Joshua (Hebrew)
יהושע
1
1:1b.JOS.001.001 ויהי אחרי מות משה עבד יהוה ויאמר יהוה אל יהושע בן נון משרת משה לאמר׃
1:2b.JOS.001.002 משה עבדי מת ועתה קום עבר את הירדן הזה אתה וכל העם הזה אל הארץ אשר אנכי נתן להם לבני ישראל׃
1:3b.JOS.001.003 כל מקום אשר תדרך כף רגלכם בו לכם נתתיו כאשר דברתי אל משה׃
1:4b.JOS.001.004 מהמדבר והלבנון הזה ועד הנהר הגדול נהר פרת כל ארץ החתים ועד הים הגדול מבוא השמש יהיה גבולכם׃
1:5b.JOS.001.005 לא יתיצב איש לפניך כל ימי חייך כאשר הייתי עם משה אהיה עמך לא ארפך ולא אעזבך׃
1:6b.JOS.001.006 חזק ואמץ כי אתה תנחיל את העם הזה את הארץ אשר נשבעתי לאבותם לתת להם׃
1:7b.JOS.001.007 רק חזק ואמץ מאד לשמר לעשות ככל התורה אשר צוך משה עבדי אל תסור ממנו ימין ושמאול למען תשכיל בכל אשר תלך׃
1:8b.JOS.001.008 לא ימוש ספר התורה הזה מפיך והגית בו יומם ולילה למען תשמר לעשות ככל הכתוב בו כי אז תצליח את דרכך ואז תשכיל׃
1:9b.JOS.001.009 הלוא צויתיך חזק ואמץ אל תערץ ואל תחת כי עמך יהוה אלהיך בכל אשר תלך׃
1:10b.JOS.001.010 ויצו יהושע את שטרי העם לאמר׃
1:11b.JOS.001.011 עברו בקרב המחנה וצוו את העם לאמר הכינו לכם צידה כי בעוד שלשת ימים אתם עברים את הירדן הזה לבוא לרשת את הארץ אשר יהוה אלהיכם נתן לכם לרשתה׃
1:12b.JOS.001.012 ולראובני ולגדי ולחצי שבט המנשה אמר יהושע לאמר׃
1:13b.JOS.001.013 זכור את הדבר אשר צוה אתכם משה עבד יהוה לאמר יהוה אלהיכם מניח לכם ונתן לכם את הארץ הזאת׃
1:14b.JOS.001.014 נשיכם טפכם ומקניכם ישבו בארץ אשר נתן לכם משה בעבר הירדן ואתם תעברו חמשים לפני אחיכם כל גבורי החיל ועזרתם אותם׃
1:15b.JOS.001.015 עד אשר יניח יהוה לאחיכם ככם וירשו גם המה את הארץ אשר יהוה אלהיכם נתן להם ושבתם לארץ ירשתכם וירשתם אותה אשר נתן לכם משה עבד יהוה בעבר הירדן מזרח השמש׃
1:16b.JOS.001.016 ויענו את יהושע לאמר כל אשר צויתנו נעשה ואל כל אשר תשלחנו נלך׃
1:17b.JOS.001.017 ככל אשר שמענו אל משה כן נשמע אליך רק יהיה יהוה אלהיך עמך כאשר היה עם משה׃
1:18b.JOS.001.018 כל איש אשר ימרה את פיך ולא ישמע את דבריך לכל אשר תצונו יומת רק חזק ואמץ׃
2
2:1b.JOS.002.001 וישלח יהושע בן נון מן השטים שנים אנשים מרגלים חרש לאמר לכו ראו את הארץ ואת יריחו וילכו ויבאו בית אשה זונה ושמה רחב וישכבו שמה׃
2:2b.JOS.002.002 ויאמר למלך יריחו לאמר הנה אנשים באו הנה הלילה מבני ישראל לחפר את הארץ׃
2:3b.JOS.002.003 וישלח מלך יריחו אל רחב לאמר הוציאי האנשים הבאים אליך אשר באו לביתך כי לחפר את כל הארץ באו׃
2:4b.JOS.002.004 ותקח האשה את שני האנשים ותצפנו ותאמר כן באו אלי האנשים ולא ידעתי מאין המה׃
2:5b.JOS.002.005 ויהי השער לסגור בחשך והאנשים יצאו לא ידעתי אנה הלכו האנשים רדפו מהר אחריהם כי תשיגום׃
2:6b.JOS.002.006 והיא העלתם הגגה ותטמנם בפשתי העץ הערכות לה על הגג׃
2:7b.JOS.002.007 והאנשים רדפו אחריהם דרך הירדן על המעברות והשער סגרו אחרי כאשר יצאו הרדפים אחריהם׃
2:8b.JOS.002.008 והמה טרם ישכבון והיא עלתה עליהם על הגג׃
2:9b.JOS.002.009 ותאמר אל האנשים ידעתי כי נתן יהוה לכם את הארץ וכי נפלה אימתכם עלינו וכי נמגו כל ישבי הארץ מפניכם׃
2:10b.JOS.002.010 כי שמענו את אשר הוביש יהוה את מי ים סוף מפניכם בצאתכם ממצרים ואשר עשיתם לשני מלכי האמרי אשר בעבר הירדן לסיחן ולעוג אשר החרמתם אותם׃
2:11b.JOS.002.011 ונשמע וימס לבבנו ולא קמה עוד רוח באיש מפניכם כי יהוה אלהיכם הוא אלהים בשמים ממעל ועל הארץ מתחת׃
2:12b.JOS.002.012 ועתה השבעו נא לי ביהוה כי עשיתי עמכם חסד ועשיתם גם אתם עם בית אבי חסד ונתתם לי אות אמת׃
2:13b.JOS.002.013 והחיתם את אבי ואת אמי ואת אחי ואת אחותי ואת כל אשר להם והצלתם את נפשתינו ממות׃
2:14b.JOS.002.014 ויאמרו לה האנשים נפשנו תחתיכם למות אם לא תגידו את דברנו זה והיה בתת יהוה לנו את הארץ ועשינו עמך חסד ואמת׃
2:15b.JOS.002.015 ותורדם בחבל בעד החלון כי ביתה בקיר החומה ובחומה היא יושבת׃
2:16b.JOS.002.016 ותאמר להם ההרה לכו פן יפגעו בכם הרדפים ונחבתם שמה שלשת ימים עד שוב הרדפים ואחר תלכו לדרככם׃
2:17b.JOS.002.017 ויאמרו אליה האנשים נקים אנחנו משבעתך הזה אשר השבעתנו׃
2:18b.JOS.002.018 הנה אנחנו באים בארץ את תקות חוט השני הזה תקשרי בחלון אשר הורדתנו בו ואת אביך ואת אמך ואת אחיך ואת כל בית אביך תאספי אליך הביתה׃
2:19b.JOS.002.019 והיה כל אשר יצא מדלתי ביתך החוצה דמו בראשו ואנחנו נקים וכל אשר יהיה אתך בבית דמו בראשנו אם יד תהיה בו׃
2:20b.JOS.002.020 ואם תגידי את דברנו זה והיינו נקים משבעתך אשר השבעתנו׃
2:21b.JOS.002.021 ותאמר כדבריכם כן הוא ותשלחם וילכו ותקשר את תקות השני בחלון׃
2:22b.JOS.002.022 וילכו ויבאו ההרה וישבו שם שלשת ימים עד שבו הרדפים ויבקשו הרדפים בכל הדרך ולא מצאו׃
2:23b.JOS.002.023 וישבו שני האנשים וירדו מההר ויעברו ויבאו אל יהושע בן נון ויספרו לו את כל המצאות אותם׃
2:24b.JOS.002.024 ויאמרו אל יהושע כי נתן יהוה בידנו את כל הארץ וגם נמגו כל ישבי הארץ מפנינו׃
3
3:1b.JOS.003.001 וישכם יהושע בבקר ויסעו מהשטים ויבאו עד הירדן הוא וכל בני ישראל וילנו שם טרם יעברו׃
3:2b.JOS.003.002 ויהי מקצה שלשת ימים ויעברו השטרים בקרב המחנה׃
3:3b.JOS.003.003 ויצוו את העם לאמר כראותכם את ארון ברית יהוה אלהיכם והכהנים הלוים נשאים אתו ואתם תסעו ממקומכם והלכתם אחריו׃
3:4b.JOS.003.004 אך רחוק יהיה ביניכם ובינו כאלפים אמה במדה אל תקרבו אליו למען אשר תדעו את הדרך אשר תלכו בה כי לא עברתם בדרך מתמול שלשום׃
3:5b.JOS.003.005 ויאמר יהושע אל העם התקדשו כי מחר יעשה יהוה בקרבכם נפלאות׃
3:6b.JOS.003.006 ויאמר יהושע אל הכהנים לאמר שאו את ארון הברית ועברו לפני העם וישאו את ארון הברית וילכו לפני העם׃
3:7b.JOS.003.007 ויאמר יהוה אל יהושע היום הזה אחל גדלך בעיני כל ישראל אשר ידעון כי כאשר הייתי עם משה אהיה עמך׃
3:8b.JOS.003.008 ואתה תצוה את הכהנים נשאי ארון הברית לאמר כבאכם עד קצה מי הירדן בירדן תעמדו׃
3:9b.JOS.003.009 ויאמר יהושע אל בני ישראל גשו הנה ושמעו את דברי יהוה אלהיכם׃
3:10b.JOS.003.010 ויאמר יהושע בזאת תדעון כי אל חי בקרבכם והורש יוריש מפניכם את הכנעני ואת החתי ואת החוי ואת הפרזי ואת הגרגשי והאמרי והיבוסי׃
3:11b.JOS.003.011 הנה ארון הברית אדון כל הארץ עבר לפניכם בירדן׃
3:12b.JOS.003.012 ועתה קחו לכם שני עשר איש משבטי ישראל איש אחד איש אחד לשבט׃
3:13b.JOS.003.013 והיה כנוח כפות רגלי הכהנים נשאי ארון יהוה אדון כל הארץ במי הירדן מי הירדן יכרתון המים הירדים מלמעלה ויעמדו נד אחד׃
3:14b.JOS.003.014 ויהי בנסע העם מאהליהם לעבר את הירדן והכהנים נשאי הארון הברית לפני העם׃
3:15b.JOS.003.015 וכבוא נשאי הארון עד הירדן ורגלי הכהנים נשאי הארון נטבלו בקצה המים והירדן מלא על כל גדותיו כל ימי קציר׃
3:16b.JOS.003.016 ויעמדו המים הירדים מלמעלה קמו נד אחד הרחק מאד באדם העיר אשר מצד צרתן והירדים על ים הערבה ים המלח תמו נכרתו והעם עברו נגד יריחו׃
3:17b.JOS.003.017 ויעמדו הכהנים נשאי הארון ברית יהוה בחרבה בתוך הירדן הכן וכל ישראל עברים בחרבה עד אשר תמו כל הגוי לעבר את הירדן׃
4
4:1b.JOS.004.001 ויהי כאשר תמו כל הגוי לעבור את הירדן ויאמר יהוה אל יהושע לאמר׃
4:2b.JOS.004.002 קחו לכם מן העם שנים עשר אנשים איש אחד איש אחד משבט׃
4:3b.JOS.004.003 וצוו אותם לאמר שאו לכם מזה מתוך הירדן ממצב רגלי הכהנים הכין שתים עשרה אבנים והעברתם אותם עמכם והנחתם אותם במלון אשר תלינו בו הלילה׃
4:4b.JOS.004.004 ויקרא יהושע אל שנים העשר איש אשר הכין מבני ישראל איש אחד איש אחד משבט׃
4:5b.JOS.004.005 ויאמר להם יהושע עברו לפני ארון יהוה אלהיכם אל תוך הירדן והרימו לכם איש אבן אחת על שכמו למספר שבטי בני ישראל׃
4:6b.JOS.004.006 למען תהיה זאת אות בקרבכם כי ישאלון בניכם מחר לאמר מה האבנים האלה לכם׃
4:7b.JOS.004.007 ואמרתם להם אשר נכרתו מימי הירדן מפני ארון ברית יהוה בעברו בירדן נכרתו מי הירדן והיו האבנים האלה לזכרון לבני ישראל עד עולם׃
4:8b.JOS.004.008 ויעשו כן בני ישראל כאשר צוה יהושע וישאו שתי עשרה אבנים מתוך הירדן כאשר דבר יהוה אל יהושע למספר שבטי בני ישראל ויעברום עמם אל המלון וינחום שם׃
4:9b.JOS.004.009 ושתים עשרה אבנים הקים יהושע בתוך הירדן תחת מצב רגלי הכהנים נשאי ארון הברית ויהיו שם עד היום הזה׃
4:10b.JOS.004.010 והכהנים נשאי הארון עמדים בתוך הירדן עד תם כל הדבר אשר צוה יהוה את יהושע לדבר אל העם ככל אשר צוה משה את יהושע וימהרו העם ויעברו׃
4:11b.JOS.004.011 ויהי כאשר תם כל העם לעבור ויעבר ארון יהוה והכהנים לפני העם׃
4:12b.JOS.004.012 ויעברו בני ראובן ובני גד וחצי שבט המנשה חמשים לפני בני ישראל כאשר דבר אליהם משה׃
4:13b.JOS.004.013 כארבעים אלף חלוצי הצבא עברו לפני יהוה למלחמה אל ערבות יריחו׃
4:14b.JOS.004.014 ביום ההוא גדל יהוה את יהושע בעיני כל ישראל ויראו אתו כאשר יראו את משה כל ימי חייו׃
4:15b.JOS.004.015 ויאמר יהוה אל יהושע לאמר׃
4:16b.JOS.004.016 צוה את הכהנים נשאי ארון העדות ויעלו מן הירדן׃
4:17b.JOS.004.017 ויצו יהושע את הכהנים לאמר עלו מן הירדן׃
4:18b.JOS.004.018 ויהי בעלות הכהנים נשאי ארון ברית יהוה מתוך הירדן נתקו כפות רגלי הכהנים אל החרבה וישבו מי הירדן למקומם וילכו כתמול שלשום על כל גדותיו׃
