1 Kings (Hebrew)

1

1:1b.1KI.001.001 והמלך דוד זקן בא בימים ויכסהו בבגדים ולא יחם לו׃

1:2b.1KI.001.002 ויאמרו לו עבדיו יבקשו לאדני המלך נערה בתולה ועמדה לפני המלך ותהי לו סכנת ושכבה בחיקך וחם לאדני המלך׃

1:3b.1KI.001.003 ויבקשו נערה יפה בכל גבול ישראל וימצאו את אבישג השונמית ויבאו אתה למלך׃

1:4b.1KI.001.004 והנערה יפה עד מאד ותהי למלך סכנת ותשרתהו והמלך לא ידעה׃

1:5b.1KI.001.005 ואדניה בן חגית מתנשא לאמר אני אמלך ויעש לו רכב ופרשים וחמשים איש רצים לפניו׃

1:6b.1KI.001.006 ולא עצבו אביו מימיו לאמר מדוע ככה עשית וגם הוא טוב תאר מאד ואתו ילדה אחרי אבשלום׃

1:7b.1KI.001.007 ויהיו דבריו עם יואב בן צרויה ועם אביתר הכהן ויעזרו אחרי אדניה׃

1:8b.1KI.001.008 וצדוק הכהן ובניהו בן יהוידע ונתן הנביא ושמעי ורעי והגבורים אשר לדוד לא היו עם אדניהו׃

1:9b.1KI.001.009 ויזבח אדניהו צאן ובקר ומריא עם אבן הזחלת אשר אצל עין רגל ויקרא את כל אחיו בני המלך ולכל אנשי יהודה עבדי המלך׃

1:10b.1KI.001.010 ואת נתן הנביא ובניהו ואת הגבורים ואת שלמה אחיו לא קרא׃

1:11b.1KI.001.011 ויאמר נתן אל בת שבע אם שלמה לאמר הלוא שמעת כי מלך אדניהו בן חגית ואדנינו דוד לא ידע׃

1:12b.1KI.001.012 ועתה לכי איעצך נא עצה ומלטי את נפשך ואת נפש בנך שלמה׃

1:13b.1KI.001.013 לכי ובאי אל המלך דוד ואמרת אליו הלא אתה אדני המלך נשבעת לאמתך לאמר כי שלמה בנך ימלך אחרי והוא ישב על כסאי ומדוע מלך אדניהו׃

1:14b.1KI.001.014 הנה עודך מדברת שם עם המלך ואני אבוא אחריך ומלאתי את דבריך׃

1:15b.1KI.001.015 ותבא בת שבע אל המלך החדרה והמלך זקן מאד ואבישג השונמית משרת את המלך׃

1:16b.1KI.001.016 ותקד בת שבע ותשתחו למלך ויאמר המלך מה לך׃

1:17b.1KI.001.017 ותאמר לו אדני אתה נשבעת ביהוה אלהיך לאמתך כי שלמה בנך ימלך אחרי והוא ישב על כסאי׃

1:18b.1KI.001.018 ועתה הנה אדניה מלך ועתה אדני המלך לא ידעת׃

1:19b.1KI.001.019 ויזבח שור ומריא וצאן לרב ויקרא לכל בני המלך ולאביתר הכהן וליאב שר הצבא ולשלמה עבדך לא קרא׃

1:20b.1KI.001.020 ואתה אדני המלך עיני כל ישראל עליך להגיד להם מי ישב על כסא אדני המלך אחריו׃

1:21b.1KI.001.021 והיה כשכב אדני המלך עם אבתיו והייתי אני ובני שלמה חטאים׃

1:22b.1KI.001.022 והנה עודנה מדברת עם המלך ונתן הנביא בא׃

1:23b.1KI.001.023 ויגידו למלך לאמר הנה נתן הנביא ויבא לפני המלך וישתחו למלך על אפיו ארצה׃

1:24b.1KI.001.024 ויאמר נתן אדני המלך אתה אמרת אדניהו ימלך אחרי והוא ישב על כסאי׃

1:25b.1KI.001.025 כי ירד היום ויזבח שור ומריא וצאן לרב ויקרא לכל בני המלך ולשרי הצבא ולאביתר הכהן והנם אכלים ושתים לפניו ויאמרו יחי המלך אדניהו׃

1:26b.1KI.001.026 ולי אני עבדך ולצדק הכהן ולבניהו בן יהוידע ולשלמה עבדך לא קרא׃

1:27b.1KI.001.027 אם מאת אדני המלך נהיה הדבר הזה ולא הודעת את עבדיך מי ישב על כסא אדני המלך אחריו׃

1:28b.1KI.001.028 ויען המלך דוד ויאמר קראו לי לבת שבע ותבא לפני המלך ותעמד לפני המלך׃

1:29b.1KI.001.029 וישבע המלך ויאמר חי יהוה אשר פדה את נפשי מכל צרה׃

1:30b.1KI.001.030 כי כאשר נשבעתי לך ביהוה אלהי ישראל לאמר כי שלמה בנך ימלך אחרי והוא ישב על כסאי תחתי כי כן אעשה היום הזה׃

1:31b.1KI.001.031 ותקד בת שבע אפים ארץ ותשתחו למלך ותאמר יחי אדני המלך דוד לעלם׃

1:32b.1KI.001.032 ויאמר המלך דוד קראו לי לצדוק הכהן ולנתן הנביא ולבניהו בן יהוידע ויבאו לפני המלך׃

1:33b.1KI.001.033 ויאמר המלך להם קחו עמכם את עבדי אדניכם והרכבתם את שלמה בני על הפרדה אשר לי והורדתם אתו אל גחון׃

1:34b.1KI.001.034 ומשח אתו שם צדוק הכהן ונתן הנביא למלך על ישראל ותקעתם בשופר ואמרתם יחי המלך שלמה׃

1:35b.1KI.001.035 ועליתם אחריו ובא וישב על כסאי והוא ימלך תחתי ואתו צויתי להיות נגיד על ישראל ועל יהודה׃

1:36b.1KI.001.036 ויען בניהו בן יהוידע את המלך ויאמר אמן כן יאמר יהוה אלהי אדני המלך׃

1:37b.1KI.001.037 כאשר היה יהוה עם אדני המלך כן יהי עם שלמה ויגדל את כסאו מכסא אדני המלך דוד׃

1:38b.1KI.001.038 וירד צדוק הכהן ונתן הנביא ובניהו בן יהוידע והכרתי והפלתי וירכבו את שלמה על פרדת המלך דוד וילכו אתו על גחון׃

1:39b.1KI.001.039 ויקח צדוק הכהן את קרן השמן מן האהל וימשח את שלמה ויתקעו בשופר ויאמרו כל העם יחי המלך שלמה׃

1:40b.1KI.001.040 ויעלו כל העם אחריו והעם מחללים בחללים ושמחים שמחה גדולה ותבקע הארץ בקולם׃

1:41b.1KI.001.041 וישמע אדניהו וכל הקראים אשר אתו והם כלו לאכל וישמע יואב את קול השופר ויאמר מדוע קול הקריה הומה׃

1:42b.1KI.001.042 עודנו מדבר והנה יונתן בן אביתר הכהן בא ויאמר אדניהו בא כי איש חיל אתה וטוב תבשר׃

1:43b.1KI.001.043 ויען יונתן ויאמר לאדניהו אבל אדנינו המלך דוד המליך את שלמה׃

1:44b.1KI.001.044 וישלח אתו המלך את צדוק הכהן ואת נתן הנביא ובניהו בן יהוידע והכרתי והפלתי וירכבו אתו על פרדת המלך׃

1:45b.1KI.001.045 וימשחו אתו צדוק הכהן ונתן הנביא למלך בגחון ויעלו משם שמחים ותהם הקריה הוא הקול אשר שמעתם׃

1:46b.1KI.001.046 וגם ישב שלמה על כסא המלוכה׃

1:47b.1KI.001.047 וגם באו עבדי המלך לברך את אדנינו המלך דוד לאמר ייטב אלהיך את שם שלמה משמך ויגדל את כסאו מכסאך וישתחו המלך על המשכב׃

1:48b.1KI.001.048 וגם ככה אמר המלך ברוך יהוה אלהי ישראל אשר נתן היום ישב על כסאי ועיני ראות׃

1:49b.1KI.001.049 ויחרדו ויקמו כל הקראים אשר לאדניהו וילכו איש לדרכו׃

1:50b.1KI.001.050 ואדניהו ירא מפני שלמה ויקם וילך ויחזק בקרנות המזבח׃

1:51b.1KI.001.051 ויגד לשלמה לאמר הנה אדניהו ירא את המלך שלמה והנה אחז בקרנות המזבח לאמר ישבע לי כיום המלך שלמה אם ימית את עבדו בחרב׃

1:52b.1KI.001.052 ויאמר שלמה אם יהיה לבן חיל לא יפל משערתו ארצה ואם רעה תמצא בו ומת׃

1:53b.1KI.001.053 וישלח המלך שלמה וירדהו מעל המזבח ויבא וישתחו למלך שלמה ויאמר לו שלמה לך לביתך׃

2

2:1b.1KI.002.001 ויקרבו ימי דוד למות ויצו את שלמה בנו לאמר׃

2:2b.1KI.002.002 אנכי הלך בדרך כל הארץ וחזקת והיית לאיש׃

2:3b.1KI.002.003 ושמרת את משמרת יהוה אלהיך ללכת בדרכיו לשמר חקתיו מצותיו ומשפטיו ועדותיו ככתוב בתורת משה למען תשכיל את כל אשר תעשה ואת כל אשר תפנה שם׃

2:4b.1KI.002.004 למען יקים יהוה את דברו אשר דבר עלי לאמר אם ישמרו בניך את דרכם ללכת לפני באמת בכל לבבם ובכל נפשם לאמר לא יכרת לך איש מעל כסא ישראל׃

2:5b.1KI.002.005 וגם אתה ידעת את אשר עשה לי יואב בן צרויה אשר עשה לשני שרי צבאות ישראל לאבנר בן נר ולעמשא בן יתר ויהרגם וישם דמי מלחמה בשלם ויתן דמי מלחמה בחגרתו אשר במתניו ובנעלו אשר ברגליו׃

2:6b.1KI.002.006 ועשית כחכמתך ולא תורד שיבתו בשלם שאל׃

2:7b.1KI.002.007 ולבני ברזלי הגלעדי תעשה חסד והיו באכלי שלחנך כי כן קרבו אלי בברחי מפני אבשלום אחיך׃

2:8b.1KI.002.008 והנה עמך שמעי בן גרא בן הימיני מבחרים והוא קללני קללה נמרצת ביום לכתי מחנים והוא ירד לקראתי הירדן ואשבע לו ביהוה לאמר אם אמיתך בחרב׃

2:9b.1KI.002.009 ועתה אל תנקהו כי איש חכם אתה וידעת את אשר תעשה לו והורדת את שיבתו בדם שאול׃

2:10b.1KI.002.010 וישכב דוד עם אבתיו ויקבר בעיר דוד׃

2:11b.1KI.002.011 והימים אשר מלך דוד על ישראל ארבעים שנה בחברון מלך שבע שנים ובירושלם מלך שלשים ושלש שנים׃

2:12b.1KI.002.012 ושלמה ישב על כסא דוד אביו ותכן מלכתו מאד׃

2:13b.1KI.002.013 ויבא אדניהו בן חגית אל בת שבע אם שלמה ותאמר השלום באך ויאמר שלום׃

2:14b.1KI.002.014 ויאמר דבר לי אליך ותאמר דבר׃

2:15b.1KI.002.015 ויאמר את ידעת כי לי היתה המלוכה ועלי שמו כל ישראל פניהם למלך ותסב המלוכה ותהי לאחי כי מיהוה היתה לו׃

2:16b.1KI.002.016 ועתה שאלה אחת אנכי שאל מאתך אל תשבי את פני ותאמר אליו דבר׃

2:17b.1KI.002.017 ויאמר אמרי נא לשלמה המלך כי לא ישיב את פניך ויתן לי את אבישג השונמית לאשה׃

2:18b.1KI.002.018 ותאמר בת שבע טוב אנכי אדבר עליך אל המלך׃

2:19b.1KI.002.019 ותבא בת שבע אל המלך שלמה לדבר לו על אדניהו ויקם המלך לקראתה וישתחו לה וישב על כסאו וישם כסא לאם המלך ותשב לימינו׃

2:20b.1KI.002.020 ותאמר שאלה אחת קטנה אנכי שאלת מאתך אל תשב את פני ויאמר לה המלך שאלי אמי כי לא אשיב את פניך׃

2:21b.1KI.002.021 ותאמר יתן את אבישג השנמית לאדניהו אחיך לאשה׃

2:22b.1KI.002.022 ויען המלך שלמה ויאמר לאמו ולמה את שאלת את אבישג השנמית לאדניהו ושאלי לו את המלוכה כי הוא אחי הגדול ממני ולו ולאביתר הכהן וליואב בן צרויה׃

2:23b.1KI.002.023 וישבע המלך שלמה ביהוה לאמר כה יעשה לי אלהים וכה יוסיף כי בנפשו דבר אדניהו את הדבר הזה׃

2:24b.1KI.002.024 ועתה חי יהוה אשר הכינני ויושיביני על כסא דוד אבי ואשר עשה לי בית כאשר דבר כי היום יומת אדניהו׃

2:25b.1KI.002.025 וישלח המלך שלמה ביד בניהו בן יהוידע ויפגע בו וימת׃

2:26b.1KI.002.026 ולאביתר הכהן אמר המלך ענתת לך על שדיך כי איש מות אתה וביום הזה לא אמיתך כי נשאת את ארון אדני יהוה לפני דוד אבי וכי התענית בכל אשר התענה אבי׃

2:27b.1KI.002.027 ויגרש שלמה את אביתר מהיות כהן ליהוה למלא את דבר יהוה אשר דבר על בית עלי בשלה׃

2:28b.1KI.002.028 והשמעה באה עד יואב כי יואב נטה אחרי אדניה ואחרי אבשלום לא נטה וינס יואב אל אהל יהוה ויחזק בקרנות המזבח׃

2:29b.1KI.002.029 ויגד למלך שלמה כי נס יואב אל אהל יהוה והנה אצל המזבח וישלח שלמה את בניהו בן יהוידע לאמר לך פגע בו׃

2:30b.1KI.002.030 ויבא בניהו אל אהל יהוה ויאמר אליו כה אמר המלך צא ויאמר לא כי פה אמות וישב בניהו את המלך דבר לאמר כה דבר יואב וכה ענני׃

2:31b.1KI.002.031 ויאמר לו המלך עשה כאשר דבר ופגע בו וקברתו והסירת דמי חנם אשר שפך יואב מעלי ומעל בית אבי׃

2:32b.1KI.002.032 והשיב יהוה את דמו על ראשו אשר פגע בשני אנשים צדקים וטבים ממנו ויהרגם בחרב ואבי דוד לא ידע את אבנר בן נר שר צבא ישראל ואת עמשא בן יתר שר צבא יהודה׃

2:33b.1KI.002.033 ושבו דמיהם בראש יואב ובראש זרעו לעלם ולדוד ולזרעו ולביתו ולכסאו יהיה שלום עד עולם מעם יהוה׃

2:34b.1KI.002.034 ויעל בניהו בן יהוידע ויפגע בו וימתהו ויקבר בביתו במדבר׃

2:35b.1KI.002.035 ויתן המלך את בניהו בן יהוידע תחתיו על הצבא ואת צדוק הכהן נתן המלך תחת אביתר׃

2:36b.1KI.002.036 וישלח המלך ויקרא לשמעי ויאמר לו בנה לך בית בירושלם וישבת שם ולא תצא משם אנה ואנה׃

2:37b.1KI.002.037 והיה ביום צאתך ועברת את נחל קדרון ידע תדע כי מות תמות דמך יהיה בראשך׃

2:38b.1KI.002.038 ויאמר שמעי למלך טוב הדבר כאשר דבר אדני המלך כן יעשה עבדך וישב שמעי בירושלם ימים רבים׃

2:39b.1KI.002.039 ויהי מקץ שלש שנים ויברחו שני עבדים לשמעי אל אכיש בן מעכה מלך גת ויגידו לשמעי לאמר הנה עבדיך בגת׃

2:40b.1KI.002.040 ויקם שמעי ויחבש את חמרו וילך גתה אל אכיש לבקש את עבדיו וילך שמעי ויבא את עבדיו מגת׃

2:41b.1KI.002.041 ויגד לשלמה כי הלך שמעי מירושלם גת וישב׃

2:42b.1KI.002.042 וישלח המלך ויקרא לשמעי ויאמר אליו הלוא השבעתיך ביהוה ואעד בך לאמר ביום צאתך והלכת אנה ואנה ידע תדע כי מות תמות ותאמר אלי טוב הדבר שמעתי׃

2:43b.1KI.002.043 ומדוע לא שמרת את שבעת יהוה ואת המצוה אשר צויתי עליך׃

2:44b.1KI.002.044 ויאמר המלך אל שמעי אתה ידעת את כל הרעה אשר ידע לבבך אשר עשית לדוד אבי והשיב יהוה את רעתך בראשך׃

2:45b.1KI.002.045 והמלך שלמה ברוך וכסא דוד יהיה נכון לפני יהוה עד עולם׃

2:46b.1KI.002.046 ויצו המלך את בניהו בן יהוידע ויצא ויפגע בו וימת והממלכה נכונה ביד שלמה׃

3

3:1b.1KI.003.001 ויתחתן שלמה את פרעה מלך מצרים ויקח את בת פרעה ויביאה אל עיר דוד עד כלתו לבנות את ביתו ואת בית יהוה ואת חומת ירושלם סביב׃

