Numbers (Hebrew)

1

1:1b.NUM.001.001 וידבר יהוה אל משה במדבר סיני באהל מועד באחד לחדש השני בשנה השנית לצאתם מארץ מצרים לאמר׃

1:2b.NUM.001.002 שאו את ראש כל עדת בני ישראל למשפחתם לבית אבתם במספר שמות כל זכר לגלגלתם׃

1:3b.NUM.001.003 מבן עשרים שנה ומעלה כל יצא צבא בישראל תפקדו אתם לצבאתם אתה ואהרן׃

1:4b.NUM.001.004 ואתכם יהיו איש איש למטה איש ראש לבית אבתיו הוא׃

1:5b.NUM.001.005 ואלה שמות האנשים אשר יעמדו אתכם לראובן אליצור בן שדיאור׃

1:6b.NUM.001.006 לשמעון שלמיאל בן צורישדי׃

1:7b.NUM.001.007 ליהודה נחשון בן עמינדב׃

1:8b.NUM.001.008 ליששכר נתנאל בן צוער׃

1:9b.NUM.001.009 לזבולן אליאב בן חלן׃

1:10b.NUM.001.010 לבני יוסף לאפרים אלישמע בן עמיהוד למנשה גמליאל בן פדהצור׃

1:11b.NUM.001.011 לבנימן אבידן בן גדעני׃

1:12b.NUM.001.012 לדן אחיעזר בן עמישדי׃

1:13b.NUM.001.013 לאשר פגעיאל בן עכרן׃

1:14b.NUM.001.014 לגד אליסף בן דעואל׃

1:15b.NUM.001.015 לנפתלי אחירע בן עינן׃

1:16b.NUM.001.016 אלה קריאי העדה נשיאי מטות אבותם ראשי אלפי ישראל הם׃

1:17b.NUM.001.017 ויקח משה ואהרן את האנשים האלה אשר נקבו בשמות׃

1:18b.NUM.001.018 ואת כל העדה הקהילו באחד לחדש השני ויתילדו על משפחתם לבית אבתם במספר שמות מבן עשרים שנה ומעלה לגלגלתם׃

1:19b.NUM.001.019 כאשר צוה יהוה את משה ויפקדם במדבר סיני׃

1:20b.NUM.001.020 ויהיו בני ראובן בכר ישראל תולדתם למשפחתם לבית אבתם במספר שמות לגלגלתם כל זכר מבן עשרים שנה ומעלה כל יצא צבא׃

1:21b.NUM.001.021 פקדיהם למטה ראובן ששה וארבעים אלף וחמש מאות׃

1:22b.NUM.001.022 לבני שמעון תולדתם למשפחתם לבית אבתם פקדיו במספר שמות לגלגלתם כל זכר מבן עשרים שנה ומעלה כל יצא צבא׃

1:23b.NUM.001.023 פקדיהם למטה שמעון תשעה וחמשים אלף ושלש מאות׃

1:24b.NUM.001.024 לבני גד תולדתם למשפחתם לבית אבתם במספר שמות מבן עשרים שנה ומעלה כל יצא צבא׃

1:25b.NUM.001.025 פקדיהם למטה גד חמשה וארבעים אלף ושש מאות וחמשים׃

1:26b.NUM.001.026 לבני יהודה תולדתם למשפחתם לבית אבתם במספר שמת מבן עשרים שנה ומעלה כל יצא צבא׃

1:27b.NUM.001.027 פקדיהם למטה יהודה ארבעה ושבעים אלף ושש מאות׃

1:28b.NUM.001.028 לבני יששכר תולדתם למשפחתם לבית אבתם במספר שמת מבן עשרים שנה ומעלה כל יצא צבא׃

1:29b.NUM.001.029 פקדיהם למטה יששכר ארבעה וחמשים אלף וארבע מאות׃

1:30b.NUM.001.030 לבני זבולן תולדתם למשפחתם לבית אבתם במספר שמת מבן עשרים שנה ומעלה כל יצא צבא׃

1:31b.NUM.001.031 פקדיהם למטה זבולן שבעה וחמשים אלף וארבע מאות׃

1:32b.NUM.001.032 לבני יוסף לבני אפרים תולדתם למשפחתם לבית אבתם במספר שמת מבן עשרים שנה ומעלה כל יצא צבא׃

1:33b.NUM.001.033 פקדיהם למטה אפרים ארבעים אלף וחמש מאות׃

1:34b.NUM.001.034 לבני מנשה תולדתם למשפחתם לבית אבתם במספר שמות מבן עשרים שנה ומעלה כל יצא צבא׃

1:35b.NUM.001.035 פקדיהם למטה מנשה שנים ושלשים אלף ומאתים׃

1:36b.NUM.001.036 לבני בנימן תולדתם למשפחתם לבית אבתם במספר שמת מבן עשרים שנה ומעלה כל יצא צבא׃

1:37b.NUM.001.037 פקדיהם למטה בנימן חמשה ושלשים אלף וארבע מאות׃

1:38b.NUM.001.038 לבני דן תולדתם למשפחתם לבית אבתם במספר שמת מבן עשרים שנה ומעלה כל יצא צבא׃

1:39b.NUM.001.039 פקדיהם למטה דן שנים וששים אלף ושבע מאות׃

1:40b.NUM.001.040 לבני אשר תולדתם למשפחתם לבית אבתם במספר שמת מבן עשרים שנה ומעלה כל יצא צבא׃

1:41b.NUM.001.041 פקדיהם למטה אשר אחד וארבעים אלף וחמש מאות׃

1:42b.NUM.001.042 בני נפתלי תולדתם למשפחתם לבית אבתם במספר שמת מבן עשרים שנה ומעלה כל יצא צבא׃

1:43b.NUM.001.043 פקדיהם למטה נפתלי שלשה וחמשים אלף וארבע מאות׃

1:44b.NUM.001.044 אלה הפקדים אשר פקד משה ואהרן ונשיאי ישראל שנים עשר איש איש אחד לבית אבתיו היו׃

1:45b.NUM.001.045 ויהיו כל פקודי בני ישראל לבית אבתם מבן עשרים שנה ומעלה כל יצא צבא בישראל׃

1:46b.NUM.001.046 ויהיו כל הפקדים שש מאות אלף ושלשת אלפים וחמש מאות וחמשים׃

1:47b.NUM.001.047 והלוים למטה אבתם לא התפקדו בתוכם׃

1:48b.NUM.001.048 וידבר יהוה אל משה לאמר׃

1:49b.NUM.001.049 אך את מטה לוי לא תפקד ואת ראשם לא תשא בתוך בני ישראל׃

1:50b.NUM.001.050 ואתה הפקד את הלוים על משכן העדת ועל כל כליו ועל כל אשר לו המה ישאו את המשכן ואת כל כליו והם ישרתהו וסביב למשכן יחנו׃

1:51b.NUM.001.051 ובנסע המשכן יורידו אתו הלוים ובחנת המשכן יקימו אתו הלוים והזר הקרב יומת׃

1:52b.NUM.001.052 וחנו בני ישראל איש על מחנהו ואיש על דגלו לצבאתם׃

1:53b.NUM.001.053 והלוים יחנו סביב למשכן העדת ולא יהיה קצף על עדת בני ישראל ושמרו הלוים את משמרת משכן העדות׃

1:54b.NUM.001.054 ויעשו בני ישראל ככל אשר צוה יהוה את משה כן עשו׃

2

2:1b.NUM.002.001 וידבר יהוה אל משה ואל אהרן לאמר׃

2:2b.NUM.002.002 איש על דגלו באתת לבית אבתם יחנו בני ישראל מנגד סביב לאהל מועד יחנו׃

2:3b.NUM.002.003 והחנים קדמה מזרחה דגל מחנה יהודה לצבאתם ונשיא לבני יהודה נחשון בן עמינדב׃

2:4b.NUM.002.004 וצבאו ופקדיהם ארבעה ושבעים אלף ושש מאות׃

2:5b.NUM.002.005 והחנים עליו מטה יששכר ונשיא לבני יששכר נתנאל בן צוער׃

2:6b.NUM.002.006 וצבאו ופקדיו ארבעה וחמשים אלף וארבע מאות׃

2:7b.NUM.002.007 מטה זבולן ונשיא לבני זבולן אליאב בן חלן׃

2:8b.NUM.002.008 וצבאו ופקדיו שבעה וחמשים אלף וארבע מאות׃

2:9b.NUM.002.009 כל הפקדים למחנה יהודה מאת אלף ושמנים אלף וששת אלפים וארבע מאות לצבאתם ראשנה יסעו׃

2:10b.NUM.002.010 דגל מחנה ראובן תימנה לצבאתם ונשיא לבני ראובן אליצור בן שדיאור׃

2:11b.NUM.002.011 וצבאו ופקדיו ששה וארבעים אלף וחמש מאות׃

2:12b.NUM.002.012 והחונם עליו מטה שמעון ונשיא לבני שמעון שלמיאל בן צורי שדי׃

2:13b.NUM.002.013 וצבאו ופקדיהם תשעה וחמשים אלף ושלש מאות׃

2:14b.NUM.002.014 ומטה גד ונשיא לבני גד אליסף בן דעואל׃

2:15b.NUM.002.015 וצבאו ופקדיהם חמשה וארבעים אלף ושש מאות וחמשים׃

2:16b.NUM.002.016 כל הפקדים למחנה ראובן מאת אלף ואחד וחמשים אלף וארבע מאות וחמשים לצבאתם ושנים יסעו׃

2:17b.NUM.002.017 ונסע אהל מועד מחנה הלוים בתוך המחנת כאשר יחנו כן יסעו איש על ידו לדגליהם׃

2:18b.NUM.002.018 דגל מחנה אפרים לצבאתם ימה ונשיא לבני אפרים אלישמע בן עמיהוד׃

2:19b.NUM.002.019 וצבאו ופקדיהם ארבעים אלף וחמש מאות׃

2:20b.NUM.002.020 ועליו מטה מנשה ונשיא לבני מנשה גמליאל בן פדהצור׃

2:21b.NUM.002.021 וצבאו ופקדיהם שנים ושלשים אלף ומאתים׃

2:22b.NUM.002.022 ומטה בנימן ונשיא לבני בנימן אבידן בן גדעני׃

2:23b.NUM.002.023 וצבאו ופקדיהם חמשה ושלשים אלף וארבע מאות׃

2:24b.NUM.002.024 כל הפקדים למחנה אפרים מאת אלף ושמנת אלפים ומאה לצבאתם ושלשים יסעו׃

2:25b.NUM.002.025 דגל מחנה דן צפנה לצבאתם ונשיא לבני דן אחיעזר בן עמישדי׃

2:26b.NUM.002.026 וצבאו ופקדיהם שנים וששים אלף ושבע מאות׃

2:27b.NUM.002.027 והחנים עליו מטה אשר ונשיא לבני אשר פגעיאל בן עכרן׃

2:28b.NUM.002.028 וצבאו ופקדיהם אחד וארבעים אלף וחמש מאות׃

2:29b.NUM.002.029 ומטה נפתלי ונשיא לבני נפתלי אחירע בן עינן׃

2:30b.NUM.002.030 וצבאו ופקדיהם שלשה וחמשים אלף וארבע מאות׃

2:31b.NUM.002.031 כל הפקדים למחנה דן מאת אלף ושבעה וחמשים אלף ושש מאות לאחרנה יסעו לדגליהם׃

2:32b.NUM.002.032 אלה פקודי בני ישראל לבית אבתם כל פקודי המחנת לצבאתם שש מאות אלף ושלשת אלפים וחמש מאות וחמשים׃

2:33b.NUM.002.033 והלוים לא התפקדו בתוך בני ישראל כאשר צוה יהוה את משה׃

2:34b.NUM.002.034 ויעשו בני ישראל ככל אשר צוה יהוה את משה כן חנו לדגליהם וכן נסעו איש למשפחתיו על בית אבתיו׃

3

3:1b.NUM.003.001 ואלה תולדת אהרן ומשה ביום דבר יהוה את משה בהר סיני׃

3:2b.NUM.003.002 ואלה שמות בני אהרן הבכור נדב ואביהוא אלעזר ואיתמר׃

3:3b.NUM.003.003 אלה שמות בני אהרן הכהנים המשחים אשר מלא ידם לכהן׃

3:4b.NUM.003.004 וימת נדב ואביהוא לפני יהוה בהקרבם אש זרה לפני יהוה במדבר סיני ובנים לא היו להם ויכהן אלעזר ואיתמר על פני אהרן אביהם׃

3:5b.NUM.003.005 וידבר יהוה אל משה לאמר׃

3:6b.NUM.003.006 הקרב את מטה לוי והעמדת אתו לפני אהרן הכהן ושרתו אתו׃

3:7b.NUM.003.007 ושמרו את משמרתו ואת משמרת כל העדה לפני אהל מועד לעבד את עבדת המשכן׃

3:8b.NUM.003.008 ושמרו את כל כלי אהל מועד ואת משמרת בני ישראל לעבד את עבדת המשכן׃

3:9b.NUM.003.009 ונתתה את הלוים לאהרן ולבניו נתונם נתונם המה לו מאת בני ישראל׃

3:10b.NUM.003.010 ואת אהרן ואת בניו תפקד ושמרו את כהנתם והזר הקרב יומת׃

3:11b.NUM.003.011 וידבר יהוה אל משה לאמר׃

3:12b.NUM.003.012 ואני הנה לקחתי את הלוים מתוך בני ישראל תחת כל בכור פטר רחם מבני ישראל והיו לי הלוים׃

3:13b.NUM.003.013 כי לי כל בכור ביום הכתי כל בכור בארץ מצרים הקדשתי לי כל בכור בישראל מאדם עד בהמה לי יהיו אני יהוה׃

3:14b.NUM.003.014 וידבר יהוה אל משה במדבר סיני לאמר׃

3:15b.NUM.003.015 פקד את בני לוי לבית אבתם למשפחתם כל זכר מבן חדש ומעלה תפקדם׃

3:16b.NUM.003.016 ויפקד אתם משה על פי יהוה כאשר צוה׃

3:17b.NUM.003.017 ויהיו אלה בני לוי בשמתם גרשון וקהת ומררי׃

3:18b.NUM.003.018 ואלה שמות בני גרשון למשפחתם לבני ושמעי׃

3:19b.NUM.003.019 ובני קהת למשפחתם עמרם ויצהר חברון ועזיאל׃

3:20b.NUM.003.020 ובני מררי למשפחתם מחלי ומושי אלה הם משפחת הלוי לבית אבתם׃

3:21b.NUM.003.021 לגרשון משפחת הלבני ומשפחת השמעי אלה הם משפחת הגרשני׃

3:22b.NUM.003.022 פקדיהם במספר כל זכר מבן חדש ומעלה פקדיהם שבעת אלפים וחמש מאות׃

3:23b.NUM.003.023 משפחת הגרשני אחרי המשכן יחנו ימה׃

3:24b.NUM.003.024 ונשיא בית אב לגרשני אליסף בן לאל׃

3:25b.NUM.003.025 ומשמרת בני גרשון באהל מועד המשכן והאהל מכסהו ומסך פתח אהל מועד׃

3:26b.NUM.003.026 וקלעי החצר ואת מסך פתח החצר אשר על המשכן ועל המזבח סביב ואת מיתריו לכל עבדתו׃

3:27b.NUM.003.027 ולקהת משפחת העמרמי ומשפחת היצהרי ומשפחת החברני ומשפחת העזיאלי אלה הם משפחת הקהתי׃

3:28b.NUM.003.028 במספר כל זכר מבן חדש ומעלה שמנת אלפים ושש מאות שמרי משמרת הקדש׃

3:29b.NUM.003.029 משפחת בני קהת יחנו על ירך המשכן תימנה׃

3:30b.NUM.003.030 ונשיא בית אב למשפחת הקהתי אליצפן בן עזיאל׃

3:31b.NUM.003.031 ומשמרתם הארן והשלחן והמנרה והמזבחת וכלי הקדש אשר ישרתו בהם והמסך וכל עבדתו׃

3:32b.NUM.003.032 ונשיא נשיאי הלוי אלעזר בן אהרן הכהן פקדת שמרי משמרת הקדש׃

3:33b.NUM.003.033 למררי משפחת המחלי ומשפחת המושי אלה הם משפחת מררי׃

3:34b.NUM.003.034 ופקדיהם במספר כל זכר מבן חדש ומעלה ששת אלפים ומאתים׃

3:35b.NUM.003.035 ונשיא בית אב למשפחת מררי צוריאל בן אביחיל על ירך המשכן יחנו צפנה׃

3:36b.NUM.003.036 ופקדת משמרת בני מררי קרשי המשכן ובריחיו ועמדיו ואדניו וכל כליו וכל עבדתו׃

3:37b.NUM.003.037 ועמדי החצר סביב ואדניהם ויתדתם ומיתריהם׃

3:38b.NUM.003.038 והחנים לפני המשכן קדמה לפני אהל מועד מזרחה משה ואהרן ובניו שמרים משמרת המקדש למשמרת בני ישראל והזר הקרב יומת׃

3:39b.NUM.003.039 כל פקודי הלוים אשר פקד משה ואהרן על פי יהוה למשפחתם כל זכר מבן חדש ומעלה שנים ועשרים אלף׃

3:40b.NUM.003.040 ויאמר יהוה אל משה פקד כל בכר זכר לבני ישראל מבן חדש ומעלה ושא את מספר שמתם׃

3:41b.NUM.003.041 ולקחת את הלוים לי אני יהוה תחת כל בכר בבני ישראל ואת בהמת הלוים תחת כל בכור בבהמת בני ישראל׃

3:42b.NUM.003.042 ויפקד משה כאשר צוה יהוה אתו את כל בכר בבני ישראל׃

3:43b.NUM.003.043 ויהי כל בכור זכר במספר שמות מבן חדש ומעלה לפקדיהם שנים ועשרים אלף שלשה ושבעים ומאתים׃

3:44b.NUM.003.044 וידבר יהוה אל משה לאמר׃

3:45b.NUM.003.045 קח את הלוים תחת כל בכור בבני ישראל ואת בהמת הלוים תחת בהמתם והיו לי הלוים אני יהוה׃

3:46b.NUM.003.046 ואת פדויי השלשה והשבעים והמאתים העדפים על הלוים מבכור בני ישראל׃

3:47b.NUM.003.047 ולקחת חמשת חמשת שקלים לגלגלת בשקל הקדש תקח עשרים גרה השקל׃

3:48b.NUM.003.048 ונתתה הכסף לאהרן ולבניו פדויי העדפים בהם׃

3:49b.NUM.003.049 ויקח משה את כסף הפדיום מאת העדפים על פדויי הלוים׃

3:50b.NUM.003.050 מאת בכור בני ישראל לקח את הכסף חמשה וששים ושלש מאות ואלף בשקל הקדש׃

3:51b.NUM.003.051 ויתן משה את כסף הפדים לאהרן ולבניו על פי יהוה כאשר צוה יהוה את משה׃

4

4:1b.NUM.004.001 וידבר יהוה אל משה ואל אהרן לאמר׃

4:2b.NUM.004.002 נשא את ראש בני קהת מתוך בני לוי למשפחתם לבית אבתם׃

4:3b.NUM.004.003 מבן שלשים שנה ומעלה ועד בן חמשים שנה כל בא לצבא לעשות מלאכה באהל מועד׃

4:4b.NUM.004.004 זאת עבדת בני קהת באהל מועד קדש הקדשים׃

4:5b.NUM.004.005 ובא אהרן ובניו בנסע המחנה והורדו את פרכת המסך וכסו בה את ארן העדת׃

4:6b.NUM.004.006 ונתנו עליו כסוי עור תחש ופרשו בגד כליל תכלת מלמעלה ושמו בדיו׃

4:7b.NUM.004.007 ועל שלחן הפנים יפרשו בגד תכלת ונתנו עליו את הקערת ואת הכפת ואת המנקית ואת קשות הנסך ולחם התמיד עליו יהיה׃

4:8b.NUM.004.008 ופרשו עליהם בגד תולעת שני וכסו אתו במכסה עור תחש ושמו את בדיו׃

4:9b.NUM.004.009 ולקחו בגד תכלת וכסו את מנרת המאור ואת נרתיה ואת מלקחיה ואת מחתתיה ואת כל כלי שמנה אשר ישרתו לה בהם׃

4:10b.NUM.004.010 ונתנו אתה ואת כל כליה אל מכסה עור תחש ונתנו על המוט׃

4:11b.NUM.004.011 ועל מזבח הזהב יפרשו בגד תכלת וכסו אתו במכסה עור תחש ושמו את בדיו׃

4:12b.NUM.004.012 ולקחו את כל כלי השרת אשר ישרתו בם בקדש ונתנו אל בגד תכלת וכסו אותם במכסה עור תחש ונתנו על המוט׃

4:13b.NUM.004.013 ודשנו את המזבח ופרשו עליו בגד ארגמן׃

4:14b.NUM.004.014 ונתנו עליו את כל כליו אשר ישרתו עליו בהם את המחתת את המזלגת ואת היעים ואת המזרקת כל כלי המזבח ופרשו עליו כסוי עור תחש ושמו בדיו׃

4:15b.NUM.004.015 וכלה אהרן ובניו לכסת את הקדש ואת כל כלי הקדש בנסע המחנה ואחרי כן יבאו בני קהת לשאת ולא יגעו אל הקדש ומתו אלה משא בני קהת באהל מועד׃

4:16b.NUM.004.016 ופקדת אלעזר בן אהרן הכהן שמן המאור וקטרת הסמים ומנחת התמיד ושמן המשחה פקדת כל המשכן וכל אשר בו בקדש ובכליו׃

4:17b.NUM.004.017 וידבר יהוה אל משה ואל אהרן לאמר׃

4:18b.NUM.004.018 אל תכריתו את שבט משפחת הקהתי מתוך הלוים׃

4:19b.NUM.004.019 וזאת עשו להם וחיו ולא ימתו בגשתם את קדש הקדשים אהרן ובניו יבאו ושמו אותם איש איש על עבדתו ואל משאו׃

4:20b.NUM.004.020 ולא יבאו לראות כבלע את הקדש ומתו׃

4:21b.NUM.004.021 וידבר יהוה אל משה לאמר׃

4:22b.NUM.004.022 נשא את ראש בני גרשון גם הם לבית אבתם למשפחתם׃

4:23b.NUM.004.023 מבן שלשים שנה ומעלה עד בן חמשים שנה תפקד אותם כל הבא לצבא צבא לעבד עבדה באהל מועד׃

4:24b.NUM.004.024 זאת עבדת משפחת הגרשני לעבד ולמשא׃

4:25b.NUM.004.025 ונשאו את יריעת המשכן ואת אהל מועד מכסהו ומכסה התחש אשר עליו מלמעלה ואת מסך פתח אהל מועד׃

4:26b.NUM.004.026 ואת קלעי החצר ואת מסך פתח שער החצר אשר על המשכן ועל המזבח סביב ואת מיתריהם ואת כל כלי עבדתם ואת כל אשר יעשה להם ועבדו׃

4:27b.NUM.004.027 על פי אהרן ובניו תהיה כל עבדת בני הגרשני לכל משאם ולכל עבדתם ופקדתם עלהם במשמרת את כל משאם׃

