10b.JOH.007.010 ויהי כאשר עלו אחיו לרגל ויעל גם הוא לא בגלוי כי אם כמסתתר׃
7:11b.JOH.007.011 והיהודים בקשהו בחג ויאמרו איה הוא׃
7:12b.JOH.007.012 ותהי תלונה רבה על אדותיו בתוך העם אלה אמרו טוב הוא ואלה אמרו לא כי מתעה הוא את העם׃
7:13b.JOH.007.013 אך אין איש מדבר עליו בגלוי מפני יראת היהודים׃
7:14b.JOH.007.014 ויהי בחצי ימי החג עלה ישוע אל המקדש וילמד׃
7:15b.JOH.007.015 ויתמהו היהודים ויאמרו איך ידע זה ספר והוא לא למד׃
7:16b.JOH.007.016 ויען אתם ישוע ויאמר לקחי לא שלי הוא כי אם לאשר שלחני׃
7:17b.JOH.007.017 האיש החפץ לעשות רצונו ידע לקחי אם מאת אלהים הוא ואם מנפשי אדבר׃
7:18b.JOH.007.018 המדבר מנפשי כבוד עצמו יבקש אבל המבקש כבוד שלחו נאמן הוא ואין עולתה בו׃
7:19b.JOH.007.019 הלא משה נתן לכם את התורה ואין איש מכם עשה התורה מדוע תבקשו להרגני׃
7:20b.JOH.007.020 ויען העם ויאמר שד בקרבך מי מבקש להרגך׃
7:21b.JOH.007.021 ויען ישוע ויאמר להם פעלה אחת פעלתי וכלכם עליה תתמהו׃
7:22b.JOH.007.022 משה נתן לכם המילה אך לא ממשה היא כי אם מן האבות וביום השבת תמולו כל זכר׃
7:23b.JOH.007.023 ועתה אם ימול זכר בשבת למען אשר לא תופר תורת משה מה תקצפו עלי כי רפאתי איש כלו בשבת׃
7:24b.JOH.007.024 אל תשפטו למראה עין כי אם משפט צדק שפטו׃
7:25b.JOH.007.025 ויאמרו אנשים מישבי ירושלים הלא זה הוא אשר בקשו להמיתו׃
7:26b.JOH.007.026 והנה הוא דבר בגלוי ולא יגערו בו האף אמנם ידעו ראשינו כי באמת זה הוא המשיח׃
7:27b.JOH.007.027 אך את זה ידענו מאין הוא וכאשר יבוא המשיח לא ידע איש אי מזה הוא׃
7:28b.JOH.007.028 אז קרא ישוע במקדש וילמד לאמר הן ידעתם אתי אף ידעתם מאין אני ומנפשי לא באתי אכן יש אמתי אשר שלחני ואתו לא ידעתם׃
7:29b.JOH.007.029 ואני ידעתיו כי מאתו אני והוא שלחני׃
7:30b.JOH.007.030 ויבקשו לתפשו ואיש לא שלח בו יד כי לא בא עתו׃
7:31b.JOH.007.031 ורבים מן העם האמינו בו ויאמרו אם יבא המשיח הגם יעשה אתות רבות מאשר עשה זה׃
7:32b.JOH.007.032 והפרושים שמעו את העם מתלחשים עליו כזאת וישלחו הפרושים וראשי הכהנים משרתים לתפשו׃
7:33b.JOH.007.033 ויאמר אליהם ישוע אך למצער עודני עמכם והלכתי אל אשר שלחני׃
7:34b.JOH.007.034 תשחרנני ולא תמצאנני ובאשר אני שם אתם לא תוכלו לבוא׃
7:35b.JOH.007.035 ויאמרו היהודים איש רעהו אנה ילך זה ואנחנו לא נמצאהו הכי ילך אל הנפוצים בין היונים וילמד אנשי יון׃
7:36b.JOH.007.036 מה זה הדבר אשר אמר תשחרנני ולא תמצאנני ובאשר אני שם אתם לא תוכלו לבוא׃
7:37b.JOH.007.037 ויהי ביום החג האחרון הגדול עמד ישוע ויקרא לאמר איש כי יצמא יבא נא אלי וישתה׃
7:38b.JOH.007.038 המאמין בי כדבר הכתוב מבטנו ינהרו נהרי מים חיים׃
7:39b.JOH.007.039 וזאת אמר על הרוח אשר יקחהו המאמינים בו כי לא נתן רוח הקדש עדנה יען אשר ישוע עוד לא נתפאר׃
7:40b.JOH.007.040 ורבים מהמון העם כשמעם את הדבר הזה אמרו אכן זה הוא הנביא׃
7:41b.JOH.007.041 ויש אשר אמרו זה הוא המשיח ואחרים אמרו המן הגליל יבא המשיח׃
7:42b.JOH.007.042 הלא הכתוב אמר כי מזרע דוד ומכפר בית לחם מקום דוד יצא המשיח׃
7:43b.JOH.007.043 ותהי מחלקת בתוך העם על אדותיו׃
7:44b.JOH.007.044 ומקצתם רצו לתפשו ואיש לא שלח בו יד׃
7:45b.JOH.007.045 וישובו המשרתים אל הכהנים הגדולים והפרושים והמה אמרו אליהם מדוע לא הבאתם אתו׃
7:46b.JOH.007.046 ויענו העבדים מעולם לא דבר איש כאיש הזה׃
7:47b.JOH.007.047 ויאמרו אליהם הפרושים הכי נדהתם גם אתם׃
7:48b.JOH.007.048 הגם האמין בו איש מן השרים או מן הפרושים׃
7:49b.JOH.007.049 רק ההמון הזה אשר אינם ידעים את התורה ארורים המה׃
7:50b.JOH.007.050 ויאמר אליהם נקדימון אשר בא אליו בלילה והוא היה אחד מהם׃
7:51b.JOH.007.051 התשפט תורתנו איש בטרם תחקרהו לדעת את אשר עשה׃
7:52b.JOH.007.052 ויענו ויאמרו אליו הגם אתה מן הגליל דרש נא וראה כי לא קם נביא מן הגליל׃
7:53b.JOH.007.053 וילכו איש איש לביתו׃
8
8:1b.JOH.008.001 וישוע הלך אל הר הזיתים׃
8:2b.JOH.008.002 ויהי בבקר ויבא עוד אל המקדש וכל העם באו אליו וישב וילמדם׃
8:3b.JOH.008.003 ויביאו הסופרים והפרושים אשה לפניו אשר נתפשה בשטותה ויעמידוה בתוך׃
8:4b.JOH.008.004 ויאמרו אליו רבי האשה הזאת נתפשה כשנטמאת בנאופיה׃
8:5b.JOH.008.005 ומשה צונו בתורה לסקל נשים כאלה ואתה מה תאמר׃
8:6b.JOH.008.006 ואך לנסות אתו דברו זאת למצא עליו שטנה ויכף ישוע למטה ויתו באצבעו על הקרקע׃
8:7b.JOH.008.007 ויהי כאשר הוסיפו לשאל אתו וישא את עיניו ויאמר אליהם מי בכם זך בלי פשע הוא ראשונה ידה בה אבן׃
8:8b.JOH.008.008 ויכף שנית למטה ויתו על הקרקע׃
8:9b.JOH.008.009 ויהי כשמעם ויך לבם אתם ויצאו אחד אחד החוצה החל מן הזקנים ועד האחרונים ויותר ישוע לבדו והאשה נצבת בתוך׃
8:10b.JOH.008.010 וישא ישוע את עיניו וירא כי אין איש בלתי האשה לבדה ויאמר אליה אשה איפה שטניך הכי הרשיעך איש׃
8:11b.JOH.008.011 ותאמר לא אדני ויאמר לכן גם אני לא ארשיעך לכי לדרכך ואל תחטאי עוד׃
8:12b.JOH.008.012 ויסף ישוע וידבר אליהם לאמר אני אור העולם כל ההלך אחרי לא יתהלך בחשכה כי אור החיים יהיה לו׃
8:13b.JOH.008.013 ויאמרו הפרושים על נשפך מעיד אתה עדותך איננה נאמנה׃
8:14b.JOH.008.014 ויען ישוע ויאמר אליהם אף אם אעיד על נפשי עדותי נאמנה יען כי ידעתי מאין באתי ואנה אני הלך ואתם לא ידעתם מאין באתי ואנה אלך׃
8:15b.JOH.008.015 אתם לפי הבשר תשפטו ואני לא אשפט איש׃
8:16b.JOH.008.016 ואם אנכי אשפט משפטי אמת כי לא לבדי הנני כי אם אני והאב אשר שלחני׃
8:17b.JOH.008.017 וגם בתורתכם כתוב כי עדות שני אנשים נאמנה היא׃
8:18b.JOH.008.018 אני הוא המעיד עלי וגם האב אשר שלחני יעידני׃
8:19b.JOH.008.019 ויאמרו אליו איו אביך ויען ישוע גם אתי גם את אבי לא ידעתם אלו אתי ידעתם כי עתה גם את אבי ידעתם׃
8:20b.JOH.008.020 כדברים האלה דבר בבית האוצר בלמדו במקדש ולא תפשו איש כי לא בא עתו׃
8:21b.JOH.008.021 ויוסף ישוע ויאמר אליהם אני הלך מזה ותבקשוני ובחטאתכם תמותו אל אשר אני הלך שמה אתם לא תוכלו לבוא׃
8:22b.JOH.008.022 ויאמרו היהודים ההמת ימית את נפשו כי אמר אל אשר אני הולך שמה אתם לא תוכלו לבוא׃
8:23b.JOH.008.023 ויאמר אליהם אתם הנכם מן התחתונים ואני מן העליונים אתם מן העולם הזה ואני אינני מן העולם הזה׃
8:24b.JOH.008.024 לכן אמרתי אליכם כי תמותו בחטאיכם כי אם לא תאמינו כי אני הוא בחטאיכם תמותו׃
8:25b.JOH.008.025 ויאמרו אליו מי זה אתה ויאמר אליהם ישוע מה שגם מראש דברתי אליכם׃
8:26b.JOH.008.026 רבות עמי לדבר ולשפט עליכם אכן שלחי נאמן הוא ואשר שמעתי ממנו אתו אני מדבר אל העולם׃
8:27b.JOH.008.027 והם לא התבוננו כי על האב אמר אליהם׃
8:28b.JOH.008.028 אז אמר להם ישוע בעת תנשאו את בן האדם וידעתם כי אני הוא וכי אינני עשה דבר מנפשי כי אם כאשר למדני אבי אלה אדבר׃
8:29b.JOH.008.029 ואשר שלח אתי הוא עמדי האב לא עזבני לבדד כי את הטוב בעיניו אני עשה תמיד׃
8:30b.JOH.008.030 ויהי בדברו זאת ויאמינו בו רבים׃
8:31b.JOH.008.031 ויאמר ישוע אל היהודים המאמינים בו אם תעמדו בדברי באמת תלמידי אתם׃
8:32b.JOH.008.032 וידעתם את האמת והאמת תשימכם לבני חורין׃
8:33b.JOH.008.033 ויענו אתו זרע אברהם נחנו ומעולם לא היינו לאיש לעבדים איכה תאמר בני חורין תהיו׃
8:34b.JOH.008.034 ויען אתם ישוע אמן אמן אני אמר לכם כל עשה חטא עבד החטא הוא׃
8:35b.JOH.008.035 והעבד לא ישכן בבית לעולם הבן ישכן לעולם׃
8:36b.JOH.008.036 לכן אם הבן יעשה אתכם בני חורין חפשים באמת תהיו׃
