Ezra (Hebrew)

1

1:1b.EZR.001.001 ובשנת אחת לכורש מלך פרס לכלות דבר יהוה מפי ירמיה העיר יהוה את רוח כרש מלך פרס ויעבר קול בכל מלכותו וגם במכתב לאמר׃

1:2b.EZR.001.002 כה אמר כרש מלך פרס כל ממלכות הארץ נתן לי יהוה אלהי השמים והוא פקד עלי לבנות לו בית בירושלם אשר ביהודה׃

1:3b.EZR.001.003 מי בכם מכל עמו יהי אלהיו עמו ויעל לירושלם אשר ביהודה ויבן את בית יהוה אלהי ישראל הוא האלהים אשר בירושלם׃

1:4b.EZR.001.004 וכל הנשאר מכל המקמות אשר הוא גר שם ינשאוהו אנשי מקמו בכסף ובזהב וברכוש ובבהמה עם הנדבה לבית האלהים אשר בירושלם׃

1:5b.EZR.001.005 ויקומו ראשי האבות ליהודה ובנימן והכהנים והלוים לכל העיר האלהים את רוחו לעלות לבנות את בית יהוה אשר בירושלם׃

1:6b.EZR.001.006 וכל סביבתיהם חזקו בידיהם בכלי כסף בזהב ברכוש ובבהמה ובמגדנות לבד על כל התנדב׃

1:7b.EZR.001.007 והמלך כורש הוציא את כלי בית יהוה אשר הוציא נבוכדנצר מירושלם ויתנם בבית אלהיו׃

1:8b.EZR.001.008 ויוציאם כורש מלך פרס על יד מתרדת הגזבר ויספרם לששבצר הנשיא ליהודה׃

1:9b.EZR.001.009 ואלה מספרם אגרטלי זהב שלשים אגרטלי כסף אלף מחלפים תשעה ועשרים׃

1:10b.EZR.001.010 כפורי זהב שלשים כפורי כסף משנים ארבע מאות ועשרה כלים אחרים אלף׃

1:11b.EZR.001.011 כל כלים לזהב ולכסף חמשת אלפים וארבע מאות הכל העלה ששבצר עם העלות הגולה מבבל לירושלם׃

2

2:1b.EZR.002.001 ואלה בני המדינה העלים משבי הגולה אשר הגלה נבוכדנצור מלך בבל לבבל וישובו לירושלם ויהודה איש לעירו׃

2:2b.EZR.002.002 אשר באו עם זרבבל ישוע נחמיה שריה רעליה מרדכי בלשן מספר בגוי רחום בענה מספר אנשי עם ישראל׃

2:3b.EZR.002.003 בני פרעש אלפים מאה שבעים ושנים׃

2:4b.EZR.002.004 בני שפטיה שלש מאות שבעים ושנים׃

2:5b.EZR.002.005 בני ארח שבע מאות חמשה ושבעים׃

2:6b.EZR.002.006 בני פחת מואב לבני ישוע יואב אלפים שמנה מאות ושנים עשר׃

2:7b.EZR.002.007 בני עילם אלף מאתים חמשים וארבעה׃

2:8b.EZR.002.008 בני זתוא תשע מאות וארבעים וחמשה׃

2:9b.EZR.002.009 בני זכי שבע מאות וששים׃

2:10b.EZR.002.010 בני בני שש מאות ארבעים ושנים׃

2:11b.EZR.002.011 בני בבי שש מאות עשרים ושלשה׃

2:12b.EZR.002.012 בני עזגד אלף מאתים עשרים ושנים׃

2:13b.EZR.002.013 בני אדניקם שש מאות ששים וששה׃

2:14b.EZR.002.014 בני בגוי אלפים חמשים וששה׃

2:15b.EZR.002.015 בני עדין ארבע מאות חמשים וארבעה׃

2:16b.EZR.002.016 בני אטר ליחזקיה תשעים ושמנה׃

2:17b.EZR.002.017 בני בצי שלש מאות עשרים ושלשה׃

2:18b.EZR.002.018 בני יורה מאה ושנים עשר׃

2:19b.EZR.002.019 בני חשם מאתים עשרים ושלשה׃

2:20b.EZR.002.020 בני גבר תשעים וחמשה׃

2:21b.EZR.002.021 בני בית לחם מאה עשרים ושלשה׃

2:22b.EZR.002.022 אנשי נטפה חמשים וששה׃

2:23b.EZR.002.023 אנשי ענתות מאה עשרים ושמנה׃

2:24b.EZR.002.024 בני עזמות ארבעים ושנים׃

2:25b.EZR.002.025 בני קרית ערים כפירה ובארות שבע מאות וארבעים ושלשה׃

2:26b.EZR.002.026 בני הרמה וגבע שש מאות עשרים ואחד׃

2:27b.EZR.002.027 אנשי מכמס מאה עשרים ושנים׃

2:28b.EZR.002.028 אנשי בית אל והעי מאתים עשרים ושלשה׃

2:29b.EZR.002.029 בני נבו חמשים ושנים׃

2:30b.EZR.002.030 בני מגביש מאה חמשים וששה׃

2:31b.EZR.002.031 בני עילם אחר אלף מאתים חמשים וארבעה׃

2:32b.EZR.002.032 בני חרם שלש מאות ועשרים׃

2:33b.EZR.002.033 בני לד חדיד ואונו שבע מאות עשרים וחמשה׃

2:34b.EZR.002.034 בני ירחו שלש מאות ארבעים וחמשה׃

2:35b.EZR.002.035 בני סנאה שלשת אלפים ושש מאות ושלשים׃

2:36b.EZR.002.036 הכהנים בני ידעיה לבית ישוע תשע מאות שבעים ושלשה׃

2:37b.EZR.002.037 בני אמר אלף חמשים ושנים׃

2:38b.EZR.002.038 בני פשחור אלף מאתים ארבעים ושבעה׃

2:39b.EZR.002.039 בני חרם אלף ושבעה עשר׃

2:40b.EZR.002.040 הלוים בני ישוע וקדמיאל לבני הודויה שבעים וארבעה׃

2:41b.EZR.002.041 המשררים בני אסף מאה עשרים ושמנה׃

2:42b.EZR.002.042 בני השערים בני שלום בני אטר בני טלמון בני עקוב בני חטיטא בני שבי הכל מאה שלשים ותשעה׃