4:28b.NUM.004.028 זאת עבדת משפחת בני הגרשני באהל מועד ומשמרתם ביד איתמר בן אהרן הכהן׃

4:29b.NUM.004.029 בני מררי למשפחתם לבית אבתם תפקד אתם׃

4:30b.NUM.004.030 מבן שלשים שנה ומעלה ועד בן חמשים שנה תפקדם כל הבא לצבא לעבד את עבדת אהל מועד׃

4:31b.NUM.004.031 וזאת משמרת משאם לכל עבדתם באהל מועד קרשי המשכן ובריחיו ועמודיו ואדניו׃

4:32b.NUM.004.032 ועמודי החצר סביב ואדניהם ויתדתם ומיתריהם לכל כליהם ולכל עבדתם ובשמת תפקדו את כלי משמרת משאם׃

4:33b.NUM.004.033 זאת עבדת משפחת בני מררי לכל עבדתם באהל מועד ביד איתמר בן אהרן הכהן׃

4:34b.NUM.004.034 ויפקד משה ואהרן ונשיאי העדה את בני הקהתי למשפחתם ולבית אבתם׃

4:35b.NUM.004.035 מבן שלשים שנה ומעלה ועד בן חמשים שנה כל הבא לצבא לעבדה באהל מועד׃

4:36b.NUM.004.036 ויהיו פקדיהם למשפחתם אלפים שבע מאות וחמשים׃

4:37b.NUM.004.037 אלה פקודי משפחת הקהתי כל העבד באהל מועד אשר פקד משה ואהרן על פי יהוה ביד משה׃

4:38b.NUM.004.038 ופקודי בני גרשון למשפחותם ולבית אבתם׃

4:39b.NUM.004.039 מבן שלשים שנה ומעלה ועד בן חמשים שנה כל הבא לצבא לעבדה באהל מועד׃

4:40b.NUM.004.040 ויהיו פקדיהם למשפחתם לבית אבתם אלפים ושש מאות ושלשים׃

4:41b.NUM.004.041 אלה פקודי משפחת בני גרשון כל העבד באהל מועד אשר פקד משה ואהרן על פי יהוה׃

4:42b.NUM.004.042 ופקודי משפחת בני מררי למשפחתם לבית אבתם׃

4:43b.NUM.004.043 מבן שלשים שנה ומעלה ועד בן חמשים שנה כל הבא לצבא לעבדה באהל מועד׃

4:44b.NUM.004.044 ויהיו פקדיהם למשפחתם שלשת אלפים ומאתים׃

4:45b.NUM.004.045 אלה פקודי משפחת בני מררי אשר פקד משה ואהרן על פי יהוה ביד משה׃

4:46b.NUM.004.046 כל הפקדים אשר פקד משה ואהרן ונשיאי ישראל את הלוים למשפחתם ולבית אבתם׃

4:47b.NUM.004.047 מבן שלשים שנה ומעלה ועד בן חמשים שנה כל הבא לעבד עבדת עבדה ועבדת משא באהל מועד׃

4:48b.NUM.004.048 ויהיו פקדיהם שמנת אלפים וחמש מאות ושמנים׃

4:49b.NUM.004.049 על פי יהוה פקד אותם ביד משה איש איש על עבדתו ועל משאו ופקדיו אשר צוה יהוה את משה׃

5

5:1b.NUM.005.001 וידבר יהוה אל משה לאמר׃

5:2b.NUM.005.002 צו את בני ישראל וישלחו מן המחנה כל צרוע וכל זב וכל טמא לנפש׃

5:3b.NUM.005.003 מזכר עד נקבה תשלחו אל מחוץ למחנה תשלחום ולא יטמאו את מחניהם אשר אני שכן בתוכם׃

5:4b.NUM.005.004 ויעשו כן בני ישראל וישלחו אותם אל מחוץ למחנה כאשר דבר יהוה אל משה כן עשו בני ישראל׃

5:5b.NUM.005.005 וידבר יהוה אל משה לאמר׃

5:6b.NUM.005.006 דבר אל בני ישראל איש או אשה כי יעשו מכל חטאת האדם למעל מעל ביהוה ואשמה הנפש ההוא׃

5:7b.NUM.005.007 והתודו את חטאתם אשר עשו והשיב את אשמו בראשו וחמישתו יסף עליו ונתן לאשר אשם לו׃

5:8b.NUM.005.008 ואם אין לאיש גאל להשיב האשם אליו האשם המושב ליהוה לכהן מלבד איל הכפרים אשר יכפר בו עליו׃

5:9b.NUM.005.009 וכל תרומה לכל קדשי בני ישראל אשר יקריבו לכהן לו יהיה׃

5:10b.NUM.005.010 ואיש את קדשיו לו יהיו איש אשר יתן לכהן לו יהיה׃

5:11b.NUM.005.011 וידבר יהוה אל משה לאמר׃

5:12b.NUM.005.012 דבר אל בני ישראל ואמרת אלהם איש איש כי תשטה אשתו ומעלה בו מעל׃

5:13b.NUM.005.013 ושכב איש אתה שכבת זרע ונעלם מעיני אישה ונסתרה והיא נטמאה ועד אין בה והוא לא נתפשה׃

5:14b.NUM.005.014 ועבר עליו רוח קנאה וקנא את אשתו והוא נטמאה או עבר עליו רוח קנאה וקנא את אשתו והיא לא נטמאה׃

5:15b.NUM.005.015 והביא האיש את אשתו אל הכהן והביא את קרבנה עליה עשירת האיפה קמח שערים לא יצק עליו שמן ולא יתן עליו לבנה כי מנחת קנאת הוא מנחת זכרון מזכרת עון׃

5:16b.NUM.005.016 והקריב אתה הכהן והעמדה לפני יהוה׃

5:17b.NUM.005.017 ולקח הכהן מים קדשים בכלי חרש ומן העפר אשר יהיה בקרקע המשכן יקח הכהן ונתן אל המים׃

5:18b.NUM.005.018 והעמיד הכהן את האשה לפני יהוה ופרע את ראש האשה ונתן על כפיה את מנחת הזכרון מנחת קנאת הוא וביד הכהן יהיו מי המרים המאררים׃

5:19b.NUM.005.019 והשביע אתה הכהן ואמר אל האשה אם לא שכב איש אתך ואם לא שטית טמאה תחת אישך הנקי ממי המרים המאררים האלה׃

5:20b.NUM.005.020 ואת כי שטית תחת אישך וכי נטמאת ויתן איש בך את שכבתו מבלעדי אישך׃

5:21b.NUM.005.021 והשביע הכהן את האשה בשבעת האלה ואמר הכהן לאשה יתן יהוה אותך לאלה ולשבעה בתוך עמך בתת יהוה את ירכך נפלת ואת בטנך צבה׃

5:22b.NUM.005.022 ובאו המים המאררים האלה במעיך לצבות בטן ולנפל ירך ואמרה האשה אמן אמן׃

5:23b.NUM.005.023 וכתב את האלת האלה הכהן בספר ומחה אל מי המרים׃

5:24b.NUM.005.024 והשקה את האשה את מי המרים המאררים ובאו בה המים המאררים למרים׃

5:25b.NUM.005.025 ולקח הכהן מיד האשה את מנחת הקנאת והניף את המנחה לפני יהוה והקריב אתה אל המזבח׃

5:26b.NUM.005.026 וקמץ הכהן מן המנחה את אזכרתה והקטיר המזבחה ואחר ישקה את האשה את המים׃

5:27b.NUM.005.027 והשקה את המים והיתה אם נטמאה ותמעל מעל באישה ובאו בה המים המאררים למרים וצבתה בטנה ונפלה ירכה והיתה האשה לאלה בקרב עמה׃

5:28b.NUM.005.028 ואם לא נטמאה האשה וטהרה הוא ונקתה ונזרעה זרע׃

5:29b.NUM.005.029 זאת תורת הקנאת אשר תשטה אשה תחת אישה ונטמאה׃

5:30b.NUM.005.030 או איש אשר תעבר עליו רוח קנאה וקנא את אשתו והעמיד את האשה לפני יהוה ועשה לה הכהן את כל התורה הזאת׃

5:31b.NUM.005.031 ונקה האיש מעון והאשה ההוא תשא את עונה׃

6

6:1b.NUM.006.001 וידבר יהוה אל משה לאמר׃

6:2b.NUM.006.002 דבר אל בני ישראל ואמרת אלהם איש או אשה כי יפלא לנדר נדר נזיר להזיר ליהוה׃

6:3b.NUM.006.003 מיין ושכר יזיר חמץ יין וחמץ שכר לא ישתה וכל משרת ענבים לא ישתה וענבים לחים ויבשים לא יאכל׃

6:4b.NUM.006.004 כל ימי נזרו מכל אשר יעשה מגפן היין מחרצנים ועד זג לא יאכל׃

6:5b.NUM.006.005 כל ימי נדר נזרו תער לא יעבר על ראשו עד מלאת הימם אשר יזיר ליהוה קדש יהיה גדל פרע שער ראשו׃

6:6b.NUM.006.006 כל ימי הזירו ליהוה על נפש מת לא יבא׃

6:7b.NUM.006.007 לאביו ולאמו לאחיו ולאחתו לא יטמא להם במתם כי נזר אלהיו על ראשו׃

6:8b.NUM.006.008 כל ימי נזרו קדש הוא ליהוה׃

6:9b.NUM.006.009 וכי ימות מת עליו בפתע פתאם וטמא ראש נזרו וגלח ראשו ביום טהרתו ביום השביעי יגלחנו׃

6:10b.NUM.006.010 וביום השמיני יבא שתי תרים או שני בני יונה אל הכהן אל פתח אהל מועד׃

6:11b.NUM.006.011 ועשה הכהן אחד לחטאת ואחד לעלה וכפר עליו מאשר חטא על הנפש וקדש את ראשו ביום ההוא׃

6:12b.NUM.006.012 והזיר ליהוה את ימי נזרו והביא כבש בן שנתו לאשם והימים הראשנים יפלו כי טמא נזרו׃

6:13b.NUM.006.013 וזאת תורת הנזיר ביום מלאת ימי נזרו יביא אתו אל פתח אהל מועד׃

6:14b.NUM.006.014 והקריב את קרבנו ליהוה כבש בן שנתו תמים אחד לעלה וכבשה אחת בת שנתה תמימה לחטאת ואיל אחד תמים לשלמים׃

6:15b.NUM.006.015 וסל מצות סלת חלת בלולת בשמן ורקיקי מצות משחים בשמן ומנחתם ונסכיהם׃

6:16b.NUM.006.016 והקריב הכהן לפני יהוה ועשה את חטאתו ואת עלתו׃

6:17b.NUM.006.017 ואת האיל יעשה זבח שלמים ליהוה על סל המצות ועשה הכהן את מנחתו ואת נסכו׃

6:18b.NUM.006.018 וגלח הנזיר פתח אהל מועד את ראש נזרו ולקח את שער ראש נזרו ונתן על האש אשר תחת זבח השלמים׃

6:19b.NUM.006.019 ולקח הכהן את הזרע בשלה מן האיל וחלת מצה אחת מן הסל ורקיק מצה אחד ונתן על כפי הנזיר אחר התגלחו את נזרו׃

6:20b.NUM.006.020 והניף אותם הכהן תנופה לפני יהוה קדש הוא לכהן על חזה התנופה ועל שוק התרומה ואחר ישתה הנזיר יין׃

6:21b.NUM.006.021 זאת תורת הנזיר אשר ידר קרבנו ליהוה על נזרו מלבד אשר תשיג ידו כפי נדרו אשר ידר כן יעשה על תורת נזרו׃

6:22b.NUM.006.022 וידבר יהוה אל משה לאמר׃

6:23b.NUM.006.023 דבר אל אהרן ואל בניו לאמר כה תברכו את בני ישראל אמור להם׃

6:24b.NUM.006.024 יברכך יהוה וישמרך׃

6:25b.NUM.006.025 יאר יהוה פניו אליך ויחנך׃

6:26b.NUM.006.026 ישא יהוה פניו אליך וישם לך שלום׃

6:27b.NUM.006.027 ושמו את שמי על בני ישראל ואני אברכם׃

7

7:1b.NUM.007.001 ויהי ביום כלות משה להקים את המשכן וימשח אתו ויקדש אתו ואת כל כליו ואת המזבח ואת כל כליו וימשחם ויקדש אתם׃

7:2b.NUM.007.002 ויקריבו נשיאי ישראל ראשי בית אבתם הם נשיאי המטת הם העמדים על הפקדים׃

7:3b.NUM.007.003 ויביאו את קרבנם לפני יהוה שש עגלת צב ושני עשר בקר עגלה על שני הנשאים ושור לאחד ויקריבו אותם לפני המשכן׃

7:4b.NUM.007.004 ויאמר יהוה אל משה לאמר׃

7:5b.NUM.007.005 קח מאתם והיו לעבד את עבדת אהל מועד ונתתה אותם אל הלוים איש כפי עבדתו׃

7:6b.NUM.007.006 ויקח משה את העגלת ואת הבקר ויתן אותם אל הלוים׃

7:7b.NUM.007.007 את שתי העגלת ואת ארבעת הבקר נתן לבני גרשון כפי עבדתם׃

7:8b.NUM.007.008 ואת ארבע העגלת ואת שמנת הבקר נתן לבני מררי כפי עבדתם ביד איתמר בן אהרן הכהן׃

7:9b.NUM.007.009 ולבני קהת לא נתן כי עבדת הקדש עלהם בכתף ישאו׃

7:10b.NUM.007.010 ויקריבו הנשאים את חנכת המזבח ביום המשח אתו ויקריבו הנשיאם את קרבנם לפני המזבח׃

7:11b.NUM.007.011 ויאמר יהוה אל משה נשיא אחד ליום נשיא אחד ליום יקריבו את קרבנם לחנכת המזבח׃

7:12b.NUM.007.012 ויהי המקריב ביום הראשון את קרבנו נחשון בן עמינדב למטה יהודה׃

7:13b.NUM.007.013 וקרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן למנחה׃

7:14b.NUM.007.014 כף אחת עשרה זהב מלאה קטרת׃

7:15b.NUM.007.015 פר אחד בן בקר איל אחד כבש אחד בן שנתו לעלה׃

7:16b.NUM.007.016 שעיר עזים אחד לחטאת׃

7:17b.NUM.007.017 ולזבח השלמים בקר שנים אילם חמשה עתודים חמשה כבשים בני שנה חמשה זה קרבן נחשון בן עמינדב׃

7:18b.NUM.007.018 ביום השני הקריב נתנאל בן צוער נשיא יששכר׃

7:19b.NUM.007.019 הקרב את קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן למנחה׃

7:20b.NUM.007.020 כף אחת עשרה זהב מלאה קטרת׃

7:21b.NUM.007.021 פר אחד בן בקר איל אחד כבש אחד בן שנתו לעלה׃

7:22b.NUM.007.022 שעיר עזים אחד לחטאת׃

7:23b.NUM.007.023 ולזבח השלמים בקר שנים אילם חמשה עתודים חמשה כבשים בני שנה חמשה זה קרבן נתנאל בן צוער׃

7:24b.NUM.007.024 ביום השלישי נשיא לבני זבולן אליאב בן חלן׃

7:25b.NUM.007.025 קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן למנחה׃

7:26b.NUM.007.026 כף אחת עשרה זהב מלאה קטרת׃

7:27b.NUM.007.027 פר אחד בן בקר איל אחד כבש אחד בן שנתו לעלה׃

7:28b.NUM.007.028 שעיר עזים אחד לחטאת׃

7:29b.NUM.007.029 ולזבח השלמים בקר שנים אילם חמשה עתדים חמשה כבשים בני שנה חמשה זה קרבן אליאב בן חלן׃

7:30b.NUM.007.030 ביום הרביעי נשיא לבני ראובן אליצור בן שדיאור׃

7:31b.NUM.007.031 קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן למנחה׃

7:32b.NUM.007.032 כף אחת עשרה זהב מלאה קטרת׃

7:33b.NUM.007.033 פר אחד בן בקר איל אחד כבש אחד בן שנתו לעלה׃

7:34b.NUM.007.034 שעיר עזים אחד לחטאת׃

7:35b.NUM.007.035 ולזבח השלמים בקר שנים אילם חמשה עתדים חמשה כבשים בני שנה חמשה זה קרבן אליצור בן שדיאור׃

7:36b.NUM.007.036 ביום החמישי נשיא לבני שמעון שלמיאל בן צורישדי׃

7:37b.NUM.007.037 קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן למנחה׃

7:38b.NUM.007.038 כף אחת עשרה זהב מלאה קטרת׃

7:39b.NUM.007.039 פר אחד בן בקר איל אחד כבש אחד בן שנתו לעלה׃

7:40b.NUM.007.040 שעיר עזים אחד לחטאת׃

7:41b.NUM.007.041 ולזבח השלמים בקר שנים אילם חמשה עתדים חמשה כבשים בני שנה חמשה זה קרבן שלמיאל בן צורישדי׃

7:42b.NUM.007.042 ביום הששי נשיא לבני גד אליסף בן דעואל׃

7:43b.NUM.007.043 קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן למנחה׃

7:44b.NUM.007.044 כף אחת עשרה זהב מלאה קטרת׃

7:45b.NUM.007.045 פר אחד בן בקר איל אחד כבש אחד בן שנתו לעלה׃

7:46b.NUM.007.046 שעיר עזים אחד לחטאת׃

7:47b.NUM.007.047 ולזבח השלמים בקר שנים אילם חמשה עתדים חמשה כבשים בני שנה חמשה זה קרבן אליסף בן דעואל׃

7:48b.NUM.007.048 ביום השביעי נשיא לבני אפרים אלישמע בן עמיהוד׃

7:49b.NUM.007.049 קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן למנחה׃

7:50b.NUM.007.050 כף אחת עשרה זהב מלאה קטרת׃

7:51b.NUM.007.051 פר אחד בן בקר איל אחד כבש אחד בן שנתו לעלה׃

7:52b.NUM.007.052 שעיר עזים אחד לחטאת׃

7:53b.NUM.007.053 ולזבח השלמים בקר שנים אילם חמשה עתדים חמשה כבשים בני שנה חמשה זה קרבן אלישמע בן עמיהוד׃

7:54b.NUM.007.054 ביום השמיני נשיא לבני מנשה גמליאל בן פדהצור׃

7:55b.NUM.007.055 קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן למנחה׃

7:56b.NUM.007.056 כף אחת עשרה זהב מלאה קטרת׃

7:57b.NUM.007.057 פר אחד בן בקר איל אחד כבש אחד בן שנתו לעלה׃

7:58b.NUM.007.058 שעיר עזים אחד לחטאת׃

7:59b.NUM.007.059 ולזבח השלמים בקר שנים אילם חמשה עתדים חמשה כבשים בני שנה חמשה זה קרבן גמליאל בן פדהצור׃

7:60b.NUM.007.060 ביום התשיעי נשיא לבני בנימן אבידן בן גדעני׃

7:61b.NUM.007.061 קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן למנחה׃

7:62b.NUM.007.062 כף אחת עשרה זהב מלאה קטרת׃

7:63b.NUM.007.063 פר אחד בן בקר איל אחד כבש אחד בן שנתו לעלה׃

7:64b.NUM.007.064 שעיר עזים אחד לחטאת׃

7:65b.NUM.007.065 ולזבח השלמים בקר שנים אילם חמשה עתדים חמשה כבשים בני שנה חמשה זה קרבן אבידן בן גדעני׃

7:66b.NUM.007.066 ביום העשירי נשיא לבני דן אחיעזר בן עמישדי׃

7:67b.NUM.007.067 קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן למנחה׃

7:68b.NUM.007.068 כף אחת עשרה זהב מלאה קטרת׃

7:69b.NUM.007.069 פר אחד בן בקר איל אחד כבש אחד בן שנתו לעלה׃

7:70b.NUM.007.070 שעיר עזים אחד לחטאת׃

7:71b.NUM.007.071 ולזבח השלמים בקר שנים אילם חמשה עתדים חמשה כבשים בני שנה חמשה זה קרבן אחיעזר בן עמישדי׃

7:72b.NUM.007.072 ביום עשתי עשר יום נשיא לבני אשר פגעיאל בן עכרן׃

7:73b.NUM.007.073 קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן למנחה׃

7:74b.NUM.007.074 כף אחת עשרה זהב מלאה קטרת׃

7:75b.NUM.007.075 פר אחד בן בקר איל אחד כבש אחד בן שנתו לעלה׃

7:76b.NUM.007.076 שעיר עזים אחד לחטאת׃

7:77b.NUM.007.077 ולזבח השלמים בקר שנים אילם חמשה עתדים חמשה כבשים בני שנה חמשה זה קרבן פגעיאל בן עכרן׃

7:78b.NUM.007.078 ביום שנים עשר יום נשיא לבני נפתלי אחירע בן עינן׃

7:79b.NUM.007.079 קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן למנחה׃

7:80b.NUM.007.080 כף אחת עשרה זהב מלאה קטרת׃

7:81b.NUM.007.081 פר אחד בן בקר איל אחד כבש אחד בן שנתו לעלה׃

7:82b.NUM.007.082 שעיר עזים אחד לחטאת׃

7:83b.NUM.007.083 ולזבח השלמים בקר שנים אילם חמשה עתדים חמשה כבשים בני שנה חמשה זה קרבן אחירע בן עינן׃

7:84b.NUM.007.084 זאת חנכת המזבח ביום המשח אתו מאת נשיאי ישראל קערת כסף שתים עשרה מזרקי כסף שנים עשר כפות זהב שתים עשרה׃

7:85b.NUM.007.085 שלשים ומאה הקערה האחת כסף ושבעים המזרק האחד כל כסף הכלים אלפים וארבע מאות בשקל הקדש׃

7:86b.NUM.007.086 כפות זהב שתים עשרה מלאת קטרת עשרה עשרה הכף בשקל הקדש כל זהב הכפות עשרים ומאה׃

7:87b.NUM.007.087 כל הבקר לעלה שנים עשר פרים אילם שנים עשר כבשים בני שנה שנים עשר ומנחתם ושעירי עזים שנים עשר לחטאת׃

7:88b.NUM.007.088 וכל בקר זבח השלמים עשרים וארבעה פרים אילם ששים עתדים ששים כבשים בני שנה ששים זאת חנכת המזבח אחרי המשח אתו׃

7:89b.NUM.007.089 ובבא משה אל אהל מועד לדבר אתו וישמע את הקול מדבר אליו מעל הכפרת אשר על ארן העדת מבין שני הכרבים וידבר אליו׃

8

8:1b.NUM.008.001 וידבר יהוה אל משה לאמר׃

8:2b.NUM.008.002 דבר אל אהרן ואמרת אליו בהעלתך את הנרת אל מול פני המנורה יאירו שבעת הנרות׃

8:3b.NUM.008.003 ויעש כן אהרן אל מול פני המנורה העלה נרתיה כאשר צוה יהוה את משה׃

8:4b.NUM.008.004 וזה מעשה המנרה מקשה זהב עד ירכה עד פרחה מקשה הוא כמראה אשר הראה יהוה את משה כן עשה את המנרה׃

