Psalms (Hebrew)

1

1:1b.PSA.001.001 אשרי האיש אשר לא הלך בעצת רשעים ובדרך חטאים לא עמד ובמושב לצים לא ישב׃

1:2b.PSA.001.002 כי אם בתורת יהוה חפצו ובתורתו יהגה יומם ולילה׃

1:3b.PSA.001.003 והיה כעץ שתול על פלגי מים אשר פריו יתן בעתו ועלהו לא יבול וכל אשר יעשה יצליח׃

1:4b.PSA.001.004 לא כן הרשעים כי אם כמץ אשר תדפנו רוח׃

1:5b.PSA.001.005 על כן לא יקמו רשעים במשפט וחטאים בעדת צדיקים׃

1:6b.PSA.001.006 כי יודע יהוה דרך צדיקים ודרך רשעים תאבד׃

2

2:1b.PSA.002.001 למה רגשו גוים ולאמים יהגו ריק׃

2:2b.PSA.002.002 יתיצבו מלכי ארץ ורוזנים נוסדו יחד על יהוה ועל משיחו׃

2:3b.PSA.002.003 ננתקה את מוסרותימו ונשליכה ממנו עבתימו׃

2:4b.PSA.002.004 יושב בשמים ישחק אדני ילעג למו׃

2:5b.PSA.002.005 אז ידבר אלימו באפו ובחרונו יבהלמו׃

2:6b.PSA.002.006 ואני נסכתי מלכי על ציון הר קדשי׃

2:7b.PSA.002.007 אספרה אל חק יהוה אמר אלי בני אתה אני היום ילדתיך׃

2:8b.PSA.002.008 שאל ממני ואתנה גוים נחלתך ואחזתך אפסי ארץ׃

2:9b.PSA.002.009 תרעם בשבט ברזל ככלי יוצר תנפצם׃

2:10b.PSA.002.010 ועתה מלכים השכילו הוסרו שפטי ארץ׃

2:11b.PSA.002.011 עבדו את יהוה ביראה וגילו ברעדה׃

2:12b.PSA.002.012 נשקו בר פן יאנף ותאבדו דרך כי יבער כמעט אפו אשרי כל חוסי בו׃

3

3:1b.PSA.003.001 מזמור לדוד בברחו מפני אבשלום בנו יהוה מה רבו צרי רבים קמים עלי׃

3:2b.PSA.003.002 רבים אמרים לנפשי אין ישועתה לו באלהים סלה׃

3:3b.PSA.003.003 ואתה יהוה מגן בעדי כבודי ומרים ראשי׃

3:4b.PSA.003.004 קולי אל יהוה אקרא ויענני מהר קדשו סלה׃

3:5b.PSA.003.005 אני שכבתי ואישנה הקיצותי כי יהוה יסמכני׃

3:6b.PSA.003.006 לא אירא מרבבות עם אשר סביב שתו עלי׃

3:7b.PSA.003.007 קומה יהוה הושיעני אלהי כי הכית את כל איבי לחי שני רשעים שברת׃

3:8b.PSA.003.008 ליהוה הישועה על עמך ברכתך סלה׃

4

4:1b.PSA.004.001 למנצח בנגינות מזמור לדוד בקראי ענני אלהי צדקי בצר הרחבת לי חנני ושמע תפלתי׃

4:2b.PSA.004.002 בני איש עד מה כבודי לכלמה תאהבון ריק תבקשו כזב סלה׃

4:3b.PSA.004.003 ודעו כי הפלה יהוה חסיד לו יהוה ישמע בקראי אליו׃

4:4b.PSA.004.004 רגזו ואל תחטאו אמרו בלבבכם על משכבכם ודמו סלה׃

4:5b.PSA.004.005 זבחו זבחי צדק ובטחו אל יהוה׃

4:6b.PSA.004.006 רבים אמרים מי יראנו טוב נסה עלינו אור פניך יהוה׃

4:7b.PSA.004.007 נתתה שמחה בלבי מעת דגנם ותירושם רבו׃

4:8b.PSA.004.008 בשלום יחדו אשכבה ואישן כי אתה יהוה לבדד לבטח תושיבני׃

5

5:1b.PSA.005.001 למנצח אל הנחילות מזמור לדוד אמרי האזינה יהוה בינה הגיגי׃

5:2b.PSA.005.002 הקשיבה לקול שועי מלכי ואלהי כי אליך אתפלל׃

5:3b.PSA.005.003 יהוה בקר תשמע קולי בקר אערך לך ואצפה׃

5:4b.PSA.005.004 כי לא אל חפץ רשע אתה לא יגרך רע׃

5:5b.PSA.005.005 לא יתיצבו הוללים לנגד עיניך שנאת כל פעלי און׃

5:6b.PSA.005.006 תאבד דברי כזב איש דמים ומרמה יתעב יהוה׃

5:7b.PSA.005.007 ואני ברב חסדך אבוא ביתך אשתחוה אל היכל קדשך ביראתך׃

5:8b.PSA.005.008 יהוה נחני בצדקתך למען שוררי הושר לפני דרכך׃

5:9b.PSA.005.009 כי אין בפיהו נכונה קרבם הוות קבר פתוח גרונם לשונם יחליקון׃

5:10b.PSA.005.010 האשימם אלהים יפלו ממעצותיהם ברב פשעיהם הדיחמו כי מרו בך׃

5:11b.PSA.005.011 וישמחו כל חוסי בך לעולם ירננו ותסך עלימו ויעלצו בך אהבי שמך׃

5:12b.PSA.005.012 כי אתה תברך צדיק יהוה כצנה רצון תעטרנו׃

6

6:1b.PSA.006.001 למנצח בנגינות על השמינית מזמור לדוד יהוה אל באפך תוכיחני ואל בחמתך תיסרני׃

6:2b.PSA.006.002 חנני יהוה כי אמלל אני רפאני יהוה כי נבהלו עצמי׃

6:3b.PSA.006.003 ונפשי נבהלה מאד ואת יהוה עד מתי׃

6:4b.PSA.006.004 שובה יהוה חלצה נפשי הושיעני למען חסדך׃

6:5b.PSA.006.005 כי אין במות זכרך בשאול מי יודה לך׃

6:6b.PSA.006.006 יגעתי באנחתי אשחה בכל לילה מטתי בדמעתי ערשי אמסה׃

6:7b.PSA.006.007 עששה מכעס עיני עתקה בכל צוררי׃

6:8b.PSA.006.008 סורו ממני כל פעלי און כי שמע יהוה קול בכיי׃

6:9b.PSA.006.009 שמע יהוה תחנתי יהוה תפלתי יקח׃

6:10b.PSA.006.010 יבשו ויבהלו מאד כל איבי ישבו יבשו רגע׃

7

7:1b.PSA.007.001 שגיון לדוד אשר שר ליהוה על דברי כוש בן ימיני יהוה אלהי בך חסיתי הושיעני מכל רדפי והצילני׃

7:2b.PSA.007.002 פן יטרף כאריה נפשי פרק ואין מציל׃

7:3b.PSA.007.003 יהוה אלהי אם עשיתי זאת אם יש עול בכפי׃

7:4b.PSA.007.004 אם גמלתי שולמי רע ואחלצה צוררי ריקם׃

7:5b.PSA.007.005 ירדף אויב נפשי וישג וירמס לארץ חיי וכבודי לעפר ישכן סלה׃

7:6b.PSA.007.006 קומה יהוה באפך הנשא בעברות צוררי ועורה אלי משפט צוית׃

7:7b.PSA.007.007 ועדת לאמים תסובבך ועליה למרום שובה׃

7:8b.PSA.007.008 יהוה ידין עמים שפטני יהוה כצדקי וכתמי עלי׃

7:9b.PSA.007.009 יגמר נא רע רשעים ותכונן צדיק ובחן לבות וכליות אלהים צדיק׃

7:10b.PSA.007.010 מגני על אלהים מושיע ישרי לב׃

7:11b.PSA.007.011 אלהים שופט צדיק ואל זעם בכל יום׃

7:12b.PSA.007.012 אם לא ישוב חרבו ילטוש קשתו דרך ויכוננה׃

7:13b.PSA.007.013 ולו הכין כלי מות חציו לדלקים יפעל׃

7:14b.PSA.007.014 הנה יחבל און והרה עמל וילד שקר׃

7:15b.PSA.007.015 בור כרה ויחפרהו ויפל בשחת יפעל׃

7:16b.PSA.007.016 ישוב עמלו בראשו ועל קדקדו חמסו ירד׃

7:17b.PSA.007.017 אודה יהוה כצדקו ואזמרה שם יהוה עליון׃

8

8:1b.PSA.008.001 למנצח על הגתית מזמור לדוד יהוה אדנינו מה אדיר שמך בכל הארץ אשר תנה הודך על השמים׃

8:2b.PSA.008.002 מפי עוללים וינקים יסדת עז למען צורריך להשבית אויב ומתנקם׃

8:3b.PSA.008.003 כי אראה שמיך מעשי אצבעתיך ירח וכוכבים אשר כוננתה׃

8:4b.PSA.008.004 מה אנוש כי תזכרנו ובן אדם כי תפקדנו׃

8:5b.PSA.008.005 ותחסרהו מעט מאלהים וכבוד והדר תעטרהו׃

8:6b.PSA.008.006 תמשילהו במעשי ידיך כל שתה תחת רגליו׃

8:7b.PSA.008.007 צנה ואלפים כלם וגם בהמות שדי׃

8:8b.PSA.008.008 צפור שמים ודגי הים עבר ארחות ימים׃

8:9b.PSA.008.009 יהוה אדנינו מה אדיר שמך בכל הארץ׃

9

9:1b.PSA.009.001 למנצח עלמות לבן מזמור לדוד אודה יהוה בכל לבי אספרה כל נפלאותיך׃

9:2b.PSA.009.002 אשמחה ואעלצה בך אזמרה שמך עליון׃

9:3b.PSA.009.003 בשוב אויבי אחור יכשלו ויאבדו מפניך׃

9:4b.PSA.009.004 כי עשית משפטי ודיני ישבת לכסא שופט צדק׃

9:5b.PSA.009.005 גערת גוים אבדת רשע שמם מחית לעולם ועד׃

9:6b.PSA.009.006 האויב תמו חרבות לנצח וערים נתשת אבד זכרם המה׃

9:7b.PSA.009.007 ויהוה לעולם ישב כונן למשפט כסאו׃

9:8b.PSA.009.008 והוא ישפט תבל בצדק ידין לאמים במישרים׃

9:9b.PSA.009.009 ויהי יהוה משגב לדך משגב לעתות בצרה׃

9:10b.PSA.009.010 ויבטחו בך יודעי שמך כי לא עזבת דרשיך יהוה׃

9:11b.PSA.009.011 זמרו ליהוה ישב ציון הגידו בעמים עלילותיו׃

9:12b.PSA.009.012 כי דרש דמים אותם זכר לא שכח צעקת עניים׃

9:13b.PSA.009.013 חננני יהוה ראה עניי משנאי מרוממי משערי מות׃

9:14b.PSA.009.014 למען אספרה כל תהלתיך בשערי בת ציון אגילה בישועתך׃

9:15b.PSA.009.015 טבעו גוים בשחת עשו ברשת זו טמנו נלכדה רגלם׃

9:16b.PSA.009.016 נודע יהוה משפט עשה בפעל כפיו נוקש רשע הגיון סלה׃

9:17b.PSA.009.017 ישובו רשעים לשאולה כל גוים שכחי אלהים׃

9:18b.PSA.009.018 כי לא לנצח ישכח אביון תקות ענוים תאבד לעד׃

9:19b.PSA.009.019 קומה יהוה אל יעז אנוש ישפטו גוים על פניך׃

9:20b.PSA.009.020 שיתה יהוה מורה להם ידעו גוים אנוש המה סלה׃

10

10:1b.PSA.010.001 למה יהוה תעמד ברחוק תעלים לעתות בצרה׃

10:2b.PSA.010.002 בגאות רשע ידלק עני יתפשו במזמות זו חשבו׃

10:3b.PSA.010.003 כי הלל רשע על תאות נפשו ובצע ברך נאץ יהוה׃

10:4b.PSA.010.004 רשע כגבה אפו בל ידרש אין אלהים כל מזמותיו׃

10:5b.PSA.010.005 יחילו דרכו בכל עת מרום משפטיך מנגדו כל צורריו יפיח בהם׃

10:6b.PSA.010.006 אמר בלבו בל אמוט לדר ודר אשר לא ברע׃

10:7b.PSA.010.007 אלה פיהו מלא ומרמות ותך תחת לשונו עמל ואון׃

10:8b.PSA.010.008 ישב במארב חצרים במסתרים יהרג נקי עיניו לחלכה יצפנו׃

10:9b.PSA.010.009 יארב במסתר כאריה בסכה יארב לחטוף עני יחטף עני במשכו ברשתו׃

10:10b.PSA.010.010 ודכה ישח ונפל בעצומיו חלכאים׃

10:11b.PSA.010.011 אמר בלבו שכח אל הסתיר פניו בל ראה לנצח׃

10:12b.PSA.010.012 קומה יהוה אל נשא ידך אל תשכח עניים׃

10:13b.PSA.010.013 על מה נאץ רשע אלהים אמר בלבו לא תדרש׃

10:14b.PSA.010.014 ראתה כי אתה עמל וכעס תביט לתת בידך עליך יעזב חלכה יתום אתה היית עוזר׃

10:15b.PSA.010.015 שבר זרוע רשע ורע תדרוש רשעו בל תמצא׃

10:16b.PSA.010.016 יהוה מלך עולם ועד אבדו גוים מארצו׃

10:17b.PSA.010.017 תאות ענוים שמעת יהוה תכין לבם תקשיב אזנך׃

10:18b.PSA.010.018 לשפט יתום ודך בל יוסיף עוד לערץ אנוש מן הארץ׃

11

11:1b.PSA.011.001 למנצח לדוד ביהוה חסיתי איך תאמרו לנפשי נודו הרכם צפור׃

11:2b.PSA.011.002 כי הנה הרשעים ידרכון קשת כוננו חצם על יתר לירות במו אפל לישרי לב׃

11:3b.PSA.011.003 כי השתות יהרסון צדיק מה פעל׃

11:4b.PSA.011.004 יהוה בהיכל קדשו יהוה בשמים כסאו עיניו יחזו עפעפיו יבחנו בני אדם׃

11:5b.PSA.011.005 יהוה צדיק יבחן ורשע ואהב חמס שנאה נפשו׃

11:6b.PSA.011.006 ימטר על רשעים פחים אש וגפרית ורוח זלעפות מנת כוסם׃

11:7b.PSA.011.007 כי צדיק יהוה צדקות אהב ישר יחזו פנימו׃

12

12:1b.PSA.012.001 למנצח על השמינית מזמור לדוד הושיעה יהוה כי גמר חסיד כי פסו אמונים מבני אדם׃

12:2b.PSA.012.002 שוא ידברו איש את רעהו שפת חלקות בלב ולב ידברו׃

12:3b.PSA.012.003 יכרת יהוה כל שפתי חלקות לשון מדברת גדלות׃

12:4b.PSA.012.004 אשר אמרו ללשננו נגביר שפתינו אתנו מי אדון לנו׃

12:5b.PSA.012.005 משד עניים מאנקת אביונים עתה אקום יאמר יהוה אשית בישע יפיח לו׃

12:6b.PSA.012.006 אמרות יהוה אמרות טהרות כסף צרוף בעליל לארץ מזקק שבעתים׃

12:7b.PSA.012.007 אתה יהוה תשמרם תצרנו מן הדור זו לעולם׃

12:8b.PSA.012.008 סביב רשעים יתהלכון כרם זלות לבני אדם׃

13

13:1b.PSA.013.001 למנצח מזמור לדוד עד אנה יהוה תשכחני נצח עד אנה תסתיר את פניך ממני׃

13:2b.PSA.013.002 עד אנה אשית עצות בנפשי יגון בלבבי יומם עד אנה ירום איבי עלי׃

13:3b.PSA.013.003 הביטה ענני יהוה אלהי האירה עיני פן אישן המות׃

13:4b.PSA.013.004 פן יאמר איבי יכלתיו צרי יגילו כי אמוט׃

13:5b.PSA.013.005 ואני בחסדך בטחתי יגל לבי בישועתך׃

13:6b.PSA.013.006 אשירה ליהוה כי גמל עלי׃

14

14:1b.PSA.014.001 למנצח לדוד אמר נבל בלבו אין אלהים השחיתו התעיבו עלילה אין עשה טוב׃

14:2b.PSA.014.002 יהוה משמים השקיף על בני אדם לראות היש משכיל דרש את אלהים׃

14:3b.PSA.014.003 הכל סר יחדו נאלחו אין עשה טוב אין גם אחד׃

14:4b.PSA.014.004 הלא ידעו כל פעלי און אכלי עמי אכלו לחם יהוה לא קראו׃

14:5b.PSA.014.005 שם פחדו פחד כי אלהים בדור צדיק׃

14:6b.PSA.014.006 עצת עני תבישו כי יהוה מחסהו׃

14:7b.PSA.014.007 מי יתן מציון ישועת ישראל בשוב יהוה שבות עמו יגל יעקב ישמח ישראל׃

15

15:1b.PSA.015.001 מזמור לדוד יהוה מי יגור באהלך מי ישכן בהר קדשך׃

15:2b.PSA.015.002 הולך תמים ופעל צדק ודבר אמת בלבבו׃

15:3b.PSA.015.003 לא רגל על לשנו לא עשה לרעהו רעה וחרפה לא נשא על קרבו׃

15:4b.PSA.015.004 נבזה בעיניו נמאס ואת יראי יהוה יכבד נשבע להרע ולא ימר׃

15:5b.PSA.015.005 כספו לא נתן בנשך ושחד על נקי לא לקח עשה אלה לא ימוט לעולם׃

16

16:1b.PSA.016.001 מכתם לדוד שמרני אל כי חסיתי בך׃

16:2b.PSA.016.002 אמרת ליהוה אדני אתה טובתי בל עליך׃

16:3b.PSA.016.003 לקדושים אשר בארץ המה ואדירי כל חפצי בם׃

16:4b.PSA.016.004 ירבו עצבותם אחר מהרו בל אסיך נסכיהם מדם ובל אשא את שמותם על שפתי׃

16:5b.PSA.016.005 יהוה מנת חלקי וכוסי אתה תומיך גורלי׃

16:6b.PSA.016.006 חבלים נפלו לי בנעמים אף נחלת שפרה עלי׃

16:7b.PSA.016.007 אברך את יהוה אשר יעצני אף לילות יסרוני כליותי׃

16:8b.PSA.016.008 שויתי יהוה לנגדי תמיד כי מימיני בל אמוט׃

16:9b.PSA.016.009 לכן שמח לבי ויגל כבודי אף בשרי ישכן לבטח׃

16:10b.PSA.016.010 כי לא תעזב נפשי לשאול לא תתן חסידך לראות שחת׃

16:11b.PSA.016.011 תודיעני ארח חיים שבע שמחות את פניך נעמות בימינך נצח׃

17

17:1b.PSA.017.001 תפלה לדוד שמעה יהוה צדק הקשיבה רנתי האזינה תפלתי בלא שפתי מרמה׃

17:2b.PSA.017.002 מלפניך משפטי יצא עיניך תחזינה מישרים׃

17:3b.PSA.017.003 בחנת לבי פקדת לילה צרפתני בל תמצא זמתי בל יעבר פי׃

17:4b.PSA.017.004 לפעלות אדם בדבר שפתיך אני שמרתי ארחות פריץ׃

17:5b.PSA.017.005 תמך אשרי במעגלותיך בל נמוטו פעמי׃

17:6b.PSA.017.006 אני קראתיך כי תענני אל הט אזנך לי שמע אמרתי׃

17:7b.PSA.017.007 הפלה חסדיך מושיע חוסים ממתקוממים בימינך׃

17:8b.PSA.017.008 שמרני כאישון בת עין בצל כנפיך תסתירני׃

17:9b.PSA.017.009 מפני רשעים זו שדוני איבי בנפש יקיפו עלי׃

17:10b.PSA.017.010 חלבמו סגרו פימו דברו בגאות׃

17:11b.PSA.017.011 אשרינו עתה סבבוני עיניהם ישיתו לנטות בארץ׃

17:12b.PSA.017.012 דמינו כאריה יכסוף לטרוף וככפיר ישב במסתרים׃

17:13b.PSA.017.013 קומה יהוה קדמה פניו הכריעהו פלטה נפשי מרשע חרבך׃

17:14b.PSA.017.014 ממתים ידך יהוה ממתים מחלד חלקם בחיים וצפינך תמלא בטנם ישבעו בנים והניחו יתרם לעולליהם׃

17:15b.PSA.017.015 אני בצדק אחזה פניך אשבעה בהקיץ תמונתך׃

18

18:1b.PSA.018.001 למנצח לעבד יהוה לדוד אשר דבר ליהוה את דברי השירה הזאת ביום הציל יהוה אותו מכף כל איביו ומיד שאול ויאמר ארחמך יהוה חזקי׃

18:2b.PSA.018.002 יהוה סלעי ומצודתי ומפלטי אלי צורי אחסה בו מגני וקרן ישעי משגבי׃

18:3b.PSA.018.003 מהלל אקרא יהוה ומן איבי אושע׃

18:4b.PSA.018.004 אפפוני חבלי מות ונחלי בליעל יבעתוני׃

18:5b.PSA.018.005 חבלי שאול סבבוני קדמוני מוקשי מות׃

18:6b.PSA.018.006 בצר לי אקרא יהוה ואל אלהי אשוע ישמע מהיכלו קולי ושועתי לפניו תבוא באזניו׃

18:7b.PSA.018.007 ותגעש ותרעש הארץ ומוסדי הרים ירגזו ויתגעשו כי חרה לו׃

18:8b.PSA.018.008 עלה עשן באפו ואש מפיו תאכל גחלים בערו ממנו׃

18:9b.PSA.018.009 ויט שמים וירד וערפל תחת רגליו׃

18:10b.PSA.018.010 וירכב על כרוב ויעף וידא על כנפי רוח׃

18:11b.PSA.018.011 ישת חשך סתרו סביבותיו סכתו חשכת מים עבי שחקים׃

18:12b.PSA.018.012 מנגה נגדו עביו עברו ברד וגחלי אש׃

18:13b.PSA.018.013 וירעם בשמים יהוה ועליון יתן קלו ברד וגחלי אש׃

18:14b.PSA.018.014 וישלח חציו ויפיצם וברקים רב ויהמם׃

18:15b.PSA.018.015 ויראו אפיקי מים ויגלו מוסדות תבל מגערתך יהוה מנשמת רוח אפך׃

18:16b.PSA.018.016 ישלח ממרום יקחני ימשני ממים רבים׃

18:17b.PSA.018.017 יצילני מאיבי עז ומשנאי כי אמצו ממני׃

18:18b.PSA.018.018 יקדמוני ביום אידי ויהי יהוה למשען לי׃

18:19b.PSA.018.019 ויוציאני למרחב יחלצני כי חפץ בי׃

18:20b.PSA.018.020 יגמלני יהוה כצדקי כבר ידי ישיב לי׃

18:21b.PSA.018.021 כי שמרתי דרכי יהוה ולא רשעתי מאלהי׃

18:22b.PSA.018.022 כי כל משפטיו לנגדי וחקתיו לא אסיר מני׃

18:23b.PSA.018.023 ואהי תמים עמו ואשתמר מעוני׃

18:24b.PSA.018.024 וישב יהוה לי כצדקי כבר ידי לנגד עיניו׃

18:25b.PSA.018.025 עם חסיד תתחסד עם גבר תמים תתמם׃

18:26b.PSA.018.026 עם נבר תתברר ועם עקש תתפתל׃

18:27b.PSA.018.027 כי אתה עם עני תושיע ועינים רמות תשפיל׃

18:28b.PSA.018.028 כי אתה תאיר נרי יהוה אלהי יגיה חשכי׃

18:29b.PSA.018.029 כי בך ארץ גדוד ובאלהי אדלג שור׃

18:30b.PSA.018.030 האל תמים דרכו אמרת יהוה צרופה מגן הוא לכל החסים בו׃

18:31b.PSA.018.031 כי מי אלוה מבלעדי יהוה ומי צור זולתי אלהינו׃

18:32b.PSA.018.032 האל המאזרני חיל ויתן תמים דרכי׃

18:33b.PSA.018.033 משוה רגלי כאילות ועל במתי יעמידני׃

18:34b.PSA.018.034 מלמד ידי למלחמה ונחתה קשת נחושה זרועתי׃

18:35b.PSA.018.035 ותתן לי מגן ישעך וימינך תסעדני וענותך תרבני׃

18:36b.PSA.018.036 תרחיב צעדי תחתי ולא מעדו קרסלי׃

18:37b.PSA.018.037 ארדוף אויבי ואשיגם ולא אשוב עד כלותם׃

18:38b.PSA.018.038 אמחצם ולא יכלו קום יפלו תחת רגלי׃

18:39b.PSA.018.039 ותאזרני חיל למלחמה תכריע קמי תחתי׃

18:40b.PSA.018.040 ואיבי נתתה לי ערף ומשנאי אצמיתם׃

18:41b.PSA.018.041 ישועו ואין מושיע על יהוה ולא ענם׃

18:42b.PSA.018.042 ואשחקם כעפר על פני רוח כטיט חוצות אריקם׃

18:43b.PSA.018.043 תפלטני מריבי עם תשימני לראש גוים עם לא ידעתי יעבדוני׃

18:44b.PSA.018.044 לשמע אזן ישמעו לי בני נכר יכחשו לי׃

18:45b.PSA.018.045 בני נכר יבלו ויחרגו ממסגרותיהם׃

18:46b.PSA.018.046 חי יהוה וברוך צורי וירום אלוהי ישעי׃

18:47b.PSA.018.047 האל הנותן נקמות לי וידבר עמים תחתי׃

18:48b.PSA.018.048 מפלטי מאיבי אף מן קמי תרוממני מאיש חמס תצילני׃

18:49b.PSA.018.049 על כן אודך בגוים יהוה ולשמך אזמרה׃

18:50b.PSA.018.050 מגדל ישועות מלכו ועשה חסד למשיחו לדוד ולזרעו עד עולם׃

19

19:1b.PSA.019.001 למנצח מזמור לדוד השמים מספרים כבוד אל ומעשה ידיו מגיד הרקיע׃

19:2b.PSA.019.002 יום ליום יביע אמר ולילה ללילה יחוה דעת׃

19:3b.PSA.019.003 אין אמר ואין דברים בלי נשמע קולם׃

19:4b.PSA.019.004 בכל הארץ יצא קום ובקצה תבל מליהם לשמש שם אהל בהם׃

19:5b.PSA.019.005 והוא כחתן יצא מחפתו ישיש כגבור לרוץ ארח׃

19:6b.PSA.019.006 מקצה השמים מוצאו ותקופתו על קצותם ואין נסתר מחמתו׃

19:7b.PSA.019.007 תורת יהוה תמימה משיבת נפש עדות יהוה נאמנה מחכימת פתי׃

19:8b.PSA.019.008 פקודי יהוה ישרים משמחי לב מצות יהוה ברה מאירת עינים׃

19:9b.PSA.019.009 יראת יהוה טהורה עומדת לעד משפטי יהוה אמת צדקו יחדו׃

19:10b.PSA.019.010 הנחמדים מזהב ומפז רב ומתוקים מדבש ונפת צופים׃

19:11b.PSA.019.011 גם עבדך נזהר בהם בשמרם עקב רב׃

19:12b.PSA.019.012 שגיאות מי יבין מנסתרות נקני׃

19:13b.PSA.019.013 גם מזדים חשך עבדך אל ימשלו בי אז איתם ונקיתי מפשע רב׃

19:14b.PSA.019.014 יהיו לרצון אמרי פי והגיון לבי לפניך יהוה צורי וגאלי׃

20

20:1b.PSA.020.001 למנצח מזמור לדוד יענך יהוה ביום צרה ישגבך שם אלהי יעקב׃

20:2b.PSA.020.002 ישלח עזרך מקדש ומציון יסעדך׃

20:3b.PSA.020.003 יזכר כל מנחתך ועולתך ידשנה סלה׃

20:4b.PSA.020.004 יתן לך כלבבך וכל עצתך ימלא׃

20:5b.PSA.020.005 נרננה בישועתך ובשם אלהינו נדגל ימלא יהוה כל משאלותיך׃

20:6b.PSA.020.006 עתה ידעתי כי הושיע יהוה משיחו יענהו משמי קדשו בגברות ישע ימינו׃

