2 Corinthians (Dinka)

21

21:1b.2CO.021.001 Yɛn Paulo, tuny e Yecu Kritho ne kede piɔn e Nhialic, woke Timotheo mɛnhkeneda, awarek en gɛɛrku kanithɔ de Nhialic nu Korinth, keke kɔc ɣerpiɔth kedhie kɔc nu Akaya ebɛn:

21:2b.2CO.021.002 E dhueeŋdepiɔu keke mat ne ke tɔu e weyiic, ne ke bɔ tede Nhialic Waada keke Bɛnydit Yecu Kritho.

21:3b.2CO.021.003 Thicithieei Nhialic yen Wun Bɛnydan Yecu Kritho, Wun kokdepiɔu ku ye Nhialic de muŋdepiɔu ebɛn;

21:4b.2CO.021.004 Raan e wo muk piɔth ne ka dhal wook ebɛn, luɔi bi wo kɔc ŋiec muk piɔth kɔc cii kedaŋ dhal, ne muŋ ci wo muk piɔth e Nhialic wogup.

21:5b.2CO.021.005 Ku acit man juece katuc gumku ne biak de Kritho, en a diite muŋ ee wo muk piɔth aya ne Kritho.

21:6b.2CO.021.006 Ku na dhal kaŋ wook, ee kede muŋ bi we muk piɔth ayi kuny bi we kony wei; ku ayeke luoi week ne ruot aa wek wepiɔth ruut ne kaguomki, ka kit e ka gumku ayadaŋ: ku te ci wo muk piɔth, ee kede muŋ bi we muk piɔth aya ku kuny bi we kony wei.

21:7b.2CO.021.007 Ku aŋɔth ŋathku e biakdun ee yin egɔk, luɔi ŋic wok ekene, yan, acit man aa wek kɔc e rɔm etok ne guomdekaŋ, ke we bi aa kɔc e rɔm etok ne muŋdepiɔu aya.

21:8b.2CO.021.008 Ku wo cin piɔth luɔi ba wek ka ci wo dhal kuc, wek mithekɔckuɔ, ka cuk yok e Athia, yik ci wo yink piɔth kethiek edot, ke cuku dueer leu e guom, arek acuk rot kuoc piir:

21:9b.2CO.021.009 ee yic, wok aa rɛɛr e wo ye kɔc e rot ŋiec thuɔɔu, luɔi cii wo rot e ŋɔɔth, ee Nhialic en abuk dhil aa ŋɔɔth, Raan e kɔc ci thou jat nhial;

21:10b.2CO.021.010 Raan e wo luok ne thon diit yinya, ku ŋoot ke ye wo luok: ku yen a ŋathku luɔi bi en ŋoot ke luak wook aya;

21:11b.2CO.021.011 ku week ayadaŋ we bi wo kony etok ne laŋ aa wek lɔŋ ne biakda; na miak, te ci wo kaŋ yok ne lɔŋ cii kɔc juec lɔŋ, ka bi kɔc juec lueel, an, Thieithieei, ne biakda.

21:12b.2CO.021.012 Miɛt e wo piɔth miɛt ki, yan, jam e yok yok e wopiɔth aye lueel, yan, yok cath e piɔn cinic rueeny ku ciɛthku ne yic de Nhialic, wok aacii rɛɛr ne pɛlenɔm de kɔc, ee dhueeŋ de Nhialic piɔu, en aa reer wok e piny nɔm, ku en aa reer wok e weyiic awarki kɔc kɔk

21:13b.2CO.021.013 Acin wel kɔk gɛɛrku week, ee wel kuɛnki enɔɔne kapac, ku yek wel cak gam aya, ku yɛn de piɔu luɔi ba wek ke gam athooke kaŋ:

21:14b.2CO.021.014 acit man ca wek wo kɔn gam e biak, yan, yok lɛcduon aa wek ro leec, cit man aa wek lɛcda ayadaŋ ekool e Bɛnydan Yecu.

21:15b.2CO.021.015 Ku gam can ekene gam yen aa luɛɛl ɛn en e yapiɔu waan, nɔn ban bɛn tede week, luɔi ba wek kepiɛth bɛ yok raanrou;

21:16b.2CO.021.016 ku nɔn ban teek e welɔm ke ya lɔ Makedonia, aguɔ anɔm pɔk Makedonia ba tede week, ke we bi a ruac kueer lɔ Judaya.

21:17b.2CO.021.017 Loŋ ca lueel e yapiɔu aya, ca lueel e ya wiel piɔu? ayi loŋ e ya lueel, ee kede guop en luɛɛl ɛn en, cit man jam ɛn e looŋ kaarou, yan, Ɣɛɛ, ɣɛɛ, ku, yan, Ei, ei?

21:18b.2CO.021.018 Ku ne don ee Nhialic adot, jamda woke week acie Ɣɛɛ ku be aa Ei.

21:19b.2CO.021.019 Wen e Nhialic, Yecu Kritho, raan e wok rinke guiir e weyiic, wo woke Thiluano ku Timotheo, yen aacii ye Ɣɛɛ ku be aa Ei, kaŋ ayek Ɣɛɛ tede yen.

21:20b.2CO.021.020 Ku te de en ka ci Nhialic lueel, an, bi ke gam kɔc, Ɣɛɛ yen aye kede, ku ye Amen kede, ke Nhialic bi dhueeŋ yok ne wook.

21:21b.2CO.021.021 Ku Raan e wo tɔ kaac aril e Krithoyic woke week etok, ku ci wo tɔc gup, yen aye Nhialic;

21:22b.2CO.021.022 Raan ci wo gaar piɔth rinke aya, ago wo gam Weidit e wopiɔth, ke ye biak de ke buk yok rial.

21:23b.2CO.021.023 Ku yɛn cɔl Nhialic bi aa caatɔdi ne kede yɛnpiɔu, yan, Pal pal ɛn week en a ŋuɔɔt ɛn ke ya ken bɛn Korintho.

21:24b.2CO.021.024 Ku acie luɔi ee wok week cieŋ, wok ee kɔc e week kony ne miɛt ba we piɔth miɛt: ee gamdun en a kaac wek.

22

22:1b.2CO.022.001 Ku yɛn e loŋ lueel e yapiɔu yatok, nɔn can bi bɛ bɛn tede week ke ya dhiau piɔu.

22:2b.2CO.022.002 Te can week tɔ dhiau piɔth, ke eeŋa bi a tɔ mit piɔu, cie yen raan ca tɔ dhiau piɔu?

22:3b.2CO.022.003 Ku yɛn e kemane gaar week, na miak, te can bɛn, ke yɛn cii dhienepiɔu dueer yok tede kɔc bi a dhil tɔ mit piɔu; ku we ca gam wedhie, nɔn ci miɛt de yɛnpiɔu aa miɛt de wepiɔth wedhie.

22:4b.2CO.022.004 Aca gaar week waan woke piu juec e yanyin ne kediit dhal ɛn, ku jiɛthepiɔu; acie luɔi ba wek piɔth dhiau, e luɔi ba wek nhieerdi ŋic nhieer nhiaar ɛn week awar kerieec.

22:5b.2CO.022.005 Ku na de raan ci kɔc tɔ dhiau piɔth, acie yɛn e tɔ dhiau piɔu yɛn atok, ee week wedhie we ci tɔ dhiau piɔth e biak (ke we ca bi gɔk e gaak dit).

22:6b.2CO.022.006 Gaŋ ci raane gɔk e loi enɔɔne, gaŋ ci kɔc juec e gɔk.

22:7b.2CO.022.007 Ku enɔɔne aŋuan nɔn ba wek e pɔl, ku jaki muk piɔu, ke raane cii tieel bi dɔm ne dit de jiɛth e yenpiɔu.