2:43b.EZR.002.043 הנתינים בני ציחא בני חשופא בני טבעות׃

2:44b.EZR.002.044 בני קרס בני סיעהא בני פדון׃

2:45b.EZR.002.045 בני לבנה בני חגבה בני עקוב׃

2:46b.EZR.002.046 בני חגב בני שמלי בני חנן׃

2:47b.EZR.002.047 בני גדל בני גחר בני ראיה׃

2:48b.EZR.002.048 בני רצין בני נקודא בני גזם׃

2:49b.EZR.002.049 בני עזא בני פסח בני בסי׃

2:50b.EZR.002.050 בני אסנה בני מעונים בני נפיסים׃

2:51b.EZR.002.051 בני בקבוק בני חקופא בני חרחור׃

2:52b.EZR.002.052 בני בצלות בני מחידא בני חרשא׃

2:53b.EZR.002.053 בני ברקוס בני סיסרא בני תמח׃

2:54b.EZR.002.054 בני נציח בני חטיפא׃

2:55b.EZR.002.055 בני עבדי שלמה בני סטי בני הספרת בני פרודא׃

2:56b.EZR.002.056 בני יעלה בני דרקון בני גדל׃

2:57b.EZR.002.057 בני שפטיה בני חטיל בני פכרת הצביים בני אמי׃

2:58b.EZR.002.058 כל הנתינים ובני עבדי שלמה שלש מאות תשעים ושנים׃

2:59b.EZR.002.059 ואלה העלים מתל מלח תל חרשא כרוב אדן אמר ולא יכלו להגיד בית אבותם וזרעם אם מישראל הם׃

2:60b.EZR.002.060 בני דליה בני טוביה בני נקודא שש מאות חמשים ושנים׃

2:61b.EZR.002.061 ומבני הכהנים בני חביה בני הקוץ בני ברזלי אשר לקח מבנות ברזלי הגלעדי אשה ויקרא על שמם׃

2:62b.EZR.002.062 אלה בקשו כתבם המתיחשים ולא נמצאו ויגאלו מן הכהנה׃

2:63b.EZR.002.063 ויאמר התרשתא להם אשר לא יאכלו מקדש הקדשים עד עמד כהן לאורים ולתמים׃

2:64b.EZR.002.064 כל הקהל כאחד ארבע רבוא אלפים שלש מאות ששים׃

2:65b.EZR.002.065 מלבד עבדיהם ואמהתיהם אלה שבעת אלפים שלש מאות שלשים ושבעה ולהם משררים ומשררות מאתים׃

2:66b.EZR.002.066 סוסיהם שבע מאות שלשים וששה פרדיהם מאתים ארבעים וחמשה׃

2:67b.EZR.002.067 גמליהם ארבע מאות שלשים וחמשה חמרים ששת אלפים שבע מאות ועשרים׃

2:68b.EZR.002.068 ומראשי האבות בבואם לבית יהוה אשר בירושלם התנדבו לבית האלהים להעמידו על מכונו׃

2:69b.EZR.002.069 ככחם נתנו לאוצר המלאכה זהב דרכמונים שש רבאות ואלף וכסף מנים חמשת אלפים וכתנת כהנים מאה׃

2:70b.EZR.002.070 וישבו הכהנים והלוים ומן העם והמשררים והשוערים והנתינים בעריהם וכל ישראל בעריהם׃

3

3:1b.EZR.003.001 ויגע החדש השביעי ובני ישראל בערים ויאספו העם כאיש אחד אל ירושלם׃

3:2b.EZR.003.002 ויקם ישוע בן יוצדק ואחיו הכהנים וזרבבל בן שאלתיאל ואחיו ויבנו את מזבח אלהי ישראל להעלות עליו עלות ככתוב בתורת משה איש האלהים׃

3:3b.EZR.003.003 ויכינו המזבח על מכונתיו כי באימה עליהם מעמי הארצות ויעל עליו עלות ליהוה עלות לבקר ולערב׃

3:4b.EZR.003.004 ויעשו את חג הסכות ככתוב ועלת יום ביום במספר כמשפט דבר יום ביומו׃

3:5b.EZR.003.005 ואחריכן עלת תמיד ולחדשים ולכל מועדי יהוה המקדשים ולכל מתנדב נדבה ליהוה׃

3:6b.EZR.003.006 מיום אחד לחדש השביעי החלו להעלות עלות ליהוה והיכל יהוה לא יסד׃

3:7b.EZR.003.007 ויתנו כסף לחצבים ולחרשים ומאכל ומשתה ושמן לצדנים ולצרים להביא עצי ארזים מן הלבנון אל ים יפוא כרשיון כורש מלך פרס עליהם׃

3:8b.EZR.003.008 ובשנה השנית לבואם אל בית האלהים לירושלם בחדש השני החלו זרבבל בן שאלתיאל וישוע בן יוצדק ושאר אחיהם הכהנים והלוים וכל הבאים מהשבי ירושלם ויעמידו את הלוים מבן עשרים שנה ומעלה לנצח על מלאכת בית יהוה׃