20:7b.PSA.020.007 אלה ברכב ואלה בסוסים ואנחנו בשם יהוה אלהינו נזכיר׃

20:8b.PSA.020.008 המה כרעו ונפלו ואנחנו קמנו ונתעודד׃

20:9b.PSA.020.009 יהוה הושיעה המלך יעננו ביום קראנו׃

21

21:1b.PSA.021.001 למנצח מזמור לדוד יהוה בעזך ישמח מלך ובישועתך מה יגיל מאד׃

21:2b.PSA.021.002 תאות לבו נתתה לו וארשת שפתיו בל מנעת סלה׃

21:3b.PSA.021.003 כי תקדמנו ברכות טוב תשית לראשו עטרת פז׃

21:4b.PSA.021.004 חיים שאל ממך נתתה לו ארך ימים עולם ועד׃

21:5b.PSA.021.005 גדול כבודו בישועתך הוד והדר תשוה עליו׃

21:6b.PSA.021.006 כי תשיתהו ברכות לעד תחדהו בשמחה את פניך׃

21:7b.PSA.021.007 כי המלך בטח ביהוה ובחסד עליון בל ימוט׃

21:8b.PSA.021.008 תמצא ידך לכל איביך ימינך תמצא שנאיך׃

21:9b.PSA.021.009 תשיתמו כתנור אש לעת פניך יהוה באפו יבלעם ותאכלם אש׃

21:10b.PSA.021.010 פרימו מארץ תאבד וזרעם מבני אדם׃

21:11b.PSA.021.011 כי נטו עליך רעה חשבו מזמה בל יוכלו׃

21:12b.PSA.021.012 כי תשיתמו שכם במיתריך תכונן על פניהם׃

21:13b.PSA.021.013 רומה יהוה בעזך נשירה ונזמרה גבורתך׃

22

22:1b.PSA.022.001 למנצח על אילת השחר מזמור לדוד אלי אלי למה עזבתני רחוק מישועתי דברי שאגתי׃

22:2b.PSA.022.002 אלהי אקרא יומם ולא תענה ולילה ולא דומיה לי׃

22:3b.PSA.022.003 ואתה קדוש יושב תהלות ישראל׃

22:4b.PSA.022.004 בך בטחו אבתינו בטחו ותפלטמו׃

22:5b.PSA.022.005 אליך זעקו ונמלטו בך בטחו ולא בושו׃

22:6b.PSA.022.006 ואנכי תולעת ולא איש חרפת אדם ובזוי עם׃

22:7b.PSA.022.007 כל ראי ילעגו לי יפטירו בשפה יניעו ראש׃

22:8b.PSA.022.008 גל אל יהוה יפלטהו יצילהו כי חפץ בו׃

22:9b.PSA.022.009 כי אתה גחי מבטן מבטיחי על שדי אמי׃

22:10b.PSA.022.010 עליך השלכתי מרחם מבטן אמי אלי אתה׃

22:11b.PSA.022.011 אל תרחק ממני כי צרה קרובה כי אין עוזר׃

22:12b.PSA.022.012 סבבוני פרים רבים אבירי בשן כתרוני׃

22:13b.PSA.022.013 פצו עלי פיהם אריה טרף ושאג׃

22:14b.PSA.022.014 כמים נשפכתי והתפרדו כל עצמותי היה לבי כדונג נמס בתוך מעי׃

22:15b.PSA.022.015 יבש כחרש כחי ולשוני מדבק מלקוחי ולעפר מות תשפתני׃

22:16b.PSA.022.016 כי סבבוני כלבים עדת מרעים הקיפוני כארי ידי ורגלי׃

22:17b.PSA.022.017 אספר כל עצמותי המה יביטו יראו בי׃

22:18b.PSA.022.018 יחלקו בגדי להם ועל לבושי יפילו גורל׃

22:19b.PSA.022.019 ואתה יהוה אל תרחק אילותי לעזרתי חושה׃

22:20b.PSA.022.020 הצילה מחרב נפשי מיד כלב יחידתי׃

22:21b.PSA.022.021 הושיעני מפי אריה ומקרני רמים עניתני׃

22:22b.PSA.022.022 אספרה שמך לאחי בתוך קהל אהללך׃

22:23b.PSA.022.023 יראי יהוה הללוהו כל זרע יעקב כבדוהו וגורו ממנו כל זרע ישראל׃

22:24b.PSA.022.024 כי לא בזה ולא שקץ ענות עני ולא הסתיר פניו ממנו ובשועו אליו שמע׃

22:25b.PSA.022.025 מאתך תהלתי בקהל רב נדרי אשלם נגד יראיו׃

22:26b.PSA.022.026 יאכלו ענוים וישבעו יהללו יהוה דרשיו יחי לבבכם לעד׃

22:27b.PSA.022.027 יזכרו וישבו אל יהוה כל אפסי ארץ וישתחוו לפניך כל משפחות גוים׃

22:28b.PSA.022.028 כי ליהוה המלוכה ומשל בגוים׃

22:29b.PSA.022.029 אכלו וישתחוו כל דשני ארץ לפניו יכרעו כל יורדי עפר ונפשו לא חיה׃

22:30b.PSA.022.030 זרע יעבדנו יספר לאדני לדור׃

22:31b.PSA.022.031 יבאו ויגידו צדקתו לעם נולד כי עשה׃

23

23:1b.PSA.023.001 מזמור לדוד יהוה רעי לא אחסר׃

23:2b.PSA.023.002 בנאות דשא ירביצני על מי מנחות ינהלני׃

23:3b.PSA.023.003 נפשי ישובב ינחני במעגלי צדק למען שמו׃

23:4b.PSA.023.004 גם כי אלך בגיא צלמות לא אירא רע כי אתה עמדי שבטך ומשענתך המה ינחמני׃

23:5b.PSA.023.005 תערך לפני שלחן נגד צררי דשנת בשמן ראשי כוסי רויה׃

23:6b.PSA.023.006 אך טוב וחסד ירדפוני כל ימי חיי ושבתי בבית יהוה לארך ימים׃

24

24:1b.PSA.024.001 לדוד מזמור ליהוה הארץ ומלואה תבל וישבי בה׃

24:2b.PSA.024.002 כי הוא על ימים יסדה ועל נהרות יכוננה׃

24:3b.PSA.024.003 מי יעלה בהר יהוה ומי יקום במקום קדשו׃

24:4b.PSA.024.004 נקי כפים ובר לבב אשר לא נשא לשוא נפשי ולא נשבע למרמה׃

24:5b.PSA.024.005 ישא ברכה מאת יהוה וצדקה מאלהי ישעו׃

24:6b.PSA.024.006 זה דור דרשו מבקשי פניך יעקב סלה׃

24:7b.PSA.024.007 שאו שערים ראשיכם והנשאו פתחי עולם ויבוא מלך הכבוד׃

24:8b.PSA.024.008 מי זה מלך הכבוד יהוה עזוז וגבור יהוה גבור מלחמה׃

24:9b.PSA.024.009 שאו שערים ראשיכם ושאו פתחי עולם ויבא מלך הכבוד׃

24:10b.PSA.024.010 מי הוא זה מלך הכבוד יהוה צבאות הוא מלך הכבוד סלה׃

25

25:1b.PSA.025.001 לדוד אליך יהוה נפשי אשא׃

25:2b.PSA.025.002 אלהי בך בטחתי אל אבושה אל יעלצו איבי לי׃

25:3b.PSA.025.003 גם כל קויך לא יבשו יבשו הבוגדים ריקם׃

25:4b.PSA.025.004 דרכיך יהוה הודיעני ארחותיך למדני׃

25:5b.PSA.025.005 הדריכני באמתך ולמדני כי אתה אלהי ישעי אותך קויתי כל היום׃

25:6b.PSA.025.006 זכר רחמיך יהוה וחסדיך כי מעולם המה׃

25:7b.PSA.025.007 חטאות נעורי ופשעי אל תזכר כחסדך זכר לי אתה למען טובך יהוה׃

25:8b.PSA.025.008 טוב וישר יהוה על כן יורה חטאים בדרך׃

25:9b.PSA.025.009 ידרך ענוים במשפט וילמד ענוים דרכו׃

25:10b.PSA.025.010 כל ארחות יהוה חסד ואמת לנצרי בריתו ועדתיו׃

25:11b.PSA.025.011 למען שמך יהוה וסלחת לעוני כי רב הוא׃

25:12b.PSA.025.012 מי זה האיש ירא יהוה יורנו בדרך יבחר׃

25:13b.PSA.025.013 נפשו בטוב תלין וזרעו יירש ארץ׃

25:14b.PSA.025.014 סוד יהוה ליראיו ובריתו להודיעם׃

25:15b.PSA.025.015 עיני תמיד אל יהוה כי הוא יוציא מרשת רגלי׃

25:16b.PSA.025.016 פנה אלי וחנני כי יחיד ועני אני׃

25:17b.PSA.025.017 צרות לבבי הרחיבו ממצוקותי הוציאני׃

25:18b.PSA.025.018 ראה עניי ועמלי ושא לכל חטאותי׃

25:19b.PSA.025.019 ראה אויבי כי רבו ושנאת חמס שנאוני׃

25:20b.PSA.025.020 שמרה נפשי והצילני אל אבוש כי חסיתי בך׃

25:21b.PSA.025.021 תם וישר יצרוני כי קויתיך׃

25:22b.PSA.025.022 פדה אלהים את ישראל מכל צרותיו׃

26

26:1b.PSA.026.001 לדוד שפטני יהוה כי אני בתמי הלכתי וביהוה בטחתי לא אמעד׃

26:2b.PSA.026.002 בחנני יהוה ונסני צרופה כליותי ולבי׃

26:3b.PSA.026.003 כי חסדך לנגד עיני והתהלכתי באמתך׃

26:4b.PSA.026.004 לא ישבתי עם מתי שוא ועם נעלמים לא אבוא׃

26:5b.PSA.026.005 שנאתי קהל מרעים ועם רשעים לא אשב׃

26:6b.PSA.026.006 ארחץ בנקיון כפי ואסבבה את מזבחך יהוה׃

26:7b.PSA.026.007 לשמע בקול תודה ולספר כל נפלאותיך׃

26:8b.PSA.026.008 יהוה אהבתי מעון ביתך ומקום משכן כבודך׃

26:9b.PSA.026.009 אל תאסף עם חטאים נפשי ועם אנשי דמים חיי׃

26:10b.PSA.026.010 אשר בידיהם זמה וימינם מלאה שחד׃

26:11b.PSA.026.011 ואני בתמי אלך פדני וחנני׃

26:12b.PSA.026.012 רגלי עמדה במישור במקהלים אברך יהוה׃

27

27:1b.PSA.027.001 לדוד יהוה אורי וישעי ממי אירא יהוה מעוז חיי ממי אפחד׃

27:2b.PSA.027.002 בקרב עלי מרעים לאכל את בשרי צרי ואיבי לי המה כשלו ונפלו׃

27:3b.PSA.027.003 אם תחנה עלי מחנה לא יירא לבי אם תקום עלי מלחמה בזאת אני בוטח׃

27:4b.PSA.027.004 אחת שאלתי מאת יהוה אותה אבקש שבתי בבית יהוה כל ימי חיי לחזות בנעם יהוה ולבקר בהיכלו׃

27:5b.PSA.027.005 כי יצפנני בסכה ביום רעה יסתרני בסתר אהלו בצור ירוממני׃

27:6b.PSA.027.006 ועתה ירום ראשי על איבי סביבותי ואזבחה באהלו זבחי תרועה אשירה ואזמרה ליהוה׃

27:7b.PSA.027.007 שמע יהוה קולי אקרא וחנני וענני׃

27:8b.PSA.027.008 לך אמר לבי בקשו פני את פניך יהוה אבקש׃

27:9b.PSA.027.009 אל תסתר פניך ממני אל תט באף עבדך עזרתי היית אל תטשני ואל תעזבני אלהי ישעי׃

27:10b.PSA.027.010 כי אבי ואמי עזבוני ויהוה יאספני׃

27:11b.PSA.027.011 הורני יהוה דרכך ונחני בארח מישור למען שוררי׃

27:12b.PSA.027.012 אל תתנני בנפש צרי כי קמו בי עדי שקר ויפח חמס׃

27:13b.PSA.027.013 לולא האמנתי לראות בטוב יהוה בארץ חיים׃

27:14b.PSA.027.014 קוה אל יהוה חזק ויאמץ לבך וקוה אל יהוה׃

28

28:1b.PSA.028.001 לדוד אליך יהוה אקרא צורי אל תחרש ממני פן תחשה ממני ונמשלתי עם יורדי בור׃

28:2b.PSA.028.002 שמע קול תחנוני בשועי אליך בנשאי ידי אל דביר קדשך׃

28:3b.PSA.028.003 אל תמשכני עם רשעים ועם פעלי און דברי שלום עם רעיהם ורעה בלבבם׃

28:4b.PSA.028.004 תן להם כפעלם וכרע מעלליהם כמעשה ידיהם תן להם השב גמולם להם׃

28:5b.PSA.028.005 כי לא יבינו אל פעלת יהוה ואל מעשה ידיו יהרסם ולא יבנם׃

28:6b.PSA.028.006 ברוך יהוה כי שמע קול תחנוני׃

28:7b.PSA.028.007 יהוה עזי ומגני בו בטח לבי ונעזרתי ויעלז לבי ומשירי אהודנו׃

28:8b.PSA.028.008 יהוה עז למו ומעוז ישועות משיחו הוא׃

28:9b.PSA.028.009 הושיעה את עמך וברך את נחלתך ורעם ונשאם עד העולם׃

29

29:1b.PSA.029.001 מזמור לדוד הבו ליהוה בני אלים הבו ליהוה כבוד ועז׃

29:2b.PSA.029.002 הבו ליהוה כבוד שמו השתחוו ליהוה בהדרת קדש׃

29:3b.PSA.029.003 קול יהוה על המים אל הכבוד הרעים יהוה על מים רבים׃

29:4b.PSA.029.004 קול יהוה בכח קול יהוה בהדר׃

29:5b.PSA.029.005 קול יהוה שבר ארזים וישבר יהוה את ארזי הלבנון׃

29:6b.PSA.029.006 וירקידם כמו עגל לבנון ושרין כמו בן ראמים׃

29:7b.PSA.029.007 קול יהוה חצב להבות אש׃

29:8b.PSA.029.008 קול יהוה יחיל מדבר יחיל יהוה מדבר קדש׃

29:9b.PSA.029.009 קול יהוה יחולל אילות ויחשף יערות ובהיכלו כלו אמר כבוד׃

29:10b.PSA.029.010 יהוה למבול ישב וישב יהוה מלך לעולם׃

29:11b.PSA.029.011 יהוה עז לעמו יתן יהוה יברך את עמו בשלום׃

30

30:1b.PSA.030.001 מזמור שיר חנכת הבית לדוד ארוממך יהוה כי דליתני ולא שמחת איבי לי׃

30:2b.PSA.030.002 יהוה אלהי שועתי אליך ותרפאני׃

30:3b.PSA.030.003 יהוה העלית מן שאול נפשי חייתני מיורדי בור׃

30:4b.PSA.030.004 זמרו ליהוה חסידיו והודו לזכר קדשו׃

30:5b.PSA.030.005 כי רגע באפו חיים ברצונו בערב ילין בכי ולבקר רנה׃

30:6b.PSA.030.006 ואני אמרתי בשלוי בל אמוט לעולם׃

30:7b.PSA.030.007 יהוה ברצונך העמדתה להררי עז הסתרת פניך הייתי נבהל׃

30:8b.PSA.030.008 אליך יהוה אקרא ואל אדני אתחנן׃

30:9b.PSA.030.009 מה בצע בדמי ברדתי אל שחת היודך עפר היגיד אמתך׃

30:10b.PSA.030.010 שמע יהוה וחנני יהוה היה עזר לי׃

30:11b.PSA.030.011 הפכת מספדי למחול לי פתחת שקי ותאזרני שמחה׃

30:12b.PSA.030.012 למען יזמרך כבוד ולא ידם יהוה אלהי לעולם אודך׃

31

31:1b.PSA.031.001 למנצח מזמור לדוד בך יהוה חסיתי אל אבושה לעולם בצדקתך פלטני׃

31:2b.PSA.031.002 הטה אלי אזנך מהרה הצילני היה לי לצור מעוז לבית מצודות להושיעני׃

31:3b.PSA.031.003 כי סלעי ומצודתי אתה ולמען שמך תנחני ותנהלני׃

31:4b.PSA.031.004 תוציאני מרשת זו טמנו לי כי אתה מעוזי׃

31:5b.PSA.031.005 בידך אפקיד רוחי פדיתה אותי יהוה אל אמת׃

31:6b.PSA.031.006 שנאתי השמרים הבלי שוא ואני אל יהוה בטחתי׃

31:7b.PSA.031.007 אגילה ואשמחה בחסדך אשר ראית את עניי ידעת בצרות נפשי׃

31:8b.PSA.031.008 ולא הסגרתני ביד אויב העמדת במרחב רגלי׃

31:9b.PSA.031.009 חנני יהוה כי צר לי עששה בכעס עיני נפשי ובטני׃

31:10b.PSA.031.010 כי כלו ביגון חיי ושנותי באנחה כשל בעוני כחי ועצמי עששו׃

31:11b.PSA.031.011 מכל צררי הייתי חרפה ולשכני מאד ופחד למידעי ראי בחוץ נדדו ממני׃

31:12b.PSA.031.012 נשכחתי כמת מלב הייתי ככלי אבד׃

31:13b.PSA.031.013 כי שמעתי דבת רבים מגור מסביב בהוסדם יחד עלי לקחת נפשי זממו׃

31:14b.PSA.031.014 ואני עליך בטחתי יהוה אמרתי אלהי אתה׃

31:15b.PSA.031.015 בידך עתתי הצילני מיד אויבי ומרדפי׃

31:16b.PSA.031.016 האירה פניך על עבדך הושיעני בחסדך׃

31:17b.PSA.031.017 יהוה אל אבושה כי קראתיך יבשו רשעים ידמו לשאול׃

31:18b.PSA.031.018 תאלמנה שפתי שקר הדברות על צדיק עתק בגאוה ובוז׃

31:19b.PSA.031.019 מה רב טובך אשר צפנת ליראיך פעלת לחסים בך נגד בני אדם׃

31:20b.PSA.031.020 תסתירם בסתר פניך מרכסי איש תצפנם בסכה מריב לשנות׃

31:21b.PSA.031.021 ברוך יהוה כי הפליא חסדו לי בעיר מצור׃

31:22b.PSA.031.022 ואני אמרתי בחפזי נגרזתי מנגד עיניך אכן שמעת קול תחנוני בשועי אליך׃

31:23b.PSA.031.023 אהבו את יהוה כל חסידיו אמונים נצר יהוה ומשלם על יתר עשה גאוה׃

31:24b.PSA.031.024 חזקו ויאמץ לבבכם כל המיחלים ליהוה׃

32

32:1b.PSA.032.001 לדוד משכיל אשרי נשוי פשע כסוי חטאה׃

32:2b.PSA.032.002 אשרי אדם לא יחשב יהוה לו עון ואין ברוחו רמיה׃

32:3b.PSA.032.003 כי החרשתי בלו עצמי בשאגתי כל היום׃

32:4b.PSA.032.004 כי יומם ולילה תכבד עלי ידך נהפך לשדי בחרבני קיץ סלה׃

32:5b.PSA.032.005 חטאתי אודיעך ועוני לא כסיתי אמרתי אודה עלי פשעי ליהוה ואתה נשאת עון חטאתי סלה׃

32:6b.PSA.032.006 על זאת יתפלל כל חסיד אליך לעת מצא רק לשטף מים רבים אליו לא יגיעו׃

32:7b.PSA.032.007 אתה סתר לי מצר תצרני רני פלט תסובבני סלה׃

32:8b.PSA.032.008 אשכילך ואורך בדרך זו תלך איעצה עליך עיני׃

32:9b.PSA.032.009 אל תהיו כסוס כפרד אין הבין במתג ורסן עדיו לבלום בל קרב אליך׃

32:10b.PSA.032.010 רבים מכאובים לרשע והבוטח ביהוה חסד יסובבנו׃

32:11b.PSA.032.011 שמחו ביהוה וגילו צדיקים והרנינו כל ישרי לב׃

33

33:1b.PSA.033.001 רננו צדיקים ביהוה לישרים נאוה תהלה׃

33:2b.PSA.033.002 הודו ליהוה בכנור בנבל עשור זמרו לו׃

33:3b.PSA.033.003 שירו לו שיר חדש היטיבו נגן בתרועה׃

33:4b.PSA.033.004 כי ישר דבר יהוה וכל מעשהו באמונה׃

33:5b.PSA.033.005 אהב צדקה ומשפט חסד יהוה מלאה הארץ׃

33:6b.PSA.033.006 בדבר יהוה שמים נעשו וברוח פיו כל צבאם׃

33:7b.PSA.033.007 כנס כנד מי הים נתן באצרות תהומות׃

33:8b.PSA.033.008 ייראו מיהוה כל הארץ ממנו יגורו כל ישבי תבל׃

33:9b.PSA.033.009 כי הוא אמר ויהי הוא צוה ויעמד׃

33:10b.PSA.033.010 יהוה הפיר עצת גוים הניא מחשבות עמים׃

33:11b.PSA.033.011 עצת יהוה לעולם תעמד מחשבות לבו לדר ודר׃

33:12b.PSA.033.012 אשרי הגוי אשר יהוה אלהיו העם בחר לנחלה לו׃

33:13b.PSA.033.013 משמים הביט יהוה ראה את כל בני האדם׃

33:14b.PSA.033.014 ממכון שבתו השגיח אל כל ישבי הארץ׃

33:15b.PSA.033.015 היצר יחד לבם המבין אל כל מעשיהם׃

33:16b.PSA.033.016 אין המלך נושע ברב חיל גבור לא ינצל ברב כח׃

33:17b.PSA.033.017 שקר הסוס לתשועה וברב חילו לא ימלט׃

33:18b.PSA.033.018 הנה עין יהוה אל יראיו למיחלים לחסדו׃

33:19b.PSA.033.019 להציל ממות נפשם ולחיותם ברעב׃

33:20b.PSA.033.020 נפשנו חכתה ליהוה עזרנו ומגננו הוא׃

33:21b.PSA.033.021 כי בו ישמח לבנו כי בשם קדשו בטחנו׃

33:22b.PSA.033.022 יהי חסדך יהוה עלינו כאשר יחלנו לך׃

34

34:1b.PSA.034.001 לדוד בשנותו את טעמו לפני אבימלך ויגרשהו וילך אברכה את יהוה בכל עת תמיד תהלתו בפי׃

34:2b.PSA.034.002 ביהוה תתהלל נפשי ישמעו ענוים וישמחו׃

34:3b.PSA.034.003 גדלו ליהוה אתי ונרוממה שמו יחדו׃

34:4b.PSA.034.004 דרשתי את יהוה וענני ומכל מגורותי הצילני׃

34:5b.PSA.034.005 הביטו אליו ונהרו ופניהם אל יחפרו׃

34:6b.PSA.034.006 זה עני קרא ויהוה שמע ומכל צרותיו הושיעו׃

34:7b.PSA.034.007 חנה מלאך יהוה סביב ליראיו ויחלצם׃

34:8b.PSA.034.008 טעמו וראו כי טוב יהוה אשרי הגבר יחסה בו׃

34:9b.PSA.034.009 יראו את יהוה קדשיו כי אין מחסור ליראיו׃

34:10b.PSA.034.010 כפירים רשו ורעבו ודרשי יהוה לא יחסרו כל טוב׃

34:11b.PSA.034.011 לכו בנים שמעו לי יראת יהוה אלמדכם׃

34:12b.PSA.034.012 מי האיש החפץ חיים אהב ימים לראות טוב׃

34:13b.PSA.034.013 נצר לשונך מרע ושפתיך מדבר מרמה׃

34:14b.PSA.034.014 סור מרע ועשה טוב בקש שלום ורדפהו׃

34:15b.PSA.034.015 עיני יהוה אל צדיקים ואזניו אל שועתם׃

34:16b.PSA.034.016 פני יהוה בעשי רע להכרית מארץ זכרם׃

34:17b.PSA.034.017 צעקו ויהוה שמע ומכל צרותם הצילם׃

34:18b.PSA.034.018 קרוב יהוה לנשברי לב ואת דכאי רוח יושיע׃

34:19b.PSA.034.019 רבות רעות צדיק ומכלם יצילנו יהוה׃

34:20b.PSA.034.020 שמר כל עצמותיו אחת מהנה לא נשברה׃

34:21b.PSA.034.021 תמותת רשע רעה ושנאי צדיק יאשמו׃

34:22b.PSA.034.022 פודה יהוה נפש עבדיו ולא יאשמו כל החסים בו׃

35

35:1b.PSA.035.001 לדוד ריבה יהוה את יריבי לחם את לחמי׃

35:2b.PSA.035.002 החזק מגן וצנה וקומה בעזרתי׃

35:3b.PSA.035.003 והרק חנית וסגר לקראת רדפי אמר לנפשי ישעתך אני׃

35:4b.PSA.035.004 יבשו ויכלמו מבקשי נפשי יסגו אחור ויחפרו חשבי רעתי׃

35:5b.PSA.035.005 יהיו כמץ לפני רוח ומלאך יהוה דוחה׃

35:6b.PSA.035.006 יהי דרכם חשך וחלקלקות ומלאך יהוה רדפם׃

35:7b.PSA.035.007 כי חנם טמנו לי שחת רשתם חנם חפרו לנפשי׃

35:8b.PSA.035.008 תבואהו שואה לא ידע ורשתו אשר טמן תלכדו בשואה יפל בה׃

35:9b.PSA.035.009 ונפשי תגיל ביהוה תשיש בישועתו׃

35:10b.PSA.035.010 כל עצמותי תאמרנה יהוה מי כמוך מציל עני מחזק ממנו ועני ואביון מגזלו׃

