Lamentations (Hebrew)

1

1:1b.LAM.001.001 איכה ישבה בדד העיר רבתי עם היתה כאלמנה רבתי בגוים שרתי במדינות היתה למס׃

1:2b.LAM.001.002 בכו תבכה בלילה ודמעתה על לחיה אין לה מנחם מכל אהביה כל רעיה בגדו בה היו לה לאיבים׃

1:3b.LAM.001.003 גלתה יהודה מעני ומרב עבדה היא ישבה בגוים לא מצאה מנוח כל רדפיה השיגוה בין המצרים׃

1:4b.LAM.001.004 דרכי ציון אבלות מבלי באי מועד כל שעריה שוממין כהניה נאנחים בתולתיה נוגות והיא מר לה׃

1:5b.LAM.001.005 היו צריה לראש איביה שלו כי יהוה הוגה על רב פשעיה עולליה הלכו שבי לפני צר׃

1:6b.LAM.001.006 ויצא מן בת ציון כל הדרה היו שריה כאילים לא מצאו מרעה וילכו בלא כח לפני רודף׃

1:7b.LAM.001.007 זכרה ירושלם ימי עניה ומרודיה כל מחמדיה אשר היו מימי קדם בנפל עמה ביד צר ואין עוזר לה ראוה צרים שחקו על משבתה׃

1:8b.LAM.001.008 חטא חטאה ירושלם על כן לנידה היתה כל מכבדיה הזילוה כי ראו ערותה גם היא נאנחה ותשב אחור׃

1:9b.LAM.001.009 טמאתה בשוליה לא זכרה אחריתה ותרד פלאים אין מנחם לה ראה יהוה את עניי כי הגדיל אויב׃

1:10b.LAM.001.010 ידו פרש צר על כל מחמדיה כי ראתה גוים באו מקדשה אשר צויתה לא יבאו בקהל לך׃

1:11b.LAM.001.011 כל עמה נאנחים מבקשים לחם נתנו מחמודיהם באכל להשיב נפש ראה יהוה והביטה כי הייתי זוללה׃

1:12b.LAM.001.012 לוא אליכם כל עברי דרך הביטו וראו אם יש מכאוב כמכאבי אשר עולל לי אשר הוגה יהוה ביום חרון אפו׃

1:13b.LAM.001.013 ממרום שלח אש בעצמתי וירדנה פרש רשת לרגלי השיבני אחור נתנני שממה כל היום דוה׃

1:14b.LAM.001.014 נשקד על פשעי בידו ישתרגו עלו על צוארי הכשיל כחי נתנני אדני בידי לא אוכל קום׃

1:15b.LAM.001.015 סלה כל אבירי אדני בקרבי קרא עלי מועד לשבר בחורי גת דרך אדני לבתולת בת יהודה׃

1:16b.LAM.001.016 על אלה אני בוכיה עיני עיני ירדה מים כי רחק ממני מנחם משיב נפשי היו בני שוממים כי גבר אויב׃

1:17b.LAM.001.017 פרשה ציון בידיה אין מנחם לה צוה יהוה ליעקב סביביו צריו היתה ירושלם לנדה ביניהם׃

1:18b.LAM.001.018 צדיק הוא יהוה כי פיהו מריתי שמעו נא כל עמים וראו מכאבי בתולתי ובחורי הלכו בשבי׃

1:19b.LAM.001.019 קראתי למאהבי המה רמוני כהני וזקני בעיר גועו כי בקשו אכל למו וישיבו את נפשם׃

1:20b.LAM.001.020 ראה יהוה כי צר לי מעי חמרמרו נהפך לבי בקרבי כי מרו מריתי מחוץ שכלה חרב בבית כמות׃

1:21b.LAM.001.021 שמעו כי נאנחה אני אין מנחם לי כל איבי שמעו רעתי ששו כי אתה עשית הבאת יום קראת ויהיו כמוני׃