22:8b.2CO.022.008 Yen a laŋ ɛn week, yan, bak bɛ tɔ ŋic nhieerduon nhiaar wek en.

22:9b.2CO.022.009 En aa gaar ɛn week waan aya, luɔi ban week them aguɔ piɔndun ŋic, nɔn aa wek kerieecdi piŋ ebɛn.

22:10b.2CO.022.010 Ku raan bak pal kedaŋ, ka ca pɔl aya; ku te can kedaŋ pal raan, ka ye biakdun week, en aa pal ɛn en e Kritho nɔm;

22:11b.2CO.022.011 ke Catan cii bi dɛ te bi en wo woor: rueenyde acuku kuc, aŋicku.

22:12b.2CO.022.012 Cook daŋ, waan can bɛn Toroa ba welpiɛth ke Kritho bɛn guiir, ago kal thok liep ɛn e Bɛnydit,

22:13b.2CO.022.013 acin lɔŋ ca yok e yapiɔu, luɔi kɛn ɛn Tito mɛnhkai yok: aguɔ kɔcke tɔɔŋ, guɔ jal etɛɛn la Makedonia.

22:14b.2CO.022.014 Ku thieithieei Nhialic, Raan e cool e tɔ wo tiam kaŋ e Krithoyic, ago atuomde tɔ tiec ne wook e baai nɔm ebɛn, atuom de ŋiny bi kɔc e ŋic.

22:15b.2CO.022.015 Wok ee atuom de Kritho ne kede Nhialic e kɔc yiic, ayi kɔc kony wei ayi kɔc mar;

22:16b.2CO.022.016 tede kɔcke wok ee atuom e thuɔɔu a luel thuɔɔu, ku tede kɔcke wok ee atuom e piir a lueel piir. Ku eeŋa dueer kacit e kake leu?

22:17b.2CO.022.017 Ku wook, wo cii cit tediit e kɔc, kɔc e jam e Nhialic riɔɔk ne biak de weu: jam yok lueel ee piɔn yic yen aye wok e lueel, ku cit liem de Nhialic, e Nhialic nɔm, yen aye wo jam e Krithoyic.

23

23:1b.2CO.023.001 Cuk bɛ gɔl e lɛc leec wok rot? Ku kɔɔrku awareek bi wo leec, cit man e kɔc kɔk, awareek ci gaar week, ayi ka bak gɔɔr ku yine ke wook?

23:2b.2CO.023.002 Wek aye awarekda awarek ci gɔɔr e wopiɔth, ku ci ŋic e raan ebɛn ku yek kueen;

23:3b.2CO.023.003 we ye tic nɔn aa wek awarek de Kritho, awarek ci looi ne wook, ku kene gɔɔr e miok e gaar, ee Wei ke Nhialic piir kek e gɛɛre ye; ku acie pɛɛm e kur kek e gaar kɔɔth, ee pɛɛm cɔl piɔth ke kɔc.

23:4b.2CO.023.004 Ku aŋɔth yinya en aŋɛɛth wok Nhialic ne Kritho:

23:5b.2CO.023.005 ku wo wapac acin ke dueerku lueel e ye, yan, e bɔ ne wook; leu ee wok kaŋ leu abɔ tede Nhialic;

23:6b.2CO.023.006 Raan ci wo tɔ leu kaŋ, buk aa kɔc ee ka ke loŋ ci piac mac ŋiec guiir; ku guieerda acie kede wel ci gɔɔr tei, ee kede wei: wel ci gɔɔr tei ayek kɔc nɔk, ku wei kek aye kɔc tɔ piir.

23:7b.2CO.023.007 Ku na guieer e loŋ de thuɔɔu, en aye loŋ ɣɔn ci gaar e kur kɔɔth, te ci e yekic dhueeŋ, ago mith ke Yithrael dhal e wni woi kek Mothe nyin, ne baŋ de dhueeŋ e yennyin; ku dhueeŋe ee ke kɔɔr liu:

23:8b.2CO.023.008 na guieer e wei eeŋo cii en guieere bi woor e dhueeŋ?

23:9b.2CO.023.009 Ku na guieer e jany bi kɔc jɔɔny ten ee yen dhueeŋ, ke guieer e piathepiɔu ee guieere woor e dhueeŋ alaldiite.

23:10b.2CO.023.010 Ke ci gam dhueeŋ ɣɔn acin dhueeŋ be cath keke yen enɔɔne, ne biak de cooke, yan, a wɛɛr dhueeŋ war kerieec.

23:11b.2CO.023.011 Ku na ke bi nyaai, te ciɛth en keke dhueeŋ, ke ke bi doŋ anande acath keke dhueeŋ war dhueeŋe alaldiite.

23:12b.2CO.023.012 Yen ka, nɔn ciɛth wok e aŋɔth yinya, wok ee jam ke wo ril nyiin alal,

23:13b.2CO.023.013 ku wo cii cit Mothe, ɣɔn e yen enyin kum e lupɔ, ke mith ke Yithrael ke ke cii thok e dhueeŋe dueer woi, dhueeŋ kɔɔr luɔi bi en jal:

23:14b.2CO.023.014 acik niim riɛl: ku aɣet ci ekoole lupɔ mane guop e doŋ akene nyaai, te ye awarek kueenic awarek de loŋ ci mac thɛɛr; ku lupɔye aye nyaai ne Krithoyic.

23:15b.2CO.023.015 Ku aɣet ci ekoole, te ye loŋ de Mothe kueenic, ke lupɔ ke ŋoot ke rɛɛr e kepiɔth.

23:16b.2CO.023.016 Ku kool bi kek kepiɔth wɛl Bɛnydit tei, ka bi nyaai.

23:17b.2CO.023.017 Ku Bɛnydit en aye Weidit: ku te nu Weidiit ke Bɛnydit, en ee te nu luny bi kɔc lony.

23:18b.2CO.023.018 Ku wok wodhie, wok ee dhueeŋ de Bɛnydit woi cit man e wo kaŋ woi e mɛndheric, ke cin lupɔ kum wonyiin, agoku rot aa puk buk aa ciet taudɛn mane guop, ku yok dhueeŋ yok dhueeŋ e cool e ŋuak rot, ku ye Bɛnydit en a bii en, yen aye Weidit.

24

24:1b.2CO.024.001 Yen ka, enɔn de wo niim luɔiye, acit man ci wo kokdepiɔu yok, ke wo cie bap;

24:2b.2CO.024.002 ku ka ke ayaar ka ci moony acuk ke jai, ku wo cie reer e wo e ruɛny, ku cuku jam e Nhialic e cakic; ee yic en a yok tɔ tiec, ago wo ŋic e kɔc piɔth kedhie nɔn piɛth wok e Nhialic nɔm.

24:3b.2CO.024.003 Ku te ci welkuɔn piɛth kum, ayeke kum tede kɔc mɛɛr wei:

24:4b.2CO.024.004 kek kɔc cii jɔŋ rɛɛc ceŋ pinye nɔm enɔɔne tɔ cɔɔr piɔth, kek kɔc reec gam, ke riau de welpiɛth ke cii keek bi riaau, welpiɛth ke dhueeŋ de Kritho, raan e tɔu e tau de Nhialic guop.

24:5b.2CO.024.005 Ku wo cie guiir e keda, ee kede Kritho Yecu Bɛnydit en e yok guiir, ku wook, wok ee himkun ne biak de Yecu.

24:6b.2CO.024.006 Luɔi ee yen Nhialic, Raan ɣɔn yook ɣɛɛrepiny, an, Ba bei tecol, ye piny riaau, yen aa riau wopiɔth, agoku riau de ŋiny de dhueeŋ de Nhialic yok, riau nu e Yecu Kritho nyin.