35:11b.PSA.035.011 יקומון עדי חמס אשר לא ידעתי ישאלוני׃

35:12b.PSA.035.012 ישלמוני רעה תחת טובה שכול לנפשי׃

35:13b.PSA.035.013 ואני בחלותם לבושי שק עניתי בצום נפשי ותפלתי על חיקי תשוב׃

35:14b.PSA.035.014 כרע כאח לי התהלכתי כאבל אם קדר שחותי׃

35:15b.PSA.035.015 ובצלעי שמחו ונאספו נאספו עלי נכים ולא ידעתי קרעו ולא דמו׃

35:16b.PSA.035.016 בחנפי לעגי מעוג חרק עלי שנימו׃

35:17b.PSA.035.017 אדני כמה תראה השיבה נפשי משאיהם מכפירים יחידתי׃

35:18b.PSA.035.018 אודך בקהל רב בעם עצום אהללך׃

35:19b.PSA.035.019 אל ישמחו לי איבי שקר שנאי חנם יקרצו עין׃

35:20b.PSA.035.020 כי לא שלום ידברו ועל רגעי ארץ דברי מרמות יחשבון׃

35:21b.PSA.035.021 וירחיבו עלי פיהם אמרו האח האח ראתה עינינו׃

35:22b.PSA.035.022 ראיתה יהוה אל תחרש אדני אל תרחק ממני׃

35:23b.PSA.035.023 העירה והקיצה למשפטי אלהי ואדני לריבי׃

35:24b.PSA.035.024 שפטני כצדקך יהוה אלהי ואל ישמחו לי׃

35:25b.PSA.035.025 אל יאמרו בלבם האח נפשנו אל יאמרו בלענוהו׃

35:26b.PSA.035.026 יבשו ויחפרו יחדו שמחי רעתי ילבשו בשת וכלמה המגדילים עלי׃

35:27b.PSA.035.027 ירנו וישמחו חפצי צדקי ויאמרו תמיד יגדל יהוה החפץ שלום עבדו׃

35:28b.PSA.035.028 ולשוני תהגה צדקך כל היום תהלתך׃

36

36:1b.PSA.036.001 למנצח לעבד יהוה לדוד נאם פשע לרשע בקרב לבי אין פחד אלהים לנגד עיניו׃

36:2b.PSA.036.002 כי החליק אליו בעיניו למצא עונו לשנא׃

36:3b.PSA.036.003 דברי פיו און ומרמה חדל להשכיל להיטיב׃

36:4b.PSA.036.004 און יחשב על משכבו יתיצב על דרך לא טוב רע לא ימאס׃

36:5b.PSA.036.005 יהוה בהשמים חסדך אמונתך עד שחקים׃

36:6b.PSA.036.006 צדקתך כהררי אל משפטך תהום רבה אדם ובהמה תושיע יהוה׃

36:7b.PSA.036.007 מה יקר חסדך אלהים ובני אדם בצל כנפיך יחסיון׃

36:8b.PSA.036.008 ירוין מדשן ביתך ונחל עדניך תשקם׃

36:9b.PSA.036.009 כי עמך מקור חיים באורך נראה אור׃

36:10b.PSA.036.010 משך חסדך לידעיך וצדקתך לישרי לב׃

36:11b.PSA.036.011 אל תבואני רגל גאוה ויד רשעים אל תנדני׃

36:12b.PSA.036.012 שם נפלו פעלי און דחו ולא יכלו קום׃

37

37:1b.PSA.037.001 לדוד אל תתחר במרעים אל תקנא בעשי עולה׃

37:2b.PSA.037.002 כי כחציר מהרה ימלו וכירק דשא יבולון׃

37:3b.PSA.037.003 בטח ביהוה ועשה טוב שכן ארץ ורעה אמונה׃

37:4b.PSA.037.004 והתענג על יהוה ויתן לך משאלת לבך׃

37:5b.PSA.037.005 גול על יהוה דרכך ובטח עליו והוא יעשה׃

37:6b.PSA.037.006 והוציא כאור צדקך ומשפטך כצהרים׃

37:7b.PSA.037.007 דום ליהוה והתחולל לו אל תתחר במצליח דרכו באיש עשה מזמות׃

37:8b.PSA.037.008 הרף מאף ועזב חמה אל תתחר אך להרע׃

37:9b.PSA.037.009 כי מרעים יכרתון וקוי יהוה המה יירשו ארץ׃

37:10b.PSA.037.010 ועוד מעט ואין רשע והתבוננת על מקומו ואיננו׃

37:11b.PSA.037.011 וענוים יירשו ארץ והתענגו על רב שלום׃

37:12b.PSA.037.012 זמם רשע לצדיק וחרק עליו שניו׃

37:13b.PSA.037.013 אדני ישחק לו כי ראה כי יבא יומו׃

37:14b.PSA.037.014 חרב פתחו רשעים ודרכו קשתם להפיל עני ואביון לטבוח ישרי דרך׃

37:15b.PSA.037.015 חרבם תבוא בלבם וקשתותם תשברנה׃

37:16b.PSA.037.016 טוב מעט לצדיק מהמון רשעים רבים׃

37:17b.PSA.037.017 כי זרועות רשעים תשברנה וסומך צדיקים יהוה׃

37:18b.PSA.037.018 יודע יהוה ימי תמימם ונחלתם לעולם תהיה׃

37:19b.PSA.037.019 לא יבשו בעת רעה ובימי רעבון ישבעו׃

37:20b.PSA.037.020 כי רשעים יאבדו ואיבי יהוה כיקר כרים כלו בעשן כלו׃

37:21b.PSA.037.021 לוה רשע ולא ישלם וצדיק חונן ונותן׃

37:22b.PSA.037.022 כי מברכיו יירשו ארץ ומקלליו יכרתו׃

37:23b.PSA.037.023 מיהוה מצעדי גבר כוננו ודרכו יחפץ׃

37:24b.PSA.037.024 כי יפל לא יוטל כי יהוה סומך ידו׃

37:25b.PSA.037.025 נער הייתי גם זקנתי ולא ראיתי צדיק נעזב וזרעו מבקש לחם׃

37:26b.PSA.037.026 כל היום חונן ומלוה וזרעו לברכה׃

37:27b.PSA.037.027 סור מרע ועשה טוב ושכן לעולם׃

37:28b.PSA.037.028 כי יהוה אהב משפט ולא יעזב את חסידיו לעולם נשמרו וזרע רשעים נכרת׃

37:29b.PSA.037.029 צדיקים יירשו ארץ וישכנו לעד עליה׃

37:30b.PSA.037.030 פי צדיק יהגה חכמה ולשונו תדבר משפט׃

37:31b.PSA.037.031 תורת אלהיו בלבו לא תמעד אשריו׃

37:32b.PSA.037.032 צופה רשע לצדיק ומבקש להמיתו׃

37:33b.PSA.037.033 יהוה לא יעזבנו בידו ולא ירשיענו בהשפטו׃

37:34b.PSA.037.034 קוה אל יהוה ושמר דרכו וירוממך לרשת ארץ בהכרת רשעים תראה׃

37:35b.PSA.037.035 ראיתי רשע עריץ ומתערה כאזרח רענן׃

37:36b.PSA.037.036 ויעבר והנה איננו ואבקשהו ולא נמצא׃

37:37b.PSA.037.037 שמר תם וראה ישר כי אחרית לאיש שלום׃

37:38b.PSA.037.038 ופשעים נשמדו יחדו אחרית רשעים נכרתה׃

37:39b.PSA.037.039 ותשועת צדיקים מיהוה מעוזם בעת צרה׃

37:40b.PSA.037.040 ויעזרם יהוה ויפלטם יפלטם מרשעים ויושיעם כי חסו בו׃

38

38:1b.PSA.038.001 מזמור לדוד להזכיר יהוה אל בקצפך תוכיחני ובחמתך תיסרני׃

38:2b.PSA.038.002 כי חציך נחתו בי ותנחת עלי ידך׃

38:3b.PSA.038.003 אין מתם בבשרי מפני זעמך אין שלום בעצמי מפני חטאתי׃

38:4b.PSA.038.004 כי עונתי עברו ראשי כמשא כבד יכבדו ממני׃

38:5b.PSA.038.005 הבאישו נמקו חבורתי מפני אולתי׃

38:6b.PSA.038.006 נעויתי שחתי עד מאד כל היום קדר הלכתי׃

38:7b.PSA.038.007 כי כסלי מלאו נקלה ואין מתם בבשרי׃

38:8b.PSA.038.008 נפוגותי ונדכיתי עד מאד שאגתי מנהמת לבי׃

38:9b.PSA.038.009 אדני נגדך כל תאותי ואנחתי ממך לא נסתרה׃

38:10b.PSA.038.010 לבי סחרחר עזבני כחי ואור עיני גם הם אין אתי׃

38:11b.PSA.038.011 אהבי ורעי מנגד נגעי יעמדו וקרובי מרחק עמדו׃

38:12b.PSA.038.012 וינקשו מבקשי נפשי ודרשי רעתי דברו הוות ומרמות כל היום יהגו׃

38:13b.PSA.038.013 ואני כחרש לא אשמע וכאלם לא יפתח פיו׃

38:14b.PSA.038.014 ואהי כאיש אשר לא שמע ואין בפיו תוכחות׃

38:15b.PSA.038.015 כי לך יהוה הוחלתי אתה תענה אדני אלהי׃

38:16b.PSA.038.016 כי אמרתי פן ישמחו לי במוט רגלי עלי הגדילו׃

38:17b.PSA.038.017 כי אני לצלע נכון ומכאובי נגדי תמיד׃

38:18b.PSA.038.018 כי עוני אגיד אדאג מחטאתי׃

38:19b.PSA.038.019 ואיבי חיים עצמו ורבו שנאי שקר׃

38:20b.PSA.038.020 ומשלמי רעה תחת טובה ישטנוני תחת רדופי טוב׃

38:21b.PSA.038.021 אל תעזבני יהוה אלהי אל תרחק ממני׃

38:22b.PSA.038.022 חושה לעזרתי אדני תשועתי׃

39

39:1b.PSA.039.001 למנצח לידיתון מזמור לדוד אמרתי אשמרה דרכי מחטוא בלשוני אשמרה לפי מחסום בעד רשע לנגדי׃

39:2b.PSA.039.002 נאלמתי דומיה החשיתי מטוב וכאבי נעכר׃

39:3b.PSA.039.003 חם לבי בקרבי בהגיגי תבער אש דברתי בלשוני׃

39:4b.PSA.039.004 הודיעני יהוה קצי ומדת ימי מה היא אדעה מה חדל אני׃

39:5b.PSA.039.005 הנה טפחות נתתה ימי וחלדי כאין נגדך אך כל הבל כל אדם נצב סלה׃

39:6b.PSA.039.006 אך בצלם יתהלך איש אך הבל יהמיון יצבר ולא ידע מי אספם׃

39:7b.PSA.039.007 ועתה מה קויתי אדני תוחלתי לך היא׃

39:8b.PSA.039.008 מכל פשעי הצילני חרפת נבל אל תשימני׃

39:9b.PSA.039.009 נאלמתי לא אפתח פי כי אתה עשית׃

39:10b.PSA.039.010 הסר מעלי נגעך מתגרת ידך אני כליתי׃

39:11b.PSA.039.011 בתוכחות על עון יסרת איש ותמס כעש חמודו אך הבל כל אדם סלה׃

39:12b.PSA.039.012 שמעה תפלתי יהוה ושועתי האזינה אל דמעתי אל תחרש כי גר אנכי עמך תושב ככל אבותי׃

39:13b.PSA.039.013 השע ממני ואבליגה בטרם אלך ואינני׃

40

40:1b.PSA.040.001 למנצח לדוד מזמור קוה קויתי יהוה ויט אלי וישמע שועתי׃

40:2b.PSA.040.002 ויעלני מבור שאון מטיט היון ויקם על סלע רגלי כונן אשרי׃

40:3b.PSA.040.003 ויתן בפי שיר חדש תהלה לאלהינו יראו רבים וייראו ויבטחו ביהוה׃

40:4b.PSA.040.004 אשרי הגבר אשר שם יהוה מבטחו ולא פנה אל רהבים ושטי כזב׃

40:5b.PSA.040.005 רבות עשית אתה יהוה אלהי נפלאתיך ומחשבתיך אלינו אין ערך אליך אגידה ואדברה עצמו מספר׃

40:6b.PSA.040.006 זבח ומנחה לא חפצת אזנים כרית לי עולה וחטאה לא שאלת׃

40:7b.PSA.040.007 אז אמרתי הנה באתי במגלת ספר כתוב עלי׃

40:8b.PSA.040.008 לעשות רצונך אלהי חפצתי ותורתך בתוך מעי׃

40:9b.PSA.040.009 בשרתי צדק בקהל רב הנה שפתי לא אכלא יהוה אתה ידעת׃

40:10b.PSA.040.010 צדקתך לא כסיתי בתוך לבי אמונתך ותשועתך אמרתי לא כחדתי חסדך ואמתך לקהל רב׃

40:11b.PSA.040.011 אתה יהוה לא תכלא רחמיך ממני חסדך ואמתך תמיד יצרוני׃

40:12b.PSA.040.012 כי אפפו עלי רעות עד אין מספר השיגוני עונתי ולא יכלתי לראות עצמו משערות ראשי ולבי עזבני׃

40:13b.PSA.040.013 רצה יהוה להצילני יהוה לעזרתי חושה׃

40:14b.PSA.040.014 יבשו ויחפרו יחד מבקשי נפשי לספותה יסגו אחור ויכלמו חפצי רעתי׃

40:15b.PSA.040.015 ישמו על עקב בשתם האמרים לי האח האח׃

40:16b.PSA.040.016 ישישו וישמחו בך כל מבקשיך יאמרו תמיד יגדל יהוה אהבי תשועתך׃

40:17b.PSA.040.017 ואני עני ואביון אדני יחשב לי עזרתי ומפלטי אתה אלהי אל תאחר׃

41

41:1b.PSA.041.001 למנצח מזמור לדוד אשרי משכיל אל דל ביום רעה ימלטהו יהוה׃

41:2b.PSA.041.002 יהוה ישמרהו ויחיהו יאשר בארץ ואל תתנהו בנפש איביו׃

41:3b.PSA.041.003 יהוה יסעדנו על ערש דוי כל משכבו הפכת בחליו׃

41:4b.PSA.041.004 אני אמרתי יהוה חנני רפאה נפשי כי חטאתי לך׃

41:5b.PSA.041.005 אויבי יאמרו רע לי מתי ימות ואבד שמו׃

41:6b.PSA.041.006 ואם בא לראות שוא ידבר לבו יקבץ און לו יצא לחוץ ידבר׃

41:7b.PSA.041.007 יחד עלי יתלחשו כל שנאי עלי יחשבו רעה לי׃

41:8b.PSA.041.008 דבר בליעל יצוק בו ואשר שכב לא יוסיף לקום׃

41:9b.PSA.041.009 גם איש שלומי אשר בטחתי בו אוכל לחמי הגדיל עלי עקב׃

41:10b.PSA.041.010 ואתה יהוה חנני והקימני ואשלמה להם׃

41:11b.PSA.041.011 בזאת ידעתי כי חפצת בי כי לא יריע איבי עלי׃

41:12b.PSA.041.012 ואני בתמי תמכת בי ותציבני לפניך לעולם׃

41:13b.PSA.041.013 ברוך יהוה אלהי ישראל מהעולם ועד העולם אמן ואמן׃

42

42:1b.PSA.042.001 למנצח משכיל לבני קרח כאיל תערג על אפיקי מים כן נפשי תערג אליך אלהים׃

42:2b.PSA.042.002 צמאה נפשי לאלהים לאל חי מתי אבוא ואראה פני אלהים׃

42:3b.PSA.042.003 היתה לי דמעתי לחם יומם ולילה באמר אלי כל היום איה אלהיך׃

42:4b.PSA.042.004 אלה אזכרה ואשפכה עלי נפשי כי אעבר בסך אדדם עד בית אלהים בקול רנה ותודה המון חוגג׃

42:5b.PSA.042.005 מה תשתוחחי נפשי ותהמי עלי הוחילי לאלהים כי עוד אודנו ישועות פניו׃

42:6b.PSA.042.006 אלהי עלי נפשי תשתוחח על כן אזכרך מארץ ירדן וחרמונים מהר מצער׃

42:7b.PSA.042.007 תהום אל תהום קורא לקול צנוריך כל משבריך וגליך עלי עברו׃

42:8b.PSA.042.008 יומם יצוה יהוה חסדו ובלילה שירה עמי תפלה לאל חיי׃

42:9b.PSA.042.009 אומרה לאל סלעי למה שכחתני למה קדר אלך בלחץ אויב׃

42:10b.PSA.042.010 ברצח בעצמותי חרפוני צוררי באמרם אלי כל היום איה אלהיך׃

42:11b.PSA.042.011 מה תשתוחחי נפשי ומה תהמי עלי הוחילי לאלהים כי עוד אודנו ישועת פני ואלהי׃

43

43:1b.PSA.043.001 שפטני אלהים וריבה ריבי מגוי לא חסיד מאיש מרמה ועולה תפלטני׃

43:2b.PSA.043.002 כי אתה אלהי מעוזי למה זנחתני למה קדר אתהלך בלחץ אויב׃

43:3b.PSA.043.003 שלח אורך ואמתך המה ינחוני יביאוני אל הר קדשך ואל משכנותיך׃

43:4b.PSA.043.004 ואבואה אל מזבח אלהים אל אל שמחת גילי ואודך בכנור אלהים אלהי׃

43:5b.PSA.043.005 מה תשתוחחי נפשי ומה תהמי עלי הוחילי לאלהים כי עוד אודנו ישועת פני ואלהי׃

44

44:1b.PSA.044.001 למנצח לבני קרח משכיל אלהים באזנינו שמענו אבותינו ספרו לנו פעל פעלת בימיהם בימי קדם׃

44:2b.PSA.044.002 אתה ידך גוים הורשת ותטעם תרע לאמים ותשלחם׃

44:3b.PSA.044.003 כי לא בחרבם ירשו ארץ וזרועם לא הושיעה למו כי ימינך וזרועך ואור פניך כי רציתם׃

44:4b.PSA.044.004 אתה הוא מלכי אלהים צוה ישועות יעקב׃

44:5b.PSA.044.005 בך צרינו ננגח בשמך נבוס קמינו׃

44:6b.PSA.044.006 כי לא בקשתי אבטח וחרבי לא תושיעני׃

44:7b.PSA.044.007 כי הושעתנו מצרינו ומשנאינו הבישות׃

44:8b.PSA.044.008 באלהים הללנו כל היום ושמך לעולם נודה סלה׃

44:9b.PSA.044.009 אף זנחת ותכלימנו ולא תצא בצבאותינו׃

44:10b.PSA.044.010 תשיבנו אחור מני צר ומשנאינו שסו למו׃

44:11b.PSA.044.011 תתננו כצאן מאכל ובגוים זריתנו׃

44:12b.PSA.044.012 תמכר עמך בלא הון ולא רבית במחיריהם׃

44:13b.PSA.044.013 תשימנו חרפה לשכנינו לעג וקלס לסביבותינו׃

44:14b.PSA.044.014 תשימנו משל בגוים מנוד ראש בל אמים׃

44:15b.PSA.044.015 כל היום כלמתי נגדי ובשת פני כסתני׃

44:16b.PSA.044.016 מקול מחרף ומגדף מפני אויב ומתנקם׃

44:17b.PSA.044.017 כל זאת באתנו ולא שכחנוך ולא שקרנו בבריתך׃

44:18b.PSA.044.018 לא נסוג אחור לבנו ותט אשרינו מני ארחך׃

44:19b.PSA.044.019 כי דכיתנו במקום תנים ותכס עלינו בצלמות׃

44:20b.PSA.044.020 אם שכחנו שם אלהינו ונפרש כפינו לאל זר׃

44:21b.PSA.044.021 הלא אלהים יחקר זאת כי הוא ידע תעלמות לב׃

44:22b.PSA.044.022 כי עליך הרגנו כל היום נחשבנו כצאן טבחה׃

44:23b.PSA.044.023 עורה למה תישן אדני הקיצה אל תזנח לנצח׃

44:24b.PSA.044.024 למה פניך תסתיר תשכח ענינו ולחצנו׃

44:25b.PSA.044.025 כי שחה לעפר נפשנו דבקה לארץ בטננו׃

44:26b.PSA.044.026 קומה עזרתה לנו ופדנו למען חסדך׃

45

45:1b.PSA.045.001 למנצח על ששנים לבני קרח משכיל שיר ידידת רחש לבי דבר טוב אמר אני מעשי למלך לשוני עט סופר מהיר׃

45:2b.PSA.045.002 יפיפית מבני אדם הוצק חן בשפתותיך על כן ברכך אלהים לעולם׃

45:3b.PSA.045.003 חגור חרבך על ירך גבור הודך והדרך׃

45:4b.PSA.045.004 והדרך צלח רכב על דבר אמת וענוה צדק ותורך נוראות ימינך׃

45:5b.PSA.045.005 חציך שנונים עמים תחתיך יפלו בלב אויבי המלך׃

45:6b.PSA.045.006 כסאך אלהים עולם ועד שבט מישר שבט מלכותך׃

45:7b.PSA.045.007 אהבת צדק ותשנא רשע על כן משחך אלהים אלהיך שמן ששון מחבריך׃

45:8b.PSA.045.008 מר ואהלות קציעות כל בגדתיך מן היכלי שן מני שמחוך׃

45:9b.PSA.045.009 בנות מלכים ביקרותיך נצבה שגל לימינך בכתם אופיר׃

45:10b.PSA.045.010 שמעי בת וראי והטי אזנך ושכחי עמך ובית אביך׃

45:11b.PSA.045.011 ויתאו המלך יפיך כי הוא אדניך והשתחוי לו׃

45:12b.PSA.045.012 ובת צר במנחה פניך יחלו עשירי עם׃

45:13b.PSA.045.013 כל כבודה בת מלך פנימה ממשבצות זהב לבושה׃

45:14b.PSA.045.014 לרקמות תובל למלך בתולות אחריה רעותיה מובאות לך׃

45:15b.PSA.045.015 תובלנה בשמחת וגיל תבאינה בהיכל מלך׃

45:16b.PSA.045.016 תחת אבתיך יהיו בניך תשיתמו לשרים בכל הארץ׃

45:17b.PSA.045.017 אזכירה שמך בכל דר ודר על כן עמים יהודך לעלם ועד׃

46

46:1b.PSA.046.001 למנצח לבני קרח על עלמות שיר אלהים לנו מחסה ועז עזרה בצרות נמצא מאד׃

46:2b.PSA.046.002 על כן לא נירא בהמיר ארץ ובמוט הרים בלב ימים׃

46:3b.PSA.046.003 יהמו יחמרו מימיו ירעשו הרים בגאותו סלה׃

46:4b.PSA.046.004 נהר פלגיו ישמחו עיר אלהים קדש משכני עליון׃

46:5b.PSA.046.005 אלהים בקרבה בל תמוט יעזרה אלהים לפנות בקר׃

46:6b.PSA.046.006 המו גוים מטו ממלכות נתן בקולו תמוג ארץ׃

46:7b.PSA.046.007 יהוה צבאות עמנו משגב לנו אלהי יעקב סלה׃

46:8b.PSA.046.008 לכו חזו מפעלות יהוה אשר שם שמות בארץ׃

46:9b.PSA.046.009 משבית מלחמות עד קצה הארץ קשת ישבר וקצץ חנית עגלות ישרף באש׃

46:10b.PSA.046.010 הרפו ודעו כי אנכי אלהים ארום בגוים ארום בארץ׃

46:11b.PSA.046.011 יהוה צבאות עמנו משגב לנו אלהי יעקב סלה׃

47

47:1b.PSA.047.001 למנצח לבני קרח מזמור כל העמים תקעו כף הריעו לאלהים בקול רנה׃

47:2b.PSA.047.002 כי יהוה עליון נורא מלך גדול על כל הארץ׃

47:3b.PSA.047.003 ידבר עמים תחתינו ולאמים תחת רגלינו׃

47:4b.PSA.047.004 יבחר לנו את נחלתנו את גאון יעקב אשר אהב סלה׃

47:5b.PSA.047.005 עלה אלהים בתרועה יהוה בקול שופר׃

47:6b.PSA.047.006 זמרו אלהים זמרו זמרו למלכנו זמרו׃

47:7b.PSA.047.007 כי מלך כל הארץ אלהים זמרו משכיל׃

47:8b.PSA.047.008 מלך אלהים על גוים אלהים ישב על כסא קדשו׃

47:9b.PSA.047.009 נדיבי עמים נאספו עם אלהי אברהם כי לאלהים מגני ארץ מאד נעלה׃

48

48:1b.PSA.048.001 שיר מזמור לבני קרח גדול יהוה ומהלל מאד בעיר אלהינו הר קדשו׃

48:2b.PSA.048.002 יפה נוף משוש כל הארץ הר ציון ירכתי צפון קרית מלך רב׃

48:3b.PSA.048.003 אלהים בארמנותיה נודע למשגב׃

48:4b.PSA.048.004 כי הנה המלכים נועדו עברו יחדו׃

48:5b.PSA.048.005 המה ראו כן תמהו נבהלו נחפזו׃

48:6b.PSA.048.006 רעדה אחזתם שם חיל כיולדה׃

48:7b.PSA.048.007 ברוח קדים תשבר אניות תרשיש׃

48:8b.PSA.048.008 כאשר שמענו כן ראינו בעיר יהוה צבאות בעיר אלהינו אלהים יכוננה עד עולם סלה׃