8:37b.JOH.008.037 ידעתי כי זרע אברהם אתם אבל אתם מבקשים להמיתני כי דברי לא יכן בתוככם׃
8:38b.JOH.008.038 אני מדבר את אשר ראיתי אצל אבי ואתם עשים את אשר ראיתם אצל אביכם׃
8:39b.JOH.008.039 ויענו ויאמרו אליו אבינו הוא אברהם ויאמר אליהם ישוע אלו הייתם בני אברהם כמעשי אברהם עשיתם׃
8:40b.JOH.008.040 ועתה אתם מבקשים להמיתני איש דבר אליכם האמת אשר שמעתי מעם האלהים אברהם לא עשה כזאת׃
8:41b.JOH.008.041 את מעשי אביכם אתם עשים ויאמרו אליו לא ילדי זנונים אנחנו יש לנו אב אחד הוא האלהים׃
8:42b.JOH.008.042 ויאמר אליהם ישוע אלו אלהים הוא אביכם כי עתה אהבתם אתי כי אנכי יצאתי ובאתי מאת האלהים הן לא ממני באתי אך הוא שלחני׃
8:43b.JOH.008.043 מדוע לא תבינו לשוני יען לא תוכלון לשמע את דברי׃
8:44b.JOH.008.044 אתם מן אביכם השטן ולעשות את תאות אביכם חפצתם הוא רוצח נפש היה מראש ובאמת לא עמד כי אמת אין בו מדי דברי כזב משלו ידבר כי כזב הוא ואבי הכזב׃
8:45b.JOH.008.045 ואני יען דברי האמת לא תאמינו לי׃
8:46b.JOH.008.046 מי בכם על עון יוכיחני ואם אמת דברתי מדוע לא תאמינו לי׃
8:47b.JOH.008.047 אשר מאת האלהים הוא ישמע את דברי האלהים על כן אתם לא שמעתם כי אינכם מאת האלהים׃
8:48b.JOH.008.048 אז יענו היהודים ויאמרו אליו הלא הטבנו אשר דברנו כי שמרוני אתה ושד בך׃
8:49b.JOH.008.049 ויען ישוע שד אין בי רק את אבי אני מכבד ואתם תבזוני׃
8:50b.JOH.008.050 אכן לא אבקש את כבודי יש אחד אשר יבקש וישפט׃
8:51b.JOH.008.051 אמן אמן אני אמר לכם אם ישמר איש את דברי לא יראה מות לנצח׃
8:52b.JOH.008.052 ויאמרו אליו היהודים עתה ידענו כי שד בך הן אברהם והנביאים מתו ואתה אמרת אם ישמר איש את דברי לא יטעם מות לנצח׃
8:53b.JOH.008.053 האתה גדול מאברהם אבינו אשר מת גם הנביאים מתו מה תעשה את עצמך׃
8:54b.JOH.008.054 ויען ישוע אם אני מכבד את נפשי כבודי מאין אבי הוא המכבד אתי אשר תאמרו עליו כי הוא אלהיכם׃
8:55b.JOH.008.055 ולא ידעתם אתו ואני ידעתיו ואם אמר לא ידעתי אתו אהיה כזב כמוכם אבל ידעתיו ואת דברו שמרתי׃
8:56b.JOH.008.056 אברהם אביכם שש לראות את יומי וירא וישמח׃
8:57b.JOH.008.057 ויאמרו אליו היהודים הנה אינך בן חמשים שנה ואת אברהם ראית׃
8:58b.JOH.008.058 ויאמר אליהם ישוע אמן אמן אני אמר לכם בטרם היות אברהם אני הוא׃
8:59b.JOH.008.059 אז ירימו אבנים לרגם אתו וישוע התעלם ויצא מן המקדש ויעבר בתוכם עבור וחלוף׃
9
9:1b.JOH.009.001 ויהי בעברו וירא איש והוא עור מיום הולדו׃
9:2b.JOH.009.002 וישאלו אתו תלמידיו לאמר רבי מי הוא אשר חטא הזה אם ילדיו כי נולד עור׃
9:3b.JOH.009.003 ויען ישוע לא זה חטא ולא יולדיו אך למען יגלו בו מעללי אל׃
9:4b.JOH.009.004 עלי לעשות מעשי שלחי בעוד יום יבוא הלילה אשר בו לא יוכל איש לפעל׃
9:5b.JOH.009.005 בהיותי בעולם אור העולם אני׃
9:6b.JOH.009.006 ויהי כדברו זאת וירק על הארץ ויעש טיט מן הרוק וימרח את הטיט על עיני העור׃
9:7b.JOH.009.007 ויאמר אליו לך ורחץ בברכת השלח פרושו שלוח וילך וירחץ ויבא ועיניו ראות׃
9:8b.JOH.009.008 ויאמרו שכניו ואשר ראו אתו לפנים כי עור הוא הלא זה הוא הישב ומשאל׃
9:9b.JOH.009.009 אלה אמרו כי הוא זה ואלה אמרו אך דומה לו והוא אמר אני הוא׃
9:10b.JOH.009.010 ויאמרו אליו במה אפו נפקחו עיניך׃
9:11b.JOH.009.011 ויען ויאמר איש אשר נקרא שמו ישוע עשה טיט וימרח על עיני ויאמר אלי לך ורחץ בברכת השלח ואלך וארחץ ותארנה עיני׃
9:12b.JOH.009.012 ויאמרו אליו איו ויאמר לא ידעתי׃
9:13b.JOH.009.013 ויביאו את האיש אשר היה עור לפנים אל הפרושים׃
9:14b.JOH.009.014 והיום אשר עשה בו ישוע את הטיט ויפקח את עיניו שבת היה׃
9:15b.JOH.009.015 ויוסיפו לשאל אתו גם הפרושים איך נפקחו עיניו ויאמר אליהם טיט שם על עיני וארחץ והנני ראה׃
9:16b.JOH.009.016 ויאמרו מקצת הפרושים זה האיש לא מאלהים הוא כי לא ישמר את השבת ואחרים אמרו איכה יוכל איש חטא לעשות אתות כאלה ויהי ריב ביניהם׃
9:17b.JOH.009.017 ויוסיפו ויאמרו אל העור מה תאמר אתה עליו אשר פקח עיניך ויאמר נביא הוא׃
9:18b.JOH.009.018 ולא האמינו היהודים עליו כי עור היה וארו עיניו עד אשר קראו אל יולדי הנרפא׃
9:19b.JOH.009.019 וישאלו אתם לאמר הזה הוא בנכם אשר אמרתם כי נולד עור ואיכה הוא ראה עתה׃
9:20b.JOH.009.020 ויענו אתם יולדיו ויאמרו ידענו כי זה הוא בננו וכי נולד עור׃
9:21b.JOH.009.021 אבל איך הוא ראה עתה או מי פקח את עיניו אנחנו לא ידענו הלא בן דעת הוא שאלו את פיהו והוא יגיד מה היה לו׃
9:22b.JOH.009.022 כזאת דברו יולדיו מיראתם את היהודים כי היהודים כבר נועצו לנדות את כל אשר יודה כי הוא המשיח׃
9:23b.JOH.009.023 על כן אמרו יולדיו בן דעת הוא שאלו את פיהו׃
9:24b.JOH.009.024 ויקראו שנית לאיש אשר היה עור ויאמרו אליו תן כבוד לאלהים אנחנו ידענו כי האיש הזה חטא הוא׃
9:25b.JOH.009.025 ויען ויאמר אם האיש חטא הוא אינני ידע אחת ידעתי כי עור הייתי ועתה הנני ראה׃
9:26b.JOH.009.026 ויאמרו אליו עוד מה עשה לך איכה פקח עיניך׃
9:27b.JOH.009.027 ויען אתם כבר אמרתי לכם הלא שמעתם ומה לכם לשמע שנית התאבו גם אתם להיות תלמידיו׃
9:28b.JOH.009.028 ויחרפו אתו ויאמרו אתה תלמידו ואנחנו תלמידיו של משה׃
9:29b.JOH.009.029 אנחנו יודעים כי אל משה דבר האלהים ואת זה לא ידענו מאין הוא׃
9:30b.JOH.009.030 ויען האיש ויאמר אליהם זאת היא הפלא ופלא כי לא ידעתם מאין הוא והוא פקח את עיני׃
9:31b.JOH.009.031 והנה ידענו כי את החטאים לא ישמע אל כי אם את ירא האלהים ועשה רצונו אתו ישמע׃
9:32b.JOH.009.032 מעולם לא נשמע כי פקח איש עיני עור מרחם׃
9:33b.JOH.009.033 לולא היה זה מאת אלהים לא היה יכל לעשות מאומה׃
9:34b.JOH.009.034 ויענו ויאמרו אליו הן בחטאים נולדת כלך ואתה תלמדנו ויהדפהו החוצה׃
9:35b.JOH.009.035 וישמע ישוע כי הדפהו החוצה ויפגשהו ויאמר אליו התאמין בבן האדם׃
9:36b.JOH.009.036 ויען ויאמר מי הוא זה אדני למען אאמין בו׃
9:37b.JOH.009.037 ויאמר אליו ישוע הן ראית אתו והמדבר אליך הנה זה הוא׃
9:38b.JOH.009.038 ויאמר אני מאמין אדני וישתחו לו׃
9:39b.JOH.009.039 ויאמר ישוע אני לדין באתי לעולם הזה למען יראו העורים והראים יכו בעורון׃
9:40b.JOH.009.040 ואשר היו עמו מן הפרושים שמעו דבריו ויאמרו אליו הגם אנחנו עורים׃
9:41b.JOH.009.041 ויאמר אליהם אם עורים הייתם לא היה בכם חטא ועתה כי אמרתם פקחים אנחנו חטאתכם תעמד׃
10
10:1b.JOH.010.001 אמן אמן אני אמר לכם איש אשר לא יבוא דרך השער אל מכלא הצאן כי אם יעלה בדרך אחר גנב ופריץ הוא׃
10:2b.JOH.010.002 ואשר יבוא דרך השער הוא רעה הצאן׃
10:3b.JOH.010.003 לו יפתח שמר הסף והצאן את קלו תשמענה והוא לצאנו בשם יקרא ויוציאם׃
10:4b.JOH.010.004 ואחרי הוציאו את צאנו הוא יעבר לפניהן והצאן הלכות אחריו כי ידעו את קולו׃
10:5b.JOH.010.005 ואחרי זר לא תלכנה כי אם ינוסו מפניו כי את קול הזרים לא ידעו׃
10:6b.JOH.010.006 המשל הזה דבר ישוע באזניהם והמה לא ידעו מה זאת אשר אמר אליהם׃
10:7b.JOH.010.007 ויוסף ישוע וידבר אליהם אמן אמן אני אמר לכם אני הוא דלת הצאן׃
10:8b.JOH.010.008 כל אשר באו לפני גנבים המה ופריצים והצאן לא שמעו לקולם׃
10:9b.JOH.010.009 אנכי הדלת איש כי יבוא בי יושע ובצאתו ובבואו ימצא מרעה׃
10:10b.JOH.010.010 הגנב לא יבוא כי אם לגנוב ולהרוג ולאבד ואני באתי לבעבור הביא להם חיים ומלא ספקם׃
10:11b.JOH.010.011 אנכי הוא הרעה הטוב הרעה הטוב יתן את נפשו בעד צאנו׃
10:12b.JOH.010.012 והשכיר אשר לא רעה הוא והצאן לא לו הנה בראותו כי בא הזאב יעזב את הצאן ונס והזאב יחטף ויפיץ את הצאן׃