3:2b.1KI.003.002 רק העם מזבחים בבמות כי לא נבנה בית לשם יהוה עד הימים ההם׃

3:3b.1KI.003.003 ויאהב שלמה את יהוה ללכת בחקות דוד אביו רק בבמות הוא מזבח ומקטיר׃

3:4b.1KI.003.004 וילך המלך גבענה לזבח שם כי היא הבמה הגדולה אלף עלות יעלה שלמה על המזבח ההוא׃

3:5b.1KI.003.005 בגבעון נראה יהוה אל שלמה בחלום הלילה ויאמר אלהים שאל מה אתן לך׃

3:6b.1KI.003.006 ויאמר שלמה אתה עשית עם עבדך דוד אבי חסד גדול כאשר הלך לפניך באמת ובצדקה ובישרת לבב עמך ותשמר לו את החסד הגדול הזה ותתן לו בן ישב על כסאו כיום הזה׃

3:7b.1KI.003.007 ועתה יהוה אלהי אתה המלכת את עבדך תחת דוד אבי ואנכי נער קטן לא אדע צאת ובא׃

3:8b.1KI.003.008 ועבדך בתוך עמך אשר בחרת עם רב אשר לא ימנה ולא יספר מרב׃

3:9b.1KI.003.009 ונתת לעבדך לב שמע לשפט את עמך להבין בין טוב לרע כי מי יוכל לשפט את עמך הכבד הזה׃

3:10b.1KI.003.010 וייטב הדבר בעיני אדני כי שאל שלמה את הדבר הזה׃

3:11b.1KI.003.011 ויאמר אלהים אליו יען אשר שאלת את הדבר הזה ולא שאלת לך ימים רבים ולא שאלת לך עשר ולא שאלת נפש איביך ושאלת לך הבין לשמע משפט׃

3:12b.1KI.003.012 הנה עשיתי כדבריך הנה נתתי לך לב חכם ונבון אשר כמוך לא היה לפניך ואחריך לא יקום כמוך׃

3:13b.1KI.003.013 וגם אשר לא שאלת נתתי לך גם עשר גם כבוד אשר לא היה כמוך איש במלכים כל ימיך׃

3:14b.1KI.003.014 ואם תלך בדרכי לשמר חקי ומצותי כאשר הלך דויד אביך והארכתי את ימיך׃

3:15b.1KI.003.015 ויקץ שלמה והנה חלום ויבוא ירושלם ויעמד לפני ארון ברית אדני ויעל עלות ויעש שלמים ויעש משתה לכל עבדיו׃

3:16b.1KI.003.016 אז תבאנה שתים נשים זנות אל המלך ותעמדנה לפניו׃

3:17b.1KI.003.017 ותאמר האשה האחת בי אדני אני והאשה הזאת ישבת בבית אחד ואלד עמה בבית׃

3:18b.1KI.003.018 ויהי ביום השלישי ללדתי ותלד גם האשה הזאת ואנחנו יחדו אין זר אתנו בבית זולתי שתים אנחנו בבית׃

3:19b.1KI.003.019 וימת בן האשה הזאת לילה אשר שכבה עליו׃

3:20b.1KI.003.020 ותקם בתוך הלילה ותקח את בני מאצלי ואמתך ישנה ותשכיבהו בחיקה ואת בנה המת השכיבה בחיקי׃

3:21b.1KI.003.021 ואקם בבקר להיניק את בני והנה מת ואתבונן אליו בבקר והנה לא היה בני אשר ילדתי׃

3:22b.1KI.003.022 ותאמר האשה האחרת לא כי בני החי ובנך המת וזאת אמרת לא כי בנך המת ובני החי ותדברנה לפני המלך׃

3:23b.1KI.003.023 ויאמר המלך זאת אמרת זה בני החי ובנך המת וזאת אמרת לא כי בנך המת ובני החי׃

3:24b.1KI.003.024 ויאמר המלך קחו לי חרב ויבאו החרב לפני המלך׃

3:25b.1KI.003.025 ויאמר המלך גזרו את הילד החי לשנים ותנו את החצי לאחת ואת החצי לאחת׃

3:26b.1KI.003.026 ותאמר האשה אשר בנה החי אל המלך כי נכמרו רחמיה על בנה ותאמר בי אדני תנו לה את הילוד החי והמת אל תמיתהו וזאת אמרת גם לי גם לך לא יהיה גזרו׃

3:27b.1KI.003.027 ויען המלך ויאמר תנו לה את הילוד החי והמת לא תמיתהו היא אמו׃

3:28b.1KI.003.028 וישמעו כל ישראל את המשפט אשר שפט המלך ויראו מפני המלך כי ראו כי חכמת אלהים בקרבו לעשות משפט׃

4

4:1b.1KI.004.001 ויהי המלך שלמה מלך על כל ישראל׃

4:2b.1KI.004.002 ואלה השרים אשר לו עזריהו בן צדוק הכהן׃

4:3b.1KI.004.003 אליחרף ואחיה בני שישא ספרים יהושפט בן אחילוד המזכיר׃

4:4b.1KI.004.004 ובניהו בן יהוידע על הצבא וצדוק ואביתר כהנים׃

4:5b.1KI.004.005 ועזריהו בן נתן על הנצבים וזבוד בן נתן כהן רעה המלך׃

4:6b.1KI.004.006 ואחישר על הבית ואדנירם בן עבדא על המס׃

4:7b.1KI.004.007 ולשלמה שנים עשר נצבים על כל ישראל וכלכלו את המלך ואת ביתו חדש בשנה יהיה על אחד לכלכל׃

4:8b.1KI.004.008 ואלה שמותם בן חור בהר אפרים׃

4:9b.1KI.004.009 בן דקר במקץ ובשעלבים ובית שמש ואילון בית חנן׃

4:10b.1KI.004.010 בן חסד בארבות לו שכה וכל ארץ חפר׃

4:11b.1KI.004.011 בן אבינדב כל נפת דאר טפת בת שלמה היתה לו לאשה׃

4:12b.1KI.004.012 בענא בן אחילוד תענך ומגדו וכל בית שאן אשר אצל צרתנה מתחת ליזרעאל מבית שאן עד אבל מחולה עד מעבר ליקמעם׃

4:13b.1KI.004.013 בן גבר ברמת גלעד לו חות יאיר בן מנשה אשר בגלעד לו חבל ארגב אשר בבשן ששים ערים גדלות חומה ובריח נחשת׃

4:14b.1KI.004.014 אחינדב בן עדא מחנימה׃

4:15b.1KI.004.015 אחימעץ בנפתלי גם הוא לקח את בשמת בת שלמה לאשה׃

4:16b.1KI.004.016 בענא בן חושי באשר ובעלות׃

4:17b.1KI.004.017 יהושפט בן פרוח ביששכר׃

4:18b.1KI.004.018 שמעי בן אלא בבנימן׃

4:19b.1KI.004.019 גבר בן ארי בארץ גלעד ארץ סיחון מלך האמרי ועג מלך הבשן ונציב אחד אשר בארץ׃

4:20b.1KI.004.020 יהודה וישראל רבים כחול אשר על הים לרב אכלים ושתים ושמחים׃

4:21b.1KI.004.021 ושלמה היה מושל בכל הממלכות מן הנהר ארץ פלשתים ועד גבול מצרים מגשים מנחה ועבדים את שלמה כל ימי חייו׃

4:22b.1KI.004.022 ויהי לחם שלמה ליום אחד שלשים כר סלת וששים כר קמח׃

4:23b.1KI.004.023 עשרה בקר בראים ועשרים בקר רעי ומאה צאן לבד מאיל וצבי ויחמור וברברים אבוסים׃

4:24b.1KI.004.024 כי הוא רדה בכל עבר הנהר מתפסח ועד עזה בכל מלכי עבר הנהר ושלום היה לו מכל עבריו מסביב׃

4:25b.1KI.004.025 וישב יהודה וישראל לבטח איש תחת גפנו ותחת תאנתו מדן ועד באר שבע כל ימי שלמה׃

4:26b.1KI.004.026 ויהי לשלמה ארבעים אלף ארות סוסים למרכבו ושנים עשר אלף פרשים׃

4:27b.1KI.004.027 וכלכלו הנצבים האלה את המלך שלמה ואת כל הקרב אל שלחן המלך שלמה איש חדשו לא יעדרו דבר׃

4:28b.1KI.004.028 והשערים והתבן לסוסים ולרכש יבאו אל המקום אשר יהיה שם איש כמשפטו׃

4:29b.1KI.004.029 ויתן אלהים חכמה לשלמה ותבונה הרבה מאד ורחב לב כחול אשר על שפת הים׃

4:30b.1KI.004.030 ותרב חכמת שלמה מחכמת כל בני קדם ומכל חכמת מצרים׃

4:31b.1KI.004.031 ויחכם מכל האדם מאיתן האזרחי והימן וכלכל ודרדע בני מחול ויהי שמו בכל הגוים סביב׃

4:32b.1KI.004.032 וידבר שלשת אלפים משל ויהי שירו חמשה ואלף׃

4:33b.1KI.004.033 וידבר על העצים מן הארז אשר בלבנון ועד האזוב אשר יצא בקיר וידבר על הבהמה ועל העוף ועל הרמש ועל הדגים׃

4:34b.1KI.004.034 ויבאו מכל העמים לשמע את חכמת שלמה מאת כל מלכי הארץ אשר שמעו את חכמתו׃

5

5:1b.1KI.005.001 וישלח חירם מלך צור את עבדיו אל שלמה כי שמע כי אתו משחו למלך תחת אביהו כי אהב היה חירם לדוד כל הימים׃

5:2b.1KI.005.002 וישלח שלמה אל חירם לאמר׃

5:3b.1KI.005.003 אתה ידעת את דוד אבי כי לא יכל לבנות בית לשם יהוה אלהיו מפני המלחמה אשר סבבהו עד תת יהוה אתם תחת כפות רגלו׃

5:4b.1KI.005.004 ועתה הניח יהוה אלהי לי מסביב אין שטן ואין פגע רע׃

5:5b.1KI.005.005 והנני אמר לבנות בית לשם יהוה אלהי כאשר דבר יהוה אל דוד אבי לאמר בנך אשר אתן תחתיך על כסאך הוא יבנה הבית לשמי׃

5:6b.1KI.005.006 ועתה צוה ויכרתו לי ארזים מן הלבנון ועבדי יהיו עם עבדיך ושכר עבדיך אתן לך ככל אשר תאמר כי אתה ידעת כי אין בנו איש ידע לכרת עצים כצדנים׃

5:7b.1KI.005.007 ויהי כשמע חירם את דברי שלמה וישמח מאד ויאמר ברוך יהוה היום אשר נתן לדוד בן חכם על העם הרב הזה׃

5:8b.1KI.005.008 וישלח חירם אל שלמה לאמר שמעתי את אשר שלחת אלי אני אעשה את כל חפצך בעצי ארזים ובעצי ברושים׃

5:9b.1KI.005.009 עבדי ירדו מן הלבנון ימה ואני אשימם דברות בים עד המקום אשר תשלח אלי ונפצתים שם ואתה תשא ואתה תעשה את חפצי לתת לחם ביתי׃

5:10b.1KI.005.010 ויהי חירום נתן לשלמה עצי ארזים ועצי ברושים כל חפצו׃

5:11b.1KI.005.011 ושלמה נתן לחירם עשרים אלף כר חטים מכלת לביתו ועשרים כר שמן כתית כה יתן שלמה לחירם שנה בשנה׃

5:12b.1KI.005.012 ויהוה נתן חכמה לשלמה כאשר דבר לו ויהי שלם בין חירם ובין שלמה ויכרתו ברית שניהם׃

5:13b.1KI.005.013 ויעל המלך שלמה מס מכל ישראל ויהי המס שלשים אלף איש׃

5:14b.1KI.005.014 וישלחם לבנונה עשרת אלפים בחדש חליפות חדש יהיו בלבנון שנים חדשים בביתו ואדנירם על המס׃

5:15b.1KI.005.015 ויהי לשלמה שבעים אלף נשא סבל ושמנים אלף חצב בהר׃

5:16b.1KI.005.016 לבד משרי הנצבים לשלמה אשר על המלאכה שלשת אלפים ושלש מאות הרדים בעם העשים במלאכה׃

5:17b.1KI.005.017 ויצו המלך ויסעו אבנים גדלות אבנים יקרות ליסד הבית אבני גזית׃

5:18b.1KI.005.018 ויפסלו בני שלמה ובני חירום והגבלים ויכינו העצים והאבנים לבנות הבית׃

6

6:1b.1KI.006.001 ויהי בשמונים שנה וארבע מאות שנה לצאת בני ישראל מארץ מצרים בשנה הרביעית בחדש זו הוא החדש השני למלך שלמה על ישראל ויבן הבית ליהוה׃

6:2b.1KI.006.002 והבית אשר בנה המלך שלמה ליהוה ששים אמה ארכו ועשרים רחבו ושלשים אמה קומתו׃

6:3b.1KI.006.003 והאולם על פני היכל הבית עשרים אמה ארכו על פני רחב הבית עשר באמה רחבו על פני הבית׃

6:4b.1KI.006.004 ויעש לבית חלוני שקפים אטמים׃

6:5b.1KI.006.005 ויבן על קיר הבית יצוע סביב את קירות הבית סביב להיכל ולדביר ויעש צלעות סביב׃

6:6b.1KI.006.006 היצוע התחתנה חמש באמה רחבה והתיכנה שש באמה רחבה והשלישית שבע באמה רחבה כי מגרעות נתן לבית סביב חוצה לבלתי אחז בקירות הבית׃

6:7b.1KI.006.007 והבית בהבנתו אבן שלמה מסע נבנה ומקבות והגרזן כל כלי ברזל לא נשמע בבית בהבנתו׃

6:8b.1KI.006.008 פתח הצלע התיכנה אל כתף הבית הימנית ובלולים יעלו על התיכנה ומן התיכנה אל השלשים׃

6:9b.1KI.006.009 ויבן את הבית ויכלהו ויספן את הבית גבים ושדרת בארזים׃

6:10b.1KI.006.010 ויבן את היצוע על כל הבית חמש אמות קומתו ויאחז את הבית בעצי ארזים׃

6:11b.1KI.006.011 ויהי דבר יהוה אל שלמה לאמר׃

6:12b.1KI.006.012 הבית הזה אשר אתה בנה אם תלך בחקתי ואת משפטי תעשה ושמרת את כל מצותי ללכת בהם והקמתי את דברי אתך אשר דברתי אל דוד אביך׃

6:13b.1KI.006.013 ושכנתי בתוך בני ישראל ולא אעזב את עמי ישראל׃

6:14b.1KI.006.014 ויבן שלמה את הבית ויכלהו׃

6:15b.1KI.006.015 ויבן את קירות הבית מביתה בצלעות ארזים מקרקע הבית עד קירות הספן צפה עץ מבית ויצף את קרקע הבית בצלעות ברושים׃

6:16b.1KI.006.016 ויבן את עשרים אמה מירכותי הבית בצלעות ארזים מן הקרקע עד הקירות ויבן לו מבית לדביר לקדש הקדשים׃

6:17b.1KI.006.017 וארבעים באמה היה הבית הוא ההיכל לפני׃

6:18b.1KI.006.018 וארז אל הבית פנימה מקלעת פקעים ופטורי צצים הכל ארז אין אבן נראה׃

6:19b.1KI.006.019 ודביר בתוך הבית מפנימה הכין לתתן שם את ארון ברית יהוה׃

6:20b.1KI.006.020 ולפני הדביר עשרים אמה ארך ועשרים אמה רחב ועשרים אמה קומתו ויצפהו זהב סגור ויצף מזבח ארז׃

6:21b.1KI.006.021 ויצף שלמה את הבית מפנימה זהב סגור ויעבר ברתיקות זהב לפני הדביר ויצפהו זהב׃

6:22b.1KI.006.022 ואת כל הבית צפה זהב עד תם כל הבית וכל המזבח אשר לדביר צפה זהב׃

6:23b.1KI.006.023 ויעש בדביר שני כרובים עצי שמן עשר אמות קומתו׃

6:24b.1KI.006.024 וחמש אמות כנף הכרוב האחת וחמש אמות כנף הכרוב השנית עשר אמות מקצות כנפיו ועד קצות כנפיו׃

6:25b.1KI.006.025 ועשר באמה הכרוב השני מדה אחת וקצב אחד לשני הכרבים׃

6:26b.1KI.006.026 קומת הכרוב האחד עשר באמה וכן הכרוב השני׃

6:27b.1KI.006.027 ויתן את הכרובים בתוך הבית הפנימי ויפרשו את כנפי הכרבים ותגע כנף האחד בקיר וכנף הכרוב השני נגעת בקיר השני וכנפיהם אל תוך הבית נגעת כנף אל כנף׃

6:28b.1KI.006.028 ויצף את הכרובים זהב׃

6:29b.1KI.006.029 ואת כל קירות הבית מסב קלע פתוחי מקלעות כרובים ותמרת ופטורי צצים מלפנים ולחיצון׃

6:30b.1KI.006.030 ואת קרקע הבית צפה זהב לפנימה ולחיצון׃

6:31b.1KI.006.031 ואת פתח הדביר עשה דלתות עצי שמן האיל מזוזות חמשית׃

6:32b.1KI.006.032 ושתי דלתות עצי שמן וקלע עליהם מקלעות כרובים ותמרות ופטורי צצים וצפה זהב וירד על הכרובים ועל התמרות את הזהב׃

6:33b.1KI.006.033 וכן עשה לפתח ההיכל מזוזות עצי שמן מאת רבעית׃

6:34b.1KI.006.034 ושתי דלתות עצי ברושים שני צלעים הדלת האחת גלילים ושני קלעים הדלת השנית גלילים׃