3:9b.EZR.003.009 ויעמד ישוע בניו ואחיו קדמיאל ובניו בני יהודה כאחד לנצח על עשה המלאכה בבית האלהים בני חנדד בניהם ואחיהם הלוים׃

3:10b.EZR.003.010 ויסדו הבנים את היכל יהוה ויעמידו הכהנים מלבשים בחצצרות והלוים בני אסף במצלתים להלל את יהוה על ידי דויד מלך ישראל׃

3:11b.EZR.003.011 ויענו בהלל ובהודת ליהוה כי טוב כי לעולם חסדו על ישראל וכל העם הריעו תרועה גדולה בהלל ליהוה על הוסד בית יהוה׃

3:12b.EZR.003.012 ורבים מהכהנים והלוים וראשי האבות הזקנים אשר ראו את הבית הראשון ביסדו זה הבית בעיניהם בכים בקול גדול ורבים בתרועה בשמחה להרים קול׃

3:13b.EZR.003.013 ואין העם מכירים קול תרועת השמחה לקול בכי העם כי העם מריעים תרועה גדולה והקול נשמע עד למרחוק׃

4

4:1b.EZR.004.001 וישמעו צרי יהודה ובנימן כי בני הגולה בונים היכל ליהוה אלהי ישראל׃

4:2b.EZR.004.002 ויגשו אל זרבבל ואל ראשי האבות ויאמרו להם נבנה עמכם כי ככם נדרוש לאלהיכם ולא אנחנו זבחים מימי אסר חדן מלך אשור המעלה אתנו פה׃

4:3b.EZR.004.003 ויאמר להם זרבבל וישוע ושאר ראשי האבות לישראל לא לכם ולנו לבנות בית לאלהינו כי אנחנו יחד נבנה ליהוה אלהי ישראל כאשר צונו המלך כורש מלך פרס׃

4:4b.EZR.004.004 ויהי עם הארץ מרפים ידי עם יהודה ומבלהים אותם לבנות׃

4:5b.EZR.004.005 וסכרים עליהם יועצים להפר עצתם כל ימי כורש מלך פרס ועד מלכות דריוש מלך פרס׃

4:6b.EZR.004.006 ובמלכות אחשורוש בתחלת מלכותו כתבו שטנה על ישבי יהודה וירושלם׃

4:7b.EZR.004.007 ובימי ארתחששתא כתב בשלם מתרדת טבאל ושאר כנותו על ארתחששתא מלך פרס וכתב הנשתון כתוב ארמית ומתרגם ארמית׃

4:8b.EZR.004.008 רחום בעל טעם ושמשי ספרא כתבו אגרה חדה על ירושלם לארתחששתא מלכא כנמא׃

4:9b.EZR.004.009 אדין רחום בעל טעם ושמשי ספרא ושאר כנותהון דיניא ואפרסתכיא טרפליא אפרסיא ארכוי בבליא שושנכיא דהוא עלמיא׃

4:10b.EZR.004.010 ושאר אמיא די הגלי אסנפר רבא ויקירא והותב המו בקריה די שמרין ושאר עבר נהרה וכענת׃

4:11b.EZR.004.011 דנה פרשגן אגרתא די שלחו עלוהי על ארתחששתא מלכא עבדיך אנש עבר נהרה וכענת׃

4:12b.EZR.004.012 ידיע להוא למלכא די יהודיא די סלקו מן לותך עלינא אתו לירושלם קריתא מרדתא ובאישתא בנין ושורי אשכללו ואשיא יחיטו׃

4:13b.EZR.004.013 כען ידיע להוא למלכא די הן קריתא דך תתבנא ושוריה ישתכללון מנדה בלו והלך לא ינתנון ואפתם מלכים תהנזק׃

4:14b.EZR.004.014 כען כל קבל די מלח היכלא מלחנא וערות מלכא לא אריך לנא למחזא על דנה שלחנא והודענא למלכא׃

4:15b.EZR.004.015 די יבקר בספר דכרניא די אבהתך ותהשכח בספר דכרניא ותנדע די קריתא דך קריא מרדא ומהנזקת מלכין ומדנן ואשתדור עבדין בגוה מן יומת עלמא על דנה קריתא דך החרבת׃

4:16b.EZR.004.016 מהודעין אנחנה למלכא די הן קריתא דך תתבנא ושוריה ישתכללון לקבל דנה חלק בעבר נהרא לא איתי לך׃

4:17b.EZR.004.017 פתגמא שלח מלכא על רחום בעל טעם ושמשי ספרא ושאר כנותהון די יתבין בשמרין ושאר עבר נהרה שלם וכעת׃

4:18b.EZR.004.018 נשתונא די שלחתון עלינא מפרש קרי קדמי׃

4:19b.EZR.004.019 ומני שים טעם ובקרו והשכחו די קריתא דך מן יומת עלמא על מלכין מתנשאה ומרד ואשתדור מתעבד בה׃

4:20b.EZR.004.020 ומלכין תקיפין הוו על ירושלם ושליטין בכל עבר נהרה ומדה בלו והלך מתיהב להון׃

4:21b.EZR.004.021 כען שימו טעם לבטלא גבריא אלך וקריתא דך לא תתבנא עד מני טעמא יתשם׃

4:22b.EZR.004.022 וזהירין הוו שלו למעבד על דנה למה ישגא חבלא להנזקת מלכין׃

4:23b.EZR.004.023 אדין מן די פרשגן נשתונא די ארתחששתא מלכא קרי קדם רחום ושמשי ספרא וכנותהון אזלו בבהילו לירושלם על יהודיא ובטלו המו באדרע וחיל׃