10:13b.JOH.010.013 השכיר ינוס כי שכיר הוא ולא ידאג לצאן׃
10:14b.JOH.010.014 אני הרעה הטוב וידעתי את אשר לי ונודעתי לאשר לי׃
10:15b.JOH.010.015 כאשר האב ידעני ואני ידעתי את האב ואת נפשי אתן בעד הצאן׃
10:16b.JOH.010.016 וצאן אחרות יש לי אשר אינן מן המכלה הזאת ועלי לנהל גם אתן ותשמענה קולי והיה עדר אחד ורעה אחד׃
10:17b.JOH.010.017 על כן אהב אתי אבי כי את נפשי אתן למען אשוב ואקחה׃
10:18b.JOH.010.018 ואיש לא יקחנה מאתי כי אם אני מעצמי אתננה יש בידי לתת אתה ובידי לשוב לקחתה את המצוה הזאת לקחתי מעם אבי׃
10:19b.JOH.010.019 ותהי מחלקת גם בפעם הזאת בין היהודים על הדברים האלה׃
10:20b.JOH.010.020 ויאמרו רבים מהם שד בו ומשגע הוא למה תשמעו אליו׃
10:21b.JOH.010.021 ואחרים אמרו לא כאלה ידבר איש אחוז שד היוכל שד לפקח עיני עורים׃
10:22b.JOH.010.022 ויהי חג חנכת הבית בירושלים וסתיו היה׃
10:23b.JOH.010.023 ויתהלך ישוע במקדש באולם של שלמה׃
10:24b.JOH.010.024 ויסבו אתו היהודים ויאמרו אליו עד אנה תתלה את נפשנו את המשיח אתה הגידה לנו ברור׃
10:25b.JOH.010.025 ויען אתם ישוע הן אמרתי אליכם ולא האמנתם בי המעשים אשר אני עשה בשם אבי הם יעידו עלי׃
10:26b.JOH.010.026 אבל אתם לא תאמינו יען לא מצאני אתם כאשר אמרתי לכם׃
10:27b.JOH.010.027 צאני תשמענה את קולי ואני ידעתין ואחרי תלכנה׃
10:28b.JOH.010.028 ואני אתן להן חיי עולמים ולא תאבדנה לנצח ואיש לא יחטף אתהן מידי׃
10:29b.JOH.010.029 האב אשר נתנן לי גדול הוא על כל ואיש לא יחטף אתהן מיד האב׃
10:30b.JOH.010.030 אני ואבי אחד אנחנו׃
10:31b.JOH.010.031 אז ירימו היהודים כפעם בפעם אבנים לסקלו׃
10:32b.JOH.010.032 ויען אתם ישוע מעשים טובים רבים הראיתי אתכם מאת אבי על אי זה מן המעשים ההם תסקלני׃
10:33b.JOH.010.033 ויענו היהודים אתו לאמר על מעשה טוב לא נסקל אתך כי אם על גדפך את אלהים ועל כי אדם אתה ותעש את עצמך לאלהים׃
10:34b.JOH.010.034 ויען אתם ישוע הלא כתוב בתורתכם אני אמרתי אלהים אתם׃
10:35b.JOH.010.035 הן קרא שם אלהים לאלה אשר היה דבר האלהים אליהם והכתוב לא יופר׃
10:36b.JOH.010.036 ואיך תאמרו על אשר קדשו האב ושלחו לעולם מגדף אתה יען אמרתי בן אלהים אני׃
10:37b.JOH.010.037 אם לא אעשה את מעשי אבי אל תאמינו לי׃
10:38b.JOH.010.038 ואם עשיתי ולא תאמינו לי האמינו נא למעשי למען תדעו ותאמינו כי בי האב ואני בו׃
10:39b.JOH.010.039 אז ישובו ויבקשו לתפשו וימלט מידם׃
10:40b.JOH.010.040 וילך וישב אל עבר הירדן אל המקום אשר הטביל שם יוחנן בתחלה וישב שם׃
10:41b.JOH.010.041 ויבאו אליו רבים ויאמרו הנה יוחנן לא עשה אות אבל כל אשר דבר יוחנן על האיש הזה אמת היה׃
10:42b.JOH.010.042 ויאמינו בו רבים במקום ההוא׃
11
11:1b.JOH.011.001 ויהי איש חולה לעזר שמו מבית היני כפר מרים ומרתא אחותה׃
11:2b.JOH.011.002 היא מרים אשר משחה את האדון בשמן המר ותנגב את רגליו בשערותיה ועתה לעזר אחיה חלה׃
11:3b.JOH.011.003 ותשלחנה אחיותיו אליו לאמר אדני הנה זה אשר אהבת חלה הוא׃
11:4b.JOH.011.004 וישמע ישוע ויאמר זאת המחלה איננה למות כי אם לכבוד האלהים למען יכבד בה בן האלהים׃
11:5b.JOH.011.005 וישוע אהב את מרתא ואת אחותה ואת לעזר׃
11:6b.JOH.011.006 ויהי כשמעו כי חלה ויתמהמה וישב יומים במקום אשר הוא שם׃
11:7b.JOH.011.007 מאחרי כן אמר לתלמידיו לכו ונשובה לארץ יהודה׃
11:8b.JOH.011.008 ויאמרו אליו תלמידיו רבי עתה זה בקשו היהודים לסקלך ואתה תשוב שמה׃
11:9b.JOH.011.009 ויען ישוע הלא שתים עשרה שעות ליום איש כי ילך ביום לא יכשל כי יראה אור העולם הזה׃
11:10b.JOH.011.010 אבל ההלך בלילה יכשל כי האור אין בו׃
11:11b.JOH.011.011 כזאת דבר ואחרי כן אמר אליהם לעזר ידידנו ישן הוא ואנכי הלך למען אעירנו׃
11:12b.JOH.011.012 ויאמרו תלמידיו אדני אם ישן הוא יושע׃
11:13b.JOH.011.013 וישוע דבר על מותו והמה חשבו כי על מנוחת השנה דבר׃
11:14b.JOH.011.014 אז גלה ישוע את אזנם ויאמר אליהם לעזר מת׃
11:15b.JOH.011.015 ושמח אני בגללכם כי לא הייתי שם למען תאמינו ועתה נסעה ונלכה אליו׃
11:16b.JOH.011.016 ויאמר תומא הנקרא דידומוס אל התלמידים חבריו נלכה גם אנחנו למען נמות עמו׃
11:17b.JOH.011.017 ויבא ישוע וימצאהו זה ארבעה ימים שכב בקבר׃
11:18b.JOH.011.018 ובית היני היה קרוב לירושלים כדרך חמש עשרה ריס׃
11:19b.JOH.011.019 ורבים מן היהודים באו בית מרתא ומרים לנחם אתהן על אחיהן׃
11:20b.JOH.011.020 ויהי כשמע מרתא כי ישוע בא ותצא לקרתו ומרים יושבת בבית׃
11:21b.JOH.011.021 ותאמר מרתא אל ישוע אדני אלו היית פה כי אז לא מת אחי׃
11:22b.JOH.011.022 וגם עתה ידעתי כי כל אשר תשאל מאת אלהים יתן לך אלהים׃
11:23b.JOH.011.023 ויאמר אליה ישוע קום יקום אחיך׃
11:24b.JOH.011.024 ותאמר אליו מרתא ידעתי כי יקום בתקומה ביום האחרון׃
11:25b.JOH.011.025 ויאמר אליה ישוע אנכי התקומה והחיים המאמין בי יחיה גם כי ימות׃
11:26b.JOH.011.026 וכל החי אשר יאמין בי לא ימות לעולם התאמיני זאת׃
11:27b.JOH.011.027 ותאמר אליו כן אדני האמנתי כי אתה המשיח בן האלהים הבא לעולם׃
11:28b.JOH.011.028 ויהי אחר דברה זאת ותלך ותקרא למרים אחותה בסתר לאמר הנה המורה פה וקרא לך׃
11:29b.JOH.011.029 היא שמעה ותמהר לקום ותבא אליו׃
11:30b.JOH.011.030 וישוע טרם יבא אל הכפר כי עודנו עמד במקום אשר פגשתו שם מרתא׃
11:31b.JOH.011.031 והיהודים אשר באו אל ביתה לנחמה כראותם את מרים כי קמה פתאם ותצא הלכו אחריה באמרם כי הלכה לה אל הקבר לבכות שמה׃
11:32b.JOH.011.032 ותבא מרים אל המקום אשר ישוע עמד שם ותרא אתו ותפל לרגליו ותאמר לו אדני אלו היית פה כי אז לא מת אחי׃
11:33b.JOH.011.033 ויהי כראות ישוע אתה בכיה וגם היהודים אשר באו אתה בכים ותזעם רוחו ויהי מרעיד׃
11:34b.JOH.011.034 ויאמר איפה שמתם אתו ויאמרו אליו אדני בא וראה׃
11:35b.JOH.011.035 ויבך ישוע׃
11:36b.JOH.011.036 ויאמרו היהודים הנה מה גדלה אהבתו אתו׃
11:37b.JOH.011.037 ומקצתם אמרו הפקח עיני העור הלא יכל לעשות שגם זה לא ימות׃
11:38b.JOH.011.038 ויוסף עוד ישוע להזעם ברוחו ויבא אל הקבר והוא מערה ואבן על מבואה׃
11:39b.JOH.011.039 ויאמר ישוע שאו את האבן מעליה ותאמר אליו מרתא אחות המת אדני הנה כבר באש כי ארבעה ימים לו׃
11:40b.JOH.011.040 ויאמר אליה ישוע הלא אמרתי לך כי אם תאמיני תחזי את כבוד האלהים׃
11:41b.JOH.011.041 וישאו את האבן אשר המת הושם שם וישוע נשא את עיניו למרום ויאמר אודך אבי כי עניתני׃
11:42b.JOH.011.042 ואני ידעתי כי בכל עת תענני אולם בעבור העם הזה אשר סביבותי דברתי למען יאמינו בי כי אתה שלחתני׃
11:43b.JOH.011.043 ויהי ככלותו לדבר ויקרא בקול גדול לעזר קום צא׃
11:44b.JOH.011.044 ויצא המת וידיו ורגליו כרוכת בתכריכין ופיו לוטים בסודר ויאמר אליהם ישוע התירו אתו וילך לדרכו׃
11:45b.JOH.011.045 ורבים מן היהודים אשר באו אל מרים בראותם את אשר עשה ישוע האמינו בו׃
11:46b.JOH.011.046 ומקצתם הלכו אל הפרושים ויגידו להם את אשר עשה ישוע׃
11:47b.JOH.011.047 אז יקהילו הכהנים הגדולים והפרושים את הסנהדרין ויאמרו מה נעשה כי האיש הלזה עשה אתות הרבה׃
11:48b.JOH.011.048 אם נניח לו לעשות כלם יאמינו בו ובאו הרומיים ולקחו גם את אדמתנו וגם את עמנו׃
11:49b.JOH.011.049 ואחד מהם קיפא שמו והוא כהן גדול בשנה ההיא אמר אליהם הן לא תדעו מאומה׃
11:50b.JOH.011.050 אף לא תתבוננו כי טוב לנו מות איש אחד בעד הגוי מאבד העם כלו׃
11:51b.JOH.011.051 וזאת לא דבר מלבו כי אם בהיותו כהן גדול בשנה ההיא נבא כי ישוע ימות בעד העם׃