24:7b.2CO.024.007 Ku wo ee kepiɛthe muk e ka ci cueec e tiɔp yiic, ke diit e riɛl war kerieec ke bi aa kede Nhialic, ku cii bɔ tede wook.

24:8b.2CO.024.008 Wo cii katuc tuɔɔk, ku te lniny wok acie liu; wo e niim mum, ku wo cii niim e mum etaiwei;

24:9b.2CO.024.009 wok e yɔŋ, ku wo kene pal wei; wo ye dɛɛny piny, ku cii wo nak eliŋliŋ;

24:10b.2CO.024.010 thon e Bɛnydit Yecu en ayok cool e ɣɛɛc wok en e wogup, ke piir e Yecu bi tic e wogup ayadaŋ.

24:11b.2CO.024.011 Ku wo kɔc piir, wo ye cool e yine wo thuɔɔu ne baŋ de Yecu, luɔi bi piir e Yecu tic e guopdayic guop deyic thuɔɔu.

24:12b.2CO.024.012 Yen tede ka, thuɔɔu ee luui e woyiic, ku lui piir e weyiic.

24:13b.2CO.024.013 Ku wo cath wo wei toŋe wei ke gam, acit man e ke ci gɔɔr, yan, Aca gam, en aa jam ɛn; ayi wook ayadaŋ, wok gam, ku yen a jiɛɛm wok,

24:14b.2CO.024.014 ne ŋiny ŋic wok cooke, yan, Raan waan jɔt Bɛnydit Yecu nhial, en abi wo jat nhial aya ne Yecu, ago wo taau e yenɔm woke week etok.

24:15b.2CO.024.015 Ku kaŋ kedhie atɔuki ne biakdun, ke dhueeŋdepiɔu bi ro ŋuak ne kɔc juec ne luɛl ci kɔc juec thieithieei lueel, ke Nhialic bi dhueeŋ yok.

24:16b.2CO.024.016 Yen acii wok e bap; ku na cak jɔ a tiaam en e raandan nu biic, ke raandan nu thin aye bɛ cool e cuɛɛceye e akoolnyiin kedhie.

24:17b.2CO.024.017 Kepiɔɔldan dhal wook, ke bi dap lɔ with wei, aye wo luoi dhueeŋ thiek dhueeŋ war ke dhal wook alalditte, ku ye tɔu athɛɛr;

24:18b.2CO.024.018 e luɔi cii wok ka ci tiŋ e tak, ee ka kene tiŋ kek a yok tak: ka ci tiŋ ayek ka ke akoolke tei; ku ka kene tiŋ ayek tɔu athɛɛr.

25

25:1b.2CO.025.001 Ku kene aŋicku, yan, ɣondan e piny nɔm, yen keemɔ ee wok reer thin, te ci en riaak, ke wo de ɣon bɔ tede Nhialic, ɣon e cii yik e raan cin, ee ɣon bi tɔu athɛɛr paannhial.

25:2b.2CO.025.002 Ku wo ye kim e ɣon nu wo thineyic, ku yok kɔɔr alal luɔi bi wo ɣonda cieŋ cit man e lupɔ, ɣondan bɔ tenhial:

25:3b.2CO.025.003 ku te ye wok lupɔ cieŋ ne yic, ke wo cii bi yok e wo cin kɔɔth lupɔɔ.

25:4b.2CO.025.004 Ku wok kɔc e tɔu e keemɔyic enɔɔne, wo ye kim eyic, ku yok duɔɔny; ku acie reer bi wo reer ke wo cin kɔɔth lupɔɔ en kɔɔrku, wo kɔɔr luɔi bi wo kɔɔth dɛ lupɔɔ, ago kedan kɔɔr thuɔɔu, ago liek e piir.

25:5b.2CO.025.005 Ku Raan e cuec wo ne kemane guop en aye Nhialic, Raan ci wo gam Weikɛn Dit, ee biak de ke buk yok rial.

25:6b.2CO.025.006 Agoku cool e rit wo wopiɔth, ne ŋiny ŋic wok ecooke, yan, te nu wok baai e guopdayic, ke wok tɔu roor te liiuwe Bɛnydit:

25:7b.2CO.025.007 (ee gam en aye wo reer, acie daai);

25:8b.2CO.025.008 wo ee wopiɔth riit, di, ku yok lueel, yan, adueer ŋuan tede wook te tɔu wok roor te liiuwe guopda, ku tɔuku baai ne Bɛnydit etok.

25:9b.2CO.025.009 Ku kene en ayok cool e kɔɔr wok en aret, yan, Te nu wo baai ayi te nu wo roor, ke wo bi miɛt e Bɛnydit piɔu.

25:10b.2CO.025.010 Ku wo bi dhil tic e thoony de Kritho nɔm wodhie, thoony de guieereloŋ; ago raan ebɛn kaŋ yok ka bi roŋ ne ke ci looi e guopdeyic, nɔn ee yen kepiɛth, ku nɔn ee yen kerac.

25:11b.2CO.025.011 Yen ka, luɔi ŋic wok riɔɔc bi kɔc dhil riɔɔc e Bɛnydit, ke wo ye kɔc guet niim, ku Nhialic aŋic wopiɔth; ku yɛn dueer piɔu miɛt te ca wek wook ŋic piɔth ayadaŋ ne jam e yak yok e wepiɔth.

25:12b.2CO.025.012 Ku wo cii rot e bɛ lɛc week, wek ayok tɔ yok ke duɛɛr wek rot leec ne biakda, ke we bi dɛ ke ba wek kede kɔc bɛɛr, kɔc e rot leec ne ke ci tic tei, ku ciki rot e leec ne ke nu e raan piɔu.

25:13b.2CO.025.013 Ku na ye te jiɛɛm wok wei, ee kede Nhialic; ku na yok niim piath, ee kedun week.

25:14b.2CO.025.014 Nhieer e Kritho ee wo cieŋ; ayok lueel ale, yan, Thon e thouwe raan tok ne biak de raan ebɛn, ka yen thon ci raan thou ebɛn ka;

25:15b.2CO.025.015 ku thon thou en ne biak de raan ebɛn, ee ke cii kɔc piir bi bɛ piir e kede yenhden, ka bik piir e kede raan ci thou ne biakden ku be ro jɔt.

25:16b.2CO.025.016 Yen acin en raan beku ŋic e baŋ de guop: acakaa Kritho guop, te ciɛk wok e kɔn ŋic ne baŋ de guop, ka cuku be ŋic aya.

25:17b.2CO.025.017 Yen tede ka, te de yen raan nu e Krithoyic, ka ye ke ci piac cak: kathɛɛr acik lɔ ya; wɔiki, kaŋ acike piac cak kedhie.

25:18b.2CO.025.018 Ku kaŋ aake bɔ tede Nhialic kedhie, Raan e wo tɔ mat ne yen ne Yecu Kritho, ago luɔi de mat yien wook;

25:19b.2CO.025.019 luɔi e nu Nhialic e Krithoyic, ee piny nɔm tɔ mat ne yen, ku luɔi cii en ka cii kɔc wooc e mac e keyieth, ago jam de mat taau e wocin.

25:20b.2CO.025.020 Ku enɔɔne wok ee tuuc ke Kritho, acit man lɛŋe Nhialic kɔc ne wothook: we laŋku ne biak de Kritho, yan, Bɛki mat ne Nhialic.

25:21b.2CO.025.021 Yen raan kuc kerac aci tɔ ye kerac guop ne biakda; luɔi bi wo tɔ ye piathepiɔn e Nhialic ne yen.

26

26:1b.2CO.026.001 Ku nɔn ee wok luui ne yen etok, en a lɛŋ wo week, ke we cii dhueeŋ de Nhialic piɔu nom e ɣɔric.