4:24b.EZR.004.024 באדין בטלת עבידת בית אלהא די בירושלם והות בטלא עד שנת תרתין למלכות דריוש מלך פרס׃

5

5:1b.EZR.005.001 והתנבי חגי נביאה וזכריה בר עדוא נביאיא על יהודיא די ביהוד ובירושלם בשם אלה ישראל עליהון׃

5:2b.EZR.005.002 באדין קמו זרבבל בר שאלתיאל וישוע בר יוצדק ושריו למבנא בית אלהא די בירושלם ועמהון נביאיא די אלהא מסעדין להון׃

5:3b.EZR.005.003 בה זמנא אתא עליהון תתני פחת עבר נהרה ושתר בוזני וכנותהון וכן אמרין להם מן שם לכם טעם ביתא דנה לבנא ואשרנא דנה לשכללה׃

5:4b.EZR.005.004 אדין כנמא אמרנא להם מן אנון שמהת גבריא די דנה בנינא בנין׃

5:5b.EZR.005.005 ועין אלההם הות על שבי יהודיא ולא בטלו המו עד טעמא לדריוש יהך ואדין יתיבון נשתונא על דנה׃

5:6b.EZR.005.006 פרשגן אגרתא די שלח תתני פחת עבר נהרה ושתר בוזני וכנותה אפרסכיא די בעבר נהרה על דריוש מלכא׃

5:7b.EZR.005.007 פתגמא שלחו עלוהי וכדנה כתיב בגוה לדריוש מלכא שלמא כלא׃

5:8b.EZR.005.008 ידיע להוא למלכא די אזלנא ליהוד מדינתא לבית אלהא רבא והוא מתבנא אבן גלל ואע מתשם בכתליא ועבידתא דך אספרנא מתעבדא ומצלח בידהם׃

5:9b.EZR.005.009 אדין שאלנא לשביא אלך כנמא אמרנא להם מן שם לכם טעם ביתא דנה למבניה ואשרנא דנה לשכללה׃

5:10b.EZR.005.010 ואף שמהתהם שאלנא להם להודעותך די נכתב שם גבריא די בראשיהם׃

5:11b.EZR.005.011 וכנמא פתגמא התיבונא לממר אנחנא המו עבדוהי די אלה שמיא וארעא ובנין ביתא די הוא בנה מקדמת דנה שנין שגיאן ומלך לישראל רב בנהי ושכללה׃

5:12b.EZR.005.012 להן מן די הרגזו אבהתנא לאלה שמיא יהב המו ביד נבוכדנצר מלך בבל כסדיא וביתה דנה סתרה ועמה הגלי לבבל׃

5:13b.EZR.005.013 ברם בשנת חדה לכורש מלכא די בבל כורש מלכא שם טעם בית אלהא דנה לבנא׃

5:14b.EZR.005.014 ואף מאניא די בית אלהא די דהבה וכספא די נבוכדנצר הנפק מן היכלא די בירושלם והיבל המו להיכלא די בבל הנפק המו כורש מלכא מן היכלא די בבל ויהיבו לששבצר שמה די פחה שמה׃

5:15b.EZR.005.015 ואמר לה אלה מאניא שא אזל אחת המו בהיכלא די בירושלם ובית אלהא יתבנא על אתרה׃

5:16b.EZR.005.016 אדין ששבצר דך אתא יהב אשיא די בית אלהא די בירושלם ומן אדין ועד כען מתבנא ולא שלם׃

5:17b.EZR.005.017 וכען הן על מלכא טב יתבקר בבית גנזיא די מלכא תמה די בבבל הן איתי די מן כורש מלכא שים טעם למבנא בית אלהא דך בירושלם ורעות מלכא על דנה ישלח עלינא׃

6

6:1b.EZR.006.001 באדין דריוש מלכא שם טעם ובקרו בבית ספריא די גנזיא מהחתין תמה בבבל׃

6:2b.EZR.006.002 והשתכח באחמתא בבירתא די במדי מדינתה מגלה חדה וכן כתיב בגוה דכרונה׃

6:3b.EZR.006.003 בשנת חדה לכורש מלכא כורש מלכא שם טעם בית אלהא בירושלם ביתא יתבנא אתר די דבחין דבחין ואשוהי מסובלין רומה אמין שתין פתיה אמין שתין׃

6:4b.EZR.006.004 נדבכין די אבן גלל תלתא ונדבך די אע חדת ונפקתא מן בית מלכא תתיהב׃

6:5b.EZR.006.005 ואף מאני בית אלהא די דהבה וכספא די נבוכדנצר הנפק מן היכלא די בירושלם והיבל לבבל יהתיבון ויהך להיכלא די בירושלם לאתרה ותחת בבית אלהא׃

6:6b.EZR.006.006 כען תתני פחת עבר נהרה שתר בוזני וכנותהון אפרסכיא די בעבר נהרה רחיקין הוו מן תמה׃

6:7b.EZR.006.007 שבקו לעבידת בית אלהא דך פחת יהודיא ולשבי יהודיא בית אלהא דך יבנון על אתרה׃

6:8b.EZR.006.008 ומני שים טעם למא די תעבדון עם שבי יהודיא אלך למבנא בית אלהא דך ומנכסי מלכא די מדת עבר נהרה אספרנא נפקתא תהוא מתיהבא לגבריא אלך די לא לבטלא׃

6:9b.EZR.006.009 ומה חשחן ובני תורין ודכרין ואמרין לעלון לאלה שמיא חנטין מלח חמר ומשח כמאמר כהניא די בירושלם להוא מתיהב להם יום ביום די לא שלו׃