11:52b.JOH.011.052 ולא בעד העם לבד כי אם לקבץ גם את בני אלהים המפזרים והיו לאחדים׃
11:53b.JOH.011.053 ויועצו יחדו להמיתו מהיום ההוא והלאה׃
11:54b.JOH.011.054 על כן לא התהלך ישוע עוד בתוך היהודים בגלוי כי אם סר משם לארץ הקרובה אל המדבר אל עיר עפרים ויגר שם עם תלמידיו׃
11:55b.JOH.011.055 ויקרבו ימי הפסח ליהודים ועם רב עלו מן הארץ ירושלימה לפני הפסח למען יטהרו׃
11:56b.JOH.011.056 ויבקשו את ישוע ובעמדם בבית המקדש נדברו לאמר מה תחשבו הכי לא יבוא אל החג׃
11:57b.JOH.011.057 והכהנים הגדולים והפרושים גזרו גזרה אשר אם ידע איש את מקומו יודיענו למען יתפשהו׃
12
12:1b.JOH.012.001 וששת ימים לפני חג הפסח בא ישוע לבית היני מקום לעזר אשר העיר אתו מעם המתים׃
12:2b.JOH.012.002 ויעשו לו שם משתה בערב ומרתא משרתת ולעזר היה אחד מן המסבים אתו׃
12:3b.JOH.012.003 ותקח מרים מרקחת נרד זך ויקר מאד לטרא אחת משקלה ותמשח בה את רגלי ישוע ותנגב את רגליו בשערותיה והבית ימלא ריח המרקחת׃
12:4b.JOH.012.004 ויאמר אחד מתלמידיו הוא יהודה בן שמעון איש קריות העתיד למסרו׃
12:5b.JOH.012.005 מדוע לא נמכרה המרקחת בשלש מאות דינר ונתן לעניים׃
12:6b.JOH.012.006 והוא לא דבר את זאת מחמלתו על העניים כי אם גנב היה וכיס הכסף אתו וישא כל אשר ישימו בו׃
12:7b.JOH.012.007 ויאמר ישוע הניחה לה ליום קבורתי צפנה זאת׃
12:8b.JOH.012.008 כי העניים תמיד המה עמכם ואני אינני תמיד עמכם׃
12:9b.JOH.012.009 וישמעו עם רב ביהודה כי שם הוא ויבאו לא בעבור ישוע לבדו כי אם לראות גם את לעזר אשר העירו מעם המתים׃
12:10b.JOH.012.010 וראשי הכהנים התיעצו להרג גם את לעזר׃
12:11b.JOH.012.011 כי בגללו באו שמה רבים מן היהודים ויאמינו בישוע׃
12:12b.JOH.012.012 ויהי ממחרת כשמוע המון רב אשר באו לחג החג כי יבא ישוע ירושלים׃
12:13b.JOH.012.013 ויקחו בידם כפות תמרים ויצאו לקראתו ויריעו לאמר הושע נא ברוך הבא בשם יהוה מלך ישראל׃
12:14b.JOH.012.014 וימצא ישוע עיר אחד וירכב עליו כאשר כתוב׃
12:15b.JOH.012.015 אל תיראי בת ציון הנה מלכך יבוא לך רכב על עיר בן אתנות׃
12:16b.JOH.012.016 וכל זאת לא הבינו תלמידיו בראשונה אך אחרי אשר נתפאר ישוע זכרו כי כן כתוב עליו וכי זאת עשו לו׃
12:17b.JOH.012.017 ויעידו העם אשר היו אצלו בקראו אל לעזר לצאת מן הקבר ויער אתו מעם המתים׃
12:18b.JOH.012.018 על זאת גם המון העם יצא לקראתו על שמעם כי עשה האות הזה׃
12:19b.JOH.012.019 והפרושים דברו איש את אחיו לאמר הראיתם כי הועיל לא תועילו מאומה הנה כל העולם נמשך אחריו׃
12:20b.JOH.012.020 ובתוך העלים להשתחות בחג היו אנשים יונים׃
12:21b.JOH.012.021 ויקרבו אל פילפוס איש בית צידה אשר בארץ הגליל וישאלו ממנו לאמר אדני לראות את ישוע חפצנו׃
12:22b.JOH.012.022 ויבא פילפוס ויגד זאת אל אנדרי ואנדרי ופילפוס הגידו אל ישוע׃
12:23b.JOH.012.023 ויען אותם ישוע ויאמר באה השעה שיפאר בן האדם׃
12:24b.JOH.012.024 אמן אמן אני אמר לכם אם לא יפל גרגר החטא אל תוך האדמה ומת ישאר לבדו וכאשר מת יעשה פרי הרבה׃
12:25b.JOH.012.025 האהב את נפשו יאבדנה והשנא את נפשו בעולם הזה ינצרה לחיי נצח׃
12:26b.JOH.012.026 החפץ לשרתני ילך אחרי ובאשר אהיה שם יהיה גם משרתי ואיש אשר ישרתני אתו יכבד אבי׃
12:27b.JOH.012.027 עתה נבהלה נפשי ומה אמר הושיעני אבי מן השעה הזאת אך על כן באתי אל השעה הזאת׃
12:28b.JOH.012.028 אבי פאר את שמך ותצא בת קול מן השמים גם פארתי וגם אוסיף לפאר׃
12:29b.JOH.012.029 והעם העמדים שמה כשמעם אמרו רעם נשמע ואחרים אמרו מלאך דבר אתו׃
12:30b.JOH.012.030 ויען ישוע ויאמר לא למעני היה הקול הזה כי אם למענכם׃
12:31b.JOH.012.031 עתה משפט בא על העולם הזה עתה ישלך שר העולם הזה חוצה׃
12:32b.JOH.012.032 ואני בהנשאי מעל הארץ אמשך כלם אלי׃
12:33b.JOH.012.033 וזאת דבר לרמוז אי זה מות הוא עתיד למות׃
12:34b.JOH.012.034 ויענו אתו העם ויאמרו הנה שמענו בתורה כי המשיח יכון לעולם ואיך אמרת כי בן האדם צריך להנשא ומי בן האדם הלזה׃
12:35b.JOH.012.035 ויאמר אליהם ישוע אך למצער יהיה האור עמכם התהלכו בעוד לכם האור פן ישופכם חשך וההלך בחשך לא ידע אנה הוא הלך׃
12:36b.JOH.012.036 בעוד לכם האור האמינו באור למען תהיו בני האור את הדברים האלה דבר ישוע וילך לו ויסתר מפניהם׃
12:37b.JOH.012.037 רבים האתות אשר עשה לעיניהם ובכל זאת לא האמינו בו׃
12:38b.JOH.012.038 למלאת דבר ישעיהו הנביא אשר אמר יהוה מי האמין לשמעתנו וזרוע יהוה על מי נגלתה׃
12:39b.JOH.012.039 על כן לא יכלו להאמין כי עוד אמר ישעיהו׃
12:40b.JOH.012.040 השע עיניהם והשמין לבבם פן יראו בעיניהם ולבבם יבין ושבו ורפאתי להם׃
12:41b.JOH.012.041 כזאת דבר ישעיהו בראותו את תפארתו וינבא עליו׃
12:42b.JOH.012.042 אולם רבים אף מן השרים האמינו בו אך בגלל הפרושים לא הודו למען אשר לא ינדו׃
12:43b.JOH.012.043 כי אהבו כבוד אנשים יותר מכבוד האלהים׃
12:44b.JOH.012.044 ויקרא ישוע ויאמר המאמין בי לא בי הוא מאמין כי אם בשלח אתי׃
12:45b.JOH.012.045 והראה אתי את אשר שלחני הוא ראה׃
12:46b.JOH.012.046 אני באתי לאור אל העולם למען כל אשר יאמין בי לא ישב בחשך׃
12:47b.JOH.012.047 והשמע את דברי ולא ישמרם אני לא אשפט אתו כי לא באתי לשפט את העולם כי אם להושיע את העולם׃
12:48b.JOH.012.048 ואיש אשר יבזני ולא יקח אמרי יש אחד אשר ידין אתו הדבר אשר דברתי הוא ידין אתו ביום האחרון׃
12:49b.JOH.012.049 כי אני לא מלבי דברתי כי אם אבי השלח אתי הוא צוני את אשר אמר ואת אשר אדבר׃
12:50b.JOH.012.050 ואני ידעתי כי מצותו חיי עולם לכן כל אשר אדבר כאשר אמר אלי אבי כן אני מדבר׃
13
13:1b.JOH.013.001 ולפני חג הפסח כשידע ישוע כי באה שעתו לעבר מן העולם הזה אל אביו כאשר אהב את בחיריו אשר בעולם כן אהבם עד הקץ׃
13:2b.JOH.013.002 ויהי אחרי החל הסעודה והשטן נתן בלב יהודה בן שמעון איש קריות למסרו׃
13:3b.JOH.013.003 וידע ישוע כי נתן אביו את הכל בידו וכי מאלהים בא ואל אלהים ישוב׃
13:4b.JOH.013.004 ויקם מעל השלחן ויפשט את בגדיו ויקח מטפחת ויחגרה׃
13:5b.JOH.013.005 ואחר יצק מים בכיור ויחל לרחץ את רגלי תלמידיו ולנגב במטפחת אשר הוא חגור בה׃
13:6b.JOH.013.006 ויקרב אל שמעון פטרוס והוא אמר אליו אדני האתה תרחץ את רגלי׃
13:7b.JOH.013.007 ויען ישוע ויאמר אליו את אשר אני עשה אינך ידע כעת ואחרי כן תדע׃
13:8b.JOH.013.008 ויאמר אליו פטרוס לעולם לא תרחץ את רגלי ויען ישוע אם לא ארחץ אתך אין לך חלק עמי׃
13:9b.JOH.013.009 ויאמר אליו שמעון פטרוס אדני לא לבד את רגלי כי אם גם את ידי ואת ראשי׃
13:10b.JOH.013.010 ויאמר אליו ישוע המרחץ אין לו לרחץ עוד כי אם את הרגלים כי כלו טהור הוא ואתם טהורים אך לא כלכם׃
13:11b.JOH.013.011 כי ידע מי ימסרהו על כן אמר לא כלכם טהורים׃
13:12b.JOH.013.012 ויהי אחרי אשר רחץ את רגלים וילבש את בגדיו וישב להסב ויאמר אליהם הידעתם מה הדבר אשר עשיתי לכם׃
13:13b.JOH.013.013 אתם קראים לי רב ואדון והיטבתם אשר דברתם כי אני הוא׃
13:14b.JOH.013.014 לכן אם אני המורה והאדון רחצתי את רגליכם גם אתם חיבים לרחץ איש את רגלי אחיו׃
13:15b.JOH.013.015 כי מופת נתתי לכם למען תעשו גם אתם כאשר עשיתי לכם׃
13:16b.JOH.013.016 אמן אמן אני אמר לכם כי העבד איננו גדול מאדניו והשלוח איננו גדול משלחו׃
13:17b.JOH.013.017 אם ידעתם זאת אשריכם אם כן תעשו׃
13:18b.JOH.013.018 לא על כלכם דברתי יודע אני את אשר בחרתי בהם אך למען ימלא הכתוב אוכל לחמי הגדיל עלי עקב׃
13:19b.JOH.013.019 מעתה אני אמר לכם בטרם היותה למען בבואה תאמינו כי אני הוא׃
