Ruth (Hebrew)

1

1:1b.RUT.001.001 ויהי בימי שפט השפטים ויהי רעב בארץ וילך איש מבית לחם יהודה לגור בשדי מואב הוא ואשתו ושני בניו׃

1:2b.RUT.001.002 ושם האיש אלימלך ושם אשתו נעמי ושם שני בניו מחלון וכליון אפרתים מבית לחם יהודה ויבאו שדי מואב ויהיו שם׃

1:3b.RUT.001.003 וימת אלימלך איש נעמי ותשאר היא ושני בניה׃

1:4b.RUT.001.004 וישאו להם נשים מאביות שם האחת ערפה ושם השנית רות וישבו שם כעשר שנים׃

1:5b.RUT.001.005 וימותו גם שניהם מחלון וכליון ותשאר האשה משני ילדיה ומאישה׃

1:6b.RUT.001.006 ותקם היא וכלתיה ותשב משדי מואב כי שמעה בשדה מואב כי פקד יהוה את עמו לתת להם לחם׃

1:7b.RUT.001.007 ותצא מן המקום אשר היתה שמה ושתי כלתיה עמה ותלכנה בדרך לשוב אל ארץ יהודה׃

1:8b.RUT.001.008 ותאמר נעמי לשתי כלתיה לכנה שבנה אשה לבית אמה יעשה יהוה עמכם חסד כאשר עשיתם עם המתים ועמדי׃

1:9b.RUT.001.009 יתן יהוה לכם ומצאן מנוחה אשה בית אישה ותשק להן ותשאנה קולן ותבכינה׃

1:10b.RUT.001.010 ותאמרנה לה כי אתך נשוב לעמך׃

1:11b.RUT.001.011 ותאמר נעמי שבנה בנתי למה תלכנה עמי העוד לי בנים במעי והיו לכם לאנשים׃

1:12b.RUT.001.012 שבנה בנתי לכן כי זקנתי מהיות לאיש כי אמרתי יש לי תקוה גם הייתי הלילה לאיש וגם ילדתי בנים׃

1:13b.RUT.001.013 הלהן תשברנה עד אשר יגדלו הלהן תעגנה לבלתי היות לאיש אל בנתי כי מר לי מאד מכם כי יצאה בי יד יהוה׃

1:14b.RUT.001.014 ותשנה קולן ותבכינה עוד ותשק ערפה לחמותה ורות דבקה בה׃

1:15b.RUT.001.015 ותאמר הנה שבה יבמתך אל עמה ואל אלהיה שובי אחרי יבמתך׃

1:16b.RUT.001.016 ותאמר רות אל תפגעי בי לעזבך לשוב מאחריך כי אל אשר תלכי אלך ובאשר תליני אלין עמך עמי ואלהיך אלהי׃

1:17b.RUT.001.017 באשר תמותי אמות ושם אקבר כה יעשה יהוה לי וכה יסיף כי המות יפריד ביני ובינך׃

1:18b.RUT.001.018 ותרא כי מתאמצת היא ללכת אתה ותחדל לדבר אליה׃

1:19b.RUT.001.019 ותלכנה שתיהם עד באנה בית לחם ויהי כבאנה בית לחם ותהם כל העיר עליהן ותאמרנה הזאת נעמי׃

1:20b.RUT.001.020 ותאמר אליהן אל תקראנה לי נעמי קראן לי מרא כי המר שדי לי מאד׃

1:21b.RUT.001.021 אני מלאה הלכתי וריקם השיבני יהוה למה תקראנה לי נעמי ויהוה ענה בי ושדי הרע לי׃

1:22b.RUT.001.022 ותשב נעמי ורות המואביה כלתה עמה השבה משדי מואב והמה באו בית לחם בתחלת קציר שערים׃

2

2:1b.RUT.002.001 ולנעמי מידע לאישה איש גבור חיל ממשפחת אלימלך ושמו בעז׃

2:2b.RUT.002.002 ותאמר רות המואביה אל נעמי אלכה נא השדה ואלקטה בשבלים אחר אשר אמצא חן בעיניו ותאמר לה לכי בתי׃

2:3b.RUT.002.003 ותלך ותבוא ותלקט בשדה אחרי הקצרים ויקר מקרה חלקת השדה לבעז אשר ממשפחת אלימלך׃

2:4b.RUT.002.004 והנה בעז בא מבית לחם ויאמר לקוצרים יהוה עמכם ויאמרו לו יברכך יהוה׃

2:5b.RUT.002.005 ויאמר בעז לנערו הנצב על הקוצרים למי הנערה הזאת׃

2:6b.RUT.002.006 ויען הנער הנצב על הקוצרים ויאמר נערה מואביה היא השבה עם נעמי משדה מואב׃

2:7b.RUT.002.007 ותאמר אלקטה נא ואספתי בעמרים אחרי הקוצרים ותבוא ותעמוד מאז הבקר ועד עתה זה שבתה הבית מעט׃