6:35b.1KI.006.035 וקלע כרובים ותמרות ופטרי צצים וצפה זהב מישר על המחקה׃

6:36b.1KI.006.036 ויבן את החצר הפנימית שלשה טורי גזית וטור כרתת ארזים׃

6:37b.1KI.006.037 בשנה הרביעית יסד בית יהוה בירח זו׃

6:38b.1KI.006.038 ובשנה האחת עשרה בירח בול הוא החדש השמיני כלה הבית לכל דבריו ולכל משפטו ויבנהו שבע שנים׃

7

7:1b.1KI.007.001 ואת ביתו בנה שלמה שלש עשרה שנה ויכל את כל ביתו׃

7:2b.1KI.007.002 ויבן את בית יער הלבנון מאה אמה ארכו וחמשים אמה רחבו ושלשים אמה קומתו על ארבעה טורי עמודי ארזים וכרתות ארזים על העמודים׃

7:3b.1KI.007.003 וספן בארז ממעל על הצלעת אשר על העמודים ארבעים וחמשה חמשה עשר הטור׃

7:4b.1KI.007.004 ושקפים שלשה טורים ומחזה אל מחזה שלש פעמים׃

7:5b.1KI.007.005 וכל הפתחים והמזוזות רבעים שקף ומול מחזה אל מחזה שלש פעמים׃

7:6b.1KI.007.006 ואת אולם העמודים עשה חמשים אמה ארכו ושלשים אמה רחבו ואולם על פניהם ועמדים ועב על פניהם׃

7:7b.1KI.007.007 ואולם הכסא אשר ישפט שם אלם המשפט עשה וספון בארז מהקרקע עד הקרקע׃

7:8b.1KI.007.008 וביתו אשר ישב שם חצר האחרת מבית לאולם כמעשה הזה היה ובית יעשה לבת פרעה אשר לקח שלמה כאולם הזה׃

7:9b.1KI.007.009 כל אלה אבנים יקרת כמדת גזית מגררות במגרה מבית ומחוץ וממסד עד הטפחות ומחוץ עד החצר הגדולה׃

7:10b.1KI.007.010 ומיסד אבנים יקרות אבנים גדלות אבני עשר אמות ואבני שמנה אמות׃

7:11b.1KI.007.011 ומלמעלה אבנים יקרות כמדות גזית וארז׃

7:12b.1KI.007.012 וחצר הגדולה סביב שלשה טורים גזית וטור כרתת ארזים ולחצר בית יהוה הפנימית ולאלם הבית׃

7:13b.1KI.007.013 וישלח המלך שלמה ויקח את חירם מצר׃

7:14b.1KI.007.014 בן אשה אלמנה הוא ממטה נפתלי ואביו איש צרי חרש נחשת וימלא את החכמה ואת התבונה ואת הדעת לעשות כל מלאכה בנחשת ויבוא אל המלך שלמה ויעש את כל מלאכתו׃

7:15b.1KI.007.015 ויצר את שני העמודים נחשת שמנה עשרה אמה קומת העמוד האחד וחוט שתים עשרה אמה יסב את העמוד השני׃

7:16b.1KI.007.016 ושתי כתרת עשה לתת על ראשי העמודים מצק נחשת חמש אמות קומת הכתרת האחת וחמש אמות קומת הכתרת השנית׃

7:17b.1KI.007.017 שבכים מעשה שבכה גדלים מעשה שרשרות לכתרת אשר על ראש העמודים שבעה לכתרת האחת ושבעה לכתרת השנית׃

7:18b.1KI.007.018 ויעש את העמודים ושני טורים סביב על השבכה האחת לכסות את הכתרת אשר על ראש הרמנים וכן עשה לכתרת השנית׃

7:19b.1KI.007.019 וכתרת אשר על ראש העמודים מעשה שושן באולם ארבע אמות׃

7:20b.1KI.007.020 וכתרת על שני העמודים גם ממעל מלעמת הבטן אשר לעבר שבכה והרמונים מאתים טרים סביב על הכתרת השנית׃

7:21b.1KI.007.021 ויקם את העמדים לאלם ההיכל ויקם את העמוד הימני ויקרא את שמו יכין ויקם את העמוד השמאלי ויקרא את שמו בעז׃

7:22b.1KI.007.022 ועל ראש העמודים מעשה שושן ותתם מלאכת העמודים׃

7:23b.1KI.007.023 ויעש את הים מוצק עשר באמה משפתו עד שפתו עגל סביב וחמש באמה קומתו וקוה שלשים באמה יסב אתו סביב׃

7:24b.1KI.007.024 ופקעים מתחת לשפתו סביב סבבים אתו עשר באמה מקפים את הים סביב שני טורים הפקעים יצקים ביצקתו׃

7:25b.1KI.007.025 עמד על שני עשר בקר שלשה פנים צפונה ושלשה פנים ימה ושלשה פנים נגבה ושלשה פנים מזרחה והים עליהם מלמעלה וכל אחריהם ביתה׃

7:26b.1KI.007.026 ועביו טפח ושפתו כמעשה שפת כוס פרח שושן אלפים בת יכיל׃

7:27b.1KI.007.027 ויעש את המכנות עשר נחשת ארבע באמה ארך המכונה האחת וארבע באמה רחבה ושלש באמה קומתה׃

7:28b.1KI.007.028 וזה מעשה המכונה מסגרת להם ומסגרת בין השלבים׃

7:29b.1KI.007.029 ועל המסגרות אשר בין השלבים אריות בקר וכרובים ועל השלבים כן ממעל ומתחת לאריות ולבקר ליות מעשה מורד׃

7:30b.1KI.007.030 וארבעה אופני נחשת למכונה האחת וסרני נחשת וארבעה פעמתיו כתפת להם מתחת לכיר הכתפת יצקות מעבר איש ליות׃

7:31b.1KI.007.031 ופיהו מבית לכתרת ומעלה באמה ופיה עגל מעשה כן אמה וחצי האמה וגם על פיה מקלעות ומסגרתיהם מרבעות לא עגלות׃

7:32b.1KI.007.032 וארבעת האופנים למתחת למסגרות וידות האופנים במכונה וקומת האופן האחד אמה וחצי האמה׃

7:33b.1KI.007.033 ומעשה האופנים כמעשה אופן המרכבה ידותם וגביהם וחשקיהם וחשריהם הכל מוצק׃

7:34b.1KI.007.034 וארבע כתפות אל ארבע פנות המכנה האחת מן המכנה כתפיה׃

7:35b.1KI.007.035 ובראש המכונה חצי האמה קומה עגל סביב ועל ראש המכנה ידתיה ומסגרתיה ממנה׃

7:36b.1KI.007.036 ויפתח על הלחת ידתיה ועל ומסגרתיה כרובים אריות ותמרת כמער איש וליות סביב׃

7:37b.1KI.007.037 כזאת עשה את עשר המכנות מוצק אחד מדה אחת קצב אחד לכלהנה׃

7:38b.1KI.007.038 ויעש עשרה כירות נחשת ארבעים בת יכיל הכיור האחד ארבע באמה הכיור האחד כיור אחד על המכנה האחת לעשר המכונות׃

7:39b.1KI.007.039 ויתן את המכנות חמש על כתף הבית מימין וחמש על כתף הבית משמאלו ואת הים נתן מכתף הבית הימנית קדמה ממול נגב׃

7:40b.1KI.007.040 ויעש חירום את הכירות ואת היעים ואת המזרקות ויכל חירם לעשות את כל המלאכה אשר עשה למלך שלמה בית יהוה׃

7:41b.1KI.007.041 עמדים שנים וגלת הכתרת אשר על ראש העמדים שתים והשבכות שתים לכסות את שתי גלת הכתרת אשר על ראש העמודים׃

7:42b.1KI.007.042 ואת הרמנים ארבע מאות לשתי השבכות שני טורים רמנים לשבכה האחת לכסות את שתי גלת הכתרת אשר על פני העמודים׃

7:43b.1KI.007.043 ואת המכנות עשר ואת הכירת עשרה על המכנות׃

7:44b.1KI.007.044 ואת הים האחד ואת הבקר שנים עשר תחת הים׃

7:45b.1KI.007.045 ואת הסירות ואת היעים ואת המזרקות ואת כל הכלים האהל אשר עשה חירם למלך שלמה בית יהוה נחשת ממרט׃

7:46b.1KI.007.046 בככר הירדן יצקם המלך במעבה האדמה בין סכות ובין צרתן׃

7:47b.1KI.007.047 וינח שלמה את כל הכלים מרב מאד מאד לא נחקר משקל הנחשת׃

7:48b.1KI.007.048 ויעש שלמה את כל הכלים אשר בית יהוה את מזבח הזהב ואת השלחן אשר עליו לחם הפנים זהב׃

7:49b.1KI.007.049 ואת המנרות חמש מימין וחמש משמאול לפני הדביר זהב סגור והפרח והנרת והמלקחים זהב׃

7:50b.1KI.007.050 והספות והמזמרות והמזרקות והכפות והמחתות זהב סגור והפתות לדלתות הבית הפנימי לקדש הקדשים לדלתי הבית להיכל זהב׃

7:51b.1KI.007.051 ותשלם כל המלאכה אשר עשה המלך שלמה בית יהוה ויבא שלמה את קדשי דוד אביו את הכסף ואת הזהב ואת הכלים נתן באצרות בית יהוה׃

8

8:1b.1KI.008.001 אז יקהל שלמה את זקני ישראל את כל ראשי המטות נשיאי האבות לבני ישראל אל המלך שלמה ירושלם להעלות את ארון ברית יהוה מעיר דוד היא ציון׃

8:2b.1KI.008.002 ויקהלו אל המלך שלמה כל איש ישראל בירח האתנים בחג הוא החדש השביעי׃

8:3b.1KI.008.003 ויבאו כל זקני ישראל וישאו הכהנים את הארון׃

8:4b.1KI.008.004 ויעלו את ארון יהוה ואת אהל מועד ואת כל כלי הקדש אשר באהל ויעלו אתם הכהנים והלוים׃

8:5b.1KI.008.005 והמלך שלמה וכל עדת ישראל הנועדים עליו אתו לפני הארון מזבחים צאן ובקר אשר לא יספרו ולא ימנו מרב׃

8:6b.1KI.008.006 ויבאו הכהנים את ארון ברית יהוה אל מקומו אל דביר הבית אל קדש הקדשים אל תחת כנפי הכרובים׃

8:7b.1KI.008.007 כי הכרובים פרשים כנפים אל מקום הארון ויסכו הכרבים על הארון ועל בדיו מלמעלה׃

8:8b.1KI.008.008 ויארכו הבדים ויראו ראשי הבדים מן הקדש על פני הדביר ולא יראו החוצה ויהיו שם עד היום הזה׃

8:9b.1KI.008.009 אין בארון רק שני לחות האבנים אשר הנח שם משה בחרב אשר כרת יהוה עם בני ישראל בצאתם מארץ מצרים׃

8:10b.1KI.008.010 ויהי בצאת הכהנים מן הקדש והענן מלא את בית יהוה׃

8:11b.1KI.008.011 ולא יכלו הכהנים לעמד לשרת מפני הענן כי מלא כבוד יהוה את בית יהוה׃

8:12b.1KI.008.012 אז אמר שלמה יהוה אמר לשכן בערפל׃

8:13b.1KI.008.013 בנה בניתי בית זבל לך מכון לשבתך עולמים׃

8:14b.1KI.008.014 ויסב המלך את פניו ויברך את כל קהל ישראל וכל קהל ישראל עמד׃

8:15b.1KI.008.015 ויאמר ברוך יהוה אלהי ישראל אשר דבר בפיו את דוד אבי ובידו מלא לאמר׃

8:16b.1KI.008.016 מן היום אשר הוצאתי את עמי את ישראל ממצרים לא בחרתי בעיר מכל שבטי ישראל לבנות בית להיות שמי שם ואבחר בדוד להיות על עמי ישראל׃

8:17b.1KI.008.017 ויהי עם לבב דוד אבי לבנות בית לשם יהוה אלהי ישראל׃

8:18b.1KI.008.018 ויאמר יהוה אל דוד אבי יען אשר היה עם לבבך לבנות בית לשמי הטיבת כי היה עם לבבך׃

8:19b.1KI.008.019 רק אתה לא תבנה הבית כי אם בנך היצא מחלציך הוא יבנה הבית לשמי׃

8:20b.1KI.008.020 ויקם יהוה את דברו אשר דבר ואקם תחת דוד אבי ואשב על כסא ישראל כאשר דבר יהוה ואבנה הבית לשם יהוה אלהי ישראל׃

8:21b.1KI.008.021 ואשם שם מקום לארון אשר שם ברית יהוה אשר כרת עם אבתינו בהוציאו אתם מארץ מצרים׃

8:22b.1KI.008.022 ויעמד שלמה לפני מזבח יהוה נגד כל קהל ישראל ויפרש כפיו השמים׃

8:23b.1KI.008.023 ויאמר יהוה אלהי ישראל אין כמוך אלהים בשמים ממעל ועל הארץ מתחת שמר הברית והחסד לעבדיך ההלכים לפניך בכל לבם׃

8:24b.1KI.008.024 אשר שמרת לעבדך דוד אבי את אשר דברת לו ותדבר בפיך ובידך מלאת כיום הזה׃

8:25b.1KI.008.025 ועתה יהוה אלהי ישראל שמר לעבדך דוד אבי את אשר דברת לו לאמר לא יכרת לך איש מלפני ישב על כסא ישראל רק אם ישמרו בניך את דרכם ללכת לפני כאשר הלכת לפני׃

8:26b.1KI.008.026 ועתה אלהי ישראל יאמן נא דבריך אשר דברת לעבדך דוד אבי׃

8:27b.1KI.008.027 כי האמנם ישב אלהים על הארץ הנה השמים ושמי השמים לא יכלכלוך אף כי הבית הזה אשר בניתי׃

8:28b.1KI.008.028 ופנית אל תפלת עבדך ואל תחנתו יהוה אלהי לשמע אל הרנה ואל התפלה אשר עבדך מתפלל לפניך היום׃

8:29b.1KI.008.029 להיות עינך פתחות אל הבית הזה לילה ויום אל המקום אשר אמרת יהיה שמי שם לשמע אל התפלה אשר יתפלל עבדך אל המקום הזה׃

8:30b.1KI.008.030 ושמעת אל תחנת עבדך ועמך ישראל אשר יתפללו אל המקום הזה ואתה תשמע אל מקום שבתך אל השמים ושמעת וסלחת׃

8:31b.1KI.008.031 את אשר יחטא איש לרעהו ונשא בו אלה להאלתו ובא אלה לפני מזבחך בבית הזה׃

8:32b.1KI.008.032 ואתה תשמע השמים ועשית ושפטת את עבדיך להרשיע רשע לתת דרכו בראשו ולהצדיק צדיק לתת לו כצדקתו׃

8:33b.1KI.008.033 בהנגף עמך ישראל לפני אויב אשר יחטאו לך ושבו אליך והודו את שמך והתפללו והתחננו אליך בבית הזה׃

8:34b.1KI.008.034 ואתה תשמע השמים וסלחת לחטאת עמך ישראל והשבתם אל האדמה אשר נתת לאבותם׃

8:35b.1KI.008.035 בהעצר שמים ולא יהיה מטר כי יחטאו לך והתפללו אל המקום הזה והודו את שמך ומחטאתם ישובון כי תענם׃

8:36b.1KI.008.036 ואתה תשמע השמים וסלחת לחטאת עבדיך ועמך ישראל כי תורם את הדרך הטובה אשר ילכו בה ונתתה מטר על ארצך אשר נתתה לעמך לנחלה׃

8:37b.1KI.008.037 רעב כי יהיה בארץ דבר כי יהיה שדפון ירקון ארבה חסיל כי יהיה כי יצר לו איבו בארץ שעריו כל נגע כל מחלה׃

8:38b.1KI.008.038 כל תפלה כל תחנה אשר תהיה לכל האדם לכל עמך ישראל אשר ידעון איש נגע לבבו ופרש כפיו אל הבית הזה׃

8:39b.1KI.008.039 ואתה תשמע השמים מכון שבתך וסלחת ועשית ונתת לאיש ככל דרכיו אשר תדע את לבבו כי אתה ידעת לבדך את לבב כל בני האדם׃

8:40b.1KI.008.040 למען יראוך כל הימים אשר הם חיים על פני האדמה אשר נתתה לאבתינו׃

8:41b.1KI.008.041 וגם אל הנכרי אשר לא מעמך ישראל הוא ובא מארץ רחוקה למען שמך׃

8:42b.1KI.008.042 כי ישמעון את שמך הגדול ואת ידך החזקה וזרעך הנטויה ובא והתפלל אל הבית הזה׃

8:43b.1KI.008.043 אתה תשמע השמים מכון שבתך ועשית ככל אשר יקרא אליך הנכרי למען ידעון כל עמי הארץ את שמך ליראה אתך כעמך ישראל ולדעת כי שמך נקרא על הבית הזה אשר בניתי׃

8:44b.1KI.008.044 כי יצא עמך למלחמה על איבו בדרך אשר תשלחם והתפללו אל יהוה דרך העיר אשר בחרת בה והבית אשר בנתי לשמך׃

8:45b.1KI.008.045 ושמעת השמים את תפלתם ואת תחנתם ועשית משפטם׃

8:46b.1KI.008.046 כי יחטאו לך כי אין אדם אשר לא יחטא ואנפת בם ונתתם לפני אויב ושבום שביהם אל ארץ האויב רחוקה או קרובה׃

8:47b.1KI.008.047 והשיבו אל לבם בארץ אשר נשבו שם ושבו והתחננו אליך בארץ שביהם לאמר חטאנו והעוינו רשענו׃