13:20b.JOH.013.020 אמן אמן אני אמר לכם כי כל המקבל את אשר אשלחהו אתי הוא מקבל והמקבל אתי הוא מקבל את שלחי׃
13:21b.JOH.013.021 ויהי ככלות ישוע לדבר הדברים האלה ויבהל ברוחו ויעד ויאמר אמן אמן אני אמר לכם כי אחד מכם ימסרני׃
13:22b.JOH.013.022 ויתראו תלמידיו ויתמהו איש אל רעהו לדעת על מי דבר׃
13:23b.JOH.013.023 ואחד מתלמידיו מסב על חיק ישוע אשר ישוע אהבו׃
13:24b.JOH.013.024 וירמז לו שמעון פטרוס לדרש מי הוא זה אשר דבר עליו׃
13:25b.JOH.013.025 ויפל על לב ישוע ויאמר אליו אדני מי הוא׃
13:26b.JOH.013.026 ויען ישוע הנה זה הוא אשר אטבל פתי לתתו לו ויטבל את פתו ויתן אל יהודה בן שמעון איש קריות׃
13:27b.JOH.013.027 ואחרי בלעו בא השטן אל קרבו ויאמר אליו ישוע את אשר תעשה עשה מהרה׃
13:28b.JOH.013.028 ומן המסבים לא ידע איש על מה דבר אליו כזאת׃
13:29b.JOH.013.029 כי יש אשר חשבו כי אמר אליו ישוע קנה לנו צרכי החג או לתת לאביונים יען אשר כיס הכסף תחת יד יהודה׃
13:30b.JOH.013.030 והוא בקחתו את פת הלחם מהר לצאת החוצה ויהי לילה׃
13:31b.JOH.013.031 הוא יצא וישוע אמר עתה נתפאר בן האדם והאלהים נתפאר בו׃
13:32b.JOH.013.032 אם האלהים נתפאר בו גם האלהים הוא יפארהו בעצמו ובמהרה יפארהו׃
13:33b.JOH.013.033 בני עוד מעט מזער אהיה עמכם אתם תבקשוני וכאשר אמרתי אל היהודים כי אל אשר אני הולך לא תוכלו לבוא שמה כן אליכם אמר אני עתה׃
13:34b.JOH.013.034 מצוה חדשה אני נתן לכם כי תאהבו איש את אחיו כאשר אהבתי אתכם כן גם אתם איש את אחיו תאהבון׃
13:35b.JOH.013.035 בזאת ידעו כלם כי תלמידי אתם בהיות אהבה ביניכם׃
13:36b.JOH.013.036 ויאמר אליו פטרוס אדני אנה תלך ויען אתו ישוע אל אשר אני הולך שמה לא תוכל עתה ללכת אחרי אך אחרי כן תלך אחרי׃
13:37b.JOH.013.037 ויאמר אליו פטרוס מדוע לא אוכל עתה ללכת אחריך הן נפשי בעד נפשך אתן׃
13:38b.JOH.013.038 ויען אתו ישוע הכי תתן נפשך בעד נפשי אמן אמן אני אמר לך בטרם יקרא התרנגל תכחש בי שלש פעמים׃
14
14:1b.JOH.014.001 אל יבהל לבבכם האמינו באלהים ובי האמינו׃
14:2b.JOH.014.002 בבית אבי מעונות רבות ואם לא כן הוא כי עתה הגדתי לכם הנני הלך להכין מקום לכם׃
14:3b.JOH.014.003 והיה כי הלכתי והכינותי לכם מקום שוב אשוב ולקחתי אתכם אלי למען באשר אהיה שם תהיו גם אתם׃
14:4b.JOH.014.004 ואל אשר אני הולך שמה ידעתם ואת הדרך ידעתם׃
14:5b.JOH.014.005 ויאמר אליו תומא אדני לא ידענו אנה אתה הלך ואיככה נדע את הדרך׃
14:6b.JOH.014.006 ויאמר אליו ישוע אנכי הנני הדרך והאמת והחיים לא יבא איש אל האב כי אם על ידי׃
14:7b.JOH.014.007 לו ידעתם אתי גם את אבי ידעתם ומעתה ידעתם אתו וראיתם אתו׃
14:8b.JOH.014.008 ויאמר אליו פילפוס אדני הראנו נא את האב ודי לנו׃
14:9b.JOH.014.009 ויאמר אליו ישוע זה כמה ימים אנכי אתכם ואתה פילפוס הטרם תדעני הראה אתי ראה את האב ולמה זה תאמר הראנו את האב׃
14:10b.JOH.014.010 האינך מאמין כי אנכי באבי ואבי בי הוא הדברים אשר אדבר אליכם לא מנפשי אנכי דבר כי אבי השכן בקרבי הוא עשה את המעשים׃
14:11b.JOH.014.011 האמינו לי כי אנכי באבי ואבי בי הוא ואם לא אך בגלל המעשים האמינו לי׃
14:12b.JOH.014.012 אמן אמן אני אמר לכם המאמין בי יעשה גם הוא את המעשים אשר אנכי עשה וגדלות מאלה יעשה כי אני הולך אל אבי׃
14:13b.JOH.014.013 וכל אשר תשאלו בשמי אעשנו למען יכבד האב בבנו׃
14:14b.JOH.014.014 כי תשאלו דבר בשמי אני אעשנו׃
14:15b.JOH.014.015 אם אהבתם אתי את מצותי תשמרו׃
14:16b.JOH.014.016 ואני אשאלה מאבי והוא יתן לכם פרקליט אחר אשר ישכן אתכם לנצח׃
14:17b.JOH.014.017 את רוח האמת אשר לא יכל העולם להשיגו באשר לא יראהו ולא ידעהו ואתם ידעתם אתו כי אתכם שכן הוא אף יהיה בתוככם׃
14:18b.JOH.014.018 לא אעזבכם יתומים אבואה אליכם׃
14:19b.JOH.014.019 עוד מעט והעולם לא יוסיף לראות אתי ואתם תראוני כי חי אני וגם אתם חיה תחיו׃
14:20b.JOH.014.020 והיה ביום ההוא ידוע תדעו כי אני באבי ואתם בי ואני בכם׃
14:21b.JOH.014.021 מי אשר מצותי אתו וינצרן זה הוא אשר יאהבני ואהבי אהוב הוא לאבי ואני אהבהו ואליו אתודע׃
14:22b.JOH.014.022 ויאמר אליו יהודה לא יהודה איש קריות אדני מה הוא זה כי תחפץ להתודע אלינו ולא לעולם׃
14:23b.JOH.014.023 ויען ישוע ויאמר אליו איש כי יאהבני ישמר את דברי ואבי יאהב אתו ונבואה אליו ונשים אצלו מעונתנו׃
14:24b.JOH.014.024 ואשר לא יאהבני הוא לא ישמר את דברי והדבר אשר שמעתם לא שלי הוא כי אם של אבי אשר שלחני׃
14:25b.JOH.014.025 את אלה דברתי אליכם בעוד היותי עמכם׃
14:26b.JOH.014.026 והפרקליט תוח הקדש אשר ישלחנו אבי בשמי הוא ילמדכם את כל ויזכירכם את כל אשר הגדתי לכם׃
14:27b.JOH.014.027 שלום אניח לכם את שלומי אתן לכם לא כאשר יתן העולם אנכי נתן לכם אל יבהל לבבכם ואל יחת׃
14:28b.JOH.014.028 הלא שמעתם כי אמרתי אליכם אלך לי ואשובה אליכם אם אהב תאהבוני כי עתה תשמחו באמרי לכם כי הלך אני אל האב כי אבי גדול ממני׃
14:29b.JOH.014.029 ועתה הנה הגדתי זאת לכם בטרם היותה למען בבואה תאמינו׃
14:30b.JOH.014.030 לא ארבה עוד אמרים עמכם כי יבוא שר העולם הזה ובי אין לו מאומה׃
14:31b.JOH.014.031 אך למען ידע העולם כי את אבי אני אהב וכאשר צוני אבי כן אני עשה קומו ונלכה מזה׃
15
15:1b.JOH.015.001 אנכי הגפן האמתית ואבי הוא הכרם׃
15:2b.JOH.015.002 כל שריג בי אשר איננו עשה פרי יסירנו ואשר יעשה פרי יטהרנו להרבות את פריו׃
15:3b.JOH.015.003 אתם כעת מטהרים בעבור דברי אשר דברתי אליכם׃
15:4b.JOH.015.004 עמדו בי ואני בכם כאשר השריג בל יעשה פרי מאליו אם לא יעמד בגפן כן גם אתם אם לא תעמדו בי׃
15:5b.JOH.015.005 אנכי הוא הגפן ואתם השריגים העמד בי ואני בו הוא יעשה פרי לרב כי בלעדי לא תוכלון עשות מאומה׃
15:6b.JOH.015.006 איש אשר לא יעמד בי השלך כשריג החוצה וייבש וילקטום וישליכום אל תוך האש והיה לבער׃
15:7b.JOH.015.007 והיה אם תעמדו בי ודברי יהיו בכם ככל חפצכם תשאלו ויעשה לכם׃
15:8b.JOH.015.008 בזאת נכבד אבי בעשותכם פרי לרב והייתם לי לתלמידים׃
15:9b.JOH.015.009 כאשר אהבני אבי אהבתי אתכם גם אני ואתם עמדו באהבתי׃
15:10b.JOH.015.010 אם תשמרו את מצותי תעמדו באהבתי כאשר שמרתי גם אני את מצות אבי ועמדתי באהבתו׃
15:11b.JOH.015.011 את אלה דברתי אליכם בעבור תהיה שמחתי בכם ותמלא שמחתכם׃
15:12b.JOH.015.012 הנה זאת מצותי כי תאהבון איש את אחיו כאשר אהבתיכם׃
15:13b.JOH.015.013 אין לאיש אהבה יתרה מתתו את נפשו בעד ידידיו׃
15:14b.JOH.015.014 ואתם ידידי אתם אם תעשו את אשר אני מצוה אתכם׃
15:15b.JOH.015.015 לא אקרא לכם עוד עבדים כי העבד איננו ידע את אשר יעשה אדניו כי אם אמרתי ידידי אתם כי כל אשר שמעתי מאת אבי הודעתי אתכם׃
15:16b.JOH.015.016 לא אתם בחרתם בי כי אם אנכי בחרתי בכם והפקדתי אתכם ללכת ולעשות פרי ופריכם יקום והיה כל אשר תשאלו מאבי בשמי יתן לכם׃
15:17b.JOH.015.017 את אלה אני מצוה אתכם למען תאהבון איש את אחיו׃
15:18b.JOH.015.018 אם העולם שנא אתכם דעו כי אתי שנא ראשונה׃
15:19b.JOH.015.019 אלו מן העולם הייתם כי אז אהב העולם את אשר לו ויען כי אינכם מן העולם כי אם בחרתי אתכם מתוך העולם לכן העולם ישנא אתכם׃
15:20b.JOH.015.020 זכרו את דברי אשר דברתי אליכם העבד איננו גדול מאדניו אם רדפו אתי גם אתכם ירדפו אם שמרו את דברי גם את דברכם ישמרו׃
15:21b.JOH.015.021 אבל כל זאת יעשו לכם בעבור שמי כי לא ידעו את שלחי׃
15:22b.JOH.015.022 לולא באתי ודברתי אליהם לא היה בהם חטא ועתה לא יוכלון להתנצל על חטאתם׃