26:2b.2CO.026.002 Nɔn ci en e lueel, yan, Yɛn e kedu piŋ ekool piɛth, Ku yin ca luok ekool e kunydewei. Ekoole ki, yen aye kool piɛth; tieŋki, ekoole ki, yen aye kool e kunydewei.

26:3b.2CO.026.003 Acin ke loiku ke bi raan diiu piɔu, ke luɔi e wo kaŋ looi ke ci bi gɔk;

26:4b.2CO.026.004 wo ye rot tɔ ye kɔc piɛth ne kerieec ebɛn, acit man e kɔc e ka ke Nhialic looi, ne liɛɛr diit e wopiɔth, ne katuc dhal wook, ne ka dak wook, ne ka giŋ wook,

26:5b.2CO.026.005 ne dui duiye wook, ne many mɛce wook, ne awuoou dit, ne luɔi ril, ne yin ee wo yin, ne mɔl ee wo mɔl e cam;

26:6b.2CO.026.006 ne ɣɛɛrepiɔu, ne ŋinydekaŋ, ne guomdekaŋ, ne piathepiɔu, ne Weidit Ɣer, ne nhieer cinic rueeny,

26:7b.2CO.026.007 ne jam de yic, ne riel diit e Nhialic, ne weu ke tɔŋ weu ke piathepiɔu e ciin cuec ku ciin cam,

26:8b.2CO.026.008 ne lɛc, ku ne cien lɛc, ne rin piɛth ku ne rin rac; acit kɔc e kɔc math, ku wok ee kɔc yith;

26:9b.2CO.026.009 acit kɔc kuc, ku wo ŋic apiɛth; acit kɔc, an, thouki, ku tieŋki, wok piir; acit kɔc ci dui, ku wo kene nɔk;

26:10b.2CO.026.010 acit kɔc e dhiau, ku wo ye piɔth miɛt ananda; acit kɔc kuany nyiin, ku wo ye kɔc juec tɔ kueth; acit kɔc cin niim kaken, ku wo de niim kaŋ kedhie.

26:11b.2CO.026.011 Wo ci wothook liep week, wek Korinthoi, wo ci piɔth laau e kedun.

26:12b.2CO.026.012 Acie wook e giŋ week, ee weyac, kek e giŋ week.

26:13b.2CO.026.013 Ku enɔɔne, ne cuot ba wek kaŋ cool aya (yɛn cit ke jam woke mithki), taki weyac laau.

26:14b.2CO.026.014 Duoki rot e tɔ mac etok ne kɔc reec gam, ke we ci kit: piathepiɔu eeŋode thin keke dhaŋ de loŋic? ayi ɣɛɛrepiny bi mat adi keke cuɔlepiny?

26:15b.2CO.026.015 Ku bi Kritho ethok mat adi keke Belial? ayi raan gam bi kaŋ rɔm adi keke raan reec gam?

26:16b.2CO.026.016 Ayi luaŋ e Nhialic bi jam mat keke yinth adi? ku week, wek aye luaŋ e Nhialic piir; acit man ci Nhialic e lueel, yan, Yɛn bi reer e keyiic, ku cath e keyiic; ku yɛn bi aa Nhialicden, ku kek abik aa kɔcki.

26:17b.2CO.026.017 Yen Ba wek bei ne keyiic, abak rot tɔ ye kɔc mɛɛn pei, ke lueel Bɛnydit ki, Ku duoki kecol e jak; Ku we ba dɔm,

26:18b.2CO.026.018 Ku yɛn bi aa Wuoordun, Ku we bi aa wɛɛtki ku nyurki, Ke lueel Bɛnydiit Leu Kerieec ka.

27

27:1b.2CO.027.001 Yen ka, enɔn ciɛth wok woke ka ci lueel, an, bike gam wooke, wek kɔc nhiaar, yok rot waak ne acuɔl ebɛn acol e guop ku acol e wei, ku yok wopiɔth tɔ ɣer abik dikedik ne rieu de Nhialic.

27:2b.2CO.027.002 Liɛpki wepiɔth wook: acin raan cuk luoi kerac, acin raan cuk riɔɔk piɔu, acin raan cuk cam.

27:3b.2CO.027.003 Acie jany jaany ɛn week, yen e luɛɛl ekene. aca kɔn lueel, nɔn tau wek e wopiɔth, ku abuk thou etok, ku abuk piir etok.

27:4b.2CO.027.004 Yɛn ci anyin riil alal, te jaam ɛn wo week, ku lɛɛc rot alal ne biakdun: yɛn ci riit piɔu alal ka cin daŋ kaar, yɛn mit piɔu aret awar kerieec ne ketuc dhal wook ebɛn.

27:5b.2CO.027.005 Waan, te ci wok bɛn Makedonia, wo cin lɔŋ ci wogup lɔŋ, wo cii ketuc dhal wook tuɔɔk e biake ku biake; e wogup biic, tɔɔŋ aake nu, ku e wopiɔth thin, riɔɔc aa nu.

27:6b.2CO.027.006 Acakaa kake kek e nu, Nhialic, Raan e kɔc riit piɔth kɔc e piɔth dhiau, aci wo riit piɔth ne bɛn de Tito;

27:7b.2CO.027.007 ku acie ne bɛnde etok, ku ne riet ci e riit piɔu yenguop ne kedun ayadaŋ, waan lek en wook taŋ aa wek ɛn tak alal, ayi dhien aa wek dhiau, ayi lɛthduon aa wek yiic lɛth ne biakdi; aguɔ piɔu jɔ miɛt aret awar miɛtepiɔu awaan.

27:8b.2CO.027.008 Ku acakaa yɛn e ci week tɔ dhiau piɔth ne awarek, ke yɛn cii rot gak enɔɔne, acakaa yɛn e ci ro kɔn gɔk waan; aca tiŋ nɔn ci awareke we tɔ dhiau piɔth, ku we ci piɔth guɔ lɔ yaŋ.

27:9b.2CO.027.009 Ku enɔɔne, acie luɔi ci we tɔ dhiau piɔth, en e miɛt ɛn piɔu, e luɔi ca wek piɔth dhiau aɣet puŋ ba wek wepiɔth puk: ee kede Nhialic en aci we tɔ dhiau piɔth, ke cin kerɛɛc bak yok e kedayic.

27:10b.2CO.027.010 Ku dhienepiɔu bɔ tede Nhialic ee puŋdepiɔu bɛɛi, ke bi raan kony wei, ku acin raan bi ro gɔk e ye: ku dhienepiɔu bɔ ne piny nɔm ee thuɔɔu bɛɛi.

27:11b.2CO.027.011 Thɔɔŋki kemane guop, dhien ci we tɔ dhiau piɔth ne kede Nhialic, thɔɔŋki lɛth ci we tɔ leth yiic dit diit en, yeka, ku dit e luɛl ca wek kedun lueel, yeka, ku diu ca wek piɔth diu, yeka, ayi taŋ ca wek kaŋ tak aret, yeka, ayi tuoc ca we piɔth tuoc, yeka, ayi guur ca wek kaŋ guoor! ne kerieec ebɛn we ci ro nyuɔɔth nɔn ca wek gup a gɔk e liu liɛɛu wek e jameyic.

27:12b.2CO.027.012 Yen na ca we cak gaar waan, acie biak de raan ci kedaŋ wooc, en e gaar ɛn en, ku cie biak de raan ci wac kedaŋ aya, ee luɔi bi diɛɛrduon dit tɔ tiec tede week e Nhialic nɔm, diɛɛr aa wek diɛɛr e wook.

27:13b.2CO.027.013 Yen aci wo muk piɔth: ku enɔn ci wo muk piɔth, yen aci wo piɔth miɛt aretditte ne miɛt e Tito piɔu, luɔi ci piɔnde tɔ lɔ guik piny e week wedhie.