8:48b.1KI.008.048 ושבו אליך בכל לבבם ובכל נפשם בארץ איביהם אשר שבו אתם והתפללו אליך דרך ארצם אשר נתתה לאבותם העיר אשר בחרת והבית אשר בנית לשמך׃

8:49b.1KI.008.049 ושמעת השמים מכון שבתך את תפלתם ואת תחנתם ועשית משפטם׃

8:50b.1KI.008.050 וסלחת לעמך אשר חטאו לך ולכל פשעיהם אשר פשעו בך ונתתם לרחמים לפני שביהם ורחמום׃

8:51b.1KI.008.051 כי עמך ונחלתך הם אשר הוצאת ממצרים מתוך כור הברזל׃

8:52b.1KI.008.052 להיות עיניך פתחות אל תחנת עבדך ואל תחנת עמך ישראל לשמע אליהם בכל קראם אליך׃

8:53b.1KI.008.053 כי אתה הבדלתם לך לנחלה מכל עמי הארץ כאשר דברת ביד משה עבדך בהוציאך את אבתינו ממצרים אדני יהוה׃

8:54b.1KI.008.054 ויהי ככלות שלמה להתפלל אל יהוה את כל התפלה והתחנה הזאת קם מלפני מזבח יהוה מכרע על ברכיו וכפיו פרשות השמים׃

8:55b.1KI.008.055 ויעמד ויברך את כל קהל ישראל קול גדול לאמר׃

8:56b.1KI.008.056 ברוך יהוה אשר נתן מנוחה לעמו ישראל ככל אשר דבר לא נפל דבר אחד מכל דברו הטוב אשר דבר ביד משה עבדו׃

8:57b.1KI.008.057 יהי יהוה אלהינו עמנו כאשר היה עם אבתינו אל יעזבנו ואל יטשנו׃

8:58b.1KI.008.058 להטות לבבנו אליו ללכת בכל דרכיו ולשמר מצותיו וחקיו ומשפטיו אשר צוה את אבתינו׃

8:59b.1KI.008.059 ויהיו דברי אלה אשר התחננתי לפני יהוה קרבים אל יהוה אלהינו יומם ולילה לעשות משפט עבדו ומשפט עמו ישראל דבר יום ביומו׃

8:60b.1KI.008.060 למען דעת כל עמי הארץ כי יהוה הוא האלהים אין עוד׃

8:61b.1KI.008.061 והיה לבבכם שלם עם יהוה אלהינו ללכת בחקיו ולשמר מצותיו כיום הזה׃

8:62b.1KI.008.062 והמלך וכל ישראל עמו זבחים זבח לפני יהוה׃

8:63b.1KI.008.063 ויזבח שלמה את זבח השלמים אשר זבח ליהוה בקר עשרים ושנים אלף וצאן מאה ועשרים אלף ויחנכו את בית יהוה המלך וכל בני ישראל׃

8:64b.1KI.008.064 ביום ההוא קדש המלך את תוך החצר אשר לפני בית יהוה כי עשה שם את העלה ואת המנחה ואת חלבי השלמים כי מזבח הנחשת אשר לפני יהוה קטן מהכיל את העלה ואת המנחה ואת חלבי השלמים׃

8:65b.1KI.008.065 ויעש שלמה בעת ההיא את החג וכל ישראל עמו קהל גדול מלבוא חמת עד נחל מצרים לפני יהוה אלהינו שבעת ימים ושבעת ימים ארבעה עשר יום׃

8:66b.1KI.008.066 ביום השמיני שלח את העם ויברכו את המלך וילכו לאהליהם שמחים וטובי לב על כל הטובה אשר עשה יהוה לדוד עבדו ולישראל עמו׃

9

9:1b.1KI.009.001 ויהי ככלות שלמה לבנות את בית יהוה ואת בית המלך ואת כל חשק שלמה אשר חפץ לעשות׃

9:2b.1KI.009.002 וירא יהוה אל שלמה שנית כאשר נראה אליו בגבעון׃

9:3b.1KI.009.003 ויאמר יהוה אליו שמעתי את תפלתך ואת תחנתך אשר התחננתה לפני הקדשתי את הבית הזה אשר בנתה לשום שמי שם עד עולם והיו עיני ולבי שם כל הימים׃

9:4b.1KI.009.004 ואתה אם תלך לפני כאשר הלך דוד אביך בתם לבב ובישר לעשות ככל אשר צויתיך חקי ומשפטי תשמר׃

9:5b.1KI.009.005 והקמתי את כסא ממלכתך על ישראל לעלם כאשר דברתי על דוד אביך לאמר לא יכרת לך איש מעל כסא ישראל׃

9:6b.1KI.009.006 אם שוב תשבון אתם ובניכם מאחרי ולא תשמרו מצותי חקתי אשר נתתי לפניכם והלכתם ועבדתם אלהים אחרים והשתחויתם להם׃

9:7b.1KI.009.007 והכרתי את ישראל מעל פני האדמה אשר נתתי להם ואת הבית אשר הקדשתי לשמי אשלח מעל פני והיה ישראל למשל ולשנינה בכל העמים׃

9:8b.1KI.009.008 והבית הזה יהיה עליון כל עבר עליו ישם ושרק ואמרו על מה עשה יהוה ככה לארץ הזאת ולבית הזה׃

9:9b.1KI.009.009 ואמרו על אשר עזבו את יהוה אלהיהם אשר הוציא את אבתם מארץ מצרים ויחזקו באלהים אחרים וישתחו להם ויעבדם על כן הביא יהוה עליהם את כל הרעה הזאת׃

9:10b.1KI.009.010 ויהי מקצה עשרים שנה אשר בנה שלמה את שני הבתים את בית יהוה ואת בית המלך׃

9:11b.1KI.009.011 חירם מלך צר נשא את שלמה בעצי ארזים ובעצי ברושים ובזהב לכל חפצו אז יתן המלך שלמה לחירם עשרים עיר בארץ הגליל׃

9:12b.1KI.009.012 ויצא חירם מצר לראות את הערים אשר נתן לו שלמה ולא ישרו בעיניו׃

9:13b.1KI.009.013 ויאמר מה הערים האלה אשר נתתה לי אחי ויקרא להם ארץ כבול עד היום הזה׃

9:14b.1KI.009.014 וישלח חירם למלך מאה ועשרים ככר זהב׃

9:15b.1KI.009.015 וזה דבר המס אשר העלה המלך שלמה לבנות את בית יהוה ואת ביתו ואת המלוא ואת חומת ירושלם ואת חצר ואת מגדו ואת גזר׃

9:16b.1KI.009.016 פרעה מלך מצרים עלה וילכד את גזר וישרפה באש ואת הכנעני הישב בעיר הרג ויתנה שלחים לבתו אשת שלמה׃

9:17b.1KI.009.017 ויבן שלמה את גזר ואת בית חרן תחתון׃

9:18b.1KI.009.018 ואת בעלת ואת תמר במדבר בארץ׃

9:19b.1KI.009.019 ואת כל ערי המסכנות אשר היו לשלמה ואת ערי הרכב ואת ערי הפרשים ואת חשק שלמה אשר חשק לבנות בירושלם ובלבנון ובכל ארץ ממשלתו׃

9:20b.1KI.009.020 כל העם הנותר מן האמרי החתי הפרזי החוי והיבוסי אשר לא מבני ישראל המה׃

9:21b.1KI.009.021 בניהם אשר נתרו אחריהם בארץ אשר לא יכלו בני ישראל להחרימם ויעלם שלמה למס עבד עד היום הזה׃

9:22b.1KI.009.022 ומבני ישראל לא נתן שלמה עבד כי הם אנשי המלחמה ועבדיו ושריו ושלשיו ושרי רכבו ופרשיו׃

9:23b.1KI.009.023 אלה שרי הנצבים אשר על המלאכה לשלמה חמשים וחמש מאות הרדים בעם העשים במלאכה׃

9:24b.1KI.009.024 אך בת פרעה עלתה מעיר דוד אל ביתה אשר בנה לה אז בנה את המלוא׃

9:25b.1KI.009.025 והעלה שלמה שלש פעמים בשנה עלות ושלמים על המזבח אשר בנה ליהוה והקטיר אתו אשר לפני יהוה ושלם את הבית׃

9:26b.1KI.009.026 ואני עשה המלך שלמה בעציון גבר אשר את אלות על שפת ים סוף בארץ אדום׃

9:27b.1KI.009.027 וישלח חירם באני את עבדיו אנשי אניות ידעי הים עם עבדי שלמה׃

9:28b.1KI.009.028 ויבאו אופירה ויקחו משם זהב ארבע מאות ועשרים ככר ויבאו אל המלך שלמה׃

10

10:1b.1KI.010.001 ומלכת שבא שמעת את שמע שלמה לשם יהוה ותבא לנסתו בחידות׃

10:2b.1KI.010.002 ותבא ירושלמה בחיל כבד מאד גמלים נשאים בשמים וזהב רב מאד ואבן יקרה ותבא אל שלמה ותדבר אליו את כל אשר היה עם לבבה׃

10:3b.1KI.010.003 ויגד לה שלמה את כל דבריה לא היה דבר נעלם מן המלך אשר לא הגיד לה׃

10:4b.1KI.010.004 ותרא מלכת שבא את כל חכמת שלמה והבית אשר בנה׃

10:5b.1KI.010.005 ומאכל שלחנו ומושב עבדיו ומעמד משרתו ומלבשיהם ומשקיו ועלתו אשר יעלה בית יהוה ולא היה בה עוד רוח׃

10:6b.1KI.010.006 ותאמר אל המלך אמת היה הדבר אשר שמעתי בארצי על דבריך ועל חכמתך׃

10:7b.1KI.010.007 ולא האמנתי לדברים עד אשר באתי ותראינה עיני והנה לא הגד לי החצי הוספת חכמה וטוב אל השמועה אשר שמעתי׃

10:8b.1KI.010.008 אשרי אנשיך אשרי עבדיך אלה העמדים לפניך תמיד השמעים את חכמתך׃

10:9b.1KI.010.009 יהי יהוה אלהיך ברוך אשר חפץ בך לתתך על כסא ישראל באהבת יהוה את ישראל לעלם וישימך למלך לעשות משפט וצדקה׃

10:10b.1KI.010.010 ותתן למלך מאה ועשרים ככר זהב ובשמים הרבה מאד ואבן יקרה לא בא כבשם ההוא עוד לרב אשר נתנה מלכת שבא למלך שלמה׃

10:11b.1KI.010.011 וגם אני חירם אשר נשא זהב מאופיר הביא מאפיר עצי אלמגים הרבה מאד ואבן יקרה׃

10:12b.1KI.010.012 ויעש המלך את עצי האלמגים מסעד לבית יהוה ולבית המלך וכנרות ונבלים לשרים לא בא כן עצי אלמגים ולא נראה עד היום הזה׃

10:13b.1KI.010.013 והמלך שלמה נתן למלכת שבא את כל חפצה אשר שאלה מלבד אשר נתן לה כיד המלך שלמה ותפן ותלך לארצה היא ועבדיה׃

10:14b.1KI.010.014 ויהי משקל הזהב אשר בא לשלמה בשנה אחת שש מאות ששים ושש ככר זהב׃

10:15b.1KI.010.015 לבד מאנשי התרים ומסחר הרכלים וכל מלכי הערב ופחות הארץ׃

10:16b.1KI.010.016 ויעש המלך שלמה מאתים צנה זהב שחוט שש מאות זהב יעלה על הצנה האחת׃

10:17b.1KI.010.017 ושלש מאות מגנים זהב שחוט שלשת מנים זהב יעלה על המגן האחת ויתנם המלך בית יער הלבנון׃

10:18b.1KI.010.018 ויעש המלך כסא שן גדול ויצפהו זהב מופז׃

10:19b.1KI.010.019 שש מעלות לכסה וראש עגל לכסה מאחריו וידת מזה ומזה אל מקום השבת ושנים אריות עמדים אצל הידות׃

10:20b.1KI.010.020 ושנים עשר אריים עמדים שם על שש המעלות מזה ומזה לא נעשה כן לכל ממלכות׃

10:21b.1KI.010.021 וכל כלי משקה המלך שלמה זהב וכל כלי בית יער הלבנון זהב סגור אין כסף לא נחשב בימי שלמה למאומה׃

10:22b.1KI.010.022 כי אני תרשיש למלך בים עם אני חירם אחת לשלש שנים תבוא אני תרשיש נשאת זהב וכסף שנהבים וקפים ותכיים׃

10:23b.1KI.010.023 ויגדל המלך שלמה מכל מלכי הארץ לעשר ולחכמה׃

10:24b.1KI.010.024 וכל הארץ מבקשים את פני שלמה לשמע את חכמתו אשר נתן אלהים בלבו׃

10:25b.1KI.010.025 והמה מבאים איש מנחתו כלי כסף וכלי זהב ושלמות ונשק ובשמים סוסים ופרדים דבר שנה בשנה׃

10:26b.1KI.010.026 ויאסף שלמה רכב ופרשים ויהי לו אלף וארבע מאות רכב ושנים עשר אלף פרשים וינחם בערי הרכב ועם המלך בירושלם׃

10:27b.1KI.010.027 ויתן המלך את הכסף בירושלם כאבנים ואת הארזים נתן כשקמים אשר בשפלה לרב׃

10:28b.1KI.010.028 ומוצא הסוסים אשר לשלמה ממצרים ומקוה סחרי המלך יקחו מקוה במחיר׃

10:29b.1KI.010.029 ותעלה ותצא מרכבה ממצרים בשש מאות כסף וסוס בחמשים ומאה וכן לכל מלכי החתים ולמלכי ארם בידם יצאו׃

11

11:1b.1KI.011.001 והמלך שלמה אהב נשים נכריות רבות ואת בת פרעה מואביות עמניות אדמית צדנית חתית׃

11:2b.1KI.011.002 מן הגוים אשר אמר יהוה אל בני ישראל לא תבאו בהם והם לא יבאו בכם אכן יטו את לבבכם אחרי אלהיהם בהם דבק שלמה לאהבה׃

11:3b.1KI.011.003 ויהי לו נשים שרות שבע מאות ופלגשים שלש מאות ויטו נשיו את לבו׃

11:4b.1KI.011.004 ויהי לעת זקנת שלמה נשיו הטו את לבבו אחרי אלהים אחרים ולא היה לבבו שלם עם יהוה אלהיו כלבב דויד אביו׃

11:5b.1KI.011.005 וילך שלמה אחרי עשתרת אלהי צדנים ואחרי מלכם שקץ עמנים׃

11:6b.1KI.011.006 ויעש שלמה הרע בעיני יהוה ולא מלא אחרי יהוה כדוד אביו׃

11:7b.1KI.011.007 אז יבנה שלמה במה לכמוש שקץ מואב בהר אשר על פני ירושלם ולמלך שקץ בני עמון׃

11:8b.1KI.011.008 וכן עשה לכל נשיו הנכריות מקטירות ומזבחות לאלהיהן׃

11:9b.1KI.011.009 ויתאנף יהוה בשלמה כי נטה לבבו מעם יהוה אלהי ישראל הנראה אליו פעמים׃

11:10b.1KI.011.010 וצוה אליו על הדבר הזה לבלתי לכת אחרי אלהים אחרים ולא שמר את אשר צוה יהוה׃

11:11b.1KI.011.011 ויאמר יהוה לשלמה יען אשר היתה זאת עמך ולא שמרת בריתי וחקתי אשר צויתי עליך קרע אקרע את הממלכה מעליך ונתתיה לעבדך׃

11:12b.1KI.011.012 אך בימיך לא אעשנה למען דוד אביך מיד בנך אקרענה׃

11:13b.1KI.011.013 רק את כל הממלכה לא אקרע שבט אחד אתן לבנך למען דוד עבדי ולמען ירושלם אשר בחרתי׃

11:14b.1KI.011.014 ויקם יהוה שטן לשלמה את הדד האדמי מזרע המלך הוא באדום׃

11:15b.1KI.011.015 ויהי בהיות דוד את אדום בעלות יואב שר הצבא לקבר את החללים ויך כל זכר באדום׃

11:16b.1KI.011.016 כי ששת חדשים ישב שם יואב וכל ישראל עד הכרית כל זכר באדום׃

11:17b.1KI.011.017 ויברח אדד הוא ואנשים אדמיים מעבדי אביו אתו לבוא מצרים והדד נער קטן׃

11:18b.1KI.011.018 ויקמו ממדין ויבאו פארן ויקחו אנשים עמם מפארן ויבאו מצרים אל פרעה מלך מצרים ויתן לו בית ולחם אמר לו וארץ נתן לו׃

11:19b.1KI.011.019 וימצא הדד חן בעיני פרעה מאד ויתן לו אשה את אחות אשתו אחות תחפניס הגבירה׃

11:20b.1KI.011.020 ותלד לו אחות תחפניס את גנבת בנו ותגמלהו תחפנס בתוך בית פרעה ויהי גנבת בית פרעה בתוך בני פרעה׃

11:21b.1KI.011.021 והדד שמע במצרים כי שכב דוד עם אבתיו וכי מת יואב שר הצבא ויאמר הדד אל פרעה שלחני ואלך אל ארצי׃

11:22b.1KI.011.022 ויאמר לו פרעה כי מה אתה חסר עמי והנך מבקש ללכת אל ארצך ויאמר לא כי שלח תשלחני׃

11:23b.1KI.011.023 ויקם אלהים לו שטן את רזון בן אלידע אשר ברח מאת הדדעזר מלך צובה אדניו׃

11:24b.1KI.011.024 ויקבץ עליו אנשים ויהי שר גדוד בהרג דוד אתם וילכו דמשק וישבו בה וימלכו בדמשק׃