15:23b.JOH.015.023 השנא אתי ישנא גם את אבי׃
15:24b.JOH.015.024 לולא עשיתי בתוכם את המעשים אשר איש זולתי לא עשה לא היה בהם חטא ועתה ראו וישנאו גם אתי גם את אבי׃
15:25b.JOH.015.025 אך למלאת דבר הכתוב בתורתם שנאת חנם שנאוני׃
15:26b.JOH.015.026 ובבוא הפרקליט אשר אשלחנו לכם מאת אבי רוח האמת היוצא מאת אבי הוא יעיד עלי׃
15:27b.JOH.015.027 וגם אתם תעידו כי מראש הייתם עמדי׃
16
16:1b.JOH.016.001 את אלה דברתי אליכם למען לא תכשלו׃
16:2b.JOH.016.002 הנה ינדו אתכם ואף באה השעה אשר כל הרג אתכם ידמה להקריב עבודה לאלהים׃
16:3b.JOH.016.003 וכזאת יעשו לכם יען גם את אבי וגם אתי לא ידעו׃
16:4b.JOH.016.004 אבל הגדתי לכם את אלה למען אשר בבא השעה תזכרום כי אנכי אמרתי אליכם וכאלה לא אמרתי אליכם מראש כי הייתי עמכם׃
16:5b.JOH.016.005 ועתה הלך אנכי אל שלחי ולא ישאלני איש מכם אנה תלך׃
16:6b.JOH.016.006 אך על דברי את אלה אליכם מלא לבבכם עצבת׃
16:7b.JOH.016.007 אולם האמת אגיד לכם כי לכתי אך טוב לכם כי אם לא אלך לא יבא אליכם הפרקליט ואם אלך אשלחהו אליכם׃
16:8b.JOH.016.008 והיה בבאו יוכיח את העולם על דבר החטא והצדק והמשפט׃
16:9b.JOH.016.009 על החטא כי לא האמינו בי׃
16:10b.JOH.016.010 ועל הצדק כי אלך אל אבי ולא תוסיפו לראות אתי׃
16:11b.JOH.016.011 ועל המשפט כי נדון שר העולם הזה׃
16:12b.JOH.016.012 עוד רבות לי להגיד לכם אך לא תוכלון שאת עתה׃
16:13b.JOH.016.013 ורוח האמת בבאו הוא ידריך אתכם אל כל האמת כי לא ידבר מעצמו כי אם אשר ישמע ידבר והאתיות יגיד לכם׃
16:14b.JOH.016.014 הוא יפארני כי משלי יקח ויגיד לכם׃
16:15b.JOH.016.015 כל אשר לאבי לי הוא על כן אמרתי כי משלי יקח ויגיד לכם׃
16:16b.JOH.016.016 הן מעט ולא תראוני ועוד מעט ותחזוני כי אני הלך אל אבי׃
16:17b.JOH.016.017 ומקצת תלמידיו נדברו איש אל אחיו לאמר מה זה אמר אלינו הן מעט ולא תראוני ועוד מעט ותחזוני ואמרו אני הלך אל אבי׃
16:18b.JOH.016.018 ויאמרו מה זה אשר אמר מעט לא ידענו מה דבר׃
16:19b.JOH.016.019 וידע ישוע כי עם לבבם לשאל אתו ויאמר אליהם העל זאת אתם דרשים ביניכם כי אמרתי הן מעט ולא תראוני ועוד מעט ותחזוני׃
16:20b.JOH.016.020 אמן אמן אני אמר לכם כי אתם תבכו ותילילו והעולם ישמח הן אתם תעצבו אכן עצבכם יהפך לששון׃
16:21b.JOH.016.021 האשה בלדתה עצב לה כי באה עתה ואחרי ילדה את הילד לא תזכר עוד את עצבונה משמחתה כי אדם נולד לעולם׃
16:22b.JOH.016.022 וגם אתם כעת תתעצבו אך אשוב אראה אתכם ושש לבכם ואין לקח שמחתכם מכם׃
16:23b.JOH.016.023 וביום ההוא לא תשאלוני דבר אמן אמן אני אמר לכם כי כל אשר תשאלו מאת אבי בשמי יתננו לכם׃
16:24b.JOH.016.024 עד עתה לא שאלתם דבר בשמי שאלו ותקחו למען תמלא שמחתכם׃
16:25b.JOH.016.025 את אלה דברתי אליכם במשלים אכן שעה באה ולא אדבר עוד אליכם במשלים כי אם ברור אמלל לכם על אבי׃
16:26b.JOH.016.026 ביום ההוא תשאלו בשמי ואינני אמר לכם כי אני אעתיר לאבי בעדכם׃
16:27b.JOH.016.027 כי אבי גם הוא אהב אתכם עקב אשר אהבתוני והאמנתם כי מאת אלהים יצאתי׃
16:28b.JOH.016.028 מאת האב יצאתי ואבא לעולם אשובה אעזב את העולם ואלך אל אבי׃
16:29b.JOH.016.029 ויאמרו אליו תלמידיו הנה כעת ברור תמלל ולא תמשל משל׃
16:30b.JOH.016.030 עתה ידענו כי כל ידעת ולא תצטרך כי ישאלך איש בזאת נאמין כי מאת אלהים יצאת׃
16:31b.JOH.016.031 ויען אתם ישוע עתה תאמינו׃
16:32b.JOH.016.032 הנה שעה באה ועתה זה הגיעה ונפצותם איש איש לביתו ואתי תעזבו לבדי ואינני לבדי כי אבי עמדי׃
16:33b.JOH.016.033 את אלה דברתי אליכם למען בי יהיה לכם שלום בעולם יהיה לכם עני אך יאמץ לבבכם אני נצחתי את העולם׃
17
17:1b.JOH.017.001 את אלה דבר ישוע וישא עיניו השמימה ויאמר אבי הנה באה השעה פאר את בנך למען גם בנך יפארך׃
17:2b.JOH.017.002 כאשר נתת לו השלטן על כל בשר למען יתן חיי עולמים לכל אשר נתת לו׃
17:3b.JOH.017.003 ואלה הם חיי העולמים לדעת אתך אשר אתה לבדך אל אמת ואת ישוע המשיח אשר שלחת׃
17:4b.JOH.017.004 אני פארתיך בארץ כליתי פעלך אשר צויתני לעשות׃
17:5b.JOH.017.005 ועתה פארני אתה אבי עמך בכבוד אשר היה לי עמך טרם היות העולם׃
17:6b.JOH.017.006 את שמך הודעתי לבני האדם אשר נתתם לי מתוך העולם לך היו ולי נתת אתם ואת דברך נצרו׃
17:7b.JOH.017.007 ועתה ידעו כי כל אשר נתת לי מעמך הוא׃
17:8b.JOH.017.008 כי הדברים אשר נתת לי נתתי להם והם קבלום ויכירו באמת כי מעמך יצאתי ויאמינו כי אתה שלחתני׃
17:9b.JOH.017.009 אני בעדם אעתיר לך לא בעד העולם אעתיר כי אם בעד אלה אשר נתת לי כי לך המה׃
17:10b.JOH.017.010 וכל אשר לי לך הוא ושלך שלי ונתפארתי בהם׃
17:11b.JOH.017.011 ואני אינני עוד בעולם והם בעולם המה ואני בא אליך אבי הקדוש נצר בשמך את אשר נתתם לי למען יהיו אחד כמנו׃
17:12b.JOH.017.012 בהיותי עמהם בעולם אני נצרתי אתם בשמך את אשר נתתם לי שמרתי ולא אבד מהם איש זולתי בן האבדון למלאת דבר הכתוב׃
17:13b.JOH.017.013 ועתה הנני בא אליך ואלה אני מדבר בעולם למען תמלא להם שמחתי בקרבם׃
17:14b.JOH.017.014 אני נתתי להם את דברך והעולם שנא אתם יען כי לא מן העולם המה כאשר גם אנכי לא מן העולם אני׃
17:15b.JOH.017.015 ולא אעתיר לך אשר תקחם מן העולם רק שתצרם מן הרע׃
17:16b.JOH.017.016 מן העולם אינמו כאשר גם אנכי אינני מן העולם׃
17:17b.JOH.017.017 קדש אתם באמתך דברך אמת הוא׃
17:18b.JOH.017.018 כאשר אתה שלחת אתי אל העולם כן גם אני שלחתי אתם אל העולם׃
17:19b.JOH.017.019 והתקדשתי בעדם למען יהיו גם הם מקדשים באמת׃
17:20b.JOH.017.020 אולם לא לבד בעד אלה אנכי מעתיר לך כי אם גם בעד המאמינים בי על פי דברם׃
17:21b.JOH.017.021 למען יהיו כלם אחד כאשר אתה אבי בי אתה ואני בך והיו גם המה בנו כאשר למען יאמין העולם כי אתה שלחתני׃
17:22b.JOH.017.022 ואני נתתי להם את הכבוד אשר נתת לי למען יהיו אחד כאשר אנחנו אחד נחנו׃
17:23b.JOH.017.023 אני בהם ואתה בי למען יהיו משלמים לאחד ולמען ידע העולם כי אתה שלחתני ואהבת אתם כאשר אהבתני׃
17:24b.JOH.017.024 אבי חפצתי כי גם הם אשר נתתם לי יהיו עמי באשר אהיה אני למען יחזו את כבודי אשר נתת לי כי אהבתני לפני מוסדות עולם׃
17:25b.JOH.017.025 אבי הצדיק הן העולם לא ידעך ואני ידעתיך ואלה הכירו כי אתה שלחתני׃
17:26b.JOH.017.026 ואני הודעתים את שמך ואוסיף להודיעם למען תהיה בם האהבה אשר אהבתני ואני אהיה בהם׃
18
18:1b.JOH.018.001 ויהי ככלות ישוע לדבר את הדברים האלה ויצא החוצה עם תלמידיו מעבר לנחל קדרון ושם גן ויבא בו הוא ותלמידיו׃
18:2b.JOH.018.002 וגם יהודה מוסרו ידע את המקום כי פעמים רבות נועד שמה ישוע עם תלמידיו׃
18:3b.JOH.018.003 ויקח יהודה את הגדוד ומשרתים מאת הכהנים הגדולים והפרושים ויבא שמה בנרות ובלפידים ובכלי נשק׃
18:4b.JOH.018.004 וישוע ידע את כל אשר יבא עליו ויצא ויאמר אליהם את מי תבקשו׃
18:5b.JOH.018.005 ויענו ויאמרו את ישוע הנצרי ויאמר אליהם ישוע אני הוא וגם יהודה מוסרו עמד אצלם׃
18:6b.JOH.018.006 ויהי בדבר ישוע אליהם אני הוא ויסגו אחור ויפלו ארצה׃
18:7b.JOH.018.007 ויסף וישאל אתם את מי תבקשו ויאמרו את ישוע הנצרי׃
18:8b.JOH.018.008 ויען ישוע הלא אמרתי לכם אני הוא לכן אם אתי תבקשו הניחו לאלה וילכו׃
18:9b.JOH.018.009 למלאת הדבר אשר אמר מאלה אשר נתת לי לא אבד לי אף אחד׃
18:10b.JOH.018.010 ולשמעון פטרוס חרב וישלפה ויך את עבד הכהן הגדול ויקצץ את אזנו הימנית ושם העבד מלכוס׃
18:11b.JOH.018.011 ויאמר ישוע אל פטרוס השב חרבך אל נדנה הכי לא אשתה את הכוס אשר נתן לי אבי׃