1:22b.LAM.001.022 תבא כל רעתם לפניך ועולל למו כאשר עוללת לי על כל פשעי כי רבות אנחתי ולבי דוי׃

2

2:1b.LAM.002.001 איכה יעיב באפו אדני את בת ציון השליך משמים ארץ תפארת ישראל ולא זכר הדם רגליו ביום אפו׃

2:2b.LAM.002.002 בלע אדני לא חמל את כל נאות יעקב הרס בעברתו מבצרי בת יהודה הגיע לארץ חלל ממלכה ושריה׃

2:3b.LAM.002.003 גדע בחרי אף כל קרן ישראל השיב אחור ימינו מפני אויב ויבער ביעקב כאש להבה אכלה סביב׃

2:4b.LAM.002.004 דרך קשתו כאויב נצב ימינו כצר ויהרג כל מחמדי עין באהל בת ציון שפך כאש חמתו׃

2:5b.LAM.002.005 היה אדני כאויב בלע ישראל בלע כל ארמנותיה שחת מבצריו וירב בבת יהודה תאניה ואניה׃

2:6b.LAM.002.006 ויחמס כגן שכו שחת מועדו שכח יהוה בציון מועד ושבת וינאץ בזעם אפו מלך וכהן׃

2:7b.LAM.002.007 זנח אדני מזבחו נאר מקדשו הסגיר ביד אויב חומת ארמנותיה קול נתנו בבית יהוה כיום מועד׃

2:8b.LAM.002.008 חשב יהוה להשחית חומת בת ציון נטה קו לא השיב ידו מבלע ויאבל חל וחומה יחדו אמללו׃

2:9b.LAM.002.009 טבעו בארץ שעריה אבד ושבר בריחיה מלכה ושריה בגוים אין תורה גם נביאיה לא מצאו חזון מיהוה׃

2:10b.LAM.002.010 ישבו לארץ ידמו זקני בת ציון העלו עפר על ראשם חגרו שקים הורידו לארץ ראשן בתולת ירושלם׃

2:11b.LAM.002.011 כלו בדמעות עיני חמרמרו מעי נשפך לארץ כבדי על שבר בת עמי בעטף עולל ויונק ברחבות קריה׃

2:12b.LAM.002.012 לאמתם יאמרו איה דגן ויין בהתעטפם כחלל ברחבות עיר בהשתפך נפשם אל חיק אמתם׃

2:13b.LAM.002.013 מה אעודך מה אדמה לך הבת ירושלם מה אשוה לך ואנחמך בתולת בת ציון כי גדול כים שברך מי ירפא לך׃

2:14b.LAM.002.014 נביאיך חזו לך שוא ותפל ולא גלו על עונך להשיב שביתך ויחזו לך משאות שוא ומדוחים׃

2:15b.LAM.002.015 ספקו עליך כפים כל עברי דרך שרקו וינעו ראשם על בת ירושלם הזאת העיר שיאמרו כלילת יפי משוש לכל הארץ׃

2:16b.LAM.002.016 פצו עליך פיהם כל אויביך שרקו ויחרקו שן אמרו בלענו אך זה היום שקוינהו מצאנו ראינו׃

2:17b.LAM.002.017 עשה יהוה אשר זמם בצע אמרתו אשר צוה מימי קדם הרס ולא חמל וישמח עליך אויב הרים קרן צריך׃

2:18b.LAM.002.018 צעק לבם אל אדני חומת בת ציון הורידי כנחל דמעה יומם ולילה אל תתני פוגת לך אל תדם בת עינך׃

2:19b.LAM.002.019 קומי רני בליל לראש אשמרות שפכי כמים לבך נכח פני אדני שאי אליו כפיך על נפש עולליך העטופים ברעב בראש כל חוצות׃

2:20b.LAM.002.020 ראה יהוה והביטה למי עוללת כה אם תאכלנה נשים פרים עללי טפחים אם יהרג במקדש אדני כהן ונביא׃