4:19b.JOS.004.019 והעם עלו מן הירדן בעשור לחדש הראשון ויחנו בגלגל בקצה מזרח יריחו׃
4:20b.JOS.004.020 ואת שתים עשרה האבנים האלה אשר לקחו מן הירדן הקים יהושע בגלגל׃
4:21b.JOS.004.021 ויאמר אל בני ישראל לאמר אשר ישאלון בניכם מחר את אבותם לאמר מה האבנים האלה׃
4:22b.JOS.004.022 והודעתם את בניכם לאמר ביבשה עבר ישראל את הירדן הזה׃
4:23b.JOS.004.023 אשר הוביש יהוה אלהיכם את מי הירדן מפניכם עד עברכם כאשר עשה יהוה אלהיכם לים סוף אשר הוביש מפנינו עד עברנו׃
4:24b.JOS.004.024 למען דעת כל עמי הארץ את יד יהוה כי חזקה היא למען יראתם את יהוה אלהיכם כל הימים׃
5
5:1b.JOS.005.001 ויהי כשמע כל מלכי האמרי אשר בעבר הירדן ימה וכל מלכי הכנעני אשר על הים את אשר הוביש יהוה את מי הירדן מפני בני ישראל עד עברנו וימס לבבם ולא היה בם עוד רוח מפני בני ישראל׃
5:2b.JOS.005.002 בעת ההיא אמר יהוה אל יהושע עשה לך חרבות צרים ושוב מל את בני ישראל שנית׃
5:3b.JOS.005.003 ויעש לו יהושע חרבות צרים וימל את בני ישראל אל גבעת הערלות׃
5:4b.JOS.005.004 וזה הדבר אשר מל יהושע כל העם היצא ממצרים הזכרים כל אנשי המלחמה מתו במדבר בדרך בצאתם ממצרים׃
5:5b.JOS.005.005 כי מלים היו כל העם היצאים וכל העם הילדים במדבר בדרך בצאתם ממצרים לא מלו׃
5:6b.JOS.005.006 כי ארבעים שנה הלכו בני ישראל במדבר עד תם כל הגוי אנשי המלחמה היצאים ממצרים אשר לא שמעו בקול יהוה אשר נשבע יהוה להם לבלתי הראותם את הארץ אשר נשבע יהוה לאבותם לתת לנו ארץ זבת חלב ודבש׃
5:7b.JOS.005.007 ואת בניהם הקים תחתם אתם מל יהושע כי ערלים היו כי לא מלו אותם בדרך׃
5:8b.JOS.005.008 ויהי כאשר תמו כל הגוי להמול וישבו תחתם במחנה עד חיותם׃
5:9b.JOS.005.009 ויאמר יהוה אל יהושע היום גלותי את חרפת מצרים מעליכם ויקרא שם המקום ההוא גלגל עד היום הזה׃
5:10b.JOS.005.010 ויחנו בני ישראל בגלגל ויעשו את הפסח בארבעה עשר יום לחדש בערב בערבות יריחו׃
5:11b.JOS.005.011 ויאכלו מעבור הארץ ממחרת הפסח מצות וקלוי בעצם היום הזה׃
5:12b.JOS.005.012 וישבת המן ממחרת באכלם מעבור הארץ ולא היה עוד לבני ישראל מן ויאכלו מתבואת ארץ כנען בשנה ההיא׃
5:13b.JOS.005.013 ויהי בהיות יהושע ביריחו וישא עיניו וירא והנה איש עמד לנגדו וחרבו שלופה בידו וילך יהושע אליו ויאמר לו הלנו אתה אם לצרינו׃
5:14b.JOS.005.014 ויאמר לא כי אני שר צבא יהוה עתה באתי ויפל יהושע אל פניו ארצה וישתחו ויאמר לו מה אדני מדבר אל עבדו׃
5:15b.JOS.005.015 ויאמר שר צבא יהוה אל יהושע של נעלך מעל רגלך כי המקום אשר אתה עמד עליו קדש הוא ויעש יהושע כן׃
6
6:1b.JOS.006.001 ויריחו סגרת ומסגרת מפני בני ישראל אין יוצא ואין בא׃
6:2b.JOS.006.002 ויאמר יהוה אל יהושע ראה נתתי בידך את יריחו ואת מלכה גבורי החיל׃
6:3b.JOS.006.003 וסבתם את העיר כל אנשי המלחמה הקיף את העיר פעם אחת כה תעשה ששת ימים׃
6:4b.JOS.006.004 ושבעה כהנים ישאו שבעה שופרות היובלים לפני הארון וביום השביעי תסבו את העיר שבע פעמים והכהנים יתקעו בשופרות׃
6:5b.JOS.006.005 והיה במשך בקרן היובל בשמעכם את קול השופר יריעו כל העם תרועה גדולה ונפלה חומת העיר תחתיה ועלו העם איש נגדו׃
6:6b.JOS.006.006 ויקרא יהושע בן נון אל הכהנים ויאמר אלהם שאו את ארון הברית ושבעה כהנים ישאו שבעה שופרות יובלים לפני ארון יהוה׃
6:7b.JOS.006.007 ויאמרו אל העם עברו וסבו את העיר והחלוץ יעבר לפני ארון יהוה׃
6:8b.JOS.006.008 ויהי כאמר יהושע אל העם ושבעה הכהנים נשאים שבעה שופרות היובלים לפני יהוה עברו ותקעו בשופרות וארון ברית יהוה הלך אחריהם׃
6:9b.JOS.006.009 והחלוץ הלך לפני הכהנים תקעו השופרות והמאסף הלך אחרי הארון הלוך ותקוע בשופרות׃
6:10b.JOS.006.010 ואת העם צוה יהושע לאמר לא תריעו ולא תשמיעו את קולכם ולא יצא מפיכם דבר עד יום אמרי אליכם הריעו והריעתם׃
6:11b.JOS.006.011 ויסב ארון יהוה את העיר הקף פעם אחת ויבאו המחנה וילינו במחנה׃
6:12b.JOS.006.012 וישכם יהושע בבקר וישאו הכהנים את ארון יהוה׃
6:13b.JOS.006.013 ושבעה הכהנים נשאים שבעה שופרות היבלים לפני ארון יהוה הלכים הלוך ותקעו בשופרות והחלוץ הלך לפניהם והמאסף הלך אחרי ארון יהוה הולך ותקוע בשופרות׃
6:14b.JOS.006.014 ויסבו את העיר ביום השני פעם אחת וישבו המחנה כה עשו ששת ימים׃
6:15b.JOS.006.015 ויהי ביום השביעי וישכמו כעלות השחר ויסבו את העיר כמשפט הזה שבע פעמים רק ביום ההוא סבבו את העיר שבע פעמים׃
6:16b.JOS.006.016 ויהי בפעם השביעית תקעו הכהנים בשופרות ויאמר יהושע אל העם הריעו כי נתן יהוה לכם את העיר׃
6:17b.JOS.006.017 והיתה העיר חרם היא וכל אשר בה ליהוה רק רחב הזונה תחיה היא וכל אשר אתה בבית כי החבאתה את המלאכים אשר שלחנו׃
6:18b.JOS.006.018 ורק אתם שמרו מן החרם פן תחרימו ולקחתם מן החרם ושמתם את מחנה ישראל לחרם ועכרתם אותו׃
6:19b.JOS.006.019 וכל כסף וזהב וכלי נחשת וברזל קדש הוא ליהוה אוצר יהוה יבוא׃
6:20b.JOS.006.020 וירע העם ויתקעו בשפרות ויהי כשמע העם את קול השופר ויריעו העם תרועה גדולה ותפל החומה תחתיה ויעל העם העירה איש נגדו וילכדו את העיר׃
6:21b.JOS.006.021 ויחרימו את כל אשר בעיר מאיש ועד אשה מנער ועד זקן ועד שור ושה וחמור לפי חרב׃
6:22b.JOS.006.022 ולשנים האנשים המרגלים את הארץ אמר יהושע באו בית האשה הזונה והוציאו משם את האשה ואת כל אשר לה כאשר נשבעתם לה׃
6:23b.JOS.006.023 ויבאו הנערים המרגלים ויציאו את רחב ואת אביה ואת אמה ואת אחיה ואת כל אשר לה ואת כל משפחותיה הוציאו ויניחום מחוץ למחנה ישראל׃
6:24b.JOS.006.024 והעיר שרפו באש וכל אשר בה רק הכסף והזהב וכלי הנחשת והברזל נתנו אוצר בית יהוה׃
6:25b.JOS.006.025 ואת רחב הזונה ואת בית אביה ואת כל אשר לה החיה יהושע ותשב בקרב ישראל עד היום הזה כי החביאה את המלאכים אשר שלח יהושע לרגל את יריחו׃
6:26b.JOS.006.026 וישבע יהושע בעת ההיא לאמר ארור האיש לפני יהוה אשר יקום ובנה את העיר הזאת את יריחו בבכרו ייסדנה ובצעירו יציב דלתיה׃
6:27b.JOS.006.027 ויהי יהוה את יהושע ויהי שמעו בכל הארץ׃
7
7:1b.JOS.007.001 וימעלו בני ישראל מעל בחרם ויקח עכן בן כרמי בן זבדי בן זרח למטה יהודה מן החרם ויחר אף יהוה בבני ישראל׃
7:2b.JOS.007.002 וישלח יהושע אנשים מיריחו העי אשר עם בית און מקדם לבית אל ויאמר אליהם לאמר עלו ורגלו את הארץ ויעלו האנשים וירגלו את העי׃
7:3b.JOS.007.003 וישבו אל יהושע ויאמרו אליו אל יעל כל העם כאלפים איש או כשלשת אלפים איש יעלו ויכו את העי אל תיגע שמה את כל העם כי מעט המה׃
7:4b.JOS.007.004 ויעלו מן העם שמה כשלשת אלפים איש וינסו לפני אנשי העי׃
7:5b.JOS.007.005 ויכו מהם אנשי העי כשלשים וששה איש וירדפום לפני השער עד השברים ויכום במורד וימס לבב העם ויהי למים׃
7:6b.JOS.007.006 ויקרע יהושע שמלתיו ויפל על פניו ארצה לפני ארון יהוה עד הערב הוא וזקני ישראל ויעלו עפר על ראשם׃
7:7b.JOS.007.007 ויאמר יהושע אהה אדני יהוה למה העברת העביר את העם הזה את הירדן לתת אתנו ביד האמרי להאבידנו ולו הואלנו ונשב בעבר הירדן׃
7:8b.JOS.007.008 בי אדני מה אמר אחרי אשר הפך ישראל ערף לפני איביו׃
7:9b.JOS.007.009 וישמעו הכנעני וכל ישבי הארץ ונסבו עלינו והכריתו את שמנו מן הארץ ומה תעשה לשמך הגדול׃
7:10b.JOS.007.010 ויאמר יהוה אל יהושע קם לך למה זה אתה נפל על פניך׃
7:11b.JOS.007.011 חטא ישראל וגם עברו את בריתי אשר צויתי אותם וגם לקחו מן החרם וגם גנבו וגם כחשו וגם שמו בכליהם׃
7:12b.JOS.007.012 ולא יכלו בני ישראל לקום לפני איביהם ערף יפנו לפני איביהם כי היו לחרם לא אוסיף להיות עמכם אם לא תשמידו החרם מקרבכם׃
7:13b.JOS.007.013 קם קדש את העם ואמרת התקדשו למחר כי כה אמר יהוה אלהי ישראל חרם בקרבך ישראל לא תוכל לקום לפני איביך עד הסירכם החרם מקרבכם׃
7:14b.JOS.007.014 ונקרבתם בבקר לשבטיכם והיה השבט אשר ילכדנו יהוה יקרב למשפחות והמשפחה אשר ילכדנה יהוה תקרב לבתים והבית אשר ילכדנו יהוה יקרב לגברים׃
7:15b.JOS.007.015 והיה הנלכד בחרם ישרף באש אתו ואת כל אשר לו כי עבר את ברית יהוה וכי עשה נבלה בישראל׃
7:16b.JOS.007.016 וישכם יהושע בבקר ויקרב את ישראל לשבטיו וילכד שבט יהודה׃
7:17b.JOS.007.017 ויקרב את משפחת יהודה וילכד את משפחת הזרחי ויקרב את משפחת הזרחי לגברים וילכד זבדי׃
7:18b.JOS.007.018 ויקרב את ביתו לגברים וילכד עכן בן כרמי בן זבדי בן זרח למטה יהודה׃
7:19b.JOS.007.019 ויאמר יהושע אל עכן בני שים נא כבוד ליהוה אלהי ישראל ותן לו תודה והגד נא לי מה עשית אל תכחד ממני׃
7:20b.JOS.007.020 ויען עכן את יהושע ויאמר אמנה אנכי חטאתי ליהוה אלהי ישראל וכזאת וכזאת עשיתי׃
7:21b.JOS.007.021 ואראה בשלל אדרת שנער אחת טובה ומאתים שקלים כסף ולשון זהב אחד חמשים שקלים משקלו ואחמדם ואקחם והנם טמונים בארץ בתוך האהלי והכסף תחתיה׃
7:22b.JOS.007.022 וישלח יהושע מלאכים וירצו האהלה והנה טמונה באהלו והכסף תחתיה׃
7:23b.JOS.007.023 ויקחום מתוך האהל ויבאום אל יהושע ואל כל בני ישראל ויצקם לפני יהוה׃
7:24b.JOS.007.024 ויקח יהושע את עכן בן זרח ואת הכסף ואת האדרת ואת לשון הזהב ואת בניו ואת בנתיו ואת שורו ואת חמרו ואת צאנו ואת אהלו ואת כל אשר לו וכל ישראל עמו ויעלו אתם עמק עכור׃