18:12b.JOH.018.012 אז תפשו הגדוד ושר האלף ומשרתי היהודים את ישוע ויאסרהו׃
18:13b.JOH.018.013 ויוליכהו בראשונה אל חנן והוא חתן קיפא אשר שמש בכהנה גדולה בשנה ההיא׃
18:14b.JOH.018.014 הוא קיפא אשר יעץ את היהודים כי טוב אשר איש אחד יאבד בעד כל העם׃
18:15b.JOH.018.015 ושמעון פטרוס ותלמיד אחר הלכו אחרי ישוע והתלמיד ההוא היה נודע לכהן הגדול ויבא עם ישוע לחצר הכהן הגדול׃
18:16b.JOH.018.016 ופטרוס עמד מחוץ לפתח ויצא התלמיד האחר המידע לכהן הגדול וידבר אל השערת ויבא את פטרוס פנימה׃
18:17b.JOH.018.017 ותאמר האמה השערת אל פטרוס הלא גם אתה מתלמידי האיש הזה ויאמר אינני׃
18:18b.JOH.018.018 והעבדים והמשרתים בערו אש גחלים כי עת קר היתה ויעמדו שם ויתחממו וגם פטרוס עמד עמם ומתחמם׃
18:19b.JOH.018.019 וישאל הכהן הגדול את ישוע על תלמידיו ועל לקחו׃
18:20b.JOH.018.020 ויען אתו ישוע אנכי בגלוי דברתי אל העולם ותמיד למדתי בבית הכנסת ובבית המקדש אשר כל היהודים נקהלים שמה ולא דברתי דבר בסתר׃
18:21b.JOH.018.021 ומה תשאל אתי שאל נא את השמעים מה שדברתי אליהם הנם יודעים את אשר אמרתי׃
18:22b.JOH.018.022 ויהי כדברו הדברים האלה ויך אחד המשרתים העמד שמה את ישוע על הלחי ויאמר הכזאת תענה את הכהן הגדול׃
18:23b.JOH.018.023 ויען אותו ישוע אם רעה דברתי תנה עד כי רעה היא ואם טוב מדוע תסטרני׃
18:24b.JOH.018.024 וישלחהו חנן אסור בזקים אל קיפא הכהן הגדול׃
18:25b.JOH.018.025 ושמעון פטרוס עמד ומתחמם ויאמרו אליו הלא גם אתה מתלמידיו ויכחש ויאמר אינני׃
18:26b.JOH.018.026 ויאמר איש מעבדי הכהן הגדול והוא מודע לאשר קצץ פטרוס את אזנו הלא ראיתיך עמו בתוך הגן׃
18:27b.JOH.018.027 ויסף פטרוס לכחש ופתאם קרא התרנגול׃
18:28b.JOH.018.028 ויוליכו את ישוע מבית קיפא אל בית המשפט ויהי בבקר השכם והמה לא נכנסו אל בית המשפט למען אשר לא יטמאו כי אם יאכלו את הפסח׃
18:29b.JOH.018.029 ויצא פילטוס אליהם ויאמר על מה תאשימו את האיש הזה׃
18:30b.JOH.018.030 ויענו ויאמרו אליו לולא היה זה עשה רע כי עתה לא הסגרנהו אליך׃
18:31b.JOH.018.031 ויאמר אליהם פילטוס קחהו אתם עמכם ועשו משפטו כתורתכם ויאמרו אליו היהודים אין לנו רשיון להמית איש׃
18:32b.JOH.018.032 למלאת דבר ישוע אשר דבר לרמז אי זה מות עתיד הוא למות׃
18:33b.JOH.018.033 וישב פילטוס אל בית המשפט ויקרא אל ישוע ויאמר אליו האתה הוא מלך היהודים׃
18:34b.JOH.018.034 ויען אתו ישוע המלבך תדבר זאת או אחרים הגידו לך עלי׃
18:35b.JOH.018.035 ויען פילטוס האף אנכי יהודי הלא עמך וראשי הכהנים הסגירוך אלי מה עשית׃
18:36b.JOH.018.036 ויען ישוע מלכותי איננה מן העולם הזה אם היתה מלכותי מן העולם הזה כי אז נלחמו לי משרתי לבלתי המסר ביד היהודים ועתה מלכותי איננה מפה׃
18:37b.JOH.018.037 ויאמר אליו פילטוס אם כן אפוא מלך אתה ויען ישוע אתה אמרת כי מלך אנכי לזה נולדתי ולזה באתי בעולם להעיד לאמת כל אשר הוא מן האמת ישמע בקולי׃
18:38b.JOH.018.038 ויאמר אליו פילטוס מה היא האמת ואחרי דברו זאת יצא שנית אל היהודים ויאמר אליהם אני לא מצאתי בו כל עון׃
18:39b.JOH.018.039 הן מנהג הוא בכם כי אשלח לכם איש אחד חפשי בפסח היש את נפשכם כי אשלח לכם את מלך היהודים׃
18:40b.JOH.018.040 ויוסיפו ויצעקו לאמר לא את האיש הזה אלא את בר אבא ובר אבא היה מרצח׃
19
19:1b.JOH.019.001 אז לקח פילטוס את ישוע וייסרהו בשוטים׃
19:2b.JOH.019.002 וישרגו אנשי הצבא עטרת קצים וישימו אתו על ראשו ויעטהו לבוש ארגמן׃
19:3b.JOH.019.003 ויאמרו שלום לך מלך היהודים ויכהו על הלחי׃
19:4b.JOH.019.004 ויצא פילטוס עוד החוצה ויאמר אליהם הנני מוציא אתו אליכם למען תדעו כי לא מצאתי בו כל עון׃
19:5b.JOH.019.005 וישוע יצא החוץ ועליו עטרת הקצים ולבוש הארגמן ויאמר אליהם פילטוס הנה האדם׃
19:6b.JOH.019.006 ויהי כאשר ראהו הכהנים הגדולים והמשרתים ויצעקו לאמר הצלב הצלב ויאמר אליהם פילטוס קחהו אתם והצליבהו כי אנכי לא מצאתי בו אשמה׃
19:7b.JOH.019.007 ויענו היהודים תורה יש לנו ועל פי תורתנו חיב מות הוא כי עשה עצמו לבן אלהים׃
19:8b.JOH.019.008 ויהי כשמע פילטוס את הדבר הזה ויאסף לרא עוד׃
19:9b.JOH.019.009 וישב ויבא אל בית המשפט ויאמר אל ישוע מאין אתה ולא השיבו ישוע דבר׃
19:10b.JOH.019.010 ויאמר אליו פילטוס אלי לא תדבר הלא ידעת כי יש לאל ידי לצלבך ויש לאל ידי לשלחך׃
19:11b.JOH.019.011 ויען ישוע לא היתה לך רשות עלי לולא נתן לך מלמעלה לכן עון המסגיר אתי אליך גדול מעונך׃
19:12b.JOH.019.012 אז יבקש פילטוס לשלחו והיהודים צעקו ויאמרו אם תשלח את זה אינך אהב לקיסר כי כל המתנשא להיות מלך מרד הוא בקיסר׃
19:13b.JOH.019.013 ויהי כשמע פילטוס את הדבר הזה הוציא את ישוע החוצה וישב על כסא המשפט במקום הנקרא בשם רצפה ובלשונם גבתא׃
19:14b.JOH.019.014 ואז היתה הכנת הפסח והשעה כשעה הששית ויאמר אל היהודים הנה מלככם והם צעקו טול טול צלב אתו׃
19:15b.JOH.019.015 ויאמר אליהם פילטוס הצלב אצלב את מלככם ויענו ראשי הכהנים אין לנו מלך כי אם הקיסר׃
19:16b.JOH.019.016 אז מסרו אליהם להצליבו ויקחו את ישוע ויוליכהו׃
19:17b.JOH.019.017 וישא את צלבו ויצא אל המקום הנקרא מקום הגלגלת ובלשונם גלגלתא׃
19:18b.JOH.019.018 ויצלבו אתו שמה ושני אנשים אחרים עמו מזה אחד ומזה אחד וישוע בתוך׃
19:19b.JOH.019.019 ופילטוס כתב על לוח וישם על הצלב וזה מכתבו ישוע הנצרי מלך היהודים׃
19:20b.JOH.019.020 ויהודים רבים קראו את המכתב הזה כי המקום אשר נצלב שם ישוע היה קרוב אל העיר והמכתב היה בלשון עבר יון ורומי׃
19:21b.JOH.019.021 ויאמרו ראשי כהני היהודים אל פילטוס אל נא תכתב מלך היהודים כי אם אשר אמר אני מלך היהודים׃
19:22b.JOH.019.022 ויען פילטוס ויאמר את אשר כתבתי כתבתי׃
19:23b.JOH.019.023 ויהי כאשר צלבו אנשי הצבא את ישוע ויקחו את בגדיו ויחלקום לארבעה חלקים לאיש איש חלק אחד וגם את כתנתו והכתנת לא היתה תפורה כי אם מעשה ארג מלמעלה ועד קצה׃
19:24b.JOH.019.024 ויאמרו איש אל אחיו אל נא נקרעה לקרעים אך נפיל עליה גורל למי תהיה למלאת דבר הכתוב יחלקו בגדי להם ועל לבושי יפילו גורל ויעשו כן אנשי הצבא׃
19:25b.JOH.019.025 ועל יד צלב ישוע עמדו אמו ואחות אמו מרים אשת קלופס ומרים המגדלית׃
19:26b.JOH.019.026 וירא ישוע את אמו ואת תלמידו אשר אהב עמדים אצלו ויאמר אל אמו אשה הנה זה בנך׃
19:27b.JOH.019.027 ואחר אמר אל תלמידו הנה זאת אמך ומן השעה ההיא אסף אתה התלמיד אל ביתו׃
19:28b.JOH.019.028 ויהי מאחרי כן כאשר ידע ישוע כי עתה זה כלה הכל למען ימלא הכתוב כלו אמר צמאתי׃
19:29b.JOH.019.029 ושם כלי מלא חמץ ויטבלו ספוג בחמץ וישימהו על אזוב ויקריבהו אל פיו׃
19:30b.JOH.019.030 ויקח ישוע את החמץ ויאמר כלה ויט את ראשו ויפקד את רוחו׃
19:31b.JOH.019.031 ולמען לא תשארנה הגויות על הצלב ביום השבת כי ערב שבת היה וגדול יום השבת ההוא שאלו היהודים מן פילטוס לשבר את שוקיהם ולהוריד אתם׃
19:32b.JOH.019.032 ויבאו אנשי הצבא וישברו את שוקי הראשון והשני הנצלבים עמו׃
19:33b.JOH.019.033 ויבאו אל ישוע ובראתם כי כבר מת לא שברו את שוקיו׃
19:34b.JOH.019.034 אך אחד מאנשי הצבא דקר בחנית את צדו וכרגע יצא דם ומים׃
19:35b.JOH.019.035 והראה זאת העיד ועדותו נאמנה והוא יודע כי האמת יגיד למען גם אתם תאמינו׃
19:36b.JOH.019.036 כי כל זאת היתה למלאת הכתוב ועצם לא תשברו בו׃
19:37b.JOH.019.037 ועוד כתוב אחר אמר והביט אליו את אשר דקרו׃
19:38b.JOH.019.038 ויהי אחרי כן בא יוסף הרמתי והוא תלמיד ישוע אך בסתר מפני היהודים וישאל מאת פילטוס אשר יתנהו לשאת את גופת ישוע וינח לו פילטוס ויבא וישא את גופת ישוע׃