8:5b.NUM.008.005 וידבר יהוה אל משה לאמר׃

8:6b.NUM.008.006 קח את הלוים מתוך בני ישראל וטהרת אתם׃

8:7b.NUM.008.007 וכה תעשה להם לטהרם הזה עליהם מי חטאת והעבירו תער על כל בשרם וכבסו בגדיהם והטהרו׃

8:8b.NUM.008.008 ולקחו פר בן בקר ומנחתו סלת בלולה בשמן ופר שני בן בקר תקח לחטאת׃

8:9b.NUM.008.009 והקרבת את הלוים לפני אהל מועד והקהלת את כל עדת בני ישראל׃

8:10b.NUM.008.010 והקרבת את הלוים לפני יהוה וסמכו בני ישראל את ידיהם על הלוים׃

8:11b.NUM.008.011 והניף אהרן את הלוים תנופה לפני יהוה מאת בני ישראל והיו לעבד את עבדת יהוה׃

8:12b.NUM.008.012 והלוים יסמכו את ידיהם על ראש הפרים ועשה את האחד חטאת ואת האחד עלה ליהוה לכפר על הלוים׃

8:13b.NUM.008.013 והעמדת את הלוים לפני אהרן ולפני בניו והנפת אתם תנופה ליהוה׃

8:14b.NUM.008.014 והבדלת את הלוים מתוך בני ישראל והיו לי הלוים׃

8:15b.NUM.008.015 ואחרי כן יבאו הלוים לעבד את אהל מועד וטהרת אתם והנפת אתם תנופה׃

8:16b.NUM.008.016 כי נתנים נתנים המה לי מתוך בני ישראל תחת פטרת כל רחם בכור כל מבני ישראל לקחתי אתם לי׃

8:17b.NUM.008.017 כי לי כל בכור בבני ישראל באדם ובבהמה ביום הכתי כל בכור בארץ מצרים הקדשתי אתם לי׃

8:18b.NUM.008.018 ואקח את הלוים תחת כל בכור בבני ישראל׃

8:19b.NUM.008.019 ואתנה את הלוים נתנים לאהרן ולבניו מתוך בני ישראל לעבד את עבדת בני ישראל באהל מועד ולכפר על בני ישראל ולא יהיה בבני ישראל נגף בגשת בני ישראל אל הקדש׃

8:20b.NUM.008.020 ויעש משה ואהרן וכל עדת בני ישראל ללוים ככל אשר צוה יהוה את משה ללוים כן עשו להם בני ישראל׃

8:21b.NUM.008.021 ויתחטאו הלוים ויכבסו בגדיהם וינף אהרן אתם תנופה לפני יהוה ויכפר עליהם אהרן לטהרם׃

8:22b.NUM.008.022 ואחרי כן באו הלוים לעבד את עבדתם באהל מועד לפני אהרן ולפני בניו כאשר צוה יהוה את משה על הלוים כן עשו להם׃

8:23b.NUM.008.023 וידבר יהוה אל משה לאמר׃

8:24b.NUM.008.024 זאת אשר ללוים מבן חמש ועשרים שנה ומעלה יבוא לצבא צבא בעבדת אהל מועד׃

8:25b.NUM.008.025 ומבן חמשים שנה ישוב מצבא העבדה ולא יעבד עוד׃

8:26b.NUM.008.026 ושרת את אחיו באהל מועד לשמר משמרת ועבדה לא יעבד ככה תעשה ללוים במשמרתם׃

9

9:1b.NUM.009.001 וידבר יהוה אל משה במדבר סיני בשנה השנית לצאתם מארץ מצרים בחדש הראשון לאמר׃

9:2b.NUM.009.002 ויעשו בני ישראל את הפסח במועדו׃

9:3b.NUM.009.003 בארבעה עשר יום בחדש הזה בין הערבים תעשו אתו במועדו ככל חקתיו וככל משפטיו תעשו אתו׃

9:4b.NUM.009.004 וידבר משה אל בני ישראל לעשת הפסח׃

9:5b.NUM.009.005 ויעשו את הפסח בראשון בארבעה עשר יום לחדש בין הערבים במדבר סיני ככל אשר צוה יהוה את משה כן עשו בני ישראל׃

9:6b.NUM.009.006 ויהי אנשים אשר היו טמאים לנפש אדם ולא יכלו לעשת הפסח ביום ההוא ויקרבו לפני משה ולפני אהרן ביום ההוא׃

9:7b.NUM.009.007 ויאמרו האנשים ההמה אליו אנחנו טמאים לנפש אדם למה נגרע לבלתי הקרב את קרבן יהוה במעדו בתוך בני ישראל׃

9:8b.NUM.009.008 ויאמר אלהם משה עמדו ואשמעה מה יצוה יהוה לכם׃

9:9b.NUM.009.009 וידבר יהוה אל משה לאמר׃

9:10b.NUM.009.010 דבר אל בני ישראל לאמר איש איש כי יהיה טמא לנפש או בדרך רחקה לכם או לדרתיכם ועשה פסח ליהוה׃

9:11b.NUM.009.011 בחדש השני בארבעה עשר יום בין הערבים יעשו אתו על מצות ומררים יאכלהו׃

9:12b.NUM.009.012 לא ישאירו ממנו עד בקר ועצם לא ישברו בו ככל חקת הפסח יעשו אתו׃

9:13b.NUM.009.013 והאיש אשר הוא טהור ובדרך לא היה וחדל לעשות הפסח ונכרתה הנפש ההוא מעמיה כי קרבן יהוה לא הקריב במעדו חטאו ישא האיש ההוא׃

9:14b.NUM.009.014 וכי יגור אתכם גר ועשה פסח ליהוה כחקת הפסח וכמשפטו כן יעשה חקה אחת יהיה לכם ולגר ולאזרח הארץ׃

9:15b.NUM.009.015 וביום הקים את המשכן כסה הענן את המשכן לאהל העדת ובערב יהיה על המשכן כמראה אש עד בקר׃

9:16b.NUM.009.016 כן יהיה תמיד הענן יכסנו ומראה אש לילה׃

9:17b.NUM.009.017 ולפי העלת הענן מעל האהל ואחרי כן יסעו בני ישראל ובמקום אשר ישכן שם הענן שם יחנו בני ישראל׃

9:18b.NUM.009.018 על פי יהוה יסעו בני ישראל ועל פי יהוה יחנו כל ימי אשר ישכן הענן על המשכן יחנו׃

9:19b.NUM.009.019 ובהאריך הענן על המשכן ימים רבים ושמרו בני ישראל את משמרת יהוה ולא יסעו׃

9:20b.NUM.009.020 ויש אשר יהיה הענן ימים מספר על המשכן על פי יהוה יחנו ועל פי יהוה יסעו׃

9:21b.NUM.009.021 ויש אשר יהיה הענן מערב עד בקר ונעלה הענן בבקר ונסעו או יומם ולילה ונעלה הענן ונסעו׃

9:22b.NUM.009.022 או ימים או חדש או ימים בהאריך הענן על המשכן לשכן עליו יחנו בני ישראל ולא יסעו ובהעלתו יסעו׃

9:23b.NUM.009.023 על פי יהוה יחנו ועל פי יהוה יסעו את משמרת יהוה שמרו על פי יהוה ביד משה׃

10

10:1b.NUM.010.001 וידבר יהוה אל משה לאמר׃

10:2b.NUM.010.002 עשה לך שתי חצוצרת כסף מקשה תעשה אתם והיו לך למקרא העדה ולמסע את המחנות׃

10:3b.NUM.010.003 ותקעו בהן ונועדו אליך כל העדה אל פתח אהל מועד׃

10:4b.NUM.010.004 ואם באחת יתקעו ונועדו אליך הנשיאים ראשי אלפי ישראל׃

10:5b.NUM.010.005 ותקעתם תרועה ונסעו המחנות החנים קדמה׃

10:6b.NUM.010.006 ותקעתם תרועה שנית ונסעו המחנות החנים תימנה תרועה יתקעו למסעיהם׃

10:7b.NUM.010.007 ובהקהיל את הקהל תתקעו ולא תריעו׃

10:8b.NUM.010.008 ובני אהרן הכהנים יתקעו בחצצרות והיו לכם לחקת עולם לדרתיכם׃

10:9b.NUM.010.009 וכי תבאו מלחמה בארצכם על הצר הצרר אתכם והרעתם בחצצרות ונזכרתם לפני יהוה אלהיכם ונושעתם מאיביכם׃

10:10b.NUM.010.010 וביום שמחתכם ובמועדיכם ובראשי חדשיכם ותקעתם בחצצרת על עלתיכם ועל זבחי שלמיכם והיו לכם לזכרון לפני אלהיכם אני יהוה אלהיכם׃

10:11b.NUM.010.011 ויהי בשנה השנית בחדש השני בעשרים בחדש נעלה הענן מעל משכן העדת׃

10:12b.NUM.010.012 ויסעו בני ישראל למסעיהם ממדבר סיני וישכן הענן במדבר פארן׃

10:13b.NUM.010.013 ויסעו בראשנה על פי יהוה ביד משה׃

10:14b.NUM.010.014 ויסע דגל מחנה בני יהודה בראשנה לצבאתם ועל צבאו נחשון בן עמינדב׃

10:15b.NUM.010.015 ועל צבא מטה בני יששכר נתנאל בן צוער׃

10:16b.NUM.010.016 ועל צבא מטה בני זבולן אליאב בן חלון׃

10:17b.NUM.010.017 והורד המשכן ונסעו בני גרשון ובני מררי נשאי המשכן׃

10:18b.NUM.010.018 ונסע דגל מחנה ראובן לצבאתם ועל צבאו אליצור בן שדיאור׃

10:19b.NUM.010.019 ועל צבא מטה בני שמעון שלמיאל בן צורי שדי׃

10:20b.NUM.010.020 ועל צבא מטה בני גד אליסף בן דעואל׃

10:21b.NUM.010.021 ונסעו הקהתים נשאי המקדש והקימו את המשכן עד באם׃

10:22b.NUM.010.022 ונסע דגל מחנה בני אפרים לצבאתם ועל צבאו אלישמע בן עמיהוד׃

10:23b.NUM.010.023 ועל צבא מטה בני מנשה גמליאל בן פדהצור׃

10:24b.NUM.010.024 ועל צבא מטה בני בנימן אבידן בן גדעוני׃

10:25b.NUM.010.025 ונסע דגל מחנה בני דן מאסף לכל המחנת לצבאתם ועל צבאו אחיעזר בן עמישדי׃

10:26b.NUM.010.026 ועל צבא מטה בני אשר פגעיאל בן עכרן׃

10:27b.NUM.010.027 ועל צבא מטה בני נפתלי אחירע בן עינן׃

10:28b.NUM.010.028 אלה מסעי בני ישראל לצבאתם ויסעו׃

10:29b.NUM.010.029 ויאמר משה לחבב בן רעואל המדיני חתן משה נסעים אנחנו אל המקום אשר אמר יהוה אתו אתן לכם לכה אתנו והטבנו לך כי יהוה דבר טוב על ישראל׃

10:30b.NUM.010.030 ויאמר אליו לא אלך כי אם אל ארצי ואל מולדתי אלך׃

10:31b.NUM.010.031 ויאמר אל נא תעזב אתנו כי על כן ידעת חנתנו במדבר והיית לנו לעינים׃

10:32b.NUM.010.032 והיה כי תלך עמנו והיה הטוב ההוא אשר ייטיב יהוה עמנו והטבנו לך׃

10:33b.NUM.010.033 ויסעו מהר יהוה דרך שלשת ימים וארון ברית יהוה נסע לפניהם דרך שלשת ימים לתור להם מנוחה׃

10:34b.NUM.010.034 וענן יהוה עליהם יומם בנסעם מן המחנה׃

10:35b.NUM.010.035 ויהי בנסע הארן ויאמר משה קומה יהוה ויפצו איביך וינסו משנאיך מפניך׃

10:36b.NUM.010.036 ובנחה יאמר שובה יהוה רבבות אלפי ישראל׃

11

11:1b.NUM.011.001 ויהי העם כמתאננים רע באזני יהוה וישמע יהוה ויחר אפו ותבער בם אש יהוה ותאכל בקצה המחנה׃

11:2b.NUM.011.002 ויצעק העם אל משה ויתפלל משה אל יהוה ותשקע האש׃

11:3b.NUM.011.003 ויקרא שם המקום ההוא תבערה כי בערה בם אש יהוה׃

11:4b.NUM.011.004 והאספסף אשר בקרבו התאוו תאוה וישבו ויבכו גם בני ישראל ויאמרו מי יאכלנו בשר׃

11:5b.NUM.011.005 זכרנו את הדגה אשר נאכל במצרים חנם את הקשאים ואת האבטחים ואת החציר ואת הבצלים ואת השומים׃

11:6b.NUM.011.006 ועתה נפשנו יבשה אין כל בלתי אל המן עינינו׃

11:7b.NUM.011.007 והמן כזרע גד הוא ועינו כעין הבדלח׃

11:8b.NUM.011.008 שטו העם ולקטו וטחנו ברחים או דכו במדכה ובשלו בפרור ועשו אתו עגות והיה טעמו כטעם לשד השמן׃

11:9b.NUM.011.009 וברדת הטל על המחנה לילה ירד המן עליו׃

11:10b.NUM.011.010 וישמע משה את העם בכה למשפחתיו איש לפתח אהלו ויחר אף יהוה מאד ובעיני משה רע׃

11:11b.NUM.011.011 ויאמר משה אל יהוה למה הרעת לעבדך ולמה לא מצתי חן בעיניך לשום את משא כל העם הזה עלי׃

11:12b.NUM.011.012 האנכי הריתי את כל העם הזה אם אנכי ילדתיהו כי תאמר אלי שאהו בחיקך כאשר ישא האמן את הינק על האדמה אשר נשבעת לאבתיו׃

11:13b.NUM.011.013 מאין לי בשר לתת לכל העם הזה כי יבכו עלי לאמר תנה לנו בשר ונאכלה׃

11:14b.NUM.011.014 לא אוכל אנכי לבדי לשאת את כל העם הזה כי כבד ממני׃

11:15b.NUM.011.015 ואם ככה את עשה לי הרגני נא הרג אם מצאתי חן בעיניך ואל אראה ברעתי׃

11:16b.NUM.011.016 ויאמר יהוה אל משה אספה לי שבעים איש מזקני ישראל אשר ידעת כי הם זקני העם ושטריו ולקחת אתם אל אהל מועד והתיצבו שם עמך׃

11:17b.NUM.011.017 וירדתי ודברתי עמך שם ואצלתי מן הרוח אשר עליך ושמתי עליהם ונשאו אתך במשא העם ולא תשא אתה לבדך׃

11:18b.NUM.011.018 ואל העם תאמר התקדשו למחר ואכלתם בשר כי בכיתם באזני יהוה לאמר מי יאכלנו בשר כי טוב לנו במצרים ונתן יהוה לכם בשר ואכלתם׃

11:19b.NUM.011.019 לא יום אחד תאכלון ולא יומים ולא חמשה ימים ולא עשרה ימים ולא עשרים יום׃

11:20b.NUM.011.020 עד חדש ימים עד אשר יצא מאפכם והיה לכם לזרא יען כי מאסתם את יהוה אשר בקרבכם ותבכו לפניו לאמר למה זה יצאנו ממצרים׃

11:21b.NUM.011.021 ויאמר משה שש מאות אלף רגלי העם אשר אנכי בקרבו ואתה אמרת בשר אתן להם ואכלו חדש ימים׃

11:22b.NUM.011.022 הצאן ובקר ישחט להם ומצא להם אם את כל דגי הים יאסף להם ומצא להם׃

11:23b.NUM.011.023 ויאמר יהוה אל משה היד יהוה תקצר עתה תראה היקרך דברי אם לא׃

11:24b.NUM.011.024 ויצא משה וידבר אל העם את דברי יהוה ויאסף שבעים איש מזקני העם ויעמד אתם סביבת האהל׃

11:25b.NUM.011.025 וירד יהוה בענן וידבר אליו ויאצל מן הרוח אשר עליו ויתן על שבעים איש הזקנים ויהי כנוח עליהם הרוח ויתנבאו ולא יספו׃

11:26b.NUM.011.026 וישארו שני אנשים במחנה שם האחד אלדד ושם השני מידד ותנח עליהם הרוח והמה בכתבים ולא יצאו האהלה ויתנבאו במחנה׃

11:27b.NUM.011.027 וירץ הנער ויגד למשה ויאמר אלדד ומידד מתנבאים במחנה׃

11:28b.NUM.011.028 ויען יהושע בן נון משרת משה מבחריו ויאמר אדני משה כלאם׃

11:29b.NUM.011.029 ויאמר לו משה המקנא אתה לי ומי יתן כל עם יהוה נביאים כי יתן יהוה את רוחו עליהם׃

11:30b.NUM.011.030 ויאסף משה אל המחנה הוא וזקני ישראל׃

11:31b.NUM.011.031 ורוח נסע מאת יהוה ויגז שלוים מן הים ויטש על המחנה כדרך יום כה וכדרך יום כה סביבות המחנה וכאמתים על פני הארץ׃

11:32b.NUM.011.032 ויקם העם כל היום ההוא וכל הלילה וכל יום המחרת ויאספו את השלו הממעיט אסף עשרה חמרים וישטחו להם שטוח סביבות המחנה׃

11:33b.NUM.011.033 הבשר עודנו בין שניהם טרם יכרת ואף יהוה חרה בעם ויך יהוה בעם מכה רבה מאד׃

11:34b.NUM.011.034 ויקרא את שם המקום ההוא קברות התאוה כי שם קברו את העם המתאוים׃

11:35b.NUM.011.035 מקברות התאוה נסעו העם חצרות ויהיו בחצרות׃

12

12:1b.NUM.012.001 ותדבר מרים ואהרן במשה על אדות האשה הכשית אשר לקח כי אשה כשית לקח׃

12:2b.NUM.012.002 ויאמרו הרק אך במשה דבר יהוה הלא גם בנו דבר וישמע יהוה׃

12:3b.NUM.012.003 והאיש משה ענו מאד מכל האדם אשר על פני האדמה׃

12:4b.NUM.012.004 ויאמר יהוה פתאם אל משה ואל אהרן ואל מרים צאו שלשתכם אל אהל מועד ויצאו שלשתם׃

12:5b.NUM.012.005 וירד יהוה בעמוד ענן ויעמד פתח האהל ויקרא אהרן ומרים ויצאו שניהם׃

12:6b.NUM.012.006 ויאמר שמעו נא דברי אם יהיה נביאכם יהוה במראה אליו אתודע בחלום אדבר בו׃

12:7b.NUM.012.007 לא כן עבדי משה בכל ביתי נאמן הוא׃

12:8b.NUM.012.008 פה אל פה אדבר בו ומראה ולא בחידת ותמנת יהוה יביט ומדוע לא יראתם לדבר בעבדי במשה׃

12:9b.NUM.012.009 ויחר אף יהוה בם וילך׃

12:10b.NUM.012.010 והענן סר מעל האהל והנה מרים מצרעת כשלג ויפן אהרן אל מרים והנה מצרעת׃

12:11b.NUM.012.011 ויאמר אהרן אל משה בי אדני אל נא תשת עלינו חטאת אשר נואלנו ואשר חטאנו׃

12:12b.NUM.012.012 אל נא תהי כמת אשר בצאתו מרחם אמו ויאכל חצי בשרו׃

12:13b.NUM.012.013 ויצעק משה אל יהוה לאמר אל נא רפא נא לה׃

12:14b.NUM.012.014 ויאמר יהוה אל משה ואביה ירק ירק בפניה הלא תכלם שבעת ימים תסגר שבעת ימים מחוץ למחנה ואחר תאסף׃

12:15b.NUM.012.015 ותסגר מרים מחוץ למחנה שבעת ימים והעם לא נסע עד האסף מרים׃

12:16b.NUM.012.016 ואחר נסעו העם מחצרות ויחנו במדבר פארן׃

13

13:1b.NUM.013.001 וידבר יהוה אל משה לאמר׃

13:2b.NUM.013.002 שלח לך אנשים ויתרו את ארץ כנען אשר אני נתן לבני ישראל איש אחד איש אחד למטה אבתיו תשלחו כל נשיא בהם׃

13:3b.NUM.013.003 וישלח אתם משה ממדבר פארן על פי יהוה כלם אנשים ראשי בני ישראל המה׃

13:4b.NUM.013.004 ואלה שמותם למטה ראובן שמוע בן זכור׃

13:5b.NUM.013.005 למטה שמעון שפט בן חורי׃

13:6b.NUM.013.006 למטה יהודה כלב בן יפנה׃

13:7b.NUM.013.007 למטה יששכר יגאל בן יוסף׃

13:8b.NUM.013.008 למטה אפרים הושע בן נון׃

13:9b.NUM.013.009 למטה בנימן פלטי בן רפוא׃

13:10b.NUM.013.010 למטה זבולן גדיאל בן סודי׃

13:11b.NUM.013.011 למטה יוסף למטה מנשה גדי בן סוסי׃

13:12b.NUM.013.012 למטה דן עמיאל בן גמלי׃

13:13b.NUM.013.013 למטה אשר סתור בן מיכאל׃

13:14b.NUM.013.014 למטה נפתלי נחבי בן ופסי׃

13:15b.NUM.013.015 למטה גד גאואל בן מכי׃

13:16b.NUM.013.016 אלה שמות האנשים אשר שלח משה לתור את הארץ ויקרא משה להושע בן נון יהושע׃

13:17b.NUM.013.017 וישלח אתם משה לתור את ארץ כנען ויאמר אלהם עלו זה בנגב ועליתם את ההר׃

13:18b.NUM.013.018 וראיתם את הארץ מה הוא ואת העם הישב עליה החזק הוא הרפה המעט הוא אם רב׃

13:19b.NUM.013.019 ומה הארץ אשר הוא ישב בה הטובה הוא אם רעה ומה הערים אשר הוא יושב בהנה הבמחנים אם במבצרים׃

13:20b.NUM.013.020 ומה הארץ השמנה הוא אם רזה היש בה עץ אם אין והתחזקתם ולקחתם מפרי הארץ והימים ימי בכורי ענבים׃

13:21b.NUM.013.021 ויעלו ויתרו את הארץ ממדבר צן עד רחב לבא חמת׃

13:22b.NUM.013.022 ויעלו בנגב ויבא עד חברון ושם אחימן ששי ותלמי ילידי הענק וחברון שבע שנים נבנתה לפני צען מצרים׃

13:23b.NUM.013.023 ויבאו עד נחל אשכל ויכרתו משם זמורה ואשכול ענבים אחד וישאהו במוט בשנים ומן הרמנים ומן התאנים׃

13:24b.NUM.013.024 למקום ההוא קרא נחל אשכול על אדות האשכול אשר כרתו משם בני ישראל׃

13:25b.NUM.013.025 וישבו מתור הארץ מקץ ארבעים יום׃

13:26b.NUM.013.026 וילכו ויבאו אל משה ואל אהרן ואל כל עדת בני ישראל אל מדבר פארן קדשה וישיבו אותם דבר ואת כל העדה ויראום את פרי הארץ׃

13:27b.NUM.013.027 ויספרו לו ויאמרו באנו אל הארץ אשר שלחתנו וגם זבת חלב ודבש הוא וזה פריה׃

13:28b.NUM.013.028 אפס כי עז העם הישב בארץ והערים בצרות גדלת מאד וגם ילדי הענק ראינו שם׃