2:21b.LAM.002.021 שכבו לארץ חוצות נער וזקן בתולתי ובחורי נפלו בחרב הרגת ביום אפך טבחת לא חמלת׃

2:22b.LAM.002.022 תקרא כיום מועד מגורי מסביב ולא היה ביום אף יהוה פליט ושריד אשר טפחתי ורביתי איבי כלם׃

3

3:1b.LAM.003.001 אני הגבר ראה עני בשבט עברתו׃

3:2b.LAM.003.002 אותי נהג וילך חשך ולא אור׃

3:3b.LAM.003.003 אך בי ישב יהפך ידו כל היום׃

3:4b.LAM.003.004 בלה בשרי ועורי שבר עצמותי׃

3:5b.LAM.003.005 בנה עלי ויקף ראש ותלאה׃

3:6b.LAM.003.006 במחשכים הושיבני כמתי עולם׃

3:7b.LAM.003.007 גדר בעדי ולא אצא הכביד נחשתי׃

3:8b.LAM.003.008 גם כי אזעק ואשוע שתם תפלתי׃

3:9b.LAM.003.009 גדר דרכי בגזית נתיבתי עוה׃

3:10b.LAM.003.010 דב ארב הוא לי אריה במסתרים׃

3:11b.LAM.003.011 דרכי סורר ויפשחני שמני שמם׃

3:12b.LAM.003.012 דרך קשתו ויציבני כמטרא לחץ׃

3:13b.LAM.003.013 הביא בכליותי בני אשפתו׃

3:14b.LAM.003.014 הייתי שחק לכל עמי נגינתם כל היום׃

3:15b.LAM.003.015 השביעני במרורים הרוני לענה׃

3:16b.LAM.003.016 ויגרס בחצץ שני הכפישני באפר׃

3:17b.LAM.003.017 ותזנח משלום נפשי נשיתי טובה׃

3:18b.LAM.003.018 ואמר אבד נצחי ותוחלתי מיהוה׃

3:19b.LAM.003.019 זכר עניי ומרודי לענה וראש׃

3:20b.LAM.003.020 זכור תזכור ותשיח עלי נפשי׃

3:21b.LAM.003.021 זאת אשיב אל לבי על כן אוחיל׃

3:22b.LAM.003.022 חסדי יהוה כי לא תמנו כי לא כלו רחמיו׃

3:23b.LAM.003.023 חדשים לבקרים רבה אמונתך׃

3:24b.LAM.003.024 חלקי יהוה אמרה נפשי על כן אוחיל לו׃

3:25b.LAM.003.025 טוב יהוה לקוו לנפש תדרשנו׃

3:26b.LAM.003.026 טוב ויחיל ודומם לתשועת יהוה׃

3:27b.LAM.003.027 טוב לגבר כי ישא על בנעוריו׃

3:28b.LAM.003.028 ישב בדד וידם כי נטל עליו׃

3:29b.LAM.003.029 יתן בעפר פיהו אולי יש תקוה׃

3:30b.LAM.003.030 יתן למכהו לחי ישבע בחרפה׃

3:31b.LAM.003.031 כי לא יזנח לעולם אדני׃

3:32b.LAM.003.032 כי אם הוגה ורחם כרב חסדו׃

3:33b.LAM.003.033 כי לא ענה מלבו ויגה בני איש׃

3:34b.LAM.003.034 לדכא תחת רגליו כל אסירי ארץ׃

3:35b.LAM.003.035 להטות משפט גבר נגד פני עליון׃

3:36b.LAM.003.036 לעות אדם בריבו אדני לא ראה׃

3:37b.LAM.003.037 מי זה אמר ותהי אדני לא צוה׃

3:38b.LAM.003.038 מפי עליון לא תצא הרעות והטוב׃

3:39b.LAM.003.039 מה יתאונן אדם חי גבר על חטאו׃

3:40b.LAM.003.040 נחפשה דרכינו ונחקרה ונשובה עד יהוה׃