48:9b.PSA.048.009 דמינו אלהים חסדך בקרב היכלך׃

48:10b.PSA.048.010 כשמך אלהים כן תהלתך על קצוי ארץ צדק מלאה ימינך׃

48:11b.PSA.048.011 ישמח הר ציון תגלנה בנות יהודה למען משפטיך׃

48:12b.PSA.048.012 סבו ציון והקיפוה ספרו מגדליה׃

48:13b.PSA.048.013 שיתו לבכם לחילה פסגו ארמנותיה למען תספרו לדור אחרון׃

48:14b.PSA.048.014 כי זה אלהים אלהינו עולם ועד הוא ינהגנו על מות׃

49

49:1b.PSA.049.001 למנצח לבני קרח מזמור שמעו זאת כל העמים האזינו כל ישבי חלד׃

49:2b.PSA.049.002 גם בני אדם גם בני איש יחד עשיר ואביון׃

49:3b.PSA.049.003 פי ידבר חכמות והגות לבי תבונות׃

49:4b.PSA.049.004 אטה למשל אזני אפתח בכנור חידתי׃

49:5b.PSA.049.005 למה אירא בימי רע עון עקבי יסובני׃

49:6b.PSA.049.006 הבטחים על חילם וברב עשרם יתהללו׃

49:7b.PSA.049.007 אח לא פדה יפדה איש לא יתן לאלהים כפרו׃

49:8b.PSA.049.008 ויקר פדיון נפשם וחדל לעולם׃

49:9b.PSA.049.009 ויחי עוד לנצח לא יראה השחת׃

49:10b.PSA.049.010 כי יראה חכמים ימותו יחד כסיל ובער יאבדו ועזבו לאחרים חילם׃

49:11b.PSA.049.011 קרבם בתימו לעולם משכנתם לדר ודר קראו בשמותם עלי אדמות׃

49:12b.PSA.049.012 ואדם ביקר בל ילין נמשל כבהמות נדמו׃

49:13b.PSA.049.013 זה דרכם כסל למו ואחריהם בפיהם ירצו סלה׃

49:14b.PSA.049.014 כצאן לשאול שתו מות ירעם וירדו בם ישרים לבקר וצירם לבלות שאול מזבל לו׃

49:15b.PSA.049.015 אך אלהים יפדה נפשי מיד שאול כי יקחני סלה׃

49:16b.PSA.049.016 אל תירא כי יעשר איש כי ירבה כבוד ביתו׃

49:17b.PSA.049.017 כי לא במותו יקח הכל לא ירד אחריו כבודו׃

49:18b.PSA.049.018 כי נפשו בחייו יברך ויודך כי תיטיב לך׃

49:19b.PSA.049.019 תבוא עד דור אבותיו עד נצח לא יראו אור׃

49:20b.PSA.049.020 אדם ביקר ולא יבין נמשל כבהמות נדמו׃

50

50:1b.PSA.050.001 מזמור לאסף אל אלהים יהוה דבר ויקרא ארץ ממזרח שמש עד מבאו׃

50:2b.PSA.050.002 מציון מכלל יפי אלהים הופיע׃

50:3b.PSA.050.003 יבא אלהינו ואל יחרש אש לפניו תאכל וסביביו נשערה מאד׃

50:4b.PSA.050.004 יקרא אל השמים מעל ואל הארץ לדין עמו׃

50:5b.PSA.050.005 אספו לי חסידי כרתי בריתי עלי זבח׃

50:6b.PSA.050.006 ויגידו שמים צדקו כי אלהים שפט הוא סלה׃

50:7b.PSA.050.007 שמעה עמי ואדברה ישראל ואעידה בך אלהים אלהיך אנכי׃

50:8b.PSA.050.008 לא על זבחיך אוכיחך ועולתיך לנגדי תמיד׃

50:9b.PSA.050.009 לא אקח מביתך פר ממכלאתיך עתודים׃

50:10b.PSA.050.010 כי לי כל חיתו יער בהמות בהררי אלף׃

50:11b.PSA.050.011 ידעתי כל עוף הרים וזיז שדי עמדי׃

50:12b.PSA.050.012 אם ארעב לא אמר לך כי לי תבל ומלאה׃

50:13b.PSA.050.013 האוכל בשר אבירים ודם עתודים אשתה׃

50:14b.PSA.050.014 זבח לאלהים תודה ושלם לעליון נדריך׃

50:15b.PSA.050.015 וקראני ביום צרה אחלצך ותכבדני׃

50:16b.PSA.050.016 ולרשע אמר אלהים מה לך לספר חקי ותשא בריתי עלי פיך׃

50:17b.PSA.050.017 ואתה שנאת מוסר ותשלך דברי אחריך׃

50:18b.PSA.050.018 אם ראית גנב ותרץ עמו ועם מנאפים חלקך׃

50:19b.PSA.050.019 פיך שלחת ברעה ולשונך תצמיד מרמה׃

50:20b.PSA.050.020 תשב באחיך תדבר בבן אמך תתן דפי׃

50:21b.PSA.050.021 אלה עשית והחרשתי דמית היות אהיה כמוך אוכיחך ואערכה לעיניך׃

50:22b.PSA.050.022 בינו נא זאת שכחי אלוה פן אטרף ואין מציל׃

50:23b.PSA.050.023 זבח תודה יכבדנני ושם דרך אראנו בישע אלהים׃

51

51:1b.PSA.051.001 למנצח מזמור לדוד בבוא אליו נתן הנביא כאשר בא אל בת שבע חנני אלהים כחסדך כרב רחמיך מחה פשעי׃

51:2b.PSA.051.002 הרבה כבסני מעוני ומחטאתי טהרני׃

51:3b.PSA.051.003 כי פשעי אני אדע וחטאתי נגדי תמיד׃

51:4b.PSA.051.004 לך לבדך חטאתי והרע בעיניך עשיתי למען תצדק בדברך תזכה בשפטך׃

51:5b.PSA.051.005 הן בעוון חוללתי ובחטא יחמתני אמי׃

51:6b.PSA.051.006 הן אמת חפצת בטחות ובסתם חכמה תודיעני׃

51:7b.PSA.051.007 תחטאני באזוב ואטהר תכבסני ומשלג אלבין׃

51:8b.PSA.051.008 תשמיעני ששון ושמחה תגלנה עצמות דכית׃

51:9b.PSA.051.009 הסתר פניך מחטאי וכל עונתי מחה׃

51:10b.PSA.051.010 לב טהור ברא לי אלהים ורוח נכון חדש בקרבי׃

51:11b.PSA.051.011 אל תשליכני מלפניך ורוח קדשך אל תקח ממני׃

51:12b.PSA.051.012 השיבה לי ששון ישעך ורוח נדיבה תסמכני׃

51:13b.PSA.051.013 אלמדה פשעים דרכיך וחטאים אליך ישובו׃

51:14b.PSA.051.014 הצילני מדמים אלהים אלהי תשועתי תרנן לשוני צדקתך׃

51:15b.PSA.051.015 אדני שפתי תפתח ופי יגיד תהלתך׃

51:16b.PSA.051.016 כי לא תחפץ זבח ואתנה עולה לא תרצה׃

51:17b.PSA.051.017 זבחי אלהים רוח נשברה לב נשבר ונדכה אלהים לא תבזה׃

51:18b.PSA.051.018 היטיבה ברצונך את ציון תבנה חומות ירושלם׃

51:19b.PSA.051.019 אז תחפץ זבחי צדק עולה וכליל אז יעלו על מזבחך פרים׃

52

52:1b.PSA.052.001 למנצח משכיל לדוד בבוא דואג האדמי ויגד לשאול ויאמר לו בא דוד אל בית אחימלך מה תתהלל ברעה הגבור חסד אל כל היום׃

52:2b.PSA.052.002 הוות תחשב לשונך כתער מלטש עשה רמיה׃

52:3b.PSA.052.003 אהבת רע מטוב שקר מדבר צדק סלה׃

52:4b.PSA.052.004 אהבת כל דברי בלע לשון מרמה׃

52:5b.PSA.052.005 גם אל יתצך לנצח יחתך ויסחך מאהל ושרשך מארץ חיים סלה׃

52:6b.PSA.052.006 ויראו צדיקים וייראו ועליו ישחקו׃

52:7b.PSA.052.007 הנה הגבר לא ישים אלהים מעוזו ויבטח ברב עשרו יעז בהותו׃

52:8b.PSA.052.008 ואני כזית רענן בבית אלהים בטחתי בחסד אלהים עולם ועד׃

52:9b.PSA.052.009 אודך לעולם כי עשית ואקוה שמך כי טוב נגד חסידיך׃

53

53:1b.PSA.053.001 למנצח על מחלת משכיל לדוד אמר נבל בלבו אין אלהים השחיתו והתעיבו עול אין עשה טוב׃

53:2b.PSA.053.002 אלהים משמים השקיף על בני אדם לראות היש משכיל דרש את אלהים׃

53:3b.PSA.053.003 כלו סג יחדו נאלחו אין עשה טוב אין גם אחד׃

53:4b.PSA.053.004 הלא ידעו פעלי און אכלי עמי אכלו לחם אלהים לא קראו׃

53:5b.PSA.053.005 שם פחדו פחד לא היה פחד כי אלהים פזר עצמות חנך הבשתה כי אלהים מאסם׃

53:6b.PSA.053.006 מי יתן מציון ישעות ישראל בשוב אלהים שבות עמו יגל יעקב ישמח ישראל׃

54

54:1b.PSA.054.001 למנצח בנגינת משכיל לדוד בבוא הזיפים ויאמרו לשאול הלא דוד מסתתר עמנו אלהים בשמך הושיעני ובגבורתך תדינני׃

54:2b.PSA.054.002 אלהים שמע תפלתי האזינה לאמרי פי׃

54:3b.PSA.054.003 כי זרים קמו עלי ועריצים בקשו נפשי לא שמו אלהים לנגדם סלה׃

54:4b.PSA.054.004 הנה אלהים עזר לי אדני בסמכי נפשי׃

54:5b.PSA.054.005 ישוב הרע לשררי באמתך הצמיתם׃

54:6b.PSA.054.006 בנדבה אזבחה לך אודה שמך יהוה כי טוב׃

54:7b.PSA.054.007 כי מכל צרה הצילני ובאיבי ראתה עיני׃

55

55:1b.PSA.055.001 למנצח בנגינת משכיל לדוד האזינה אלהים תפלתי ואל תתעלם מתחנתי׃

55:2b.PSA.055.002 הקשיבה לי וענני אריד בשיחי ואהימה׃

55:3b.PSA.055.003 מקול אויב מפני עקת רשע כי ימיטו עלי און ובאף ישטמוני׃

55:4b.PSA.055.004 לבי יחיל בקרבי ואימות מות נפלו עלי׃

55:5b.PSA.055.005 יראה ורעד יבא בי ותכסני פלצות׃

55:6b.PSA.055.006 ואמר מי יתן לי אבר כיונה אעופה ואשכנה׃

55:7b.PSA.055.007 הנה ארחיק נדד אלין במדבר סלה׃

55:8b.PSA.055.008 אחישה מפלט לי מרוח סעה מסער׃

55:9b.PSA.055.009 בלע אדני פלג לשונם כי ראיתי חמס וריב בעיר׃

55:10b.PSA.055.010 יומם ולילה יסובבה על חומתיה ואון ועמל בקרבה׃

55:11b.PSA.055.011 הוות בקרבה ולא ימיש מרחבה תך ומרמה׃

55:12b.PSA.055.012 כי לא אויב יחרפני ואשא לא משנאי עלי הגדיל ואסתר ממנו׃

55:13b.PSA.055.013 ואתה אנוש כערכי אלופי ומידעי׃

55:14b.PSA.055.014 אשר יחדו נמתיק סוד בבית אלהים נהלך ברגש׃

55:15b.PSA.055.015 ישימות עלימו ירדו שאול חיים כי רעות במגורם בקרבם׃

55:16b.PSA.055.016 אני אל אלהים אקרא ויהוה יושיעני׃

55:17b.PSA.055.017 ערב ובקר וצהרים אשיחה ואהמה וישמע קולי׃

55:18b.PSA.055.018 פדה בשלום נפשי מקרב לי כי ברבים היו עמדי׃

55:19b.PSA.055.019 ישמע אל ויענם וישב קדם סלה אשר אין חליפות למו ולא יראו אלהים׃

55:20b.PSA.055.020 שלח ידיו בשלמיו חלל בריתו׃

55:21b.PSA.055.021 חלקו מחמאת פיו וקרב לבו רכו דבריו משמן והמה פתחות׃

55:22b.PSA.055.022 השלך על יהוה יהבך והוא יכלכלך לא יתן לעולם מוט לצדיק׃

55:23b.PSA.055.023 ואתה אלהים תורדם לבאר שחת אנשי דמים ומרמה לא יחצו ימיהם ואני אבטח בך׃

56

56:1b.PSA.056.001 למנצח על יונת אלם רחקים לדוד מכתם באחז אתו פלשתים בגת חנני אלהים כי שאפני אנוש כל היום לחם ילחצני׃

56:2b.PSA.056.002 שאפו שוררי כל היום כי רבים לחמים לי מרום׃

56:3b.PSA.056.003 יום אירא אני אליך אבטח׃

56:4b.PSA.056.004 באלהים אהלל דברו באלהים בטחתי לא אירא מה יעשה בשר לי׃

56:5b.PSA.056.005 כל היום דברי יעצבו עלי כל מחשבתם לרע׃

56:6b.PSA.056.006 יגורו יצפינו המה עקבי ישמרו כאשר קוו נפשי׃

56:7b.PSA.056.007 על און פלט למו באף עמים הורד אלהים׃

56:8b.PSA.056.008 נדי ספרתה אתה שימה דמעתי בנאדך הלא בספרתך׃

56:9b.PSA.056.009 אז ישובו אויבי אחור ביום אקרא זה ידעתי כי אלהים לי׃

56:10b.PSA.056.010 באלהים אהלל דבר ביהוה אהלל דבר׃

56:11b.PSA.056.011 באלהים בטחתי לא אירא מה יעשה אדם לי׃

56:12b.PSA.056.012 עלי אלהים נדריך אשלם תודת לך׃

56:13b.PSA.056.013 כי הצלת נפשי ממות הלא רגלי מדחי להתהלך לפני אלהים באור החיים׃

57

57:1b.PSA.057.001 למנצח אל תשחת לדוד מכתם בברחו מפני שאול במערה חנני אלהים חנני כי בך חסיה נפשי ובצל כנפיך אחסה עד יעבר הוות׃

57:2b.PSA.057.002 אקרא לאלהים עליון לאל גמר עלי׃

57:3b.PSA.057.003 ישלח משמים ויושיעני חרף שאפי סלה ישלח אלהים חסדו ואמתו׃

57:4b.PSA.057.004 נפשי בתוך לבאם אשכבה להטים בני אדם שניהם חנית וחצים ולשונם חרב חדה׃

57:5b.PSA.057.005 רומה על השמים אלהים על כל הארץ כבודך׃

57:6b.PSA.057.006 רשת הכינו לפעמי כפף נפשי כרו לפני שיחה נפלו בתוכה סלה׃

57:7b.PSA.057.007 נכון לבי אלהים נכון לבי אשירה ואזמרה׃

57:8b.PSA.057.008 עורה כבודי עורה הנבל וכנור אעירה שחר׃

57:9b.PSA.057.009 אודך בעמים אדני אזמרך בל אמים׃

57:10b.PSA.057.010 כי גדל עד שמים חסדך ועד שחקים אמתך׃

57:11b.PSA.057.011 רומה על שמים אלהים על כל הארץ כבודך׃

58

58:1b.PSA.058.001 למנצח אל תשחת לדוד מכתם האמנם אלם צדק תדברון מישרים תשפטו בני אדם׃

58:2b.PSA.058.002 אף בלב עולת תפעלון בארץ חמס ידיכם תפלסון׃

58:3b.PSA.058.003 זרו רשעים מרחם תעו מבטן דברי כזב׃

58:4b.PSA.058.004 חמת למו כדמות חמת נחש כמו פתן חרש יאטם אזנו׃

58:5b.PSA.058.005 אשר לא ישמע לקול מלחשים חובר חברים מחכם׃

58:6b.PSA.058.006 אלהים הרס שנימו בפימו מלתעות כפירים נתץ יהוה׃

58:7b.PSA.058.007 ימאסו כמו מים יתהלכו למו ידרך חצו כמו יתמללו׃

58:8b.PSA.058.008 כמו שבלול תמס יהלך נפל אשת בל חזו שמש׃

58:9b.PSA.058.009 בטרם יבינו סירתיכם אטד כמו חי כמו חרון ישערנו׃

58:10b.PSA.058.010 ישמח צדיק כי חזה נקם פעמיו ירחץ בדם הרשע׃

58:11b.PSA.058.011 ויאמר אדם אך פרי לצדיק אך יש אלהים שפטים בארץ׃

59

59:1b.PSA.059.001 למנצח אל תשחת לדוד מכתם בשלח שאול וישמרו את הבית להמיתו הצילני מאיבי אלהי ממתקוממי תשגבני׃

59:2b.PSA.059.002 הצילני מפעלי און ומאנשי דמים הושיעני׃

59:3b.PSA.059.003 כי הנה ארבו לנפשי יגורו עלי עזים לא פשעי ולא חטאתי יהוה׃

59:4b.PSA.059.004 בלי עון ירוצון ויכוננו עורה לקראתי וראה׃

59:5b.PSA.059.005 ואתה יהוה אלהים צבאות אלהי ישראל הקיצה לפקד כל הגוים אל תחן כל בגדי און סלה׃

59:6b.PSA.059.006 ישובו לערב יהמו ככלב ויסובבו עיר׃

59:7b.PSA.059.007 הנה יביעון בפיהם חרבות בשפתותיהם כי מי שמע׃

59:8b.PSA.059.008 ואתה יהוה תשחק למו תלעג לכל גוים׃

59:9b.PSA.059.009 עזו אליך אשמרה כי אלהים משגבי׃

59:10b.PSA.059.010 אלהי חסדו יקדמני אלהים יראני בשררי׃

59:11b.PSA.059.011 אל תהרגם פן ישכחו עמי הניעמו בחילך והורידמו מגננו אדני׃

59:12b.PSA.059.012 חטאת פימו דבר שפתימו וילכדו בגאונם ומאלה ומכחש יספרו׃

59:13b.PSA.059.013 כלה בחמה כלה ואינמו וידעו כי אלהים משל ביעקב לאפסי הארץ סלה׃

59:14b.PSA.059.014 וישובו לערב יהמו ככלב ויסובבו עיר׃

59:15b.PSA.059.015 המה ינועון לאכל אם לא ישבעו וילינו׃

59:16b.PSA.059.016 ואני אשיר עזך וארנן לבקר חסדך כי היית משגב לי ומנוס ביום צר לי׃

59:17b.PSA.059.017 עזי אליך אזמרה כי אלהים משגבי אלהי חסדי׃

60

60:1b.PSA.060.001 למנצח על שושן עדות מכתם לדוד ללמד בהצותו את ארם נהרים ואת ארם צובה וישב יואב ויך את אדום בגיא מלח שנים עשר אלף אלהים זנחתנו פרצתנו אנפת תשובב לנו׃

60:2b.PSA.060.002 הרעשתה ארץ פצמתה רפה שבריה כי מטה׃

60:3b.PSA.060.003 הראיתה עמך קשה השקיתנו יין תרעלה׃

60:4b.PSA.060.004 נתתה ליראיך נס להתנוסס מפני קשט סלה׃

60:5b.PSA.060.005 למען יחלצון ידידיך הושיעה ימינך ועננו׃

60:6b.PSA.060.006 אלהים דבר בקדשו אעלזה אחלקה שכם ועמק סכות אמדד׃

60:7b.PSA.060.007 לי גלעד ולי מנשה ואפרים מעוז ראשי יהודה מחקקי׃

60:8b.PSA.060.008 מואב סיר רחצי על אדום אשליך נעלי עלי פלשת התרעעי׃

60:9b.PSA.060.009 מי יבלני עיר מצור מי נחני עד אדום׃

60:10b.PSA.060.010 הלא אתה אלהים זנחתנו ולא תצא אלהים בצבאותינו׃

60:11b.PSA.060.011 הבה לנו עזרת מצר ושוא תשועת אדם׃

60:12b.PSA.060.012 באלהים נעשה חיל והוא יבוס צרינו׃

61

61:1b.PSA.061.001 למנצח על נגינת לדוד שמעה אלהים רנתי הקשיבה תפלתי׃

61:2b.PSA.061.002 מקצה הארץ אליך אקרא בעטף לבי בצור ירום ממני תנחני׃

61:3b.PSA.061.003 כי היית מחסה לי מגדל עז מפני אויב׃

61:4b.PSA.061.004 אגורה באהלך עולמים אחסה בסתר כנפיך סלה׃

61:5b.PSA.061.005 כי אתה אלהים שמעת לנדרי נתת ירשת יראי שמך׃

61:6b.PSA.061.006 ימים על ימי מלך תוסיף שנותיו כמו דר ודר׃

61:7b.PSA.061.007 ישב עולם לפני אלהים חסד ואמת מן ינצרהו׃

61:8b.PSA.061.008 כן אזמרה שמך לעד לשלמי נדרי יום יום׃

62

62:1b.PSA.062.001 למנצח על ידותון מזמור לדוד אך אל אלהים דומיה נפשי ממנו ישועתי׃

62:2b.PSA.062.002 אך הוא צורי וישועתי משגבי לא אמוט רבה׃

62:3b.PSA.062.003 עד אנה תהותתו על איש תרצחו כלכם כקיר נטוי גדר הדחויה׃

62:4b.PSA.062.004 אך משאתו יעצו להדיח ירצו כזב בפיו יברכו ובקרבם יקללו סלה׃

62:5b.PSA.062.005 אך לאלהים דומי נפשי כי ממנו תקותי׃

62:6b.PSA.062.006 אך הוא צורי וישועתי משגבי לא אמוט׃

62:7b.PSA.062.007 על אלהים ישעי וכבודי צור עזי מחסי באלהים׃

62:8b.PSA.062.008 בטחו בו בכל עת עם שפכו לפניו לבבכם אלהים מחסה לנו סלה׃

62:9b.PSA.062.009 אך הבל בני אדם כזב בני איש במאזנים לעלות המה מהבל יחד׃

62:10b.PSA.062.010 אל תבטחו בעשק ובגזל אל תהבלו חיל כי ינוב אל תשיתו לב׃

62:11b.PSA.062.011 אחת דבר אלהים שתים זו שמעתי כי עז לאלהים׃

62:12b.PSA.062.012 ולך אדני חסד כי אתה תשלם לאיש כמעשהו׃

63

63:1b.PSA.063.001 מזמור לדוד בהיותו במדבר יהודה אלהים אלי אתה אשחרך צמאה לך נפשי כמה לך בשרי בארץ ציה ועיף בלי מים׃

63:2b.PSA.063.002 כן בקדש חזיתיך לראות עזך וכבודך׃

63:3b.PSA.063.003 כי טוב חסדך מחיים שפתי ישבחונך׃

63:4b.PSA.063.004 כן אברכך בחיי בשמך אשא כפי׃

63:5b.PSA.063.005 כמו חלב ודשן תשבע נפשי ושפתי רננות יהלל פי׃

63:6b.PSA.063.006 אם זכרתיך על יצועי באשמרות אהגה בך׃

63:7b.PSA.063.007 כי היית עזרתה לי ובצל כנפיך ארנן׃

63:8b.PSA.063.008 דבקה נפשי אחריך בי תמכה ימינך׃

63:9b.PSA.063.009 והמה לשואה יבקשו נפשי יבאו בתחתיות הארץ׃

63:10b.PSA.063.010 יגירהו על ידי חרב מנת שעלים יהיו׃

63:11b.PSA.063.011 והמלך ישמח באלהים יתהלל כל הנשבע בו כי יסכר פי דוברי שקר׃

64

64:1b.PSA.064.001 למנצח מזמור לדוד שמע אלהים קולי בשיחי מפחד אויב תצר חיי׃

64:2b.PSA.064.002 תסתירני מסוד מרעים מרגשת פעלי און׃

64:3b.PSA.064.003 אשר שננו כחרב לשונם דרכו חצם דבר מר׃

64:4b.PSA.064.004 לירות במסתרים תם פתאם ירהו ולא ייראו׃

64:5b.PSA.064.005 יחזקו למו דבר רע יספרו לטמון מוקשים אמרו מי יראה למו׃

64:6b.PSA.064.006 יחפשו עולת תמנו חפש מחפש וקרב איש ולב עמק׃

64:7b.PSA.064.007 וירם אלהים חץ פתאום היו מכותם׃

64:8b.PSA.064.008 ויכשילוהו עלימו לשונם יתנדדו כל ראה בם׃

64:9b.PSA.064.009 וייראו כל אדם ויגידו פעל אלהים ומעשהו השכילו׃

64:10b.PSA.064.010 ישמח צדיק ביהוה וחסה בו ויתהללו כל ישרי לב׃

65

65:1b.PSA.065.001 למנצח מזמור לדוד שיר לך דמיה תהלה אלהים בציון ולך ישלם נדר׃

65:2b.PSA.065.002 שמע תפלה עדיך כל בשר יבאו׃

65:3b.PSA.065.003 דברי עונת גברו מני פשעינו אתה תכפרם׃

65:4b.PSA.065.004 אשרי תבחר ותקרב ישכן חצריך נשבעה בטוב ביתך קדש היכלך׃

65:5b.PSA.065.005 נוראות בצדק תעננו אלהי ישענו מבטח כל קצוי ארץ וים רחקים׃

65:6b.PSA.065.006 מכין הרים בכחו נאזר בגבורה׃

65:7b.PSA.065.007 משביח שאון ימים שאון גליהם והמון לאמים׃

65:8b.PSA.065.008 וייראו ישבי קצות מאותתיך מוצאי בקר וערב תרנין׃

65:9b.PSA.065.009 פקדת הארץ ותשקקה רבת תעשרנה פלג אלהים מלא מים תכין דגנם כי כן תכינה׃