6:10b.EZR.006.010 די להון מהקרבין ניחוחין לאלה שמיא ומצלין לחיי מלכא ובנוהי׃

6:11b.EZR.006.011 ומני שים טעם די כל אנש די יהשנא פתגמא דנה יתנסח אע מן ביתה וזקיף יתמחא עלהי וביתה נולו יתעבד על דנה׃

6:12b.EZR.006.012 ואלהא די שכן שמה תמה ימגר כל מלך ועם די ישלח ידה להשניה לחבלה בית אלהא דך די בירושלם אנה דריוש שמת טעם אספרנא יתעבד׃

6:13b.EZR.006.013 אדין תתני פחת עבר נהרה שתר בוזני וכנותהון לקבל די שלח דריוש מלכא כנמא אספרנא עבדו׃

6:14b.EZR.006.014 ושבי יהודיא בנין ומצלחין בנבואת חגי נביאה וזכריה בר עדוא ובנו ושכללו מן טעם אלה ישראל ומטעם כורש ודריוש וארתחששתא מלך פרס׃

6:15b.EZR.006.015 ושיציא ביתה דנה עד יום תלתה לירח אדר די היא שנת שת למלכות דריוש מלכא׃

6:16b.EZR.006.016 ועבדו בני ישראל כהניא ולויא ושאר בני גלותא חנכת בית אלהא דנה בחדוה׃

6:17b.EZR.006.017 והקרבו לחנכת בית אלהא דנה תורין מאה דכרין מאתין אמרין ארבע מאה וצפירי עזין לחטיא על כל ישראל תרי עשר למנין שבטי ישראל׃

6:18b.EZR.006.018 והקימו כהניא בפלגתהון ולויא במחלקתהון על עבידת אלהא די בירושלם ככתב ספר משה׃

6:19b.EZR.006.019 ויעשו בני הגולה את הפסח בארבעה עשר לחדש הראשון׃

6:20b.EZR.006.020 כי הטהרו הכהנים והלוים כאחד כלם טהורים וישחטו הפסח לכל בני הגולה ולאחיהם הכהנים ולהם׃

6:21b.EZR.006.021 ויאכלו בני ישראל השבים מהגולה וכל הנבדל מטמאת גוי הארץ אלהם לדרש ליהוה אלהי ישראל׃

6:22b.EZR.006.022 ויעשו חג מצות שבעת ימים בשמחה כי שמחם יהוה והסב לב מלך אשור עליהם לחזק ידיהם במלאכת בית האלהים אלהי ישראל׃

7

7:1b.EZR.007.001 ואחר הדברים האלה במלכות ארתחשסתא מלך פרס עזרא בן שריה בן עזריה בן חלקיה׃

7:2b.EZR.007.002 בן שלום בן צדוק בן אחיטוב׃

7:3b.EZR.007.003 בן אמריה בן עזריה בן מריות׃

7:4b.EZR.007.004 בן זרחיה בן עזי בן בקי׃

7:5b.EZR.007.005 בן אבישוע בן פינחס בן אלעזר בן אהרן הכהן הראש׃

7:6b.EZR.007.006 הוא עזרא עלה מבבל והוא ספר מהיר בתורת משה אשר נתן יהוה אלהי ישראל ויתן לו המלך כיד יהוה אלהיו עליו כל בקשתו׃

7:7b.EZR.007.007 ויעלו מבני ישראל ומן הכהנים והלוים והמשררים והשערים והנתינים אל ירושלם בשנת שבע לארתחשסתא המלך׃

7:8b.EZR.007.008 ויבא ירושלם בחדש החמישי היא שנת השביעית למלך׃

7:9b.EZR.007.009 כי באחד לחדש הראשון הוא יסד המעלה מבבל ובאחד לחדש החמישי בא אל ירושלם כיד אלהיו הטובה עליו׃

7:10b.EZR.007.010 כי עזרא הכין לבבו לדרוש את תורת יהוה ולעשת וללמד בישראל חק ומשפט׃

7:11b.EZR.007.011 וזה פרשגן הנשתון אשר נתן המלך ארתחשסתא לעזרא הכהן הספר ספר דברי מצות יהוה וחקיו על ישראל׃

7:12b.EZR.007.012 ארתחשסתא מלך מלכיא לעזרא כהנא ספר דתא די אלה שמיא גמיר וכענת׃

7:13b.EZR.007.013 מני שים טעם די כל מתנדב במלכותי מן עמה ישראל וכהנוהי ולויא למהך לירושלם עמך יהך׃

7:14b.EZR.007.014 כל קבל די מן קדם מלכא ושבעת יעטהי שליח לבקרא על יהוד ולירושלם בדת אלהך די בידך׃

7:15b.EZR.007.015 ולהיבלה כסף ודהב די מלכא ויעטוהי התנדבו לאלה ישראל די בירושלם משכנה׃

7:16b.EZR.007.016 וכל כסף ודהב די תהשכח בכל מדינת בבל עם התנדבות עמא וכהניא מתנדבין לבית אלההם די בירושלם׃

7:17b.EZR.007.017 כל קבל דנה אספרנא תקנא בכספא דנה תורין דכרין אמרין ומנחתהון ונסכיהון ותקרב המו על מדבחה די בית אלהכם די בירושלם׃

7:18b.EZR.007.018 ומה די עליך ועל אחיך ייטב בשאר כספא ודהבה למעבד כרעות אלהכם תעבדון׃

7:19b.EZR.007.019 ומאניא די מתיהבין לך לפלחן בית אלהך השלם קדם אלה ירושלם׃

7:20b.EZR.007.020 ושאר חשחות בית אלהך די יפל לך למנתן תנתן מן בית גנזי מלכא׃

7:21b.EZR.007.021 ומני אנה ארתחשסתא מלכא שים טעם לכל גזבריא די בעבר נהרה די כל די ישאלנכון עזרא כהנה ספר דתא די אלה שמיא אספרנא יתעבד׃