3:41b.LAM.003.041 נשא לבבנו אל כפים אל אל בשמים׃

3:42b.LAM.003.042 נחנו פשענו ומרינו אתה לא סלחת׃

3:43b.LAM.003.043 סכתה באף ותרדפנו הרגת לא חמלת׃

3:44b.LAM.003.044 סכותה בענן לך מעבור תפלה׃

3:45b.LAM.003.045 סחי ומאוס תשימנו בקרב העמים׃

3:46b.LAM.003.046 פצו עלינו פיהם כל איבינו׃

3:47b.LAM.003.047 פחד ופחת היה לנו השאת והשבר׃

3:48b.LAM.003.048 פלגי מים תרד עיני על שבר בת עמי׃

3:49b.LAM.003.049 עיני נגרה ולא תדמה מאין הפגות׃

3:50b.LAM.003.050 עד ישקיף וירא יהוה משמים׃

3:51b.LAM.003.051 עיני עוללה לנפשי מכל בנות עירי׃

3:52b.LAM.003.052 צוד צדוני כצפור איבי חנם׃

3:53b.LAM.003.053 צמתו בבור חיי וידו אבן בי׃

3:54b.LAM.003.054 צפו מים על ראשי אמרתי נגזרתי׃

3:55b.LAM.003.055 קראתי שמך יהוה מבור תחתיות׃

3:56b.LAM.003.056 קולי שמעת אל תעלם אזנך לרוחתי לשועתי׃

3:57b.LAM.003.057 קרבת ביום אקראך אמרת אל תירא׃

3:58b.LAM.003.058 רבת אדני ריבי נפשי גאלת חיי׃

3:59b.LAM.003.059 ראיתה יהוה עותתי שפטה משפטי׃

3:60b.LAM.003.060 ראיתה כל נקמתם כל מחשבתם לי׃

3:61b.LAM.003.061 שמעת חרפתם יהוה כל מחשבתם עלי׃

3:62b.LAM.003.062 שפתי קמי והגיונם עלי כל היום׃

3:63b.LAM.003.063 שבתם וקימתם הביטה אני מנגינתם׃

3:64b.LAM.003.064 תשיב להם גמול יהוה כמעשה ידיהם׃

3:65b.LAM.003.065 תתן להם מגנת לב תאלתך להם׃

3:66b.LAM.003.066 תרדף באף ותשמידם מתחת שמי יהוה׃

4

4:1b.LAM.004.001 איכה יועם זהב ישנא הכתם הטוב תשתפכנה אבני קדש בראש כל חוצות׃

4:2b.LAM.004.002 בני ציון היקרים המסלאים בפז איכה נחשבו לנבלי חרש מעשה ידי יוצר׃

4:3b.LAM.004.003 גם תנין חלצו שד היניקו גוריהן בת עמי לאכזר כי ענים במדבר׃

4:4b.LAM.004.004 דבק לשון יונק אל חכו בצמא עוללים שאלו לחם פרש אין להם׃

4:5b.LAM.004.005 האכלים למעדנים נשמו בחוצות האמנים עלי תולע חבקו אשפתות׃

4:6b.LAM.004.006 ויגדל עון בת עמי מחטאת סדם ההפוכה כמו רגע ולא חלו בה ידים׃

4:7b.LAM.004.007 זכו נזיריה משלג צחו מחלב אדמו עצם מפנינים ספיר גזרתם׃

4:8b.LAM.004.008 חשך משחור תארם לא נכרו בחוצות צפד עורם על עצמם יבש היה כעץ׃

4:9b.LAM.004.009 טובים היו חללי חרב מחללי רעב שהם יזובו מדקרים מתנובת שדי׃

4:10b.LAM.004.010 ידי נשים רחמניות בשלו ילדיהן היו לברות למו בשבר בת עמי׃

4:11b.LAM.004.011 כלה יהוה את חמתו שפך חרון אפו ויצת אש בציון ותאכל יסודתיה׃