27:14b.2CO.027.014 Ku na de ke ca lɛk en e lɛc lɛɛc ɛn rot e week, ke yɛn ken yaar; ku acit man ci wo week lɛk kaŋ kedhie ne yic, ayi lɛcdan e wo rot lɛc week e Tito nɔm, aci aa yic aya.

27:15b.2CO.027.015 Ku taŋ tɛk en week aci yenyin ŋuak, te tɛk en enɔm ne piŋ ca wek kaŋ piŋ wedhie, ku nyuuc ca wek e nyuooc ne riɔɔc keke lɛtheguop.

27:16b.2CO.027.016 Yɛn e piɔu miɛt nɔn duɛɛr ɛn guop a laŋ ne kedun ne kerieec ebɛn.

28

28:1b.2CO.028.001 Ku daŋ ki, wek tɔku ŋic dhueeŋ de Nhialic piɔu, wek mithekɔckuɔ, dhueeŋ ci yien kanithɔɔ ke Makedonia,

28:2b.2CO.028.002 acakaa kek e ye them ne ketuc diit dhal keek, ke miɛt mit kek piɔth alal ku kuany de kekuyiin acik piɔndɛn adhuɛŋ tɔ ŋuak rot abi dit alal.

28:3b.2CO.028.003 Ku yɛn ee caatɔ de miɔc ci kek miooc e kaken, ke roŋ ke weu cath ke keek, arek acik ŋuak nyin ayadaŋ, ku acik tak e kede nɔmden kapac,

28:4b.2CO.028.004 agoki wo lɔŋ e laŋ dit, an, buk ke cik gam edhueeŋ noom, ku jɔku mat e luɔiyin ne keek etok, luɔi de kuny de kɔc ɣerpiɔth:

28:5b.2CO.028.005 ku acii cit ke e ŋathku tei, acik rot kɔn gam Bɛnydit, ku gɛmki rot wook ne kede piɔn e Nhialic.

28:6b.2CO.028.006 Agoku Tito yɔɔk, yan, cit man ci en e kɔn gɔl, ka bi dhueeŋe thol e weyiic aya.

28:7b.2CO.028.007 Ku acit man ca wek kuɛth ne kerieec ebɛn, ne gam, ku ne jam, ku ne ŋinydekaŋ, ku ne lɛth lɛth wek yiic, ku ne nhieer nhiaar wek wook, en ja wek aa kuɛth ne dhueeŋe ayadaŋ.

28:8b.2CO.028.008 Acie luɔi dhiɛl wek e looi en luɛɛl, ee biak de lɛth e kɔc kɔk yiic en a luɛɛl ɛn en, ku e them thɛm ɛn nhieerdun ayadaŋ nɔn ee yen yic.

28:9b.2CO.028.009 Wek ŋic dhueeŋ de Bɛnydan Yecu Kritho piɔu, acakaa yen e juec e kake, ke ye ro tɔ ye raan kuany nyin ne biakdun, luɔi ba wek aa kɔc juec e kakun ne kuany kuɛɛny en nyin.

28:10b.2CO.028.010 Ku yɛn e loŋdi taau ne kede jame: kene adueer piath tede week, wek kɔc ci kaŋ kɔn gɔl run waan, acie ne luɔi tei, ee gam ca wek piɔth dɛ gam ayadaŋ.

28:11b.2CO.028.011 Ku enɔɔne, jaki luɔi de kaŋ thol ayadaŋ; ago cit man nu gam de piɔu, ke tholekaŋ abi nu aya ne ka nu e wecin.

28:12b.2CO.028.012 Ku na nu gam e raan piɔu, ka bi tɔ ye piathde, ne kede ke nu e yecin, ku acie ne kede ke liu e yecin.

28:13b.2CO.028.013 Ku yɛn cin piɔu luɔi bi kɔc kɔk dɛ lɔŋ, ku duɔɔnyki:

28:14b.2CO.028.014 ee kit ba we kit en a kaar, yan, enɔɔne kuɛthdun abi keek kony ne ke dak keek, na ekool daŋ, ke kuɛthden abi we kony ne ke dak week; aguɔki kit wedhie:

28:15b.2CO.028.015 acit man ci e gɔɔr, yan, Raan ci kajuec kuany, acin ke ci doŋ keke yen; ku raan ci kalik kuany, ka cin ke dak en.

28:16b.2CO.028.016 Ku thieithieei Nhialic, Raan e tɛɛu lɛtheyic mane guop e Tito piɔu ne biakdun.

28:17b.2CO.028.017 Ee yic, aci loŋda gam; ku nɔn leth en yic alal, ke jɔ lɔ tede week ne kede piɔnde etok.

28:18b.2CO.028.018 Agoku mɛnhkeneda tooc keke yen etok, raan ci leec e kanithɔɔ yiic kedhie ne baŋ de welpiɛth;

28:19b.2CO.028.019 ku acie kene etok, ee raan cii kanithɔɔ lɔc, yan, buk cath etok e yen, lok ke ci gam edhueeŋe looi, ke Bɛnydit bi dhueeŋ yok, ku luɔi kɔɔr wok nɔn bi wo kɔc kony.

28:20b.2CO.028.020 Ku wo cin piɔth luɔi bi en dɛ raan bi wo gɔk ne juec de kaŋ ka looi wok kake:

28:21b.2CO.028.021 agoku kaŋ aa dot apiɛth, aci e Benydit nɔm tei, e kɔc niim ayadaŋ.

28:22b.2CO.028.022 Ku wo ci mɛnhkenedan daŋ tooc keke keek etok, raan cuk kɔn them ecaŋɣɔn ku cuk yok alethic ne kajuec, ku enɔɔne alethic awar man waan ne biak de aŋɔth ŋɛɛth en week aret.

28:23b.2CO.028.023 Ku na de raan lop e kede Tito, ee raan rom wok etok ku lniku etok ne kedun; ku na lop raan e kede mithekɔckuɔ, ayek tuuc ke kanithɔɔ, ku yek dhueeŋ de Kritho.

28:24b.2CO.028.024 Yen nyuoth wek keek yic ee nhieerdun yic e kanithɔɔ niim, ayi yic ee lɛcda yic lɛc ee wo rot leec e kedun.

29

29:1b.2CO.029.001 Ku ne kede kuny de kɔc ɣerpiɔth, acin ke duɛɛr ɛn e dhil gaar week:

29:2b.2CO.029.002 yɛn ŋic thok ca wek thok e guiɛɛk, en a lɛɛc ɛn rot ne kedun e kɔc ke Makedonia niim, yan, ci Akaya guɔ thok e guiɛɛk run waan; ku lɛth e wekyiic aci kɔc juec alal tɔ leth yiic ayadaŋ.

29:3b.2CO.029.003 Ku yɛn ci mithekɔckuɔ tooc tei ke lɛc leec wok rot e kedun ke cii bi aa ɣɔric ne kede cooke; luɔi ba wek thok e guiɛɛk, cit man can e lueel.

29:4b.2CO.029.004 Ku na de te bi kɔc kɔk ke Makedonia ne yɛn etok, ku yokki week aken thok e guiɛɛk, ke wook (aca bi lueel, yan, ee week), wo dueer yaar e aŋɔth ci wo week ŋɔɔth, ku lɛc ci wo rot leec e kedun.

29:5b.2CO.029.005 Aguɔ lueel e yapiɔu, yan, ba mithekɔckuɔ dhil yɔɔk, yan, bik kɔn lɔ tede week, lek ke cak gam edhueeŋ kɔn guik abi thok, ke can kede kɔn lɛk week, luɔi bi en aa kede dhueeŋ, acie kede ciɛɛŋ ci we dhil cieŋ.

29:6b.2CO.029.006 Ku cooke en a luɛɛl, yan, Raan cum e kalik, ka bi kalik tem ayadaŋ; ku raan cum edhueeŋ, ka bi tem ne dhueeŋ aya.