7:25b.JOS.007.025 ויאמר יהושע מה עכרתנו יעכרך יהוה ביום הזה וירגמו אתו כל ישראל אבן וישרפו אתם באש ויסקלו אתם באבנים׃
7:26b.JOS.007.026 ויקימו עליו גל אבנים גדול עד היום הזה וישב יהוה מחרון אפו על כן קרא שם המקום ההוא עמק עכור עד היום הזה׃
8
8:1b.JOS.008.001 ויאמר יהוה אל יהושע אל תירא ואל תחת קח עמך את כל עם המלחמה וקום עלה העי ראה נתתי בידך את מלך העי ואת עמו ואת עירו ואת ארצו׃
8:2b.JOS.008.002 ועשית לעי ולמלכה כאשר עשית ליריחו ולמלכה רק שללה ובהמתה תבזו לכם שים לך ארב לעיר מאחריה׃
8:3b.JOS.008.003 ויקם יהושע וכל עם המלחמה לעלות העי ויבחר יהושע שלשים אלף איש גבורי החיל וישלחם לילה׃
8:4b.JOS.008.004 ויצו אתם לאמר ראו אתם ארבים לעיר מאחרי העיר אל תרחיקו מן העיר מאד והייתם כלכם נכנים׃
8:5b.JOS.008.005 ואני וכל העם אשר אתי נקרב אל העיר והיה כי יצאו לקראתנו כאשר בראשנה ונסנו לפניהם׃
8:6b.JOS.008.006 ויצאו אחרינו עד התיקנו אותם מן העיר כי יאמרו נסים לפנינו כאשר בראשנה ונסנו לפניהם׃
8:7b.JOS.008.007 ואתם תקמו מהאורב והורשתם את העיר ונתנה יהוה אלהיכם בידכם׃
8:8b.JOS.008.008 והיה כתפשכם את העיר תציתו את העיר באש כדבר יהוה תעשו ראו צויתי אתכם׃
8:9b.JOS.008.009 וישלחם יהושע וילכו אל המארב וישבו בין בית אל ובין העי מים לעי וילן יהושע בלילה ההוא בתוך העם׃
8:10b.JOS.008.010 וישכם יהושע בבקר ויפקד את העם ויעל הוא וזקני ישראל לפני העם העי׃
8:11b.JOS.008.011 וכל העם המלחמה אשר אתו עלו ויגשו ויבאו נגד העיר ויחנו מצפון לעי והגי בינו ובין העי׃
8:12b.JOS.008.012 ויקח כחמשת אלפים איש וישם אותם ארב בין בית אל ובין העי מים לעיר׃
8:13b.JOS.008.013 וישימו העם את כל המחנה אשר מצפון לעיר ואת עקבו מים לעיר וילך יהושע בלילה ההוא בתוך העמק׃
8:14b.JOS.008.014 ויהי כראות מלך העי וימהרו וישכימו ויצאו אנשי העיר לקראת ישראל למלחמה הוא וכל עמו למועד לפני הערבה והוא לא ידע כי ארב לו מאחרי העיר׃
8:15b.JOS.008.015 וינגעו יהושע וכל ישראל לפניהם וינסו דרך המדבר׃
8:16b.JOS.008.016 ויזעקו כל העם אשר בעיר לרדף אחריהם וירדפו אחרי יהושע וינתקו מן העיר׃
8:17b.JOS.008.017 ולא נשאר איש בעי ובית אל אשר לא יצאו אחרי ישראל ויעזבו את העיר פתוחה וירדפו אחרי ישראל׃
8:18b.JOS.008.018 ויאמר יהוה אל יהושע נטה בכידון אשר בידך אל העי כי בידך אתננה ויט יהושע בכידון אשר בידו אל העיר׃
8:19b.JOS.008.019 והאורב קם מהרה ממקומו וירוצו כנטות ידו ויבאו העיר וילכדוה וימהרו ויציתו את העיר באש׃
8:20b.JOS.008.020 ויפנו אנשי העי אחריהם ויראו והנה עלה עשן העיר השמימה ולא היה בהם ידים לנוס הנה והנה והעם הנס המדבר נהפך אל הרודף׃
8:21b.JOS.008.021 ויהושע וכל ישראל ראו כי לכד הארב את העיר וכי עלה עשן העיר וישבו ויכו את אנשי העי׃
8:22b.JOS.008.022 ואלה יצאו מן העיר לקראתם ויהיו לישראל בתוך אלה מזה ואלה מזה ויכו אותם עד בלתי השאיר לו שריד ופליט׃
8:23b.JOS.008.023 ואת מלך העי תפשו חי ויקרבו אתו אל יהושע׃
8:24b.JOS.008.024 ויהי ככלות ישראל להרג את כל ישבי העי בשדה במדבר אשר רדפום בו ויפלו כלם לפי חרב עד תמם וישבו כל ישראל העי ויכו אתה לפי חרב׃
8:25b.JOS.008.025 ויהי כל הנפלים ביום ההוא מאיש ועד אשה שנים עשר אלף כל אנשי העי׃
8:26b.JOS.008.026 ויהושע לא השיב ידו אשר נטה בכידון עד אשר החרים את כל ישבי העי׃
8:27b.JOS.008.027 רק הבהמה ושלל העיר ההיא בזזו להם ישראל כדבר יהוה אשר צוה את יהושע׃
8:28b.JOS.008.028 וישרף יהושע את העי וישימה תל עולם שממה עד היום הזה׃
8:29b.JOS.008.029 ואת מלך העי תלה על העץ עד עת הערב וכבוא השמש צוה יהושע וירידו את נבלתו מן העץ וישליכו אותה אל פתח שער העיר ויקימו עליו גל אבנים גדול עד היום הזה׃
8:30b.JOS.008.030 אז יבנה יהושע מזבח ליהוה אלהי ישראל בהר עיבל׃
8:31b.JOS.008.031 כאשר צוה משה עבד יהוה את בני ישראל ככתוב בספר תורת משה מזבח אבנים שלמות אשר לא הניף עליהן ברזל ויעלו עליו עלות ליהוה ויזבחו שלמים׃
8:32b.JOS.008.032 ויכתב שם על האבנים את משנה תורת משה אשר כתב לפני בני ישראל׃
8:33b.JOS.008.033 וכל ישראל וזקניו ושטרים ושפטיו עמדים מזה ומזה לארון נגד הכהנים הלוים נשאי ארון ברית יהוה כגר כאזרח חציו אל מול הר גרזים והחציו אל מול הר עיבל כאשר צוה משה עבד יהוה לברך את העם ישראל בראשנה׃
8:34b.JOS.008.034 ואחרי כן קרא את כל דברי התורה הברכה והקללה ככל הכתוב בספר התורה׃
8:35b.JOS.008.035 לא היה דבר מכל אשר צוה משה אשר לא קרא יהושע נגד כל קהל ישראל והנשים והטף והגר ההלך בקרבם׃
9
9:1b.JOS.009.001 ויהי כשמע כל המלכים אשר בעבר הירדן בהר ובשפלה ובכל חוף הים הגדול אל מול הלבנון החתי והאמרי הכנעני הפרזי החוי והיבוסי׃
9:2b.JOS.009.002 ויתקבצו יחדו להלחם עם יהושע ועם ישראל פה אחד׃
9:3b.JOS.009.003 וישבי גבעון שמעו את אשר עשה יהושע ליריחו ולעי׃
9:4b.JOS.009.004 ויעשו גם המה בערמה וילכו ויצטירו ויקחו שקים בלים לחמוריהם ונאדות יין בלים ומבקעים ומצררים׃
9:5b.JOS.009.005 ונעלות בלות ומטלאות ברגליהם ושלמות בלות עליהם וכל לחם צידם יבש היה נקדים׃
9:6b.JOS.009.006 וילכו אל יהושע אל המחנה הגלגל ויאמרו אליו ואל איש ישראל מארץ רחוקה באנו ועתה כרתו לנו ברית׃
9:7b.JOS.009.007 ויאמרו איש ישראל אל החוי אולי בקרבי אתה יושב ואיך אכרות לך ברית׃
9:8b.JOS.009.008 ויאמרו אל יהושע עבדיך אנחנו ויאמר אלהם יהושע מי אתם ומאין תבאו׃
9:9b.JOS.009.009 ויאמרו אליו מארץ רחוקה מאד באו עבדיך לשם יהוה אלהיך כי שמענו שמעו ואת כל אשר עשה במצרים׃
9:10b.JOS.009.010 ואת כל אשר עשה לשני מלכי האמרי אשר בעבר הירדן לסיחון מלך חשבון ולעוג מלך הבשן אשר בעשתרות׃
9:11b.JOS.009.011 ויאמרו אלינו זקינינו וכל ישבי ארצנו לאמר קחו בידכם צידה לדרך ולכו לקראתם ואמרתם אליהם עבדיכם אנחנו ועתה כרתו לנו ברית׃
9:12b.JOS.009.012 זה לחמנו חם הצטידנו אתו מבתינו ביום צאתנו ללכת אליכם ועתה הנה יבש והיה נקדים׃
9:13b.JOS.009.013 ואלה נאדות היין אשר מלאנו חדשים והנה התבקעו ואלה שלמותינו ונעלינו בלו מרב הדרך מאד׃
9:14b.JOS.009.014 ויקחו האנשים מצידם ואת פי יהוה לא שאלו׃
9:15b.JOS.009.015 ויעש להם יהושע שלום ויכרת להם ברית לחיותם וישבעו להם נשיאי העדה׃
9:16b.JOS.009.016 ויהי מקצה שלשת ימים אחרי אשר כרתו להם ברית וישמעו כי קרבים הם אליו ובקרבו הם ישבים׃
9:17b.JOS.009.017 ויסעו בני ישראל ויבאו אל עריהם ביום השלישי ועריהם גבעון והכפירה ובארות וקרית יערים׃
9:18b.JOS.009.018 ולא הכום בני ישראל כי נשבעו להם נשיאי העדה ביהוה אלהי ישראל וילנו כל העדה על הנשיאים׃
9:19b.JOS.009.019 ויאמרו כל הנשיאים אל כל העדה אנחנו נשבענו להם ביהוה אלהי ישראל ועתה לא נוכל לנגע בהם׃
9:20b.JOS.009.020 זאת נעשה להם והחיה אותם ולא יהיה עלינו קצף על השבועה אשר נשבענו להם׃
9:21b.JOS.009.021 ויאמרו אליהם הנשיאים יחיו ויהיו חטבי עצים ושאבי מים לכל העדה כאשר דברו להם הנשיאים׃
9:22b.JOS.009.022 ויקרא להם יהושע וידבר אליהם לאמר למה רמיתם אתנו לאמר רחוקים אנחנו מכם מאד ואתם בקרבנו ישבים׃
9:23b.JOS.009.023 ועתה ארורים אתם ולא יכרת מכם עבד וחטבי עצים ושאבי מים לבית אלהי׃
9:24b.JOS.009.024 ויענו את יהושע ויאמרו כי הגד הגד לעבדיך את אשר צוה יהוה אלהיך את משה עבדו לתת לכם את כל הארץ ולהשמיד את כל ישבי הארץ מפניכם ונירא מאד לנפשתינו מפניכם ונעשה את הדבר הזה׃
9:25b.JOS.009.025 ועתה הננו בידך כטוב וכישר בעיניך לעשות לנו עשה׃
9:26b.JOS.009.026 ויעש להם כן ויצל אותם מיד בני ישראל ולא הרגום׃
9:27b.JOS.009.027 ויתנם יהושע ביום ההוא חטבי עצים ושאבי מים לעדה ולמזבח יהוה עד היום הזה אל המקום אשר יבחר׃
10
10:1b.JOS.010.001 ויהי כשמע אדני צדק מלך ירושלם כי לכד יהושע את העי ויחרימה כאשר עשה ליריחו ולמלכה כן עשה לעי ולמלכה וכי השלימו ישבי גבעון את ישראל ויהיו בקרבם׃
10:2b.JOS.010.002 וייראו מאד כי עיר גדולה גבעון כאחת ערי הממלכה וכי היא גדולה מן העי וכל אנשיה גברים׃
10:3b.JOS.010.003 וישלח אדני צדק מלך ירושלם אל הוהם מלך חברון ואל פראם מלך ירמות ואל יפיע מלך לכיש ואל דביר מלך עגלון לאמר׃
10:4b.JOS.010.004 עלו אלי ועזרני ונכה את גבעון כי השלימה את יהושע ואת בני ישראל׃
10:5b.JOS.010.005 ויאספו ויעלו חמשת מלכי האמרי מלך ירושלם מלך חברון מלך ירמות מלך לכיש מלך עגלון הם וכל מחניהם ויחנו על גבעון וילחמו עליה׃
10:6b.JOS.010.006 וישלחו אנשי גבעון אל יהושע אל המחנה הגלגלה לאמר אל תרף ידיך מעבדיך עלה אלינו מהרה והושיעה לנו ועזרנו כי נקבצו אלינו כל מלכי האמרי ישבי ההר׃
10:7b.JOS.010.007 ויעל יהושע מן הגלגל הוא וכל עם המלחמה עמו וכל גבורי החיל׃
10:8b.JOS.010.008 ויאמר יהוה אל יהושע אל תירא מהם כי בידך נתתים לא יעמד איש מהם בפניך׃
10:9b.JOS.010.009 ויבא אליהם יהושע פתאם כל הלילה עלה מן הגלגל׃
10:10b.JOS.010.010 ויהמם יהוה לפני ישראל ויכם מכה גדולה בגבעון וירדפם דרך מעלה בית חורן ויכם עד עזקה ועד מקדה׃
10:11b.JOS.010.011 ויהי בנסם מפני ישראל הם במורד בית חורן ויהוה השליך עליהם אבנים גדלות מן השמים עד עזקה וימתו רבים אשר מתו באבני הברד מאשר הרגו בני ישראל בחרב׃
10:12b.JOS.010.012 אז ידבר יהושע ליהוה ביום תת יהוה את האמרי לפני בני ישראל ויאמר לעיני ישראל שמש בגבעון דום וירח בעמק אילון׃