4:12b.LAM.004.012 לא האמינו מלכי ארץ וכל ישבי תבל כי יבא צר ואויב בשערי ירושלם׃

4:13b.LAM.004.013 מחטאת נביאיה עונות כהניה השפכים בקרבה דם צדיקים׃

4:14b.LAM.004.014 נעו עורים בחוצות נגאלו בדם בלא יוכלו יגעו בלבשיהם׃

4:15b.LAM.004.015 סורו טמא קראו למו סורו סורו אל תגעו כי נצו גם נעו אמרו בגוים לא יוסיפו לגור׃

4:16b.LAM.004.016 פני יהוה חלקם לא יוסיף להביטם פני כהנים לא נשאו זקנים לא חננו׃

4:17b.LAM.004.017 עודינה תכלינה עינינו אל עזרתנו הבל בצפיתנו צפינו אל גוי לא יושע׃

4:18b.LAM.004.018 צדו צעדינו מלכת ברחבתינו קרב קצינו מלאו ימינו כי בא קצינו׃

4:19b.LAM.004.019 קלים היו רדפינו מנשרי שמים על ההרים דלקנו במדבר ארבו לנו׃

4:20b.LAM.004.020 רוח אפינו משיח יהוה נלכד בשחיתותם אשר אמרנו בצלו נחיה בגוים׃

4:21b.LAM.004.021 שישי ושמחי בת אדום יושבתי בארץ עוץ גם עליך תעבר כוס תשכרי ותתערי׃

4:22b.LAM.004.022 תם עונך בת ציון לא יוסיף להגלותך פקד עונך בת אדום גלה על חטאתיך׃

5

5:1b.LAM.005.001 זכר יהוה מה היה לנו הביט וראה את חרפתנו׃

5:2b.LAM.005.002 נחלתנו נהפכה לזרים בתינו לנכרים׃

5:3b.LAM.005.003 יתומים היינו אין אב אמתינו כאלמנות׃

5:4b.LAM.005.004 מימינו בכסף שתינו עצינו במחיר יבאו׃

5:5b.LAM.005.005 על צוארנו נרדפנו יגענו לא הונח לנו׃

5:6b.LAM.005.006 מצרים נתנו יד אשור לשבע לחם׃

5:7b.LAM.005.007 אבתינו חטאו אינם אנחנו עונתיהם סבלנו׃

5:8b.LAM.005.008 עבדים משלו בנו פרק אין מידם׃

5:9b.LAM.005.009 בנפשנו נביא לחמנו מפני חרב המדבר׃

5:10b.LAM.005.010 עורנו כתנור נכמרו מפני זלעפות רעב׃

5:11b.LAM.005.011 נשים בציון ענו בתלת בערי יהודה׃

5:12b.LAM.005.012 שרים בידם נתלו פני זקנים לא נהדרו׃

5:13b.LAM.005.013 בחורים טחון נשאו ונערים בעץ כשלו׃

5:14b.LAM.005.014 זקנים משער שבתו בחורים מנגינתם׃

5:15b.LAM.005.015 שבת משוש לבנו נהפך לאבל מחלנו׃

5:16b.LAM.005.016 נפלה עטרת ראשנו אוי נא לנו כי חטאנו׃

5:17b.LAM.005.017 על זה היה דוה לבנו על אלה חשכו עינינו׃

5:18b.LAM.005.018 על הר ציון ששמם שועלים הלכו בו׃

5:19b.LAM.005.019 אתה יהוה לעולם תשב כסאך לדר ודור׃

5:20b.LAM.005.020 למה לנצח תשכחנו תעזבנו לארך ימים׃

5:21b.LAM.005.021 השיבנו יהוה אליך ונשוב חדש ימינו כקדם׃

5:22b.LAM.005.022 כי אם מאס מאסתנו קצפת עלינו עד מאד׃