13:29b.NUM.013.029 עמלק יושב בארץ הנגב והחתי והיבוסי והאמרי יושב בהר והכנעני ישב על הים ועל יד הירדן׃

13:30b.NUM.013.030 ויהס כלב את העם אל משה ויאמר עלה נעלה וירשנו אתה כי יכול נוכל לה׃

13:31b.NUM.013.031 והאנשים אשר עלו עמו אמרו לא נוכל לעלות אל העם כי חזק הוא ממנו׃

13:32b.NUM.013.032 ויוציאו דבת הארץ אשר תרו אתה אל בני ישראל לאמר הארץ אשר עברנו בה לתור אתה ארץ אכלת יושביה הוא וכל העם אשר ראינו בתוכה אנשי מדות׃

13:33b.NUM.013.033 ושם ראינו את הנפילים בני ענק מן הנפלים ונהי בעינינו כחגבים וכן היינו בעיניהם׃

14

14:1b.NUM.014.001 ותשא כל העדה ויתנו את קולם ויבכו העם בלילה ההוא׃

14:2b.NUM.014.002 וילנו על משה ועל אהרן כל בני ישראל ויאמרו אלהם כל העדה לו מתנו בארץ מצרים או במדבר הזה לו מתנו׃

14:3b.NUM.014.003 ולמה יהוה מביא אתנו אל הארץ הזאת לנפל בחרב נשינו וטפנו יהיו לבז הלוא טוב לנו שוב מצרימה׃

14:4b.NUM.014.004 ויאמרו איש אל אחיו נתנה ראש ונשובה מצרימה׃

14:5b.NUM.014.005 ויפל משה ואהרן על פניהם לפני כל קהל עדת בני ישראל׃

14:6b.NUM.014.006 ויהושע בן נון וכלב בן יפנה מן התרים את הארץ קרעו בגדיהם׃

14:7b.NUM.014.007 ויאמרו אל כל עדת בני ישראל לאמר הארץ אשר עברנו בה לתור אתה טובה הארץ מאד מאד׃

14:8b.NUM.014.008 אם חפץ בנו יהוה והביא אתנו אל הארץ הזאת ונתנה לנו ארץ אשר הוא זבת חלב ודבש׃

14:9b.NUM.014.009 אך ביהוה אל תמרדו ואתם אל תיראו את עם הארץ כי לחמנו הם סר צלם מעליהם ויהוה אתנו אל תיראם׃

14:10b.NUM.014.010 ויאמרו כל העדה לרגום אתם באבנים וכבוד יהוה נראה באהל מועד אל כל בני ישראל׃

14:11b.NUM.014.011 ויאמר יהוה אל משה עד אנה ינאצני העם הזה ועד אנה לא יאמינו בי בכל האתות אשר עשיתי בקרבו׃

14:12b.NUM.014.012 אכנו בדבר ואורשנו ואעשה אתך לגוי גדול ועצום ממנו׃

14:13b.NUM.014.013 ויאמר משה אל יהוה ושמעו מצרים כי העלית בכחך את העם הזה מקרבו׃

14:14b.NUM.014.014 ואמרו אל יושב הארץ הזאת שמעו כי אתה יהוה בקרב העם הזה אשר עין בעין נראה אתה יהוה ועננך עמד עלהם ובעמד ענן אתה הלך לפניהם יומם ובעמוד אש לילה׃

14:15b.NUM.014.015 והמתה את העם הזה כאיש אחד ואמרו הגוים אשר שמעו את שמעך לאמר׃

14:16b.NUM.014.016 מבלתי יכלת יהוה להביא את העם הזה אל הארץ אשר נשבע להם וישחטם במדבר׃

14:17b.NUM.014.017 ועתה יגדל נא כח אדני כאשר דברת לאמר׃

14:18b.NUM.014.018 יהוה ארך אפים ורב חסד נשא עון ופשע ונקה לא ינקה פקד עון אבות על בנים על שלשים ועל רבעים׃

14:19b.NUM.014.019 סלח נא לעון העם הזה כגדל חסדך וכאשר נשאתה לעם הזה ממצרים ועד הנה׃

14:20b.NUM.014.020 ויאמר יהוה סלחתי כדברך׃

14:21b.NUM.014.021 ואולם חי אני וימלא כבוד יהוה את כל הארץ׃

14:22b.NUM.014.022 כי כל האנשים הראים את כבדי ואת אתתי אשר עשיתי במצרים ובמדבר וינסו אתי זה עשר פעמים ולא שמעו בקולי׃

14:23b.NUM.014.023 אם יראו את הארץ אשר נשבעתי לאבתם וכל מנאצי לא יראוה׃

14:24b.NUM.014.024 ועבדי כלב עקב היתה רוח אחרת עמו וימלא אחרי והביאתיו אל הארץ אשר בא שמה וזרעו יורשנה׃

14:25b.NUM.014.025 והעמלקי והכנעני יושב בעמק מחר פנו וסעו לכם המדבר דרך ים סוף׃

14:26b.NUM.014.026 וידבר יהוה אל משה ואל אהרן לאמר׃

14:27b.NUM.014.027 עד מתי לעדה הרעה הזאת אשר המה מלינים עלי את תלנות בני ישראל אשר המה מלינים עלי שמעתי׃

14:28b.NUM.014.028 אמר אלהם חי אני נאם יהוה אם לא כאשר דברתם באזני כן אעשה לכם׃

14:29b.NUM.014.029 במדבר הזה יפלו פגריכם וכל פקדיכם לכל מספרכם מבן עשרים שנה ומעלה אשר הלינתם עלי׃

14:30b.NUM.014.030 אם אתם תבאו אל הארץ אשר נשאתי את ידי לשכן אתכם בה כי אם כלב בן יפנה ויהושע בן נון׃

14:31b.NUM.014.031 וטפכם אשר אמרתם לבז יהיה והביאתי אתם וידעו את הארץ אשר מאסתם בה׃

14:32b.NUM.014.032 ופגריכם אתם יפלו במדבר הזה׃

14:33b.NUM.014.033 ובניכם יהיו רעים במדבר ארבעים שנה ונשאו את זנותיכם עד תם פגריכם במדבר׃

14:34b.NUM.014.034 במספר הימים אשר תרתם את הארץ ארבעים יום יום לשנה יום לשנה תשאו את עונתיכם ארבעים שנה וידעתם את תנואתי׃

14:35b.NUM.014.035 אני יהוה דברתי אם לא זאת אעשה לכל העדה הרעה הזאת הנועדים עלי במדבר הזה יתמו ושם ימתו׃

14:36b.NUM.014.036 והאנשים אשר שלח משה לתור את הארץ וישבו וילונו עליו את כל העדה להוציא דבה על הארץ׃

14:37b.NUM.014.037 וימתו האנשים מוצאי דבת הארץ רעה במגפה לפני יהוה׃

14:38b.NUM.014.038 ויהושע בן נון וכלב בן יפנה חיו מן האנשים ההם ההלכים לתור את הארץ׃

14:39b.NUM.014.039 וידבר משה את הדברים האלה אל כל בני ישראל ויתאבלו העם מאד׃

14:40b.NUM.014.040 וישכמו בבקר ויעלו אל ראש ההר לאמר הננו ועלינו אל המקום אשר אמר יהוה כי חטאנו׃

14:41b.NUM.014.041 ויאמר משה למה זה אתם עברים את פי יהוה והוא לא תצלח׃

14:42b.NUM.014.042 אל תעלו כי אין יהוה בקרבכם ולא תנגפו לפני איביכם׃

14:43b.NUM.014.043 כי העמלקי והכנעני שם לפניכם ונפלתם בחרב כי על כן שבתם מאחרי יהוה ולא יהיה יהוה עמכם׃

14:44b.NUM.014.044 ויעפלו לעלות אל ראש ההר וארון ברית יהוה ומשה לא משו מקרב המחנה׃

14:45b.NUM.014.045 וירד העמלקי והכנעני הישב בהר ההוא ויכום ויכתום עד החרמה׃

15

15:1b.NUM.015.001 וידבר יהוה אל משה לאמר׃

15:2b.NUM.015.002 דבר אל בני ישראל ואמרת אלהם כי תבאו אל ארץ מושבתיכם אשר אני נתן לכם׃

15:3b.NUM.015.003 ועשיתם אשה ליהוה עלה או זבח לפלא נדר או בנדבה או במעדיכם לעשות ריח ניחח ליהוה מן הבקר או מן הצאן׃

15:4b.NUM.015.004 והקריב המקריב קרבנו ליהוה מנחה סלת עשרון בלול ברבעית ההין שמן׃

15:5b.NUM.015.005 ויין לנסך רביעית ההין תעשה על העלה או לזבח לכבש האחד׃

15:6b.NUM.015.006 או לאיל תעשה מנחה סלת שני עשרנים בלולה בשמן שלשית ההין׃

15:7b.NUM.015.007 ויין לנסך שלשית ההין תקריב ריח ניחח ליהוה׃

15:8b.NUM.015.008 וכי תעשה בן בקר עלה או זבח לפלא נדר או שלמים ליהוה׃

15:9b.NUM.015.009 והקריב על בן הבקר מנחה סלת שלשה עשרנים בלול בשמן חצי ההין׃

15:10b.NUM.015.010 ויין תקריב לנסך חצי ההין אשה ריח ניחח ליהוה׃

15:11b.NUM.015.011 ככה יעשה לשור האחד או לאיל האחד או לשה בכבשים או בעזים׃

15:12b.NUM.015.012 כמספר אשר תעשו ככה תעשו לאחד כמספרם׃

15:13b.NUM.015.013 כל האזרח יעשה ככה את אלה להקריב אשה ריח ניחח ליהוה׃

15:14b.NUM.015.014 וכי יגור אתכם גר או אשר בתוככם לדרתיכם ועשה אשה ריח ניחח ליהוה כאשר תעשו כן יעשה׃

15:15b.NUM.015.015 הקהל חקה אחת לכם ולגר הגר חקת עולם לדרתיכם ככם כגר יהיה לפני יהוה׃

15:16b.NUM.015.016 תורה אחת ומשפט אחד יהיה לכם ולגר הגר אתכם׃

15:17b.NUM.015.017 וידבר יהוה אל משה לאמר׃

15:18b.NUM.015.018 דבר אל בני ישראל ואמרת אלהם בבאכם אל הארץ אשר אני מביא אתכם שמה׃

15:19b.NUM.015.019 והיה באכלכם מלחם הארץ תרימו תרומה ליהוה׃

15:20b.NUM.015.020 ראשית ערסתכם חלה תרימו תרומה כתרומת גרן כן תרימו אתה׃

15:21b.NUM.015.021 מראשית ערסתיכם תתנו ליהוה תרומה לדרתיכם׃

15:22b.NUM.015.022 וכי תשגו ולא תעשו את כל המצות האלה אשר דבר יהוה אל משה׃

15:23b.NUM.015.023 את כל אשר צוה יהוה אליכם ביד משה מן היום אשר צוה יהוה והלאה לדרתיכם׃

15:24b.NUM.015.024 והיה אם מעיני העדה נעשתה לשגגה ועשו כל העדה פר בן בקר אחד לעלה לריח ניחח ליהוה ומנחתו ונסכו כמשפט ושעיר עזים אחד לחטת׃

15:25b.NUM.015.025 וכפר הכהן על כל עדת בני ישראל ונסלח להם כי שגגה הוא והם הביאו את קרבנם אשה ליהוה וחטאתם לפני יהוה על שגגתם׃

15:26b.NUM.015.026 ונסלח לכל עדת בני ישראל ולגר הגר בתוכם כי לכל העם בשגגה׃

15:27b.NUM.015.027 ואם נפש אחת תחטא בשגגה והקריבה עז בת שנתה לחטאת׃

15:28b.NUM.015.028 וכפר הכהן על הנפש השגגת בחטאה בשגגה לפני יהוה לכפר עליו ונסלח לו׃

15:29b.NUM.015.029 האזרח בבני ישראל ולגר הגר בתוכם תורה אחת יהיה לכם לעשה בשגגה׃

15:30b.NUM.015.030 והנפש אשר תעשה ביד רמה מן האזרח ומן הגר את יהוה הוא מגדף ונכרתה הנפש ההוא מקרב עמה׃

15:31b.NUM.015.031 כי דבר יהוה בזה ואת מצותו הפר הכרת תכרת הנפש ההוא עונה בה׃

15:32b.NUM.015.032 ויהיו בני ישראל במדבר וימצאו איש מקשש עצים ביום השבת׃

15:33b.NUM.015.033 ויקריבו אתו המצאים אתו מקשש עצים אל משה ואל אהרן ואל כל העדה׃

15:34b.NUM.015.034 ויניחו אתו במשמר כי לא פרש מה יעשה לו׃

15:35b.NUM.015.035 ויאמר יהוה אל משה מות יומת האיש רגום אתו באבנים כל העדה מחוץ למחנה׃

15:36b.NUM.015.036 ויציאו אתו כל העדה אל מחוץ למחנה וירגמו אתו באבנים וימת כאשר צוה יהוה את משה׃

15:37b.NUM.015.037 ויאמר יהוה אל משה לאמר׃

15:38b.NUM.015.038 דבר אל בני ישראל ואמרת אלהם ועשו להם ציצת על כנפי בגדיהם לדרתם ונתנו על ציצת הכנף פתיל תכלת׃

15:39b.NUM.015.039 והיה לכם לציצת וראיתם אתו וזכרתם את כל מצות יהוה ועשיתם אתם ולא תתרו אחרי לבבכם ואחרי עיניכם אשר אתם זנים אחריהם׃

15:40b.NUM.015.040 למען תזכרו ועשיתם את כל מצותי והייתם קדשים לאלהיכם׃

15:41b.NUM.015.041 אני יהוה אלהיכם אשר הוצאתי אתכם מארץ מצרים להיות לכם לאלהים אני יהוה אלהיכם׃

16

16:1b.NUM.016.001 ויקח קרח בן יצהר בן קהת בן לוי ודתן ואבירם בני אליאב ואון בן פלת בני ראובן׃

16:2b.NUM.016.002 ויקמו לפני משה ואנשים מבני ישראל חמשים ומאתים נשיאי עדה קראי מועד אנשי שם׃

16:3b.NUM.016.003 ויקהלו על משה ועל אהרן ויאמרו אלהם רב לכם כי כל העדה כלם קדשים ובתוכם יהוה ומדוע תתנשאו על קהל יהוה׃

16:4b.NUM.016.004 וישמע משה ויפל על פניו׃

16:5b.NUM.016.005 וידבר אל קרח ואל כל עדתו לאמר בקר וידע יהוה את אשר לו ואת הקדוש והקריב אליו ואת אשר יבחר בו יקריב אליו׃

16:6b.NUM.016.006 זאת עשו קחו לכם מחתות קרח וכל עדתו׃

16:7b.NUM.016.007 ותנו בהן אש ושימו עליהן קטרת לפני יהוה מחר והיה האיש אשר יבחר יהוה הוא הקדוש רב לכם בני לוי׃

16:8b.NUM.016.008 ויאמר משה אל קרח שמעו נא בני לוי׃

16:9b.NUM.016.009 המעט מכם כי הבדיל אלהי ישראל אתכם מעדת ישראל להקריב אתכם אליו לעבד את עבדת משכן יהוה ולעמד לפני העדה לשרתם׃

16:10b.NUM.016.010 ויקרב אתך ואת כל אחיך בני לוי אתך ובקשתם גם כהנה׃

16:11b.NUM.016.011 לכן אתה וכל עדתך הנעדים על יהוה ואהרן מה הוא כי תלונו עליו׃

16:12b.NUM.016.012 וישלח משה לקרא לדתן ולאבירם בני אליאב ויאמרו לא נעלה׃

16:13b.NUM.016.013 המעט כי העליתנו מארץ זבת חלב ודבש להמיתנו במדבר כי תשתרר עלינו גם השתרר׃

16:14b.NUM.016.014 אף לא אל ארץ זבת חלב ודבש הביאתנו ותתן לנו נחלת שדה וכרם העיני האנשים ההם תנקר לא נעלה׃

16:15b.NUM.016.015 ויחר למשה מאד ויאמר אל יהוה אל תפן אל מנחתם לא חמור אחד מהם נשאתי ולא הרעתי את אחד מהם׃

16:16b.NUM.016.016 ויאמר משה אל קרח אתה וכל עדתך היו לפני יהוה אתה והם ואהרן מחר׃

16:17b.NUM.016.017 וקחו איש מחתתו ונתתם עליהם קטרת והקרבתם לפני יהוה איש מחתתו חמשים ומאתים מחתת ואתה ואהרן איש מחתתו׃

16:18b.NUM.016.018 ויקחו איש מחתתו ויתנו עליהם אש וישימו עליהם קטרת ויעמדו פתח אהל מועד ומשה ואהרן׃

16:19b.NUM.016.019 ויקהל עליהם קרח את כל העדה אל פתח אהל מועד וירא כבוד יהוה אל כל העדה׃

16:20b.NUM.016.020 וידבר יהוה אל משה ואל אהרן לאמר׃

16:21b.NUM.016.021 הבדלו מתוך העדה הזאת ואכלה אתם כרגע׃

16:22b.NUM.016.022 ויפלו על פניהם ויאמרו אל אלהי הרוחת לכל בשר האיש אחד יחטא ועל כל העדה תקצף׃

16:23b.NUM.016.023 וידבר יהוה אל משה לאמר׃

16:24b.NUM.016.024 דבר אל העדה לאמר העלו מסביב למשכן קרח דתן ואבירם׃

16:25b.NUM.016.025 ויקם משה וילך אל דתן ואבירם וילכו אחריו זקני ישראל׃

16:26b.NUM.016.026 וידבר אל העדה לאמר סורו נא מעל אהלי האנשים הרשעים האלה ואל תגעו בכל אשר להם פן תספו בכל חטאתם׃

16:27b.NUM.016.027 ויעלו מעל משכן קרח דתן ואבירם מסביב ודתן ואבירם יצאו נצבים פתח אהליהם ונשיהם ובניהם וטפם׃

16:28b.NUM.016.028 ויאמר משה בזאת תדעון כי יהוה שלחני לעשות את כל המעשים האלה כי לא מלבי׃

16:29b.NUM.016.029 אם כמות כל האדם ימתון אלה ופקדת כל האדם יפקד עליהם לא יהוה שלחני׃

16:30b.NUM.016.030 ואם בריאה יברא יהוה ופצתה האדמה את פיה ובלעה אתם ואת כל אשר להם וירדו חיים שאלה וידעתם כי נאצו האנשים האלה את יהוה׃

16:31b.NUM.016.031 ויהי ככלתו לדבר את כל הדברים האלה ותבקע האדמה אשר תחתיהם׃

16:32b.NUM.016.032 ותפתח הארץ את פיה ותבלע אתם ואת בתיהם ואת כל האדם אשר לקרח ואת כל הרכוש׃

16:33b.NUM.016.033 וירדו הם וכל אשר להם חיים שאלה ותכס עליהם הארץ ויאבדו מתוך הקהל׃

16:34b.NUM.016.034 וכל ישראל אשר סביבתיהם נסו לקלם כי אמרו פן תבלענו הארץ׃

16:35b.NUM.016.035 ואש יצאה מאת יהוה ותאכל את החמשים ומאתים איש מקריבי הקטרת׃

16:36b.NUM.016.036 וידבר יהוה אל משה לאמר׃

16:37b.NUM.016.037 אמר אל אלעזר בן אהרן הכהן וירם את המחתת מבין השרפה ואת האש זרה הלאה כי קדשו׃

16:38b.NUM.016.038 את מחתות החטאים האלה בנפשתם ועשו אתם רקעי פחים צפוי למזבח כי הקריבם לפני יהוה ויקדשו ויהיו לאות לבני ישראל׃

16:39b.NUM.016.039 ויקח אלעזר הכהן את מחתות הנחשת אשר הקריבו השרפים וירקעום צפוי למזבח׃

16:40b.NUM.016.040 זכרון לבני ישראל למען אשר לא יקרב איש זר אשר לא מזרע אהרן הוא להקטיר קטרת לפני יהוה ולא יהיה כקרח וכעדתו כאשר דבר יהוה ביד משה לו׃

16:41b.NUM.016.041 וילנו כל עדת בני ישראל ממחרת על משה ועל אהרן לאמר אתם המתם את עם יהוה׃

16:42b.NUM.016.042 ויהי בהקהל העדה על משה ועל אהרן ויפנו אל אהל מועד והנה כסהו הענן וירא כבוד יהוה׃

16:43b.NUM.016.043 ויבא משה ואהרן אל פני אהל מועד׃

16:44b.NUM.016.044 וידבר יהוה אל משה לאמר׃

16:45b.NUM.016.045 הרמו מתוך העדה הזאת ואכלה אתם כרגע ויפלו על פניהם׃

16:46b.NUM.016.046 ויאמר משה אל אהרן קח את המחתה ותן עליה אש מעל המזבח ושים קטרת והולך מהרה אל העדה וכפר עליהם כי יצא הקצף מלפני יהוה החל הנגף׃

16:47b.NUM.016.047 ויקח אהרן כאשר דבר משה וירץ אל תוך הקהל והנה החל הנגף בעם ויתן את הקטרת ויכפר על העם׃

16:48b.NUM.016.048 ויעמד בין המתים ובין החיים ותעצר המגפה׃

16:49b.NUM.016.049 ויהיו המתים במגפה ארבעה עשר אלף ושבע מאות מלבד המתים על דבר קרח׃

16:50b.NUM.016.050 וישב אהרן אל משה אל פתח אהל מועד והמגפה נעצרה׃

17

17:1b.NUM.017.001 וידבר יהוה אל משה לאמר׃

17:2b.NUM.017.002 דבר אל בני ישראל וקח מאתם מטה מטה לבית אב מאת כל נשיאהם לבית אבתם שנים עשר מטות איש את שמו תכתב על מטהו׃

17:3b.NUM.017.003 ואת שם אהרן תכתב על מטה לוי כי מטה אחד לראש בית אבותם׃

17:4b.NUM.017.004 והנחתם באהל מועד לפני העדות אשר אועד לכם שמה׃

17:5b.NUM.017.005 והיה האיש אשר אבחר בו מטהו יפרח והשכתי מעלי את תלנות בני ישראל אשר הם מלינם עליכם׃

17:6b.NUM.017.006 וידבר משה אל בני ישראל ויתנו אליו כל נשיאיהם מטה לנשיא אחד מטה לנשיא אחד לבית אבתם שנים עשר מטות ומטה אהרן בתוך מטותם׃

17:7b.NUM.017.007 וינח משה את המטת לפני יהוה באהל העדת׃

17:8b.NUM.017.008 ויהי ממחרת ויבא משה אל אהל העדות והנה פרח מטה אהרן לבית לוי ויצא פרח ויצץ ציץ ויגמל שקדים׃

17:9b.NUM.017.009 ויצא משה את כל המטת מלפני יהוה אל כל בני ישראל ויראו ויקחו איש מטהו׃

17:10b.NUM.017.010 ויאמר יהוה אל משה השב את מטה אהרן לפני העדות למשמרת לאות לבני מרי ותכל תלונתם מעלי ולא ימתו׃