10:13b.JOS.010.013 וידם השמש וירח עמד עד יקם גוי איביו הלא היא כתובה על ספר הישר ויעמד השמש בחצי השמים ולא אץ לבוא כיום תמים׃
10:14b.JOS.010.014 ולא היה כיום ההוא לפניו ואחריו לשמע יהוה בקול איש כי יהוה נלחם לישראל׃
10:15b.JOS.010.015 וישב יהושע וכל ישראל עמו אל המחנה הגלגלה׃
10:16b.JOS.010.016 וינסו חמשת המלכים האלה ויחבאו במערה במקדה׃
10:17b.JOS.010.017 ויגד ליהושע לאמר נמצאו חמשת המלכים נחבאים במערה במקדה׃
10:18b.JOS.010.018 ויאמר יהושע גלו אבנים גדלות אל פי המערה והפקידו עליה אנשים לשמרם׃
10:19b.JOS.010.019 ואתם אל תעמדו רדפו אחרי איביכם וזנבתם אותם אל תתנום לבוא אל עריהם כי נתנם יהוה אלהיכם בידכם׃
10:20b.JOS.010.020 ויהי ככלות יהושע ובני ישראל להכותם מכה גדולה מאד עד תמם והשרידים שרדו מהם ויבאו אל ערי המבצר׃
10:21b.JOS.010.021 וישבו כל העם אל המחנה אל יהושע מקדה בשלום לא חרץ לבני ישראל לאיש את לשנו׃
10:22b.JOS.010.022 ויאמר יהושע פתחו את פי המערה והוציאו אלי את חמשת המלכים האלה מן המערה׃
10:23b.JOS.010.023 ויעשו כן ויציאו אליו את חמשת המלכים האלה מן המערה את מלך ירושלם את מלך חברון את מלך ירמות את מלך לכיש את מלך עגלון׃
10:24b.JOS.010.024 ויהי כהוציאם את המלכים האלה אל יהושע ויקרא יהושע אל כל איש ישראל ויאמר אל קציני אנשי המלחמה ההלכוא אתו קרבו שימו את רגליכם על צוארי המלכים האלה ויקרבו וישימו את רגליהם על צואריהם׃
10:25b.JOS.010.025 ויאמר אליהם יהושע אל תיראו ואל תחתו חזקו ואמצו כי ככה יעשה יהוה לכל איביכם אשר אתם נלחמים אותם׃
10:26b.JOS.010.026 ויכם יהושע אחרי כן וימיתם ויתלם על חמשה עצים ויהיו תלוים על העצים עד הערב׃
10:27b.JOS.010.027 ויהי לעת בוא השמש צוה יהושע וירידום מעל העצים וישלכם אל המערה אשר נחבאו שם וישמו אבנים גדלות על פי המערה עד עצם היום הזה׃
10:28b.JOS.010.028 ואת מקדה לכד יהושע ביום ההוא ויכה לפי חרב ואת מלכה החרם אותם ואת כל הנפש אשר בה לא השאיר שריד ויעש למלך מקדה כאשר עשה למלך יריחו׃
10:29b.JOS.010.029 ויעבר יהושע וכל ישראל עמו ממקדה לבנה וילחם עם לבנה׃
10:30b.JOS.010.030 ויתן יהוה גם אותה ביד ישראל ואת מלכה ויכה לפי חרב ואת כל הנפש אשר בה לא השאיר בה שריד ויעש למלכה כאשר עשה למלך יריחו׃
10:31b.JOS.010.031 ויעבר יהושע וכל ישראל עמו מלבנה לכישה ויחן עליה וילחם בה׃
10:32b.JOS.010.032 ויתן יהוה את לכיש ביד ישראל וילכדה ביום השני ויכה לפי חרב ואת כל הנפש אשר בה ככל אשר עשה ללבנה׃
10:33b.JOS.010.033 אז עלה הרם מלך גזר לעזר את לכיש ויכהו יהושע ואת עמו עד בלתי השאיר לו שריד׃
10:34b.JOS.010.034 ויעבר יהושע וכל ישראל עמו מלכיש עגלנה ויחנו עליה וילחמו עליה׃
10:35b.JOS.010.035 וילכדוה ביום ההוא ויכוה לפי חרב ואת כל הנפש אשר בה ביום ההוא החרים ככל אשר עשה ללכיש׃
10:36b.JOS.010.036 ויעל יהושע וכל ישראל עמו מעגלונה חברונה וילחמו עליה׃
10:37b.JOS.010.037 וילכדוה ויכוה לפי חרב ואת מלכה ואת כל עריה ואת כל הנפש אשר בה לא השאיר שריד ככל אשר עשה לעגלון ויחרם אותה ואת כל הנפש אשר בה׃
10:38b.JOS.010.038 וישב יהושע וכל ישראל עמו דברה וילחם עליה׃
10:39b.JOS.010.039 וילכדה ואת מלכה ואת כל עריה ויכום לפי חרב ויחרימו את כל נפש אשר בה לא השאיר שריד כאשר עשה לחברון כן עשה לדברה ולמלכה וכאשר עשה ללבנה ולמלכה׃
10:40b.JOS.010.040 ויכה יהושע את כל הארץ ההר והנגב והשפלה והאשדות ואת כל מלכיהם לא השאיר שריד ואת כל הנשמה החרים כאשר צוה יהוה אלהי ישראל׃
10:41b.JOS.010.041 ויכם יהושע מקדש ברנע ועד עזה ואת כל ארץ גשן ועד גבעון׃
10:42b.JOS.010.042 ואת כל המלכים האלה ואת ארצם לכד יהושע פעם אחת כי יהוה אלהי ישראל נלחם לישראל׃
10:43b.JOS.010.043 וישב יהושע וכל ישראל עמו אל המחנה הגלגלה׃
11
11:1b.JOS.011.001 ויהי כשמע יבין מלך חצור וישלח אל יובב מלך מדון ואל מלך שמרון ואל מלך אכשף׃
11:2b.JOS.011.002 ואל המלכים אשר מצפון בהר ובערבה נגב כנרות ובשפלה ובנפות דור מים׃
11:3b.JOS.011.003 הכנעני ממזרח ומים והאמרי והחתי והפרזי והיבוסי בהר והחוי תחת חרמון בארץ המצפה׃
11:4b.JOS.011.004 ויצאו הם וכל מחניהם עמם עם רב כחול אשר על שפת הים לרב וסוס ורכב רב מאד׃
11:5b.JOS.011.005 ויועדו כל המלכים האלה ויבאו ויחנו יחדו אל מי מרום להלחם עם ישראל׃
11:6b.JOS.011.006 ויאמר יהוה אל יהושע אל תירא מפניהם כי מחר כעת הזאת אנכי נתן את כלם חללים לפני ישראל את סוסיהם תעקר ואת מרכבתיהם תשרף באש׃
11:7b.JOS.011.007 ויבא יהושע וכל עם המלחמה עמו עליהם על מי מרום פתאם ויפלו בהם׃
11:8b.JOS.011.008 ויתנם יהוה ביד ישראל ויכום וירדפום עד צידון רבה ועד משרפות מים ועד בקעת מצפה מזרחה ויכם עד בלתי השאיר להם שריד׃
11:9b.JOS.011.009 ויעש להם יהושע כאשר אמר לו יהוה את סוסיהם עקר ואת מרכבתיהם שרף באש׃
11:10b.JOS.011.010 וישב יהושע בעת ההיא וילכד את חצור ואת מלכה הכה בחרב כי חצור לפנים היא ראש כל הממלכות האלה׃
11:11b.JOS.011.011 ויכו את כל הנפש אשר בה לפי חרב החרם לא נותר כל נשמה ואת חצור שרף באש׃
11:12b.JOS.011.012 ואת כל ערי המלכים האלה ואת כל מלכיהם לכד יהושע ויכם לפי חרב החרים אותם כאשר צוה משה עבד יהוה׃
11:13b.JOS.011.013 רק כל הערים העמדות על תלם לא שרפם ישראל זולתי את חצור לבדה שרף יהושע׃
11:14b.JOS.011.014 וכל שלל הערים האלה והבהמה בזזו להם בני ישראל רק את כל האדם הכו לפי חרב עד השמדם אותם לא השאירו כל נשמה׃
11:15b.JOS.011.015 כאשר צוה יהוה את משה עבדו כן צוה משה את יהושע וכן עשה יהושע לא הסיר דבר מכל אשר צוה יהוה את משה׃
11:16b.JOS.011.016 ויקח יהושע את כל הארץ הזאת ההר ואת כל הנגב ואת כל ארץ הגשן ואת השפלה ואת הערבה ואת הר ישראל ושפלתה׃
11:17b.JOS.011.017 מן ההר החלק העולה שעיר ועד בעל גד בבקעת הלבנון תחת הר חרמון ואת כל מלכיהם לכד ויכם וימיתם׃
11:18b.JOS.011.018 ימים רבים עשה יהושע את כל המלכים האלה מלחמה׃
11:19b.JOS.011.019 לא היתה עיר אשר השלימה אל בני ישראל בלתי החוי ישבי גבעון את הכל לקחו במלחמה׃
11:20b.JOS.011.020 כי מאת יהוה היתה לחזק את לבם לקראת המלחמה את ישראל למען החרימם לבלתי היות להם תחנה כי למען השמידם כאשר צוה יהוה את משה׃
11:21b.JOS.011.021 ויבא יהושע בעת ההיא ויכרת את הענקים מן ההר מן חברון מן דבר מן ענב ומכל הר יהודה ומכל הר ישראל עם עריהם החרימם יהושע׃
11:22b.JOS.011.022 לא נותר ענקים בארץ בני ישראל רק בעזה בגת ובאשדוד נשארו׃
11:23b.JOS.011.023 ויקח יהושע את כל הארץ ככל אשר דבר יהוה אל משה ויתנה יהושע לנחלה לישראל כמחלקתם לשבטיהם והארץ שקטה ממלחמה׃
12
12:1b.JOS.012.001 ואלה מלכי הארץ אשר הכו בני ישראל וירשו את ארצם בעבר הירדן מזרחה השמש מנחל ארנון עד הר חרמון וכל הערבה מזרחה׃
12:2b.JOS.012.002 סיחון מלך האמרי היושב בחשבון משל מערוער אשר על שפת נחל ארנון ותוך הנחל וחצי הגלעד ועד יבק הנחל גבול בני עמון׃
12:3b.JOS.012.003 והערבה עד ים כנרות מזרחה ועד ים הערבה ים המלח מזרחה דרך בית הישמות ומתימן תחת אשדות הפסגה׃
12:4b.JOS.012.004 וגבול עוג מלך הבשן מיתר הרפאים היושב בעשתרות ובאדרעי׃
12:5b.JOS.012.005 ומשל בהר חרמון ובסלכה ובכל הבשן עד גבול הגשורי והמעכתי וחצי הגלעד גבול סיחון מלך חשבון׃
12:6b.JOS.012.006 משה עבד יהוה ובני ישראל הכום ויתנה משה עבד יהוה ירשה לראובני ולגדי ולחצי שבט המנשה׃
12:7b.JOS.012.007 ואלה מלכי הארץ אשר הכה יהושע ובני ישראל בעבר הירדן ימה מבעל גד בבקעת הלבנון ועד ההר החלק העלה שעירה ויתנה יהושע לשבטי ישראל ירשה כמחלקתם׃
12:8b.JOS.012.008 בהר ובשפלה ובערבה ובאשדות ובמדבר ובנגב החתי האמרי והכנעני הפרזי החוי והיבוסי׃
12:9b.JOS.012.009 מלך יריחו אחד מלך העי אשר מצד בית אל אחד׃
12:10b.JOS.012.010 מלך ירושלם אחד מלך חברון אחד׃
12:11b.JOS.012.011 מלך ירמות אחד מלך לכיש אחד׃
12:12b.JOS.012.012 מלך עגלון אחד מלך גזר אחד׃
12:13b.JOS.012.013 מלך דבר אחד מלך גדר אחד׃
12:14b.JOS.012.014 מלך חרמה אחד מלך ערד אחד׃
12:15b.JOS.012.015 מלך לבנה אחד מלך עדלם אחד׃
12:16b.JOS.012.016 מלך מקדה אחד מלך בית אל אחד׃
12:17b.JOS.012.017 מלך תפוח אחד מלך חפר אחד׃
12:18b.JOS.012.018 מלך אפק אחד מלך לשרון אחד׃
12:19b.JOS.012.019 מלך מדון אחד מלך חצור אחד׃
12:20b.JOS.012.020 מלך שמרון מראון אחד מלך אכשף אחד׃
12:21b.JOS.012.021 מלך תענך אחד מלך מגדו אחד׃
12:22b.JOS.012.022 מלך קדש אחד מלך יקנעם לכרמל אחד׃
12:23b.JOS.012.023 מלך דור לנפת דור אחד מלך גוים לגלגל אחד׃
12:24b.JOS.012.024 מלך תרצה אחד כל מלכים שלשים ואחד׃
13
13:1b.JOS.013.001 ויהושע זקן בא בימים ויאמר יהוה אליו אתה זקנתה באת בימים והארץ נשארה הרבה מאד לרשתה׃
13:2b.JOS.013.002 זאת הארץ הנשארת כל גלילות הפלשתים וכל הגשורי׃
13:3b.JOS.013.003 מן השיחור אשר על פני מצרים ועד גבול עקרון צפונה לכנעני תחשב חמשת סרני פלשתים העזתי והאשדודי האשקלוני הגתי והעקרוני והעוים׃
13:4b.JOS.013.004 מתימן כל ארץ הכנעני ומערה אשר לצידנים עד אפקה עד גבול האמרי׃
13:5b.JOS.013.005 והארץ הגבלי וכל הלבנון מזרח השמש מבעל גד תחת הר חרמון עד לבוא חמת׃
13:6b.JOS.013.006 כל ישבי ההר מן הלבנון עד משרפת מים כל צידנים אנכי אורישם מפני בני ישראל רק הפלה לישראל בנחלה כאשר צויתיך׃