11:25b.1KI.011.025 ויהי שטן לישראל כל ימי שלמה ואת הרעה אשר הדד ויקץ בישראל וימלך על ארם׃

11:26b.1KI.011.026 וירבעם בן נבט אפרתי מן הצרדה ושם אמו צרועה אשה אלמנה עבד לשלמה וירם יד במלך׃

11:27b.1KI.011.027 וזה הדבר אשר הרים יד במלך שלמה בנה את המלוא סגר את פרץ עיר דוד אביו׃

11:28b.1KI.011.028 והאיש ירבעם גבור חיל וירא שלמה את הנער כי עשה מלאכה הוא ויפקד אתו לכל סבל בית יוסף׃

11:29b.1KI.011.029 ויהי בעת ההיא וירבעם יצא מירושלם וימצא אתו אחיה השילני הנביא בדרך והוא מתכסה בשלמה חדשה ושניהם לבדם בשדה׃

11:30b.1KI.011.030 ויתפש אחיה בשלמה החדשה אשר עליו ויקרעה שנים עשר קרעים׃

11:31b.1KI.011.031 ויאמר לירבעם קח לך עשרה קרעים כי כה אמר יהוה אלהי ישראל הנני קרע את הממלכה מיד שלמה ונתתי לך את עשרה השבטים׃

11:32b.1KI.011.032 והשבט האחד יהיה לו למען עבדי דוד ולמען ירושלם העיר אשר בחרתי בה מכל שבטי ישראל׃

11:33b.1KI.011.033 יען אשר עזבוני וישתחוו לעשתרת אלהי צדנין לכמוש אלהי מואב ולמלכם אלהי בני עמון ולא הלכו בדרכי לעשות הישר בעיני וחקתי ומשפטי כדוד אביו׃

11:34b.1KI.011.034 ולא אקח את כל הממלכה מידו כי נשיא אשתנו כל ימי חייו למען דוד עבדי אשר בחרתי אתו אשר שמר מצותי וחקתי׃

11:35b.1KI.011.035 ולקחתי המלוכה מיד בנו ונתתיה לך את עשרת השבטים׃

11:36b.1KI.011.036 ולבנו אתן שבט אחד למען היות ניר לדויד עבדי כל הימים לפני בירושלם העיר אשר בחרתי לי לשום שמי שם׃

11:37b.1KI.011.037 ואתך אקח ומלכת בכל אשר תאוה נפשך והיית מלך על ישראל׃

11:38b.1KI.011.038 והיה אם תשמע את כל אשר אצוך והלכת בדרכי ועשית הישר בעיני לשמור חקותי ומצותי כאשר עשה דוד עבדי והייתי עמך ובניתי לך בית נאמן כאשר בניתי לדוד ונתתי לך את ישראל׃

11:39b.1KI.011.039 ואענה את זרע דוד למען זאת אך לא כל הימים׃

11:40b.1KI.011.040 ויבקש שלמה להמית את ירבעם ויקם ירבעם ויברח מצרים אל שישק מלך מצרים ויהי במצרים עד מות שלמה׃

11:41b.1KI.011.041 ויתר דברי שלמה וכל אשר עשה וחכמתו הלוא הם כתבים על ספר דברי שלמה׃

11:42b.1KI.011.042 והימים אשר מלך שלמה בירושלם על כל ישראל ארבעים שנה׃

11:43b.1KI.011.043 וישכב שלמה עם אבתיו ויקבר בעיר דוד אביו וימלך רחבעם בנו תחתיו׃

12

12:1b.1KI.012.001 וילך רחבעם שכם כי שכם בא כל ישראל להמליך אתו׃

12:2b.1KI.012.002 ויהי כשמע ירבעם בן נבט והוא עודנו במצרים אשר ברח מפני המלך שלמה וישב ירבעם במצרים׃

12:3b.1KI.012.003 וישלחו ויקראו לו ויבאו ירבעם וכל קהל ישראל וידברו אל רחבעם לאמר׃

12:4b.1KI.012.004 אביך הקשה את עלנו ואתה עתה הקל מעבדת אביך הקשה ומעלו הכבד אשר נתן עלינו ונעבדך׃

12:5b.1KI.012.005 ויאמר אליהם לכו עד שלשה ימים ושובו אלי וילכו העם׃

12:6b.1KI.012.006 ויועץ המלך רחבעם את הזקנים אשר היו עמדים את פני שלמה אביו בהיתו חי לאמר איך אתם נועצים להשיב את העם הזה דבר׃

12:7b.1KI.012.007 וידבר אליו לאמר אם היום תהיה עבד לעם הזה ועבדתם ועניתם ודברת אליהם דברים טובים והיו לך עבדים כל הימים׃

12:8b.1KI.012.008 ויעזב את עצת הזקנים אשר יעצהו ויועץ את הילדים אשר גדלו אתו אשר העמדים לפניו׃

12:9b.1KI.012.009 ויאמר אליהם מה אתם נועצים ונשיב דבר את העם הזה אשר דברו אלי לאמר הקל מן העל אשר נתן אביך עלינו׃

12:10b.1KI.012.010 וידברו אליו הילדים אשר גדלו אתו לאמר כה תאמר לעם הזה אשר דברו אליך לאמר אביך הכביד את עלנו ואתה הקל מעלינו כה תדבר אליהם קטני עבה ממתני אבי׃

12:11b.1KI.012.011 ועתה אבי העמיס עליכם על כבד ואני אוסיף על עלכם אבי יסר אתכם בשוטים ואני איסר אתכם בעקרבים׃

12:12b.1KI.012.012 ויבו ירבעם וכל העם אל רחבעם ביום השלישי כאשר דבר המלך לאמר שובו אלי ביום השלישי׃

12:13b.1KI.012.013 ויען המלך את העם קשה ויעזב את עצת הזקנים אשר יעצהו׃

12:14b.1KI.012.014 וידבר אליהם כעצת הילדים לאמר אבי הכביד את עלכם ואני אסיף על עלכם אבי יסר אתכם בשוטים ואני איסר אתכם בעקרבים׃

12:15b.1KI.012.015 ולא שמע המלך אל העם כי היתה סבה מעם יהוה למען הקים את דברו אשר דבר יהוה ביד אחיה השילני אל ירבעם בן נבט׃

12:16b.1KI.012.016 וירא כל ישראל כי לא שמע המלך אליהם וישבו העם את המלך דבר לאמר מה לנו חלק בדוד ולא נחלה בבן ישי לאהליך ישראל עתה ראה ביתך דוד וילך ישראל לאהליו׃

12:17b.1KI.012.017 ובני ישראל הישבים בערי יהודה וימלך עליהם רחבעם׃

12:18b.1KI.012.018 וישלח המלך רחבעם את אדרם אשר על המס וירגמו כל ישראל בו אבן וימת והמלך רחבעם התאמץ לעלות במרכבה לנוס ירושלם׃

12:19b.1KI.012.019 ויפשעו ישראל בבית דוד עד היום הזה׃

12:20b.1KI.012.020 ויהי כשמע כל ישראל כי שב ירבעם וישלחו ויקראו אתו אל העדה וימליכו אתו על כל ישראל לא היה אחרי בית דוד זולתי שבט יהודה לבדו׃

12:21b.1KI.012.021 ויבאו רחבעם ירושלם ויקהל את כל בית יהודה ואת שבט בנימן מאה ושמנים אלף בחור עשה מלחמה להלחם עם בית ישראל להשיב את המלוכה לרחבעם בן שלמה׃

12:22b.1KI.012.022 ויהי דבר האלהים אל שמעיה איש האלהים לאמר׃

12:23b.1KI.012.023 אמר אל רחבעם בן שלמה מלך יהודה ואל כל בית יהודה ובנימין ויתר העם לאמר׃

12:24b.1KI.012.024 כה אמר יהוה לא תעלו ולא תלחמון עם אחיכם בני ישראל שובו איש לביתו כי מאתי נהיה הדבר הזה וישמעו את דבר יהוה וישבו ללכת כדבר יהוה׃

12:25b.1KI.012.025 ויבן ירבעם את שכם בהר אפרים וישב בה ויצא משם ויבן את פנואל׃

12:26b.1KI.012.026 ויאמר ירבעם בלבו עתה תשוב הממלכה לבית דוד׃

12:27b.1KI.012.027 אם יעלה העם הזה לעשות זבחים בבית יהוה בירושלם ושב לב העם הזה אל אדניהם אל רחבעם מלך יהודה והרגני ושבו אל רחבעם מלך יהודה׃

12:28b.1KI.012.028 ויועץ המלך ויעש שני עגלי זהב ויאמר אלהם רב לכם מעלות ירושלם הנה אלהיך ישראל אשר העלוך מארץ מצרים׃

12:29b.1KI.012.029 וישם את האחד בבית אל ואת האחד נתן בדן׃

12:30b.1KI.012.030 ויהי הדבר הזה לחטאת וילכו העם לפני האחד עד דן׃

12:31b.1KI.012.031 ויעש את בית במות ויעש כהנים מקצות העם אשר לא היו מבני לוי׃

12:32b.1KI.012.032 ויעש ירבעם חג בחדש השמיני בחמשה עשר יום לחדש כחג אשר ביהודה ויעל על המזבח כן עשה בבית אל לזבח לעגלים אשר עשה והעמיד בבית אל את כהני הבמות אשר עשה׃

12:33b.1KI.012.033 ויעל על המזבח אשר עשה בבית אל בחמשה עשר יום בחדש השמיני בחדש אשר בדא מלבד ויעש חג לבני ישראל ויעל על המזבח להקטיר׃

13

13:1b.1KI.013.001 והנה איש אלהים בא מיהודה בדבר יהוה אל בית אל וירבעם עמד על המזבח להקטיר׃

13:2b.1KI.013.002 ויקרא על המזבח בדבר יהוה ויאמר מזבח מזבח כה אמר יהוה הנה בן נולד לבית דוד יאשיהו שמו וזבח עליך את כהני הבמות המקטרים עליך ועצמות אדם ישרפו עליך׃

13:3b.1KI.013.003 ונתן ביום ההוא מופת לאמר זה המופת אשר דבר יהוה הנה המזבח נקרע ונשפך הדשן אשר עליו׃

13:4b.1KI.013.004 ויהי כשמע המלך את דבר איש האלהים אשר קרא על המזבח בבית אל וישלח ירבעם את ידו מעל המזבח לאמר תפשהו ותיבש ידו אשר שלח עליו ולא יכל להשיבה אליו׃

13:5b.1KI.013.005 והמזבח נקרע וישפך הדשן מן המזבח כמופת אשר נתן איש האלהים בדבר יהוה׃

13:6b.1KI.013.006 ויען המלך ויאמר אל איש האלהים חל נא את פני יהוה אלהיך והתפלל בעדי ותשב ידי אלי ויחל איש האלהים את פני יהוה ותשב יד המלך אליו ותהי כבראשנה׃

13:7b.1KI.013.007 וידבר המלך אל איש האלהים באה אתי הביתה וסעדה ואתנה לך מתת׃

13:8b.1KI.013.008 ויאמר איש האלהים אל המלך אם תתן לי את חצי ביתך לא אבא עמך ולא אכל לחם ולא אשתה מים במקום הזה׃

13:9b.1KI.013.009 כי כן צוה אתי בדבר יהוה לאמר לא תאכל לחם ולא תשתה מים ולא תשוב בדרך אשר הלכת׃

13:10b.1KI.013.010 וילך בדרך אחר ולא שב בדרך אשר בא בה אל בית אל׃

13:11b.1KI.013.011 ונביא אחד זקן ישב בבית אל ויבוא בנו ויספר לו את כל המעשה אשר עשה איש האלהים היום בבית אל את הדברים אשר דבר אל המלך ויספרום לאביהם׃

13:12b.1KI.013.012 וידבר אלהם אביהם אי זה הדרך הלך ויראו בניו את הדרך אשר הלך איש האלהים אשר בא מיהודה׃

13:13b.1KI.013.013 ויאמר אל בניו חבשו לי החמור ויחבשו לו החמור וירכב עליו׃

13:14b.1KI.013.014 וילך אחרי איש האלהים וימצאהו ישב תחת האלה ויאמר אליו האתה איש האלהים אשר באת מיהודה ויאמר אני׃

13:15b.1KI.013.015 ויאמר אליו לך אתי הביתה ואכל לחם׃

13:16b.1KI.013.016 ויאמר לא אוכל לשוב אתך ולבוא אתך ולא אכל לחם ולא אשתה אתך מים במקום הזה׃

13:17b.1KI.013.017 כי דבר אלי בדבר יהוה לא תאכל לחם ולא תשתה שם מים לא תשוב ללכת בדרך אשר הלכת בה׃

13:18b.1KI.013.018 ויאמר לו גם אני נביא כמוך ומלאך דבר אלי בדבר יהוה לאמר השבהו אתך אל ביתך ויאכל לחם וישת מים כחש לו׃

13:19b.1KI.013.019 וישב אתו ויאכל לחם בביתו וישת מים׃

13:20b.1KI.013.020 ויהי הם ישבים אל השלחן ויהי דבר יהוה אל הנביא אשר השיבו׃

13:21b.1KI.013.021 ויקרא אל איש האלהים אשר בא מיהודה לאמר כה אמר יהוה יען כי מרית פי יהוה ולא שמרת את המצוה אשר צוך יהוה אלהיך׃

13:22b.1KI.013.022 ותשב ותאכל לחם ותשת מים במקום אשר דבר אליך אל תאכל לחם ואל תשת מים לא תבוא נבלתך אל קבר אבתיך׃

13:23b.1KI.013.023 ויהי אחרי אכלו לחם ואחרי שתותו ויחבש לו החמור לנביא אשר השיבו׃

13:24b.1KI.013.024 וילך וימצאהו אריה בדרך וימיתהו ותהי נבלתו משלכת בדרך והחמור עמד אצלה והאריה עמד אצל הנבלה׃

13:25b.1KI.013.025 והנה אנשים עברים ויראו את הנבלה משלכת בדרך ואת האריה עמד אצל הנבלה ויבאו וידברו בעיר אשר הנביא הזקן ישב בה׃

13:26b.1KI.013.026 וישמע הנביא אשר השיבו מן הדרך ויאמר איש האלהים הוא אשר מרה את פי יהוה ויתנהו יהוה לאריה וישברהו וימתהו כדבר יהוה אשר דבר לו׃

13:27b.1KI.013.027 וידבר אל בניו לאמר חבשו לי את החמור ויחבשו׃

13:28b.1KI.013.028 וילך וימצא את נבלתו משלכת בדרך וחמור והאריה עמדים אצל הנבלה לא אכל האריה את הנבלה ולא שבר את החמור׃

13:29b.1KI.013.029 וישא הנביא את נבלת איש האלהים וינחהו אל החמור וישיבהו ויבא אל עיר הנביא הזקן לספד ולקברו׃

13:30b.1KI.013.030 וינח את נבלתו בקברו ויספדו עליו הוי אחי׃

13:31b.1KI.013.031 ויהי אחרי קברו אתו ויאמר אל בניו לאמר במותי וקברתם אתי בקבר אשר איש האלהים קבור בו אצל עצמתיו הניחו את עצמתי׃

13:32b.1KI.013.032 כי היה יהיה הדבר אשר קרא בדבר יהוה על המזבח אשר בבית אל ועל כל בתי הבמות אשר בערי שמרון׃

13:33b.1KI.013.033 אחר הדבר הזה לא שב ירבעם מדרכו הרעה וישב ויעש מקצות העם כהני במות החפץ ימלא את ידו ויהי כהני במות׃

13:34b.1KI.013.034 ויהי בדבר הזה לחטאת בית ירבעם ולהכחיד ולהשמיד מעל פני האדמה׃

14

14:1b.1KI.014.001 בעת ההיא חלה אביה בן ירבעם׃

14:2b.1KI.014.002 ויאמר ירבעם לאשתו קומי נא והשתנית ולא ידעו כי אתי אשת ירבעם והלכת שלה הנה שם אחיה הנביא הוא דבר עלי למלך על העם הזה׃

14:3b.1KI.014.003 ולקחת בידך עשרה לחם ונקדים ובקבק דבש ובאת אליו הוא יגיד לך מה יהיה לנער׃

14:4b.1KI.014.004 ותעש כן אשת ירבעם ותקם ותלך שלה ותבא בית אחיה ואחיהו לא יכל לראות כי קמו עיניו משיבו׃

14:5b.1KI.014.005 ויהוה אמר אל אחיהו הנה אשת ירבעם באה לדרש דבר מעמך אל בנה כי חלה הוא כזה וכזה תדבר אליה ויהי כבאה והיא מתנכרה׃

14:6b.1KI.014.006 ויהי כשמע אחיהו את קול רגליה באה בפתח ויאמר באי אשת ירבעם למה זה את מתנכרה ואנכי שלוח אליך קשה׃

14:7b.1KI.014.007 לכי אמרי לירבעם כה אמר יהוה אלהי ישראל יען אשר הרימתיך מתוך העם ואתנך נגיד על עמי ישראל׃

14:8b.1KI.014.008 ואקרע את הממלכה מבית דוד ואתנה לך ולא היית כעבדי דוד אשר שמר מצותי ואשר הלך אחרי בכל לבבו לעשות רק הישר בעיני׃

14:9b.1KI.014.009 ותרע לעשות מכל אשר היו לפניך ותלך ותעשה לך אלהים אחרים ומסכות להכעיסני ואתי השלכת אחרי גוך׃

14:10b.1KI.014.010 לכן הנני מביא רעה אל בית ירבעם והכרתי לירבעם משתין בקיר עצור ועזוב בישראל ובערתי אחרי בית ירבעם כאשר יבער הגלל עד תמו׃