17:11b.NUM.017.011 ויעש משה כאשר צוה יהוה אתו כן עשה׃

17:12b.NUM.017.012 ויאמרו בני ישראל אל משה לאמר הן גוענו אבדנו כלנו אבדנו׃

17:13b.NUM.017.013 כל הקרב הקרב אל משכן יהוה ימות האם תמנו לגוע׃

18

18:1b.NUM.018.001 ויאמר יהוה אל אהרן אתה ובניך ובית אביך אתך תשאו את עון המקדש ואתה ובניך אתך תשאו את עון כהנתכם׃

18:2b.NUM.018.002 וגם את אחיך מטה לוי שבט אביך הקרב אתך וילוו עליך וישרתוך ואתה ובניך אתך לפני אהל העדת׃

18:3b.NUM.018.003 ושמרו משמרתך ומשמרת כל האהל אך אל כלי הקדש ואל המזבח לא יקרבו ולא ימתו גם הם גם אתם׃

18:4b.NUM.018.004 ונלוו עליך ושמרו את משמרת אהל מועד לכל עבדת האהל וזר לא יקרב אליכם׃

18:5b.NUM.018.005 ושמרתם את משמרת הקדש ואת משמרת המזבח ולא יהיה עוד קצף על בני ישראל׃

18:6b.NUM.018.006 ואני הנה לקחתי את אחיכם הלוים מתוך בני ישראל לכם מתנה נתנים ליהוה לעבד את עבדת אהל מועד׃

18:7b.NUM.018.007 ואתה ובניך אתך תשמרו את כהנתכם לכל דבר המזבח ולמבית לפרכת ועבדתם עבדת מתנה אתן את כהנתכם והזר הקרב יומת׃

18:8b.NUM.018.008 וידבר יהוה אל אהרן ואני הנה נתתי לך את משמרת תרומתי לכל קדשי בני ישראל לך נתתים למשחה ולבניך לחק עולם׃

18:9b.NUM.018.009 זה יהיה לך מקדש הקדשים מן האש כל קרבנם לכל מנחתם ולכל חטאתם ולכל אשמם אשר ישיבו לי קדש קדשים לך הוא ולבניך׃

18:10b.NUM.018.010 בקדש הקדשים תאכלנו כל זכר יאכל אתו קדש יהיה לך׃

18:11b.NUM.018.011 וזה לך תרומת מתנם לכל תנופת בני ישראל לך נתתים ולבניך ולבנתיך אתך לחק עולם כל טהור בביתך יאכל אתו׃

18:12b.NUM.018.012 כל חלב יצהר וכל חלב תירוש ודגן ראשיתם אשר יתנו ליהוה לך נתתים׃

18:13b.NUM.018.013 בכורי כל אשר בארצם אשר יביאו ליהוה לך יהיה כל טהור בביתך יאכלנו׃

18:14b.NUM.018.014 כל חרם בישראל לך יהיה׃

18:15b.NUM.018.015 כל פטר רחם לכל בשר אשר יקריבו ליהוה באדם ובבהמה יהיה לך אך פדה תפדה את בכור האדם ואת בכור הבהמה הטמאה תפדה׃

18:16b.NUM.018.016 ופדויו מבן חדש תפדה בערכך כסף חמשת שקלים בשקל הקדש עשרים גרה הוא׃

18:17b.NUM.018.017 אך בכור שור או בכור כשב או בכור עז לא תפדה קדש הם את דמם תזרק על המזבח ואת חלבם תקטיר אשה לריח ניחח ליהוה׃

18:18b.NUM.018.018 ובשרם יהיה לך כחזה התנופה וכשוק הימין לך יהיה׃

18:19b.NUM.018.019 כל תרומת הקדשים אשר ירימו בני ישראל ליהוה נתתי לך ולבניך ולבנתיך אתך לחק עולם ברית מלח עולם הוא לפני יהוה לך ולזרעך אתך׃

18:20b.NUM.018.020 ויאמר יהוה אל אהרן בארצם לא תנחל וחלק לא יהיה לך בתוכם אני חלקך ונחלתך בתוך בני ישראל׃

18:21b.NUM.018.021 ולבני לוי הנה נתתי כל מעשר בישראל לנחלה חלף עבדתם אשר הם עבדים את עבדת אהל מועד׃

18:22b.NUM.018.022 ולא יקרבו עוד בני ישראל אל אהל מועד לשאת חטא למות׃

18:23b.NUM.018.023 ועבד הלוי הוא את עבדת אהל מועד והם ישאו עונם חקת עולם לדרתיכם ובתוך בני ישראל לא ינחלו נחלה׃

18:24b.NUM.018.024 כי את מעשר בני ישראל אשר ירימו ליהוה תרומה נתתי ללוים לנחלה על כן אמרתי להם בתוך בני ישראל לא ינחלו נחלה׃

18:25b.NUM.018.025 וידבר יהוה אל משה לאמר׃

18:26b.NUM.018.026 ואל הלוים תדבר ואמרת אלהם כי תקחו מאת בני ישראל את המעשר אשר נתתי לכם מאתם בנחלתכם והרמתם ממנו תרומת יהוה מעשר מן המעשר׃

18:27b.NUM.018.027 ונחשב לכם תרומתכם כדגן מן הגרן וכמלאה מן היקב׃

18:28b.NUM.018.028 כן תרימו גם אתם תרומת יהוה מכל מעשרתיכם אשר תקחו מאת בני ישראל ונתתם ממנו את תרומת יהוה לאהרן הכהן׃

18:29b.NUM.018.029 מכל מתנתיכם תרימו את כל תרומת יהוה מכל חלבו את מקדשו ממנו׃

18:30b.NUM.018.030 ואמרת אלהם בהרימכם את חלבו ממנו ונחשב ללוים כתבואת גרן וכתבואת יקב׃

18:31b.NUM.018.031 ואכלתם אתו בכל מקום אתם וביתכם כי שכר הוא לכם חלף עבדתכם באהל מועד׃

18:32b.NUM.018.032 ולא תשאו עליו חטא בהרימכם את חלבו ממנו ואת קדשי בני ישראל לא תחללו ולא תמותו׃

19

19:1b.NUM.019.001 וידבר יהוה אל משה ואל אהרן לאמר׃

19:2b.NUM.019.002 זאת חקת התורה אשר צוה יהוה לאמר דבר אל בני ישראל ויקחו אליך פרה אדמה תמימה אשר אין בה מום אשר לא עלה עליה על׃

19:3b.NUM.019.003 ונתתם אתה אל אלעזר הכהן והוציא אתה אל מחוץ למחנה ושחט אתה לפניו׃

19:4b.NUM.019.004 ולקח אלעזר הכהן מדמה באצבעו והזה אל נכח פני אהל מועד מדמה שבע פעמים׃

19:5b.NUM.019.005 ושרף את הפרה לעיניו את ערה ואת בשרה ואת דמה על פרשה ישרף׃

19:6b.NUM.019.006 ולקח הכהן עץ ארז ואזוב ושני תולעת והשליך אל תוך שרפת הפרה׃

19:7b.NUM.019.007 וכבס בגדיו הכהן ורחץ בשרו במים ואחר יבוא אל המחנה וטמא הכהן עד הערב׃

19:8b.NUM.019.008 והשרף אתה יכבס בגדיו במים ורחץ בשרו במים וטמא עד הערב׃

19:9b.NUM.019.009 ואסף איש טהור את אפר הפרה והניח מחוץ למחנה במקום טהור והיתה לעדת בני ישראל למשמרת למי נדה חטאת הוא׃

19:10b.NUM.019.010 וכבס האסף את אפר הפרה את בגדיו וטמא עד הערב והיתה לבני ישראל ולגר הגר בתוכם לחקת עולם׃

19:11b.NUM.019.011 הנגע במת לכל נפש אדם וטמא שבעת ימים׃

19:12b.NUM.019.012 הוא יתחטא בו ביום השלישי וביום השביעי יטהר ואם לא יתחטא ביום השלישי וביום השביעי לא יטהר׃

19:13b.NUM.019.013 כל הנגע במת בנפש האדם אשר ימות ולא יתחטא את משכן יהוה טמא ונכרתה הנפש ההוא מישראל כי מי נדה לא זרק עליו טמא יהיה עוד טמאתו בו׃

19:14b.NUM.019.014 זאת התורה אדם כי ימות באהל כל הבא אל האהל וכל אשר באהל יטמא שבעת ימים׃

19:15b.NUM.019.015 וכל כלי פתוח אשר אין צמיד פתיל עליו טמא הוא׃

19:16b.NUM.019.016 וכל אשר יגע על פני השדה בחלל חרב או במת או בעצם אדם או בקבר יטמא שבעת ימים׃

19:17b.NUM.019.017 ולקחו לטמא מעפר שרפת החטאת ונתן עליו מים חיים אל כלי׃

19:18b.NUM.019.018 ולקח אזוב וטבל במים איש טהור והזה על האהל ועל כל הכלים ועל הנפשות אשר היו שם ועל הנגע בעצם או בחלל או במת או בקבר׃

19:19b.NUM.019.019 והזה הטהר על הטמא ביום השלישי וביום השביעי וחטאו ביום השביעי וכבס בגדיו ורחץ במים וטהר בערב׃

19:20b.NUM.019.020 ואיש אשר יטמא ולא יתחטא ונכרתה הנפש ההוא מתוך הקהל כי את מקדש יהוה טמא מי נדה לא זרק עליו טמא הוא׃

19:21b.NUM.019.021 והיתה להם לחקת עולם ומזה מי הנדה יכבס בגדיו והנגע במי הנדה יטמא עד הערב׃

19:22b.NUM.019.022 וכל אשר יגע בו הטמא יטמא והנפש הנגעת תטמא עד הערב׃

20

20:1b.NUM.020.001 ויבאו בני ישראל כל העדה מדבר צן בחדש הראשון וישב העם בקדש ותמת שם מרים ותקבר שם׃

20:2b.NUM.020.002 ולא היה מים לעדה ויקהלו על משה ועל אהרן׃

20:3b.NUM.020.003 וירב העם עם משה ויאמרו לאמר ולו גוענו בגוע אחינו לפני יהוה׃

20:4b.NUM.020.004 ולמה הבאתם את קהל יהוה אל המדבר הזה למות שם אנחנו ובעירנו׃

20:5b.NUM.020.005 ולמה העליתנו ממצרים להביא אתנו אל המקום הרע הזה לא מקום זרע ותאנה וגפן ורמון ומים אין לשתות׃

20:6b.NUM.020.006 ויבא משה ואהרן מפני הקהל אל פתח אהל מועד ויפלו על פניהם וירא כבוד יהוה אליהם׃

20:7b.NUM.020.007 וידבר יהוה אל משה לאמר׃

20:8b.NUM.020.008 קח את המטה והקהל את העדה אתה ואהרן אחיך ודברתם אל הסלע לעיניהם ונתן מימיו והוצאת להם מים מן הסלע והשקית את העדה ואת בעירם׃

20:9b.NUM.020.009 ויקח משה את המטה מלפני יהוה כאשר צוהו׃

20:10b.NUM.020.010 ויקהלו משה ואהרן את הקהל אל פני הסלע ויאמר להם שמעו נא המרים המן הסלע הזה נוציא לכם מים׃

20:11b.NUM.020.011 וירם משה את ידו ויך את הסלע במטהו פעמים ויצאו מים רבים ותשת העדה ובעירם׃

20:12b.NUM.020.012 ויאמר יהוה אל משה ואל אהרן יען לא האמנתם בי להקדישני לעיני בני ישראל לכן לא תביאו את הקהל הזה אל הארץ אשר נתתי להם׃

20:13b.NUM.020.013 המה מי מריבה אשר רבו בני ישראל את יהוה ויקדש בם׃

20:14b.NUM.020.014 וישלח משה מלאכים מקדש אל מלך אדום כה אמר אחיך ישראל אתה ידעת את כל התלאה אשר מצאתנו׃

20:15b.NUM.020.015 וירדו אבתינו מצרימה ונשב במצרים ימים רבים וירעו לנו מצרים ולאבתינו׃

20:16b.NUM.020.016 ונצעק אל יהוה וישמע קלנו וישלח מלאך ויצאנו ממצרים והנה אנחנו בקדש עיר קצה גבולך׃

20:17b.NUM.020.017 נעברה נא בארצך לא נעבר בשדה ובכרם ולא נשתה מי באר דרך המלך נלך לא נטה ימין ושמאול עד אשר נעבר גבולך׃

20:18b.NUM.020.018 ויאמר אליו אדום לא תעבר בי פן בחרב אצא לקראתך׃

20:19b.NUM.020.019 ויאמרו אליו בני ישראל במסלה נעלה ואם מימיך נשתה אני ומקני ונתתי מכרם רק אין דבר ברגלי אעברה׃

20:20b.NUM.020.020 ויאמר לא תעבר ויצא אדום לקראתו בעם כבד וביד חזקה׃

20:21b.NUM.020.021 וימאן אדום נתן את ישראל עבר בגבלו ויט ישראל מעליו׃

20:22b.NUM.020.022 ויסעו מקדש ויבאו בני ישראל כל העדה הר ההר׃

20:23b.NUM.020.023 ויאמר יהוה אל משה ואל אהרן בהר ההר על גבול ארץ אדום לאמר׃

20:24b.NUM.020.024 יאסף אהרן אל עמיו כי לא יבא אל הארץ אשר נתתי לבני ישראל על אשר מריתם את פי למי מריבה׃

20:25b.NUM.020.025 קח את אהרן ואת אלעזר בנו והעל אתם הר ההר׃

20:26b.NUM.020.026 והפשט את אהרן את בגדיו והלבשתם את אלעזר בנו ואהרן יאסף ומת שם׃

20:27b.NUM.020.027 ויעש משה כאשר צוה יהוה ויעלו אל הר ההר לעיני כל העדה׃

20:28b.NUM.020.028 ויפשט משה את אהרן את בגדיו וילבש אתם את אלעזר בנו וימת אהרן שם בראש ההר וירד משה ואלעזר מן ההר׃

20:29b.NUM.020.029 ויראו כל העדה כי גוע אהרן ויבכו את אהרן שלשים יום כל בית ישראל׃

21

21:1b.NUM.021.001 וישמע הכנעני מלך ערד ישב הנגב כי בא ישראל דרך האתרים וילחם בישראל וישב ממנו שבי׃

21:2b.NUM.021.002 וידר ישראל נדר ליהוה ויאמר אם נתן תתן את העם הזה בידי והחרמתי את עריהם׃

21:3b.NUM.021.003 וישמע יהוה בקול ישראל ויתן את הכנעני ויחרם אתהם ואת עריהם ויקרא שם המקום חרמה׃

21:4b.NUM.021.004 ויסעו מהר ההר דרך ים סוף לסבב את ארץ אדום ותקצר נפש העם בדרך׃

21:5b.NUM.021.005 וידבר העם באלהים ובמשה למה העליתנו ממצרים למות במדבר כי אין לחם ואין מים ונפשנו קצה בלחם הקלקל׃

21:6b.NUM.021.006 וישלח יהוה בעם את הנחשים השרפים וינשכו את העם וימת עם רב מישראל׃

21:7b.NUM.021.007 ויבא העם אל משה ויאמרו חטאנו כי דברנו ביהוה ובך התפלל אל יהוה ויסר מעלינו את הנחש ויתפלל משה בעד העם׃

21:8b.NUM.021.008 ויאמר יהוה אל משה עשה לך שרף ושים אתו על נס והיה כל הנשוך וראה אתו וחי׃

21:9b.NUM.021.009 ויעש משה נחש נחשת וישמהו על הנס והיה אם נשך הנחש את איש והביט אל נחש הנחשת וחי׃

21:10b.NUM.021.010 ויסעו בני ישראל ויחנו באבת׃

21:11b.NUM.021.011 ויסעו מאבת ויחנו בעיי העברים במדבר אשר על פני מואב ממזרח השמש׃

21:12b.NUM.021.012 משם נסעו ויחנו בנחל זרד׃

21:13b.NUM.021.013 משם נסעו ויחנו מעבר ארנון אשר במדבר היצא מגבול האמרי כי ארנון גבול מואב בין מואב ובין האמרי׃

21:14b.NUM.021.014 על כן יאמר בספר מלחמת יהוה את והב בסופה ואת הנחלים ארנון׃

21:15b.NUM.021.015 ואשד הנחלים אשר נטה לשבת ער ונשען לגבול מואב׃

21:16b.NUM.021.016 ומשם בארה הוא הבאר אשר אמר יהוה למשה אסף את העם ואתנה להם מים׃

21:17b.NUM.021.017 אז ישיר ישראל את השירה הזאת עלי באר ענו לה׃

21:18b.NUM.021.018 באר חפרוה שרים כרוה נדיבי העם במחקק במשענתם וממדבר מתנה׃

21:19b.NUM.021.019 וממתנה נחליאל ומנחליאל במות׃

21:20b.NUM.021.020 ומבמות הגיא אשר בשדה מואב ראש הפסגה ונשקפה על פני הישימן׃

21:21b.NUM.021.021 וישלח ישראל מלאכים אל סיחן מלך האמרי לאמר׃

21:22b.NUM.021.022 אעברה בארצך לא נטה בשדה ובכרם לא נשתה מי באר בדרך המלך נלך עד אשר נעבר גבלך׃

21:23b.NUM.021.023 ולא נתן סיחן את ישראל עבר בגבלו ויאסף סיחן את כל עמו ויצא לקראת ישראל המדברה ויבא יהצה וילחם בישראל׃

21:24b.NUM.021.024 ויכהו ישראל לפי חרב ויירש את ארצו מארנן עד יבק עד בני עמון כי עז גבול בני עמון׃

21:25b.NUM.021.025 ויקח ישראל את כל הערים האלה וישב ישראל בכל ערי האמרי בחשבון ובכל בנתיה׃

21:26b.NUM.021.026 כי חשבון עיר סיחן מלך האמרי הוא והוא נלחם במלך מואב הראשון ויקח את כל ארצו מידו עד ארנן׃

21:27b.NUM.021.027 על כן יאמרו המשלים באו חשבון תבנה ותכונן עיר סיחון׃

21:28b.NUM.021.028 כי אש יצאה מחשבון להבה מקרית סיחן אכלה ער מואב בעלי במות ארנן׃

21:29b.NUM.021.029 אוי לך מואב אבדת עם כמוש נתן בניו פליטם ובנתיו בשבית למלך אמרי סיחון׃

21:30b.NUM.021.030 ונירם אבד חשבון עד דיבון ונשים עד נפח אשר עד מידבא׃

21:31b.NUM.021.031 וישב ישראל בארץ האמרי׃

21:32b.NUM.021.032 וישלח משה לרגל את יעזר וילכדו בנתיה ויירש את האמרי אשר שם׃

21:33b.NUM.021.033 ויפנו ויעלו דרך הבשן ויצא עוג מלך הבשן לקראתם הוא וכל עמו למלחמה אדרעי׃

21:34b.NUM.021.034 ויאמר יהוה אל משה אל תירא אתו כי בידך נתתי אתו ואת כל עמו ואת ארצו ועשית לו כאשר עשית לסיחן מלך האמרי אשר יושב בחשבון׃

21:35b.NUM.021.035 ויכו אתו ואת בניו ואת כל עמו עד בלתי השאיר לו שריד ויירשו את ארצו׃

22

22:1b.NUM.022.001 ויסעו בני ישראל ויחנו בערבות מואב מעבר לירדן ירחו׃

22:2b.NUM.022.002 וירא בלק בן צפור את כל אשר עשה ישראל לאמרי׃

22:3b.NUM.022.003 ויגר מואב מפני העם מאד כי רב הוא ויקץ מואב מפני בני ישראל׃

22:4b.NUM.022.004 ויאמר מואב אל זקני מדין עתה ילחכו הקהל את כל סביבתינו כלחך השור את ירק השדה ובלק בן צפור מלך למואב בעת ההוא׃

22:5b.NUM.022.005 וישלח מלאכים אל בלעם בן בעור פתורה אשר על הנהר ארץ בני עמו לקרא לו לאמר הנה עם יצא ממצרים הנה כסה את עין הארץ והוא ישב ממלי׃

22:6b.NUM.022.006 ועתה לכה נא ארה לי את העם הזה כי עצום הוא ממני אולי אוכל נכה בו ואגרשנו מן הארץ כי ידעתי את אשר תברך מברך ואשר תאר יואר׃

22:7b.NUM.022.007 וילכו זקני מואב וזקני מדין וקסמים בידם ויבאו אל בלעם וידברו אליו דברי בלק׃

22:8b.NUM.022.008 ויאמר אליהם לינו פה הלילה והשבתי אתכם דבר כאשר ידבר יהוה אלי וישבו שרי מואב עם בלעם׃

22:9b.NUM.022.009 ויבא אלהים אל בלעם ויאמר מי האנשים האלה עמך׃

22:10b.NUM.022.010 ויאמר בלעם אל האלהים בלק בן צפר מלך מואב שלח אלי׃

22:11b.NUM.022.011 הנה העם היצא ממצרים ויכס את עין הארץ עתה לכה קבה לי אתו אולי אוכל להלחם בו וגרשתיו׃

22:12b.NUM.022.012 ויאמר אלהים אל בלעם לא תלך עמהם לא תאר את העם כי ברוך הוא׃

22:13b.NUM.022.013 ויקם בלעם בבקר ויאמר אל שרי בלק לכו אל ארצכם כי מאן יהוה לתתי להלך עמכם׃

22:14b.NUM.022.014 ויקומו שרי מואב ויבאו אל בלק ויאמרו מאן בלעם הלך עמנו׃

22:15b.NUM.022.015 ויסף עוד בלק שלח שרים רבים ונכבדים מאלה׃

22:16b.NUM.022.016 ויבאו אל בלעם ויאמרו לו כה אמר בלק בן צפור אל נא תמנע מהלך אלי׃

22:17b.NUM.022.017 כי כבד אכבדך מאד וכל אשר תאמר אלי אעשה ולכה נא קבה לי את העם הזה׃

22:18b.NUM.022.018 ויען בלעם ויאמר אל עבדי בלק אם יתן לי בלק מלא ביתו כסף וזהב לא אוכל לעבר את פי יהוה אלהי לעשות קטנה או גדולה׃

22:19b.NUM.022.019 ועתה שבו נא בזה גם אתם הלילה ואדעה מה יסף יהוה דבר עמי׃

22:20b.NUM.022.020 ויבא אלהים אל בלעם לילה ויאמר לו אם לקרא לך באו האנשים קום לך אתם ואך את הדבר אשר אדבר אליך אתו תעשה׃

22:21b.NUM.022.021 ויקם בלעם בבקר ויחבש את אתנו וילך עם שרי מואב׃

22:22b.NUM.022.022 ויחר אף אלהים כי הולך הוא ויתיצב מלאך יהוה בדרך לשטן לו והוא רכב על אתנו ושני נעריו עמו׃

22:23b.NUM.022.023 ותרא האתון את מלאך יהוה נצב בדרך וחרבו שלופה בידו ותט האתון מן הדרך ותלך בשדה ויך בלעם את האתון להטתה הדרך׃

22:24b.NUM.022.024 ויעמד מלאך יהוה במשעול הכרמים גדר מזה וגדר מזה׃

22:25b.NUM.022.025 ותרא האתון את מלאך יהוה ותלחץ אל הקיר ותלחץ את רגל בלעם אל הקיר ויסף להכתה׃