29:7b.2CO.029.007 Raan ebɛn e ye miooc e miɔcdɛn cit man e yenpiɔu; e cie ne dhien dhiɛɛu en, ku cie ciɛɛŋ ci e cieŋ: raan e miooc ne piɔnmit en a nhiɛɛr Nhialic.

29:8b.2CO.029.008 Ku Nhialic adueer dhueeŋdepiɔu ebɛn tɔ dit tede week; ke we bi kuɛth alal anandun ne kerieec ebɛn, aguɔki kuɛth e leu ba wek luɔi piɛth aa leu ebɛn:

29:9b.2CO.029.009 acit man ci e gɔɔr, yan, Aci kake thiai wei, gɛm keek kɔc kuany nyiin; Ku piath e yenpiɔu a tɔu athɛɛr.

29:10b.2CO.029.010 Ku enɔɔne, Raan e raan cum yien kɔth, ku ye raan cam yien kuin, abi we yien kɔthkuon lak com, ku ŋuɛk ke, ago piath e wepiɔth ŋuak e luɔk:

29:11b.2CO.029.011 ke we bi tɔ kueth e kerieec abak piɔth adhuɛŋ alal, en aye Nhialic tɔ yok lɛc ne wook.

29:12b.2CO.029.012 Luɔi e kuny e kɔc ro konye ee kɔc ɣerpiɔth tɔ kueth alal ne ke dak keek, ku acie yen etok, piath de luɔiye e ro ŋuak aya, ne luɛl ee kɔc e lueel, an, Thieithieei Nhialic, ecaŋɣɔn;

29:13b.2CO.029.013 ŋiny ci kek we ŋic piɔth ne luɔiduone, yen aye kek Nhialic leec nɔm, ne biak de reer rɛɛr wek e gamic gam de welpiɛth ke Kritho, ku ne biak de piɔnduon adhuɛŋ aa wek keek miɔɔc e kakun ayi kɔc kedhie;

29:14b.2CO.029.014 ku kegup ayadaŋ, te ye kek lɔŋ e biakdun, ke ke ye week tak alal, ne biak de dhueeŋ diit e Nhialic nu e wepiɔth dhueeŋ dit alal.

29:15b.2CO.029.015 Thieithieei Nhialic e biak de miɔcdɛn e ye miooc edhueeŋ, niiɔc iiu ene.

210

210:1b.2CO.210.001 Ku yɛn Paulo guop, wek yɔɔk ne kuur ci Kritho ro tɔ koor ku ne liɛɛr e yenpiɔu, yɛn raan cin naamdi e weyiic te wɔi wek ɛn, ku nɔn liɛɛu ɛn, yɛn ci nyin riɛl tede week:

210:2b.2CO.210.002 ku wek a laŋ, duoki ya tɔ ŋeeny te nuo yɛn, ne ŋeeny ca lueel, an, ba kɔc kɔk dhil ŋɛny kɔc e jam e wook, yan, yok reer e reer e guop tei.

210:3b.2CO.210.003 Ku na cakku reer e guopic, ke wo ci tɔŋ e biok e biok de guop

210:4b.2CO.210.004 (weukuɔn ke tɔŋ aciki e ka ke guop, ayek riɛl etor e Nhialic nɔm, bik alocdit ril aa dhuoor piny);

210:5b.2CO.210.005 ayok looŋ rac dhuoor piny, ayi kerieec nu nɔm nhial ebɛn, kak e ro jɔt ku cakki ater ne ŋiny de Nhialic, ku jɔku ke yok tak e wopiɔth ebɛn tɔ ye lim bi kede Kritho aa piŋ;

210:6b.2CO.210.006 ku buk rot dap guoor e rɛɛc reece kɔc piŋ ebɛn, te ca wek guɔ thok e piŋ piɛŋ wek kaŋ.

210:7b.2CO.210.007 Yak kaŋ woi ne kede tic ee kek tic biic? Na de raan ŋic rot nɔn ee yen kede Kritho, e be cooke thɔɔŋ e yepiɔu aya, yan, Acit man ee yen kede Kritho, yen aye wok ka ke Kritho ayadaŋ.

210:8b.2CO.210.008 Ku na ya cak ro leec alal ne riɛlda (riɛl e gɛme Bɛnydit wook ne kede kuɛt bi wo week kueet, ku acie kede dhuur bi wo we dhuoor piny), ke yɛn cii dueer yaar:

210:9b.2CO.210.009 ku yɛn cin piɔu luɔi ban we tɔ riɔc ne awareek.

210:10b.2CO.210.010 Ade kɔc e ye lueel, yan, Awareekke aciɛthki ne loŋ thiek, ku arilki; ku tau de yenguop akɔc, ayi jamde acin nɔm.

210:11b.2CO.210.011 Raan luel en aya, tɔ ciet enɔm e kene, yan, Tau tɔu wok e jamic e awareek yiic te liiu wok, yen aye tau bi wo tɔu e luɔiyin aya te nu wok.

210:12b.2CO.210.012 Ku wo cii woyiic dueer mat ne kɔc kɔk kɔc e rot leec kapac, ku cuku ro dueer thɔɔŋ e keek aya: ku keek, them ee kek ro them kapac, ku thooŋ ee kek ro thɔɔŋ kapac, acin kek niim.

210:13b.2CO.210.013 Ku wook, wo cii ro bi leec abuk akeu lii nɔm, wo bi pek e akeu nɔm aken e them ci Nhialic yien wook, aken ci ɣet tede week aya.

210:14b.2CO.210.014 Wo ken akenda lii nɔm, cit man ken wo ɣet tede week: wok e ɣet tede week aya ne guieer ee wok welpiɛth ke Kritho guiir:

210:15b.2CO.210.015 wo cii rot dueer leec e ka nu e akenda baŋtni, kek aye luɔi e looi kɔc kɔk; ku kene aŋathku, yan, te ci gamdun ro guɔ ŋuak, ke riɛlda bi dit e weyiic, ku ŋootku ke wo pek akenda, agoku lɔ tueŋ,

210:16b.2CO.210.016 ku jɔku welpiɛth guiir ayi bɛi nu e weniim tueŋ, ku cuku rot e leec ne luɔi ci raan daŋ kɔn looi, luɔi cuk yok e thok.

210:17b.2CO.210.017 Ku raan e ro leec, e ye ro leec e Bɛnyditic.

210:18b.2CO.210.018 Acie raan lec rot etok yen piɛth egɔk, ee raan leec Nhialic yen apiɛth.

211

211:1b.2CO.211.001 Adi miɛt piɔu te guom wek kedi tethiinakaŋ e piɔl piaal ɛn piɔu: yeka, guomki tei.

211:2b.2CO.211.002 Yɛn de yic tiɛɛl e biakdun, tiɛɛl e Nhialic: luɔi can week tɔ thiak e mony tok, luɔi ban week gam Kritho cit man e dhueny ɣerewic.

211:3b.2CO.211.003 Ku yɛn riɔc, luɔi bi en dɛ te ba wek piɔth riaak, cit man ci kerac Kawa math ne rueenyde, aguɔki piɔth cuo bɛ aa tok, ku caki yiic be ɣɛɛr ne Kritho.

211:4b.2CO.211.004 Ku na raan bɔ enɔɔne, ten ee yen kede Kritho daŋ guiir, Kritho ken wo kede guiir, ku te yok wek wei mɛɛn wei kɛnki yok waan, ayi welpiɛth mɛɛn wel kɛnki gam waan, aduɛɛrki yien guum apiɛth.

211:5b.2CO.211.005 Ku e yapiɔu, yɛn kit woke tuuc ebɛn, acakaa tuuc dit nu tueŋ alal, acin kethiin tau ɛn cieen.