14:11b.1KI.014.011 המת לירבעם בעיר יאכלו הכלבים והמת בשדה יאכלו עוף השמים כי יהוה דבר׃

14:12b.1KI.014.012 ואת קומי לכי לביתך בבאה רגליך העירה ומת הילד׃

14:13b.1KI.014.013 וספדו לו כל ישראל וקברו אתו כי זה לבדו יבא לירבעם אל קבר יען נמצא בו דבר טוב אל יהוה אלהי ישראל בבית ירבעם׃

14:14b.1KI.014.014 והקים יהוה לו מלך על ישראל אשר יכרית את בית ירבעם זה היום ומה גם עתה׃

14:15b.1KI.014.015 והכה יהוה את ישראל כאשר ינוד הקנה במים ונתש את ישראל מעל האדמה הטובה הזאת אשר נתן לאבותיהם וזרם מעבר לנהר יען אשר עשו את אשריהם מכעיסים את יהוה׃

14:16b.1KI.014.016 ויתן את ישראל בגלל חטאות ירבעם אשר חטא ואשר החטיא את ישראל׃

14:17b.1KI.014.017 ותקם אשת ירבעם ותלך ותבא תרצתה היא באה בסף הבית והנער מת׃

14:18b.1KI.014.018 ויקברו אתו ויספדו לו כל ישראל כדבר יהוה אשר דבר ביד עבדו אחיהו הנביא׃

14:19b.1KI.014.019 ויתר דברי ירבעם אשר נלחם ואשר מלך הנם כתובים על ספר דברי הימים למלכי ישראל׃

14:20b.1KI.014.020 והימים אשר מלך ירבעם עשרים ושתים שנה וישכב עם אבתיו וימלך נדב בנו תחתיו׃

14:21b.1KI.014.021 ורחבעם בן שלמה מלך ביהודה בן ארבעים ואחת שנה רחבעם במלכו ושבע עשרה שנה מלך בירושלם העיר אשר בחר יהוה לשום את שמו שם מכל שבטי ישראל ושם אמו נעמה העמנית׃

14:22b.1KI.014.022 ויעש יהודה הרע בעיני יהוה ויקנאו אתו מכל אשר עשו אבתם בחטאתם אשר חטאו׃

14:23b.1KI.014.023 ויבנו גם המה להם במות ומצבות ואשרים על כל גבעה גבהה ותחת כל עץ רענן׃

14:24b.1KI.014.024 וגם קדש היה בארץ עשו ככל התועבת הגוים אשר הוריש יהוה מפני בני ישראל׃

14:25b.1KI.014.025 ויהי בשנה החמישית למלך רחבעם עלה שושק מלך מצרים על ירושלם׃

14:26b.1KI.014.026 ויקח את אצרות בית יהוה ואת אוצרות בית המלך ואת הכל לקח ויקח את כל מגני הזהב אשר עשה שלמה׃

14:27b.1KI.014.027 ויעש המלך רחבעם תחתם מגני נחשת והפקיד על יד שרי הרצים השמרים פתח בית המלך׃

14:28b.1KI.014.028 ויהי מדי בא המלך בית יהוה ישאום הרצים והשיבום אל תא הרצים׃

14:29b.1KI.014.029 ויתר דברי רחבעם וכל אשר עשה הלא המה כתובים על ספר דברי הימים למלכי יהודה׃

14:30b.1KI.014.030 ומלחמה היתה בין רחבעם ובין ירבעם כל הימים׃

14:31b.1KI.014.031 וישכב רחבעם עם אבתיו ויקבר עם אבתיו בעיר דוד ושם אמו נעמה העמנית וימלך אבים בנו תחתיו׃

15

15:1b.1KI.015.001 ובשנת שמנה עשרה למלך ירבעם בן נבט מלך אבים על יהודה׃

15:2b.1KI.015.002 שלש שנים מלך בירושלם ושם אמו מעכה בת אבישלום׃

15:3b.1KI.015.003 וילך בכל חטאות אביו אשר עשה לפניו ולא היה לבבו שלם עם יהוה אלהיו כלבב דוד אביו׃

15:4b.1KI.015.004 כי למען דוד נתן יהוה אלהיו לו ניר בירושלם להקים את בנו אחריו ולהעמיד את ירושלם׃

15:5b.1KI.015.005 אשר עשה דוד את הישר בעיני יהוה ולא סר מכל אשר צוהו כל ימי חייו רק בדבר אוריה החתי׃

15:6b.1KI.015.006 ומלחמה היתה בין רחבעם ובין ירבעם כל ימי חייו׃

15:7b.1KI.015.007 ויתר דברי אבים וכל אשר עשה הלוא הם כתובים על ספר דברי הימים למלכי יהודה ומלחמה היתה בין אבים ובין ירבעם׃

15:8b.1KI.015.008 וישכב אבים עם אבתיו ויקברו אתו בעיר דוד וימלך אסא בנו תחתיו׃

15:9b.1KI.015.009 ובשנת עשרים לירבעם מלך ישראל מלך אסא מלך יהודה׃

15:10b.1KI.015.010 וארבעים ואחת שנה מלך בירושלם ושם אמו מעכה בת אבישלום׃

15:11b.1KI.015.011 ויעש אסא הישר בעיני יהוה כדוד אביו׃

15:12b.1KI.015.012 ויעבר הקדשים מן הארץ ויסר את כל הגללים אשר עשו אבתיו׃

15:13b.1KI.015.013 וגם את מעכה אמו ויסרה מגבירה אשר עשתה מפלצת לאשרה ויכרת אסא את מפלצתה וישרף בנחל קדרון׃

15:14b.1KI.015.014 והבמות לא סרו רק לבב אסא היה שלם עם יהוה כל ימיו׃

15:15b.1KI.015.015 ויבא את קדשי אביו וקדשו בית יהוה כסף וזהב וכלים׃

15:16b.1KI.015.016 ומלחמה היתה בין אסא ובין בעשא מלך ישראל כל ימיהם׃

15:17b.1KI.015.017 ויעל בעשא מלך ישראל על יהודה ויבן את הרמה לבלתי תת יצא ובא לאסא מלך יהודה׃

15:18b.1KI.015.018 ויקח אסא את כל הכסף והזהב הנותרים באוצרות בית יהוה ואת אוצרות בית מלך ויתנם ביד עבדיו וישלחם המלך אסא אל בן הדד בן טברמן בן חזיון מלך ארם הישב בדמשק לאמר׃

15:19b.1KI.015.019 ברית ביני ובינך בין אבי ובין אביך הנה שלחתי לך שחד כסף וזהב לך הפרה את בריתך את בעשא מלך ישראל ויעלה מעלי׃

15:20b.1KI.015.020 וישמע בן הדד אל המלך אסא וישלח את שרי החילים אשר לו על ערי ישראל ויך את עיון ואת דן ואת אבל בית מעכה ואת כל כנרות על כל ארץ נפתלי׃

15:21b.1KI.015.021 ויהי כשמע בעשא ויחדל מבנות את הרמה וישב בתרצה׃

15:22b.1KI.015.022 והמלך אסא השמיע את כל יהודה אין נקי וישאו את אבני הרמה ואת עציה אשר בנה בעשא ויבן בם המלך אסא את גבע בנימן ואת המצפה׃

15:23b.1KI.015.023 ויתר כל דברי אסא וכל גבורתו וכל אשר עשה והערים אשר בנה הלא המה כתובים על ספר דברי הימים למלכי יהודה רק לעת זקנתו חלה את רגליו׃

15:24b.1KI.015.024 וישכב אסא עם אבתיו ויקבר עם אבתיו בעיר דוד אביו וימלך יהושפט בנו תחתיו׃

15:25b.1KI.015.025 ונדב בן ירבעם מלך על ישראל בשנת שתים לאסא מלך יהודה וימלך על ישראל שנתים׃

15:26b.1KI.015.026 ויעש הרע בעיני יהוה וילך בדרך אביו ובחטאתו אשר החטיא את ישראל׃

15:27b.1KI.015.027 ויקשר עליו בעשא בן אחיה לבית יששכר ויכהו בעשא בגבתון אשר לפלשתים ונדב וכל ישראל צרים על גבתון׃

15:28b.1KI.015.028 וימתהו בעשא בשנת שלש לאסא מלך יהודה וימלך תחתיו׃

15:29b.1KI.015.029 ויהי כמלכו הכה את כל בית ירבעם לא השאיר כל נשמה לירבעם עד השמדו כדבר יהוה אשר דבר ביד עבדו אחיה השילני׃

15:30b.1KI.015.030 על חטאות ירבעם אשר חטא ואשר החטיא את ישראל בכעסו אשר הכעיס את יהוה אלהי ישראל׃

15:31b.1KI.015.031 ויתר דברי נדב וכל אשר עשה הלא הם כתובים על ספר דברי הימים למלכי ישראל׃

15:32b.1KI.015.032 ומלחמה היתה בין אסא ובין בעשא מלך ישראל כל ימיהם׃

15:33b.1KI.015.033 בשנת שלש לאסא מלך יהודה מלך בעשא בן אחיה על כל ישראל בתרצה עשרים וארבע שנה׃

15:34b.1KI.015.034 ויעש הרע בעיני יהוה וילך בדרך ירבעם ובחטאתו אשר החטיא את ישראל׃

16

16:1b.1KI.016.001 ויהי דבר יהוה אל יהוא בן חנני על בעשא לאמר׃

16:2b.1KI.016.002 יען אשר הרימתיך מן העפר ואתנך נגיד על עמי ישראל ותלך בדרך ירבעם ותחטא את עמי ישראל להכעיסני בחטאתם׃

16:3b.1KI.016.003 הנני מבעיר אחרי בעשא ואחרי ביתו ונתתי את ביתך כבית ירבעם בן נבט׃

16:4b.1KI.016.004 המת לבעשא בעיר יאכלו הכלבים והמת לו בשדה יאכלו עוף השמים׃

16:5b.1KI.016.005 ויתר דברי בעשא ואשר עשה וגבורתו הלא הם כתובים על ספר דברי הימים למלכי ישראל׃

16:6b.1KI.016.006 וישכב בעשא עם אבתיו ויקבר בתרצה וימלך אלה בנו תחתיו׃

16:7b.1KI.016.007 וגם ביד יהוא בן חנני הנביא דבר יהוה היה אל בעשא ואל ביתו ועל כל הרעה אשר עשה בעיני יהוה להכעיסו במעשה ידיו להיות כבית ירבעם ועל אשר הכה אתו׃

16:8b.1KI.016.008 בשנת עשרים ושש שנה לאסא מלך יהודה מלך אלה בן בעשא על ישראל בתרצה שנתים׃

16:9b.1KI.016.009 ויקשר עליו עבדו זמרי שר מחצית הרכב והוא בתרצה שתה שכור בית ארצא אשר על הבית בתרצה׃

16:10b.1KI.016.010 ויבא זמרי ויכהו וימיתהו בשנת עשרים ושבע לאסא מלך יהודה וימלך תחתיו׃

16:11b.1KI.016.011 ויהי במלכו כשבתו על כסאו הכה את כל בית בעשא לא השאיר לו משתין בקיר וגאליו ורעהו׃

16:12b.1KI.016.012 וישמד זמרי את כל בית בעשא כדבר יהוה אשר דבר אל בעשא ביד יהוא הנביא׃

16:13b.1KI.016.013 אל כל חטאות בעשא וחטאות אלה בנו אשר חטאו ואשר החטיאו את ישראל להכעיס את יהוה אלהי ישראל בהבליהם׃

16:14b.1KI.016.014 ויתר דברי אלה וכל אשר עשה הלוא הם כתובים על ספר דברי הימים למלכי ישראל׃

16:15b.1KI.016.015 בשנת עשרים ושבע שנה לאסא מלך יהודה מלך זמרי שבעת ימים בתרצה והעם חנים על גבתון אשר לפלשתים׃

16:16b.1KI.016.016 וישמע העם החנים לאמר קשר זמרי וגם הכה את המלך וימלכו כל ישראל את עמרי שר צבא על ישראל ביום ההוא במחנה׃

16:17b.1KI.016.017 ויעלה עמרי וכל ישראל עמו מגבתון ויצרו על תרצה׃

16:18b.1KI.016.018 ויהי כראות זמרי כי נלכדה העיר ויבא אל ארמון בית המלך וישרף עליו את בית מלך באש וימת׃

16:19b.1KI.016.019 על חטאתיו אשר חטא לעשות הרע בעיני יהוה ללכת בדרך ירבעם ובחטאתו אשר עשה להחטיא את ישראל׃

16:20b.1KI.016.020 ויתר דברי זמרי וקשרו אשר קשר הלא הם כתובים על ספר דברי הימים למלכי ישראל׃

16:21b.1KI.016.021 אז יחלק העם ישראל לחצי חצי העם היה אחרי תבני בן גינת להמליכו והחצי אחרי עמרי׃

16:22b.1KI.016.022 ויחזק העם אשר אחרי עמרי את העם אשר אחרי תבני בן גינת וימת תבני וימלך עמרי׃

16:23b.1KI.016.023 בשנת שלשים ואחת שנה לאסא מלך יהודה מלך עמרי על ישראל שתים עשרה שנה בתרצה מלך שש שנים׃

16:24b.1KI.016.024 ויקן את ההר שמרון מאת שמר בככרים כסף ויבן את ההר ויקרא את שם העיר אשר בנה על שם שמר אדני ההר שמרון׃

16:25b.1KI.016.025 ויעשה עמרי הרע בעיני יהוה וירע מכל אשר לפניו׃

16:26b.1KI.016.026 וילך בכל דרך ירבעם בן נבט ובחטאתיו אשר החטיא את ישראל להכעיס את יהוה אלהי ישראל בהבליהם׃

16:27b.1KI.016.027 ויתר דברי עמרי אשר עשה וגבורתו אשר עשה הלא הם כתובים על ספר דברי הימים למלכי ישראל׃

16:28b.1KI.016.028 וישכב עמרי עם אבתיו ויקבר בשמרון וימלך אחאב בנו תחתיו׃

16:29b.1KI.016.029 ואחאב בן עמרי מלך על ישראל בשנת שלשים ושמנה שנה לאסא מלך יהודה וימלך אחאב בן עמרי על ישראל בשמרון עשרים ושתים שנה׃

16:30b.1KI.016.030 ויעש אחאב בן עמרי הרע בעיני יהוה מכל אשר לפניו׃

16:31b.1KI.016.031 ויהי הנקל לכתו בחטאות ירבעם בן נבט ויקח אשה את איזבל בת אתבעל מלך צידנים וילך ויעבד את הבעל וישתחו לו׃

16:32b.1KI.016.032 ויקם מזבח לבעל בית הבעל אשר בנה בשמרון׃

16:33b.1KI.016.033 ויעש אחאב את האשרה ויוסף אחאב לעשות להכעיס את יהוה אלהי ישראל מכל מלכי ישראל אשר היו לפניו׃

16:34b.1KI.016.034 בימיו בנה חיאל בית האלי את יריחה באבירם בכרו יסדה ובשגיב צעירו הציב דלתיה כדבר יהוה אשר דבר ביד יהושע בן נון׃

17

17:1b.1KI.017.001 ויאמר אליהו התשבי מתשבי גלעד אל אחאב חי יהוה אלהי ישראל אשר עמדתי לפניו אם יהיה השנים האלה טל ומטר כי אם לפי דברי׃

17:2b.1KI.017.002 ויהי דבר יהוה אליו לאמר׃

17:3b.1KI.017.003 לך מזה ופנית לך קדמה ונסתרת בנחל כרית אשר על פני הירדן׃

17:4b.1KI.017.004 והיה מהנחל תשתה ואת הערבים צויתי לכלכלך שם׃

17:5b.1KI.017.005 וילך ויעש כדבר יהוה וילך וישב בנחל כרית אשר על פני הירדן׃

17:6b.1KI.017.006 והערבים מביאים לו לחם ובשר בבקר ולחם ובשר בערב ומן הנחל ישתה׃

17:7b.1KI.017.007 ויהי מקץ ימים וייבש הנחל כי לא היה גשם בארץ׃

17:8b.1KI.017.008 ויהי דבר יהוה אליו לאמר׃

17:9b.1KI.017.009 קום לך צרפתה אשר לצידון וישבת שם הנה צויתי שם אשה אלמנה לכלכלך׃

17:10b.1KI.017.010 ויקם וילך צרפתה ויבא אל פתח העיר והנה שם אשה אלמנה מקששת עצים ויקרא אליה ויאמר קחי נא לי מעט מים בכלי ואשתה׃

17:11b.1KI.017.011 ותלך לקחת ויקרא אליה ויאמר לקחי נא לי פת לחם בידך׃

17:12b.1KI.017.012 ותאמר חי יהוה אלהיך אם יש לי מעוג כי אם מלא כף קמח בכד ומעט שמן בצפחת והנני מקששת שנים עצים ובאתי ועשיתיהו לי ולבני ואכלנהו ומתנו׃

17:13b.1KI.017.013 ויאמר אליה אליהו אל תיראי באי עשי כדברך אך עשי לי משם עגה קטנה בראשנה והוצאת לי ולך ולבנך תעשי באחרנה׃

17:14b.1KI.017.014 כי כה אמר יהוה אלהי ישראל כד הקמח לא תכלה וצפחת השמן לא תחסר עד יום תתן יהוה גשם על פני האדמה׃

17:15b.1KI.017.015 ותלך ותעשה כדבר אליהו ותאכל הוא והיא וביתה ימים׃

17:16b.1KI.017.016 כד הקמח לא כלתה וצפחת השמן לא חסר כדבר יהוה אשר דבר ביד אליהו׃