65:10b.PSA.065.010 תלמיה רוה נחת גדודיה ברביבים תמגגנה צמחה תברך׃

65:11b.PSA.065.011 עטרת שנת טובתך ומעגליך ירעפון דשן׃

65:12b.PSA.065.012 ירעפו נאות מדבר וגיל גבעות תחגרנה׃

65:13b.PSA.065.013 לבשו כרים הצאן ועמקים יעטפו בר יתרועעו אף ישירו׃

66

66:1b.PSA.066.001 למנצח שיר מזמור הריעו לאלהים כל הארץ׃

66:2b.PSA.066.002 זמרו כבוד שמו שימו כבוד תהלתו׃

66:3b.PSA.066.003 אמרו לאלהים מה נורא מעשיך ברב עזך יכחשו לך איביך׃

66:4b.PSA.066.004 כל הארץ ישתחוו לך ויזמרו לך יזמרו שמך סלה׃

66:5b.PSA.066.005 לכו וראו מפעלות אלהים נורא עלילה על בני אדם׃

66:6b.PSA.066.006 הפך ים ליבשה בנהר יעברו ברגל שם נשמחה בו׃

66:7b.PSA.066.007 משל בגבורתו עולם עיניו בגוים תצפינה הסוררים אל ירימו למו סלה׃

66:8b.PSA.066.008 ברכו עמים אלהינו והשמיעו קול תהלתו׃

66:9b.PSA.066.009 השם נפשנו בחיים ולא נתן למוט רגלנו׃

66:10b.PSA.066.010 כי בחנתנו אלהים צרפתנו כצרף כסף׃

66:11b.PSA.066.011 הבאתנו במצודה שמת מועקה במתנינו׃

66:12b.PSA.066.012 הרכבת אנוש לראשנו באנו באש ובמים ותוציאנו לרויה׃

66:13b.PSA.066.013 אבוא ביתך בעולות אשלם לך נדרי׃

66:14b.PSA.066.014 אשר פצו שפתי ודבר פי בצר לי׃

66:15b.PSA.066.015 עלות מחים אעלה לך עם קטרת אילים אעשה בקר עם עתודים סלה׃

66:16b.PSA.066.016 לכו שמעו ואספרה כל יראי אלהים אשר עשה לנפשי׃

66:17b.PSA.066.017 אליו פי קראתי ורומם תחת לשוני׃

66:18b.PSA.066.018 און אם ראיתי בלבי לא ישמע אדני׃

66:19b.PSA.066.019 אכן שמע אלהים הקשיב בקול תפלתי׃

66:20b.PSA.066.020 ברוך אלהים אשר לא הסיר תפלתי וחסדו מאתי׃

67

67:1b.PSA.067.001 למנצח בנגינת מזמור שיר אלהים יחננו ויברכנו יאר פניו אתנו סלה׃

67:2b.PSA.067.002 לדעת בארץ דרכך בכל גוים ישועתך׃

67:3b.PSA.067.003 יודוך עמים אלהים יודוך עמים כלם׃

67:4b.PSA.067.004 ישמחו וירננו לאמים כי תשפט עמים מישור ולאמים בארץ תנחם סלה׃

67:5b.PSA.067.005 יודוך עמים אלהים יודוך עמים כלם׃

67:6b.PSA.067.006 ארץ נתנה יבולה יברכנו אלהים אלהינו׃

67:7b.PSA.067.007 יברכנו אלהים וייראו אתו כל אפסי ארץ׃

68

68:1b.PSA.068.001 למנצח לדוד מזמור שיר יקום אלהים יפוצו אויביו וינוסו משנאיו מפניו׃

68:2b.PSA.068.002 כהנדף עשן תנדף כהמס דונג מפני אש יאבדו רשעים מפני אלהים׃

68:3b.PSA.068.003 וצדיקים ישמחו יעלצו לפני אלהים וישישו בשמחה׃

68:4b.PSA.068.004 שירו לאלהים זמרו שמו סלו לרכב בערבות ביה שמו ועלזו לפניו׃

68:5b.PSA.068.005 אבי יתומים ודין אלמנות אלהים במעון קדשו׃

68:6b.PSA.068.006 אלהים מושיב יחידים ביתה מוציא אסירים בכושרות אך סוררים שכנו צחיחה׃

68:7b.PSA.068.007 אלהים בצאתך לפני עמך בצעדך בישימון סלה׃

68:8b.PSA.068.008 ארץ רעשה אף שמים נטפו מפני אלהים זה סיני מפני אלהים אלהי ישראל׃

68:9b.PSA.068.009 גשם נדבות תניף אלהים נחלתך ונלאה אתה כוננתה׃

68:10b.PSA.068.010 חיתך ישבו בה תכין בטובתך לעני אלהים׃

68:11b.PSA.068.011 אדני יתן אמר המבשרות צבא רב׃

68:12b.PSA.068.012 מלכי צבאות ידדון ידדון ונות בית תחלק שלל׃

68:13b.PSA.068.013 אם תשכבון בין שפתים כנפי יונה נחפה בכסף ואברותיה בירקרק חרוץ׃

68:14b.PSA.068.014 בפרש שדי מלכים בה תשלג בצלמון׃

68:15b.PSA.068.015 הר אלהים הר בשן הר גבננים הר בשן׃

68:16b.PSA.068.016 למה תרצדון הרים גבננים ההר חמד אלהים לשבתו אף יהוה ישכן לנצח׃

68:17b.PSA.068.017 רכב אלהים רבתים אלפי שנאן אדני בם סיני בקדש׃

68:18b.PSA.068.018 עלית למרום שבית שבי לקחת מתנות באדם ואף סוררים לשכן יה אלהים׃

68:19b.PSA.068.019 ברוך אדני יום יום יעמס לנו האל ישועתנו סלה׃

68:20b.PSA.068.020 האל לנו אל למושעות וליהוה אדני למות תוצאות׃

68:21b.PSA.068.021 אך אלהים ימחץ ראש איביו קדקד שער מתהלך באשמיו׃

68:22b.PSA.068.022 אמר אדני מבשן אשיב אשיב ממצלות ים׃

68:23b.PSA.068.023 למען תמחץ רגלך בדם לשון כלביך מאיבים מנהו׃

68:24b.PSA.068.024 ראו הליכותיך אלהים הליכות אלי מלכי בקדש׃

68:25b.PSA.068.025 קדמו שרים אחר נגנים בתוך עלמות תופפות׃

68:26b.PSA.068.026 במקהלות ברכו אלהים יהוה ממקור ישראל׃

68:27b.PSA.068.027 שם בנימן צעיר רדם שרי יהודה רגמתם שרי זבלון שרי נפתלי׃

68:28b.PSA.068.028 צוה אלהיך עזך עוזה אלהים זו פעלת לנו׃

68:29b.PSA.068.029 מהיכלך על ירושלם לך יובילו מלכים שי׃

68:30b.PSA.068.030 גער חית קנה עדת אבירים בעגלי עמים מתרפס ברצי כסף בזר עמים קרבות יחפצו׃

68:31b.PSA.068.031 יאתיו חשמנים מני מצרים כוש תריץ ידיו לאלהים׃

68:32b.PSA.068.032 ממלכות הארץ שירו לאלהים זמרו אדני סלה׃

68:33b.PSA.068.033 לרכב בשמי שמי קדם הן יתן בקולו קול עז׃

68:34b.PSA.068.034 תנו עז לאלהים על ישראל גאותו ועזו בשחקים׃

68:35b.PSA.068.035 נורא אלהים ממקדשיך אל ישראל הוא נתן עז ותעצמות לעם ברוך אלהים׃

69

69:1b.PSA.069.001 למנצח על שושנים לדוד הושיעני אלהים כי באו מים עד נפש׃

69:2b.PSA.069.002 טבעתי ביון מצולה ואין מעמד באתי במעמקי מים ושבלת שטפתני׃

69:3b.PSA.069.003 יגעתי בקראי נחר גרוני כלו עיני מיחל לאלהי׃

69:4b.PSA.069.004 רבו משערות ראשי שנאי חנם עצמו מצמיתי איבי שקר אשר לא גזלתי אז אשיב׃

69:5b.PSA.069.005 אלהים אתה ידעת לאולתי ואשמותי ממך לא נכחדו׃

69:6b.PSA.069.006 אל יבשו בי קויך אדני יהוה צבאות אל יכלמו בי מבקשיך אלהי ישראל׃

69:7b.PSA.069.007 כי עליך נשאתי חרפה כסתה כלמה פני׃

69:8b.PSA.069.008 מוזר הייתי לאחי ונכרי לבני אמי׃

69:9b.PSA.069.009 כי קנאת ביתך אכלתני וחרפות חורפיך נפלו עלי׃

69:10b.PSA.069.010 ואבכה בצום נפשי ותהי לחרפות לי׃

69:11b.PSA.069.011 ואתנה לבושי שק ואהי להם למשל׃

69:12b.PSA.069.012 ישיחו בי ישבי שער ונגינות שותי שכר׃

69:13b.PSA.069.013 ואני תפלתי לך יהוה עת רצון אלהים ברב חסדך ענני באמת ישעך׃

69:14b.PSA.069.014 הצילני מטיט ואל אטבעה אנצלה משנאי וממעמקי מים׃

69:15b.PSA.069.015 אל תשטפני שבלת מים ואל תבלעני מצולה ואל תאטר עלי באר פיה׃

69:16b.PSA.069.016 ענני יהוה כי טוב חסדך כרב רחמיך פנה אלי׃

69:17b.PSA.069.017 ואל תסתר פניך מעבדך כי צר לי מהר ענני׃

69:18b.PSA.069.018 קרבה אל נפשי גאלה למען איבי פדני׃

69:19b.PSA.069.019 אתה ידעת חרפתי ובשתי וכלמתי נגדך כל צוררי׃

69:20b.PSA.069.020 חרפה שברה לבי ואנושה ואקוה לנוד ואין ולמנחמים ולא מצאתי׃

69:21b.PSA.069.021 ויתנו בברותי ראש ולצמאי ישקוני חמץ׃

69:22b.PSA.069.022 יהי שלחנם לפניהם לפח ולשלומים למוקש׃

69:23b.PSA.069.023 תחשכנה עיניהם מראות ומתניהם תמיד המעד׃

69:24b.PSA.069.024 שפך עליהם זעמך וחרון אפך ישיגם׃

69:25b.PSA.069.025 תהי טירתם נשמה באהליהם אל יהי ישב׃

69:26b.PSA.069.026 כי אתה אשר הכית רדפו ואל מכאוב חלליך יספרו׃

69:27b.PSA.069.027 תנה עון על עונם ואל יבאו בצדקתך׃

69:28b.PSA.069.028 ימחו מספר חיים ועם צדיקים אל יכתבו׃

69:29b.PSA.069.029 ואני עני וכואב ישועתך אלהים תשגבני׃

69:30b.PSA.069.030 אהללה שם אלהים בשיר ואגדלנו בתודה׃

69:31b.PSA.069.031 ותיטב ליהוה משור פר מקרן מפריס׃

69:32b.PSA.069.032 ראו ענוים ישמחו דרשי אלהים ויחי לבבכם׃

69:33b.PSA.069.033 כי שמע אל אביונים יהוה ואת אסיריו לא בזה׃

69:34b.PSA.069.034 יהללוהו שמים וארץ ימים וכל רמש בם׃

69:35b.PSA.069.035 כי אלהים יושיע ציון ויבנה ערי יהודה וישבו שם וירשוה׃

69:36b.PSA.069.036 וזרע עבדיו ינחלוה ואהבי שמו ישכנו בה׃

70

70:1b.PSA.070.001 למנצח לדוד להזכיר אלהים להצילני יהוה לעזרתי חושה׃

70:2b.PSA.070.002 יבשו ויחפרו מבקשי נפשי יסגו אחור ויכלמו חפצי רעתי׃

70:3b.PSA.070.003 ישובו על עקב בשתם האמרים האח האח׃

70:4b.PSA.070.004 ישישו וישמחו בך כל מבקשיך ויאמרו תמיד יגדל אלהים אהבי ישועתך׃

70:5b.PSA.070.005 ואני עני ואביון אלהים חושה לי עזרי ומפלטי אתה יהוה אל תאחר׃

71

71:1b.PSA.071.001 בך יהוה חסיתי אל אבושה לעולם׃

71:2b.PSA.071.002 בצדקתך תצילני ותפלטני הטה אלי אזנך והושיעני׃

71:3b.PSA.071.003 היה לי לצור מעון לבוא תמיד צוית להושיעני כי סלעי ומצודתי אתה׃

71:4b.PSA.071.004 אלהי פלטני מיד רשע מכף מעול וחומץ׃

71:5b.PSA.071.005 כי אתה תקותי אדני יהוה מבטחי מנעורי׃

71:6b.PSA.071.006 עליך נסמכתי מבטן ממעי אמי אתה גוזי בך תהלתי תמיד׃

71:7b.PSA.071.007 כמופת הייתי לרבים ואתה מחסי עז׃

71:8b.PSA.071.008 ימלא פי תהלתך כל היום תפארתך׃

71:9b.PSA.071.009 אל תשליכני לעת זקנה ככלות כחי אל תעזבני׃

71:10b.PSA.071.010 כי אמרו אויבי לי ושמרי נפשי נועצו יחדו׃

71:11b.PSA.071.011 לאמר אלהים עזבו רדפו ותפשוהו כי אין מציל׃

71:12b.PSA.071.012 אלהים אל תרחק ממני אלהי לעזרתי חישה׃

71:13b.PSA.071.013 יבשו יכלו שטני נפשי יעטו חרפה וכלמה מבקשי רעתי׃

71:14b.PSA.071.014 ואני תמיד איחל והוספתי על כל תהלתך׃

71:15b.PSA.071.015 פי יספר צדקתך כל היום תשועתך כי לא ידעתי ספרות׃

71:16b.PSA.071.016 אבוא בגברות אדני יהוה אזכיר צדקתך לבדך׃

71:17b.PSA.071.017 אלהים למדתני מנעורי ועד הנה אגיד נפלאותיך׃

71:18b.PSA.071.018 וגם עד זקנה ושיבה אלהים אל תעזבני עד אגיד זרועך לדור לכל יבוא גבורתך׃

71:19b.PSA.071.019 וצדקתך אלהים עד מרום אשר עשית גדלות אלהים מי כמוך׃

71:20b.PSA.071.020 אשר הראיתנו צרות רבות ורעות תשוב תחיינו ומתהמות הארץ תשוב תעלני׃

71:21b.PSA.071.021 תרב גדלתי ותסב תנחמני׃

71:22b.PSA.071.022 גם אני אודך בכלי נבל אמתך אלהי אזמרה לך בכנור קדוש ישראל׃

71:23b.PSA.071.023 תרננה שפתי כי אזמרה לך ונפשי אשר פדית׃

71:24b.PSA.071.024 גם לשוני כל היום תהגה צדקתך כי בשו כי חפרו מבקשי רעתי׃

72

72:1b.PSA.072.001 לשלמה אלהים משפטיך למלך תן וצדקתך לבן מלך׃

72:2b.PSA.072.002 ידין עמך בצדק וענייך במשפט׃

72:3b.PSA.072.003 ישאו הרים שלום לעם וגבעות בצדקה׃

72:4b.PSA.072.004 ישפט עניי עם יושיע לבני אביון וידכא עושק׃

72:5b.PSA.072.005 ייראוך עם שמש ולפני ירח דור דורים׃

72:6b.PSA.072.006 ירד כמטר על גז כרביבים זרזיף ארץ׃

72:7b.PSA.072.007 יפרח בימיו צדיק ורב שלום עד בלי ירח׃

72:8b.PSA.072.008 וירד מים עד ים ומנהר עד אפסי ארץ׃

72:9b.PSA.072.009 לפניו יכרעו ציים ואיביו עפר ילחכו׃

72:10b.PSA.072.010 מלכי תרשיש ואיים מנחה ישיבו מלכי שבא וסבא אשכר יקריבו׃

72:11b.PSA.072.011 וישתחוו לו כל מלכים כל גוים יעבדוהו׃

72:12b.PSA.072.012 כי יציל אביון משוע ועני ואין עזר לו׃

72:13b.PSA.072.013 יחס על דל ואביון ונפשות אביונים יושיע׃

72:14b.PSA.072.014 מתוך ומחמס יגאל נפשם וייקר דמם בעיניו׃

72:15b.PSA.072.015 ויחי ויתן לו מזהב שבא ויתפלל בעדו תמיד כל היום יברכנהו׃

72:16b.PSA.072.016 יהי פסת בר בארץ בראש הרים ירעש כלבנון פריו ויציצו מעיר כעשב הארץ׃

72:17b.PSA.072.017 יהי שמו לעולם לפני שמש ינין שמו ויתברכו בו כל גוים יאשרוהו׃

72:18b.PSA.072.018 ברוך יהוה אלהים אלהי ישראל עשה נפלאות לבדו׃

72:19b.PSA.072.019 וברוך שם כבודו לעולם וימלא כבודו את כל הארץ אמן ואמן׃

72:20b.PSA.072.020 כלו תפלות דוד בן ישי׃

73

73:1b.PSA.073.001 מזמור לאסף אך טוב לישראל אלהים לברי לבב׃

73:2b.PSA.073.002 ואני כמעט נטוי רגלי כאין שפכה אשרי׃

73:3b.PSA.073.003 כי קנאתי בהוללים שלום רשעים אראה׃

73:4b.PSA.073.004 כי אין חרצבות למותם ובריא אולם׃

73:5b.PSA.073.005 בעמל אנוש אינמו ועם אדם לא ינגעו׃

73:6b.PSA.073.006 לכן ענקתמו גאוה יעטף שית חמס למו׃

73:7b.PSA.073.007 יצא מחלב עינמו עברו משכיות לבב׃

73:8b.PSA.073.008 ימיקו וידברו ברע עשק ממרום ידברו׃

73:9b.PSA.073.009 שתו בשמים פיהם ולשונם תהלך בארץ׃

73:10b.PSA.073.010 לכן ישיב עמו הלם ומי מלא ימצו למו׃

73:11b.PSA.073.011 ואמרו איכה ידע אל ויש דעה בעליון׃

73:12b.PSA.073.012 הנה אלה רשעים ושלוי עולם השגו חיל׃

73:13b.PSA.073.013 אך ריק זכיתי לבבי וארחץ בנקיון כפי׃

73:14b.PSA.073.014 ואהי נגוע כל היום ותוכחתי לבקרים׃

73:15b.PSA.073.015 אם אמרתי אספרה כמו הנה דור בניך בגדתי׃

73:16b.PSA.073.016 ואחשבה לדעת זאת עמל היא בעיני׃

73:17b.PSA.073.017 עד אבוא אל מקדשי אל אבינה לאחריתם׃

73:18b.PSA.073.018 אך בחלקות תשית למו הפלתם למשואות׃

73:19b.PSA.073.019 איך היו לשמה כרגע ספו תמו מן בלהות׃

73:20b.PSA.073.020 כחלום מהקיץ אדני בעיר צלמם תבזה׃

73:21b.PSA.073.021 כי יתחמץ לבבי וכליותי אשתונן׃

73:22b.PSA.073.022 ואני בער ולא אדע בהמות הייתי עמך׃

73:23b.PSA.073.023 ואני תמיד עמך אחזת ביד ימיני׃

73:24b.PSA.073.024 בעצתך תנחני ואחר כבוד תקחני׃

73:25b.PSA.073.025 מי לי בשמים ועמך לא חפצתי בארץ׃

73:26b.PSA.073.026 כלה שארי ולבבי צור לבבי וחלקי אלהים לעולם׃

73:27b.PSA.073.027 כי הנה רחקיך יאבדו הצמתה כל זונה ממך׃

73:28b.PSA.073.028 ואני קרבת אלהים לי טוב שתי באדני יהוה מחסי לספר כל מלאכותיך׃

74

74:1b.PSA.074.001 משכיל לאסף למה אלהים זנחת לנצח יעשן אפך בצאן מרעיתך׃

74:2b.PSA.074.002 זכר עדתך קנית קדם גאלת שבט נחלתך הר ציון זה שכנת בו׃

74:3b.PSA.074.003 הרימה פעמיך למשאות נצח כל הרע אויב בקדש׃

74:4b.PSA.074.004 שאגו צרריך בקרב מועדך שמו אותתם אתות׃

74:5b.PSA.074.005 יודע כמביא למעלה בסבך עץ קרדמות׃

74:6b.PSA.074.006 ועת פתוחיה יחד בכשיל וכילפת יהלמון׃

74:7b.PSA.074.007 שלחו באש מקדשך לארץ חללו משכן שמך׃

74:8b.PSA.074.008 אמרו בלבם נינם יחד שרפו כל מועדי אל בארץ׃

74:9b.PSA.074.009 אותתינו לא ראינו אין עוד נביא ולא אתנו ידע עד מה׃

74:10b.PSA.074.010 עד מתי אלהים יחרף צר ינאץ אויב שמך לנצח׃

74:11b.PSA.074.011 למה תשיב ידך וימינך מקרב חוקך כלה׃

74:12b.PSA.074.012 ואלהים מלכי מקדם פעל ישועות בקרב הארץ׃

74:13b.PSA.074.013 אתה פוררת בעזך ים שברת ראשי תנינים על המים׃

74:14b.PSA.074.014 אתה רצצת ראשי לויתן תתננו מאכל לעם לציים׃

74:15b.PSA.074.015 אתה בקעת מעין ונחל אתה הובשת נהרות איתן׃

74:16b.PSA.074.016 לך יום אף לך לילה אתה הכינות מאור ושמש׃

74:17b.PSA.074.017 אתה הצבת כל גבולות ארץ קיץ וחרף אתה יצרתם׃

74:18b.PSA.074.018 זכר זאת אויב חרף יהוה ועם נבל נאצו שמך׃

74:19b.PSA.074.019 אל תתן לחית נפש תורך חית ענייך אל תשכח לנצח׃

74:20b.PSA.074.020 הבט לברית כי מלאו מחשכי ארץ נאות חמס׃

74:21b.PSA.074.021 אל ישב דך נכלם עני ואביון יהללו שמך׃

74:22b.PSA.074.022 קומה אלהים ריבה ריבך זכר חרפתך מני נבל כל היום׃

74:23b.PSA.074.023 אל תשכח קול צרריך שאון קמיך עלה תמיד׃

75

75:1b.PSA.075.001 למנצח אל תשחת מזמור לאסף שיר הודינו לך אלהים הודינו וקרוב שמך ספרו נפלאותיך׃

75:2b.PSA.075.002 כי אקח מועד אני מישרים אשפט׃

75:3b.PSA.075.003 נמגים ארץ וכל ישביה אנכי תכנתי עמודיה סלה׃

75:4b.PSA.075.004 אמרתי להוללים אל תהלו ולרשעים אל תרימו קרן׃

75:5b.PSA.075.005 אל תרימו למרום קרנכם תדברו בצואר עתק׃

75:6b.PSA.075.006 כי לא ממוצא וממערב ולא ממדבר הרים׃

75:7b.PSA.075.007 כי אלהים שפט זה ישפיל וזה ירים׃

75:8b.PSA.075.008 כי כוס ביד יהוה ויין חמר מלא מסך ויגר מזה אך שמריה ימצו ישתו כל רשעי ארץ׃

75:9b.PSA.075.009 ואני אגיד לעלם אזמרה לאלהי יעקב׃

75:10b.PSA.075.010 וכל קרני רשעים אגדע תרוממנה קרנות צדיק׃

76

76:1b.PSA.076.001 למנצח בנגינת מזמור לאסף שיר נודע ביהודה אלהים בישראל גדול שמו׃

76:2b.PSA.076.002 ויהי בשלם סכו ומעונתו בציון׃

76:3b.PSA.076.003 שמה שבר רשפי קשת מגן וחרב ומלחמה סלה׃

76:4b.PSA.076.004 נאור אתה אדיר מהררי טרף׃

76:5b.PSA.076.005 אשתוללו אבירי לב נמו שנתם ולא מצאו כל אנשי חיל ידיהם׃

76:6b.PSA.076.006 מגערתך אלהי יעקב נרדם ורכב וסוס׃

76:7b.PSA.076.007 אתה נורא אתה ומי יעמד לפניך מאז אפך׃

76:8b.PSA.076.008 משמים השמעת דין ארץ יראה ושקטה׃

76:9b.PSA.076.009 בקום למשפט אלהים להושיע כל ענוי ארץ סלה׃

76:10b.PSA.076.010 כי חמת אדם תודך שארית חמת תחגר׃

76:11b.PSA.076.011 נדרו ושלמו ליהוה אלהיכם כל סביביו יובילו שי למורא׃

76:12b.PSA.076.012 יבצר רוח נגידים נורא למלכי ארץ׃

77

77:1b.PSA.077.001 למנצח על ידיתון לאסף מזמור קולי אל אלהים ואצעקה קולי אל אלהים והאזין אלי׃

77:2b.PSA.077.002 ביום צרתי אדני דרשתי ידי לילה נגרה ולא תפוג מאנה הנחם נפשי׃

77:3b.PSA.077.003 אזכרה אלהים ואהמיה אשיחה ותתעטף רוחי סלה׃

77:4b.PSA.077.004 אחזת שמרות עיני נפעמתי ולא אדבר׃

77:5b.PSA.077.005 חשבתי ימים מקדם שנות עולמים׃

77:6b.PSA.077.006 אזכרה נגינתי בלילה עם לבבי אשיחה ויחפש רוחי׃

77:7b.PSA.077.007 הלעולמים יזנח אדני ולא יסיף לרצות עוד׃

77:8b.PSA.077.008 האפס לנצח חסדו גמר אמר לדר ודר׃

77:9b.PSA.077.009 השכח חנות אל אם קפץ באף רחמיו סלה׃

77:10b.PSA.077.010 ואמר חלותי היא שנות ימין עליון׃

77:11b.PSA.077.011 אזכיר מעללי יה כי אזכרה מקדם פלאך׃

77:12b.PSA.077.012 והגיתי בכל פעלך ובעלילותיך אשיחה׃

77:13b.PSA.077.013 אלהים בקדש דרכך מי אל גדול כאלהים׃

77:14b.PSA.077.014 אתה האל עשה פלא הודעת בעמים עזך׃

77:15b.PSA.077.015 גאלת בזרוע עמך בני יעקב ויוסף סלה׃

77:16b.PSA.077.016 ראוך מים אלהים ראוך מים יחילו אף ירגזו תהמות׃

77:17b.PSA.077.017 זרמו מים עבות קול נתנו שחקים אף חצציך יתהלכו׃

77:18b.PSA.077.018 קול רעמך בגלגל האירו ברקים תבל רגזה ותרעש הארץ׃

77:19b.PSA.077.019 בים דרכך ושביליך במים רבים ועקבותיך לא נדעו׃

77:20b.PSA.077.020 נחית כצאן עמך ביד משה ואהרן׃

78

78:1b.PSA.078.001 משכיל לאסף האזינה עמי תורתי הטו אזנכם לאמרי פי׃

78:2b.PSA.078.002 אפתחה במשל פי אביעה חידות מני קדם׃

78:3b.PSA.078.003 אשר שמענו ונדעם ואבותינו ספרו לנו׃

78:4b.PSA.078.004 לא נכחד מבניהם לדור אחרון מספרים תהלות יהוה ועזוזו ונפלאותיו אשר עשה׃