22:26b.NUM.022.026 ויוסף מלאך יהוה עבור ויעמד במקום צר אשר אין דרך לנטות ימין ושמאול׃

22:27b.NUM.022.027 ותרא האתון את מלאך יהוה ותרבץ תחת בלעם ויחר אף בלעם ויך את האתון במקל׃

22:28b.NUM.022.028 ויפתח יהוה את פי האתון ותאמר לבלעם מה עשיתי לך כי הכיתני זה שלש רגלים׃

22:29b.NUM.022.029 ויאמר בלעם לאתון כי התעללת בי לו יש חרב בידי כי עתה הרגתיך׃

22:30b.NUM.022.030 ותאמר האתון אל בלעם הלוא אנכי אתנך אשר רכבת עלי מעודך עד היום הזה ההסכן הסכנתי לעשות לך כה ויאמר לא׃

22:31b.NUM.022.031 ויגל יהוה את עיני בלעם וירא את מלאך יהוה נצב בדרך וחרבו שלפה בידו ויקד וישתחו לאפיו׃

22:32b.NUM.022.032 ויאמר אליו מלאך יהוה על מה הכית את אתנך זה שלוש רגלים הנה אנכי יצאתי לשטן כי ירט הדרך לנגדי׃

22:33b.NUM.022.033 ותראני האתון ותט לפני זה שלש רגלים אולי נטתה מפני כי עתה גם אתכה הרגתי ואותה החייתי׃

22:34b.NUM.022.034 ויאמר בלעם אל מלאך יהוה חטאתי כי לא ידעתי כי אתה נצב לקראתי בדרך ועתה אם רע בעיניך אשובה לי׃

22:35b.NUM.022.035 ויאמר מלאך יהוה אל בלעם לך עם האנשים ואפס את הדבר אשר אדבר אליך אתו תדבר וילך בלעם עם שרי בלק׃

22:36b.NUM.022.036 וישמע בלק כי בא בלעם ויצא לקראתו אל עיר מואב אשר על גבול ארנן אשר בקצה הגבול׃

22:37b.NUM.022.037 ויאמר בלק אל בלעם הלא שלח שלחתי אליך לקרא לך למה לא הלכת אלי האמנם לא אוכל כבדך׃

22:38b.NUM.022.038 ויאמר בלעם אל בלק הנה באתי אליך עתה היכול אוכל דבר מאומה הדבר אשר ישים אלהים בפי אתו אדבר׃

22:39b.NUM.022.039 וילך בלעם עם בלק ויבאו קרית חצות׃

22:40b.NUM.022.040 ויזבח בלק בקר וצאן וישלח לבלעם ולשרים אשר אתו׃

22:41b.NUM.022.041 ויהי בבקר ויקח בלק את בלעם ויעלהו במות בעל וירא משם קצה העם׃

23

23:1b.NUM.023.001 ויאמר בלעם אל בלק בנה לי בזה שבעה מזבחת והכן לי בזה שבעה פרים ושבעה אילים׃

23:2b.NUM.023.002 ויעש בלק כאשר דבר בלעם ויעל בלק ובלעם פר ואיל במזבח׃

23:3b.NUM.023.003 ויאמר בלעם לבלק התיצב על עלתך ואלכה אולי יקרה יהוה לקראתי ודבר מה יראני והגדתי לך וילך שפי׃

23:4b.NUM.023.004 ויקר אלהים אל בלעם ויאמר אליו את שבעת המזבחת ערכתי ואעל פר ואיל במזבח׃

23:5b.NUM.023.005 וישם יהוה דבר בפי בלעם ויאמר שוב אל בלק וכה תדבר׃

23:6b.NUM.023.006 וישב אליו והנה נצב על עלתו הוא וכל שרי מואב׃

23:7b.NUM.023.007 וישא משלו ויאמר מן ארם ינחני בלק מלך מואב מהררי קדם לכה ארה לי יעקב ולכה זעמה ישראל׃

23:8b.NUM.023.008 מה אקב לא קבה אל ומה אזעם לא זעם יהוה׃

23:9b.NUM.023.009 כי מראש צרים אראנו ומגבעות אשורנו הן עם לבדד ישכן ובגוים לא יתחשב׃

23:10b.NUM.023.010 מי מנה עפר יעקב ומספר את רבע ישראל תמת נפשי מות ישרים ותהי אחריתי כמהו׃

23:11b.NUM.023.011 ויאמר בלק אל בלעם מה עשית לי לקב איבי לקחתיך והנה ברכת ברך׃

23:12b.NUM.023.012 ויען ויאמר הלא את אשר ישים יהוה בפי אתו אשמר לדבר׃

23:13b.NUM.023.013 ויאמר אליו בלק לך נא אתי אל מקום אחר אשר תראנו משם אפס קצהו תראה וכלו לא תראה וקבנו לי משם׃

23:14b.NUM.023.014 ויקחהו שדה צפים אל ראש הפסגה ויבן שבעה מזבחת ויעל פר ואיל במזבח׃

23:15b.NUM.023.015 ויאמר אל בלק התיצב כה על עלתך ואנכי אקרה כה׃

23:16b.NUM.023.016 ויקר יהוה אל בלעם וישם דבר בפיו ויאמר שוב אל בלק וכה תדבר׃

23:17b.NUM.023.017 ויבא אליו והנו נצב על עלתו ושרי מואב אתו ויאמר לו בלק מה דבר יהוה׃

23:18b.NUM.023.018 וישא משלו ויאמר קום בלק ושמע האזינה עדי בנו צפר׃

23:19b.NUM.023.019 לא איש אל ויכזב ובן אדם ויתנחם ההוא אמר ולא יעשה ודבר ולא יקימנה׃

23:20b.NUM.023.020 הנה ברך לקחתי וברך ולא אשיבנה׃

23:21b.NUM.023.021 לא הביט און ביעקב ולא ראה עמל בישראל יהוה אלהיו עמו ותרועת מלך בו׃

23:22b.NUM.023.022 אל מוציאם ממצרים כתועפת ראם לו׃

23:23b.NUM.023.023 כי לא נחש ביעקב ולא קסם בישראל כעת יאמר ליעקב ולישראל מה פעל אל׃

23:24b.NUM.023.024 הן עם כלביא יקום וכארי יתנשא לא ישכב עד יאכל טרף ודם חללים ישתה׃

23:25b.NUM.023.025 ויאמר בלק אל בלעם גם קב לא תקבנו גם ברך לא תברכנו׃

23:26b.NUM.023.026 ויען בלעם ויאמר אל בלק הלא דברתי אליך לאמר כל אשר ידבר יהוה אתו אעשה׃

23:27b.NUM.023.027 ויאמר בלק אל בלעם לכה נא אקחך אל מקום אחר אולי יישר בעיני האלהים וקבתו לי משם׃

23:28b.NUM.023.028 ויקח בלק את בלעם ראש הפעור הנשקף על פני הישימן׃

23:29b.NUM.023.029 ויאמר בלעם אל בלק בנה לי בזה שבעה מזבחת והכן לי בזה שבעה פרים ושבעה אילים׃

23:30b.NUM.023.030 ויעש בלק כאשר אמר בלעם ויעל פר ואיל במזבח׃

24

24:1b.NUM.024.001 וירא בלעם כי טוב בעיני יהוה לברך את ישראל ולא הלך כפעם בפעם לקראת נחשים וישת אל המדבר פניו׃

24:2b.NUM.024.002 וישא בלעם את עיניו וירא את ישראל שכן לשבטיו ותהי עליו רוח אלהים׃

24:3b.NUM.024.003 וישא משלו ויאמר נאם בלעם בנו בער ונאם הגבר שתם העין׃

24:4b.NUM.024.004 נאם שמע אמרי אל אשר מחזה שדי יחזה נפל וגלוי עינים׃

24:5b.NUM.024.005 מה טבו אהליך יעקב משכנתיך ישראל׃

24:6b.NUM.024.006 כנחלים נטיו כגנת עלי נהר כאהלים נטע יהוה כארזים עלי מים׃

24:7b.NUM.024.007 יזל מים מדליו וזרעו במים רבים וירם מאגג מלכו ותנשא מלכתו׃

24:8b.NUM.024.008 אל מוציאו ממצרים כתועפת ראם לו יאכל גוים צריו ועצמתיהם יגרם וחציו ימחץ׃

24:9b.NUM.024.009 כרע שכב כארי וכלביא מי יקימנו מברכיך ברוך וארריך ארור׃

24:10b.NUM.024.010 ויחר אף בלק אל בלעם ויספק את כפיו ויאמר בלק אל בלעם לקב איבי קראתיך והנה ברכת ברך זה שלש פעמים׃

24:11b.NUM.024.011 ועתה ברח לך אל מקומך אמרתי כבד אכבדך והנה מנעך יהוה מכבוד׃

24:12b.NUM.024.012 ויאמר בלעם אל בלק הלא גם אל מלאכיך אשר שלחת אלי דברתי לאמר׃

24:13b.NUM.024.013 אם יתן לי בלק מלא ביתו כסף וזהב לא אוכל לעבר את פי יהוה לעשות טובה או רעה מלבי אשר ידבר יהוה אתו אדבר׃

24:14b.NUM.024.014 ועתה הנני הולך לעמי לכה איעצך אשר יעשה העם הזה לעמך באחרית הימים׃

24:15b.NUM.024.015 וישא משלו ויאמר נאם בלעם בנו בער ונאם הגבר שתם העין׃

24:16b.NUM.024.016 נאם שמע אמרי אל וידע דעת עליון מחזה שדי יחזה נפל וגלוי עינים׃

24:17b.NUM.024.017 אראנו ולא עתה אשורנו ולא קרוב דרך כוכב מיעקב וקם שבט מישראל ומחץ פאתי מואב וקרקר כל בני שת׃

24:18b.NUM.024.018 והיה אדום ירשה והיה ירשה שעיר איביו וישראל עשה חיל׃

24:19b.NUM.024.019 וירד מיעקב והאביד שריד מעיר׃

24:20b.NUM.024.020 וירא את עמלק וישא משלו ויאמר ראשית גוים עמלק ואחריתו עדי אבד׃

24:21b.NUM.024.021 וירא את הקיני וישא משלו ויאמר איתן מושבך ושים בסלע קנך׃

24:22b.NUM.024.022 כי אם יהיה לבער קין עד מה אשור תשבך׃

24:23b.NUM.024.023 וישא משלו ויאמר אוי מי יחיה משמו אל׃

24:24b.NUM.024.024 וצים מיד כתים וענו אשור וענו עבר וגם הוא עדי אבד׃

24:25b.NUM.024.025 ויקם בלעם וילך וישב למקמו וגם בלק הלך לדרכו׃

25

25:1b.NUM.025.001 וישב ישראל בשטים ויחל העם לזנות אל בנות מואב׃

25:2b.NUM.025.002 ותקראן לעם לזבחי אלהיהן ויאכל העם וישתחוו לאלהיהן׃

25:3b.NUM.025.003 ויצמד ישראל לבעל פעור ויחר אף יהוה בישראל׃

25:4b.NUM.025.004 ויאמר יהוה אל משה קח את כל ראשי העם והוקע אותם ליהוה נגד השמש וישב חרון אף יהוה מישראל׃

25:5b.NUM.025.005 ויאמר משה אל שפטי ישראל הרגו איש אנשיו הנצמדים לבעל פעור׃

25:6b.NUM.025.006 והנה איש מבני ישראל בא ויקרב אל אחיו את המדינית לעיני משה ולעיני כל עדת בני ישראל והמה בכים פתח אהל מועד׃

25:7b.NUM.025.007 וירא פינחס בן אלעזר בן אהרן הכהן ויקם מתוך העדה ויקח רמח בידו׃

25:8b.NUM.025.008 ויבא אחר איש ישראל אל הקבה וידקר את שניהם את איש ישראל ואת האשה אל קבתה ותעצר המגפה מעל בני ישראל׃

25:9b.NUM.025.009 ויהיו המתים במגפה ארבעה ועשרים אלף׃

25:10b.NUM.025.010 וידבר יהוה אל משה לאמר׃

25:11b.NUM.025.011 פינחס בן אלעזר בן אהרן הכהן השיב את חמתי מעל בני ישראל בקנאו את קנאתי בתוכם ולא כליתי את בני ישראל בקנאתי׃

25:12b.NUM.025.012 לכן אמר הנני נתן לו את בריתי שלום׃

25:13b.NUM.025.013 והיתה לו ולזרעו אחריו ברית כהנת עולם תחת אשר קנא לאלהיו ויכפר על בני ישראל׃

25:14b.NUM.025.014 ושם איש ישראל המכה אשר הכה את המדינית זמרי בן סלוא נשיא בית אב לשמעני׃

25:15b.NUM.025.015 ושם האשה המכה המדינית כזבי בת צור ראש אמות בית אב במדין הוא׃

25:16b.NUM.025.016 וידבר יהוה אל משה לאמר׃

25:17b.NUM.025.017 צרור את המדינים והכיתם אותם׃

25:18b.NUM.025.018 כי צררים הם לכם בנכליהם אשר נכלו לכם על דבר פעור ועל דבר כזבי בת נשיא מדין אחתם המכה ביום המגפה על דבר פעור׃

26

26:1b.NUM.026.001 ויהי אחרי המגפה ויאמר יהוה אל משה ואל אלעזר בן אהרן הכהן לאמר׃

26:2b.NUM.026.002 שאו את ראש כל עדת בני ישראל מבן עשרים שנה ומעלה לבית אבתם כל יצא צבא בישראל׃

26:3b.NUM.026.003 וידבר משה ואלעזר הכהן אתם בערבת מואב על ירדן ירחו לאמר׃

26:4b.NUM.026.004 מבן עשרים שנה ומעלה כאשר צוה יהוה את משה ובני ישראל היצאים מארץ מצרים׃

26:5b.NUM.026.005 ראובן בכור ישראל בני ראובן חנוך משפחת החנכי לפלוא משפחת הפלאי׃

26:6b.NUM.026.006 לחצרן משפחת החצרוני לכרמי משפחת הכרמי׃

26:7b.NUM.026.007 אלה משפחת הראובני ויהיו פקדיהם שלשה וארבעים אלף ושבע מאות ושלשים׃

26:8b.NUM.026.008 ובני פלוא אליאב׃

26:9b.NUM.026.009 ובני אליאב נמואל ודתן ואבירם הוא דתן ואבירם קרואי העדה אשר הצו על משה ועל אהרן בעדת קרח בהצתם על יהוה׃

26:10b.NUM.026.010 ותפתח הארץ את פיה ותבלע אתם ואת קרח במות העדה באכל האש את חמשים ומאתים איש ויהיו לנס׃

26:11b.NUM.026.011 ובני קרח לא מתו׃

26:12b.NUM.026.012 בני שמעון למשפחתם לנמואל משפחת הנמואלי לימין משפחת הימיני ליכין משפחת היכיני׃

26:13b.NUM.026.013 לזרח משפחת הזרחי לשאול משפחת השאולי׃

26:14b.NUM.026.014 אלה משפחת השמעני שנים ועשרים אלף ומאתים׃

26:15b.NUM.026.015 בני גד למשפחתם לצפון משפחת הצפוני לחגי משפחת החגי לשוני משפחת השוני׃

26:16b.NUM.026.016 לאזני משפחת האזני לערי משפחת הערי׃

26:17b.NUM.026.017 לארוד משפחת הארודי לאראלי משפחת האראלי׃

26:18b.NUM.026.018 אלה משפחת בני גד לפקדיהם ארבעים אלף וחמש מאות׃

26:19b.NUM.026.019 בני יהודה ער ואונן וימת ער ואונן בארץ כנען׃

26:20b.NUM.026.020 ויהיו בני יהודה למשפחתם לשלה משפחת השלני לפרץ משפחת הפרצי לזרח משפחת הזרחי׃

26:21b.NUM.026.021 ויהיו בני פרץ לחצרן משפחת החצרני לחמול משפחת החמולי׃

26:22b.NUM.026.022 אלה משפחת יהודה לפקדיהם ששה ושבעים אלף וחמש מאות׃

26:23b.NUM.026.023 בני יששכר למשפחתם תולע משפחת התולעי לפוה משפחת הפוני׃

26:24b.NUM.026.024 לישוב משפחת הישובי לשמרן משפחת השמרני׃

26:25b.NUM.026.025 אלה משפחת יששכר לפקדיהם ארבעה וששים אלף ושלש מאות׃

26:26b.NUM.026.026 בני זבולן למשפחתם לסרד משפחת הסרדי לאלון משפחת האלני ליחלאל משפחת היחלאלי׃

26:27b.NUM.026.027 אלה משפחת הזבולני לפקדיהם ששים אלף וחמש מאות׃

26:28b.NUM.026.028 בני יוסף למשפחתם מנשה ואפרים׃

26:29b.NUM.026.029 בני מנשה למכיר משפחת המכירי ומכיר הוליד את גלעד לגלעד משפחת הגלעדי׃

26:30b.NUM.026.030 אלה בני גלעד איעזר משפחת האיעזרי לחלק משפחת החלקי׃

26:31b.NUM.026.031 ואשריאל משפחת האשראלי ושכם משפחת השכמי׃

26:32b.NUM.026.032 ושמידע משפחת השמידעי וחפר משפחת החפרי׃

26:33b.NUM.026.033 וצלפחד בן חפר לא היו לו בנים כי אם בנות ושם בנות צלפחד מחלה ונעה חגלה מלכה ותרצה׃

26:34b.NUM.026.034 אלה משפחת מנשה ופקדיהם שנים וחמשים אלף ושבע מאות׃

26:35b.NUM.026.035 אלה בני אפרים למשפחתם לשותלח משפחת השתלחי לבכר משפחת הבכרי לתחן משפחת התחני׃

26:36b.NUM.026.036 ואלה בני שותלח לערן משפחת הערני׃

26:37b.NUM.026.037 אלה משפחת בני אפרים לפקדיהם שנים ושלשים אלף וחמש מאות אלה בני יוסף למשפחתם׃

26:38b.NUM.026.038 בני בנימן למשפחתם לבלע משפחת הבלעי לאשבל משפחת האשבלי לאחירם משפחת האחירמי׃

26:39b.NUM.026.039 לשפופם משפחת השופמי לחופם משפחת החופמי׃

26:40b.NUM.026.040 ויהיו בני בלע ארד ונעמן משפחת הארדי לנעמן משפחת הנעמי׃

26:41b.NUM.026.041 אלה בני בנימן למשפחתם ופקדיהם חמשה וארבעים אלף ושש מאות׃

26:42b.NUM.026.042 אלה בני דן למשפחתם לשוחם משפחת השוחמי אלה משפחת דן למשפחתם׃

26:43b.NUM.026.043 כל משפחת השוחמי לפקדיהם ארבעה וששים אלף וארבע מאות׃

26:44b.NUM.026.044 בני אשר למשפחתם לימנה משפחת הימנה לישוי משפחת הישוי לבריעה משפחת הבריעי׃

26:45b.NUM.026.045 לבני בריעה לחבר משפחת החברי למלכיאל משפחת המלכיאלי׃

26:46b.NUM.026.046 ושם בת אשר שרח׃

26:47b.NUM.026.047 אלה משפחת בני אשר לפקדיהם שלשה וחמשים אלף וארבע מאות׃

26:48b.NUM.026.048 בני נפתלי למשפחתם ליחצאל משפחת היחצאלי לגוני משפחת הגוני׃

26:49b.NUM.026.049 ליצר משפחת היצרי לשלם משפחת השלמי׃

26:50b.NUM.026.050 אלה משפחת נפתלי למשפחתם ופקדיהם חמשה וארבעים אלף וארבע מאות׃

26:51b.NUM.026.051 אלה פקודי בני ישראל שש מאות אלף ואלף שבע מאות ושלשים׃

26:52b.NUM.026.052 וידבר יהוה אל משה לאמר׃

26:53b.NUM.026.053 לאלה תחלק הארץ בנחלה במספר שמות׃

26:54b.NUM.026.054 לרב תרבה נחלתו ולמעט תמעיט נחלתו איש לפי פקדיו יתן נחלתו׃

26:55b.NUM.026.055 אך בגורל יחלק את הארץ לשמות מטות אבתם ינחלו׃

26:56b.NUM.026.056 על פי הגורל תחלק נחלתו בין רב למעט׃

26:57b.NUM.026.057 ואלה פקודי הלוי למשפחתם לגרשון משפחת הגרשני לקהת משפחת הקהתי למררי משפחת המררי׃

26:58b.NUM.026.058 אלה משפחת לוי משפחת הלבני משפחת החברני משפחת המחלי משפחת המושי משפחת הקרחי וקהת הולד את עמרם׃

26:59b.NUM.026.059 ושם אשת עמרם יוכבד בת לוי אשר ילדה אתה ללוי במצרים ותלד לעמרם את אהרן ואת משה ואת מרים אחתם׃

26:60b.NUM.026.060 ויולד לאהרן את נדב ואת אביהוא את אלעזר ואת איתמר׃

26:61b.NUM.026.061 וימת נדב ואביהוא בהקריבם אש זרה לפני יהוה׃

26:62b.NUM.026.062 ויהיו פקדיהם שלשה ועשרים אלף כל זכר מבן חדש ומעלה כי לא התפקדו בתוך בני ישראל כי לא נתן להם נחלה בתוך בני ישראל׃

26:63b.NUM.026.063 אלה פקודי משה ואלעזר הכהן אשר פקדו את בני ישראל בערבת מואב על ירדן ירחו׃

26:64b.NUM.026.064 ובאלה לא היה איש מפקודי משה ואהרן הכהן אשר פקדו את בני ישראל במדבר סיני׃

26:65b.NUM.026.065 כי אמר יהוה להם מות ימתו במדבר ולא נותר מהם איש כי אם כלב בן יפנה ויהושע בן נון׃

27

27:1b.NUM.027.001 ותקרבנה בנות צלפחד בן חפר בן גלעד בן מכיר בן מנשה למשפחת מנשה בן יוסף ואלה שמות בנתיו מחלה נעה וחגלה ומלכה ותרצה׃

27:2b.NUM.027.002 ותעמדנה לפני משה ולפני אלעזר הכהן ולפני הנשיאם וכל העדה פתח אהל מועד לאמר׃

27:3b.NUM.027.003 אבינו מת במדבר והוא לא היה בתוך העדה הנועדים על יהוה בעדת קרח כי בחטאו מת ובנים לא היו לו׃

27:4b.NUM.027.004 למה יגרע שם אבינו מתוך משפחתו כי אין לו בן תנה לנו אחזה בתוך אחי אבינו׃

27:5b.NUM.027.005 ויקרב משה את משפטן לפני יהוה׃

27:6b.NUM.027.006 ויאמר יהוה אל משה לאמר׃

27:7b.NUM.027.007 כן בנות צלפחד דברת נתן תתן להם אחזת נחלה בתוך אחי אביהם והעברת את נחלת אביהן להן׃

27:8b.NUM.027.008 ואל בני ישראל תדבר לאמר איש כי ימות ובן אין לו והעברתם את נחלתו לבתו׃