7:22b.EZR.007.022 עד כסף ככרין מאה ועד חנטין כרין מאה ועד חמר בתין מאה ועד בתין משח מאה ומלח די לא כתב׃

7:23b.EZR.007.023 כל די מן טעם אלה שמיא יתעבד אדרזדא לבית אלה שמיא די למה להוא קצף על מלכות מלכא ובנוהי׃

7:24b.EZR.007.024 ולכם מהודעין די כל כהניא ולויא זמריא תרעיא נתיניא ופלחי בית אלהא דנה מנדה בלו והלך לא שליט למרמא עליהם׃

7:25b.EZR.007.025 ואנת עזרא כחכמת אלהך די בידך מני שפטין ודינין די להון דאנין לכל עמה די בעבר נהרה לכל ידעי דתי אלהך ודי לא ידע תהודעון׃

7:26b.EZR.007.026 וכל די לא להוא עבד דתא די אלהך ודתא די מלכא אספרנא דינה להוא מתעבד מנה הן למות הן לשרשו הן לענש נכסין ולאסורין׃

7:27b.EZR.007.027 ברוך יהוה אלהי אבותינו אשר נתן כזאת בלב המלך לפאר את בית יהוה אשר בירושלם׃

7:28b.EZR.007.028 ועלי הטה חסד לפני המלך ויועציו ולכל שרי המלך הגברים ואני התחזקתי כיד יהוה אלהי עלי ואקבצה מישראל ראשים לעלות עמי׃

8

8:1b.EZR.008.001 ואלה ראשי אבתיהם והתיחשם העלים עמי במלכות ארתחשסתא המלך מבבל׃

8:2b.EZR.008.002 מבני פינחס גרשם מבני איתמר דניאל מבני דויד חטוש׃

8:3b.EZR.008.003 מבני שכניה מבני פרעש זכריה ועמו התיחש לזכרים מאה וחמשים׃

8:4b.EZR.008.004 מבני פחת מואב אליהועיני בן זרחיה ועמו מאתים הזכרים׃

8:5b.EZR.008.005 מבני שכניה בן יחזיאל ועמו שלש מאות הזכרים׃

8:6b.EZR.008.006 ומבני עדין עבד בן יונתן ועמו חמשים הזכרים׃

8:7b.EZR.008.007 ומבני עילם ישעיה בן עתליה ועמו שבעים הזכרים׃

8:8b.EZR.008.008 ומבני שפטיה זבדיה בן מיכאל ועמו שמנים הזכרים׃

8:9b.EZR.008.009 מבני יואב עבדיה בן יחיאל ועמו מאתים ושמנה עשר הזכרים׃

8:10b.EZR.008.010 ומבני שלומית בן יוספיה ועמו מאה וששים הזכרים׃

8:11b.EZR.008.011 ומבני בבי זכריה בן בבי ועמו עשרים ושמנה הזכרים׃

8:12b.EZR.008.012 ומבני עזגד יוחנן בן הקטן ועמו מאה ועשרה הזכרים׃

8:13b.EZR.008.013 ומבני אדניקם אחרנים ואלה שמותם אליפלט יעיאל ושמעיה ועמהם ששים הזכרים׃

8:14b.EZR.008.014 ומבני בגוי עותי וזבוד ועמו שבעים הזכרים׃

8:15b.EZR.008.015 ואקבצם אל הנהר הבא אל אהוא ונחנה שם ימים שלשה ואבינה בעם ובכהנים ומבני לוי לא מצאתי שם׃

8:16b.EZR.008.016 ואשלחה לאליעזר לאריאל לשמעיה ולאלנתן וליריב ולאלנתן ולנתן ולזכריה ולמשלם ראשים וליויריב ולאלנתן מבינים׃

8:17b.EZR.008.017 ואוצאה אותם על אדו הראש בכספיא המקום ואשימה בפיהם דברים לדבר אל אדו אחיו הנתונים בכספיא המקום להביא לנו משרתים לבית אלהינו׃

8:18b.EZR.008.018 ויביאו לנו כיד אלהינו הטובה עלינו איש שכל מבני מחלי בן לוי בן ישראל ושרביה ובניו ואחיו שמנה עשר׃

8:19b.EZR.008.019 ואת חשביה ואתו ישעיה מבני מררי אחיו ובניהם עשרים׃

8:20b.EZR.008.020 ומן הנתינים שנתן דויד והשרים לעבדת הלוים נתינים מאתים ועשרים כלם נקבו בשמות׃

8:21b.EZR.008.021 ואקרא שם צום על הנהר אהוא להתענות לפני אלהינו לבקש ממנו דרך ישרה לנו ולטפנו ולכל רכושנו׃

8:22b.EZR.008.022 כי בשתי לשאול מן המלך חיל ופרשים לעזרנו מאויב בדרך כי אמרנו למלך לאמר יד אלהינו על כל מבקשיו לטובה ועזו ואפו על כל עזביו׃

8:23b.EZR.008.023 ונצומה ונבקשה מאלהינו על זאת ויעתר לנו׃

8:24b.EZR.008.024 ואבדילה משרי הכהנים שנים עשר לשרביה חשביה ועמהם מאחיהם עשרה׃

8:25b.EZR.008.025 ואשקולה להם את הכסף ואת הזהב ואת הכלים תרומת בית אלהינו ההרימו המלך ויעציו ושריו וכל ישראל הנמצאים׃

8:26b.EZR.008.026 ואשקלה על ידם כסף ככרים שש מאות וחמשים וכלי כסף מאה לככרים זהב מאה ככר׃