211:6b.2CO.211.006 Ku na cakaa yɛn e dɛk e jam, ka cin ke dak ɛn ne ŋinydekaŋ; ee yic, kene acuk cok e nyuth wok e week ne kerieecic ebɛn.

211:7b.2CO.211.007 Ca kerac looi, e kuur can ro kuɔɔr piny, luɔi bi we jat nhial, nɔn can welpiɛth ke Nhialic guieer week youyou?

211:8b.2CO.211.008 Yɛn e weu ke kanithɔɔ kɔk rum, waan nɔɔm ɛn ariop tede keek, luɔi ban kedun aa looi;

211:9b.2CO.211.009 ku te waan rɛɛr ɛn wo week, ekool e de en ke dak ɛn, acin raan ca miɛn; ken ee ya dak, aye mithekɔckuɔ yinn ɛn aba kuɛth, mithekɔckuɔn e bɔ Makedonia; ku yɛn aa ye ro muk ne kerieec ebɛn aguɔ we cuo min, ku yɛn bi ro muk e muŋdi.

211:10b.2CO.211.010 Yic de Kritho acath ke yɛn, acin raan bi a pɛn lɛc lɛɛc ɛn rot ne cooke, piny de Akaya nɔm ebɛn.

211:11b.2CO.211.011 Ee kaŋo? ee luɔi can we nhiaar? Nhialic en aŋic en.

211:12b.2CO.211.012 Ku ke luɔɔi enɔɔne, yen aba ya looi, luɔi ban ke bi kek ro leec tɛɛm wei tede kɔc kɔɔr en; ago, an, lecki rot, ka bik ro yok akit e wook.

211:13b.2CO.211.013 Kɔc cit e kake kek aye tuuc aluɛth, kɔc e luui ecueer, agoki rot aa puk tɔki rot e tuuc ke Kritho.

211:14b.2CO.211.014 Ku acie kegai en ekene; Catan guop ee ro puk tɔ rot e tuny e ɣɛɛrepiny tunynhial.

211:15b.2CO.211.015 Ku acie kedit, te ye kɔc e kede looi ro puk tɔki rot e kɔc e ka ke piathepiɔu looi; ku kedɛn bik yok rial abi roŋ ke luɔiden.

211:16b.2CO.211.016 A bɛ lueel, yan, E cin raan e ya tɔ ye raan mum nɔm; ku na yak a tɔ ye raan mum nɔm, ke we dɔm ɛn tei, cit man e raan mum nɔm, ke ya bi ro leec tethiinakaŋ.

211:17b.2CO.211.017 Ke luɛɛl enɔɔne, acie kede Bɛnydit en a luɛɛl ɛn en, ku ja ro leec aya, ke yan ci nyin riɛl.

211:18b.2CO.211.018 Enɔn juece kɔc e rot leec ne kede guop, ke yɛn aya yɛn bi ro leec.

211:19b.2CO.211.019 We ŋic kede kɔc mum niim guum, luɔi aa wek kɔc pel niim.

211:20b.2CO.211.020 Te tɔ raan week e him, ayak guum, ayi te ciɛme raan week, ayi te rume raan week, ayi te bieeke raan wenyin.

211:21b.2CO.211.021 Yɛn jam e jam e raan cin naamde, acit man kɔc wok. Ku na de ke bi raan enyin riil, (yɛn jam e jam e mumnɔm), ke yɛn ci anyin riil aya.

211:22b.2CO.211.022 Kɔcke yek Eberuu? ayi yɛn aya. Yek kɔc ke Yithrael; ayi yɛn aya. Yek kɔth ke Abraɣam? ayi yɛn aya.

211:23b.2CO.211.023 Yek kɔc e ka ke Kritho looi? (Yɛn jam cit raan jiɛɛm wei) a waar ke; e luɔi tuc, en a waar ɛn keek, ku waar keek e dui cii dueere kueen, ku many e ya cool e mɛce yɛn e aloc yiic, ku ŋiny aa yɛn cool e ŋic rot thuɔɔu.

211:24b.2CO.211.024 Tede Judai yɛn aa dui raandhic e wɛt kathierŋuan a lɔ tok liu.

211:25b.2CO.211.025 Yɛn aa dui e thieec raandiak, ku biooke yɛn e kur raantok, yɛn aa tuke wei abelic raandiak, wɛɛr tok ku cool tok ke ya tɔu abapditic;

211:26b.2CO.211.026 awaar ke ne keny aa yɛn cool e keny, ku riɔɔc wiir, ku riɔɔc de kɔc e kɔc luc, riɔɔc e jurda, riɔɔc e juoor, riɔɔc nu e panyditic, riɔɔc nu e jɔɔric, riɔɔc nu e abapditic, riɔɔc nu e mithekɔckuɔn cuɛɛr yiic.

211:27b.2CO.211.027 ne luɔi tuc e kɔc doony, ku luɔi e kɔc nɔk, ne ruu aa yɛn ruu yin ecaŋɣɔn, ku ne cɔŋ e ya nɔk ayi reu, ku ne nyaŋ aa yɛn cool e nyaŋ rot e kecam, ku ne wiir e ya nɔk, ku cin aa yɛn kɔu cien lupɔ.

211:28b.2CO.211.028 Jaki kake pɔl, ee ka nu biic tei, lɔ ken e ya miɛn piɔu e akooinyiin kedhie, yen aye diɛɛr aa yɛn piɔu diɛɛr e kanithɔɔ kedhie.

211:29b.2CO.211.029 Eeŋa kɔc, ku ca kɔc ayadaŋ? de raan ci tɔ wac kaŋ, ku ca piɔu bi tuoc?

211:30b.2CO.211.030 Na de ke ban ro dhil leec, ke yɛn bi ro leec ne kak aa yɛn ke kɔc e ke.

211:31b.2CO.211.031 Nhialic Wun Bɛnydan Yecu Kritho, yen aŋic en nɔn can lueth tor, yen acath ke athiɛɛi aɣet athɛɛr.

211:33b.2CO.211.033 ku yɛn aa luɛiye piny e dionyic e aweernyin, awer nu e panydit kɔu, aguɔ ban e yecin.

212

212:1b.2CO.212.001 Yɛn bi ro dhil leec, acakaa yen e cii piɛth; ku yɛn bi bɛ bɛn te nu jam de tiŋ can Bɛnydit tiŋ ku nyuth ci en ro nyuoth ɛn.

212:2b.2CO.212.002 Yɛn ŋic raan nu e Krithoyin, ku run acik teek kathieer ku ŋuan (nɔn e ciɛth en keke guopde, ku nɔn e cii en cath ke yen, a ja kuc; aŋic Nhialic), raane, yen raan wen luɛɛl aci gap nhial ɣeet paan e Nhialic ya.

212:3b.2CO.212.003 Yɛn ŋic raan cit ekene (nɔn e ciɛth en keke guopde, ku nɔn e cii en cath ke yen, a ja kuc; aŋic Nhialic),

212:4b.2CO.212.004 raane aci gap nhial ɣeet Paradeitho, ago wel piŋ wel e raan pɛn luɛl lueel en ke.

212:5b.2CO.212.005 Ne kede raan cit ekene, en a ban ro leec: ku ne kedi guop yɛn cii ro bi leec, ee kɔc kaac ɛn tei, en a ban ro leec.

212:6b.2CO.212.006 Ku na cak piɔu dɛ luɔi ban ro leec, ke yɛn cii dueer aa raan mum nɔm; luɔi ee yen yic en ba lueel; ku enɔɔne aca pɔl, ke cin raan bi a tɔ ye raan dit awar tiŋ tiŋ en ɛn, ku wɛɛr ke ci piŋ ne kedi.