27:9b.NUM.027.009 ואם אין לו בת ונתתם את נחלתו לאחיו׃

27:10b.NUM.027.010 ואם אין לו אחים ונתתם את נחלתו לאחי אביו׃

27:11b.NUM.027.011 ואם אין אחים לאביו ונתתם את נחלתו לשארו הקרב אליו ממשפחתו וירש אתה והיתה לבני ישראל לחקת משפט כאשר צוה יהוה את משה׃

27:12b.NUM.027.012 ויאמר יהוה אל משה עלה אל הר העברים הזה וראה את הארץ אשר נתתי לבני ישראל׃

27:13b.NUM.027.013 וראיתה אתה ונאספת אל עמיך גם אתה כאשר נאסף אהרן אחיך׃

27:14b.NUM.027.014 כאשר מריתם פי במדבר צן במריבת העדה להקדישני במים לעיניהם הם מי מריבת קדש מדבר צן׃

27:15b.NUM.027.015 וידבר משה אל יהוה לאמר׃

27:16b.NUM.027.016 יפקד יהוה אלהי הרוחת לכל בשר איש על העדה׃

27:17b.NUM.027.017 אשר יצא לפניהם ואשר יבא לפניהם ואשר יוציאם ואשר יביאם ולא תהיה עדת יהוה כצאן אשר אין להם רעה׃

27:18b.NUM.027.018 ויאמר יהוה אל משה קח לך את יהושע בן נון איש אשר רוח בו וסמכת את ידך עליו׃

27:19b.NUM.027.019 והעמדת אתו לפני אלעזר הכהן ולפני כל העדה וצויתה אתו לעיניהם׃

27:20b.NUM.027.020 ונתתה מהודך עליו למען ישמעו כל עדת בני ישראל׃

27:21b.NUM.027.021 ולפני אלעזר הכהן יעמד ושאל לו במשפט האורים לפני יהוה על פיו יצאו ועל פיו יבאו הוא וכל בני ישראל אתו וכל העדה׃

27:22b.NUM.027.022 ויעש משה כאשר צוה יהוה אתו ויקח את יהושע ויעמדהו לפני אלעזר הכהן ולפני כל העדה׃

27:23b.NUM.027.023 ויסמך את ידיו עליו ויצוהו כאשר דבר יהוה ביד משה׃

28

28:1b.NUM.028.001 וידבר יהוה אל משה לאמר׃

28:2b.NUM.028.002 צו את בני ישראל ואמרת אלהם את קרבני לחמי לאשי ריח ניחחי תשמרו להקריב לי במועדו׃

28:3b.NUM.028.003 ואמרת להם זה האשה אשר תקריבו ליהוה כבשים בני שנה תמימם שנים ליום עלה תמיד׃

28:4b.NUM.028.004 את הכבש אחד תעשה בבקר ואת הכבש השני תעשה בין הערבים׃

28:5b.NUM.028.005 ועשירית האיפה סלת למנחה בלולה בשמן כתית רביעת ההין׃

28:6b.NUM.028.006 עלת תמיד העשיה בהר סיני לריח ניחח אשה ליהוה׃

28:7b.NUM.028.007 ונסכו רביעת ההין לכבש האחד בקדש הסך נסך שכר ליהוה׃

28:8b.NUM.028.008 ואת הכבש השני תעשה בין הערבים כמנחת הבקר וכנסכו תעשה אשה ריח ניחח ליהוה׃

28:9b.NUM.028.009 וביום השבת שני כבשים בני שנה תמימם ושני עשרנים סלת מנחה בלולה בשמן ונסכו׃

28:10b.NUM.028.010 עלת שבת בשבתו על עלת התמיד ונסכה׃

28:11b.NUM.028.011 ובראשי חדשיכם תקריבו עלה ליהוה פרים בני בקר שנים ואיל אחד כבשים בני שנה שבעה תמימם׃

28:12b.NUM.028.012 ושלשה עשרנים סלת מנחה בלולה בשמן לפר האחד ושני עשרנים סלת מנחה בלולה בשמן לאיל האחד׃

28:13b.NUM.028.013 ועשרן עשרון סלת מנחה בלולה בשמן לכבש האחד עלה ריח ניחח אשה ליהוה׃

28:14b.NUM.028.014 ונסכיהם חצי ההין יהיה לפר ושלישת ההין לאיל ורביעת ההין לכבש יין זאת עלת חדש בחדשו לחדשי השנה׃

28:15b.NUM.028.015 ושעיר עזים אחד לחטאת ליהוה על עלת התמיד יעשה ונסכו׃

28:16b.NUM.028.016 ובחדש הראשון בארבעה עשר יום לחדש פסח ליהוה׃

28:17b.NUM.028.017 ובחמשה עשר יום לחדש הזה חג שבעת ימים מצות יאכל׃

28:18b.NUM.028.018 ביום הראשון מקרא קדש כל מלאכת עבדה לא תעשו׃

28:19b.NUM.028.019 והקרבתם אשה עלה ליהוה פרים בני בקר שנים ואיל אחד ושבעה כבשים בני שנה תמימם יהיו לכם׃

28:20b.NUM.028.020 ומנחתם סלת בלולה בשמן שלשה עשרנים לפר ושני עשרנים לאיל תעשו׃

28:21b.NUM.028.021 עשרון עשרון תעשה לכבש האחד לשבעת הכבשים׃

28:22b.NUM.028.022 ושעיר חטאת אחד לכפר עליכם׃

28:23b.NUM.028.023 מלבד עלת הבקר אשר לעלת התמיד תעשו את אלה׃

28:24b.NUM.028.024 כאלה תעשו ליום שבעת ימים לחם אשה ריח ניחח ליהוה על עולת התמיד יעשה ונסכו׃

28:25b.NUM.028.025 וביום השביעי מקרא קדש יהיה לכם כל מלאכת עבדה לא תעשו׃

28:26b.NUM.028.026 וביום הבכורים בהקריבכם מנחה חדשה ליהוה בשבעתיכם מקרא קדש יהיה לכם כל מלאכת עבדה לא תעשו׃

28:27b.NUM.028.027 והקרבתם עולה לריח ניחח ליהוה פרים בני בקר שנים איל אחד שבעה כבשים בני שנה׃

28:28b.NUM.028.028 ומנחתם סלת בלולה בשמן שלשה עשרנים לפר האחד שני עשרנים לאיל האחד׃

28:29b.NUM.028.029 עשרון עשרון לכבש האחד לשבעת הכבשים׃

28:30b.NUM.028.030 שעיר עזים אחד לכפר עליכם׃

28:31b.NUM.028.031 מלבד עלת התמיד ומנחתו תעשו תמימם יהיו לכם ונסכיהם׃

29

29:1b.NUM.029.001 ובחדש השביעי באחד לחדש מקרא קדש יהיה לכם כל מלאכת עבדה לא תעשו יום תרועה יהיה לכם׃

29:2b.NUM.029.002 ועשיתם עלה לריח ניחח ליהוה פר בן בקר אחד איל אחד כבשים בני שנה שבעה תמימם׃

29:3b.NUM.029.003 ומנחתם סלת בלולה בשמן שלשה עשרנים לפר שני עשרנים לאיל׃

29:4b.NUM.029.004 ועשרון אחד לכבש האחד לשבעת הכבשים׃

29:5b.NUM.029.005 ושעיר עזים אחד חטאת לכפר עליכם׃

29:6b.NUM.029.006 מלבד עלת החדש ומנחתה ועלת התמיד ומנחתה ונסכיהם כמשפטם לריח ניחח אשה ליהוה׃

29:7b.NUM.029.007 ובעשור לחדש השביעי הזה מקרא קדש יהיה לכם ועניתם את נפשתיכם כל מלאכה לא תעשו׃

29:8b.NUM.029.008 והקרבתם עלה ליהוה ריח ניחח פר בן בקר אחד איל אחד כבשים בני שנה שבעה תמימם יהיו לכם׃

29:9b.NUM.029.009 ומנחתם סלת בלולה בשמן שלשה עשרנים לפר שני עשרנים לאיל האחד׃

29:10b.NUM.029.010 עשרון עשרון לכבש האחד לשבעת הכבשים׃

29:11b.NUM.029.011 שעיר עזים אחד חטאת מלבד חטאת הכפרים ועלת התמיד ומנחתה ונסכיהם׃

29:12b.NUM.029.012 ובחמשה עשר יום לחדש השביעי מקרא קדש יהיה לכם כל מלאכת עבדה לא תעשו וחגתם חג ליהוה שבעת ימים׃

29:13b.NUM.029.013 והקרבתם עלה אשה ריח ניחח ליהוה פרים בני בקר שלשה עשר אילם שנים כבשים בני שנה ארבעה עשר תמימם יהיו׃

29:14b.NUM.029.014 ומנחתם סלת בלולה בשמן שלשה עשרנים לפר האחד לשלשה עשר פרים שני עשרנים לאיל האחד לשני האילם׃

29:15b.NUM.029.015 ועשרון עשרון לכבש האחד לארבעה עשר כבשים׃

29:16b.NUM.029.016 ושעיר עזים אחד חטאת מלבד עלת התמיד מנחתה ונסכה׃

29:17b.NUM.029.017 וביום השני פרים בני בקר שנים עשר אילם שנים כבשים בני שנה ארבעה עשר תמימם׃

29:18b.NUM.029.018 ומנחתם ונסכיהם לפרים לאילם ולכבשים במספרם כמשפט׃

29:19b.NUM.029.019 ושעיר עזים אחד חטאת מלבד עלת התמיד ומנחתה ונסכיהם׃

29:20b.NUM.029.020 וביום השלישי פרים עשתי עשר אילם שנים כבשים בני שנה ארבעה עשר תמימם׃

29:21b.NUM.029.021 ומנחתם ונסכיהם לפרים לאילם ולכבשים במספרם כמשפט׃

29:22b.NUM.029.022 ושעיר חטאת אחד מלבד עלת התמיד ומנחתה ונסכה׃

29:23b.NUM.029.023 וביום הרביעי פרים עשרה אילם שנים כבשים בני שנה ארבעה עשר תמימם׃

29:24b.NUM.029.024 מנחתם ונסכיהם לפרים לאילם ולכבשים במספרם כמשפט׃

29:25b.NUM.029.025 ושעיר עזים אחד חטאת מלבד עלת התמיד מנחתה ונסכה׃

29:26b.NUM.029.026 וביום החמישי פרים תשעה אילם שנים כבשים בני שנה ארבעה עשר תמימם׃

29:27b.NUM.029.027 ומנחתם ונסכיהם לפרים לאילם ולכבשים במספרם כמשפט׃

29:28b.NUM.029.028 ושעיר חטאת אחד מלבד עלת התמיד ומנחתה ונסכה׃

29:29b.NUM.029.029 וביום הששי פרים שמנה אילם שנים כבשים בני שנה ארבעה עשר תמימם׃

29:30b.NUM.029.030 ומנחתם ונסכיהם לפרים לאילם ולכבשים במספרם כמשפט׃

29:31b.NUM.029.031 ושעיר חטאת אחד מלבד עלת התמיד מנחתה ונסכיה׃

29:32b.NUM.029.032 וביום השביעי פרים שבעה אילם שנים כבשים בני שנה ארבעה עשר תמימם׃

29:33b.NUM.029.033 ומנחתם ונסכהם לפרים לאילם ולכבשים במספרם כמשפטם׃

29:34b.NUM.029.034 ושעיר חטאת אחד מלבד עלת התמיד מנחתה ונסכה׃

29:35b.NUM.029.035 ביום השמיני עצרת תהיה לכם כל מלאכת עבדה לא תעשו׃

29:36b.NUM.029.036 והקרבתם עלה אשה ריח ניחח ליהוה פר אחד איל אחד כבשים בני שנה שבעה תמימם׃

29:37b.NUM.029.037 מנחתם ונסכיהם לפר לאיל ולכבשים במספרם כמשפט׃

29:38b.NUM.029.038 ושעיר חטאת אחד מלבד עלת התמיד ומנחתה ונסכה׃

29:39b.NUM.029.039 אלה תעשו ליהוה במועדיכם לבד מנדריכם ונדבתיכם לעלתיכם ולמנחתיכם ולנסכיכם ולשלמיכם׃

29:40b.NUM.029.040 ויאמר משה אל בני ישראל ככל אשר צוה יהוה את משה׃

30

30:1b.NUM.030.001 וידבר משה אל ראשי המטות לבני ישראל לאמר זה הדבר אשר צוה יהוה׃

30:2b.NUM.030.002 איש כי ידר נדר ליהוה או השבע שבעה לאסר אסר על נפשו לא יחל דברו ככל היצא מפיו יעשה׃

30:3b.NUM.030.003 ואשה כי תדר נדר ליהוה ואסרה אסר בבית אביה בנעריה׃

30:4b.NUM.030.004 ושמע אביה את נדרה ואסרה אשר אסרה על נפשה והחריש לה אביה וקמו כל נדריה וכל אסר אשר אסרה על נפשה יקום׃

30:5b.NUM.030.005 ואם הניא אביה אתה ביום שמעו כל נדריה ואסריה אשר אסרה על נפשה לא יקום ויהוה יסלח לה כי הניא אביה אתה׃

30:6b.NUM.030.006 ואם היו תהיה לאיש ונדריה עליה או מבטא שפתיה אשר אסרה על נפשה׃

30:7b.NUM.030.007 ושמע אישה ביום שמעו והחריש לה וקמו נדריה ואסרה אשר אסרה על נפשה יקמו׃

30:8b.NUM.030.008 ואם ביום שמע אישה יניא אותה והפר את נדרה אשר עליה ואת מבטא שפתיה אשר אסרה על נפשה ויהוה יסלח לה׃

30:9b.NUM.030.009 ונדר אלמנה וגרושה כל אשר אסרה על נפשה יקום עליה׃

30:10b.NUM.030.010 ואם בית אישה נדרה או אסרה אסר על נפשה בשבעה׃

30:11b.NUM.030.011 ושמע אישה והחרש לה לא הניא אתה וקמו כל נדריה וכל אסר אשר אסרה על נפשה יקום׃

30:12b.NUM.030.012 ואם הפר יפר אתם אישה ביום שמעו כל מוצא שפתיה לנדריה ולאסר נפשה לא יקום אישה הפרם ויהוה יסלח לה׃

30:13b.NUM.030.013 כל נדר וכל שבעת אסר לענת נפש אישה יקימנו ואישה יפרנו׃

30:14b.NUM.030.014 ואם החרש יחריש לה אישה מיום אל יום והקים את כל נדריה או את כל אסריה אשר עליה הקים אתם כי החרש לה ביום שמעו׃

30:15b.NUM.030.015 ואם הפר יפר אתם אחרי שמעו ונשא את עונה׃

30:16b.NUM.030.016 אלה החקים אשר צוה יהוה את משה בין איש לאשתו בין אב לבתו בנעריה בית אביה׃

31

31:1b.NUM.031.001 וידבר יהוה אל משה לאמר׃

31:2b.NUM.031.002 נקם נקמת בני ישראל מאת המדינים אחר תאסף אל עמיך׃

31:3b.NUM.031.003 וידבר משה אל העם לאמר החלצו מאתכם אנשים לצבא ויהיו על מדין לתת נקמת יהוה במדין׃

31:4b.NUM.031.004 אלף למטה אלף למטה לכל מטות ישראל תשלחו לצבא׃

31:5b.NUM.031.005 וימסרו מאלפי ישראל אלף למטה שנים עשר אלף חלוצי צבא׃

31:6b.NUM.031.006 וישלח אתם משה אלף למטה לצבא אתם ואת פינחס בן אלעזר הכהן לצבא וכלי הקדש וחצצרות התרועה בידו׃

31:7b.NUM.031.007 ויצבאו על מדין כאשר צוה יהוה את משה ויהרגו כל זכר׃

31:8b.NUM.031.008 ואת מלכי מדין הרגו על חלליהם את אוי ואת רקם ואת צור ואת חור ואת רבע חמשת מלכי מדין ואת בלעם בן בעור הרגו בחרב׃

31:9b.NUM.031.009 וישבו בני ישראל את נשי מדין ואת טפם ואת כל בהמתם ואת כל מקנהם ואת כל חילם בזזו׃

31:10b.NUM.031.010 ואת כל עריהם במושבתם ואת כל טירתם שרפו באש׃

31:11b.NUM.031.011 ויקחו את כל השלל ואת כל המלקוח באדם ובבהמה׃

31:12b.NUM.031.012 ויבאו אל משה ואל אלעזר הכהן ואל עדת בני ישראל את השבי ואת המלקוח ואת השלל אל המחנה אל ערבת מואב אשר על ירדן ירחו׃

31:13b.NUM.031.013 ויצאו משה ואלעזר הכהן וכל נשיאי העדה לקראתם אל מחוץ למחנה׃

31:14b.NUM.031.014 ויקצף משה על פקודי החיל שרי האלפים ושרי המאות הבאים מצבא המלחמה׃

31:15b.NUM.031.015 ויאמר אליהם משה החייתם כל נקבה׃

31:16b.NUM.031.016 הן הנה היו לבני ישראל בדבר בלעם למסר מעל ביהוה על דבר פעור ותהי המגפה בעדת יהוה׃

31:17b.NUM.031.017 ועתה הרגו כל זכר בטף וכל אשה ידעת איש למשכב זכר הרגו׃

31:18b.NUM.031.018 וכל הטף בנשים אשר לא ידעו משכב זכר החיו לכם׃

31:19b.NUM.031.019 ואתם חנו מחוץ למחנה שבעת ימים כל הרג נפש וכל נגע בחלל תתחטאו ביום השלישי וביום השביעי אתם ושביכם׃

31:20b.NUM.031.020 וכל בגד וכל כלי עור וכל מעשה עזים וכל כלי עץ תתחטאו׃

31:21b.NUM.031.021 ויאמר אלעזר הכהן אל אנשי הצבא הבאים למלחמה זאת חקת התורה אשר צוה יהוה את משה׃

31:22b.NUM.031.022 אך את הזהב ואת הכסף את הנחשת את הברזל את הבדיל ואת העפרת׃

31:23b.NUM.031.023 כל דבר אשר יבא באש תעבירו באש וטהר אך במי נדה יתחטא וכל אשר לא יבא באש תעבירו במים׃

31:24b.NUM.031.024 וכבסתם בגדיכם ביום השביעי וטהרתם ואחר תבאו אל המחנה׃

31:25b.NUM.031.025 ויאמר יהוה אל משה לאמר׃

31:26b.NUM.031.026 שא את ראש מלקוח השבי באדם ובבהמה אתה ואלעזר הכהן וראשי אבות העדה׃

31:27b.NUM.031.027 וחצית את המלקוח בין תפשי המלחמה היצאים לצבא ובין כל העדה׃

31:28b.NUM.031.028 והרמת מכס ליהוה מאת אנשי המלחמה היצאים לצבא אחד נפש מחמש המאות מן האדם ומן הבקר ומן החמרים ומן הצאן׃

31:29b.NUM.031.029 ממחציתם תקחו ונתתה לאלעזר הכהן תרומת יהוה׃

31:30b.NUM.031.030 וממחצת בני ישראל תקח אחד אחז מן החמשים מן האדם מן הבקר מן החמרים ומן הצאן מכל הבהמה ונתתה אתם ללוים שמרי משמרת משכן יהוה׃

31:31b.NUM.031.031 ויעש משה ואלעזר הכהן כאשר צוה יהוה את משה׃

31:32b.NUM.031.032 ויהי המלקוח יתר הבז אשר בזזו עם הצבא צאן שש מאות אלף ושבעים אלף וחמשת אלפים׃

31:33b.NUM.031.033 ובקר שנים ושבעים אלף׃

31:34b.NUM.031.034 וחמרים אחד וששים אלף׃

31:35b.NUM.031.035 ונפש אדם מן הנשים אשר לא ידעו משכב זכר כל נפש שנים ושלשים אלף׃

31:36b.NUM.031.036 ותהי המחצה חלק היצאים בצבא מספר הצאן שלש מאות אלף ושלשים אלף ושבעת אלפים וחמש מאות׃

31:37b.NUM.031.037 ויהי המכס ליהוה מן הצאן שש מאות חמש ושבעים׃

31:38b.NUM.031.038 והבקר ששה ושלשים אלף ומכסם ליהוה שנים ושבעים׃

31:39b.NUM.031.039 וחמרים שלשים אלף וחמש מאות ומכסם ליהוה אחד וששים׃

31:40b.NUM.031.040 ונפש אדם ששה עשר אלף ומכסם ליהוה שנים ושלשים נפש׃

31:41b.NUM.031.041 ויתן משה את מכס תרומת יהוה לאלעזר הכהן כאשר צוה יהוה את משה׃

31:42b.NUM.031.042 וממחצית בני ישראל אשר חצה משה מן האנשים הצבאים׃

31:43b.NUM.031.043 ותהי מחצת העדה מן הצאן שלש מאות אלף ושלשים אלף שבעת אלפים וחמש מאות׃

31:44b.NUM.031.044 ובקר ששה ושלשים אלף׃

31:45b.NUM.031.045 וחמרים שלשים אלף וחמש מאות׃

31:46b.NUM.031.046 ונפש אדם ששה עשר אלף׃

31:47b.NUM.031.047 ויקח משה ממחצת בני ישראל את האחז אחד מן החמשים מן האדם ומן הבהמה ויתן אתם ללוים שמרי משמרת משכן יהוה כאשר צוה יהוה את משה׃

31:48b.NUM.031.048 ויקרבו אל משה הפקדים אשר לאלפי הצבא שרי האלפים ושרי המאות׃

31:49b.NUM.031.049 ויאמרו אל משה עבדיך נשאו את ראש אנשי המלחמה אשר בידנו ולא נפקד ממנו איש׃

31:50b.NUM.031.050 ונקרב את קרבן יהוה איש אשר מצא כלי זהב אצעדה וצמיד טבעת עגיל וכומז לכפר על נפשתינו לפני יהוה׃

31:51b.NUM.031.051 ויקח משה ואלעזר הכהן את הזהב מאתם כל כלי מעשה׃

31:52b.NUM.031.052 ויהי כל זהב התרומה אשר הרימו ליהוה ששה עשר אלף שבע מאות וחמשים שקל מאת שרי האלפים ומאת שרי המאות׃

31:53b.NUM.031.053 אנשי הצבא בזזו איש לו׃

31:54b.NUM.031.054 ויקח משה ואלעזר הכהן את הזהב מאת שרי האלפים והמאות ויבאו אתו אל אהל מועד זכרון לבני ישראל לפני יהוה׃

32

32:1b.NUM.032.001 ומקנה רב היה לבני ראובן ולבני גד עצום מאד ויראו את ארץ יעזר ואת ארץ גלעד והנה המקום מקום מקנה׃

32:2b.NUM.032.002 ויבאו בני גד ובני ראובן ויאמרו אל משה ואל אלעזר הכהן ואל נשיאי העדה לאמר׃

32:3b.NUM.032.003 עטרות ודיבן ויעזר ונמרה וחשבון ואלעלה ושבם ונבו ובען׃

32:4b.NUM.032.004 הארץ אשר הכה יהוה לפני עדת ישראל ארץ מקנה הוא ולעבדיך מקנה׃

32:5b.NUM.032.005 ויאמרו אם מצאנו חן בעיניך יתן את הארץ הזאת לעבדיך לאחזה אל תעברנו את הירדן׃