78:5b.PSA.078.005 ויקם עדות ביעקב ותורה שם בישראל אשר צוה את אבותינו להודיעם לבניהם׃

78:6b.PSA.078.006 למען ידעו דור אחרון בנים יולדו יקמו ויספרו לבניהם׃

78:7b.PSA.078.007 וישימו באלהים כסלם ולא ישכחו מעללי אל ומצותיו ינצרו׃

78:8b.PSA.078.008 ולא יהיו כאבותם דור סורר ומרה דור לא הכין לבו ולא נאמנה את אל רוחו׃

78:9b.PSA.078.009 בני אפרים נושקי רומי קשת הפכו ביום קרב׃

78:10b.PSA.078.010 לא שמרו ברית אלהים ובתורתו מאנו ללכת׃

78:11b.PSA.078.011 וישכחו עלילותיו ונפלאותיו אשר הראם׃

78:12b.PSA.078.012 נגד אבותם עשה פלא בארץ מצרים שדה צען׃

78:13b.PSA.078.013 בקע ים ויעבירם ויצב מים כמו נד׃

78:14b.PSA.078.014 וינחם בענן יומם וכל הלילה באור אש׃

78:15b.PSA.078.015 יבקע צרים במדבר וישק כתהמות רבה׃

78:16b.PSA.078.016 ויוצא נוזלים מסלע ויורד כנהרות מים׃

78:17b.PSA.078.017 ויוסיפו עוד לחטא לו למרות עליון בציה׃

78:18b.PSA.078.018 וינסו אל בלבבם לשאל אכל לנפשם׃

78:19b.PSA.078.019 וידברו באלהים אמרו היוכל אל לערך שלחן במדבר׃

78:20b.PSA.078.020 הן הכה צור ויזובו מים ונחלים ישטפו הגם לחם יוכל תת אם יכין שאר לעמו׃

78:21b.PSA.078.021 לכן שמע יהוה ויתעבר ואש נשקה ביעקב וגם אף עלה בישראל׃

78:22b.PSA.078.022 כי לא האמינו באלהים ולא בטחו בישועתו׃

78:23b.PSA.078.023 ויצו שחקים ממעל ודלתי שמים פתח׃

78:24b.PSA.078.024 וימטר עליהם מן לאכל ודגן שמים נתן למו׃

78:25b.PSA.078.025 לחם אבירים אכל איש צידה שלח להם לשבע׃

78:26b.PSA.078.026 יסע קדים בשמים וינהג בעזו תימן׃

78:27b.PSA.078.027 וימטר עליהם כעפר שאר וכחול ימים עוף כנף׃

78:28b.PSA.078.028 ויפל בקרב מחנהו סביב למשכנתיו׃

78:29b.PSA.078.029 ויאכלו וישבעו מאד ותאותם יבא להם׃

78:30b.PSA.078.030 לא זרו מתאותם עוד אכלם בפיהם׃

78:31b.PSA.078.031 ואף אלהים עלה בהם ויהרג במשמניהם ובחורי ישראל הכריע׃

78:32b.PSA.078.032 בכל זאת חטאו עוד ולא האמינו בנפלאותיו׃

78:33b.PSA.078.033 ויכל בהבל ימיהם ושנותם בבהלה׃

78:34b.PSA.078.034 אם הרגם ודרשוהו ושבו ושחרו אל׃

78:35b.PSA.078.035 ויזכרו כי אלהים צורם ואל עליון גאלם׃

78:36b.PSA.078.036 ויפתוהו בפיהם ובלשונם יכזבו לו׃

78:37b.PSA.078.037 ולבם לא נכון עמו ולא נאמנו בבריתו׃

78:38b.PSA.078.038 והוא רחום יכפר עון ולא ישחית והרבה להשיב אפו ולא יעיר כל חמתו׃

78:39b.PSA.078.039 ויזכר כי בשר המה רוח הולך ולא ישוב׃

78:40b.PSA.078.040 כמה ימרוהו במדבר יעציבוהו בישימון׃

78:41b.PSA.078.041 וישובו וינסו אל וקדוש ישראל התוו׃

78:42b.PSA.078.042 לא זכרו את ידו יום אשר פדם מני צר׃

78:43b.PSA.078.043 אשר שם במצרים אתותיו ומופתיו בשדה צען׃

78:44b.PSA.078.044 ויהפך לדם יאריהם ונזליהם בל ישתיון׃

78:45b.PSA.078.045 ישלח בהם ערב ויאכלם וצפרדע ותשחיתם׃

78:46b.PSA.078.046 ויתן לחסיל יבולם ויגיעם לארבה׃

78:47b.PSA.078.047 יהרג בברד גפנם ושקמותם בחנמל׃

78:48b.PSA.078.048 ויסגר לברד בעירם ומקניהם לרשפים׃

78:49b.PSA.078.049 ישלח בם חרון אפו עברה וזעם וצרה משלחת מלאכי רעים׃

78:50b.PSA.078.050 יפלס נתיב לאפו לא חשך ממות נפשם וחיתם לדבר הסגיר׃

78:51b.PSA.078.051 ויך כל בכור במצרים ראשית אונים באהלי חם׃

78:52b.PSA.078.052 ויסע כצאן עמו וינהגם כעדר במדבר׃

78:53b.PSA.078.053 וינחם לבטח ולא פחדו ואת אויביהם כסה הים׃

78:54b.PSA.078.054 ויביאם אל גבול קדשו הר זה קנתה ימינו׃

78:55b.PSA.078.055 ויגרש מפניהם גוים ויפילם בחבל נחלה וישכן באהליהם שבטי ישראל׃

78:56b.PSA.078.056 וינסו וימרו את אלהים עליון ועדותיו לא שמרו׃

78:57b.PSA.078.057 ויסגו ויבגדו כאבותם נהפכו כקשת רמיה׃

78:58b.PSA.078.058 ויכעיסוהו בבמותם ובפסיליהם יקניאוהו׃

78:59b.PSA.078.059 שמע אלהים ויתעבר וימאס מאד בישראל׃

78:60b.PSA.078.060 ויטש משכן שלו אהל שכן באדם׃

78:61b.PSA.078.061 ויתן לשבי עזו ותפארתו ביד צר׃

78:62b.PSA.078.062 ויסגר לחרב עמו ובנחלתו התעבר׃

78:63b.PSA.078.063 בחוריו אכלה אש ובתולתיו לא הוללו׃

78:64b.PSA.078.064 כהניו בחרב נפלו ואלמנתיו לא תבכינה׃

78:65b.PSA.078.065 ויקץ כישן אדני כגבור מתרונן מיין׃

78:66b.PSA.078.066 ויך צריו אחור חרפת עולם נתן למו׃

78:67b.PSA.078.067 וימאס באהל יוסף ובשבט אפרים לא בחר׃

78:68b.PSA.078.068 ויבחר את שבט יהודה את הר ציון אשר אהב׃

78:69b.PSA.078.069 ויבן כמו רמים מקדשו כארץ יסדה לעולם׃

78:70b.PSA.078.070 ויבחר בדוד עבדו ויקחהו ממכלאת צאן׃

78:71b.PSA.078.071 מאחר עלות הביאו לרעות ביעקב עמו ובישראל נחלתו׃

78:72b.PSA.078.072 וירעם כתם לבבו ובתבונות כפיו ינחם׃

79

79:1b.PSA.079.001 מזמור לאסף אלהים באו גוים בנחלתך טמאו את היכל קדשך שמו את ירושלם לעיים׃

79:2b.PSA.079.002 נתנו את נבלת עבדיך מאכל לעוף השמים בשר חסידיך לחיתו ארץ׃

79:3b.PSA.079.003 שפכו דמם כמים סביבות ירושלם ואין קובר׃

79:4b.PSA.079.004 היינו חרפה לשכנינו לעג וקלס לסביבותינו׃

79:5b.PSA.079.005 עד מה יהוה תאנף לנצח תבער כמו אש קנאתך׃

79:6b.PSA.079.006 שפך חמתך אל הגוים אשר לא ידעוך ועל ממלכות אשר בשמך לא קראו׃

79:7b.PSA.079.007 כי אכל את יעקב ואת נוהו השמו׃

79:8b.PSA.079.008 אל תזכר לנו עונת ראשנים מהר יקדמונו רחמיך כי דלונו מאד׃

79:9b.PSA.079.009 עזרנו אלהי ישענו על דבר כבוד שמך והצילנו וכפר על חטאתינו למען שמך׃

79:10b.PSA.079.010 למה יאמרו הגוים איה אלהיהם יודע בגיים לעינינו נקמת דם עבדיך השפוך׃

79:11b.PSA.079.011 תבוא לפניך אנקת אסיר כגדל זרועך הותר בני תמותה׃

79:12b.PSA.079.012 והשב לשכנינו שבעתים אל חיקם חרפתם אשר חרפוך אדני׃

79:13b.PSA.079.013 ואנחנו עמך וצאן מרעיתך נודה לך לעולם לדר ודר נספר תהלתך׃

80

80:1b.PSA.080.001 למנצח אל ששנים עדות לאסף מזמור רעה ישראל האזינה נהג כצאן יוסף ישב הכרובים הופיעה׃

80:2b.PSA.080.002 לפני אפרים ובנימן ומנשה עוררה את גבורתך ולכה לישעתה לנו׃

80:3b.PSA.080.003 אלהים השיבנו והאר פניך ונושעה׃

80:4b.PSA.080.004 יהוה אלהים צבאות עד מתי עשנת בתפלת עמך׃

80:5b.PSA.080.005 האכלתם לחם דמעה ותשקמו בדמעות שליש׃

80:6b.PSA.080.006 תשימנו מדון לשכנינו ואיבינו ילעגו למו׃

80:7b.PSA.080.007 אלהים צבאות השיבנו והאר פניך ונושעה׃

80:8b.PSA.080.008 גפן ממצרים תסיע תגרש גוים ותטעה׃

80:9b.PSA.080.009 פנית לפניה ותשרש שרשיה ותמלא ארץ׃

80:10b.PSA.080.010 כסו הרים צלה וענפיה ארזי אל׃

80:11b.PSA.080.011 תשלח קצירה עד ים ואל נהר יונקותיה׃

80:12b.PSA.080.012 למה פרצת גדריה וארוה כל עברי דרך׃

80:13b.PSA.080.013 יכרסמנה חזיר מיער וזיז שדי ירענה׃

80:14b.PSA.080.014 אלהים צבאות שוב נא הבט משמים וראה ופקד גפן זאת׃

80:15b.PSA.080.015 וכנה אשר נטעה ימינך ועל בן אמצתה לך׃

80:16b.PSA.080.016 שרפה באש כסוחה מגערת פניך יאבדו׃

80:17b.PSA.080.017 תהי ידך על איש ימינך על בן אדם אמצת לך׃

80:18b.PSA.080.018 ולא נסוג ממך תחינו ובשמך נקרא׃

80:19b.PSA.080.019 יהוה אלהים צבאות השיבנו האר פניך ונושעה׃

81

81:1b.PSA.081.001 למנצח על הגתית לאסף הרנינו לאלהים עוזנו הריעו לאלהי יעקב׃

81:2b.PSA.081.002 שאו זמרה ותנו תף כנור נעים עם נבל׃

81:3b.PSA.081.003 תקעו בחדש שופר בכסה ליום חגנו׃

81:4b.PSA.081.004 כי חק לישראל הוא משפט לאלהי יעקב׃

81:5b.PSA.081.005 עדות ביהוסף שמו בצאתו על ארץ מצרים שפת לא ידעתי אשמע׃

81:6b.PSA.081.006 הסירותי מסבל שכמו כפיו מדוד תעברנה׃

81:7b.PSA.081.007 בצרה קראת ואחלצך אענך בסתר רעם אבחנך על מי מריבה סלה׃

81:8b.PSA.081.008 שמע עמי ואעידה בך ישראל אם תשמע לי׃

81:9b.PSA.081.009 לא יהיה בך אל זר ולא תשתחוה לאל נכר׃

81:10b.PSA.081.010 אנכי יהוה אלהיך המעלך מארץ מצרים הרחב פיך ואמלאהו׃

81:11b.PSA.081.011 ולא שמע עמי לקולי וישראל לא אבה לי׃

81:12b.PSA.081.012 ואשלחהו בשרירות לבם ילכו במועצותיהם׃

81:13b.PSA.081.013 לו עמי שמע לי ישראל בדרכי יהלכו׃

81:14b.PSA.081.014 כמעט אויביהם אכניע ועל צריהם אשיב ידי׃

81:15b.PSA.081.015 משנאי יהוה יכחשו לו ויהי עתם לעולם׃

81:16b.PSA.081.016 ויאכילהו מחלב חטה ומצור דבש אשביעך׃

82

82:1b.PSA.082.001 מזמור לאסף אלהים נצב בעדת אל בקרב אלהים ישפט׃

82:2b.PSA.082.002 עד מתי תשפטו עול ופני רשעים תשאו סלה׃

82:3b.PSA.082.003 שפטו דל ויתום עני ורש הצדיקו׃

82:4b.PSA.082.004 פלטו דל ואביון מיד רשעים הצילו׃

82:5b.PSA.082.005 לא ידעו ולא יבינו בחשכה יתהלכו ימוטו כל מוסדי ארץ׃

82:6b.PSA.082.006 אני אמרתי אלהים אתם ובני עליון כלכם׃

82:7b.PSA.082.007 אכן כאדם תמותון וכאחד השרים תפלו׃

82:8b.PSA.082.008 קומה אלהים שפטה הארץ כי אתה תנחל בכל הגוים׃

83

83:1b.PSA.083.001 שיר מזמור לאסף אלהים אל דמי לך אל תחרש ואל תשקט אל׃

83:2b.PSA.083.002 כי הנה אויביך יהמיון ומשנאיך נשאו ראש׃

83:3b.PSA.083.003 על עמך יערימו סוד ויתיעצו על צפוניך׃

83:4b.PSA.083.004 אמרו לכו ונכחידם מגוי ולא יזכר שם ישראל עוד׃

83:5b.PSA.083.005 כי נועצו לב יחדו עליך ברית יכרתו׃

83:6b.PSA.083.006 אהלי אדום וישמעאלים מואב והגרים׃

83:7b.PSA.083.007 גבל ועמון ועמלק פלשת עם ישבי צור׃

83:8b.PSA.083.008 גם אשור נלוה עמם היו זרוע לבני לוט סלה׃

83:9b.PSA.083.009 עשה להם כמדין כסיסרא כיבין בנחל קישון׃

83:10b.PSA.083.010 נשמדו בעין דאר היו דמן לאדמה׃

83:11b.PSA.083.011 שיתמו נדיבמו כערב וכזאב וכזבח וכצלמנע כל נסיכמו׃

83:12b.PSA.083.012 אשר אמרו נירשה לנו את נאות אלהים׃

83:13b.PSA.083.013 אלהי שיתמו כגלגל כקש לפני רוח׃

83:14b.PSA.083.014 כאש תבער יער וכלהבה תלהט הרים׃

83:15b.PSA.083.015 כן תרדפם בסערך ובסופתך תבהלם׃

83:16b.PSA.083.016 מלא פניהם קלון ויבקשו שמך יהוה׃

83:17b.PSA.083.017 יבשו ויבהלו עדי עד ויחפרו ויאבדו׃

83:18b.PSA.083.018 וידעו כי אתה שמך יהוה לבדך עליון על כל הארץ׃

84

84:1b.PSA.084.001 למנצח על הגתית לבני קרח מזמור מה ידידות משכנותיך יהוה צבאות׃

84:2b.PSA.084.002 נכספה וגם כלתה נפשי לחצרות יהוה לבי ובשרי ירננו אל אל חי׃

84:3b.PSA.084.003 גם צפור מצאה בית ודרור קן לה אשר שתה אפרחיה את מזבחותיך יהוה צבאות מלכי ואלהי׃

84:4b.PSA.084.004 אשרי יושבי ביתך עוד יהללוך סלה׃

84:5b.PSA.084.005 אשרי אדם עוז לו בך מסלות בלבבם׃

84:6b.PSA.084.006 עברי בעמק הבכא מעין ישיתוהו גם ברכות יעטה מורה׃

84:7b.PSA.084.007 ילכו מחיל אל חיל יראה אל אלהים בציון׃

84:8b.PSA.084.008 יהוה אלהים צבאות שמעה תפלתי האזינה אלהי יעקב סלה׃

84:9b.PSA.084.009 מגננו ראה אלהים והבט פני משיחך׃

84:10b.PSA.084.010 כי טוב יום בחצריך מאלף בחרתי הסתופף בבית אלהי מדור באהלי רשע׃

84:11b.PSA.084.011 כי שמש ומגן יהוה אלהים חן וכבוד יתן יהוה לא ימנע טוב להלכים בתמים׃

84:12b.PSA.084.012 יהוה צבאות אשרי אדם בטח בך׃

85

85:1b.PSA.085.001 למנצח לבני קרח מזמור רצית יהוה ארצך שבת שבות יעקב׃

85:2b.PSA.085.002 נשאת עון עמך כסית כל חטאתם סלה׃

85:3b.PSA.085.003 אספת כל עברתך השיבות מחרון אפך׃

85:4b.PSA.085.004 שובנו אלהי ישענו והפר כעסך עמנו׃

85:5b.PSA.085.005 הלעולם תאנף בנו תמשך אפך לדר ודר׃

85:6b.PSA.085.006 הלא אתה תשוב תחינו ועמך ישמחו בך׃

85:7b.PSA.085.007 הראנו יהוה חסדך וישעך תתן לנו׃

85:8b.PSA.085.008 אשמעה מה ידבר האל יהוה כי ידבר שלום אל עמו ואל חסידיו ואל ישובו לכסלה׃

85:9b.PSA.085.009 אך קרוב ליראיו ישעו לשכן כבוד בארצנו׃

85:10b.PSA.085.010 חסד ואמת נפגשו צדק ושלום נשקו׃

85:11b.PSA.085.011 אמת מארץ תצמח וצדק משמים נשקף׃

85:12b.PSA.085.012 גם יהוה יתן הטוב וארצנו תתן יבולה׃

85:13b.PSA.085.013 צדק לפניו יהלך וישם לדרך פעמיו׃

86

86:1b.PSA.086.001 תפלה לדוד הטה יהוה אזנך ענני כי עני ואביון אני׃

86:2b.PSA.086.002 שמרה נפשי כי חסיד אני הושע עבדך אתה אלהי הבוטח אליך׃

86:3b.PSA.086.003 חנני אדני כי אליך אקרא כל היום׃

86:4b.PSA.086.004 שמח נפש עבדך כי אליך אדני נפשי אשא׃

86:5b.PSA.086.005 כי אתה אדני טוב וסלח ורב חסד לכל קראיך׃

86:6b.PSA.086.006 האזינה יהוה תפלתי והקשיבה בקול תחנונותי׃

86:7b.PSA.086.007 ביום צרתי אקראך כי תענני׃

86:8b.PSA.086.008 אין כמוך באלהים אדני ואין כמעשיך׃

86:9b.PSA.086.009 כל גוים אשר עשית יבואו וישתחוו לפניך אדני ויכבדו לשמך׃

86:10b.PSA.086.010 כי גדול אתה ועשה נפלאות אתה אלהים לבדך׃

86:11b.PSA.086.011 הורני יהוה דרכך אהלך באמתך יחד לבבי ליראה שמך׃

86:12b.PSA.086.012 אודך אדני אלהי בכל לבבי ואכבדה שמך לעולם׃

86:13b.PSA.086.013 כי חסדך גדול עלי והצלת נפשי משאול תחתיה׃

86:14b.PSA.086.014 אלהים זדים קמו עלי ועדת עריצים בקשו נפשי ולא שמוך לנגדם׃

86:15b.PSA.086.015 ואתה אדני אל רחום וחנון ארך אפים ורב חסד ואמת׃

86:16b.PSA.086.016 פנה אלי וחנני תנה עזך לעבדך והושיעה לבן אמתך׃

86:17b.PSA.086.017 עשה עמי אות לטובה ויראו שנאי ויבשו כי אתה יהוה עזרתני ונחמתני׃

87

87:1b.PSA.087.001 לבני קרח מזמור שיר יסודתו בהררי קדש׃

87:2b.PSA.087.002 אהב יהוה שערי ציון מכל משכנות יעקב׃

87:3b.PSA.087.003 נכבדות מדבר בך עיר האלהים סלה׃

87:4b.PSA.087.004 אזכיר רהב ובבל לידעי הנה פלשת וצור עם כוש זה ילד שם׃

87:5b.PSA.087.005 ולציון יאמר איש ואיש ילד בה והוא יכוננה עליון׃

87:6b.PSA.087.006 יהוה יספר בכתוב עמים זה ילד שם סלה׃

87:7b.PSA.087.007 ושרים כחללים כל מעיני בך׃

88

88:1b.PSA.088.001 שיר מזמור לבני קרח למנצח על מחלת לענות משכיל להימן האזרחי יהוה אלהי ישועתי יום צעקתי בלילה נגדך׃

88:2b.PSA.088.002 תבוא לפניך תפלתי הטה אזנך לרנתי׃

88:3b.PSA.088.003 כי שבעה ברעות נפשי וחיי לשאול הגיעו׃

88:4b.PSA.088.004 נחשבתי עם יורדי בור הייתי כגבר אין איל׃

88:5b.PSA.088.005 במתים חפשי כמו חללים שכבי קבר אשר לא זכרתם עוד והמה מידך נגזרו׃

88:6b.PSA.088.006 שתני בבור תחתיות במחשכים במצלות׃

88:7b.PSA.088.007 עלי סמכה חמתך וכל משבריך ענית סלה׃

88:8b.PSA.088.008 הרחקת מידעי ממני שתני תועבות למו כלא ולא אצא׃

88:9b.PSA.088.009 עיני דאבה מני עני קראתיך יהוה בכל יום שטחתי אליך כפי׃

88:10b.PSA.088.010 הלמתים תעשה פלא אם רפאים יקומו יודוך סלה׃

88:11b.PSA.088.011 היספר בקבר חסדך אמונתך באבדון׃

88:12b.PSA.088.012 היודע בחשך פלאך וצדקתך בארץ נשיה׃

88:13b.PSA.088.013 ואני אליך יהוה שועתי ובבקר תפלתי תקדמך׃

88:14b.PSA.088.014 למה יהוה תזנח נפשי תסתיר פניך ממני׃

88:15b.PSA.088.015 עני אני וגוע מנער נשאתי אמיך אפונה׃

88:16b.PSA.088.016 עלי עברו חרוניך בעותיך צמתותני׃

88:17b.PSA.088.017 סבוני כמים כל היום הקיפו עלי יחד׃

88:18b.PSA.088.018 הרחקת ממני אהב ורע מידעי מחשך׃

89

89:1b.PSA.089.001 משכיל לאיתן האזרחי חסדי יהוה עולם אשירה לדר ודר אודיע אמונתך בפי׃

89:2b.PSA.089.002 כי אמרתי עולם חסד יבנה שמים תכן אמונתך בהם׃

89:3b.PSA.089.003 כרתי ברית לבחירי נשבעתי לדוד עבדי׃

89:4b.PSA.089.004 עד עולם אכין זרעך ובניתי לדר ודור כסאך סלה׃

89:5b.PSA.089.005 ויודו שמים פלאך יהוה אף אמונתך בקהל קדשים׃

89:6b.PSA.089.006 כי מי בשחק יערך ליהוה ידמה ליהוה בבני אלים׃

89:7b.PSA.089.007 אל נערץ בסוד קדשים רבה ונורא על כל סביביו׃

89:8b.PSA.089.008 יהוה אלהי צבאות מי כמוך חסין יה ואמונתך סביבותיך׃

89:9b.PSA.089.009 אתה מושל בגאות הים בשוא גליו אתה תשבחם׃

89:10b.PSA.089.010 אתה דכאת כחלל רהב בזרוע עזך פזרת אויביך׃

89:11b.PSA.089.011 לך שמים אף לך ארץ תבל ומלאה אתה יסדתם׃

89:12b.PSA.089.012 צפון וימין אתה בראתם תבור וחרמון בשמך ירננו׃

89:13b.PSA.089.013 לך זרוע עם גבורה תעז ידך תרום ימינך׃

89:14b.PSA.089.014 צדק ומשפט מכון כסאך חסד ואמת יקדמו פניך׃

89:15b.PSA.089.015 אשרי העם יודעי תרועה יהוה באור פניך יהלכון׃

89:16b.PSA.089.016 בשמך יגילון כל היום ובצדקתך ירומו׃

89:17b.PSA.089.017 כי תפארת עזמו אתה וברצנך תרים קרננו׃

89:18b.PSA.089.018 כי ליהוה מגננו ולקדוש ישראל מלכנו׃

89:19b.PSA.089.019 אז דברת בחזון לחסידיך ותאמר שויתי עזר על גבור הרימותי בחור מעם׃