13:7b.JOS.013.007 ועתה חלק את הארץ הזאת בנחלה לתשעת השבטים וחצי השבט המנשה׃
13:8b.JOS.013.008 עמו הראובני והגדי לקחו נחלתם אשר נתן להם משה בעבר הירדן מזרחה כאשר נתן להם משה עבד יהוה׃
13:9b.JOS.013.009 מערוער אשר על שפת נחל ארנון והעיר אשר בתוך הנחל וכל המישר מידבא עד דיבון׃
13:10b.JOS.013.010 וכל ערי סיחון מלך האמרי אשר מלך בחשבון עד גבול בני עמון׃
13:11b.JOS.013.011 והגלעד וגבול הגשורי והמעכתי וכל הר חרמון וכל הבשן עד סלכה׃
13:12b.JOS.013.012 כל ממלכות עוג בבשן אשר מלך בעשתרות ובאדרעי הוא נשאר מיתר הרפאים ויכם משה וירשם׃
13:13b.JOS.013.013 ולא הורישו בני ישראל את הגשורי ואת המעכתי וישב גשור ומעכת בקרב ישראל עד היום הזה׃
13:14b.JOS.013.014 רק לשבט הלוי לא נתן נחלה אשי יהוה אלהי ישראל הוא נחלתו כאשר דבר לו׃
13:15b.JOS.013.015 ויתן משה למטה בני ראובן למשפחתם׃
13:16b.JOS.013.016 ויהי להם הגבול מערוער אשר על שפת נחל ארנון והעיר אשר בתוך הנחל וכל המישר על מידבא׃
13:17b.JOS.013.017 חשבון וכל עריה אשר במישר דיבון ובמות בעל ובית בעל מעון׃
13:18b.JOS.013.018 ויהצה וקדמת ומפעת׃
13:19b.JOS.013.019 וקריתים ושבמה וצרת השחר בהר העמק׃
13:20b.JOS.013.020 ובית פעור ואשדות הפסגה ובית הישמות׃
13:21b.JOS.013.021 וכל ערי המישר וכל ממלכות סיחון מלך האמרי אשר מלך בחשבון אשר הכה משה אתו ואת נשיאי מדין את אוי ואת רקם ואת צור ואת חור ואת רבע נסיכי סיחון ישבי הארץ׃
13:22b.JOS.013.022 ואת בלעם בן בעור הקוסם הרגו בני ישראל בחרב אל חלליהם׃
13:23b.JOS.013.023 ויהי גבול בני ראובן הירדן וגבול זאת נחלת בני ראובן למשפחתם הערים וחצריהן׃
13:24b.JOS.013.024 ויתן משה למטה גד לבני גד למשפחתם׃
13:25b.JOS.013.025 ויהי להם הגבול יעזר וכל ערי הגלעד וחצי ארץ בני עמון עד ערוער אשר על פני רבה׃
13:26b.JOS.013.026 ומחשבון עד רמת המצפה ובטנים וממחנים עד גבול לדבר׃
13:27b.JOS.013.027 ובעמק בית הרם ובית נמרה וסכות וצפון יתר ממלכות סיחון מלך חשבון הירדן וגבל עד קצה ים כנרת עבר הירדן מזרחה׃
13:28b.JOS.013.028 זאת נחלת בני גד למשפחתם הערים וחצריהם׃
13:29b.JOS.013.029 ויתן משה לחצי שבט מנשה ויהי לחצי מטה בני מנשה למשפחותם׃
13:30b.JOS.013.030 ויהי גבולם ממחנים כל הבשן כל ממלכות עוג מלך הבשן וכל חות יאיר אשר בבשן ששים עיר׃
13:31b.JOS.013.031 וחצי הגלעד ועשתרות ואדרעי ערי ממלכות עוג בבשן לבני מכיר בן מנשה לחצי בני מכיר למשפחותם׃
13:32b.JOS.013.032 אלה אשר נחל משה בערבות מואב מעבר לירדן יריחו מזרחה׃
13:33b.JOS.013.033 ולשבט הלוי לא נתן משה נחלה יהוה אלהי ישראל הוא נחלתם כאשר דבר להם׃
14
14:1b.JOS.014.001 ואלה אשר נחלו בני ישראל בארץ כנען אשר נחלו אותם אלעזר הכהן ויהושע בן נון וראשי אבות המטות לבני ישראל׃
14:2b.JOS.014.002 בגורל נחלתם כאשר צוה יהוה ביד משה לתשעת המטות וחצי המטה׃
14:3b.JOS.014.003 כי נתן משה נחלת שני המטות וחצי המטה מעבר לירדן וללוים לא נתן נחלה בתוכם׃
14:4b.JOS.014.004 כי היו בני יוסף שני מטות מנשה ואפרים ולא נתנו חלק ללוים בארץ כי אם ערים לשבת ומגרשיהם למקניהם ולקנינם׃
14:5b.JOS.014.005 כאשר צוה יהוה את משה כן עשו בני ישראל ויחלקו את הארץ׃
14:6b.JOS.014.006 ויגשו בני יהודה אל יהושע בגלגל ויאמר אליו כלב בן יפנה הקנזי אתה ידעת את הדבר אשר דבר יהוה אל משה איש האלהים על אדותי ועל אדותיך בקדש ברנע׃
14:7b.JOS.014.007 בן ארבעים שנה אנכי בשלח משה עבד יהוה אתי מקדש ברנע לרגל את הארץ ואשב אתו דבר כאשר עם לבבי׃
14:8b.JOS.014.008 ואחי אשר עלו עמי המסיו את לב העם ואנכי מלאתי אחרי יהוה אלהי׃
14:9b.JOS.014.009 וישבע משה ביום ההוא לאמר אם לא הארץ אשר דרכה רגלך בה לך תהיה לנחלה ולבניך עד עולם כי מלאת אחרי יהוה אלהי׃
14:10b.JOS.014.010 ועתה הנה החיה יהוה אותי כאשר דבר זה ארבעים וחמש שנה מאז דבר יהוה את הדבר הזה אל משה אשר הלך ישראל במדבר ועתה הנה אנכי היום בן חמש ושמונים שנה׃
14:11b.JOS.014.011 עודני היום חזק כאשר ביום שלח אותי משה ככחי אז וככחי עתה למלחמה ולצאת ולבוא׃
14:12b.JOS.014.012 ועתה תנה לי את ההר הזה אשר דבר יהוה ביום ההוא כי אתה שמעת ביום ההוא כי ענקים שם וערים גדלות בצרות אולי יהוה אותי והורשתים כאשר דבר יהוה׃
14:13b.JOS.014.013 ויברכהו יהושע ויתן את חברון לכלב בן יפנה לנחלה׃
14:14b.JOS.014.014 על כן היתה חברון לכלב בן יפנה הקנזי לנחלה עד היום הזה יען אשר מלא אחרי יהוה אלהי ישראל׃
14:15b.JOS.014.015 ושם חברון לפנים קרית ארבע האדם הגדול בענקים הוא והארץ שקטה ממלחמה׃
15
15:1b.JOS.015.001 ויהי הגורל למטה בני יהודה למשפחתם אל גבול אדום מדבר צן נגבה מקצה תימן׃
15:2b.JOS.015.002 ויהי להם גבול נגב מקצה ים המלח מן הלשן הפנה נגבה׃
15:3b.JOS.015.003 ויצא אל מנגב למעלה עקרבים ועבר צנה ועלה מנגב לקדש ברנע ועבר חצרון ועלה אדרה ונסב הקרקעה׃
15:4b.JOS.015.004 ועבר עצמונה ויצא נחל מצרים והיה תצאות הגבול ימה זה יהיה לכם גבול נגב׃
15:5b.JOS.015.005 וגבול קדמה ים המלח עד קצה הירדן וגבול לפאת צפונה מלשון הים מקצה הירדן׃
15:6b.JOS.015.006 ועלה הגבול בית חגלה ועבר מצפון לבית הערבה ועלה הגבול אבן בהן בן ראובן׃
15:7b.JOS.015.007 ועלה הגבול דברה מעמק עכור וצפונה פנה אל הגלגל אשר נכח למעלה אדמים אשר מנגב לנחל ועבר הגבול אל מי עין שמש והיו תצאתיו אל עין רגל׃
15:8b.JOS.015.008 ועלה הגבול גי בן הנם אל כתף היבוסי מנגב היא ירושלם ועלה הגבול אל ראש ההר אשר על פני גי הנם ימה אשר בקצה עמק רפאים צפנה׃
15:9b.JOS.015.009 ותאר הגבול מראש ההר אל מעין מי נפתוח ויצא אל ערי הר עפרון ותאר הגבול בעלה היא קרית יערים׃
15:10b.JOS.015.010 ונסב הגבול מבעלה ימה אל הר שעיר ועבר אל כתף הר יערים מצפונה היא כסלון וירד בית שמש ועבר תמנה׃
15:11b.JOS.015.011 ויצא הגבול אל כתף עקרון צפונה ותאר הגבול שכרונה ועבר הר הבעלה ויצא יבנאל והיו תצאות הגבול ימה׃
15:12b.JOS.015.012 וגבול ים הימה הגדול וגבול זה גבול בני יהודה סביב למשפחתם׃
15:13b.JOS.015.013 ולכלב בן יפנה נתן חלק בתוך בני יהודה אל פי יהוה ליהושע את קרית ארבע אבי הענק היא חברון׃
15:14b.JOS.015.014 וירש משם כלב את שלושה בני הענק את ששי ואת אחימן ואת תלמי ילידי הענק׃
15:15b.JOS.015.015 ויעל משם אל ישבי דבר ושם דבר לפנים קרית ספר׃
15:16b.JOS.015.016 ויאמר כלב אשר יכה את קרית ספר ולכדה ונתתי לו את עכסה בתי לאשה׃
15:17b.JOS.015.017 וילכדה עתניאל בן קנז אחי כלב ויתן לו את עכסה בתו לאשה׃
15:18b.JOS.015.018 ויהי בבואה ותסיתהו לשאול מאת אביה שדה ותצנח מעל החמור ויאמר לה כלב מה לך׃
15:19b.JOS.015.019 ותאמר תנה לי ברכה כי ארץ הנגב נתתני ונתתה לי גלת מים ויתן לה את גלת עליות ואת גלת תחתיות׃
15:20b.JOS.015.020 זאת נחלת מטה בני יהודה למשפחתם׃
15:21b.JOS.015.021 ויהיו הערים מקצה למטה בני יהודה אל גבול אדום בנגבה קבצאל ועדר ויגור׃
15:22b.JOS.015.022 וקינה ודימונה ועדעדה׃
15:23b.JOS.015.023 וקדש וחצור ויתנן׃
15:24b.JOS.015.024 זיף וטלם ובעלות׃
15:25b.JOS.015.025 וחצור חדתה וקריות חצרון היא חצור׃
15:26b.JOS.015.026 אמם ושמע ומולדה׃
15:27b.JOS.015.027 וחצר גדה וחשמון ובית פלט׃
15:28b.JOS.015.028 וחצר שועל ובאר שבע ובזיותיה׃
15:29b.JOS.015.029 בעלה ועיים ועצם׃
15:30b.JOS.015.030 ואלתולד וכסיל וחרמה׃
15:31b.JOS.015.031 וצקלג ומדמנה וסנסנה׃
15:32b.JOS.015.032 ולבאות ושלחים ועין ורמון כל ערים עשרים ותשע וחצריהן׃
15:33b.JOS.015.033 בשפלה אשתאול וצרעה ואשנה׃
15:34b.JOS.015.034 וזנוח ועין גנים תפוח והעינם׃
15:35b.JOS.015.035 ירמות ועדלם שוכה ועזקה׃
15:36b.JOS.015.036 ושערים ועדיתים והגדרה וגדרתים ערים ארבע עשרה וחצריהן׃
15:37b.JOS.015.037 צנן וחדשה ומגדל גד׃
15:38b.JOS.015.038 ודלען והמצפה ויקתאל׃
15:39b.JOS.015.039 לכיש ובצקת ועגלון׃
15:40b.JOS.015.040 וכבון ולחמס וכתליש׃
15:41b.JOS.015.041 וגדרות בית דגון ונעמה ומקדה ערים שש עשרה וחצריהן׃
15:42b.JOS.015.042 לבנה ועתר ועשן׃
15:43b.JOS.015.043 ויפתח ואשנה ונציב׃
15:44b.JOS.015.044 וקעילה ואכזיב ומראשה ערים תשע וחצריהן׃
15:45b.JOS.015.045 עקרון ובנתיה וחצריה׃
15:46b.JOS.015.046 מעקרון וימה כל אשר על יד אשדוד וחצריהן׃
15:47b.JOS.015.047 אשדוד בנותיה וחצריה עזה בנותיה וחצריה עד נחל מצרים והים הגבול וגבול׃
15:48b.JOS.015.048 ובהר שמיר ויתיר ושוכה׃
15:49b.JOS.015.049 ודנה וקרית סנה היא דבר׃
15:50b.JOS.015.050 וענב ואשתמה וענים׃
15:51b.JOS.015.051 וגשן וחלן וגלה ערים אחת עשרה וחצריהן׃
15:52b.JOS.015.052 ארב ורומה ואשען׃
15:53b.JOS.015.053 וינים ובית תפוח ואפקה׃
15:54b.JOS.015.054 וחמטה וקרית ארבע היא חברון וציער ערים תשע וחצריהן׃
15:55b.JOS.015.055 מעון כרמל וזיף ויוטה׃
15:56b.JOS.015.056 ויזרעאל ויקדעם וזנוח׃
15:57b.JOS.015.057 הקין גבעה ותמנה ערים עשר וחצריהן׃
15:58b.JOS.015.058 חלחול בית צור וגדור׃
15:59b.JOS.015.059 ומערת ובית ענות ואלתקן ערים שש וחצריהן׃
15:60b.JOS.015.060 קרית בעל היא קרית יערים והרבה ערים שתים וחצריהן׃
15:61b.JOS.015.061 במדבר בית הערבה מדין וסככה׃
15:62b.JOS.015.062 והנבשן ועיר המלח ועין גדי ערים שש וחצריהן׃