19:39b.JOH.019.039 ויבא גם נקדימון אשר בא לפנים בלילה אל ישוע ויבא ערוב מר ואהלות כמאה ליטרין׃
19:40b.JOH.019.040 ויקחו את גופת ישוע ויחתלוה בתכריכין עם הבשמים כאשר נהגים היהודים לקבר את מתיהם׃
19:41b.JOH.019.041 ובמקום אשר נצלב שם היה גן ובגן קבר חדש אשר לא הושם בו איש עד עתה׃
19:42b.JOH.019.042 שם שמו את ישוע כי ערב שבת היה ליהודים והקבר קרוב׃
20
20:1b.JOH.020.001 ויהי באחד בשבת לפנות הבקר בעוד חשך ותבא מרים המגדלית אל הקבר ותרא את האבן מוסרה מעל הקבר׃
20:2b.JOH.020.002 ותרץ ותבא אל שמעון פטרוס ואל התלמיד האחר אשר חשק בו ישוע ותאמר אליהם הנה נשאו את האדון מקברו ולא ידענו איפה הניחהו׃
20:3b.JOH.020.003 ויצא פטרוס והתלמיד האחר וילכו אל הקבר׃
20:4b.JOH.020.004 וירוצו שניהם יחדו וימהר התלמיד האחר לרוץ ויעבר את פטרוס ויבא ראשונה אל הקבר׃
20:5b.JOH.020.005 וישקף אל תוכו וירא את התכריכין מנחים אך לא בא פנימה׃
20:6b.JOH.020.006 ויבא שמעון פטרוס אחריו והוא נכנס אל הקבר וירא את התכריכין מנחים׃
20:7b.JOH.020.007 והסודר אשר היתה על ראשו איננה מנחת אצל התכריכין כי אם מקפלת לבדה במקומה׃
20:8b.JOH.020.008 ויבא שמה גם התלמיד האחר אשר בא ראשונה אל הקבר וירא ויאמן׃
20:9b.JOH.020.009 כי לא הבינו עד עתה את הכתוב אשר קום יקום מעם המתים׃
20:10b.JOH.020.010 וישובו התלמידים וילכו אל ביתם׃
20:11b.JOH.020.011 ומרים עמדה בוכיה מחוץ לקבר ויהי בבכותה ותשקף אל תוך הקבר׃
20:12b.JOH.020.012 ותרא שני מלאכים לבושי לבנים ישבים במקום אשר שמו שם את גופת ישוע אחד מראשותיו ואחד מרגלותיו׃
20:13b.JOH.020.013 ויאמרו אליה אשה למה תבכי ותאמר אליהם כי נשאו מזה את אדני ולא ידעתי איפה הניחהו׃
20:14b.JOH.020.014 ויהי בדברה זאת ותפן אחריה ותרא את ישוע עמד ולא ידעה כי הוא ישוע׃
20:15b.JOH.020.015 ויאמר אליה ישוע אשה למה תבכי את מי תבקשי והיא חשבה כי הוא שמר הגן ותאמר אליו אדני אם אתה נשאת אתו מזה הגידה נא לי איפה הנחתו ולקחתיו משם׃
20:16b.JOH.020.016 ויאמר אליה ישוע מרים ותפן ותאמר אליו רבוני הוא מורה׃
20:17b.JOH.020.017 ויאמר אליה ישוע אל תגעי בי כי עוד לא עליתי אל אבי אך לכי נא אל אחי ואמרי אליהם אני עלה אל אבי ואביכם ואל אלהי ואלהיכם׃
20:18b.JOH.020.018 ותבא מרים המגדלית ותספר אל התלמידים כי ראתה את האדון וכזאת דבר אליה׃
20:19b.JOH.020.019 ויהי לעת ערב ביום ההוא והוא אחד בשבת כאשר נסגרו דלתות הבית אשר נקבצו שם התלמידים מיראת היהודים ויבא ישוע ויעמד ביניהם ויאמר אליהם שלום לכם׃
20:20b.JOH.020.020 ובדברו זאת הראה אתם את ידיו ואת צדו וישמחו התלמידים בראותם את האדון׃
20:21b.JOH.020.021 ויסף ישוע לדבר אליהם שלום לכם כאשר שלח אתי האב כן אנכי שלח אתכם׃
20:22b.JOH.020.022 ויהי בדברו זאת ויפח בהם ויאמר אליהם קחו לכם את רוח הקדש׃
20:23b.JOH.020.023 והיה כל אשר תסלחו את חטאתם ונסלח להם ואשר תאשימו יאשמו׃
20:24b.JOH.020.024 ותומא אחד משנים העשר הנקרא דידומוס לא היה בתוכם כבוא ישוע׃
20:25b.JOH.020.025 ויגידו לו התלמידים הנשארים ראה ראינו את האדון ויאמר אליהם אם לא אראה בידיו את רשם המסמרות ואשים את אצבעתי במקום המסמרות ואשים את ידי בצדו לא אאמין׃
20:26b.JOH.020.026 ויהי מקצה שמונת ימים ותלמידיו שנית פנימה ותומא עמהם ויבא ישוע והדלתות מסגרות ויעמד ביניהם ויאמר שלום לכם׃
20:27b.JOH.020.027 ואחר אמר אל תומא שלח אצבעך הנה וראה את ידי ושלח את ידך הנה ושים בצדי ואל תהי חסר אמונה כי אם מאמין׃
20:28b.JOH.020.028 ויען תומא ויאמר אליו אדני ואלהי׃
20:29b.JOH.020.029 ויאמר אליו ישוע יען ראית אתי האמנת אשרי המאמינים ואינם ראים׃
20:30b.JOH.020.030 והנה גם אתות אחרים רבים עשה ישוע לעיני תלמידיו אשר לא נכתבו בספר הזה׃
20:31b.JOH.020.031 אך אלה נכתבו למען תאמינו כי ישוע הוא המשיח בן אלהים ולמען יהיו לכם המאמינים חיי עולם בשמו׃
21
21:1b.JOH.021.001 ויהי אחרי כן ויסף ישוע הגלות אל תלמידיו על ים טיבריה וכה נגלה אליהם׃
21:2b.JOH.021.002 שמעון פטרוס ותומא הנקרא דידומוס ונתנאל מקנה אשר בארץ הגליל ובני זבדי ועוד שנים אחרים מתלמידיו ישבו יחדו׃
21:3b.JOH.021.003 ויאמר אליהם שמעון פטרוס הנני הלך לדיג ויאמרו אליו גם אנחנו נלך עמך ויצאו וימהרו לרדת אל האניה ובלילה ההוא לא אחזו מאומה׃
21:4b.JOH.021.004 הבקר אור וישוע עמד על שפת הים ולא ידעו התלמידים כי ישוע הוא׃
21:5b.JOH.021.005 ויאמר אליהם ישוע בני היש לכם אכל מאומה ויענו אתו אין׃
21:6b.JOH.021.006 ויאמר להם השליכו המכמרת מימין לאניה ותמצאו וישליכו ולא יכלו עוד למשך אתה מרב הדגים׃
21:7b.JOH.021.007 ויאמר התלמיד ההוא אשר ישוע אהבו אל פטרוס זה הוא האדון ויהי כשמע שמעון פטרוס כי הוא האדון ויחגר את מעילו כי עירום היה ויתנפל אל הים׃
21:8b.JOH.021.008 והתלמידים הנשארים באו בספינה כי לא הרחיקו מן היבשה כי אם כמאתים אמה וימשכו את המכמרת עם הדגים׃
21:9b.JOH.021.009 ויהי כצאתם אל היבשה ויראו שם גחלי אש ערוכים ודגים עליהם ולחם לאכל׃
21:10b.JOH.021.010 ויאמר אליהם ישוע הביאו הלם מן הדגים אשר אחזתם עתה׃
21:11b.JOH.021.011 ויעל שמעון פטרוס וימשך את המכמרת אל היבשה והיא מלאה דגים גדולים מאה וחמשים ושלשה ולא נקרעה המכמרת אף כי רבים היו׃
21:12b.JOH.021.012 ויאמר אליהם ישוע באו ברו לחם ואין גם אחד בתלמידים אשר מלאו לבו לשאל אתו מי אתה כי ידעו אשר הוא האדון׃
21:13b.JOH.021.013 ויבא ישוע ויקח את הלחם ויתן להם וגם את הדגים׃
21:14b.JOH.021.014 וזאת היא הפעם השלישית אשר נגלה ישוע אל תלמידיו אחרי קומו מעם המתים׃
21:15b.JOH.021.015 ויהי אחרי אכלם אמר ישוע אל שמעון פטרוס שמעון בן יונה התאהב אתי יותר מאלה ויאמר אליו כן אדני אתה ידעת כי אהבתיך ויאמר אליו רעה את טלאי׃
21:16b.JOH.021.016 ויאמר אליו עוד הפעם שמעון בן יונה התאהב אתי ויאמר אליו כן אדני אתה ידעת כי אהבתיך ויאמר אליו נהג את צאני׃
21:17b.JOH.021.017 ויאמר אליו פעם שלישית שמעון בן יונה התאהב אתי ויתעצב פטרוס על כי אמר אליו בשלישית התאהב אתי ויאמר אליו אדני את כל אתה יודע וידעת כי אהבתיך ויאמר אליו ישוע רעה את צאני׃
21:18b.JOH.021.018 אמן אמן אני אמר לך בהיותך צעיר לימים אתה חגרת את עצמך ותלך אל אשר חפצת והיה כאשר תזקן ופרשת כפיך ואחר יחגרך ונשאך אל אשר לא תחפץ׃
21:19b.JOH.021.019 וכל זאת דבר לרמז על המיתה אשר יכבד בה את האלהים ויהי ככלותו לדבר ויאמר אליו לך אחרי׃
21:20b.JOH.021.020 ויפן פטרוס וירא את התלמיד אשר ישוע אהבו הלך אחריהם הוא הנפל על לבו בעת הסעודה וגם שאל אדני מי הוא זה אשר ימסרך׃
21:21b.JOH.021.021 ויהי בראות אתו פטרוס ויאמר אל ישוע אדני וזה מה הוא׃
21:22b.JOH.021.022 ויאמר אליו ישוע אם חפצי כי ישאר עד באי מה לך ולזאת אתה לך אחרי׃
21:23b.JOH.021.023 על כן יצא הדבר הזה בין האחים כי התלמיד ההוא לא ימות וישוע לא אמר לו כי לא ימות אך אמר אם חפצי כי ישאר עד באי מה זה לך׃
21:24b.JOH.021.024 זה הוא התלמיד המעיד על אלה ואשר כתב כל זאת וידענו כי עדותו נאמנה׃
21:25b.JOH.021.025 ויש עוד מעשים רבים אחרים אשר עשה ישוע ואם יכתבו כלם לאחד אחד אחשבה כי גם העולם כלו לא יכיל את הספרים אשר יכתבו אמן׃
- Holder of rights
- Multilingual Bible Corpus
- Citation Suggestion for this Object
- TextGrid Repository (2025). Hebrew Collection. John (Hebrew). John (Hebrew). Multilingual Parallel Bible Corpus. Multilingual Bible Corpus. https://hdl.handle.net/21.11113/0000-0016-9B88-0