212:7b.2CO.212.007 Ku luɔi can ro tɔ dit e dit cii piɛth, ne biak de ka juec gook ci nyuoth ɛn, yen aa yike ya guop kou kon nu e riŋic, ee tuny e tuuce Catan bi yɛn aa biɔɔk guop, ke ya cii ro bi tɔ dit e dit cii piɛth.

212:8b.2CO.212.008 Guɔ Bɛnydit lɔŋ ne biak de kene raandiak, ke bi jal e yaguop.

212:9b.2CO.212.009 Go lɛk ɛn, yan, Dhueeŋ de yɛnpiɔu ee yi kiet: riɛldien dit aye tɔ ye dikedik ne kɔc kɔɔce raan. Yen a ban rot aa leec ke ya mit piɔu alal ne kɔc aa yɛn guop kɔc, ke riɛldiit e Kritho bi reer e yaguop.

212:10b.2CO.212.010 Yen a ya yɛn piɔu miɛt e kɔc kaac ɛn, ku ne lɛɛt ee ya laat, ku ne dak aa yɛn dak e kaŋ, ku ne yoŋ ee ya yɔŋ, ku ne dhal ee kaŋ a dhal, ne biak de Kritho: kool kaac ɛn, en aye kool riɛl ɛn.

212:11b.2CO.212.011 Yɛn ci aa raan mum nɔm e lɛc lɛɛc ɛn rot; we ci a dhil tɔ lec rot; adi cak a leec week: acin ke ye tuuc a woor acakaa tuuc ditt nu tueŋ alal, acakaa yɛn e cinkedaŋ.

212:12b.2CO.212.012 Ŋiny dueere ye ŋic egɔk nɔn aa yɛn tuc e guɔ looi e weyiic ne yic ne guom de kerieec ebɛn, ku ne gook ku ka gɛiye kɔc, ku luɔi ril ebɛn.

212:13b.2CO.212.013 Ee kaŋo ke ci we tɔ kor e kanithɔɔ kɔk, ee luɔi e can kakun e cam lɛɛny etok, yɛnguop; palki yɛn e ke ca wooce.

212:14b.2CO.212.014 Tieŋki, yɛn e cok aa rou tede week, ku dieŋden ki, yɛn jɔ bɛn; ku kakun aca ke bi aa cam lɛɛny: acie kakun ke kaar, ee wegup wek kaar; acii piɛth luɔi bi mith kɔc e dhieth ke kuɛt kaŋ, ee kɔc e dhieth mith kek aye kaŋ kuɛt mithken.

212:15b.2CO.212.015 Ku yɛn bi kaki aa riaar piny ke ya mit piɔu, ku ja ro riaar piny aya ne biak de weikun; ciɛk an, dit nhieer nhiaar ɛn week ke yen aye nhieerduon nhiaar wek ɛn tɔ koor.

212:16b.2CO.212.016 Ne tɔu aya tei, wek kɛn miɛn; ee rueeny en e dam ɛn week, en luɛlki?

212:17b.2CO.212.017 De raan toŋ ca tɔ cam week, e kɔc ca tuoc week yiic?

212:18b.2CO.212.018 Yɛn e Tito lɔŋ, an, bi lɔ tede week, ku ja mɛnhkenedan daŋ tooc keke yen etok. De ke ci Tito we cam? e wo cii cath e piɔn toŋe? E wo cii cath e kueer toŋr?

212:19b.2CO.212.019 Cook daŋ, yan, yak lueel, yan, konyku rot e weniim ecaŋawen? Wok jam e Nhialic nɔm e Krithoyic. Ku ka luelku kedhie, wek kɔc nhiaar, ee ka ke kuɛt bi we kueet.

212:20b.2CO.212.020 Yɛn e riɔɔc, miak, te can bɛn, ke we cit ka ca bi yok aye kɔc kaar e yapiɔu, ku yɛnguop yɛn cit ke caki bi yok aye raan kaarki e wepiɔth; yɛn e riɔɔc e ciet ke bi dɛ ateer nu, ku tiɛɛl, ku agooth, ku tɔɔŋ, ku ciek de thok, ku atuum, ku lɛc leece kɔc rot, ku awuoou;

212:21b.2CO.212.021 ku yɛn e riɔɔc, miak, te la yɛn bɛ bɛn, ke Nhialicdi acit ke bi a tɔ yaar e weyiic, ku yɛn cit ke bi kɔc juec dhieu kɔc ci kerac kɔn looi, ku kenki kepiɔth puk ne luɔidɛn col ku kɔɔr ee kek diaar kɔɔr ku dhoomden, luɔidɛn rɛɛc e cik aa looi.

213

213:1b.2CO.213.001 Yɛn e cok aa rou, ku dieŋden ki, ban jɔ bɛn tede week. Ne thok ke caatɔɔ kaarou ayi diak abi jam lɔ kimpiny ebɛn.

213:2b.2CO.213.002 Aca lɛk week waan, ku kan lɛk week tueŋ enɔɔne raanrou, cit nɔn nuo yɛn woke week; ku iiu liɛɛu ɛn enɔɔne, en a gaar ɛn kɔc ci kerac looi ɣɔn, ku gaar kɔc kedhie, yan, Te la yɛn bɛ bɛn, ke we ca bi pɔl;

213:3b.2CO.213.003 luɔi kaar wek ŋiny ba wek e ŋic egɔk nɔn jiɛɛme Kritho e yathok; ku yen acii kɔc tede week, aril alal e weyiic:

213:4b.2CO.213.004 acakaa yen e ci piaat e tim ci riiu nɔm kɔu ke kɔc guop, ka piir enɔɔne ne riɛl diit e Nhialic. Ayi wook aya, wok kɔc ne yeyic, ku wo bi piir ne yen etok ne riɛl diit e Nhialic, riɛl nu tede week.

213:5b.2CO.213.005 Thɛmki rot nɔn rɛɛr wek e gamic egɔk; caathki rot. Kuocki wegup nɔn nu Yecu Kritho e weyiic, te ca wek e kɔc ci rɛɛc tei?

213:6b.2CO.213.006 Ku ya ŋath ba wek wo ŋic nɔn cii wok e kɔc ci rɛɛc.

213:7b.2CO.213.007 Ku enɔɔne yɛn laŋ Nhialic e biakdun, ke cin kerɛɛc bak aa looi; acie luɔi bi wo tɔ ye kɔc piɛth, ee luɔi ba wek kepiɛth aa looi, na cakaa wok e ye tɔ cit kɔc ci rɛɛc.

213:8b.2CO.213.008 Wok cin ater dueerku lueel e yic, ee man mɛt wok e yic, en anu.

213:9b.2CO.213.009 Wok e piɔth miɛt, te ee wok kɔc, ku riɛlki: ku cook ee wok lɔŋ aya, ee luɔi ba wek piɔth dikedik.

213:10b.2CO.213.010 Yen a gaar ɛn kake ke ya liu e weyiic, ke we ca bi dhil nen e nen rac miak te can bɛn, ago riɛl cii Bɛnydit gam ɛn, ago aa kede yin de kaŋ, ku acie kede dhuur e kaŋ piny.

213:11b.2CO.213.011 Cook cieen, mithekɔckuɔ, yak piɔth miɛt. Yak piɔth dikedik; yak wepiɔth riit; yak tɔu ne piɔn tok; yak reer ediu: ku Nhialic de nhieer ku mat abi reer ke week.

213:12b.2CO.213.012 Thiecki rot wapac ne ciem ɣeric.

213:13b.2CO.213.013 Wek thieec kɔc ɣerpiɔth kedhie.

213:14b.2CO.213.014 Dhueeŋ de Bɛnydan Yecu Kritho piɔu, ku nhieer e Nhialic, ku maath de Weidit Ɣer, e ye tɔu keke week wedhie. Amen.