15:63b.JOS.015.063 ואת היבוסי יושבי ירושלם לא יוכלו בני יהודה להורישם וישב היבוסי את בני יהודה בירושלם עד היום הזה׃
16
16:1b.JOS.016.001 ויצא הגורל לבני יוסף מירדן יריחו למי יריחו מזרחה המדבר עלה מיריחו בהר בית אל׃
16:2b.JOS.016.002 ויצא מבית אל לוזה ועבר אל גבול הארכי עטרות׃
16:3b.JOS.016.003 וירד ימה אל גבול היפלטי עד גבול בית חורן תחתון ועד גזר והיו תצאתו ימה׃
16:4b.JOS.016.004 וינחלו בני יוסף מנשה ואפרים׃
16:5b.JOS.016.005 ויהי גבול בני אפרים למשפחתם ויהי גבול נחלתם מזרחה עטרות אדר עד בית חורן עליון׃
16:6b.JOS.016.006 ויצא הגבול הימה המכמתת מצפון ונסב הגבול מזרחה תאנת שלה ועבר אותו ממזרח ינוחה׃
16:7b.JOS.016.007 וירד מינוחה עטרות ונערתה ופגע ביריחו ויצא הירדן׃
16:8b.JOS.016.008 מתפוח ילך הגבול ימה נחל קנה והיו תצאתיו הימה זאת נחלת מטה בני אפרים למשפחתם׃
16:9b.JOS.016.009 והערים המבדלות לבני אפרים בתוך נחלת בני מנשה כל הערים וחצריהן׃
16:10b.JOS.016.010 ולא הורישו את הכנעני היושב בגזר וישב הכנעני בקרב אפרים עד היום הזה ויהי למס עבד׃
17
17:1b.JOS.017.001 ויהי הגורל למטה מנשה כי הוא בכור יוסף למכיר בכור מנשה אבי הגלעד כי הוא היה איש מלחמה ויהי לו הגלעד והבשן׃
17:2b.JOS.017.002 ויהי לבני מנשה הנותרים למשפחתם לבני אביעזר ולבני חלק ולבני אשריאל ולבני שכם ולבני חפר ולבני שמידע אלה בני מנשה בן יוסף הזכרים למשפחתם׃
17:3b.JOS.017.003 ולצלפחד בן חפר בן גלעד בן מכיר בן מנשה לא היו לו בנים כי אם בנות ואלה שמות בנתיו מחלה ונעה חגלה מלכה ותרצה׃
17:4b.JOS.017.004 ותקרבנה לפני אלעזר הכהן ולפני יהושע בן נון ולפני הנשיאים לאמר יהוה צוה את משה לתת לנו נחלה בתוך אחינו ויתן להם אל פי יהוה נחלה בתוך אחי אביהן׃
17:5b.JOS.017.005 ויפלו חבלי מנשה עשרה לבד מארץ הגלעד והבשן אשר מעבר לירדן׃
17:6b.JOS.017.006 כי בנות מנשה נחלו נחלה בתוך בניו וארץ הגלעד היתה לבני מנשה הנותרים׃
17:7b.JOS.017.007 ויהי גבול מנשה מאשר המכמתת אשר על פני שכם והלך הגבול אל הימין אל ישבי עין תפוח׃
17:8b.JOS.017.008 למנשה היתה ארץ תפוח ותפוח אל גבול מנשה לבני אפרים׃
17:9b.JOS.017.009 וירד הגבול נחל קנה נגבה לנחל ערים האלה לאפרים בתוך ערי מנשה וגבול מנשה מצפון לנחל ויהי תצאתיו הימה׃
17:10b.JOS.017.010 נגבה לאפרים וצפונה למנשה ויהי הים גבולו ובאשר יפגעון מצפון וביששכר ממזרח׃
17:11b.JOS.017.011 ויהי למנשה ביששכר ובאשר בית שאן ובנותיה ויבלעם ובנותיה ואת ישבי דאר ובנותיה וישבי עין דר ובנתיה וישבי תענך ובנתיה וישבי מגדו ובנותיה שלשת הנפת׃
17:12b.JOS.017.012 ולא יכלו בני מנשה להוריש את הערים האלה ויואל הכנעני לשבת בארץ הזאת׃
17:13b.JOS.017.013 ויהי כי חזקו בני ישראל ויתנו את הכנעני למס והורש לא הורישו׃
17:14b.JOS.017.014 וידברו בני יוסף את יהושע לאמר מדוע נתתה לי נחלה גורל אחד וחבל אחד ואני עם רב עד אשר עד כה ברכני יהוה׃
17:15b.JOS.017.015 ויאמר אליהם יהושע אם עם רב אתה עלה לך היערה ובראת לך שם בארץ הפרזי והרפאים כי אץ לך הר אפרים׃
17:16b.JOS.017.016 ויאמרו בני יוסף לא ימצא לנו ההר ורכב ברזל בכל הכנעני הישב בארץ העמק לאשר בבית שאן ובנותיה ולאשר בעמק יזרעאל׃
17:17b.JOS.017.017 ויאמר יהושע אל בית יוסף לאפרים ולמנשה לאמר עם רב אתה וכח גדול לך לא יהיה לך גורל אחד׃
17:18b.JOS.017.018 כי הר יהיה לך כי יער הוא ובראתו והיה לך תצאתיו כי תוריש את הכנעני כי רכב ברזל לו כי חזק הוא׃
18
18:1b.JOS.018.001 ויקהלו כל עדת בני ישראל שלה וישכינו שם את אהל מועד והארץ נכבשה לפניהם׃
18:2b.JOS.018.002 ויותרו בבני ישראל אשר לא חלקו את נחלתם שבעה שבטים׃
18:3b.JOS.018.003 ויאמר יהושע אל בני ישראל עד אנה אתם מתרפים לבוא לרשת את הארץ אשר נתן לכם יהוה אלהי אבותיכם׃
18:4b.JOS.018.004 הבו לכם שלשה אנשים לשבט ואשלחם ויקמו ויתהלכו בארץ ויכתבו אותה לפי נחלתם ויבאו אלי׃
18:5b.JOS.018.005 והתחלקו אתה לשבעה חלקים יהודה יעמד על גבולו מנגב ובית יוסף יעמדו על גבולם מצפון׃
18:6b.JOS.018.006 ואתם תכתבו את הארץ שבעה חלקים והבאתם אלי הנה ויריתי לכם גורל פה לפני יהוה אלהינו׃
18:7b.JOS.018.007 כי אין חלק ללוים בקרבכם כי כהנת יהוה נחלתו וגד וראובן וחצי שבט המנשה לקחו נחלתם מעבר לירדן מזרחה אשר נתן להם משה עבד יהוה׃
18:8b.JOS.018.008 ויקמו האנשים וילכו ויצו יהושע את ההלכים לכתב את הארץ לאמר לכו והתהלכו בארץ וכתבו אותה ושובו אלי ופה אשליך לכם גורל לפני יהוה בשלה׃
18:9b.JOS.018.009 וילכו האנשים ויעברו בארץ ויכתבוה לערים לשבעה חלקים על ספר ויבאו אל יהושע אל המחנה שלה׃
18:10b.JOS.018.010 וישלך להם יהושע גורל בשלה לפני יהוה ויחלק שם יהושע את הארץ לבני ישראל כמחלקתם׃
18:11b.JOS.018.011 ויעל גורל מטה בני בנימן למשפחתם ויצא גבול גורלם בין בני יהודה ובין בני יוסף׃
18:12b.JOS.018.012 ויהי להם הגבול לפאת צפונה מן הירדן ועלה הגבול אל כתף יריחו מצפון ועלה בהר ימה והיה תצאתיו מדברה בית און׃
18:13b.JOS.018.013 ועבר משם הגבול לוזה אל כתף לוזה נגבה היא בית אל וירד הגבול עטרות אדר על ההר אשר מנגב לבית חרון תחתון׃
18:14b.JOS.018.014 ותאר הגבול ונסב לפאת ים נגבה מן ההר אשר על פני בית חרון נגבה והיה תצאתיו אל קרית בעל היא קרית יערים עיר בני יהודה זאת פאת ים׃
18:15b.JOS.018.015 ופאת נגבה מקצה קרית יערים ויצא הגבול ימה ויצא אל מעין מי נפתוח׃
18:16b.JOS.018.016 וירד הגבול אל קצה ההר אשר על פני גי בן הנם אשר בעמק רפאים צפונה וירד גי הנם אל כתף היבוסי נגבה וירד עין רגל׃
18:17b.JOS.018.017 ותאר מצפון ויצא עין שמש ויצא אל גלילות אשר נכח מעלה אדמים וירד אבן בהן בן ראובן׃
18:18b.JOS.018.018 ועבר אל כתף מול הערבה צפונה וירד הערבתה׃
18:19b.JOS.018.019 ועבר הגבול אל כתף בית חגלה צפונה והיה תצאותיו הגבול אל לשון ים המלח צפונה אל קצה הירדן נגבה זה גבול נגב׃
18:20b.JOS.018.020 והירדן יגבל אתו לפאת קדמה זאת נחלת בני בנימן לגבולתיה סביב למשפחתם׃
18:21b.JOS.018.021 והיו הערים למטה בני בנימן למשפחותיהם יריחו ובית חגלה ועמק קציץ׃
18:22b.JOS.018.022 ובית הערבה וצמרים ובית אל׃
18:23b.JOS.018.023 והעוים והפרה ועפרה׃
18:24b.JOS.018.024 וכפר העמני והעפני וגבע ערים שתים עשרה וחצריהן׃
18:25b.JOS.018.025 גבעון והרמה ובארות׃
18:26b.JOS.018.026 והמצפה והכפירה והמצה׃
18:27b.JOS.018.027 ורקם וירפאל ותראלה׃
18:28b.JOS.018.028 וצלע האלף והיבוסי היא ירושלם גבעת קרית ערים ארבע עשרה וחצריהן זאת נחלת בני בנימן למשפחתם׃
19
19:1b.JOS.019.001 ויצא הגורל השני לשמעון למטה בני שמעון למשפחותם ויהי נחלתם בתוך נחלת בני יהודה׃
19:2b.JOS.019.002 ויהי להם בנחלתם באר שבע ושבע ומולדה׃
19:3b.JOS.019.003 וחצר שועל ובלה ועצם׃
19:4b.JOS.019.004 ואלתולד ובתול וחרמה׃
19:5b.JOS.019.005 וצקלג ובית המרכבות וחצר סוסה׃
19:6b.JOS.019.006 ובית לבאות ושרוחן ערים שלש עשרה וחצריהן׃
19:7b.JOS.019.007 עין רמון ועתר ועשן ערים ארבע וחצריהן׃
19:8b.JOS.019.008 וכל החצרים אשר סביבות הערים האלה עד בעלת באר ראמת נגב זאת נחלת מטה בני שמעון למשפחתם׃
19:9b.JOS.019.009 מחבל בני יהודה נחלת בני שמעון כי היה חלק בני יהודה רב מהם וינחלו בני שמעון בתוך נחלתם׃
19:10b.JOS.019.010 ויעל הגורל השלישי לבני זבולן למשפחתם ויהי גבול נחלתם עד שריד׃
19:11b.JOS.019.011 ועלה גבולם לימה ומרעלה ופגע בדבשת ופגע אל הנחל אשר על פני יקנעם׃
19:12b.JOS.019.012 ושב משריד קדמה מזרח השמש על גבול כסלת תבר ויצא אל הדברת ועלה יפיע׃
19:13b.JOS.019.013 ומשם עבר קדמה מזרחה גתה חפר עתה קצין ויצא רמון המתאר הנעה׃
19:14b.JOS.019.014 ונסב אתו הגבול מצפון חנתן והיו תצאתיו גי יפתח אל׃
19:15b.JOS.019.015 וקטת ונהלל ושמרון וידאלה ובית לחם ערים שתים עשרה וחצריהן׃
19:16b.JOS.019.016 זאת נחלת בני זבולן למשפחותם הערים האלה וחצריהן׃
19:17b.JOS.019.017 ליששכר יצא הגורל הרביעי לבני יששכר למשפחותם׃
19:18b.JOS.019.018 ויהי גבולם יזרעאלה והכסולת ושונם׃
19:19b.JOS.019.019 וחפרים ושיאן ואנחרת׃
19:20b.JOS.019.020 והרבית וקשיון ואבץ׃
19:21b.JOS.019.021 ורמת ועין גנים ועין חדה ובית פצץ׃
19:22b.JOS.019.022 ופגע הגבול בתבור ושחצומה ובית שמש והיו תצאות גבולם הירדן ערים שש עשרה וחצריהן׃
19:23b.JOS.019.023 זאת נחלת מטה בני יששכר למשפחתם הערים וחצריהן׃
19:24b.JOS.019.024 ויצא הגורל החמישי למטה בני אשר למשפחותם׃
19:25b.JOS.019.025 ויהי גבולם חלקת וחלי ובטן ואכשף׃
19:26b.JOS.019.026 ואלמלך ועמעד ומשאל ופגע בכרמל הימה ובשיחור לבנת׃
19:27b.JOS.019.027 ושב מזרח השמש בית דגן ופגע בזבלון ובגי יפתח אל צפונה בית העמק ונעיאל ויצא אל כבול משמאל׃
19:28b.JOS.019.028 ועברן ורחב וחמון וקנה עד צידון רבה׃
19:29b.JOS.019.029 ושב הגבול הרמה ועד עיר מבצר צר ושב הגבול חסה ויהיו תצאתיו הימה מחבל אכזיבה׃
19:30b.JOS.019.030 ועמה ואפק ורחב ערים עשרים ושתים וחצריהן׃
19:31b.JOS.019.031 זאת נחלת מטה בני אשר למשפחתם הערים האלה וחצריהן׃
19:32b.JOS.019.032 לבני נפתלי יצא הגורל הששי לבני נפתלי למשפחתם׃
19:33b.JOS.019.033 ויהי גבולם מחלף מאלון בצעננים ואדמי הנקב ויבנאל עד לקום ויהי תצאתיו הירדן׃