32:6b.NUM.032.006 ויאמר משה לבני גד ולבני ראובן האחיכם יבאו למלחמה ואתם תשבו פה׃

32:7b.NUM.032.007 ולמה תנואון את לב בני ישראל מעבר אל הארץ אשר נתן להם יהוה׃

32:8b.NUM.032.008 כה עשו אבתיכם בשלחי אתם מקדש ברנע לראות את הארץ׃

32:9b.NUM.032.009 ויעלו עד נחל אשכול ויראו את הארץ ויניאו את לב בני ישראל לבלתי בא אל הארץ אשר נתן להם יהוה׃

32:10b.NUM.032.010 ויחר אף יהוה ביום ההוא וישבע לאמר׃

32:11b.NUM.032.011 אם יראו האנשים העלים ממצרים מבן עשרים שנה ומעלה את האדמה אשר נשבעתי לאברהם ליצחק וליעקב כי לא מלאו אחרי׃

32:12b.NUM.032.012 בלתי כלב בן יפנה הקנזי ויהושע בן נון כי מלאו אחרי יהוה׃

32:13b.NUM.032.013 ויחר אף יהוה בישראל וינעם במדבר ארבעים שנה עד תם כל הדור העשה הרע בעיני יהוה׃

32:14b.NUM.032.014 והנה קמתם תחת אבתיכם תרבות אנשים חטאים לספות עוד על חרון אף יהוה אל ישראל׃

32:15b.NUM.032.015 כי תשובן מאחריו ויסף עוד להניחו במדבר ושחתם לכל העם הזה׃

32:16b.NUM.032.016 ויגשו אליו ויאמרו גדרת צאן נבנה למקננו פה וערים לטפנו׃

32:17b.NUM.032.017 ואנחנו נחלץ חשים לפני בני ישראל עד אשר אם הביאנם אל מקומם וישב טפנו בערי המבצר מפני ישבי הארץ׃

32:18b.NUM.032.018 לא נשוב אל בתינו עד התנחל בני ישראל איש נחלתו׃

32:19b.NUM.032.019 כי לא ננחל אתם מעבר לירדן והלאה כי באה נחלתנו אלינו מעבר הירדן מזרחה׃

32:20b.NUM.032.020 ויאמר אליהם משה אם תעשון את הדבר הזה אם תחלצו לפני יהוה למלחמה׃

32:21b.NUM.032.021 ועבר לכם כל חלוץ את הירדן לפני יהוה עד הורישו את איביו מפניו׃

32:22b.NUM.032.022 ונכבשה הארץ לפני יהוה ואחר תשבו והייתם נקיים מיהוה ומישראל והיתה הארץ הזאת לכם לאחזה לפני יהוה׃

32:23b.NUM.032.023 ואם לא תעשון כן הנה חטאתם ליהוה ודעו חטאתכם אשר תמצא אתכם׃

32:24b.NUM.032.024 בנו לכם ערים לטפכם וגדרת לצנאכם והיצא מפיכם תעשו׃

32:25b.NUM.032.025 ויאמר בני גד ובני ראובן אל משה לאמר עבדיך יעשו כאשר אדני מצוה׃

32:26b.NUM.032.026 טפנו נשינו מקננו וכל בהמתנו יהיו שם בערי הגלעד׃

32:27b.NUM.032.027 ועבדיך יעברו כל חלוץ צבא לפני יהוה למלחמה כאשר אדני דבר׃

32:28b.NUM.032.028 ויצו להם משה את אלעזר הכהן ואת יהושע בן נון ואת ראשי אבות המטות לבני ישראל׃

32:29b.NUM.032.029 ויאמר משה אלהם אם יעברו בני גד ובני ראובן אתכם את הירדן כל חלוץ למלחמה לפני יהוה ונכבשה הארץ לפניכם ונתתם להם את ארץ הגלעד לאחזה׃

32:30b.NUM.032.030 ואם לא יעברו חלוצים אתכם ונאחזו בתככם בארץ כנען׃

32:31b.NUM.032.031 ויענו בני גד ובני ראובן לאמר את אשר דבר יהוה אל עבדיך כן נעשה׃

32:32b.NUM.032.032 נחנו נעבר חלוצים לפני יהוה ארץ כנען ואתנו אחזת נחלתנו מעבר לירדן׃

32:33b.NUM.032.033 ויתן להם משה לבני גד ולבני ראובן ולחצי שבט מנשה בן יוסף את ממלכת סיחן מלך האמרי ואת ממלכת עוג מלך הבשן הארץ לעריה בגבלת ערי הארץ סביב׃

32:34b.NUM.032.034 ויבנו בני גד את דיבן ואת עטרת ואת ערער׃

32:35b.NUM.032.035 ואת עטרת שופן ואת יעזר ויגבהה׃

32:36b.NUM.032.036 ואת בית נמרה ואת בית הרן ערי מבצר וגדרת צאן׃

32:37b.NUM.032.037 ובני ראובן בנו את חשבון ואת אלעלא ואת קריתים׃

32:38b.NUM.032.038 ואת נבו ואת בעל מעון מוסבת שם ואת שבמה ויקראו בשמת את שמות הערים אשר בנו׃

32:39b.NUM.032.039 וילכו בני מכיר בן מנשה גלעדה וילכדה ויורש את האמרי אשר בה׃

32:40b.NUM.032.040 ויתן משה את הגלעד למכיר בן מנשה וישב בה׃

32:41b.NUM.032.041 ויאיר בן מנשה הלך וילכד את חותיהם ויקרא אתהן חות יאיר׃

32:42b.NUM.032.042 ונבח הלך וילכד את קנת ואת בנתיה ויקרא לה נבח בשמו׃

33

33:1b.NUM.033.001 אלה מסעי בני ישראל אשר יצאו מארץ מצרים לצבאתם ביד משה ואהרן׃

33:2b.NUM.033.002 ויכתב משה את מוצאיהם למסעיהם על פי יהוה ואלה מסעיהם למוצאיהם׃

33:3b.NUM.033.003 ויסעו מרעמסס בחדש הראשון בחמשה עשר יום לחדש הראשון ממחרת הפסח יצאו בני ישראל ביד רמה לעיני כל מצרים׃

33:4b.NUM.033.004 ומצרים מקברים את אשר הכה יהוה בהם כל בכור ובאלהיהם עשה יהוה שפטים׃

33:5b.NUM.033.005 ויסעו בני ישראל מרעמסס ויחנו בסכת׃

33:6b.NUM.033.006 ויסעו מסכת ויחנו באתם אשר בקצה המדבר׃

33:7b.NUM.033.007 ויסעו מאתם וישב על פי החירת אשר על פני בעל צפון ויחנו לפני מגדל׃

33:8b.NUM.033.008 ויסעו מפני החירת ויעברו בתוך הים המדברה וילכו דרך שלשת ימים במדבר אתם ויחנו במרה׃

33:9b.NUM.033.009 ויסעו ממרה ויבאו אילמה ובאילם שתים עשרה עינת מים ושבעים תמרים ויחנו שם׃

33:10b.NUM.033.010 ויסעו מאילם ויחנו על ים סוף׃

33:11b.NUM.033.011 ויסעו מים סוף ויחנו במדבר סין׃

33:12b.NUM.033.012 ויסעו ממדבר סין ויחנו בדפקה׃

33:13b.NUM.033.013 ויסעו מדפקה ויחנו באלוש׃

33:14b.NUM.033.014 ויסעו מאלוש ויחנו ברפידם ולא היה שם מים לעם לשתות׃

33:15b.NUM.033.015 ויסעו מרפידם ויחנו במדבר סיני׃

33:16b.NUM.033.016 ויסעו ממדבר סיני ויחנו בקברת התאוה׃

33:17b.NUM.033.017 ויסעו מקברת התאוה ויחנו בחצרת׃

33:18b.NUM.033.018 ויסעו מחצרת ויחנו ברתמה׃

33:19b.NUM.033.019 ויסעו מרתמה ויחנו ברמן פרץ׃

33:20b.NUM.033.020 ויסעו מרמן פרץ ויחנו בלבנה׃

33:21b.NUM.033.021 ויסעו מלבנה ויחנו ברסה׃

33:22b.NUM.033.022 ויסעו מרסה ויחנו בקהלתה׃

33:23b.NUM.033.023 ויסעו מקהלתה ויחנו בהר שפר׃

33:24b.NUM.033.024 ויסעו מהר שפר ויחנו בחרדה׃

33:25b.NUM.033.025 ויסעו מחרדה ויחנו במקהלת׃

33:26b.NUM.033.026 ויסעו ממקהלת ויחנו בתחת׃

33:27b.NUM.033.027 ויסעו מתחת ויחנו בתרח׃

33:28b.NUM.033.028 ויסעו מתרח ויחנו במתקה׃

33:29b.NUM.033.029 ויסעו ממתקה ויחנו בחשמנה׃

33:30b.NUM.033.030 ויסעו מחשמנה ויחנו במסרות׃

33:31b.NUM.033.031 ויסעו ממסרות ויחנו בבני יעקן׃

33:32b.NUM.033.032 ויסעו מבני יעקן ויחנו בחר הגדגד׃

33:33b.NUM.033.033 ויסעו מחר הגדגד ויחנו ביטבתה׃

33:34b.NUM.033.034 ויסעו מיטבתה ויחנו בעברנה׃

33:35b.NUM.033.035 ויסעו מעברנה ויחנו בעציון גבר׃

33:36b.NUM.033.036 ויסעו מעציון גבר ויחנו במדבר צן הוא קדש׃

33:37b.NUM.033.037 ויסעו מקדש ויחנו בהר ההר בקצה ארץ אדום׃

33:38b.NUM.033.038 ויעל אהרן הכהן אל הר ההר על פי יהוה וימת שם בשנת הארבעים לצאת בני ישראל מארץ מצרים בחדש החמישי באחד לחדש׃

33:39b.NUM.033.039 ואהרן בן שלש ועשרים ומאת שנה במתו בהר ההר׃

33:40b.NUM.033.040 וישמע הכנעני מלך ערד והוא ישב בנגב בארץ כנען בבא בני ישראל׃

33:41b.NUM.033.041 ויסעו מהר ההר ויחנו בצלמנה׃

33:42b.NUM.033.042 ויסעו מצלמנה ויחנו בפונן׃

33:43b.NUM.033.043 ויסעו מפונן ויחנו באבת׃

33:44b.NUM.033.044 ויסעו מאבת ויחנו בעיי העברים בגבול מואב׃

33:45b.NUM.033.045 ויסעו מעיים ויחנו בדיבן גד׃

33:46b.NUM.033.046 ויסעו מדיבן גד ויחנו בעלמן דבלתימה׃

33:47b.NUM.033.047 ויסעו מעלמן דבלתימה ויחנו בהרי העברים לפני נבו׃

33:48b.NUM.033.048 ויסעו מהרי העברים ויחנו בערבת מואב על ירדן ירחו׃

33:49b.NUM.033.049 ויחנו על הירדן מבית הישמת עד אבל השטים בערבת מואב׃

33:50b.NUM.033.050 וידבר יהוה אל משה בערבת מואב על ירדן ירחו לאמר׃

33:51b.NUM.033.051 דבר אל בני ישראל ואמרת אלהם כי אתם עברים את הירדן אל ארץ כנען׃

33:52b.NUM.033.052 והורשתם את כל ישבי הארץ מפניכם ואבדתם את כל משכיתם ואת כל צלמי מסכתם תאבדו ואת כל במתם תשמידו׃

33:53b.NUM.033.053 והורשתם את הארץ וישבתם בה כי לכם נתתי את הארץ לרשת אתה׃

33:54b.NUM.033.054 והתנחלתם את הארץ בגורל למשפחתיכם לרב תרבו את נחלתו ולמעט תמעיט את נחלתו אל אשר יצא לו שמה הגורל לו יהיה למטות אבתיכם תתנחלו׃

33:55b.NUM.033.055 ואם לא תורישו את ישבי הארץ מפניכם והיה אשר תותירו מהם לשכים בעיניכם ולצנינם בצדיכם וצררו אתכם על הארץ אשר אתם ישבים בה׃

33:56b.NUM.033.056 והיה כאשר דמיתי לעשות להם אעשה לכם׃

34

34:1b.NUM.034.001 וידבר יהוה אל משה לאמר׃

34:2b.NUM.034.002 צו את בני ישראל ואמרת אלהם כי אתם באים אל הארץ כנען זאת הארץ אשר תפל לכם בנחלה ארץ כנען לגבלתיה׃

34:3b.NUM.034.003 והיה לכם פאת נגב ממדבר צן על ידי אדום והיה לכם גבול נגב מקצה ים המלח קדמה׃

34:4b.NUM.034.004 ונסב לכם הגבול מנגב למעלה עקרבים ועבר צנה והיה תוצאתיו מנגב לקדש ברנע ויצא חצר אדר ועבר עצמנה׃

34:5b.NUM.034.005 ונסב הגבול מעצמון נחלה מצרים והיו תוצאתיו הימה׃

34:6b.NUM.034.006 וגבול ים והיה לכם הים הגדול וגבול זה יהיה לכם גבול ים׃

34:7b.NUM.034.007 וזה יהיה לכם גבול צפון מן הים הגדל תתאו לכם הר ההר׃

34:8b.NUM.034.008 מהר ההר תתאו לבא חמת והיו תוצאת הגבל צדדה׃

34:9b.NUM.034.009 ויצא הגבל זפרנה והיו תוצאתיו חצר עינן זה יהיה לכם גבול צפון׃

34:10b.NUM.034.010 והתאויתם לכם לגבול קדמה מחצר עינן שפמה׃

34:11b.NUM.034.011 וירד הגבל משפם הרבלה מקדם לעין וירד הגבול ומחה על כתף ים כנרת קדמה׃

34:12b.NUM.034.012 וירד הגבול הירדנה והיו תוצאתיו ים המלח זאת תהיה לכם הארץ לגבלתיה סביב׃

34:13b.NUM.034.013 ויצו משה את בני ישראל לאמר זאת הארץ אשר תתנחלו אתה בגורל אשר צוה יהוה לתת לתשעת המטות וחצי המטה׃

34:14b.NUM.034.014 כי לקחו מטה בני הראובני לבית אבתם ומטה בני הגדי לבית אבתם וחצי מטה מנשה לקחו נחלתם׃

34:15b.NUM.034.015 שני המטות וחצי המטה לקחו נחלתם מעבר לירדן ירחו קדמה מזרחה׃

34:16b.NUM.034.016 וידבר יהוה אל משה לאמר׃

34:17b.NUM.034.017 אלה שמות האנשים אשר ינחלו לכם את הארץ אלעזר הכהן ויהושע בן נון׃

34:18b.NUM.034.018 ונשיא אחד נשיא אחד ממטה תקחו לנחל את הארץ׃

34:19b.NUM.034.019 ואלה שמות האנשים למטה יהודה כלב בן יפנה׃

34:20b.NUM.034.020 ולמטה בני שמעון שמואל בן עמיהוד׃

34:21b.NUM.034.021 למטה בנימן אלידד בן כסלון׃

34:22b.NUM.034.022 ולמטה בני דן נשיא בקי בן יגלי׃

34:23b.NUM.034.023 לבני יוסף למטה בני מנשה נשיא חניאל בן אפד׃

34:24b.NUM.034.024 ולמטה בני אפרים נשיא קמואל בן שפטן׃

34:25b.NUM.034.025 ולמטה בני זבולן נשיא אליצפן בן פרנך׃

34:26b.NUM.034.026 ולמטה בני יששכר נשיא פלטיאל בן עזן׃

34:27b.NUM.034.027 ולמטה בני אשר נשיא אחיהוד בן שלמי׃

34:28b.NUM.034.028 ולמטה בני נפתלי נשיא פדהאל בן עמיהוד׃

34:29b.NUM.034.029 אלה אשר צוה יהוה לנחל את בני ישראל בארץ כנען׃

35

35:1b.NUM.035.001 וידבר יהוה אל משה בערבת מואב על ירדן ירחו לאמר׃

35:2b.NUM.035.002 צו את בני ישראל ונתנו ללוים מנחלת אחזתם ערים לשבת ומגרש לערים סביבתיהם תתנו ללוים׃

35:3b.NUM.035.003 והיו הערים להם לשבת ומגרשיהם יהיו לבהמתם ולרכשם ולכל חיתם׃

35:4b.NUM.035.004 ומגרשי הערים אשר תתנו ללוים מקיר העיר וחוצה אלף אמה סביב׃

35:5b.NUM.035.005 ומדתם מחוץ לעיר את פאת קדמה אלפים באמה ואת פאת נגב אלפים באמה ואת פאת ים אלפים באמה ואת פאת צפון אלפים באמה והעיר בתוך זה יהיה להם מגרשי הערים׃

35:6b.NUM.035.006 ואת הערים אשר תתנו ללוים את שש ערי המקלט אשר תתנו לנס שמה הרצח ועליהם תתנו ארבעים ושתים עיר׃

35:7b.NUM.035.007 כל הערים אשר תתנו ללוים ארבעים ושמנה עיר אתהן ואת מגרשיהן׃

35:8b.NUM.035.008 והערים אשר תתנו מאחזת בני ישראל מאת הרב תרבו ומאת המעט תמעיטו איש כפי נחלתו אשר ינחלו יתן מעריו ללוים׃

35:9b.NUM.035.009 וידבר יהוה אל משה לאמר׃

35:10b.NUM.035.010 דבר אל בני ישראל ואמרת אלהם כי אתם עברים את הירדן ארצה כנען׃

35:11b.NUM.035.011 והקריתם לכם ערים ערי מקלט תהיינה לכם ונס שמה רצח מכה נפש בשגגה׃

35:12b.NUM.035.012 והיו לכם הערים למקלט מגאל ולא ימות הרצח עד עמדו לפני העדה למשפט׃

35:13b.NUM.035.013 והערים אשר תתנו שש ערי מקלט תהיינה לכם׃

35:14b.NUM.035.014 את שלש הערים תתנו מעבר לירדן ואת שלש הערים תתנו בארץ כנען ערי מקלט תהיינה׃

35:15b.NUM.035.015 לבני ישראל ולגר ולתושב בתוכם תהיינה שש הערים האלה למקלט לנוס שמה כל מכה נפש בשגגה׃

35:16b.NUM.035.016 ואם בכלי ברזל הכהו וימת רצח הוא מות יומת הרצח׃

35:17b.NUM.035.017 ואם באבן יד אשר ימות בה הכהו וימת רצח הוא מות יומת הרצח׃

35:18b.NUM.035.018 או בכלי עץ יד אשר ימות בו הכהו וימת רצח הוא מות יומת הרצח׃

35:19b.NUM.035.019 גאל הדם הוא ימית את הרצח בפגעו בו הוא ימיתנו׃

35:20b.NUM.035.020 ואם בשנאה יהדפנו או השליך עליו בצדיה וימת׃

35:21b.NUM.035.021 או באיבה הכהו בידו וימת מות יומת המכה רצח הוא גאל הדם ימית את הרצח בפגעו בו׃

35:22b.NUM.035.022 ואם בפתע בלא איבה הדפו או השליך עליו כל כלי בלא צדיה׃

35:23b.NUM.035.023 או בכל אבן אשר ימות בה בלא ראות ויפל עליו וימת והוא לא אויב לו ולא מבקש רעתו׃

35:24b.NUM.035.024 ושפטו העדה בין המכה ובין גאל הדם על המשפטים האלה׃

35:25b.NUM.035.025 והצילו העדה את הרצח מיד גאל הדם והשיבו אתו העדה אל עיר מקלטו אשר נס שמה וישב בה עד מות הכהן הגדל אשר משח אתו בשמן הקדש׃

35:26b.NUM.035.026 ואם יצא יצא הרצח את גבול עיר מקלטו אשר ינוס שמה׃

35:27b.NUM.035.027 ומצא אתו גאל הדם מחוץ לגבול עיר מקלטו ורצח גאל הדם את הרצח אין לו דם׃

35:28b.NUM.035.028 כי בעיר מקלטו ישב עד מות הכהן הגדל ואחרי מות הכהן הגדל ישוב הרצח אל ארץ אחזתו׃

35:29b.NUM.035.029 והיו אלה לכם לחקת משפט לדרתיכם בכל מושבתיכם׃

35:30b.NUM.035.030 כל מכה נפש לפי עדים ירצח את הרצח ועד אחד לא יענה בנפש למות׃

35:31b.NUM.035.031 ולא תקחו כפר לנפש רצח אשר הוא רשע למות כי מות יומת׃

35:32b.NUM.035.032 ולא תקחו כפר לנוס אל עיר מקלטו לשוב לשבת בארץ עד מות הכהן׃

35:33b.NUM.035.033 ולא תחניפו את הארץ אשר אתם בה כי הדם הוא יחניף את הארץ ולארץ לא יכפר לדם אשר שפך בה כי אם בדם שפכו׃

35:34b.NUM.035.034 ולא תטמא את הארץ אשר אתם ישבים בה אשר אני שכן בתוכה כי אני יהוה שכן בתוך בני ישראל׃

36

36:1b.NUM.036.001 ויקרבו ראשי האבות למשפחת בני גלעד בן מכיר בן מנשה ממשפחת בני יוסף וידברו לפני משה ולפני הנשאים ראשי אבות לבני ישראל׃

36:2b.NUM.036.002 ויאמרו את אדני צוה יהוה לתת את הארץ בנחלה בגורל לבני ישראל ואדני צוה ביהוה לתת את נחלת צלפחד אחינו לבנתיו׃

36:3b.NUM.036.003 והיו לאחד מבני שבטי בני ישראל לנשים ונגרעה נחלתן מנחלת אבתינו ונוסף על נחלת המטה אשר תהיינה להם ומגרל נחלתנו יגרע׃

36:4b.NUM.036.004 ואם יהיה היבל לבני ישראל ונוספה נחלתן על נחלת המטה אשר תהיינה להם ומנחלת מטה אבתינו יגרע נחלתן׃

36:5b.NUM.036.005 ויצו משה את בני ישראל על פי יהוה לאמר כן מטה בני יוסף דברים׃

36:6b.NUM.036.006 זה הדבר אשר צוה יהוה לבנות צלפחד לאמר לטוב בעיניהם תהיינה לנשים אך למשפחת מטה אביהם תהיינה לנשים׃

36:7b.NUM.036.007 ולא תסב נחלה לבני ישראל ממטה אל מטה כי איש בנחלת מטה אבתיו ידבקו בני ישראל׃

36:8b.NUM.036.008 וכל בת ירשת נחלה ממטות בני ישראל לאחד ממשפחת מטה אביה תהיה לאשה למען יירשו בני ישראל איש נחלת אבתיו׃

36:9b.NUM.036.009 ולא תסב נחלה ממטה למטה אחר כי איש בנחלתו ידבקו מטות בני ישראל׃

36:10b.NUM.036.010 כאשר צוה יהוה את משה כן עשו בנות צלפחד׃

36:11b.NUM.036.011 ותהיינה מחלה תרצה וחגלה ומלכה ונעה בנות צלפחד לבני דדיהן לנשים׃

36:12b.NUM.036.012 ממשפחת בני מנשה בן יוסף היו לנשים ותהי נחלתן על מטה משפחת אביהן׃

36:13b.NUM.036.013 אלה המצות והמשפטים אשר צוה יהוה ביד משה אל בני ישראל בערבת מואב על ירדן ירחו׃