17:17b.1KI.017.017 ויהי אחר הדברים האלה חלה בן האשה בעלת הבית ויהי חליו חזק מאד עד אשר לא נותרה בו נשמה׃

17:18b.1KI.017.018 ותאמר אל אליהו מה לי ולך איש האלהים באת אלי להזכיר את עוני ולהמית את בני׃

17:19b.1KI.017.019 ויאמר אליה תני לי את בנך ויקחהו מחיקה ויעלהו אל העליה אשר הוא ישב שם וישכבהו על מטתו׃

17:20b.1KI.017.020 ויקרא אל יהוה ויאמר יהוה אלהי הגם על האלמנה אשר אני מתגורר עמה הרעות להמית את בנה׃

17:21b.1KI.017.021 ויתמדד על הילד שלש פעמים ויקרא אל יהוה ויאמר יהוה אלהי תשב נא נפש הילד הזה על קרבו׃

17:22b.1KI.017.022 וישמע יהוה בקול אליהו ותשב נפש הילד על קרבו ויחי׃

17:23b.1KI.017.023 ויקח אליהו את הילד וירדהו מן העליה הביתה ויתנהו לאמו ויאמר אליהו ראי חי בנך׃

17:24b.1KI.017.024 ותאמר האשה אל אליהו עתה זה ידעתי כי איש אלהים אתה ודבר יהוה בפיך אמת׃

18

18:1b.1KI.018.001 ויהי ימים רבים ודבר יהוה היה אל אליהו בשנה השלישית לאמר לך הראה אל אחאב ואתנה מטר על פני האדמה׃

18:2b.1KI.018.002 וילך אליהו להראות אל אחאב והרעב חזק בשמרון׃

18:3b.1KI.018.003 ויקרא אחאב אל עבדיהו אשר על הבית ועבדיהו היה ירא את יהוה מאד׃

18:4b.1KI.018.004 ויהי בהכרית איזבל את נביאי יהוה ויקח עבדיהו מאה נבאים ויחביאם חמשים איש במערה וכלכלם לחם ומים׃

18:5b.1KI.018.005 ויאמר אחאב אל עבדיהו לך בארץ אל כל מעיני המים ואל כל הנחלים אולי נמצא חציר ונחיה סוס ופרד ולוא נכרית מהבהמה׃

18:6b.1KI.018.006 ויחלקו להם את הארץ לעבר בה אחאב הלך בדרך אחד לבדו ועבדיהו הלך בדרך אחד לבדו׃

18:7b.1KI.018.007 ויהי עבדיהו בדרך והנה אליהו לקראתו ויכרהו ויפל על פניו ויאמר האתה זה אדני אליהו׃

18:8b.1KI.018.008 ויאמר לו אני לך אמר לאדניך הנה אליהו׃

18:9b.1KI.018.009 ויאמר מה חטאתי כי אתה נתן את עבדך ביד אחאב להמיתני׃

18:10b.1KI.018.010 חי יהוה אלהיך אם יש גוי וממלכה אשר לא שלח אדני שם לבקשך ואמרו אין והשביע את הממלכה ואת הגוי כי לא ימצאכה׃

18:11b.1KI.018.011 ועתה אתה אמר לך אמר לאדניך הנה אליהו׃

18:12b.1KI.018.012 והיה אני אלך מאתך ורוח יהוה ישאך על אשר לא אדע ובאתי להגיד לאחאב ולא ימצאך והרגני ועבדך ירא את יהוה מנערי׃

18:13b.1KI.018.013 הלא הגד לאדני את אשר עשיתי בהרג איזבל את נביאי יהוה ואחבא מנביאי יהוה מאה איש חמשים חמשים איש במערה ואכלכלם לחם ומים׃

18:14b.1KI.018.014 ועתה אתה אמר לך אמר לאדניך הנה אליהו והרגני׃

18:15b.1KI.018.015 ויאמר אליהו חי יהוה צבאות אשר עמדתי לפניו כי היום אראה אליו׃

18:16b.1KI.018.016 וילך עבדיהו לקראת אחאב ויגד לו וילך אחאב לקראת אליהו׃

18:17b.1KI.018.017 ויהי כראות אחאב את אליהו ויאמר אחאב אליו האתה זה עכר ישראל׃

18:18b.1KI.018.018 ויאמר לא עכרתי את ישראל כי אם אתה ובית אביך בעזבכם את מצות יהוה ותלך אחרי הבעלים׃

18:19b.1KI.018.019 ועתה שלח קבץ אלי את כל ישראל אל הר הכרמל ואת נביאי הבעל ארבע מאות וחמשים ונביאי האשרה ארבע מאות אכלי שלחן איזבל׃

18:20b.1KI.018.020 וישלח אחאב בכל בני ישראל ויקבץ את הנביאים אל הר הכרמל׃

18:21b.1KI.018.021 ויגש אליהו אל כל העם ויאמר עד מתי אתם פסחים על שתי הסעפים אם יהוה האלהים לכו אחריו ואם הבעל לכו אחריו ולא ענו העם אתו דבר׃

18:22b.1KI.018.022 ויאמר אליהו אל העם אני נותרתי נביא ליהוה לבדי ונביאי הבעל ארבע מאות וחמשים איש׃

18:23b.1KI.018.023 ויתנו לנו שנים פרים ויבחרו להם הפר האחד וינתחהו וישימו על העצים ואש לא ישימו ואני אעשה את הפר האחד ונתתי על העצים ואש לא אשים׃

18:24b.1KI.018.024 וקראתם בשם אלהיכם ואני אקרא בשם יהוה והיה האלהים אשר יענה באש הוא האלהים ויען כל העם ויאמרו טוב הדבר׃

18:25b.1KI.018.025 ויאמר אליהו לנביאי הבעל בחרו לכם הפר האחד ועשו ראשנה כי אתם הרבים וקראו בשם אלהיכם ואש לא תשימו׃

18:26b.1KI.018.026 ויקחו את הפר אשר נתן להם ויעשו ויקראו בשם הבעל מהבקר ועד הצהרים לאמר הבעל עננו ואין קול ואין ענה ויפסחו על המזבח אשר עשה׃

18:27b.1KI.018.027 ויהי בצהרים ויהתל בהם אליהו ויאמר קראו בקול גדול כי אלהים הוא כי שיח וכי שיג לו וכי דרך לו אולי ישן הוא ויקץ׃

18:28b.1KI.018.028 ויקראו בקול גדול ויתגדדו כמשפטם בחרבות וברמחים עד שפך דם עליהם׃

18:29b.1KI.018.029 ויהי כעבר הצהרים ויתנבאו עד לעלות המנחה ואין קול ואין ענה ואין קשב׃

18:30b.1KI.018.030 ויאמר אליהו לכל העם גשו אלי ויגשו כל העם אליו וירפא את מזבח יהוה ההרוס׃

18:31b.1KI.018.031 ויקח אליהו שתים עשרה אבנים כמספר שבטי בני יעקב אשר היה דבר יהוה אליו לאמר ישראל יהיה שמך׃

18:32b.1KI.018.032 ויבנה את האבנים מזבח בשם יהוה ויעש תעלה כבית סאתים זרע סביב למזבח׃

18:33b.1KI.018.033 ויערך את העצים וינתח את הפר וישם על העצים׃

18:34b.1KI.018.034 ויאמר מלאו ארבעה כדים מים ויצקו על העלה ועל העצים ויאמר שנו וישנו ויאמר שלשו וישלשו׃

18:35b.1KI.018.035 וילכו המים סביב למזבח וגם את התעלה מלא מים׃

18:36b.1KI.018.036 ויהי בעלות המנחה ויגש אליהו הנביא ויאמר יהוה אלהי אברהם יצחק וישראל היום יודע כי אתה אלהים בישראל ואני עבדך ובדבריך עשיתי את כל הדברים האלה׃

18:37b.1KI.018.037 ענני יהוה ענני וידעו העם הזה כי אתה יהוה האלהים ואתה הסבת את לבם אחרנית׃

18:38b.1KI.018.038 ותפל אש יהוה ותאכל את העלה ואת העצים ואת האבנים ואת העפר ואת המים אשר בתעלה לחכה׃

18:39b.1KI.018.039 וירא כל העם ויפלו על פניהם ויאמרו יהוה הוא האלהים יהוה הוא האלהים׃

18:40b.1KI.018.040 ויאמר אליהו להם תפשו את נביאי הבעל איש אל ימלט מהם ויתפשום ויורדם אליהו אל נחל קישון וישחטם שם׃

18:41b.1KI.018.041 ויאמר אליהו לאחאב עלה אכל ושתה כי קול המון הגשם׃

18:42b.1KI.018.042 ויעלה אחאב לאכל ולשתות ואליהו עלה אל ראש הכרמל ויגהר ארצה וישם פניו בין ברכו׃

18:43b.1KI.018.043 ויאמר אל נערו עלה נא הבט דרך ים ויעל ויבט ויאמר אין מאומה ויאמר שב שבע פעמים׃

18:44b.1KI.018.044 ויהי בשבעית ויאמר הנה עב קטנה ככף איש עלה מים ויאמר עלה אמר אל אחאב אסר ורד ולא יעצרכה הגשם׃

18:45b.1KI.018.045 ויהי עד כה ועד כה והשמים התקדרו עבים ורוח ויהי גשם גדול וירכב אחאב וילך יזרעאלה׃

18:46b.1KI.018.046 ויד יהוה היתה אל אליהו וישנס מתניו וירץ לפני אחאב עד באכה יזרעאלה׃

19

19:1b.1KI.019.001 ויגד אחאב לאיזבל את כל אשר עשה אליהו ואת כל אשר הרג את כל הנביאים בחרב׃

19:2b.1KI.019.002 ותשלח איזבל מלאך אל אליהו לאמר כה יעשון אלהים וכה יוספון כי כעת מחר אשים את נפשך כנפש אחד מהם׃

19:3b.1KI.019.003 וירא ויקם וילך אל נפשו ויבא באר שבע אשר ליהודה וינח את נערו שם׃

19:4b.1KI.019.004 והוא הלך במדבר דרך יום ויבא וישב תחת רתם אחת וישאל את נפשו למות ויאמר רב עתה יהוה קח נפשי כי לא טוב אנכי מאבתי׃

19:5b.1KI.019.005 וישכב ויישן תחת רתם אחד והנה זה מלאך נגע בו ויאמר לו קום אכול׃

19:6b.1KI.019.006 ויבט והנה מראשתיו עגת רצפים וצפחת מים ויאכל וישת וישב וישכב׃

19:7b.1KI.019.007 וישב מלאך יהוה שנית ויגע בו ויאמר קום אכל כי רב ממך הדרך׃

19:8b.1KI.019.008 ויקם ויאכל וישתה וילך בכח האכילה ההיא ארבעים יום וארבעים לילה עד הר האלהים חרב׃

19:9b.1KI.019.009 ויבא שם אל המערה וילן שם והנה דבר יהוה אליו ויאמר לו מה לך פה אליהו׃

19:10b.1KI.019.010 ויאמר קנא קנאתי ליהוה אלהי צבאות כי עזבו בריתך בני ישראל את מזבחתיך הרסו ואת נביאיך הרגו בחרב ואותר אני לבדי ויבקשו את נפשי לקחתה׃

19:11b.1KI.019.011 ויאמר צא ועמדת בהר לפני יהוה והנה יהוה עבר ורוח גדולה וחזק מפרק הרים ומשבר סלעים לפני יהוה לא ברוח יהוה ואחר הרוח רעש לא ברעש יהוה׃

19:12b.1KI.019.012 ואחר הרעש אש לא באש יהוה ואחר האש קול דממה דקה׃

19:13b.1KI.019.013 ויהי כשמע אליהו וילט פניו באדרתו ויצא ויעמד פתח המערה והנה אליו קול ויאמר מה לך פה אליהו׃

19:14b.1KI.019.014 ויאמר קנא קנאתי ליהוה אלהי צבאות כי עזבו בריתך בני ישראל את מזבחתיך הרסו ואת נביאיך הרגו בחרב ואותר אני לבדי ויבקשו את נפשי לקחתה׃

19:15b.1KI.019.015 ויאמר יהוה אליו לך שוב לדרכך מדברה דמשק ובאת ומשחת את חזאל למלך על ארם׃

19:16b.1KI.019.016 ואת יהוא בן נמשי תמשח למלך על ישראל ואת אלישע בן שפט מאבל מחולה תמשח לנביא תחתיך׃

19:17b.1KI.019.017 והיה הנמלט מחרב חזאל ימית יהוא והנמלט מחרב יהוא ימית אלישע׃

19:18b.1KI.019.018 והשארתי בישראל שבעת אלפים כל הברכים אשר לא כרעו לבעל וכל הפה אשר לא נשק לו׃

19:19b.1KI.019.019 וילך משם וימצא את אלישע בן שפט והוא חרש שנים עשר צמדים לפניו והוא בשנים העשר ויעבר אליהו אליו וישלך אדרתו אליו׃

19:20b.1KI.019.020 ויעזב את הבקר וירץ אחרי אליהו ויאמר אשקה נא לאבי ולאמי ואלכה אחריך ויאמר לו לך שוב כי מה עשיתי לך׃

19:21b.1KI.019.021 וישב מאחריו ויקח את צמד הבקר ויזבחהו ובכלי הבקר בשלם הבשר ויתן לעם ויאכלו ויקם וילך אחרי אליהו וישרתהו׃

20

20:1b.1KI.020.001 ובן הדד מלך ארם קבץ את כל חילו ושלשים ושנים מלך אתו וסוס ורכב ויעל ויצר על שמרון וילחם בה׃

20:2b.1KI.020.002 וישלח מלאכים אל אחאב מלך ישראל העירה׃

20:3b.1KI.020.003 ויאמר לו כה אמר בן הדד כספך וזהבך לי הוא ונשיך ובניך הטובים לי הם׃

20:4b.1KI.020.004 ויען מלך ישראל ויאמר כדברך אדני המלך לך אני וכל אשר לי׃

20:5b.1KI.020.005 וישבו המלאכים ויאמרו כה אמר בן הדד לאמר כי שלחתי אליך לאמר כספך וזהבך ונשיך ובניך לי תתן׃

20:6b.1KI.020.006 כי אם כעת מחר אשלח את עבדי אליך וחפשו את ביתך ואת בתי עבדיך והיה כל מחמד עיניך ישימו בידם ולקחו׃

20:7b.1KI.020.007 ויקרא מלך ישראל לכל זקני הארץ ויאמר דעו נא וראו כי רעה זה מבקש כי שלח אלי לנשי ולבני ולכספי ולזהבי ולא מנעתי ממנו׃

20:8b.1KI.020.008 ויאמרו אליו כל הזקנים וכל העם אל תשמע ולוא תאבה׃

20:9b.1KI.020.009 ויאמר למלאכי בן הדד אמרו לאדני המלך כל אשר שלחת אל עבדך בראשנה אעשה והדבר הזה לא אוכל לעשות וילכו המלאכים וישבהו דבר׃

20:10b.1KI.020.010 וישלח אליו בן הדד ויאמר כה יעשון לי אלהים וכה יוספו אם ישפק עפר שמרון לשעלים לכל העם אשר ברגלי׃

20:11b.1KI.020.011 ויען מלך ישראל ויאמר דברו אל יתהלל חגר כמפתח׃

20:12b.1KI.020.012 ויהי כשמע את הדבר הזה והוא שתה הוא והמלכים בסכות ויאמר אל עבדיו שימו וישימו על העיר׃

20:13b.1KI.020.013 והנה נביא אחד נגש אל אחאב מלך ישראל ויאמר כה אמר יהוה הראית את כל ההמון הגדול הזה הנני נתנו בידך היום וידעת כי אני יהוה׃

20:14b.1KI.020.014 ויאמר אחאב במי ויאמר כה אמר יהוה בנערי שרי המדינות ויאמר מי יאסר המלחמה ויאמר אתה׃

20:15b.1KI.020.015 ויפקד את נערי שרי המדינות ויהיו מאתים שנים ושלשים ואחריהם פקד את כל העם כל בני ישראל שבעת אלפים׃

20:16b.1KI.020.016 ויצאו בצהרים ובן הדד שתה שכור בסכות הוא והמלכים שלשים ושנים מלך עזר אתו׃

20:17b.1KI.020.017 ויצאו נערי שרי המדינות בראשנה וישלח בן הדד ויגידו לו לאמר אנשים יצאו משמרון׃

20:18b.1KI.020.018 ויאמר אם לשלום יצאו תפשום חיים ואם למלחמה יצאו חיים תפשום׃

20:19b.1KI.020.019 ואלה יצאו מן העיר נערי שרי המדינות והחיל אשר אחריהם׃

20:20b.1KI.020.020 ויכו איש אישו וינסו ארם וירדפם ישראל וימלט בן הדד מלך ארם על סוס ופרשים׃

20:21b.1KI.020.021 ויצא מלך ישראל ויך את הסוס ואת הרכב והכה בארם מכה גדולה׃

20:22b.1KI.020.022 ויגש הנביא אל מלך ישראל ויאמר לו לך התחזק ודע וראה את אשר תעשה כי לתשובת השנה מלך ארם עלה עליך׃

20:23b.1KI.020.023 ועבדי מלך ארם אמרו אליו אלהי הרים אלהיהם על כן חזקו ממנו ואולם נלחם אתם במישור אם לא נחזק מהם׃

20:24b.1KI.020.024 ואת הדבר הזה עשה הסר המלכים איש ממקמו ושים פחות תחתיהם׃

20:25b.1KI.020.025 ואתה תמנה לך חיל כחיל הנפל מאותך וסוס כסוס ורכב כרכב ונלחמה אותם במישור אם לא נחזק מהם וישמע לקלם ויעש כן׃