8:27b.EZR.008.027 וכפרי זהב עשרים לאדרכנים אלף וכלי נחשת מצהב טובה שנים חמודת כזהב׃

8:28b.EZR.008.028 ואמרה אלהם אתם קדש ליהוה והכלים קדש והכסף והזהב נדבה ליהוה אלהי אבתיכם׃

8:29b.EZR.008.029 שקדו ושמרו עד תשקלו לפני שרי הכהנים והלוים ושרי האבות לישראל בירושלם הלשכות בית יהוה׃

8:30b.EZR.008.030 וקבלו הכהנים והלוים משקל הכסף והזהב והכלים להביא לירושלם לבית אלהינו׃

8:31b.EZR.008.031 ונסעה מנהר אהוא בשנים עשר לחדש הראשון ללכת ירושלם ויד אלהינו היתה עלינו ויצילנו מכף אויב ואורב על הדרך׃

8:32b.EZR.008.032 ונבוא ירושלם ונשב שם ימים שלשה׃

8:33b.EZR.008.033 וביום הרביעי נשקל הכסף והזהב והכלים בבית אלהינו על יד מרמות בן אוריה הכהן ועמו אלעזר בן פינחס ועמהם יוזבד בן ישוע ונועדיה בן בנוי הלוים׃

8:34b.EZR.008.034 במספר במשקל לכל ויכתב כל המשקל בעת ההיא׃

8:35b.EZR.008.035 הבאים מהשבי בני הגולה הקריבו עלות לאלהי ישראל פרים שנים עשר על כל ישראל אילים תשעים וששה כבשים שבעים ושבעה צפירי חטאת שנים עשר הכל עולה ליהוה׃

8:36b.EZR.008.036 ויתנו את דתי המלך לאחשדרפני המלך ופחוות עבר הנהר ונשאו את העם ואת בית האלהים׃

9

9:1b.EZR.009.001 וככלות אלה נגשו אלי השרים לאמר לא נבדלו העם ישראל והכהנים והלוים מעמי הארצות כתועבתיהם לכנעני החתי הפרזי היבוסי העמני המאבי המצרי והאמרי׃

9:2b.EZR.009.002 כי נשאו מבנתיהם להם ולבניהם והתערבו זרע הקדש בעמי הארצות ויד השרים והסגנים היתה במעל הזה ראשונה׃

9:3b.EZR.009.003 וכשמעי את הדבר הזה קרעתי את בגדי ומעילי ואמרטה משער ראשי וזקני ואשבה משומם׃

9:4b.EZR.009.004 ואלי יאספו כל חרד בדברי אלהי ישראל על מעל הגולה ואני ישב משומם עד למנחת הערב׃

9:5b.EZR.009.005 ובמנחת הערב קמתי מתעניתי ובקרעי בגדי ומעילי ואכרעה על ברכי ואפרשה כפי אל יהוה אלהי׃

9:6b.EZR.009.006 ואמרה אלהי בשתי ונכלמתי להרים אלהי פני אליך כי עונתינו רבו למעלה ראש ואשמתנו גדלה עד לשמים׃

9:7b.EZR.009.007 מימי אבתינו אנחנו באשמה גדלה עד היום הזה ובעונתינו נתנו אנחנו מלכינו כהנינו ביד מלכי הארצות בחרב בשבי ובבזה ובבשת פנים כהיום הזה׃

9:8b.EZR.009.008 ועתה כמעט רגע היתה תחנה מאת יהוה אלהינו להשאיר לנו פליטה ולתת לנו יתד במקום קדשו להאיר עינינו אלהינו ולתתנו מחיה מעט בעבדתנו׃

9:9b.EZR.009.009 כי עבדים אנחנו ובעבדתנו לא עזבנו אלהינו ויט עלינו חסד לפני מלכי פרס לתת לנו מחיה לרומם את בית אלהינו ולהעמיד את חרבתיו ולתת לנו גדר ביהודה ובירושלם׃

9:10b.EZR.009.010 ועתה מה נאמר אלהינו אחרי זאת כי עזבנו מצותיך׃

9:11b.EZR.009.011 אשר צוית ביד עבדיך הנביאים לאמר הארץ אשר אתם באים לרשתה ארץ נדה היא בנדת עמי הארצות בתועבתיהם אשר מלאוה מפה אל פה בטמאתם׃

9:12b.EZR.009.012 ועתה בנותיכם אל תתנו לבניהם ובנתיהם אל תשאו לבניכם ולא תדרשו שלמם וטובתם עד עולם למען תחזקו ואכלתם את טוב הארץ והורשתם לבניכם עד עולם׃

9:13b.EZR.009.013 ואחרי כל הבא עלינו במעשינו הרעים ובאשמתנו הגדלה כי אתה אלהינו חשכת למטה מעוננו ונתתה לנו פליטה כזאת׃

9:14b.EZR.009.014 הנשוב להפר מצותיך ולהתחתן בעמי התעבות האלה הלוא תאנף בנו עד כלה לאין שארית ופליטה׃

9:15b.EZR.009.015 יהוה אלהי ישראל צדיק אתה כי נשארנו פליטה כהיום הזה הננו לפניך באשמתינו כי אין לעמוד לפניך על זאת׃

10

10:1b.EZR.010.001 וכהתפלל עזרא וכהתודתו בכה ומתנפל לפני בית האלהים נקבצו אליו מישראל קהל רב מאד אנשים ונשים וילדים כי בכו העם הרבה בכה׃

10:2b.EZR.010.002 ויען שכניה בן יחיאל מבני עולם ויאמר לעזרא אנחנו מעלנו באלהינו ונשב נשים נכריות מעמי הארץ ועתה יש מקוה לישראל על זאת׃