2:8b.RUT.002.008 ויאמר בעז אל רות הלוא שמעת בתי אל תלכי ללקט בשדה אחר וגם לא תעבורי מזה וכה תדבקין עם נערתי׃

2:9b.RUT.002.009 עיניך בשדה אשר יקצרון והלכת אחריהן הלוא צויתי את הנערים לבלתי נגעך וצמת והלכת אל הכלים ושתית מאשר ישאבון הנערים׃

2:10b.RUT.002.010 ותפל על פניה ותשתחו ארצה ותאמר אליו מדוע מצאתי חן בעיניך להכירני ואנכי נכריה׃

2:11b.RUT.002.011 ויען בעז ויאמר לה הגד הגד לי כל אשר עשית את חמותך אחרי מות אישך ותעזבי אביך ואמך וארץ מולדתך ותלכי אל עם אשר לא ידעת תמול שלשום׃

2:12b.RUT.002.012 ישלם יהוה פעלך ותהי משכרתך שלמה מעם יהוה אלהי ישראל אשר באת לחסות תחת כנפיו׃

2:13b.RUT.002.013 ותאמר אמצא חן בעיניך אדני כי נחמתני וכי דברת על לב שפחתך ואנכי לא אהיה כאחת שפחתיך׃

2:14b.RUT.002.014 ויאמר לה בעז לעת האכל גשי הלם ואכלת מן הלחם וטבלת פתך בחמץ ותשב מצד הקוצרים ויצבט לה קלי ותאכל ותשבע ותתר׃

2:15b.RUT.002.015 ותקם ללקט ויצו בעז את נעריו לאמר גם בין העמרים תלקט ולא תכלימוה׃

2:16b.RUT.002.016 וגם של תשלו לה מן הצבתים ועזבתם ולקטה ולא תגערו בה׃

2:17b.RUT.002.017 ותלקט בשדה עד הערב ותחבט את אשר לקטה ויהי כאיפה שערים׃

2:18b.RUT.002.018 ותשא ותבוא העיר ותרא חמותה את אשר לקטה ותוצא ותתן לה את אשר הותרה משבעה׃

2:19b.RUT.002.019 ותאמר לה חמותה איפה לקטת היום ואנה עשית יהי מכירך ברוך ותגד לחמותה את אשר עשתה עמו ותאמר שם האיש אשר עשיתי עמו היום בעז׃

2:20b.RUT.002.020 ותאמר נעמי לכלתה ברוך הוא ליהוה אשר לא עזב חסדו את החיים ואת המתים ותאמר לה נעמי קרוב לנו האיש מגאלנו הוא׃

2:21b.RUT.002.021 ותאמר רות המואביה גם כי אמר אלי עם הנערים אשר לי תדבקין עד אם כלו את כל הקציר אשר לי׃

2:22b.RUT.002.022 ותאמר נעמי אל רות כלתה טוב בתי כי תצאי עם נערותיו ולא יפגעו בך בשדה אחר׃

2:23b.RUT.002.023 ותדבק בנערות בעז ללקט עד כלות קציר השערים וקציר החטים ותשב את חמותה׃

3

3:1b.RUT.003.001 ותאמר לה נעמי חמותה בתי הלא אבקש לך מנוח אשר ייטב לך׃

3:2b.RUT.003.002 ועתה הלא בעז מדעתנו אשר היית את נערותיו הנה הוא זרה את גרן השערים הלילה׃

3:3b.RUT.003.003 ורחצת וסכת ושמת שמלתך עליך וירדתי הגרן אל תודעי לאיש עד כלתו לאכל ולשתות׃

3:4b.RUT.003.004 ויהי בשכבו וידעת את המקום אשר ישכב שם ובאת וגלית מרגלתיו ושכבתי והוא יגיד לך את אשר תעשין׃

3:5b.RUT.003.005 ותאמר אליה כל אשר תאמרי אעשה׃

3:6b.RUT.003.006 ותרד הגרן ותעש ככל אשר צותה חמותה׃

3:7b.RUT.003.007 ויאכל בעז וישת וייטב לבו ויבא לשכב בקצה הערמה ותבא בלט ותגל מרגלתיו ותשכב׃

3:8b.RUT.003.008 ויהי בחצי הלילה ויחרד האיש וילפת והנה אשה שכבת מרגלתיו׃

3:9b.RUT.003.009 ויאמר מי את ותאמר אנכי רות אמתך ופרשת כנפך על אמתך כי גאל אתה׃

3:10b.RUT.003.010 ויאמר ברוכה את ליהוה בתי היטבת חסדך האחרון מן הראשון לבלתי לכת אחרי הבחורים אם דל ואם עשיר׃

3:11b.RUT.003.011 ועתה בתי אל תיראי כל אשר תאמרי אעשה לך כי יודע כל שער עמי כי אשת חיל את׃