20:26b.1KI.020.026 ויהי לתשובת השנה ויפקד בן הדד את ארם ויעל אפקה למלחמה עם ישראל׃

20:27b.1KI.020.027 ובני ישראל התפקדו וכלכלו וילכו לקראתם ויחנו בני ישראל נגדם כשני חשפי עזים וארם מלאו את הארץ׃

20:28b.1KI.020.028 ויגש איש האלהים ויאמר אל מלך ישראל ויאמר כה אמר יהוה יען אשר אמרו ארם אלהי הרים יהוה ולא אלהי עמקים הוא ונתתי את כל ההמון הגדול הזה בידך וידעתם כי אני יהוה׃

20:29b.1KI.020.029 ויחנו אלה נכח אלה שבעת ימים ויהי ביום השביעי ותקרב המלחמה ויכו בני ישראל את ארם מאה אלף רגלי ביום אחד׃

20:30b.1KI.020.030 וינסו הנותרים אפקה אל העיר ותפל החומה על עשרים ושבעה אלף איש הנותרים ובן הדד נס ויבא אל העיר חדר בחדר׃

20:31b.1KI.020.031 ויאמרו אליו עבדיו הנה נא שמענו כי מלכי בית ישראל כי מלכי חסד הם נשימה נא שקים במתנינו וחבלים בראשנו ונצא אל מלך ישראל אולי יחיה את נפשך׃

20:32b.1KI.020.032 ויחגרו שקים במתניהם וחבלים בראשיהם ויבאו אל מלך ישראל ויאמרו עבדך בן הדד אמר תחי נא נפשי ויאמר העודנו חי אחי הוא׃

20:33b.1KI.020.033 והאנשים ינחשו וימהרו ויחלטו הממנו ויאמרו אחיך בן הדד ויאמר באו קחהו ויצא אליו בן הדד ויעלהו על המרכבה׃

20:34b.1KI.020.034 ויאמר אליו הערים אשר לקח אבי מאת אביך אשיב וחוצות תשים לך בדמשק כאשר שם אבי בשמרון ואני בברית אשלחך ויכרת לו ברית וישלחהו׃

20:35b.1KI.020.035 ואיש אחד מבני הנביאים אמר אל רעהו בדבר יהוה הכיני נא וימאן האיש להכתו׃

20:36b.1KI.020.036 ויאמר לו יען אשר לא שמעת בקול יהוה הנך הולך מאתי והכך האריה וילך מאצלו וימצאהו האריה ויכהו׃

20:37b.1KI.020.037 וימצא איש אחר ויאמר הכיני נא ויכהו האיש הכה ופצע׃

20:38b.1KI.020.038 וילך הנביא ויעמד למלך על הדרך ויתחפש באפר על עיניו׃

20:39b.1KI.020.039 ויהי המלך עבר והוא צעק אל המלך ויאמר עבדך יצא בקרב המלחמה והנה איש סר ויבא אלי איש ויאמר שמר את האיש הזה אם הפקד יפקד והיתה נפשך תחת נפשו או ככר כסף תשקול׃

20:40b.1KI.020.040 ויהי עבדך עשה הנה והנה והוא איננו ויאמר אליו מלך ישראל כן משפטך אתה חרצת׃

20:41b.1KI.020.041 וימהר ויסר את האפר מעל עיניו ויכר אתו מלך ישראל כי מהנבאים הוא׃

20:42b.1KI.020.042 ויאמר אליו כה אמר יהוה יען שלחת את איש חרמי מיד והיתה נפשך תחת נפשו ועמך תחת עמו׃

20:43b.1KI.020.043 וילך מלך ישראל על ביתו סר וזעף ויבא שמרונה׃

21

21:1b.1KI.021.001 ויהי אחר הדברים האלה כרם היה לנבות היזרעאלי אשר ביזרעאל אצל היכל אחאב מלך שמרון׃

21:2b.1KI.021.002 וידבר אחאב אל נבות לאמר תנה לי את כרמך ויהי לי לגן ירק כי הוא קרוב אצל ביתי ואתנה לך תחתיו כרם טוב ממנו אם טוב בעיניך אתנה לך כסף מחיר זה׃

21:3b.1KI.021.003 ויאמר נבות אל אחאב חלילה לי מיהוה מתתי את נחלת אבתי לך׃

21:4b.1KI.021.004 ויבא אחאב אל ביתו סר וזעף על הדבר אשר דבר אליו נבות היזרעאלי ויאמר לא אתן לך את נחלת אבותי וישכב על מטתו ויסב את פניו ולא אכל לחם׃

21:5b.1KI.021.005 ותבא אליו איזבל אשתו ותדבר אליו מה זה רוחך סרה ואינך אכל לחם׃

21:6b.1KI.021.006 וידבר אליה כי אדבר אל נבות היזרעאלי ואמר לו תנה לי את כרמך בכסף או אם חפץ אתה אתנה לך כרם תחתיו ויאמר לא אתן לך את כרמי׃

21:7b.1KI.021.007 ותאמר אליו איזבל אשתו אתה עתה תעשה מלוכה על ישראל קום אכל לחם ויטב לבך אני אתן לך את כרם נבות היזרעאלי׃

21:8b.1KI.021.008 ותכתב ספרים בשם אחאב ותחתם בחתמו ותשלח הספרים אל הזקנים ואל החרים אשר בעירו הישבים את נבות׃

21:9b.1KI.021.009 ותכתב בספרים לאמר קראו צום והושיבו את נבות בראש העם׃

21:10b.1KI.021.010 והושיבו שנים אנשים בני בליעל נגדו ויעדהו לאמר ברכת אלהים ומלך והוציאהו וסקלהו וימת׃

21:11b.1KI.021.011 ויעשו אנשי עירו הזקנים והחרים אשר הישבים בעירו כאשר שלחה אליהם איזבל כאשר כתוב בספרים אשר שלחה אליהם׃

21:12b.1KI.021.012 קראו צום והשיבו את נבות בראש העם׃

21:13b.1KI.021.013 ויבאו שני האנשים בני בליעל וישבו נגדו ויעדהו אנשי הבליעל את נבות נגד העם לאמר ברך נבות אלהים ומלך ויצאהו מחוץ לעיר ויסקלהו באבנים וימת׃

21:14b.1KI.021.014 וישלחו אל איזבל לאמר סקל נבות וימת׃

21:15b.1KI.021.015 ויהי כשמע איזבל כי סקל נבות וימת ותאמר איזבל אל אחאב קום רש את כרם נבות היזרעאלי אשר מאן לתת לך בכסף כי אין נבות חי כי מת׃

21:16b.1KI.021.016 ויהי כשמע אחאב כי מת נבות ויקם אחאב לרדת אל כרם נבות היזרעאלי לרשתו׃

21:17b.1KI.021.017 ויהי דבר יהוה אל אליהו התשבי לאמר׃

21:18b.1KI.021.018 קום רד לקראת אחאב מלך ישראל אשר בשמרון הנה בכרם נבות אשר ירד שם לרשתו׃

21:19b.1KI.021.019 ודברת אליו לאמר כה אמר יהוה הרצחת וגם ירשת ודברת אליו לאמר כה אמר יהוה במקום אשר לקקו הכלבים את דם נבות ילקו הכלבים את דמך גם אתה׃

21:20b.1KI.021.020 ויאמר אחאב אל אליהו המצאתני איבי ויאמר מצאתי יען התמכרך לעשות הרע בעיני יהוה׃

21:21b.1KI.021.021 הנני מבי אליך רעה ובערתי אחריך והכרתי לאחאב משתין בקיר ועצור ועזוב בישראל׃

21:22b.1KI.021.022 ונתתי את ביתך כבית ירבעם בן נבט וכבית בעשא בן אחיה אל הכעס אשר הכעסת ותחטא את ישראל׃

21:23b.1KI.021.023 וגם לאיזבל דבר יהוה לאמר הכלבים יאכלו את איזבל בחל יזרעאל׃

21:24b.1KI.021.024 המת לאחאב בעיר יאכלו הכלבים והמת בשדה יאכלו עוף השמים׃

21:25b.1KI.021.025 רק לא היה כאחאב אשר התמכר לעשות הרע בעיני יהוה אשר הסתה אתו איזבל אשתו׃

21:26b.1KI.021.026 ויתעב מאד ללכת אחרי הגללים ככל אשר עשו האמרי אשר הוריש יהוה מפני בני ישראל׃

21:27b.1KI.021.027 ויהי כשמע אחאב את הדברים האלה ויקרע בגדיו וישם שק על בשרו ויצום וישכב בשק ויהלך אט׃

21:28b.1KI.021.028 ויהי דבר יהוה אל אליהו התשבי לאמר׃

21:29b.1KI.021.029 הראית כי נכנע אחאב מלפני יען כי נכנע מפני לא אבי הרעה בימיו בימי בנו אביא הרעה על ביתו׃

22

22:1b.1KI.022.001 וישבו שלש שנים אין מלחמה בין ארם ובין ישראל׃

22:2b.1KI.022.002 ויהי בשנה השלישית וירד יהושפט מלך יהודה אל מלך ישראל׃

22:3b.1KI.022.003 ויאמר מלך ישראל אל עבדיו הידעתם כי לנו רמת גלעד ואנחנו מחשים מקחת אתה מיד מלך ארם׃

22:4b.1KI.022.004 ויאמר אל יהושפט התלך אתי למלחמה רמת גלעד ויאמר יהושפט אל מלך ישראל כמוני כמוך כעמי כעמך כסוסי כסוסיך׃

22:5b.1KI.022.005 ויאמר יהושפט אל מלך ישראל דרש נא כיום את דבר יהוה׃

22:6b.1KI.022.006 ויקבץ מלך ישראל את הנביאים כארבע מאות איש ויאמר אלהם האלך על רמת גלעד למלחמה אם אחדל ויאמרו עלה ויתן אדני ביד המלך׃

22:7b.1KI.022.007 ויאמר יהושפט האין פה נביא ליהוה עוד ונדרשה מאותו׃

22:8b.1KI.022.008 ויאמר מלך ישראל אל יהושפט עוד איש אחד לדרש את יהוה מאתו ואני שנאתיו כי לא יתנבא עלי טוב כי אם רע מיכיהו בן ימלה ויאמר יהושפט אל יאמר המלך כן׃

22:9b.1KI.022.009 ויקרא מלך ישראל אל סריס אחד ויאמר מהרה מיכיהו בן ימלה׃

22:10b.1KI.022.010 ומלך ישראל ויהושפט מלך יהודה ישבים איש על כסאו מלבשים בגדים בגרן פתח שער שמרון וכל הנביאים מתנבאים לפניהם׃

22:11b.1KI.022.011 ויעש לו צדקיה בן כנענה קרני ברזל ויאמר כה אמר יהוה באלה תנגח את ארם עד כלתם׃

22:12b.1KI.022.012 וכל הנבאים נבאים כן לאמר עלה רמת גלעד והצלח ונתן יהוה ביד המלך׃

22:13b.1KI.022.013 והמלאך אשר הלך לקרא מיכיהו דבר אליו לאמר הנה נא דברי הנביאים פה אחד טוב אל המלך יהי נא דבריך כדבר אחד מהם ודברת טוב׃

22:14b.1KI.022.014 ויאמר מיכיהו חי יהוה כי את אשר יאמר יהוה אלי אתו אדבר׃

22:15b.1KI.022.015 ויבוא אל המלך ויאמר המלך אליו מיכיהו הנלך אל רמת גלעד למלחמה אם נחדל ויאמר אליו עלה והצלח ונתן יהוה ביד המלך׃

22:16b.1KI.022.016 ויאמר אליו המלך עד כמה פעמים אני משבעך אשר לא תדבר אלי רק אמת בשם יהוה׃

22:17b.1KI.022.017 ויאמר ראיתי את כל ישראל נפצים אל ההרים כצאן אשר אין להם רעה ויאמר יהוה לא אדנים לאלה ישובו איש לביתו בשלום׃

22:18b.1KI.022.018 ויאמר מלך ישראל אל יהושפט הלוא אמרתי אליך לוא יתנבא עלי טוב כי אם רע׃

22:19b.1KI.022.019 ויאמר לכן שמע דבר יהוה ראיתי את יהוה ישב על כסאו וכל צבא השמים עמד עליו מימינו ומשמאלו׃

22:20b.1KI.022.020 ויאמר יהוה מי יפתה את אחאב ויעל ויפל ברמת גלעד ויאמר זה בכה וזה אמר בכה׃

22:21b.1KI.022.021 ויצא הרוח ויעמד לפני יהוה ויאמר אני אפתנו ויאמר יהוה אליו במה׃

22:22b.1KI.022.022 ויאמר אצא והייתי רוח שקר בפי כל נביאיו ויאמר תפתה וגם תוכל צא ועשה כן׃

22:23b.1KI.022.023 ועתה הנה נתן יהוה רוח שקר בפי כל נביאיך אלה ויהוה דבר עליך רעה׃

22:24b.1KI.022.024 ויגש צדקיהו בן כנענה ויכה את מיכיהו על הלחי ויאמר אי זה עבר רוח יהוה מאתי לדבר אותך׃

22:25b.1KI.022.025 ויאמר מיכיהו הנך ראה ביום ההוא אשר תבא חדר בחדר להחבה׃

22:26b.1KI.022.026 ויאמר מלך ישראל קח את מיכיהו והשיבהו אל אמן שר העיר ואל יואש בן המלך׃

22:27b.1KI.022.027 ואמרת כה אמר המלך שימו את זה בית הכלא והאכילהו לחם לחץ ומים לחץ עד באי בשלום׃

22:28b.1KI.022.028 ויאמר מיכיהו אם שוב תשוב בשלום לא דבר יהוה בי ויאמר שמעו עמים כלם׃

22:29b.1KI.022.029 ויעל מלך ישראל ויהושפט מלך יהודה רמת גלעד׃

22:30b.1KI.022.030 ויאמר מלך ישראל אל יהושפט התחפש ובא במלחמה ואתה לבש בגדיך ויתחפש מלך ישראל ויבוא במלחמה׃

22:31b.1KI.022.031 ומלך ארם צוה את שרי הרכב אשר לו שלשים ושנים לאמר לא תלחמו את קטן ואת גדול כי אם את מלך ישראל לבדו׃

22:32b.1KI.022.032 ויהי כראות שרי הרכב את יהושפט והמה אמרו אך מלך ישראל הוא ויסרו עליו להלחם ויזעק יהושפט׃

22:33b.1KI.022.033 ויהי כראות שרי הרכב כי לא מלך ישראל הוא וישובו מאחריו׃

22:34b.1KI.022.034 ואיש משך בקשת לתמו ויכה את מלך ישראל בין הדבקים ובין השרין ויאמר לרכבו הפך ידך והוציאני מן המחנה כי החליתי׃

22:35b.1KI.022.035 ותעלה המלחמה ביום ההוא והמלך היה מעמד במרכבה נכח ארם וימת בערב ויצק דם המכה אל חיק הרכב׃

22:36b.1KI.022.036 ויעבר הרנה במחנה כבא השמש לאמר איש אל עירו ואיש אל ארצו׃

22:37b.1KI.022.037 וימת המלך ויבוא שמרון ויקברו את המלך בשמרון׃

22:38b.1KI.022.038 וישטף את הרכב על ברכת שמרון וילקו הכלבים את דמו והזנות רחצו כדבר יהוה אשר דבר׃

22:39b.1KI.022.039 ויתר דברי אחאב וכל אשר עשה ובית השן אשר בנה וכל הערים אשר בנה הלוא הם כתובים על ספר דברי הימים למלכי ישראל׃

22:40b.1KI.022.040 וישכב אחאב עם אבתיו וימלך אחזיהו בנו תחתיו׃

22:41b.1KI.022.041 ויהושפט בן אסא מלך על יהודה בשנת ארבע לאחאב מלך ישראל׃

22:42b.1KI.022.042 יהושפט בן שלשים וחמש שנה במלכו ועשרים וחמש שנה מלך בירושלם ושם אמו עזובה בת שלחי׃

22:43b.1KI.022.043 וילך בכל דרך אסא אביו לא סר ממנו לעשות הישר בעיני יהוה אך הבמות לא סרו עוד העם מזבחים ומקטרים בבמות׃

22:44b.1KI.022.044 וישלם יהושפט עם מלך ישראל׃

22:45b.1KI.022.045 ויתר דברי יהושפט וגבורתו אשר עשה ואשר נלחם הלא הם כתובים על ספר דברי הימים למלכי יהודה׃

22:46b.1KI.022.046 ויתר הקדש אשר נשאר בימי אסא אביו בער מן הארץ׃

22:47b.1KI.022.047 ומלך אין באדום נצב מלך׃

22:48b.1KI.022.048 יהושפט עשר אניות תרשיש ללכת אופירה לזהב ולא הלך כי נשברה אניות בעציון גבר׃

22:49b.1KI.022.049 אז אמר אחזיהו בן אחאב אל יהושפט ילכו עבדי עם עבדיך באניות ולא אבה יהושפט׃

22:50b.1KI.022.050 וישכב יהושפט עם אבתיו ויקבר עם אבתיו בעיר דוד אביו וימלך יהורם בנו תחתיו׃

22:51b.1KI.022.051 אחזיהו בן אחאב מלך על ישראל בשמרון בשנת שבע עשרה ליהושפט מלך יהודה וימלך על ישראל שנתים׃

22:52b.1KI.022.052 ויעש הרע בעיני יהוה וילך בדרך אביו ובדרך אמו ובדרך ירבעם בן נבט אשר החטיא את ישראל׃

22:53b.1KI.022.053 ויעבד את הבעל וישתחוה לו ויכעס את יהוה אלהי ישראל ככל אשר עשה אביו׃