10:3b.EZR.010.003 ועתה נכרת ברית לאלהינו להוציא כל נשים והנולד מהם בעצת אדני והחרדים במצות אלהינו וכתורה יעשה׃

10:4b.EZR.010.004 קום כי עליך הדבר ואנחנו עמך חזק ועשה׃

10:5b.EZR.010.005 ויקם עזרא וישבע את שרי הכהנים הלוים וכל ישראל לעשות כדבר הזה וישבעו׃

10:6b.EZR.010.006 ויקם עזרא מלפני בית האלהים וילך אל לשכת יהוחנן בן אלישיב וילך שם לחם לא אכל ומים לא שתה כי מתאבל על מעל הגולה׃

10:7b.EZR.010.007 ויעבירו קול ביהודה וירושלם לכל בני הגולה להקבץ ירושלם׃

10:8b.EZR.010.008 וכל אשר לא יבוא לשלשת הימים כעצת השרים והזקנים יחרם כל רכושו והוא יבדל מקהל הגולה׃

10:9b.EZR.010.009 ויקבצו כל אנשי יהודה ובנימן ירושלם לשלשת הימים הוא חדש התשיעי בעשרים בחדש וישבו כל העם ברחוב בית האלהים מרעידים על הדבר ומהגשמים׃

10:10b.EZR.010.010 ויקם עזרא הכהן ויאמר אלהם אתם מעלתם ותשיבו נשים נכריות להוסיף על אשמת ישראל׃

10:11b.EZR.010.011 ועתה תנו תודה ליהוה אלהי אבתיכם ועשו רצונו והבדלו מעמי הארץ ומן הנשים הנכריות׃

10:12b.EZR.010.012 ויענו כל הקהל ויאמרו קול גדול כן כדבריך עלינו לעשות׃

10:13b.EZR.010.013 אבל העם רב והעת גשמים ואין כח לעמוד בחוץ והמלאכה לא ליום אחד ולא לשנים כי הרבינו לפשע בדבר הזה׃

10:14b.EZR.010.014 יעמדו נא שרינו לכל הקהל וכל אשר בערינו ההשיב נשים נכריות יבא לעתים מזמנים ועמהם זקני עיר ועיר ושפטיה עד להשיב חרון אף אלהינו ממנו עד לדבר הזה׃

10:15b.EZR.010.015 אך יונתן בן עשהאל ויחזיה בן תקוה עמדו על זאת ומשלם ושבתי הלוי עזרם׃

10:16b.EZR.010.016 ויעשו כן בני הגולה ויבדלו עזרא הכהן אנשים ראשי האבות לבית אבתם וכלם בשמות וישבו ביום אחד לחדש העשירי לדריוש הדבר׃

10:17b.EZR.010.017 ויכלו בכל אנשים ההשיבו נשים נכריות עד יום אחד לחדש הראשון׃

10:18b.EZR.010.018 וימצא מבני הכהנים אשר השיבו נשים נכריות מבני ישוע בן יוצדק ואחיו מעשיה ואליעזר ויריב וגדליה׃

10:19b.EZR.010.019 ויתנו ידם להוציא נשיהם ואשמים איל צאן על אשמתם׃

10:20b.EZR.010.020 ומבני אמר חנני וזבדיה׃

10:21b.EZR.010.021 ומבני חרם מעשיה ואליה ושמעיה ויחיאל ועזיה׃

10:22b.EZR.010.022 ומבני פשחור אליועיני מעשיה ישמעאל נתנאל יוזבד ואלעשה׃

10:23b.EZR.010.023 ומן הלוים יוזבד ושמעי וקליה הוא קליטא פתחיה יהודה ואליעזר׃

10:24b.EZR.010.024 ומן המשררים אלישיב ומן השערים שלם וטלם ואורי׃

10:25b.EZR.010.025 ומישראל מבני פרעש רמיה ויזיה ומלכיה ומימן ואלעזר ומלכיה ובניה׃

10:26b.EZR.010.026 ומבני עילם מתניה זכריה ויחיאל ועבדי וירמות ואליה׃

10:27b.EZR.010.027 ומבני זתוא אליועני אלישיב מתניה וירמות וזבד ועזיזא׃

10:28b.EZR.010.028 ומבני בבי יהוחנן חנניה זבי עתלי׃

10:29b.EZR.010.029 ומבני בני משלם מלוך ועדיה ישוב ושאל ירמות׃

10:30b.EZR.010.030 ומבני פחת מואב עדנא וכלל בניה מעשיה מתניה בצלאל ובנוי ומנשה׃

10:31b.EZR.010.031 ובני חרם אליעזר ישיה מלכיה שמעיה שמעון׃

10:32b.EZR.010.032 בנימן מלוך שמריה׃

10:33b.EZR.010.033 מבני חשם מתני מתתה זבד אליפלט ירמי מנשה שמעי׃

10:34b.EZR.010.034 מבני בני מעדי עמרם ואואל׃

10:35b.EZR.010.035 בניה בדיה כלוהי׃

10:36b.EZR.010.036 וניה מרמות אלישיב׃

10:37b.EZR.010.037 מתניה מתני ויעשו׃

10:38b.EZR.010.038 ובני ובנוי שמעי׃

10:39b.EZR.010.039 ושלמיה ונתן ועדיה׃

10:40b.EZR.010.040 מכנדבי ששי שרי׃

10:41b.EZR.010.041 עזראל ושלמיהו שמריה׃

10:42b.EZR.010.042 שלום אמריה יוסף׃

10:43b.EZR.010.043 מבני נבו יעיאל מתתיה זבד זבינא ידו ויואל בניה׃

10:44b.EZR.010.044 כל אלה נשאי נשים נכריות ויש מהם נשים וישימו בנים׃