19:34b.JOS.019.034 ושב הגבול ימה אזנות תבור ויצא משם חוקקה ופגע בזבלון מנגב ובאשר פגע מים וביהודה הירדן מזרח השמש׃
19:35b.JOS.019.035 וערי מבצר הצדים צר וחמת רקת וכנרת׃
19:36b.JOS.019.036 ואדמה והרמה וחצור׃
19:37b.JOS.019.037 וקדש ואדרעי ועין חצור׃
19:38b.JOS.019.038 ויראון ומגדל אל חרם ובית ענת ובית שמש ערים תשע עשרה וחצריהן׃
19:39b.JOS.019.039 זאת נחלת מטה בני נפתלי למשפחתם הערים וחצריהן׃
19:40b.JOS.019.040 למטה בני דן למשפחתם יצא הגורל השביעי׃
19:41b.JOS.019.041 ויהי גבול נחלתם צרעה ואשתאול ועיר שמש׃
19:42b.JOS.019.042 ושעלבין ואילון ויתלה׃
19:43b.JOS.019.043 ואילון ותמנתה ועקרון׃
19:44b.JOS.019.044 ואלתקה וגבתון ובעלת׃
19:45b.JOS.019.045 ויהד ובני ברק וגת רמון׃
19:46b.JOS.019.046 ומי הירקון והרקון עם הגבול מול יפו׃
19:47b.JOS.019.047 ויצא גבול בני דן מהם ויעלו בני דן וילחמו עם לשם וילכדו אותה ויכו אותה לפי חרב וירשו אותה וישבו בה ויקראו ללשם דן כשם דן אביהם׃
19:48b.JOS.019.048 זאת נחלת מטה בני דן למשפחתם הערים האלה וחצריהן׃
19:49b.JOS.019.049 ויכלו לנחל את הארץ לגבולתיה ויתנו בני ישראל נחלה ליהושע בן נון בתוכם׃
19:50b.JOS.019.050 על פי יהוה נתנו לו את העיר אשר שאל את תמנת סרח בהר אפרים ויבנה את העיר וישב בה׃
19:51b.JOS.019.051 אלה הנחלת אשר נחלו אלעזר הכהן ויהושע בן נון וראשי האבות למטות בני ישראל בגורל בשלה לפני יהוה פתח אהל מועד ויכלו מחלק את הארץ׃
20
20:1b.JOS.020.001 וידבר יהוה אל יהושע לאמר׃
20:2b.JOS.020.002 דבר אל בני ישראל לאמר תנו לכם את ערי המקלט אשר דברתי אליכם ביד משה׃
20:3b.JOS.020.003 לנוס שמה רוצח מכה נפש בשגגה בבלי דעת והיו לכם למקלט מגאל הדם׃
20:4b.JOS.020.004 ונס אל אחת מהערים האלה ועמד פתח שער העיר ודבר באזני זקני העיר ההיא את דבריו ואספו אתו העירה אליהם ונתנו לו מקום וישב עמם׃
20:5b.JOS.020.005 וכי ירדף גאל הדם אחריו ולא יסגרו את הרצח בידו כי בבלי דעת הכה את רעהו ולא שנא הוא לו מתמול שלשום׃
20:6b.JOS.020.006 וישב בעיר ההיא עד עמדו לפני העדה למשפט עד מות הכהן הגדול אשר יהיה בימים ההם אז ישוב הרוצח ובא אל עירו ואל ביתו אל העיר אשר נס משם׃
20:7b.JOS.020.007 ויקדשו את קדש בגליל בהר נפתלי ואת שכם בהר אפרים ואת קרית ארבע היא חברון בהר יהודה׃
20:8b.JOS.020.008 ומעבר לירדן יריחו מזרחה נתנו את בצר במדבר במישר ממטה ראובן ואת ראמת בגלעד ממטה גד ואת גלון בבשן ממטה מנשה׃
20:9b.JOS.020.009 אלה היו ערי המועדה לכל בני ישראל ולגר הגר בתוכם לנוס שמה כל מכה נפש בשגגה ולא ימות ביד גאל הדם עד עמדו לפני העדה׃
21
21:1b.JOS.021.001 ויגשו ראשי אבות הלוים אל אלעזר הכהן ואל יהושע בן נון ואל ראשי אבות המטות לבני ישראל׃
21:2b.JOS.021.002 וידברו אליהם בשלה בארץ כנען לאמר יהוה צוה ביד משה לתת לנו ערים לשבת ומגרשיהן לבהמתנו׃
21:3b.JOS.021.003 ויתנו בני ישראל ללוים מנחלתם אל פי יהוה את הערים האלה ואת מגרשיהן׃
21:4b.JOS.021.004 ויצא הגורל למשפחת הקהתי ויהי לבני אהרן הכהן מן הלוים ממטה יהודה וממטה השמעני וממטה בנימן בגורל ערים שלש עשרה׃
21:5b.JOS.021.005 ולבני קהת הנותרים ממשפחת מטה אפרים וממטה דן ומחצי מטה מנשה בגורל ערים עשר׃
21:6b.JOS.021.006 ולבני גרשון ממשפחות מטה יששכר וממטה אשר וממטה נפתלי ומחצי מטה מנשה בבשן בגורל ערים שלש עשרה׃
21:7b.JOS.021.007 לבני מררי למשפחתם ממטה ראובן וממטה גד וממטה זבולן ערים שתים עשרה׃
21:8b.JOS.021.008 ויתנו בני ישראל ללוים את הערים האלה ואת מגרשיהן כאשר צוה יהוה ביד משה בגורל׃
21:9b.JOS.021.009 ויתנו ממטה בני יהודה וממטה בני שמעון את הערים האלה אשר יקרא אתהן בשם׃
21:10b.JOS.021.010 ויהי לבני אהרן ממשפחות הקהתי מבני לוי כי להם היה הגורל ראישנה׃
21:11b.JOS.021.011 ויתנו להם את קרית ארבע אבי הענוק היא חברון בהר יהודה ואת מגרשה סביבתיה׃
21:12b.JOS.021.012 ואת שדה העיר ואת חצריה נתנו לכלב בן יפנה באחזתו׃
21:13b.JOS.021.013 ולבני אהרן הכהן נתנו את עיר מקלט הרצח את חברון ואת מגרשה ואת לבנה ואת מגרשה׃
21:14b.JOS.021.014 ואת יתר ואת מגרשה ואת אשתמע ואת מגרשה׃
21:15b.JOS.021.015 ואת חלן ואת מגרשה ואת דבר ואת מגרשה׃
21:16b.JOS.021.016 ואת עין ואת מגרשה ואת יטה ואת מגרשה את בית שמש ואת מגרשה ערים תשע מאת שני השבטים האלה׃
21:17b.JOS.021.017 וממטה בנימן את גבעון ואת מגרשה את גבע ואת מגרשה׃
21:18b.JOS.021.018 את ענתות ואת מגרשה ואת עלמון ואת מגרשה ערים ארבע׃
21:19b.JOS.021.019 כל ערי בני אהרן הכהנים שלש עשרה ערים ומגרשיהן׃
21:20b.JOS.021.020 ולמשפחות בני קהת הלוים הנותרים מבני קהת ויהי ערי גורלם ממטה אפרים׃
21:21b.JOS.021.021 ויתנו להם את עיר מקלט הרצח את שכם ואת מגרשה בהר אפרים ואת גזר ואת מגרשה׃
21:22b.JOS.021.022 ואת קבצים ואת מגרשה ואת בית חורן ואת מגרשה ערים ארבע׃
21:23b.JOS.021.023 וממטה דן את אלתקא ואת מגרשה את גבתון ואת מגרשה׃
21:24b.JOS.021.024 את אילון ואת מגרשה את גת רמון ואת מגרשה ערים ארבע׃
21:25b.JOS.021.025 וממחצית מטה מנשה את תענך ואת מגרשה ואת גת רמון ואת מגרשה ערים שתים׃
21:26b.JOS.021.026 כל ערים עשר ומגרשיהן למשפחות בני קהת הנותרים׃
21:27b.JOS.021.027 ולבני גרשון ממשפחת הלוים מחצי מטה מנשה את עיר מקלט הרצח את גלון בבשן ואת מגרשה ואת בעשתרה ואת מגרשה ערים שתים׃
21:28b.JOS.021.028 וממטה יששכר את קשיון ואת מגרשה את דברת ואת מגרשה׃
21:29b.JOS.021.029 את ירמות ואת מגרשה את עין גנים ואת מגרשה ערים ארבע׃
21:30b.JOS.021.030 וממטה אשר את משאל ואת מגרשה את עבדון ואת מגרשה׃
21:31b.JOS.021.031 את חלקת ואת מגרשה ואת רחב ואת מגרשה ערים ארבע׃
21:32b.JOS.021.032 וממטה נפתלי את עיר מקלט הרצח את קדש בגליל ואת מגרשה ואת חמת דאר ואת מגרשה ואת קרתן ואת מגרשה ערים שלש׃
21:33b.JOS.021.033 כל ערי הגרשני למשפחתם שלש עשרה עיר ומגרשיהן׃
21:34b.JOS.021.034 ולמשפחות בני מררי הלוים הנותרים מאת מטה זבולן את יקנעם ואת מגרשה את קרתה ואת מגרשה׃
21:35b.JOS.021.035 את דמנה ואת מגרשה את נהלל ואת מגרשה ערים ארבע׃
21:36b.JOS.021.036 וממטה ראובן את בצר ואת מגרשה ואת יהצה ואת מגרשה׃
21:37b.JOS.021.037 את קדמות ואת מגרשה ואת מיפעת ואת מגרשה ערים ארבע׃
21:38b.JOS.021.038 וממטה גד את עיר מקלט הרצח את רמת בגלעד ואת מגרשה ואת מחנים ואת מגרשה׃
21:39b.JOS.021.039 את חשבון ואת מגרשה את יעזר ואת מגרשה כל ערים ארבע׃
21:40b.JOS.021.040 כל הערים לבני מררי למשפחתם הנותרים ממשפחות הלוים ויהי גורלם ערים שתים עשרה׃
21:41b.JOS.021.041 כל ערי הלוים בתוך אחזת בני ישראל ערים ארבעים ושמנה ומגרשיהן׃
21:42b.JOS.021.042 תהיינה הערים האלה עיר עיר ומגרשיה סביבתיה כן לכל הערים האלה׃
21:43b.JOS.021.043 ויתן יהוה לישראל את כל הארץ אשר נשבע לתת לאבותם וירשוה וישבו בה׃
21:44b.JOS.021.044 וינח יהוה להם מסביב ככל אשר נשבע לאבותם ולא עמד איש בפניהם מכל איביהם את כל איביהם נתן יהוה בידם׃
21:45b.JOS.021.045 לא נפל דבר מכל הדבר הטוב אשר דבר יהוה אל בית ישראל הכל בא׃
22
22:1b.JOS.022.001 אז יקרא יהושע לראובני ולגדי ולחצי מטה מנשה׃
22:2b.JOS.022.002 ויאמר אליהם אתם שמרתם את כל אשר צוה אתכם משה עבד יהוה ותשמעו בקולי לכל אשר צויתי אתכם׃
22:3b.JOS.022.003 לא עזבתם את אחיכם זה ימים רבים עד היום הזה ושמרתם את משמרת מצות יהוה אלהיכם׃
22:4b.JOS.022.004 ועתה הניח יהוה אלהיכם לאחיכם כאשר דבר להם ועתה פנו ולכו לכם לאהליכם אל ארץ אחזתכם אשר נתן לכם משה עבד יהוה בעבר הירדן׃
22:5b.JOS.022.005 רק שמרו מאד לעשות את המצוה ואת התורה אשר צוה אתכם משה עבד יהוה לאהבה את יהוה אלהיכם וללכת בכל דרכיו ולשמר מצותיו ולדבקה בו ולעבדו בכל לבבכם ובכל נפשכם׃
22:6b.JOS.022.006 ויברכם יהושע וישלחם וילכו אל אהליהם׃
22:7b.JOS.022.007 ולחצי שבט המנשה נתן משה בבשן ולחציו נתן יהושע עם אחיהם מעבר הירדן ימה וגם כי שלחם יהושע אל אהליהם ויברכם׃
22:8b.JOS.022.008 ויאמר אליהם לאמר בנכסים רבים שובו אל אהליכם ובמקנה רב מאד בכסף ובזהב ובנחשת ובברזל ובשלמות הרבה מאד חלקו שלל איביכם עם אחיכם׃
22:9b.JOS.022.009 וישבו וילכו בני ראובן ובני גד וחצי שבט המנשה מאת בני ישראל משלה אשר בארץ כנען ללכת אל ארץ הגלעד אל ארץ אחזתם אשר נאחזו בה על פי יהוה ביד משה׃
22:10b.JOS.022.010 ויבאו אל גלילות הירדן אשר בארץ כנען ויבנו בני ראובן ובני גד וחצי שבט המנשה שם מזבח על הירדן מזבח גדול למראה׃
22:11b.JOS.022.011 וישמעו בני ישראל לאמר הנה בנו בני ראובן ובני גד וחצי שבט המנשה את המזבח אל מול ארץ כנען אל גלילות הירדן אל עבר בני ישראל׃
22:12b.JOS.022.012 וישמעו בני ישראל ויקהלו כל עדת בני ישראל שלה לעלות עליהם לצבא׃
22:13b.JOS.022.013 וישלחו בני ישראל אל בני ראובן ואל בני גד ואל חצי שבט מנשה אל ארץ הגלעד את פינחס בן אלעזר הכהן׃
22:14b.JOS.022.014 ועשרה נשאים עמו נשיא אחד נשיא אחד לבית אב לכל מטות ישראל ואיש ראש בית אבותם המה לאלפי ישראל׃
22:15b.JOS.022.015 ויבאו אל בני ראובן ואל בני גד ואל חצי שבט מנשה אל ארץ הגלעד וידברו אתם לאמר׃
22:16b.JOS.022.016 כה אמרו כל עדת יהוה מה המעל הזה אשר מעלתם באלהי ישראל לשוב היום מאחרי יהוה בבנותכם לכם מזבח למרדכם היום ביהוה׃