89:20b.PSA.089.020 מצאתי דוד עבדי בשמן קדשי משחתיו׃

89:21b.PSA.089.021 אשר ידי תכון עמו אף זרועי תאמצנו׃

89:22b.PSA.089.022 לא ישא אויב בו ובן עולה לא יעננו׃

89:23b.PSA.089.023 וכתותי מפניו צריו ומשנאיו אגוף׃

89:24b.PSA.089.024 ואמונתי וחסדי עמו ובשמי תרום קרנו׃

89:25b.PSA.089.025 ושמתי בים ידו ובנהרות ימינו׃

89:26b.PSA.089.026 הוא יקראני אבי אתה אלי וצור ישועתי׃

89:27b.PSA.089.027 אף אני בכור אתנהו עליון למלכי ארץ׃

89:28b.PSA.089.028 לעולם אשמור לו חסדי ובריתי נאמנת לו׃

89:29b.PSA.089.029 ושמתי לעד זרעו וכסאו כימי שמים׃

89:30b.PSA.089.030 אם יעזבו בניו תורתי ובמשפטי לא ילכון׃

89:31b.PSA.089.031 אם חקתי יחללו ומצותי לא ישמרו׃

89:32b.PSA.089.032 ופקדתי בשבט פשעם ובנגעים עונם׃

89:33b.PSA.089.033 וחסדי לא אפיר מעמו ולא אשקר באמונתי׃

89:34b.PSA.089.034 לא אחלל בריתי ומוצא שפתי לא אשנה׃

89:35b.PSA.089.035 אחת נשבעתי בקדשי אם לדוד אכזב׃

89:36b.PSA.089.036 זרעו לעולם יהיה וכסאו כשמש נגדי׃

89:37b.PSA.089.037 כירח יכון עולם ועד בשחק נאמן סלה׃

89:38b.PSA.089.038 ואתה זנחת ותמאס התעברת עם משיחך׃

89:39b.PSA.089.039 נארתה ברית עבדך חללת לארץ נזרו׃

89:40b.PSA.089.040 פרצת כל גדרתיו שמת מבצריו מחתה׃

89:41b.PSA.089.041 שסהו כל עברי דרך היה חרפה לשכניו׃

89:42b.PSA.089.042 הרימות ימין צריו השמחת כל אויביו׃

89:43b.PSA.089.043 אף תשיב צור חרבו ולא הקימתו במלחמה׃

89:44b.PSA.089.044 השבת מטהרו וכסאו לארץ מגרתה׃

89:45b.PSA.089.045 הקצרת ימי עלומיו העטית עליו בושה סלה׃

89:46b.PSA.089.046 עד מה יהוה תסתר לנצח תבער כמו אש חמתך׃

89:47b.PSA.089.047 זכר אני מה חלד על מה שוא בראת כל בני אדם׃

89:48b.PSA.089.048 מי גבר יחיה ולא יראה מות ימלט נפשו מיד שאול סלה׃

89:49b.PSA.089.049 איה חסדיך הראשנים אדני נשבעת לדוד באמונתך׃

89:50b.PSA.089.050 זכר אדני חרפת עבדיך שאתי בחיקי כל רבים עמים׃

89:51b.PSA.089.051 אשר חרפו אויביך יהוה אשר חרפו עקבות משיחך׃

89:52b.PSA.089.052 ברוך יהוה לעולם אמן ואמן׃

90

90:1b.PSA.090.001 תפלה למשה איש האלהים אדני מעון אתה היית לנו בדר ודר׃

90:2b.PSA.090.002 בטרם הרים ילדו ותחולל ארץ ותבל ומעולם עד עולם אתה אל׃

90:3b.PSA.090.003 תשב אנוש עד דכא ותאמר שובו בני אדם׃

90:4b.PSA.090.004 כי אלף שנים בעיניך כיום אתמול כי יעבר ואשמורה בלילה׃

90:5b.PSA.090.005 זרמתם שנה יהיו בבקר כחציר יחלף׃

90:6b.PSA.090.006 בבקר יציץ וחלף לערב ימולל ויבש׃

90:7b.PSA.090.007 כי כלינו באפך ובחמתך נבהלנו׃

90:8b.PSA.090.008 שת עונתינו לנגדך עלמנו למאור פניך׃

90:9b.PSA.090.009 כי כל ימינו פנו בעברתך כלינו שנינו כמו הגה׃

90:10b.PSA.090.010 ימי שנותינו בהם שבעים שנה ואם בגבורת שמונים שנה ורהבם עמל ואון כי גז חיש ונעפה׃

90:11b.PSA.090.011 מי יודע עז אפך וכיראתך עברתך׃

90:12b.PSA.090.012 למנות ימינו כן הודע ונבא לבב חכמה׃

90:13b.PSA.090.013 שובה יהוה עד מתי והנחם על עבדיך׃

90:14b.PSA.090.014 שבענו בבקר חסדך ונרננה ונשמחה בכל ימינו׃

90:15b.PSA.090.015 שמחנו כימות עניתנו שנות ראינו רעה׃

90:16b.PSA.090.016 יראה אל עבדיך פעלך והדרך על בניהם׃

90:17b.PSA.090.017 ויהי נעם אדני אלהינו עלינו ומעשה ידינו כוננה עלינו ומעשה ידינו כוננהו׃

91

91:1b.PSA.091.001 ישב בסתר עליון בצל שדי יתלונן׃

91:2b.PSA.091.002 אמר ליהוה מחסי ומצודתי אלהי אבטח בו׃

91:3b.PSA.091.003 כי הוא יצילך מפח יקוש מדבר הוות׃

91:4b.PSA.091.004 באברתו יסך לך ותחת כנפיו תחסה צנה וסחרה אמתו׃

91:5b.PSA.091.005 לא תירא מפחד לילה מחץ יעוף יומם׃

91:6b.PSA.091.006 מדבר באפל יהלך מקטב ישוד צהרים׃

91:7b.PSA.091.007 יפל מצדך אלף ורבבה מימינך אליך לא יגש׃

91:8b.PSA.091.008 רק בעיניך תביט ושלמת רשעים תראה׃

91:9b.PSA.091.009 כי אתה יהוה מחסי עליון שמת מעונך׃

91:10b.PSA.091.010 לא תאנה אליך רעה ונגע לא יקרב באהלך׃

91:11b.PSA.091.011 כי מלאכיו יצוה לך לשמרך בכל דרכיך׃

91:12b.PSA.091.012 על כפים ישאונך פן תגף באבן רגלך׃

91:13b.PSA.091.013 על שחל ופתן תדרך תרמס כפיר ותנין׃

91:14b.PSA.091.014 כי בי חשק ואפלטהו אשגבהו כי ידע שמי׃

91:15b.PSA.091.015 יקראני ואענהו עמו אנכי בצרה אחלצהו ואכבדהו׃

91:16b.PSA.091.016 ארך ימים אשביעהו ואראהו בישועתי׃

92

92:1b.PSA.092.001 מזמור שיר ליום השבת טוב להדות ליהוה ולזמר לשמך עליון׃

92:2b.PSA.092.002 להגיד בבקר חסדך ואמונתך בלילות׃

92:3b.PSA.092.003 עלי עשור ועלי נבל עלי הגיון בכנור׃

92:4b.PSA.092.004 כי שמחתני יהוה בפעלך במעשי ידיך ארנן׃

92:5b.PSA.092.005 מה גדלו מעשיך יהוה מאד עמקו מחשבתיך׃

92:6b.PSA.092.006 איש בער לא ידע וכסיל לא יבין את זאת׃

92:7b.PSA.092.007 בפרח רשעים כמו עשב ויציצו כל פעלי און להשמדם עדי עד׃

92:8b.PSA.092.008 ואתה מרום לעלם יהוה׃

92:9b.PSA.092.009 כי הנה איביך יהוה כי הנה איביך יאבדו יתפרדו כל פעלי און׃

92:10b.PSA.092.010 ותרם כראים קרני בלתי בשמן רענן׃

92:11b.PSA.092.011 ותבט עיני בשורי בקמים עלי מרעים תשמענה אזני׃

92:12b.PSA.092.012 צדיק כתמר יפרח כארז בלבנון ישגה׃

92:13b.PSA.092.013 שתולים בבית יהוה בחצרות אלהינו יפריחו׃

92:14b.PSA.092.014 עוד ינובון בשיבה דשנים ורעננים יהיו׃

92:15b.PSA.092.015 להגיד כי ישר יהוה צורי ולא עלתה בו׃

93

93:1b.PSA.093.001 יהוה מלך גאות לבש לבש יהוה עז התאזר אף תכון תבל בל תמוט׃

93:2b.PSA.093.002 נכון כסאך מאז מעולם אתה׃

93:3b.PSA.093.003 נשאו נהרות יהוה נשאו נהרות קולם ישאו נהרות דכים׃

93:4b.PSA.093.004 מקלות מים רבים אדירים משברי ים אדיר במרום יהוה׃

93:5b.PSA.093.005 עדתיך נאמנו מאד לביתך נאוה קדש יהוה לארך ימים׃

94

94:1b.PSA.094.001 אל נקמות יהוה אל נקמות הופיע׃

94:2b.PSA.094.002 הנשא שפט הארץ השב גמול על גאים׃

94:3b.PSA.094.003 עד מתי רשעים יהוה עד מתי רשעים יעלזו׃

94:4b.PSA.094.004 יביעו ידברו עתק יתאמרו כל פעלי און׃

94:5b.PSA.094.005 עמך יהוה ידכאו ונחלתך יענו׃

94:6b.PSA.094.006 אלמנה וגר יהרגו ויתומים ירצחו׃

94:7b.PSA.094.007 ויאמרו לא יראה יה ולא יבין אלהי יעקב׃

94:8b.PSA.094.008 בינו בערים בעם וכסילים מתי תשכילו׃

94:9b.PSA.094.009 הנטע אזן הלא ישמע אם יצר עין הלא יביט׃

94:10b.PSA.094.010 היסר גוים הלא יוכיח המלמד אדם דעת׃

94:11b.PSA.094.011 יהוה ידע מחשבות אדם כי המה הבל׃

94:12b.PSA.094.012 אשרי הגבר אשר תיסרנו יה ומתורתך תלמדנו׃

94:13b.PSA.094.013 להשקיט לו מימי רע עד יכרה לרשע שחת׃

94:14b.PSA.094.014 כי לא יטש יהוה עמו ונחלתו לא יעזב׃

94:15b.PSA.094.015 כי עד צדק ישוב משפט ואחריו כל ישרי לב׃

94:16b.PSA.094.016 מי יקום לי עם מרעים מי יתיצב לי עם פעלי און׃

94:17b.PSA.094.017 לולי יהוה עזרתה לי כמעט שכנה דומה נפשי׃

94:18b.PSA.094.018 אם אמרתי מטה רגלי חסדך יהוה יסעדני׃

94:19b.PSA.094.019 ברב שרעפי בקרבי תנחומיך ישעשעו נפשי׃

94:20b.PSA.094.020 היחברך כסא הוות יצר עמל עלי חק׃

94:21b.PSA.094.021 יגודו על נפש צדיק ודם נקי ירשיעו׃

94:22b.PSA.094.022 ויהי יהוה לי למשגב ואלהי לצור מחסי׃

94:23b.PSA.094.023 וישב עליהם את אונם וברעתם יצמיתם יצמיתם יהוה אלהינו׃

95

95:1b.PSA.095.001 לכו נרננה ליהוה נריעה לצור ישענו׃

95:2b.PSA.095.002 נקדמה פניו בתודה בזמרות נריע לו׃

95:3b.PSA.095.003 כי אל גדול יהוה ומלך גדול על כל אלהים׃

95:4b.PSA.095.004 אשר בידו מחקרי ארץ ותועפות הרים לו׃

95:5b.PSA.095.005 אשר לו הים והוא עשהו ויבשת ידיו יצרו׃

95:6b.PSA.095.006 באו נשתחוה ונכרעה נברכה לפני יהוה עשנו׃

95:7b.PSA.095.007 כי הוא אלהינו ואנחנו עם מרעיתו וצאן ידו היום אם בקלו תשמעו׃

95:8b.PSA.095.008 אל תקשו לבבכם כמריבה כיום מסה במדבר׃

95:9b.PSA.095.009 אשר נסוני אבותיכם בחנוני גם ראו פעלי׃

95:10b.PSA.095.010 ארבעים שנה אקוט בדור ואמר עם תעי לבב הם והם לא ידעו דרכי׃

95:11b.PSA.095.011 אשר נשבעתי באפי אם יבאון אל מנוחתי׃

96

96:1b.PSA.096.001 שירו ליהוה שיר חדש שירו ליהוה כל הארץ׃

96:2b.PSA.096.002 שירו ליהוה ברכו שמו בשרו מיום ליום ישועתו׃

96:3b.PSA.096.003 ספרו בגוים כבודו בכל העמים נפלאותיו׃

96:4b.PSA.096.004 כי גדול יהוה ומהלל מאד נורא הוא על כל אלהים׃

96:5b.PSA.096.005 כי כל אלהי העמים אלילים ויהוה שמים עשה׃

96:6b.PSA.096.006 הוד והדר לפניו עז ותפארת במקדשו׃

96:7b.PSA.096.007 הבו ליהוה משפחות עמים הבו ליהוה כבוד ועז׃

96:8b.PSA.096.008 הבו ליהוה כבוד שמו שאו מנחה ובאו לחצרותיו׃

96:9b.PSA.096.009 השתחוו ליהוה בהדרת קדש חילו מפניו כל הארץ׃

96:10b.PSA.096.010 אמרו בגוים יהוה מלך אף תכון תבל בל תמוט ידין עמים במישרים׃

96:11b.PSA.096.011 ישמחו השמים ותגל הארץ ירעם הים ומלאו׃

96:12b.PSA.096.012 יעלז שדי וכל אשר בו אז ירננו כל עצי יער׃

96:13b.PSA.096.013 לפני יהוה כי בא כי בא לשפט הארץ ישפט תבל בצדק ועמים באמונתו׃

97

97:1b.PSA.097.001 יהוה מלך תגל הארץ ישמחו איים רבים׃

97:2b.PSA.097.002 ענן וערפל סביביו צדק ומשפט מכון כסאו׃

97:3b.PSA.097.003 אש לפניו תלך ותלהט סביב צריו׃

97:4b.PSA.097.004 האירו ברקיו תבל ראתה ותחל הארץ׃

97:5b.PSA.097.005 הרים כדונג נמסו מלפני יהוה מלפני אדון כל הארץ׃

97:6b.PSA.097.006 הגידו השמים צדקו וראו כל העמים כבודו׃

97:7b.PSA.097.007 יבשו כל עבדי פסל המתהללים באלילים השתחוו לו כל אלהים׃

97:8b.PSA.097.008 שמעה ותשמח ציון ותגלנה בנות יהודה למען משפטיך יהוה׃

97:9b.PSA.097.009 כי אתה יהוה עליון על כל הארץ מאד נעלית על כל אלהים׃

97:10b.PSA.097.010 אהבי יהוה שנאו רע שמר נפשות חסידיו מיד רשעים יצילם׃

97:11b.PSA.097.011 אור זרע לצדיק ולישרי לב שמחה׃

97:12b.PSA.097.012 שמחו צדיקים ביהוה והודו לזכר קדשו׃

98

98:1b.PSA.098.001 מזמור שירו ליהוה שיר חדש כי נפלאות עשה הושיעה לו ימינו וזרוע קדשו׃

98:2b.PSA.098.002 הודיע יהוה ישועתו לעיני הגוים גלה צדקתו׃

98:3b.PSA.098.003 זכר חסדו ואמונתו לבית ישראל ראו כל אפסי ארץ את ישועת אלהינו׃

98:4b.PSA.098.004 הריעו ליהוה כל הארץ פצחו ורננו וזמרו׃

98:5b.PSA.098.005 זמרו ליהוה בכנור בכנור וקול זמרה׃

98:6b.PSA.098.006 בחצצרות וקול שופר הריעו לפני המלך יהוה׃

98:7b.PSA.098.007 ירעם הים ומלאו תבל וישבי בה׃

98:8b.PSA.098.008 נהרות ימחאו כף יחד הרים ירננו׃

98:9b.PSA.098.009 לפני יהוה כי בא לשפט הארץ ישפט תבל בצדק ועמים במישרים׃

99

99:1b.PSA.099.001 יהוה מלך ירגזו עמים ישב כרובים תנוט הארץ׃

99:2b.PSA.099.002 יהוה בציון גדול ורם הוא על כל העמים׃

99:3b.PSA.099.003 יודו שמך גדול ונורא קדוש הוא׃

99:4b.PSA.099.004 ועז מלך משפט אהב אתה כוננת מישרים משפט וצדקה ביעקב אתה עשית׃

99:5b.PSA.099.005 רוממו יהוה אלהינו והשתחוו להדם רגליו קדוש הוא׃

99:6b.PSA.099.006 משה ואהרן בכהניו ושמואל בקראי שמו קראים אל יהוה והוא יענם׃

99:7b.PSA.099.007 בעמוד ענן ידבר אליהם שמרו עדתיו וחק נתן למו׃

99:8b.PSA.099.008 יהוה אלהינו אתה עניתם אל נשא היית להם ונקם על עלילותם׃

99:9b.PSA.099.009 רוממו יהוה אלהינו והשתחוו להר קדשו כי קדוש יהוה אלהינו׃

100

100:1b.PSA.100.001 מזמור לתודה הריעו ליהוה כל הארץ׃

100:2b.PSA.100.002 עבדו את יהוה בשמחה באו לפניו ברננה׃

100:3b.PSA.100.003 דעו כי יהוה הוא אלהים הוא עשנו ולא אנחנו עמו וצאן מרעיתו׃

100:4b.PSA.100.004 באו שעריו בתודה חצרתיו בתהלה הודו לו ברכו שמו׃

100:5b.PSA.100.005 כי טוב יהוה לעולם חסדו ועד דר ודר אמונתו׃

101

101:1b.PSA.101.001 לדוד מזמור חסד ומשפט אשירה לך יהוה אזמרה׃

101:2b.PSA.101.002 אשכילה בדרך תמים מתי תבוא אלי אתהלך בתם לבבי בקרב ביתי׃

101:3b.PSA.101.003 לא אשית לנגד עיני דבר בליעל עשה סטים שנאתי לא ידבק בי׃

101:4b.PSA.101.004 לבב עקש יסור ממני רע לא אדע׃

101:5b.PSA.101.005 מלושני בסתר רעהו אותו אצמית גבה עינים ורחב לבב אתו לא אוכל׃

101:6b.PSA.101.006 עיני בנאמני ארץ לשבת עמדי הלך בדרך תמים הוא ישרתני׃

101:7b.PSA.101.007 לא ישב בקרב ביתי עשה רמיה דבר שקרים לא יכון לנגד עיני׃

101:8b.PSA.101.008 לבקרים אצמית כל רשעי ארץ להכרית מעיר יהוה כל פעלי און׃

102

102:1b.PSA.102.001 תפלה לעני כי יעטף ולפני יהוה ישפך שיחו יהוה שמעה תפלתי ושועתי אליך תבוא׃

102:2b.PSA.102.002 אל תסתר פניך ממני ביום צר לי הטה אלי אזנך ביום אקרא מהר ענני׃

102:3b.PSA.102.003 כי כלו בעשן ימי ועצמותי כמו קד נחרו׃

102:4b.PSA.102.004 הוכה כעשב ויבש לבי כי שכחתי מאכל לחמי׃

102:5b.PSA.102.005 מקול אנחתי דבקה עצמי לבשרי׃

102:6b.PSA.102.006 דמיתי לקאת מדבר הייתי ככוס חרבות׃

102:7b.PSA.102.007 שקדתי ואהיה כצפור בודד על גג׃

102:8b.PSA.102.008 כל היום חרפוני אויבי מהוללי בי נשבעו׃

102:9b.PSA.102.009 כי אפר כלחם אכלתי ושקוי בבכי מסכתי׃

102:10b.PSA.102.010 מפני זעמך וקצפך כי נשאתני ותשליכני׃

102:11b.PSA.102.011 ימי כצל נטוי ואני כעשב איבש׃

102:12b.PSA.102.012 ואתה יהוה לעולם תשב וזכרך לדר ודר׃

102:13b.PSA.102.013 אתה תקום תרחם ציון כי עת לחננה כי בא מועד׃

102:14b.PSA.102.014 כי רצו עבדיך את אבניה ואת עפרה יחננו׃

102:15b.PSA.102.015 וייראו גוים את שם יהוה וכל מלכי הארץ את כבודך׃

102:16b.PSA.102.016 כי בנה יהוה ציון נראה בכבודו׃

102:17b.PSA.102.017 פנה אל תפלת הערער ולא בזה את תפלתם׃

102:18b.PSA.102.018 תכתב זאת לדור אחרון ועם נברא יהלל יה׃

102:19b.PSA.102.019 כי השקיף ממרום קדשו יהוה משמים אל ארץ הביט׃

102:20b.PSA.102.020 לשמע אנקת אסיר לפתח בני תמותה׃

102:21b.PSA.102.021 לספר בציון שם יהוה ותהלתו בירושלם׃

102:22b.PSA.102.022 בהקבץ עמים יחדו וממלכות לעבד את יהוה׃

102:23b.PSA.102.023 ענה בדרך כחו קצר ימי׃

102:24b.PSA.102.024 אמר אלי אל תעלני בחצי ימי בדור דורים שנותיך׃

102:25b.PSA.102.025 לפנים הארץ יסדת ומעשה ידיך שמים׃

102:26b.PSA.102.026 המה יאבדו ואתה תעמד וכלם כבגד יבלו כלבוש תחליפם ויחלפו׃

102:27b.PSA.102.027 ואתה הוא ושנותיך לא יתמו׃

102:28b.PSA.102.028 בני עבדיך ישכונו וזרעם לפניך יכון׃

103

103:1b.PSA.103.001 לדוד ברכי נפשי את יהוה וכל קרבי את שם קדשו׃

103:2b.PSA.103.002 ברכי נפשי את יהוה ואל תשכחי כל גמוליו׃

103:3b.PSA.103.003 הסלח לכל עונכי הרפא לכל תחלאיכי׃

103:4b.PSA.103.004 הגואל משחת חייכי המעטרכי חסד ורחמים׃

103:5b.PSA.103.005 המשביע בטוב עדיך תתחדש כנשר נעוריכי׃

103:6b.PSA.103.006 עשה צדקות יהוה ומשפטים לכל עשוקים׃

103:7b.PSA.103.007 יודיע דרכיו למשה לבני ישראל עלילותיו׃

103:8b.PSA.103.008 רחום וחנון יהוה ארך אפים ורב חסד׃

103:9b.PSA.103.009 לא לנצח יריב ולא לעולם יטור׃

103:10b.PSA.103.010 לא כחטאינו עשה לנו ולא כעונתינו גמל עלינו׃

103:11b.PSA.103.011 כי כגבה שמים על הארץ גבר חסדו על יראיו׃

103:12b.PSA.103.012 כרחק מזרח ממערב הרחיק ממנו את פשעינו׃

103:13b.PSA.103.013 כרחם אב על בנים רחם יהוה על יראיו׃

103:14b.PSA.103.014 כי הוא ידע יצרנו זכור כי עפר אנחנו׃

103:15b.PSA.103.015 אנוש כחציר ימיו כציץ השדה כן יציץ׃

103:16b.PSA.103.016 כי רוח עברה בו ואיננו ולא יכירנו עוד מקומו׃

103:17b.PSA.103.017 וחסד יהוה מעולם ועד עולם על יראיו וצדקתו לבני בנים׃

103:18b.PSA.103.018 לשמרי בריתו ולזכרי פקדיו לעשותם׃

103:19b.PSA.103.019 יהוה בשמים הכין כסאו ומלכותו בכל משלה׃

103:20b.PSA.103.020 ברכו יהוה מלאכיו גברי כח עשי דברו לשמע בקול דברו׃

103:21b.PSA.103.021 ברכו יהוה כל צבאיו משרתיו עשי רצונו׃

103:22b.PSA.103.022 ברכו יהוה כל מעשיו בכל מקמות ממשלתו ברכי נפשי את יהוה׃

104

104:1b.PSA.104.001 ברכי נפשי את יהוה יהוה אלהי גדלת מאד הוד והדר לבשת׃

104:2b.PSA.104.002 עטה אור כשלמה נוטה שמים כיריעה׃

104:3b.PSA.104.003 המקרה במים עליותיו השם עבים רכובו המהלך על כנפי רוח׃

104:4b.PSA.104.004 עשה מלאכיו רוחות משרתיו אש להט׃

104:5b.PSA.104.005 יסד ארץ על מכוניה בל תמוט עולם ועד׃

104:6b.PSA.104.006 תהום כלבוש כסיתו על הרים יעמדו מים׃

104:7b.PSA.104.007 מן גערתך ינוסון מן קול רעמך יחפזון׃

104:8b.PSA.104.008 יעלו הרים ירדו בקעות אל מקום זה יסדת להם׃

104:9b.PSA.104.009 גבול שמת בל יעברון בל ישובון לכסות הארץ׃

104:10b.PSA.104.010 המשלח מעינים בנחלים בין הרים יהלכון׃

104:11b.PSA.104.011 ישקו כל חיתו שדי ישברו פראים צמאם׃

104:12b.PSA.104.012 עליהם עוף השמים ישכון מבין עפאים יתנו קול׃

104:13b.PSA.104.013 משקה הרים מעליותיו מפרי מעשיך תשבע הארץ׃

104:14b.PSA.104.014 מצמיח חציר לבהמה ועשב לעבדת האדם להוציא לחם מן הארץ׃

104:15b.PSA.104.015 ויין ישמח לבב אנוש להצהיל פנים משמן ולחם לבב אנוש יסעד׃

104:16b.PSA.104.016 ישבעו עצי יהוה ארזי לבנון אשר נטע׃

104:17b.PSA.104.017 אשר שם צפרים יקננו חסידה ברושים ביתה׃

104:18b.PSA.104.018 הרים הגבהים ליעלים סלעים מחסה לשפנים׃

104:19b.PSA.104.019 עשה ירח למועדים שמש ידע מבואו׃

104:20b.PSA.104.020 תשת חשך ויהי לילה בו תרמש כל חיתו יער׃

104:21b.PSA.104.021 הכפירים שאגים לטרף ולבקש מאל אכלם׃

104:22b.PSA.104.022 תזרח השמש יאספון ואל מעונתם ירבצון׃

104:23b.PSA.104.023 יצא אדם לפעלו ולעבדתו עדי ערב׃

104:24b.PSA.104.024 מה רבו מעשיך יהוה כלם בחכמה עשית מלאה הארץ קנינך׃

104:25b.PSA.104.025 זה הים גדול ורחב ידים שם רמש ואין מספר חיות קטנות עם גדלות׃

104:26b.PSA.104.026 שם אניות יהלכון לויתן זה יצרת לשחק בו׃

104:27b.PSA.104.027 כלם אליך ישברון לתת אכלם בעתו׃

104:28b.PSA.104.028 תתן להם ילקטון תפתח ידך ישבעון טוב׃

104:29b.PSA.104.029 תסתיר פניך יבהלון תסף רוחם יגועון ואל עפרם ישובון׃

104:30b.PSA.104.030 תשלח רוחך יבראון ותחדש פני אדמה׃

104:31b.PSA.104.031 יהי כבוד יהוה לעולם ישמח יהוה במעשיו׃

104:32b.PSA.104.032 המביט לארץ ותרעד יגע בהרים ויעשנו׃

104:33b.PSA.104.033 אשירה ליהוה בחיי אזמרה לאלהי בעודי׃

104:34b.PSA.104.034 יערב עליו שיחי אנכי אשמח ביהוה׃

104:35b.PSA.104.035 יתמו חטאים מן הארץ ורשעים עוד אינם ברכי נפשי את יהוה הללו יה׃