3:12b.RUT.003.012 ועתה כי אמנם כי אם גאל אנכי וגם יש גאל קרוב ממני׃

3:13b.RUT.003.013 ליני הלילה והיה בבקר אם יגאלך טוב יגאל ואם לא יחפץ לגאלך וגאלתיך אנכי חי יהוה שכבי עד הבקר׃

3:14b.RUT.003.014 ותשכב מרגלתו עד הבקר ותקם בטרום יכיר איש את רעהו ויאמר אל יודע כי באה האשה הגרן׃

3:15b.RUT.003.015 ויאמר הבי המטפחת אשר עליך ואחזי בה ותאחז בה וימד שש שערים וישת עליה ויבא העיר׃

3:16b.RUT.003.016 ותבוא אל חמותה ותאמר מי את בתי ותגד לה את כל אשר עשה לה האיש׃

3:17b.RUT.003.017 ותאמר שש השערים האלה נתן לי כי אמר אל תבואי ריקם אל חמותך׃

3:18b.RUT.003.018 ותאמר שבי בתי עד אשר תדעין איך יפל דבר כי לא ישקט האיש כי אם כלה הדבר היום׃

4

4:1b.RUT.004.001 ובעז עלה השער וישב שם והנה הגאל עבר אשר דבר בעז ויאמר סורה שבה פה פלני אלמני ויסר וישב׃

4:2b.RUT.004.002 ויקח עשרה אנשים מזקני העיר ויאמר שבו פה וישבו׃

4:3b.RUT.004.003 ויאמר לגאל חלקת השדה אשר לאחינו לאלימלך מכרה נעמי השבה משדה מואב׃

4:4b.RUT.004.004 ואני אמרתי אגלה אזנך לאמר קנה נגד הישבים ונגד זקני עמי אם תגאל גאל ואם לא יגאל הגידה לי ואדע כי אין זולתך לגאול ואנכי אחריך ויאמר אנכי אגאל׃

4:5b.RUT.004.005 ויאמר בעז ביום קנותך השדה מיד נעמי ומאת רות המואביה אשת המת קניתי להקים שם המת על נחלתו׃

4:6b.RUT.004.006 ויאמר הגאל לא אוכל לגאול לי פן אשחית את נחלתי גאל לך אתה את גאלתי כי לא אוכל לגאל׃

4:7b.RUT.004.007 וזאת לפנים בישראל על הגאולה ועל התמורה לקים כל דבר שלף איש נעלו ונתן לרעהו וזאת התעודה בישראל׃

4:8b.RUT.004.008 ויאמר הגאל לבעז קנה לך וישלף נעלו׃

4:9b.RUT.004.009 ויאמר בעז לזקנים וכל העם עדים אתם היום כי קניתי את כל אשר לאלימלך ואת כל אשר לכליון ומחלון מיד נעמי׃

4:10b.RUT.004.010 וגם את רות המאביה אשת מחלון קניתי לי לאשה להקים שם המת על נחלתו ולא יכרת שם המת מעם אחיו ומשער מקומו עדים אתם היום׃

4:11b.RUT.004.011 ויאמרו כל העם אשר בשער והזקנים עדים יתן יהוה את האשה הבאה אל ביתך כרחל וכלאה אשר בנו שתיהם את בית ישראל ועשה חיל באפרתה וקרא שם בבית לחם׃

4:12b.RUT.004.012 ויהי ביתך כבית פרץ אשר ילדה תמר ליהודה מן הזרע אשר יתן יהוה לך מן הנערה הזאת׃

4:13b.RUT.004.013 ויקח בעז את רות ותהי לו לאשה ויבא אליה ויתן יהוה לה הריון ותלד בן׃

4:14b.RUT.004.014 ותאמרנה הנשים אל נעמי ברוך יהוה אשר לא השבית לך גאל היום ויקרא שמו בישראל׃

4:15b.RUT.004.015 והיה לך למשיב נפש ולכלכל את שיבתך כי כלתך אשר אהבתך ילדתו אשר היא טובה לך משבעה בנים׃

4:16b.RUT.004.016 ותקח נעמי את הילד ותשתהו בחיקה ותהי לו לאמנת׃

4:17b.RUT.004.017 ותקראנה לו השכנות שם לאמר ילד בן לנעמי ותקראנה שמו עובד הוא אבי ישי אבי דוד׃

4:18b.RUT.004.018 ואלה תולדות פרץ פרץ הוליד את חצרון׃

4:19b.RUT.004.019 וחצרון הוליד את רם ורם הוליד את עמינדב׃

4:20b.RUT.004.020 ועמינדב הוליד את נחשון ונחשון הוליד את שלמה׃

4:21b.RUT.004.021 ושלמון הוליד את בעז ובעז הוליד את עובד׃

4:22b.RUT.004.022 ועבד הוליד את ישי וישי הוליד את דוד׃