22:17b.JOS.022.017 המעט לנו את עון פעור אשר לא הטהרנו ממנו עד היום הזה ויהי הנגף בעדת יהוה׃
22:18b.JOS.022.018 ואתם תשבו היום מאחרי יהוה והיה אתם תמרדו היום ביהוה ומחר אל כל עדת ישראל יקצף׃
22:19b.JOS.022.019 ואך אם טמאה ארץ אחזתכם עברו לכם אל ארץ אחזת יהוה אשר שכן שם משכן יהוה והאחזו בתוכנו וביהוה אל תמרדו ואתנו אל תמרדו בבנתכם לכם מזבח מבלעדי מזבח יהוה אלהינו׃
22:20b.JOS.022.020 הלוא עכן בן זרח מעל מעל בחרם ועל כל עדת ישראל היה קצף והוא איש אחד לא גוע בעונו׃
22:21b.JOS.022.021 ויענו בני ראובן ובני גד וחצי שבט המנשה וידברו את ראשי אלפי ישראל׃
22:22b.JOS.022.022 אל אלהים יהוה אל אלהים יהוה הוא ידע וישראל הוא ידע אם במרד ואם במעל ביהוה אל תושיענו היום הזה׃
22:23b.JOS.022.023 לבנות לנו מזבח לשוב מאחרי יהוה ואם להעלות עליו עולה ומנחה ואם לעשות עליו זבחי שלמים יהוה הוא יבקש׃
22:24b.JOS.022.024 ואם לא מדאגה מדבר עשינו את זאת לאמר מחר יאמרו בניכם לבנינו לאמר מה לכם וליהוה אלהי ישראל׃
22:25b.JOS.022.025 וגבול נתן יהוה ביננו וביניכם בני ראובן ובני גד את הירדן אין לכם חלק ביהוה והשביתו בניכם את בנינו לבלתי ירא את יהוה׃
22:26b.JOS.022.026 ונאמר נעשה נא לנו לבנות את המזבח לא לעולה ולא לזבח׃
22:27b.JOS.022.027 כי עד הוא בינינו וביניכם ובין דרותינו אחרינו לעבד את עבדת יהוה לפניו בעלותינו ובזבחינו ובשלמינו ולא יאמרו בניכם מחר לבנינו אין לכם חלק ביהוה׃
22:28b.JOS.022.028 ונאמר והיה כי יאמרו אלינו ואל דרתינו מחר ואמרנו ראו את תבנית מזבח יהוה אשר עשו אבותינו לא לעולה ולא לזבח כי עד הוא בינינו וביניכם׃
22:29b.JOS.022.029 חלילה לנו ממנו למרד ביהוה ולשוב היום מאחרי יהוה לבנות מזבח לעלה למנחה ולזבח מלבד מזבח יהוה אלהינו אשר לפני משכנו׃
22:30b.JOS.022.030 וישמע פינחס הכהן ונשיאי העדה וראשי אלפי ישראל אשר אתו את הדברים אשר דברו בני ראובן ובני גד ובני מנשה וייטב בעיניהם׃
22:31b.JOS.022.031 ויאמר פינחס בן אלעזר הכהן אל בני ראובן ואל בני גד ואל בני מנשה היום ידענו כי בתוכנו יהוה אשר לא מעלתם ביהוה המעל הזה אז הצלתם את בני ישראל מיד יהוה׃
22:32b.JOS.022.032 וישב פינחס בן אלעזר הכהן והנשיאים מאת בני ראובן ומאת בני גד מארץ הגלעד אל ארץ כנען אל בני ישראל וישבו אותם דבר׃
22:33b.JOS.022.033 וייטב הדבר בעיני בני ישראל ויברכו אלהים בני ישראל ולא אמרו לעלות עליהם לצבא לשחת את הארץ אשר בני ראובן ובני גד ישבים בה׃
22:34b.JOS.022.034 ויקראו בני ראובן ובני גד למזבח כי עד הוא בינתינו כי יהוה האלהים׃
23
23:1b.JOS.023.001 ויהי מימים רבים אחרי אשר הניח יהוה לישראל מכל איביהם מסביב ויהושע זקן בא בימים׃
23:2b.JOS.023.002 ויקרא יהושע לכל ישראל לזקניו ולראשיו ולשפטיו ולשטריו ויאמר אלהם אני זקנתי באתי בימים׃
23:3b.JOS.023.003 ואתם ראיתם את כל אשר עשה יהוה אלהיכם לכל הגוים האלה מפניכם כי יהוה אלהיכם הוא הנלחם לכם׃
23:4b.JOS.023.004 ראו הפלתי לכם את הגוים הנשארים האלה בנחלה לשבטיכם מן הירדן וכל הגוים אשר הכרתי והים הגדול מבוא השמש׃
23:5b.JOS.023.005 ויהוה אלהיכם הוא יהדפם מפניכם והוריש אתם מלפניכם וירשתם את ארצם כאשר דבר יהוה אלהיכם לכם׃
23:6b.JOS.023.006 וחזקתם מאד לשמר ולעשות את כל הכתוב בספר תורת משה לבלתי סור ממנו ימין ושמאול׃
23:7b.JOS.023.007 לבלתי בוא בגוים האלה הנשארים האלה אתכם ובשם אלהיהם לא תזכירו ולא תשביעו ולא תעבדום ולא תשתחוו להם׃
23:8b.JOS.023.008 כי אם ביהוה אלהיכם תדבקו כאשר עשיתם עד היום הזה׃
23:9b.JOS.023.009 ויורש יהוה מפניכם גוים גדלים ועצומים ואתם לא עמד איש בפניכם עד היום הזה׃
23:10b.JOS.023.010 איש אחד מכם ירדף אלף כי יהוה אלהיכם הוא הנלחם לכם כאשר דבר לכם׃
23:11b.JOS.023.011 ונשמרתם מאד לנפשתיכם לאהבה את יהוה אלהיכם׃
23:12b.JOS.023.012 כי אם שוב תשובו ודבקתם ביתר הגוים האלה הנשארים האלה אתכם והתחתנתם בהם ובאתם בהם והם בכם׃
23:13b.JOS.023.013 ידוע תדעו כי לא יוסיף יהוה אלהיכם להוריש את הגוים האלה מלפניכם והיו לכם לפח ולמוקש ולשטט בצדיכם ולצננים בעיניכם עד אבדכם מעל האדמה הטובה הזאת אשר נתן לכם יהוה אלהיכם׃
23:14b.JOS.023.014 והנה אנכי הולך היום בדרך כל הארץ וידעתם בכל לבבכם ובכל נפשכם כי לא נפל דבר אחד מכל הדברים הטובים אשר דבר יהוה אלהיכם עליכם הכל באו לכם לא נפל ממנו דבר אחד׃
23:15b.JOS.023.015 והיה כאשר בא עליכם כל הדבר הטוב אשר דבר יהוה אלהיכם אליכם כן יביא יהוה עליכם את כל הדבר הרע עד השמידו אותכם מעל האדמה הטובה הזאת אשר נתן לכם יהוה אלהיכם׃
23:16b.JOS.023.016 בעברכם את ברית יהוה אלהיכם אשר צוה אתכם והלכתם ועבדתם אלהים אחרים והשתחויתם להם וחרה אף יהוה בכם ואבדתם מהרה מעל הארץ הטובה אשר נתן לכם׃
24
24:1b.JOS.024.001 ויאסף יהושע את כל שבטי ישראל שכמה ויקרא לזקני ישראל ולראשיו ולשפטיו ולשטריו ויתיצבו לפני האלהים׃
24:2b.JOS.024.002 ויאמר יהושע אל כל העם כה אמר יהוה אלהי ישראל בעבר הנהר ישבו אבותיכם מעולם תרח אבי אברהם ואבי נחור ויעבדו אלהים אחרים׃
24:3b.JOS.024.003 ואקח את אביכם את אברהם מעבר הנהר ואולך אותו בכל ארץ כנען וארב את זרעו ואתן לו את יצחק׃
24:4b.JOS.024.004 ואתן ליצחק את יעקב ואת עשו ואתן לעשו את הר שעיר לרשת אותו ויעקב ובניו ירדו מצרים׃
24:5b.JOS.024.005 ואשלח את משה ואת אהרן ואגף את מצרים כאשר עשיתי בקרבו ואחר הוצאתי אתכם׃
24:6b.JOS.024.006 ואוציא את אבותיכם ממצרים ותבאו הימה וירדפו מצרים אחרי אבותיכם ברכב ובפרשים ים סוף׃
24:7b.JOS.024.007 ויצעקו אל יהוה וישם מאפל ביניכם ובין המצרים ויבא עליו את הים ויכסהו ותראינה עיניכם את אשר עשיתי במצרים ותשבו במדבר ימים רבים׃
24:8b.JOS.024.008 ואביאה אתכם אל ארץ האמרי היושב בעבר הירדן וילחמו אתכם ואתן אותם בידכם ותירשו את ארצם ואשמידם מפניכם׃
24:9b.JOS.024.009 ויקם בלק בן צפור מלך מואב וילחם בישראל וישלח ויקרא לבלעם בן בעור לקלל אתכם׃
24:10b.JOS.024.010 ולא אביתי לשמע לבלעם ויברך ברוך אתכם ואצל אתכם מידו׃
24:11b.JOS.024.011 ותעברו את הירדן ותבאו אל יריחו וילחמו בכם בעלי יריחו האמרי והפרזי והכנעני והחתי והגרגשי החוי והיבוסי ואתן אותם בידכם׃
24:12b.JOS.024.012 ואשלח לפניכם את הצרעה ותגרש אותם מפניכם שני מלכי האמרי לא בחרבך ולא בקשתך׃
24:13b.JOS.024.013 ואתן לכם ארץ אשר לא יגעת בה וערים אשר לא בניתם ותשבו בהם כרמים וזיתים אשר לא נטעתם אתם אכלים׃
24:14b.JOS.024.014 ועתה יראו את יהוה ועבדו אתו בתמים ובאמת והסירו את אלהים אשר עבדו אבותיכם בעבר הנהר ובמצרים ועבדו את יהוה׃
24:15b.JOS.024.015 ואם רע בעיניכם לעבד את יהוה בחרו לכם היום את מי תעבדון אם את אלהים אשר עבדו אבותיכם אשר בעבר הנהר ואם את אלהי האמרי אשר אתם ישבים בארצם ואנכי וביתי נעבד את יהוה׃
24:16b.JOS.024.016 ויען העם ויאמר חלילה לנו מעזב את יהוה לעבד אלהים אחרים׃
24:17b.JOS.024.017 כי יהוה אלהינו הוא המעלה אתנו ואת אבותינו מארץ מצרים מבית עבדים ואשר עשה לעינינו את האתות הגדלות האלה וישמרנו בכל הדרך אשר הלכנו בה ובכל העמים אשר עברנו בקרבם׃
24:18b.JOS.024.018 ויגרש יהוה את כל העמים ואת האמרי ישב הארץ מפנינו גם אנחנו נעבד את יהוה כי הוא אלהינו׃
24:19b.JOS.024.019 ויאמר יהושע אל העם לא תוכלו לעבד את יהוה כי אלהים קדשים הוא אל קנוא הוא לא ישא לפשעכם ולחטאותיכם׃
24:20b.JOS.024.020 כי תעזבו את יהוה ועבדתם אלהי נכר ושב והרע לכם וכלה אתכם אחרי אשר היטיב לכם׃
24:21b.JOS.024.021 ויאמר העם אל יהושע לא כי את יהוה נעבד׃
24:22b.JOS.024.022 ויאמר יהושע אל העם עדים אתם בכם כי אתם בחרתם לכם את יהוה לעבד אותו ויאמרו עדים׃
24:23b.JOS.024.023 ועתה הסירו את אלהי הנכר אשר בקרבכם והטו את לבבכם אל יהוה אלהי ישראל׃
24:24b.JOS.024.024 ויאמרו העם אל יהושע את יהוה אלהינו נעבד ובקולו נשמע׃
24:25b.JOS.024.025 ויכרת יהושע ברית לעם ביום ההוא וישם לו חק ומשפט בשכם׃
24:26b.JOS.024.026 ויכתב יהושע את הדברים האלה בספר תורת אלהים ויקח אבן גדולה ויקימה שם תחת האלה אשר במקדש יהוה׃
24:27b.JOS.024.027 ויאמר יהושע אל כל העם הנה האבן הזאת תהיה בנו לעדה כי היא שמעה את כל אמרי יהוה אשר דבר עמנו והיתה בכם לעדה פן תכחשון באלהיכם׃
24:28b.JOS.024.028 וישלח יהושע את העם איש לנחלתו׃
24:29b.JOS.024.029 ויהי אחרי הדברים האלה וימת יהושע בן נון עבד יהוה בן מאה ועשר שנים׃
24:30b.JOS.024.030 ויקברו אתו בגבול נחלתו בתמנת סרח אשר בהר אפרים מצפון להר געש׃
24:31b.JOS.024.031 ויעבד ישראל את יהוה כל ימי יהושע וכל ימי הזקנים אשר האריכו ימים אחרי יהושע ואשר ידעו את כל מעשה יהוה אשר עשה לישראל׃
24:32b.JOS.024.032 ואת עצמות יוסף אשר העלו בני ישראל ממצרים קברו בשכם בחלקת השדה אשר קנה יעקב מאת בני חמור אבי שכם במאה קשיטה ויהיו לבני יוסף לנחלה׃
24:33b.JOS.024.033 ואלעזר בן אהרן מת ויקברו אתו בגבעת פינחס בנו אשר נתן לו בהר אפרים׃
- Holder of rights
- Multilingual Bible Corpus
- Citation Suggestion for this Object
- TextGrid Repository (2025). Hebrew Collection. Joshua (Hebrew). Joshua (Hebrew). Multilingual Parallel Bible Corpus. Multilingual Bible Corpus. https://hdl.handle.net/21.11113/0000-0016-9B19-E