105

105:1b.PSA.105.001 הודו ליהוה קראו בשמו הודיעו בעמים עלילותיו׃

105:2b.PSA.105.002 שירו לו זמרו לו שיחו בכל נפלאותיו׃

105:3b.PSA.105.003 התהללו בשם קדשו ישמח לב מבקשי יהוה׃

105:4b.PSA.105.004 דרשו יהוה ועזו בקשו פניו תמיד׃

105:5b.PSA.105.005 זכרו נפלאותיו אשר עשה מפתיו ומשפטי פיו׃

105:6b.PSA.105.006 זרע אברהם עבדו בני יעקב בחיריו׃

105:7b.PSA.105.007 הוא יהוה אלהינו בכל הארץ משפטיו׃

105:8b.PSA.105.008 זכר לעולם בריתו דבר צוה לאלף דור׃

105:9b.PSA.105.009 אשר כרת את אברהם ושבועתו לישחק׃

105:10b.PSA.105.010 ויעמידה ליעקב לחק לישראל ברית עולם׃

105:11b.PSA.105.011 לאמר לך אתן את ארץ כנען חבל נחלתכם׃

105:12b.PSA.105.012 בהיותם מתי מספר כמעט וגרים בה׃

105:13b.PSA.105.013 ויתהלכו מגוי אל גוי מממלכה אל עם אחר׃

105:14b.PSA.105.014 לא הניח אדם לעשקם ויוכח עליהם מלכים׃

105:15b.PSA.105.015 אל תגעו במשיחי ולנביאי אל תרעו׃

105:16b.PSA.105.016 ויקרא רעב על הארץ כל מטה לחם שבר׃

105:17b.PSA.105.017 שלח לפניהם איש לעבד נמכר יוסף׃

105:18b.PSA.105.018 ענו בכבל רגליו ברזל באה נפשו׃

105:19b.PSA.105.019 עד עת בא דברו אמרת יהוה צרפתהו׃

105:20b.PSA.105.020 שלח מלך ויתירהו משל עמים ויפתחהו׃

105:21b.PSA.105.021 שמו אדון לביתו ומשל בכל קנינו׃

105:22b.PSA.105.022 לאסר שריו בנפשו וזקניו יחכם׃

105:23b.PSA.105.023 ויבא ישראל מצרים ויעקב גר בארץ חם׃

105:24b.PSA.105.024 ויפר את עמו מאד ויעצמהו מצריו׃

105:25b.PSA.105.025 הפך לבם לשנא עמו להתנכל בעבדיו׃

105:26b.PSA.105.026 שלח משה עבדו אהרן אשר בחר בו׃

105:27b.PSA.105.027 שמו בם דברי אתותיו ומפתים בארץ חם׃

105:28b.PSA.105.028 שלח חשך ויחשך ולא מרו את דבריו׃

105:29b.PSA.105.029 הפך את מימיהם לדם וימת את דגתם׃

105:30b.PSA.105.030 שרץ ארצם צפרדעים בחדרי מלכיהם׃

105:31b.PSA.105.031 אמר ויבא ערב כנים בכל גבולם׃

105:32b.PSA.105.032 נתן גשמיהם ברד אש להבות בארצם׃

105:33b.PSA.105.033 ויך גפנם ותאנתם וישבר עץ גבולם׃

105:34b.PSA.105.034 אמר ויבא ארבה וילק ואין מספר׃

105:35b.PSA.105.035 ויאכל כל עשב בארצם ויאכל פרי אדמתם׃

105:36b.PSA.105.036 ויך כל בכור בארצם ראשית לכל אונם׃

105:37b.PSA.105.037 ויוציאם בכסף וזהב ואין בשבטיו כושל׃

105:38b.PSA.105.038 שמח מצרים בצאתם כי נפל פחדם עליהם׃

105:39b.PSA.105.039 פרש ענן למסך ואש להאיר לילה׃

105:40b.PSA.105.040 שאל ויבא שלו ולחם שמים ישביעם׃

105:41b.PSA.105.041 פתח צור ויזובו מים הלכו בציות נהר׃

105:42b.PSA.105.042 כי זכר את דבר קדשו את אברהם עבדו׃

105:43b.PSA.105.043 ויוצא עמו בששון ברנה את בחיריו׃

105:44b.PSA.105.044 ויתן להם ארצות גוים ועמל לאמים יירשו׃

105:45b.PSA.105.045 בעבור ישמרו חקיו ותורתיו ינצרו הללו יה׃

106

106:1b.PSA.106.001 הללויה הודו ליהוה כי טוב כי לעולם חסדו׃

106:2b.PSA.106.002 מי ימלל גבורות יהוה ישמיע כל תהלתו׃

106:3b.PSA.106.003 אשרי שמרי משפט עשה צדקה בכל עת׃

106:4b.PSA.106.004 זכרני יהוה ברצון עמך פקדני בישועתך׃

106:5b.PSA.106.005 לראות בטובת בחיריך לשמח בשמחת גויך להתהלל עם נחלתך׃

106:6b.PSA.106.006 חטאנו עם אבותינו העוינו הרשענו׃

106:7b.PSA.106.007 אבותינו במצרים לא השכילו נפלאותיך לא זכרו את רב חסדיך וימרו על ים בים סוף׃

106:8b.PSA.106.008 ויושיעם למען שמו להודיע את גבורתו׃

106:9b.PSA.106.009 ויגער בים סוף ויחרב ויוליכם בתהמות כמדבר׃

106:10b.PSA.106.010 ויושיעם מיד שונא ויגאלם מיד אויב׃

106:11b.PSA.106.011 ויכסו מים צריהם אחד מהם לא נותר׃

106:12b.PSA.106.012 ויאמינו בדבריו ישירו תהלתו׃

106:13b.PSA.106.013 מהרו שכחו מעשיו לא חכו לעצתו׃

106:14b.PSA.106.014 ויתאוו תאוה במדבר וינסו אל בישימון׃

106:15b.PSA.106.015 ויתן להם שאלתם וישלח רזון בנפשם׃

106:16b.PSA.106.016 ויקנאו למשה במחנה לאהרן קדוש יהוה׃

106:17b.PSA.106.017 תפתח ארץ ותבלע דתן ותכס על עדת אבירם׃

106:18b.PSA.106.018 ותבער אש בעדתם להבה תלהט רשעים׃

106:19b.PSA.106.019 יעשו עגל בחרב וישתחוו למסכה׃

106:20b.PSA.106.020 וימירו את כבודם בתבנית שור אכל עשב׃

106:21b.PSA.106.021 שכחו אל מושיעם עשה גדלות במצרים׃

106:22b.PSA.106.022 נפלאות בארץ חם נוראות על ים סוף׃

106:23b.PSA.106.023 ויאמר להשמידם לולי משה בחירו עמד בפרץ לפניו להשיב חמתו מהשחית׃

106:24b.PSA.106.024 וימאסו בארץ חמדה לא האמינו לדברו׃

106:25b.PSA.106.025 וירגנו באהליהם לא שמעו בקול יהוה׃

106:26b.PSA.106.026 וישא ידו להם להפיל אותם במדבר׃

106:27b.PSA.106.027 ולהפיל זרעם בגוים ולזרותם בארצות׃

106:28b.PSA.106.028 ויצמדו לבעל פעור ויאכלו זבחי מתים׃

106:29b.PSA.106.029 ויכעיסו במעלליהם ותפרץ בם מגפה׃

106:30b.PSA.106.030 ויעמד פינחס ויפלל ותעצר המגפה׃

106:31b.PSA.106.031 ותחשב לו לצדקה לדר ודר עד עולם׃

106:32b.PSA.106.032 ויקציפו על מי מריבה וירע למשה בעבורם׃

106:33b.PSA.106.033 כי המרו את רוחו ויבטא בשפתיו׃

106:34b.PSA.106.034 לא השמידו את העמים אשר אמר יהוה להם׃

106:35b.PSA.106.035 ויתערבו בגוים וילמדו מעשיהם׃

106:36b.PSA.106.036 ויעבדו את עצביהם ויהיו להם למוקש׃

106:37b.PSA.106.037 ויזבחו את בניהם ואת בנותיהם לשדים׃

106:38b.PSA.106.038 וישפכו דם נקי דם בניהם ובנותיהם אשר זבחו לעצבי כנען ותחנף הארץ בדמים׃

106:39b.PSA.106.039 ויטמאו במעשיהם ויזנו במעלליהם׃

106:40b.PSA.106.040 ויחר אף יהוה בעמו ויתעב את נחלתו׃

106:41b.PSA.106.041 ויתנם ביד גוים וימשלו בהם שנאיהם׃

106:42b.PSA.106.042 וילחצום אויביהם ויכנעו תחת ידם׃

106:43b.PSA.106.043 פעמים רבות יצילם והמה ימרו בעצתם וימכו בעונם׃

106:44b.PSA.106.044 וירא בצר להם בשמעו את רנתם׃

106:45b.PSA.106.045 ויזכר להם בריתו וינחם כרב חסדו׃

106:46b.PSA.106.046 ויתן אותם לרחמים לפני כל שוביהם׃

106:47b.PSA.106.047 הושיענו יהוה אלהינו וקבצנו מן הגוים להדות לשם קדשך להשתבח בתהלתך׃

106:48b.PSA.106.048 ברוך יהוה אלהי ישראל מן העולם ועד העולם ואמר כל העם אמן הללו יה׃

107

107:1b.PSA.107.001 הדו ליהוה כי טוב כי לעולם חסדו׃

107:2b.PSA.107.002 יאמרו גאולי יהוה אשר גאלם מיד צר׃

107:3b.PSA.107.003 ומארצות קבצם ממזרח וממערב מצפון ומים׃

107:4b.PSA.107.004 תעו במדבר בישימון דרך עיר מושב לא מצאו׃

107:5b.PSA.107.005 רעבים גם צמאים נפשם בהם תתעטף׃

107:6b.PSA.107.006 ויצעקו אל יהוה בצר להם ממצוקותיהם יצילם׃

107:7b.PSA.107.007 וידריכם בדרך ישרה ללכת אל עיר מושב׃

107:8b.PSA.107.008 יודו ליהוה חסדו ונפלאותיו לבני אדם׃

107:9b.PSA.107.009 כי השביע נפש שקקה ונפש רעבה מלא טוב׃

107:10b.PSA.107.010 ישבי חשך וצלמות אסירי עני וברזל׃

107:11b.PSA.107.011 כי המרו אמרי אל ועצת עליון נאצו׃

107:12b.PSA.107.012 ויכנע בעמל לבם כשלו ואין עזר׃

107:13b.PSA.107.013 ויזעקו אל יהוה בצר להם ממצקותיהם יושיעם׃

107:14b.PSA.107.014 יוציאם מחשך וצלמות ומוסרותיהם ינתק׃

107:15b.PSA.107.015 יודו ליהוה חסדו ונפלאותיו לבני אדם׃

107:16b.PSA.107.016 כי שבר דלתות נחשת ובריחי ברזל גדע׃

107:17b.PSA.107.017 אולים מדרך פשעם ומעונתיהם יתענו׃

107:18b.PSA.107.018 כל אכל תתעב נפשם ויגיעו עד שערי מות׃

107:19b.PSA.107.019 ויזעקו אל יהוה בצר להם ממצקותיהם יושיעם׃

107:20b.PSA.107.020 ישלח דברו וירפאם וימלט משחיתותם׃

107:21b.PSA.107.021 יודו ליהוה חסדו ונפלאותיו לבני אדם׃

107:22b.PSA.107.022 ויזבחו זבחי תודה ויספרו מעשיו ברנה׃

107:23b.PSA.107.023 יורדי הים באניות עשי מלאכה במים רבים׃

107:24b.PSA.107.024 המה ראו מעשי יהוה ונפלאותיו במצולה׃

107:25b.PSA.107.025 ויאמר ויעמד רוח סערה ותרומם גליו׃

107:26b.PSA.107.026 יעלו שמים ירדו תהומות נפשם ברעה תתמוגג׃

107:27b.PSA.107.027 יחוגו וינועו כשכור וכל חכמתם תתבלע׃

107:28b.PSA.107.028 ויצעקו אל יהוה בצר להם וממצוקתיהם יוציאם׃

107:29b.PSA.107.029 יקם סערה לדממה ויחשו גליהם׃

107:30b.PSA.107.030 וישמחו כי ישתקו וינחם אל מחוז חפצם׃

107:31b.PSA.107.031 יודו ליהוה חסדו ונפלאותיו לבני אדם׃

107:32b.PSA.107.032 וירממוהו בקהל עם ובמושב זקנים יהללוהו׃

107:33b.PSA.107.033 ישם נהרות למדבר ומצאי מים לצמאון׃

107:34b.PSA.107.034 ארץ פרי למלחה מרעת ישבי בה׃

107:35b.PSA.107.035 ישם מדבר לאגם מים וארץ ציה למצאי מים׃

107:36b.PSA.107.036 ויושב שם רעבים ויכוננו עיר מושב׃

107:37b.PSA.107.037 ויזרעו שדות ויטעו כרמים ויעשו פרי תבואה׃

107:38b.PSA.107.038 ויברכם וירבו מאד ובהמתם לא ימעיט׃

107:39b.PSA.107.039 וימעטו וישחו מעצר רעה ויגון׃

107:40b.PSA.107.040 שפך בוז על נדיבים ויתעם בתהו לא דרך׃

107:41b.PSA.107.041 וישגב אביון מעוני וישם כצאן משפחות׃

107:42b.PSA.107.042 יראו ישרים וישמחו וכל עולה קפצה פיה׃

107:43b.PSA.107.043 מי חכם וישמר אלה ויתבוננו חסדי יהוה׃

108

108:1b.PSA.108.001 שיר מזמור לדוד נכון לבי אלהים אשירה ואזמרה אף כבודי׃

108:2b.PSA.108.002 עורה הנבל וכנור אעירה שחר׃

108:3b.PSA.108.003 אודך בעמים יהוה ואזמרך בל אמים׃

108:4b.PSA.108.004 כי גדול מעל שמים חסדך ועד שחקים אמתך׃

108:5b.PSA.108.005 רומה על שמים אלהים ועל כל הארץ כבודך׃

108:6b.PSA.108.006 למען יחלצון ידידיך הושיעה ימינך וענני׃

108:7b.PSA.108.007 אלהים דבר בקדשו אעלזה אחלקה שכם ועמק סכות אמדד׃

108:8b.PSA.108.008 לי גלעד לי מנשה ואפרים מעוז ראשי יהודה מחקקי׃

108:9b.PSA.108.009 מואב סיר רחצי על אדום אשליך נעלי עלי פלשת אתרועע׃

108:10b.PSA.108.010 מי יבלני עיר מבצר מי נחני עד אדום׃

108:11b.PSA.108.011 הלא אלהים זנחתנו ולא תצא אלהים בצבאתינו׃

108:12b.PSA.108.012 הבה לנו עזרת מצר ושוא תשועת אדם׃

108:13b.PSA.108.013 באלהים נעשה חיל והוא יבוס צרינו׃

109

109:1b.PSA.109.001 למנצח לדוד מזמור אלהי תהלתי אל תחרש׃

109:2b.PSA.109.002 כי פי רשע ופי מרמה עלי פתחו דברו אתי לשון שקר׃

109:3b.PSA.109.003 ודברי שנאה סבבוני וילחמוני חנם׃

109:4b.PSA.109.004 תחת אהבתי ישטנוני ואני תפלה׃

109:5b.PSA.109.005 וישימו עלי רעה תחת טובה ושנאה תחת אהבתי׃

109:6b.PSA.109.006 הפקד עליו רשע ושטן יעמד על ימינו׃

109:7b.PSA.109.007 בהשפטו יצא רשע ותפלתו תהיה לחטאה׃

109:8b.PSA.109.008 יהיו ימיו מעטים פקדתו יקח אחר׃

109:9b.PSA.109.009 יהיו בניו יתומים ואשתו אלמנה׃

109:10b.PSA.109.010 ונוע ינועו בניו ושאלו ודרשו מחרבותיהם׃

109:11b.PSA.109.011 ינקש נושה לכל אשר לו ויבזו זרים יגיעו׃

109:12b.PSA.109.012 אל יהי לו משך חסד ואל יהי חונן ליתומיו׃

109:13b.PSA.109.013 יהי אחריתו להכרית בדור אחר ימח שמם׃

109:14b.PSA.109.014 יזכר עון אבתיו אל יהוה וחטאת אמו אל תמח׃

109:15b.PSA.109.015 יהיו נגד יהוה תמיד ויכרת מארץ זכרם׃

109:16b.PSA.109.016 יען אשר לא זכר עשות חסד וירדף איש עני ואביון ונכאה לבב למותת׃

109:17b.PSA.109.017 ויאהב קללה ותבואהו ולא חפץ בברכה ותרחק ממנו׃

109:18b.PSA.109.018 וילבש קללה כמדו ותבא כמים בקרבו וכשמן בעצמותיו׃

109:19b.PSA.109.019 תהי לו כבגד יעטה ולמזח תמיד יחגרה׃

109:20b.PSA.109.020 זאת פעלת שטני מאת יהוה והדברים רע על נפשי׃

109:21b.PSA.109.021 ואתה יהוה אדני עשה אתי למען שמך כי טוב חסדך הצילני׃

109:22b.PSA.109.022 כי עני ואביון אנכי ולבי חלל בקרבי׃

109:23b.PSA.109.023 כצל כנטותו נהלכתי ננערתי כארבה׃

109:24b.PSA.109.024 ברכי כשלו מצום ובשרי כחש משמן׃

109:25b.PSA.109.025 ואני הייתי חרפה להם יראוני יניעון ראשם׃

109:26b.PSA.109.026 עזרני יהוה אלהי הושיעני כחסדך׃

109:27b.PSA.109.027 וידעו כי ידך זאת אתה יהוה עשיתה׃

109:28b.PSA.109.028 יקללו המה ואתה תברך קמו ויבשו ועבדך ישמח׃

109:29b.PSA.109.029 ילבשו שוטני כלמה ויעטו כמעיל בשתם׃

109:30b.PSA.109.030 אודה יהוה מאד בפי ובתוך רבים אהללנו׃

109:31b.PSA.109.031 כי יעמד לימין אביון להושיע משפטי נפשו׃

110

110:1b.PSA.110.001 לדוד מזמור נאם יהוה לאדני שב לימיני עד אשית איביך הדם לרגליך׃

110:2b.PSA.110.002 מטה עזך ישלח יהוה מציון רדה בקרב איביך׃

110:3b.PSA.110.003 עמך נדבת ביום חילך בהדרי קדש מרחם משחר לך טל ילדתיך׃

110:4b.PSA.110.004 נשבע יהוה ולא ינחם אתה כהן לעולם על דברתי מלכי צדק׃

110:5b.PSA.110.005 אדני על ימינך מחץ ביום אפו מלכים׃

110:6b.PSA.110.006 ידין בגוים מלא גויות מחץ ראש על ארץ רבה׃

110:7b.PSA.110.007 מנחל בדרך ישתה על כן ירים ראש׃

111

111:1b.PSA.111.001 הללו יה אודה יהוה בכל לבב בסוד ישרים ועדה׃

111:2b.PSA.111.002 גדלים מעשי יהוה דרושים לכל חפציהם׃

111:3b.PSA.111.003 הוד והדר פעלו וצדקתו עמדת לעד׃

111:4b.PSA.111.004 זכר עשה לנפלאתיו חנון ורחום יהוה׃

111:5b.PSA.111.005 טרף נתן ליראיו יזכר לעולם בריתו׃

111:6b.PSA.111.006 כח מעשיו הגיד לעמו לתת להם נחלת גוים׃

111:7b.PSA.111.007 מעשי ידיו אמת ומשפט נאמנים כל פקודיו׃

111:8b.PSA.111.008 סמוכים לעד לעולם עשוים באמת וישר׃

111:9b.PSA.111.009 פדות שלח לעמו צוה לעולם בריתו קדוש ונורא שמו׃

111:10b.PSA.111.010 ראשית חכמה יראת יהוה שכל טוב לכל עשיהם תהלתו עמדת לעד׃

112

112:1b.PSA.112.001 הללו יה אשרי איש ירא את יהוה במצותיו חפץ מאד׃

112:2b.PSA.112.002 גבור בארץ יהיה זרעו דור ישרים יברך׃

112:3b.PSA.112.003 הון ועשר בביתו וצדקתו עמדת לעד׃

112:4b.PSA.112.004 זרח בחשך אור לישרים חנון ורחום וצדיק׃

112:5b.PSA.112.005 טוב איש חונן ומלוה יכלכל דבריו במשפט׃

112:6b.PSA.112.006 כי לעולם לא ימוט לזכר עולם יהיה צדיק׃

112:7b.PSA.112.007 משמועה רעה לא יירא נכון לבו בטח ביהוה׃

112:8b.PSA.112.008 סמוך לבו לא יירא עד אשר יראה בצריו׃

112:9b.PSA.112.009 פזר נתן לאביונים צדקתו עמדת לעד קרנו תרום בכבוד׃

112:10b.PSA.112.010 רשע יראה וכעס שניו יחרק ונמס תאות רשעים תאבד׃

113

113:1b.PSA.113.001 הללו יה הללו עבדי יהוה הללו את שם יהוה׃

113:2b.PSA.113.002 יהי שם יהוה מברך מעתה ועד עולם׃

113:3b.PSA.113.003 ממזרח שמש עד מבואו מהלל שם יהוה׃

113:4b.PSA.113.004 רם על כל גוים יהוה על השמים כבודו׃

113:5b.PSA.113.005 מי כיהוה אלהינו המגביהי לשבת׃

113:6b.PSA.113.006 המשפילי לראות בשמים ובארץ׃

113:7b.PSA.113.007 מקימי מעפר דל מאשפת ירים אביון׃

113:8b.PSA.113.008 להושיבי עם נדיבים עם נדיבי עמו׃

113:9b.PSA.113.009 מושיבי עקרת הבית אם הבנים שמחה הללו יה׃

114

114:1b.PSA.114.001 בצאת ישראל ממצרים בית יעקב מעם לעז׃

114:2b.PSA.114.002 היתה יהודה לקדשו ישראל ממשלותיו׃

114:3b.PSA.114.003 הים ראה וינס הירדן יסב לאחור׃

114:4b.PSA.114.004 ההרים רקדו כאילים גבעות כבני צאן׃

114:5b.PSA.114.005 מה לך הים כי תנוס הירדן תסב לאחור׃

114:6b.PSA.114.006 ההרים תרקדו כאילים גבעות כבני צאן׃

114:7b.PSA.114.007 מלפני אדון חולי ארץ מלפני אלוה יעקב׃

114:8b.PSA.114.008 ההפכי הצור אגם מים חלמיש למעינו מים׃

115

115:1b.PSA.115.001 לא לנו יהוה לא לנו כי לשמך תן כבוד על חסדך על אמתך׃

115:2b.PSA.115.002 למה יאמרו הגוים איה נא אלהיהם׃

115:3b.PSA.115.003 ואלהינו בשמים כל אשר חפץ עשה׃

115:4b.PSA.115.004 עצביהם כסף וזהב מעשה ידי אדם׃

115:5b.PSA.115.005 פה להם ולא ידברו עינים להם ולא יראו׃

115:6b.PSA.115.006 אזנים להם ולא ישמעו אף להם ולא יריחון׃

115:7b.PSA.115.007 ידיהם ולא ימישון רגליהם ולא יהלכו לא יהגו בגרונם׃

115:8b.PSA.115.008 כמוהם יהיו עשיהם כל אשר בטח בהם׃

115:9b.PSA.115.009 ישראל בטח ביהוה עזרם ומגנם הוא׃

115:10b.PSA.115.010 בית אהרן בטחו ביהוה עזרם ומגנם הוא׃

115:11b.PSA.115.011 יראי יהוה בטחו ביהוה עזרם ומגנם הוא׃

115:12b.PSA.115.012 יהוה זכרנו יברך יברך את בית ישראל יברך את בית אהרן׃

115:13b.PSA.115.013 יברך יראי יהוה הקטנים עם הגדלים׃

115:14b.PSA.115.014 יסף יהוה עליכם עליכם ועל בניכם׃

115:15b.PSA.115.015 ברוכים אתם ליהוה עשה שמים וארץ׃

115:16b.PSA.115.016 השמים שמים ליהוה והארץ נתן לבני אדם׃

115:17b.PSA.115.017 לא המתים יהללו יה ולא כל ירדי דומה׃

115:18b.PSA.115.018 ואנחנו נברך יה מעתה ועד עולם הללו יה׃

116

116:1b.PSA.116.001 אהבתי כי ישמע יהוה את קולי תחנוני׃

116:2b.PSA.116.002 כי הטה אזנו לי ובימי אקרא׃

116:3b.PSA.116.003 אפפוני חבלי מות ומצרי שאול מצאוני צרה ויגון אמצא׃

116:4b.PSA.116.004 ובשם יהוה אקרא אנה יהוה מלטה נפשי׃

116:5b.PSA.116.005 חנון יהוה וצדיק ואלהינו מרחם׃

116:6b.PSA.116.006 שמר פתאים יהוה דלותי ולי יהושיע׃

116:7b.PSA.116.007 שובי נפשי למנוחיכי כי יהוה גמל עליכי׃

116:8b.PSA.116.008 כי חלצת נפשי ממות את עיני מן דמעה את רגלי מדחי׃

116:9b.PSA.116.009 אתהלך לפני יהוה בארצות החיים׃

116:10b.PSA.116.010 האמנתי כי אדבר אני עניתי מאד׃

116:11b.PSA.116.011 אני אמרתי בחפזי כל האדם כזב׃

116:12b.PSA.116.012 מה אשיב ליהוה כל תגמולוהי עלי׃

116:13b.PSA.116.013 כוס ישועות אשא ובשם יהוה אקרא׃

116:14b.PSA.116.014 נדרי ליהוה אשלם נגדה נא לכל עמו׃

116:15b.PSA.116.015 יקר בעיני יהוה המותה לחסידיו׃

116:16b.PSA.116.016 אנה יהוה כי אני עבדך אני עבדך בן אמתך פתחת למוסרי׃

116:17b.PSA.116.017 לך אזבח זבח תודה ובשם יהוה אקרא׃

116:18b.PSA.116.018 נדרי ליהוה אשלם נגדה נא לכל עמו׃

116:19b.PSA.116.019 בחצרות בית יהוה בתוככי ירושלם הללו יה׃

117

117:1b.PSA.117.001 הללו את יהוה כל גוים שבחוהו כל האמים׃

117:2b.PSA.117.002 כי גבר עלינו חסדו ואמת יהוה לעולם הללו יה׃

118

118:1b.PSA.118.001 הודו ליהוה כי טוב כי לעולם חסדו׃

118:2b.PSA.118.002 יאמר נא ישראל כי לעולם חסדו׃